MAT 1:1 Izesuꞌ Kilisitoꞌ avolomote mini di aniꞌ neti guliveꞌine nene neꞌmino neive: Guvelesi ve Davidiꞌ aza Abalahamuꞌ aꞌvo minineꞌ. Idoꞌ Izesuꞌ Kilisitoꞌ aza Abalahamungi Davidingi ngaꞌvo minineꞌ.
MAT 1:2 Abalahamuꞌ nene Isakaꞌni gidineꞌ. Idoꞌ Isakaꞌ minosa Zakoboꞌni gidineꞌ. Idoꞌ Zakoboꞌ minosa Zudaꞌnisi uvolomotine nakunolomotine nesi gidineꞌ.
MAT 1:3 Idoꞌ Zudaꞌ nene Tamalaꞌni do Pelezangi Zelangi gidineꞌ. Idoꞌ Pelezaꞌ nene Hezeloniꞌni gidineꞌ. Idoꞌ Hezeloniꞌ minosa Lamuꞌni gidineꞌ.
MAT 1:4 Idoꞌ Lamuꞌ minosa Aminadabuꞌni gidineꞌ. Idoꞌ Aminadabuꞌ minosa Nasoniꞌni gidineꞌ. Idoꞌ Nasoniꞌ minosa Salemoneꞌni gidineꞌ.
MAT 1:5 Idoꞌ Salemoneꞌ minosa Lahabaꞌni do Boaziꞌni gidineꞌ. Idoꞌ Boaziꞌ aza Lutiꞌni do Obediꞌni gidineꞌ. Idoꞌ Obediꞌ aza Zesaiꞌ meleho minineꞌ.
MAT 1:6 Idoꞌ Zesaiꞌ minosa guvelesi ve naba Davidiꞌni gidineꞌ. Idoꞌ Davidiꞌ nene veneꞌ gonoꞌ ma Uliaꞌ elenahine do Solomoniꞌni gidineꞌ.
MAT 1:7 Idoꞌ Solomoniꞌ nene Lehoboamuꞌ meleho minineꞌ. Idoꞌ Lehoboamuꞌ minosa Abiaꞌni gidineꞌ. Idoꞌ Abiaꞌ nene Asaꞌ meleho minineꞌ.
MAT 1:8 Idoꞌ Asaꞌ nene Zehosohatiꞌni gidineꞌ. Idoꞌ Zehosohatiꞌ nene Zolamuꞌ meleho minineꞌ. Idoꞌ Zolamuꞌ nene Uziaꞌ avoloho minineꞌ.
MAT 1:9 Idoꞌ Uziaꞌ nene Zotamuꞌ meleho minineꞌ. Idoꞌ Zotamuꞌ minosa Ahaziꞌni gidineꞌ. Idoꞌ Ahaziꞌ nene Hezekiaꞌ meleho minineꞌ.
MAT 1:10 Idoꞌ Hezekiaꞌ minosa Manaseꞌni gidineꞌ. Idoꞌ Manaseꞌ nene Amoniꞌ meleho minineꞌ. Idoꞌ Amoniꞌ minosa Zosiaꞌni gidineꞌ.
MAT 1:11 Idoꞌ Babelonia ve nete igi lovo hizi ngimi Zuda ve ngivileꞌ igi ngeleꞌmizi Babelonia misubouko vaniꞌ gameneuꞌ nene Zekoniaꞌ ve uvele mele nene Zosiadatiꞌ sotoꞌ igi minaniꞌ.
MAT 1:12 Idoꞌ Babelonia misubouko vi mini adotiꞌ Zekoniaꞌ nene Sealetieleꞌni gidineꞌ. Idoꞌ Sealetieleꞌ nene Zelubabeliꞌ meleho minineꞌ.
MAT 1:13 Idoꞌ Zelubabeliꞌ sotoꞌ ogo minavo ezelatiꞌ nene Abiudiꞌ sotoꞌ ineꞌ. Idoꞌ Abiudiꞌ sotoꞌ ogo minavo ezelatiꞌ nene Eliakimiꞌ sotoꞌ ineꞌ. Idoꞌ Eliakimiꞌ sotoꞌ ogo minavo ezelatiꞌ nene Azoloꞌ sotoꞌ ineꞌ.
MAT 1:14 Idoꞌ Azoloꞌ sotoꞌ ogo minavo ezelatiꞌ nene Zadokuꞌ sotoꞌ ogo minineꞌ. Idoꞌ Zadokuꞌ sotoꞌ ogo minavo ezelatiꞌ nene Akimiꞌ sotoꞌ ineꞌ. Idoꞌ Akimidotiꞌ nene Eliudiꞌ sotoꞌ ogo minineꞌ.
MAT 1:15 Idoꞌ Eliudiꞌ sotoꞌ ogo minavo ezelatiꞌ nene Eleazaleꞌ sotoꞌ ineꞌ. Idoꞌ Eleazaleꞌ sotoꞌ ogo minidotiꞌ nene Mataniꞌ sotoꞌ ineꞌ. Idoꞌ Mataniꞌ sotoꞌ ogo minavo ezelatiꞌ nene Zakoboꞌ sotoꞌ ineꞌ.
MAT 1:16 Idoꞌ Zakoboꞌ nene Zoseheꞌ meleho minineꞌ. Idoꞌ Zoseheꞌ nene Izesuꞌ izeleho Maliaꞌ neꞌmi vanaho minineꞌ. Aꞌmine ve Izesuꞌnimuꞌ nene Oꞌmosoꞌmo leliꞌ do luꞌ izelive lo imiselelesa live ve lo laaꞌ noune.
MAT 1:17 Eveneꞌ guliveꞌine neꞌmino gizuneꞌ nene Abalahamuꞌ gulivelotiꞌ vo Davidiꞌ guliveloꞌ ivo nene guliveꞌine fotini (14) neꞌmine gizune. Idoꞌ Davidiꞌ gulivelotiꞌ Babelonia ve nete Zuda ve ngeleꞌmizi Babelonia misubouko vaniꞌ gizunida nene eveneꞌ guliveꞌine gohi fotini (14) neꞌmine nene gizune. Idoꞌ Babelonia misubouko vi mini tineꞌ mili aniꞌ gizunidotiꞌ vo Oꞌmosoꞌmo do luꞌ izelive lo imiselelesa live neꞌmi guliveloꞌ ivo nene guliveꞌine gohi fotini (14) neꞌmine nene gizune.
MAT 1:18 Oꞌmosoꞌmo do luꞌ izelive lo Imiselelesa live Izesuꞌ sotoꞌ ineꞌ monovo nene neꞌmino neive: Izesuꞌ izeleho Maliaꞌ nene Zoseheꞌ izeni elenaho minineꞌza olihe bizi minamasivo Oꞌmosoꞌmi Sikalahuꞌ neꞌmo Maliaꞌ mulunouꞌ lemo mino izipe molo imineꞌ.
MAT 1:19 Neꞌmine ogavo vanaho Zoseheꞌ aza aꞌminemuꞌ ningo gelo ve lisiheꞌ minineꞌ nenako nemuꞌ Maliaꞌni nene eveneꞌ mukilite nigilavo hulo-deloniꞌ nene ovozo helalive lo gelo zegeno haleko hulo-delove lo gilineꞌ.
MAT 1:20 Idoꞌ neꞌmino gala geleꞌmo nomonivo Guvelesi veꞌmi angeloꞌ maliꞌmo vamutoꞌ sotoꞌ o emo tiꞌ lo lo-imineꞌ: Zoseheꞌ gaza guvelesi ve Davidiꞌ aꞌvo make, veneka Maliaꞌni nene dalohe hulo-delohe lo gaka gopo nogelaineꞌ nene gelamozo. Izipahala nominineꞌ nene Oꞌmosoꞌmi Sikalahuliꞌmidatiꞌ nenako ne ha dalosane.
MAT 1:21 Neꞌmine oganivo gipe ma gedeleseive. Neꞌmine ogavo gulive Izesuꞌ ve lo molalosane. Aꞌmine gulive neꞌmi monovo nene do luꞌ izelive ve. Idoꞌ eze evenele zuho neti lihimeꞌine hulo-ngedo do nguꞌ izelineꞌ nenako nemuꞌ guliveꞌve nene Izesuꞌ ve lo molalosane.
MAT 1:22 Initeꞌ mukiꞌ neꞌmino sotoꞌ ineꞌ nene Oꞌmosoꞌmi veletiꞌ gamazi lo sotoꞌ ogaꞌ ive polohete maliꞌmo Guvelesi veꞌmo lineꞌ gamazi ma lo-ngimineꞌ nene gihile izelive losa sotoꞌ ineꞌ. Idoꞌ aꞌmine Guvelesi veꞌmo lineꞌ gamazi nene neꞌmino neive:
MAT 1:23 Zaha ningamineꞌ alu maliꞌmo izipahala mino gipele gedelineꞌ nene guliveꞌve Emanueliꞌ ve li milalisave. Aꞌmine gulive Emanueliꞌ neꞌmi monovo di velepeꞌ izaniꞌ nene neꞌmino neive: Oꞌmoso lelikisi neive.
MAT 1:24 Idoꞌ neꞌmine ogavo Zoseheꞌ aza okisetiꞌ otosa angeloꞌ lidoꞌ nene gele do elenahine Maliaꞌni nene eleꞌmize numuꞌveuꞌ molaniꞌza
MAT 1:25 okoꞌnoloꞌ damivo gipele ma gedavo gulive Izesuꞌ ve lo molaniꞌ.
MAT 2:1 Helodeꞌ aza Zuda veti misubouꞌ guvelesi ve naba loloꞌ ogo minineꞌ gamene neuꞌ nene Izesuꞌ aza Zudaia misubouꞌ numuno ebeꞌ ma gulive Betelehemi neuꞌ sotoꞌ ogavo sonohiꞌ monovo gilaaꞌ ave ma engiꞌ misuboꞌine hotaa hoꞌ dizaaꞌ ida minineꞌ nene huli igi Zelusalemi numuno ebeta heteli tiꞌ li longoꞌ igi laniꞌ:
MAT 2:2 Zuda ve lengiꞌ guvetinesi ve loloꞌ ilive gosohoꞌ sotoꞌ ineꞌ nene zala nolive. Laza nene eiꞌ sotoꞌ ilingumuꞌ sotoꞌ ilineꞌ sonohiꞌ nene sotoꞌ ogavo ningo nemuꞌ Guvelesi ve mo sotoꞌ ogave lo gelo gubuꞌ ize emelesa noune.
MAT 2:3 Neꞌmine likevo guvelesi ve Helodeꞌ aza laniꞌ gamazi nene gelo gopo gala gelavo Zelusalemi aleve inginesi aꞌmineꞌmine igi gopo gaꞌine gilaniꞌ.
MAT 2:4 Neꞌmine ogo Helodeꞌ nene Zuda veloꞌ medeli mini Oꞌmoso initeꞌ lehizi-daaꞌ ave nabasi idoꞌ monoꞌ apizi ngimaaꞌ avesi nene asi lo do nubo o-ngedo Oꞌmosoꞌmo imiselelesa live Guvelesi ve naba aza nene zala sotoꞌ ilive li nizaniꞌ neve lo longoꞌ o-ngidineꞌ.
MAT 2:5 Longoꞌ o-ngedavo ingine tiꞌ li laniꞌ: Oꞌmosoꞌmi veletiꞌ gamazi lo sotoꞌ ogaꞌ ive polohete gozopoꞌ ma minidiꞌmo Oꞌmosoꞌmo lineꞌ gamazi ma tiꞌ lo gize neive: Idoꞌ Zudaia misubouko Betelehemi aleve naneꞌ gaza Zuda veti misubouꞌ eveneꞌ dizi minanguꞌ nene gaza lemo minanive nomane. Geitatiꞌ guvelesi ve ma neze eveneꞌne zuho Isilaeleꞌ aleve gizebo o-ngedelive ma sotoꞌ ilineꞌ nenako nemuꞌ nene gaza lemosi ma minamane. Poloheteliꞌmo tiꞌ lo gizineꞌ nemuꞌ aꞌmine Oꞌmosoꞌmo do luꞌ izelive lo imiselelesa live nene Zudaia misubouꞌ Betelehemi numuda sotoꞌ oloseive li li nizaniꞌ ve li li-imaniꞌ.
MAT 2:7 Tiꞌ li li-imikevo sonohiꞌ monovo gilaaꞌ ave nene Helodeꞌ zegeno sunoꞌ asi lo-ngedavo ikevo sonohiꞌ apiꞌ ogo sotoꞌ ineꞌ gamene gehepevemuꞌ longoꞌ o-ngedavo nemuꞌ li-imaniꞌ.
MAT 2:8 Li-imikevo aza Betelehemi numuda ngimiselo tiꞌ lo lo-ngimineꞌ: Lingine vi aꞌmine izipe nene viseꞌ di lamini ilo. Viseꞌ di lamineꞌ igi ningi ma tineꞌ mili igi li-nimilo. Nazasi vo gubuꞌ ize emeloze.
MAT 2:9 Neꞌmine lo lavo ingine gili limi vaniꞌ. Idoꞌ nivavo, ee, aꞌmine gomuꞌ sotoꞌ neivo ninganiꞌ sonohiꞌ nene gohi sotoꞌ ogo gomuꞌ molo ngemo vo izipe minineꞌ ebeꞌ veleta nene utuꞌvize minineꞌ.
MAT 2:10 Idoꞌ sonohiꞌ nene ningi ngolize nabaꞌmine goloso izi
MAT 2:11 numunguꞌ dizi ninganiꞌ nene izipe ngomo nene izeleho Maliakisi nizasivo ninganiꞌ. Ningi obuvoꞌine hizi izipe ngomo nene gubuꞌ izi imii goꞌningutiꞌ initeꞌ ma imaniꞌ nene ngolimonisi idoꞌ atoꞌ atoꞌ za sitalitisi novozo di lumo lumo aniꞌ unuvo lamineꞌ ogaꞌ ineꞌ nesi lehizi-daniꞌ.
MAT 2:12 Lehizi-daniꞌza Oꞌmoso neꞌmo vamutoꞌ nene Helodeꞌ neida mo tineꞌ mili vamilizave lo lo-ngedavo ingine aniꞌ akala vami atoꞌ akala vi numuꞌine ebeꞌnida vaniꞌ.
MAT 2:13 Idoꞌ sonohiꞌ monovo ningaaꞌ ave ingine mo vikevo Guvelesi veꞌmi angeloꞌ maliꞌmo Zoseheꞌni vamutoꞌ sotoꞌ o emo tiꞌ lo lo-imineꞌ: Helodeꞌ aza aꞌmine izipe nene belelove lo gelo ezemuꞌ viseꞌ olosa neize. Gaza oto izipesi izelehingisi ngeleꞌmizo vo Aigita misubouko vi minilo. Nizavo alingeꞌ tineꞌ mili alizave loloniꞌ gameneuꞌ nene tineꞌ mili alizaze.
MAT 2:14 Neꞌmine lavo Zoseheꞌ aza oto izelehingi gipelengi nene holukaꞌ naba ngeleꞌmizo Aigita misubouko vavo aꞌminguꞌ minaniꞌ.
MAT 2:15 Aꞌminguꞌ nizavo Helodeꞌ nene hilineꞌ. Oꞌmosoꞌmo Aigita misubouko ngimiselineꞌ nene Guvelesi veꞌmo lineꞌ gamazi polohete maliꞌmo lo sotoꞌ ineꞌ ma nene gihile izelive lo ngimiselineꞌ. Aꞌmine lo sotoꞌ ineꞌ gamazi nene neꞌmino neive: Aigita misubouko neivo neniꞌ gipeꞌnemuꞌ ano lo asi lo-dekuve.
MAT 2:16 Helodeꞌ ha neivo sonohiꞌ monovo gilaaꞌ ave ingine Helodeꞌ neida tineꞌ mili vami golo izaniꞌ nene ningo gelo izeboloꞌ goloso molavo nemuꞌ sonohiꞌ monovo gilaaꞌ avete li-imaniꞌ gamene nene ha gele mino gipe ngomo kilisimasiꞌine sitaꞌ ivileꞌ amineꞌ gipe mukiꞌ nene ngibililo lo ami ma ngimiselavo ingine vi Betelehemi ebekuꞌ idoꞌ numuno ebeꞌ gohi ma avitoꞌ miniꞌmi monanguꞌ nene moni neꞌmine gameneꞌinesi minaniꞌ gipe nene ngibili geseꞌ aniꞌ.
MAT 2:17 Neꞌmine ikevo Oꞌmosoꞌmi veletiꞌ gamazi lo sotoꞌ ogaꞌ ive polohete Zelemiaꞌ gizineꞌ gamazi neꞌmino ma nene gihile izineꞌ:
MAT 2:18 Lama misubouꞌ ive namaliꞌmo nolo molo minineꞌ. Veneꞌ mukiꞌ Laheliꞌ aꞌvo ingine gekeꞌ gekeꞌ li Izipahaꞌinemuꞌ ive nama goloso igi minaniꞌ. Izipahaꞌine vaiꞌ osuꞌ laniꞌ neꞌmo di nguꞌ izilizaniꞌ nesi ngeli matamilizaniꞌ ineꞌ ve.
MAT 2:19 Helodeꞌ mo helavo alingeꞌ Guvelesi veꞌmi angeloꞌ maliꞌmo Aigita misubouko vo Zoseheꞌni vamutoꞌ sotoꞌ o emo
MAT 2:20 tiꞌ lo lo-imineꞌ: Izipe belelove live ma nene mo helaze. Nemuꞌ nene gaza oto izelehingi gipelengi ngeleꞌmizo Isilaeleꞌ misubouko vozo.
MAT 2:21 Lavo Zoseheꞌ aza oto izelehingi gipelengi ngeleꞌmizo Isilaeleꞌ misubouko vineꞌza
MAT 2:22 Akelaoꞌ aza meleho Helodeꞌ gonoloꞌ medelo Zuda veti guveꞌinesi ve naba loloꞌ ineꞌ nene gelo eiꞌ gizebo ineꞌ misubouꞌ nene vo minelesa ehelele izineꞌ. Ehelele izavo Oꞌmosoꞌmo vamutoꞌ lo-imidiꞌmine ogo izipesi izelehingisi ngeleꞌmizo nGalilaia misubouꞌ vavo
MAT 2:23 numuno ebeꞌ ma gulive Nasalete neuꞌ vi minaniꞌ. Neꞌmine ikevo nemuꞌ nene Oꞌmosoꞌmi veletiꞌ gamazi li sotoꞌ igaꞌ avelite Oꞌmosoꞌmo imiselelesa livemuꞌ nene Nasalete ve ve lilisave laniꞌ nene gihile izineꞌ.
MAT 3:1 Idoꞌ aꞌmine gameneuꞌ nene monoꞌ noso holo-ngedaaꞌ ive Zohaneꞌ nene apiꞌ ogo Zudaia misubouꞌ ebeꞌ hadivela sotoꞌ ogo
MAT 3:2 gamazi tiꞌ lo lo ngeme ngemeꞌ oꞌmo aniꞌ: Oꞌmosoꞌmi gizebouꞌ vo holosoꞌ gamene mo alitaze. Lutine di velepeꞌ izilo lo lo-ngemeꞌmo aniꞌ.
MAT 3:3 Idoꞌ gozopoꞌ ma mino Oꞌmosoꞌmo lineꞌ gamazi lo sotoꞌ ogaꞌ ive polohete Isaiaꞌ aza Oꞌmosoꞌmo lineꞌ gamazi ma tiꞌ lo gizineꞌ: Ebeꞌ hadivelatiꞌ eveneꞌ maliꞌmo asi naba ma tiꞌ lo nolive: Guvelesi ve alingumuꞌ ve li akaꞌve di vaꞌvaꞌ igi lutine di lisiheꞌ i-dilo. Neꞌmine lo lineꞌ nene Zohaneꞌnimuꞌ lineꞌ ve.
MAT 3:4 Idoꞌ aꞌmine Zohaneꞌ okoꞌnoloꞌ initeꞌ nene kamelaꞌ ize zopovodunuꞌ amuzo molo vineꞌ liliꞌ aniꞌ nene ngolo idoꞌ ize losuvodunuꞌ liliꞌ aniꞌ leti nesi gopololoꞌ izo maꞌnabusosi himoni neti novozo nesi naaꞌ ineꞌ ve.
MAT 3:5 Idoꞌ eveneꞌ mukiꞌ nene Zudaia misubouꞌ Zelusalemi numuno ebekutikisi idoꞌ aꞌmine misubouꞌ numuno ebeꞌ mukiꞌ netikisi idoꞌ Zodani noso gahevela minaniꞌ numuno ebeꞌ mukikutikisi nene Zohaneꞌ neida vi
MAT 3:6 lihimeꞌine li sotoꞌ ikevo Zodani nosouꞌ noso holo-ngidineꞌ.
MAT 3:7 Holo-ngidineꞌza Zuda veti monoꞌ mulise ato atoꞌ minangutiꞌ eveneꞌ linge ma Halisaioꞌ monoꞌ gilaaꞌ ave idoꞌ linge ma Sadukaioꞌ monoꞌ gilaaꞌ ave mukiꞌ noso hilalisa navo ningo tiꞌ lo lo-ngidineꞌ: Lingine Sataliꞌmi izipahala goloso mene Oꞌmosoꞌmo lihime lengemelingutiꞌ ha olovoꞌ ilisave lo ve maliꞌmo lo-lengemavosa olovoꞌ ilisa nahe.
MAT 3:8 Nemuꞌ nene lingine aꞌmingutiꞌ olovoꞌ olone lii ma lingine luꞌine di velepeꞌ lamineꞌ izaveti monovo nene di mini initeꞌ lamineꞌ gihilevoꞌ nene igi mili minilo.
MAT 3:9 Idoꞌ gililo. Lingine laza Abalahamuꞌ aꞌvopilemoꞌ Oꞌmosoꞌmo noꞌnohoꞌ ize-ledelesuve live nounako Oꞌmosoꞌmo lihime lemo do goloso o-ledamivo laminekovoꞌ ha minelesune li lutinguꞌ gilamilo. Naza ma lo-lengemeloze. Lengiꞌ nene do hulosa Oꞌmosoꞌmo Abalahamuꞌni lo huko-dineꞌ gamazi do gihile izelesa Abalahamuꞌ aꞌvopilemoꞌ gohi ma do sotoꞌ o-delove lo gilidiniko geheni nevote Abalahamuꞌ aꞌvopilemoꞌ liliꞌ adine. Nemuꞌ nene lingine laza Abalahamuꞌ aꞌvopilemoꞌ nounako lihime lemamoloseive li gilamilo.
MAT 3:10 Oꞌmosoꞌmo idise lihime lemo mo lebelelesa do nene ogo mino eveneꞌ za belelesa za monovola luno bai gamunoꞌ ogaꞌ neineꞌ neꞌmine o neive. Za mukiꞌ gihile lamineꞌ izamaniꞌ nene monoꞌ gilamaniꞌ aleve neꞌminosa nenako huko olokuꞌ gizeleseive.
MAT 3:11 Naza nene monoꞌ noso holo-ngedeꞌmo vo nouvoniꞌ nene lutine di velepeꞌ izangumuꞌ nene haza nosodunuꞌ holo-lengedeꞌmo vo nouvoniꞌza alingeꞌ neꞌmeto nave nene dizo mino nezesi nivileꞌ goloso o-nedosa neive nenako naza aꞌneꞌmineꞌmine limi minavelite daaꞌ aniꞌ gono nesi do-do suuꞌve nesi ngelo do-do vamolosuve. Idoꞌ aꞌmine ve neꞌmo noso holo-lengedelineꞌ nene Oꞌmosoꞌmi Sikalahukisi olokisi ne neive.
MAT 3:12 Ee, aꞌmine ve nene eveneꞌ laminekisi golososi do gizekaꞌ olosa do nene ogo mino ve ma viti gihilesi losuvosi gopo igi minaniꞌ nene do kegeselesa gono daaꞌ initeꞌve do anauꞌ ogo do nene ogo minaaꞌ neineꞌ neꞌmine o neive. Aza viti gihile losuvosi minangutiꞌ aꞌmine vaiꞌ nene do lamino izeꞌ molo naaꞌ initeꞌ nene do nubo ogo numuꞌveuko molo losuvo nene lovoꞌ lovoꞌ ogo minaaꞌ neineꞌ olokuꞌ nene gizeleseive.
MAT 3:13 Idoꞌ Izesuꞌ aza Zohaneꞌ monoꞌ noso holo-nedelive lo nGalilaia misubo hulo Zohaneꞌ neida Zodani nosola vineꞌ.
MAT 3:14 Vo hetelo noso holo-delingumuꞌ lavo Zohaneꞌ aza naza aꞌneꞌmine veꞌmine holo-deloniꞌ nene edamoloseive lo gelo oꞌve lo-delesa tiꞌ lo lineꞌ: Geiꞌ neke, neniꞌ noso holo-nedelinidoꞌ o neineꞌ nenako neniꞌ holo-nedelive lo nenita nanimuꞌ nane.
MAT 3:15 Lavo Izesuꞌ aꞌmidoꞌ lo-imineꞌ: Lamineꞌ laineꞌza neꞌmine olosivetise Oꞌmosoꞌmo lidoꞌ olosineꞌ nenako nemuꞌ oꞌve lamozo. Neꞌmine lavo gele emo monoꞌ noso holo-dineꞌ.
MAT 3:16 Monoꞌ noso holo-davo Izesuꞌ aza geto nosoutiꞌ dizo ningineꞌ nene, ee, Okulumoꞌ ngoloꞌ lavo Oꞌmosoꞌmi Sikalahuꞌ neꞌmo nama viluso neꞌmino ezela lemo navo ningineꞌ.
MAT 3:17 Ningavo Okulumokutiꞌ gamazi ma tiꞌ lo limineꞌ: Aza mene voꞌneloꞌ gipeꞌne hamoꞌ nene neive. Ezemuꞌ nene mo muluꞌneuꞌ lamineꞌ nogiluve.
MAT 4:1 Neꞌmine ogavo Sataniꞌmo emenguꞌ molalingumuꞌ ve lo Sikalahuꞌ neꞌmo eleꞌmizo ebeꞌ hadivela dizineꞌ.
MAT 4:2 Eleꞌmizo dizavo aꞌmida nosoꞌ niteꞌ malise ogo ongo oto ineꞌ nene gamene foti (40) nominivo alingeꞌ gaꞌna goloso helo minineꞌ.
MAT 4:3 Gaꞌna helo neivo ngemenguꞌ molaaꞌ ive aza Izesuda ogo tiꞌ lo lo-imineꞌ: Gaza Oꞌmosoꞌmi gipele noo ma geheni mevomuꞌ lanivo nalineꞌ initeꞌ beleti liliꞌ ilo lovo.
MAT 4:4 Neꞌmine lavo Izesuꞌ tiꞌ lo lo-imineꞌ: Oꞌove, monoꞌ godolouꞌ gamazi ma tiꞌ li gizi nizaniꞌ ma neive: Eveneꞌ minevoꞌ alevote nene nosoꞌ nitekukovoꞌ nomive. Oꞌmosoꞌmi veletiꞌ gamazi mukitoꞌ nesi ha minevoꞌ alevoꞌ olosune. Neꞌmine li gizi nizaniꞌ nenako nemuꞌ nene geiꞌ laineꞌ neꞌmine nene mo amolosuve.
MAT 4:5 Neꞌmine lavo Satani aza Izesuꞌni eleꞌmizo Zelusalemi ebekuꞌ vo monoꞌ numuno naba haꞌna haꞌna minineꞌ neꞌmi gololoꞌ eleꞌmizo dize mino
MAT 4:6 tiꞌ lo lo-imineꞌ: Monoꞌ godolouꞌ tiꞌ li gizi nizaniꞌ ma neive: Oꞌmosoꞌmo geikumuꞌ angeloꞌve gono gamazi lo-ngedeleseive. Idoꞌ ma nene: Gizenga gehedoꞌ gebele gulutilingutiꞌ angeloꞌ nete alete mili di hozi li-gidilisave li gizi nizaniꞌ ve. Idoꞌ aꞌmine gamazi lidoꞌ igi neꞌmine i-gidilisaze. Gaza lamineꞌ Oꞌmosoꞌmi gipele noo ma melotiꞌ oluto akaꞌmeloꞌ izevo.
MAT 4:7 Neꞌmine lavo Izesuꞌ tiꞌ lo lo-imineꞌ: Ne neiha monoꞌ godolouꞌ gamazi gohi ma tiꞌ li gizi nizaniꞌ ma neive: Lingine Guvetinesi ve Oꞌmoso golo izamilo. Neꞌmine lo-leme neineꞌ nenako geze nolaineꞌ nene Oꞌmoso golo izaaꞌ noloseinako neꞌmine amolosuve.
MAT 4:8 Neꞌmine lavo Satani aza gohi eleꞌmizo golo haꞌna haꞌna maloꞌ dize mino eveneꞌ zuho ato atoꞌ misuboꞌninguꞌ misuboꞌninguꞌ amuzoꞌinesi minaniꞌ idoꞌ gonoliseꞌine lamineꞌ tamineꞌ ato atokisi minaniꞌ nene elebizo
MAT 4:9 tiꞌ lo lo-imineꞌ: Gaza neniꞌ gubuꞌ ize nemo nopoꞌni lilineꞌ nene initeꞌ noningaineꞌ akaꞌme nene gemelesuve lineꞌ.
MAT 4:10 Neꞌmine lavo Izesuꞌ aza tiꞌ lo lo-imineꞌ: Monoꞌ godolouꞌ tiꞌ li gizi nizaniꞌ ma neive: Laza Guvetesi ve Oꞌmoso eiꞌ hamoꞌ nene opoꞌni lo gubiꞌ ize emo minelesune. Ee, eiꞌ hamokovoꞌ nene gelekeleꞌ o-do minelesune. Neꞌmine li gizi nizaniꞌ nenako nemuꞌ nene gaza laineꞌ neꞌmine amolosuze. Satani gaza hulo-nedo vo haha ozo.
MAT 4:11 Lavo nelotiꞌ Satani aza hulo-do vavo Izesuꞌ neida angeloꞌ sotoꞌ igi nasahiliꞌ igi hize eleꞌ i-daniꞌ ve.
MAT 4:12 Idoꞌ Zohaneꞌni nene nalaꞌ numunguꞌ huli-daniꞌ nemuꞌ gelo Izesuꞌ aza nGalilaia misubouko vineꞌ.
MAT 4:13 Vo Nasalete ebeꞌ hulo Kahanaumi ebeta vo minineꞌ. Kahanaumi ebeꞌ nene nGalilaia noso ohuno gahevela Zakoboꞌ gipele Zebuloniki Nahataliki ngaꞌvopilemoꞌ zuho engiꞌ misuboꞌninguꞌ ongo minineꞌ.
MAT 4:14 Neꞌmine ineꞌ nene Oꞌmosoꞌmi veletiꞌ gamazi lo sotoꞌ ogaꞌ ive polohete Isaiaꞌni Oꞌmosoꞌmo lo-imineꞌ gamazi ma neꞌmine lo lineꞌ ma nene ogo gihile izineꞌ:
MAT 4:15 Litiꞌmusouꞌ gopo Zebuloniꞌ misuboukisi Nahataliꞌ misuboukisi idoꞌ noso ohuno nabaꞌmi gahevela idoꞌ Zodani noso liginela Zuda ve minamaniꞌ aleveti misubo nGalilaia neuꞌ minave ingine labanaꞌ naba mo ningikeve. Ee, aꞌmine aleve liꞌnimuso luꞌninguꞌ ize minivo minave ingine mudise hilaaꞌ akaloꞌ mini mili minave engita labanaꞌ nene mo sotoꞌ o ngemave.
MAT 4:17 Aꞌmine gamenelotiꞌ Izesuꞌ nene monoꞌ tiꞌ lo lo-ngemekaꞌ ngemekaꞌ oꞌmo monineꞌ: Oꞌmosoꞌmi gizebouꞌ vo holosoꞌ gamene mo alitaze. Lutine gatine di velepeꞌ izilo.
MAT 4:18 Izesuꞌ aza tiꞌ oꞌmo nGalilaia noso ohuno nabaꞌmi gahevela nomono uvolohoi akunoloi ma guliveꞌine Simoniꞌ ve gulive gohi ma Petoloꞌ aza nakunolo Adeleakisi alahaꞌ daaꞌ asive minasinako alahaꞌ daaꞌ asineꞌ golalezeꞌine nene alahaꞌ dalisa nosouꞌ nihulasivo ningineꞌ.
MAT 4:19 Ningo tiꞌ lo lo-ngimineꞌ: Lingine igi neꞌmetilizo. Alahaꞌ daaꞌ nasineꞌ neꞌmini eveneꞌ di nenita igaꞌ ilisive loloꞌ o-lengedelesuze.
MAT 4:20 Neꞌmine lavo ingine liteꞌ li alahaꞌ daaꞌ asineꞌ golalezeꞌine nene hitiki eꞌmeti vasineꞌ.
MAT 4:21 Ve sitaꞌ nene do giꞌmizo ngomo ma novo uvolohoi akunoloi gohi ma Zebedaioꞌ gipele sitaꞌ guliveꞌine Zakobokisi idoꞌ akunolo Zohanekisi ingine meꞌnibo Zebedaioꞌ nesi sipiuꞌ mini alahaꞌ daaꞌ aniꞌ golalezeꞌine nene ongoti di lamineꞌ igi nizavo ningo neꞌmetilisive lo asi lo-ngimineꞌ.
MAT 4:22 Neꞌmine lavo liteꞌ li oti meꞌnibinesi sipi nesi huli-ngidi eꞌmeti vasineꞌ.
MAT 4:23 Idoꞌ nGalilaia misubo mukikuꞌ mone mone ogo monoꞌ numunoꞌine mininguꞌ mininguꞌ monoꞌ apize ngemo Oꞌmosoꞌmo eveneꞌ do giꞌmizo gizebo o-ledelineꞌ gamazi lamineꞌ nene lo-ngemekaꞌ ngemekaꞌ ogo eveneꞌ initeꞌ gizi davesi gilizevo alevesi mukiꞌ nene do lamineꞌ o-ngedeꞌmo monineꞌ.
MAT 4:24 Neꞌmine ogavo guvele nene Silia misubo mukikuꞌ nene mono osuꞌ lavo initeꞌ ato atoꞌ gizi di mulumo gilave mukiꞌ nesi idoꞌ sikalahuꞌ goloso luꞌninguꞌ minive idoꞌ lemo lise-ngedaaꞌ ive idoꞌ gizeꞌine aꞌnine gulupese ive mukiꞌ nene Izesuda ngeleꞌmizi ikevo do lamineꞌ o-ngidineꞌ.
MAT 4:25 Idoꞌ eveneꞌ mukiꞌ vaiꞌ goloso nGalilaia misuboukotikisi idoꞌ Dekapoli misuboukotikisi Zelusalemi ebekutikisi idoꞌ Zudaia misubouꞌ minaniꞌ ebeꞌ linge malatikisi Zodani noso helala minineꞌ misuboukotikisi igi di geseꞌ igi eꞌmetaniꞌ.
MAT 5:1 Izesuꞌ aza eveneꞌ mukiꞌ goloso aniꞌ nene ningo gololoꞌ dizo aꞌmida mitoꞌ neivo izipahala zuho ingine ezela igi minikevo
MAT 5:2 gamazi apiꞌ ogo neꞌmine lo apize ngemo minineꞌ:
MAT 5:3 Lute hize eleꞌ ilineꞌ initeꞌ mataꞌ lezela nomive li viseꞌ igaꞌ ave ingine Oꞌmosoꞌmo gizebo o-ngedelinguꞌ vi hilalizaniꞌ nenako nemuꞌ lamineꞌ iliza akaloꞌ mini mili nizaze. Nemuꞌ ngolize izilizaniꞌ o neive.
MAT 5:4 Idoꞌ lihime initeliꞌmi lulouꞌ mini agae agae li ive igi minaaꞌ nave ingine nene Oꞌmosoꞌmo do nguꞌ izelineꞌ nenako nemuꞌ lamineꞌ iliza akaloꞌ mini mili nizaze. Nemuꞌ ngolize izilizaniꞌ o neive.
MAT 5:5 Idoꞌ eveneꞌ hongu li limi minaaꞌ nave ingine nene Oꞌmosoꞌmo misubo meꞌningine loloꞌ o-ngedo aꞌminguꞌ initeꞌ mataꞌ nesi ngemelineꞌ nenako nemuꞌ lamineꞌ iliza akaloꞌ mini mili nizaze. Nemuꞌ ngolize izilizaniꞌ o neive.
MAT 5:6 Idoꞌ eveneꞌ govi ve noso ve li gaꞌna hili minaaꞌ nave neꞌmini Oꞌmosoꞌmi monovo lisihekumuꞌ ma dunivoo li gaꞌna hili minaaꞌ nave ingine aꞌmine dalisa laniꞌ initeꞌ nene Oꞌmosoꞌmo ngemavo laniteꞌ gili minilizaniꞌ nenako nemuꞌ lamineꞌ iliza akaloꞌ mini mili nizaze. Nemuꞌ ngolize izilizaniꞌ o neive.
MAT 5:7 Idoꞌ eveneꞌ mamuꞌ mulumoꞌine gili nasahiliꞌ i-ngidaaꞌ nave engiꞌ nene Oꞌmosoꞌmo mulumoꞌine gelo nasahiliꞌ o-ngedelineꞌ nenako nemuꞌ lamineꞌ iliza akaloꞌ mini mili nizaze. Nemuꞌ ngolize izilizaniꞌ o neive.
MAT 5:8 Idoꞌ luꞌninguꞌ golososi nomivo lamineꞌ minaaꞌ nave ingine Oꞌmoso ningilisave. Ningilizaniꞌ nenako nemuꞌ lamineꞌ iliza akaloꞌ mini mili nizaze. Nemuꞌ ngolize izilizaniꞌ o neive.
MAT 5:9 Idoꞌ eveneꞌ hongu li miniliza monovo di sotoꞌ igaꞌ nave ingine Oꞌmosoꞌmo eiꞌ izipahala zuho ve lo-ngedelineꞌ nenako nemuꞌ lamineꞌ iliza akaloꞌ mini mili nizaze. Nemuꞌ ngolize izilizaniꞌ o neive.
MAT 5:10 Idoꞌ Oꞌmosoꞌmi monovo lisiheꞌ nene di tiꞌ igisa igi mili nizavo nemuꞌ goboni nimili-ngidavo goboni malaꞌ malaliꞌmi lulouꞌ minaaꞌ nave ingine Oꞌmosoꞌmo gizebo o-ngedelinguꞌ vi hilalizaniꞌ nenako nemuꞌ lamineꞌ iliza akaloꞌ mini mili nizaze. Nemuꞌ ngolize izilizaniꞌ o neive.
MAT 5:11 Ve ma ingine neniꞌ neꞌmetangumuꞌ ve li lengelemi goboni mili-lingidi soza li gamazi goloso palasa li-lingidilizaniꞌ nene lamineꞌ iliza akaloꞌ mini mili nizave.
MAT 5:12 Idoꞌ gomuꞌ minaniꞌ Polohete aꞌmineꞌmine igi goboni mili-ngidaaꞌ aniꞌ nenako lingine engiꞌ gonoꞌnidoꞌ medeli minaniꞌ nemukisi idoꞌ Oꞌmosoꞌmo aza menitine naba Okulumokuko molo-lengedelingumukisi muludinguꞌ lamineꞌ gili longolize izi minilo.
MAT 5:13 Guvo nene nosoꞌ nitekuꞌ tileꞌ okunivo neꞌmo do lamineꞌ ogaꞌ neive. Lingine eveneꞌ mukiliti vovoꞌninguꞌ guvo neꞌmine mini ngeleꞌmize lamineꞌ igi minilisave. Ee, lingine guvo neꞌmini nizaniꞌza aꞌmine guvo nene goloso ogavo laniteꞌve osuꞌ lavo ma ngelo gohi lamineꞌ amoloseive. Mo goloso o vineꞌ nenako nemuꞌ di huli akaloꞌ ikevo eveneꞌ aꞌmidoꞌ lisi monilisave.
MAT 5:14 Lingine nene misubouꞌ veliti liviꞌ labanaꞌine nene nizave. Idoꞌ nemuꞌ nene gololoꞌ gehepeve minineꞌ numuno ebeꞌ neꞌminisasi minilisave. Gololoꞌ gehepeve minineꞌ neꞌmo ngelo haleko minamoloseive. Lingine aꞌmineꞌmine igi sotoꞌ igivoꞌ minikevo eveneꞌ mukiꞌ nene ningi osuꞌ li minilisave.
MAT 5:15 Idoꞌ oloꞌ liviꞌ nene viteꞌ igisa aꞌmidoꞌ somo naba ma di hiti di halekami aꞌmine liviꞌ nene numunguꞌ nizave mukiꞌ nene hize labanaꞌ ele-ngedelive li holomoꞌveloꞌ sotoꞌ ogo minelidokovoꞌ di milalisave.
MAT 5:16 Lingine aꞌmineꞌmine igi labanatine neꞌmo eveneꞌ nene hize labanaꞌ ele-ngedelive li di sotoꞌ igisa igi mili minilizaniꞌ monovo nene lamineꞌ ogavo nemuꞌ nene eveneꞌ nete ningi Okulumokuꞌ Metibine nene opoꞌni lilisave. Nemuꞌ labanatine nedunuꞌ hize labanaꞌ ili minilo.
MAT 5:17 Lingine nenikumuꞌ Oꞌmosoꞌmi louꞌ gamazi Moseꞌ lo huko lineꞌ nesi Oꞌmosoꞌmi veletiꞌ gamazi polohete nete li sotoꞌ aniꞌ nesi gili damilo lo aꞌmine gamazi ize hukolosa ahe li gilamilo. Nene ize hukolosa amuve. Monovoꞌve lo sotoꞌ ogo do gihile izelesa ogo nouvoniꞌ ve.
MAT 5:18 Gamazi mene mo laminetoꞌ nolo-lingimuve: Oꞌmosoꞌmo lo huko lineꞌ gamaziutiꞌ nene gamazi ngomo ha nitekisi mo vo tolovo amivo okulumokisi misubosi osuꞌ lilisineꞌ gameneukisi aꞌmine louꞌ gamazi nene ha mineleseive. Lamineꞌ ha mino aꞌmine gamazi mukiꞌ nene gihile izosavoꞌ nene osuꞌ loloseive.
MAT 5:19 Ve ma ingine Oꞌmosoꞌmo gili dalizave lo louꞌ gamazi lo huko-lidineꞌ mukikutiꞌ ngomo gidini ma minineꞌ nemukisi haza niteꞌ ve li avutoꞌ igi mini eveneꞌ mamuꞌ linginesi aꞌmineꞌmine igi avutoꞌ igi minilizaniꞌ nesi lamineꞌ oloseive li apizi ngimilizaniꞌ nene Oꞌmosoꞌmo engikumuꞌ eiꞌ gizebouꞌ vi hilaveti muliseuꞌ limi minave ve lo lo-ngedeleseive. Neꞌmine lo-ngedelineꞌza ve ma ingine aꞌmine louꞌ gamazi mukiꞌ nene gili di mini eveneꞌ mamuꞌ linginesi aꞌmineꞌmine igi gili di minilizave li apizi ngimilizave ingine Oꞌmosoꞌmi gizebouꞌ vi hilaveti muliseuꞌ dizi minilisave.
MAT 5:20 Idoꞌ nemuꞌ nene naza nolo-lingimuve. Lingine Oꞌmosoꞌmi louꞌ gamazi apizi lingimaaꞌ avesi idoꞌ Halisaioꞌ monoꞌ laaꞌ avesi ingine eveneꞌ mukiꞌ ngivileꞌ igi ve lisiheꞌ lamineꞌ nizave ve li gilaaꞌ nahe. Gililo. Lingine lisiheꞌ goloso igi mini aꞌmine monoꞌ li-lingimaaꞌ aniꞌ aleve nene ngivileꞌ igi minamilizaniꞌ nene Oꞌmosoꞌmi gizebouꞌ mo kekeꞌ vi hilamilisave.
MAT 5:21 Idoꞌ louꞌ gamazi gozopoꞌ avotinginemuꞌ neꞌmine lo Moseꞌ lo huko gizineꞌ ma nene mo gili nizave: Gaza eveneꞌ ma bele helamozo. Nemuꞌ nene eveneꞌ ma bele helelive nene gonitoꞌ eleꞌmize mili lihimeꞌve imilisave.
MAT 5:22 Ne neineꞌza ma lo-lengemeloze. Ve ma aza ve mamuꞌ izeboloꞌ dalineꞌ nene gonitoꞌ oteleseive. Idoꞌ ve ma aza ve mamuꞌ dingani negi goloso ve lo-delive nene goniꞌ nabaloꞌ oteleseive. Idoꞌ ve mamuꞌ gaza gamazi gelesaꞌmane dingani goloso mene lo lo-delive nene olokuꞌ vaaꞌ akaloꞌ mine molaloseive.
MAT 5:23 Nemuꞌ nene gaza initeꞌ ma Oꞌmoso emelesa monoꞌ numunguꞌ dizo aꞌmine initeꞌ milaaꞌ holomoꞌveloꞌ olihe nomolo ve ma nenikumuꞌ mulunouꞌ goloso gelo lihimeꞌne do neive lo aꞌmidoꞌ gaka liteꞌ lo gelo ma
MAT 5:24 Oꞌmoso emelineꞌ initeꞌ nene holomoꞌveloꞌ molamo aꞌmidoꞌ huloko vo aꞌmine lihimeka do neiveꞌmi mulunouꞌ nene do lamineꞌ o-dezo. Do lamineꞌ o-dosa nene ogo Oꞌmoso emelineꞌ initeꞌ nene holomoꞌveloꞌ molo-delesane.
MAT 5:25 Ve maliꞌmo goniꞌ o-gedelesa geleꞌmize do zasila novivo ma nene zasiꞌmo minosa hulo pilisi veti aꞌninguꞌ ogavo huli galapusoloꞌ i-gidikelizaze. Akala olihe nivi ma gaza liteꞌ lo gonitoꞌ geleꞌmize molaliveꞌmi mulunouꞌ do hongu lo-do zogo molo-dezo.
MAT 5:26 Naza lamineꞌ lo-gemeloze. Gaza zogo emo mulunouꞌ do hongu lo-damanivo galapusoloꞌ huli-gidilizaniꞌ nene gaza aꞌminguꞌ mino lihimeka apasekaꞌ apasekaꞌ ogo mino meni hize osuꞌ gehepeve losavoꞌ nene osuꞌ losa volosane.
MAT 5:27 Moseꞌ lo huko lineꞌ gamazi neꞌmo gaza veneꞌ ma longoꞌ amozo lo neineꞌ ma mo gili nizave.
MAT 5:28 Gili nizaniꞌza idise naza ma lo-lengemelove: Ve ma aza Veneꞌ alu mamuꞌ ningo ma duvo lo gelelineꞌ nene eiꞌ luloliꞌmo aꞌmine veneꞌ nene longoꞌ ineꞌ geleleseive.
MAT 5:29 Nemuꞌ nene veka zamelatiꞌ ningaineꞌ neꞌmo goloso initekumuꞌ luka otavo ma aꞌmine veka neꞌmo geleꞌmize goloso ogavo Oꞌmosoꞌmo olokuꞌ hulo-gedalize. Aꞌmine monovo goloso nene hulilineꞌ neꞌmo veka mene kuluhize hulaineꞌ gilivo minelineꞌ nene lamineꞌ oloseive. Okonga mukiꞌ lamineꞌ ha do minaaꞌ nene mo neineꞌza okonga mukiꞌ lamineꞌ ha do minaineꞌ neꞌmo mudise vo olokuꞌ minaaꞌ akaloꞌ geleꞌmize molalineꞌ nene geikumuꞌ lamineꞌ amoloseive. Nemuꞌ nene veka goloso nene kuluhize hulaineꞌ gilivosa monovo goloso nene hulozo.
MAT 5:30 Idoꞌ anga zamela neꞌmo lihime daaꞌ akaloꞌ geleꞌmize nomolavo ma aꞌmine anga neꞌmo geleꞌmize goloso ogavo Oꞌmosoꞌmo olokuꞌ hulo-gedalize. Aꞌmine monovo goloso hulilineꞌ neꞌmo anga mene huko hulaineꞌ gelavo minelineꞌ nene lamineꞌ oloseive. Idoꞌ okonga mukiꞌ lamineꞌ ha do minaaꞌ nene mo neineꞌza neꞌmo mudise olokuꞌ vaaꞌ akaloꞌ geleꞌmize molalineꞌ nene lisiheꞌ o-gedamoloseive. Nemuꞌ anga nene huko hulaineꞌ gilivo lihime daaꞌ akaloꞌ nene vamozo.
MAT 5:31 Moseꞌ lo huko lineꞌ gamazi ma neꞌmino neive: Ve maliꞌmo aza elenahine hulo-delove lo ma veneꞌ mene mo hulo-dekuve lo luhuvo gizo emosa hulo-delive.
MAT 5:32 Ne neineꞌza neniꞌ ma lo-lengemeloze: Ve ma elenaho gopo monamo nolineꞌ initeꞌ mamuꞌ haza hulo-delineꞌ neꞌmo louꞌ gamazi ma veneꞌ vadingine huli ve maloꞌ vamilo lo minineꞌ ma nene avutoꞌ ogo ve gohiloꞌ vilineꞌ nene lihime daloseive. Dalineꞌ nene gomuꞌ vanahi monovo neꞌmo lihime mineleseive. Idoꞌ ve gohi maliꞌmo aꞌmine veneꞌ dalineꞌ nene louꞌ gamazi ve maliti eleꞌningine damilo lo minineꞌ ma nene avutoꞌ ogo lihime daloseive.
MAT 5:33 Idoꞌ louꞌ gamazi gozopoꞌ avotingine tiꞌ li li-ngimaniꞌ nesi mo gilikeniꞌ ma neive: Initeꞌ neꞌmine olosuve lo anga dizo lo hukolo ma soza lamozo. Oꞌmosomuꞌ initeꞌ olosuve lo anga dizo lo huko lo-emanidoꞌ nene ha olosane.
MAT 5:34 Ne neineꞌza neniꞌ ma lo-lengemeloze. Lingine initeꞌ mamuꞌ adine dizi lamineꞌ nolune li kekeꞌ mo li hukamilo. Okulumoꞌ nene Oꞌmosoꞌmo gizebo o-ledo minaaꞌ neineꞌ moꞌmosiꞌve neinako nemuꞌ okulumokuꞌ li izi adine dizi lamineꞌ nolune li li hukilizaniꞌ nene Oꞌmosomuꞌ li adine dizaniꞌ geleleseinako nemuꞌ neꞌmine amilo.
MAT 5:35 Idoꞌ misubo nene Oꞌmosoꞌmo gizene lise minaaꞌ neineꞌ initeꞌve nenako nemuꞌ misubouꞌ li izi adine dizi lamineꞌ nolune li li hukamilo. Idoꞌ Zelusalemi ebeꞌ nene Guvelesi ve nabaꞌmi numuno ebeꞌve nenako nemuꞌ Zelusalemi ebekuꞌ li izi adine dizi lamineꞌ nolune li li hukamilo.
MAT 5:36 Idoꞌ lamineꞌ nolune li lengiꞌ godotingukisi li izi lamilo. Lamineꞌ nolune lo godoteuꞌ lo izo loloneꞌ nene geni amivo ha lolosune li gili nizahe. Lingine godotine zopovo hamokisi mokonope gonobupe minineꞌ nene gonobupe mokonope loloꞌ ilive likevo neꞌmine amoloseive. Langisetine godotine zopovo nene ngeli di atoꞌ amilisave. Oꞌmoso hamoꞌ neꞌmo ha oloseive. Nemuꞌ nene godotinguꞌ li izi lamineꞌ nolune lilizaniꞌ nene Oꞌmosola li izi laniꞌ geleleseinako nemuꞌ godotinguꞌ li izi adine dizi gamazi mamuꞌ lamineꞌ nolune li li hukamilo.
MAT 5:37 Initeꞌ mamuꞌ oꞌve noluve lo ma mo oꞌve laminetoꞌ lozo. Idoꞌ oo noluve lo ma nene mo oo laminetoꞌ lozo. Idoꞌ initeꞌ masi masi lo molo lo huko lilineꞌ nene Satanilatiꞌ sotoꞌ ineꞌ lolosane.
MAT 5:38 Moseꞌ lo huko lineꞌ gamaziuꞌ tiꞌ lo neineꞌ gili nizaniꞌ ma neive. Idoꞌ ve maliꞌmo ve maliꞌmi vele hizo likavo ma eze vele hizi likilo. Idoꞌ vele gavulo bele ledavo ma eze vele gavulo bili ledilo.
MAT 5:39 Neꞌmine lo neineꞌ ma neineꞌza naza idise ma lo-lengemelove: Lingine ma nilingibilavo ma ingine di tiꞌni ngibilamilo. Idoꞌ gatine zamela niizavo ma hela adavalasi izilizaze. Mine velepeꞌ izilo.
MAT 5:40 Idoꞌ sioti ngomo lulouꞌ izikaniꞌ nene dalone li gonitoꞌ lengeleꞌmize nimilavo ma saketitine izikaniꞌ nesi di ngimilo.
MAT 5:41 Idoꞌ ve malite heneniꞌine gihi-ngidi aka liꞌnibe gidiniloꞌ di vilo nilavo ma aka haꞌna gidini nesi ha gihi-ngidi vilo.
MAT 5:42 Idoꞌ ve malite lengitatiꞌ initeꞌ ma dalone li longoꞌ navo ma ha ngimilo. Idoꞌ lengitatiꞌ initeꞌ ma do vo do-lengede mino alingeꞌ do lengemelone nilavo ma aꞌmanapa igi mehedine ngimamilo.
MAT 5:43 Idoꞌ tiꞌ li laaꞌ naniꞌ ma mo gili nizaniꞌ ma neive: Lengiꞌ zuho avita minaniꞌ nene lutine ngimilizaniꞌza biluvatine nene lutine ngimamilo.
MAT 5:44 Neꞌmine li laaꞌ naniꞌ ma nene neineꞌza neniꞌ ma lo-lengemelove: Biluvatine nene lutine ngimi goboni mili-lingidilizavemuꞌ nene Oꞌmosoꞌmo engita minelive li Oꞌmosola lilo.
MAT 5:45 Neꞌmine ilizaniꞌ nene Okulumokuꞌ metibi izipahala zuho gihile minilisave. Ee, Okulumokuꞌ metibo Oꞌmoso aza eveneꞌ do kegeso ve laminekovoꞌ do lamineꞌ o-ngedo eveneꞌ goloso lovo imaaꞌ ave nene do lamineꞌ o-ngedamo hulo-ngedesaꞌmineꞌza eiꞌ lavo hoꞌve neꞌmo silingengeꞌneꞌve hulo eveneꞌ golososi laminekisi nene do lamineꞌ o-ngedaaꞌ neive. Idoꞌ lavo goline nene izo eveneꞌ lisiheꞌ lamineꞌ minanikisi minamanikisi nene do lamineꞌ o-ngedaaꞌ neive. Nemuꞌ nene lingine aꞌmineꞌmine igi lovo vetine nene lutine ngimi goboni mili-lingidaaꞌ navemuꞌ Oꞌmosola li neꞌmine igi di lamineꞌ i-ngidilizaniꞌ nene eze emeni damenisi mini Okulumokuꞌ metibi izipahala gehepeve minilisave.
MAT 5:46 Idoꞌ lingine luꞌine lingimaaꞌ navevoꞌ nene lute ngemesoꞌ Oꞌmosoꞌmo meni lemeleseive li gilaaꞌ nahe. Lingine takisi daaꞌ navemuꞌ eveneꞌ goloso nizave li-ngidaaꞌ nave idoꞌ inginesi aꞌmineꞌmine igi luꞌine ngimavevoꞌ ngimaaꞌ naniꞌza lingine nene ma ngivileꞌ igi monovo lamineꞌ ma damanako Oꞌmosolatiꞌ meni ma damilisave.
MAT 5:47 Idoꞌ lingine lengiꞌ zuhovoꞌ zogo mili-ngidi gekeꞌ vokeꞌ li-ngidaaꞌ naniꞌ nene lingine eveneꞌ gohi mukiꞌ minaniꞌ ngivileꞌ ogo monovo lamineꞌ ma daaꞌ none li gilaaꞌ nahe. Eꞌe, heta atoꞌ ve Oꞌmosomuꞌ gilamave inginesi aꞌmineꞌmine igi engiꞌ zuho zogo mili-ngidi gekeꞌ vokeꞌ li-ngidaaꞌ nanako nemuꞌ lingine atoliꞌmine igi monovo lamineꞌ nene ma damave.
MAT 5:48 Nemuꞌ nene Okulumokuꞌ metibo lisiheꞌ lamineꞌ goloso neineꞌ neꞌmini linginesi lisiheꞌ lamineꞌ goloso minilo.
MAT 6:1 Lingine monoꞌ lamineꞌ di minaaꞌ naniꞌ nene evenelite di naba i-lingidilizave lisavoꞌ di minamilo. Evenelite ma ningilizahe ningamilizahe li minilizaniꞌ nene Okulumokuꞌ metibo neꞌmo meni ma nene mo molo-lengedamoloseive.
MAT 6:2 Nemuꞌ nene gaza eveneꞌ ma nasahiliꞌ noo-ngedo ma eveneꞌ luꞌine sitakisi velite monoꞌ numunguꞌ nehe maketiloꞌ nehe eveneꞌ nasahiliꞌ i-ngidilisa eveneꞌ ningi lopoꞌni lilizave li hosoꞌ izaaꞌ naniꞌ neꞌmine nene amilo. Naza lamineꞌ ma lo-lengemeloze: Eveneꞌ ningilizahe li eveneꞌ sotoꞌ nasahiliꞌ i-ngidikevo evenelite ningi di naba i-ngidaniꞌ neꞌmo alingeꞌ daliza meniꞌine gidini ma nene mo loloꞌ ogavo mo dikeve.
MAT 6:3 Mo dikeniꞌza nene neꞌmine ami eveneꞌ ma nasahiliꞌ i-ngidili ma nene lengiꞌ zuho laminelitesi gilikelizaze li minisa
MAT 6:4 sunoꞌ nasahiliꞌ i-ngidilo. Neꞌmo nasahiliꞌ i-ngidilizaniꞌ nene sunoꞌ initekisi ningo gelaaꞌ ive metibo Oꞌmoso neꞌmo meni lengemeleseive.
MAT 6:5 Idoꞌ lingine Oꞌmosola lili ma eveneꞌ luꞌine sitakisi minadite oꞌmotoꞌ nehe monoꞌ numunguꞌ nehe eveneꞌ mukiꞌ di geseꞌ igaꞌ aniꞌ ebetoꞌ mini ma ningilizahe li Oꞌmosola laaꞌ naniꞌ neꞌmine igi lamilo. Naza lamineꞌ ma lo-lengemelove: Ingine eveneꞌ mukiliti veꞌnidoꞌ neꞌmine aniꞌ neꞌmo alingeꞌ daliza meniꞌine mo dikeve.
MAT 6:6 Nemuꞌ nene gaza Oꞌmosola lolo ma gasivoꞌ numungauꞌ sunoꞌ vo akahe gizo mino aꞌmine sunoꞌ numuno lulouꞌ naninguꞌ minive mahine Oꞌmoso nene opoꞌni lozo. Neꞌmine oganivo sunoꞌ initeꞌ ningaaꞌ ive maho Oꞌmoso aza meni gemeleseive.
MAT 6:7 Idoꞌ lingine Oꞌmosola nilii ma soza Oꞌmosomuꞌ gilavete Oꞌmosotela gohi lo gohi lo univo gele lemelive li gamazi vaiꞌ mukiꞌ likaꞌ likaꞌ igi laaꞌ naniꞌ neꞌmine igi lamilo.
MAT 6:8 Nanitekumuꞌ lilisa nahe nemuꞌ metibo nene gomuꞌ gelavosa alingeꞌ nene eita lilisanako nemuꞌ nene gamazi mukiꞌ hazamuꞌ lami aꞌmine Oꞌmoso gihilemuꞌ gilamavete igaꞌ naniꞌ neꞌmine amilo.
MAT 6:9 Lingine Oꞌmosola neꞌminisa lilisave: Okulumokuꞌ meteho, Okulumokuko igaꞌ nadiꞌmine ogo laza misubolasi mene aꞌmineꞌmine olobo. Adoꞌ geiꞌ guliveka nene eveneꞌ vaiꞌ gelekunivo dizosa miniliho.
MAT 6:10 Idoꞌ eveneka gizebo o-ledelineꞌ nene lelita mudise sotoꞌ iliho. Idoꞌ geiꞌ lukalokovoꞌ ogo molo minelobo.
MAT 6:11 Idoꞌ idise naloneꞌ nosoꞌ nitete lemezo.
MAT 6:12 Idoꞌ laꞌlise lihime di li-daveti lihimeꞌine mo hulo-ngedekuneꞌ nenako aꞌmineꞌmine ogo gaza leliꞌ lihimete hulo-ledezo.
MAT 6:13 Idoꞌ lemenguꞌ nene leleꞌmize molamo goloso melehi anauꞌ voloningutiꞌ nene leleꞌmize tiꞌno do luꞌ izezo lilisave.
MAT 6:14 Idoꞌ lingine eveneꞌ lihime di-lingidaveti lihimeꞌine huli-ngidilizaniꞌ nene Okulumokuꞌ metibo aza lengiꞌ lihimetinesi hulo-lengedeleseiha
MAT 6:15 eveneliti lihimeꞌine huli-ngidamilizaniꞌ nene metibo aꞌmineꞌmine ogo lengiꞌ lihimetinesi hulo-lengedamoloseive.
MAT 6:16 Idoꞌ monokumuꞌ ve lii nosoꞌ niteꞌ malise ili ma luꞌine sitakisi evenelite igaꞌ naniꞌ neꞌmine igi muheleꞌ i minamilo. Aꞌmine ve monokumuꞌ ve li nosoꞌ niteꞌ malise igi ma ingine initeꞌ malise ogo noneꞌ nene eveneꞌ ningi gililizave li veꞌine goꞌine di lamineꞌ ami muheleꞌ aheleꞌ igivoꞌ minaaꞌ nave. Naza lamineꞌ ma lo-lengemelove. Ingine eveneꞌ mukiliti veꞌnidoꞌ neꞌmine aniꞌ neꞌmo meniꞌine nene mo dikeve.
MAT 6:17 Idoꞌ gaza monokumuꞌ ve lo nosoꞌ niteꞌ malise o no ma eveneꞌ mukiliti veꞌnidoꞌ muheleꞌ ogo monamo goka veka nosoꞌ izo madungauꞌ uveli holo do lamineꞌ ogo monezo.
MAT 6:18 Neꞌmine oganivo eveneꞌ nete nosoꞌ niteꞌ malise o nane li ningi gilamavo sunoꞌ neꞌmine olosaba sunoꞌ mino sunoꞌ minineꞌ initeꞌ ningaaꞌ ive maho neꞌmo ningo meni gemeleseive.
MAT 6:19 Lingine misubouko mene heneni nganeni mo milamilo. Giꞌningonite hukikevo idoꞌ gaba hitavo idoꞌ gumine ve nete numuno izi veꞌvizi dizi daaꞌ naze.
MAT 6:20 Nemuꞌ nene heneni nganenitine nene giꞌningonite hukamavo gaba hitamivo gumine vete damilizaniꞌ o minineꞌ ebeꞌ Okulumokuko nene milalo.
MAT 6:21 Lutine nene henenitine minelida minelineꞌ nenako nemuꞌ nene henenitine Okulumokuko milalo.
MAT 6:22 Eveneꞌ voloneꞌ akate nene vete neꞌmo oloꞌ liviꞌ neꞌmino mino do sotoꞌ o-ledaaꞌ neive. Idoꞌ lukaliꞌmi vele lamineꞌ ha minelineꞌ nene Oꞌmosoꞌmo okonga luka mukiꞌ nene hize labanaꞌ ele-gedeleseive.
MAT 6:23 Idoꞌ lukaliꞌmi veleꞌve goloso o nolineꞌ neꞌmo nene okonga lukauꞌ nene litiꞌmusovoꞌ ize vaiꞌ lo mineleseive. Ee, labanaꞌ ele-gedelineꞌ initeꞌ nene goloso ogavo lukauꞌ litiꞌmuso izelineꞌ nene, agae, mo litiꞌmuso gehepeve golosouꞌ minelesane.
MAT 6:24 Idoꞌ ve maliꞌmo gono eveneꞌ sitatoꞌ ngelo ma damoloseive. Aꞌmine ve sitatoꞌ gono dalosa ilineꞌ nene ve hamota ma lulo emeleseiha sitaꞌ nene lulo ngelo ngemamoloseive. Mala lulo emelineꞌ nene mala lulo emamoloseive. Idoꞌ ma veloꞌ giꞌmizo eze gono amuzo molo dalineꞌ nene ma vemuꞌ goseleꞌ belavo gono gamazi lo-delineꞌ nene ngelo damoloseive. Aꞌmineꞌmine ogo gaza moniloꞌ gono do luka aꞌmine moniuꞌ molo lamineꞌ ilineꞌ nene luka Oꞌmoso emo gamazi lidoꞌ gele do eze gelekeleꞌ o-daaꞌ anive ngelo minamolosane.
MAT 6:25 Nemuꞌ naza tiꞌ lo nolo-lingimuve: Gaꞌnaliꞌmo helamo vetesi ha mineloningumuꞌ nosoꞌ niteꞌ nene nani nalonivo lii gopo gatine gilaaꞌ naniꞌ nene alamilo. Idoꞌ okodidokumuꞌ nene naniteꞌ ngolalonivo li gopo gatine gilaaꞌ naniꞌ nesi nene mo alamilo. Vetesi minevoꞌ alevoꞌ ogo minaaꞌ neꞌmo nosoꞌ niteꞌ nene ivileꞌ ogosa initeꞌ naba neivo idoꞌ okode neꞌmosi nene okodeloꞌ initeꞌ nene ivileꞌ ogo initeꞌ naba nenaze. Nemuꞌ nene gopo gatine gilamilo.
MAT 6:26 Idoꞌ lingine veleta pateli monaaꞌ naniꞌ nama neti monovo nemuꞌ nene ma gatine giliꞌ nalo. Ingine naliza nosoꞌ niteꞌine nene zuhoꞌ isaꞌmaniꞌ nenako nemuꞌ nene nosoꞌ niteꞌ dolizi di milaaꞌ numunguꞌ nene milisaꞌmaniꞌza Okulumokuꞌ metibo neꞌmo nene nosoꞌ niteꞌ ngemaaꞌ neive. Neꞌmine o-ngedaaꞌ neineꞌza lengiꞌ nete ngivileꞌ igi initeꞌ naba nizanako Oꞌmosoꞌmo lengikumuꞌ nene ha gele minaaꞌ neive.
MAT 6:27 Lengikutiꞌ ve zaholiꞌmo initeꞌ matakumuꞌ gopo gala ma gele do vo minelidiꞌmo eze mino molo ilineꞌve nene do haꞌna ilive. Mo ngelo ngomosi ma do haꞌna amoloseize. Nemuꞌ nene gopo gatine gilamilo.
MAT 6:28 Idoꞌ okodidoꞌ initekumuꞌ nene nanimuꞌ gopo gatine gilaaꞌ nave. Guviseuꞌ guvovo initeꞌ nene dizi guvovo igaꞌ naniꞌ nemuꞌ nene ningi gililo. Ingine gono di okoꞌnidoꞌ initeꞌ nene ma ongoti ngilisaꞌmaniꞌza Oꞌmosoꞌmo do lamineꞌ o-ngedaaꞌ neive.
MAT 6:29 Gozopoꞌ guvelesi ve Solomoniꞌ nene okoꞌnoloꞌ initeꞌ lamineꞌ goloso ngolaaꞌ ineꞌza naza ma lo-lengemelove. Aza ngolaaꞌ ineꞌ initeꞌ nene lamineꞌ minaniꞌza guvovo igaꞌ naniꞌ initeꞌ nene mo ngivileꞌ isaꞌmaniꞌ ve.
MAT 6:30 Idoꞌ aꞌmine guvovo initeꞌ nene initeꞌ lamineꞌ neꞌmine minamo gamene haꞌna minesaꞌmive. Idise ha minelineꞌza aizeꞌ nene gokoꞌ lavo evenelite olokuꞌ di gizilisave. Neꞌmino neineꞌza Oꞌmoso neꞌmo aꞌmine guvovo initeꞌ nene do lamineꞌ goloso ogaꞌ neive. Oꞌmoso neꞌmo haza initeꞌ aꞌneꞌmine nene ha do lamineꞌ o-ngedaaꞌ neineꞌ nenako lengiꞌ nene guvovo initeꞌ ngivileꞌ igi initeꞌ naba nizaniꞌ nenako okodidoꞌ initeꞌ nene ma lengemamilidoꞌ o neihe. Ha lengemelidoꞌ o neive. Nemuꞌ nene lingine amuzo mili Oꞌmosomuꞌ gili eleꞌvoleꞌ ilizanako gili eleꞌvoleꞌ amave.
MAT 6:31 Nemuꞌ nene lingine nosoꞌ niteꞌ zatiꞌ nalone idoꞌ okodeloꞌ initeꞌ zatiꞌ dalone li gopo gatine gilamilo.
MAT 6:32 Nevoꞌmine manaꞌmine gaꞌine nene Oꞌmosoꞌmi zuho minamave nete gili aꞌneꞌmine initeꞌ visetoꞌ minaaꞌ nave. Okulumokuꞌ metibo neꞌmo nene aꞌmine dalisa gilaniꞌ initeꞌ ne dami haza ma minamilisave lo gele neive.
MAT 6:33 Ne neineꞌza initeꞌ maloꞌ maloꞌ olihe lutine milami Oꞌmosoꞌmo gizebo o-ledeli monovolokisi monovo lisiheꞌvelokisi nene gomuꞌ lutine mili giliꞌ li milalo. Neꞌmine igi Oꞌmosoꞌmo gizebo o-ledeli monovolokisi monovo lisiheꞌvelokisi lutine mili visetoꞌ minilizaniꞌ nene aꞌmine initeꞌ nesi lehize-lengedo aꞌmine okodine losuvoꞌmi initeꞌ mataꞌ nesi nene ha lehize-lengedeleseive.
MAT 6:34 Aizeꞌ sotoꞌ ilineꞌ initeꞌ nene aizekumuꞌ gizebo ha o neinako lingine idise nene aꞌmine aizeꞌ initekumuꞌ gopo gatine gilamilo. Idise sotoꞌ ilineꞌ initekutiꞌ geni ma sotoꞌ ilineꞌ nene idise gihiliza votigileloꞌ o neivo aizeꞌ nesi initeꞌ ma sotoꞌ ilineꞌ nene asiꞌve gamene aizeꞌ neꞌmo gihiliza votigileloꞌ lengemelidoꞌ o neinaze. Aizeꞌ nadolone li gopo gatine gili minavo lingivizalive. Oꞌmosoꞌmo initeꞌ matatine lehize-lengedeleseize. Neꞌmine manaꞌmine initekumuꞌ nene gopo gatine gilamilo.
MAT 7:1 Oꞌmosoꞌmo lengiꞌ monovomuꞌ izeꞌ molo dovo ledevoꞌ ogo lamilingisi lingine eveneꞌ maliti monovo divi lediviꞌ igi ingine monovomuꞌ izeꞌ mili lamilo.
MAT 7:2 Eveneliti monovomuꞌ izeꞌ mili lilizaniꞌ nene aꞌmineꞌmine ogo Oꞌmosoꞌmo lengiꞌ monovomuꞌ izeꞌ molo loloseive. Idoꞌ lingine eveneꞌ i-ngidilizaniꞌ votigilelokovoꞌ aza aꞌmineꞌmine o-lengedeleseive. Nemuꞌ nene monovoꞌinemuꞌ izeꞌ mili lamilo.
MAT 7:3 Idoꞌ gaza veka gihileuꞌ za lana naba vo neineꞌ mamuꞌ nene ningo gelamo ve maliꞌmi veleuꞌ initeꞌ ngomo lasolo vo neineꞌ nene nanimuꞌ ningaaꞌ nane.
MAT 7:4 Idoꞌ geꞌmo veka gihileuꞌ za lana naba vo neivosa gaza ve mamuꞌ veka gihileuꞌ initeꞌ ngomo vo neineꞌ nene do hulo-gedelove lo lo-delinidoꞌ o neihe. Ne nomive.
MAT 7:5 Gaza soza sunolavoꞌ monaineꞌ mene veka gihileuꞌ za lana vo neineꞌ nene gomuꞌ do hulokosavoꞌ nene maliꞌmi vele gihileutiꞌ initeꞌ lasolo vo neineꞌ nene ninge guno ogo do hulo-delineꞌ o neive. Ee, monovo goloso naba daaꞌ naineꞌ nene gomuꞌ hulosavoꞌ maliꞌmo monovo goloso ngomo ma do nolineꞌ nene do lisiheꞌ o-delesane.
MAT 7:6 Lingine monoꞌ nene eveneꞌ goloso gulo neꞌmine minaniꞌ engiꞌ nene ngimamilo. nGimilizaniꞌ ingine dami velepeꞌ izi lingibililisave. Idoꞌ aꞌmine gonoliseꞌvesi initeꞌ meniꞌve dize neineꞌ nene ize ngimamilo. Ingine aꞌmidoꞌ lisi lana igi di goloso ikelizaze.
MAT 7:7 Idoꞌ initeꞌ ma dalone li Oꞌmosola lilizave mukiꞌ nete nene initeꞌ ha dalisave. Idoꞌ Oꞌmosolatiꞌ nene initeꞌ ma viseꞌ ilizave nete nene ha ningilisave. Idoꞌ akaheloꞌ okohoꞌ izilizave nene Oꞌmosoꞌmo ha siꞌze-ngedeleseive. Nemuꞌ linginesi Oꞌmosola initeꞌ mamuꞌ longoꞌ ilizaniꞌ nene ha lengemeleseive. Idoꞌ viseꞌ ilizaniꞌ nene Oꞌmosoꞌmo ha lengelebizeleseive. Idoꞌ akaheloꞌ okohoꞌ izilizaniꞌ nene Oꞌmosoꞌmo ha siꞌze-lengedeleseive.
MAT 7:9 Ve ma lengikutiꞌ gipeleꞌmo sikonimuꞌ lilineꞌ nene geheni mene do nozo lo emelihe. Ne nomive.
MAT 7:10 Idoꞌ aꞌmine gipele neꞌmo alahaꞌ ma nalove lo lilineꞌ nene sataꞌ ha do emelihe. Ne nomive.
MAT 7:11 Lingine nevo ha eveneꞌ golososi nilizaha izipahatine zuho nene ha gizebo lamineꞌ i-ngidi initeꞌ lamineꞌ nene ha ngimaaꞌ nave. Nemuꞌ nene linginesi lingivileꞌ ogo lamineꞌ minive Okulumokuꞌ metibo neꞌmo nene eveneꞌ ingine vokuꞌ li ezela laaꞌ nave nene initeꞌ lamineꞌ ma ngemamilihe. Oꞌve. Mo atoliꞌmine ogo ngemeleseive.
MAT 7:12 Lingine eveneꞌ malite neꞌmine manaꞌmine i-lidilizave li gili ma nene engikisi aꞌmineꞌmine i-ngidilo. Neꞌmine ilizaniꞌ nene Moseꞌ gizineꞌ louꞌ gamazi mukiꞌ nesi idoꞌ gili dalizangumuꞌ ve li polohetelite gizaniꞌ gamazi mukiꞌ maꞌmi mehene ne neive.
MAT 7:13 Simeꞌ naaꞌ ebeliꞌmi gateni nene naba neive. Idoꞌ akaꞌve nesi naba goloso neive. Neꞌmino minavo aꞌmine akaliꞌmi gatenguꞌ nene eveneꞌ mukiꞌ vi hilaaꞌ nave. Neꞌmine igaꞌ naniꞌza vi minevoꞌ minevoꞌ ngemeni dameni daliza akaꞌmi gateniꞌve nene ngomo lasolo neive. Idoꞌ akaꞌve nesi ngomo lasolo goloso minavo eveneꞌ hamo hamoꞌ nete aꞌmine aka nene viseꞌ igi ningi vaaꞌ nave. Nemuꞌ nene lingine gateni ngomouꞌ nene dizilo.
MAT 7:15 Soza saza li Oꞌmosoꞌmi gamazi lo sotoꞌ ogaꞌ unive polohete none laaꞌ avemuꞌ lingine ningisa minilo. Ingine loposo gulo eveneꞌ ngibilaaꞌ aniꞌ gulo neꞌmine luꞌine golososi mini linginela alizaniꞌ nene engiꞌ monovo di haleki ngibilamaaꞌ ave sipisipi ize gidini alisanako nemuꞌ engikumuꞌ eheꞌ igi gizebo lamineꞌ igi minilo.
MAT 7:16 Igi mili ilizaniꞌ nene gihile lamineꞌ izelihe izamilihe nene ningisa engiꞌ monovo nene ningi gililisave. Za lamineliꞌmi gihileꞌve nene za golosoloꞌ izavo nelotiꞌ ha dalizahe.
MAT 7:17 Oꞌve. Za lamineliꞌmovoꞌ gihile lamineꞌ izaaꞌ neivo za goloso neꞌmo gihile goloso izaaꞌ neive.
MAT 7:18 Za ma lamineꞌ nolineꞌ nene gihileꞌve goloso ngelo izamoloseive. Idoꞌ za ma goloso nolineꞌ nene gihileꞌve lamineꞌ ngelo ma izamoloseive.
MAT 7:19 Neꞌmino neineꞌ nenako za gihile lamineꞌ izisaꞌmaniꞌ za nene huki olokuꞌ gizaaꞌ nave.
MAT 7:20 Idoꞌ za neꞌmine nizanako ingine soza monoꞌ laaꞌ ave igi mili ilizaniꞌ gihile izelineꞌ nene lingine ningi engiꞌ monovo nene ningi gililisave.
MAT 7:21 Idoꞌ eveneꞌ ma nete nenikumuꞌ Guvekasi ve, Guvekasi ve, laaꞌ nahe. Engiꞌ netiꞌ linge ma nene Oꞌmosoꞌmo gizebo o-ngedelinguꞌ vi hilamavo Okulumokuꞌ meꞌnehine gelekeleꞌ i-di eiꞌ luloloꞌ igi mili minaaꞌ niilizavevoꞌ eiꞌ gizebouꞌ vi hilalisave.
MAT 7:22 Ee, gamene nabala eveneꞌ mukiꞌ nete tiꞌ li li-nimilisave: Guvekasi ve make, geiꞌ vekamuꞌ ogo monoꞌ lo-ngemaaꞌ uneꞌ ma ve. Idoꞌ geiꞌ vekamuꞌ ogo sikalahuꞌ goloso eveneꞌ luꞌninguꞌ minaniꞌ nene ngimiselo hulaaꞌ uneꞌ ma ve. Idoꞌ geiꞌ vekamuꞌ ogo ato atoꞌ suno mukiꞌ nene do sotoꞌ ogaꞌ uneꞌ ma ve.
MAT 7:23 Neꞌmine li-nimilizaniꞌza neꞌmine lo laminetoꞌ lo-ngemelesuve: Lingine goloso niteꞌ diꞌmi monaaꞌ ave lingine neze zuho ningaaꞌ uve ma nizamaze. Vilo.
MAT 7:24 Ve maliꞌmo numuno ma gizineꞌ nene otohato ogaꞌ iveꞌmo numuno geheni nabaloꞌ giliꞌ lo minelidoꞌ gizavo goline naba izo noso velo hepeꞌ naba elo ogo numuno bilineꞌza numuno nene geheni neꞌmo do giliꞌ lavo lemo ongamo amuzo molo ote minineꞌ. Idoꞌ eveneꞌ ingine neze gamaziꞌne gili di luvodoꞌ luvodoꞌ igi mili eꞌmetilizaniꞌ nete aꞌmine numuno gizive neꞌmine mini otohato igaꞌ ave minilisave. Minilisanako neniꞌ gamaziꞌne luvodoꞌ luvodoꞌ igi mili ilizaniꞌ neꞌmo igi mili ilizaniꞌ nene lemo ongamoloseive.
MAT 7:26 Idoꞌ ve gohi maliꞌmo numuno ma gizineꞌ nene aza ve negi otohato amiveꞌmo numuno amuzo molo minamilidoꞌ gepeloꞌ gizavo goline izo noso velo hepeꞌ naba elo ogo numuno nene belavo numuno nene, agae, do goloso ogo lemo pouꞌ lo izevo nguꞌvosovoꞌ ogo onganiꞌ. Idoꞌ eveneꞌ ingine neze gamaziꞌne gilii gili huli luvodoꞌ luvodoꞌ eꞌmetamilizaniꞌ nete aꞌmine numuno gizive neꞌmini negivoꞌ minilisave. Ee, luvodoꞌ luvodoꞌ igi eꞌmetamilizaniꞌ nene negivoꞌ minilisave.
MAT 7:28 Idoꞌ Izesuꞌ aza gamazi mene lo osuꞌ lavo nemuꞌ eveneꞌ mukiꞌ ingine gili voꞌine vavo upuhoꞌ aniꞌ. Ee, aza monoꞌ apize ngimineꞌ mene engiꞌ avoꞌningeliti monoꞌ gamazi apizi ngimaaꞌ avete apizi ngimaaꞌ aniꞌ neꞌmino apize ngemamo asi gamazi meleho neꞌmineꞌmo apize ngimineꞌ gelavo nemuꞌ voꞌine vavo upuhoꞌ aniꞌ ve.
MAT 8:1 Izesuꞌ aza gololotiꞌ oto lemo ogavo eveneꞌ mukiꞌ goloso nene eꞌmeti vaniꞌ.
MAT 8:2 Eꞌmeti nivavo ganadise gize dave maliꞌmo Izesuda ogo obuvolo hize emo tiꞌ lo lo-imineꞌ: Guvekasi ve, gaza do lamineꞌ o-nedelineꞌ amuzokasi naineꞌ nene naza mo gele mino do lamineꞌ o-nedeline lo gele nouve. Gaza do lamineꞌ o-nedelesa gele nabe.
MAT 8:3 Neꞌmine lavo Izesuꞌ aza ana hulo molo okoꞌnoloꞌ nohito tiꞌ lo lo-imineꞌ: Naza do lamineꞌ o-gedelesa gele nouve. Nemuꞌ gaza lamineꞌ ozo. Neꞌmine lavo ganadise neꞌmo liteꞌ lo hulo-do vavo lamineꞌ gilineꞌ.
MAT 8:4 Lamineꞌ gelavo Izesuꞌ tiꞌ lo lo-imineꞌ: Gele nabe. Gaza lamineꞌ aineꞌ monovo nene eveneꞌ hamokisi mo lo-ngemamozo. Evenetoꞌ medelo mino Oꞌmoso initeꞌ lehize-daaꞌ ive neꞌmo ganadise okongalotiꞌ hulo-gedo vineꞌ nene ningo lo sotoꞌ ogavo gaza lamineꞌ aineꞌ nemuꞌ nene evenelite ningi gililizangumuꞌ ve lo neꞌmine ozo: Ganadise gizi dave ingine lamineꞌ igi ma ize initeꞌ neꞌmine neꞌmine Oꞌmoso imilisave lo Moseꞌ lo huko lidoꞌ nene eꞌmeto evenetoꞌ medelo mino Oꞌmoso initeꞌ lehize-daaꞌ ive nene initeꞌ ma Oꞌmoso olokuꞌ gize emelingumuꞌ nene do vo emezo.
MAT 8:5 Izesuꞌ aza Kahanaumi numuno ebekuꞌ novivo Loma amiliti gizebo ve ma aza Izesuda ogo longoꞌ ogo
MAT 8:6 tiꞌ lo lineꞌ: Guvekasi ve, neniꞌ gelekeleꞌ izipeꞌne aza nene amuzolo helavo numuda amuzolosi nomivo ongo mino mulumo gono goloso do neineꞌ lae.
MAT 8:7 Neꞌmine lavo Izesuꞌ tiꞌ lo lo-imineꞌ: Naza ha vo do lamineꞌ o-delesuve.
MAT 8:8 Lavo amiliti gizebo ve aza tiꞌ lo Izesuꞌni lo-imineꞌ: Naza eveneꞌ goloso nouvonako aꞌneꞌmineꞌmi numuꞌneuꞌ alinidoꞌ lisiheꞌ amane. Nemuꞌ nene vamo ha gamazivoꞌ lo lamineꞌ ozo lanivo gelekeleꞌ izipeꞌne nene lamineꞌ ilive lo gele nouve.
MAT 8:9 Idoꞌ lamineꞌ ilive lo gele nouvoniꞌ nene naza nene eveneꞌ maliti gizeboloꞌ nouve. Idoꞌ neze gizeboloꞌ nesi ami ma nizave. Nemuꞌ nene engikutiꞌ ve mamuꞌ vozo lokuvo ha voloseive. Idoꞌ mamuꞌ ano loloniꞌ nene ha aloseive. Idoꞌ gelekeleꞌ izipeꞌne nene neꞌmine ozo loloniꞌ ha oloseive. Idoꞌ aꞌmineꞌmine ogo gaza lanivo siki initeꞌ neꞌmo geiꞌ gamazi ha gele do gelekeleꞌ izipeꞌne nene ha hulo-do voloseive losa gele nosa noluve.
MAT 8:10 Lavo Izesuꞌ aza gamazi nene gelo aizo, lo gelo eveneꞌ eꞌmeti vave mukiꞌ nene tiꞌ lo lo-ngimineꞌ: Naza laminetoꞌ nolo-lingimuve. Oꞌmosomuꞌ gili eleꞌvoleꞌ igaꞌ ave gehepeve ve lave Isilaeleꞌ aleve lengikutikisi nene heta atoꞌ ve meneꞌmo gele eleꞌvoleꞌ ineꞌ neꞌmini ve hamolitesi ma gili eleꞌvoleꞌ avo ma ningamuvoniꞌ ve.
MAT 8:11 Nemuꞌ nene nolo-lingimuve. Isilaeleꞌ aleve minamave hotatiꞌ ve hoꞌ dizaaꞌ idatiꞌ ve idoꞌ hoꞌ lemaaꞌ idatiꞌ ve mukiꞌ ingine Oꞌmosoꞌmi gizebouꞌ imi hili mini Abalahamule Zakobole Isakalesi nosoꞌ niteꞌ nii ngolize izi minilisave.
MAT 8:12 Minilisaniꞌza Oꞌmosoꞌmo eiꞌ gizebouꞌ vi hili eze zuho minilizave lo lengeleꞌmize molaniꞌ Isilaeleꞌ aleve lingine nene hulo heta ogavo litiꞌmuso gehepeveuꞌ vi mini ive nama igi mulumo gili vetine ingihi langoloꞌ igi minilisave.
MAT 8:13 Neꞌmine lo Izesuꞌ aza amiliti gizebo ve tiꞌ lo lo-imineꞌ: Gaza numungala vozo. Gele eleꞌvoleꞌ aineka ma nene sotoꞌ o-gemeleseive. Lavo gelekeleꞌ izipe nene lineꞌ gamene gehepeveloꞌ nene lamineꞌ ineꞌ ve.
MAT 8:14 Neꞌmine ogo Izesuꞌ aza Petoloꞌ numuꞌveuꞌ dizo Petoloꞌ elenahi izeleho nene okoꞌnoloꞌ oloꞌ lavo ongo neivo ningineꞌ.
MAT 8:15 Ningo Izesuꞌ aza analoꞌ davo okoꞌnouꞌ oloꞌ lineꞌ nene osuꞌ lo-dineꞌ. Osuꞌ lo-davo oto Izesuꞌni nasahiliꞌ o-dineꞌ.
MAT 8:16 Idoꞌ nivengaꞌ molavo luꞌninguꞌ sikalahuꞌ goloso minive ma Izesuda ngeleꞌmizi ikevo gamazi lo-ngedo aꞌmine sikalahuꞌ goloso nene ngimiselo do hulo idoꞌ initeꞌ gizi dave mukikisi do lamineꞌ o-ngidineꞌ.
MAT 8:17 Neꞌmine ineꞌ nene Oꞌmosoꞌmi veletiꞌ gamazi lo sotoꞌ ogaꞌ ive polohete Isaiaꞌ luhuvo tiꞌ lo gizineꞌ ma nene omo gihile izelive losa nene neꞌmine ineꞌ ve: Di gilizevo i-lidaaꞌ aniꞌ initeꞌ nene asiꞌve do hulo-ledo initeꞌ lisaaꞌ ineꞌ initeꞌ nesi do hulo-lidineꞌ ve.
MAT 8:18 Idoꞌ eveneꞌ mukiꞌ ikaꞌ ikaꞌ igi di vodo vodo i-di minaniꞌ nene ningo Izesuꞌ aza sipiuꞌ nGalilaia noso ohuno helala eleꞌmizi vilizave lo izipahala zuho lo-ngimineꞌ.
MAT 8:19 Lo-ngemavo Zuda vete laaꞌ aniꞌ monoꞌ gamazi apize ngemaaꞌ ive maliꞌmo Izesuda ogo tiꞌ lo lineꞌ: Tisazo, naza nene geiꞌ vilinida alinida ha geꞌmeto volosuve.
MAT 8:20 Lavo Izesuꞌ tiꞌ lo lo-imineꞌ: Initeꞌ mukiꞌ loposo gulosi idoꞌ namasi nene ingalizaniꞌ numuꞌinesi minaaꞌ naniꞌza Oꞌmosolatiꞌ ve gihile neniꞌ ongalo numuꞌne nomineꞌ nenako ha neꞌmetelibe.
MAT 8:21 Idoꞌ eze gonoloꞌ eꞌmeti monave engikutiꞌ ve gohi maliꞌmo Izesuꞌni tiꞌ lo lo-imineꞌ: Guvekasi ve, gaza gele nemanivo meꞌnehine vo do galese ize-dosa ogo geꞌmetelohe.
MAT 8:22 Neꞌmine lo lineꞌza Izesuꞌ tiꞌ lo lo-imineꞌ: Gaza gelezo. Luꞌine hele vive angise nete hililiza okoꞌine di galese izi minilisaze. Ogo neꞌmetezo.
MAT 8:23 Neꞌmine ogo Izesuꞌ aza sipiuꞌ vo dizavo Izipahala zuhosi igi dizikevo nosoloꞌ apiꞌ igi ledi vaniꞌ.
MAT 8:24 Ledi nivavo hepeꞌ naba elavo neꞌmo noso nene golo gidini dizevoꞌ dizevoꞌ ogo sipi nene hito lulouꞌ velo lemeꞌ lemeꞌ idiꞌmo sipiuꞌ nene vaiꞌ lolosa ineꞌza Izesuꞌ nene okise ongo minineꞌ.
MAT 8:25 Ongo neivo izipahala zuho ingine ezela vi uꞌmukoꞌ igi tiꞌ li laniꞌ: Guvekasi ve, gaza oto do luꞌ izevo. Noso neꞌmo lebele geseꞌ o leize.
MAT 8:26 Likevo aza lo-ngimineꞌ: Lingine lengehelele nanimuꞌ noizive. Lingine amuzo mili Oꞌmosomuꞌ gili eleꞌvoleꞌ ilizanako gili eleꞌvoleꞌ amave. Neꞌmine lo aza oto hepekisi nososi ngelemavo ingine nene mati zou li minasineꞌ.
MAT 8:27 Neꞌmine ikesivo sipiuꞌ minave ingine ngehelele goloso izavo gaꞌine vaiꞌ gili tiꞌ li laniꞌ: Ve meꞌmi gamazi nene hepeꞌ matesi noso matesi gili dikeko atoliꞌmine ve goloso noloseive li laniꞌ.
MAT 8:28 Ingine noso helala Gadala vetida vi heteli nivavo sikalahuꞌ goloso luꞌninguꞌ minive sitaꞌ nene gonoso mili-ngidaaꞌ aniꞌ geheni mulikutiꞌ igi Izesuꞌni voteneꞌ asineꞌ. Ingine aꞌmine ve nene goꞌine gasava goloso hize vivo eveneꞌ ingine engikumuꞌ ngehelele goloso izavo minasineꞌ akala nene eveneꞌ hamokisi ngeli igi vigi monamaniꞌ.
MAT 8:29 Aꞌmine ve sitaꞌ ingine gekeꞌ li Izesuꞌnimuꞌ tiꞌ li lasineꞌ: Oꞌmosoꞌmi gipele gaza nosida mene nanitekumuꞌ nane. Gaza mulumo gono lemaaꞌ gamene olihe alitaminguꞌ mulumo gono lemelove losa nabe.
MAT 8:30 Aꞌmidotiꞌ hotoꞌ ile nene ize mulise naba galese ni nizavo
MAT 8:31 sikalahuꞌ goloso luꞌninguꞌ minive ingine amuzonga li Izesuꞌni tiꞌ li li-imasineꞌ: Gaza limisele hulolo ma nene ize mulise naba voleti luꞌninguꞌ nene limisele hulozo.
MAT 8:32 Likesivo aza tiꞌ lo lo-ngimineꞌ: Neꞌmine li ma aloꞌ vilo lo lo-ngedavo sikalahuꞌ goloso ingine velisi luꞌningutiꞌ limi igi vi izeliti luꞌninguꞌ dizaniꞌ. Dizikevo ize mulise naba ingine galese ni minaniꞌ golo aveseloꞌ nene mangilise hizi limi vi noso ohunguꞌ hili geseꞌ aniꞌ.
MAT 8:33 Hili geseꞌ ikevo ize gizebo ve ingine golise numuno ebeta vi sotoꞌ ineꞌ initeliꞌmi gamaziꞌve nene mukiꞌ veteteꞌ igi ngimi ve sitaꞌ luꞌninguꞌ sikalahuꞌ goloso minive netisi gamazi nesi li sotoꞌ igi li-ngimi osuꞌ laniꞌ.
MAT 8:34 Li-ngimi osuꞌ likevo aꞌmine numuno ebekuꞌ eveneꞌ minaniꞌ mukiꞌ ingine Izesuꞌ neida aniꞌ. Igi ningi engiꞌ misubo nene hulo vilive li ezela amuzonga laniꞌ.
MAT 9:1 Neꞌmine likevo Izesuꞌ aza sipiuꞌ dizo izipahala zuhosi noso ohunoloꞌ tineꞌ mili ledi vi eze numuno ebeꞌve Kahanaumila vaniꞌ.
MAT 9:2 Aꞌmida nene ve malite ve ma amuzolo hele geseꞌ ogavo minive gebili ma ngakakuꞌ ongo neivo zaloꞌ mili di neida aniꞌ. Idoꞌ vekise ingine gebili ma ha do lamineꞌ o-deleseive li gili eleꞌvoleꞌ aniꞌ nene Izesuꞌ aza mo ningo gelo aꞌmine gebili mamuꞌ tiꞌ lo lineꞌ: Gipeꞌneho, geiꞌ lihimeka nene mo apase-gedekuve. Nemuꞌ nene luka gaka ngi lo minivo.
MAT 9:3 Neꞌmine lavo Zuda vete laaꞌ aniꞌ monoꞌ apizi ngimaaꞌ ave malite luꞌninguꞌ tiꞌ li gili minaniꞌ: Ve mene veꞌmo gamazi nolineꞌ neꞌmo nene Oꞌmoso ivileꞌ o-daaꞌ gamazi nolive.
MAT 9:4 Neꞌmine li nigilavo Izesuꞌ aza luꞌninguꞌ gilaniꞌ gamazi nene ningo gelo tiꞌ lo lo-ngimineꞌ: Lingine lutinguꞌ gatine goloso nanimuꞌ nigilave.
MAT 9:5 Lingine nenikumuꞌ nene sozavoꞌ laaꞌ neive li gilaaꞌ nahe. Naza ve gebili nemuꞌ lihimeka mo hulo-gedekuve luvoniꞌ nene soza lolohe lamineꞌ lolohe ma gilamilisave lo lapa nomivo noluvoniꞌza sozaloꞌ ve minuvodini ve gebili mamuꞌ nene oto vozo nolo-duvo oto vamivo soza luvoniꞌ nene sotoꞌ ogavo novozo helalove lo gelo ve gebili mamuꞌ oto vozo loo ma lamuvodine.
MAT 9:6 Idoꞌ naza Oꞌmosolatiꞌ ve gihile misubouko lengiꞌ lihimetine apase-lengedaaꞌ amuzo do nouve luvoniꞌ nene soza lamo laminetoꞌ noluvoniꞌ nene ningi gililizave lo idise ogo molo oloniꞌ nene lingine gililo lo ve gebilimuꞌ tiꞌ lo lineꞌ: Gaza oto ngakaka do geho numungala vozo.
MAT 9:7 Lavo ve gebili aza oto numuꞌvela vineꞌ.
MAT 9:8 Eveneꞌ mukiꞌ ingine nene ningi ngehelele izavo leliꞌ gidini ve neꞌmine amuzo imingumuꞌ ve li Oꞌmoso opoꞌni laniꞌ.
MAT 9:9 Izesuꞌ aza aꞌmine minineꞌ numungutiꞌ lemo akala novo ve ma gulive Mataioꞌ nene takisi moni daaꞌ ineꞌ numuꞌveuꞌ gono do neivo ningo tiꞌ lo lo-imineꞌ: Gaza oto neꞌmeto ano. Neꞌmine lavo aza oto eꞌmeto vineꞌ.
MAT 9:10 Idoꞌ Mataioꞌ numuꞌveuꞌ Izesulesi nosoꞌ niteꞌ ni nizavo takisi moni daaꞌ avesi idoꞌ Zuda veti louꞌ gamaziloꞌ eꞌmete lamineꞌ isaꞌmave gohi ma nesi mukiꞌ numunguꞌ dizi ikevo izipahala zuhosi makatoꞌ nosoꞌ niteꞌ nii minaniꞌ.
MAT 9:11 Ni nizavo Halisaioꞌ monoꞌ laaꞌ ave ingine ningi izipahala zuho longoꞌ i-ngidi tiꞌ li laniꞌ: Lingine tisatine nene takisi moni daaꞌ ave golososi idoꞌ lihime daaꞌ ave lingesi nosoꞌ niteꞌ makatoꞌ nene nanimuꞌ ninave.
MAT 9:12 Li laniꞌ nene Izesuꞌ gelo tiꞌ lo lo-ngimineꞌ: Luso ve aza lamineꞌ haza minave do lamineꞌ o-ngedelesa osaꞌmiha initeꞌ gizi davemukovoꞌ nene ogaꞌ neive.
MAT 9:13 Naza aꞌmineꞌmine ogo eveneꞌ lisiheꞌ i minavemuꞌ amuvoniꞌza eveneꞌ lihimeꞌinesi vemuꞌ uvoniꞌ ve. Nemuꞌ lingine vi Oꞌmosoꞌmo lineꞌ gamazi ma monoꞌ godolouꞌ tiꞌ lo minineꞌ maꞌmi monovomuꞌ viseꞌ igi gililo: Initeꞌ neniꞌ nimi olokuꞌ gizaaꞌ nene lamineꞌ neiha Neniꞌ giluvoniꞌ nene evenekumuꞌ mulumoꞌine gili nasahiliꞌ o-ngedaaꞌ neꞌmo ivileꞌ o neive.
MAT 9:14 Nelotiꞌ nene monoꞌ noso holo-ngedaaꞌ ive Zohaneꞌ izipahala zuholite Izesuda igi tiꞌ li longoꞌ i-daniꞌ: Lazasi idoꞌ Halisaioꞌ monoꞌ laaꞌ avesi monokumuꞌ ve lo nosoꞌ niteꞌ nene malise okaꞌ okaꞌ ogo minaaꞌ nouneꞌza geze izipaha zuho nene malise isaꞌmako nanimuꞌ nave.
MAT 9:15 Neꞌmine li likevo Izesuꞌ tiꞌ lo lo-ngimineꞌ: Ve maliꞌmo veneꞌ di imiliza gameneuꞌ olize izo nosoꞌ niteꞌ gize vataꞌ ogo eze zuho molo-ngedavo ingine aza aꞌminguꞌ ha neivo mulumo gili-di nosoꞌ niteꞌ malise ilizadoꞌ nehe. Ne nomive. Aꞌmineꞌmine igi naza nouvosa nene lamineꞌ gili nizanako nosoꞌ niteꞌ malise amilisaha engiꞌ vovoꞌningutiꞌ biluvalite neze neleꞌmizi di vilizaniꞌ gamene nene mo aliteleseive. Aꞌmine gamene alitavo mulumo gili-nidisa nosoꞌ niteꞌ malise ilisave.
MAT 9:16 Idoꞌ lavolavo gosohototiꞌ ngomo ma huki saketi litehe hukidoꞌ mili ongotilizaniꞌ nene ngingili lo geleleheꞌ ogavo neꞌmo naba hukaaꞌ neinako nemuꞌ lavolavo olihe ngingili lamineꞌ netiꞌ ngomo ma huki saketi liteheloꞌ mili ongotisaꞌmave.
MAT 9:17 Idoꞌ aꞌmineꞌmine igi lingine vaini noso gosohoꞌ neꞌmo memeꞌ ize losuvodunuꞌ liliꞌ aniꞌ gomise nene izo pouꞌ loo vaini noso lepo vo gomiseꞌvesi nene goloso ogalive li vaini noso gosohoꞌ gituhoꞌ galakalaꞌ neidiꞌmo nene lulu izavo gomise liteheliꞌmo ngipu lo hukilineꞌ o mininguꞌ nene ma ohizi milisaꞌmave. Vaini noso gosohoꞌ gituhoꞌ galakalaꞌ neivo nene memeꞌ ize losuvo gosohotunuꞌ liliꞌ aniꞌ gomise gosohokuꞌ nene ohizaaꞌ nave. Neꞌmine ikevo gomisesi vaini nososi nene lamineꞌ ha minaaꞌ nasive. Neꞌmine lineꞌ nene aza monoꞌ lo-ngemaaꞌ ineꞌ nene gosohoꞌ nenako izipahala zuho igi mili ilizaniꞌ monovo neꞌmo aꞌmine Zuda veti monovo litehe maloꞌ vo damingumuꞌ nene lineꞌ.
MAT 9:18 Izesuꞌ nene gamazi lo-ngemo neivo monoꞌ gizebo ve maliꞌmo eze neida ogo gubiꞌ noize emo tiꞌ lo lineꞌ: Alune ma nene idise aꞌmene nohilineꞌzo gaza ogo anga okoꞌnoloꞌ hitanivo gohi vele gizo otelive losa noluve.
MAT 9:19 Lavo Izesuꞌ aza oto monoꞌ gizebo ve nene eꞌmeto izipahala zuhosi vaniꞌ.
MAT 9:20 Nivavo veneꞌ ma venelite ikeꞌniloꞌ ikeꞌniloꞌ ningaaꞌ aniꞌ siki nene mate-desaꞌmivo mino gamene haꞌnaloꞌ ninge do vo mino kilisimasi tuvelu (12) minineꞌ veneꞌ neꞌmo naza okoꞌnoloꞌ damo ha Izesuꞌ geneganaꞌvelokovoꞌ do gelelodiꞌmo nene lamineꞌ olosuve lo gelo Izesuꞌ mehenelatiꞌ ogo geneganaꞌve gahevela do gilineꞌza
MAT 9:22 Izesuꞌ aza mine velepeꞌ izo aꞌmine veneꞌ nene vonuꞌ belo tiꞌ lo lo-imineꞌ: Aluneve, gele eleꞌvoleꞌ anidiꞌmo nene lamineꞌ ogange. Gaka mukiꞌ gelaaꞌ aineꞌ ma nene gohi gelamozo. Neꞌmine lo-davo liteꞌ lo aꞌmidoꞌ lamineꞌ gilineꞌ.
MAT 9:23 Tiꞌ ogavo Izesuꞌ aza vo monoꞌ gizebo ve maꞌmi numuꞌveuꞌ dizo ningineꞌ nene alungo mulumo gili polopeꞌ mili eveneꞌ mukiꞌ ive nama igi nizavo ningo tiꞌ lo lineꞌ:
MAT 9:24 Alungo nene ma helamineꞌ. Haza okise ongo neize. Heta igi vilo lo lo-ngedavo gizeꞌ i-daniꞌ.
MAT 9:25 Tiꞌ igi eveneꞌ mukiꞌ ingine heta vi osuꞌ likevo Izesuꞌ aza numunguꞌ dizo vo alungo neꞌmi analoꞌ nodavo otineꞌ.
MAT 9:26 Neꞌmine ogavo guvele nene hutileꞌ ogo mone osuꞌ lineꞌ.
MAT 9:27 Idoꞌ Izesuꞌ aza numuno nene hulo novivo veꞌine likive sitaꞌ ma eꞌmeti nivi asi naba li tiꞌ li lasineꞌ: Guvelesi ve naba Davidiꞌ aꞌvo ezeloꞌ medelo minanive make, gaza mulumote ningevo.
MAT 9:28 Likesivo Izesuꞌ aza numunguꞌ dizo neivo ve sitaꞌ ingine dizi minida minikesivo Izesuꞌ tiꞌ lo longoꞌ o-ngidineꞌ: Lingine gilasineꞌ initeꞌ nene neniꞌ ha oloseive li mo gili eleꞌvoleꞌ i nizasihe. Neꞌmine lo longoꞌ o-ngedavo tiꞌ li li-imasineꞌ: Guvekasi ve, laza mo gele eleꞌvoleꞌ o nosive li li-imasineꞌ.
MAT 9:29 Li-imikesivo veꞌnidoꞌ nodo gelo tiꞌ lo lineꞌ: Lingine gili eleꞌvoleꞌ asineꞌ neꞌmino lengita gihile sotoꞌ ivo.
MAT 9:30 Neꞌmine lo nolivo veꞌine nene lamineꞌ ogavo veꞌine niningasivo amuzonga lo-ngedo tiꞌ lo lineꞌ: Lingine initeꞌ o-lingiduvoniꞌ memuꞌ eveneꞌ hamokisi gilikelizaze. Li-ngimamilizo.
MAT 9:31 Lineꞌza ingine vi Izesuꞌ guvele nene li hutileꞌ ikesivo guvele nene buu lo aꞌmine ebeꞌ nabauꞌ nene mone pilineꞌ.
MAT 9:32 Idoꞌ nelotiꞌ Izesuꞌve ezesi monave nesi limi heta navo eveneꞌ malite ve ma sikalahuꞌ goloso lulouꞌ minidiꞌmo gamazi lamilidoꞌ o vive ma nene eleꞌmizi Izesuda aniꞌ.
MAT 9:33 Eleꞌmizi ikevo Izesuꞌ aza sikalahuꞌ goloso eveneꞌ luloutiꞌ imisele hulavo aꞌmine ve nene gamazi apiꞌ ogo lineꞌ. Lavo eveneꞌ mukiꞌ ingine ningi voꞌine goloso vavo tiꞌ li laniꞌ: Isilaeleꞌ misubouꞌ mene neꞌmine ma sotoꞌ ivo ningamuneꞌ ve.
MAT 9:34 Neꞌmine li laniꞌza Halisaioꞌ monoꞌ laaꞌ ave nete tiꞌ li laniꞌ: Sikalahuꞌ goloso ngimiselo do nohulineꞌ amuzo nene sikalahuꞌ golosoliti guveꞌinesi velatiꞌ dosa nene nongimiselive laniꞌ.
MAT 9:35 Idoꞌ Izesuꞌ aza numuno ebeꞌ nabaꞌ naba idoꞌ ngomo ngomo mukikuꞌ nene mone mone ogo eveneꞌ monoꞌ numunguꞌ monoꞌ apize ngeme ngemeꞌ ogo idoꞌ Oꞌmosoꞌmi gizebomuꞌ gamazi lamineꞌ nene lo-ngeme ngemeꞌ ogo idoꞌ initeꞌ ato atoꞌ gizi davesi gilizevo alevesi nene do lamineꞌ o-ngidineꞌ.
MAT 9:36 Idoꞌ eveneꞌ mukiꞌ goloso ezela aniꞌ nene ningo ingine sipisipi izeloꞌ gizebo veꞌine ma nomivo minaniꞌ maꞌmine igi muheleꞌ aheleꞌ igi gopo minaniꞌ nenako nemuꞌ nene mulumoꞌine ningo muluno hukineꞌ.
MAT 9:37 Neꞌmine ogavo izipahala zuho aneza gamazi ma evenekumuꞌ lo molo neꞌmine lo lo-ngimineꞌ: Eveneꞌ mene gopo ikelizaze. Minguꞌ nene nosoꞌ niteꞌ mukiꞌ goloso o molaniꞌza aꞌminguꞌ gono dalonive nene ngomosiꞌ minekunge.
MAT 9:38 Nemuꞌ nene lingine mine melehida likevo gonoloꞌ ve ma ngimiselavo vi minamuno dolizilizave lineꞌ.
MAT 10:1 Izesuꞌ aza izipahala zuho tuvelu (12) asi lo-ngemavo ikevo eveneliti luꞌningutiꞌ sikalahuꞌ goloso ngimisele hulaaꞌ idoꞌ ato atoꞌ initeꞌ gizi davesi gilizevosi mukiꞌ do lamineꞌ o-ngedaaꞌ amuzo nene ngimineꞌ.
MAT 10:2 Aꞌmine aposolo tuvelu (12) neti guliveꞌine nene neꞌmino neive: Ganaꞌ nene Simoniꞌ gulive gohi ma Petoloꞌ idoꞌ Adeleaꞌ nene akunolo minineꞌ. Idoꞌ Zebedaioꞌ gipele Zakoboꞌ ve, akunolo Zohaneꞌ ve,
MAT 10:3 Hilipoki Batolomaioki idoꞌ Tomasiꞌ ve, takisi moni daaꞌ ive Mataioꞌ nesi idoꞌ Zakoboꞌ gohi ma minineꞌ nene Alahaioꞌ gipele minineꞌ. Idoꞌ Tadaioꞌ ve,
MAT 10:4 idoꞌ Loma ve ngimisele hulolone li amuzo milaaꞌ aveutiꞌ ve ma Simoniꞌ ve, idoꞌ alingeꞌ Izesuꞌni do sotoꞌ o-dive adoꞌ Kelioto numudotiꞌ ve Zudaꞌ nesi nene minaniꞌ.
MAT 10:5 Idoꞌ aꞌmine ve tuvelu (12) nene gonoloꞌ nongimiselo gamazi tiꞌ lo lo-ngidineꞌ: Lingine Zuda ve minamaniꞌ eveneliti misubouꞌ vami idoꞌ Samalia eveneliti numuno ebeꞌningukisi nene vami
MAT 10:6 sipisipi ize vi halekaaꞌ naniꞌ neꞌmini Isilaeleꞌ aleve vi tolovo igi nizaniꞌ engita nene vilo.
MAT 10:7 Vi ma nene Oꞌmosoꞌmi gizebo nene lengita mo ogave li li sotoꞌ igi li-ngimilo.
MAT 10:8 Idoꞌ initeꞌ gizi dave nene di lamineꞌ i-ngidilo. Idoꞌ hili nilizangutiꞌ nesi di oti-ngidilo. Idoꞌ ganadise gizi dave nesi di lamineꞌ i-ngidilo. Idoꞌ sikalahuꞌ goloso eveneꞌ luꞌningutiꞌ nesi ngimiseli hulilo. Neꞌmine manaꞌmine o-ngedaaꞌ amuzo nene meni hizi ma damaze. Lingine haza neꞌmine manaꞌmine i-ngidilo.
MAT 10:9 Idoꞌ lingine gotinguꞌ moni ngomosi ma goꞌziki vamilo.
MAT 10:10 Idoꞌ aka vilizangumuꞌ ve li goꞌ neꞌminesi dami idoꞌ sioti sitaꞌ izi vami hamokovoꞌ izi vi suuꞌ nesi izi vami idoꞌ hatuso nesi di vami okodidoꞌ neineꞌ nevoꞌ nene minivo vilo. Gono dave nene gonoꞌnidoꞌ initeꞌ ma ngimikevo menite ve li haza dalizaniꞌ nene lisiheꞌ o neinako linginesi nene aꞌmineꞌmine igi lingimikevo haza dalisanaze. Nemuꞌ nene hazavoꞌ vilo.
MAT 10:11 Idoꞌ lingine numuno ebeꞌ nabaupe ngomoupe ma vi heteli ma eveneꞌ lamineꞌ ma nolingumuꞌ nene viseꞌ igi ningisa aꞌmine veꞌmi numuꞌveuꞌ nene dizi limi nizavo numuno ebeꞌ mala viliza gamene nene alitavo ma nene vilo.
MAT 10:12 Lingine numuno mauꞌ dizi ma aꞌmine numunguꞌ miniliza aleve nene lengita hongu minivo li meseꞌ aseka li-ngidilo.
MAT 10:13 Idoꞌ aꞌminguꞌ minave ingine eveneꞌ lamineꞌ nilizaniꞌ nene lengitatiꞌ hongu nene engita mineleseive. Idoꞌ eveneꞌ lamineꞌ minami nilizaniꞌ nene aꞌmine hongu nene engita minamo gohi tineꞌ molo lengita aloseive.
MAT 10:14 Idoꞌ eveneꞌ malite gamazitine gilami lengeleꞌmize lamineꞌ amavo ma lingine aꞌmine numungutipe ebekutipe vili ma ingine engiꞌ monovoꞌine ningilizangumuꞌ ve li avazaha igi gizedidotiꞌ uꞌmusupo nene okohoꞌ izi di huli vilo.
MAT 10:15 Laminetoꞌ nolo-lingimuve. Gamene nabauꞌ aꞌmine aleve Oꞌmosoꞌmo lihimeꞌine ngemelineꞌ nene Sodomu aleve idoꞌ nGomola aleve mulumo initeꞌ naba ngemelineꞌ nesi ivileꞌ ogosa naba goloso ngemeleseive.
MAT 10:16 Idoꞌ gilahe. Lingine nene neniꞌ gonoꞌne vi dalizave lo nolingimiseluve. Lingine nene sipisipi ize neꞌminisa minilisave. Sipisipi ize ingine lovo veꞌinete ngibililisa ikevo ingine aꞌmidoꞌ alete mili ngibililiza gavosoꞌine nomivo minaaꞌ naniꞌ neꞌminisa nene minilisave. Idoꞌ lingine vovoꞌninguꞌ vi miniliza aleve neve nene sipisipi ize ngibilaaꞌ aniꞌ loposo gulo neꞌminisa nene minilisanaze. Lingibilikelizaze. Nemuꞌ lingine nene gosiheꞌ igaꞌ naniꞌ neꞌmine igi gatine lamineꞌ gili gizebo ilo. Idoꞌ nama viluso igaꞌ naniꞌ neꞌmine igi honguvoꞌ li minilo.
MAT 10:17 Lingine nene evenekumuꞌ ningisa minilo. Ingine nene kanisoleꞌnidoꞌ di gonitoꞌ mili-lingidi monoꞌ numuꞌninguꞌ nalatunuꞌ liliꞌ aniꞌ gavosodunuꞌ lingibililisave.
MAT 10:18 Idoꞌ nenita giꞌmizi minangumuꞌ ve li gonitoꞌ lengeleꞌmizi mili guveꞌinesi ve nabaliti veꞌnidokisi ngamani nabaliti veꞌnidokisi lengeleꞌmize milikevo engikisi idoꞌ Zuda ve minamaniꞌ alevesi nene neniꞌ monovoꞌne li sotoꞌ igi li-ngimilisave.
MAT 10:19 Nemuꞌ nene lengeleꞌmize gonitoꞌ nimilavo ma gamazi nado lolove idoꞌ nadive lolove li gopo gatine gilamilo. Gonitoꞌ lengeleꞌmizi milikevo gamazi liliza gamene alitelineꞌ nene lilizaniꞌ gamazi nene ha omo gatinguꞌ ogavo lilisave.
MAT 10:20 Gamazi lilizaniꞌ nene langisetine lamilisave. Metibi Sikalahuꞌ neꞌmo nene lengikuꞌ omo holo mino gamazi lilizaniꞌ nene eiꞌ loloseive.
MAT 10:21 Idoꞌ eveneꞌ nenikumuꞌ gili eleꞌvoleꞌ amaniꞌ nete nene nenikumuꞌ gili eleꞌvoleꞌ ave nene ngibili hililizave li gonitoꞌ ngeleꞌmizi milalisave. Ee, mo uvoꞌninge akuꞌninge nilizaniꞌ netesi idoꞌ izeꞌninge meꞌninge izipahaꞌine zuho nilizaniꞌ netesi nene ha neꞌmine ilisave.
MAT 10:22 Neniꞌ guliveꞌne di minilizangumuꞌ eveneꞌ mukiꞌ nete nene lengikumuꞌ goloso gililisave. Neꞌmine ilizaniꞌza ve malite nenikumuꞌ gili eleꞌvoleꞌ igi amuzo mili mini di vi nizavo gameneꞌine ma osuꞌ lilive nene Oꞌmosoꞌmo do nguꞌ izeleseive.
MAT 10:23 Idoꞌ numuno ebeꞌ mautiꞌ alevelite ma lengeleꞌmize goloso navo ma golise ebeꞌ maloꞌ maloꞌ vikaꞌ vikaꞌ igisa nene monilo. Naza laminetoꞌ nolo-lingimuve. Isilaeleꞌ aleveti numuno ebeꞌninguꞌ nene olihe moni pilamavo Oꞌmosolatiꞌ ve gihile naza nene tineꞌ molo alosuve.
MAT 10:24 Tisaꞌ maliꞌmi izipahala zuho ingine nete nene tisaꞌine nene ivileꞌ igi ma minisaꞌmave. Idoꞌ agove izipe nete ingine gizebo i-ngidave nene ngivileꞌ igi ma minisaꞌmave.
MAT 10:25 Izipahala zuho ingine tisaliꞌmo gehaaꞌ ineꞌ gono gihi minilizaniꞌ nene lamineꞌ oloseive. Idoꞌ agove izipe ingine nene gizebo o-ngedaaꞌ iveꞌmo gehaaꞌ ineꞌ gono inginesi gihilizaniꞌ nene lamineꞌ oloseive. Ve goloso nete metibine nenikumuꞌ sikalahuꞌ golosoliti guveꞌinesi ve Belezebuloꞌ ve li-nidaniꞌ nenako izipahaꞌne zuho lengikumuꞌ nene nabisa divi ledivika li-lingidilisave.
MAT 10:26 Nemuꞌ nene engikumuꞌ golise gilamilo. Idise mene hito neineꞌ initeꞌ mukiꞌ nene alingeꞌ sotoꞌ oloseive. Idoꞌ idise mene haleko neineꞌ initeꞌ nene sotoꞌ ogavo gililisave.
MAT 10:27 Idoꞌ naza litiꞌmusouꞌ haleko sunoꞌ lengikovoꞌ lo-lengemaaꞌ uvo gamazi nene eveneꞌ mukiꞌ ningi gililizada nene li sotoꞌ igi li-ngimilo. Idoꞌ zegeno nununga lo lo-lengemaaꞌ uvoniꞌ gamazi nene numuno heta eveneꞌ mukiꞌ gililizada nene li hutileꞌ igi li-ngimilo.
MAT 10:28 Eveneꞌ ingine okodinevoꞌ nene ha lingibili hililizaniꞌza lutine nene ngeli di gopo amilisave. Engikumuꞌ golise gilamilo. Mudise lutinesi okodinesi olokuꞌ hulo lengebele heleli amuzoꞌvesi minive Oꞌmosomukovoꞌ nene golise gili minilo.
MAT 10:29 Gilahe. Nama ngomo ngomo osoꞌmohoꞌ neꞌmine nama nene haza niteꞌve li gili guleheꞌ moni hamokovoꞌ nene huli nama sitaꞌ meni hizaaꞌ aniꞌ ve. Idoꞌ aꞌmine neꞌmine nama nene haza niteꞌ neiha metibo engitoꞌ gizebo lamineꞌ ogaꞌ neive. Aza gelamivo engikutiꞌ hamoꞌ neꞌminesi nene ma ngelo helo misubouꞌ lemamoloseive.
MAT 10:30 Idoꞌ lingine neve nama ngomo ngomo mukiꞌ nene ngivileꞌ igi initeꞌ naba nizanako nemuꞌ nene golise gilamilo. Lengita initeꞌ ngomo lasolo nesi goloso ogalive lo godotine zopovo mukiꞌ nene gate osuꞌ lo nelokisi gizebo ogaꞌ neive.
MAT 10:32 Ve maliꞌmo neze guliveꞌne eveneꞌ mukiliti veꞌnidoꞌ lo sotoꞌ ilineꞌ nene eze gulivesi meꞌnehi veleloꞌ Okulumokuꞌ lo sotoꞌ olosuve.
MAT 10:33 Idoꞌ ve maliꞌmo nenikumuꞌ eveneꞌ mukiliti veꞌnidoꞌ ningamuve ve lo ataize lo-nedelineꞌ nene ezemukisi ningamuve ve lo meꞌnehi veleloꞌ Okulumokuko lo-delesuve.
MAT 10:34 Naza lemo uvoniꞌ nemuꞌ nene misubo mukikuꞌ lovo mukiꞌ nene osuꞌ lavo eveneꞌ mukiꞌ nene honguvoꞌ li minilisave li gilamilo. Naza lemo uvoniꞌ neꞌmo eveneꞌ mukiꞌ nene hongu li minami lovo hizi minilisave.
MAT 10:35 Naza lemo uvoniꞌ neꞌmo eveneꞌ hoꞌ li eza ema minikevo ve malite engiꞌ meꞌninge lovo i ngimi minilisave. Idoꞌ aluvoꞌine malite izeꞌningine lovo i ngimi minilisave. Idoꞌ ngonohulo malite veneꞌ avoꞌningine lovo i ngimi minilisave.
MAT 10:36 Idoꞌ engiꞌ zuho gehepeve nete nene engiꞌ zuholiti lovo ve liliꞌ igi minilisave.
MAT 10:37 Idoꞌ lingine izetingine metingine lutine ngimilizaniꞌ ivileꞌ igi lutine nimamilizaniꞌ nene neze zuho gihile minilizaniꞌ votigileloꞌ minamilisave. Idoꞌ izipahatine lutine ngimilizaniꞌ nene ivileꞌ igi lutine nimamilizaniꞌ nene neze zuho gihile minamilisave.
MAT 10:38 Idoꞌ ve ma mulumo initeꞌ i-lidi lohotoꞌ zaloꞌ libilikelizave li geli aꞌmanapa igi neꞌmetamilizaniꞌ nene neze zuho gehepeve minilizaniꞌ votigileloꞌ minamilisaave.
MAT 10:39 Idoꞌ ve ma aza helelohe helelohe lo okoꞌnomuꞌ golise golise gelo minelive nene alingeꞌ helosa minevoꞌ minevoꞌ emeni dameni damoloseive. Idoꞌ ve ma aza neniꞌ neꞌmeto novilinguꞌ bili hililizaniꞌ nene alingeꞌ minevoꞌ minevoꞌ emeni dameni nene mo daloseive.
MAT 10:40 Idoꞌ eveneꞌ ma ingine lengiꞌ gamazitine gili lengeleꞌmize lamineꞌ ilizaniꞌ nene neniꞌ gamaziꞌne gili neleꞌmize lamineꞌ aniꞌ geleleseive. Idoꞌ neze neꞌmine i-nidilizaniꞌ nene nimiselive eiꞌ gamaziꞌve gili eleꞌmize lamineꞌ aniꞌ geleleseive.
MAT 10:41 Idoꞌ aza Oꞌmosoꞌmi veletiꞌ gamazi lo sotoꞌ ogaꞌ ive polohete ma ne neive lo ve maliꞌmo aꞌmine ve eleꞌmize lamineꞌ ilineꞌ nene Oꞌmosoꞌmi veletiꞌ gamazi lo sotoꞌ ogaꞌ iveꞌmo meni daaꞌ ineꞌ votigileloꞌ meni daloseive. Idoꞌ ve lisiheꞌ ma ne neive lo ve maliꞌmo aꞌmine ve lisiheꞌ nene eleꞌmize lamineꞌ ilineꞌ nene aꞌmine ve lisiheliꞌmo meni dalineꞌ votigileloꞌ ogo meni daloseive.
MAT 10:42 Idoꞌ ve maliꞌmo izipahaꞌne zuho limi minangutiꞌ nene ma ningo mene ve nene Izesuꞌ izipahala zuhoutiꞌ neive lo gelo hepeꞌ noso ngomosi ma ohizo emelineꞌ nene alingeꞌ meniꞌve nene damilivoba daloseive.
MAT 11:1 Izesuꞌ aza izipahala zuho tuvelu (12) nene gono gamazi lo-ngedo osuꞌ lo aza nene hulo-ngedo aꞌmine gahevela numuno ebeꞌ mukikuꞌ veneꞌ vemohoꞌ nene monoꞌ apize ngeme ngemeꞌ ogo idoꞌ lo soto sotoꞌ ogo lo-ngemeꞌmo monineꞌ.
MAT 11:2 Neꞌmine ogavo monoꞌ noso holo-ngedaaꞌ ive Zohaneꞌ aza nalaꞌ numunguꞌ huli-mikavo mininguꞌ nene Oꞌmosoꞌmo do luꞌ izelive lo imiselelesa liveꞌmo ogo molo monineꞌ gamaziꞌve nene gelo Izipahala zuho ma ngimiselavo ingine Izesuꞌ neida vi tiꞌ li longoꞌ i-dasineꞌ:
MAT 11:3 Gaza nene aloseive li-limi lave ma ne nabe idoꞌ ve gohi mamuꞌ gizebo oloneꞌ o neihe.
MAT 11:4 Neꞌmine li longoꞌ i-dikesivo Izesuꞌ tiꞌ lo lo-ngimineꞌ: Lingine tineꞌ mili vi Zohaneꞌni nene neniꞌ gono noduvo nigilasineꞌ idoꞌ ningasineꞌ initeꞌ nemuꞌ nene vi tiꞌ li li-imilizo:
MAT 11:5 Veꞌine likive ingine veꞌine gohi niningave. Idoꞌ gizeꞌine goloso ive nene gohi aka nimonavo ganadise gizi dave nene gohi kululuꞌ niizave. Idoꞌ gaꞌine molave nene gohi nigilavo hilave nene gohi do noote-ngidive. Idoꞌ gohoꞌ aleve nene monoꞌ gamazi lamineꞌ nigilave.
MAT 11:6 Lingine neꞌmine li li-imi tiꞌ li li-imilizo: Gaza neniꞌ monovomuꞌ gaka sitaꞌ sataꞌ nogelaineꞌ nene hulo nenikumuꞌ gele eleꞌvoleꞌ ilineꞌ nene mine lamineꞌ ogo mcnelineꞌ akaloꞌ eꞌmeto volosane. Idoꞌ eveneꞌ mukiꞌ inginesi gaꞌine sitaꞌ sataꞌ gilami nenikumuꞌ gili eleꞌvoleꞌ ilizave nete mine lamineꞌ igi miniliza akaloꞌ eꞌmeti vilisave.
MAT 11:7 Neꞌmine lo lavo Zohaneꞌ ngimiselive ingine tineꞌ mili nivasivo Izesuꞌ aza eveneꞌ vaiꞌ li minaniꞌ nene Zohaneꞌnimuꞌ apiꞌ ogo tiꞌ lo lo-ngimineꞌ: Lingine eveneꞌ mukiꞌ Zohaneꞌni ningilisa ebeꞌ hadivela vaniꞌ ma nene naniteꞌ ningilisa vaniꞌ neve. Aꞌmida nene hepeliꞌmo do gabe kabeꞌ ogaꞌ neineꞌ initeꞌ gepeꞌ neꞌmino gamazi do tiꞌne vatiꞌne ogo laaꞌ ive ma ningilisa vaniꞌ nehe.
MAT 11:8 Idoꞌ lingine vaniꞌ ma nene ve maliꞌmo genegana lamineꞌ goloso ngolo minineꞌ ningilisa vaniꞌ neve. Eꞌe, aꞌmine neꞌmine genegana nene guveꞌinesi vevoꞌ minanguꞌ minavetevoꞌ nene ngili minaaꞌ nave.
MAT 11:9 Nemuꞌ nene naniteꞌ ningilisa ebeꞌ hadivela vaniꞌ neve. Polohete ningilisa vaniꞌ noloseive. Olo. Ee, aꞌmine vi ningave nene polohete ma ve. Aꞌmine ve nene polohete gomuꞌ minaniꞌ neꞌmine minamo ngivileꞌ ogosa neive.
MAT 11:10 Idoꞌ aꞌmine vemuꞌ nene monoꞌ godolouꞌ Oꞌmosoꞌmo do luꞌ izelive lo imiselelesa live lo-emo lineꞌ gamazi ma tiꞌ li gizi nizaniꞌ ma neive: Gelezo. Naza neze gamazi lo-ngeme ngemeꞌ ilive ma imiselekuvo aza do gomuꞌ molo akaka vele-gedeleseive. Aꞌmine gamazi nene aꞌmine ve Zohaneꞌnimuꞌ nene gizaniꞌ ve.
MAT 11:11 Neꞌmine aniꞌ nene naza lamineꞌ ma lo-lengemelove. Eveneꞌ misubouko sotoꞌ igi mini di aveutiꞌ nene monoꞌ noso holo-ngedaaꞌ ive Zohaneꞌni nene ivileꞌ igi minave ma minamaniꞌ ve. Ne neiha Oꞌmosoꞌmo eveneꞌveloꞌ gizebo ilineꞌ gameneꞌve sotoꞌ ogavo aꞌmine gizebo o-ngedelinguꞌ vi hilalizave engikutiꞌ ma lemo mineliveꞌmosi nene Zohaneꞌ minineꞌ monovo nene ivileꞌ ivo minilizadoꞌ o neive.
MAT 11:12 Zohaneꞌ monoꞌ noso holo-ngedo minidotiꞌ mine do dizo Oꞌmosoꞌmo eveneꞌveloꞌ gizebo ilineꞌ neꞌmo amuzo molo sotoꞌ olosa minineꞌ ve. Idoꞌ eveneꞌ ma amuzoꞌinesi minaniꞌ nete aꞌminguꞌ vi hilalisa amuzo miliꞌmi miliꞌmi vi minaniꞌ.
MAT 11:13 Idoꞌ Oꞌmosoꞌmi veletiꞌ gamazi li sotoꞌ igaꞌ avete laniꞌ gamazisi idoꞌ Oꞌmosoꞌmo lo huko-lidineꞌ gamazisi gizikaniꞌ neuꞌ nene initeꞌ sotoꞌ oꞌmo vo mine do dizelineꞌ initekumukisi li Zohaneꞌ sotoꞌ ogo minelineꞌ gameneuꞌ sotoꞌ ilineꞌ initekumukisi nene li osuꞌ laniꞌ ve.
MAT 11:14 Idoꞌ aꞌmine gamazi gizaniꞌ mauꞌ nene tiꞌ li gizaniꞌ: Oꞌmosoꞌmo do luꞌ izelive lo imiselelesa live sotoꞌ olosa neivo nene gozopoꞌ minive polohete Eliaꞌ emeni damenisi minelive ma sotoꞌ oloseive. Neꞌmine li lave ma nene Zohaneꞌ nene neiha lingine nemuꞌ gilii lamineꞌ mo Eliaꞌ ve li gililizahe.
MAT 11:15 Ve ma lingine gili nge li gilaaꞌ ave nii ma nene gamazi mene gili vevesi gililo.
MAT 11:16 Idise mene nizaniꞌ alevemuꞌ nene nanitetoꞌ lo molo lokuvo vo dalive. Lingine izipe goseleꞌ ngebelaaꞌ ineꞌ izipe neꞌminisa nene nizave. Izipe ingine di geseꞌ igaꞌ ebetoꞌ zohiꞌ igi mini gonoꞌninginemuꞌ
MAT 11:17 neꞌmine li laaꞌ nave: Laza lengikumuꞌ huhunaleꞌ mulunidoꞌ nene longolize izi gizedine adine izisaꞌmave. Idoꞌ nama muheleꞌ aheleꞌ ogo lunidoꞌ nene nanimuꞌ muheleꞌ aheleꞌ isaꞌmave.
MAT 11:18 Naza neꞌmini nizave luvoniꞌ nene neꞌmini minangumuꞌ luvoniꞌ ve. Zohaneꞌ aza gonoꞌve do do vinguꞌ nene nosoꞌ niteꞌ lamineꞌ namo idoꞌ vaini noso namo mine atoꞌ ogo minivo ningi goseleꞌ lengebelavo tiꞌ li laniꞌ ve: Ve mene sikalahuꞌ goloso maliꞌmo lulo do gopo ogavo neꞌmine neihe li laniꞌ.
MAT 11:19 Idoꞌ Oꞌmosolatiꞌ ve gihile naza lemo nosoꞌ niteꞌ di geseꞌ igi ni nizanguꞌ vo naaꞌ idoꞌ vaini noso naaꞌ nouvo lingine ningi goseleꞌ lengebelavo soza gamazisi li tiꞌ li laaꞌ nave: Ve mene ningilo. Aza nene vele gohi nave mino idoꞌ noso geli gelo naaꞌ ive mino takisi moni daaꞌ avesi idoꞌ monoꞌ gilamave gohi masi nene zogo molo ngemaaꞌ ive ne neive. Lingine neꞌmine li gilaaꞌ naha ve ma laza Oꞌmosoꞌmi monovolo do tiꞌ ogo otohato o minunive leliꞌ ogo molo oloneꞌ initeꞌ neꞌmo nene leliꞌ monovote lamineꞌ neineꞌ nene do sotoꞌ oloseive.
MAT 11:20 Izesuꞌ aza numuno ebeꞌ mauꞌ vo gono do do novo ato atoꞌ suno mukiꞌ nene eiꞌ gono dadiꞌmi amuzo nene do sotoꞌ ineꞌ. Do sotoꞌ ogavo ninganiꞌza ningahe ningamahe igi luꞌine di velepeꞌ izamavo ngelemo tiꞌ lo lo-ngimineꞌ:
MAT 11:21 Agae, Kolazini aleve idoꞌ Betesaida aleve lengikumuꞌ nene mulumo nogele-lingiduve. Lengita mulumo initeꞌ goloso alingeꞌ sotoꞌ o-lengedeleseive. Lengita ato atoꞌ suno do sotoꞌ uvoniꞌ ma nene Tilo alevetingukisi Sidoni alevetingukisi do sotoꞌ uvodiniko ingine Oꞌmosomuꞌ gilamaniꞌ aleve minikeniꞌza aꞌmine ebekuꞌ aleve ingine nene mo geti luꞌine do velepeꞌ izekune li lani gisi hili initeꞌ huko pako ineꞌ nene di ngili minadine.
MAT 11:22 Nemuꞌ nene naza ma lo-lengemeloze. Gililo. Lingine Tilo alevemukisi idoꞌ Sidoni alevemukisi nene Oꞌmosoꞌmo gamene nabala lihime ngemelineꞌ nene nabaꞌ naba ngemeleseive li gilaaꞌ nahe. Oꞌmosoꞌmo engiꞌ lihime ngemelineꞌ nene ivileꞌ ogosa lengiꞌ lihimetine nene nabaꞌ naba lengemeleseive.
MAT 11:23 Idoꞌ Kahanaumi alevekizo, lengiꞌ gulivetine nene Okulumokuꞌ dizelive li di hozi laaꞌ nahe. Lingine nene Oꞌmosoꞌmo oloꞌ galeseuꞌ lengehusoꞌ o huloloseive. Idoꞌ Sodomi misubouꞌ nene eveneꞌ ma mino idise atoꞌ atoꞌ suno do sotoꞌ nouvoniꞌ neꞌmino ma do sotoꞌ idiniko Sodomi numuno ebekuꞌ aleve nene luꞌine di velepeꞌ izikevo numuno ebeꞌine nene Oꞌmosoꞌmo do goloso amivo idisesi ha neivo evenekisi nene ha minadine.
MAT 11:24 Nemuꞌ nene laminetoꞌ ma lo-lengemeloze. Gililo. Gamene nabala Oꞌmosoꞌmo lihime ngemelineꞌ gameneloꞌ nene Sodomi aleve mulumo initeꞌ naba gehe-ngedelineꞌ nene ivileꞌ ogosa lengiꞌ nene geniꞌvesi naba gehe-lengedeleseive lo lineꞌ.
MAT 11:25 Aꞌmine gameneloꞌ nene Izesuꞌ tiꞌ lo Oꞌmosola lineꞌ: Meꞌneho ve, gaza Okulumoꞌ misuboloꞌ gizebo o mino Guveꞌinesi ve minanivelike, naza lo sotoꞌ ogo noluvoniꞌ gamazi mene evenelite gilikevo eveneꞌ ma gili nge li gamazi monovo gilaaꞌ ave minaniꞌ nete aꞌmineꞌmi monovo nene ningi gilikelizave lo gaza do halekosa aꞌmine monovo nene eveneꞌ ma izipe ngomo neꞌmine mini initeꞌ mukiliti monovomuꞌ olihe gilamavemuꞌ nene do sotoꞌ o-ngedaineꞌ nemuꞌ nene isaaꞌ neve nolo-giduve.
MAT 11:26 Ee, Meꞌneho ve, gaza neꞌmine olosa lamineꞌ gelo neꞌmine aineꞌ nemuꞌ nene isaaꞌ neve nolo-giduve.
MAT 11:27 Neꞌmine lo gohi tiꞌ lo lineꞌ: Meꞌneho aza initeꞌ mataꞌ mukiꞌ nene aꞌneuꞌ molave. Idoꞌ Oꞌmosoꞌmi gipele neniꞌ nene Oꞌmosoꞌmi gipele ve li ningi ma gilamave. Meꞌneho eiꞌ neꞌmovoꞌ nene ningo gele neive. Idoꞌ meꞌnehinemukisi nene ma zaho nehe ningi gilamavo gipele nenikovoꞌ nene ningo gele nouvonako ezemuꞌ nene eveneꞌ masi gililizave lo eze monovo lo sotoꞌ o ngemeloniꞌ alevesi lelikovoꞌ nene meꞌnehinemuꞌ ningo gele minelesune.
MAT 11:28 Lingine minevoꞌ alevotine geni ogavo di lamineꞌ ilisa geꞌnebe igi agae li minaaꞌ nave, lingine nenita alizaniꞌ nene neniꞌ do lunguꞌ izelesuze. Mukitoꞌ nenita alo.
MAT 11:29 Lingine igi gihilizave lo lengemeloniꞌ gono nene di mini nenitoꞌ gelekeleꞌ ikevo naza neniꞌ monovoꞌne nene apize lengemekaꞌ lengemekaꞌ nouvo di tiꞌ igi di minilizave. Idoꞌ naza nene luꞌneuꞌ hongu lo zou lo minive nouvonako lingine nene neꞌmine igi neniꞌ monovoꞌne di tiꞌ ilizaniꞌ nene lengiꞌ lutinguꞌ nesi hongu lo lamineꞌ mineleseinako nemuꞌ nene nenita igi gelekeleꞌ igi minilo.
MAT 11:30 Naza lengemeloniꞌ gono nene geni amivo lamineꞌ gili ha gihilizadoꞌ lengemelosuvonako nemuꞌ nene lutinguꞌ nene hongu lo lamineꞌ mineleseive.
MAT 12:1 Aꞌmine gameneuꞌ nene holiseꞌ gamene mauꞌ Izesuꞌ izipahala zuhosi viti minguꞌ nivavo izipahala zuho ingine gaꞌnamuꞌ ngisavo viti godololatiꞌ gihile nene ili niꞌmi nivavo
MAT 12:2 Halisaioꞌ monoꞌ laaꞌ ave malite ningi gili Izesuꞌni tiꞌ li li-imaniꞌ: Ningezo geze izipaha zuho ingine neꞌmine aniꞌ neꞌmo holiseꞌ gameneꞌmi louꞌ gamazi ma nene avutoꞌ ikeve.
MAT 12:3 Neꞌmine li likevo Izesuꞌ tiꞌ lo lo-ngimineꞌ: Davidikisi idoꞌ ezesi monave nesi gaꞌna hili minaniꞌ gamenela nene avotemoti guveꞌinesi ve naba Davidiꞌ ineꞌ initekumuꞌ nene gati gilahe gilamave.
MAT 12:4 Adoꞌ Oꞌmosoꞌmi numunguꞌ dizo Oꞌmosoꞌmi veleloꞌ milaaꞌ aniꞌ beleti nene naniꞌ. Adoꞌ louliꞌmo lidoꞌ nene evenetoꞌ medeli mini Oꞌmoso initeꞌ lehize-daaꞌ avelitevoꞌ nalizadoꞌ o minineꞌ beleti nene Davidikisi ezesi monavesi nalizadoꞌ lisiheꞌ amineꞌ nene naniꞌ ve.
MAT 12:5 Idoꞌ evenetoꞌ medeli mini Oꞌmoso initeꞌ lehize-daaꞌ ave ingine holisekuꞌ nene monoꞌ numuno nabauꞌ nene holisekuꞌ gono damaaꞌ ve li li huki nizanako ningi lamavo gono ha daaꞌ naniꞌ ma nene gati gilamaniꞌ nehe.
MAT 12:6 Naza ma lo-lengemeloze. Gililo. Idise mene gameneloꞌ lengiꞌ vovotinguꞌ mene gono noduvoniꞌ neꞌmo nene monoꞌ numuno naba nene ivileꞌ ogosa initeꞌ naba neive. Nemuꞌ nene evenetoꞌ medeli mini Oꞌmoso initeꞌ lehize-daaꞌ ave holisekuꞌ gono dangumuꞌ lihime dikeve li-ngidisaꞌmaniꞌ neꞌminisa neniꞌ izipahaꞌne zuho nene lihime dikeve li-ngidamilo.
MAT 12:7 Monoꞌ godolouꞌ Oꞌmosoꞌmo lineꞌ gamazi ma tiꞌ lo neive: Initeꞌ ma nimi olokuꞌ gizaaꞌ nene lamineꞌ neiha neniꞌ giluvoniꞌ nene evenekumuꞌ mulumoꞌine gelo nasahiliꞌ o-ngedaaꞌ neꞌmo ivileꞌ o neive. Mene gamaziꞌmi monovo nene gili lamineꞌ adiniko lihimeꞌine nomivo minaniꞌ nemuꞌ nene lingine lihime dikeve li-ngidamadine.
MAT 12:8 Lingine neniꞌ izipahaꞌne zuho nene holiseꞌmi louꞌ nene avutoꞌ ikeve li-ngidamilizadoꞌ o neive. Nanitekumuꞌ ve. Oꞌmosolatiꞌ ve gihile naza nene holiseliꞌmi meleho mino aꞌmine holisekuꞌ iliza initekumuꞌ idoꞌ amiliza initekumuꞌ laaꞌ uve nene nenikovoꞌ nouvoniꞌ nenako nemuꞌ ve.
MAT 12:9 Izesuꞌ aza minineꞌ ebeꞌ nene hulo vo monoꞌ numunguꞌ dizineꞌ.
MAT 12:10 Vo dizo ningo gilineꞌ nene eveneꞌ ma ana hela goloso ogo gilizevo o vive ma minineꞌ nene ningineꞌza eveneꞌ malite Izesuꞌni goniꞌ i-diliza akamuꞌ viseꞌ igi tiꞌ li longoꞌ i-daniꞌ: Eveneꞌ holisekuꞌ do lamineꞌ o-ngedaaꞌ nene gelaineꞌ leliꞌ louliꞌmo lidoꞌ nene vo do neihe.
MAT 12:11 Neꞌmine likevo Izesuꞌ tiꞌ lo lo-ngimineꞌ: Lengikutiꞌ ve maliꞌmo sipisipi ize hamoꞌ ma gedekelineꞌ aꞌmine nene holisekuꞌ galeseuꞌ lemelineꞌ nene aꞌmingutiꞌ nene do hazala o-damilidoꞌ o neihe. Eveneꞌ neꞌmo sipisipi ize nene ivileꞌ ogo initeꞌ gihile neinako
MAT 12:12 holisekuꞌ do lamineꞌ o-ngedaaꞌ nene ha neive.
MAT 12:13 Neꞌmine lo ana helala goloso o vive nene tiꞌ lo lo-dineꞌ: Anga do pehe lozo. Lo-davo ana do pehe lavo helala minineꞌ ana neꞌmino lamineꞌ ineꞌ.
MAT 12:14 Lamineꞌ ogavo Halisaioꞌ monoꞌ laaꞌ ave ingine ningi heta limi vi Izesuꞌni bililizaniꞌ aka di sotoꞌ ilisa mulise mili gamazi di hamoꞌ aniꞌ.
MAT 12:15 Neꞌmine aniꞌza Izesuꞌ aza monoꞌ numungutiꞌ lemo bililiza akamuꞌ viseꞌ igi gamazi di hamoꞌ aniꞌ nemuꞌ gelo aꞌmine ebeꞌ nene hulo vineꞌ. Hulo novivo eveneꞌ mukiꞌ nene eꞌmeti nivavo engikutiꞌ linge ma initeꞌ gizi dave minaniꞌ nene mukiꞌ do lamineꞌ o-ngidineꞌ.
MAT 12:16 Neꞌmine ineꞌza eze monovomuꞌ nene li hutileꞌ amilizave lo gaꞌine daniꞌ.
MAT 12:17 Neꞌmine ineꞌ nene Oꞌmosoꞌmi veletiꞌ gamazi lo sotoꞌ ogaꞌ ive Isaiaꞌ gozopoꞌ Oꞌmosoꞌmo lineꞌ gamazi gizineꞌ ma gihile izelingumuꞌ ve losa ineꞌ. Aꞌmine gamazi nene tiꞌ lo neive:
MAT 12:18 Naza gonoloꞌ gipeꞌne ma do kegeso eleꞌmize muluve nene ningilo. Aza nene voꞌneloꞌ gipeꞌne neivo ezemuꞌ numo helavo laniteꞌ goloso gelaaꞌ nouve. Idoꞌ neniꞌ Sikalahuꞌne nene eitoꞌ molokuvo eveneꞌ ato atoꞌ mukiꞌ nene lihimeꞌinemuꞌ izeꞌ molo-ngedeli gamazi nene lo sotoꞌ ogo lo-ngemeleseive.
MAT 12:19 Aza nene lovo gamaziutiꞌ gekeꞌ lo lamo akaloꞌ nevo gamazi nabautiꞌ lamoloseive.
MAT 12:20 Idoꞌ aza eveneꞌ ma monovoꞌine goloso ogavo gepeꞌ ma mange mange siꞌzo lemo ongalosa minineꞌ neꞌmine igi limi ingalisa minaniꞌ nene do lemo ongo-ngedo do goloso ma o-ngedamoloseive. Idoꞌ eveneꞌ ma monoꞌine mo osuꞌ lolosa neivo lamu viki ma lihizelesa vevezeꞌ ogo minineꞌ neꞌmine igi minaniꞌ nene monoꞌine do osuꞌ lo-ngedo do goloso ma o-ngedamoloseive. Akaꞌve hizi tili-dilizaniꞌ initeꞌ mukiꞌ nene ngivileꞌ ogo gono do do vo eveneꞌ izeꞌ molo-ngedo initeꞌ goloso o vineꞌ mukiꞌ nene do lisiheꞌ ogo do peleleseive.
MAT 12:21 Neꞌmine ogo neivo eveneꞌ ato atoꞌ neze eveneꞌne zuho olihe loloꞌ amave ingine eze emeni damenimuꞌ gili leleꞌmize lamineꞌ oloseive li gili eleꞌvoleꞌ igi gizebo minilisave lineꞌ.
MAT 12:22 Ne gamenela nene eveneꞌ ma sikalahuꞌ golosoliꞌmo lulouꞌ mino vele do like-do vele hize langoloꞌ o-davo gamazi lamive ma Izesuda eleꞌmizi ikevo do lamineꞌ o-davo aꞌmine ve nene gamazi laaꞌ idoꞌ vele ningaaꞌ ineꞌ.
MAT 12:23 Neꞌmine ogavo eveneꞌ mukiꞌ aꞌmidoꞌ minave ingine nene ningi gopo gaꞌine gili tiꞌ li laniꞌ: Zuda ve leliꞌ avotemoti guveꞌinesi ve naba Davidiꞌ aꞌvopilemoꞌ ezeloꞌ medelo guvelesi ve naba loloꞌ ilive laniꞌ ma nene nolihee.
MAT 12:24 Neꞌmine laniꞌza Halisaioꞌ monoꞌ laaꞌ ave ingine gili tiꞌ li laniꞌ: Oꞌve. Ve mene sikalahuꞌ goloso do nohulineꞌ nene aꞌmine sikalahuꞌ golosoliti guveꞌinesi ve naba Belezebuloꞌ neꞌmo amuzo imidotikovoꞌ do nohulineꞌ ve.
MAT 12:25 Neꞌmine likevo Izesuꞌ aza luꞌninguꞌ gamazi gili minaniꞌ nene ningo gelo tiꞌ lo lo-ngimineꞌ: Misubo mauꞌ aleve ingine nene hizi hoꞌli mini lovo hizilizaniꞌ nene mo eveneꞌ simeꞌ nikevo ebeꞌ nene gaꞌme pizeleseive. Idoꞌ ebeꞌ naba mautiꞌ nehe numuno ngomo mautiꞌ nehe eveneꞌ hamoꞌ zuho ingine hoꞌli vi eza ema vilizaniꞌ ingine nene eleꞌvoleꞌ igi minami gopoꞌnapa ilisave.
MAT 12:26 Idoꞌ Satani neꞌmo eze zuho ngimiselo do huli-diniko azasi eze zuhosi hoꞌli mini ngelami diꞌmozi vi gopoꞌ napa adine.
MAT 12:27 Idoꞌ nenikumuꞌ nene Belezebulodatiꞌ amuzo dosa sikalahuꞌ goloso nene ngimiselo do nohulive nilahe. Idoꞌ lengiꞌ zuholite sikalahuꞌ goloso ngimiseli hulaaꞌ aniꞌ ma nene amuzo zahidatiꞌ disa neve. Lingine engikumuꞌ nene Belezebulodatiꞌ amuzo disa sikalahuꞌ goloso nene ngimiseli nihulave li ma li-ngidadiniko lengiꞌ nene di gonitoꞌ i-lingidadine. Oꞌove. Ingine Belezebulodatiꞌ amuzo damaaꞌ aniꞌ neꞌmino nazasi ezelatiꞌ damo Oꞌmosolatikovoꞌ amuzo daaꞌ nouve.
MAT 12:28 Idoꞌ neꞌmine ogaꞌ nouvoniꞌ nene Oꞌmosoꞌmi Sikalahuꞌ neꞌmo neleꞌmize aka ivo sikalahuꞌ goloso ngimisele hulaaꞌ nooloniꞌ nene Oꞌmosoꞌmo eveneꞌveloꞌ gizebo ogo amuzoꞌve nene do sotoꞌ ogo nolengelebizive.
MAT 12:29 Eveneꞌ maliꞌmo ve ma gasava daaꞌ ive mineliveliꞌmi numuꞌveuꞌ dizo aꞌmine gasava daaꞌ iveꞌmo gizebo ogo minineꞌ initeꞌve ipeꞌ ogo dalineꞌ nene haza dizo ipeꞌ ogo damoloseive. Asi aꞌmine gasava daaꞌ ive nene gomuꞌ ivileꞌ ogo nalaꞌ do-mikosavoꞌ nene dizo initeꞌve ipeꞌ ogo daloseive. Aꞌmineꞌmine ogo naza nene Satani ivileꞌ ogosa eveneꞌ eitatiꞌ nene do nenita ogaꞌ nouve.
MAT 12:30 Idoꞌ ve ma ingine nenita giꞌmizi minamave nene neniꞌ lovo i nimaaꞌ ave nene nizave. Idoꞌ ve ma ingine nenikisi makaꞌ mino eveneꞌ do nenita amunive nene eveneꞌ ngimiseli di hutileꞌ i huli-ngidaaꞌ nave.
MAT 12:31 Nemuꞌ nene lo-lengemeloze. Gililo. Eveneꞌ ingine goloso initeꞌ ato atoꞌ igaꞌ aniꞌ neꞌmi lihime idoꞌ Oꞌmosomuꞌ idoꞌ evenekumuꞌ divi lediviꞌ igaꞌ aniꞌ neꞌmi lihime nene Oꞌmosoꞌmo ha hulo-ngedeleseiha Oꞌmosoꞌmi Sikalahuꞌ divi ledivika ma i-dilizaniꞌ nene lihimetine mo kekeꞌ hulo-lengedamoloseive.
MAT 12:32 Ee, ve ma ingine gamazi goloso li Oꞌmosolatiꞌ ve gihile neniꞌ divi ledivika li-nidilizaniꞌ lihime nene Oꞌmosoꞌmo ha hulo-ngedeleseiha gamazi goloso li Oꞌmosoꞌmi Sikalahuꞌ divi ledivika li-dilizaniꞌ lihime nene apase-ngedamivo alingeꞌ gamene nabauꞌ lihimeꞌine apase-ngedo goniꞌ o-ngedeli gameneuꞌ nesi ha minivo mine do vo mineleseive.
MAT 12:33 Eveneꞌ ingine za nene lamineꞌ nolihe goloso nolihe nene zaliꞌmi gihileꞌvelotiꞌ nene lubamu ningi gililisave. Nemuꞌ nene za maliꞌmo goloso nolineꞌ nene gihileꞌvesi goloso mineleseive. Idoꞌ za maliꞌmo lamineꞌ nolineꞌ nene gihileꞌvesi lamineꞌ mineleseive. Idoꞌ eveneliti monovo nene aꞌmineꞌmine ogo ningo gelelesane.
MAT 12:34 Lingine Sataliꞌmi izipahala zuho nene nizave. Eveneꞌ luꞌninguꞌ goꞌzikaniꞌ initeꞌ nene veꞌningutiꞌ li hulaaꞌ nanako lingine lutinguꞌ golososi minivo nizaniꞌ nete gamazi lamineꞌ nene ngeli mo lamilisave.
MAT 12:35 Eveneꞌ lamineꞌ neꞌmi lulouꞌ nene gamazi lamineliꞌmo vaiꞌ lo neinako neꞌmo nene monovo lamineꞌ do sotoꞌ ogaꞌ neive. Idoꞌ eveneꞌ goloso neꞌmi lulouꞌ nene gamazi goloso neꞌmo vaiꞌ lo neinako neꞌmo nene monovo goloso do sotoꞌ ogaꞌ neive.
MAT 12:36 Idoꞌ ma lo-lengemeloze. Gililo. Gamazi goloso gidini mukiꞌ nene haza gamazi nehe li gopo ma li nilizaniꞌ nene aꞌminemuꞌ Oꞌmosoꞌmo gamene nabaloꞌ goniꞌ o-ngedo longoꞌ o-ngedavo eveneꞌ mukiꞌ aꞌmine laniꞌ gamazi nene li sotoꞌ ikevo neꞌmi lihime ngemeleseive.
MAT 12:37 Geiꞌ gamazika lilineꞌ neꞌmo ogo molo ilineꞌ monovoka nene do sotoꞌ ogavo lamineꞌ o nolineꞌ nene ve lisiheꞌ ve lo Oꞌmosoꞌmo lo-gedeleseive. Idoꞌ goloso o nolineꞌ nene ve goloso ve lo-gedo lihime gemeleseive.
MAT 12:38 Neꞌmine lo lo-ngemavo monoꞌ monovo apizi ngimaaꞌ ave idoꞌ Halisaioꞌ monoꞌ laaꞌ ave linge ingine gamazi tiꞌ li li-imaniꞌ: Tisazo, gaza Oꞌmosoꞌmo amuzo gimineꞌ nene lelebizo atoliꞌmine suno ma do sotoꞌ oganivo ningelone.
MAT 12:39 Likevo Izesuꞌ aza tiꞌ lo lo-ngimineꞌ: Mene gameneloꞌ nizave lingine eveneꞌ golosovoꞌ mini veneꞌ ma vaꞌningine huli ve gohi maloꞌ vi lihime daaꞌ naniꞌ neꞌmine igi Oꞌmosotine huli lihime daaꞌ nave. Lingine nenikumuꞌ atoliꞌmine suno do sotoꞌ ogo Oꞌmosoꞌmo amuzo nimineꞌ nene lengelebizelongumuꞌ nilaniꞌza ma lengelebizamolosuve. Oꞌmosoꞌmo gozopoꞌ eze veletiꞌ gamazi lo sotoꞌ ogaꞌ ive Zonada initeꞌ do sotoꞌ ogo amuzoꞌve ngelebizineꞌ neꞌmine initeꞌ ma nenita sotoꞌ ogavo nevoꞌ ningilisave.
MAT 12:40 Aꞌmine ningilizaniꞌ initeꞌ nene neꞌmino neive: Zonaꞌni nene alahaꞌ nabaliꞌmo do mikileꞌ ogavo neꞌmi gatunouꞌ gamene sitohamo minineꞌ neꞌmino Oꞌmosolatiꞌ ve gihile naza nene misuboꞌmi lulouꞌ gamene sitohamo minelesuve.
MAT 12:41 Idoꞌ Nineve aleve ingine Zonaꞌ monoꞌ gamazi lo-ngimineꞌ nene gilii luꞌine di velepeꞌ izaniꞌza lingine giliꞌ nalo. Naza Zonaꞌni ivileꞌ ogo minuve mene ogo lengiꞌ vovotinguꞌ mela sotoꞌ ogo mino gamazi lo-lingimuvodoꞌ nene gili lutine di velepeꞌ izamanako gamene nabala nene Nineve aleve nete oti lengiꞌ lihimetine li sotoꞌ i-lingidi gonitoꞌ lengeleꞌmize milalisave.
MAT 12:42 Idoꞌ guvelesi veneꞌ naba aza emala misubo monovo liginela gizebo o minineꞌ misubo Seba nene hulo avotemoti guveꞌinesi ve naba Solomoniꞌ laaꞌ ineꞌ gamazi lamineꞌ nene gelelesa aka haꞌna haꞌna goloso aniꞌza neniꞌ nene Solomoniꞌni ivileꞌ ogo mino mela lengiꞌ vovotinguꞌ sotoꞌ ogo mino gamazi lamineꞌ noluvoniꞌ nene lingine gilisaꞌmave. Nemuꞌ nene gamene nabala aꞌmine guvelesi veneꞌ naba neꞌmo nene oto lihimetine lo sotoꞌ ogo goniꞌ o-lengedeleseive.
MAT 12:43 Sikalahuꞌ goloso maliꞌmo ve maliꞌmi lulouꞌ miningutiꞌ hulo-do vilineꞌ nene mine gelo minelineꞌ ebekumuꞌ nene ebeꞌ gokota visetoꞌ voloseive. Viseꞌ ilineꞌza ma ningamilineꞌ nene
MAT 12:44 tiꞌ lo loloseive: Naza ganaꞌ hulo uvoniꞌ numuꞌnela tineꞌ molo volove. Neꞌmine lo tineꞌ molo ogo ningelineꞌ nene pipiaꞌ gisi di lisiheꞌ ikeniꞌ neiha aꞌminguꞌ eveneꞌ ma ingamaniꞌ neivo ningeleseive.
MAT 12:45 Ningo gohi vo sikalahuꞌ goloso seveni eze ivileꞌ igi goloso naba gehepeve minaniꞌ nene ngeleꞌmizo ogavo aꞌminguꞌ dizi aꞌmine veꞌmi lulo nene ingine numuꞌine loloꞌ ogavo minilizaniꞌ nene gomuꞌ aꞌmine ve minaaꞌ ineꞌ nesi ivileꞌ ogosa goloso nabaloꞌ mine molo mineleseive. Idoꞌ neꞌmine monovo nene lingine ve goloso idise nizaniꞌ aleve lengita sotoꞌ oloseive losa noluve.
MAT 12:46 Izesuꞌ aza di geseꞌ ave mukiꞌ nene gamazi ha lo-ngemo neivo izeleho idoꞌ akunolo zuho ingine gamazi li-imilisa igi heta oti minaniꞌ.
MAT 12:47 Igi oti nizavo ve maliꞌmo tiꞌ lo lo-imineꞌ: Gelezo. Izaho idoꞌ nakuna zuho ingine gamazi lo-gemelone li heta home igi oti nizave.
MAT 12:48 Neꞌmine lavo Izesuꞌ tiꞌ lo lo-imineꞌ: Izeꞌnehinemukisi idoꞌ nakuꞌnemotinemukisi nolabe. Nemuꞌ naza lolove.
MAT 12:49 Neꞌmine lo eꞌmeti monaniꞌ alevela nene ana hisuꞌ noogo tiꞌ lo lineꞌ: Izeꞌnemote nakuꞌnemote nene mene nizaniꞌ ve. Nene nanitekumuꞌ noluve. Okulumokuꞌ meꞌnehi luloloꞌ igi mili igaꞌ nave engiꞌ nene izeꞌnemote nakuꞌnemote ne nizaniꞌ nenako nemuꞌ nene noluve.
MAT 13:1 Nelotiꞌ aꞌmine gameneuꞌ nene Izesuꞌ aza numuno nene hulo nGalilaia noso ohuno gahevela nene lemo vo mitoꞌ minineꞌ.
MAT 13:2 Aꞌmida nene eveneꞌ vaiꞌ goloso di nubo adiꞌmo sipiuꞌ dizo mitoꞌ minavo eveneꞌ mukiꞌ ingine noso gahevela oti minaniꞌ.
MAT 13:3 Nizavo Izesuꞌ aza initeꞌ mukikumuꞌ nene aneza gamaziutiꞌ lo-ngemo minineꞌ. Lo-ngemo mino aneza gamazi ma tiꞌ lo lineꞌ: Lingine giliꞌnalo. Ve ma zuho initeꞌ tileꞌ ogaꞌ iveliꞌmo zuho initeꞌ tileꞌ olosa vineꞌ.
MAT 13:4 Vo tileꞌ oꞌmo novivo zuho initeꞌ linge ma nene akaloꞌ diꞌmozikevo nama nete igi di naniꞌ.
MAT 13:5 Idoꞌ linge ma nene gehedoꞌ misubo naba minamidoꞌ diꞌmozi misubo nene naba nomineꞌ neꞌmo zuho initeꞌ nene liteꞌ li gala hoꞌli dizaniꞌza
MAT 13:6 hoꞌ nene dizo amuzo molo lavo luhive vaiꞌ damaniꞌ nenako neꞌmo gulugulu izaniꞌ.
MAT 13:7 Idoꞌ ma nene gasava guvise huki hulikevo luhive ha minidoꞌ diꞌmozi gala hoꞌli dizaniꞌza gasava guvise neꞌmo dizo molo-ngidineꞌ.
MAT 13:8 Neꞌmine aniꞌza linge ma misubo laminekuꞌ diꞌmozaniꞌ nete nene gala hoꞌli dizi gihile izaniꞌ nene hamo hamolite vanu hadeti (100) idoꞌ sigisiti (60) idoꞌ teoti (30) neꞌmine iziꞌmi vaniꞌ.
MAT 13:9 Gatine ngoloꞌ live ma nii ma nene gili lamineꞌ ilo.
MAT 13:10 Neꞌmine ogavo alingeꞌ izipahala zuho ingine ezela vi tiꞌ li longoꞌ i-daniꞌ: Eveneꞌ initekumuꞌ lo-ngemelesa aneza gamaziutiꞌ lo-ngemaaꞌ naineꞌ nene nanitekumuꞌ lo-ngemaaꞌ nane.
MAT 13:11 Neꞌmine likevo Izesuꞌ tiꞌ lo lo-ngimineꞌ: Okulumokuꞌ minive Oꞌmoso neꞌmo gizebo o-ledelingumuꞌ sunoꞌ gamazi nene lengiꞌ ha gililisave lavo lo sotoꞌ o-lengemaaꞌ nouvoniꞌza eveneꞌ linge mala nene gililizave lamive.
MAT 13:12 Idoꞌ nanimuꞌ ve. Ve ma ingine monoꞌ ma di nilizaniꞌ nene Oꞌmosoꞌmo gohi ma ngemavo di vaiꞌ li di minilisave. Idoꞌ monoꞌ ma di minamilizave nene engita monoꞌ ngomo ma nolineꞌ nene aꞌminesi gohi ipeꞌ ogo do voloseive.
MAT 13:13 Nemuꞌ nene ingine ningii ningi guni isaꞌmanako idoꞌ gilii gili guni isaꞌmanako nemuꞌ nene naza aneza gamazivoꞌ nene lo-ngemaaꞌ nouve.
MAT 13:14 Idoꞌ neꞌmo nene Oꞌmosoꞌmi veletiꞌ gamazi lo sotoꞌ ogaꞌ ive polohete Isaiaꞌni Oꞌmosoꞌmo tiꞌ lo lo-imineꞌ gamazi lineꞌ ma nene engitoꞌ vo gihile izave: Gatinedunuꞌ nene ha gililisaniꞌza gili vevesamilizadoꞌ o neive. Idoꞌ vetinedunuꞌ nene ningaaꞌni ha ningilisaha initeꞌ ma ningamilizadoꞌ o neive.
MAT 13:15 Neꞌmine losa imineꞌ molo Isaiaꞌni tiꞌ lo lo-imineꞌ: Idoꞌ mene aleve nene veꞌine liko gaꞌine ngi lo luꞌine hize tile vineꞌ nizave. Neꞌmo nene veꞌinedunuꞌ initeꞌ ma ningisaꞌmave. Idoꞌ gaꞌinedunuꞌ gamazi ma gilisaꞌmave. Idoꞌ luꞌinedunuꞌ gamazi gili hehe lisaꞌmave. Ingine nene neꞌmine amadiniko luꞌine di velepeꞌ izikevo ha do lamineꞌ o-ngiduvodine.
MAT 13:16 Gomuꞌ polohete mukiꞌ minaniꞌ netesi idoꞌ monoꞌve lisiheꞌ lamineꞌ mukiꞌ netesi ingine neniꞌ ogo molo nouvoniꞌ initeꞌ idise lingine nininganiꞌ memuꞌ nene ningelobo li gilaniꞌza ma ningamaniꞌ ve. Idoꞌ laaꞌ nouvoniꞌ gamazi idise lingine gatinedunuꞌ nigilaniꞌ nene gelelobo li minaaꞌ aniꞌza gilamaniꞌ ve. Nemuꞌ nene aꞌmine ningi gili nizaniꞌ initeꞌ nene Oꞌmosoꞌmo initeꞌ gihile nene lengeme neize. Longolize izi minilo.
MAT 13:18 Nemuꞌ nene aneza gamazi zuho initeꞌ tileꞌ ineꞌ neꞌmi monovo ma nene mene gililo.
MAT 13:19 Ve ma zuho initeꞌ tileꞌ ogavo linge ma akaloꞌ diꞌmozave luvoniꞌ maꞌmi monovo nene neꞌmino neive: Oꞌmosoꞌmo gizebo o-ledeli gamazi lamineꞌ nene gilii gili lamineꞌ amave engitatiꞌ nene goloso meleho aza ogo Oꞌmosoꞌmo eveneꞌ luꞌninguꞌ zuhoꞌ ineꞌ gamazi nene do vaaꞌ neive.
MAT 13:20 Idoꞌ zuho initeꞌ linge ma gehedoꞌ diꞌmozave luvoniꞌ maꞌmi monovo nene neꞌmino neive: Eveneꞌ ma ingine Oꞌmosoꞌmo gamaziꞌve tileꞌ ineꞌ nene gilii liteꞌ li gili laniteꞌ igi di goꞌzaaꞌ naha
MAT 13:21 aꞌmine gamazi neꞌmo luꞌninguꞌ luhise do minelidoꞌ mini mili minamavo gamene haꞌnamuꞌ gili di minisaꞌmave. Idoꞌ gamene haꞌnamuꞌ gili di minisaꞌmaniꞌ nene ingine aꞌmine gamazi nene gili-nidavo neꞌmo engita geni sotoꞌ o ngemelihe goboni malaꞌ malaꞌ ngemelihe. Ineꞌ nene geti hulaaꞌ nave.
MAT 13:22 Idoꞌ zuho initeꞌ linge ma nene gasava guviseuꞌ diꞌmozi gala hoꞌli dizaniꞌza gasava guvise goloso neꞌmo molo hite-ngidineꞌ nene eveneꞌ ma ingine Oꞌmosoꞌmi gamazi nene mo gili di goꞌzaniꞌza okoꞌineꞌmi initekumuꞌ gaꞌine aꞌmidokovoꞌ gili minaaꞌ idoꞌ monimuꞌ ngumo hilivo minaaꞌ aniꞌ neꞌmo dizo Oꞌmosoꞌmi gamazi inginela lemo minineꞌ nene molo hite-davo inginela dizo gihile izamaaꞌ neive.
MAT 13:23 Idoꞌ zuho initeꞌ linge ma misubo laminekuꞌ diꞌmozave luvoniꞌ ma nene eveneꞌ malite Oꞌmosoꞌmo gamazi tileꞌ ineꞌ nene gilii gili vevesi di minave engita nene gihile izaaꞌ neive. Ee, gihile hamototiꞌ gihile vanu hadeti (100) izaaꞌ neineꞌ neꞌmino ve malitida nene vauve goloso elosa izaaꞌ neive. Idoꞌ zuho niteꞌ hamototiꞌ gihile sigisiti (60) izaaꞌ neineꞌ neꞌmino ve mala nene vaiꞌ goloso izaaꞌ neive. Idoꞌ zuho niteꞌ hamototiꞌ gihile teoti (30) izaaꞌ neineꞌ neꞌmino ve mala nene mukiꞌ izaaꞌ neive.
MAT 13:24 Neꞌmine lo Izesuꞌ aza aneza gamazi gohi ma lo-ngimineꞌ nene neꞌmine lo lo-ngimineꞌ: Okulumokuꞌ miniveꞌmo evenetoꞌ gizebo ogaꞌ ineꞌ neꞌmi monovo nene ve maliꞌmo miꞌveuꞌ viti gihile lamineꞌ nene zuhoꞌ ogo neloꞌ gizebo ogaꞌ neineꞌ neꞌminosa nene neive.
MAT 13:25 Gamene ma holukaꞌ mine melehosi idoꞌ eze zuhosi ingine ingi hilikevo lovo o emaaꞌ iveliꞌmo ogo viti gele vineꞌ guvise goloso nene viti zuhoꞌ inguꞌ nene tileꞌ oꞌmo voloseive.
MAT 13:26 Neꞌmine ogavosa alingeꞌ viti nene dizo gihile izelesa neivosa viti gele vineꞌ guvise masi nene aꞌminguꞌ golo dizo sotoꞌ ineꞌ.
MAT 13:27 Neꞌmine ogavo agove izipe ingine mine melehine vi tiꞌ li li-imaniꞌ: Guvekasi ve gaza mingauꞌ nene viti laminekovoꞌ ma zuhoꞌ aineꞌ ma nene aꞌminguꞌ viti gele vineꞌ guvise goloso masi nene dizako nadosa dizive.
MAT 13:28 Likevo mine meleho tiꞌ lo lo-ngimineꞌ: Lovo vete maliꞌmo nene zuhoꞌ o noloseive. Neꞌmine lavo agove izipe ingine tiꞌ li li-imaniꞌ: Nemuꞌ nene gaza aꞌmine guvise goloso nene leliꞌ kiselilizave losa gele nabe.
MAT 13:29 Neꞌmine likevo aza tiꞌ lo lo-ngimineꞌ: Lingine viti gele vineꞌ guvise nene nokiselube li vitisi kiselikelizanako nemuꞌ oꞌve noluve.
MAT 13:30 Nemuꞌ nene aꞌmine guvise goloso nesi makaꞌ dizi nizavo viti hukiliza gamene nene alitelive. Viti hukaaꞌ gamene alitelineꞌ nene viti hukaaꞌ ave tiꞌ lo lo-ngedelesuve: Gomuꞌ nene guvise goloso nene olokuꞌ gizeloningumuꞌ huki di goꞌno izi atoꞌ di nubo i-ngidi alingeꞌ vitila nene huki di vi neniꞌ mino molo ogaꞌ uvoda milalizave lolosuve.
MAT 13:31 Idoꞌ Izesuꞌ aza aneza gamazi gohi ma tiꞌ lo lo-ngimineꞌ: Ve maliꞌmo miꞌveuꞌ nabaꞌmine sakaveꞌ zuho hamoꞌ ma do zuhoꞌ ogavo gala hoꞌlo dizo naba ilineꞌ neꞌmino Oꞌmosoꞌmi gizebouꞌ vi hilaliza aleve engiꞌ neti muliseꞌine nene vo naba oloseive.
MAT 13:32 Aꞌmine zuho initeꞌ nene ngomo lasolo mino zuho initeꞌ ato atoꞌ mukiꞌ nene ngivileꞌ ogo ngomo minineꞌza zuhoꞌ ogavo gala hoꞌlo dizo minguꞌ zuhoꞌ igaꞌ naniꞌ initeꞌ mukiꞌ nene ngivileꞌ ogo initeꞌ naba loloꞌ ogo za neꞌmine mineleseive. Neꞌmine ogavo namalite igi aꞌmine initeliꞌmi aꞌnavauꞌ nene numuno gizi ingaaꞌ nave. Aꞌmineꞌmine igi Oꞌmosoꞌmi evenele zuho nene vi naba ilisave.
MAT 13:33 Idoꞌ Oꞌmosoꞌmo gizebo o-ngedeli alevetinguꞌ nene monoꞌ vo naba ilingumuꞌ aneza gamazi gohi ma tiꞌ lo lo-ngimineꞌ: Gizebo o-ngedelineꞌ alevetinguꞌ Okulumokuꞌ minive Oꞌmosoꞌmo gono daaꞌ neineꞌ nene beleti do lulu izaaꞌ ineꞌ initeꞌ zisiti neꞌmine neive. Veneꞌ maliꞌmo beleti loloꞌ olosa palauvaꞌ beki ngomo sitohamo nene do nososi do gopo ogo aꞌminguꞌ zisiti ngomosi do gopo ogavo neꞌmo beleti nene lulu izo naba ineꞌ.
MAT 13:34 Eveneꞌ mukiꞌ di geseꞌ aniꞌ gameneuꞌ Izesuꞌ aza initeꞌ mukiꞌ lo-ngemelesa ineꞌ nene aneza gamaziutikovoꞌ lo-ngimineꞌ.
MAT 13:35 Neꞌmino lo-ngimineꞌ neꞌmo nene Oꞌmosoꞌmi veletiꞌ gamazi lo sotoꞌ ogaꞌ ive maliꞌmo gamazi ma tiꞌ lo lineꞌ ma nene gihile izineꞌ: Veꞌneutiꞌ nene aneza gamaziutikovoꞌ nolo-ngemo gozopoꞌ akaꞌmila misubo olihe sotoꞌ amivo haleko minineꞌ gamazi nene lo soto sotoꞌ olosuve.
MAT 13:36 Nelotiꞌ nene Izesuꞌ aza di geseꞌ ave mukiꞌ nene hulo-ngedo numunguꞌ dizo minineꞌ. Neivo izipahala zuho ezela igi viti minguꞌ guvise goloso dizive lo aneza gamazi laineꞌ maꞌmi monovo ma lo ngoloꞌ lo lo-lemanivo gelelone li Izesuꞌni li-imaniꞌ.
MAT 13:37 Li-imikevo Izesuꞌ tiꞌ lo lo-ngimineꞌ: Eveneꞌ viti gihile zuhoꞌ ive nene Oꞌmosolatiꞌ ve gihile naza nene nouve.
MAT 13:38 Idoꞌ mine neve nene misubo mukikumuꞌ nene neive. Idoꞌ viti gihile lamineꞌ neve nene Oꞌmosoꞌmo gizebo inguꞌ mini mili minaniꞌ alevemuꞌ nene neive. Idoꞌ viti gele vineꞌ guvise goloso ve luvoniꞌ nene ve goloso Satanila mini mili minaniꞌ aleve nemuꞌ nene neive.
MAT 13:39 Idoꞌ lovo ve guvise goloso zuhoꞌ ive nene Satani nemuꞌ luve. Idoꞌ viti hukaaꞌ gamene alitelinguꞌ ve luvoniꞌ nene eveneꞌ misubouꞌ mini mili miniliza gamene osuꞌ lavo gamene naba alitelingumuꞌ nene luvoniꞌ ve. Idoꞌ viti hukilizave ve luvoniꞌ nene angelokumuꞌ luvoniꞌve.
MAT 13:40 Idoꞌ guvise goloso nene huki di nubo igi olokuꞌ gizilisave luvodiꞌmine ogo eveneꞌ misubouꞌ mini mili minilizaniꞌ gamene nene osuꞌ lavo gamene naba alitelinguꞌ nene neꞌmine ilisave.
MAT 13:41 Oꞌmosolatiꞌ ve gihile naza angeloꞌne zuho nene ngimiselekuvo ingine vi eveneꞌ neze gizeboloꞌ mini mili minanguꞌ nene eveneꞌ ngeleꞌmize goloso igaꞌ naniꞌ initeꞌ mukiꞌ nesi idoꞌ Oꞌmosoꞌmo lo hukineꞌ gamazi gili huli goloso initeꞌ daaꞌ ave mukiꞌ nesi nene ngeleꞌmizi vi di nubo i-ngidi
MAT 13:42 oloꞌ nabauꞌ huli-ngidilisave. Huli-ngidikevo aꞌminguꞌ nene mini agae agae li ive nama igi mulumo alumo gili veꞌine ingihi langoloꞌ igi minilisave.
MAT 13:43 Idoꞌ eveneꞌ lisiheꞌ lamineꞌ ingine nene meꞌnibo Oꞌmosoꞌmo gizebo o-ngidinguꞌ nene hoꞌ neꞌminisa labanaꞌ ili minilisave. Nemuꞌ nene eveneꞌ ma lingine gili nge li gilaaꞌ ave ma nii ma nene gililo.
MAT 13:44 Oꞌmosoꞌmi gizebouꞌ minaaꞌ nene lamineꞌ goloso neineꞌ nenako eveneꞌ ingine initeꞌ mataꞌine aꞌminemuꞌ huli aꞌminguꞌ vi hilalizaniꞌ monovo nene neꞌmino neive: Ve maliꞌmo meniꞌve dizo minineꞌ initeꞌ haleko misubo mauꞌ minineꞌ nene ningo do sotoꞌ ogo huloko olize izeꞌmo numuꞌvela tineꞌ molo vo initeꞌ mataꞌve nene meni do osuꞌ lo gohi tineꞌ molo ogo meniꞌve dizo minineꞌ initeꞌ haleko minineꞌ misubo maꞌmi melehine nene meni emo misubo do eita ogaꞌ neineꞌ neꞌminosa ne neive.
MAT 13:45 Idoꞌ ma nene Okulumokuꞌ miniveꞌmi gizebouꞌ minaaꞌ nene lamineꞌ goloso neineꞌ nenako initeꞌ mataꞌ mukiꞌ nene hulo osuꞌ lo aꞌminguꞌ vo holaaꞌ neꞌmi monovo nene neꞌmino neive: Ve ma situvaꞌ molaaꞌ ive maliꞌmo gonolise initeꞌ laminekumuꞌ viseꞌ oꞌmo moninguꞌ nene
MAT 13:46 viseꞌ oꞌmo monineꞌ initeꞌ mukiꞌ ngivileꞌ ogo lamineꞌ goloso mino meniꞌve nabaloꞌ goloso minineꞌ ma ningosa tineꞌ molo vo initeꞌ mataꞌve mukiꞌ nene meni do osuꞌ lo gohi tineꞌ molo ogo gonolise initeliꞌmi melehine nene meni emo aꞌmine initeꞌ do eita ineꞌ neꞌminosa ne neive.
MAT 13:47 Idoꞌ ma nene Okulumokuꞌ gizebo o miniveꞌmo aꞌmine gizebo o mininguꞌ vo holaloningumuꞌ eveneꞌ izeꞌ molo-ngedeli monovo nene neꞌmino neive: Ve ma alahaꞌ daaꞌ iveꞌmo alahaꞌ daaꞌ golalezeꞌ nene hulo nosouꞌ ogavo ato atoꞌ alahaꞌ nene aꞌminguꞌ dizi minaaꞌ nave.
MAT 13:48 Dizi mini vaiꞌ likevo alahaꞌ daaꞌ ive neꞌmo geleleheꞌ ogo hulo gahevela ogo mitoꞌ mino lamineta nene gizekaꞌ ogo gokuꞌ goꞌzo golosola do hulaaꞌ neineꞌ neꞌminosa ne neive.
MAT 13:49 Nemuꞌ nene eveneꞌ misubouko mini mili iliza gamene nene osuꞌ lavo gamene nabala sotoꞌ ilineꞌ initeꞌ nene neꞌminosa sotoꞌ oloseive: Angeloꞌ ingine igi eveneꞌ lisiheꞌ lamineliti vovoꞌninguꞌ eveneꞌ goloso miniꞌmi monaniꞌ nene izeꞌ mili huli atoꞌ i-ngidi
MAT 13:50 di vi oloꞌ nabauꞌ huli-ngidikevo aꞌminguꞌ nene veꞌine ingihi langoloꞌ igi agae agae li ive nama igi minilisave.
MAT 13:51 Nemuꞌ nene lingine initeꞌ mukiꞌ mene luvoniꞌ nemuꞌ mo gilikehe lo Izesuꞌ lavo izipahala zuho ingine tiꞌ li li-imaniꞌ: Ee, mo gelekune.
MAT 13:52 Neꞌmine likevo aza tiꞌ lo lo-ngimineꞌ: Nemuꞌ nene numuno meꞌninge ma initeꞌ milikangutiꞌ initeꞌ gosohokisi litehesi di sotoꞌ igi engiꞌ numuꞌninguꞌ minave ngimaaꞌ naniꞌ neꞌminisa linginesi monoꞌ monovo apizi ngimaaꞌ nave mukiꞌ nesi Okulumokuꞌ miniveꞌmo evenetoꞌ gizebo o-ngedeli monovomuꞌ gili vevesave mukiꞌ nene monoꞌ gosohokisi litehesi di sotoꞌ igi eveneꞌ apizi ngimilisave.
MAT 13:53 Izesuꞌ aza neꞌmino aneza gamazi mukiꞌ nene lo-ngemo osuꞌ lo aꞌmine ebeꞌ nene hulo
MAT 13:54 eiꞌ numuno ebeꞌve gihile Nasaletela vo hetelineꞌ. Vo hetelo aꞌmida veneꞌ vemohoꞌ nene monoꞌ numuꞌninguꞌ Oꞌmosoꞌmi gamazi nene lo-ngimineꞌ. Neꞌmine ogavo eveneꞌ mukiꞌ ingine voꞌine goloso vavo tiꞌ li laniꞌ: Neꞌmine manaꞌmine suno nesi idoꞌ gamazi nesi zaukotiꞌ do ave.
MAT 13:55 Aza ha kamuda maꞌmi gipele neive. Izeleho nene Maliaꞌ ve li-daaꞌ naniꞌ veneꞌ ne neive. Olo. Nakunolomote nene Zakobole Zosehele Simonile idoꞌ Zudale nene nizave.
MAT 13:56 Idoꞌ alunolo zuho nesi makaꞌ lelikisi mene none. Aza ha aꞌneꞌmine ve neineꞌ nenako nemuꞌ nene monoꞌ laaꞌ idoꞌ atoꞌ suno do sotoꞌ ogaꞌ neineꞌ monovo nene zalatiꞌ do ave. Do aniꞌ aka nene ma ningamuniko.
MAT 13:57 Neꞌmine li Izesuꞌnimuꞌ nene muluꞌninguꞌ goloso gilaniꞌza aza tiꞌ lo lo-ngimineꞌ: Oꞌmosoꞌmi veletiꞌ gamazi li sotoꞌ igaꞌ ave polohete engikumuꞌ nene eveneꞌ mukiꞌ gilavo dizisa minaaꞌ naha engiꞌ zuho gihile lamineꞌ netesi idoꞌ misuboꞌninguꞌ aleve netesi nene engikumuꞌ gilavo dizesaꞌmineꞌ neꞌminosa nazasi nouve lo lineꞌ.
MAT 13:58 Idoꞌ Izesuꞌ numuꞌve ebeꞌvelotiꞌ aleve ingine ezemuꞌ gili eleꞌvoleꞌ isaꞌmaniꞌ nenako nemuꞌ nene engita Oꞌmosoꞌmi amuzo do sotoꞌ ogo ato atoꞌ suno nene mukiꞌ do sotoꞌ osaꞌmineꞌ.
MAT 14:1 Aꞌmine gameneuꞌ nene Izesuꞌ guvele monivo guvelesi ve Helodeꞌ nene gilineꞌ.
MAT 14:2 Gelo gelekeleꞌ izipahala nene tiꞌ lo lo-ngimineꞌ: Mene ve nene monoꞌ noso holo-ngedaaꞌ ive Zohaneꞌ noloseive. Bele helekuvoniꞌ mautiꞌ otineꞌ neꞌmo ato atoꞌ suno daaꞌ amuzo nene ezela neivosa ato atoꞌ suno nene nodaloseive lineꞌ.
MAT 14:3 Neꞌmine lineꞌ nene hazamuꞌ lamive. Gomuꞌ galaꞌmuda vomine Helodeꞌ aza akunolo Hilipoꞌ elenaho Helodiaꞌni gumine daniꞌ. Gumine davo monoꞌ noso holo-ngedaaꞌ ive Zohaneꞌ neꞌmo akunaꞌmi elenahine daineꞌ nene lisiheꞌ amive lo Helodeꞌni lo-emeꞌmo vo minineꞌ. Neꞌmine lo lo-emeꞌmo vo minivo nemuꞌ Helodeꞌ aza Helodiaꞌnimuꞌ ogo aꞌmine Zohaneꞌni nene vi dalizave lo eveneꞌ ma ngimiselavo vi analoꞌ di nalava imi eleꞌmizi di vi nalaꞌ numunguꞌ huli-daniꞌ.
MAT 14:5 Helodeꞌ aza Zohaneꞌni bele helelesa gilineꞌza eveneꞌ nete Zohaneꞌnimuꞌ nene polohete neive li gili nizanako lo ehelele izavo hulo-mikineꞌ.
MAT 14:6 Neꞌmine ogavo neivo Helodeꞌ sotoꞌ ineꞌ gamene ogavo eiꞌ numunguꞌ di geseꞌ igi nosoꞌ niteꞌ ni nizavo eveneꞌ mukiꞌ neti veꞌnidoꞌ Helodiaꞌ aluvo neꞌmo denisi ineꞌ nene Helodeꞌ ningineꞌ umo goloso hilineꞌ.
MAT 14:7 Umo helavo aꞌmine alu neꞌmo initeꞌ ma gelelineꞌ initeꞌ nene ha emelesuve lo Oꞌmosoꞌmi veleloꞌ nolo hukuve lo lo hukineꞌ.
MAT 14:8 Neꞌmine lo lo hukavo alungo nene izeleho gala do lidoꞌ lidoꞌ ogo Helodeꞌni tiꞌ lo lo-imineꞌ: Monoꞌ noso holo-ngedaaꞌ ive Zohaneꞌ godolo nene giti lapeseuꞌ mili di nimilo.
MAT 14:9 Lavo guvelesi ve Helodeꞌ aza eii lo gelo agae lo gilineꞌza aza mo Oꞌmosoꞌmi velelokisi ezesi makaꞌ minaveti veꞌnidokisi gamazi lo huko lo neineꞌ ma nenako Zohaneꞌ godolo nene di di alo lo
MAT 14:10 eveneꞌ ngimiselavo vi nalaꞌ numunguꞌ luvono giti
MAT 14:11 godolo nene di igi alungo nene imikevo do vo izelehine imineꞌ.
MAT 14:12 Neꞌmine ikevo Zohaneꞌ izipahala zuho ingine okoꞌnoꞌve nene di vi galese izi-di Izesuꞌni vi li-imaniꞌ.
MAT 14:13 Li-imikevo gelo Helodeꞌ ezemuꞌ lineꞌ gamazi nesi mo gelo aꞌmine minineꞌ ebeꞌ nene hulo sipiuꞌ dizavo izipahala zuho aꞌminguꞌ eleꞌmizi vi angiseꞌinevoꞌ minilizada ebeꞌ gaꞌmeta vaniꞌ. Idoꞌ nivavo eveneꞌ mukiꞌ nemuꞌ gili taunitiꞌ taunitiꞌ misubouꞌ eꞌmeti vilida vi vi hukaniꞌ.
MAT 14:14 Neꞌmine ikevo Izesuꞌ aza aꞌmine ebeꞌ gaꞌmeta nene vo hetelo sipiutiꞌ lemo aꞌmida eveneꞌ vaiꞌ di geseꞌ igi nizavo ningo mulumoꞌine gelo engikutiꞌ initeꞌ ngisive nene do lamineꞌ o-ngidineꞌ.
MAT 14:15 Neꞌmine ogo neivo nivengaꞌ molavo izipahala zuho ingine Izesuꞌ neida igi tiꞌ li laniꞌ: Mene ebeꞌ nene eveneꞌ nizamaniꞌ hadiveloꞌ nonivo nivengaꞌ mo molaze. Eveneꞌ mukiꞌ mene vi avita minaniꞌ numuno ebekutiꞌ angiseꞌine naliza nosoꞌ niteꞌ meni hizilizangisi ngimisele hulozo.
MAT 14:16 Neꞌmine likevo Izesuꞌ tiꞌ lo lo-ngimineꞌ: Nanimuꞌ vilizave. Lengiꞌ nene nosoꞌ niteꞌ di ngimilevo.
MAT 14:17 Neꞌmine lo lo-ngemavo izipahala zuho ingine laniꞌ: Nosoꞌ niteꞌ lelita nene sikoni faefusi alahaꞌ sitakisi moda aꞌnevoꞌ neive.
MAT 14:18 Likevo aza lineꞌ: Nene di nouvoda alo.
MAT 14:19 Neꞌmine lo eveneꞌ nene guviseloꞌ mitoꞌ minilizave lo Izesuꞌ lavo li-ngidikevo minaniꞌ. Nizavo Izesuꞌ aza sikoni faef nesi alahaꞌ sitaꞌ nesi nene do Okulumotoꞌ vonuꞌ noogo Oꞌmoso opoꞌni lo aꞌmine nosoꞌ niteꞌ nene gito apilo izipahala zuho izeꞌ molo ngemavo eveneꞌ nene di moni ngimaniꞌ.
MAT 14:20 nGimikevo eveneꞌ mukitoꞌ ni gatuꞌine aniꞌ. Gatuꞌine ogavo izipahala zuho ingine lumo sama hulaniꞌ nene gosuvahaꞌ tuvelu (12) neꞌmine goꞌzi vaiꞌ laniꞌ.
MAT 14:21 Nosoꞌ niteꞌ naniꞌ nene vemohoꞌ faef tauseni (5,000) neꞌminelite naniꞌza veneꞌ izipe nene gatamune.
MAT 14:22 Idoꞌ eveneꞌ nene nosoꞌ niteꞌ ni osuꞌ likevo nelotiꞌ Izesuꞌ aza izipahala zuho nene sipiuꞌ dizi noso helala gomuꞌ nivilizave lo ngimiselo aza nene eveneꞌ mukiꞌ numuꞌnida ngimisele hulo huloꞌ ogo minineꞌ.
MAT 14:23 nGimisele hulo osuꞌ lo golola eikovoꞌ Oꞌmosola lolosa dizo vineꞌ. Eikovoꞌ dizo vo aꞌmida mino Oꞌmosola lo neivo litiꞌmuso izineꞌ.
MAT 14:24 Litiꞌmuso izavo izipahala zuho nene misubo huli hotoꞌ igi noso olusotoꞌ nivavo hepeꞌ naba neꞌmo veꞌnidatiꞌ ogo noso nene sipiloꞌ belekaꞌ belekaꞌ ivo viviꞌ viviꞌ igi minaniꞌ.
MAT 14:25 Neꞌmine iꞌmi nivavo goꞌ loꞌmo lomo nedengaꞌ fo kiloku he faef kiloku he nela nene Izesuꞌ aza noso avileloꞌ lise lise nizada aniꞌ.
MAT 14:26 Nizada noso avileloꞌ navo ningi golise goloso gili mene holoso neive li ngehelele izavo gekeꞌ laniꞌ.
MAT 14:27 Gekeꞌ laniꞌza aꞌmidoꞌ geto Izesuꞌ gamazi lo-ngemo tiꞌ lo lo-ngimineꞌ: Neniꞌ ma ne nouze. Lengehelele izamivo mini ngi li minilo.
MAT 14:28 Neꞌmine lavo Petoloꞌ tiꞌ lo lineꞌ: Guvekasi ve gaza nene mo geiꞌ lamineꞌ noo ma nene lanivo nosoloꞌ nene ogo geiꞌ nanida alove.
MAT 14:29 Neꞌmine lo lavo anevo lo Izesuꞌ lavo Petoloꞌ aza sipiutiꞌ lemo apiꞌ ogo noso avileloꞌ lise lise Izesuꞌ neida volosa ineꞌ.
MAT 14:30 Volosa ineꞌza novo hepeliꞌmo noso bilineꞌ nene ningo vono vavo golise gilineꞌ neꞌmo nosoliꞌmo do suꞌmize-delesa ineꞌ. Neꞌmine ogavo Petoloꞌ asi lo tiꞌ lo lineꞌ: Guvekasi ve do nuꞌ izevo.
MAT 14:31 Lavo Izesuꞌ geto ogo ana hulo do hozi nolo-do tiꞌ lo lo-imineꞌ: Gaza nenikumuꞌ gele eleꞌvoleꞌ amo nosoꞌmo nebelelihe nebelamilihe lo nanimuꞌ gaka sitaꞌ gelane.
MAT 14:32 Neꞌmine igi sipiuꞌ dizikesivo hepeꞌ nene zou lo matineꞌ.
MAT 14:33 Hepeꞌ nene matavo sipiuꞌ minave ingine opoꞌni li gubiꞌ izi imi laminetoꞌ geiꞌ nene mo Oꞌmosoꞌmi gipele nane li li-daniꞌ ve.
MAT 14:34 Neꞌmine igi noso helala vii nGenesalete misubouko heteli sipiutiꞌ limaniꞌ.
MAT 14:35 Aꞌmida nene evenelite Izesuꞌni nene ningi guni aniꞌ. Neꞌmine igi aꞌmidotiꞌ numudoꞌ numudoꞌ gamazi hulikevo eveneꞌ initeꞌ gizi dave nene do lamineꞌ o-ngedelive li ngeleꞌmizi ezela igi
MAT 14:36 amuzo mili tiꞌ li li-imaniꞌ: Okongaloꞌ initeꞌ lolovolokovoꞌ nevone di gililizadotikisi nene lamineꞌ ilizaniꞌ nenako nemuꞌ nene gele ngemanivo di gililizave li laniꞌ. Idoꞌ okoꞌnoloꞌ initeꞌ lolovoloꞌ di gilave mukiꞌ nene mo lamineꞌ aniꞌ ve.
MAT 15:1 Nelotiꞌ nene Halisaioꞌ monoꞌ laaꞌ ave linge masi avoꞌningelite laniꞌ monoꞌ apizi ngimaaꞌ ave linge masi Zelusalemi numudatiꞌ Izesuꞌ neida aniꞌ. Igi tiꞌ li longoꞌ i-daniꞌ:
MAT 15:2 Geiꞌ izipaha zuho ingine nosoꞌ niteꞌ nalisa aꞌine noso izamaaꞌ naniꞌ nene avotemote eꞌmetilo li li-limaaꞌ aniꞌ gamazi nene avutoꞌ igaꞌ naniꞌ nene neꞌmine amilizanako nanimuꞌ avutoꞌ igaꞌ nave.
MAT 15:3 Likevo Izesuꞌ aza tiꞌ lo lo-ngimineꞌ: Idoꞌ langisetine avotemotidatiꞌ monovote nene do minelone li Oꞌmosoꞌmo louꞌ gamazi lo huko-lidineꞌ nene avutoꞌ igaꞌ naniꞌ nene nanimuꞌ nave.
MAT 15:4 Neꞌmine noluvoniꞌ mene lingine tiꞌ igaꞌ nangumuꞌ noluve: Oꞌmosoꞌmo lingine izetingine metinginemuꞌ gilavo dizavo gelekeleꞌ lamineꞌ i-ngidivoꞌ minilo. Idoꞌ ma nene ve maliꞌmo izelehingi melehingi gamazi goloso lo-ngedelineꞌ nene bilikevo helelive lo lineꞌ.
MAT 15:5 Lineꞌza lingine tiꞌ li laaꞌ nave: Ve maliꞌmo izelehinemupe melehinemupe initeꞌ molo nouvongutiꞌ nene ma gimuvodiba aꞌmine initeꞌ nene mo Oꞌmosomuꞌ ogo molo nouvonako geiꞌ gemamolosuve lo lo-emelineꞌ nene aꞌmine lineꞌ initeꞌ nene izele mele ngemamilineꞌ nene lamineꞌ ve. Neꞌmine laaꞌ naniꞌ nene izelehine melehinemuꞌ gelekeleꞌ lamineꞌ amilineꞌ aka nene siꞌzi-daaꞌ nave. Aꞌneꞌmine aniꞌ nene avotingidatiꞌ di minaniꞌ gamazi neꞌmo Oꞌmosoꞌmo lineꞌ gamazi neve haza niteꞌ loloꞌ ogaꞌ neive.
MAT 15:7 Lingine lutine goloso o vineꞌ nene di halekisa eveneꞌ lamineꞌ gili monaaꞌ nave, polohete Isaiaꞌ Oꞌmosoꞌmi veletiꞌ gamazi tiꞌ lo lineꞌ ma nene lengikumuꞌ lamineꞌ laniꞌ neive:
MAT 15:8 Mene aleve ingine veꞌine avilelotiꞌ nopoꞌni li neniꞌ gulive di hozi laaꞌ naniꞌ nene luꞌine nezela milamavo luꞌineꞌve nene hotoꞌ minaaꞌ neive.
MAT 15:9 Haza eveneliti gamazi nene neze gamazi gidini loloꞌ ogavo li-ngimi ngimiꞌ igi minaaꞌ naniꞌ nenako nenikumuꞌ nopoꞌni laaꞌ naniꞌ nene gopo hazamuꞌ laaꞌ nave.
MAT 15:10 Neꞌmine lo Izesuꞌ aza eveneꞌ mukiꞌ nene asi lo-ngemo tiꞌ lo lo-ngimineꞌ:
MAT 15:11 Lingine initeꞌ ma nikevo neꞌmo eveneꞌ luꞌine do goloso o-ngedaaꞌ neive li gilaaꞌ nahe. Gamazi mene gilii gili nge li gililo. Eveneꞌ luꞌine do goloso o-ngedaaꞌ neineꞌ initeꞌ nene veꞌninguꞌ mili naaꞌ naniꞌ initeꞌ nene nevoba luꞌningutiꞌ dizo veꞌningutiꞌ sotoꞌ ogo leme heta ogaꞌ neineꞌ initeꞌ neꞌmo nene luꞌine do goloso o-ngedaaꞌ neive.
MAT 15:12 Neꞌmine lavo alingeꞌ nene izipahala zuho ingine Izesuꞌ neida igi tiꞌ li longoꞌ i-daniꞌ: Halisaioꞌ monoꞌ laaꞌ ave ingine geiꞌ gamazi laningumuꞌ muluꞌninguꞌ goloso ogavo upuhoꞌ aniꞌ nene ningabe.
MAT 15:13 Neꞌmine likevo Izesuꞌ aza gamazi tiꞌ lo lo-ngimineꞌ: Okulumokuꞌ meꞌnehi evenele nene eiꞌ miꞌve neꞌmine nizanako aza meꞌneho zuhoꞌ amivo aꞌmine miꞌveuꞌ gopo dizaniꞌ initeꞌ mukiꞌ nene kiselo do huloloseive.
MAT 15:14 Aꞌmine Halisaioꞌ monoꞌ laaꞌ ave nene ningi mati-ngimikilo. Minilizaze. Ingine eveneꞌ monoꞌ akaloꞌ ngeleꞌmizi vaaꞌ ave nizaniꞌza angiseꞌine aka ningi guni isaꞌmanako veꞌine likivete veꞌine likive ma nene aka ngelebizi vaniꞌ gelave. Nemuꞌ nene vele likive maliꞌmo vele likive ma eleꞌmizo vilineꞌ nene sitatoꞌ galeseuꞌ veleheꞌ limilisasive.
MAT 15:15 Neꞌmine lavo Petoloꞌ tiꞌ lo lo-imineꞌ: Gaza gamazi monovoꞌve haleko minineꞌ gepeꞌ gamazi neꞌmine laineꞌ ma nene lo ngoloꞌ lo lo-lemevo.
MAT 15:16 Neꞌmine lavo Izesuꞌ tiꞌ lo lineꞌ: Izipahaꞌne zuho lingine gili nilisave lo giluvoniꞌza linginesi olihe gili guni amahe.
MAT 15:17 Initeꞌ mukiꞌ nene veꞌninguꞌ nikevo gatuꞌninguꞌ lemo ise galeseuꞌ vaaꞌ neineꞌ nene lingine ningi gilamahe.
MAT 15:18 Ne neineꞌza veꞌningutiꞌ leme heta ogaꞌ neineꞌ initeꞌ nene luꞌningutiꞌ dizo ogaꞌ neinako neꞌmo nene eveneꞌ luꞌine do goloso o-ngedaaꞌ neive.
MAT 15:19 Initeꞌ luꞌningutiꞌ dizaaꞌ neineꞌ initeꞌ nene neꞌmino neive: Gaꞌine goloso gilaaꞌ, eveneꞌ ngebele helaaꞌ, veneꞌ vemohoꞌ alungo umungive gopo ingi monaaꞌ, gumine damine ogaꞌ, soza sakupo gamazi laaꞌ idoꞌ eveneꞌ dovo ledevoꞌ ogo ngemenga laaꞌ monovo ne neive.
MAT 15:20 Mene initeꞌ mukiꞌ neꞌmo nene eveneꞌ luꞌine do goloso o-ngedaaꞌ neive. Eveneꞌ aꞌine noso izami nosoꞌ niteꞌ gopo naniꞌ neꞌmo nene luꞌine do goloso o-ngedesaꞌmive.
MAT 15:21 Neꞌmine ogo Izesuꞌ aza aꞌmine minineꞌ misubo nene hulo vo Tilo numuno ebeꞌ idoꞌ Sidoni numuno ebeꞌ neti gahevela minineꞌ misubouꞌ volosa vineꞌ.
MAT 15:22 Aꞌmine numuno ebeꞌ gahevelatiꞌ Zuda veneꞌ minamineꞌ Kanaha veneꞌ maliꞌmo ogo gamazi nabatiꞌ tiꞌ lo lo-imineꞌ: Guvekasi ve, gozopoꞌ guvelesi ve naba Davidiꞌ aꞌvopilemoꞌ ezeloꞌ medelo minanive make, gaza mulumoꞌne ningevo. Alune nene sikalahuꞌ goloso lulouko neivo mo goloso ogo neive.
MAT 15:23 Neꞌmine lineꞌza aꞌmine gamaziꞌveloꞌ nene Izesuꞌ gamazi hamokisi mo lo-emamineꞌ. Neꞌmine ogavo izipahala zuho ingine ezela igi tiꞌ li laniꞌ: Veneꞌ mene gamazi loꞌmo loꞌmo leꞌmeto ogo minineꞌ nenako nemuꞌ imiselo huliline lo nogilune.
MAT 15:24 Likevo Izesuꞌ tiꞌ lo lineꞌ: Naza nene nimiselive nene Isilaeleꞌ aleve sipisipi neꞌmine mini vi tolovo igi moni minaniꞌ engita vo gono daline lo nimiselavo uvoniꞌ nouve.
MAT 15:25 Neꞌmine lineꞌza veneꞌ aza ogo gizeneuꞌ golo hizo ongo tiꞌ lo lineꞌ: Guvekasi ve, ogo gamaziꞌne gelo hize apase-nedelibo.
MAT 15:26 Neꞌmine lavo Izesuꞌ aza tiꞌ lo lineꞌ: Izipeliti nosoꞌ niteꞌ ipeꞌ ogo gulo hulo-ngemaaꞌ nene edamive. Oꞌmosoꞌmi izipahala zuho Isilaeleꞌ aleve do lamineꞌ o-ngedaaꞌ nouvoniꞌ nene heta atoꞌ ve geita oloniꞌ nene aꞌmineꞌmine ogo edamilihe lo gele nouve.
MAT 15:27 Lavo veneꞌ aza tiꞌ lo lo-imineꞌ: Guvekasi ve, izipeliti nosoꞌ niteꞌine ipeꞌ ogo gulo hulo ngemaaꞌ nene edamive lo lamineꞌ laineꞌza meꞌninge nosoꞌ niteꞌ naaꞌ aniꞌ holomolotiꞌ lana doꞌmozineꞌ nene gulo nete ha naaꞌ nave. Nemuꞌ nene heta atoꞌ veneꞌ nenikisi nene gele nemelineꞌ nene ha lamineꞌ oloseive.
MAT 15:28 Neꞌmine lavo gelo Izesuꞌ tiꞌ lo lo-imineꞌ: Aizo, veneꞌ mene gaza gele eleꞌvoleꞌ aineka nene mo gele eleꞌvoleꞌ ogo gelane. Nemuꞌ nene gele eleꞌvoleꞌ aineꞌ initeka nene ha sotoꞌ o gemeleseive. Lavo nolineꞌ velesi aluvo nene lamineꞌ ineꞌ ve.
MAT 15:29 Izesuꞌ aza aꞌmine minineꞌ ebeꞌ nene hulo tineꞌ molo nGalilaia noso ohuno gahevela nene lemo vo gololoꞌ dizo vo minineꞌ.
MAT 15:30 Neꞌmine ogavo eveneꞌ mukiꞌ ingine gebili mini gizeꞌine aꞌine goloso o vineꞌ idoꞌ veꞌine like vineꞌ idoꞌ gamazi lamilizaniꞌ o vive idoꞌ initeꞌ gizi dave masi masi mukiꞌ nene ngeleꞌmizi Izesuda vi gizenela ingi-ngidikevo aza do lamineꞌ o-ngidineꞌ.
MAT 15:31 Neꞌmine ogavo veneꞌ vemohoꞌ mukiꞌ ingine ningi negi nete gamazi apiꞌ igi laniꞌ, okoꞌnidoꞌ goloso ineꞌ aleve lamineꞌ aniꞌ, gizeꞌine goloso o vineꞌ aka monaniꞌ, idoꞌ veꞌine likive gohi veꞌine ninganiꞌ nene ningi voꞌine goloso vavo mini engiꞌ Isilaeleꞌ aleveti Oꞌmosoꞌine nene opoꞌni li guliveꞌve di hozi laniꞌ.
MAT 15:32 Neꞌmine ogo Izesuꞌ aza izipahala zuho asi lo-ngemavo ikevo tiꞌ lo lo-ngimineꞌ: Mene aleve nene nazasi gamene sito hamo makaꞌ minunidiꞌmo nosoꞌ niteꞌinesi nomivo engikumuꞌ muluꞌne hukave. Akaloꞌ gaꞌnaꞌmo veꞌine gaꞌine monavo diꞌmozikelizave lo nosoꞌ niteꞌ namavo haza ngimiselamolove lo gele nouve.
MAT 15:33 Neꞌmine lavo izipahala zuho ingine tiꞌ li laniꞌ: Ebeꞌ hadiveloꞌ nouneꞌ nenako nemuꞌ nene nosoꞌ niteꞌ vaiꞌ adoꞌ eveneꞌ vaiꞌ meꞌminelite nalizaniꞌ votigileloꞌ nene zalatiꞌ dalone. Daloneꞌ akate nene ma nomive.
MAT 15:34 Likevo Izesuꞌ tiꞌ lo lo-ngimineꞌ: Lengita sikoni nanikeꞌ neve. Lavo ingine laniꞌ: Seveni ve idoꞌ alahaꞌ ngomosikisi ma neive.
MAT 15:35 Likevo eveneꞌ mukiꞌ nene mitoꞌ minilizave li li-ngidilizave lo Izesuꞌ lavo li-ngidikevo mitoꞌ minaniꞌ.
MAT 15:36 Minikevo sikoni seveni nesi alahaꞌ nesi do Oꞌmoso opoꞌni lo nosoꞌ niteꞌ nene gito apilo izipahala zuho izeꞌ molo ngemavo eveneꞌ nene di moni ngimaniꞌ.
MAT 15:37 nGimikevo mukitoꞌ ni gatuꞌine aniꞌ. Gatuꞌine ogavo lumo sama hulaniꞌ nene izipahala zuholite gosuvahaꞌ naba seveni neꞌmine goꞌzi vaiꞌ laniꞌ.
MAT 15:38 Nosoꞌ niteꞌ naniꞌ nene vemohoꞌ fo (4) tausenilite naniꞌza veneꞌ izipe nene gatamune.
MAT 15:39 Neꞌmine ikevo Izesuꞌ eveneꞌ mukiꞌ nene ngimisele huloko sipiuꞌ dizo izipahala zuhosi Magadani misubola vaniꞌ.
MAT 16:1 Halisaioꞌ monoꞌ laaꞌ ave linge masi Sadukaioꞌ monoꞌ laaꞌ ave linge masi Izesuꞌ neida igi emenguꞌ mili tiꞌ li laniꞌ: Gaza Oꞌmosoꞌmo geikisi neive laaꞌ naineꞌ nene lamineꞌ labe gosohoꞌ labe neꞌmi monovo nene ningelonge. Okulumokuꞌ minive Oꞌmoso aza amuzo gemavo gaza atoliꞌmine suno do sotoꞌ ogo lelebizanivo ningelone li li-imaniꞌ.
MAT 16:2 Tiꞌ li li-imikevo aza tiꞌ lo lo-ngimineꞌ: Nivengaꞌ molavo guhizangiꞌ ilineꞌ nene lingine ningi aizeꞌ nene hoꞌ lo gamene lamineꞌ oloseive li laaꞌ nave.
MAT 16:3 Idoꞌ nedengaꞌ goꞌ lalosa guhizangiꞌ elo limuso gonobuꞌ hitineꞌ nene lingine ningi goline izo hepeꞌ eleleseive li laaꞌ nave. Neꞌmine igi Okulumota ningisa neꞌmine initeꞌ sotoꞌ oloseive li ningi gilaaꞌ naniꞌza sotoꞌ ilineꞌ initeꞌ ato atokumuꞌ Oꞌmosoꞌmo molaniꞌ gamene alitelineꞌ monovo nene ningi gili minisaꞌmave.
MAT 16:4 Mene gameneloꞌ nizave lingine eveneꞌ golosovoꞌ mini veneꞌ ma vaꞌningine huli ve gohi maloꞌ vi lihime daaꞌ naniꞌ neꞌmine igi Oꞌmosotine huli lihime daaꞌ nave. Lingine nenikumuꞌ atoliꞌmine suno do sotoꞌ ogo Oꞌmosoꞌmo amuzo nimineꞌ nene lengelebizelongumuꞌ nilaniꞌza ma lengelebizamolosuve. Oꞌmosoꞌmo gozopoꞌ eze veletiꞌ gamazi lo sotoꞌ ogaꞌ ive Zonada atoꞌ suno do sotoꞌ ogo amuzoꞌve ngelebizineꞌ maꞌminevoꞌ ma nenita sotoꞌ ogavo nevoꞌ ningilisave. Neꞌmine lo hulo-ngedo vineꞌ.
MAT 16:5 Idoꞌ izipahala zuho ingine Izesukisi sipiuꞌ dizi noso ohuno helala vaniꞌ nene beletimuꞌ gaꞌine molavo ma di vamaniꞌ.
MAT 16:6 Neꞌmine ikevo Izesuꞌ aza eveneꞌ maliti ngemeni damenimuꞌ beleti do lulu izaaꞌ ineꞌ initeꞌ zisitiloꞌ lo molo tiꞌ lo lo-ngimineꞌ: Halisaioꞌ monoꞌ laaꞌ ave idoꞌ Sadukaioꞌ monoꞌ laaꞌ ave engitatiꞌ zisiti nene dikelizaze. Nemuꞌ ningisa minilo.
MAT 16:7 Neꞌmine lavo ingine li voleloꞌ meloꞌ igi tiꞌ li laniꞌ: Laza beleti ma do amuneꞌ nenako nemuꞌ lave.
MAT 16:8 Izesuꞌ aza gamazi li voleloꞌ meloꞌ aniꞌ nemuꞌ nene mo ningo gelo tiꞌ lo lineꞌ: Lingine gili eleꞌvoleꞌ amave mene beleti di amaniꞌ nemuꞌ nene nanitekumuꞌ gamazi li voleloꞌ meloꞌ nave.
MAT 16:9 Naza beleti faef (5) do gito izeꞌ molo eveneꞌ faef (5) tauseni ngemekuvo nisa lumo sama hulaniꞌ nedunuꞌ nene lingine gosuvahaꞌ tuvelu goꞌzi vaiꞌ laniꞌ mamuꞌ gatine molahe.
MAT 16:10 Idoꞌ beleti seveni do gito izeꞌ molo eveneꞌ fo (4) tauseni ngemekuvo nisa lumo sama hulaniꞌ nene lingine gosuvahaꞌ naba gidini seveni goꞌzi vaiꞌ laniꞌ mamuꞌ gatine molahe.
MAT 16:11 Beleti nene neꞌmine ogo ha do sotoꞌ olosuvonako beletimuꞌ lamuvoniꞌ nene lingine gili nilisave lo giluvoniꞌza gilamaniꞌ neive. Halisaioꞌ monoꞌ laaꞌ ave idoꞌ Sadukaioꞌ monoꞌ laaꞌ ave engitatiꞌ zisiti nene dikelizaze. Nemuꞌ ningisa minilo.
MAT 16:12 Neꞌmine lavo nelotiꞌ alingeꞌ nene beleti do lulu izaaꞌ initekumuꞌ lamo zisitimuꞌ lo molo lineꞌ ma nene Halisaioꞌ monoꞌ laaꞌ avelite idoꞌ Sadukaioꞌ monoꞌ laaꞌ avelite gamazi ladeni igi eveneꞌ apizi ngimaaꞌ aniꞌ monovo nene do minalone li ningi minilizangumuꞌ lineꞌ ma nene alingeꞌ mo gili ngoloꞌ laniꞌ ve.
MAT 16:13 Izesuꞌ aza Kaesalea Hilipi misubola vo hetelo izipahala zuho tiꞌ lo longoꞌ o-ngidineꞌ: Oꞌmosolatiꞌ ve gihile nenikumuꞌ nene zaho ve li laaꞌ nave.
MAT 16:14 Neꞌmine lo longoꞌ o-ngedavo ingine tiꞌ li laniꞌ: Eveneꞌ linge ma nete monoꞌ noso holo-ngedaaꞌ ive Zohaneꞌ hilingutiꞌ otosa noloseive li laaꞌ nave. Idoꞌ linge ma nete gozopoꞌ polohete Eliaꞌ aza gohi sotoꞌ oloseive ma nene tineꞌ molo abe li laaꞌ nave. Idoꞌ ma nete polohete Zelemiaꞌ ma helaningutiꞌ otosa nolibe polohete atoꞌ ma minaineꞌ helanive nolibe li laaꞌ nave.
MAT 16:15 Neꞌmine likevo Izesuꞌ gohi tiꞌ lo longoꞌ o-ngidineꞌ: Idoꞌ ingine nene mo neꞌmine laaꞌ naniꞌza lingine nenikumuꞌ nene zaho neve li laaꞌ nave.
MAT 16:16 Neꞌmine lo longoꞌ o-ngedavo Simoniꞌ Petoloꞌ aza aꞌmidoꞌ tiꞌ lo lineꞌ: Minevoꞌ minevoꞌ Oꞌmosoꞌmo do luꞌ izelove lo gipele do kegeso gimiselive ma ne nane.
MAT 16:17 Neꞌmine lavo Izesuꞌ tiꞌ lo lo-imineꞌ: Zonaꞌ gipele Simonizo, haza evenelite aꞌmine monovoꞌne nene li-gimikevo lamane. Okulumokuꞌ meꞌneho veka do lapa nomineꞌ o-gedavo lange. Nemuꞌ nene lamineꞌ ilineꞌ akaloꞌ mine molo nange. Golizesi minezo.
MAT 16:18 Idoꞌ tiꞌ lo nolo-gimuze. Gelezo. Gaza guliveka Petoloꞌ nane. Idoꞌ Petoloꞌ neꞌmi monovo nene eleꞌvoleꞌ geheni ve lo nenako nemuꞌ eveneꞌne zuho do sotoꞌ o-ngedo eleꞌvoleꞌ igi minilizave lo aꞌmine eleꞌvoleꞌ gehedoꞌ do giꞌmize-ngedekuvo ve golosoꞌmi amuzoꞌve neꞌmo ngelo ngivileꞌ amivo helaaꞌ neꞌmo mudise hele osuꞌ laaꞌ akaloꞌ ma ngeleꞌmize molamoloseive.
MAT 16:19 Naza Okulumokuꞌ miniveꞌmi gizebouꞌ vi hilalizaniꞌ amuzo gemekuvo eveneꞌ ngeleꞌmizo Oꞌmosoꞌmo gizebo inguꞌ vo holalosane. Idoꞌ misubouko gaza eveneꞌne zuho gamazi initeꞌ mamuꞌ lo huko lo-ngemo neꞌmine amilo lo oꞌve lo-ngedelineꞌ nene Okulumokuko Oꞌmoso neꞌmosi aꞌmine initekumuꞌ oꞌve lo lo huko-ngedeleseive. Idoꞌ misubouko gaza initeꞌ mamuꞌ nene neꞌmine ogaꞌ ve lo lo-ngedelineꞌ nene Okulumokuko Oꞌmoso neꞌmosi aꞌmine initekumuꞌ mo neꞌmine ogaꞌ ve lo lo-ngedeleseive.
MAT 16:20 Neꞌmine lo Petoloꞌni lo-emosa Izesuꞌ aza eikumuꞌ nene Oꞌmosoꞌmo do kegeso imiselelesa live neive li eze monovo mo kekeꞌ eveneꞌ masi li-ngimamilo lo amuzo molo lo izipahala zuho nene gaꞌine daniꞌ.
MAT 16:21 Idoꞌ aꞌmine gamene nelotiꞌ Izesuꞌ aza apiꞌ ogo tiꞌ lo lo-ngemeꞌmo vo minineꞌ: Neniꞌ gono neꞌmo gihileꞌve do sotoꞌ ilingumuꞌ naza Zelusalemi numuda vokuvo aꞌmida monoꞌ gizebo vesi idoꞌ evenetoꞌ medeli mini Oꞌmoso initeꞌ lehizi-daaꞌ ave nabasi idoꞌ Zuda vete gozopotatiꞌ laaꞌ naniꞌ monoꞌ apizi ngimaaꞌ avesi ingine goboni mili-nidi mulumo gono nimi nibili hililisave.
MAT 16:22 Neꞌmine ikevo helo gamene sitohamo minekuvo Oꞌmosoꞌmo do ote-nedeleseive. Neꞌmine lavo Petoloꞌ aza do gahevela o-miko elemo tiꞌ lo lineꞌ: Guvekasi ve, neꞌmine lamozo. Oꞌmosoꞌmo do guꞌ izavo laineꞌ initeꞌ mo kekeꞌ geiꞌ okongaloꞌ sotoꞌ amoloseive.
MAT 16:23 Neꞌmine lo lineꞌza Izesuꞌ aza velepeꞌ izo Petoloꞌni tiꞌ lo lo-imineꞌ: Satani gaza akaloꞌ nene golise ozo. Gaza gaka gele naineꞌ nene Oꞌmosoꞌmo gilidiꞌmino gelamo me misubouꞌ evenelite gilaaꞌ adiꞌmino gele naineꞌ nenako volodoꞌ o neineꞌ akaꞌnela ogo hizo notilange. Satani gaza olovoꞌ ozo.
MAT 16:24 Neꞌmine lo Izesuꞌ aza eze eꞌmetaaꞌ ave gamazi tiꞌ lo lo-ngimineꞌ: Ve ma ingine neꞌmeto alone li gilii ma gomuꞌ nene minevoꞌ alevoꞌine gizebo igaꞌ naniꞌ monovoꞌine nene huli alami neniꞌ neꞌmetilizangumuꞌ ve goloso nizave li lohotoꞌ zaloꞌ ngibili hililizangumuꞌ nene gili hulisa neꞌmeti alizave.
MAT 16:25 Idoꞌ neꞌmine igisa neꞌmeti alizave lo noluvoniꞌ nene nanitekumuꞌ luhe. Lingine mene gililo. Ve ma ingine neniꞌ neꞌmeteloneꞌ nene geni initeliꞌmi lulouꞌ vo minevoꞌ alevote hulalone li neꞌmetamilizave nene minevoꞌ minevoꞌ minaaꞌ ngemeni dameni nene ma damilisave. Damilisaha ve ma ingine neꞌmeti vilizanguꞌ ngibili hilikevo minevoꞌ alevoꞌine hulilizaniꞌ nene alingeꞌ minevoꞌ minevoꞌ ngemeni dameni dalisave.
MAT 16:26 Ee, misubouko mene minevoꞌ alevoꞌ igi mini misubouꞌ initeꞌ vaiꞌ di engita igi minilizanguꞌ nene minevoꞌ minevoꞌ minaaꞌ ngemeniꞌine hulilizaniꞌ nene aꞌmine initeꞌ vaiꞌ nete nene ma hize eleꞌ i-ngidamilisave. Ee, eveneꞌ ma ingine minevoꞌ minevoꞌ minaaꞌ ngemeni dameni ma hulilizaniꞌ nene aꞌmine ngemeni dameni di engita olone li aꞌmidoꞌ golo hizilizaniꞌ initeꞌ hamokisi ma minamoloseive.
MAT 16:27 Idoꞌ Oꞌmosolatiꞌ ve gihile naza meꞌnehi emeni dameni lamineꞌ nene do tiꞌ ogo mino angeloꞌne zuhosi ngeleꞌmizo alosuve. Idoꞌ aloniꞌ nene naza evenelite hamoꞌ hamoꞌ initeꞌ golososi idoꞌ laminekisi igi mili minaniꞌ votigileloꞌ nene meni ngemelesuve.
MAT 16:28 Lamineꞌ lo-lengemelesuve. Meloꞌ nizave lengikutiꞌ linge ma hilami ha nizavo naza Oꞌmosolatiꞌ ve gihile Guveꞌnesi ve loloꞌ ogo eveneꞌne zuho gizebo o-ngedelesa sotoꞌ ogo lemo nouvo ingine ningilisave.
MAT 17:1 Gamene sigisi ogo vavo Izesuꞌ aza Petoloꞌni ve Zakoboꞌni ve idoꞌ nakunolo Zohaneꞌni nesi ngeleꞌmizo golo haꞌnaloꞌ dizo vavo aꞌmida nene engikovoꞌ mini
MAT 17:2 ningi nizavo Izesuꞌ nene okoꞌno do atoliꞌmine ogavo golo velelotiꞌ nene hoꞌ neꞌmine hulo mino okoꞌnoloꞌ initetoꞌ nene labanaꞌ elo mokonoꞌ goloso elo minineꞌ.
MAT 17:3 Neꞌmine neivo neloꞌ nene Moseki Eliakisi sotoꞌ i ngimi Izesuꞌ nesi gamazi li voleloꞌ meloꞌ igi minaniꞌ.
MAT 17:4 Neꞌmine igi nizavo Petoloꞌ Izesuꞌni tiꞌ lo lo-imineꞌ: Guvekasi ve, makaꞌ meloꞌ minuneꞌ nene lamineꞌ ogave. Nemuꞌ gaza gele nemanivo azibe sitohamo gizelove. Ma nene geikumuꞌ ve. Ma nene Moseꞌni ve idoꞌ ma nene Eliaꞌni ve lineꞌ.
MAT 17:5 Tiꞌ lo gamazi nolivo silingengeꞌne hulo minineꞌ limusoꞌmo ogo molo hite-ngidineꞌ. Molo hite-ngedavo aꞌmingutiꞌ gamazi ma tiꞌ lo sotoꞌ ineꞌ: Me ve nene neniꞌ gipeꞌne luꞌne eme nouvoniꞌ ne neive. Eikumuꞌ laniteꞌ goloso nogiluve. Lingine eze gamaziꞌve gili dalo.
MAT 17:6 Izipahala zuho sitohamo aꞌmine gamazi gili ngehelele izavo goꞌine hizi ingi minaniꞌ.
MAT 17:7 Neꞌmine igi nizavo Izesuꞌ aza ogo okoꞌnidoꞌ do nogelo tiꞌ lo lineꞌ: Lingine lengehelele izamivo otilo.
MAT 17:8 Neꞌmine lavo ingine oti ninganiꞌ nene eveneꞌ ma ningami Izesukovoꞌ neivo ninganiꞌ.
MAT 17:9 Neꞌmine igi gololotiꞌ makaꞌ limi niigi Izesuꞌ tiꞌ lo gaꞌine daniꞌ: Lingine aꞌmine ninganiꞌ initeꞌ nemuꞌ eveneꞌ hamokisi li-ngimamavo Oꞌmosolatiꞌ ve gihile naza nene helekuvo meꞌneho do ote-nedavo ma nene ha li sotoꞌ ilizave lo gaꞌine daniꞌ.
MAT 17:10 Neꞌmine lavo izipahala zuho tiꞌ li longoꞌ i-daniꞌ: Idoꞌ do luꞌ izelive lo Oꞌmosoꞌmo do kegeso imiselelesa live nene aꞌmine gozopoꞌ minineꞌ polohete Eliaꞌ neꞌmo gomuꞌ molo-do tineꞌ molo aloseive li avotemoti monoꞌ gamazi apizi limaaꞌ avete laaꞌ naniꞌ ma nene nanimuꞌ laaꞌ nave.
MAT 17:11 Neꞌmine li longoꞌ i-dikevo aza tiꞌ lo lineꞌ: Eliaꞌ initeꞌ mukiꞌ do veveselesa Oꞌmosoꞌmo do luꞌ izelive lo imiselelesa live gomuꞌ molo-do aloseive laniꞌ nene mo laminetoꞌ nilave.
MAT 17:12 Idoꞌ naza laminetoꞌ noluve. Eliaꞌ nene mo gomuꞌ aniꞌ ma nene ingine Eliaꞌ ve li ningi guni ami angise gaꞌine gilaniꞌ initeꞌ i-di bili hilaniꞌ. Idoꞌ Oꞌmosolatiꞌ ve gihile nenikisi nene aꞌmineꞌmine ogo engiꞌ aꞌninguꞌ okuvo ingine mulumo gono nimi eze i-dadiꞌmine i-nidilisave.
MAT 17:13 Neꞌmine lavo izipahala zuho ingine nene monoꞌ noso holo-ngedaaꞌ ive Zohaneꞌnimuꞌ nene nolo-limive li gili nge li gilaniꞌ.
MAT 17:14 Idoꞌ Izesule golo gizeneuꞌ limi eveneꞌ mukiꞌ di geseꞌ adoꞌ navo ve maliꞌmo ogo Izesuꞌni obuvolo hize emo tiꞌ lo lineꞌ:
MAT 17:15 Guvekasi ve, neze gipeꞌne nene lemo lise-davo goloso ogo mino olokuꞌ lemo pouꞌ laaꞌ idoꞌ nosouꞌ lemo pouꞌ laaꞌ ogaꞌ neive. Nemuꞌ nene muheleꞌve ninge-devo.
MAT 17:16 Geze geꞌmetaaꞌ avela eleꞌmizo uvoniꞌza ma ngeli di lamineꞌ i-damave.
MAT 17:17 Neꞌmine lavo Izesuꞌ tiꞌ lo lineꞌ: Eii, lingine ngeli imiseli hulisaꞌmaniꞌ nehe. Oꞌmosomuꞌ gili eleꞌvoleꞌ amaniꞌ zuho lutine zovoꞌ ize vineꞌ mene lengikumuꞌ goseleꞌ nebeleꞌmo novivo lengiꞌ vovotinguꞌ gamene gohi ma imineꞌ molo mino langamuzo hizeꞌmo vo mineloniꞌ nemuꞌ nene agae lo noluve. Aꞌmine gipe eleꞌmizi alo lo lavo
MAT 17:18 eleꞌmizi ikevo izipe do goloso o-do minineꞌ sikalahuꞌ goloso nene Izesuꞌ ganuꞌ elemavo izipe nene hulo-do lemo vavo izipe nene aꞌmidotiꞌ lamineꞌ ineꞌ.
MAT 17:19 Neꞌmine ogavo alingeꞌ angisevoꞌ mini izipahala zuho Izesuda igi tiꞌ li longoꞌ i-daniꞌ: Sikalahuꞌ goloso nene laza naniteliꞌmo imisele hulamolonidoꞌ ineꞌ neve.
MAT 17:20 Likevo Izesuꞌ tiꞌ lo lineꞌ: Naniteliꞌmo ve. Lengiꞌ Oꞌmosomuꞌ gili eleꞌvoleꞌ aniꞌ nene naba minamidiꞌmo ve. Sakaveꞌ zuho nene initeꞌ ngomo lasolo neineꞌza lingine Oꞌmosomuꞌ gili eleꞌvoleꞌ anitine ngomo nene aꞌmine zuho niteꞌ ngomo neꞌmine votigileloꞌ vo lisiheꞌ otiꞌ otiꞌ ilineꞌ nene alingeꞌ initeꞌ lamineꞌ ma ilisa navo initeꞌ ma aka hize tile-lengedo golo neꞌmine minelineꞌ nene aꞌmine Oꞌmosomuꞌ gili eleꞌvoleꞌ anitine ngomo nedunukisi aꞌmine golomuꞌ olovoꞌ ogo ebeꞌ mala vozo lilizaniꞌ nene ha olovoꞌ ogo voloseive. Idoꞌ initeꞌ mamuꞌ neꞌmine olone li lilizaniꞌ nene amilizavoba ha ilisave.
MAT 17:22 Gamene ma izipahala zuhosi nGalilaia misubouꞌ miniꞌmi nivavo Izesuꞌ aza izipahala zuho tiꞌ lo lo-ngimineꞌ: Oꞌmosolatiꞌ ve gihile neniꞌ nene eveneꞌ maliti aꞌninguꞌ neleꞌmizi milikevo
MAT 17:23 nibili hilikevo helo gamene sitohamo minekuvo Oꞌmosoꞌmo gohi neleꞌmize oteleseive. Neꞌmine lavo izipahala zuho ingine muluꞌine gitihineꞌ ogavo mulumo goloso gili-di minaniꞌ ve.
MAT 17:24 Idoꞌ Izesuꞌ ve izipahala zuho ve ingine Kahanaumi numuda igi hetelikevo Oꞌmosoꞌmi gono monoꞌ numuno nabala daaꞌ naniꞌ nene hize eleꞌ ilive li takisi moni daaꞌ ave ingine Petoloꞌ neida igi tiꞌ li longoꞌ i-daniꞌ: Lengiꞌ tisatine nene takisi moni hulaaꞌ nooloseive. Olo.
MAT 17:25 Neꞌmine li longoꞌ i-dikevo oo, hulaaꞌ neineꞌ ve lineꞌ: Neꞌmine lo numunguko dizo olihe gamazi lamivo Izesuꞌ tiꞌ lo lineꞌ: Simonizo, misubouꞌ misubouꞌ guveꞌinesi vete takisi moni daaꞌ naniꞌ nene zamotidatiꞌ daaꞌ nave. Engiꞌ zuholatiꞌ daaꞌ nahe atoꞌ vetidatiꞌ daaꞌ nave. Nemuꞌ gaza nadive lo gele nane.
MAT 17:26 Lavo Petoloꞌ tiꞌ lo lineꞌ: Atoꞌ vetidatiꞌ daaꞌ nave. Neꞌmine lavo Izesuꞌ tiꞌ lo lo-imineꞌ: Atoꞌ vetidatiꞌ takisi moni daaꞌ ve nene lamineꞌ lainako nemuꞌ nene guvelesi veti zuho nene takisi moni meni hizisaꞌmave. Nemuꞌ nene meꞌnehi gonomuꞌ hulaaꞌ naniꞌ takisi moni nene gipele naza hulamoloniꞌ o neineꞌza
MAT 17:27 eveneꞌ ingine goloso gilikelizave losa ha hulolove. Gaza vo noso ohungutiꞌ alahaꞌ belaaꞌ nalaꞌ nene hulo nosouꞌ ogo alahaꞌ ganaꞌ ma belelineꞌ nene vele do aaꞌ o-do ningelineꞌ nene moni nevo ma neivo ningelesange. Aꞌmine nene do vo nenitokisi geitokisi takisi moni ngemezo.
MAT 18:1 Aꞌmine gameneloꞌ izipahala zuho ingine neida igi tiꞌ li longoꞌ i-daniꞌ: Okulumokuꞌ miniveꞌmo gizebo o-lidinguꞌ mene zaho livileꞌ ogo dizosa neive.
MAT 18:2 Neꞌmine likevo Izesuꞌ aza izipe ma asi lo vovoꞌninguꞌ do ote-miko
MAT 18:3 tiꞌ lo lineꞌ: Naza lamineꞌ nolo-lingimuve. Lutine di velepeꞌ izi lutine di limi izipe ngomo meꞌmine minamilizaniꞌ nene Okulumokuꞌ miniveꞌmo gizebo inguꞌ nene vamilisave. Oꞌve. Vi hilamilisave.
MAT 18:4 Idoꞌ ve ma ingine izipe ngomo meꞌmine igi engiꞌ okoꞌinemuꞌ gilikevo lemo mine do vaaꞌ neineꞌ neꞌmini minilizave nete nene Okulumokuꞌ veliꞌmo gizebo inguꞌ minave linge ngivileꞌ igi dizisa minilisave.
MAT 18:5 Idoꞌ ve ma ingine nenikumuꞌ ve li izipe ngomo meꞌmine ma ngeleꞌmize lamineꞌ ilizaniꞌ nene neniꞌ neleꞌmize lamineꞌ aniꞌ geleleseive.
MAT 18:6 Idoꞌ nenikumuꞌ gili eleꞌvoleꞌ igi minaaꞌ naniꞌ izipahaꞌne zuho limi minaniꞌ engikutiꞌ hamoꞌ ma eveneꞌ maliꞌmo goloso niteꞌ dalineꞌ akauꞌ eleꞌmize molalosa neivo ma aꞌmine ve nene Oꞌmosoꞌmo mulumo gono nabaꞌ naba emalinako nemuꞌ nene goloso niteꞌ dalineꞌ akauꞌ nene olihe eleꞌmize molamivo gomuꞌ nene luvonouꞌ geniꞌvesi geheni naba nene nalava izi-di noso ohuno nabauꞌ ehusoꞌ i hulikevo aꞌminguꞌ lemo helelineꞌ nene lamineꞌ oloseive.
MAT 18:7 Me misubouꞌ nene eveneꞌ ngimimiseꞌ igi aka golosoloꞌ ngeleꞌmizi milaliza initeꞌ nene sotoꞌ amilizavoba mo vaiꞌ sotoꞌ ilisanako nemuꞌ nene me misubouꞌ alevemuꞌ mulumo nogele-lingiduve. Idoꞌ aꞌmine eveneꞌ ngimimiseꞌ igi aka golosoloꞌ ngeleꞌmizi milaliza initeꞌ di sotoꞌ ilizave nene Oꞌmosoꞌmo lihime naba ngemeleseinako engikumuꞌ agae lo mulumo nogele-ngiduve.
MAT 18:8 Idoꞌ anga sitakisi gizenga sitakisi nanivo Oꞌmosoꞌmo lihime gemo lihizami olokuꞌ hulo-gedavo lemo minalinge. Anga nehe gizenga nehe netise lihime daaꞌ akaloꞌ geleꞌmize nimilasivo ma neꞌmine amilizo lo angasi gizengasi nene huko hulaineꞌ gilivosa minezo. Neꞌmine ogo gizenga anga gebili do minaineꞌ gilivo minevoꞌ minevoꞌ ebekuko vilineꞌ nene ede voloseive.
MAT 18:9 Idoꞌ vega sitakisi nanivo Oꞌmosoꞌmo lihime gemo lihizami olokuꞌ hulo-gedavo lemo minalinge. Vega neꞌmo lihime daaꞌ aka ma nogelebizivo ma nene neꞌmine amozo lo vega nene kuluhize hulaineꞌ gilivosa minezo. Neꞌmine ogo vega hela gebili do minaineꞌ gilivo minevoꞌ minevoꞌ ebekuꞌ vilineꞌ nene ede voloseive.
MAT 18:10 Lingine izipahaꞌne zuho ngomo ngomo engiꞌ neti angeloꞌine nene gamene gamene meꞌnehi veleloꞌ minaaꞌ nanaze. Lingine aꞌmine izipemuꞌ gilavo haza niteꞌ ogalive. Nemuꞌ nene ehee noluve.
MAT 18:12 Idoꞌ lingine nadive li nigilave. Ve maliꞌmi sipisipi ize vanu hadeti (100) minilizangutiꞌ hamoꞌ ma vo halekelineꞌ nene aꞌminemuꞌ viseꞌ amilihe. Neꞌmino nomive. Sipisipi ize naedi naeni (99) nene aꞌmida golola hulo-ngimiko hamoꞌ vo halekineꞌ nemuꞌ nene viseꞌ oꞌmo voloseive. Olo.
MAT 18:13 Ee, aza viseꞌ ogo do sotoꞌ ilineꞌ nene naza laminetoꞌ nolo-lingimuve. Olize goloso izeleseive. Olize izelineꞌ nene sipisipi vi halekami mela naedi naeni (99) minaniꞌ mamuꞌ olize izineꞌ ma nene ivileꞌ ivosa olize izeleseive.
MAT 18:14 Aꞌmineꞌmine ogo izipahaꞌne zuho ngomo ngomo nizangutiꞌ mene Okulumokuꞌ Metibo neꞌmo hamokisi vo halekilive lo luꞌveuꞌ gelesaꞌmive.
MAT 18:15 Idoꞌ eveneꞌ maliꞌmo geiꞌ mulunga do goloso o-gedo lihime davo ma gaza aꞌmine ve neida vanivo lengiꞌ sitakovoꞌ mini aꞌmine lihime daniꞌ monovo nene elebizanivo ningelive. Ningo gele gemelineꞌ nene aꞌmine ve nene gohi aka lamineta nene mo eleꞌmizo ogane.
MAT 18:16 Idoꞌ gele gemamivo ma nene eveneꞌ gohi sitape sitohamo he do giꞌmizo makaꞌ vi lihime daniꞌ monovo nene elebizilo. Neꞌmine ilizaniꞌ nene monoꞌ godolouꞌ minineꞌ gamazi mauꞌ nene vo daloseive. Aꞌmine gamazi nene tiꞌ lo neive: Gamazi gono nidavo lihime daveꞌmi monovo nene eveneꞌ sitape sitohamo he neꞌminete likevo gamazi lilizaniꞌ vo hamoꞌ ilineꞌ nene lisiheꞌ oloseive.
MAT 18:17 Idoꞌ ngeleꞌmizo vaniveti gamaziꞌine nesi gele hulavo ma eiꞌ lihime daniꞌ monovo nene monoꞌ aleveti muliseuꞌ lo sotoꞌ oganivo ingine liliza gamazi nesi gele hulavo ma gaza gelanivo eveneꞌ atoꞌ nene monoꞌ gilamavetingutipe takisi moni daaꞌ ave goloso engikutipe minineꞌ gelavo ezesi bizamanivo atokovoꞌ monaaꞌ ilive.
MAT 18:18 Idoꞌ naza lamineꞌ nolo-lingimuve. Misubouko lingine eveneꞌne zuho gamazi initeꞌ mamuꞌ li huki li-ngimi neꞌmine amilo li oꞌve li-ngidilizaniꞌ nene Okulumokuko Oꞌmoso neꞌmosi aꞌmine initekumuꞌ nene oꞌve lo lo huko-ngedeleseive. Idoꞌ misubouko lingine initeꞌ mamuꞌ nene neꞌmine ogaꞌ ve li li-ngidilizaniꞌ nene Okulumokuko Oꞌmoso neꞌmosi aꞌmine initekumuꞌ mo neꞌmine ogaꞌ ve lo lo-ngedeleseive.
MAT 18:19 Idoꞌ gohi ma imineꞌ molo lo-lengemeloze: Eveneꞌ setape setohamohe neꞌminete neniꞌ aleve minaniꞌ di geseꞌ igi nopoꞌni nilavo ma naza engiꞌ vovoꞌninguꞌ hize eleꞌ o-ngedo mineloniꞌ nenako lengikutiꞌ sitalitise initeꞌ mamuꞌ luꞌine mili hamoꞌ igi mini Oꞌmosola lilisineꞌ nene Okulumokuꞌ neive Meꞌneho neꞌmo ha gele ngemeleseive.
MAT 18:21 Neꞌmine ogo Petoloꞌ aza Izesuꞌ neida ogo tiꞌ lo longoꞌ o-dineꞌ: Guvekasi ve, eveneꞌ maliꞌmo lihime nemeꞌmo vo minelineꞌ nene lihime hulo-deloniꞌ nene gamene nanikeꞌ hulo-delove. Gamene seveni (7) avoꞌ lihimeꞌve hulo-miko ha minelohe. Olo.
MAT 18:22 Neꞌmine lavo Izesuꞌ aza tiꞌ lo lo-imineꞌ: Gamene seveni (7) avoꞌ lihimeꞌve hulo-deline noluvoba lihimeꞌve hulo-deꞌmo vo minelineꞌ nene gamene sevedi seveni (77) nesi ivileꞌ ogo mo lihime dokaꞌ dokaꞌ neivo ma hulo-dakovoꞌ olosane.
MAT 18:23 Nemuꞌ nene Okulumokuꞌ miniveꞌmo evenetoꞌ gizebo ogo lihimeꞌine hulo-ngedelineꞌ monovomuꞌ nene neꞌmino lo molo lo-lengemelove: Guvelesi ve maliꞌmo gelekeleꞌ izipahaꞌne zuho dinaꞌ o-ngiduvoniꞌ nene do lisiheꞌ olove lo gelo
MAT 18:24 apiꞌ ogo do lisiheꞌ neivo gelekeleꞌ izipe ma nene eleꞌmizi guvelesi ve neida aniꞌ. Gozopoꞌ aꞌmine gelekeleꞌ izipe nene teni (10) milioni kina dinaꞌ ogo guvelesi velatiꞌ daniꞌ.
MAT 18:25 Neꞌmine ineꞌza aza nene aꞌmine moniloꞌ golo hizo emelineꞌ moni nene ma molamineꞌ nenako nemuꞌ guvelesi ve aza tiꞌ lo lineꞌ: Aꞌmine ganalaloꞌ apaselingumuꞌ nene ezesi venele izipahalasi initeꞌ mataꞌvesi maketi ebeta ngeleꞌmizi di vikevo meni hizi-ngidi osuꞌ likevo moni dalove lineꞌ.
MAT 18:26 Lavo aꞌmine gelekeleꞌ ve lo-imineꞌ: Agae, gaza iseꞌne izeꞌmo novanivo dinaꞌ o-nidanidoꞌ golo hizeꞌmo vo osuꞌ loloho.
MAT 18:27 Neꞌmine lavo guvelesi ve aza mulumoꞌve ningo alingeꞌ dinaꞌ o-giduvoniꞌ moniloꞌ nene golo hizo nemamolosane lo lo-do imisele hulineꞌ.
MAT 18:28 Imisele hulavo heta lemo vineꞌ nene gelekeleꞌ izipe ezesi gono makatoꞌ daaꞌ asive nene ningineꞌ. Aꞌmine ve nene guvelesi veꞌmo moni naba imive neꞌmo dinaꞌ o-do vanu hadeti (100) kina imive minineꞌ nene ningo luvono do nohoto tiꞌ lo lineꞌ: Gaza nenitatiꞌ moni dinaꞌ aineꞌ maloꞌ nene aloꞌ golo hizezo.
MAT 18:29 Neꞌmine lavo gono makatoꞌ daaꞌ asive neꞌmo lemo gizeneuꞌ obuvolo hize emo tiꞌ lo lineꞌ: Gaza iseꞌne izeꞌmo novanivo alingeꞌ aꞌmidoꞌ golo hize-gedeloho.
MAT 18:30 Neꞌmine lineꞌza gele hulo oꞌove lo gonitoꞌ eleꞌmize molo tiꞌ lo lineꞌ: Nalaꞌ numunguꞌ huli-dikevo mino dinaꞌ nene apaso moni neme osuꞌ lavosa kuluhizi-dikevo vilive. Lavo nalaꞌ numunguꞌ huli-daniꞌ.
MAT 18:31 Neꞌmine ogavo ezesi makatoꞌ gono daaꞌ ave ingine neꞌmine ineꞌ nene ningi muluꞌninguꞌ goloso gili vi guveꞌinesi ve nene aꞌmine gelekeleꞌ ve nene ogo molo ineꞌ initekumuꞌ nene li-imi osuꞌ laniꞌ.
MAT 18:32 Li-imikevo guvelesi veꞌmo gelekeleꞌ izipe nene asi lavo dizineꞌ. Dizavo tiꞌ lo lo-dineꞌ: Gelekeleꞌ izipe goloso mene gaza muheleꞌ gamazi lo-nemanivo dinaꞌ o-giduvoniꞌ ma apase-gedekuve.
MAT 18:33 Neꞌmine o-giduvoniꞌ neꞌmino gazasi makatoꞌ gono daaꞌ asive nene mulumolo ningo dinaꞌ o-daineꞌ nene apase-delinako apase-damane.
MAT 18:34 Neꞌmine lo izeboloꞌ molavo guvelesi ve tiꞌ lo lineꞌ: Nalaꞌ numunguꞌ mino mulumo gono imiꞌmi vi nizavo dinaꞌ o-duvoniꞌ nene golo hizeꞌmo vo minevoꞌ minevoꞌ ilive. Idoꞌ neꞌmine lo nalaꞌ numunguꞌ gizebo igaꞌ aveti aꞌninguꞌ molaniꞌ.
MAT 18:35 Neꞌmine lo Izesuꞌ tiꞌ lo lineꞌ: Lingine hamoꞌ hamoꞌ eveneꞌ lihime lutingutiꞌ gehepeve huli-ngidamilizaniꞌ nene guvelesi veꞌmo gelekeleꞌ izipahala o-didiꞌmino Okulumokuꞌ Meꞌneho aza aꞌmineꞌmine o-lengedo lihimetine nene hulo-lengedamo mulumo gono lengemeleseive.
MAT 19:1 Idoꞌ Izesuꞌ aza gamazi mukiꞌ mene lo-ngemo osuꞌ lo nGalilaia misubo hulo vo Zudaia misubouko Zodani noso helala vineꞌ.
MAT 19:2 Aꞌminguꞌ novivo eveneꞌ mukiꞌ eꞌmeti nivavo engikutiꞌ initeꞌ gizi dave nene do lamineꞌ o-ngedeꞌmo vineꞌ.
MAT 19:3 Halisaioꞌ monoꞌ laaꞌ ave linge ma ingine Izesuda igi emenguꞌ mili tiꞌ li longoꞌ i-daniꞌ: Gaza Zuda veti louꞌ gamazitemuꞌ gelanivo eleꞌningine initeꞌ ngomoꞌ nabakumuꞌ ngimisele hulaaꞌ nene lisiheꞌ o neihe lisiheꞌ amive.
MAT 19:4 Tiꞌ li longoꞌ i-dikevo tiꞌ lo lo-ngimineꞌ: Monoꞌ godolouꞌ gamazi ma tiꞌ lo minineꞌ nene lingine mo gati gili nizaniꞌ ma nene gilamaniꞌ nehe: Gomuꞌ initeꞌ mukiꞌ do sotoꞌ molaaꞌ iveꞌmo vegi veneki loloꞌ o-ngidineꞌ ve.
MAT 19:5 Neꞌmine ogo tiꞌ lo lineꞌ: Nemuꞌ nene ve nene izelehingi melehingi hulo elenahida bizo minavo ingine hamoꞌ loloꞌ asineꞌ gelavo minilisasive. Nemuꞌ nene ingine nene sitaꞌ nizasive ma lo-ngedamolosune. Mo hamoꞌ nene nizasive.
MAT 19:6 Nemuꞌ nene Oꞌmosoꞌmo initeꞌ do hamoꞌ ogo molo neingutiꞌ ve malike do izeꞌ molaaꞌ nene nomive.
MAT 19:7 Lavo ingine tiꞌ li laniꞌ: Idoꞌ neꞌmine lo ma Moseꞌ aza gamazi neꞌmine lo lineꞌ nene nanitekumuꞌ lineꞌ neve: Ve maliꞌmo elenahine hulo-delove lo ma veneꞌ mene mo hulo-dekuve lo luhuvo gize emosa hulo-davo vilive.
MAT 19:8 Neꞌmine likevo aza tiꞌ lo lineꞌ: Lingine gamazi gilami peleseveꞌ izaaꞌ angumuꞌ nene Moseꞌ veneꞌ ngimisele hulaakumuꞌ gele lengemave. Neꞌmine ineꞌza Oꞌmosoꞌmo veneꞌ vemohoꞌ do sotoꞌ ogo do bize-ngidineꞌ gamenelatiꞌ nene eleꞌningine hulo-ngedaaꞌ monovo nomineꞌ ve.
MAT 19:9 Idoꞌ naza neꞌmine lo nolo-lingimuve: Ve ma elenaho aza ve gohi masi monamivo initeꞌ atokumuꞌ hulo-do veneꞌ gohi ma dalineꞌ nene Oꞌmosoꞌmi louꞌ gamazi avutoꞌ ogo lihime naba daloseive.
MAT 19:10 Neꞌmine lavo izipahala zuho ingine tiꞌ li li-imaniꞌ: Vesi venekisi bizo nonivo initeꞌ neꞌmine manaꞌmine ilizangumuꞌ huli-ngidamilizave lainako veneꞌ damo ha minaaꞌ nene lamineꞌ neive.
MAT 19:11 Neꞌmine likevo Izesuꞌ tiꞌ lo lineꞌ: Mene gamazi nene eveneꞌ mukilite gili dalizadoꞌ nomive. Eveneꞌ linge ma Oꞌmosoꞌmo luꞌine gaꞌine hize eleꞌ o-ngedavo engikovoꞌ dalisave.
MAT 19:12 Idoꞌ linge ma aꞌmine gamazi gili dalizave noluvoniꞌ nene nemuꞌ nene noluve: Eveneꞌ linge ma izeꞌningi muluꞌningutiꞌ gizehoꞌine nevoꞌmine nomineꞌ sotoꞌ aniꞌ neꞌmo veneꞌ damaaꞌ aniꞌ ve. Idoꞌ ve ma nene evenelite gizehoꞌine ili huli-ngidikevo veneꞌ dami minaaꞌ nave. Idoꞌ linge ma nene Oꞌmosoꞌmo gizebo inguꞌ gono neineꞌ nemuꞌ luꞌine milalisa veneꞌ daaꞌ nene angiseꞌine oꞌove li haza minaaꞌ nave. Ve ma ingine veneꞌ damaaꞌ amuzo engita minelineꞌ nete nene gamazi mene gili dalisave.
MAT 19:13 Nelotiꞌ nene eveneꞌ ingine izipe ngomo ngomo nene Izesuꞌ ana godoꞌnidoꞌ hito Oꞌmosola lo noꞌnohoꞌ ize-ngedelive li ngeleꞌmizi neida navo izipahala zuho ingine ngelemi oꞌve li-ngidaniꞌza
MAT 19:14 Izesuꞌ aza tiꞌ lo lineꞌ: Izipe ngomo ngomo meꞌmine minave nene Oꞌmosoꞌmo gizebo o neinguꞌ ngeleꞌmize molaaꞌ neinako huli-ngimikavo nenita ha alizaze. Oꞌove li-ngidamilo.
MAT 19:15 Neꞌmine lo ana godoꞌnidoꞌ hito mino noꞌnohoꞌ ize-ngedosa vo mala vineꞌ.
MAT 19:16 Idoꞌ novivo ve ma aza Izesuꞌ neida ogo tiꞌ lo longoꞌ o-do lineꞌ: Tisazo, naza initeꞌ lamineꞌ naniꞌmine olodiꞌmo nene minevoꞌ minevoꞌ nemeni dameni daloniꞌ o neive.
MAT 19:17 Neꞌmine lo longoꞌ o-do lineꞌza Izesuꞌ aza tiꞌ lo lo-imineꞌ: Monovo lamineliꞌmi Meleho nene hamokovoꞌ neineꞌ nenako neniꞌ nene monovo lamineꞌ ogakumuꞌ nene nanitekumuꞌ longoꞌ o-nedane. Minevoꞌ minevoꞌ gemeni dameni nene dalove lo ma aka gamazi eꞌmetaaꞌ olosane.
MAT 19:18 Neꞌmine lavo aza tiꞌ lo lineꞌ: Aka gamaziutiꞌ nene adoꞌ zaꞌ ma eꞌmetelongumuꞌ nolane. Neꞌmine lavo Izesuꞌ tiꞌ lo lineꞌ: Lingine eveneꞌ ngibili hilamilo. Idoꞌ veneꞌ vemohoꞌ liliꞌ ikeniꞌ nete lingine bizivoꞌ mini veneꞌ nehe vemohoꞌ nehe gohi masi gopo ingamilo. Idoꞌ gumine amilo. Idoꞌ eveneꞌ mamuꞌ gopoꞌ napa gamazi li-ngidi sakupo gamazi li-ngidamilo.
MAT 19:19 Idoꞌ izetingine metinginemuꞌ gilikevo dizavo gelekeleꞌ i-ngidi minilo. Idoꞌ lingine lengikumuꞌ gilaaꞌ naniꞌ neꞌmini avitoꞌ gidini ingi monavemukisi nene aꞌmineꞌmine igi gilii lutine ngimilo.
MAT 19:20 Neꞌmine lavo ve gosoꞌve aza tiꞌ lo lo-imineꞌ: Aꞌmine gamazi mukiꞌ nene mo eꞌmetaaꞌ nouvoniꞌza olihe vo damivosa naniteꞌ gohi ma eꞌmeteloniꞌ neve.
MAT 19:21 Neꞌmine lavo Izesuꞌ tiꞌ lo lo-imineꞌ: Gaza mo eveneꞌ lisiheꞌ lamineꞌ gehepeve minelo ma nene vo henenika initeꞌ mataka maketi molo moni dalineꞌ nene izeꞌ molo gohoꞌ gahaliꞌ izeꞌ molo ngemezo. Neꞌmine ilineꞌ neꞌmo Okulumokuko henenika ma mineleseive. Idoꞌ neꞌmine ogo ogo neꞌmetezo.
MAT 19:22 Neꞌmine lavo gosoꞌve aza heneniꞌve vaiꞌ goloso mininako aꞌminemuꞌ gilivo geni belavo muheleꞌ ogo vo ha ha ineꞌ.
MAT 19:23 Neꞌmine ogavo Izesuꞌ aza izipahala zuho tiꞌ lo lo-ngimineꞌ: Heneni ve minangutiꞌ linge ma Okulumokuꞌ miniveꞌmo gizebo inguꞌ vi hilalizaniꞌ nene geꞌnebe igisavoꞌ aꞌminguꞌ vi hilalisave.
MAT 19:24 Idoꞌ gohi nolo-lingimuve: Kamelaꞌ ize nene naba neineꞌ nenako nemuꞌ nene initeꞌ ongotilisa nakeseuꞌ nalaꞌ lolosoꞌ igaꞌ aniꞌ veleuꞌ nene ma volosa ilineꞌ nene geꞌnebe goloso oloseineꞌza heneni ve nete aꞌmine nene ivileꞌ ivosa Oꞌmosoꞌmo gizebo o neineꞌ ebekuꞌ vilisa geꞌnebe goloso ilisave.
MAT 19:25 Neꞌmine lavo izipahala zuho ingine upuhoꞌ goloso igi voꞌine gohi vavo tiꞌ li laniꞌ: Laza nene Oꞌmosoꞌmo umo hilive nene heneni ve loloꞌ o-ngedaaꞌ neihe lo giluneꞌza gaza heneni ve netesi Oꞌmosoꞌmo gizebo o neineꞌ ebekuꞌ mo vi hilamilisave lo lainako nemuꞌ nene Oꞌmosoꞌmo eveneꞌ hamokisi mo ma do luꞌ izamivo eze gizebo inguꞌ vo holamolobe lo nogilune.
MAT 19:26 Neꞌmine likevo Izesuꞌ aza vonuꞌ ngebelo tiꞌ lo lo-ngimineꞌ: Eveneꞌ angiseꞌnidatiꞌ lukuvo ngeli ma namilisaha Oꞌmoso nene initeꞌ mukiꞌ ogaꞌ amuzo do neineꞌ nenako nemuꞌ eveneꞌ do nguꞌ izelidoꞌ lisiheꞌ o neive.
MAT 19:27 Neꞌmine lavo Petoloꞌ tiꞌ lo lineꞌ: Gaza gelezo. Laza neve initeꞌ matate mukiꞌ nene hulo osuꞌ lo nogeꞌmetuniko neꞌmine nounidoꞌ nene naniteꞌ dalone.
MAT 19:28 Neꞌmine lavo Izesuꞌ aza tiꞌ lo lo-ngimineꞌ: Lamineꞌ ma lo-lengemelove: Alingeꞌ Oꞌmosoꞌmo initeꞌ mataꞌ mukiꞌ do gosohoꞌ ogavo Oꞌmosolatiꞌ ve gihile naza labanaꞌne do sotoꞌ ogo Guveꞌnesi ve naba mineloniꞌ moꞌmosiꞌneloꞌ mino eveneꞌne zuho gizebo o-ngedo nouvo neze neꞌmetaaꞌ ave linginesi guvetinesi ve loloꞌ igi guveꞌinesi ve minaaꞌ aniꞌ moꞌmosiꞌ tuvelu neloꞌ mini Isilaeleꞌ aleveti mulise tuvelu nene gizebo i-ngidi minilisave.
MAT 19:29 Idoꞌ eveneꞌ ma ingine neniꞌ neꞌmetilisa numuꞌine ebeꞌine nehe uvoꞌningine nakuꞌningine nehe ateꞌningine alunoꞌningine nehe izeꞌningine meꞌningine he izipahaꞌine nehe idoꞌ misuboꞌine nehe mukiꞌ huli neꞌmetave nene Oꞌmosoꞌmo gohi aꞌmidoꞌ imineꞌ molo ngemavo mukiꞌ goloso dalisave. Idoꞌ Oꞌmosoꞌmo gohi minevoꞌ minevoꞌ ngemeni dameni nesi ngemavo dalisave.
MAT 19:30 Neꞌmino neineꞌza dizi nilizaniꞌ aleveutiꞌ linge mukiꞌ nene limi minilisave. Idoꞌ limi nilizaniꞌ aleve nene dizi minilisave.
MAT 20:1 Idoꞌ Okulumokuꞌ miniveꞌmo gelekeleꞌ i-daaꞌ aveloꞌ gizebo ogo gono dadoꞌ meni ngemelineꞌ monovomuꞌ nene neꞌmino lo molo lo-lengemelove: Gamene ma nedengaꞌ goꞌ lavo ve ma misuboꞌve naba miniveꞌmo oto vaini miꞌveuꞌ gono dalizavemuꞌ visetoꞌ monineꞌ.
MAT 20:2 Mono eveneꞌ ma ningo miꞌneuꞌ gono dalizangumuꞌ nene gamene hamo hamotoꞌ tu (2) kina tu (2) kina lengemelove lavo lamineꞌve likevo miꞌvela ngimiselavo vi gono di minaniꞌ.
MAT 20:3 Idoꞌ gono di nizavo hoꞌ dizo naeni (9) kiloku neꞌmine ogavo mine meleho vo eveneꞌ gohi ma maketi ebekuꞌ haza nizavo ningo tiꞌ lo lo-ngimineꞌ:
MAT 20:4 Linginesi vi miꞌneuꞌ gono dalo. Vi dikevo meni aꞌmidoꞌ lisiheꞌ ilineꞌ nene lengemelesuve.
MAT 20:5 Neꞌmine lavo vi gono di minaniꞌ. Idoꞌ ingine gono di nizavo mine meleho holiseꞌ gamene tuvelu (12) kiloku neꞌminelokisi idoꞌ tili (3) kiloku neꞌminelokisi gohi vo eveneꞌ gohi ma ningo aꞌmineꞌmine ogo gonoꞌveloꞌ ngimiselavo vaniꞌ.
MAT 20:6 Vi gono di nizavo nivengaꞌ molalosa faef (5) kiloku neꞌmine ogavo iheꞌ vo eveneꞌ gohi ma minaniꞌ nene ningo tiꞌ lo lo-ngimineꞌ: Lingine nedengatiꞌ gono dami haza miniꞌmi vi idise nivengaꞌ molalosa neidokisi haza nizaniꞌ nene nanimuꞌ nave.
MAT 20:7 Neꞌmine lavo ingine tiꞌ li li-imaniꞌ: Eveneꞌ ma gono ma limamanako neꞌmo haza none. Neꞌmine likevo aza tiꞌ lo lo-ngimineꞌ: Linginesi miꞌneuꞌ vi gono dalo.
MAT 20:8 Lavo vi gono dikevo nivengaꞌ molo sigisi (6) kiloku ogavo mine meleho gusikusiꞌve tiꞌ lo lo-imineꞌ: Gonoloꞌ ve asi lo-ngemezo. Gono huli ikevo meni ngemelinge. Gono alingeꞌ dave nene gomuꞌ ngemo aꞌmidotiꞌ aꞌmidotiꞌ dave ngemekaꞌ ngemekaꞌ ogo gomuꞌ dave alingeꞌ ngemelesane.
MAT 20:9 Neꞌmine lavo neꞌmine ogo neivo faef (5) kiloku neꞌmineloꞌ apiꞌ igi gono dave ikevo tu (2) kina tu (2) kina ngemavo daniꞌ.
MAT 20:10 Idoꞌ nelotiꞌ gono gomuꞌ dave igi ingine aza tu (2) kina tu (2) kina lemosa aꞌmidoꞌ gohi ma imineꞌ molo lemelihe li gilaniꞌza neꞌmine amo tu (2) kina tu (2) kina nene ngemavo aꞌminevoꞌ daniꞌ.
MAT 20:11 Aꞌminevoꞌ di mine melehine elemi tiꞌ li laniꞌ:
MAT 20:12 Holiꞌmo amuzo molo nolivo gohise helo gono naba dovoꞌ dovoꞌ ogo minunive meni lemo gono ngomovoꞌ dave ngivileꞌ ogosa meni naba lemelinako gaza engikisi lelikisi do lisiheꞌ ogo hamoꞌ votigileloꞌ meni lemane.
MAT 20:13 Neꞌmine li elemaniꞌza aza mine meleho engikutiꞌ ve mamuꞌ tiꞌ lo lo-imineꞌ: Zogone ve, naza monovo goloso o-gedamuve. Gono dalinidoꞌ tu (2) kina gemelove lokuvo gaza lamineꞌ ve lanivo gamazite do hamoꞌ ogo lusidoꞌ mo gimuvoniꞌ nenako
MAT 20:14 aꞌmine menika nene dosa vozo. Geiꞌ gimuvoniꞌ neꞌmine alingeꞌ igi gono davesi hamoꞌ meni ngemelesuve lo gele nouve.
MAT 20:15 Idoꞌ neniꞌ moniꞌnedunuꞌ olosa giluvoniꞌ initeꞌ nene neniꞌ luꞌneloꞌ ogaꞌ nene ha neive. Naza eveneꞌ ma do lamineꞌ o-ngiduvoniꞌ nemuꞌ nene geiꞌ lukehe nebelelinidoꞌ o neihe lineꞌ.
MAT 20:16 Neꞌmine lo Izesuꞌ tiꞌ lo lineꞌ: Idoꞌ aꞌmineꞌmine igi gomuꞌ milaaꞌ nave ingine nene mine alingeꞌ ilisave idoꞌ alingeꞌ milaaꞌ nave ingine nene gomuꞌ milalisave.
MAT 20:17 Idoꞌ Izesuꞌ aza Zelusalemi numuno ebeta dizelesa izipahala zuho tuvelu nene ngeleꞌmizo novo ngeleꞌmize abazaꞌ ogo akaloꞌ nivanguꞌ tiꞌ lo lo-ngimineꞌ:
MAT 20:18 Gililo. Laza nene Zelusalemi numuno ebeta dizo novune. Aꞌmida nene Oꞌmosolatiꞌ ve gihile neniꞌ nene evenetoꞌ medeli mini Oꞌmoso initeꞌ lehizi-daaꞌ ave nabasi idoꞌ avotemote monoꞌ laniꞌ apizi ngimaaꞌ avesi engiꞌ aꞌninguꞌ milikevo ingine goniꞌ i-nidi lihimeka apaso helelinidoꞌ o neive li
MAT 20:19 Zuda ve minamaniꞌ heta atoꞌ aleveti aꞌninguꞌ mili-nidikevo ingine gize zohiꞌ i-nidi gasavasi nalatunuꞌ nene meheꞌne iziviꞌ lediviꞌ igi lohotoꞌ zaloꞌ nibili hililisave. Neꞌmine ikevo helo galeseuꞌ lemo gamene sitohamo minekuvo Oꞌmosoꞌmo do ote-nedeleseive lo lineꞌ.
MAT 20:20 Nelotiꞌ nene Zebedaioꞌ gipele sitalitisi izeꞌnibo neꞌmo aꞌmine gipele sitaꞌ nene ngeleꞌmizo Izesuda ogo gubiꞌ ize emo opoꞌni lo initeꞌ ma ilive lo lo-imineꞌ.
MAT 20:21 Neꞌmine ogavo Izesuꞌ tiꞌ lo longoꞌ o-do lineꞌ: Gaza nadiꞌ olongumuꞌ nolane. Lavo tiꞌ lo lo-imineꞌ: Gaza alingeꞌ Guvekasi ve loloꞌ ogo eveneꞌ gizebo o-ngedo minelineꞌ gameneuꞌ nene neiꞌ gipeꞌne sitaꞌ mene gezelotiꞌ limi eveneꞌ lingesi ma ngivileꞌ igi guveꞌinesi ve liliꞌ igi mini anga zamelasi adavalasi minilisive lo gele nemeline losa gele nouve.
MAT 20:22 Neꞌmine lavo Izesuꞌ tiꞌ lo lo-ngimineꞌ: Lingine longoꞌ i-nidasineꞌ initeliꞌmi monovo nene gilami gopo likeve. Initeꞌ goloso i-nidilizaniꞌ nene ekeseꞌ noso neꞌmino nenako aꞌmine i-nidilizaniꞌ initeꞌ nene ha gehelesa nouve. Idoꞌ linginesi neniꞌ geheloniꞌ initeꞌ ekeseꞌ noso neꞌmino minineꞌ nene ha gihilisidoꞌ i nizasihe. Neꞌmine lavo tiꞌ li lasineꞌ: Ee, laza neꞌmine ha olosidoꞌ o nosive.
MAT 20:23 Likesivo aza lo-ngimineꞌ: Lamineꞌ lingine neniꞌ geheloniꞌ mulumo geni nene gihilisineꞌza zamelasi adavalasi minaaꞌ moꞌmosiꞌ nene neniꞌ initeꞌ neivosa lengemelohe. Meꞌneho dalisive lo do vaꞌvaꞌ o-ngidive nene engikovoꞌ nene dalisasive.
MAT 20:24 Idoꞌ uvolohoi akunoloi neꞌmine asineꞌ nemuꞌ izipahala zuho linge teni nene gilii engikumuꞌ nene muluꞌninguꞌ goloso ineꞌza
MAT 20:25 Izesuꞌ aza aꞌmine zuho asi lo-ngemavo ezela ikevo tiꞌ lo lo-ngimineꞌ: Oꞌmosoꞌmi zuho minamaniꞌ heta atoꞌ ve engiꞌ gizebo veꞌine eveneꞌine nene gelekeleꞌ i-ngidilizave li amuzo mili li-ngidaaꞌ nave. Aꞌmine eveneꞌ engita eveneꞌ naba minave nete nene aꞌmine eveneꞌine zuho nene ngivileꞌ igi amuzo ve goloso minisa gizebo i-ngidaaꞌ nave. Neꞌmine igaꞌ naniꞌ nemuꞌ nene lingine mo gili nizaniꞌza
MAT 20:26 lengiꞌ muliseuꞌ nene ingine igaꞌ naniꞌ neꞌmine nene amilisave. Lengikutiꞌ ve maliꞌmo guveꞌnesi ve loloꞌ olove lo gelo ma aza nene lengiꞌ gelekeleꞌ vetine neꞌmine loloꞌ ogo mineleseive.
MAT 20:27 Ee, ve ma aza gomuꞌ molo lengemo eveneꞌ naba minelove lo gelo ma lengiꞌ goboni izipetine neꞌmine loloꞌ ogo mineleseive.
MAT 20:28 Ee, aꞌmine ve aza Oꞌmosolatiꞌ ve gihile ogaꞌ nouvoniꞌ neꞌmine oloseive. Naza eveneꞌ gelekeleꞌ i-nidi neleꞌmizi lamineꞌ ilizave losa lemamuve. Asi gelekeleꞌ o-ngedo ngeleꞌmize lamineꞌ olosa ogo eveneꞌ mukiꞌ nene meni hizo do nguꞌ izo do tineꞌ molo-ngedelove lo engikumuꞌ okoꞌne hulo helelesa limuvoniꞌ ve lineꞌ.
MAT 20:29 Idoꞌ Izesuꞌ aza izipahala zuho ngeleꞌmizo vo Zeliko ebeꞌ hulo novivo eveneꞌ mukiꞌ goloso eꞌmeti vaniꞌ.
MAT 20:30 Neꞌmine navo veꞌine likive sitaꞌ aka gahevela mini Izesuꞌ ogo volosa nave li-ngimikevo gili asi naba li tiꞌ li lasineꞌ: Guvelesi ve naba Davidiꞌ aꞌvo ezeloꞌ medelo minanive make, gaza leliꞌ mulumote ningevo.
MAT 20:31 Nilasivo eveneꞌ mukiꞌ nene gamazi hulilisive li ngelemaniꞌza ingine gohi amuzo mili asi lasineꞌ: Guvekasi ve, Davidiꞌ aꞌvo make, leliꞌ mulumote ningevo.
MAT 20:32 Neꞌmine li nilasivo gelo Izesuꞌ aza akaloꞌ minidoꞌ ha mino asi lo-ngemavo ikesivo tiꞌ lo lo-ngimineꞌ: Lingine nadiꞌ o-lengedelove lisa nigilasive.
MAT 20:33 Neꞌmine lavo ingine tiꞌ li lasineꞌ: Guvekasi ve, vete do lamineꞌ o-ledanivo vete gohi ningelosive losa nolusive.
MAT 20:34 Likesivo Izesuꞌ aza muluno hukavo veꞌnidoꞌ do gelavo aꞌmidoꞌ liteꞌ lo veꞌine lamineꞌ ogavo veꞌine gohi ningi eꞌmeti vasineꞌ.
MAT 21:1 Idoꞌ Zelusalemi numuno di avitoꞌ igi Oliva golola Betehage ebeta igi hetelaniꞌ nene Izesuꞌ aza izipahala zuhoutiꞌ ve sitaꞌ ma ngimiselo
MAT 21:2 tiꞌ lo lo-ngimineꞌ: Aꞌmine ningi nizasineꞌ numuno ebekuꞌ volene vi nidizi ningilisineꞌ nene dongi ize ma naꞌnava izikaniꞌ nene angaleꞌve naba nesi nizasivo ningilisasize. Aꞌmine dongi ize nene vakesi di nouvoda alizo.
MAT 21:3 Idoꞌ neꞌmine nasivo eveneꞌ maliꞌmo aꞌminemuꞌ longoꞌ nolingidivo ma tiꞌ li li-imilizo: Guvelesi veꞌmo eze gono neivo dongi ize memuꞌ limiselavo nousive. Likesivo liteꞌ lo gele lengemo ize ne di vilizo loloseive.
MAT 21:4 Idoꞌ Izesuꞌ aza dongi izemuꞌ ngimiselineꞌ nene Oꞌmosoꞌmi veletiꞌ gamazi lo sotoꞌ ogaꞌ ive polohete maliꞌmo Oꞌmosoꞌmi gamazi ma tiꞌ lo gizineꞌ ma nene gihile izelingumuꞌ lineꞌ ve:
MAT 21:5 Zioni golola Zelusalemi ebekuꞌ alevemuꞌ nene tiꞌ li li-ngimilo: Ningilo. Guvetinesi ve naba aza lengita nave. Hongu emeni damenisi lemo mino dongi izeliꞌmi meheneloꞌ nave. Ee, gono daaꞌ ineꞌ izeꞌmi angale maꞌmo noohikivo lengita nave.
MAT 21:6 Idoꞌ Izesuꞌ aza ngimiselavo izipahala sitaꞌ vi lo-ngimidiꞌmine igi
MAT 21:7 dongi izesi angaleꞌvesi di asineꞌ. Idoꞌ saketiꞌine apasi meheꞌnidoꞌ hitikevo Izesuꞌ aza dongi ize ngomoꞌmi meheneloꞌ dizo aꞌmidoꞌ minineꞌ.
MAT 21:8 Neivo eveneꞌ vailite geneganaꞌine kuluhizi apasi akaloꞌ mili-daniꞌ. Idoꞌ linge ma nete zavile davile ledi aviliseꞌ i-daniꞌ.
MAT 21:9 Neꞌmine ikevo eveneꞌ linge ma vi velela vave netesi idoꞌ alingeꞌ mili ave netesi asi naba li tiꞌ li laniꞌ: Agae, gozopoꞌ guvelesi ve naba Davidiꞌ aꞌvopilemoꞌ ezeloꞌ medelo moꞌmosiꞌve dalinive Guvetesi ve Oꞌmosoꞌmi velemuꞌ anive naineꞌ ma nene noꞌnohoꞌ geita minivo. Agae, Oꞌmoso Okulumokuꞌ veleta opoꞌni lolone li laniꞌ.
MAT 21:10 Idoꞌ Izesuꞌ aza Zelusalemi numuda nodizivo numuno meꞌninge ingine upuhoꞌ igi laniꞌ: Me ve nene zaho neve.
MAT 21:11 Tiꞌ li likevo eveneꞌ eꞌmetave ingine laniꞌ: Me ve nene polohete Izesuꞌ nGalilaia misubouꞌ Nasalete numudatiꞌ ve ma ne neive li laniꞌ.
MAT 21:12 Idoꞌ Izesuꞌ aza monoꞌ numuno nabala dizineꞌ. Dizo aꞌminguꞌ initeꞌ maketi milaaꞌ meni hizaaꞌ igi minave nene ngeleto do hulo-ngedo monoꞌ numunguꞌ hulaaꞌ moni senisimi igaꞌ aveliti holomoꞌine nene do tululu lo do hulo-ngedo nama viluso Oꞌmoso lehizi-dilizangumuꞌ maketi mili minavete holomoꞌinesi do velepeꞌ izo hite-ngidineꞌ.
MAT 21:13 Neꞌmine ogo Izesuꞌ aza tiꞌ lo lo-ngimineꞌ: Oꞌmosoꞌmo lineꞌ gamazi ma Monoꞌ Godolouꞌ tiꞌ li gizi nizaniꞌ ve: Neniꞌ numuꞌne nene eveneꞌ nete dizi nopoꞌni li-nimaaꞌ numuno ve losa mineleseive. Neꞌmine li gizi nizaniꞌza lingine aꞌminguꞌ igi mili minaaꞌ naniꞌ initeꞌ neꞌmo nene gumineloꞌ vete igi mili minaaꞌ numuno loloꞌ ogave.
MAT 21:14 Idoꞌ monoꞌ numunguꞌ neivo veꞌine likive idoꞌ gizeꞌine aꞌine goloso ive ingine ezela aniꞌ. Ikevo do guno o-ngidineꞌ.
MAT 21:15 Idoꞌ neꞌmine neivo evenetoꞌ medeli mini Oꞌmoso initeꞌ lehizi-daaꞌ ave naba nesi idoꞌ Zuda ve gozopotatiꞌ laniꞌ monoꞌ apizi ngimaaꞌ avesi ingine Izesuꞌ ngehelele izaaꞌ initeꞌ atoꞌ atoꞌ ogo molo ineꞌ nene ningi idoꞌ aꞌminguꞌ izipe ngomo ngama nete gozopoꞌ guvelesi ve naba Davidiꞌ aꞌvopilemoꞌ ezeloꞌ medelo minanive make, lolize ize gemelone li gekeꞌ gekeꞌ li-di minaniꞌ nesi ningi gili muluꞌninguꞌ goloso gili ngizeboloꞌ molaniꞌ.
MAT 21:16 nGizeboloꞌ molavo tiꞌ li li-imaniꞌ: Neꞌmine lamilizaniꞌ gamazi nilaniꞌ nene gele nabe. Likevo Izesuꞌ tiꞌ lo lineꞌ: Naza gele nouvoniꞌza monoꞌ godolouꞌ gamazi ma Oꞌmosomuꞌ tiꞌ lo neineꞌ ma nene lingine gati gilahe gilamave: Gaza veꞌine do lapa nomineꞌ o-ngedanivo izipe angale ngomo olihe amine ninaniꞌ nete gopoꞌni li-gimilizanguꞌ nene ladanga ma lamilisave.
MAT 21:17 Neꞌmine lo lo-ngemo hulo-ngedo Zelusalemi numuno ebeꞌ hulo Betani numuno ebeta vo onganiꞌ.
MAT 21:18 Nedengaꞌ goꞌ lavo oteko numuno nabala novivo gaꞌna olaniꞌ.
MAT 21:19 Gaꞌna olavo novo akaloꞌ gohuno za ma ningineꞌ. Ningo gihile ize neihe lo aꞌmida vo ningineꞌza haza avilevoꞌ ningineꞌ. Ningo tiꞌ lo lineꞌ: Gohi ma gihile izamilidoꞌ o neive. Neꞌmine lo lavo aꞌmidoꞌ geto gohuno za ma apiꞌ ogo gulugulu izo gokoꞌ lineꞌ.
MAT 21:20 Neꞌmine ogavo Izesuꞌ izipahala zuho ingine ningi upuhoꞌ igi tiꞌ li laniꞌ: Za me ve ne nadiꞌmine ogosa liteꞌ lo gulugulu izive.
MAT 21:21 Neꞌmine likevo Izesuꞌ aza tiꞌ lo lo-ngimineꞌ: Laminetoꞌ nolo-lingimuve. Lingine initeꞌ ma ilisa gili Oꞌmosola lunivo hize eleꞌ o-ledavo ha olosune li gili eleꞌvoleꞌ igi gatine sitakisi gilamilizaniꞌ nene aꞌmine initeꞌ ha ilisave. Idoꞌ neniꞌ gohuno zaloꞌ uvoniꞌ initeꞌ neꞌminesi ha igi aꞌmine neꞌmine initeꞌ ivileꞌ igisa eveneꞌ amiliza initeꞌ gehepeve ha ilisave. Adoꞌ mene golomuꞌ nene ngutoko guvo nosouꞌ lemelive lilizaniꞌ nesi nene gihile ha izeleseive.
MAT 21:22 Ee, Oꞌmosola loloneꞌ initeꞌ nene ha lemeleseive li ezemuꞌ gili eleꞌvoleꞌ igi mini ezela li naniteꞌ nanitekumuꞌ lilizahe aꞌmine initeꞌ nene ha lengemeleseive.
MAT 21:23 Idoꞌ Izesuꞌ aza monoꞌ numuno nabauꞌ dizo eveneꞌ monoꞌ lo-ngemo neivo evenetoꞌ medeli mini Oꞌmoso initeꞌ lehizi-daaꞌ ave nabasi idoꞌ eveneliti gizebo veꞌinesi igi heteli tiꞌ li longoꞌ i-daniꞌ: Initeꞌ mene ogaꞌ naineꞌ nene zahi velemuꞌ ogaꞌ nane. Idoꞌ zaho lavosa ogaꞌ nane.
MAT 21:24 Likevo Izesuꞌ aza lo-ngimineꞌ: Nazasi initeꞌ mamuꞌ longoꞌ o-lengedekuvo li-nimilizaniꞌ nene aꞌmineꞌmine ogo nazasi ha zahi velemuꞌ initeꞌ ogaꞌ nouhe nemuꞌ nene lo-lengemelesuve.
MAT 21:25 Monoꞌ noso holo-ngedelive lo Zohaneꞌni zaho imiselive. Oꞌmosoꞌmo imiselihe idoꞌ haza misubouꞌ velite imiselave. Neꞌmine lavo ingine angiseꞌinemuꞌ li voleloꞌ meloꞌ igi tiꞌ li laniꞌ: Laza Oꞌmosoꞌmo imiselive losoꞌ nene nanitekumuꞌ gili imisaꞌmave loloseive.
MAT 21:26 Idoꞌ evenelite ve losoꞌ nene eveneliti golise gelelesune. Evenelite Zohaneꞌ nene polohete ve li gili nizanako nemuꞌ ngehelele izineꞌ.
MAT 21:27 Neꞌmine li gili ngehelele izavo Izesuꞌni tiꞌ li li-imaniꞌ: Ma gelamune. Likevo Izesuꞌ aza tiꞌ lo lo-ngimineꞌ: Lingine li-nimamaniꞌ nemuꞌ nene nazasi ogo molo ogaꞌ nouvoniꞌ initeꞌ mene iline lo nimiselivemuꞌ nene ma lo-lengemamolosuve.
MAT 21:28 Neꞌmine lo imineꞌ molo lineꞌ: Lingine gililo. Ve maliꞌmo gipele sitaꞌ gedekineꞌ. Aꞌmine ve aza gipele ganaꞌve neidoꞌ vo tiꞌ lo lineꞌ: Gipeꞌne make, idise nene vaini minguꞌ vo gono dozo lineꞌ.
MAT 21:29 Lavo gipele aza vamolosuve lineꞌ. Neꞌmine lineꞌza alingeꞌ luꞌve do velepeꞌ izo gele do vineꞌ.
MAT 21:30 Meꞌnibo aza iheꞌ vo alingeni gipele neida vo aꞌmineꞌmine lineꞌ. Lavo gipele aza Ahono, volosuve lo lineꞌza vamineꞌ.
MAT 21:31 Neꞌmine lo Izesuꞌ tiꞌ lo longoꞌ o-ngidineꞌ: Aꞌmine gipele sitakutiꞌ nene meꞌnibine gelekeleꞌ lamineꞌ zaho o-dive. Neꞌmine lavo ingine ganaꞌveꞌmo ve laniꞌ. Likevo aza tiꞌ lo lo-ngimineꞌ: Idoꞌ aꞌmineꞌmine ogo Zohaneꞌ lengita ogo lamineꞌ igi mili minilizaniꞌ aka lengelebizineꞌza lingine gili imamaniꞌ. Ee, lingine gili imamaniꞌza initeꞌ goloso palasa igaꞌ ave, takisi moni daaꞌ ave idoꞌ pasidiatoꞌ monaaꞌ aniꞌ veneꞌ alu nevoꞌminete gili imaniꞌ. Neꞌmine aniꞌ nene lingine ningikeniꞌ neineꞌza ningisa alingeꞌ lutine di velepeꞌ izi gili imamaniꞌ neive. Lingine langisetinemuꞌ nene laza Okulumokuꞌ miniveꞌmo gizebo inguꞌ vo holalonive nene laꞌlisete adoꞌ nene none li gilaaꞌ nahe. Naza laminetoꞌ ma lo-lengemelove. Aꞌmine takisi moni daaꞌ ave golososi idoꞌ pasidiaꞌ veneꞌ nesi lengiꞌ lingivileꞌ igi aꞌminguꞌ vi hilalizave liliꞌ ilisave.
MAT 21:33 Aneza gamazi gohi me gililo. Ve maliꞌmo misuboꞌve naba minavo aꞌminguꞌ vaini mine ma zuhoꞌ ineꞌ. Zuhoꞌ ogo aꞌmidoꞌ gesi hize vodo vodo ogo vaini gihile hite miꞌ izo lipelineꞌ galese nesi elo aꞌminguꞌ mini miꞌveloꞌ gizebo iliza numuno haꞌna nesi do dizo gizo eveneꞌ ma mine gizebo i-dilizave lo hulo-ngedo misubo mala vo minineꞌ.
MAT 21:34 Vo neivo za gihile elaaꞌ gamene alitavo aꞌmine za gihiletiꞌ ma vi di-nidi alo lo gelekeleꞌ izipe ngeletavo vi aꞌmine mineloꞌ gizebo i-davela vi laniꞌ.
MAT 21:35 Vi laniꞌza minguꞌ gono daaꞌ avete gelekeleꞌ izipe nene aꞌnidoꞌ di giliꞌ li ma ne gesebeꞌ izi bili ma nene bili hili ma nene geheni huli huliꞌ igi bilaniꞌ.
MAT 21:36 Neꞌmine ikevo gelekeleꞌ ve gomuꞌ ngimiselineꞌ nene ngivileꞌ ogo gelekeleꞌ ve gohi ma mukiꞌ ngimiselineꞌ. Ngimiselavo vikevo gohi aꞌmineꞌmine sunovoꞌ di-ngidaniꞌ.
MAT 21:37 Neꞌmine ikevo alingeꞌ mine meleho aza neꞌmine ikeniꞌza neniꞌ gipeꞌne gihile mene imiselekuvo vavo eiꞌ gipele ogaze li ningi nene eleꞌmizi lamineꞌ ilizahe lo gelo aꞌmine gipele nene engita imiselavo vineꞌ.
MAT 21:38 Novivo mineloꞌ gizebo ve ingine ningi eiꞌ gipele gehepeve navo ningi tiꞌ li laniꞌ: Me veꞌmo alingeꞌ melehidoꞌ medelo mine mene dalive neinako mo bele helo eiꞌ mineloꞌ nene leliꞌ molalone.
MAT 21:39 Neꞌmine li mo geleleheꞌ igi eleꞌmizi vaini gesi heta vi bili hilaniꞌ.
MAT 21:40 Neꞌmine aniꞌ nemuꞌ mine meleho ogo ningo mineloꞌ gizebo ve nadiꞌ o-ngedelive.
MAT 21:41 Neꞌmine lo longoꞌ ogavo tiꞌ li Izesuꞌni li-imaniꞌ: Aꞌmine eveneꞌ goloso nene do goloso ogo ngebele geseꞌ oloseive. Idoꞌ vaini mine nene mine gizebo igaꞌ ave atoꞌ ngemavo gizebo igi nizavo mingutiꞌ za gihile daaꞌ gamene vilineꞌ nene aꞌmine gihile mine melehine di imikaꞌ imikaꞌ igi minilisave.
MAT 21:42 Tiꞌ li likevo Izesuꞌ aza tiꞌ lo lo-ngimineꞌ: Lingine Monoꞌ Godolouꞌ gamazi neꞌmine lo neineꞌ ma gati gilisaꞌmahe: Numuno gizilizaniꞌ geheni mukikutiꞌ geheni ma nene numuno gizaaꞌ avete ningi goloso o vive li di kegesi hulaniꞌ geheni neꞌmo geheni mukiꞌ ngivileꞌ ogo numuno do amuzo molaaꞌ geheni loloꞌ ogave. Guvelesi veꞌmo aꞌmine initeꞌ do sotoꞌ ogaze. Evenelite ningekunivo lamineꞌ gehepeve ogave.
MAT 21:43 Nemuꞌ naza lo-lengemelove: Oꞌmosoꞌmo lengitoꞌ gizebo ogaꞌ neineꞌ nene ipeꞌ ogo eveneꞌ zuho gohi ma eiꞌ gizebouꞌ minaliꞌmi monovo gihile igi mili gelekeleꞌ i-di minilizave ma do ngemeleseive. [
MAT 21:44 Idoꞌ eveneꞌ ma nete aꞌmine gehedoꞌ veleheꞌ limi ingalizaniꞌ nene izi iti hupiꞌ izilisave. Idoꞌ aꞌmine geheni neꞌmo lemo eveneꞌ ma ngebelelineꞌ nene izo lanahana o-ngedeleseive.]
MAT 21:45 Aneza gamazi lo okuꞌ lavo evenetoꞌ medeli mini Oꞌmoso initeꞌ lehizi-daaꞌ ave naba nesi idoꞌ Halisaioꞌ monoꞌ laaꞌ avesi aꞌmine aneza gamazi ne gili lelikumuꞌ nolive li gilaniꞌ.
MAT 21:46 Neꞌmine li gili analoꞌ di bililizaniꞌ akamuꞌ viseꞌ igi minaniꞌza eveneꞌ mukiꞌ Izesuꞌnimuꞌ nene Oꞌmosolatiꞌ polohete neive li gilanako neꞌmo engikumuꞌ golise gili huli-mikaniꞌ ve.
MAT 22:1 Izesuꞌ aza iheꞌ imineꞌ molo aneza gamazi nolo-ngemo tiꞌ lo lineꞌ:
MAT 22:2 Okulumokuꞌ miniveꞌmo eiꞌ gizebo inguꞌ vi hilalizave lo elese molave ingine aꞌmanapa igi amavo atoꞌ aleve ngeleꞌmize molalineꞌ monovo neꞌmino neive: Guvelesi ve maliꞌmo gipeleloꞌ veneꞌ hukolosa nosoꞌ niteꞌ do vaꞌvaꞌ ineꞌ.
MAT 22:3 Do vaꞌvaꞌ noogo gelekeleꞌ izipe ngimiselavo elese molaveloꞌ vi alo li li-ngidaniꞌza aꞌmine elese molave ingine gilii aꞌmanapa igi amaniꞌ.
MAT 22:4 Neꞌmine ikevo aza iheꞌ gelekeleꞌ izipe ngimiselo tiꞌ lo lineꞌ: Elese muluve maloꞌ gohi vi neꞌmine li-ngimilo: Nosoꞌ niteꞌ nene mo do vaꞌvaꞌ okuve. Bulumakaꞌ idoꞌ ize ato atoꞌ gehesi minaniꞌ mo ngebelo gize vataꞌ ogo nosoꞌ niteꞌ ato atokisi do vaꞌvaꞌ ogo molo nouve. Nemuꞌ nene aꞌmine lo vineꞌ nosoꞌ nitetoꞌ nene aloꞌ alo.
MAT 22:5 Tiꞌ lo lavo ingine iheꞌ vi li-ngidikevo goseleꞌ ngebelo vosoꞌ gaꞌine ngisamivo gili huli ve ma ne miꞌveuko vavo ve ma ne bisinisiꞌvela vo gonouꞌ vineꞌ.
MAT 22:6 Idoꞌ linge ma nete guvelesi veꞌmi gelekeleꞌ izipe nene aꞌnidoꞌ di linge ma goboni mili-ngidi linge ma nene ngibili hilaniꞌ.
MAT 22:7 Neꞌmine ikevo guvelesi ve aza izeboloꞌ goloso molavo ami lovouꞌ monaaꞌ ave ngeletavo vi gelekeleꞌ izipe ngibili hilave vi ngebele geseꞌ igi numuꞌine ebeꞌine viteꞌ viteꞌ igi ngibilaniꞌ.
MAT 22:8 Neꞌmine ikevo guvelesi ve aza iheꞌ gelekeleꞌ izipe tiꞌ lo lo-ngimineꞌ: Nosoꞌ niteꞌ nene mo do vaꞌvaꞌ o noneꞌza elese muluve nene ngemeni dameni golososi aꞌminguꞌ amosolovoꞌ minaniꞌ.
MAT 22:9 Nemuꞌ nene vi aka ngomoꞌ nabakuꞌ moni ningilizaniꞌ eveneꞌ mukiꞌ ngeleꞌmizi ikevo nosoꞌ niteꞌ mene nalizave.
MAT 22:10 Neꞌmine lavo aꞌmine gelekeleꞌ izipe aka ngomo ngomouꞌ moni eveneꞌ golososi laminekisi ngeleꞌmizi ikevo nosoꞌ niteꞌ di vaꞌvaꞌ aniꞌ numunguꞌ nene gikiꞌ lamineꞌ aniꞌ ve.
MAT 22:11 Eveneꞌ vaiꞌ gikiꞌ ikevo guvelesi ve aza ningelesa dizineꞌ. Dizo ningineꞌ nene ve maliꞌmo nosoꞌ niteꞌ nalisa gonolise lamineꞌ igaꞌ adiꞌmine amo haza ogo minineꞌ nene ningineꞌ.
MAT 22:12 Ningo guvelesi veꞌmo tiꞌ lo longoꞌ o-dineꞌ: Zogone, gaza nosoꞌ niteꞌ nalisa genegana lamineꞌ ngilaaꞌ aniꞌ ma ngolamo meuꞌ nanitekumuꞌ dizane. Neꞌmine lavo aꞌmine ve gamazi lilineꞌ nomivo viseꞌ ogo minineꞌ.
MAT 22:13 Neꞌmine ogavo guvelesi ve aza gelekeleꞌ izipe lo-ngimineꞌ: Gizene analoꞌ nalaꞌ di-miki huli hetoꞌ litiꞌmuso naba ize mininguꞌ nene huli-dilo. Neloꞌ mino mulumo alumo gelo ive nama ogo vele ongoho langoloꞌ ogo mineleseive.
MAT 22:14 Tiꞌ lo lo-ngemo Izesuꞌ aza neꞌmine lineꞌ: Oꞌmosoꞌmo eveneꞌ mukiꞌ elese molo neineꞌza aꞌmingutiꞌ nene eveneꞌ hamo pamokovoꞌ nevo gizekaꞌ ogo do anauꞌ oloseive.
MAT 22:15 Neꞌmine lavo Halisaioꞌ monoꞌ laaꞌ ave vi tiꞌ li lovo gizi laniꞌ: Eveneꞌ ma ngimiselekunivo vi Izesuꞌni golo izikevo goniꞌ o-deloineꞌ gamazi lilingumuꞌ ve laniꞌ. Neꞌmine li engiꞌ izipahaꞌine zuhoutikisi guvelesi ve Helodeꞌni hize eleꞌ i-daaꞌ aveutikisi eveneꞌ linge ma ngimiselikevo
MAT 22:16 Izesuda igi heteli tiꞌ li li-imaniꞌ: Tisazo, gaza ve lisiheꞌ lamineꞌ naineꞌ nene mo gele none. Gamazi lo-ngemelineꞌ aleve nene naniꞌmine aleve nilizahe nemuꞌ gaza gaka mukiꞌ gelesaꞌmane. Eveneꞌ naba mini geiꞌ lilineꞌ gamazimuꞌ muluꞌninguꞌ goloso gili gelemilizadokisi nilizaniꞌ nemuꞌ gelamo Oꞌmosoꞌmi aka lelebizo gamazi gihilevoꞌ lo lemaaꞌ nane. Nemuꞌ nene geiꞌ gaka gele naineꞌ nene lo lemezo. Gelelonge. Neꞌmine li tiꞌ li longoꞌ i-daniꞌ: Loma veti guveꞌinesi ve naba Kaesaleꞌ aza takisi moni huli-nidilizave lo neidoꞌ nene eꞌmeto Zuda ve laza ma hulo-desoꞌ nene lisiheꞌ o neihe. Louꞌ gamazite avutoꞌ o neive.
MAT 22:18 Tiꞌ li laniꞌza Izesuꞌ aza engiꞌ monovo goloso ningo gelo adoꞌ lingine Kaesaleꞌni takisi moni imilo lilineꞌ neꞌmo Zuda ve nene ngizeboloꞌ molavo ganala dalive. Idoꞌ imamilo lilineꞌ nene Loma ve ngizeboloꞌ molavo ganala dalive li gilaniꞌ nene gelo tiꞌ lo lo-ngimineꞌ: Lingine eveneꞌ vevesi minaniꞌ gili moni lutine goloso o vineꞌ nene di halekaniꞌ mene
MAT 22:19 nanimuꞌ nemenguꞌ nimilave. Takisi milaliza moni nene ningeloze. Di alo. Neꞌmine lavo aꞌmine geheni ne di igi elebizaniꞌ.
MAT 22:20 Elebizikevo ningo tiꞌ lo longoꞌ o-ngedo lineꞌ: Me moniloꞌ eveneliꞌmi golo velesi gulivesi neineꞌ nene zahi golo velesi gulivesi neive. Longoꞌ o-ngedavo nene Kaesaleꞌ ma ve laniꞌ.
MAT 22:21 Neꞌmine likevo Izesuꞌ aza tiꞌ lo lo-ngimineꞌ: Tiꞌ li ma aꞌmine moni nene ngamani gizebo ve eiꞌ Kaesaleꞌ initeꞌve noloseinako aꞌminemuꞌ nolivo ma nene ha imilo. Idoꞌ aꞌmineꞌmine igi Oꞌmosoꞌmo lingimineꞌ initetoꞌ nene ha golo hizi imilo.
MAT 22:22 Neꞌmine lavo engiꞌ gamaziꞌine neꞌmo ivileꞌ amivo ingine veꞌine gahava nomineꞌ mini huli-miki vi ha ha aniꞌ.
MAT 22:23 Idoꞌ aꞌmine gameneuꞌ nene Sadukaioꞌ monoꞌ laaꞌ ave ingine helaakutiꞌ otaaꞌ ne nomive laaꞌ ave engikutiꞌ linge ma Izesuda igi longoꞌ i-di laniꞌ:
MAT 22:24 Tisazo, Moseꞌ aza luhuvo tiꞌ lo gizo lemave: Uvoꞌninge nakuꞌninge ma minilizangutiꞌ maliꞌmo veneꞌ do mino izipe gedamo helavo ma engikutiꞌ maliꞌmo aꞌmine veneꞌ gevonoꞌ nene do aꞌmine hilivemuꞌ nene izipe gedo molo-delive.
MAT 22:25 Neꞌmine o neinako uvoꞌninge nakuꞌninge seveni ma minaniꞌ. Uvoꞌnibo ganaꞌve neꞌmo veneꞌ do mino izipahala sotoꞌ amavo hilineꞌ. Helavo nakunolo aꞌmidotiꞌ neꞌmo elenahine daniꞌ.
MAT 22:26 Idoꞌ aꞌmine nakunolo aꞌmine veneꞌ do aꞌmineꞌmine ogo izipe gedamo helavo nakunolo aꞌmidotiꞌ neꞌmosi aꞌmine veneꞌ do izipe gedamo hilineꞌ. Ee, aꞌmine uvoꞌninge nakuꞌninge seveni aꞌmine veneꞌ nene dikaꞌ dikaꞌ igi izipe gidami hili osuꞌ laniꞌ.
MAT 22:27 Hili osuꞌ likevo alingeꞌ veneꞌ aza hilineꞌ.
MAT 22:28 Neꞌmine ogavo aꞌmine uvoꞌninge nakuꞌninge seveni nete aꞌmine veneꞌ nene mukilite daniꞌ ma nenako eveneꞌ mukiꞌ hilangutiꞌ otiliza gameneuꞌ zahi elenaho loloꞌ ilive.
MAT 22:29 Likevo Izesuꞌ aza tiꞌ lo lo-ngimineꞌ: Lingine Oꞌmosoꞌmi gamazi Monoꞌ Godolouꞌ gizi nizaniꞌ nene gili vevesami Oꞌmosoꞌmi amuzomukisi gili lamineꞌ isaꞌmaniꞌ neꞌmo gili gopo ikeve.
MAT 22:30 Hilangutiꞌ otaaꞌ gameneuꞌ nene veneꞌ daaꞌ idoꞌ veloꞌ vaaꞌ monovo nene ma minamoloseive. Eveneꞌ Oꞌmosoꞌmi angelole ha minaaꞌ naniꞌ neꞌmini inginesi ha minilisave.
MAT 22:31 Neꞌmine o neineꞌza eveneꞌ hilangutiꞌ otaaꞌ nemuꞌ lo-lengemelove. Lingine Oꞌmosoꞌmo me gamazi lo-lingimineꞌ nene Monoꞌ Godolouꞌ gize neineꞌ ma gati gilahe gilamave.
MAT 22:32 Tiꞌ lo gize neive: Naza Abalahamule Isakale Zakobole engiꞌ Oꞌmosoꞌine ne nouve lineꞌ. Idoꞌ aꞌmine ve hili osuꞌ ladiniko engiꞌ Oꞌmosoꞌine nouve ngelo ma lamidine. Engiꞌ Oꞌmosoꞌine nouve lineꞌ neꞌmo mo hili osuꞌ lami ha nizave lo gelelesune.
MAT 22:33 Tiꞌ lo Izesuꞌ lineꞌ nemuꞌ eveneꞌ ingine upuhoꞌ igi voꞌine gaꞌine vineꞌ ve.
MAT 22:34 IdoꞌIzesuꞌ lineꞌ gamazi nene ivileꞌ igi Sadukaioꞌ monoꞌ laaꞌ avete aꞌmidoꞌ gamazi ma li-imamilizaniꞌ o vivo gili Halisaioꞌ monoꞌ laaꞌ ave Izesuꞌ neida vi di geseꞌ ikevo
MAT 22:35 engikutiꞌ ve ma Zuda vete monoꞌ gozopotatiꞌ laaꞌ naniꞌ nene apize ngemaaꞌ ive ma minineꞌ neꞌmo emenguꞌ molo tiꞌ lo longoꞌ o-dineꞌ:
MAT 22:36 Tisazo, Oꞌmosoꞌmo louꞌ gamazi lo huko-lidineꞌ neutiꞌ louꞌ gamazi mukiꞌ ngivileꞌ ogo nani gamaziꞌmo dizo neive.
MAT 22:37 Lavo Izesuꞌ aza tiꞌ lo lo-imineꞌ: Dizo neineꞌ gamazi nene neꞌmine lo neive: Lutine gatine vodinesi Guvelesi ve Oꞌmosotida nene mili lutine imivoꞌ minilo.
MAT 22:39 Idoꞌ aꞌmidotiꞌ lemo minineꞌ gamazi ma aꞌmine gidini mino tiꞌ lo neive: Lingine lengiꞌ okodinemuꞌ gilaaꞌ naniꞌ neꞌmine igi eveneꞌ avita gidini nizavemukisi nene gili lutine ngimilo.
MAT 22:40 Moseꞌ louꞌ gamazi linge gizineꞌ nesi idoꞌ Oꞌmosoꞌmi veletiꞌ gamazi li sotoꞌ igaꞌ ave polohetelite gizi nizaniꞌ gamazi mukiꞌ nesi aꞌmine louꞌ sitaꞌ gele daaꞌ monovo nene ha li ngoloꞌ lilisa imineꞌ mili gizi nizaniꞌ ve.
MAT 22:41 Idoꞌ Halisaioꞌ monoꞌ laaꞌ ave ingine di geseꞌ igi nizavo Izesuꞌ aza longoꞌ o-ngedo
MAT 22:42 tiꞌ lineꞌ: Lingine Oꞌmosoꞌmo do luꞌ izelive lo imiselelesa livemuꞌ gilikevo zahi aꞌvopilemoꞌ nolive. Lavo ingine avotemoti guveꞌinesi ve naba Davidiꞌ aꞌvopilemoꞌ ve li li-imaniꞌ.
MAT 22:43 Li-imikevo tiꞌ lo lo-ngimineꞌ: Tiꞌ li ma Oꞌmosoꞌmi Sikalahuꞌ neꞌmo do ote-davo Davidiꞌ aza aꞌmine vemuꞌ Guveꞌnesi ve ve lineꞌ nene nanimuꞌ lave. Davidiꞌ aza tiꞌ lo lineꞌ:
MAT 22:44 Okulumokuꞌ ve aza Guveꞌnesi vemuꞌ tiꞌ lo lo-imineꞌ: Nezelotiꞌ geiꞌ ne nange. Aꞌne hulaaꞌ uvoda minezo. Nanivo biluvaka nene gizengala doꞌmo leme-ngedekuvo gelekeleꞌ i-gidi minilisave.
MAT 22:45 Neꞌmino Davidiꞌ neꞌmo Guveꞌnesi ve ve lo lineꞌ nenako nemuꞌ aꞌmine do luꞌ izelive lo Oꞌmosoꞌmo imiselelesa live aza Davididatiꞌ leme mino ha aꞌvovoꞌ nado minelive.
MAT 22:46 Neꞌmine lo longoꞌ o-ngedavo eveneꞌ aꞌminguꞌ mo ngeli li-imamilizaniꞌ ogavo aꞌmine gamenelotiꞌ nene ngehelele goloso izavo initeꞌ gohi mamuꞌ longoꞌ i-damaniꞌ.
MAT 23:1 Izesuꞌ aza eveneꞌ mulisesi idoꞌ izipahala zuhosi gamazi nolo-ngemo
MAT 23:2 tiꞌ lo lineꞌ: Ingine Zuda vete monoꞌ gozopotatiꞌ laaꞌ naniꞌ apizi lingimaaꞌ navesi idoꞌ Halisaioꞌ monoꞌ laaꞌ avesi Moseꞌ ogo molo ineꞌ monovo di aꞌninguꞌ igi Oꞌmosoꞌmo louꞌ gamazi lo huko-limingumuꞌ nene li-lingimaaꞌ nave.
MAT 23:3 Nemuꞌ nene gili ngimii ingine li-lingimilizaniꞌ gamazi mukiꞌ nene gili di minilo. Tiꞌ o neineꞌza li-lingimaaꞌ naniꞌ gamaziloꞌ nene angiseꞌinesi eꞌmetisaꞌmanaze. Nemuꞌ ingine igi mili igaꞌ naniꞌ ngemeni dameni neꞌmine nene lingine amilo.
MAT 23:4 Ingine louꞌ gamazi ngomoꞌ nabaꞌ di nubuho igi gili dalizave li aꞌmine geniꞌvesi louꞌ gamazi vaiꞌ nene eveneliti gataꞌnidoꞌ gihi-ngidaaꞌ nave. Gihi-ngidaaꞌ naniꞌza aꞌmine geniꞌvesi louꞌ gamaziutiꞌ louꞌ hamoꞌ ma ngomo lasolo neꞌminesi angiseꞌine ma gihisaꞌmave.
MAT 23:5 Initeꞌ mukiꞌ igi mili igaꞌ naniꞌ nene evenelite ningi lopoꞌni lilizave lisa igaꞌ nave. Idoꞌ ngopoꞌni lilizangumuꞌ nene Monoꞌ Godolo avile di gangi bokisi ngomouꞌ miliki golihiꞌnidoꞌ nehe aꞌninguꞌ nehe nalaꞌ izikaꞌ aniꞌ nene eveneꞌ linge ngivileꞌ igi engiꞌ di naba igi izikaꞌ nave. Tiꞌ igi Moseꞌ louꞌ molaniꞌ nene gate molalive li gili goꞌ gala neꞌmine geneganaꞌine gahevela hela hela naꞌnava izikaniꞌ neꞌmo eveneꞌ ma ngivileꞌ igi di naba igi izikaꞌ nave.
MAT 23:6 Neꞌmine iki nosoꞌ niteꞌ naba nada nehe idoꞌ monoꞌ numunguꞌ nehe nevoꞌminguꞌ vilizaniꞌ nene eveneꞌ nabalitevoꞌ minaaꞌ aniꞌ holomolokovoꞌ minilisa gili minaaꞌ nave.
MAT 23:7 Idoꞌ maketiloꞌ eveneꞌ muliseuꞌ siza li-lidilizave li idoꞌ tisazo li di hozi li-lidilizave li gilaaꞌ nave.
MAT 23:8 Ingine neꞌmine igaꞌ naniꞌza Oꞌmosoꞌmo hamoꞌ lengiꞌ tisatine neivo lingine eze izipahala zuho mini linge ma dizi minikevo linge ma limi minamanako nemuꞌ eveneꞌ mamuꞌ Tisazo li-ngidamilizave.
MAT 23:9 Idoꞌ me misubouko eveneꞌ ma di hozi li-di ezemuꞌ meteho ve lamilo. Okulumokuko neive Oꞌmoso eiꞌ hamoꞌ Metibo ne neive.
MAT 23:10 Idoꞌ lengikumuꞌ gizebo ve ve likelizave. Oꞌmosoꞌmo do lunguꞌ izelive lo imiselelesa live eikovoꞌ hamoꞌ lengiꞌ gizebo vetine neive.
MAT 23:11 Idoꞌ aꞌmineꞌmine ogo lengikutiꞌ ve ma dizo nolineꞌ nene gelekeleꞌ o-lengedo minelive.
MAT 23:12 Idoꞌ ve ma engiꞌ guliveꞌine di dizi minilizaniꞌ nene engiꞌ guliveꞌine doꞌmo leme-ngedeleseive. Idoꞌ ingine engiꞌ diꞌmi limi minilizaniꞌ nene Oꞌmosoꞌmo doꞌmo dize-ngedo hize eleꞌ o-ngedeleseive.
MAT 23:13 Lingine Zuda vete monoꞌ gozopotatiꞌ laaꞌ naniꞌ apizi ngimaaꞌ navesi idoꞌ Halisaioꞌ monoꞌ laaꞌ navesi nene ehetine ve. Lingine eveneꞌ vevesi minave gili monaaꞌ naha lutine goloso o vineꞌ nene di halekaaꞌ nave minaniꞌ neive. Neꞌmine igi mini Okulumokuko miniveꞌmo gizebo inguꞌ vi hilalisa naveti aka hizi tilaaꞌ nave. Langisetine nene aꞌminguꞌ ma dizisaꞌmave. Idoꞌ eveneꞌ ma dizilisa navo ha nevo dizilizave li ningi huli ngimikavo ma dizisaꞌmave. Neꞌmine igaꞌ nanako nemuꞌ agae, mulumotine gelekuve. Oꞌmosoꞌmo lihime lengemelesa neive.
MAT 23:15 Ee, Lingine Zuda vete monoꞌ gozopotatiꞌ laaꞌ aniꞌ apizi ngimaaꞌ navesi idoꞌ Halisaioꞌ monoꞌ laaꞌ navesi ehetine ve. Lingine eveneꞌ vevesi minave gili monaaꞌ naha lutine goloso o vineꞌ nene di halekaaꞌ nave minaniꞌ neive. Neꞌmine igi mini lingine numudoꞌ namadoꞌ moni eveneꞌ hamoꞌ nevo ne lengita giꞌmizilizahe li lingine lelita leꞌmetilizave li li-ngimii eveneꞌ gaꞌine dalisa amuzo goloso milaaꞌ nave. Idoꞌ ma lengeꞌmeti izipahatine zuho liliꞌ igi ma lingine laniꞌ gamazitine gili dalizadiꞌmo lengiꞌ lingivileꞌ igi aka golosoloꞌ moni mulumo ebekuꞌ vi hilalizave liliꞌ ilisave. Neꞌmine igaꞌ nanako nemuꞌ agae, mulumotine gelekuve. Oꞌmosoꞌmo lihime lengemelesa neive.
MAT 23:16 Idoꞌ lingine monoꞌ aka ngelebizaaꞌ ave nizaniꞌza vetine likineꞌ gelavo aꞌmine aka ningi vevesami eveneꞌ monoꞌ nili-ngimi gopo gamazi tiꞌ li li-ngimaaꞌ nave: Gamaziꞌine di amuzo milalisa gamazi lamineꞌ nolune li aꞌine di dizi monoꞌ numuno nabaloꞌ li mili lilizave nene ingine haza gamazivoꞌ lilisave. Soza lilizanikisi engita gamazi ma minamoloseive. Neꞌmine li lingine tiꞌ li li-ngimaaꞌ nave: Ne neiha lamineꞌ nolune li aꞌine di dizi monoꞌ numuno nabauꞌ minineꞌ ngolimoniloꞌ li mili lilizave ingine gamazi laminekovoꞌ lilizaniꞌ o neive. Soza lilizaniꞌ nene Oꞌmosoꞌmo lihime ngemeleseive. Lingine gopo gamazi neꞌmine li eveneꞌ ngeleꞌmizi gopo igaꞌ nanako nemuꞌ ehetine ve.
MAT 23:17 Aꞌmine ngolimoni nene monoꞌ numuno nabauꞌ minidiꞌmo kekeize lineꞌ nenako nemuꞌ nene monoꞌ numuno naba neꞌmo ngolimoni ivileꞌ ogo initeꞌ naba neive. Olo. Neineꞌ nenako nemuꞌ lingine aꞌmine monoꞌ numuno nabaloꞌ lo molaaꞌ nene haza niteꞌ neivo monoꞌ numuno nabauꞌ minineꞌ ngolimoni neloꞌ lo molaaꞌ nene initeꞌ gihile neive li laaꞌ nanako nemuꞌ nene vetine like vineꞌ gelavo eveneꞌ dingani goloso nizave.
MAT 23:18 Idoꞌ lingine gopo gamazi neꞌminesi li-ngimaaꞌ nave: Gamaziꞌine di amuzo milalisa gamazi lamineꞌ nolune li aꞌine di dizi Oꞌmoso imaniꞌ initeꞌ molaaꞌ holomo neloꞌ li mili lilizave ingine haza gamazivoꞌ lilisave. Soza lilizanikisi engita gamazi ma minamoloseive. Neꞌmine li lingine tiꞌ li li-ngimaaꞌ nave: Ne neiha lamineꞌ nolune li aꞌine di dizi aꞌmine holomoloꞌ Oꞌmoso imaaꞌ naniꞌ initetoꞌ li mili lilizave ingine gamazi laminekovoꞌ lilizaniꞌ o neive. Soza lilizaniꞌ nene Oꞌmosoꞌmo lihime ngemeleseive li li-ngimaaꞌ nave.
MAT 23:19 Idoꞌ monoꞌ numuno nabauꞌ Oꞌmoso imaniꞌ initeꞌ molaaꞌ holomo neꞌmo aꞌmine Oꞌmoso imaniꞌ initeꞌ nene kekeize lo neineꞌ nenako nemuꞌ Oꞌmoso imaniꞌ initeꞌ nene holomo neꞌmo ivileꞌ ogo initeꞌ naba neive. Olo. Neineꞌ nenako nemuꞌ lingine aꞌmine holomoloꞌ lo molaaꞌ nene haza niteꞌ neivo aꞌmine holomoloꞌ mili Oꞌmoso imaniꞌ initetoꞌ lo molaaꞌ nene initeꞌ gihile neive li laaꞌ nanako nemuꞌ nene vetine likineꞌ gelave.
MAT 23:20 Gililo. Ingine lamineꞌ nolune li aꞌine di dizi Oꞌmoso imaniꞌ initeꞌ molaaꞌ holomoloꞌ li milalizaniꞌ nene aꞌmine holomolokisi idoꞌ Oꞌmoso imaaꞌ naniꞌ initeꞌ mukiꞌ aꞌmidoꞌ neineꞌ nemukisi li mili lilizaniꞌ geleleseive.
MAT 23:21 Idoꞌ ingine aꞌine di dizi monoꞌ numuno nabaloꞌ li mili lilizaniꞌ nene aꞌmine monoꞌ numuno nabalokisi aꞌmine monoꞌ numuno melehinelokisi li mili laniꞌ geleleseive.
MAT 23:22 Idoꞌ ingine aꞌine di dizi Okulumotoꞌ li mili lilizaniꞌ nene Oꞌmosoꞌmo aꞌmidoꞌ mino initeꞌ mukitoꞌ gizebo ogaꞌ neineꞌ moꞌmosiꞌve nelokisi li mili aꞌmidoꞌ minivelokisi li mili laniꞌ geleleseive. Nemuꞌ nene naniteꞌ nanitetoꞌ li mili adine di dizi lilizahe. Ha gamazi laminekovoꞌ lilisave.
MAT 23:23 Lingine Zuda vete monoꞌ gozopotatiꞌ laaꞌ naniꞌ apizi ngimaaꞌ navesi idoꞌ Halisaioꞌ monoꞌ laaꞌ navesi nene ehetine ve. Lingine eveneꞌ vevesi minave gili monaaꞌ naha lutine goloso o vineꞌ nene di halekaaꞌ nave minaniꞌ neive. Neꞌmine igi mini lingine Moseꞌ louꞌ gamaziutiꞌ gamazi ngomo maloꞌ eꞌmeti midinguꞌ minineꞌ initekutiꞌ linge ngomo ma ize mili Oꞌmoso imaaꞌ nanguꞌ nene initeꞌ ngomo ngomo adoꞌ noso niteꞌ do laniteꞌ ogaꞌ ineꞌ initeꞌ nevoꞌmingutikisi izeꞌ mili Oꞌmoso imaaꞌ naniꞌza Moseꞌ aza eveneꞌ monovo lisihekovoꞌ i-ngidilizangumukisi idoꞌ mulumoꞌine gili ngeleꞌmize lamineꞌ ilizangumukisi idoꞌ goꞌine izamilizangumukisi louꞌ gamazi lineꞌ nene dizo mino initeꞌ naba neineꞌ nene gili hulaaꞌ nave. Aꞌmine lemo minineꞌ louꞌ gamazi ngomo ngomo damilizavoba gili dalizadoꞌ o neineꞌza aꞌmine luvoniꞌ louꞌ gamazi naba nesi gili dalizanako mo gili disaꞌmave. Agae, mulumotine gelekuve. Oꞌmosoꞌmo lihime lengemelidoꞌ o neive.
MAT 23:24 Lingine vetine like vineꞌ gelavo monoꞌ aka ngelebizilisa igi aꞌmine aka ningi vevesami lihime ngomo ngomo daaꞌ monovo hulaniꞌza lihime nabaꞌ naba daaꞌ monovo nene hulamanako eveneꞌ ma nalizaniꞌ initekutiꞌ initeꞌ ngomo lasolo neꞌmo do goloso alive li di huliki initeꞌ goloso naba nene mikileꞌ igaꞌ naniꞌ gili vaniꞌ nizave.
MAT 23:25 Idoꞌ lingine Zuda vete monoꞌ gozopotatiꞌ laaꞌ aniꞌ nene apizi ngimaaꞌ navesi idoꞌ Halisaioꞌ monoꞌ laaꞌ navesi ehetine ve. Lingine eveneꞌ vevesi minave gili monaaꞌ naha lutine goloso o vineꞌ nene di halekaaꞌ nave minaniꞌ neive. Neꞌmine igi mini lingine okodine losuvo di guni iki lamineꞌ noube li igaꞌ naha lutine neꞌmo gumineloꞌ ve gelo mo initeꞌ golosovoꞌ dalisa gili nizave. Lingine kapu idoꞌ lapese heta noso iziki lulouko ha hulikaꞌ naniꞌ neꞌmine nizanako nemuꞌ agae, mulumotine gelekuve. Oꞌmosoꞌmo lihime lengemelesa neive.
MAT 23:26 Halisaioꞌ ve vetine like vineꞌ gilineꞌ mene okodine losuvo nene mo lamineꞌ ilive li ma gomuꞌ nene lutine di lamineꞌ ilisave.
MAT 23:27 Lingine Zuda vete monoꞌ gozopotatiꞌ laaꞌ aniꞌ apizi ngimaaꞌ navesi idoꞌ Halisaioꞌ monoꞌ laaꞌ navesi ehetine ve. Lingine eveneꞌ vevesi minave gili monaaꞌ naha lutine goloso o vineꞌ nene di halekaaꞌ nave minaniꞌ neive. Neꞌmine igi mino lingine gonoso galese heta luhuvo izi di guni ikaniꞌ neꞌmine igi nimonaha lulouko nene gonoso amuzoꞌmo sihononi initeliꞌmo vaiꞌ lo ongo neive. Eveneꞌ okodine losuvoloꞌ ningikevo ve lisiheꞌ lamineꞌ nizahe li ningaaꞌ naha lutinguꞌ nene soza saza laaꞌ monovosi idoꞌ peleseveꞌ izaaꞌ monovosi di naba igi daaꞌ nave. Neꞌmine igaꞌ nanako nemuꞌ agae, mulumotine gelekuve. Oꞌmosoꞌmo lihime lengemelesa neive.
MAT 23:29 Idoꞌ lingine Zuda vete monoꞌ gozopotatiꞌ laaꞌ naniꞌ apizi ngimaaꞌ navesi idoꞌ Halisaioꞌ monoꞌ laaꞌ navesi nene ehetine ve. Lingine eveneꞌ vevesi minave gili monaaꞌ naha lutine goloso o vineꞌ nene di halekaaꞌ nave minaniꞌ neive. Neꞌmine igi mini lingine tiꞌ li laaꞌ nave: Laza avotemote minaniꞌ gameneuꞌ makatoꞌ minunidini ingine Oꞌmosoꞌmi veletiꞌ gamazi li sotoꞌ igaꞌ ave polohete nene ngibili nihilavo laza aꞌmine avotemotine hize eleꞌ o-ngedamunidine. Neꞌmine lii laaꞌ naha aꞌmine avotinge apiꞌ aniꞌ gono nene imineꞌ mili di aꞌmine ngibilaniꞌ polohete idoꞌ ve lisiheꞌ lamineliti gonoso amuzoꞌine mili-ngidaniꞌ numuno gizikaniꞌ nene imineꞌ mili di guni igi gonoso mili-ngidaniꞌ galeseꞌine nene di lamineꞌ igaꞌ nave.
MAT 23:31 Idoꞌ neꞌmine igi lingine polohete ngibili hilaveti zuho minikevo engiꞌ ngemeni dameni lengita minineꞌ nene di sotoꞌ igi lengiꞌ monovotine langisetine li sotoꞌ igaꞌ nave.
MAT 23:32 Lingine avotinge aniꞌ monovo nene di di vamilizanako ha di di vilevo. Neꞌmine igaꞌ nanako nemuꞌ agae, mulumotine gelekuve. Oꞌmosoꞌmo lihime lengemelesa neive.
MAT 23:33 Sataliꞌmi izipahala zuho, Oꞌmosoꞌmo gonitoꞌ lengeleꞌmize molalidotiꞌ ha olovoꞌ ilizahe. Oꞌove. nGeli olovoꞌ amilisave. Nemuꞌ nene lihizamilineꞌ olokuꞌ vi hilalisave.
MAT 23:34 Neꞌmine ilizangumuꞌ nene naza Oꞌmosoꞌmi veletiꞌ gamazi li sotoꞌ i lingimilizavesi idoꞌ gamazi monovo ningi gili li sotoꞌ i lingimilizavesi idoꞌ monoꞌ apizi lingimilizavesi nene lengita ngimiselelesuve. Neꞌmine okuvo ikevo lingine engikutiꞌ linge ma lohotoꞌ zaloꞌ ngibili hili linge ma monoꞌ numudinguꞌ gavosotunuꞌ ngibiliki numudotiꞌ numudotiꞌ ngimiselekaꞌ ngimiselekaꞌ igi minilisave.
MAT 23:35 Aꞌmine ve ngimiseleloniꞌ nene nemuꞌ ngimiselelesuve: Me misubouko nene ve lisiheꞌ lamineꞌ mukiꞌ nene eveneꞌ malite ngibili hilikaꞌ hilikaꞌ aniꞌ neꞌmi lihime nene lengita dizeleseive lo ngimiselelove. Ee, Adamuꞌ gipele ve lisiheꞌ Abeliꞌni uvolohoꞌmo bele hilidotiꞌ nene ve lisiheꞌ mukiꞌ ngibili hiliꞌmi dizi Balakiaꞌ gipele Zakaliaꞌ aza Oꞌmoso lehizi-daniꞌ initeꞌ olokuꞌ gizaaꞌ aniꞌ holomosi idoꞌ monoꞌ numuno naba nesi olusoꞌ neivo bili hiladoꞌ ivo aꞌmine ngibili hilaniꞌ neti lihimeꞌine nene lengita dizeleseive.
MAT 23:36 Laminetoꞌ nolo-lingimuve: Eveneꞌ mukiꞌ ngibili hiladiꞌmi lihime mukiꞌ nene me misubouꞌ idise nizave lengita dizeleseive.
MAT 23:37 Agae, Zelusalemi alevekizo, lingine polohete ngibili hilii idoꞌ Oꞌmosoꞌmo lengita gono dalizave lo ngeletivesi nene geheni gavoso ngibili hilaaꞌ ave lengiꞌ nene okoloholiꞌmo goduvoꞌ do holokeꞌneꞌveko do nubuho o-ngidineꞌ maꞌmine ogo gamene gamene lengeleꞌmize lamineꞌ olosa uvoniꞌza lingine goseleꞌ lengebelave.
MAT 23:38 Lingine gililo. Numuno nabatine minineꞌ ebetinguꞌ nene Oꞌmoso aza gohi minamo mo hulo-lengedavo gaꞌmetoꞌ neꞌmine ogo mineleseive.
MAT 23:39 Idoꞌ mene noluvoniꞌ gamazi neꞌmi monovo tiꞌ lo nolo-lingimuve. Idise melotiꞌ nene neze okoꞌneloꞌ ningami miniꞌmi dizi alingeta gohi sotoꞌ nouvo tiꞌ li li-nimilisave: Guvetesi ve Oꞌmosoꞌmi velemuꞌ anive naineꞌ ma nene noꞌnohoꞌ geita minivoo. Neꞌmine li li-nimilizaniꞌ gameneuꞌ nene neze ningilisave lo lo-ngimineꞌ ve.
MAT 24:1 Izesuꞌ aza monoꞌ numuno naba nene hulo novivo izipahala zuho eita igi monoꞌ numunguꞌ numuno lamineꞌ tamineꞌ nene elebizaniꞌ.
MAT 24:2 Elebizikevo Izesuꞌ aza tiꞌ lo lo-ngimineꞌ: Tiꞌ iha me ningilo. Agae, laminetoꞌ lo-lengemelesuve. Numuno naba me geheni nabaꞌ nabadunuꞌ gizi nizaniꞌ ningahe. Aꞌmine geheni nene bili ngululubizi hulikevo aꞌmingutiꞌ geheni sitaꞌ neꞌminesi ma bizi minamilisasive.
MAT 24:3 Neꞌmine losa Oliva gololoꞌ vo mitoꞌ neivo izipahala zuho engikovoꞌ nene neida igi tiꞌ li longoꞌ i-daniꞌ: Idiꞌne lo-lemaineꞌ initeꞌ nene naniheꞌ sotoꞌ ilive. Idoꞌ geiꞌ tineꞌ molo alineꞌ gamene nesi idoꞌ misubouꞌ initeꞌ mataꞌ mukiꞌ osuꞌ lilineꞌ gamene nesi nene mo alitave lo ningesoꞌ nene naniteꞌ sotoꞌ ogavo ningelone.
MAT 24:4 Neꞌmine likevo Izesuꞌ aza tiꞌ lo lo-ngimineꞌ: Eveneꞌ mukiꞌ nete nene igi neniꞌ guliveꞌne lii Oꞌmosoꞌmo do lunguꞌ izelive lo nimiselelesa live nene naꞌmo nouve li likaꞌ likaꞌ igi goꞌine izikevo eveneꞌ mukiꞌ nete gili ngimikevo di gopo i-ngidilisave. Neꞌmine ilisanako nemuꞌ nene engikutiꞌ maliꞌmo lengiꞌ gotine izavo linginesi gili imikelizave. Ehe, gizebo lamineꞌ igi minilo.
MAT 24:6 Idoꞌ lovo sotoꞌ neivo gili ebeꞌ mala mala lovo sotoꞌ neivo neꞌmi gamazi ma gililisave. Gili ma upuhoꞌ igi golise gilamilo. Aꞌmine nene sotoꞌ oloseiha initeꞌ vaiꞌ osuꞌ lilineꞌ gamene naba nene aꞌmidoꞌ olihe sotoꞌ amive.
MAT 24:7 Idoꞌ misubo mauꞌ vete misubo mauꞌ vesi lovo hizilisave. Idoꞌ guvelesi ve naba maliꞌmi zuhote guvelesi ve naba maliꞌmi zuhosi lovo hizilisave. Misubo ato atota gaꞌna naba helaaꞌ gamene idoꞌ mimiꞌ naba sotoꞌ okaꞌ okaꞌ oloseive.
MAT 24:8 Venelite izipe gidilisa mulumo apiꞌ igi gilii gilikaꞌ gilikaꞌ iꞌmi iꞌmi navo alingeꞌ izipahaꞌine sotoꞌ ogaꞌ neive. Aꞌmineꞌmine ogo mulumo initeꞌ mukiꞌ mene sotoꞌ ilineꞌ nene ha apiꞌ ineꞌ nenako nemuꞌ nene gilikaꞌ gilikaꞌ iꞌmi iꞌmi navo alingeꞌ naza sotoꞌ olosuve.
MAT 24:9 Aꞌmine mulumo niteꞌ apiꞌ ogo sotoꞌ ogavo evenelite gonitoꞌ lengeleꞌmizi mili goboni mili-lingidi linge ma lingibili hililisave. Lingine nenita giꞌmizi minilisanako nemuꞌ eveneꞌ zuho ato atoꞌ mukiꞌ ingine lukehe lingibililisave.
MAT 24:10 Neꞌmine aningumuꞌ nene eveneꞌ mukiꞌ gili nimi nenita giꞌmizaniꞌ nene huli ge lo sotoꞌ o ne lo sotoꞌ o li ngibililizaniꞌ aleveti aꞌninguꞌ mili ingine lukehe ge nebele ne gebele li minilisave.
MAT 24:11 Idoꞌ eveneꞌ ma nete engikumuꞌ soza li Oꞌmosoꞌmi gamazi lo sotoꞌ ogaꞌ nouve polohete ma ne nouve lii eveneꞌ mukiꞌ goꞌine izi ngeleꞌmize gopo ilisave.
MAT 24:12 Idoꞌ monovo goloso daaꞌ suno nene hutileꞌ ogo naba ogavo neꞌmo eveneꞌ mukiꞌ ingine luꞌine ge neme ne geme li guni amavo aꞌmine monovo ngomo oloseive.
MAT 24:13 Tiꞌ iha eveneꞌ ma nenikumuꞌ ha gili eleꞌvoleꞌ igi mini huli-nidamavo gamene naba ilineꞌ nene Oꞌmosoꞌmo do nguꞌ izeleseive.
MAT 24:14 Idoꞌ Oꞌmosoꞌmo eiꞌ gizebo inguꞌ vi hilaliza evenele do nguꞌ izo gizebo o-ngedelingumuꞌ gamazi lamineꞌ nene gililizave li di vi misubouꞌ misubouꞌ li-ngimikaꞌ li-ngimikaꞌ igi eveneꞌ zuho ato atoꞌ mukiꞌ nene li-ngimi osuꞌ lilisave. Idoꞌ idise mene noluvoniꞌ initeꞌ nene sotoꞌ iꞌmi nivavo aꞌmine gamazi li-ngimi osuꞌ nilavo gamene naba sotoꞌ oloseive.
MAT 24:15 Gozopoꞌ minineꞌ polohete Danieliꞌ lineꞌ initeꞌ adoꞌ ebeꞌ do goloso ilineꞌ initeꞌ goseleꞌ initeꞌ goloso gehepeve nene kekeize lo neineꞌ numunguꞌ di sotoꞌ milikevo ningilisave. (Aꞌmene gizuvoniꞌ gamazi mene gato nogelo ma gatelinive gaza gele ngoloꞌ lo gelezo.) Aꞌmine initeꞌ nene di sotoꞌ milikevo lingine niningi ma Zudaiaꞌ misubouꞌ nilizave nene golise golola nivilo.
MAT 24:17 Ehe, aꞌmine gameneuꞌ nene silibe ogo minaaꞌ nene nominako ve ma ingine numuꞌine avitasi nilizadotiꞌ nene iheꞌ numuꞌninguko vi initeꞌ mataꞌine aꞌminguꞌ neineꞌ nene di vamilisave.
MAT 24:18 Idoꞌ minguꞌ nilizadotiꞌ nene okoꞌnidoꞌ initeꞌine dalisa tineꞌ mili numunguko amilisave.
MAT 24:19 Agae, aꞌmine gameneuꞌ nene Izipahaꞌine minineꞌ venekumukisi idoꞌ izipe amidoꞌ nizaniꞌ venekumukisi mulumo gele-ngedekuve. Geꞌnebe goloso ilisave.
MAT 24:20 Aꞌmine initeꞌ nene goline gameneuꞌ sotoꞌ ogo idoꞌ monokumuꞌ mini gililizangumuꞌ ve li aka monamilo li li huki lingimilizaniꞌ gameneuꞌ sotoꞌ ogalize li Oꞌmosolavoꞌ li minilo.
MAT 24:21 Nanitekumuꞌ ve. Oꞌmosoꞌmo initeꞌ mataꞌ do sotoꞌ idotiꞌ idise mene noneꞌ gameneloꞌ mulumo alumo niteꞌ naba neꞌmine gomuta sotoꞌ amineꞌ nenako apiꞌ ogo aꞌmine gameneloꞌ sotoꞌ oloseive. Idoꞌ sotoꞌ ilidotiꞌ nene alingeta gohi ma neꞌmine sotoꞌ amoloseive.
MAT 24:22 Idoꞌ Guvelesi veꞌmo aꞌmine gamene nene mine haꞌna ogalive lo bele hukolove ma lamidiniko eveneꞌ hamokisi veꞌinesi ma minamadineꞌza Guvelesi ve aza do kegesineꞌ evenekumuꞌ gelo aꞌmine gamene nene mine haꞌna ogalive lo bele hukolosa neive.
MAT 24:23 Idoꞌ aꞌmine gameneuꞌ nene ve maliꞌmo Oꞌmosoꞌmo do luꞌ izelive lo imiselelesa live aza mela neive lo idoꞌ ningilo. Holela neive lo nolo-lingimivo ma nene gili imamilo.
MAT 24:24 Eveneꞌ ma nete sotoꞌ ikaꞌ ikaꞌ igi soza saza li do lunguꞌ izelive lo Oꞌmosoꞌmo imiselelesa live ma nene nouve idoꞌ Oꞌmosoꞌmi gamazi lo sotoꞌ ogaꞌ nouve polohete ma ne nouve li Oꞌmosoꞌmo ngeleꞌmize kegesineꞌ eveneꞌve ingine leꞌmetilizahe li gotine izi atoꞌ niteꞌ golize laaꞌ niteꞌ masi masi di sotoꞌ mili lengelebizilisave.
MAT 24:25 Ehe, mene initeꞌ olihe sotoꞌ amivo initeꞌ mukikumuꞌ gomuꞌ lo-lengemekuve. Nemuꞌ gizebo lamineꞌ ilo.
MAT 24:26 Idoꞌ tiꞌ li ningilo. Oꞌmosoꞌmo do luꞌ izelive lo imiselelesa live aza ebeꞌ hadivela vo neive nilavo ma aꞌmida vamilo. Idoꞌ numuno lulouko dize neive lii nilavo ma gili ngimamilo.
MAT 24:27 Ingine Oꞌmosoꞌmo do luꞌ izelive lo imiselelesa live zegeno omo neive lilizaniꞌza Oꞌmosolatiꞌ ve gihile naza aloniꞌ gameneuꞌ nene gopaꞌna ledo ogo vaaꞌ neineꞌ neꞌmine ogo numudoꞌ namadoꞌ ve mukiꞌ ningi nizavo alosuve.
MAT 24:28 Idoꞌ eveneꞌ hilaniꞌ gonoso nolida nene gonoso naaꞌ aniꞌ namalite aꞌmida nene liteꞌ li igi di geseꞌ igi minilisave.
MAT 24:29 Aꞌmine mulumo sotoꞌ ogo minelineꞌ gamene nene osuꞌ lavo liteꞌ lo holiꞌmi labanala nolihizivo ikeꞌniꞌmi labanaꞌvesi osuꞌ loloseive. Idoꞌ sonohiꞌ nene Okulumokutiꞌ suludiꞌmoziꞌ moziꞌ navo Okulumokuꞌ amuzoꞌinesi initeꞌ nene moꞌmongoꞌ i geseꞌ ilisave.
MAT 24:30 Neꞌmine ikevo nelotiꞌ nene Oꞌmosolatiꞌ ve gihile alongumuꞌ sotoꞌ ilineꞌ maki nene Okulumotoꞌ sotoꞌ ogavo misubouꞌ misubouꞌ minaniꞌ eveneꞌ zuho ato atoꞌ mukiꞌ ingine ningi agae agae lii ive nama igi minilisave. Ee, Oꞌmosolatiꞌ ve gihile naza amuzoꞌnesi idoꞌ labanaꞌne nabasi do sotoꞌ ogosa limuso avileloꞌ nolimuvo ningilisave.
MAT 24:31 Idoꞌ pikuli nolo naba nomolavo naza angeloꞌne zuho ngimiselekuvo ingine limi ngeleꞌmize kegesuvoniꞌ eveneꞌne nene misubo atoꞌ atokuꞌ miniꞌmi monaniꞌ ebeꞌ mukikutiꞌ nene moni ngeleꞌmize nubuho ilisave.
MAT 24:32 Idoꞌ gohuno zaloꞌ lo molaloniꞌ nene gili lamineꞌ igi gililo. Lingine Zuda veti misubotida mene gohuno zalotiꞌ sisive hoꞌ lavo mo hoꞌ gamene alitave li ningi gilaaꞌ nave.
MAT 24:33 Idoꞌ aꞌmineꞌmine ogo nolo-lingimuvoniꞌ niteꞌ nene sotoꞌ neivo ma aza avitoꞌ ogo mo nene hetelelesa neive li ningi gililisave.
MAT 24:34 Laminetoꞌ ma lo-lengemeloze. Gililo. Aꞌmine gameneloꞌ aleve nene ha mini olihe hili osuꞌ lamavosi aꞌmine initeꞌ mukiꞌ nene sotoꞌ ilisave.
MAT 24:35 Okulumoki misubogi nene ha vi osuꞌ lilisasineꞌza aꞌmine gamaziꞌne nene mo osuꞌ lamo eleꞌvoleꞌ ogo mineleseive.
MAT 24:36 Neꞌmine o neineꞌza aꞌmine sotoꞌ ilineꞌ gamenemuꞌ nene ve hamolitesi ma gelamune. Idoꞌ Okulumokuko angeloꞌ nesi nene gilamave. Idoꞌ Oꞌmosoꞌmi gipele nazasi nene ma gelamuve. Meꞌneho eiꞌ hamoꞌ ne gele neive.
MAT 24:37 Noaꞌ minineꞌ gameneuꞌ nene eveneꞌ gopo minaniꞌ neꞌmini neniꞌ Oꞌmosolatiꞌ ve gihile aloniꞌ gameneukisi aꞌmineꞌmine igi minilisave.
MAT 24:38 Noaꞌ minineꞌ gameneuꞌ nene noso naba velamivo eveneꞌ ingine ngolize izi nosoꞌ niteꞌ ni noso ni idoꞌ veneꞌ veloꞌ vavo veneꞌ di huki mili nizavo Noaꞌ aza sipiuꞌ dizavo
MAT 24:39 ingine noso velo lebeleleseive li gilami gopo nizavo noso naba velo ogo aꞌmine aleve nene giso gilito do vineꞌ. Idoꞌ eveneꞌ aꞌmineꞌmine igi aloseive li gilami gopo nizavo Oꞌmosolatiꞌ ve gihile naza aꞌmineꞌmine ogo ogo hetelelesuve.
MAT 24:40 Idoꞌ aꞌmine gameneuꞌ eveneꞌ sitaꞌ ma minguꞌ gono di minilisineꞌ nene eveneꞌ ma nene Oꞌmosoꞌmo do vavo ma ne ha mineleseive.
MAT 24:41 Idoꞌ veneꞌ sitaꞌ viti gihile sege daaꞌ initetunuꞌ sege di minilisingutiꞌ ma nene Oꞌmosoꞌmo do vavo ma ne ha mineleseive.
MAT 24:42 Guvetinesi ve nani gameneloꞌ alohe. Lingine gilamanako nemuꞌ nene lingine gizebo lamineꞌ igi minilo.
MAT 24:43 Idoꞌ lingine mene giliꞌ nalo. Gumineloꞌ veꞌmo bedineꞌ numuno neꞌmi meleho aza gumineloꞌ ve olihe amivosa holukaꞌ alineꞌ gamenemuꞌ nene ma gele minidiniko numuꞌveloꞌ nene gizebo ogavo gumineloꞌ ve neꞌmo nene ma bedamidine.
MAT 24:44 Oꞌmosolatiꞌ ve gihile naza aloseive li gilamilizaniꞌ gameneloꞌ alosuze. Nemuꞌ lingine nene aꞌmineꞌmine igi di nene igi gizebo lamineꞌ minilo.
MAT 24:45 Idoꞌ Guvelesi veꞌmo gelekeleꞌ izipe ma eleꞌmize molo gelekeleꞌ izipahaꞌneloꞌ gizebo ogo nosoꞌ niteꞌ naliza gameneloꞌ gameneloꞌ nosoꞌ niteꞌ ngemekaꞌ ngemekaꞌ ogo minelive lo eleꞌmize molavo peleseveꞌ izamaaꞌ ive otohato o minive nolineꞌ nene nadiꞌ oꞌmo vo minelineꞌ o neive.
MAT 24:46 Aꞌmine eleꞌmize molaniꞌ gelekeleꞌ izipe neꞌmo aꞌmine meleho imineꞌ gono nene dovoꞌ dovoꞌ ogo neivo Guvelesi ve ogo hetelo ningelineꞌ neꞌmo gelekeleꞌ izipe nene lamineꞌ ilineꞌ akaloꞌ mine molo mineleseive.
MAT 24:47 Laminetoꞌ nolo-lingimuve. Guvelesi ve aza ogo aꞌmine gelekeleꞌ izipe nene monovolo ningo initeꞌne mukitoꞌ nene gizebo o-nedelive lo lo-emavo gizebo o-deleseive.
MAT 24:48 Ee, neꞌmine ilineꞌza gelekeleꞌ izipe aza lulo golososi mino lulouko neniꞌ gizebo veꞌne ma nene mo liteꞌ lo amiko mino gamene alingeta alihe lo gala gelo
MAT 24:49 apiꞌ ogo ezesi makaꞌ gono daaꞌ ave nene ngebeledoꞌ ngebeledoꞌ ogo mino noso ni sipaki igi monaaꞌ avela vo giꞌmizo engikisi makaꞌ nosoꞌ niteꞌ ni noso niꞌmi moni minaaꞌ navo
MAT 24:50 aꞌmine gelekeleꞌ izipe aza gizebo veꞌne nene ne gameneloꞌ aloseive lo gelamo ngelo amoloseive lo gelo minelineꞌ gameneloꞌ nene gizebo veꞌve ogo hetelo
MAT 24:51 okoꞌno belevoꞌ hukovoꞌ ogo monovoꞌine goloso di halekaaꞌ ave hulo-ngedaaꞌ ida hulo-davo aꞌmida mulumo alumo gili ive nama igi veꞌine ingihi langoloꞌ igi nilizada ezesi vo aꞌmineꞌmine ogo mineleseive.
MAT 25:1 Neꞌmine lo Izesuꞌ imineꞌ molo tiꞌ lo lineꞌ: Noluvoniꞌ gameneloꞌ nene eveneꞌ Oꞌmosoꞌmo gizebo inguꞌ vi hilalizaniꞌ monovomuꞌ lo molaloze. Gililo. Alungo teni (10) neꞌmine ingine veneꞌ dalive nene vi eleꞌmizi alisa gizebo i minilisa vaniꞌ neꞌmine gele voloseive.
MAT 25:2 Aꞌmine alungo teni (10) netiꞌ faef (5) nene gaꞌine ngoloꞌ lineꞌ idoꞌ linge faef (5) nene gaꞌine ngoloꞌ lamineꞌ negi minaniꞌ.
MAT 25:3 Idoꞌ ingi gaꞌine ngoloꞌ lamineꞌ negi alu faef (5) nene lamuꞌine di vaniꞌza aꞌminguꞌ noso lumo oloꞌ lihizelingumuꞌ ve li mo di vamaniꞌ.
MAT 25:4 Tiꞌ aha gaꞌine ngoloꞌ lineꞌ alu ingine oloꞌine lihizelingumuꞌ noso lumo gomiseuꞌ lepi lamuꞌinesi di vaniꞌ.
MAT 25:5 Idoꞌ veneꞌ dalive geto amilineꞌ ogavo alungo teni (10) mukitoꞌ veꞌine hihiꞌ ogavo inganiꞌ.
MAT 25:6 Ingi nizavo goꞌ loꞌmo lomo oloꞌmudise holukaꞌ nene veneꞌ dalive mo naze. Vi eleꞌmizi alo li asi likevo
MAT 25:7 alungo mukiꞌ okisetiꞌ oti lamuꞌine di guni igi enge viteꞌ aniꞌ.
MAT 25:8 Neꞌmine igi gaꞌine ngoloꞌ lamineꞌ negi alu nete gaꞌine ngoloꞌ lineꞌ alumuꞌ tiꞌ li laniꞌ: Lamuteuꞌ noso okuꞌ lo lihizelesa neize. Lengiꞌ nosotingutiꞌ ma leki limilizaniꞌ o neive.
MAT 25:9 Neꞌmine likevo gaꞌine ngoloꞌ lineꞌ alu nete tiꞌ li li-ngimaniꞌ: Lengemesoꞌ o neiha linginesi lezesi dalonidoꞌ lisiheꞌ amize. Situvakuꞌ vi langisetine hizisa lamutinguꞌ lepi di alizaniꞌ ne lamineꞌ oloseive.
MAT 25:10 Neꞌmine likevo ingine meni hizilisa vikengumuꞌ nene veneꞌ dalive ogo hetelavo lamuꞌine di vaꞌvaꞌ i minaniꞌ alungo ezesi makaꞌ veneꞌ dalingumuꞌ nosoꞌ niteꞌ gizi vataꞌ anguꞌ nene vaniꞌ. Aꞌminguꞌ dizi vikevo akahe hizi tilaniꞌ.
MAT 25:11 Akahe hizi tilikevo alingeꞌ alungo lingela igi heteli Guvekasi ve make, mo okunge. Akahe siꞌze-ledevo li laniꞌ.
MAT 25:12 Likevo guvelesi ve tiꞌ lo lineꞌ: Laminetoꞌ nolo-lingimuve. Lingine ningamuvoniꞌ alevete nilave.
MAT 25:13 Neꞌmine lo Izesuꞌ imineꞌ molo lineꞌ: Ehetine ve. Nani gameneloꞌ alohe. Lingine mo kekeꞌ gilamanaze. Nemuꞌ gizebo lekeseve igi minilo.
MAT 25:14 Idoꞌ aloniꞌ gameneuꞌ gelekeleꞌ izipahaꞌne meni ngemeloniꞌ monovomuꞌ lo molaloze. Gililo. Ve maliꞌmo ebeꞌ mala volosa gelekeleꞌ i-daaꞌ aniꞌ izipahala zuho eita do nubuho o-ngedo gizebo i-nidilizave lo initeꞌve mukiꞌ nene ngimineꞌ.
MAT 25:15 Idoꞌ neꞌmine noogo gono daaꞌ adoꞌ gele mineꞌ mineꞌ ogo moni izeꞌ molo ngimineꞌ. Gelekeleꞌ izipe ma ne faef tauseni kina (K5,000) imineꞌ. Idoꞌ ma ne tu tauseni kina (K2,000) imineꞌ. Idoꞌ ma ne vanu tauseni kina (K1,000) imineꞌ.
MAT 25:16 Neꞌmine ogo guvelesi ve mo vavo gelekeleꞌ izipe faef tauseni kina (K5,000) daveꞌmo liteꞌ liteꞌ lo vo aꞌmine faef tauseni kina (K5,000) nedunuꞌ moni gono do gohi faef tauseni kina (K5,000) ma do sotoꞌ molaniꞌ.
MAT 25:17 Idoꞌ gelekeleꞌ izipe aza tu tauseni kina (K2,000) dave aꞌmineꞌmine ogo moni gono do iheꞌ tu tauseni kina (K2,000) ma do sotoꞌ molaniꞌ.
MAT 25:18 Idoꞌ vanu tauseni kina (K1,000) dave aza vo misubouꞌ galese elo aꞌmine vanu tauseni kina (K1,000) nene galese izekineꞌ.
MAT 25:19 Neꞌmine ikevo guveꞌinesi ve aza gamene haꞌna goloso mino alingeꞌ monidatiꞌ ogo izipahala zuho moni ngemekidunuꞌ gono daniꞌ ningo do lisiheꞌ olosa aniꞌ.
MAT 25:20 Gelekeleꞌ izipe aza faef tauseni kina (K5,000) dave guvelesi veꞌmi velela ogo oto tiꞌ lo lineꞌ: Guvekasi ve, gaza faef tauseni kina (K5,000) nemeko vaineꞌ matunuꞌ moni gono do iheꞌ faef tauseni kina (K5,000) ma do sotoꞌ uvoniꞌ ne neive lo do ogo elebizineꞌ.
MAT 25:21 Elebizavo guvelesi ve aza gelekeleꞌ izipe tiꞌ lo lo-imineꞌ: Gaza peleseveꞌ izamanive gelekeleꞌ izipe lamineꞌ goloso nane. Gonoloꞌ gizebo lamineꞌ goloso ogane. Gono ngomoloꞌ gizebo lamineꞌ goloso aineꞌ nemuꞌ initeꞌ naba mukitoꞌ gizebo ve hulo-gedelesuve. Guvekasi ve naza nolize izo nouvonguꞌ dizanivo makatoꞌ lolize izo minelesusize. Ano.
MAT 25:22 Idoꞌ aza tu tauseni kina (K2,000) daveꞌmosi ogo tiꞌ lo lineꞌ: Guvekasi ve, gaza tu tauseni kina (K2,000) nemaineꞌ aꞌmine matunuꞌ gohi tu tauseni kina (K2,000) ne ma do sotoꞌ uvoniꞌ ne neive lo do ogo elebizineꞌ.
MAT 25:23 Elebizavo guvelesi ve aza tiꞌ lo lo-imineꞌ: Gaza peleseveꞌ izamanive gelekeleꞌ izipe lamineꞌ goloso nane. Gonoloꞌ gizebo lamineꞌ goloso ogane. Idoꞌ gono ngomoloꞌ gizebo lamineꞌ goloso aineꞌ nemuꞌ initeꞌ naba mukitoꞌ gizebo ve hulo-gedelesuve. Guvekasi ve naza nolize izo nouvonguꞌ dizanivo makatoꞌ lolize izo minelesusize. Ano.
MAT 25:24 Idoꞌ aza vanu tauseni kina (K1,000) dave nesi ogo guvelesi ve neida ogo tiꞌ lo lineꞌ: Guvekasi ve, geiꞌ monovoka nene gele nouvoniꞌ ma neive. Gaza ve amuzo malehe mino gasika zuhoꞌ amaningutiꞌ nosoꞌ niteꞌ nene ha dolize daaꞌ nanive mino gasika gono damaningutiꞌ eveneꞌ maliti gonoutiꞌ nesi gihile izavo ipeꞌ ogo ha daaꞌ nanive nane.
MAT 25:25 Gaza aꞌneꞌmine ve naneꞌ nenako nemuꞌ geiꞌ moni nemaningutiꞌ ma vo tolovo ilineꞌ nene nelemaline lo golise gelo vo misubouꞌ galese elo aꞌmine vanu tauseni kina (K1,000) nemaineꞌ nene aꞌminguꞌ do haleko molo hitekuvoniꞌ ve. Idoꞌ ningezo. Idise geiꞌ monika mene do-gedo nouve.
MAT 25:26 Neꞌmine lavo guvelesi ve tiꞌ lo lo-emo lineꞌ: Gaza gelekeleꞌ izipe goloso, gonomuꞌ goseleꞌ gebele vineꞌ mene, nenikumuꞌ nene aza zuhoꞌ amidotiꞌ nene nosoꞌ niteꞌ dolizo daaꞌ ive ve idoꞌ gono damingutiꞌ nene gihile izavo ma nesi ipeꞌ ogo daaꞌ ive ve lo gelo nolabe.
MAT 25:27 Tiꞌ lo ma moniꞌne nene beni numunguꞌ molo-nedanidini naza tineꞌ molo ogo aꞌmine moniꞌnesi idoꞌ aꞌmidoꞌ imineꞌ mili-nidilizaniꞌ polopeti masi duvodineꞌ nemuꞌ aꞌmine moniꞌne nene beni numunguꞌ molo-nedelinako molo-nedamane.
MAT 25:28 Neꞌmine lo gelekeleꞌ izipahala aꞌmida minaniꞌ nene tiꞌ lo lo-ngimineꞌ: Idoꞌ ve ma ingine initeꞌneloꞌ gizebo lamineꞌ igi ma di minilizave nene imineꞌ molo gohi ma ngemekuvo vaiꞌ livo di minilisave. Idoꞌ initeꞌneloꞌ gizebo lamineꞌ igi di minamilizave engita initeꞌ ngomo ma nolineꞌ nene aꞌminesi gohi ipeꞌ ogo dalosuve. Neꞌmino neineꞌ nenako nemuꞌ lingine aꞌmine vanu tauseni kina (K1,000) do neineꞌ nene ipeꞌ igi teni tauseni kina (K10,000) do minivela di imilevo.
MAT 25:30 Neꞌmine igi gelekeleꞌ izipe gulupese mene huli heta i-dikevo litiꞌmuso gehepeveuꞌ vo mino ive nama ogo mulumo alumo gelo vele ongoho langoloꞌ ogo mineleseive.
MAT 25:31 Idoꞌ Oꞌmosolatiꞌ ve gihile naza labanaꞌne do sotoꞌ ogo angeloꞌ mukiꞌ ngeleꞌmizo aloniꞌ nene Guveꞌnesi ve naba mineloniꞌ moꞌmosiꞌneloꞌ minelesuve.
MAT 25:32 Idoꞌ aꞌmidoꞌ nouvo eveneꞌ zuho ato atoꞌ mukiꞌ nene neniꞌ veꞌneloꞌ ngeleꞌmize nubuho ilisave. Neꞌmine ikevo izeloꞌ gizebo ve neꞌmo sipisipi izeꞌvesi memeꞌ izesi gopo igi minangutiꞌ nene do kegese-ngedo sipisipi ize mulise atoꞌ hulo-ngedo memeꞌ ize mulise atoꞌ hulo-ngedaaꞌ ineꞌ neꞌmine naza eveneꞌ do kegese-ngedo sipisipi ize neꞌmini minilizave nene aꞌne hulaaꞌ uvoda ngeleꞌmize molo memeꞌ ize neꞌmini minilizave nene aꞌne hulamaaꞌ uvoda hulo-ngedelesuve.
MAT 25:34 Neꞌmine ogo Guveꞌnesi ve mino naza aꞌne hulaaꞌ uvoda minilizavemuꞌ tiꞌ lo lo-ngemelesuve: Meꞌneho noꞌnohoꞌ ize-lingidive mate, alo. Naza gaꞌna hele nouvo lingine nosoꞌ niteꞌ nimaaꞌ ikeniꞌ ve. Idoꞌ naza nosomuꞌ nisavo lingine hepeꞌ noso ohizi nimaaꞌ ikeniꞌ ve. Idoꞌ venenga ve mino naza lengita okuvo lingine igi neleꞌmizi lamineꞌ igaꞌ aniꞌ ve. Idoꞌ geneganaꞌne nomivo lingine ma di ngili-nidaaꞌ aniꞌ ve. Idoꞌ initeꞌ gize dokuvo lingine igi nasahiliꞌ lamineꞌ i-nidi minaaꞌ aniꞌ ve. Idoꞌ nalaꞌ numunguꞌ huli-nidikevo nouvo lingine igi hizi eleꞌ i-nidaaꞌ aniꞌ ve. Neꞌmini i-nidi minaniꞌ nenako nemuꞌ nene Oꞌmosoꞌmo Okulumoꞌ misubo do sotoꞌ idotiꞌ nene lengiꞌ ebetine eiꞌ gizebo inguꞌ salani molo-lengede neineꞌ nene igi di minilo.
MAT 25:37 Neꞌmine lo lo-ngemekuvo ingine tiꞌ li lilisave: Guvekasi ve make, laineꞌ initeꞌ nene geiꞌ o-gedamuneꞌ ve lo gele none. Nemuꞌ nene geiꞌ gaꞌna helane lo ningo nosoꞌ niteꞌ naniheꞌ do gimuningumuꞌ nolane. Idoꞌ gaza nosomuꞌ nisave lanivo gelo noso naniheꞌ ohizo gimuningumuꞌ nolane.
MAT 25:38 Idoꞌ gaza venenga ve nane lo ningo laza naniheꞌ geleꞌmize lamineꞌ uningumuꞌ nolane. Idoꞌ geneganaka nomivo ningo naniheꞌ ma do ngolo-giduningumuꞌ nolane.
MAT 25:39 Idoꞌ gaza initeꞌ gize danivo laza naniheꞌ ogo nasahiliꞌ o-giduningumuꞌ nolane. Idoꞌ gaza nalaꞌ numunguꞌ huli-gidikevo nanivo laza naniheꞌ ogo hize eleꞌ o-giduningumuꞌ nolane.
MAT 25:40 Tiꞌ li longoꞌ i-nidikevo naza guveꞌnesi ve mino tiꞌ lo lo-ngemelesuve: Lingine eveneꞌne zuho ma nene o-ngidube li gilaniꞌza neꞌmine initeꞌ i-ngidaniꞌ nene neniꞌ i-nidaniꞌ gelave. Ee, neze eveneꞌne zuho minangutiꞌ lemo minivesi neꞌmine i-dikevo neniꞌ i-nidaniꞌ gelave.
MAT 25:41 Idoꞌ neꞌmine lo aꞌne hulamaaꞌ uvoda minilizavemukisi tiꞌ lo lo-ngemelesuve: Lingine meꞌneho usiꞌ ize-lingidivete nouvodatiꞌ vi haha igi lihizami oloꞌ lovoꞌ lovoꞌ ogo neineꞌ nene meꞌneho do sotoꞌ ogo Satanisi eze angelole zuhosi aꞌminguꞌ vi hilalizave lo engikumuꞌ salani molo-ngidinguꞌ vi hilalo.
MAT 25:42 Ne Nanitekumuꞌ ve. Naza gaꞌna helo nouvo lingine nosoꞌ niteꞌ nimamaniꞌ ve. Idoꞌ nosomuꞌ nonisivo lingine noso ohizi nimamaniꞌ ve.
MAT 25:43 Idoꞌ venenga ve mino lengita okuvo lingine neleꞌmizi lamineꞌ amaniꞌ ve. Idoꞌ geneganaꞌne nomivo lingine ma di ngili-nidamaniꞌ ve. Idoꞌ naza initeꞌ gize dokuvo idoꞌ nalaꞌ numunguꞌ huli-nidikevo nouvo lingine igi nasahiliꞌ i-nidamaniꞌ ve.
MAT 25:44 Neꞌmine lokuvo ingine tiꞌ li longoꞌ i-nidilisave: Guvekasi ve make, gaza gaꞌna hele nanivo he nosomuꞌ gise neivo he idoꞌ venenga ve minanivo he geneganaka nomivo he idoꞌ initeꞌ gize do nanivo he idoꞌ nalaꞌ numunguꞌ nanivo naniheꞌ ningo nasahiliꞌ o-gedo geleꞌmize lamineꞌ amune.
MAT 25:45 Neꞌmine likevo naza tiꞌ lo lo-ngemelesuve: Laminetoꞌ lo-lengemeloze. Lingine eveneꞌ ma neꞌmine i-ngidamaniꞌ neꞌmo neniꞌ i-nidamaniꞌ gelave. Ee, neze eveneꞌne zuho minangutiꞌ lemo minivesi neꞌmine i-damavo neniꞌ i-nidamaniꞌ gelave.
MAT 25:46 Idoꞌ neꞌmine lo lo-ngemekuvo ingine vi mulumo ebekuꞌ vi mulumo gono diviꞌ diviꞌ igi nizavo apasi-ngidamilisave. Ingine neꞌmine ilisaha eveneꞌ lisiheꞌ lamineꞌ ingine eleꞌvoleꞌ ngemeni dameni dii minevoꞌ minevoꞌ ebekuꞌ vi hilalisave.
MAT 26:1 Izesuꞌ aza aꞌmine gamazi lo-ngeme osuꞌ lo aꞌmine gameneloꞌ izipahala zuho tiꞌ lo lo-ngimineꞌ:
MAT 26:2 Lingine mo gili nizaniꞌ ma neive. Isilaeleꞌ aleveti avotemote Aigita misubouꞌ minaniꞌ gameneuꞌ Oꞌmosoꞌmo isiꞌine izingumuꞌ gelo holiseꞌ mino nosoꞌ niteꞌ naaꞌ nouneꞌ gamene ma ne okozoꞌ apiꞌ oloseive. Neꞌmine ogo Oꞌmosolatiꞌ ve gihile neze nene biluvaliti aꞌninguꞌ mili-nidikevo lohotoꞌ zaloꞌ nibili hililisave lineꞌ.
MAT 26:3 Idoꞌ aꞌmine gameneuꞌ nene evenetoꞌ medeli mini Oꞌmoso initeꞌ lehizi-daaꞌ ave nabasi idoꞌ eveneliti monoꞌ gizebo veꞌinesi igi evenetoꞌ medelo mino Oꞌmoso initeꞌ lehize-daaꞌ ive naba gulive Kaiahaꞌ neꞌmi numuꞌve nabauꞌ igi di geseꞌ aniꞌ.
MAT 26:4 Di geseꞌ igi gamazi li gele ha gele igi mini Izesuꞌni nene zegeno bele helelone li lovo gizaniꞌ.
MAT 26:5 Neꞌmine li lovo gizaniꞌza holiseꞌ gameneuꞌ nene eveneꞌ vaiꞌ di geseꞌ igi ningi nizavo analoꞌ daloneꞌ nene lovo di sotoꞌ ikelizanako holisekuꞌ nene alamolone li laniꞌ.
MAT 26:6 Idoꞌ Izesuꞌ aza Betania numuda mino ganadise gozopoꞌ ma gize dave Simoniꞌ neꞌmi numuꞌveuꞌ neivo
MAT 26:7 minida nene veneꞌ maliꞌmo luhuvo laminekisi gehenidunuꞌ liliꞌ aniꞌ botoloꞌ nene unuvo uveli lamineꞌ meniꞌve nabasi nene aꞌminguꞌ neivo do ogo Izesuꞌ nosoꞌ niteꞌ nonavo godololoꞌ leke-dineꞌ.
MAT 26:8 Idoꞌ Izesuꞌ izipahala zuho ingine ningi muluꞌninguꞌ goloso ogo ngizeboloꞌ molavo tiꞌ li laniꞌ: Unuvo lamineꞌ ogaꞌ ineꞌ uveli nene nanitekumuꞌ do labuluvo neive.
MAT 26:9 Aꞌmine unuvo lamineꞌ ogaꞌ ineꞌ uveli nene do vo hizilizave ngemekunivo hizi moni naba limikevo aꞌmine moni nene gohoꞌ aleve ngimunidine.
MAT 26:10 Tiꞌ li nilavo Izesuꞌ aza gamazi laniꞌ nene mo gelo tiꞌ lo lineꞌ: Veneꞌ mene aza naniteꞌ do goloso ogavosa geniꞌvesi gamazi nili-imave. Aza nene initeꞌ lamineꞌ noo-nidivo ede vive.
MAT 26:11 Lingine nene gohoꞌ alevesi mini di vi minikelizaha nezesi nene mudive ma mini di vi minamilisave.
MAT 26:12 Veneꞌ aza aꞌmine unuvo lamineꞌ ogaꞌ ineꞌ uveli nene holo-nididiꞌmo galese izi-nidilizangumuꞌ gomuꞌ okoꞌne nene do lamineꞌ o-nedo holo-nedave.
MAT 26:13 Naza laminetoꞌ lo-lengemeloze. Gililo. Monoꞌ gamazi lamineꞌ mene di misubouꞌ misubouꞌ moni li-ngimilizadaa eze guvele nene ha gili minilizave li aza initeꞌ o-nidineꞌ nemukisi li sotoꞌ igi li-ngimilizave.
MAT 26:14 Neꞌmine ogavo Izesuꞌ izipahala zuho tuvelu engikutiꞌ Kelioto numudotiꞌ ve ma gulive Zudaꞌ aza evenetoꞌ medeli mini Oꞌmoso initeꞌ lehizi-daaꞌ ave nabala vo tiꞌ lo lo-ngimineꞌ:
MAT 26:15 Aꞌmine ve ma nene naza do vo hulo vetinguꞌ okuvo naniteꞌ ma nimilizave. Lavo ingine siluvaꞌ moni teoti (30) neꞌmine imaniꞌ.
MAT 26:16 Imikevo aꞌmine gamenelotiꞌ nene aza Izesuꞌni ngelebizeli akamuꞌ viseꞌ o minineꞌ.
MAT 26:17 Zuda vete lulu izamineꞌ beleti naaꞌ nouneꞌ holiseꞌ nene apiꞌ neivo Izesuꞌ izipahala zuho ezela igi tiꞌ li longoꞌ i-daniꞌ: Oꞌmosoꞌmo avotemotine iseꞌine ize-ngidingumuꞌ gelo naaꞌ nouneꞌ nosoꞌ niteꞌ naliningumuꞌ nene zala vo do vaꞌvaꞌ o-gedelone lo nolane.
MAT 26:18 Likevo Izesuꞌ aza nongimiselo tiꞌ lo lo-ngimineꞌ: Numuno nabala vi aꞌmida lo-lingimuve ma neida vi ningi tiꞌ li li-imilo: Tisaꞌ maꞌmo neniꞌ gamene mo alitave lo aꞌmine Oꞌmosoꞌmo avotemotine iseꞌine ize-ngidingumuꞌ gelo mino naaꞌ nouneꞌ nosoꞌ niteꞌ nene geiꞌ numungauꞌ neniꞌ izipahaꞌnesi nalone nolive.
MAT 26:19 Lo-ngemavo izipahala zuho ingine lo-ngimidiꞌmine igi aꞌmine nosoꞌ niteꞌ di vaꞌvaꞌ aniꞌ.
MAT 26:20 Di vaꞌvaꞌ ikevo mo nivengaꞌ molavo Izesuꞌ izipahala zuho tuvelu nesi mini nosoꞌ niteꞌ naniꞌ.
MAT 26:21 Aꞌmine nosoꞌ niteꞌ ni nizavo Izesuꞌ aza tiꞌ lo lineꞌ: Laminetoꞌ ma lo-lengemeloze. Gililo. Lengikutiꞌ maliꞌmo nenikumuꞌ me neive lo biluvaliti aꞌninguꞌ molaloseive.
MAT 26:22 Aꞌmine gamazi nene lingumuꞌ izipahala zuho mulumo goloso gili-di apiꞌ igi hamoꞌ hamoꞌ oti laniꞌ: Guvekasi ve, nenikumuꞌ lamo nolosane. Olo.
MAT 26:23 Likevo Izesuꞌ aza tiꞌ lo lo-ngimineꞌ: Lapeseuꞌ ana nenikisi hulo molave neꞌmo biluvaliti aꞌninguꞌ do hulo-nedeleseive.
MAT 26:24 Ee, Oꞌmosolatiꞌ ve gihile nenikumuꞌ polohetelite gizi nizaniꞌ maꞌmino heleloniꞌ akaloꞌ novuvoniꞌza biluvalite neniꞌ dalizave lo do sotoꞌ o-nedelive nene agae, mulumo gono atoliꞌmine daloseinako nemuꞌ aꞌmine ve aza izeleho ma gedamidiniko aꞌmine mulumo gono goloso sotoꞌ o-delesa neineꞌ akaloꞌ mine molo ma minamivo lamineꞌ o minidine.
MAT 26:25 Neꞌmine lavo Zudaꞌ aza alingeꞌ biluvaliti aꞌninguꞌ eleꞌmize molaveꞌmo tiꞌ lo lineꞌ: Tisazo, nenikumuꞌ nene ma lamane. Olo. Lavo Izesuꞌ aza tiꞌ lo lo-imineꞌ: Oꞌove. Gasika mo ne nolane lo lineꞌ.
MAT 26:26 Nosoꞌ niteꞌ ninavo Izesuꞌ aza beleti do Oꞌmosola opoꞌni lo gito izipahala zuho nongemo tiꞌ lo lineꞌ: Di nalo. Mene neniꞌ meꞌmeleꞌne ma ne neive.
MAT 26:27 Neꞌmine lavo di nikevo vaini gomise do Oꞌmosola opoꞌni lo nongemo tiꞌ lo lineꞌ: Aꞌminguꞌ nene Oꞌmosoꞌmo lo huko-lidineꞌ gamazi nene do eleꞌvoleꞌ ilineꞌ vaniseꞌne mene eveneꞌ mukikumuꞌ lihimetine apase-lengedelove lo lekeloniꞌ mene neinako nemuꞌ aꞌmingutiꞌ lingine mukitoꞌ nalo.
MAT 26:29 Idoꞌ tiꞌ lo nolo-lingimuve. Idise melotiꞌ naza vaini gihileꞌmi novozoutiꞌ mo namo mino alingeꞌ Meꞌneho gizebo o-lengedelineꞌ gameneuꞌ nene aꞌmine novozo atoliꞌmine nene lengikisi mino nalosune.
MAT 26:30 Neꞌmine lavo monoꞌ nama lisa limi heta igi Oliva gololoꞌ dizi vaniꞌ.
MAT 26:31 Oliva gololoꞌ dizi nizavo Izesuꞌ tiꞌ lo lo-ngimineꞌ: Monoꞌ Godolouꞌ Oꞌmosoꞌmo lineꞌ gamazi ma tiꞌ li gizi nizaniꞌ ma neive: Gizebo veꞌine belekuvo sipisipi ize mulise nene hutileꞌ igi vilisave. Tiꞌ li gizi nizaniꞌ nenako nemuꞌ idise holukaꞌ lingine mukitoꞌ nenikumuꞌ goloso giladiꞌmo huli-nidi vilisaniꞌza
MAT 26:32 helekuvo Oꞌmosoꞌmo neleꞌmize otavo gomuꞌ molo lengemo nGalilaia misubouko vo minelesuve.
MAT 26:33 Lavo Petoloꞌ aza tiꞌ lo lo-imineꞌ: Ingine mukiꞌ geikumuꞌ goloso gili huli-gidi vilizanikisi naza nene mo kekeꞌ hulo-gedo vamolosuve.
MAT 26:34 Lavo Izesuꞌ tiꞌ lo lo-imineꞌ: Laminetoꞌ nolo-gimuve. Idise holukakisi okoloho nolo olihe molamivo gaza gamene setohamo ataize lo-nedelesane.
MAT 26:35 Lavo Petoloꞌ tiꞌ lo lo-imineꞌ: Oꞌove. Ge gibili hili nesi nibili hililisa lilizanikisi nene ataize lo-gedamolosuve. Lavo Izesuꞌ izipahala zuho mukitoꞌ Petoloꞌ lidiꞌmine igi hamoꞌ gamazivoꞌ laniꞌ.
MAT 26:36 Neꞌmine ogavo Izesuꞌ aza izipahala zuhosi ebeꞌ ma gulive Gesemani neuꞌ vaniꞌ. Vo hetelo izipahala zuho tiꞌ lo lo-ngimineꞌ: Naza holeloꞌ vo Oꞌmosola nololongumuꞌ lingine meloꞌ minilo.
MAT 26:37 Idoꞌ neꞌmine lo Petolokisi idoꞌ Zebedaioꞌ gipele sitakisi nene ngeleꞌmizo novo Izesuꞌ aza apiꞌ ogo muluno hukavo mulumo naba gilineꞌ.
MAT 26:38 Gelo neꞌmine lo lo-ngimineꞌ: Naza mo muluꞌneuꞌ mulumo goloso ogo geni naba idiꞌmo heleloniꞌ akaloꞌ mine molokuve. Lingine makatoꞌ neniꞌ olodiꞌmine igi meloꞌ gizebo igi ningi minilo.
MAT 26:39 Izesuꞌ aza neꞌmine lo ngomo ma hotoꞌile novo misuboloꞌ golo hizo Oꞌmosola nolo tiꞌ lo lineꞌ: Meꞌneho make, ha ilinidoꞌ neivo ma aꞌmine di sotoꞌ i-nidilisa naniꞌ ekeseꞌ initeꞌ nene nenita amilive lo do hulo-nedelinibo. Neꞌmine ha olosaineꞌza neniꞌ luꞌneloꞌ do molamo asi geiꞌ lukaloꞌ do molozo.
MAT 26:40 Neꞌmine lo Izesuꞌ aza tineꞌ molo ogo ningineꞌ nene izipahala zuho okise ingi minaniꞌ nene ningo Petoloꞌni tiꞌ lo lo-dineꞌ: Nadive. Lingine amuzo milami neniꞌ uvodiꞌmine igi makatoꞌ gamene liꞌnibe ngomo vanu aua neꞌmine vetine ningi minamahe.
MAT 26:41 Lengemenguꞌ milalizanguꞌ nene gopo ikelizaze. Gizebo igi Oꞌmosola li minilo. Ee, lutine neꞌmo gono dalosa neiha okodine neꞌmo nene geni o neive.
MAT 26:42 Neꞌmine lo iheꞌ gohi vo Oꞌmosola nolo tiꞌ lo lineꞌ: Meꞌneho make, geiꞌ gelanivo aꞌmine di sotoꞌ i-nidilisa naniꞌ ekeseꞌ initeꞌ nene hulo-nedelidoꞌ amivo geheloniꞌ o neivo ma geiꞌ lukaloꞌ do molo gehelesuve.
MAT 26:43 Neꞌmine lo Izesuꞌ aza tineꞌ molo ogo ningineꞌ nene veꞌine hihiꞌ ogavo okise ingi nizavo ningineꞌ.
MAT 26:44 Ningo iheꞌ hulo-ngedo vo Oꞌmosola lo gomuꞌ lineꞌ maꞌmine ogo lineꞌ. Neꞌmine ogo vo Oꞌmosola lineꞌ nene gamene sitohamo ineꞌ.
MAT 26:45 Neꞌmine ogo iheꞌ izipahala nizada ogo tiꞌ lo lo-ngimineꞌ: Okise ingi mine gililisa gili nizahe. Ningilo. Oꞌmosolatiꞌ ve gihile neniꞌ nene di sotoꞌ igi ve golosoliti aꞌninguꞌ milalizaniꞌ gamene mo ogaze.
MAT 26:46 Otilo. Mo volonge. Ningilo. Biluvalite dalizave lo neze do sotoꞌ ilive nene mo avitoꞌ ogave.
MAT 26:47 Tiꞌ lo nolo-ngimivo izipahala zuho tuvelu engikutiꞌ nene ve gonoꞌnibo Zudaꞌ aza ogo hetelineꞌ. Idoꞌ evenetoꞌ medeli mini Oꞌmoso initeꞌ lehizi-daaꞌ ave nabasi monoꞌ gizebo vesi mini eveneꞌ mukiꞌ ngimiselikevo bainati mitekisi gavososi dii Zudalesi makaꞌ aniꞌ.
MAT 26:48 Idoꞌ olihe igi hetelami Izesuꞌni do sotoꞌ o-ngidive neꞌmo gomuꞌ tiꞌ lo lovo gize ngimineꞌ: Golo elo nalove nene aꞌmine ve mineleseize. Dalo.
MAT 26:49 Ogo hetelo Zudaꞌ aza Izesuꞌ neida liteꞌ lo o-duvo Tisazo, ne nabe lo golo elo naniꞌ.
MAT 26:50 Neꞌmine ogavo Izesuꞌ aza tiꞌ lo lo-imineꞌ: Zogone, gaza ogo olosa aineꞌ initeꞌ nene aloꞌ ozo. Tiꞌ lo nolivo biluvalite ingine Izesuꞌ neida igi analoꞌ di minaniꞌ.
MAT 26:51 Neꞌmine navo Izesulesi monaveutiꞌ ve maliꞌmo ana do patelo bainati miteꞌ gokutiꞌ geleleheꞌ ogo evenetoꞌ medelo mino Oꞌmoso initeꞌ lehize-daaꞌ ive nabaꞌmi gelekeleꞌ izipe ma belo gala hela hasaꞌ o hulineꞌ.
MAT 26:52 Hasaꞌ o hulavo Izesuꞌ aza tiꞌ lo lo-imineꞌ: Bainati miteka nene iheꞌ daninguko do molozo. Eveneꞌ malike bainati miteꞌ do lovo olosa ilinive nene ve malite bainati mitedunuꞌ gibilikevo helelesane.
MAT 26:53 Gaza gelaineꞌ meꞌnehida lokuvo alete mili-nidilizave ma ngimiselamilive lo gele nabe. Oꞌve. Lokuvo angeloꞌ mulise naba ato atoꞌ tuvelu adoꞌ angeloꞌ sevedi tu tauseni (72,000) neꞌmine ivileꞌ ogo ma ngimiselavo igi ha alete mili-nidilisave.
MAT 26:54 Neꞌmino neiha neꞌmine oloniꞌ nene monoꞌ godolouꞌ nene aꞌneloꞌ di goniꞌ i-nidi nibili hililizave li gizi nizaniꞌ gamazi nene ngelo gihile izamilineꞌ nenako nemuꞌ nene alete mili-nidilizavemuꞌ lamolosuve.
MAT 26:55 Idoꞌ aꞌmine gameneloꞌ Izesuꞌ aza eveneꞌ mulise tiꞌ lo lo-ngimineꞌ: Gizengize ve ma dalisa igaꞌ adiꞌmine igi bainati mitekisi gavososi di neniꞌ dalisa ahe. Naza gamene gamene monoꞌ numuno nabauꞌ monoꞌ apize ngemaaꞌ uvoniꞌ maloꞌ nene aꞌneloꞌ damaniꞌ nehe.
MAT 26:56 Gomuꞌ neꞌmine ami idise neꞌmine navo sotoꞌ neineꞌ nene Oꞌmosoꞌmi veletiꞌ gamazi li sotoꞌ igaꞌ ave polohete nete gizi nizaniꞌ gamazi ma gihile izelive losa nene sotoꞌ neive. Neꞌmine lavo izipahala zuho Izesuꞌni huli-di mukitoꞌ golise vaniꞌ.
MAT 26:57 Idoꞌ Izesuꞌ analoꞌ di minave ingine eleꞌmizi evenetoꞌ medelo mino Oꞌmoso initeꞌ lehize-daaꞌ ive naba Kaiahaꞌ neida vaniꞌ. Aꞌmida Zuda vete monoꞌ gozopotatiꞌ laaꞌ aniꞌ apizi ngimaaꞌ avesi idoꞌ Zuda veti gizebo veꞌine nesi mulise mili nizavo aꞌminguꞌ eleꞌmizi vaniꞌ.
MAT 26:58 Neꞌmine navo Petoloꞌ aza hotoꞌile eꞌmete-do ogo aꞌmine evenetoꞌ medelo mino Oꞌmoso initeꞌ lehize-daaꞌ ive naba neꞌmi gesi minguꞌ ogo dizi minaniꞌ numuno nene vodo vodo ogo minavo olusoꞌ omoꞌ naba minidoꞌ nene dizo Izesuꞌni goniꞌ i-di nadiꞌ i-dilizahe lo ningelesa pilisi vesi makatoꞌ minaniꞌ.
MAT 26:59 Neꞌmino neivo evenetoꞌ medeli mini Oꞌmoso initeꞌ lehizi-daaꞌ ave nabasi engiꞌ kanisoleꞌine mukikisi nani lihimemuꞌ Izesuꞌni belelone li soza saza li lihimeꞌve li sotoꞌ ilizavemuꞌ viseꞌ ikevo
MAT 26:60 eveneꞌ mukiꞌ eze lihime ma li sotoꞌ ilisa igi soza saza gamazi laniꞌza ingine giladoꞌ vo dalineꞌ gamazi ma lamavo eze lihime li sotoꞌ ilizave ma di sotoꞌ amaniꞌ. Di sotoꞌ ami viseꞌ iꞌmi vi nizavo alingeꞌ nene ve sitaꞌ ma igi tiꞌ li lasineꞌ:
MAT 26:61 Me veꞌmo naꞌniseꞌne Oꞌmosoꞌmi monoꞌ numuno naba nene nguꞌvoso gamene sitohamo ogo novivo iheꞌ gizelesuve lo live lasineꞌ.
MAT 26:62 Neꞌmine likesivo evenetoꞌ medelo mino Oꞌmoso initeꞌ lehize-daaꞌ ive naba aza oto tiꞌ lo lineꞌ: Gaza nilasineꞌ gamaziloꞌ mene do velepeꞌ izo lo-ngemelineꞌ gamazi ne nomihe. Mene ve netise geikumuꞌ nilasineꞌ gamazi mene gelanivo nadiꞌ o neive.
MAT 26:63 Neꞌmine lineꞌza Izesuꞌ aza gamazi lamo minineꞌ. Neivo evenetoꞌ medelo mino Oꞌmoso initeꞌ lehize-daaꞌ ive naba aza tiꞌ lo lineꞌ: Idiꞌnise minevoꞌ minevoꞌ ogo minaaꞌ ive Oꞌmosoꞌmi veleloꞌ lo sotoꞌ ogo liline lo noluve. Oꞌmosoꞌmi gipele Oꞌmosoꞌmo do luꞌ izelive lo imiselelesa live nabe lo lemezo.
MAT 26:64 Lavo Izesuꞌ aza tiꞌ lo lo-imineꞌ: Mo ne laineꞌza lo-lengemeloze. Gililo. Oꞌmosolatiꞌ ve gihile naza amuzoꞌvesi minive Oꞌmosolotiꞌ lemo nouvoniꞌ nenako nemuꞌ ana hulaaꞌ ida mitoꞌ nouvo ningilisave. Idoꞌ Okulumotoꞌ limuso avileloꞌ nolimuvo ningilisave.
MAT 26:65 Neꞌmine lavo evenetoꞌ medelo mino Oꞌmoso initeꞌ lehize-daaꞌ ive naba neꞌmo Izesuꞌ aza Oꞌmoso ivileꞌ olosa gamazi goloso lihe lo gala gilineꞌ nene ngelebizelesa asiꞌve ngolokineꞌ geneganaꞌve nene do nohikelo tiꞌ lo lineꞌ: Asiꞌve Oꞌmoso ivileꞌ olosa gamazi goloso laanako nemuꞌ lihimeꞌve li sotoꞌ ilizavemuꞌ nene nanimuꞌ gohi viseꞌ olone. Oꞌmoso ivileꞌ o-do gamazi goloso lineꞌ nene langisetine mo gilikeve.
MAT 26:66 Nemuꞌ lingine gilikevo nadiꞌ o neive. Lavo ingine tiꞌ li li-imaniꞌ: Aza nene mo lihime naba danako mo helelidoꞌ ogave.
MAT 26:67 Neꞌmine li golo veleuꞌ gituhoꞌ i-di aꞌinedunuꞌ bilii aꞌine gatapaꞌ gavoso bilaniꞌ.
MAT 26:68 Neꞌmine igi nibili tiꞌ li laniꞌ: Geiꞌ neke Oꞌmosoꞌmo eveneꞌ do nguꞌ izeline lo gimiselelesa live nouve nolabe. Olo. Ne ma nigibilaze. Geze monovoka ningelone. Zaho gibilihe. Gaza polohetelite laaꞌ adiꞌmine ogo lo sotoꞌ ogo lo-lemevo.
MAT 26:69 Neꞌmine igi nizavo Petoloꞌ aza numuno vodo vodo minavo olusoꞌ omoꞌ naba minidoꞌ neivo gelekeleꞌ alu maliꞌmo eita ogo tiꞌ lo lineꞌ: Gaza nene nGalilaia misubotiꞌ ve Izesukisi monaaꞌ asive ma ne nolosane.
MAT 26:70 Lavo aza eveneꞌ mukiliti veꞌnidoꞌ ataize lo nolaineꞌ gamazi ne ma gelamuvongumuꞌ nolane lineꞌ.
MAT 26:71 Neꞌmine lo gesi gateda lemo novivo gelekeleꞌ alu gohi maliꞌmo ningeko eveneꞌ aꞌmida minave lo-ngimineꞌ: Me ve nene Nasalete numudatiꞌ Izesulesi monaaꞌ ave ma ne neive.
MAT 26:72 Lavo gohi ataize lo lineꞌ: Oꞌmosoꞌmi veleloꞌ aꞌne dizo noluve. Mo ningamuvemuꞌ nilave.
MAT 26:73 nGomo lasolo ma nimini aꞌmida minave nete Petoloꞌ neida igi tiꞌ li li-imaniꞌ: Engiꞌ gamazi laaꞌ adiꞌmino nolainako nemuꞌ mo laminetoꞌ aꞌmine zuhoutiꞌ nolosane. Gaza gamazi nolaineꞌ neꞌmo do sotoꞌ o-gedave.
MAT 26:74 Likevo aza gosohoꞌ noluvo ma Oꞌmosoꞌmo usiꞌ ize-nidivo lo mo laminetoꞌ noluve lineꞌ. Oꞌmosoꞌmi veleloꞌ lo huko noluve lo tiꞌ lo lineꞌ: Ningamuvemuꞌ nilave. Petoloꞌ neꞌmine nolivo okoloho liteꞌ lo nolo molaniꞌ.
MAT 26:75 Idoꞌ okoloho nolo molavo Petoloꞌ aza Izesuꞌ okolohoꞌmo olihe nolo gedamivo nenikumuꞌ gamene sitohamo ataize lo-nedelesane lineꞌ gamazi nene gohi gala gelo heta lemo vo ive nabaloꞌ goloso ineꞌ ve.
MAT 27:1 Nedengaꞌ goꞌ nolivo evenetoꞌ medeli Oꞌmoso initeꞌ lehizi-daaꞌ ave naba mukiꞌ idoꞌ Zuda veti gizebo veꞌine nesi ingine mulise mili Izesuꞌni bili hililizangumuꞌ gamazi li li voleloꞌ meloꞌ igi minaniꞌ.
MAT 27:2 Li mini analoꞌ nalaꞌ di eleꞌmizi vi Zuda veti misubola Loma vete di sotoꞌ milaniꞌ ngamaniloꞌ gizebo o minineꞌ guvelesi ve Pilatoꞌ neida eleꞌmizi vi eiꞌ anauꞌ milaniꞌ ve.
MAT 27:3 Vikevo Zudaꞌ aza Izesuꞌni hulo biluvaliti aꞌninguꞌ iveꞌmo Izesuꞌni goniꞌ i-di helelive laniꞌ nene ningo gelo muluno do velepeꞌ izo aꞌmine siluvaꞌ moni teoti (30) nene iheꞌ do vo evenetoꞌ medeli mini Oꞌmoso initeꞌ lehizi-daaꞌ ave nabasi idoꞌ Zuda veti gizebo veꞌinesi do tineꞌ molo nongemo
MAT 27:4 tiꞌ lo lineꞌ: Naza lihime do ve lamineꞌ lihimeꞌve nomineꞌ mene hulo biluvaliti adinguꞌ okuvo bili hililisa naze. Lavo ingine olo. Lihime dabe. Neve ne leliꞌ gono nomive. Geiꞌ gonoka ve laniꞌ.
MAT 27:5 Likevo Zudaꞌ aza aꞌmine siluvaꞌ moni nene monoꞌ numunguꞌ hulo molo monoꞌ numungutiꞌ lemo vineꞌ. Lemo vosa vo nalaꞌ ineꞌ.
MAT 27:6 Neꞌmine ogavo ingine evenetoꞌ medeli mini Oꞌmoso initeꞌ lehizi-daaꞌ ave naba aꞌmine moni di neꞌmine laniꞌ: Mene moni nene eveneꞌ ma bele helelone lo huluneꞌ nenako nemuꞌ neꞌmi lihime aꞌmidoꞌ neinako nemuꞌ Oꞌmosoꞌmi gonomuꞌ hulaniꞌ monisi do hamoꞌ ogo molalonidoꞌ nomive.
MAT 27:7 Neꞌmine li aꞌmine monimuꞌ gamazi li voleloꞌ meloꞌ igisa misubo somo loloꞌ ogaꞌ iveꞌmi misuboꞌve ma hetatiꞌ ve ma aꞌmida hililiza aleve galese izilizaniꞌ ebeꞌ meni hizaniꞌ.
MAT 27:8 Meni hizi aꞌmine misubo nene eveneꞌ ma bele helo vaniseꞌve leke-delone li hulaniꞌ monidunuꞌ meni hizanako nemuꞌ nene aꞌmine misubo nene vanise misubo ve li milaniꞌ. Neꞌmine li milikevo idisesi nene vanise misubo ve lo ha laaꞌ none.
MAT 27:9 Neꞌmine ikevo Oꞌmosoꞌmi veletiꞌ gamazi lo sotoꞌ ogaꞌ ive gozopoꞌ ma minive Zelemiaꞌ aza gamazi monoꞌ godolouꞌ gizekineꞌ ma nene gihile izineꞌ. Tiꞌ lo gize neive: Aꞌmine siluvaꞌ moni teoti (30) nene Isilaeleꞌ aleve malite aꞌmine dize minivemuꞌ eiꞌ okoꞌnoloꞌ meni hizilizangumuꞌ eiꞌ meniꞌve ve laniꞌ moni nene di
MAT 27:10 Guvelesi veꞌmo lo-nimidoꞌ aꞌmine monitunuꞌ nene misubo somo loloꞌ ogaꞌ iveꞌmi misubo ma meni hizaniꞌ.
MAT 27:11 Idoꞌ Izesuꞌni eleꞌmizi vi ngamaniloꞌ gizebo ve nabaꞌmi veleloꞌ di vi oti-daniꞌ. Oti-dikevo ve naba neꞌmo longoꞌ o-do tiꞌ lineꞌ: Gaza nene Zuda veti guveꞌinesi ve naba nabe. Olo. Neꞌmine lavo Izesuꞌ aza tiꞌ lo lo-imineꞌ: Mo gasika nene nolaineꞌ ve.
MAT 27:12 Idoꞌ ingine evenetoꞌ medeli mini Oꞌmoso initeꞌ lehizi-daaꞌ ave nabasi evenelite gizebo veꞌinesi initeꞌ mukikumuꞌ goniꞌ i-daniꞌza aza gamazi hamokisi mo lo-ngemamineꞌ.
MAT 27:13 Neꞌmine ogavo Pilatoꞌ aza tiꞌ lo lo-imineꞌ: Gamazi ma lo-ngemamaineꞌ nenako gamazi mukiꞌ geitoꞌ li mili nilaniꞌ nene mo gelabe gelamane
MAT 27:14 Neꞌmine lineꞌza aza gamazi hamokisi aꞌmidoꞌ mo lo-emamineꞌ. Gamazi lo-emamivo ngamaniloꞌ gizebo ve Pilatoꞌ aza gala mukiꞌ goloso gilineꞌ.
MAT 27:15 Idoꞌ kilisimasiloꞌ kilisimasiloꞌ Oꞌmosoꞌmo Zuda veti avotemotine iseꞌine izingumuꞌ geloo holiseꞌ minaaꞌ uneꞌ gameneloꞌ gameneloꞌ nene evenelite galapuso ve mukiꞌ minangutiꞌ nene hamoꞌ ma heta vilive li gulive ikevo ngamaniloꞌ gizebo ve naba neꞌmo aꞌmine ve nene nalaꞌ numungutiꞌ hulo heta o-ngedaaꞌ ineꞌ ve.
MAT 27:16 Aꞌmine Izesuꞌni goniꞌ i-daniꞌ gameneloꞌ nene Izesuꞌ abalaho ma gizengize ve ma guvele buu lo monive gulive gohi ma Balabasiꞌ aza nalaꞌ numunguꞌ minineꞌ.
MAT 27:17 Neivo eveneꞌ mulise milikevo Pilatoꞌ aza tiꞌ lo longoꞌ o-ngidineꞌ: Lingine gilikevo zahine iseve izo hulo lengita olove. Izesuꞌ eveneꞌ do nguꞌ izelive alosa neive lave ma nehe abalaho Balabasiꞌ ma neve.
MAT 27:18 Idoꞌ Pilatoꞌ neꞌmine lo longoꞌ o-ngidineꞌ nene nanitekumuꞌ ve. Eveneꞌ vaiꞌ Izesuꞌni eꞌmetaniꞌ nenako nemuꞌ nene ingine ezemuꞌ muluꞌninguꞌ goloso gilaniꞌ nemukovoꞌ nene nezela gonitoꞌ eleꞌmizi milikeve lo gilineꞌ nemuꞌ longoꞌ o-ngidineꞌ.
MAT 27:19 Idoꞌ Pilatoꞌ aza zasite minaaꞌ aniꞌ holomoloꞌ mino Izesuꞌ goniꞌve nogilivo elenaho gamazi eita hulo molo lineꞌ: Gaza ne mo aꞌmine ve lamineꞌ lisiheꞌ ogo neiveꞌmi okoꞌnola mo gamazi lo molamilineꞌ o neive. Holukaꞌ eikumuꞌ vamuꞌ ma ninge emo mulumo naba goloso nogele-duve lo lineꞌ.
MAT 27:20 Pilatoꞌ aza zahine apase lengemelove lo longoꞌ o-ngedavo evenetoꞌ medeli mini Oꞌmoso initeꞌ lehizi-daaꞌ ave nabasi monoꞌ gizebo veꞌinesi ingine muluꞌninguꞌ hizikevo evenelite Balabasiꞌni nene apase-ledo Izesuꞌni bele helelesane li li-imaniꞌ.
MAT 27:21 Li-imikevo ve nabaꞌmo gohi longoꞌ o-ngedo lineꞌ: Aꞌmine ve sitakutiꞌ mene zahine apase hulo-lengedekuvo lengita vilive. Lavo ingine Balabasiꞌ ve laniꞌ.
MAT 27:22 Likevo Pilatoꞌ tiꞌ lo lo-ngimineꞌ: Idoꞌ eveneꞌ Oꞌmosoꞌmo do luꞌ izelive lo imiselelesa live ve lave Izesuꞌni mene nadiꞌ o-delove. Lavo eveneꞌ mukilite tiꞌ li laniꞌ: Gaza lanivo lohotoꞌ zaloꞌ bili hililizave.
MAT 27:23 Likevo aza lo-ngimineꞌ: Nanitekumuꞌ lohotoꞌ zaloꞌ bele helelone. Initeꞌ goloso ineꞌ nene naniteꞌ nolive. Tiꞌ lo lo-ngimineꞌza ingine amuzo mili lohotoꞌ zaloꞌ beleꞌ navo li gohi geligelinga laniꞌ.
MAT 27:24 Likevo Pilatoꞌ aza gamazi lineꞌ mo ana damivo aꞌminguꞌ lovo naba mo sotoꞌ ilineꞌ ogavo nene ningo lihime ezela minamilive lo ngelebizelesa noso ma do eveneliti veꞌnidoꞌ ana nosoꞌ noizo tiꞌ lo lo-ngimineꞌ: Mene lengiꞌ initetine ve. Lingine lihimeꞌve nomive lisiheꞌ lamineꞌ mene bililizaha nenita eiꞌ lihime minamoloseive.
MAT 27:25 Neꞌmine lavo eveneꞌ mukitoꞌ laniꞌ: Bele heleloneꞌ nene aꞌmine lihime lelitasi mino leze zuho alingeꞌ sotoꞌ ilizavelasi havoꞌ mine do vo mineleseive.
MAT 27:26 Neꞌmine likevo Pilatoꞌ aza Balabasiꞌni hulo heta o-davo engita vineꞌ. Neꞌmine ogo Pilatoꞌ aza lavo ngibilaaꞌ aniꞌ gavosodunuꞌ Izesuꞌni mehene iziviꞌ lediviꞌ igi bilikevo di vi lohotoꞌ zaloꞌ bililizave lo Loma veti ami pilisi ve neti aꞌninguꞌ molaniꞌ ve.
MAT 27:27 Aꞌninguꞌ molavo aꞌmine ngamaniloꞌ gizebo ve nabaꞌmi ami pilisi velite Izesuꞌni eleꞌmizi ngamani numuno nabaꞌmi lulouꞌ dizi vi aꞌminguꞌ minaniꞌ ami pilisi ve linge mamuꞌ vise likevo mukitoꞌ Izesuꞌ veleloꞌ di geseꞌ aniꞌ.
MAT 27:28 Neꞌmine igi aꞌmine ngolokineꞌ genegana ne di huli-di guveꞌinesi ve naba nete ngilaaꞌ aniꞌ neꞌmine gele minelive li lehokoꞌ neꞌmine guleheꞌ lavolavo di ngili-di
MAT 27:29 uhoni nalaꞌ di gangi guveꞌinesi ve nabalite maduꞌnidoꞌ gihaaꞌ aniꞌ initeꞌ neꞌmine apa niteꞌ igi liliꞌ igi madunoloꞌ gihi-di ana zamela angaba gavoso neꞌmine imaniꞌ. Imi velela obuvoꞌine hizi imi Zuda veti guveꞌinesi ve ma gopoꞌni nolo-gimune li golo izi gize zohiꞌ i-daniꞌ.
MAT 27:30 Gize zohiꞌ i-di gituhoꞌ i-di aꞌmine angaba gavoso imikadunuꞌ godololoꞌ bili minaniꞌ.
MAT 27:31 Neꞌmini golo izaniꞌ ne osuꞌ lavo genegana di ngili-daniꞌ nene apasi di huli-di eiꞌ okoꞌnoloꞌ initeꞌve nene gohi di izi-di lohotoꞌ zaloꞌ bililisa eleꞌmizi vaniꞌ.
MAT 27:32 Eleꞌmizi vi numuno ebeꞌ nihuli Kilene ebekutiꞌ ve ma gulive Simoniꞌni nene ningi Izesuꞌ lohotoꞌ zaꞌveloꞌ gehe-delive li amuzonga li-imikevo gihineꞌ.
MAT 27:33 Gehavo vi ebeꞌ ma minineꞌ gulive Goligota nene leliꞌ gamazikotiꞌ godolo amuzo ebeꞌ nela vi hetelaniꞌ.
MAT 27:34 Vi heteli vaini noso aꞌminguꞌ mulumo mate-ngedaaꞌ initeꞌ ekeseꞌ ineꞌ nene di gopo ikeniꞌ nene nalive li imaniꞌza ngomo no geleko namolosuve lo oꞌove lineꞌ.
MAT 27:35 Neꞌmine ogavo lohotoꞌ zaloꞌ bili giliꞌ li di oti badaniꞌ. Di oti badi geneganaꞌve izeꞌ mili dalisa zohiꞌ igi geheni mulo ngomo ma hulikaꞌ hulikaꞌ ikevo ngivileꞌ ogo huliveꞌmo dokaꞌ dokaꞌ ineꞌ.
MAT 27:36 Neꞌmine igi aꞌmida mini gizebo i-di minaniꞌ.
MAT 27:37 Idoꞌ lohotoꞌ zaloꞌ bilisa goniꞌ i-daniꞌ lihime ne li sotoꞌ igi me ve Izesuꞌ nene Zuda veti guveꞌinesi ve ve li luhuvo gizi godolo veletoꞌ nene di badaniꞌ.
MAT 27:38 Idoꞌ gizengize ve sitaꞌ ezesi makaꞌ lohotoꞌ zaloꞌ ngibili ma ne ana zamela di oti-di ma ne ana adavala di oti-daniꞌ.
MAT 27:39 Neꞌmine ikevo eveneꞌ igi vigi ave nete ungumuꞌ izi diviꞌ ledevika li-di
MAT 27:40 tiꞌ li laniꞌ: Monoꞌ numuno naba izo kuso hulo gamene sitohamo novivo gohi gizelove laaꞌ anive gaza Oꞌmosoꞌmi gipele noo ma geiꞌ okonga nene do guꞌ izo lohotoꞌ zalotiꞌ apaso lemevo.
MAT 27:41 Nilavo evenetoꞌ medeli mini Oꞌmoso initeꞌ lehizi-daaꞌ ave nabasi monoꞌ apizi ngimaaꞌ avesi monoꞌ gizebo veꞌinesi ingine aꞌmine aꞌmine igi gizeꞌ i-di li voleloꞌ meloꞌ igi tiꞌ li laniꞌ:
MAT 27:42 Aza eveneꞌ linge ma nene do nguꞌ izive laniꞌza eiꞌ okoꞌno nene ngelo do uꞌ izamilineꞌ ogave. Isilaeleꞌ aleveti guvetesi ve naba ma ne ngelo minelihe. Lohotoꞌ zalotiꞌ lemo ano lovo. Lemavo eitoꞌ gele eleꞌvoleꞌ olone.
MAT 27:43 Oꞌmosoloꞌ gele medele mino Oꞌmosoꞌmi gipele nouve laaꞌ neineꞌ nenako nemuꞌ nene Oꞌmosoꞌmo ezemuꞌ umo helavo ma aloꞌ do uꞌ izezo lovo.
MAT 27:44 Likevo gizengize ve sitaꞌ lohotoꞌ zaloꞌ makaꞌ ngibilavesi aꞌmine aꞌmine igi gamazi goloso li-dasineꞌ ve.
MAT 27:45 Idoꞌ holiseꞌ tuvelu (12) kilokulotiꞌ ebeꞌ mukikuꞌ nene litiꞌmuso ize geseꞌ ogo mine do vo tili (3) kiloku nivengaꞌ ogavo gohi labanaꞌ ilineꞌ.
MAT 27:46 Idoꞌ tili kiloku neꞌmidoꞌ nene Izesuꞌ aza amuzo molo asi naba lo tiꞌ lo lineꞌ: Eli, Eli lema sabahatani. Leliꞌ gamazikotiꞌ nene neꞌmi monovo neꞌmino neive: Oꞌmosoo Oꞌmosoꞌne make, nanitekumuꞌ hulo-nedane.
MAT 27:47 Lavo eze minineꞌ gahevela minave linge ma nete nene gili tiꞌ li laniꞌ: Polohete Eliaꞌnimuꞌ asi nolive.
MAT 27:48 Likevo ve maliꞌmo aꞌmidoꞌ geto lotiꞌ izo vo nosouꞌ lupizisa lipi naaꞌ aniꞌ initeꞌ ma do ekeseꞌ ogaꞌ ineꞌ vaini noso mauꞌ lupizo vaiꞌ lavo vilikiꞌ vilikiꞌ lo nalive lo ngongoꞌnoloꞌ izo imineꞌ.
MAT 27:49 Emavo eveneꞌ malite tiꞌ li laniꞌ: Eliaꞌ lemo do uꞌ izelihe ninge minelone.
MAT 27:50 Likevo Izesuꞌ aza gohi asi naba nolo Sikalahuꞌve nohulo hilineꞌ.
MAT 27:51 Nohilivo monoꞌ numuno nabauꞌ izi hukikaniꞌ lavolavo nene veletatiꞌ galaꞌmuda limivo izo hoꞌlo sitaꞌ neivo misubo mimiꞌ noogo meni naba lemo geheni naba nene iziviꞌ hoꞌliviꞌ aniꞌ.
MAT 27:52 Neꞌmine neivo gonoso galese ma nene ngoloꞌ laniꞌ nene Oꞌmosoꞌmi evenele zuho gozopoꞌ hili minangutiꞌ mukiꞌ ma oti geseꞌ aniꞌ.
MAT 27:53 Oti geseꞌ ikevo alingeꞌ Izesuꞌ hilingutiꞌ otavo aꞌmine gomuꞌ hilave gonoso galese huli Zelusalemi numuda vi eveneꞌ mukiꞌ sotoꞌ pizi ngimaniꞌ.
MAT 27:54 Idoꞌ aꞌmine mimiꞌ ogavo ami pilisi veti gizebo veꞌinesi idoꞌ aꞌmida ami pilisi ve Izesuꞌnimuꞌ gizebo minavesi mimiꞌ ineꞌ nene niningi aꞌmida initeꞌ ineꞌ nene ningi ngehelele goloso izavo tiꞌ li laniꞌ: Laminetoꞌ me ve nene mo Oꞌmosoꞌmi gipele gihile minaniꞌ neive laniꞌ.
MAT 27:55 Idoꞌ veneꞌ mukiꞌ nGalilaia misubokotiꞌ Izesuꞌni eꞌmeti vi nasahiliꞌ idiꞌmi vaniꞌ nete hota gidini mini ningi minaniꞌ.
MAT 27:56 Aꞌmine veneꞌ mukiꞌ minanguꞌ nene Mangadala numudotiꞌ Maliaꞌ nene minineꞌ idoꞌ Maliaꞌ abalaho Zakobongi Zosehengi izeꞌnibosi idoꞌ Zebedaioꞌ gipele zuhoti izeꞌnibosi nene minaniꞌ.
MAT 27:57 Nivengaꞌ molavo Alimataia ebetatiꞌ heneni ve ma gulive Zoseheꞌ nene aza Izesuꞌni eꞌmetaaꞌ ive nene aniꞌ.
MAT 27:58 Aza Pilatoꞌ neida vo Izesuꞌ okoꞌnomuꞌ longoꞌ ineꞌ. Longoꞌ ogavo Pilatoꞌ aza Zoseheꞌni di imilizave lo ami pilisi ve lo-ngedavo
MAT 27:59 gonoso nene Zoseheꞌni mo imikevo aza do lavolavo mokonoꞌ laminekuꞌ do molo asese ize-dineꞌ.
MAT 27:60 Ize-do asiꞌve Zoseheꞌ lavo eiꞌ gonoso galeseꞌve gosohoꞌ gehenguꞌ ma goloꞌvati-mikanguꞌ nene do vo molo-do aꞌmine gonoso galese veleloꞌ nene geheni naba ma do veleheꞌ molo do tileko vineꞌ.
MAT 27:61 Neꞌmine neivo Maliaꞌ Mangadala numudotiꞌ nesi Maliaꞌ ma nesi aꞌmine gonoso galese gahevela nene mini ningi minasineꞌ.
MAT 27:62 Idoꞌ aizeꞌ holiseꞌ gamene ve li aꞌmine gamenemuꞌ nene nosoꞌ niteꞌ di vaꞌvaꞌ igaꞌ aniꞌ gamene vavo gamene maloꞌ evenetoꞌ medeli mini Oꞌmoso initeꞌ lehizi-daaꞌ ave nabasi idoꞌ Halisaioꞌ monoꞌ laaꞌ avesi vi Pilatoꞌ neidaa di geseꞌ igi
MAT 27:63 tiꞌ li laniꞌ: Guvekasi ve, velesi ha mino aꞌmine Oꞌmosoꞌmo eveneꞌ do nguꞌ izeline lo nimiselelesa live nouve lo gote izaaꞌ iveꞌmo helo gamene sitohamo mino gohi otelesuve lineꞌ nene ha gele none.
MAT 27:64 Nemuꞌ nene izipahala zuhote igi aꞌmine gonoso nene gumine di vi gonoso galesetiꞌ mo otave li eveneꞌ li-ngimikevo gomuꞌ gote izo Oꞌmosoꞌmo nimiselelesa live nouve lineꞌ gamazi nene ivileꞌ ogo ingine alingeꞌ soza lilizaniꞌ neꞌmo eveneꞌ ngeleꞌmize gopo ogalive. Nemuꞌ nene lo-ngemanivo ami pilisi vete vi aꞌmine gonoso galeseloꞌ gamene sitohamo mini gizebo lamineꞌ ilizave losa nolune.
MAT 27:65 Neꞌmine likevo Pilatoꞌ aza tiꞌ lo lo-ngimineꞌ: Tiꞌ li ma aꞌmida gizebo ilizave ami pilisi ve neꞌmine ma di aꞌmida huli-ngidi lingine aꞌmine gonoso galesetiꞌ nene gonoso gumine di vikelizave li akaꞌine hizi tililizaniꞌ aka ma gili nii ma ha hizi tililisave.
MAT 27:66 Idoꞌ neꞌmine lavo vi gonoso galese veleloꞌ hizi tilaniꞌ gehedoꞌ nalaꞌ di giliꞌ li humo izi aꞌmidoꞌ kekeize luhuvo bili giꞌmizi aꞌmidoꞌ gizebo minilizave li ami pilisi ve huli-ngidaniꞌ ve.
MAT 28:1 Aꞌmine Zuda vete mine gelo minaaꞌ uneꞌ holisete Salele nene ogo vavo Sadeuꞌ goꞌ lolosa neivo Maliaꞌ Mangadala numudatiꞌ nesi idoꞌ Maliaꞌ ma nesi aꞌmine gonoso galese nene vi ningilisa vasineꞌ.
MAT 28:2 Idoꞌ nivasivo aꞌmine gonoso galesela mimiꞌ naba goloso ineꞌ. Neivo Guvelesi veꞌmi angeloꞌ ma lemo ogo aꞌmine gonoso galeseloꞌ geheni naba nene ehusoꞌ ogo do hulo aꞌmidoꞌ mitoꞌ minineꞌ.
MAT 28:3 Aꞌmida nene gopaꞌna gopaꞌna ogaꞌ ineꞌ neꞌmine labanalasi neivo geneganaꞌvelotiꞌ nene mokonoꞌ goloso elo silingengeꞌni hulo minineꞌ.
MAT 28:4 Aꞌmine angeloꞌ ningadiꞌmo ami pilisi ve ingine ngehelele goloso izo luvoluvo goloso izi amuzoꞌine guluꞌ gelavo hilave neꞌmine igi minaniꞌ.
MAT 28:5 Neꞌmine ikevo angeloꞌ aza veneꞌ sitaꞌ tiꞌ lo lo-ngimineꞌ: Lengehelele izamivo. Lingine nene Izesuꞌ lohotoꞌ zaloꞌ bili hilavemuꞌ viseꞌ nasineꞌ nene gele nouvoniꞌza
MAT 28:6 aza nene meuꞌ nomive. Mili-danguꞌ me igi ningilizo. Gomuꞌ lo-lingimineꞌ maꞌmino aza mo oto vave.
MAT 28:7 Nemuꞌ nene liteꞌ li vi eiꞌ izipahala zuho nene tiꞌ li li-ngimilizo: Hilineꞌ matiꞌ mo oto lengiꞌ lingivileꞌ ogo nGalilaia misubola ganaꞌ vo hetelo neivo aꞌmida ningilisave li li-ngimilizo. Mo aꞌne lo-lengeme nouve.
MAT 28:8 Lavo ngehelele izineꞌza ngolize goloso izi aꞌmidatiꞌ liteꞌ mateꞌ li Izesuꞌ izipahala zuho li-ngimilisa lotiꞌ izi vasineꞌ.
MAT 28:9 Idoꞌ Izesuꞌ aza veneꞌ sitaꞌ nene akaloꞌ nivasivo voteneꞌ ogo ne nasihe lavo ingine veneꞌ sitaꞌ igi osoꞌmolo izi-di opoꞌni lasineꞌ.
MAT 28:10 Neꞌmine ikesivo Izesuꞌ aza lo-ngimineꞌ: Lengehelele izamivo. Vi neze zuho nGalilaia misubola vi aꞌmida neze ningilisave li vi li-ngidilizo.
MAT 28:11 Apiꞌ igi nivasivo ami pilisi ve gonoso galeseloꞌ gizebo minave ingine Zelusalemi numuda vi evenetoꞌ medeli mini Oꞌmoso initeꞌ lehizi-daaꞌ ave naba nene aꞌmine initeꞌ sotoꞌ ingumuꞌ nene li-ngimaniꞌ.
MAT 28:12 Idoꞌ aꞌmine evenetoꞌ medeli mini Oꞌmoso initeꞌ lehizi-daaꞌ ave naba nesi idoꞌ monoꞌ gizebo ve nesi mulise mili gamazi li voleloꞌ meloꞌ igi ami pilisi ve moni ningimi tiꞌ li laniꞌ:
MAT 28:13 Evenelite hilingutiꞌ mo otave li gilikelizave. Neꞌmine li-ngimilo: Okise ongo noningumuꞌ izipahala zuhote igi gonoso ma gumine di vikeve li li-ngimilo.
MAT 28:14 Idoꞌ guvetinesi ve ngamaniloꞌ gizebo ve naba neꞌmo aꞌmine gamazi gelelineꞌ nene gono dami okise ingangumuꞌ goniꞌ o-lengedo lihime lengemalive lo gamazitunuꞌ mulunouꞌ hizekunivo isetine izavo linginela gamazi ma minamoloseive.
MAT 28:15 Likevo aꞌmine moni di li-ngimaniꞌ neꞌmine igi ami pilisi ve nete Izesuꞌ izipahala zuho igi gonoso gumine di vikeve likevo aꞌmine laniꞌ gamazi nene Zuda vetida buu lavo idisesi ha gili nizave.
MAT 28:16 Idoꞌ Izesuꞌ izipahala zuho leveni (11) nene nGalilaia misubouko vi Izesuꞌ lo-ngimineꞌ golo ma minida vi
MAT 28:17 Izesuꞌni ninganiꞌ. Idoꞌ eze ningave nete gubiꞌ izi imi opoꞌni laniꞌza linge ma nete hele neingutiꞌ ngelo alihe li gaꞌine sitaꞌ gilaniꞌ.
MAT 28:18 Neꞌmine ikevo Izesuꞌ aza izipahala zuho nizada ogo tiꞌ lo lo-ngimineꞌ: Okulumokuko minavesi idoꞌ misubouko minavesi ingine mukiꞌ neze nene gelekeleꞌ i-nidi minilizave lo Oꞌmosoꞌmo amuzo mo neme neineꞌ ma ne neive.
MAT 28:19 Nemuꞌ nene misubouꞌ misubouꞌ moni eveneꞌ zuho ato atoꞌ mukiꞌ nene neniꞌ eveneꞌne zuho liliꞌ igi neꞌmetilizave li muluꞌninguꞌ hizi Meꞌneho idoꞌ gipele neniꞌ idoꞌ Sikalahuꞌve lamineꞌ nesi leliꞌ guliveteloꞌ noso mili-ngidi monoꞌ noso hili-ngidilo.
MAT 28:20 Hili-ngidi naza neꞌmine igi, igi mili minilo lo lo-lingimuvoniꞌ initekumuꞌ li-ngimi inginesi aꞌmine sunovoꞌ igi mili minilizaniꞌ aka nene ngelebizi apizi ngimilo. Neꞌmine igi nizavo naza nene hize eleꞌ o-lengedo linginesi gamene gamene havoꞌ mine do vo me misubouꞌ minilizaniꞌ gamene osuꞌ lavo gamene naba alidoꞌ nesi nene lengikisi ha minelesune lo lo-ngimineꞌ. Moda ve
MAR 1:1 Oꞌmosoꞌmi gipele Izesuꞌ Kilisitoꞌ ezemuꞌ gamazi lamineꞌ nene ganaꞌ apiꞌ ogo sotoꞌ ineꞌ ma tiꞌ lo neive:
MAR 1:2 Oꞌmosoꞌmi gamazi lo sotoꞌ o-ngemaaꞌ ive polohete ma gulive Isaiaꞌ aza luhuvo ma gizinguꞌ Oꞌmosoꞌmo guvelesi vemuꞌ gamazi lo-imineꞌ nene tiꞌ lo gize neive: Gelezo. Naza neze gamazi lo-ngeme ngemeꞌ ilive imiselekuvo aza do gomuꞌ molo akaka vele-gedeleseive.
MAR 1:3 Ebeꞌ hadivelatiꞌ ve maliꞌmo asi naba ma tiꞌ lo nolive: Guvelesi ve alingumuꞌ ve li akaꞌve di vaꞌvaꞌ igi di lisiheꞌ i-dilo.
MAR 1:4 Aꞌmine neꞌmine lidoꞌ eꞌmeto eveneꞌ monoꞌ noso holo-ngedaaꞌ ive Zohaneꞌ aza misubo hadiveuꞌ vo sotoꞌ ogo eveneꞌ tiꞌ lo lo-ngimineꞌ: Oꞌmosoꞌmo lengiꞌ lihimetine hulo-lengedelingumuꞌ ve li lutine di velepeꞌ izi monoꞌ noso hilalo lo lo-ngeme ngemeꞌ ogo minineꞌ.
MAR 1:5 Minavo Zudaia misubokotikisi Zelusalemi numungutikisi eveneꞌ mukiꞌ ezela vi heteli lihimeꞌine li sotoꞌ ikevo Zodani nosouꞌ noso holo-ngidineꞌ.
MAR 1:6 Zohaneꞌ aza kamela ize zopovodunuꞌ liliꞌ aniꞌ geneganaꞌve izo ize losuvodunuꞌ liliꞌ aniꞌ leti ma gopololoꞌ izineꞌ. Idoꞌ nosoꞌ niteꞌve naaꞌ ineꞌ nene maꞌnabuso idoꞌ himoni novozo nesi no minaaꞌ ineꞌ.
MAR 1:7 No mino eveneꞌ tiꞌ lo lo sotoꞌ ogo lo-ngeme ngemeꞌ ogo minineꞌ: Eveneꞌ meheꞌnela alingeꞌ ma nave nene nezesi nivileꞌ o-nedosa ve naba ve. Naza aꞌneꞌmineꞌmine goboni gono do-do eiꞌ suuꞌvelotiꞌ nalaꞌve nesi nene gubiꞌ izo apase hulo-delodoꞌ nene mo lisiheꞌ amuve.
MAR 1:8 Naza noso holo-lingiduvoniꞌ nene haza nosotunuꞌ holo-lingiduve. Ne neiha aꞌmine ve neꞌmo noso neꞌmine holo-lengedelineꞌ nene Oꞌmosoꞌmi Sikalahukisi ne neive.
MAR 1:9 Aꞌmine gamene neuꞌ Izesuꞌ aza nGalilaia misubouꞌ numuno ngomo ma Nasalete nene hulo vo hetelavo Zohaneꞌ aza Zodani nosouꞌ holo-dineꞌ.
MAR 1:10 Holo-davo nosoutiꞌ dizosa aꞌmidoꞌ ningineꞌ nene okulumoꞌ ne ngoloꞌ lavo Sikalahuꞌ neꞌmo nama viluso neꞌmino lulouꞌ dizelesa nolimivo ningineꞌ.
MAR 1:11 Neꞌmine ogavo Okulumokutiꞌ gamazi tiꞌ lo limineꞌ: Gaza nene voꞌneloꞌ gipeꞌne hamoꞌ nene nane. Gezemuꞌ nene mo muluꞌneuꞌ lamineꞌ nogiluve.
MAR 1:12 Idoꞌ nelotiꞌ geto Sikalahuliꞌmo Izesuꞌni nene hadive misubouꞌ imiselavo vineꞌ.
MAR 1:13 Vavo aꞌmida nene Sataniꞌmo emenguꞌ moloꞌmo novivo gamene foti (40) vineꞌ. Idoꞌ aꞌmida nene Izesuꞌ aza loposo nama gaha minaaꞌ ada neivo angeloꞌ nete nasahiliꞌ i-dii hize eleꞌ i-di minaniꞌ ve.
MAR 1:14 Idoꞌ Zohaneꞌni nalatoꞌ huli-dikevo neivo Izesuꞌ aza nGalilaia misubouꞌ vo Oꞌmosoꞌmi gamazi lamineꞌ lo sotoꞌ ogo tiꞌ lo lo-ngimineꞌ:
MAR 1:15 Gamene nene mo ogave. Oꞌmosoꞌmo gizebo o-ledelineꞌ gamene alitave. Nemuꞌ nene lingine lutine di velepeꞌ izi gamazi lamineꞌ mene gili eleꞌvoleꞌ ilo lo lo-ngimineꞌ.
MAR 1:16 Idoꞌ Izesuꞌ aza nGalilaia noso ohuno nabaꞌmi gahevela nomono Simoniki nakunolo Adeleaki ingine alahaꞌ daaꞌ asive minasinako alahaꞌ daaꞌ asineꞌ golalezeꞌine nene alahaꞌ dalisa nosouꞌ nihulasivo ningineꞌ.
MAR 1:17 Ningo tiꞌ lo lo-ngimineꞌ: Lingine igi neꞌmetilizo. Alahaꞌ daaꞌ nasineꞌ neꞌmini eveneꞌ di nenita igaꞌ ilisive lo lengeleꞌmize molaloze.
MAR 1:18 Neꞌmine lavo ingine liteꞌ li alahaꞌ daaꞌ asineꞌ golalezeꞌine hitiki eꞌmeti vasineꞌ.
MAR 1:19 Ve sitaꞌ nene do giꞌmizo ngomo ma novo aza Zebedaioꞌ gipele sitaꞌ Zakoboki nakunolo Zohaneki sipiuꞌ mini alahaꞌ daaꞌ aniꞌ golalezeꞌine nene ongoti di lamineꞌ nasivo ningo
MAR 1:20 asi lo-ngemavo gili meꞌnibo Zebedaioꞌnisi agoveꞌvesi sipiuꞌ huli-ngimiki eꞌmeti vasineꞌ.
MAR 1:21 Ingine vi Kahanaumi numunguꞌ mini holiseꞌ gamene naba ogavo monoꞌ numunguꞌ dizi Izesuꞌ monoꞌ gamazi apize ngimineꞌ.
MAR 1:22 Idoꞌ apize ngimineꞌ gamazimuꞌ nene voꞌine vavo upuhoꞌ aniꞌ. Ee, aza monoꞌ apize ngimineꞌ nene avoꞌningeliti monoꞌ gamazi apizi ngimaaꞌ avete apizi ngimaaꞌ aniꞌ neꞌmino apize ngemamo asi gamazi meleho neꞌmineꞌmo apize ngimineꞌ gelavo nemuꞌ voꞌine vavo upuhoꞌ aniꞌ ve.
MAR 1:23 Neꞌmine nilavo aꞌmine monoꞌ numuꞌninguꞌ nene ve ma minineꞌ. Aꞌmine veꞌmi lulouꞌ nene eveneliti luteuꞌ do goloso ogaꞌ ive Satanilatiꞌ sikalahuꞌ nene minavo aza gekeꞌ lo tiꞌ lo lineꞌ:
MAR 1:24 Nasalete ve Izesuvo, leliꞌ nonida mene nanimuꞌ ane. Gaza do goloso o-ledelesa abe. Geze nene naza mo ningo gele nouve ma nene nane. Gaza nene Oꞌmosolatiꞌ kegeso lamineꞌ minanive ma nene nane.
MAR 1:25 Neꞌmine lineꞌza Izesuꞌ aza elemo tiꞌ lo lo-imineꞌ: Gamazi lamo zegeneꞌ oko mino eveneꞌ hulo-do lemo ogo vozo.
MAR 1:26 Neꞌmine lavo aꞌmine sikalahuꞌ goloso nene vauve elo eveneꞌ do upuhoꞌ ogo do gesevase ize-do gekeꞌ naba lo luloutiꞌ lemo vineꞌ.
MAR 1:27 Neꞌmine ogo lemo vavo eveneꞌ ingine ningi upuhoꞌ igi angise okoꞌninguꞌ longoꞌ i huli voleloꞌ meloꞌ igi tiꞌ li laniꞌ: Mene nani suno ve. Ve mene amuzo ve mino sikalahuꞌ goloso gamazi lo-ngemavo gamaziꞌve gili daaꞌ nave li li voleloꞌ meloꞌ aniꞌ.
MAR 1:28 Neꞌmine ikevo guvele nene hutileꞌ ogo nGalilaia misubouꞌ numudoꞌ namadoꞌ mone osuꞌ lineꞌ.
MAR 1:29 Neꞌmine ogavo monoꞌ numungutiꞌ limi Simoniki Adeleaki numuꞌninguꞌ Zakobole Zohanelesi dizaniꞌ.
MAR 1:30 Simoniꞌ elenahi izeleho nene okoꞌnoloꞌ oloꞌ ahuꞌ lavo ongo neivo nemuꞌ Izesuꞌni geti li-imaniꞌ.
MAR 1:31 Li-imikevo aza neida vo analoꞌ do do ote-davo okoꞌnoloꞌ oloꞌ ahuꞌ lineꞌ niteꞌ nene aꞌmidoꞌ geto hulo-davo lamineꞌ gelo nosoꞌ niteꞌ gize vataꞌ o-ngedo nasahiliꞌ o-ngidineꞌ.
MAR 1:32 Idoꞌ nivengaꞌ hoꞌ lemavo initeꞌ gizi davesi luꞌninguꞌ sikalahuꞌ goloso minivesi mukiꞌ ezela ngeleꞌmizi di ikaꞌ ikaꞌ aniꞌ.
MAR 1:33 Aꞌmine numudotiꞌ aleve mukiꞌ nene igi gatedoꞌ di geseꞌ aniꞌ.
MAR 1:34 Neꞌmine ikevo aza initeꞌ ato atoliꞌmine gizi dave mukiꞌ do lamineꞌ o-ngedo sikalahuꞌ goloso mukiꞌ eveneꞌ maliti luꞌningutiꞌ ngimiselo do hulineꞌ. Idoꞌ Sikalahuꞌ goloso ingine eze ningi lamineꞌ igi gili nizaniꞌ nenako gamazi lamilo lo lo-ngemo ngimiselo do hulineꞌ ve.
MAR 1:35 Nedengaꞌ goꞌ olihe lamivo Izesuꞌ aza oto guviseuꞌ eveneꞌ nizamanguꞌ vo Oꞌmosola lo minineꞌ.
MAR 1:36 Tiꞌ neivo Simoniꞌ nene gonolomotesi ingine viseꞌ iꞌmi vaniꞌ.
MAR 1:37 Ningi tiꞌ li li-imaniꞌ: Eveneꞌ mukiꞌ gezemuꞌ viseꞌ nave.
MAR 1:38 Li-imikevo aza tiꞌ lo lo-ngimineꞌ: Naza monoꞌ lo sotoꞌ ogo lo-ngemelongisi numuno ebeꞌ avitoꞌ minaniꞌ nela vukeleꞌzo. Naza nene mo neꞌmine olove losa uvoniꞌ ve lo lo-ngimineꞌ.
MAR 1:39 Neꞌmine lo aza mono monoꞌ numuꞌninguꞌ monoꞌ lo sotoꞌ o-ngemeꞌmo vo idoꞌ sikalahuꞌ goloso eveneꞌ maliti luꞌninguꞌ dizi minaniꞌ nene ngimiselo huloꞌmo vo nGalilaia misubouꞌ minaniꞌ ebeꞌ mukikuꞌ nene mone osuꞌ lineꞌ.
MAR 1:40 Idoꞌ ganadise gize dave maliꞌmo ezela ogosa obuvolo hize emo amuzonga lo tiꞌ lo lo-imineꞌ: Gaza do lamineꞌ o-nedelineꞌ amuzokasi naineꞌ nene naza mo gele mino do lamineꞌ o-nedeline lo gele nouve. Gaza do lamineꞌ o-nedelesa gele nabe.
MAR 1:41 Neꞌmine lavo Izesuꞌ muluno hukavo ganadise gizi dave i-ngidisaꞌmaniꞌ initeꞌ o-do ana hulo molo okoꞌnoloꞌ hito tiꞌ lo lo-imineꞌ: Naza do lamineꞌ o-gedelesa gele nouve. Nemuꞌ gaza lamineꞌ ozo.
MAR 1:42 Neꞌmine lavo ganadise neꞌmo liteꞌ lo okoꞌnolotiꞌ hulo-do vavo lamineꞌ gilineꞌ.
MAR 1:43 Lamineꞌ gelavo Izesuꞌ aza geto gamazi amuzo molo lo-emo imiselo nohulo tiꞌ lo lineꞌ:
MAR 1:44 Gele nabe. Gaza lamineꞌ aineꞌ monovo nene eveneꞌ hamokisi lo-ngemamozo. Evenetoꞌ medelo mino Oꞌmoso initeꞌ lehize-daaꞌ ive neꞌmo ganadise okongalotiꞌ hulo-gedo vineꞌ nene ningo lo sotoꞌ ogavo gaza lamineꞌ aineꞌ nemuꞌ nene evenelite ningi gililizangumuꞌ ve lo neꞌmine ozo: Ganadise gizi dave ingine lamineꞌ igi ma ize initeꞌ neꞌmine neꞌmine Oꞌmoso imilisave lo Moseꞌ lo huko lidoꞌ nene eꞌmeto evenetoꞌ medelo mino Oꞌmoso initeꞌ lehize-daaꞌ ive nene initeꞌ ma Oꞌmoso olokuꞌ gize emelingumuꞌ nene do vo emezo lo lo-imineꞌ.
MAR 1:45 Neꞌmine lo lo-imineꞌza ve aza vo aꞌmine gamazi apiꞌ ogo veteteꞌ ogo do hutileꞌ ineꞌ. Neꞌmine ogavo nemuꞌ nene eveneꞌ gili Izesuꞌni lisilizaniꞌ o vivo aza nene numuno ebekuꞌ sotoꞌ vamilidoꞌ ogavo haza guvisela neivo numudoꞌ namadoꞌ ve nene ezela igivoꞌ minaniꞌ ve.
MAR 2:1 Gamene ma ogo vavo Izesuꞌ aza Kahanaumi numuda tibizo ogo aꞌmida numuꞌvela neivo nemuꞌ eveneꞌ ingine gili
MAR 2:2 igi di geseꞌ igi gikiꞌ goloso adiꞌmo gatedokisi vovosi ma minamineꞌ. Neꞌmine ikevo aza monoꞌ gamazi lo-ngemo minineꞌ.
MAR 2:3 Tiꞌ neivo inginelatiꞌ ve sitaꞌve sitaꞌve nete gebili ma ngakatoꞌ mili di navo eveneꞌ malite ezela ngeleꞌmizi alisa aniꞌza
MAR 2:4 eveneꞌ mukiꞌ gikiꞌ ikevo neꞌmo neida di vamilizaniꞌ ogavo nubitoꞌ dizi Izesuꞌ minineꞌ lisiheleloꞌ numuno nubikuꞌ bili heteli gebili ongo minineꞌ ngakaꞌ nene nalatoꞌ hulikevo limineꞌ.
MAR 2:5 Aꞌmine hulave nete ha do lamineꞌ o-deleseive li gili eleꞌvoleꞌ aniꞌ nene ningo gelo Izesuꞌ aza gebili ve nemuꞌ tiꞌ lo lineꞌ: Gipeꞌneho geiꞌ lihimeka nene mo apase-gedekuve.
MAR 2:6 Lavo avoꞌningeliti monoꞌ apizi ngimaaꞌ ave ma aꞌmida minave nete gaꞌninguꞌ tiꞌ li gili minaniꞌ:
MAR 2:7 Eveneꞌ me ve nene nanimuꞌ neꞌmine nolive. Oꞌmoso ivileꞌ o-daaꞌ gamazi lave. Oꞌmosoꞌmovoꞌ lihimete hulo-ledaaꞌ ive ne neive li gili minaniꞌ.
MAR 2:8 Tiꞌ li gilaniꞌ nene Izesuꞌ aza lulouko gelo tiꞌ lo lo-ngimineꞌ: Lingine nanimuꞌ gatinguꞌ neꞌmine li nigilave.
MAR 2:9 Lingine nenikumuꞌ nene sozavoꞌ laaꞌ neive li gilaaꞌ nahe. Gebili nemuꞌ lihimeka mo hulo-gedekuve luvoniꞌ nene soza lolohe lamineꞌ lolohe ma gilamilisave lo lapa nomivo noluvoniꞌza sozaloꞌ ve minuvodini ve gebili nemuꞌ naza oto vozo nolo-duvo oto vamivo soza luvoniꞌ nene sotoꞌ ogavo novozo helalove lo gelo oto vozo lo ma lamuvodine.
MAR 2:10 Ne neiha Oꞌmosolatiꞌ ve gihile naza misubouko lengiꞌ lihimetine apase-lengedaaꞌ amuzo do nouve luvoniꞌ nene soza lamo mo laminetoꞌ noluvoniꞌ nene ningi gililizangumuꞌ naza idise ogo molo oloniꞌ initeꞌ nene ningilo. Neꞌmine lo gebili nemuꞌ tiꞌ lo lo-imineꞌ:
MAR 2:11 Tiꞌ lo nolo-gimuve. Gaza oto ngakaka do geho numungala vozo.
MAR 2:12 Lavo mukitoꞌ ningi nizavo geto oto ngakaꞌve do geho vineꞌ. Neꞌmine ineꞌ nemuꞌ eveneꞌ mukiꞌ ingine golize li Oꞌmoso opoꞌni li tiꞌ li laniꞌ: Laza gomuꞌ initeꞌ neꞌmine ma ningesaꞌmuneꞌ ve li laniꞌ.
MAR 2:13 Neꞌmine ogavo Izesuꞌ aza noso ohuno gahevela tibizo vineꞌ. Vavo eveneꞌ mukiꞌ ezela ikaꞌ ikaꞌ navo aza monoꞌ apize ngemeꞌmo vo minineꞌ.
MAR 2:14 Neꞌmine oꞌmo novo Alahaioꞌ gipele Leviꞌ aza takisi moni daaꞌ ineꞌ opisiꞌveuꞌ gono do neivo ningo tiꞌ lo lo-imineꞌ: Gaza neꞌmeto ano. Neꞌmine lavo aza oto eꞌmeto vineꞌ.
MAR 2:15 Vi eze numuꞌveuꞌ Izesulesi nosoꞌ niteꞌ ni nizavo monovo goloso igi takisi moni daaꞌ avesi idoꞌ Zuda veti louꞌ gamaziloꞌ eꞌmete lamineꞌ isaꞌmave gohi ma nesi mukiꞌ eꞌmeti vaniꞌ nenako eze izipahala zuhosi mukitoꞌ makatoꞌ nosoꞌ niteꞌ ni minaniꞌ.
MAR 2:16 Neꞌmine igi nizavo Halisaioꞌ eveneliti monoꞌ apizi ngimaaꞌ ave ingine Izesuꞌ nene takisi moni daaꞌ avesi idoꞌ Zuda veti louꞌ gamaziloꞌ eꞌmete lamineꞌ isaꞌmavesi nosoꞌ niteꞌ makaꞌ ninavo ningi izapahala zuho tiꞌ li longoꞌ i-ngidaniꞌ: Aza takisi moni daaꞌ ave golososi idoꞌ lihime daaꞌ ave lingesi makaꞌ mini nanimuꞌ nosoꞌ niteꞌ ninave.
MAR 2:17 Likevo gelo Izesuꞌ aza tiꞌ lo lo-ngimineꞌ: Luso ve aza lamineꞌ haza minave do lamineꞌ o-ngedelesa osaꞌmiha initeꞌ gizi davemukovoꞌ nene ogaꞌ neive. Naza aꞌmine aꞌmine ogo eveneꞌ lisiheꞌ i minavemuꞌ amuvoniꞌza eveneꞌ lihimeꞌinesi vemuꞌ uvoniꞌ ve.
MAR 2:18 Gamene ma Zohaneꞌ izipahala zuhosi Halisaioꞌ evenekisi monoꞌinemuꞌ gili nosoꞌ niteꞌ malise igi nizavo eveneꞌ linge ma Izesuda igi tiꞌ li longoꞌ i-daniꞌ: Zohaneꞌ izipahala zuhosi Halisaioꞌ eveneliti izipahaꞌine zuhosi ingine nosoꞌ niteꞌ malise igi nizaha geze izipaha zuho nosoꞌ niteꞌ malise amave. Ne nanimuꞌ nave.
MAR 2:19 Longoꞌ i-dikevo aza tiꞌ lo lo-ngimineꞌ: Ve maliꞌmo veneꞌ di imiliza gameneuꞌ olize izo nosoꞌ niteꞌ gize vataꞌ ogo eze zuho molo-ngedavo ingine aza aꞌminguꞌ neivo mulumo gili-di nosoꞌ niteꞌ malise ilizadoꞌ nehe. Ne nomive. Veneꞌ dalosa ive aꞌminguꞌ ha neivo ma nosoꞌ niteꞌ ngeli malise amilisave. Aꞌmine aꞌmine igi naza nouvosa nene lamineꞌ gili nizanako nosoꞌ niteꞌ malise amilizaha
MAR 2:20 engiꞌ vovoꞌningutiꞌ biluvalite neze neleꞌmizi di vilizaniꞌ gamene nene mo aliteleseive. Aꞌmine gamene alitavo mulumo gilisa nosoꞌ niteꞌ malise ilisave.
MAR 2:21 Idoꞌ lavolavo gosohototiꞌ ngomo ma huki saketi litehe hukidoꞌ mili ongotilizaniꞌ nene lavolavo gosohoꞌ neꞌmo geleleheꞌ ogavo saketi litehe nene naba hukalinako lavolavo ngomo ma olihe ngingili lamineꞌ nene saketi liteheloꞌ mili ongotisaꞌmave.
MAR 2:22 Idoꞌ aꞌmineꞌmine igi lingine vaini noso gosohoꞌ neꞌmo memeꞌ ize losuvodunuꞌ liliꞌ aniꞌ gomise nene izo pouꞌ lavo vaini noso nene lepo vo gomiseꞌvesi nene goloso ogalive li vaini noso gosohoꞌ gituhoꞌ galakalaꞌ neidiꞌmo nene lulu izavo gomise liteheliꞌmo gipu lo hukilineꞌ o mininguꞌ nene ma ohizi milisaꞌmave. Vaini noso gosohoꞌ gituhoꞌ galakalaꞌ neivo nene memeꞌ ize losuvo gosohotunuꞌ liliꞌ aniꞌ gomise gosohokuꞌ nene ohizesoꞌ o neive. Neꞌmine lineꞌ nene aza monoꞌ lo-ngemaaꞌ ineꞌ nene gosohoꞌ nenako izipahala zuho igi mili ilizaniꞌ monovo neꞌmo aꞌmine Zuda veti monovo litehe maloꞌ vo damingumuꞌ nene lineꞌ ve.
MAR 2:23 Holiseꞌ gamene mauꞌ Izesuꞌ izipahala zuhosi viti minguꞌ nivavo izipahala zuhote viti godololatiꞌ gihile ili niꞌmi vaniꞌ.
MAR 2:24 Neꞌmine iꞌmi vaniꞌ nemuꞌ Halisaioꞌ eveneꞌ malite Izesuꞌni tiꞌ li li-imaniꞌ: Ningezo. Leze louꞌ gamaziteuꞌ nene holiseꞌ gameneuꞌ gono damilo li nizaniꞌ mako neꞌmine nanimuꞌ nave.
MAR 2:25 Likevo aza tiꞌ lo lo-ngimineꞌ: Davidiꞌ eze evenele zuhosi nosoꞌ niteꞌine nomivo gaꞌna hili nizadoꞌ aza initeꞌ ineꞌ nemuꞌ gati gilisaꞌmahe.
MAR 2:26 Adoꞌ Abiatalaꞌ evenetoꞌ medelo mino Oꞌmoso initeꞌ lehize-daaꞌ ive naba minineꞌ gameneuꞌ Davidiꞌ aza Oꞌmosoꞌmi numunguꞌ dizo Oꞌmosoꞌmi veleloꞌ milaaꞌ aniꞌ beleti nene do azasi makaꞌ monavesi ngemavo naniꞌ. Aꞌmine beleti nene haza ve namilizave li evenetoꞌ medeli mini Oꞌmoso initeꞌ lehize-daaꞌ avetevoꞌ nalizave li li hukikaniꞌ beleti nene gopo naniꞌ ma ve.
MAR 2:27 Neꞌmine lo tiꞌ lo lo-ngimineꞌ: Oꞌmosoꞌmo eveneꞌ do sotoꞌ molaniꞌ nene holiseꞌ gamene hize eleꞌ ilizangumuꞌ ve lo do sotoꞌ molaniꞌ nomive. Asi holiseꞌ gamene neꞌmo nene eveneꞌ hize eleꞌ o-ngedaaꞌ ilive losa evenekumuꞌ do sotoꞌ molaniꞌ ve.
MAR 2:28 Nemuꞌ nene naza Oꞌmosolatiꞌ ve gihile naza nene holiseliꞌmi melehosi mino aꞌmine holisekuꞌ iliza initekumuꞌ idoꞌ amiliza initekumuꞌ laaꞌ uve nene nenikovoꞌ nouve lo lineꞌ ve.
MAR 3:1 Mino monoꞌ numunguꞌ gohi dizineꞌ. Aꞌmida ve ma ana hamoꞌ ma goloso ogo gilizevo o vineꞌ nene omo neivo
MAR 3:2 eveneꞌ ma nete holiseꞌ gamene neinako Izesuꞌ do lamineꞌ o-delineꞌ nene holisekumuꞌ laniꞌ louꞌ gamazi ma nene avutoꞌ oloseinako nemuꞌ goniꞌ o-delone li ningilisa gizebo igi minaniꞌ.
MAR 3:3 Tiꞌ igi nizavo Izesuꞌ aza ana goloso o vivemuꞌ tiꞌ lo lineꞌ: Vovoteuꞌ ote minezo.
MAR 3:4 Lo eveneꞌ longoꞌ o-ngidineꞌ: Leze louꞌ gamazite neꞌmo nadive lo neive. Holiseꞌ gameneuꞌ nene monovo lamineꞌ ilo lo neihe. Monovo goloso ilo lo neive. Adoꞌ eveneꞌ di lamineꞌ i-ngidilo lo neihe. Eveneꞌ ngibili hililo lo neive lo longoꞌ ogo lineꞌza gamazi di tibizi lamavo
MAR 3:5 izeboloꞌ molavo vele do eza ema ogo vonuꞌ goloso ngebelo luꞌine gaꞌine ngi lo tile vineꞌ minangumuꞌ mulumoꞌine ninge-ngidineꞌ. Neꞌmine ogo ana goloso o vive ma nene tiꞌ lo lo-imineꞌ: Anga do pehe lozo. Neꞌmine lavo ana do pehe lavo gohi lamineꞌ ineꞌ.
MAR 3:6 Neꞌmine ogavo Halisaioꞌ eveneꞌ ingine limi bililizaniꞌ aka di sotoꞌ ilisa aꞌmidoꞌ geti Helodeꞌ zuhosi mulise mili gamazi di hamoꞌ aniꞌ.
MAR 3:7 Neꞌmine ogavo Izesuꞌ aza aꞌmine ebeꞌ hulo izipahala zuho ngeleꞌmizo noso ohuda limineꞌ. Lemavo nGalilaia misubokotiꞌ nene eveneꞌ vaiꞌ goloso eꞌmeti aniꞌ. Idoꞌ eveneꞌ Zelusalemi numudotikisi Zudaia misubo lingelatikisi ma avo idoꞌ Idumaia misubokotikisi ma avo idoꞌ Zodani noso helalatikisi ma avo idoꞌ linge ma Tilo numudotikisi Sidoni numudotikisi aniꞌ. Aꞌmine eveneꞌ vaiꞌ goloso aniꞌ nete Izesuꞌ ogo molo minineꞌ initeꞌ nemuꞌ nene gilaniꞌ nenako nemuꞌ ezela aniꞌ.
MAR 3:9 Neꞌmini ikevo di geseꞌ ave ingine gikiꞌ gikiꞌ igi di langoloꞌ i-nidikelizave lo sipi ma di igi di mili-nidilo lo izipahala zuho lo-ngimineꞌ.
MAR 3:10 Idoꞌ sipiuꞌ minelove lineꞌ nene nemuꞌ lineꞌ ve: Eveneꞌ mukiꞌ do lamineꞌ o-ngedo miningumuꞌ nene initeꞌ gizi dave vaiꞌ ingine okoꞌnoloꞌ do gelelone li ezela igi okoꞌnidoꞌ okoꞌnidoꞌ igi di langoloꞌ i-dilizaniꞌ ineꞌ.
MAR 3:11 Idoꞌ neꞌmine navo eveneꞌ luꞌninguꞌ minaniꞌ sikalahuꞌ goloso nete eze ningi gizenela limi ingi gekeꞌ naba li tiꞌ li likaꞌ likaꞌ igi minaniꞌ: Gaza Oꞌmosoꞌmi gipele ma ne nane.
MAR 3:12 Likevo aza nene neꞌmo ma ve li neze monovo li sotoꞌ sotoꞌ igi li-ngimamilo lo amuzo molo lo huko lo-ngimineꞌ.
MAR 3:13 Idoꞌ Izesuꞌ aza gololoꞌ dizo eiꞌ gala gilidoꞌ eveneꞌ ma vise lo-ngemavo ezela aniꞌ.
MAR 3:14 Ikevo aza ve tuvelu do kegeso nenikisi monelone lo idoꞌ ngimiselekuvo monoꞌ li sotoꞌ igi li-ngimilizave.
MAR 3:15 Idoꞌ amuzo ngemekuvo di mini eveneꞌ luꞌningutiꞌ sikalahuꞌ goloso ngimiselilizave lo do kegese-ngidineꞌ.
MAR 3:16 Do kegese-ngidive ve tuvelu nete guliveꞌine nene neꞌmino neive: Simoniꞌ gulive gohi ma nene Petoloꞌ ve lo molo-dineꞌ
MAR 3:17 idoꞌ Zebedaioꞌ gipele Zakobolesi akunolo Zohanelesi guliveꞌine Boanelegesiꞌ ve lo molo-ngidineꞌ. Leze gamaziteutiꞌ nene goꞌ ngilili gili vasineꞌ ve losa ve.
MAR 3:18 Idoꞌ Adeleaꞌ idoꞌ Hilipoꞌ idoꞌ Batolomaioꞌ idoꞌ Mataioꞌ idoꞌ Tomasiꞌ idoꞌ Alahaioꞌ gipele Zakoboꞌ abalaho idoꞌ Tadaioꞌ idoꞌ Simoniꞌ aza Loma ve ngimiselelone lo amuzonga laaꞌ ive nesi
MAR 3:19 idoꞌ alingeꞌ Izesuꞌni do sotoꞌ o-do biluvaliti aꞌninguꞌ molave Kelioto ebekutiꞌ ve Zudaꞌ nesi nene minaniꞌ ve.
MAR 3:20 Izesuꞌ aza numunguko vineꞌ. Vo neivo eveneꞌ mukiꞌ gohi igi di geseꞌ adiꞌmo veꞌine initekisi namaniꞌ.
MAR 3:21 Neꞌmine igi nizavo eze zuho ingine gili eleꞌmizi alisa vaniꞌ ve. Idoꞌ eleꞌmizi alisa vaniꞌ nene aza mo negi hizave li laniꞌ nenako nemuꞌ eleꞌmizi alisa vaniꞌ ve.
MAR 3:22 Idoꞌ avoꞌningeliti monoꞌ apizi ngimaaꞌ ave Zelusalemi numudatiꞌ ave ingine tiꞌ li li minaniꞌ: Ve mene sikalahuꞌ goloso ngimiselo do nohulineꞌ nene engiꞌ guveꞌinesi ve naba Belezebuloꞌ lulouꞌ mino aꞌmine sikalahuꞌ golosoliti guveꞌinesi ve naba neꞌmo amuzo emavo nedunuꞌ do nohulineꞌ ve.
MAR 3:23 Tiꞌ li nizavo Izesuꞌ vise lo-ngemo aneza gamazi tiꞌ lo lo-ngimineꞌ: Satani neꞌmo Satani nene nado imiselelive.
MAR 3:24 Misubo mauꞌ eveneꞌ engikuꞌ lovo hizi vi eza ema ilizaniꞌ nene vi gopoꞌnapa ilisave.
MAR 3:25 Idoꞌ eveneꞌ hamoꞌ zuho vi eza ema ilizaniꞌ nene vi gopoꞌnapa ilisave.
MAR 3:26 Aꞌmine aꞌmine igi Sataniꞌmi zuho ingine vi eza ema igi minadini nge lami diꞌmozi osuꞌ li ma minamadine.
MAR 3:27 Eveneꞌ maliꞌmo ve ma gasava daaꞌ ive miniveliꞌmi numuꞌveuꞌ dizo aꞌmine gasava daaꞌ iveꞌmo gizebo ogo minineꞌ initeꞌve ipeꞌ ogo dalineꞌ nene haza dizo ipeꞌ ogo damoloseive. Asi aꞌmine gasava daaꞌ ive nene gomuꞌ ivileꞌ ogo nalaꞌ do-mikosavoꞌ nene dizo initeꞌve ipeꞌ ogo daloseive. Aꞌmineꞌmine ogo naza nene Satani ivileꞌ ogosa eveneꞌ eitatiꞌ nene do nenita ogaꞌ nouve.
MAR 3:28 Naza lamineꞌ ma lo-lengemelove: Eveneꞌ ingine goloso niteꞌ ato atoꞌ igaꞌ aniꞌ neꞌmi lihime idoꞌ Oꞌmoso divi lediviꞌ igaꞌ aniꞌ neꞌmi lihime nene Oꞌmosoꞌmo ha hulo-ngedeleseiha
MAR 3:29 eveneꞌ maliꞌmo Oꞌmosoꞌmi Sikalahuꞌve dovo ledevoꞌ ilineꞌ neꞌmi lihime nene Oꞌmosoꞌmo mo hulo-damoloseive. Aza nene imineꞌ molo mineꞌmo vo minevoꞌ minevoꞌ ilineꞌ lihime daloseive lo lo-ngimineꞌ.
MAR 3:30 Idoꞌ Oꞌmosoꞌmi Sikalahuꞌ dovo ledevoꞌ ogaliꞌmi lihime Oꞌmosoꞌmo hulo-lengedamoloseive lo lo-ngimineꞌ nene oꞌmosoꞌmi Sikalahuꞌ Izesuꞌ lulouꞌ neineꞌ nenako eveneꞌ ingine sikalahuꞌ goloso eiꞌ lulouꞌ neive li minaniꞌ nemuꞌ nene lo-ngimineꞌ.
MAR 3:31 Idoꞌ izelehosi akunolomotesi igi heteli heta oti mini ezemuꞌ longoꞌ aniꞌ.
MAR 3:32 Neꞌmine ikevo eveneꞌ mukiꞌ eze vodo vodo i-di minave nete tiꞌ li li-imaniꞌ: Ningezo. Izahosi nakunamote nesi heta imi mini gezemuꞌ nilave.
MAR 3:33 Neꞌmine likevo gamazi tiꞌ lo do tibizo lo-ngimineꞌ: Izeꞌnehinemukisi nakuꞌnemotinemukisi nilahe.
MAR 3:34 Neꞌmine lo vele do eza ema ogo eveneꞌ vodo vodo i-di minave vonuꞌ ngebelo tiꞌ lo lo-ngimineꞌ: Izeꞌnemote nakuꞌnemote nene mene nizaniꞌ ve.
MAR 3:35 Eveneꞌ Oꞌmosoꞌmi luloloꞌ igi mili igaꞌ nave engiꞌ nene izeꞌnemote nakuꞌnemote idoꞌ aluꞌnemote ne nizave.
MAR 4:1 Izesuꞌ noso ohuno gahevela mino gohi monoꞌ apiꞌ ogo nolo-ngimivo eveneꞌ mukiꞌ goloso igi di geseꞌ adiꞌmo aza nene nosouꞌ minineꞌ sipi mauꞌ vo dizo minavo di geseꞌ ave mukiꞌ ingine noso gahevela gepeloꞌ minaniꞌ.
MAR 4:2 Nizavo aneza gamazi ato atoꞌ lo-ngemeꞌmo novo initeꞌ mukikumuꞌ apize ngimineꞌ. Noapize ngemo gamazi ma tiꞌ lo lo-ngimineꞌ:
MAR 4:3 Gililo. Ve ma zuho initeꞌ tileꞌ ogaꞌ iveliꞌmo zuho niteꞌ tileꞌ olosa vineꞌ.
MAR 4:4 Vo tileꞌ oꞌmo novivo zuho niteꞌ linge ma nene akaloꞌ diꞌmozikevo namalite igi naniꞌ.
MAR 4:5 Linge ma nene gehedoꞌ misubo naba minamidoꞌ diꞌmozi misubo naba nomineꞌ neꞌmo getiꞌ geti gala hoꞌli dizaniꞌza
MAR 4:6 hoꞌ nene amuzo molo lavo dizi luhive vaiꞌ damaniꞌ nenako neꞌmo gulugulu izaniꞌ.
MAR 4:7 Linge ma nene gasava guvise hukikevo luhive ma ha minidoꞌ diꞌmozi gala hoꞌli dizaniꞌza gasava guvise neꞌmo dizo molo-ngedavo gihile izamaniꞌ.
MAR 4:8 Idoꞌ linge ma misubo laminekuꞌ diꞌmozi gala hoꞌli dizi gihile izaniꞌ. Ma neꞌmo gihile teoti (30) izineꞌ. Ma neꞌmo gihile sigisiti (60) izineꞌ. Ma neꞌmo gihile vanu hadeti (100) izineꞌ.
MAR 4:9 Neꞌmine losa tiꞌ lo lineꞌ: Gatine ngoloꞌ live nii ma nene gili lamineꞌ ilo.
MAR 4:10 Eveneꞌ mukiꞌ ingine hutileꞌ igi vikevo izipahala zuho tuvelu inginesi idoꞌ ezesi monaaꞌ ave linge masi engikovoꞌ mini aneza gamazi laaꞌ ineꞌ monovo mamuꞌ longoꞌ i-dikevo
MAR 4:11 tiꞌ lo lo-ngimineꞌ: Oꞌmosoꞌmo gizebo o-ledelingumuꞌ sunoꞌ gamazi nene lengiꞌ ha gililisave lavo lo sotoꞌ o-lengemaaꞌ nouvoniꞌza lelikisi monamaaꞌ ave nene aneza gamazivoꞌ lo-ngemaaꞌ nouve. Neꞌmine nouvoniꞌ nene polohete maliꞌmo gizineꞌ gamazi ma nene inginela gihile izelive losa neꞌmine ogaꞌ nouve. Tiꞌ lo gize neive:
MAR 4:12 Ningi ningi ningilizaha ninge lamineꞌ amilisave. Idoꞌ gili gili gililizaha gili lamineꞌ amilisave. Nene nanitekumuꞌ ve. Ingine luꞌine di velepeꞌ izikevo Oꞌmosoꞌmo lihimeꞌine hulo-ngedalive losa ve.
MAR 4:13 Neꞌmine lo tiꞌ lo lo-ngimineꞌ: Aneza gamazi luvoniꞌ meꞌmi monovo gilamahe. Idoꞌ gilamilizaniꞌ nene aneza gamazi mukiꞌ nene nadiꞌ igi gililizave.
MAR 4:14 Zuho niteꞌ tileꞌ ogaꞌ ive aza Oꞌmosoꞌmi gamazi nene tileꞌ ogaꞌ neive.
MAR 4:15 Idoꞌ gihile ma akaloꞌ doꞌmozive luvoniꞌ neꞌmi monovo nene neꞌmino neive: Oꞌmosoꞌmi gamazi nene eveneꞌ maliti luꞌninguꞌ tileꞌ ogavo nigilavo Sataniꞌmo geto ogo aꞌmine gamazi nene luꞌningutiꞌ ipeꞌ ogo do vaaꞌ neive.
MAR 4:16 Aꞌmineꞌmine ogo gihile ma gehedoꞌ misubo naba minamidoꞌ diꞌmozave luvoniꞌ neꞌmi monovo nene neꞌmino neive: Eveneꞌ ma ingine Oꞌmosoꞌmo gamaziꞌve tileꞌ ineꞌ nene gilii liteꞌ li gili laniteꞌ igi di goꞌzaaꞌ naha
MAR 4:17 aꞌmine gamazi neꞌmo luꞌninguꞌ luhise do minelidoꞌ mini mili minamavo gamene haꞌnamuꞌ gili dii minisaꞌmave. Idoꞌ gamene haꞌna gili di minisaꞌmaniꞌ nene ingine aꞌmine gamazi gili nidavo neꞌmo engita geni sotoꞌ o-ngemelihe goboni malaꞌ malaꞌ sotoꞌ o-ngemelihe. Ineꞌ nene geti hulaaꞌ nave.
MAR 4:18 Idoꞌ gihile ma gasava guvise minidoꞌ diꞌmozave luvoniꞌ neꞌmi monovo nene neꞌmino neive: Eveneꞌ ma ingine Oꞌmosoꞌmo gamazi tileꞌ ineꞌ nene ha gilaniꞌza
MAR 4:19 ingine okoꞌine losuvoꞌmi initekumuꞌ gilaaꞌ idoꞌ moni henenimuꞌ gahuꞌninguꞌ ogaꞌ idoꞌ ato atoꞌ niteꞌ mukiꞌ nene dalone li gilaaꞌ aniꞌ neꞌmo nene dizo Oꞌmosoꞌmi gamazi nene molo-davo gihile izesaꞌmive.
MAR 4:20 Idoꞌ gihile ma misubo laminekuꞌ diꞌmozave luvoniꞌ neꞌmi monovo nene neꞌmino neive: Eveneꞌ ma ingine Oꞌmosoꞌmi gamazi gili luꞌninguꞌ di goꞌzi gili lamineꞌ igi nizavo gihile izaaꞌ neive. Ee, zuho niteꞌ hamototiꞌ gihile teoti (30) izaaꞌ neineꞌ neꞌmino ve mala nene mukiꞌ izaaꞌ neive. Idoꞌ zuho niteꞌ hamototiꞌ gihile sigisiti (60) izaaꞌ neineꞌ neꞌmino ve mala nene vaiꞌ goloso izaaꞌ neive. Idoꞌ zuho niteꞌ hamototiꞌ gihile vanu hadeti (100) izaaꞌ neineꞌ neꞌmino ve mala nene vauve goloso elosa izaaꞌ neive.
MAR 4:21 Neꞌmine lo tiꞌ lo lo-ngimineꞌ: Lamu ma gizi misubo somodunuꞌ molo hitelone li idoꞌ holomoliꞌmi sebenguꞌ haleko molalone li di igi milaaꞌ nahe. Ne nomive. Lamu gizii labanaꞌ elo minelidoꞌ holomoꞌveloꞌ molalone li di igi milaaꞌ nave. Olo.
MAR 4:22 Aꞌmineꞌmine ogo initeꞌ ma sunoꞌ minelineꞌ nene mudise ningamavo ma minamoloseive. Mo sotoꞌ oloseive. Idoꞌ initeꞌ ma hito minelineꞌ nene ningilizada omo sotoꞌ oloseive.
MAR 4:23 Gatine ngoloꞌ live nii ma gili lamineꞌ ilo.
MAR 4:24 Idoꞌ gamazi neꞌminosasi ma lo-ngimineꞌ: Gamazi ma li-lingimikevo nigili ma nene gatine mili mini aꞌmingutiꞌ hoꞌli gilisa minilo. Lingine igi mili minilizaniꞌ votigileloꞌ nene do molo Oꞌmosoꞌmo hize eleꞌ o-lengedo gohi masi imineꞌ molo-lengedeleseive.
MAR 4:25 Ee, monoꞌ ma do nolive nene Oꞌmosoꞌmo gohi ma emeleseive. Idoꞌ monoꞌ ma damo nolive nene eita monoꞌ ngomosi ma nolineꞌ nene mo ipeꞌ ogo do voloseive.
MAR 4:26 Idoꞌ gamazi gohi ma tiꞌ lo lo-ngimineꞌ: Oꞌmosoꞌmo eveneꞌveloꞌ gizebo ilineꞌ nene neꞌmine oꞌmo vo nabauꞌ voloseive: Ve maliꞌmo zuho niteꞌ miꞌveuꞌ tileꞌ ogosa
MAR 4:27 litiꞌmuso izo goꞌ lo neivo aza ongo oto oꞌmo novivo zuho niteꞌ nene gala ngoloꞌ lo dizineꞌ. Dizineꞌza neꞌmi monovo nene aza ningo gelamineꞌ ve.
MAR 4:28 Misubo neꞌmo asiꞌve do dize-daaꞌ neive. Apiꞌ ogo gala ngoloꞌ lo avile ogo gihile izaaꞌ neive.
MAR 4:29 Neꞌmine ogo gihile husavo ma aza huko daloneꞌ gamene alitave lo gelo goboni ve vi hukilizave lo ngimiselaaꞌ neive.
MAR 4:30 Aꞌmine gamaziloꞌ gohi ma imineꞌ molo tiꞌ lo lo-ngimineꞌ: Oꞌmosoꞌmo eveneꞌveloꞌ gizebo ilineꞌ vo naba ilineꞌ akaꞌve nene laza nado neive lolone. Idoꞌ initeꞌ nanitetoꞌ lo molo lokunivo vo miliseꞌ ilive. Idoꞌ initeꞌ nanitetoꞌ aneza gamazi lo molo lolone.
MAR 4:31 Aꞌmine Oꞌmosoꞌmi gizebo nene nabaꞌmine sakaveꞌ zuho neꞌminosa neive. Aꞌmine niteꞌ nene me misubouko minaniꞌ zuho niteꞌ vaikutiꞌ eiꞌ nene ngomo lasolo neineꞌza
MAR 4:32 zuhoꞌ ikevo gala hoꞌlo dizo minguꞌ niteꞌ mukiꞌ nene ngivileꞌ ogo naba ogo aꞌnavaꞌve nene naba ogo zamuꞌ gizavo nama nete igi aꞌminguꞌ numuno gizaaꞌ nave lo lineꞌ.
MAR 4:33 Idoꞌ neꞌmine aneza gamazi ato atoꞌ mukiꞌ nene monoꞌ ha gililizadokovoꞌ lo-ngemo minineꞌ.
MAR 4:34 Eveneꞌ mukiꞌ nene aneza gamazivoꞌ lo-ngimineꞌza alingeꞌ azasi izipahala zuhosi angisevoꞌ minanguꞌ nene gamazi monovo mukiꞌ nesi nene lo sotoꞌ ogo lo-ngemaaꞌ ineꞌ.
MAR 4:35 Aꞌmine gameneuꞌ nene nivengaꞌ molavo Izesuꞌ aza izipahala zuho tiꞌ lo lo-ngimineꞌ: Noso helala holene volone.
MAR 4:36 Lavo eveneꞌ mukiꞌ di geseꞌ igi minave nene huli-ngidi sipiuꞌ nene ha minidokovoꞌ ha neivo ingine eleꞌmizi vaniꞌ. Nivavo sipi gohi masi makaꞌ vaniꞌ.
MAR 4:37 Nivavo hepeꞌ naba goloso elavo neꞌmo noso nene golo gidini dizevoꞌ dizevoꞌ ogo sipi nene hito lulouko velo lemeꞌ lemeꞌ idiꞌmo sipiuꞌ nene nosoꞌmo vaiꞌ lolosa ineꞌ.
MAR 4:38 Neꞌmine ogo neivo Izesuꞌ aza nene sipi isevela godololoꞌ alese molo okise ongo minineꞌ. Minavo izipahala zuho ingine uꞌmukoꞌ igi tiꞌ li laniꞌ: Tisazo, laza nosouꞌ mene lemo heleloningumuꞌ nene ma gelamabe. Olo.
MAR 4:39 Neꞌmine likevo aza oto hepeꞌ nene elemo noso mamuꞌ moda ve. Hongu lozo lineꞌ. Lavo hepeꞌ nene matavo noso nesi hongu lo zou lo minineꞌ.
MAR 4:40 Neꞌmine ogavo tiꞌ lo lo-ngimineꞌ: Lingine golise nanimuꞌ nigilave. Oꞌmosomuꞌ gili eleꞌvoleꞌ amahe.
MAR 4:41 Tiꞌ lo lavo ingine ngehelele goloso izavo aꞌminemuꞌ li voleloꞌ meloꞌ igi tiꞌ li laniꞌ: Mene ve nene naniꞌmine ve neivo hepeki nosogi nene gamaziꞌve gili dikesive.
MAR 5:1 Neꞌmine ogavo ingine noso ohuno helala Gelasa vetida vi hetelaniꞌ.
MAR 5:2 Vi hetelikevo Izesuꞌ sipiutiꞌ lemavo sikalahuꞌ golososi minive maliꞌmo gonoso mili-ngidaaꞌ aniꞌ geheni muliꞌ ebekutiꞌ ogo navo voteneꞌ asineꞌ.
MAR 5:3 Aꞌmine ve nene geheni mulikuꞌ ongo minaaꞌ neivo ve maliꞌmosi analoꞌ damilineꞌ ogavo seni nalatunukisi daniꞌ nene damineꞌ ve.
MAR 5:4 Gamene mukiꞌ gizene analoꞌ seni nalaꞌ izi-daniꞌza analoꞌ nalaꞌ nene do huko hulo gizeneloꞌ nalaꞌ nesi izo huko hulavo ve hamoliꞌmosi amuzo molo ivileꞌ ogo do hongu lo-damilidoꞌ o minineꞌ.
MAR 5:5 Gamene gamene holukaꞌ holukaꞌ geheni mulikukisi gololokisi mino gekeꞌ gekeꞌ lo mino gehenitunuꞌ gesebeꞌ izo asiꞌve okoꞌno nene huko minaaꞌ ineꞌ.
MAR 5:6 Izesuꞌ aza hotoꞌ navo ningo lotiꞌ izo ogo gizeneuꞌ gubiꞌ ize emo
MAR 5:7 amuzo molo gekeꞌ naba lo tiꞌ lo lo-imineꞌ: Izesuvo, Oꞌmoso dizo miniveꞌmi gipele mene gaza nouvoda nanitekaꞌ nane. Oꞌmosoꞌmi guliveloꞌ agae lo nolo-gimuze. Mulumo gono nemamozo.
MAR 5:8 Mene gamazi lineꞌ nene Izesuꞌ aza sikalahuꞌ goloso gaza aꞌmine veꞌmi luloutiꞌ lemo vozo lo nolo-divosa lineꞌ.
MAR 5:9 Lavo Izesuꞌ aza longoꞌ o-do tiꞌ lo lineꞌ: Guliveka zaho nane. Longoꞌ o-davo aza lineꞌ: Laza vaiꞌ nounako guliveꞌne nene Mangiliseꞌ nouve.
MAR 5:10 Neꞌmine lo mene misuboukotiꞌ limiselo mala do hulo-ledamilive lo amuzo molo zegeꞌ zegeka lineꞌ.
MAR 5:11 Idoꞌ aꞌmida golola nene ize vaiꞌ goloso galese ni nizavo
MAR 5:12 sikalahuꞌ golosolite zegeꞌ zegeka li tiꞌ li li-imaniꞌ: Agae. Izeuꞌ volene do hulo-ledanivo luꞌninguꞌ dizelone.
MAR 5:13 Neꞌmine likevo vi aꞌminguꞌ dizilizave lo Izesuꞌ gele ngimineꞌ. Neꞌmine ogavo sikalahuꞌ goloso ingine aꞌmine veꞌmi luloutiꞌ limi izeliti luꞌninguꞌ vi dizaniꞌ. Dizikevo ize tu tauseni (2,000) neꞌmine ingine mangilise hizi lotiꞌ izi golo aveseloꞌ nene limi noso ohunouꞌ vi noso ni hilaniꞌ ve.
MAR 5:14 Hilikevo ize gizebo ve nete golise vi tauni nabaukisi idoꞌ hazalasi veteteꞌ igi li-ngimikevo evenelite sotoꞌ ineꞌ initeꞌ nene ningelone li
MAR 5:15 Izesuda igi sikalahuꞌ goloso mukikisi minive nene genegana do otuho gala gele nge losa neivo ningi ngehelele izineꞌ.
MAR 5:16 Idoꞌ aꞌmine sikalahuꞌ goloso mukiꞌ minivelasi idoꞌ izelasi sotoꞌ ineꞌ initeꞌ ningave nete neꞌmi gamaziꞌve nene veteteꞌ igi li-ngimikevo
MAR 5:17 engiꞌ misuboꞌine nene hulo vilive li Izesuꞌni geligelinga li-daniꞌ.
MAR 5:18 Neꞌmine li-dikevo Izesuꞌ sipi mauꞌ nodizivo sikalahuꞌ golososi minive aza ezela giꞌmizo monelove lo geligelinga lo lo-imineꞌza
MAR 5:19 Izesuꞌ oꞌve lo-emo tiꞌ lo lo-imineꞌ: Gaza numungala vo Guvelesi ve gezemuꞌ muluno hukavo initeꞌ lamineꞌ goloso o-gidineꞌ neꞌmi gamazi nene veteteꞌ ogo geze eveneka zuho lo-ngemezo.
MAR 5:20 Lavo Dekapoli misubouko vo Izesuꞌ initeꞌ o-dingumuꞌ nene lo sotoꞌ ogo lo-ngemavo eveneꞌ mukiꞌ gili golize laniꞌ.
MAR 5:21 Neꞌmine ikevo Izesuꞌ aza sipiuꞌ dizo noso ohuno ema helala gohi ogo noso gaheve gepeloꞌ neivo eveneꞌ mukiꞌ goloso ezela igi di geseꞌ aniꞌ.
MAR 5:22 Neꞌmine ikevo Zuda veti monoꞌ numungutiꞌ guvelesi ve ma gulive Zailoꞌ aza ogo Izesuꞌni ningo gizeneuꞌ gubiꞌ ize emo
MAR 5:23 agae lo geligelinga lo tiꞌ lo lo-imineꞌ: Neniꞌ alune ngomo ma nene mo osuꞌ lolosa neize. Aza nene lamineꞌ ogo velesi lamineꞌ ha minelingumuꞌ ve lo gaza ogo angadunuꞌ do geleline lo nouve.
MAR 5:24 Lo-emavo makaꞌ nivasivo eveneꞌ vaiꞌ li eꞌmeti nivii ezela gikiꞌ gikiꞌ igi minaniꞌ.
MAR 5:25 Neꞌmine igi nivanguꞌ nene veneꞌ ma vineꞌ. Aꞌmine veneꞌ nene venelite ikeꞌniloꞌ ikeꞌniloꞌ ningaaꞌ naniꞌ siki nene mate-desaꞌmivo mino gamene haꞌnaloꞌ ninge do vo neivo
MAR 5:26 kilisimasi tuvelu ogo vineꞌ ve. Neꞌmino neivo luso ve mukiꞌ nete di lamineꞌ i-dilisa luso gizi-danguꞌ nene mulumo niteꞌ mukiꞌ imi luso gizi-dikevo aꞌmidoꞌ nene meni ngemo initeꞌve mukiꞌ hulo osuꞌ lineꞌza isineꞌ niteꞌ nene osuꞌ lo-damo gohi do naba ogo minineꞌ ve.
MAR 5:27 Aꞌmine veneꞌ nene Izesuꞌ guvele gelosa naza okoꞌnoloꞌ damo ha geneganaꞌvelokovoꞌ do geleloniꞌ nene lamineꞌ olosuve lo gilineꞌ nenako nemuꞌ aza eveneꞌ gikiꞌ igi minanguꞌ nene Izesuꞌ mehenelatiꞌ ogo
MAR 5:29 anadunuꞌ geneganaꞌveloꞌ do gilineꞌ. Do nogilivo aꞌmidoꞌ geto siki initeꞌve minineꞌ nene okuꞌ lo-davo tiꞌ lo lulouꞌ gilineꞌ: Nisineꞌ niteꞌ nene mo osuꞌ lo-nedave.
MAR 5:30 Neꞌmine ogavo Izesuꞌ aza ezelatiꞌ amuzo vineꞌ nene eiꞌ lulouko gelosa aꞌmine eveneꞌ muliseuꞌ nene liteꞌ lo mine velepeꞌ izo tiꞌ lo lineꞌ: Geneganaꞌneloꞌ eveneꞌ zaho do gelane.
MAR 5:31 Lavo izipahala zuho ingine tiꞌ li li-imaniꞌ: Eveneꞌ mukiꞌ nene geiꞌ di vodo vodo i-gidi okoꞌnidoꞌ okoꞌnidoꞌ igi nivanako nenitoꞌ zaho do gilive lo nolabe.
MAR 5:32 Laniꞌza aza nene zaho do gilive lo ningelesa vele do eza ema ogo ningeꞌmo monineꞌ.
MAR 5:33 Ningeꞌmo nomonivo veneꞌ aza eita sotoꞌ o-dineꞌ initeꞌ mamuꞌ gelosa golise gelo luvoluvo izo ogo Izesuꞌ gizeneuꞌ lemo pouꞌ lo ongo gubiꞌ ize emosa eiꞌ ineꞌ initeꞌ nemuꞌ nene hitamo lo sotoꞌ ogo osuꞌ lineꞌ.
MAR 5:34 Lo-emavo aza tiꞌ lo lo-imineꞌ: Alune ve, gaza gele eleꞌvoleꞌ anidiꞌmo nene lamineꞌ ogange. Mulungauꞌ hongu lo lamineꞌ o minivo vozo. Initeꞌ gisineꞌ nene osuꞌ lo-gedavo lamineꞌ minezo.
MAR 5:35 Tiꞌ nolivo aꞌmine monoꞌ numungutiꞌ guvelesi veꞌmi numuꞌvelatiꞌ ma igi tiꞌ li laniꞌ: Aluva ma mo helave. Nemuꞌ nene gaza tisaꞌni lihiteheka lo gohi eleꞌmizo amozo.
MAR 5:36 Neꞌmine laniꞌza Izesuꞌ aꞌmine gamazi gele hulo monoꞌ numungutiꞌ guvelesi vemuꞌ tiꞌ lo lo-imineꞌ: Gaza gopo gaka gelamo nenikumuꞌ gele eleꞌvoleꞌ ogovoꞌ minezo.
MAR 5:37 Tiꞌ lo losa eꞌmetikelizave lo eveneꞌ mukikumuꞌ nene oꞌve lo lo huko-ngedo Petolole Zakobole Zakoboꞌ akunolo Zohanelesi engikovoꞌ oꞌve lo-ngedamivo eꞌmetaniꞌ.
MAR 5:38 Monoꞌ numungutiꞌ guvelesi veꞌmi numudoꞌ vi hetelikevo alungomuꞌ gulugulunga li ive nama igi zanamana izi nizavo ningineꞌ.
MAR 5:39 Ningo numunguꞌ dizo tiꞌ lo lo-ngimineꞌ: Lingine nanimuꞌ ngeunga li ive nama igi nizave. Izipe nene helamineꞌ haza okise ongo neive lineꞌ.
MAR 5:40 Lavo gizeꞌ i-daniꞌza aza mukiꞌ ngimisele hulo hetoꞌ ogo izipeꞌmi melehingi izelehingi idoꞌ ezesi ave nesi ngeleꞌmizo izipe minineꞌ numunguꞌ dizineꞌ.
MAR 5:41 Dizo alungo neꞌmi analoꞌ do tiꞌ lo lo-imineꞌ: Talita kumi, neꞌmi monovo leliꞌ gamazitiꞌ nene tiꞌ lo neive: Alungo ngomo, neniꞌ nolo gimuze. Otezo.
MAR 5:42 Lavo aꞌmidoꞌ geto oto aka mono minineꞌ. Aꞌmine aluꞌmi kilisimasiꞌve nene tuvelu neꞌmine minineꞌ. Neꞌmine ogavo ningave ingine aꞌmidoꞌ geti golize goloso li minaniꞌ.
MAR 5:43 Tiꞌ igi nizavo Izesuꞌ aza aꞌmine ninganiꞌ initekumuꞌ nene eveneꞌ hamokisi li-ngimamilo lo lo huko lo-ngemo alungo nene nosoꞌ niteꞌ imilizave lo lo-ngimineꞌ.
MAR 6:1 Izesuꞌ aza aꞌmine ebeꞌ hulo izipahala zuhosi eꞌmeti minavo gotoꞌ numuꞌvela vo hetelineꞌ.
MAR 6:2 Holiseꞌ gamene ogavo monoꞌ numunguꞌ monoꞌ apize ngemo neivo eveneꞌ mukiꞌ ingine gili golize li tiꞌ li laniꞌ: Mene ve nene gamazi zalatiꞌ dave. Idoꞌ eiꞌ gamazi galauꞌ neineꞌ lo-limineꞌ nene atoliꞌmine neinako neꞌmi monovo nene nado nolive. Ato atoꞌ niteꞌ do sotoꞌ neineꞌ nene nado do sotoꞌ nomolave.
MAR 6:3 Me ve nene ha Maliaꞌ gipele kamuda minive ne neive. Olo. Idoꞌ Zakobole Zosele Zudale Simonile engiꞌ uvoꞌnibo neive. Alunolo nesi nene lezesi mela none. Neꞌmine li ingine muluꞌninguꞌ goloso gilaniꞌ ve.
MAR 6:4 Neꞌmine ikevo Izesuꞌ tiꞌ lo lo-ngimineꞌ: Oꞌmosoꞌmi veletiꞌ gamazi li sotoꞌ i ngimaaꞌ ave polohete engikumuꞌ nene eveneꞌ mukiꞌ gilavo dizisa minaaꞌ naha engiꞌ misuboꞌninguꞌ aleve netesi engiꞌ zuho gihile lamineꞌ netesi idoꞌ engiꞌ numuꞌnine gihileuꞌ ingaaꞌ nave ingine netesi nene engikumuꞌ gilavo dizesaꞌmineꞌ neꞌminosa nazasi nouve lo lineꞌ.
MAR 6:5 Neꞌmine lo aꞌmida nene Oꞌmosoꞌmi amuzo do sotoꞌ ogo atoꞌ niteꞌ amilineꞌ ogavo initeꞌ gizi dave hamo hamokovoꞌ anadunuꞌ okoꞌnidoꞌ dokaꞌ dokaꞌ ogo do lamineꞌ o-ngidineꞌ.
MAR 6:6 Aꞌmine numuda aleve ingine gili imamangumuꞌ nene gala mukiꞌ gilineꞌ. Neꞌmine ogavo aza numudoꞌ numudoꞌ mono monoꞌ lo-ngeme ngemeꞌ ogo minineꞌ.
MAR 6:7 Neꞌmino mineꞌmo novo izipahala zuho tuvelu asi lo-ngemo sikalahuꞌ goloso ngimiseli hulilizave lo amuzo ngemo setaꞌ setaꞌ ngimiselineꞌ.
MAR 6:8 Nongimiselo tiꞌ lo lo-ngimineꞌ: Aka vilizada hatuso nene ha di vilizaha initeꞌ gohi mo di vamilo. Adoꞌ beleti nene di vami gokisi di vami monisi goꞌzi di vamilo.
MAR 6:9 Suuꞌ nene ha izi vilisaha sioti nene setaꞌ izi vami hamokovoꞌ izi vilo.
MAR 6:10 Idoꞌ neꞌminosasi ma lo-ngimineꞌ: Ebeꞌ mala igi ma nene numuno hamokukovoꞌ ingi mini aꞌmine ebeꞌ hulilizaniꞌ gamenelokovoꞌ gaꞌ li vilizave.
MAR 6:11 Numuno maloꞌ nivavo lengeleꞌmize lamineꞌ ami gamazitine gilamavo ma nene lingine huli-ngidi vilisa niigi ma nene ingine engiꞌ monovoꞌine gililizangumuꞌ ve li avazaha igi gizedidotiꞌ uꞌmusupo nene okohoꞌ izi di huli vilo.
MAR 6:12 Neꞌmine lavo ingine vi eveneꞌ mukiꞌ luꞌine di velepeꞌ izilizave li li sotoꞌ igi li-ngimiꞌmi vaniꞌ.
MAR 6:13 Neꞌmine iꞌmi nivi sikalahuꞌ goloso mukiꞌ eveneliti luꞌningutiꞌ ngimiseli huli initeꞌ ngisive mukiꞌ uveli noso hili-ngidi di lamineꞌ i-ngidaniꞌ ve.
MAR 6:14 Izesuꞌ guvele nene hutileꞌ ogo vavo guvelesi ve Helodeꞌ aza aꞌmine gamazi nesi gilineꞌ. Eveneꞌ linge malite Izesungumuꞌ tiꞌ li laniꞌ: Noso holo-ngedaaꞌ ive Zohaneꞌ ma nene hilingutiꞌ otave. Neꞌmo nene ato atoꞌ suno daaꞌ amuzo nene ezela neivosa ato atoꞌ suno nene nodaloseive.
MAR 6:15 Neꞌmine laniꞌza ma nete gomuꞌ polohete Eliaꞌ ma ne neive likevo ma nete polohete gozopoꞌ minaniꞌ mautiꞌ neive laniꞌ.
MAR 6:16 Neꞌmine laniꞌza Helodeꞌ aza laniꞌ gamazi gelo tiꞌ lo lineꞌ: Neniꞌ luvono gituve Zohaneꞌ ma nene gohi ote noloseive.
MAR 6:17 Idoꞌ Zohaneꞌnimuꞌ lineꞌ nene nemuꞌ lineꞌ ve: Gomuꞌ galaꞌmuda vomine Helodeꞌ aza akunolo Hilipoꞌ elenaho Helodiaꞌni gumine daniꞌ. Gumine davo monoꞌ noso holo-ngedaaꞌ ive Zohaneꞌ neꞌmo akunaꞌmi elenahine daineꞌ nene lisiheꞌ amive lo Helodeꞌni lo-emeꞌmo vo minineꞌ. Neꞌmine lo lo-emeꞌmo vo minivo nemuꞌ Helodeꞌ aza Helodiaꞌnimuꞌ ogo aꞌmine Zohaneꞌni nene vi dalizave lo eveneꞌ ma ngimiselavo vi analoꞌ di nalava imi eleꞌmizi di vi nalaꞌ numunguꞌ huli-daniꞌ.
MAR 6:19 Idoꞌ Zohaneꞌ neꞌmine lo miningumuꞌ Helodiaꞌ aza Zohanengumuꞌ lukehe do mino bele helelesa gala gilineꞌ.
MAR 6:20 Neꞌmine ineꞌza Zohaneꞌ aza ve lisiheꞌ mino goloso niteꞌ damaaꞌ ineꞌ monovoꞌvesi minineꞌ nemuꞌ gele mino ezemuꞌ ehelele izavo Helodeꞌ aza gizebo lamineꞌ o-dinako neꞌmo nene Helodiaꞌ Zohaneꞌni ngelo belamilineꞌ ineꞌ. Helodeꞌ aza Zohaneꞌ gamazi nene gamene gamene gelo gala setaꞌ gelaaꞌ ineꞌza ha gelo laniteꞌ gelaaꞌ ineꞌ.
MAR 6:21 Alingeꞌ Helodiaꞌ Zohaneꞌni belelineꞌ aka neꞌmino do sotoꞌ molaniꞌ: Helodeꞌ sotoꞌ ineꞌ gamene alitavo eveneꞌ naba guveꞌinesi ve ngamani gonoloꞌ hize eleꞌ i-daaꞌ avesi amiliti eveneꞌ nabaꞌ naba nesi nGalilaia misubokotiꞌ eveneꞌ nabaꞌ naba nesi elese molo ngemo nosoꞌ niteꞌ naba gize vataꞌ ineꞌ.
MAR 6:22 Neꞌmine igi ni nizavo Helodiaꞌ aluvo aza dizo eveneꞌ veꞌnidoꞌ nene aza ogaꞌ ineꞌ melengeni ogavo Helodekisi makaꞌ minavesi ngumo helavo guveꞌinesi ve Helodeꞌ aza aꞌmine alu nemuꞌ tiꞌ lo lineꞌ: Gaza initeꞌ mamuꞌ gelo lilineꞌ nene mo ha gemelesuve.
MAR 6:23 Neꞌmine lo Oꞌmosoꞌmi veleloꞌ noluve lo lo huko tiꞌ lo lo-imineꞌ: Initeꞌ neꞌmine initekumuꞌ gele nouve lo lo-nemelineꞌ nene ha gemelesuve. Idoꞌ gizebo o nouvoniꞌ misubo nene hoꞌlo setaꞌ ogo lingela nemukisi lilineꞌ nene ha gemelesuve.
MAR 6:24 Lavo aza lemo izelehida tiꞌ lo longoꞌ ineꞌ: Nanitekumuꞌ lolove. Lavo izeleho aza tiꞌ lo lineꞌ: Monoꞌ noso holo-ngedaaꞌ ive Zohaneꞌ godolo mamuꞌ lozo.
MAR 6:25 Lavo liteꞌ lo guvelesi ve neida dizo tiꞌ lo lineꞌ: Monoꞌ noso holo-ngedaaꞌ ive Zohaneꞌ godolo nene gito lapeseuꞌ molo nemeline losa noluve.
MAR 6:26 Neꞌmine lavo guvelesi ve nene geni bilineꞌza eveneꞌ veꞌnidoꞌ Oꞌmosoꞌmi veleloꞌ lo hukineꞌ nenako nemuꞌ nene aza gamaziꞌne lemalive lo gelo
MAR 6:27 liteꞌ lo pilisi ve hamoꞌ ma godolo gito do alive lo imiselavo vo galapuso numunguꞌ luvono gito
MAR 6:28 godolo nene lapeseuꞌ molo do ogo alungo nene emavo aza do izelehine imineꞌ.
MAR 6:29 Neꞌmine ogavo Zohaneꞌ izipahala zuho ingine gili igi okoꞌnola di vi geheni mulikuꞌ galese izi-daniꞌ ve. Helodeꞌ aza Zohaneꞌni nene neꞌmino bele helaniꞌ nenako Helodeꞌ aza Izesuꞌ guvele nene gelosa aꞌmine bele hiluve Zohaneꞌ nene gohi ote noloseive lo gelosa neꞌmine lineꞌ ve.
MAR 6:30 Izipahala zuhoutiꞌ ngimiselive aposolo ingine Izesuda tineꞌ mili igi initeꞌ aniꞌ idoꞌ monoꞌ li-ngimaniꞌ nemuꞌ nene veteteꞌ igi li-imaniꞌ.
MAR 6:31 Neꞌmine ikevo eveneꞌ mukiꞌ ingine engita igi vigi igi nizavo nosoꞌ niteꞌ nalizaniꞌ gamenesi ivileꞌ ogavo nemuꞌ Izesuꞌ tiꞌ lo lo-ngimineꞌ: Laꞌlisetevoꞌ vo eveneꞌ nizamada haza guviseloꞌ mine gelo minelone.
MAR 6:32 Lavo sipiuꞌ angiseꞌinevoꞌ dizi eveneꞌ nizamada haza guvisela vaniꞌ.
MAR 6:33 Aꞌmida olihe nivavo eveneꞌ mukilite ningi engiꞌ nizave li ningi tauni mukikutiꞌ misubouꞌ lotiꞌ izi vi gomuꞌ hetelaniꞌ.
MAR 6:34 Vi hetelikevo Izesuꞌ sipiutiꞌ nolemo eveneꞌ vaiꞌ di geseꞌ igi nizavo ningo ingine nene sipisipi izeloꞌ gizebo ogaꞌ ive ma nomivo gopo monaaꞌ naniꞌ neꞌmine igi minikevo engikumuꞌ muluno hukavo apiꞌ ogo initeꞌ mukiꞌ apize ngemo minineꞌ.
MAR 6:35 Neꞌmine ogo neivo hoꞌ nene lemo vavo izipahala zuho ezela igi tiꞌ li laniꞌ: Mene ebeꞌ nene eveneꞌ nizamaniꞌ hadiveloꞌ nonivo litiꞌmuso gamene alitanaze.
MAR 6:36 Gaza eveneꞌ mene ngimiselanivo vi avitoꞌ luhuvo numudasi hazalatikisi moni naliza nosoꞌ niteꞌine meni hizilizaze. nGimiselezo.
MAR 6:37 Likevo Izesuꞌ aza lo-ngimineꞌ: Lengiꞌ nene nosoꞌ niteꞌ di ngimilevo. Lavo ingine tiꞌ li li-imaniꞌ: Laza vo moni fo hadeti Kina (K400) neꞌminedunuꞌ beleti meni hizo mene aleve nalizave lo ngemekunivo ngelo vo dalihe.
MAR 6:38 Likevo aza tiꞌ lo lineꞌ: Linginela sikoni nanikeꞌ neve. Vi ningilo. Lavo vi ningi tiꞌ li laniꞌ: Lezela sikoni faefusi (5) alahaꞌ setakisi neive.
MAR 6:39 Likevo guvise laminetoꞌ ve hizi hizi minilizave lo lo-ngemavo
MAR 6:40 ve hizi di duvaaꞌ lomaaꞌ aniꞌ nene linge ma eveneꞌ hadeti (100) neꞌmine minikaꞌ minikaꞌ ikevo linge ma nene eveneꞌ fifti (50) neꞌmine minikaꞌ minikaꞌ aniꞌ ve.
MAR 6:41 Tiꞌ igi nizavo sikoni faef nesi (5) alahaꞌ sitaꞌ nesi nene do Okulumota vonuꞌ noogo Oꞌmoso opoꞌni lo aꞌmine sikoni nene gito apilo izipahala zuho nete izeꞌ mili eveneꞌ ngimilizave lo ngemo alahaꞌ setakisi do gito izeꞌ molo mukitoꞌ ngimineꞌ.
MAR 6:42 nGemavo eveneꞌ mukitoꞌ ni gatuꞌine aniꞌ.
MAR 6:43 Gatuꞌine ogavo sikonisi alahakisi lumo hulaniꞌ nene gizekaꞌ igi gosuvahaꞌ tuvelu (12) neꞌmine mili vaiꞌ laniꞌ ve.
MAR 6:44 Nosoꞌ niteꞌ naniꞌ nene vemohoꞌ faif tauseni neꞌminelite naniꞌ ve.
MAR 6:45 Idoꞌ eveneꞌ nene nosoꞌ niteꞌ ni osuꞌ likevo Izesuꞌ aza izipahala zuho nene sipiuꞌ dizi noso hela hole Betesaida numuda gomuꞌ nivilizave lo liteꞌ lo ngimisele hulosa aza nene eveneꞌ mukiꞌ numuꞌnida ngimisele hulolosa ogo minineꞌ.
MAR 6:46 Neꞌmino mino gekeꞌvokeꞌ lo hulo-ngedo aza Oꞌmosola lolosa golola dizo vineꞌ.
MAR 6:47 Neꞌmine ogavo litiꞌmuso izavo izipahala zuho vaniꞌ sipi nene noso olusoꞌ minavo Izesuꞌ aza asiꞌvevoꞌ misubola haza mino
MAR 6:48 ningineꞌ nene hepeꞌ neꞌmo vilizaniꞌ akalatiꞌ adiꞌmo izipahala zuho ingine sipi di vaaꞌ aniꞌ gavosodunuꞌ nene sipi di vilisa geꞌnebe goloso igi minaniꞌ nene ningineꞌ. Nemuꞌ nene goꞌ loꞌmo lomo nedengaꞌ fo kiloku he faif kiloku he nela nene noso avileloꞌ lise lise vo nizada hetelo ngivileꞌ ogo volosa ineꞌza
MAR 6:49 noso avileloꞌ lise lise novivo ingine mukitoꞌ ningi golise goloso gilisa holoso ve li gili gekeꞌ gekeꞌ laniꞌ. Gekeꞌ laniꞌza aꞌmidoꞌ geto Izesuꞌ gamazi lo-ngemo tiꞌ lo lo-ngimineꞌ: Neniꞌ ma ne nouze. lengehelele izamivo mini ngi li minilo.
MAR 6:51 Neꞌmine lo sipiuꞌ dizo nizada minineꞌ. Dizo nominivo hepeꞌ nene matineꞌ. Matavo nemuꞌ ingine gopo gaꞌine goloso gilaniꞌ. Gopo gaꞌine goloso gilaniꞌ nene Izesuꞌ nosoꞌ niteꞌ ngimineꞌ gameneuꞌ nene eze monovo ma ningadiniko hepeꞌ matineꞌ nemuꞌ nene gopo gaꞌine goloso ma gilamadineꞌza gaꞌine ngoloꞌ lamivo eze monovo olihe ningami minaniꞌ nenako neꞌmo nene gopo gaꞌine goloso gilaniꞌ ve.
MAR 6:53 Neꞌmine igi noso helala vii nGenesalete misubouko heteli sipi nene noso gahevela naꞌnava iziki
MAR 6:54 sipiutiꞌ limikevo eveneꞌ nete liteꞌ li eiꞌ ve li ningi gili
MAR 6:55 aꞌmine misubouꞌ numuno mineꞌmo monida nene lotiꞌ izi vi initeꞌ gizi dave holomoloꞌ ingi minaniꞌ nene zaloꞌ mili Izesuꞌ neive li laniꞌ ebeta ebeta nene ngeleꞌmizi di vaniꞌ.
MAR 6:56 Idoꞌ Izesuꞌ taunila vihe luhuvo numuda vihe hazala vihe aꞌmida vida vida miniꞌmi monave nete initeꞌ gizi dave nene ngeleꞌmizi di igi maketi ebeꞌine minida minida huli-ngidikaꞌ huli-ngidikaꞌ igi amuzo mili tiꞌ li li-imaniꞌ: Okongala initeꞌ lolovolokovoꞌ nevosi di gililizadotikisi nene lamineꞌ ilizaniꞌ nenako nemuꞌ nene gele ngemanivo di gililizave li laniꞌ. Idoꞌ okoꞌnoloꞌ initeꞌ lolovoloꞌ di gilave mukiꞌ nene mo lamineꞌ aniꞌ ve.
MAR 7:1 Halisaioꞌ eveneꞌ masi Zelusalemi numudatiꞌ avoꞌningeliti monoꞌ gamazi apizi ngimaaꞌ ave linge masi Izesuda vi di geseꞌ aniꞌ.
MAR 7:2 Neꞌmine ikevo izipahala zuho linge nete aꞌine di lamineꞌ ami nosoꞌ niteꞌ ninavo ninganiꞌ. Aꞌine di lamineꞌ amave laniꞌ nene Halisaioꞌ eveneliti monovoꞌnidoꞌ eꞌmeti aꞌine noso izamaniꞌ nemuꞌ laniꞌ.
MAR 7:3 Halisaioꞌ evenekisi Zuda ve mukikisi nene avoꞌningeliti monovoꞌnidokovoꞌ gili di lute goloduvo elo minalive li aꞌine di atoꞌ igi noso izisavoꞌ nosoꞌ niteꞌ naaꞌ nave.
MAR 7:4 Idoꞌ nosoꞌ niteꞌ maketilotiꞌ meni hizi di igi ma noso izisavoꞌ naaꞌ nave. Idoꞌ nevoꞌ nomive. Avoꞌningeliti monovoꞌine ato atoꞌ gohi masi masi neineꞌ nene gili daaꞌ nave. Aꞌmingutiꞌ ma nene kapusi somosi idoꞌ vapa lapesesi nene monoꞌinemuꞌ gili nosouꞌ izaaꞌ aniꞌ ve.
MAR 7:5 Idoꞌ Halisaioꞌ evenekisi Zuda veti avoꞌningeliti monoꞌ gamazi apizi ngimaaꞌ avesi Izesuꞌni tiꞌ li longoꞌ i-di laniꞌ: Geiꞌ izipaha zuho nene avotemotidatiꞌ do noneꞌ monoꞌ gamaziloꞌ eꞌmetami mini aꞌmine gamaziliꞌmo lidoꞌ igi aꞌine nosoꞌ izami ha goloduvo ize minivo nosoꞌ niteꞌ di naaꞌ naniꞌ nene nanimuꞌ nave.
MAR 7:6 Neꞌmine likevo Izesuꞌ nene tiꞌ lo lo-ngimineꞌ: Lengemeni dameni goloso di haleki eveneꞌ lamineꞌ gili monaaꞌ nave lengikumuꞌ Isaiaꞌ lineꞌ ma nene lamineꞌ laaniꞌ neive. Aza tiꞌ lo gize neive: Me aleve nete veꞌine avilelotiꞌ neniꞌ guliveꞌne di hozi li minaaꞌ naniꞌza luꞌine nene nezela milamavo luꞌineꞌve nene hotoꞌ minaaꞌ neive.
MAR 7:7 Haza eveneliti gamazi nene neze gamazi gidini loloꞌ ogavo li-ngimi ngimiꞌ igi minaaꞌ naniꞌ nenako neꞌmo nenikumuꞌ nopoꞌni laaꞌ naniꞌ nene gopo hazamuꞌ laaꞌ nave.
MAR 7:8 Lingine Oꞌmosoꞌmo louꞌ gamazi lo huko-lingidineꞌ ma nene huli eveneliti monovoꞌine nene di giliꞌ li minaaꞌ nave.
MAR 7:9 Neꞌmine losa tiꞌ lo lo-ngimineꞌ: Lengiꞌ nene avotingidatiꞌ monovo do minelone li Oꞌmosoꞌmi louꞌ gamazi izi hulatoꞌ nene otohato ve gehepeve minikeve.
MAR 7:10 Neꞌmine noluvoniꞌ mene lingine tiꞌ igaꞌ angumuꞌ noluve: Moseꞌ aza ma tiꞌ lo lave: Lingine izetingine metinginemuꞌ gilavo dizavo gelekeleꞌ lamineꞌ i-ngidivoꞌ minilo. Idoꞌ ma nene ve maliꞌmo izelehingi melehingi gamazi goloso lo-ngedelineꞌ nene mo bilikevo helelive.
MAR 7:11 Neꞌmine lo lineꞌza lingine aꞌmine lineꞌ gamaziloꞌ eꞌmetilizaniꞌ aka nene tiꞌ igi hizi tilaaꞌ nave: Eveneꞌ malite engiꞌ izeꞌninginemuꞌ nehe meꞌninginemuꞌ nehe tiꞌ li li ngimaaꞌ nave: Lengiꞌ hize eleꞌ o-lengedo lengemeloneꞌ o minineꞌ initete nene kolobani initeꞌ loloꞌ oganiꞌ nenako ma lengemamolosune. Idoꞌ Kolobani initeꞌ loloꞌ ogave laniꞌ neꞌmi monovo nene neꞌmino neive: Oꞌmosoꞌmine molo-dekunivo mo eiꞌ initeꞌve loloꞌ ogave.
MAR 7:12 Idoꞌ neꞌmine laniꞌ neꞌmo nene alingeꞌ izeꞌningine meꞌningine hizi eleꞌ ilisa ikevo ma lingine oꞌve li-ngidikevo izeꞌningine meꞌningine gelekeleꞌ lamineꞌ i-ngidivoꞌ minilo lo Moseꞌ lineꞌ gamaziloꞌ eꞌmetilizaniꞌ aka nene hize tilaaꞌ neive.
MAR 7:13 Neꞌmine ogavo lingine lengiꞌ monovotine nene Oꞌmosoꞌmi gamaziloꞌ di medeli apizi ngimaaꞌ naniꞌ neꞌmo nene Oꞌmosoꞌmi gamazi do haza niteꞌ loloꞌ o-daaꞌ neive. Idoꞌ nevoꞌ nene nomive. Linginela neꞌmine monovo nene mukiꞌ minaaꞌ neive.
MAR 7:14 Neꞌmine lo Izesuꞌ eveneꞌ mukiꞌ gohi asi lo-ngemo tiꞌ lo lo-ngimineꞌ: Naza gamazi lo-lengemekuvo mukitoꞌ gili gili ngoloꞌ lilo.
MAR 7:15 Initeꞌ naanivo mulungauko lemaaꞌ neineꞌ initeꞌ neꞌmo nene luka do goloso o-damoloseive. Lukatiꞌ dizaaꞌ neineꞌ neꞌmo nene luka do goloso o-daaꞌ neive.
MAR 7:17 Tiꞌ lo lo-ngemo eveneꞌ hulo-ngedo numunguꞌ dizavo izipahala zuho nete aneza gamazimuꞌ longoꞌ i-daniꞌ.
MAR 7:18 Longoꞌ i-dikevo tiꞌ lo lo-ngimineꞌ: Haza aleve aniꞌ neꞌmini linginesi olihe gili guni amahe. Initeꞌ ma nalineꞌ neꞌmo nene lukauꞌ vo holamo gatungauꞌ lemo ise galeseuꞌ vaaꞌ neinako luka ngelo do goloso amoloseive. Nemuꞌ nene gili lamineꞌ amahe. Neꞌmine lineꞌ nene nosoꞌ niteꞌ mukiꞌ nete lute di goloso amilisanako ha nalosune losa lineꞌ ve.
MAR 7:20 Neꞌmine lo gohi mesi lineꞌ ve: Lutingutiꞌ dizaaꞌ neineꞌ initeꞌ neꞌmovoꞌ nene lutine do goloso o-lengedaaꞌ neive.
MAR 7:21 Naza neꞌmine noluvoniꞌ nene lutingutiꞌ goloso niteꞌ neꞌminosa dizaaꞌ neingumuꞌ luvoniꞌ ve: Adoꞌ gatine goloso gilaaꞌ idoꞌ umungive alungo gopo ingi monaaꞌ idoꞌ gumine damine ogaꞌ idoꞌ eveneꞌ ngebele helaaꞌ
MAR 7:22 idoꞌ veneꞌ vemohoꞌ liliꞌ ikeniꞌ nene gopo ingi monaaꞌ idoꞌ initekumuꞌ lumo helepeleꞌ ogaꞌ idoꞌ monovo do goloso ogaꞌ idoꞌ goꞌine izo gosohoꞌ nasahaꞌ laaꞌ idoꞌ zogo zogo peleseveꞌ izaaꞌ idoꞌ ve maliti initekumuꞌ mumuzoꞌ ogo lukehe ngebelaaꞌ idoꞌ eveneꞌ dovo ledevoꞌ ogo ngemenga laaꞌ idoꞌ hokolizeꞌ igi okodine di dizaaꞌ idoꞌ dingani hizo minaaꞌ
MAR 7:23 neꞌmine initeꞌ goloso mukiꞌ neꞌmo nene lutingutiꞌ dizaaꞌ neineꞌ nenako neꞌmo nene lutine do goloso ogaꞌ neive lineꞌ.
MAR 7:24 Neꞌmine ogo aza aꞌmine ebeꞌ hulo oto Tilo misubouꞌ ebeꞌ nabala vineꞌ. Vo numuno mauꞌ dizo eveneꞌ hamolitesi mela nouvongumuꞌ nene gilikelizave lo gilineꞌza aza ngelo halekilineꞌ amineꞌ.
MAR 7:25 Neꞌmine neivo veneꞌ maliꞌmi aluvo neꞌmi lulouꞌ nene sikalahuꞌ golosoliꞌmo dizo minavo veneꞌ neꞌmo Izesuꞌ guvele nene gelo liteꞌ lo ogo gizeneuꞌ gubiꞌ ize imineꞌ.
MAR 7:26 Aꞌmine veneꞌ nene Zuda veneꞌ nevoba Silia misuboꞌmi gahevela Hoinikia alevetingutiꞌ sotoꞌ ogo mino nGiliki aleveti monovoꞌnidoꞌ eꞌmeto minineꞌ veneꞌ neꞌmo nene eiꞌ aluvoꞌmi luloutiꞌ sikalahuꞌ goloso nene imisele hulilive lo amuzo molo lo-imineꞌ.
MAR 7:27 Lo-emavo Izesuꞌ aza aneza gamazi ma tiꞌ lo lo-imineꞌ: Izipeliti nosoꞌ niteꞌ nene ipeꞌ ogo gulo ngemaaꞌ nene edamive. Oꞌmosoꞌmi izipahala Isilaeleꞌ aleve do lamineꞌ o-ngedaaꞌ nouvoniꞌ nenako geiꞌ heta atoꞌ veneꞌ do lamineꞌ o-gedeloniꞌ nene edamoloseive losa gele nouve. Nemuꞌ nene nosoꞌ niteꞌ nene aꞌmine izipe nete ganaꞌ nalisave.
MAR 7:28 Tiꞌ lo lavo aꞌmine veneliꞌmo Izesuꞌ gamaziꞌveloꞌ do velepeꞌ izo tiꞌ lo lo-imineꞌ: Guvekasi ve gaza lamineꞌ laineꞌza izipelite nosoꞌ niteꞌ nangutiꞌ lana ngomo tevolilotiꞌ doꞌmozineꞌ nene aꞌmine tevoliꞌmi sebenguꞌ minaaꞌ aniꞌ gulo nete ha naaꞌ nave. Nemuꞌ nene ha gele nemelesane.
MAR 7:29 Lavo Izesuꞌ lo-imineꞌ: Tiꞌ lo laningumuꞌ nene gele gemekuve. Numungala vozo. Sikalahuꞌ goloso nene mo aluva hulo-do vave.
MAR 7:30 Lavo numuꞌvela vo ningineꞌ nene sikalahuꞌ goloso aza hulo-do vavo izipe nene holomoloꞌ ongo neivo ningineꞌ.
MAR 7:31 Neꞌmine ogavo Tilo ebekutiꞌ tineꞌ molo vo Sidoni ebeꞌ hulo vo Dekapoli misubo ivileꞌ ogo nGalilaia noso ohuda vo hetelineꞌ.
MAR 7:32 Vo hetelavo gala molave gamazi lo guno amive nene eleꞌmizi Izesuda igi anadunuꞌ okoꞌnoloꞌ do geleliho li agae li li-imaniꞌ.
MAR 7:33 Li-imikevo vo eveneꞌ nizamanguko eleꞌmize molo ana nedunuꞌ gala lulouꞌ molo gituhoꞌ ogo vele nahunoloꞌ do gilineꞌ.
MAR 7:34 Do gelo Okulumota vonuꞌ ogo leꞌ izo tiꞌ lo lo-imineꞌ: Ehata, leliꞌ gamaziutiꞌ nene ngoloꞌ lozo losa ve.
MAR 7:35 Lavo geto gala ngoloꞌ lavo vele nahuno nene do velepeꞌ izavo gamazi nene lo lamineꞌ ineꞌ.
MAR 7:36 Neꞌmine ogavo eveneꞌ mukikumuꞌ nene aꞌmine gamazi nene li sotoꞌ amilizave lo lo huko-ngidineꞌza li sotoꞌ ikevo aza gohi oꞌve lo-ngedekaꞌ lo-ngedekaꞌ neivo ingine di naba ikaꞌ ikaꞌ igi li sotoꞌ ikaꞌ ikaꞌ iꞌmi vi minaniꞌ.
MAR 7:37 Idoꞌ ingine amuzo mili siza li mini tiꞌ li laniꞌ: Aza initeꞌ mukiꞌ oꞌmo vineꞌ nene mo laminekovoꞌ oꞌmo vave. Aza lavo gaꞌine molave ingine gamazi gohi nigilavo gamazi lamilizadoꞌ i minave netesi nene gamazi ha nilave.
MAR 8:1 Aꞌmine gameneuꞌ nene eveneꞌ mukiꞌ gohi igi di geseꞌ igi nosoꞌ niteꞌ nomivo nizavo Izesuꞌ aza izipahala zuho asi lo-ngemo tiꞌ lo lineꞌ:
MAR 8:2 Mene aleve nene nazasi gamene sitohamo makaꞌ minunidiꞌmo nosoꞌ niteꞌinesi nomivo engikumuꞌ muluꞌne hukave.
MAR 8:3 Nosoꞌ niteꞌ namavo numuꞌnida ngimiseleloniꞌ nene akala vilizada veꞌine gaꞌine monavo diꞌmozilisave. Linge ma nene aka hotatiꞌ nizave.
MAR 8:4 Lavo izipahala zuho ingine di velepeꞌ izi tiꞌ li li-imaniꞌ: Ebeꞌ hadiveloꞌ mene eveneꞌ mukiꞌ mene nosoꞌ niteꞌ nadiꞌ ogo ngemelone. Nosoꞌ niteꞌ daloneꞌ akate nene ma nomive.
MAR 8:5 Likevo aza longoꞌ o-ngedo lineꞌ: Linginela sikoni nanikeꞌ neve. Longoꞌ ogavo seveni ve laniꞌ.
MAR 8:6 Ingine likevo eveneꞌ mukiꞌ misuboloꞌ minilizave lo lo-ngedo sikoni seveni nene do Oꞌmoso opoꞌni lo apilo izeꞌ mili eveneꞌ ngimilizave lo izipahala zuho ngemavo ingine izeꞌ mili eveneꞌ mukiꞌ ngimaniꞌ.
MAR 8:7 Alahaꞌ ngomo ngomo ngomosiꞌ minineꞌ nesi nene do oꞌmosola lo aꞌminesi eveneꞌ ngimilizave lineꞌ.
MAR 8:8 Neꞌmine ogavo ni gatuꞌine aniꞌ. Neꞌmine igisa lumo hulaniꞌ nene gizekaꞌ igi gosuvahakuꞌ milikevo gosuvahaꞌ seveni vaiꞌ lineꞌ.
MAR 8:9 Nosoꞌ niteꞌ nave nene fo tauseni (4,000) neꞌmine minaniꞌ.
MAR 8:10 Idoꞌ eveneꞌ nene ngimisele hulo aza nene izipahala zuhosi geti sipiuꞌ dizi Dalamanuta misubouko vaniꞌ.
MAR 8:11 Vi nizavo Halisaioꞌ eveneꞌ ingine igi ezesi gamazi gono di mini eiꞌ nene nimiselive Oꞌmoso aza nenikisi neive lineꞌ nene lamineꞌ lihe gosohoꞌ lihe nemuꞌ Oꞌmosoꞌmo amuzo emavo atoliꞌmine suno do sotoꞌ ogavo ningelone li emenguꞌ mili laniꞌ.
MAR 8:12 Neꞌmine ikevo lulouko agae lo gelo tiꞌ lo lineꞌ: Laminetoꞌ Oꞌmosoꞌmi amuzo gezela neingumuꞌ nene gele eleꞌvoleꞌ oloningisi atoliꞌmine suno do sotoꞌ oganivo ningelone li idise mene gameneloꞌ nizave lingine laaꞌ naniꞌ nene nanimuꞌ laaꞌ nave. Naza mo laminetoꞌ lo-lengemeloze. Idise gameneloꞌ nizaniꞌ aleve mene atoliꞌmine suno neꞌmine nene mo kekeꞌ lengelebizamolosuve.
MAR 8:13 Neꞌmine lo hulo-ngedo sipiuꞌ dizo noso ohuno helala volosa aka apiꞌ ogo vineꞌ.
MAR 8:14 Idoꞌ izipahala zuho nene beletimuꞌ gaꞌine molavo ma di vamavo beleti inginela ma minamidineꞌza hamokovoꞌ nene sipiuꞌ ma minineꞌ.
MAR 8:15 Neꞌmini nivavo Izesuꞌ aza eveneꞌ maliti ngemeni dameni golosomuꞌ beleti do lulu izaaꞌ ineꞌ initeꞌ zisitiloꞌ nene aneza gamazi lo molo tiꞌ lo hungoꞌ molo lo-ngimineꞌ: Halisaioꞌ monoꞌ laaꞌ avelatikisi idoꞌ Helodedatikisi zisiti nene dikelizave. Nemuꞌ ningisa minilo.
MAR 8:16 Neꞌmine lo lo-ngemavo ingine li voleloꞌ meloꞌ igi tiꞌ li laniꞌ: Laza beleti ma do amuneꞌ nenako nemuꞌ lave.
MAR 8:17 Likevo gelo Izesuꞌ aza tiꞌ lo lo-ngimineꞌ: Beleti di amaniꞌ nemuꞌ nene nanimuꞌ li voleloꞌ meloꞌ nave. Lingine olihe gili lamineꞌ amahe. Lutineꞌmi gala nene ngoloꞌ lamihe.
MAR 8:18 Vetine neineꞌza ningamahe. Gatine neineꞌza gilamahe. Gomuꞌ nene eveneꞌ faef tauseni (5,000) engikumuꞌ sikoni faef do gito apilo ngemekuvo nikevo lingine sikoni lumosama nedunuꞌ nene gosuvahaꞌ nanikeꞌ goꞌzi vaiꞌ laniꞌ neve. Nee mamuꞌ gatine molahe. Neꞌmine lavo ingine tiꞌ li laniꞌ: Gosuvahaꞌ tuvelu (12) ve
MAR 8:20 likevo gohi tiꞌ lo lineꞌ: Idoꞌ eveneꞌ fo tauseni (4,000) engikumuꞌ sikoni seveni gito apilo ngemekuvo nikevo lingine sikoni lumosama hulaniꞌ nene gosuvahaꞌ nabaꞌ naba nanikeꞌ goꞌzi vaiꞌ laniꞌ neve. Lavo ingine gosuvahaꞌ nabaꞌ naba seveni ve laniꞌ.
MAR 8:21 Neꞌmine likevo aza tiꞌ lo lo-ngidineꞌ: Idoꞌ lingine aꞌmine nemuꞌ mo gili minaniꞌza monovoꞌvemuꞌ nene olihe gili lamineꞌ ami naza beletimuꞌ lokuvosa nilahe.
MAR 8:22 Nelotiꞌ nene vi Betesaida numuda hetelaniꞌ. Hetelikevo aꞌmida nene ve ma vele likive Izesuda eleꞌmizi igi okoꞌnoloꞌ do gelelive li muheleka li longoꞌ i-daniꞌ.
MAR 8:23 Longoꞌ i-dikevo aza vele likiveꞌmi analoꞌ do numuno ebeꞌ heta vo veleuꞌ gituhoꞌ ogo holo-do ana hitosa tiꞌ lo longoꞌ o-dineꞌ: Initeꞌ noningabe.
MAR 8:24 Longoꞌ o-davo aza vokeneꞌ ogo ningo tiꞌ lo lineꞌ: Eveneꞌ za gili vaniꞌ nene nimonavo noninguve.
MAR 8:25 Lavo Izesuꞌ aza ana veleloꞌ gohi hitavo ve aza vele do guno ningavo vele nene lamineꞌ ogavo initeꞌ mukiꞌ ningo ninge ngoloꞌ lineꞌ.
MAR 8:26 Vele lamineꞌ ogavo numuꞌvela imiselo tiꞌ lo lo-dineꞌ: Luhuvo numuda nene vamo geiꞌ numungala vo minezo.
MAR 8:27 Idoꞌ nelotiꞌ nene Izesuꞌ aza izipahala zuhosi Kaesalea Hilipi ebeta luhuvo numuno minekaꞌ minekaꞌ idoꞌ vaniꞌ. Akaloꞌ olihe nivi Izesuꞌ aza izipahala zuho tiꞌ lo longoꞌ o-ngidineꞌ: Eveneꞌ ingine nene nezemuꞌ zaho ve li laaꞌ nave.
MAR 8:28 Longoꞌ o-ngedavo ingine tiꞌ li li-imaniꞌ: Eveneꞌ ma nete nene monoꞌ noso holo-ngedaaꞌ ive Zohaneꞌ nene hilingutiꞌ otosa noloseive li laaꞌ nave. Idoꞌ linge ma nete nene gozopoꞌ polohete Eliaꞌ aza gohi sotoꞌ oloseive lave ma nene tineꞌ molo abe li laaꞌ nave. Idoꞌ linge ma nete nene gomuꞌ minaniꞌ polohete hilaniꞌ linge engitatiꞌ otanive nolibe li laaꞌ nave.
MAR 8:29 Neꞌmine likevo Izesuꞌ aza gohi tiꞌ lo longoꞌ o-ngidineꞌ: Idoꞌ ingine nene mo neꞌmine laaꞌ naniꞌza lingine nenikumuꞌ nene zaho neve li laaꞌ nave. Neꞌmine lavo Petoloꞌ aza tiꞌ lo lineꞌ: Gaza nene Oꞌmosoꞌmo do luꞌ izeline lo gimiselelesa lo huko-gidive ma nene nane.
MAR 8:30 Neꞌmine lavo ingine eveneꞌ masi masi aꞌmine monovoꞌvemuꞌ li-ngimikelizave lo lo huko-ngidineꞌ ve.
MAR 8:31 Neꞌmine ogo Izesuꞌ aza apiꞌ ogo gamazi tiꞌ lo apize ngemeꞌmo vineꞌ: Neniꞌ gono neꞌmo gihileꞌve do sotoꞌ ilingumuꞌ Oꞌmosolatiꞌ ve gihile neniꞌ nene mulumo gono naba geho helosa gohi otelodoꞌ o neineꞌ nenako monoꞌ gizebo vesi evenetoꞌ medeli mini Oꞌmoso initeꞌ lehizi daaꞌ ave nabasi idoꞌ Zuda vete gozopotatiꞌ laaꞌ aniꞌ monoꞌ apizi ngimaaꞌ ave nesi ingine meheꞌine nimi mulumo niteꞌ mukiꞌ nimii nibili hilikevo helosa gamene seto hamo mino otelesuve.
MAR 8:32 Neꞌmine lo aꞌmine gamazi nene lo lamino lo sotoꞌ ogosa lo ngoloꞌ lo lo-ngimineꞌ. Neꞌmine lo lo-ngemavo Petoloꞌ aza eleꞌmize gahevela ogo helelineꞌ gamazi lingumuꞌ nene elemelesa ineꞌza
MAR 8:33 Izesuꞌ mine velepeꞌ izo izipahala zuho vonuꞌ ngebelo Petoloꞌni elemo tiꞌ lo lineꞌ: Gaza gaka gele naineꞌ nene Oꞌmosoꞌmo gilidiꞌmino gelamo asi me misubouꞌ vete gilaaꞌ adiꞌmino gele nange. Satani gaza akaꞌne hize tilamo olovoꞌ ozo.
MAR 8:34 Tiꞌ lo eveneꞌ mukikisi izipahala zuhosi asi lo-ngedavo ezela igi di geseꞌ ikevo tiꞌ lo lo-ngimineꞌ: Ve ma ingine neniꞌ neꞌmeto alone li gilii ma gomuꞌ nene engiꞌ minevoꞌ alevoꞌine gizebo igaꞌ naniꞌ monovoꞌine nene huli alami neniꞌ neꞌmetilizangumuꞌ ve goloso nizave li lohotoꞌ zaloꞌ ngibili hililizangumuꞌ nene gili hulisa neꞌmeti alizave.
MAR 8:35 Idoꞌ neꞌmine igisa neꞌmeti alizave lo noluvoniꞌ nene nanitekumuꞌ luhe. Lingine mene gililo: Ve ma ingine neniꞌ neꞌmeteloneꞌ nene geni initeliꞌmi lulouꞌ vo minevoꞌ alevote hulalone li neꞌmetamilizave nene minevoꞌ minevoꞌ minaaꞌ ngemeni dameni nene ma damilisave. Damilisaha ve ma ingine neniꞌ gamaziꞌne lamineꞌ nene gili gili eleꞌvoleꞌ igi neꞌmetilizangumuꞌ ngibili hilikevo minevoꞌ alevoꞌine hulilizaniꞌ nene alingeꞌ minevoꞌ minevoꞌ minaaꞌ ngemeni dameni nene ha dalisave.
MAR 8:36 Ee, eveneꞌ ma ingine minevoꞌ minevoꞌ minaaꞌ ngemeni dameni ma hulilizaniꞌ nene aꞌmine ngemeni dameni gohi do engita olone li aꞌmidoꞌ golo hizilizaniꞌ initeꞌ nene hamokisi ma minamoloseive. Nemuꞌ nene eveneꞌ ma ingine misubouko mene minevoꞌ alevoꞌ igi mini misubouꞌ initeꞌ vaiꞌ nene di engita igi minilizanguꞌ nene minevoꞌ minevoꞌ minaaꞌ ngemeniꞌine hulilizaniꞌ nene aꞌmine initeꞌ vaiꞌ nete nene ma hize eleꞌ i-ngidamilisave.
MAR 8:38 Idoꞌ me misubouꞌ minevoꞌ alevoꞌinemuꞌ gili neniꞌ neꞌmetamilizave nene ingine minevoꞌ minevoꞌ minaaꞌ ngemeni dameni nene ma damilisave noluvoniꞌ nene ve ma ingine libilikevo minevoꞌ alevote hulalone li aꞌmine Oꞌmoso huli lihime daaꞌ akaloꞌ vaaꞌ naniꞌ aleve engiꞌ vovoꞌninguꞌ nene neniꞌ gamaziꞌne hize eleꞌ ogaꞌ unive neniꞌ evenele none lilisa ngovozo hililizaniꞌ nene Oꞌmosolatiꞌ ve gihile naza meꞌnehi amuzo do tiꞌ ogo eiꞌ angeloꞌ vesi aloneꞌ gamenela aꞌmine alevemuꞌ nene neniꞌ eveneꞌne nizave lolosa ingine adiꞌmino novozo helo lamuvo minevoꞌ minevoꞌ minaaꞌ ngemeni dameni nene ma damilisave.
MAR 9:1 Neꞌmine lo imineꞌ molo tiꞌ lo lo-ngimineꞌ: Lamineꞌ ma lo-lengemeloze. Meloꞌ nizave lengikutiꞌ linge ma nene hilami ha nizavo Oꞌmosoꞌmo gizebo o-ledaaꞌ monovo nene amuzoꞌvesi sotoꞌ ogavo ningilisave.
MAR 9:2 Idoꞌ gamene sigisi ogo vavo Izesuꞌ aza Petoloꞌni ve Zakoboꞌni ve Zohaneꞌni ve nene golo haꞌnaloꞌ ngeleꞌmizo dizavo aꞌmida engikovoꞌ mini ningi nizavo eiꞌ okoꞌno do atoliꞌmine ogavo
MAR 9:3 geneganaꞌve nene silingengeꞌniꞌve hulo mokonoꞌ goloso elo minineꞌ. Aꞌmine mokonoꞌ ilineꞌ neꞌmine nene me misubouko eveneꞌ hamoliꞌmosi ngelo ma do sotoꞌ amoloseive.
MAR 9:4 Neꞌmine neivo Eliaki Moseki sotoꞌ igi Izesulesi gamazi li voleloꞌ meloꞌ igi nizavo ninganiꞌ.
MAR 9:5 Neꞌmine igi nizavo Petoloꞌ aza Izesuꞌni tiꞌ lo lo-imineꞌ: Tisazo, makaꞌ meloꞌ minuneꞌ nene lamineꞌ ogave. Nemuꞌ nene azibe sitohamo ma gizelone. Ma nene geiꞌ ve idoꞌ ma nene Moseꞌni ve idoꞌ ma nene Eliaꞌni ve.
MAR 9:6 Golise naba gili minaniꞌ nenako nemuꞌ Petoloꞌ aza nadive lolove lo gamazi gopo lineꞌ.
MAR 9:7 Lavo limusoliꞌmo ogo molo hite-ngedavo limuso luloutiꞌ Oꞌmosoꞌmi nolo ma tiꞌ lo sotoꞌ ineꞌ: Me ve nene neniꞌ gipeꞌne luꞌne eme nouvoniꞌ nenaze. Eze gamaziꞌve gili dalo.
MAR 9:8 Tiꞌ lavo aꞌmidoꞌ liteꞌ li velepeꞌ izi ninganiꞌ nene ve masi minamaniꞌza Izesukovoꞌ neivo ninganiꞌ.
MAR 9:9 Neꞌmine igi gololotiꞌ limi ada nene Izesuꞌ tiꞌ lo lo huko lo-ngimineꞌ: Initeꞌ ninganiꞌ nene veteteꞌ igi li-ngimami nizavo Oꞌmosolatiꞌ ve gihile naza helo otekuvo ma nene ha li-ngimilizave.
MAR 9:10 Lavo lineꞌ gamazi gili di li sotoꞌ ami mini hilingutiꞌ otelineꞌ gamazi lineꞌ nemuꞌ nene monovo viseꞌ igi li voleloꞌ meloꞌ igi minaniꞌ.
MAR 9:11 Idoꞌ tiꞌ li longoꞌ i-daniꞌ: Do luꞌ izelive lo Oꞌmosoꞌmo do kegeso imiselelesa live nene aꞌmine gozopoꞌ minineꞌ polohete Eliaꞌ neꞌmo gomuꞌ molo-do tineꞌ molo aloseive li avotemoti monoꞌ gamazi apizi limaaꞌ avete laaꞌ naniꞌ ma nene nanimuꞌ laaꞌ nave.
MAR 9:12 Neꞌmine li longoꞌ i-dikevo aza tiꞌ lo lo-ngimineꞌ: Initeꞌ mukiꞌ do veveselesa Eliaꞌ gomuꞌ aloseive laniꞌ nene mo laminetoꞌ laniꞌ ve. Neꞌmine aniꞌza ve gihile neniꞌ nene mulumo niteꞌ nimi goboni mili-nidilisave li polohetelite nenikumuꞌ ma nene nadive li gizi nizaniꞌ neve.
MAR 9:13 Neꞌmine lo monoꞌ noso holo-ngedaaꞌ ive Zohaneꞌ nene Eliadoꞌ medelo minineꞌ nemuꞌ gililizave lo gelo tiꞌ lo lo-ngimineꞌ: Idoꞌ Eliangumuꞌ lo-lengemeloze. Polohetelite ezemuꞌ luhuvo gizi milaniꞌ nene mo gihile izave. Aza mo gomuꞌ molo-nedo ogavo ve lingelite engiꞌ luꞌnidoꞌ eꞌmeti bilaniꞌ ma ve.
MAR 9:14 Neꞌmine igi izipahala zuho linge nizada vi hetelaniꞌ nene eveneꞌ mukilite di vodo vodo i-ngidi nizavo avoꞌningeliti monoꞌ gamazi apizi ngimaaꞌ ave linge ma nete lolize gani li-ngimi li voleloꞌ meloꞌ igi nizavo ninganiꞌ.
MAR 9:15 Niningavo eveneꞌ mukiꞌ eze ningi upuhoꞌ goloso igi geti ezela lotiꞌ izi vi gekeꞌ vokeꞌ li-daniꞌ.
MAR 9:16 Neꞌmine ikevo Izesuꞌ tiꞌ lo longoꞌ o-ngedo lineꞌ: Nanitekumuꞌ lolize gani li voleloꞌ meloꞌ nave.
MAR 9:17 Longoꞌ ogavo eveneꞌ mukikutiꞌ ve maliꞌmo tiꞌ lo lo-imineꞌ: Tisazo, gipeꞌneꞌmi lulouꞌ nene sikalahuꞌ golosoliꞌmo mino gamazi lilineꞌ aka hize tile-davo geita eleꞌmizo nouvoniꞌ ve.
MAR 9:18 Sikalahuꞌ golosoliꞌmo do ote-dineꞌ gameneloꞌ gameneloꞌ nene do hulo misuboloꞌ o-do izo gesebeꞌ ize-davo veletiꞌ gituhoꞌ galakalaꞌ dizo veletiꞌ kilikoꞌ kilikoꞌ lo mino gizene ana do ngipu ngapa lo minaaꞌ neive. Neꞌmine ogo minaaꞌ ingumuꞌ izipaha zuho nete sikalahuꞌ goloso nene imisele hulilizave lo ingine nizada eleꞌmizo uvoniꞌza ingine nene ngeli imiseli hulilizadoꞌ minamaniꞌ ve.
MAR 9:19 Neꞌmine lavo Izesuꞌ tiꞌ lo lo-ngimineꞌ: Eii, ngeli imiseli hulisaꞌmaniꞌ nehe. Lingine Oꞌmosomuꞌ gili eleꞌvoleꞌ amaniꞌ zuho lengikumuꞌ nene goseleꞌ nebeleꞌmo novivo lengiꞌ vovotinguꞌ gamene gohi ma imineꞌ molo mino langamuzo hizeꞌmo vo mineloniꞌ nemuꞌ agae lo noluve. Gipe nene neniꞌ nouvoda eleꞌmizi alo.
MAR 9:20 Lavo eleꞌmizi ikevo sikalahuꞌ goloso neꞌmo Izesuꞌni ningo gipe nene ehusoꞌ ogo hulavo misubola lemo pouꞌ lo ongo velepeꞌ velepeꞌ izo minavo veletiꞌ gituhoꞌ galakalaꞌ vo minineꞌ.
MAR 9:21 Neꞌmino neivo Izesuꞌ aza gipe neꞌmi melehine longoꞌ o-do lineꞌ: Initeꞌ nanihekutiꞌ gize daniꞌ neve. Lavo aza lineꞌ: Izipe ngomolotiꞌ gize daniꞌ ve.
MAR 9:22 Gamene mukiꞌ izipe nene belelesa olokuꞌ nehe nosouꞌ nehe ehusoꞌ ogo hulaaꞌ ineꞌ ve. Nemuꞌ nene do lamineꞌ o-ledelinidoꞌ o neivo ma nene muhelete ningo do lamineꞌ o-ledezo.
MAR 9:23 Lavo Izesuꞌ tiꞌ lo lo-imineꞌ: Do lamineꞌ o-delinidoꞌ o neivo ma ve laineꞌ ma nene naza ma lokuvo gelezo. Gele eleꞌvoleꞌ o minelive neꞌmo nene amaaꞌ nitekisi ha oloseive.
MAR 9:24 Lavo izipeliꞌmi meleho geto gekeꞌ naba lo lineꞌ: Idise geikumuꞌ gele eleꞌvoleꞌ o nouve. Aꞌmine gele eleꞌvoleꞌ o nouvoniꞌ neꞌmo vo damida nene hize eleꞌ o-nedezo.
MAR 9:25 Lavo eveneꞌ mukiꞌ ingine lotiꞌ izi igi di geseꞌ navo ningo sikalahuꞌ goloso elemo tiꞌ lo lineꞌ: Sikalahuꞌ goloso gaza gipe meꞌmi gala do negi hize-do gamazi laaꞌ akaꞌve hize tile-danive gaza eiꞌ luloutiꞌ lemo vosa tibizo amozo lo nolo huko-giduve.
MAR 9:26 Lavo gekeꞌ lo do gabeꞌ kabeꞌ o-dosa lemo vineꞌ. Lemo vavo gipe aza hilave neꞌmino ongo miningumuꞌ eveneꞌ linge mukiꞌ nete nene aza mo helave laniꞌ.
MAR 9:27 Laniꞌza Izesuꞌ aza analoꞌ dosa do hozi lo-davo otineꞌ.
MAR 9:28 Neꞌmine ogavo Izesuꞌ aza numunguꞌ dizavo izipahala zuhosi angisevoꞌ mini tiꞌ li longoꞌ i-daniꞌ: Sikalahuꞌ goloso nene laza naniteliꞌmo imisele hulamolonidoꞌ ineꞌ neve.
MAR 9:29 Neꞌmine li longoꞌ i-dikevo tiꞌ lo lo-ngimineꞌ: Initeꞌ atotunuꞌ nene sikalahuꞌ goloso neꞌmine nene ngelo ngimiselamolosune. Asi Oꞌmosola laadunukovoꞌ nene ngimisele hulolosune.
MAR 9:30 Aꞌmine ebeꞌ huli nGalilaia misubouꞌ vi heteli aꞌmine misubo nene ivileꞌ iki eleseꞌ igi vaniꞌ. Idoꞌ eleseꞌ igi vaniꞌ nene Izesuꞌ aza izipahala zuho gamazi apize ngemeꞌmo vo minineꞌ nenako nemuꞌ eveneꞌ nete aza mela neive li gilikelizave lo lavo eleseꞌ igi vaniꞌ. Neꞌmine igi nivadoꞌ nene izipahala zuho tiꞌ lo apize ngeme ngemeꞌ oꞌmo vineꞌ: Oꞌmosolatiꞌ ve gihile neniꞌ nene eveneꞌ maliti aꞌninguꞌ neleꞌmizi milikevo di vi nibili hililisave. Di vi nibili hilikevo helo mino gamene setohamo vavo otelesuve.
MAR 9:32 Neꞌmine lo lineꞌza izipahala zuho ingine aꞌmine gamaziꞌmi monovomuꞌ nene gili lamineꞌ amaniꞌ. Gili lamineꞌ amaniꞌza eikumuꞌ golise gili nemuꞌ longoꞌ i-damaniꞌ ve.
MAR 9:33 Idoꞌ Kahanaumi numudoꞌ vi heteli numunguꞌ dizisa Izesuꞌ aza izipahala zuho longoꞌ o-ngedo tiꞌ lo lineꞌ: Akala ma nene lingine nanitekumuꞌ li voleloꞌ meloꞌ iꞌmi ave.
MAR 9:34 Longoꞌ o-ngedavo ingine akaloꞌ niigi engiꞌ mukikutiꞌ nene ve zaho ngivileꞌ ogo naba neive li li voleloꞌ meloꞌ aniꞌ nenako nemuꞌ gamazi li-imami minaniꞌ.
MAR 9:35 Gamazi li-imamavo aza mitoꞌ mino izipahala zuho tuvelu asi lavo ezela ikevo tiꞌ lo lo-ngimineꞌ: Ve ma ingine eveneꞌ naba minelone li ma eveneꞌ mukiꞌ nene dizi minikevo engiꞌ nene limi mini eveneꞌ mukiliti gelekeleꞌ ve minilisave.
MAR 9:36 Neꞌmine lo izipe ngomo ma eleꞌmizo vovoꞌninguꞌ do ote-do do mumunouko o-de mino tiꞌ lo lo-ngimineꞌ:
MAR 9:37 Ve ma ingine nenikumuꞌ ve li izipe ngomo meꞌmine ma ngeleꞌmize lamineꞌ ilizaniꞌ nene neniꞌ neleꞌmize lamineꞌ aniꞌ geleleseive. Idoꞌ neniꞌ neleꞌmize lamineꞌ ilizaniꞌ nene nenikovoꞌ neleꞌmize lamineꞌ ami nimiselive nesi nene eleꞌmize lamineꞌ aniꞌ geleleseive.
MAR 9:38 Idoꞌ Zohaneꞌ aza tiꞌ lo lo-imineꞌ: Tisazo, ve maliꞌmo geiꞌ guliveka lo sotoꞌ ogo geiꞌ vekamuꞌ ve lo sikalahuꞌ goloso nongimiselivo laza ningo aꞌmine ve nene lezesi bizo geiꞌ geꞌmetesaꞌmineꞌ nenako nemuꞌ neꞌmine amozo lo oꞌve lo-dekune.
MAR 9:39 Lavo Izesuꞌ aza tiꞌ lo lineꞌ: Oꞌve li-damilo. Ve ma ingine neze guliveꞌne li sotoꞌ igi neze veꞌnemuꞌ ve li amuzo niteꞌ di sotoꞌ ilizave nete ingine liteꞌ li diviꞌ lediviꞌ ma i-nidamilisave.
MAR 9:40 Ve ma ingine biluvaꞌ i-lidamilizave nene lelita ve nene nizave.
MAR 9:41 Naza lamineꞌ Ma lo-lengemelove. Ve ma aza nene lingine neniꞌ Kilisitoꞌ zuho nizangumuꞌ ve lo noso kapuuꞌ ohizo lengemelineꞌ neꞌmi meniꞌve nene damilivoba daloseive.
MAR 9:42 Idoꞌ nenikumuꞌ gili eleꞌvoleꞌ igi minaaꞌ naniꞌ izipahaꞌne zuho limi minaniꞌ engikutiꞌ hamoꞌ ma eveneꞌ maliꞌmo goloso niteꞌ dalineꞌ akauꞌ eleꞌmize molalosa neivo ma aꞌmine ve nene Oꞌmosoꞌmo mulumo gono nabaꞌ naba emalinako nemuꞌ nene goloso niteꞌ dalineꞌ akauꞌ nene olihe eleꞌmize molamivo gomuꞌ nene luvonouꞌ genivesi geheni naba nene nalava izi-di noso ohuno nabauꞌ ehusoꞌ i hulikevo aꞌminguꞌ lemo helelineꞌ nene lamineꞌ oloseive.
MAR 9:43 Idoꞌ anga sitaꞌ ha do mino Oꞌmosoꞌmo lihime gemavo lihizami olokuꞌ vilineꞌ nene mo edamoloseineꞌ nenako nemuꞌ nene anga maliꞌmo lihime daaꞌ akaloꞌ geleꞌmize molalosa neivo ma oꞌve lo aꞌmine anga nene huko hulaineꞌ gilivosa minezo. Anga hamokovoꞌ minineꞌ gilivo mino minevoꞌ minevoꞌ ebekuko vilineꞌ nene ede voloseive.
MAR 9:45 Idoꞌ gizenga sitaꞌ ha do minanivo Oꞌmosoꞌmo lihime gemo oloꞌ galeseuꞌ gehusoꞌ o hulilineꞌ nene mo edamoloseineꞌ nenako nemuꞌ nene gizenga maliꞌmo lihime daaꞌ akaloꞌ geleꞌmize molalosa neivo ma oꞌve lo aꞌmine gizenga nene huko hulaineꞌ gilivosa minezo. Gizenga hamokovoꞌ minineꞌ gilivo mino minevoꞌ minevoꞌ ebekuko vilineꞌ nene ede voloseive.
MAR 9:47 Idoꞌ veka sitakisi ha nanivo Oꞌmosoꞌmo lihime gemo okoꞌnine naliza ginine osuꞌ lamavo oloꞌ lihizamilineꞌ galeseuꞌ gehusoꞌ o hulilineꞌ nene edamoloseineꞌ nenako nemuꞌ nene veka gulo maliꞌmo lihime daaꞌ akaloꞌ geleꞌmize molalosa neivo ma gaza oꞌve lo aꞌmine veka nene kuluhize hulaineꞌ gilivosa minezo. Veka hamokovoꞌ minineꞌ gilivo mino Oꞌmosoꞌmo gizebo o neinguꞌ vilineꞌ nene ede voloseive.
MAR 9:49 Nosoꞌ nitekuꞌ laniteꞌ ilive lo guvo hulaaꞌ none. Aꞌmineꞌmine ogo eveneꞌ mukitoꞌ oloꞌ neꞌmo guvo neꞌmine loloꞌ oloseive.
MAR 9:50 Guvo nene lamineꞌ neineꞌza guvo laniteꞌve ma osuꞌ lavo ma gohi nado do laniteꞌ o-delone. Nosoꞌ nitekuꞌ guvo hulokunivo laniteꞌ ogaꞌ neineꞌ neꞌmino lingine lutinguꞌ guvo neꞌminosa laniteꞌ o minivo mini aꞌmida aꞌmida hongu li minilo.
MAR 10:1 Izesuꞌ aza aꞌmine ebeꞌ hulo Zudaia misubo nene vo hulo Zodani noso helala vineꞌ. Vo nela neivo ezela eveneꞌ mukiꞌ iheꞌ igi di geseꞌ ikevo aza ogaꞌ ineꞌ neꞌmino gohi monoꞌ apize ngemo minineꞌ.
MAR 10:2 Neꞌmino neivo Halisaioꞌ monoꞌ laaꞌ ave malite igi emenguꞌ mili tiꞌ li longoꞌ i-daniꞌ: Ve maliꞌmo elenahine imisele hulilineꞌ nene gaza gelanivo leze Zuda veti louꞌ gamazi avutoꞌ ilihe amilive.
MAR 10:3 Longoꞌ i-dikevo velepeꞌ izo longoꞌ o-ngedo tiꞌ lo lineꞌ: Moseꞌ aza nadive lo lo huko-lengede neineꞌ neve.
MAR 10:4 Neꞌmine lavo ingine tiꞌ li laniꞌ: Ve ma elenahine imiselelove lo gelo ma veneꞌ vemohoꞌ izi hukaaꞌ luhuvo gizo emosa imiseleleseive lo Moseꞌ aza gele leme neineꞌ ve.
MAR 10:5 Likevo aza tiꞌ lo lineꞌ: Lingine gamazi gilami peleseveꞌ izaaꞌ angumuꞌ aꞌmine louꞌ gamazi nene gize-lingidineꞌ ma neive.
MAR 10:6 Gize-lingidineꞌza Oꞌmosoꞌmo initeꞌ mataꞌ ganaꞌ apiꞌ ogo do sotoꞌ ineꞌ gamenela nene veneꞌ vemohoꞌ do sotoꞌ ineꞌ ve.
MAR 10:7 Nemuꞌ tiꞌ lo lo neineꞌ ma neive: Vemohoꞌ nene izelehingi melehingi hulo elenahida bizo minavo ingine hamoꞌ liliꞌ asineꞌ gelavo minilisasive.
MAR 10:8 Nemuꞌ nene ingine sitaꞌ nizasive ma lo-ngedamolosune. Mo hamoꞌ nene nizasive.
MAR 10:9 Nemuꞌ nene Oꞌmosoꞌmo initeꞌ do hamoꞌ ogo molo neingutiꞌ ve malike do izeꞌ molaaꞌ nene nomive.
MAR 10:10 Neꞌmine lavosa numunguꞌ dizi minanguꞌ nene izipahala zuho nete aꞌmine initekumuꞌ nene gohi longoꞌ i-daniꞌ.
MAR 10:11 Longoꞌ i-dikevo tiꞌ lo lo-ngimineꞌ: Ve maliꞌmo elenahine imisele hulo veneꞌ gohi ma dalineꞌ nene aza elenahine do gopo o-do Oꞌmosoꞌmi louꞌ gamazi avutoꞌ oloseinako lihime naba daloseive.
MAR 10:12 Idoꞌ veneꞌ ma vanahine hulo-do ve gohi maloꞌ vilineꞌ nene Oꞌmosoꞌmi louꞌ gamazi avutoꞌ oloseinako lihime naba daloseive.
MAR 10:13 Eveneꞌ malite izipe ngomo nene okoꞌnidoꞌ do gelo noꞌnohoꞌ ize-ngedelive li Izesuda ngeleꞌmizi nivavo izipahala zuho nete oꞌve li-ngidi ngelemaniꞌ.
MAR 10:14 Neꞌmine ikevo ningo gelo Izesuꞌ aza izeboloꞌ molavo tiꞌ lo lo-ngidineꞌ: Izipe ngomo ngomo meꞌmine minave nene Oꞌmosoꞌmo gizebo o neinguꞌ ngeleꞌmize molaaꞌ neinako huli-ngimikavo nenita ha alizaze. Oꞌve li-ngidamilo.
MAR 10:15 Naza laminetoꞌ nolo-lingimuve: Izipe ngomoliti ngemeni dameni neꞌminesi mini Oꞌmoso nene gizebo vete minelive li gelekeleꞌ lapa nomineꞌ i-damilizave nene eiꞌ Oꞌmosoꞌmo gizebo o neinguꞌ nene mo kekeꞌ vi hilamilisave.
MAR 10:16 Neꞌmine lo izipe ngabutiꞌ izo ana okoꞌnidoꞌ nohito noꞌnohoꞌ ize-ngidineꞌ.
MAR 10:17 Izesuꞌ aza aka volosa apiꞌ neivo ve maliꞌmo lotiꞌ izo ogo hetelo gizeneuꞌ gubiꞌ ize emo longoꞌ o-do tiꞌ lo lineꞌ: Tisaꞌ lamino, naza nene nadiꞌ okuvo Oꞌmosoꞌmo minevoꞌ minevoꞌ nemeni dameni nemelive.
MAR 10:18 Lavo Izesuꞌ tiꞌ lo lo-imineꞌ: Nezemuꞌ nene ve lamino nanimuꞌ nolo-nedane. Lamineꞌ minave nene hamokisi mo nizamavo Oꞌmoso eiꞌ hamoꞌ nene lamineꞌ minive nenako neꞌmine laineꞌ nene neniꞌ monovoꞌne nadiꞌ o neive.
MAR 10:19 Gaza aka gamazi nene mo gele nane. Aꞌmine gamazi nene tiꞌ lo neive: Lingine eveneꞌ ngibili hilamilo. Idoꞌ veneꞌ vemohoꞌ liliꞌ ikeniꞌ nete lingine bizivoꞌ mini veneꞌ nehe vemohoꞌ nehe gohi masi gopo ingamilo. Idoꞌ gumine amilo. Idoꞌ eveneꞌ mamuꞌ gopoꞌ napa gamazi li-ngidii sakupo gamazi li-ngidamilo. Ve maliti initeꞌ nene tiliki igi damilo. Idoꞌ izetingine metinginemuꞌ gilikevo dizavo gelekeleꞌ i-ngidi minilo.
MAR 10:20 Neꞌmine lo-emavo ve aza tiꞌ lo lo-imineꞌ: Tisazo. Aꞌmine laineꞌ mukiꞌ nene naza izipelotiꞌ gelo eꞌmeteꞌmo ogo minuvoniꞌ ve.
MAR 10:21 Lavo Izesuꞌ aza ningo ninge lamineꞌ o-do tiꞌ lo lo-imineꞌ: Gaza initeꞌ hamoꞌ ma amanidiꞌmo nene lisiheꞌ amane. Vo initeꞌ mataka mukiꞌ nene izeꞌ molo meni do aꞌmidotiꞌ moni nene do gohoꞌ gahaliꞌ izeꞌ molo ngemezo. Neꞌmine ilineꞌ neꞌmo nene henenika Okulumokuko nene ma mineleseive Neꞌmine ogosa ogo neꞌmetezo.
MAR 10:22 Neꞌmine lo lavo ve aza eiꞌ heneniꞌve vaiꞌ lo minineꞌ nemuꞌ agae lo geni belavo muheleꞌ ogo vo ha ha ineꞌ ve.
MAR 10:23 Novivo Izesuꞌ aza velepeꞌ izo vonuꞌ ngebelo hulo eza ema ogo izipahala zuho tiꞌ lo lo-ngimineꞌ: Heneni nganeni ve ingine Oꞌmosoꞌmo gizebo o neinguꞌ nene vi hilalisa geꞌnebe goloso ilisave.
MAR 10:24 Lavo izipahala zuho ingine Izesuꞌ gamazi neꞌmine lingumuꞌ gopo gaꞌine gilaniꞌza gohi tiꞌ lo lo-ngimineꞌ: Vekizo. Oꞌmosoꞌmo gizebo o neinguꞌ vo holaaꞌ nene geꞌnebe gono goloso neive.
MAR 10:25 Idoꞌ kamela ize nene naba neineꞌ nenako nemuꞌ nene nalaꞌ lolosoꞌ igaꞌ naniꞌ nakese neꞌmi veleuꞌ nene ma volosa ilineꞌ nene geꞌnebe goloso oloseineꞌza heneni ve nete aꞌmine nene ivileꞌ ivosa Oꞌmosoꞌmo gizebo o neineꞌ ebekuꞌ nene vilisa geꞌnebe ilisave.
MAR 10:26 Neꞌmine lavo ingine upuhoꞌ goloso igi voꞌine vavo angiseꞌine tiꞌ li li voleloꞌ meloꞌ aniꞌ: Laza nene Oꞌmosoꞌmo umo hilive nene heneni ve loloꞌ o-ngedaaꞌ neihe lo giluneꞌza gaza heneni ve netesi Oꞌmosoꞌmo gizebo o neineꞌ ebekuꞌ nene mo vi hilamilisave lo lainako nemuꞌ nene Oꞌmosoꞌmo eveneꞌ hamokisi mo ma do luꞌ izamivo eze gizebo inguꞌ nene vo holamolobe lo nogilune.
MAR 10:27 Neꞌmine likevo Izesuꞌ aza vonuꞌ nongebelo tiꞌ lo lo-ngimineꞌ: Eveneꞌ angiseꞌnidatiꞌ lukuvo ngeli ma namilisaha Oꞌmoso nene engiꞌ neꞌmine nomive. Oꞌove. Eiꞌ nene initeꞌ mukiꞌ ogaꞌ amuzo do neineꞌ nenako eveneꞌ do nguꞌ izelidoꞌ lisiheꞌ o neive.
MAR 10:28 Lavo Petoloꞌ apiꞌ ogo tiꞌ lo lo-imineꞌ: Gaza gelezo. Laza neve initeꞌ matate mukiꞌ nene hulo osuꞌ lo geꞌmeto noune.
MAR 10:29 Lavo Izesuꞌ tiꞌ lo lineꞌ: Laminetoꞌ ma lo-lengemelove. Ve ma ingine nenikumuꞌ idoꞌ monoꞌ gamazi laminekumuꞌ numuno ebeꞌine nehe uvoꞌningine nakuꞌningine nehe ateꞌningine alunoꞌningine nehe izeꞌningine meꞌningine nehe idoꞌ izipahaꞌine nehe misuboꞌine nehe neꞌmine initeꞌ ma huli nilizaniꞌ nene
MAR 10:30 aꞌmine huli nilizaniꞌ initetoꞌ nene medeli ma damilizavoba mo dalizavevoꞌ nene nizave. Aꞌmine huli nilizaniꞌ initeꞌ mukiꞌ hamotoꞌ hamotoꞌ nene hadeti hadeti neꞌmine gohi ma dikaꞌ dikaꞌ ilisave. Aꞌmine numuꞌnidoꞌ nehe engiꞌ zuholoꞌ nehe minamunoꞌnidoꞌ nehe aꞌmidoꞌ aꞌmidoꞌ nene gohi gohi dalisave. Aꞌmine initeꞌ nene idise noneꞌ gameneuꞌ nene dikaꞌ dikaꞌ ilisaniꞌza goboni malaꞌ malaꞌ neꞌmi lulouꞌ nesi mini-di vilisave. Idoꞌ alingeꞌ gamene ma sotoꞌ ogo alinguꞌ nene minevoꞌ minevoꞌ ngemeni dameni nesi dalisave.
MAR 10:31 Neꞌmine ilisaniꞌza dizi nilizaniꞌ aleveutiꞌ linge mukiꞌ nene limi minilisave. Idoꞌ limi nilizaniꞌ aleve nene dizi minilisave.
MAR 10:32 Zelusalemi numuda vilisa akaloꞌ nivavo Izesuꞌ aza gomuꞌ molo novivo izipahala zuho ingine nene ngehelele ize mineꞌ mineꞌ ivo nivavo ma ngeꞌmeti vave ingine nene golise gilaniꞌ. Tiꞌ navo Izesuꞌ aza izipahala zuho tuvelu nene ngeleꞌmize gaheve ogo ezela sotoꞌ o-delineꞌ initekumuꞌ nene gohi apiꞌ ogo tiꞌ lo lo-ngimineꞌ:
MAR 10:33 Gililo. Laza nene Zelusalemi numuno ebeta dizo novune. Aꞌmida nene Oꞌmosolatiꞌ ve gihile neniꞌ nene evenetoꞌ medeli mini Oꞌmoso initeꞌ lehizi-daaꞌ ave nabasi avotemote laniꞌ monoꞌ apizi ngimaaꞌ avesi engiꞌ aꞌninguꞌ milikevo ingine goniꞌ i-nidi lihimeka apaso helelinidoꞌ o neive li Zuda ve minamaniꞌ heta atoꞌ aleveliti aꞌninguꞌ mili-nidikevo
MAR 10:34 ingine gize zohiꞌ i-nidi gituhoꞌ i-nidi gasavasi nalatunuꞌ nene meheꞌne iziviꞌ lediviꞌ igi nibili nibili hililisave. Neꞌmine igi nibili hilikevo gamene setohamo vavo gohi otelesuve lo lineꞌ.
MAR 10:35 Zebedaioꞌ gipele setaꞌ Zakoboki Zohaneki ingi Izesuda vi tiꞌ li li-imasineꞌ: Tisazo. Laza initeꞌ nanitekumuꞌ lolosihe aꞌminemuꞌ lokusivo gaza aꞌmidoꞌ o-ledeline losa nolusive.
MAR 10:36 Likesivo aza tiꞌ lo longoꞌ o-ngidineꞌ: Lingi nene naza nadiꞌ o-lengedelongumuꞌ nilasive.
MAR 10:37 Lavo tiꞌ li li-imasineꞌ: Gaza Guvekasi ve loloꞌ ogo minelineꞌ gamenela nene laza gezelotiꞌ lemo eveneꞌ lingesi ma ngivileꞌ ogo guvetesi ve loloꞌ ogo mino anga zamelasi adavalasi minilizo lo gele lemeline losa nolusive.
MAR 10:38 Likesivo aza tiꞌ lo lo-ngimineꞌ: Lingine longoꞌ i-nidasineꞌ initeliꞌmi monovo nene gilami gopo likesive. Initeꞌ goloso i-nidilizaniꞌ nene ekeseꞌ noso neꞌmino nenako aꞌmine i-nidilizaniꞌ initeꞌ nene ha gehelesa nouve. Idoꞌ linginesi neniꞌ geheloniꞌ initeꞌ ekeseꞌ noso neꞌmine minineꞌ nene ha gihilisidoꞌ i nizasihe. Mulumo alumo niteꞌ noso neꞌmino holosa neꞌmi lulouꞌ minelonguꞌ nene linginesi neꞌmi lulouꞌ nene ha minilisidoꞌ i nizasihe.
MAR 10:39 Lavo ingine tiꞌ li li-imasineꞌ: Ee, laza neꞌmine ha olosidoꞌ o nosive. Likesivo Izesuꞌ aza tiꞌ lo lo-ngimineꞌ: Lamineꞌ lingine neniꞌ geheloniꞌ geni nene gihi mulumo alumoliꞌmi lulouꞌ minelonguꞌ nene linginesi aꞌmineꞌmi lulouꞌ nene minilisineꞌza
MAR 10:40 aꞌne zamelasi adavalasi minaaꞌ moꞌmosiꞌ nene neniꞌ initeꞌ neivosa lengemelohe. Oꞌmosoꞌmo dalisive lo do vaꞌvaꞌ o-ngidive engikovoꞌ nene dalisasive.
MAR 10:41 Zakoboki Zohaneki neꞌmine asineꞌ nemuꞌ izipahala zuho linge teni ingine gilii engikumuꞌ nene muluꞌninguꞌ goloso ineꞌ
MAR 10:42 Neꞌmine ogavo Izesuꞌ asi lo-ngedavo ezela ikevo tiꞌ lo lo-ngimineꞌ: Oꞌmosoꞌmi zuho minamaniꞌ heta atoꞌ ve engiꞌ gizebo veꞌine ve lave ingine nete eveneꞌine nene gelekeleꞌ i-lidilizave li amuzo mili li-ngidaaꞌ nave. Aꞌmine eveneꞌ engita eveneꞌ naba minave nete nene aꞌmine eveneꞌine zuho nene ngivileꞌ igi amuzo ve goloso minisa gizebo i-ngidaaꞌ nave. Neꞌmine igaꞌ naniꞌ nemuꞌ nene lingine mo gili nizaniꞌza
MAR 10:43 lengiꞌ muliseuꞌ nene ingine igaꞌ naniꞌ neꞌmine nene ma amilisave. Lengikutiꞌ ve maliꞌmo guveꞌnesi ve loloꞌ olove lo gelo ma aza nene lengiꞌ gelekeleꞌ vetine neꞌmine loloꞌ ogo mineleseive.
MAR 10:44 Ee, ve ma aza gomuꞌ molo lengemo eveneꞌ naba minelove lo gelo ma aza nene mukiliti goboni izipe neꞌmine loloꞌ ogo mineleseive.
MAR 10:45 Idoꞌ neꞌmine noluvoniꞌ nene naza Oꞌmosolatiꞌ ve gihile nouvoniꞌ nesi nene eveneꞌ gelekeleꞌ i-nidi neleꞌmize lamineꞌ ilizave losa lemamuve. Asi gelekeleꞌ o-ngedo ngeleꞌmize lamineꞌ olosa ogo eveneꞌ mukiꞌ nene meni hizo do nguꞌ izo do tineꞌ molo-ngedelove lo engikumuꞌ okoꞌne hulo helelesa limuvoniꞌ nenako nemuꞌ noluve.
MAR 10:46 Zeliko numuda vi hetelaniꞌ. Vi heteli Aꞌmine ebeꞌ nene huli izipahala zuhosi eveneꞌ mukiꞌ ezela di geseꞌ igi minavesi nivavo Timaioꞌ gipele Batimaioꞌ aza vele likavo mino monimuꞌ vokuꞌ vokuꞌ lo aka gahevela minineꞌ.
MAR 10:47 Mino Nasalete ve Izesuꞌ nave likevo gelo apiꞌ ogo amuzo molo asi lo lineꞌ: Izesuvo, guvelesi ve naba Davidiꞌ aꞌvo ezeloꞌ medelo minanive make, nenikumuꞌ nene mulumoꞌne ningevo.
MAR 10:48 Lavo eveneꞌ mukiꞌ ingine legeno minelive li oꞌve li-di elemaniꞌza aza nene gohi amuzo molo vise naba lo tiꞌ lo lineꞌ: Davidiꞌ aꞌvo make, nenikumuꞌ nene mulumoꞌne ningevo.
MAR 10:49 Neꞌmine loꞌmo loꞌmo angumuꞌ nene gelo Izesuꞌ aza akaloꞌ vo ote mino alize li-imilo lineꞌ. Lavo vele likivemuꞌ nene asi tiꞌ li li-imaniꞌ: Gezemuꞌ nolize. Mulungauꞌ lamineꞌ gelo oto ano.
MAR 10:50 Neꞌmine likevo vele likive gelo saketiꞌve apase hulo upuhoꞌ ogo oto Izesuda vineꞌ.
MAR 10:51 Vogavo Izesuꞌ aza tiꞌ lo longoꞌ o-do lineꞌ: Gaza nene nadiꞌ o-gedelove losa nogelane. Neꞌmine lo longoꞌ o-davo aza tiꞌ lo lineꞌ: Guveꞌnesi ve make, gaza veꞌne nene do lamineꞌ oganivo gohi veꞌne ningeloho.
MAR 10:52 Neꞌmine lavo Izesuꞌ aza tiꞌ lo lo-imineꞌ: Gaza gele eleꞌvoleꞌ anidiꞌmo nene lamineꞌ ogange. Vozo. Neꞌmine nolivo aꞌmidoꞌ liteꞌ lo vele nene lamineꞌ ogavo vele ningo akaloꞌ nene Izesuꞌni eꞌmeto vineꞌ.
MAR 11:1 Zelusalemi numuno di avitoꞌ igi Oliva golola ebeꞌ setaꞌ Betehagesi Betanisi minasida nene vi hetelaniꞌ. Vi hetelisa Izesuꞌ aza izipahala zuhoutiꞌ setaꞌ ma ngimiselo
MAR 11:2 tiꞌ lo lo-ngidineꞌ: Aꞌmine ningi nizasineꞌ numuno ebekuꞌ volene vi nidizi ningilisineꞌ nene dongi ize evenelite aꞌmidoꞌ mitoꞌ mini olihe monamaniꞌ nene nalava izi nizavo ningilisasize. Aꞌmine nene vakesi daalizo.
MAR 11:3 Neꞌmine nasivo ve maliꞌmo nanitekumuꞌ nasive lo nolivo ma lingine tiꞌ li li-imilizo: Guvelesi ve aza gonoꞌve ma neivo aꞌmine dongi izemuꞌ mene lavo nousinako gono davo liteꞌ lo gohi do tiꞌno imiseleleseive li lilizo.
MAR 11:4 Lavo vi numuno gatedoꞌ aka gahevela naꞌnava izikaniꞌ dongi ize angale naba nene ningi vakesasineꞌ.
MAR 11:5 Neꞌmine igi nizasivo aꞌmidoꞌ minave nete longoꞌ i-ngidi tiꞌ li laniꞌ: Ize nene nanitekumuꞌ nivakesasive.
MAR 11:6 Likevo Izesuꞌ lo-ngimineꞌ gamazi ma nene li-ngimikesivo ha huli-ngimikavo vasineꞌ.
MAR 11:7 Huli-ngimikavo vi aꞌmine dongi ize nene Izesuda di ikesivo saketiꞌine nene apasi ize neꞌmi meheneloꞌ milikevo Izesuꞌ aza aꞌmidoꞌ dizo minineꞌ.
MAR 11:8 Neꞌmine ogavo Eveneꞌ linge mukiꞌ nete nene saketiꞌine apasi akaloꞌ aviliseꞌ iꞌmi nivavo linge ma nete nene za aꞌnava avilesi guvisetiꞌ huki di aniꞌ nene aviliseꞌ iꞌmi vaniꞌ.
MAR 11:9 Neꞌmine iꞌmi nivavo gomuꞌ milavesi alingeꞌ milavesi ingine gekeꞌ gekeꞌ li tiꞌ li laniꞌ: Geikumuꞌ nene gopoꞌni nolunize. Guvetesi ve oꞌmosoꞌmi velemuꞌ anive geiꞌ nene Oꞌmosoꞌmo noꞌnohoꞌ ize-gidivo.
MAR 11:10 Avoteho Davidiꞌ moꞌmosiꞌve do geita ogo guvetesi ve loloꞌ ogo gizebo o-ledo minelineꞌ gamene nene alitaze. Aꞌmine gizebo ilineꞌ nene Oꞌmosoꞌmo noꞌnohoꞌ izelive. Agae, veleta Okulumokuꞌ Oꞌmoso geiꞌ nene gopoꞌni nolune.
MAR 11:11 Neꞌmine iꞌmi navo Izesuꞌ aza Zelusalemi numuno ebekuꞌ dizosa monoꞌ numuno nabauꞌ dizo initeꞌ mataꞌ mono ninge osuꞌ lineꞌ. Neꞌmine ineꞌ nene nivengaꞌ mo molanguꞌ nenako azasi izipahala zuho tuvelu nesi nene Betani numuda limi vaniꞌ.
MAR 11:12 Litiꞌmuso izo goꞌ lavo Betani numudatiꞌ nilimi Izesuꞌ gaꞌna olavo
MAR 11:13 gohuno za avile mukikisi hotoꞌ neivo ningo aꞌmidoꞌ gihile ize neihe lo viseꞌ olosa vineꞌ. Vo ningo gihile izaaꞌ gamene amineꞌ nenako gihile izamivo avilevoꞌ ningineꞌ.
MAR 11:14 Ningo aꞌmine zamuꞌ tiꞌ lo lineꞌ: Geitoꞌ nene gihile gohi ma izamivo ve maliꞌmosi elo namilive. Neꞌmine lineꞌ nene izipahala zuho nete gilaniꞌ ve.
MAR 11:15 Idoꞌ Zelusalemi numuda gohi vi hetelaniꞌ. Aꞌmida Izesuꞌ aza monoꞌ numuno nabauꞌ vo dizo initeꞌ maketi milaaꞌ meni hizaaꞌ igi minave nene ngeleto do hulo monoꞌ numunguꞌ hulaaꞌ moni senisimi igaꞌ aveliti holomoꞌine nene do tululu lo do hulo-ngedo nama viluso Oꞌmoso lehizi-dilizangumuꞌ meni hizilizave li maketi mili minavete minaaꞌ holomoꞌinesi nene do velepeꞌ izo hite-ngidineꞌ.
MAR 11:16 Idoꞌ monoꞌ numuno nabauꞌ nene maketi initeꞌ nevoꞌmine nene di dizi limi amilizave lo oꞌve lo-ngidineꞌ.
MAR 11:17 Neꞌmine lo-ngedo eveneꞌ apize ngemo tiꞌ lo lineꞌ: Oꞌmosoꞌmo tiꞌ lo lineꞌ gamazi ma nene luhuvo gizamaniꞌ nehe: Neniꞌ numuꞌne nene eveneꞌ ato atoꞌ zuho mukiꞌ nete dizi nopoꞌni li-nimaaꞌ numuno ve losa mineleseive. Neꞌmine li gizaniꞌza lingine aꞌminguꞌ igi mili minaaꞌ naniꞌ initeꞌ neꞌmo nene gumineloꞌ vete igi mili minaaꞌ numuno loloꞌ ogave.
MAR 11:18 Neꞌmine lavo evenetoꞌ medeli mini Oꞌmoso initeꞌ lehizi-daaꞌ ave nabasi monoꞌ apizi ngimaaꞌ avesi ingine gili bililizaniꞌ aka viseꞌ iꞌmi vi minaniꞌ. Idoꞌ bililizaniꞌ akamuꞌ viseꞌ aniꞌ nene nanitekumuꞌ ve. Eveneꞌ mukiꞌ nete eze apize ngemo minineꞌ gamazi nemuꞌ nene laniteꞌ gili golize laniꞌ nenako nemuꞌ ingine golise gili bililizaniꞌ akamuꞌ nene viseꞌ iꞌmi vi minaniꞌ ve.
MAR 11:19 Idoꞌ mo nivengaꞌ molavo izipahala zuhosi Zelusalemi numuno ebeꞌ nene huli vaniꞌ ve.
MAR 11:20 Ingi goꞌ lavo nedengaꞌ akaloꞌ gohi nivi gohuno za nene monovoukotiꞌ gulugulu ize pilineꞌ nene ninganiꞌ.
MAR 11:21 Petoloꞌ aza aꞌmine za ningidotiꞌ Izesuꞌ gamazi lineꞌ ma nene galauꞌ ogavo gohi gelo tiꞌ lo lo-imineꞌ: Tisazo, ningezo. Geiꞌ usiꞌ ize-daineꞌ gohuno za nene mo gulugulu izave.
MAR 11:22 Lavo Izesuꞌ do velepeꞌ izo tiꞌ lo lo-ngimineꞌ: Lingine nene Oꞌmosomuꞌ gili eleꞌvoleꞌ igisa minilo. Naza laminetoꞌ ma lo-lengemelove.
MAR 11:23 Ve maliꞌmo gala setaꞌ gelamo loloniꞌ gamazi nene gihile izeleseive lo gele eleꞌvoleꞌ o mino mene golomuꞌ ngutoko guvo nosouꞌ lemelive lo lo-delineꞌ nene lilidoꞌ gihile ha izeleseive.
MAR 11:24 Nemuꞌ nolo-lingimuve. Initeꞌ neꞌmine manaꞌmine initekumuꞌ Oꞌmosola li longoꞌ igi nili mo dalosune li gili eleꞌvoleꞌ ilizaniꞌ nene lilizadoꞌ ha gihile izeleseive.
MAR 11:25 Idoꞌ gamene gamene oti mini Oꞌmoso opoꞌni nilii ma ve mamuꞌ lihime di minilizaniꞌ nene ha huli-ngidilo. Neꞌmine ikevo Okulumokuꞌ metibo aza aꞌmineꞌmine ogo lengiꞌ lihimetine nene ha hulo-lengedeleseive.
MAR 11:27 Idoꞌ Zelusalemi numuda gohi dizi ikevo Izesuꞌ aza monoꞌ numuno nabauꞌ dizo nomonivo evenetoꞌ medeli mini Oꞌmoso initeꞌ lehizi-daaꞌ ave nabasi monoꞌ apizi ngimaaꞌ avesi monoꞌ gizebo vesi ezela igi
MAR 11:28 longoꞌ i-di tiꞌ li laniꞌ: Initeꞌ ogaꞌ naineꞌ nene zahi velemuꞌ ogaꞌ nane. Idoꞌ zaho lavosa ogaꞌ nane.
MAR 11:29 Longoꞌ i-dikevo aza tiꞌ lo lo-ngimineꞌ: Nazasi initeꞌ mamuꞌ longoꞌ o-lengedekuvo li-nimilizaniꞌ nene naza zahi velemuꞌ initeꞌ ogaꞌ nouhe nemuꞌ nene lo-lengemelesuve.
MAR 11:30 Monoꞌ noso holo-ngedelive lo Zohaneꞌni imiselive ma nene Oꞌmosoꞌmo imiselihe haza misubouꞌ velite imiselave. Lingine aꞌminemuꞌ likevo gelelove.
MAR 11:31 Neꞌmine lavo ingine angiseꞌinemuꞌ li voleloꞌ meloꞌ igi tiꞌ li laniꞌ: Laza Oꞌmosoꞌmo imiselive losoꞌ nene Izesuꞌ aza lingine tiꞌ li ma eitoꞌ nene nanimuꞌ gili eleꞌvoleꞌ amave lo lalive.
MAR 11:32 Ne neiha haza misubouꞌ velite imiselave ha lolobe. Neꞌmine laniꞌ nene eveneꞌ mukiꞌ nete Zohaneꞌ nene polohete gihile minineꞌ ve li gilaniꞌ nenako eveneliti goliseꞌine gili laniꞌ ve.
MAR 11:33 Nemuꞌ nene Izesuꞌ longoꞌ ineꞌ gamaziloꞌ nene tiꞌ li li-imaniꞌ: Laza ma gelamune. Likevo Izesuꞌ aza tiꞌ lo lo-ngimineꞌ: Lingine li-nimamaniꞌ nemuꞌ nene nazasi ogo molo ogaꞌ nouvoniꞌ initeꞌ nene iline lo nimiselivemuꞌ nene ma lo-lengamamolosuve.
MAR 12:1 Idoꞌ aneza gamazi ma Izesuꞌ tiꞌ lo lo-ngimineꞌ: Ve maliꞌmo vaini mine zuhoꞌ ogo aꞌmidoꞌ gesi hize vodo vodo ogo vaini gihile hite miꞌ izo lipelineꞌ galese nesi elosa aꞌminguꞌ mini miꞌveloꞌ gizebo iliza numuno haꞌna nesi do dizo gizo eveneꞌ ma mine gizebo i-dilizave lo hulo-ngedo misubo mala vo minineꞌ.
MAR 12:2 Aꞌmida neivo vaini nalaꞌ gihile elaaꞌ gamene ogavo mine meleho aza aꞌmine vaini nalaꞌ gihile nene ma do-nedo alive lo gelekeleꞌ izipe ma mine gizebo vela imiselineꞌ.
MAR 12:3 Imiselavo vo hetelavo mine gizebo ve ingine analoꞌ di giliꞌ liki bili imiseli hulikevo initekisi ma damo haza tineꞌ molo vineꞌ ve.
MAR 12:4 Neꞌmine ogavo gelekeleꞌ izipe gohi ma engita imiselavo vo hetelavo godolo izi okoti huli di goloso initeꞌ gehepeve i-daniꞌ.
MAR 12:5 Neꞌmine i-dikevo gohi ma imiselineꞌ nene bili hilaniꞌ. Aꞌmineꞌmine igi gohi eveneꞌ mukiꞌ ngimiselineꞌ nene linge ma ngibili di goloso i-ngidi linge ma nene mo ngibili hilaniꞌ ve.
MAR 12:6 Neꞌmine ikevo imiselelive hamoꞌ ma minineꞌ nene lulo eme neineꞌ gipele minineꞌ nenako alingeꞌ noimiselo tiꞌ lo lineꞌ: Aza neniꞌ gipeꞌne nenako ha eleꞌmize lamineꞌ ilisave.
MAR 12:7 Tiꞌ lo imiselineꞌza vo hetelavo mine gizebo ve nete tiꞌ li li voleloꞌ meloꞌ igi tiꞌ li laniꞌ: Me veꞌmo alingeꞌ melehidoꞌ medelo mino mine dalive nenaze. Aloꞌ bele hilukeꞌzo.
MAR 12:8 Neꞌmine okunivo mine mene leliꞌ mide loloꞌ ilive. Tiꞌ li liteꞌ li analoꞌ diki bili hilisa mingutiꞌ geleleheꞌ igi di vi heta huli-daniꞌ ve.
MAR 12:9 Neꞌmine aniꞌ nenako mine meleho aza nadiꞌ ilive. Aza nene ogo aꞌmine midoꞌ gizebo ve mukiꞌ nene ngebele geseꞌ ogo miꞌveloꞌ nene eveneꞌ atoꞌ gohi gizebo ve ma hulo-ngedeleseive.
MAR 12:10 Idoꞌ monoꞌ godolouꞌ gamazi ma tiꞌ lo neineꞌ ma nene lingine gati gilisaꞌmahe: Numuno gizilizaniꞌ geheni mukikutiꞌ geheni ma nene numuno gizaaꞌ avete ningi goloso o vive lii di kegesi di hulaniꞌ geheni neꞌmo nene geheni mukiꞌ ngivileꞌ ogosa numuno do amuzo molo minaaꞌ geheni loloꞌ ogave.
MAR 12:11 Aꞌmine initeꞌ do sotoꞌ ive nene guvelesi veꞌmo do sotoꞌ ineꞌ ve. Aꞌmine initeꞌ nene evenelite ninguneꞌ mo amebe izo do sotoꞌ oganiꞌ neive.
MAR 12:12 Tiꞌ lo lo-ngemavo aꞌmine Zuda veliti monoꞌ ve naba ingine aneza gamazi nene lelikumuꞌ lave li gili galapuso emelone li gilaniꞌza eveneꞌ mukiꞌ aꞌmida minavemuꞌ nene golise ngemavo huli-di vaniꞌ.
MAR 12:13 Neꞌmine igi Zuda veti gizebo ve ingine Halisaioꞌ monoꞌ laaꞌ aveutikisi guvelesi ve Helodeꞌni hize eleꞌ i-daaꞌ aveutikisi linge ma ingine vi Izesuꞌni golo izikevo goniꞌ o-deloneꞌ gamazi lilihe li ngimiselikevo
MAR 12:14 ezela igi heteli tiꞌ li li-imaniꞌ: Tisazo, gaza ve lisiheꞌ lamineꞌ naineꞌ nene mo gele none. Gamazi lo-ngemelineꞌ aleve nene naniꞌmine aleve nilizahe nemuꞌ gaza gaka mukiꞌ gelesaꞌmane. Eveneꞌ naba mini geiꞌ lilineꞌ gamazimuꞌ muluꞌninguꞌ goloso gili gelemilizadokisi nilizaniꞌ nemuꞌ gelamo Oꞌmosoꞌmi aka lelebizo gamazi gihilevoꞌ lo-lemaaꞌ nane. Nemuꞌ nene gaza laanivo gelelone. Loma veti guveꞌinesi ve naba Kaesaleꞌ aza takisi moni huli-nidilizave lo neidoꞌ nene eꞌmeto Zuda ve laza ma hulo-desoꞌ nene lisiheꞌ o neihe louꞌ gamazite avutoꞌ o neive.
MAR 12:15 Gaza gelanivo takisi emelonidoꞌ o neihe emamolonidoꞌ o neive. Neꞌmine laniꞌza lingine Kaesaleꞌni takisi imilo lilineꞌ nene Zuda ve ngizeboloꞌ molavo ganala dalive. Idoꞌ imamilo lilineꞌ nene Loma ve ngizeboloꞌ molavo ganala dalive li gili longoꞌ aniꞌ initeliꞌmi monovo gililisa lami ha veꞌine avilelotiꞌ golo izisa longoꞌ i-daniꞌ nene Izesuꞌ aza mo ningo gelo tiꞌ lo lo-ngimineꞌ: Nanimuꞌ nemenguꞌ nimilave. Moni ma di igi nelebizikevo ningelove.
MAR 12:16 Lavo ma imikevo ningo tiꞌ lo longoꞌ o-ngedo lineꞌ: Me moniloꞌ eveneliꞌmi golo velesi gulivesi neineꞌ nene zahi golo velesi gulivesi neive. Longoꞌ o-ngedavo ingine Kaesaleꞌ ma ve laniꞌ.
MAR 12:17 Likevo Izesuꞌ tiꞌ lo lo-ngimineꞌ: Tiꞌ li ma aꞌmine moni nene ngamani gizebo ve eiꞌ Kaisaleꞌ initeꞌve noloseinako aꞌminemuꞌ nolivo ma nene ha imilo. Idoꞌ aꞌmineꞌmine igi Oꞌmosoꞌmo lingimineꞌ initetoꞌ nene ha golo hizi imilo. Neꞌmine lavo ingine golize naba li-daniꞌ.
MAR 12:18 Idoꞌ Sadukaioꞌ monoꞌ laaꞌ ave helakutiꞌ otaaꞌ ne nomive laaꞌ ave engikutiꞌ linge ma Izesuda igi longoꞌ i-di tiꞌ li laniꞌ:
MAR 12:19 Tisazo, Moseꞌ aza luhuvo gize-lidineꞌ nene tiꞌ lo neive: Uvoꞌninge nakuꞌninge ma minilizangutiꞌ maliꞌmo veneꞌ do mino izipe gedamo helavo ma engikutiꞌ maliꞌmo aꞌmine gevonoꞌ veneꞌ nene dosa aꞌmine hilive nemuꞌ medelo izipe gedo molo-delive.
MAR 12:20 Neꞌmino nenako uvoꞌninge nakuꞌninge seveni ma minaniꞌ. Aꞌmingutiꞌ uvoꞌnibo ganaꞌve neꞌmo veneꞌ do mino izipahala sotoꞌ amavo hilineꞌ.
MAR 12:21 Helavo akunolo aꞌmidotiꞌ neꞌmo aꞌmine veneꞌ nene do mino izipe sotoꞌ amivo hilineꞌ. Idoꞌ helavo akunolo aꞌmidotiꞌ neꞌmo aꞌmine veneꞌ daniꞌza izipe gedamo hilineꞌ.
MAR 12:22 Neꞌmine igi aꞌmine veneꞌ dikaꞌ dikaꞌ igi izipe gidami ve seveni ingine mukitoꞌ hilikaꞌ hilikaꞌ igi osuꞌ laniꞌ. Neꞌmine ikevo alingeꞌ aꞌmine venekisi nene hilineꞌ.
MAR 12:23 Neꞌmine ogavo aꞌmine veneꞌ nene aꞌmine ve seveni mukiꞌ nete daniꞌ nenako eveneꞌ mukiꞌ hilangutiꞌ otiliza gameneuꞌ nene zahi elenaho loloꞌ ilive.
MAR 12:24 Likevo aza tiꞌ lo lo-ngimineꞌ: Lingine gili gopo aniꞌ nene Oꞌmosoꞌmi gamazi monoꞌ godolouꞌ gizi nizaniꞌ ma nene gili vevesami Oꞌmosoꞌmi amuzomukisi ma gili lamineꞌ isaꞌmaniꞌ nenako nemuꞌ nene gili gopo aniꞌ ve. Olo.
MAR 12:25 Neꞌmine noluvoniꞌ nene nemuꞌ noluve. Helaakutiꞌ otaaꞌ gameneuꞌ nene veneꞌ daaꞌ idoꞌ veloꞌ vaaꞌ monovo nene ma minamoloseive. Asi Oꞌmosoꞌmi angeloꞌve ha minaaꞌ naniꞌ neꞌmini eveneꞌ inginesi ha minilisave.
MAR 12:26 Idoꞌ lingine helaakutiꞌ otaaꞌ nemuꞌ likeze. Aꞌminemuꞌ ma Lo-lengemelove. Moseꞌ aza zautiꞌ oloꞌ gulumo ogavo ninge neivo Oꞌmosoꞌmo gamazi tiꞌ lo lo-imineꞌ monoꞌ godolouꞌ gize neineꞌ ma nene gati gilahe gilamave: Naza nene Abalahamule Isakale Zakobole engiꞌ Oꞌmosoꞌine nouve lineꞌ.
MAR 12:27 Idoꞌ aꞌmine ve hili osuꞌ ladiniko engiꞌ Oꞌmosoꞌine nouve ngelo ma lamidine. Engiꞌ Oꞌmosoꞌine nouve lineꞌ neꞌmo mo hili osuꞌ lami ha nizave lo gelelesune. Nemuꞌ nene lingine hilave nene mudise osuꞌ laaꞌ nave laaꞌ naniꞌ nene mo ladanga gehepeve nilave lo lo-ngidineꞌ.
MAR 12:28 Neꞌmine li gamazidunuꞌ ge hulo ne hulo li gamazi gono di nizavo monoꞌ apize ngemaaꞌ ive maliꞌmo ogo gele minineꞌ nene Izesuꞌni longoꞌ i-dikevo aꞌmidoꞌ nene do lamineꞌ ogo do velepeꞌ izo nolo-ngimivo gelo tiꞌ lo longoꞌ o-do lineꞌ: Oꞌmosoꞌmo louꞌ gamazi lo huko-lidineꞌ neutiꞌ nene gamazi mukiꞌ ngivileꞌ ogo nani gamaziꞌmo dizosa neive.
MAR 12:29 Lavo Izesuꞌ tiꞌ lo lo-imineꞌ: Dizo neineꞌ gamazi nene neꞌmine lo neive: Lingine Isilaeleꞌ aleve gililo. Guvelesi ve Oꞌmosote neve nene eiꞌ hamoꞌ Guvelesi ve ne neive.
MAR 12:30 Nemuꞌ nene lutine gatine vodinesi amuzotine vaiꞌ nesi nene Guvelesi ve Oꞌmosotida nene mili osuꞌ li lutine imivoꞌ minilo.
MAR 12:31 Idoꞌ aꞌmidotiꞌ lemo nene tiꞌ lo neive: Lingine lengiꞌ okodinemuꞌ gilaaꞌ naniꞌ neꞌmine igi eveneꞌ avita gidini nizavemukisi nene gili lutine ngimilo. Aꞌmine gamazi setaꞌ ngivileꞌ ogo minineꞌ louꞌ gamazi nene gohi ma nomive.
MAR 12:32 Lavo monoꞌ apize ngemaaꞌ ive aza tiꞌ lo lo-imineꞌ: Tisazo, mo lamineꞌ gehepeve lane. Oꞌmoso nene hamoꞌ neivo Oꞌmoso gohi ma nomive lo laineꞌ nene mo lamineꞌ lane.
MAR 12:33 Idoꞌ lute gatesi amuzote vaikisi nene mudise ezela molo mino lute emo minaaꞌ idoꞌ leliꞌ okodemuꞌ gelaaꞌ nouneꞌ neꞌminosa evenekumuꞌ gelo lute ngemaaꞌ neꞌmo nene initeꞌ olokuꞌ gizo Oꞌmoso lehize-daaꞌ idoꞌ ato atoꞌ niteꞌ lehize-daaꞌ monovo nene ivileꞌ goloso ogosa naba neive. Mo lamineꞌ lane.
MAR 12:34 Neꞌmine lavo aza gele vevese mino neꞌmine lineꞌ nene gelo Izesuꞌ aza tiꞌ lo lo-imineꞌ: Oꞌmosoꞌmo gizebo o neinguꞌ vo holalinidoꞌ avitoꞌ ogane. Neꞌmine lavo gili ngehelele izavo eveneꞌ hamolitesi initeꞌ mamuꞌ gohi longoꞌ i-damaniꞌ.
MAR 12:35 Izesuꞌ aza monoꞌ numuno nabauꞌ monoꞌ noapize ngemo tiꞌ lo longoꞌ o-ngidineꞌ: Monoꞌ apizi lingimaaꞌ ave nete Oꞌmosoꞌmo do luꞌ izelive lo imiselelesa live nene mo ha Davidiꞌ aꞌvopilemoꞌ neive laaꞌ naniꞌ nene nanimuꞌ laaꞌ nave.
MAR 12:36 Oꞌmosoꞌmi Sikalahuliꞌmo do ote-davo asiꞌve Davidiꞌ neꞌmo nene tiꞌ lo lineꞌ ma neive: Okulumukuꞌ ve aza Guveꞌnesi vemuꞌ tiꞌ lo lo-imineꞌ ve: Nezelotiꞌ geiꞌ nene nange. Aꞌne hulaaꞌ uvoda mene minezo. Nanivo biluvaꞌ i-gidaaꞌ nave nene gizengala doꞌmo leme-ngedekuvo gelekeleꞌ i-gidi minilisave.
MAR 12:37 Neꞌmino asiꞌve Davidiꞌ neꞌmo nene aꞌmine do luꞌ izelive lo Oꞌmosoꞌmo imiselelesa livemuꞌ Guveꞌnesi ve ve lo lineꞌ nenako nemuꞌ nene aꞌmine ve aza ha Davidiꞌ aꞌvovoꞌ nene nado minelive. Olo. Neꞌmine lo monoꞌ nolivo di geseꞌ ave mukiꞌ ingine laniteꞌ gili minisa gapepeꞌ i minaniꞌ.
MAR 12:38 Izesuꞌ aza monoꞌ noapize ngemo imineꞌ molo tiꞌ lo lineꞌ: Monoꞌ apizi lingimaaꞌ aveti monovo nene dikelizaze. Eheꞌ igi minilo. Ingine nene lavolavo haꞌna haꞌna liki monaakumukovoꞌ ngumo helaaꞌ neivo idoꞌ maketiloꞌ nimonavo evenelite ningi ngopoꞌni li-ngidilizangumukovoꞌ ngumo helaaꞌ neivo
MAR 12:39 idoꞌ monoꞌ numungukisi idoꞌ nosoꞌ niteꞌ naba nadasi ingine nene ve nabalitevoꞌ minaaꞌ aniꞌ holomoloꞌ minaakumukovoꞌ nene ngumo helaaꞌ neive.
MAR 12:40 Idoꞌ ingine veneꞌ gonoliti initeꞌ mataꞌine nene di gopo igi di engita igi idoꞌ apa niteꞌ igi gamazi haꞌna haꞌna li Oꞌmosola laaꞌ nave. Gamene nabauꞌ aꞌmine ve nene Oꞌmosoꞌmo lihime naba goloso ngemeleseive.
MAR 12:41 Izesuꞌ aza monoꞌ numuno nabauꞌ moni milaaꞌ aniꞌ bokisi gahevela mino eveneꞌ mukiꞌ aꞌmine bokisiuꞌ moni nihulavo ninge minineꞌ. Moni heneni ve mukiꞌ nete nene moni vaiꞌ hulikaꞌ hulikaꞌ navo
MAR 12:42 veneꞌ gevonoꞌ gohoꞌ minineꞌ ma aza ogo guleheꞌ moni ngomo setaꞌ hulineꞌ. Aꞌmine moni ngomo setaꞌ nene do bizo tili (3) toea ogaꞌ neive.
MAR 12:43 Neꞌmine ogavo Izesuꞌ izipahala zuho asi lo-ngemavo ezela ikevo tiꞌ lo lo-ngimineꞌ: Laminetoꞌ nolo-lingimuve. Veneꞌ gevonoꞌ gohoꞌ veneꞌ meꞌmo moni hulineꞌ neꞌmo nene eveneꞌ mukitoꞌ moni hulaniꞌ nene ngivileꞌ ivosa hulave.
MAR 12:44 Neꞌmine ngivileꞌ ogo hulave luvoniꞌ nene eveneꞌ mukiꞌ ingine moniꞌine vaiꞌ lo miningutiꞌ hulaniꞌza aza nene nosoꞌ niteꞌve do sotoꞌ ilineꞌ initeꞌ gohi ma minamivo initeꞌ mataꞌ gohoꞌ neingutiꞌ nene hulave lo lo-ngimineꞌ.
MAR 13:1 Izesuꞌ monoꞌ numuno nabautiꞌ nolimivo izipahala zuhoutiꞌ maliꞌmo tiꞌ lo lo-imineꞌ: Tisazo, ningezo. Numuno mene geheni amebe gehenidunuꞌ numuno atoliꞌmine lamineꞌ goloso gizikeve.
MAR 13:2 Lavo Izesuꞌ tiꞌ lo lo-imineꞌ: Numuno naba mene ninge nabe. Neꞌmi geheniꞌve nene bili ngululubizi hulikevo geheni sitaꞌ neꞌminesi ma bizi minamilisasive.
MAR 13:3 Neꞌmine lo Oliva gololoꞌ dizo monoꞌ numuno nabala vele ize hulo neivo Petolole Zakobole Zohanele Adeleale angisevoꞌ mini Izesuꞌni longoꞌ i-daniꞌ:
MAR 13:4 Idiꞌne laineꞌ initeꞌ nene naniheꞌ sotoꞌ ilive. Idoꞌ aꞌmine gamazi nene gihile izelesa neivo noso molo naniteꞌ naniteꞌ sotoꞌ ilihe. Nemuꞌ lo-lemezo.
MAR 13:5 Tiꞌ li longoꞌ i-dikevo aza apiꞌ ogo tiꞌ lo lo-ngimineꞌ: Ve malite gotine izi lengeleꞌmize gopo ikelizaze. Lingine eheꞌ igi ningisa minilo.
MAR 13:6 Eveneꞌ mukiꞌ nete nene neniꞌ guliveꞌne igi aꞌmine Oꞌmosoꞌmo do lunguꞌ izelive lo nimiselelesa live ma nene naꞌmo nouve li goꞌine izi eveneꞌ mukiꞌ ngeleꞌmize gopo ilisave.
MAR 13:7 Idoꞌ lovo sotoꞌ neivo nigili ma idoꞌ ebeꞌ mala mala lovo sotoꞌ neivo neꞌmi gamazi nigili ma upuhoꞌ igi golise gilamilo. Aꞌmine initeꞌ nene sotoꞌ oloseiha initeꞌ vaiꞌ osuꞌ lilineꞌ gamene naba nene aꞌmidoꞌ olihe sotoꞌ amive.
MAR 13:8 Idoꞌ misubo mauꞌ vete misubo mauꞌ vesi lovo hizilisave. Idoꞌ guvelesi ve naba maliꞌmi zuhote guvelesi ve naba maliꞌmi zuhosi lovo hizilisave. Misubo ato atota mimiꞌ okaꞌ okaꞌ oloseive. Idoꞌ gaꞌna naba helaaꞌ gamene nevosi nene sotoꞌ okaꞌ okaꞌ oloseive. Venelite izipe gidilisa mulumo apiꞌ igi gili gilikaꞌ gilikaꞌ iꞌmi iꞌmi navo alingeꞌ izipahaꞌine sotoꞌ ogaꞌ neive. Aꞌmineꞌmine ogo aꞌmine mulumo niteꞌ sotoꞌ ilineꞌ nene ha apiꞌ ilineꞌ nenako nemuꞌ nene gilikaꞌ gilikaꞌ iꞌmi navo alingeꞌ naza sotoꞌ olosuve.
MAR 13:9 Idoꞌ lingine nene eheꞌ igi ningisa minilo. Kanisoleꞌnidoꞌ gonitoꞌ lengeleꞌmizi milalisave. Monoꞌ numuꞌninguꞌ lingibililisave. Nenita giꞌmizi minangumuꞌ ve li gonitoꞌ lengeleꞌmizi milikevo guveꞌinesi ve nabaliti veꞌnidokisi ngamani nabaliti veꞌnidokisi oti mini neze monovoꞌne li sotoꞌ igi li-ngimilisave.
MAR 13:10 Neꞌmine ilizaniꞌza gamene naba olihe amivo gomuꞌ nene monoꞌ gamazi lamineꞌ di hutileꞌ igi li sotoꞌ i-ngimikevo eveneꞌ zuho ato atoꞌ mukita voloseive.
MAR 13:11 Idoꞌ adidoꞌ di lengeleꞌmizi gonitoꞌ milalisa navo ma nani gamazi lolone li gatine mukiꞌ gilamilo. Lengiꞌ gamazi nomive. Oꞌmosoꞌmi Sikalahuꞌ eiꞌ gamazi lilisanaze. Asi Oꞌmosoꞌmo aꞌmine gameneloꞌ gatinguꞌ do sotoꞌ ilineꞌ gamazivoꞌ nene lilo.
MAR 13:12 Idoꞌ eveneꞌ nenikumuꞌ gili eleꞌvoleꞌ amaniꞌ nete nene nenikumuꞌ gili eleꞌvoleꞌ ave nene ngibili hililizave li gonitoꞌ ngeleꞌmizi milalisave. Ee, mo uvoꞌninge nakuꞌninge nilizaniꞌ netesi idoꞌ izeꞌninge meꞌninge izipahaꞌine zuho nilizaniꞌ netesi nene ha neꞌmine ilisave.
MAR 13:13 Neniꞌ guliveꞌne di minilizangumuꞌ eveneꞌ mukiꞌ nete nene lengikumuꞌ goloso gililisave. Neꞌmine ilizaha eveneꞌ ma nenikumuꞌ ha gili eleꞌvoleꞌ igi mini huli-nidamavo gamene naba ilineꞌ nene Oꞌmosoꞌmo do nguꞌ izeleseive.
MAR 13:14 Alingeꞌ nene ebeꞌ do goloso ilineꞌ initeꞌ goseleꞌ niteꞌ goloso gehepeve ma aloseive laniꞌ ma nene aꞌmida minamilidoꞌ o neineꞌ ebeta sotoꞌ oloseive. (Aꞌmene gizuvoniꞌ gamazi mene gato nogelo ma gatelinive gaza gele ngoloꞌ lo gelezo.) Neꞌmino sotoꞌ neivo niningi ma Zudaia misubo meuꞌ nilizave lingine aꞌmidoꞌ geti golise golola vi halekilizave.
MAR 13:15 Ehe, aꞌmine gameneuꞌ nene silibe ogo minaaꞌ nene nominako ve ma ingine numuꞌine avitasi nilizadotiꞌ nene iheꞌ numuꞌninguko vi initeꞌ mataꞌine aꞌminguꞌ neineꞌ nene di vamilisave.
MAR 13:16 Idoꞌ minguꞌ nilizadotiꞌ nene okoꞌnidoꞌ initeꞌine dalisa tineꞌ mili numunguꞌ amilisave.
MAR 13:17 Agae, aꞌmine gameneuꞌ nene izipahaꞌine minineꞌ venekumukisi idoꞌ izipe amidoꞌ nizaniꞌ venekumukisi nene mo mulumo gele-ngedekuve. Geꞌnebe goloso ilisave.
MAR 13:18 Luvoniꞌ initeꞌ nene goline gameneuꞌ sotoꞌ ogalive li Oꞌmosola li minilo.
MAR 13:19 Ne nanitekumuꞌ ve. Oꞌmosoꞌmo initeꞌ mataꞌ do sotoꞌ idotiꞌ idise noneꞌ gamenela mene mulumo alumo niteꞌ naba neꞌmine gomuta sotoꞌ amineꞌ nenako apiꞌ ogo aꞌmine gameneloꞌ sotoꞌ oloseive. Idoꞌ sotoꞌ ilidotiꞌ nene alingeꞌ gohi ma neꞌmino sotoꞌ amoloseive.
MAR 13:20 Guvelesi veꞌmo aꞌmine gamene nene mine haꞌna ogalive lo bele hukolove ma lamidiniko eveneꞌ hamoꞌ veꞌinesi ma minamadineꞌza eiꞌ evenele ve lo ngeleꞌmize kegesineꞌ evenelemuꞌ nene gelosa aꞌmine gamene nene mine haꞌna alive lo bele hukolosa lineꞌ ve.
MAR 13:21 Aꞌmine gameneuꞌ nene ve maliꞌmo ningilo. Oꞌmosoꞌmo do luꞌ izelive lo imiselelesa live aza mela neive lo idoꞌ ningilo. Holela neive lo nolo-lingimivo ma nene gili imamilo.
MAR 13:22 Idoꞌ nanitekumuꞌ ve. Eveneꞌ ma nete soza li linge ma Oꞌmosoꞌmo do lunguꞌ izeline lo nimiselelesa live nouve li idoꞌ linge ma Oꞌmosoꞌmi gamazi lo sotoꞌ ogaꞌ nouve polohete nouve li sotoꞌ igisa Oꞌmosoꞌmo eiꞌ ve lo ngeleꞌmize kegesineꞌ eveneꞌve nene goꞌine izekunivo leꞌmetilizahe li ngeleꞌmize gopo ilisa atoꞌ nitekisi eveneꞌ golize laaꞌ nitekisi di sotoꞌ igi ngelebizilisave.
MAR 13:23 Mene initeꞌ nene olihe sotoꞌ amivosa initeꞌ mukikumuꞌ gomuꞌ nolo-lingimuze. Ehe, mo gizebo lamineꞌ igi minilo.
MAR 13:24 Aꞌmine mulumo niteꞌ sotoꞌ ogo minelineꞌ gamene osuꞌ lavo alingeꞌ nene holiꞌmi labanala nolihizivo ikeꞌniꞌmi labanala osuꞌ lavo
MAR 13:25 sonohiꞌ nene okulumokutiꞌ diꞌmoziꞌ moziꞌ navo okulumokuꞌ amuzoꞌinesi niteꞌ nene moꞌmongoꞌ i geseꞌ navo
MAR 13:26 Oꞌmosolatiꞌ ve gihile neniꞌ nene amuzo naba do mino labanaꞌnesi limuso avileloꞌ nolimuvo ningilisave.
MAR 13:27 Neꞌmine ogo angeloꞌ ngimiselekuvo vi ngeleꞌmize kegesuvoniꞌ eveneꞌne nene misubo ato atokuꞌ miniꞌmi minaniꞌ ebeꞌ mukikutiꞌ nene moni ngeleꞌmizi di nubo i-ngidilisave.
MAR 13:28 Idoꞌ gohuno zaloꞌ lo molaloniꞌ nene gili lamineꞌ igi gililo. Lingine Zuda veti misubotida mene gohuno zalotiꞌ sisive hoꞌlavo mo hoꞌ gamene alitave li ningi gilaaꞌ nave.
MAR 13:29 Idoꞌ aꞌmineꞌmine ogo aꞌmine nolo-lingimuvo niteꞌ nene sotoꞌ neivo ma aza avitoꞌ ogo mo nene hetelelesa neive li ningi gililisave.
MAR 13:30 Laminetoꞌ ma lo-lengemeloze. Gililo. Aꞌmine gameneloꞌ aleve nene ha mini olihe hili osuꞌ lamavosi aꞌmine initeꞌ mukiꞌ nene sotoꞌ ilisave.
MAR 13:31 Okulumoki misubogi nene ha vi osuꞌ lilisasineꞌza aꞌmine gamaziꞌne nene mo osuꞌ lamo eleꞌvoleꞌ ogo mineleseive.
MAR 13:32 Neꞌmine o neineꞌza aꞌmine sotoꞌ ilineꞌ gamenemuꞌ nene ve hamolitesi ma gelamune. Idoꞌ Okulumokuko angelolesi nene gilamave. Idoꞌ Oꞌmosoꞌmi gipele nazasi nene ma gelamuve. Meꞌneho eiꞌ hamoꞌ nene gele neive.
MAR 13:33 Sotoꞌ ilineꞌ gamene nene naniheꞌ nolihe lingine ma gilamanaze. Eheꞌ igi gizebo igi minilo.
MAR 13:34 Idoꞌ ma neꞌmino neive: Ve maliꞌmo venenga volosa numuꞌve ebeꞌve hulosa gelekeleꞌ izipahala initeꞌveloꞌ gizebo ve hulo-ngedo hamoꞌ hamoꞌ nene gono ngemo gatedoꞌ gizebo ilivemuꞌ nene gatedoꞌ gizebo lekeseve ilive lo lo-doosa vineꞌ ve.
MAR 13:35 Numuno meleho alineꞌ gamene nene nivengaꞌ alihe holukaꞌ oloꞌmudise alihe goꞌ nuvonuvo neivo nehe goꞌ lo labanaꞌ elelesa neivo nehe lingine gilamanaze. Liteꞌ lo ogo ingi nizavo ningalize. Nemuꞌ gizebo lamineꞌ igi minilo.
MAR 13:37 Lengiꞌ nolo-lingimuvoniꞌ gamazi mene eveneꞌ mukikumukisi nene noluve. Gizebo lamineꞌ igi minilo.
MAR 14:1 Isilaeleꞌ aleveti avotemote Aigita misubouꞌ minaniꞌ gameneuꞌ Oꞌmosoꞌmo iseꞌine izingumuꞌ gelo holiseꞌ mino nosoꞌ niteꞌ naaꞌ nouneꞌ gamene adoꞌ lulu izamineꞌ beleti naaꞌ nouneꞌ holiseꞌ nene olosa gamene setaꞌ lumo ha neivo evenetoꞌ medeli mini Oꞌmoso initeꞌ lehizi-daaꞌ ave nabasi monoꞌ apizi ngimaaꞌ avesi Izesuꞌni analoꞌ di bililisa gilaniꞌza holiseꞌ gameneuꞌ nene eveneꞌ vaiꞌ di geseꞌ igi ningi nizavo analoꞌ daloneꞌ nene lovo di sotoꞌ ikelizanako holisekuꞌ nene alamolone li zegeni analoꞌ di bililiza akamuꞌ viseꞌ iꞌmi vi minaniꞌ.
MAR 14:3 Neꞌmine igi nizavo Izesuꞌ Betani numuda mino ganadise gozopoꞌ ma gize dave Simoniꞌ neꞌmi numuꞌveuꞌ dizo mino nosoꞌ niteꞌ no neivo veneꞌ maliꞌmo unuvo laminekisi uveli lamineꞌ gehepeve meniꞌve dizo minineꞌ gulive nalida nene luhuvo laminekisi gehenidunuꞌ liliꞌ aniꞌ botolokuꞌ minineꞌ nene do ogo botololiꞌmi velela ize siꞌze hulo aꞌmingutiꞌ uveli nene Izesuꞌ godolouꞌ leke-dineꞌ.
MAR 14:4 Leke-davo eveneꞌ linge ma nete muluꞌninguꞌ goloso gili engikuꞌ tiꞌ li laniꞌ: Uveli nene nani monovomuꞌ do labuluvo neive.
MAR 14:5 Aꞌmine uveli nene maketi miladini sigisi hadeti Kina (K600) ivileꞌ ivosa moni naba dadinako maketi mili meni di gohoꞌ gahaliꞌ ngimilizanako ve li elemikevo
MAR 14:6 Izesuꞌ aza gelo tiꞌ lo lineꞌ: Huli-dilo. Aza naniteꞌ do goloso ogavosa genivesi gamazi nili-dave. Veneꞌ neꞌmo initeꞌ lamineꞌ noo-nidivo ede vive.
MAR 14:7 Nene nanitekumuꞌ ve. Lingine nene gohoꞌ gahaliꞌ alevesi mini di vi minilizaniꞌ nenako lingine ngeleꞌmize lamineꞌ olone li gililizaniꞌ nene nani gamenela gililizahe aꞌmidoꞌ ha ngeleꞌmize lamineꞌ ilisaniꞌza nezesi nene mudive ma mini di vi minamilisave.
MAR 14:8 Aza ilidoꞌ o minineꞌ niteꞌ nene ogave. Galese izi-nidilizangumuꞌ nene gomuꞌ okoꞌne do lamineꞌ o-nedo holo-nedave.
MAR 14:9 Naza laminetoꞌ lo-lengemeloze. Gililo. Monoꞌ gamazi lamineꞌ mene di misubouꞌ misubouꞌ moni li-ngimilizadaa nene eze guvele nene ha gili minilizave li aza initeꞌ o-nidineꞌ nemukisi li sotoꞌ igi li-ngimilizave.
MAR 14:10 Neꞌmine ogavo Izesuꞌ izipahala zuho tuvelu engikutiꞌ Kelioto numudotiꞌ ve ma gulive Zudaꞌ aza Izesuꞌni ngelebizekuvo dalizave lo evenetoꞌ medeli mini Oꞌmoso initeꞌ lehizi-daaꞌ ave nabala vo lo-ngimineꞌ.
MAR 14:11 Lo-ngemavo muluꞌninguꞌ lamineꞌ gili moni emelone lii li huki-dikevo aza vo Izesuꞌni nene ngelebizeli akamuꞌ viseꞌ ogo minineꞌ.
MAR 14:12 Zuda vete lulu izamineꞌ beleti naaꞌ nouneꞌ holiseꞌ nene apiꞌ neivo Oꞌmosoꞌmo avotemotine iseꞌine ize-ngidingumuꞌ gele mino naaꞌ nouneꞌ nosoꞌ niteꞌ naloningumuꞌ sipisipi angale belaaꞌ nouneꞌ gameneloꞌ nene Izesuꞌ izipahala zuho nete tiꞌ li longoꞌ i-daniꞌ: Oꞌmosoꞌmo avotemotine iseꞌine ize-ngidingumuꞌ gelo naaꞌ nouneꞌ nosoꞌ niteꞌ nene zala vo do vaꞌvaꞌ o-gedelone lo nolane.
MAR 14:13 Likevo izipahala zuhoutiꞌ ve setaꞌ ma nongimiselo tiꞌ lo lo-ngimineꞌ: Numuno nabala vi nihetelasivo ve maliꞌmo misubo somouꞌ noso ohizo geho navo voteneꞌ ilisaze. Lingine eꞌmeti vilizo.
MAR 14:14 Numuno mauꞌ dizo vavo ma aꞌminguꞌ vi numuno neꞌmi melehine tiꞌ li li-imilizo: Tisate neꞌmo tiꞌ lo lave: Nazasi izipahaꞌnesi Oꞌmosoꞌmo avotemotine iseꞌine izingumuꞌ gelo naaꞌ nosoꞌ niteꞌ naloneꞌ numuno lulo nene zauꞌ nalone.
MAR 14:15 Likesivo numuno meleho aza numuno veletoꞌ mino galaꞌmudoꞌ mino ingutiꞌ veletoꞌ nene lulo nabasi mininguꞌ initeꞌ mataꞌ aviliseꞌ i nizaniꞌ nene lengelebizeleseive. Aꞌminguꞌ nene nosoꞌ nitete di vaꞌvaꞌ ilizo.
MAR 14:16 Tiꞌ lo lo-ngemavo izipahala setaꞌ ingine oti numuno nabala vi heteli lo-ngimineꞌ maꞌmine ogavo Oꞌmosoꞌmo iseꞌine izingumuꞌ gelo naaꞌ nouneꞌ nosoꞌ niteꞌ nene di vaꞌvaꞌ asineꞌ.
MAR 14:17 Neꞌmine ikesivo mo nivengaꞌ molavo Izesuꞌ aza izipahala zuho tuvelu nesi aniꞌ.
MAR 14:18 Nosoꞌ niteꞌ ni nizavo Izesuꞌ aza tiꞌ lo lineꞌ: Laminetoꞌ ma lo-lengemeloze. Gililo. Nosoꞌ niteꞌ nonunive lengikutiꞌ maliꞌmo nenikumuꞌ me neive lo biluvaliti aꞌninguꞌ molaloseive.
MAR 14:19 Lavo ingine mulumo gili igi hamoꞌ hamoꞌ longoꞌ i-daniꞌ. Nenikumuꞌ lamo nolosane. Olo.
MAR 14:20 Neꞌmine li longoꞌ i-dikevo aza tiꞌ lo lo-ngimineꞌ: Aꞌmine ve nene lapese hamokutiꞌ nonunive tuvelu lengikutiꞌ hamoliꞌmo neꞌmine oloseive losa noluve.
MAR 14:21 Ee, Oꞌmosolatiꞌ ve gihile nenikumuꞌ polohetelite gizi nizadoꞌ eꞌmeto heleloniꞌ akaloꞌ novuvoniꞌza biluvalite neniꞌ dalizave lo do sotoꞌ o-nedelive nene agae, mo mulumo gono goloso daloseinako nemuꞌ aꞌmine ve aza izeleho ma gedamidiniko aꞌmine mulumo gono sotoꞌ o-delesa neineꞌ akaloꞌ nene ma mine molo minamivo lamineꞌ o minidine.
MAR 14:22 Nosoꞌ niteꞌ ninavo Izesuꞌ aza beleti do Oꞌmoso opoꞌni lo gito nongemo tiꞌ lo lineꞌ: Dalo. Mene neniꞌ meꞌmeleꞌne ma ne neive.
MAR 14:23 Neꞌmine lo vaini gomise do Oꞌmoso opoꞌni lo ngemavo aꞌmingutiꞌ vaini noso ninavo
MAR 14:24 tiꞌ lo lineꞌ: Oꞌmosoꞌmo lo huko-lidineꞌ gamazi nene do eleꞌvoleꞌ ilineꞌ vaniseꞌne nene eveneꞌ mukikumuꞌ ve lo lekeloniꞌ vanise mene neive.
MAR 14:25 Laminetoꞌ lo-lengemelove. Naza vaini gihileꞌmi novozo nene gohi ma namo mino alingeꞌ Oꞌmosoꞌmo gizebo o-lengedelineꞌ gameneloꞌ nene aꞌmine novozo atoliꞌmine gosohoꞌ nalosuve.
MAR 14:26 Neꞌmine lavo monoꞌ nama lisa limi heta igi Oliva golola dizi vaniꞌ.
MAR 14:27 Dizi minikevo Izesuꞌ tiꞌ lo lo-ngimineꞌ: Monoꞌ Godolouꞌ nene Oꞌmosoꞌmo lineꞌ gamazi ma tiꞌ li gizi nizaniꞌ ve: Gizebo veꞌine belekuvo sipisipi ize hutileꞌ igi vilisave. Tiꞌ li gizi nizaniꞌ nenako lingine mukiꞌ huli-nidii vilisaniꞌza
MAR 14:28 helekuvo Oꞌmosoꞌmo neleꞌmize otavo gomuꞌ molo-lengemo nGalilaia misubouko volosuve.
MAR 14:29 Lavo Petoloꞌ aza tiꞌ lo lo-imineꞌ: Ingine mukitoꞌ huli-gidii vilizaniꞌza neniꞌ nene mo neꞌmine amolosuve.
MAR 14:30 Lavo Izesuꞌ tiꞌ lo lo-imineꞌ: Laminetoꞌ nolo-gimuve: Idise holukaꞌ gehepeve nene okoloho nolo setaꞌ olihe molamivo gaza gamene setohamo ataize lo-nedelesane.
MAR 14:31 Lavo Petoloꞌ pigi izo tiꞌ lo lineꞌ: Oꞌove. Ge gibili hili nesi nibili hililisa lilizanikisi nene ataize lo-gedamolosuve. Lavo izapahala zuho linge nesi aꞌmineꞌmine li osuꞌ laniꞌ.
MAR 14:32 Idoꞌ ingine vi ebeꞌ ma gulive Gesemani nela vi hetelikevo izipahala zuho tiꞌ lo lo-ngimineꞌ: Naza Oꞌmosola nololongumuꞌ lingine meloꞌ mitoꞌ minilo.
MAR 14:33 Neꞌmine lo Petolole Zakobole Zohanenginevoꞌ ngeleꞌmizo novivo Izesuꞌ mulunouꞌ nene apiꞌ ogo hongiliꞌ hongiliꞌ ogo minivo gala mukiꞌ gilidiꞌmo mulumo naba gelo
MAR 14:34 tiꞌ lo lo-ngimineꞌ: Naza mo muluꞌneuꞌ mulumo goloso ogo geni naba idiꞌmo heleloniꞌ akaloꞌ mine molokuve. Lingine meloꞌ gizebo igi ningi minilo.
MAR 14:35 Izesuꞌ aza neꞌmine lo ngomo ma hotoꞌile novo misuboloꞌ golo hizo ongo aꞌmine mulumo gamene nene ivileꞌ ogo vilidoꞌ o nolineꞌ nene ivileꞌ ogo viliho lo ivileꞌ ogo vilingumuꞌ Oꞌmosola lo tiꞌ lo lineꞌ:
MAR 14:36 Ahono meꞌneho make, osoꞌ amosoꞌ initekisi ha ilinidoꞌ o neineꞌ nenako mulumo ekeseꞌ naaniꞌ mene do olovoꞌ o-nedezo. Do olovoꞌ o-nedelineꞌza neniꞌ luꞌneloꞌ amozo. Asi geiꞌ lukaloꞌ ozo.
MAR 14:37 Neꞌmine lo tineꞌ molo vo okise ingi nizavo ningo Petoloꞌni tiꞌ lo lo-imineꞌ: Simoni, gaza okise ongo nabe. Gamene ngomosi vanu aua neꞌminemuꞌ ha veka ma ninge minamilinidoꞌ o nehe.
MAR 14:38 Lengemenguꞌ milalizanguꞌ nene gopo ikelizaze. Gizebo igi Oꞌmosola li minilo. Ee, lutine neꞌmo gono dalosa neiha okodine neꞌmo nene geni o neive.
MAR 14:39 Tiꞌ lo lo-ngemo gohi vo gomuꞌ lidiꞌmino Oꞌmosola loo
MAR 14:40 gohi tineꞌ molo ogo ningineꞌ nene veꞌine hihiꞌ ogavo okise ingi nizavo ningineꞌ. Neꞌmine neivo nadive lo-emelone lii li-imiliza gamazimuꞌ viseꞌ igi minaniꞌ.
MAR 14:41 Gohi vosa iheꞌ ogo gamene setohamo ogavo tiꞌ lo lo-ngimineꞌ: Okise ingi mini gililisa gili nizahe. Mo aꞌnesiꞌ ve. Ningilo. Oꞌmosolatiꞌ ve gihile neniꞌ nene di sotoꞌ igi ve golosoliti aꞌninguꞌ milalizaniꞌ gamene nene mo ogaze.
MAR 14:42 Otilo. Mo volonge. Ningilo. Biluvalite dalizave lo neze do sotoꞌ ilive nene mo avitoꞌ ogave.
MAR 14:43 Tiꞌ lo nolo-ngimivo aꞌmidoꞌ geto izipahala zuho tuvelu engikutiꞌ ve gonoꞌnibo Zudaꞌ aza ogo hetelineꞌ. Idoꞌ evenetoꞌ medeli mini Oꞌmoso initeꞌ lehizi-daaꞌ ave nabasi monoꞌ apizi ngimaaꞌ avesi monoꞌ gizebo vesi mini eveneꞌ mukiꞌ ngimiselikevo bainati mitekisi gavososi davo Zudalesi makaꞌ aniꞌ.
MAR 14:44 Idoꞌ olihe igi hetelami Izesuꞌni do sotoꞌ o-ngidive neꞌmo gomuꞌ tiꞌ lo lovo gize ngimineꞌ: Golo elo nalo ve nene mo aꞌmine ve mineleseize. Dalo. Golise valize. Gizebo lamineꞌ igi eleꞌmizi vilo.
MAR 14:45 Neꞌmine losa Izesuꞌ neida geto vo Tisazo loo golo elo naniꞌ. Golo elo navo
MAR 14:46 makaꞌ ave ingine ningi analoꞌ daniꞌ.
MAR 14:47 Neꞌmine ikevo Izesulesi aꞌmida minaveutiꞌ maliꞌmo bainati miteꞌ gokutiꞌ geleleheꞌ ogo evenetoꞌ medelo mino Oꞌmoso initeꞌ lehize-daaꞌ ive nabaliꞌmi gelekeleꞌ izipeꞌmi gala belo hasaꞌ o hulineꞌ.
MAR 14:48 Idoꞌ Izesuꞌ aza analoꞌ dave tiꞌ lo lo-ngimineꞌ: Gizengize ve ma dalisa igaꞌ adiꞌmine igi bainati mitekisi gavososi di neniꞌ dalisa ahe.
MAR 14:49 Naza gamene gamene monoꞌ numuno nabauꞌ linginesi makaꞌ mino monoꞌ apize ngemaaꞌ uvoniꞌ maloꞌ nene aꞌneloꞌ damaniꞌ nehe. Aꞌmine gamene maloꞌ aꞌneloꞌ dami mini idise mene daniꞌ nene monoꞌ godolouꞌ gizi nizaniꞌ gamazi ma nene gihile izelineꞌ nenaze. Ha neꞌmine ilo.
MAR 14:50 Neꞌmine lavo izipahala zuho mukiꞌ huli-di golise vaniꞌ.
MAR 14:51 Golise vikevo gosoꞌve ma lavolavo mokonokovoꞌ liko eꞌmeto novivo ezesi daniꞌza
MAR 14:52 lavolavolokovoꞌ dikevo lavolavo apase hito bakaꞌ golise vineꞌ.
MAR 14:53 Idoꞌ Izesuꞌni eleꞌmizi evenetoꞌ medelo mino Oꞌmoso initeꞌ lehize-daaꞌ ive naba neida vaniꞌ. Neꞌmine ikevo evenetoꞌ medeli mini Oꞌmoso initeꞌ lehizi-daaꞌ ave naba mukikisi monoꞌ apizi ngimaaꞌ avesi monoꞌ gizebo vesi mukiꞌ di geseꞌ aniꞌ.
MAR 14:54 Izesuꞌni eleꞌmizi nivavo Petoloꞌ aza hotoꞌile eꞌmete-do ogo heta minamo aꞌmine dizi minaniꞌ numuno nene vodo vodo ogo minavo olusoꞌ misubo vovo haza minidoꞌ gelekeleꞌ izipe oloꞌ gizi lahizi minangukisi hozi dizo vovoꞌninguꞌ mino oloꞌ lahizo minineꞌ.
MAR 14:55 Neꞌmino neivo evenetoꞌ medeli mini Oꞌmoso initeꞌ lehizi-daaꞌ ave nabasi Zuda veti kanisole vaikisi mini nani lihimemuꞌ Izesuꞌni belelone li lihimeꞌve li sotoꞌ ilizavemuꞌ viseꞌ aniꞌza
MAR 14:56 eveneꞌ mukiꞌ soza saza gamazi likevo gamaziꞌine vo hamoꞌ amivo bililizadoꞌ o minineꞌ gamazi ma di sotoꞌ amaniꞌ ve.
MAR 14:57 Neꞌmine ikevo malite oti soza saza gamazi ezemuꞌ tiꞌ li laniꞌ:
MAR 14:58 Aza tiꞌ lo livo giluneꞌ ve: Monoꞌ numuno naba mene eveneꞌ aꞌinedunuꞌ gizaniꞌ nene izo kuso gamene setohamo ogavo gohi ma eveneꞌ aꞌinedunuꞌ gizamilizaniꞌza neniꞌ lokuvo sotoꞌ oloseive.
MAR 14:59 Tiꞌ lo live li laniꞌza engiꞌ gamazi nene vo hamoꞌ amivo
MAR 14:60 evenetoꞌ medelo mino Oꞌmoso initeꞌ lehize-daaꞌ ive nabaliꞌmo vovoꞌninguꞌ ote mino Izesuꞌni longoꞌ o-do tiꞌ lo lineꞌ: Gaza nilaniꞌ gamaziloꞌ mene do velepeꞌ izo lo-ngemelineꞌ gamazi ne nomihe. Mene ve nete geikumuꞌ nilaniꞌ gamazi nene gelanivo nadiꞌ o neive.
MAR 14:61 Tiꞌ lo longoꞌ o-dineꞌza aza vele bizo mino gamazi ma do velepeꞌ izo lo-emamineꞌ. Neꞌmine amivo evenetoꞌ medelo mino Oꞌmoso initeꞌ lehize-daaꞌ ive naba aza gohi longoꞌ o-do tiꞌ lo lineꞌ: Gulive do hozi laaꞌ nounive Oꞌmoso neꞌmi gipele do luꞌ izelive lo imiselelesa live ma nene geiꞌ ne nabe.
MAR 14:62 Neꞌmine lo longoꞌ o-davo Izesuꞌ aza tiꞌ lo lineꞌ: Aꞌmine ma nene nouve. Idoꞌ Oꞌmosolatiꞌ ve gihile naza nene amuzoꞌvesi minive Oꞌmosolotiꞌ lemo nouvoniꞌ nenako nemuꞌ ana hulaaꞌ ida mitoꞌ nouvo ningilisave. Idoꞌ Okulumotoꞌ limuso avileloꞌ nolimuvo ningilisave.
MAR 14:63 Lavo evenetoꞌ medelo mino Oꞌmoso initeꞌ lehize-daaꞌ ive naba neꞌmo Izesuꞌ aza Oꞌmoso ivileꞌ olosa gamazi goloso lihe lo gala gilineꞌ nene ngelebizelesa asiꞌve ngolokineꞌ geneganaꞌve nene do nohikelo tiꞌ lo lineꞌ: Lihimeꞌve li sotoꞌ ilizavemuꞌ nene gohi nanimuꞌ viseꞌ olone.
MAR 14:64 Oꞌmoso ivileꞌ o-do gamazi goloso lineꞌ nene langisetine mo gilikeve. Nemuꞌ lingine gilikevo nadiꞌ o neive. Lavo ingine mukitoꞌ tiꞌ li laniꞌ: Aza nene mo lihime naba daanako mo helelidoꞌ ogave.
MAR 14:65 Neꞌmine likevo malite gituhoꞌ i-di veleloꞌ hiti mini aꞌine gavoso nibili tiꞌ li laniꞌ: Zaho nogibilihe. Gaza polohetelite laaꞌ adiꞌmine ogo lo sotoꞌ ogo lo-lemezo. Likevo gelekeleꞌ izipe nete Izesuꞌni di aꞌine gatapaꞌ gavoso bilaniꞌ.
MAR 14:66 Neꞌmine igi nizavo Petoloꞌ aza numuno vodo vodo ogo minavo olusoꞌ omoꞌ naba minidoꞌ galaꞌmuda neivo evenetoꞌ medelo mino Oꞌmoso initeꞌ lehize-daaꞌ ive nabaliꞌmi gelekeleꞌ alu maliꞌmo ogo
MAR 14:67 Petoloꞌ nene oloꞌ lahizo neivo ningo ninge lamineꞌ ogo tiꞌ lo lineꞌ: Gazasi nene Nasalete ve Izesukisi minaaꞌ asive ma nene nane.
MAR 14:68 Tiꞌ lo lineꞌza aza oꞌve lo gaza laineꞌ gamazi nene gelamo aꞌmineꞌmi monovosi gele lamineꞌ amuve lineꞌ. Neꞌmine loo gateda lemo vo minineꞌ.
MAR 14:69 Minavo gelekeleꞌ alu neꞌmo gohi eze ningo aꞌmida minave gohi lo-ngimineꞌ: Mene ve nene aꞌmine zuhoutiꞌ ma ne neive.
MAR 14:70 Lavo gohi ataize gehepeve lineꞌ. nGomo lasolo ma nimini aꞌmida minave nete Petoloꞌni tiꞌ li li-imaniꞌ: nGalilaialatiꞌ nainako gaza nene mo lamineꞌ eze zuho nane.
MAR 14:71 Neꞌmine likevo aza gosohoꞌ noluvo ma Oꞌmosoꞌmo usiꞌ ize-nidivo loo laminetoꞌ noluve. Oꞌmosoꞌmi veleloꞌ lo huko noluve lo tiꞌ lo lineꞌ: Lingine naza ma ningo gelamuvemuꞌ nilave.
MAR 14:72 Lavo okoloho neꞌmo aꞌmidoꞌ geto nolo gohi ma molavo gamene setaꞌ ineꞌ. Neꞌmine ogavo Petoloꞌ aza Izesuꞌ lo-imineꞌ gamazi nene okoloho nolo gamene setaꞌ olihe molamivo gaza gamene setohamo nenikumuꞌ ataize lo-nedelesane lo lineꞌ gamazi nene gohi gelo ive naba goloso ineꞌ.
MAR 15:1 Nedengaꞌ goꞌ nolivo evenetoꞌ medeli mini Oꞌmoso initeꞌ lehizi-daaꞌ ave nabasi monoꞌ gizebo vesi monoꞌ apizi ngimaaꞌ avesi kanisole mukiꞌ nesi ingine lovo gizi gamazi li huki Izesuꞌni analoꞌ nalaꞌ di-di eleꞌmizi vi Pilatoꞌ anauꞌ milaniꞌ.
MAR 15:2 Neꞌmine ikevo Pilatoꞌ aza longoꞌ o-do tiꞌ lo lineꞌ: Gaza nene Zuda veti guveꞌinesi ve naba nabe. Olo. Neꞌmine lo longoꞌ o-davo tiꞌ lo lo-imineꞌ: Mo gasika nene nolaineꞌ ve.
MAR 15:3 Lavo evenetoꞌ medeli mini Oꞌmoso initeꞌ lehizi-daaꞌ ave naba nete initeꞌ mukikumuꞌ goniꞌ i-dikevo
MAR 15:4 Pilatoꞌ tiꞌ lo gohi longoꞌ o-dineꞌ: Ingine neꞌmine manaꞌmine nitekumuꞌ goniꞌ nogidune li initeꞌ mukikumuꞌ nilaniꞌ nene gele nabe. Nemuꞌ do velepeꞌ izo gamazi gaza ma lo-ngemelineꞌ nomihe.
MAR 15:5 Neꞌmine lo longoꞌ o-dineꞌza Izesuꞌ aza gamazi gohi ma do velepeꞌ izo lamivo Pilatoꞌ aza gala mukiꞌ gilineꞌ.
MAR 15:6 Kilisimasiloꞌ kilisimasiloꞌ Oꞌmosoꞌmo Zuda veti avotemotine iseꞌine izingumuꞌ gelo holiseꞌ minaaꞌ uneꞌ gameneloꞌ gameneloꞌ nene Zuda ve nete galapuso ve mukiꞌ minangutiꞌ nene hamoꞌ ma heta vilive li gulive ikevo Pilatoꞌ aza aꞌmine ve nene nalaꞌ numungutiꞌ hulo heta o-ngedaaꞌ ineꞌ ve.
MAR 15:7 Idoꞌ ve malite ngamani lovo ngimi eveneꞌ ngibilavo galapuso numunguꞌ huli-ngidikevo aꞌmine gameneloꞌ nene inginesi aꞌminguꞌ minaniꞌ. Aꞌmine veutiꞌ nene ve ma gulive Balabasiꞌ minineꞌ.
MAR 15:8 Minineꞌ nenako eveneꞌ mukiꞌ di geseꞌ igi Pilatoꞌ neida vi kilisimasiloꞌ kilisimasiloꞌ ogaꞌ ineꞌ maꞌmine ogo eveneꞌ ma hulo heta o-delive li longoꞌ i-di minikevo
MAR 15:9 Pilatoꞌ aza do velepeꞌ izo tiꞌ lo longoꞌ o-ngidineꞌ: Lengiꞌ Zuda veti guvetinesi ve iseve izo hulo-delongumuꞌ nilahe.
MAR 15:10 Idoꞌ neꞌmine lo longoꞌ o-ngidineꞌ nene eveneꞌ vaiꞌ Izesuꞌni eꞌmetaniꞌ nenako nemuꞌ evenetoꞌ medeli mini Oꞌmoso initeꞌ lehizi-daaꞌ ave naba nete ezemuꞌ muluꞌninguꞌ goloso gilii nemuꞌ gonitoꞌ eleꞌmizi milikeniꞌ neivo nemuꞌ Pilatoꞌ aza ningo gelo longoꞌ o-ngidineꞌ ve.
MAR 15:11 Tiꞌ lo lineꞌza evenetoꞌ medeli mini Oꞌmoso initeꞌ lehizi-daaꞌ ave naba nete eveneꞌ mukiꞌ gaꞌine di aꞌmine vemuꞌ lami Balabasiꞌ ve lilo likevo aꞌmidoꞌ gili ngimi Balabasiꞌ ve laniꞌ.
MAR 15:12 Neꞌmine likevo Pilatoꞌ aza gohi longoꞌ o-ngedo tiꞌ lo lineꞌ: Zuda veti guvetinesi ve ve lave nene nadiꞌ o-delove.
MAR 15:13 Tiꞌ lo longoꞌ o-ngedavo di velepeꞌ izi gamazi nabautiꞌ tiꞌ li laniꞌ: Gaza lanivo lohotoꞌ zaloꞌ bili hililizave.
MAR 15:14 Likevo Pilatoꞌ aza tiꞌ lo lo-ngimineꞌ: Nanitekumuꞌ lohotoꞌ zaloꞌ belelone. Initeꞌ goloso ineꞌ nene naniteꞌ nolive. Tiꞌ lo lo-ngimineꞌza ingine amuzo mili lohotoꞌ zaloꞌ beleꞌnavo li gohi geligelinga laniꞌ.
MAR 15:15 Neꞌmine likevo Pilatoꞌ nene eveneliti muluꞌine do hongu lo Balabasiꞌni hulo heta o-davo engita vineꞌ. Neꞌmine ogo Pilatoꞌ aza lavo ngibilaaꞌ aniꞌ gavosodunuꞌ Izesuꞌni mehene iziviꞌ lediviꞌ igi bilikevo di vi lohotoꞌ zaloꞌ bililizave lo Loma veti ami pilisi ve neti aꞌninguꞌ molaniꞌ ve.
MAR 15:16 Aꞌninguꞌ molavo eleꞌmizi ngamaniloꞌ gizebo ve nabaliꞌmi numuno olusoꞌ misubo vovo minidoꞌ vii ami lingela asi li-ngidikevo ikevo
MAR 15:17 guleheꞌ lavolavo guveꞌinesi vetevoꞌ ngilaaꞌ aniꞌ neꞌmine ma okoꞌnoloꞌ di ngili-di uhoni nalaꞌ nene di gangi guveꞌinesi ve nabalitevoꞌ maduꞌnidoꞌ gihaaꞌ aniꞌ niteꞌ neꞌmine ma apa niteꞌ igi liliꞌ igi gihi-di
MAR 15:18 apiꞌ igi gekeꞌ vokeꞌ li-dikaꞌ li-dikaꞌ igi mini Zuda veti guveꞌinesi ve naba ma nene gopoꞌni nolo-gidune lii
MAR 15:19 angabadunuꞌ godololoꞌ bilaaꞌ bilaaꞌ idoꞌ gituhoꞌ i-daaꞌ i-daaꞌ idoꞌ gubiꞌ izi imaaꞌ imaaꞌ igi golo izi minaniꞌ.
MAR 15:20 Neꞌmini golo izaniꞌ nene osuꞌ lavo lavolavo guleheꞌ nene apasi di huli-di eiꞌ okoꞌnoloꞌ initeꞌve nene gohi di izi-di lohotoꞌ zaloꞌ bililisa eleꞌmizi vaniꞌ.
MAR 15:21 Neꞌmine igi nivavo ve ma gulive Simoniꞌ aza Kilene ebetotiꞌ ve Alekisadeki Luhuki meꞌnibo aza Zelusalemi tauni hetatiꞌ aꞌminguꞌ dizo volosa navo voteneꞌ igi Izesuꞌ lohotoꞌ zaꞌveloꞌ nene gehe-delive li amuzonga li-dikevo geho vineꞌ.
MAR 15:22 Neꞌmine ogavo Izesuꞌni eleꞌmizi vi ebeꞌ ma gulive Goligota nene leze gamaziutiꞌ nene godolo amuzo ebeꞌ ve ladoꞌ nene vi heteli
MAR 15:23 vaini nosouꞌ mulumo gilamaaꞌ initeꞌ gulive mula nene di gopo igi imaniꞌza namineꞌ.
MAR 15:24 Namivo lohotoꞌ zaloꞌ nilidunuꞌ bilisa geneganaꞌve nene izeꞌ mili dalisa do nado izeꞌ molalone li zohiꞌ igi geheni mulo ngomo ma hulikaꞌ hulikaꞌ ikevo ngivileꞌ igi hulave nete dikaꞌ dikaꞌ aniꞌ.
MAR 15:25 Hoꞌ olihe amuzo nomolavo 9 kiloku neꞌmidoꞌ nene zaloꞌ bili di otaniꞌ.
MAR 15:26 Neꞌmine ikevo goniꞌ i-daniꞌ lihime li sotoꞌ igi luhuvo tiꞌ li gizikevo minineꞌ: Zuda veliti guveꞌinesi ve naba ve.
MAR 15:27 Idoꞌ gizengize ve setaꞌ ezesi makaꞌ lohotoꞌ zaloꞌ ngibili ma ne ana zamela di oti-di ma ne ana adavala di oti-daniꞌ.
MAR 15:29 Neꞌmine ikevo eveneꞌ igi vigi ave nete ungumuꞌ ungumuꞌ izi gizeꞌ i-di tiꞌ li laniꞌ: Oho, monoꞌ numuno naba izo kuso gamene setohamo novivo gohi gizelove laaꞌ anive gaza
MAR 15:30 geiꞌ okonga nene do guꞌ izo lohotoꞌ zalotiꞌ nene apaso lemevo.
MAR 15:31 Nilavo evenetoꞌ medeli mini Oꞌmoso initeꞌ lehizi-daaꞌ ave nabasi monoꞌ apizi ngimaaꞌ avesi aꞌmineꞌmine igi gizeꞌ i-di li voleloꞌ meloꞌ igi tiꞌ li laniꞌ: Aza eveneꞌ linge ma nene do nguꞌ izive laniꞌza eiꞌ okoꞌno nene ngelo do uꞌ izamilineꞌ ogave.
MAR 15:32 Oꞌmosoꞌmo Isilaeleꞌ ve do luꞌ izelive lo imiselelesa live leliꞌ guvetesi ve naba nolineꞌ nene lohotoꞌ zalotiꞌ lemelive. Neꞌmine ogavosa laza ningo ezemuꞌ gele eleꞌvoleꞌ oloneꞌ nenako ve li laniꞌ. Likevo lohotoꞌ zaloꞌ makaꞌ ngibilave sitaꞌ nesi aꞌmineꞌmine igi gamazi goloso li-dasineꞌ.
MAR 15:33 Idoꞌ tuvelu (12) kiloku ogavo nelotiꞌ nene ebeꞌ mukikuꞌ litiꞌmuso ize geseꞌ ogo mine do vo tili (3) kiloku nivengaꞌ ogavo gohi labanaꞌ ilineꞌ.
MAR 15:34 Idoꞌ tili kiloku ogavo Izesuꞌ aza amuzo molo asi naba lo tiꞌ lo lineꞌ: Eloi Eloi lama sabahatani. Leze gamaziutiꞌ neꞌmi monovo nene neꞌmino neive: Oꞌmosoo, Oꞌmosoꞌne make, nanitekumuꞌ hulo-nedane.
MAR 15:35 Lavo eze minineꞌ gahevela minave linge ma nete nene gili tiꞌ li laniꞌ: Gililo. Polohete Eliaꞌnimuꞌ asi nolive.
MAR 15:36 Likevo ve maliꞌmo nosouꞌ lupizisa lipi naaꞌ aniꞌ initeꞌ ma do ekeseꞌ ogaꞌ ineꞌ vaini nosouꞌ lupizo vaiꞌ lavo vilikiꞌ vilikiꞌ lo nalive lo ngongoꞌnoloꞌ izo noemo tiꞌ lo lineꞌ: Eliaꞌ lemo apase-delihe ninge minelone.
MAR 15:37 Lavo Izesuꞌ asi naba lo ahuꞌ do dizo hulo hilineꞌ.
MAR 15:38 Nohilivo monoꞌ numuno nabauꞌ izi hukikaniꞌ lavolavo nene veletatiꞌ galaꞌmuda limivo izo hoꞌlo setaꞌ ineꞌ.
MAR 15:39 Izesuꞌ ahuꞌ do dizo hulo nohilivo ami pilisi veliti gizebo veꞌine naba ma Izesuꞌ velela ote minive neꞌmo ningo tiꞌ lo lineꞌ: Ve mene laminetoꞌ mo Oꞌmosoꞌmi gipele minaniꞌ neive.
MAR 15:40 Idoꞌ veneꞌ linge ma nene hotoꞌ gidini mini ningi minaniꞌ. Aꞌmine veneꞌ mukiꞌ minanguꞌ nene Mangadala numudotiꞌ veneꞌ Maliaꞌ nesi idoꞌ eiꞌ abalaho adoꞌ Zoseki idoꞌ Zakoboꞌ ngomogi netise izeꞌnibo nesi idoꞌ Salomeꞌ nesi nene makaꞌ minaniꞌ.
MAR 15:41 Ingine nene Izesuꞌ nGalilaia misubola mono minidoꞌ eꞌmeti moni hize eleꞌ i-di makaꞌ minaniꞌ veneꞌ minaniꞌ. Idoꞌ veneꞌ linge mukiꞌ Izesulesi Zelusalemi numuda dizi aniꞌ veneꞌ nesi nene makaꞌ minaniꞌ ve.
MAR 15:42 Nivengaꞌ molavo holisekumuꞌ initeꞌ di vaꞌvaꞌ aniꞌ gamene nene aꞌmidoꞌ geto osuꞌ lo holiseꞌ minaaꞌ aniꞌ gamene nene olosa neivo nemuꞌ nene
MAR 15:43 Alimataia numudotiꞌ ve Zoseheꞌ aza evenelite gilavo dizo minavo gili imaaꞌ aniꞌ kanisole mino idoꞌ Oꞌmosoꞌmo evenetoꞌ gizebo ilineꞌ gamene alingumukovoꞌ nene gizebo ogo minaaꞌ ive neꞌmo aza ehelele izineꞌ nene gele hulo Pilatoda vo Izesuꞌ okoꞌno nene nemelive lo longoꞌ o-dineꞌ.
MAR 15:44 Longoꞌ o-davo Pilatoꞌ aza mo Izesuꞌ hilihe lo gala setaꞌ gelo ami pilisi veliti gizebo ve naba asi lo-davo ogavo Izesuꞌ mo helahe lo longoꞌ o-dineꞌ.
MAR 15:45 Longoꞌ o-davo mo helave lavo gonoso nene Zoseheꞌni do vilive lo lo huko-davo
MAR 15:46 aza lavolavo mokonoꞌ lamineꞌ ma vo meni hizosa Izesuꞌni nene lohotoꞌ zalotiꞌ apaso do lemo aꞌmine lavolavodunuꞌ asabuꞌ ize-do gonoso milaaꞌ aniꞌ ebeꞌ liliꞌ igi gehenguꞌ goloꞌvatikanguꞌ nene do vo molo-do gonoso galese veleloꞌ nene geheni naba ma do veleheꞌ molo do tilekineꞌ.
MAR 15:47 Galeseuꞌ nomolo-divo Mangadala numudotiꞌ veneꞌ Maliakisi idoꞌ abalaho Zoseꞌ izelehosi engiꞌ nene ningi minasineꞌ.
MAR 16:1 Gohi nivengaꞌ molo sigisi (6) kiloku ogavo holiseꞌ nene mo osuꞌ lave li Mangadala numudotiꞌ veneꞌ Maliakisi eiꞌ abalaho Zakoboꞌ izelehosi Salomekisi gonosoloꞌ holalone li unuvo lamineꞌ ogaꞌ ineꞌ uveli nene vi meni hizaniꞌ.
MAR 16:2 Meni hizi di vi ingi Sadeuꞌ goꞌ lolosa neivo gonoso ebeta vaniꞌ.
MAR 16:3 Nivi tiꞌ li li voleloꞌ meloꞌ iꞌmi vaniꞌ: Gonoso galese veleloꞌ geheni naba ma nene zaho do veleheꞌ molo hulo-ledelive.
MAR 16:4 Tiꞌ liꞌmi visa ningi huli gonoso galesela milaniꞌ nene aꞌmine geheni naba goloso ma nene veleheꞌ mili hulikeniꞌ neivo ninganiꞌ.
MAR 16:5 Neꞌmine igi gonoso mili-daniꞌ geheni mulikuꞌ dizi ninganiꞌ nene gosoꞌve ma saketi mokonoꞌ haꞌna haꞌna izo aꞌine hulaaꞌ ada mitoꞌ neivo ningi ngehelele izineꞌ.
MAR 16:6 Neꞌmine neivo nizavo tiꞌ lo lo-ngimineꞌ: Lengehelele izamivo. Nasalete ve Izesuꞌni lohotoꞌ zaloꞌ bilave ma nene ningilisa ahe. Aza nene meuꞌ nomive. Mo oto vaze. Mili-daniꞌ ebeꞌ mene ningilo.
MAR 16:7 Nemuꞌ lingine vi izipahala zuhosi idoꞌ Petoloꞌ eiꞌ nesi nene nGalilaia misubouko gomuꞌ molo lengemo volosuve lo lo-lingimineꞌ maꞌmine ogo vo neivo aꞌmida vi ningilisave li li-ngimilo.
MAR 16:8 Neꞌmine lo lo-ngemavo luvoluvo izi gopo gaꞌine gili mini hetoꞌ limi gonoso ebetotiꞌ golise vaniꞌ. Idoꞌ ngehelele izineꞌ nemuꞌ nene ve masi veteteꞌ igi li-ngimamaniꞌ.
MAR 16:9 Zuda velite gono do do vaaꞌ uneꞌ gamene apiꞌ neivo Sadeuꞌ nedengaꞌ goꞌ nuvonuvo neivo Izesuꞌ nene hilingutiꞌ otosa sikalahuꞌ goloso seveni luloutiꞌ ngimiselo do hulineꞌ veneꞌ Mangadala numudotiꞌ veneꞌ Maliaꞌni nene ganaꞌ sotoꞌ pize imineꞌ.
MAR 16:10 Sotoꞌ pize emavo aza nene vo Izesulesi monaaꞌ ave nene mulumo alumo gili-di ive nama igi nizavo lo-ngimineꞌ.
MAR 16:11 Hilingutiꞌ oto ha neivo ninguve lo lo-ngemavo ingine lineꞌ gamazi nene gili eleꞌvoleꞌ amaniꞌ ve.
MAR 16:12 Neꞌmine ogavo alingeꞌ nene engikutiꞌ ve setaꞌ nene numuno ebeꞌ naba nene huli ebeꞌ ngomola nivasivo Izesuꞌ aza eiꞌ emeni do atoliꞌmine ogosa sotoꞌ pize ngimineꞌ.
MAR 16:13 Sotoꞌ pize ngemavo ingine tineꞌ mili vi ingi zuho linge nene li-ngimasineꞌza nesi gili eleꞌvoleꞌ amaniꞌ ve.
MAR 16:14 Alingeꞌ nene izipahala zuho leveni (11) di geseꞌ igi nosoꞌ niteꞌ ni nizavo engitasi sotoꞌ pize ngemo tiꞌ lo ngelemineꞌ: Hiluvongutiꞌ nene mo ote nouvo ningave nete aꞌminemuꞌ li-lingimaniꞌza lingine lutine hize tilavo aꞌmanapa igi engiꞌ gamazi nene gili eleꞌvoleꞌ amave.
MAR 16:15 Neꞌmine lo ngelemosa tiꞌ lo lo-ngimineꞌ: Lingine numudoꞌ namadoꞌ misubouꞌ misubouꞌ vi osuꞌ li eveneꞌ zuho ato atoꞌ mukiꞌ nizaniꞌ nene monoꞌ gamazi lamineꞌ nene li sotoꞌ igi li-ngimilo.
MAR 16:16 Li-ngimikevo gili gamazi gihile ve li gili eleꞌvoleꞌ igi monoꞌ noso hilalizave nene Oꞌmosoꞌmo golosoutiꞌ do nguꞌ izeleseiha ve ma gili eleꞌvoleꞌ amilizave nene Oꞌmosoꞌmo goniꞌ o-ngedo lihime ngemeleseive.
MAR 16:17 Idoꞌ ingine nezemuꞌ gili eleꞌvoleꞌ i minilizave nene neze amuzo neꞌminisa di sotoꞌ ilisave: Adoꞌ sikalahuꞌ goloso neniꞌ veꞌnemuꞌ ngimiseli hulilisave. Idoꞌ ato atoꞌ noꞌningutiꞌ gamazi lilisave.
MAR 16:18 Idoꞌ gosiheꞌ nene ngibilamavo aꞌinedunuꞌ nene ha dalisave. Idoꞌ zahemede noso nalizaniꞌ nene ma do goloso o-ngedamoloseive. Initeꞌ gizi daveti okoꞌnidoꞌ aꞌinetunuꞌ hitikevo lamineꞌ ilisave.
MAR 16:19 Guvetesi ve Izesuꞌ aza neꞌmine lo mo lo-ngemavo Oꞌmosoꞌmo Okulumokuko eleꞌmizo do dizavo Oꞌmosolotiꞌ lemo minidiꞌmo Oꞌmosoꞌmo ana hulaaꞌ ida moꞌmosiꞌveloꞌ mitoꞌ neive.
MAR 16:20 Neꞌmino neivo eze izipahala zuho ingine numudoꞌ namadoꞌ vi eze gamazi nene li sotoꞌ igi nili-ngimavo gamazi laaꞌ aniꞌ nene gihile izave li ningilizave lo Guvelesi ve aza inginesi mino hize eleꞌ o-ngidivo ingine amuzo niteꞌ ato atoꞌ igi mili minaniꞌ ve.
LUK 1:1 Eveneꞌ Naba Teohiloꞌ, Gaza Izesuꞌnimuꞌ li-gimaniꞌ gamazi nene mo laminetokovoꞌ li-nimikeve lo geleline lo luhuvo niteꞌ mene nogize-giduze. Ningezo. Ee, leliꞌ vovoteuꞌ sotoꞌ aniꞌ initeꞌ nene apiꞌ ogo sotoꞌ idotiꞌ ningave linge ma nene aꞌmine sotoꞌ ineꞌ monoꞌ gamaziꞌmi gonoloꞌ ve liliꞌ igi mini lelita li hulikevo eveneꞌ mukiꞌ nene aꞌmine li hulaniꞌ gamaziloꞌ nene eꞌmeti di lisiheꞌ igi luhuvo gizaniꞌ ve. Idoꞌ neꞌmine angumukisi idoꞌ aꞌmine Izesuꞌ gono do ogo molo minineꞌ initeꞌ mataꞌ apiꞌ ogo sotoꞌ oꞌmo oꞌmo vo miningumuꞌ nene naza aꞌmineꞌmi monovo danavaꞌve ngomoꞌ nabaꞌ nene viseꞌ ogo gelekaꞌ gelekaꞌ ogo gele osuꞌ luvoniꞌ nenako nemukisi nene nazasi aꞌmine sotoꞌ ineꞌ initeliꞌmi gamaziꞌve nene do lisiheꞌ ogo luhuvo gizeloniꞌ nene lamineꞌ oloseive losa geiꞌ nene nogize-giduve.
LUK 1:5 Naza tiꞌ lo nolo-gimuve: Helodeꞌ aza Zudaia misubouꞌ guvelesi ve naba loloꞌ ogo minineꞌ gameneuꞌ nene evenetoꞌ medelo mino Oꞌmoso initeꞌ lehize-daaꞌ ive ma minineꞌ nene gulive Zakaliaꞌ ve. Aza nene evenetoꞌ medeli mini Oꞌmoso initeꞌ lehizi-daaꞌ ave Aloniꞌ aꞌvopilemoꞌ zuhoutiꞌ mino idoꞌ Oꞌmoso initeꞌ lehizi-daaꞌ gono senisi senisi igi daaꞌ aniꞌ mulise ma Abiaꞌ muliseutiꞌ minineꞌ ve. Idoꞌ veneꞌ ma do minineꞌ gulive Elisabeteꞌ nesi nene Aloniꞌ aꞌvopilemoꞌ zuhoutiꞌ minineꞌ ve.
LUK 1:6 Ingine sitaꞌ nene Guvelesi veꞌmo louꞌ gamazi lo huko lineꞌ vaitoꞌ nene eꞌmeti mini gamaziꞌinesi nomineꞌ aleve mini Oꞌmosoꞌmi veleloꞌ nene eveneꞌ lisiheꞌ minasineꞌ ve.
LUK 1:7 Eveneꞌ lisiheꞌ minasineꞌza Elisabeteꞌ nene gohuno lizo neivo ingine nene izipahaꞌinesi gidami mini setatoꞌ nene ozoho mili minasineꞌ ve.
LUK 1:8 Idoꞌ Zakaliaꞌ zuho muliselite Zelusalemi ebekuꞌ monoꞌ numuno nabauꞌ nene gono dalizadoꞌ vavo Zakaliaꞌ nene Oꞌmoso initeꞌ lehize-daaꞌ gono Oꞌmosoꞌmi veleloꞌ dokaꞌ dokaꞌ ogo neivo
LUK 1:9 aꞌmine Zakaliaꞌ muliseutiꞌ nene kekeize lo minineꞌ monoꞌ numuno lulouꞌ dizo unuvo lamineꞌ ogaꞌ ineꞌ initeꞌ nene olokuꞌ gizo Oꞌmoso emelive ma di kegesilisa evenetoꞌ medeli mini Oꞌmoso initeꞌ lehizi-daaꞌ aveti monovoloꞌ eꞌmeti eveneꞌ maliꞌmi gulive di sotoꞌ igaꞌ zohikuꞌ zohiꞌ ikevo Zakaliaꞌ guliveꞌve sotoꞌ ogavo di kegesi-daniꞌ ve.
LUK 1:10 Di kegesi-dikevo unuvo lamineꞌ ogaꞌ ineꞌ initeꞌ olokuꞌ gizi Oꞌmoso imilizaniꞌ gamene ogavo eveneꞌ mukiꞌ nene monoꞌ numuno naba heta nene mulise mili mini Oꞌmosola li nizavo engitoꞌ medelo Zakaliaꞌ aza monoꞌ numuno kekeize lo mininguꞌ nene dizo aꞌmine unuvo lamineꞌ ogaꞌ ineꞌ initeꞌ nene gizo Oꞌmoso noimivo
LUK 1:11 Guvelesi veꞌmi angeloꞌ maliꞌmo sotoꞌ o emo unuvo lamineꞌ ogaꞌ ineꞌ initeꞌ gizaaꞌ aniꞌ holomo neꞌmi zamela ote minineꞌ.
LUK 1:12 Ote neivo Zakaliaꞌ ningosa upuhoꞌ ogo golise gelo minineꞌ ve.
LUK 1:13 Golise gilineꞌza angeloꞌ neꞌmo tiꞌ lo lo-imineꞌ: Zakaliazo, gaza golise gelamozo. Oꞌmosoꞌmo ezela lokaꞌ lokaꞌ naineꞌ initekumuꞌ nene mo gele gemave. Nemuꞌ elengaho Elisabeteꞌ nene gipa ma gedeleseize. Gulive nene Zohaneꞌ ve lo molalosane.
LUK 1:14 Idoꞌ gaza nene mulungauꞌ lamineꞌ goloso gelo golize izelesane. Idoꞌ eveneꞌ linge mukiꞌ nesi nene eiꞌ sotoꞌ ilingumuꞌ lamineꞌ gililisave.
LUK 1:15 Aza nene Guvelesi veꞌmo gilivo eze veleloꞌ nene eveneꞌ naba neꞌmine mineleseive. Aza nene vaini nososi mo namo sipaki ogaꞌ noso ato atoꞌ nesi nene mo namoloseive. Idoꞌ aza nene izelehi mulunouꞌ neivo minilidokisi nene Oꞌmosoꞌmi Sikalahuꞌ neꞌmo lulouꞌ minevo dovoꞌ ogo minivo Oꞌmosoꞌmi gono dalive lo eleꞌmize molaloseive.
LUK 1:16 Neꞌmine ogo aza neve Isilaeleꞌ aleve linge mukiꞌ nene aka golosoloꞌ nivangutiꞌ nene engiꞌ Guveꞌinesi ve Oꞌmosola do tineꞌ molo-ngedeleseive.
LUK 1:17 Idoꞌ aza nene gomuꞌ polohete Eliaꞌ eiꞌ amuzo idoꞌ emeni dameni neꞌmine do otuhosa Guvelesi ve nene gomuꞌ molo emo novo meꞌninge nete izipahaꞌine nene monovo do goloso goloso i-ngidamavo laminivoꞌ minilizave lo do hamoꞌ o-ngedo idoꞌ hokolizeꞌ igi bikiheti igaꞌ ave nene eveneꞌ lisiheꞌ laminelite gili daaꞌ naniꞌ monoꞌ nene lo-ngemavo gili dalisave. Neꞌmine ogo Guvelesi ve alingumuꞌ nene eveneꞌ ma ingine eze evenele zuho ma liliꞌ igi eꞌmetilizadoꞌ lisiheꞌ gehepeve i minilizave lo do lisiheꞌ o-ngedeleseive. Nemuꞌ aꞌmine gipa nene sotoꞌ ogavo gazasi eveneꞌ linge mukikisi longolize izilisave.
LUK 1:18 Angeloꞌ aza neꞌmine lavo Zakaliaꞌ tiꞌ lo longoꞌ o-dineꞌ: Nazasi eleꞌnahosi nene mo eleni vani molokusineꞌ nenako gipeꞌne ma gedelongumuꞌ nolo-nemaineꞌ nene mo laminetoꞌ lo-nemaneꞌ neive lo nado gelelove.
LUK 1:19 Neꞌmine lavo angeloꞌ aza tiꞌ lo lo-imineꞌ: Naza nene Oꞌmosoꞌmi veleloꞌ minaaꞌ nouvoniꞌ angeloꞌ nGabilieleꞌ ma ne nouve. Oꞌmoso asiꞌve nene geiꞌ gamazi lo-gemo idoꞌ gamazi lamineꞌ lo-gimuvoniꞌ nemukisi lo-gemelongumuꞌ nene nimiselavo nouve.
LUK 1:20 Nemuꞌ nene gelezo. Gaza neniꞌ gamazi luvoniꞌ gele eleꞌvoleꞌ amaneꞌ nemuꞌ nene gamazi lamo tihine hizo nanivo aꞌmine luvoniꞌ initekumuꞌ nene gameneꞌveloꞌ lisiheꞌ ogosa ogo gihile izeleseive. Idoꞌ neꞌmine ogavo gaza gohi gamazi lolosane.
LUK 1:21 Idoꞌ eveneꞌ nete monoꞌ numuno nabaꞌmi heta mini Zakaliaꞌ geto nonida lemo alihe li ezemuꞌ gizebo igi minaniꞌza angeloꞌ neꞌmo gamazi lo-emo minidiꞌmo nene gamene haꞌna mino lemo heta amivo nemuꞌ nene eveneꞌ ingine gaꞌine mukiꞌ gili minaniꞌ ve.
LUK 1:22 Neꞌmine igi nizavo Zakaliaꞌ aza heta lemo aniꞌza gamazi ngelo lamilineꞌ ogavo tihine hize mino eveneꞌ gamazi lo-ngemelesa nene anadunuꞌ avazahavoꞌ o-ngimineꞌ ve. Neꞌmine noo-ngimivo eveneꞌ nete aza nene monoꞌ numunguꞌ nene initeꞌ ma veleloꞌ o molo noloseive li gilaniꞌ.
LUK 1:23 Idoꞌ Zakaliaꞌ nene aꞌmine gonoꞌve nene do do vo neivo gono do do vilineꞌ gameneꞌve nene osuꞌ lavo Zelusalemi numuno ebeꞌ nene hulo numuꞌvela tineꞌ molo vineꞌ.
LUK 1:24 Idoꞌ nelotiꞌ alingeꞌ nene elenaho Elisabeteꞌ neve izipahala minavo tiꞌ lo lineꞌ: Idise naza izipahaꞌne minineꞌ nene Guvelesi veꞌmo neze ninge lamineꞌ do gohuno lizo minuvongumuꞌ eveneliti veꞌnidoꞌ novozo helo minaaꞌ uvoniꞌ nene gohi nenita novozo minamilive lo gelavo izipahaꞌne minineꞌ ve. Neꞌmine lo mine haleko neivo ikeꞌni faef (5) nene ogo vineꞌ ve.
LUK 1:26 Elisabeteꞌ nene izipahala minavo neivo ikeꞌni sigisi (6) neꞌmine ogo vavo Oꞌmoso neꞌmo angeloꞌ nGabilieleꞌni nene imiselavo nGalilaia misubouꞌ numuno ebeꞌ ma gulive Nasaletela lemo aniꞌ.
LUK 1:27 Aꞌmida nene alungo olihe veloꞌ vamineꞌ alu ma gulive Maliaꞌ nene Zuda veti guveꞌinesi ve naba Davidiꞌ aꞌvopilemoꞌ zuhoutiꞌ ve ma gulive Zoseheꞌni izeni imikaniꞌ alu neida lemo aniꞌ.
LUK 1:28 Angeloꞌ aza ogo aꞌmine alu Maliaꞌni nene meseꞌ aseka lo-do tiꞌ lo lo-imineꞌ: Guvelesi veꞌmo ninge lamineꞌ do hize eleꞌ o-gidivo naneꞌ veneꞌ gaza nabe. Guvelesi ve nene geikisi neive.
LUK 1:29 Neꞌmine lo lavo Maliaꞌ aza aꞌmine meseꞌ aseka lo-do lineꞌ gamazi nemuꞌ nene monovo nanitekumuꞌ lihe lo gopo gala gelo minineꞌ.
LUK 1:30 Neꞌmino neivo angeloꞌ aza tiꞌ lo lo-imineꞌ: Maliazo, gaza gehelele izamivoo. Oꞌmosoꞌmo geiꞌ nene ninge lamineꞌ dave.
LUK 1:31 Gaza gelezo. Gaza nene mo izipaha minavo gipe ma gedelesange. Guliveꞌve Izesuꞌ ve lo molalosane.
LUK 1:32 Aza nene eveneꞌ naba loloꞌ ogo mineleseive. Neꞌmine ogo neivo eikumuꞌ nene Oꞌmoso hozila miniveꞌmi gipele ve lavo mineleseive. Idoꞌ Guvelesi ve Oꞌmoso neꞌmo avoloho Davidiꞌ guvelesi ve naba loloꞌ ogo minineꞌ moꞌmosiꞌve nene emavo
LUK 1:33 Zakoboꞌ zuho Isilaeleꞌ aleveti Guveꞌinesi ve naba loloꞌ ogo engitoꞌ nene minevoꞌ minevoꞌ ogo gizebo o-ngedo neivo aꞌmine gizebo ogo mine do vilineꞌ nene osuꞌ lamoloseive.
LUK 1:34 Angeloꞌ aza neꞌmine lavo Maliaꞌ aza tiꞌ lo longoꞌ o-dineꞌ: Naza nene olihe vemohokisi bizo ongamusineꞌ nenako gaza laineꞌ gamazi nene nenita nado sotoꞌ ilive.
LUK 1:35 Neꞌmine lineꞌza angeloꞌ aza tiꞌ lo lo-imineꞌ: Oꞌmosoꞌmi Sikalahuꞌ nene geita ogo minavo Oꞌmoso hozila dizo minive neꞌmi amuzo neꞌmo asabuꞌ ize-gedavo neꞌmo nene izipaha mineleseive. Nemuꞌ nene aꞌmine izipahaka gedelineꞌ nene Oꞌmosoꞌmi gipele gehepeve ve lavo mineleseive.
LUK 1:36 Idoꞌ ma nene gelezo. Geze zuhoutiꞌ veneꞌ gohaho Elisabeteꞌ nene gohuno veneꞌ ve li-daaꞌ aniꞌza idise nene izipahala minavo gipe gatunosi neivo ikeꞌni sigisi (6) nene novive.
LUK 1:37 Idoꞌ neꞌmine noluvoniꞌ nene Oꞌmoso aza neꞌmine manaꞌmine initeꞌ ilineꞌ amuzoꞌve nene nomineꞌ nevoba aza olove lo lilineꞌ initeꞌ mukiꞌ nene ha ogakovoꞌ ilineꞌ nenako ha oloseive losa nemuꞌ noluze. Gaza gaka mukiꞌ gelamozo.
LUK 1:38 Neꞌmine lavo Maliaꞌ aza tiꞌ lo lineꞌ: Naza nene Guvelesi veꞌmi gelekeleꞌ alu nouvoniꞌ nenako nemuꞌ nene gaza laineꞌ neꞌmino sotoꞌ o-nidivoo. Neꞌmine lavo angeloꞌ aza Maliaꞌni hulo-do vineꞌ.
LUK 1:39 Idoꞌ angeloꞌ hulo-do vavo nelotiꞌ nene Maliaꞌ aza mine haꞌna amo Zudaia misubouꞌ golo mukiꞌ lo minida numuno ebeꞌ ma minida nene geto vo hetelineꞌ.
LUK 1:40 Aꞌmida nene Zakaliaꞌ numunguꞌ dizo elenaho Elisabeteꞌni nene meseꞌ aseka lo-dineꞌ.
LUK 1:41 Neꞌmino meseꞌ aseka nolo-divo Elisabeteꞌ aza nogilivo izipe neꞌmo mulunouko gabe kabeꞌ neivo Oꞌmosoꞌmi Sikalahuꞌ neꞌmo Elisabeteda mino hize eleꞌ o-divo
LUK 1:42 nolo nabautiꞌ gekeꞌ lo tiꞌ lo Maliaꞌni lo-dineꞌ: Oꞌmosoꞌmo geiꞌ nene veneꞌ mukiꞌ ngivileꞌ ogo ninge lamineꞌ do noꞌnohoꞌ ize-gedavo nane. Idoꞌ geiꞌ mulungauꞌ neineꞌ izipaha nesi nene noꞌnohoꞌ ize-davo neive.
LUK 1:43 Nemuꞌ nene Guveꞌnesi veꞌmi izeleho gaza nene neniꞌ haza veneꞌ nouvoda alinidoꞌ lisiheꞌ amaneꞌ nenako mo oganivo laniteꞌ nogiluve.
LUK 1:44 Gelezo. Gaza ogo hetelo meseꞌ aseka nolo-nedanivo nogiluvo gatuꞌneuꞌ izipe neꞌmo olize izo moiꞌ moiꞌ ogavosa nemuꞌ nene noluve.
LUK 1:45 Gaza Guvelesi veꞌmo lo-gimineꞌ gamazi nene gihile izeleseive lo gele eleꞌvoleꞌ aineꞌ nenako nemuꞌ Guvelesi veꞌmo noꞌnohoꞌ ize-gedavo golize izo minelineꞌ akaloꞌ mine molo nane.
LUK 1:46 Elisabeteꞌ aza neꞌmine lavo Maliaꞌ aza nama gosohoꞌ bele molo tiꞌ lo lineꞌ: Naza luꞌnedunuꞌ nene Guvelesi ve do naba noo-duve.
LUK 1:47 Idoꞌ luꞌne neꞌmo nene nuꞌ izaaꞌ ive Oꞌmosomuꞌ nene olize noizive.
LUK 1:48 Naza neꞌmine uvoniꞌ nene nanitekumuꞌ ve. Oꞌmoso aza neꞌmo naza nene haza gelekeleꞌ aluvo lemo minuvoniꞌ nemuꞌ nene ningo gelo doꞌmo dize-nedo do lamineꞌ o-nedave.
LUK 1:49 Ee, amuzo malehe minive Oꞌmoso aza nene initeꞌ lamineꞌ goloso nenita o-nidineꞌ nene eiꞌ emeni dameni atoliꞌmine goloso ogo lamineꞌ neivo opoꞌni noluve.
LUK 1:50 Idoꞌ ezemuꞌ lehelele izivo mino eꞌmeto nonive leliꞌ nene mulumote ningo hize eleꞌ o-ledo neineꞌ monovoꞌve nene eveneꞌ sotoꞌ igi mini di vilizadasi nene ha mine do vo mineleseive.
LUK 1:51 Idoꞌ ve ma ingine amebe ve none li luꞌine gaꞌninguꞌ gili gavele ve gehesave nene aza amuzolo atoliꞌmine ogo minineꞌ do sotoꞌ ogo do gopo o-ngedavo hutileꞌ igi vaniꞌ ve.
LUK 1:52 Idoꞌ guveꞌinesi naba minave nene eveneꞌ gizebo i-ngidi minaaꞌ aniꞌ moꞌmosiꞌnidotiꞌ nene ngehusoꞌ ogo do hulineꞌ gelavo guveꞌinesi ve nene gohi minamaaꞌ aniꞌ ve. Idoꞌ haza ve limi minave nene aza lavo eveneꞌ dizi minave ve naba neꞌmine liliꞌ igaꞌ aniꞌ ve.
LUK 1:53 Idoꞌ gohoꞌ gahaliꞌ mini initekumuꞌ gaꞌna hili minave nene initeꞌ lamineꞌ vaiꞌ ngemavo di vaiꞌ li minaaꞌ aniꞌza heneni ve minave nene initeꞌ ma ngemamo do hulo-ngedavo haza minaaꞌ aniꞌ ve.
LUK 1:54 Aza nene Abalahamukisi eiꞌ aꞌvopilemoꞌ zuho engiꞌ nesi mulumoꞌine ningo hize eleꞌ o-ngedeꞌmo vo mineloniꞌ nene mo huko vamo ha minevoꞌ minevoꞌ ogovoꞌ mineleseive lo lo huko avotemotine lo-ngimingumuꞌ nene gala molamivo ha gele mino eze gelekeleꞌ o-daaꞌ unive Isilaeleꞌ zuho nene hize eleꞌ o-ledave. Nemuꞌ nene naza ezemuꞌ nolize noizuve.
LUK 1:56 Maliaꞌ aza mo neꞌmine lo osuꞌ lo Elisabetekisi makaꞌ mino ikeꞌni sito hamo do hulosa numuꞌvela tineꞌ molo vineꞌ.
LUK 1:57 Idoꞌ Elisabeteꞌ aza izipahala gedelineꞌ gamene nene mo alitavo gipele gidineꞌ.
LUK 1:58 Neꞌmine ogavo nemuꞌ nene Guvelesi veꞌmo Elisabeteꞌni atoliꞌmine ogo mulumolo ningo nasahiliꞌ o-do hize eleꞌ o-dingumuꞌ nene eze zuho netesi idoꞌ oholomote zuho netesi nene gili ezesi inginesi ngolize makatoꞌ izaniꞌ.
LUK 1:59 Neꞌmine igi nizavo izipe nene sotoꞌ idotiꞌ gamene eiti (8) ogo vavo aꞌmine gameneuꞌ aꞌmine izipe nene Oꞌmosoꞌmi noso mili-di okoꞌno lolovo huki-dilisa igi guliveꞌve nene melehidoꞌ Zakaliaꞌ ve li milalisa aniꞌza
LUK 1:60 izeleho neꞌmo oꞌve lo-ngedo guliveꞌve nene Zohaneꞌ ve lo mineleseive lineꞌ.
LUK 1:61 Neꞌmine lavo ingine tiꞌ li li-imaniꞌ: Eꞌe, geze zuho mukikutiꞌ nene neꞌmine guliveꞌinesi minave hamokisi ma minamave.
LUK 1:62 Neꞌmine li aꞌinedunuꞌ avazaha igi melehine tiꞌ li longoꞌ i-daniꞌ: Gaza gulive nadive lo molo-delesa gele nane.
LUK 1:63 Neꞌmine li longoꞌ i-dikevo meleho aza luhuvo gizo lo-ngemelesa luhuvo gizelineꞌ initekumuꞌ anadunuꞌ avazaha ogo longoꞌ o-ngedavo ma di imikevo tiꞌ lo gizineꞌ: Guliveꞌve nene Zohaneꞌ ve lo mineleseive. Neꞌmine lo gizavo eveneꞌ ingine voꞌine vavo gopo gaꞌine gili minaniꞌ.
LUK 1:64 Neꞌmine igi nizavo Zakaliaꞌ aza gamazi lilineꞌ akaꞌve hize tile-davo minineꞌ initeꞌ nene osuꞌ lo-davo gohi tihine hizamo aꞌmidoꞌ liteꞌ lo gamazi apiꞌ ogo nolo Oꞌmoso opoꞌni lo minineꞌ.
LUK 1:65 Idoꞌ initeꞌ neꞌmine sotoꞌ ingumuꞌ nene aꞌmine ebekuꞌ miniꞌmi monave mukiꞌ nene gili ngehelele izivo nizavo aꞌmine sotoꞌ ineꞌ initeꞌ neꞌmi gamaziꞌve nene Zudaia misubouꞌ golola numuno ebeꞌ mukikuꞌ minave ingine nene li voleloꞌ meloꞌ igi minaniꞌ.
LUK 1:66 Neꞌmine igi mini aꞌmine gamazi gilave mukiꞌ ingine nene Guvelesi veꞌmi amuzo eita sotoꞌ ogo minineꞌ nemuꞌ nene gilaniꞌ nenako nemuꞌ aꞌmine gamazi nene di maduꞌninguꞌ mili mini tiꞌ li laniꞌ: Aꞌmine izipe nene sotoꞌ olosa neivosi idoꞌ sotoꞌ neivosi vote vineꞌ initeꞌ neꞌmine sotoꞌ ineꞌ nenako alingeꞌ naniꞌmine ve loloꞌ ogo mineꞌ nalivo. Mo eveneꞌ naba neꞌmine ma loloꞌ ilidoꞌ o noloseive li laniꞌ ve.
LUK 1:67 Idoꞌ Zohaneꞌ meleho Zakaliaꞌ aza nene Oꞌmosoꞌmi Sikalahuliꞌmo ogo hize eleꞌ o-divo Oꞌmosoꞌmi veletiꞌ gamazi tiꞌ lo lo sotoꞌ ogo nama lineꞌ:
LUK 1:68 Isilaeleꞌ aleveti Guvetesi ve Oꞌmoso nene do naba o-do opoꞌni lolone. Aza nene ogo evenele zuho leliꞌ nene mulumote ningo goloso ogo minuningutiꞌ nene kuluhize-ledave.
LUK 1:69 Ee, Oꞌmosoꞌmi veletiꞌ gamazi li sotoꞌ igaꞌ ave polohete gozopoꞌ akaꞌmila minaniꞌ nete Oꞌmosoꞌmo lo huko-lidineꞌ gamaziꞌve gozopoꞌ li sotoꞌ aniꞌ nene do gihile izo gomuꞌ Oꞌmoso gelekeleꞌ o-do minive guvetesi ve Davidiꞌ aꞌvopilemoꞌ zuhoutiꞌ nene amuzo malehe ve leliꞌ do luꞌ izelive nene mo do ote-dave.
LUK 1:71 Idoꞌ do ote-dineꞌ nene eveneꞌ ma lelikumuꞌ muso gaꞌine dizavo biluvaꞌ i-lidaaꞌ aveti aꞌninguꞌ minuningutiꞌ nene kuluhize-ledo do luꞌ izelive losa do ote-dave.
LUK 1:72 Ee, neꞌmine ineꞌ nene gomuꞌ eiꞌ guliveꞌveloꞌ eleꞌvoleꞌ gamazi leliꞌ avotehine Abalahamuꞌni lo huko-dineꞌ mamuꞌ nene gala gele mino aꞌmine gamazi leliꞌ Isilaeleꞌ aleveti avotemotinemuꞌ nene lengiꞌ zuho mulumoꞌine ningo hize eleꞌ o-ngedeꞌmo vo minelesuve lo lo huko-ngidineꞌ nene do gihile izelesa neꞌmine ineꞌ ve. Idoꞌ aꞌmine gamazi lo huko linguꞌ nene neꞌmine olosa lineꞌ:
LUK 1:74 Aza nene leze biluvateliti aꞌningutiꞌ do kuluhize-ledavo laza nene lehelele izamivo mino mene misubouko eze veleloꞌ vetesi mine do voloninguꞌ laza nene monovo lisiheꞌ laminekovoꞌ ogo molo mino ezemuꞌ gele lamineꞌ o mino opoꞌni lo mine do vo minelone. Idoꞌ neꞌmine ineꞌ nemuꞌ nene Isilaeleꞌ aleveti Guvetesi ve Oꞌmoso nene do naba o-do opoꞌni lolone.
LUK 1:76 Neꞌmine lo Zakaliaꞌ aza gipele ngomo Zohaneꞌnimuꞌ nene tiꞌ loo imineꞌ molo lineꞌ: Idoꞌ gipeꞌne gaza nene Guvelesi veꞌmi aka vele-delesa eze evenele tiꞌ lo lo sotoꞌ o ngemeꞌmo gomuꞌ molo-do volosane: Leliꞌ Oꞌmosote aza nene lelikumuꞌ mulunouꞌ mulumo naba gilineꞌ nenako nemuꞌ aza nene lihimete hulo-ledo do luꞌ izelineꞌ aka vele-ledelesa neive. Ee, Oꞌmoso aza leliꞌ mulumote ningo Guvelesi ve imiselavo aza Okulumokuko hozi minidotiꞌ nene lemo leliꞌ luteuꞌ litiꞌmuso ize minivo mino helo vo tolovo oloneꞌ akaloꞌ mine molo minuniveti vovoteuꞌ mino goꞌ lo labanaꞌ elaaꞌ neineꞌ neꞌmino luteuꞌ hize labanaꞌ ele-ledo hongu lo mineloneꞌ akaloꞌ leleꞌmize molaloseive. Idoꞌ gipeꞌne gaza eveneꞌ neꞌmine lo lo-ngemeꞌmo vo mino Guvelesi ve gomuꞌ molo-do akaꞌve vele-delineꞌ nenako nemuꞌ nene geikumuꞌ evenelite Okulumokuꞌ atoliꞌmine ogo dizo miniveꞌmi polohete ve li li-gidaaꞌ ilisave lo lo-imineꞌ.
LUK 1:80 Idoꞌ nelotiꞌ aꞌmine izipe Zohaneꞌ nene naba oꞌmo vo mino gala gele ngenga lo minineꞌza eze gono dalineꞌ gamene Oꞌmosoꞌmo molo-dineꞌ nene olihe amivo Isilaeleꞌ aleveti veꞌnidoꞌ nene sotoꞌ amo ebeꞌ hadive gokoꞌ lo minaaꞌ idaavoꞌ nene ongo mono minineꞌ ve.
LUK 2:1 Aꞌmine Izesuꞌ sotoꞌ olosa ineꞌ gameneloꞌ nene Loma veti guveꞌinesi ve ngamani naba Augusitoꞌ Kaesaleꞌ nene eiꞌ gizebo ineꞌ misubo ato atoꞌ mukikuꞌ numudoꞌ namadoꞌ nene eveneꞌ takisi hulaakumuꞌ guliveꞌine dalizave lo lo huko gamazi hulavo vineꞌ ve.
LUK 2:2 Aꞌmine guliveꞌine di lisiheꞌ igi luhuvo gizaaꞌ gono nene gomuꞌ Zuda veti misubouꞌ nene ma damaaꞌ aniꞌza Loma vete Silia misubo ve languꞌ nene Kilinioꞌ aza ngamani naba loloꞌ ogo minelive lo Kaesaleꞌ doote-davo neivo Zuda veti misubo nene aꞌmine Silia misubo neꞌmi lingelatiꞌ minineꞌ nenako aꞌmine gameneuꞌ nene ganaꞌ apiꞌ igi aꞌmidasi aꞌmine gono daniꞌ ve.
LUK 2:3 Neꞌmini nidavo eveneꞌ mukiꞌ nene guliveꞌine gizi di lisiheꞌ ilizangumuꞌ gotoꞌ numuꞌine ebeꞌine minida minida vaniꞌ ve.
LUK 2:4 Idoꞌ nivavo Zoseheꞌ azasi nene gomuꞌ guvelesi ve Davidiꞌ aꞌvopilemoꞌ zuhoutiꞌ minineꞌ nenako nemuꞌ aꞌmine minineꞌ numuno ebeꞌ Nasalete nGalilaia misubouꞌ minineꞌ nene hulo izeni elenahine Maliaꞌni nesi nene gulivete vo gizo do lisiheꞌ olosive lo eleꞌmizo avoloho Davidiꞌ numuno ebeꞌ Betelehemi Zudaia misubouꞌ minida nene dizo vineꞌ. Idoꞌ aꞌmine gameneuꞌ nene Maliaꞌ aza izipe gatunosi neivo vasineꞌ.
LUK 2:6 Neꞌmine o neivo vasineꞌ nenako ingine vi Betelehemi numunguꞌ nizasivo izipe gedeli gamene nene mo ogavo
LUK 2:7 ganaꞌ gipele nene apiꞌ ogo gidineꞌ. Neꞌmine ineꞌ nene venenga vete meni hizi ingaaꞌ aniꞌ numunguꞌ nene eveneꞌ gikiꞌ igi minikevo ingine minilisineꞌ numuno nene ma nomivo aꞌmida nene ize ato atoliti numuno ma mininguꞌ nene vi nizasivo gidineꞌ nenako nemuꞌ aꞌmine gipele nene gedosa izipe ngomo asabuꞌ izi-ngidaaꞌ aniꞌ lavolavodunuꞌ asabuꞌ ize-do ize nosoꞌ niteꞌ mili-ngidaaꞌ aniꞌ bokisiuꞌ nene ongo-mikivo minineꞌ ve.
LUK 2:8 Neꞌmino neivo aꞌmine holukakuꞌ nene aꞌmine Betelehemi numuno ebeꞌ gaheve guvisela sipisipi izeloꞌ gizebo ve linge ma ingine nene sipisipi izeꞌnidoꞌ gizebo igi minaniꞌ.
LUK 2:9 Neꞌmine igi nizavo Guvelesi veꞌmi angeloꞌ maliꞌmo engita ogo hetelo sotoꞌ neivo Guvelesi veꞌmi labanala neꞌmo ogo hize labanaꞌ ele-ngedavo ingine golise goloso gilaniꞌ.
LUK 2:10 Neꞌmine navo angeloꞌ neꞌmo tiꞌ lo lo-ngimineꞌ: Lingine golise gilami mini gililo. Naza nene eveneꞌ mukitoꞌ ngolize izilizaniꞌ initekumuꞌ nene gamazi lamineꞌ ma do nouve.
LUK 2:11 Naza gamazi lamineꞌ ma do nouve noluvoniꞌ nene eveneꞌ mukiꞌ lengikumuꞌ lengiꞌ do lunguꞌ izelive ma nene idise mene mo sotoꞌ o neive. Adoꞌ gomuꞌ guvelesi ve minive Davidiꞌ numuno ebeꞌ meuꞌ nene sotoꞌ o neive. Aꞌmine izipe nene Oꞌmosoꞌmo aꞌmine do lunguꞌ izaaꞌ gono nene dalive lo eleꞌmize molo imiselelesa live Guvelesi ve ma ne neive losa noluve.
LUK 2:12 Idoꞌ lingine vi aꞌmine izipe neize li ningi gililizangumuꞌ nene tiꞌ lo nolo-lingimuve: Lingine vi ningilizaniꞌ aꞌmine izipe nene izipe asabuꞌ izaaꞌ aniꞌ lavolavodunuꞌ asabuꞌ izi-dikevo izelitine nosoꞌ niteꞌ mili-ngidaaꞌ aniꞌ bokisiuꞌ nene ongo neivo ningilisave.
LUK 2:13 Neꞌmine nolo-ngimineꞌ velesi angeloꞌ mulise naba Okulumokuꞌ ami pilisi ve neꞌmine minaniꞌ nene limi igi gonoꞌnibo minida nene makaꞌ Oꞌmoso opoꞌni li nama tiꞌ li laniꞌ:
LUK 2:14 Guvelesi ve mo sotoꞌ oganako nemuꞌ nene Okulumokuko hozi Oꞌmoso opoꞌni lolone. Idoꞌ misubouko nene aza ninge lamineꞌ daaꞌ neineꞌ alevela nene hongu monovo mineleseive.
LUK 2:15 Idoꞌ angeloꞌ nete sipisipi izeloꞌ gizebo ve nene huli-ngidi Okulumokuko tineꞌ mili dizi vikevo ingine li voleloꞌ meloꞌ igi tiꞌ li laniꞌ: Betelehemi numuda vukeꞌzo. Aꞌmine sotoꞌ ineꞌ initeꞌ Guvelesi veꞌmo lo-limineꞌ initekumuꞌ nene vo ningelone laniꞌ.
LUK 2:16 Neꞌmine li ingine aꞌmida nene geti vi Maliangi Zosehengi nene ningi izipe ngomo nene ize nosoꞌ niteꞌ mili-ngidaaꞌ aniꞌ bokisiuꞌ nene ongo neivo ninganiꞌ.
LUK 2:17 Mo ningi aꞌmine izipemuꞌ angeloliꞌmo lo-ngimineꞌ gamazi nene veteteꞌ igi li sotoꞌ sotoꞌ aniꞌ ve.
LUK 2:18 Idoꞌ aꞌmine sipisipi izeloꞌ gizebo velite li-ngimaniꞌ gamazimuꞌ gilave mukiꞌ nene aizo li voꞌine vavo minaniꞌ ve.
LUK 2:19 Neꞌmine igi minaniꞌza Maliaꞌ aza sotoꞌ ineꞌ initeꞌ mukikumuꞌ laniꞌ gamazi nene do madunouꞌ molo aꞌminemuꞌ nene gala gelevoꞌ gelevoꞌ ogo minineꞌ ve.
LUK 2:20 Idoꞌ sipisipi ize gizebo ve ingine nene initeꞌ mukiꞌ angeloliꞌmo lo-ngimidoꞌ gehepeve sotoꞌ ogavo aꞌmine gili ninganiꞌ initeꞌ nemuꞌ nene Oꞌmoso di naba i-di opoꞌni liꞌmi liꞌmi sipisipi ize gizebo igi minaaꞌ aniꞌ ebeta gohi vaniꞌ ve.
LUK 2:21 Idoꞌ izipe sotoꞌ idotiꞌ nene gamene eiti (8) ogo vavo okoꞌno lolovo huki huli-di Oꞌmosoꞌmi noso nene mili-dilizaniꞌ gamene ogavo Oꞌmosoꞌmi noso nimili-di gulive mili-daniꞌ nene Izesuꞌ ve li milaniꞌ ve.
LUK 2:22 Idoꞌ Moseꞌ louꞌ gamaziꞌmo lidoꞌ eꞌmeti izipe gididotiꞌ nene izelehi okoꞌnoloꞌ di lamineꞌ i-di di hetoꞌ i-dilizaniꞌ gamene alitavo neꞌmine i-dilisa Izesuꞌ izelehoi melehoi ingine Zelusalemi numuda vasinguꞌ nene Izesukisi eleꞌmizi vasineꞌ ve. Idoꞌ vasineꞌ nene Guvelesi veꞌmi louꞌ gamaziꞌmo tiꞌ lo lidoꞌ nene eꞌmeti ilisa vasineꞌ: Izeꞌninge ingine izipahaꞌine gidikevo okoꞌnidoꞌ di lamineꞌ i-ngidilizaniꞌ nene lingine nama viluso he aꞌmine neꞌmine nama gohi ma he netiꞌ nama sitaꞌ di igi ngibili Oꞌmoso lehizi-dilisave lo minidoꞌ eꞌmeti ilisa vasineꞌ ve. Idoꞌ eleꞌmizi vasineꞌ nene Guvelesi veꞌmi louꞌ gamazi gohi maloꞌ nene eꞌmeti Izesuꞌni nene Guvelesi ve lehizi-dilisa vasineꞌ. Aꞌmine louꞌ gamazi nene tiꞌ li gizi nizave: Ganaꞌ sotoꞌ ilizaniꞌ gipe mukiꞌ nene Guvelesi veꞌmine ve li di kegesi-ngidaaꞌ ilisave li gizi nizaniꞌ ve.
LUK 2:25 Idoꞌ Zelusalemi numuno ebekuꞌ nene ve ma minineꞌ gulive Simeoniꞌ. Aza nene ve lisiheꞌ mino Oꞌmoso gelekeleꞌ o-do mino Oꞌmosoꞌmo Isilaeleꞌ aleve do nguꞌ izelineꞌ gamenemuꞌ nene gizebo ogo neivo Oꞌmosoꞌmi Sikalahuꞌ neꞌmo nene ezela mino lulouꞌ gono do minineꞌ ve.
LUK 2:26 Neꞌmine ogo neivo aꞌmine Oꞌmosoꞌmi Sikalahuꞌ neꞌmo nene tiꞌ lo lo sotoꞌ ogo lo-emavo gele minosa minineꞌ ve: Gaza nene Guvelesi veꞌmo do lunguꞌ izelive ma eleꞌmize molo imiselelesa live nene gaza ningamo helelinivoba mo ningosa helelesane.
LUK 2:27 Idoꞌ Izesuꞌ izele mele ingine nene Moseꞌ louꞌ gamaziꞌmo ilizave lo lidoꞌ lidoꞌ nene i-dilisa monoꞌ numuno nabauꞌ eleꞌmize dizi nasivo Sikalahuꞌ neꞌmo do ote-davo aꞌmine ve Simeoniꞌ nesi nene aꞌminguꞌ dize minidotiꞌ
LUK 2:28 izipe nene do abasalauꞌ molo Oꞌmoso opoꞌni lo tiꞌ lo lineꞌ ve:
LUK 2:29 Guvekasi ve make, gaza do luꞌ izelive do sotoꞌ o-daineꞌ nene naza neniꞌ veꞌnedunuꞌ gehepeve idise mo ningekuvoniꞌ nemuꞌ nene gaza gomuꞌ laineꞌ gamaziloꞌ eꞌmeto gelekeleꞌ veka neniꞌ nene mudise aka viline lo gele nemanivo muluꞌneuꞌ hongu lo minivo volosuve lo noluve.
LUK 2:31 Idoꞌ gaza aꞌmine leliꞌ do luꞌ izelive mene eveneꞌ ato atoꞌ mukilite ningilizave lo do sotoꞌ o-do eleꞌmize molane.
LUK 2:32 Aꞌmine ve mene oloꞌ liviꞌ neꞌmino mino Zuda ve minamave heta atoꞌ ve nesi nene hize labanaꞌ ele-ngedeleseive. Idoꞌ eiꞌ sotoꞌ ogo minelineꞌ neꞌmo geze zuho Isilaeleꞌ aleveti guveꞌine nene moneleseive.
LUK 2:33 Neꞌmine lavo Izesuꞌ izelehoi melehoi ingine nene Simeoniꞌ aꞌmine izipemuꞌ lineꞌ gamazi nemuꞌ nene voꞌine vavo gopo gaꞌine gili minasineꞌ ve.
LUK 2:34 Neꞌmine igi nizasivo Simeoniꞌ aza Oꞌmoso lengikisi mino hize eleꞌ o-lengedo minivo lo izipeliꞌmi izeleho Maliaꞌni tiꞌ lo lo-imineꞌ: Gelezo. Oꞌmosoꞌmo me izipe eleꞌmize molaniꞌ neꞌmo nene Isilaeleꞌ aleveutiꞌ eveneꞌ linge mukiꞌ nene ezemuꞌ goseleꞌ ngibilivo mini limi ingi goloso ilisave. Idoꞌ eveneꞌ linge ma nete nene ezela vi giꞌmizikevo do nguꞌ izo do ote-ngedelive losa eleꞌmize molaniꞌ ve. Ee, aza do nguꞌ izivo minilizaniꞌ aka do sotoꞌ ogo ngelebizeleseineꞌza eveneꞌ mukiꞌ ingine ezemuꞌ diviꞌ ledivika li-dilisave.
LUK 2:35 Neꞌmine nili-davo geiꞌ mulunga hukilineꞌ nene bainati miteliꞌmo hizo sokuluꞌ lineꞌ geleleseive. Idoꞌ diviꞌ ledivika li-dilizaniꞌ neꞌmo eveneꞌ mukiꞌ luꞌninguꞌ gilaaꞌ naniꞌ gamazi nene mo sotoꞌ ogo mineleseive lo lineꞌ.
LUK 2:36 Idoꞌ aꞌmida nene Oꞌmosoꞌmi veleutiꞌ gamazi lo sotoꞌ ogaꞌ ineꞌ veneꞌ ma minineꞌ gulive Hanaꞌ. Aza nene Zakoboꞌ gipele Aseliꞌ aꞌvopilemoꞌ zuhoutiꞌ ve Hanueliꞌ aluvo mino eleni gehepeve molo minineꞌ. Idoꞌ ganaꞌ apiꞌ ogo veloꞌ vidotiꞌ nene kilisimasi seveni (7) ogo vavo
LUK 2:37 nelotiꞌ nene vanaho helavo veneꞌ gevonoꞌ mino kilisimasi eiti foꞌa (84) neꞌmine minineꞌ ve. Aza nene gamene gamene holukakisi holisekisi monoꞌ numuno naba nene hulo vamo Oꞌmosomuꞌ gelelesa nosoꞌ niteꞌ malise ogo mino Oꞌmosola lo Oꞌmoso opoꞌni lo minaaꞌ ineꞌ ve.
LUK 2:38 Neꞌmino minaaꞌ ineꞌ nenako Izesuꞌni eleꞌmizi monoꞌ numunguꞌ aniꞌ gameneloꞌ nene aꞌmine veneꞌ azasi nene aꞌmida ogo Izesuꞌ sotoꞌ ingumuꞌ nene Oꞌmoso isaaꞌ neve lo tangezoꞌ lo-do Oꞌmosoꞌmo Zelusalemi aleve goloso igi minangutiꞌ do nguꞌ izeli gamenemuꞌ gizebo igi minave nene aꞌmine izipe Izesuꞌnimuꞌ gamaziꞌve nene lo sotoꞌ o-ngemeꞌ ngemeꞌ oꞌmo ogo minineꞌ.
LUK 2:39 Idoꞌ Zoseheki Maliaki ingine Guvelesi veꞌmi louꞌ gamaziloꞌ eꞌmeti ilisa asineꞌ initeꞌ mukiꞌ nene di pili engiꞌ numuꞌine ebeꞌine Nasalete nGalilaia misubouko nene tineꞌ mili vaniꞌ.
LUK 2:40 Idoꞌ nelotiꞌ aꞌmine izipe Izesuꞌ nene naba oꞌmo vo ngenga lo otohato gala gelo neivo Oꞌmoso neꞌmo ninge lamineꞌ do hize eleꞌ o-daaꞌ ineꞌ ve.
LUK 2:41 Idoꞌ kilisimasiloꞌ kilisimasiloꞌ Izesuꞌ izele mele ingine nene engiꞌ Zuda veti avoꞌningine Oꞌmosoꞌmo iseꞌine izingumuꞌ gohi gili mini nosoꞌ niteꞌ naaꞌ aniꞌ holiseꞌ nene alitavo aꞌmine nosoꞌ niteꞌ nalisa Zelusalemi numuda vaaꞌ asineꞌ.
LUK 2:42 Nemuꞌ nene Izesuꞌ aza kilisimasiꞌve tuvelu (12) neivo aꞌmine holiseꞌ mini nosoꞌ niteꞌ nalisa ingine mo vaaꞌ aniꞌ maꞌmine igi Zelusalemi numuda dizi vaniꞌ ve.
LUK 2:43 Idoꞌ dizi mini aꞌmine nosoꞌ niteꞌ nene ni osuꞌ li numuꞌnida apiꞌ igi tineꞌ mili nivavo Izesuꞌ aza engikisi vamo ha minineꞌ. Idoꞌ aꞌmida ha miningumuꞌ nene izele mele ingine gilami
LUK 2:44 aza nene leze alevesi naahe li gili nivasivo litiꞌmuso izavo engiꞌ alevela nene ezemuꞌ apiꞌ igi viseꞌ asineꞌ.
LUK 2:45 Viseꞌ igi mo ningami gohi ezemuꞌ visetoꞌ Zelusalemi numuda tineꞌ mili vasineꞌ ve.
LUK 2:46 Tineꞌ mili vi viseꞌ igi nizasivo gamene sito hamo ogo vavo Izesuꞌ nene monoꞌ numuno nabauꞌ monoꞌ apizi ngimaaꞌ aveti vovoꞌninguꞌ mino gamazi ladoꞌ gapepeꞌ ogo gelo mino initeꞌ atoꞌ atokumuꞌ nene longoꞌ o-ngedo gelo neivo ningasineꞌ.
LUK 2:47 Idoꞌ Izesuꞌ gamazi lineꞌ gilave mukiꞌ ingine nene aza gala gele nge lo mino gamazi lingumuꞌ nesi idoꞌ longoꞌ i-daniꞌ gamaziloꞌ do velepeꞌ izo laminetokovoꞌ lo-ngimineꞌ nemukisi nene voꞌine vavo aizo li gilaniꞌ.
LUK 2:48 Idoꞌ izelehoi melehoi ingine Izesuꞌ nene neꞌmine ogo neivo ningi voꞌine goloso vavo upuhoꞌ asineꞌ. Neꞌmine igi izeleho aza Izesuꞌni tiꞌ lo lo-imineꞌ: Gipeꞌne, gaza nene neꞌmino minanivo mahosi nezesi nene geikumuꞌ gopo gate gelo viseꞌ goloso okusiko nanimuꞌ neꞌmine ane.
LUK 2:49 Neꞌmine lavo Izesuꞌ aza izelehingi melehingi nene tiꞌ lo lo-ngimineꞌ ve: Nenikumuꞌ nene nanimuꞌ viseꞌ asive. Naza nene meꞌnehi numunguꞌ nene minelodoꞌ o neineꞌ nene gili minilisinako gilamasihe.
LUK 2:50 Neꞌmine lineꞌza ingine nene aꞌmine lineꞌ gamazi neꞌmi monovomuꞌ nene ma gili hehe lamasineꞌ ve.
LUK 2:51 Neꞌmine ikesivo aza nene izelehoi melehosi makaꞌ limi vi Nasaletela heteli minaniꞌ ve. Idoꞌ Izesuꞌ nene mo izelehi melehi gamaziꞌnidoꞌ nene gele do minaaꞌ ineꞌ. Neꞌmino neivo izeleho aza nene aꞌmine Zelusalemi numuda sotoꞌ ineꞌ initeꞌ mukiꞌ nemuꞌ nene gelo do madunouꞌ molaniꞌ ve.
LUK 2:52 Neꞌmine ogo neivo Izesuꞌ aza nene naba oꞌmo vo neivo ezela gala gele nge laaꞌ monovoꞌve nene vaiꞌ loꞌmo novivo eveneꞌ nete ningi lamineꞌ nidavo idoꞌ Oꞌmoso neꞌmosi nene ninge lamineꞌ daniꞌ ve.
LUK 3:1 Idoꞌ Tibelioꞌ Kaesaleꞌ aza kilisimasi fiftini (15) neꞌmine Loma veti guveꞌinesi ve loloꞌ ogo neivo Podioꞌ Pilatoꞌ nene Zudaia misubouꞌ ngamani naba loloꞌ o-davo evenetoꞌ gizebo ogo neivo idoꞌ Helodeꞌ aza meleho gomuꞌ gizebo ineꞌ misubo linge ma nGalilaia misubouꞌ nene guvelesi ve loloꞌ ogo neivo idoꞌ akunolo Hilipoꞌ nene misubo linge ma Itulia misuboukisi Talakonito misuboukisi nene guvelesi ve neivo idoꞌ Lisaniaꞌ nene misubo linge ma Abilene misubouꞌ nene guvelesi ve neivo
LUK 3:2 idoꞌ Anasiꞌ ve Kaiahaꞌ ve ingine nene evenetoꞌ medeli mini Oꞌmoso initeꞌ lehizi-daaꞌ asive naba nizasivo neꞌmine igi minaniꞌ gameneloꞌ nene Zakaliaꞌ gipele Zohaneꞌ aza ebeꞌ hadivela mininguꞌ nene Oꞌmoso neꞌmo eze gamaziꞌve eveneꞌ lo-ngeme ngemeꞌ ilive lo aꞌmine Zohaneꞌ veleuꞌ molavo lo-ngeme ngemeꞌ ineꞌ.
LUK 3:3 Neꞌmine oꞌmo novo Zodani noso gahevela misubo mukiꞌ mineꞌmo moninguꞌ nene tiꞌ lo lo-ngeme ngemeꞌ oꞌmo vineꞌ: Oꞌmosoꞌmo lengiꞌ lihimetine nene hulo-lengedelingumuꞌ ve li lingine lutine di velepeꞌ izi monoꞌ noso hilalo.
LUK 3:4 Neꞌmino lo-ngeme ngemeꞌ oꞌmo vo minineꞌ nene monoꞌ godolouꞌ polohete Isaiaꞌ tiꞌ lo lineꞌ gamazi gizaniꞌ minineꞌ maloꞌ nene vo gihile izineꞌ ve: Ebeꞌ hadivelatiꞌ eveneꞌ maliꞌmo asi naba ma tiꞌ lo nolive: Guvelesi ve alingumuꞌ ve li akaꞌve di vaꞌvaꞌ igi lutine di lisiheꞌ i-dilo.
LUK 3:5 Giꞌmize gaꞌmize nene misubo mili di lisiheꞌ igi golo ngomoꞌ nabaꞌ dizaaꞌ lemaaꞌ o neineꞌ nene bili diꞌmi limi di lisiheꞌ igi aka zovoꞌ zavaꞌ izo minineꞌ nene di pehe li idoꞌ aka goloso o nolineꞌ nene hasaꞌ igi di lisiheꞌ ilisave.
LUK 3:6 Neꞌmine ikevo eveneꞌ mukiꞌ ingine Oꞌmosoꞌmo eze evenele do nguꞌ izelineꞌ aka nene ningilisave.
LUK 3:7 Idoꞌ polohete Isaiaꞌ nene Zohaneꞌ neꞌmine gamazi lilingumuꞌ lineꞌ nenako nemuꞌ nene eveneꞌ vaiꞌ goloso neꞌminete Zohaneꞌ noso holo-ledelive li eiꞌ neida ikevo aza tiꞌ lo lo-ngeme ngemeꞌ ogo minineꞌ: Lingine sataliꞌmi izipahala goloso mene Oꞌmosoꞌmo lihime lengemelingutiꞌ ha olovoꞌ ilisave lo ve maliꞌmo lo-lengemavosa olovoꞌ ilisa nahe.
LUK 3:8 Nemuꞌ nene lingine aꞌmingutiꞌ olovoꞌ olone lii ma lingine luꞌine di velepeꞌ lamineꞌ izaveti monovo nene di mini initeꞌ lamineꞌ gihilevoꞌ nene igi mili minilo. Idoꞌ gililo. Lingine laza Abalahamuꞌ aꞌvopilemoꞌ Oꞌmosoꞌmo noꞌnohoꞌ ize-ledelesuve live nounako Oꞌmosoꞌmo lihime lemo do goloso o-ledamivo laminekovoꞌ ha minelesune li mo lamilo. Naza ma lo-lengemeloze. Lengiꞌ nene do hulosa Oꞌmosoꞌmo Abalahamuꞌni lo huko-dineꞌ gamazi do gihile izelesa Abalahamuꞌ aꞌvopilemoꞌ gohi ma do sotoꞌ o-delove lo gilidiniko geheni nevote Abalahamuꞌ aꞌvopilemoꞌ liliꞌ adine. Nemuꞌ nene lingine laza Abalahamuꞌ aꞌvopilemoꞌ nounako lihime lemamoloseive li gilamilo.
LUK 3:9 Oꞌmosoꞌmo idise lihime lemo mo lebelelesa do nene ogo mino eveneꞌ za belelesa za monovola luno bai gamunoꞌ ogaꞌ neineꞌ neꞌmine o neive. Za mukiꞌ gihile lamineꞌ izamaniꞌ nene monoꞌ gilamaniꞌ aleve neꞌminosa nenako huko olokuꞌ gizeleseive.
LUK 3:10 Neꞌmine lavo eveneꞌ nete tiꞌ li longoꞌ i-daniꞌ: Idoꞌ gaza neꞌmine laineꞌ nemuꞌ nene Oꞌmosoꞌmo neꞌmine o-ledamilingumuꞌ nene laza nadiꞌ olone.
LUK 3:11 Neꞌmine likevo Zohaneꞌ tiꞌ lo lo-ngimineꞌ: Lingine nene okodidoꞌ izaaꞌ naniꞌ initeꞌ saketitine nene sitaꞌ neivo ma nene saketiꞌve ma nomivo nolive nesi nene izeꞌ mili dalisive. Idoꞌ aꞌmineꞌmine igi ve ma ingine nosoꞌ niteꞌine ma neivo minaaꞌ nave nete nene ma nomivo minaaꞌ nave nene izeꞌ mili ngimi ni minilizave.
LUK 3:12 Idoꞌ takisi moni daaꞌ ave nesi nene monoꞌ noso holo-ledelive li Zohaneꞌ neida igi tiꞌ li longoꞌ i-daniꞌ: Idoꞌ Tisazo, leliꞌ nene nadiꞌ oloneꞌ o neive.
LUK 3:13 Neꞌmine likevo aza tiꞌ lo lo-ngimineꞌ: Lingine nene eveneꞌ takisi moni di-ngidilizanguꞌ nene ngamaniꞌmo moni neꞌmine makiloꞌ dalizave lo-lengede nolineꞌ maki nene ivileꞌ igi di gopo igi vaiꞌ damilo.
LUK 3:14 Neꞌmine lo-ngedavo ami pilisi ve netesi nene igi tiꞌ li longoꞌ i-daniꞌ: Idoꞌ leze nene nadiꞌ oloneꞌ o neive. Neꞌmine likevo Zohaneꞌ aza tiꞌ lo lo-ngimineꞌ: Lingine eveneꞌ mamuꞌ nene lengebelalone idoꞌ gonikuꞌ lengeleꞌmize molalonge moni limilo li soza sakupo gamazi li-ngidi ngehelele izelineꞌ initeꞌ i-ngidi moni gumine damilo. Moni gohi gohi dalisa amuzo milami menitine lingimilizanikovoꞌ lisiheꞌ igi dalo.
LUK 3:15 Idoꞌ Zohaneꞌ neꞌmine ogo miningumuꞌ gili eveneꞌ nete leze do luꞌ izelive lo Oꞌmosoꞌmo imiselelesa live nene mo sotoꞌ olosa neihe li laniteꞌ gilii aꞌminemuꞌ gizebo igi mini eveneꞌ mukilite aꞌmine ve nene aꞌmine Zohaneꞌ nolihe li luꞌninguꞌ nigilavo
LUK 3:16 Zohaneꞌ aza aꞌmine eveneꞌ mukiꞌ nene tiꞌ lo lo-ngimineꞌ: Naza nene monoꞌ noso holo-lengedeꞌmo vo nouvoniꞌ nene haza nosodunuꞌ holo-lengedeꞌmo vo nouvoniꞌza eveneꞌ ma neniꞌ amuzo nesi ivileꞌ o neineꞌ amuzoꞌvesi minive nene mo nave. Naza aꞌneꞌmine goboni gono do-do eiꞌ suuꞌvelotiꞌ nalaꞌve nesi nene apase hulo-delodoꞌ nene lisiheꞌ amuve. Aꞌmine ve neꞌmo noso neꞌmine holo-lengedelineꞌ nene Oꞌmosoꞌmi Sikalahukisi olokisi ne neive.
LUK 3:17 Ee, aꞌmine ve nene eveneꞌ laminekisi golososi do gizekaꞌ olosa do nene ogo mino ve ma viti gihilesi losuvosi gopo igi minaniꞌ nene do kegeselesa gono daaꞌ initeꞌve do anauꞌ ogo do nene ogo minaaꞌ neineꞌ neꞌmine o neive. Aza viti gihile losuvosi minangutiꞌ aꞌmine vaiꞌ nene do lamino izeꞌ moloo naaꞌ initeꞌ nene do nubo ogo numuꞌveuko molo losuvo nene lovoꞌ lovoꞌ ogo minaaꞌ neineꞌ olokuꞌ nene gizeleseive.
LUK 3:18 Idoꞌ neꞌmine gamazi nene ato atoꞌ vaiꞌ lo-ngemo luꞌine do ngi lo-ngedo monoꞌ gamazi lamineꞌ nene eveneꞌ lo sotoꞌ o-ngemo minineꞌ ve.
LUK 3:19 Neꞌmine ogo minineꞌza guvelesi ve Helodeꞌ aza akunoloꞌmi elenahine ipeꞌ ogo dangumukisi idoꞌ goloso niteꞌ vaiꞌ dangumukisi Zohaneꞌ aza elemavo
LUK 3:20 Helodeꞌ aza aꞌmine goloso niteꞌ vaiꞌ dadoꞌ nene imineꞌ molo monovo goloso gohi ogo Zohaneꞌni nene galapuso numunguꞌ hulo-dineꞌ ve.
LUK 3:21 Idoꞌ Helodeꞌ aza Zohaneꞌni galapuso numunguꞌ olihe hulo-damivo Zohaneꞌ aza eveneꞌ mukiꞌ nene monoꞌ noso holo-ngedo osuꞌ losa nelotiꞌ Izesuꞌni nesi nene noso holo-davo Oꞌmosola lo neivo Okulumoꞌ nene ngoloꞌ lavo
LUK 3:22 Oꞌmosoꞌmi Sikalahuꞌ nene nama viluso neꞌmine okoꞌno do otuho Izesuda lemo aniꞌ ve. Lemo navo Okulumokutiꞌ gamazi ma tiꞌ lo limineꞌ ve: Gaza nene voꞌneloꞌ gipeꞌne hamoꞌ nene nane. Gezemuꞌ nene mo muluꞌneuꞌ lamineꞌ nogiluve.
LUK 3:23 Neꞌmine ogo nelotiꞌ Izesuꞌ aza gonoꞌve gihile nene apiꞌ ogo do do vineꞌ nene kilisimasiꞌve teoti (30) neꞌmine minosa gonoꞌve gihile nene apiꞌ ineꞌ ve. Idoꞌ evenelite gilavo Izesuꞌ aza Zoseheꞌ gipele minineꞌ ve. Idoꞌ aꞌmine Zoseheꞌ nene Heliꞌ gipele minineꞌ ve.
LUK 3:24 Idoꞌ Heliꞌ nene Matatiꞌ gipele minineꞌ. Idoꞌ Matatiꞌ nene Leviꞌ gipele minineꞌ. Idoꞌ Leviꞌ nene Melekiꞌ gipele minineꞌ. Idoꞌ Melekiꞌ nene Zanaiꞌ gipele minineꞌ. Idoꞌ Zanaiꞌ nene Zoseheꞌ gipele minineꞌ.
LUK 3:25 Idoꞌ Zoseheꞌ nene Matatiaꞌ gipele minineꞌ. Idoꞌ Matatiaꞌ nene Amosiꞌ gipele minineꞌ. Idoꞌ Amosiꞌ nene Nahumiꞌ gipele minineꞌ. Idoꞌ Nahumiꞌ nene Hesiliꞌ gipele minineꞌ. Idoꞌ Hesiliꞌ nene Nagaiꞌ gipele minineꞌ.
LUK 3:26 Idoꞌ Nagaiꞌ nene Maatiꞌ gipele minineꞌ. Idoꞌ Maatiꞌ nene Matatiaꞌ gipele minineꞌ. Idoꞌ Matatiaꞌ nene Semeiniꞌ gipele minineꞌ. Idoꞌ Semeiniꞌ nene Zosekeꞌ gipele minineꞌ. Idoꞌ Zosekeꞌ nene Zodaꞌ gipele minineꞌ.
LUK 3:27 Idoꞌ Zodaꞌ nene Zoanaꞌ gipele minineꞌ. Idoꞌ Zoanaꞌ nene Lesaꞌ gipele minineꞌ. Idoꞌ Lesaꞌ nene Zelubabeliꞌ gipele minineꞌ. Idoꞌ Zelubabeliꞌ nene Sealetieliꞌ gipele minineꞌ. Idoꞌ Sealetieliꞌ nene Neliꞌ gipele minineꞌ.
LUK 3:28 Idoꞌ Neliꞌ nene Melekiꞌ gipele minineꞌ. Idoꞌ Melekiꞌ nene Adiꞌ gipele minineꞌ. Idoꞌ Adiꞌ nene Kosamuꞌ gipele minineꞌ. Idoꞌ Kosamuꞌ nene Elimadamuꞌ gipele minineꞌ. Idoꞌ Elimadamuꞌ nene Eliꞌ gipele minineꞌ.
LUK 3:29 Idoꞌ Eliꞌ nene Zosuaꞌ gipele minineꞌ. Idoꞌ Zosuaꞌ nene Eliezeleꞌ gipele minineꞌ. Idoꞌ Eliezeleꞌ nene Zolimiꞌ gipele minineꞌ. Idoꞌ Zolimiꞌ nene Matatiꞌ gipele minineꞌ. Idoꞌ Matatiꞌ nene Leviꞌ gipele minineꞌ.
LUK 3:30 Idoꞌ Leviꞌ nene Simeoniꞌ gipele minineꞌ. Idoꞌ Simeoniꞌ nene Zudaꞌ gipele minineꞌ. Idoꞌ Zudaꞌ nene Zoseheꞌ gipele minineꞌ. Idoꞌ Zoseheꞌ nene Zonamuꞌ gipele minineꞌ. Idoꞌ Zonamuꞌ nene Eliakimiꞌ gipele minineꞌ.
LUK 3:31 Idoꞌ Eliakimiꞌ nene Meleaꞌ gipele minineꞌ. Idoꞌ Meleaꞌ nene Menaꞌ gipele minineꞌ. Idoꞌ Menaꞌ nene Matataꞌ gipele minineꞌ. Idoꞌ Matataꞌ nene Nataniꞌ gipele minineꞌ. Idoꞌ Nataniꞌ nene Zuda veti guveꞌinesi ve naba Davidiꞌ gipele minineꞌ.
LUK 3:32 Idoꞌ Davidiꞌ nene Zesaiꞌ gipele minineꞌ. Idoꞌ Zesaiꞌ nene Obediꞌ gipele minineꞌ. Idoꞌ Obediꞌ nene Boaziꞌ gipele minineꞌ. Idoꞌ Boaziꞌ nene Salaꞌ gipele minineꞌ. Idoꞌ Salaꞌ nene Nasoniꞌ gipele minineꞌ.
LUK 3:33 Idoꞌ Nasoniꞌ nene Aminadabuꞌ gipele minineꞌ. Idoꞌ Aminadabuꞌ nene Adiminiꞌ gipele minineꞌ. Idoꞌ Adiminiꞌ nene Alaniꞌ gipele minineꞌ. Idoꞌ Alaniꞌ nene Hezeloniꞌ gipele minineꞌ. Idoꞌ Hezeloniꞌ nene Pelezaꞌ gipele minineꞌ. Idoꞌ Pelezaꞌ nene Zudaꞌ gipele minineꞌ.
LUK 3:34 Idoꞌ Zudaꞌ nene Zakoboꞌ gipele minineꞌ. Idoꞌ Zakoboꞌ nene Isakaꞌ gipele minineꞌ. Idoꞌ Isakaꞌ nene Abalahamuꞌ gipele minineꞌ. Idoꞌ Abalahamuꞌ nene Telaꞌ gipele minineꞌ. Idoꞌ Telaꞌ nene Naholiꞌ gipele minineꞌ.
LUK 3:35 Idoꞌ Naholiꞌ nene Selugaꞌ gipele minineꞌ. Idoꞌ Selugaꞌ nene Leguꞌ gipele minineꞌ. Idoꞌ Leguꞌ nene Pelekoꞌ gipele minineꞌ. Idoꞌ Pelekoꞌ nene Ebeliꞌ gipele minineꞌ. Idoꞌ Ebeliꞌ nene Selaꞌ gipele minineꞌ.
LUK 3:36 Idoꞌ Selaꞌ nene Kenaniꞌ gipele minineꞌ. Idoꞌ Kenaniꞌ nene Alahasadaꞌ gipele minineꞌ. Idoꞌ Alahasadaꞌ nene Semiꞌ gipele minineꞌ. Idoꞌ Semiꞌ nene Noaꞌ gipele minineꞌ. Idoꞌ Noaꞌ nene Lamekiꞌ gipele minineꞌ.
LUK 3:37 Idoꞌ Lamekiꞌ nene Metuselaꞌ gipele minineꞌ. Idoꞌ Metuselaꞌ nene Enokuꞌ gipele minineꞌ. Idoꞌ Enokuꞌ nene Zalediꞌ gipele minineꞌ. Idoꞌ Zalediꞌ nene Mahalaleliꞌ gipele minineꞌ. Idoꞌ Mahalaleliꞌ nene Kenaniꞌ gipele minineꞌ.
LUK 3:38 Idoꞌ Kenaniꞌ nene Enosiꞌ gipele minineꞌ. Idoꞌ Enosiꞌ nene Setiꞌ gipele minineꞌ. Idoꞌ Setiꞌ nene Adamuꞌ gipele minineꞌ. Idoꞌ Adamuꞌ nene Oꞌmosoꞌmo loloꞌ o-davo gipele neꞌmine minineꞌ ve.
LUK 4:1 Idoꞌ Izesuꞌni nene Oꞌmosoꞌmi Sikalahuꞌ neꞌmo lulouꞌ lemo mino gono dadiꞌmo do zauꞌ o-davo Zodani nene hulo misubo gaꞌmeta vavo aꞌmida Oꞌmosoꞌmi Sikalahuꞌ aza gamene foti (40) neꞌmine eleꞌmizo nomonivo Satani neꞌmo emenguꞌ molokaꞌ molokaꞌ ogo minineꞌ. Aꞌmine gameneuꞌ nene Izesuꞌ aza velesi namo minineꞌ nenako aꞌmine gamene foti (40) nene ogo vo osuꞌ nolivo gaꞌna naba helo minineꞌ.
LUK 4:3 Neꞌmine neivo Satani aza ogo Izesuꞌni tiꞌ lo lo-imineꞌ: Gaza nene Oꞌmosoꞌmi gipele noo ma nene gaza geheni mevoomuꞌ lanivo nalineꞌ initeꞌ beleti loloꞌ ozo lovo.
LUK 4:4 Neꞌmine lavo Izesuꞌ tiꞌ lo lo-imineꞌ: Oꞌove. Monoꞌ godolouꞌ gamazi ma tiꞌ li gizi nizaniꞌ ma neive: Eveneꞌ minevoꞌ alevote nene nosoꞌ nitekukovoꞌ nomive. Neꞌmine li gizi nizaniꞌ nenako nemuꞌ nene geiꞌ laineꞌ neꞌmine nene mo amolosuve.
LUK 4:5 Idoꞌ nelotiꞌ nene aza golo maloꞌ Izesuꞌni eleꞌmizo dize mino misubouꞌ misubouꞌ minaniꞌ eveneꞌ zuho ato atoꞌ mukiꞌ misuboꞌninguꞌ misuboꞌninguꞌ minaniꞌ nene liteꞌ lo elebizo osuꞌ lo
LUK 4:6 tiꞌ lo lo-imineꞌ: Aꞌmine eveneꞌ zuho ato atoꞌ mukitoꞌ gizebo ogaꞌ amuzo nesi idoꞌ engiꞌ guveꞌine vaaꞌ neineꞌ nesi nene neniꞌ initeꞌ loloꞌ ogo neineꞌ nenako eveneꞌ ma emelove lo geleloniꞌ nene zaho nolihe aꞌmine ve nene ha emelodoꞌ o nouve.
LUK 4:7 Idoꞌ aꞌmine amuzo emelove lo giluve nene ha emelodoꞌ o nouvoniꞌ nenako gaza gubiꞌ ize nemo obuvoka hize nemelineꞌ aꞌmine initeꞌ nene gemekuvo mukiꞌ nene geiꞌ initeꞌ loloꞌ oloseive.
LUK 4:8 Neꞌmine lavo Izesuꞌ aza tiꞌ lo lo-imineꞌ: Monoꞌ godolouꞌ tiꞌ li gizi nizaniꞌ ma neive: Laza Guvetesi ve Oꞌmoso eiꞌ hamoꞌ nene opoꞌni lo gubiꞌ ize emo minelesune. Ee, eiꞌ hamokovoꞌ nene gelekeleꞌ o-do minelesune. Neꞌmine li gizi nizaniꞌ nenako nemuꞌ nene gaza laineꞌ neꞌmine amolosuve.
LUK 4:9 Idoꞌ aza gohi eleꞌmizo Zelusalemi ebekuꞌ vo monoꞌ numuno naba haꞌna haꞌna minineꞌ neꞌmi gololoꞌ eleꞌmizo dize mino tiꞌ lo lo-imineꞌ: Monoꞌ godolouꞌ tiꞌ li gizi nizaniꞌ ma neive: Oꞌmosoꞌmo geiꞌ gizebo i-gidilizangumuꞌ angeloꞌve gono gamazi lo-ngedeleseive. Idoꞌ ma nene: Gizenga geheniloꞌ gebele gulutilingutiꞌ angeloꞌ nete alete mili di hozi li-gidilisave li gizi nizaniꞌ ve. Idoꞌ aꞌmine gamazi lidoꞌ igi neꞌmine i-gidilisaze. Gaza lamineꞌ Oꞌmosoꞌmi gipele noo ma nene melotiꞌ oluto akaꞌmeloꞌ izevo.
LUK 4:12 Neꞌmine lavo Izesuꞌ tiꞌ lo lo-imineꞌ: Ne neiha monoꞌ godolouꞌ gamazi ma tiꞌ lo neive: Lingine Guvetinesi ve Oꞌmoso nene golo izamilo. Neꞌmine lo-leme neineꞌ ma nenako geze nolaineꞌ nene Oꞌmoso golo izaaꞌ noloseinako neꞌmine amolosuve.
LUK 4:13 Neꞌmine lavo Satani aza emenguꞌ molo osuꞌ lo gamene ma emenguꞌ molalosa hulo-do vineꞌ ve.
LUK 4:14 Idoꞌ Izesuꞌ nene Oꞌmosoꞌmi Sikalahuliꞌmo amuzo emo hize eleꞌ o-davo nGalilaia misubouko do tineꞌ molo vineꞌ. Tineꞌ molo vavo aꞌmida nene eiꞌ guvele neꞌmo buu lo nGalilaia misubo gahevela ebeꞌ mukikuꞌ nene mone osuꞌ lineꞌ.
LUK 4:15 Aꞌmine nGalilaia misubouꞌ nene monoꞌ numuno mininguꞌ mininguꞌ monoꞌ apize ngeme ngemeꞌ ivo eveneꞌ mukiꞌ di naba i-di gekeꞌ li-daniꞌ ve.
LUK 4:16 Neꞌmine ikevo Izesuꞌ aza mino naba ineꞌ ebeꞌve Nasaletela vo hetelo aza ogaꞌ idiꞌmine ogo holiseꞌ gamene ogavo monoꞌ numunguꞌ monoꞌ gili nizanguꞌ nene dizineꞌ. Dizo mitoꞌ neivo monoꞌ godoloutiꞌ polohetelite gizaniꞌ gamazi linge ma gililizaniꞌ gamene ogavo Izesuꞌ aza aꞌmine monoꞌ gato ngemelesa ote neivo
LUK 4:17 monoꞌ numudoꞌ gizebo ve aza polohete Isaiaꞌ gizineꞌ monoꞌ buku nene do emavo buku nene do patelo gamazi ma tiꞌ lo gizineꞌ minineꞌ nene do sotoꞌ ineꞌ:
LUK 4:18 Guvelesi veꞌmo neniꞌ nene eze gonoloꞌ neleꞌmize molaniꞌ nenako neꞌmo eiꞌ Sikalahuꞌve nene nenita omo neive. Ee, Guvelesi ve aza gono gamazi tiꞌ lo lo-nimineꞌ: Gaza eveneꞌ gohoꞌ gahaliꞌ neꞌmine minaniꞌ nene neniꞌ gamaziꞌne lamineꞌ nene lo sotoꞌ o-ngemeline lo neleꞌmize molaniꞌ ve. Idoꞌ biluvaliti aꞌninguꞌ galapuso ve neꞌmine gili minave nene kuluhizi vilizaniꞌ akatine nene mo idise ngoloꞌ lave lo lo sotoꞌ o-ngemeline lo neleꞌmize molaniꞌ ve. Idoꞌ veꞌine likive neꞌmine minavemuꞌ nene gohi veꞌine ningilizaniꞌ aka nene mo ngoloꞌ lave lo lo sotoꞌ sotoꞌ ogo lo-ngemeline lo nimiselineꞌ ve. Idoꞌ goboni malaꞌ malaꞌ i-ngidavo geni initeliꞌmi lulouꞌ minave nene gaza aꞌmingutiꞌ hulo heta o-ngedosa
LUK 4:19 Guvelesi veꞌmo ninge lamineꞌ o-ngedelineꞌ gamene nene mo alitave lo lo sotoꞌ o-ngemeline lo nimiselineꞌ ve.
LUK 4:20 Idoꞌ aꞌmine gamazi nene mo gato ngemo buku nene do gango monoꞌ numudoꞌ gizebo ve nene do emo mitoꞌ minavo aꞌmine monoꞌ numunguꞌ minave mukiꞌ nene monoꞌ lo-lemelihe li vonuꞌ bili minaniꞌ ve.
LUK 4:21 Neꞌmine igi nizavo aza gamazi apiꞌ ogo tiꞌ lo lo-ngimineꞌ: Aꞌmine monoꞌ godoloutiꞌ gamazi mene lingine nigilavo idise aꞌmene gihile noizive.
LUK 4:22 Neꞌmine lavo ingine di naba i-di gamazi lamineꞌ eiꞌ veleutiꞌ lineꞌ nemuꞌ nene veꞌine gahava nomivo mini tiꞌ li laniꞌ: Aza nene ha Zoseheꞌ gipele nenako neꞌmine gamazi nene nadosa nolive. Olo.
LUK 4:23 Neꞌmine likevo aza aneza gamaziutiꞌ tiꞌ lo lo-ngimineꞌ: Naza giluvoniꞌ lingine tiꞌ li li-nimilisa gilaniꞌ ve: Dotazo, gaza eveneꞌ atoꞌ do lamineꞌ o-ngedaaꞌ naineꞌ neꞌmino geiꞌ okongasi do lamineꞌ ovo. Nemuꞌ nene aꞌmine gamaziloꞌ eꞌmeto gaza Kahanaumi numuda do sotoꞌ ane lavo giluneꞌ initeꞌ nene gaza geiꞌ numunga ebeka melokisi do sotoꞌ ovo.
LUK 4:24 Idoꞌ neꞌmine lo tiꞌ lo lo-ngimineꞌ: Naza laminetoꞌ tiꞌ lo lo-lengemeloze. Gililo. Oꞌmosoꞌmi veletiꞌ gamazi laaꞌ unive polohete mukiꞌ leliꞌ numudela leliꞌ zuho gihile nete leliꞌ polohetelite lunidoꞌ nene ma gili limisaꞌmave.
LUK 4:25 Nemuꞌ nene naza laminetoꞌ ma tiꞌ lo nolo-lingimuve: Isilaeleꞌ misubouꞌ mene gozopota polohete Eliaꞌ minineꞌ gameneuꞌ nene Oꞌmosoꞌmo goline izelineꞌ aka hize tilavo kilisimasi setohamosi hapusi ogo novivo goline izamivo aꞌmine misubo mukikuꞌ nene gaꞌna naba sotoꞌ ogavo minaniꞌ gamenela nene Isilaeleꞌ veneꞌ engikutiꞌ nene veneꞌ gevonoꞌ mukiꞌ minaniꞌza
LUK 4:26 Oꞌmosoꞌmo Eliaꞌni nene hize eleꞌ o-ngedelingumuꞌ engiꞌ mukita imiselamo asi Sidoni misubouꞌ numuno ebeꞌ ma gulive Zalehati nela heta atoꞌ veneꞌ gevonoꞌ minida imiselavo vineꞌ ve.
LUK 4:27 Idoꞌ Isilaeleꞌ misubouꞌ mene polohete Elisaꞌ minineꞌ gameneuꞌ nene ganadise gizi dave vaiꞌ minaniꞌza polohete Elisaꞌ aza aꞌmingutiꞌ hamokisi ma do lamineꞌ o-ngedamo asi heta atoꞌ ve Silia misuboutiꞌ ve Naamaniꞌni nene do lamineꞌ o-dineꞌ ve.
LUK 4:28 Neꞌmine lavo aꞌmine monoꞌ numunguꞌ mini lineꞌ gamazi gilave mukiꞌ nene aza lelita gono dalidoꞌ lisiheꞌ amune nolive li gili ngizeboloꞌ goloso molaniꞌ ve.
LUK 4:29 Neꞌmine ogavo oti Izesuꞌni nene ehusoꞌ ahasaꞌ igi numuno ebeꞌine neꞌmi heta di vi aꞌmine numuꞌine ebeꞌine minineꞌ gololotiꞌ nene aveseuꞌ ehusoꞌ i hulilisa aniꞌza
LUK 4:30 aza vovoꞌningutiꞌ olovoꞌ ogo vo mala vineꞌ ve.
LUK 4:31 Idoꞌ Izesuꞌ aza nGalilaia misubouꞌ numuno ebeꞌ ma Kahanaumi nela lemo vineꞌ. Aꞌmida vo neivo holiseꞌ gamene ogavo monoꞌ apize ngemo minineꞌ.
LUK 4:32 Neꞌmino neivo monoꞌ gamazi lo-ngimivo gilave ingine Izesuꞌ aza nene gamazi eveneꞌ malite ladoꞌ do molo lamo asi gamazi neꞌmi meleho neꞌmine mino lo-ngimidiꞌmo voꞌine vavo upuhoꞌ aniꞌ.
LUK 4:33 Neꞌmine igi nizavo aꞌmine engiꞌ monoꞌ numunguꞌ nene Satanilatiꞌ sikalahuꞌ goloso lulouꞌ minive ma minidiꞌmo gekeꞌ gekeꞌ lo tiꞌ lo lineꞌ:
LUK 4:34 Agae, Nasalete ve Izesuvo, leliꞌ nonida mene nanimuꞌ ane. Gaza do goloso o-ledelesa abe. Geze nene naza mo ningo gele nouve ma nene nane. Gaza nene Oꞌmosolatiꞌ kegeso lamineꞌ minanive ma nene nane.
LUK 4:35 Neꞌmine lineꞌza Izesuꞌ aza elemo tiꞌ lo lo-imineꞌ: Gamazi lamo zegeneꞌ oko mino eveneꞌ hulo-do lemo ogo vozo. Lavo sikalahuꞌ goloso neꞌmo eveneꞌ nene eveneꞌ mukiliti vovoꞌninguꞌ nene ehusoꞌ ogo do ongo-do luloutiꞌ lemo ogo vineꞌza eveneꞌ nene do goloso o-damineꞌ ve.
LUK 4:36 Neꞌmine ogo lemo vavo eveneꞌ ingine ningi upuhoꞌ igi tiꞌ li li gele ha gele aniꞌ: Mene naniꞌmine gamazi live. Aza nene mo gavele ve mino atoliꞌmine amuzo do mino lavo sikalahuꞌ goloso netesi eze gamazi gili dii eveneꞌ neti luꞌningutiꞌ nesi limi vaaꞌ naanako eze gamaziꞌve nene amuzoꞌvesi minineꞌ atoliꞌmine gamazi neive.
LUK 4:37 Li likevo Izesuꞌ guvele neꞌmo aꞌmine ebeꞌ neꞌmi gahevela numuno ebeꞌ miniꞌmi monaniꞌ mukikuꞌ nene buu lo mone osuꞌ lineꞌ.
LUK 4:38 Neꞌmine ogavo Izesuꞌ aza oto monoꞌ numuno hulo lemo voo Simoni Petoloꞌ numuꞌveuꞌ vo dizineꞌ. Aꞌminguꞌ nene Simoni elenahi izeleho nene okoꞌnouꞌ oloꞌ naba goloso lavo neivo aꞌmine veneꞌ nene do lamineꞌ o-delibo li Izesuda laniꞌ.
LUK 4:39 Neꞌmine likevo aza ogo veneꞌ neida ote mino aꞌmine okoꞌnouꞌ oloꞌ lo minineꞌ initeꞌ nene mate-delive lo amuzonga lo-davo okoꞌnouꞌ oloꞌ lineꞌ nene osuꞌ lo-dineꞌ. Neꞌmine ogavo veneꞌ aza liteꞌ lo oto ngeleꞌmize lamineꞌ ogo nasahiliꞌ o-ngedo minineꞌ ve.
LUK 4:40 Idoꞌ nivengaꞌ hoꞌ nolimivo eveneꞌ mukiꞌ ingine engiꞌ zuhoutiꞌ initeꞌ ato atoꞌ gizi dave minaniꞌ nene Izesuꞌ neida ngeleꞌmizi ikevo Izesuꞌ aza aꞌmine initeꞌ gizi dave mukiꞌ nene okoꞌnidoꞌ do gelekaꞌ gelekaꞌ ogo do lamineꞌ o-ngidineꞌ ve.
LUK 4:41 Neꞌmine noo-ngedo eveneꞌ mukiliti luꞌningutiꞌ sikalahuꞌ goloso minaniꞌ nesi ngimiselo do nohulo-ngidivo aꞌmine sikalahuꞌ goloso nete tiꞌ li laniꞌ: Gaza nene Oꞌmosoꞌmi gipele ma nene nane. Neꞌmine li eveneꞌ luꞌningutiꞌ huli-ngidi limi nivavo aꞌmine sikalahuꞌ goloso nete Izesuꞌ nene Oꞌmosoꞌmo do nguꞌ izelive lo do kegese-do imiselelesa live ma ne neive li gili nizaniꞌ nenako nemuꞌ nene Izesuꞌ aza sikalahuꞌ goloso ingine gamazi lami zegeni limi vilizave lo ngelemineꞌ.
LUK 4:42 Idoꞌ goꞌ lavo nedengaꞌ Izesuꞌ aza numungutiꞌ lemo eveneꞌ nizamada guvisela vo minineꞌ. Vo neivo eveneꞌ mukiꞌ ingine ezemuꞌ viseꞌ iꞌ moni moni neida igi hulo-ngedo vamilive li laniꞌza
LUK 4:43 aza tiꞌ lo lo-ngimineꞌ: Oꞌmosoꞌmo eveneꞌ eze gizebouꞌ vi hilalizaniꞌ akaꞌmi gamazi lamineꞌ nene lo sotoꞌ sotoꞌ ogo eveneꞌ mukiꞌ lo-ngemeline lo nimiselineꞌ nenako naza nene numuno ebeꞌ mala malasi vo aꞌmine gono nene daloniꞌ o neive.
LUK 4:44 Aza neꞌmine lo Zuda veti misubouꞌ monoꞌ numuno mininguꞌ mininguꞌ nene dizo monoꞌ lo-ngeme ngemeꞌ oꞌmo mono minineꞌ ve.
LUK 5:1 Idoꞌ gamene ma Izesuꞌ aza nGalilaia noso ohuno neꞌmi gulive gohi ma nGenesalete neꞌmi gahevela ote mino monoꞌ nolo-ngimivo aꞌmine Oꞌmosoꞌmi gamazi lineꞌ nene gililisa eveneꞌ vaiꞌ nubo nubo igi Izesuꞌnisi lisikelizaniꞌ o vivo
LUK 5:2 aza ningineꞌ nene noso gahevela sipi sitaꞌ ma nizasivo ningineꞌ. Ningineꞌ nene alahaꞌ daaꞌ ave nete aꞌmine sipiutiꞌ nene limisa alahaꞌ daaꞌ aniꞌ golalezeꞌine nene nosoꞌ izi nizavo aꞌmine sipi sitaꞌ gahevela haza minasineꞌ nene ningineꞌ.
LUK 5:3 Aꞌmine sipi sitakutiꞌ hamoꞌ ma Simoniꞌ sipi mininguꞌ nene dizo Simoniꞌni tiꞌ lo lo-imineꞌ: Sipi mene ngomo ma ehusoꞌ ogo hulo nosola ozo. Neꞌmine lavo Simoniꞌ aza sipi nene ngomo ma ehusoꞌ ogo hulo nosola ogavo Izesuꞌ aza aꞌminguꞌ mitoꞌ mino eveneꞌ mukiꞌ nene monoꞌ apize ngemo minineꞌ.
LUK 5:4 Idoꞌ neꞌmino gamazi lo-ngemo osuꞌ lo Simoniꞌni tiꞌ lo lo-imineꞌ: Sipi mene do vo noso ohuno naba moladaa hulozo. Hulanivo lingine alahaꞌ dalizangumuꞌ ve li alahaꞌ daaꞌ aniꞌ golalezetine nene di huli nosouꞌ ilo.
LUK 5:5 Neꞌmine lavo Simoniꞌ tiꞌ lo lo-imineꞌ: Guvekasi ve, laza idise holukaꞌ nene alahaꞌ daaꞌ uneꞌ golalezeꞌ nene hulokaꞌ hulokaꞌ oꞌmo monevoꞌ monevoꞌ uneꞌza alahaꞌ hamokisi ma damuneꞌ nenako ha geiꞌ laningumuꞌ golalezeꞌ nene gohi hulolosuve.
LUK 5:6 Neꞌmine lavo golalezeꞌine nene huli nosouꞌ ikevo alahaꞌ nene vaiꞌ goloso likevo golalezeꞌine nene hukotiꞌ hukotiꞌ ogo minivo
LUK 5:7 eveneꞌ masi geleleheꞌ ilizaniꞌ ogavo engikisi makaꞌ gono daaꞌ ave sipi mauꞌ minaniꞌ nene igi hize eleꞌ i-lidavo geleleheꞌ olone li aꞌine ngumungumuꞌ izaniꞌ. Neꞌmine ikevo ingine igi golalezeꞌine nene makatoꞌ geleleheꞌ igi alahaꞌ nene sipiuꞌ di tululu likevo sipi sitaꞌ nene vaiꞌ lo geni goloso ogavo sipi sitaꞌ nene nosouꞌ limilisa asineꞌ ve.
LUK 5:8 Neꞌmine ogavo Simoni Petoloꞌ aza ningo Izesuꞌ gizenela obuvolo hizo gubiꞌ ize emo tiꞌ lo lineꞌ: Guvekasi ve, naza lihime daaꞌ uve goloso nouvoniꞌ nenako gaza neniꞌ hulo-nedo vozo.
LUK 5:9 Idoꞌ Simoni Petoloꞌ neꞌmine ineꞌ nene ingine alahaꞌ vaiꞌ goloso dangumuꞌ nene vono vavo nemuꞌ nene neꞌmine ineꞌ ve. Ee, idoꞌ alahaꞌ vaiꞌ goloso dangumuꞌ nene Simonikisi minave mukiꞌ nene voꞌine vavo
LUK 5:10 ezesi gono makaꞌ daaꞌ asive Zebedaioꞌ gipele Zakoboki Zohaneki nesi nene voꞌine vavo minasineꞌ ve. Neꞌmine igi nizavo Izesuꞌ aza Simoniꞌni nene tiꞌ lo lo-imineꞌ: Gaza gopo gaka gelo golise gelamozo. Idise melotiꞌ nene apiꞌ ogo alahaꞌ daaꞌ aineꞌ neꞌmino eveneꞌ do nenita olosane.
LUK 5:11 Neꞌmine lavo ingine sipi di sevetoꞌ igisa initeꞌ mataꞌ mukiꞌ nene mudise mo hulisa Izesuꞌni eꞌmeti vaniꞌ.
LUK 5:12 Idoꞌ Izesuꞌ aza numuno ebeꞌ ma minidoꞌ vo neivo aꞌmida ganadiseliꞌmo okoꞌno vovosi nomivo gize dave ma ogo Izesuꞌni ningo aza vo gizeneuꞌ lemo golo hizo ongo do lamineꞌ o-delingumuꞌ tiꞌ lo lineꞌ: Guvekasi ve, gaza do lamineꞌ o-nedelineꞌ amuzokasi naineꞌ nene naza mo gele mino do lamineꞌ o-nedeline lo gele nouve. Gaza do lamineꞌ o-nedelesa gele nabe.
LUK 5:13 Neꞌmine lavo Izesuꞌ aza ganadise gizi dave i-ngidisaꞌmaniꞌ initeꞌ o-do ana hulo molo okoꞌnoloꞌ nohito tiꞌ lo lo-imineꞌ: Naza do lamineꞌ o-gedelesa gele nouve. Nemuꞌ gaza lamineꞌ ozo. Neꞌmine lavo ganadise neꞌmo liteꞌ lo okoꞌnolotiꞌ hulo-do vavo lamineꞌ gilineꞌ.
LUK 5:14 Idoꞌ Izesuꞌ do lamineꞌ o-dingumuꞌ eveneꞌ hamokisi mo veteteꞌ ogo lo-ngemamilive lo lo huko-do tiꞌ lo lo-imineꞌ: Evenetoꞌ medelo mino Oꞌmoso initeꞌ lehize-daaꞌ ive neꞌmo ganadise okongalotiꞌ hulo-gedo vineꞌ nene ningo lo sotoꞌ ogavo gaza lamineꞌ aineꞌ nemuꞌ nene evenelite ningi gililizangumuꞌ ve lo neꞌmine ozo: Ganadise gizi dave ingine lamineꞌ igi ma ize initeꞌ neꞌmine neꞌmine Oꞌmoso imilisave lo Moseꞌ lo huko lidoꞌ nene eꞌmeto evenetoꞌ medelo mino Oꞌmoso initeꞌ lehize-daaꞌ ive nene initeꞌ ma Oꞌmoso olokuꞌ gize emelingumuꞌ nene do vo emezo.
LUK 5:15 Neꞌmine lo lineꞌza Izesuꞌnimuꞌ gamazi nene gohi buu naba lo mone osuꞌ lavo eveneꞌ vaiꞌ nene gili eiꞌ gamazi gelelone li eveneꞌ mukiꞌ nene initeꞌ gizi di minavesi nene do lamineꞌ o-ledelive li Izesuꞌ neida igi di geseꞌ igaꞌ aniꞌza
LUK 5:16 aza nene haza ebeꞌ eveneꞌ minamada vo Oꞌmosola lolosa vaaꞌ ineꞌ ve.
LUK 5:17 Neꞌmino minaaꞌ ineꞌ gameneuꞌ nene gamene ma Izesuꞌ aza gamazi lo-ngemo neivo Halisaioꞌ monoꞌ gilaaꞌ avesi Oꞌmosoꞌmi louꞌ gamazi apizi ngimaaꞌ avesi nGalilaia misubouꞌ numuno ebeꞌ ngomo ngomo mineꞌmo moningutikisi Zelusalemi numuno ebekutikisi Zudaia misubo lingelatikisi ave nene aꞌmida di nubo igi nizavo Izesuꞌ eveneꞌ ma do lamineꞌ o-ngedavo Izesuda nene Guvelesi veꞌmi amuzo neꞌmo nene eveneꞌ do lamineꞌ o-ngedelingumuꞌ amuzo molo minineꞌ nene mo ninganiꞌ ve.
LUK 5:18 Neꞌmine ogo neivo eveneꞌ amuzolo hele vivo gebili ma ngakakuꞌ zaloꞌ mili di igi Izesuꞌ neida di dizi huli-dilisa aniꞌza
LUK 5:19 eveneꞌ nete gikiꞌ igi aka hizi tilikevo ingine numuno nubitoꞌ di dizi mini nubikuꞌ ngoloꞌ li ngakakuꞌ neivo huli-dikevo eveneliti vovoꞌninguꞌ Izesuꞌ velela limineꞌ.
LUK 5:20 Lemavo za gohovo mili di ave ingine gebili ma ha do lamineꞌ o-deleseive li gili eleꞌvoleꞌ aniꞌ nene Izesuꞌ aza mo ningo gelo aꞌmine amuzolo hele geseꞌ o vive nene tiꞌ lo lo-imineꞌ: Ve melo, gaza lihimeka nene mo hulo-gedekuve.
LUK 5:21 Neꞌmine lavo Halisaioꞌ monoꞌ gilaaꞌ avesi Oꞌmosoꞌmi louꞌ apizi ngimaaꞌ avesi ingine aꞌmine lineꞌ gamazimuꞌ luꞌninguꞌ tiꞌ li gilaniꞌ: Eveneꞌ hamolitesi lihimete huli-lidilizadoꞌ lisiheꞌ amavo asi Oꞌmoso eikovoꞌ nene lihimete hulaaꞌ ive neineꞌ nenako ve meve nene Oꞌmoso nevoba gamazi neꞌmine lo Oꞌmoso ivileꞌ ogaꞌ gamazi nolineꞌ nene edamive.
LUK 5:22 Neꞌmine li luꞌninguꞌ nigilavo Izesuꞌ aza ningo gelo tiꞌ lo lo-ngimineꞌ: Lingine lutinguꞌ neꞌmine gatine nanimuꞌ nigilave.
LUK 5:23 Lingine nenikumuꞌ nene sozavoꞌ laaꞌ neive li gilaaꞌ nahe. Naza amuzolo hele vive nemuꞌ lihimeka mo hulo-gedekuve luvoniꞌ nene soza lolohe lamineꞌ lolohe ma gilamilisave lo lapa nomivo noluvoniꞌza sozaloꞌ ve minuvodini amuzolo hele vivemuꞌ mene naza oto vozo nolo-duvo oto vamivo soza luvoniꞌ nene sotoꞌ ogavo novozo helalove lo gelo oto vozo lo ma lamuvodine. Olo.
LUK 5:24 Ne neiha Oꞌmosolatiꞌ ve gihile naza misubouko lengiꞌ lihimetine apase-lengedaaꞌ amuzo do nouve luvoniꞌ nene soza lamo mo laminetoꞌ noluvoniꞌ nene ningi gililizangumuꞌ naza idise ogo molo oloniꞌ initeꞌ nene ningilo. Neꞌmine lo amuzolo helavo minive nemuꞌ tiꞌ lo lineꞌ: Naza tiꞌ lo nolo-gimuve: Gaza oto ongo minaineꞌ initeka nene do geho numungala vozo.
LUK 5:25 Lavo amuzolo helavo minive aza nene eveneꞌ mukiliti veꞌnidoꞌ nene liteꞌ lo oto ongo minineꞌ initeꞌve nene do geho Oꞌmoso do naba o-do opoꞌni loꞌmo loꞌmo numuꞌvela vineꞌ.
LUK 5:26 Neꞌmine neivo eveneꞌ ingine ningi upuhoꞌ igi voꞌine vavo Oꞌmoso opoꞌni li di naba i-di ngehelele goloso izavo idise nene atoliꞌmine initeꞌ goloso ningekune li laniꞌ ve.
LUK 5:27 Idoꞌ nelotiꞌ nene Izesuꞌ aza heta lemo vo takisi moni daaꞌ ive gulive Leviꞌ nene takisi moni daaꞌ ineꞌ opisiꞌveuꞌ gono do neivo ningo tiꞌ lo lo-imineꞌ: Gaza neꞌmeto ano.
LUK 5:28 Neꞌmine lavo aza initeꞌ mukiꞌ nene hulo oto eꞌmeto vineꞌ.
LUK 5:29 Makaꞌ Leviꞌ numuꞌveuꞌ vii Leviꞌ aza Izesuꞌni nosoꞌ niteꞌ naba gize vataꞌ o-divo eveneꞌ mukiꞌ takisiloꞌ vesi idoꞌ eveneꞌ atoꞌ masi nene makaꞌ mini nosoꞌ niteꞌ ni minaniꞌ.
LUK 5:30 Ni nizavo Halisaioꞌ monoꞌ gilaaꞌ avesi monoꞌ gamazi apizi ngimaaꞌ avesi ingine Izesuꞌ izipahala zuhomuꞌ nene ngemenga li tiꞌ li laniꞌ: Lingine takisi moni daaꞌ ave golososi idoꞌ lihime daaꞌ ave lingesi nene nosoꞌ niteꞌ makaꞌ namilizanako nanimuꞌ ninave.
LUK 5:31 Likevo Izesuꞌ aza tiꞌ lo lo-ngimineꞌ: Luso ve aza haza lamineꞌ minave do lamineꞌ o-ngedelesa osaꞌmiha initeꞌ gizi davemukovoꞌ nene ogaꞌ neive.
LUK 5:32 Aꞌmineꞌmine ogo naza nene eveneꞌ lisiheꞌ i minavemuꞌ amuvoniꞌza eveneꞌ lihimeꞌinesi nizave nene luꞌine di velepeꞌ izilizave lo lo-ngemelesa uvoniꞌ ve.
LUK 5:33 Idoꞌ Izesuꞌ neꞌmine lo lavo ingine tiꞌ li li-imaniꞌ: Zohaneꞌ izipahala zuho ingine monokumuꞌ ve li nosoꞌ niteꞌ malise ikaꞌ ikaꞌ igi mini Oꞌmosola likaꞌ likaꞌ navo Halisaioꞌ monoꞌ laaꞌ aveti izipahaꞌine zuho nesi nene aꞌmineꞌmine igaꞌ naniꞌza geiꞌ izipaha zuho ingine nene aꞌmineꞌmine igi nosoꞌ niteꞌ malise ilizadoꞌ o neineꞌ nenako neꞌmine ami nosoꞌ niteꞌ gopo naakovoꞌ igaꞌ nako nanimuꞌ nave.
LUK 5:34 Neꞌmine likevo Izesuꞌ aza aneza gamazi ma tiꞌ lo lo-ngimineꞌ: Ve maliꞌmo eze veneꞌ huki imiliza gameneuꞌ olize izo eze zuho nosoꞌ niteꞌ gize vataꞌ ogo molo-ngedavo aza aꞌminguꞌ neivo eze zuhomuꞌ nene lingine nosoꞌ niteꞌ malise ilizave lilizadoꞌ nene ha gili lingimilizadoꞌ o neihe. Ne nomive. Aꞌmineꞌmine igi neze izipahaꞌne zuho nene naza nouvodoꞌ nene nosoꞌ niteꞌ malise amilisave.
LUK 5:35 Idise neꞌmine amilisaniꞌza neꞌmine ilizaniꞌ gamene ma aloseive. Engiꞌ vovoꞌningutiꞌ biluvalite neze neleꞌmizi di vilizaniꞌ gamene alitavo aꞌmine gameneuꞌ nene ingine mulumo gili-nidisa nosoꞌ niteꞌ malise ilisave.
LUK 5:36 Neꞌmine lo lo-ngemo imineꞌ molo aneza gamazi ma tiꞌ lo lo-ngimineꞌ: Eveneꞌ malite saketi gosohototiꞌ lavolavo ngomo ma huki saketi litehe hukidoꞌ nene ma mili ongotisaꞌmave. Neꞌmine igi ma ongotilizaniꞌ nene saketi gosohoꞌ nene huki di goloso ilisave. Idoꞌ lavolavo gosohoꞌ saketi liteheloꞌ minelineꞌ nene atokutiꞌ gelo edamoloseive.
LUK 5:37 Idoꞌ aꞌmineꞌmine igi lingine vaini noso gosohoꞌ neꞌmo memeꞌ ize losuvodunuꞌ liliꞌ aniꞌ gomise nene izo pouꞌ lavo vaini noso lepo vo gomiseꞌvesi nene goloso ogalive li vaini noso gosohoꞌ gituhoꞌ galakalaꞌ neidiꞌmo nene lulu izavo gomise liteheliꞌmo ngipu lo hukilineꞌ o mininguꞌ nene ma ohizi milisaꞌmave.
LUK 5:38 Vaini noso gosohoꞌ gituhoꞌ galakalaꞌ neivo nene memeꞌ ize losuvo gosohotunuꞌ liliꞌ aniꞌ gomise gosohokuꞌ nene ohizesoꞌ o neive.
LUK 5:39 Idoꞌ gozopoꞌ vaini nosovoꞌ naaꞌ ave nete gozopoꞌ niteꞌ mene lamineꞌ ve li vaini noso gosohoꞌ ma nalisa gilamilisave. Neꞌmine lineꞌ nene aza monoꞌ lo-ngemaaꞌ ineꞌ nene gosohoꞌ nenako izipahala zuho igi mili ilizaniꞌ monovo neꞌmo aꞌmine Zuda veti monovo litehe maloꞌ vo damivo ingine gozopoꞌ monovoꞌine mamuꞌ laniteꞌ gili aꞌmine monovo gosohoꞌ nene di tiꞌ amilizaniꞌ o miningumuꞌ lineꞌ ve.
LUK 6:1 Holiseꞌ gameneuꞌ Izesuꞌ aza izipahala zuhosi viti minguꞌ nivavo izipahala zuho nete viti godololatiꞌ gihile nene ili aꞌninguꞌ hupuꞌ izi niꞌmi vaniꞌ.
LUK 6:2 Neꞌmine aniꞌza Halisaioꞌ monoꞌ gilaaꞌ ave malite tiꞌ li laniꞌ: Lingine louꞌ gamaziuꞌ nene holiseꞌ gameneuꞌ gono damilo li nizaniꞌ mako neꞌmine nanimuꞌ nave.
LUK 6:3 Likevo Izesuꞌ aza tiꞌ lo lo-ngimineꞌ: Idoꞌ Zuda ve leliꞌ avotemoti guveꞌinesi ve naba Davidiꞌ aza ezesi monave gaꞌna hili minangumuꞌ nene louꞌ gamaziꞌmo initeꞌ mamuꞌ namaaꞌ ve lo hize tilavo tile minineꞌ aka nene goloso amivo ha do ngoloꞌ loo Davidiꞌ ineꞌ initeꞌ nene monoꞌ godolouꞌ gati gilahe gilamahe.
LUK 6:4 Aza neꞌmine ineꞌ ve. Oꞌmosoꞌmi monoꞌ numunguꞌ dizavo evenetoꞌ medelo mino Oꞌmoso initeꞌ lehize-daaꞌ ive neꞌmo Oꞌmosoꞌmi veleloꞌ milaniꞌ beleti nene eveneꞌ gohi malitesi namilizave lo asi evenetoꞌ medeli mini Oꞌmoso initeꞌ lehizi-daaꞌ avetevoꞌ ha nalisave lo louꞌ gamaziꞌmo lavo minineꞌ beleti nene Davidiꞌni do emavo idoꞌ ezesi makaꞌ monave ngemavo mukitoꞌ ezesi naniꞌ. Nemuꞌ nene goloso amivo neniꞌ izipahaꞌne zuho nene aꞌmineꞌmine igi viti gihile mene ha nalisave.
LUK 6:5 Neꞌmine lo tiꞌ lo lo-ngimineꞌ: Oꞌmosolatiꞌ ve gihile naza nene holiseliꞌmi meleho mino aꞌmine holisekuꞌ iliza initekumuꞌ idoꞌ amiliza initekumuꞌ laaꞌ uve nene nenikovoꞌ nouve.
LUK 6:6 Idoꞌ holiseꞌ gamene mauꞌ Izesuꞌ aza monoꞌ numunguꞌ dizo monoꞌ apize ngemo neivo aꞌminguꞌ nene ve ma ana zamela goloso ogo gilizevo o vive ma minineꞌ.
LUK 6:7 Neivo louꞌ gamazi apizi ngimaaꞌ avesi Halisaioꞌ monoꞌ gilaaꞌ avesi ingine Izesuꞌ aza aꞌmine ve nene idise do lamineꞌ o-delineꞌ nene holisekumuꞌ laniꞌ louꞌ gamazi ma nene avutoꞌ oloseinako nemuꞌ goniꞌ o-deloneꞌ aka ma sotoꞌ ilihe li vonuꞌ bili ningi minaniꞌ.
LUK 6:8 Neꞌmine igi nizavo Izesuꞌ aza ingine gilaniꞌ initeꞌ nene mo ningo gelo ana goloso o vive nene tiꞌ lo lo-imineꞌ: Gaza olusoꞌ mene ogo otezo. Neꞌmine lavo aza oto ogo aꞌmidoꞌ ote minineꞌ.
LUK 6:9 Ote neivo Izesuꞌ aza tiꞌ lo lo-ngimineꞌ: Naza tiꞌ lo longoꞌ noo-lingiduve. Leze louꞌ gamazite neꞌmo nadive lo neive. Holiseꞌ gameneuꞌ nene monovo lamineꞌ ilo lo neihe goloso ilo lo neive. Adoꞌ eveneꞌ di lamineꞌ i-ngidilo lo neihe di goloso i-ngidilo lo neive.
LUK 6:10 Lo lo-ngemo eveneꞌ mukiꞌ vonuꞌ ngebele osuꞌ lo ana goloso o vive ma nene tiꞌ lo lo-imineꞌ: Anga do pehe lozo. Lavo do pehe lavo ana nene gohi lamineꞌ ineꞌ ve.
LUK 6:11 Neꞌmine ineꞌza louꞌ gamazi apizi ngimaaꞌ avesi Halisaioꞌ monoꞌ gilaaꞌ avesi ingine Izesuꞌnimuꞌ ngizeboloꞌ goloso molavo nemuꞌ li voleloꞌ meloꞌ igi nadiꞌ o-delone li laniꞌ ve.
LUK 6:12 Aꞌmine gameneuꞌ nene Izesuꞌ aza Oꞌmosola lolosa golola dizo vineꞌ. Dizo vo Oꞌmosola lovoꞌ lovoꞌ ogo neivo litiꞌmuso izo goꞌ lineꞌ.
LUK 6:13 Idoꞌ goꞌ lavo nedengaꞌ nene eze eꞌmeti monaaꞌ ave izipahala zuho mukiꞌ nene asi lo-ngedavo ikevo engikutiꞌ eveneꞌ tuvelu (12) ngeleꞌmize kegeso ezeloꞌ medeli mini gamazi lilizave aposolo ve lo ngeleꞌmize molaniꞌ.
LUK 6:14 Ingine guliveꞌine nene neꞌmino minineꞌ: Simoniꞌ nene guliveꞌve gohi Petoloꞌ ve lo molaniꞌ idoꞌ Petoloꞌ nakunolo Adeleaꞌ ve idoꞌ Zakoboꞌ ve Zohaneꞌ ve idoꞌ Hilipoꞌ ve Batolomaioꞌ ve
LUK 6:15 Mataioꞌ ve Tomasiꞌ ve idoꞌ Alahaioꞌ gipele Zakoboꞌ abalaho ve idoꞌ Loma ve leliꞌ misuboutiꞌ ngimisele hulolone li amuzo milaaꞌ aveutiꞌ minive lave Simoniꞌ gohi ma neeve
LUK 6:16 idoꞌ Zakoboꞌ gohi maliꞌmi gipele Zudaꞌ ve idoꞌ alingeꞌ Izesuꞌni do sotoꞌ o-dive adoꞌ Keliotoꞌ numuno ebetotiꞌ ve Zudaꞌ engiꞌ neve nene minaniꞌ ve.
LUK 6:17 Idoꞌ Izesuꞌ aza aꞌmine eveneꞌ tuvelu (12) inginesi gololatiꞌ limi ikevo izipahala zuho linge vaikisi idoꞌ eveneꞌ mukiꞌ goloso eze gamaziꞌve gililisa avesi idoꞌ initeꞌ gizi dave do lamineꞌ o-ledelive li avesi Zelusalemi numuno ebetatikisi idoꞌ Zudaia misubo linge mukitatikisi idoꞌ Tilo idoꞌ Sidoni numuno ebeꞌ minasineꞌ misubo guvo noso gahevelatikisi igi di geseꞌ ikevo Izesuꞌ aza aꞌmida nene misubo geledoꞌ lemo ogo ote minineꞌ ve. Neivo eveneꞌ luꞌninguꞌ sikalahuꞌ golososi minave ezela ikevo do lamineꞌ o-ngidineꞌ.
LUK 6:19 Idoꞌ Izesudatiꞌ amuzo neꞌmo eveneꞌ do lamineꞌ o-ngidineꞌ nemuꞌ nene eveneꞌ mukiꞌ ingine eiꞌ okoꞌnoloꞌ do gelosa lamineꞌ olosune li okoꞌnoloꞌ di gililisa aniꞌ ve.
LUK 6:20 Neꞌmine ikevo Izesuꞌ aza izipahala zuhola vonuꞌ nongebelo tiꞌ lo lineꞌ: Initetine nomivo gohoꞌ gahaliꞌ aleve lingine nene Oꞌmosoꞌmo gizebo o-ledelinguꞌ vi hilalizaniꞌ o neineꞌ nenako lamineꞌ iliza akaloꞌ mini mili nizaze. Nemuꞌ longolize izilizaniꞌ o neive. Neꞌmine igi nizaniꞌza initetine vaiꞌ lo neivo heneni ve nizave lingine longolize izi initeꞌ mukiꞌ mo dikeve. Alingeꞌ gohi ma damilisaze. Nemuꞌ nene agae, ehetine ve. Idoꞌ idise gaꞌna hili minaaꞌ nave lingine nene alingeꞌ Oꞌmosoꞌmo nosoꞌ nitetine vaiꞌ lengemelineꞌ nenako lamineꞌ iliza akaloꞌ mini mili nizaze. Nemuꞌ longolize izilizaniꞌ o neive. Neꞌmine igi nizaniꞌza idise gatudinevoꞌ o minivo minaaꞌ nave lingine alingeꞌ gaꞌna hilivoꞌ minilizaniꞌ o neineꞌ nenaze. Nemuꞌ nene agae, ehetine ve. Idoꞌ minevoꞌ alevotine goloso o vivo idise agae agae li ive namavoꞌ igi minaaꞌ nave lingine alingeꞌ Oꞌmosoꞌmo minevoꞌ alevotine do lamineꞌ ogavo lamineꞌ gili gize zohiꞌ igi minilizaniꞌ o neineꞌ nenako lamineꞌ iliza akaloꞌ mini mili nizaze. Nemuꞌ longolize izilizaniꞌ o neive. Neꞌmine igi nizaniꞌza idise gize zohiꞌ igi minaaꞌ nave lingine alingeꞌ mulumo alumo gili ive nama igi minilizaniꞌ o neineꞌ nenaze. Nemuꞌ agae, ehetine ve. Idoꞌ Oꞌmosolatiꞌ ve gihile neniꞌ neꞌmeti minangumuꞌ ve li eveneꞌ lengikumuꞌ goseleꞌ goloso ngebelavo vasa izi-lingidi gamazi goloso li lengelemi gulivetine nesi goloso neineꞌ nenako mo gohi gelamolone li gulivetine di hulilizaniꞌ nene engiꞌ avoꞌninge nete gozopoꞌ polohete minave i-ngidaniꞌ initeꞌ goloso neꞌmine i-lingidilizaniꞌ nenako lingine poloheteliti gonoloꞌ nene medeli minikevo Oꞌmosoꞌmo menitine naba Okulumokuko molo-lengedeleseize. Nemuꞌ nene aꞌmine neꞌmine manaꞌmine i-lingidilizaniꞌ gameneuꞌ nene longolize goloso izi ganine hizi gizedine adine izisa minilo. Ee, neꞌmine i-lingidikevo ma lamineꞌ iliza akaloꞌ mini mili nizaze. Nemuꞌ longolize izilizaniꞌ o neive. Neꞌmine ilizaniꞌ o neineꞌza eveneꞌ mukiꞌ nete longopoꞌni li di naba nii-lingidavo ma avoꞌninge nete soza polohete goloso gomuꞌ minave di naba i-ngidaaꞌ aniꞌ neꞌmine i-lingidilizaniꞌ nenako lingine aꞌmine soza polohete minaveloꞌ medeli minilizaniꞌ o neineꞌ nenako agae, ehetine ve.
LUK 6:27 Neꞌmino neineꞌza neze gamaziꞌne nigilave nene naza tiꞌ lo nolo-lingimuve: Biluvatine nene lutine ngimi lengikumuꞌ goseleꞌ ngebelaaꞌ neive nene nasahiliꞌ i-ngidi di lamineꞌ i-ngidilo.
LUK 6:28 Idoꞌ initeliꞌmo ma lingibilivoo li usiꞌ izi-lingidaaꞌ naniꞌ aleve nene Oꞌmosoꞌmo noꞌnohoꞌ ize-lingidivoo li-lingimilo. Idoꞌ goboni mili-lingidilizavemuꞌ nene do lamineꞌ o-ngedelive li Oꞌmosola li minilo.
LUK 6:29 Idoꞌ ve maliꞌmo gatidoꞌ noizivo ma nene helalasi izelize mine velepeꞌ izilo. Idoꞌ ve maliꞌmo saketika nene dalove nolivo ma nene siotika ngomo lulouꞌ nesi nene do aꞌmanapa amozo.
LUK 6:30 Idoꞌ lengitatiꞌ initeꞌ ma dalone li longoꞌ navo ma nene ha ngimilo. Idoꞌ lengitatiꞌ initeꞌ ma ipeꞌ igi di vikevo ma nene gohi di tiꞌni limilo li lamilo.
LUK 6:31 Idoꞌ lingine evenelite lelita neꞌmine manaꞌmine i-lidilizave li gili ma nene engitasi aꞌmineꞌmine i-ngidilo.
LUK 6:32 Idoꞌ eveneꞌ ma luꞌine lengiꞌ lingimaaꞌ avevoꞌ lutine ngimilizaniꞌ nene monoꞌ gilamave lihime daaꞌ ave netesi nene eveneꞌ luꞌine engita ngimave nene luꞌine ngimaaꞌ naniꞌ nenako lingine nene eveneꞌ ma ngivileꞌ igi monovo lamineꞌ ma damave. Oꞌmosoꞌmo eveneꞌ linge ngopoꞌni lilineꞌ votigile ivileꞌ ivosa lengiꞌ longopoꞌni goloso lilidoꞌ minamaniꞌ ve.
LUK 6:33 Idoꞌ eveneꞌ ma lengiꞌ lengeleꞌmize lamineꞌ avevoꞌ ngeleꞌmize lamineꞌ ilizaniꞌ nene monoꞌ gilamave lihime daaꞌ ave netesi nene aꞌmineꞌmine igi ingine ngeleꞌmize lamineꞌ ave nene ngeleꞌmize lamineꞌ igaꞌ naniꞌ nenako lingine eveneꞌ ma ngivileꞌ igi monovo lamineꞌ ma damaze. Oꞌmosoꞌmo ve mamuꞌ ngopoꞌni laaꞌ neineꞌ votigile ivileꞌ ivosa lengiꞌ longopoꞌni goloso lilidoꞌ minaniꞌ nehe. Oꞌove.
LUK 6:34 Idoꞌ lingine nene eveneꞌ ma initeꞌ ngemekunivo ingine alingeꞌ aꞌmine initeꞌ gohi limilizadoꞌ ve li gili mini ngimilizaniꞌ nene monoꞌ gilamave lihime daaꞌ ave netesi nene aꞌmineꞌmine igi aꞌmine initeꞌ gohi dalosune li aꞌmine initeꞌ ngimaaꞌ naniꞌ nenako lingine nene eveneꞌ ma ngivileꞌ igi monovo lamineꞌ ma damaze. Oꞌmosoꞌmo eveneꞌ linge ngopoꞌni lilineꞌ votigile ivileꞌ ivosa lengiꞌ longopoꞌni goloso lilidoꞌ minaniꞌ nehe. Oꞌove.
LUK 6:35 Ne neiha lingine lengiꞌ biluvatine nene lutine ngimilo. Idoꞌ ngeleꞌmize lamineꞌ i-ngidilo. Idoꞌ eveneꞌ initeꞌ ngimilizaniꞌ nene alingeꞌ gohi dalone lami haza gidini ngimilo. Neꞌmine igi haza ngimilizaniꞌ nene Oꞌmosoꞌmo menitine naba molo-lengedeleseive. Atoliꞌmine ogo dize minive Oꞌmoso aza eveneꞌ goloso nene nasahiliꞌ o-ngedaaꞌ neineꞌ nemuꞌ gilavo haza niteꞌ loloꞌ ogavo ezemuꞌ opoꞌni lisaꞌmave nesi haza gopo nasahiliꞌ o-ngedaaꞌ neineꞌ nenako lingine nene eveneꞌ initeꞌ ma haza gidini ngimilizaniꞌ nene aꞌmine atoliꞌmine ogo dizo minive neꞌmine gili vaniꞌ mini eiꞌ izipahala gehepeve minilisave.
LUK 6:36 Nemuꞌ nene lingine metibo neꞌmo eveneꞌ mukiꞌ mulumotine ningo hize eleꞌ o-lengedaaꞌ neineꞌ neꞌmine igi linginesi eveneꞌ mulumoꞌine ningi hize eleꞌ i-ngidi minilo.
LUK 6:37 Idoꞌ neꞌmine igi Oꞌmosoꞌmo lengiꞌ monovotinemuꞌ dovoꞌ ledevoꞌ ogo izeꞌ molo lamilingisi lingine eveneꞌ maliti monovomuꞌ diviꞌ lediviꞌ igi izeꞌ mili lamilo. Idoꞌ Oꞌmosoꞌmo lingine monovo goloso dikeve lo lengemenga lamilingisi lingine eveneꞌ mamuꞌ monovo goloso dikeve li ngemenga liꞌmi monamilo. Idoꞌ Oꞌmosoꞌmo lengiꞌ lihimetine nene hulo-lengedelingisi lingine eveneꞌ lihime di-lingidaveti lihimeꞌine nene huli-ngidilo.
LUK 6:38 Idoꞌ Oꞌmoso neꞌmo initeꞌ mataꞌ lengemelingisi lingine nene eveneꞌ initeꞌ mataꞌ ngimilo. Aꞌmine Oꞌmosoꞌmo lengemelineꞌ initeꞌ nene vauve goloso elosa lengiꞌ di miniliza votigile nesi ivileꞌ ogosa lengemeleseive. Aꞌmine initeꞌ lengemelineꞌ nene lingine eveneꞌ ngimiliza votigilelokovoꞌ lengemeleseinako nemuꞌ lingine aꞌmineꞌmine igi initeꞌ vauve ili ngimi minilo.
LUK 6:39 Neꞌmine lo Izesuꞌ aza aneza gamazi tiꞌ losasi ma imineꞌ molo lo-ngimineꞌ ve: Vele likive maliꞌmo vele likive atoꞌ ma aka elebizo analoꞌ do do ha vilihe. Ne nomive. Mo sitatoꞌ vi galeseuꞌ limilisasive.
LUK 6:40 Idoꞌ sukulu izipe malite tisaꞌine nene ivileꞌ igi ma minamilisaniꞌza mukitoꞌ nene initeꞌ mukikumuꞌ apizi ngimi osuꞌ likevo initeꞌ mukikumuꞌ gili osuꞌ lavetevoꞌ nene tisaꞌine neꞌmine liliꞌ ilisave. (Nemuꞌ nene lingine eveneꞌ nene aka lamineꞌ ngelebizelone li ma veꞌine likive neꞌmine minami lo-lengemaaꞌ nouvoniꞌ gamazi mukiꞌ nene gili lamineꞌ igisavoꞌ apizi ngimilizadoꞌ minilisave.)
LUK 6:41 Idoꞌ gaza veka gihileuꞌ za lana naba vo neineꞌ nemuꞌ nene ningo gelamo ve maliꞌmi vele gihileuꞌ initeꞌ ngomo lasolo vo neineꞌ nemuꞌ nene nanimuꞌ ningaaꞌ nane.
LUK 6:42 Idoꞌ geꞌmo vekauꞌ nene za lana naba vo neivosa gaza ve mamuꞌ ve melo, vekauꞌ initeꞌ ngomo vo neineꞌ nene do hulo-gedelove lo-delinidoꞌ o neihe. Ne nomive. Soza sunolavoꞌ monanive gaza za lana vekauꞌ vo neineꞌ nene gomuꞌ do hulokosavoꞌ nene ve maliꞌmi veleuꞌ initeꞌ ngomo lasolo vo neineꞌ nene ninge guno o minosa do hulo-delineꞌ o neive. Ee, monovo goloso naba daaꞌ naineꞌ nene gomuꞌ hulosavoꞌ maliꞌmo monovo goloso ngomo ma do nolineꞌ nene do lisiheꞌ o-delesane.
LUK 6:43 Gohuno gihile nene uhoni zalotiꞌ ngelo ma elamolosane. Idoꞌ vaini gihile nene gasavasi nalaꞌ golosolotiꞌ nene ngelo ma elamolosune. Nemuꞌ za mukiliti monovo nene gihileꞌine izelineꞌ neꞌmo do sotoꞌ ogavo ningelonidoꞌ o neineꞌ nenako nemuꞌ nene za ma lamineꞌ nolineꞌ neꞌmo nene gihileꞌve goloso ma izamoloseive. Idoꞌ za ma goloso nolineꞌ neꞌmo nene gihileꞌve lamineꞌ ma izamoloseive.
LUK 6:45 Idoꞌ eveneꞌ aꞌmineꞌmine igi nizave. Eveneꞌ luꞌninguꞌ goꞌzikaniꞌ initeꞌ nene veꞌningutiꞌ li hulaaꞌ nanako eveneꞌ lamineꞌ neꞌmi lulouꞌ nene gamazi lamineliꞌmo vaiꞌ lo neinako neꞌmo nene monovo lamineꞌ do sotoꞌ ogaꞌ neive. Idoꞌ eveneꞌ goloso neꞌmi lulouꞌ nene gamazi goloso neꞌmo nene vaiꞌ lo neinako neꞌmo nene monovo goloso do sotoꞌ ogaꞌ neive.
LUK 6:46 Idoꞌ eveneꞌ nene guveꞌinesi veti gamazi gili dalizadokovoꞌ minaaꞌ naniꞌ nenako lingine nenikumuꞌ Guvetesi ve, Guvetesi ve, li-nidi minaaꞌ niigisa neze gamaziꞌne gili hulaaꞌ naniꞌ nene nanimuꞌ nave.
LUK 6:47 Idoꞌ eveneꞌ ma ingine nenita igi gamaziꞌne gili di luvodoꞌ luvodoꞌ igi mili eꞌmetilizaniꞌ nene ingine naniꞌmine ve nizahe nemuꞌ lo-lengemelove:
LUK 6:48 Ve maliꞌmo numuno gizelesa posi galese haꞌna elo homi gehedoꞌ ogo posi nene gehedoꞌ hize giliꞌ loo numuno gizavo goline izo noso naba velo numudoꞌ nene bilineꞌza numuno nene do lamineꞌ ogo gehedoꞌ gizineꞌ nenako neꞌmo numuno nene lemo ongamo amuzo molo haza minineꞌ ve. Idoꞌ ingine neniꞌ gamazi luvodoꞌ luvodoꞌ igi mili eꞌmetilizave nene aꞌmine numuno gizive neꞌmine minikevo initeꞌ igi mili minilizaniꞌ nene lemo ongamoloseive.
LUK 6:49 Ne neiha eveneꞌ ma ingine neze gamaziꞌne gili gili huli luvodoꞌ luvodoꞌ eꞌmetamilizaniꞌ nene numuno gizive gohi ma neꞌmine minilisave. Aꞌmine ve aza numuno gizelesa posi galese elo hulo homiuꞌ ogo posi nene gehedoꞌ hize giliꞌ lamo galese avileloꞌ eleko gizavo goline izo noso naba velo numudoꞌ ogo belavo numuno nene eii, do goloso ogosa izevo etevoꞌ ogo lemo onganiꞌ ve. Idoꞌ aꞌmineꞌmine ogo neniꞌ gamaziꞌne gili huli luvodoꞌ luvodoꞌ igi mili eꞌmetamilizavete igi mili minilizaniꞌ initeꞌ nene lemo ongaloseive.
LUK 7:1 Izesuꞌ aza aꞌmine monoꞌ gamazi nene eveneꞌ aꞌmida minaniꞌ nene lo-ngemo osuꞌ lo Kahanaumi numuno ebekuꞌ vineꞌ.
LUK 7:2 Aꞌmida nene Loma amiliti gizebo ve ma minineꞌ. Eze gelekeleꞌ izipeutiꞌ vonoloꞌ minive nene initeꞌ gize do helaaꞌ akaloꞌ vo minineꞌ.
LUK 7:3 Neꞌmine ogo neivo amiliti gizebo ve aza nene Izesuꞌ guvele gelo aza ogo gelekeleꞌ izipe do lamineꞌ o-delive li vi li-imilizave lo Zuda veti gizebo veꞌine linge ma ngimiselineꞌ.
LUK 7:4 nGimiselavo ingine Izesuda vi heteli aꞌmine gamazi li-imi amuzonga tiꞌ li li-imaniꞌ: Isaaꞌ neve. Loma amiloꞌ gizebo ve aza lulo nene leliꞌ Zuda ve lemaaꞌ neive. Idoꞌ monoꞌ numude nesi nene gizilizave lo moni huko hulavo gizune. Neꞌmine ogaꞌ neineꞌ nenako gaza eiꞌ lineꞌ initeꞌ nene ha o-delinidoꞌ lisiheꞌ o neive.
LUK 7:6 Neꞌmine li li-imikevo Izesuꞌ aza inginesi makaꞌ vaniꞌ. Izesuꞌ aza olihe numudoꞌ vo hetelamo avita navo amiloꞌ gizebo ve aza gamazi tiꞌ lo loo eze zogo ve linge Izesuda ngimiselavo vaniꞌ: Guvekasi ve, naza eveneꞌ goloso nouvonako aꞌneꞌmineꞌmi numuꞌneuꞌ alinidoꞌ lisiheꞌ amaninako hotatiꞌ ogo mela alinidoꞌ gabusoka elalive.
LUK 7:7 Idoꞌ naza geita vamuvoniꞌ nene naza heta atoꞌ ve goloso nouvonako nemuꞌ geita alodoꞌ lisiheꞌ amuve. Nemuꞌ nene gaza gamazivoꞌ lo lamineꞌ ozo lolosane. Lanivo neniꞌ gelekeleꞌ izipeꞌne nene lamineꞌ ilive lo gele nouve.
LUK 7:8 Idoꞌ lamineꞌ ilive lo gele nouvoniꞌ nene naza eveneꞌ maliti gizeboloꞌ nouve. Idoꞌ neze gizeboloꞌ nesi nene ami ma nizave. Nemuꞌ nene engikutiꞌ ve mamuꞌ vozo lokuvo ha voloseive. Idoꞌ mamuꞌ ano loloniꞌ nene ha aloseive. Idoꞌ gelekeleꞌ izipeꞌne nene neꞌmine ozo loloniꞌ ha oloseive. Idoꞌ aꞌmineꞌmine ogo gaza lanivo siki initeꞌ neꞌmo geiꞌ gamazi nene ha gele do gelekeleꞌ izipeꞌne nene ha hulo-do voloseive losa gele nosa noluve.
LUK 7:9 Lavo Izesuꞌ aza gamazi lineꞌ nene gelo aizo lo gelo mine velepeꞌ izo eꞌmeti vave mukiꞌ nene tiꞌ lo lo-ngimineꞌ: Naza tiꞌ lo nolo-lingimuve. Oꞌmosomuꞌ gili eleꞌvoleꞌ igaꞌ ave gehepeve ve lave lengiꞌ Isilaeleꞌ aleve lengikutikisi nene heta atoꞌ ve meneꞌmo gele eleꞌvoleꞌ ineꞌ neꞌmini ve hamolitesi gili eleꞌvoleꞌ avo ma ningamuvoniꞌ ve.
LUK 7:10 Neꞌmine lavo amiloꞌ gizebo veꞌmo ngimiselive ingine tineꞌ mili numuꞌvela vi ninganiꞌ nene gelekeleꞌ izipe aza lamineꞌ ogavo ninganiꞌ.
LUK 7:11 Neꞌmine ogavo nelotiꞌ gamene haꞌna vamivo Izesuꞌ aza numuno ebeꞌ ma gulive Nainila novivo izipahala zuhosi eveneꞌ mukikisi nene eꞌmetavo makatoꞌ vaniꞌ.
LUK 7:12 Makaꞌ vo numuno ebeliꞌmi gateda nohetelivo veneꞌ getoꞌ ma minineꞌ neꞌmi gipele hamokovoꞌ minineꞌ nene helavo veneꞌ getoꞌ nene aꞌmine numuno ebekutiꞌ eveneꞌ vaiꞌ nene mulumo gili-di eꞌmeti minavo aꞌmine gonoso nene zaloꞌ mili numuno ebekutiꞌ galese izi-dilisa di heta aniꞌ.
LUK 7:13 Neꞌmine navo Guvelesi ve aza hiliveꞌmi izelehine nene ningo muluno hukavo aꞌmine veneꞌ nene tiꞌ lo lo-imineꞌ: Gaza ive nama amozo.
LUK 7:14 Neꞌmine lo avitoꞌ vo aꞌmine hilive ongo minineꞌ initetoꞌ nene davo gonoso zaloꞌ milave nene aꞌmidoꞌ legeni oti minaniꞌ. Oti nizavo tiꞌ lo lineꞌ: Gosoꞌ ve, gaza gohi veka gizo oteline nolo-giduze. Otezo.
LUK 7:15 Lavo hilive aza oto mitoꞌ mino gamazi apiꞌ ogo nolivo aꞌmine hilive nene izelihida gohi do tiꞌno imineꞌ.
LUK 7:16 Neꞌmine ogavo veneꞌ vemohoꞌ mukiꞌ nene ngehelele naba goloso izavo Oꞌmoso opoꞌni li tiꞌ li laniꞌ: Leliꞌ vovoteuꞌ nene polohete naba ma sotoꞌ ogave. Idoꞌ Oꞌmoso neꞌmo eze evenele mulumote ningo hize eleꞌ o-ledave.
LUK 7:17 Likevo Izesuꞌ neꞌmine ineꞌ guvele neꞌmo Zudaia misubo mukikukisi idoꞌ Zudaia misubo gaheve gahevela misubo mukikuꞌ nesi nene buu lo mone osuꞌ lineꞌ.
LUK 7:18 Idoꞌ monoꞌ noso holo-ngedaaꞌ ive Zohaneꞌ izipahala zuho nete Izesuꞌ neꞌmine manaꞌmine monovo do sotoꞌ ogo minineꞌ nemuꞌ nene Zohaneꞌni li-imaniꞌ.
LUK 7:19 Neꞌmine ikevo Zohaneꞌ aza izipahala zuho sitaꞌ vise lo-ngedo gamazi tiꞌ li longoꞌ i-dilisive lo Guvelesi vela ngeletineꞌ: Gaza nene Oꞌmosoꞌmo imiselavo aloseive li li-limave ma nene nabe idoꞌ ve gohi atoꞌ mamuꞌ gizebo oloneꞌ o neive.
LUK 7:20 Neꞌmine lavo aꞌmine ve sitaꞌ ingine Izesuda vi heteli tiꞌ li li-imasineꞌ: Laza nene noso holo-ngedaaꞌ ive Zohaneꞌ tiꞌ lo losa leletavo nousive: Gaza nene Oꞌmosoꞌmo imiselavo aloseive li li-limave ma nene nabe idoꞌ ve gohi atoꞌ mamuꞌ gizebo oloneꞌ o neive.
LUK 7:21 Neꞌmine likesivo aꞌmine minasineꞌ gameneuꞌ gehepeve nene aza initeꞌ ato atoꞌ gizi dave vaiꞌ do lamineꞌ o-ngedo eveneꞌ luꞌningutiꞌ sikalahuꞌ goloso ngelete hulo idoꞌ veꞌine likive mukiꞌ nene do lamineꞌ o-ngedavo gohi veꞌine ningi minaniꞌ ve.
LUK 7:22 Neꞌmine ogosa aza Zohaneꞌ izipahala tiꞌ lo lo-ngimineꞌ ve: Lingine tineꞌ mili vi Zohaneꞌni nene neniꞌ gono noduvo gilasineꞌ idoꞌ ningasineꞌ initekumuꞌ nene tiꞌ li li-imilizo: Veꞌine likive ingine veꞌine gohi niningave. Idoꞌ gizeꞌine goloso ive nene gohi aka nimonavo ganadise gizi dave nene gohi kululuꞌ niizave. Idoꞌ gaꞌine molave nene ingine gohi nigilavo hilave nene gohi do noote-ngidive. Idoꞌ gohoꞌ aleve nene monoꞌ gamazi lamineꞌ nigilave.
LUK 7:23 Lingine neꞌmine li li-imi tiꞌ li li-imilizo: Gaza neniꞌ monovomuꞌ gaka sita sataꞌ nogelaineꞌ ma nene hulo nenikumuꞌ gele eleꞌvoleꞌ ilineꞌ nene mine lamineꞌ ogo minelineꞌ akaloꞌ eꞌmeto volosane. Idoꞌ eveneꞌ mukiꞌ ingine gaꞌine sita sataꞌ gilami nenikumuꞌ gili eleꞌvoleꞌ ilizave nene mine lamineꞌ igi miniliza akaloꞌ eꞌmeti vilisave.
LUK 7:24 Neꞌmine lo lavo Zohaneꞌ ngimiselive ingine tineꞌ mili nivasivo eveneꞌ vaiꞌ minaniꞌ nene Izesuꞌ aza Zohaneꞌnimuꞌ apiꞌ ogo tiꞌ lo lo-ngimineꞌ: Lingine eveneꞌ mukiꞌ Zohaneꞌni ningilisa ebeꞌ hadivela vaniꞌ ma nene naniteꞌ ningilisa vaniꞌ neve. Aꞌmida nene hepeliꞌmo do gabeꞌ kabeꞌ ogaꞌ neineꞌ initeꞌ gepeꞌ neꞌmino gamazi do tiꞌne vatiꞌne ogo laaꞌ ive ma ningilisa vaniꞌ nehe.
LUK 7:25 Naniteꞌ ningilisa vaniꞌ neve. Ve maliꞌmo genegana lamineꞌ goloso ngolo minineꞌ ningilisa vaniꞌ neve. Eꞌe, aꞌmine neꞌmine genegana ngili minaaꞌ nave nene guveꞌinesi ve nabavoꞌ minanguꞌ mini initeꞌ lamineꞌ taminekovoꞌ di ngolize izi minaaꞌ nave.
LUK 7:26 Nemuꞌ nene naniteꞌ ningilisa ebeꞌ hadivela vaniꞌ neve. Polohete ningilisa vaniꞌ noloseive. Olo. Ee, aꞌmine vi ningave nene polohete ma ve. Aꞌmine ve nene polohete gomuꞌ minaniꞌ neꞌmine minamo ngivileꞌ ogosa neive.
LUK 7:27 Idoꞌ aꞌmine vemuꞌ nene monoꞌ godolouꞌ Oꞌmosoꞌmo do luꞌ izelive lo imiselelesa live lo-emo lineꞌ gamazi ma tiꞌ li gizi nizaniꞌ ma neive: Gelezo. Naza neze gamazi lo-ngeme ngemeꞌ ilive ma imiselekuvo aza do gomuꞌ molo akaka vele-gedeleseive. Aꞌmine gamazi nene aꞌmine ve Zohaneꞌnimuꞌ gizaniꞌ ve.
LUK 7:28 Neꞌmine aniꞌ nene naza ma lo-lengemelove. Eveneꞌ misubouko sotoꞌ igi mini di aveutiꞌ nene monoꞌ noso holo-ngedaaꞌ ive Zohaneꞌni nene ivileꞌ igi minave ma minamaniꞌ ve. Ne neiha Oꞌmosoꞌmo eveneꞌveloꞌ gizebo ilineꞌ gameneꞌve sotoꞌ ogavo aꞌmine gizebo o-ngedelinguꞌ vi hilalizave engikutiꞌ ma lemo miniliveꞌmosi nene Zohaneꞌ minineꞌ monovo nene ivileꞌ ivo minilizadoꞌ o neive.
LUK 7:29 Idoꞌ eveneꞌ linge masi idoꞌ takisi moni daaꞌ avesi nene gomuꞌ Zohanedatiꞌ noso hili minaniꞌ neꞌmo Izesuꞌ Zohaneꞌnimuꞌ lineꞌ gamazi nene gili hize eleꞌ igi Oꞌmoso opoꞌni laniꞌza
LUK 7:30 Halisaioꞌ monoꞌ laaꞌ avesi idoꞌ louꞌ gamazi apizi ngimaaꞌ avesi ingine Zohanedatiꞌ monoꞌ noso hilamaniꞌ neꞌmo nene Oꞌmosoꞌmo engikumuꞌ neꞌmine neꞌmine ilizave lo galauꞌ gelo ilizaniꞌ aka do sotoꞌ o-ngidineꞌ nene ningi hulikeve.
LUK 7:31 Idoꞌ Izesuꞌ imineꞌ molo tiꞌ lo lineꞌ: Idise mene gamenela mine do vuvoniꞌ ningi nizaniꞌ alevemuꞌ nene naniꞌmine initeꞌ neꞌmine nizave lo lo molo lolove. Idoꞌ engikumuꞌ nene nanitetoꞌ lo molo lokuvo vo dalive.
LUK 7:32 Engikumuꞌ nene izipe linge maloꞌ lo molo lolosuve. Aꞌmine izipe nene gili goseleꞌ aseleꞌ izipe mini do geseꞌ ogaꞌ ebetoꞌ zohiꞌ igi mini gonoꞌninginemuꞌ nene tiꞌ li laaꞌ nave: Laza lengikumuꞌ huhunaleꞌ mulunidoꞌ nene longolize izi gizedine adine izisaꞌmave. Idoꞌ nama muheleꞌ aheleꞌ ogo lunidoꞌ nene lingine aꞌmineꞌmine igi muheleꞌ aheleꞌ igi lisaꞌmave.
LUK 7:33 Naza neꞌmini nizave luvoniꞌ nene neꞌmine minangumuꞌ luvoniꞌ ve: Monoꞌ noso holo-ngedaaꞌ ive Zohaneꞌ aza gonoꞌve do do vinguꞌ nene nosoꞌ niteꞌ lamineꞌ namo idoꞌ vaini nososi namo neivo lingine ningi goseleꞌ lengebelavo tiꞌ li laniꞌ ve: Ve mene sikalahuꞌ goloso maliꞌmo lulo do gopo o-davo neꞌmine neihe li laniꞌ ve.
LUK 7:34 Idoꞌ Oꞌmosolatiꞌ ve gihile naza ogo nosoꞌ niteꞌ di geseꞌ igi ni nizanguꞌ vo naaꞌ idoꞌ vaini nososi nene naaꞌ nouvo lingine ningi goseleꞌ lengebelavo soza gamazi li tiꞌ li laaꞌ nave: Ve mene ningilo. Aza nene vele gohi nave mino idoꞌ noso geligelo naaꞌ ive mino takisi moni daaꞌ avesi idoꞌ monoꞌ gilami lihime daaꞌ ave gohi masi nene zogo molo ngemaaꞌ ive ne neive.
LUK 7:35 Neꞌmine laaꞌ naniꞌza Oꞌmosoꞌmo otohato monovoloꞌ ogo molo minaaꞌ neineꞌ emeni dameni do tiꞌ o nonive mukiꞌ nene aꞌmine emeni dameni lamineꞌ neineꞌ nene lengelebizaaꞌ noune.
LUK 7:36 Idoꞌ Izesuꞌ nene Halisaioꞌ monoꞌ laaꞌ ive maliꞌmo numuꞌveuꞌ nosoꞌ niteꞌ makaꞌ naakumuꞌ elese molo-davo aꞌmine veꞌmi numuꞌveuꞌ dizo nosoꞌ niteꞌ no minineꞌ.
LUK 7:37 Neivo aꞌmine numuno ebekutiꞌ veneꞌ ma monovo golosoloꞌ monaaꞌ ineꞌ veneꞌ minidiꞌmo Izesuꞌ nene Halisaioꞌ veꞌmi numuꞌveuꞌ nosoꞌ niteꞌ no minineꞌ nene mo gelo luhuvo laminekisi gehenidunuꞌ liliꞌ aniꞌ botolokuꞌ unuvo laminekisi uveli minineꞌ nene do ogo
LUK 7:38 mehenela ogo gizenela mino ive neivo vele novozo neꞌmo Izesuꞌ gizeneloꞌ nene lemavo maduno zopovo nedunuꞌ gilite hulo-do gizene nene upaꞌ ele-do mino aꞌmine unuvo laminekisi uveli nene holo-dineꞌ.
LUK 7:39 Noholo-divo Halisaioꞌ ve Izesuꞌni nosoꞌ nitetoꞌ elese molo-dive aza nene ningo asiꞌve lulouꞌ tiꞌ lo lineꞌ: Aꞌmine ve nene polohete minidiniko aꞌmine okoꞌnoloꞌ nodo gilineꞌ veneꞌ nene monovo golosoloꞌ monaaꞌ ineꞌ veneꞌ neive lo gele mino okoꞌneloꞌ do gelamozo lo oꞌve lo-didine.
LUK 7:40 Neꞌmine lo nogilivo Izesuꞌ aza aꞌmine Halisaioꞌ ve tiꞌ lo lo-imineꞌ: Simonizo, nenitatiꞌ nene geiꞌ lo-gemeloniꞌ gamazi ma neive. Lavo aza tiꞌ lo lineꞌ: Tisazo, aꞌmine gamazika nene lovo.
LUK 7:41 Neꞌmine lavo Izesuꞌ tiꞌ lo lineꞌ: Ve maliꞌmo alingeꞌ nimilisingumuꞌ ve lo moni dinaꞌ ogo faef hadeti kina (K500) ve ma emo ve ma nene fifti kina (K50) imineꞌ.
LUK 7:42 Neꞌmine ineꞌza ingine alingeꞌ nene ngeli bekimi i-damilisineꞌ ogavo moni dinaꞌ ogo ngimive aza nene nevo alamilizo lo oꞌve lo-ngidineꞌ. Neꞌmine lavosa engikutiꞌ nene ezemuꞌ mulunouꞌ lamineꞌ nabaloꞌ zaho gele nolive.
LUK 7:43 Neꞌmine lavo Simoni aza tiꞌ lo lineꞌ: Naza giluvoniꞌ nene moni nabaloꞌ goloso dinaꞌ ogavo lihime nabaloꞌ goloso hulo-dive nene noloseive lo lavo Izesuꞌ tiꞌ lo lineꞌ: Gaza mo gihile lane.
LUK 7:44 Neꞌmine lo Izesuꞌ velepeꞌ ize veneta ogo Halisaioꞌ ve Simoniꞌni nene tiꞌ lo lo-imineꞌ: Gaza veneꞌ mene ninge nabe. Gaza nene Zuda ve leliꞌ monovoteloꞌ eꞌmeto neleꞌmize lamineꞌ olosa geiꞌ ilineꞌ initeꞌ nene amanivo veneꞌ meꞌmo noo-nidive. Gaza nene numungauꞌ okuvo gizeꞌne nosoꞌ izeloniꞌ noso ma lepe molo-nedamanivo veneꞌ meꞌmo nene vele novozodunuꞌ gizeꞌneloꞌ nene noso ize-nedo maduno zopovodunuꞌ nene nogilite-nidive.
LUK 7:45 Idoꞌ goꞌne veꞌne elo namanivo veneꞌ meꞌmo naza ogo numungauꞌ dizuvodotiꞌ gizeꞌne nene upaꞌ lo-nedo neineꞌ nene osuꞌ lamive.
LUK 7:46 Idoꞌ maduꞌneuꞌ nene gaza uveli ma lepo holo-nedamanivo veneꞌ meꞌmo nene unuvo lamineꞌ ogaꞌ ineꞌ uvelidunuꞌ gizeꞌneloꞌ holo-nedave.
LUK 7:47 Nemuꞌ nene naza ma lo-gemelove. Veneꞌ aza nene lulo nabaloꞌ goloso nimineꞌ neꞌmo lihimeꞌve nabaloꞌ goloso minineꞌ apase-dineꞌ nene sotoꞌ o neive. Neꞌmine oganiꞌza ve ma aza lihimeꞌve ngomo apase-delove neꞌmo nene lulo ngomo neꞌmine nemaaꞌ neive.
LUK 7:48 Neꞌmine lo veneꞌ nene tiꞌ lo lo-imineꞌ: Geiꞌ lihimeka nene mo apase-gedekuve.
LUK 7:49 Neꞌmine lavo nosoꞌ niteꞌ makaꞌ ni minave ingine nene apiꞌ igi luꞌninguꞌ tiꞌ li laniꞌ: Ve mene ve naniꞌmine ve minidiꞌmo lihimeꞌine hulo-ngedaatokisi lisiheꞌ o neive.
LUK 7:50 Neꞌmine li luꞌninguꞌ nilavo Izesuꞌ aza veneꞌ nene tiꞌ lo lo-imineꞌ: Nenikumuꞌ geiꞌ gele eleꞌvoleꞌ aineka neꞌmo lihime akalotiꞌ geleꞌmize lamineꞌ ogaze. Mulungauꞌ zou lo minivo numungala vozo lo lo-dineꞌ.
LUK 8:1 Nelotiꞌ ngomo ma nomino alingeꞌ nene Izesuꞌ aza nGalilaia numuno ebeꞌ ngomo nabakuꞌ nene mone mone ogo Oꞌmosoꞌmo gizebo o-ledaaꞌ neineꞌ neꞌmi gamazi lamineꞌ nesi nene do vo lo-ngeme ngemeꞌ oꞌmo monineꞌ. Neꞌmine oꞌmo vinguꞌ nene eze izipahala zuho tuvelu nesi nene makaꞌ monaniꞌ.
LUK 8:2 Idoꞌ veneꞌ ma Izesuꞌ gomuꞌ sikalahuꞌ goloso luꞌningutiꞌ ngimisele hulineꞌ venekisi idoꞌ initeꞌ gizi daniꞌ do guno o-ngidineꞌ venekisi nene makaꞌ monaniꞌ. Aꞌminguꞌ veneꞌ ma nene Maliaꞌ minineꞌ nene ezemuꞌ Mangadalatiꞌ veneꞌ ve li-daaꞌ aniꞌ veneꞌ minineꞌ eiꞌ luloutiꞌ nene sikalahuꞌ goloso seveni Izesuꞌ gomuꞌ ngimisele hulineꞌ ve.
LUK 8:3 Idoꞌ veneꞌ ma nene Helodeꞌ numudoꞌ gizebo ve Kuzaꞌ elenaho Zoanaꞌ nesi idoꞌ Susanaꞌ nesi idoꞌ veneꞌ linge ma nesi nene makaꞌ Izesulesi vaniꞌ ve. Ingine aꞌmine veneꞌ nete nene Izesuꞌnisi izipahala zuho nesi nene engiꞌ initeꞌ mataꞌ idoꞌ nosoꞌ niteꞌine nedunuꞌ nene nasahiliꞌ i-ngidi hize eleꞌ i-ngidavo monaniꞌ ve.
LUK 8:4 Idoꞌ eveneꞌ mukiꞌ nene Izesuda ikaꞌ ikaꞌ navo numudotiꞌ numudotiꞌ nesi nene golovoꞌ izi igi nihitavo ningo aneza gamazi ma tiꞌ lo lo-ngimineꞌ:
LUK 8:5 Ve ma zuho initeꞌ tileꞌ ogaꞌ ive nene zuho initeꞌve tileꞌ olosa vineꞌ. Vo mo tileꞌ oꞌmo novivo linge ma nene aka gahevela diꞌmozi minikevo eveneꞌ nete aꞌmidoꞌ lisi di goloso ikevo nama nete igi di naniꞌ.
LUK 8:6 Idoꞌ linge ma nene gehedoꞌ diꞌmozi gala hoꞌli dizaniꞌza gehedoꞌ mino misubo nene naba minamo gokoꞌ gidini minidiꞌmo nene gulugulu izaniꞌ.
LUK 8:7 Idoꞌ linge ma gasava guvise hukikevo luhive ma ha mininguꞌ diꞌmozi gala hoꞌli dizaniꞌza gasava guvise nene gohi dizi mili hiti-ngidaniꞌ.
LUK 8:8 Idoꞌ neꞌmine aniꞌza linge ma misubo laminetoꞌ diꞌmozaniꞌ nete nene gala hoꞌli dizi gihile izaniꞌ nene hamo hamolite vanu hadeti (100) neꞌmine iziꞌmi vaniꞌ ve lineꞌ. Neꞌmine lo tiꞌ lo lineꞌ: Gatine ngoloꞌ live nii ma nene gili lamineꞌ igi gililo.
LUK 8:9 Neꞌmine lo lavo aꞌmine aneza gamazi neꞌmiꞌ monovomuꞌ izipahala zuho nete longoꞌ i-dikevo
LUK 8:10 Izesuꞌ aza tiꞌ lo lo-ngimineꞌ: Oꞌmosoꞌmo gizebo o-ledelingumuꞌ sunoꞌ gamazi nene lengiꞌ ha gililisave lavo lo sotoꞌ o-lengemaaꞌ nouvoniꞌza eveneꞌ ma ato atoꞌ nene aneza gamazivoꞌ gililizave lo lo-ngemaaꞌ nouve. Neꞌmine nouvoniꞌ nene ingine ningi ningi ningilizaha ninge lamineꞌ amilisave. Idoꞌ gili gili gililizaha gili lamineꞌ amilisave losa nene aneza gamazivoꞌ lo-ngemaaꞌ nouve.
LUK 8:11 Aꞌmine gepeꞌ gamazi luvoniꞌ ma nene neꞌmino neive: Zuho initeꞌ nene Oꞌmosoꞌmi gamazi neꞌminosa nene neive.
LUK 8:12 Idoꞌ zuho initeꞌ ma akaloꞌ diꞌmozikevo evenelite lisi di goloso ikevo namalite nave luvoniꞌ ma nene eveneꞌ malite Oꞌmosoꞌmi gamazi nene gilaniꞌza gili di luꞌninguꞌ milalisa aniꞌ nene ve goloso neꞌmo gili eleꞌvoleꞌ ikevo Oꞌmosoꞌmo do nguꞌ izalive lo ogo aꞌmine gamazi nene do vaaꞌ neingumuꞌ luvoniꞌ ve.
LUK 8:13 Idoꞌ gehedoꞌ diꞌmozave luvoniꞌ nene eveneꞌ ingine monoꞌ gamazi nene gili ngolize izi liteꞌ li luꞌninguꞌ di goꞌzi gili eleꞌvoleꞌ aniꞌza di giliꞌ li damavo luhiseꞌine damivo gamene haꞌna gili eleꞌvoleꞌ amavo ngemenguꞌ sotoꞌ o ngiminguꞌ nene mo mudise limi ingaaꞌ nave.
LUK 8:14 Idoꞌ ma nene gasava guviseuꞌ diꞌmozi gala hoꞌli dizaniꞌza gasava guvise goloso neꞌmo molo hite-ngidive luvoniꞌ nene eveneꞌ ma ingine Oꞌmosoꞌmi gamazi nene mo gili aꞌmidoꞌ eꞌmeti vaniꞌza okoꞌine losuvoꞌmi initeꞌ do sotoꞌ ogakumuꞌ gopo gaꞌine gilaaꞌ idoꞌ moni henenimuꞌ gilaaꞌ idoꞌ me misubouꞌ initekumuꞌ gopo gaꞌine gilaaꞌ aniꞌ neꞌmo Oꞌmosoꞌmi gamazi nene molo hitavo inginela nene gulupese ogo gihile izesaꞌmineꞌ ve.
LUK 8:15 Idoꞌ misubo laminekuꞌ diꞌmozi gala hoꞌli dizi gihile izave luvoniꞌ ma nene eveneꞌ ma aꞌmine Oꞌmosoꞌmi gamazi nene li-ngimikevo liteꞌ li gili di monovoꞌine laminetotiꞌ idoꞌ luꞌine laminekisi minadotiꞌ monoꞌ nene di giliꞌ li daniꞌ nene ingine goseleꞌ ngebelamivo aꞌmine monoꞌ nene di giliꞌ li di mini mini di dizi minikevo neꞌmo nene engita gihile lamineꞌ izeꞌmo vo minaaꞌ neive.
LUK 8:16 Eveneꞌ ingine liviꞌ lamu viteꞌ igisa somo naba aꞌmidoꞌ ma hitikisaꞌmave. Idoꞌ aꞌmine lamu nene viteꞌ igisa sebenguꞌ ma di milikisaꞌmave. Asi eveneꞌ numunguꞌ dizilizave nene hize labanaꞌ ele-ngedelingumuꞌ sotoꞌ lamu molaaꞌ holomoloꞌ milalisave.
LUK 8:17 Idoꞌ aꞌmineꞌmine ogo idise mene hito neineꞌ initeꞌ mukiꞌ nene alingeꞌ sotoꞌ oloseive. Idoꞌ idise mene haleko sunoꞌ neineꞌ initeꞌ mukiꞌ nesi nene sotoꞌ ogavo ningi gililisave.
LUK 8:18 Ve ma ingine monoꞌ ma di minilizave nene Oꞌmosoꞌmo gohi ma ngemavo di vaiꞌ li minilisave. Idoꞌ monoꞌ ma di minamilizave nene ingine monoꞌ nene mo do none li gili ma di nilizaniꞌ nesi nene ipeꞌ ogo do voloseive. Lingine monoꞌ gilili ma nene gopo abeleni abeleni igi gilami di guni igi gili guni igisa gililo.
LUK 8:19 Idoꞌ Izesuꞌ izelehosi idoꞌ nakunolomotesi nene Izesuꞌ neida aniꞌza numunguꞌ nene eveneꞌ gikiꞌ ikevo neidoꞌ ngeli vamilizadoꞌ ogavo heta ha minaniꞌ.
LUK 8:20 Oti nizavo eveneꞌ nete izahosi nakuna zuhosi heta geiꞌ ningi-gidilisa igi oti nizave li Izesuꞌni li-imaniꞌ.
LUK 8:21 Li-imaniꞌza Izesuꞌ aza tiꞌ lo lo-ngimineꞌ: Neze izeꞌneho idoꞌ nakuꞌne zuho nene ve ma ingine Oꞌmosoꞌmi gamazi gili aꞌmidoꞌ eꞌmeti igi mili igaꞌ ave nene nizave lo lineꞌ.
LUK 8:22 Idoꞌ gamene ma izipahala zuhosi sipiuꞌ dizi izipahala zuho tiꞌ lo lo-ngimineꞌ: Laza noso ohuno mene hulo helala holene volone. Lavo mo vaniꞌ.
LUK 8:23 Mo nosoloꞌ ledi nivavo Izesuꞌ nene okise onganiꞌ. Ongo neivo hepeꞌ naba goloso elo noso nene golo gidini eleꞌ alaꞌ ogo noso nene sipiuꞌ velo nodizivo ingine nene ganala di helaaꞌ akaloꞌ mini mili minaniꞌ ve.
LUK 8:24 Neꞌmine neivo izipahala zuho ingine vi Izesuꞌni uꞌmukoꞌ igi tiꞌ li li-imaniꞌ: Ve naboo, ve naboo, laza nene mo osuꞌ losoꞌ o neineꞌ lae. Likevo aza oto hepeꞌ nesi noso monineꞌ nesi nene ngelemavo hepeꞌ nene matavo noso nesi mato ngi lo lamineꞌ minineꞌ.
LUK 8:25 Neꞌmine ogavo izipahala zuho nene tiꞌ lo lo-ngidineꞌ: Lingine nene Oꞌmosola gili eleꞌvoleꞌ ilizanako nanimuꞌ gili eleꞌvoleꞌ amave. Neꞌmine lavo izipahala zuho ingine ngehelele goloso izo voꞌine vavo tiꞌ li li voleloꞌ meloꞌ aniꞌ: Ve meꞌmo hepeꞌ masi noso masi matilisive lo-ngedavo gamaziꞌve gili dikesiko ve mene atoliꞌmine ve goloso noloseive li laniꞌ.
LUK 8:26 Neꞌmine igi ingine nene nGalilaia noso ohuno neꞌmi helala Gelegesa misubola vi hetelaniꞌ.
LUK 8:27 Vi heteli Izesuꞌ sipiutiꞌ lemo noso gahevela novivo aꞌmida minineꞌ numuno ebekutiꞌ ve sikalahuꞌ goloso lulouꞌ minive masi voteneꞌ asineꞌ. Aꞌmine ve nene mo gamene haꞌnaloꞌ okoꞌnoloꞌ initeꞌ ma izamo mino numungukisi ongosaꞌmo gonoso galese minida mono ongokaꞌ ogo monaaꞌ ineꞌ.
LUK 8:28 Neꞌmino neivo evenelite senidunuꞌ gizene analoꞌ nene nalaꞌ izi-di gizebo i-daaꞌ aniꞌza sikalahuꞌ goloso neꞌmo aꞌmine seni nalaꞌ nene izo huko eveneꞌ nene eleꞌmizo ebeꞌ hadivela vaaꞌ ineꞌ ve. Idoꞌ Izesukisi voteneꞌ igi aꞌmine ve neꞌmo Izesuꞌni nene ningo gekeꞌ lo Izesuꞌ velela vo lemo pouꞌ lo ongavo aꞌmine sikalahuꞌ goloso neꞌmo gamene gamene aꞌmine veꞌmi lulouꞌ nene minavo nemuꞌ nene Izesuꞌ aza sikalahuꞌ goloso nemuꞌ sikalahuꞌ goloso gaza ve neꞌmi luloutiꞌ nene hulo-do lemo ogo vozo lo-dineꞌ ve. Idoꞌ aꞌmine gamazi lo-dingumuꞌ aꞌmine ve neꞌmo gamazi naba lo tiꞌ lo lineꞌ: Izesuvo, Oꞌmoso dizo miniveꞌmi gipele mene gaza nouvoda nanitekaꞌ nane. Nenita mulumo gono nemamiline losa geita amuzonga nolo-giduve.
LUK 8:30 Neꞌmine lavo Izesuꞌ aza aꞌmine sikalahuꞌ goloso lulouꞌ minive nene tiꞌ lo longoꞌ o-dineꞌ: Gaza guliveka nene zaho nane. Neꞌmine lavo sikalahuꞌ goloso lulouꞌ minive aza sikalahuꞌ goloso vaiꞌ minaniꞌ nenako nemuꞌ nene aza guliveꞌve nene Mangiliseꞌ nouve lineꞌ.
LUK 8:31 Lavo sikalahuꞌ goloso ingine limisele hulo galese lulouꞌ amilive li amuzonga li geligelinga laniꞌ.
LUK 8:32 Idoꞌ aꞌmida golola nene ize mukiꞌ goloso galese ni nizavo sikalahuꞌ goloso ingine aꞌmine izeliti luꞌninguꞌ nene limisele hulavo vo dizelone li Izesuda amuzonga goloso laniꞌ. Neꞌmine likevo vi aꞌminguꞌ dizilizave lo Izesuꞌ gele ngimineꞌ.
LUK 8:33 Neꞌmine ogavo ingine aꞌmine eveneliꞌmi luloutiꞌ limi vi ize neti luꞌninguꞌ dizikevo ize mulise ingine mangilise hizi lotiꞌ izi golo aveseloꞌ nene limi noso ohunouꞌ vi noso nii hilaniꞌ ve.
LUK 8:34 Neꞌmine ikevo ize gizebo ve ingine golise vi aꞌmine ninganiꞌ initeꞌ nemuꞌ aꞌmida numuno ebeꞌ nabauꞌ nesi idoꞌ hazala nesi nene li-ngimi osuꞌ laniꞌ.
LUK 8:35 Neꞌmine ikevo eveneꞌ ingine aꞌmine sotoꞌ ineꞌ initeꞌ nene ningelone li Izesuꞌ neida igi ninganiꞌ nene aꞌmine luloutiꞌ sikalahuꞌ goloso limi igi vave nene gamazi gelaaꞌ initeꞌve maduno nesi nene mo lamineꞌ ogavo geneganaꞌve nesi do izo Izesuꞌ gizeneuꞌ mitoꞌ mino gapepeꞌ o neivo ningi ngehelele izineꞌ.
LUK 8:36 Idoꞌ ve ma ingine aꞌmine sikalahuꞌ goloso lulouꞌ minave Izesuꞌ do lamineꞌ o-dineꞌ ningave nete aꞌmine monovo nemuꞌ eveneꞌ mukiꞌ li-ngimaniꞌ.
LUK 8:37 Neꞌmine ikevo Gelegesa misubouꞌ aleve ingine nene ngehelele naba goloso izavo engiꞌ misubo nene hulo vilive li amuzo mili Izesuda laniꞌ. Neꞌmine likevo gohi sipiuꞌ dizo tineꞌ molo vineꞌ.
LUK 8:38 Novivo sikalahuꞌ goloso luloutiꞌ do hulo-ngidive aza Izesuda giꞌmizo makaꞌ monelove lo amuzonga lineꞌza Izesuꞌ aza oꞌve lo imisele hulo tiꞌ lo lo-dineꞌ:
LUK 8:39 Gaza nene numungala vo Oꞌmosoꞌmo amebe initeꞌ o-gidineꞌ nemuꞌ nene neꞌmine o-nidive lo lo sotoꞌ ogo lo-ngemezo. Neꞌmine lo-davo sikalahuꞌ goloso luloutiꞌ igi vave aza aꞌmida minineꞌ numuno ebekuꞌ nene vo Izesuꞌ amebe initeꞌ o-dineꞌ nemuꞌ lo-ngeme ngemeꞌ oꞌmo vineꞌ.
LUK 8:40 Neꞌmine ogavo eveneꞌ ingine Izesungumuꞌ gizebo igi nizavo Izesuꞌ aza tineꞌ molo vo hetelavo gekeꞌ vokeꞌ li-daniꞌ.
LUK 8:41 Neꞌmine nili-davo ve ma monoꞌ numudoꞌ gizebo ve gulive Zailoꞌ aza aluvo kilisimasiꞌve tuvelu (12) neꞌmidoꞌ minineꞌ aluvo hamoꞌ nene mo nohilivo lotiꞌ izo ogo Izesuꞌ gizeneuꞌ lemo golo hizo Izesuꞌ nene numuꞌveuko alive lo amuzonga lo-dineꞌ. Neꞌmine lo-davo Izesuꞌ aza aꞌmida novivo eveneꞌ mukiꞌ nene muloloꞌ muloloꞌ igi eꞌmeti vaniꞌ.
LUK 8:43 Neꞌmine igi nivavo veneꞌ ma venelite ikeꞌniloꞌ ikeꞌniloꞌ ningaaꞌ naniꞌ siki nene mate-desaꞌmivo mino gamene haꞌnaloꞌ ninge do vo neivo kilisimasi tuvelu do hulo minineꞌza ve malitesi ma di lamineꞌ i-damavo ha minineꞌ nene
LUK 8:44 Izesuꞌni eꞌmeto mehenela ogo geneganaꞌve neꞌmi lolovola do gelavo aꞌmidoꞌ liteꞌ lo siki initeꞌve minineꞌ nene okuꞌ lo-dineꞌ.
LUK 8:45 Neꞌmine ogavo Izesuꞌ aza okoꞌneloꞌ zaho do gilive lineꞌza eveneꞌ mukiꞌ ingine nene laza ma do gelamune li oꞌove likevo Petoloꞌ aza tiꞌ lo lineꞌ: Eveneꞌ nabazo, eveneꞌ mukiꞌ goloso muloloꞌ muloloꞌ igi nizave nete geiꞌ okongaloꞌ nene hitikeve lo lineꞌ.
LUK 8:46 Neꞌmine lineꞌza Izesuꞌ aza tiꞌ lo lineꞌ: Eveneꞌ maliꞌmo okoꞌneloꞌ do gelavo nenitatiꞌ amuzo ezela vineꞌ nene mo gelekuve lo lineꞌ.
LUK 8:47 Neꞌmine lavo okoꞌnoloꞌ do gilineꞌ veneꞌ aza nene monovoꞌne mo sotoꞌ ogave lo gelo luvo luvo ize do ogo Izesuꞌ veleloꞌ lemo golo hizo ongo Izesuꞌ geneganaꞌveloꞌ do gilineꞌ nene nanitekumuꞌ do gilihe neꞌmi monovosi idoꞌ venelite ikeꞌniloꞌ ikeꞌniloꞌ ningaaꞌ naniꞌ siki initeꞌ ningo minineꞌ liteꞌ lo osuꞌ lo-dineꞌ monovo nemukisi nene eveneꞌ mukiꞌ neti veꞌnidoꞌ lo sotoꞌ ineꞌ ve.
LUK 8:48 Neꞌmine ogavo Izesuꞌ aza tiꞌ lo lo-imineꞌ: Aluneve, gele eleꞌvoleꞌ anidiꞌmo nene lamineꞌ ogange. Mulungauꞌ hongu lo lamineꞌ o minivo vozo.
LUK 8:49 Neꞌmine lo nolivo monoꞌ numudoꞌ gizebo veꞌmi numungukotiꞌ eveneꞌ ma ogo tiꞌ lo lineꞌ: Gaza aluva ma nene mo helave. Nemuꞌ nene gaza tisaꞌni nene lihiteheka lo gohi eleꞌmizo amozo.
LUK 8:50 Neꞌmine lineꞌza Izesuꞌ aza gelo monoꞌ numudoꞌ gizebo ve nene tiꞌ lo lo-imineꞌ: Gaza gopo gaka gelamo aluva ha do lamineꞌ o-delongumuꞌ nene gele eleꞌvolekovoꞌ nene ogo minezo. Neꞌmine oganivo aluva neve lamineꞌ oloseive.
LUK 8:51 Neꞌmine lo mo aluvo hiliveꞌmi numudoꞌ ogo hetelo eveneꞌ mukiꞌ nene aza numunguꞌ dizelonguꞌ nene ma dizamavo Petoloꞌ ve Zohaneꞌ ve Zakoboꞌ ve idoꞌ alungo neꞌmi izelehoi melehoi engiꞌ neevoꞌ nene dizilisave idoꞌ eveneꞌ mukiꞌ nene oꞌove lo lo huko-ngidineꞌ.
LUK 8:52 Neꞌmine lavo numunguꞌ dizanguꞌ nene eveneꞌ mukiꞌ ive nama igi mulumo alumo gili minaniꞌza Izesuꞌ aza tiꞌ lo lineꞌ: Alungo nene helamineꞌ haza okise ongo neize. Lingine ive nama amilo.
LUK 8:53 Neꞌmine lineꞌza eveneꞌ aꞌminguꞌ minave ingine alungo nene mo helavo ningi gili nizaniꞌ nenako nemuꞌ Izesuꞌni nene gizeꞌ i-daniꞌ.
LUK 8:54 Gizeꞌ i-daniꞌza Izesuꞌ aza alungo nene analoꞌ nodo vise lo-do tiꞌ lo lineꞌ: Izipahaꞌne, otevo.
LUK 8:55 Neꞌmine lavo vonahaza gohi omo izavo liteꞌ lo otineꞌ. Otavo Izesuꞌ aza aꞌmine alu nene nalineꞌ initeꞌ ma imilizave lo lineꞌ.
LUK 8:56 Neꞌmine lavo alungo neꞌmi izelehoi melehoi nene voꞌine goloso vavo minasineꞌza Izesuꞌ nene aꞌmine gamazi nemuꞌ eveneꞌ veteteꞌ igi li-ngimamilizave lo lo huko-ngidineꞌ ve.
LUK 9:1 Izesuꞌ aza izipahala zuho tuvelu nene vise lo do nubo o-ngedo eveneꞌ luꞌningutiꞌ sikalahuꞌ goloso vaiꞌ nene ngimisele hulaaꞌ amuzo atoliꞌminesi idoꞌ initeꞌ gizi dave di lamineꞌ i-ngidiliza amuzo nesi nene ngimineꞌ.
LUK 9:2 Neꞌmine ogo Oꞌmosoꞌmo gizebo o-ledelingumuꞌ gamazi lamineꞌ nene li-ngimaaꞌ ilizave lo idoꞌ initeꞌ gizi dave nene di lamineꞌ i-ngidaaꞌ ilizave lo ngimiselineꞌ.
LUK 9:3 Nongimiselo tiꞌ lo lo-ngidineꞌ: Aka vilizada nene initeꞌ mo di vamilo. Hatuso nesi di vami idoꞌ gokisi nene di vami idoꞌ beleti nesi nene dami idoꞌ monisi nene goꞌzi di vami idoꞌ sioti nesi nene sitaꞌ izi vami hamokovoꞌ izikisa vilo.
LUK 9:4 Idoꞌ lingine nene vi numuno mauꞌ nidizi ma nene aꞌmine numunguꞌ nene ingiꞌmi nivi viliza gameneuꞌ nene vilo.
LUK 9:5 Idoꞌ numuno maloꞌ nivavo lengeleꞌmize lamineꞌ amavo ma nene lingine aꞌmine numuno ebeꞌ huli vilisa niigi ma nene ingine engiꞌ monovoꞌine gililizangumuꞌ ve li avazaha igi gizedidotiꞌ uꞌmusupo nene okohoꞌ izi di huli vilo.
LUK 9:6 Neꞌmine lo-ngedavo ingine nene vi numuno ebeꞌ ngomo ngomouꞌ idoꞌ ebeꞌ mukikuꞌ nene monoꞌ gamazi li-ngimiꞌ ngimiꞌ igi initeꞌ gizi dave di lamineꞌ i-ngidiꞌmi vaniꞌ ve.
LUK 9:7 Neꞌmine iꞌmi nivavo guvelesi ve naba Helodeꞌ aza Izesuꞌ gonoꞌve do ogo molo ineꞌ initekumuꞌ nene gelo gopo gala gilineꞌ. Gopo gala gilineꞌ nene ve malite monoꞌ noso holo-ngedaaꞌ ive Zohaneꞌ nene hilingutiꞌ gohi otosa neꞌmine neive nilavo
LUK 9:8 idoꞌ malite nene polohete Eliaꞌ ma nene gohi sotoꞌ ogave li nilavo idoꞌ ma nete nene gomuꞌ polohete linge minaniꞌ mautiꞌ ma vele gizo gohi oto neꞌmine gono nodave li nilavo
LUK 9:9 Helodeꞌ aza gelo tiꞌ lo lineꞌ: Zohaneꞌ nene luvono gitekuvoniꞌ ma neineꞌza idoꞌ gamaziꞌve nogiluve mene zaho nolive lineꞌ. Neꞌmine lo aꞌmine Izesuꞌni nene ningelesa gilineꞌ.
LUK 9:10 Idoꞌ aposolo ingine monoꞌ gonoloꞌ ngimiselidotiꞌ nene tineꞌ mili igi initeꞌ igi mili monaniꞌ nemuꞌ nene Izesuꞌni veteteꞌ igi li-imaniꞌ. Neꞌmine ikevo eveneꞌ linge ma nene huli-ngidi Izesuꞌ nene izipahala zuho ngeleꞌmizo gililiheꞌ ivo vi numuno ebeꞌ ma gulive Betesaida nela vi hetelaniꞌ.
LUK 9:11 Eveneꞌ mukiꞌ ingine Izesuꞌ vineꞌ nemuꞌ gili eꞌmeti vaniꞌ. Eꞌmeti nivavo aza ngeleꞌmize lamineꞌ ogo Oꞌmosoꞌmo gizebo o-ledelingumuꞌ gamazi lamineꞌ nene lo-ngemaaꞌ idoꞌ initeꞌ gizi dave adoꞌ di lamineꞌ i-ngidiliza akaloꞌ mini mili minave nene do lamineꞌ o-ngedaaꞌ ineꞌ ve.
LUK 9:12 Neꞌmine neivo hoꞌ nene lemo voo nivengaꞌ nomolavo izipahala zuho tuvelu ingine Izesuꞌ neida igi tiꞌ li li-imaniꞌ: Laza ebeꞌ hadiveloꞌ mene noneꞌ nenako nemuꞌ eveneꞌ nene ngimisele hulovo. Ingine nene mevola miniꞌmi monaniꞌ luhuvo numunguꞌ nehe haza numuda nehe vi nosoꞌ niteꞌine meni hizi naaꞌ idoꞌ ingaaꞌ ilizangisi.
LUK 9:13 Neꞌmine laniꞌza aza tiꞌ lo lo-ngimineꞌ: Lengiꞌ nene nosoꞌ niteꞌ di ngimilevo. Neꞌmine lavo ingine tiꞌ li laniꞌ: Laza nene sikoni faef (5) idoꞌ alahaꞌ sitaꞌ aꞌnevoꞌ molo noneꞌ nenako eveneꞌ mukiꞌ memuꞌ nene gohi ma vo hizelesune lo nolabe.
LUK 9:14 Neꞌmine laniꞌ nene ve faef tauseni (5,000) neꞌmine minaniꞌ nenako nemuꞌ nene laniꞌ ve. Neꞌmine likevo Izesuꞌ izipahala zuhomuꞌ tiꞌ lo lineꞌ: Eveneꞌ nene fifti fifti (50) neꞌmine ve hizi guviseloꞌ nene mitoꞌ minilizave li li-ngidilizave lo lo-ngidineꞌ.
LUK 9:15 Neꞌmine lavo izipahala zuho ingine Izesuꞌ lidoꞌ lidoꞌ igi eveneꞌ nene di lisiheꞌ i-ngidikevo vaitoꞌ nene mitoꞌ minaniꞌ.
LUK 9:16 Nizavo sikoni faef nesi alahaꞌ sitaꞌ nesi nene do Okulumota vonuꞌ noogo Oꞌmoso opoꞌni lo aꞌmine nosoꞌ niteꞌ nene gito apilo izipahala zuho nete izeꞌ mili eveneꞌ ngimilizave lo ngemavo moni ngimaniꞌ.
LUK 9:17 nGimikevo eveneꞌ mukitoꞌ ni gatuꞌine aniꞌ. Neꞌmine ikevo izipahala zuho ingine lumo sama minineꞌ nene gosuvahaꞌ tuvelu (12) neꞌmine goꞌzi vaiꞌ laniꞌ ve.
LUK 9:18 Gamene ma Izesuꞌ aza eikovoꞌ Oꞌmosola lo neivo izipahala zuho nesi makaꞌ imi nizavo tiꞌ lo longoꞌ o-ngidineꞌ: Eveneꞌ nete nenikumuꞌ nene zaho ve li laaꞌ nave.
LUK 9:19 Neꞌmine lavo izipahala zuho ingine tiꞌ li li-imaniꞌ: Eveneꞌ linge ma nete nene monoꞌ noso holo-ngedaaꞌ ive Zohaneꞌ nene hilingutiꞌ otosa oloseive li laaꞌ nave. Idoꞌ linge ma nete nene gozopoꞌ polohete Eliaꞌ aza gohi sotoꞌ oloseive lave ma nene tineꞌ molo abe li laaꞌ nave. Idoꞌ ma nete nene gomuꞌ minaniꞌ polohete hilaniꞌ linge engikutiꞌ otanive nolibe li laaꞌ nave.
LUK 9:20 Neꞌmine likevo Izesuꞌ gohi tiꞌ lo longoꞌ o-ngidineꞌ: Idoꞌ ingine nene mo neꞌmine laaꞌ naniꞌza lingine nenikumuꞌ nene zaho neve li laaꞌ nave. Neꞌmine lavo Petoloꞌ aza tiꞌ lo lo-imineꞌ: Oꞌmosoꞌmo do luꞌ izeline lo do kegese-gedo gimiselelesa live ma nene nane.
LUK 9:21 Neꞌmine lo lineꞌza Izesuꞌ aza neꞌmine li eveneꞌ hamokisi li-ngimamilizave lo oꞌove lo lo huko-ngidineꞌ.
LUK 9:22 Idoꞌ Izesuꞌ aza neniꞌ nene do lunguꞌ izelongumuꞌ do kegese-nedo Oꞌmosoꞌmo nimiselelesa live neive li eveneꞌ hamokisi li-ngimamilizave lo lo huko-ngedo tiꞌ lo lo-ngimineꞌ: Neniꞌ gono neꞌmo gihileꞌve do sotoꞌ ilingumuꞌ Oꞌmosolatiꞌ ve gihile neniꞌ nene mulumo gono naba geho helosa gohi otelodoꞌ o neineꞌ nenako monoꞌ gizebo vesi idoꞌ evenetoꞌ medeli mini Oꞌmoso initeꞌ lehizi-daaꞌ ave nabasi idoꞌ Zuda vete monoꞌ gozopotatiꞌ laaꞌ aniꞌ apizi ngimaaꞌ avesi ingine meheꞌine nimi mulumo initeꞌ mukiꞌ nimi nibili hililisave. Neꞌmine ikevo galeseuꞌ lemo gamene sitohamo minekuvo Oꞌmosoꞌmo gohi do ote-nedeleseive.
LUK 9:23 Neꞌmine lo eveneꞌ mukiꞌ nene tiꞌ lo lo-ngimineꞌ: Ve ma ingine neꞌmeto alone li gilii ma gomuꞌ nene engiꞌ minevoꞌ alevoꞌine gizebo igaꞌ naniꞌ monovoꞌine nene huli alami neniꞌ neꞌmetilizangumuꞌ ve goloso nizave li lohotoꞌ zaloꞌ ngibili hililizangumuꞌ nene gamene gamene gili hulisa neꞌmeti alizave.
LUK 9:24 Idoꞌ neꞌmine igisa neꞌmeti alizave lo noluvoniꞌ nene nanitekumuꞌ luhe. Lingine mene gililo. Ve ma ingine neniꞌ neꞌmeteloneꞌ nene geni initeliꞌmi lulouꞌ vo minevoꞌ alevote hulalone li neꞌmetamilizave nene minevoꞌ minevoꞌ minaaꞌ ngemeni dameni nene ma damilisave. Damilisaha ve ma ingine neꞌmeti vilizanguꞌ ngibili hilikevo minevoꞌ alevoꞌine hulilizaniꞌ nene alingeꞌ minevoꞌ minevoꞌ ngemeni dameni dalisave.
LUK 9:25 Ee, misubouko mene minevoꞌ alevoꞌ igi mini misubouꞌ initeꞌ vaiꞌ nene di engita igi minilizanguꞌ nene minevoꞌ minevoꞌ minaaꞌ ngemeniꞌine hulilizahe vo tolovo ilihe ilineꞌ nene aꞌmine initeꞌ vaiꞌ nete nene ma hize eleꞌ i-ngidamilisave.
LUK 9:26 Idoꞌ me misubouꞌ minevoꞌ alevoꞌinemuꞌ gili neniꞌ neꞌmetamilizave ingine minevoꞌ minevoꞌ ngemeni ma damilisave noluvoniꞌ nene ve ma ingine libilikevo minevoꞌ alevote hulalone li neniꞌ evenele none lilisa ngovozo hililizaniꞌ nene Oꞌmosolatiꞌ ve gihile naza labanalasi amuzoꞌnesi idoꞌ meꞌnehi amuzosi idoꞌ eiꞌ angeloꞌveti amuzosi nene do mino aloniꞌ gamenela aꞌmine alevemuꞌ nene neniꞌ eveneꞌne nizave lolosa ingine adiꞌmino novozo helo lamuvo minevoꞌ minevoꞌ ngemeni dameni nene ma damilisave.
LUK 9:27 Naza laminetoꞌ ma lo-lengemelove: Meloꞌ nizave lengikutiꞌ nene linge ma hilami ha nizavo Oꞌmosoꞌmo gizebo o-ledaaꞌ monovo nene sotoꞌ ogavo ningilisave.
LUK 9:28 Izesuꞌ aza aꞌmine gamazi lo-ngimidotiꞌ gamene eiti (8) ogo vavo Oꞌmosola lolosa Petoloꞌni ve Zohaneꞌni ve Zakoboꞌni ve nene ngeleꞌmizo gololoꞌ dizo vineꞌ.
LUK 9:29 nGeleꞌmizo dizo Oꞌmosola lo neivo golo vele nene do atoliꞌmine loloꞌ noo-divo geneganaꞌvelotiꞌ nene mokonoꞌ hego hego lo minineꞌ.
LUK 9:30 Neꞌmine neivo Okulumokutiꞌ limi asineꞌ nene ve sitaꞌ ma Izesulesi gamazi li voleloꞌ meloꞌ igi minaniꞌ nene Moseki Eliaki minasineꞌ ve.
LUK 9:31 Ingine nene labanaꞌine atoliꞌminesi sotoꞌ igi mini Izesuꞌ Zelusalemi numuda helelineꞌ neꞌmo Oꞌmosoꞌmo imineꞌ gono nene do pelo me misubo hulo dizo vilineꞌ nemukisi nene li voleloꞌ meloꞌ aniꞌ.
LUK 9:32 Neꞌmine li nilavo Petoloꞌ ve Zohaneꞌ ve Zakoboꞌ ve ingine nene veꞌine hihiꞌ ogavo mo ingalisa gilaniꞌza ingami ha oti mini Izesuꞌ labanala nene ningisa idoꞌ ve sitaꞌ nesi makaꞌ oti minasineꞌ nene ninganiꞌ.
LUK 9:33 Idoꞌ ve sitaꞌ nene Izesuꞌni huli-di nivasivo Petoloꞌ tiꞌ lo lo-imineꞌ: Ve naboo, makaꞌ meloꞌ minuneꞌ nene lamineꞌ ogave. Nemuꞌ nene meloꞌ azibe sitohamo ma gizelone. Ma nene geiꞌ ve idoꞌ ma nene Moseꞌni ve idoꞌ ma nene Eliaꞌni ve. Neꞌmine lineꞌ nene nadive noluhe lo gelamo gopo gani lineꞌ ve.
LUK 9:34 Petoloꞌ aza neꞌmine nolivo limusoliꞌmo ogo molo hite-ngidineꞌ. Molo nohite-ngidivo limuso lulouꞌ halekaniꞌ nemuꞌ ngehelele izineꞌ.
LUK 9:35 Neꞌmine neivo limuso luloutiꞌ Oꞌmosoꞌmi gamazi ma tiꞌ lo sotoꞌ ineꞌ: Meve nene neniꞌ gipeꞌne do lunguꞌ izelive lo do kegese-de nouvoniꞌ nenaze. Lingine eze gamaziꞌve gili dalo.
LUK 9:36 Neꞌmine lo limusoutiꞌ lavo izipahala zuho sitohamo ingine Izesuꞌ nene eikovoꞌ neivo ninganiꞌ. Idoꞌ ingine aꞌmine ninganiꞌ initeꞌ nene eveneꞌ hamokisi li-ngimami legeneꞌ iki ha nizavo gamene haꞌna gidini vineꞌ ve.
LUK 9:37 Neꞌmine igi mini goꞌ lavo gololatiꞌ limi navo eveneꞌ mukiꞌ nene Izesulesi voteneꞌ aniꞌ.
LUK 9:38 Voteneꞌ navo aꞌmine eveneꞌ muliseutiꞌ ve maliꞌmo gekeꞌ lo tiꞌ lo lineꞌ: Tisazoo, neniꞌ gipeꞌne hamoꞌ gehepeve mene ninge-deline lo geita noluve.
LUK 9:39 Eze nene sikalahuꞌ goloso maliꞌmo do ote-davo upuhoꞌ ogo gekeꞌ naba lavo sikalahuꞌ goloso neꞌmo gohi do upuhoꞌ o-davo ahezeve izo neivo vele lavozo ogo gituhoꞌ galakalaꞌ ogo neivo sikalahuꞌ goloso nene aꞌmanapa ogo hulo-do vamolosa ingutiꞌ hulo-do vavo okoꞌno malalapa izo minavo amuzolo nomivo minaaꞌ neive.
LUK 9:40 Naza izipaha zuho nete sikalahuꞌ goloso nene imiseli hulilizave lo engita luvoniꞌza ingine nene ngeli imiseli hulilizadoꞌ minamaniꞌ ve.
LUK 9:41 Lavo Izesuꞌ aza aꞌmidoꞌ tiꞌ lo lineꞌ: Eii, ngeli imiseli hulisaꞌmaniꞌ nehe lingine Oꞌmosomuꞌ gili eleꞌvoleꞌ amaniꞌ zuho lutine zovoꞌ ize vineꞌ mene lengikumuꞌ goseleꞌ nebeleꞌmo novivo lengiꞌ vovotinguꞌ gamene gohi ma imineꞌ molo mino langamuzo hizeꞌmo vo mineloniꞌ nemuꞌ nene agae lo noluve. Neꞌmine lo gipa nene eleꞌmizo ano lavo
LUK 9:42 eleꞌmizi ikevo aꞌmine izipe olihe navo sikalahuꞌ goloso neꞌmo ehusoꞌ o hulavo lemo pouꞌ lo ongo neivo do gabeꞌ kabeꞌ o-divo ahezeve izo minineꞌ. Neꞌmine o-dineꞌza Izesuꞌ aza sikalahuꞌ goloso nene elemo izipe nene do lamineꞌ o-do melehine gohi do imineꞌ.
LUK 9:43 Neꞌmine ogavo eveneꞌ mukiꞌ ingine Oꞌmosoꞌmi amuzo atoliꞌmine goloso nene ningi upuhoꞌ goloso aniꞌ ve. Idoꞌ Izesuꞌ ogo molo ineꞌ initeꞌ mukiꞌ nemuꞌ eveneꞌ nene voꞌine vavo gopo gaꞌine ha gili nizavo Izesuꞌ aza izipahala zuho tiꞌ lo lo-ngimineꞌ:
LUK 9:44 Gamazi mene loloniꞌ nene lingine mili gatinguꞌ iki gili minilo. Adoꞌ Oꞌmosolatiꞌ ve gihile neniꞌ nene nibililizaniꞌ eveneliti aꞌninguꞌ neleꞌmizi milalisave.
LUK 9:45 Neꞌmine lo lineꞌza aꞌmine gamaziꞌmi monovo geti gilikelizave lo Oꞌmosoꞌmo gaꞌine do ngoloꞌ lo-ngedamivo aꞌmine gamazi neꞌmi monovo nene gili lamineꞌ amaniꞌ nenako nemuꞌ nene aꞌmine gamazimuꞌ longoꞌ i-dilisa ngehelele izineꞌ ve.
LUK 9:46 Neꞌmine igi izipahala zuho ingine lelikutiꞌ nene zaho livileꞌ ogo dizosa nolive li nemuꞌ gamazitunuꞌ lovo noꞌninguꞌ aniꞌ.
LUK 9:47 Neꞌmine igi lolize gamazi nilavo Izesuꞌ aza luꞌninguꞌ gilaniꞌ nene mo ningo gelo izipe ngomo ma eleꞌmize do ogo minida do ote-do
LUK 9:48 tiꞌ lo lo-ngimineꞌ: Ve ma ingine nenikumuꞌ ve li izipe ngomo meꞌmine ma ngeleꞌmize lamineꞌ ilizaniꞌ nene neniꞌ neleꞌmize lamineꞌ aniꞌ geleleseive. Idoꞌ ve ma ingine neniꞌ ma neleꞌmize lamineꞌ ilizaniꞌ nene nimiselive Oꞌmoso nene eleꞌmize lamineꞌ aniꞌ geleleseive. Nemuꞌ nene Oꞌmosoꞌmo gilivo lengikutiꞌ maliꞌmo eikumuꞌ neniꞌ nene lemo nouve lo gele nolive neꞌmo lengiꞌ nene lingivileꞌ ogosa mineleseive.
LUK 9:49 Neꞌmine lavo aꞌmidoꞌ Zohaneꞌ aza tiꞌ lo lo-imineꞌ: Ve nabazo, ve maliꞌmo geiꞌ guliveka lo sotoꞌ ogo geiꞌ vekamuꞌ ve lo sikalahuꞌ goloso nongimiselivo laza ningo aꞌmine ve nene lezesi bizo geiꞌ geꞌmetesaꞌmineꞌ nenako nemuꞌ neꞌmine amozo lo oꞌove lo-dekune.
LUK 9:50 Neꞌmine lo lineꞌza Izesuꞌ aza tiꞌ lo lo-imineꞌ: Ve ma ingine biluvaꞌ i-lidamilizave nene lelita ve nene nizaze. Nemuꞌ lingine oꞌove li-damilo lineꞌ ve.
LUK 9:51 Izesuꞌ nene Oꞌmosoꞌmo mo Okulumokuko gohi eleꞌmizo dizelineꞌ gamene alitavo mo Zelusalemi numuno ebeta volosa amuzo molo gilineꞌ.
LUK 9:52 Idoꞌ neꞌmine ogosa eiꞌ vilingumuꞌ gamazi di gomuꞌ vilizave ma ngimiselineꞌ. nGimiselavo ingine Samalia alevetinguꞌ numuno ebeꞌ mauꞌ vi numuno di lisiheꞌ i-dilisa aniꞌza
LUK 9:53 aꞌminguꞌ aleve nete Izesuꞌ aza engikisi bizisaꞌmaniꞌ aleveti numuno ebeꞌ Zelusalemi numuno ebeta volosa ingumuꞌ nene eze eleꞌmize lamineꞌ amolosune laniꞌ.
LUK 9:54 Neꞌmine likevo izipahala zuhoutiꞌ ve sitaꞌ ma Zohaneki Zakoboki ingine neꞌmine laniꞌ nemuꞌ ningi gili Izesuꞌni tiꞌ li li-imasineꞌ: Guvekasi ve, laza lokunivo okulumokutiꞌ ololiꞌmo lemo aꞌmine mene aleve ngebele geseꞌ ilive lo nogelabe.
LUK 9:55 Neꞌmine lasineꞌza Izesuꞌ aza mine velepeꞌ izo ngelemineꞌ.
LUK 9:56 Neꞌmine ogavo numuno ebeꞌ gohi mala vaniꞌ.
LUK 9:57 Akaloꞌ nivavo ve maliꞌmo Izesuꞌni tiꞌ lo lo-imineꞌ: Naza nene geiꞌ vilinida alinida ha geꞌmeto volosuve.
LUK 9:58 Neꞌmine lavo Izesuꞌ tiꞌ lo lo-imineꞌ: Initeꞌ mukiꞌ loposo gulosi idoꞌ namasi nene ingalizaniꞌ numuꞌinesi minaaꞌ naniꞌza Oꞌmosolatiꞌ ve gihile neniꞌ ongalo numuꞌne nene nomineꞌ nenako ha neꞌmetelibe.
LUK 9:59 Idoꞌ neꞌmine lo ve mamuꞌ nene neꞌmeto ano lo-dineꞌza aza tiꞌ lo Izesuꞌni lo-imineꞌ: Guvekasi ve, gaza gele nemanivo meꞌnehine vo do galese ize-dosa ogo geꞌmetelove lo lineꞌza
LUK 9:60 Izesuꞌ aza tiꞌ lo lo-imineꞌ: Gaza gelezo. Luꞌine hele vive angise nete hililiza okoꞌine nene di galese izi minilisaze. Gaza nene vo Oꞌmosoꞌmo gizebo o-ledelingumuꞌ gamazi nene lo sotoꞌ sotoꞌ ozo.
LUK 9:61 Idoꞌ ve ma neꞌmo tiꞌ lo lo-imineꞌ: Guvekasi ve, nazasi nene geꞌmetelesuze. Gaza gele nemanivo neze aleve nene vo aꞌnidoꞌ do mo minilo lo alove.
LUK 9:62 Neꞌmine lavo Izesuꞌ tiꞌ lo lo-imineꞌ: Eveneꞌ ma ingine gono di di nivilizangutiꞌ velepeꞌ izi meheꞌnida ningaaꞌ nave nete nene Oꞌmosoꞌmo gizebo o-ledelingumuꞌ ve li gono dalizadoꞌ nene lisiheꞌ isaꞌmave.
LUK 10:1 Neꞌmine ogo alingeꞌ nene Guvelesi veꞌmo eveneꞌ sevedi tuu (72) gohi ma do kegese-ngedo aza alingeꞌ aꞌmida vilineꞌ numuno ebeꞌ mukikuꞌ nene gomuꞌ mili nivilizave lo sitaꞌ sitaꞌ ngimiselineꞌ.
LUK 10:2 Nongimiselo tiꞌ lo lo-ngidineꞌ: Eveneꞌ mene gopo ikelizaze. Minguꞌ nene nosoꞌ niteꞌ mukiꞌ goloso o molaniꞌza aꞌminguꞌ gono dalonive nene ngomosiꞌ minekunge. Nemuꞌ nene lingine mine melehida likevo gonoloꞌ ve ma ngimiselavo vi minamuno dolizilizave lineꞌ.
LUK 10:3 Eii, lingine nene sipisipi ize angale neꞌminisa minilisave. Sipisipi ize ingine lovo veꞌinelite ngibililisa ikevo ingine aꞌmidoꞌ alete mili ngibililiza gavosoꞌine nomivo minaaꞌ naniꞌ neꞌminisa nene vi minilisave. Idoꞌ lingine vovoꞌninguꞌ vi miniliza aleve neve nene sipisipi ize ngibilaaꞌ aniꞌ loposo gulo neꞌminisa nene minilisaze. Mo vilo.
LUK 10:4 Nemuꞌ lingine vilizada nene moni goꞌzaaꞌ hanipausi nene di vami kisi di monaaꞌ goꞌ nesi di vami gizedidoꞌ suuꞌ nesi ma di vami idoꞌ akaloꞌ vilizadoꞌ nesi nene di tiꞌ militiꞌ igi evenekisi gamazi lamilo.
LUK 10:5 Idoꞌ lingine vi numuno mauꞌ dizi ma nene aꞌmine numunguꞌ miniliza alevemuꞌ nene lengita hongu lo minaaꞌ monovo minelive li gomuꞌ li-ngidilo.
LUK 10:6 Idoꞌ aꞌmine numunguꞌ hongu ve ma minelineꞌ nene aꞌmine hongu lo minaaꞌ monovo minelive laniꞌ ma nene aꞌmine veloꞌ mino gihile izeleseive. Idoꞌ engita hongu lo minaaꞌ monovo ma minamivo nilizaniꞌ nene aꞌmine hongu lo minaaꞌ monovo nene gohi tineꞌ molo lengita aloseive.
LUK 10:7 Idoꞌ gonouꞌ ve nene meniꞌine dalizadoꞌ lisiheꞌ o neineꞌ nenako aꞌmine numunguꞌ nene ha mini nosoꞌ niteꞌ idoꞌ noso avoso lingimilizaniꞌ nene ni numuno neuꞌ ongoku meuꞌ ongoku li minami aꞌmine numuno hamokukovoꞌ nene ha minilo.
LUK 10:8 Idoꞌ numuno ebeꞌ mala nivavo ingine di lamineꞌ i-lingidi lengeleꞌmize nimilavo ma nene nosoꞌ niteꞌ naniꞌmine di igi mili-lingidilizahe nene ha nalo.
LUK 10:9 Idoꞌ initeꞌ gizi dave aꞌminguꞌ nilizaniꞌ nene di lamineꞌ i-ngidi tiꞌ li li-ngimilo: Oꞌmosoꞌmo gizebo o-lengedeli gamene nene mo avitoꞌ ogave li li sotoꞌ igi li-ngimilo.
LUK 10:10 Idoꞌ neꞌmine ilisaniꞌza lingine numuno ebeꞌ mala nivavo gamazitine gilami di lamineꞌ i-lingidamavo ma aꞌmine numuno ebeliꞌmi aka ngomo ngomouꞌ nene nivi tiꞌ li lilo:
LUK 10:11 Lengiꞌ monovotine goloso neineꞌ nene gililizave lo numuno ebetingutiꞌ uꞌmusupo gizedeloꞌ giꞌmize neineꞌ nene gohi lengita tileꞌ ogo do nohulune. Do nohuluneꞌza Oꞌmosoꞌmo gizebo o-ledelineꞌ gamene nene mo avitoꞌ o neive lo nolo-lingimuneꞌ nene gili minilo.
LUK 10:12 Naza tiꞌ lo nolo-lingimuve: Gamene nabauꞌ nene aꞌmine aleve Oꞌmosoꞌmo lihime ngemelineꞌ nene eveneꞌ goloso gehepeve Sodomi aleve mulumo initeꞌ naba ngemelineꞌ nesi nene ivileꞌ ogosa naba goloso ngemeleseive.
LUK 10:13 Agae, Kolazini aleve idoꞌ Betesaida aleve lengikumuꞌ nene mulumo nogele-lingiduve. Lengita mulumo initeꞌ goloso alingeꞌ sotoꞌ o-lengedeleseive. Lengita ato atoꞌ suno do sotoꞌ uvoniꞌ ma nene Tilo alevetingukisi Sidoni alevetingukisi do sotoꞌ uvodiniko ingine Oꞌmosomuꞌ gilamaniꞌ aleve minikeniꞌza aꞌmingutiꞌ aleve ingine nene mo lute do velepeꞌ izekune li geti lani gisi hili initeꞌ huko pako ineꞌ nene di ngili minadine. Lingine Tilo alevemukisi Sidoni alevemukisi gilavo gamene nabala Oꞌmosoꞌmo lihime nabaꞌ naba ngemeleseive li gilaaꞌ nahe. Ne neiha engiꞌ lihime ngemelineꞌ nene ivileꞌ ivosa Oꞌmosoꞌmo lihime nabaꞌ naba goloso lengiꞌ lengemeleseive.
LUK 10:15 Idoꞌ Kahanaumi alevekizo, lengiꞌ gulivetine nene Okulumokuꞌ dizelive li di hozi laaꞌ nahe. Lingine nene Oꞌmosoꞌmo oloꞌ galeseuꞌ lengehusoꞌ o huloloseive.
LUK 10:16 Idoꞌ neꞌmine lo izipahala tiꞌ lo lo-ngimineꞌ: Ve ma ingine lengiꞌ gamazitine gililizave nene lengiꞌ gamazitine nogilube li gililizaniꞌ nene neniꞌ gamazi gililisave. Idoꞌ ve ma ningi goseleꞌ i-lingidi gamazitine gilamilizaniꞌ nene neniꞌ ninge goseleꞌ igi gamaziꞌne gilamilisave. Idoꞌ ve ma neniꞌ ninge goseleꞌ igi gamaziꞌne gilamilizaniꞌ nene nimiselive eiꞌ nene ningi goseleꞌ i-di gamaziꞌve gilamilisave.
LUK 10:17 Neꞌmine lo ngimiselavo aꞌmine eveneꞌ sevedi tuu (72) nene visa gohi tineꞌ mili igi muluꞌninguꞌ laniteꞌ goloso gili ngolize iziꞌmi igi tiꞌ li laniꞌ: Guvetesi ve, geiꞌ guliveka ogo sikalahuꞌ golosomukisi gamazi luneꞌ nene inginesi ha gili di vaaꞌ ave.
LUK 10:18 Neꞌmine li likevo Izesuꞌ aza tiꞌ lo lo-ngimineꞌ: Lingine neꞌmine navo Satani nene gopaꞌna neꞌmino Okulumokutiꞌ veleheꞌ limineꞌ gelavo ningekuve.
LUK 10:19 Gilahe. Naza nene amuzo mo lengemekuvoniꞌ nenako neꞌmo nene lingine satatoꞌ lisilizanikisi idoꞌ eveneꞌ ngibilaaꞌ aniꞌ initeꞌ netesi nene ngeli di goloso i-lingidamilisave. Ee, naza Sataniꞌmi amuzo ato atoꞌ vaiꞌ nene ivileꞌ ivosa amuzo mo lengeme nouvoniꞌ neꞌmo nene initeꞌ hamolitesi lengiꞌ nene ngeli di goloso i-lingidamilisave.
LUK 10:20 Neꞌmine o neineꞌza sikalahuꞌ goloso nete lengiꞌ gamazitine gili di vaaꞌ naniꞌ nemuꞌ nene gilikevo dizavo longolize izami asi Oꞌmosoꞌmo do nguꞌ izeliveti guliveꞌine gizinguꞌ lengiꞌ gulivetinesi Okulumokuko gize neineꞌ nemukovoꞌ nene gilikevo dizavo longolize izi minilo.
LUK 10:21 Idoꞌ Izesuꞌ neꞌmine lo nolo-ngidivo mo aꞌmidoꞌ Oꞌmosoꞌmi Sikalahuliꞌmo do ote-davo olize noizo tiꞌ lo lineꞌ: Meꞌneho ve, gaza Okulumoꞌ misubo gizebo o mino Guvekasi ve minanivelike, naza lo sotoꞌ ogo noluvoniꞌ gamazi mene evenelite gilikevo eveneꞌ ma gili nge li gamazi monovo gilaaꞌ ave minaniꞌ nete aꞌmineꞌmi monovo nene ningi gilikelizave lo gaza do halekosa aꞌmine monovo nene eveneꞌ izipe ngomo neꞌmine mini initeꞌ mukiliti monovomuꞌ olihe gilamavemuꞌ do sotoꞌ o-ngedaineꞌ nemuꞌ nene isaaꞌ neve nolo-giduve. Ee, Meꞌneho ve, gaza neꞌmine olosa lamineꞌ gelo neꞌmine aineꞌ nemuꞌ nene isaaꞌ neve nolo-giduve.
LUK 10:22 Neꞌmine lo gohi tiꞌ lo lineꞌ: Meꞌneho aza initeꞌ mataꞌ mukiꞌ nene aꞌneuꞌ molave. Idoꞌ Oꞌmosoꞌmi gipele neniꞌ nene Oꞌmosoꞌmi gipele ve li ningi ma gilamave. Meꞌneho eiꞌ neꞌmovoꞌ nene ningo gele neive. Idoꞌ meꞌnehinemukisi nene zaho nehe ma ningi gilamavo gipele nenikovoꞌ nene ningo gele nouvonako ezemuꞌ nene eveneꞌ masi gililizave lo eze monovo lo sotoꞌ o ngemeloniꞌ alevesi lelikovoꞌ nene meꞌnehinemuꞌ ningo gele minelesune.
LUK 10:23 Idoꞌ mine velepeꞌ izo izipahala zuho vonuꞌ nongebelo engikumukovoꞌ tiꞌ lo lo-ngimineꞌ: Naza laminetoꞌ ma lo-lengemelove. Gomuꞌ polohete minaniꞌ netesi idoꞌ guveꞌinesi ve linge ma netesi ingine neniꞌ ogo molo nouvoniꞌ initeꞌ idise lingine nininganiꞌ memuꞌ nene ningelobo li gilaniꞌza ma ningamaniꞌ ve. Idoꞌ laaꞌ nouvoniꞌ gamazi idise lingine gatinedunuꞌ nigilaniꞌ nene gelelobo li minaaꞌ aniꞌza gilamaniꞌ ve. Nemuꞌ nene aꞌmine ningi gili nizaniꞌ initeꞌ nene Oꞌmosoꞌmo initeꞌ gihile nene lengeme neize. Longolize izi minilo.
LUK 10:25 Idoꞌ Zuda velite monoꞌ gozopotatiꞌ laaꞌ aniꞌ sukulu naba lo monekive maliꞌmo oto Izesuꞌni emenguꞌ nomolo tiꞌ lo lineꞌ: Tisazo, Oꞌmosoꞌmo minevoꞌ minevoꞌ nemeni dameni nemelineꞌ nene naza nadiꞌ okuvosa nemelive.
LUK 10:26 Neꞌmine lo longoꞌ o-davo Izesuꞌ tiꞌ lo lo-imineꞌ: Gaza longoꞌ o-nidaineꞌ gamazimuꞌ nene Oꞌmosoꞌmi louꞌ gamazi neuꞌ nene nadive li gizi nizavo gataaꞌ nane lo longoꞌ o-dineꞌ.
LUK 10:27 Longoꞌ o-davo Gozopoꞌ laaꞌ aniꞌ monoꞌ apize ngemaaꞌ ive aza tiꞌ lo lo-imineꞌ: Oꞌmosoꞌmi louꞌ gamaziuꞌ nene tiꞌ li gizi nizave: Lutine gatine vodinesi amuzotine vaiꞌ nesi nene Guvelesi ve Oꞌmosotida nene mili osuꞌ li lutine imivoꞌ minilo. Idoꞌ lingine lengiꞌ okodinemuꞌ gilaaꞌ naniꞌ neꞌmine igi eveneꞌ avita gidini nizavemukisi nene gilii lutine ngimilo.
LUK 10:28 Neꞌmine lavo Izesuꞌ tiꞌ lo lo-imineꞌ: Gaza mo lamineꞌ gehepeve laange. Minevoꞌ minevoꞌ ogaꞌ gemeni dameni doo mineliningisi gaza laineꞌ neꞌmine ozo.
LUK 10:29 Neꞌmine lo-davo aꞌmine ve aza ovozo helo ovozo hilineꞌ akaꞌve hize tilelove lo gelo Izesuꞌni tiꞌ lo longoꞌ o-dineꞌ: Idoꞌ aꞌmine Oꞌmosoꞌmi louꞌ gamazi nene eveneꞌ avita gidini nizave lutine ngimilo lineꞌ nene zamotine zamotine lute ngemeloningumuꞌ live.
LUK 10:30 Neꞌmine lavo Izesuꞌ tiꞌ lo lo-imineꞌ: Leliꞌ Zuda veutiꞌ ve ma aza Zelusalemi numuno ebeꞌ hulo Zeliko numuno ebeta lemo novivo lasikoli nete akaloꞌ novidoꞌ ningi initeꞌ mataꞌve ipeꞌ igi di bili huli akaloꞌ iki vikevo helaatoꞌ minineꞌ.
LUK 10:31 Neꞌmino ongo neivo eze mulumolo ningo do lamineꞌ o-delidoꞌ o minive gehepeve leliꞌ Zuda veutiꞌ eveneꞌ gohi ma evenetoꞌ medelo mino Oꞌmoso initeꞌ lehize-daaꞌ ive nene aꞌmine akaloꞌ nene lemo vilineꞌ ogavo lemo novo aꞌmine bili hulikave nene ningo ninge hulo-do aka do zovoꞌ izo vineꞌ.
LUK 10:32 Vavo aꞌmineꞌmine ogo monoꞌ numuno nabauꞌ gono daaꞌ ive Leviꞌ aꞌvopilemokutiꞌ ve ma nene aꞌmida lemo ogo aꞌmine bili hulikave nene ningo aka do zovoꞌ izo vineꞌ.
LUK 10:33 Vavo Zuda ve leliꞌ biluvaꞌ Samalia ve ma nene Zuda ve sitaꞌ vasidiꞌmine ogo vo bili hulikave nene ningo muluno goloso hukavo
LUK 10:34 neida vo biladoꞌ nene holo-ngedaaꞌ initeꞌ uvelisi vaini nososi nene holo-do banisi like-do eleꞌmizo do hozi lo dongi izeꞌveloꞌ nene molo-do makaꞌ eleꞌmizo do vo venenga ve meni hizi ingaaꞌ aniꞌ numunguꞌ nene do lamineꞌ o-dineꞌ.
LUK 10:35 Neꞌmine igi ingi goꞌ lavo Samalia ve aza mo volosa aꞌmine venenga ve ingaaꞌ aniꞌ numudoꞌ gizebo ve nene moni tu kina (K2) ma noemo tiꞌ lo lo-dineꞌ: Gaza ve mene gizebo lamineꞌ o-dezo. Neꞌmine o-do nanivo moni nene osuꞌ lavo eiꞌ okoꞌnoloꞌ initeꞌ naniteꞌ haza o-delibe naza tineꞌ molo alodoꞌ nene ogo bekimi ogo meni gemelesuve.
LUK 10:36 Neꞌmine lo lineꞌ nemuꞌ nene gaza nadive lo gele nane. Eveneꞌ setihami aniꞌ neutiꞌ nene akaloꞌ bili hulikave neꞌmi evenele avita gidini minive nene zaho minive.
LUK 10:37 Neꞌmine lavo gozopotatiꞌ laaꞌ aniꞌ monoꞌ apize ngemaaꞌ ive aza tiꞌ lo lo-imineꞌ: Muluno goloso hukive neve ne neive. Lavo Izesuꞌ tiꞌ lo lo-imineꞌ: Gaza vo eiꞌ ineꞌ neꞌmine ogo minelesane.
LUK 10:38 Neꞌmine lo nelotiꞌ akaloꞌ gohi vi numuno ebeꞌ ngomo ma mininguꞌ vi hetelaniꞌ. Vi hetelikevo aꞌmine numudoꞌ nene veneꞌ ma minineꞌ gulive Mataꞌ aza Izesuꞌni nene eiꞌ numuꞌveuꞌ eleꞌmize molaniꞌ.
LUK 10:39 Aꞌminguꞌ nene Mataꞌ alunolo ma minineꞌ gulive Maliaꞌ aza nene ogo Guvelesi veꞌmi gizenela mino gamaziꞌve gelo minineꞌ.
LUK 10:40 Neꞌmino neivo Mataꞌ aza nosoꞌ nitekisi initeꞌ vaikisi do lisiheꞌ ogo mino gono mene mo nivizelineꞌ ogave lo gelo Izesuda vo tiꞌ lo lo-imineꞌ: Guvekasi ve, aluꞌne nene ninge lede-nimikivo gono naba mene nenikovoꞌ do nouvoniꞌ nemuꞌ nene ma gelamabe. Gaza lo-danivo ogo hize eleꞌ o-nidivo makatoꞌ gono dalosive.
LUK 10:41 Neꞌmine lavo Guvelesi veꞌmo tiꞌ lo lo-imineꞌ: Eii, Matazo, gaza nene initeꞌ mukikumuꞌ gaka mukiꞌ gelo mulungauꞌ nene goloso nogelaineꞌza
LUK 10:42 initeꞌ hamokumukovoꞌ geleloneꞌ o neineꞌ nenako Maliaꞌ nene aꞌmine initeꞌ lamineꞌ nene dalosa gelave. Nemuꞌ nene laza dalineꞌ aka nene ma hize tile-damolosusive lo lineꞌ.
LUK 11:1 Gamene ma Izesuꞌ aza ebeꞌ maloꞌ Oꞌmosola lo minineꞌ nene osuꞌ lavo izipahala zuhoutiꞌ maliꞌmo Izesuꞌni tiꞌ lo lo-imineꞌ: Gaza nene monoꞌ noso holo-ngedaaꞌ ive Zohaneꞌ Oꞌmosola laakumuꞌ izipahala zuho apize ngimineꞌ maꞌmino leze apize lemevo.
LUK 11:2 Neꞌmine lavo Izesuꞌ aza tiꞌ lo lo-ngimineꞌ: Oꞌmosola nili ma neꞌminisa lilo: Meteho ve, Geiꞌ guliveka nene eveneꞌ vaiꞌ gelekunivo dizosa miniliho. Idoꞌ eveneka gizebo o-ledelineꞌ nene lelita mudise sotoꞌ iliho.
LUK 11:3 Idoꞌ naloneꞌ nosoꞌ nitete nene gamene gamene lemezo.
LUK 11:4 Idoꞌ lihime di-lidave mukiliti lihimeꞌine nene mo hulo-ngedaaꞌ nouneꞌ nenaze. Aꞌmineꞌmine ogo leze lihimete nene hulo-ledezo. Idoꞌ lemenguꞌ molaaꞌ akaloꞌ nene leleꞌmizo vamozo.
LUK 11:5 Neꞌmine lo lo-ngemo tiꞌ lo lo-ngimineꞌ: Lengikutiꞌ ve maliꞌmo okise ongo velepeꞌ izaaꞌ gameneloꞌ nene zogo veꞌmi numuda vo tiꞌ lo lo-emelihe: Zogone, neniꞌ zogone ma aza aka haꞌnatiꞌ ogo nohetelineꞌza nosoꞌ niteꞌ emeloniꞌ ma nomize. Beleti setohamo neꞌmine ma lehize-nedevo.
LUK 11:7 Neꞌmine loloseineꞌza zogo ve ongo minelineꞌ neꞌmo nene numuno luloukotiꞌ nene tiꞌ lo ha lilidoꞌ o neihe: Idise akahe tile neivo veneꞌ izipahaꞌne zuhosi ongo noninguꞌ nene goseleka lo-ledamozo. Naza oto initeꞌ ma ngelo gemamolosuve lilihe.
LUK 11:8 Oꞌove. Neꞌmine lamoloseive. Asi aꞌmine ongo minive nene zogo ve nolinekisi nene initeꞌ ma emelesa gelamo ongo minelineꞌza ongalosa nouninguꞌ mene lihiteheka lo minalive lo oto aꞌmine viseꞌ ineꞌ initeꞌ nene ha do emeleseive.
LUK 11:9 Neꞌmine oloseinako naza tiꞌ lo nolo-lingimuve: Initeꞌ ma dalone li Oꞌmosola lilizave mukiꞌ nene initeꞌ ha dalisave. Idoꞌ Oꞌmosolatiꞌ nene initeꞌ ma viseꞌ ilizave nene ha ningilisave. Idoꞌ akaheloꞌ okohoꞌ izilizave nene Oꞌmosoꞌmo ha siꞌze-ngedeleseive. Nemuꞌ linginesi Oꞌmosola initeꞌ mamuꞌ longoꞌ ilizaniꞌ nene ha lengemeleseive. Idoꞌ viseꞌ ilizaniꞌ nene Oꞌmosoꞌmo ha lengelebizeleseive. Idoꞌ akaheloꞌ okohoꞌ izilizaniꞌ nene Oꞌmosoꞌmo ha siꞌze-lengedeleseive.
LUK 11:11 Idoꞌ lengikutiꞌ gipeleꞌmo alahakumuꞌ ma lilineꞌ nene meleho zaholike alahaꞌ ma do emamo sataꞌ ma do emeline.
LUK 11:12 Idoꞌ okoloho mulomuꞌ lilineꞌ nene gaza ongovusoꞌ belelineꞌ initeꞌ sataꞌ gazehe nevoꞌmine emelibe.
LUK 11:13 Lingine nevo ha eveneꞌ golososi nilizaha izipahatine zuho nene ha gizebo lamineꞌ i-ngidi initeꞌ lamineꞌ nene ha ngimaaꞌ nave. Nemuꞌ nene linginesi lingivileꞌ ogo lamineꞌ minive Okulumokuꞌ metibo neꞌmo nene eveneꞌ ingine vokuꞌ li ezela laaꞌ nave nene Sikalahuꞌve lehize-lengedamilihe. Oꞌove. Mo atoliꞌmine ogo lehize-lengedeleseive.
LUK 11:14 Sikalahuꞌ golosoliꞌmo ve maliꞌmi lulouꞌ mino vele hize langoloꞌ ogavo gamazi lamiveꞌmi luloutiꞌ nene gamene ma Izesuꞌ aza sikalahuꞌ goloso imisele hulavo aꞌmine ve aza gamazi apiꞌ ogo laaꞌ ineꞌ. Neꞌmine ogavo eveneꞌ nene voꞌine goloso vineꞌza
LUK 11:15 linge ma nete tiꞌ li laniꞌ: Ve mene sikalahuꞌ goloso ngimiselo do nohulineꞌ nene sikalahuꞌ golosoliti guveꞌinesi ve Belezebulodatiꞌ nene amuzo do minosa neꞌmine neive li laniꞌ.
LUK 11:16 Idoꞌ linge ma nete emenguꞌ mili tiꞌ li laniꞌ: Okulumokuꞌ minive aza geikisi nolineꞌ nene amuzo gemavo atoliꞌmine suno ma do sotoꞌ oganivo ningelone li laniꞌ.
LUK 11:17 Neꞌmine laniꞌza Izesuꞌ aza luꞌninguꞌ gamazi gili minaniꞌ nene ningo nogelo tiꞌ lo lo-ngimineꞌ: Misubo mauꞌ minilizaniꞌ aleve ingine nene hizi hoꞌli mini lovo hizilizaniꞌ nene mo eveneꞌ simeꞌ nikevo ebeꞌ nene gaꞌmeꞌ pizeleseive. Idoꞌ vani hamoliꞌmi izipahalalite hizi hoꞌli mini lovo hizilizaniꞌ nene ingine mo hutileꞌ ilisave.
LUK 11:18 Idoꞌ aꞌmineꞌmine ogo neze nene Belezebulodatiꞌ amuzo do sikalahuꞌ goloso nene ngimiselo do nohulive laaꞌ naniꞌ nene Satani aza eze zuhosi hoꞌli ato atoꞌ minadiniko aꞌmine zuho nene ngeli eleꞌvoleꞌ igi minadibe. Oꞌove. Mo limi ingi vi gopoꞌ napaꞌ adine.
LUK 11:19 Idoꞌ nenikumuꞌ nene Belezebulodatiꞌ amuzo dosa sikalahuꞌ goloso nene ngimiselo do nohulive nilahe. Idoꞌ lengiꞌ zuholite sikalahuꞌ goloso ngimiseli hulaaꞌ aniꞌ ma nene amuzo zahidatiꞌ disa neve. Lingine engikumuꞌ nene Belezebulodatiꞌ amuzo disa sikalahuꞌ goloso nene ngimiseli nihulave li ma li-ngidadiniko lengiꞌ nene mo di gonitoꞌ i-lingidadine. Oꞌove. Ingine Belezebulodatiꞌ amuzo damaaꞌ aniꞌ neꞌmino nazasi ezelatiꞌ damo Oꞌmosolatikovoꞌ amuzo daaꞌ nouve.
LUK 11:20 Idoꞌ sikalahuꞌ goloso ngimisele hulaaꞌ nouvoniꞌ nene Oꞌmosoꞌmi amuzodunuꞌ neꞌmine ogaꞌ nooloniꞌ nene Oꞌmosoꞌmo eveneꞌveloꞌ gizebo ogaꞌ amuzoꞌve nene lengita mo do sotoꞌ ogo nolengelebizive.
LUK 11:21 Idoꞌ amuzo malehe ve maliꞌmo gimise elese ogo mino numuꞌveloꞌ gizebo ogo minelineꞌ nene initeꞌ mataꞌve mukiꞌ nene lamineꞌ ha mineleseive.
LUK 11:22 Ha mineleseineꞌza eze nene ivileꞌ ogo amuzo ve ma minelineꞌ neꞌmo ogo lovo o emo ivileꞌ ilineꞌ nene aza gimise elese mene do nouvoniꞌ neꞌmo nene nivileꞌ amilisave lo gele eleꞌvoleꞌ ineꞌza ivileꞌ ogo aꞌmine gimise elese ipeꞌ ogo do hulo initeꞌve nene izeꞌ molo ngemeleseive. Aꞌmineꞌmine ogo naza Satani ivileꞌ okuve.
LUK 11:23 Idoꞌ ve ma ingine nenita giꞌmizi minamave nene neniꞌ lovo i nimaaꞌ ave nene nizave. Idoꞌ ve ma ingine nenikisi makaꞌ mino eveneꞌ do nenita amunive nene eveneꞌ ngimiseli di hutileꞌ i huli-ngidaaꞌ nave.
LUK 11:24 Sikalahuꞌ goloso maliꞌmo ve maliꞌmi lulouꞌ miningutiꞌ hulo-do vilineꞌ nene mine gelo minelineꞌ ebekumuꞌ nene ebeꞌ gokota visetoꞌ voloseive. Vo viseꞌ ilineꞌza ma ningamilineꞌ nene tiꞌ lo loloseive: Naza ganaꞌ hulo uvoniꞌ numuꞌne mala tineꞌ molo volove.
LUK 11:25 Neꞌmine lo tineꞌ molo ogo ningelineꞌ nene pipiaꞌ gisi di lisiheꞌ ikeniꞌ neiha eveneꞌ nizamaniꞌ neivo ningeleseive.
LUK 11:26 Ningo gohi vo sikalahuꞌ goloso seveni eze ivileꞌ igi goloso naba gehepeve minaniꞌ nene ngeleꞌmizo ogavo aꞌminguꞌ dizi aꞌmine veꞌmi lulouꞌ nene ingine numuꞌine loloꞌ ogavo minilizaniꞌ nene gomuꞌ aꞌmine ve minaaꞌ ineꞌ nesi ivileꞌ ogosa goloso nabaloꞌ mine molo mineleseive.
LUK 11:27 Tiꞌ lo nolivo eveneꞌ di geseꞌ aniꞌ muliseutiꞌ veneꞌ ma minidiꞌmo vise lo Izesuꞌni tiꞌ lo lo-imineꞌ ve: Geiꞌ nene gedosa amineꞌve gimineꞌ veneꞌ nene Oꞌmosoꞌmo noꞌnohoꞌ ize-do do lamineꞌ o-de neineꞌ ma neive.
LUK 11:28 Neꞌmine lineꞌza Izesuꞌ tiꞌ lo lineꞌ: Ne neiha asi Oꞌmosoꞌmi gamazi gili aꞌmidoꞌ eꞌmetaaꞌ nave nene Oꞌmosoꞌmo noꞌnohoꞌ ize-ngedo do lamineꞌ o-ngede neineꞌ ma neive loloneꞌ nene lamineꞌ o neive.
LUK 11:29 Neꞌmine lo-ngemo neivo eveneꞌ ikaꞌ ikaꞌ igi vaiꞌ nilavo Izesuꞌ aza apiꞌ ogo tiꞌ lo lo-ngemeꞌmo vineꞌ: Mene gameneloꞌ mine do nouvoda ningi nizave lingine nene eveneꞌ golosovoꞌ minii nenikumuꞌ atoliꞌmine initeꞌ do sotoꞌ ogo Oꞌmosoꞌmo amuzo nimineꞌ nene lengelebizelongumuꞌ nilaniꞌza ma lengelebizamuvo Oꞌmosoꞌmo gozopoꞌ eze veletiꞌ gamazi lo sotoꞌ ogaꞌ ive Zonada atoꞌ suno do sotoꞌ ogo amuzoꞌve ngelebizineꞌ maꞌminevoꞌ ma nenita sotoꞌ ogavo neve ningilisave.
LUK 11:30 Aꞌmine ningilizaniꞌ initeꞌ nene Zonada atoꞌ suno sotoꞌ ogavo Nineve alevete ninganiꞌ neꞌmino idise mene nizaniꞌ aleve lengitasi nene Oꞌmosolatiꞌ ve gihile nenita nene initeꞌ ma sotoꞌ ogavo ningilisave.
LUK 11:31 Idoꞌ guvelesi veneꞌ naba aza emala misubo monovo liginela gizebo o minineꞌ misubo Seba nene hulo avotemoti guveꞌinesi ve naba Solomoniꞌ laaꞌ ineꞌ gamazi lamineꞌ nene gelelesa aka haꞌna haꞌna goloso aniꞌza neniꞌ nene Solomoniꞌni ivileꞌ ogo mino mela lengiꞌ vovotinguꞌ sotoꞌ ogo mino gamazi lamineꞌ noluvoniꞌ nene lingine gilisaꞌmave. Nemuꞌ nene gamene nabala aꞌmine guvelesi veneꞌ naba neꞌmo nene oto lihimetine lo sotoꞌ ogo goniꞌ o-lengedeleseive.
LUK 11:32 Idoꞌ Nineve aleve ingine Zonaꞌ monoꞌ gamazi lo-ngimineꞌ nene gilii luꞌine di velepeꞌ izaniꞌza lingine giliꞌnalo. Naza Zonaꞌni ivileꞌ ogo minuve mene ogo lengiꞌ vovotinguꞌ mino gamazi lo-lingimuvodoꞌ nene gilii lutine di velepeꞌ izamanako gamene nabala nene Nineve aleve nete oti lengiꞌ lihimetine li sotoꞌ i-lingidi gonitoꞌ lengeleꞌmizi milalisave.
LUK 11:33 Ve ma lamu viteꞌ igisa galese lulouꞌ nehe idoꞌ somo lulouꞌ nehe nene ma haleki milamilisave. Asi eveneꞌ numunguꞌ dizilizave hize labanaꞌ ele-ngedelingumuꞌ nene sotoꞌ lamu molaaꞌ holomoloꞌ milalisave.
LUK 11:34 Eveneꞌ voloneꞌ akate nene vete neꞌmo oloꞌ liviꞌ neꞌmino mino do sotoꞌ o-ledaaꞌ neive. Idoꞌ lukaliꞌmi vele lamineꞌ ha minelineꞌ nene Oꞌmosoꞌmo okonga luka mukiꞌ nene hize labanaꞌ ele-gedeleseive. Idoꞌ lukaliꞌmi veleꞌve goloso o nolineꞌ neꞌmo nene okonga lukauꞌ litiꞌmusovoꞌ ize vaiꞌ lo mineleseive.
LUK 11:35 Ve ma gaza lukauꞌ nene labanaꞌ neivo nouhe lo gelo nanivo lukauꞌ litiꞌmuso ize mininekisi minalinge. Eheꞌ ogo minezo.
LUK 11:36 Idoꞌ geiꞌ okonga lukauꞌ nene litiꞌmuso ngomosiꞌ minamo labanaliꞌmo vaiꞌ lo minelineꞌ nene lamu hize labanaꞌ goloso ele neineꞌ gelavo luka okonga mukikuꞌ nene labanaꞌ goloso elo mineleseive.
LUK 11:37 Idoꞌ Izesuꞌ aza gamazi lo-ngemo minineꞌ nene osuꞌ nolivo Halisaioꞌ ve maliꞌmo nosoꞌ nitekumuꞌ elese molo imineꞌ. Neꞌmine ogavo Izesuꞌ aza numunguꞌ dizo nosoꞌ niteꞌ nalosa nosoꞌ niteꞌ naaꞌ holomoloꞌ minineꞌ.
LUK 11:38 Neꞌmine ogo nosoꞌ niteꞌ no neivo Halisaioꞌ ve aza ningineꞌ nene Izesuꞌ aza Zuda ve engiꞌ monovoloꞌ eꞌmeto ana gomuꞌ nosoꞌ ize hulamo nosoꞌ niteꞌ nonavo ningo gopo gala gilineꞌ.
LUK 11:39 Neꞌmine neivo Guvelesi veꞌmo tiꞌ lo lo-imineꞌ: Gaza gelezo. Halisaioꞌ ve lingine nene kapu idoꞌ lapese naba heta eveneꞌ ningilizadavoꞌ nosoꞌ izaaꞌ naniꞌ neꞌminisa nene nizaniꞌza lutinguko nene gumine damineloꞌ monovo idoꞌ monovo goloso nene vaiꞌ lo neive.
LUK 11:40 Lingine mo negi nizave. Oꞌmoso neꞌmo initeꞌ okoꞌno heta loloꞌ ogosa lulouko nesi nene aꞌmineꞌmine ogosa loloꞌ o neineꞌ nemuꞌ nene gilamahe.
LUK 11:41 Idoꞌ lutinemuꞌ nene lo-lengemelove. Lingine eveneꞌ ma ngeleꞌmizi lamineꞌ ilisa initeꞌ ma ngimaaꞌ ilizaniꞌ neꞌmo lutinguꞌ goloso minineꞌ ma nene do lamineꞌ ogavo lisiheꞌ lamineꞌ minilisave.
LUK 11:42 Neꞌmine ilisaniꞌza lingine Halisaioꞌ ve nene ehetineꞌ neve. Lingine Moseꞌ louꞌ gamaziloꞌ ma gili dii minguꞌ initeꞌ ngomo ngomo nosoꞌ niteꞌ do laniteꞌ ogaꞌ ineꞌ initeꞌ nevoꞌmingutiꞌ linge ngomo nene izeꞌ mili Oꞌmoso imaaꞌ naha louꞌ gamazi ma adoꞌ eveneꞌ nene monovo lisihekovoꞌ i-ngidilo idoꞌ lutine Oꞌmoso imilo lo neineꞌ ma nene gili hulaaꞌ naniꞌ nene Moseꞌ louꞌ gamaziloꞌ eꞌmeti minguꞌ initeꞌ ngomo ngomo Oꞌmoso imaaꞌ naniꞌ neꞌmini ha gili dalizanako gili disaꞌmave.
LUK 11:43 Idoꞌ Halisaioꞌ ve lingine monoꞌ numunguꞌ numunguꞌ eveneꞌ nabalitevoꞌ minaaꞌ aniꞌ holomolokovoꞌ minilisa gilaaꞌ naniꞌ nemukisi idoꞌ maketiloꞌ eveneꞌ muliseuꞌ siza li-lidilizave lii gilaaꞌ naniꞌ nemukisi nene ehetineꞌ neve.
LUK 11:44 Lingine gonoso galese sotoꞌ igi minami haleki nizavo eveneꞌ gopo aꞌmidoꞌ lisi moni goloso igaꞌ naniꞌ neꞌmine gonoso galese gili minaniꞌ nemuꞌ nene agae, ehetineꞌ neve.
LUK 11:45 Izesuꞌ neꞌmine lavo louꞌ gamazi apize ngemaaꞌ ive maliꞌmo Izesuꞌni tiꞌ lo lo-imineꞌ: Tisazo, gaza neꞌmine nolaineꞌ nene lelikisi nolelemaineꞌ gelave.
LUK 11:46 Lavo Izesuꞌ tiꞌ lo lo-imineꞌ: Louꞌ gamaziloꞌ sukulu naba li monikeve lingine louꞌ gamazi ngomoꞌ nabaꞌ di nubuho igi eveneꞌ gili dalizave li geniꞌvesi louꞌ gamazi vaiꞌ nene gataꞌnidoꞌ gihi-ngidaaꞌ nave. Gihi-ngidaaꞌ naniꞌza aꞌmine geniꞌvesi louꞌ gamaziutiꞌ louꞌ hamoꞌ ma ngomo lasolo neꞌminesi langisetine ma gihisaꞌmaniꞌ nenako nemuꞌ nene agae, ehetineꞌ neve.
LUK 11:47 Idoꞌ gozopoꞌ polohete minave nene avotingelite ngibili hilaaꞌ aniꞌ ve. Neꞌmine adoꞌ nene lingine imineꞌ mili aꞌmine poloheteliti gonoso galeseloꞌ nene gono di di lamineꞌ igaꞌ naniꞌ nemuꞌ nene ehetineꞌ neve.
LUK 11:48 Ee, avotingelite polohete ngibilikevo hilaveti gonoso galeseꞌnidoꞌ nene lingine gono di di lamineꞌ igaꞌ naniꞌ neꞌmo avotingelite igi mili igaꞌ adoꞌ nene hize eleꞌ i-ngidaaꞌ naniꞌ monovo nene di sotoꞌ ikeve.
LUK 11:49 Nemuꞌ nene gele vevesaaꞌ ive Oꞌmoso neꞌmo tiꞌ lo lave: Polohetesi idoꞌ aposolokisi ngimiselekuvo engita vi gono nidavo linge ma nene ngibili hili idoꞌ ma nene goboni malaꞌ malaꞌ i-ngidilisave.
LUK 11:50 Neꞌmine ilizaniꞌ neꞌmi lihime nene gamene galaꞌmuda vomine Oꞌmosoꞌmo misubo do sotoꞌ idatiꞌ polohete ngibiliꞌmi igi mini idisesi ngibiliꞌmi vi nizaniꞌ lihime nene lengiꞌ idise mene gameneloꞌ nizaniꞌ aleve neti okodida dizeleseive.
LUK 11:51 Ee, naza laminetoꞌ nolo-lingimuve. Abeliꞌni uvolohoꞌmo bele hilidotiꞌ nene polohete neꞌmine ve mukiꞌ ngibili hiliꞌmi dizi Zakaliaꞌni Oꞌmoso lehizi-daniꞌ initeꞌ olokuꞌ gizaaꞌ aniꞌ holomosi idoꞌ monoꞌ numuno naba nesi olusoꞌ neivo bili hiladoꞌ ivo ngibili hilaniꞌ neti lihimeꞌine nene idise mene gameneloꞌ nizaniꞌ aleve neti okodida dizeleseive.
LUK 11:52 Idoꞌ louꞌ gamaziloꞌ sukulu naba li monikeve lingine nene monoꞌ monovo gele ngoloꞌ laaꞌ amuzo nene di minilizanako mo hulikeve. Ee, langisetine nene monoꞌ monovo gili ngoloꞌ lami eveneꞌ ma monoꞌ gili ngoloꞌ lilisa ave nene akaꞌine hizi tili-ngidaaꞌ nave.
LUK 11:53 Neꞌmine loo numungutiꞌ lemo novivo louꞌ gamazi apizi ngimaaꞌ avesi Halisaioꞌ vesi ingine Izesuꞌ nene gamazi do gopo ogo ma lilineꞌ nene analoꞌ do goniꞌ o-delone li amuzo mili golo izi longoꞌ ato atoꞌ vaiꞌ goloso i-daniꞌ ve.
LUK 12:1 Neꞌmine navo eveneꞌ vaiꞌ goloso tauseni neꞌmine igi di nubo igi gikiꞌ igi okoꞌnidoꞌ okoꞌnidoꞌ igi nizavo Izesuꞌ aza izipahala zuho nene do gomuꞌ molo-ngedo apiꞌ ogo tiꞌ lo lo-ngimineꞌ: Halisaioꞌ monoꞌ laaꞌ avetidatiꞌ zisiti bekini paula gele vineꞌ nene dikelizaze. Lingine ningisa minilo. Zisitimuꞌ noluvoniꞌ nene ingine luꞌninguꞌ monovo goloso di haleki mini goꞌine izi eveneꞌ lisiheꞌ gili monaaꞌ naniꞌ monovoꞌinemuꞌ nene zisitiloꞌ lo molo noluve.
LUK 12:2 Idise mene hito neineꞌ initeꞌ mukiꞌ nene sotoꞌ ogavo ningi gililisave.
LUK 12:3 Nemuꞌ nene lingine sunoꞌ haleki litiꞌmusouꞌ neꞌmine lengikovoꞌ laaꞌ naniꞌ gamazi nene eveneꞌ mukilite sotoꞌ gililisave. Idoꞌ lengiꞌ numudinguꞌ lengikovoꞌ mini nununga li lilizaniꞌ gamazitine nene numuno oꞌmota mini asi naba li li sotoꞌ i-lingidilisave.
LUK 12:4 Idoꞌ zogo zuhokizo, naza tiꞌ lo nolo-lingimuve: Eveneꞌ ingine lingibili hilisa aꞌmidotiꞌ nene gohi gohi ma di goloso i-lingidilizaniꞌ nomize. Nemuꞌ nene engikumuꞌ golise gilamilo.
LUK 12:5 Gilamilizaniꞌza goliseꞌve gili-dilizave nene lo-lengemelove. nGebele helosa voꞌine haza nesi mudise ngebelo hulo olokuꞌ ogaꞌ amuzoꞌvesi minive eiꞌ nemukovoꞌ nene goliseꞌve gililo. Ee, mo laminetoꞌ nolo-lingimuze. Goliseꞌve gililo.
LUK 12:6 Gilahe. Nama ngomo ngomo osoꞌmohoꞌ neꞌmine nene haza initeꞌ ve li gili guleheꞌ moni ngomo sitaꞌ nene huli nama faef (5) meni hizaaꞌ nave. Neꞌmine igaꞌ naniꞌza Oꞌmosoꞌmo gizebo o-ngedo minidotiꞌ nene hamokisi ma gala molosaꞌmive.
LUK 12:7 Ne neiha lengita initeꞌ ngomo lasolosi goloso ogalive lo godotine zopovo mukiꞌ nene gate osuꞌ lo nelokisi gizebo ogaꞌ neive. Idoꞌ nama ngomo ngomo mukiꞌ nesi nene ngivileꞌ igi lingine initeꞌ naba nizanaze. Nemuꞌ lingine nene golise gilamilo.
LUK 12:8 Idoꞌ naza tiꞌ lo nolo-lingimuve: Ve ma ingine eveneliti veꞌnidoꞌ neniꞌ evenele none li li sotoꞌ ilizaniꞌ nene Oꞌmosolatiꞌ ve gihile naza aꞌmineꞌmine ogo Oꞌmosoꞌmi angeloliti veꞌnidoꞌ engikumuꞌ nene neniꞌ eveneꞌne nizave lo lo sotoꞌ o-ngedelesuve.
LUK 12:9 Idoꞌ ve ma eveneliti veꞌnidoꞌ neniꞌ evenele nomune li lilizaniꞌ nene naza aꞌmineꞌmine ogo Oꞌmosoꞌmi angeloliti veꞌnidoꞌ ingine neniꞌ eveneꞌne nizamave lo lolosuve.
LUK 12:10 Idoꞌ ve ma ingine Oꞌmosolatiꞌ ve gihile nenikumuꞌ gamazi goloso li-nidi divi lediviꞌ i-nidilizaniꞌ nene Oꞌmosoꞌmo aꞌmine lihime nene ha apase-ngedeleseineꞌza Oꞌmosoꞌmi Sikalahuꞌ nemuꞌ gamazi goloso li-di divi lediviꞌ i-dilizaniꞌ nene Oꞌmosoꞌmo aꞌmine lihime nene apase-ngedelidoꞌ nomive.
LUK 12:11 Idoꞌ monoꞌ numunguꞌ nehe ngamani nabala nehe idoꞌ guveꞌinesi ve nabala nehe lengeleꞌmizi di vi neniꞌ neꞌmetaaꞌ nangumuꞌ goniꞌ nii-lingidavo ma nene engiꞌ liliza gamaziloꞌ nadive lolobe idoꞌ nani gamazi lolobe li gopo gatine nene gilamilo.
LUK 12:12 Lingine liliza gamazi nene aꞌmine gonitoꞌ lengeleꞌmize milaliza gameneloꞌ gehepeve nene Oꞌmosoꞌmi Sikalahuliꞌmo lo-lengemeꞌ lengemeꞌ ivo lilisave. Nemuꞌ nene lingine gopo gatine gilamilo.
LUK 12:13 Neꞌmine lavo di geseꞌ igi minaniꞌ aleveutiꞌ ve maliꞌmo Izesuꞌni tiꞌ lo lo-imineꞌ: Tisazo, gaza uvoꞌnehine lo-danivo meꞌnehi initeꞌ mataꞌ nene izeꞌ molo lingela nemelive.
LUK 12:14 Neꞌmine lo lineꞌza Izesuꞌ tiꞌ lo lo-imineꞌ: Nadiꞌ ive. Lengiꞌ goniꞌ gele-lengedaaꞌ idoꞌ initeꞌ mataꞌ izeꞌ molo-lengedaaꞌ olongumuꞌ nene zaho neleꞌmize molo neineꞌ neve.
LUK 12:15 Neꞌmine lo tiꞌ lo lo-ngimineꞌ: Minevoꞌ alevoꞌ gihile laminekisi minaaꞌ nene initeꞌ ato atoꞌ vaiꞌ minadotiꞌ nene ma sotoꞌ osaꞌmineꞌ nenako nemuꞌ nene initeꞌ gohi gohi daliza gatine nene mo kekeꞌ gilami eheꞌ igi ningisa minilo.
LUK 12:16 Neꞌmine lo lo-ngemo gepeꞌ gamazi ma tiꞌ lo lo-ngimineꞌ: Moni heneni ve maliꞌmi miꞌveuꞌ nene nosoꞌ niteꞌ vaiꞌ goloso o molaniꞌ.
LUK 12:17 Neꞌmine ogavo aza lulouꞌ tiꞌ lo gala gilineꞌ: Naza nosoꞌ niteꞌ dolizo do molaloniꞌ numuno nene naba nominako nadolove lo gala gilineꞌ.
LUK 12:18 Neꞌmine ogo tiꞌ lo gilineꞌ: Naza nosoꞌ niteꞌ molaaꞌ numuno nene kuso do naba ogo gizelove. Neꞌmine ogosa aꞌminguꞌ nene initeꞌ mataꞌne lamineꞌ nesi nosoꞌ niteꞌne nesi nene molalove.
LUK 12:19 Do molosa naza tiꞌ lo gelelove: Initeꞌ mataꞌne nene mukiꞌ goloso neinako aꞌmine nene osuꞌ lo-nidamivo kilisimasi vaiꞌ goloso ogo voloseive. Nemuꞌ nene naza mine gelo nolize izo noso avoso no nosoꞌ niteꞌ no minelove.
LUK 12:20 Neꞌmine lo gelo lineꞌza Oꞌmosoꞌmo tiꞌ lo lo-imineꞌ: Gaza negi hize vaneꞌ mene naza geitatiꞌ vongahaza nene idise holukaꞌ dokuvo helelesainako gaza initeꞌ mataka do salani molaineꞌ ma nene zaho dalive. Gasika ha do minelibe.
LUK 12:21 Idoꞌ eveneꞌ ma angiseꞌinemukovoꞌ ve li heneni vaiꞌ di milisa Oꞌmosoꞌmi veleloꞌ heneni neꞌmine monovo lamineꞌ engita vaiꞌ lo minamivo minavela nene aꞌmine heneni vela sotoꞌ ineꞌ suno nene sotoꞌ o-ngedeleseive.
LUK 12:22 Neꞌmine lo Izesuꞌ aza izipahala zuho tiꞌ lo lo-ngimineꞌ: Eveneꞌ okoꞌine losuvoꞌmi initekumukovoꞌ gili minaaꞌ avela nene luvoniꞌ neꞌmine initeꞌ nene sotoꞌ o-ngedaaꞌ neineꞌ nenako nemuꞌ nene naza ma tiꞌ lo nolo-lingimuve. Gaꞌnaliꞌmo helamo vetesi ha mineloningumuꞌ nosoꞌ niteꞌ nene nani nalonivo lii gopo gatine gilaaꞌ naniꞌ nene alamilo. Idoꞌ okodidokumuꞌ nene naniteꞌ ngolalonivo lii gopo gatine gilaaꞌ naniꞌ nesi nene mo alamilo.
LUK 12:23 Vetesi minevoꞌ alevoꞌ ogo minaaꞌ neꞌmo nosoꞌ niteꞌ nene ivileꞌ ogosa initeꞌ naba neivo idoꞌ okode neꞌmosi nene okodeloꞌ initeꞌ nene ivileꞌ ogo initeꞌ naba neineꞌ nenaze. Nemuꞌ nene gopo gatine gilamilo.
LUK 12:24 Idoꞌ lingine namaliti monovo nemuꞌ nene gatine ma giliꞌnalo. Ingine naliza nosoꞌ niteꞌine nene ma zuhoꞌ igi dolizi di milaliza numuꞌine nesi nene ma nomivo ma dolizi milisaꞌmavo Oꞌmoso neꞌmo nene nosoꞌ niteꞌ ngemaaꞌ neive. Neꞌmine o-ngedaaꞌ neineꞌza lengiꞌ nete nama nene ngivileꞌ igi initeꞌ naba nizaniꞌ nenako Oꞌmosoꞌmo lengikumuꞌ nene ha gele minaaꞌ neive.
LUK 12:25 Lengikutiꞌ ve zaholiꞌmo initeꞌ matakumuꞌ gopo gala ma gele do vo minelidiꞌmo eze mino molo ilineꞌve nene do haꞌna ilive. Mo ngelo ngomosi ma do haꞌna amoloseize. Nemuꞌ nene gopo gatine gilamilo.
LUK 12:26 Idoꞌ lingine initeꞌ ngomo aꞌneꞌminesi nene ma amilizadoꞌ o neineꞌ nenako lingine initeꞌ linge ma nemuꞌ nene gopo gatine nanimuꞌ gilaaꞌ nave.
LUK 12:27 Guviseuꞌ guvovo initeꞌ nene dizi guvovo igaꞌ naniꞌ nemuꞌ nene ningi gililo. Ingine gono di okoꞌnidoꞌ initeꞌ nene ma ongoti ngilisaꞌmaniꞌza Oꞌmosoꞌmo do lamineꞌ o-ngedaaꞌ neive. Gozopoꞌ guvelesi ve Solomoniꞌ nene okoꞌnoloꞌ initeꞌ lamineꞌ goloso ngolaaꞌ ineꞌza naza ma lo-lengemelove. Aza ngolaaꞌ ineꞌ initeꞌ nene lamineꞌ minaniꞌza guvovo igaꞌ naaniꞌ initeꞌ nene mo ngivileꞌ isaꞌmaniꞌ ve.
LUK 12:28 Idoꞌ aꞌmine guvovo initeꞌ nene initeꞌ lamineꞌ neꞌmine minamo gamene haꞌna minesaꞌmive. Idise ha minelineꞌza aizeꞌ nene gokoꞌ lavo evenelite olokuꞌ di gizilisave. Neꞌmino neineꞌza Oꞌmoso neꞌmo aꞌmine guvovo initeꞌ nene do lamineꞌ goloso ogaꞌ neive. Oꞌmoso neꞌmo haza initeꞌ aꞌneꞌmine nene ha do lamineꞌ o-ngedaaꞌ neineꞌ nenako lengiꞌ nene guvovo initeꞌ ngivileꞌ igi initeꞌ naba nizaniꞌ nenako okodidoꞌ initeꞌ nene ma lengemamilidoꞌ o neihe. Ha lengemelidoꞌ o neive. Nemuꞌ nene lingine amuzo mili Oꞌmosomuꞌ gili eleꞌvoleꞌ ilizanako gili eleꞌvoleꞌ amave.
LUK 12:29 Idoꞌ lingine nani nalonivo li naliza initekumuꞌ viseꞌ igi gopo gatine gili minamilo.
LUK 12:30 Misubo mukikuꞌ aleve mukiꞌ nete nene nevoꞌmine manaꞌmine gaꞌine nene gilii aꞌmine initeꞌ nene visetoꞌ minaaꞌ nave. Neꞌmine igi minaaꞌ naniꞌza Okulumokuꞌ metibo neꞌmo nene aꞌmine aꞌmine initeꞌ nene dami haza ma minamilisave lo gele neive.
LUK 12:31 Okodine losuvoꞌmi initekumuꞌ nene gopo gatine gilami asi Oꞌmosoꞌmo gizebo o-lengedelingumuꞌ ve li eiꞌ gele neidokovoꞌ di mili aꞌmine gizebo o-lengedelingumuꞌ nene viseꞌ igi minilo. Neꞌmine ilizaniꞌ nene aꞌmine initeꞌ nesi lehize-lengedo idoꞌ okodine losuvoꞌmi initeꞌ nesi nene ha lehize-lengedeleseive.
LUK 12:32 Lingine Oꞌmosoꞌmi zuho sipisipi ize mulise ngomo neꞌmine gili minave, lingine nene lengehelele izamivoo. Metibo neꞌmo eiꞌ gizebo o-lengedeli monovo lehize-lengedelesa gala gelaaꞌ neineꞌ nene laniteꞌ gele minosa gelaaꞌ neive.
LUK 12:33 Lingine initeꞌ matatine nene eveneꞌ ma meni hizilisa ilizave nene ma ngimii aꞌmidotiꞌ moni dalizaniꞌ nene gohoꞌ aleve hize eleꞌ i-ngidi ngimilo. Neꞌmine ilizadiꞌmo henenitine nene Okulumokuko salani milalisave. Moni nehe initeꞌ ma nehe hanipausiuꞌ salani molaloneꞌ nene aꞌmine hanipausi nene hulupo elo hukavo doꞌmozeleseize. Okulumoꞌ nene hulupo elamilineꞌ hanipausitine neꞌmine minavosa henenitine aꞌminguꞌ salani milalizaniꞌ nene osuꞌ lamivo idoꞌ gumineloꞌ ve netesi aꞌmida vamavo idoꞌ nabaꞌ naba kolokolosi netesi nene di goloso amilisaze. Nemuꞌ henenitine nene Okulumokuko milalo.
LUK 12:34 Idoꞌ henenitine Okulumokuko milalo noluvoniꞌ nene eveneliti lutine nene henenitine minida vo minaaꞌ neineꞌ nenako nemuꞌ ne noluve.
LUK 12:35 Lingine nene oti lavolavotine di liki letitine nene gopodidoꞌ di izi giliꞌ li lamutine nene lo minivosa di nene igi minilo.
LUK 12:36 Idoꞌ gizebo veꞌine veneꞌ huki mili-di nosoꞌ niteꞌ gize vataꞌ adoꞌ monosa ogo akaheloꞌ izelineꞌ liteꞌ lo siꞌze-deloningumuꞌ ve li ve ma ingine gizebo igi minaaꞌ naniꞌ neꞌmine igisa minilo.
LUK 12:37 Idoꞌ gizebo veꞌine neꞌmo ogo ningivo okise ingami nizavo ningelive ingine nene ngolize iziliza akaloꞌ mini mili minilisave. Naza laminetoꞌ ma lo-lengemelove. Gizebo veꞌine neꞌmo ogo gonouꞌ lavolavo nene do liko lingine igi nosoꞌ niteꞌ nalo lo-ngedo asiꞌve nene nosoꞌ niteꞌ izeꞌ molo ngemeleseive.
LUK 12:38 Gizebo veꞌine holukaꞌ ongo velepetoꞌ nehe goꞌ lalosa neivo nehe ogo ningivo gelekeleꞌ izipahala ingine ha gizebo igi nizavo ningelineꞌ nene ingine mo ngolize iziliza akaloꞌ nene mini mili minilisave.
LUK 12:39 Idoꞌ lingine mene giliꞌnalo. Gumineloꞌ veꞌmo bedineꞌ numuno neꞌmi meleho aza gumineloꞌ ve olihe amivosa alineꞌ gamenemuꞌ nene ma gele minidiniko numuꞌveloꞌ nene gizebo ogavo gumineloꞌ ve neꞌmo nene ma bedamidine.
LUK 12:40 Oꞌmosolatiꞌ ve gihile naza nene aloseive li gilamiliza gameneloꞌ alosuze. Nemuꞌ lingine nene aꞌmineꞌmine igi di nene igi minilo.
LUK 12:41 Neꞌmine lo lavo Petoloꞌ aza tiꞌ lo lo-imineꞌ: Guvekasi ve, gaza gepeꞌ gamazi nolo-lemaneꞌ mene lelikumukovoꞌ nolo-lemabe idoꞌ eveneꞌ mukikumuꞌ nene nolane.
LUK 12:42 Neꞌmine lavo Guvelesi veꞌmo tiꞌ lo lo-imineꞌ: Gelekeleꞌ izipe peleseveꞌ izamaaꞌ ave otohato i minave mukikumuꞌ noluve. Idoꞌ Guvelesi veꞌmo gelekeleꞌ izipe ma do kegeso eleꞌmize molo neniꞌ gelekeleꞌ izipeꞌne mukitoꞌ nene gizebo o-ngedo ingine nosoꞌ niteꞌ naliza gameneloꞌ gameneloꞌ nene nosoꞌ niteꞌ ngemekaꞌ ngemekaꞌ ogo minelive lo eleꞌmize molavo gelekeleꞌ izipe aza peleseveꞌ izamaaꞌ ive otohato o minive nolineꞌ nene aza nadiꞌ oꞌmo vo minelidoꞌ o neive.
LUK 12:43 Aꞌmine do kegeso eleꞌmize molaniꞌ gelekeleꞌ izipe neꞌmo aꞌmine meleho imineꞌ gono nene dovo dovoꞌ ogo neivo Guvelesi ve ogo hetelo ningelineꞌ neꞌmo gelekeleꞌ izipe eze nene lamineꞌ ilineꞌ akaloꞌ mine molo mineleseive.
LUK 12:44 Nemuꞌ nene naza laminetoꞌ ma lo-lengemeloze. Guvelesi ve aza ogo aꞌmine gelekeleꞌ izipe nene monovolo ningo initeꞌne mukitoꞌ nene gizebo o-nedelive lo lo-emavo gizebo o-deleseive.
LUK 12:45 Neꞌmine ilineꞌza aꞌmine gono imive gelekeleꞌ izipe neꞌmo nene neniꞌ gizebo veꞌne ma nene mo liteꞌ lo amiko nomino gamene alingeta alihe lo gala gelo eze gizebo o-ngedo minineꞌ veneꞌ vemohoꞌ nene ngebeledoꞌ ngebeledoꞌ ogo mino nosoꞌ niteꞌ haza gidini no mino idoꞌ noso no sipaki ogo minaaꞌ noilinguꞌ nene
LUK 12:46 aꞌmine gelekeleꞌ izipe aza gizebo veꞌne nene ne gameneloꞌ aloseive lo gelamo ngelo amoloseive lo gelo minelineꞌ gameneuꞌ nene gizebo veꞌve ogo hetelo ezemuꞌ gili eleꞌvoleꞌ isaꞌmave o-ngedaaꞌ idiꞌmine ogo belo do goloso gehepeve o-deleseive.
LUK 12:47 Idoꞌ gelekeleꞌ izipe maliꞌmo eiꞌ ilineꞌ initekumuꞌ guvelesi veꞌmo lulouꞌ gele minineꞌ nene ningo gele mino do vaꞌvaꞌ ogo aꞌmine luloloꞌ eꞌmetamilineꞌ nene guvelesi veꞌmo do goloso ogosa beleleseive.
LUK 12:48 Neꞌmine oloseineꞌza gelekeleꞌ izipe gohi maliꞌmo eiꞌ ilineꞌ initekumuꞌ guvelesi veꞌmo lulouꞌ gele neineꞌ nemuꞌ ningo gelamo gavoso belelineꞌ votigileloꞌ ogo monovo goloso dalineꞌ nene guvelesi veꞌmo mo belelineꞌza nabosa belamoloseive. Oꞌmosoꞌmo vauve elo hize eleꞌ o-ngedaaꞌ neive mukiꞌ nene ingine o-ngiduvoniꞌ votigileloꞌ di mili vauve ili neniꞌ gono nene hize eleꞌ ilizave lo gelo mineleseive. Ee, Oꞌmosoꞌmo gizebo i-nidilizave lo initeꞌ vaiꞌ ngemaaꞌ neivemuꞌ nene aꞌmine ngimineꞌ initetoꞌ golo hizi initeꞌ vaiꞌ goloso di-nidilizave lo amuzo molo gele minosa aꞌminemuꞌ gizebo ogo minaaꞌ neive.
LUK 12:49 Naza me misubouko lemo uvoniꞌ nene eveneꞌ engikuꞌ oloꞌ enge viteꞌ olosa uvoniꞌ ve. Agae, aꞌmine oloꞌ nene idisesi mene lo miniliko lo amuzo molo nogiluve.
LUK 12:50 Naza mulumo alumo niteꞌ gihi-nidikevo aꞌmineꞌmi lulouꞌ ma mineloniꞌ o neive. Nemuꞌ nene luꞌneuꞌ geni naba nonibilive. Aꞌmine luꞌneuꞌ geni nonibilineꞌ osuꞌ lo-nedelineꞌ nene aꞌmine mulumo alumo initeꞌ gihi-nidilizaniꞌ nene gehe pelekuvosa nene osuꞌ loloseive.
LUK 12:51 Lingine naza lemo uvoniꞌ nemuꞌ nene misubo mukikuꞌ lovo mukiꞌ nene osuꞌ lavo eveneꞌ mukiꞌ nene honguvoꞌ li minilisave li gili nizahe. Oꞌove. Naza lemo uvoniꞌ neꞌmo nene eveneꞌ hizi hoꞌli minilisave losa nolo-lingimuve.
LUK 12:52 Neꞌmine noluvoniꞌ nene adoꞌ idise melotiꞌ nene eveneꞌ numuno hamokuꞌ ingaaꞌ aniꞌ aleve faef neꞌmine minilizangutiꞌ linge ma nenita giꞌmizikevo ma nene giꞌmizamavo hoꞌli mini setaꞌ netise setohamo nene biluvaꞌ i-ngidasivo setohamo nete setaꞌ nene biluvaꞌ i-ngidavo minilisave.
LUK 12:53 Hizi hoꞌli minilizaniꞌ nene meleholiꞌmo gipele biluvaꞌ o-divo gipeleꞌmo melehine biluvaꞌ o-divo idoꞌ izelehoꞌmo aluvo biluvaꞌ o-divo aluvoꞌmo izelehine biluvaꞌ o-divo idoꞌ avoloholiꞌmo onohulo biluvaꞌ o-divo onohuloꞌmo avolohine biluvaꞌ o-divo minilisave.
LUK 12:54 Neꞌmine lo lo-ngemo di geseꞌ aniꞌ aleve nene gohi tiꞌ lo lo-ngimineꞌ: Lingine Isilaeleꞌ misubouꞌ mene hoꞌ lemaaꞌ idatiꞌ limuso nene ma navo ningi tiꞌ li laaꞌ nave: Goline mo izeleseive li laaꞌ nave. Neꞌmine likevo goline nene lingine ladoꞌ laminetoꞌ mo izaaꞌ neive.
LUK 12:55 Idoꞌ hepeꞌ emalatiꞌ naba elo oduvo aniꞌ nene lingine tiꞌ li laaꞌ nave: Hoꞌ naba goloso loloseive laaꞌ nave. Neꞌmine likevosa lingine mo ladoꞌ hoꞌ naba goloso laaꞌ neive.
LUK 12:56 Soza sunolavoꞌ monave lingine mene Okulumotasi misubolasi ningisa neꞌmine initeꞌ sotoꞌ oloseive li izeꞌ mili ningi gilaaꞌ naniꞌza lingine idise mene ogo molo nouvoniꞌ nemuꞌ nene nanimuꞌ izeꞌ mili gilisaꞌmave.
LUK 12:57 Idoꞌ lengiꞌ igi mili ilizadoꞌ lisiheꞌ o minelineꞌ monovo nene langisetine di kegesi ningaaꞌ ilizanako nanimuꞌ ningisaꞌmave.
LUK 12:58 Ve maliꞌmo goniꞌ o-gedelesa geleꞌmize do zasila novivo ma nene mo zasila geleꞌmizo vavo zasi neꞌmo pilisi veti aꞌninguꞌ molavo huli galapusoloꞌ i-gidikelizaze. Akaloꞌ olihe nivi ma nene aꞌmine goniꞌ o-gedelesa ive nene amuzo molo mulunouꞌ do hongu lo-dezo.
LUK 12:59 Naza laminetoꞌ ma lo-gemeloze. Gaza zogo emo mulunouꞌ do hongu lo-damanivo galapusoloꞌ huli-gidilizaniꞌ nene gaza aꞌminguꞌ mino lihimeka apasekaꞌ apasekaꞌ ogo mino meni hize osuꞌ gehepeve losavoꞌ nene osuꞌ losa volosange. Zogo emezo.
LUK 13:1 Idoꞌ Izesuꞌ aꞌmine gamazi lo osuꞌ lo nolo-ngimivo nGalilaia ve malite ize ngibili Oꞌmoso lehizi-di nizavo Pilatoꞌ lavo aꞌmine ve nene ngibili hilave li aꞌmine gameneloꞌ gehepeve nene eveneꞌ ma igi heteli Izesuꞌni veteteꞌ igi li-imaniꞌ.
LUK 13:2 Neꞌmine li li-imikevo ingine ladoꞌ tiꞌ lo lo-ngimineꞌ: Idoꞌ nemuꞌ lingine gilaniꞌ aꞌmine nGalilaia ve ngebelavo hilave nene nGalilaia ve linge mukiꞌ nene ngivileꞌ igi lihime nabaloꞌ daaꞌ ave minadiꞌmo nene mulumo gili hilaniꞌ noloseive lisa nigilahe.
LUK 13:3 Oꞌove. Mo neꞌmino nomive losa tiꞌ lo laminetoꞌ nolo-lingimuve. Lingine lutine ma di velepeꞌ izamilizaniꞌ nene linginesi aꞌmineꞌmine igi vi tolovo ilisave.
LUK 13:4 Idoꞌ Siloamu numuno ebekutiꞌ numuno haꞌna gizi di dizi vaniꞌ numunoliꞌmo ngutoko lemo eveneꞌ eitini (18) ngibilive nete Zelusalemi numuno ebekuꞌ minaniꞌ aleve nene ngivileꞌ igi monovo goloso naba daaꞌ aniꞌ noloseive li nigilahe.
LUK 13:5 Oꞌove. Mo neꞌmino nomive losa tiꞌ lo laminetoꞌ nolo-lingimuve: Lingine lutine ma di velepeꞌ izamilizaniꞌ nene linginesi aꞌmineꞌmine igi vi tolovo ilisave.
LUK 13:6 Neꞌmine lo aneza gamazi ma tiꞌ lo lo-ngimineꞌ: Ve maliꞌmo vaini nalaꞌ zuhoꞌ ogaꞌ ineꞌ miꞌveuꞌ gohuno za ma zuhoꞌ okinguꞌ nene aza alingeꞌ ogo gihile izihe izamihe lo elelesa viseꞌ ineꞌza ma izamivo
LUK 13:7 midoꞌ gizebo ve nene tiꞌ lo lo-imineꞌ: Ningezo. Gohuno za mene ningekaꞌ ningekaꞌ uvoniꞌ kilisimasi setohamo nene gihileꞌve izineꞌ ma ningamuze. Misubo ngilisi hazamuꞌ no minalize. Bele hulozo lo-dineꞌ.
LUK 13:8 Neꞌmine lavo midoꞌ gizebo ve aza tiꞌ lo lo-imineꞌ: Ve nabo, idise kilisimasi nene ha minelive. Naza nene aꞌmine gohuno za neꞌmi monovouko nene omoꞌ do guno ogo gono dosa za nene lamineꞌ dizo gihile izelingumuꞌ bulumakaꞌ ise neꞌmine molalove.
LUK 13:9 Neꞌmine okuvo ma kilisimasiuꞌ nene gihile lamineꞌ izelihe ningelone. Idoꞌ lamineꞌ ogo gihile ma izamilineꞌ nene belo huko do hulolosane lo lineꞌ.
LUK 13:10 Holiseꞌ gameneuꞌ nene Izesuꞌ aza monoꞌ numuno mauꞌ monoꞌ apize ngemo minineꞌ.
LUK 13:11 Lo-ngemo neivo aꞌminguꞌ veneꞌ ma minineꞌ nene sikalahuꞌ golosoliꞌmo kilisimasi eitini (18) neꞌmine veneꞌ neꞌmi lulouꞌ mino mehene do hilingize-divo mehene hili-ngize vineꞌ mino ote pehe lamilineꞌ o vineꞌ minineꞌ.
LUK 13:12 Neivo Izesuꞌ aza ningo asi lo-do tiꞌ lo lo-imineꞌ: Veneꞌ gaza gize do naneꞌ initeꞌ nene mo do mate-gedekuve.
LUK 13:13 Neꞌmine nolo veneꞌ neꞌmi okoꞌnoloꞌ ana hitavo aꞌmidoꞌ liteꞌ lo mehene hilingize minineꞌ nene lisiheꞌ ineꞌ. Neꞌmine ogavo veneꞌ aza apiꞌ ogo Oꞌmoso opoꞌni loꞌmo vo minineꞌ.
LUK 13:14 Neꞌmine neivo monoꞌ numudoꞌ gizebo ve naba neꞌmo holisekuꞌ veneꞌ do lamineꞌ o-dineꞌ nemuꞌ nene mulunouꞌ goloso gelo eveneꞌ tiꞌ lo lo-ngimineꞌ: Lingine initeꞌ gizi daniꞌ do lamineꞌ o-lengedelingumuꞌ ve li ma nene holiseꞌ gameneuꞌ nene ami asi gono gameneuꞌ gamene sigisi (6) neineꞌ neukovoꞌ nene alizave.
LUK 13:15 Neꞌmine lo lavo aꞌmidoꞌ Guvelesi veꞌmo tiꞌ lo lo-imineꞌ: Lingine eveneꞌ lisiheꞌ lamineꞌ gili monii lutinguꞌ monovo goloso di haleki minaaꞌ ave mene lengiꞌ hamo hamoꞌ dongi izetine nehe bulumakaꞌ izetine nehe nene noso nalizangumuꞌ ve li ize numungutiꞌ nene holisekuꞌ vi kuluhizi di vamaaꞌ naniꞌ nehe. Neꞌmine igaꞌ naniꞌ nene aꞌminesi ne gono ve.
LUK 13:16 Nemuꞌ nene veneꞌ Abalahamuꞌ aꞌvopilemoꞌ mene Sataniꞌmo do goloso o-davo mino kilisimasi eitini (18) ivileꞌ ineꞌ nenako naza holiseꞌ gameneuꞌ aꞌmine gize daniꞌ initeꞌ do lamineꞌ o-deloniꞌ nene edamilihe.
LUK 13:17 Neꞌmine lo lavo eze biluvaꞌ gidini i-di minave mukiꞌ nene ngovozo hilaniꞌ. Neꞌmine navo eveneꞌ mukiꞌ ingine nene atoliꞌmine suno lamineꞌ do sotoꞌ ineꞌ vaiꞌ nemuꞌ nene ngolize naba goloso izaniꞌ.
LUK 13:18 Idoꞌ nelotiꞌ gohi ma tiꞌ lo lineꞌ: Oꞌmosoꞌmo eveneꞌveloꞌ gizebo ilineꞌ akaꞌve nene nadiꞌ ogo neive lolove. Idoꞌ nanitetoꞌ lo molo lokuvo vo dalive.
LUK 13:19 Aꞌmine Oꞌmosoꞌmi gizebo nene nabaꞌmine sakaveꞌ zuho neꞌminosa ne neive. Aꞌmine nene ngomo ha niteꞌ gehepeve neiha ve maliꞌmo do vo miꞌveuꞌ zuhoꞌ ogavo dizo za neꞌmine loloꞌ ogavo nama nete aꞌmineꞌmi aꞌnavauꞌ nene numuno gizi ingaaꞌ nave.
LUK 13:20 Idoꞌ aneza gamazi gohi ma tiꞌ lo lineꞌ: Oꞌmosoꞌmo eiꞌ gizebo o-ngedelineꞌ alevetinguꞌ gono daaꞌ neineꞌ nene nanitetoꞌ lo molo lokuvo vo dalive.
LUK 13:21 Beleti do lulu izaaꞌ neineꞌ initeꞌ zisiti neꞌmine nene neive. Veneꞌ maliꞌmo beleti loloꞌ olosa palauvaꞌ beki ngomo sitohamo nene do nososi do gopo ogo aꞌminguꞌ zisiti ngomosi do gopo ogavo neꞌmo beleti nene lulu izo naba ineꞌ.
LUK 13:22 Izesuꞌ aza Zelusalemila volosa aka vida numuno ebeꞌ ngomo nabakuꞌ nene gamazi apize ngeme ngemeꞌ oꞌmo vineꞌ.
LUK 13:23 Neꞌmine oꞌmo novivo ve maliꞌmo tiꞌ lo longoꞌ o-do lineꞌ: Guvekasi ve, Oꞌmosoꞌmo eveneꞌ do nguꞌ izelive nene ngomosiꞌ nizahe. Lavo Izesuꞌ tiꞌ lo lo-ngimineꞌ:
LUK 13:24 Lingine gateni ngomouꞌ nene dizili ma dizilisa eleꞌvoleꞌ goloso ilo. Nanitekumuꞌ ve. Naza tiꞌ lo nolo-lingimuve: Eveneꞌ mukiꞌ nete aꞌmine gateni ngomouꞌ nene dizelone li dizilisa ilizaniꞌza ngeli ma dizamilisave.
LUK 13:25 Neꞌmine igi nizavo numuno meleho naza oto akahe nene gize giliꞌ lokuvo lingine heta oti mini vise li tiꞌ li lilisave: Gaza Guvekasi ve make, akahe siꞌze-ledevo. Likevo naza tiꞌ lo lolosuve: Lingine nene zaaꞌ ve nizahe. Ningo gele-lengedamuve.
LUK 13:26 Neꞌmine lavo lingine tiꞌ li li-nimilisave: Gezesi makaꞌ mino nosoꞌ niteꞌ naaꞌ uneꞌ ma ve. Idoꞌ gaza numudela aka vida nene gamazi apize lemeꞌ lemeꞌ ogaꞌ aineꞌ ma ve.
LUK 13:27 Neꞌmine li li-nimilizaniꞌza naza tiꞌ lo lo-lengemelesuve: Lingine zaaꞌ ve nizahe ma gelamuve. Lingine goloso initetokovoꞌ monaaꞌ ave lingine nene mo vi haha ilo lolosuve.
LUK 13:28 Neꞌmine lo lingine hulo heta o-lengedekuvo mini ningilizaniꞌ nene Abalahamuꞌ ve Isakaꞌ ve Zakoboꞌ ve idoꞌ polohete mukiꞌ nesi nene Oꞌmosoꞌmi gizebouꞌ vi nizavo ningi nemuꞌ vetine ingihi langoloꞌ igi mini ive nama igi mulumo alumo gili minilisave.
LUK 13:29 Lingine neꞌmine navo Oꞌmosoꞌmo gizebo ineꞌ ebekuꞌ nene atoꞌ aleve hoꞌ dizaaꞌ idatiꞌ idoꞌ lemaaꞌ idatiꞌ idoꞌ eza gahevelatiꞌ idoꞌ ema gahevelatiꞌ nene igi moꞌmosiꞌine di ngolize izi nosoꞌ niteꞌ ni minilisave.
LUK 13:30 Lingine gililo. Idise mene limi nilizaniꞌ aleveutiꞌ linge ma alingeꞌ dizi minilisave. Idoꞌ idise mene dizi nilizaniꞌ aleveutiꞌ linge ma nene alingeꞌ limi minilisave.
LUK 13:31 Aꞌmine gameneloꞌ nene Halisaioꞌ eveneꞌ linge ma igi Izesuꞌni tiꞌ li li-imaniꞌ: Guvelesi ve Helodeꞌ aza nene gebele helelesa nolize. Me ebeꞌ nene hulo vozo.
LUK 13:32 Neꞌmine likevo aza tiꞌ lo lo-ngimineꞌ: Lingine aꞌmine lovo gulo gele vive nene tiꞌ li li-imilo: Gaza gelezo. Naza nene geikumuꞌ golise gelamo idisesi aizekisi nene sikalahuꞌ goloso ngimiselo mino eveneꞌ initeꞌ gizi daniꞌ nene do lamineꞌ o-ngedo mino okozoꞌ nene gonoꞌne do pelelesuve.
LUK 13:33 Neꞌmine o neineꞌza polohete ngibili hilaaꞌ naniꞌ ebeꞌ nene Zelusalemi ebeꞌ neevoꞌ neineꞌ nenako polohete ma ebeꞌ atota bili hililizaniꞌ nene mo edamilineꞌ nenako nemuꞌ nene aꞌmine Zelusalemi numuda nene idisesi aizekisi idoꞌ okozokisi nene voꞌmo voꞌmo voloniꞌ o neive.
LUK 13:34 Agae, Zelusalemi alevekizo, lingine polohete ngibili hilii idoꞌ Oꞌmosoꞌmo lengita gono dalizave lo ngeletivesi geheni gavoso ngibili hilaaꞌ ave lengiꞌ nete gamene gamene lengiꞌ nene okoloholiꞌmo goduvoꞌ do holokeꞌneꞌveko do nubuho o-ngidineꞌ maꞌmine ogo lengeleꞌmize lamineꞌ uvoniꞌza lingine goseleꞌ lengebelave.
LUK 13:35 Lingine gililo. Numuno nabatine minineꞌ ebetinguꞌ nene Oꞌmoso aza gohi minamo mo hulo-lengedelesa neive. Naza tiꞌ lo nolo-lingimuve: Idise melotiꞌ nene okoꞌneloꞌ ningami miniꞌmi dizi alingeta gohi sotoꞌ nouvo tiꞌ li li-nimilisave: Guvetesi ve Oꞌmosoꞌmi velemuꞌ anive naneꞌ ma nene noꞌnohoꞌ geita minivoo. Neꞌmine lii li-nimilizaniꞌ gameneuꞌ nene neze ningilisave lo lineꞌ.
LUK 14:1 Holiseꞌ gamene mauꞌ Izesuꞌ aza Halisaioꞌ veti ve nabaꞌine maliꞌmi nosoꞌ niteꞌ no neivo aza initeꞌ ma do gopo ilingumuꞌ ve li gizebo igi ningi minaniꞌ.
LUK 14:2 Neꞌmine igi nizavo aꞌminguꞌ nene ve ma okoꞌno lulu izive nene Izesuꞌ neida avita minineꞌ.
LUK 14:3 Neivo Izesuꞌ aza Halisaioꞌ vesi idoꞌ louꞌ gamaziloꞌ sukulu naba li monikevesi nene tiꞌ lo longoꞌ o-ngidineꞌ: Leze louꞌ gamazite neꞌmo nadive lo neive. Holisekuꞌ nene laza eveneꞌ do lamineꞌ o-ngedelobe ma do lamineꞌ o-ngedamolone.
LUK 14:4 Neꞌmine lavo ingine gamaziꞌinesi nomivo minaniꞌ. Neꞌmine ikevo okoꞌno lulu izive nene do lamineꞌ o-do hulo-davo vineꞌ.
LUK 14:5 Neꞌmine ogo tiꞌ lo lo-ngimineꞌ: Lengikutiꞌ ve maliꞌmi dongi izeꞌve nehe bulumakaꞌ izeꞌve nehe holiseꞌ gameneuꞌ galeseuꞌ leme neivo liteꞌ lo vo gono do geleleheꞌ ogo hulo hazala o-damilidoꞌ o neihe.
LUK 14:6 Neꞌmine lavo ingine aꞌmine gamaziloꞌ nene ngeli di tiꞌni li-imamaniꞌ.
LUK 14:7 Neꞌmine ikevo aꞌmine nosoꞌ niteꞌ nalisa ave ingine nene eveneꞌ naba gelo holomo laminetoꞌ minelone li minilisa navo Izesuꞌ aza ningo gamazi ma tiꞌ lo lo-ngimineꞌ:
LUK 14:8 Lingine nene ve maliꞌmo nosoꞌ niteꞌ nabamuꞌ elese molo-lengemavo niigi ma nene holomo laminetoꞌ nene gomuꞌ igi minamilo. Lengikisi makatoꞌ elese molo-lengede nolive ma lengiꞌ lingivileꞌ igi dizi nilizaniꞌ nene
LUK 14:9 aza elese molo-lingidive neꞌmo ogo tiꞌ lo lo-lengemeleseive: Lingine minaniꞌ holomoloꞌ nene me vete minilizaze. Otilo. Neꞌmine lavo lingine longovozo hili holomo meheꞌnida nene minikelizaze.
LUK 14:10 Ve maliꞌmo nosoꞌ nitekumuꞌ elese molo-lengemavo niigi ma holomo meheꞌnida nene vi minilo. Neꞌmine igi nizavo elese molo-lingimive ogo ningo zogone, holomo lamineta dizi minilo lo lo-lengedeleseive. Neꞌmine ogavosa aꞌmine nosoꞌ niteta makaꞌ vi minaveti veꞌnidoꞌ nene mo dizi minave minilisave.
LUK 14:11 Idoꞌ neꞌmine noluvoniꞌ nene nanitekumuꞌ ve. Ve ma okoꞌine di dizaaꞌ ave mukiꞌ engiꞌ nene Oꞌmosoꞌmo do leme-ngedeleseive. Idoꞌ ve ma okoꞌine di limi minaaꞌ nave engiꞌ nene Oꞌmosoꞌmo do dize-ngedeleseive.
LUK 14:12 Neꞌmine lo lo-ngemo nosoꞌ nitekumuꞌ elese molo-dive nene tiꞌ lo lo-imineꞌ: Nosoꞌ niteꞌ gize vataꞌ ogo molo eveneꞌ elese molalosa gelo ma geze alingeꞌ elese mili-gidikevo ge nosoꞌ nitekaloꞌ golo hizaniꞌ gelalize. Geze zuho gihile nilizahe idoꞌ zogo veka zuho nilizahe idoꞌ geze nanida heneni aleve minaaꞌ nilizahe neꞌmine aleve mukiꞌ nene elese molo-ngedamozo.
LUK 14:13 Asi nosoꞌ niteꞌ gize vataꞌ ogo eveneꞌ elese molalosa gelo ma nene gohoꞌ gahaliꞌ nilizahe gebili siꞌzi miniliza aleve nilizahe idoꞌ veꞌine likive nilizahe neꞌmine alevevoꞌ nene elese molo-ngedezo.
LUK 14:14 Neꞌmine ilineꞌ nene ingine aꞌmine nosoꞌ nitetoꞌ nene ngeli golo hizamavo Oꞌmosoꞌmo eveneꞌ lisiheꞌ hilangutiꞌ do ote-ngedelineꞌ gameneloꞌ nene meni gemelineꞌ nenako neꞌmine ilineꞌ neꞌmo gaza mine lamineꞌ ilineꞌ akaloꞌ minelesane.
LUK 14:15 Neꞌmine lavo nosoꞌ niteꞌ makatoꞌ ni minave maliꞌmo gelo Izesuꞌni tiꞌ lo lo-imineꞌ: Oꞌmosoꞌmo gizebo inguꞌ vo holo mino nosoꞌ niteꞌ no minelonive leliꞌ nene mine lamineꞌ oloneꞌ akaloꞌ mine molo none.
LUK 14:16 Neꞌmine lo lavo nemuꞌ aneza gamazi Izesuꞌ ma tiꞌ lo lo-ngimineꞌ: Ve maliꞌmo nosoꞌ niteꞌ naba do vaꞌvaꞌ olosa eveneꞌ mukiꞌ nene elese molo-ngimineꞌ.
LUK 14:17 Elese molo-ngemavo nosoꞌ niteꞌ naliza gamene nene alitavo gonouꞌ ve nene aꞌmine elese molo-ngidive nene lo-ngemelive lo imiselavo vo tiꞌ lo lo-ngimineꞌ: Lingine nosoꞌ niteꞌ nene mo do vaꞌvaꞌ ogaze. Alo.
LUK 14:18 Neꞌmine lo lo-ngimineꞌza ingine mukitoꞌ vamoloniko lii apiꞌ igi amiliza monovomuꞌ abelenga li-imikaꞌ li-imikaꞌ aniꞌ ve. Maliꞌmo nene apiꞌ ogo tiꞌ lo lo-imineꞌ: Agae, naza nene misubo ma meni hizuvoniꞌ nenako aꞌmida vo ningeloniꞌ o neive lo guvelesi ve nene lo-emezo.
LUK 14:19 Neꞌmine lo lavo maliꞌmo tiꞌ lo lineꞌ: Agae, naza nene gono dalizaniꞌ bulumakaꞌ teni meni hizo hulo nouvoniꞌ nene gono lamineꞌ dalizahe damilizahe lo ningelesa volosa nouze. Nemuꞌ guvelesi ve lo-emezo.
LUK 14:20 Lavo maliꞌmo tiꞌ lo lineꞌ: Naza nene mo idise aꞌne veneꞌ dosa nouvonako nemuꞌ nene vamoloniꞌ o neive lo lineꞌ.
LUK 14:21 Neꞌmine likevo gonouꞌ ve aza laniꞌ gamazi nene vo nosoꞌ niteꞌ naba gize vataꞌ ive nene lo-emavo aza izeboloꞌ goloso molavo gonouꞌ ve nene tiꞌ lo lo-imineꞌ: Gaza nene numuno ebeꞌ nabala aka ngomoꞌ nabakuꞌ nene vo gohoꞌ gahaliꞌ aleve idoꞌ gizeꞌine aꞌine goloso ineꞌ idoꞌ veꞌine likineꞌ idoꞌ gebili aleve nene ngeleꞌmizo ano lo imiselineꞌ.
LUK 14:22 Neꞌmine lo imiselavo gonouꞌ ve aza aꞌmine lidoꞌ ogosa ogo gizebo veꞌve nene tiꞌ lo lo-imineꞌ: Ve nabo, gaza lo-nedaineꞌ maꞌmine nene mo okuvoniꞌza minaaꞌ holomo linge nene lumo haza neive.
LUK 14:23 Neꞌmine lavo nosoꞌ niteꞌ gize vataꞌ ive ve naba neꞌmo gonouꞌ ve tiꞌ lo lo-imineꞌ: Gaza aka nabaloꞌ vaaꞌ idoꞌ mine akauꞌ vaaꞌ ogo eveneꞌ nilizaniꞌ nene amuzo molo ngeleꞌmizo do oganivo numuꞌne nene vaiꞌ lilive.
LUK 14:24 Naza tiꞌ lo nolo-gimuve: Naza gomuꞌ elese molo-ngiduvoniꞌ aleveutiꞌ nene hamolitesi neniꞌ nosoꞌ nitekutiꞌ nene mo namilisave lo lineꞌ.
LUK 14:25 Eveneꞌ mukiꞌ goloso nene Izesuꞌni eꞌmeti nivavo aza mine velepeꞌ izo tiꞌ lo lo-ngimineꞌ:
LUK 14:26 Ve ma nenita igi giꞌmizi minilizave ingine nene izeꞌningine meꞌningine veneꞌ izipahaꞌine ingine zuhomuꞌ idoꞌ engiꞌ okoꞌinemukisi gilavo dizavo nenikumuꞌ gilavo ngomo ma lemo minelineꞌ nene neniꞌ izipahaꞌne liliꞌ igi minamilisave.
LUK 14:27 Idoꞌ ve ma mulumo initeꞌ i-lidi lohotoꞌ zaloꞌ libilikelizave li gili aꞌmanapa igi neꞌmetamilizaniꞌ nene neniꞌ izipahaꞌne zuho loloꞌ igi minamilisave.
LUK 14:28 Idoꞌ lengikutiꞌ ve malite numuno haꞌna dizo minelineꞌ numuno ma gizelone li gili ma ingine nene aꞌmine numuno gizeloneꞌ meniꞌve nene vo dahe damihe li gomuꞌ gati gilaaꞌ nave.
LUK 14:29 Neꞌmine igi gati ningi gilamilizaniꞌ nene alingeꞌ posi di hizisa numuno gizilizaniꞌ initeꞌine nene geto osuꞌ lavo ngeli gizi osuꞌ lamilizaniꞌ ogavo eveneꞌ ingine ningi gizeꞌ i-ngidi
LUK 14:30 ve mene gosohoꞌ niteꞌ di numuno haꞌna di hizi tiꞌ aha hulikevo goꞌnupo o neive lilisave. Nemuꞌ nene neꞌmine ikelizaze. Numuno haꞌna gizili ma gomuꞌ nene moniꞌine nehe numuno giziliza initeꞌine nehe nene vo dahe damihe li gati ningi gilaaꞌ nave.
LUK 14:31 Idoꞌ guvelesi ve maliꞌmo neze zuhosi guvelesi ve maliꞌmi zuhosi lovo hizelone lo gelelineꞌ nene olihe lovoloꞌ vamo lovo di alizave engiꞌ nene tuvedi tauseni (20,000) ami nizavo eze nene teni tauseni (10,000) amivoꞌ do neineꞌ nemuꞌ engiꞌ nene ha ngivileꞌ olobe amolobe lo gomuꞌ nene lulouꞌ izeꞌ molo gala geleleseive.
LUK 14:32 Idoꞌ gala gilivo ngeli ngivileꞌ amilizaniꞌ ineꞌ nene lovo ve ingine hotoꞌ olihe navo eveneꞌ ma lovo hizamoloningumuꞌ nene gamazi do lisiheꞌ olone lo ngimiselaaꞌ neive.
LUK 14:33 Idoꞌ aꞌmineꞌmine igi neniꞌ neꞌmetilisa ilizaniꞌ nene ingine naniteꞌ naniteliꞌmo kostim o-ngedelihe gomuꞌ nene ningi gili minisavoꞌ nene neꞌmetilisave lo noluve. Aꞌmineꞌmine ogo lengikutiꞌ ve maliꞌmo eiꞌ initeꞌ mataꞌve mukiꞌ mehene emamilineꞌ nene neniꞌ izipahaꞌne minamoloseive.
LUK 14:34 Guvo nene lamineꞌ neineꞌza aꞌmine guvo nene goloso ogavo laniteꞌve osuꞌ lilineꞌ nene gohi ma lamineꞌ amoloseive.
LUK 14:35 Aꞌneꞌmine guvo nedunuꞌ neꞌmine manaꞌmine initeꞌ ma amolosunako mo do hulolosune. Nemuꞌ lingine gatine gili nge laaꞌ ave ma nii ma nene gili lamineꞌ igi gililo.
LUK 15:1 Idoꞌ takisi moni daaꞌ avesi lihime daaꞌ ave linge ma nesi Izesuꞌ monoꞌ gamazi lineꞌ gililisa ezela ikaꞌ ikaꞌ igi minaniꞌ.
LUK 15:2 Neꞌmine navo Halisaioꞌ vesi idoꞌ louꞌ gamazi apizi ngimaaꞌ ave ingine ningi goloso gili Izesuꞌnimuꞌ tiꞌ li laniꞌ: Ve mene lihime daaꞌ ave ma nene zogo ngemo engikisi nosoꞌ niteꞌ makaꞌ naaꞌ neineꞌ nene edamive.
LUK 15:3 Neꞌmine likevo Izesuꞌ aza gelo aneza gamazi ma tiꞌ lo lo-ngimineꞌ:
LUK 15:4 Lengitatiꞌ ve maliꞌmi sipisipi izeꞌve vanu hadeti (100) minilizangutiꞌ hamoꞌ ma vo halekelineꞌ nene aꞌminemuꞌ viseꞌ amilihe. Neꞌmino nomive. Sipisipi naedi naeni (99) nene guvisela hulo-ngimiko hamoꞌ vo halekineꞌ nemuꞌ nene viseꞌ ogo do sotoꞌ oloseive.
LUK 15:5 Mo viseꞌ ogo do sotoꞌ ogo mulunouꞌ lamineꞌ gelo olize izeꞌmo izeꞌmo abutiꞌ izo do geho numuda aloseive.
LUK 15:6 Do ogo eze zuho elese molo-ngedo tiꞌ lo lo-ngemeleseive: Naza sipisipi izeꞌne vo halekineꞌ ma nene mo ningo do sotoꞌ okuze. Makaꞌ lolize izelone loloseive.
LUK 15:7 Nemuꞌ naza ma lo-lengemelove. Okulumokuꞌ nene aꞌmineꞌmine ogo eveneꞌ lisiheꞌ naedi naeni luꞌine di velepeꞌ izamilizadoꞌ i minilizavemuꞌ ngolize izaaꞌ naniꞌ nene ivileꞌ ivosa ve goloso hamoꞌ lulo do velepeꞌ izelineꞌ nemuꞌ nene ngolize naba goloso izilisave.
LUK 15:8 Idoꞌ ma nene veneꞌ maliꞌmo moni siluvaꞌ teni kina (K10) goꞌzekelingutiꞌ vanu kina ma vo halekilineꞌ nene aza mo liviꞌ gizo viseꞌ ovoꞌ ovoꞌ ogo ningo do sotoꞌ oloseive.
LUK 15:9 Ningo do sotoꞌ ogo veneꞌ gonolomotine nene tiꞌ lo lo-ngemeleseive: Naza moniꞌne hamoꞌ vo halekineꞌ ma nene mo ningo do sotoꞌ okuze. Lolize makatoꞌ izelone.
LUK 15:10 Idoꞌ naza ma lo-lengemelove. Aꞌmineꞌmine igi Oꞌmosoꞌmi angeloꞌ nete lihimeloꞌ ve hamoꞌ ma lulo do velepeꞌ izineꞌ nene ngolize naba goloso izaaꞌ nave.
LUK 15:11 Idoꞌ Izesuꞌ aza gamazi gohi ma tiꞌ lo lo-ngimineꞌ: Ve maliꞌmi gipele sitaꞌ ma minasineꞌ.
LUK 15:12 Minasingutiꞌ alingeni neꞌmo melehine nene tiꞌ lo lo-imineꞌ: Ahono, gaza moni heneni initeꞌ uvoꞌnehingisi izeꞌ molo lemelesa molaineꞌ ma nene neze nemelida idise izeꞌ molo nemezo lineꞌ. Lavo meꞌnibo moni heneni initeꞌ mukiꞌ nene izeꞌ molo ngimineꞌ.
LUK 15:13 nGemavo alingeni izipe aza initeꞌ izeꞌ molo ngimidotiꞌ nene mine haꞌna amo aꞌmine initeꞌ mataꞌvelotiꞌ nene moni do osuꞌ lo do ebeꞌ hota ma vo minineꞌ. Aꞌmidoꞌ nene vo mino moni heneniꞌve nene monovo danava golosoloꞌ nene hulo osuꞌ lineꞌ.
LUK 15:14 Neꞌmino hulo osuꞌ lavo aꞌmine minineꞌ misuboloꞌ nene gaꞌna nabaꞌ naba sotoꞌ neivo ezela nene initeꞌ hamokisi ma lumo minamivo gaꞌnaꞌmo helelidoꞌ mine molo minineꞌ.
LUK 15:15 Neꞌmine ogo aꞌmine misubouꞌ ve ma minidoꞌ vo gonomuꞌ lavo Zuda ve leliꞌ Oꞌmosoꞌmo malise o-lede neineꞌ initeꞌ izeloꞌ nene vo gizebo ilive lo lo-davo agae lo gopo vo gizebo ogo minineꞌ.
LUK 15:16 Neꞌmino neivo nosoꞌ nitekisi imamavo izeliti nosoꞌ nitekutiꞌ nene ha nalove lo gilineꞌza ma imamaniꞌ.
LUK 15:17 Neꞌmine ikevo aza gala gele veveso tiꞌ lo lineꞌ: Meꞌnehi gelekeleꞌ izipe mukiꞌ nene nosoꞌ niteꞌ lamineꞌ mukiꞌ ni nilisaniꞌza naza nene mela mino gaꞌnaꞌmo helelesuve.
LUK 15:18 Nemuꞌ nene naza numuꞌnela tineꞌ molo vo meꞌnehine tiꞌ lo lo-emelove: Ahono, naza do goloso ogo lihime Oꞌmosoꞌmi velelokisi geiꞌ vegalokisi dokuvo edamive.
LUK 15:19 Nemuꞌ nene geiꞌ gipa minuvoniꞌ ma nene gohi geiꞌ gipa minelodoꞌ lisiheꞌ amuvonako nemuꞌ nene gelekeleꞌ izipaha neꞌmine loloꞌ o-nedanivo minelove lo lo-emelove lo gala gelo
LUK 15:20 oto meleho neida vineꞌ. Vineꞌza meleho aza gipele olihe hotoꞌile navo ningo muluno gitihineꞌ ogavo aza lotiꞌ izo vo abutiꞌ izo golo elo naniꞌ.
LUK 15:21 Neꞌmine ogavo gipele aza melehine tiꞌ lo lo-imineꞌ: Ahono, naza do goloso ogo lihime Oꞌmosoꞌmi velelokisi geiꞌ vekalokisi dokuvo edamive. Nemuꞌ nene geiꞌ gipa minuvoniꞌ ma nene gohi geiꞌ gipa minelodoꞌ lisiheꞌ amuve.
LUK 15:22 Neꞌmine lo lineꞌza meleho aza eiꞌ gelekeleꞌ izipeꞌve nene tiꞌ lo lo-ngidineꞌ: Lingine liteꞌ li vi okoꞌnoloꞌ initeꞌ lamineꞌ ma vi di igi ngili-dilo. Idoꞌ analoꞌ nene lini ma di izi-di idoꞌ gizeneloꞌ suuꞌ nesi nene di igi izi-dilo.
LUK 15:23 Neꞌmine igi vi bulumakaꞌ angale adoꞌ geheso ma minelineꞌ ma di igi bili gize vataꞌ i-dilo. Laza lolize izo mino no minelone.
LUK 15:24 Gipeꞌne mene mo vo haha ogavo hilihe luvonako helangutiꞌ gohi vele gizo ogave lavo nemuꞌ ngolize izi tiꞌ igi minaniꞌ.
LUK 15:25 Neꞌmine igi nizavo gipele ganaꞌve nene mida ha minineꞌ. Aꞌmidatiꞌ ogo numuno avita aniꞌ nene beni bili huhunaleꞌ mili melengeni igi minaniꞌ nene gilineꞌ.
LUK 15:26 Gelo nanitekumuꞌ neꞌmine igi nizahe lo gelekeleꞌ izipe ma vise lo-do longoꞌ o-dineꞌ.
LUK 15:27 Longoꞌ o-davo aza tiꞌ lo lo-imineꞌ: Geiꞌ nakuna ma nene velesi lamineꞌ ha mino gohi tineꞌ molo numuda mene angumuꞌ nene maho ma bulumakaꞌ angale adoꞌ geheso ma minineꞌ nene ma belavo nosoꞌ niteꞌ gizi vataꞌ nave.
LUK 15:28 Neꞌmine lo lo-imineꞌza aza neve izeboloꞌ molavo aꞌminguꞌ dizelesa goseleꞌ bilineꞌ. Neꞌmine ogo numunguꞌ dizamivo meꞌnibo nene lemo eze mulunouꞌ do zou lo-dineꞌza
LUK 15:29 melehine tiꞌ lo lo-imineꞌ: Gaza gelezo. Kilisimasi vaiꞌ goloso mene geiꞌ gonoka do minuvoniꞌ nene haza gelekeleꞌ izipe neꞌmine loloꞌ ogo mino gono do minuvoniꞌ ve. Idoꞌ neꞌmine manaꞌmine ozo lo-nidaineꞌ nene ma gele hulosaꞌmuvoniꞌ ve. Neꞌmine ogaꞌ uvoniꞌza gaza memeꞌ angale neꞌminesi kekeꞌ mo ma nemanivo neze zogone zuhosi belo ma gize vataꞌ ogo nosaꞌmuneꞌ ma neive.
LUK 15:30 Ma nemesaꞌmaneꞌza gipa aza nene initeka mukiꞌ do vineꞌ ma nene pasidiaꞌ veneꞌ aluloꞌ hulo osuꞌ lineꞌ ma neineꞌza gaza nene bulumakaꞌ ize gehesineꞌ nene bele-dabe. Olo.
LUK 15:31 Neꞌmine lavo meleho tiꞌ lo lo-imineꞌ: Gipeꞌne, gaza nenikisi makaꞌ minaaꞌ nosineꞌ nene initeꞌ mukiꞌ nenita neineꞌ nene geiꞌ initeka nene neive.
LUK 15:32 Idoꞌ nakuna nene mo hilihe lunako helangutiꞌ gohi sotoꞌ ogave. Nemuꞌ nene muludeuꞌ lamineꞌ gelo lolize noizunivo lamineꞌ neive lo lineꞌ.
LUK 16:1 Izesuꞌ aza izipahala zuho gamazi gohi ma tiꞌ lo lo-ngimineꞌ: Heneni ve maliꞌmi heneniꞌveloꞌ gizebo veꞌve ma minineꞌ. Aꞌmine heneniloꞌ gizebo ve neꞌmi gamaziꞌve ma tiꞌ li likevo heneni ve maꞌmo gilineꞌ: Heneniloꞌ gizebo ve aza nene heneni do gopoꞌ napa ogaꞌ neive. Neꞌmine laniꞌ gelo
LUK 16:2 heneniloꞌ gizebo ve nene vise lo-do tiꞌ lo lo-imineꞌ: Gaza gamazika ma laniꞌ nene gelekuko nadiꞌ ive. Gaza gohi heneniloꞌ gizebo ve minamolosange. Nemuꞌ nene gaza gono doꞌmo vo minaineꞌ luhuvo ma nene do nelebizezo.
LUK 16:3 Neꞌmine lo-davo heneniloꞌ gizebo ve aza gala gelo tiꞌ lo gilineꞌ: Naza heneniloꞌ gizebo ve minuvoniꞌ malotiꞌ nene do nohulo-nidiko nadiꞌ olove. Naza savoli hizo ledo daaꞌ amuzoꞌne nomivo idoꞌ evenetatiꞌ nosoꞌ niteꞌ vokuꞌ lo dalosa novozo helalove lo giluvoniꞌ nemuꞌ nene
LUK 16:4 neze gonoꞌneutiꞌ nimisele hulavo naza vo eveneꞌ ma ingine numuꞌninguꞌ neleꞌmize mili di lamineꞌ i-nidavo dizo lemo olongumuꞌ nene engita initeꞌ ma o-ngedelove.
LUK 16:5 Neꞌmine lo gala gelo aꞌmine heneni velatiꞌ dinaꞌ ave nene hamo hamoꞌ vise lo-ngedavo neida aniꞌ. Ve maliꞌmo gomuꞌ ogavo heneniloꞌ gizebo ve aza tiꞌ lo longoꞌ o-dineꞌ: Gaza neniꞌ gizebo veꞌne nabalatiꞌ nene initeꞌ nanikeꞌ dinaꞌ ogo daineꞌ neve.
LUK 16:6 Lavo ve aza tiꞌ lo lo-imineꞌ: Nosoꞌ niteꞌ gize vataꞌ ogaꞌ uveli dalamu ngomo ngomo vanu hadeti (100) duvoniꞌ ve. Lavo heneniloꞌ gizebo ve aza tiꞌ lo lo-imineꞌ: Liteꞌ lo dinaꞌ aineꞌ luhuvouꞌ mene hadeti do hulo fifti (50) ve lo gizezo.
LUK 16:7 Neꞌmine lo lo-do ve gohi ma nene tiꞌ lo longoꞌ o-dineꞌ: Idoꞌ gaza nene initeꞌ nanikeꞌ dinaꞌ o naneꞌ neve. Lavo ve aza tiꞌ lo lineꞌ: Viti beki vanu hadeti duvoniꞌ ve. Lavo heneniloꞌ gizebo ve aza tiꞌ lo lo-imineꞌ: Dinaꞌ aineꞌ pepaka mene do hadeti do hulo eiti (80) ve lo gizezo lineꞌ.
LUK 16:8 Idoꞌ me misubouꞌ aleve Oꞌmosomuꞌ gilamaniꞌ nete engiꞌ initeꞌinemuꞌ initeꞌ igaꞌ naaniꞌ neꞌmo nene Oꞌmosoꞌmi evenele luꞌninguꞌ labanaꞌ ele neive nene ngivileꞌ ivosa otohato initeꞌ igaꞌ naaniꞌ nenako aꞌmine do goloso ogaꞌ ive heneniloꞌ gizebo ve nene otohato initeꞌ ogave lo eze gizebo veꞌve heneni ve neꞌmo nene opoꞌni lineꞌ ve.
LUK 16:9 Izesuꞌ neꞌmine losa imineꞌ molo gohi tiꞌ lo lineꞌ: Naza tiꞌ lo nolo-lingimuve: Me misubo golosouꞌ neineꞌ heneni nene lengiꞌ zogo vetine minilizangumuꞌ ve li eveneꞌ zogo mili-ngidi ngimilo. Neꞌmine ilizaniꞌ neꞌmo alingeꞌ heneni osuꞌ lilineꞌ gamenela nene minevoꞌ minevoꞌ ebekuꞌ nene lengeleꞌmize lamineꞌ ilisave.
LUK 16:10 Ve ma aza initeꞌ ngomolokisi vomene do guno gizebo lamineꞌ ilineꞌ nene initeꞌ nabaloꞌ nesi aꞌmineꞌmine ogo gizebo lamineꞌ oloseive. Idoꞌ ve ma aza initeꞌ ngomo ngamaloꞌ nesi nene do gopoꞌ napa ogo minelineꞌ nene initeꞌ nabaꞌ nabaloꞌ nesi nene do gopoꞌ napa oloseive.
LUK 16:11 Idoꞌ lingine me misubo golosouꞌ neineꞌ heneni nganeni nene ma di guni gizebo amilizaniꞌ nene lutineꞌmi heneni nganeni gihile lamineꞌ nene zaho lengemelivoba ma lingimamilisave.
LUK 16:12 Idoꞌ ve maliti initetoꞌ gizebo lamineꞌ i-ngidamilizaniꞌ nene Oꞌmosoꞌmo salani molo-lingidineꞌ lengiꞌ initetine gehepeve nene zaho lengemelivoba ma lingimamilisave.
LUK 16:13 Idoꞌ gonouꞌ ve maliꞌmo eveneꞌ sitatoꞌ nene mo gono ngelo damoloseive. Aꞌmine ve sitatoꞌ gono dalosa ilineꞌ nene ve hamota ma lulo emeleseiha sitaꞌ nene lulo ngelo ngemamoloseive. Mala lulo emelineꞌ nene mala lulo emamoloseive. Idoꞌ ma veloꞌ giꞌmizo eze gono amuzo molo dalineꞌ nene ma vemuꞌ goseleꞌ belavo gono gamazi lo-delineꞌ nene ngelo damoloseive. Aꞌmineꞌmine ogo gaza moniloꞌ gono do luka aꞌmine moniuꞌ molo lamineꞌ ilineꞌ nene luka Oꞌmoso emo gamazi lidoꞌ gele do eze gelekeleꞌ o-daaꞌ anive ngelo minamolosane.
LUK 16:14 Neꞌmine lo lavo moni henenimuꞌ laniteꞌ gilaaꞌ ave Halisaioꞌ ve ingine gili gizeꞌ i-daniꞌ.
LUK 16:15 Neꞌmine aniꞌza aza tiꞌ lo lo-ngimineꞌ: Lingine nene eveneꞌ veꞌnidoꞌ veveso minunive ma nene none li amuzo mili initeꞌ igi mili igaꞌ naaniꞌza lengiꞌ lutineꞌmi monovoꞌve nene Oꞌmosoꞌmo ha ningo gelaaꞌ neive. Evenelite initeꞌ ma di igi di hozi lilizaniꞌ nene Oꞌmosoꞌmi veleloꞌ aꞌmine initeꞌ nene muso gala dizaaꞌ initeꞌ loloꞌ ogaꞌ neive.
LUK 16:16 Louꞌ gamazi nesi idoꞌ poloheteliti gamazi nesi nene mine do ogo monoꞌ noso holo-ngedaaꞌ ive Zohaneꞌ sotoꞌ ogo minineꞌ gameneloꞌ nesi amuzo molo minineꞌ ve. Neꞌmine ogavo nelotiꞌ nene Oꞌmosoꞌmo gizebo o-ledelingumuꞌ gamazi lamineꞌ nene li sotoꞌ sotoꞌ igi nilavo eveneꞌ mukiꞌ nene aꞌminguꞌ vi hilalisa amuzo goloso mili vi hilaaꞌ nave.
LUK 16:17 Idoꞌ okulumoꞌ misubo nene ha vi tolovo ilisidoꞌ i nizasineꞌza Oꞌmosoꞌmi louꞌ gamazi lingelatiꞌ ngomo nesi nene mo vo tolovo amo amuzo molo mineleseive.
LUK 16:18 Ve maliꞌmo elenahine hulo-do veneꞌ gohi ma dalineꞌ nene Oꞌmosoꞌmi louꞌ gamazi avutoꞌ oloseinako lihime naba daloseive. Idoꞌ vanahine hulo-dosa nolineꞌ veneꞌ ve maliꞌmo ma dalineꞌ nesi nene louꞌ gamazi avutoꞌ oloseinako lihime naba daloseive.
LUK 16:19 Moni heneni ve ma mino gamene gamene okoꞌnoloꞌ initeꞌ nene guleheꞌ kaleheꞌ initeꞌ lamineꞌ taminekovoꞌ ngolaaꞌ ineꞌ. Idoꞌ nosoꞌ niteꞌ neve lamineꞌ taminekovoꞌ no minaaꞌ ineꞌ.
LUK 16:20 Idoꞌ aꞌmine heneni ve neꞌmi numuno gatedoꞌ nene gohoꞌ gahaliꞌ ma minaaꞌ ineꞌ nene gulive Lasaloꞌ. Okoꞌnoloꞌ husoꞌmovoꞌ o vineꞌ mino
LUK 16:21 aꞌmine heneni ve neꞌmo nosoꞌ niteꞌ nalingutiꞌ lumo sama doꞌmozelineꞌ nalove lo vo minineꞌ. Neivo gulo nete igi husoloꞌ nene geꞌne geꞌne i-daaꞌ aniꞌ.
LUK 16:22 Nelotiꞌ alingeꞌ aꞌmine gohoꞌ gahaliꞌ nene helavo Oꞌmosoꞌmi angeloꞌ nete di vi Abalahamuꞌ neinguꞌ huli-dikevo makaꞌ minasineꞌ. Idoꞌ heneni ve masi nene helavo galese izi-daniꞌ.
LUK 16:23 Neꞌmine i-dikevo aza nene lovoꞌ lovoꞌ ogo minaaꞌ ineꞌ olokuꞌ nene vo mino mulumo alumo naba goloso gelo minineꞌ. Mino ninge hulo veleta ineꞌ nene Abalahamuꞌ aza hotoꞌ goloso hozene neivo ningo gohoꞌ gahaliꞌ Lasaloꞌ nesi makaꞌ Abalahamukisi nizasivo ningineꞌ.
LUK 16:24 Ningo moni heneni ve aza tiꞌ lo vise lineꞌ: Abalahamuvo meꞌneho make, olokuꞌ mene mulumo alumo gelo nouze. Neniꞌ nene mulumoꞌne gele-nido Lasaloꞌni nene imiselanivo lemo ogo nosouꞌ ana lolovoloꞌ lupizeko veꞌne nahunoloꞌ mene do gelavo hongu lo-nideliho lo lineꞌ.
LUK 16:25 Neꞌmine lineꞌza Abalahamuꞌ aza tiꞌ lo lo-imineꞌ: Gipeꞌneho, idise mene gaza gaka ma geleꞌnazo. Gaza misubouko gomuꞌ vekasi mino initeꞌ lamineꞌ tamineꞌ ningo do nanivo Lasaloꞌ nene mulumo alumo gelo mino gohoꞌ gahaliꞌ minineꞌ ma neineꞌza idise nene eleꞌmize lamineꞌ navo geze ma nene mulumo alumo goloso gelo nane.
LUK 16:26 Neꞌmine ogo naneꞌ nenevoꞌ nevoba leze mela nonivo lingine minikevo olusoteuꞌ nene Oꞌmosoꞌmo avese naba molo neive. Neꞌmo nene mela nizave nete aꞌmine avese nene avutoꞌ igi vi helala vilisa ilizaniꞌ nene ngeli vamilisave. Idoꞌ nela nizave nete aꞌmine avese nene avutoꞌ igi mela alisa ilizaniꞌ nene ngeli amilisave.
LUK 16:27 Neꞌmine lavo moni heneni ve aza tiꞌ lo lineꞌ: Neꞌmino neineꞌ neivo ma nene meꞌneho make, neze nakuꞌne zuho faef (5) neꞌmine nizaniꞌ nene mulumo alumo gelaaꞌ ebekuꞌ mene inginesi ikelizaze. Lasaloꞌ nene imiselanivo meꞌnehi numuda vo hungoꞌ ngemo gaꞌine dalive.
LUK 16:29 Neꞌmine lo lineꞌza Abalahamuꞌ aza tiꞌ lo lo-imineꞌ: Inginela nene Moseꞌ gamazisi idoꞌ polohetelite laniꞌ gamazisi nene neineꞌ nenako aꞌmine gamazi nene gililizadoꞌ o neive.
LUK 16:30 Neꞌmine lavo heneni ve aza tiꞌ lo lineꞌ: Abalahamuvo meꞌneho ve, ne neiha oꞌove, eveneꞌ ma hilikedatiꞌ vi gamazi li-ngimilizaniꞌ nene luꞌine di velepeꞌ izilisave.
LUK 16:31 Neꞌmine lavo Abalahamuꞌ aza tiꞌ lo lo-imineꞌ: Idoꞌ Moseꞌ gamazisi idoꞌ poloheteliti gamazisi gili damilizaniꞌ nene ve ma helosa tineꞌ molo ogo lo-ngemelineꞌ nesi nene ma gili eleꞌvoleꞌ igi gili damilisave.
LUK 17:1 Izesuꞌ aza neꞌmine lo izipahala zuho gamazi gohi ma tiꞌ lo lo-ngimineꞌ: Eveneꞌ ngimimiseꞌ igi aka golosouꞌ ngeleꞌmizi milaliza niteꞌ nene sotoꞌ amilizavoba mo vaiꞌ sotoꞌ ilisaha aꞌmine initeꞌ di sotoꞌ ilizave nene Oꞌmosoꞌmo lihime naba ngemeleseinako engikumuꞌ agae lo mulumo nogele-ngiduve.
LUK 17:2 Neniꞌ izipahaꞌne limi minangutiꞌ mene aka golosouꞌ ma ngeleꞌmizi milalizave nene Oꞌmosoꞌmo mulumo gono atoliꞌmine goloso ngemalive li aꞌmine izipahaꞌne olihe aka golosouꞌ ngeleꞌmizi milalisa naveti luvoꞌninguꞌ nene geheni nabaꞌ naba izi-ngidi noso nabauꞌ ngehusoꞌ i hulikevo noso ni hililizaniꞌ nene lamineꞌ oloseive.
LUK 17:3 Nemuꞌ lingine nene lutidoꞌ gizebo lamineꞌ igi minilo. Idoꞌ geiꞌ zuho maliꞌmo monovo goloso do lihime nodavo ma gala do elemezo. Neꞌmine oganivo lulo do velepeꞌ izavo ma nene lihimeꞌve hulo-dezo.
LUK 17:4 Idoꞌ gamene hamokukovoꞌ geita monovo goloso o-gedo lihime gamene seveni ogosa aza ogo do goloso okuve lo geita ogo lulo do velepeꞌ noizivo ma nene lihimeꞌve gamene seveni neꞌminesi nene ha hulo-dekaꞌ hulo-dekaꞌ olosane.
LUK 17:5 Neꞌmine lavo aposolo ingine Guvelesi ve nene tiꞌ li li-imaniꞌ: Gaza gele eleꞌvoleꞌ ogate nene do naba o-ledezo.
LUK 17:6 Neꞌmine likevo Guvelesi ve aza tiꞌ lo lineꞌ: Lingine Oꞌmosomuꞌ gili eleꞌvoleꞌ igatine nene sakaveꞌ zuho ngomo neꞌminesi ma minidiniko gihile izaaꞌ ineꞌ za menemuꞌ luhivekasi kiselo vo guvo nosouꞌ zuhoꞌ o minezo lilizadokisi nene ha gele lingimidine.
LUK 17:7 Lengikutiꞌ ve maliꞌmi gelekeleꞌ izipeꞌve ma minelidiꞌmo minguꞌ gono do minelihe idoꞌ sipisipi izeloꞌ gizebo ogo minelihe ilidotiꞌ nivengaꞌ gonouꞌ osuꞌ lo ogavo liteꞌ lo gaza ogo mitoꞌ mino nosoꞌ niteka nonozo lo gizebo veꞌve neꞌmo nene ha lo-delihe.
LUK 17:8 Mo ngelo lo-damoloseive. Asi tiꞌ lo lo-emeleseive: Nosoꞌ niteꞌne gize vataꞌ o-nedosa gono daliningumuꞌ do nene ogo gonouꞌ initeꞌ do ngolo nosoꞌ niteꞌ hizo do nemekaꞌ nemekaꞌ nanivo neniꞌ no osuꞌ lokuvosa gaza nene alingeꞌ nalosane.
LUK 17:9 Idoꞌ gelekeleꞌ ve aza nene eiꞌ lidoꞌ eꞌmeto gamaziꞌve gele davo aza neꞌmine ingumuꞌ nene tangezoꞌ ve ha lo-delihe. Oꞌve, mo neꞌmine lamoloseive.
LUK 17:10 Lingine mo aꞌmineꞌmine igi neniꞌ gamaziꞌne gili di aꞌmidoꞌ eꞌmeti osuꞌ lii ma nene lingine tiꞌ li gililo: Laza nene gono atoliꞌmine lamineꞌ guvetesi ve lopoꞌni lilineꞌ votigileloꞌ ma damune. Asi eveneꞌ gono daaꞌ naniꞌ neꞌmine ha olonidoꞌ o minineꞌ initeꞌ ma nene okune li lilo.
LUK 17:11 Izesuꞌ nene mo Zelusalemi numuno ebeta volosa nGalilaia misubosi Samalia misubosi olusota vo
LUK 17:12 numuno ebeꞌ ngomo ma minidoꞌ vo nohetelivo ganadise gizi dave teni (10) ingine nete ningi siki zuho ngemalone li aꞌmida hota ha mini
LUK 17:13 vise li-di tiꞌ li laniꞌ: Eveneꞌ naba Izesuvo, leliꞌ mulumote ningevo.
LUK 17:14 Neꞌmine li likevo ningo tiꞌ lo lo-ngimineꞌ: Lingine lamineꞌ ilizaniꞌ okodine nene ningisa evenetoꞌ medeli mini Oꞌmoso initeꞌ lehizi-daaꞌ ave nete gili lingimikevo lingine eveneꞌ gomuꞌ golise i-lingidaaꞌ aniꞌ ma nene gohi bizi monilizangisi vi ngelebizilo. Neꞌmine lavo ganadise gizi dave teni (10) ingine nene ngimiselida nivavo okoꞌnidoꞌ ganadise nene osuꞌ lo-ngidineꞌ.
LUK 17:15 Osuꞌ lo-ngedavo engitatiꞌ maliꞌmo okoꞌnolotiꞌ ganadise osuꞌ lineꞌ nene ningo do tineꞌ molo ogo gekeꞌ gekeꞌ lo Oꞌmoso opoꞌni loꞌmo loꞌmo
LUK 17:16 Izesuꞌ neida ogo lemo golo hizo ongo isaaꞌ neve lo-dineꞌ. Aꞌmine ve nene heta atoꞌ ve Samalia misuboutiꞌ ve minineꞌ.
LUK 17:17 Neꞌmine ogavo Izesuꞌ tiꞌ lo lineꞌ: Eveneꞌ teni (10) neꞌmine nene ganadise engiꞌ okoꞌnidotiꞌ nene osuꞌ lo-ngedaniꞌza ve naeni (9) nene zala vave.
LUK 17:18 Ingine nene igi Oꞌmoso opoꞌni lilizadoꞌ o neineꞌza ingine gopo nivavo atoꞌ ve Samalia ve hamoꞌ eikovoꞌ mene nahe.
LUK 17:19 Neꞌmine lo tiꞌ lo lo-dineꞌ: Gaza geiꞌ gele eleꞌvoleꞌ aineꞌ neꞌmo lamineꞌ ogange. Oto vozo lo-dineꞌ.
LUK 17:20 Halisaioꞌ ve ingine Izesuꞌni tiꞌ li longoꞌ i-daniꞌ: Oꞌmosoꞌmo gizebo o-ledeli gamene nene naniheꞌ sotoꞌ ilive. Neꞌmine li longoꞌ i-dikevo aza tiꞌ lo lo-ngimineꞌ: Oꞌmosoꞌmo gizebo o-ledelineꞌ gamene nene vetinedunuꞌ ningi nizavo ato atoꞌ suno sotoꞌ neivosa nene ma sotoꞌ amoloseive.
LUK 17:21 Idoꞌ eveneꞌ malite mela neize. Ningilo ma lamilisave. Idoꞌ holela neize. Hole ningilo ma lamilisave. Oꞌmoso gizebo o-ledaaꞌ neineꞌ nene lengiꞌ vovotinguꞌ neive.
LUK 17:22 Neꞌmine lo izipahala zuho nene gohi tiꞌ lo lo-ngimineꞌ: Mine do vo alingeꞌ gamene ma sotoꞌ ilineꞌ gameneuꞌ nene Oꞌmosolatiꞌ ve gihile naza nene ogo sotoꞌ ivo ningelone li laniteꞌ goloso gililizaniꞌza ma ningamilisave.
LUK 17:23 Aꞌmine gameneloꞌ nene tiꞌ li li-lingimilisave: Ningilo. Hole neive. Idoꞌ ningilo. Me neive. Neꞌmine nili-lingimavo ma nene ingine gamaziloꞌ eꞌmeti aꞌmida vamilo.
LUK 17:24 Lingine mo ningi gili nizaniꞌ ma neive. Gopaꞌna ineꞌ nene okulumotoꞌ vaiꞌ mone osuꞌ lavo sotoꞌ ogaꞌ neive. Aꞌmineꞌmine ogo aloniꞌ gamene sotoꞌ ilinguꞌ nene Oꞌmosolatiꞌ ve gihile neniꞌ nene eveneꞌ mukilite ningi osuꞌ lilisave.
LUK 17:25 Neꞌmine o neineꞌza olihe neꞌmine amivo idise mene gamenela mine do nouvoda ningi nizaniꞌ aleve nete nene meheꞌine nimi mulumo initeꞌ mukiꞌ goloso gihi-nidilizaniꞌ o neive.
LUK 17:26 Noaꞌ minineꞌ gameneuꞌ igi mili minaaꞌ aniꞌ maꞌmine nene Oꞌmosolatiꞌ ve gihile neniꞌ aloniꞌ gameneuꞌ nesi nene ha igi mili minilisave.
LUK 17:27 Aꞌmine Noaꞌ minineꞌ gameneuꞌ nene noso naba olihe velamivo eveneꞌ ingine nene Oꞌmosoꞌmo ilineꞌ initekumuꞌ gilami okoꞌine losuvoliꞌmi initekumukovoꞌ gili mini adoꞌ nosoꞌ niteꞌ naaꞌ idoꞌ noso naaꞌ idoꞌ veneꞌ alu hizaaꞌ idoꞌ veneꞌ huki milaaꞌ igi nizavo Noaꞌ nene sipiuꞌ dizavo noso naba nene velo ogo eveneꞌ vaiꞌ ngebele geseꞌ ineꞌ ve.
LUK 17:28 Idoꞌ Lotiꞌ gameneuꞌ nene aꞌmineꞌmine ogosa sotoꞌ ineꞌ ma neive. Aꞌmine gameneuꞌ nene eveneꞌ ingine nosoꞌ niteꞌ naaꞌ idoꞌ noso naaꞌ idoꞌ initeꞌ maketi milaaꞌ meni hizaaꞌ igi idoꞌ mine zuhoꞌ igaꞌ numuno gizaaꞌ igi minaniꞌza
LUK 17:29 Lotiꞌ aꞌmine numuno ebeꞌ Sodomu nene hulo novivo Oꞌmosoꞌmo lavo oloꞌ gulumo ogo minineꞌ geheni nene okulumokutiꞌ goline izaaꞌ neineꞌ neꞌmino lemo ngebele geseꞌ ineꞌ ve.
LUK 17:30 Neꞌmine ineꞌ nenako Oꞌmosolatiꞌ ve gihile neniꞌ sotoꞌ oloniꞌ gamenela nene aꞌmineꞌmine igi gopo minilizangutiꞌ upuhoꞌ ilisave.
LUK 17:31 Oꞌmosoꞌmo Sodomu aleve ngebele geseꞌ neivo Lotiꞌ elenaho aza golise vidoꞌ nene liteꞌ lo vamo aꞌmidoꞌ ha ninge miningumuꞌ ezesi bilineꞌ neꞌmino lengebelalize. Nemuꞌ lingine gatine gili nge li minilo. Aꞌmine gameneuꞌ nene silibe ogo minaaꞌ nene nominako ve ma ingine numuꞌine avitasi nilizadotiꞌ nene iheꞌ numuꞌninguko vi initeꞌ mataꞌine nene di vamilisave. Idoꞌ aꞌmineꞌmine igi mingukotiꞌ nene tineꞌ mili numunguko amilisave.
LUK 17:33 Idoꞌ ve ma aza helelohe helelohe lo okoꞌnomuꞌ ehelele izivo minaaꞌ ilive nene alingeꞌ minevoꞌ minevoꞌ emeni dameni damoloseive. Idoꞌ ve ma aza neniꞌ neꞌmeto novilinguꞌ bili hililizaniꞌ nene alingeꞌ minevoꞌ minevoꞌ emeni dameni nene mo daloseive.
LUK 17:34 Nemuꞌ naza tiꞌ lo nolo-lingimuve: Aꞌmine gameneuꞌ eveneꞌ sitaꞌ ma holukoꞌ holomo hamotoꞌ ingi minilisingutiꞌ ve ma nene Oꞌmosoꞌmo do vavo ma ve nene ha mineleseive.
LUK 17:35 Idoꞌ veneꞌ sitaꞌ nosoꞌ niteꞌ di vaꞌvaꞌ igi minilisingutiꞌ ma nene Oꞌmosoꞌmo do vavo ma nene ha mineleseive.
LUK 17:37 Izesuꞌ aza neꞌmine lo lavo izipahala zuho ingine tiꞌ li longoꞌ i-daniꞌ: Guvekasi ve, aꞌmine laineꞌ initeꞌ nene zala sotoꞌ ilive. Neꞌmine li longoꞌ i-dikevo aza tiꞌ lo lineꞌ: Eveneꞌ hilaniꞌ gonoso nolida nene gonoso naaꞌ aniꞌ namalite aꞌmida nene liteꞌ li igi di geseꞌ igi minilisave. Aꞌmineꞌmine ogo eveneꞌ luꞌnine unuvo o vineꞌ minilizada nene Oꞌmosoꞌmo lihime ngemeleseive.
LUK 18:1 Idoꞌ gamene ma nene Izesuꞌ aza goseleꞌ ngebelamivo gamene gamene Oꞌmosola laakovoꞌ igi mini hulami minilizave lo aneza gamazi neꞌmino ma lo-ngimineꞌ:
LUK 18:2 Numuno ebeꞌ naba mauꞌ zasi ma minineꞌ neꞌmo nene aza Oꞌmosomuꞌ golise gelamaaꞌ idoꞌ evenekumuꞌ nene do haza niteꞌ loloꞌ o-ngedosa gelaaꞌ ineꞌ.
LUK 18:3 Idoꞌ aꞌminguꞌ nene gevonoꞌ ma minineꞌ neꞌmo nene gamene gamene aꞌmine zasi neida ogo tiꞌ lo lovoꞌ lovoꞌ ogo minineꞌ: Ve masi goniꞌ olosa nosize. Aꞌminguꞌ nene neniꞌ gamaziꞌne hize eleꞌ ogo do lisiheꞌ o-nedezo.
LUK 18:4 Neꞌmine lokaꞌ lokaꞌ ogo neivo aꞌmine zasi neꞌmo gele hulosa ngomo ma minineꞌza alingeꞌ nene eiꞌ lulouko gala tiꞌ lo gelo lineꞌ: Oꞌmosomuꞌ golise gelamaaꞌ idoꞌ evenekumuꞌ ningo do haza niteꞌ loloꞌ o-ngedaaꞌ nouve nouvoniꞌza
LUK 18:5 gevonoꞌ meꞌmo nene lihiteheka lo neineꞌ nenako nemuꞌ nene aza okaꞌ okaꞌ ogo ne do goseleꞌ gehepeve o-nedalive lo eze gamaziꞌve hize eleꞌ ogo do lisiheꞌ o-delove lineꞌ.
LUK 18:6 Neꞌmine lo Guvelesi ve imineꞌ molo tiꞌ lo lineꞌ: Monovolo goloso o vineꞌ zasi neꞌmo lineꞌ gamazi nene mo gilikeve.
LUK 18:7 Idoꞌ Oꞌmoso neꞌmo aꞌmine zasi nene ivileꞌ ogo eze do kegesineꞌ evenele zuho goꞌ laneme goꞌ laneme ezela laaꞌ nave nene hize eleꞌ o-ngedamilihe. Ezela likevo hize eleꞌ o-ngedamo gamene haꞌna ha minelihe. Oꞌve.
LUK 18:8 Naza lo-lengemelove. Aza liteꞌ lo hize eleꞌ o-ngedeleseive. Neꞌmine oloseineꞌza Oꞌmosolatiꞌ ve gihile aloniꞌ gameneuꞌ nene Oꞌmosomuꞌ gili eleꞌvoleꞌ avemuꞌ nene viseꞌ ogo vaiꞌ ningelohe. Oꞌve. Mo vaiꞌ ningamolosuve.
LUK 18:9 Izesuꞌ aza aneza gamazi gohi ma imineꞌ molo lineꞌ nene eveneꞌ malite engikumuꞌ gilavo eveneꞌ lisiheꞌ lamineꞌ dizi minisa eveneꞌ linge mamuꞌ nene gilavo leme minaaꞌ ingumuꞌ nene tiꞌ lo lo-ngimineꞌ:
LUK 18:10 Halisaioꞌ monoꞌ laaꞌ ive maliꞌmo Oꞌmosola lolosa monoꞌ numuno nabauꞌ dize minineꞌ. Neivo ve gohi ma eveneꞌ gono goloso takisi moni daaꞌ ive azasi nene Oꞌmosola lolosa aꞌmine monoꞌ numuno nabauꞌ nene dizo minineꞌ.
LUK 18:11 Halisaioꞌ ve aza nene ote mino Oꞌmosola lulouko tiꞌ lo lineꞌ: Oꞌmosoo, eveneꞌ linge mukiꞌ ingine eveneꞌ goꞌine izi initeꞌ gumine gidini daaꞌ ave nizahe veneꞌ longoꞌ igaꞌ ave nizahe monovo lisihetoꞌ eꞌmetamaaꞌ ave nizahe naza engiꞌ nevoꞌmine ve neꞌmine minamo takisi moni daaꞌ ive meneꞌminesi minamuvoniꞌ nemuꞌ nene mo lamineꞌ ve lo gopoꞌni noluve.
LUK 18:12 Naza nene salele hamoꞌ hamokuꞌ gamene sitaꞌ sitaꞌ monokumuꞌ ve lo nosoꞌ niteꞌ malise ogo minaaꞌ nouve. Idoꞌ initeꞌ mataꞌne teni teni daaꞌ nouvongutiꞌ hamoꞌ hamoꞌ nene geiꞌ gemaaꞌ nouve lineꞌ.
LUK 18:13 Halisaioꞌ ve aza neꞌmine lineꞌza takisi moni daaꞌ ive nene hota gidini ote mino vokeneꞌ igi okulumokuko vonuꞌ igi Oꞌmosola laaꞌ aniꞌ neꞌminesi amo asi eita lihime monovomuꞌ agae lo gelo losonoloꞌ pouꞌ pouꞌ lo belo tiꞌ lo lineꞌ: Oꞌmosoo, lihimeloꞌ ve nouvoniꞌ nenaze. Mulumoꞌne ningo iseꞌne izezo lineꞌ ve.
LUK 18:14 Nemuꞌ nene naza tiꞌ lo nolo-lingimuve. Ingine okoꞌine di dizaaꞌ nave nene Oꞌmosoꞌmo doꞌmo leme-ngedo okoꞌine di limaaꞌ nave nene doꞌmo dize-ngedaaꞌ neineꞌ nenako Halisaioꞌ ve nene Oꞌmosoꞌmo lihimeꞌve hulo-do do lisiheꞌ o-divosa vivoba asi takisi moni daaꞌ ive nene Oꞌmosoꞌmo lihimeꞌve hulo do lisiheꞌ o-divosa numuꞌvela vineꞌ ve.
LUK 18:15 Nelotiꞌ nene eveneꞌ ingine izipe ngomo ngomo nene Izesuꞌ okoꞌnidoꞌ do gelo noꞌnohoꞌ ize-ngedelive li ngeleꞌmizi di Izesuꞌ neida aniꞌza Izesuꞌ izipahala zuho ingine ningi eveneꞌ nene ngelemi oꞌve li-ngidaniꞌ.
LUK 18:16 Neꞌmine aniꞌza Izesuꞌ aza izipe nene ngeleꞌmizi alizave lo vise nolo-ngedo tiꞌ lo lineꞌ: Izipe ngomo ngomo meꞌmine minave nene Oꞌmosoꞌmo gizebo o neinguꞌ ngeleꞌmize molaaꞌ neinako huli-ngimikavo nenita ha alizaze. Oꞌve li-ngidamilo.
LUK 18:17 Naza laminetoꞌ nolo-lingimuve. Izipe ngomoliti ngemeni dameni neꞌminesi mini Oꞌmoso nene gizebo vete minelive li gelekeleꞌ lapa nomineꞌ i-damilizave nene eiꞌ Oꞌmosoꞌmo gizebo o neinguꞌ nene mo kekeꞌ vi hilamilisave.
LUK 18:18 Idoꞌ eveneꞌ naba dizo minive maliꞌmo Izesuꞌni tiꞌ lo longoꞌ o-dineꞌ: Tisaꞌ lamino, naza nene nadiꞌ okuvo Oꞌmosoꞌmo minevoꞌ minevoꞌ nemeni dameni nemelive.
LUK 18:19 Neꞌmine lavo Izesuꞌ tiꞌ lo lo-imineꞌ: Nezemuꞌ nene ve lamino nanimuꞌ nolo-nedane. Lamineꞌ minave nene hamokisi mo nizamavo Oꞌmoso eiꞌ hamoꞌ nene lamineꞌ minive nenako neꞌmine laineꞌ nene neniꞌ monovoꞌne nadiꞌ o neive.
LUK 18:20 Gaza aka gamazi nene mo gele naneꞌ. Aꞌmine gamazi nene tiꞌ lo neive: Lingine veneꞌ vemohoꞌ liliꞌ ikeniꞌ nete bizivoꞌ mini veneꞌ nehe vemohoꞌ nehe gohi masi gopo ingamilo. Idoꞌ lingine eveneꞌ ngibili hilamilo. Idoꞌ gumine amilo. Idoꞌ eveneꞌ mamuꞌ gopoꞌ napa gamazi li-ngidi sakupo gamazi li-ngidamilo. Idoꞌ izetingine metinginemuꞌ gilikevo dizavo gelekeleꞌ i-ngidi minilo.
LUK 18:21 Neꞌmine lavo ve aza tiꞌ lo lo-imineꞌ: Aꞌmine laineꞌ mukiꞌ nene naza izipelotiꞌ gelo eꞌmeteꞌmo ogo minuvoniꞌ ve.
LUK 18:22 Neꞌmine lavo Izesuꞌ aza nene gelo ve nene tiꞌ lo lo-imineꞌ: Gaza initeꞌ hamoꞌ ma amanidiꞌmo nene olihe lisiheꞌ gehepeve amane. Nemuꞌ nene gaza initeꞌ mataka vaiꞌ geita minineꞌ nene meni dosa aꞌmidotiꞌ moniꞌve nene izeꞌ molo gohoꞌ gahaliꞌ minaniꞌ nene ngeme osuꞌ lozo. Neꞌmine ilineꞌ neꞌmo nene henenika Okulumokuko nene ma mineleseive. Idoꞌ neꞌmine ogosa nene ogo neniꞌ neꞌmetezo.
LUK 18:23 Neꞌmine lineꞌza ve aza nene moni heneni ve goloso minineꞌ nenako nemuꞌ Izesuꞌ lineꞌ gamazi nene aza gilivo geni belavo golo muheleꞌ ineꞌ.
LUK 18:24 Neꞌmine ogavo Izesuꞌ aza vonuꞌ bele mino tiꞌ lo lo-ngimineꞌ: Heneni nganeni vaiꞌ goloso di minaaꞌ nave nene Oꞌmosoꞌmo gizebo o neineꞌ ebekuꞌ nene vilisa geꞌnebe goloso ilisave.
LUK 18:25 Idoꞌ kamela ize nene naba neineꞌ nenako nemuꞌ nene nalaꞌ lolosoꞌ igaꞌ naniꞌ nakese neꞌmi veleuꞌ nene ma volosa ilineꞌ nene geꞌnebe goloso oloseineꞌza heneni ve nete aꞌmine nene ivileꞌ ivosa Oꞌmosoꞌmo gizebo o neineꞌ ebekuꞌ nene vilisa geꞌnebe goloso ilisave.
LUK 18:26 Neꞌmine lo lavo aꞌmine gamazi gilave nete tiꞌ li Izesuꞌni li-imaniꞌ: Laza nene Oꞌmosoꞌmo umo hilive nene heneni ve loloꞌ o-ngedaaꞌ neihe lo giluneꞌza gaza heneni ve netesi Oꞌmosoꞌmo gizebo o neineꞌ ebekuꞌ nene mo vi hilamilisave lainako nemuꞌ nene Oꞌmosoꞌmo eveneꞌ hamokisi mo ma do luꞌ izamivo eze gizebo inguꞌ nene vo holamolobe lo nogilune.
LUK 18:27 Neꞌmine li laniꞌza Izesuꞌ aza tiꞌ lo lo-ngimineꞌ: Eveneꞌ ingine ngeli amilizaniꞌ initekisi Oꞌmosoꞌmo ogaꞌ neive. Nemuꞌ nene eveneꞌ do nguꞌ izelidoꞌ lisiheꞌ o neive.
LUK 18:28 Neꞌmine lavo Petoloꞌ aza aꞌmidoꞌ tiꞌ lo lo-imineꞌ: Gaza gelezo. Laza nene ebete initete mukiꞌ nene hulo osuꞌ lo nogeꞌmetuniko aꞌmidoꞌ meni nani dalone.
LUK 18:29 Neꞌmine lavo Izesuꞌ aza tiꞌ lo lo-ngimineꞌ: Naza laminetoꞌ nolo-lingimuve. Ve ma ingine Oꞌmosoꞌmi gizebouꞌ vo holaloningumuꞌ ve li aꞌminguko neꞌmeti alisa numuꞌine ebeꞌine nehe eleꞌningine uvoꞌningine nakuꞌningine zuho nehe izeꞌningine meꞌningine nehe izipahaꞌine nehe nene huli osuꞌ li neꞌmeti alizaniꞌ nene
LUK 18:30 aꞌmine initeꞌ vaiꞌ hulilizadoꞌ nene golo hizo me misubouko mini mili ilizanguꞌ nene Oꞌmosoꞌmo vaiꞌ goloso imineꞌ molo ngemavo dalisave. Idoꞌ alingeꞌ gamene nabala nene minevoꞌ minevoꞌ ngemeni dameni nene dalisave.
LUK 18:31 Idoꞌ Izesuꞌ aza izipahala zuho tuvelu nene ngeleꞌmize abazaꞌ ogo tiꞌ lo lo-ngimineꞌ: Gililo. Laza nene Zelusalemi numuda dizo novune. Aꞌmida vokunivo polohetelite Oꞌmosolatiꞌ ve gihile nenitoꞌ sotoꞌ ilineꞌ initekumuꞌ monoꞌ godolouꞌ li sotoꞌ igi gizaniꞌ maloꞌ nene sotoꞌ oꞌmo vo gihile ize osuꞌ loloseive.
LUK 18:32 Idoꞌ neꞌmine noluvoniꞌ nene nemuꞌ noluve. Neniꞌ nene Zuda ve minamaniꞌ atoꞌ aleveti aꞌninguꞌ mili-nidikevo ingine gize zohiꞌ i-nidi novozo suno goloso di-nidi gituhoꞌ i-nidi
LUK 18:33 gasavasi nalaꞌ nedunuꞌ meheꞌne iziviꞌ lediviꞌ igi idoꞌ nibili hililisave. Neꞌmine ikevo helo gamene sitohamo mino gohi otelesuve.
LUK 18:34 Neꞌmine lo lineꞌza ingine aꞌmine initekumuꞌ nene ma gili guni amave. Ee, aꞌmine gamaziꞌve nene hito minavo lineꞌ initeliꞌmi monovo nene gilamaniꞌ ve.
LUK 18:35 Izesuꞌ aza mo Zeliko numuno ebetoꞌ nene ogo hetelelesa navo aka gahevela nene vele likive ma mino moni vokuꞌ vokuꞌ lo minineꞌ.
LUK 18:36 Neꞌmino mino gilineꞌ nene eveneꞌ vaiꞌ goloso igi nivavo gelo nanitekumuꞌ nahe lo longoꞌ o-ngedavo
LUK 18:37 tiꞌ li li-imaniꞌ: Nasalete ve Izesuꞌ ma nene ogo novive.
LUK 18:38 Neꞌmine likevo gelo vise naba lo tiꞌ lo lineꞌ: Izesuvo, guvelesi ve naba Davidiꞌ aꞌvo ezeloꞌ medelo minanive make, nenikumuꞌ nene mulumoꞌne ningevo.
LUK 18:39 Neꞌmine lavo gomuꞌ ave nete nene legeno minelive li oꞌve li-di elemaniꞌza aza nene gohi amuzo molo vise naba lo gohi tiꞌ lo lineꞌ: Davidiꞌ aꞌvo make, nenikumuꞌ nene mulumoꞌne ningevo.
LUK 18:40 Neꞌmine lo lavo Izesuꞌ aza gelo vo akaloꞌ ha ote mino aꞌmine vele likive nene neida eleꞌmizi alizave lo lo-ngidineꞌ. Neꞌmine lavo aꞌmine vele likive nene mo avita ogavo Izesuꞌ tiꞌ lo longoꞌ o-dineꞌ:
LUK 18:41 Gaza nene nadiꞌ o-gedelove losa nogelane. Neꞌmine lavo vele likive aza tiꞌ lo lineꞌ: Guvekasi ve, gaza veꞌne nene do lamineꞌ oganivo gohi ningeloho.
LUK 18:42 Neꞌmine lavo Izesuꞌ tiꞌ lo lo-imineꞌ: Gaza nene gele eleꞌvoleꞌ anidiꞌmo lamineꞌ ogange. Veka nene gohi ningezo.
LUK 18:43 Tiꞌ lo nolivo aꞌmidoꞌ liteꞌ lo vele nene mo lamineꞌ ogavo vele ningo eꞌmeto novo Oꞌmoso opoꞌni loꞌmo vineꞌ. Eveneꞌ mukiꞌ ingine aꞌmine nene ningi Oꞌmoso opoꞌni li di naba i-daniꞌ.
LUK 19:1 Izesuꞌ aza ebeꞌ mala volosa Zeliko numuno ebekuꞌ dizo novivo
LUK 19:2 aꞌmida ve ma minineꞌ gulive Zakaioꞌ aza takisi moni daaꞌ ive naba mino mo heneni ve goloso minineꞌ.
LUK 19:3 Idoꞌ Izesuꞌ novivo zaho neve lo eze ningelesa ineꞌza eveneꞌ liꞌnibe ngomo minineꞌ nenako eveneꞌ vailiti meheꞌnida mino ngelo ningamilineꞌ ineꞌ ve.
LUK 19:4 Nemuꞌ nene eze ningelongumuꞌ ve lo gomuꞌ molo lotiꞌ izo vo gohuno za gele vineꞌ ma Izesuꞌ vilineꞌ akala minineꞌ nenako aꞌminguꞌ nene vo dize minineꞌ ve.
LUK 19:5 Neꞌmino dize neivo Izesuꞌ aꞌmida vo hetelo aꞌmine zauko vonuꞌ ogo Zakaioꞌni tiꞌ lo lo-imineꞌ: Zakaioo, idise nene geiꞌ numungauꞌ mineloniꞌ nenaze. Liteꞌ lo lemezo.
LUK 19:6 Neꞌmine lavo liteꞌ lo lemo Izesuꞌni nene olize numudoꞌ mino eleꞌmizo numuꞌvela vineꞌ.
LUK 19:7 Idoꞌ neꞌmine ineꞌ nene eveneꞌ mukiꞌ ningi aza nene lihimeloꞌ veꞌmi numunguꞌ minelesa dizo vaave li Izesuꞌni nene emenga laniꞌ.
LUK 19:8 Neꞌmine navo Zakaioꞌ aza ote mino Guvelesi ve nene tiꞌ lo lo-imineꞌ: Guvekasi ve, gaza gelezo. Initeꞌ mataꞌne nene olusotoꞌ molo mino izeꞌ molo lingela nene gohoꞌ aleve ngemelesuve. Idoꞌ naza eveneꞌ malitidatiꞌ initeꞌ ma goꞌine izo gumine gidini do noloniꞌ nene naza aꞌmidoꞌ golo hizo initeꞌ hamo hamotoꞌ nene initeꞌ sitaꞌve sitaꞌve molo ngemekaꞌ ngemekaꞌ olosuve.
LUK 19:9 Neꞌmine lavo Izesuꞌ aza tiꞌ lo lo-imineꞌ: Oꞌmosolatiꞌ ve gihile naza uvoniꞌ nene eveneꞌ ma vi tolovo iliza akaloꞌ mini mili minave nene viseꞌ ogo do nguꞌ izelove losa uvoniꞌ nenako ve mene ve lulo do velepeꞌ izo leliꞌ ogaꞌ nounidiꞌmine ogo Oꞌmosoꞌmi louꞌ gamazi lidoꞌ eꞌmetelesa nolinako neꞌmo nene azasi Abalahamuꞌ aꞌvopilemoꞌ gihile minineꞌ nene mo sotoꞌ oganako idise mene numunguꞌ nizaniꞌ aleve menesi Oꞌmosoꞌmo mo do lunguꞌ noizive.
LUK 19:11 Neꞌmino Izesuꞌ gamazi lo-ngimidoꞌ nene gapepeꞌ igi gili nizavo aneza gamazi gohi ma imineꞌ molo nemuꞌ lineꞌ ve. Aza nene mo Zelusalemi numuno ebekuꞌ vo hetelelesa do alite alite neineꞌ nemukisi idoꞌ makaꞌ minave nete nene Oꞌmosoꞌmo gizebo o-ledelineꞌ gamene nene mo aꞌne sotoꞌ oke leive li gili minaniꞌ nemukisi nene mo ladeni gaꞌine gilikeve losa nemuꞌ nene Oꞌmosoꞌmo gizebo o-ledelineꞌ gamene geto sotoꞌ amoloseinako lo aꞌminemuꞌ gizebo igi minilizanguꞌ igi mili ilizaniꞌ monovomuꞌ aneza gamazi lo-ngimineꞌ ve.
LUK 19:12 Aꞌmine aneza gamazi nene tiꞌ lo lineꞌ: Ve naba maliꞌmo nene misubo hotoꞌ misubola nene vokuvo Guveꞌnesi ve naba loloꞌ i-nidikevo tineꞌ molo numuꞌnela alove lo vineꞌ.
LUK 19:13 Neꞌmino volosa gelekeleꞌ izipeꞌve teni neꞌmine vise lo-ngemo moni nene vanu hadeti kina (K100) neꞌmine ngemekaꞌ ngemekaꞌ ineꞌ. Neꞌmino nongemo tiꞌ lo lo-ngidineꞌ: Lingine nene aꞌmine monidunuꞌ nene gono gihiꞌmi vi nizavo tineꞌ molo alove.
LUK 19:14 Neꞌmine lineꞌza eze gizebo o-ngede minineꞌ aleve linge ma nete nene goseleꞌ goloso ngebelavo aꞌmine ve vida nene eveneꞌ ma gamazi tiꞌ li lisa ngimiselaniꞌ: Ve meve nene guvetesi ve minamilive lo nolune.
LUK 19:15 Neꞌmine laniꞌza mo guvelesi ve liliꞌ i-dikevo minidotiꞌ tineꞌ molo aniꞌ nene moni ngimuve nene gono do nanikeꞌ imineꞌ mili di sotoꞌ ahe ningeloniꞌ nenaze. Nemuꞌ nene nenita alizaze. Vise li-ngidilizave lavo vise li-ngidikevo ikaꞌ ikaꞌ aniꞌ.
LUK 19:16 Ganaꞌ ave neꞌmo nene tiꞌ lo lineꞌ: Guvekasi ve, gaza hadeti kina (K100) nemaineꞌ malotiꞌ nene vanu tauseni kina (K1000) gohi ma do sotoꞌ okuve.
LUK 19:17 Neꞌmine lavo guvelesi veꞌmo tiꞌ lo lo-imineꞌ: Gelekeleꞌ izipe lamineꞌ goloso nane. Gonoloꞌ gizebo lamineꞌ goloso ogane. Gono ngomoloꞌ gizebo lamineꞌ aineꞌ nemuꞌ nene numuno ebeꞌ teni neloꞌ nene gizebo ve hulo-gedelesuve.
LUK 19:18 Neꞌmine lavo aꞌmidotiꞌ ave neꞌmo nene tiꞌ lo lineꞌ: Guvekasi ve, gaza hadeti kina (K100) nemaineꞌ malotiꞌ nene faef hadeti kina (K500) gohi ma do sotoꞌ okuve.
LUK 19:19 Neꞌmine lavo guvelesi veꞌmo tiꞌ lo lo-dineꞌ: Geiꞌ nene numuno ebeꞌ faef neꞌmidoꞌ nene gizebo ve hulo-gedelesuve.
LUK 19:20 Neꞌmine lavo gelekeleꞌ izipe gohi maliꞌmo ogo tiꞌ lo lineꞌ: Guvekasi ve, gaza hadeti kina (K100) nemaineꞌ ma nene gohi do nogimuve. Gaza nene gasava ve mino eveneꞌ malite milikaniꞌ initeꞌ nene geiꞌ do tiꞌ ogaꞌ nane. Idoꞌ ve malite zuhoꞌ aniꞌ initeꞌ nene geiꞌ do tiꞌ o mino dolizo naaꞌ nane. Nemuꞌ nene naza geiꞌ goliseka gelo aꞌmine moni nemaineꞌ ma nene lavolavouꞌ asabuꞌ izo do haleko molokuvoniꞌ nene do nogimuve.
LUK 19:22 Neꞌmine lavo guvelesi ve aza tiꞌ lo lo-imineꞌ: Gelekeleꞌ izipe goloso gaza mene geiꞌ vekatiꞌ laineꞌ gamazika maꞌmo goniꞌ o-gedeleseive. Gaza nenikumuꞌ tiꞌ lo labe: Gaza gasava ve mino eveneꞌ malite milikaniꞌ initeꞌ nene geiꞌ do tiꞌ ogaꞌ nane. Idoꞌ ve malite zuhoꞌ aniꞌ initeꞌ nene geiꞌ do tiꞌ o mino dolizo naaꞌ nane labe.
LUK 19:23 Naza nene geiꞌ laineꞌ neꞌmine ogaꞌ uve noloniꞌ nene gaza moniꞌne nene do vo beni numunguꞌ molo-nedekelinako nanimuꞌ neꞌmine amane. Neꞌmine anidiniko naza idise mene uvodoꞌ nene polopetisi duvodine.
LUK 19:24 Neꞌmine lo-emo guvelesi veꞌmo aꞌmida minavemuꞌ nene tiꞌ lo lo-ngimineꞌ: Aꞌmine hadeti kina (K100) do neineꞌ mene ipeꞌ igi vanu tauseni kina (K1,000) do minive nene imilo.
LUK 19:25 Neꞌmine lavo ingine nene tiꞌ li laniꞌ: Guvekasi ve, tauseni kina (K1,000) nene mo do neineꞌ nenako emamoloinako gohi emelobe laniꞌ.
LUK 19:26 Neꞌmine likevo guvelesi ve aza tiꞌ lo lo-ngimineꞌ: Naza tiꞌ lo nolo-lingimuve: Initeꞌ ma di nilizave nene gohi ma ngimi aꞌminguꞌ ikevo dalisave. Neꞌmine ilisaniꞌza initeꞌ ma dami minilizave engita nene ngomo ma di nilizaniꞌ nesi nene engitatiꞌ ipeꞌ igi di vikevo haza minilisave.
LUK 19:27 Idoꞌ neniꞌ biluvaꞌne nenikumuꞌ engiꞌ guveꞌinesi ve loloꞌ amiline lave ma nene ngeleꞌmizi di igi veꞌneloꞌ mene ngibili geseꞌ ilo.
LUK 19:28 Izesuꞌ aza tiꞌ lo lo-ngemo Zelusalemi numuno akala nene do gomuꞌ molo dizo vineꞌ.
LUK 19:29 Mo vo numuno ebeꞌ sitaꞌ Betehagesi Betanisi Oliva Golo ve ladoꞌ minasida nene omo avitoꞌ ogo izipahala zuho sitaꞌ ma ngimiselo
LUK 19:30 tiꞌ lo lineꞌ: Lingine aꞌmine ningi nizasineꞌ numuno ebekuꞌ volene vi dizi ningilisineꞌ nene dongi ize angale naba evenelitesi aꞌmidoꞌ olihe mitoꞌ mini monamaniꞌ nene ningilisasize. Aꞌmine nene vakesi di mela alizo.
LUK 19:31 Idoꞌ aꞌmine nene vi nivakesasivo evenelite lingine nanimuꞌ nivakesasive nilavo ma lingine tiꞌ li lilizo: Gono neivosa Guvelesi veꞌmo aꞌmine ize memuꞌ limiselavo usineꞌ ve li lilizo.
LUK 19:32 Neꞌmino ngimiselavo ngimiselive ingine vi aꞌmine dongi ize nene Izesuꞌ lineꞌ maloꞌ eꞌmeti ningasineꞌ.
LUK 19:33 Ningi nivakesasivo aꞌmine dongi ize neꞌmi meꞌninge nete tiꞌ li li-ngimaniꞌ: Dongi ize nene nanimuꞌ nivakesasive.
LUK 19:34 Neꞌmine likevo ingine tiꞌ li lasineꞌ: Guvelesi veꞌmo gono neivo aꞌmine ize mamuꞌ limiselavo nousive.
LUK 19:35 Neꞌmine li Izesuꞌ neida di ikesivo saketiꞌine nene apasi aꞌmine dongi ize neꞌmi meheneloꞌ nene Izesuꞌ minelive li hitikevo aꞌmidoꞌ mitoꞌ minineꞌ.
LUK 19:36 Mo mitoꞌ mino novivo eveneꞌ ingine geneganaꞌine nene apasi kuluhizi akaloꞌ mili-dikaꞌ mili-dikaꞌ aniꞌ.
LUK 19:37 Neꞌmine navo Izesuꞌ aza Zelusalemi numuno ebeꞌ nene mo do avitoꞌ noogo Oliva Gololatiꞌ lemo omo minineꞌ akaloꞌ nene vo nohetelivo eze eꞌmeti ave mukiꞌ goloso ingine nene apiꞌ igi ngolize niizi gono lamineꞌ ato atoꞌ amuzo molo davo ninganiꞌ nemuꞌ nene Oꞌmoso opoꞌni nili gekeꞌ gekeꞌ li
LUK 19:38 tiꞌ li laniꞌ: Guvetesi ve naba Oꞌmosoꞌmi velemuꞌ anive nene noꞌnohoꞌ geita minivoo. Okulumokuꞌ miniveꞌmo hongu lo mineloneꞌ monovo nene do sotoꞌ ogavosa aꞌmine veleta Okulumokuꞌ minivemuꞌ nene opoꞌni nolune.
LUK 19:39 Idoꞌ eveneꞌ muliseutiꞌ Halisaioꞌ ve linge malite Izesuꞌni tiꞌ li li-imaniꞌ: Tisazo, izipaha zuho nene neꞌmine li gekeꞌ gekeꞌ lamilo lo oꞌve lo-ngedo ngelemevo.
LUK 19:40 Neꞌmine likevo Izesuꞌ tiꞌ lo lineꞌ: Naza laminetoꞌ nolo-lingimuve. Idise mene gekeꞌ gekeꞌ li vise naba nilaniꞌ nene ma lamadiniko adoꞌ geheni mevotesi nene gekeꞌ gekeꞌ li neꞌmine ladine.
LUK 19:41 Neꞌmine ogo Zelusalemi numuno ebeta nene omo avitoꞌ noogo aꞌmine Zelusalemi numuno ebeꞌ nene noningo aꞌminemuꞌ ive ineꞌ.
LUK 19:42 Ive noogo iveutiꞌ nene tiꞌ lo lineꞌ ve: Lingine hongu li minilizaniꞌ aka do sotoꞌ o-lengedelineꞌ monovo nene aloꞌ gozopotatiꞌ gililizanako idisesi nene mo apiꞌ igi gililizadoꞌ o neiha idisesi nene ha vetidoꞌ hite neinako gohi ngeli ma ningamilizaniꞌ oganako lengikumuꞌ nene agae lo nogiluve.
LUK 19:43 Neꞌmine lo nogiluvoniꞌ nene nanitekumuꞌ ve. Oꞌmosoꞌmo lengiꞌ do lunguꞌ izelesa lengita aniꞌ gamene nene ma ningi gilamaniꞌ neꞌmo lengita nene gamene atoꞌ ma aloseive. Aꞌmine gameneuꞌ nene biluvalite igi numudine gesi heta nene misubo mili di dizi numuno nabaꞌ nabaliꞌmi laveloꞌ nene di lisiheꞌ igi vilizaniꞌ akatine hizi tili-lingidi aꞌmidatiꞌ aꞌmidatiꞌ biluvalite mo lili gesi neꞌmine hize-lingidi galapuso lingimilisave. Neꞌmine i-lingidikevo aꞌmine numuno ebetinesi linginesi nene ingi geseꞌ ilisave. Aꞌmine numudine gizaniꞌ geheni nesi nene mo bili tululu li hulikevo aꞌmingutiꞌ geheni sitaꞌ nesi nene lobeꞌ igi minamilisasive.
LUK 19:45 Nelotiꞌ nene monoꞌ numuno nabauꞌ vo dizo aꞌminguꞌ initeꞌ maketi mili minave nene ngeleto do nohulo-ngedo
LUK 19:46 tiꞌ lo lo-ngimineꞌ: Oꞌmosoꞌmo lineꞌ gamazi monoꞌ godolouꞌ ma tiꞌ lo neineꞌ ma neive: Neniꞌ numuꞌne nene eveneꞌ dizi nopoꞌni li-nimaaꞌ numuno mineleseive. Neꞌmine li gizi nizaniꞌ ma neineꞌza lingine aꞌminguꞌ igi mili minaaꞌ naniꞌ initeꞌ neꞌmo nene gumineloꞌ vete igi mili minaaꞌ numuno loloꞌ ogave lineꞌ.
LUK 19:47 Idoꞌ aꞌmine gamenelotiꞌ apiꞌ ogo monoꞌ numuno nabauꞌ nene gamene gamene eveneꞌ monoꞌ apize ngemo minineꞌ. Neꞌmino neivo evenetoꞌ medeli mini Oꞌmoso initeꞌ lehizi-daaꞌ ave naba nesi louꞌ gamazi apizi ngimaaꞌ ave nesi idoꞌ eveneliti gizebo veꞌine nesi ingine aꞌmine Izesuꞌni nene bili hililizaniꞌ akamuꞌ viseꞌ aniꞌza
LUK 19:48 eveneꞌ nete eiꞌ gamaziꞌve gililisa amuzo mili minaniꞌ nenako neꞌmo nene Izesuꞌni bililizaniꞌ aka nene viseꞌ igi ma ningamaniꞌ ve.
LUK 20:1 Gamene ma Izesuꞌ aza monoꞌ numuno nabauꞌ nene eveneꞌ monoꞌ gamazi apize ngeme ngemeꞌ ogo eiꞌ gamaziꞌve lamineꞌ nene lo-ngemo neivo evenetoꞌ medeli mini Oꞌmoso initeꞌ lehizi-daaꞌ ave nabasi monoꞌ gamazi apizi ngimaaꞌ avesi idoꞌ monoꞌ gizebo ve nesi nene Izesuꞌ neida igi
LUK 20:2 tiꞌ li longoꞌ i-daniꞌ: Gaza initeꞌ mene mela ogaꞌ naineꞌ nene zahi velemuꞌ ogaꞌ nane. Idoꞌ zaho lavosa ogaꞌ nane. Nemuꞌ lo-lemezo.
LUK 20:3 Likevo aza tiꞌ lo lo-ngimineꞌ: Nazasi initeꞌ mamuꞌ longoꞌ o-lengedelesuze. Lingine li-nimilo.
LUK 20:4 Monoꞌ noso holo-ngedelive lo Zohaneꞌni imiselive ma nene Oꞌmosoꞌmo imiselihe haza misubouꞌ velite imiselave.
LUK 20:5 Neꞌmine lavo angiseꞌine li voleloꞌ meloꞌ igi tiꞌ li laniꞌ: Laza Oꞌmosoꞌmo imiselive losoꞌ nene lingine eitoꞌ nene nanitekumuꞌ gili eleꞌvoleꞌ amave lo lalive.
LUK 20:6 Ne neiha haza misubouꞌ velite imiselave losoꞌ nene eveneꞌ ingine Zohaneꞌ nene polohete ve li gili nizaniꞌ nenako nemuꞌ ingine geheni libililisave li ngehelele izavo golise gilaniꞌ.
LUK 20:7 Neꞌmine igi tiꞌ li li-imaniꞌ: Monoꞌ noso holo-ngedelive lo imiselive nene zaho nolihe ma gelamune laniꞌ.
LUK 20:8 Neꞌmine likevo Izesuꞌ aza tiꞌ lo lo-ngimineꞌ: Lingine li-nimamaniꞌ nemuꞌ nene nazasi ogo molo ogaꞌ nouvoniꞌ initeꞌ mene iline lo nimiselivemuꞌ nene ma lo-lengemamolosuve.
LUK 20:9 Idoꞌ apiꞌ ogo aneza gamaziutiꞌ eveneꞌ tiꞌ lo lo-ngimineꞌ: Ve maliꞌmo vaini mine ma zuhoꞌ ogo eveneꞌ ma mine gizebo i-dilizave lo hulo-ngedo misubo mala vo gamene haꞌna minineꞌ.
LUK 20:10 Aꞌmida neivo vaini nalaꞌ gihile elaaꞌ gamene ogavo mine meleho aza aꞌmine vaini nalaꞌ gihile nene ma ili nimikevo do-nedo alive lo gelekeleꞌ izipe ma imiselavo mine gizebo avela vo hetelineꞌza ingine bili imiseli hulikevo initekisi ma damo haza tineꞌ molo vineꞌ ve.
LUK 20:11 Neꞌmine ogavo gohi gelekeleꞌ izipeꞌve ma imiselavo vineꞌza aꞌminesi bili di goloso initeꞌ gehepeve i-di imiseli hulikevo initekisi ma damo haza tineꞌ molo vineꞌ.
LUK 20:12 Neꞌmine ogavo gohi setohamo ivo gelekeleꞌ izipe ma nene imiselavo vineꞌ. Vavo aꞌminesi nene mine gizebo ve ingine bili di goloso igi huli heta i-daniꞌ ve.
LUK 20:13 Neꞌmine ikevo mine meleho aza tiꞌ lo lineꞌ: Naza nene nadiꞌ oꞌ nalove. Naza luꞌne eme nouvoniꞌ gipeꞌne mene eze gamaziꞌve gili di eleꞌmizi lamineꞌ ma ilizahe imiselekuvo vilive.
LUK 20:14 Neꞌmine lo gelo imiselavo vo hetelavo mine gizebo ve ingine ningi angise tiꞌ li laniꞌ: Me veꞌmo melehidoꞌ medelo mino mine mene dalive neinako aꞌmine mine mene leliꞌ mide loloꞌ ilingisi mo bele helelone.
LUK 20:15 Neꞌmine li vaini mingutiꞌ nene geleleheꞌ igi eleꞌmizi di vi gesi heta bilaniꞌ ve. Neꞌmine aniꞌ nenako nemuꞌ nene vaini nalaꞌ mine neꞌmi meleho aza nene nadiꞌ o-ngedelive.
LUK 20:16 Aza ogo hetelo aꞌmine gizebo ve nene ngebele helo miꞌveloꞌ nene eveneꞌ gizebo ilizave gohi ma hulo-ngedeleseive. Neꞌmine lo Izesuꞌ lavo eze gamazi gili minave ingine gili tiꞌ li laniꞌ: Eꞌe. Neꞌmino sotoꞌ amilihoo.
LUK 20:17 Neꞌmine laniꞌza aza gelo vonuꞌ ngebelo tiꞌ lo lineꞌ: Idoꞌ lingine neꞌmine lii ma monoꞌ godolouꞌ gamazi ma tiꞌ li gizi nizaniꞌ ma nene neniꞌ luvodoꞌ nene mo vo damive lisa gili nizahe. Oꞌve. Mo vo do neive: Numuno gizilizaniꞌ geheni mukikutiꞌ geheni ma nene numuno gizaaꞌ avete ningi goloso o vive li di kegesi di hulaniꞌ geheni neꞌmo nene geheni mukiꞌ ngivileꞌ ogo numuno do amuzo molaaꞌ geheni loloꞌ ogave.
LUK 20:18 Ve ma ingine aꞌmine gehedoꞌ veleheꞌ limi ingalizaniꞌ nene izi iti hupuꞌ izilisave. Idoꞌ aꞌmine geheni neꞌmo lemo eveneꞌ ma ngebelelineꞌ nene izo lanahana o-ngedeleseive.
LUK 20:19 Neꞌmine lavo monoꞌ monovo apizi ngimaaꞌ avesi evenetoꞌ medeli mini Oꞌmoso initeꞌ lehizi-daaꞌ avesi ingine aneza gamazi lineꞌ mene lelikumuꞌ lo molo logave li gili aꞌmidoꞌ nene analoꞌ di bililisa laniꞌza evenekumuꞌ golise gilaniꞌ.
LUK 20:20 Neꞌmine igi mini Izesuꞌni nene gamazi lo gopo ilidotiꞌ analoꞌ do do vo guvelesi ve naba neꞌmi anauꞌ molalone li lelitatiꞌ eveneꞌ ma ngimiselekunivo ingine vi Izesuꞌni gamazidunuꞌ longoꞌ i-di minavo gamazi gopo lilingumuꞌ ve li eveneꞌ ma ngimiselikevo ingine vi eveneꞌ lamineꞌ minave gili mini gamazi lo gopo ilingumuꞌ amamakaꞌ mili minaniꞌ.
LUK 20:21 Neꞌmine igi mini Izesuꞌni longoꞌ i-dilisa tiꞌ li li-imaniꞌ: Tisazo, geiꞌ monovoka gele none. Gaza eveneꞌ gamazi apize ngemaaꞌ naineꞌ monovoka nene mo lisiheꞌ laminekovoꞌ o minaaꞌ neive. Gaza gamazi lo-ngemelineꞌ aleve nene naniꞌmine aleve nilizahe eveneꞌ dizi nizaniꞌ nilizahe limi minaniꞌ nilizahe gasava ve nilizahe hongu ve nilizahe nemuꞌ gaka mukiꞌ gelamo Oꞌmosoꞌmi aka lelebizo gamazi gihilevoꞌ lo lemaaꞌ anive nane.
LUK 20:22 Nemuꞌ nene gaza laanivo gelelone. Loma veti guveꞌinesi ve ngamani naba Kaesaleꞌ aza takisi moni huli-nidilizave lo neidoꞌ nene eꞌmeto Zuda ve laza ma hulo-desoꞌ nene lisiheꞌ o neihe louꞌ gamazite avutoꞌ o neive.
LUK 20:23 Neꞌmine laniꞌ nene Kaesaleꞌni takisi moni imilo lilineꞌ neꞌmo Zuda ve nene ngizeboloꞌ molavo ganala dalive. Idoꞌ imamilo lilineꞌ nene Loma ve ngizeboloꞌ molavo nesi ganala dalive li ingine gili mini eiꞌ golo izi laniꞌ nene Izesuꞌ aza mo ningo gelo tiꞌ lo lo-ngimineꞌ:
LUK 20:24 Lingine moni ma di igi nelebizilo. Me moniloꞌ eveneliꞌmi golo velesi gulivesi neineꞌ nene zahi golo velesi gulivesi neive lo lo-ngedavo ingine tiꞌ li laniꞌ: Kaesaleꞌ ma ve laniꞌ.
LUK 20:25 Neꞌmine likevo Izesuꞌ aza tiꞌ lo lo-ngimineꞌ: Tiꞌ li ma aꞌmine moni nene ngamani gizebo ve eiꞌ Kaesaleꞌ initeꞌve noloseinako aꞌminemuꞌ nolivo ma nene ha imilo. Idoꞌ aꞌmineꞌmine igi Oꞌmosoꞌmo lingimineꞌ initetoꞌ nene ha golo hizi imilo.
LUK 20:26 Neꞌmine lavo ingine eveneꞌ mukiliti veꞌnidoꞌ nene gamaziꞌve lidotiꞌ nene ngeli di goniꞌ i-damilizaniꞌ o vivo ingine longoꞌ i-dadoꞌ gamazi do tiꞌno lo-ngimineꞌ gamazi nemuꞌ nene voꞌine vavo gamazi lami minaniꞌ.
LUK 20:27 Nizavo Sadukaioꞌ monoꞌ laaꞌ ave engikutiꞌ helaakutiꞌ otaaꞌ nene nomive laaꞌ ave linge ma ingine Izesuda igi longoꞌ i-di
LUK 20:28 tiꞌ li laniꞌ: Tisazo, Moseꞌ aza luhuvo gize-lidineꞌ nene tiꞌ lo neive: Uvoꞌninge nakuꞌninge ma minilizangutiꞌ maliꞌmo veneꞌ do mino izipe gedamo helavo ma engikutiꞌ maliꞌmo aꞌmine gevonoꞌ veneꞌ nene dosa aꞌmine hilive nemuꞌ medelo izipe gedo molo-delive.
LUK 20:29 Neꞌmine ilisanako nemuꞌ nene uvoꞌninge nakuꞌninge seveni ma minaniꞌ ve. Ganaꞌ ve neꞌmo veneꞌ do izipahala ma sotoꞌ amavo hilineꞌ.
LUK 20:30 Idoꞌ hilive neꞌmi mehenelotiꞌ neꞌmo daniꞌza aꞌmineꞌmine ogavo
LUK 20:31 ma neꞌmo do mino aꞌmineꞌmine ogo hilineꞌ. Mo mukitoꞌ aꞌmineꞌmine ikaꞌ ikaꞌ igi izipahaꞌine ma gidami hili osuꞌ laniꞌ ve.
LUK 20:32 Neꞌmine ikevo alingeꞌ nene veneꞌ nesi hilineꞌ ve.
LUK 20:33 Neꞌmine ineꞌza eveneꞌ seveni aꞌmine veneꞌ daniꞌ nenako eveneꞌ mukiꞌ hilangutiꞌ otiliza gameneuꞌ nene veneꞌ nene zahi elenaho loloꞌ ogo minelive.
LUK 20:34 Aza aꞌmidoꞌ ngelo do velepeꞌ izo lamivo gize zohiꞌ o-delobe li neꞌmine likevo Izesuꞌ tiꞌ lo lo-ngimineꞌ: Idise mene noneꞌ gameneloꞌ nizaniꞌ aleve lingine nene veneꞌ daaꞌ idoꞌ veloꞌ vaaꞌ igaꞌ naniꞌza
LUK 20:35 eveneꞌ ma alingeꞌ gamene vomila hili nilizangutiꞌ gohi oti minevoꞌ minevoꞌ ngemeni dameni di otuhiliza aleve nene veneꞌ daaꞌ idoꞌ veloꞌ vaaꞌ ami minilisave.
LUK 20:36 Aꞌmine aleve ingine nene angeloꞌ neꞌmine minilisanako mo hilamilisave. Idoꞌ hili nilizangutiꞌ otiliza aleve nene Oꞌmosoꞌmo do ote-ngidineꞌ nenako mo eiꞌ izipahala neꞌmine liliꞌ igi minilisave.
LUK 20:37 Idoꞌ helaakutiꞌ otaaꞌ nemuꞌ nene Moseꞌ neꞌmosi nene do sotoꞌ ogo lelebizave. Adoꞌ aza za ngomoutiꞌ oloꞌ gulumo ineꞌ gamazi gizida nene Oꞌmosoꞌmo lineꞌ gamazi tiꞌ lo gizidotiꞌ nene lelebizineꞌ ma neive: Naza Abalahamule Isakale idoꞌ Zakobole engiꞌ Oꞌmosoꞌine nouve lineꞌ. Idoꞌ aꞌmine ve hili osuꞌ ladiniko engiꞌ Oꞌmosoꞌine nouve ngelo ma lamidine. Engiꞌ Oꞌmosoꞌine nouve lineꞌ neꞌmo mo hili osuꞌ lami ha nizave lo gelelesune.
LUK 20:38 Idoꞌ nanitekumuꞌ ve. Oꞌmosoꞌmo gelavo eveneꞌ mukiꞌ nene mo hili osuꞌ lami ha nizaniꞌ nenako nemuꞌ ve.
LUK 20:39 Neꞌmine lavo eveneꞌ monoꞌ apizi ngimaaꞌ ave linge malite Izesuꞌ gamaziꞌveloꞌ nene tiꞌ li li-imaniꞌ: Tisazo, gaza mo laminetoꞌ goloso laane laniꞌ.
LUK 20:40 Izesuꞌ neꞌmine lo lo-ngimineꞌ nemuꞌ nene ingine longoꞌ gohi i-dilisa voꞌine vavo alamaniꞌ ve.
LUK 20:41 Neꞌmine igi nizavo Izesuꞌ aza tiꞌ lo longoꞌ o-ngedo lo-ngimineꞌ: Do luꞌ izelive lo Oꞌmosoꞌmo imiselelesa live nene gozopoꞌ guvelesi ve naba Davidiꞌ aꞌvopilemoꞌ ve laaꞌ naniꞌ nene nanimuꞌ laaꞌ nave.
LUK 20:42 Asiꞌve Davidiꞌ monoꞌ nama linguꞌ aꞌmine veꞌmi monovo lineꞌ nene monoꞌ godolouꞌ tiꞌ lo gize neineꞌ ma neive: Okulumokuꞌ ve aza Guveꞌnesi vemuꞌ tiꞌ lo lo-imineꞌ: Nezelotiꞌ geiꞌ nene nange. Aꞌne hulaaꞌ uvoda minezo.
LUK 20:43 Nanivo biluvaka nene gizengala doꞌmo leme-ngedekuvo gizenga lisaaꞌ ilineꞌ initeꞌ neꞌmine liliꞌ igi gelekeleꞌ i-gidi minilisave.
LUK 20:44 Aꞌmine ve nemuꞌ nene Davidiꞌ aza Guveꞌnesi ve ve lineꞌ nenako nemuꞌ aꞌmine do luꞌ izelive lo Oꞌmosoꞌmo imiselelesa live nene Davidiꞌ aꞌvopilemoꞌ lemo minive minelidoꞌ nomive.
LUK 20:45 Izesuꞌ aza neꞌmine lo lo-ngemavo eveneꞌ mukiꞌ nete nigilavo izipahala zuho tiꞌ lo lo-ngimineꞌ:
LUK 20:46 Monoꞌ apizi lingimaaꞌ aveti monovo nene dikelizaze. Eheꞌ igi golise gili minilo. Ingine nene lavolavo haꞌna haꞌna liki monaakumukovoꞌ ngumo helaaꞌ neivo idoꞌ maketiloꞌ nimonavo evenelite ningi ngopoꞌni li-ngidilizangumukovoꞌ ngumo helaaꞌ neivo idoꞌ monoꞌ numungukisi idoꞌ nosoꞌ niteꞌ naba nadaasi ingine nene ve nabalitevoꞌ minaaꞌ aniꞌ holomoloꞌ minaakumukovoꞌ nene ngumo helaaꞌ neive.
LUK 20:47 Idoꞌ veneꞌ gonoꞌ neti initeꞌ mataꞌine di osuꞌ li-ngidaaꞌ idoꞌ Oꞌmosola opoꞌni languꞌ nene evenelite ma ningilizahe li apa niteꞌ igi gamazi haꞌna haꞌna laaꞌ nave. Gamene nabauꞌ aꞌmine ve nene Oꞌmosoꞌmo lihime naba goloso ngemeleseive.
LUK 21:1 Heneni nganeni aleve nete monoꞌ numuno nabauꞌ ofa moni milaaꞌ aniꞌ initekuꞌ nene Oꞌmoso initeꞌ lehizi-dikaꞌ lehizi-dikaꞌ navo Izesuꞌ aza vokeneꞌ ogo ningineꞌ.
LUK 21:2 Ninge minineꞌ nene gevonoꞌ gohoꞌ veneꞌ maliꞌmo guleheꞌ moni sitaꞌ nomolavo ningo
LUK 21:3 eveneꞌ nene tiꞌ lo lo-ngimineꞌ: Naza laminetoꞌ nolo-lingimuve. Gohoꞌ veneꞌ gevonoꞌ minineꞌ meꞌmo moni hulineꞌ neꞌmo eveneꞌ mukiꞌ hulaniꞌ nene ngivileꞌ ogosa hulave.
LUK 21:4 Neꞌmino ngivileꞌ ogo hulave luvoniꞌ nene eveneꞌ mukiꞌ ingine moniꞌine vaiꞌ lo miningutiꞌ hulaniꞌza aza nene nosoꞌ niteꞌve do sotoꞌ ilineꞌ initeꞌ gohi ma minamivo initeꞌ mataꞌ gohoꞌ neingutiꞌ nene hulave lo lo-ngimineꞌ.
LUK 21:5 Izipahala zuho linge ingine monoꞌ numuno naba ningi geheni laminedunuꞌ luhuvo lahava izi gizaniꞌ nemuꞌ nene siza nilavo Izesuꞌ tiꞌ lo lineꞌ:
LUK 21:6 Lingine aꞌmine monoꞌ numuno lamineꞌ nininganiꞌ mene alingeꞌ bili ngululubizikevo aꞌmingutiꞌ geheni setakisi bizi minamilisi gamene ma aloseive.
LUK 21:7 Neꞌmine lavo eveneꞌ ingine tiꞌ li longoꞌ i-daniꞌ: Tisazo, idise aꞌmine nolaineꞌ initeꞌ nene naniheꞌ sotoꞌ ogo neꞌmine ilive. Idoꞌ aꞌmine laineꞌ initeꞌ nene sotoꞌ ogo vo gihile izelesa neivo nene naniteꞌ naniteꞌ sotoꞌ ivo ningelone.
LUK 21:8 Neꞌmine likevo aza tiꞌ lo lo-ngimineꞌ: Eveneꞌ mukiꞌ nete nene igi neniꞌ guliveꞌne li aꞌmine Oꞌmosoꞌmo do lunguꞌ izelive lo nimiselelesa live ma nene naꞌmo nouve idoꞌ Oꞌmosoꞌmo molaniꞌ gamene ma nene mo ogave li lilisaze. Nete di gopo i-lingidikelizaze. nGeꞌmeti vami eheꞌ igi ningisa minilo.
LUK 21:9 Idoꞌ lovo sotoꞌ neive lilizahe idoꞌ ngamanimuꞌ lovo nihizave lilizahe nemuꞌ gili ma golise gilami minilo. Neꞌmine initeꞌ nene ha sotoꞌ oloseineꞌza neꞌmine initeꞌ sotoꞌ oꞌmo vilineꞌ neꞌmo nene gamene naba olihe do alitamoloseive.
LUK 21:10 Neꞌmine lo gohi tiꞌ lo lo-ngimineꞌ: Idoꞌ misubo mauꞌ ve nene misubo mauꞌ vesi lovo hizilisave. Idoꞌ guvelesi ve naba maliꞌmi zuhote guvelesi ve naba maliꞌmi zuhosi lovo hizilisave.
LUK 21:11 Idoꞌ misubo ato atota nene mimiꞌ nabasi idoꞌ gaꞌna naba helaaꞌ gamenesi sotoꞌ okaꞌ okaꞌ neivo aꞌmidasi nene siki niteꞌ naba hutileꞌ okaꞌ okaꞌ oꞌmo vo mineleseive. Neꞌmine neivo okulumotoꞌ nene vodine vo lengehelele izelineꞌ initeꞌ mukiꞌ sotoꞌ oloseive.
LUK 21:12 Neꞌmine oloseineꞌza aꞌmine initeꞌ mukiꞌ nene olihe sotoꞌ amivo eveneꞌ nete adidoꞌ di goboni mili-lingidi monoꞌ numungukisi galapuso numungukisi lengeleꞌmizi di vi goniꞌ i-lingidaaꞌ idoꞌ guveꞌinesi ve nabaliti veꞌnidoꞌ idoꞌ ngamani nabaliti veꞌnidoꞌ lengeleꞌmizi milaaꞌ ilizaniꞌ nene neniꞌ guliveꞌne lengita minavo di minangumuꞌ nene neꞌmine manaꞌmine i-lingidilisave.
LUK 21:13 Neꞌmine i-lingidilizaniꞌ neꞌmo nene engiꞌ veꞌnidoꞌ neniꞌ monovoꞌne nene li sotoꞌ igi li-ngimilisave.
LUK 21:14 Aꞌmine gameneuꞌ nene neniꞌ nene vetine do lapa nomineꞌ o-lengedo gamazi gili vevesi mini lilizaniꞌ gamazi nene lengemekuvo engiꞌ gamazi lilizaniꞌ nene belavo aꞌmine biluvatine mukiꞌ nete lengiꞌ gamazi nene bililisa ilizaha mo bilamilisave. Nemuꞌ nene lingine tiꞌ li gili nge likisa minilo. Olihe gonitoꞌ leleꞌmizi mili-lidilisa navo ma gomuꞌ nene nadive lolone lo gopo gate gelamolone li gili nge likisavoꞌ nene minilo.
LUK 21:16 Idoꞌ izetinge metinge nilizahe uvotinge nilizahe lengiꞌ zuho nilizahe idoꞌ zogo vetine nilizahe netesi nene adidoꞌ di goniꞌ i-lingidikevo lengikutiꞌ linge nene lingibili hililisave.
LUK 21:17 Ee, neniꞌ guliveꞌne di minilizangumuꞌ eveneꞌ mukiꞌ nete lengikumuꞌ nene muso gaꞌine goloso dizeleseive.
LUK 21:18 Ne neiha neꞌmine i-lingidilizanguꞌ nene lengiꞌ godotingutiꞌ madudine zopovo hamoꞌ nesi nene ngelo vo tolovo amoloseive.
LUK 21:19 Neꞌmine manaꞌmine i-lingidi nizavo lingine gili huli mudise nenita giꞌmizi minilizaniꞌ nelotiꞌ nene minevoꞌ minevoꞌ ogaꞌ lengemeni dameni dalisave.
LUK 21:20 Idoꞌ Zelusalemi numuno ebeꞌ nene lovo vete igi di goloso ilisa mine vodo vodo igi gesi neꞌmini nihizavo ma nene lingine tiꞌ li gililo: Eii, numuno ebeꞌ mukiꞌ niteꞌ mene mo di goloso gehepeve ilizaniꞌ gamene nene mo alitave li gililo.
LUK 21:21 Neꞌmine navo ma nene aꞌmine Zelusalemi ebekuꞌ nilizavesi idoꞌ aꞌmine ebeꞌ minineꞌ misubo Zudaia misubo neukisi nilizave nene gololavoꞌ nivilizave. Idoꞌ Zelusalemi ebeꞌ gahevela minaniꞌ aleve nene igi aꞌmine Zelusalemi numuno ebekuꞌ nene dizamilizave.
LUK 21:22 Idoꞌ neꞌmine noluvoniꞌ nene nemuꞌ noluve: Aꞌmine gamene sotoꞌ ilineꞌ nene aꞌminemuꞌ monoꞌ godolouꞌ gizikaniꞌ gamazi mukiꞌ ma nene do gihile izelove losa Oꞌmosoꞌmo monovo goloso di sotoꞌ igaꞌ angumuꞌ lihime ngemelineꞌ gamene mineleseive.
LUK 21:23 Agae, aꞌmine gameneuꞌ nene izipahaꞌine minineꞌ venekumukisi idoꞌ izipe amidoꞌ nizavo nizaniꞌ venekumukisi nene mo mulumo gele-ngedekuve. Geꞌnebe goloso ilisave. Aꞌmine gameneloꞌ nene me misubouko nene initeꞌ goloso gehepeve sotoꞌ ogavo Oꞌmosoꞌmi izeboloꞌve neꞌmo me misubouꞌ aleve nene do dingani hizo hite-ngedeleseive.
LUK 21:24 Idoꞌ eveneꞌ linge nene bainati mitedunuꞌ ngibili hililisave. Idoꞌ linge ma nene galapuso ngimi numudoꞌ namadoꞌ ebeꞌ mukikuꞌ ngeleꞌmizi di vilisave. Neꞌmine igi Zuda ve minamaniꞌ aleve heta atoꞌ ve nete igi Zelusalemi aleve nene di hupiꞌ izi-ngidi ngibili gizisa aꞌmine ebeꞌ nene di tiꞌ igi mini di dizi nizavo Oꞌmosoꞌmo molo-ngidineꞌ gameneloꞌ nene osuꞌ loloseive.
LUK 21:25 Hoꞌ, ikeꞌni, sonohiꞌ engikuꞌ nene ato atoꞌ suno sotoꞌ noo-ngidivo guvo noso neꞌmo izo pouꞌ paaꞌ lo nolo nolo nomolavo nemuꞌ eveneꞌ zuho ato atoꞌ ingine aꞌmine nene nigili voꞌine vo muluꞌine pouꞌ loloseive.
LUK 21:26 Idoꞌ Okulumotoꞌ amuzoꞌinesi minaniꞌ initeꞌ mukiꞌ nene moꞌmongoꞌ igi gabeꞌ i geseꞌ ilisanako neꞌmine ilineꞌ nemuꞌ eveneꞌ nete me misubouꞌ nene initeꞌ atoꞌ ma sotoꞌ olosa neiko naniteꞌ sotoꞌ ilivoo li gopo gaꞌine gili muluꞌningutiꞌ gohi dizo gohi dizo ivo minilisave.
LUK 21:27 Neꞌmine navo Oꞌmosolatiꞌ ve gihile naza nene amuzoꞌnesi idoꞌ labanaꞌne nabasi do sotoꞌ ogo limuso avileloꞌ nolimuvo ningilisave.
LUK 21:28 Nemuꞌ nene alingeꞌ aꞌmine initeꞌ sotoꞌ olosa apiꞌ neivo ma nene lingine Oꞌmosoꞌmo mudise do luꞌ izelineꞌ gamene nene mo avitoꞌ ogave lisa lutine di upuhoꞌ i-di lutine otavo minilo.
LUK 21:29 Idoꞌ Izesuꞌ aza neꞌmine lo aneza gamazi ma tiꞌ lo lo-ngimineꞌ: Lingine lengiꞌ Zuda veti misubotinguꞌ mene gohuno zaloꞌ nesi idoꞌ za mukitoꞌ nesi nene ma ningi giliꞌnalo.
LUK 21:30 Avile gosohoꞌ sotoꞌ olosa apiꞌ ogo gulumo liselesa neivo ma lingine nene hoꞌ lilineꞌ gamene mo avitoꞌ ogave li langisetine ningi gilaaꞌ nave.
LUK 21:31 Idoꞌ aꞌmineꞌmine ogo aꞌmine veleta gomuꞌ luvoniꞌ initeꞌ mukiꞌ nene sotoꞌ oꞌmo novivo ma lingine nene Oꞌmosoꞌmo evenetoꞌ gizebo ilineꞌ gamene nene mo alitave li gililo.
LUK 21:32 Naza mo laminetoꞌ nolo-lingimuve. Aꞌmine initeꞌ mukiꞌ sotoꞌ oꞌmo vilineꞌ nene idise nizaniꞌ aleve nesi nene olihe hili osuꞌ lamavosi sotoꞌ oloseive.
LUK 21:33 Idoꞌ Okulumoki misubogi nene ha vi osuꞌ lilisasineꞌza aꞌmine gamaziꞌne nene mo osuꞌ lamo eleꞌvoleꞌ ogo mineleseive.
LUK 21:34 Nemuꞌ nene lingine negi hizi gopo minaaꞌ idoꞌ noso vauve ili ni sipaki igi minaaꞌ idoꞌ me misubouꞌ miniviꞌ aliviꞌ ilizangumuꞌ nesi giliivoꞌ minaaꞌ ilizaniꞌ nene gaha nete gelevuso neive li gilamadoꞌ liteꞌ lo ngebelaaꞌ neineꞌ neꞌmino gamene naba nene sotoꞌ o-lengedavo upuhoꞌ goloso ikelizaze. Monovotidoꞌ gizebo lamineꞌ igi minilo.
LUK 21:35 Aꞌmine gamene nene eveneꞌ mukiꞌ misubo mukikuꞌ miniꞌmi monada nesi nene sotoꞌ o-ngedelineꞌ nenako nemuꞌ noluve.
LUK 21:36 Nemuꞌ nene lingine lutine ongamivo mini Oꞌmosoꞌmo hize eleꞌ o-ledavo aꞌmine sotoꞌ ilineꞌ initeꞌ nene sotoꞌ oꞌmo novo aꞌmineꞌmo do gopo o-ledamivo mino Oꞌmosolatiꞌ ve gihile alineꞌ nene veleloꞌ ha ote mineloningumuꞌ ve li Oꞌmosola gamene gamene liivoꞌ minilo.
LUK 21:37 Izesuꞌ aza gamene gamene goꞌ laneme goꞌ lanemeꞌ monoꞌ numuno nabauꞌ nene eveneꞌ monoꞌ apize ngemo minaaꞌ ineꞌ ve. Idoꞌ holukaꞌ holukaꞌ nene golo ma gulive Oliva nela ongalosa dizo vaaꞌ ineꞌ ve.
LUK 21:38 Idoꞌ nedengaꞌ holukatiꞌ aza ogo monoꞌ numuno nabauꞌ dize neivo eveneꞌ mukiꞌ ingine geti igi aꞌmine neida nene gamaziꞌve gililisa di nubo igaꞌ aniꞌ ve.
LUK 22:1 Idoꞌ lulu izamineꞌ beleti naaꞌ aniꞌ holiseꞌ Oꞌmosoꞌmo Zuda veti avoꞌningine iseꞌine izingumuꞌ gili minaaꞌ holiseꞌ ve laniꞌ nene alitineꞌ ve.
LUK 22:2 Noalitivo evenetoꞌ medeli mini Oꞌmoso initeꞌ lehizi-daaꞌ ave nabasi idoꞌ monoꞌ apizi ngimaaꞌ avesi ingine nene Izesuꞌni bililisa gilaniꞌza evenelite ningi lovo di sotoꞌ ilizahe li golise gili ingine evenelite aꞌminemuꞌ ningi lamavo zegeni bili hililizaniꞌ akamuꞌ viseꞌ igi minaniꞌ.
LUK 22:3 Neꞌmine igi nizavo Izesuꞌ izipahala zuho tuvelu engikutiꞌ Kelioto ve ve lave Zudaꞌ eiꞌ lulouꞌ nene Satani neꞌmo lemo mino do ote-davo
LUK 22:4 aza nene evenetoꞌ medeli mini Oꞌmoso initeꞌ lehizi-daaꞌ ave nabasi idoꞌ monoꞌ numuno nabauꞌ gizebo igaꞌ aniꞌ pilisi veti gizebo vesi nizada vo hetelavo Izesuꞌni bililizangumuꞌ Izesuꞌni do sotoꞌ ogo aꞌninguꞌ molalineꞌ akamuꞌ viseꞌ igi engikisi gamazi lo gele ha gele aniꞌ.
LUK 22:5 Neꞌmine ogavo nemuꞌ ingine laniteꞌ gili moni ma emelone li li hukaniꞌ ve.
LUK 22:6 Neꞌmine li li hukikevo aza lamineꞌ ve losa Izesuꞌ aza eveneꞌ vaikisi minami eikovoꞌ nolidoꞌ ngelebizekuvo dalizave lo amamakaꞌ moloꞌmo vo minineꞌ ve.
LUK 22:7 Nelotiꞌ nene Zuda ve lulu izamineꞌ beleti naaꞌ aniꞌ gamene Oꞌmosoꞌmo avoꞌningine iseꞌine izingumuꞌ gili sipisipi angale bilaaꞌ aniꞌ gamene nene ogavo
LUK 22:8 nemuꞌ Oꞌmosoꞌmo avotemotine iseꞌine izingumuꞌ gelo mino naaꞌ nosoꞌ niteꞌ naloningumuꞌ nene lingine vi di vaꞌvaꞌ ilizo lo Izesuꞌ aza Petolongi Zohanengi ngimiselineꞌ.
LUK 22:9 nGimiselavo ingine tiꞌ li li-imasineꞌ: Gaza nene zaala vo do vaꞌvaꞌ olosingumuꞌ nolane.
LUK 22:10 Neꞌmine likesivo aza tiꞌ lo lo-ngimineꞌ: Olopehe, numuno ebeta nene dizi vi nihetelasivo ve maliꞌmo misubo somouꞌ noso ohizo geho navo voteneꞌ ilisaze. Lingine eꞌmeti vilizo. Ve aza numuno mauꞌ dizo novivo ma aꞌminguꞌ eꞌmeti vi
LUK 22:11 numuno neꞌmi melehine nene tiꞌ li li-imilizo: Tisate maꞌmo tiꞌ lo lo-gedave: Nazasi izipahaꞌnesi Oꞌmosoꞌmo avotemotine iseꞌine izingumuꞌ gelo naaꞌ nouneꞌ nosoꞌ niteꞌ naloneꞌ numuno lulo nene zauꞌ nalone.
LUK 22:12 Likesivo numuno meleho aza numuno veletoꞌ mino galaꞌmudoꞌ mino ingutiꞌ veletoꞌ nene lulo nabasi mininguꞌ initeꞌ mataꞌ aviliseꞌ i nizaniꞌ nene lengelebizeleseive. Aꞌminguꞌ nene nosoꞌ nitete di vaꞌvaꞌ ilizo.
LUK 22:13 Tiꞌ lo lo-ngemavo ingine aꞌmida vi heteli ningasineꞌ nene lo-ngimineꞌ maꞌmino neivo aꞌminguꞌ nene Oꞌmosoꞌmo iseꞌine izingumuꞌ gili naaꞌ aniꞌ nosoꞌ niteꞌ nene di vaꞌvaꞌ asineꞌ ve.
LUK 22:14 Mo di vaꞌvaꞌ ikesivo nosoꞌ niteꞌ nalizaniꞌ gamene nene ogavo aposoloꞌve zuhosi mini nosoꞌ niteꞌ ni minaniꞌ.
LUK 22:15 Neꞌmine igi minanguꞌ nene Izesuꞌ tiꞌ lo lo-ngimineꞌ: Mulumo alumo niteꞌ gihi-nidilizaniꞌ gamene alitelesa olihe alitamivo holiseꞌ mino naaꞌ nosoꞌ niteꞌ mene lengikisi makatoꞌ mino nalone lo muluꞌneuꞌ huhu lo mulumo goloso ivosa gele minuvoniꞌ ve.
LUK 22:16 Nene nanitekumuꞌ ve. Naza lo-lengemelove. Oꞌmosoꞌmo iseꞌine izineꞌ nosoꞌ niteꞌ meꞌmine nene gohi ma namuvo aꞌmine nosoꞌ niteꞌ avazahaloꞌ minineꞌ initeꞌ gihile nene sotoꞌ ogosa Oꞌmosoꞌmi gizeboꞌve sotoꞌ ogavo nalosuve.
LUK 22:17 Neꞌmine lo noso minineꞌ gomise ma do Oꞌmosola opoꞌni lo tiꞌ lo lineꞌ: Lingine mene di izeꞌ mili nalo.
LUK 22:18 Nemuꞌ naza tiꞌ lo nolo-lingimuve. Naza nene idise mene vaini noso nonunidotiꞌ nene gohi ma namo nouvo Oꞌmosoꞌmo eveneleloꞌ gizebo ilineꞌ gamene sotoꞌ ilinguꞌ nene gohi nalosuve.
LUK 22:19 Neꞌmine lo beleti ma do Oꞌmosola opoꞌni lo gito apilo nongemo tiꞌ lo lo-ngimineꞌ: Mene neniꞌ meꞌmeleꞌne [lengikumuꞌ ve losa nenaze. Nenikumuꞌ gili mini nikaꞌ nikaꞌ iꞌmi vi minilo.
LUK 22:20 Nosoꞌ niteꞌ nene mo nisa nelotiꞌ alingeꞌ nene aꞌmineꞌmine ogo vaini noso minineꞌ gomise do tiꞌ lo lineꞌ: Vaini noso gomiseuꞌ neineꞌ mene neniꞌ vaniseꞌne lengikumuꞌ hulokuvo Oꞌmosoꞌmo lo huko-lingidineꞌ gamazi gosohoꞌ ma nene do eleꞌvoleꞌ ilineꞌ vanise ma nene] neive.
LUK 22:21 Neꞌmine o neineꞌza lingine gililo. Biluvaliti aꞌninguꞌ neniꞌ molo-nedelive nene idise tevoliloꞌ mene makaꞌ mino nosoꞌ niteꞌ ade hulo do no nosive.
LUK 22:22 Ee, Oꞌmosolatiꞌ ve gihile nenikumuꞌ nene Oꞌmosoꞌmo mo neꞌmine olosane lo gele minidoꞌ do molo mo heleloniꞌ akaloꞌ novuvoniꞌza biluvalite neniꞌ dalizave lo do sotoꞌ o-nedelive nene agae, mo mulumo gono goloso daloseive.
LUK 22:23 Neꞌmine lo lavo izipahala zuho ingine neve lelikutiꞌ neꞌmine zaho ilivoo lii engiꞌ okoꞌninguꞌ nene viseka li minaniꞌ ve.
LUK 22:24 Aꞌmine izipahala zuho engiꞌ muliseuꞌ nene lovo lolize sotoꞌ ineꞌ. Ingine nene engikutiꞌ maliꞌmo linge ma ngivileꞌ ogo dizo minive ve li gililizadoꞌ lisiheꞌ o minive nene zaho nolive li lolize hizi minaniꞌ.
LUK 22:25 Neꞌmine igi nizavo Izesuꞌ aza tiꞌ lo lo-ngimineꞌ: Oꞌmosoꞌmi zuho minamaniꞌ heta atoꞌ ve engiꞌ guveꞌinesi veꞌine naba nete nene amuzo goloso mili di gelekeleꞌ ve liliꞌ i-ngidaaꞌ nave. Idoꞌ neꞌmine igi mini engitoꞌ gizebo i-ngidiliza amuzo di minave ingine nene lelikumuꞌ di lamineꞌ i-lidaaꞌ ave ve li-lidilizadoꞌ lisiheꞌ o none laaꞌ nave.
LUK 22:26 Neꞌmine igi minaaꞌ naniꞌza lengita neꞌminosa minamilineꞌ o neive. Asi lengikutiꞌ ma dizo minelive nene eveneꞌ limi minaaꞌ nave neꞌminosa lemo mineleseive. Idoꞌ lengiꞌ gizebo ve nete nene hize eleꞌ igaꞌ ave gelekeleꞌ izipe neꞌmine liliꞌ igi minilizadoꞌ o neive.
LUK 22:27 Nemuꞌ nene lingine ma liꞌnalo. Ve maliꞌmo nosoꞌ niteꞌ nokaꞌ nokaꞌ neivo maliꞌmo gelekeleꞌ o-do nosoꞌ niteꞌ do emekaꞌ emekaꞌ neivo minilisingutiꞌ guvelesi ve dizo minive nene zaho nolive. Nosoꞌ niteꞌ nokaꞌ nokaꞌ ogo minive nene noloseive. Olo. Ne neiha naza lengikuꞌ nouvoniꞌ nene gelekeleꞌ izipe neꞌmine loloꞌ ogo nouve.
LUK 22:28 Idoꞌ naza mulumo gono geho minuvonguꞌ nene olovoꞌ ami nenikisi makaꞌ gihi minaaꞌ ave ma nene nizave.
LUK 22:29 Nemuꞌ nene nenikumuꞌ nene meꞌneho neniꞌ eveneꞌneloꞌ gizebo olosane lo do kegese-nedo neleꞌmize molo neineꞌ neꞌmino linginesi nene lengeleꞌmize molokuvo
LUK 22:30 neniꞌ eveneꞌneloꞌ gizebo o minelonguꞌ lingine holomoꞌneloꞌ nosoꞌ niteꞌ niꞌmi vi mini guveꞌinesi ve minaaꞌ aniꞌ moꞌmosiꞌ tuvelu (12) nene lengemekuvo mini Isilaeleꞌ aleveti mulise tuvelu nene gizebo i-ngidi minilisave.
LUK 22:31 Neꞌmine lo Izesuꞌ tiꞌ lo lineꞌ: Agae Simonizo, gaza gelezo. Nosoꞌ niteꞌ losuvo ili mili atoꞌ igaꞌ naniꞌ neꞌmino Satani neꞌmo lengiꞌ nene lengemenguꞌ molo do gizekaꞌ o-lengedelesa lavo Oꞌmoso aza gele imineꞌza
LUK 22:32 geiꞌ nenikumuꞌ gele eleꞌvoleꞌ aineꞌ nene mudise hulamiline lo neniꞌ nene geikumuꞌ gelo Oꞌmosola lokuve. Nemuꞌ nene gaza gohi tineꞌ molo ogo nenita giꞌmizosa geze zuho nene hize eleꞌ o-ngedezo.
LUK 22:33 Neꞌmine lo lo-emavo Petoloꞌ aza tiꞌ lo lo-imineꞌ: Guvekasi ve, neꞌmino nomive. Gaza nene galapuso numunguꞌ vilibe idoꞌ gibilikevo helaaꞌ akalokisi vilibe neꞌmine ilineꞌ nene nazasi makaꞌ aꞌminguꞌ ha volosusive.
LUK 22:34 Neꞌmine lavo Izesuꞌ tiꞌ lo lo-imineꞌ: Petoloo, naza tiꞌ lo nolo-gimuze. Gelezo. Idise holukaꞌ nene okoloho nolo olihe molamivo gaza nenikumuꞌ nene ma ningamu ve ve lo ataize nolanivo gamene sitohamo oloseive.
LUK 22:35 Neꞌmine lo tiꞌ lo lo-ngimineꞌ: Gomuꞌ monoꞌ gonouꞌ nolingimiselo moni goꞌzaaꞌ pausi nehe idoꞌ hanibeki goꞌ nehe idoꞌ gizedidoꞌ suuꞌ nehe neꞌmine initekisi ma di vami haza vilo lo lingimiselekuvo vaniꞌ mauꞌ nene initeꞌ mamuꞌ viseꞌ igi minaniꞌ nehe. Neꞌmine lavo izipahala zuho ingine ma viseꞌ amuneꞌ ve laniꞌ.
LUK 22:36 Neꞌmine likevo aza tiꞌ lo lo-ngimineꞌ: Gomuꞌ nene eveneꞌ zogo nimili-lidavosa neꞌmine aniꞌza idise hize eleꞌ i-lingidami lovo i-lingimilizaniꞌ nenako nemuꞌ idise nene moni goꞌzaaꞌ pausi nehe idoꞌ hanibeki goꞌ nehe ma molo nolive neꞌmo nene ha do vilive. Idoꞌ bainati miteꞌ ma molamo nolive nene okoꞌnoloꞌ izaaꞌ ineꞌ initeꞌ saketi nene salimi ogo moni do bainati miteꞌ nene meni hizelive.
LUK 22:37 Naza neꞌmine lo nolo-lingimuvoniꞌ nene monoꞌ godolouꞌ nenikumuꞌ gomuꞌ gizi nizaniꞌ gamazi vaiꞌ ma nene gihile izelidokovoꞌ neineꞌ nenako aꞌminguꞌ nenikumuꞌ tiꞌ li gizi nizaniꞌ gamazi nene mo aꞌnene gihile ize leive losa noluve: Adoꞌ eveneꞌ nete ezemuꞌ nene louꞌ gamazi avutoꞌ igi monovo goloso daaꞌ aveti muliseutiꞌ minive ve li li-dilisave.
LUK 22:38 Neꞌmine lavo ingine tiꞌ li laniꞌ: Guvekasi ve, gaza ningezo. Bainati miteꞌ sitaꞌ mene ma neive. Neꞌmine li likevo Izesuꞌ aza moda aꞌnevo neive lineꞌ.
LUK 22:39 Neꞌmine lo numungutiꞌ heta lemo vo Oliva golola gomuꞌ vaaꞌ ineꞌ maꞌmine ogo dizo novivo izipahala zuho nene eꞌmeti vaniꞌ.
LUK 22:40 Neꞌmine ogo mo aꞌmine ebeta dizo voo izipahala zuho tiꞌ lo lo-ngimineꞌ: Lingine lengemenguꞌ sotoꞌ o-lengedelinguꞌ nene limi ingikelizaze. Oꞌmosola li minilo.
LUK 22:41 Neꞌmine lo izipahala zuho nene hulo-ngedo ngomo ma vo hotoꞌile ogo lemo obuvolo hizo Oꞌmosola tiꞌ lo lineꞌ:
LUK 22:42 Meꞌneho make, mulumo alumo ekeseꞌ nenita sotoꞌ olosa naniꞌ nene gaza geiꞌ lukaloꞌ neivo ma do olovoꞌ o-nedeline losa noluvoniꞌza geiꞌ lukauꞌ nene atoꞌ neivo ma neniꞌ luꞌneloꞌ do molamo geiꞌ lukalokovoꞌ do molo eꞌmeto iline losa noluve. [
LUK 22:43 Neꞌmine lo nolivo Okulumokutiꞌ angeloꞌ maliꞌmo lemo sotoꞌ o emo hize eleꞌ o-dineꞌ.
LUK 22:44 Neꞌmine ogavo mulunouꞌ mulumo naba goloso gelo mino Oꞌmosola nene amuzo gohi ma molo nolivo gohise belavo gohise hilineꞌ nene vanise neꞌmine misubouko doꞌmozeꞌ mozeꞌ ineꞌ ve.]
LUK 22:45 Neꞌmino neivo Oꞌmosola lo minidotiꞌ nene oto izipahala zuho minaniꞌ mala vineꞌ. Vo ningineꞌ nene ingine muluꞌninguꞌ mulumo naba gili minadiꞌmo ngabusoꞌine elavo okise ingi nizavo ningineꞌ.
LUK 22:46 Ningo tiꞌ lo lo-ngimineꞌ: Lingine nene nanimuꞌ okise ingi nizave. Lingine nene lengemenguꞌ ma sotoꞌ ilineꞌ nene vi gopo ikelizaze. Oti Oꞌmosola li minilevo.
LUK 22:47 Neꞌmine ogo Izesuꞌ nene gamazi nolivo eveneꞌ mukiꞌ aꞌmida aniꞌ nene ve ma Izesuꞌ izipahala zuho tuvelu engikutiꞌ minive Zudaꞌ nene do gomuꞌ molavo aꞌmida igisa Izesuꞌni nene golo elo nalosa Zudaꞌ nene Izesuꞌ neida aniꞌ ve.
LUK 22:48 Aniꞌza Izesuꞌ aza tiꞌ lo lo-imineꞌ: Zudazo, gaza neniꞌ zogone minaineꞌ gelo soza suno do Oꞌmosolatiꞌ ve gihile neniꞌ nene goꞌne elo nosa lovo veti aꞌninguꞌ molo-nedelesa ogane.
LUK 22:49 Neꞌmine lo lavo aꞌmine Izesuꞌ neida makaꞌ minave nete eveneꞌ aniꞌ nene mo Izesuꞌni dalisa nave li mo ningi gilii tiꞌ li laniꞌ: Guvetesi ve, Bainati mitedunuꞌ nene ha ngebelelobe.
LUK 22:50 Neꞌmine li nilavo hamoliꞌmo oteko evenetoꞌ medelo mino Oꞌmoso initeꞌ lehize-daaꞌ ive nabaliꞌmi gelekeleꞌ izipe ma belo gala zamela hasaꞌ o hulineꞌ.
LUK 22:51 Neꞌmine ineꞌza Izesuꞌ aza tiꞌ lo lineꞌ: Neꞌmine monovo nene modaze. Gohi amilo. Neꞌmine lo galaloꞌ nene nodo gelo gala nene do lamineꞌ o-dineꞌ.
LUK 22:52 Do lamineꞌ o-do eze analoꞌ dalisa ave evenetoꞌ medeli mini Oꞌmoso initeꞌ lehizi-daaꞌ ave nabasi idoꞌ monoꞌ numuno nabauꞌ gizebo igaꞌ aniꞌ pilisi veti gizebo ve nabasi idoꞌ monoꞌ gizebo vesi nene tiꞌ lo lo-ngimineꞌ: Gizengize ve dalisa igaꞌ adiꞌmine igi bainati miteꞌ di gavososi di nahe.
LUK 22:53 Gamene gamene monoꞌ numuno nabauꞌ linginesi makaꞌ minaaꞌ uneꞌ ma nene lingine neniꞌ okoꞌneloꞌ adine huli ma di gonitoꞌ i-nidisaꞌmaniꞌ ma ve. Neꞌmine isaꞌmaniꞌ ma neineꞌza ee, mo hoꞌ dize dize laaꞌ initeꞌ ma nenako idise nene litiꞌmusoꞌmi meleho Satani neꞌmi amuzo sotoꞌ o neinguꞌ nene mo lengiꞌ hotine nodizize. Lengitokovoꞌ neive lineꞌ.
LUK 22:54 Neꞌmine lavo nelotiꞌ nene Izesuꞌni analoꞌ disa evenetoꞌ medelo mino Oꞌmoso initeꞌ lehize-daaꞌ ive nabaꞌmi numunguko eleꞌmizi vaniꞌ. Eleꞌmizi nivavo Petoloꞌ aza eꞌmete-do hotoꞌile aniꞌ.
LUK 22:55 Aꞌmine dizi minaniꞌ numuno nene vodo vodo ogo minavo olusoꞌ omoꞌ naba minidoꞌ nene eveneꞌ ingine igi oloꞌ gizi lahizi nizavo Petoloꞌ azasi nene ogo vovoꞌninguꞌ mitoꞌ makaꞌ minaniꞌ.
LUK 22:56 Aza nene oloꞌ labanatoꞌ neivo gelekeleꞌ alu maliꞌmo ningo vonuꞌ nobelo tiꞌ lo lineꞌ: Ve meesi nene Izesukisi makaꞌ minasive ma ne neive.
LUK 22:57 Neꞌmine lavo Petoloꞌ aza ataize tiꞌ lo lineꞌ: Veneꞌ gaza nene neze ma ningo gelamu vemuꞌ nolane.
LUK 22:58 Neꞌmine loosa ngomo ma nominivo ve maliꞌmo Petoloꞌni ningo tiꞌ lo lineꞌ: Gazasi nene engiꞌ zuho ma nene nane. Neꞌmine lo lineꞌza Petoloꞌ tiꞌ lo lineꞌ: Ve melo, naza nene engiꞌ zuho minamuve.
LUK 22:59 Neꞌmine lavo gohi ngomo ma aua hamoꞌ neꞌmine nomino ve gohi maliꞌmo amuzonga goloso lo tiꞌ lo lineꞌ: Aza nene nGalilaia nolosi ve neiko azasi nene mo makatoꞌ Izesukisi minasive ne neive.
LUK 22:60 Neꞌmine lo lavo Petoloꞌ tiꞌ lo lineꞌ: Ve melo, gaza nolaineꞌ gamazi nene ma gelamuvoniꞌ gamazi nolane. Neꞌmine lo nolivo aꞌmidoꞌ liteꞌ lo okoloho nolo molaniꞌ.
LUK 22:61 Okoloho nolo molavo Guvelesi ve aza mine velepeꞌ izo Petoloꞌni vonuꞌ bilineꞌ. Vonuꞌ nobilivo Petoloꞌ aza Guvelesi veꞌmo gomuꞌ minada idise okoloho olihe nolo molamivo gamene sitohamo nenikumuꞌ nene ningamu ve ve lo ataize lo-nedelesane lo gomuꞌ lineꞌ gamazi nene gohi gelo
LUK 22:62 heta lemo vo ive nabaloꞌ goloso ineꞌ ve.
LUK 22:63 Neꞌmine ogavo nelotiꞌ nene Izesuꞌ analoꞌ di minave nete nene golo izi goboni mili-di bili minaniꞌ.
LUK 22:64 Idoꞌ veleloꞌ nene lavolavodunuꞌ liki hiti-mikisasi tiꞌ li longoꞌ i-di laniꞌ: Nogibilive nene zaho nolihe. Gaza nene polohetelite laaꞌ adiꞌmine ogo lo sotoꞌ ogo lo-lemevo.
LUK 22:65 Neꞌmine li-dii divi ledivika li-di gamazi goloso palasa vaiꞌ goloso li-di minaniꞌ ve.
LUK 22:66 Neꞌmine li-di nizavo goꞌ lavo Zuda veti gizebo ve mukiꞌ evenetoꞌ medeli mini Oꞌmoso initeꞌ lehizi-daaꞌ ave nabasi idoꞌ monoꞌ apizi ngimaaꞌ avesi nene kanisole ma minaniꞌ nenako Izesuꞌni nene engiꞌ kanisoleliti numuꞌninguꞌ eleꞌmizi di vi mini tiꞌ li longoꞌ i-daniꞌ:
LUK 22:67 Gaza nene Oꞌmosoꞌmo do luꞌ izelive lo imiselelesa live ma nene nabe. Gaza nemuꞌ lo-lemanivo gelelone. Neꞌmine li laniꞌza aza tiꞌ lo lo-ngimineꞌ: Naza ma lo-lengemeloniꞌ nene mo lamineꞌ laave li ma gili eleꞌvoleꞌ amilisave.
LUK 22:68 Idoꞌ lengiꞌ longoꞌ ma o-lengedeloniꞌ nesi nene mo ngeli li-nimamilisave.
LUK 22:69 Li-nimamilisaniꞌza alingeꞌ nela Oꞌmosolatiꞌ ve gihile neniꞌ nene Oꞌmoso amuzo velotiꞌ lemo gizebo ve naba mino ana hulaaꞌ ida minelesuve.
LUK 22:70 Neꞌmine lavo ingine mukitoꞌ tiꞌ li laniꞌ: Gaza nene mo Oꞌmosoꞌmi gipele nouve nolabe. Olo. Likevo aza tiꞌ lo lo-ngimineꞌ: Langisetine nene mo nilaniꞌ ve.
LUK 22:71 Neꞌmine lavo ingine tiꞌ li laniꞌ: Izesuꞌ monovo goloso do nolingumuꞌ gili nilizaniꞌ aleve gohi ma atoꞌ nene nanimuꞌ asi lo-ngedosa gamazi gohi gelelone. Asiꞌve veleutiꞌ nene mo Oꞌmoso avutoꞌ ineꞌ gamazi lavo laꞌlise mo gelekune.
LUK 23:1 Nelotiꞌ nene ingine mukitoꞌ oti eleꞌmizi Pilatoꞌ neida vaniꞌ.
LUK 23:2 Pilatoꞌ neida vii apiꞌ igi tiꞌ li goniꞌ i-daniꞌ: Me veꞌmo nene Zuda ve leliꞌ aleve ngeleꞌmizo gopo ogo mino takisi moni nesi nene guvelesi ve Kaesaleꞌni imamilo laaꞌ idoꞌ aza nene Oꞌmosoꞌmo leliꞌ Zuda vemuꞌ nimiselelesa live nouve nolineꞌ nene guvelesi ve naba mamuꞌ nolinako mo guvelesi ve naba nouve losa nolive.
LUK 23:3 Neꞌmine likevo Pilatoꞌ aza tiꞌ lo longoꞌ o-dineꞌ: Gaza nene Zuda veti guveꞌinesi ve naba nabe. Olo. Neꞌmine lo longoꞌ o-davo Izesuꞌ aza tiꞌ lo lo-imineꞌ: Mo gasika nene nolaineꞌ ve.
LUK 23:4 Neꞌmine lavo Pilatoꞌ aza nene evenetoꞌ medeli mini Oꞌmoso initeꞌ lehizi-daaꞌ ave nabasi idoꞌ eveneꞌ mukiꞌ nesi tiꞌ lo lo-ngimineꞌ: Naza me veꞌmi lihimemuꞌ viseꞌ uvoniꞌza ma ningamuve.
LUK 23:5 Neꞌmine lavo ingine amuzo mili tiꞌ li laniꞌ: Eveneꞌ mukiꞌ nGalilaia misuboukotiꞌ ogo Zudaia misubouꞌ ogo mo melokisi omo pilivo nene gaꞌine hizo gamazi apize ngemo lovo do sotoꞌ noo-ngimive.
LUK 23:6 Neꞌmine li likevo Pilatoꞌ aza aꞌmine gamazi nene gelo longoꞌ o-ngidineꞌ: Ve me ve nene nGalilaia misuboukotiꞌ ve nehe.
LUK 23:7 Neꞌmine lo longoꞌ o-ngedavo ingine oo likevo Pilatoꞌ aza Helodeꞌ gizebo o minineꞌ misuboukotiꞌ ve neineꞌ neivo mo ningo gelo aꞌmine gameneuꞌ Helodeꞌ nesi nene aꞌmine Zelusalemi numuda omo minineꞌ nenako nemuꞌ Pilatoꞌ aza nene Izesuꞌni nene aꞌmine Helodeꞌ neida imiselavo eleꞌmizi vaniꞌ.
LUK 23:8 Neꞌmine ikevo Helodeꞌ aza nene Izesuꞌnimuꞌ nene gozopotiꞌ gele mino atoliꞌmine suno ma do sotoꞌ ilineꞌ ningelonako lo gala gelo gamene haꞌna Izesuꞌni ma ninguvoo lo geleꞌmo vo minaaꞌ ineꞌ nenako Helodeꞌ aza Izesuꞌni ningo mulunouꞌ lamineꞌ gilineꞌ.
LUK 23:9 Laniteꞌ goloso gelo Helodeꞌ aza Izesuꞌ ogo molo oꞌmo monineꞌ initekumuꞌ nene longoꞌ o-dekaꞌ o-dekaꞌ oꞌmo vo minineꞌza Izesuꞌ nene gamazi hamokisi ma bekimi ogo lo-emamineꞌ.
LUK 23:10 Neꞌmine ogavo evenetoꞌ medeli mini Oꞌmoso initeꞌ lehizi-daaꞌ ave nabasi idoꞌ monoꞌ apizi ngimaaꞌ ave linge masi ingine igi velela oti amuzo goloso mili goniꞌ i-daniꞌ.
LUK 23:11 Neꞌmine i-dikevo Helodeꞌ ve eze ami pilisi veꞌve nete divi lediviꞌ i-di golo izi goboni mili-daniꞌ. Neꞌmine niigi guvelesi ve ma nange. Me izevo li okoꞌnoloꞌ initeꞌ lamineꞌ goloso ma di ngili-dikevo Helodeꞌ neꞌmo gohi Pilatoꞌ neida imiselineꞌ.
LUK 23:12 Idoꞌ gomuꞌ nene Pilatoki Helodeki ingine biluvaꞌ biluvaꞌ igi minasineꞌza aꞌmine Izesuꞌni goniꞌ i-dasineꞌ gamenelotiꞌ nene zogo milasineꞌ ve.
LUK 23:13 Idoꞌ Helodeꞌ aza gohi Pilatoꞌ neida imiselavo Pilatoꞌ aza evenetoꞌ medeli mini Oꞌmoso initeꞌ lehizi-daaꞌ ave nabasi gizebo vesi idoꞌ eveneꞌ linge ma mukikisi do nubo o-ngedo
LUK 23:14 tiꞌ lo lo-ngimineꞌ: Lingine ve mene nenita eleꞌmizi igisa ve mene eveneꞌ gaꞌine hizo lovo do aꞌninguꞌ izaaꞌ neive likevo naza nene lengiꞌ vetidoꞌ mo neꞌmine idoꞌ nilahe lo longoꞌ o-do viseꞌ uvoniꞌ nene lingine giliꞌ nalo. Lingine goniꞌ nii-danguꞌ nene monovo do goloso ineꞌ monovo nene ma ningamoloniꞌ ogave.
LUK 23:15 Idoꞌ naza ve meꞌmo monovo goloso daniꞌ monovoloꞌvemuꞌ viseꞌ ogo ma ningamuvoniꞌ maꞌmine ogo Helodeꞌ ezesi ma ningamosa nene imisele hulave. Aza ma viseꞌ ogo ningidiniko mela imiselavo amidine. Nemuꞌ lingine giliꞌ nalo. Ve me ve nene bele heleloneꞌ votigileloꞌ ogo lihime ma damive.
LUK 23:16 Nemuꞌ nene naza ami ma lo-ngedekuvo ngibilaaꞌ aniꞌ gavosodunuꞌ bilavo bilavo imiselekuvo vilive.
LUK 23:18 Idoꞌ eveneꞌ mukiꞌ ingine mukitoꞌ gekeꞌ li gamazi tiꞌ li laniꞌ: Ve mene bele helo Balabasiꞌni nene hulo heta o-danivo lelita alive li laniꞌ.
LUK 23:19 Aꞌmine Balabasiꞌ nene Zelusalemi numuno ebekuꞌ Loma ngamanila lovo do sotoꞌ ogo evenekisi ma bele helavo di huli galapusouꞌ imikavo minineꞌ ve.
LUK 23:20 Neꞌmino minivemuꞌ nene neꞌmine likevo Pilatoꞌ nene Izesuꞌni haza hulo-dekuvo vilive lo gelo eveneꞌ nene gohi gamazi lo-ngimineꞌza
LUK 23:21 eveneꞌ ingine gama gama gizi tiꞌ li laniꞌ: Lohotoꞌ zaloꞌ belezo, belezo laniꞌ ve.
LUK 23:22 Neꞌmine li likevo Pilatoꞌ aza gomuꞌ gamene sitaꞌ lineꞌ nene gilamavo gohi tiꞌ lo lo-ngimineꞌ: Nanitekumuꞌ lohotoꞌ zaloꞌ belelone. Initeꞌ goloso ineꞌ nene naniteꞌ nolive. Monovo goloso davo bele heleloneꞌ monovoꞌve nene ma nolihe lo viseꞌ uvoniꞌza ma ningo do sotoꞌ amuve. Nemuꞌ nene naza ami ma lo-ngedekuvo ngibilaaꞌ aniꞌ gavosodunuꞌ bilavo bilavo imisele hulolove.
LUK 23:23 Neꞌmine lo lineꞌza eveneꞌ ingine Pilatoꞌ lineꞌ gamazi nene gilahe gilamahe igi mini Izesuꞌ nene mo lohotoꞌ zaloꞌ helelive li mili hiti hitiꞌ igi gekeꞌ gekeꞌ goloso liviꞌ liviꞌ adiꞌmo Pilatoꞌ gamaziꞌve nene ivileꞌ aniꞌ ve.
LUK 23:24 Neꞌmine ogavo Pilatoꞌ aza engiꞌ laniꞌ gamaziloꞌ nene gele ngemo Izesuꞌni bililizave lo lo hukineꞌ ve.
LUK 23:25 Neꞌmine ogo ve ma gomuꞌ Zelusalemi numuno ebekuꞌ lovo do sotoꞌ ogo evenekisi ma bele helavo galapusoloꞌ huli-dikevo minive nene mo galapusolotiꞌ osuꞌ lo lelita alive li lave nene galapusolotiꞌ osuꞌ lo-dosa Izesuꞌni nene engiꞌ luꞌnidoꞌ eꞌmeto ami pilisi veti aꞌninguꞌ molavo di vaniꞌ ve.
LUK 23:26 Neꞌmine ogavo Izesuꞌni nene eleꞌmizi di nivavo ve ma Afilika misubo gaheve Kilene misuboukotiꞌ minive gulive Simoniꞌ aza nene Zelusalemi numuno ebeꞌ hetatiꞌ ogo tauniko dizo voloso adotiꞌ ogo akaloꞌ neivo ningisa Izesuꞌ gehe do vo minineꞌ lohotoꞌ za nene gehe do eꞌmeto alive li gihi-dikevo geho eꞌmeto vineꞌ ve.
LUK 23:27 Neꞌmine igi nivavo eveneꞌ mukiꞌ goloso nene ngeꞌmeti nivavo aꞌminguꞌ veneꞌ ma vaniꞌ nete Izesuꞌni nene mulumo gili-di aꞌnine gesebeꞌ izi ive nama i-diꞌmi eꞌmeti vaniꞌ ve.
LUK 23:28 Neꞌmine iꞌmi nivavo Izesuꞌ nene mine velepeꞌ izo tiꞌ lo lo-ngimineꞌ: Zelusalemi venekizo, nenikumuꞌ nene ive nama ami asi langisetinemukisi idoꞌ lengiꞌ izipahatinemukisivoꞌ nene ive ilo.
LUK 23:29 Idoꞌ lingine neꞌmine ilizaniꞌ nene mene giliꞌ nalo. Gamene ma sotoꞌ olosa neineꞌ sotoꞌ ilinguꞌ nene gohuno venekumukisi izipe gidamaniꞌ venekumukisi idoꞌ izipe amine ngimamaaꞌ naniꞌ venekumukisi nene evenelite tiꞌ li lilisave: Geni naba sotoꞌ o neinguꞌ mene Izipahaꞌine nomivo minaniꞌ neꞌmo nene mo lamineꞌ minikeve li lilisave.
LUK 23:30 Idoꞌ aꞌmine gamene nene evenelite golo nabamuꞌ nene ngutoko lemo molo hite-ledevo idoꞌ golo ngomomuꞌ nene ogo do haleke-ledevo lilizaniꞌ gamene mineleseive.
LUK 23:31 Neꞌmine lo tiꞌ lo lo-ngimineꞌ: Naza neꞌmine noluvoniꞌ nene neꞌmine ma i-nidilizaniꞌ nene naza eveneꞌ lamineꞌ oloꞌ gosohoꞌ neꞌmine minuve ma nene neꞌmine i-nidilisaniꞌza alingeꞌ gamene atoꞌ ma sotoꞌ ilinguꞌ lingine monovo goloso daaꞌ nave oloꞌ gokoꞌ neꞌmine gili minave nene agae, initeꞌ di nadiꞌ i-lingidiꞌ nalizavo.
LUK 23:32 Idoꞌ gizengize ve sitaꞌ ma nesi nene Izesungisi makaꞌ lohotoꞌ zaloꞌ ngibili hililisa ngeleꞌmizi di vaniꞌ ve.
LUK 23:33 Mo ngeleꞌmizi vi ebeꞌ ma gulive Godoꞌine Amuzo ve laaꞌ adoꞌ nene heteli aꞌmidoꞌ nene Izesuꞌni lohotoꞌ zaloꞌ bili badisa idoꞌ gizengize ve sitaꞌ nesi nene ngibili hela hela ana hulaaꞌ idaasi hulamaaꞌ idasi badi-ngidaniꞌ ve.
LUK 23:34 Neꞌmine ikevo [Izesuꞌ nene tiꞌ lo lineꞌ: Ahono, ingine mene igi mili naniꞌ initeꞌ nene gili guni amaze. Lihimeꞌine hulo-ngedezo. Neꞌmine lavo] ingine Izesuꞌ okoꞌnoloꞌ initeꞌ nene zaho dalihe dalihe li geheni ngomo ngomo hulaaꞌ zohiꞌ aniꞌ.
LUK 23:35 Neꞌmine navo eveneꞌ ma nene aꞌmine ngibili badadoꞌ nene oti mini ningi minaniꞌ. Idoꞌ Zuda veti gizebo veꞌine nete nene divi lediviꞌ igi gizeꞌ zohika eikumuꞌ li mini tiꞌ li laniꞌ: Aza nene eveneꞌ do nguꞌ izo do lamineꞌ o-ngedaaꞌ ive ve laniꞌ nenako aza nene leliꞌ do luꞌ izelive lo Oꞌmosoꞌmo imiselelesa live nene eiꞌ neivo ma eiꞌ okoꞌno nene do uꞌ izezo lovo.
LUK 23:36 Neꞌmine likevo ami pilisi ve netesi nene gizeꞌ zohika li golo izi vaini noso ekeseꞌ o vineꞌ nene nalihe li neida di igi imilisa igi
LUK 23:37 tiꞌ li laniꞌ: Gaza nene Zuda veti guveꞌinesi ve naba noo ma nene gasika geiꞌ nene do guꞌ izevo.
LUK 23:38 Idoꞌ lohotoꞌ za veleta nene luhuvo ma tiꞌ li gizikaniꞌ nene bili giꞌmizikaniꞌ: Me ve nene Zuda veti guveꞌinesi ve naba ve.
LUK 23:39 Idoꞌ gizengize ve ngibili badaniꞌ sitakutiꞌ maliꞌmo nene Izesuꞌni dovo ledevoꞌ ogo tiꞌ lo lo-dineꞌ: Gaza nene do luꞌ izelive lo Oꞌmosoꞌmo gimiselelesa live ma nene nane. Olo. Nemuꞌ amuzokasi naneꞌ noloseinako nemuꞌ gasika geiꞌ nene do guꞌ izo idoꞌ lezesi do luꞌ izevo.
LUK 23:40 Neꞌmine lo lineꞌza gizengize ve ma neꞌmo nene elemo tiꞌ lo lo-imineꞌ: Lezesi ezesi nene hamoꞌ oloꞌ nogizuneꞌ nenako gaza neꞌmine gamazi lo-deliningumuꞌ nene Oꞌmosoꞌmo lihime gemeleseinako Oꞌmosomuꞌ golisesi mo gelamabe. Olo.
LUK 23:41 Leze mene libilaniꞌ nene gizengize ogaꞌ usineꞌ lihimete maloꞌ nene apasi nilibilaniꞌ nene mo lisiheꞌ o neive. Idoꞌ ve me ve nene initeꞌ ma do goloso amidoꞌ hazauꞌ nibilave.
LUK 23:42 Neꞌmine losa Izesuꞌni tiꞌ lo lo-imineꞌ: Izesuvo, gaza evenetoꞌ gizebo ilineꞌ amuzo dosa alineꞌ gameneloꞌ nene nenikumuꞌ gelezo.
LUK 23:43 Neꞌmine lavo Izesuꞌ aza tiꞌ lo lo-imineꞌ: Naza mo laminetoꞌ tiꞌ lo nolo-gimuve. Idise mene Okulumoꞌ ebeꞌ gulive Paladisi ebekuꞌ gesi nesi makatoꞌ bizo minelesusive.
LUK 23:44 Neꞌmine lo nolivo holiseꞌ tuvelu (12) kiloku neꞌmine neivo hoꞌ lamivo ebeꞌ mukikuꞌ nene litiꞌmuso ize geseꞌ ogo mine do vo tili (3) kiloku nivengaꞌ ogavo gohi labanaꞌ ilineꞌ ve.
LUK 23:45 Idoꞌ monoꞌ numuno nabauꞌ Oꞌmosoꞌmi kekeize numuno lulo ve li numuno lulo ma lavolavo nabaꞌ nabadunuꞌ izi huki Oꞌmosoꞌmo minaaꞌ inguꞌ dizaaꞌ aka hizi tilikaniꞌ nene belo hoꞌ lo sitaꞌ ogo ngoloꞌ lineꞌ ve.
LUK 23:46 Neꞌmine ogavo Izesuꞌ nene asi naba lo tiꞌ lo lineꞌ: Ahono, neniꞌ voꞌnehaza nene geiꞌ angauꞌ nomuluve. Neꞌmine losa ahuꞌ do dizo nohulo hilineꞌ.
LUK 23:47 Nohilivo ami pilisi veti gizebo ve aza nene sotoꞌ ineꞌ initeꞌ nene ningo Oꞌmosoꞌmi gulive do naba o-do tiꞌ lo lineꞌ: Mo laminetoꞌ me ve ma nene mo eveneꞌ lisiheꞌ minaniꞌ neive.
LUK 23:48 Neꞌmine lo lavo aꞌmine Izesuꞌni bililizaniꞌ ningilisa aꞌmida igi di geseꞌ ave mukiꞌ ingine aꞌmine sotoꞌ ineꞌ initeꞌ nene ningi mulumo naba goloso gili aꞌine gesebeꞌ iziꞌmi iziꞌmi numuꞌnida tineꞌ mili vaniꞌ ve.
LUK 23:49 Idoꞌ neꞌmine navo eiꞌ zogo ve zuho mukikisi nGalilaia misuboukotiꞌ makaꞌ aniꞌ venekisi nene hotoꞌ ile mini aꞌmine sotoꞌ ineꞌ initeꞌ nene ningi minaniꞌ ve.
LUK 23:50 Idoꞌ neꞌmine ikevo ve ma gulive Zoseheꞌ aza nene Zuda veti numuno ebeꞌ ma Alimataiatiꞌ ve minineꞌ. Aza nene eveneꞌ lamineꞌ hehe lo minive Zuda veti kanisoleti muliseutiꞌ ve minineꞌza kanisole linge nete Izesuꞌni belelone li lovo gizi li hukisa aꞌmine niteꞌ igi mili anguꞌ nesi nene gele ngemamineꞌ ve. Asi Oꞌmosoꞌmo evenetoꞌ gizebo ilineꞌ gamene alingumukovoꞌ nene gizebo ogo minaaꞌ ive minineꞌ ve.
LUK 23:52 Aꞌmine ve neꞌmo nene Pilatoꞌ neida vo Izesuꞌ okoꞌnomuꞌ nene nemelive lo longoꞌ ineꞌ ve.
LUK 23:53 Neꞌmine ogavo ha do vo molo-delesane lavo Izesuꞌni nene lohotoꞌ zalotiꞌ apaso do lemo lavolavo laminekuꞌ asabuꞌ izo do vo gonoso galese gehenguꞌ ma goloꞌvati liliꞌ anguꞌ nene eveneꞌ hamokisi ma mili-ngidamanguꞌ apiꞌ ogo molo-dineꞌ ve.
LUK 23:54 Aꞌmine molo-dineꞌ gamene nene holiseꞌ gameneuꞌ nalizaniꞌ nosoꞌ niteꞌ di vaꞌvaꞌ igi mili minaaꞌ gamene Falade minineꞌ nenako engiꞌ holiseꞌ minaaꞌ aniꞌ gamene nene mo alitelesa neivo molo-dineꞌ ve.
LUK 23:55 Neꞌmine neivo nGalilaia misuboukotiꞌ Izesuꞌni eꞌmeti aniꞌ veneꞌ nene Zoseheꞌ aza Izesuꞌni nene do zala molo-delihe li ningilisa eꞌmeti vi aꞌmine gonoso galese nene ningi gonoso molo-dineꞌ nesi nene ninganiꞌ ve.
LUK 23:56 Mo ningisa tineꞌ mili numuꞌnida vi gonoso nene geleso unuvo ogalive li gonosoloꞌ hilaaꞌ aniꞌ uveli ato atoꞌ nene di vaꞌvaꞌ igi minisa holisekuꞌ nene engiꞌ louꞌ gamaziꞌmo lidoꞌ eꞌmeti haza mini gili minaniꞌ ve.
LUK 24:1 Neꞌmine igi mini gili minisa aꞌmine Zuda veti holiseꞌine Salele nene osuꞌ lavo Sadeuꞌ nedengaꞌ holukatiꞌ nene aꞌmine veneꞌ ingine aꞌmine gonosoloꞌ hilaaꞌ aniꞌ uveli di vaꞌvaꞌ igi milaniꞌ ma nene di gonoso galesela vaniꞌ ve.
LUK 24:2 Vi heteli ninganiꞌ nene aꞌmine gonoso galeseliꞌmi veleloꞌ geheni naba di tilikaniꞌ ma nene veleheꞌ mili hulikeniꞌ neivo ningisa
LUK 24:3 ingine aꞌminguꞌ dizi vi ninganiꞌ nene aꞌmine gonoso Izesuꞌ okoꞌnoꞌve nene nomivo ma ningamaniꞌ ve.
LUK 24:4 Ma ningami aꞌminemuꞌ nene gopo gaꞌine gili nizavo aizo, eveneꞌ sitaꞌ ma liteꞌ li sotoꞌ igi veneꞌ minada nene oti minasineꞌ ve. Aꞌmine veti okoꞌnidoꞌ initeꞌ neꞌmo nene veꞌne veꞌne lo minineꞌ ve.
LUK 24:5 Neꞌmine ivo nizasivo veneꞌ ingine golise gili ngehelele noizivo gubiꞌ izi misubouko goꞌine veꞌine nihulavo ve sitaꞌ ingine tiꞌ li li-ngimasineꞌ: Velesi neivemuꞌ nene hilavetinguꞌ mene nanimuꞌ viseꞌ nave.
LUK 24:6 Aza nene meuꞌ nomineꞌza asi mo kululuꞌ izo otave. Idoꞌ lingine nGalilaia misubouko velesi ha mino tiꞌ lo lo-lingimineꞌ mamuꞌ giliꞌ nalo:
LUK 24:7 Oꞌmosolatiꞌ ve gihile naza nene monovo goloso daaꞌ aveti aꞌninguꞌ neleꞌmizi milikevo lohotoꞌ zaloꞌ nibili hilikevo gamene sito hamo minosa gohi otelesuve.
LUK 24:8 Neꞌmine lo neineꞌ ma neive li likesivo veneꞌ ingine gomuꞌ aꞌmine neꞌmine lineꞌ mala gohi gaꞌine gilii
LUK 24:9 gonoso galese nene hulii gohi tineꞌ mili numuꞌnida vi eiꞌ Izesuꞌ izipahala zuho leveni engikisi idoꞌ minaniꞌ aleve linge mukiꞌ nesi nene aꞌmine ninganiꞌ initeꞌ mukiꞌ nemuꞌ nene veteteꞌ igi li-ngimi osuꞌ laniꞌ ve.
LUK 24:10 Aꞌmine ninganiꞌ initekumuꞌ aposolo li-ngimaniꞌ veneꞌ nene Zoanaꞌ ve Zakoboꞌ izeleho Maliaꞌ ve idoꞌ Mangadala ebetotiꞌ veneꞌ Maliaꞌ atoꞌ gohi ma ve idoꞌ veneꞌ ma makaꞌ monaniꞌ veneꞌ nete nene li-ngimaniꞌza
LUK 24:11 ingine aposolo nete nene aꞌmine venelite li-ngimaniꞌ gamazi nene abelenga gamazi nilave lii gili eleꞌvoleꞌ amaniꞌ ve.
LUK 24:12 Neꞌmine aniꞌza Petoloꞌ nene oteko lotiꞌ izo gonoso galesela vo hetelo aꞌminguꞌ gubiꞌ izo ningineꞌ nene initeꞌ ma nomivo Izesuꞌ okoꞌnoloꞌ asabuꞌ izaniꞌ lavolavo mavoꞌ nene ha neivo ningo aꞌmine sotoꞌ ineꞌ initekumuꞌ nene gala geleꞌmo geleꞌmo numuda tineꞌ molo vineꞌ ve.
LUK 24:13 Idoꞌ aꞌmine Izesuꞌ galeseuꞌ nomivo ninganiꞌ gameneuꞌ nene Izesuꞌni eꞌmetaveutiꞌ ve sitaꞌ ma Emausi numuda vilisa vasineꞌ. Aꞌmine numuno ebeꞌ nene Zelusalemi numuno ebetotiꞌ leveni kilomita (seveni maili) neꞌmine minineꞌ nenako
LUK 24:14 ingine aꞌmine Emausila vilisa akaloꞌ nivi nivi aꞌmine Izesuꞌni bilaniꞌ gamazi nemuꞌ veteteꞌ igi li voleloꞌ meloꞌ iꞌmi vasineꞌ ve.
LUK 24:15 Neꞌmini gamazi li voleloꞌ meloꞌ igi liꞌmi nivasivo asiꞌve Izesuꞌ nene ogo aꞌminguꞌ makaꞌ vineꞌ ve.
LUK 24:16 Makaꞌ engikisi vineꞌza ve sitaꞌ netisi veꞌnidoꞌ nene hitavo Izesuꞌ ve li ma ningi gilamasineꞌ ve.
LUK 24:17 Ningi gilamasivo aza tiꞌ lo longoꞌ o-ngidineꞌ: Lingine gamazi li voleloꞌ meloꞌ igi li gili ha gele iꞌmi nivasineꞌ nene nani gamazi li voleloꞌ meloꞌ iꞌmi nivasive. Neꞌmine lavo ingine vi oti mini goꞌine veꞌine di muheleꞌ igi minasineꞌ.
LUK 24:18 Neꞌmine igi mini engikutiꞌ gulive Keleopaꞌ ve lo minive neꞌmo Izesuꞌ lineꞌ gamaziloꞌ nene tiꞌ lo lo-imineꞌ: Ve melo, venenga ve Zelusalemi numuno ebekuꞌ imi nizaniꞌ netesi nene aizeꞌ okozoꞌ aꞌmene sotoꞌ ineꞌ initeꞌ nemuꞌ nene mo gili osuꞌ li nizaniꞌza geiꞌ hamoꞌ nene ma gelamabe.
LUK 24:19 Neꞌmine lavo Izesuꞌ aza tiꞌ lo lineꞌ: Initeꞌ naniteꞌ sotoꞌ ive. Neꞌmine lavo ingine tiꞌ li li-imasineꞌ: Laza gamazi lo voleloꞌ meloꞌ ogo loꞌmo nousineꞌ initeꞌ nene Nasalete ve Izesuꞌni mamuꞌ nene nolusive. Aza nene Oꞌmosoꞌmo ningivo idoꞌ eveneꞌ mukilite ningavo polohete mino gamazi laaꞌ idoꞌ initeꞌ ogo molo ogaꞌ ineꞌ nene eleꞌvoleꞌ ogovoꞌ gamazi laaꞌ idoꞌ ogo molo ogaꞌ ineꞌ ve.
LUK 24:20 Neꞌmine ogaꞌ ineꞌza evenetoꞌ medeli mini Oꞌmoso initeꞌ lehizi-daaꞌ ave nabatelitesi idoꞌ leliꞌ gizebo vete netesi nene Izesuꞌni bili hililizave li goniꞌ i-dikevo lohotoꞌ zaloꞌ bili hilaniꞌ ve. Laza nemuꞌ nene loꞌmo nousive.
LUK 24:21 Neꞌmine igi bili hilaniꞌza laza eikumuꞌ nene gomuꞌ tiꞌ lo gele minuneꞌ ve: Eveneꞌ golosolite leliꞌ Isilaeleꞌ aleve gizebo i-lidi minavo gelekeleꞌ o-ngedo minuningutiꞌ aza nene do kuluhize-ledelive ma nene eiꞌ ne neive lo giluneꞌ ve. Idoꞌ gamazi gohi ma nene aꞌmine initeꞌ sotoꞌ idotiꞌ nene gamene sito hamo ogo novineꞌ nenako mo mudise initeꞌ noloseive.
LUK 24:22 Neꞌmine o neineꞌza idise leliꞌ zuhoutiꞌ veneꞌ linge malite igi gamazi ma likevo upuhoꞌ okune. Ingine nene gonoso galesela nedengaꞌ holukatiꞌ vaniꞌ nene
LUK 24:23 aꞌmine gonoso ningami tineꞌ mili numuda igi vamuꞌ neꞌmine veteloꞌ o molavo angeloꞌ ma sotoꞌ i limi tiꞌ li lasive li veteteꞌ igi li-limave: Izesuꞌ nene oto velesi neive.
LUK 24:24 Neꞌmine li veneꞌ nete li-limikevo lelikutiꞌ malite gonoso galesela vi ninganiꞌ nene venelite laniꞌ maꞌmino neivo ninganiꞌza eiꞌ Izesuꞌni nene okoꞌnoloꞌ ma ningamave.
LUK 24:25 Neꞌmine li li-imikesivo aza tiꞌ lo eikumukisi lo-ngimineꞌ: Lingine nene ha eveneꞌ negi nizasive. Lingine polohetelite laniꞌ gamazi mukiꞌ gili eleꞌvoleꞌ igaꞌ ilisanako geni lingibilineꞌ gelavo mini gamazi linge ma nene gili eleꞌvoleꞌ isaꞌmasive.
LUK 24:26 Idoꞌ do lunguꞌ izelive lo Oꞌmosoꞌmo imiselelesa live nene mulumo alumo niteꞌ gehosavoꞌ alingeꞌ nene Guvelesi ve loloꞌ ogo minaaꞌ moꞌmosiꞌve labanaꞌvesi minineꞌ nene daloseive li gizi nizaniꞌ nenako aꞌmine gamaziloꞌ eꞌmeto do gihile izamilineꞌ o neihe.
LUK 24:27 Neꞌmine losa eikumuꞌ monoꞌ godolouꞌ gizikaniꞌ gamazi mukiꞌ nene Moseꞌ gizineꞌ gamazi mukikutiꞌ nene apiꞌ ogo lo ngoloꞌ lo lo-ngemeꞌmo vo polohete mukilite gizangukotikisi nene lo-ngeme osuꞌ lineꞌ ve.
LUK 24:28 Neꞌmino lo-ngeme ngemeꞌ ivo ingine vi aꞌmine velise vilisa asineꞌ numuno ebeꞌ Emausi nene di alitaniꞌ ve. Neꞌmine igi aza nene aꞌmine numuno ebeꞌ nene hulo ivileꞌ oko volosa neivo
LUK 24:29 ve sitaꞌ ingine oꞌve li-di tiꞌ li li-imasineꞌ: Hoꞌ nene mo lemo vo mo litiꞌmuso izelidoꞌ o neize. Gaza nene lelikisi makaꞌ ongalone likesivo gele ngemavo numunguko nene makaꞌ vaniꞌ ve.
LUK 24:30 Mo numunguko dizi vi nosoꞌ niteꞌ nalisa nene mitoꞌ minisa aza beleti ma dosa Oꞌmosola opoꞌni lo apilo ngimineꞌ ve.
LUK 24:31 Idoꞌ ve sitaꞌ nene veꞌnidoꞌ hite minivo Izesuꞌ neive li ma ningamasivo aniꞌ ma neineꞌza beleti nene apilo nongimivo Izesuꞌ neive li ninge lamineꞌ asineꞌ. Mo ninge lamineꞌ nasivo makaꞌ minadotiꞌ nene gopo ogavo gohi ningamasineꞌ ve.
LUK 24:32 Neꞌmine ogavo ingine tiꞌ li li voleloꞌ meloꞌ igi tiꞌ li lasineꞌ: Aza nene akala unida gamazi lo-liminguꞌ nene monoꞌ godoloutiꞌ gamazi lo ngoloꞌ lo lo-lemeꞌmo navo luteuꞌ gulumo liso minivo usineꞌ ma nene eiꞌ neive lo ningelosinako agae, nanimuꞌ ningamusivo.
LUK 24:33 Neꞌmine lisa liteꞌ li oti Zelusalemi numuda tineꞌ mili vasineꞌ ve. Vi Zelusalemi numuda heteli eiꞌ Izesuꞌ izipahala zuho leveni nesi idoꞌ inginesi makaꞌ minaaꞌ ave linge ma nesi nene mulise mili nizavo vi hetelikesivo ingine
LUK 24:34 tiꞌ li ve sitaꞌ nene li-ngimaniꞌ: Guvetesi ve ma nene mo laminetoꞌ hilingutiꞌ otosa Simoniꞌni nene sotoꞌ o emave.
LUK 24:35 Neꞌmine li ingine likevo ve sitaꞌ ingine Emausi numuno akala nivasivo Guvelesi ve aza vovoꞌninguꞌ sotoꞌ o ngemavo ingine eiꞌ ve li ningi gilamasivo makatoꞌ vi numunguꞌ dizi mini beleti gito apilo nongimivo eze ningi hehe lasineꞌ nemuꞌ nene veteteꞌ igi li-ngimasineꞌ ve.
LUK 24:36 Li-ngimikesivo izipahala zuho ingine aꞌmine gamazi nene li voleloꞌ meloꞌ igi nizavo Izesuꞌ asiꞌve nene vovoꞌninguꞌ sotoꞌ ogo ote mino tiꞌ lo lo-ngimineꞌ: Muludinguꞌ nene lamineꞌ hongu lo minivo.
LUK 24:37 Neꞌmine lo lo-ngimineꞌza ingine upuhoꞌ goloso igi ngehelele goloso izavo ingine nene holoso neꞌmine ma noningube li gaꞌine gilaniꞌ ve.
LUK 24:38 Neꞌmine li nigilavo Izesuꞌ aza tiꞌ lo lo-ngimineꞌ: Lingine upuhoꞌ igi lutinguꞌ gopo gatine nigilaniꞌ nene nanimuꞌ nigilave.
LUK 24:39 Lingine idise nininganiꞌ okoꞌne neꞌmino holoso neve okoꞌinesi amuzohazaꞌinesi nene mo nomineꞌ nizaniꞌ nenako nemuꞌ naza mene neniꞌ ma nene nouze. Lingine gizeꞌne aꞌneloꞌ huꞌne mene ningi okoꞌneloꞌ nesi di gili ningi gililo. [
LUK 24:40 Aza neꞌmine lo lo-ngemosa gizene analoꞌ bilaniꞌ hulo nene do ngelebizineꞌ.]
LUK 24:41 Neꞌmine ineꞌza ingine nene lolize izaaꞌ initeꞌ atoliꞌmine goloso nene lelita ngelo sotoꞌ ilihe lisa Izesuꞌ ma nene mo galeseutiꞌ otave li gili eleꞌvoleꞌ ami gopo gaꞌine ha gili nizavo Izesuꞌ aza nosoꞌ niteꞌ ma milahe milamave lo lineꞌ.
LUK 24:42 Neꞌmine lavo izipahala zuho ingine alahaꞌ olotoꞌ miliviꞌ diviꞌ igi gizaniꞌ ma di imikevo
LUK 24:43 dosa ningi nizavo naniꞌ.
LUK 24:44 Idoꞌ Izesuꞌ tiꞌ lo izipahala zuho lo-ngimineꞌ: Naza gomuꞌ linginesi makaꞌ haza minunidoꞌ ma nene tiꞌ lo lo-lengemaaꞌ uvoniꞌ ma neive: Moseꞌ louꞌ gamazi idoꞌ Oꞌmosoꞌmi veletiꞌ gamazi li sotoꞌ igaꞌ avete gizaniꞌ gamaziuꞌ idoꞌ Oꞌmoso di naba i-di laaꞌ aniꞌ nama gizanguꞌ nenikumuꞌ li mili luhuvo gizaniꞌ gamazi nene gihile ize osuꞌ lilidoꞌ o neive lo lo-lengemaaꞌ uvoniꞌ ma neive.
LUK 24:45 Neꞌmine lo lo-ngemo aꞌmine monoꞌ godolouꞌ luhuvo eikumuꞌ gizaniꞌ mamuꞌ nene gili ngoloꞌ li gililizave lo luꞌine gaꞌine do ngolose-ngidineꞌ.
LUK 24:46 Neꞌmine o-ngedo tiꞌ lo lo-ngimineꞌ: Monoꞌ godolouꞌ nene do lunguꞌ izelive lo Oꞌmosoꞌmo imiselelesa live aza nene mulumo alumo gelo helosa gamene sito hamo mino hilingutiꞌ gohi oteleseive li gizi nizaniꞌ ma neive.
LUK 24:47 Idoꞌ neꞌmine ogavosa eveneꞌ nene lutine di velepeꞌ izikevo Oꞌmosoꞌmo lihimetine hulo-lengedeleseive li Zelusalemi numuno ebekutiꞌ apiꞌ igi eiꞌ velemuꞌ li-ngimi ngimiꞌ iꞌmi moni eveneꞌ zuho ato atoꞌ minaniꞌ mukiꞌ nene li-ngimilisave li gizi nizaniꞌ ma neive.
LUK 24:48 Aꞌmine gamazi mukiꞌ nene gihile izeꞌmo novivo lingine ningiꞌmi nivaniꞌ nenako nemuꞌ lengiꞌ nene li sotoꞌ sotoꞌ iliza ve ma nene nizave.
LUK 24:49 Idoꞌ gililo. Meꞌneho aza Sikalahuꞌve nene lehize-lengedelesuve lo lo hukineꞌ maloꞌ nene eꞌmeto imiselekuvo lengita lemeleseive. Lemeleseiha olihe Okulumokutiꞌ lemo do amuzo molo-lengedamidoꞌ nene Zelusalemi numuno ebeꞌ mene liteꞌ li huli mala vami ha gizebo i minilo.
LUK 24:50 Idoꞌ Izesuꞌ aza izipahala zuho nene ngeleꞌmizo Betani numuno ebeꞌ minida vo mino ana do hozi losa noꞌnohoꞌ ize-ngidineꞌ ve.
LUK 24:51 Neꞌmine o-ngedosa mo hulo-ngedavo Oꞌmosoꞌmo Okulumokuko eleꞌmizo do dizo vineꞌ ve.
LUK 24:52 Okulumokuko dizo vavo izipahala zuho ingine di naba i-disa Zelusalemi numuda muluꞌninguꞌ lamineꞌ goloso gili tineꞌ mili vi mini
LUK 24:53 gamene gamene monoꞌ numuno nabauꞌ nene dizi Oꞌmoso opoꞌni li minaaꞌ aniꞌ ve.
JOH 1:1 Oꞌmosoꞌmo initeꞌ mataꞌ olihe do sotoꞌ amineꞌ gameneloꞌ vomine Oꞌmosoꞌmi gamaziloꞌ medelive nene ha minineꞌ ve. Idoꞌ aꞌmine ve nene Oꞌmososi makaꞌ mino azasi Oꞌmoso minineꞌ ve.
JOH 1:2 Ganakutiꞌ Oꞌmoso mine do ada nene azasi makaꞌ minineꞌ ve.
JOH 1:3 Initeꞌ mataꞌ mukiꞌ sotoꞌ aniꞌ nene aꞌmine Oꞌmosoꞌmi gamaziloꞌ medelivelatikovoꞌ sotoꞌ aniꞌ ve. Eitatiꞌ sotoꞌ amineꞌ initeꞌ nene hamokisi ma nomive.
JOH 1:4 Aza nene minevoꞌ minevoꞌ lemeni dameniꞌmi meleho minaavo eveneꞌ laza eitatiꞌ minevoꞌ minevoꞌ lemeni nene dokunivo neꞌmo liviꞌ neꞌmino do labanaꞌ ele-ledaaꞌ neive.
JOH 1:5 Aꞌmine labanaꞌ nene litiꞌmusouꞌ hize labanaꞌ elaaꞌ neivo litiꞌmuso neꞌmo nene ngelo molo hite-desaꞌmivo ha labanaꞌ ele minaaꞌ neive.
JOH 1:6 Eveneꞌ ma Oꞌmosoꞌmo imiselavo aniꞌ nene gulive Zohaneꞌ ve.
JOH 1:7 Aza eveneꞌ maliti gamazi li sotoꞌ igaꞌ ave neꞌmine loloꞌ ogo ogo hetelineꞌ nene aꞌmine labanaliꞌmi melehi gamaziꞌve lo sotoꞌ o ngemavo nemuꞌ eveneꞌ mukiꞌ nene aꞌminemuꞌ gili eleꞌvoleꞌ ilizave losa ogo hetelineꞌ ve.
JOH 1:8 Eiꞌ neve nene aꞌmine labanaliꞌmi meleho gehepeve nene minivoba asi aꞌmine labanaliꞌmi melehinemuꞌ nene lo sotoꞌ sotoꞌ olosa aniꞌ ve.
JOH 1:9 Labanaliꞌmi meleho gehepeve eveneꞌ mukiꞌ lute hize labanaꞌ ele-ledaaꞌ ive nene mo me misubouko navosa lo sotoꞌ ineꞌ ve.
JOH 1:10 Aꞌmine Oꞌmosoꞌmi gamaziloꞌ medelive aza nene me misubouꞌ omo minineꞌza me misubo nesi nene do sotoꞌ ineꞌza me misubouꞌ aleve nete nene eze ningi eiꞌ monovomuꞌ nesi nene mo ningi gilamaniꞌ ve.
JOH 1:11 Eiꞌ misuboꞌveuko nene ogo hetelineꞌza eiꞌ aleve gehepeve nete nene ma gili imamaniꞌ ve.
JOH 1:12 Idoꞌ eveneꞌ ma gili imave mukiꞌ adoꞌ eikumuꞌ lineꞌ gamazi gili eleꞌvoleꞌ igi eitoꞌ gili muꞌmusiꞌ i-dave engiꞌ nene gele ngemavo Oꞌmosoꞌmi izipahala liliꞌ aniꞌ.
JOH 1:13 Idoꞌ Oꞌmosoꞌmi izipahala liliꞌ aniꞌ nene eveneꞌ zuho malotiꞌ sotoꞌ adotiꞌ nene nomive. Idoꞌ veneꞌ vemohoꞌ okoꞌineꞌmo laniteꞌ gilivo ingasidotiꞌ sotoꞌ aniꞌ nene nomive. Idoꞌ ve maliꞌmi luloloꞌ sotoꞌ aniꞌ nomive. Asi mo Oꞌmosoꞌmo gelavo eiꞌ izipahala gihile liliꞌ aniꞌ ve.
JOH 1:14 Idoꞌ Oꞌmosoꞌmi gamaziloꞌ medelive nene leliꞌ okode neꞌmine do otuho eveneꞌ loloꞌ ogosa leliꞌ vovoteuꞌ ogo gamene liꞌnibemukovoꞌ minevo dovoꞌ inguꞌ nene nasahiliꞌ ogaꞌ monovosi idoꞌ Oꞌmosoꞌmi monovo gihile nesi nene ezela vauve elo minivosa amuzoꞌve do sotoꞌ ogo minineꞌ nene mo ninguneꞌ ve. Asiꞌve eiꞌ meleho Oꞌmosoꞌmi vonoloꞌ gipele hamoꞌ gehepeve minineꞌ nenako neꞌmo nene aꞌmine ninguneꞌ amuzoꞌve nene do minineꞌ ve.
JOH 1:15 Eze monovo nene Zohaneꞌ aza tiꞌ lo lo sotoꞌ ineꞌ ve: Neniꞌ meheꞌnela nave nene nenikisi olihe sotoꞌ amuvosa gomukutiꞌ ha minive neineꞌ nenako eiꞌ neniꞌ nene nivileꞌ ogo ve naba neive lo gomuꞌ luhe. Aꞌmine luve ma nene me ve nene neive lo nongelebizo lineꞌ.
JOH 1:16 Ee, ezela nasahiliꞌ ogaꞌ monovo vauve elo minineꞌ ve luvoniꞌ nene aza leze mukiꞌ nene nasahiliꞌ gohi gohi o-lidineꞌ nene aꞌmine monovo ezela vauve elo minidotiꞌ neꞌmine o-lidineꞌ nenako nemuꞌ luve.
JOH 1:17 Idoꞌ me gamazi noluvoniꞌ nene Oꞌmosoꞌmo eiꞌ louꞌ gamaziꞌve lo-emavo lo-limive Moseꞌ nene lo-limineꞌza nasahiliꞌ monovo nesi idoꞌ Oꞌmosoꞌmi monovo gihile nesi do sotoꞌ ive nene Izesuꞌ Kilisitoꞌ do sotoꞌ ineꞌ nenako nemuꞌ nene noluve.
JOH 1:18 Idoꞌ Oꞌmoso nene ve hamolitesi mo kekeꞌ ningamune. Ningamuneꞌza Oꞌmosoꞌmi gipele hamoꞌ minive azasi nene Oꞌmoso mino melehosi makaꞌ bizi minasive neꞌmo Oꞌmoso nene do sotoꞌ ogo lelebizavo ningo gele none.
JOH 1:19 Idoꞌ Zuda veti monoꞌ gizebo ve ingine nene evenetoꞌ medeli mini Oꞌmoso initeꞌ lehizi-daaꞌ avesi idoꞌ Leviꞌ aꞌvopilemoꞌ monoꞌ numuno nabauꞌ gonoloꞌ ve nesi nene Zelusalemi numuno ebetatiꞌ ngimiselikevo vi Zohaneꞌnimuꞌ nene zaho nane li eiꞌ monovomuꞌ longoꞌ i-dikevo eiꞌ monovo nene neꞌmino lo sotoꞌ ogo lo-ngimineꞌ ve.
JOH 1:20 Ingine gamazi ladoꞌ nene ataize livoba mo lamino lo sotoꞌ ogo naza nene Oꞌmosoꞌmo do luꞌ izelive lo imiselelesa live ma nene nomuve lo lo-ngimineꞌ ve.
JOH 1:21 Neꞌmine lo lo-ngemavo tiꞌ li longoꞌ i-daniꞌ: Idoꞌ neꞌmine lo ma gaza nene zaho nane. Gomuꞌ polohete Eliaꞌni nene Oꞌmosoꞌmo gohi imiselelesa live ma ne nabe. Likevo aza nene aꞌmine nomuve lineꞌ. Neꞌmine lavo ingine tiꞌ li laniꞌ: Idoꞌ gaza neꞌmine laniko polohete alingeꞌ ma aloseive lo Moseꞌ live ma nene nabe. Neꞌmine laniꞌza oꞌve lineꞌ.
JOH 1:22 Neꞌmine lavo ingine tiꞌ li gohi longoꞌ i-daniꞌ: Laza nene geiꞌ nene zaho nolibe gaza nemuꞌ lo-lemanivo longoꞌ i-gidilisa limiselave nene vo lo-ngemesoꞌ nenaze. Gaza nene mo zaho nouve laaꞌ nane.
JOH 1:23 Neꞌmine likevo aza tiꞌ lo lo-ngimineꞌ: Polohete Isaiaꞌ tiꞌ lo live ma nene nouve. Ebeꞌ hadivelatiꞌ eveneꞌ maliꞌmo asi naba ma tiꞌ lo nolive: Guvelesi ve alingumuꞌ ve li akaꞌve di lisiheꞌ i-dilo.
JOH 1:24 Idoꞌ neꞌmine lavo Halisaioꞌ monoꞌ laaꞌ avete ngimiselikevo ave
JOH 1:25 ingine longoꞌ i-di tiꞌ li laniꞌ: Gaza monoꞌ noso eveneꞌ noholo-ngedaineꞌ nene gaza Oꞌmosoꞌmo do luꞌ izelive lo imiselelesa live minamo polohete Eliakisi minamo idoꞌ polohete aloseive lave nesi minamaneꞌ nenako nanimuꞌ neꞌmine nane.
JOH 1:26 Neꞌmine likevo Zohaneꞌ aza aꞌmidoꞌ tiꞌ lo lo-ngimineꞌ ve: Neniꞌ nene haza nosodunukovoꞌ holo-ngedaaꞌ nouvoniꞌza
JOH 1:27 lengiꞌ vovotinguꞌ nene ve ma neive. Aꞌmine ve nene lingine ningamaniꞌza aza nene nenitoꞌ medelelesa meheꞌnela nave. Naza aꞌneꞌmine goboni gono do do eiꞌ suuꞌvelotiꞌ nalaꞌve nesi nene apase hulo-delodoꞌ lisiheꞌ amuve lineꞌ ve.
JOH 1:28 Idoꞌ aꞌmine noluvoniꞌ initeꞌ meve nene Zohaneꞌ monoꞌ noso holo-ngedo minaaꞌ idaa hoꞌ dizaaꞌ idaa Zodani noso hela holela Betania numuno ebeta sotoꞌ ineꞌ ve.
JOH 1:29 Ongo goꞌ lavo Izesuꞌ nene monoꞌ noso holo-ngedaaꞌ ive Zohaneꞌ neida navo ningo tiꞌ lo lineꞌ ve: Aizo, ningilo. Lihimetemuꞌ belaaꞌ nouneꞌ sipisipi angaleloꞌ medelo Oꞌmosolatiꞌ minive me misubouꞌ aleveti lihimete apase-ledaaꞌ ive ma ve.
JOH 1:30 Naza neniꞌ meheꞌnela ve ma naniꞌ nene nenikisi olihe sotoꞌ amuvosa gomukutiꞌ ha minive neineꞌ nenako eiꞌ neꞌmo neniꞌ nene nivileꞌ ogo ve naba neive lo gomuꞌ luvoniꞌ ma nene me vemuꞌ luve.
JOH 1:31 Nazasi nene eze ma ningo gelamo minuvoniꞌza naza ogo hetelo eveneꞌ nosodunuꞌ noso holo-ngedeꞌmo ogo minuvoniꞌ nene Isilaeleꞌ aleve ezemuꞌ ningi gililizave losa do sotoꞌ o-delesa uvoniꞌ ve lineꞌ.
JOH 1:32 Idoꞌ Zohaneꞌ tiꞌ lo gamazi ma lo sotoꞌ ineꞌ ve: Naza Oꞌmosoꞌmi Sikalahuꞌ nene nama viluso neꞌmino Okulumokutiꞌ lemo navo ninguve. Aꞌmine nene lemo ogo aꞌmine vela minive.
JOH 1:33 Gomuꞌ nene aꞌmine veꞌmi monovo nene ningo gelamuvoniꞌza eveneꞌ nosodunuꞌ noso holo-ngedeline lo nimiselive neꞌmo tiꞌ lo lo-nimive: Neniꞌ Sikalahuꞌneliꞌmo lemo ogo ezela nominivo ningelinive nene aꞌmine Sikalahuꞌne nedunuꞌ nene noso neꞌmino holo-ngedeleseive.
JOH 1:34 Neꞌmine lo lineꞌ ma nene naza mo ningosa eiꞌ nene mo Oꞌmosoꞌmi gipele ve lo lo sotoꞌ okaꞌ okaꞌ nouve lineꞌ.
JOH 1:35 Ongo goꞌ lavo mino holiseꞌ gamene ogavo Zohaneꞌ nene izipahala zuho sitakisi imi nizavo
JOH 1:36 Izesuꞌ aꞌmida ogo novivo Zohaneꞌ vonuꞌ bele mino tiꞌ lo lineꞌ: Ningilo. Lihimetemuꞌ belaaꞌ nouneꞌ sipisipi angaleloꞌ medelo Oꞌmosolatiꞌ minive ma ve.
JOH 1:37 Neꞌmine lavo izipahala zuho sitaꞌ nene gili Izesuꞌni eꞌmeti vasineꞌ.
JOH 1:38 Eꞌmeti nivasivo Izesuꞌ velepeꞌ izo ningineꞌ nene eꞌmeti nasineꞌ neivo tiꞌ lo lineꞌ: Lingine nanitekumuꞌ nasive. Neꞌmine lavo tiꞌ li li-imasineꞌ: Labi, gaza nene zala minaaꞌ nane (laza aꞌmine gamazi labi nene do velepeꞌ izo tiꞌ lo lolosune: Tisazo).
JOH 1:39 Tiꞌ li likesivo aza tiꞌ lo lo-ngimineꞌ: Lingine igi ningilizo. Neꞌmine lavo nemuꞌ ezesi makaꞌ vi eiꞌ minaaꞌ ineꞌ numuno nene ningi aꞌmida aꞌmine gamene nene ezesi makaꞌ minaniꞌ. Idoꞌ Izesuꞌ numuꞌvela vaniꞌ nene nivengaꞌ fo kilokuloꞌ nene vaniꞌ ve.
JOH 1:40 Aꞌmine Zohaneꞌ lineꞌ gamazi gili Izesuꞌni eꞌmetasive engikutiꞌ ma neve nene Simoniꞌ Petoloꞌ akunolo Adeleaꞌ minineꞌ ve.
JOH 1:41 Aza Izesukisi minosa aꞌmidotiꞌ nene geto vo uvolohine Simoniꞌni viseꞌ ogo ningo tiꞌ lo lo-imineꞌ: Mesiaꞌni nene mo ningekune (laza aꞌmine gamazi Mesiaꞌ nene do velepeꞌ izo tiꞌ lo lolosune: Oꞌmosoꞌmo do luꞌ izelive lo imiselelesa live ve).
JOH 1:42 Neꞌmine lo lo-emo eleꞌmizo Izesuda vineꞌ. Eleꞌmizo vavo Izesuꞌ aza vonuꞌ belo tiꞌ lo lineꞌ: Gaza nene Zohaneꞌ gipele Simoniꞌ ma nene nane. Guliveka Kehaꞌ ve lo nomolo-giduve (aꞌmine gulive Kehaꞌ nene do velepeꞌ izo Petoloꞌ ve laaꞌ noune. Aꞌmine Petoloꞌ neꞌmi monovo nene geheni gavulo ve).
JOH 1:43 Ingi goꞌ lavo Izesuꞌ nene nGalilaia misubouko volove lo gilineꞌ. Neꞌmine lo gelosa Hilipoꞌni viseꞌ ogo ningosa Izesuꞌ tiꞌ lo lo-imineꞌ: Gaza neꞌmeto ano lineꞌ.
JOH 1:44 Idoꞌ aꞌmine Hilipoꞌ nene Adeleaki Petoloki asineꞌ numuno ebeꞌ Betesaida nelotiꞌ ve minineꞌ ve.
JOH 1:45 Neꞌmeto ano lo-davo Hilipoꞌ aza vo Natanieleꞌni ningo tiꞌ lo lo-imineꞌ: Laza Moseꞌ louꞌ gamazi gizingukisi polohetelite gizangukisi ve mamuꞌ li sotoꞌ igi monovoꞌve gizikavo minive ma nene mo ningekune. Aꞌmine ve nene Izesuꞌ Zoseheꞌ gipele Nasalete numuno ebetotiꞌ ave ve.
JOH 1:46 Neꞌmine lavo Natanieleꞌ aza tiꞌ lo lineꞌ: Nasalete numudotiꞌ ve ve labe. Aꞌneꞌmine ebekutiꞌ nene initeꞌ lamineꞌ ma ngelo sotoꞌ ilihe. Neꞌmine lavo Hilipoꞌ aza tiꞌ lo lo-imineꞌ: Gasika ma ogo ningeꞌ nazo.
JOH 1:47 Neꞌmine lo-davo Natanieleꞌ nene ningelesa Izesuꞌ neida vo nohetelivo Izesuꞌ ningo ezemuꞌ tiꞌ lo lineꞌ: Ningilo. Me ve nene Isilaeleꞌ ve gihile eveneꞌ goꞌine izaaꞌ monovo mo kekeꞌ eita nomive ne neive.
JOH 1:48 Neꞌmine lo-davo Natanieleꞌ tiꞌ lo Izesuꞌni longoꞌ o-dineꞌ: Gaza neniꞌ monovo nene nadosa ningo gelane. Neꞌmine lavo Izesuꞌ tiꞌ lo lo-imineꞌ: Hilipoꞌ nene geikumuꞌ viseꞌ ogo olihe ningamivosa gaza nene gohuno zaliꞌmi monovouꞌ nanivo ma nene ninguve.
JOH 1:49 Neꞌmine lavo Natanieleꞌ tiꞌ lo lo-imineꞌ: Tisazo, gaza nene mo Oꞌmosoꞌmi gipele nane. Adoꞌ Isilaeleꞌ aleve leliꞌ Guvetesi ve naba ma nene nane.
JOH 1:50 Neꞌmine lavo Izesuꞌ tiꞌ lo lo-imineꞌ: Gaza idise nenikumuꞌ gele eleꞌvoleꞌ aineꞌ nene gaza gohuno zaliꞌmi monovouꞌ nanivo ninguve luvongumuꞌ nene gele eleꞌvoleꞌ abe. Alingeꞌ nene idise gele eleꞌvoleꞌ aineꞌ initeꞌ nesi nene ivileꞌ ivosa initeꞌ naba goloso ningelesane.
JOH 1:51 Neꞌmine lo aꞌmidoꞌ gohi imineꞌ molo tiꞌ lo lo-imineꞌ: Naza laminetoꞌ gehepeve nolo-lingimuve. Okulumoꞌ huko godavo Oꞌmosoꞌmi angeloꞌve nete nene Oꞌmosolatiꞌ ve gihile nenita limaaꞌ dizaaꞌ igi nizavo ningilisave lineꞌ.
JOH 2:1 Gamene setaꞌ ma ogo vavo sitohamoloꞌ nene nGalilaia misubouꞌ numuno ebeꞌ ma Kana neuꞌ nene ve maloꞌ veneꞌ ma huki mili-di nosoꞌ niteꞌ ni minaniꞌ. Aꞌminguꞌ nene Izesuꞌ izelehosi neivo
JOH 2:2 Izesuꞌ eiꞌ izipahala zuhosi nene vise li-ngimikevo vi minaniꞌ ve.
JOH 2:3 Minanguꞌ nene vaini nosoꞌine nene mo osuꞌ lavo Izesuꞌni nene izeleho tiꞌ lo lo-imineꞌ: Vaini nosoꞌine nene mo osuꞌ laniꞌ lae.
JOH 2:4 Neꞌmine lavo Izesuꞌ tiꞌ lo lo-dineꞌ: Veneꞌ menelo, neniꞌ gono neivosa nolabe. Neꞌmino nomive. Eveneꞌ veꞌnidoꞌ nene neniꞌ monovoꞌne do sotoꞌ oloniꞌ gameneꞌve nene olihe amive.
JOH 2:5 Neꞌmine lineꞌza Izesuꞌ izeleho neꞌmo gelekeleꞌ izipe nene tiꞌ lo lo-ngimineꞌ: Aza lo-lengemelineꞌ gamaziloꞌ nene eꞌmeti ilo.
JOH 2:6 Aꞌmida nene Zuda veti monovoloꞌ eꞌmeti eveneꞌ Oꞌmosomuꞌ gili noso gili hili hiliꞌ igi aꞌine noso izilizangumuꞌ nene geheni somo nabaꞌ naba sigisi nene ma minaniꞌ ve. Aꞌmine somo hamoꞌ hamokuꞌ nene noso tuvedi ngaleni teoti ngaleni neꞌmine ohizi milaaꞌ aniꞌ ve.
JOH 2:7 Idoꞌ Izesuꞌ aꞌmine somouꞌ nene noso ohizi vaiꞌ lilo lo gelekeleꞌ izipe nene lo-ngedavo mo ohizi vaiꞌ goloso likaꞌ likaꞌ aniꞌ.
JOH 2:8 Neꞌmine ikevo Izesuꞌ tiꞌ lo lo-ngidineꞌ: Aꞌmingutiꞌ ma nene ohizi nosoꞌ nitetoꞌ gizebo vela di vi imilo. Lavo ohizi di vi imaniꞌ ve.
JOH 2:9 Imikevo aꞌmine haza noso neꞌmo nene vaini noso loloꞌ ogo neivo nosoꞌ nitetoꞌ gizebo ve neꞌmo aꞌmingutiꞌ ma no gilineꞌ. No gilineꞌza aꞌmine vaini noso ohizi di igi imave gelekeleꞌ izipe engikovoꞌ nene aꞌmine noso sotoꞌ ineꞌ monovo nene gili minaniꞌza nosoꞌ nitetoꞌ gizebo ve aza nene aꞌmine vaini noso nene zalatiꞌ di ahe aꞌminemuꞌ nene ma ningo gelamo mino no gelosa aza veneꞌ dalosa ive nene vise lo-do
JOH 2:10 tiꞌ lo lo-imineꞌ: Eveneꞌ nosoꞌ niteꞌ nanguꞌ nene nosoꞌ niteꞌ gizi vataꞌ igaꞌ ave mukiꞌ nete gomuꞌ nene vaini noso lamineꞌ gehepeve nene ngimikevo vaiꞌ nikevosa alingeꞌ nene vaini noso laniteꞌ amineꞌ ngimaaꞌ naha geiꞌ nene aꞌmineꞌmine ogo gomuꞌ ngemamo idise aꞌnene vaini noso lamineꞌ ma nene do sotoꞌ ogo nongemane lineꞌ.
JOH 2:11 Idoꞌ aꞌmine nGalilaia misubouꞌ Kana numuno ebeꞌ mininguꞌ initeꞌ ineꞌ me ve nene mo ganaꞌ apiꞌ ogosa eiꞌ Izesuꞌ monovoꞌve ngelebizo atoꞌ suno do sotoꞌ ogavo izipahala zuho nete aꞌmine amuzoꞌve nene ningi ezemuꞌ nene gili eleꞌvoleꞌ aniꞌ ve.
JOH 2:12 Aꞌmine nosoꞌ niteꞌ ni minadotiꞌ nene Izesuꞌ aza izelehosi nakunolomotesi idoꞌ izipahala zuhosi Kahanaumi numuda limi vi mini gamene ngomosiꞌ ma ingi moni minaniꞌ ve.
JOH 2:13 Idoꞌ engiꞌ avoꞌningine Oꞌmosoꞌmo iseꞌine izingumuꞌ gili Zuda ve holiseꞌ mini nosoꞌ niteꞌ nalizaniꞌ gamene nene noalitivo Izesuꞌ nene Zelusalemi numuda dizo vineꞌ ve.
JOH 2:14 Dizo vo monoꞌ numuno nabaꞌmi gesi minguꞌ dizo ningineꞌ nene eveneꞌ nete bulumakaꞌ izesi idoꞌ nama viluso neꞌminesi nene Oꞌmoso lehizi-dilizangumuꞌ meni hizilizaniꞌ ve li maketi nimilavo idoꞌ Oꞌmoso lehizi-dilizaniꞌ moni senisimi igaꞌ ave nesi nene gonoꞌine di nizavo ningineꞌ.
JOH 2:15 Ningosa Izesuꞌ aza naladunuꞌ ngebelelineꞌ gavoso ma loloꞌ ogo monoꞌ numuno nabaꞌmi gesi mingutiꞌ nene sipisipi izeꞌinesi bulumakaꞌinesi mukitoꞌ nene ngeleto do hulo heta ogo moni senisimi igi minaveti holomo nene do velepeꞌ izo moniꞌine nene do tululu lo hulo misuboloꞌ o-ngidineꞌ ve.
JOH 2:16 Neꞌmine ogo nama viluso neꞌmine maketi mili minave nene tiꞌ lo lo-ngidineꞌ ve: Lingine meꞌnehi numuno mene maketi numuno neꞌmine loloꞌ i-di minaniꞌ nene huli aꞌmine initeꞌ mukiꞌ nene di heta vilo lo lo-ngidineꞌ.
JOH 2:17 Neꞌmine ogavo izipahala zuho nene Oꞌmosoꞌmo do luꞌ izelive lo imiselelesa liveꞌmi gamazi monoꞌ godolouꞌ tiꞌ li gizikaniꞌ mamuꞌ nene gohi gilaniꞌ: Geiꞌ numunga nene di goloso amavo lamineꞌ minelive lo neniꞌ luꞌne nene oto ngilingiliꞌ ogovoꞌ minaaꞌ neineꞌ nenako neꞌmino minelodiꞌmo initeꞌ mamukisi gele minamolosuve.
JOH 2:18 Idoꞌ Izesuꞌ neꞌmino ngeleto do hulineꞌ nemuꞌ nene Zuda veti eveneꞌ nabaꞌine nete tiꞌ li li-imaniꞌ: Oꞌmosoꞌmo neꞌmine iline lo gele gimineꞌ nene lelebizo atoꞌ suno nene naniꞌmine initeꞌ do sotoꞌ iline.
JOH 2:19 Neꞌmine likevo Izesuꞌ aꞌmidoꞌ do velepeꞌ izo tiꞌ lo lineꞌ: Monoꞌ numuno mene bili di goloso ikevo gamene sitohamo ogo novivo naza gohi do otelesuve.
JOH 2:20 Neꞌmine lavo Zuda veti eveneꞌ nabaꞌine nete aꞌmidoꞌ tiꞌ li li-imaniꞌ: Monoꞌ numuno me ve nene giziviꞌ giziviꞌ igi nizavo kilisimasi foti sigisi (46) ogo novineꞌ nene gaza gamene sitohamo neꞌmi lulouꞌ nene gohi do otelesuve nolabe.
JOH 2:21 Neꞌmine laniꞌza aza nene eiꞌ okoꞌnomuꞌ monoꞌ numunoloꞌ lo molo lineꞌ nenako
JOH 2:22 nemuꞌ nene alingeꞌ hilingutiꞌ otavosa izipahala zuho neꞌmine lingumuꞌ nene gohi gili mini monoꞌ godolouꞌ minineꞌ gamazisi idoꞌ Izesuꞌ lineꞌ gamazi nesi nene gili eleꞌvoleꞌ aniꞌ ve.
JOH 2:23 Aꞌmine avoꞌningine Oꞌmosoꞌmo iseꞌine izingumuꞌ gili holiseꞌ mini nosoꞌ niteꞌ ni minaniꞌ gameneuꞌ nene Izesuꞌ aza Zelusalemi numuno ebekuꞌ mininguꞌ nene eveneꞌ linge mukiꞌ neꞌminete atoꞌ suno daniꞌ nene ningi ezemuꞌ gili eleꞌvoleꞌ aniꞌ ve.
JOH 2:24 Ezemuꞌ gili eleꞌvoleꞌ aniꞌza Izesuꞌ aza luteuꞌ minaaꞌ neineꞌ initeꞌ nemuꞌ nene ningo gelo osuꞌ lo mino eveneꞌ maliꞌmosi aꞌmine eveneꞌ monovotemuꞌ li sotoꞌ igi li-imilizadoꞌ lisiheꞌ amaniꞌ nene aza eveneꞌ mukiliti monovote ningo gele osuꞌ lo neineꞌ nenako nemuꞌ nene gele mino aꞌmine gili eleꞌvoleꞌ i-daniꞌ aleve ingine ezemuꞌ gili eleꞌvoleꞌ adoꞌ nene aza engikumuꞌ gilivo muꞌmusiꞌ amineꞌ ve.
JOH 3:1 Idoꞌ ve ma minineꞌ gulive Nikodemoꞌ nene Halisaioꞌ monoꞌ laaꞌ aveutiꞌ mino Zuda veti kanisoleliti muliseutiꞌ ve mino ve naba neꞌmine minineꞌ.
JOH 3:2 Aꞌmine ve nene Izesuꞌ neida holukaꞌ ogo hetelo tiꞌ lo lineꞌ ve: Tisazo, gaza atoꞌ suno do sotoꞌ ogaꞌ naineꞌ neꞌmine nene ve maliꞌmo Oꞌmoso ezesi mino hize eleꞌ o-damivo nene ngelo ma do sotoꞌ amoloseinako nemuꞌ laza geikumuꞌ nene Oꞌmosoꞌmo tisaꞌ gono daline lo gimiselive ma ne nane losa gele none.
JOH 3:3 Neꞌmine lavo Izesuꞌ tiꞌ lo lineꞌ: Naza mo laminetoꞌ gehepeve tiꞌ lo nolo-gimuve: Eveneꞌ ma ingine Oꞌmosolatiꞌ gohi sotoꞌ amilizaniꞌ nene Oꞌmosoꞌmo gizebo o neinguꞌ nene mo kekeꞌ vi hilami ma ningamilisave.
JOH 3:4 Neꞌmine lavo Nikodemoꞌ tiꞌ lo lo-imineꞌ: Eveneꞌ lodive ikeniꞌ nete gohi nadisa sotoꞌ ilizave. Izeꞌningi muluꞌninguꞌ nene gohi visa ngeli ma sotoꞌ amilisave.
JOH 3:5 Neꞌmine lavo Izesuꞌ tiꞌ lo lo-imineꞌ: Naza mo laminetoꞌ gehepeve tiꞌ lo nolo-gimuve: Ve ma nosolatiꞌ sotoꞌ igisa Oꞌmosoꞌmi Sikalahutatikisi sotoꞌ amilizave ingine nene Oꞌmosoꞌmo gizebo o neinguꞌ nene mo kekeꞌ vi hilamilisave.
JOH 3:6 Eveneꞌ okodeutiꞌ sotoꞌ ogaꞌ neineꞌ initeꞌ nene mo okode neꞌminevoꞌ sotoꞌ ogaꞌ neive. Idoꞌ Sikalahutatiꞌ sotoꞌ ogaꞌ neineꞌ initeꞌ nene mo Sikalahuliꞌmi emeni damenisivoꞌ nene sotoꞌ ogo minaaꞌ neive.
JOH 3:7 Naza Oꞌmosolatiꞌ gohi sotoꞌ ilizadoꞌ o neive noluvoniꞌ nemuꞌ nene upuhoꞌ ogo gaka mukiꞌ gelamozo.
JOH 3:8 Hepeꞌ neꞌmo huhu lo ma volosa gilida nene vaaꞌ neive. Novivo gugu lo vilineꞌ nene ha gelelesaineꞌza nelatiꞌ ogosa nela novive lo ngelo ningo gelamolosane. Aꞌmineꞌmine ogosa Sikalahutatiꞌ sotoꞌ ave nene sotoꞌ aniꞌ aka ne ningamii igi mili igaꞌ naniꞌ initekovoꞌ ningaaꞌ naniꞌ nenako aꞌmine hepeꞌ neꞌminisa nizave.
JOH 3:9 Neꞌmine lavo Nikodemoꞌ aza aꞌmidoꞌ do velepeꞌ izo tiꞌ lo longoꞌ o-dineꞌ: Gaza nolaineꞌ initeꞌ me ve nadiꞌ ogosa sotoꞌ ilingumuꞌ nolane.
JOH 3:10 Neꞌmino longoꞌ o-davo Izesuꞌ tiꞌ lo lo-dineꞌ: Geiꞌ nene Isilaeleꞌ aleve gozopotiꞌ monoꞌ apize ngemeꞌmo ogo minaaꞌ anive ma nene naineꞌza mene initekumuꞌ nene mo gelamaneꞌ neive. Olo.
JOH 3:11 Naza laminetoꞌ gehepeve tiꞌ lo nolo-gimuve: Laza gamazi laaꞌ nouneꞌ nene mo gele minuneꞌ initekumukovoꞌ laaꞌ noune. Idoꞌ laza lo sotoꞌ sotoꞌ ogaꞌ nouneꞌ initeꞌ nene mo ningo gele noneꞌ initekumukovoꞌ nene laaꞌ noune. Neꞌmine ogaꞌ nouneꞌza lingine nene aꞌmidoꞌ ma gili limisaꞌmave.
JOH 3:12 Misubouꞌ initetoꞌ lo molo lo-lengemaaꞌ uvoniꞌ initekumuꞌ nene gili eleꞌvoleꞌ isaꞌmaniꞌ nenako Okulumoꞌ initetoꞌ lo molo lo-lengemeloniꞌ nene nadisa gili eleꞌvoleꞌ ilizave. nGeli ma gili eleꞌvoleꞌ amilisave.
JOH 3:13 Idoꞌ Okulumokuꞌ nene eveneꞌ hamolitesi ma dizi vi ningamave. Ma vi ningamaniꞌza Okulumokutiꞌ limuve Oꞌmosolatiꞌ ve gihile nenikovoꞌ nene aꞌmida mino ninge nouve.
JOH 3:14 Idoꞌ Moseꞌ Isilaeleꞌ aleve ebeꞌ hadiveuꞌ ngeleꞌmizo moninguꞌ nene gosihelite ngibilikaꞌ ngibilikaꞌ navo Moseꞌ aza gosiheꞌ neꞌmi avazahaloꞌ ma loloꞌ ogo za posiloꞌ do otineꞌ nene aꞌmine gosihetoꞌ ningilizave nene hilami veꞌine gizi minilizave losa neꞌmine ineꞌ ve. Idoꞌ neꞌmine ineꞌ neꞌmini Oꞌmosolatiꞌ ve gihile nenikumuꞌ gili eleꞌvoleꞌ ilizave ingine nene minevoꞌ minevoꞌ ngemeni damenisi minilizave losa nenikisi nene aꞌmineꞌmine igi zaloꞌ di oti-nidilizaniꞌ o neive lineꞌ.
JOH 3:16 Idoꞌ Izesuꞌ neꞌmine lineꞌ nene nemuꞌ lineꞌ ve: Oꞌmosoꞌmo me misubouꞌ ve lulo limineꞌ nene atoliꞌmine goloso ogosa lulo limidiꞌmo eiꞌ gipele nene mo hamoꞌ gehepeve minineꞌza ve ma ingine eikumuꞌ gili eleꞌvoleꞌ ilizave nene vi tolovo ami minevoꞌ minevoꞌ ngemeni dameni dalisave losa aꞌmine gipele hamoꞌ nene lehize-lidineꞌ ve.
JOH 3:17 Idoꞌ Oꞌmosoꞌmo aꞌmine gipele me misubouko imiselineꞌ nene me misubouko aleve leliꞌ nene goniꞌ o-ledo lihime lemelive losa imiselineꞌ nevoba asi me misubouꞌ aleve leliꞌ nene do luꞌ izelingumuꞌ ve losa imiselineꞌ ma neive.
JOH 3:18 Idoꞌ ve ma ingine ezemuꞌ gili eleꞌvoleꞌ ilizave nene Oꞌmosoꞌmo lihime ngemamoloseineꞌza ma gili imamilizave nene Oꞌmosoꞌmi gipele hamoꞌ ma ne neive li gili imami ezemuꞌ gili eleꞌvoleꞌ ami haza minaniꞌ nenako nemuꞌ nene Oꞌmosoꞌmo goniꞌine nene gomukutiꞌ gele osuꞌ lo neineꞌ nenako lihime mo ngemelidoꞌ o neive.
JOH 3:19 Idoꞌ lihime ngemelineꞌ monovo nene neꞌminemuꞌ ngemeleseive: Labanaliꞌmi meleho nene me misubouko oganiꞌza me misubouꞌ aleve ingine nene monovo golosovoꞌ igi mili minadiꞌmo labanaliꞌmi lulouꞌ minaakumuꞌ goseleꞌ ngebelavo litiꞌmusouꞌ minaakumuꞌ ngumo helaaꞌ ineꞌ ve.
JOH 3:20 Eveneꞌ mukiꞌ monovo goloso daaꞌ nave nene aꞌmine monovo golosote nene labanaliꞌmo do sotoꞌ ogalive li labanaꞌ nene meheꞌine imisa labanaliꞌmi lulouꞌ nene imi hilisaꞌmave.
JOH 3:21 Neꞌmine isaꞌmaniꞌza monovo gihile laminekovoꞌ igi mili minaaꞌ nave mukiꞌ ingine ogo molo ogaꞌ nouneꞌ initeꞌ mukiꞌ nene Oꞌmosoꞌmovoꞌ hize eleꞌ o-lidivosavoꞌ ogo molo ogaꞌ nouneꞌ nenako aꞌmine nene sotoꞌ ilive li labanaliꞌmi lulouꞌ imi hilaaꞌ nave.
JOH 3:22 Nelotiꞌ nene Izesuꞌ aza izipahala zuhosi Zudaia misubouko vi mini eveneꞌ monoꞌ noso holo-ngedeꞌmo vo minivo minaniꞌ ve.
JOH 3:23 Idoꞌ Zohaneꞌ nene noso vaiꞌ minida Salemi numuno ebeꞌ avita minineꞌ ebeꞌ Ainoni nela nene azasi noso holo-ngedeꞌmo vo neivo eveneꞌ nene ezela igi noso hilikaꞌ hilikaꞌ aniꞌ ve.
JOH 3:24 (Neꞌmine aniꞌ nene Zohaneꞌni nene Helodeꞌ aza olihe galapuso numunguꞌ hulo-damivosa neꞌmine aniꞌ ve.)
JOH 3:25 Idoꞌ neꞌmini noso hili-ngidiꞌmi vi nizasivo Zohaneꞌ izipahala zuhosi idoꞌ Zuda ve masi noso holaakumuꞌ gamazidunuꞌ lovo aniꞌ.
JOH 3:26 Neꞌmine igisa Zohaneꞌ izipahala zuho ingine Zohaneꞌ neida vi tiꞌ li li-imaniꞌ ve: Tisazo, Zodani noso hela holela nanivo ve ma geikisi neivo eze monovomuꞌ lo sotoꞌ sotoꞌ abe. Aꞌmine ve maꞌmo nene eveneꞌ noso noholo-ngidivo eveneꞌ vaiꞌ goloso nene ezela nivave.
JOH 3:27 Neꞌmine likevo Zohaneꞌ aza aꞌmidoꞌ tiꞌ lo lo-ngimineꞌ: Okulumokuꞌ minive Oꞌmoso neꞌmo eveneꞌ ma lehize-damo nolineꞌ initeꞌ nene asiꞌvelatiꞌ amuzo molo ngelo damoloseive.
JOH 3:28 Naza tiꞌ lo luvoniꞌ gamazi ma nene langisetine mo gili nizave: Naza nene Oꞌmosoꞌmo do luꞌ izelive lo imiselelesa live ma ne nomuvoniꞌza asi Oꞌmosoꞌmo ha gomuꞌ molo-deline lo nimiselive ma ne nouve luvoniꞌ ma neive.
JOH 3:29 Idoꞌ izeni ikaniꞌ veneꞌ nene mo vanahidokovoꞌ vaaꞌ neineꞌza veneliꞌmi vanahi zuho neꞌmo aꞌmine venetoꞌ nene gizebo o-do neivo ogo elenahine do vilineꞌ nene gizebo o-do minelive aza izeboloꞌ molamoloseive. Asi elenahine dalosa ogo vise lilineꞌ noloꞌve gelelineꞌ nene olize izeleseive. Aꞌmineꞌmine ogo eveneꞌ nete neniꞌ huli-nidi Izesuda nivangumuꞌ nene naza nolize izo nouvo luꞌneuꞌ nene gulumo lise osuꞌ nolive.
JOH 3:30 Aꞌmine ve nene mineꞌmo dizovoꞌ neivo naza nene mineꞌmo lemo mineloniꞌ o neive.
JOH 3:31 Veletatiꞌ limive neꞌmo nene eveneꞌ mukiꞌ livileꞌ ogo dizo minive neive. Idoꞌ ve ma misuboukotiꞌ mene sotoꞌ ive nene misuboukotiꞌ monovovoꞌ ogo molo mino misubouko initekumukovoꞌ nene laaꞌ neive. Okulumokutiꞌ limive eveneꞌ mukiꞌ livileꞌ ogo dizo minive neꞌmo nene
JOH 3:32 ningaaꞌ neineꞌ initekumukisi idoꞌ gelaaꞌ neineꞌ initekumukisivoꞌ lo sotoꞌ ogaꞌ neineꞌza aꞌmidoꞌ nene ma gili imisaꞌmave.
JOH 3:33 Ne neiha Oꞌmoso neꞌmo eiꞌ Sikalahuꞌve emaaꞌ neineꞌ nene apa niteꞌ ogo emamo mo eme osuꞌ laaꞌ neineꞌ nenako nemuꞌ nene aꞌmine Oꞌmosoꞌmo imiselive nene Oꞌmosoꞌmi gamazi gihilevoꞌ laaꞌ neive. Nemuꞌ nene aꞌmine lo sotoꞌ ogaꞌ neineꞌ initetoꞌ gili imaaꞌ nave ingine gili imaaꞌ nadiꞌmo nene Oꞌmosoꞌmo gamazi gihile laminekovoꞌ laaꞌ neive li aꞌmine gamazi nene hize eleꞌ igaꞌ nave.
JOH 3:35 Meleho neꞌmo nene gipele lulo eme osuꞌ lo mino initeꞌ mataꞌ nene eiꞌ anauꞌ molo osuꞌ lo neive.
JOH 3:36 Idoꞌ gipelemuꞌ gili eleꞌvoleꞌ igaꞌ nave mukiꞌ nete nene minevoꞌ minevoꞌ ngemeni dameni nene mo di nizaha ve ma ingine aꞌmine gipelemuꞌ gili eleꞌvoleꞌ ami gamaziꞌve gili hulaaꞌ ilizave nete nene minevoꞌ minevoꞌ minaaꞌ ngemeni dameni nene ma di ningamilisave. Neꞌmine ilisaniꞌza engikumuꞌ Oꞌmosoꞌmo izeboloꞌ sotoꞌ ineꞌ nene mo engita mine molosa mine do novive.
JOH 4:1 Izesuꞌ nene Zohaneꞌ eveneꞌ do giꞌmizo noso holo-ngidineꞌ nene ivileꞌ ivosa eitoꞌ nene eveneꞌ vaiꞌ goloso do giꞌmizo noso holo-ngedeꞌmo vo neivo Halisaioꞌ monoꞌ laaꞌ ave ingine aꞌminemuꞌ gilangumuꞌ nene Izesuꞌ gelosa
JOH 4:2 Zudaia misubo hulo nGalilaia misubola volosa vineꞌ. Aꞌmine Izesuꞌ eveneꞌ do giꞌmizo noso holo-ngidineꞌ nene asiꞌve Izesuꞌ holo-ngidineꞌ nevoba asi izipahala zuho nete ezeloꞌ medeli mini noso hili-ngidaniꞌ nemuꞌ luve.
JOH 4:4 Izesule nene nGalilaia misubouꞌ vi hetelilisa Samalia misubouꞌ vi hilisa vilizaniꞌ o neivosa aꞌminguꞌ vi hili vaniꞌ ve.
JOH 4:5 Aꞌminguꞌ vilizaniꞌ o neivosa vanguꞌ nene Zakoboꞌ gipele Zoseheꞌni imineꞌ misubo minidoꞌ avita Samalia aleveti numuno ebeꞌ ma Sekemi nela igi hetelaniꞌ ve.
JOH 4:6 Aꞌmida nene avoteho Zakoboꞌ galese elo noso do sotoꞌ ineꞌ nene neivo Izesuꞌ aza aka haꞌna haꞌnatiꞌ ogo abusolo elavo gamene tuvelu (12) kiloku neꞌmidoꞌ nene aꞌmine noso engetineꞌ gahevela nene mitoꞌ minineꞌ ve.
JOH 4:7 Neivo Samalia veneꞌ maliꞌmo noso ohizelesa navo Izesuꞌ tiꞌ lo lo-imineꞌ: Nosomuꞌ nonisize. Noso ma ohize nemezo lineꞌ.
JOH 4:8 Nosomuꞌ vokuꞌ lo-dineꞌ nene izipahala zuho ingine nosoꞌ niteꞌ meni hizi di alisa Sekemi numuno ebekuꞌ vikevosa lineꞌ ve.
JOH 4:9 Idoꞌ Samalia alevesi Zuda alevesi hamoꞌ lapeseuꞌ mo kekeꞌ ma nisaꞌmaniꞌ nenako Izesuꞌ neꞌmine lo vokuꞌ lavo Samalia veneꞌ neꞌmo tiꞌ lo lineꞌ: Gaza Zuda ve minanidike neniꞌ Samalia veneꞌ nene nosomuꞌ vokuꞌ nanimuꞌ nolo-nedane.
JOH 4:10 Neꞌmine lavo Izesuꞌ tiꞌ lo lo-imineꞌ: Gaza Oꞌmosoꞌmo lehize-lengedaaꞌ neineꞌ initekumukisi idoꞌ nosomuꞌ vokuꞌ lo-giduve neniꞌ monovoꞌne nemukisi nene ma ningo gele minaineꞌ neidiniko gaza vokuꞌ laanivo naza nene noso hinipinikutiꞌ dizaaꞌ neineꞌ noso minevoꞌ minevoliꞌmi izelehosi minineꞌ noso nene gimuvodine.
JOH 4:11 Neꞌmine lavo veneꞌ aza tiꞌ lo lo-imineꞌ: Ve melo, gaza noso ohizaaꞌ initeka nene ma do minamaneꞌ nenako idoꞌ galeseuꞌ noso nesi nene homiuꞌ goloso neineꞌ nenako gaza aꞌmine hinipinikutiꞌ minineꞌ noso nemelove laineꞌ nene zaukotiꞌ do nemelesa lane.
JOH 4:12 Leliꞌ avoteho Zakoboꞌ neꞌmo galese mene elo noso do sotoꞌ ogosa azasi idoꞌ izipahalasi idoꞌ ato atoꞌ izeꞌvesi mukitoꞌ ingine aꞌmingutiꞌ nene noso ni minaniꞌ ve. Idoꞌ gaza nene aꞌmine noso do sotoꞌ o-lidive avoteho Zakoboꞌni nene ivileꞌ o nabe.
JOH 4:13 Neꞌmine lavo Izesuꞌ aza aꞌmidoꞌ tiꞌ lo lo-imineꞌ: Mene galeseutiꞌ noso nalizave nene gohi nosomuꞌ ngisivo nikaꞌ nikaꞌ igi minilisave.
JOH 4:14 Neꞌmine ilisaniꞌza neniꞌ ngemeloniꞌ noso nalizave nene gohi aꞌminemuꞌ ngisamivo mini di dizi nizavo aꞌmine ngemeloniꞌ noso minevoꞌ minevoꞌ ogaliꞌmi izeleho neꞌmo engiꞌ luꞌninguꞌ nene hinipiniꞌ neꞌmino dizo mineleseive.
JOH 4:15 Neꞌmine lavo veneꞌ aza tiꞌ lo lineꞌ: Ve melo, gaza nolaineꞌ noso nene naza nosa nosomuꞌ gohi nisamivo mela noso ohizelesa ogaꞌ nouvoniꞌ nene gohi amolongisi aꞌmine noso nene ma nemevo.
JOH 4:16 Neꞌmine lavo Izesuꞌ aza tiꞌ lo lo-imineꞌ: Gaza vo vangahine vise lo-danivo alizo.
JOH 4:17 Neꞌmine lavo veneꞌ aza tiꞌ lo lineꞌ: Naza nene vaꞌneho ma nomive. Lavo Izesuꞌ tiꞌ lo lineꞌ: Gaza vaꞌneho nomive laineꞌ nene mo laminetoꞌ laane.
JOH 4:18 Nanitekumuꞌ ve. Gomuꞌ nene ve faefuloꞌ vaanivo vangamote liliꞌ aniꞌza idise veloꞌ vo naneꞌ nene aka lamineꞌ avutoꞌ ogosa gopo vo naneꞌ neꞌmo nene geiꞌ vangaho gihile loloꞌ amivo gopo ingaaꞌ nasineꞌ nenako nemuꞌ nene vaꞌneho nomive laineꞌ nene mo laminetoꞌ laane.
JOH 4:19 Neꞌmine lavo veneꞌ aza Izesuꞌnimuꞌ tiꞌ lo lineꞌ: Ve nabo, naza ningo giluvoniꞌ geiꞌ nene mo polohete nane lo ningekuve.
JOH 4:20 Nemuꞌ nene Samalia aleve leliꞌ avotemote ingine Gelazimi gololoꞌ mene dizi Oꞌmoso opoꞌni laaꞌ aniꞌza Zuda ve lingine Zelusalemi numuno ebeꞌ neevoꞌ nene Oꞌmoso opoꞌni laaꞌ ebeꞌ neive li laaꞌ naniꞌ nenako mo laminetoꞌ laaꞌ aniꞌ nehe nemuꞌ nene lo-nemezo.
JOH 4:21 Neꞌmine lavo Izesuꞌ tiꞌ lo lineꞌ: Alungoo, naza lo-gemeloniꞌ gamazi nene gelezo. Gamene ma sotoꞌ ilineꞌ nene me gololokisi Zelusalemi numuno ebekukisi nene metehine Oꞌmoso opoꞌni lamiliza gamene ma sotoꞌ oloseive.
JOH 4:22 Lingine Samalia aleve Oꞌmoso opoꞌni laaꞌ naniꞌ nene eze monovomuꞌ nene ma ningi gilamisa opoꞌni laaꞌ nave. Neꞌmine igaꞌ naniꞌza Oꞌmosoꞌmo eveneꞌ do luꞌ izelineꞌ aka nene leliꞌ Zuda velatiꞌ sotoꞌ ineꞌ nenako Zuda ve leliꞌ nene eze monovo ningo gele minosavoꞌ opoꞌni laaꞌ nene noune.
JOH 4:23 Gamene ma alineꞌ o minineꞌ gamene idise mo oganguꞌ mene luꞌine laminetotiꞌ Oꞌmoso opoꞌni laaꞌ ave ingine eiꞌ Sikalahuꞌve neꞌmo ngelebizelineꞌ monovo gihilelotikovoꞌ nene opoꞌni lilizave. Neꞌmine noluvoniꞌ nene meꞌneho Oꞌmoso aza aꞌmine neꞌmine monovolotiꞌ opoꞌni lilizavemuꞌ nene viseꞌ ogo minaaꞌ neineꞌ nenako nemuꞌ ne luve.
JOH 4:24 Oꞌmosoꞌmi emeni dameni nene Sikalahuꞌ neꞌmine neineꞌ nenako eiꞌ Oꞌmoso opoꞌni lilizave nete eiꞌ Sikalahuꞌve neꞌmo ngelebizelineꞌ monovo gihilelotikovoꞌ nene opoꞌni lilizadoꞌ o neive.
JOH 4:25 Neꞌmine lavo veneꞌ aza tiꞌ lo lo-imineꞌ: Oꞌmosoꞌmo do luꞌ izelive lo imiselelesa live ve lave nene mo aloseive likevosa naza nene mo aloseive lo gele nouve. Aza ogo initeꞌ mukikumuꞌ nene lo sotoꞌ ogo lo-lemeleseive.
JOH 4:26 Lavo Izesuꞌ tiꞌ lo lo-imineꞌ: Gamazi nolo-gimuve neniꞌ nene aꞌmine ve ne nouve.
JOH 4:27 Neꞌmine nolivo izipahala zuho ingine nosoꞌ nitetoꞌ vadotiꞌ tineꞌ mili igi heteli ninganiꞌ nene veneꞌ masi gamazi li minasineꞌ ningi gopo gaꞌine gilaniꞌ. Gopo gaꞌine gilaniꞌza izipahala zuho ingine engikumuꞌ nene gaza nani dalosa nane idoꞌ veneꞌ mene nanitekumuꞌ gamazi nolo-emane li aꞌneꞌmine igi longoꞌ hamokisi ma i-damaniꞌ ve.
JOH 4:28 Neꞌmine igi nizavo veneꞌ aza noso gomiseꞌve nene aꞌmida huloko aꞌmine Sekemi numuno ebekuꞌ vo eveneꞌ tiꞌ lo lo-ngimineꞌ:
JOH 4:29 Lingine ve ma neniꞌ ogo molo ogaꞌ uvoniꞌ monovo mukiꞌ lo sotoꞌ o-nidive nene ningilizaze. Alo. Aza nene Oꞌmosoꞌmo do luꞌ izelesa kegese-dive Kilisitoꞌ nehe lo gaꞌne sitaꞌ nogiluze. Igi ningiꞌ nalo.
JOH 4:30 Neꞌmine lavo eveneꞌ taunilatiꞌ nene Izesuꞌ neida vaniꞌ ve.
JOH 4:31 Neꞌmine navo izipahala zuho Izesuꞌni tiꞌ li geligelinga li-daniꞌ: Tisazo, nosoꞌ niteꞌ mene do novo li-di minaniꞌ.
JOH 4:32 Neꞌmine aniꞌza aza tiꞌ lo lo-ngimineꞌ: Neniꞌ naloniꞌ nosoꞌ niteꞌne ma neineꞌ nene lingine ma ningi gilamave.
JOH 4:33 Neꞌmine lavo izipahala zuho engikuꞌ tiꞌ li li voleloꞌ meloꞌ igi minaniꞌ: Nosoꞌ niteꞌ ma di-di amahe. Olo.
JOH 4:34 Neꞌmine likevo Izesuꞌ tiꞌ lo lo-ngimineꞌ: Neniꞌ nosoꞌ niteꞌne nene nimiselive eiꞌ luloloꞌ initeꞌ ogo molo mino nimineꞌ gonoꞌve do peleloniꞌ neve nene nosoꞌ niteꞌne ve.
JOH 4:35 Lingine tiꞌ li laaꞌ nave: Ikeꞌni sitaꞌ ve sitaꞌ ve ogo vavosa nosoꞌ niteꞌ dolizelone. Neꞌmine laaꞌ naniꞌza naza tiꞌ lo nolo-lingimuve. Ningiꞌ nalo. Minguꞌ akaꞌmene mo minamuno dolizaatoꞌ vave. Eveneꞌ nenita alisa di nene igi minikeve.
JOH 4:36 Zuho niteꞌ zuhoꞌ avesi idoꞌ nosoꞌ niteꞌ dolizavesi makatokovoꞌ ngolize izilizave lisa minamuno dolizaaꞌ nave ingine meniꞌine mo nidi gonoꞌineꞌmi gihile nene eveneꞌ ingine minevo minevoꞌ ngemeni dameni nene dalizave li di nubo nii-ngidave.
JOH 4:37 Neꞌmine naniꞌ neꞌmo nene evenelite tiꞌ li laaꞌ naniꞌ gamazi ma nene mo gihile izave: Ve malite zuhoꞌ aniꞌ initeꞌ nene ve atolite dolizaaꞌ nave.
JOH 4:38 Lingine zuhoꞌ igi gono damaniꞌ minguꞌ nene vi mine dolizilizave lo lingimiselekuvo ve atolite daniꞌ gonoꞌmi gihile ma nene dalisa nave.
JOH 4:39 Aꞌmine Sekemi numuno ebetotiꞌ Samalia ve mukiꞌ neꞌminete veneꞌ neꞌmo neniꞌ ogo molo ogaꞌ uvoniꞌ monovo mukiꞌ ma nene lo sotoꞌ o-nidave lo lineꞌ gamazi nene giladiꞌmo nene Izesuꞌnimuꞌ gili eleꞌvoleꞌ aniꞌ ve.
JOH 4:40 Idoꞌ ezemuꞌ gili eleꞌvoleꞌ aniꞌ nenako nemuꞌ nene ezela igi hetelisa engikisi makaꞌ minelive li amuzonga li-dikevo aza gamene sitaꞌ engikisi makaꞌ ma minineꞌ ve.
JOH 4:41 Neꞌmine ogo gamazi lo-ngimineꞌ gamaziꞌve giladiꞌmo eveneꞌ gohi vaiꞌ neꞌmine nete imineꞌ mili ezemuꞌ gili eleꞌvoleꞌ aniꞌ ve.
JOH 4:42 Neꞌmine igi veneꞌ nene tiꞌ li li-imaniꞌ: Ezemuꞌ gele eleꞌvoleꞌ uneꞌ nene gomuꞌ geiꞌ gamazi lanidotiꞌ gele eleꞌvoleꞌ uneꞌza idise asiꞌve lineꞌ gamazi giluneꞌ neꞌmo nene gele eleꞌvoleꞌ gehepeve ogosa laza aꞌmine me vemuꞌ giluneꞌ nene misubouko aleve mukiꞌ leliꞌ nene do luꞌ izeleseive lave ma nene mo laminetoꞌ eiꞌ nene neive losa gelekune.
JOH 4:43 Asiꞌve Izesuꞌ gomuꞌ lineꞌ gamazi ma neꞌmino neive: Polohete nene engiꞌ numuꞌine ebeꞌinelotiꞌ aleve nete nene gili ngimami di nabasi ma i-ngidisaꞌmave. Idoꞌ aꞌmineꞌmine igi eiꞌ misuboꞌveuꞌ aleve nene eze gili imami di naba i-damilizaniꞌ o neineꞌ nenako nemuꞌ nene aza Sekemi alevesi minelineꞌ gamene sitaꞌ nene mo osuꞌ lavo aꞌmine numuno ebeꞌ nene hulo aꞌmine misuboꞌve nGalilaia misubouko vineꞌ ve.
JOH 4:45 Neꞌmino ma nenako nGalilaia aleve ma Zelusalemi numuda holiseꞌ mini nosoꞌ niteꞌ ni minada inginesi vi minaniꞌ nenako aꞌmida Izesuꞌ ogo molo minineꞌ initeꞌ nene ninganiꞌ nenako nemuꞌ nene Izesuꞌ nGalilaia misubouko ogo nohetelivo eleꞌmizi lamineꞌ aniꞌ ve.
JOH 4:46 Neꞌmine ikevo Izesuꞌ aza nGalilaia misubouꞌ numuno ebeꞌ ma Kana neuꞌ gomuꞌ haza nosodunuꞌ vaini noso loloꞌ ineꞌ numuno ebeta nene gohi vineꞌ ve. Aꞌmida vo neivo Kahanaumi numuno ebekuꞌ nene guvelesi ve maliꞌmi gonouꞌ ve naba ma minineꞌ. Aꞌmine veꞌmi gipele nene initeꞌ gize do minineꞌ ve.
JOH 4:47 Neꞌmino neivo meleho aza Izesuꞌ nene Zudaia misubo hulo nGalilaia misubouko mene tineꞌ molo ogave laniꞌ nemuꞌ nene gilineꞌ. Neꞌmine ogosa eiꞌ gipele nene mo helaatoꞌ neivo aza Izesuꞌ neida vosa Izesuꞌ lemo ogo do lamineꞌ o-delive lo amuzonga lo-dineꞌ.
JOH 4:48 Neꞌmine lo-davo Izesuꞌ tiꞌ lo lo-imineꞌ: Lingine naza atoꞌ suno golize laaꞌ initeꞌ ma do sotoꞌ okuvo ningamilizaniꞌ nene nenikumuꞌ gili eleꞌvoleꞌ amilisaave.
JOH 4:49 Lavo guvelesi veꞌmi gonouꞌ ve naba neꞌmo tiꞌ lo lo-imineꞌ: Ve nabo, gipeꞌne nene helalize. Lemo volosize. Ano.
JOH 4:50 Neꞌmine lavo Izesuꞌ tiꞌ lo lo-imineꞌ: Gipa nene velesi ha minelize. Numungala vozo. Neꞌmine lavo aꞌmine ve nene Izesuꞌ lo-imineꞌ gamaziloꞌ nene gele eleꞌvoleꞌ ogo numuꞌvela vineꞌ.
JOH 4:51 Neꞌmine ogo olihe numuꞌvela volosa akaloꞌ novivo gelekeleꞌ izipeꞌve malite akala novidoꞌ igi voteneꞌ i-di gipele vele gizingumuꞌ nene li-imaniꞌ.
JOH 4:52 Neꞌmine ikevo umungive nene nani gameneloꞌ lamineꞌ gele nolihe lo aꞌminemuꞌ gelelesa longoꞌ o-ngidineꞌ. Neꞌmine ogavo ingine tiꞌ li li-imaniꞌ: Okoꞌnoloꞌ oloꞌ lineꞌ nene aizeꞌ holiseꞌ vanu kiloku neꞌmidoꞌ nene hulo-dive.
JOH 4:53 Neꞌmine likevo izipeliꞌmi meleho gilineꞌ nene Izesukahoꞌmo gipa nene velesi ha minelive lineꞌ gameneloꞌ gehepeve nene lamineꞌ gelaniꞌ neive lo gelosa azasi eze numuꞌveuꞌ minaaꞌ aniꞌ alevesi mukitoꞌ nene Izesuꞌnimuꞌ gili eleꞌvoleꞌ aniꞌ ve.
JOH 4:54 Idoꞌ Izesuꞌ Zudaia misubo hulo nGalilaia misubouko tineꞌ molo ogosa atoliꞌmine suno do sotoꞌ ineꞌ meꞌmo nene atoꞌ suno nGalilaia misubouꞌ do sotoꞌ ineꞌ nene mo gamene sitaꞌ ineꞌ ve.
JOH 5:1 Nelotiꞌ alingeꞌ nene Zuda velite holiseꞌ mini nosoꞌ niteꞌ naaꞌ aniꞌ gamene ma alitavo Izesuꞌ nene Zelusalemi numuda vineꞌ.
JOH 5:2 Idoꞌ Zelusalemi numuno ebekuꞌ sipisipi dizaaꞌ aniꞌ gateniꞌmi gahevela nene noso ohuno ma minineꞌ nene gulive Zuda veti gamaziꞌningutiꞌ Beꞌsada ve laaꞌ nave. Aꞌmida nene gehenidunuꞌ azibe faefu aꞌmine noso ohuno nene di vodo vodo i-di gizikavo minineꞌ ve.
JOH 5:3 Aꞌmine azibe numunguꞌ nene initeꞌ gizi daniꞌ aleve mukiꞌ, veꞌine likive, idoꞌ gizeꞌine aꞌninguꞌ gebili di minave neꞌmine nene mukiꞌ vaiꞌ minaniꞌ ve. [
JOH 5:4 Ingine aꞌmine noso ohunouꞌ nene Oꞌmosoꞌmi angeloꞌve maliꞌmo gameneloꞌ gameneloꞌ lemo ogo noso nene do moꞌmongoꞌ o-davo aꞌminguꞌ gomuꞌ limive nene gize daniꞌ initeꞌve osuꞌ lo-davo lamineꞌ gelaaꞌ ineꞌ nenako nemuꞌ nene gizebo igi ingi minaaꞌ aniꞌ ve.]
JOH 5:5 Engikutiꞌ ve ma ongo minineꞌ nene kilisimasi teoti eiti (38) neꞌmine initeꞌ gize do minineꞌ ve.
JOH 5:6 Neꞌmino neivo Izesuꞌ aza ningo gamene haꞌnaloꞌ initeꞌ gize do minineꞌ nemukisi nene ningo gelo tiꞌ lo longoꞌ o-dineꞌ: Gaza nene lamineꞌ olove lo gele nabe.
JOH 5:7 Neꞌmine lavo initeꞌ gize dave aza tiꞌ lo lineꞌ: Ve melo, angeloꞌ neꞌmo noso do moꞌmongoꞌ neivo aꞌminguꞌ lemo lamineꞌ olongumuꞌ neleꞌmizi limilizave nene ma nizamavo neꞌmo neniꞌ nene zou zou lo nouvosa ve ma gomuꞌ vive neꞌmovoꞌ nene lamineꞌ ogaꞌ neive.
JOH 5:8 Neꞌmine lavo Izesuꞌ tiꞌ lo lo-imineꞌ: Otezo. Oto aviliseka do geho aka vozo.
JOH 5:9 Neꞌmine lo-davo aꞌmine ve nene aꞌmidoꞌ liteꞌ lo lamineꞌ ogosa aviliseꞌve nene do otosa aka vineꞌ ve. Aꞌmine gameneuꞌ nene holiseꞌ gamene minineꞌ ve.
JOH 5:10 Nemuꞌ nene Zuda ve nete aꞌmine lamineꞌ ive nene tiꞌ li li-daniꞌ: Idise nene holiseꞌ gamene neineꞌ nenako gaza aviliseka do novaineꞌ neꞌmo nene louꞌ gamazite ma nene avutoꞌ nane.
JOH 5:11 Neꞌmine laniꞌza aza do velepeꞌ izo tiꞌ lo lo-ngimineꞌ: Neniꞌ do lamineꞌ o-nidive asiꞌve neꞌmo aviliseka do oto vozo lo-nedavosa nene neꞌmine nouve lineꞌ.
JOH 5:12 Neꞌmine lavo ingine tiꞌ li longoꞌ i-daniꞌ: Gaza aviliseka do oto vozo lo-gidive nene zaho ma neve.
JOH 5:13 Neꞌmine li longoꞌ i-daniꞌza Izesuꞌ nene aꞌmida eveneꞌ mulise minanguꞌ nene gopo ogavo lamineꞌ gilive aza nene eveneꞌ neꞌmo do lamineꞌ o-nidineꞌ ve lo ma ningo gelamineꞌ ve.
JOH 5:14 Neꞌmine ogosa aꞌmine ve nene alingeꞌ monoꞌ numuno nabauꞌ neivo Izesuꞌ ningo tiꞌ lo lo-dineꞌ: Ningezo. Gaza nene mo lamineꞌ ogange. Gomuꞌ goloso ogo minaineꞌ nene ivileꞌ ivosa goloso gehepeve ogalinge. Gaza nene lihimeka hulo gohi damozo.
JOH 5:15 Neꞌmine lo-davosa aꞌmine ve aza vo Zuda ve nene tiꞌ lo lo-ngimineꞌ: Aꞌmine do lamineꞌ o-nidive ma nene Izesuꞌ do lamineꞌ o-nedaniꞌ neive lo lo-ngimineꞌ ve.
JOH 5:16 Idoꞌ Izesuꞌ holiseꞌ gameneuꞌ neꞌmine gono daaꞌ ineꞌ nemuꞌ Zuda veti ve nabaꞌine nete apiꞌ igi elemi biluvaꞌ i-daniꞌ ve.
JOH 5:17 Neꞌmine ikevo Izesuꞌ aza do velepeꞌ izo tiꞌ lo lo-ngimineꞌ: Meꞌneho gono doꞌmo doꞌmo ogo neineꞌ nene idisesi ha do neivo nazasi nene aꞌmineꞌmine ogo gono doꞌmo novuve.
JOH 5:18 Neꞌmine lavo Zuda veti ve nabaꞌine nete Izesuꞌni bililiza akamuꞌ nene gohi amuzo goloso milisa viseꞌ igi minaniꞌ. Idoꞌ neꞌmine aniꞌ nene nanitekumuꞌ ve. Ingine holisekumuꞌ louꞌ milaniꞌ nene Izesuꞌ avutoꞌ ogave li neemukovoꞌ nene bililiza akamuꞌ viseꞌ igi minaniꞌ nevoba asiꞌve Izesuꞌ neꞌmo Oꞌmoso nene neniꞌ meꞌneho gehepeve ve lineꞌ neꞌmo nene eiꞌ Izesuꞌ nene Oꞌmososi do lisiheꞌ ogosa lave liisa nemukisi nene bililisa gohi nabisa amuzo milave.
JOH 5:19 Neꞌmine navo nemuꞌ nene Izesuꞌ aza aꞌmidoꞌ do velepeꞌ izo tiꞌ lo lo-ngimineꞌ: Naza laminetoꞌ tiꞌ lo nolo-lingimuve: Meꞌneho aza naniteꞌ naniteꞌ ogo molo ilihe gipele nazasi nene aꞌmineꞌminevoꞌ ogo, ogo molo minelesuvonako nemuꞌ nene naza luꞌneloꞌ do molo initeꞌ hamokisi ngelo ma amolosuve. Asi meꞌneho ogo molo neineꞌ initekovoꞌ nene ogo molo ogaꞌ nouve.
JOH 5:20 Idoꞌ gamazi mene noluvoniꞌ nene neemuꞌ noluve. Meꞌneho aza gipele neniꞌ nene lulo neme neineꞌ nenako nemuꞌ nene aza ogo molo ogaꞌ neineꞌ initeꞌ mukiꞌ nene nelebize osuꞌ laaꞌ neive. Idoꞌ neꞌmine ogaꞌ neineꞌ nenako nemuꞌ nene lingine upuhoꞌ igi golize lilizave lo idise ogo molo nouvoniꞌ initeꞌ mene ivileꞌ ivosa atoliꞌmine suno naba goloso nelebizavo olosuve.
JOH 5:21 Ee, meꞌneho aza eveneꞌ hilave nene veꞌine gizi minilizave lo do ote-ngedaaꞌ neineꞌ neꞌmino gipele nazasi nene aꞌmineꞌmine ogo neniꞌ gaꞌne giluvoniꞌ aleve mukikumuꞌ nene gohi miniviꞌ aliviꞌ igi minilizave lokuvo gohi miniviꞌ aliviꞌ igi minaaꞌ naniꞌ ma neive.
JOH 5:22 Idoꞌ naza neꞌmine olosuve lo noluvoniꞌ nene nanitekumuꞌ ve. Meꞌneho aza neve eveneꞌ monovoꞌinemuꞌ izeꞌ molo goniꞌ ma o-ngedesaꞌmo aꞌmine neꞌmine gono mukiꞌ nene gipele neniꞌ aꞌneuꞌ molo neive.
JOH 5:23 Aza neꞌmine ineꞌ nene eveneꞌ mukiꞌ ingine meꞌnehine opoꞌni li di naba i-daaꞌ naaniꞌ neꞌmine igi gipele neniꞌ nene nopoꞌni li di naba i-nidilizave losa neꞌmine ineꞌ ve. Idoꞌ gipele neniꞌ nopoꞌni li di naba i-nidamilizave nene nimiselive meꞌnehine nene opoꞌni li di naba i-disaꞌmave.
JOH 5:24 Naza mo laminetoꞌ tiꞌ lo nolo-lingimuve: Ve ma ingine neniꞌ gamaziꞌneloꞌ gili di mini nimiselivemuꞌ gili eleꞌvoleꞌ i-di minilizave nene minevoꞌ minevoꞌ minaaꞌ ngemeni dameni nene mo di tiꞌ ikeve. Aꞌmine ve ingine nene gonitoꞌ vi otami asi luꞌine hele vivo minadotiꞌ nene upuhoꞌ igi veꞌine gizikeve.
JOH 5:25 Ee, naza mo laminetoꞌ tiꞌ lo nolo-lingimuve: Gamene ma naaniꞌ nene eveneꞌ mo luꞌine helavo nizave netesi Oꞌmosoꞌmi gipele neniꞌ noꞌne nene gililisave. Aꞌmine gamene nene mo idisesi ogave. Neꞌmine oganako noꞌne gililizave mukiꞌ nene veꞌine gizilisave.
JOH 5:26 Neꞌmine noluvoniꞌ nene nanitekumuꞌ ve. Meꞌnehi minevoꞌ alevoꞌve nene malatiꞌ damiha asiꞌve nene minevoꞌ alevoꞌ ogaliꞌmi izeleho gehepeve ma ne neive. Idoꞌ aꞌmineꞌmine ogo meꞌneho lavosa gipele nazasi nene eiꞌ neꞌmine mino minevoꞌ alevoꞌ neꞌmi izeleho gehepeve nouve.
JOH 5:27 Idoꞌ naza nene Oꞌmosolatiꞌ eveneꞌ gihile nouvonako nemuꞌ nene naza eveneꞌ goniꞌine gelaaꞌ gono nene daline lo amuzo nemavo nouve.
JOH 5:28 Lingine gamazi memuꞌ nene gatine gopo gilamilo. Gamene ma aliteleseive. Aꞌminguꞌ nene mati matiuꞌ minave mukiꞌ nene neniꞌ gamazi loloniꞌ noꞌne nene gili
JOH 5:29 aꞌmingutiꞌ heta alisave. Ingine monovo lamineꞌ igi mili minave nene otisa minevoꞌ minevoꞌ igi minilisaha monovo goloso igi mili minave ingine nene otisa gonitoꞌ otikevo naza lokuvo mulumo gono dalisave.
JOH 5:30 Idoꞌ neꞌmine oloniꞌ nene neniꞌ luꞌneloꞌ do molo initeꞌ hamokisi ngelo ma amolosuve. Asi meꞌneho lidokovoꞌ nene gelo eꞌmeto goniꞌ gelo izeꞌ molaaꞌ nouve. Idoꞌ neniꞌ luꞌneloꞌ do molo eꞌmetamo nimiseliveꞌmi luloloꞌ do molo eꞌmeto goniꞌ gelo izeꞌ molaaꞌ nouvoniꞌ nene mo lisiheꞌ gehepeve o minaaꞌ neive.
JOH 5:31 Naza neniꞌ monovomuꞌ naꞌniseꞌnelatiꞌ ma lo sotoꞌ sotoꞌ ogo mineloniꞌ nene lingine soza nolihe lamineꞌ nolive. Laza gelamune li gili minilisave.
JOH 5:32 Idoꞌ nenikumuꞌ lo sotoꞌ sotoꞌ ogaꞌ ive nene ma neinako naza eikumuꞌ giluvo nenikumuꞌ lo sotoꞌ sotoꞌ neineꞌ nene mo laminetoꞌ laaꞌ neive losa gele nouve.
JOH 5:33 Lingine monoꞌ noso holo-ngedaaꞌ ive Zohaneꞌ neida eveneꞌ ma vi longoꞌ i-dilizave li ngimiselikevo aza neniꞌ monovoꞌne lo sotoꞌ ogo gamazi gihilevoꞌ lo-lengemavo nigilaniꞌ ma neive.
JOH 5:34 Nenikumuꞌ nene Zohaneꞌ neꞌmine lineꞌza naza nene me misubouꞌ ve malite nenikumuꞌ li sotoꞌ ilizangumuꞌ ve lo engita ma gele medelesaꞌmuvoniꞌza Zohaneꞌ lineꞌ gamazimuꞌ noluvoniꞌ nene lingine aꞌmine gamazi gili eleꞌvoleꞌ ikevosa Oꞌmosoꞌmo do lunguꞌ izelive losa noluve.
JOH 5:35 Zohaneꞌ aza nene lamu ma lo lamineꞌ o mino hize labanaꞌ elo minaaꞌ neineꞌ neꞌmine mino hize labanaꞌ elo gamazi lokaꞌ lokaꞌ neivo aꞌminemuꞌ lingine gilavo lamineꞌ ogavo gamene liꞌnibemuꞌ longolize izi minaniꞌ ma neive.
JOH 5:36 Ne neiha Zohaneꞌ neniꞌ monovoꞌne lo sotoꞌ ineꞌ nene ivileꞌ ivosa neniꞌ monovoꞌne lo sotoꞌ ogo lengelebizaaꞌ neineꞌ initeꞌ gohi ma neive. Aꞌmine nene meꞌneho aza neꞌmine gono doꞌmo vo do peleline lo-nididoꞌ nene ato atoꞌ suno do sotoꞌ ogo gono doꞌmo vo minaaꞌ nouvoniꞌ neꞌmo nene neniꞌ monovo do sotoꞌ ogo lengelebize neivo neꞌmo nene meꞌneho Oꞌmoso neꞌmo nimiselaniꞌ neive li ningi gililizadoꞌ o neive.
JOH 5:37 Idoꞌ aꞌmine nimiselive meꞌneho aza nesi neniꞌ monovoꞌne nene lo sotoꞌ oganiꞌ neiha lingine eiꞌ nolo nene mo kekeꞌ gilami eiꞌ okoꞌnoloꞌ nesi nene ma ningamave.
JOH 5:38 Idoꞌ lingine Oꞌmosoꞌmo imiselive nenikumuꞌ gili eleꞌvoleꞌ amaniꞌ neꞌmo Oꞌmosoꞌmi gamazi lengiꞌ lutinguꞌ minamineꞌ nene do sotoꞌ ogo lelebizave.
JOH 5:39 Idoꞌ lingine monoꞌ godoloutiꞌ gamazi neꞌmo nene minevoꞌ minevoꞌ lengemeni dameni dalizaniꞌ aka nene do sotoꞌ o-ledelihe li aꞌminguꞌ amuzo mili viseꞌ igi minaaꞌ nave. Aꞌmine monoꞌ gamazi nene nenikumuꞌ lo sotoꞌ ogaꞌ neiha
JOH 5:40 nenita minevoꞌ minevoꞌ lengemeni dameni dalone li alisa gilisaꞌmave.
JOH 5:41 Guveꞌne vilingumuꞌ ve lo naza eveneꞌ di naba i-nidilizave lo luꞌninguꞌ hizesaꞌmuvoniꞌza
JOH 5:42 lengiꞌ monovotine nene mo gele nouve. Lutine nene Oꞌmoso imisaꞌmave.
JOH 5:43 Naza nene meꞌneho lavo ezeloꞌ medelosa uvoniꞌza lingine gili nimisaꞌmaha ve ma ingine meꞌneho lamivo angiseꞌine engitoꞌ medeli mini alizaniꞌ nene lingine aꞌmine ve gili ngimilisave.
JOH 5:44 Lingine nene ge do naba o-nede ne do naba o-gede li minilisa laniteꞌ gili mini igaꞌ naha Oꞌmoso eiꞌ hamoꞌ minive neꞌmo do naba o-lengedelineꞌ akaloꞌ nene eꞌmetilisa gilisaꞌmaniꞌ nenako nemuꞌ nene lingine ezemuꞌ nadisa gili eleꞌvoleꞌ ilizave.
JOH 5:45 Nenikumuꞌ nene melehida goniꞌ o-ledeleseive li gilamilo. Lengiꞌ goniꞌ o-lengedelive nene ezemuꞌ hize eleꞌ o-ledelive li gili eleꞌvoleꞌ ave Moseꞌ nene goniꞌ o-lengedeleseive.
JOH 5:46 Idoꞌ mene noluvoniꞌ nene nanitekumuꞌ ve. Moseꞌ aza nenikumuꞌ gizineꞌ nenako eiꞌ gizineꞌ gamazi nene ma gili eleꞌvoleꞌ adiniko nenikumukisi gili eleꞌvoleꞌ adine.
JOH 5:47 Gili eleꞌvoleꞌ adineꞌza eiꞌ gizineꞌ gamazi nene gili eleꞌvoleꞌ amadiꞌmo nene neniꞌ gamaziꞌne nene nadisa gili eleꞌvoleꞌ ilizave. nGeli ma gili eleꞌvoleꞌ amilisave.
JOH 6:1 Idoꞌ nelotiꞌ nene Izesuꞌ aza minineꞌ ebeꞌ nene hulo sipiuꞌ dizo nGalilaia noso ohuno naba gulive ma Tibeliaꞌ noso ohunoloꞌ nene ledo vo helala vineꞌ.
JOH 6:2 Neꞌmino novivo eveneꞌ mukiꞌ goloso nene Izesuꞌ atoꞌ suno do sotoꞌ ogo initeꞌ gizi dave do lamineꞌ o-ngididoꞌ ningadiꞌmo eꞌmeti vaniꞌ ve.
JOH 6:3 Neꞌmini navo Izesuꞌ aza nene gololoꞌ ma dizo vo izipahala zuhosi mitoꞌ minaniꞌ ve.
JOH 6:4 Aꞌmine gameneloꞌ nene Zuda veti avoꞌninge Aigita misubouꞌ minaniꞌ gameneuꞌ Oꞌmosoꞌmo iseꞌine izingumuꞌ gili holiseꞌ mini nosoꞌ niteꞌ naaꞌ aniꞌ gamene nene mo avitoꞌ o minineꞌ ve.
JOH 6:5 Idoꞌ Izesuꞌ vokeneꞌ ogo ningineꞌ nene eveneꞌ mukiꞌ goloso eiꞌ neida navo ningo Hilipoꞌni tiꞌ lo lo-imineꞌ: Eveneꞌ mukiꞌ emesene naaniꞌ neti nosoꞌ niteꞌine nene zalatiꞌ meni hizelone.
JOH 6:6 Izesuꞌ neꞌmine lineꞌ nene aꞌmine aleve do veꞌine molalineꞌ monovomuꞌ nene ha gele neiha ha Hilipoꞌni emenguꞌ molalosamuꞌ nene neꞌmine lineꞌ ve.
JOH 6:7 Neꞌmine lavo Hilipoꞌ aza tiꞌ lo lo-imineꞌ: Moni naba fo hadeti kina (K400) neꞌmine hulo nosoꞌ niteꞌ meni hizesoꞌ nene vo damivo ngomo lasolo pasolo nalizadoꞌ mineleseive.
JOH 6:8 Neꞌmine lavo Izesuꞌ izipahala zuho ma Simoniꞌ Petoloꞌ akunolo Adeleaꞌ aza minosa tiꞌ lo Izesuꞌni lo-imineꞌ:
JOH 6:9 Gipe mene balidunuꞌ loloꞌ aniꞌ sikoni faefusi idoꞌ alahaꞌ ngomo setakisi ma do neineꞌza eveneꞌ mukikuꞌ mene nadosa vo dalive.
JOH 6:10 Neꞌmine lavo Izesuꞌ aza izipahala zuho tiꞌ lo lo-ngimineꞌ: Eveneꞌ nene mitoꞌ minilizaze. Li-ngidilo lineꞌ. Aꞌmida nene guvise lamineꞌ vaiꞌ minidoꞌ eveneꞌ nene mitoꞌ minikevo gataniꞌ nene vemohoꞌ faef tauseni (5,000) neꞌmine minaniꞌ ve.
JOH 6:11 Mitoꞌ minikevo Izesuꞌ aza sikoni nene do Oꞌmosola opoꞌni losa aꞌmine aleve nene ngimineꞌ. Idoꞌ aꞌmineꞌmine ogo alahakisi nene ngimineꞌ ve. Ingine nisa goseleꞌ ilizaniꞌ votigileloꞌ ngimineꞌ.
JOH 6:12 Mukitoꞌ gatuꞌine ogavo nizavo izipahala zuho tiꞌ lo lo-ngimineꞌ: Nosoꞌ niteꞌ linge nene labuluvo ogalize. Lumo sama nene di nubo ilo.
JOH 6:13 Neꞌmine lavo ingine balidunuꞌ loloꞌ aniꞌ sikoni faef neꞌmi lumo sama nosoꞌ niteꞌ navete hulaniꞌ nene di nubo igi gosuvahaꞌ tuvelu goꞌzi vaiꞌ laniꞌ ve.
JOH 6:14 Idoꞌ eveneꞌ ingine Izesuꞌ atoliꞌmine suno ineꞌ nene ningi nemuꞌ tiꞌ li laniꞌ: Me ve nene polohete ma me misubouꞌ aloseive lave ma nene mo laminetoꞌ eiꞌ ne neive.
JOH 6:15 Neꞌmine likevo Izesuꞌ aza ingine Guvetesi ve naba loloꞌ o-delone li igi analoꞌ dalisa minaniꞌ nene mo ningo gelo aꞌmine ebeꞌ nene hulo asiꞌvevoꞌ gohi golola ma dize minineꞌ ve.
JOH 6:16 Izesuꞌ golola dizo neivo nivengaꞌ nomolavo izipahala zuho ingine noso ohuno gahevela limi heteli
JOH 6:17 sipiuꞌ dizi Kahanaumi numuno noso helala minida nene vilisa vaniꞌ. Nivavo litiꞌmuso nene mo izineꞌza Izesuꞌ nene olihe engita ogo giꞌmizamineꞌ ve.
JOH 6:18 Giꞌmizamivo haza nivavo hepeꞌ nene amuzo malehe goloso noilivo noso nene amuzo molo siiꞌ naba goloso olosa ineꞌ.
JOH 6:19 Neꞌmine neivo ingine 5, 6 kilomita (3, 4 maili) neꞌmine sipiuꞌ nivi Izesuꞌ nene noso avileloꞌ lise lise navo ningi ngehelele izavo golise goloso gilaniꞌza
JOH 6:20 aza tiꞌ lo lo-ngimineꞌ: Neniꞌ ma ne nouze. Golise gilamilo.
JOH 6:21 Neꞌmine lavo ingine sipiuꞌ dizelive li gili niimavo aꞌmidoꞌ liteꞌ lo sipi nene mo aꞌmine vilisa gilaniꞌ ebeta noso gahevela nene hetele minineꞌ ve.
JOH 6:22 Gohi goꞌ lavo noso ohuno helala aizetiꞌ ha minaniꞌ aleve mukiꞌ nete ningi gilaniꞌ nene aꞌmida sipi hamokovoꞌ minineꞌ vinguꞌ nene Izesuꞌ aza izipahala zuhosi aꞌminguꞌ dizamivo izipahala zuho engikovoꞌ vi nizave lisa gili minaniꞌ ve.
JOH 6:23 Neꞌmine igi nizavo aꞌmine Izesuꞌ Oꞌmosola opoꞌni lo nosoꞌ niteꞌ do veꞌine molavo ni minaniꞌ ebeꞌ avita nene Tibeliaꞌ numuno ebekutiꞌ sipi ma igi heteli minaniꞌ ve.
JOH 6:24 Minikevo eveneꞌ mukiꞌ aꞌmine ebeta ninganiꞌ Izesuꞌ nene nomivo idoꞌ izipahala zuhosi nizamavo ningi aꞌmine imi minaniꞌ sipiuꞌ nene dizi Kahanaumi numuda Izesuꞌnimuꞌ visetoꞌ vaniꞌ ve.
JOH 6:25 Neꞌmine igi noso ohuno helala vi Izesuꞌni nene ningi tiꞌ li li-imaniꞌ: Tisazo, gaza mela aineꞌ nene naniheꞌ neve. Sipiuꞌ amaneꞌ nenako misubouꞌ nene gaza nadosa geto ogo hetelane laniꞌ ve.
JOH 6:26 Neꞌmine likevo Izesuꞌ aza aꞌmidoꞌ tiꞌ lo lo-ngimineꞌ: Naza laminetoꞌ gehepeve tiꞌ lo nolo-lingiduve: Lingine nenikumuꞌ viseꞌ naniꞌ nene atoꞌ suno duvoniꞌ neꞌmi monovo ningangumuꞌ viseꞌ navoba asi gaꞌnamuꞌ nolingisidoꞌ do vetine molokuvo gatudine ineꞌ mamuꞌ nene mo neꞌminevoꞌ o-ledelihe lisa nene nenikumuꞌ viseꞌ nave.
JOH 6:27 Neꞌmine igi unuvo goloso ogaꞌ neineꞌ nosoꞌ nitekumukovoꞌ nene gono dami asi minevoꞌ minevoꞌ ogo minaaꞌ neineꞌ nosoꞌ niteꞌ minevoꞌ minevoꞌ lengemeni dameni do sotoꞌ o-lengedelingumuꞌ Oꞌmosolatiꞌ ve gihile neniꞌ lengemeloniꞌ nemukovoꞌ nene viseꞌ igaꞌ gono dalo. Idoꞌ neꞌmine nosoꞌ niteꞌ lengemeloniꞌ nene meꞌneho Oꞌmoso asiꞌve nene neniꞌ neꞌmine iline lo amuzo nemo neleꞌmize molaniꞌ nenako nemuꞌ nene neꞌmine olosuve.
JOH 6:28 Neꞌmine lavo ingine tiꞌ li li-imaniꞌ: Oꞌmosoꞌmo gilivo leliꞌ dalonidoꞌ o neineꞌ gono daloneꞌ nene nani gono dalone.
JOH 6:29 Neꞌmine likevo Izesuꞌ tiꞌ lo lo-ngimineꞌ: Oꞌmosoꞌmo gilivo lingine dalizadoꞌ o neineꞌ gono nene neꞌmino neive: Asiꞌve Oꞌmosoꞌmo imiselive nenikumuꞌ nene gili eleꞌvoleꞌ ilizadoꞌ o neive.
JOH 6:30 Neꞌmine lavo ingine tiꞌ li li-imaniꞌ: Idoꞌ nenikumuꞌ gili eleꞌvoleꞌ ilo laineꞌ nenako laza geikumuꞌ gele eleꞌvoleꞌ o-gedesoꞌ nene atoliꞌmine suno naniꞌmine do sotoꞌ oganivosa ningosa gele eleꞌvoleꞌ olone.
JOH 6:31 Idoꞌ avotemote neve nene ebeꞌ hadivela nivanguꞌ Okulumokutiꞌ limineꞌ nosoꞌ niteꞌ gulive mana nangumuꞌ nene gele none. Monoꞌ godolouꞌ nene tiꞌ li gizi nizaniꞌ ma neive: Aza nene nalizave lo Okulumokutiꞌ nosoꞌ niteꞌ ngimineꞌ ma neive. Neꞌmine ineꞌ nenako gaza nene nadiꞌ ilinidoꞌ o neive.
JOH 6:32 Neꞌmine likevo Izesuꞌ aza tiꞌ lo lo-ngimineꞌ: Okulumokutiꞌ nosoꞌ niteꞌ nene lingine gilavo Moseꞌ nene lemave li gilahe. Naza laminetoꞌ nolo-lingimuve. Moseꞌ aza Okulumokutiꞌ nosoꞌ niteꞌ gihile lamineꞌ nene olihe lengemamineꞌ ma neive. Asi Okulumokutiꞌ nosoꞌ niteꞌ gihile lamineꞌ lengemelive nene meꞌneho eiꞌ lengemeleseive.
JOH 6:33 Idoꞌ neꞌmine noluvoniꞌ nene nanitekumuꞌ ve. Okulumokutiꞌ lemo misubouꞌ aleve hize eleꞌ o-lengedo minevoꞌ minevoꞌ minaaꞌ lengemeni dameni lehize-lengedaaꞌ neive nene Oꞌmosolatiꞌ nosoꞌ niteꞌ gihile nenako nemuꞌ nene noluve.
JOH 6:34 Neꞌmine lavo ingine tiꞌ li li-imaniꞌ: Ve melo, gaza neꞌmine loo ma nene aꞌmine nolaineꞌ nosoꞌ niteꞌ nene gamene gamene lemezo.
JOH 6:35 Neꞌmine likevo Izesuꞌ aza tiꞌ lo lo sotoꞌ o ngimineꞌ: Neniꞌ neve nene minevoꞌ minevoꞌ minaaꞌ do sotoꞌ ogaꞌ neineꞌ nosoꞌ niteꞌ ma ne nouve. Neꞌmine nouvoniꞌ nenako ve ma ingine nenita igi giꞌmizi minilizave nene aꞌmine nosoꞌ nitekumuꞌ gohi gaꞌna hilamilisave. Ee, idoꞌ nenikumuꞌ ma gili eleꞌvoleꞌ ilizave nene nosomuꞌ gohi ma ngisamoloseive.
JOH 6:36 Ne neiha mo gomuꞌ lo-lingimuvodiꞌmine igi lingine neniꞌ nene mo ningi nizaha aꞌminesi nene mo gili eleꞌvoleꞌ amave.
JOH 6:37 Meꞌneho neniꞌ nimive mukiꞌ nene nenita alisave. Idoꞌ nenita alizave mukiꞌ nene mo kekeꞌ vasa izo do hulo-ngedamolosuve.
JOH 6:38 Neꞌmine amolosuve noluvoniꞌ nene nanitekumuꞌ ve. Naza Okulumokutiꞌ lemo uvoniꞌ nene naꞌniseꞌne luꞌneloꞌ do molo ogo molo olove losa limuvoba asi nimiselive eiꞌ luloloꞌ do molo ogo molo olove losa lemo omo nouvoniꞌ nenako nemuꞌ nene neꞌmine amolosuve noluve.
JOH 6:39 Aꞌmine nimiseliveꞌmi luloloꞌ ogo molo oloniꞌ nene ma neꞌmino neive: Naza gizebo lamineꞌ okuvo aꞌmine neniꞌ nimingutiꞌ nene hamolitesi ma vi tolovo amavo alingeꞌ gamene nabala nene mukiꞌ gohi do ote-ngedeline losa gele neive.
JOH 6:40 Ee, meꞌneho aza lulouꞌ gele neineꞌ nene gipele neniꞌ ningisa nenikumuꞌ gili eleꞌvoleꞌ ilizave mukiꞌ nene minevoꞌ minevoꞌ minaaꞌ ngemeni dameni ngemanivo di nizavo alingeꞌ gamene nabala nene gohi do ote-ngedelesane losa gele neive.
JOH 6:41 Idoꞌ Izesuꞌ neꞌmine loꞌmo vinguꞌ nene aza neniꞌ neve nene Okulumokutiꞌ limineꞌ nosoꞌ niteꞌ ma nene nouve lineꞌ nemuꞌ nene Zuda ve naba ingine ningedo hangedoka li emenga li
JOH 6:42 tiꞌ li li minaniꞌ: Me ve nene Zoseheꞌ gipele neive. Olo. Izelehingi melehingi nene mo ninge none. Nemuꞌ nene aza Okulumokutiꞌ limuve nolineꞌ nene lamilinako nanimuꞌ nolive.
JOH 6:43 Neꞌmine li nizavo Izesuꞌ aꞌmidoꞌ do velepeꞌ izo tiꞌ lo lo-ngimineꞌ: Lingine lengikuꞌ lihiteheka li ningedo hangedoka li minaniꞌ nene alamilevo.
JOH 6:44 Eveneꞌ ma nenita alizaniꞌ nene haza ma ngeli amilisave. Asi nimiselive meꞌneho neꞌmo do nenita ogavosavoꞌ alisave. Idoꞌ ikevosa gamene nabala nene do ote-ngedelesuve.
JOH 6:45 Monoꞌ godolouꞌ nene polohetelite ma tiꞌ li gizi nizaniꞌ ve: Oꞌmoso neꞌmo evenele mukiꞌ nene apize ngemeleseive. Neꞌmine oloseinako ve ma ingine eiꞌ gamaziꞌve gilisa lo-ngimineꞌ gamazi gili lamineꞌ ave nene nenita igaꞌ nave.
JOH 6:46 Idoꞌ meꞌnehine nene eveneꞌ hamolitesi kekeꞌ mo ningisi amave. Oꞌmosolatiꞌ uve neniꞌ hamoꞌ neꞌmovoꞌ nene meꞌnehine ningo gele nouve.
JOH 6:47 Naza mo laminetoꞌ gehepeve nolo-lingimuve. Gili eleꞌvoleꞌ ilizave mukiꞌ nene minevoꞌ minevoꞌ minaaꞌ ngemeni dameni nene mo di nizave.
JOH 6:48 Neniꞌ neve nene minevoꞌ minevoꞌ minaaꞌ do sotoꞌ ogaꞌ neineꞌ nosoꞌ niteꞌ ma ne nouve.
JOH 6:49 Lengiꞌ avotinge misubo hadivela monanguꞌ nene Okulumokutiꞌ ngemaaꞌ ineꞌ nosoꞌ niteꞌ mana nene nikaꞌ nikaꞌ iꞌmi vi minaniꞌza nesi mo hilaniꞌ ve.
JOH 6:50 Mo hilaniꞌza Okulumokutiꞌ limineꞌ nosoꞌ niteꞌ gihile lamineliꞌmi monovo nene neꞌmino neive: Aꞌmine nosoꞌ niteꞌ ma nalizave nene mo hili osuꞌ lamilisave.
JOH 6:51 Idoꞌ neniꞌ neve nene aꞌmine Okulumokutiꞌ limineꞌ nosoꞌ niteꞌ minevoꞌ minevoꞌ izelehosi minineꞌ initeꞌ ma ne nouve. Nouvonako aꞌmine nosoꞌ nitekutiꞌ ma nalizave nene minevoꞌ minevoꞌ igi minilisave. Neꞌmine ilisanako me misubouꞌ aleve miniviꞌ miniviꞌ igi minilizave lo nenitatiꞌ nosoꞌ niteꞌ ma ngemeloniꞌ nene neniꞌ meꞌmeleꞌne ngemelesuve.
JOH 6:52 Neꞌmine lavo Zuda ve naba ingine engikuꞌ lovo lolize goloso igi tiꞌ li laniꞌ: Ve meꞌmo okoꞌno meꞌmele lengemekuvo nalizave nolineꞌ nene ngelo lemelivoba nadosa lemelesa nolive li laniꞌ.
JOH 6:53 Neꞌmine likevo Izesuꞌ aꞌmidoꞌ tiꞌ lo lo-ngimineꞌ: Naza laminetoꞌ mo tiꞌ lo nolo-lingimuve: Lingine Oꞌmosolatiꞌ ve gihile neniꞌ meꞌmeleꞌne nami idoꞌ vaniseꞌnesi ma namilizaniꞌ nene minevoꞌ minevoꞌ minaaꞌ lengemeni dameni nene lengita ma minamoloseive.
JOH 6:54 Idoꞌ ingine neniꞌ meꞌmeleꞌnesi vaniseꞌnesi ma nalizave nene minevoꞌ minevoꞌ minaaꞌ ngemeni dameni di nizanako alingeꞌ gamene nabaloꞌ nene do ote-ngedelesuve.
JOH 6:55 Neꞌmine noluvoniꞌ nene nanitekumuꞌ ve. Neniꞌ meꞌmeleꞌne nene mo nosoꞌ niteꞌ gihile neivo idoꞌ vaniseꞌne nesi nene mo naaꞌ noso gihile lamineꞌ neineꞌ nenako nemuꞌ nene noluve.
JOH 6:56 Ve ma ingine neniꞌ meꞌmeleꞌnesi vaniseꞌnesi ma nalizave ingine nene nenita mini mili nizavo naza nene inginela mine molo nouve.
JOH 6:57 Nimiselive minevoꞌ minevoꞌ minaaꞌ meleho minive meꞌnehidatiꞌ nene naza amuzo do mino minevoꞌ minevoꞌ ogo minaaꞌ nouvoniꞌ neꞌmine igi neniꞌ okoꞌne nalizave ingine nenitatiꞌ nene amuzo di mini miniviꞌ miniviꞌ igi minilisave.
JOH 6:58 Meve nene Okulumokutiꞌ limineꞌ nosoꞌ niteꞌ gihile mamuꞌ nene noluve. Aꞌmine nosoꞌ niteꞌ nene avotinge nisa hilaniꞌ nosoꞌ niteꞌ neꞌmine nevoba asi aꞌmine mene noluvoniꞌ nosoꞌ niteꞌ nalizave nene hili osuꞌ lami mo miniviꞌ miniviꞌ igi minilisave.
JOH 6:59 Neꞌmine lineꞌ nene Kahanaumi numuda Zuda veti monoꞌ numunguꞌ monoꞌ apize nongemosa lineꞌ ve.
JOH 6:60 Izesuꞌ eiꞌ okoꞌno nalizangumuꞌ lineꞌ nene gili izipahala zuho linge mukiꞌ nete tiꞌ li laniꞌ: Gamazi nolineꞌ mene goseleꞌ gamazi geniꞌvesi nolineꞌ nenako eveneꞌ hamolitesi aꞌmidoꞌ gelo ngelo amoloneꞌ ogave.
JOH 6:61 Neꞌmine li izipahala zuho ingine ningedo hangedoka li minaniꞌ nemuꞌ nene eiꞌ lulouꞌ gelo tiꞌ lo lo-ngimineꞌ: Neꞌmine gamazi luvodiꞌmo nene okodidoꞌ do molahe.
JOH 6:62 Lingine neꞌmine luvoniꞌ nemuꞌ nene ningedo hangedoka li minikeko Oꞌmosolatiꞌ ve gihile naza gomuꞌ minuvoniꞌ ebeta dizo novuvo ningilizaniꞌ nene nadive li gililizave.
JOH 6:63 Okode losuvolotiꞌ ogo molo ogaꞌ nouneꞌ monovote neꞌmo nene lute ma hize eleꞌ osaꞌminako haza okodine losuvolotiꞌ meꞌmeleꞌne naaꞌ neꞌmosi nene lutine ma hize eleꞌ ogo minevoꞌ minevoꞌ minaaꞌ lengemeni dameni do sotoꞌ o-lengedelivoba asi minevoꞌ minevoꞌ minaaꞌ nene Oꞌmosoꞌmi Sikalahuꞌ neꞌmovoꞌ do sotoꞌ o-lengedaaꞌ neive. Idoꞌ neniꞌ noluvoniꞌ gamazi meve nene Sikalahuliꞌmi amuzosi neivosa minevoꞌ minevoꞌ igi minilizaniꞌ aka do sotoꞌ o-lengedelingumuꞌ nene noluve.
JOH 6:64 Neꞌmine o neineꞌza lengikutiꞌ linge ma nizaniꞌ nene nenikumuꞌ olihe gili eleꞌvoleꞌ amavesi nene ha ma nizave. Neꞌmine lo Izesuꞌ lineꞌ nene nanitekumuꞌ ve. Aza nene gomuꞌ akaꞌmilatiꞌ gili eleꞌvoleꞌ amavemukisi idoꞌ biluvaliti aꞌninguꞌ molo-delive nemukisi nene mo ningo gele minineꞌ nenako nemuꞌ nene lineꞌ ve.
JOH 6:65 Idoꞌ neꞌmine lo gohi imineꞌ molo tiꞌ lo lineꞌ: Idoꞌ eveneꞌ ma nenita alizaniꞌ nene haza ma ngeli amilisave. Asi meꞌneho gele ngemavosavoꞌ alisave lo gomuꞌ lo-lingimuvoniꞌ nene lengikutiꞌ linge ma nenikumuꞌ gili eleꞌvoleꞌ amangumuꞌ nene gele minosa lo-lingimuvoniꞌ ve.
JOH 6:66 Neꞌmine lo lidotiꞌ nene eze eꞌmeti monaaꞌ ave linge mukiꞌ nene Izesuꞌni meheꞌine imi huli-di viisa gohi eꞌmeti vamaniꞌ ve.
JOH 6:67 Neꞌmine ikevo nemuꞌ nene Izesuꞌ aza izipahala zuho tuvelu nene tiꞌ lo lo-ngimineꞌ: Linginesi nene huli-nidi vilisa nigilahe. olo.
JOH 6:68 Neꞌmine lavo Simoniꞌ Petoloꞌ aꞌmidoꞌ tiꞌ lo lineꞌ: Guvekasi ve. Minevoꞌ minevoꞌ minaaliꞌmi gamaziꞌve nene geitavoꞌ neineꞌ nenako ve gohi ma zahida vo giꞌmizelone.
JOH 6:69 Gaza nene Oꞌmosoꞌmo eiꞌ gonomuꞌ do kegese-gidive hamoꞌ eitatiꞌ anive ma nene nane lo geikumuꞌ gele eleꞌvoleꞌ ogo gele none.
JOH 6:70 Neꞌmine lavo Izesuꞌ aꞌmidoꞌ tiꞌ lo lo-ngimineꞌ: Naꞌniseꞌne nene lengiꞌ izipahaꞌne zuho tuvelu do kegeso do nenita o-lingiduvoniꞌza aꞌmingutiꞌ hamoꞌ nene Sataniꞌmi zuho gehepeve ma neive.
JOH 6:71 Neꞌmine lineꞌ nene Kelioto ve Simoniꞌ gipele Zudaꞌnimuꞌ lineꞌ ve. Aꞌmine ve nene Izesuꞌ izipahala zuho tuvelu engiꞌ muliseutiꞌ minineꞌza aza nene Izesuꞌni biluvaliti aꞌninguꞌ molo-delive minineꞌ ve.
JOH 7:1 Nelotiꞌ nene Zuda ve nete Izesuꞌni bililisa viseꞌ iꞌmi vi nizaniꞌ nenako nemuꞌ aza Zudaia misubouꞌ nene monelesa gelamo nGalilaia misubouꞌ nene mone mone ogo minineꞌ ve.
JOH 7:2 Neꞌmino neivo Zuda velite azibe mili ingi mini holiseꞌ mini nosoꞌ niteꞌ naaꞌ aniꞌ gamene nene avitoꞌ ogavo
JOH 7:3 Izesuꞌ akunolomote zuho nete tiꞌ li li-daniꞌ: Eveneꞌ ma aza guveꞌne monelive lo gelelive neꞌmo initeꞌ ogo molo ilineꞌ nene halekovoꞌ ogo molo osaꞌmive. Idoꞌ gaza nene atoliꞌmine suno ogaꞌ naineꞌ nenako eveneꞌ mukiliti veꞌnidoꞌ nene vo neꞌmine ogo ngelebizelinge. Ebeꞌ mene hulo izipaha aꞌmida nizaniꞌ nete nene gaza ogaꞌ naineꞌ initeꞌ ningilizangumuꞌ nene Zudaia misubouꞌ nene vozo.
JOH 7:5 Idoꞌ neꞌmine li akunolomote li-daniꞌ nene inginesi eikumuꞌ gili eleꞌvoleꞌ amaniꞌ nenako neꞌmo nene neꞌmine li-daniꞌ ve.
JOH 7:6 Neꞌmine li-dikevo Izesuꞌ aza aꞌmidoꞌ nene tiꞌ lo lineꞌ ve: Naza vo eveneꞌ mukiliti veꞌnidoꞌ neze monovo do sotoꞌ ogo ngelebizeloniꞌ gameneꞌne nene olihe alitamive. Alitamiha lengita nene neꞌmino nomive. Gopo gameneloꞌ nesi neꞌmida nene lingine ha vaakovoꞌ ilisave.
JOH 7:7 Me misubouꞌ monoꞌ gili lamineꞌ amaniꞌ aleve nete nene lengikumuꞌ nene goseleꞌ igi gili goloso i-lingidamilisanako aꞌmida nene ha vilisaha naza nene aꞌmine monoꞌ gili lamineꞌ amaniꞌ aleve nene monovo goloso daaꞌ nave lo lo sotoꞌ ogaꞌ nouvoniꞌ nenako nemuꞌ nene ingine nenikumuꞌ goseleꞌ igi gili goloso i-nidaaꞌ nave.
JOH 7:8 Nemuꞌ lengiꞌ nene aꞌmine nosoꞌ niteꞌ nalizada nene ha dizi vilo. Naza aꞌmine ebeꞌ nabala monovoꞌne do sotoꞌ oloniꞌ gameneꞌne nene olihe amineꞌ nenako nemuꞌ nene aꞌmine nosoꞌ niteꞌ nalizada nene idise dizo vamolosuve.
JOH 7:9 Aꞌmine gamazi nene lo-ngemosa aꞌmine nGalilaia misubouko nene gohi imineꞌ molo minineꞌ ve.
JOH 7:10 Idoꞌ akunolomote ingine Zelusalemi numuda aꞌmine nosoꞌ niteꞌ nalizada nene dizi vikevo Izesuꞌ azasi nene aꞌmida dizo vineꞌ ve. Vineꞌza eveneꞌ veꞌnidoꞌ sotoꞌ ogo vamo halekosa vineꞌ ve.
JOH 7:11 Nemuꞌ nene aꞌmine nosoꞌ niteꞌ nada nene Zuda ve naba ingine nene aꞌmine ve nene zala neve li viseꞌ igi minaniꞌ.
JOH 7:12 Idoꞌ eveneꞌ vaiꞌ di geseꞌ igi minangutiꞌ mukiꞌ neꞌminete nene Izesuꞌnimuꞌ nunungaꞌ tiꞌ li li minaniꞌ: Aza nene eveneꞌ lamineꞌ neive li eveneꞌ linge nete nilavo ma nete nene eveneꞌ mukiꞌ goꞌine izo do goloso neive li laniꞌ ve.
JOH 7:13 Ne neiha Zuda ve nabamuꞌ nene golise gilaniꞌ nenako Izesuꞌnimuꞌ nene gamazi eveneꞌ gililizadoꞌ li sotoꞌ igi eveneꞌ hamolitesi ma lamaniꞌ ve.
JOH 7:14 Idoꞌ aꞌmine nosoꞌ niteꞌ nene niꞌmi vi di goholo naavo Izesuꞌ nene monoꞌ numuno nabauꞌ dizo eveneꞌ nene apize ngemo minineꞌ ve.
JOH 7:15 Neꞌmino neivo Zuda ve naba ingine ningi aizo li tiꞌ li laniꞌ: Ve me ve nene monoꞌ gamazi neꞌmine lilineꞌ votigileloꞌ vivo sukulu ma lamineꞌ maha gamazi neꞌmine nolineꞌ nene nadosa nolive li laniꞌ.
JOH 7:16 Neꞌmine likevo aꞌmidoꞌ aza tiꞌ lo lineꞌ: Naza gamazi mene apize nolingimuvoniꞌ nene naꞌniseꞌne gaꞌneutiꞌ gelo apize lengemamuve. Asi nimiselive eitatiꞌ nene do minosa apizo nolo-lingimuve.
JOH 7:17 Nemuꞌ nene ve ma ingine nimiselive Oꞌmosoꞌmi luloloꞌ di mili gonoꞌve ma di-dilisa gili nilizaniꞌ nene naza gamazi apize lengemaaꞌ nouvoniꞌ nene mo Oꞌmosolatiꞌ nolihe idoꞌ naꞌniseꞌne gaꞌnetiꞌ gelo noluhe neꞌmi monovo nene ningi vevesilisave.
JOH 7:18 Idoꞌ ve ma ingine engiꞌ gaꞌningutiꞌ gili gamazi apizi ngimaaꞌ nave nene engiꞌ guveꞌine vilingumukovoꞌ nene gili minisa gamazi apizi ngimaaꞌ nave. Neꞌmine igaꞌ naniꞌza ve ma ingine ve maliꞌmo ngimiselavo igi gamazi apizi ngimaaꞌ nanguꞌ nene aꞌmine ngimiselive neꞌmi guvele vilingumukovoꞌ ve li gono dalizaniꞌ nene mo eveneꞌ gihile lamineꞌ monovo goloso engita nomineꞌ alevetevoꞌ neꞌmine ilisave.
JOH 7:19 Ne neiha Oꞌmosoꞌmi louꞌ gamazi nene Moseꞌ mo do sotoꞌ o-lengemavo di nizaniꞌza aꞌmine louꞌ gamazi nene lingine mukitoꞌ avutoꞌ igaꞌ nave. Lingine neniꞌ nibililisa gili nizaniꞌ nene nanimuꞌ nave.
JOH 7:20 Neꞌmine lavo aꞌmida minave mukiꞌ ingine tiꞌ li li-imaniꞌ: Laza ma gebelelesa gelamuniko sikalahuꞌ golosoliꞌmo do dudu lo-gedavo negi gamazi nolabe.
JOH 7:21 Neꞌmine likevo Izesuꞌ tiꞌ lo lo-ngimineꞌ: Naza eveneꞌ do lamineꞌ o-do holisekuꞌ gono hamoꞌ duvoniꞌ neꞌmo nene lengiꞌ mukiꞌ okodidoꞌ do molavo upuhoꞌ ikeve.
JOH 7:22 Lengiꞌ gipetineti okoꞌnidoꞌ nene Oꞌmosoꞌmi noso mili-ngidilizave lo Moseꞌ lo-lingimineꞌ ve (Ee, Moseꞌ lo-lingimineꞌza asiꞌve neꞌmo aꞌmine monovo nene ganaꞌ do sotoꞌ ineꞌ nevoba asi avotingidatiꞌ akaꞌmine sotoꞌ ineꞌ ve). Nemuꞌ nene lingine gipetineti okoꞌnidoꞌ Oꞌmosoꞌmi noso mili-ngidaaꞌ gamene nene gono damaaꞌ ve laniꞌ holisekuꞌ alitelinekisi nene holiseꞌ gamene ma ne neive lami ha gono di Oꞌmosoꞌmi noso mili-ngidaaꞌ nave.
JOH 7:23 Idoꞌ lingine Moseꞌ Louꞌ gamazi nene avutoꞌ ogalone li neꞌmine igi gipetine Oꞌmosoꞌmi evenele minilizangumuꞌ di lamineꞌ i-ngidi holisekukisi okoꞌnidoꞌ Oꞌmosoꞌmi noso mili-ngidaaꞌ naniꞌ nenako naza holisekuꞌ eveneꞌ ma do lamineꞌ gehepeve o-duvongumuꞌ nene lingizeboloꞌ nanimuꞌ nomolave.
JOH 7:24 Lingine eveneꞌ maliti monovoꞌinemuꞌ izeꞌ mili lili ma nene gopo liteꞌ li lami asi monovo ningi hehe likisavoꞌ nene izeꞌ mili lilo.
JOH 7:25 Neꞌmine lavo Zelusalemi aleve linge nene tiꞌ li li minaniꞌ: Me ve nene leliꞌ ve nabalite bililisa gilave ma nene neive. Olo.
JOH 7:26 Ne neiha aza mela nene golise gelamo monoꞌ lovo kiselevoꞌ ogo nolo-limivo ingine aꞌminemuꞌ nene ma lamave. Idoꞌ oꞌve li-damaniꞌ nene ingine aꞌmine ve nene mo lamineꞌ Oꞌmosoꞌmo do luꞌ izelive lo imiselelesa live ma nene noloseive li gilisa lamaniꞌ nolihe.
JOH 7:27 Ne neineꞌza aꞌmine aniꞌ numuno ebeꞌve nene laza mo vaitoꞌ ningo gele noba aꞌmine Oꞌmosoꞌmo do luꞌ izelive lo imiselelesa live ogo sotoꞌ ilineꞌ nene aza nelatiꞌ aniꞌ ve li ma ningi gilamilisave li nizaniꞌ nenako aꞌmine ve nene Oꞌmosoꞌmo imiselelesa live ngelo minelihe.
JOH 7:28 Neꞌmine likevo nemuꞌ nene Izesuꞌ monoꞌ numuno nabauꞌ monoꞌ apize ngemo mininguꞌ nene pigi izo tiꞌ lo lineꞌ: Lingine gilavo neniꞌ nene ningi nizave nouve. Idoꞌ numuꞌne ebeꞌne nesi nene mo ningi nizaha neniꞌ nene naꞌniseꞌne gaꞌne gelo luꞌneloꞌ do molo amuve. Ve maliꞌmo nimiselive luvoniꞌ nene ladanga lamuve. Aꞌmine nimiselive nene nomineꞌ nevoba mo laminetoꞌ neive. Lingine eiꞌ nene ningi gilamaniꞌza
JOH 7:29 neniꞌ nene ezelatiꞌ uvoniꞌ nenako neniꞌ nene mo ninge nouve neive. Ee, aꞌmine ninge nouve neꞌmo nene nimiselineꞌ ve lineꞌ.
JOH 7:30 Neꞌmine lingumuꞌ nene goniꞌ o-deloningumuꞌ analoꞌ dalone li neꞌmine ilisa aniꞌza neꞌmine i-dilizave lo Oꞌmosoꞌmo molo-dineꞌ gamene nene olihe amineꞌ nenako neꞌmo nene neꞌmine i-damaniꞌ ve.
JOH 7:31 Idoꞌ aꞌmida eveneꞌ vaiꞌ mulise mili minangutiꞌ mukiꞌ nene Izesuꞌnimuꞌ tiꞌ li li minaniꞌ: Oꞌmosoꞌmo do luꞌ izelesa imiselelesa live neꞌmo nene atoliꞌmine suno vaiꞌ goloso do sotoꞌ ivo monovolo sotoꞌ oloseive li laaꞌ nanako me ve neꞌmo atoꞌ suno vaiꞌ do sotoꞌ ineꞌ nene ve gohi ma ogo atoꞌ suno vaiꞌ ivileꞌ ogo ngelo damoloseinako me ve nene mo aꞌmine Oꞌmosoꞌmo do luꞌ izelesa imiselelesa live ma nene neive li li minaniꞌ.
JOH 7:32 Eveneꞌ mukiꞌ nete Izesuꞌnimuꞌ neꞌmine li engikuꞌ li voleloꞌ meloꞌ igi nizavo Halisaioꞌ monoꞌ laaꞌ ave naba nete gili inginesi idoꞌ evenetoꞌ medeli mini Oꞌmoso initeꞌ lehizi-daaꞌ ave nabasi makaꞌ mini engitoꞌ gono daaꞌ aniꞌ pilisi ve linge nene Izesuꞌni dalizave li ngimiselaniꞌ.
JOH 7:33 Neꞌmine angumuꞌ nene Izesuꞌ tiꞌ lo lineꞌ: Naza lengikisi mineloniꞌ nene ha gamene liꞌnibevoꞌ minosa nelotiꞌ nene nimiselive neida volosuve.
JOH 7:34 Lingine nene nenikumuꞌ hize eleꞌ o-ledelive li viseꞌ ilizaha okoꞌneloꞌ nene mo ngeli ma ningamilisave. Idoꞌ aꞌmine vo mineloda nesi nene lingine ngeli ma vamilisave.
JOH 7:35 Neꞌmine lavo Zuda ve naba nete engikuꞌ tiꞌ li laniꞌ: Ve me ve nene laza ngelo ma ningamolonida volosuve nolineꞌ nene zala volosamuꞌ nolive. Aza nene heta atoꞌ vetida Zuda ve vi ingi monavela nene vo aꞌmine heta atoꞌ vesi makaꞌ gamazi apize ngemelesamuꞌ nene ngelo ma lamoloseiha aza nene zala volosa nolivoo.
JOH 7:36 Aza nene nenikumuꞌ viseꞌ ilizaniꞌ nene ngeli ningamilisave idoꞌ vo mineloda nesi nene ngeli ma vamilisave nolineꞌ nene nadive losa nolive li gopo gaꞌine gili minaniꞌ ve.
JOH 7:37 Azibe mili ingi mini holiseꞌ mini nosoꞌ niteꞌ naaꞌ aniꞌ gamene osuꞌ lineꞌ gameneuꞌ nene gamene naba minaaꞌ neineꞌ nenako aꞌmine gameneloꞌ nene Izesuꞌ aza ote mino gamazi naba ogo aneza gamazi gidini ma tiꞌ lo lineꞌ: Ve ma ingine nosomuꞌ ngiselive nene nenita igi aꞌmine noso nene nalizave.
JOH 7:38 Ee, monoꞌ godolouꞌ tiꞌ li gizi nizaniꞌ maꞌmino sotoꞌ oloseive: Ve ma nenikumuꞌ gili eleꞌvoleꞌ igi minilizave nene luꞌningutiꞌ minevoꞌ minevoliꞌmi izeleho minineꞌ noso nene vaiꞌ lemovoꞌ mineleseive.
JOH 7:39 Idoꞌ Izesuꞌ neꞌmine lineꞌ nene ezemuꞌ gili eleꞌvoleꞌ igi minilizave nete Oꞌmosoꞌmi Sikalahuꞌ nene alingeꞌ dalizaniꞌ nenako aꞌminemuꞌ nene lineꞌ ve. Idoꞌ alingeꞌ dalizave luvoniꞌ nene nemuꞌ luvoniꞌ ve: Izesuꞌ aꞌmine gamazi lineꞌ gamenela nene Okulumokuꞌ moꞌmosiꞌve nabala nene olihe dizo vamineꞌ nenako neꞌmo nene aꞌmine Sikalahuꞌ nene olihe imiselamivo amineꞌ ve.
JOH 7:40 Neꞌmine lineꞌ nene eveneꞌ mukiꞌ nete gilisa linge ma nete tiꞌ li li minaniꞌ ve: Mo laminetoꞌ me ve nene polohete ma aloseive lo Moseꞌ live ma nene neive.
JOH 7:41 Neꞌmine likaꞌ likaꞌ navo linge ma nete nene tiꞌ li li minaniꞌ ve: Me ve nene Oꞌmosoꞌmo do luꞌ izelesa imiselelesa live ma ne neive. Neꞌmine laniꞌza linge ma nete nene tiꞌ li laniꞌ ve: Monoꞌ godolouꞌ nene tiꞌ li gizi nizaniꞌ ma neive. Olo: Oꞌmosoꞌmo do luꞌ izelive lo imiselelesa live neve nene Davidiꞌ numuno ebeꞌve Betelehemi neuꞌ eiꞌ Davidiꞌ aꞌvopilemoꞌ zuhoutiꞌ sotoꞌ oloseive. Neꞌmine li gizi nizaniꞌ nenako aꞌmine nGalilaia misuboutiꞌ ve me ve nene ngelo Oꞌmosoꞌmo do luꞌ izelive lo imiselelesa live minamoloseive. Olo.
JOH 7:43 Neꞌmine li eveneꞌ linge ma Oꞌmosoꞌmo do luꞌ izelive lo imiselelesa live ve lavo linge ma oꞌve eiꞌ nomive lavo eveneꞌ mukiꞌ nene hizi hoꞌli minaniꞌ ve.
JOH 7:44 Neꞌmine navo eveneꞌ linge ma nete di gonitoꞌ i-dilisa gilaniꞌza eveneꞌ hamolitesi okoꞌnoloꞌ ma damaniꞌ ve.
JOH 7:45 Aꞌmine gomuꞌ ngimiselaniꞌ pilisi ve ingine tineꞌ mili Halisaioꞌ ve nabasi idoꞌ evenetoꞌ medeli mini Oꞌmoso initeꞌ lehizi-daaꞌ ave nabasi nizada Izesuꞌni di ami haza ikevo tiꞌ li longoꞌ i-ngidaniꞌ: Izesuꞌni nene nanimuꞌ analoꞌ di di amave.
JOH 7:46 Neꞌmine likevo pilisi ve nete tiꞌ li li-ngimaniꞌ: Vekizo, eveneꞌ hamolitesi aꞌmine ve neꞌmo gamazi lineꞌ neꞌmini mo lisaꞌmaniꞌ nenako eiꞌ nene ngelo damoloneꞌ ogavo damune.
JOH 7:47 Neꞌmine likevo Halisaioꞌ ve ingine tiꞌ li longoꞌ i-ngidaniꞌ: Lengiꞌ nene gotine izamilinako lengikisi gotine izo live. Olo.
JOH 7:48 Leliꞌ eveneꞌ nabatine minuningutiꞌ mene hamolitesi eitoꞌ gili eleꞌvoleꞌ aniꞌ ma ningikehe. Oꞌve. Halisaioꞌ ve netesi nene ma gili eleꞌvoleꞌ amave.
JOH 7:49 Neꞌmine aniꞌza eveneꞌ mukiꞌ mete nene Moseꞌ louꞌ gamaziꞌve nene gili lamineꞌ amaniꞌ nenako neꞌmo nene eikumuꞌ gili eleꞌvoleꞌ aniꞌ ve. Engiꞌ nene Oꞌmosoꞌmo usiꞌ ize-ngede neive.
JOH 7:50 Neꞌmine likevo Izesuꞌ neida gomuꞌ ma vive Nikodemoꞌ eiꞌ nene engiꞌ mulisetiꞌ minive nenako aza tiꞌ lo longoꞌ o-ngidineꞌ ve:
JOH 7:51 Ve ma olihe goniꞌ o-do initeꞌ inekumuꞌ gele hehe lamosa ve goloso ve ha gopo loloneꞌ nene leliꞌ louꞌ gamazite nene avutoꞌ amolobe. Olo.
JOH 7:52 Neꞌmine lavo aꞌmidoꞌ tiꞌ li li-imaniꞌ: Gazasi nene aꞌmine veꞌmi zuho nGalilaia ve nolosane. Olo. nGalilaia misuboutiꞌ nene polohete ma sotoꞌ ilizave li monoꞌ godolouꞌ nene ma gizamaniꞌ nenaze. Geiꞌ nene monoꞌ godolouꞌ aꞌminemuꞌ luhuvo ma gizi nizahe viseꞌ ogo ningo do sotoꞌ ozo. [
JOH 7:53 Eveneꞌ mukiꞌ numuꞌnida vaniꞌ] ve.
JOH 8:1 Izesuꞌ aza gohi Oliva Golola dizo vineꞌ
JOH 8:2 Idoꞌ nedengaꞌ goꞌ vesemeꞌ neivo Izesuꞌ nene monoꞌ numuno nabaꞌmi gesi minguꞌ dizo neivo eveneꞌ mukiꞌ nene aꞌmine neida navo Izesuꞌ aza mitoꞌ mino apiꞌ ogo monoꞌ apize ngemeꞌmo vineꞌ.
JOH 8:3 Neꞌmine oꞌmo novivo louꞌ gamazi apizi ngimaaꞌ avesi idoꞌ Halisaioꞌ vesi ingine veneꞌ ma ve masi monovo goloso ikesivo ningi aꞌmine veneꞌ nene eleꞌmizi igi eveneꞌ mukilite ningilizadoꞌ di oti-di
JOH 8:4 Izesuꞌni tiꞌ li li-imaniꞌ: Tisazo, veneꞌ me ve nene ve masi monovo goloso nasivo laza ningo analoꞌ dokune.
JOH 8:5 Nemuꞌ nene Moseꞌ louꞌ gamazi gize-lidinguꞌ nene neꞌmine veneꞌ nene geheni huli huliꞌ igi ngibili hililizave lo-lede neineꞌ nenako gaza aꞌminemuꞌ nene nadive lilinidoꞌ o neive laniꞌ.
JOH 8:6 Neꞌmine li longoꞌ i-daniꞌ nene Izesuꞌ gamazi do gopo ogo lilineꞌ nene goniꞌ nabaloꞌ eleꞌmize molalobe li gili ha emenguꞌ neꞌmine milisa golo izi longoꞌ i-daniꞌ ve. Neꞌmine li longoꞌ i-dikevo Izesuꞌ aza gubiꞌ izo anadunuꞌ misubouꞌ luhuvo gizo minineꞌ.
JOH 8:7 Neꞌmine ineꞌza ingine geligeli igi gohi longoꞌ i-dikevo Izesuꞌ oto tiꞌ lo lo-ngimineꞌ: Lengikutiꞌ ve ma lihimeꞌvesi nomo nolive ma nolineꞌ neꞌmo nene ganaꞌ apiꞌ ogo geheni hulo belavosa nene bililo.
JOH 8:8 Neꞌmine lo gohi gubiꞌ izo misubouꞌ luhuvo gizo minineꞌ.
JOH 8:9 Idoꞌ Izesuꞌ neꞌmine lineꞌ nene gili ingine eveneꞌ nabalatiꞌ apiꞌ igi hamo hamoꞌ vikaꞌ vikaꞌ igi osuꞌ likevo Izesukovoꞌ nene aꞌmine veneꞌ masi ha ote minivo minasineꞌ ve.
JOH 8:10 Neꞌmine ogo Izesuꞌ aza gohi ote pehe lo veneꞌ nene tiꞌ lo longoꞌ o-dineꞌ: Geiꞌ gelemi minave ma nene zaala vave. Eveneꞌ hamolitesi ma lihime gimamahe.
JOH 8:11 Neꞌmine lavo veneꞌ aza aꞌmidoꞌ tiꞌ lo lineꞌ: Oꞌove, ma neꞌmine i-nidamave lineꞌ. Neꞌmine lavo Izesuꞌ asi nene tiꞌ lo lineꞌ: Nazasi nene aꞌmineꞌmine ogo lihime ma gemamolosuze. Gaza voosa nene lihime gohi ma damozo lo-dineꞌ.]
JOH 8:12 Idoꞌ Izesuꞌ aza gamazi gohi ma eveneꞌ lo-ngiminguꞌ nene tiꞌ lo lineꞌ: Naza nene misubouꞌ aleve hize labanaꞌ ele-ngedaaꞌ uve ma nene nouve. Ve ma neꞌmeti minilizave nene luꞌninguꞌ litiꞌmuso ize minamivo aꞌmine neniꞌ hize eleꞌ o-ngedeloniꞌ labanaꞌ neꞌmo nene minevoꞌ minevoꞌ iliza aka ngelebizivo minilisave.
JOH 8:13 Neꞌmine lavo Halisaioꞌ ve aꞌmidoꞌ tiꞌ li laniꞌ: Geiꞌ monovoka nene eveneꞌ atolitesi hize eleꞌ i-gidi lamavo gasikavoꞌ lo sotoꞌ sotoꞌ naineꞌ nenako neꞌmo nene geiꞌ gamazika nene gamazi gihile nehe lo ngelo ma gelamolosune.
JOH 8:14 Neꞌmine likevo aꞌmidoꞌ Izesuꞌ tiꞌ lo lineꞌ: Lingine nenikumuꞌ geiꞌ monovoka nene gasikavoꞌ nolane laniꞌ nene laminetokisi nililizaha gamaziꞌne nene gamazi gihile gehepeve neive. Nene nanitekumuꞌ ve. Naza nene zalatiꞌ uvoniꞌ nehe idoꞌ zala voloniꞌ nehe nemuꞌ nene mo gele nouve. Gele nouvoniꞌza lingine nene zaala voloniꞌ nehe idoꞌ zaalatiꞌ uhe nemuꞌ nene ma gilamave.
JOH 8:15 Lingine eveneliti monovomuꞌ izeꞌ mili laaꞌ naniꞌ nene ha me misubouꞌ monovolokovoꞌ eꞌmetisa neꞌmine igaꞌ nave. Idoꞌ neniꞌ nene eveneꞌ maliti monovomuꞌ izeꞌ molo lihime ngemesaꞌmuve.
JOH 8:16 Ne neiha eveneliti monovomuꞌ izeꞌ molo lihime ma ngimuvodiniko neniꞌ hamokovoꞌ nene neꞌmine amo nimiselive meꞌnehosi nene makaꞌ neꞌmine usidinako nemuꞌ nene eveneliti monovoꞌinemuꞌ nene ma luvodiniko aꞌminemuꞌ nene mo gamazi gihile ve li lingine mo gililizadoꞌ o minidine.
JOH 8:17 Idoꞌ lengiꞌ louꞌ gamazitinguꞌ nene tiꞌ li gizi nizaniꞌ ma neive: Eveneꞌ setalitise initeꞌ maliꞌmi monovomuꞌ hamoꞌ gamazivoꞌ li sotoꞌ ilisineꞌ nene aꞌmine li sotoꞌ ilisineꞌ gamazi nene gamazi gihile neive li gililizadoꞌ o neive.
JOH 8:18 Naza naꞌniseꞌne neniꞌ monovoꞌnemuꞌ nene lo sotoꞌ sotoꞌ nouha nimiselive meꞌneho nesi nene neniꞌ monovoꞌnemuꞌ lo sotoꞌ sotoꞌ ogaꞌ neinako nemuꞌ nene nenikumuꞌ naꞌniseꞌne gamazi laaꞌ nouvoniꞌ ma nene mo laminekovoꞌ neive li gililizadoꞌ o neive.
JOH 8:19 Neꞌmine lavo Halisaioꞌ ve ingine tiꞌ li longoꞌ i-daniꞌ: Aꞌmine maho nene zala neive. Neꞌmine li longoꞌ i-dikevo aꞌmidoꞌ Izesuꞌ tiꞌ lo lo-ngimineꞌ: Neniꞌ nene zaho nouhe lingine ningi gilamaniꞌ nene meꞌnehinemukisi nene aza zaho nehe ma ningi gilamave. Nenikumuꞌ nene ma ningi giladiniko meꞌnehinemukisi ningi giladine.
JOH 8:20 Neꞌmine lineꞌ nene monoꞌ numuno nabauꞌ Oꞌmoso imaniꞌ moni milaniꞌ bokisi minaniꞌ numuno luloꞌmi gahevela mino monoꞌ apize ngemeꞌmo vo mininguꞌ nene aꞌmine gamazi lineꞌ ve. Neꞌmine ineꞌza Oꞌmosoꞌmo eze dalizave lo gamene molo-dineꞌ nene olihe amineꞌ nenako neꞌmo nene eveneꞌ hamolitesi analoꞌ di di gonitoꞌ i-damave.
JOH 8:21 Idoꞌ Izesuꞌ aza gohi tiꞌ lo lo-ngimineꞌ: Naza mo lengiꞌ hulo-lengedo volosuve. Neꞌmine okuvo lingine nenikumuꞌ viseꞌ igi minilizaha mo ningami mini lihimetine apasamo ha neivo hililisave. Idoꞌ neniꞌ ningamilizave noluvoniꞌ nene nanitekumuꞌ ve. Neniꞌ voloda nene lingine ngeli vamilizaniꞌ ogavosa noluve.
JOH 8:22 Neꞌmine lavo Zuda ve naba nete tiꞌ li laniꞌ: Aza neniꞌ voloda nene lingine ngeli vamilisave nolineꞌ nene eiꞌ okoꞌno bele helelesa nene ngelo neꞌmine lamoloseiha neꞌmine lineꞌ nene nanitekumuꞌ live.
JOH 8:23 Neꞌmine likevo aza imineꞌ molo tiꞌ lo lo-ngimineꞌ: Lengiꞌ nene galaꞌmuno melatiꞌ ma nene nizave. Idoꞌ neniꞌ nene veletatiꞌ ma nene nouve. Ee, lingine nene me misuboutiꞌ ma nene nizave. Idoꞌ neniꞌ nene me misuboutiꞌ nomuve.
JOH 8:24 Neꞌmini nizangumuꞌ nene lingine lihimetinesi ha neivo hililisave luvoniꞌ ma neive. Ee, lingine nenikumuꞌ aꞌmine neive ma ne neive li ma gili eleꞌvoleꞌ amilizaniꞌ nene lihimetine apasamo ha neivo aꞌminesi hililisave.
JOH 8:25 Neꞌmine lavo ingine tiꞌ li li-imaniꞌ: Gaza nene zaho ma nane. Neꞌmine likevo Izesuꞌ tiꞌ lo lo-ngimineꞌ: Gamene galaꞌmuda vomine lo-lingimuve ma adoꞌ nene nouve.
JOH 8:26 Idoꞌ lengiꞌ monovotinemuꞌ izeꞌ molo lihime lengemelodoꞌ o minineꞌ gamazi nene vaiꞌ lo neiha nimiselive neꞌmo mo gamazi gihile laminekovoꞌ laaꞌ neivo eitatiꞌ giluvoniꞌ gamazivoꞌ nene me misubouꞌ aleve lo-ngemaaꞌ nouve.
JOH 8:27 Aꞌmine neꞌmine lineꞌ nene metehine Oꞌmosomuꞌ lineꞌ nene ingine gilamaniꞌ ve.
JOH 8:28 Neꞌmine lo Izesuꞌ tiꞌ lo lineꞌ: Lingine alingeꞌ Oꞌmosolatiꞌ ve gihile neniꞌ zaloꞌ di oti-nidiliza gameneloꞌ nenikumuꞌ nene mo eiꞌ ma neive li ningi gilisa idoꞌ naza initeꞌ ogo molo ogaꞌ nouvoniꞌ nene naꞌniseꞌne gaꞌnetiꞌ gelo ma osaꞌmuvoniꞌza asi meꞌneho nelebizineꞌ initekovoꞌ nene lo sotoꞌ ogaꞌ nouvoniꞌ nesi ningi gililisave.
JOH 8:29 Aꞌmine nimiselive nene nenikisi makaꞌ neive. Ee, naza eiꞌ mulunouꞌ lamineꞌ gelelineꞌ initekovoꞌ ogaꞌ nouvoniꞌ nenako nemuꞌ nene aza ninge mate nimikivo ma minesaꞌmuve.
JOH 8:30 Neꞌmine lo loꞌmo novivo eveneꞌ linge mukiꞌ nene ezela gili eleꞌvoleꞌ aniꞌ ve.
JOH 8:31 Neꞌmine ikevo Zuda ve ezemuꞌ gili eleꞌvoleꞌ avemuꞌ nene Izesuꞌ tiꞌ lo lineꞌ: Lingine neniꞌ apize lingimuvoniꞌ gamaziloꞌ eꞌmeti mini di vi nilizaniꞌ nene neniꞌ izipahaꞌne zuho gihile nene nizave.
JOH 8:32 Neꞌmine igisa nene gamazi gihileꞌmi monovo nene ningi gilikevo lingine gelekeleꞌ goloso igi nizangutiꞌ nene aꞌmine gamazi gihile neꞌmo nene do kuluhize-lengedeleseive.
JOH 8:33 Neꞌmine lavo eveneꞌ linge malite aꞌmidoꞌ tiꞌ li li-imaniꞌ: Laza Oꞌmosoꞌmo do ote-dive Abalahamuꞌ aꞌvopilemoꞌ zuho noneꞌ nenako laza nene mo kekeꞌ eveneꞌ malite di gelekeleꞌ i-lidikevo minamuneꞌ nenako gaza gelekeleꞌ goloso igi nizangutiꞌ kuluhizi minilisave nolaneꞌ nene lamilinako nanimuꞌ lane.
JOH 8:34 Neꞌmine likevo aꞌmidoꞌ Izesuꞌ tiꞌ lo lo-ngimineꞌ: Naza laminetoꞌ tiꞌ lo nolo-lingimuve: Lihime dalizave mukiꞌ nene mo lihime monovoliꞌmi gelekeleꞌ ve nizave.
JOH 8:35 Ve ma ve mala vi gelekeleꞌ ve minilizave ingine aꞌmine meꞌnibi numuꞌveuꞌ mudise minilizaniꞌ moꞌmosiꞌine nene ma minesaꞌmineꞌza aꞌmine meꞌnibi gipele zuho nete nene mudise minilizaniꞌ moꞌmosiꞌine nene mo ha minaaꞌ neive.
JOH 8:36 Nemuꞌ nene Oꞌmosoꞌmi gipele naza lihime monovoliꞌmi gelekeleꞌ ve minangutiꞌ do kuluhize-lengedeloniꞌ nene mo mudise haza gehepeve minilisave.
JOH 8:37 Idoꞌ lengiꞌ nene mo Abalahamuꞌ aꞌvopilemoꞌ nizave losa nene ha gele nouha lingine nene neniꞌ nibili hililiza aka nene viseꞌ igi nizave. Nene nanitekumuꞌ ve. Lingine neniꞌ gamaziꞌne damavo lutinguꞌ vo minamineꞌ nemuꞌ ve.
JOH 8:38 Idoꞌ naza neniꞌ gamaziꞌne laaꞌ nouvoniꞌ nene meꞌnehosi makatoꞌ minosa ninguvoniꞌ initekumukovoꞌ nene laaꞌ nouve. Idoꞌ lingine igi mili igaꞌ naniꞌ nene lengiꞌ metibidatiꞌ gilaniꞌ initeꞌ nene igi mili igaꞌ nave.
JOH 8:39 Neꞌmine lavo ingine tiꞌ li li-imaniꞌ: Gaza leliꞌ metehinemuꞌ laineꞌ nene leze meteho nene Abalahamuꞌ ma ve. Neꞌmine likevo Izesuꞌ aza tiꞌ lo lo-ngidineꞌ: Lingine mo laminetoꞌ Abalahamuꞌ aꞌvopilemoꞌ minadiniko mo Abalahamuꞌ ogo molo ogo minaaꞌ ineꞌ monovoloꞌ nene eꞌmeti minadineꞌza neꞌmine ma isaꞌmave.
JOH 8:40 Naza gamazi gihile Oꞌmosoꞌmo lo-nemavo giluvoniꞌ lo-lingimuve neniꞌ nene nibili hililiza aka viseꞌ igi nizave. Neꞌmine igi nizaniꞌza Abalahamuꞌ nene neꞌmine initeꞌ ma osaꞌmineꞌ ma neive.
JOH 8:41 Lingine neꞌmine igi mili naniꞌ nene mo lingi metibo ogo molo ogaꞌ idiꞌmine nave. Neꞌmine lavo ingine aꞌmidoꞌ tiꞌ li laniꞌ: Laza nene gopo akaloꞌ izipe nomune. Meteho nene Oꞌmoso hamoꞌ neive.
JOH 8:42 Neꞌmine likevo aꞌmidoꞌ Izesuꞌ tiꞌ lo lo-ngimineꞌ: Idoꞌ naza mela ogo nouvoniꞌ nene Oꞌmosolatiꞌ uvoniꞌ ve. Naꞌniseꞌne gaꞌne gelo amo eiꞌ Oꞌmosoꞌmo nimiselavo nouve. Nouvoniꞌ nenako Oꞌmoso nene metibo minidiniko lingine neniꞌ nene lutine nimadine.
JOH 8:43 Lingine neniꞌ gamazi lo-lengemaaꞌ nouvoniꞌ gilamaniꞌ nene nanitekumuꞌ ve. Lingine neniꞌ gamazi gililizadoꞌ lisiheꞌ amaniꞌ nenako neꞌmo ve.
JOH 8:44 Lingine nene metibo Satanilatiꞌ sotoꞌ aniꞌ nenako nemuꞌ nene aꞌmine metibo lulouꞌ laniteꞌ gilineꞌ initeꞌ nene igi mili ilisa gilaaꞌ nave. Aꞌmine Satani nene ganaꞌ sotoꞌ idatiꞌ eveneꞌ ngebele helaaꞌ ive minineꞌ ve. Gamazi gihile eita nomineꞌ nenako neꞌmo aza nene gamazi gihileloꞌ eꞌmeto ogo molo osaꞌmive. Aza nene sozaloꞌ ve mino soza laaꞌ monovoliꞌmi meleho neineꞌ nenako neꞌmo nene aza soza lilineꞌ nene ha eiꞌ emeni dameni gehepeveloꞌ eꞌmeto loloseive.
JOH 8:45 Ne neiha neniꞌ nene gamazi gihilevoꞌ laaꞌ nouvoniꞌ nenako nemuꞌ nene lingine aꞌmine metibine neꞌmine mini aꞌmine laaꞌ nouvoniꞌ gamazi nene gili eleꞌvoleꞌ isaꞌmave.
JOH 8:46 Lengikutiꞌ ve maliꞌmosi neniꞌ monovo goloso do noloniꞌ nene ngelo ma do sotoꞌ amoloseinako nemuꞌ nene naza gamazi gihile noluvoniꞌ nenako nanimuꞌ gili eleꞌvoleꞌ amave.
JOH 8:47 Idoꞌ Oꞌmosolatiꞌ sotoꞌ igi minave nene Oꞌmosoꞌmi gamazi gilaaꞌ naha lingine Oꞌmosolatiꞌ sotoꞌ amaniꞌ nenako neꞌmo nene eiꞌ gamazi gilisaꞌmave.
JOH 8:48 Neꞌmine lavo Zuda ve ingine aꞌmidoꞌ tiꞌ li li-imaniꞌ: Gaza nene gopo izipe Samalia vete gidaniꞌ ma nanivosa sikalahuꞌ goloso nene lukauꞌ neive noluneꞌ nene mo laminetoꞌ nololosune.
JOH 8:49 Neꞌmine likevo aꞌmidoꞌ Izesuꞌ tiꞌ lo lo-ngimineꞌ: Naza sikalahuꞌ goloso neve nene mo kekeꞌ luꞌneuꞌ nomive noluve. Asi meꞌnehine nene gelekeleꞌ o-do do naba o-daaꞌ nouve. Neꞌmine ogaꞌ nouvoniꞌza lingine neꞌmine i-nidami di limi-nidilisa igaꞌ nave.
JOH 8:50 Ne neiha neniꞌ di naba i-nidilizave losa gono dosaꞌmuve. Neniꞌ di naba i-nidilizave losa gono daaꞌ neive nene ma mino aꞌminemuꞌ izeꞌ molaloseive.
JOH 8:51 Naza laminetoꞌ tiꞌ lo nolo-lingimuve: Neniꞌ gamaziꞌne gili di minilizave mukiꞌ nene hili osuꞌ lami miniviꞌ miniviꞌ igivoꞌ minilisave.
JOH 8:52 Neꞌmine lavo Zuda ve ingine tiꞌ li laniꞌ: Idise gamazi nolainidotiꞌ nogiluneꞌ geikuꞌ sikalahuꞌ goloso neive luneꞌ nene mo laminetoꞌ lokuneꞌ neive lo gele none. Oꞌmosola giꞌmizive naba Abalahamuꞌ nene mo helave. Idoꞌ polohete minaniꞌ nesi mo hilikeve. Neꞌmine ikeniꞌza gaza nene neniꞌ gamaziꞌne gili dalizave mukiꞌ nene hilami ha minilisave nolabe.
JOH 8:53 Avoteho naba Abalahamuꞌ nene helaaniꞌ nenako geiꞌ nene eiꞌ ivileꞌ ogo eveneꞌ naba nabe. Idoꞌ polohete nesi hilaakovoꞌ aniꞌ nenako gaza nene okonga do dizo naniꞌmine ve nouve losa nane.
JOH 8:54 Neꞌmine likevo Izesuꞌ aꞌmidoꞌ tiꞌ lo lineꞌ: Naza guveꞌne monelive lo naꞌniseꞌne okoꞌne do dizeꞌmo vo nouvo guveꞌne vilineꞌ nene mo haza niteꞌ loloꞌ oloseive. Neniꞌ guveꞌne vilive lo neniꞌ do naba o-nedaaꞌ neive nene meꞌneho lengiꞌ nete eiꞌ nene Oꞌmosote ve laaꞌ nave ne neive.
JOH 8:55 Ne neiha lingine eiꞌ monovomuꞌ nene ningi gilamavo nenikovoꞌ nene eikumuꞌ ningo gele nouve. Idoꞌ naza nene ezemuꞌ ma ningo gelamuve luvodiniko lengiꞌ neꞌmine mino sozaloꞌ ve minuvodine. Ne neiha ezemuꞌ nene mo ningo gelosa gamaziꞌvesi nene mo gele daaꞌ nouve.
JOH 8:56 Lengiꞌ avotibo Abalahamuꞌ nene neniꞌ me misubouꞌ ogo, ogo molo nouvo ningelingumuꞌ nene olize goloso izineꞌ ve. Ee, aꞌmine mela nouvoniꞌ gamene nene ningo gelo mulunouꞌ lamineꞌ gilineꞌ ma neive.
JOH 8:57 Neꞌmine lavo Zuda ve ingine tiꞌ li li-daniꞌ: Gaza nene kilisimasika olihe fifti (50) nelasi amineꞌ neke nene gozopoꞌ akaꞌmila hele vive Abalahamuꞌ nene ningaineꞌ gani nolabe.
JOH 8:58 Neꞌmine likevo Izesuꞌ aꞌmidoꞌ tiꞌ lo lo-ngimineꞌ: Naza mo laminetoꞌ gehepeve nolo-lingimuve. Aꞌmine Abalahamuꞌ olihe sotoꞌ amivosa neniꞌ nene nouvoniꞌ ve.
JOH 8:59 Neꞌmine lavo nemuꞌ nene Zuda ve ingine geheni bililisa geheni daniꞌza Izesuꞌ aꞌminguꞌ vo haleko monoꞌ numuno nabautiꞌ nene heta lemo vineꞌ ve.
JOH 9:1 Idoꞌ Izesuꞌ nene akaloꞌ ma novo ve ma izelehi mulunoutiꞌ vele like minivo sotoꞌ ive ma ningineꞌ.
JOH 9:2 Aꞌmine vemuꞌ nene Izesuꞌ izipahala zuho nete tiꞌ li longoꞌ i-daniꞌ: Tisazo, ve me ve ne vele like minivo sotoꞌ ineꞌ nene eita lihime minidiꞌmo ihe idoꞌ izele melela minidiꞌmo ive.
JOH 9:3 Neꞌmine likevo Izesuꞌ aꞌmidoꞌ tiꞌ lo lo-ngimineꞌ: Aza vele like minivo sotoꞌ ineꞌ nene lihime izele melelasi ezelasi minidiꞌmo nomive. Asi Oꞌmosoꞌmo ezela gono davo eiꞌ amuzoꞌve ezela sotoꞌ ogavo ningilizangumuꞌ nene izelehi mulunoutiꞌ vele like minivo sotoꞌ ineꞌ ve.
JOH 9:4 Idoꞌ labanaꞌ ele minelineꞌ gamene nene gono daaꞌ gamene ne neive. Litiꞌmuso izelineꞌ nene gono ngelo ma damolosunako nemuꞌ nene laza idise nimiseliveꞌmo molo-lidineꞌ gameneuꞌ mene eiꞌ gono nene geho voloneꞌ aka olihe tilamo gode neidoꞌ nene ha geheꞌmo vo mineloneꞌ o neive.
JOH 9:5 Naza me misubouꞌ omo nouvoniꞌ nene eveneꞌ hize labanaꞌ ele-ngedaaꞌ uve nouve.
JOH 9:6 Neꞌmine losa misubouꞌ gituhoꞌ ogo do gohiꞌ loloꞌ ogo vele likiveꞌmi veleloꞌ nene holo-do
JOH 9:7 tiꞌ lo lo-dineꞌ: Gaza vo Siloamu noso ohunguꞌ nene nosoꞌ izezo (Aꞌmine gamazi Siloamu neꞌmi monovo nene neꞌmino neive: imiselave). Neꞌmine lavo vele likive aza vo nosoꞌ izoosa numuꞌvela tineꞌ molo aniꞌ nene vele lamineꞌ o minivosa tineꞌ molo aniꞌ ve.
JOH 9:8 Neꞌmine ogavo eiꞌ numuꞌvela avitoꞌ minaaꞌ avesi idoꞌ akaloꞌ mitoꞌ mino monimuꞌ vokuꞌ vokuꞌ lo minaaꞌ ivo ningaaꞌ avesi ingine tiꞌ li li minaniꞌ: Me ve nene akaloꞌ mitoꞌ mino vokuꞌ vokuꞌ lo minaaꞌ ive ma noloseive. Olo.
JOH 9:9 Eveneꞌ linge ma nete nene mo aꞌmine ve ma ne neive laniꞌza ma nete nene Oꞌve. Eiꞌ nene aꞌmine ve gele vive neive laniꞌ. Neꞌmine likevo aꞌmine ve neꞌmo tiꞌ lo lineꞌ: Aꞌmine ve ma nouve.
JOH 9:10 Neꞌmine lavo ingine tiꞌ li longoꞌ i-daniꞌ: Neꞌmine lo ma veka nene nadosa lamineꞌ ive.
JOH 9:11 Neꞌmine li longoꞌ i-dikevo aza aꞌmidoꞌ tiꞌ lo lo-ngidineꞌ: Izesuꞌ ve laaꞌ nave neꞌmo nene gohiꞌ loloꞌ ogo veꞌneloꞌ holo-nido tiꞌ lo lo-nimive: Gaza vo Siloamu nosouꞌ nosoꞌ izezo. Lavo naza vo aꞌminguꞌ nosoꞌ izuvoniꞌ nene aꞌmidoꞌ liteꞌ lo veꞌne ningekuve.
JOH 9:12 Neꞌmine lavo ingine tiꞌ li longoꞌ i-daniꞌ: Aꞌmine ve nene zala neve. Neꞌmine likevo aza nene naza ma gelamuve lineꞌ ve.
JOH 9:13 Aꞌmine vele likive lamineꞌ ive nene Halisaioꞌ ve naba nizada eleꞌmizi vaniꞌ ve.
JOH 9:14 Aꞌmine vele likive do lamineꞌ o-delesa Izesuꞌ gohiꞌ loloꞌ ineꞌ gameneuꞌ nene holiseꞌ gamene minineꞌ ve.
JOH 9:15 Nemuꞌ nene Halisaioꞌ ve ingine aꞌmine ve vele ningineꞌ monovomuꞌ gohi longoꞌ i-dikevo aza tiꞌ lo lo-ngimineꞌ ve: Aza nene veꞌneloꞌ gohiꞌ holo-nedavo nosoꞌ ize hulokosa veꞌne nene ninguve.
JOH 9:16 Neꞌmine lavo Halisaioꞌ ve linge malite tiꞌ li laniꞌ ve: Ve me ve nene holiseꞌ gamene mauꞌ ve lo gelamo vele likive do lamineꞌ o-dineꞌ nene gono daniꞌ nenako Oꞌmosolatiꞌ ave nomo noloseive. Neꞌmine li laniꞌza linge ma nete nene tiꞌ li laniꞌ: Lihimeloꞌ ve nete nene atoꞌ suno meꞌmine nene ngeli di sotoꞌ ilizahe. Likevo lovoꞌninguꞌ ogavo ingine hizi hoꞌli minaniꞌ ve.
JOH 9:17 Neꞌmine igi mini nelotiꞌ nene vele likive nene gamazi gohi ma tiꞌ li longoꞌ i-daniꞌ: Geiꞌ veka do lamineꞌ o-gidineꞌ nenako geiꞌ nene eikumuꞌ nadive lo-daaꞌ nane. Neꞌmine likevo aza nene polohete ma ve lineꞌ.
JOH 9:18 Idoꞌ Zuda ve naba ingine aꞌmine ve nene gomuꞌ vele like minidotiꞌ vele ningave laniꞌ nemuꞌ nene gili eleꞌvoleꞌ ami mini aꞌmine veꞌmi izele mele nene asi li-ngidi longoꞌ i-ngidi engiꞌ gamazi gilisa nene gili eleꞌvoleꞌ aniꞌ ve.
JOH 9:19 Ee, aꞌmine veꞌmi izele mele nene asi li-ngidi tiꞌ li longoꞌ i-ngidaniꞌ: Me ve nene lengiꞌ gipetine vele like minivo sotoꞌ ive lave ma ne neihe. Aꞌmine nolineꞌ nene vele nene nadosa ningive.
JOH 9:20 Neꞌmine li likevo izelehoi melehoi ingine tiꞌ li lasineꞌ: Me ve nene mo leliꞌ gipete neivo idoꞌ velesi nene like minivo sotoꞌ ineꞌ ve lo gele nosiha
JOH 9:21 idise vele ningineꞌ monovo nemukisi idoꞌ vele do lamineꞌ o-dive nemukisi nene mo gelamusize. Eiꞌ nene izipe namuno nomize. Eiꞌ nene ha lo-lengemeleseize. Longoꞌ i-dilo.
JOH 9:22 Idoꞌ izelehoi melehoi neꞌmine lasineꞌ nene Zuda ve naba nete nene gomukutiꞌ gamazi neꞌmine li li hukikaniꞌ ve: Ve malite Izesuꞌ nene Oꞌmosoꞌmo do luꞌ izelesa imiselelesa live ve li lilizave nene Zuda ve leliꞌ monoꞌ muliseutiꞌ do hulo-ngedelesune. Neꞌmine li li hukikaniꞌ nenako nemuꞌ nene izelehoi melehoi ingine aꞌmine Zuda ve nabamuꞌ golise gili minisa nene neꞌmine lasineꞌ ve.
JOH 9:23 Ee, Zuda ve naba gamazi neꞌmine li li hukikaniꞌ nenako nemuꞌ nene eiꞌ nene izipe ngomo nomize. Longoꞌ i-dilo li izelehoi melehoi lasineꞌ ve.
JOH 9:24 Neꞌmine likesivo Halisaioꞌ ve ingine aꞌmine vele like minidotiꞌ lamineꞌ ive nene gohi gamene sitaꞌ ivo asi li-daniꞌ ve. Vise likevo ogavo tiꞌ li li-daniꞌ: Laza nene aꞌmine veka do lamineꞌ o-nidive lanive nene lihimeloꞌ ve neivo ningo gele noneꞌ nenaze. Gaza Oꞌmoso opoꞌni lo eiꞌ veleloꞌ nene gamazi lisiheꞌ ogo lamineꞌ lozo.
JOH 9:25 Neꞌmine likevo aza tiꞌ lo lo-ngimineꞌ ve: Aza nene lihimeloꞌ ve nolineꞌ nemuꞌ nene ma gelamuvoniꞌza naza initeꞌ hamokumuꞌ ma gele nouvoniꞌ nene naza gomuꞌ veꞌne like minidotiꞌ gohi ninguvoniꞌ nemukovoꞌ nene gele nouve.
JOH 9:26 Neꞌmine lavo tiꞌ li longoꞌ i-daniꞌ: Nadiꞌ ogosa veka do lamineꞌ o-gidive.
JOH 9:27 Longoꞌ i-dikevo aꞌmidoꞌ nene tiꞌ lo lo-ngimineꞌ ve: Naza mo lo-lengemekuvoniꞌ maha lingine gilami nanitekumuꞌ gohi gililisa nilave. Linginesi nene eiꞌ izipahala zuho loloꞌ olone li gili nizahe. Nanimuꞌ geligelinga nilave.
JOH 9:28 Neꞌmine lavo ingine gamazi goloso li-di elemisa tiꞌ li laniꞌ ve: Geiꞌ gehepeve nene eiꞌ izipahala nene nane. Idoꞌ laza nene Moseꞌ izipahala nene none.
JOH 9:29 Laza nene Oꞌmosoꞌmo eiꞌ gamazi Moseꞌni lo-imineꞌ nene gele noba gaza nolanive nene aniꞌ akaꞌve nene gelamune.
JOH 9:30 Neꞌmine likevo vele likive aza aꞌmidoꞌ tiꞌ lo lo-ngimineꞌ: Agae, voꞌne vave. Aꞌmine neniꞌ veꞌne do lamineꞌ o-nididotiꞌ nene aꞌmine ve aniꞌ akaꞌve nene sotoꞌ o neineꞌza lingine gililizanako gelamune likeve.
JOH 9:31 Laza mo gele none. Oꞌmoso neꞌmo nene lihimeloꞌ ve nene gele ngemesaꞌmo asi eveneꞌ lamineꞌ Oꞌmosola luꞌine mili eiꞌ luloloꞌ eꞌmetaaꞌ avevoꞌ nene gele ngemaaꞌ neive.
JOH 9:32 Gozopoꞌ gozopokisi nene ve malitesi izeꞌningi muluꞌningutiꞌ veꞌine like minivo sotoꞌ ave di lamineꞌ i-ngidave nene hamokisi mo kekeꞌ minamaniꞌza aꞌmine ve hamokovoꞌ ne neive.
JOH 9:33 Eiꞌ nene Oꞌmosolatiꞌ amidiniko aꞌneꞌmine initeꞌ neꞌminesi nene mo ngelo ma amidine.
JOH 9:34 Neꞌmine lavo ingine aꞌmidoꞌ tiꞌ li li-daniꞌ: Gaza izipe goloso lihimekasi sotoꞌ aineꞌ neke nene leliꞌ nene apize nolemabe. Neꞌmine li engiꞌ muliseutiꞌ ve minamilive li mudise di huli heta i-daniꞌ ve.
JOH 9:35 Izesuꞌ nene aꞌmine vele like minivo do lamineꞌ o-dive nene Halisaioꞌ vete di huli-dangumuꞌ nene gelo aꞌmine ve nene viseꞌ ogo ningo tiꞌ lo lo-imineꞌ: Oꞌmosolatiꞌ ve gihilemuꞌ nene gele eleꞌvoleꞌ abe amane.
JOH 9:36 Neꞌmine lavo vele likive aza tiꞌ lo lineꞌ: Ve melo, naza aꞌmine ve gele eleꞌvoleꞌ o-deloko zaho neve.
JOH 9:37 Neꞌmine lavo Izesuꞌ tiꞌ lo lo-imineꞌ: Aꞌmine ve nene gaza vonuꞌ bele minanive gamazi nolo-gimuve ne nouve.
JOH 9:38 Neꞌmine lavo ve aza tiꞌ lo lineꞌ: Guvekasi ve, naza nene gele eleꞌvoleꞌ okuve lo gubiꞌ ize emo opoꞌni lineꞌ.
JOH 9:39 Neꞌmine ogavo Izesuꞌ aza tiꞌ lo lineꞌ: Naza me misubouꞌ uvoniꞌ nene eveneꞌ luꞌineꞌmi vele likavo nizave nene ningilizave idoꞌ laza aka ninge none li soza laaꞌ ave nene luꞌineꞌmi vele nene mudise like minelive losa eveneꞌ izeꞌ molo-ngedelesa uvoniꞌ ve.
JOH 9:40 Neꞌmine nolivo Halisaioꞌ ve linge makaꞌ minaniꞌ nete gili tiꞌ li li-imaniꞌ: Nadive. Lelikisi nene vete likineꞌ ve nolo-ledabe.
JOH 9:41 Neꞌmine likevo Izesuꞌ tiꞌ lo lo-ngimineꞌ: Lutineꞌmi vele nene lamineꞌ like minidiniko lihime nene lengiꞌ okodida dizamidineꞌza lingine aka ninge none li zovoꞌ izi vaaꞌ nanako neꞌmo nene lihimetine ha neive.
JOH 10:1 Izesuꞌ imineꞌ molo tiꞌ lo lineꞌ: Naza laminetoꞌ tiꞌ lo nolo-lingimuve: Ve ma ingine sipisipi izeliti gesi minguko dizilisa nene gatenguko dizami aka atota gesi goholouꞌ dizaaꞌ nave nene mo aꞌmine sipisipi gizebo veꞌine minami gizengize ve goloso nizave.
JOH 10:2 Idoꞌ ve ma gatenguꞌ alineꞌ neꞌmo nene aꞌmine sipisipi izeliti gizebo ve gehepeve mineleseive.
JOH 10:3 Aꞌmine ve alineꞌ nene gatedoꞌ gizebo ve neꞌmo akahe siꞌze-davo dizo eiꞌ sipisipi izeꞌvela nene guliveꞌine ogo vise lavo eiꞌ noloꞌve nene lubamu gilikaꞌ gilikaꞌ igi ikevo ngeleꞌmizo lemo vo guvisela voloseive.
JOH 10:4 Idoꞌ neꞌmine ogo eiꞌ sipisipi izeꞌve mukiꞌ ngeleꞌmizo lemo gomuꞌ molo-ngedo vavo eiꞌ noloꞌve nene lubamu gili nizaniꞌ nenako nemuꞌ nene eꞌmeti vaaꞌ nave.
JOH 10:5 Ve gohiliti noꞌine nene lubamu gilamaaꞌ naniꞌ nenako nemuꞌ nene ve gohi nene ngeꞌmeti vami golise i-ngidilisave.
JOH 10:6 Neꞌmine lo aneza gamazi nene Halisaioꞌ vesi eveneꞌ aꞌmida minavesi nene lo-ngimineꞌza ingine nene monovo nanitekumuꞌ lihe li gili guno amaniꞌ ve.
JOH 10:7 Nemuꞌ nene imineꞌ molo Izesuꞌ tiꞌ lo lineꞌ: Naza nene mo laminetoꞌ gehepeve nolo-lingimuve. Sipisipi ize dizi ingaaꞌ aniꞌ gesiꞌmi gateni nene neniꞌ nouve.
JOH 10:8 Olihe amuvo gomuꞌ ave mukiꞌ nene gizengize ve gumineloꞌ ve neꞌminevoꞌ minaniꞌza sipisipi ize nete ingine ma gili ngimamaniꞌ ve.
JOH 10:9 Ee, neniꞌ nene aꞌmine gesiꞌmi gateni nouvonako aꞌminguꞌ nenikuꞌ imi hili gesi minguko dizilizave mukiꞌ nene initeꞌ maliꞌmosi do goloso o-ngedamivo laminekovoꞌ minilisave. Neꞌmine igi mini dizi limi igi nosoꞌ niteꞌ ningi ni lamini minilisave.
JOH 10:10 Idoꞌ gumine gizengizeloꞌ ve ingine hazamuꞌ ami asi gumine damine igi ngibili di goloso ilisavoꞌ igaꞌ nave. Neꞌmine igaꞌ naha neniꞌ uvoniꞌ nene neꞌmine olosa amo asi neniꞌ sipisipi izeꞌne nene minevoꞌ minevoꞌ ngemeni dameni nene ingine dalizaniꞌ votigile ivileꞌ ivosa lehize-ngedekuvo di tiꞌ igi lamini gehepevevoꞌ minilizave losa uvoniꞌ ve.
JOH 10:11 Neniꞌ nene sipisipi izeloꞌ gizebo ve lamineꞌ gehepeve ma ne nouve. Sipisipi izeloꞌ gizebo ve lamineꞌ nete nene sipisipi izeꞌine di nguꞌ izilisa nene golise ami okoꞌine huli hililizadoꞌ o neive.
JOH 10:12 Idoꞌ monimuꞌ sipisipi izeloꞌ gizebo gono daaꞌ ave sipisipi meꞌninge minamaniꞌ nete nene loposo gulo navo ningilizaniꞌ nene sipisipi ize huli-ngidi golise vilisave. Neꞌmine ikevo aꞌmine loposo gulo nene ogo sipisipi ize ma belo geleleheꞌ o-do novivo sipisipi ize linge nene hutileꞌ igi vilisave.
JOH 10:13 Idoꞌ sipisipiloꞌ gono dave huli-ngidi vilizaniꞌ nene nanitekumuꞌ ve. Ingine monimukovoꞌ gono di minisa sipisipi izeliti mulumoꞌine nene gilamaniꞌ nenako nemuꞌ nene huli-ngidi vilisave.
JOH 10:14 Idoꞌ naza meꞌnehinemuꞌ ningo gele nouvo aza neniꞌ ningo gele neineꞌ neꞌmino naza nene sipisipi izeloꞌ gizebo ve lamineꞌ gehepeve nouvonako nemuꞌ nene naza sipisipi izeꞌne engikumuꞌ nene mo ningo gele nouvo ingine nenikumuꞌ nene ningi gili nizave. Idoꞌ naza engikumuꞌ nene neniꞌ okoꞌne hulolosuve.
JOH 10:16 Idoꞌ neniꞌ sipisipi izeꞌne gohi ma nizave. Ingine nene Zuda ve lengiꞌ minaniꞌ gesi mingutiꞌ mene minamave. Engikisi nene do neꞌmete-ngedekuvo ingine nene neniꞌ noꞌne lubamu gililisave. Neꞌmine okuvo mulise hamoꞌ liliꞌ igi minikevo aꞌmidoꞌ gizebo ve nene mo hamoꞌ minelesuve.
JOH 10:17 Idoꞌ naza neniꞌ minevoꞌ alevoꞌne hulo helelesa nouvoniꞌ nenako nemuꞌ nene meꞌneho lulo nemave. Idoꞌ minevoꞌ alevoꞌne huloloniꞌ nene gohi do tineꞌ molo dalosuve losa hulolosuve.
JOH 10:18 Idoꞌ eveneꞌ nibili hilikevo minevoꞌ alevoꞌne hulo heleloniꞌ nene ingine nivileꞌ igi amuzo milalizadiꞌmo nomive. Asi neniꞌ luꞌneloꞌ do molo gele ngemekuvosa nene neꞌmine i-nidilisave. Idoꞌ meꞌneho neꞌmo nene neꞌmine iline lo-nede neineꞌ nenako nemuꞌ nene okoꞌne nene haza hulolosuve. Aꞌmine neꞌmine oloniꞌ amuzoꞌne nene do nouve. Idoꞌ aꞌmineꞌmine ogo minevoꞌ alevoꞌne gohi do tineꞌ molo daloniꞌ amuzoꞌne nesi nene do nouve lineꞌ ve.
JOH 10:19 Gamazi neꞌmine lidiꞌmo nene Zuda veti luꞌine nene do sitaꞌ o-ngedavo gohi hizi hoꞌli minaniꞌ ve.
JOH 10:20 Engikutiꞌ linge mukiꞌ nete tiꞌ li li minaniꞌ ve: Eiꞌ nene sikalahuꞌ goloso lulouꞌ minavo negi hizo gamazi gopo nolinguꞌ nene lingine aꞌmidoꞌ nene nanitekumuꞌ nigilave.
JOH 10:21 Neꞌmine likevo linge nete tiꞌ li li minaniꞌ ve: Neꞌmine gamazi nene sikalahuꞌ goloso luꞌninguꞌ minive nete nene ma lisaꞌmave. Sikalahuꞌ goloso neꞌmo nene vele likiveꞌmi vele nene ngelo ma do lamineꞌ o-delihe. nGelo ma do lamineꞌ o-damoloseive.
JOH 10:22 Kilisimasi gameneloꞌ Zelusalemi numuno ebekuꞌ nene monoꞌ numuno naba gozopoꞌ biluvalite di goloso angutiꞌ di lamineꞌ angumuꞌ Zuda vete gili ngolize izi holiseꞌ minaaꞌ aniꞌ gamene ogavo idoꞌ hepeꞌ elaaꞌ ineꞌ gamene nesi nene mo omo neivo minanguꞌ nene
JOH 10:23 Izesuꞌ aza monoꞌ numuno nabaꞌmi gesila heꞌ numuno naba gizikaniꞌ gulive Solomoniꞌ ve languꞌ nene nomonivo
JOH 10:24 Zuda ve naba nete igi di vodo vodo i-di mini tiꞌ li li-daniꞌ ve: Gaza gamene haꞌna geiꞌ monovoka do haleko nanivo laza gopo gate gele noneꞌ nene lo-lemamo lane. Gaza nene mo Oꞌmosoꞌmo do luꞌ izelesa gimiselelesa live noo ma nene lisiheꞌ ogo laminetoꞌ lo-lemevo.
JOH 10:25 Neꞌmine likevo Izesuꞌ aza aꞌmidoꞌ tiꞌ lo lo-ngimineꞌ: Naza nene mo lo-lingimuvoniꞌza lingine ma gili eleꞌvoleꞌ i-nidamaniꞌ ma neive. Naza meꞌnehi velemuꞌ ogo ogo molo nouvoniꞌ initeꞌ mukiꞌ neꞌmo nene neniꞌ monovoꞌne do sotoꞌ neiha
JOH 10:26 lingine nene neniꞌ sipisipi izeꞌne minamadiꞌmo nene gili eleꞌvoleꞌ amave.
JOH 10:27 Neniꞌ sipisipi izeꞌne nete noꞌneloꞌ nene lubamu gili nimaaꞌ navo naza engiꞌ nene ningo gele nouvo ingine nene neniꞌ neꞌmetaaꞌ nave.
JOH 10:28 Naza minevoꞌ minevoꞌ ngemeni dameni ngemekuvo ingine mo kekeꞌ vi tolovo igi hahasi mo amavo eveneꞌ malitesi ipeꞌ igi aꞌneutiꞌ ma di vamilisave.
JOH 10:29 Aꞌmine sipisipi izeꞌne do neniꞌ nimive meꞌneho nene initeꞌ mukiꞌ ngivileꞌ ogo naba goloso neinako eveneꞌ malitesi nene ipeꞌ igi anautiꞌ ma di vamilisave.
JOH 10:30 Idoꞌ meꞌnehosi nazasi nene do bizo mo hamoꞌ gehepeve nosive.
JOH 10:31 Neꞌmine lavo Zuda ve ingine bililisa geheni gohi nidavo
JOH 10:32 Izesuꞌ tiꞌ lo lo-ngidineꞌ: Naza meꞌneho lidoꞌ eꞌmeto gono lamineꞌ ato atoꞌ mukiꞌ noduvo lingine ningikeve. Aꞌmine duvongutiꞌ nene nani gonomuꞌ geheni huli huliꞌ igi nibililisa nave.
JOH 10:33 Neꞌmine lavo aꞌmidoꞌ nene Zuda ve ingine tiꞌ li li-imaniꞌ: Laza geheni gebelelesa nouneꞌ nene gono lamineꞌ daningumuꞌ nevoba asi Oꞌmoso ivileꞌ ilineꞌ gamazi laineꞌ nemuꞌ nene geheni gebelelesa noune. Nene nanitekumuꞌ ve. Gaza nene haza evenelike Oꞌmoso loloꞌ ogo gamazi laineꞌ nemuꞌ ve.
JOH 10:34 Neꞌmine likevo Izesuꞌ tiꞌ lo lo-ngimineꞌ: Lengiꞌ monoꞌ gamazitinguꞌ nene Oꞌmosoꞌmo eze gono dave lo-ngimineꞌ gamazi nene tiꞌ li gizi nizaniꞌ ve: Naza tiꞌ lo lo-lingiduve: Lingine nenitoꞌ medeli minaniꞌ nenako nemuꞌ lengikumuꞌ oꞌmoso ve nolo-lingiduve.
JOH 10:35 Idoꞌ monoꞌ godolouꞌ gamazi nene gihile amo haza gamazi loloꞌ ilivoba asi gihile neineꞌ nenako aꞌmine Oꞌmosoꞌmo lineꞌ gamazi nesi nene gamazi gihile neive. Idoꞌ aꞌmine eze gamazi ngimive nene haza eveneꞌ minaniꞌza oꞌmoso nizave lo lo-ngidineꞌ ve.
JOH 10:36 Nemuꞌ nene engiꞌ ngivileꞌ ogo Oꞌmosoꞌmo do kegeso neleꞌmize molo me misubouꞌ nimiselive neniꞌ nene Oꞌmosoꞌmi gipele nouve luvongumuꞌ nene lingine Oꞌmoso ivileꞌ ilineꞌ gamazi lane nilahe.
JOH 10:37 Idoꞌ lingine gilavo naza gono noduvoniꞌ nene meꞌneho daaꞌ idoꞌ do molo damuvo ma nene nenikumuꞌ gili eleꞌvoleꞌ amilizadoꞌ o neive.
JOH 10:38 Idoꞌ lingine gamaziꞌnelotikovoꞌ nenikumuꞌ gili eleꞌvoleꞌ amilizaniꞌ nolinekisi nene naza lamineꞌ meꞌneho daaꞌ idoꞌ do molo gono daaꞌ nouvoniꞌ nenako nemuꞌ nene aꞌmine gono daaꞌ nouvodotiꞌ nene nenikumuꞌ gili eleꞌvoleꞌ ilizadoꞌ o neive. Idoꞌ gonoꞌnelotiꞌ gili eleꞌvoleꞌ ilizave noluvoniꞌ nene lingine meꞌneho nene nenikisi neivo naza nene meꞌnehosi nouvoniꞌ nene gilii gili lamineꞌ igi minilizave losa noluve.
JOH 10:39 Neꞌmine lavo ingine analoꞌ do goniꞌ o-delone li gohi neꞌmine ilisa aniꞌza Izesuꞌ aza engiꞌ vovoꞌningutiꞌ nene hulo-ngedo vavo ingine di aꞌninguꞌ milamaniꞌ ve.
JOH 10:40 Neꞌmine ogo Izesuꞌ aza Zodani noso liko vo gomuꞌ Zohaneꞌ eveneꞌ noso holo-ngedo minineꞌ ebeta nene vo minineꞌ ve.
JOH 10:41 Neivo eveneꞌ vaiꞌ nene ezela aniꞌ ve. Ingine tiꞌ li laniꞌ: Eveneꞌ linge noso holo-lidive Zohaneꞌ nene atoliꞌmine suno ma do sotoꞌ osaꞌmineꞌza aza aꞌmine ve meꞌmi monovo lo sotoꞌ ogo gamazi lineꞌ ma nene mo laminetokovoꞌ laaniꞌ neive.
JOH 10:42 Neꞌmine lisa aꞌmine ebekuꞌ nene eveneꞌ mukiꞌ Izesuꞌnimuꞌ gili eleꞌvoleꞌ aniꞌ ve.
JOH 11:1 Betania numudotiꞌ ve ma minineꞌ nene gulive Lasaloꞌ ve. Aꞌmine ve nene initeꞌ gize do minineꞌ. Idoꞌ alungo setaꞌ atelehoi alunoloi Maliaki Mataki nene makaꞌ hamoꞌ numudotiꞌ minasineꞌ ve.
JOH 11:2 Aꞌmine meuko guliveꞌve nouvoniꞌ Maliaꞌ Guvelesi veꞌmi gizeneloꞌ uveli lamineꞌ leke-do godolo zopovodunuꞌ gilite-dineꞌ alu nene initeꞌ gize dave Lasaloꞌ alunolo minineꞌ ve.
JOH 11:3 Minineꞌ nenako alunolo setaꞌ ingine Izesuda gamazi tiꞌ li li hulasineꞌ: Guvekasi ve, gelezo. Gaza luka eme minanive ma nene initeꞌ gize dave.
JOH 11:4 Idoꞌ Izesuꞌ nene aꞌmine gamazi gelosa tiꞌ lo lineꞌ: Initeꞌ gize daniꞌ nene mudise helelive losa nevoba asi Oꞌmosoꞌmi guvele monelive losasi idoꞌ nelotiꞌ nene Oꞌmosoꞌmi gipele neniꞌ nene di hozi li-nidilizangumuꞌ ve losasi nene initeꞌ gize daniꞌ ve.
JOH 11:5 Idoꞌ Izesuꞌ aza Mataꞌnisi alunolosi idoꞌ uvoꞌnibine Lasaloꞌnisi nene lulo ngeme minive minaniꞌza
JOH 11:6 Lasaloꞌ initeꞌ gize dave li laniꞌ gamaziꞌve gilidotiꞌ nene gohi gamene sitaꞌ ma imineꞌ molo aꞌmine minineꞌ ebekuꞌ nene ha minineꞌ ve.
JOH 11:7 Neꞌmine ogo izipahala zuho alingeꞌ tiꞌ lo lo-ngimineꞌ ve: Laza Zudaia misubouko nene gohi vukeꞌzo.
JOH 11:8 Neꞌmine lavo izipahala zuho ingine tiꞌ li laniꞌ ve: Tisazo, aꞌmida aizeꞌ aꞌmene Zuda vete geheni gibililisa aniꞌ ma nene gohi volone nolabe.
JOH 11:9 Neꞌmine likevo Izesuꞌ aꞌmidoꞌ tiꞌ lo lo-ngimineꞌ: Gamene hamokuꞌ hoꞌ loꞌmo do vo tuvelu (12) aua neꞌmida novivo aꞌmine tuvelu (12) aua nene olihe osuꞌ lamidoꞌ gono nene ha doꞌmo vo minelesune. Ve ma ingine labanaꞌ ele neivo aka monilizaniꞌ nene me misubouꞌ hize labanaꞌ elaaꞌ ive nene ningi nizaniꞌ nenako neꞌmo nene zodohoꞌ ngebelamivo ha aka monilisave.
JOH 11:10 Idoꞌ ve ma ingine litiꞌmuso izavo aꞌminguꞌ monilizave nene inginela hize labanaꞌ ele-ngedeli labanaꞌ nomineꞌ nenako neꞌmo nene mo zodohoꞌ izilisave.
JOH 11:11 Neꞌmine lo gohi imineꞌ molo tiꞌ lo lineꞌ: Leliꞌ zogo ve Lasaloꞌ aza nene mo ongo neive. Naza nene uꞌmukoꞌ olosa volosuve.
JOH 11:12 Neꞌmine lavo izipahala zuho ingine tiꞌ li li-imaniꞌ: Guvekasi ve, aza okise ongo nolineꞌ nene alingeꞌ lamineꞌ geleleseive laniꞌ.
JOH 11:13 Izesuꞌ aza ongo neive lineꞌ nene mo hilingumuꞌ lineꞌza ingine gilaniꞌ nene ha okise ongangumuꞌ lihe li gilaniꞌ ve.
JOH 11:14 Nemuꞌ nene Izesuꞌ aza lo ngoloꞌ lo tiꞌ lo lo-ngimineꞌ: Lasaloꞌ nene mo hele neive.
JOH 11:15 Idoꞌ naza hilineꞌ gameneuꞌ ezesi minamuvoniꞌ nene lamineꞌ ve lo gele nouve. Nene nanitekumuꞌ ve. Lingine Lasaloꞌ hilidotiꞌ nene nenikumuꞌ gili eleꞌvoleꞌ ikevo lengiꞌ hize eleꞌ o-lengedeleseive losa nemuꞌ nene naza minamuvoniꞌ nene lamineꞌ ve lo gele nouve. Neꞌmine nouvoniꞌza aꞌmine Lasaloda nene vukeꞌ nalo.
JOH 11:16 Neꞌmine lavo lobeꞌ izipe ve lave Tomasiꞌ aza Izesuꞌ izipahala gonolomotine tiꞌ lo lo-ngimineꞌ: Lazasi Izesuꞌnisi nene libili hililizangisi makatoꞌ lazasi vukeꞌzo.
JOH 11:17 Idoꞌ Izesuꞌ Nene Lasaloꞌ numuꞌvela vo hetelavo Lasaloꞌni galese ize-dekunivo mo gamene setaꞌ ve setaꞌ ve minave li likevo ningo gilineꞌ ve.
JOH 11:18 Idoꞌ aꞌmine Betania numuno ebeꞌ nene Zelusalemi numuno ebetotiꞌ tuu (2) maili (tili kilomita) neꞌmino avita minineꞌ.
JOH 11:19 Neꞌmino neivo Zuda ve vaiꞌ nene Maliaki Mataki uvoꞌnibo hilingumuꞌ nene mulumoꞌine gili ive nama i-ngidi di lamineꞌ i-ngidilisa vaniꞌ ve.
JOH 11:20 Idoꞌ Izesuꞌ nene nave li-imikevo Mataꞌ aza oto akaloꞌ navo voteneꞌ o-delesa vineꞌza Maliaꞌ neve nene numunguko minineꞌ ve.
JOH 11:21 Mataꞌ aza Izesuꞌ naada vo hetelo tiꞌ lo lo-imineꞌ ve: Guvekasi ve, geiꞌ nene mela ogo minanidoꞌ neidiniko uvoꞌneho helamidine.
JOH 11:22 Ne neiha idisesi nene Oꞌmosola nanitekumuꞌ longoꞌ o-delibe ha gele gemeleseive lo gele nouve.
JOH 11:23 Neꞌmine lavo Izesuꞌ tiꞌ lo lo-imineꞌ: Uvaho nene gohi vele gizo oteleseive.
JOH 11:24 Neꞌmine lavo Mataꞌ tiꞌ lo lo-imineꞌ: Ee, alingeꞌ gamene nabala eveneꞌ hilaniꞌ otilizaniꞌ gameneuꞌ nene azasi oteleseive losa gele nouve.
JOH 11:25 Neꞌmine lavo Izesuꞌ tiꞌ lo lo-imineꞌ: Neniꞌ neve nene helaakutiꞌ otaakisi idoꞌ minevoꞌ minevoꞌ ogakisi do sotoꞌ uve nene nouve. Nenikumuꞌ gili eleꞌvoleꞌ igi minilizave mukiꞌ nene hililizaha nesi nene ha gohi miniviꞌ miniviꞌ igi minilisave.
JOH 11:26 Ee, idoꞌ ve ma ingine miniviꞌ aliviꞌ igi mini nenikumuꞌ gilii gili eleꞌvoleꞌ igi minilizave mukiꞌ nene mo mudise hili osuꞌ lami miniviꞌ miniviꞌ igivoꞌ minilisave. Gamazi mene noluvongumuꞌ nene gele eleꞌvoleꞌ abe amane.
JOH 11:27 Neꞌmine lavo Mataꞌ aza tiꞌ lo lo-imineꞌ: Guvekasi ve, naza mo gele eleꞌvoleꞌ o nouve. Geiꞌ nene Oꞌmosoꞌmo do luꞌ izelesa gimiselelesa live eiꞌ gipele me misubouꞌ aloseive lave ma nene nane losa gele nouve.
JOH 11:28 Neꞌmine lo Mataꞌ aza tineꞌ molo ogo atelehine Maliaꞌni vise lo do abazaꞌ o-do zegeno tiꞌ lo lo-imineꞌ: Maliazo, Tisaꞌ nene mo omo mino geikumuꞌ nolive.
JOH 11:29 Neꞌmine lavo gelo oto aꞌmine neida vineꞌ ve.
JOH 11:30 Izesuꞌ nene Maliale Matale numuꞌine ebeꞌninguꞌ olihe ogo hetelamo Mataꞌ vo voteneꞌ o-dineꞌ ebeta nene havoꞌ minineꞌ ve.
JOH 11:31 Idoꞌ Zuda aleve igi Maliaꞌni mulumo gili-di ive nama igi eleꞌmizi minaniꞌ aleve ingine Maliaꞌ liteꞌ lo oto numungutiꞌ lemo vineꞌ nene ningi gonoso galesela vo ive nama olosa novive li eꞌmeti vaniꞌ ve.
JOH 11:32 Neꞌmine navo Maliaꞌ nene Izesuꞌ neida vo hetelo eze ningo gizeneuꞌ golo hizo noongo tiꞌ lo lineꞌ ve: Guvekasi ve, geiꞌ nene mela ogo minanidoꞌ neidiniko uvoꞌneho nene helamidine.
JOH 11:33 Neꞌmine lo ive ogo neivo idoꞌ ezesi ave nesi nene ive navo nene ningo lulosi mutuhavo Izesuꞌ gisingisi molo minineꞌ ve.
JOH 11:34 Neꞌmino mino lingine Lasaloꞌni nene zala mili-di nizave lavo ingine tiꞌ li laniꞌ: Guvekasi ve, gaza nene ningelinge. Ano.
JOH 11:35 Neꞌmine nilavo Izesuꞌni nene vele novozo doꞌmozineꞌ ve.
JOH 11:36 Neꞌmine neivo aꞌmida Zuda ve minaniꞌ nete nene tiꞌ li laniꞌ ve: Aizoo, ve meꞌmo Lasaloꞌni nene atoliꞌmine ogo lulo eme minaaniꞌ neineꞌ ningiꞌ nalo.
JOH 11:37 Neꞌmine laniꞌza linge ma nete nene tiꞌ li laniꞌ ve: Ve meve nene vele like minive ma do lamineꞌ o-de neineꞌ nenako hilive mene helamilive lo initeꞌ ma o-delinako neꞌmine amivo helave.
JOH 11:38 Izesuꞌ nene gohi gisingisi moloꞌmo gonoso galesela aniꞌ ve. Aꞌmine gonoso galese nene geheni mulikuꞌ neivo gatedoꞌ nene geheni naba di tilikavo minineꞌ ve.
JOH 11:39 Aꞌmine geheni nene di hulilo lo Izesuꞌ lavo Mataꞌ aꞌmine hiliveꞌmi alunolo neꞌmo tiꞌ lo lineꞌ ve: Guvekasi ve, aꞌmine ve nene gamene setaꞌ ve setaꞌ ve neꞌmine minaaniꞌ nenako idise nene unuvo goloso oloseive.
JOH 11:40 Neꞌmine lavo Izesuꞌ aꞌmidoꞌ tiꞌ lo lo-imineꞌ: Gaza gele eleꞌvoleꞌ ilineꞌ nene Oꞌmosoꞌmo amuzoꞌve do sotoꞌ ilineꞌ ningelesane lo lo-gimuhe lo-gemamuvoniꞌ neve. Gaza gele eleꞌvoleꞌ ozo.
JOH 11:41 Neꞌmine lavo aꞌmine gonoso galeseloꞌ geheni naba tilikaniꞌ nene di hulikevo Izesuꞌ aza vokeneꞌ ogo veleta ningo tiꞌ lo lineꞌ: Ahono, gaza gele nemaningumuꞌ nene isaaꞌ neve lo geita noluve.
JOH 11:42 Gaza gamene gamene gele nemaaꞌ naineꞌ nene naza ha gele nouha eveneꞌ mene nizaniꞌ nete neniꞌ nene geiꞌ nimiselane li gili eleꞌvoleꞌ ilizave losa engikumuꞌ nene mene gamazi nene noluve.
JOH 11:43 Neꞌmine lo nolo nabautiꞌ tiꞌ lo vise lineꞌ: Lasaloo, neutiꞌ nene heta lemo ano.
JOH 11:44 Neꞌmine lavo aꞌmine hilive nene banisi neꞌminedunuꞌ asabuꞌ izimikaniꞌ minineꞌ nene leme hetoꞌ ineꞌ ve. Neꞌmine ogavo Izesuꞌ aza aꞌmine initeꞌ nene apasi di huli-dilo. Vilize. Tiꞌ lavo neꞌmine i-daniꞌ ve.
JOH 11:45 Neꞌmine ogavo Maliaꞌ neida aniꞌ Zuda ve linge mukiꞌ nene ingine Izesuꞌ initeꞌ ineꞌ nemuꞌ nene ningi ezemuꞌ gili eleꞌvoleꞌ aniꞌ ve.
JOH 11:46 Neꞌmine aniꞌza linge ma nete nene Halisaioꞌ ve nizada vi Izesuꞌ ineꞌ initeꞌ nemuꞌ nene li-ngimaniꞌ ve.
JOH 11:47 Neꞌmine ikevo evenetoꞌ medeli mini Oꞌmoso initeꞌ lehizi-daaꞌ ave nabasi idoꞌ Halisaioꞌ vesi nene Zuda veti kanisole ve naba linge minaniꞌ nene vise li di nubo i-ngidi tiꞌ li laniꞌ: Aꞌmine ve nene atoliꞌmine suno vaiꞌ nodangumuꞌ nene nadiꞌ o-deꞌ nalone.
JOH 11:48 Laza ninge mate-dekunivo neꞌmine o do vo minelineꞌ nene eveneꞌ mukiꞌ ingine ezemuꞌ gili eleꞌvoleꞌ igi eꞌmetilisave. Neꞌmine ikevo Loma ve nete nene igi leliꞌ monoꞌ numuno nabate nesi idoꞌ Zuda ve mukiꞌ leliꞌ nesi nene di goloso i-lidilisave.
JOH 11:49 Neꞌmine likevo engikutiꞌ ve ma aꞌmine kilisimasiuꞌ evenetoꞌ medeli mini Oꞌmoso initeꞌ lehizi-daaꞌ aveti ve nabaꞌine minive Kaiahaꞌ aza Loma ve igi libilikelizave lo gelo tiꞌ lo lo-ngimineꞌ ve: Lingine negi nizahe.
JOH 11:50 Zuda ve mukiꞌ hilikilizave lo belekunivo eveneꞌ mukitoꞌ medelo aꞌmine ve hamokovoꞌ helelineꞌ nene lamineꞌ o neineꞌ ma gilamaniꞌ nehe.
JOH 11:51 Idoꞌ Kaiahaꞌ neꞌmine lineꞌ nene asiꞌve galatiꞌ gelo lamive. Asi aza aꞌmine kilisimasiuꞌ nene evenetoꞌ medeli mini Oꞌmoso initeꞌ lehizi-daaꞌ aveti ve nabaꞌine minidiꞌmo ve losa Oꞌmosoꞌmi veletiꞌ gamazi nene polohete laaꞌ aniꞌ neꞌmino Izesuꞌ Zuda ve mukikumuꞌ helelineꞌ o neineꞌ nemuꞌ lineꞌ ve.
JOH 11:52 Idoꞌ helelineꞌ ogavo hilineꞌ nene Zuda ve mukiꞌ engikumukovoꞌ nevoba asi Oꞌmosoꞌmi izipahala mukiꞌ ato atoꞌ ebekuꞌ miniꞌmi monave nene do hamoꞌ zuho loloꞌ o-ngedelingumukisi nene helelineꞌ ogavosa hilineꞌ ve.
JOH 11:53 Idoꞌ nelotiꞌ nene Izesuꞌni bililiza akamuꞌ viseꞌ igi lovo gizi minaniꞌ ve.
JOH 11:54 Neꞌmine igi minaniꞌ nenako nemuꞌ nene Izesuꞌ aza gohi Zuda vetinguꞌ sotoꞌ mino monamilidoꞌ ogavo aꞌmine minineꞌ ebeꞌ nene hulo vo misubo hadive neꞌmi gahevela numuno ebeꞌ ma gulive Ehelaimi nela vo izipahala zuhosi aꞌmida vi minaniꞌ ve.
JOH 11:55 Idoꞌ Aigita misubouꞌ minaniꞌ gameneloꞌ nene Oꞌmosoꞌmo avoꞌningine iseꞌine izingumuꞌ gili Zuda ve nosoꞌ niteꞌ ni holiseꞌ minaaꞌ aniꞌ gamene nene avitoꞌ ogavo eveneꞌ mukiꞌ Zelusalemi numuno ebeliꞌmi gahevela miniꞌmi monaniꞌ nene aꞌmine gamene alingumuꞌ nene Oꞌmosoꞌmi veleloꞌ nene goloso niteꞌine nomivo lamineꞌ minilisa ingine igaꞌ naniꞌ niteꞌ neꞌmine nene olone li aꞌmine Zelusalemi ebekuꞌ nene vi minaniꞌ ve.
JOH 11:56 Neꞌmine igi monoꞌ numuno nabauꞌ vi minanguꞌ nene engikuꞌ tiꞌ li longoꞌ igi minaniꞌ ve: Izesuꞌ nene holiseꞌ gamene noalitinguꞌ nene mela ngelo amoloseive. Nemuꞌ lingine nadive li gili nizave.
JOH 11:57 Idoꞌ evenetoꞌ medeli mini Oꞌmoso initeꞌ lehizi-daaꞌ ave nabasi idoꞌ Halisaioꞌ ve nesi nene Izesuꞌnimuꞌ gamazi tiꞌ li li hukikaniꞌ ve: Analoꞌ daloneꞌ nenaze. Eze minineꞌ ebekumuꞌ nene ve ma gele nolineꞌ nene aza ogo lo sotoꞌ ogo lo-lemelive.
JOH 12:1 Izesuꞌ nene Oꞌmosoꞌmo iseꞌine izingumuꞌ gili mini nosoꞌ niteꞌ naaꞌ holiseꞌ nene alosa gamene sigisi (6) neꞌmine nene ha neivo hilingutiꞌ gohi do ote-dive Lasaloꞌ minida Betania numuno ebeꞌ nela nene vineꞌ ve.
JOH 12:2 Aꞌmida neivo nosoꞌ niteꞌ gize vataꞌ i-daniꞌ nene Mataꞌ do vaꞌvaꞌ ogo do ngeme ngemeꞌ gono do neivo aꞌminguꞌ Lasalokisi makaꞌ mino nosoꞌ niteꞌ no minineꞌ ve.
JOH 12:3 Neꞌmini nizavo Maliaꞌ nene okoꞌnidoꞌ hilaaꞌ aniꞌ uveli meniꞌve dize minineꞌ uveli nalida guvisedunuꞌ gehepeve liliꞌ aniꞌ uveli nene botoloꞌ naba gidini ma do ogo Izesuꞌ gizeneloꞌ leko holo-dosa godolo zopovodunuꞌ nene gilite-dineꞌ ve. Neꞌmine neivo aꞌmine uveliꞌmi unuvo lamineꞌ nene numunguꞌ bizo minineꞌ ve.
JOH 12:4 Neꞌmine ogavo izipahala zuhoutiꞌ alingeꞌ Izesuꞌni biluvaliti aꞌninguꞌ molave Kelioto numudotiꞌ ve Zudaꞌ nene tiꞌ lo lineꞌ ve:
JOH 12:5 Aꞌmine uveli meve nene sigisi hadeti kina (K600) neꞌmidoꞌ maketi mili moni di gohoꞌ gahaliꞌ aleve ngimilizanako neꞌmine amave.
JOH 12:6 Zudaꞌ aza neꞌmine gamazi lineꞌ nene gohoꞌ gahaliꞌ alevemuꞌ nene mulumoꞌine gelosa lamive. Asi aza nene engiꞌ moni milaniꞌ beniloꞌ gizebo ve mino gumineloꞌ ve minineꞌ nenako aꞌmingutiꞌ nene do halekeꞌ halekeꞌ ogo minaaꞌ ineꞌ ve.
JOH 12:7 Idoꞌ Zudaꞌ neꞌmine lavo Izesuꞌ tiꞌ lo lineꞌ ve: Lihiteheka lo-damozo. Aꞌmine uveli mene do minineꞌ nene galese izi-nidilizaniꞌ gamenemuꞌ nene holo-nedelove losa do minelineꞌ ogavosa do minosa holo-nedave.
JOH 12:8 Neꞌmine ineꞌ nene lingine gohoꞌ alevesi nene ha mini di vi minikelizaha nezesi nene mudive ma mine do vamolosunako aza ineꞌ initeꞌ nene mo lamineꞌ ve.
JOH 12:9 Zuda ve vaiꞌ goloso nene Izesuꞌ Betania numuno ebekuꞌ neive laniꞌ nemuꞌ nene gilii aꞌmida nene vaniꞌ ve. Idoꞌ aꞌmida vaniꞌ nene Izesuꞌnivoꞌ ningilisa vaniꞌ nevoba asi hilingutiꞌ do ote-dive Lasaloꞌni nesi nene ningelone lisa vaniꞌ ve.
JOH 12:10 Aꞌmine Lasaloꞌnimuꞌ nene eveneꞌ mukiꞌ evenetoꞌ medeli mini Oꞌmoso initeꞌ lehizi-daaꞌ ave naba nene meheꞌine ngimi Izesuda vi giꞌmizikaꞌ giꞌmizikaꞌ igi minaniꞌ nenako nemuꞌ nene aꞌmine evenetoꞌ medeli mini Oꞌmoso initeꞌ lehizi-daaꞌ ave naba ingine Lasaloꞌni nene belelone li gamazi di hamoꞌ aniꞌ ve.
JOH 12:12 Goꞌ losa gohi gamene ogavo eveneꞌ vaiꞌ goloso nene Oꞌmosoꞌmo avoꞌningine iseꞌine izineꞌ holiseꞌ minilisa aniꞌ nene Izesuꞌ Zelusalemi numuda mene nave likevo gili
JOH 12:13 zavile davile ledi di vi numuno ebekutiꞌ gesi heta limi igi akaloꞌ naada nene vi voteneꞌ igi gamazi nabautiꞌ tiꞌ li laniꞌ ve: Geikumuꞌ gopoꞌni nolunize. Guvetesi ve Oꞌmosoꞌmi velemuꞌ anive Isilaeleꞌ aleve leliꞌ Guvetesi ve naba geiꞌ nene Oꞌmosoꞌmo noꞌnohoꞌ ize-gidivoo.
JOH 12:14 Idoꞌ Izesuꞌ aza dongi ize ma mo ningo Monoꞌ Godolouꞌ gizi nizaniꞌ neꞌmine ogo aꞌmidoꞌ dizo mino vineꞌ ve. Aꞌmine Monoꞌ Godolouꞌ gamazi nene tiꞌ lo neive:
JOH 12:15 Zaioni golola minave Zelusalemi alevekizo, golise gilikiliꞌ ami longolize izilo. Lingine giliꞌ nalo. Guvetinesi ve naba ma nene dongi ize olihe lodive olosa neidoꞌ nene meheneloꞌ mino lengita nave.
JOH 12:16 Izesuꞌ neꞌmino numunguꞌ dizo vineꞌ nemuꞌ nene izipahala zuho ingine nene Monoꞌ Godolouꞌ minineꞌ gamazi maloꞌ nene eꞌmetosa neꞌmine neive li aꞌmine gameneuꞌ nene ma gili vevesami minaniꞌza asi Izesuꞌ nene Okulumokuꞌ moꞌmosiꞌvela dizavosa alingeꞌ nene Monoꞌ Godolouꞌ neꞌmine oloseive li gizaniꞌ minineꞌ mamuꞌ nene gilisa laza mo aꞌmine maloꞌ eꞌmeto okuneꞌ neive li gilaniꞌ ve.
JOH 12:17 Idoꞌ eveneꞌ ingine Izesuꞌni voteneꞌ ilisa vaniꞌ nene eveneꞌ vaiꞌ Lasaloꞌni hilingutiꞌ do noote-do gonoso galeseutiꞌ vise lo do heta noo-divo aꞌmida makaꞌ minave ingine nete nene aꞌminemuꞌ li sotoꞌ sotoꞌ ikevo nemuꞌ nene atoꞌ suno meꞌmine ogave li gilaniꞌ nenako nemuꞌ nene eze voteneꞌ ilisa giliisa vaniꞌ ve.
JOH 12:19 Neꞌmine igi vaniꞌ nene Halisaioꞌ ve ingine ningi tiꞌ li li voleloꞌ meloꞌ aniꞌ ve: Lingine ningahe. Laza eiꞌ ivileꞌ amoloneꞌ ogave. Eveneꞌ vaiꞌ goloso nene mo eikovoꞌ eꞌmeti vikeve.
JOH 12:20 Idoꞌ Oꞌmosoꞌmo Zuda ve iseꞌine izineꞌ holiseꞌ mini Oꞌmoso opoꞌni li minilisa Zelusalemi numuda dizi minaveuꞌ nene nGiliki ve ma minaniꞌ ve.
JOH 12:21 Aꞌmine ve nete nene nGalilaia misubouꞌ Betesaida numudotiꞌ ve Hilipoꞌ neida igi tiꞌ li laniꞌ ve: Ve melo, laza nene Izesuꞌni ninge-delesa noune.
JOH 12:22 Neꞌmine likevo Hilipoꞌ aza voosa Adeleaꞌni lo-emavo ingine di bizi makatoꞌ vi Izesuꞌni li-imasineꞌ ve.
JOH 12:23 Li-imikesivo aꞌmidoꞌ Izesuꞌ tiꞌ lo lo-ngimineꞌ: Oꞌmosolatiꞌ ve gihile neniꞌ nene di hozi li-nidikevo Guveꞌnesi ve mineloniꞌ gamene nene mo avitoꞌ ogave.
JOH 12:24 Neꞌmine lo eitoꞌ lo molo tiꞌ lo lineꞌ: Naza laminetoꞌ gehepeve tiꞌ lo nolo-lingimuve: Viti zuho gihile hamoꞌ ma misubouꞌ lemo helamilineꞌ nene gihile izamo hazavoꞌ mineleseive. Neꞌmine oloseineꞌza misubouꞌ lemo helelidotiꞌ nene gihileꞌve vaiꞌ izeleseive.
JOH 12:25 Idoꞌ ve ma ingine minevoꞌ alevote hulalone li ingine di aꞌmanapa igi minaaꞌ nave nete nene aꞌmine minevoꞌ alevoꞌine nene di goloso igi di hulaaꞌ naha ve ma ingine minevoꞌ alevoꞌine di aꞌmanapa amaaꞌ ave nete nene hulami ha di mini miniviꞌ miniviꞌ igi minilisave.
JOH 12:26 Ve ma ingine neniꞌ gonoꞌneloꞌ gelekeleꞌ ilisa ilizave nene neniꞌ mo neꞌmetaakovoꞌ ilizadoꞌ o neive. Neꞌmine igi mini ingine nene naza zaala zaala minelohe inginesi nene makakovoꞌ minilisave. Ve ma ingine neniꞌ gonoꞌneloꞌ gelekeleꞌ ilizave mukiꞌ nene neniꞌ meꞌnehoꞌmo do naba o-ngedeleseive.
JOH 12:27 Naza idise nene nemeni balala nolive. Nemuꞌ nene nadive lolove. Ahono, nenita initeꞌ sotoꞌ olosa neineꞌ nene do olovoꞌ ogo do nuꞌ izezo lolohe. Oꞌove. Naza nene aꞌmine sotoꞌ o-nedelesa neineꞌ initeꞌ nene gehelesa uvoniꞌ nenako mo ma lamolodoꞌ o noolive.
JOH 12:28 Nemuꞌ nene Ahono, geze guliveka nene do hozi nolozo. Neꞌmine lavo Okulumokutiꞌ gamazi ma tiꞌ lo lineꞌ ve: Naza guliveꞌne nene mo do hozi lokuze. Mo gohi do hozi lolosuve.
JOH 12:29 Neꞌmine lavo aꞌmida gili minaniꞌ aleve mukiꞌ ingine nete nene mo goꞌ ngilili logave li laniꞌza linge ma nete nene tiꞌ li laniꞌ: Aꞌmine neve nene angeloliꞌmo gamazi lo-imineꞌ ve laniꞌ ve.
JOH 12:30 Neꞌmine likevo Izesuꞌ aꞌmidoꞌ tiꞌ lo lo-ngimineꞌ: Gamazi mene lineꞌ nene nenikumuꞌ lamive. Asi lengikumuꞌ lineꞌ ma ne neive.
JOH 12:31 Idise melotiꞌ nene Oꞌmosoꞌmo me misubouꞌ aleve nene lihime ngemelesa apiꞌ ogo izeꞌ nomolo-ngidive. Neꞌmine noogo me misubouꞌ guvelesi ve loloꞌ ogo minive Satani nene imiselo do nohulive.
JOH 12:32 Idoꞌ misuboutiꞌ mene neniꞌ di oti-nidilizaniꞌ nene naza eveneꞌ mukiꞌ nene do nenita olosuve.
JOH 12:33 Neꞌmine gamazi lineꞌ nene eiꞌ helelineꞌ monovo nene do sotoꞌ ogosa lineꞌ ve.
JOH 12:34 Neꞌmine lavo eveneꞌ mukiꞌ nete tiꞌ li laniꞌ ve: Leliꞌ louꞌ gamazite Monoꞌ Godolouꞌ neineꞌ neꞌmo nene Oꞌmosoꞌmo do luꞌ izelesa imiselelesa live nene helamo minevoꞌ minevoꞌ oloseive lavo gele noneꞌ nenako gaza aꞌmine Oꞌmosolatiꞌ ve gihile nene di oti-dilizaniꞌ o neive laineꞌ nene zahinemuꞌ lane.
JOH 12:35 Neꞌmine likevo Izesuꞌ tiꞌ lo lo-ngimineꞌ: Labanaꞌ neꞌmo nene lengiꞌ vovotinguꞌ gamene liꞌnibevoꞌ mine molo mineleseive. Litiꞌmuso neꞌmo molo hite-lengedavo minikelizave. Lengitoꞌ labanaꞌ omo neidoꞌ nene ningi monilo. Nanitekumuꞌ ve. Eveneꞌ litiꞌmuso lulouꞌ aka monaaꞌ ave nene neꞌmine akaloꞌ novune li ningi gilamave.
JOH 12:36 Labanaꞌ lengemeni damenisi minilizangumuꞌ ve li labanaꞌ lengikuꞌ ha neidoꞌ nene aꞌmine labanakumuꞌ gili eleꞌvoleꞌ igi minilo. Neꞌmine lo engikisi gohi minelesa gelamo vo halekineꞌ ve.
JOH 12:37 Idoꞌ neꞌmine ogo Zuda ve hulo-ngedo vo halekineꞌ nene aza engiꞌ vovoꞌninguꞌ nene atoliꞌmine suno vaiꞌ do sotoꞌ inekisi ningi ingine ezemuꞌ nene ma gili eleꞌvoleꞌ amaniꞌ nenako nemuꞌ nene vo halekineꞌ ve.
JOH 12:38 Idoꞌ ingine ezemuꞌ gili eleꞌvoleꞌ amaniꞌ nene polohete Isaiaꞌ gizineꞌ gamazi ma nene gihile izelingumuꞌ ve losa gili eleꞌvoleꞌ amaniꞌ ve. Aꞌmine gamazi nene neꞌmino gizineꞌ ve: Guvekasi ve, Geiꞌ lo-lemaineꞌ gamazi lo-ngimuneꞌ nene eveneꞌ hamolitesi nene ma gili eleꞌvoleꞌ amave. Ee, Guvelesi veꞌmo eiꞌ amuzoꞌve do sotoꞌ ineꞌ nene eveneꞌ hamolitesi ma ningi gilamaniꞌ ve.
JOH 12:39 Idoꞌ ingine ngeli gili eleꞌvoleꞌ ilizadoꞌ amaniꞌ monovo Isaiaꞌ lo sotoꞌ ogo gamazi gohi ma tiꞌ lo gizineꞌ ve:
JOH 12:40 Guvelesi ve neꞌmo nene luꞌineꞌmi vele do like-ngedo luꞌineꞌmi gala nesi nene do ngi lo-ngidineꞌ ve. Idoꞌ neꞌmine ineꞌ nene luꞌineꞌmi vele ninge minivo idoꞌ luꞌineꞌmi gala nene gele hehe lo minivo minisa luꞌine di velepeꞌ izilizaniꞌ nene naza do lamineꞌ o-ngedalove losa neꞌmine ineꞌ ve.
JOH 12:41 Isaiaꞌ neꞌmine lo gizineꞌ nene Guvelesi ve Okulumokuꞌ minineꞌ moꞌmosiꞌveloꞌ emeni dameni lamineꞌ atoliꞌminesi miningumuꞌ nene ningosa nemuꞌ nene gizineꞌ ve. Idoꞌ aꞌmine nene Izesuꞌnimuꞌ loganiꞌ neive.
JOH 12:42 Neꞌmino neiha Zuda ve naba minangutiꞌ mukiꞌ nesi nene ezemuꞌ gili eleꞌvoleꞌ aniꞌza ingine eveneꞌ engiꞌ di hozi li-ngidilizangumuꞌ laniteꞌ gilaniꞌ nene ivileꞌ ogavo Zuda ve leliꞌ muliseutiꞌ huli heta i-lidikelizave li Halisaioꞌ vemuꞌ golise gili aꞌmine Izesuꞌnimuꞌ gili eleꞌvoleꞌ aniꞌ nene ma li sotoꞌ amaaꞌ aniꞌ ve.
JOH 12:44 Nelotiꞌ Izesuꞌ gamazi nabautiꞌ tiꞌ lo lineꞌ: Ve ma ingine nenikumuꞌ gili eleꞌvoleꞌ igaꞌ nave nene nenikumukovoꞌ gili eleꞌvoleꞌ navoba aꞌminguꞌ nene mo nimiselive eikumukisi nene gili eleꞌvoleꞌ igaꞌ nave.
JOH 12:45 Idoꞌ ve ma ingine neniꞌ ningi minaaꞌ nave nene nenikovoꞌ ningi minaaꞌ navoba aꞌminguꞌ nene mo nimiselive nesi nene ningaaꞌ nave.
JOH 12:46 Naza me misubouꞌ uvoniꞌ nene labanaꞌ neꞌminosa uvoniꞌ nene ve ma ingine nenikumuꞌ gili eleꞌvoleꞌ igaꞌ nave mukiꞌ nene litiꞌmuso monovouꞌ mini mili minikelizave losa uvoniꞌ ma neive.
JOH 12:47 Idoꞌ ve ma ingine neniꞌ laaꞌ nouvoniꞌ gamazi gilisa gili dami minaaꞌ nave nene naꞌniseꞌne lihime ngemesaꞌmuve. Ee, naza me misubouꞌ uvoniꞌ nene eveneꞌ izeꞌ molo-ngedo lihime ngemelesa amo do nguꞌ izelesa uvoniꞌ nenako nemuꞌ nene naꞌniseꞌne lihime ngemesaꞌmuve.
JOH 12:48 Asi aꞌmine neniꞌ meheꞌine nimi gamaziꞌnesi gili dami minilizave izeꞌ molo-ngedelive ma neineꞌ nene neniꞌ gamazi luvoniꞌ neꞌmo nene alingeꞌ gamene nabala izeꞌ molo-ngedavo lihime dalisave.
JOH 12:49 Aꞌmine gamaziꞌne laaꞌ nouvodiꞌmo izeꞌ molo-ngedeleseive luvoniꞌ nene nanitekumuꞌ ve. Aꞌmine gamazi nene naꞌnise gaꞌneutiꞌ laaꞌ nouvoba asi nimiselive meꞌneho neꞌmo nene mo lilinidoꞌ o neive lineꞌ gamazivoꞌ nene laaꞌ nouve.
JOH 12:50 Meꞌneho lo-nidineꞌ gamazi laaꞌ nouvoniꞌ nene eiꞌ gamaziꞌve neꞌmo minevoꞌ minevoꞌ minaaꞌ monovo do sotoꞌ ogaꞌ neive lo gele nouvodiꞌmo nene aꞌmine gamazi laaꞌ nouvoniꞌ mukiꞌ nene meꞌneho lo-nimineꞌ gamazi gehepevevoꞌ nene laaꞌ nouve.
JOH 13:1 Zuda ve Oꞌmosoꞌmo avoꞌningine iseꞌine izingumuꞌ gili holiseꞌ minaaꞌ aniꞌ gamene nene alitelesa gamene hamoꞌ ha neivo Izesuꞌ aza me misubo hulosa melehida vilineꞌ gamene nene mo ogave lo gala gilineꞌ ve. Eze evenele me misubouꞌ minaniꞌ lulo ngimineꞌ nene atoliꞌmine ogo ngemo helelineꞌ nesi nene ivileꞌ ivosa minineꞌ ve.
JOH 13:2 Idoꞌ nivengaꞌ molavo nosoꞌ niteꞌ ni nizavo Kelioto numudotiꞌ ve Simoniꞌ gipele Zudaꞌni nene Izesuꞌni biluvalite dalizangumuꞌ do sotoꞌ o-delineꞌ gamazi nene Satani neꞌmo do lulouꞌ molo-davo neivo
JOH 13:3 Izesuꞌ aza meleho initeꞌ mataꞌ eiꞌ anauꞌ molo neineꞌ nesi idoꞌ eiꞌ nene Oꞌmosolatiꞌ ogosa Oꞌmosola volosa neineꞌ nesi nene gele mino
JOH 13:4 nosoꞌ niteꞌ no miningutiꞌ nene oto saketiꞌve apaso do molo tauli do gopololoꞌ izineꞌ.
JOH 13:5 Neꞌmine ogo lapese mauꞌ noso lekosa apiꞌ ogo izipahala zuholiti gizeꞌine nosoꞌ izekaꞌ izekaꞌ ogo gopololoꞌ likekineꞌ taulidunuꞌ nene gilite ngimikaꞌ gilite ngimikaꞌ oꞌmo vineꞌ.
JOH 13:6 Neꞌmine ogo nosoꞌ ize-ngedeꞌmo novo Simoni Petolodoꞌ ogavo aza tiꞌ lo lo-imineꞌ: Guvekasi ve, geiꞌ nene neniꞌ gizeꞌne nene nosoꞌ ize-nedelesa nabe.
JOH 13:7 Neꞌmine lavo Izesuꞌ aꞌmidoꞌ tiꞌ lo lo-imineꞌ: Naza mene ogo molo nouvoniꞌ initeliꞌmi monovo nene idise mene mo gelamaneꞌza alingeꞌ nene gele hehe lolosane.
JOH 13:8 Neꞌmine lavo Petoloꞌ tiꞌ lo lo-imineꞌ: Geiꞌ nene mo kekeꞌ gizeꞌneloꞌ nene nosoꞌ izo gilite-nedamozo. Neꞌmine lavo Izesuꞌ aꞌmidoꞌ tiꞌ lo lo-imineꞌ: Idoꞌ geiꞌ nene ma nosoꞌ ize-gedamoloniꞌ nene neniꞌ eveneꞌne zuholiti muliseutiꞌ minamolosane.
JOH 13:9 Neꞌmine lavo Simoniꞌ Petoloꞌ aza tiꞌ lo lo-imineꞌ: Gaza neꞌmine lo ma nene gizeꞌnevoꞌ nene nosoꞌ ize-nedamo aꞌnelasi maduꞌneukisi nene nosoꞌ ize-nedezo.
JOH 13:10 Neꞌmine lavo Izesuꞌ tiꞌ lo lo-imineꞌ: Nosouꞌ ongosa minelive neꞌmo nene okoꞌno mukiꞌ nene mo guluviꞌ lo neivo akala adotiꞌ uꞌmusupo giꞌmize minelineꞌ nemuꞌ nene gizenelokovoꞌ nosoꞌ izelidoꞌ o neive.
JOH 13:11 Lengiꞌ nene mo guluviꞌ li lamineꞌ nizaha lengiꞌ vaitoꞌ nene neꞌmine amave. Vaitoꞌ guluviꞌ amave lineꞌ nene eze biluvaliti aꞌninguꞌ do molo-delivemuꞌ nene ha gele minineꞌ nenako nemuꞌ live.
JOH 13:12 Gizeꞌnidoꞌ nene nosoꞌ izo gilito osuꞌ lo-ngedo saketiꞌve nene do izo gohi mitoꞌ minosa tiꞌ lo lo-ngimineꞌ: Lingine idise o-lingiduvoniꞌ initeliꞌmi monovo nene gilahe gilamave.
JOH 13:13 Lingine nenikumuꞌ nene Tisaꞌ ve idoꞌ Guvekasi ve ve li li-nidaaꞌ nave. Idoꞌ naza nene mo neꞌmine ve nouvoniꞌ nenako neꞌmine li-nidaaꞌ naniꞌ nene mo laminetoꞌ gehepeve li-nidaaꞌ nave.
JOH 13:14 Idoꞌ neniꞌ nene tisatine neꞌminesi idoꞌ Guvetinesi ve neꞌminesi minuvodiꞌmine naza gelekeleꞌ izipe neꞌmine loloꞌ ogo gizedidoꞌ nene nosoꞌ izo gilite-lengedekuze. Aꞌmineꞌmine igi linginesi nene ge gizeꞌne nosoꞌ ize-nede ne gizenga nosoꞌ ize-gede li minilizave.
JOH 13:15 Naza neꞌmine noo-lingiduvoniꞌ nene linginesi nene naza o-lingiduvoniꞌ neꞌmine ilizave losa nene aka lengelebizo neꞌmine nouve.
JOH 13:16 Naza mo laminetoꞌ tiꞌ lo nolo-lingimuve: Gelekeleꞌ izipe neꞌmo nene gizebo o-do minive guvelesi veꞌve nene ivileꞌ o-do minesaꞌmive. Idoꞌ gonouꞌ ngimiselavo gonoloꞌ monaaꞌ nave nete nene ngimiselive ivileꞌ i-di minisaꞌmave.
JOH 13:17 Lingine aꞌmine noluvoniꞌ initekumuꞌ nene gili nizanako aꞌmidoꞌ eꞌmete gehepeve ilizaniꞌ nene Oꞌmosoꞌmo do lamineꞌ o-lengedeli akaloꞌ mini mili minilisave.
JOH 13:18 Neꞌmine noluvoniꞌ nene naza neniꞌ ve lo do kegese-lingiduve nene mo ningo gele nouvoniꞌ nenako lengiꞌ mukikumuꞌ lamuve. Monoꞌ Godolouꞌ tiꞌ li gizi nizaniꞌ gamazi nene gihile izelive losa neꞌmine nouve: Neniꞌ nosoꞌ niteꞌneutiꞌ naaꞌ usive neꞌmo nene biluvaꞌ o-nedo nebele leive.
JOH 13:19 Naza idise aꞌmine gamazi nene nolo-lingimuvoniꞌ mene aꞌmine initeꞌ olihe sotoꞌ olosa neivosa noluve. Sotoꞌ ilineꞌ nene lingine aꞌmidotiꞌ ningi neniꞌ nene mo neive neniꞌ ma ne neive li gili eleꞌvoleꞌ ilizave losa noluve.
JOH 13:20 Naza laminetoꞌ gehepeve tiꞌ lo nolo-lingimuve: Ve ma ingine neniꞌ ngimiseleloniꞌ aleve ngeleꞌmize lamineꞌ ilizaniꞌ nene aꞌminguꞌ mo nenikisi neleꞌmize lamineꞌ ilisave. Idoꞌ ve ma ingine neniꞌ neleꞌmize lamineꞌ ilizaniꞌ nene aꞌminguꞌ nimiselive eiꞌ nene eleꞌmize lamineꞌ ilisave.
JOH 13:21 Neꞌmine losa Izesuꞌ nene emeni balala livo mino tiꞌ lo lo sotoꞌ ogo lineꞌ: Naza laminetoꞌ tiꞌ lo nolo-lingimuve. Lengikutiꞌ maliꞌmo nenikumuꞌ me neive lo biluvaliti aꞌninguꞌ molo-nedeleseive.
JOH 13:22 Neꞌmine lavo izipahala zuho nene zahinemuꞌ nolive li gopo gaꞌine gili vonuꞌ gimise aniꞌ ve.
JOH 13:23 Izipahala zuho engikutiꞌ ve ma nene vonoloꞌ izipe neꞌmine minive nene Izesuꞌ minida avitoꞌ gehepeve minineꞌ ve.
JOH 13:24 Nemuꞌ aꞌmine vemuꞌ nene Simoniꞌ Petoloꞌ aza godolodunuꞌ avazaha ogo zahinemuꞌ lihe longoꞌ o-dezo lo-dineꞌ ve.
JOH 13:25 Neꞌmine lo-davo aꞌmine ve aza Izesuda mine lehete ogo tiꞌ lo longoꞌ o-dineꞌ ve: Guvekasi ve, gaza nene zahinemuꞌ nolane.
JOH 13:26 Neꞌmine lavo Izesuꞌ aꞌmidoꞌ tiꞌ lo lineꞌ: Aꞌmine ve nene beleti lumo ma do supu nosouꞌ lupizo emelove ne neive. Neꞌmine lo beleti lumo ma do lupizo Kelioto numudotiꞌ ve Simoniꞌ gipele Zudaꞌni nene imineꞌ.
JOH 13:27 Emavo do anauꞌ ogo nonavo aꞌmidoꞌ liteꞌ lo Satani neꞌmo lulouꞌ dizineꞌ ve. Neꞌmine ogavo Izesuꞌ aza Zudaꞌni tiꞌ lo lo-imineꞌ: Gaza olosa naineꞌ initeꞌ nene geto olosane.
JOH 13:28 Neꞌmine lo lineꞌza nosoꞌ niteꞌ makaꞌ ni minave mukiꞌ nene Zudaꞌni neꞌmine lo-dineꞌ nene nanimuꞌ lo-dihe nemuꞌ ma gilami minaniꞌ.
JOH 13:29 Ee, Zudaꞌ nene engiꞌ moni milaniꞌ beniloꞌ nene gizebo ve minineꞌ nenako nemuꞌ nene engikutiꞌ linge ma nete Izesuꞌ aza neꞌmine lineꞌ nene holiseꞌ nosoꞌ niteꞌ nevoꞌmine vo meni hizelingumuꞌ lo-dihe idoꞌ moni ma gohoꞌ gahaliꞌ aleve ngemelingumuꞌ lo-dihe lisa gilaniꞌ ve.
JOH 13:30 Neꞌmine ogo Zudaꞌ nene aꞌmine beleti nene no osuꞌ lo liteꞌ lo oto numungutiꞌ lemo heta vohaha ineꞌ nene litiꞌmuso ize mininguꞌ vineꞌ ve.
JOH 13:31 Idoꞌ Zudaꞌ nene heta lemo vavo Izesuꞌ tiꞌ lo lineꞌ: Idise nene Oꞌmosolatiꞌ ve gihile nene di hozi li-nidilizaniꞌ gamene nene mo ogave. Idoꞌ nenitotiꞌ nene Oꞌmoso di hozi li-dilisave.
JOH 13:32 Idoꞌ neꞌmino neineꞌ nenako Oꞌmosoꞌmo eitoꞌ do medele-nedo do hozi lo-nedeleseive. Ee, idoꞌ gamene haꞌna vamivo mo liteꞌ lo do hozi lo-nedeleseive.
JOH 13:33 Izipekizo, naza lengikisi nene gamene liꞌnibevoꞌ mineloniꞌ ogave. Nenikumuꞌ lingine viseꞌ ilizaha mo ngeli ningamilisave. Zuda ve lo-ngimuvoniꞌ maꞌmino idise nene lengikisi tiꞌ lo nolo-lingimuve: Naza vo mineloda lingine ngeli amilisave.
JOH 13:34 Naza gamazi gosohoꞌ ma tiꞌ lo lo huko nolo-lingimuve: Lingine nene ge luka neme ne luꞌne geme livoꞌ minilo. Ee, neniꞌ luꞌne lengeme nouvoniꞌ neꞌmine igi lingine nesi nene ge luka neme ne luꞌne geme livoꞌ minilo.
JOH 13:35 Eveneꞌ mukiꞌ nete lingine neniꞌ izipahaꞌne zuhoutiꞌ nizave li ningi gililizaniꞌ nene lingine ge luka neme ne luꞌne geme li minilizadotiꞌ nene ningi gililisave.
JOH 13:36 Neꞌmine lavo Simoniꞌ Petoloꞌ aza Izesuꞌni tiꞌ lo longoꞌ o-dineꞌ ve: Guvekasi ve, gaza zala viliningumuꞌ nolane. Neꞌmine lavo Izesuꞌ aꞌmidoꞌ tiꞌ lo lo-imineꞌ: Naza voloda nene idise nene gaza ngelo neꞌmeto vamolosaba asi alingeꞌ nene neꞌmeto volosane.
JOH 13:37 Neꞌmine lavo Petoloꞌ aza tiꞌ lo lo-imineꞌ: Guvekasi ve, idise nene nanitekumuꞌ geꞌmeto vamolove. Gaza libililiza akaloꞌ volosa nolilineꞌ nene naza nene geikumuꞌ okoꞌne nene ha hulolosuve.
JOH 13:38 Neꞌmine lavo Izesuꞌ aꞌmidoꞌ tiꞌ lo lo-imineꞌ: Gaza okonga nenikumuꞌ ha hulolosuve nolabe. Oꞌove. Idise melotiꞌ nene okoloholiꞌmo olihe nolo molamivo gaza neniꞌ nene ningamuve ve lo ataize gamene setohamo lolosane.
JOH 14:1 Neꞌmine lo Izesuꞌ imineꞌ molo tiꞌ lo lineꞌ: Lingine lutinguꞌ naniteꞌ sotoꞌ o-ledelivo li gili lengemeni balala lokaꞌ lokaꞌ ivo nizaniꞌ nene mo alamilo. Asi Oꞌmosomuꞌ gili eleꞌvoleꞌ igi nenikumukisi nene gili eleꞌvoleꞌ igi minilo.
JOH 14:2 Meꞌnehi numuno ebeꞌvela minevoꞌ alevoꞌ igi minilizaniꞌ numuno nene vaiꞌ goloso neive. Idoꞌ neꞌmino ma minamidiniko naza vo numuno do vaꞌvaꞌ o-lengedelove lo lo-lingimuvoniꞌ nene ma lamuvodine.
JOH 14:3 Idoꞌ naza vo numuno do vaꞌvaꞌ o-lengedeloniꞌ nene aꞌmine vo mineloda nene linginesi vi minilizangumuꞌ ve lo lengiꞌ nene do nenita ogo lengeleꞌmizo volosa gohi alosuve.
JOH 14:4 Idoꞌ aꞌmine naza voloniꞌ ebeta aka vo neineꞌ nene lingine mo ningi gili nizave.
JOH 14:5 Idoꞌ izipahala zuhoutiꞌ Tomasiꞌ neꞌmo tiꞌ lo lo-dineꞌ ve: Guvekasi ve, gaza vilineꞌ ebekumuꞌ nene ma gelamuneꞌ nenako aꞌmida vaaꞌ akasi nene laza nado ningo gelelone.
JOH 14:6 Neꞌmine lavo Izesuꞌ aꞌmidoꞌ tiꞌ lo lineꞌ: Meꞌneho Oꞌmosola vaaꞌ aka nene naꞌniseꞌne nouve. Aka nouvonako naza nene aꞌmida vilizangumuꞌ gamazi gihile neꞌmi meleho mino minevoꞌ minevoꞌ lengemeni dameni lengemaaꞌ meleho nesi nene naꞌniseꞌne nouve. Nemuꞌ nene aꞌmine aka nenita vamilizave hamolitesi nene meꞌnehida ngeli ma vi hetelamilisave.
JOH 14:7 Lingine neniꞌ nene mo ningi gili nizanako meꞌnehinesi nene mo ningi gililisave. Idise melotiꞌ nene eze mo ningi gilisa mo ningi nizave.
JOH 14:8 Neꞌmine lavo Hilipoꞌ tiꞌ lo lo-imineꞌ: Guvekasi ve, mahine nene lelebizezo. Lelebizanivo laza ningekunivo neꞌmo vo davo gohi viseꞌ amolone.
JOH 14:9 Neꞌmine lavo Izesuꞌ tiꞌ lo lo-imineꞌ: Hilipoo, naza nene lengikisi gamene haꞌna nene minuneꞌ neineꞌza gaza nene nenikumuꞌ olihe ningo gelamabe. Ve ma ingine neniꞌ ningaaꞌ nave nene aꞌminguꞌ nene meꞌnehinesi ningaaꞌ nave. Neꞌmine o neineꞌ nenako gaza meꞌnehine lelebizezo laineꞌ nene lamilinako nanimuꞌ lane.
JOH 14:10 Meꞌneho nene nenikisi minaaꞌ neivo naza nene meꞌnehosi minaaꞌ nouvoniꞌ mamuꞌ nene gele eleꞌvoleꞌ amabe. Gamazi mene lo-lengemaaꞌ nouvoniꞌ ma nene neniꞌ gaꞌneutiꞌ gelo lo-lengemesaꞌmuve. Asi meꞌneho neꞌmo nene nenikuꞌ mino eiꞌ gono nodavosa nene laaꞌ nouve.
JOH 14:11 Meꞌneho nene nenikisi minaaꞌ neivo naza nene meꞌnehosi minaaꞌ nouve lo lo-lengemaaꞌ nouvoniꞌ nene gili eleꞌvoleꞌ ilizadoꞌ o neive. Idoꞌ haza gili eleꞌvoleꞌ amilizadoꞌ nolineꞌ nene neniꞌ meꞌnehi gono do ogo molo nouvoniꞌ initetotiꞌ nene gili eleꞌvoleꞌ ilizaniꞌ o neive.
JOH 14:12 Naza mo laminetoꞌ gehepeve nolo-lingimuve. Ve ma ingine nenikumuꞌ gili eleꞌvoleꞌ i minilizave mukiꞌ nesi nene naza ogo molo nouvoniꞌ initeꞌ neꞌmine nene ha igi mili ilisave. Ee, idoꞌ naza nene meꞌnehida voloniꞌ nenako neꞌmo nene ingine naza uvoniꞌ initeꞌ nene ivileꞌ ivosa atoliꞌmine initeꞌ naba nesi ha ilisave.
JOH 14:13 Neniꞌ guliveꞌne di tiꞌ igi mini neniꞌ eveneꞌne loloꞌ igi minilizangutiꞌ initeꞌ mamuꞌ lilizaniꞌ nene gipele nenitotiꞌ nene meꞌnehi guliveꞌve di hozi lilizangumuꞌ ve losa nene ha gele lengemelesuve.
JOH 14:14 Ee, neniꞌ eveneꞌne liliꞌ igi minilizangutiꞌ initeꞌ mamuꞌ nenita lilizaniꞌ nene ha gele lengemelesuve.
JOH 14:15 Lingine lutine nimi nizaniꞌ nolineꞌ nene naza lo-lingimuvoniꞌ gamazi nene gili di minilisave.
JOH 14:16 Neꞌmine ikevo naza meꞌnehine lokuvo lengita minevoꞌ minevoꞌ ilingumuꞌ nene hize eleꞌ o-lengedelive gohi ma imiseleleseive.
JOH 14:17 Aꞌmine imiselelive nene gamazi gihile do sotoꞌ ive Oꞌmosoꞌmi Sikalahuꞌ nene neive. Me misubouꞌ initekumukovoꞌ gilaaꞌ ave ingine aꞌminemuꞌ nene ma ningi gilisaꞌmaniꞌ nenako eze nene ngeli ma di tiꞌ amilisave. Nene neiha aza nene lengita mino lutinguꞌ omo minaaꞌ neineꞌ nenako lingine nene ezemuꞌ mo ningi gili nizave.
JOH 14:18 Naza hulo-lengedo voloniꞌ nene lingine mudise muheleꞌ izipe neꞌmine minilizave losa hulo-lengedamolosuve. Naza nene lengita gohi alosuve.
JOH 14:19 Melotiꞌ nene gamene liꞌnibevoꞌ ogo vavo me misubouꞌ aleve nete neniꞌ nene gohi ma ningamilisaha lengiꞌ nene neniꞌ ha ningilisave. Naza nene mo minevoꞌ minevoꞌ ogo nouvoniꞌ nenako nemuꞌ nene linginesi miniviꞌ miniviꞌ igi minilisave.
JOH 14:20 Aꞌmine neniꞌ gohi ningilizaniꞌ gameneloꞌ nene naza meꞌnehida mine molo nouvo idoꞌ lingine nene nenita mini mili nizavo naza nene lengita mine molo nouvoniꞌ nemuꞌ nene mo ningi gililisave.
JOH 14:21 Eveneꞌ ma ingine neniꞌ gamaziꞌne di mini aꞌmidoꞌ gili di minaaꞌ nave nene mo luꞌine laminetotiꞌ nimaaꞌ nave nene nizave. Idoꞌ aꞌmine luꞌine laminetotiꞌ nimaaꞌ nave nene meꞌneho lulo ngemeleseive. Neꞌmine neivo nazasi nene luꞌne ngemo neniꞌ nemeni dameni ngelebizelesuve.
JOH 14:22 Neꞌmine lavo Kelioto ve Zudaꞌ abalaho Zudaꞌ gohi ma neꞌmo Izesuꞌni nene tiꞌ lo lo-imineꞌ ve: Gaza leliꞌ Zuda veti guvetesi ve naba naneꞌ gemeni dameni nene me misubouꞌ aleve mukiꞌ ngelebizamo lelikovoꞌ lelebizelove nolaineꞌ nene do nadosa lelikovoꞌ lelebizeline.
JOH 14:23 Neꞌmine lavo Izesuꞌ aꞌmidoꞌ tiꞌ lo lo-imineꞌ: Naza nemeni dameni lengelebizeloniꞌ aka neꞌmino neive: Ve ma ingine luꞌine neniꞌ nimi minilizave nete nene neniꞌ gamaziꞌneloꞌ eꞌmeti gili di minilisave. Neꞌmine ikevo meꞌneho lulo ngemavo azasi nazasi engita ogo mine molo minelesusive.
JOH 14:24 Ve ma ingine luꞌine neniꞌ nimamaaꞌ nave nene neniꞌ gamaziꞌneloꞌ eꞌmetamaaꞌ nave. Aꞌmine lokuvo gilaaꞌ naniꞌ gamazi nene neniꞌ gamaziꞌne nomive. Asi nimiselive meꞌnehi gamazi nene neive.
JOH 14:25 Aꞌmine nolo-lingimuvoniꞌ gamazi meve nene naza linginesi ha minuvodoꞌ ve losa nene nolo-lingimuve.
JOH 14:26 Neꞌmine nouha naza vokuvo meꞌneho nene neniꞌ veꞌnemuꞌ ogo lengita imiselelive lengiꞌ hize eleꞌ o-lengedelive Oꞌmosoꞌmi Sikalahuꞌ neꞌmo nene initeꞌ mataꞌ mukikumuꞌ nene apize lengemo lo-lingimuvo niteꞌ mukikumuꞌ nene gohi lo gatine oloseive.
JOH 14:27 Idoꞌ mo hulo-lengedeloniꞌ o neineꞌ nenako haza hulo-lengedamo hongu monovo nesi nene nohulo-lingiduve. Aꞌmine hongu monovo nene me misubouꞌ alevete hongu monovo di sotoꞌ igaꞌ naniꞌ neꞌmine minamo nenitatiꞌ atoliꞌmine ogo minineꞌ hongu nene nolingimuze. Lingine lengemeni balala livo mini goliseloꞌ ve minamilo.
JOH 14:28 Naza hulo-lengedo vosa lengita alosuve lo lo-lingimuvoniꞌ nene lingine mo gilikeve. Nemuꞌ lingine nene lutine lamineꞌ gehepeve nimi minadiniko meꞌneho nene neniꞌ nivileꞌ ogo naba neineꞌ nenako aꞌmine meꞌnehida volongumuꞌ nene lingine mo lamineta novive li longolize izi minadine.
JOH 14:29 Idoꞌ initeꞌ mataꞌ idise mene nolo-lingimuvoniꞌ nene alingeꞌ sotoꞌ ilineꞌ nene lingine gili eleꞌvoleꞌ ilizave losa olihe sotoꞌ amidoꞌ nene gomuꞌ nolo-lingimuve.
JOH 14:30 Me misubouꞌ guvelesi ve loloꞌ ogo minive nene nenita mo nave. Nemuꞌ nene lengikisi gamazi haꞌna lamolonidoꞌ o neive. Aꞌmine nenita nave nene initeꞌ hamokisi neniꞌ o-nedelidoꞌ mo lisiheꞌ amineꞌza
JOH 14:31 oloniꞌ initeꞌ nene me misubouꞌ aleve ningi meꞌnehine luꞌne eme mino aza lo-nidineꞌ initetokovoꞌ eꞌmeto ogo molo ogaꞌ neive li ningi gililizave losa aꞌmine initeꞌ nene olosa nouze. Mo valonge. Otilo.
JOH 15:1 Izesuꞌ imineꞌ molo tiꞌ lo lo-ngimineꞌ: Neniꞌ nene vaini nalaꞌ neꞌmi zava gehepeve ne nouve. Idoꞌ meꞌneho neve nene aꞌmine vaini nalatoꞌ gizebo ve ne neive.
JOH 15:2 Aꞌmine nenikuꞌ aꞌnava neꞌmine mini gihile izamaniꞌ nene huko do hulaaꞌ neive. Idoꞌ gihile izi minaniꞌ aꞌnava mukikuꞌ nene gihile mo vaiꞌ goloso izelingumuꞌ ve lo sisive do do lisiheꞌ gehepeve ogaꞌ neive.
JOH 15:3 Naza gamazi lo-lengemaaꞌ nouvoniꞌ neꞌmo lengikuꞌ nene mo sisive do do lisiheꞌ ogave.
JOH 15:4 Nemuꞌ lingine nenitoꞌ nene giꞌmizi giliꞌ li minilo. Aꞌmineꞌmine ogo naza linginela giꞌmizo minelove. Aꞌnava neꞌmo zavaꞌveloꞌ giꞌmize minamilineꞌ nene asiꞌve ngelo gihile izamoloseiha zavaꞌveloꞌ giꞌmize minelineꞌ nene gihile izeleseive. Aꞌmineꞌmine ogo lingine nenita giꞌmizami minilizaniꞌ nene gihile ma izami asi nenita giꞌmizi minilizanikovoꞌ nene gihile izilisave.
JOH 15:5 Ee, neniꞌ nene vaini nalaꞌ neꞌmi zavaꞌve nene nouvo lingine nene aꞌnava neꞌmine nene nizave. Idoꞌ neniꞌ nene hize eleꞌ o-ngedamuvo initeꞌ hamokisi ma amilisanako ve ma ingine nenita giꞌmizi nizavo naza inginela giꞌmizo minelove nete nene gihile vaiꞌ goloso izilisave.
JOH 15:6 Ve ma ingine nenitoꞌ giꞌmizi minamave nene za aꞌnava huki hulikevo gokoꞌ lavo di nubuho igi olokuꞌ gizikevo laaꞌ neineꞌ neꞌmine nene nizave.
JOH 15:7 Lingine nenitoꞌ giꞌmizi minilizaniꞌ nene naniteꞌ naniteꞌ dalisa gililizahe aꞌminemuꞌ lilizaniꞌ nene meꞌneho ha gele lengemavo dalisave.
JOH 15:8 Idoꞌ lingine gihile vaiꞌ izi neniꞌ izipahaꞌne zuho gihile liliꞌ igi minilizadotiꞌ nene meꞌnehine di hozi li-dilisave.
JOH 15:9 Meꞌneho lulo nene neniꞌ neme neineꞌ neꞌmino naza luꞌne nene lengeme nouve. Nemuꞌ nene luꞌne lengemeꞌmo vo minelodoꞌ vo lisiheꞌ ivosavoꞌ minilo.
JOH 15:10 Naza meꞌneho lo huko lo-nidineꞌ gamaziloꞌ eꞌmeto mino meꞌneho lulo nimidoꞌ lisiheꞌ ivosa minaaꞌ nouvoniꞌ neꞌmine igi linginesi nene aꞌmineꞌmine igi neniꞌ lo huko lo-lingiduvoniꞌ gamaziloꞌ eꞌmeti minilizaniꞌ nene luꞌne lengemeꞌmo vo minelodoꞌ vo lisiheꞌ ivosavoꞌ nene minilisave.
JOH 15:11 Gamazi mene nolo-lingimuvoniꞌ nene luꞌne gulumo avile lisivo minaaꞌ nouvoniꞌ monovo nene lengitasi minivo aꞌmine neꞌmo vaiꞌ lo lingibilivo minilizave losa noluve.
JOH 15:12 Neniꞌ gamazi ma lo huko lo-lingiduvoniꞌ ma nene neꞌmino neive: Naza luꞌne lengiꞌ lengeme nouvoniꞌ neꞌmine igi linginesi nene ge luka neme ne luꞌne geme livoꞌ minilo.
JOH 15:13 Ve maliꞌmo eze zogo alevemuꞌ okoꞌno hulo labuluvo ogosa helelineꞌ nene lulo atoliꞌmine gehepeve ogo ngeme minosa nene neꞌmine ilineꞌ nenako lulo mo ngemo minineꞌ votigile nene ivileꞌ ivosa lulo gohi ngemelidoꞌ ngelo minamoloseive.
JOH 15:14 Lingine lo huko lo-lingimuvodoꞌ eꞌmeti minilizaniꞌ nene neniꞌ zogone nene nizave.
JOH 15:15 Idoꞌ gelekeleꞌ izipe nete nene guveꞌinesi ve gizebo o-ngede miniveꞌmo ogo molo ogaꞌ neineꞌ initekumuꞌ nene ma ningi gilisaꞌmaniꞌ nenako nemuꞌ nene naza lengikumuꞌ nene gelekeleꞌ izipe ve lo gohi ma lo-lengedamolodoꞌ o neive. Asi meꞌnehidatiꞌ ningo giluvoniꞌ initeꞌ mukiꞌ nene lengiꞌ gililizave lo do sotoꞌ ogo lo-lengeme nouvoniꞌ nenako nemuꞌ nene idise lengiꞌ nene zogone ve nolo-lingiduve.
JOH 15:16 Lengiꞌ nene gomuꞌ apizi neniꞌ nene lengiꞌ ve li ma di tiꞌ amave. Asi neniꞌ neve lengiꞌ do tiꞌ uvoniꞌ nene vi gono dikevo minevoꞌ minevoꞌ ilineꞌ gihile nene izelive losasi idoꞌ lingine neniꞌ veꞌnemuꞌ igi meꞌnehida vokuꞌ nanitekumuꞌ lilizahe aꞌmine initeꞌ nene lengemelive losasi do tiꞌ o-lingiduvoniꞌ ve.
JOH 15:17 Naza nene mo neꞌmine lo nolo huko-lingiduve: Lingine nene ge luka neme ne luꞌne geme li minilo.
JOH 15:18 Me misubouꞌ initetoꞌ luꞌine milaaꞌ nave nete lengiꞌ biluvaꞌ i-lingidilizaniꞌ nene gomuꞌ neniꞌ biluvaꞌ i-nidi minaniꞌ ma nene idise leliꞌ nene biluvaꞌ nii-lidave lisa gili minilo.
JOH 15:19 Lingine nene aꞌmine me misubouꞌ aleveti muliseꞌningutiꞌ minadiniko ingine lengikumuꞌ nene leliꞌ aleve ve li zogo mili-lingidadine. Neꞌmine adineꞌza engiꞌ muliseutiꞌ lengiꞌ nene neniꞌ ve lo do kegese-lengedo do nenita o-lingiduvoniꞌ neꞌmo nene biluvaꞌ nii-lingidave.
JOH 15:20 Naza tiꞌ lo lo-lingimuvoniꞌ gamazi mamuꞌ nene gili minilo: Gelekeleꞌ izipe neꞌmo nene gizebo o-do minive guvelesi veꞌve nene ivileꞌ o-do minesaꞌmive. Neniꞌ goboni mili-nidaaꞌ ave nilizaniꞌ nene lengikisi goboni mili-lingidilisave. Idoꞌ neniꞌ gamaziꞌneloꞌ gili di minaaꞌ ave nilizaniꞌ nene lengiꞌ gamazitinesi nene gili di minilisave.
JOH 15:21 Mene noluvoniꞌ initeꞌ i-lingidilizaniꞌ nene ingine neniꞌ nimiselive nene ningi gilami minilisanako neꞌmo nene lingine neniꞌ guliveꞌne di tiꞌ igi nenitoꞌ giꞌmizi minangumuꞌ ve li aꞌmine noluvoniꞌ initeꞌ nene ha i-lingidilisave.
JOH 15:22 Idoꞌ naza ma amo gamaziꞌne nene ma lo-ngemamuvodiniko nenikumuꞌ gili hulamavo lihime nene engita mo minamivo minadineꞌza idise nene ingine laza lihime nodune lo gelamo gopo minune li eꞌmenga lilizaniꞌ aka nene ogo hize tile-ngedekuvoniꞌ nenako olovoꞌ ma amilisave.
JOH 15:23 Ve ma ingine neniꞌ biluvaꞌ i-nidaaꞌ nave nene aꞌminguꞌ meꞌnehinesi nene biluvaꞌ nii-dave.
JOH 15:24 Idoꞌ neniꞌ nene eveneꞌ malitesi amaniꞌ initeꞌ atoliꞌmine suno gehepeve nene engiꞌ vovoꞌninguꞌ do sotoꞌ uvoniꞌ ma nene ma do sotoꞌ amuvodiniko lihime engita ma minamivo minadineꞌza engiꞌ vovoꞌninguꞌ nene aꞌmine atoꞌ suno nene do sotoꞌ nouvo ningisasi nene nenikisi meꞌnehinesi nene biluvaꞌ i-lidi minaniꞌ ma neive.
JOH 15:25 Neꞌmine igi minaniꞌ nene engiꞌ monoꞌ gamaziꞌninguꞌ gizikaniꞌ minineꞌ gamazi ma nene gihile izelingumuꞌ ve losa nene neꞌmine aniꞌ ve. Aꞌmine gamazi nene neꞌmino neive: Biluvaꞌ i-nidaniꞌ nene mo hazamuꞌ gehepeve neꞌmine aniꞌ ve.
JOH 15:26 Idoꞌ meꞌnehosi minasidotiꞌ imiselekuvo alive hize eleꞌ o-lengedelive adoꞌ gamazi gihile do sotoꞌ ive Oꞌmosoꞌmi Sikalahuꞌ alineꞌ nene neniꞌ monovoꞌnemuꞌ lo sotoꞌ sotoꞌ oloseive.
JOH 15:27 Idoꞌ lengiꞌ nene gono apiꞌ ogo do minuvodotiꞌ nene nenikisi makaꞌ mine do ogo noneꞌ nenako nemuꞌ nene linginesi nene neniꞌ monovoꞌnemuꞌ li sotoꞌ sotoꞌ ilisave.
JOH 16:1 Gamazi mene nolo-lingimuvoniꞌ nene lingine nenikumuꞌ gili eleꞌvoleꞌ aniꞌ nene hulii limi ingikelizave losa nene nolo-lingimuve.
JOH 16:2 Zuda ve nete monoꞌ muliseꞌningutiꞌ nene huli heta i-lingidilisave. Ee, gamene ma alosa neive. Aꞌminguꞌ nene lengiꞌ lingibili hililizave mukiꞌ nete Oꞌmosoꞌmi gono nodube li gilii lingibili hililisave.
JOH 16:3 Initeꞌ nevoꞌmine nene ingine meꞌnehinesi nenikisi nene ningi gilamaniꞌ nenako neꞌmo nene neꞌmine ilisave.
JOH 16:4 Naza aꞌmine sotoꞌ ilineꞌ initekumuꞌ do gomuꞌ molo nolo-lingimuvoniꞌ nene aꞌmine initeꞌ alingeꞌ sotoꞌ ilineꞌ gamenela nene lingine neniꞌ lo-limineꞌ maloꞌ nene sotoꞌ neive li gili minilizangumuꞌ nene nolo-lingimuve. Naza nene lengikisi mine do ogo nouvoniꞌ nenako nemuꞌ nene naza idise nolo-lingimuvoniꞌ initekumuꞌ ganaꞌ ma lo-lengemamuvoniꞌ ma neive.
JOH 16:5 Ee, gomuꞌ lengikisi mine do ogo minuvoniꞌza idise nene mo nimiselivela nene novuve. Novuvoniꞌza lengikutiꞌ hamoliꞌmosi nene zala novane lo longoꞌ ma o-nedamive.
JOH 16:6 Ne neiha gamazi mene lo-lingimuvoniꞌ neꞌmo nene mulumo alumo lutinguꞌ do vaiꞌ lo-lengedavo vaiꞌ lo neive.
JOH 16:7 Ne neiha naza mo laminetoꞌ tiꞌ lo nolo-lingimuve: Naza hulo-lengedo ma vamoloniꞌ nene aꞌmine hize eleꞌ o-lengedelive nene ma alidoꞌ minamoloseiha naza voloniꞌ nene lengita imiselekuvo aloseinako nemuꞌ voloniꞌ neꞌmo nene hize eleꞌ o-lengedeleseive.
JOH 16:8 Idoꞌ aꞌmine hize eleꞌ o-lengedelive alineꞌ nene lihimeꞌineꞌmi monovo nesi idoꞌ lihime nomineꞌ lisiheꞌ lamineꞌ minaaliꞌmi monovo nesi idoꞌ Oꞌmosoꞌmo goniꞌ o-ngedo lihime ngemelineꞌ monovo nesi nene do sotoꞌ ogo me misubouꞌ aleve nene luꞌninguꞌ hizivo ningi gililisave.
JOH 16:9 Ee, ingine nenikumuꞌ gili eleꞌvoleꞌ ami minaaꞌ naadotiꞌ nene lihime engita neineꞌ nene ngelebizeleseive.
JOH 16:10 Idoꞌ lingine neniꞌ nene gohi ningamilizada meꞌnehida volodotiꞌ nene aza lihimeꞌve nomineꞌ mino ve lisiheꞌ lamineꞌ minineꞌ ve li ningilizave lo nesi ngelebizeleseive.
JOH 16:11 Idoꞌ me misubouꞌ aleveti guveꞌinesi ve loloꞌ ogo minive nene naza mo ivileꞌ okuvo Oꞌmosoꞌmo goniꞌ o-do lihime emelingumuꞌ lo huko-didotiꞌ nene me misubouꞌ aleve monoꞌ gilamave engikisi Oꞌmosoꞌmo goniꞌ o-ngedo lihime ngemelineꞌ o neineꞌ nesi nene ngelebizeleseive.
JOH 16:12 Agae, naza idise nene gamazi vaiꞌ goloso ha lo-lengemeloniꞌ o neineꞌza lingine idise aꞌmene liteꞌ li di lutinguꞌ milalizadoꞌ lisiheꞌ amilisave.
JOH 16:13 Ne neiha aꞌmine luve gamazi gihile do sotoꞌ ogaꞌ ive Oꞌmosoꞌmi Sikalahuꞌ alineꞌ nene lengeleꞌmize gamazi gihile mukiliꞌmi akaloꞌ molaloseive. Neꞌmine ilineꞌ nene nanitekumuꞌ ve. Aza nene eiꞌ galautiꞌ gelo lilivoba asi meꞌnehidatiꞌ gelelineꞌ initekovoꞌ nene lo-lengemo idoꞌ alingeꞌ sotoꞌ ilineꞌ initekumuꞌ nene lo sotoꞌ o-lengemeleseive.
JOH 16:14 Aꞌmine luve neꞌmo nene neniꞌ gamaziꞌneutiꞌ ma dosa lengiꞌ lo-lengemelineꞌ nene aꞌmine neꞌmo neniꞌ nene do hozi lo-nedeleseive.
JOH 16:15 Naza aꞌmine luve neꞌmo lo-lengemaaꞌ neineꞌ initeꞌ nene nenitatiꞌ dalineꞌ initekovoꞌ nene lo-lengemeleseive noluvoniꞌ nene neniꞌ meꞌnehida neineꞌ initeꞌ mukiꞌ nene neniꞌ initeꞌne neineꞌ nenako nemuꞌ nene noluve.
JOH 16:16 Idoꞌ gamene liꞌnibevoꞌ gehepeve ogo vavo neniꞌ nene gohi ma ningamilisave. Idoꞌ aꞌmidotiꞌ nene gamene liꞌnibevoꞌ gehepeve gohi ogo vavo neniꞌ nene ningilisave.
JOH 16:17 Neꞌmine lavo izipahala zuho linge ma nete nene angiseꞌine li voleloꞌ meloꞌ igi tiꞌ li laniꞌ ve: Aza nene gamene liꞌnibe ogo vavo neniꞌ ningamilisave idoꞌ gamene liꞌnibe gohi ma ogo vavo neniꞌ nene ningilisave lineꞌ ve. Idoꞌ gamazi ma meꞌnehida voloniꞌ nenako nemuꞌ noluve lo nesi nene lineꞌ ve. Idoꞌ aꞌmine neꞌmine gamazi lineꞌ nene nanitekumuꞌ live. Laza gelamune.
JOH 16:18 Neꞌmine li gohi tiꞌ li laniꞌ: Gamene liꞌnibe ve lineꞌ neꞌmi monovo nene nado nolive. Laza nene nadive nolihe nemuꞌ nene ma gelamolonidoꞌ ogave.
JOH 16:19 Neꞌmine nilavo Izesuꞌ nene ingine longoꞌ i-dilisa gili minaniꞌ nemuꞌ nene mo ningo gelo aza tiꞌ lo lo-ngimineꞌ ve: Lingine langisetine longoꞌ tongoꞌ igi li voleloꞌ meloꞌ naniꞌ nene naza nene gamene liꞌnibe gehepeve ogo vavo neniꞌ ningamilisave idoꞌ gamene liꞌnibe gehepeve gohi ogo vavo neniꞌ nene ningilisave luvongumuꞌ nene nilahe.
JOH 16:20 Naza laminetoꞌ tiꞌ lo nolo-lingimuve: Lengiꞌ nene vetingutiꞌ ive novozo doꞌmozeꞌ mozeꞌ neivo ive nama igi nizavo me misubouꞌ aleve nene ngolize izilisave. Lingine muheleꞌ igi mulumo alumo gililisaha aꞌmine mulumo alumo gililizaniꞌ nene do velepeꞌ izo longoloze izaaꞌ loloꞌ oloseive.
JOH 16:21 Veneliꞌmo nene izipe gedelineꞌ gamene ogavo izipe nogedo mulumo alumo gelaaꞌ neiha alingeꞌ nene izipe sotoꞌ ogavosa eveneꞌ ma nene me misubouꞌ sotoꞌ ogave lo olize izosa aꞌmine mulumo gilineꞌ mamuꞌ nene gohi ma gele minesaꞌmive.
JOH 16:22 Idoꞌ aꞌmineꞌmine igi lingine idise mulumo nigilaniꞌza alingeꞌ naza gohi lengiꞌ ningeloniꞌ gameneuꞌ nene lutinguꞌ gulumo avile lise minivo longolize izi minilisave. Ee, idoꞌ aꞌmine lutinguꞌ longolize izilizaniꞌ nene eveneꞌ gohi malitesi nene ngeli ma di hulamilisave.
JOH 16:23 Aꞌmine gamene alineꞌ nene lingine initeꞌ hamokumukisi longoꞌ ma i-nidamilisave. Naza mo laminetoꞌ tiꞌ lo nolo-lingimuve: Neniꞌ veꞌnemuꞌ igi lingine meꞌnehida initeꞌ mamuꞌ lilizaniꞌ nene aza aꞌmine initeꞌ nene mo lengemeleseive.
JOH 16:24 Neꞌmine o neineꞌza vokuꞌ lilizadoꞌ minamivo ganakutiꞌ nene neniꞌ veꞌnemuꞌ initeꞌ mamukisi vokuꞌ lamavo mine do ogo idisesi nene ha none. Vokuꞌ lilo. Vokuꞌ lilizaniꞌ nene lengita longolize neꞌmo nene vaiꞌ goloso lo minelive lo aꞌmine vokuꞌ liliza initeꞌ nene ha lengemavo dalisave.
JOH 16:25 Naza gamazi nolo-lingimuvoniꞌ mene lo sotoꞌ lamineꞌ amo ha gepeꞌ gamaziutiꞌ lo-lingimuvoniꞌza gamene ma naniꞌ aꞌmine gameneloꞌ nene gepeꞌ gamaziutiꞌ lo-lengemamo asi haza gamaziutikovoꞌ nene lisiheꞌ ogo laminetoꞌ gehepeve meꞌnehinemuꞌ lo-lengemelesuve.
JOH 16:26 Aꞌmine gameneuꞌ nene neniꞌ veꞌnemuꞌ igi initeꞌ mamuꞌ vokuꞌ lilizaniꞌ nene naza lengitoꞌ medelo mino aꞌmine initekumuꞌ nene meꞌnehine longoꞌ o-delesuve lamolosuve. Nene nanitekumuꞌ ve. Lingine nene lutine nimi Oꞌmosolatiꞌ ave ve li gili gili eleꞌvoleꞌ igisa minaniꞌ nenako nemuꞌ nene meꞌneho asiꞌve nene lulo lengeme neineꞌ nenako langisetine eita lilizaniꞌ nene ha gele lengemeleseive.
JOH 16:28 Ee, naza nene meꞌnehidatiꞌ ogo me misubouꞌ ogo hetelosa aꞌminguꞌ mene mino mo me misubo hulo meꞌnehida tineꞌ molo volosa nouve.
JOH 16:29 Neꞌmine lavo izipahala zuho ingine tiꞌ li li-imaniꞌ: Gaza idise gamazi nolaineꞌ nene do haleko gepeꞌ gamaziutiꞌ lamo gamazi gihile lamineꞌ nolo-lemane.
JOH 16:30 Idise neꞌmine nolanidotiꞌ nene laza tiꞌ lo gele osuꞌ lo none: Eveneꞌ lelita longoꞌ minineꞌ aꞌminemuꞌ nene gaza longoꞌ o-gedamunivosi nene aꞌmine longoꞌ nene mo ningo gelaaꞌ nane. Neꞌmine ogaꞌ naningumuꞌ geiꞌ nene mo Oꞌmosolatiꞌ anive ma ne nane losa gele eleꞌvoleꞌ o none.
JOH 16:31 Neꞌmine likevo Izesuꞌ aꞌmidoꞌ tiꞌ lo lo-ngimineꞌ: Lingine idise mo gili eleꞌvoleꞌ ikehe. Oꞌove.
JOH 16:32 Lingine giliꞌ nalo. Gamene atoliꞌmine ma alineꞌ nene idise mo sotoꞌ o neinako lingine huli-nidi hutileꞌ igi numudida numudida vikevo nenikovoꞌ minuvodiba mo meꞌneho nene nenikisi neineꞌ neꞌmo nene nenikovoꞌ ma minamolosuve.
JOH 16:33 Lingine mene gamazi nolo-lingimuvoniꞌ nene nenitatiꞌ hongu lo lamino minaaꞌ monovo di minilizave losa nene nolo-lingimuve. Ne neiha me misubouꞌ minilizanguꞌ nene geni initeliꞌmi lulouꞌ lengeleꞌmizi milalisave. Neꞌmine ilisaha naza me misubouꞌ aleve nene mo ngivileꞌ o nouvoniꞌ nenaze. Lingine aꞌmine geniliꞌmi lulouꞌ minilizanguꞌ nesi nene ha amuzo milivoꞌ minilo.
JOH 17:1 Izesuꞌ aza aꞌmine mene gamazi nene lo-ngemo osuꞌ lo vokeneꞌ ogo Okulumokuko noningo tiꞌ lo lineꞌ: Ahonoo, gamene molo-nedaineꞌ ma nene mo ogave. Nemuꞌ gipa neniꞌ nene geiꞌ nene do naba o-gedelesuze. Gaza gipa neniꞌ nene do naba o-nedezo.
JOH 17:2 Idoꞌ neꞌmine noluvoniꞌ nene gaza nemaineꞌ eveneꞌ mukiꞌ nene minevoꞌ minevoꞌ ngemeni ngemeline lo eveneꞌ ato atoꞌ mukitoꞌ nesi gizebo oloniꞌ amuzo nene mo neme naneꞌ nenako nemuꞌ nene noluve.
JOH 17:3 Idoꞌ minevoꞌ minevoꞌ ngemeni dameni daaꞌ nene geiꞌ Oꞌmoso gihile hamoꞌ nemuꞌ ningi gili hehe laatotiꞌ nesi idoꞌ eveneꞌ do nguꞌ izeline lo nimiselanive Izesuꞌ Kilisitoꞌ nenikumuꞌ ningi gili hehe lilizadotiꞌ nesi nene dalisave.
JOH 17:4 Naza nene geiꞌ nemaineꞌ gono do piluvodiꞌmo nene me misubouꞌ geiꞌ nene do naba o-gedekuve.
JOH 17:5 Nemuꞌ nene naza gomuꞌ misubo mene olihe sotoꞌ aminguꞌ geikisi mino guveꞌnesi ve naba minuvodiꞌmine ogo idise geikisi gohi nouvo aꞌmida nene do naba o-nedezo.
JOH 17:6 Me misubouꞌ aleveutiꞌ eveneꞌ ma do kegese-ngedo neniꞌ nemelove lo nemanive engiꞌ nene geiꞌ monovoka ngelebizekuvo mo ningi gili nizave. Ingine nene geiꞌ eveneka minadotiꞌ nene neme nenita ogane. Idoꞌ geiꞌ gamazika nene mo gili di nizave.
JOH 17:7 Geiꞌ nemaineꞌ initeꞌ mukiꞌ nene geitatikovoꞌ aniꞌ ma neive li mo gili nizave.
JOH 17:8 Idoꞌ neꞌmine li gili nizaniꞌ nene geiꞌ lo-nemaineꞌ gamazi nene lo-ngemekuvo di luꞌninguꞌ milisa neniꞌ nene lamineꞌ geitatiꞌ uvoniꞌ nemuꞌ nene gili osuꞌ li geiꞌ nimiselaningumuꞌ nene gili eleꞌvoleꞌ aniꞌ nenako nemuꞌ nene neꞌmine li gili nizave.
JOH 17:9 Aꞌmine eveneꞌ nemaineꞌ nene geiꞌ eveneka nizaniꞌ nenako nemukisi idoꞌ aꞌmine alevelotiꞌ nene neniꞌ guveꞌne monaaꞌ neineꞌ nenako nemukisi nene engikumuꞌ geita noluve. Me misubouꞌ aleve geiꞌ gelekeleꞌ i-gidisaꞌmangumuꞌ nene geita noluvoba asi aꞌmine nemaineꞌ evenekumukovoꞌ nene noluve.
JOH 17:10 Ee, idoꞌ geiꞌ eveneka nizave luvoniꞌ nene nenita neineꞌ initeꞌ mukiꞌ nene geiꞌ initeka neivo geita neineꞌ initeꞌ mukiꞌ nene neniꞌ initeꞌne neineꞌ nenako nemuꞌ nene luvoniꞌ ve.
JOH 17:11 Naza nene me misubouꞌ gohi imineꞌ molo minamo geita alosa nouha aꞌmine aleve nete nene me misubouꞌ miniꞌmi igi nizave. Nemuꞌ nene lamineꞌ atoliꞌmine ogo minanive meꞌneho make, gazasi nazasi bizo hamoꞌ nosineꞌ neꞌmino inginesi bizi hamoꞌ minilizangumuꞌ ve lo geiꞌ amuzoka do sotoꞌ ogo nedunuꞌ nene alete molo-ngedezo. Aꞌmine nemaineꞌ amuzoka mamuꞌ nene noluve.
JOH 17:12 Naza me misubouꞌ engikisi makaꞌ minuvoniꞌ gameneuꞌ nene geiꞌ nemaineꞌ amuzo do sotoꞌ ogo nedunuꞌ alete molo-ngedo gizebo lamineꞌ o-ngedekuvo engikutiꞌ nene hamokisi ma vi tolovo amavo vo tolovo ilidoꞌ lisiheꞌ o minive neevoꞌ nene vo tolovo ogave. Idoꞌ aꞌmine vo tolovo ineꞌ nene monoꞌ godolouꞌ gizi nizaniꞌ gamazi nene gihile izelive losa vo tolovo ineꞌ ve.
JOH 17:13 Idoꞌ idise nene naza mo geita nouve. Idoꞌ naza me misubouko ha mino vekisine mene gamazi mene nolo-ngimuvoniꞌ nene ingine luꞌninguꞌ gulumo avile lisivo minaaꞌ monovo nenitatiꞌ nene dikevo engita vaiꞌ lilive losa nene nolo-ngimuve.
JOH 17:14 Naza vekisine mene geiꞌ gamazika nene lo-ngemekuvo me misubouꞌ aleve nete nene biluvaꞌ i-ngidi nizave. Idoꞌ biluvaꞌ nii-ngidaniꞌ nene naza aꞌmine me misubouꞌ aleveti muliseutiꞌ minamuvoniꞌ neꞌmino inginesi nene aꞌmine muliseutiꞌ minamaniꞌ nenako nemuꞌ nene biluvaꞌ nii-ngidave.
JOH 17:15 Gaza nene aꞌmine vekisine meve nene me misuboukotiꞌ do viline losa geita noluvoba asi ve goloso ngemenguꞌ molavo goloso ikelizave losa alete molo-ngedeline losa noluve.
JOH 17:16 Naza nene me misubouꞌ aleveti muliseutiꞌ minamuvoniꞌ neꞌmino engikisi nene me misubouꞌ aleveti muliseꞌningutiꞌ minamave.
JOH 17:17 Gamazi gihile lamineꞌ nene apize ngemo nedunuꞌ gono dalizadoꞌ do lisiheꞌ o-ngedo do kegese-ngedezo. Idoꞌ gamazi gihile laminekumuꞌ noluvoniꞌ meve nene geiꞌ gamazika nene gamazi gihile lamineꞌ neineꞌ nenako nemuꞌ nene noluve.
JOH 17:18 Gaza me misubouꞌ alevetinguꞌ nimiselanivo uvoniꞌ neꞌmino nazasi nene vekisine mene me misubouꞌ alevetinguꞌ nene ngimiseluve.
JOH 17:19 Idoꞌ gamazi gihile lamineꞌ neꞌmo gonoꞌinemuꞌ do lisiheꞌ o-ngedavo mini kegesi minilizadoꞌ o neize. Nemuꞌ nene naza engikumuꞌ ve lo okoꞌne hulolodoꞌ naꞌniseꞌne nene mine kegese nouve.
JOH 17:20 Idoꞌ geita noluvoniꞌ mene engikumukovoꞌ noluvoba asi engiꞌ gamaziꞌine gilisa nenikumuꞌ gili eleꞌvoleꞌ ilizavemukisi nene geita noluve.
JOH 17:21 Idoꞌ geita engikumuꞌ noluvoniꞌ nene ingine bizi hamoꞌ minilizave losa geita noluve. Ee, meꞌneho make, gaza nenita nanivo naza geita nouvo nosineꞌ neꞌmine igi inginesi lelita bizi minikevo nelotiꞌ nene me misubouꞌ aleve nete nene nenikumuꞌ geiꞌ nimiselaineꞌ neive li ningi gili gili eleꞌvoleꞌ ilizave losa nemukisi nene geita noluve.
JOH 17:22 Idoꞌ gaza nemaineꞌ amuzo ma nene laza hamoꞌ loloꞌ ogo nosineꞌ neꞌmine igi inginesi hamoꞌ liliꞌ igi minilizave lo engiꞌ ngemekuve.
JOH 17:23 Ee, naza engita nouvo gaza nenita nanivo neꞌmo engiꞌ nene bizi hamoꞌ gehepeve liliꞌ igi minikevo nelotiꞌ nene me misubouꞌ aleve nete nene geiꞌ nimiselaineꞌ ve idoꞌ gaza luka nemaaꞌ naineꞌ neꞌmino vekisine nene luka ngeme naineꞌ neive li ningi gililizave losa aꞌmine amuzo nene vekisine ngemekuve.
JOH 17:24 Ahonoo, misubo mene olihe do sotoꞌ amosa luka nemosa nemuꞌ amuzo atoliꞌmine ogo minineꞌ nemaineꞌ nene ningilizangumuꞌ nene aꞌmine geiꞌ do nemaineꞌ eveneꞌ nene neniꞌ mineloda nenikisi makaꞌ minelone losa gele nouve.
JOH 17:25 Ahonoo, ve lisiheꞌ gehepeve ve. Me misubouꞌ aleve nete nene geikumuꞌ ma ningi gilamaniꞌza neniꞌ neevoꞌ nene mo ningo gele nouvoniꞌ nenako vekise nete nene geiꞌ nimiselaineꞌ neive li ningi gili nizave.
JOH 17:26 Idoꞌ naza geiꞌ monovoka nene mo lo-ngemekuvo gilikeve. Idoꞌ gohi ha lo-ngemelesuve. Nanitekumuꞌ ve. Gaza nenitoꞌ luka naba goloso nemaaꞌ naineꞌ monovo ma nene engita neivo nazasi engita mine molo minelongumuꞌ ve losa nene geiꞌ monovoka gohi lo-ngemelesuve.
JOH 18:1 Izesuꞌ aza gamazi mene lo osuꞌ lo izipahala zuhosi Zelusalemi numuno ebekutiꞌ limi heta igi Kidiloni giꞌmize nosouꞌ nene ledi vi za zuho ma minida aꞌminguꞌ dizi minaniꞌ ve.
JOH 18:2 Izesukisi izipahala zuhosi nene aꞌminguꞌ igi di geseꞌ ikaꞌ ikaꞌ igaꞌ aniꞌ nenako biluvaliti aꞌninguꞌ molo-dive Zudaꞌ azasi nene aꞌmine ebekumuꞌ nene ha ningo gele minineꞌ ve.
JOH 18:3 Neꞌmine o neineꞌ nenako nemuꞌ nene Zudaꞌ nene Loma veti ami linge ma do idoꞌ eveneliti lihimeꞌine apaselive li Oꞌmoso guno gizi imaaꞌ ave nabasi Halisaioꞌ vesi mini ngimiselaniꞌ pilisi ve linge masi nene lovouꞌ initekisi idoꞌ lamusi livikisi davo ngeleꞌmizo aꞌmine za zuhouko nene aniꞌ ve.
JOH 18:4 nGeleꞌmizo ogavo Izesuꞌ aza ezela sotoꞌ ilineꞌ initeꞌ mukikumuꞌ nene mo gele mino engiꞌ nizada ogo hetelo zahinemuꞌ viseꞌ iꞌmi nave lo longoꞌ o-ngidineꞌ ve.
JOH 18:5 Neꞌmine lo longoꞌ o-ngedavo laza Nasalete ve Izesuꞌni nene viseꞌ oꞌmo noune li ingine laniꞌ. Neꞌmine likevo Izesuꞌ tiꞌ lo lo-ngimineꞌ: Aꞌmine ve ma nene nouve. Idoꞌ aꞌmine Izesuꞌni biluvaliti aꞌninguꞌ molave nene engikisi aꞌmida ote minineꞌ ve.
JOH 18:6 Idoꞌ Izesuꞌ aza aꞌmine ve ma nene nouve nolivo analoꞌ dalisa ave nene meheꞌnidatiꞌ nene lomi limi misuboloꞌ pouꞌ li inganiꞌ ve.
JOH 18:7 Neꞌmine ikevo zahinemuꞌ viseꞌ iꞌmi nave lo gohi longoꞌ o-ngedavo laza Nasalete ve Izesuꞌni mamuꞌ viseꞌ oꞌmo noune li laniꞌ ve.
JOH 18:8 Neꞌmine likevo Izesuꞌ aꞌmidoꞌ tiꞌ lo lineꞌ ve: Aꞌmine viseꞌ iꞌmi nave ma nene nouve lo lo-lingimuvoniꞌ ma ve. Aꞌmine viseꞌ iꞌmi nave ma nene nouvonaze. Lingine vekisine menesi nene aꞌnidoꞌ dami ha huli-ngidikevo vilizave.
JOH 18:9 Neꞌmine lo lineꞌ nene gomuꞌ melehinemuꞌ nene gaza nemaineꞌ eveneꞌ hamokisi ma vo tolovo amive lo lineꞌ gamazi ma nene gihile izelive losa nene lineꞌ ve.
JOH 18:10 Neꞌmine lavo Simoni Petoloꞌ neꞌmo nene bainati miteꞌ do minineꞌ nenako aꞌmine nene goꞌveutiꞌ geleleheꞌ oko evenetoꞌ medeli mini Oꞌmoso initeꞌ lehizi-daaꞌ aveliti ve nabaliꞌmi gelekeleꞌ ve belo gala zamela nene hasaꞌ o hulineꞌ ve. Aꞌmine gelekeleꞌ ve neꞌmi gulive nene Malakusiꞌ ve.
JOH 18:11 Neꞌmine ogavo Izesuꞌ aza Petoloꞌni nene tiꞌ lo lo-imineꞌ: Gaza nene meꞌneho geheline losa nimineꞌ geni ekeseꞌ noso neꞌmine nene geheloniꞌ o neineꞌ ma nene gelamabe. Gaza aka hize tile-nedamo aꞌmine bainati miteka nene goꞌveuꞌ goꞌzekezo.
JOH 18:12 Neꞌmine lavo amisi idoꞌ engiꞌ guveꞌinesi ve naba nesi idoꞌ Zuda veti pilisi vesi nene Izesuꞌni analoꞌ di nalaꞌ di-disa
JOH 18:13 aꞌmine kilisimasiuꞌ nene evenetoꞌ medeli mini Oꞌmoso initeꞌ lehizi-daaꞌ aveliti ve nabaꞌine minive Kaiahaꞌ izemo Anasiꞌ neida nene gomuꞌ eleꞌmizi vaniꞌ ve.
JOH 18:14 Aꞌmine Kaiahaꞌ nene Zuda ve naba gaꞌine do eveneꞌ mukitoꞌ medelo ve hamokovoꞌ helelineꞌ nene lamineꞌ o neive live minineꞌ ve.
JOH 18:15 Simoni Petoloꞌ nene Izesuꞌ izipahala masi Izesuꞌni eꞌmeti vasineꞌ ve. Aꞌmine Izesuꞌ izipahala ma neve nene evenetoꞌ medeli mini Oꞌmoso initeꞌ lehizi-daaꞌ aveliti ve naba neꞌmosi nene mo ninge neive minineꞌ nenako Izesuꞌni eleꞌmizi aꞌmine evenetoꞌ medeli mini Oꞌmoso initeꞌ lehizi-daaꞌ aveliti ve nabaꞌmi numuno vodo vodo ogo minavo olusoꞌ omoꞌ naba mininguꞌ dizanguꞌ nene azasi aꞌminguꞌ dizineꞌ ve.
JOH 18:16 Dizineꞌza Petoloꞌ nene dizamo heta gatedoꞌ ha ote minineꞌ ve. Nemuꞌ nene aꞌmine Izesuꞌ izipahala ma ve naba neꞌmosi ninge neive minive nene lemo gatedoꞌ gizebo ogo minineꞌ gelekeleꞌ alu ma nene Petoloꞌnimuꞌ lo-emosa eleꞌmizo dizineꞌ ve.
JOH 18:17 Neꞌmine ogavo gatedoꞌ gizebo ogo minineꞌ alu neꞌmo nene Petoloꞌni tiꞌ lo longoꞌ o-dineꞌ: Geikisi nene aꞌmine Izesuꞌ izipahala zuhoutiꞌ nomo nolosane. Olo. Neꞌmine lo longoꞌ o-davo aza nene oꞌove. Engikutiꞌ nomuve lineꞌ ve.
JOH 18:18 Idoꞌ aꞌmine gameneloꞌ nene mo hepeꞌ noilivo gelekeleꞌ vesi idoꞌ pilisi vesi nene oloꞌ siꞌnibuloꞌ nene ingi viteꞌ iki lahizi minaniꞌ ve. Neꞌmine igi nizavo Petoloꞌ nesi nene aꞌmida ote mino lahizo minineꞌ ve.
JOH 18:19 Idoꞌ evenetoꞌ medeli mini Oꞌmoso initeꞌ lehizi-daaꞌ aveliti ve nabaꞌine Anasiꞌ neꞌmo Izesuꞌni nene izipahala zuhomukisi idoꞌ eveneꞌ gamazi apize ngemaaꞌ ineꞌ nemukisi nene longoꞌ o-davo
JOH 18:20 Izesuꞌ aꞌmidoꞌ tiꞌ lo lo-imineꞌ: Naza eveneꞌ mukiliti veꞌnidoꞌ nene gamazi sotokovoꞌ laaꞌ uvoniꞌ ma ve. Ee, Zuda ve mukiꞌ di geseꞌ igaꞌ ada monoꞌ numuno ngomo ngomoukisi monoꞌ numuno nabaꞌ nabaukisi nene gamazi apize ngemaaꞌ uvoniꞌ ma ve. Idoꞌ haleke mino gamazi ma losaꞌmuvoniꞌ ma ve.
JOH 18:21 Neniꞌ neve nene nanitekumuꞌ longoꞌ noo-nedane. Gamazi noluvo gilave nete aꞌmine luvoniꞌ gamazi nene gili nizaniꞌ nenaze. Engiꞌ nene longoꞌ o-ngedevo.
JOH 18:22 Neꞌmine lavo aꞌmida pilisi ve minangutiꞌ maliꞌmo nene ana gavoso golo veleuꞌ belo tiꞌ lo lineꞌ: Gaza evenetoꞌ medeli mini Oꞌmoso initeꞌ lehizi-daaꞌ aveliti ve nabamuꞌ nene neꞌmine gamazi lo-emamilinako nanimuꞌ neꞌmine lo-emane.
JOH 18:23 Neꞌmine lavo aꞌmidoꞌ nene Izesuꞌ tiꞌ lo lo-dineꞌ: Naza gamazi goloso ma luvoniꞌ neivo ma nene aꞌmine gamazi goloso neꞌmi monovo nene lo sotoꞌ ozo. Idoꞌ naza nene mo laminetokovoꞌ noluvoniꞌ nolineꞌ nene gaza hazamuꞌ nanimuꞌ nonebelane.
JOH 18:24 Neꞌmine lavo nalaꞌ di-dikaniꞌ ha neivo Anasiꞌ nene evenetoꞌ medeli mini Oꞌmoso initeꞌ lehizi-daaꞌ aveliti ve naba Kaiahaꞌ neida eleꞌmizi vilo lo aꞌmida ngimiselineꞌ ve.
JOH 18:25 Idoꞌ Petoloꞌ nene oloꞌ lahizo neivo tiꞌ li longoꞌ i-daniꞌ: Geikisi nene aꞌmine veꞌmi izipahala zuhoutiꞌ nomo nolosane. Olo. Neꞌmine likevo aza nene aꞌmidoꞌ oꞌove. Naza nene engikutiꞌ nomuve lo ataize lineꞌ ve.
JOH 18:26 Neꞌmine lavo evenetoꞌ medeli mini Oꞌmoso initeꞌ lehizi-daaꞌ aveliti ve nabaliꞌmi gelekeleꞌ ve Petoloꞌ gala huko huliveꞌmi zuho minive maliꞌmo nene tiꞌ lo lineꞌ ve: Gaza nene Oliva golo za zuhouꞌ Izesulesi nizavo ninguve ma ne nane. Olo.
JOH 18:27 Neꞌmine lavo Petoloꞌ gohi ataize lineꞌ. Lavo aꞌmidoꞌ liteꞌ lo okoloho nolo molaniꞌ ve.
JOH 18:28 Neꞌmine ogavo Zuda ve nete nedengaꞌ holukaꞌ nene Kaiahaꞌ numuꞌveutiꞌ nene Izesuꞌni eleꞌmizi Loma ve Zudaia misubouꞌ ngamani naba loloꞌ o miniveꞌmi numuꞌvela nene vaniꞌ ve. Neꞌmine aniꞌza laza avotemote Aigita misubouꞌ minaniꞌ gameneuꞌ Oꞌmosoꞌmo iseꞌine izingumuꞌ gelo mino naaꞌ nosoꞌ niteꞌ nene aizeꞌ nalosunako heta atoꞌ veti numunguꞌ dizekunivo aꞌmine velatiꞌ initeꞌ goloso neꞌmo okodeloꞌ dizavo neꞌmo aꞌmine nosoꞌ niteꞌ nalonidoꞌ lisiheꞌ amo minalone li aꞌmine numunguꞌ nene mo dizamaniꞌ ve.
JOH 18:29 Neꞌmine igi dizami nizavo ngamani naba Pilatoꞌ nene heta lemo ogo tiꞌ lo longoꞌ o-ngidineꞌ: Ve meve nene nani monovo goloso ingumuꞌ gonitoꞌ eleꞌmizi nave.
JOH 18:30 Neꞌmine lavo ingine tiꞌ li li-imaniꞌ ve: Aza nene monovo goloso daaꞌ ive minamidiniko laza nene geiꞌ nanida ma eleꞌmizo amunidine.
JOH 18:31 Neꞌmine likevo Pilatoꞌ aza tiꞌ lo lineꞌ ve: Langisetine nene eleꞌmizi vi lengiꞌ louꞌ gamazitineꞌmo lidoꞌ eꞌmetisa goniꞌ i-di lihime imilo. Neꞌmine lavo Zuda ve ingine tiꞌ li laniꞌ: Ne neiha leliꞌ louꞌ gamaziteꞌmo lidoꞌ nene mo bele helelonidoꞌ lisiheꞌ o neiha Loma ve lingine eveneꞌ lihime ngimi ngibili hilaaꞌ nene leliꞌ Loma vevoꞌ neꞌmine olosune li mo oꞌove li-lidi nizaniꞌ ma neive li laniꞌ.
JOH 18:32 Aꞌneꞌmine laniꞌ nene Izesuꞌ aza Loma vetevoꞌ ngibili hilaaꞌ aniꞌ monovoloꞌ eꞌmetisa bili hililizangumuꞌ gomuꞌ lo sotoꞌ ineꞌ gamazi di gihile izisa laniꞌ ve.
JOH 18:33 Neꞌmine likevo Pilatoꞌ nene gohi ngamani numuno nabauko dizo vo Izesuꞌni vise lo-do tiꞌ lo longoꞌ o-dineꞌ: Gaza nene Zuda veti guveꞌinesi naba ma nene nabe.
JOH 18:34 Neꞌmine lavo Izesuꞌ aꞌmidoꞌ tiꞌ lo lo-imineꞌ: Gaza neꞌmine nolaineꞌ nene gasika gakautiꞌ gelo nolabe idoꞌ eveneꞌ malite nene nenikumuꞌ li-gimikevosa nolane.
JOH 18:35 Neꞌmine lavo aꞌmidoꞌ nene Pilatoꞌ tiꞌ lo lo-imineꞌ: Naza nene Zuda ve nouhe. Zuda ve nomuvoniꞌ nenako geiꞌ monovoka nado gelelove. Geiꞌ zuholitesi idoꞌ evenetoꞌ medeli mini Oꞌmoso initeꞌ lehizi-daaꞌ ave naba netesi nene gonitoꞌ geleꞌmizi neniꞌ nouvoda naniꞌ nenako gaza nene nani monovo goloso ane.
JOH 18:36 Neꞌmine lavo Izesuꞌ tiꞌ lo lineꞌ: Guveꞌnesi ve nouvoniꞌ nene me misuboꞌmi monovoloꞌ do molosa guveꞌnesi ve minamuve. Naza me misubouꞌ monovoloꞌ do molo guveꞌnesi ve minuvodiniko neze gelekeleꞌ i-nidaaꞌ ave ingine neniꞌ nene Zuda veti aꞌninguꞌ vamilive li alete mili-nidi lovo di sotoꞌ adine. Neꞌmine adineꞌza guveꞌnesi ve nouvoniꞌ nene meloꞌ monovoloꞌ do molosa nomive.
JOH 18:37 Neꞌmine lavo Pilatoꞌ aza tiꞌ lo lineꞌ: Neꞌmine laineꞌ nene gaza mo guvekasi ve nouve nolabe. Neꞌmine lavo Izesuꞌ tiꞌ lo lineꞌ: Gaza nenikumuꞌ nene guvekasi ve lo gasi nene nolane. Naza nene nemuꞌ me misubouꞌ sotoꞌ ogo nouvoniꞌ ve. Naza gamazi gihilemuꞌ lo sotoꞌ sotoꞌ ogo hize eleꞌ olosa nene me misubouꞌ sotoꞌ ogo nouvoniꞌ ve. Gamazi gihileloꞌ medeli minave mukiꞌ nene neniꞌ gamaziꞌneloꞌ nene gili daaꞌ nave.
JOH 18:38 Neꞌmine lavo Pilatoꞌ aza tiꞌ lo lineꞌ: Gamazi gihile nene nado nolive. Nemuꞌ nene gelamolosune. Neꞌmine lo Pilatoꞌ aza gohi Zuda ve nizada heta lemo vo tiꞌ lo lo-ngimineꞌ: Eiꞌ nene goniꞌ o-deloniꞌ monovoꞌve nene viseꞌ ogo ningamuve.
JOH 18:39 Idoꞌ neniꞌ monovo nene neꞌmino ma neineꞌ ma neive. Oꞌmosoꞌmo avotingine iseꞌine izingumuꞌ gili nosoꞌ niteꞌ naaꞌ aniꞌ gameneloꞌ gameneloꞌ nene lengiꞌ muludine do lamineꞌ o-lengedo nalatoꞌ ve hamoꞌ kuluhize-lengedaaꞌ nouvoniꞌ ma neive. Nemuꞌ nene lingine gilavo naza Zuda veti guvetinesi ve naba nene kuluhize-lengedelohe.
JOH 18:40 Neꞌmine lavo ingine gohi gekeꞌ li tiꞌ li laniꞌ ve: Ve neve nene kuluhize-damo Balabasiꞌni nene kuluhize-dezo. Aꞌmine Balabasiꞌ nene ngamani lovo o ngemaaꞌ ive minineꞌ ve.
JOH 19:1 Idoꞌ nelotiꞌ nene Pilatoꞌ aza lavo Izesuꞌni nene nalaꞌ gavosodunuꞌ mehenela sogaꞌ sagaꞌ izi bilaniꞌ ve.
JOH 19:2 Neꞌmine igi amilite uhoni nalaꞌ nene di gangi guveꞌinesi ve nabalite gihaaꞌ aniꞌ initeꞌ neꞌmine apa niteꞌ igi liliꞌ igi godololoꞌ gihi-di guleheꞌ lavolavo guveꞌinesi vete ngilaaꞌ aniꞌ neꞌmine nene di ngili-daniꞌ ve.
JOH 19:3 Neꞌmine igi mini ezela ikaꞌ ikaꞌ igi Zuda veti guveꞌinesi ve naba ma nene gopoꞌni nolo-gidune likaꞌ likaꞌ igi aꞌine gatapaꞌ gavoso bilikaꞌ bilikaꞌ igi minaniꞌ.
JOH 19:4 Idoꞌ Pilatoꞌ nene gohi heta lemo ogo Zuda ve tiꞌ lo lo-ngimineꞌ ve: Ningilo. Naza goniꞌ o-deloniꞌ monovoꞌve nene viseꞌ ogo mo ningamuvongumuꞌ nene ningilizave losa lengiꞌ vetida eleꞌmizo nolimuve.
JOH 19:5 Neꞌmine lavo Izesuꞌ nene uhoni di ganganiꞌ nene godololoꞌ geho idoꞌ guleheꞌ lavolavo nene ngoloko heta lemo aniꞌ ve. Nolimivo Pilatoꞌ tiꞌ lo lineꞌ: Aꞌmine ve ma nene me neize. Ningilo.
JOH 19:6 Neꞌmine nolivo evenetoꞌ medeli mini Oꞌmoso initeꞌ lehizi-daaꞌ aveti ve nabaꞌine netesi idoꞌ Zuda veti pilisi ve netesi Izesuꞌni niningi gekeꞌ li lohotoꞌ zaloꞌ belezo belezo laniꞌ ve. Likevo Pilatoꞌ aza aꞌmidoꞌ tiꞌ lo lo-ngimineꞌ ve: Neꞌmine lii ma naza neve nene eze goniꞌ o-do lihime emeloniꞌ monovoꞌve nene viseꞌ ogo ma ningamuze. Neniꞌ nene neꞌmine amolosuze. Langisetine di vi lohotoꞌ zaloꞌ bililo.
JOH 19:7 Neꞌmine lavo Zuda ve nete tiꞌ li li-imaniꞌ: Lelita louꞌ gamazi nene mo ma neineꞌ ma neive. Aza nene Oꞌmosoꞌmi gipele nouve lo aꞌmine louꞌ gamazi nene avutoꞌ ineꞌ nenako aꞌmine louꞌ neꞌmo lidoꞌ eꞌmeto mo helelidoꞌ lisiheꞌ o neive.
JOH 19:8 Oꞌmosoꞌmi gipele nouve lo Izesuꞌ lineꞌ gamazi li sotoꞌ aniꞌ nene Pilatoꞌ gelo ehelele izineꞌ nene gohi naba goloso ehelele izavo
JOH 19:9 ngamani numunguko nene gohi dizo Izesuꞌni tiꞌ lo longoꞌ o-dineꞌ ve: Gaza nene zalatiꞌ aineꞌ neve. Neꞌmine lineꞌza Izesuꞌ aꞌmidoꞌ gamazi hamokisi ma lo-emamineꞌ ve.
JOH 19:10 Neꞌmine ogavo Pilatoꞌ nene tiꞌ lo lo-imineꞌ ve: Gaza nene gamazi neniꞌ lo-nemelesa gelamaniko neniꞌ gehepeve nene kuluhize-gedeloniꞌ amuzosi idoꞌ lohotoꞌ zaloꞌ gebeleloniꞌ amuzosi do nouvongumuꞌ nene gelamabe.
JOH 19:11 Neꞌmine lavo Izesuꞌ nene aꞌmidoꞌ tiꞌ lo lineꞌ ve: Aꞌmine amuzoka nene vozeuꞌ veꞌmo ma gemamidiniko gaza nene initeꞌ hamokisi o-nedelineꞌ amuzoka nene mo kekeꞌ geita ma minamidine. Neꞌmine o neineꞌ nenako geiꞌ angauꞌ molo-nidive neve nene geiꞌ lihime idise nodaineꞌ nene ivileꞌ ivosa lihime naba nodave.
JOH 19:12 Neꞌmine lidotiꞌ nene Pilatoꞌ aza Izesuꞌni kuluhize-delesa aka viseꞌ oꞌmo vineꞌza Zuda ve ingine gekeꞌ gekeꞌ li tiꞌ li li minaniꞌ ve: Gaza ve mene ma kuluhize-delineꞌ nene ve ma ingine guveꞌinesi ve loloꞌ ilisa ave nene Kaesaleꞌ moꞌmosiꞌve dalisa biluvaꞌ i-daaꞌ naniꞌ nenako geiꞌ nene Kaesaleꞌni hize eleꞌ i-daaꞌ aveti zuhoutiꞌ nomo nolosane.
JOH 19:13 Neꞌmine laniꞌ nene gelo nemuꞌ Pilatoꞌ aza Izesuꞌni eleꞌmizo heta lemo ogo ebeꞌ ma gulive Geheni Omoꞌ idoꞌ gulive gohi Zuda veti gamaziutiꞌ nene nGabata ve laaꞌ ada zasilite minaaꞌ aniꞌ moꞌmositoꞌ nene mitoꞌ minineꞌ ve.
JOH 19:14 Neꞌmino lemo mitoꞌ minineꞌ nene avoꞌninge Aigita misubouꞌ minaniꞌ gameneuꞌ Oꞌmosoꞌmo iseꞌine izingumuꞌ nene Zuda ve nete gili nosoꞌ niteꞌ nalizangumuꞌ di vaꞌvaꞌ ilizaniꞌ gamene holiseꞌ belotoꞌ mitoꞌ minineꞌ ve. Neꞌmino mitoꞌ minosa Zuda ve tiꞌ lo lo-ngimineꞌ ve: Ningilo. Guvetinesi ve ma nene me neive.
JOH 19:15 Neꞌmine lineꞌza ingine gekeꞌ li tiꞌ li laniꞌ ve: Osuꞌ lo-dezo. Lohotoꞌ zaloꞌ belezo. Likevo Pilatoꞌ aꞌmidoꞌ tiꞌ lo lo-ngimineꞌ ve: Guvetinesi ve meve nene lohotoꞌ zaloꞌ mo belezo nili-nidahe. Neꞌmine lavo evenetoꞌ medeli mini Oꞌmoso initeꞌ lehizi-daaꞌ aveliti ve nabaꞌine nete aꞌmidoꞌ tiꞌ li li-imaniꞌ ve: Leliꞌ guvetesi ve nene gohi ma nomineꞌ. Asi Kaesaleꞌ eiꞌ hamokovoꞌ nene neive.
JOH 19:16 Neꞌmine likevosa Pilatoꞌ aza Izesuꞌni lohotoꞌ zaloꞌ bililizave lo do ngimineꞌ ve. Neꞌmine ogo do ngemavo di vaniꞌ ve.
JOH 19:17 Di vada nene Izesuꞌ asiꞌve eiꞌ lohotoꞌ zaꞌve geho numuno ebekutiꞌ leme heta ogo vo ebeꞌ ma gulive Godolo Amuzo Ebeꞌ adoꞌ Zuda veti gamaziutiꞌ nene Goligota ve laaꞌ adoꞌ nene hetelavo
JOH 19:18 aꞌmida nene lohotoꞌ zaloꞌ bili di otaniꞌ ve. Idoꞌ Izesuꞌ olusoꞌ minavo aꞌmida hela hela nene ve sitakisi lohotoꞌ zaloꞌ ma ngibili di oti-ngidaniꞌ ve.
JOH 19:19 Idoꞌ Pilatoꞌ neꞌmo nene gamazisi ma luhuvo gizavo Izesuꞌ lohotoꞌ zaꞌveloꞌ nene badikaniꞌ ve. Aꞌmine luhuvo nene tiꞌ lo minineꞌ ve: Ve meve nene Nasalete ve Izesuꞌ ve. Zuda veti guveꞌinesi ve.
JOH 19:20 Izesuꞌni bilaniꞌ ebeꞌ nene numuno ebeꞌ nabaliꞌmi avitoꞌ neꞌmine minineꞌ nenako Zuda ve mukiꞌ aꞌmine luhuvo nene gataniꞌ ve. Aꞌmine luhuvo nene Zuda veti gamaziutikisi Loma veti gamaziutikisi idoꞌ nGiliki veti gamaziutikisi minineꞌ ve.
JOH 19:21 Neꞌmine ogavo ningisa Zuda veloꞌ medeli mini Oꞌmoso initeꞌ lehizi-daaꞌ aveliti ve nabaꞌine nete nene Pilatoꞌni tiꞌ li li-daniꞌ ve: Meve nene Zuda veti guveꞌinesi ve naba ve lo gizamo asi meve neꞌmo nene Zuda veti guveꞌinesi ve nouve live lo gizezo.
JOH 19:22 Neꞌmine likevo Pilatoꞌ aza aꞌmidoꞌ tiꞌ lo lineꞌ ve: Naza luhuvo gize nouvoniꞌ nene mo gizosa gize nouve.
JOH 19:23 Idoꞌ Izesuꞌni nene mo lohotoꞌ zaloꞌ bili badisa ami nene sitaꞌve sitaꞌve minaniꞌ nenako Izesuꞌ geneganaꞌve nene izeꞌ sitaꞌve sitaꞌve mili izeꞌ hamo hamo dikaꞌ dikaꞌ aniꞌ ve. Neꞌmine aniꞌza lulouꞌ ngolaaꞌ ineꞌ initeꞌve nene olusokuꞌ noꞌnovoꞌve nomineꞌ mo veletatiꞌ galaꞌmuda home limivosa loloꞌ aniꞌ minineꞌ ve.
JOH 19:24 Neꞌmine ikeniꞌ neivo ami nete angiseꞌine tiꞌ li li voleloꞌ meloꞌ aniꞌ ve: Laza aꞌmine mene hikelo damolone. Asi aꞌmine initeꞌ mene zahida minelihe do sotoꞌ oloningumuꞌ nene geheni ngomo ngomo hulaaꞌ zohiꞌ ogo livileꞌ ilive nene emelone. Idoꞌ neꞌmine aniꞌ nene monoꞌ godolouꞌ tiꞌ li gizi nizaniꞌ gamazi ma nene gihile izelive lisa neꞌmine aniꞌ ve: Neniꞌ geneganaꞌne nene angiseꞌine izeꞌ mili dave. Idoꞌ okoꞌneloꞌ initeꞌ nene zaho dalihe li geheni zohiꞌ ave. Ee, ami nene gilamisa neꞌmine aniꞌ ve.
JOH 19:25 Idoꞌ Izesuꞌni bili badikaniꞌ lohotoꞌ za avita nene izelehosi idoꞌ izelehi alunolosi Kelopasiꞌ elenaho Maliakisi idoꞌ Mangadala numudotiꞌ veneꞌ Maliakisi nene oti minaniꞌ ve.
JOH 19:26 Nizavo Izesuꞌ aza aꞌmida nene izelehosi idoꞌ izipahala zuhoutiꞌ vonoloꞌ izipesi oti nizasivo ningo izelihinemuꞌ nene tiꞌ lo lineꞌ: Alungoo, nesee ve nene geiꞌ gipa nene loloꞌ o neive.
JOH 19:27 Neꞌmine lo aꞌmine izipahala zuhoutiꞌ minive mamuꞌ nene tiꞌ lo lineꞌ: Ningezo. Meve nene geiꞌ izaho loloꞌ ogave. Neꞌmine lo lineꞌ gamenelotiꞌ nene aꞌmine Izesuꞌ izipahala zuhoutiꞌ minive neꞌmo Maliaꞌni nene eiꞌ numuꞌveuko do molo gizebo o-dineꞌ ve.
JOH 19:28 Nelotiꞌ nene Izesuꞌ aza ilidoꞌ o minineꞌ initeꞌ mukiꞌ nene mo ogo osuꞌ gehepeve lokuve lo gelo monoꞌ godolouꞌ gamazi ma gizikaniꞌ ma nene do gihile izelesa nosomuꞌ nonisive lineꞌ ve.
JOH 19:29 Neꞌmine lavo aꞌmida gomise ma minineꞌ aꞌminguꞌ vaini noso ekeseꞌ ineꞌ nene vaiꞌ lo neivo nosouꞌ lupizisa lipi naaꞌ aniꞌ initeꞌ ma disa lupizikevo vaiꞌ lo neivo hisopu ve laaꞌ aniꞌ gavosoloꞌ hizi di dizi veleloꞌ mili-daniꞌ ve.
JOH 19:30 Mili-dikevo aꞌmine vaini noso nene noosa Izesuꞌ tiꞌ lo lineꞌ ve: Gonoꞌne nene mo do pelekuve. Neꞌmine losa luvono nene vage lavo sikalahuꞌve hulosa hilineꞌ ve.
JOH 19:31 Aꞌmine gameneloꞌ sigisi kilokulotiꞌ holiseꞌ minilizangumuꞌ di vaꞌvaꞌ igaꞌ aniꞌ gamene neivo idoꞌ aꞌmine holiseꞌ nene holiseꞌ naba goloso neineꞌ nenako Zuda ve nete aꞌmine holisekuꞌ nene aꞌmine ngibilave lohotoꞌ zaloꞌ ha minikelizave li Pilatoꞌ lavo gizeꞌine amuzo di ledisa lohotoꞌ zalotiꞌ apasi di mili-ngidilizave li ezela laniꞌ ve.
JOH 19:32 Neꞌmine likevo Pilatoꞌ aza gele ngemo aꞌmine ami nene lo-ngedavo igi Izesukisi makaꞌ ngibilave ma ma nene gizene amuzo bili ledi ma nesi aꞌmineꞌmine i-daniꞌza
JOH 19:33 Izesudoꞌ igi ninganiꞌ nene mo helaniꞌ neivo ningi gizene ma izi ledamaniꞌ ve.
JOH 19:34 Izi ledamaniꞌza asi ami engikutiꞌ maliꞌmo nene gohodunuꞌ Izesuꞌ losono gahevela nene hizo ngolosavo aꞌmingutiꞌ nene vanisesi nososi nene liteꞌ losa limineꞌ ve.
JOH 19:35 Aꞌmine initeꞌ sotoꞌ neivo ningive neꞌmo nene mo mene lo sotoꞌ neive. Neꞌmine neineꞌ nenako aꞌmine nene mo laminetoꞌ neive. Idoꞌ aꞌmine ve neꞌmo nene aza laminetoꞌ nolineꞌ nene mo gele minosa linginesi aꞌminemuꞌ gilisa Izesuꞌnimuꞌ gili eleꞌvoleꞌ ilizave losa nolive.
JOH 19:36 Idoꞌ initeꞌ mene sotoꞌ ineꞌ nene monoꞌ godolouꞌ tiꞌ li gizikaniꞌ gamazi ma nene gihile izelive losa sotoꞌ ineꞌ ve: Amuzoꞌve hamokisi ma di ledamilisave.
JOH 19:37 Idoꞌ monoꞌ godolouꞌ gamazi gohi ma tiꞌ lo neineꞌ mesi ve: Okoꞌnouꞌ hizaveloꞌ nene veꞌine huli ningi minilisave.
JOH 19:38 Neꞌmine ogavo nelotiꞌ nene Alimataia numudotiꞌ ve Zoseheꞌ nene Izesuꞌni eꞌmetaaꞌ ive minineꞌza Zuda vemuꞌ golise gelo sunoꞌ eꞌmetaaꞌ ive neꞌmo nene Izesuꞌ okoꞌno dalove lo Pilatoꞌni aꞌminemuꞌ nene longoꞌ o-davo gele emavo ogo aꞌmine Izesuꞌ okoꞌno nene do vineꞌ ve.
JOH 19:39 Idoꞌ gomuꞌ Izesuꞌ velesi ha neivo gamene ma holukaꞌ ezela vo hetelive Nikodemoꞌ nene za setalitisi novozo unuvo lamineꞌ ogaꞌ ineꞌ do gopo ineꞌ geniꞌve teoti fo (34) kilo (75 pauni) neꞌmine nene davo Zosehekisi vasineꞌ ve.
JOH 19:40 Ve sitaꞌ ingine vi aꞌmine unuvo initekisi nene aꞌminguꞌ milisa okoꞌnoloꞌ nene banisi neꞌminedunuꞌ nene asabuꞌ izi-dasineꞌ ve. Neꞌmine asineꞌ nene Zuda vete igaꞌ aniꞌ monovoloꞌ eꞌmetisa asineꞌ ve.
JOH 19:41 Idoꞌ aꞌmine Izesuꞌni lohotoꞌ zaloꞌ biladaa nene za zuho ma mininguꞌ nene eveneꞌ hamokisi ma mili-ngidamaniꞌ gonoso galese nene ma minineꞌ ve.
JOH 19:42 Mininguꞌ nene holisekumuꞌ di vaꞌvaꞌ igaꞌ aniꞌ gamene nene mo okuꞌ losa holiseꞌ minilizaniꞌ gamene sigisi kiloku nene olosa mo alite neivo gonoso galese avitoꞌ miningumuꞌ Izesuꞌni nene aꞌminguꞌ mili-daniꞌ ve.
JOH 20:1 Holiseꞌ gamene osuꞌ lavo Sadeuꞌ nedengaꞌ holukaꞌ olihe goꞌ lalosa neivo Mangadala numudotiꞌ veneꞌ Maliaꞌ aza gonoso galesela vo ningineꞌ nene gonoso galese velelotiꞌ geheni nene di hulikeniꞌ neivo ningineꞌ ve.
JOH 20:2 Neꞌmine ogo tineꞌ molo lotiꞌ izo ogo Simoni Petoloꞌ ve idoꞌ Izesuꞌ izipahala zuhoutiꞌ vonoloꞌ ve minive engiꞌ sitaꞌ nizasidoꞌ ogo tiꞌ lo lo-ngimineꞌ: Guvelesi ve nene gonoso galeseutiꞌ di vikeniꞌ neineꞌza di vi mili-daniꞌ ebekumuꞌ nene ma ningo gelamune.
JOH 20:3 Neꞌmine lavo Petolokisi idoꞌ Izesuꞌ izipahala ma nesi gonoso galesela vilisa di aka milasineꞌ ve.
JOH 20:4 Neꞌmine igi setatoꞌ nene lotiꞌ izi vasineꞌza Izesuꞌ izipahala ma neꞌmo nene amuzo molo lotiꞌ izo Petoloꞌni ivileꞌ ogo gonoso galesela gomuꞌ vo hetelineꞌ ve.
JOH 20:5 Gomuꞌ vo hetelo gubiꞌ izo gava hizo gonoso galese lulouꞌ ningineꞌ nene Izesuꞌ okoꞌnoloꞌ asabuꞌ izaniꞌ banisi nene aꞌminguꞌ haza neivo ningineꞌza lulouꞌ nene ma dizamineꞌ ve.
JOH 20:6 Dizamo neivo eꞌmeto ave Simoni Petoloꞌ nesi ogo hetelo eiꞌ neve nene mo gonoso galese lulouꞌ hozi dizo ningineꞌ nene banisi nene aꞌminguꞌ haza neivo ningo
JOH 20:7 idoꞌ godololoꞌ asabuꞌ izi-daniꞌ lavolavo nene banisi minida minamo asi lisiheꞌ ogo gangosa abazata minineꞌ ve.
JOH 20:8 Neꞌmine o neivo Izesuꞌ izipahala gonoso galesela gomuꞌ ave masi nene aꞌminguꞌ dizo ningosa Izesuꞌ mo otave lo gele eleꞌvoleꞌ ineꞌ ve.
JOH 20:9 Ingine gonoso galeseuꞌ dizi ningisa gili eleꞌvoleꞌ asineꞌ nene monoꞌ godolouꞌ Oꞌmosoꞌmo do luꞌ izelive lo imiselelesa live hilingutiꞌ otelidoꞌ o neive li gizikaniꞌ gamazi ma nene olihe gili guni amasidiꞌmo nene veꞌinetunuꞌ ningasidotiꞌ gili eleꞌvoleꞌ asineꞌ ve.
JOH 20:10 Neꞌmine igisa gohi tineꞌ mili numuꞌnida vasineꞌ ve.
JOH 20:11 Numuꞌnida vikesivo Maliaꞌ nene gonoso galese heta nene ha ote mino ive ogo minineꞌ ve. Ive ogo mino gubiꞌ izo gava hizo gonoso galese lulouꞌ ningineꞌ nene
JOH 20:12 angeloꞌ sitaꞌ geneganaꞌine mokonoꞌ ngilikasineꞌ nene Izesuꞌ okoꞌno gomuꞌ minineꞌ maloꞌ mitoꞌ minasineꞌ nene ma neꞌmo godolo minida minivo ma neꞌmo nene gizene minida minivo minasineꞌ nene ningineꞌ ve.
JOH 20:13 Neꞌmine ogavo ingine tiꞌ li longoꞌ i-dasineꞌ: Alungoo, gaza nene nanitekumuꞌ ive ogo nane. Neꞌmine likesivo aza tiꞌ lo lo-ngimineꞌ ve: Guveꞌnesi ve nene di vikeniꞌ neiha di vi mili-daniꞌ ebekumuꞌ nene ma ningo gelamuve.
JOH 20:14 Neꞌmine losa mehenela velepeꞌ izo Izesuꞌ aꞌmida ote neivo ningineꞌza Izesuꞌ ve lo ningo gelamineꞌ ve.
JOH 20:15 Neꞌmino neivo Izesuꞌ aza tiꞌ lo lo-imineꞌ ve: Alungoo, nanitekumuꞌ ive ogo nane. Gaza zahinemuꞌ viseꞌ nane. Neꞌmine lavo Maliaꞌ aza ve mene za zuho meꞌmi gizebo veꞌmo nololoseive lo gelo tiꞌ lo lo-imineꞌ: Ve meloo, eiꞌ nene geiꞌ do vaineꞌ neivo ma nene gaza molo-de nolineꞌ ebekumuꞌ lo-nemanivo naza nene vo do volosuve.
JOH 20:16 Neꞌmine lavo Izesuꞌ aza Maliazo lavo velepeꞌ izo vonuꞌ belo Zuda veti gamaziutiꞌ tiꞌ lo lo-imineꞌ ve. Labouni, leliꞌ gamaziutiꞌ nene Tisazo lineꞌ ve.
JOH 20:17 Neꞌmine lavo Izesuꞌ nene veneꞌ aza okoꞌnoloꞌ do gelalive lo tiꞌ lo lo-imineꞌ: Naza nene meꞌneho neida olihe dizo vamuze. Okoꞌneloꞌ do gelamozo. Asi neze zuho nizada voosa nene tiꞌ lo lo-ngemezo: Neniꞌ ma nene neniꞌ meꞌnehosi lengiꞌ metibosi minive idoꞌ neniꞌ Oꞌmosoꞌnesi idoꞌ lengiꞌ Oꞌmosotinesi minive neida nene dizo novive lozo.
JOH 20:18 Neꞌmine lo-davo Maliaꞌ aza Izesuꞌ izipahala zuho nizada vosa Guvelesi ve nene mo ningekuve lo aꞌmine Izesuꞌ lo-imineꞌ gamazi nene lo-ngimineꞌ ve.
JOH 20:19 Aꞌmine gamene Sadeuꞌ nivengaꞌ nene izipahala zuho ingine Zuda veti golise gilisa ingine minaniꞌ numuno nene akahe mukiꞌ gizi giliꞌ lisa minanguꞌ nene Izesuꞌ aza ogo vovoꞌninguꞌ ote mino tiꞌ lo lo-ngimineꞌ: Lengiꞌ muludinguꞌ nene lamineꞌ hongu lo minivo.
JOH 20:20 Neꞌmine lo anauꞌ nili bilaniꞌ nesi idoꞌ losonouꞌ hizaniꞌ nesi nene ngelebizineꞌ ve. Neꞌmine ogavo izipahala zuho ingine aꞌmine Guvelesi ve ninganiꞌ nemuꞌ nene ngolize naba goloso izaniꞌ ve.
JOH 20:21 Neꞌmine navo gohi tiꞌ lo lo-ngimineꞌ: Muludinguꞌ nene lamineꞌ hongu lo minivo. Meꞌneho neze nimiselineꞌ neꞌmino lingine nene naza nolingimiseluve.
JOH 20:22 Neꞌmine losa vele muꞌnive hubu lo-ngedo tiꞌ lo lo-ngimineꞌ ve: Oꞌmosoꞌmi Sikalahuꞌ mene dalo.
JOH 20:23 Lingine eveneꞌ maliti lihimeꞌine nene ma di huli-ngidilizaniꞌ nene mo aꞌmine lihimeꞌine nene gohi minamivo minilisave. Idoꞌ eveneꞌ maliti lihimeꞌine nene lingine ma di huli-ngidamilizaniꞌ nene aꞌmine lihimeꞌinesi ha minilisave.
JOH 20:24 Idoꞌ Izesuꞌ engita aniꞌ gameneloꞌ nene izipahala zuho tuvelu engikutiꞌ lobeꞌ izipe ve li-daaꞌ ave Tomasiꞌ nene aꞌminguꞌ minamineꞌ ve.
JOH 20:25 Minamineꞌ nenako Izesuꞌ izipahala linge nete Guvelesi ve ma nene mo ningekune li li-imaniꞌza aza tiꞌ lo lo-ngimineꞌ ve: Aꞌmine laniꞌ gamazi nene ma gele eleꞌvoleꞌ amolosuve. Asi veꞌnedunuꞌ anauꞌ niliꞌmo hulo molo-dineꞌ nene ningo aꞌminguꞌ nene aꞌne do gelo idoꞌ losonouko nesi nene aꞌne molo geleloniꞌ nene mo gele eleꞌvoleꞌ olosuve.
JOH 20:26 Idoꞌ gamene eiti (8) neꞌmine ogo vavo Izesuꞌ izipahala zuho nene gohi aꞌmine numunguꞌ nene akahe vaiꞌ gizi giliꞌ li minanguꞌ nene Tomasikisi aꞌminguꞌ neivo Izesuꞌ nene gohi ogo vovoꞌninguꞌ ote mino tiꞌ lo lo-ngimineꞌ ve: Muludinguꞌ nene lamineꞌ hongu lo minivo.
JOH 20:27 Neꞌmine loosa Tomasiꞌni nene tiꞌ lo lo-imineꞌ ve: Gaza aꞌne mene ningezo. Anga do ogo aꞌneuꞌ huꞌne mene hizo gelo losoꞌnela huꞌneukisi nene anga molo geleꞌ nazo. Gaza gele eleꞌvoleꞌ amaineꞌ nene hulo gele eleꞌvoleꞌ ozo.
JOH 20:28 Neꞌmine lavo aꞌmidoꞌ Tomasiꞌ tiꞌ lo Izesuꞌni lo-dineꞌ ve: Agae, Guveꞌnesi ve, Oꞌmosoꞌne gehepeve ve.
JOH 20:29 Neꞌmine lavo Izesuꞌ tiꞌ lo lo-imineꞌ ve: Gaza gele eleꞌvoleꞌ naineꞌ nene okoꞌneloꞌ ningosa gele eleꞌvoleꞌ nabe. Eveneꞌ ma ingine neze okoꞌneloꞌ ningamisa gili eleꞌvoleꞌ i nilizave nene mo Oꞌmosoꞌmo do lamineꞌ o-ngedeli akaloꞌ mini mili minilisave.
JOH 20:30 Idoꞌ izipahala zuhoti veꞌnidoꞌ nene Izesuꞌ aza eze monovo ngelebizo ato atoꞌ suno vaiꞌ do sotoꞌ ineꞌza linge mukiꞌ nene me bukuuꞌ ma gizamuve.
JOH 20:31 Linge ma gize nouvoniꞌ neve nene Izesuꞌ nene Oꞌmosoꞌmo do luꞌ izelive lo imiselelesa live Oꞌmosoꞌmi gipele ma nene neive li gili eleꞌvoleꞌ ilizave losa gizuvoniꞌ ve. Idoꞌ lingine aꞌmidoꞌ gili eleꞌvoleꞌ ilizaniꞌ nene lingine minevoꞌ minevoꞌ lengemeni dameni nene eitatiꞌ dalizave losa gizuvoniꞌ ve.
JOH 21:1 Nelotiꞌ alingeꞌ nene Izesuꞌ aza Tibelia noso ohuno gahevela nene izipahala zuhola gohi sotoꞌ o ngimineꞌ nene neꞌmino sotoꞌ o ngimineꞌ ve.
JOH 21:2 Adoꞌ Simoni Petoloꞌ ve, lobeꞌ izipe ve laaꞌ ave Tomasiꞌ ve, nGalilaia misubouꞌ numuno ebeꞌ ma gulive Kana numudotiꞌ ve Natanieleꞌ neeve idoꞌ Zebedaioꞌ gipele sitaꞌ neeve idoꞌ izipahala zuhoutiꞌ ve gohi ma setaꞌ nesi nene makatoꞌ minaniꞌ ve.
JOH 21:3 Minadotiꞌ nene Simoni Petoloꞌ nene tiꞌ lo lo-ngimineꞌ ve: Naza nene alahatoꞌ nosouꞌ novuve. Neꞌmine lavo ingine tiꞌ li li-imaniꞌ: Lazasi nene geikisi makatoꞌ volone. Neꞌmine likevo vaitoꞌ vi sipiuꞌ dizi alahatoꞌ vaniꞌza aꞌmine holukaꞌ nene alahaꞌ hamokisi ma damaniꞌ ve.
JOH 21:4 Neꞌmine aniꞌza nedengaꞌ holukatiꞌ hoꞌ olihe nodizivo Izesuꞌ nene noso gahevela ote minineꞌza izipahala zuho ingine nene Izesuꞌ neive li ningi gilamaniꞌ ve.
JOH 21:5 Neꞌmine aniꞌza Izesuꞌ nene tiꞌ lo lo-ngimineꞌ ve: Vekizo, lingine nene alahaꞌ hamokisi ma dami nilisave. Neꞌmine lavo ingine nene ee, mo ma damune li laniꞌ ve.
JOH 21:6 Neꞌmine likevo aza tiꞌ lo lo-ngimineꞌ ve: Alahaꞌ mo ma dalisaze. Alahaꞌ daaꞌ golalezetine nene huli hela zamela ilo. Neꞌmine lavo hulisa ingine geleleheꞌ aniꞌza aꞌminguꞌ nene alahaꞌ vaiꞌ goloso likevo ngeli geleleheꞌ amaniꞌ ve.
JOH 21:7 Neꞌmine ikevo Izesuꞌ vonoloꞌ izipahala neꞌmo Petoloꞌni tiꞌ lo lo-imineꞌ ve: Meve nene Guvelesi ve ma nene neive. Guvelesi ve ma nene neive lineꞌ nene Simoni Petoloꞌ aza gelosa aza nene okoꞌnoloꞌ initeꞌ do huloko minineꞌ nenako liteꞌ lo okoꞌnoloꞌ initeꞌ do izo nosouꞌ oluto izosa vineꞌ ve.
JOH 21:8 Neꞌmine ogavo Izesuꞌ izipahala zuho linge nene noso gahevelotiꞌ nene naedi (90) mitas (300 fiti) neꞌmidoꞌ avitoꞌ minaniꞌ nenako aꞌmine alahaꞌ golalezeꞌinesi sipiuꞌ geleleheꞌ i di noso gahevela aniꞌ.
JOH 21:9 Neꞌmine igi sipiutiꞌ limi hazala igi ninganiꞌ nene sinibotunuꞌ gizikaniꞌ oloꞌ ma lo minidoꞌ nene alahakisi beletisi neivo ninganiꞌ ve.
JOH 21:10 Neꞌmine ikevo Izesuꞌ tiꞌ lo lo-ngimineꞌ: Lingine idise daniꞌ alahakutiꞌ nene ma dalo.
JOH 21:11 Neꞌmine lavo Simoni Petoloꞌ aza sipiuꞌ dizo golalezeꞌ nene geleleheꞌ ogo noso gahevela do aniꞌ ve. Aꞌmine golalezeꞌ nene alahaꞌ naba vaiꞌ goloso vanu hadeti fifti tili (153) neꞌmine minaniꞌ ve. Idoꞌ neꞌmini alahaꞌ vaiꞌ laniꞌza aꞌmine golalezeꞌ nene hukamineꞌ ve.
JOH 21:12 Neꞌmine ogavo Izesuꞌ tiꞌ lo lo-ngimineꞌ ve: Nosoꞌ niteꞌ mene nalonge. Alo. Neꞌmine lineꞌza ingine nene Guvelesi ve ve li gili mini ingine mukiꞌ nene zaho nane li longoꞌ i-dilisa ngovozo ogavo engikutiꞌ hamoliꞌmosi neꞌmine lo longoꞌ ma o-damineꞌ ve.
JOH 21:13 Neꞌmine igi nizavo Izesuꞌ aza ogo beleti do ngemo aꞌmineꞌmine ogo alahakisi nene do ngimineꞌ ve.
JOH 21:14 Idoꞌ Izesuꞌ hilingutiꞌ otidotiꞌ nene ha sotoꞌ o ngemekaꞌ ngemekaꞌ ineꞌza idise mene sotoꞌ o-ngimineꞌ neꞌmo nene gamene setohamo neive.
JOH 21:15 Nosoꞌ niteꞌ ni osuꞌ likevo Izesuꞌ aza Simoni Petoloꞌni nene tiꞌ lo lo-imineꞌ ve: Zohaneꞌ gipele Simonizo, vekise mete luꞌine nimaniꞌ nene ivileꞌ ivosa luka neme nabe. Neꞌmine lavo aza tiꞌ lo lo-imineꞌ ve: Guvekasi ve, mo laminetoꞌ lane. Luꞌne geme nouvoniꞌ nene mo gasi gele nane. Neꞌmine lavo Izesuꞌ aꞌmidoꞌ tiꞌ lo lineꞌ ve: Sipisipi angaleꞌneloꞌ nene nosoꞌ niteꞌ ngemo gizebo ozo.
JOH 21:16 Neꞌmine lo gohi tiꞌ lo lo-dineꞌ ve: Zohaneꞌ gipele Simonizo, gaza nene mo luka neme lamineꞌ o nabe. Neꞌmine lavo Petoloꞌ tiꞌ lo lo-imineꞌ ve: Ee, Guvekasi ve, naza luꞌne geme nouvoniꞌ nene mo gasi gele nane. Neꞌmine lavo tiꞌ lo lo-imineꞌ ve: Sipisipi izeꞌneloꞌ nene gizebo lamineꞌ ozo.
JOH 21:17 Idoꞌ gohi gamene sitohamoꞌ ivo tiꞌ lo lo-imineꞌ ve: Zohaneꞌ gipele Simonizo, gaza nene mo luka neme nabe. Neꞌmine lo luka neme nabe neme nabe gamene sitohamoꞌ lineꞌ nemuꞌ nene geni belavo tiꞌ lo lineꞌ ve: Guvekasi ve, gaza nene initeꞌ mukikumuꞌ nene ha gelaaꞌ naineꞌ nenako naza luꞌne geme nouvoniꞌ nemuꞌ nene ha gele nane. Lavo aza tiꞌ lo lo-imineꞌ ve: Sipisipi izeꞌneloꞌ nene nosoꞌ niteꞌ ngemo gizebo ozo.
JOH 21:18 Naza laminetoꞌ tiꞌ lo nolo-gimuve: Gaza gosoꞌveloꞌ minanidoꞌ nene gopokaloꞌ leti nene gasika do izosa volosa gaka gelaineꞌ ebeta nene ha vaaꞌ aineꞌ ve. Neꞌmine ogaꞌ aineꞌza ozoho molanidoꞌ nene anga nene do hozi lo do patelanivo gopokaloꞌ nene leti neꞌmini nalaꞌ di-gidi volosa gelamilineꞌ ebeta nene geleꞌmizi vilisave.
JOH 21:19 Idoꞌ Izesuꞌ aza neꞌmine lineꞌ nene Petoloꞌ Oꞌmosoꞌmi gulive do hozi losa helelineꞌ monovo nene do sotoꞌ ogosa lineꞌ ve. Idoꞌ neꞌmine losa neꞌmeto minezo lo lo-dineꞌ ve.
JOH 21:20 Neꞌmine lavo Petoloꞌ mine velepeꞌ izo ningineꞌ nene Izesuꞌ vonoloꞌ izipe minive Izesuꞌni dalizaniꞌ gamene avitoꞌ ogavo nosoꞌ niteꞌ naniꞌ gameneuꞌ Izesuda mine lehete ogo geiꞌ nene biluvaliti aꞌninguꞌ zaho do ngemelive lo longoꞌ o-dive nene ngeꞌmeto navo ningineꞌ ve.
JOH 21:21 Aꞌmine ve ningo Petoloꞌ aza Izesuꞌni tiꞌ lo lo-imineꞌ ve: Guvekasi ve, vole ve nene naniteꞌ sotoꞌ o-delive.
JOH 21:22 Neꞌmine lavo Izesuꞌ tiꞌ lo lo-imineꞌ ve: Naza eiꞌ nene velesi ha neivo tineꞌ molo alove loloniꞌ nene ha lolosuha geiꞌ gonoka neivosa longoꞌ o-nedabe. Neꞌmeto minezo.
JOH 21:23 Idoꞌ Izesuꞌ nene ha neꞌmine lineꞌ nenako aꞌminemuꞌ nene gamazi ma tiꞌ lo hutileꞌ ogo vineꞌ ve: Aꞌmine Izesuꞌ izipahala nene mo helamoloseive. Gamazi neꞌmine lo vineꞌza Izesuꞌ nene helamoloseive livoba asi eiꞌ nene velesi ha neivo alove loloniꞌ nene ha lolosuve lineꞌ ma neive.
JOH 21:24 Aꞌmine Izesuꞌ izipahala zuhoutiꞌ minive meve nene aꞌmine initekumuꞌ mene lo sotoꞌ sotoꞌ ogo luhuvo gizive nene neive. Idoꞌ laza nene aꞌmine eiꞌ lo sotoꞌ sotoꞌ ineꞌ gamazi nene mo laminetoꞌ neive lo gele noneꞌ ma neive.
JOH 21:25 Idoꞌ Izesuꞌ nene initeꞌ ato atoꞌ mukiꞌ nesi nene ha ogo molo ineꞌza aꞌmine initeꞌ mukiꞌ nene luhuvo ma gizi miladiniko aꞌmine gizaniꞌ buku nene me misubouꞌ molaloneꞌ ebeꞌ nene vovosi minamivo ma vo damidine losa gele nouve. Moda aꞌnesiꞌ ve.
ACT 1:1 O Teohiloꞌ, Naza luhuvo niteꞌ lingela ma gomuꞌ gize-giduhe. Aꞌmine luhuvo nitekuꞌ nene Izesuꞌ apiꞌ ogo gono do minineꞌ neꞌmi gamazisi idoꞌ eveneꞌ apize ngimineꞌ gamazi nesi nene gize osuꞌ luvoniꞌ ma neive. Idoꞌ aꞌmine gamazi nogizo Izesuꞌ aza gono do eveneꞌ apize ngemeꞌmo dizosa do kegese-ngidive aposolo gono dalizaniꞌ gamazi nene Oꞌmosoꞌmi Sikalahuliꞌmo lidoꞌ lo-ngemavo Oꞌmosoꞌmo Izesuꞌni Okulumokuꞌ eleꞌmizo dizineꞌ nene gizosa gamazi gohi ma gizamo luhuvo niteꞌ nene hulo-giduvoniꞌ ma ve.
ACT 1:3 Ee, lohotoꞌ zaloꞌ bili badikevo mulumo gelo helo oto velesi mino aposolo sotoꞌ o ngimineꞌ ve. Neze ha neive li gilikevo gihile izeleseive lo eleꞌvoleꞌ niteꞌ mukiꞌ nene ogo ngelebizo neivo gamene foti novivo eze ningikaꞌ ningikaꞌ navo ezesi gamazi li voleloꞌ meloꞌ igi laniꞌ ve. Idoꞌ aza nene Oꞌmosoꞌmo gizebo o-ledelineꞌ gamazi lo-ngimineꞌ ve.
ACT 1:4 Neꞌmine ogo engikisi mino tiꞌ lo lo-ngimineꞌ: Lingine Zelusalemi numuno ebeꞌ mene hulamilo. Meꞌneho Sikalahuꞌve imiselelove lingumuꞌ lo-lingimuvoniꞌ mamuꞌ nene gizebo igi minilo.
ACT 1:5 Zohaneꞌ aza eveneꞌ noso holo-ngedavo ingine haza nosovoꞌ daniꞌza lingine gamene haꞌna ogo vamivo Oꞌmosoꞌmi Sikalahuꞌ neve nene dalisave lo lo-ngimineꞌ ve.
ACT 1:6 Gamene ma izipahala zuhosi di geseꞌ igi mini Izesuꞌni tiꞌ li longoꞌ i-daniꞌ: Guvekasi ve make, guveꞌinesi ve nabalite avotemotine gizebo i-ngidi minaaꞌ aniꞌ maꞌmine ogo gaza Guvetesi ve naba loloꞌ ogo leze Isilaeleꞌ ve gizebo o-ledelineꞌ gamene nene idise nehe. Olo.
ACT 1:7 Neꞌmine li likevo Izesuꞌ aza tiꞌ lo lo-ngimineꞌ: Naza olihe neꞌmine amuvo gamene ma ogo vilineꞌ nene nehe idoꞌ gomuꞌ sotoꞌ ilineꞌ initeꞌ nene nehe neve nene lengiꞌ initetine ne nominako lingine ma gilamilisave. Nanitekumuꞌ ve. Meꞌneho asiꞌve amuzoꞌveloꞌ molo gelo mino lo hukineꞌ nemuꞌ ve.
ACT 1:8 Ne neineꞌza Oꞌmosoꞌmi Sikalahuꞌ lengita lemo amuzo molo lengemavo neniꞌ gamaziꞌne nene Zelusalemi numudotiꞌ apiꞌ igi li Zudaia misuboukosi Samalia misuboukosi vi li sotoꞌ ikevo misubo lumolasi vo osuꞌ lilive.
ACT 1:9 Tiꞌ lo lo-ngemavo ingine vonuꞌ bili nizavo Okulumokuko dizo volosa nodizivo limusoꞌmo molo hite-davo vo halekavo ma ningamaniꞌ ve.
ACT 1:10 Okulumokuꞌ vo halekavo ingine okeneꞌ igi ningi nizavo ve setaꞌ geneganaꞌine mokonokisi liteꞌ mateꞌ li vovoꞌninguꞌ sotoꞌ asineꞌ ve.
ACT 1:11 Sotoꞌ igi tiꞌ li li-ngimasineꞌ: nGalilaia ve lingine nanimuꞌ okeneꞌ igi ningi nizave. Izesutine lengikisi minidotiꞌ Oꞌmosoꞌmo Okulumokuko eleꞌmizo dizive nene ningi nizavo dizineꞌ neꞌmine ogo lemo aloseive li li-ngimasineꞌ.
ACT 1:12 Neꞌmine ikesivo aposolo nene Oliva gololotiꞌ tibizi aka alite minida vi Zelusalemi numuda hetelaniꞌ.
ACT 1:13 Heteli numuno muloloꞌ ma minineꞌ numunguꞌ ingi minaaꞌ aniꞌ numunguꞌ nene dizi minaniꞌ. Engiꞌ guliveꞌine nene Petoloꞌ ve Zohaneꞌ ve Zakoboꞌ ve Adeleaꞌ ve Hilipoꞌ ve Tomasiꞌ ve Batolomaioꞌ ve Mataioꞌ ve idoꞌ Alahaioꞌ gipele Zakoboꞌ ve idoꞌ Simoni aza Loma ve ngimiselelone lo amuzonga laaꞌ ive neve idoꞌ Zakoboꞌ gipele Zudakisi ve.
ACT 1:14 Vekise nesi idoꞌ veneꞌ linge masi Izesuꞌ izeleho Maliakisi idoꞌ Izesuꞌ akunolomotesi di geseꞌ igi mini luꞌine mili hamoꞌ igi Oꞌmosola li minaniꞌ ve.
ACT 1:15 Aꞌmine gamene neuꞌ nene Izesuꞌ evenele zuho eveneꞌ vani hadeti tuvedi (120) neꞌmine nene igi mulise mili nizavo Petoloꞌ aza voꞌninguꞌ ote mino tiꞌ lo lo-ngimineꞌ:
ACT 1:16 Zogone zuhokizo, gililo. Oꞌmosoꞌmi Sikalahuliꞌmo Davidiꞌni do ote-davo Davidiꞌ aza Zudaꞌ adoꞌ Izesuꞌni dalizave gomuꞌ molo ngemo ngelebizive mamuꞌ lineꞌ gamazi gizikaniꞌ nene gihile izelineꞌ ogavosa gihile izineꞌ ve.
ACT 1:17 Lezesi makaꞌ gono dalive lo Izesuꞌ aza Zudaꞌni do kegeso eleꞌmize molaniꞌ nenako aza Zudaꞌ leliꞌ aleve minineꞌ ve.
ACT 1:18 Aꞌmine ve nene monovo goloso ogo Izesuꞌni nene adeuꞌ molalive li biluvalite moni imaniꞌ nedunuꞌ nene misubo ma meni hizo aꞌmidoꞌ vo mino godololatiꞌ velepeꞌ izeko lemo gatuno izo hoꞌlavo iseve nene dulungizo doꞌmozineꞌ ve.
ACT 1:19 Nemuꞌ Zelusalemi aleve mukiꞌ gili aꞌmine ebeliꞌmi gulive nene engiꞌ gamaziꞌningutiꞌ Akeledama ve li milaniꞌ ve. Idoꞌ aꞌmine gulive nene leliꞌ gamaziutiꞌ vanise ebeꞌ ve lo neive.
ACT 1:20 Idoꞌ Oꞌmoso opoꞌni li nama laaꞌ aniꞌ nama monoꞌ godolouꞌ ma tiꞌ li gizi nizaniꞌ ma neive. Numuꞌve nene hulavo zupoꞌ molo neivo eveneꞌ maliꞌmo aꞌminguꞌ minamoloseive li gizi nizave. Idoꞌ ma nene tiꞌ li gizi nizave: Eiꞌ gono veleloꞌ nene ve maliꞌmo do tiꞌ ogo dalive li gizi nizaniꞌ ma neive.
ACT 1:21 Nemuꞌ nene Izesuꞌ hilingutiꞌ ote neineꞌ gamazi lo sotoꞌ ilive lo ve ma do kegeso leliꞌ aposolokuꞌ do giꞌmize-do eleꞌmize molaloneꞌ ogave. Adoꞌ Izesuꞌ ha neivo Zohaneꞌ noso holo-dineꞌ gamenelotiꞌ apiꞌ ogo mine do dizo Oꞌmosoꞌmo vovoteutiꞌ Izesuꞌni Okulumokuꞌ do dizo vineꞌ gameneuꞌ ezesi makaꞌ minuniveutiꞌ ma do kegeso eleꞌmize molaloneꞌ ogave.
ACT 1:23 Petoloꞌ tiꞌ lo lo-ngemavo Izesuꞌ evenele zuho ingine ve sitaꞌ ma Zoseheꞌ adoꞌ gulive ngomo Balasabaꞌ ve lo mininekisi idoꞌ gulive ma Zusitoꞌ ve lo mininekisi idoꞌ ve ma gulive Matatiaꞌ nesi nene di sotoꞌ i-ngidi
ACT 1:24 Oꞌmosola tiꞌ li opoꞌni laniꞌ ve. Agae, Guvetesi ve make, eveneꞌ mukiꞌ luteuꞌ ningaaꞌ anive neke, Zudaꞌ aza aposolo gono hulo Oꞌmoso geiꞌ do vaꞌvaꞌ ogo molo-daineꞌ ebeta vo mo gopo ogaze. Eze gono veleloꞌ dalive lo mene ve sitakutiꞌ ma do kegeso lelebizezo.
ACT 1:26 Tiꞌ li opoꞌni li Oꞌmoso gelavo di kegesaaꞌ zohikuꞌ ngeleꞌmizi milikevo Matatiaꞌ ivileꞌ ogavo aposolo leveni minanguꞌ nene di giꞌmizi-daniꞌ ve.
ACT 2:1 Zuda veliti avoꞌningine Oꞌmosoꞌmo iseꞌine izingumuꞌ gili minaaꞌ aniꞌ holiseꞌ nene osuꞌ lavo nelotiꞌ salele seveni ogo vavo nosoꞌ niteꞌ apiꞌ igi di naaꞌ aniꞌ holiseꞌ mo ogavo Izesuꞌ evenele zuho ingine numuno hamokuꞌ ma mulise mili nizavo
ACT 2:2 hepeꞌ naba amuzoꞌvesi gugu laaꞌ neineꞌ neꞌmine Okulumokutiꞌ nene liteꞌ mateꞌ lo gugu lo lemavo gugu lineꞌ neꞌmo minaniꞌ numunguꞌ nene amuzo molaniꞌ ve.
ACT 2:3 Neꞌmine ogavo ningi nizavo oloꞌ vele gele vineꞌ nene sotoꞌ pizo eveneꞌ godoꞌnidoꞌ hamoꞌ hamoꞌ mine hutileꞌ ogo minavo
ACT 2:4 Oꞌmosoꞌmi sikalahuꞌ neꞌmo luꞌninguꞌ lemo gono do do lapa nomineꞌ o-ngedavo ato atoꞌ gamazi gilamaniꞌ gamaziutiꞌ apiꞌ igi liꞌmi vaniꞌ.
ACT 2:5 Tiꞌ igi nizavo aꞌmine gameneuꞌ nene Zuda ve monoꞌ gilaaꞌ ave numudoꞌ namadoꞌ ve Zelusalemi ebeta igi mini
ACT 2:6 gugu lineꞌ nene gili nemuꞌ mulise mili aposolo ingine gamaziꞌningutiꞌ gamaziꞌningutiꞌ likevo gili gopo gaꞌine gilaniꞌ.
ACT 2:7 Gili golize li sizaga li tiꞌ li laniꞌ: Mene gamazi nilave ingine nGalilaia misubokotikovoꞌ nizaniꞌ ve.
ACT 2:8 Ne nadiꞌ isa leze note gihile izete metetidatiꞌ giluneꞌ nene likevo gilune.
ACT 2:9 Laza misubo ato atokutiꞌ none. Palatia ve idoꞌ Mede ve idoꞌ Elame ve idoꞌ Mesopotamia misuboutiꞌ ve idoꞌ Zuda ve idoꞌ Kapadokia ve idoꞌ Podo ve idoꞌ Asia ve
ACT 2:10 Piligia ve idoꞌ Pamahilia ve, Aigita ve idoꞌ Libia misubo ebekutiꞌ Kilene ve idoꞌ Loma ebetasi ungunive ne none.
ACT 2:11 Idoꞌ laza Zuda ve gehepeve noube idoꞌ monokumuꞌ Zuda vela do giꞌmizunive noube idoꞌ Keleta ve nehe Alabia ve nehe laza mukiꞌ gelo leliꞌ notetiꞌ notetiꞌ Oꞌmosoꞌmi eleꞌvoleꞌ sunomuꞌ likevo gelekune.
ACT 2:12 Neꞌmine lii golize li gili gopo igi agae, mene nani suno ve li laniꞌ.
ACT 2:13 Tiꞌ li laniꞌza ve linge ma nete aꞌmine di ledi mini gizeꞌ i-ngidi tiꞌ li laniꞌ: Vaini noso gosohoꞌ nisa sipaki igi mini nilave.
ACT 2:14 Sipaki igi mini nilave likevo Petoloꞌ aza gonolomote levenisi ne ote mino gamazi naba lo tiꞌ lo lo-ngimineꞌ: Vekizo, lingine Zelusalemi alevesi idoꞌ Zuda ve mukikisi naza gamazi ma lo-lengemeloze. Gatine huli gili minilo.
ACT 2:15 Lengiꞌ nene gili ladani ikeve. Nedengaꞌ naeni kiloku nene olihe aminako me ve ne sipaki amave.
ACT 2:16 Sipaki amaniꞌza sotoꞌ neineꞌ initekumuꞌ mene Oꞌmosoꞌmi gamazi lo sotoꞌ ogaꞌ ive Zoeleꞌ luhuvo gizineꞌ neꞌmi gihile nene me neive. Tiꞌ lo gize neive:
ACT 2:17 Oꞌmosoꞌmo tiꞌ lo lineꞌ: Mino alingeꞌ gamene alitavo Sikalahuꞌne eveneꞌ mukiꞌ lehize-ngedekuvo aꞌmine Sikalahuꞌne neꞌmo nene zatuhoꞌ o-ngedavo gipe alu langaꞌvopilemoꞌ nete neniꞌ veꞌnetiꞌ gamazi li sotoꞌ igi li-lingimilisave. Idoꞌ aꞌmine Sikalahuꞌne neꞌmo do sotoꞌ o-ngedavo initeꞌ ato atoꞌ nene gosoꞌ vetineliti veꞌnidoꞌ o molavo ningikaꞌ ningikaꞌ navo ozohotinelitesi vamuꞌ ningiꞌmi vi minilisave.
ACT 2:18 Ee, aꞌmine gameneuꞌ Sikalahuꞌne nene aꞌmine gelekeleꞌ alu izipeꞌne nesi lehize-ngedekuvo neniꞌ gamaziꞌne nene li sotoꞌ igi eveneꞌ li-ngimilisave.
ACT 2:19 Idoꞌ neꞌmine navo hoze okulumoꞌ veletasi idoꞌ misubo galaꞌmudasi nene eleꞌvoleꞌ initeꞌ mukiꞌ noso molo lengelebizelesuve. Adoꞌ misubola nene vanisesi olokisi sotoꞌ ikesivo sokileꞌmo limuso neꞌminosa sotoꞌ ogavo ningilisave.
ACT 2:20 Idoꞌ Guvelesi veꞌmi gamene naba olihe alitamivo hoꞌ veleloꞌ nene hitavo litiꞌmuso ize mineleseive. Idoꞌ aꞌmineꞌmine ogo ikeꞌnisi nene guleheꞌ kuleheꞌ lizo vanise neꞌmine geleleseive.
ACT 2:21 Idoꞌ Guvelesi veꞌmi gulive di minilizave nene Oꞌmosoꞌmo do nguꞌ ize-lengedeleseive lo gize neive.
ACT 2:22 Neꞌmine lo Petoloꞌ imineꞌ molo tiꞌ lo lineꞌ: Isilaeleꞌ alevekizo, ma lo-lengemeloze. Gililo. Oꞌmosoꞌmo lingine nezelatiꞌ ve ve li ningilizave lo Nasalete ve Izesuꞌni do amuzo molo-do hize eleꞌ o-davo eleꞌvoleꞌ nitekisi golize nitekisi ogo noso molaniꞌ nene lengiꞌ vovotinguꞌ ineꞌ nemuꞌ gili nizaniꞌ ma neive.
ACT 2:23 Eze nene Oꞌmosoꞌmo gozopoꞌ gelo lo huko gele neidoꞌ ogo aka elebizo adinguꞌ molaniꞌ ve. Adinguꞌ molavo lingine bilaniꞌ ve. Ee, lingine likevo biluvaꞌve gamazi gilamavete lohotoꞌ zaloꞌ nilidunuꞌ bilikevo hilineꞌ.
ACT 2:24 Neꞌmine ikeniꞌza gonoso milaaꞌ anguꞌ mine giliꞌ lamilineꞌ ogavo nemuꞌ mulumo gelo hilingutiꞌ Oꞌmosoꞌmo do ote-dineꞌ ve.
ACT 2:25 Davidiꞌ ezemuꞌ tiꞌ lo gizineꞌ ve: Guvelesi ve nezesi gamene gamene minaaꞌ neive lo aꞌmine nene gaꞌneuꞌ sotoꞌ o neivo naza gele minaaꞌ uvoniꞌ ve. Aza initeꞌ maliꞌmo do goloso o-nedalive lo neniꞌ aꞌne zamela minaaꞌ neive.
ACT 2:26 Nemuꞌ luꞌneuꞌ lamineꞌ gelo muluꞌneuꞌ gulumo avile lisavo nolize gamazi noluve. Oꞌmosoꞌne make, voꞌnehaza nene hilavetida minelive lo mudise hulamolosane. Idoꞌ luꞌne geita molo gelekeleꞌ o-giduve neniꞌ nene hulo-nedanivo okoꞌne geleso unuvo amoloseive. Nemuꞌ nene gele hamoꞌ ogo hongu lo gizebo ogo minelesuve.
ACT 2:28 Naza minevoꞌ minevoꞌ ogo luꞌne gosohoꞌ do mineloniꞌ aka nene nelebizanivo gezesi minusidiꞌmo luꞌneuꞌ gulumo avile liso minavo neꞌminovoꞌ minelesuve lo gizineꞌ ve.
ACT 2:29 Neniꞌ zuhokizo, naza avoteho Davidiꞌnimuꞌ nene mo laminetoꞌ lo-lengemelesuve. Aza helavo galese izi-daniꞌ ve. Gonoso galeseꞌve nene idisesi sotoꞌ neivo ningo minaaꞌ noune.
ACT 2:30 Ne neiha aza Oꞌmosoꞌmi gamazi lo sotoꞌ ogaꞌ ive polohete minineꞌ nenako aꞌmine lineꞌ gamazi nene Oꞌmosoꞌmo gamaziꞌve do amuzo molo lo huko-dineꞌ gamazimuꞌ gelo mino lineꞌ ve. Adoꞌ ezeloꞌ medelo eze aꞌvopilemoꞌ zuhoutiꞌ maliꞌmo eze moꞌmosiꞌve dalive lo lo huko-dingumuꞌ gele minosa lineꞌ ve.
ACT 2:31 Ee, aza alingeꞌ sotoꞌ ilineꞌ initekumuꞌ gele mino Oꞌmosoꞌmo do luꞌ izelive lo imiselelesa live nene hilingutiꞌ do ote-delingumuꞌ lineꞌ ve. Adoꞌ Oꞌmosoꞌmo aꞌmine ve hilavetida mudise hulo-damivo okoꞌno gelesamilive lineꞌ nene Oꞌmosoꞌmo hilingutiꞌ do ote-delingumuꞌ lineꞌ ve.
ACT 2:32 Oꞌmosoꞌmo Izesuꞌni do ote-dineꞌ nene eze izipahala zuho laza vete gihiletunuꞌ ninge noneꞌ ma neive.
ACT 2:33 Idoꞌ meleho Oꞌmosoꞌmo eveneꞌ mukiꞌ livileꞌ ogo dize minive ve li ningilizave lo ana zamela eleꞌmize molo gozopoꞌ lo huko-didoꞌ eꞌmeto eze Sikalahuꞌve emavo lehize-lidineꞌ. Idoꞌ idise gili ningi nizaniꞌ initeꞌ adoꞌ eze Sikalahuꞌve lehize-lidineꞌ nene gili ningi nizave.
ACT 2:34 Idoꞌ Davidiꞌ aza okoꞌno losuvosi Okulumokuꞌ dizamineꞌza aza gamazi tiꞌ lo lineꞌ: Vozeuꞌ veꞌmo aza Guveꞌnesi vemuꞌ tiꞌ lo lo-imineꞌ: Gaza eveneꞌ nabavoꞌ minaaꞌ ada aꞌne hulaaꞌ uvoda minezo.
ACT 2:35 Mine do vo nanivo biluvaka nete gelekeleꞌ i-gidi minilizave lo gizengauko doꞌmo leme-ngedelesuve lineꞌ.
ACT 2:36 Nemuꞌ lingine Isilaeleꞌ zuho mukiꞌ gili lamineꞌ ilo. Aꞌmine ve ma lingine bilikevo hilive Izesuꞌ nene Oꞌmosoꞌmo Guvelesi ve ve lo idoꞌ do luꞌ izelive imiselelesa live ve lo eleꞌmize molavo neive lo Petoloꞌ lo-ngimineꞌ.
ACT 2:37 Neꞌmine lavo eveneꞌ gili muluꞌine hukavo mulumo gili Petoloꞌ ve aposolo linge ma nesi longoꞌ i-ngidi tiꞌ li laniꞌ: Zogole zuhokizo, nadiꞌ okunivo lamineꞌ ilive.
ACT 2:38 Neꞌmine likevo Petoloꞌ tiꞌ lo lo-ngimineꞌ: Oꞌmosoꞌmo lihimete hulo-ledelingumuꞌ ve li lingine hamoꞌ hamoꞌ igi lutine di velepeꞌ izilo. Neꞌmine ikevo laza Izesuꞌ Kilisitoꞌ guliveloꞌ monoꞌ noso holo-lengedekunivo Oꞌmosoꞌmi Sikalahuꞌve nene lehize-lengedeleseive.
ACT 2:39 Linginesi langaꞌvopilemoꞌ hota nizavesi elese molo-lengemavo aliza aleve mukiꞌ nene eze Sikalahuꞌve lehize-lengedelesa lo huko neineꞌ ma ve.
ACT 2:40 Petoloꞌ aza tiꞌ lo lo-ngemosa gamazi mukiꞌ imineꞌ molo gaꞌine do tiꞌ lo lo-ngimineꞌ: Eveneꞌ zuho goloso minaniꞌ mene Oꞌmosoꞌmo goniꞌ o-ngedo ngebelelinguꞌ nene lengikisi lengebelamivo lukuvo nalizangisi olovoꞌ ilo lo lo-ngimineꞌ.
ACT 2:41 Tiꞌ lo lo-ngemavo eze gamazi gili dave gohi tili tauseni (3,000) nene imineꞌ milavo monoꞌ noso hili-ngidaniꞌ ve.
ACT 2:42 Neꞌmine ogavo gamene gamene amuzo mili di geseꞌ igi gili hamoꞌ igi aposolo apizi ngimaniꞌ gamazi gili haza nosoꞌ nitekisi lebeni initekisi ni Oꞌmosola li minaaꞌ aniꞌ.
ACT 2:43 Tiꞌ igi nizavo aposolo ingine Oꞌmosoꞌmi amuzo ningilizave li eiꞌ velemuꞌ ato atoꞌ initekisi golize nitekisi di sotoꞌ ikevo eveneꞌ mukiꞌ ngehelele izivo minaniꞌ.
ACT 2:44 Izesuꞌni gili imaaꞌ ave ingine mukiꞌ hamoꞌ zuho liliꞌ igi initeꞌ mataꞌ di minaniꞌ nene mukitoꞌ initeꞌ ogavo di minaniꞌ ve.
ACT 2:45 Misuboꞌine nehe heneni nganeniꞌine nehe nene meni hizi aꞌmidotiꞌ moni daniꞌ nene initeꞌine nomivo viseꞌ igaꞌ ave izeꞌ mili engiꞌ votigileloꞌ ngimaniꞌ ve.
ACT 2:46 Luꞌine gaꞌine mili hamoꞌ igi monoꞌ numuno nabauꞌ mulise milaaꞌ aniꞌ. Idoꞌ numunguꞌ numunguꞌ di geseꞌ ikaꞌ ikaꞌ igi mini nosoꞌ niteꞌ naaꞌ aniꞌ nene muluꞌninguꞌ lamineꞌ gili balu i-ngidi
ACT 2:47 ni mini Oꞌmosola opoꞌni li minikevo eveneꞌ mukiꞌ ningi lamineꞌ i-ngidaniꞌ. Neꞌmine navo Guvelesi ve neꞌmo gamene gamene eveneꞌ gohi ma do nguꞌ izo eiꞌ evenele zuhouꞌ do imineꞌ molo-ngedaaꞌ ineꞌ ve.
ACT 3:1 Gamene ma Petoloki Zohaneki nivengaꞌ gamene tili kilokuloꞌ nene Oꞌmosola laaꞌ aniꞌ gamene ogavo monoꞌ numuno nabauꞌ dizilisa nivasivo
ACT 3:2 ve ma izelehi mulunoutiꞌ gebili sotoꞌ ive nene monoꞌ numuno neꞌmi gateni adoꞌ lamineꞌ goloso neive laaꞌ aniꞌ gateniloꞌ nene gamene gamene eleꞌmizi di huli-dikevo aꞌmidoꞌ mino eveneꞌ dizi limi ave nene monimuꞌ vokuꞌ vokuꞌ lo-ngedo minaaꞌ ineꞌ ve.
ACT 3:3 Petoloki Zohaneki monoꞌ numuno nabauꞌ dizilisa nivasivo ningo monimuꞌ vokuꞌ lo-ngidineꞌ.
ACT 3:4 Vokuꞌ lo-ngedavo Petoloki Zohaneki vonuꞌ bili Petoloꞌ tiꞌ lo lo-imineꞌ: Vonuꞌ lebelezo.
ACT 3:5 Tiꞌ lo lo-emavo ve gebili aza gilineꞌ nene initeꞌ ma nemelesa lihe lo vonuꞌ ngibilineꞌ.
ACT 3:6 Neꞌmino neivo Petoloꞌ tiꞌ lo lo-imineꞌ: Nezela moni heneniꞌne nomineꞌza initeꞌ hamoꞌ ma neineꞌ nene gemekuvo dalosane. Nasalete ve Izesuꞌ Kilisitoꞌ eiꞌ velemuꞌ lo-gemekuvo oto aka monezo.
ACT 3:7 Neꞌmine lo-emo ana zamela do do ote-davo liteꞌ lo gizene luhisesi omuvosi amuzo molavo
ACT 3:8 liteꞌ lo ote pehe lo aka mono olutoꞌ dize dizeꞌ ogo mono Oꞌmoso opoꞌni nolivo engikisi monoꞌ numunguꞌ makaꞌ dizaniꞌ.
ACT 3:9 Dizikevo aka nomono Oꞌmoso opoꞌni nolivo eveneꞌ mukiꞌ ningi
ACT 3:10 gateni laminekuꞌ mino monimuꞌ vokuꞌ vokuꞌ lo-ledo minaaꞌ ive ma neive li gilii lamineꞌ ingumuꞌ sizaga li gekeꞌ li-daniꞌ ve.
ACT 3:11 Aꞌmine di lamineꞌ i-dasive nene Petoloki Zohaneki engita vo giꞌmizo neivo eveneꞌ mukiꞌ ningi monoꞌ numuno neuꞌ heꞌ numuno naba gizikaniꞌ gulive Solomoniꞌ ve languꞌ nene lotiꞌ izi vi di geseꞌ igi veꞌine gahava nomivo minaniꞌ.
ACT 3:12 Petoloꞌ eveneꞌ ningo tiꞌ lo lo-ngimineꞌ: Isilaeleꞌ alevekizo, ve mene ningi sizaga goloso nilaniꞌ nene leliꞌ amuzotedunuꞌ nomive. Idoꞌ leliꞌ laminetemuꞌ ogo ma do lamineꞌ o-damusive. Nemuꞌ vonuꞌ vonuꞌ libilamilo.
ACT 3:13 Oꞌmoso adoꞌ avotemote Abalahamule Isakale Zakobole idoꞌ avotemote mukiꞌ gelekeleꞌ i-daaꞌ ave nene aza gipele Izesuꞌ gulive do hozi lo amuzoꞌve do sotoꞌ ogavo niningave. Aꞌmine ve Izesuꞌni nene lingine guvelesi ve Pilatoꞌ anauꞌ eleꞌmizi milikevo Pilatoꞌ aza iseve ize-delove lo nolivo lingine Pilatoꞌ veleloꞌ mehedine imi belelive laniꞌ.
ACT 3:14 Ee, aꞌmine lulo laminekisi ve lisiheꞌ lamineꞌ nene ezemuꞌ goseleꞌ lengebelavo oꞌve li-di eveneꞌ bele hilive ma gomukutiꞌ nalatoꞌ neivo lingine Pilatoꞌ iseve ize-davo aꞌmine eveneꞌ bele hilive lezesi minelone laniꞌ.
ACT 3:15 Neꞌmine igi minevoꞌ alevoꞌ neꞌmi melehine bili hilaniꞌ ve. Bili hilaniꞌza Oꞌmosoꞌmo hilingutiꞌ do ote-dineꞌ. Idoꞌ do ote-dineꞌ nene laꞌlisete ninge noneꞌ ma ve.
ACT 3:16 Izesuꞌ guliveloꞌ gele eleꞌvoleꞌ ogo minosa ningaaꞌ ave mene do lamineꞌ o-dusivo aza Izesuꞌnimuꞌ gele eleꞌvoleꞌ idiꞌmo lamineꞌ ineꞌ ve.
ACT 3:17 Zogone zuhokizo, linginesi gizebo vetinesi Izesuꞌni i-daniꞌ nene gili lamineꞌ ami ladani igi minaniꞌ nemuꞌ i-daniꞌ ne gele nouve.
ACT 3:18 Do luꞌ izelive lo Oꞌmosoꞌmo imiselelesa live mene aza mulumo gelo heleleseive lo Oꞌmosoꞌmo lineꞌ gamazi adoꞌ polohete mukilite li sotoꞌ ikeniꞌ gamazi nene neꞌmine ogo do gihile ize-dave.
ACT 3:19 Oꞌmosoꞌmo lihimetine gilite-lengedelingumuꞌ ve li lutine di velepeꞌ izi goloso nitetine hulilo.
ACT 3:20 Neꞌmine ikevo Oꞌmosoꞌmo hongu lo lamineꞌ minaaꞌ nene do sotoꞌ o-lengedo do lunguꞌ izelive lo imiselelove lo lo huko salani molo-lidive nene lengita imiseleleseive. Aꞌmine do luꞌ izelive nene Izesuꞌ ma ve.
ACT 3:21 Eze nene Okulumoliꞌmo asabuꞌ o-davo aꞌmida minelineꞌ ogave. Mino Oꞌmosoꞌmo initeꞌ mataꞌ do gosohoꞌ ilineꞌ gamene nene alitavo ma tineꞌ molo aloseive. Aꞌmine gamenemuꞌ nene Oꞌmosoꞌmo gamaziꞌve veꞌninguꞌ molavo gozopoꞌ akaꞌmilatiꞌ eiꞌ poloheteꞌve kekeize li minaniꞌ nete li sotoꞌ aniꞌ ve.
ACT 3:22 Idoꞌ Moseꞌ aza gamazi ma tiꞌ lo lineꞌ: Guvetinesi ve Oꞌmoso aza lengiꞌ zuhoutiꞌ ve ma eze gamazi lo sotoꞌ ilive polohete neniꞌ neꞌmine do ote-do hulo-lengedeleseive. Aꞌmine veliꞌmo gamazi lo-lengemelineꞌ nene gili dalo.
ACT 3:23 Idoꞌ aꞌmine poloheteꞌmo lilineꞌ gamaziloꞌ ve maliꞌmo gele damilineꞌ nene bilikevo Oꞌmosoꞌmi evenele zuhouꞌ minamo osuꞌ lilive lo lineꞌ.
ACT 3:24 Ee, gamazi li sotoꞌ igi minaniꞌ polohete adoꞌ Samuvelikisi idoꞌ ezelotiꞌ alingeꞌ milavesi mukiꞌ idise mene gamenemuꞌ li sotoꞌ aniꞌ.
ACT 3:25 Lingine polohete minaveti gizeꞌnidoꞌ lisi nimonaze. Oꞌmosoꞌmo avotingine gamazi lo huko lo-ngimineꞌ nene linginemukisi lineꞌ ma ve. Nemuꞌ neve Abalahamuꞌni tiꞌ lo lo-imineꞌ: Gaꞌvopilemoꞌ ma misubouꞌ zuho ato atoꞌ nene noꞌnohoꞌ ize-ngedeleseive lo lineꞌ.
ACT 3:26 Ganaꞌ Zuda ve lengikumuꞌ ve lo gipele do ote-do imiselavo lingine goloso niteꞌ diꞌmi vi minangutiꞌ nene lengiꞌ hamoꞌ hamoꞌ do tiꞌne-lengedo noꞌnohoꞌ ize-lingidineꞌ ve.
ACT 4:1 Petoloki Zohaneki gamazi neꞌmine li eveneꞌ li-ngimi nizasivo evenetoꞌ medeli mini Oꞌmoso initeꞌ lehizi-daaꞌ ave nabasi monoꞌ numuno nabauꞌ gizebo igaꞌ ave pilisi veti guveꞌinesi ve nabasi Sadukaioꞌ eveneꞌ masi engita igi heteli nizavo
ACT 4:2 eveneꞌ apizi ngimi Oꞌmosoꞌmo Izesuꞌni hilingutiꞌ do ote-dineꞌ neꞌmine ogo eveneꞌ masi do ote-ngedeleseive li lasingumuꞌ gili goloso igi
ACT 4:3 aꞌnidoꞌ diki tiꞌ li laniꞌ: Nivengaꞌ mo molako aizeꞌ goniꞌ o-ngedelone li naꞌnava numunguꞌ huli-ngidaniꞌ.
ACT 4:4 Neꞌmine i-ngidaniꞌza lasineꞌ gamazi gilave mukiꞌ nene gili eleꞌvoleꞌ aniꞌ. Idoꞌ neꞌmine ikevo gili eleꞌvoleꞌ ave nene imineꞌ milikevo nabaꞌine nene faef tauseni (5,000) ineꞌ.
ACT 4:5 Ingi goꞌ lavo Zuda veliti guveꞌinesi vesi monoꞌ gizebo vesi monoꞌ apizi ngimaaꞌ avesi Zelusalemi numuda mulise milaniꞌ.
ACT 4:6 Ee, evenetoꞌ medelo mino Oꞌmoso initeꞌ lehize-daaꞌ ive naba Anasiꞌ ve Kaiahaꞌ ve Zohaneꞌ ve Alekisadeꞌ ve idoꞌ evenetoꞌ medelo mino Oꞌmoso initeꞌ lehize-daaꞌ ive nabaꞌmi zuho mukikisi mulise mili mini
ACT 4:7 aposolo ngeleꞌmizi di igi vovoꞌninguꞌ di oti-ngidi tiꞌ li longoꞌ i-ngidaniꞌ: Ve aꞌneꞌminelitise lingine zahidatiꞌ amuzo di idoꞌ zahi guliveloꞌ me suno dasive.
ACT 4:8 Tiꞌ li longoꞌ i-ngidikevo Oꞌmosoꞌmi Sikalahuliꞌmo Petoloꞌ lulouꞌ gono davo aza tiꞌ lo lo-ngimineꞌ: Eveneꞌ guvetesi vekizo, idoꞌ gizebo vekizo,
ACT 4:9 ve gebili ma do lamineꞌ o-dusineꞌ mamuꞌ nene nadiꞌ igi di lamineꞌ i-dasive li longoꞌ nii-lidahe.
ACT 4:10 Linginesi Isilaeleꞌ aleve mukikisi gililizave lo lo-lengemeloze. Gililo. Nasalete ve Izesuꞌ Kilisitoꞌni langisetine lohotoꞌ zaloꞌ bilikevo Oꞌmosoꞌmo hilavetidatiꞌ do ote-dive neꞌmi amuzoꞌveloꞌ me ve nene lamineꞌ ogosa vetida ote neive.
ACT 4:11 Monoꞌ godolouꞌ gamazi ma tiꞌ li gizi nizaniꞌ ma neive: Numuno gizaaꞌ geheni lingine numuno gizaaꞌ ave nete ningi hulaniꞌ neꞌmo nene geheni mukiꞌ ngivileꞌ ogo numuno do amuzo molaaꞌ geheni loloꞌ ogo neive.
ACT 4:12 Aꞌmine geheni nene Izesuꞌ ve. Numudoꞌ namadoꞌ ve lelikutiꞌ do luꞌ izelive gohi ma nomive. Adoꞌ eze guliveloꞌ lamineꞌ olonive gohi ma nomive. Eiꞌ hamokovoꞌ nene neive lo lo-ngimineꞌ.
ACT 4:13 Neꞌmine lavo Petoloki Zohaneki ngehelele izamivo gamazi liviꞌ kiseliviꞌ igi lasineꞌ nemuꞌ ingine sukulu ma lamasive haza ve matise ve li gili sizaga li Izesukisi makaꞌ minasive matise lasi nave li gilaniꞌ.
ACT 4:14 Neꞌmine igi di lamineꞌ i-dasive nene engikisi minavo ningi ngelemilizaniꞌ gamazi viseꞌ igi hulaniꞌ.
ACT 4:15 Viseꞌ igi huli goniꞌ numungutiꞌ ngeleꞌmizi hetoꞌ igi engikovoꞌ tiꞌ li li gili ha gele aniꞌ:
ACT 4:16 Ve mene nadiꞌ o-ngedelone. Ingine atoꞌ suno dikesive li Zelusalemi aleve mukiꞌ nene gili osuꞌ likenako laza nadiꞌ ogo ataize lo-ngedelone. Ne nomive.
ACT 4:17 Nemuꞌ aꞌmine gamazi hutileꞌ ogavo eveneꞌ masi gilikelizave lii Izesuꞌ gulive iheꞌ gohi li sotoꞌ igi li-ngimamilizo lo gaꞌine dalone lisa
ACT 4:18 alizo li asi li-ngidaniꞌ. Asi li-ngidikevo ikesivo Izesuꞌnimuꞌ li-ngimi eze gulive gohi li sotoꞌ amilizo li oꞌve li amuzonga li li huki-ngidaniꞌ.
ACT 4:19 Li huki-ngidikevo Petoloki Zohaneki di velepeꞌ izi tiꞌ li li-ngimasineꞌ: Langisetine gili ningilevo. Lengiꞌ eveneliti gamazi gele do Oꞌmosoꞌmi gamazi gele hulokusivo Oꞌmosoꞌmo gilivo lamineꞌ ilihe.
ACT 4:20 Laꞌlisete ningo gilusineꞌ initeꞌ nene nanitekumuꞌ hiteko minelesive. Lo sotoꞌ sotoꞌ ogo minelesusive.
ACT 4:21 Neꞌmine likesivo gizebo ve nabaꞌ naba ingine ngehelele izineꞌ gani gohi li-ngimi sotoꞌ ineꞌ initekumuꞌ nene evenelite Oꞌmoso opoꞌni li minanako lilimikelizave li ngibililizaniꞌ akamuꞌ viseꞌ igi haza ngimiseli hulikevo vasineꞌ.
ACT 4:22 Golize initeꞌ di di lamineꞌ i-dasive nene kilisimasiꞌve foti (40) ivileꞌ ogo minineꞌ nenako nemuꞌ evenelite Oꞌmoso opoꞌni li minaniꞌ.
ACT 4:23 nGimiseli hulikevo limi ingine zuho nizada vi evenetoꞌ medeli mini Oꞌmoso initeꞌ lehize-daaꞌ ave nabasi monoꞌ gizebo ve nabalitesi li-ngidaniꞌ gamazi nene veteteꞌ igi li-ngimikesivo
ACT 4:24 gili luꞌine mili hamoꞌ igi Oꞌmosola li tiꞌ li laniꞌ: Vozeuꞌ ve Guvekasi ve, Okulumoꞌ misubo guvo noso idoꞌ aꞌminguꞌ minaniꞌ initeꞌ mukiꞌ do sotoꞌ aniveke,
ACT 4:25 Sikalahuka neꞌmo geze gelekeleꞌ gipa avoteho Davidiꞌni nene do ote-do gamazi veleuꞌ molavo tiꞌ lo lineꞌ: Eveneꞌ heta atoꞌ ve nene ngizeboloꞌ molavo gopo gani laniꞌ nene idoꞌ evenelite haza gopo igi gamazi goloso li hukaniꞌ nene nanimuꞌ neve.
ACT 4:26 Misubouꞌ misubouꞌ veti guveꞌinesi ve idoꞌ gizebo veꞌine ingine, Guvelesi vesi idoꞌ ve naba ve lo do kegese-divesi nene lovo o ngemelone li di nene igi di geseꞌ ave lo lineꞌ.
ACT 4:27 Ee, lulo laminekisi gelekeleꞌ gipa Izesuꞌni nene do luꞌ izelive ve lo eze do kegese-danive nene lovo imilisa Helodeꞌ ve Podioꞌ Pilatoꞌ ve heta atoꞌ vesi Isilaeleꞌ alevesi ingine lamineꞌ mene ebekuꞌ di geseꞌ igi
ACT 4:28 gasika gozopoꞌ gaka gelo amuzokaloꞌ molo gelo salani molo-daneꞌ initeꞌ nene i-daniꞌ ve.
ACT 4:29 Neꞌmine aniꞌza Guvetesi ve make, lehelele izineꞌ gamazi laniꞌ nemuꞌ gele mino gamazika livi kiseliviꞌ igi lilizave lo gelekeleꞌ veka leliꞌ nene vete do lapa nomineꞌ o-ledo
ACT 4:30 amuzoka lemanivo initeꞌ gizi dave do lamineꞌ o-ngedo eze monovo ningilizave lo gelekeleꞌ gipa lulo laminekisi Izesuꞌ guliveloꞌ atoꞌ suno do gono dalone lo nolune li laniꞌ.
ACT 4:31 Neꞌmine li Oꞌmosola likevo di geseꞌ igi minaniꞌ numuno nene gulukuluꞌ ogo moꞌmongoꞌ ogavo Oꞌmosoꞌmi Sikalahuꞌ neꞌmo luꞌninguꞌ gono do veꞌine do lapa nomineꞌ o-ngedavo Oꞌmosoꞌmi gamazi liviꞌ kiseliviꞌ igi golise gilami li-ngimikaꞌ iꞌmi minaniꞌ ve.
ACT 4:32 Idoꞌ gili eleꞌvoleꞌ igi minaniꞌ aleve ingine luꞌine gaꞌine mili hamoꞌ igi initeꞌ mataꞌine di minaniꞌ nene geiꞌ initeka ve neniꞌ initeꞌne ve lami mukitoꞌ initeꞌine di minaniꞌ.
ACT 4:33 Neꞌmine igi nizavo aposolo ingine Guvelesi ve Izesuꞌ hilingutiꞌ otineꞌ gamazi nene amuzo mili li sotoꞌ i ngimiꞌ ngimiꞌ igi minikevo Oꞌmosoꞌmo hize eleꞌ o-ngedavo evenelite ingine mukikumuꞌ ningavo lamineꞌ ineꞌ.
ACT 4:34 Numuno nehe misubo nehe initeꞌ meꞌninge nete meniꞌve di di vi aposolo ngimikevo eveneꞌ linge ma initeꞌ mamuꞌ viseꞌ ikevo ma viseꞌ aniꞌ votigile ngimaaꞌ avo engikutiꞌ ve maliꞌmosi initekumuꞌ ma viseꞌ amaaꞌ ineꞌ ve.
ACT 4:36 Idoꞌ neꞌmine suno nene Zoseheꞌ nesi daniꞌ ve. Aꞌmine Zoseheꞌ nene aposololite gulive gohi ma Banabasiꞌ ve li mili-dave Leviꞌ aꞌvopilemoꞌ zuho monoꞌ gono daaꞌ aveutiꞌ minive adoꞌ Kipilo ailaniuꞌ sotoꞌ ivemuꞌ noluve. Idoꞌ aꞌmine gulive Banabasiꞌ neꞌmi monovo nene do nguꞌ izaaꞌ ive ve lo neive.
ACT 4:37 Aꞌmine ve aza ebeꞌ za zuhoꞌve ma do minineꞌ nene meni hizikevo moni do aposolo do vo ngimineꞌ ve.
ACT 5:1 Banabasiꞌ neꞌmine ineꞌza ve ma gulive Ananiakisi elenaho Sahilakisi angiseꞌine gamazi li gili ebeꞌ za zuhoꞌine eveneꞌ ma ngimi aꞌmidotiꞌ moni dasineꞌ nene lingela di halekisa lingela Ananiaꞌ do vo aposolo ngimineꞌ.
ACT 5:3 nGemavo Petoloꞌ tiꞌ lo lo-imineꞌ: Ananiazo. Gaza Sataniꞌmo lemo lukauꞌ gono davo nanimuꞌ Oꞌmosoꞌmi Sikalahuꞌ soza gani lo-emo misuboꞌmi meni lingela do halekekane.
ACT 5:4 Misuboka geita minelinako gasika gelo ngemaineꞌ ma ve. Idoꞌ ngemo meni daineꞌ nene geiꞌ monika neineꞌza laꞌlise vokuꞌ lo-gedamune. Nedunuꞌ do initeꞌ mataka dalo ma dalinako geiꞌ lukaꞌmo goka izavo nanitekumuꞌ neꞌmine ane. Eveneꞌ soza lo-limuhe lo Oꞌmoso soza lo-emo golo izane.
ACT 5:5 Tiꞌ lo nolo-imivo Ananiaꞌ nogelo nogelo lemo pouꞌ lo ongo hilineꞌ. Helavo ningi gilave nene ngehelele naba izineꞌ.
ACT 5:6 Izipe gosoꞌve minaniꞌ nete gonoso nene lavolavotunuꞌ asabuꞌ izi di vi galese izi-daniꞌ ve.
ACT 5:7 Galese izi-dikevo gamene tili aua neꞌmine ngomo mine haꞌna noogo elenaho aꞌmine gamazi gelamo vanaho ha neihe lo ogo hetelineꞌ.
ACT 5:8 Hetelavo Petoloꞌ tiꞌ lo longoꞌ o-do lineꞌ: Olo. Misubolotiꞌ meniꞌve mo aꞌnevoꞌ dasineꞌ nehe. Neꞌmine lavo aza tiꞌ lo lineꞌ: Oo. Mo aꞌnevoꞌ ve.
ACT 5:9 Lavo Petoloꞌ tiꞌ lo lo-imineꞌ: Lingine nanitekumuꞌ gamazi li halekiki Guvelesi veꞌmi Sikalahuꞌ golo izasive. Vangahine di galese izi-dave ma nesu gateda lidi lidi li niigi lanako gezesi aꞌmine aꞌmine igi di vi galese izi-gidilisave lo nolo-imivo
ACT 5:10 nogelo galinali lo gizeneuꞌ lemo pouꞌ lo ongo hilineꞌ. Helavo gosoꞌve nete dizi gonoso ne ningi di vi vanahine galese izi-dadoꞌ galese izi-daniꞌ ve.
ACT 5:11 Galese izi-dikevo noso hilave mukikisi eveneꞌ linge ma aꞌmine gamazi gilave mukikisi nene ngehelele naba izivo minaniꞌ ve.
ACT 5:12 Aposolo ingine ato atoꞌ suno di eveneta initeꞌ ato atoꞌ mukiꞌ di sotoꞌ igaꞌ aniꞌ. Idoꞌ Izesuꞌnimuꞌ gili eleꞌvoleꞌ igaꞌ ave mukiꞌ luꞌine di hamoꞌ igi mini monoꞌ numuno nabaꞌmi heꞌ numuno ma gizikaniꞌ ma gulive Solomoniꞌ ve lo minineꞌ neuꞌ nene di geseꞌ igi minaaꞌ aniꞌ.
ACT 5:13 Nizavo eveneꞌ heta minavete engikumuꞌ sizaga li di naba i-ngidaniꞌza ngehelele izavo vi engita giꞌmizamaniꞌ.
ACT 5:14 Vi giꞌmizamaniꞌza veneꞌ vemohoꞌ mukiꞌ vanu hizi igi gili eleꞌvoleꞌ igi Guvelesi vela igi imineꞌ mili giꞌmizaaꞌ aniꞌ.
ACT 5:15 Neꞌmine ikevo gebili nabili initeꞌ gizi davesi ngeleꞌmizi vi Petoloꞌ ogo novivo mumunoꞌmo nesi linge ma avutoꞌ ngebelavo lamineꞌ ilizahe li holomosi ingaaꞌ aniꞌ initekisi di vi akaloꞌ huli ngimikaꞌ aniꞌ.
ACT 5:16 Zelusalemi ebeꞌ gahevela inganiꞌ aleve mukikisi igi engita initeꞌ gizi daniꞌ alevesi idoꞌ luꞌninguꞌ sikalahuꞌ golosoliꞌmo mino do goloso o-ngedo minivesi ngeleꞌmizi ikevo di lamineꞌ igi osuꞌ li-ngidaniꞌ ve.
ACT 5:17 Neꞌmine igi nizavo evenetoꞌ medelo mino Oꞌmoso initeꞌ lehize-daaꞌ ive nabasi ezela igi giꞌmizave mukiꞌ adoꞌ Sadukaioꞌ aleve aꞌmidoꞌ mulise milaaꞌ ave engikutiꞌ minikevo ngizeboloꞌ goloso molavo
ACT 5:18 aposolo aꞌnidoꞌ di giliꞌ li ngeleꞌmizi di vi eveneꞌ mukiliti nalaꞌ numuno gizikanguꞌ huli-ngidaniꞌ.
ACT 5:19 Huli-ngidikevo nizavo holukaꞌ litiꞌmusouꞌ Guvelesi veꞌmi angeloꞌ maliꞌmo ogo nalaꞌ numungutiꞌ akahe siꞌze-ngedo ngeleꞌmize hetoꞌ ogo tiꞌ lo lineꞌ:
ACT 5:20 Vi monoꞌ numuno nabauꞌ oti mini Oꞌmosoꞌmo do luꞌ izavo minevoꞌ minevoꞌ ogo minaaꞌ gosoholiꞌmi monovomuꞌ gamazi mukiꞌ nene li sotoꞌ igi eveneꞌ li-ngimi minilo.
ACT 5:21 Neꞌmine lavo gili goꞌ lolosa neivo monoꞌ numuno nabauꞌ dizi aꞌmine gamazi li sotoꞌ i-ngimi minaniꞌ. Nizavo evenetoꞌ medelo mino Oꞌmoso initeꞌ lehize-daaꞌ ive nabasi ezela giꞌmizi minavesi di nubo igi engiꞌ Isilaeleꞌ aleveti gizebo veti kanisole nabaꞌine vise li di mulise mili-ngidi aꞌmine ve ngeleꞌmizi alizave li pilisi ve ma nalaꞌ numuda ngimiselaniꞌ.
ACT 5:22 nGimiselikevo vi ninganiꞌza nalaꞌ numunguꞌ nene nizamavo viseꞌ igi di tibizi vi tiꞌ li li-ngimaniꞌ:
ACT 5:23 Vuneꞌza nalaꞌ numunoꞌmi akahe nene gizi giliꞌ likevo gatedoꞌ gizebo igaꞌ ave nene ha oti nizavo ninguneꞌza akahe siꞌzuneꞌ nene eveneꞌ hamokisi ma nizamavo ninguneꞌ ve.
ACT 5:24 Likevo monoꞌ numuno nabauꞌ gizebo igaꞌ ave adoꞌ pilisi veti guveꞌinesi ve nabasi evenetoꞌ medeli mini Oꞌmoso initeꞌ lehizi-daaꞌ ave nabasi gili aposolo nadiꞌ ahe li gopo gaꞌine gili alingeꞌ nene initeꞌ ma nadiꞌ ogo sotoꞌ ilihe li laniꞌ.
ACT 5:25 Neꞌmine li nizavo ve maliꞌmo ogo hetelo tiꞌ lo lo-ngimineꞌ: Mene gililo. Lingine nalaꞌ numunguꞌ huli-ngidave nene monoꞌ numuno nabauꞌ mini eveneꞌ monoꞌ li-ngimi nizave.
ACT 5:26 Lavo pilisi veti gizebo veꞌine aza pilisi ve ma ngeleꞌmizo vo aposolo ngeleꞌmizo aniꞌ. Aꞌmine pilisi ve nete ngeleꞌmizi aniꞌza evenelite gehenidunuꞌ libilikelizave li golise gili ngibilami zou li ngeleꞌmizi aniꞌ ve.
ACT 5:27 nGeleꞌmizi kanisoleti vovoꞌninguꞌ huli-ngidikevo nizavo evenetoꞌ medelo mino Oꞌmoso initeꞌ lehize-daaꞌ ive naba neꞌmo tiꞌ lo longoꞌ o-ngidineꞌ:
ACT 5:28 Laza aꞌmine veꞌmi gulive igi li-ngimiꞌ ngimiꞌ amilo lo amuzo molo lo-lengemamuneꞌ nehe. Olo. Lingine peleseveꞌ izi aꞌmine gamazi nene Zelusalemi numunguꞌ li hutileꞌ ikevo buu lineꞌ ma ve. Neꞌmine igi aꞌmine ve bilaveliti lihimeꞌine nene leliꞌ okodela dizelive lisa nahe.
ACT 5:29 Lavo Petolole aposolo linge masi di velepeꞌ izi gamazi tiꞌ li li-imaniꞌ: Eveneliti gamazi gele do Oꞌmosoꞌmi gamazi gele hulaaꞌ ne ma nomive.
ACT 5:30 Lingine Izesuꞌni lohotoꞌ zaloꞌ bili hilikevo avotemoteliti Oꞌmosoꞌine neꞌmo do ote-dineꞌ ve.
ACT 5:31 Otavo Isilaeleꞌ aleve lingine lutine di velepeꞌ izikevo lihimetine hulo-lengedelive lo Guvetesi ve ve lo idoꞌ do luꞌ izaaꞌ ive ve lo Oꞌmosoꞌmo eiꞌ amuzodunuꞌ do dize-davo neive.
ACT 5:32 Idoꞌ aꞌme luvoniꞌ initeꞌ nene ningo gelosa aꞌminemuꞌ lo sotoꞌ o lengemelonive nene leliꞌ ne none. Idoꞌ lelikovoꞌ nomive. Oꞌmosoꞌmi Sikalahuꞌve nesi nene lo sotoꞌ ogaꞌ neive. Aꞌmine Sikalahuꞌve nene Oꞌmosoꞌmo eze gamaziloꞌ gele daaꞌ unive nene leme neineꞌ ma neive lo lo-ngimineꞌ.
ACT 5:33 Tiꞌ lo lo-ngemavo ngizeboloꞌ goloso molavo mo ngebelelone li gilaniꞌ.
ACT 5:34 nGebelelone li gilaniꞌza Zuda veliti kanisole mulise nabautiꞌ ve ma Halisaioꞌ ve aza Moseꞌ louꞌ gamazi gize ngimineꞌ nene apize ngemaaꞌ ivo eveneꞌ mukiꞌ ezemuꞌ gilavo dize minive neꞌmi gulive Gamalieleꞌ neꞌmo oto aposolo vi heta igi gamene ngomo minilizave lavo vi minikevo
ACT 5:35 kanisole alevemuꞌ tiꞌ lo lo-ngimineꞌ: Isilaeleꞌ aleve neze zuhokizo, lingine aꞌmine ve nadiꞌ i-ngidilizahe. Gatine gili nge li minisa i-ngidilo.
ACT 5:36 Gamene gozopoꞌ akaꞌmila ve ma gulive Teudaꞌ aza oto ve guveꞌnesi ve naba nouve lavo eveneꞌ fo hadeti (400) neꞌmine ezela giꞌmizaniꞌza alingeꞌ ngamani nete meꞌnibine bili hilikevo ezela giꞌmizave nene hutileꞌ igi vi haha ikevo aꞌmine initeꞌ osuꞌ lineꞌ.
ACT 5:37 Idoꞌ alingeꞌ gulivete gizaniꞌ gamenela nGalilaia ve ma gulive Zudaꞌ ve lo minive neꞌmo oto eveneꞌ linge gaꞌine do lovo do sotoꞌ ogo ngamani ngebelelone lavo gili imikevo lovo hizanguꞌ nene Zudaꞌni bili hilikevo eze aleve mukiꞌ vi hutileꞌ igi vi halekaniꞌ.
ACT 5:38 Nemuꞌ ne mene vemuꞌ lo-lengemeloze. Gililo. Lingine huli-ngimikavo haza minilizave. Ingine di sotoꞌ aniꞌ initeꞌ nene haza evenelite gaꞌine gili gono di di sotoꞌ aniꞌ nolineꞌ nene mo gopo ogo haha oloseive.
ACT 5:39 Idoꞌ Oꞌmosoꞌmo hize eleꞌ o-ngedo minivo di sotoꞌ aniꞌ nolineꞌ nene lingine Oꞌmoso ivileꞌ igi ingine gono nidangumuꞌ nene ngeli oꞌve li li-ngidilizahe. Oꞌmososi lovo i imi minikelizave lo nemuꞌ nolo-lingimuve lo lo-ngimineꞌ. Lo-ngemavo ingine gili di
ACT 5:40 aposolo gohi ngeleꞌmizi numunguko dizi lobuno gavosodunuꞌ ngibiliviꞌ ngibiliviꞌ igi Izesuꞌ gulive igi eveneꞌ li-ngimamilizave li li huki-ngidi ngimiseli hulaniꞌ.
ACT 5:41 Idoꞌ ngimiselikevo aꞌmine kanisole alevesi minadotiꞌ huli-ngidi ngolize iziꞌmi limi vaniꞌ. Idoꞌ ngolize iziꞌmi limi vaniꞌ nene ingine Oꞌmosoꞌmo lelikumuꞌ gelavo lamineꞌ ogavo ingine Izesuꞌ gulive di minangumuꞌ ve li biluvalite diꞌmi limi-ngidi ngibililizaniꞌ nene monokuꞌ amuzoꞌine nene aꞌmine geni ha gihilizadoꞌ lisiheꞌ o neive lo gilineꞌ noloseive li ngolize iziꞌmi vaniꞌ ve.
ACT 5:42 Neꞌmine ogavo gamene gamene monoꞌ numuno nabaukisi numudasi Oꞌmosoꞌmo do luꞌ izelive lo imiselelesa live nene Izesuꞌ minineꞌ nenako nemuꞌ gamazi lamineꞌ nene di halekami li sotoꞌ igi apizi ngimiꞌ ngimikovoꞌ igi minaniꞌ ve.
ACT 6:1 Aꞌmine gameneuꞌ nene Izesuꞌ evenele zuho mo imineꞌ miliꞌmi nivavo engikutiꞌ eveneꞌ ma adoꞌ nGiliki eveneliti gamaziꞌningutiꞌ laaꞌ ave nete tiꞌ li li muluꞌninguꞌ goloso gilaniꞌ. Gamene gamene nosoꞌ niteꞌ izeꞌ mili ngimaaꞌ anguꞌ leze muliseutiꞌ minaniꞌ getoꞌ veneꞌ ne ningi huli-ngidi nosoꞌ niteꞌ mili-ngidisaꞌmave li muluꞌninguꞌ goloso gili Zuda veti gamaziꞌningutiꞌ laaꞌ ave ngelemilisa laniꞌ.
ACT 6:2 Neꞌmine ikevo aposolo tuvelu ingine Izesuꞌ evenele zuho mukiꞌ vise li di mulise mili-ngidi tiꞌ li li-ngimaniꞌ: Laza nosoꞌ niteꞌ izeꞌ molo ngemo minelesa Oꞌmosoꞌmi gamazi lo-ngemaaꞌ nouneꞌ nene huloloneꞌ ne edamoloseize.
ACT 6:3 Leze zuhokizo, lingine lengikutiꞌ eveneꞌ seveni Oꞌmosoꞌmi Sikalahuꞌ gili imi nizavo luꞌninguꞌ gono daaꞌ neive idoꞌ gamazi nosoꞌvesi laminekovoꞌ laaꞌ ave eveneꞌ ningi gamangi mili-ngidaaꞌ ave di sotoꞌ ikevo laza gono mene dalizave lo ngeleꞌmize molalone.
ACT 6:4 Idoꞌ neꞌmine ogo laꞌlise Oꞌmoso opoꞌni lo idoꞌ eveneꞌ Oꞌmosoꞌmi gamazi lo-ngemo lute hamoꞌ minavo amuzo molo minelone.
ACT 6:5 Likevo Izesuꞌ evenele zuho mukiꞌ gamazi lamineꞌ ve li Setehanoꞌ nene Oꞌmosola amuzo molo gele emo minavo Sikalahuꞌveꞌmo lulouꞌ vauve elo gono davo minive nesi idoꞌ Hilipokisi idoꞌ Polokolokisi idoꞌ Nikanolokisi idoꞌ Timonakisi idoꞌ Palamenakisi idoꞌ Nikolaoꞌ adoꞌ Adiokia ebekutiꞌ monokumuꞌ Zuda vela giꞌmizive nesi nene di kegesi-ngidi
ACT 6:6 aposolo nizada ngeleꞌmizi milikevo ingine aꞌmine gono ngimilisa Oꞌmosola li aꞌine godoꞌnidoꞌ hitaniꞌ ve.
ACT 6:7 Neꞌmine ikevo Oꞌmosoꞌmi gamazi hutileꞌ ogo novivo Zelusalemi ebeta Izesuꞌ evenele zuho vanu hizi imineꞌ mili mukiꞌ goloso sotoꞌ navo evenetoꞌ medeli mini Oꞌmoso initeꞌ lehizi-daaꞌ ave linge mukiꞌ ma Izesuꞌni gili imi gamaziꞌve gili daniꞌ ve.
ACT 6:8 Idoꞌ Oꞌmosoꞌmo Setehanoꞌni ninge lamineꞌ ogo hize eleꞌ o-do amuzo mukiꞌ emavo Oꞌmosoꞌmi amuzo ningilizave lo eveneta ato atoꞌ suno doo do sotoꞌ ogo minineꞌ.
ACT 6:9 Neꞌmine ineꞌza eveneꞌ malite oti gamazi lidoꞌ nene eꞌmenga li-imaniꞌ. Ingine Zuda veti monoꞌ mulise hamokutiꞌ minaniꞌ ve. Adoꞌ goboni gelekeleꞌ ve minangutiꞌ kuluhizi-ngidikevo minaveliti muliseꞌine ve langutiꞌ nene minaniꞌ ve. Engikutiꞌ ve ma Kilene misuboutiꞌ ve minavo idoꞌ ve ma Alekisadalia ebekutiꞌ ve minavo ve ma Kilikia misuboutiꞌ ve minavo ve ma Asia misuboutiꞌ ve minavo minaniꞌ ve. Ingine oti Setehanoꞌ gamazi lidoꞌ nene eꞌmenga li-imaniꞌza
ACT 6:10 Sikalahuꞌ neꞌmo hize eleꞌ o-davo Setehanoꞌ gamazi laminekovoꞌ lavo ingine eze gamazi ngeli ivileꞌ amilizaniꞌ ogavo
ACT 6:11 eveneꞌ ma di ezemuꞌ soza gamazi li-ngimilizaniꞌ nene sunoꞌ li-ngimisa di oti-ngidikevo ingine me ve nene Moseꞌnisi Oꞌmososi dovo ledevoꞌ ogo gamazi nolivo gelekune li laniꞌ.
ACT 6:12 Likevo ingine haza vesi gizebo veꞌinesi monoꞌ apizi ngimaaꞌ avesi goꞌine izi di upuhoꞌ i-ngidikevo liteꞌ mateꞌ li vi analoꞌ di engiꞌ kanisole aleve nabala gonitoꞌ eleꞌmizi vaniꞌ.
ACT 6:13 Eleꞌmizi vikevo sakupo gamazi laaꞌ ave soza li tiꞌ li laniꞌ: Me ve nene monoꞌ ebeꞌ memukisi Oꞌmosoꞌmo lavo Moseꞌ lo huko-lidineꞌ gamazi mamukisi dovo ledevoꞌ ogo lo minaaꞌ neive.
ACT 6:14 Aza tiꞌ lo gamazi nolivo gele nouneꞌ ma ve. Nasalete ve Izesuꞌ aza ebeꞌ mene do goloso ogo Moseꞌ gize limineꞌ gamaziloꞌ ogo molo ogaꞌ uneꞌ monovo nene do gopoꞌ napaꞌ oloseive lineꞌ ve li laniꞌ.
ACT 6:15 Likevo kanisole numunguꞌ minave mukiꞌ nete vonuꞌ bili ninganiꞌ nene golo veleloꞌ ne angeloliꞌmi golo vele gele neivo ninganiꞌ ve.
ACT 7:1 Neꞌmine ogavo evenetoꞌ medelo mino Oꞌmoso initeꞌ lehize-daaꞌ ive nabaꞌmo tiꞌ lo longoꞌ o-dineꞌ: Mene gamazi nilaniꞌ nene mo lamineꞌ nehe.
ACT 7:2 Lavo Setehanoꞌ tiꞌ lo lo-imineꞌ: Lingine gonoꞌnemote idoꞌ neze zuho gamazi lokuvo gililo. Avoteho Abalahamuꞌ olihe Halanaꞌ misubouko vo minamo Mesopotamia misubouko ha neivo labanaꞌvesi minaaꞌ neineꞌ Oꞌmoso neꞌmo sotoꞌ omo
ACT 7:3 tiꞌ lo lo-imineꞌ: Geze misubokasi idoꞌ geze zuhosi nene hulo-ngedo misubo ma gelebizeloniꞌ neloꞌ nene vo mineline.
ACT 7:4 Lavo gelo aꞌmine Kaladiaꞌ misubo hulo Halanaꞌ misubouꞌ ne vo minineꞌ. Aꞌmida mino meleho helavo Abalahamuꞌ aza Oꞌmosoꞌmo lavo leliꞌ noneꞌ misubouꞌ meuko nene aniꞌ ve.
ACT 7:5 Ogavo do gotoꞌ misubo loloꞌ ogo minamineꞌ. Oꞌmosoꞌmo misubo ngomo ha nitekisi ma emamineꞌ. Ee, misubo ma emamineꞌza azasi idoꞌ aꞌvopilemoꞌ zuhosi di minilizaniꞌ misubo ve lo salani gamazi lo-emo aꞌmine misubo lengemelove lo lo huko lo-dineꞌ ve. Idoꞌ aꞌmine gaꞌvopilemoꞌ zuhosi lengemelove lo lineꞌ gameneuꞌ nene Abalahamuꞌ aza izipahala ma nomivo minineꞌ ve.
ACT 7:6 Idoꞌ aꞌmine gamazi lo gamazi gohi ma tiꞌ lo lo-imineꞌ: Gaꞌvopilemoꞌ vi misubo mala minikevo aꞌmida goboni izipe liliꞌ i-ngidi mulumo gono ngimi di goloso i-ngidi nizavo kilisimasi fo hadeti (400) ogo voloseive lineꞌ.
ACT 7:7 Neꞌmine lo gohi imineꞌ molo tiꞌ lo lineꞌ: Kilisimasi neꞌmine ogo vavo aꞌmine goboni izipe liliꞌ i-ngidiliza aleve nene naꞌniseꞌne goniꞌ o-ngedelesuve. Neꞌmine okuvo ngimiselikevo gaꞌvopilemoꞌ me misubouko di tineꞌ mili igi nopoꞌni li gelekeleꞌ i-nidi minilizave lo lo-imineꞌ.
ACT 7:8 Idoꞌ Oꞌmosoꞌmo salani molo-ngidineꞌ initeꞌ dalizave eze zuhoutiꞌ minilizangumuꞌ nene Abalahamukisi idoꞌ eiꞌ aꞌvopilemoꞌ zuhosi engiꞌ gipeꞌine okoꞌine lolovo huki huli-ngidi Oꞌmosoꞌmi noso mili-ngidilizave lo lo huko lo-dineꞌ ve. Idoꞌ lo huko-davo gipele Isakaꞌ sotoꞌ idotiꞌ nene gamene seveni ogo vavo eiti maloꞌ ne Oꞌmosoꞌmi noso molo-dineꞌ. Molo-davo Isakaꞌ aza mino naba ogo Zakoboꞌni gidineꞌ. Idoꞌ Zakoboꞌ neꞌmo avotemotine tuvelu ne gidineꞌ ve.
ACT 7:9 Neꞌmine ogavo aꞌmine avotemote ingine nakuꞌine ma Zoseheꞌnimuꞌ livileꞌ ogalinako li lukehe bili eveneꞌ ma ngimisa eiꞌ okoꞌnolotiꞌ meni daniꞌ. Dikevo aꞌmine ve nete eleꞌmizi Aigita misubosuko vaniꞌza Oꞌmosoꞌmo Zoseheꞌnisi mininako neꞌmo
ACT 7:10 mulumo alumo niteꞌ mukiꞌ sotoꞌ o-dinguꞌ nene gizebo lamineꞌ o-davo goloso amo minineꞌ. Neꞌmine ogo minavo Aigita misubouꞌ veti guveꞌinesi ve naba Halaoꞌ aza Zoseheꞌni ningineꞌ gamazi nosoꞌvesivoꞌ linako ninge lamineꞌ o-do ne eze zuho idoꞌ Aigita aleve mukikisi do nubuho ogo mukiliti guveꞌinesi ve minelive lo eleꞌmize molaniꞌ.
ACT 7:11 Eleꞌmize molavo neivo Aigita misuboukisi Kanaha misuboukisi gaꞌna naba sotoꞌ ogavo eveneꞌ mukiꞌ gaꞌnaliꞌmo goloso aniꞌ. Goloso ikevo avotemotesi nosoꞌ nitekumuꞌ viseꞌ aniꞌ.
ACT 7:12 Neꞌmine igi mini alingeꞌ eveneꞌ malite Aigita misubouꞌ nosoꞌ niteꞌ neive likevo Zakoboꞌ gelo ganaꞌ apiꞌ ogo avotemotine ngimiselavo vi tineꞌ mili aniꞌ.
ACT 7:13 Idoꞌ gohi Aigita misubola vaniꞌ gameneuꞌ nene ingine Zoseheꞌnimuꞌ Aigita ve nehe li ha gili nizavo aza nakunotine Zoseheꞌ ma ne nouve lo uvolomotine lo-ngemo Halaoꞌ neida ngeleꞌmizo vavo engikumuꞌ nene Zoseheꞌ zuho ve lo Halaoꞌ ningo gilineꞌ.
ACT 7:14 Neꞌmine ogavo Zoseheꞌ melehine Zakoboꞌnisi eze zuho mukikisi elese molo ngemavo eveneꞌ sevedi faef (75) neꞌmine Zakobokisi Aigita misubouko vi minaniꞌ.
ACT 7:15 Vi mini Zakoboꞌ helavo idoꞌ leliꞌ avotemote minave eiꞌ gipele zuho nesi hilikaꞌ hilikaꞌ igi osuꞌ laniꞌ.
ACT 7:16 Hilikevo engiꞌ izipahaꞌine zuho nete gonosoꞌine nene di vi Sekemi numuda galese izi-ngidaniꞌ. Adoꞌ Abalahamuꞌ aza Hamolaꞌ zuho meni ngemo gonoso ebeꞌ meni hizinguꞌ nene galese izi-ngidaniꞌ ve.
ACT 7:17 Neꞌmine lo Setehanoꞌ imineꞌ molo tiꞌ lo lo-ngimineꞌ: Neꞌmine ikevo mino Oꞌmosoꞌmo Abalahamuꞌni lo huko-dineꞌ gamazi gihile izelineꞌ gamene avitoꞌ ogavo leze avotemote zuho Aigita misubouꞌ mini vanu hizi mine hutileꞌ aniꞌ.
ACT 7:18 Aꞌmine gamene neuꞌ nene guveꞌinesi ve naba gohi atoꞌ ma Zoseheꞌnimuꞌ gelamive Aigita misuboko sotoꞌ ogo minineꞌ.
ACT 7:19 Aꞌmine Aigita ve aza leze zuho goꞌine izo do goloso o-ngedo hililizave lo izipe namuno heta di huliꞌ hulikovoꞌ i-ngidilo lavo di huliꞌ hulikovoꞌ i-ngidaaꞌ avo hilaniꞌ.
ACT 7:20 Aꞌmine gameneuꞌ nene Moseꞌ sotoꞌ ineꞌ. Oꞌmosoꞌmo ningineꞌ nene nosoꞌvesi izipe lamineꞌ minineꞌ. Minavo melehi numunguꞌ gizebo i-di nizavo
ACT 7:21 ikeꞌni seto hamoꞌ vavo di heta huli-dikevo Halaoꞌ aluvoꞌmo ningo do tiꞌ ogo eiꞌ gidineꞌ gelavo gizebo o-dineꞌ.
ACT 7:22 Gizebo o-do neivo Aigita aleve ningi gilaniꞌ initeꞌ mukikumuꞌ apizi li-imikevo gele osuꞌ lo amuzo ve loloꞌ ogo mino gamazi lineꞌ nehe idoꞌ initeꞌ ogo molo ineꞌ nehe mukiꞌ initeꞌ nene amuzovoꞌ molo minineꞌ ve.
ACT 7:23 Neꞌmine ogo mino kilisimasiꞌve nene foti (40) ogo vavo eze zuho Isilaeleꞌ aleve vo ninge-ngedelove lo gelo lulo otavo vineꞌ.
ACT 7:24 Vo ninge neivo Aigita ve maliꞌmo Isilaeleꞌ ve ma do goloso o-do neivo ningo eze zuho alete molo-do Aigita veꞌmo monovo do goloso o-didoꞌ nene golo hizo aꞌmine Aigita ve nene bele hilineꞌ.
ACT 7:25 Idoꞌ Moseꞌ aza aꞌmine Aigita ve bele hilineꞌ nene aza neꞌmine okuvo neze zuho do nguꞌ izelove lo Oꞌmosoꞌmo nimiselave li ningi gililizave lo gelo bele hilineꞌza ingine neꞌmine li ningi gilamaniꞌ ve.
ACT 7:26 Ongo goꞌ lavo vo Isilaeleꞌ ve sitaꞌ ma lovo nihizasivo ningo kuku holo-ngedo do hongu lo-ngedelesa tiꞌ lo lineꞌ: Velizo, hamoꞌ zuho nizasineꞌ nenako ge nebele ne gebele nanimuꞌ nilasive lo lineꞌza
ACT 7:27 eze zuho do goloso o-do minive neꞌmo Moseꞌni vasa ize-do tiꞌ lo lineꞌ: Geze nene lelitoꞌ gizebo iline lo zaho do ote-gedavo guvekasi ve loloꞌ ogosa leze gonitoꞌ leleꞌmize nomolane.
ACT 7:28 Gaza neꞌmine ogo aizeꞌ Aigita ve ma bele helaineꞌ maꞌmino nezesi aꞌmineꞌmino nebelelesa nolabe. Olo.
ACT 7:29 Neꞌmine lavo Moseꞌ aza gelo golise Midiani misubouꞌ vo venenga ve gelo minineꞌ. Mino veneꞌ do gipele sitaꞌ gidineꞌ ve.
ACT 7:30 Mino kilisimasi iheꞌ foti (40) ogo vavo vo Sinae golo neꞌmi gizeneuꞌ ebeꞌ hadiveloꞌ neivo za liꞌnibe hamoꞌ ma miningutiꞌ oloꞌ gulumo ogo neivo aꞌmineꞌmi lulouꞌ angeloꞌ ma sotoꞌ ogo neivo ningineꞌ.
ACT 7:31 Ningo aꞌmine initekumuꞌ naniteꞌ sotoꞌ neive lo gelo ninge veveselove lo avitoꞌ vineꞌ. Avitoꞌ vavo aꞌmine zautiꞌ Guvelesi veꞌmi nolo sotoꞌ ogo tiꞌ lo lineꞌ:
ACT 7:32 Naza avamote nopoꞌni li gelekeleꞌ i-nidaaꞌ aniꞌ Oꞌmosoꞌine nene nouve. Adoꞌ Abalahamule Isakale Zakobole engiꞌ Oꞌmosoꞌine nene nouve. Neꞌmine lavo Moseꞌ aza gelo luvo luvo izo ningelesa ehelele izineꞌ.
ACT 7:33 Neꞌmine ogo neivo Guvelesi veꞌmo tiꞌ lo lo-imineꞌ: Nolisaneꞌ misubo nene do kegeso neniꞌ ve lokuvo neineꞌ nenaze. Gizengaloꞌ niteꞌ nene kuluhizo hulozo.
ACT 7:34 Neze eveneꞌne zuho Aigita misubouꞌ nizavo Aigita aleve nete goboni malaꞌ malaꞌ i-ngidi minikevo goloso igi minaniꞌ nene ningo agae agae li minaniꞌ nene gaꞌneloꞌ ogavo giluvoniꞌ ve. Nemuꞌ do nguꞌ izelove losa lemekuve. Idise geiꞌ nene Aigita misubouꞌ nogimiseluze. Vozo lo lo-imineꞌ ve.
ACT 7:35 Ee, aꞌmine ve Moseꞌ nene ingine geze zaho do ote-gedavo guvekasi ve loloꞌ ogosa leze gonitoꞌ leleꞌmize nomolane li vasa izi-dave ve. Idoꞌ aꞌmine ve Moseꞌni Oꞌmosoꞌmo aꞌmine Isilaeleꞌ aleveti guveꞌinesi ve idoꞌ do nguꞌ izelive loloꞌ ogo minelive lo engita imiselineꞌ. Adoꞌ angeloꞌ ma Oꞌmosoloꞌ medelo mino za ngomouꞌ oloꞌ gulumo o mininguꞌ sotoꞌ o-dineꞌ neꞌmo nene imiselineꞌ ve.
ACT 7:36 Imiselavo vo Isilaeleꞌ aleve Aigita misubouꞌ minangutiꞌ ngeleꞌmizo Aigita misuboukosi guvo noso ma gulive Guleheꞌ Noso ve ladokisi ebeꞌ hadive maukisi ngeleꞌmizo novo kilisimasi foti (40) novivo ato atoꞌ suno do minineꞌ.
ACT 7:37 Eze gamazi lo sotoꞌ ilive polohete ma neniꞌ neꞌmine ma lengiꞌ zuhoutiꞌ do ote-do Oꞌmosoꞌmo imisele-lengedeleseive lo Isilaeleꞌ zuho lo-ngimive nene idise luvoniꞌ Moseꞌ ma ne neive.
ACT 7:38 Avotemote Isilaeleꞌ aleve ebeꞌ hadiveuꞌ mulise mili nizavo aꞌmida Sinae gololoꞌ aꞌmine ve azasi engikisi angeloꞌ ma Oꞌmosoꞌmi gamazi lo-imivesi nizavo minevoꞌ minevoꞌ lemeni neꞌmi gamazi do lemelove lo Oꞌmosolatiꞌ daniꞌ.
ACT 7:39 Ne daniꞌza avotemote ingine eze gamazi gele damolone li vasa izi-di Aigita misubouko do tiꞌno voloninako li luꞌine nela milaniꞌ.
ACT 7:40 Neꞌmine igi Moseꞌ uvoloho Aloniꞌni tiꞌ li li-imaniꞌ: Moseꞌ nene Aigita misuboutiꞌ leleꞌmizo ave aza vo gopo ihe vo hadene ihe laza gelamunako gaza leze oꞌmosote gohi loloꞌ o-ledanivo gomuꞌ molo limivo volone.
ACT 7:41 Likevo ne gameneuꞌ bulumakaꞌ angale naba avazaha neꞌmine liliꞌ igi aꞌmine avazaha oꞌmoso nene guno gizi imilizaniꞌ initeꞌ di igi imi mini engiꞌ aꞌinedunuꞌ liliꞌ aniꞌ initekumuꞌ ngolize izi minaniꞌ.
ACT 7:42 Neꞌmine igi Okulumokuꞌ labanaꞌ elaaꞌ ineꞌ initeꞌ mukiꞌ oꞌmosoꞌine liliꞌ igi ngopoꞌni lilisa igi minikevo Oꞌmosoꞌmo tiꞌ igi minilizave lo velepeꞌ izo mehene ngemo hulo-ngidineꞌ. Neꞌmine aniꞌ nemuꞌ Oꞌmosoꞌmo lineꞌ gamazi nene polohete luhuvo gizaniꞌ neuꞌ tiꞌ li gizi nizaniꞌ ma neive: Isilaeleꞌ alevekizo, lingine ebeꞌ hadive mauꞌ moni nizavo kilisimasi foti (40) novivo ize ato atoꞌ bili guno gizikaꞌ gizikaꞌ igi minaniꞌ nene nenikumuꞌ nehe. Ne nomive.
ACT 7:43 Lingine monoꞌ numuno adoꞌ seli numuno gele vineꞌ di monaniꞌ nene avazaha oꞌmosotine Molokoꞌnisi idoꞌ gohi ma sonohiꞌ avazahaꞌvesi minineꞌ Lehanaꞌnisi ngopoꞌni lilisa di monaniꞌ ma ve. Lolize izo aꞌmine initeꞌ ngopoꞌni lo minelone li avazaha initeꞌ liliꞌ igi di minaniꞌ nemuꞌ nene naꞌnise lokuvo Kanaha misubo huli vi Babelonia misubo nesi huli misubo mauko vi mini mulumo gili minilisave lineꞌ ve.
ACT 7:44 Idoꞌ di minilizave lo Oꞌmosoꞌmo Moseꞌni avazaha ogo elebizidiꞌmine liliꞌ aniꞌ monoꞌ numuno selitunuꞌ gizanguꞌ Oꞌmosoꞌmi gamazi minineꞌ nene avotemote ebeꞌ hadiveuꞌ di minaniꞌ.
ACT 7:45 Idoꞌ meꞌninge ngimikevo avotemote zuho engitotiꞌ minaniꞌ netesi aꞌmine seli numuno di minaniꞌ. Idoꞌ Zosuaꞌ ngeleꞌmizo novivo Oꞌmosoꞌmo gomuꞌ molo ngemo aꞌmine misubouꞌ minaniꞌ zuho ato atoꞌ nene ngeleto do nohulivo aꞌmine avotemote zuho Kanaha misubo di tiꞌ aniꞌ gameneuꞌ nene aꞌmine monoꞌ numuno nene di aniꞌ ve. Aꞌmida nene aꞌmine numuno ha di nizavo mini di igi guvelesi ve naba Davidiꞌ sotoꞌ ogo neivosasi nene ha di minaniꞌ ve.
ACT 7:46 Davidiꞌni nene Oꞌmosoꞌmo ninge lamineꞌ daniꞌ ve. Idoꞌ Oꞌmosoꞌmo ninge lamineꞌ davo Davidiꞌ aza Zakoboꞌ ngaꞌvo pilemoꞌ zuho gelekeleꞌ i-daniꞌ Oꞌmosoꞌinemuꞌ numuno gosohoꞌ do sotoꞌ o-delesa gelo neꞌmine o-delingumuꞌ nene longoꞌ o-dineꞌza
ACT 7:47 Oꞌmosoꞌmi numuno gosohoꞌ gize-dive nene Davidiꞌ gipele Solomoniꞌ gize-dineꞌ ve.
ACT 7:48 Ee, numuno gize-dineꞌza Vozeuꞌ ve dize neive Oꞌmoso nene evenelite aꞌinedunuꞌ gizaniꞌ numunguꞌ minevoꞌ dovoꞌ osaꞌmive. Oꞌmosoꞌmi gamazi lo sotoꞌ ive polohete ma tiꞌ lo gize neineꞌ ma ve:
ACT 7:49 Guvelesi ve aneza gamazi lo tiꞌ lo laaꞌ neive: Okulumoꞌ nene neze moꞌmosiꞌne ve. Idoꞌ misubo nene gizeꞌne lise minaaꞌ uvoniꞌ initeꞌ ve. Nemuꞌ nene numuno naniꞌmine numuno gizi-nidikevo lisiheꞌ ilive. Nani holomoloꞌ mine geleloniꞌ o neive
ACT 7:50 Naꞌniseꞌne aꞌnetunuꞌ Okulumoꞌ Misubo do sotoꞌ muluvoniꞌ ma gilamaniꞌ nehe lo gize neineꞌ ve.
ACT 7:51 Neꞌmine lo Setehanoꞌ aza kanisole aleve lo-ngemo imineꞌ molo tiꞌ lo lineꞌ: Lingine aꞌmanapa igi gamazi gilamaaꞌ igi mini lutine gatine ngoloꞌ lamivo avotinge igi mili igaꞌ aniꞌ suno maꞌmine igisa lingine Oꞌmosoꞌmi Sikalahuꞌ lovo i imaaꞌ nave.
ACT 7:52 Avotinge ingine polohete sotoꞌ aniꞌ mukiꞌ goboni mili-ngidisa hamokisi iseꞌine izi-ngidaniꞌ ma nehe. Ne nomive. Ve lisiheꞌ lamineꞌ ma sotoꞌ ilive li li sotoꞌ igi lave polohete nene ingine ngibili osuꞌ likevo mini lingine aꞌmine ve lisiheꞌ bili hililizave li biluvaliti aꞌninguꞌ milikevo bili hilaniꞌ ve.
ACT 7:53 Idoꞌ Oꞌmosoꞌmo lo hukineꞌ gamazi nene angelole neve nete avotemotine ngimikevo dikevo imineꞌ mili gizebo ilizave lo lengita oganiꞌ neiha lingine gili damaniꞌ neive.
ACT 7:54 Setehanoꞌ tiꞌ lo lo-ngemavo gili ngizeboloꞌ goloso molavo veꞌine ingihi giliꞌ laniꞌza
ACT 7:55 Setehanoꞌni lulouꞌ Oꞌmosoꞌmi Sikalahuliꞌmo gono davo aza Okulumokuꞌ vokeneꞌ ogo ningineꞌ. Ningo Oꞌmosoꞌmi labanaꞌve ningo Izesuꞌ Oꞌmosoꞌmo ana hulaaꞌ ida neivo ningo
ACT 7:56 tiꞌ lo lineꞌ: Okulumoꞌ ngoloꞌ lavo ve gihile Oꞌmososi mino ana hulaaꞌ ida neivo ningekuve.
ACT 7:57 Neꞌmine lavo gili gamazi goloso nolihe li aꞌmine gelalone li gaꞌnidoꞌ hiti mini gekeꞌ li-di vi abutiꞌ izi giliꞌ laniꞌ.
ACT 7:58 Abutiꞌ izi ehusoꞌ igi di vi numuno siꞌmingala huli-di vi eze lihimeꞌvemuꞌ li sotoꞌ ave nete geheni huli biliꞌ biliꞌ ilisa ingine okoꞌnidoꞌ initeꞌ haꞌna haꞌna ne kuluhizi gipe gosoꞌve ma minineꞌ gulive Sauloꞌ neꞌmi gizeneuꞌ di mulise milaniꞌ.
ACT 7:59 Setehanoꞌni gehenitunuꞌ nibilavo aza vise lo Guvekasi ve Izesuvo, gaza sikalahuꞌne dozo lo
ACT 7:60 alabuvolo hize mino gamazi naba lo Guvekasi ve mene lihime nidaniꞌ nene do minamo hulo-ngedezo lo hilineꞌ.
ACT 8:1 Bili hilikevo Sauloꞌ aꞌminemuꞌ lamineꞌ gilineꞌ ve. Aꞌmine gamene nene Izesuꞌ evenele Zelusalemi ebekuꞌ mulise milaaꞌ ave apiꞌ igi goboni naba mili-ngidi minaniꞌ. Goboni mili-ngidi nizavo hutileꞌ igi vi Zudaia misuboukosi Samalia misuboukisi vi osuꞌ likevo aposolo angiseꞌinevoꞌ Zelusalemi ebekuꞌ minaniꞌ.
ACT 8:2 Idoꞌ monoꞌ gili lamineꞌ ave linge ma Setehanoꞌni ive nama naba i-di mini galese izi-daniꞌ.
ACT 8:3 Galese izi-dikevo Sauloꞌ aza Izesuꞌ evenele zuho ngebelo osuꞌ lolosa ogo lovo o ngemo numuꞌninguꞌ numuꞌninguꞌ dizo veneꞌ vemohoꞌ geleleheꞌ maleleheꞌ ogo do lemo naꞌnava numunguꞌ hulo-ngedaaꞌ ineꞌ.
ACT 8:4 Neꞌmine neivo hutileꞌ igi vave ingine hutileꞌ igi vadoꞌ vadoꞌ vi numudoꞌ namadoꞌ Izesuꞌnimuꞌ gamazi lamineꞌ li-ngimiꞌ ngimiꞌ igi minaniꞌ.
ACT 8:5 Mini Hilipoꞌ Samalia ebekuꞌ lomo vo Oꞌmosoꞌmo do luꞌ izelive lo imiselelesa live nene Izesuꞌ ve lo lo-ngemo minineꞌ.
ACT 8:6 Lo-ngemo neivo eveneꞌ mukiꞌ nene gamazi lineꞌ gili hamoꞌ igi gili laniteꞌ gili ato atoꞌ suno daniꞌ nene ninganiꞌ.
ACT 8:7 Eveneꞌ luꞌninguꞌ minaniꞌ sikalahuꞌ goloso mukiꞌ ngimisele hulavo gekeꞌ naba li limi vaniꞌ. Idoꞌ lavo eveneꞌ gizehoꞌ numuno avesi gebili nabilisi mukiꞌ lamineꞌ aniꞌ.
ACT 8:8 Neꞌmine ogavo Samalia ebekuꞌ eveneꞌ ngolize naba izaniꞌ.
ACT 8:9 Idoꞌ aꞌmine ebeꞌ nabauꞌ ve ma minineꞌ gulive Simoniꞌ. Aza gamene haꞌna luso ve loloꞌ ogo mino naza guveꞌnesi ve nouve lo Samalia aleve mukiꞌ goꞌine izaaꞌ ineꞌ.
ACT 8:10 Neꞌmine neivo dizi minaniꞌ idoꞌ limi minaniꞌ nene ezemuꞌ gilavo dizineꞌ. Adoꞌ aza nene Oꞌmosoꞌmi amuzo malehe monovoꞌve ato atoꞌ minangutiꞌ monovo ma ngivileꞌ ogo amuzo molo minineꞌ ve li laaꞌ naniꞌ nene dosa Oꞌmoso gele vineꞌ neive li gili laniꞌ.
ACT 8:11 Neꞌmine li gamene haꞌna avazaha niteꞌ dangumuꞌ sizaga liꞌmi vi eze gamazi gili di vi eita giꞌmizaniꞌ.
ACT 8:12 Neꞌmine igi minaniꞌza Hilipoꞌ aza Oꞌmosoꞌmo gizebo o-ledelineꞌ mamukisi idoꞌ Oꞌmosoꞌmo do luꞌ izelive lo imiselelesa live nene Izesuꞌ neingumukisi monoꞌ gamazi lamineꞌ nene lo-ngemavo gili eleꞌvoleꞌ igi veneꞌ vemohoꞌ mukiꞌ noso hilaniꞌ.
ACT 8:13 Simoniꞌ asiꞌvesi gele eleꞌvoleꞌ ogo noso holaniꞌ. Holo Hilipoda vo giꞌmizo mono Hilipoꞌ ato atoꞌ suno do sotoꞌ ineꞌ nene ningo sizaga lo-do minineꞌ.
ACT 8:14 Samalia aleve Oꞌmosoꞌmi gamazi gili dikevo Zelusalemi ebekuꞌ minaniꞌ aposolo nete aꞌmine gamazi gili Petolongi Zohanengi engita ngimiselikevo vasineꞌ.
ACT 8:15 Vi heteli aꞌmine Samalia aleve ingine Guvelesi ve Izesuꞌ guliveloꞌ noso hilaniꞌza Oꞌmosoꞌmi Sikahaluꞌ olihe engita lemamivo haza minaniꞌ nenako nemuꞌ Oꞌmosoꞌmi Sikalahuꞌ engita lemo minelive li Oꞌmosola lasineꞌ.
ACT 8:17 Neꞌmine igi aꞌine godoꞌnidoꞌ hitikesivo Oꞌmosoꞌmi Sikalahuꞌ engita lemo ogo minineꞌ.
ACT 8:18 Aposolo netise aꞌine godoꞌnidoꞌ hitikesivo Oꞌmosoꞌmo Sikalahuꞌve ngimineꞌ nene Simoniꞌ ningo engita moni do vo tiꞌ lo lo-ngimineꞌ:
ACT 8:19 Moni ma lengemekuvo dalisize. Nazasi ve ma zahi godololoꞌ aꞌne hitelohe. Hitekuvo Oꞌmosoꞌmi Sikalahuꞌ ezela lemo minelingumuꞌ aꞌmine di nizasineꞌ amuzo ma nimilizo lineꞌ.
ACT 8:20 Lavo Petoloꞌ tiꞌ lo lo-imineꞌ: Oꞌmosoꞌmo amuzoꞌve haza lehize-ledaaꞌ neineꞌ nene moni hulo dalove lo nolabe. Nemuꞌ geiꞌ monikasi okongasi labuluvo oloseive.
ACT 8:21 Oꞌmosoꞌmo geiꞌ luka ningineꞌ nene lisiheꞌ amivo dusineꞌ gono nene geiꞌ dalinidoꞌ lisiheꞌ amilineꞌ ogako nemuꞌ damolosane.
ACT 8:22 Gaza lukauꞌ lihime neineꞌ neꞌmi gihile ekeseꞌvesi nalinidoꞌ mino idoꞌ monovo goloso neꞌmo angaloꞌ do giliꞌ lo neivo ogo molo minelineꞌ akaloꞌ nene nane lo ningo gele nouze. Nemuꞌ nene gaza goloso niteꞌ daineꞌ mene hulo luka do velepeꞌ izo lukatunuꞌ gelaineꞌ lihime mene hulo-nedelive lo Guvelesi vela amuzo molo lozo.
ACT 8:24 Tiꞌ lo lavo Simoniꞌ tiꞌ lo lineꞌ: Lingine nenikumuꞌ nene lasineꞌ initeꞌ nenita sotoꞌ amilive li Oꞌmosola lilizo lo lineꞌ.
ACT 8:25 Aposolo ingine Izesuꞌ monovoꞌve li sotoꞌ igi Guvelesi veꞌmi gamazi li-ngimi osuꞌ li Zelusalemi ebeta di tineꞌ mili nivi Samalia vetida ebeꞌ mukikuꞌ monoꞌ gamazi lamineꞌ nene li-ngimiꞌmi vasineꞌ.
ACT 8:26 Neꞌmine nasivo Guvelesi veꞌmi angeloꞌ maliꞌmo Hilipoꞌni tiꞌ lo lo-imineꞌ: Gaza oto aka ma Zelusalemi ebetotiꞌ eza gahevela lomo vo ebeꞌ ma Gaza nela hetelelineꞌ akaloꞌ nene lomo vozo. Aꞌmine aka nene ebeꞌ hadivela vilineꞌ akamuꞌ noluve.
ACT 8:27 Neꞌmine lo lo-emavo Hilipoꞌ nene oto lomo vineꞌ. Novivo Etiopia misubouꞌ ve naba zunokuꞌ ma minineꞌ aza ve naba loloꞌ ogo Etiopia aleveliti veneꞌ guveꞌinesi veneꞌ naba engiꞌ noꞌningutiꞌ Kadake ve laniꞌ eiꞌ ne gelekeleꞌ o-do moni heneniꞌveloꞌ gizebo o-do minaaꞌ ineꞌ. Aza Zelusalemi ebeta Oꞌmoso opoꞌni lo-emelesa dizidotiꞌ
ACT 8:28 tineꞌ molo nolemo hosi izelite geleleheꞌ igaꞌ aniꞌ kalisiuꞌ dizo novo Oꞌmosoꞌmi gamazi lo sotoꞌ ogaꞌ ive polohete Isaiaꞌ gizineꞌ gamazi nogativo
ACT 8:29 Sikalahuliꞌmo Hilipoꞌni tiꞌ lo lo-imineꞌ: Gaza volene kalisiloꞌ avitoꞌ vozo.
ACT 8:30 Lavo lotiꞌ izo avitoꞌ vo polohete Isaiaꞌ gizineꞌ gamazi gato neivo gelo tiꞌ lo longoꞌ o-dineꞌ: Gamazi nogataneꞌ nene monovoꞌve gele nabe.
ACT 8:31 Lavo ve maliꞌmo lo-nemeꞌ nemeꞌ amilineꞌ nene monovoꞌve nado gelelove lo kalisiuꞌ dizanivo nezesi minelesive lo Hilipoꞌni lo-emavo kalisiuꞌ dizavo makaꞌ minasineꞌ.
ACT 8:32 Monoꞌ godoloutiꞌ gamazi gatineꞌ nene tiꞌ lo minineꞌ: Belelone li sipisipi ize di igaꞌ aniꞌ neꞌmini ezesi eleꞌmizi aniꞌ. Idoꞌ zopovoꞌine nihukavo sipisipi angale ingine noꞌine mili gekeꞌ lisaꞌmaniꞌ neꞌmine ogo azasi gamazi gopo lamive.
ACT 8:33 Mulumo idoꞌ ovozo initeꞌ di-di eiꞌ lihime nomidoꞌ di lisiheꞌ i-dami goniꞌ gopo i-daniꞌ. Misubouꞌ ogo molo ilineꞌ gamene nene izi huki-di bilikenako eze zuho mamuꞌ zaho lo sotoꞌ ilive.
ACT 8:34 Gamazi tiꞌ lo minineꞌ nene gato aꞌmine ve nene tiꞌ lo Hilipoꞌni longoꞌ o-dineꞌ: Gaza lo-nemezo. Geleloze. Polohete zahingumuꞌ lineꞌ neve. Asiꞌvemuꞌ lineꞌ nehe ve gohi mamuꞌ lineꞌ neve.
ACT 8:35 Lavo Hilipoꞌ nene aꞌmine monoꞌ godoloutiꞌ gamazi apizo loꞌmo novo Izesuꞌnimuꞌ gamazi lamineꞌ imineꞌ molo lo-imineꞌ.
ACT 8:36 Neꞌmine igi akaloꞌ nivi nosoloꞌ ma hetelasineꞌ. Heteli ve naba aza Hilipoꞌni lo-imineꞌ: Ningezo. Noso me ma neive. Noso holo-nedeliningumuꞌ nene oꞌve losoꞌ ne nomive. Olo.
ACT 8:38 Neꞌmine lo dalavamuꞌ kalisi do minezo lavo kalisi do neivo Hilipokisi ve nabasi makatoꞌ nosouꞌ limasineꞌ. Limi Hilipoꞌ neꞌmo ve naba nene noso holo-dineꞌ.
ACT 8:39 Holo-davo nosoutiꞌ dizikesivo Oꞌmosoꞌmi Sikalahuꞌ neꞌmo Hilipoꞌni geto eleꞌmizo vavo ve naba aza eze nene gohi ningamineꞌza akaloꞌ nene olize izeꞌmo vineꞌ.
ACT 8:40 Idoꞌ Hilipoꞌ nene Azoto ebekuꞌ sotoꞌ ogo gomuꞌ aꞌmine vineꞌ akala minaniꞌ numuno mukikuꞌ nene Izesuꞌnimuꞌ gamazi lamineꞌ ne lo-ngemekaꞌ ngemekaꞌ oꞌmo vo Kaesalea numuda vo hetelineꞌ ve.
ACT 9:1 Idoꞌ Sauloꞌ Izesuꞌ evenele zuho ngebelelesa lovo gani lo minineꞌ nene hulamo lovoꞌ mino
ACT 9:2 evenetoꞌ medelo mino Oꞌmoso initeꞌ lehize-daaꞌ ive naba neida vo tiꞌ lo lo-imineꞌ: Izesuꞌ vineꞌ akaloꞌ eꞌmeti viliza venepe idoꞌ vemohope ma ningo ma naꞌnava ngemo ngeleꞌmizo Zelusalemi numuda gohi alosuve lo luhuvo niteꞌ gizanivo do vo Damasiko ebeta Zuda veti monoꞌ mulise miniꞌmi monaniꞌ nene ngemelesa noluve.
ACT 9:3 Lavo luhuvo gizo emavo akaloꞌ do novo Damasiko ebeꞌ do noalitivo Okulumokutiꞌ labanaꞌ ma liteꞌ mateꞌ lo ezela lemo hize vodo vodo o-davo
ACT 9:4 misuboloꞌ lemo pouꞌ lo onganiꞌ. Ongo neivo gamazi ma tiꞌ lo lineꞌ gilineꞌ: Saulo, Saulo, gaza nanitekumuꞌ goboni nomolo-nedane.
ACT 9:5 Neꞌmine lavo aza tiꞌ lo longoꞌ ineꞌ: Guvekasi ve, gaza zaho nane. Lavo aza lo-emo tiꞌ lineꞌ: Gaza goboni molo-nedaaꞌ anive naza Izesuꞌ ma ne noluze.
ACT 9:6 Otezo. Numuno ebeꞌ nabala dizo vaanivo initeꞌ ogo molo ilineꞌ neꞌmi gamazi li-gimilisaze lineꞌ.
ACT 9:7 Idoꞌ ezesi makaꞌ vave nene gamaziꞌvevoꞌ gilaha eveneꞌve ne ningami voꞌine vavo gamaziꞌinesi nomivo ha oti minaniꞌ.
ACT 9:8 Neꞌmine i nizavo Sauloꞌ aza misubolotiꞌ oto vele pupuso ningineꞌ nene vele lenge lenge lavo initeꞌ ningamineꞌ. Ningamo neivo eze zogo ve zuholite analoꞌ di Damasiko numuda eleꞌmizi vaniꞌ.
ACT 9:9 Neꞌmine ikevo aꞌmida gamene setohamo nene vele ningamilineꞌ ogo litiꞌmusovoꞌ izo minavo nosoꞌ nitekisi idoꞌ nososi namo haza minineꞌ ve.
ACT 9:10 Neꞌmine ogavo Damasiko numunguꞌ Izesuꞌ gelekeleꞌ izipeꞌve ma minineꞌ gulive Ananiaꞌ. Guvelesi ve aꞌmine veꞌmi veleloꞌ o molo Ananiazo lavo aza Guveꞌnesi ve, me nouvoniꞌ ve lavo
ACT 9:11 Guvelesi veꞌmo gamazi ma tiꞌ lo lo-imineꞌ: Gaza oto aka ma gulive pehe ve lo minida nene vo Zudaꞌ numuꞌveuꞌ dizo Taliso numudotiꞌ ve ma gulive Sauloꞌni ne viseꞌ ogo ningezo. Aza nenita lo neive.
ACT 9:12 Neꞌmine neivo avazaha initeꞌ veleloꞌ o molavo ningineꞌ nene ve ma gulive Ananiaꞌ nene Sauloꞌ neida dizo ogo vele gohi ninge lamineꞌ ilive lo ana godololoꞌ nohitivo aꞌmine ve ningive.
ACT 9:13 Neꞌmine lavo Ananiaꞌ velepeꞌ izo tiꞌ lo lo-imineꞌ: Guvekasi ve make, eveneꞌ mukiꞌ aꞌmine veꞌmi monovo likevo gelekuve. Aza Zelusalemi ebeta geze eveneka zuho ngeleꞌmizo goloso palasa ogo minineꞌ ve.
ACT 9:14 Idoꞌ evenetoꞌ medeli mini Oꞌmoso initeꞌ lehizi-daaꞌ ave naba nete geiꞌ guliveka di nizave nene naꞌnava ngemo ngeleꞌmizo vilive li li-di luhuvo niteꞌ gizi imikevo ogo mela neive.
ACT 9:15 Neꞌmine lavo Guvelesi ve neꞌmo tiꞌ lo lo-imineꞌ: Gaza vozo. Aꞌmine ve neꞌmo vo neze monovoꞌne eveneꞌ zuho ato atoꞌ minanikisi idoꞌ guveꞌinesi ve naba minanikisi idoꞌ Isilaeleꞌ aleve engikisi lo sotoꞌ o ngemelive lo nenikumuꞌ gono dalive lo do kegese-dekuve.
ACT 9:16 Neꞌmine gono doo nenita giꞌmizo neze guliveꞌne lo-ngeme ngemeꞌ ilingumuꞌ goboni mili-dikevo mulumo naba gelelineꞌ neꞌmi monovo elebizelove.
ACT 9:17 Neꞌmine lavo Ananiaꞌ lemo vo numunguꞌ dizo ana godololoꞌ hito tiꞌ lo lo-imineꞌ: Saulo, neze zuho make, Guvetesi ve Izesuꞌ nene gaza mela anidoꞌ akaloꞌ sotoꞌ o gimive neꞌmo veka gohi ninge lamineꞌ oganivo Oꞌmosoꞌmi Sikalahuꞌ lemo lukauꞌ mino gono dalive lo nimiselavo nouve.
ACT 9:18 Tiꞌ lo nolo-imivo liteꞌ lo initeꞌ ma lihuvolo gele vineꞌ initeꞌ nene vele gihilelotiꞌ doꞌmozavo ninge lamineꞌ ogo otavo monoꞌ noso holo-dineꞌ.
ACT 9:19 Holo-davo nosoꞌ niteꞌ no amuzo daniꞌ. Neꞌmine ogo Sauloꞌ nene Izesuꞌ evenele zuho Damasiko ebekuꞌ inginesi gamene ngomo ma nomino
ACT 9:20 geto Zuda veliti monoꞌ numuꞌninguꞌ dizo Izesuꞌ monovoꞌvemuꞌ lo-ngemo aza nene mo Oꞌmosoꞌmi gipele ve lo lo sotoꞌ o ngimineꞌ.
ACT 9:21 Tiꞌ lo lo-ngemavo lineꞌ gamazi gilave mukiꞌ gopo gaꞌine gili tiꞌ li laniꞌ: Ve meve nene Zelusalemi ebekuꞌ aꞌmine lineꞌ gulive laaꞌ ave ngeleꞌmize goloso palasa ogaꞌ ive ma nehe Olo. Aza nene mela ogo galapuso ngemo evenetoꞌ medeli mini Oꞌmoso initeꞌ lehizi-daaꞌ ave nabala ngeleꞌmizo volosa aniꞌ ma neive. Nadiꞌ ogosa eze monovoꞌve do velepeꞌ izive.
ACT 9:22 Neꞌmine li laniꞌza Sauloꞌ aza gamazi nene amuzo molo lo-ngemeꞌmo vo Izesuꞌ nene do luꞌ izelive lo Oꞌmosoꞌmo imiselelesa live ve lo do lamineꞌ ogo lo-ngemavo Damasiko ebekuꞌ minaniꞌ Zuda ve ingine aꞌmidoꞌ di velepeꞌ izi li-imilizaniꞌ gamazi nomivo gopo gaꞌine gili minaniꞌ.
ACT 9:23 Gamene haꞌna gono do do novivo Zuda ve ingine Sauloꞌni bililisa li huki
ACT 9:24 numuno ebeliꞌmi gesi gatedoꞌ igi gohoni niingavo Sauloꞌ aza aꞌmine gamazi nene gelo lavo
ACT 9:25 eze evenele zuholite holukaꞌ basiketi naba ma di Sauloꞌ aꞌminguꞌ lemo minavo basiketiloꞌ nalaꞌ izi nalatoꞌ di hulikaꞌ hulikaꞌ igi numuno ebeliꞌmi lave haꞌnaloꞌ Sauloꞌni huli-dikevo heta lemo vineꞌ.
ACT 9:26 Sauloꞌ lemo vo Zelusalemi ebeta hetelineꞌ. Hetelo Izesuꞌ evenele zuhouꞌ vo giꞌmizelove lo engita giꞌmizelesa ineꞌza ingine Izesuꞌ izipahala loloꞌ uve lineꞌ nene soza lihe li ezemuꞌ ngehelele izineꞌ.
ACT 9:27 nGehelele izavo Banabasiꞌ neꞌmo Sauloꞌni do giꞌmizo aposolo nizada eleꞌmizo vo Sauloꞌ Guvelesi ve akaloꞌ ningineꞌ gamazi idoꞌ Damasiko numuda Izesuꞌ monovo danava lovoꞌ kisilevoꞌ ogo lo-ngimineꞌ gamazi nene Banabasiꞌ veteteꞌ ogo lo-ngemavo
ACT 9:28 inginesi Zelusalemi ebeta mino dizo lemo ogo mino Sauloꞌ aza ehelele izamivo Izesuꞌ monovo danavaꞌve lovoꞌ kiselevoꞌ ogo lo-ngemaaꞌ ineꞌ.
ACT 9:29 Neꞌmine ogo Zuda ve linge ma nGiliki gamazi laaꞌ aniꞌ aleve inginesi lo-ngemavo monoꞌ gamazi li voleloꞌ meloꞌ igi gamaziꞌineꞌmo lovoꞌninguꞌ ogavo bili hililiza akamuꞌ viseꞌ aniꞌ.
ACT 9:30 Tiꞌ ikevo Izesuꞌ evenele zuho gili Sauloꞌni Kaesalea ebeta eleꞌmizi vi huli-dikevo vo Taliso ebeta hetelineꞌ.
ACT 9:31 Neꞌmine ogavo noso hilave Zudaia misubouꞌ idoꞌ nGalilaia misubouꞌ idoꞌ Samalia misubouꞌ minave engita hongu sotoꞌ ineꞌ. Sotoꞌ ogavo hongu li mini Oꞌmosoꞌmo amuzo ngemavo Oꞌmosoꞌmi gamazi gili di nizavo Oꞌmosoꞌmi Sikalahuliꞌmo hize eleꞌ o-ngedavo muliseꞌine naba ineꞌ.
ACT 9:32 Petoloꞌ aza Izesuꞌ evenele zuho ninge-ngedelesa mone mone oꞌmo vo Lida ebeta nizadasi lemo vo hetelineꞌ.
ACT 9:33 Hetelo aꞌmida ve ma gulive Aineaꞌni ne ningineꞌ. Aza ve gebili mino holomoloꞌ ongo neivo kilisimasi eiti (8) ogo vineꞌ.
ACT 9:34 Ningo Petoloꞌ aza tiꞌ lo lo-imineꞌ: Aineazo, Izesuꞌ Kilisitoꞌ do lamineꞌ o-gedaze. Oto aviliseka gango molozo. Neꞌmine lavo liteꞌ lo aꞌmidoꞌ otineꞌ.
ACT 9:35 Otavo Lida aleve idoꞌ Saloni alevesi ningi luꞌine di velepeꞌ izi Guvelesi vela vi giꞌmizaniꞌ ve.
ACT 9:36 Neꞌmine ikevo Zopa ebetatiꞌ Izesuꞌ evenele zuhoutiꞌ veneꞌ ma minineꞌ gulive Tabitaꞌ. nGiliki gamaziutiꞌ aꞌmine Tabitaꞌ gulive nene Tolokaꞌ ve laaꞌ nave. Aza nene eveneꞌ hize eleꞌ o-ngedaaꞌ monovo lamineꞌ mangi o-ngedaaꞌ ineꞌ veneꞌ minineꞌ.
ACT 9:37 Neꞌmine ogaꞌ ineꞌza aꞌmine gameneloꞌ nene initeꞌ gize do hilineꞌ. Helavo gonoso nene nosoꞌ izi numuno muloloꞌ lumu gohi ma mininguꞌ di dizi ingi-mikaniꞌ.
ACT 9:38 Lida ebeꞌ nene Zopa ebeꞌ gahevela avita neivo Izesuꞌ evenele zuho ingine Petoloꞌ nela neive laniꞌ nene gili eveneꞌ sitaꞌ ma tiꞌ li ngimiselikevo ezeloꞌ vasineꞌ. Vi ee, aneꞌnazo li tiꞌ li li-imasineꞌ: Gaza geto otanivo leliꞌ ebetela volone lo nosive.
ACT 9:39 Likesivo Petoloꞌ gelo otavo engikisi vaniꞌ. Vi Petololesi hetelikevo gonoso ingi-mikanguꞌ eleꞌmizi dizaniꞌ. Dizo ningineꞌ nene veneꞌ getoꞌ natokovoꞌ di mulise mili ive nama igi Tolokaꞌ velesi mino veneꞌ kolosu ato atoliꞌmine ongote-ngidineꞌ nene Petoloꞌni elebizi osuꞌ laniꞌ ve.
ACT 9:40 Tiꞌ ikevo Petoloꞌ nene eveneꞌ mukiꞌ ngimisele hulo heta ogo alabuvolo hizo Oꞌmosola lineꞌ. Oꞌmoso opoꞌni lo osuꞌ lo velepeꞌ izo gonoso nene tiꞌ lo lo-imineꞌ: Tabita, otezo. Lavo vele pupuso Petoloꞌni ningo oto mitoꞌ minineꞌ.
ACT 9:41 Neivo Petoloꞌ analoꞌ doo do ote-dineꞌ. Neꞌmine ogavo Petoloꞌ aza veneꞌ gevonokisi idoꞌ Izesuꞌ evenele zuho lingesi asi lo-ngedavo ikevo Tabita nene gohi vele gizo ha neivo engiꞌ aꞌninguꞌ molaniꞌ.
ACT 9:42 Neꞌmine ogavo neꞌmi guvele Zopa misubouꞌ buu lo vavo eveneꞌ Guvelesi vemuꞌ gili eleꞌvoleꞌ aniꞌ.
ACT 9:43 Neꞌmine ikevo Petoloꞌ nene ve ma gulive Simoniꞌ aza ize losuvo do lamine tamineꞌ ogaꞌ ive eiꞌ numunguꞌ makaꞌ Zopa ebekuꞌ gamene haꞌna minineꞌ.
ACT 10:1 Kaesalea ebekuꞌ Loma amiliti gizebo ve ma minineꞌ gulive Konelioꞌ. Italia misuboukotiꞌ ami vanu hadeti (100) neti gizebo ve minineꞌ.
ACT 10:2 Aza Oꞌmosola gelekeleꞌ ogo ezela lulo molo minaaꞌ ive minineꞌ. Idoꞌ eze zuhosi aꞌmineꞌmine igi minaniꞌ. Aꞌmine ve nene Zuda ve nasahiliꞌ o-ngedo hize eleꞌ o-ngedo mino Oꞌmosola gamene gamene lo minaaꞌ ineꞌ.
ACT 10:3 Neꞌmine ogo minavo gamene ma tili kiloku ogavo Oꞌmosoꞌmi angeloꞌ maliꞌmo veleloꞌ o molo neida dizo Konelioo lavo ninge lamineꞌ ineꞌ.
ACT 10:4 Ningo gisili hizo ningo ehelele izavo tiꞌ lo lineꞌ: Guvekasi ve make, nadive. Lavo aza tiꞌ lo lo-emo lineꞌ: Oꞌmoso opoꞌni laaꞌ naineꞌ idoꞌ eveneꞌ nasahiliꞌ o-ngedo hize eleꞌ o-ngedaaꞌ naineꞌ ma neꞌmi guvele likevo Oꞌmosoꞌmo ningo gelavo lamineꞌ ogave.
ACT 10:5 Nemuꞌ gaza ve ma Zopa ebeta ngimiselanivo vi ve ma gulive Simoniꞌ adoꞌ gulive gohi ma Petoloꞌ ve lo minineꞌ nene eleꞌmizi alizave.
ACT 10:6 Aza abalaho ma Simoniꞌ ize losuvo do lamine tamineꞌ ogaꞌ iveꞌmi numuno adoꞌ guvo noso gahevela neinguꞌ neineꞌ ma ne eleꞌmizi alizave.
ACT 10:7 Angeloꞌ aza tiꞌ lo lo-emeko vavo Konelioꞌ nene gelekeleꞌ izipe setakisi idoꞌ eze nasahiliꞌ o-do minaaꞌ ineꞌ ami ma lulo Oꞌmosola molo minaaꞌ ive nesi asi lo
ACT 10:8 aꞌmine gamazi mukiꞌ lo-ngemo Zopa ebeta ngimiselavo vaniꞌ.
ACT 10:9 Ingi goꞌ lavo ingine akaloꞌ nivi aꞌmine ebeꞌ di alitilisa navo holiseꞌ Petoloꞌ aza numuno muloloꞌ Oꞌmoso opoꞌni lolosa dize minineꞌ.
ACT 10:10 Oꞌmoso opoꞌni lo mino nosoꞌ nitekumuꞌ isavo aꞌminemuꞌ lavo gizi vataꞌ i-di nizavo vele gala monavo ongo mino vamuꞌ tiꞌ lo ningineꞌ.
ACT 10:11 Okulumoꞌ ne godavo initeꞌ ma lavolavo naba gidini minineꞌ ne lumolatiꞌ lumolatiꞌ di uhuꞌvizi hulikevo misubola zou zou lo nolimivo ningineꞌ.
ACT 10:12 Aꞌmineꞌmi lulouꞌ nene gaha nama idoꞌ gosiheꞌ idoꞌ nama ato atoꞌ gopoꞌ napa minaniꞌ.
ACT 10:13 Neꞌmine ogavo ezemuꞌ gamazi ma tiꞌ lo sotoꞌ ineꞌ: Petoloo, oto ma belo novo.
ACT 10:14 Lavo Petoloꞌ tiꞌ lo lineꞌ: Oꞌve. Guveꞌnesi ve make, ne nomive. Ha nitekisi goloso nitekisi mosuneꞌ nene gopo nosaꞌmuve.
ACT 10:15 Tiꞌ lo lavo gamazi ma imineꞌ molo tiꞌ lo lineꞌ: Oꞌmosoꞌmo initeꞌ mamuꞌ goloso niteꞌ do hulo do lamineꞌ ogavo ma aꞌmine initeꞌ nene mo ha niteꞌ ve goloso niteꞌ ve lamo ha dalosane.
ACT 10:16 Neꞌmine lo lineꞌza aꞌmine gamazi li voleloꞌ meloꞌ igi likesivo gamene setohamo ogavo aꞌmidoꞌ geto aꞌmine initeꞌ nene geleleheꞌ ogo Okulumokuꞌ dizo vineꞌ.
ACT 10:17 Dizo vavo Petoloꞌ vamuꞌ ningineꞌ neꞌmi monovo viseꞌ ogo ne nani vamuꞌ ninguhe lo gopo gala gilineꞌ.
ACT 10:18 Gopo gala gelo neivo Konelioꞌ ngimiselive ingine Simoniꞌ numuꞌvemuꞌ longoꞌ longoꞌ iꞌmi vi di sotoꞌ igi gatedoꞌ mini asi li tiꞌ li laniꞌ: Simoniꞌ adoꞌ guliveꞌve gohi ma Petoloꞌ ma nene mene numunguꞌ neihe.
ACT 10:19 Likevo Petoloꞌ aza vamutoꞌ ningineꞌ initekumuꞌ nene gala gelevoꞌ gelevoꞌ ogo neivo Oꞌmosoꞌmi Sikalahuꞌ neꞌmo tiꞌ lo lo-imineꞌ. Gelezo. Ve setohamo geikumuꞌ nave.
ACT 10:20 Oto lemo gaka mukiꞌ gelamo engikisi makaꞌ vilo. Naꞌniseꞌne neve geitoꞌ ngimiseluvoniꞌ ve.
ACT 10:21 Lavo Petoloꞌ aza oto aꞌmine ve nizada lemo tiꞌ lo lineꞌ: Lingine viseꞌ nave ne mene nouve. Idoꞌ nanitekumuꞌ nave.
ACT 10:22 Lavo ingine tiꞌ li laniꞌ: Ami ve vanu hadeti (100) neti gizebo ve Konelioꞌ aza ve lamineꞌ mino Oꞌmoso gelekeleꞌ o-daaꞌ ive Zuda ve mukilite gamangi mili-daaꞌ ave aza nene Oꞌmosoꞌmi angeloꞌ maliꞌmo lo-emavo geiꞌ nene geleꞌmizo numuꞌvela vokunivo Konelioꞌ nene vekatiꞌ gamazi gelelove lo limiselavo noune.
ACT 10:23 Likevo Petoloꞌ ngeleꞌmizo numunguꞌ dizo holomo ngemavo mini inganiꞌ. Ingi goꞌ lavo oti Petoloꞌ ve Izesuꞌ evenele zuho Zopa misubouꞌ minaniꞌ linge masi aꞌmine avesi makaꞌ vaniꞌ.
ACT 10:24 Akaloꞌ ingi oti Kaesalea ebeta vi hetelaniꞌ. Hetelikevo Konelioꞌ eze zuhosi idoꞌ eiꞌ zogo lamineꞌ molavesi do mulise molo-ngedavo Petoloꞌnimuꞌ gizebo igi nizavo
ACT 10:25 vi heteli Petoloꞌ numunguꞌ nodizivo Konelioꞌ gubiꞌ ize emo opoꞌni lineꞌ.
ACT 10:26 Opoꞌni lavo Petoloꞌ aza tiꞌ lo lineꞌ: Otezo. Nasi haza eveneꞌ nouve lo do ote-dineꞌ.
ACT 10:27 Do ote-davo gamazi li voleloꞌ meloꞌ igi dizi eveneꞌ mukiꞌ mulise mili nizavo ningo
ACT 10:28 Petoloꞌ tiꞌ lo lo-ngimineꞌ: Lingine Zuda ve leliꞌ monovo mo gili nizave. Lezesi idoꞌ venenga aleve linginesi do voleloꞌ meloꞌ ogo bizo minamolone li li huki nizaniꞌ ma neineꞌza eveneꞌ mamuꞌ ne ha niteꞌ ve idoꞌ goloso ve lo lo-ngedamozo lo Oꞌmosoꞌmo nelebizo lo-nemavo gelekuve.
ACT 10:29 Nemuꞌ lingine asi likevo aꞌmanapa amo okuve. Lingine nanitekumuꞌ asi li-nidave. Neꞌmi monovo likevo gelelove.
ACT 10:30 Lavo Konelioꞌ lo-emo tiꞌ lo lineꞌ: Initeꞌ tiꞌ ogo sotoꞌ o-nididotiꞌ gamene setohamo ogo vave. Naza numuꞌneuꞌ mino tili kilokuloꞌ Oꞌmosola noluvo ve ma geneganaꞌvelotiꞌ silingengeꞌne hulo minivo veꞌneloꞌ o molo
ACT 10:31 tiꞌ lo lineꞌ: Konelioo, Oꞌmosola laineꞌ ma idoꞌ eveneꞌ nasahiliꞌ o-ngedo hize eleꞌ o-ngedaaꞌ aneꞌ ma Oꞌmosoꞌmo gele lamineꞌ ogave.
ACT 10:32 Nemuꞌ gaza Zopa misubouko eveneꞌ ngimiselanivo vi Simoniꞌ adoꞌ gulive gohi ma Petoloꞌni ma ne eleꞌmizi alizave. Aza nene abalaho ize losuvo do lamine tamineꞌ ogaꞌ iveliꞌmi numunguꞌ adoꞌ guvo noso gahevela ne neive.
ACT 10:33 Tiꞌ lo lo-nemavo nemuꞌ nene geto ngimiselekuvo geita vikevo gaza gamaziꞌine gelo oganivo muluꞌneuꞌ lamineꞌ gelekuve. Idiꞌnise nene Oꞌmosoꞌmo lo-gidineꞌ gamazi lanivo gelelone lo Oꞌmosoꞌmi veleloꞌ mene do geseꞌ ogo geikumuꞌ gizebo none.
ACT 10:34 Neꞌmine lavo Petoloꞌ apiꞌ ogo tiꞌ lo lineꞌ: Oꞌmosoꞌmo nene eveneꞌ mukiꞌ leliꞌ okodemuꞌ gilivo ivileꞌ avileꞌ osaꞌmive. Nemuꞌ nene idiꞌne gelekuve.
ACT 10:35 Numudoꞌ namadoꞌ ve engitatiꞌ ezemuꞌ opoꞌni li gelekeleꞌ i-di initeꞌ lisihekovoꞌ igi mili lamineꞌ minave mukiꞌ nene ninge lamineꞌ o-ngedaaꞌ neive.
ACT 10:36 Gamazi ma Isilaeleꞌ alevemuꞌ hulineꞌ nene Izesuꞌ Kilisitoꞌ neꞌmo eveneꞌ mukiliti Guvetesi ve Oꞌmososi do bize-ledo do hongu lo-ledelive lo lo sotoꞌ ogo gamazi lamineꞌ lineꞌ nene gili nilisave.
ACT 10:37 Idoꞌ Zohaneꞌ aza noso hilalizave lo lo sotoꞌ ogavo nGalilaia misubouꞌ apiꞌ ogo Zudaia misubo mukikuꞌ hutileꞌ ogo sotoꞌ ineꞌ initeꞌ nene gili nilisave.
ACT 10:38 Aꞌmine initeꞌ neꞌmino neive. Oꞌmosoꞌmo Nasalete ve Izesuꞌ neꞌmo gono dalive lo Sikalahuꞌve emo amuzo emavo Oꞌmosoꞌmo ezesi mininako eveneꞌ hize eleꞌ o-ngedo Sataniꞌmo ngeleꞌmize goloso palasa ivo minave mukiꞌ nene do lamineꞌ o-ngedo minineꞌ.
ACT 10:39 Aza initeꞌ mukiꞌ ineꞌ nene Zudaia misuboukosi Zelusalemi ebekukisi ineꞌ ne laꞌlisete ninge noneꞌ ma ve. Lohotoꞌ zaloꞌ bilaniꞌza
ACT 10:40 helavo gamene setohamo ogo vavo Oꞌmosoꞌmo gohi do ote-do eze evenele linge nene do ngelebizavo ninganiꞌ ve.
ACT 10:41 Eveneꞌ mukilite ningavoba asi eze ningo gamazi lo sotoꞌ olosune lo gozopoꞌ akaꞌmilatiꞌ do kegese-lidive lelikovoꞌ eze ningo hilingutiꞌ oto neivo ezesi nosoꞌ niteꞌ makaꞌ nuneꞌ ve.
ACT 10:42 Idoꞌ leze vetesi ha nonivesi idoꞌ hilavesi gonitoꞌ okunivo gonitoꞌ gizebo ogo goniꞌ gelelive lo Oꞌmosoꞌmo do kegeso eleꞌmize molave ve loo lo sotoꞌ o ngemo minelone lo Oꞌmosoꞌmo lo huko-lidineꞌ ve.
ACT 10:43 Idoꞌ Oꞌmosoꞌmi gamaziꞌve li sotoꞌ igaꞌ ave mukilite eze gamaziꞌve neꞌmine li gizi milaniꞌ ma neive: Ezemuꞌ gili amuzo milaliza aleve mukiꞌ Oꞌmosoꞌmo Izesungumuꞌ ve lo lihimeꞌine apase-ngedeleseive lo Petoloꞌ lineꞌ.
ACT 10:44 Petoloꞌ aza mene gamazi nolivo aꞌmine gamazi gili minavela Oꞌmosoꞌmi Sikalahuꞌ limineꞌ.
ACT 10:45 Lemavo ato atoꞌ gamaziutiꞌ li Oꞌmoso opoꞌni nilavo gilaniꞌ nenako nemuꞌ nene Izesuꞌnimuꞌ gili eleꞌvoleꞌ aniꞌ Zuda ve adoꞌ Petolokisi ave ingine Oꞌmosoꞌmo Sikalahuꞌve nene haza heta atoꞌ vesi lehize-ngidingumuꞌ nene upuhoꞌ igi Oꞌmoso di naba i-daniꞌ. Neꞌmine ikevo Petoloꞌ tiꞌ lo lineꞌ:
ACT 10:47 Oꞌmosoꞌmi Sikalahuꞌ lelita limineꞌ maꞌmino me ve inginelasi lemanako laza nene noso holo-ngedamolone lo oꞌve lo-ngedamoloneꞌ ogave. Olo.
ACT 10:48 Neꞌmine lo Izesuꞌ Kilisitoꞌ guliveloꞌ noso hilalo lavo monoꞌ noso hili-ngidikevo ingine gamene ngomosiꞌ Petoloꞌ engita minelive li likevo ngomosiꞌ ma minineꞌ ve.
ACT 11:1 Neꞌmine ogavo aposolokisi Izesuꞌ zuho linge ma Zudaia misubouꞌ minanikisi ingine nene heta atoꞌ vesi Oꞌmosoꞌmi gamazila vi giꞌmizaniꞌ neꞌmi gamazi vogavo gilaniꞌ.
ACT 11:2 Nemuꞌ Petoloꞌ Zelusalemi numuda tineꞌ molo duvavo Izesuda alisa gilave gomuꞌ okoꞌine lolovo huko hulo-ngedo Oꞌmosoꞌmi nosoꞌve molo-ngedelone li amuzonga laaꞌ ave nete Petoloꞌni elemi tiꞌ li li-imaniꞌ:
ACT 11:3 Gaza Oꞌmosoꞌmi nosoꞌve nomineꞌ alevetida vo engiꞌ aꞌningutiꞌ nosoꞌ niteꞌ no naineꞌ nene nanimuꞌ nane.
ACT 11:4 Neꞌmine likevo Petoloꞌ aza apiꞌ ogo tiꞌ lo lo-ngemo neꞌmine ineꞌ aka nene lo ngoloꞌ lo lo-ngimineꞌ:
ACT 11:5 Naza Zopa numuno ebekuꞌ mino Oꞌmosola noluvo maduꞌne gopo ogavo mino vamuꞌ tiꞌ ogo ninguve: Initeꞌ ma lavolavo naba gidini minineꞌ nene lumolatiꞌ lumolatiꞌ di uhuꞌvizi hulikevo Okulumokutiꞌ zou zou lo nolimivo ninguvoniꞌ. Lemo nouvodoꞌ minavo
ACT 11:6 aꞌmineꞌmi lulouꞌ gisili hizo ninge lamineꞌ uvoniꞌ. Gaha nama ato atoliꞌmine gizeꞌine aꞌine neineꞌ nominekisi ninguve.
ACT 11:7 Neꞌmine ogo gamazi ma tiꞌ lo sotoꞌ o nimineꞌ: Petoloo, gaza oto ma belo novo.
ACT 11:8 Tiꞌ lo sotoꞌ o nemavo naza tiꞌ lo luve: Oꞌve. Guveꞌnesi ve make, ne nomive. Ha nitekisi goloso nitekisi nene gopo nosaꞌmuve.
ACT 11:9 Neꞌmine lokuvo Okulumokutiꞌ gamazi imineꞌ molo lineꞌ: Oꞌmosoꞌmo initeꞌ mamuꞌ goloso niteꞌ do hulo do lamineꞌ ogavo ma aꞌmine niteꞌ nene ha niteꞌ ve goloso niteꞌ ve lamo ha dalosane.
ACT 11:10 Neꞌmine lo lineꞌza aꞌmine gamazivoꞌ lo voleloꞌ meloꞌ ogo lokusivo gamene setohamo ogavo aꞌmine niteꞌ mataꞌ nene geleleheꞌ ogo iheꞌ Okulumokuꞌ dizo vineꞌ.
ACT 11:11 Dizo vavo aꞌmidoꞌ geti eveneꞌ setihami Kaesalea numudotiꞌ elese igi minuvoniꞌ numuda hetelaniꞌ.
ACT 11:12 Hetelikevo Oꞌmosoꞌmi Sikalahuliꞌmo tiꞌ lo lo-nimineꞌ: Gaza geni gebelamivo inginesi vozo. Lavo nazasi idoꞌ Izesuꞌ zuho sikisi nesi vo aꞌmine veꞌmi numunguꞌ dizekunivo
ACT 11:13 gamazi tiꞌ lo lo-limineꞌ: Neniꞌ numuꞌneuꞌ angeloꞌ maliꞌmo dizo sotoꞌ o nemo tiꞌ lo lo-nimive: Gaza Zopa ebeta eveneꞌ ma ngimiselanivo vi Simoniꞌ gulive adoꞌ gohi ma Petoloꞌ ve lo minineꞌ nene eleꞌmizi ikevo
ACT 11:14 gezesi idoꞌ geiꞌ numungauꞌ inganiꞌ zuhosi Oꞌmosoꞌmo do lunguꞌ izelineꞌ gamazi lo-lengemavo lamineꞌ ilisave lo lineꞌ.
ACT 11:15 Aꞌmine gamazi lo-nemavo gamazi apiꞌ ogo nolo-ngimuvo Oꞌmosoꞌmi Sikalahuꞌ nene ganaꞌ lemo lelita minidiꞌmino inginelasi lemo minineꞌ.
ACT 11:16 Lemavo ne ningo Guvetesi veꞌmo Zohaneꞌ aza eveneꞌ noso holo-ngedavo haza nosovoꞌ daniꞌza lingine nene Oꞌmosoꞌmi Sikalahuꞌ neve ne dalizave lineꞌ gamazi maloꞌ gohi gaꞌne gele molo giluve.
ACT 11:17 Laza Guvetesi ve Izesuꞌ Kilisitoꞌnimuꞌ gele eleꞌvoleꞌ okunivo Oꞌmosoꞌmo leze lehize-lidineꞌ initeꞌ Sikalahuꞌve nene aꞌmine maꞌmino engikisi lehize-ngidineꞌ ma ve. Nemuꞌ naza amuzo malehe noosa eze oꞌve lo-delohe.
ACT 11:18 Neꞌmine lineꞌ nene gili muluꞌninguꞌ hongu lavo gamazi gohi mo li-dami Oꞌmoso opoꞌni li tiꞌ li laniꞌ: Oho, Oꞌmosoꞌmo gele ngemavo heta atoꞌ vesi luꞌine di velepeꞌ izikevo miniviꞌ miniviꞌ ilizaniꞌ ngemeni damenisi Oꞌmosoꞌmo ngeme noloseive li laniꞌ.
ACT 11:19 Setehanoꞌni bili hilisa goboni mili-ngidikevo Izesuꞌ zuho hutileꞌ igi vangutiꞌ ingine linge ma Hoinikia misubouꞌ vi minaniꞌ. Idoꞌ linge ma sipiuꞌ dizi vi ailani ma gulive Kipilo nela vi minaniꞌ. Idoꞌ linge ma vi Adiokia ebeta minaniꞌ. Ingine mukiꞌ vi mini eveneꞌ atoꞌ ma li-ngimami Zuda vevoꞌ Izesuꞌ gamaziꞌve li-ngimaniꞌ.
ACT 11:20 Neꞌmine aniꞌza inginelatiꞌ ve linge ma Kipilo vesi Kilene vesi ingine Adiokia ebekuꞌ vi mini nGiliki aleve nene Guvetesi ve Izesuꞌnimuꞌ gamazi lamineꞌ nene li-ngimaniꞌ.
ACT 11:21 Nili-ngimavo Oꞌmoso inginesi mino amuzo ngemavo eveneꞌ mukiꞌ engiꞌ gamazi gili Guvetesi vemuꞌ gili eleꞌvoleꞌ igi ezela vi giꞌmizaniꞌ.
ACT 11:22 Engikumuꞌ nene gamazi lamineꞌ ma vo Izesuꞌ zuho Zelusalemi ebekuꞌ mulise milaaꞌ aveti gaꞌninguꞌ ogavo Banabasiꞌni aꞌmine Adiokia numuno ebeta imiselaniꞌ.
ACT 11:23 Imiselikevo vo hetelo Oꞌmosoꞌmo iseꞌine izo do lamineꞌ o-ngidineꞌ nene ningo gelo mulunouꞌ lamineꞌ gelo Guvelesi vela luꞌine mili eleꞌvoleꞌ ilizave lo gaꞌine daniꞌ.
ACT 11:24 Idoꞌ Banabasiꞌ neꞌmine ineꞌ nene aza ve lamineꞌ mino Oꞌmosomuꞌ amuzo molo gele eleꞌvoleꞌ ogavo Oꞌmosoꞌmi Sikalahuꞌ lulouꞌ gono do minaaꞌ ineꞌ nenako nemuꞌ nene neꞌmine ineꞌ ve. Idoꞌ eveneꞌ mukiꞌ gamaziꞌve gili Guvelesi vela vi giꞌmizaniꞌ.
ACT 11:25 Neꞌmine ikevo Banabasiꞌ vo Sauloꞌni viseꞌ ogo ningelesa Taliso ebekuꞌ vineꞌ.
ACT 11:26 Vo ningo Adiokia ebeta eleꞌmizo ogavo Izesuꞌ zuho di mulise mili mini eveneꞌ mukiꞌ monoꞌ apizi ngimi ngimiꞌ igi nizasivo kilisimasi hamoꞌ vineꞌ. Idoꞌ Adiokia ebekuꞌ ganaꞌ apiꞌ igi Izesuꞌ evenele zuho mamuꞌ guliveꞌine mili Kilisiteni aleve ve laniꞌ.
ACT 11:27 Aꞌmine gamene neuꞌ Oꞌmosoꞌmi veleutiꞌ gamazi li sotoꞌ ave polohete linge ma Zelusalemi numudatiꞌ lomi Adiokia ebeta vi hetelaniꞌ.
ACT 11:28 Heteli engikutiꞌ ve ma gulive Agaboꞌni nene Oꞌmosoꞌmi Sikalahuꞌ neꞌmo do ote-davo misubo mukikuꞌ gaꞌna naba sotoꞌ olosa neivo neꞌmi gamazi lo-ngimineꞌ. Idoꞌ alingeꞌ Kalaudioꞌ Loma veti guveꞌinesi ve naba loloꞌ ogo neivo aꞌmine gaꞌna naba sotoꞌ ilingumuꞌ lineꞌ gamazi gihile izineꞌ.
ACT 11:29 Lo-ngemavo gili Izesuꞌ evenele zuho ma gaꞌine gili tiꞌ li gamazi di hamoꞌ igi laniꞌ: Laza hamoꞌ hamoꞌ ogo initeꞌ neineꞌ votigileloꞌ hulo-ngedo leze zuho Zudaia misubouꞌ minave nosoꞌ niteꞌ nevoꞌmine ngemelone li laniꞌ.
ACT 11:30 Idoꞌ laadoꞌ igi aꞌmine initeꞌ nene Banabasikisi Saulokisi di vi monoꞌ gizebo vetine ngimilisive li ngimiselikevo vasineꞌ.
ACT 12:1 Aꞌmine gameneuꞌ guvelesi ve naba ma minineꞌ gulive Helodeꞌ aza Izesuꞌ zuho linge ma ne lovo zatuhoꞌ o ngemo
ACT 12:2 eiꞌ lavo Zohaneꞌ uvoloho Zakoboꞌni luvono gitaniꞌ.
ACT 12:3 Neꞌmine ikevo Zuda ve muluꞌninguꞌ lamineꞌ gilaniꞌ nene ningo gohi lavo Oꞌmosoꞌmo Zuda veti avoꞌningine iseꞌine izingumuꞌ gili mini lulu izamineꞌ beleti naaꞌ aniꞌ holisekuꞌ nene Petoloꞌni nalaꞌ numunguꞌ huli-daniꞌ.
ACT 12:4 Aꞌmine holiseꞌ osuꞌ lavo Zuda veti aꞌninguꞌ molokuvo goniꞌ i-di bililizave lo gelo analoꞌ do nalaꞌ numunguꞌ eleꞌmize molo pilisi ve sitaꞌve sitaꞌvelite gizebo i-dikaꞌ i-dikaꞌ ilizave lo pilisi ve sigisitini (16) ngeleꞌmize molaniꞌ.
ACT 12:5 Neꞌmine ogavo Petoloꞌ nene nalaꞌ numunguꞌ neivo gizebo i-di nizavo Izesuꞌ evenele zuho ezemuꞌ Oꞌmosola amuzo mili li minaniꞌ.
ACT 12:6 Helodeꞌ aza Petoloꞌni do eveneliti aꞌninguꞌ ngemelesa ineꞌ gamene alitavo aꞌmine holukaꞌ nene Petoloꞌ ana helala nene di pilisi ve maliꞌmi anasi di hamoꞌ igi senitunuꞌ izi-ngidi idoꞌ ana helala nene aꞌmineꞌmine igi pilisi ve maliꞌmi anasi di hamoꞌ igi izi-ngidaniꞌ. Neꞌmine iki ingi nizavo pilisi ve linge ma nalaꞌ numunoꞌmi gatedoꞌ gizebo igi minaniꞌ.
ACT 12:7 Tiꞌ igi nizavo Guvelesi veꞌmi angeloꞌ maliꞌmo liteꞌ mateꞌ lo sotoꞌ neivo numuno lulouꞌ labanaꞌ ilineꞌ. Neꞌmine ogavo angeloꞌ aza Petoloꞌni gapileloꞌ izo uꞌmukoꞌ o-do tiꞌ lo lineꞌ: Geto otezo. Lavo Petoloꞌ analotiꞌ seni ne apaseꞌmozavo
ACT 12:8 angeloliꞌmo tiꞌ lo lo-imineꞌ: Letika do izezo. Idoꞌ gizengaloꞌ niteꞌ do izezo. Lavo neꞌmine ogavo tiꞌ lo lineꞌ: Okongaloꞌ initeꞌ haꞌna ma do izo neꞌmeto ano.
ACT 12:9 Lavo do izo angeloꞌ ogo molo ineꞌ nene ningo gele lamineꞌ amo haza vamuꞌ noninguhe lo gelo eꞌmeto vineꞌ.
ACT 12:10 Vi pilisi ve gizebo igi nizavo ngivileꞌ iki pilisi ve gohi ma aꞌmineꞌmine igi gizebo igi nizavo aꞌminesi ngivileꞌ igi gateni naba ainidunuꞌ liliꞌ aniꞌ aꞌminguꞌ ebeꞌ nabala limi vaaꞌ aniꞌ gatedokisi hetelikesivo aꞌmine akahe neꞌmo asiꞌve engikumuꞌ siꞌzeko vavo limi aka hamoꞌ huliki nelotiꞌ liteꞌ lo angeloꞌ nene Petoloꞌni hulo-do vo haha ineꞌ.
ACT 12:11 Idoꞌ vo haha ogavo Petoloꞌ galauꞌ ngoloꞌ lavo tiꞌ lo gilineꞌ: Naza Guvelesi veꞌmo angeloꞌve imiselo Helodeꞌ anautiꞌ apase-nedo Zuda vete i-nidilisa gilangutiꞌ kuluhize-nidineꞌ nene gihile izavo idise gelekuve.
ACT 12:12 Tiꞌ lo ningo gelo Zohaneꞌ adoꞌ gulive naba Malekoꞌ ve lo minineꞌ neꞌmi izeleho Maliaꞌ numuꞌveuꞌ vo hetelineꞌ. Aꞌminguꞌ eveneꞌ mukiꞌ di geseꞌ igi mini Oꞌmosola li minaniꞌ.
ACT 12:13 Li minanguꞌ vo hetelo aza gatedoꞌ vo okohoꞌ izavo gelekeleꞌ alu ma minineꞌ gulive Lodaꞌ nene akahe siꞌze-delesa ogo
ACT 12:14 Petoloꞌ nolo gelo mulunouꞌ lamineꞌ gelo akahe siꞌzamo velepeꞌ izo lotiꞌ izo vo eveneꞌ tiꞌ lo lo-ngimineꞌ: Petoloꞌ nene gatedoꞌ omo neive.
ACT 12:15 Neꞌmine lo lo-ngemavo ingine tiꞌ li laniꞌ: Dudu gamazi nolabe. Likevoo oꞌve. Lamineꞌ noluve lo amuzo molo lavo angeloꞌve noloseive li laniꞌ.
ACT 12:16 Neꞌmine nilavo Petoloꞌ gatedoꞌ okohoꞌ ha izo neivo akahe siꞌzi eze ningi voꞌine vavo upuhoꞌ goloso aniꞌ.
ACT 12:17 Neꞌmine ikevo anatunuꞌ avazaha ogo gamazi oꞌve lo-ngedo Guvelesi veꞌmo nalaꞌ numungutiꞌ kuluhize-dineꞌ monovo lo-ngemo mene gamazi nene Zakobokisi leze zuho linge masi li-ngimilo lo velepeꞌ izo ebeꞌ mala vineꞌ.
ACT 12:18 Vavo goꞌ lavo pilisi ve Petoloꞌni nadiꞌ i-dave li gopo gaꞌine gili angiseꞌine noꞌninguꞌ gamazi mukiꞌ li voleloꞌ meloꞌ aniꞌ ve.
ACT 12:19 Neꞌmine ikevo Helodeꞌ viseꞌ ilizave lavo viseꞌ igi igi di sotoꞌ amavo Petoloꞌni gizebo aniꞌ pilisi ve longoꞌ mingeꞌ o-ngedo ngibili huli huliꞌ ilizave lo lo huko-ngidineꞌ. Lo huko-ngedo Zudaia misubo hulo lemo Kaesalea ebekuꞌ vo minineꞌ.
ACT 12:20 Aꞌmine gamene neuꞌ Tilo alevemukisi idoꞌ Sidoni alevemukisi Helodeꞌ izeboloꞌ goloso molavo lovo gize ngimineꞌ. Lovo gize ngemavo aꞌmine misubo neꞌmi meꞌninge nete gamaziꞌine di hamoꞌ igi ingine zuho nosoꞌ initeꞌine guvelesi veꞌmi misubolotiꞌ meni hizi ni minaniꞌ nenako nemuꞌ nene vi gomuꞌ leleꞌmize lamineꞌ ilingumuꞌ ve li Helodeꞌ okoꞌnoloꞌ nitetoꞌ gizebo o-daaꞌ ive ma gulive Bilasitoꞌni gala di Helodeꞌ neida dizi igi zogo imi mulunouꞌ do hongu lilineꞌ gamazi li-imaniꞌ ve.
ACT 12:21 Neꞌmine ikevo Helodeꞌ aza gamene molaniꞌ gamene alitavo eiꞌ guvelesi veꞌmo ngolaaꞌ ineꞌ initeꞌ nene do ngolo mino guvelesi veꞌmo minaaꞌ ineꞌ moꞌmosiꞌveloꞌ mino eze zuho gamazi lo-ngimineꞌ.
ACT 12:22 Nolo-ngimivo eveneꞌ ingine eveneliꞌmo lamive. Oꞌmosoliꞌmo lineꞌ ma ve li gamazi naba laniꞌ.
ACT 12:23 Neꞌmine likevo aza nene neniꞌ nopoꞌni lami Oꞌmosovoꞌ opoꞌni lilo lamivo Oꞌmosoꞌmi angeloliꞌmo belavo okoꞌno ginine hizavo hilineꞌ ve.
ACT 12:24 Idoꞌ Oꞌmosoꞌmi gamazi neꞌmo hutileꞌ ogo hiluluꞌ piluluꞌ izo vineꞌ.
ACT 12:25 Zelusalemi ebeta gono ngimineꞌ nene di osuꞌ li Banabasiki Sauloki Adiokia ebeta tineꞌ mili vilisa niigi Zohaneꞌ adoꞌ gulive naba Malekoꞌ ve lo mininekisi nene eleꞌmizi vasineꞌ ve.
ACT 13:1 Izesuꞌ evenele zuho ma Adiokia ebekuꞌ minaniꞌ nete vovoꞌninguꞌ Oꞌmosoꞌmi gamazi li sotoꞌ igi apizi ngimaaꞌ ave linge minaniꞌ nene guliveꞌine Banabasiꞌ ve idoꞌ Simeoniꞌ adoꞌ gulive gohi ma Gonobuꞌ ve lo minineꞌ nesi idoꞌ Lukioꞌ aza Kilene ebekutiꞌ ve idoꞌ Manaeniꞌ aza guvelesi ve Helodekisi uvoloho akunolo gili gana gana naba asive nesi idoꞌ Saulokisi ve.
ACT 13:2 Aꞌmine ve nete monokumuꞌ nosoꞌ niteꞌ malise igi mini Oꞌmoso opoꞌni li gonoꞌve nidavo Oꞌmosoꞌmi Sikalahuꞌ neꞌmo tiꞌ lo lo-ngimineꞌ: Banabasiki Sauloki gono dalisive lo do nenita uvongumuꞌ nene aꞌmine ve ne di kegesi mili-nidilo.
ACT 13:3 Lavo nosoꞌ niteꞌ malise igi Oꞌmosola li mini aꞌine godoꞌnidoꞌ hiti di kegesi-ngidi ngimiselikevo vasineꞌ.
ACT 13:4 Ingine Oꞌmosoꞌmi Sikalahuꞌ neꞌmo ngimiselavo Seleukia ebeta lomi vi sipiuꞌ dizi Kipilo ailaniuꞌ vasineꞌ.
ACT 13:5 Kipilo ailaniuꞌ vi heteli aꞌmidaa minineꞌ ebeꞌ Salami neuꞌ vi Zuda veti monoꞌ numuno minidoꞌ minidoꞌ Oꞌmosoꞌmi gamazi li sotoꞌ igi li-ngimasineꞌ. Idoꞌ neꞌmine igi nizasivo Zohaneꞌ adoꞌ guliveꞌve gohi ma Malekoꞌ ve lo minineꞌ neꞌmo gelekeleꞌ o-ngedo hize eleꞌ o-ngedo minineꞌ.
ACT 13:6 Neꞌmine igi Salami ebeꞌ huli Kipilo ailani lumola ivileꞌ igi vi Pahosi ebekuꞌ hetelaniꞌ.
ACT 13:7 Heteli nela Zuda ve ma aza mino soza gamazi lo sotoꞌ ogo minaaꞌ ive ma gulive Bala Izesuꞌ ve lo minineꞌ ma ninganiꞌ. Aꞌmine ve nene Kipilo aleveti guveꞌinesi ve naba gulive Selegioꞌ Pauloꞌ aza galauꞌ vevese minineꞌ minaniꞌ neivo makaꞌ minasineꞌ. Guvelesi ve Selegioꞌ aza Banabasingi Saulongi elese molo ngemo Oꞌmosoꞌmi gamazi gelelesa longoꞌ longoꞌ o-ngidineꞌ.
ACT 13:8 Neꞌmine ogavo aꞌmine ve nene Elimasiꞌ (mene guliveꞌmi monovo tiꞌ lo neive: Aniꞌ amaniꞌ ogo minaaꞌ ive ve.) Aꞌmine ve aza engiꞌ gamazi lasidoꞌ nene guvelesi veꞌmo gele eleꞌvoleꞌ olosa gilineꞌ nene hulilive lo aꞌmine gamaziloꞌ eꞌmenga lo-ngimineꞌ.
ACT 13:9 Neꞌmine ineꞌza Sauloꞌ gulive gosohoꞌ Pauloꞌ ve lo minineꞌ nene Oꞌmosoꞌmi Sikalahuꞌve neꞌmo lulouꞌ gono davo vonuꞌ gisili hize-de mino
ACT 13:10 tiꞌ lo lo-imineꞌ: Gaza Sataniꞌmi gipele mino soza saza lo eveneꞌ goꞌine gohi izo lisiheꞌ amaniꞌ initeꞌ mataꞌ ogo initeꞌ lamineꞌ mukiꞌ lovo o-ngemaaꞌ anive gaza Guvelesi veꞌmi aka lisiheꞌ nene do gopoꞌ napaꞌ ogaꞌ naineꞌ nene aloꞌ hulamane.
ACT 13:11 Nemuꞌ Guvelesi veꞌmo amuzolotunuꞌ gebelavo veka likavo gamene ma alinguꞌ holiꞌmi labanala ma ningamo haza minelesane. Nolivo nolineꞌ velesi liteꞌ lo limuso neꞌmine gele vineꞌ neꞌmo veleloꞌ litiꞌmuso izavo analoꞌ di monilizavemuꞌ viseꞌ ogo minineꞌ.
ACT 13:12 Neꞌmine ogavo sotoꞌ ineꞌ initeꞌ ningo misubouꞌ veti guvelesi ve aza Guvelesi veꞌmi monokumuꞌ gilineꞌ gasava hizavo gele eleꞌvoleꞌ ineꞌ.
ACT 13:13 Pauloꞌ ve idoꞌ ezesi monavesi Pahosi ebeꞌ huli sipiuꞌ dizi Pamahilia misubouꞌ Pelega ebeta vi hetelaniꞌ. Heteli Zohaneꞌ aza hulo-ngedo Zelusalemi numuda do tineꞌ molo vineꞌ.
ACT 13:14 Neꞌmine ogavo ingine Pelega ebeꞌ huli vi Pisidia misuboꞌmi gahevela Adiokia ebeta nene vi hetelasineꞌ. Heteli mini holisekuꞌ nene Zuda veti monoꞌ numunguꞌ dizi minasineꞌ.
ACT 13:15 Nizasivo Moseꞌ gizineꞌ gamaziutiꞌ gati Oꞌmosoꞌmi gamazi li sotoꞌ igaꞌ ave polohetelite gizikaniꞌ gamazi mautiꞌ gati monoꞌ gizebo ve ingine elese mili ngimi tiꞌ li li-ngimaniꞌ: Zogole zuho matise eveneꞌ leze mulude do giliꞌ lo-ledelineꞌ gamazi lengita ma neivo ma ma li-limilizo.
ACT 13:16 Tiꞌ li li-ngimikevo Pauloꞌ aza oto eleseꞌ iki minilizave lo ana do oto avazaha ogo tiꞌ lo lineꞌ: Isilaeleꞌ alevesi idoꞌ eveneꞌ linge ma Oꞌmosomuꞌ golise gilaaꞌ naniꞌ masi lingine gililo.
ACT 13:17 Oꞌmoso aza Isilaeleꞌ aleve lezemuꞌ eze zuho minilizave lo avotemotine do kegese-ngedo Aigita misubouko venenga ve gili nizavo do amuzo molo-ngedo neivo hizi hutileꞌ aniꞌ. Neꞌmine ikevo goboni mili-ngidi minangutiꞌ amuzo molo ngeleꞌmizo ebeꞌ hadiveloꞌ novivo
ACT 13:18 ingine goloso niteꞌ iꞌmi vangumuꞌ goseleꞌ belamivo gizebo o-ngedeꞌmo vo neivo kilisimasi foti (40) ogo vineꞌ.
ACT 13:19 Neꞌmine ogo Kanaha misubouꞌ eveneꞌ guliveꞌine ato atokisi zuho seveni nene ngebele geseꞌ ogo engiꞌ misuboꞌine nene avotemotine izeꞌ molo ngemavo goꞌnidoꞌ goꞌnidoꞌ di nizavo kilisimasi fo hadeti fifti (450) ogo vineꞌ.
ACT 13:20 Ogo vavo gizebo ve do kegese-ngedo hulo-ngedavo miniꞌmi nivavo alingeꞌ Oꞌmosoꞌmi gamazi lo sotoꞌ ilive Samuveli sotoꞌ ineꞌ.
ACT 13:21 Sotoꞌ ogo neivo avotemote ingine guvelesi ve naba loloꞌ ili ve mamuꞌ longoꞌ ikevo Oꞌmosoꞌmo Benizaminiꞌ aꞌvopilemoꞌ zuhoutiꞌ ve ma Kisiꞌ gipele Sauloꞌni do sotoꞌ o-ngedavo Sauloꞌ aza guveꞌinesi ve loloꞌ ogo neivo Kilisimasi foti (40) ogo vineꞌ.
ACT 13:22 Alingeꞌ nene Sauloꞌni do hulo-do Davidiꞌni do sotoꞌ ogo guveꞌinesi ve loloꞌ ogo minelive lo do ngimineꞌ. Idoꞌ ezemuꞌ tiꞌ lo lineꞌ: Naza Zesaiꞌ gipele Davidiꞌ nene neniꞌ voꞌneloꞌ minive minavo ninguvoniꞌ ve. Aza naꞌnise giluvodoꞌ initeꞌ ogo molo oloseive lo lineꞌ.
ACT 13:23 Idoꞌ Oꞌmosoꞌmo Davidiꞌni lo huko-dineꞌ gamazi ma do gihile izo aꞌmine veꞌmi aꞌvopilemoꞌ zuhoutiꞌ ve ma Izesuꞌni nene Isilaeleꞌ aleve do luꞌ izelive minelive lo eleꞌmize molaniꞌ.
ACT 13:24 Idoꞌ Izesuꞌ nene olihe gonoꞌve apiꞌ ogo damivo Zohaneꞌ aza gomuꞌ ogo lo sotoꞌ ogo Isilaeleꞌ alevekizo, lingine lutine di velepeꞌ izi lihimetine huli monoꞌ noso hilalizave lo lo-limineꞌ.
ACT 13:25 Tiꞌ lo lo-lemo gonoꞌve do pelelesa noogo tiꞌ lo lo-ngimineꞌ: Lingine nenikumuꞌ gili Oꞌmosoꞌmo do luꞌ izelive lo imiselelesa live nehe li laaꞌ aniꞌ ma nene oꞌve naza aꞌmine ve ne nomuve. Eze nene alingeꞌ nave. Naza lemo minuvoniꞌ aꞌnemineliꞌmine eze dizo miniveꞌmi gizenelotiꞌ suuꞌve nene ngelo apase hulo-delohe lo lineꞌ.
ACT 13:26 Zogone zuhokizo, Abalahamuꞌ aꞌvopilemoꞌ mate, idoꞌ lingine heta ve mini Oꞌmosomuꞌ golise gili ezela giꞌmizi minaaꞌ naniꞌ nene leze do luꞌ izelive lo mene gamazi lelikumuꞌ ogo hulineꞌ ma ve.
ACT 13:27 Zelusalemi alevesi engiꞌ gizebo veꞌinesi Izesuꞌ monovo ningi gili lamineꞌ ami Oꞌmosoꞌmi gamazi li sotoꞌ igaꞌ ave polohetelite gizikaniꞌ gamazi nene holiseꞌ mukikuꞌ gataaꞌ naniꞌ nesi gili lamineꞌ ami Izesuꞌni gonitoꞌ eleꞌmizi mili helelive laniꞌ neꞌmo aꞌmine gizikaniꞌ gamazi di gihile izaniꞌ.
ACT 13:28 Lihimeꞌve nomivo ingine helelineꞌ neꞌmi monovo ma di sotoꞌ milamaniꞌza hazamuꞌ Pilatoda tiꞌ li laniꞌ: Gaza bililo lanivo amilite bililizave laniꞌ.
ACT 13:29 Neꞌmine igi monoꞌ godolouꞌ neꞌmine i-dilizave li ezemuꞌ gamazi gizi nizaniꞌ maloꞌ nene i-dikevo helavo lohotoꞌ zalotiꞌ apasi di galese izi-daniꞌza
ACT 13:30 Oꞌmosoꞌmo hilave engiꞌ muliseꞌningutiꞌ do ote-dineꞌ.
ACT 13:31 Do ote-davo engita sotoꞌ okaꞌ okaꞌ ivo ezesi makaꞌ nGalilaia misubolatiꞌ duvi Zelusalemi ebekuꞌ vi minave eze ningikaꞌ ningikaꞌ igi nizavo gamene mukiꞌ ineꞌ. Idoꞌ aꞌmine ve nete ningangumuꞌ idisesi eze gamaziꞌve li sotoꞌ igi eveneꞌ li-ngimaaꞌ nave.
ACT 13:32 Li-ngimaaꞌ navo lazasi gamazi lamineꞌ mene lo-lengemo Oꞌmosoꞌmo Izesuꞌni do ote-do avotemotinemuꞌ gamazi lo huko lo-ngidineꞌ nene ngaꞌvopilemoꞌ lelikumuꞌ ogo mo do gihile izaniꞌ ma ve losa nemuꞌ nolo-lingimusive. Do ote-dingumuꞌ nene monoꞌ godolouꞌ Sam naba tu neuꞌ tiꞌ lo gize neineꞌ ma neive:
ACT 13:34 Idise naza geiꞌ maho loloꞌ ogo neniꞌ gipeꞌne geiꞌ nene nane lo do ote-giduvoniꞌ ve. Idoꞌ Izesuꞌni hilingutiꞌ do ote-davo aꞌminguko gohi tineꞌ molo vo gelesamilineꞌ o neive. Nemuꞌ nene Oꞌmosoꞌmo lineꞌ gamazi ma tiꞌ lo gize neive: Eleꞌvoleꞌ gamazi lo Davidiꞌni lo huko lo-duvoniꞌ initeꞌ lamineꞌ nene lehize-lengedelesa nouve.
ACT 13:35 Nemuꞌ ne gamazi gohi ma Davidiꞌ aza Oꞌmosomuꞌ lineꞌ mene tiꞌ lo neive: Luꞌne geita molo gelekeleꞌ o-giduve neze hulo-nedanivo okoꞌne geleso unuvo amoloseive.
ACT 13:36 Davidiꞌnimuꞌ mo gele none. Aza minineꞌ gameneuꞌ Oꞌmosomuꞌ ogo gelekeleꞌ o emo gono gamazi lo-dineꞌ nene do osuꞌ lo helavo avolomotine galese izi-ngidadoꞌ galese izi-dikevo okoꞌno geleso unuvo ineꞌza
ACT 13:37 geleso unuvo amive nene zaho neve. Oꞌmosoꞌmo do ote-dive ma ve.
ACT 13:38 Neze zuhokizo, nemuꞌ lo-lengemeloze. Gili guni i minilo. Aꞌmine veꞌmo akaꞌve do sotoꞌ ineꞌ mamuꞌ nene Oꞌmosoꞌmo lihimetine hulo-lengedelive lo gamaziꞌve nolo-lingimusive. Idoꞌ aꞌmine ve Izesuꞌnimuꞌ gili eleꞌvoleꞌ ilizaniꞌ nene lihimetine mukiꞌ Moseꞌ louꞌ gamazi gizinguꞌ gilite-lengedamilineꞌ o minineꞌ nene Oꞌmosoꞌmo gilite osuꞌ lo-lengedeleseive.
ACT 13:40 Ehe, Oꞌmosoꞌmi gamazi li sotoꞌ igaꞌ ave polohetelite gizaniꞌ gamazi mauꞌ gize neineꞌ nene lengita sotoꞌ ogo gihile izalive lo nolo-lingimusize. Gizebo igi minilo. Oꞌmosoꞌmo lineꞌ gamazi ma tiꞌ lo gize neive:
ACT 13:41 Agae, neniꞌ gonoꞌnemuꞌ nene ha niteꞌ ve li gilaaꞌ nave lingine gililo. Lingine nizaniꞌ gameneuꞌ mene amebe gono dalosuvonako aꞌminemuꞌ nene li ngoloꞌ li li-lingimilizanikisi aꞌminemuꞌ nene ngeli gili eleꞌvoleꞌ amilizaniꞌ nenako nemuꞌ nene lengehelele izivo mini sizaga li hili minilo lo gize neineꞌ ma ve.
ACT 13:42 Pauloꞌ neꞌmine lavoo monoꞌ numungutiꞌ limi nasivo eveneꞌ nete holiseꞌ mauꞌ nene igi idise lasineꞌ initekumuꞌ iheꞌ li-limilisineꞌ nehe li longoꞌ i-ngidaniꞌ.
ACT 13:43 Idoꞌ eveneꞌ monoꞌ numungutiꞌ limi hutileꞌ igi nivi Zuda ve linge masi idoꞌ Zuda veti monokuꞌ vi hilave linge masi eveneꞌ mukiꞌ Paulongi Banabasingi ngeꞌmeti nivavo ingine Oꞌmosoꞌmi mulumo nasahilikuꞌ nene eleꞌvoleꞌ igi minilizave li gaꞌine dasineꞌ.
ACT 13:44 Neꞌmine ikevo holiseꞌ mauꞌ ebeꞌ meꞌninge ngomosiꞌ ma numuda nizavo vaiꞌ goloso Oꞌmosoꞌmi gamazi gililisa aniꞌ.
ACT 13:45 Vaiꞌ goloso ikevo Zuda ve nete eveneꞌ mukiꞌ aniꞌ ningi veꞌine muloloꞌ ingihi Paulongi idoꞌ Banabasingi lukehe naba ngibili Pauloꞌ lineꞌ gamazi nesi ataize li diꞌmi limi-ngidi diviꞌ ledivika li minaniꞌ.
ACT 13:46 Diviꞌ ledivika li minikevo Pauloki Banabasiki gamazi liviꞌ kiseliviꞌ igi tiꞌ li lasineꞌ: Lingine Zuda vemuꞌ gomuꞌ apiꞌ ogo Oꞌmosoꞌmi gamazi lo-lengemeloneꞌ o neivosa lo-lingimuneꞌza lingine aꞌmine gamazi vasa izi hulikenako lingine Oꞌmosoꞌmo minevoꞌ minevoꞌ lengemeni dameni nene oꞌve lo lengemamili initeꞌ igi minaniꞌ nene langise idise di sotoꞌ ikeve. Nemuꞌ nene laza heta atoꞌ vela volosusive.
ACT 13:47 Nemuꞌ nene Guvelesi veꞌmo tiꞌ lo lo leme neineꞌ ve: Gaza nene heta atoꞌ veliti lamu liviꞌine neꞌmine loloꞌ ogo mineline lo geleꞌmize molokuve. Adoꞌ misubo lumola minave nesi lukuvo nalizaniꞌ aka nene geiꞌ ngelebizeline lo geleꞌmize molokuve.
ACT 13:48 Tiꞌ li likesivo heta atoꞌ ve ingine gili muluꞌninguꞌ lamineꞌ gili Oꞌmosoꞌmi gamaziꞌvemuꞌ opoꞌni li sizaga li-daniꞌ. Neꞌmine ikevo minevoꞌ minevoꞌ ngemenisi minilizave lo Oꞌmosoꞌmo gelo do gizekaꞌ ineꞌ aleve ingine gili eleꞌvoleꞌ aniꞌ.
ACT 13:49 Neꞌmine ikevo aꞌmine misubouꞌ nene Guvelesi veꞌmi gamazi neꞌmo buu lo monineꞌ.
ACT 13:50 Buu lo monineꞌza Zuda ve ingine aꞌmine ebekuꞌ veneꞌ ma dizi mini Zuda veti monoꞌ numunguꞌ monoꞌ gili minaniꞌ nesi ve naba minanikisi muluꞌninguꞌ hizikevo Paulongi Banabasingi gobonga li-ngidi numuno ebeꞌningutiꞌ ngimiseli hulikevo vasineꞌ.
ACT 13:51 Vilisa nivi monovoꞌine gililizave li avazaha igi hungoꞌ mili gizeꞌnidotiꞌ uꞌmusupo nene okohoꞌ izi huli Ikonio ebeta vasineꞌ.
ACT 13:52 Nivasivo Izesuꞌ evenele zuho Adiokia ebekuꞌ minaniꞌ ingine Oꞌmosoꞌmi Sikalahuꞌ neꞌmo luꞌninguꞌ gono do neivo muluꞌninguꞌ lamineꞌ gili ngolize izi minaniꞌ.
ACT 14:1 Neꞌmine ikevo Ikonio ebekuꞌ heteli aꞌmineꞌmine igi Zuda veti monoꞌ numunguꞌ dizi monoꞌ lasineꞌ. Neꞌmine lasingumuꞌ eveneꞌ mulise naba Zuda vesi nGiliki aleve netesi gili ngeho laniꞌ.
ACT 14:2 Neꞌmine aniꞌza Zuda ve linge ma ve setalitisi gamazi gili hulave nete aꞌmingutiꞌ ve linge maliti muluꞌninguꞌ hizi guvelesi veꞌmi evenele zuhomuꞌ gili goloso ilizave li gaꞌine daniꞌ.
ACT 14:3 Neꞌmine ikevo nemuꞌ nene Paulokisi Banabasikisi gamene haꞌna aꞌmida ha mini ngehelele izamivo Guvelesi veꞌmo nasahiliꞌ o-ledo do luꞌ izaaꞌ neineꞌ gamazi nene livi kiseliviꞌ igi li-ngimiꞌ ngimiꞌ igi minasineꞌ. Neꞌmine igi nizasivo Guvelesi veꞌmo mangi o-ledo do luꞌ izaaꞌ neineꞌ eveneꞌ gilavo gihile izeleseive lo Guvelesi veꞌmo aꞌmine lasineꞌ gamazi hize eleꞌ ogo amuzo ngemavo ingine osoꞌ amosoꞌ niteꞌ atoꞌ atoꞌ di sotoꞌ asineꞌ.
ACT 14:4 Neꞌmine ikesivo aꞌmine ebeꞌ nabaloꞌ minaniꞌ aleve ingine hoꞌli lingela Zuda vetida giꞌmizekevo lingela nene aposolo setata vi giꞌmizaniꞌ.
ACT 14:5 Neꞌmine ikevo alingeꞌ nene misubo meꞌningesi Zuda vesi idoꞌ engiꞌ gizebo vesi di nubo igi aposolo divi lediviꞌ igi geheni hulo huloꞌ ogo ngebelelone li li hukaniꞌ.
ACT 14:6 Li hukikevo Pauloki Banabasiki aꞌmine gamazi gili golise vi Likaionia ebeꞌ nabauꞌ Lisitila numuda idoꞌ Delebe numuda idoꞌ aꞌmida numuno ngomo ngomo mineꞌmo moninguꞌ nesi vi
ACT 14:7 monoꞌ gamazi lamineꞌ nene li-ngimikaꞌ li-ngimikaꞌ igi moni minasineꞌ.
ACT 14:8 Idoꞌ Lisitila numuda ve ma gizene hela hela gebili do minineꞌ. Idoꞌ aza nene izeleho ganaꞌ gidingutiꞌ gizene goloso o vineꞌ gedavo aka monamo huꞌmo huꞌmo ogo minaaꞌ ineꞌ
ACT 14:9 Neivo Pauloꞌ monoꞌ nolivo nogilivo Pauloꞌ aza gisili hizo vonuꞌ belo ningineꞌ nene aꞌmine ve neꞌmo Oꞌmosomuꞌ gele eleꞌvoleꞌ ogo neivo lamineꞌ ozo lokuvo lamineꞌ ilive lo ningo gilineꞌ.
ACT 14:10 Neꞌmine lo gelo gamazi naba lo tiꞌ lo lo-imineꞌ: Gaza ote pehe lo minezo. Tiꞌ lo lavo upuhoꞌ ogo oto aka mone mone ineꞌ.
ACT 14:11 Neꞌmine ogavo eveneꞌ mukiꞌ nete Pauloꞌ ineꞌ initeꞌ ne ningi engiꞌ Likaionia aleveti gamaziꞌningutiꞌ gamazi naba li tiꞌ li laniꞌ: Oꞌmosolitise eveneꞌ okoꞌine di otuhi lelita limi nizasive li laniꞌ.
ACT 14:12 Banabasiꞌnimuꞌ engiꞌ oꞌmoso niteꞌ maliꞌmi gulive li Zeuseꞌ ve li mili-daniꞌ. Idoꞌ Pauloꞌ aza gamazi gamazi laaꞌ ive mininako leliꞌ Oꞌmoso niteꞌ Helemeꞌ ogaꞌ ineꞌ neꞌmine azasi neive li gulive aꞌmidoꞌ Helemeꞌ ve li mili-daniꞌ.
ACT 14:13 Neꞌmine ikevo ebeꞌ naba neꞌmi velela Zeuseꞌnimuꞌ ve li monoꞌ numuno gizikaniꞌ ma minineꞌ. Aꞌmingutiꞌ Zeuseꞌni mabanuho gizo emaaꞌ ive aza gonolise initeꞌ loloꞌ ogo bulumakaꞌ izeliti luvoꞌninguꞌ molo-ngedo ebeꞌ nabaliꞌmi gatedoꞌ do do vo azasi eveneꞌ mukikisi mabanuho gize ngemelone li nilavo
ACT 14:14 aposolo setaꞌ Pauloki Banabasiki ingine gili upuhoꞌ goloso igi initeꞌ loloꞌ ilizaniꞌ nene goloso niteꞌ ve li eveneꞌ ningi gililisave li geneganaꞌine di boloti lotiꞌ izi vi eveneꞌ mulise nizanguꞌ heteli gekeꞌ li
ACT 14:15 tiꞌ li lasineꞌ: Vekizo, lingine nanitekumuꞌ neꞌmine ilisa nave. Laza nene lingine gidini haza eveneꞌ nosive. Lingine nene oꞌmosotine soza sazaliꞌmine haza niteꞌ nene mehedine ngimi mineꞌmo dizovoꞌ minaaꞌ neineꞌ Oꞌmoso ezela vi giꞌmizilizave lo mene gamazi lamineꞌ nene nolo-lingimusive. Aza aꞌmine Oꞌmoso nene Okulumoꞌ misubo idoꞌ guvo noso idoꞌ mukiꞌ initeꞌ neineꞌ nene do sotoꞌ molaniꞌ ve.
ACT 14:16 Gamene galaꞌmudatiꞌ eveneꞌ linge mukiꞌ ingine aniꞌ amaniꞌ iꞌmi nidizavo gele ngemavo engiꞌ luꞌineꞌmo lidoꞌ aka ato atoꞌ di sotoꞌ miliꞌmi dizaniꞌ.
ACT 14:17 Lamineꞌ nenako aza nene eze monovo ngelebizamo haza minineꞌ nevoba eze monovo ningilizave lo do lamineꞌ o-lengedo Okulumokutiꞌ nene goline gamenesi nosoꞌ niteꞌ vaiꞌ laaꞌ ineꞌ gamenesi lingimivo niviꞌ niviꞌ igi mini muludinguꞌ lamineꞌ gilaaꞌ nave.
ACT 14:18 Neꞌmine lasineꞌza nesi nene eveneꞌ nete mabanuho gizi ngimilisa ha amuzo mili gili minikevo geꞌnebe goloso igi oꞌove li-ngidikesivo gili ngimi mabanuho gizi ngimamaniꞌ ve.
ACT 14:19 Neꞌmine aniꞌza Zuda ve ma Adiokia ebekutikisi idoꞌ Ikonio ebekutikisi igi eveneꞌ mukiꞌ goꞌine izikevo Pauloꞌni geheni huli huliꞌ igi bilikevo helavo mo hilihe li numungutiꞌ geleleheꞌ igi di heta limi siꞌmingala huli-daniꞌ.
ACT 14:20 Huli-daniꞌza Izesuꞌ evenele zuholite igi hize vodo vodo i-dikevo oto vo numuno nabauꞌ dizineꞌ. Dizo ongo goꞌ lavo Banabasikisi Delebe numuno ebekuꞌ vasineꞌ.
ACT 14:21 Vi aꞌmine ebekuꞌ minaniꞌ aleve monoꞌ gamazi lamineꞌ nene li-ngimikesivo eveneꞌ mukiꞌ gili di Izesuꞌ evenele zuho liliꞌ aniꞌ. Neꞌmine ikevo asineꞌ akala tineꞌ mili vi Lisitila ebeta vi Ikonio ebeta vi Adiokia ebeta vi hetelasineꞌ.
ACT 14:22 Nivi Izesuꞌ evenele zuho aꞌmine ebekuꞌ miniꞌmi vaniꞌ nene monokuꞌ amuzo mili minilizave li gaꞌine diꞌmi diꞌmi moni igi luꞌine di amuzo mili-ngidi tiꞌ li li-ngimasineꞌ: Mulumo niteꞌ mukiꞌ sotoꞌ o lemelidoꞌ o neineꞌ nenako aꞌmine mulumo niteꞌ gehelonidotikovoꞌ nene Oꞌmosoꞌmo gizebo o neineꞌ ebekuꞌ moꞌmosite dalosune li li-ngimasineꞌ.
ACT 14:23 Neꞌmine igi Izesuꞌ evenele zuho mulise miliꞌmi monanguꞌ numudoꞌ numudoꞌ eveneꞌ linge ma di kegesi gizebo veꞌine minilizave li ngeleꞌmize miliꞌmi vi monokumuꞌ gili nosoꞌ niteꞌ malise igi Oꞌmosola li Guvelesi vemuꞌ gili eleꞌvoleꞌ ikeze nemuꞌ aza gizebo o-lingidivo li lasineꞌ ve.
ACT 14:24 Neꞌmine igi Pisidia misubo huli vi Pamahilia misubouko hetelasineꞌ.
ACT 14:25 Heteli Pelega ebekuꞌ monoꞌ li-ngimi Atalia ebeta limi vasineꞌ.
ACT 14:26 Limi heteli sipiuꞌ dizi aꞌminguꞌ Adiokia ebeta hetelasineꞌ. Adoꞌ aꞌmine di osuꞌ lasineꞌ monoꞌ gono nene olihe apiꞌ igi dalisa nasivo Izesuꞌ evenele nete Oꞌmosola li aꞌmine gono nidasivo Oꞌmosoꞌmo nasahiliꞌ o-ngedo hize eleꞌ o-ngedo minelive li aꞌmine gonouꞌ ngimiselaniꞌ ebeta igi hetelasineꞌ.
ACT 14:27 Idoꞌ aꞌmidoꞌ igi heteli Izesuꞌ evenele zuho di mulise mili-ngidi Oꞌmosoꞌmo hize eleꞌ o-ngidivo gono dasineꞌ gamazi li-ngimi idoꞌ Oꞌmosoꞌmo akahe siꞌze-ngedavo heta atoꞌ ve ma Izesuꞌnimuꞌ gili eleꞌvoleꞌ aniꞌ nemuꞌ veteteꞌ igi li-ngimi osuꞌ lasineꞌ.
ACT 14:28 Neꞌmine igi Izesuꞌ evenele zuhosi mini gamene haꞌna minasineꞌ ve.
ACT 15:1 Zudaia misuboukotiꞌ ve linge ma ingine Adiokia ebeta limi Izesuꞌ evenele zuho tiꞌ li li-ngimi ngimiꞌ igi minaniꞌ: Lingine Moseꞌ lo huko-lidineꞌ maꞌmine igi Oꞌmosoꞌmi noso mili okodine lolovo huki hulamilizaniꞌ nene Oꞌmosoꞌmo do lunguꞌ izamoloseive.
ACT 15:2 Aꞌmine laniꞌ gamazi nene gili Pauloki Banabasiki aꞌmine vesi gamazi langutiꞌ lovoꞌninguꞌ ogavo lovo lolize naba hizaniꞌ. Neꞌmine ogavo Pauloki Banabasiki idoꞌ engikutiꞌ ve linge masi Zelusalemi numuda duvikevo aꞌmine gamazimuꞌ nene aposolokisi idoꞌ gizebo ve lingesi ingine engiꞌ veꞌningutiꞌ gamazi lilizaniꞌ gililizave li gamazi di hamoꞌ aniꞌ.
ACT 15:3 Gamazi di hamoꞌ igi Izesuda giꞌmizi mulise milaaꞌ aniꞌ aleve ingine ngimiselikevo vaniꞌ. Nivi heta atoꞌ ve luꞌine di velepeꞌ izi Oꞌmosola giꞌmizaniꞌ gamazi nene veteteꞌ igi Hoinikia misuboukisi idoꞌ Samalia misuboukisi li-ngimikevo Izesuꞌ zuho mukilite gili ngolize izi minaniꞌ.
ACT 15:4 Idoꞌ neꞌmine ikevo Paulolesi vi Zelusalemi numuda hetelaniꞌ. Hetelikevo Izesuꞌ evenele mulisesi gizebo veꞌinesi idoꞌ aposolokisi mulise mili lamineꞌ ikeve li-ngidikevo Pauloki Banabasiki ingine Oꞌmosoꞌmo hize eleꞌ o-ngidivo gono dasineꞌ gamazi nene veteteꞌ igi li-ngimasineꞌ.
ACT 15:5 Li-ngimikesivo Halisaioꞌ zuhoutiꞌ eveneꞌ linge ma Izesuda giꞌmizi minavelite oti tiꞌ li laniꞌ: Aꞌmine gono nidasivo heta atoꞌ ve Izesuꞌnimuꞌ gili eleꞌvoleꞌ aniꞌ ingine Oꞌmosoꞌmi noso mili okoꞌine lolovo huki hulilizaniꞌ o neive. Idoꞌ Moseꞌ louꞌ gamazi lo huko-lidineꞌ nene gili dalizave lo lo-ngemeloneꞌ o neive li laniꞌ.
ACT 15:6 Likevo aposolokisi gizebo vesi aꞌmine gamazimuꞌ lo voleloꞌ meloꞌ ogo lolone li di geseꞌ aniꞌ.
ACT 15:7 Di geseꞌ igi li voleloꞌ meloꞌ igi gamazi mukiꞌ likevo Petoloꞌ oto tiꞌ lo lo-ngimineꞌ: Vekizo, lingine neze zuho gililo. Eveneꞌ heta atoꞌ ve Izesuꞌ gamazi lamineꞌ mene neniꞌ veꞌnetiꞌ gilii gili eleꞌvoleꞌ ilizave lo leliꞌ vovotetiꞌ Oꞌmosoꞌmo gozopoꞌ gamene galaꞌmudatiꞌ vomine lingine zuho neniꞌ neleꞌmize molaniꞌ nene mo gili nizave.
ACT 15:8 Neꞌmine ogavo Oꞌmoso luteuꞌ ningaaꞌ iveꞌmo Zuda ve leliꞌ eze Sikalahuꞌ limineꞌ maꞌmino heta atoꞌ ve nongemo ninge goloso o-ngedamaaꞌ ineꞌ monovo nene lelebizineꞌ.
ACT 15:9 Ingine aka atotoꞌ ngeleꞌmize molamo aꞌmine aꞌmine do hamoꞌ o-ledo heta atoꞌ ve inginesi ezemuꞌ gili eleꞌvoleꞌ ikevo engiꞌ luꞌninguꞌ goloso o minineꞌ nesi gilite-ngidineꞌ ma neive.
ACT 15:10 Okoꞌine lolovo huki huli Moseꞌ lo huko lineꞌ gamazi mukiꞌ gili dalizave ingine genivesi gono naba daaꞌ nave. Aꞌmine gonoliꞌmo avotemotine ngivize vivo lezesi livize vineꞌ ve. Nemuꞌ nene lingine Oꞌmosoꞌmo lamidoꞌ ivileꞌ igi aꞌmine genivesi gono nene heta atoꞌ ve Izesuꞌ evenele zuho liliꞌ aniꞌ engiꞌ ngimi Oꞌmoso golo izilisa nilahe.
ACT 15:11 Neꞌmine amolone. Laza tiꞌ lo gelaaꞌ nouneꞌ ma neive. Ezemuꞌ ha gele eleꞌvoleꞌ uneꞌ nemuꞌ Guvelesi ve Izesuꞌ aza nasahiliꞌ o-ledo do luꞌ izineꞌ aꞌmineꞌmine ogo heta atoꞌ vesi ezemuꞌ gili eleꞌvoleꞌ ikevo nasahiliꞌ o ngemo do nguꞌ izeleseive.
ACT 15:12 Petoloꞌ aza tiꞌ lo lavo eveneꞌ mukiꞌ ingine lolize gani lami veꞌine bizi mini Pauloki Banabasiki ingine heta atoꞌ vetida vi gono dasinguꞌ nene Oꞌmosoꞌmo engikisi gono nodo amuzo ngemavo osoꞌ amosoꞌ niteꞌ ato atoꞌ di sotoꞌ asingumuꞌ nene veteteꞌ igi nilasivo gili minaniꞌ.
ACT 15:13 Li-ngimi osuꞌ likesivo Zakoboꞌ tiꞌ lo lo-ngimineꞌ: Vekizo, neze zuho mate, gamazi ma loloze. Gililo.
ACT 15:14 Oꞌmosoꞌmo heta atoꞌ ve engikumuꞌ gelo lulo otavo eze zuho liliꞌ ilizave lo aka vele-ngedo linge ma ngeleꞌmize kegesineꞌ gamazi nene Simeoniꞌ veteteꞌ ogo lo-lemavo gelekuneꞌ ma neive.
ACT 15:15 Aꞌmine gamazisi idoꞌ Oꞌmosoꞌmi gamazi li sotoꞌ igaꞌ ave polohete nete gizi mili nizaniꞌ gamazi nesi nene vo miliseꞌ o neive. Idoꞌ polohete malite Oꞌmosoꞌmo lineꞌ gamazi gizaniꞌ ma tiꞌ lo neive:
ACT 15:16 Guvelesi ve adoꞌ gono dalineꞌ monovo nene gozopoꞌ akaꞌmilatiꞌ lo sotoꞌ iveꞌmo tiꞌ lo nolive: Naza nene tineꞌ molo ogo guvelesi ve Davidiꞌ evenele zuho ingine numuno gazaꞌ hulupo elo lemo onganiꞌ neꞌmine igi limi ingi minaniꞌ nene gohi do ote-ngedelesuve. Ee, aꞌmine numuno gazaꞌ zupoꞌ o minineꞌ nene nguꞌvoso gohi gizo do gosohoꞌ olosuve. Idoꞌ neꞌmine olodotiꞌ nene eveneꞌ gohi lumo minaniꞌ nete adoꞌ neniꞌ ve lo lo-ngiduvoniꞌ heta atoꞌ ve mukiꞌ nete Guvelesi ve nenita igi giꞌmizilizaniꞌ aka ma viseꞌ ilisave lo lineꞌ.
ACT 15:19 Tiꞌ li gizi nizaniꞌ nenako naza tiꞌ lo nogiluve. Heta vetidatiꞌ luꞌine di velepeꞌ izi Oꞌmosola nave ingine geniꞌvesi gono ngemamolone.
ACT 15:20 nGemamoloneꞌza avazaha oꞌmoso niteliti nosoꞌ nitekutiꞌ nene namii veneꞌ vemohoꞌ gopo ingamii ize gulo nalaꞌ i-ngidangutiꞌ namii ize guloliti vaniseꞌine namii malise igi kekeize li minilizave lo luhuvo niteꞌ gizelone lo nogiluve.
ACT 15:21 Neꞌmine okunivo Moseꞌ lo huko lineꞌ gamazi linge ma minineꞌ nene vo halekalive losa nolabe. Nene vo halekamoloseive. Gozopoꞌ galaꞌmudatiꞌ avotemote aniꞌ amaniꞌ igi leze Zuda veti monoꞌ numude miniꞌmi monanguꞌ holiseꞌ gameneuꞌ gameneuꞌ nene Moseꞌ lo huko lineꞌ gamazi gati limaaꞌ nanako ngelo vo halekamoloseive.
ACT 15:22 Neꞌmine lavo gili aposolosi gizebo vesi idoꞌ Izesuꞌ evenele mukikisi tiꞌ li laniꞌ: Laza lelikutiꞌ eveneꞌ sitaꞌ do kegese-ngedo ngimiselekunivo Paulole Banabasilesi makaꞌ Adiokia ebeta vilizave. Neꞌmine li Zudaꞌ adoꞌ gulive gohi ma Balasabaꞌ ve lo minineꞌ nesi idoꞌ Silasiꞌnisi nene di kegesi-ngidaniꞌ. Aꞌmine ve sitaꞌ ingine Izesuꞌ zuholiti vovoꞌninguꞌ ve naba gidini minasineꞌ.
ACT 15:23 Ne di kegesi-ngidi luhuvo tiꞌ li gizi aꞌninguꞌ ngimi ngimiselaniꞌ: Lengiꞌ zuho aposolosi gizebo vesi laza lingine heta atoꞌ ve leliꞌ zuho Adiokia ebekukisi idoꞌ Silia misuboukisi idoꞌ Kilikia misuboukisi nizave lengikumuꞌ isetine ve lo luhuvo niteꞌ mene gizo nolingimune.
ACT 15:24 Laza lamunidoꞌ melatiꞌ ve linge ma lengita vi gamazi li-lingimi lengeleꞌmize gopo ikevo gili gopo aniꞌ. Neꞌmine ikevo laza gelo
ACT 15:25 mulise molo ve setaꞌ do kegeso lute ngeme nonive Banabasiki Pauloki engikisi ngimiselekunivo nesene makaꞌ nivave. Aꞌmine ve ingine Guvetesi ve Izesuꞌ Kilisitoꞌnimuꞌ gilii ngibililizangumuꞌ okoꞌine hukamivo eze gono nene gopo diꞌmi vasineꞌ.
ACT 15:27 Nemuꞌ nene Zudangi Silasingi ngimiselekunivo ingine veꞌningutiꞌ aꞌmine gamazi nene li-lingimikevo gililisave.
ACT 15:28 Oꞌmosoꞌmi Sikalahuliꞌmo aza tiꞌ lo lavo lazasi aꞌmidoꞌ ve lo nolo hukune: Gono geniꞌvesi ma lengemamolosune. Aꞌne lo-lengemeloneꞌ gamazi nene lingine gili dalizadoꞌ o neivosa ha gili dalizaha Moseꞌ louꞌ gamazi vaitoꞌ gili dalizave lo genivesi gono gohi ma gehe-lengedamolosune.
ACT 15:29 Lingine avazaha oꞌmoso initeliꞌmi nosoꞌ niteꞌ vataꞌ ilizangutiꞌ namilo. Idoꞌ nalaꞌ i-ngidiliza ize gulotiꞌ namilo. Idoꞌ ize guloliti vaniseꞌine namilo. Idoꞌ veneꞌ vemohoꞌ gopo ingamilo. Neꞌmine initeꞌ mehedine imi malise gehepeve ilizaniꞌ nene vevesi minilisave. Lamineꞌ ve. Moda ve.
ACT 15:30 Luhuvo niteꞌ tiꞌ li gizi ngimi di aka i-ngidikevo vaniꞌ. Vi Adiokia ebekuꞌ heteli Izesuꞌ evenele zuho mukiꞌ di mulise mili-ngidi luhuvo niteꞌ ngimaniꞌ.
ACT 15:31 nGimikevo gati gili luhuvo gizaniꞌ gamazi neꞌmo do ngi lo-ngedavo ngolize izi minaniꞌ.
ACT 15:32 Neꞌmine ikevo Zudaki Silasiki ingine Oꞌmosoꞌmi gamazi li sotoꞌ igaꞌ asive polohete minasineꞌ nenako gamazi mukiꞌ li ngeleꞌmize hongu li di ngi li-ngidasineꞌ.
ACT 15:33 Neꞌmine igi inginesi minetiꞌ niigi ngimiselavela tineꞌ mili vilisa nasivo Izesuꞌ zuho ingine lingine muludinguꞌ hongu lo minivo vilizo li meseꞌ aseka li-ngidi di aka i-ngidaniꞌ.
ACT 15:35 Idoꞌ Pauloki Banabasiki ingine Adiokia ebekuꞌ mini inginesi ve lingesi Guvelesi veꞌmi gamazi li sotoꞌ igi apizi ngimi ngimiꞌ igi minaniꞌ ve.
ACT 15:36 Gamene ma ogo novivo Pauloꞌ aza Banabasiꞌni tiꞌ lo lo-imineꞌ: Laza vo Guvelesi veꞌmi gamazi lo sotoꞌ o ngemaaꞌ usineꞌ numudoꞌ numudoꞌ leze zuho sotoꞌ aniꞌ ingine nadiꞌ nadiꞌ igi nizahe nemuꞌ vo ninge-ngedelesive.
ACT 15:37 Tiꞌ lo lavo Banabasiꞌ aza Zohaneꞌ adoꞌ gulive ma Malekoꞌ ve lo minineꞌ nesi eleꞌmizo volosive lo lineꞌza
ACT 15:38 Malekoꞌ gomuꞌ ogo Pamahilia misubouꞌ heteli gono aꞌmidoꞌ apiꞌ igi dalisa navo damolove lo-ngedo tineꞌ molo aniꞌ nenako Pauloꞌ aza aꞌneꞌmine ve eleꞌmizo voloneꞌ amive lo gele mino oꞌve lineꞌ.
ACT 15:39 Pauloꞌ aza Malekoꞌ vamilive lavo nemuꞌ nene Banabasikisi lovo lolize naba asineꞌ. Idoꞌ neꞌmine asidotiꞌ nene gohi makatoꞌ monamilisineꞌ ogavo mine eze ema asineꞌ. Adoꞌ Banabasiꞌ aza nene Malekoꞌni eleꞌmizo vo sipiuꞌ dizi vi golo gohiloꞌ Kipilo ailaniuꞌ vasineꞌ.
ACT 15:40 Pauloꞌ aza Silasiꞌni do kegese-davo Izesuꞌ zuho ingine Guvelesi veꞌmo nasahiliꞌ o-ngedelive li Oꞌmosola likevo vasineꞌ.
ACT 15:41 Vi Silia misubouko idoꞌ Kilikia misubouko heteli Izesuꞌ evenele zuho mulise miliꞌmi monadaa moni monokuꞌ di amuzo mili-ngidiꞌmi vasineꞌ ve.
ACT 16:1 Pauloki Silasiki ingine Delebe ebeta vi Lisitila ebeta hetelasineꞌ. Idoꞌ Izesuꞌ evenele zuho aꞌmida minangutiꞌ ve ma minineꞌ nene gulive Timoteoꞌ. Aꞌmine veliꞌmi izeleho nene Zuda veneꞌ mino Izesuda giꞌmizo minineꞌ idoꞌ meleho nene nGiliki ve minineꞌ.
ACT 16:2 Izesuꞌ zuho Lisitila ebekuꞌ idoꞌ Ikonio ebekuꞌ minave ingine Timoteoꞌnimuꞌ gamangi mili-daaꞌ aniꞌ.
ACT 16:3 Aꞌmine ve nene Pauloꞌ aza eleꞌmizo volosa giliha aꞌmine ebeta Zuda ve mukiꞌ minaniꞌ nete meleho nene nGiliki misuboukotiꞌ ve minineꞌ nene gili osuꞌ li minaniꞌ nenako aza nene lukehe ikelizave lo Timoteoꞌni eleꞌmizo vo Oꞌmosoꞌmi noso molo-do okoꞌno lolovo huko hulo-dineꞌ.
ACT 16:4 Neꞌmine ogo numudoꞌ namadoꞌ vi aposolokisi gizebo vesi ingine Zelusalemi ebeta li hukaniꞌ gamazi nene gili dalizave li li-ngidiꞌmi li-ngidiꞌmi vaniꞌ.
ACT 16:5 Neꞌmine igi gono dikevo Izesuꞌ evenele zuho ingine monokumuꞌ gili eleꞌvoleꞌ aniꞌ neꞌmo amuzo molavo gamene gamene vi kilikaꞌ kilikaꞌ avo mukiꞌ hizi hutileꞌ aniꞌ.
ACT 16:6 Neꞌmine ikevo Asia misuboukosi monoꞌ li-ngimamilizave lo Oꞌmosoꞌmi Sikalahuliꞌmo aka hize tile-ngedavo Piligia misuboukosi idoꞌ Galatia misuboukosi monoꞌ gamazi lamineꞌ li-ngimiꞌ ngimiꞌ iꞌmi vaniꞌ.
ACT 16:7 Vi Misia misubo gahevela igi Bitinia misubouko volone likevo Izesuꞌ Sikalahuliꞌmo aꞌmineꞌmino gele ngemamivo
ACT 16:8 Misia misubo ivileꞌ igi lomi vi Toloasi ebeta hetelaniꞌ.
ACT 16:9 Hetelikevo me luhuvo gizuve nazasi makatoꞌ minune. Minuninguꞌ holukaꞌ Pauloꞌ vamuꞌ tiꞌ lo ningive: Makedonia ve maliꞌmo ote mino amuzonga lo tiꞌ lo lineꞌ: Gaza Makedonia misubouko ogo do luꞌ izezo.
ACT 16:10 Aza vamuꞌ neꞌmino ningavo nemuꞌ Oꞌmoso aza Makedonia misubouko vi monoꞌ gamazi lamineꞌ nene li-ngimilizave lo lo-limineꞌ nene ningo gelo aꞌmida voloneꞌ akamuꞌ viseꞌ une.
ACT 16:11 Neꞌmine ogo sipi do sotoꞌ molo aꞌminguꞌ dizo Toloasi ebeꞌ hulo lisiheꞌ ogo vo guvo noso huko guvo noso olusoꞌ ailani ma minidoꞌ Samotalaka neloꞌ vo hetelune. Hetelo ongo goꞌ lavo guvo noso hukoꞌmo vo Neapoli ebeta hetelune.
ACT 16:12 Neloꞌ Sipiutiꞌ lemo vo Hilipi ebetoꞌ hetelune. Aꞌmine numuno ebeꞌ nene Makedonia misubo nene izeꞌ milangutiꞌ guvelesi misubo dizo minineꞌ ve languꞌ nene minineꞌ. Idoꞌ Loma ve ingine igi aꞌmine ebeꞌ meꞌninge liliꞌ igi gizebo aniꞌ. Aꞌmine ebekuꞌ nomonunivo gamene ma ogo vineꞌ.
ACT 16:13 Ogo vavo holiseꞌ gamene alitavo aꞌmine veliti gesi mingutiꞌ leme heta ogo noso gahevela nene Oꞌmosola laaꞌ aniꞌ ebeꞌ nolihe lo gelo lemo vune. Aꞌmidoꞌ nene veneꞌ ma di geseꞌ igi nizavo ningo laza misuboloꞌ lemo mitoꞌ mino monoꞌ lo-ngimuneꞌ.
ACT 16:14 Lo-ngemekunivo engikutiꞌ Oꞌmosomuꞌ gele eleꞌvoleꞌ ineꞌ veneꞌ ma gulive Lidiaꞌ minineꞌ. Aza Tiatila ebekutiꞌ veneꞌ mino gumi kala pepoli live laaꞌ naniꞌ lavolavo neꞌmine maketi molavo meni hizaaꞌ aniꞌ. Aza Pauloꞌ lineꞌ gamazi nogilivo Guvelesi veꞌmo lulo do ngoloꞌ lo-davo Pauloꞌ lineꞌ gamazi nene gele daniꞌ.
ACT 16:15 Gele do azasi idoꞌ eiꞌ numunguꞌ makaꞌ ingaaꞌ aniꞌ alevesi monoꞌ noso hili aza tiꞌ lo lo-limineꞌ: Lingine neze ningavo Guvelesi vela lamineꞌ mine molokuvo ma lingine neniꞌ numunguꞌ dizi miniviꞌ diviꞌ ilizave lo amuzonga lavo gele emo dizuneꞌ ve.
ACT 16:16 Gamene ma Oꞌmosola laaꞌ aniꞌ ebeta nolimunivo gelekeleꞌ alu ma neivo aꞌminesi voteneꞌ une. Aꞌmine aluꞌmi lulouꞌ nene sikalahuꞌ goloso minavo alingeꞌ sotoꞌ o-ngedelineꞌ initekumuꞌ lo sotoꞌ ogo eveneꞌ lo-ngemaaꞌ ineꞌ nemuꞌ eze gizebo i-daaꞌ ave meni ngimikevo aꞌmidotiꞌ moni naba daaꞌ aniꞌ.
ACT 16:17 Aꞌmine alusi voteneꞌ ogo Pauloꞌnisi lezesi leꞌmeto noogo asi lo tiꞌ lo lineꞌ: Ve mene Oꞌmoso dize miniveꞌmi gelekeleꞌ izipahala mini Oꞌmosoꞌmo do lunguꞌ izelineꞌ aka ma li sotoꞌ igi li-lingimaaꞌ nave.
ACT 16:18 Aꞌmine gamazi nene gamene gamene asi lo laaꞌ ivo nemuꞌ Pauloꞌ goseleꞌ belavo velepeꞌ izo sikalahuꞌ goloso nene tiꞌ lo lo-dineꞌ: Izesuꞌ Kilisitoꞌ velemuꞌ ogo nolo-gimuve. Sikalahuꞌ goloso gaza alungo hulo-do dizo ogo vozo. Tiꞌ lo nolivo nolineꞌ velesi geto dizo ogo vineꞌ.
ACT 16:19 Neꞌmine ogavo aꞌmine alu gizebo i-di minave ingine eze gonolotiꞌ meni daaꞌ ilizaniꞌ akaꞌine nene tilavo ningi gili nemuꞌ Paulongi Silasingi aꞌnidoꞌ di geleleheꞌ maleleheꞌ igi di vi mulise ebeꞌ nabala zasi nabaliti moꞌmosiꞌnida ngeleꞌmizi vaniꞌ.
ACT 16:20 Zasila ngeleꞌmizi mili goniꞌ nii-ngidi tiꞌ li laniꞌ: Ve setaꞌ mene Zuda ve nizasive. Ingine leze mene ebekuꞌ aleve di gopo nii-lidasivo ningo do une.
ACT 16:21 Ingine monovo gohi atokumuꞌ dalizave li gate di li sotoꞌ i limikesivo aꞌmine monovo gele do eꞌmeteloneꞌ nene leze Loma veti louꞌ gamazite avutoꞌ oloneꞌ ogavosa ngeleꞌmizo noune.
ACT 16:22 Neꞌmine likevo mulise mili minavetesi lovo gamazi li-ngimikevo geneganaꞌine diviꞌ bolotiviꞌ igi huli ngibililizave li zasilite likevo neꞌmine aniꞌ.
ACT 16:23 Vauve ili iziviꞌ itiviꞌ igi ngibili nalaꞌ numunguꞌ huli-ngidi nalaꞌ numudoꞌ gizebo ve lamino gizebo ilive li li-daniꞌ.
ACT 16:24 Neꞌmine li-dikevo gelo nemuꞌ nene ngeleꞌmizo nalaꞌ numunguꞌ lulo olusoꞌ gehepeveuꞌ hulo-ngedo gizeꞌine za lulouꞌ lolosoꞌ ogo hulo ngimikivo minasineꞌ nene hanigati neꞌmine loloꞌ ogo neꞌmine o-ngidineꞌ.
ACT 16:25 Holukaꞌ ongo velepetoꞌ Pauloki Silasiki ingine Oꞌmosola li opoꞌni li monoꞌ nama li nizasivo nalatoꞌ ve lingelite aꞌminemuꞌ lubamu nigilavo
ACT 16:26 mimiꞌ naba liteꞌ lo ogavo nalaꞌ numuno nene mukiꞌ do moꞌmongoꞌ ineꞌ. Neꞌmine ogavo gete geto nalaꞌ numunguꞌ akahe mukiꞌ siꞌzo osuꞌ lavo nalatoꞌ veti aꞌnidoꞌ seni nalaꞌ daniꞌ nene apase osuꞌ lineꞌ.
ACT 16:27 Neꞌmine ogavo nalaꞌ numudoꞌ gizebo ve okisetiꞌ oto ningineꞌ nene nalaꞌ numunguꞌ akahe mukiꞌ siꞌze osuꞌ lo neineꞌ neivo ningo nalatoꞌ ve mukiꞌ limi vi haha ahe lo eiꞌ do minineꞌ bainati miteꞌ nene geleleheꞌ ogo asiꞌve okoꞌno bele helelesa neivo
ACT 16:28 Pauloꞌ aza amuzo molo asi lo lineꞌ: Gasika okonga do goloso amozo. Laza mukiꞌ meuko haza nonge lo lineꞌ.
ACT 16:29 Lavo gizebo ve aza livikumuꞌ lavo imikevo nizasida lotiꞌ izo dizo vo luvo luvo noizo engikumuꞌ lamineꞌ gilineꞌ nenako nemuꞌ Paulongi Silasingi gizeꞌninguꞌ lemo pouꞌ lo ongo
ACT 16:30 ngeleꞌmizo heta ogo tiꞌ lo longoꞌ o-ngidineꞌ: Ve naba matise, naza nadiꞌ ogosa lukuvo nalove.
ACT 16:31 Longoꞌ o-ngedavo ingine tiꞌ li lasineꞌ: Guvetesi ve Izesu Kilisitoꞌnimuꞌ gele eleꞌvoleꞌ ilineꞌ gezesi makaꞌ nizavesi do lunguꞌ izeleseive.
ACT 16:32 Neꞌmine li Guvelesi veꞌmi gamazi nene aꞌminguꞌ minaniꞌ alevesi ezesi li-ngimasineꞌ.
ACT 16:33 Li-ngimikesivo nalaꞌ numudoꞌ gizebo ve aza aꞌmine holukaꞌ mo aꞌmine gameneloꞌ gehepeve ngeleꞌmizo do vo gavoso ngibiladoꞌ nene noso izo do hongu lo-ngidineꞌ. Neꞌmine o-ngedavo aꞌmidoꞌ geti azasi idoꞌ eze zuhosi monoꞌ noso hilaniꞌ.
ACT 16:34 Neꞌmine ikevo azasi eze zuhosi Oꞌmosomuꞌ gili eleꞌvoleꞌ aniꞌ nemuꞌ ngolize izi minaniꞌ.
ACT 16:35 Ingi goꞌ lavo zasi ingine tiꞌ li li pilisi ve ngimiselaniꞌ: Ve setaꞌ ma kuluhizi-ngidilo.
ACT 16:36 Likevo nalaꞌ numudoꞌ gizebo ve gelo Pauloꞌni veteteꞌ ogo lo-emo tiꞌ lo lineꞌ: Naza kuluhize-lengedekuvo vilisive li zasilite gamazi hulikevo nenita naze. Nemuꞌ lingine muludinguꞌ hongu lo minivo vilisasive.
ACT 16:37 Lavo Pauloꞌ aza pilisi ve tiꞌ lo lo-ngimineꞌ: Laza nene Loma ve lengiꞌ muliseutiꞌ nosineꞌza Loma ve i-ngidisaꞌmaniꞌ initeꞌ ma i-lidi goniꞌ i-lidilisa gilaniꞌ nene leze monovo viseꞌ igi lihimete di sotoꞌ mili lami haza eveneꞌ mukiliti veꞌnidoꞌ gavoso libili nalaꞌ numunguꞌ huli-lidaniꞌ ma nemuꞌ nene sunoꞌ limiselilisa nilahe. Neꞌmino nomive. Angiseꞌine igi leleꞌmize heta ikevo volosineꞌ o neive.
ACT 16:38 Lavo pilisi ve ingine vi aꞌmine gamazi zasi li-ngimikevo ve setaꞌ ingine Loma veti muliseutiꞌ gidaniꞌ minasineꞌ nene gili upuhoꞌ igi golise gilaniꞌ.
ACT 16:39 Upuhoꞌ igi vi ve setakumuꞌ agae li isetine ve li di hongu li-ngidi ngeleꞌmizi di hetoꞌ i-ngidi numuno ebeꞌine huli vilisive li zou li ngimiselaniꞌ.
ACT 16:40 nGimiselikevo ingine nalaꞌ numungutiꞌ limi heta igi Lidiaꞌ numuꞌveuꞌ vi Izesuꞌ zuho ningi monoꞌ li-ngimi di amuzo mili-ngidi vasineꞌ ve.
ACT 17:1 Hilipi ebeꞌ huli vi Amihipoli ebekisi Apolonia ebekisi ivileꞌ igi Tesalonika ebekuꞌ hetelasineꞌ. Aꞌmine ebekuꞌ nene Zuda veti monoꞌ numuno ma minineꞌ.
ACT 17:2 Neivo Pauloꞌ aza ogaꞌ idiꞌmine ogo holiseꞌ gameneuꞌ mulise milanguꞌ dizekaꞌ dizekaꞌ ogo minineꞌ. Gamene setohamo dizo mino inginesi monoꞌ godoloutiꞌ gati li gili ha gili aniꞌ.
ACT 17:3 Neꞌmine igi monoꞌ luhuvo gizaniꞌ linge ma neꞌmi monovo lo-ngemo tiꞌ lo lineꞌ: Oꞌmosoꞌmo do luꞌ izelive lo imiselelesa live nene helo gohi kululuꞌ izo oteleseive li monokuꞌ gizi mili nizaniꞌ ma neive. Idoꞌ ezemuꞌ nolo-lingimuve nene guliveꞌve Izesuꞌ aza do luꞌ izelive lo imiselelesa live nene neive.
ACT 17:4 Tiꞌ lo lavo Zuda ve linge malite aꞌmine gamazi gilaniꞌ nene gihile ogavo Paulongi Silasingi ngeꞌmetaniꞌ. Idoꞌ nGiliki ve ingine Oꞌmoso opoꞌni li gelekeleꞌ i-di minaaꞌ ave mukiꞌ inginesi idoꞌ veneꞌ dizi minaniꞌ mukikisi ngeꞌmetaniꞌ.
ACT 17:5 Neꞌmine ikevo nemuꞌ Zuda ve nete Paulongi Silasingi lukehe ngibili ve goloso maketi ebekuꞌ gopo minaaꞌ aveutiꞌ ma ngeleꞌmizi di mulise mili-ngidi aꞌmine ebekuꞌ aleve mukiꞌ muluꞌninguꞌ hizii vi Zasoniꞌ numuꞌve di vodo vodo igi mini aꞌmingutiꞌ Paulongi Silasingi ngeleꞌmizo eveneꞌ mukiliti veꞌnidoꞌ do sotoꞌ molalone li eze akaheꞌve iziviꞌ apasiviꞌ aniꞌ.
ACT 17:6 Ve setaꞌ ingine numunguꞌ nizamasivo ningami Zasoniꞌnisi Izesuꞌ evenele linge masi aꞌnidoꞌ di geleleheꞌ igi ebetoꞌ gizebo igi goniꞌ gilaaꞌ avela ngeleꞌmizi igi eleꞌvoleka li tiꞌ li laniꞌ: Ve setaꞌ mene numudoꞌ namadoꞌ ve di gopo i-ngidaaꞌ asive ma mela hetelikesivo
ACT 17:7 Zasoniꞌ aza eiꞌ numuꞌveuko ngeleꞌmize molave. Idoꞌ ingine guvetesi ve naba Loma ebekuꞌ minive Kaesaleꞌ gamaziꞌve ma avutoꞌ igi Guvelesi ve gosohoꞌ ma Izesuꞌ sotoꞌ ogave li laaꞌ nasive.
ACT 17:8 Neꞌmine li goꞌine izikevo eveneꞌ mukikisi goniꞌ gilaaꞌ avesi upuhoꞌ igi gamazi gopoꞌ napa vaiꞌ laniꞌ ve.
ACT 17:9 Neꞌmine igi goniꞌ gilaaꞌ ave ingine Zasoningisi idoꞌ eze zuho lingesi tiꞌ li li-ngimaniꞌ: Pauloki Silasiki vilisive li okoꞌine meni hizilo. Likevo moni ngimikevo ngimiseli hulaniꞌ.
ACT 17:10 Neꞌmine ikevo aꞌmine gameneuꞌ holukaꞌ Izesuꞌ evenele zuho nete Paulongi Silasingi geti ngimiseli hulikevo Belia numuda vasineꞌ. Aꞌmida vi heteli Zuda veti monoꞌ numunguꞌ dizi Izesuꞌ gamazi veteteꞌ igi li-ngimasineꞌ.
ACT 17:11 Li-ngimikesivo aꞌmine ebekuko Zuda ve ingine Tesalonika ebekuko minaniꞌ neꞌmine minami luꞌine laminekisi ve hongu ve mini ngivileꞌ igi mini voꞌine ngilingili ivo monoꞌ gamazi gili Pauloki Silasiki lasineꞌ gamazi nene lamineꞌ nehe soza nehe li gamene gamene monoꞌ godoloutiꞌ monoꞌ monovomuꞌ gizeꞌnekaꞌ hizi minaniꞌ.
ACT 17:12 Neꞌmine igi engikutiꞌ eveneꞌ mukikisi idoꞌ nGiliki veneꞌ dizi minanikisi idoꞌ vemohokisi ingine Izesuꞌnimuꞌ gili eleꞌvoleꞌ aniꞌ.
ACT 17:13 Neꞌmine ikevo Pauloꞌ nene Belia ebekukisi Oꞌmosoꞌmi gamazi lo hutileꞌ ineꞌ nene Tesalonika ebekuꞌ minaniꞌ Zuda ve ingine gili Belia ebeta igi eveneꞌ mukiꞌ nene goꞌine izi lovo hizilizangumuꞌ muluꞌninguꞌ hizi laniꞌ.
ACT 17:14 Neꞌmine ikevo Izesuꞌ zuho Pauloꞌni di aka i-dikevo aꞌmine ebeꞌ hulo guvo noso gahevela vo hetelineꞌza Silasiki Timoteoki ingine Belia ebekuꞌ minasineꞌ.
ACT 17:15 Nizasivo eveneꞌ nete Pauloꞌni eleꞌmizi vi Atena ebeta huli-daniꞌ. Huli-di vi Pauloꞌ lineꞌ gamazi nene Silasingi idoꞌ Timoteongi tiꞌ li li-ngimaniꞌ: Lengikumuꞌ moda liteꞌ li alizo nolive.
ACT 17:16 Neꞌmine ikevo Pauloꞌ aza Atena ebeta gizebo mino avazaha oꞌmoso niteꞌ vanu hizi minikevo ningo mulunouꞌ oloꞌ lineꞌ.
ACT 17:17 Mulunouꞌ oloꞌ lavo Zuda veti monoꞌ numunguꞌ dizo Zuda vesi idoꞌ heta atoꞌ ve Oꞌmoso opoꞌni li gelekeleꞌ i-di minaaꞌ ave nesi aꞌmine mulunouꞌ oloꞌ lineꞌ initekumuꞌ nene li voleloꞌ meloꞌ igaꞌ aniꞌ. Neꞌmine igi gamene gamene do geseꞌ ebetoꞌ eveneꞌ mukiꞌ igi di geseꞌ adoꞌ nesi aꞌmineꞌmino monoꞌ gamazi lo-ngimineꞌ.
ACT 17:18 Neꞌmine ogavo aꞌmine ebekuꞌ eveneꞌ ma minangutiꞌ malite Epikuloꞌ monoꞌ gilaaꞌ aniꞌ. Idoꞌ malite nene Sitoiki aleveti monoꞌ gilaaꞌ aniꞌ. Aꞌmine aleve Paulolesi gamazi di velepeꞌ alepeꞌ izi li linge malite Paulongumuꞌ tiꞌ li laniꞌ: Hokolizeꞌ ve mene gamazi gihileꞌve nominekovoꞌ gohi lilineꞌ nenako nadi ve lo lo-lemelesa neive li likevo malite tiꞌ li laniꞌ: Aza neve atoꞌ aleveti oꞌmosoꞌineliti monovomuꞌ nolineꞌ gelave. Neꞌmine laniꞌ nene Pauloꞌ aza Izesuꞌnimukisi idoꞌ hele noloningutiꞌ otakumukisi lo sotoꞌ o ngimingumuꞌ nene neꞌmine laniꞌ.
ACT 17:19 Neꞌmine li analoꞌ di Aleopago gololoꞌ kanisole nizada eleꞌmizi igi tiꞌ li laniꞌ: Gaza gelamuneꞌ gamazi gosohoꞌ eveneꞌ mukiꞌ lo-ngemeꞌmo monaaꞌ naineꞌ ma idiꞌnise nene lo-lemanivo gelelobo.
ACT 17:20 Laza geiꞌ laineꞌ gamazi nene giluneꞌ atoliꞌmine oganako nemuꞌ neꞌmi monovo nado nehe. Lanivo gelelone li laniꞌ.
ACT 17:21 Neꞌmine li Atena alevesi idoꞌ engiꞌ vovoꞌninguꞌ venenga ve minanikisi ingine mukiꞌ nete gamene gamene initeꞌ malokisi luꞌine milami gamazi gosohoꞌ gamazimuꞌ nene li gili ha gili igi aꞌminemukovoꞌ gili minaaꞌ aniꞌ.
ACT 17:22 Neꞌmine likevo Pauloꞌ aza Aleopago gololoꞌ minaniꞌ kanisoleti veꞌnidoꞌ ogo oto tiꞌ lo lineꞌ: Lingine Atena vekizo, gililo. Lingine monotinemuꞌ gili ngilingili goloso igaꞌ navo noninguve.
ACT 17:23 Naza numudida ogo vogo noogo oꞌmoso initetine ato atoꞌ ningaaꞌ uvonguꞌ initeꞌ hamoꞌ ma ninguvoniꞌ nene mabanuho gizaaꞌ holomo ma ninguve. Idoꞌ aꞌmine initetoꞌ nene luhuvo tiꞌ li gizikave: Laza ma ningo gelamuneꞌ oꞌmoso ma nolingumukisi ve li gizikaniꞌ ningo gatuve. Aꞌmine Oꞌmoso nene lingine gilami gopo gubiꞌ izi imi opoꞌni laaꞌ naniꞌ neve ezemuꞌ lo lo-lengemeloze. Gililo.
ACT 17:24 Oꞌmoso aza okulumoꞌ misubo do sotoꞌ molo aꞌmidoꞌ minaniꞌ initeꞌ matakisi do sotoꞌ molo osuꞌ lineꞌ. Do sotoꞌ molaniꞌ nenako asiꞌve nene okulumoꞌ misubo engiꞌ Guveꞌinesi ve naba mino monoꞌ numuno evenelite gizanguꞌ nene dizo minevoꞌ dovoꞌ osaꞌmive.
ACT 17:25 Asiꞌve nene eveneꞌ mukiꞌ minevoꞌ alevoꞌ ngemo idoꞌ mutive daaꞌ aniꞌ ngemo idoꞌ initeꞌ mukiꞌ lehize-ngedaaꞌ neineꞌ nenako nemuꞌ aza nene initeꞌ matakumuꞌ viseꞌ osaꞌmive. oꞌve. Nemuꞌ nene evenelite gonoꞌve do initeꞌ ma do sotoꞌ ogo emelonidoꞌ nomive.
ACT 17:26 Neꞌmine o neineꞌza aza neve eveneꞌ hamoꞌ do sotoꞌ molo lavo ezelatiꞌ eveneꞌ zuho ato atoꞌ sotoꞌ ogo misubouꞌ misubouꞌ hutileꞌ ogo none. Idoꞌ sotoꞌ ogo misubouꞌ mineloneꞌ gamenesi misubotesi asiꞌve lakaꞌni molo-lede neineꞌ ma neive.
ACT 17:27 Nemuꞌ nene luꞌinedunuꞌ viseꞌ iꞌmi igi Oꞌmoso neniꞌ nouvoda igi hetelilizave lo gelo neꞌmine ineꞌ. Idoꞌ laza viseꞌ olosuba aza hotoꞌ minamo leliꞌ hamoꞌ hamokisi makaꞌ avitoꞌ neive.
ACT 17:28 Lengitatiꞌ gili vevesi mini luhuvo gizaaꞌ ave linge malite tiꞌ li laniꞌ: Eiꞌ mumunouꞌ vo holo mino ogo molo ogaꞌ noune. Neꞌmine li likevo linge malite tiꞌ li laniꞌ: Laza Oꞌmosolatiꞌ sotoꞌ uneꞌ ve.
ACT 17:29 Laza Oꞌmosolatiꞌ sotoꞌ uneꞌ nenako Oꞌmosomuꞌ nene aza evenelite gaꞌine gili ngolitunupe idoꞌ siluvatunupe idoꞌ gehenitunupe liliꞌ aniꞌ initeꞌ gidini nolihe lo gelo lamolosune.
ACT 17:30 Gomuꞌ Oꞌmosoꞌmi monovo gilamaniꞌ gameneuꞌ nene lihimeꞌine molo-ngedamo ninge hulineꞌza idiꞌnise nene numudoꞌ namadoꞌ ve mukitoꞌ luꞌine di velepeꞌ izilisave lo lo-ngede neineꞌ ve.
ACT 17:31 Nemuꞌ nene aza numudoꞌ namadoꞌ ve monovote do sotoꞌ molo do lisiheꞌ ogo lihime lemelineꞌ gamene molo neive. Idoꞌ aꞌmine gameneuꞌ goniꞌ gelelive nene do kegeso hulo-dineꞌ. Idoꞌ aꞌmine do kegese-dive ma nene neive li numudoꞌ namadoꞌ ve gililizave lo hilingutiꞌ do ote-davo neive.
ACT 17:32 Pauloꞌ aza hele noloningutiꞌ otaakumuꞌ lavo gilii ve linge ma nete gize abelenga likevo malite nene gamene ma aꞌmine gamazi lanivo gohi gelelone li laniꞌ.
ACT 17:33 Neꞌmine likevo Pauloꞌ aza hulo-ngedo lemo vineꞌ.
ACT 17:34 Vavo eveneꞌ linge nene ezela vi giꞌmizi Izesuꞌnimuꞌ lineꞌ gamazi nene gili eleꞌvoleꞌ aniꞌ. Gili eleꞌvoleꞌ anguꞌ Aleopago gololoꞌ kanisole minaaꞌ angutiꞌ ve ma gulive Dionisiokisi gele eleꞌvoleꞌ ineꞌ. Idoꞌ veneꞌ ma gulive Damalikisi idoꞌ linge masi gili eleꞌvoleꞌ aniꞌ ve.
ACT 18:1 Neꞌmine ogavo Pauloꞌ aza Atena ebeꞌ hulo Kolidi ebekuꞌ vineꞌ.
ACT 18:2 Nela Zuda ve ma do sotoꞌ molo ningineꞌ nene gulive Akuilaꞌ. Eze nene Podo misubouko gidave minineꞌ. Podo misubo hulo vo elenaho Pilisikilakisi Italia misubouko nizasivo Guvelesi ve naba Kalaudioꞌ aza Zuda ve Loma ebekuꞌ minamilizave lo lo huko-ngedo ngimiselo do hulavo ingine aꞌmine ebeꞌ huli Kolidi ebekuꞌ vi minasineꞌ. Olihe mini guni amasivo Pauloꞌ aza engita vo hetelineꞌ.
ACT 18:3 Azasi inginesi hamoꞌ gono di seli numuno gizaaꞌ ave minaniꞌ nenako engiꞌ numunguꞌ dizo mino gono makatoꞌ di minaniꞌ.
ACT 18:4 Neꞌmine navo Pauloꞌ aza holisekuꞌ holisekuꞌ Zuda veti monoꞌ numunguꞌ dizo Zuda vesi idoꞌ nGiliki vesi do upuhoꞌ o-ngedekuvo gili eleꞌvoleꞌ ilizahe lo Oꞌmosoꞌmo do luꞌ izelive lo imiselelesa live nene Izesuꞌ ma ve loo lo ngoloꞌ lo lo-ngemekaꞌ ngemekaꞌ ogo minineꞌ.
ACT 18:5 Neꞌmine ogavo Silasiki Timoteoki ingine Makedonia misuboutiꞌ asineꞌ gameneuꞌ nene Pauloꞌ monoꞌ gono gamene gamene amuzo molo do mino Oꞌmosoꞌmo do luꞌ izelive lo imiselelesa live ma nene Izesuꞌ ve lo eze monovoꞌve lo sotoꞌ ogo Zuda ve lo-ngemo minineꞌ.
ACT 18:6 Minavo eze gamazi lidoꞌ eꞌmenga li-imi eze diviꞌ ledivika li minikevo hungoꞌ molo geneganaꞌvelotiꞌ uꞌmusupo tileꞌ ogo do hulo tiꞌ lo lo-ngimineꞌ: Lingine labuluvo ilizaniꞌ nene lihime nenita minamoloseive. Lengitavoꞌ mineleseive. Nemuꞌ meheꞌne lengemo heta atoꞌ vetida volosuve.
ACT 18:7 Neꞌmine lo aꞌmidotiꞌ lemo vo ve maliꞌmi numunguꞌ dizo minineꞌ. Aꞌmine ve ne gulive Titioꞌ Zusitoꞌ. Aza nene haza heta ve mino Oꞌmoso opoꞌni lo gelekeleꞌ o-do minaaꞌ ineꞌ. Idoꞌ eze numuꞌve nene Zuda veti monoꞌ numuno gahevela minineꞌ.
ACT 18:8 Pauloꞌ aza aꞌmine numunguꞌ dizo minavo monoꞌ numuno gizebo ve Kilisipokisi eze veneꞌ izipahala zuhosi Guvelesi vemuꞌ gili eleꞌvoleꞌ ikevo Kolidi aleve minangutiꞌ eveneꞌ mukikisi monokumuꞌ gili eleꞌvoleꞌ igi monoꞌ noso hilaniꞌ.
ACT 18:9 Idoꞌ gamene ma holukaꞌ Guvelesi veꞌmo Pauloꞌni vamutoꞌ sotoꞌ o emo tiꞌ lo lo-imineꞌ: Geze gehelele izamivo monoꞌ lo-ngemaaꞌ naineꞌ nene hulamo veteteꞌ ogo lo-ngemovoꞌ mineline.
ACT 18:10 Mene ebekuꞌ aleve vaiꞌ nene neze zuho liliꞌ ilizave nizaniꞌ nenako naza gezesi mino gizebo o-gedo nouvo ve maliꞌmosi do goloso o-gedamoloseive.
ACT 18:11 Neꞌmine lo-emavo nemuꞌ Pauloꞌ aza mino Oꞌmosoꞌmi gamazi lo-ngemeꞌ ngemeꞌ ogo kilisimasi hamokisi ikeꞌni sikisi nesiꞌ hulineꞌ.
ACT 18:12 Hulavo Galioꞌ aza Akaia misubouꞌ guvelesi ve naba loloꞌ ogo neivo Zuda ve ingine di bizi Pauloꞌni lovo i imi analoꞌ di goniꞌ numunguꞌ eleꞌmizi mili
ACT 18:13 tiꞌ li laniꞌ: Ve meꞌmo nene louꞌ gamazi avutoꞌ oloneꞌ akaloꞌ leleꞌmize molo di atoliꞌmine igi Oꞌmoso opoꞌni li gelekeleꞌ i-dilizave lo eveneꞌ gate daaꞌ neive.
ACT 18:14 Neꞌmine likevo Pauloꞌ aza gamazi ladoꞌ do velepeꞌ izo lo-emelesa gilineꞌza Galioꞌ aza Zuda ve tiꞌ lo lo-ngimineꞌ: Agae, Zuda vekizo, ve meneꞌmo lihime naba nehe goloso niteꞌ geniꞌvesi nehe neꞌmine daniꞌ ningisa lingine nemuꞌ ladiniko gelelodoꞌ lisiheꞌ ogavo nemuꞌ gamazitine nene ha gele-lingiduvodine.
ACT 18:15 Ne neineꞌza haza gamazimukisi idoꞌ eveneꞌ gulivetinemukisi idoꞌ lengiꞌ louꞌ gamazitinemukisi gamazi gono nidanako nene lengiꞌ initetine ve. Neꞌmine initekumuꞌ goniꞌ gelelesa goseleꞌ gohi nebelave.
ACT 18:16 Neꞌmine lo goniꞌ numungutiꞌ ngeleto hulineꞌ.
ACT 18:17 Neꞌmine ogavo eveneꞌ mukiꞌ monoꞌ numudoꞌ gizebo ve ma gulive Sositeneꞌni nene eleꞌmizi di vi goniꞌ numuno velela biliviꞌ biliviꞌ igi minaniꞌza Galioꞌ aza ningo ninge hulineꞌ ve.
ACT 18:18 Neꞌmine ogavo Pauloꞌ aza Kolidi ebekuꞌ gamene haꞌnatile ma nomino Izesuꞌ zuho meseꞌ asekaꞌ lo-ngedo Pilisikilaki idoꞌ Akuilaki ngeleꞌmizo Kenekelea ebetoꞌ vo hetelineꞌ. Gozopoꞌ Oꞌmosoꞌmi guliveloꞌ lo huko godolo zopovo hukamo haza hulokineꞌ. Kenekelea ebetoꞌ hetelo lo hukineꞌ gamene alitavo aꞌmidoꞌ godolo zopovo hukineꞌ. Hukavo Silia misubouꞌ vilisa sipiuꞌ dizi guvo noso hukiꞌmi vaniꞌ.
ACT 18:19 Vi Eheso ebeta heteli Pilisikilaki Akuilaki aꞌmidoꞌ minikesivo Pauloꞌ aza Zuda veti monoꞌ numunguꞌ dizo inginesi monoꞌ li voleloꞌ meloꞌ igi minaniꞌ.
ACT 18:20 Neꞌmine igi inginesi gamene gohi ma minelone laniꞌza gele ngemamo
ACT 18:21 meseꞌ asekaꞌ nolo-ngedo tiꞌ lo lo-ngimineꞌ: Oꞌmosoꞌmo gele nemavo gohi lengita tineꞌ molo alosuve. Neꞌmine lo sipiuꞌ dizo Eheso ebeꞌ nene hulo vineꞌ.
ACT 18:22 Vo Kaesalea ebeta hetelo sipiutiꞌ lemo Zelusalemi ebekuꞌ dizo vo Izesuꞌ evenele zuho ninge-ngedo ngopoꞌni lo Adiokia ebeta o lomo vineꞌ.
ACT 18:23 Adiokia ebekuꞌ ngomo mino gohi vo Galatia misubouko idoꞌ Piligia misubouko numudoꞌ namadoꞌ Izesuꞌ evenele zuho luhiveꞌine do ngi lo-ngidineꞌ ve.
ACT 18:24 Idoꞌ Zuda ve ma minineꞌ gulive Apoloꞌ aza Alekisadilia ebekuꞌ gidaveliꞌmo Eheso ebeta ogo hetelineꞌ. Aza nene gamazi gehe izo nosoꞌvesivoꞌ laaꞌ ive mino monoꞌ godoloutiꞌ gamazi nene gele osuꞌ lineꞌ.
ACT 18:25 Guvelesi veꞌmi akamuꞌ veteteꞌ igi li-imikevo gilineꞌ. Idoꞌ aza Izesuꞌnimuꞌ gamazi nene do veveso laminosa ngilingili ogo amuzo molo veteteꞌ ogo lo-ngemeꞌ ngemeꞌ ogo minineꞌza Izesuꞌ zuho monoꞌ noso hili-ngidaaꞌ aniꞌ monovo nene gelamo Zohaneꞌ monoꞌ noso holo-ngedaaꞌ ineꞌ monovovoꞌ nene gelo nemukovoꞌ lo-ngemaaꞌ ineꞌ.
ACT 18:26 Zuda veti monoꞌ numunguꞌ dizo apiꞌ ogo gamazi lovoꞌ kiselevoꞌ ogo lo-ngimineꞌ. Nolo-ngimivo Pilisikilaki Akuilaki ingine gilii alingeꞌ di gahevela i-di Oꞌmosoꞌmi akamuꞌ gamazi lingela li ngoloꞌ li li-imi osuꞌ li elebize lamineꞌ asineꞌ.
ACT 18:27 Neꞌmine ikesivo Apoloꞌ aza Izesuꞌ evenele zuho Akaia misubouko minaniꞌ ingine novivo ma di lamineꞌ i-dilizave li luhuvo niteꞌ gizi imikevo do vineꞌ. Do vo hetelo Oꞌmosoꞌmo nasahiliꞌ o-ngidivo ezemuꞌ gili eleꞌvoleꞌ ave ngeleꞌmize lamineꞌ ineꞌ.
ACT 18:28 Monoꞌ godoloutiꞌ gato lo ngoloꞌ lo Oꞌmosoꞌmo do luꞌ izelive lo imiselelesa live ma Izesuꞌ ve lo neꞌmi monovo eveneꞌ mukiliti veꞌnidoꞌ lo sotoꞌ molo lo-ngemo Zuda vete li voleloꞌ meloꞌ igi ataize laniꞌ nene ngivileꞌ ogo do leme-ngidineꞌ ve.
ACT 19:1 Apoloꞌ aza Kolidi ebekuꞌ neivo Pauloꞌ aza misubo olusoꞌ dizo ledo Eheso ebeta hetelineꞌ. Hetelo Izesuꞌ evenele zuho linge ma aꞌmida minaniꞌ ningo
ACT 19:2 longoꞌ o-ngedo tiꞌ lo lineꞌ: Lingine nene monoꞌ gili eleꞌvoleꞌ igi Oꞌmosoꞌmi Sikalahuꞌ lehizikeniꞌ nehe lo longoꞌ o-ngedavo ingine tiꞌ li laniꞌ: Oꞌve. Laza Oꞌmosoꞌmi Sikalahuꞌ neive li ma li-limavo gelamuneꞌ ve.
ACT 19:3 Tiꞌ li likevo gohi longoꞌ o-ngidineꞌ: Lingine zaaꞌ monoꞌ gilisa noso hilave. Lavo ingine tiꞌ li laniꞌ: Zohaneꞌ monoꞌ gelo noso huluneꞌ ve.
ACT 19:4 Neꞌmine likevo Pauloꞌ tiꞌ lo lo-ngimineꞌ: Zohaneꞌ aza nene eveneꞌ ingine luꞌine di velepeꞌ izangumuꞌ noso holo-ngedo tiꞌ lo lo-ngimineꞌ: Meheꞌnela ve ma nave. Ezemuꞌ nene gili eleꞌvoleꞌ ilizaniꞌ o neive. Idoꞌ tiꞌ lo lineꞌ nemuꞌ naza lo-lengemelove. Aꞌmine gili eleꞌvoleꞌ ilizave nene Izesuꞌ ve.
ACT 19:5 Lavo gili Guvelesi ve Izesuꞌ guliveloꞌ noso hilaniꞌ.
ACT 19:6 Noso hilikevo Pauloꞌ ana godoꞌnidoꞌ hitavo Oꞌmosoꞌmi Sikalahuꞌ engita lemo minavo gamazi nene ato atoꞌ noꞌningutiꞌ li Oꞌmoso opoꞌni li eze gamaziꞌve li sotoꞌ aniꞌ.
ACT 19:7 Aꞌmine ve nene tuvelu neꞌmine minaniꞌ.
ACT 19:8 Neꞌmine ikevo Pauloꞌ aza Zuda veti monoꞌ numunguꞌ dizo Oꞌmosoꞌmo gizebo o-ledelineꞌ aka neꞌmi monovomuꞌ lovoꞌ kiselevoꞌ ogo muluꞌninguꞌ hizo lo-ngimivo li voleloꞌ meloꞌ igi nizavo ikeꞌni seto hamoꞌ ogo vineꞌ.
ACT 19:9 Neꞌmine ogavo ve linge ma aꞌmanapa igi eze gamazi gili imami goꞌnidoꞌ ningi eveneꞌ mukiliti veꞌnidoꞌ Izesuꞌ aka diviꞌ lediviꞌ aniꞌ. Neꞌmine ikevo hulo-ngedo Izesuda giꞌmizave ngeleꞌmizo vo do nubo o-ngedo gamene gamene ve ma gulive Tilanoꞌ eiꞌ gamazi apize ngemaaꞌ ineꞌ numunguꞌ Izesuꞌ gamaziꞌve li voleloꞌ meloꞌ igi minaniꞌ.
ACT 19:10 Nizavo Asia misuboukotiꞌ aleve mukiꞌ Zuda vesi idoꞌ nGiliki alevesi mukitoꞌ Guvelesi veꞌmi gamazi gili osuꞌ li linge ma ne gili daniꞌza linge ma nene gili hulaniꞌ. Neꞌmine navo kilisimasi setaꞌ ogo vineꞌ ve.
ACT 19:11 Oꞌmosoꞌmo Pauloꞌni hize eleꞌ o-davo initeꞌ amadiꞌmine atoliꞌmine ineꞌ.
ACT 19:12 Neꞌmine ogavo nemuꞌ eveneꞌ ma nete Pauloꞌ okoꞌnolotiꞌ gono dalosa golihileloꞌ angisipi likekaꞌ inekisi idoꞌ gopololoꞌ tauli likekaꞌ ineꞌ nesi di vi initeꞌ gizi dave ngimikevo di gili lamineꞌ nigilavo luꞌninguꞌ sikalahuꞌ goloso minineꞌ nesi dizi golise vaaꞌ aniꞌ.
ACT 19:13 Neꞌmine igi nizavo Zuda ve linge ma minaniꞌ ingine sikalahuꞌ goloso eveneꞌ luꞌninguꞌ minaniꞌ nene ngimiseli hulatoꞌ gono diꞌmi monaaꞌ aniꞌ. Engikutiꞌ malite Izesuꞌ gulive ogo sikalahuꞌ goloso ngimiselo hulokunivo vilizahe li ningelone li Guvelesi ve Izesuꞌ gulive li avazaha igi sikalahuꞌ goloso tiꞌ li li-ngimaaꞌ aniꞌ: Pauloꞌ aza eze gamazi lo sotoꞌ ogaꞌ ive Izesuꞌ eze velemuꞌ ogo vilo lo nolo-lingimune.
ACT 19:14 Neꞌmine igaꞌ aveutiꞌ ma nene Zuda ve minineꞌ adoꞌ evenetoꞌ medelo mino Oꞌmoso initeꞌ lehize-daaꞌ ive naba adoꞌ gulive Sikevaꞌ neꞌmi gipele seveni minaniꞌ netesi neꞌmine aniꞌ.
ACT 19:15 Neꞌmine li sikalahuꞌ goloso mamuꞌ vozo likevo sikalahuꞌ goloso aza do velepeꞌ izo tiꞌ lo lo-ngimineꞌ: Naza Izesuꞌnimuꞌ gele nouve. Idoꞌ Pauloꞌnimukisi mo gele nouve. Neꞌmino neiha lingine zamote nizave.
ACT 19:16 Neꞌmine lo sikalahuꞌ goloso lulouꞌ minive aza olutoꞌ molo dovoꞌ hikilevoꞌ o-ngedo ngebelo ngivileꞌ ogavo okoꞌine vanise ogo malalapa izavo okoꞌnidoꞌ initeꞌ boloto osuꞌ lavo bakakovoꞌ aꞌmine numungutiꞌ golise limi vaniꞌ.
ACT 19:17 Neꞌmine ikevo aꞌmine gamazi Eheso ebeta buu lo vavo Zuda vesi nGiliki alevesi gili osuꞌ li golise ngemavo Guvelesi ve Izesuꞌni di hozi li-di opoꞌni laniꞌ.
ACT 19:18 Neꞌmine ikevo Izesuꞌnimuꞌ gili eleꞌvoleꞌ igaꞌ ave mukiꞌ igi luso gamazi ato atoliꞌmine nene li sotoꞌ igi osuꞌ laniꞌ.
ACT 19:19 Idoꞌ gozopoꞌ luso gono daaꞌ ave lingelite luso gizaaꞌ aniꞌ buku nene gililiheꞌ mili di igi eveneꞌ mukiliti veꞌnidoꞌ olokuꞌ gizaniꞌ. Neꞌmine igi aꞌmine bukuloꞌ moni hulaniꞌ neꞌmi nabaꞌve di ninganiꞌ nene siluvaꞌ fifti tauseni (50,000) neꞌmine minineꞌ ve.
ACT 19:20 Neꞌmine ikevo Guvelesi veꞌmi gamazi neꞌmo amuzo molo sotoꞌ ogo buu lo hutileꞌ ogo gihile izineꞌ.
ACT 19:21 Neꞌmine ogavo Pauloꞌ aza Makedonia misubouko idoꞌ Akaio misubouko voꞌmo voꞌmo Zelusalemi ebeta volove lo luloꞌmo lavo tiꞌ lo lineꞌ: Naza Zelusalemi ebeta vo hetelo gohi vo Loma ebeta volove. Neꞌmine gala gele hamoꞌ ogo
ACT 19:22 nasahiliꞌ i-di makatoꞌ gono daaꞌ asive setaꞌ Timoteoki Elasitoki ngimiselavo Makedonia misubouko gomuꞌ vasineꞌ. Vikesivo Pauloꞌ aza gamene gohi ma imineꞌ molo Asia misubouko minineꞌ.
ACT 19:23 Idoꞌ aꞌmine gameneuꞌ Eheso ebeta Izesuꞌ akamuꞌ lovo lolize naba sotoꞌ ineꞌ.
ACT 19:24 Aꞌmidoꞌ siluvatunuꞌ gonoliseꞌvesi initeꞌ loloꞌ ogaꞌ ive ma minineꞌ gulive Demetelioꞌ. Aza neve avazaha oꞌmoso niteꞌineꞌmi gulive Alatemeꞌ eiꞌ monoꞌ numuꞌveꞌmi avazahaꞌve gidini ngomo ngomo loloꞌ ogo bisinisi ogaꞌ inako azasi idoꞌ makaꞌ gono daaꞌ avesi aꞌmine gonolotiꞌ moni naba daaꞌ aniꞌ.
ACT 19:25 Neꞌmine ogavo Demetelioꞌ aza ezesi gono daaꞌ avesi idoꞌ aꞌmine neꞌmine gono daaꞌ ave linge masi do mulise molo-ngedo tiꞌ lo lo-ngimineꞌ: Vekizo, lingine mo ningi gili nizave. Mene gonotelotiꞌ moni heneni sotoꞌ ogavo mine lamineꞌ ogo minaaꞌ noune.
ACT 19:26 Idoꞌ aꞌmine ve Pauloꞌ neꞌmi monovo ningi gili nizave. Aza nene Eheso ebetatiꞌ idoꞌ Asia ebeꞌ mukikukotiꞌ aleve mukiꞌ gaꞌine hizo luꞌine do gopo o-ngedo eveneꞌ adedunuꞌ loloꞌ uneꞌ oꞌmoso niteꞌ nene initeꞌ gihile nomive lo lo-ngemaaꞌ neive.
ACT 19:27 Neꞌmine loꞌmo monivo monivo leliꞌ gono nene lemeleseive. Idoꞌ leliꞌ oꞌmoso nitete naba Alatemeꞌ eiꞌ monoꞌ numunomuꞌ nene eveneꞌ mukilite gilavo lemeleseive. Neꞌmine ogavo Asia misubouko alevesi idoꞌ numudoꞌ namadoꞌ vesi Alatemengumuꞌ ngolize izi opoꞌni laaꞌ naniꞌ nenako dize minineꞌ ma mo lemo ongalihe lo nehelele izave.
ACT 19:28 Tiꞌ lo lavo ingine gili muluꞌninguꞌ oloꞌ lo ngizeboloꞌ molavo gekeꞌ naba li tiꞌ li laniꞌ: Eheso aleveti izeteho Alatemeꞌ nene guvelesi alu naba ma ne neive li laniꞌ.
ACT 19:29 Neꞌmine li likevo aꞌmine ebetoꞌ aleve nene gopo gamazi li gulugulu li zohitoꞌ di geseꞌ igaꞌ ebeta lotiꞌ izi vi di geseꞌ igi Makedonia misubo nabaukotiꞌ Paulolesi monaaꞌ ave setaꞌ guliveꞌine Gaioki Alisitakoki aꞌnidoꞌ di geleleheꞌ igi di vaniꞌ.
ACT 19:30 Neꞌmine ikevo Pauloꞌ aza gelo eveneꞌ di geseꞌ anguꞌ volove lavo Izesuꞌ zuholite vamilive li oꞌve li-daniꞌ.
ACT 19:31 Neꞌmine ikevo Asia misubouko guveꞌinesi ve linge Pauloꞌ zogo ve minaniꞌ ingine evenelite zohiꞌ ebekuꞌ di geseꞌ anguꞌ nene vo sotoꞌ amilive li gamazi hulikevo vavo gilineꞌ.
ACT 19:32 Gelavo di geseꞌ ave engikutiꞌ eveneꞌ mukiꞌ ingine di geseꞌ aniꞌ neꞌmi monovo gilami malite hamoꞌ gamazi laniꞌ idoꞌ linge malite atoꞌ gamazi laniꞌ. Neꞌmine li minanako neꞌmo luꞌine gopo ogavo haza gekeꞌ gekeꞌ li minaniꞌ.
ACT 19:33 Neꞌmine igi nizavo Zuda ve ingine engiꞌ eveneꞌine ma minineꞌ gulive Alekisadeloꞌni nene di oti-di ehusoꞌ i hulikevo eveneꞌ mukiꞌ ingine lihimeꞌvesi noloseive likevo aza ana do viliviꞌ molo ne nomive lo gamazi lo-ngemelesa lineꞌza
ACT 19:34 eveneꞌ mukiꞌ ingine ninganiꞌ leliꞌ oꞌmosote nene haza niteꞌ ve li gilaaꞌ nave Zuda veutiꞌ ve ma nave li ningi gili gekeꞌ li veꞌningutiꞌ veꞌningutiꞌ gamazi li hamoꞌ igi tiꞌ li laniꞌ: Eheso aleveti izeteho Alatemeꞌ nene guvelesi alu naba ma ne neive. Li nizavo hoꞌ gamene tu aua osuꞌ lineꞌ.
ACT 19:35 Neꞌmine ikevo kanisoleliti gamaziloꞌ gizebo ogaꞌ iveꞌmo do hongu lo-ngedo tiꞌ lo lo-ngimineꞌ: Lingine Eheso alevekizo, Alatemete lamineꞌ eze monoꞌ numuno naba idoꞌ Okulumokutiꞌ eiꞌ emeni damenisi gele vineꞌ geheni ma limineꞌ aꞌmine initeꞌ gizebo ogaꞌ uneꞌ melemote nobe. Nene gamazi nene numudoꞌ namadoꞌ ve nene moda gili osuꞌ li nizave.
ACT 19:36 Neꞌmino nomive lo zaaꞌ veꞌmo lilive. Lilive ma nomive. Nemuꞌ lingine lutine di hongu li initeꞌ gopoꞌ napa damilo.
ACT 19:37 Mela ngeleꞌmizi ave nete oꞌmoso initete eze monoꞌ numuno nabatiꞌ initeꞌ ma gumine disaꞌmasive idoꞌ oꞌmoso nitetemuꞌ levelenga li emenga lisaꞌmasineꞌ ma neive.
ACT 19:38 Neꞌmine ogavo Demeteliokisi idoꞌ ezesi makaꞌ gono daaꞌ ave nete ve masi gamazi gono dalizadoꞌ o nolineꞌ nene goniꞌ igaꞌ gamene ha neineꞌ ve. Idoꞌ goniꞌ gilaaꞌ ave zasi naba ha nizave. Nemuꞌ aꞌmida di vi goniꞌ i-dilisave.
ACT 19:39 Gamazi gono ma neivo ma eveneꞌ mukiꞌ mulise milalizaniꞌ gameneuꞌ muliseloꞌ di vikevo gamazi gono di gililizave.
ACT 19:40 Idoꞌ lingine idiꞌnise nene hazamuꞌ gopo lovo hizikeniꞌ hakave. Nemuꞌ nene guvetesi ve naba nete nadive li-limilizave. Goniꞌ i-lidikevo ma laza nani gamazi lo-ngimunivo gilavo lamineꞌ ilive. Ne ma nomive.
ACT 19:41 Neꞌmine lo gamaziloꞌ gizebo veꞌmo mulise milave ngimisele hulavo vaniꞌ ve.
ACT 20:1 Gamazi gulugulunga laniꞌ nene osuꞌ lavo Pauloꞌ aza Izesuꞌ zuho asi lo do avitoꞌ o-ngedo gaꞌine do do amuzo molo-ngede meseꞌ aseka lo-ngedo hulo-ngedo Makedonia misubouko vineꞌ.
ACT 20:2 Idoꞌ aꞌmine misubouꞌ mono Izesuꞌ evenele zuho aꞌminguꞌ miniꞌmi monaniꞌ nene gamazi vaiꞌ lo-ngemo monokuꞌ amuzo do molo-ngedoꞌmo vo Akaia misubo adoꞌ gulive ngomo nGiliki misubouko vo hetelineꞌ.
ACT 20:3 Hetelo nela ikeꞌni setohamo mino Silia misubouko volosa sipiuꞌ dizelesa neivo Zuda vete gili gohoni milaniꞌ. Pauloꞌ nene gelo Makedonia misubouko gohi do tineꞌ molo volosa gilineꞌ.
ACT 20:4 Neꞌmine lo gelo Belia ebekutiꞌ Piloꞌ gipele Sopatoloꞌ ve idoꞌ Tesalonika ebekutiꞌ Alisitakoꞌ ve idoꞌ Sekudoꞌ ve idoꞌ Delebe ebetotiꞌ Gaioꞌ ve idoꞌ Timoteoꞌ ve idoꞌ Asia misuboukotiꞌ Tikikoꞌ ve idoꞌ Tolohimoꞌ ve eveneꞌ neꞌmine Paulolesi makatoꞌ eꞌmetavo vi Makedonia misubouꞌ heteli Pauloꞌ aza aꞌmidoꞌ minavo
ACT 20:5 ezesi makaꞌ monave mukiꞌ nene gomuꞌ mili vi Toloasi numuda di geseꞌ igi lelikumuꞌ gizebo igi minaniꞌ.
ACT 20:6 Oꞌmosoꞌmo Zuda veti avoꞌningine iseꞌine izingumuꞌ gili mini lulu izamineꞌ beleti naaꞌ aniꞌ gamene osuꞌ lavo laza Paulolesi idoꞌ eveneꞌ masi Hilipi ebeꞌ hulo vo sipiuꞌ dizo guvo noso hukoꞌmo novunivo gamene faef ogo novivo Toloasi ebeta vo hetelune. Hetelo aꞌmidoꞌ salele hamoꞌ minune.
ACT 20:7 Mino salele gosohoꞌ mineloneꞌ gamene apiꞌ ineꞌ holukaꞌ nene nosoꞌ niteꞌ nalone lo do geseꞌ ogo nonivo Pauloꞌ aza nene aizeꞌ goꞌ lavo volove lo nogelo monoꞌ gamazi lo-ngemeꞌ ngemeꞌ ogo neivo litiꞌmuso mudise lipeleꞌ ilineꞌ.
ACT 20:8 Numuno veletoꞌ lulo mauꞌ minuninguꞌ nene lamu mukiꞌ gulumo ogo minineꞌ.
ACT 20:9 Neꞌmino neivo gipe gosoꞌve ma minineꞌ gulive Eutikoꞌ aza nene Pauloꞌ monoꞌ haꞌna haꞌna lavo viniduvatoꞌ mino vele hihiꞌ ongumangu ogo minidotiꞌ okise ongo helo imineꞌ mili giziꞌmi dizaniꞌ numuno lumu naba tili neꞌmi viniduvatotiꞌ veleheꞌ lemo misubouꞌ helavo di oti ninganiꞌ nene helavo
ACT 20:10 Pauloꞌ numungutiꞌ leme heta ogo gipe ne dizo abutiꞌ izo noongo eveneꞌ tiꞌ lo lo-ngimineꞌ: Lingine ive nama igi muludine hukamivo. Ve ne haza neive.
ACT 20:11 Neꞌmine lo numunguko dizo lebeni initeꞌ ngemo nosoꞌ niteꞌ ngomo naniꞌ.
ACT 20:12 Goꞌ lavo Pauloꞌ aza hulo-ngedo vineꞌ. Novivo eveneꞌ ingine gipe vele gizo otavo muluꞌninguꞌ lamineꞌ gili numuꞌveuko eleꞌmizi di vaniꞌ.
ACT 20:13 Neꞌmine ikevo Pauloꞌ aza nene misubouꞌ aka volove lo vavo laza sipiuꞌ dizo Pauloꞌni sipiuꞌ eleꞌmize molalosa Aso ebetoꞌ vo nonivo asiꞌve misubouꞌ ogo hetelineꞌ.
ACT 20:14 Hetelavo lezesi do bizo sipiuꞌ eleꞌmize molo makaꞌ vo Mitilene ebekuꞌ hetelune.
ACT 20:15 Nelotiꞌ novunivo akaloꞌ goꞌ lavo Kio ailani gahevela gohi huko novunivo goꞌ lavo Samo ailaniuꞌ vo hetelune. Hetelo ongo oto Eheso ebeꞌ nene ivileꞌ ogo vo Mileto ebeta hetelune.
ACT 20:16 Idoꞌ Eheso ebeꞌ ivileꞌ uneꞌ nene Pauloꞌ aza Zuda veti holiseꞌ gamene Pedekosi ve languꞌ nene Oꞌmosoꞌmi Sikalahuꞌ limineꞌ gamene alitelineꞌ nene Zelusalemi numuno ebeta geto voloneꞌ aka neivo ma aꞌmida vo nouvo aꞌmine gamene aliteleseive lo amuzo molo geloo Eheso ebeta voloneꞌ nene aꞌmine Asia misubola mino gamene haꞌna hulokunivo aꞌmine Pedekosi gamene gomuꞌ ogo vavo alingeꞌ Zelusalemi numuno ebeta nene vo hetelalone lo gelo Eheso ebeta vamo ivileꞌ ogo volone lavo neꞌmine uneꞌ ve.
ACT 20:17 Hetelo elese ve ngimiselavo Eheso ebeta vi monoꞌ gizebo ve linge ma ngeleꞌmizi aniꞌ.
ACT 20:18 Eita igi hetelikevo Pauloꞌ tiꞌ lo lo-ngimineꞌ: Naza Asia misubouko ganaꞌ ogo hetelo lengikisi mineꞌmo dizo minuvoniꞌ gameneuꞌ nene gamene gamene ogo molo minaaꞌ uvoniꞌ monovoꞌne nene lingine ningi gili nizave.
ACT 20:19 Naza neꞌmino minaaꞌ uvoniꞌ ma neive: Haza ve neꞌmine gelo naza hokolizeꞌ amo Guvelesi ve gelekeleꞌ o-do gonoꞌve do minuvoniꞌ ve. Linginela aꞌmine gonoꞌve nodo mulumotine gelekaꞌ ogosa ive nama ogo minaaꞌ uvoniꞌ ma ve. Idoꞌ Zuda ve nenikumuꞌ lovo gizi hukadiꞌmo mulumo niteꞌ gasavasi kise mino gonoꞌve haza do minuvoniꞌ ma ve.
ACT 20:20 Neꞌmine ogo lengeleꞌmize lamineꞌ ilineꞌ gamazi nene ma hite-lengedesaꞌmuvoniꞌ ma neive. Aꞌmine monoꞌ gamazi ma nene lo sotoꞌ ogo eveneꞌ mukiliti veꞌnidokisi idoꞌ numudinguꞌ numudingukisi hamoꞌ hamoꞌ lo-lengemaaꞌ uvoniꞌ ve.
ACT 20:21 Zuda vesi nGiliki vesi lutine di velepeꞌ izi goloso niteꞌ huli Oꞌmosola vi giꞌmizi Guvetesi ve Izesuꞌnimuꞌ gili eleꞌvoleꞌ ilizave lo lo gatine gatine ogo minaaꞌ uvoniꞌ ma neive.
ACT 20:22 Idoꞌ Oꞌmosoꞌmi Sikalahuꞌ neꞌmo nalaꞌ o-nedo geleleheꞌ nonidineꞌ gelavo idiꞌnise nene Zelusalemi numuda novuve. Holila vo heteluvo naniteꞌ sotoꞌ o nemelihe lo neꞌmi monovo gele vevesamuvoniꞌza
ACT 20:23 Oꞌmosoꞌmi Sikalahuliꞌmo nene numudoꞌ namadoꞌ vetinguꞌ nomonuvo galapuso nalaliꞌmo idoꞌ geniꞌvesi initelite nenikumuꞌ gizebo i nizave lo lo-nemaaꞌ neive.
ACT 20:24 Nemuꞌ nene naza ogo molo nouvo nezela naniteꞌ sotoꞌ ilihe aꞌmine initekumuꞌ giluvo ha niteꞌ neive. Nemuꞌ nene neze nemeniꞌne nene do giliꞌ lo minamo Guvelesi ve Izesuꞌ aza Oꞌmosoꞌmo nasahiliꞌ o-ledo do gatulo o-ledaaꞌ neineꞌ neꞌmi gamazi lamineꞌ nene lo soto sotoꞌ o-ngemo mineline lo gono nimineꞌ nemukovoꞌ gele mino aꞌmine gono nene do osuꞌ lolosavoꞌ nene gele nouve.
ACT 20:25 Idoꞌ gililo. Oꞌmosoꞌmo gizebo o-ledaaꞌ neineꞌ aka neꞌmi monovo lo sotoꞌ ogo vovotinguꞌ minevoꞌ dovoꞌ uvo lingine ninganiꞌ ma neineꞌza idiꞌnise gohi goꞌne veꞌneloꞌ ningamilisave losa gele nouve.
ACT 20:26 Idiꞌnise nene lovoꞌ ngolosevoꞌ ogo lo-lengemekuvo gililo. Lengikutiꞌ maliꞌmo labuluvo ilineꞌ nene neꞌmi lihime nenita minamoloseive.
ACT 20:27 Naza nene okoꞌne huko nehelele izamivo Oꞌmosoꞌmi galauꞌ neineꞌ nesi moda lo-lengeme osuꞌ laaꞌ uvoniꞌ ma neive.
ACT 20:28 Langisetine okodine lutine gizebo niigi Izesuꞌ evenele zuho nesi gizebo i-ngidilo. Oꞌmosoꞌmi Sikalahuꞌ neꞌmo engiꞌ gizebo ve minilizave lo lengeleꞌmize molaniꞌ. Idoꞌ lengeleꞌmize molaniꞌ nene Oꞌmosoꞌmo vono emekiveꞌmi vaniseliꞌmo meni hizivo eiꞌ ve lo daniꞌ evenele zuho nene lingine gizebo i-ngidilizave lo lengeleꞌmize molaniꞌ. Nemuꞌ gizebo lamineꞌ i-ngidilo.
ACT 20:29 Naza hulo-lengedekuvo eveneꞌ malite gulo hadene liliꞌ igi vovotinguꞌ heteli Izesuꞌ evenele zuho lutine di gopo i-lingidilisave losa gele nouve.
ACT 20:30 Idoꞌ lengikutiꞌ eveneꞌ malite oti gopo gamazi li Izesuꞌ evenele zuho lelita leꞌmetilizave li muludinguꞌ hizilisave.
ACT 20:31 Nemuꞌ nene langisetine okodine gizebo lamineꞌ igi minilo. Kilisimasi setohamoꞌ ogo novivo gamene gamene goꞌ laneme goꞌ laneme ive nama ogo lengiꞌ hamoꞌ hamoꞌ nene gatine doo gamazi lo-lengemaaꞌ uvoniꞌ nene hulosaꞌmuvoniꞌ ma neive. Nemuꞌ lingine gili minilo.
ACT 20:32 Idoꞌ idiꞌnise Oꞌmosoꞌmo hize eleꞌ o-lengedelive lo eze anauꞌ nomuluve. Aza nene nasahiliꞌ o-ledaaꞌ neineꞌ neꞌmi gamaziꞌvetunuꞌ lutine do ngi lo-lengedo eze evenele zuho do kegeso molave mukikumuꞌ salani initeꞌ molavo neingutiꞌ nene ma lengemeleseive.
ACT 20:33 Ve maliꞌmi moni henenilokisi upuhoꞌ ogo dalosa amuvoniꞌ ma neive.
ACT 20:34 Langisetine ningi gili nizave. Neniꞌ okoꞌneloꞌ nitekisi idoꞌ nezesi makaꞌ gono daaꞌ univeti okoꞌnidoꞌ initekisi nene naꞌnise aꞌnetunukovoꞌ gono do do sotoꞌ ogaꞌ uvoniꞌ ma ve.
ACT 20:35 Neꞌmine ogo aka lengelebizuvoniꞌ ma neive. Laza Guvetesi ve Izesu lineꞌ gamazi mamuꞌ gelo gono amuzo molo do eveneꞌ gulupese hize eleꞌ o-ngedelone lo neꞌmi akaꞌvesi lengelebize osuꞌ lo nouvoniꞌ ma neive. Izesuꞌ lineꞌ gamazi nene neꞌmino neive: Initeꞌ limikevo dosa muludeuꞌ lamineꞌ gelelesune. Ne neiha initeꞌ ngemeko nemuꞌ muludeuꞌ lamineꞌ giluneꞌ neꞌmo nene ivileꞌ o neive.
ACT 20:36 Pauloꞌ tiꞌ lo lo hulo ezesi inginesi obuvoꞌine hizi Oꞌmosola laniꞌ.
ACT 20:37 Oꞌmosola li ive nama igi ingine Pauloꞌni abutiꞌ izi golo ili naniꞌ.
ACT 20:38 Idoꞌ ive nama aniꞌ nene Pauloꞌ gomuꞌ lo-ngimineꞌ gamazi adoꞌ ingine eze gololoꞌ gohi ma ningamilisave lo lo-ngimineꞌ gamazimuꞌ gili mulumo naba gili ive nama aniꞌ. Neꞌmine igi sipiuꞌ dizo vilive li eleꞌmizi limaniꞌ ve.
ACT 21:1 Idoꞌ engikisi makaꞌ minunidotiꞌ oteko hulo-ngedo vo sipiuꞌ dizuneꞌ. Dizo vovoꞌ vovoꞌ ogo lisiheꞌ ogo vo Ko ailani maloꞌ hetelune. Hetelo ongo goꞌ lavo gohi oto vo vo Lodo ailaniuꞌ vo hetelo nelotiꞌ vo Patala ebeta hetelune.
ACT 21:2 Vo hetelo sipi gohi ma viseꞌ ogo Hoinikia misubouko volosa neineꞌ sipi ma ningo aꞌminguꞌ dizo vune.
ACT 21:3 Guvo noso hukoꞌmo vo Kipilo ailani ningo adavala neivo ivileꞌ ogo Silia misubo gahevela Tilo ebeta hetelune. Neloꞌ sipiutiꞌ heneni di nihulavo
ACT 21:4 laza sipiutiꞌ lemo dizo Izesuꞌ evenele zuho ma ningo inginesi ongo nonivo gamene seveni vineꞌ. Aꞌmine aleve nene Oꞌmosoꞌmi Sikalahuliꞌmo do ote-ngedavo Zelusalemi numudoꞌ vamilive li Pauloꞌni li-imaniꞌ.
ACT 21:5 Neꞌmine likevo aꞌmidoꞌ nonivo voloneꞌ gamene alitavo aꞌmidotiꞌ alevesi idoꞌ veneꞌ izipahaꞌinesi leleꞌmizi numuno ebekutiꞌ di heta i-lidikevo inginesi guvo noso gahevela mino obuvote hizo Oꞌmosola lune.
ACT 21:6 Oꞌmosola lo minunidotiꞌ mo vilo likevo mo minilo lo-ngedo sipiuꞌ dizo vokunivo ingine numuꞌnida tineꞌ mili vaniꞌ ve.
ACT 21:7 Neꞌmine ikevo laza gohi apiꞌ ogo Tilo ebeꞌ hulo Tolemai ebeta vo hetelo neloꞌ Izesuꞌ evenele zuhosi lopoꞌni lapaꞌni lo numuno hamoꞌ engikisi unguneꞌ.
ACT 21:8 Ongo goꞌ lavo Tolemai ebeꞌ hulo Kaesalea ebeta vo hetelo aꞌmine ebetoꞌ Izesuꞌ gamaziꞌve lo-ngeme ngemeꞌ ogaꞌ ive Hilipoꞌni ningo eiꞌ numuꞌveuꞌ dizo minune. Aza nene gamene galaꞌmuda vomine eveneꞌ seveni monoꞌ gonoloꞌ ngeleꞌmize milangutiꞌ minineꞌ.
ACT 21:9 Eiꞌ aluvo setaꞌve setaꞌve minaniꞌ. Veloꞌ vami haza mini Oꞌmosoꞌmi Sikalahuliꞌmo luꞌninguꞌ gono davo Oꞌmosoꞌmi gamazi li sotoꞌ i ngimiꞌ ngimiꞌ igi minaaꞌ aniꞌ.
ACT 21:10 Aꞌmidoꞌ imineꞌ molo nonivo Oꞌmosoꞌmi gamazi lo sotoꞌ ogaꞌ ive ma gulive Agaboꞌ nene Zudaia misuboukotiꞌ o lomo
ACT 21:11 nonida ogo hetelo Pauloꞌ gopololoꞌ izekineꞌ initeꞌ apaso asiꞌve gizene analoꞌ noizo tiꞌ lo lineꞌ: Oꞌmosoꞌmi Sikalahuliꞌmo tiꞌ lo nolive. Mene initeliꞌmi meleho nene Zelusalemi ebekuꞌ vo neivo aꞌminguꞌ Zuda vete uvoniꞌ neꞌmine igi nalava imi heta atoꞌ veti aꞌninguꞌ ngimilisave.
ACT 21:12 Neꞌmine lavo gelo lazasi idoꞌ aꞌmidotiꞌ alevesi Pauloꞌ aza Zelusalemi numuda dizo vamilive lo geli gelinga lo-imuneꞌza
ACT 21:13 Pauloꞌ aza tiꞌ lo lo-limive: Lingine ive nama igi neniꞌ luꞌne nene nanimuꞌ di nigangi-nidave. Naza nene nalava nimilizave lo gelo ha volosa nouha idoꞌ nevoꞌ nomive. Guvelesi ve Izesuꞌ eze zuho nouvonako Zelusalemi ebeta nibili hililizaniꞌ nesi gele nouvoniꞌza haza volosuve.
ACT 21:14 Neꞌmine lavo laza nene ngelo eiꞌ gamaziloꞌ lamosoꞌ ogavo eleseꞌ ogo mino tiꞌ lo luneꞌ: Lamineꞌ ve. Guvelesi ve lineꞌ gamazi ha sotoꞌ ilive.
ACT 21:15 Neꞌmine lo nonivo gamene ma ogo vavo Zelusalemi numuda volone lo initete do vaꞌvaꞌ uneꞌ ve.
ACT 21:16 Do vaꞌvaꞌ okunivo Kaesalea ebekutiꞌ Izesuꞌ evenele zuho linge malite leleꞌmizavo makaꞌ vune. Vo hetelekunivo leleꞌmizi ave nete ve maliꞌmi numunguꞌ leleꞌmizi milikevo dizo minune. Aꞌmine ve nene Kipilo ve mino gamene galaꞌmudatiꞌ vomine Izesuꞌ evenele minineꞌ gulive Manasoꞌ.
ACT 21:17 Zelusalemi numunguꞌ hetelekunivo Izesuꞌ zuho ngolize izi lopoꞌni laniꞌ.
ACT 21:18 Ongo goꞌ lavo Pauloꞌ aza Zakoboꞌni vo ninge-delove lavo makaꞌ vune. Numuꞌveuꞌ vo nodizo ninguneꞌ nene monoꞌ gizebo vesi Zakobolesi makaꞌ nizaniꞌ neivo ningune.
ACT 21:19 Ningo ngopoꞌni lo Pauloꞌ aza heta atoꞌ vetida eze gono doꞌmo nomonivo Oꞌmosoꞌmo initeꞌ mukiꞌ ogo molo ineꞌ neꞌmi gamazi veteteꞌ ogo osuꞌ lo lo-ngimineꞌ.
ACT 21:20 Lo-ngemavo gili nemuꞌ Oꞌmoso opoꞌni li Pauloꞌni tiꞌ li li-imaniꞌ: Leze zuho make, gaza Zuda vetinguko Izesuꞌ evenele zuho liliꞌ igi vanu hizi tauseni neꞌmine nizaniꞌ nene mo ningo gele nane. Aꞌmine aleve mukiꞌ nene Moseꞌ lo huko lineꞌ gamazi nene amuzo mili hizi eleꞌ igaꞌ nave.
ACT 21:21 Neꞌmine ogavo eveneꞌ malite soza gamazi tiꞌ li li-gidikevo gilaaꞌ nave: Gaza Zuda ve haza heta atoꞌ veti vovoꞌninguꞌ miniꞌmi moni nizave inginemuꞌ nene Moseꞌ lo huko lineꞌ gamazi nene gili hulilizave laaꞌ idoꞌ gipeꞌine zuho okoꞌine lolovo huki-ngidami Zuda veti monovo danavate mukiꞌ hulilizave lo lo-ngemeꞌ ngemeꞌ ogaꞌ nane likevo gilaaꞌ nave.
ACT 21:22 Tiꞌ li gili geiꞌ omo nane li lilizaniꞌ nene gililisanako laza nadolone.
ACT 21:23 Nemuꞌ laza gamazi ma lo-ngemesoꞌ nene ilinize. Lelita ve setaꞌve setaꞌve nizaniꞌ ingine Oꞌmosoꞌmi guliveloꞌ li mili li huki godoꞌine zopovo hukami haza nizanako
ACT 21:24 gaza vo engita giꞌmizo leze Zuda veti monovo di engikisi okodine lutine Oꞌmosoꞌmi veleloꞌ lamineꞌ ilive li di lamineꞌ ilo. Neꞌmine ikevo Oꞌmoso gizi imilizaniꞌ initeꞌ meni hize-ngedanivo gizi vataꞌ niigi godoꞌine zopovo huki matava ili di hulilizave. Neꞌmine ikevo mukilite ningi geikumuꞌ laniꞌ nene hazamuꞌ soza gamazi li-gidi laniꞌ nene gililisave. Idoꞌ Moseꞌ lo huko lineꞌ gamazi nene gazasi gele daaꞌ naineꞌ nesi gililisave.
ACT 21:25 Idoꞌ heta atoꞌ ve Izesuꞌnimuꞌ gili eleꞌvoleꞌ igi nizavemuꞌ nene gozopoꞌ luhuvo niteꞌ gizo huluneꞌ nene lo hukuneꞌ gamazi nene tiꞌ lo gizuneꞌ ma neive: Avazaha oꞌmoso niteliti nosoꞌ nitekutiꞌ nami ize guloliti vaniseꞌine nami idoꞌ nalaꞌ i-ngidikevo hilaniꞌ ize gulotiꞌ nami veneꞌ vemohoꞌ idoꞌ alungo umungive gopo ingamilo lo lo huko-ngiduneꞌ ma neive.
ACT 21:26 Neꞌmine likevo ingi goꞌ lavo Pauloꞌ aza gamaziꞌine gelo vo aꞌmine laniꞌ ve setaꞌve setaꞌvela giꞌmizavo engikisi okoꞌine luꞌine di lamineꞌ iꞌmi vi minaniꞌ. Neꞌmine igi nizavo Pauloꞌ aza Zuda veti monoꞌ numuno nabauꞌ dizo ingine hamoꞌ hamokumuꞌ Oꞌmoso initeꞌ gizi imilizaniꞌ gamene adoꞌ okoꞌine luꞌine di lamineꞌ igi minilizaniꞌ gamene nene osuꞌ lilineꞌ gamenemuꞌ nene aꞌmine gonoloꞌ gizebo ve lo-ngimineꞌ.
ACT 21:27 Lo-ngemavo okoꞌine luꞌine di lamineꞌ igi minilizaniꞌ gamene seveni nene osuꞌ lolosa neivo Pauloꞌ aza monoꞌ numunguꞌ neivo Asia misuboukotiꞌ Zuda ve linge ma eze ningi eveneꞌ mukiꞌ muluꞌninguꞌ hizi analoꞌ di giliꞌ li
ACT 21:28 gekeꞌ gekeꞌ li tiꞌ li laniꞌ: Isilaeleꞌ vekizo, alevo. Makaꞌ dalone. Aꞌmine ve mene numudoꞌ namadoꞌ mono leze Zuda ve do leme-ledo Moseꞌ lo huko-lidineꞌ gamazisi idoꞌ monoꞌ numuno mesi dovo ledevoꞌ ogo eveneꞌ mukiꞌ lo-ngeme ngemeꞌ ogaꞌ ive ma ne neive. Idoꞌ nGiliki aleve ngeleꞌmizo aꞌminguꞌ dizidiꞌmo nesi monoꞌ numudeuꞌ mene do goloso ogave li laniꞌ.
ACT 21:29 Eheso ve ma gulive Tolohimoꞌ aza Paulokisi Zelusalemi tauniuꞌ nizasivo ningi ingine nene Pauloꞌ eleꞌmizo monoꞌ numuno nabauꞌ dizihe li nemuꞌ gamazi laniꞌ.
ACT 21:30 Neꞌmine li likevo aꞌmine ebeꞌ meꞌninge mukiꞌ gili lotiꞌ izi igi di geseꞌ igi Pauloꞌni monoꞌ numuno nabautiꞌ geleleheꞌ igi di heta aniꞌ. Di heta ikevo geti akahe gizaniꞌ.
ACT 21:31 Neꞌmine igi Pauloꞌni bili hililisa navo Zelusalemi aleve mukiꞌ gulugulu li lovo gamazi nilave li gamazi hulikevo Loma veti amiliti guveꞌinesi ve naba neida nene vavo
ACT 21:32 aza gelo amisi idoꞌ engiꞌ gizebo veꞌine linge masi ngeleꞌmizivo lotiꞌ izi limi geti vi nizada hetelikevo guveꞌinesi vesi amisi ningi Pauloꞌni bililisa aniꞌ nene alami hulaniꞌ.
ACT 21:33 Hulikevo amiliti guveꞌinesi ve naba aza hetelo Pauloꞌni do goniꞌ ilive lo seni nalaꞌ setatunuꞌ izilisave lo lo-ngidineꞌ. Lo-ngedo tiꞌ lo lineꞌ: Aꞌmine ve nene zaho neve. Idoꞌ initeꞌ naniteꞌ do goloso ive lo longoꞌ o-ngidineꞌ.
ACT 21:34 Neꞌmine ogavo eveneꞌ ingine ato atoꞌ gamazi li gulugulunga li minadiꞌmo gamazi monovo gele guno amilineꞌ ogavo amiliti numunguko di dizilizave lo lo-ngidineꞌ.
ACT 21:35 Lo-ngedavo eleꞌmizi vi numuno gateda akaloꞌ eleꞌmizi dizilisa navo eveneꞌ ingine ngeꞌmeti vi gani mangilise iꞌmi vi tiꞌ li laniꞌ: Mene ve nene osuꞌ lilive. Neꞌmine lisa Pauloꞌni bili hililisa avo amilite aꞌine avileloꞌ zaloꞌ mili di vaniꞌ.
ACT 21:37 Amiliti numunguꞌ eleꞌmizi dizilisa navo Pauloꞌ aza nene nGiliki gamaziutiꞌ amiliti guveꞌinesi ve naba longoꞌ o-do lineꞌ: Naza gamazi ma lo-gemeloho. Lo lavo aza tiꞌ lo lineꞌ: Gaza nGiliki gamazi gele nabe.
ACT 21:38 Gozopoꞌ ngamani lovo o ngemo lovo ekeseꞌ igaꞌ ave gulo hadene neꞌmine fo tauseni (4,000) ngeleꞌmizo ebeꞌ hadivela vo minive Aigita ve nene geiꞌ nolosane lo giluvoniꞌza nGiliki gamazi lainako atoꞌ ve nolosane. Olo.
ACT 21:39 Lavo tiꞌ lo lineꞌ: Naza nene Zuda ve Kilikia misuboukotiꞌ Taliso ebeta gidaniꞌ nouve. Naza aꞌmine guvelesi neineꞌ tauni nabaꞌmi meꞌninge minangutiꞌ nene nouve. Gaza gele nemanivo eveneꞌ mene gamazi ngomo ma lo-ngemelohe.
ACT 21:40 Neꞌmine lavo amiliti guveꞌinesi ve aza gele emavo Pauloꞌ numuno akaloꞌ ote mino ana do oto avazaha ogo eleseꞌ ikilo lavo gamazi lami veꞌine biziki nizavo Zuda ve mukikumuꞌ Hebilaioꞌ ve laaꞌ aniꞌ engiꞌ gamaziutiꞌ tiꞌ lo lo-ngimineꞌ:
ACT 22:1 Lingine gonoꞌnemote idoꞌ neze zuho lingine monovoꞌne lo-lengemelesa luze. Gili minilo.
ACT 22:2 Neꞌmine lo engiꞌ Zuda veti gamaziutiꞌ nolo-ngimivo gili ingine eleseꞌ iki gapepeꞌ i minikevo imineꞌ molo tiꞌ lo lo-ngimineꞌ:
ACT 22:3 Naza nene Zuda ve Kilikia misubouko Taliso ebekuꞌ gidaniꞌ nouvoniꞌza mene ebekuꞌ ogo mino tisaꞌ ma Gamalieleꞌ eze gizeneuꞌ mino eze gamaziꞌve gelo mino naba uvoniꞌ ve. Neꞌmine ogo mino monoꞌ apizo lo-nemeꞌ nemeꞌ ivo avotemote li hukaniꞌ gamazi gele lisiheꞌ ogovoꞌ gelo osuꞌ luvoniꞌ ve. Idoꞌ idiꞌnise nene lingine Oꞌmoso eꞌmetilisa gilingili ikehe. Naza nene lingine adiꞌmino nazasi aꞌmineꞌmino amuzo molo minuvoniꞌ ve.
ACT 22:4 Neꞌmine ogo Izesuꞌ akaloꞌ nene eꞌmetilisa vaniꞌ aleve goboni molo-ngedo hili osuꞌ lilizave lo veneꞌ vemohoꞌ mukiꞌ nene aꞌnidoꞌ nalaꞌ izo hulo nalaꞌ numunguꞌ o-ngedaaꞌ uvoniꞌ ma ve.
ACT 22:5 Evenetoꞌ medelo mino Oꞌmoso initeꞌ lehize-daaꞌ ive nabasi idoꞌ lengiꞌ monoꞌ gizebo vetine mukikisi ingine gili nizave. Nemuꞌ nene ha li-lingimilisave. Ingine leze Zuda veti zuho Damasiko ebeta nizavemuꞌ luhuvo niteꞌ gizi nimikevo nene holela do vo Izesuꞌ evenele nalava ngemo ngeleꞌmizo Zelusalemi ebeta okuvo engiꞌ lihime apasi-ngidi ngibililizave lo gelo do vuvoniꞌ.
ACT 22:6 Idoꞌ akaloꞌ novo Damasiko ebeꞌ do noalituvo holiseꞌ tuvelu kiloku neꞌmidoꞌ Okulumokutiꞌ labanaꞌ naba galinali lemo do vodo vodo o-nidineꞌ.
ACT 22:7 Neꞌmine ogavo misubouꞌ lemo pouꞌ lo ongo nouvo aꞌmingutiꞌ nenikumuꞌ gamazi ma tiꞌ lo sotoꞌ ogavo giluve: Saulo, Saulo, gaza nanitekumuꞌ goboni nomolo-nedane.
ACT 22:8 Lavo naza tiꞌ lo lo-imuve: Guvekasi ve gaza zaho ve lokuvo aza tiꞌ lo lo-nimineꞌ: Gaza goboni molo-nedaaꞌ anive Nasalete ve Izesuꞌ ma ne noluve.
ACT 22:9 Tiꞌ lo nolivo nezesi makaꞌ minunive ingine labanaꞌ ilineꞌ nene ningikeha gamazi lo-nimineꞌ nene gilamaniꞌ ve.
ACT 22:10 Neꞌmine ogavo naza tiꞌ lo lo-imuve: Guvekasi ve naza nadiꞌ olove. Lokuvo Guvelesi ve aza tiꞌ lo lo-nimive: Gaza oto Damasiko numuda vozo. Vo hetelanivo gono mukiꞌ daline lo molo-gede nouvoniꞌ nene li-gimilisave.
ACT 22:11 Tiꞌ lo lavo oto veꞌne ningo oloꞌ labanaꞌ lidiꞌmo veꞌne lenge lenge lavo initeꞌ ninge lamineꞌ amuvo makaꞌ monunivete aꞌneloꞌ di neleꞌmizavo Damasiko numuda vuneꞌ ve.
ACT 22:12 Aꞌmida ve ma minineꞌ gulive Ananiaꞌ aza nene monoꞌ ve lamineꞌ mino Moseꞌ lo huko lineꞌ gamazi do meheneloꞌ molo minaaꞌ ive Zuda ve mukiꞌ nete gamangi mili-daaꞌ aniꞌ.
ACT 22:13 Aꞌmine ve nene nouvoda ogo ote mino tiꞌ lo lo-nimive: Saulo, gaza neze zuho make, veka gohi ninge lamineꞌ ozo lavo nolineꞌ velesi geto ningo vonuꞌ biluve.
ACT 22:14 Vonuꞌ nobiluvo tiꞌ lo lo-nimive: Avotemote gelekeleꞌ i-daaꞌ aniꞌ Oꞌmoso neꞌmo geiꞌ mo noso molo-gedo Oꞌmoso asiꞌve gilineꞌ initekumuꞌ gazasi gelo idoꞌ gaza nene eiꞌ Oꞌmosolatiꞌ lisiheꞌ ogo molo ogaꞌ ive gehepeve ningo aꞌmineꞌmi veletiꞌ gamaziꞌve geleline lo do kegeso geleꞌmize molave.
ACT 22:15 Gaza initeꞌ mataꞌ ningo gelaineꞌ neꞌmi gamaziꞌve lo eze monovo nene numudoꞌ namadoꞌ ve lo sotoꞌ ogo lo-ngemeline.
ACT 22:16 Idoꞌ idiꞌnise nene gaza nanitekumuꞌ gizebo iline. Gaza oto noso holozo. Eze guliveloꞌ lanivo lihimeka apase-gedelive.
ACT 22:17 Ananiaꞌ tiꞌ lo lo-nemavo neꞌmine ogo alingeꞌ nene Zelusalemi numuda tineꞌ molo vo monoꞌ numuno nabauꞌ dizo Oꞌmosola nolo Guvelesi ve ninguvoniꞌ nene vamuꞌ gidini ninguve.
ACT 22:18 Veꞌneloꞌ o molo tiꞌ lo lo-nimive: Me ebekuꞌ aleve nene geiꞌ vekatiꞌ nenikumuꞌ gamaziꞌne lo-ngemelineꞌ nene gili hulilisaze. Nemuꞌ gaza geto oto Zelusalemi numuno ebekutiꞌ liteꞌ lo lemo vozo.
ACT 22:19 Neꞌmine lavo naza tiꞌ lo lo-imuve: Guveꞌnesi ve make, neze monovoꞌne ningi gili osuꞌ li nizave. Naza nene Zuda veti monoꞌ numuꞌninguꞌ numuꞌninguꞌ dizo geikumuꞌ gili eleꞌvoleꞌ igaꞌ ave ave do sotoꞌ ogo ngebelo nalaꞌ numunguꞌ hulo-ngedaaꞌ uvoniꞌ ma neive.
ACT 22:20 Neꞌmine ogo geiꞌ gamazika lo sotoꞌ ogaꞌ ive Setehanoꞌni nene bililisa niigi saketiꞌine kuluhizi milikadoꞌ gizebo o nouvo bilikevo helavo naza giluvo lamineꞌ ineꞌ ma neive.
ACT 22:21 Neꞌmine lo lokuvo tiꞌ lo lo-nimive: Gaza vozo. Naza golo gohiuko heta atoꞌ vetida nogimiseluve.
ACT 22:22 Pauloꞌ aza gamazi ma nolo-ngimivo haza gili minaniꞌza aza tiꞌ lo Guvelesi veꞌmo heta atoꞌ vetida imiselelesa lineꞌ gamazi nene lo-ngemavo nololoꞌ di gani mangilise niigi tiꞌ li laniꞌ: Aꞌneꞌmine ve mene velesi misubouꞌ haza minelineꞌ edamiliko helavo osuꞌ lilive.
ACT 22:23 Neꞌmine li gani mangilise igi ngizeboloꞌ molavo saketiꞌine apasi hibiꞌhibiꞌ izi uꞌmusupo gisi huli veleta aniꞌ.
ACT 22:24 Neꞌmine igi nizavo amiliti guveꞌinesi ve nabaꞌmo lavo Pauloꞌni eleꞌmizi amiliti numunguꞌ dizaniꞌ. Neꞌmine ikevo eveneꞌ nete gani mangilise i-daniꞌ neꞌmi monovo lo sotoꞌ ogavo gelelove lo amiliti guveꞌinesi ve aza ami nene lihimeꞌvemuꞌ longoꞌ igi gasavasi nalaꞌ amuzo malahetunuꞌ bililizave lo lo-ngimineꞌ.
ACT 22:25 Neꞌmine lo lavo gizene analoꞌ nalaꞌ di di oti-di nizavo amiliti gizebo ve ngomo ma aꞌmidoꞌ neivo Pauloꞌ aza longoꞌ o-do tiꞌ lo lineꞌ: Naza Loma ve nouvoniꞌzoo louꞌ gamazi li hukanguꞌ nene Loma ve neꞌmine i-ngidamilo li li hukamaniꞌ neivosa neze goniꞌ nene olihe gilamadoꞌ gasavasi nalatunuꞌ nibililisa nahe.
ACT 22:26 Lavo gelo gizebo ve aza amiliti guveꞌinesi ve naba neida vo lo sotoꞌ ogo tiꞌ lo-imineꞌ: Nadolosa lane. Aꞌmine ve nene Loma ve ma nenako.
ACT 22:27 Lavo guvelesi ve naba aza Pauloꞌ neida vo longoꞌ o-do lineꞌ: Olo. Gaza nene Loma ve nabe. Lavo Pauloꞌ aza lineꞌ: Oo.
ACT 22:28 Lavo Guvelesi ve naba neꞌmo tiꞌ lo lo-imineꞌ: Naza nene ebeꞌ maukotiꞌ ve mino meni naba hizo Loma ve loloꞌ ogo nouvoniꞌ ma neive. Neꞌmine lo lavo Pauloꞌ tiꞌ lo lineꞌ: Neꞌmine oganeꞌza naza nene Loma vete gidaniꞌ ma nouvo nave.
ACT 22:29 Lo lavo Pauloꞌni bililisa igi minaniꞌ nene nolineꞌ velesi hulaniꞌ. Hulikevo guvelesi ve naba nene Pauloꞌnimuꞌ Loma ve neive lo gelo gizene analoꞌ nalaꞌ dangumuꞌ nene ehelele izineꞌ.
ACT 22:30 Neꞌmine ogavo ingi goꞌ lavo amiliti guveꞌinesi ve naba neꞌmo Zuda ve ingine Paulongumuꞌ nanimuꞌ gili goloso i-dave lo neꞌmi monovo gelelove lo evenetoꞌ medelo mino Oꞌmoso initeꞌ lehize-daaꞌ ive nabasi idoꞌ engiꞌ kanisole mukikisi vise lo-ngemavo igi di geseꞌ ikevo Pauloꞌni eleꞌmize veꞌnidoꞌ molaniꞌ.
ACT 23:1 Pauloꞌ aza gisili hize mino tiꞌ lo lo-ngimineꞌ: Neze zuhokizo, naza neniꞌ luꞌnemuꞌ giluvo Oꞌmosoꞌmi veleloꞌ laminekovoꞌ vevese minivo mine do dizuvoniꞌ idiꞌnise ne aꞌmineꞌmino nouve.
ACT 23:2 Neꞌmine lo nolivo evenetoꞌ medelo mino Oꞌmoso initeꞌ lehize-daaꞌ ive naba Ananiaꞌ aza Pauloꞌ minineꞌ avita minave tiꞌ lo lo-ngimineꞌ: Lingine veleloꞌ izilevo.
ACT 23:3 Lo lavo Pauloꞌ tiꞌ lo lo-imineꞌ: Gaza lukauꞌ guhoꞌ novineꞌ geiꞌ nene Oꞌmosoꞌmo gebeleleseive. Gaza nene Moseꞌ lo huko lineꞌ akaloꞌ neleꞌmizo molalove lo nolaneꞌza aꞌmine lo huko lineꞌ gamazi nene avutoꞌ ogo nibililizave lo goꞌine noizabe.
ACT 23:4 Tiꞌ lo lavo aꞌmidoꞌ minavete tiꞌ li li-imaniꞌ: Oꞌmosoꞌmo eleꞌmize molavo evenetoꞌ medelo mino initeꞌ lehize-daaꞌ ive naba ma nenako eze nanimuꞌ dovoꞌ ledevoꞌ nane.
ACT 23:5 Likevo Pauloꞌ aza tiꞌ lo lineꞌ: Lingine zuho gizebo o-lengedaaꞌ ive guvelesi ve dovoꞌ ledevoꞌ amozo li gizikevo neineꞌ ma nenako aza nene evenetoꞌ medelo mino Oꞌmoso initeꞌ lehize-daaꞌ ive naba neive lo giluvodini neꞌmine lo ma lamuvodine.
ACT 23:6 Neꞌmine lo kanisole muliseutiꞌ ve linge ma nene Sadukaioꞌ eveneꞌ idoꞌ linge ma Halisaioꞌ eveneꞌ minaniꞌ nemuꞌ gelo gamazi naba lo kanisole aleve tiꞌ lo lo-ngimineꞌ: Lingine neze zuhokizo, neze izeꞌne avoꞌnemote nene Halisaioꞌ aleve nizave idoꞌ nazasi nene Halisaioꞌ ve nouve. Helakutiꞌ otaaꞌ nene neive lo gelo nouvoniꞌ nemuꞌ nene gonitoꞌ neleꞌmizi nimilave lineꞌ.
ACT 23:7 Neꞌmine lo lavo Halisaioꞌ alevesi Sadukaioꞌ alevesi gamaziꞌineꞌmo lovoꞌninguꞌ ogavo vi eza ema vaniꞌ.
ACT 23:8 Sadukaioꞌ aleve ingine hele noloningutiꞌ otaaꞌ idoꞌ angeloꞌ idoꞌ heta ve neꞌmine initeꞌ nomive li laaꞌ navo Halisaioꞌ aleve ingine neꞌmine initekumuꞌ initeꞌ gihile ve li laaꞌ naniꞌ nemuꞌ vi eza ema vaniꞌ.
ACT 23:9 Neꞌmine ikevo muliseꞌninguꞌ gilili ngololoka li Halisaioꞌ aleveukotiꞌ monoꞌ monovo apizi ngimaaꞌ ave linge ma oti amuzo mili tiꞌ li laniꞌ: Mene veꞌmi lihimemuꞌ giluneꞌ ma nomive. Angeloꞌ nizaniꞌ idoꞌ Oꞌmosoꞌmidatiꞌ initeꞌ maliꞌmo gamazi lo-eme nolineꞌ nene nadive lo lolone.
ACT 23:10 Neꞌmine li gopoꞌ napa gamazi li lolize gamazi likevo amiliti guveꞌinesi ve naba aza nene Pauloꞌni izi giti hulilizahe lo ehelele izavo ami lo-ngemavo igi kanisoleliti vovoꞌningutiꞌ eleꞌmizi di numuꞌninguko vaniꞌ ve.
ACT 23:11 Neꞌmine ikevo holukaꞌ ingi nizavo Guvelesi veꞌmo Pauloꞌ neida sotoꞌ o emo tiꞌ lo lo-imineꞌ: Golise gelamo luka amuzo molavo minezo. Zelusalemi numuda neniꞌ gamaziꞌne lo soto sotoꞌ ogaꞌ abe. Aꞌmineꞌmine ogo Loma ebeta lo sotoꞌ olosane.
ACT 23:12 Neꞌmine lo lavo goꞌ lavo Zuda ve di bizi lovo gizi Pauloꞌni belelone li nosoꞌ niteꞌ malise aniꞌ. Olihe belamo nosoꞌ niteꞌ idoꞌ noso naloneꞌ nene Oꞌmosoꞌmo usiꞌ ize-lidivo li laniꞌ.
ACT 23:13 Aꞌmine gamazi li hukave nene foti (40) neꞌmine ivileꞌ igi minavete li hukaniꞌ ve.
ACT 23:14 Li huki evenetoꞌ medeli mini Oꞌmoso initeꞌ lehizi-daaꞌ ave nabasi monoꞌ gizebo vesi nizada vi heteli tiꞌ li li-ngimaniꞌ: Pauloꞌni belelesa olihe belamo nosoꞌ niteꞌ malise ogo minelone lo lo hukokune. Idoꞌ aꞌmine lo hukuneꞌ gamazi gele damoloneꞌ nene Oꞌmosoꞌmo usiꞌ ize-lidivo lo lo hukokune.
ACT 23:15 Neꞌmine li lingine kanisolesi amiliti guveꞌinesi ve nabala gamazi tiꞌ li hulikevo vilive: Gaza Pauloꞌni leliꞌ muliseuko imiselanivo alive. Gamaziꞌve lavo gele lamineꞌ olonize. Neꞌmine li golo izikevo gamazitine gelo neꞌmine ogavo laza Pauloꞌ nene akaloꞌ navo gohoni ongo belelone.
ACT 23:16 Neꞌmine likevo Pauloꞌ alunoloꞌmi gipele aza gohoni ingalizaniꞌ gamazi laniꞌ nene gelo vo amiliti numunguꞌ dizo omolohine Pauloꞌni nene lo-imineꞌ.
ACT 23:17 Lo-emavo Pauloꞌ aza amiliti gizebo ve ngomo nene asi lo-do tiꞌ lo lineꞌ: Gipe mene guvelesi ve naba neida eleꞌmizo vanivo gamazi ma lo-emelive.
ACT 23:18 Lavo aza guvelesi ve naba neida eleꞌmizo vo tiꞌ lo lo-imineꞌ: Nalaꞌ numunguꞌ neive Pauloꞌ aza asi lo-nemoo gipe mene geiꞌ gamazi lo-gemelove nolize nemuꞌ eleꞌmizo geita vozo lavo eleꞌmizo nouve.
ACT 23:19 Neꞌmine lavo guvelesi ve naba aza gipeliꞌmi analoꞌ do eleꞌmize abazaꞌ ogo mino longoꞌ o-do lineꞌ: Nani gamazi lo-nemelesa labe. Lo-nemezo.
ACT 23:20 Lo longoꞌ o-davo tiꞌ lo lo-imineꞌ: Zuda ve ingine Pauloꞌni aizeꞌ nene kanisoletida eleꞌmizo lomanivo eze monovo gohi viseꞌ ogo gele lamineꞌ olone li longoꞌ i-gidilisa gamazi di hamoꞌ naze.
ACT 23:21 Igi nilavo ma gele ngemamozo. Engikutiꞌ eveneꞌ foti (40) mini aꞌminguꞌ gohisi imineꞌ mili nizave. Ingine nete nosoꞌ niteꞌ namo idoꞌ noso namo malise gehepeve o mino Pauloꞌni belosa noso niteꞌ nalone li lovo gizi gohoni niingi geiꞌ gamazimuꞌ gapepeꞌ igi gizebo i nizave.
ACT 23:22 Neꞌmine lavo gelo guvelesi ve naba aza tiꞌ lo lo-imineꞌ: Gaza gamazi lo-nemaneꞌ nene lo-nimuve lo eveneꞌ masi lo nese nese ogo lo-ngemamozo lo gipe nene lo-emo imiselineꞌ.
ACT 23:23 Neꞌmine lo guvelesi ve naba aza amiliti gizebo ve setaꞌ asi lo-ngemo tiꞌ lo lo-ngimineꞌ: Lingine li-ngimikesivo ami misubouꞌ aka vilizave nene tu hadeti (200) idoꞌ hosi ize meheneloꞌ vilizave nene sevedi (70) idoꞌ goholoꞌ dalizave nene aꞌmineꞌmine ogo tu hadeti (200) neꞌminete di vaꞌvaꞌ igi mini holukaꞌ naeni (9) kiloku Kaesalea ebeta vilizave.
ACT 23:24 Idoꞌ di goloso i-damavo lamineꞌ ha neivo eleꞌmizi ngamani naba Helikiꞌ neida vilizangumuꞌ nene Pauloꞌni hosi linge ma di vaꞌvaꞌ i-dilo.
ACT 23:25 Neꞌmine lo lo-ngemo luhuvo niteꞌ tiꞌ lo gizineꞌ:
ACT 23:26 Naza Kalaudioꞌ Lisiaꞌ nGamani naba Helikiꞌ geiꞌ gopoꞌni nolo luhuvo niteꞌ mene tiꞌ lo nogize-giduve.
ACT 23:27 Gaza guvekasi ve naba make, ami ingine ve nene ma eleꞌmizi nivave. Aza nene Zuda ve ingine analoꞌ dii bili hililisa navo naza nene Loma ve neive lo gelo ami ma ngeleꞌmize do vo aꞌningutiꞌ ipeꞌ ogo do uꞌ izuneꞌ ve.
ACT 23:28 Do uꞌ izo bililisa aniꞌ nene nani lihimeꞌvemuꞌ neꞌmine i-dilisa nahe lo neꞌmi monovo gelelove lo gelo eleꞌmizo engiꞌ kanisoleliti muliseuꞌ eleꞌmizo lomuvoniꞌ.
ACT 23:29 Eleꞌmizo lomo goniꞌ i-di laniꞌ gamazi giluvoniꞌ nene eiꞌ laaꞌ ineꞌ gamazi nene engiꞌ louꞌ gamaziꞌine lidoꞌ vo miliseꞌ osaꞌmive li goniꞌ i-daniꞌza lihimeꞌve apaso bele helelonidoꞌ lisiheꞌ o minineꞌ initekumuꞌ nehe nalaꞌ numunguꞌ hulo-delonidoꞌ lisiheꞌ o minineꞌ initekumuꞌ nehe neꞌmine initekumuꞌ goniꞌ i-damave.
ACT 23:30 Neꞌmine lo gelo engikutiꞌ eveneꞌ linge ma ingine gohoni ingi aꞌmine ve belelone laniꞌ nene gelo geita imiselekuvo novive. Idoꞌ gonitoꞌ eleꞌmizi nimilave nene geiꞌ vekaloꞌ gamazi li sotoꞌ ikevo geleline lo lo-ngemekuvo alisave.
ACT 23:31 Luhuvo niteꞌ neꞌmine lo gizo ngemavo gamaziꞌve gili di ami ingine aꞌmine holukaꞌ nene Pauloꞌni eleꞌmizi Adipatili ebeta limi hetelaniꞌ.
ACT 23:32 Limi nihetelavo goꞌ lavo ami linge tineꞌ mili numuꞌnida ikevo hosi izeloꞌ vave ingine Pauloꞌni eleꞌmizi vaniꞌ.
ACT 23:33 Eleꞌmizi vi Kaesalea numuda heteli luhuvo niteꞌ ma nene ngamani naba imi Pauloꞌnisi anauꞌ milaniꞌ.
ACT 23:34 Neꞌmine ikevo luhuvo gato misuboꞌvemuꞌ longoꞌ o-dineꞌ. Longoꞌ o-davo aza Kilikia misuboukotiꞌ ve nouve lavo gelo
ACT 23:35 tiꞌ lo lo-imineꞌ: Gonitoꞌ geleꞌmizi milaaꞌ ave ingine igi hetelikevo geiꞌ gamazika gelelove. Neꞌmine lo amiliti aꞌninguꞌ molo lo-ngemavo Helodeꞌ numuꞌve nabauꞌ hulimiki gizebo i minaniꞌ ve.
ACT 24:1 Gamene faef (5) ogo vavo evenetoꞌ medelo mino Oꞌmoso initeꞌ lehize-daaꞌ ive naba Ananiakisi idoꞌ monoꞌ gizebo ve linge masi idoꞌ goniꞌ gamazi lo monovo gelaaꞌ ive ma gulive Telitulokisi ingine Kaesalea ebeta limaniꞌ. Limi Paulongumuꞌ goniꞌ gamazi lilisa ngamani naba Helikiꞌ neida dizaniꞌ.
ACT 24:2 Dizikevo ngamani naba aza asi lavo Pauloꞌ ogavo Telituloꞌ aza Pauloꞌni goniꞌ o-delesa tiꞌ lo lineꞌ: Helikizo, gaza ve naba make, gaka gele veveso gaza leleꞌmize lamineꞌ ogo leze misubouko initeꞌ mataꞌ mine gopo ineꞌ nene do vevesanivo laza lamineꞌ hongu lo minaaꞌ nouneꞌ ma nenako numudoꞌ namadoꞌ ve mukiꞌ isaaꞌ neve lo gamene gamene gopoꞌni laaꞌ noune.
ACT 24:4 Gamazi haꞌna loloniꞌ goseleꞌ gebelalize. Nemuꞌ ahovo ngomo ma lo-gemeloniꞌ nene geiꞌ nasahilikamuꞌ ogo gele nemeline.
ACT 24:5 Aꞌmine ve mene monovo goloso ogaꞌ ive mino misubouꞌ misubouꞌ mono Zuda ve mukiliti muluꞌninguꞌ hizo lovo hizilizangumuꞌ do avitoꞌ molo-ngedaaꞌ neive. Neꞌmine ogo Nasalete veꞌmi monoꞌ laaꞌ aveti ve nabaꞌine ma neive.
ACT 24:6 Aza nene leze monoꞌ numude naba do gopo olosa neivo analoꞌ duneꞌ ve. [Laza leliꞌ louteloꞌ do molo goniꞌ o-delone lo giluneꞌza
ACT 24:7 amiliti ve nabaꞌine Lisiaꞌ ogo lavo amilite amuzo mili adeutiꞌ ipeꞌ igi daniꞌ ve.
ACT 24:8 Neꞌmine ikevo aꞌmine goniꞌ i-dilizave geitoꞌ igi goniꞌ i-dilizave lo Lisiaꞌ lo-ngimineꞌ.] Gasika gonitoꞌ eleꞌmize nomuluneꞌ gamazimuꞌ monovoꞌve viseꞌ ogo longoꞌ o-do monovoꞌve do sotoꞌ molalosane.
ACT 24:9 Neꞌmine lo lavo Zuda ve gamaziꞌveloꞌ ledeni igi hizi eleꞌ i-daniꞌ.
ACT 24:10 Neꞌmine ikevo ngamani naba aza Pauloꞌni gamazi lilive lo ana hisuꞌ o-davo Pauloꞌ tiꞌ lo lineꞌ: Kilisimasi mukiꞌ ogo novinguꞌ nene gaza eveneꞌ zuho mene gizebo o-ledo goniꞌ gamazi gelekaꞌ gelekaꞌ ogo naneꞌ nenako leliꞌ monovotemuꞌ nene mo gele lamineꞌ o nolosane lo gelo aꞌmine goniꞌ i-nidaniꞌ gamaziloꞌ do velepeꞌ izo gamaziꞌne luꞌne lapa nomineꞌ mino ha lolosuve.
ACT 24:11 Naza Zelusalemi numuda Oꞌmoso opoꞌni lo-emelesa dizo minuvodotiꞌ gamene ma ogo vineꞌ nene gamene tuveluvoꞌ (12) ogo vavo none. Nemuꞌ nene gasika eveneꞌ longoꞌ o-ngedelineꞌ nene li-gimikevo ha gelelesane.
ACT 24:12 Naza nene monoꞌ numuno nabauꞌ idoꞌ monoꞌ numuno ngomo ngomouꞌ idoꞌ heta numuno ebekuꞌ eveneꞌ masi monokumuꞌ gamazitunuꞌ lovo ogo eza ema nonivo idoꞌ eveneꞌ do nubuho o-ngedo muluꞌninguꞌ nohizuvo ningisaꞌmaniꞌ ve.
ACT 24:13 Idoꞌ ingine nenikumuꞌ lihime neꞌmine neꞌmine ogo daniꞌ ve li nilaniꞌ gamazimuꞌ gelanivo gihile izeleseive li gelebizilisa ilizaniꞌ nene ngeli gelebizamilisave.
ACT 24:14 Ne neineꞌza gamazi liꞌmi vaniꞌ mautiꞌ hamoꞌ lamineꞌ ma laniꞌ lo sotoꞌ ogo lo-gemelove. Monoꞌ aka gosohokumuꞌ angiseꞌine eveneꞌ izeꞌ molo do gopo o-ngedaaꞌ aka ve laniꞌ nene aꞌmine akaloꞌ nomono naza avotemote opoꞌni li gelekeleꞌ i-daniꞌ Oꞌmoso nene opoꞌni lo gelekeleꞌ o-daaꞌ nouve. Neꞌmine ogo naza Moseꞌ lo huko lineꞌ gamazisi idoꞌ Oꞌmosoꞌmi gamazi li sotoꞌ ave polohetelite gizikaniꞌ gamazi nesi mukiꞌ gamazimuꞌ nene gele eleꞌvoleꞌ o nouve.
ACT 24:15 Idoꞌ ingine gilaniꞌ eveneꞌ goloso lamineꞌ hele noloningutiꞌ otaaꞌ nene aliteleseive li gili nizaniꞌ nene nazasi aꞌmineꞌmine ogo gele lamineꞌ o nouve.
ACT 24:16 Idoꞌ Oꞌmosoꞌmo ningavo idoꞌ eveneꞌ ningikevo neze luꞌne gamene gamene laminekovoꞌ veveso minelive lo neze monovoꞌneloꞌ gizebo laminekovoꞌ ogo minaaꞌ nouve.
ACT 24:17 Idoꞌ naza misubo mala vo nomonuvo kilisimasi linge ma ogo vavo aꞌmine monuvodaatiꞌ alevelite di nubo aniꞌ moni nene do ogo neze zuho Zuda ve engikuꞌ gohoꞌ gahaliꞌ minaniꞌ nene di ngimilizave lo lehize-ngedelesa idoꞌ Oꞌmoso opoꞌni lo initeꞌ ma lehize-delesa Zelusalemi numuno ebeta vuvoniꞌ ve.
ACT 24:18 Aꞌmida nene okoꞌne luꞌne do lamineꞌ ogosa monoꞌ numuno nabauꞌ dizo aꞌmine luvoniꞌ gono nene noduvo ninganiꞌ ve. Idoꞌ ninganiꞌ nene naza eveneꞌ vaiꞌ do nubo amo idoꞌ gani mangilise do sotoꞌ amo haza nouvo ninganiꞌ ve.
ACT 24:19 Ne neiha Asia misuboukotiꞌ Zuda ve linge ma aꞌmida mini gopo gamazi laniꞌ. Aꞌmine ve nete nenikumuꞌ lihime di minaniꞌ nolineꞌ nene geiꞌ vekaloꞌ mene mini goniꞌ i-nidilizanako amave.
ACT 24:20 Idoꞌ aꞌmine ve nete goniꞌ i-nidamilizaniꞌ nolineꞌ nene aꞌmine idise mela nizavete goniꞌ i-nidi naza engiꞌ kanisoleti muliseuꞌ nouvo neniꞌ lihime ningi nilizaniꞌ nene mo li sotoꞌ ilizadoꞌ o neive.
ACT 24:21 Gamazi hamoꞌ gehepeve ma noloseive. Naza gomuta vomine vovoꞌninguꞌ mino asi naba lo tiꞌ lo lo-ngimuvoniꞌ: Helakutiꞌ otaaꞌ nene neive lo gele eleꞌvoleꞌ o nouvongumuꞌ lingine gonitoꞌ neleꞌmizi nimilavo idiꞌnise nouve lo lo-ngimuvoniꞌ ve.
ACT 24:22 Neꞌmine lo lavo Helikiꞌ aza monoꞌ aka gosohokumuꞌ gele hehe laaꞌ ive mino gamazi olihe di hilamavo lumo haza molokivo minineꞌ. Neꞌmine ogo neꞌminevoꞌ ma lo-ngimineꞌ: Amiliti guveꞌinesi ve Lisiaꞌ lemo ogavo geiꞌ goniꞌ gohi gelo do helelove.
ACT 24:23 Neꞌmine lo lo-emo amiliti gizebo ve tiꞌ lo lo-imineꞌ: Lingine Pauloꞌni gizebo i-di neꞌmine manaꞌmine i-dami zogo ve zuholite igi naꞌnaꞌ i-dilisa nilavo ma ha gili ngimilo.
ACT 24:24 Gono gamazi tiꞌ lo lo-emo gamene ma nomino Helikiꞌ aza elenaho Zuda veneꞌ gulive Dulusilaꞌni nene eleꞌmizo dize mino Pauloꞌni asi lo-emavo aza ogo Izesuꞌ Kilisitoꞌnimuꞌ gele eleꞌvoleꞌ ogaꞌ monovomuꞌ lo-ngimineꞌ.
ACT 24:25 Initeꞌ lamineꞌ vevese mininekovoꞌ ogo molo ogaꞌ nemuꞌ idoꞌ lute do giliꞌ lo lisiheꞌ minaakumuꞌ idoꞌ gamene nabaloꞌ Oꞌmosoꞌmo goniꞌ o-ledelineꞌ nemuꞌ lo-ngemavo Helikiꞌ aza ehelele izavo tiꞌ lo lo-imineꞌ: Idiꞌnise moda ve. Vo minelinize. Vo nanivo alingeꞌ gezemuꞌ geleloniꞌ gamene alitavo ma asi lokuvo aline.
ACT 24:26 Helikiꞌ aza Pauloꞌ gamaziꞌve laniteꞌ ngomo giliha idoꞌ aꞌminguꞌ nene Pauloꞌ neꞌmo aꞌmine veliꞌmo kuluhize-nedelingumuꞌ ve lo moni nemelihe lo gelo gamene gamene asi lo-emavo ogaꞌ ivo gamazi li voleloꞌ meloꞌ igi minaaꞌ asineꞌ.
ACT 24:27 Neꞌmine igi nizasivo kilisimasi setaꞌ ogo vavo ngamani naba gohi ma gulive Polikioꞌ Hesitoꞌ aza ogo Helikiꞌ moꞌmosiꞌve daniꞌ. Neꞌmine neivo Helikiꞌ aza Zuda ve nezemuꞌ gilavo lamineꞌ ilive lo Pauloꞌni kuluhize-damo haza nalaꞌ numunguꞌ mininguꞌ hulomiko vavo minineꞌ.
ACT 25:1 Hesitoꞌ aza ogo ngamani naba loloꞌ ogo gamene seto hamovoꞌ mino Kaesalea ebeꞌ hulo nelotiꞌ Zelusalemi ebeta dizo vineꞌ.
ACT 25:2 Dizo hetelavo evenetoꞌ medeli mini Oꞌmoso initeꞌ lehizi-daaꞌ ave nabasi idoꞌ Zuda veti ve nabaꞌine lingesi ezela igi Pauloꞌ goniꞌveꞌmi monovo li-imaniꞌ.
ACT 25:3 Idoꞌ gomuꞌ lovo gizi huki akaloꞌ gohoni ongo belelone li ngamani naba Hesitoꞌni tiꞌ li golo izaniꞌ: Mulude do hongu lo-ledo Pauloꞌni Zelusalemi numuda imiseleline losa nolo-gimune.
ACT 25:4 Likevo Hesitoꞌ tiꞌ lo lo-ngimineꞌ: Pauloꞌ aza Kaesalea ebeta nalaꞌ numunguꞌ nalatoꞌ neive. Neinako naza ngomo ma nomino aꞌmida lemelesa nouve.
ACT 25:5 Nemuꞌ lengitatiꞌ eveneꞌ naba minaniꞌ nete ingine ma giꞌmizavo makaꞌ lemelone. Idoꞌ aꞌmine ve nene lihimeꞌve nolineꞌ nene goniꞌ i-dilisave.
ACT 25:6 Neꞌmine lo Hesitoꞌ aza gamene eiti nehe teni nehe neꞌmine Zelusalemi aleveti vovoꞌninguꞌ mino Kaesalea ebeta lemo vineꞌ. Lemo vo ongo goꞌ lavo goniꞌ do helaaꞌ moꞌmosiꞌveloꞌ dizo minoo aza Pauloꞌnimuꞌ lavo eleꞌmizi dizaniꞌ.
ACT 25:7 Eleꞌmizi dizikevo neivo Zelusalemi numudatiꞌ limi minaniꞌ Zuda ve ingine di vodo vodo i-di initeꞌ goloso naba neꞌmine manaꞌmine ogave li di neuꞌ manauꞌ igi li-daniꞌ. Neꞌmine li li-daniꞌza aꞌmine gamaziꞌmi gihileꞌve nene ngeli di sotoꞌ mili Helikiꞌni elebizamaniꞌ.
ACT 25:8 Neꞌmine ikevo Pauloꞌ monovoꞌve lo sotoꞌ ogo tiꞌ lo lo-ngimineꞌ: Zuda vete li hukaniꞌ louꞌ gamazi ma avutoꞌ amo idoꞌ monoꞌ numuno naba do gopo amo idoꞌ Loma veti guvetesi ve nabaꞌmi gamazi ma avutoꞌ amuvoniꞌ ma neive.
ACT 25:9 Neꞌmine lavo Hesitoꞌ aza Zuda ve neze ningavo lamineꞌ ilive lo gaꞌine hizo Pauloꞌni tiꞌ lo longoꞌ o-dineꞌ: Zelusalemi numuda geleꞌmizo vo aꞌmida gonika geleloniꞌ nene lamineꞌ ilineꞌ o-neihe. Nadive lo gele nane.
ACT 25:10 Neꞌmine lo longoꞌ o-davo Pauloꞌ tiꞌ lo lineꞌ: Loma veti guvetesi ve naba Kaesaleꞌ goniꞌ numuꞌveuꞌ omo nouve. Loma ve nouvonako nemuꞌ meꞌmingukovoꞌ goniꞌne gili-nidilizave lo gele nouve. Gaza neniꞌ monovoꞌne mo gele naineꞌ ma neive. Naza nene Zuda ve ma do goloso o-ngedesaꞌmuvoniꞌ ma neive.
ACT 25:11 Naza lihimeꞌne apasi-nidi nibili hililizaniꞌ votigileloꞌ lihime dokuvo gaza nebele helelove lo lanidiniko naza aꞌmine gamazikaloꞌ eꞌmenga lamuvodiba ingine soza li hazamuꞌ gonitoꞌ neleꞌmizi nimilanako engiꞌ muluꞌine do lamineꞌ o-ngedo neze nene aꞌninguꞌ milalizaniꞌ aka nomive. Loma veti guvetesi ve naba Kaesaleꞌ eiꞌ hamoꞌ goniꞌne gele-nedelive lo nemuꞌ eita noluve.
ACT 25:12 Neꞌmine lo lavo Hesitoꞌ aza kanisoleꞌvesi li voleloꞌ meloꞌ igi Pauloꞌni tiꞌ lo lo-imineꞌ: Guvelesi ve naba Kaesaleꞌ gamazika gelelive lo nolaineꞌ nemuꞌ aꞌmine guvelesi ve nabala viline.
ACT 25:13 Neꞌmine lavo gamene ma ogo vavo nimini misubo gohilatiꞌ guvelesi ve naba ma gulive Agilipaki idoꞌ alunolo Belenikeki ingine Hesitoꞌni analoꞌ dalosive li Kaesalea ebeta limasineꞌ.
ACT 25:14 Limi aꞌmida gamene ngomosiꞌ ma miniviꞌ diviꞌ nasivo Hesitoꞌ nene Pauloꞌ gamaziꞌve veteteꞌ ogo guvelesi ve nolo-emo tiꞌ lo lineꞌ: Helikiꞌ aza nene ve ma nalaꞌ numunguꞌ mininguꞌ haza hulomiko vavo neivo
ACT 25:15 naza Zelusalemi numuda dizo nouvo evenetoꞌ medeli mini Oꞌmoso initeꞌ lehizi-daaꞌ ave nabasi idoꞌ Zuda veti monoꞌ gizebo vesi ingine aꞌmine veꞌmi gamaziꞌvemuꞌ li-nimi mulumo gono emo lihimeꞌve apase-deline li longoꞌ i-nidave.
ACT 25:16 Longoꞌ i-nidikevo tiꞌ lo lo-ngimuvoniꞌ: Loma ve leliꞌ monovote neꞌmino nomive. Ve ma goniꞌve neivo ma laza goniꞌ nii-daveti muluꞌine do lamineꞌ o-ngedelesa aꞌmine ve aꞌninguꞌ haza gopo molosaꞌmune. Gomuꞌ nene goniꞌ nii-daveti veꞌnidoꞌ eleꞌmize molokunivo goniꞌ i-daniꞌ initetoꞌ do tineꞌ molo gamazi gohi lo-ngemavo gelaaꞌ noune.
ACT 25:17 Neꞌmine lo lo-ngemekuvo ingine limi mela hetelikevo gamene haꞌna minamo gamene hamokovoꞌ ongokuvo goꞌ lavo goniꞌ do helaaꞌ moꞌmositoꞌ dize mino aꞌmine vemuꞌ lokuvo eleꞌmizi dizaniꞌ.
ACT 25:18 Eleꞌmizi dizikevo goniꞌ i-dave oti gamazi laniꞌza naza lihimeꞌve li sotoꞌ igi goloso nitekumuꞌ lilizahe lo uha neꞌmine initekumuꞌ lami
ACT 25:19 engiꞌ monoꞌinemukovoꞌ li hilive ma gulive Izesuꞌnimuꞌ gamazi laniꞌ. Pauloꞌ aza aꞌmine ve hilingutiꞌ ote neive lavo ataize li elemaniꞌ.
ACT 25:20 Neꞌmine ikevo aꞌneꞌmine gamaziꞌmi monovo nado do sotoꞌ ogo gelelove lo gaꞌne mukiꞌ gelo tiꞌ lo longoꞌ o-duve: Gaza Zelusalemi numudoꞌ geleꞌmizosa aꞌmidoꞌ aꞌmine gonika geleloniꞌ nene lamineꞌ ilihe. Idoꞌ neꞌmine lo longoꞌ okuvo
ACT 25:21 Pauloꞌ aza Loma veti guvetesi ve naba goniꞌve do helelingumuꞌ gizebo ogo minelove lavo naza nene nalaꞌ numunguꞌ mene neivo lingine gizebo i-di nizavo Loma ebeta guvelesi ve naba Kaesaleꞌ neida imiseleloniꞌ gamene alitavo vilive lo gizebo i-dilizaniꞌ ami aleve lo-ngimuvoniꞌ.
ACT 25:22 Hesitoꞌ tiꞌ lo lo-emavo Agilipaꞌ aza tiꞌ lo lo-emo lineꞌ: Naza aꞌmine veꞌmo gamazi lavo gelelesa gele nouve. Neꞌmine lavo Hesitoꞌ tiꞌ lo lineꞌ: Neꞌmine lo ma aizeꞌ geleline.
ACT 25:23 Neꞌmine lavo ingi goꞌ lavo Agilipaꞌ ve alunolo Belenikeꞌ ve gonolise atoliꞌmine igi ngolize alize izi mulise mili gamazi gilaaꞌ aniꞌ numunguꞌ dizikesivo amiliti guveꞌinesi ve inginesi idoꞌ aꞌmine ebekuꞌ dizi minasive ngeꞌmeti dizaniꞌ. Dizikevo Hesitoꞌ lavo Pauloꞌni eleꞌmizi dizaniꞌ.
ACT 25:24 Eleꞌmizi dizikevo Hesitoꞌ tiꞌ lo lineꞌ: Guvekasi ve Agilipazo, idoꞌ lingine makaꞌ nounivesi mukitoꞌ ve mene ningilo. Zuda ve mukiꞌ nenita igi Zelusalemi numudasi idoꞌ melasi me vemuꞌ li tiꞌ li laniꞌ: Haza velesi minalinako helelive li gekeꞌ gekeꞌ laniꞌ.
ACT 25:25 Laniꞌza lihimeꞌve nene bele heleloneꞌ votigileloꞌ nehe lo lihimeꞌve viseꞌ uha do sotoꞌ amo Loma veti guvetesi ve nabaꞌmo goniꞌve gelelive lingumuꞌ ve losa imiselelove lo nolo hukuve.
ACT 25:26 Neꞌmine lo lo hukuvoniꞌza me veꞌmi lihimeꞌvemuꞌ viseꞌ ogo guvelesi ve nabala luhuvo niteꞌ gizelove lo giluvo geni ogave. Nemuꞌ nene lingine aꞌmine veꞌmi gamazi gili lihimeꞌvemuꞌ li-nimikevo luhuvo niteꞌ gizelove lo lengita eleꞌmize molo nouve. Idoꞌ guvekasi ve Agilipazo, gasika gele lamineꞌ ogo lo ngoloꞌ lo lo-nemeline lo gele amuzo molo nouve.
ACT 25:27 Nalatoꞌ ve guvelesi vela imiselo luhuvo niteꞌ gizo lihimeꞌvesi lo sotoꞌ amoloniꞌ nene negi suno duvoniꞌ geleleseive lo gele nouve lo lo-ngimineꞌ.
ACT 26:1 Neꞌmine lavo Agilipaꞌ aza Pauloꞌni tiꞌ lo lo-imineꞌ: Gasika monovoka lanivo gelelone lo nogele gimuve. Nemuꞌ lozo. Lavo Pauloꞌ aza ana do oto eiꞌ monovoꞌve tiꞌ lo lo-ngimineꞌ:
ACT 26:2 Guvekasi ve Agilipazo, gaza nene Zuda velite ogo molo ogaꞌ nouneꞌ monotemuꞌ gate atoꞌ atoꞌ gelo lute vo eza ema ogaꞌ neineꞌ initekumuꞌ gele naineꞌ nenako nemuꞌ Zuda ve goniꞌ i-nidaniꞌ initeꞌ mukitoꞌ do tineꞌ molo lo neze monovoꞌne geiꞌ vekaloꞌ lo sotoꞌ olosa muluꞌneuꞌ lamineꞌ gele nouve. Nemuꞌ gaza gelanivo mulungauꞌ hongu nolivo gamaziꞌne lolove.
ACT 26:4 Naza umungive ngomolotiꞌ neze zuhoti vovoꞌningukisi idoꞌ Zelusalemi ebekukisi mino naba ogo initeꞌ mukiꞌ ogo molo minuvoniꞌ monovoꞌne nene Zuda ve mukilite gili nizave.
ACT 26:5 Leliꞌ Zuda veti monokuꞌ eveneꞌ mulise atoꞌ atoliꞌmine minanguꞌ mulise hamoꞌ maliꞌmo nene monokutiꞌ gamazi vaiꞌ laaꞌ aniꞌ nene gele dalosa amuzo molo mulise mukiꞌ ngivileꞌ ogo neineꞌ mulise adoꞌ Halisaioꞌ aleve ve languꞌ nene naza vo giꞌmizo minosa Halisaioꞌ ve loloꞌ ogo minuvoniꞌ nenako ingine gamene galaꞌmudatiꞌ vomine neniꞌ monovoꞌne ninganiꞌ nene lo sotoꞌ olone ladini ha li sotoꞌ adine.
ACT 26:6 Idoꞌ Oꞌmosoꞌmo salani gamazi lo avotemotine lo huko lo-ngimineꞌ nene gihile izelive lo gele amuzo molo gizebo ogo nouvongumuꞌ mene gonitoꞌ neleꞌmizi nimilavo idiꞌnise ote nouve.
ACT 26:7 Nouvoniꞌza aꞌmine salani gamazi neve leze Zuda veti zuho tuvelu ingine gihile izelive li gili gizebo igi mini goꞌ laneme goꞌ laneme voꞌine gilingili ivo Oꞌmoso opoꞌni li gelekeleꞌ i-di minaaꞌ nave. Guvekasi ve make, naza aꞌmine salani gamazimuꞌ nene gele eleꞌvoleꞌ ogo nouvongumuꞌ ingine aꞌmineꞌmine igi minaaꞌ ave Zuda ve nete gonitoꞌ neleꞌmizi nimilave.
ACT 26:8 Oꞌmosoꞌmo hilaniꞌ aleve ngeleꞌmize otaaꞌ neingumuꞌ nene lingine nanimuꞌ neꞌmine osaꞌmive li gilave. Neꞌmine li-gilamilizadoꞌ o neive.
ACT 26:9 Idoꞌ gozopoꞌ nene naꞌniseꞌne neve Nasalete ve Izesuꞌ monoꞌ do goloso olosa gono naba dalove lo gaꞌne gelaaꞌ uvoniꞌ ma neive.
ACT 26:10 Neꞌmine lo gelo Zelusalemi numunguꞌ apiꞌ ogo aꞌmine gono duvoniꞌ. Evenetoꞌ medeli mini Oꞌmoso initeꞌ lehizi-daaꞌ ave naba engita lokuvo ingine luhuvo niteꞌ nimikevo Izesuꞌ evenele zuho mukiꞌ do nalaꞌ numunguꞌ hulo-ngiduvoniꞌ. Neꞌmine okuvo ngibilikevo hililizave likevo voti hizo aꞌmine gamazi hize eleꞌ uvoniꞌ ma neive.
ACT 26:11 nGebelekuvo Guvelesi ve Izesuꞌni divi lediviꞌ ilizave lo Zuda veti monoꞌ numunoꞌine mukikuꞌ gamene mukiꞌ ngebelaaꞌ uvoniꞌ ma neive. Neꞌmine ogo engikumuꞌ nizeboloꞌ goloso do mino heta atoꞌ veti numuno ebeꞌninguꞌ minangukisi goboni molo-ngedo minaaꞌ uvoniꞌ ma neive.
ACT 26:12 Neꞌmine nouvo evenetoꞌ medeli mini Oꞌmoso initeꞌ lehizi-daaꞌ ave nete luhuvo niteꞌ nimikevo engiꞌ veꞌinemuꞌ ogo Damasiko numuda volove lo novuvo
ACT 26:13 hoꞌ omo olusoꞌ neivo, ee, guvekasi ve, Okulumokutiꞌ labanaꞌ ma hoꞌ ivileꞌ ogo lemo nezesi idoꞌ makaꞌ vunivesi hize vodo vodo o-ledavo ninguvoniꞌ ve.
ACT 26:14 Hize vodo vodo o-ledavo misubouꞌ lemo gote hizo ongo nonivo Hebilaioꞌ gamaziutiꞌ gamazi ma nenikumuꞌ tiꞌ lo nolivo giluve: Saulo, Saulo, gaza nanitekumuꞌ goboni nomolo-nedane. Bulumakaꞌ ize aꞌmanapa igi meꞌningine gizeꞌine gavoso ngibililisa igaꞌ adiꞌmino gaza aꞌmineꞌmine ogo nebelelesa aneꞌza ize meꞌninge muluꞌ izi di minaniꞌ gavosoloꞌ hizi mulumo gilaaꞌ adiꞌmino gazasi aꞌmineꞌmine ogo mulumo nogelane.
ACT 26:15 Neꞌmine lavo naza Guvekasi ve gaza zaho ve lokuvo aza tiꞌ lo lo-nimineꞌ: Gaza goboni molo-nedaaꞌ anive Izesuꞌ ma ne noluve.
ACT 26:16 Idoꞌ gaza oto gizenga lise giliꞌ lo minezo. Gaza nene neniꞌ gelekeleꞌ izipe mineline losa naza geleꞌmize molalosa sotoꞌ nopize gimuve. Neꞌmine okuvo ninganeꞌ initeꞌ nemukisi idoꞌ alingeꞌ sotoꞌ o gemekuvo ningelineꞌ nemukisi lo sotoꞌ o ngeme ngemeꞌ ogo mineline lo geleꞌmize nomuluve.
ACT 26:17 Zuda veti aꞌningutikisi idoꞌ heta atoꞌ veti aꞌningutikisi do guꞌ ize-gedo minelesuve. Neꞌmine ogo aꞌmine heta atoꞌ vetida nogimiseluve.
ACT 26:18 Gimiselekuvo vo engita gono danivo luꞌine gaꞌine ngoloꞌ lavo goloso initeꞌ ningi meheꞌine imi luꞌineꞌmi labanaꞌ di lehizilizave. Neꞌmine igi Sataniꞌmi anauꞌ mini gelekeleꞌ i-di minaniꞌ nene huli Oꞌmosoꞌmi anauꞌ igi minilizave. Neꞌmine igi nenikumuꞌ gili eleꞌvoleꞌ ikevo Oꞌmosoꞌmo lihimeꞌine hulo-ngedo eze zuho do kegeso do tiꞌ ineꞌ alevetinguꞌ moꞌmosiꞌine ngemeleseive lo lo-nimineꞌ.
ACT 26:19 Neꞌmine lo-nemavo, Guvekasi ve Agilipazo, aꞌmine Okulumokuꞌ miniveꞌmo veꞌneloꞌ o molo lo-nimineꞌ gamazi gele hulamuve.
ACT 26:20 Aꞌmine gamazi gele do ganaꞌ apiꞌ ogo Damasiko aleve lo-ngemo idoꞌ alingeꞌ Zelusalemi aleve idoꞌ Zudaia misubouꞌ aleve idoꞌ heta atoꞌ ve nizaniꞌ inginesi luꞌine di velepeꞌ izi Oꞌmosola vi giꞌmizi lute do velepeꞌ izaliꞌmi aka gihileloꞌ imineꞌ mili initeꞌ lisiheꞌ laminekovoꞌ igi mili minilizave lo nene gamazi lo-ngeme ngemeꞌ ogo minuvoniꞌ ve.
ACT 26:21 Neꞌmine ogaꞌ uvoniꞌ nemuꞌ Zuda ve ingine monoꞌ numuno nabauꞌ aꞌneloꞌ di nibili hililisa navo
ACT 26:22 Oꞌmosoꞌmo alete molo neleꞌmize lamineꞌ oꞌmo novivo monoꞌ nene eveneꞌ dizi minaniꞌ idoꞌ limi minaniꞌ mukiꞌ lo-ngemaaꞌ nouve. Neꞌmine ogo gamazi gohi ma lo-ngemesaꞌmuve. Oꞌmosoꞌmi gamazi li sotoꞌ igaꞌ avesi Mosekisi alingeꞌ sotoꞌ ilineꞌ initekumuꞌ li hukaniꞌ gamazivoꞌ lo-ngemo tiꞌ lo lo-ngemaaꞌ nouve.
ACT 26:23 Oꞌmosoꞌmo do luꞌ izelive lo imiselelesa live nene mulumo gelo helelive li idoꞌ hilave engitatiꞌ do gomuꞌ molo-ngedo oto Zuda ve lezelasi idoꞌ heta atoꞌ ve engitasi labanaliꞌmi gamazi do sotoꞌ o-ngedelive li li huki-daniꞌ gamazi nene lo sotoꞌ ogo lo-ngemaaꞌ nouve.
ACT 26:24 Neꞌmine lo Pauloꞌ aza monovoꞌve lo sotoꞌ ogo nolo-ngimivo Hesitoꞌ aza gamazi naba lo tiꞌ lo lineꞌ: Pauloꞌ gaza mo negi nohizane. Luhuvo niteꞌ mukiꞌ gato gelo minaaꞌ aneꞌ maꞌmo godoka gopo ogavo negi nohizane.
ACT 26:25 Neꞌmine lavo Pauloꞌ lineꞌ: Hesitoꞌ gaza ve naba make, naza negi hizamuve. Gamazi gihile lamineꞌ nene noluve.
ACT 26:26 Mene noluvoniꞌ gamazi nene guvelesi ve naba Agilipaꞌ aza gele neive. Veꞌne lapa nomivo ezela lovoꞌ kiselevoꞌ ogo lolosuve. Noluvo initeꞌ nene haleko sotoꞌ ineꞌ nominako guvelesi ve ningo gelamineꞌ nevoba mo ningo gele neive lo gele nouve.
ACT 26:27 Guvekasi ve Agilipazo, Oꞌmosoꞌmi gamazi li sotoꞌ igaꞌ aveti gamazi nene gele eleꞌvoleꞌ abe. Gele eleꞌvoleꞌ o naneꞌ nene gele nouve.
ACT 26:28 Neꞌmine lavo Agilipaꞌ aza Pauloꞌni tiꞌ lo lo-imineꞌ: Gamene ahovo ngomo gamazi nolanivo neniꞌ nene Kilisitoꞌ evenele loloꞌ ilive losa nolabe.
ACT 26:29 Neꞌmine lavo Pauloꞌ tiꞌ lo lo-imineꞌ: Gamene haꞌna nehe liꞌnibe nehe nemuꞌ lamuve. Naꞌnise nene Kilisitoꞌ evenele loloꞌ iline losa nevoꞌ nene gele nouve. Nemuꞌ nene gezesi eveneꞌ lingesi gamazi noluvo nigilave lingine mukiꞌ nene neniꞌ gidini liliꞌ ilizave losa Oꞌmosola noluve. Noluvoniꞌ nene neniꞌ aꞌneloꞌ seni nalaꞌ izi-nidi nizaniꞌ neꞌmini izi-lingidilizave losa lamuve.
ACT 26:30 Neꞌmine lo lavo guvelesi ve naba Agilipaꞌ azasi ngamani nabasi idoꞌ Belenikekisi idoꞌ engikisi minave lingesi oti
ACT 26:31 heta limi tiꞌ li li voleloꞌ melo aniꞌ: Ve mene lihime apaso bele heleloneꞌ monovo nehe idoꞌ nalaꞌ numunguꞌ minaaꞌ monovo nehe eita nomive.
ACT 26:32 Neꞌmine likevo Agilipaꞌ aza Hesitoꞌni tiꞌ lo lo-imineꞌ: Loma veti guveꞌinesi ve naba Kaesaleꞌ goniꞌne gele-nedelive lo lamidini kuluhize-danivo vidine.
ACT 27:1 Pauloꞌ aza Italia misubouko vilive li li huki alingeꞌ nene ami vanu hadeti neti gizebo ve ma gulive Zulioꞌ aza gizebo o-ngedo ngeleꞌmizo vilive li Pauloꞌnisi idoꞌ nalatoꞌ ve linge masi anauꞌ milaniꞌ. Aꞌmine gizebo ve nene aza ami mulise ma guvelesi ve Kaesaleꞌni ve laniꞌ muliseutiꞌ minineꞌ.
ACT 27:2 Anauꞌ milikevo ngeleꞌmizo vo sipiuꞌ nazasi makaꞌ dizune. Aꞌmine sipi nene Adalamitio ebetatiꞌ ogavo aꞌmine sipi nene Asia misubouꞌ guvo noso gahevela numuno ebeꞌ vaiꞌ minidoꞌ vilive likevo dizo vuneꞌ. Idoꞌ Makedonia misubouꞌ Tesalonika ebekutiꞌ ve ma gulive Alisitakoꞌ nene lezesi makaꞌ vuneꞌ.
ACT 27:3 Sipiuꞌ ongo mino goꞌ lavo vo Sidoni ebeta hetelune. Hetelo Zulioꞌ aza Pauloꞌni nasahiliꞌ o-do zogo veꞌve zuho vo ningavo nasahiliꞌ i-dilizave lo gele emavo vineꞌ.
ACT 27:4 Vo zogo ve ningo tineꞌ molo ogavo gohi sipiuꞌ dizo aꞌmine ebeꞌ hulo novunivo vuneꞌ akalatiꞌ hepeꞌ naba elavo Kipilo ailani adavala neivo hepeꞌ naba elamineꞌ liginela ivileꞌ ogo vovoꞌ vovoꞌ ogo
ACT 27:5 guvo noso hukoꞌmo vo Kilikia misubo idoꞌ Pamahilia misubo gahevela ledo vo Mila ebeta Likia Misubouꞌ vo hetelune.
ACT 27:6 Hetelo aꞌmine sipiutiꞌ lemo neloꞌ Alekisadilia ebetatiꞌ sipi ma ogo minineꞌ nene Italia misubouko volosa neivo amiliti gizebo ve neꞌmo leleꞌmizo vo aꞌminguꞌ dizo
ACT 27:7 ongovo otevoꞌ ogo silibe oꞌmo vo zou zou lo vovoꞌ vovoꞌ ogo Kinidoꞌ ebeꞌ gahevela ogo hetelo hepeꞌ naba ilidiꞌmo volosa unida nene vo pelo vamoloneꞌ ogavo adava gahevela lemo vo Keleta ailani neꞌmi mumunouko hepeꞌ elamida vo Salomone ebeꞌ ivileꞌ ogo vune.
ACT 27:8 Noso gahevela do noalito silibe oꞌmo vo vo Lasea ebeꞌ gahevela ebeꞌ ma gulive Sipi Igi Minaaꞌ Ebeꞌ Lamineꞌ ve laniꞌ neloꞌ vo gahevela minune.
ACT 27:9 Gamene haꞌna ogo vavo Zuda velite nosoꞌ niteꞌ malise igaꞌ aniꞌ gamene nesi ivileꞌ okunivo neꞌmo hepeꞌ naba elo guvo noso velo mono sipi do goloso o-ngedaaꞌ ineꞌ gamene noalitivo imineꞌ molo volonekisi goloso ogaloneꞌ neivo Pauloꞌ gaꞌine do tiꞌ lo lo-ngimineꞌ:
ACT 27:10 Eꞌe, vekizo, volobe lo giluvoniꞌza vamolonidoꞌ o neive. Nene guvo nosoliꞌmo sipiuꞌ dizo dovoꞌ hilingizevoꞌ ogavo goꞌ heneni nganenivoꞌ goloso ilivoba laza evenekisi nosouꞌ lemo helelobe lo giluvo geni ogave.
ACT 27:11 Neꞌmine lineꞌza sipiloꞌ dalizave lo gono gamazi lo-ngedaaꞌ ivesi idoꞌ sipi melehosi gamazi atoꞌ likesivo amiliti gizebo ve gilineꞌ Pauloꞌ gamazi lemavo setalitisi gamazi dizavo aꞌmidoꞌ gele daniꞌ.
ACT 27:12 Neꞌmine ogavo laza minuneꞌ ebeꞌ nene hepeꞌ naba elelineꞌ gameneuꞌ sipi nene lamineꞌ minaaꞌ ebeꞌ minamineꞌ nenako nemuꞌ nene sipiuꞌ minaniꞌ eveneꞌ vaiꞌ gidini nete ingine aꞌmine ebeꞌ nene hulo volone li gamazi li hukaniꞌ. Idoꞌ Keleta ailani gahevela sipi minaaꞌ ebeꞌ gohi ma neineꞌ gulive Hoinika nene hepeꞌ naba elelineꞌ gameneuꞌ haleke minaaꞌ ebeꞌ lamineꞌ neineꞌ nenako nemuꞌ aꞌmida ha vo hetelelobe ha voꞌ nalone li gilaniꞌ.
ACT 27:13 Tiꞌ li gilisa gilaniꞌ nene adavalatiꞌ hepeꞌ ngomo zou zou lo apiꞌ ogo elavo lunida ha volosune li gili sipi di giliꞌ limikaniꞌ initeꞌ nene di hozi li di milikevo Keleta ailani gahevela novunivo
ACT 27:14 vo hotoꞌ amunivo ailaniutiꞌ mumu gehegehe naba gulive hoꞌ dizaaꞌ ida ezalatiꞌ lomaaꞌ ive mumu gehegehe amuzovesi sotoꞌ ogo
ACT 27:15 sipi do velepeꞌ izelineꞌ ogo ngelo aka do hehe lamoloneꞌ ogavo alamo hulokunivo hepeliꞌmo do vivo gopo aka vineꞌ.
ACT 27:16 Ailani ngomo gulive Kauda helala neivo hepeꞌ elamineꞌ liginela novunivo kanu ngomo ma geleleheꞌ uneꞌ nene nosouꞌ lemelineꞌ ogavo geꞌnebe gono do
ACT 27:17 geleleheꞌ ogo sipi nabauꞌ do molo idoꞌ sipi nene etalive lo nalaꞌ vodo vodo ogo izo do giliꞌ lune. Neꞌmine ogo gepeliꞌmovoꞌ o minineꞌ ebeꞌ ma gulive Siliti nela vo goloso ogalone lo sipiliꞌmi initekisi seli lingesi hepeliꞌmo do nguꞌvosalive lo apaso do molokunivo sipi nene haza minivo gopo aka vuneꞌ.
ACT 27:18 Neꞌmine ogavo hepeꞌ amuzoꞌvesiliꞌmo sipi do voziuꞌ vomiuꞌ o-do minineꞌ. Neꞌmine neivo goꞌ lavo heneni linge nene guvo nosouꞌ di huli huliꞌ aniꞌ.
ACT 27:19 Neꞌmine igi gohi goꞌ lavo gamene seto hamo ogavo angiseꞌine aꞌinedunuꞌ igi sipiꞌmi initeꞌ mataꞌve lingelatiꞌ aꞌmineꞌmine igi di huli huliꞌ aniꞌ.
ACT 27:20 Hoꞌ ikeꞌni sonohiꞌ nene labanaꞌ elamivo hepeꞌ naba elo leliꞌ nene do voziuꞌ vomiuꞌ o-lidivo neꞌmine ogo minuneꞌ nene gamene ngomosikisi nomive. Nemuꞌ nene akala nevo ma vo lamineꞌ volosune lo giluneꞌ nene alamosa moda goloso olosune lovoꞌ giluneꞌ ve.
ACT 27:21 Neꞌmine igi mini nosoꞌ niteꞌ ni guni nami nizavo gamene haꞌna ogo vavo Pauloꞌ nene oto vo vovoꞌninguꞌ mino tiꞌ lo lo-ngimineꞌ: Vekizo, naꞌmo Keleta ailani hulamo minelone luvoniꞌ nene gili dalizanako gili damaniꞌ ma ve. Gili dadini lezela mulumo niteꞌ mene sotoꞌ amidine. Idoꞌ heneni nganenite nene ma vo gopo amidine.
ACT 27:22 Idoꞌ gamazi ma lo-lengemekuvo gililo. Idiꞌnise lengehelele izamivo lamini minilo. Eveneꞌ hamokisi goloso amolosune. Sipivoꞌ goloso oloseive.
ACT 27:23 Neniꞌ nene Oꞌmosoꞌmi gelekeleꞌ gipele mino naza opoꞌni laaꞌ uvoniꞌ Oꞌmosoꞌne neꞌmo angeloꞌve ma aizeꞌ holukaꞌ nenita imiselavo
ACT 27:24 ogo tiꞌ lo lo-nimive: Pauloꞌ gaza guvo nosomuꞌ nene golise gelamozo. Gaza Loma veti guvetinesi ve naba Kaesaleꞌ veleloꞌ nene ha vo otelesane lo Oꞌmosoꞌmo nolineꞌ nenako akakaloꞌ initeꞌ hamoliꞌmosi ma do goloso o-gedamivo mo lamineꞌ vo hetelelesane. Idoꞌ gelezo. Oꞌmosoꞌmo geikumuꞌ ve lo gezesi makaꞌ sipiuꞌ nizave mukiꞌ inginesi guvo noso ngebelamivo haza vi hetelilisave lo nolive.
ACT 27:25 Neꞌmine lo lineꞌ nemuꞌ vekizo muludinguꞌ lamineꞌ gililo. Oꞌmosoꞌmo lo-nimineꞌ gamazi nene gihile izeleseive lo gele nouve.
ACT 27:26 Ne neiha sipi neꞌmo vo ailani maloꞌ hizo giliꞌ loloseive.
ACT 27:27 Neꞌmine lo lavo Adilia guvo nosouꞌ hepeliꞌmo ha leleꞌmizivo gopo aka novunivo salele setaꞌ ogo vavo holukaꞌ ongo velepetoꞌ sipiloꞌ gono dave ingine misubo ma do avitoꞌ ogo noso gahevela noube li gilaniꞌ.
ACT 27:28 Neꞌmine li nalaꞌ hulikevo noso hemuvoloꞌ lemavo aꞌmine nalaliꞌmi haꞌnaꞌve nene ve maliꞌmo gatineꞌ nene vo foti (40) mita ineꞌ. Neꞌmine igi ngomo ma nivi nalaꞌ gohi hulo gatineꞌ nene vo teoti (30) mita ineꞌ.
ACT 27:29 Neꞌmine gatavo sipi nene geheni veletoꞌ do vo izo giliꞌ lo etalive li gili ngehelele izavo sipi isevelatiꞌ sipi di giliꞌ li-daaꞌ aniꞌ initeꞌ nene setaꞌve setaꞌve hulikevo lemavo goꞌ la la li Oꞌmosola li nizavo
ACT 27:30 sipiloꞌ gono dave sipi huli golise volone li gili kanu ngomo apasi nalatunuꞌ guvo nosouꞌ hulikevo nolimivo soza li tiꞌ li laniꞌ: Laza sipi velela sipi di giliꞌ li-daaꞌ aniꞌ initeꞌ ma hulo minelesa noune.
ACT 27:31 Neꞌmine li nilavo Pauloꞌ aza amiliti gizebo veꞌinesi idoꞌ eze amiꞌve zuhosi tiꞌ lo lo-ngimineꞌ: Aꞌmine ve ingine sipiuꞌ minamilizaniꞌ nene lingine ngeli lukuvo ma namilisave.
ACT 27:32 Tiꞌ lo lavo ami ingine sipi nabatiꞌ kanu ngomo nene huki hulikevo gopo aka vineꞌ.
ACT 27:33 Neꞌmine ogavo Pauloꞌ aza goꞌ lolosa neivo eveneꞌ mukiꞌ nosoꞌ niteꞌ ma nalizave lo tiꞌ lo lo-ngimineꞌ: Lingine nosoꞌ niteꞌ nami gizebo igi nizavo salele setaꞌ ogo vavo okodine hulikeze.
ACT 27:34 Nosoꞌ niteꞌ ni giliꞌ likevo do amuzo molo-lengede minivo aka voloneꞌ nene okodine ngomosi ma do goloso amivo lisiheꞌ ogo vo hetelelesune.
ACT 27:35 Neꞌmine lavo mukilite ningi nizavo nosoꞌ niteꞌ ma do Oꞌmoso opoꞌni lo do gito apiꞌ ogo naniꞌ.
ACT 27:36 Navo ningi muluꞌninguꞌ lamineꞌ gili aꞌmineꞌmine igi inginesi nosoꞌ niteꞌ naniꞌ.
ACT 27:37 Idoꞌ aꞌmine sipiuꞌ minuneꞌ eveneꞌ nene tu hadeti sevedi sikisi neꞌmine minuneꞌ ve.
ACT 27:38 Nosoꞌ niteꞌ no gatude ogavo sipi geni amilive li viti gihile nene sipiutiꞌ eheluꞌ mili huli nosouꞌ nosouꞌ aniꞌ.
ACT 27:39 Neꞌmine ikevo goꞌ lo labanaꞌ noilivo misubo ma ninganiꞌza zaaꞌ ebeꞌ nehe li ningi lamineꞌ amaniꞌ. Guvo noso gahevela nene zovoꞌ izo kebili galalaꞌ ikevo ngipu lineꞌ neꞌmino minida nene gepe lamineꞌ vaiꞌ neivo ninganiꞌ. Ningi do volonidoꞌ o neivo ma laza sipi nene do vo aꞌmine gepeloꞌ do dizo hulolone li gilaniꞌ.
ACT 27:40 Neꞌmine li gili sipi di giliꞌ laaꞌ aniꞌ initeliꞌmi nalava nene huki huli aꞌmine sipi do giliꞌ laaꞌ aniꞌ initeꞌ nene guvo noso hemuvoloꞌ nizada ha minilizave li hulaniꞌ idoꞌ sipiꞌmi sitiaꞌve setatoꞌ nalaꞌ di giliꞌ laniꞌ nene apasi huli seliꞌve nene ngomo ma di patelikevo hepeliꞌmo gepela hiluluꞌ ogo do novivo
ACT 27:41 vo sevetoꞌ hize giliꞌ logavo sipi goloꞌve nene misubouꞌ hize giliꞌ lavo guvo noso neꞌmo velo ogo sipi isevela izo itineꞌ.
ACT 27:42 Izo etavo ami ingine nene nalatoꞌ ve gulo anese izi misubola vi golise vikelizave li ngebele geseꞌ olone li lovo gizaniꞌ.
ACT 27:43 Lovo gizikevo gizebo veꞌine aza Pauloꞌni bilikelizave lo gelo neꞌmine amilizave lo oꞌve lo-ngedo eveneꞌ gulo anese izaaꞌ monovo ningikave ingine guvo nosouꞌ olutoꞌ mozeꞌ mozeꞌ igi gomuꞌ mili gulo anese izi vi kelala vilizave lo
ACT 27:44 eveneꞌ lingela alingeꞌ mili linge ma palani maloꞌ dizi mini linge ma sipi izo itidoꞌ dizi mini kelala vilizave lineꞌ. Lavo neꞌmine ogo laza mukitoꞌ do goloso amo lamineꞌ vo kelala hetelune.
ACT 28:1 Kelala vo osuꞌ lokunivo ailani gulive Melita ve likevo giluneꞌ.
ACT 28:2 Aꞌmine ailaniutiꞌ aleve ingine leze mukiꞌ di lamineꞌ i-lidi nasahiliꞌ i-lidaniꞌ. Goline izo hepeꞌ lolavo oloꞌ gizi-lidikevo nolahizunivo
ACT 28:3 Pauloꞌ aza oloꞌ ngomo ngomo nubuho ogo olokuꞌ nohulivo aꞌmine olokutiꞌ gosiheꞌ ma olokumuꞌ golise higusagu izo lemo ogo Pauloꞌ analoꞌ ongoho zuꞌ lo minineꞌ.
ACT 28:4 Neꞌmine ogavo aꞌmidotiꞌ aleve ingine gosiheꞌ neꞌmo Pauloꞌ analoꞌ ongoho zuꞌ lo minineꞌ nene ningi li voleloꞌ meloꞌ igi Pauloꞌnimuꞌ tiꞌ li gili laniꞌ: Eveneꞌ ngebele huloꞌ huloꞌ ve noloseinako guvo nosouꞌ lemo helamo kelala haza dizavo lihime apase-ngedaaꞌ neineꞌ oꞌmoso niteliꞌmo aza velesi minalive lavo gosiheliꞌmo belanako heleleseive.
ACT 28:5 Neꞌmine li nilavo Pauloꞌ aza gosiheꞌ do hibiꞌ ize hulavo olokuꞌ lemavo gosiheliꞌmo belamineꞌ gelo haza minineꞌ.
ACT 28:6 Neivo ingine lulu izelihe li idoꞌ lemo pouꞌ lo ongo helelihe li gizebo igi ningi minaniꞌ. Ningi nizavo gamene haꞌna ogo novivo neꞌmine manaꞌmine amivo luꞌine di velepeꞌ izi tiꞌ li laniꞌ: Mene ve nene oꞌmoso initeꞌ noloseive.
ACT 28:7 Idoꞌ aꞌmine aleveti ve nabaꞌine gulive Pupilioꞌ neꞌmi misubo nene leliꞌ minuneꞌ gahevela minineꞌ. Nemuꞌ nene aza leleꞌmize molo zogo lemo nasahiliꞌ o-lidivo eiꞌ numuꞌveuꞌ minuneꞌ nene gamene setohamo minune.
ACT 28:8 Nonivo Pupilioꞌ meleho aza okoꞌnouꞌ oloꞌ lo isevetiꞌ vovoꞌ vovoꞌ ivo gizehoꞌ numuno ogo neivo Pauloꞌ aza neida dizo Oꞌmosola lo ana hito do lamineꞌ o-dineꞌ.
ACT 28:9 Neꞌmine ogavo aꞌmine ailaniuꞌ eveneꞌ initeꞌ gizi dave mukiꞌ ingine nonida igi aꞌmineꞌmine igi lamineꞌ aniꞌ.
ACT 28:10 Nemuꞌ nene ingine muluꞌninguꞌ lamineꞌ gili initeꞌ mukiꞌ lehizi-lidi voloneꞌ gamene alitavo akalokumuꞌ initeꞌ di vaꞌvaꞌ i-lidi sipiuꞌ di miliꞌ miliꞌ i-lidaniꞌ ve.
ACT 28:11 Aꞌmine ailani ogo heteluninguꞌ nene sipi gohi ma minineꞌ. Aꞌmine sipi nene Alekisadilia ebetatiꞌ ogavo hepeꞌ naba eleli gamene alitavo nemuꞌ golise gizebo ogo minineꞌ. Idoꞌ aꞌmine sipiloꞌ nene engiꞌ oꞌmoso niteꞌineꞌmi lobeꞌ izipahala avazaha igi liliꞌ igi di badikaniꞌ minineꞌ. Ne neivo lazasi nonivo ikeꞌni setohamo lomo helavo aꞌmine sipiuꞌ dizo vune.
ACT 28:12 Guvo noso huko vo Silakusa ebeta hetelune. Hetelo aꞌmidoꞌ numuno setohamo ungune.
ACT 28:13 Ongo gohi sipiuꞌ dizo aꞌmine ebeꞌ hulo hepeliꞌmo sipi do zovoꞌ zavaꞌ ize-divo novivo Legio ebeta vo hetelune. Aꞌmidoꞌ numuno hamoꞌ ongo goꞌ lavo mehedelatiꞌ hepeliꞌmo hiluluꞌ o-do vivo akaloꞌ numuno setaꞌ ongo Puteoli ebeta vo hetelune.
ACT 28:14 Hetelo sipiutiꞌ lemo Izesuꞌ evenele zuho linge ma ningune. Aꞌminete minelone likevo engikisi salele hamoꞌ makatoꞌ minuneꞌ. Mino gohi oto vo Loma ebeꞌ do avitoꞌ une.
ACT 28:15 Akaloꞌ novunivo Izesuꞌ evenele zuho Loma ebekuꞌ minaniꞌ nete leliꞌ uneꞌ gamazi gili lelikisi voteneꞌ olone li aniꞌ. Neꞌmine ikevo linge masi voteneꞌ uneꞌ nene Apio Maketiloꞌ voteneꞌ uneꞌ. Idoꞌ linge masi voteneꞌ uneꞌ nene ebeꞌ gulive Venenga Velite Meni Hizi Ingaaꞌ Aniꞌ Numuno Setohamo ve laaꞌ aniꞌ maloꞌ voteneꞌ uneꞌ ve. Pauloꞌ aza evenetoꞌ ningineꞌ nemuꞌ Oꞌmoso opoꞌni lo mulunouꞌ lamineꞌ gilidiꞌmo ngi lo-dineꞌ.
ACT 28:16 Loma ebeta hetelekunivo ngamani aleve Pauloꞌni gili imikevo ami maliꞌmo gizebo o-divo engikovoꞌ numuno mauꞌ ingi minasineꞌ ve.
ACT 28:17 Pauloꞌ neloꞌ numuno setohamo ongo Zuda ve Loma ebekuꞌ minaniꞌ neti gizebo ve Pauloꞌ elese molo-ngemavo ikevo Pauloꞌ aza tiꞌ lo lo-ngimineꞌ: Neze zuhokizo, naza leze evenete zuho initeꞌ goloso ma do-ngedamo idoꞌ avotemoti monovo danavasi do goloso amuvoniꞌza ingine hazaloꞌ gopo Loma veti aꞌninguꞌ mili-nidikevo Zelusalemi numuda nalaꞌ nimaniꞌ ve.
ACT 28:18 Neꞌmine igi goniꞌ i-nidi lihimeꞌve apaso bele heleloneꞌ votigileloꞌ lihime dahe damihe li viseꞌ aha aha nomivo nalaꞌ numungutiꞌ kuluhizi-nidilisa laniꞌza
ACT 28:19 Zuda vete oꞌve likevo naza neze zuhomuꞌ gamazi mela do ogo lolove losa amuvoniꞌza haza mineloniꞌ aka gohi ma nomivoo Loma veti guveꞌinesi ve nabaꞌmo goniꞌne gelelive lo luvoniꞌ ve.
ACT 28:20 Nemuꞌ nene ninge-lengedo linginesi lo voleloꞌ meloꞌ olone lo elese molo lengemekuvo nave. Idoꞌ Isilaeleꞌ aleve noneꞌ laza ve ma ogo do lamineꞌ o-ledeleseive lo gelo ezemuꞌ gizebo ogaꞌ ube. Aꞌmine ve mo ogave lo lokuvo ingine ataize li nemuꞌ nalaꞌ mene aꞌneloꞌ izi-nidikevo nouve.
ACT 28:21 Lavo ingine tiꞌ li li-imaniꞌ: Volela Zudaia misubouꞌ minavete ingine geiꞌ gamazika li gizi luhuvo niteꞌ limamave. Idoꞌ eveneꞌ ma aꞌmidatiꞌ igi geiꞌ monovomuꞌ gamazi goloso ma lavo gelamune.
ACT 28:22 Idoꞌ numudoꞌ namadoꞌ eveneꞌ ingine geiꞌ eꞌmetaaꞌ aneꞌ monoꞌ aka nemuꞌ diviꞌ lediviꞌ igaꞌ naniꞌ nene mo gele none. Nemuꞌ nene geiꞌ gaka gelaaꞌ naneꞌ nene geiꞌ vekatiꞌ lanivo gelelone losa nolune.
ACT 28:23 Neꞌmine li gamene milaniꞌ nene alitavo Zuda ve mukiꞌ nene Pauloꞌ numuꞌveuꞌ igi di geseꞌ aniꞌ. Neꞌmine ikevo Pauloꞌ aza nedengaꞌ apiꞌ ogo Oꞌmosoꞌmo gizebo o-ledaaꞌ neineꞌ neꞌmi gamazi akaꞌve lo sotoꞌ ogo lo ngoloꞌ lo lo-ngemo neivo litiꞌmuso izineꞌ. Nolo-ngemo Moseꞌ lo huko lineꞌ gamazisi Oꞌmosoꞌmi gamazi li sotoꞌ igaꞌ ave poloheteliti gamazisi gizikaniꞌ gamazi nene gato nongemoo Izesuꞌ monovoꞌve ngelebizo ezemuꞌ gili eleꞌvoleꞌ ilizave lo gaꞌine daniꞌ.
ACT 28:24 Neꞌmine ogavo linge nene gamaziꞌve gili dikevo linge nete gili hulaniꞌ.
ACT 28:25 Neꞌmine igi di bizi laniꞌ gamaziꞌine ato atoꞌ vavo vilisa navo Pauloꞌ gamazi hamoꞌ tiꞌ lo lo-ngimineꞌ: Oꞌmosoꞌmi Sikalahuꞌ neꞌmo do ote-davo Oꞌmosoꞌmi gamazi lo sotoꞌ ogaꞌ ive Isaiaꞌ aza Oꞌmosoꞌmo lo-imineꞌ gamazi nene gamazi gihile lamineꞌ avotingine tiꞌ lo lo-ngimineꞌ:
ACT 28:26 Gaza voo mene zuho Zuda ve nizanguꞌ tiꞌ lo lo-ngemezo: Lingine gilii gilii gililizaha gili lamineꞌ amilisave. Idoꞌ ningii ningii ningilizaha ningi lamineꞌ amilisave.
ACT 28:27 Ingine luꞌine hize tilavo gaꞌine nunu lo veꞌine likavo veꞌinedunuꞌ initeꞌ ma ningisaꞌmave. Gaꞌinedunuꞌ nene initeꞌ ma gili hehe lisaꞌmave. Idoꞌ luꞌinedunuꞌ nene gamazi monovo gili lamineꞌ isaꞌmave. Ingine neꞌmine amadiniko luꞌine di velepeꞌ izikevo ha do lamineꞌ o-ngiduvodine lo lineꞌ.
ACT 28:28 Nemuꞌ nene lo-lengemeloze. Gililo. Oꞌmosoꞌmo do luꞌ izaaꞌ aka vilineꞌ neꞌmi gamazi nene lingine oꞌve likevo Oꞌmosoꞌmo heta atoꞌ ve lo-ngemeline lo lo-nemavo engita do novuve. Ingine gili lamineꞌ ilisave.
ACT 28:30 Neꞌmine lo lo-ngemavo vikevo Pauloꞌ nene kilisimasi setaꞌ Loma ebekuꞌ mino numuno asiꞌve meni hizo numuno meꞌningine meni ngemekaꞌ ngemekaꞌ ogo aꞌminguꞌ ongo minineꞌ. Neivo eveneꞌ mukiꞌ ezela igi vigi igi minaniꞌ nene ngeleꞌmize lamineꞌ ogo
ACT 28:31 Oꞌmosoꞌmo gizebo o-ledaaꞌ neineꞌ neꞌmi akaꞌve lo sotoꞌ o ngemoo Guvelesi ve Izesuꞌ Kilisitoꞌ eiꞌ monovo apize ngemo mino aꞌmine gamazi lovoꞌ kiselevoꞌ ogo lo-ngemo neivo Loma ve ingine Pauloꞌni aka gizi-damaniꞌ ve.
ROM 1:1 Pauloꞌ neniꞌ nene Izesuꞌ Kilisitoꞌ aposolo mineline lo Oꞌmosoꞌmo neleꞌmize molo eiꞌ gamaziꞌve lamineꞌ nene lo soto sotoꞌ ogo mineline lo do kegese-nedavo Izesuꞌ Kilisitoꞌ gonoꞌve daaꞌ uve loloꞌ ogo minuve naza Oꞌmosoꞌmi lulo lengemo eiꞌ evenele loloꞌ igi minilizave lo lengeleꞌmize molave Loma ebekuꞌ minave lengiꞌ nene luhuvo niteꞌ mene nogize-lingiduve. Aꞌmine Oꞌmosoꞌmi gamazi lamineꞌ nene Oꞌmosoꞌmo lo-ngemavo eze veleutiꞌ gamazi li sotoꞌ igaꞌ ave nete gomukutiꞌ monoꞌ godolouꞌ gizikavo minineꞌ ve. Aꞌmine gamazi lamineꞌ nene eiꞌ Oꞌmosoꞌmi gipele Guvetesi ve Izesuꞌ Kilisitoꞌnimuꞌ gizaniꞌ ma neive. Aꞌmine Oꞌmosoꞌmi gipele aza eveneꞌ okode neꞌminesi sotoꞌ ineꞌ nene Zuda veti guvetesi ve naba gomuꞌ minive Davidiꞌ aꞌvopilemoꞌ zuhoutiꞌ sotoꞌ ogo minineꞌ ve. Idoꞌ eiꞌ Sikalahuꞌve nene atoliꞌmine ogo lisiheꞌ lamineꞌ minidiꞌmo Oꞌmosoꞌmo amuzo molo hilingutiꞌ do ote-dineꞌ neꞌmo eiꞌ gipele gehepeve minineꞌ nene lelebizave. Idoꞌ eiꞌ Izesuꞌ Kilisitoꞌ nene Oꞌmosoloꞌ medelo mino aza nasahiliꞌ o-nedo aposolo neleꞌmize molaniꞌ nene naza eze gulive nene do ote-do eveneꞌ zuho ato atoꞌ mukiꞌ miniꞌmi monaniꞌ nene ezemuꞌ lo-ngemekuvo ezemuꞌ gili eleꞌvoleꞌ igi gamaziꞌve gili di eꞌmetilizave losa neleꞌmize molaniꞌ ve. Idoꞌ Loma ebekuꞌ Oꞌmosoꞌmo Izesuꞌ Kilisitoda lengeleꞌmize molave linginesi nene aꞌmine Oꞌmosoꞌmo eveneꞌ zuho ato atoꞌ mukita viline lo lo-nimineꞌ aleveti muliseutiꞌ nene nizave. Nemuꞌ nene luhuvo niteꞌ mene nogize-lengedo Oꞌmoso metehosi idoꞌ Guvetesi ve Izesuꞌ Kilisitoꞌ nesi nasahiliꞌ i-lingidikesivo neꞌmo lengiꞌ muludinguꞌ hongu lo minivo mine lamineꞌ igi minilizave lo Oꞌmosola noluve.
ROM 1:8 Gamazi lo haꞌna ogo loloze. Ganaꞌ nene apiꞌ ogo tiꞌ lo noluve: Lingine Izesuꞌ Kilisitoꞌ gamaziꞌve amuzo mili gili eleꞌvoleꞌ igi minaniꞌ monovotine nene misubouꞌ misubouꞌ buu lo nomonive likevo naza gelo Izesuꞌ Kilisitoꞌ velemuꞌ ogo lengiꞌ mukikumuꞌ tangezoꞌ ve lo Oꞌmosola noluve.
ROM 1:9 Idoꞌ neꞌmine noluvoniꞌ nene naza eiꞌ gipeleꞌmi gamaziꞌve lo sotoꞌ o ngemeꞌmo mono eze gono nodo luꞌne molo opoꞌni laaꞌ nouvoniꞌ Oꞌmoso neꞌmo ezela luvonguꞌ lengikumuꞌ gamene gamene laaꞌ nouvoniꞌ monovoꞌne nene gele neive. Naza nene mo laminetoꞌ noluve.
ROM 1:10 Idoꞌ naza gamene gamene aꞌmine Oꞌmosola luvo gameneloꞌ nene eiꞌ gilivo lisiheꞌ o nolineꞌ nene naza gomuꞌ lengita alove lo gamene haꞌna geleꞌmo ogo minuvoniꞌza aka ma sotoꞌ o-nidamivo amuvoniꞌ mamuꞌ nene idise aka ma vele-nidavo lengita alohe lo laaꞌ nouve.
ROM 1:11 Idoꞌ neꞌmine lo Oꞌmosola laaꞌ nouvoniꞌ nene naza lengita vo Oꞌmosoꞌmi Sikalahutatiꞌ daaꞌ nouneꞌ amuzo ma nene lehize-lengedekuvo monokuꞌ amuzo mili oti minilizave lo lengita volove lo amuzo molo gelaaꞌ uvoniꞌ nenako nemuꞌ nene laaꞌ nouve.
ROM 1:12 Idoꞌ lengiꞌ do amuzo molo-lengedelove noluvoniꞌ nene naza tiꞌ lo gelosa noluve. Naza lengiꞌ nizada vokuvo lingine Kilisitoꞌnimuꞌ gili eleꞌvoleꞌ igaꞌ naniꞌ nemukisi idoꞌ naza gele eleꞌvoleꞌ ogaꞌ nouvoniꞌ monovoꞌne nemukisi nene lo voleloꞌ meloꞌ ogo gelo lute do amuzo molalone lo gelosa noluve.
ROM 1:13 Idoꞌ neze zuhokizo, naza lengita volove lo gamene vaiꞌ gaꞌne gelo minuvoniꞌ nemuꞌ lingine gilamilizaniꞌ nene edamoloseive lo gelosa nolo-lingimuve. Aꞌmine gomuꞌ lengita vamuvoniꞌ nene voloniꞌ akaꞌne ma ngoloꞌ lamivo vamuvoniꞌza idise akaꞌne ngoloꞌ lavo volosa gelekuve. Akaꞌne ngoloꞌ lavo volosa giluvoniꞌ nene eveneꞌ linge zuho ato atota vo gono dokuvo gihile izineꞌ neꞌmino lengita aꞌmineꞌmine ogo vo gono dokuvo gihile izavo monoꞌ lengemeni damenisi minilizave lo volosa giluvoniꞌ ve.
ROM 1:14 Oꞌmosoꞌmo monoꞌ gono nene eveneꞌ ato atoꞌ mukita daline lo nimineꞌ nenako nemuꞌ nene nGiliki aleveti monovoꞌnidoꞌ ngeꞌmetaaꞌ ave nevoꞌmine maduꞌninguꞌ gamazi lamineꞌ minaaꞌ ineꞌ alevelasi idoꞌ nGiliki aleveti monovoꞌnidoꞌ ngeꞌmetamave nevoꞌmine maduꞌninguꞌ gamazi lamineꞌ minesaꞌmineꞌ alevelasi mukita nene monoꞌ gono daloniꞌ o neive.
ROM 1:15 Nemuꞌ nene Loma ve linginelasi Izesuꞌ gamaziꞌve lamineꞌ nene lo sotoꞌ ogo lo-lengemelesa gilingili ogo nouve.
ROM 1:16 Naza Loma ebetasi vo Izesuꞌ gamazi lamineꞌ lo-lengemelove luvoniꞌ nene aꞌmine gamazi neꞌmo Oꞌmosoꞌmo Izesuꞌnimuꞌ gili eleꞌvoleꞌ ave do nguꞌ izelineꞌ amuzoꞌve nene do sotoꞌ ogaꞌ neivosa nemuꞌ nene naza aꞌmine gamazi lamineꞌ nene lo sotoꞌ olosa novozo helamo nolize izo laaꞌ nouvoniꞌ nenako nemuꞌ luve. Ee, aꞌmine gamazi lamineꞌ neꞌmo nene Oꞌmosoꞌmo do nguꞌ izelineꞌ amuzoꞌve nene gomuꞌ Zuda vela do sotoꞌ o-ngedosa Zuda ve minamave nGiliki ve nevoꞌmida nesi nene do sotoꞌ o do novive.
ROM 1:17 Idoꞌ Oꞌmosoꞌmo eveneꞌ do nguꞌ izelineꞌ amuzoꞌve nene Izesuꞌ gamazi neꞌmo do sotoꞌ ogaꞌ neive luvoniꞌ nene nemuꞌ luve: Aꞌmine gamazi laminekutiꞌ nene Oꞌmosoꞌmo eveneꞌ do luꞌ izelidoꞌ do lisiheꞌ o-ledaaꞌ neineꞌ akaꞌve nene sotoꞌ ogavo ningo gelekune. Aꞌmine aka nene neꞌmino neive: Eveneꞌ ma laza Izesuꞌnimuꞌ gele eleꞌvoleꞌ ogo mineloneꞌ neꞌmovoꞌ nene Oꞌmosoꞌmi veleloꞌ eveneꞌ lisiheꞌ lamineꞌ loloꞌ ogo minelesune. Ee, gele eleꞌvoleꞌ olonidotikovoꞌ nene Oꞌmosoꞌmo do luꞌ izelidoꞌ lisiheꞌ ogo minelesune. Neve nene monoꞌ godolouꞌ tiꞌ li gizi nizadoꞌ nene vo dave: Ingine Oꞌmoso nenikumuꞌ gili eleꞌvoleꞌ igi minilizadotiꞌ eveneꞌ lisiheꞌ lamineꞌ liliꞌ ilizave nene do nguꞌ izekuvo miniviꞌ miniviꞌ ilisave.
ROM 1:18 Eveneꞌ laza Oꞌmoso mehede emo goloso niteꞌ mukiꞌ daaꞌ nouningumuꞌ nene Oꞌmoso izeboloꞌ molavo lihimete lemelingumuꞌ nene Okulumokutiꞌ lo sotoꞌ ogavo aꞌmine monovo nene mo gelekune. Idoꞌ gelekuneꞌ nenako nemuꞌ nene Izesuꞌnimuꞌ gele eleꞌvoleꞌ olonidotikovoꞌ do luꞌ izeleseive luvoniꞌ nene nemuꞌ luvoniꞌ ve. Eveneꞌ ingine goloso niteꞌ di minaaꞌ adiꞌmo Oꞌmosomuꞌ gamazi gihile lamineꞌ neineꞌ nene engiꞌ luꞌninguꞌ sotoꞌ ogo minelineꞌ akaꞌve hizi tilaaꞌ nave. Ee, Oꞌmosomuꞌ ingine gililizaniꞌ o neineꞌ gamazi gihile lamineꞌ nene Oꞌmosoꞌmo inginela do sotoꞌ ogavo aꞌmine gamazi nene inginela sotoꞌ ogosa sotoꞌ neive. Sotoꞌ neineꞌ nenako aꞌminemuꞌ gilisaꞌmaniꞌ nene ingine aꞌmine gamazi gihile lamineꞌ luꞌninguꞌ sotoꞌ ogo minelineꞌ akaꞌve nene angiseꞌine hizi tiladiꞌmo nene gilisaꞌmave.
ROM 1:20 Idoꞌ evenelite Oꞌmosomuꞌ gililizaniꞌ o neineꞌ gamazi nene Oꞌmosoꞌmo inginela do sotoꞌ ineꞌ ve luvoniꞌ nene Oꞌmosoꞌmi monovo linge ma nene vetedunuꞌ ningamolonidoꞌ o minineꞌza Oꞌmosoꞌmo Okulumoꞌ misubo initeꞌ mukiꞌ do sotoꞌ molavo mine do ogo neivo aꞌmine initeꞌ mukiꞌ ningaaꞌ nounidotiꞌ nene eze monovo vetedunuꞌ ningamolonidoꞌ o minineꞌ nene ha ningo gelaaꞌ nounako nemuꞌ luvoniꞌ ve. Ee, do sotoꞌ molaniꞌ initeꞌ ningaaꞌ nounidotiꞌ nene aza minevoꞌ minevoꞌ ogo minaaꞌ neineꞌ amuzoꞌvesi idoꞌ emeni dameniꞌve atoliꞌmine ogo minineꞌ laza ma ivileꞌ amolonidoꞌ o minineꞌ nesi nene ha ninge gelelonidoꞌ o neive. Idoꞌ ha ningo gelelonidoꞌ neineꞌ nenako Oꞌmoso huli minilizave ingine nene laza eze monovo danava ningo gelamosa huluneꞌ ve li gamene nabala ma lamilisave.
ROM 1:21 Ingine nene Oꞌmoso neive li eiꞌ monovolo ha gili minaniꞌza Oꞌmoso neive li eikumuꞌ gilavo dizamivo opoꞌni li di naba i-disaꞌmaniꞌ ve. Neꞌmine ami gaꞌine gilaaꞌ aniꞌ nene vo gopoꞌnapa gehepeve ogo luꞌninguꞌ gilaaꞌ aniꞌ nene gili lamineꞌ ami litiꞌmusouꞌ nizaniꞌ gilivo minaaꞌ aniꞌ ve.
ROM 1:22 Neꞌmine igi mini ingine leliꞌ nene gate gele nge lo nonive none li minaniꞌza ingine neꞌmini ma minami negi hizi mini
ROM 1:23 emeni dameni lamineꞌ atoliꞌminesi mino helamo minevoꞌ minevoꞌ ogo minaaꞌ ive Oꞌmoso nene huli ezeloꞌ medeli eveneꞌ miniviꞌ miniviꞌ ami hilaaꞌ naniꞌ neti avazaha nehe idoꞌ nama gaha ize guloti avazaha nehe gosiheliti avazaha nehe neꞌmine niteꞌ loloꞌ igi ngopoꞌni laaꞌ aniꞌ ve.
ROM 1:24 Neꞌmine igi mini Oꞌmoso meheꞌine imikevo nemuꞌ Oꞌmoso aza nene eleꞌninge vaꞌninge ingalizaniꞌ monovo di gopo igi luꞌine do goloso ilineꞌ monovo goloso nene di mini engiꞌ okoꞌine di gopo ilisa eveneꞌ ingine luꞌninguꞌ laniteꞌ giladoꞌ nene eꞌmetamilizanako luꞌineꞌmo laniteꞌ gilidoꞌ nene ha eꞌmetilizave lo hulo-ngidineꞌ ve.
ROM 1:25 Ingine Oꞌmoso gihile nene huli-di ezeloꞌ medeli soza oꞌmoso di sotoꞌ igisa initeꞌ mukiꞌ do sotoꞌ molave Oꞌmoso nene gubuꞌ izi imi opoꞌni li-dami Oꞌmoso asiꞌve loloꞌ ineꞌ initetoꞌ nene gubuꞌ izi ngimi ngopoꞌni li minaaꞌ aniꞌ ve. Neꞌmine aniꞌza initeꞌ mataꞌ do sotoꞌ ive Oꞌmosovoꞌ nene laza gamene gamene opoꞌni laaꞌ olonidoꞌ o neive. Nemuꞌ nene neꞌmino minivo.
ROM 1:26 Idoꞌ eveneꞌ neꞌmine igi Oꞌmoso huli-di soza oꞌmoso ngopoꞌni li minaniꞌ nemuꞌ Oꞌmoso aza ninge mate ngimikivo ingine monovo goloso adoꞌ neꞌmine igi minaniꞌ ve: Veneꞌ nete vaꞌningesivoꞌ ingalizaniꞌ monovo Oꞌmosoꞌmo ganakutiꞌ ngelebizineꞌ ma nene huli Oꞌmosoꞌmo ngelebizamineꞌ monovo goloso di sotoꞌ igi engiꞌ veneꞌ okoꞌninguꞌ initeꞌ igaꞌ aniꞌ ve.
ROM 1:27 Idoꞌ aꞌmineꞌmine igi vemohoꞌ ingine Oꞌmosoꞌmo venekisi ingaaꞌ monovo ganakutiꞌ ngelebizineꞌ nene meheꞌine imi ve malite ve mamuꞌ ma duvo lo okoꞌninguꞌ oloꞌ lavo ngovozo niteꞌ goloso di sotoꞌ igi angiseꞌine okoꞌninguꞌ initeꞌ igaꞌ aniꞌ ve. Neꞌmine adotiꞌ lihime daniꞌ votigileloꞌ do molo Oꞌmosoꞌmo lihime ngemavo okoꞌine nene goloso ogaꞌ neive.
ROM 1:28 Ee, ingine Oꞌmosomuꞌ gili minilizaniꞌ nemuꞌ nene levelenga li huli-dikevo Oꞌmoso aza nene eveneꞌ ingine goloso monovomuꞌ gohi gili minikevo aꞌmine gaꞌine giladoꞌ nene eꞌmeti evenelite amilizaniꞌ o minineꞌ monovo goloso ato atoꞌ igi mili minilizave lo ninge mate-ngidineꞌ ve.
ROM 1:29 Neꞌmino ninge mate-ngedavo eveneꞌ ingine lisiheꞌ amineꞌ monovo danava goloso vaiꞌ lihime daaꞌ monovo nene engita vaiꞌ goloso sotoꞌ ivo minaniꞌ ve. Aꞌmine monovo goloso nene neꞌmini nizave: Mumuzoꞌ igaꞌ, evenekumuꞌ lukehe igaꞌ, eveneꞌ mala initeꞌ lamineꞌ ma sotoꞌ o ngemavo ma aꞌmine vemuꞌ ngizeboloꞌ gohi molaaꞌ, eveneꞌ ngibili hilaaꞌ, lolize hizaaꞌ, eveneꞌ goꞌine izaaꞌ,
ROM 1:30 eveneꞌ dovo ledevoꞌ ogo ngemenga laaꞌ, Oꞌmosoꞌmi biluvaꞌve minaaꞌ, hokolizeꞌ igi hokolizeka li engiꞌ okoꞌine di dizaaꞌ, monovo goloso di sotoꞌ igaꞌ, izeꞌninge meꞌninge laniꞌ gamazi gili hulaaꞌ,
ROM 1:31 negi suno suno daaꞌ, gamazi angise li hukisa aꞌmidoꞌ eꞌmetamaaꞌ, luꞌine ngimamaaꞌ, idoꞌ eveneꞌ muheleꞌine ningamaaꞌ ave mukiꞌ neꞌmine nene nizave.
ROM 1:32 Neꞌmino neivo Oꞌmosoꞌmo eveneꞌ neꞌmine monovo goloso ilizadotiꞌ nene golo hizi meniꞌve helaaꞌ nene dikevosa lisiheꞌ oloseive lineꞌ nemuꞌ nene mo gili minisasi aꞌmine luvoniꞌ neꞌmine monovo goloso nene ha igi mili minaaꞌ nave. Idoꞌ neꞌmine igaꞌ naniꞌ nene goloso neineꞌza ingine aꞌmine monovo goloso aꞌnevoꞌ nene ma amave. Ingine ningavo eveneꞌ malitesi aꞌmine luvoniꞌ monovo goloso nene igi mili nizavo ma nene ingine lamineꞌ ve li siza li-ngidaaꞌ nave. Ingine aꞌneꞌmine igaꞌ naniꞌ neꞌmo nene goloso gehepeve ogaꞌ neive.
ROM 2:1 Idoꞌ aꞌmela luvoniꞌ neꞌmino neꞌmine monovo goloso igaꞌ nave mukiꞌ nene Oꞌmosoꞌmo lihime molo ngimikaꞌ neineꞌ nenako nemuꞌ eveneꞌ ma lingine eveneꞌ mamuꞌ lihime dikeve li-ngidaaꞌ nave mukiꞌ lingine aꞌmine lihime dikeve li-ngidaaꞌ navete igaꞌ naniꞌ initeꞌ goloso neꞌmine nene linginesi igaꞌ naniꞌ nenako Oꞌmosoꞌmo eveneꞌ lihime ngemelineꞌ gameneloꞌ nene lingine lengiꞌ isetine izelive li-imilizaniꞌ gamazi ma minamoloseive.
ROM 2:2 Idoꞌ Oꞌmosoꞌmo eveneꞌ neꞌmine igaꞌ ave goniꞌ o-ngedo lihime ngemelineꞌ nene mo monovo lisiheꞌ lamineꞌ ogo lihime ngemeleseive losa gele none.
ROM 2:3 Gele noneꞌza lingine nene langisetinesi aꞌmine monovo goloso nene ha igi mili minaaꞌ niigisa eveneꞌ ma aꞌmine monovo goloso igaꞌ navemuꞌ izeꞌ mili-ngidi lihime dikeve li-ngidaaꞌ nave lingine nene Oꞌmosoꞌmo eveneꞌ lihime ngemelingutiꞌ nene ha olovoꞌ olosune li gilaaꞌ nahe. Oꞌove. Olovoꞌ ngeli mo amilisave.
ROM 2:4 Idoꞌ ma nene tiꞌ li gilaaꞌ nahe: Oꞌmosoꞌmo isetine izo nasahiliꞌ o-lengedeꞌmo ogo minaaꞌ neineꞌ neꞌmo do akaloꞌ o-lengedavo lutine di velepeꞌ izi monovo goloso hulilizave losa nasahiliꞌ o-lengedaaꞌ neingumuꞌ nene lingine ha gililizanako gili hulisa Oꞌmosoꞌmo atoliꞌmine ogo nasahiliꞌ o-lengedo geto lihime lengemo lengebelamo isetine izeꞌmo vo minaaꞌ neineꞌ nemuꞌ nene lingine gilavo haza niteꞌ loloꞌ ogahe.
ROM 2:5 Eveneꞌ ma lingine lutine di velepeꞌ izami lutine di aꞌmanapa iꞌmi vi minaaꞌ nangumuꞌ nene Oꞌmoso aza izeboloꞌ molokaꞌ molokaꞌ oꞌmo vo minaaꞌ neineꞌ nene naba oꞌmo vo minaaꞌ neive. Idoꞌ Oꞌmosoꞌmo monovo lisiheꞌ lamineꞌ eꞌmeto eveneꞌ izeꞌ molo-ledo lihime lemelineꞌ gamene sotoꞌ ogavo ma aꞌmine izeboloꞌ molaniꞌ votigileloꞌ nene do molo lihime ngemeleseive.
ROM 2:6 Aꞌmine eveneꞌ izeꞌ molo-ledelineꞌ gameneloꞌ nene eveneꞌ ingine monovo goloso nehe lamineꞌ nehe igi mili i nilizaniꞌ votigileloꞌ do molo meni neꞌmino ngemeleseive:
ROM 2:7 Ve ma ingine nene Oꞌmosoꞌmi monovo danava lamineꞌ goloso neineꞌ nene dalizangumukisi idoꞌ ninge lamineꞌ do-ngedo do naba o-ngedelineꞌ nemukisi idoꞌ helamaaꞌ ngemeni dameni dalizangumukisi nene aka viseꞌ ogo do sotoꞌ olone li geni initeliꞌmi lulouꞌ minilizahe mulumo alumo initeliꞌmi lulouꞌ minilizahe nemuꞌ nene gilami gili huli geli geli igi monovo laminekovoꞌ igi mili minilizaniꞌ nene Oꞌmosoꞌmo minevoꞌ minevoꞌ ngemeni dameni lehize-ngedeleseive.
ROM 2:8 Idoꞌ ve ma ingine Oꞌmoso biluvaꞌ i-di Oꞌmosoꞌmi gamazi gihile nene gili huli eꞌmetami monovo golosoloꞌ eꞌmeti vi minave engikumuꞌ nene Oꞌmosoꞌmo izeboloꞌ molavo lihime atoliꞌmine ogo ngemeleseive.
ROM 2:9 Neꞌmine ogavo mulumo niteꞌ goloso ato atoꞌ nene goloso niteꞌ daaꞌ avela sotoꞌ o ngemeleseive. Ganaꞌ nene Zuda vela sotoꞌ o ngemosa nelotiꞌ nene Zuda ve minamaniꞌ atoꞌ vela sotoꞌ o ngemeleseive.
ROM 2:10 Neꞌmine oloseineꞌza monovo laminetoꞌ eꞌmeti minaaꞌ avela nene Oꞌmosoꞌmo do hozi lo do naba o-ngedo hongu lo minaaꞌ monovo lehize-ngedeleseive. Idoꞌ neꞌmine o-ngedelineꞌ nene Oꞌmoso aza eveneꞌ mukiꞌ nizangutiꞌ nene linge mavoꞌ do kegeso do lamineꞌ o-ngedesaꞌmineꞌ nenako nemuꞌ nene Zuda ve gomuꞌ neꞌmine o-ngedosa nelotiꞌ nene Zuda ve minamaniꞌ atoꞌ ve nesi nene neꞌmine o-ngedeleseive.
ROM 2:12 Idoꞌ Oꞌmosoꞌmo gopo hazamuꞌ eveneꞌ linge ma do lamineꞌ o-ngedo linge ma do goloso o-ngedesaꞌmive luvoniꞌ nene nemuꞌ noluve: Eveneꞌ ma Oꞌmosoꞌmo louꞌ gamaziꞌve lo-ngemamivo haza minave adoꞌ Zuda ve minamave nete lihime dalizaniꞌ nene Oꞌmosoꞌmo loutoꞌ do molo izeꞌ ma molo-ngedamoloseiha nesi mo ha vi tolovo ilisave. Idoꞌ Oꞌmosoꞌmo louꞌ gamaziꞌve lo-ngemavo gili minave Zuda ve nene louꞌ di minisasi lihime dalizave nene Oꞌmosoꞌmo aꞌmine loutoꞌ do molosa izeꞌ molo-ngedo lihime ngemeleseive.
ROM 2:13 Ee, Oꞌmosoꞌmo eveneꞌ mamuꞌ ve lisiheꞌ ve lo lo-ngedaaꞌ neive nene eveneꞌ ma ingine louꞌ gamazi nene ha gaꞌinedunukovoꞌ gilaaꞌ avemuꞌ nene losaꞌmive. Asi louꞌ gamaziꞌmo lidoꞌ igaꞌ avevoꞌ nene ve lisiheꞌ ve lo lo-ngedaaꞌ neive.
ROM 2:14 Idoꞌ naza luvoniꞌ ma nene me gililo: Zuda ve minamave adoꞌ Oꞌmosoꞌmo louꞌ gamaziꞌve lo-ngemavo damave ingine engiꞌ ngemeni dameniloꞌ di mili igi mili iliza initeꞌ nene louꞌ gamaziꞌmo lidoꞌ vo miliseꞌ o minelineꞌ neꞌmo nene mo Oꞌmosoꞌmi louꞌ nene engiꞌ luꞌninguꞌ neive.
ROM 2:15 Idoꞌ engiꞌ neꞌmine igi mili minaaꞌ naniꞌ neꞌmo nene louꞌ gamaziꞌmo lo neineꞌ gamazi luꞌninguꞌ neineꞌ nene do sotoꞌ ogo lelebize neive. Ingine igaꞌ naniꞌ initekumuꞌ nene engiꞌ luꞌine gaꞌine neꞌmo gamene ma nene di lamineꞌ ikeve laaꞌ idoꞌ gamene ma nene di goloso ikeve lo lo-ngemaaꞌ neineꞌ nenako nemuꞌ nene aꞌmine neꞌmine luꞌine gaꞌine engita minaaꞌ neineꞌ neꞌmo nene naza lamineꞌ luvoniꞌ nene do sotoꞌ ogave.
ROM 2:16 Idoꞌ Oꞌmosoꞌmo lavo Izesuꞌ Kilisitoꞌ nene ezeloꞌ medelo mino eveneꞌ laza sunoꞌ ogo molo ogaꞌ nouneꞌ initeꞌ izeꞌ molalineꞌ gameneloꞌ nene neniꞌ mene noluvoniꞌ neꞌmino mineleseive. Ee, naza gamazi lamineꞌ lo sotoꞌ sotoꞌ ogaꞌ nouvoniꞌ neꞌmo nene aꞌmine gamazi mene lo sotoꞌ neive.
ROM 2:17 Idoꞌ gaza Zuda ve nolinive nene gelezo. Zuda ve nouve losa Oꞌmosoꞌmi louꞌ gamazi Moseꞌ gizo limineꞌ neꞌmo nene Oꞌmosoꞌmo goniꞌ o-ledelingutiꞌ nene ha do nuꞌ izeleseive lo gelo aꞌmidoꞌ gele medele mino okonga do dizo Oꞌmosoꞌmi evenele nouve laaꞌ nane.
ROM 2:18 Oꞌmosoꞌmi louꞌ gamazi nene apize gimikevo gele naineꞌ nenako nemuꞌ nene Oꞌmosoꞌmo geiꞌ iline lo lulouꞌ gele neineꞌ nene gaza mo ningo gelosa monovo ma ivileꞌ ogo monovo lamineꞌ gehepeve nene do kegeso ningaaꞌ nane.
ROM 2:19 Neꞌmine anidiꞌmo nene gaza tiꞌ lo laaꞌ nane: Moseꞌ gizineꞌ louꞌ gamazi nenita neinguꞌ nene gamazi monovo vaikisi gamazi gihile lamineꞌ vaikisi neivosa nene naza luꞌineꞌmi vele likavo nizave aka ngelebizelodoꞌ mino litiꞌmusouꞌ minave neti liviꞌine neꞌmine mino idoꞌ gamazi gilamave ngeleꞌmize hehe lolodoꞌ mino monoꞌ gilami izipe ngomo neꞌmine minave initeꞌ apize ngemaaꞌ olodoꞌ mo lisiheꞌ o nouve lo amuzo molo gelaaꞌ nane.
ROM 2:21 Nemuꞌ nene gaza eveneꞌ ma apize ngemaaꞌ naineꞌ gamaziloꞌ nene geikisi gele dalinako gele dosaꞌmane. Ee, gaza gumine amozo lo eveneꞌ lo-ngemaaꞌ noogosa gaza nene gumine ogaꞌ noolosane.
ROM 2:22 Idoꞌ veneꞌ vemohoꞌ liliꞌ ikeniꞌ nete veneꞌ vemohoꞌ masi gopo ingamilo laaꞌ noogosa geiꞌ nene neꞌmine ogaꞌ noolosane. Gaza soza oꞌmosomuꞌ nene muso gaka dizavo olovoꞌ ogaꞌ noogosa soza oꞌmosoliti numungutiꞌ initeꞌ gumine ogaꞌ noolosane.
ROM 2:23 Idoꞌ gaza Oꞌmosoꞌmi louꞌ gamazi nene gele nouve lo okonga do dizaaꞌ nanive neke nene aꞌmine louꞌ nene avutoꞌ ogosa Oꞌmosoꞌmi gulive do lemaaꞌ noolosane.
ROM 2:24 Neꞌmine noluvoniꞌ nene monoꞌ godolouꞌ gamazi ma tiꞌ li gizi nizaniꞌ nene lengitoꞌ vo davosa noluve: Zuda ve lengiꞌ monovotine nene heta atoꞌ ve ingine ningisa Oꞌmoso nene divi lediviꞌ igaꞌ nave.
ROM 2:25 Zuda veti okodidoꞌ Oꞌmosoꞌmi noso mili-lingidaaꞌ naniꞌ neꞌmo nene lingine Oꞌmosoꞌmi louꞌ gamaziloꞌ eꞌmeti minilizaniꞌ nene mo hize eleꞌ o-lengedeleseive. Idoꞌ okodida Oꞌmosoꞌmi noso neivo mini louꞌ gamazi avutoꞌ igi minilizaniꞌ neꞌmo nene Oꞌmosoꞌmi noso lengita neineꞌ ma nene haza niteꞌ loloꞌ ogavo nomivo nizaniꞌ geleleseive.
ROM 2:26 Neꞌmine o neineꞌ nenako ve ma ingine okoꞌnida Oꞌmosoꞌmi noso nomivo nilizadite Oꞌmosoꞌmi louꞌ gamazi gili di minaaꞌ niilizaniꞌ nene Oꞌmosoꞌmo gilivo eiꞌ nosoꞌve nene mo engiꞌ okoꞌnida mineleseive.
ROM 2:27 Idoꞌ ve ma okoꞌnida Oꞌmosoꞌmi noso nomivo mini Oꞌmosoꞌmi louꞌ gamaziloꞌ eꞌmeti osuꞌ lilizadite nene lengiꞌ monoꞌ godolo di minisasi idoꞌ Oꞌmosoꞌmi noso okodida mili-lingidikevo minisasi Oꞌmosoꞌmi louꞌ gamazi avutoꞌ igaꞌ nave lengiꞌ nene losuvotine ilavo monovotine nene sotoꞌ oloseive.
ROM 2:28 Ee, Oꞌmosoꞌmi evenele gihile Zuda ve minaaꞌ neꞌmi gihile nene okode losuvolotiꞌ nene ma sotoꞌ osaꞌmive. Idoꞌ aꞌmineꞌmine ogo Oꞌmosoꞌmi noso do minaaꞌ neꞌmi gihile nene Oꞌmosoꞌmi noso ve li okode lolovo huki hulaaꞌ nadotiꞌ nene ma sotoꞌ osaꞌmive.
ROM 2:29 Asi Oꞌmosoꞌmi evenele Zuda ve minaaꞌ neꞌmi gihile nene luteuꞌ haleko minineꞌ lemeni damenilotiꞌ nene sotoꞌ ogaꞌ neive. Idoꞌ Oꞌmosoꞌmi noso gihile nene louꞌ gamazi gizi nizadoꞌ nene ha okode losuvolotiꞌ eꞌmeto okode lolovo huko hulaaꞌ neve nene nevoba asi Oꞌmosoꞌmi Sikalahuꞌ neꞌmo luteuꞌ molo-ledaaꞌ neineꞌ lemeni dameni nene neive. Neꞌmine lemeni damenisi Zuda ve gihile minelonivemuꞌ nene evenelite lopoꞌni lilizavoba asi Oꞌmosoꞌmo loloseive.
ROM 3:1 Idoꞌ naza nene neꞌmine luvoniꞌ nemuꞌ nene Zuda ve lingine lutinguꞌ nene gopo gatine gili longoꞌ neꞌminisa ilizaniꞌ o neive: Oꞌmosoꞌmo ningivo Zuda vesi idoꞌ heta atoꞌ vesi nene mo lisihekovoꞌ o minaaꞌ nouneꞌ nolineꞌ nene laza Zuda ve minuningumuꞌ Zuda ve minamave ngivileꞌ ogo hize eleꞌ o-ledaaꞌ neineꞌ nene nanitedunuꞌ hize eleꞌ o-ledaaꞌ neive. Idoꞌ laza Oꞌmosoꞌmi noso okodela molaaꞌ nouneꞌ nelotiꞌ nene initeꞌ lamineꞌ nene naniteꞌ sotoꞌ o-ledaaꞌ neive li longoꞌ ilisave.
ROM 3:2 Neꞌmine ilisaha initeꞌ lamineꞌ vaiꞌ goloso vauve elosa lelita neive. Initeꞌ naba ganaꞌ nene Oꞌmosoꞌmo lo huko lo-lidineꞌ gamaziꞌve nene Zuda ve leliꞌ nene di minilizave losa lehize-lidineꞌ ve.
ROM 3:3 Ne neiha Zuda ve linge ma nete nene aꞌmine Oꞌmosoꞌmo lehize-lidineꞌ gamaziloꞌ nene eꞌmetamaniꞌ ve. Nemuꞌ nene ve malite nene tiꞌ li longoꞌ ilisa gili nilisave: Ingine gamaziꞌveloꞌ eꞌmetamaniꞌ nemuꞌ Oꞌmosoꞌmo aꞌmine gamaziloꞌ eꞌmeto amilidoꞌ o neihe.
ROM 3:4 Oꞌove. Eꞌmetamilivoba asi aꞌmine gamaziꞌveloꞌ nene ha mo eꞌmeteleseive. Eveneꞌ vaiꞌ nene sozaloꞌ vevoꞌ minilisaha Oꞌmoso neve nene gamazi gihile laminekovoꞌ laaꞌ ive mineleseive. Neꞌmine neingumuꞌ nene monoꞌ godolouꞌ tiꞌ li gizi nizaniꞌ ma neive: Neꞌmino neineꞌ nene nanitekumuꞌ ve. Oꞌmosoo, gaza gamazi lisihekovoꞌ lilineꞌ o neineꞌ nene mo sotoꞌ neivo gonikuꞌ nesi nene gasika ngivileꞌ olosane lo neive.
ROM 3:5 Nemuꞌ nene naza mene evenelite igaꞌ naniꞌ monovoloꞌ do molo tiꞌ lo noluve: Laza monovo goloso ogo molo ogaꞌ nouneꞌ neꞌmo nene Oꞌmosoꞌmi monovo lisiheꞌ lamineꞌ nene do sotoꞌ o-daaꞌ neineꞌ nenako Oꞌmoso aza monovote golosomuꞌ lihime lemelineꞌ nemuꞌ nene monovo do goloso ogave lo ha lo-delonidoꞌ o neihe.
ROM 3:6 Oꞌve. Mo kekeꞌ neꞌmino nomive. Idoꞌ neꞌmine minidiniko Oꞌmosoꞌmo me misubouꞌ ve mukiꞌ izeꞌ molo-ledelineꞌ nenako nado izeꞌ molo-ledelidoꞌ lisiheꞌ o minidine.
ROM 3:7 Idoꞌ ve ma tiꞌ lo loloseive: Naza soza gamazi luvodiniko Oꞌmosoꞌmo nenikumuꞌ lihimeloꞌ ve minane lo lihime nimidine. Ne neiha eveneꞌ nete aꞌmine soza gamaziꞌnemuꞌ gililizadotiꞌ nene Oꞌmosoꞌmo gamazi gihile laminekovoꞌ laaꞌ neineꞌ monovoꞌve nene sotoꞌ gehepeve ogavosa ezemuꞌ nene gohi opoꞌni li di naba igi li-dilizadoꞌ idine. Idoꞌ neꞌmine idiniko naza initeꞌ lamineꞌ do sotoꞌ uvoniꞌ gilidine. Nemuꞌ neniꞌ nene lihimeloꞌ ve ve lo lihime nene nanimuꞌ nimidine.
ROM 3:8 Ee, ve malite lelikumuꞌ nene divi lediviꞌ igi tiꞌ li laaꞌ nave: Paulole laaꞌ naniꞌ nene neꞌmino neive: Monovo goloso neꞌmo monovo lamineꞌ do sotoꞌ ilineꞌ nenako nemuꞌ neꞌmine ilingumuꞌ ve lo laza nene ha monovo goloso ogo molo minelesune. Idoꞌ neꞌmine laaꞌ nene mo lamineꞌ nehe. Oꞌove. Oꞌmosoꞌmo neꞌmine laaꞌ ave nene lihime ngemelidoꞌ lisiheꞌ i nizave.
ROM 3:9 Nelotiꞌ nene laza nadive lo gelelone. Zuda ve leliꞌ nene eveneꞌ linge mukiꞌ ngivileꞌ ogo lamineꞌ nobe. Oꞌove. Neꞌmino minamune. Mo Zuda vesi aꞌmine Zuda ve minamavesi nene mo lihime monovoliꞌmo nene adeloꞌ do minivevoꞌ none lo naza mo lo-lengemekuvoniꞌ ma ve.
ROM 3:10 Aꞌmine me luvoniꞌ gamazi neꞌmo nene monoꞌ godolouꞌ gamazi ma tiꞌ li gizi nizadoꞌ vo do neive: Me misubouꞌ nene eveneꞌ lisiheꞌ lihimeꞌvesi nomive nene mo kekeꞌ hamokisi ma nomive.
ROM 3:11 Aka laminekumuꞌ ningi gilave nene hamokisi ma nizamave. Idoꞌ Oꞌmoso ningelone li ezemuꞌ viseꞌ igaꞌ ave nene mo kekeꞌ ma nizamave.
ROM 3:12 Idoꞌ eveneꞌ mukiꞌ nene aka lamineꞌ huli zovoꞌ izi visa vi goloso nave. Ve ma monovo laminekovoꞌ i di vi minaaꞌ ave nene mo kekeꞌ hamokisi nizamave.
ROM 3:13 Luꞌningutiꞌ vomine gamazi laaꞌ naniꞌ nene gonoso galese ngoloꞌ lo miningutiꞌ unuvo goloso ogaꞌ neineꞌ neꞌminosa nene neive. Idoꞌ gamazi laaꞌ naniꞌ nene eveneꞌ goꞌine izisavoꞌ nene laaꞌ nave. Idoꞌ sataꞌ ume nete eveneꞌ ongovusoꞌ ngibilaaꞌ naniꞌ neꞌmino ingine gamazi laaꞌ naniꞌ neꞌmo nene ngebelaaꞌ neive.
ROM 3:14 Idoꞌ engita gamazi goloso ekeseꞌ lo-ngedaaꞌ monovo nene veꞌninguꞌ vaiꞌ lo neive.
ROM 3:15 Idoꞌ gizeꞌine neꞌmo nene eveneꞌ ngebelaatoꞌ liteꞌ lo ngeleꞌmizo vaaꞌ neive.
ROM 3:16 Idoꞌ zaaꞌ zaaꞌ akaloꞌ vilizahe aꞌmida nene initeꞌ mataꞌ di goloso gehepeve igaꞌ idoꞌ eveneꞌ geni ngimaaꞌ neꞌmine igaꞌ nave.
ROM 3:17 Neꞌmine igi minisa ingine hongu lo lamino minaaꞌ aka nene mo kekeꞌ ningamave.
ROM 3:18 Idoꞌ Oꞌmosomuꞌ golise gelaaꞌ monovomuꞌ nene mo ningi gilisaꞌmave.
ROM 3:19 Idoꞌ Oꞌmosoꞌmi louꞌ gamaziꞌmo neꞌmine lineꞌ nene aꞌmine louꞌ gamaziꞌmi gesi minguꞌ minunivemuꞌ lineꞌ nene mo gele none. Neꞌmine lineꞌ nene me misubouꞌ aleve mukiꞌ laza loloneꞌ gamazi nomivo luꞌ izo mino Oꞌmosoꞌmi veleloꞌ goniꞌ o-ledelidoꞌ lisiheꞌ ogo mineloningumuꞌ nene neꞌmine lineꞌ ve.
ROM 3:20 Nemuꞌ nene Oꞌmosoꞌmi louꞌ gamaziloꞌ eꞌmetelesa olonidotiꞌ nene eveneꞌ hamokisi Oꞌmosoꞌmi veleloꞌ nene gamazite nomineꞌ ngelo minamolosune. Nanitekumuꞌ ve. Aꞌmine louꞌ gamazi neꞌmo nene lihime daaꞌ monovo danava nene do sotoꞌ gehepeve ogosa lelebizaaꞌ neive.
ROM 3:21 Ne neiha Oꞌmosoꞌmi veleloꞌ eveneꞌ lisiheꞌ mineloningumuꞌ nene loutoꞌ eꞌmetaaꞌ aka neꞌmo nene vo damivo Oꞌmosoꞌmo aꞌminemuꞌ gele hulo aka atoꞌ nene idise do sotoꞌ o-lede neive. Aꞌmine akamuꞌ nene Oꞌmosoꞌmi gamazi neꞌmosi livo idoꞌ polohetelite gizaniꞌ gamazi neꞌmosi livo setatoꞌ aꞌminemuꞌ nene li sotoꞌ asineꞌ ve.
ROM 3:22 Aꞌmine aka nene neꞌmino neive: Oꞌmosoꞌmo eveneꞌ lisiheꞌ ve lo-ngedelineꞌ nene ingine Izesuꞌ Kilisitoꞌnimuꞌ gili eleꞌvoleꞌ i nizangumuꞌ ve lo Izesuꞌ Kilisitoꞌnimuꞌ gili eleꞌvoleꞌ ave mukikumuꞌ nene loloseive. Ee, eveneꞌ mukiꞌ nene lihime daaꞌ nouneꞌ nenako Oꞌmosoꞌmi emeni dameni lamineꞌ goloso nene do tiꞌ olonidoꞌ lisiheꞌ amune. Nemuꞌ nene Oꞌmosoꞌmo Zuda ve nene ve lisiheꞌ ve lo-ngedelineꞌ aka nene atoꞌ ma neivo Zuda ve minamave nene ve lisiheꞌ ve lo-ngedelineꞌ aka nene atoꞌ ma neivoba asi mo aka hamokovoꞌ nene neive.
ROM 3:24 Neꞌmino neineꞌ nenako Oꞌmosoꞌmo ve lisiheꞌ ve lo-ledelineꞌ nene laza neꞌmine lo-ledelidoꞌ lisiheꞌ amuba haza eiꞌ luloloꞌ do molo nasahiliꞌ o-ledo ve lisiheꞌ ve lo-ledeleseive. Neꞌmine lo-ledelineꞌ nene Izesuꞌ Kilisitoꞌ aza lihimetemuꞌ golo hizo helo kuluhize-ledaaꞌ aka do sotoꞌ ineꞌ nemukovoꞌ nene ve lisiheꞌ ve lo-ledeleseive.
ROM 3:25 Idoꞌ Oꞌmosoꞌmo kuluhize-ledelineꞌ aka Izesuꞌ Kilisitoꞌ do sotoꞌ ineꞌ nene aza leliꞌ lihimetemuꞌ nene eiꞌ vaniseꞌve hulo hilingumuꞌ nene gele eleꞌvoleꞌ okunivo neꞌmo nene Oꞌmosoꞌmi izeboloꞌve lelikumuꞌ nene do mate-delive losa eleꞌmize molavosa kuluhize-ledaaꞌ aka nene do sotoꞌ ineꞌ ve. Izesuꞌ neꞌmine ilive lo Oꞌmosoꞌmo eleꞌmize molaniꞌ nene gomukutiꞌ lihime daaꞌ aniꞌ mamuꞌ nene gelo geto lihime ngemamo hongu lo mino ninge mate-ngidineꞌ nenako nemuꞌ nene eiꞌ monovoꞌve lisiheꞌ o neineꞌ nene ningi gililizave lo lelebizelesa eleꞌmize molaniꞌ ve. Idoꞌ eleꞌmize molaniꞌ nene idise gamenela eiꞌ monovoꞌve lisiheꞌ nene adoꞌ ve lisiheꞌ minosasi idoꞌ Izesuꞌnimuꞌ gele eleꞌvoleꞌ nolonivemuꞌ nene ve lisiheꞌ ve ha lo-ledelidoꞌ lisiheꞌ o neineꞌ nene lelebizelesa eleꞌmize molaniꞌ ve.
ROM 3:27 Neꞌmino laza ve lisiheꞌ ve lo-ledelidoꞌ lisiheꞌ minamosa haza Izesuꞌ Kilisitoꞌnimuꞌ gele eleꞌvoleꞌ unidotikovoꞌ Oꞌmosoꞌmo ve lisiheꞌ ve lo-ledaaꞌ neineꞌ nenako laza okode do dizelonidoꞌ nene lisiheꞌ amive. Okode do dizeloneꞌ aka nene mo hize tile lamineꞌ ogave. Nene nanitekumuꞌ ve. Laꞌlisete louꞌ gamaziloꞌ eꞌmetekunivosa Oꞌmosoꞌmo ve lisiheꞌ ve lo-lididiniko aꞌmine aka nene hize tilamidineꞌza asi Kilisitoꞌnimuꞌ gele eleꞌvoleꞌ okunivosavoꞌ nene ve lisiheꞌ ve lo-ledaaꞌ neineꞌ nenako nemuꞌ nene leliꞌ okode do dizaaꞌ aka nene mo hize tile lamineꞌ ogave.
ROM 3:28 Ee, laza tiꞌ lo gele none: Oꞌmosoꞌmo evenekumuꞌ ve lisiheꞌ ve lo-ledelineꞌ nene louꞌ gamaziloꞌ eꞌmete osuꞌ lube lamube nemuꞌ gele hulo Izesuꞌ Kilisitoꞌnimuꞌ gele eleꞌvoleꞌ okunivosavoꞌ nene ve lisiheꞌ ve lo-ledeleseive.
ROM 3:29 Lingine gilavo Oꞌmoso nene Zuda ve minamaveti Oꞌmosoꞌine minamo Zuda veti Oꞌmosotevoꞌ neihe. Oꞌove. Oꞌmoso nene hamokovoꞌ neineꞌ nenako nemuꞌ nene aza mo Zuda ve minamave neti Oꞌmosoꞌinesi nene mino Oꞌmosoꞌmi noso okodela mulunive Zuda ve nene aꞌmine Kilisitoꞌnimuꞌ gele eleꞌvoleꞌ okunivo neꞌmo nene ve lisiheꞌ ve lo-ledaaꞌ ogo idoꞌ Oꞌmosoꞌmi noso okoꞌnida milisaꞌmave heta atoꞌ vesi nene aꞌmine Kilisitoꞌnimuꞌ gili eleꞌvoleꞌ ikevosavoꞌ nene engikisi Oꞌmosoꞌmo ve lisiheꞌ ve lo-ngedeleseive.
ROM 3:31 Nemuꞌ nene malite tiꞌ li longoꞌ ilisave: Neꞌmino neineꞌ nenako Kilisitoꞌnimuꞌ gele eleꞌvoleꞌ ogaꞌ neꞌmovoꞌ nene Oꞌmosoꞌmo ve lisiheꞌ ve lo-ledelidoꞌ lisiheꞌ o neive li likenako lingine nene louliꞌmi gono nene mo osuꞌ lave lisa nilahe. Oꞌove. Laza mo kekeꞌ neꞌmine lamune. Asi laza ne louꞌ nene hize eleꞌ noo-dune.
ROM 4:1 Nemuꞌ nene laza leliꞌ Zuda veti zuho do sotoꞌ ive avoteho Abalahamuꞌnida sotoꞌ ineꞌ initeꞌ mamuꞌ nene laza aꞌmidoꞌ do molosa lo gele ha gele ogo gelelone.
ROM 4:2 Abalahamuꞌ nene aza monovo laminekovoꞌ ogo molo minidotiꞌ Oꞌmosoꞌmo ve lisiheꞌ ve lo-didiniko aza nene eiꞌ okoꞌno do dizelidoꞌ lisiheꞌ o minidineꞌza Oꞌmosoꞌmi veleloꞌ nene aza neꞌmino ma minamidine.
ROM 4:3 Aꞌminemuꞌ nene monoꞌ godolouꞌ nene nadive li gizi nizaniꞌ neve. Mene gililo: Abalahamuꞌ aza Oꞌmosomuꞌ gele eleꞌvoleꞌ o minavo aza nene ve lisiheꞌ ve lo-dineꞌ ve.
ROM 4:4 Ve maliꞌmo ve maloꞌ gono davo aꞌmine ve meni emelineꞌ nene haza gidini noimuve lo gelosa emelivoba asi nenitoꞌ gono nodavo dinaꞌ neineꞌ nene golo nohizuve lo gele minosa meni nene emeleseive.
ROM 4:5 Idoꞌ aꞌmineꞌmine ogo laza ogo molo oloneꞌ neꞌmo Oꞌmosoloꞌ gono noduneꞌ gilivo mino monovo lamineꞌ gehepevelokovoꞌ eꞌmetunidiniko Oꞌmosoꞌmo aꞌmidoꞌ golo hizo meni neꞌmine lemo ve lisiheꞌ ve lo-lididineꞌza mo neꞌmino nomive. Nemuꞌ nene ve ma laza aꞌmine ogo molo oloneꞌ initetotiꞌ nene menite neꞌmine ve lisiheꞌ ve lo-ledelidoꞌ nomive lo gelosa idoꞌ Oꞌmoso aza nene lihimeꞌinesi vemukisi ve lisiheꞌ ve lo-ngedaaꞌ ive ve lo laza ogo molo oloneꞌ initetoꞌ nene gele medelamo ezemuꞌ haza gele eleꞌvoleꞌ oloneꞌ nene aza ezemuꞌ gele eleꞌvoleꞌ oloningumukovoꞌ nene ve lisiheꞌ ve lo-ledeleseive.
ROM 4:6 Idoꞌ neniꞌ luvoniꞌ neꞌmino Davidiꞌ aza Oꞌmosoꞌmo eveneꞌ igi mili minaniꞌ monovomuꞌ nene gele hulo ve lisiheꞌ ve lo-ngedelive nene ngolize izilizadoꞌ lisiheꞌ i nizave lo tiꞌ lo lineꞌ ve:
ROM 4:7 Ve ma louꞌ gamaziꞌve avutoꞌ angumuꞌ nene Oꞌmosoꞌmo gele hulo lihimeꞌine hulo-ngedelive nene ngolize izilizadoꞌ lisiheꞌ i nizave.
ROM 4:8 Ee, ve ma lihimeꞌine Oꞌmosoꞌmo do-ngede minamilive nene ngolize izilizadoꞌ lisiheꞌ i nizave.
ROM 4:9 Lingine gilavo aꞌmine neꞌmino lolize izelonidoꞌ lisiheꞌ ogaꞌ monovo mene Oꞌmosoꞌmi noso okodela mulunive Zuda velavoꞌ sotoꞌ ogaꞌ neineꞌ nehe idoꞌ Oꞌmosoꞌmi noso okoꞌnida milisaꞌmave Zuda ve minamavelasi sotoꞌ ogaꞌ neineꞌ neve. Nemuꞌ nene lo gele ha gele olonge. Gililo. Laza tiꞌ lo laaꞌ none: Abalahamuꞌ Oꞌmosomuꞌ gele eleꞌvoleꞌ ineꞌ neꞌmo Oꞌmoso ezemuꞌ ve lisiheꞌ ve lo-dineꞌ ve. Nemuꞌ nene aꞌmine luvoniꞌ monovo nene Oꞌmosoꞌmi noso okoꞌnida milisaꞌmavelasi sotoꞌ ogaꞌ neive lo ningo gele none. Nanitekumuꞌ ve.
ROM 4:10 Oꞌmosoꞌmo lihimeꞌvemuꞌ gele hulo Abalahamuꞌni ve lisiheꞌ ve lo-dineꞌ monovomuꞌ nene gohi gelosa gelelone. Abalahamuꞌ okoꞌnola Oꞌmosoꞌmi noso molosa neivo Oꞌmosoꞌmo ve lisiheꞌ ve lo-dineꞌ nehe olihe Oꞌmosoꞌmi noso okoꞌnola molamivosa lo-dineꞌ neve. Oꞌmosoꞌmo ve lisiheꞌ ve lo-dineꞌ nene okoꞌnola Oꞌmosoꞌmi noso neivosa nevoba asi olihe nomivosa ve lisiheꞌ ve lo-dineꞌ ve.
ROM 4:11 Neꞌmine ogo Abalahamuꞌ okoꞌnola Oꞌmosoꞌmi noso nomineꞌ mino Oꞌmosomuꞌ gele eleꞌvoleꞌ ogo minineꞌ nemuꞌ nene Oꞌmosoꞌmo ve lisiheꞌ ve lo-dineꞌ nene do sotoꞌ olosa aꞌmine noso nene eiꞌ okoꞌnoloꞌ nene molaniꞌ ve. Neꞌmine ineꞌ nenako Abalahamuꞌ aza Oꞌmosoꞌmi noso okoꞌnida nomineꞌ minisa Oꞌmosomuꞌ gili eleꞌvoleꞌ ilizadotiꞌ nene Oꞌmosoꞌmo ve lisiheꞌ ve lo-ngedeliveti meꞌnibo loloꞌ ineꞌ ve.
ROM 4:12 Neꞌmino engiꞌ meꞌnibo loloꞌ ogo minineꞌ nene laza Oꞌmosoꞌmi noso okodela mulunive linge maliti meteho nesi neive. Adoꞌ laza nene avoteho Abalahamuꞌ Oꞌmosoꞌmi noso okoꞌnola nomivo mino gele eleꞌvoleꞌ ogo minineꞌ monovoꞌveloꞌ eꞌmeto mino Oꞌmosoꞌmi nosovoꞌ nene okodela mulunivoba asi gele eleꞌvolekisi o noniveti meteho nesi nene neive.
ROM 4:13 Idoꞌ naza neꞌmine noluvoniꞌ nene memuꞌ luve: Oꞌmosoꞌmo Abalahamuꞌni misubo mukiꞌ nene eiꞌ aꞌvopilemokisi salani molo-lengedekuve lo lo huko-dineꞌ nene louꞌ gamazi gomukutiꞌ ma minidoꞌ eꞌmeto miningumuꞌ nevoba asi Oꞌmosomuꞌ gele eleꞌvoleꞌ ogo miningumuꞌ nene Oꞌmosoꞌmo ve lisiheꞌ ve lo-dineꞌ nenako nemuꞌ nene aꞌmine salani gamazi lo huko-dineꞌ ve.
ROM 4:14 Ee, louꞌ gamaziloꞌ eꞌmetelonidotiꞌ nene aꞌmine salani initeꞌ nene ma dunidiniko Oꞌmosomuꞌ gele eleꞌvoleꞌ ogaꞌ monovo nesi idoꞌ aꞌmine Oꞌmosoꞌmo Abalahamuꞌni lo huko-dineꞌ gamazi nesi nene vi haza niteꞌ loloꞌ asidine.
ROM 4:15 Naniteliꞌmo ve. Louꞌ gamaziloꞌ eꞌmetaaꞌ neꞌmo nene Oꞌmosoꞌmo izeboloꞌ molavo lihime lemeli akaloꞌ leleꞌmize molaaꞌ neive. Ne neiha louꞌ gamazi ma minamilidokovoꞌ nene louꞌ gamazi avutoꞌ oloneꞌ aka ma minamoloseive.
ROM 4:16 Nemuꞌ nene aꞌmine salani initeꞌ daloneꞌ nene mo Oꞌmosomuꞌ gele eleꞌvoleꞌ olonidotikovoꞌ nene haza gidini dosoꞌ o neive. Ee, aꞌmine lo huko-lidineꞌ initeꞌ nene Oꞌmosoꞌmo haza nasahiliꞌ o-lididiꞌmovoꞌ nene Abalahamuꞌ aꞌvopilemoꞌ zuho mukiꞌ adoꞌ Moseꞌ louꞌ gamaziꞌmi gesi minguꞌ nonivesi idoꞌ aꞌminguꞌ minami Abalahamuꞌ aza Oꞌmosomuꞌ gele eleꞌvoleꞌ idiꞌmine igi gili eleꞌvoleꞌ ilizavesi nene laza mukitoꞌ dalonidoꞌ lisiheꞌ o minelive losa lehize-lidineꞌ nenako gele eleꞌvoleꞌ olonidotikovoꞌ nene haza gidini dosoꞌ o neive. Abalahamuꞌ nene aꞌmine neꞌmino dalonive mukiliti meteho nene neive.
ROM 4:17 Neꞌmino meteho minineꞌ nene aꞌminemuꞌ Oꞌmosoꞌmo lineꞌ gamazi monoꞌ godolouꞌ tiꞌ li gizi nizaniꞌ ma neive: Naza nene eveneꞌ zuho ato atoꞌ mukiliti avoꞌnibo mineline lo geleꞌmize molokuve. Ee, Oꞌmosoꞌmi veleloꞌ nene aꞌmine lo huko lineꞌ gamazi nene mo eleꞌvoleꞌ o neive. Idoꞌ Oꞌmoso aza nene hilavemuꞌ gohi veꞌine gizilizave lo hilangutiꞌ nene gohi do ote-ngedaaꞌ ive mino idoꞌ olihe sotoꞌ amaniꞌ initeꞌ nene mo sotoꞌ aniꞌ gilivosa aꞌminemuꞌ nene ha lo sotoꞌ ogaꞌ ive nesi neive.
ROM 4:18 Idoꞌ Abalahamuꞌ nene Oꞌmosoꞌmo lo huko-dineꞌ initeꞌ sotoꞌ o-delineꞌ aka nene nomineꞌza aza nene aꞌmine initeꞌ sotoꞌ ilineꞌ aka nene mo ninge minineꞌ gelavo mino aza nene Oꞌmosoꞌmo gaꞌvopilemoꞌ nene neꞌmini mukiꞌ sotoꞌ ilisave lo lo-nimidoꞌ nene gihile izavo eveneꞌ zuho ato atoꞌ mukiliti avoꞌnibo ha loloꞌ olosuve lo gele eleꞌvoleꞌ ogo minineꞌ ve.
ROM 4:19 Idoꞌ neꞌmino gele eleꞌvoleꞌ ogo minineꞌ nene aza kilisimasiꞌve vanu hadeti (100) neꞌminesi mino okoꞌnoꞌve nene gilisupo molangumuꞌ nesi nene ha gele mino idoꞌ Salaꞌ aza nesi nene eleni molavo izipe gedelineꞌ gamene nene osuꞌ lavo minineꞌ neemukisi nene mo ha gele minineꞌza gele eleꞌvoleꞌ ogo minineꞌ nene matamineꞌ.
ROM 4:20 Aꞌmine neꞌmino Oꞌmosoꞌmo lo-dineꞌ nemuꞌ nene gele hepeꞌ lizo gala setaꞌ gelamineꞌza gele eleꞌvoleꞌ ineꞌ neꞌmo amuzo molo minavosa Oꞌmoso nene opoꞌni laaꞌ ineꞌ ve.
ROM 4:21 Idoꞌ aꞌmine gamazi lo huko-nidive Oꞌmoso neꞌmo aꞌmine gamazi nene do gihile izelidoꞌ mo lisiheꞌ o neineꞌ nenako ha do gihile izeleseive lo gele muꞌmusiꞌ gehepeve ogo minineꞌ ve.
ROM 4:22 Neꞌmine ogo minineꞌ nenako aꞌneemuꞌ nene Oꞌmosoꞌmo ve lisiheꞌ ve lo-dineꞌ ve.
ROM 4:23 Idoꞌ Oꞌmosoꞌmo neꞌmino ve lisiheꞌ ve lo-dineꞌ monoꞌ godolouꞌ gizi nizaniꞌ nene eikumukovoꞌ neive li gililizave lisa gizi nizaniꞌ nevoba
ROM 4:24 asi Guvetesi ve Izesuꞌ Kilisitoꞌ hilingutiꞌ do ote-dive Oꞌmosomuꞌ gele eleꞌvoleꞌ ogo minunivo Oꞌmosoꞌmo ve lisiheꞌ ve lo-ledelive lelikumukisi nene gizi nizaniꞌ ma neive.
ROM 4:25 Aꞌmine Guvetesi ve Izesuꞌni nene leliꞌ lihimetemuꞌ medelo helelive lo Oꞌmosoꞌmo eveneliti aꞌninguꞌ molavo helavosa leliꞌ nene ve lisiheꞌ ve lo-ledelineꞌ aka velo hilingutiꞌ nene gohi do ote-dineꞌ ve.
ROM 5:1 Nemuꞌ nene ezemuꞌ gele eleꞌvoleꞌ unidotiꞌ nene Oꞌmosoꞌmo ve lisiheꞌ ve lo-ledavo mino Oꞌmosoꞌmo lelikumuꞌ izeboloꞌ molaniꞌ nene matelineꞌ aka Guvetesi ve Izesuꞌ Kilisitoꞌ velavo neꞌmo nene Oꞌmososi lezesi vovoteuꞌ nene gamazisi nomivo lamineꞌ none.
ROM 5:2 Ee, idise mela Oꞌmosoꞌmo nasahiliꞌ noo-lidivo noneꞌ aka nene aꞌmine Guvetesi ve neꞌmo vele-ledavosa aꞌminguꞌ none. Idoꞌ aꞌminguꞌ mino Oꞌmosoꞌmi emeni dameni lamineꞌ nene mudise do leliꞌ olosune lo aꞌminemuꞌ nene gilingili ogo gizebo ogo lolize izo minaaꞌ noune.
ROM 5:3 Idoꞌ nemukovoꞌ lolize izesaꞌmune. Laza geni initeliꞌmi lulouꞌ mineloneꞌ neꞌmo nene Oꞌmosomuꞌ gele eleꞌvoleꞌ ogo mino geni gehe do dizo mineloneꞌ amuzote do naba o-ledaaꞌ neive lo gele mino geni initeꞌ lelita mininguꞌ nesi nene aꞌmine genimuꞌ nene ha lolize izo minaaꞌ noune.
ROM 5:4 Idoꞌ Oꞌmosomuꞌ gele eleꞌvoleꞌ ogo mino geni gehe do dizo mineloneꞌ neꞌmo nene Oꞌmosoꞌmo ninge lamineꞌ ilineꞌ lemeni dameni nene do sotoꞌ o-ledeleseive. Idoꞌ Oꞌmosoꞌmo ninge lamineꞌ ilineꞌ lemeni damenisi mineloneꞌ neꞌmo leliꞌ nene Oꞌmosoꞌmo do eita oloseive lo laza gele muꞌmusiꞌ olonidoꞌ nene do lisiheꞌ o-ledaaꞌ neive lo nesi nene gele none.
ROM 5:5 Idoꞌ aꞌmine gele muꞌmusiꞌ uneꞌ initeꞌ nene vo haza ogavo lovozo ngelo ma helamolosune. Nene nanitekumuꞌ ve. Oꞌmosoꞌmo eiꞌ Sikalahuꞌve lehize-lidineꞌ neꞌmo nene luteuꞌ gono do Oꞌmosoꞌmo vauve elo lulo limineꞌ neꞌmi monovo nene do sotoꞌ ogo lelebizaaꞌ neineꞌ nenako nemuꞌ nene aꞌmine gele muꞌmusiꞌ uneꞌ initeꞌ nene vo haza ogavo lovozo ngelo ma helamolosune.
ROM 5:6 Idoꞌ Oꞌmosoꞌmo lulo vauve elo limive luvoniꞌ nene neemuꞌ luve: Laza nene Oꞌmoso eꞌmetelonidoꞌ minamo lute gilizevosi ha nonivo Oꞌmosoꞌmo molaniꞌ gamene nene lisiheꞌ ogavo Kilisitoꞌ nene aꞌmine Oꞌmoso eꞌmetamunivemuꞌ nene medelo hilineꞌ ve.
ROM 5:7 Eveneꞌ lisiheꞌ gehepeve nene bililisa navo ma eveneꞌ hamoliꞌmosi ezeloꞌ medelo helelove lo ngelo ma lamoloseiha ma lilineꞌ nene laza amosoꞌ initeꞌ nene olosa lave lo ha gelelesune. Idoꞌ eveneꞌ lamineꞌ gehepevelokisi nene medeli eveneꞌ mukiꞌ nete ngeli ma hilamavo hamo hamolitevoꞌ nene helaakumuꞌ golise gilaniꞌ nene gili huli amuzo mili ma hililizahe lo gele nouve.
ROM 5:8 Ne neiha Oꞌmosoꞌmo lulo atoliꞌmine ogo leme neineꞌ nene neꞌmino do sotoꞌ ogo lelebizave: Laza nene ha lihimeloꞌ ve nonivo Kilisitoꞌ aza eveneꞌ amiliza initeꞌ gehepeve ogo lelitoꞌ medelo hilineꞌ ve.
ROM 5:9 Nemuꞌ nene tiꞌ lo gelelesune: Kilisitoꞌ aza lelitoꞌ medelo lihimetemuꞌ vaniseꞌve hulo helavo nemuꞌ nene Oꞌmosoꞌmo idise ve lisiheꞌ ve lo-ledavo noneꞌ nenako nemuꞌ Oꞌmosoꞌmo evenekumuꞌ izeboloꞌ molaniꞌ nene Kilisitoꞌ do matosa lihime lemelingutiꞌ do luꞌ izelingumuꞌ nene mo gele muꞌmusiꞌ olonidoꞌ o neive.
ROM 5:10 Idoꞌ neꞌmine noluvoniꞌ nene nemuꞌ noluve: Laza Oꞌmososi biluvaꞌ ogo noninguꞌ nene eiꞌ Oꞌmosoꞌmi gipele nene lelikumuꞌ helo Oꞌmososi do hamoꞌ o-lidineꞌ nene mo amosoꞌ initeꞌ daniꞌ nenako nemuꞌ nene laza Oꞌmososi do hamoꞌ o-ledavo noninguꞌ nene aza hilingutiꞌ gohi minevoꞌ alevoꞌ o neineꞌ neꞌmo nene haza ilidoꞌ o neineꞌ initeꞌ ogo mudise do luꞌ izeleseive lo gele muꞌmusiꞌ gehepeve olosune.
ROM 5:11 Idoꞌ neevoꞌ nevoba asi Guvetesi ve Izesuꞌ Kilisitoꞌ neꞌmino idise Oꞌmososi do hamoꞌ o-ledavo noneꞌ neꞌmo nene Oꞌmosomuꞌ lolize izo minaaꞌ noune.
ROM 5:12 Nemuꞌ nene laza tiꞌ lo gele none: Me misubouꞌ lihime sotoꞌ ineꞌ nene ve hamoliꞌmo do sotoꞌ ogavo aꞌmine lihime neꞌmo nene helaaꞌ monovo do sotoꞌ ineꞌ ve. Neꞌmine ogavo eveneꞌ mukiꞌ nene lihime daaꞌ nouneꞌ nenako helaaꞌ nene leliꞌ mukita sotoꞌ o limineꞌ ve.
ROM 5:13 Ee, Moseꞌ louꞌ gamazi olihe sotoꞌ amivosa me misubouꞌ nene eveneꞌ lihime daaꞌ aniꞌza louꞌ nomida nene Oꞌmosoꞌmo lihime do molo-ngedamaaꞌ neineꞌ ve.
ROM 5:14 Ne neiha louꞌ nomineꞌ gameneuꞌ nene adoꞌ Adamuꞌ minidotiꞌ mine do dizo vo Moseꞌ louꞌ gamazi daniꞌ gamenela nene eveneꞌ sotoꞌ igi miniꞌmi ave mukiꞌ ingine Adamuꞌni Oꞌmosoꞌmo lo huko-dineꞌ gamazi avutoꞌ idiꞌmine igi lihime ma damaniꞌza inginesi nene helaaliꞌmi gesi mingukovoꞌ mini hilaakovoꞌ aniꞌ ma neive. Idoꞌ Adamuꞌ neve nene alingeꞌ sotoꞌ ilivemuꞌ ha avazahaꞌve neꞌminosa nene sotoꞌ ineꞌ ve.
ROM 5:15 Ne neiha aꞌmine eveneꞌ hamoliꞌmo apiꞌ ogo Oꞌmosoꞌmo lo huko-dineꞌ gamazi avutoꞌ ogo lihime dadotiꞌ nene eveneꞌ mukiꞌ helaaꞌ nouneꞌza aꞌmine Adamuꞌ lihime daniꞌ nene ivileꞌ goloso ivosa Oꞌmosoꞌmo nasahiliꞌ o-lidineꞌ nene eveneꞌ hamoꞌ Izesuꞌ Kilisitoꞌ neꞌmo haza gidini vauve elo aꞌmine nasahiliꞌ nene eveneꞌ mukitoꞌ do sotoꞌ o-lidineꞌ nenako nemuꞌ nene Adamuꞌni Oꞌmosoꞌmo lo huko-dineꞌ gamazi avutoꞌ ineꞌ neꞌmi gihile nene atoliꞌmine ogo neivo idoꞌ Oꞌmosoꞌmo nasahiliꞌ o-lidineꞌ neꞌmi gihile nene atoliꞌmine ogo neivo ato atoliꞌmine igi nizasive.
ROM 5:16 Ee, aꞌmine eveneꞌ hamoliꞌmo lihime daniꞌ neꞌmi gihile nene atoliꞌmine ogo neivo Oꞌmosoꞌmo haza gidini o-lidineꞌ initeliꞌmi gihile nene atoliꞌmine ogo neive noluvoniꞌ nene nemuꞌ noluve: Aꞌmine lihime hamoꞌ daniꞌ neꞌmo nene Oꞌmosoꞌmo goniꞌ o-ledo lihime lemaaꞌ neineꞌ nene do sotoꞌ ineꞌza laza gamaziꞌve avutoꞌ vaiꞌ ogaꞌ nouneꞌ neivosa Oꞌmosoꞌmo nene haza gidini o-lidineꞌ initeꞌ neꞌmo nene aza gamazite do helo ve lisiheꞌ ve lo-ledaaꞌ neineꞌ nene do sotoꞌ ineꞌ ve.
ROM 5:17 Lamineꞌ, eveneꞌ hamoliꞌmo Oꞌmosoꞌmo lo huko-dineꞌ gamazi ganaꞌ avutoꞌ idotiꞌ nene eveneꞌ laza helaaliꞌmi gesi mingukovoꞌ mino helaaꞌ nouneꞌ nenako idoꞌ ve hamoꞌ Izesuꞌ Kilisitoꞌ o-lidineꞌ initeꞌ neꞌmo helaaꞌ nene ivileꞌ goloso ogavosa Oꞌmosoꞌmo vauve elo nasahiliꞌ o-ledelidotiꞌ ve lisiheꞌ ve lo-ledelive laza nene guvetesi ve neꞌmine loloꞌ ogo minevoꞌ minevoꞌ ogovoꞌ minelesune.
ROM 5:18 Nemuꞌ nene tiꞌ lo gelelesune: Ve hamoliꞌmo Oꞌmosoꞌmi gamazi avutoꞌ idotiꞌ nene eveneꞌ mukiꞌ nene Oꞌmosoꞌmo goniꞌ o-ledo lihime lemelidoꞌ o noneꞌ neꞌmino ve hamoliꞌmo monovo lisiheꞌ gehepeve ogo molo idotiꞌ nene Oꞌmosoꞌmo gamazite do helo ve lisiheꞌ ve lo-ledavo eveneꞌ mukiꞌ minevoꞌ minevoꞌ ogo minelonidoꞌ o noneꞌ ma neive.
ROM 5:19 Ee, eveneꞌ hamoliꞌmo Oꞌmosoꞌmi gamazi gele hulidotiꞌ nene eveneꞌ mukiꞌ lihimeloꞌ vevoꞌ loloꞌ uneꞌ neꞌmino ve hamoliꞌmo Oꞌmosoꞌmi gamazi gele do osuꞌ lidotiꞌ eveneꞌ mukiꞌ nene ve lisiheꞌ loloꞌ olosune.
ROM 5:20 Neꞌmine o neiha Oꞌmosoꞌmo louꞌ gamaziꞌve do sotoꞌ ineꞌ nene louꞌ avutoꞌ ogaꞌ monovo nene naba oꞌmo vo minelive losa do sotoꞌ ineꞌza lihime daaꞌ monovo naba oꞌmo vo minida nene aꞌmine naba oꞌmo vineꞌ votigile nene ivileꞌ goloso ivosa Oꞌmosoꞌmi nasahiliꞌ nene atoliꞌmine ogo sotoꞌ ogo minineꞌ ve.
ROM 5:21 Idoꞌ neꞌmine ineꞌ nene nanitekumuꞌ ve. Lihime daaꞌ monovo neꞌmo helaaliꞌmi gesi minguꞌ hulo-ledavo aꞌminguꞌ mino helaaꞌ nouneꞌ neꞌmino Guvetesi ve Izesuꞌ Kilisitoꞌ gono daniꞌ neꞌmo nene eveneꞌ lisiheꞌ loloꞌ o-ledo Oꞌmosoꞌmi nasahililiꞌmi gesi minguꞌ hulo-ledavo aꞌminguꞌ mini minivoꞌ minivoꞌ ilizave losa neꞌmine ineꞌ ve.
ROM 6:1 Idoꞌ lihime daaꞌ monovo naba oꞌmo vo minida nene aꞌmine naba oꞌmo vineꞌ votigile nene ivileꞌ goloso ivosa Oꞌmosoꞌmi nasahiliꞌ nene atoliꞌmine ogo sotoꞌ ogo minineꞌ nenako nemuꞌ nene laza nadive lolone. Oꞌmosoꞌmo nasahiliꞌ gohi vauve elo o-ledelineꞌ aka nene do sotoꞌ oloseize. Lihime nene daakovoꞌ ogo minukeꞌzo lolobe.
ROM 6:2 Mo kekeꞌ neꞌmine ma lamolosune. Laza nene hilunive gelo mino hilave nete initeꞌ hamokumukisi upuhoꞌ isaꞌmaniꞌ neꞌmino upuhoꞌ ogo lihime gohi damolonidoꞌ mine molo nonive nete nene lihime daaꞌ monovo nene gohi do oto ogo molo minelonidoꞌ nene mo kekeꞌ nomive.
ROM 6:3 Idoꞌ Kilisitoda giꞌmizo minelone lo noso hulunive laza mukiꞌ neꞌmino noso huluninguꞌ nene ezesi makaꞌ lohotoꞌ zaloꞌ hiluneꞌ gilivo noneꞌ nenako nemuꞌ nene lingine gilamahe.
ROM 6:4 Neꞌmino neineꞌ nenako nemuꞌ nene laza noso huluninguꞌ nene ezesi makaꞌ helosa ezesi makaꞌ gonoso galesela vo minuneꞌ gele neive. Idoꞌ noso huluninguꞌ neꞌmine ineꞌ nene Kilisitoꞌni nene meleho Oꞌmosoꞌmo amuzoꞌve atoliꞌmine ogo minineꞌ nene do sotoꞌ ogo hilingutiꞌ do ote-davo neineꞌ neꞌmino lazasi nene aꞌmineꞌmine ogo ezesi makaꞌ otosa minevoꞌ alevote nene gosohoꞌ loloꞌ ogavo igi mili minilizave losa neꞌmine ineꞌ ve.
ROM 6:5 Ee, ezela giꞌmizo mino eiꞌ hilidiꞌmine ogo lazasi makaꞌ hiluneꞌ gilineꞌ nenako nemuꞌ nene aza hilingutiꞌ otidiꞌmine ogo lazasi nene ha ote noneꞌ gilivosa minelesune.
ROM 6:6 Laza tiꞌ lo gele none: Lihime monovo goloso neꞌmo okodela gono daaꞌ ineꞌ nene osuꞌ lavo laza lihime monovoloꞌ gohi gelekeleꞌ ogo minamoloningumuꞌ nene lemeni dameni litehe nene Kilisitoꞌnisi lohotoꞌ zaloꞌ bili nizaniꞌ ma neive.
ROM 6:7 Idoꞌ neꞌmine noluvoniꞌ nene nemuꞌ noluve: Veꞌinesi mini lihime monovoloꞌ gelekeleꞌ igi mini hilanguꞌ nene aꞌmine monovosi huko vavosa hilave nene lihime monovoꞌmi gelekeleꞌ ve gohi ma minami haza minaaꞌ nave.
ROM 6:8 Laza nene Kilisitolesi makaꞌ hiluneꞌ ma nenako laza nene ezesi makaꞌ minevoꞌ alevoꞌ ogo minelesune lo mo gele muꞌmusiꞌ gehepeve o none.
ROM 6:9 Idoꞌ neꞌmine lo gele muꞌmusiꞌ o noneꞌ nene Kilisitoꞌ hilingutiꞌ otineꞌ nene aza helaaliꞌmi gesi mingutiꞌ nene mudise lemo heta oganiꞌ nenako gohi helamoloseive lo gele minosa nene laza gele muꞌmusiꞌ o none.
ROM 6:10 Idoꞌ hilineꞌ nene lihime monovoliꞌmi amuzo nene mudise do nohulosa hilineꞌ ve. Idoꞌ gohi minevoꞌ alevoꞌ neineꞌ nene Oꞌmosoꞌmine nene minevoꞌ alevoꞌ o do neive.
ROM 6:11 Idoꞌ lingine lengikumuꞌ nesi nene tiꞌ li gili minilo: Laza nene mo hiluneꞌ gilivo mino lihime nene gohi ma damolone. Idoꞌ minevoꞌ alevoꞌ ogo mineloneꞌ nene mo Izesuꞌ Kilisitoda giꞌmizo mino Oꞌmosoꞌmine nene minevoꞌ alevoꞌ o do minelesune.
ROM 6:12 Nemuꞌ nene okodine helelineꞌ akaloꞌ mine molo neineꞌ neꞌmo nene laniteꞌ gelo dalosa gilineꞌ goloso niteꞌ nene mo di minilizave lo lihime monovo neꞌmo nene do eita ogo do gelekeleꞌ o-lengedalize.
ROM 6:13 Lingine okodidotiꞌ gizedine adine neꞌmine nehe nanitetine nolihe initeꞌ hamokisi nene goloso niteꞌ dalive li lihime monovoliꞌmi gono daaꞌ initeꞌ neꞌmine nene loloꞌ i-damilo. Asi hiluningutiꞌ nene otosa gosohoꞌ lemeni dameniloꞌ minevoꞌ alevoꞌ ogo noneꞌ nenako nemuꞌ nene laza okodelatiꞌ gizede ade nevoꞌmine nehe idoꞌ nanitete nolihe neve nene Oꞌmosoꞌmine emekunivo eiꞌ gono daaꞌ ineꞌ initeꞌve neꞌmine loloꞌ ogavo monovo lisiheꞌ laminekovoꞌ ilive lii okodine mukiꞌ nene Oꞌmoso imilo.
ROM 6:14 Ee, lingine nene Moseꞌ louꞌ gamaziꞌmi gesi minguꞌ nene minami Oꞌmosoꞌmi nasahililiꞌmi gesi minguꞌ imi nizaniꞌ nenako nemuꞌ lengiꞌ nene lihime monovoliꞌmo eita do gelekeleꞌ o-lengedelidoꞌ minamave.
ROM 6:15 Neꞌmino neineꞌ nenako nadolone. Laza nene louꞌ gamaziꞌmi gesi minguꞌ minamo Oꞌmosoꞌmi nasahililiꞌmi gesi minguꞌ noneꞌ nenako louꞌ gamazi nene avutoꞌ ogo ha gopo lihime daakovoꞌ olobe. Oꞌove. Mo kekeꞌ neꞌmine amolosune.
ROM 6:16 Lingine ve maliꞌmi gelekeleꞌ ve loloꞌ ogo eiꞌ gamaziꞌve gele dalone li vi giꞌmizi eitoꞌ gelekeleꞌ i-diꞌmi vi minilizaniꞌ neꞌmo nene mo eiꞌ gelekeleꞌ ve gehepeve nene nizave. Idoꞌ lihime monovoloꞌ gelekeleꞌ igi minilizaniꞌ neꞌmi gihile nene helaaꞌ nene do sotoꞌ o-lengedeleseive. Idoꞌ Oꞌmosoloꞌ gelekeleꞌ igi minilizaniꞌ neꞌmi gihile nene Oꞌmosoꞌmo eveneꞌ lisiheꞌ ve lo-lengedeleseive. Neꞌmino neingumuꞌ nene lingine gilamaniꞌ nehe. Mo gili nilisave.
ROM 6:17 Ne neiha lingine gomuꞌ nene lihime monovoliꞌmi gelekeleꞌ ve minaniꞌza Kilisitoꞌ gonouꞌ velite apizi lingimi di gelekeleꞌ i-lingidaniꞌ gamaziꞌmi monovoloꞌ lutine milisa eꞌmetaniꞌ nenako nemuꞌ nene Oꞌmosomuꞌ tangezoꞌ ve lolone.
ROM 6:18 Ee, lingine nene lihime monovoloꞌ gelekeleꞌ igi minangutiꞌ nene Oꞌmosoꞌmo do kuluhize-lengedavo monovo lisiheꞌ lamineliꞌmi gelekeleꞌ ve liliꞌ ikeve.
ROM 6:19 Neꞌmine noluvoniꞌ nene lingine nene haza eveneꞌ leliꞌ neꞌmine mini naza gamazi gihileloꞌ eꞌmeto ma loloniꞌ nene lingine aꞌmineꞌmi monovo gililizadoꞌ lisiheꞌ amaniꞌ nenako nemuꞌ nene neꞌmine amo ha eveneliti gamaziloꞌ do molo neꞌmine noluve. Idoꞌ lingine gomuꞌ nene okodidoꞌ gizedine adine neꞌmine initetine mukiꞌ nene louꞌ avutoꞌ igi lutine do goloso ogaꞌ monovoloꞌ di gelekeleꞌ i-ngidisa louꞌ avutoꞌ igaꞌ ave gehepeve liliꞌ aniꞌ maꞌmine igi Oꞌmosoꞌmi evenele gehepeve minelonidoꞌ do lisiheꞌ okaꞌ okaꞌ okunivo lute lisiheꞌ lamineꞌ gehepeve ilive li monovo lisihetoꞌ nene aꞌmine okodine nene di gelekeleꞌ i-dilizave.
ROM 6:20 Neꞌmine ilizave luvoniꞌ nene nanitekumuꞌ ve. Lingine gomuꞌ nene lihime monovoliꞌmi gelekeleꞌ ve mini monovo lisihetoꞌ nene gelekeleꞌ isaꞌmaniꞌza
ROM 6:21 neꞌmine adotiꞌ nene gihileꞌve naniteꞌ sotoꞌ ogaꞌ ineꞌ neve. Aꞌmine lingine neꞌmine igaꞌ adotiꞌ idise longovozo hilaaꞌ naniꞌ initeꞌ neꞌmo nene mo helaaꞌ nene do sotoꞌ neive.
ROM 6:22 Neꞌmine ogaꞌ neineꞌza idise lingine lihime monovoloꞌ gelekeleꞌ ogaꞌ aka nene mudise huli Oꞌmosoloꞌ gelekeleꞌ igi minadotiꞌ nene gihileꞌve nene lutine lisiheꞌ oꞌmo vo osuꞌ lavosa neꞌmo nene mo minevoꞌ minevoꞌ minaaꞌ lengemeni dameni dalisave.
ROM 6:23 Ee, lihime monovoliꞌmo nene meniꞌve meni hizaaꞌ neineꞌ nene mudise helaaꞌ monovo ne neiha Guvetesi ve Izesuꞌ Kilisitoda vo giꞌmizekunivo Oꞌmosoꞌmo haza gidini lehize-ledaaꞌ neineꞌ initeꞌ nene minevoꞌ minevoꞌ minaaꞌ lemeni dameni ne neive.
ROM 7:1 Neze zuhokizo, lingine louliꞌmi monovo gili minavemuꞌ nene noluvoniꞌ nenako nemuꞌ nene eveneꞌ laza loutoꞌ gelekeleꞌ oloneꞌ nene vetesi noneꞌ gameneukovoꞌ nene gelekeleꞌ olosune lisa gili nilisave.
ROM 7:2 Nemuꞌ nene naza gamazi ma tiꞌ lo lo molo noluve: Veneꞌ di minaniꞌ veneꞌ neve nene ve maloꞌ vamoloseive lo minineꞌ louꞌ gamazi neꞌmo nene vanaho velesi ha minelineꞌ gamenelokovoꞌ nene analoꞌ do minaaꞌ neineꞌza vanaho ma helelineꞌ nene vanahidokovoꞌ minelive lo minineꞌ louꞌ neꞌmo nene kuluhize-davo haza mineleseive.
ROM 7:3 Idoꞌ nemuꞌ nene vanaho velesi ha neivo ve gohi maloꞌ vilineꞌ nene veneꞌ vemohoꞌ bizivoꞌ minaakumuꞌ minineꞌ louꞌ ma nene avutoꞌ ogaꞌ ineꞌ veneꞌ ve li-dilisave. Neꞌmine li-dilisaha vanaho helavosa ve gohi maloꞌ vamilive lo minineꞌ louꞌ maꞌmo nene kuluhize-dineꞌ nenako nemuꞌ nene ve gohi maloꞌ vilineꞌ nene aꞌmine louꞌ ma avutoꞌ amoloseive.
ROM 7:4 Nemuꞌ nene neze zuhokizo, aꞌmineꞌmine igi linginesi nene Kilisitolesi hamoꞌ liliꞌ igi mini makaꞌ hilikevo gomuꞌ vadibo neꞌmine minive adoꞌ louꞌ gamazi neꞌmo nene gohi adidoꞌ do minamivo minikeve. Idoꞌ neꞌmine aniꞌ nene ve gohi maloꞌ vi giꞌmizilizangumuꞌ nene neꞌmine aniꞌ ve. Ee, Oꞌmosola gihile di sotoꞌ ilizangumuꞌ hilingutiꞌ otive Izesuꞌni eita nene vi giꞌmizilizangumuꞌ nene neꞌmine aniꞌ ve.
ROM 7:5 Laza lemeni dameni liteheloꞌ eꞌmeto minuneꞌ gamenela nene laza lihime monovomuꞌ laniteꞌ gelaaꞌ uneꞌ monovo nene louꞌ neꞌmo do ote-davo okode mukita gono davo aꞌmidoꞌ eꞌmetunidotiꞌ gihileꞌve nene helaaꞌ akaloꞌ mine molo minuneꞌ ve.
ROM 7:6 Neꞌmine uneꞌza Kilisitolesi makaꞌ hiluneꞌ neꞌmo nene louliꞌmo adeloꞌ do minineꞌ nene idise kuluhize-ledavo laza aꞌmine litehe molo vineꞌ louꞌ gamazi gizaniꞌ maloꞌ nene gelekeleꞌ amo Oꞌmosoꞌmi Sikalahuliꞌmo lemeni dameni gosohoꞌ do sotoꞌ o-lididoꞌ nene gelekeleꞌ ogo gono daaꞌ noune.
ROM 7:7 Nemuꞌ nene laza nadive lolone. Louꞌ gamazi nene initeꞌ goloso lihime neꞌmine neive lolobe. Mo kekeꞌ neꞌmine neive lamolosuneꞌza louꞌ nene ma minamidiniko naza lihime monovo nene mo ningamuvodine. Ee, louꞌ neꞌmo mumuzoꞌ amozo lamidiniko naza mumuzoꞌ ogaꞌ monovo nene ma ningo gelamuvodine.
ROM 7:8 Aꞌmine louꞌ gamazi neꞌmo nene aka velo do upuhoꞌ o-davo lihime monovo neꞌmo nene mumuzoꞌ ogaꞌ monovo mukiꞌ nene vauve elo luꞌneuꞌ do sotoꞌ o-nidineꞌ ve. Ee, louꞌ nene ma minamidiniko lihime monovo neꞌmo nene ogo molo monaaꞌ initekisi ma amo hilive neꞌmino haza minidinako nemuꞌ nene noluve.
ROM 7:9 Gomuꞌ louꞌ neꞌmo nenita olihe amivosa naza nene ha gopo minevoꞌ alevoꞌ ogo veꞌnesi minuvoniꞌza Oꞌmosoꞌmi louꞌ gamazi ogo hetelidotiꞌ nene lihime monovo neꞌmo nene hilineꞌ gelavo luꞌneuꞌ miningutiꞌ nene gilelo otavosa
ROM 7:10 naza ma nene mo hiluvoniꞌ gelo minekuve. Neꞌmine ogo mino naza giluvoniꞌ nene Oꞌmosoꞌmi louꞌ gamazi neꞌmo minevoꞌ minevoꞌ oloniꞌ akaloꞌ nene neleꞌmize molalosa minineꞌza asi helaaꞌ akaloꞌ neleꞌmize molaave lo giluvoniꞌ ve.
ROM 7:11 Idoꞌ neꞌmine noluvoniꞌ nene nemuꞌ noluve: Aꞌmine louꞌ gamazi neꞌmo nene aka velo lihime nene do upuhoꞌ o-davo lihime monovo neꞌmo nene goꞌne izavo louꞌ nene avutoꞌ okuvosa neꞌmo nene nebele helave.
ROM 7:12 Nemuꞌ nene Oꞌmosoꞌmi louꞌ gamazi nene mo lihimeꞌvesi nomineꞌ lamineꞌ gehepeve neivo idoꞌ gamazi hamoꞌ hamoꞌ aꞌminguꞌ nizaniꞌ nesi nene lihimeꞌvesi nomineꞌ mino mo lisiheꞌ laminekovoꞌ ne neive.
ROM 7:13 Nemuꞌ nene naza hiluvoniꞌ ma nene aꞌmine initeꞌ lamineꞌ gehepeve neꞌmo nene nebelavosa hiluvoniꞌ nehe. Oꞌove. Neꞌmo nomive. Lihime monovo neve nene initeꞌ goloso minineꞌ nene mo sotoꞌ ogo minelingumuꞌ nene aꞌmine lihime monovo neꞌmo gono do aꞌmine initeꞌ lamineꞌ louꞌ gamazi nedunuꞌ nene nemenguꞌ molavo neꞌmo nene lihime dosa hiluvoniꞌ gelavo nouve. Idoꞌ neꞌmino neineꞌ nene louꞌ neꞌmo nene lelebizavo lihime monovo atoliꞌmine ogo initeꞌ goloso gehepeve minineꞌ nene ningeloningumuꞌ nene neꞌmino neive.
ROM 7:14 Ee, laza tiꞌ lo gele none: Oꞌmosoꞌmi louꞌ gamazi neuꞌ nene Oꞌmosoꞌmi Sikalahuliꞌmi emeni damenisi neive. Ne neiha neniꞌ nene haza eveneliti lemeni damenisi mino lihime monovoꞌmi gelekeleꞌ ve neꞌmine ne nouve.
ROM 7:15 Idoꞌ neꞌmine noluvoniꞌ nene nemuꞌ noluve: Naza nene olosa gelamuvoniꞌ initeꞌ monovo goloso nene ogo molo ogo mino naza goseleꞌ gehepeve nebelaaꞌ neineꞌ initeꞌ nene ha ogaꞌ nouve. Neꞌmine ogaꞌ nouvoniꞌ nene nanimuꞌ nouhe nemuꞌ nene mo gelesi amuve.
ROM 7:16 Idoꞌ naza nene louꞌ avutoꞌ ogo olosa gelamuvoniꞌ initeꞌ goloso ma oloniꞌ nene ha oloha olosa gelamuvoniꞌ neꞌmo nene aꞌmine nene amaaꞌ initeꞌ ve lo giluvoniꞌ nene do sotoꞌ oloseive. Idoꞌ louꞌ neꞌmosi nene aꞌmine initeꞌ amaaꞌ initeꞌ ve lo neineꞌ nenako naza giluvoniꞌ nesi nene louꞌ neꞌmo lidoꞌ vo miliseꞌ ogavo neꞌmo naza louꞌ nene mo lamineꞌ neive lo giluvoniꞌ nene do sotoꞌ oloseive.
ROM 7:17 Neꞌmino neineꞌ nenako naza initeꞌ goloso oloniꞌ nene neniꞌ gehepeve olovoba asi neniꞌ luꞌneuꞌ minineꞌ lihime monovo neꞌmo nene oloseive.
ROM 7:18 Naza laminetoꞌ noluve. Nenikuꞌ nene adoꞌ nemeni dameni litehesi nouvonguꞌ neve nene monovo lamineꞌ ma minamive lo gele nouve. Nanitekumuꞌ ve. Naza nene monovo laminetoꞌ eꞌmetelesa ha gelelesuha eꞌmetaaꞌ nene mo ngelo ma amolosuve.
ROM 7:19 Neꞌmine noluvoniꞌ nene nemuꞌ noluve: Initeꞌ lamineꞌ olosa gelaaꞌ nouvoniꞌ ma nene mo osaꞌmuve. Asi monovo goloso olosa ma gelesaꞌmuvoniꞌ ma nene ha oꞌmo vo minaaꞌ nouve.
ROM 7:20 Idoꞌ naza nene olosa gelamuvoniꞌ initeꞌ ma oloniꞌ nene neniꞌ gehepeve olovoba asi neniꞌ luꞌneuꞌ minineꞌ lihime monovo neꞌmo nene oloseive.
ROM 7:21 Nemuꞌ nene monovo nenita neꞌmino ma neineꞌ nene mo ningekuve: Naza nene monovo laminekovoꞌ ogo molo minelove lo nogiluvo aꞌmidoꞌ nene goloso monovo neve nene nenita mo omo minaaꞌ neive.
ROM 7:22 Ee, neniꞌ luꞌneuꞌ gehepeve vomine Oꞌmosoꞌmi louꞌ gamazimuꞌ nene laniteꞌ gelaaꞌ nouha
ROM 7:23 okoꞌne mukita nene atoꞌ monovosi minaaꞌ neivosa nene mo ningekuve. Aꞌmine monovo neꞌmo nene luꞌne gaꞌneuꞌ minineꞌ monovo lamineꞌ nene lovo o emo mino aꞌneloꞌ nesi nene do mino aꞌmine okoꞌnela minineꞌ lihime monovoloꞌ nene do gelekeleꞌ o-nedaaꞌ neive.
ROM 7:24 Agae, minevoꞌ alevoꞌne lihiteheꞌ o vive naza helaaliꞌmi akaloꞌ mine molaniꞌ okoꞌnesi mene nouvongutiꞌ nene zaho do nuꞌ izelive.
ROM 7:25 Guvetesi ve Izesuꞌ Kilisitoꞌ asiꞌve nene mo do nuꞌ izaaꞌ neive. Nemuꞌ nene Oꞌmosomuꞌ tangezoꞌ ve lo nolo-duve. Idoꞌ gamazi mukiꞌ mene luvongumuꞌ nene gelo tiꞌ lo lolosuve: Neniꞌ nene gaꞌnedunuꞌ Oꞌmosoꞌmi louꞌ gamaziloꞌ nene gelekeleꞌ ogaꞌ nouvoniꞌza nemeni dameni litehe neꞌmo nene lihime monovoloꞌ do gelekeleꞌ o-nedaaꞌ neive.
ROM 8:1 Nemuꞌ nene Izesuꞌ Kilisitoda giꞌmize minuniveti okodela nene lihime gohi ma nomivo Oꞌmosoꞌmo lihime lemelidoꞌ minamune.
ROM 8:2 Nene nanitekumuꞌ ve. Naza Izesuꞌ Kilisitoda giꞌmizosa minevoꞌ minevoꞌ minaaꞌ do sotoꞌ o-ledaaꞌ ive Oꞌmosoꞌmi Sikalahuliꞌmi anauꞌ ogo nouvoniꞌ neꞌmo nene helaatoꞌ leleꞌmize molaaꞌ neineꞌ monovo lihime daaliꞌmi anauꞌ minuvongutiꞌ nene mo kuluhize-nedave.
ROM 8:3 Ee, eveneꞌ leliꞌ lemeni dameni nene amuzo molamineꞌ nenako neꞌmo nene louꞌ gamaziloꞌ ngelo eꞌmetamoloneꞌ ogavo louꞌ gamazi neꞌmo lihimeꞌmi anauꞌ minuningutiꞌ nene ngelo ma kuluhize-ledamineꞌ ve. Ne neiha louꞌ gamazi neꞌmo ngelo mo loloꞌ amineꞌ initeꞌ nene Oꞌmosoꞌmo nene mo ha ineꞌ ve. Aꞌmine initeꞌ ineꞌ nene eiꞌ gipele nene leliꞌ lihime daaꞌ univeti okode neꞌminesi nene leliꞌ lihimete apase-ledelingumuꞌ ve lo imiselineꞌ ve. Neꞌmine ogavosa leliꞌ lihimete mukiꞌ nene aꞌmine okoꞌno hamotoꞌ nene dizavo Oꞌmosoꞌmo lihime imineꞌ ve.
ROM 8:4 Idoꞌ neꞌmine ineꞌ nene lemeni dameni liteheꞌmo lidoꞌ eꞌmetamosa asi Oꞌmosoꞌmi Sikalahuꞌ neꞌmo lidoꞌ eꞌmeto ogo molo ogaꞌ nounive nene louliꞌmo lidiꞌmine igi eveneꞌ lisiheꞌ lamineꞌ minilizangumuꞌ ve losa neꞌmine ineꞌ ve.
ROM 8:5 Ee, eveneꞌ ma ingine ngemeni dameni liteheloꞌ eꞌmetaaꞌ ave nene ngemeni dameni liteheliꞌmi initekumukovoꞌ gili minaaꞌ naniꞌza Sikalahuliꞌmo lidoꞌ eꞌmetaaꞌ nave ingine nene aꞌmine Sikalahuꞌ neꞌmo gilineꞌ initekumukovoꞌ nene gili minaaꞌ nave.
ROM 8:6 Lemeni dameni liteheꞌmo gilidoꞌ eꞌmetaaꞌ neꞌmo nene helo vo tolovo olonidoꞌ leleꞌmize molaaꞌ neineꞌza Sikalahuliꞌmo gilidoꞌ eꞌmetaaꞌ neꞌmo nene minevoꞌ minevoꞌ ogo mino hongu lovoꞌ minelonidoꞌ leleꞌmize molaaꞌ neive.
ROM 8:7 Aꞌmine lemeni dameni liteheliꞌmo gilidoꞌ eꞌmetaaꞌ neꞌmo nene Oꞌmosoꞌmi louꞌ gamaziꞌmo lidoꞌ nene gele damo mino gele dalineꞌ amuzoꞌvesi nomivo mo kekeꞌ ngelo gele damoloseinako neꞌmo nene Oꞌmoso biluvaꞌ o-daaꞌ do sotoꞌ ogaꞌ neive.
ROM 8:8 Ee, ngemeni dameni liteheliꞌmi gelekeleꞌ ve minave nete nene Oꞌmosoꞌmo ninge lamineꞌ dalineꞌ initeꞌ hamokisi nene mo kekeꞌ ngeli ma amilisave.
ROM 8:9 Ne neiha lengiꞌ lutinguꞌ Oꞌmosoꞌmi Sikalahuꞌ nene ma minevoꞌ dovoꞌ ogo nolineꞌ nene lingine lengemeni dameni liteheꞌmi gelekeleꞌ ve minami asi Sikalahuꞌ neꞌmi gelekeleꞌ ve nene nizave. Idoꞌ ve ma ingine Kilisitoꞌ Sikalahuꞌve di minamave nene Kilisitoꞌ zuho minisaꞌmave.
ROM 8:10 Ee, okodine nene lihime monovoliꞌmo mo helelidoꞌ o neineꞌza eveneꞌ lisiheꞌ liliꞌ igi minaniꞌ neꞌmo lutine nene vele gizo neive.
ROM 8:11 Izesuꞌ hilingutiꞌ do ote-diveꞌmi Sikalahuꞌ neꞌmo lutinguꞌ mo minevoꞌ dovoꞌ ogo nolineꞌ nene aꞌmine Sikalahuꞌ neꞌmo lengiꞌ lutinguꞌ minevoꞌ dovoꞌ ogo neingumuꞌ nene Kilisitoꞌ hilingutiꞌ do ote-dive aza helelidoꞌ o neineꞌ okodine nesi nene gohi ha do vele gizeleseive.
ROM 8:12 Nemuꞌ nene neze zuhokizo, aꞌmidoꞌ nene golo hizo initeꞌ ma olonidoꞌ o neineꞌza aꞌmine initeꞌ nene lemeni dameni litehe neve eitoꞌ golo hizelonidoꞌ nene nomive. Ee, aꞌmine lemeni dameni litehe neꞌmo gilidoꞌ nene eꞌmeto ogo molo olonidoꞌ nene nomive.
ROM 8:13 Nene nanitekumuꞌ ve. Lingine lengemeni dameni liteheꞌmo gilidoꞌ eꞌmeti minilizaniꞌ nene mo mudise helaatoꞌ mini mili nizave. Ne neiha lingine Oꞌmosoꞌmi Sikalahuliꞌmi amuzodunuꞌ nene okodineꞌmo monovo goloso ogo molo ogaꞌ ineꞌ nene ma bili hililizaniꞌ nene mudise minevoꞌ minevoꞌ ogatoꞌ mini mili nizave.
ROM 8:14 Ee, Oꞌmosoꞌmi Sikalahuliꞌmo lidoꞌ eꞌmetaaꞌ ave mukiꞌ nene Oꞌmosoꞌmi izipahala nizaniꞌ nenako nemuꞌ nene mudise miniviꞌ miniviꞌ ilisave.
ROM 8:15 Idoꞌ Oꞌmosoꞌmi izipahala nizave luvoniꞌ nene nemuꞌ luvoniꞌ ve: Lingine di tiꞌ aniꞌ Sikalahuꞌ neꞌmo nene golise gohi giliꞌmi vi minilizave lo do gelekeleꞌ ve loloꞌ o-lingidineꞌ nevoba asi Oꞌmosoꞌmi izipahala loloꞌ o-lingidineꞌ ma neive. Idoꞌ neꞌmine o-lidineꞌ neꞌmo laza Oꞌmosomuꞌ nene meteho ve lo Ahono lo vise laaꞌ noune.
ROM 8:16 Oꞌmosoꞌmi Sikalahuꞌ neꞌmo nene leliꞌ luteꞌmo lo-limineꞌ gamazi hize eleꞌ ogo lelikumuꞌ nene Oꞌmosoꞌmi izipahala nizave lo lo sotoꞌ ogo lo-lemaaꞌ neive.
ROM 8:17 Idoꞌ Oꞌmosoꞌmi izipahala noneꞌ nenako Oꞌmosoꞌmo salani molaniꞌ initeꞌ dalonive nene none. Ee, idoꞌ Kilisitoꞌni Oꞌmosoꞌmo do naba o-delinguꞌ lezesi makatoꞌ do naba o-ledelingumuꞌ nene Kilisitoꞌ mulumo alumo niteꞌ gihineꞌ neꞌmino lazasi makatoꞌ ma gehesoꞌ nene Kilisitoꞌ salani initeꞌve nene ezesi makatoꞌ dalosune.
ROM 8:18 Naza idise mela nene geni mulumo alumo niteꞌ gehaaꞌ nouneꞌ nemuꞌ nene amuzo molo tiꞌ lo gele nouve: Alingeꞌ sotoꞌ o-ledelineꞌ initeꞌ adoꞌ Oꞌmosoꞌmo do naba o-lidivo lamineꞌ mineloneꞌ monovo neꞌmo nene initeꞌ naba goloso neineꞌ nenako aꞌmine genimuꞌ nene mo gele hulolonidoꞌ lisiheꞌ o neive.
ROM 8:19 Ne nanitekumuꞌ ve. Oꞌmosoꞌmo do sotoꞌ molaniꞌ initeꞌ mukiꞌ nete nene Oꞌmosoꞌmo izipahala zuho Okulumoꞌ lemeni damenisi do sotoꞌ o-ledelingumuꞌ nene mo sotoꞌ iliho li gizebo lekeseve igi nizave.
ROM 8:20 Neꞌmini aꞌmine gamenemuꞌ gizebo igi nizaniꞌ nene aꞌmine gamene alidoꞌ nene Oꞌmosoꞌmo aꞌmine do sotoꞌ molaniꞌ initeꞌ nene gihile izamilizadoꞌ ngeleꞌmize molavo minadotiꞌ nene kuluhizilizaniꞌ nenako nemuꞌ nene gizebo igi nizave. Idoꞌ Oꞌmosoꞌmo gihile izamilizadoꞌ ngeleꞌmize molaniꞌ nene ingine neꞌmine o-ledelive li gilangumuꞌ nevoba asi eiꞌ luloloꞌ do molosa gihile izamilizadoꞌ ngeleꞌmize molaniꞌ ve. Ee, aza gihile izamilizadoꞌ ngeleꞌmize molaniꞌ nene aza tiꞌ lo gele muꞌmusiꞌ ogo minosa nene neꞌmine ineꞌ ve: Alingeꞌ vo tolovo ogaꞌ neꞌmi anauꞌ minilizangutiꞌ nene kuluhizi Oꞌmoso neniꞌ izipahaꞌne zuho nene initeꞌ maliꞌmi anaukisi minami atoliꞌmine igi haza gehepeve nizaniꞌ neꞌmini haza minilisave lo gele muꞌmusiꞌ ogo minineꞌ ve.
ROM 8:22 Ee, laza tiꞌ lo gele none: Oꞌmosoꞌmo do sotoꞌ molaniꞌ initeꞌ mukiꞌ nete nene veneꞌ izipe gidilisa mulumo gilaaꞌ naniꞌ neꞌmini ganakutiꞌ mulumo gili leꞌ goloso izi mini di dizi idise gamenelasi mene ha neꞌmine igi nizave.
ROM 8:23 Idoꞌ inginevoꞌ nene neꞌmine igi nizavoba asi Oꞌmosoꞌmo lehize-ledelineꞌ initekutiꞌ ganaꞌ daloneꞌ initeꞌ Oꞌmosoꞌmi Sikalahuꞌ mo do nonive lazasi nene Oꞌmosoꞌmo izipahaꞌne ve lo do eita ogo okode nene helo vaaꞌ akaloꞌ minidotiꞌ do kuluhize-delingumuꞌ gizebo ogo nonida mene luteuꞌ leꞌ izo minaaꞌ noune.
ROM 8:24 Ee, neꞌmino hele vaaꞌ okode nene do kuluhize-delive lo aꞌminemuꞌ gele muꞌmusiꞌ ogo nonivosa nene do luꞌ izineꞌ ve. Idoꞌ initeꞌ ma sotoꞌ oloseive lo gele muꞌmusiꞌ ogo gizebo minaaꞌ nouneꞌ initeꞌ ma sotoꞌ ilineꞌ nene laza gele muꞌmusiꞌ o mineloneꞌ ma nene gohi gele muꞌmusiꞌ ve lamolosune. Idoꞌ mo ningikeniꞌ initekumuꞌ nene gili muꞌmusiꞌ igi mini gizebo aꞌminemuꞌ nene ma isaꞌmave.
ROM 8:25 Ne neiha olihe ma ningamuneꞌ initekumuꞌ gele muꞌmusiꞌ ogo mineloneꞌ nene mo aꞌminemuꞌ gizebo o do dizo minelesune.
ROM 8:26 Idoꞌ gele muꞌmusiꞌ ogaꞌ nouneꞌ neꞌmo hize eleꞌ o-ledaaꞌ neineꞌ neꞌmino Oꞌmosoꞌmi Sikalahuꞌ neꞌmosi nene monokuꞌ gilizevo ogo minaaꞌ nouningutiꞌ nene hize eleꞌ o-ledaaꞌ neive. Idoꞌ hize eleꞌ o-ledaaꞌ neineꞌ nene laza Oꞌmosola loloneꞌ o neineꞌ monovo nene gele guno amuneꞌ nenako nemuꞌ nene asiꞌve nene lelitoꞌ medelo laza gamazi viseꞌ ogo leꞌ izo luteuꞌ gelaaꞌ nouneꞌ monovo nene hize eleꞌ o-ledo Oꞌmosola lo-ledaaꞌ neive.
ROM 8:27 Neꞌmine ogaꞌ neineꞌ nene Sikalahuꞌ neꞌmo gala gilineꞌ nene luteuꞌ minineꞌ initeꞌ viseꞌ ogo do sotoꞌ ogaꞌ ive Oꞌmoso neꞌmo nene mo ningo gelaaꞌ neive. Nene nanitekumuꞌ ve. Aꞌmine Sikalahuꞌ neꞌmo nene Oꞌmosoꞌmi luloloꞌ do molosa Oꞌmosoꞌmi eveneleloꞌ medelo lelikumuꞌ Oꞌmosola laaꞌ neineꞌ nemuꞌ ve.
ROM 8:28 Idoꞌ laza tiꞌ lo gele none: Lute Oꞌmoso eme nonive adoꞌ eiꞌ gala gilidoꞌ ogo eiꞌ ve lo leleꞌmize molavo nonivemuꞌ nene aza lelita sotoꞌ iliza initeꞌ mukiꞌ nene di laminekovoꞌ i-lidilizadoꞌ nene do molaaꞌ neive.
ROM 8:29 Idoꞌ neꞌmine ineꞌ nene aza ganakutiꞌ ninge lamineꞌ daniꞌ aleve nene eiꞌ gipeleꞌmi emeni dameni neꞌminesi liliꞌ igi minikevo aꞌmine gipele nene nakunolo vaiꞌ neti uvoꞌnibo naba minelive losa engiꞌ nene do kegeso ngeleꞌmize molaniꞌ ve.
ROM 8:30 Ee, aꞌmine do kegeso ngeleꞌmize molaniꞌ aleve nene elesesi molo-ngedo do eita ineꞌ ve. Idoꞌ aꞌmine elese molo-ngedo do eita ineꞌ aleve nene ve lisiheꞌ ve losasi nene lo-ngidineꞌ ve. Idoꞌ aꞌmine ve lisiheꞌ ve lo-ngidineꞌ aleve nene eitatiꞌ monovo lamineꞌ atoliꞌmine ogo minineꞌ nesi nene lehize-ngidineꞌ ve.
ROM 8:31 Oꞌmosoꞌmo neꞌmino do luꞌ ize neineꞌ nenako nemuꞌ nene tiꞌ lo gelelesune: Oꞌmoso nene lelita molo hize eleꞌ noo-lidineꞌ nenako initeꞌ malitesi nene ngeli livileꞌ gehepeve amilisave.
ROM 8:32 Oꞌmosoꞌmo eiꞌ gipele gehepeve nene do aꞌmanapa amo leliꞌ mukikumuꞌ nene lehize-lidineꞌ ve. Idoꞌ neꞌmine ineꞌ nenako initeꞌ mukiꞌ nene lehize-ledamilivoba mo ezesi do lehize-ledeleseive.
ROM 8:33 Idoꞌ eiꞌ ve lo do kegese-lede neivemuꞌ nene Oꞌmosoꞌmo asiꞌve ve lisiheꞌ ve lo-lede neineꞌ nenako zaho goniꞌ o-ledelive. Mo ma nizamave.
ROM 8:34 Lelikumuꞌ hilive adoꞌ gohi hilingutiꞌ otive Izesuꞌ Kilisitoꞌ Oꞌmosolatiꞌ leme mino ana zamela mino lelitoꞌ medelo gamazite hize eleꞌ o-ledo neineꞌ nenako zaho lihime lemelidoꞌ o neive. Mo ma nizamave.
ROM 8:35 Idoꞌ Kilisitoꞌ lulo leme neivo noneꞌ neꞌmi luloutiꞌ nene initeꞌ maliꞌmosi nene geleleheꞌ ogo hulo heta ma o-ledamoloseive. Adoꞌ geni initeꞌ neꞌmo nehe, lihitehe initeliꞌmi lulouꞌ mineloneꞌ neꞌmo nehe, goboni malaꞌ malaliꞌmi lulouꞌ minelonidiꞌmo nehe, gaꞌna naba helelonidiꞌmo nehe, okodeloꞌ initekumuꞌ viseꞌ olonidiꞌmo nehe, ganala daatoꞌ mine molo minelonidiꞌmo nehe, idoꞌ evenelite libililisa navo luno miteꞌ veleloꞌ ningelonidiꞌmo nehe, nene ma geleleheꞌ ogo ma hulo heta o-ledamoloseive.
ROM 8:36 Idoꞌ mene noluvoniꞌ initeꞌ nevoꞌmine nene laminetoꞌ mo sotoꞌ i-lidaaꞌ naniꞌ nene monoꞌ godolouꞌ tiꞌ li gizadoꞌ nene vo dave: Guvekasi ve, geita giꞌmizo minuningumuꞌ nene gamene gamene evenelite nene libili hili hiliꞌ igaꞌ nave. Neꞌmine naniꞌ nene lelikumuꞌ eveneꞌ ingine gilavo laza nene sipisipi ize neꞌmine nene nizave li giliisa libilaaꞌ nave.
ROM 8:37 Ne neiha aꞌmine mene luvoniꞌ initeꞌ nete nene mo kekeꞌ livileꞌ amavo aꞌmine lulo leme neive Kilisitoꞌ neꞌmo hize eleꞌ o-ledaaꞌ neineꞌ neꞌmo nene ngivileꞌ gehepeve okune.
ROM 8:38 Naza ngivileꞌ gehepeve okune luvoniꞌ nene nanitekumuꞌ ve. Naza nene tiꞌ lo gele eleꞌvoleꞌ o nouve: Oꞌmosoꞌmo lulo leme neineꞌ Guvetesi ve Izesuꞌ Kilisitoꞌ do sotoꞌ o-lidineꞌ neꞌmi lulouꞌ noningutiꞌ nene initeꞌ maliꞌmosi ngelo hulo heta o-ledamoloseive. Adoꞌ heleloneꞌ neꞌmo nehe, minevoꞌ alevoꞌ neꞌmo nehe, angelolitesi nehe, guveꞌinesi ve ato atolite nehe, idise sotoꞌ o-lede neineꞌ initeꞌ nehe, alingeꞌ sotoꞌ o-ledelineꞌ initeꞌ nehe, amuzo malehe initeꞌ ato atolite nehe, veleta nizaniꞌ initelite nehe, galaꞌmuda nizaniꞌ initelite nehe, idoꞌ Oꞌmosoꞌmo do sotoꞌ molaniꞌ initeꞌ gohi ma nilizaniꞌ netesi nehe, nene mo ngelo nomive.
ROM 9:1 Kilisitoꞌ evenele nouvoniꞌ nenako nemuꞌ nene loloniꞌ gamazi mene soza lamo laminetoꞌ lolosuve. Ee, Oꞌmosoꞌmi Sikalahuꞌ neꞌmo nene neniꞌ luꞌne gaꞌneuꞌ hize eleꞌ ogo neivo aꞌmine mene loloniꞌ gamazi nene mo gamazi laminekovoꞌ neive lo gele nouve.
ROM 9:2 Naza neniꞌ zuho Isilaeleꞌ alevemuꞌ mulumo naba gelo muheleꞌine geleꞌmo geleꞌmo vo nouve.
ROM 9:3 Nemuꞌ nene naza giluvo me misubouꞌ makaꞌ noneꞌ aleve neze zuho Isilaeleꞌ aleve hize eleꞌ o-ngedaaꞌ aka nene ma minidiniko engiꞌ mukikumuꞌ nene Oꞌmosoꞌmo do nguꞌ izelive lo Kilisitoda giꞌmizo nouvongutiꞌ nene izo huko Oꞌmosoꞌmo usiꞌ ize-nedavo vo tolovo uvodine.
ROM 9:4 Aꞌmine aleve nene Isilaeleꞌ aleve nene nizave. Engiꞌ aꞌmine zuho gehepeve nene Oꞌmosoꞌmo neniꞌ izipahaꞌne zuho ve lo do tiꞌ ive nene nizave. Idoꞌ Oꞌmosoꞌmi amuzo labanaꞌve ningave nesi nene nizave. Idoꞌ Oꞌmosoꞌmo igi mili ilizangumuꞌ lo huko-ngidive nesi nene nizave. Idoꞌ eze louꞌ gamaziꞌve ngimive nesi nene nizave. Idoꞌ Oꞌmoso opoꞌni lilizaniꞌ aka gihile ngelebizo idoꞌ initeꞌ do lisiheꞌ o-ngedelesa salani gamazi lo-ngidive nesi nene nizave.
ROM 9:5 Aꞌmine Zuda ve nene gomuꞌ guveꞌine gelaaꞌ unive mukiꞌ Abalahamule Mosele engikutiꞌ nene sotoꞌ aniꞌ ve. Idoꞌ Kilisitoꞌ nene Oꞌmosolatiꞌ sotoꞌ ineꞌza helala evenetatiꞌ sotoꞌ ineꞌ nene mo aꞌmine zuhoti vaniseutiꞌ sotoꞌ ineꞌ ve. Idoꞌ Kilisitoꞌ aza initeꞌ mataꞌ mukitoꞌ Guvelesi ve minive mino mo Oꞌmoso ne neive. Eze opoꞌni loꞌmo vo minesoꞌ nene mo huko vamivo opoꞌni lo mine do volonive ne neize. Mo neꞌmino miniliho.
ROM 9:6 Idoꞌ naza Isilaeleꞌ aleveutiꞌ mukiꞌ nene Kilisitoꞌnimuꞌ gili eleꞌvoleꞌ amave noluvoniꞌ nene Oꞌmosoꞌmo aꞌmine Isilaeleꞌ alevemuꞌ lineꞌ gamazi nene vo haza ogave noluvoba asi Isilaeleꞌ aleveti vaniseutiꞌ sotoꞌ igaꞌ ave mukiꞌ nene Isilaeleꞌ aleve gehepeve nene ma minisaꞌmangumuꞌ nene luve.
ROM 9:7 Idoꞌ ma nene Abalahamuꞌ aꞌvopilemoꞌ zuho mukiꞌ nene izipahala zuho gihile mukiꞌ nizavoba asi Oꞌmosoꞌmo Abalahamuꞌni tiꞌ lo lo-imidoꞌ nene neive: Isakaꞌ aꞌvopilemokovoꞌ nene geiꞌ izipaha zuho gihile ve lo-ngedelone.
ROM 9:8 Neꞌmine lo-ngedeloneꞌ nene adoꞌ eveneꞌ mukiꞌ sotoꞌ igaꞌ adiꞌmine igi haza sotoꞌ igaꞌ ave nene Oꞌmosoꞌmi izipahala ve lo-ngedelonivoba asi Oꞌmosoꞌmo lo huko lineꞌ gamaziloꞌ eꞌmeti sotoꞌ ave engikovoꞌ nene Oꞌmosoꞌmi izipahala ve lo-ngedelesune.
ROM 9:9 Idoꞌ aꞌmine Oꞌmosoꞌmo lo huko lineꞌ gamazi nene tiꞌ lo neive: Idise mene minosa gamene mauꞌ nene tineꞌ molo gohi okuvo Salaꞌ aza nene gipele gedeleseive.
ROM 9:10 Idoꞌ Abalahamuꞌ aꞌvopilemokutikovoꞌ nene Oꞌmosoꞌmi zuho do kegese-ngidineꞌ nevoba Isakaꞌ aꞌvopilemoꞌ zuhoutikisi nene ma do kegese-ngidineꞌ ve. Aꞌmine avoteho Isakaꞌ aza Lepekaꞌni nene lobeꞌ izipe gede imineꞌ ve. Idoꞌ aꞌmine izipeti meꞌnibo nene hamoꞌ minineꞌza
ROM 9:11 ingine sotoꞌ igi monovo lamineꞌ nehe monovo goloso nehe nesi nene olihe amasivoo Oꞌmoso neꞌmo nene Lepekaꞌni tiꞌ lo lo-imineꞌ ve: Ganaꞌ ve neve nene alingeni izipeꞌmi gelekeleꞌ ve minelive. Idoꞌ Oꞌmosoꞌmo neꞌmine lineꞌ nene eze evenele do kegese-ngedelesa eveneꞌ igi mili ilizaniꞌ monovoloꞌ gele mino do kegese-ngedamo asi eiꞌ ngeleꞌmize molaaꞌ neiveꞌmi luloloꞌ do molo do kegese-ngedaaꞌ neineꞌ monovoꞌve nene sotoꞌ ogo minelive losa nene neꞌmine lineꞌ ve.
ROM 9:13 Idoꞌ neve nene monoꞌ godolouꞌ Oꞌmosoꞌmo tiꞌ lo lineꞌ gamaziloꞌ nene vo daave: Naza luꞌneꞌve nene Zakoboꞌni eme nouvoniꞌza Esauꞌnimuꞌ nene goseleꞌ okuve.
ROM 9:14 Idoꞌ Oꞌmosoꞌmo nene neꞌmine ogaꞌ neineꞌ nenako nemuꞌ nene nadive lolone. Oꞌmosoꞌmo ogaꞌ neineꞌ nene mo lisiheꞌ amive lolobe. Oꞌove. Mo kekeꞌ neꞌmine ma lamolosune.
ROM 9:15 Asiꞌve Oꞌmoso neꞌmo Moseꞌni nene tiꞌ lo lo-imineꞌ ma ve: Naza iseꞌine ize-ngedelove lo gelelove nene ha iseꞌine ize-ngedelesuve. Ee, muheleꞌine ningo hize eleꞌ o-ngedelove lo gelelove nene ha muheleꞌine ningo hize eleꞌ o-ngedelesuve.
ROM 9:16 Nemuꞌ nene Oꞌmosoꞌmo eveneꞌ mamuꞌ neniꞌ ve lo do kegese-ngedelineꞌ nene angiseꞌine giladotiꞌ nehe idoꞌ ingine igi mili minaaꞌ naadotiꞌ nehe nene ma do molo do kegese-ngedesaꞌmive. Asi Oꞌmosoꞌmo eveneꞌ muhelete ningosa isete izaaꞌ neineꞌ monovoꞌve neꞌmovoꞌ nene eiꞌ ve lo do kegese-ngedeleseive.
ROM 9:17 Idoꞌ mene noluvoniꞌ nene Oꞌmosoꞌmo Halaoꞌni lo-imineꞌ gamazi monoꞌ godolouꞌ tiꞌ li gizikaniꞌ gamazi maloꞌ nene vo dave: Geiꞌ eveneꞌ naba do ote-giduvoniꞌ nene adoꞌ neꞌminemuꞌ do ote-giduvoniꞌ ve: Geita nene amuzo initeꞌ ma ogo doꞌmo leme gehepeve o-gedekuvo neꞌmo nene neniꞌ amuzoꞌne do sotoꞌ ogavo misubouꞌ misubouꞌ nene neniꞌ guveꞌne gililizangumuꞌ ve losa do ote-giduvoniꞌ ve.
ROM 9:18 Neꞌmino neineꞌ nemuꞌ nene Oꞌmosoꞌmo iseꞌine ize-ngedelove lo gelelive nene iseꞌine ize-ngedosa aza gamaziꞌve gili hulilizangumuꞌ luꞌine do aꞌmanapa o-ngedelove lo gelelive nene ha luꞌine do aꞌmanapa o-ngedeleseive.
ROM 9:19 Neꞌmino neineꞌ nenako lingine tiꞌ li li-nimilisave: Oꞌmosoꞌmo neꞌmine ogaꞌ neineꞌ nenako eveneꞌ laza nene eiꞌ lulouꞌ gelaaꞌ neineꞌ initetoꞌ nene do peleseveꞌ izaatoꞌ lisiheꞌ amo aꞌmine gelaaꞌ neidokovoꞌ nene eꞌmeto vaaꞌ nouneꞌ nenako nemuꞌ nene nanitekumuꞌ goloso gelo lihime molo-ledaaꞌ neive.
ROM 9:20 Vekizo, lingine nene neꞌmine li li-nimilisaniꞌza lingine nene haza vetesi Oꞌmoso neve nene eꞌmenga li-imilizadoꞌ lisiheꞌ i nizahe. Idoꞌ initeꞌ ma loloꞌ ilineꞌ nene aꞌmine initeliꞌmo loloꞌ o-delivemuꞌ nene ha tiꞌ lo lo-delihe: Gaza nene neꞌmino loloꞌ o-nedamilinako nanimuꞌ neꞌmino loloꞌ o-nedane lo ha lilihe.
ROM 9:21 Idoꞌ misubo somo loloꞌ ogaꞌ ive misubo do vaꞌvaꞌ ogo molokidotiꞌ nene linge ma do somo lamineꞌ gidi naniꞌ nene ma loloꞌ ogosa aꞌmine hamoꞌ misubo mautiꞌ linge ma do haza somo meniꞌve lemo minineꞌ nesi nene loloꞌ ilineꞌ nene lisiheꞌ amilihe. Oꞌove. Eiꞌ luloloꞌ nene initeꞌ laminekisi golososi nene ha lisiheꞌ o neivo loloꞌ oloseive.
ROM 9:22 Idoꞌ Oꞌmosoꞌmo aꞌmineꞌmine ogaꞌ neive. Aza nene neniꞌ nizeboloꞌ molaniꞌ nene ngelebizekuvo eveneꞌ nete neniꞌ amuzoꞌne nene ningi gililizave lo gele mino aꞌmine somo goloso neꞌmine mini eiꞌ izeboloꞌ molaaꞌ neineꞌ aleve vi tolovo ilizadoꞌ do sotoꞌ ineꞌ aleve nene gozopotiꞌ ha ninge mate ngimikoo hongu lo minineꞌ ve.
ROM 9:23 Neꞌmino minineꞌ nene eveneꞌ somo lamineꞌ neꞌmine minikevo iseꞌine ize-ngedelive adoꞌ gomukutiꞌ eiꞌ emeni dameni lamineꞌ atoliꞌmine ogo minineꞌ nene dalizadoꞌ do vaꞌvaꞌ o-ngidive nete nene aꞌmine Oꞌmosoꞌmi emeni dameni lamineꞌ tamineꞌ vaiꞌ gikiꞌ ogo neineꞌ nene ningilizave losa neꞌmino minineꞌ ve.
ROM 9:24 Eiꞌ ve lo elese molo leleꞌmize molave lelikumuꞌ nene noluve. Aꞌmine elese molo-lidive nene Zuda ve lelikutikovoꞌ nomive. Asi heta atoꞌ veutikisi nene ma neꞌmine o-ngidineꞌ ve.
ROM 9:25 Neꞌmine ineꞌ nene eiꞌ lineꞌ gamazi polohete Hoseaꞌ tiꞌ lo gize neidoꞌ nene vo dave: Eveneꞌ neniꞌ zuho minamaniꞌ alevemuꞌ nene neniꞌ zuho ve l o ha lo-ngedelesuve. Ee, naza luꞌne ngemesaꞌmuvoniꞌ alevemuꞌ nene luꞌne ngeme nouvoniꞌ aleve ve lo-ngedelesuve.
ROM 9:26 Idoꞌ lengiꞌ nene neniꞌ eveneꞌne zuho nizamave lo lo-ngimuvoda nene minevoꞌ dovoꞌ ogaꞌ ineꞌ Oꞌmoso neniꞌ izipahaꞌne zuho ve lo-ngedelesuve.
ROM 9:27 Idoꞌ polohete Isaiaꞌ aza Isilaeleꞌ alevemuꞌ nene tiꞌ lo lo sotoꞌ ineꞌ ve: Isilaeleꞌ aleve nene noso gahevela gepe minaaꞌ neineꞌ neꞌminisa vaiꞌ goloso minilizaha aꞌmingutiꞌ nene ngomosikovoꞌ ma lukuvo nalisave.
ROM 9:28 Neꞌmino eveneꞌ ngomosiꞌ do nguꞌ izavo lukuvo nalizaniꞌ nene Guvelesi veꞌmo liteꞌ lo eiꞌ misuboꞌveuꞌ aleveliti goniꞌine gele osuꞌ lo lihime ngemo osuꞌ lilidiꞌmo nene ngomosikovoꞌ ma lukuvo nalisave.
ROM 9:29 Ee, Isaiaꞌ gamazi ma gomukutiꞌ tiꞌ lo lo sotoꞌ idoꞌ nene vo dave: Amuzoꞌvesi mino initeꞌ mulise ato atoꞌ mukitoꞌ gizebo ogaꞌ neineꞌ Guvelesi veꞌmo nene Isilaeleꞌ aleve leliꞌ nene ha mini di dizivoꞌ minilizave lo eveneꞌ ngomosiꞌ nene ma hulo-ledamidiniko laza nene Sodomi alevesi idoꞌ Gomola alevesi osuꞌ gehepeve laniꞌ neꞌmine ogo mo osuꞌ gehepeve lunidine.
ROM 9:30 Neꞌmine ogo neineꞌ nenako nelotiꞌ nene laza tiꞌ lo gelelesune: Ve lisiheꞌ liliꞌ ilizaniꞌ akamuꞌ viseꞌ amave heta atoꞌ ve ma nete aꞌmine aka nene ningi ikeve. Aꞌmine aka nene ezemuꞌ gele eleꞌvoleꞌ okunivo Oꞌmosoꞌmo ve lisiheꞌ ve lo-ledaaꞌ neineꞌ akamuꞌ nene noluve.
ROM 9:31 Aꞌmine heta atoꞌ ve nene neꞌmine ikeha Oꞌmosoꞌmi evenele zuho Isilaeleꞌ aleve nete nene louꞌ gamaziloꞌ eꞌmetelonidotiꞌ nene ve lisiheꞌ loloꞌ olobe li neꞌmine ilizaniꞌ aka nene viseꞌ aniꞌza mo kekeꞌ ma di gihile izamaniꞌ ve.
ROM 9:32 Nanitekumuꞌ di gihile izamave. Di gihile izamaniꞌ nene Oꞌmosomuꞌ gele eleꞌvoleꞌ ogosavoꞌ nene do gihile izesoꞌ o neive lamisa asi leliꞌ gono dalonidotikovoꞌ nene do gihile izelesune li di gihile izilisa aniꞌ neꞌmo nene mo di gihile izamaniꞌ ve. Ingine monoꞌ godolouꞌ eveneꞌ zodohoꞌ izi limi ingalizaniꞌ gehenimuꞌ gizi nizadoꞌ nene zodohoꞌ izi limi inganiꞌ ve.
ROM 9:33 Aꞌminemuꞌ Oꞌmosoꞌmo lineꞌ gamazi nene tiꞌ li gizi nizave: Lingine gililo. Naza Zuda veti gotoꞌ numudida Zaioni golola nene eveneꞌ zodohoꞌ izi limi pouꞌ li ingalizaniꞌ geheni gehepeve nene ma nomuluve. Idoꞌ ve ma ingine aꞌmine geheni miniveloꞌ ma gili eleꞌvoleꞌ ilizave nene aꞌmine gili eleꞌvoleꞌ ilizadotiꞌ nene gihileꞌve dami ngovozo hililizavoba asi mo hilamilisave.
ROM 10:1 Neze zuhokizo, naza Zuda vemuꞌ nene luꞌneuꞌ amuzo molo gelaaꞌ nouvoniꞌ nene adoꞌ tiꞌ lo gelo Oꞌmosola aꞌminemuꞌ laaꞌ nouve: Oꞌmosoꞌmo do nguꞌ izeliho lo aꞌminemukovoꞌ laaꞌ nouve.
ROM 10:2 Nene nanitekumuꞌ ve. Engiꞌ monovo nene mo ninge lamineꞌ o nouve. Ingine nene gilingili igi Oꞌmosomuꞌ gilaaꞌ naniꞌza eze eꞌmetilizaniꞌ aka nene ninge nobe li ningi gili guni amave.
ROM 10:3 Idoꞌ neꞌmine noluvoniꞌ nene nemuꞌ noluve: Ingine Oꞌmosoꞌmo evenekumuꞌ eveneꞌ lisiheꞌ ve lo-ngedaaꞌ neineꞌ monovomuꞌ nene gili imami mini angiseꞌine di sotoꞌ aniꞌ monovoloꞌ di mili eveneꞌ lisiheꞌ ilisa igi mili minaaꞌ naniꞌza Oꞌmosoꞌmo eveneꞌ lisiheꞌ ve lo-ngedelineꞌ monovoloꞌ nene gelekeleꞌ amave.
ROM 10:4 Neꞌmine igaꞌ naniꞌza ezemuꞌ gili eleꞌvoleꞌ igi minave nene ve lisiheꞌ ve lo-ngedosa Kilisitoꞌ aza louꞌ gamaziloꞌ eꞌmetaatotiꞌ eveneꞌ lisiheꞌ loloꞌ ogaꞌ aka nene mo mudise hize tilineꞌ nenako nemuꞌ ingine nene mo ladani nave.
ROM 10:5 Naza mo laminetoꞌ noluve. Ingine ngelo amosoꞌ initeꞌ ilisa naniꞌ neineꞌ nene Moseꞌ aza louꞌ eꞌmetaatotiꞌ eveneꞌ lisiheꞌ loloꞌ ogakumuꞌ tiꞌ lo gizidotiꞌ nene ha gelelesune: Ve ma ingine aꞌmine louꞌ gamazi vaitoꞌ eꞌmeti lamineꞌ ma ilizaniꞌ nene aꞌmine neꞌmine ilizadotiꞌ nene mine lamineꞌ igi ha miniviꞌ miniviꞌ igi minilisave.
ROM 10:6 Ne neiha Oꞌmosomuꞌ gele eleꞌvoleꞌ ogatotikovoꞌ nene eveneꞌ lisiheꞌ loloꞌ ogaꞌ neve nene lapa nomivo ha loloꞌ olonidoꞌ neineꞌ nene gamazi ma tiꞌ lo neidotiꞌ nene gelelesune: Lingine aꞌmine nene mo amosoꞌ niteꞌ neive lisa lutinguꞌ tiꞌ li gilamilo: Okulumokuko zaho dizelive. Mo ma dizamilisave. Idoꞌ home galese golosouꞌ zaho lemelive. Mo ma limamilisave. Neꞌmine lilizaniꞌ nene Kilisitoꞌni Okulumokukotiꞌ eleꞌmizi limilizangumukisi idoꞌ hilingutiꞌ di oti-di eleꞌmizi dizilizangumukisi lilizaniꞌ nenako idoꞌ Kilisitoꞌ aza mo Okulumokutiꞌ lemosa hilingutiꞌ nene mo otosa neineꞌ nenako nemuꞌ nene amosoꞌ initeꞌ ma nomineꞌ nenako neꞌmine li gililizadoꞌ ma nomive lo neineꞌ ma neive.
ROM 10:8 Ne neiha aꞌminemuꞌ nene gamazi ma tiꞌ lo neive: Aꞌmine monoꞌ gamazi nene hota neꞌmine ma minamive. Asi avitoꞌ mino lingine ha vetinedunuꞌ lilizadoꞌ mino lutinguꞌ gililizadoꞌ neive. Aꞌmine monoꞌ gamazi nene Oꞌmosomuꞌ gele eleꞌvoleꞌ ogaliꞌmi gamazi leliꞌ lo sotoꞌ o ngemaaꞌ nouneꞌ gamazi nene neive.
ROM 10:9 Adoꞌ lingine vetinedunuꞌ nene Izesuꞌ aza Guvetesi ve naba ve li li sotoꞌ igi idoꞌ lutinguꞌ nene Oꞌmosoꞌmo hilingutiꞌ do ote-dineꞌ ve li gili eleꞌvoleꞌ ilizaniꞌ nene Oꞌmosoꞌmo do lunguꞌ izeleseive.
ROM 10:10 Ee, lutedunuꞌ aꞌmine gamazi gele eleꞌvoleꞌ osoꞌ nene Oꞌmosoꞌmo eveneꞌ lisiheꞌ ve lo-ledelive. Idoꞌ vetedunuꞌ aꞌminemuꞌ lo soto sotoꞌ osoꞌ nene Oꞌmosoꞌmo do luꞌ izeleseive.
ROM 10:11 Idoꞌ mene noluvoniꞌ nene monoꞌ godolouꞌ tiꞌ li gizi nizadoꞌ nene vo miliseꞌ ogave: Aꞌmine vemuꞌ gili eleꞌvoleꞌ ilizave mukiꞌ nene aꞌmine gili eleꞌvoleꞌ ilizadotiꞌ nene gihileꞌve dami ngovozo hililizavoba asi hilamilisave.
ROM 10:12 Idoꞌ ingine mukiꞌ ngovozo hilamilisave noluvoniꞌ nene Zuda vesi heta atoꞌ vesi nene ato atoliꞌmine minamavo engiꞌ sitatoꞌ gizebo ogaꞌ ive nene Guvelesi ve eiꞌ hamokovoꞌ mino hize eleꞌ o-ledelive li ezela laaꞌ nave ato atoꞌ mukiꞌ nene atoliꞌmine ogo nasahiliꞌ o-ngedaaꞌ neineꞌ nenako nemuꞌ nene noluve.
ROM 10:13 Ee, eveneꞌ mukiꞌ ingine Guvelesi veꞌmi gulive igi ezela lilizave ato atoꞌ mukiꞌ nene do nguꞌ izeleseive li monoꞌ godolouꞌ gizi nizaniꞌ ve.
ROM 10:14 Neꞌmino neineꞌza ingine Kilisitoꞌnimuꞌ gili eleꞌvoleꞌ amaniꞌ nenako nadiisa eiꞌ gulive igi ezela lilizave. Mo neꞌmine ma amilisave. Idoꞌ ezemuꞌ li-ngimavo ma gilamaniꞌ nenako haza nene nadiisa gili eleꞌvoleꞌ ilizave. Mo ngeli neꞌmine ma amilisave.
ROM 10:15 Idoꞌ Oꞌmosoꞌmo eze gamazi li sotoꞌ igi li-ngimilizave ma ngimiselamilineꞌ nene nadiisa vi li sotoꞌ igi li-ngimilizave. Mo neꞌmine ma amilisave. Gamazi lamineꞌ li-ngimilizave ngimiselingumuꞌ nene monoꞌ godolouꞌ tiꞌ li gizi nizave: Gamazi lamineꞌ li sotoꞌ igi li-limilizave aniꞌ nene mo ede vineꞌ initeꞌ ikeve lo lolize izekune. Gamazi lamineꞌ li sotoꞌ ilizave nene mo neꞌmino ngimiselavo igi li soto sotoꞌ aniꞌza
ROM 10:16 Isilaeleꞌ aleve mukiꞌ gidini nete aꞌmine gamazi laminetoꞌ nene gili damaniꞌ ve. Neꞌmine aniꞌ nene monoꞌ godolouꞌ polohete Isaiaꞌ gamazi ma tiꞌ lo lidoꞌ nene vo daniꞌ ve: Guvekasi ve, laza lo-ngimuneꞌ gamaziloꞌ nene mo ma gili eleꞌvoleꞌ amave.
ROM 10:17 Nemuꞌ nene laza tiꞌ lo gele none: Kilisitoꞌnimuꞌ gele eleꞌvoleꞌ oloneꞌ nene gamazi lamineꞌ gelosavoꞌ nene gele eleꞌvoleꞌ olosune. Idoꞌ gamazi lamineꞌ geleloneꞌ nene Kilisitoꞌ gamaziꞌve nelotikovoꞌ nene gamazi lamineꞌ gelelesune.
ROM 10:18 Neꞌmino neineꞌza naza tiꞌ lo noluve: Ingine nene aꞌmine gamazi mene gilamavoba asi mo gili nizave. Monoꞌ godolouꞌ tiꞌ li gizi nizaniꞌ maloꞌ vo dave: Veꞌningutiꞌ gamazi neꞌmo nene mo misubouꞌ misubouꞌ vo osuꞌ lave. Ee, gamaziꞌine nene eveneꞌ minaniꞌ misubo neꞌmo vo sididasi nene buu lo vineꞌ ma neive.
ROM 10:19 Idoꞌ naza gohi tiꞌ lo noluve: Isilaeleꞌ aleve ingine gili vevesamilizadoꞌ minavoba asi gili vevesilizadoꞌ minaniꞌ ve. Aꞌmine nemuꞌ nene ganaꞌ Moseꞌ Oꞌmosoꞌmo lineꞌ gamazi tiꞌ lo gizineꞌ ve: Eveneꞌ ma neniꞌ zuho nizave li gilamave haza ve engikutiꞌ nene ma do nenita okuvo lingine Isilaeleꞌ aleve aꞌminemuꞌ nene lavodine nalisave. Ee, gaꞌine gili vevesamave nene ma do nenita okuvo nemuꞌ nene mo lingizeboloꞌ molaloseive.
ROM 10:20 Idoꞌ Isaiaꞌ aza Oꞌmosoꞌmo lineꞌ gamazi gohi ma lovoꞌ kiselevoꞌ ogo tiꞌ lo gizineꞌ ve: Nenikumuꞌ viseꞌ isaꞌmave nete nene nenikumuꞌ mo ningi gilikeve. Ee, neniꞌ monovoꞌnemuꞌ gililisa longoꞌ isaꞌmavela nene neniꞌ monovoꞌne do sotoꞌ ogo ngelebizekuvo mo ningikeve.
ROM 10:21 Ne neiha Isilaeleꞌ alevemuꞌ aza tiꞌ lo lineꞌ ve: Naza nene haza minamo gamene gamene aꞌne do patelo nenita alo alo lo-ngedeꞌmo vovoꞌ minaaꞌ nouvoniꞌza ingine nene gamaziꞌne gili huli eꞌmenga laaꞌ ave mini mo gilisaꞌmave.
ROM 11:1 Isilaeleꞌ aleve ingine neꞌmine igi minaniꞌ nenako naza tiꞌ lo gelo longoꞌ nouve: Oꞌmosoꞌmo aꞌmine evenele zuho mo mudise vasa ize-ngede neineꞌ nolihe. Oꞌove. Mo kekeꞌ neꞌmine amilihe losa gele nouve. Naza mudise vasa ize-ngedamive noluvoniꞌ nene nenikisi aꞌmine Isilaeleꞌ aleveutiꞌ nouvoniꞌ nenako nemuꞌ noluve. Ee, naza Abalahamuꞌ aꞌvo mino Zakoboꞌ gipele Benizaminiꞌ aꞌvopilemoꞌ zuhoutiꞌ gehepeve ne nouve.
ROM 11:2 Oꞌmosoꞌmo gomukutiꞌ ninge lamineꞌ do eze zuho loloꞌ o-ngede neineꞌ aleveꞌve nene mo kekeꞌ mudise vasa ize-ngedamive. Oꞌove. Idoꞌ nemuꞌ nene lingine Eliaꞌ gamaziꞌve monoꞌ godolouꞌ neineꞌ ma nene gilamaniꞌ nehe. Isilaeleꞌ alevemuꞌ nene tiꞌ lo Oꞌmosola lipoti molaniꞌ ve:
ROM 11:3 Guvekasi ve, geiꞌ vekautiꞌ gamazi laaꞌ ave polohete vaiꞌ nene ngibili geseꞌ igi gopoꞌni lo initeꞌ molo-gedaaꞌ uneꞌ holomo mukiꞌ nesi neve nene izi nguꞌvosi hulikevo geita mili geꞌmetaaꞌ ave nene gohi masi nizamavo nenikovoꞌ nene lumo nouvo nenikisi nibililisamuꞌ nene viseꞌ iꞌmi nimonave.
ROM 11:4 Neꞌmine lineꞌza aꞌmidoꞌ Oꞌmosoꞌmo lo-imineꞌ gamazi mene gililo: Oꞌove. Gaza nene geikovoꞌ gehepeve nene lumo minamane. Vemohoꞌ seveni tauseni (7,000) neꞌmine nene soza oꞌmoso initeꞌ Baaliꞌni nene gubiꞌ izi imi opoꞌni lisaꞌmave neniꞌ eveneꞌne gehepeve nene nenikumuꞌ ve lo lumo ha hulo-ngede nouve.
ROM 11:5 Neꞌmine lineꞌ nenako aꞌmineꞌmine ogo idisesi nene eveneꞌ ngomosiꞌ nene haza gidini inele ogosa eiꞌ ve lo do kegese-ngedavo nizave.
ROM 11:6 Eiꞌ ve lo do kegese-ngidineꞌ nene inele ogaꞌ neꞌmine ogo haza gidini do kegese-ngidineꞌ nenako neꞌmine o-ngidineꞌ nene gono ma dikevosa neꞌmine o-ngidineꞌ nene nomive. Asi gono ma dikevosa neꞌmine o-ngidineꞌ neidiniko inele haza gidini ogo do eita o-ngidineꞌ ma nene inele neꞌmine ineꞌ gelamidine.
ROM 11:7 Nemuꞌ nene laza nadive lolone. Tiꞌ lo lolosune: Isilaeleꞌ aleve Oꞌmosolatiꞌ viseꞌ aniꞌ initeꞌ nene adoꞌ ve lisiheꞌ ve lo-ngedelineꞌ mukilite ma damavo Oꞌmosoꞌmo do kegese-ngidive netevoꞌ nene dikevosa linge ma nene aꞌmanapa igisa damaniꞌ ve.
ROM 11:8 Neꞌmino sotoꞌ ineꞌ initeꞌ nene monoꞌ godolouꞌ tiꞌ li gizadoꞌ nene sotoꞌ neive: Oꞌmosoꞌmo luꞌine nene do negi hize-ngedavo veꞌinedunuꞌ nene initeꞌ ma ningami gaꞌinedunuꞌ nene gamazi ma gilami mini idisesi neꞌminivoꞌ igi nizave.
ROM 11:9 Idoꞌ Davidiꞌ nene tiꞌ lo lineꞌ ve: Idoꞌ laniteꞌ gilaniꞌ initeꞌ neꞌmo nene gelevuso neꞌmine gehepeve loloꞌ ogo ngebelavosa lihime dalizaho.
ROM 11:10 Ee, veꞌine nene do gopo o-ngedavo initekisi ma ningamilizaho. Idoꞌ geni initeliꞌmo gamene gamene meheꞌine nene do hilingize-ngede miniliho.
ROM 11:11 Nemuꞌ nene naza tiꞌ lo gohi longoꞌ nouve: Isilaeleꞌ aleve ingine ladani igisa mo mudise limi pouꞌ li inganiꞌ nehe. Oꞌove. Mo kekeꞌ neꞌmine amaniꞌza asi ingine aka laminetotiꞌ nene zovoꞌ izi vaniꞌ neꞌmo nene Oꞌmosoꞌmo heta atoꞌ ve do nguꞌ izelineꞌ aka nene velave. Idoꞌ neꞌmine aka vele-ngidineꞌ nene aꞌmine Zuda ve ningi lezesi neꞌmine o-ledeliho lilizave losa vele-ngidineꞌ ve.
ROM 11:12 Idoꞌ ingine aka laminetotiꞌ nene zovoꞌ izi vi gopo aniꞌ neꞌmo nene Oꞌmosoꞌmo heta atoꞌ ve vaiꞌ nene do lamineꞌ o-ngedelidoꞌ ngeleꞌmize molo initeꞌ lamineꞌ gehepeve do sotoꞌ ineꞌ nenako Zuda ve ingine nene alingeꞌ mudise aka laminetoꞌ tineꞌ mili alizaniꞌ neꞌmo nene mo ivileꞌ ivosa initeꞌ lamineꞌ goloso do sotoꞌ oloseive.
ROM 11:13 Idoꞌ heta atoꞌ ve lengikumuꞌ nene tiꞌ lo noluve: Naza nene heta atoꞌ ve lengiꞌ aposolo nouvoniꞌ nenako nemuꞌ nene naza heta atoꞌ ve lengita gono daaꞌ nouvongumuꞌ nene do naba ogaꞌ nouve.
ROM 11:14 Idoꞌ lengita neꞌmino aposolo gono daaꞌ nouvongumuꞌ do naba nouvoniꞌ nene neze zuho Isilaeleꞌ aleve nene ningi ingine heta atoꞌ ve neꞌmine gono do-ngidineꞌ nene leliꞌ do-ledelinako li minikevo engikutiꞌ linge ma nene Oꞌmosoꞌmo do nguꞌ izelineꞌ akaloꞌ ngeleꞌmize molaloho lo aꞌmine gonoꞌnemuꞌ nene do naba ogaꞌ nouve.
ROM 11:15 Idoꞌ engiꞌ nene Oꞌmosoꞌmo do nguꞌ izelineꞌ akaloꞌ ngeleꞌmize molaloho lo noluvoniꞌ nene tiꞌ lo gelosa noluve: Oꞌmosoꞌmo vasa ize-ngidineꞌ neꞌmo nene misubouꞌ aleve linge lovo i imi minangutiꞌ nene gohi eiꞌ Oꞌmososi do hamoꞌ o-ngidineꞌ nenako nemuꞌ nene aꞌmine Isilaeleꞌ aleve nene gohi do gatulo o-ngedelineꞌ neꞌmo nene atoliꞌmine ogo initeꞌ lamineꞌ goloso do sotoꞌ o-ledavo mo helaaꞌ neꞌmine ogo noningutiꞌ nene gohi oto minevoꞌ dovoꞌ ogo noneꞌ geleleseive.
ROM 11:16 Idoꞌ Isilaeleꞌ alevemuꞌ nene aneza gamazi tiꞌ lo lo-lengemelesuve: Beleti loloꞌ ogosa gomuꞌ nene aꞌmidotiꞌ linge ngomo ma do Oꞌmoso emekunivo Oꞌmosoꞌmi initeꞌ loloꞌ ilineꞌ nene aꞌmine beleti linge naba nesi nene Oꞌmosoꞌmi initeꞌ loloꞌ oloseive. Idoꞌ zaliꞌmi luhive neꞌmo Oꞌmosoꞌmi initeꞌ ma minelineꞌ nene aꞌmine zaliꞌmi aꞌnava nesi nene Oꞌmosoꞌmi initeꞌ mineleseive.
ROM 11:17 Idoꞌ Isilaeleꞌ aleve ingine Oꞌmosoꞌmi oliva za neꞌmine minaniꞌ nene Oꞌmosoꞌmo aꞌmine zaꞌmi aꞌnava linge nene huko hulosa oliva za hadenelotiꞌ aꞌnava ma nene do eiꞌ oliva zaꞌveloꞌ nene do giꞌmizineꞌ nenako Isilaeleꞌ aleveti avoꞌningidatiꞌ sotoꞌ ineꞌ monoꞌ lamineꞌ nene lingine heta atoꞌ vesi nene makatoꞌ di nizaze.
ROM 11:18 Lingine nene Oꞌmosoꞌmo oliva zaꞌvelotiꞌ aꞌnavaꞌve linge ma huko hulineꞌ mamuꞌ nene ningedoꞌ hangedoka li-ngidi lengiꞌ okodine di dizamilo. Lingine nete nene aꞌmine zaliꞌmi luhiveꞌve nene di ngi li-ngidisaꞌmave. Asi eiꞌ aꞌmine za neꞌmi luhive nete lengiꞌ nene di ngi li-lingidaaꞌ naaniꞌ nenaze. Okodine nene di dizamilo.
ROM 11:19 Idoꞌ aꞌminemuꞌ nene lingine tiꞌ li lilisave: Idoꞌ nadiive. Leliꞌ nene Oꞌmosoꞌmi oliva zaꞌveloꞌ nene do giꞌmize-ledelesa eiꞌ aꞌnavaꞌve nene huko hulo do giꞌmize-ledave.
ROM 11:20 Ehe, mo laminetoꞌ nilaniꞌza engiꞌ huko hulo-ngidineꞌ nene ingine ezemuꞌ gili eleꞌvoleꞌ amavosa huko hulo-ngidineꞌ ve. Idoꞌ lingine eiꞌ zaꞌveloꞌ do giꞌmize-lengedavo nizaniꞌ nene lengiꞌ gili eleꞌvoleꞌ i minangumuꞌ nene eiꞌ zaꞌveloꞌ nene do giꞌmize-lengedavosa nizave. Nemuꞌ nene lengikumuꞌ gilavo dizalize. Oꞌmosoꞌmo aꞌmine zaꞌveꞌmi aꞌnavaꞌve gehepeve nene iseꞌine izamineꞌ nenako lengikisi nene isetine izamoloseize. Golisesi nene ha gili minilizaniꞌ o neive.
ROM 11:22 Idoꞌ Oꞌmosoꞌmo neꞌmine ogaꞌ neidotiꞌ nene helala nasahiliꞌ lamineꞌ ogaꞌ neineꞌ nene ningo idoꞌ helala amuzo molo lihime ngemaaꞌ neineꞌ nene ningo gelelesune. Ee, monokutiꞌ limi ingave nene amuzo molo lihime ngemosa lengiꞌ nene nasahiliꞌ o-lengedo neive. Idoꞌ aza nasahiliꞌ o-lengedelidoꞌ lisiheꞌ i minilizangumuꞌ nene mo nasahiliꞌ o-lengedeleseiha neꞌmine ma ami minilizaniꞌ nene linginesi zaꞌvelotiꞌ nene huko hulalize. Ningiisa minilo.
ROM 11:23 Idoꞌ aꞌmine zaꞌvelotiꞌ aꞌnava huko hulineꞌ neꞌminisa minaniꞌ Isilaeleꞌ aleve ingine gili eleꞌvoleꞌ ami minadotiꞌ nene huli gili eleꞌvoleꞌ ma ilizaniꞌ nene Oꞌmosoꞌmo gohi zaꞌvela do giꞌmize-ngedaaꞌ amuzo nene ha do neinako gohi ha do giꞌmize-ngedeleseive.
ROM 11:24 Idoꞌ neꞌmino gohi do giꞌmize-ngedelineꞌ amuzo do neineꞌ nene nadosa ningo gelelone. Aza nene amosoꞌ initeꞌ gehepeve ogo heta atoꞌ ve lingine nene oliva za hadenelotiꞌ aꞌnava neꞌmine minave nene eiꞌ oliva zaꞌve laminekuꞌ nene do giꞌmize-lingidineꞌ nenako nemuꞌ nene eiꞌ zaꞌvelotiꞌ gehepeve minaniꞌ aleve Zuda ve nene ha lapa nomineꞌ initeꞌ ogo gohi aꞌmine zaꞌveloꞌ nene ha do giꞌmize-ngedeleseive lo ningo gelelesune.
ROM 11:25 Neze zuhokizo, mene loloniꞌ gamazi nene gilami minilizaniꞌ neꞌmo lingine laza otohato ve nene none lisa okodine di dizi minikelizave losa sunoꞌ gamazi mene lo-lengemelouze. Gililo: Isilaeleꞌ aleve linge nene aꞌmanapa igi Kilisitoꞌnimuꞌ gili eleꞌvoleꞌ amaniꞌza neve nene mudise nomive. Asi heta atoꞌ ve ingine Oꞌmosoꞌmo gele neineꞌ votigileloꞌ Oꞌmosola imi hilalizaniꞌ
ROM 11:26 nelotiꞌ nene monoꞌ godolouꞌ tiꞌ li gizi nizadoꞌ nene eꞌmeto Isilaeleꞌ aleve mukiꞌ nene do nguꞌ izeleseive: Isilaeleꞌ aleveti gotoꞌ numuꞌine Zaioni gololotiꞌ nene do nguꞌ izelive ma sotoꞌ oloseive. Sotoꞌ ogosa aza monoꞌ gelamaaꞌ monovo Zakoboꞌ aꞌvopilemoꞌ zuho Isilaeleꞌ alevetinguꞌ minineꞌ nene do huloloseive.
ROM 11:27 Naza gamazi meve nene ma nolo huko-ngiduve. Engiꞌ lihime do hulo-ngedeloniꞌ gamene nene ma gihile izo sotoꞌ oloseive.
ROM 11:28 Izesuꞌnimuꞌ gamazi lamineꞌ nene gili hulisa Isilaeleꞌ aleve nene Oꞌmosoꞌmi biluvaꞌve liliꞌ aniꞌ ve. Neꞌmo nene heta atoꞌ ve lingine Oꞌmosoꞌmo do lunguꞌ izelineꞌ akaloꞌ lengeleꞌmize molave. Ne neiha ganakutiꞌ nene Oꞌmosoꞌmo eiꞌ ve lo do kegese-ngidineꞌ nenako nemuꞌ nene engiꞌ avoꞌninginemuꞌ gele minosasi nene lulo ha ngeme neive.
ROM 11:29 Idoꞌ lulo ha ngeme neive noluvoniꞌ nene adoꞌ Oꞌmosoꞌmo eveneꞌ ma elese molo-ngedo do eita ogo initeꞌ ma ngeme nolineꞌ nene aꞌminemuꞌ gamazi gohi senisi ogo oꞌve aꞌva losaꞌmineꞌ nenako nemuꞌ nene luve.
ROM 11:30 Ee, gomuꞌ nene heta atoꞌ ve lingine Oꞌmosoloꞌ gelekeleꞌ ami minaniꞌza Isilaeleꞌ aleve ingine nene idise Oꞌmosoloꞌ gelekeleꞌ amavo neꞌmo nene Oꞌmosoꞌmo lengiꞌ heta atoꞌ ve nene isetine izo do eita ogave.
ROM 11:31 Aꞌmineꞌmine ogo Oꞌmosoꞌmo lengiꞌ isetine izo do eita ineꞌ neꞌmo nene Isilaeleꞌ aleve idise Oꞌmosoloꞌ gelekeleꞌ amave. Idoꞌ neꞌmine monovo sotoꞌ ineꞌ nene Oꞌmosoꞌmo engiꞌ Isilaeleꞌ aleve nene iseꞌine izelingumukisi ve losa neꞌmino sotoꞌ ineꞌ ve.
ROM 11:32 Ee, Oꞌmosoꞌmo eveneꞌ ato atoꞌ mukiꞌ nene iseꞌine izelidoꞌ lisiheꞌ i minilizangumuꞌ ve lo eveneꞌ mukiꞌ nene ezeloꞌ gelekeleꞌ amaaꞌ monovoꞌmi gesi minguꞌ nene hulo-ngidineꞌ ve.
ROM 11:33 Aizoo, Oꞌmosote nene atoliꞌmine ogo minive neive. Adoꞌ gamazi gele neineꞌ nene atoliꞌmine ogo gele mino otohato ogaꞌ neineꞌ nesi nene vosoꞌ vamosoꞌ vaaꞌ neive. Idoꞌ lo hukaaꞌ neineꞌ gamaziꞌmi monovo nene eveneꞌ malitesi ngelo lo ngoloꞌ lo osuꞌ lamolosune. Idoꞌ eze gono dalosa gala gelaaꞌ neineꞌ nemuꞌ nene ve malitesi ngelo gelamolosune.
ROM 11:34 Monoꞌ godolouꞌ tiꞌ li gizi nizaniꞌ nenako mo laminetoꞌ noluve: Oꞌmosoꞌmo gelaaꞌ neineꞌ maduno nene eveneꞌ hamolitesi ngelo ma gelamolosune. Idoꞌ eveneꞌ hamolitesi nene ogo molo ilineꞌ monovomuꞌ ngelo ma apize emamolosune.
ROM 11:35 Idoꞌ eveneꞌ hamolitesi nene Oꞌmosoꞌmo alingeꞌ do tibizo lemelive lo dinaꞌ ogo initeꞌ nene ngelo ma emamolosune.
ROM 11:36 Nanitekumuꞌ ve. Initeꞌ mukiꞌ nene eitokovoꞌ gelekeleꞌ i-dilizave losa asiꞌvevoꞌ initeꞌ mukiꞌ do sotoꞌ ogavo mo eitokovoꞌ lehete i minaaꞌ nave. Nemuꞌ nene Oꞌmoso opoꞌni lo mineloneꞌ nene huko vamivo ha miniliho.
ROM 12:1 Nemuꞌ nene neze zuhokizo, Oꞌmosoꞌmo neꞌmino muhelete ningo isete izaaꞌ neineꞌ nenako nemuꞌ nene naza agae lo do upuhoꞌ o-lengedo gatine do tiꞌ lo nolo-lingimuve: Ize ato atoꞌ ngibili Oꞌmoso lehizi-daaꞌ aniꞌ neꞌmine igi lingine okodine nene di kekeize li Oꞌmosoꞌmi monovolokovoꞌ di milikevosa Oꞌmosoꞌmo laniteꞌ gelelidoꞌ lisiheꞌ o minivo aꞌmine okodine nene lehizi-dilo. Idoꞌ lehizi-dilizaniꞌ okodine nene hele neivosa nevoba asi velesi ha minevoꞌ dovoꞌ neidoꞌ nesi nene lehizi-dilo. Neꞌmine ilizaniꞌ neve nene mo maduꞌninguꞌ gamazi neivete igaꞌ ilizaniꞌ o neineꞌ initeꞌ nenako aꞌmidoꞌ nene ha ilisave.
ROM 12:2 Me misubouꞌ minineꞌ monovo danava goloso nene di otuhi minamilo. Asi Oꞌmosoꞌmo lutine gatine do gosohoꞌ o-lengedavo neꞌmo nene aꞌmine gomuꞌ lengemeni dameni do hulosa nene do atoꞌ o-lengedavo minilo. Neꞌmine ilizaniꞌ nene Oꞌmosoꞌmo igi mili minilizave lo gele neineꞌ monovo adoꞌ monovo lamineꞌ eiꞌ gilidoꞌ gehepeve vo daaꞌ neineꞌ monovo adoꞌ aza aꞌminemuꞌ laniteꞌ gelelidoꞌ lisiheꞌ o neineꞌ monovo nene igi mili minilizaniꞌ nenako nelotiꞌ nene eiꞌ gelaaꞌ neineꞌ monovo nene ningi gililisave.
ROM 12:3 Idoꞌ Oꞌmosoꞌmo nasahiliꞌ o-nedo neniꞌ moꞌmosiꞌne mene lehize-nidineꞌ nenako nemuꞌ nene naza lingine luvoniꞌ neꞌmine ilizangumuꞌ ve losa nene lengiꞌ hamo hamoꞌ nene tiꞌ lo nolo-lingimuve: Lingine Oꞌmosomuꞌ gili eleꞌvoleꞌ ikevo amuzo lingimineꞌ nene hamo hamoꞌ nani amuzo lingimihe neꞌmi votigile gehepeveloꞌ di milisa lengikumuꞌ gilavo aꞌmine votigile ivileꞌ ogo dizalinaze. Lengikumuꞌ nene gili vevesisa minilo.
ROM 12:4 Lingine neꞌmine ilizave lo noluvoniꞌ nene nemuꞌ noluve: Eveneꞌ okodeloꞌ nene gizede ade neꞌmine initeꞌ nene ato atoꞌ vaiꞌ goloso neivo ingine mini gonoꞌine daaꞌ naniꞌ nene ato atoꞌ gono daaꞌ nave.
ROM 12:5 Aꞌmineꞌmine ogo Kilisitoda nene eveneꞌ mukiꞌ laza okoꞌno hamoꞌ neꞌmine loloꞌ ogo ato atoꞌ minamo ne hize eleꞌ o-gede ge hize eleꞌ o-nede lo minelonive nene none.
ROM 12:6 Idoꞌ Oꞌmosoꞌmo nasahiliꞌ o-ledo amuzo lehize-ledineꞌ nene hamoliꞌminevoꞌ lehize-ledamo ato atoliꞌmine lehize-lidineꞌ ve. Nemuꞌ nene Oꞌmosoꞌmo ve ma lehize-lede nolineꞌ amuzo nene Oꞌmosoꞌmi veletiꞌ gamazi lo soto sotoꞌ ogaꞌ amuzo nolineꞌ nene laza mo laꞌlisete gele eleꞌvoleꞌ o noloneꞌ votigileloꞌ nene do molosa Oꞌmosoꞌmi veletiꞌ gamazi nene lo soto sotoꞌ ogo lolosune.
ROM 12:7 Idoꞌ ve malite eveneꞌ ma hize eleꞌ o-ngedaaꞌ amuzo lehize-lede nolineꞌ nene mo ha eveneꞌ hize eleꞌ o-ngedo minelesune. Idoꞌ eveneꞌ initeꞌ ma apize ngemaaꞌ amuzo lehize-lede neineꞌ neivo ma nene mo ha apize ngemo minelesune.
ROM 12:8 Idoꞌ eveneꞌ gaꞌine do gamazi lo-ngemaaꞌ amuzo ma lehize-lede neineꞌ neivo ma nene ha mo gaꞌnine do gamazi lo-ngemaaꞌ olosune. Idoꞌ ve ma nene initeꞌ izeꞌ molo ngemaaꞌ amuzo lehize-de nolive neꞌmo nene mo inele ogo ngemeleseive. Idoꞌ ve maliꞌmo nene gomuꞌ molo-ngemaaꞌ amuzo do nolineꞌ nene aꞌmine gonoꞌve nene amuzo molo do mineleseive. Idoꞌ ve ma aza nasahiliꞌ o-ngedaaꞌ amuzo do nolive neꞌmo nene nasahiliꞌ o-ngedaakuꞌ nene olize izo minosa neꞌmine ilive.
ROM 12:9 Lingine eveneꞌ lutine ngimaaꞌ naaniꞌ monovo nene abeleni neꞌmine nomivo mo lutine ngimi gehepeve igi minilo. Monovo golosomuꞌ nene goseleꞌ lengebelavo mehedine imivoꞌ mini monovo laminetoꞌ nene giꞌmizi giliꞌ li minilo.
ROM 12:10 Hamoꞌ zuho liliꞌ igi nizanako nemuꞌ nene hamoꞌ zuholite luꞌine ne geme ge neme li minilizaniꞌ votigileloꞌ di mili lutine amuzo mili ge neme ne geme li minilo. Idoꞌ eveneꞌ di naba i-ngidaaꞌ monovomuꞌ nene aka ge nelebize ne gelebize li minilo.
ROM 12:11 Monokuꞌ mini gonotine di di vi minaaꞌ naaniꞌ nene goseleꞌ lengebelamivo mini Guvelesi ve nene lutine gilingili ivo gelekeleꞌ i-di minilo.
ROM 12:12 Lingine Kilisitoꞌ do lamineꞌ o-ledelesa neive li gili muꞌmusiꞌ igi gizebo nizaniꞌ nenako nemuꞌ aꞌminguꞌ nene longolizesi izisa minilo. Idoꞌ geni initeꞌ lengita sotoꞌ ilingumuꞌ nene monotine hulami aꞌmine geni nene hongu li mini gihi minilo. Idoꞌ Oꞌmosola li minilizaniꞌ nene hulami laakovoꞌ igi minilo.
ROM 12:13 Oꞌmosoꞌmi evenele linge malite initeꞌ mamuꞌ viseꞌ naavo ma nene hize eleꞌ i-ngidi ma ngimilo. Idoꞌ venenga ve neꞌmine ma nimonavo ma nene ngeleꞌmize lamineꞌ i-ngidi nasahiliꞌ i-ngidilo.
ROM 12:14 Lengiꞌ goboni mili-lingidilizavemuꞌ nene Oꞌmosoꞌmo noꞌnohoꞌ ize-ngedelive li ezela lilo. Ee, usiꞌ ize-ngedelive lamisa asi noꞌnohoꞌ ize-ngedelingumuꞌ nene eita lilo.
ROM 12:15 Idoꞌ ve ma ingine initeꞌ mamuꞌ ngolize izi nizavo ma nene linginesi aꞌminguꞌ mini makatoꞌ longolize izi minilo. Idoꞌ ve ma ingine initeꞌ mamuꞌ mulumo alumo gili nizavo ma nene linginesi aꞌminguꞌ mini mili makatoꞌ mulumo alumo gili minilo.
ROM 12:16 Lingine lengiꞌ hamo hamokumuꞌ nene di dizi limi gilami asi hamoꞌ monovoloꞌ nene di milisa minilo. Ee, lengiꞌ okodine nene di dizami asi eveneꞌ limi minavesi nene bizi monilo. Idoꞌ laꞌmo nene otohato ve none li okodine di dizamilo.
ROM 12:17 Eveneꞌ malite di goloso i-lingidikevo ma nene aꞌmidoꞌ di tineꞌ mili di goloso i-ngidamilo. Asi eveneꞌ mukiliti veꞌnidoꞌ nene monovo lamineꞌ ogave li ningilizaniꞌ monovovoꞌ nene igi mili minilo.
ROM 12:18 Lingine eveneꞌ ato atoꞌ mukikisi lovo lolize ami hongu li laminivoꞌ minilizaniꞌ aka ma neivo ma nene aꞌmine akalokovoꞌ nene eꞌmeti minilo. Lengitatiꞌ neve nene lovo lolize di sotoꞌ amilo.
ROM 12:19 Luꞌne lengeme nouvoniꞌ alevekizo, eveneꞌ malite lutine di goloso igi lihime nimili-lingidavo ma aꞌmidoꞌ golo hizi aꞌmineꞌmine i-ngidamilo. Asi Oꞌmosoꞌmo izeboloꞌ molavo lihime ngemelize. Ningi mati ngimikilo. Aꞌmine nemuꞌ monoꞌ godolouꞌ tiꞌ li gizi nizaniꞌ ma neive: Guvelesi veꞌmo tiꞌ lo lineꞌ ve: Lihime ngemaaꞌ gono nene neniꞌ gono nenako lihime nene neniꞌ ngemelesuve.
ROM 12:20 Mo neꞌmine igi langisetine nene lihime ngimamilisaha monoꞌ godolouꞌ tiꞌ li gizi nizadoꞌ nene eꞌmetilisave: Lengiꞌ biluvaꞌ i-lingidaaꞌ nave ingine gaꞌna hili nizavo ma nene di veꞌine milalo. Idoꞌ nosomuꞌ gaꞌna hili nizavo ma nene noso ngimilo. Lingine neꞌmine i-ngidilizaniꞌ neꞌmo nene ngovozo naba goloso nene engita dizavo oloꞌ vele nene godoꞌnidoꞌ mili-ngidaniꞌ geleleseive.
ROM 12:21 Idoꞌ goloso monovo neꞌmo nene lingivileꞌ ogalize. Asi monovo lamineꞌ igi mili minilizaniꞌ neꞌmo nene monovo goloso nene ivileꞌ igi di limi-di minilo.
ROM 13:1 Idoꞌ eveneꞌ ma ngamani gono veleloꞌ nizaniꞌ nene Oꞌmosoꞌmo lamivosa nene hamokisi ma nizavoba asi eiꞌ Oꞌmosoꞌmo ngeleꞌmize molavosavoꞌ nene nizanako nemuꞌ nene eveneꞌ mukiꞌ lingine ngamani alevete ladoꞌ nene eꞌmeti gelekeleꞌ i-ngidilo.
ROM 13:2 Idoꞌ Oꞌmosoꞌmo ngeleꞌmize molaniꞌ nenako nemuꞌ nene engiꞌ gamaziloꞌ ma peleseveꞌ izilizaniꞌ nene Oꞌmosoꞌmo lidoꞌ sotoꞌ aveti gamaziloꞌ nene peleseveꞌ izilizaniꞌ nenako mo angiseꞌine neꞌmine ilizadiꞌmo nene lihime dalisave.
ROM 13:3 Ee, ngamani nete eveneꞌ ma golise gililiza initeꞌ ngisilizaniꞌ nene monovo laminekovoꞌ igi mili minilizave nene golise gililiza initeꞌ ngisilizavoba asi monovo goloso igi mili minilizavevoꞌ nene neꞌmine i-ngidilisave. Lingine ngamanimuꞌ golise gelamo mineloneꞌ akaꞌve nene do sotoꞌ olone li gilisa viseꞌ nahe. Monovo laminekovoꞌ igi mili minilo. Neꞌmine ikevo ngamani nete siza li-lingidilisave.
ROM 13:4 Idoꞌ siza li-lingidilizaniꞌ nene Oꞌmosoꞌmo ngeleꞌmize molavo eiꞌ gelekeleꞌ ve miniisa lengiꞌ lengeleꞌmize lamineꞌ ilisa gono nene daaꞌ naniꞌ nenako nemuꞌ nene lingine monovo lamineꞌ igi mili minilizangumuꞌ nene siza li-lingidilisave. Ne neiha monovo goloso ilizaniꞌ nene ngamanite lihime lingimilizaniꞌ amuzo nene hazamuꞌ di minamaniꞌ nenako nemuꞌ nene golise gili minilo. Nene nanitekumuꞌ ve. nGamani nete nene monovo goloso igi mili minilizaveti monovoloꞌ golo hizi lihime ngimilizangumuꞌ nene Oꞌmosoꞌmi gonoloꞌ izipeꞌve nizaniꞌ nemuꞌ ve.
ROM 13:5 Nemuꞌ nene laza ngamani alevete lilizadoꞌ eꞌmeto gelekeleꞌ o-ngedeloneꞌ o neive. Idoꞌ Oꞌmosoloꞌ medeli lihime lingimilizangumukovoꞌ nomive. Asi luteliꞌmo ngamani gamaziloꞌ peleseveꞌ izaaꞌ neꞌmo nene goloso ve lo lo-lemaaꞌ neinako nemukisi nene ngamaniloꞌ gelekeleꞌ o-ngedeloneꞌ o neive.
ROM 13:6 Idoꞌ nemukisi nene ngamanila takisi moni huli-ngidilizaniꞌ o neive. Ingine Oꞌmosoꞌmi gonouꞌ izipeꞌve mini aꞌmine noluvoniꞌ gono nene daaꞌ nave. Nemuꞌ nene gelekeleꞌ i-ngidilo.
ROM 13:7 Eveneꞌ mukiꞌ hamo hamoꞌ ngimikaꞌ ngimikaꞌ ilizadoꞌ lisiheꞌ o neineꞌ initeꞌ nene mo ha ngimilo. Takisi moni ato atoliꞌmine eveneꞌ ngimilizadoꞌ o nolineꞌ nene ma ngimilo. Idoꞌ eveneꞌ ma dizi minave minikevo ma nemuꞌ nene lengehelele izivo mini di hozi li-ngidilizadoꞌ o neivo ma aꞌmine alevemuꞌ nene lengehelele izivo mini di hozi li-ngidilo.
ROM 13:8 Idoꞌ linginela golo hizamaniꞌ dinaꞌ ma neivo ma nene geti golo hizi ngimilo. Eveneꞌ hamotasi dinaꞌ igisa haza huliki minamilo. Idoꞌ lingine dinaꞌ nene di minami golo hizi osukovoꞌ lilizave lo noluvoniꞌza linginela dinaꞌ neꞌmine ma minaaꞌ neineꞌ adoꞌ ngeli bekimi amilizaniꞌ o minaaꞌ neineꞌ nene ma neive. Aꞌmine dinaꞌ nene lingine lutine ge neme ne geme li minilizadoꞌ o neineꞌ initeꞌ nemuꞌ nene noluve. Idoꞌ neꞌmine noluvoniꞌ nene eveneꞌ malite eveneꞌ ma luꞌine ngimilizave ingine neꞌmine ilizangumuꞌ nene Oꞌmosoꞌmi louꞌ gamaziꞌveloꞌ mo eꞌmeti osuꞌ lilizaniꞌ nenako nemuꞌ nene noluve.
ROM 13:9 Ee, Oꞌmosoꞌmo lo huko lineꞌ gamazi adoꞌ veneꞌ vemohoꞌ liliꞌ ikeniꞌ nete veneꞌ vemohoꞌ masi gopo ingamilo, idoꞌ eveneꞌ ma ngibili hilamilo, idoꞌ gumine amilo, idoꞌ eveneꞌ maliti initeꞌnidoꞌ mumuzoꞌ amilo lineꞌ gamazisi idoꞌ Oꞌmosoꞌmo lo huko lineꞌ gamazi ato atoꞌ mukiꞌ nesi nene adoꞌ gamazi tiꞌ lo ma neineꞌ neꞌmo nene asabuꞌ izo osuꞌ lo neive. Adoꞌ lingine lengiꞌ okodinemuꞌ gilaaꞌ naniꞌ neꞌmini lengiꞌ nizada minilizavemuꞌ nene gili lutine ngimilo.
ROM 13:10 Lute ngemaaꞌ nooloneꞌ nene leliꞌ nonida minilizave nene ngelo do goloso o-ngedamolosunako nemuꞌ laza lute eveneꞌ ngemaaꞌ oloneꞌ neꞌmo nene Oꞌmosoꞌmi louꞌ gamazi mukiꞌ nene mo eꞌmeto osuꞌ gehepeve lolosune.
ROM 13:11 Neꞌmine igisa idise gameneꞌmi monovomuꞌ nene gili minilisave. Adoꞌ apiꞌ ogo Kilisitoꞌnimuꞌ gele eleꞌvoleꞌ unidotiꞌ nene Oꞌmosoꞌmo mudise do luꞌ izelineꞌ gamene nene avitoꞌ oꞌmo ogo mino idise mo avitoꞌ oganako nemuꞌ nene lingine lutine okise ongo helo miningutiꞌ upuhoꞌ igi di oti-dilizaniꞌ o neineꞌ gamene nene mo ogave.
ROM 13:12 Monovo goloso dizo minineꞌ gamene adoꞌ litiꞌmuso ize minineꞌ gamene nene voꞌmo voꞌmo vo osuꞌ lolosa neivo goꞌ lo labanaꞌ elelineꞌ gamene nene mo avitoꞌ ogaze. Nemuꞌ nene litiꞌmusouꞌ minave monovo goloso igi mili minaaꞌ naniꞌ nene lingine vasa izi huli hotoꞌ igi monovo goloso lovo i imilisa lovouꞌ initeꞌ neꞌmine Oꞌmosoꞌmi labanakuꞌ minavete igi mili ilizadoꞌ lisiheꞌ o neineꞌ monovo lamineꞌ nene di otuhi minilo.
ROM 13:13 Ee, eveneꞌ labanakuꞌ sotoꞌ igi monave nete monovo lisiheꞌ laminekovoꞌ igi mili minaaꞌ adiꞌmine ogo laza nene monovo laminekovoꞌ ogo molo mineloneꞌ o neize. Noso ni sipaki igi longolize izamilo. Ee, mo noso ni sipaki amilo. Idoꞌ veneꞌ vemohoꞌ alu gipe lingine gopo ingamilo. Idoꞌ longovozo hilami monovo goloso galasa gopo igaꞌ monovo nene mo amilo. Initeꞌ mamuꞌ lavodine lemavo eveneꞌ mamuꞌ nene gili goloso amilo.
ROM 13:14 Neꞌmine monovo goloso nene ogalone li lepesetine neꞌmine Guvelesi ve Izesuꞌ Kilisitoꞌni nene di kisi mini lengemeni dameni liteheliꞌmo laniteꞌ gelaaꞌ neineꞌ monovo goloso dalizangumuꞌ aka viseꞌ igaꞌ naniꞌ nene mudise hulilo.
ROM 14:1 Idoꞌ monokuꞌ gilizevo igi minave ma lengita ikevo ma nene ha ngeleꞌmizi milalo. Idoꞌ ngeleꞌmizi milalizaniꞌ nene ingine lingine gatine giladoꞌ vo lisiheꞌ amilineꞌ gaꞌine gili nilizangumuꞌ nene lesisi igi gamazidunuꞌ ge hulo ne hulo lilisamuꞌ nene ngeleꞌmizi milamilo.
ROM 14:2 Nene adoꞌ neꞌminemuꞌ noluve. Eveneꞌ malite gilavo initeꞌ ato atoꞌ mukiꞌ naaꞌ nene ha neive. Ne neiha eveneꞌ linge ma monokuꞌ gilizevo igi mini ize malise igi minguꞌ initekovoꞌ naaꞌ nave.
ROM 14:3 Nosoꞌ niteꞌ ato atoꞌ mukiꞌ naaꞌ nave nete nosoꞌ niteꞌ ma malise igaꞌ navemuꞌ nene gilavo haza niteꞌ ve li gilikelizave. Idoꞌ Oꞌmoso neꞌmo nene nosoꞌ niteꞌ mukiꞌ gopo naaꞌ avesi nene mo eiꞌ ve lo ngeleꞌmize molaniꞌ nenako nemuꞌ nene nosoꞌ niteꞌ malise igaꞌ ave nete nosoꞌ niteꞌ mukiꞌ gopo naaꞌ aveti monovomuꞌ nene izeꞌ mili lamilizadoꞌ o neive.
ROM 14:4 Lingine gilavo eveneꞌ atoꞌ neꞌmi gelekeleꞌ izipeꞌveti monovomuꞌ izeꞌ molo laaꞌ nene lisiheꞌ o neivosa nahe. Oꞌove. Neꞌmino nomive. Engiꞌ monovoꞌinemuꞌ lilive nene engiꞌ meꞌniboꞌmovoꞌ nene izeꞌ molo loloseive. Idoꞌ meꞌnibo Oꞌmosoꞌmo gelavo monovoꞌine lamineꞌ neinako ha oti minilisave lilihe idoꞌ monovoꞌine goloso neinako diꞌmozilisave lilihe nene mo eitokovoꞌ neive. Idoꞌ eiꞌ Oꞌmosoꞌmo do ote-ngedelidoꞌ lisiheꞌ o neinako ingine mo oti minilisave.
ROM 14:5 Idoꞌ gamene hamo hamokumuꞌ giluneꞌ nene eveneꞌ linge ma nete gilavo gamene nene dizi limi minaaꞌ naha eveneꞌ linge ma nete gilavo gamene mukiꞌ nene dizi limi minami mo hamoliꞌminevoꞌ minaaꞌ nave. Lingine eveneꞌ malite gilangumuꞌ izeꞌ mili lami hamo hamoꞌ aꞌmine gamenemuꞌ gilavo lisiheꞌ ilineꞌ akamuꞌ nene gili eleꞌvoleꞌ igi aꞌmidoꞌ eꞌmeti minilo.
ROM 14:6 Eveneꞌ ma ingine gamene mamuꞌ nene gamene naba ve li gilaaꞌ naniꞌ nene Guvelesi vemuꞌ gili neꞌmine igaꞌ nave. Idoꞌ eveneꞌ ma nosoꞌ niteꞌ ato atoꞌ mukiꞌ naaꞌ naniꞌ nene aꞌmine nosoꞌ nitekumuꞌ nene Oꞌmoso tangezoꞌ ve li opoꞌni li-daaꞌ naniꞌ nenako neve nene mo Guvelesi vemuꞌ gili minisa naaꞌ nave. Idoꞌ eveneꞌ ma ingine nosoꞌ niteꞌ ma malise igaꞌ nave ingine Guvelesi vemuꞌ gili malise igi inginesi Oꞌmoso tangezoꞌ ve li opoꞌni li-daaꞌ nave.
ROM 14:7 Idoꞌ neꞌmine noluvoniꞌ nene nemuꞌ noluve: Laza minevoꞌ alevoꞌ oloneꞌ nene Guvelesi vemuꞌ minevoꞌ alevoꞌ olosune. Idoꞌ heleloneꞌ nesi nene Guvelesi vemuꞌ helelesune. Nemuꞌ nene laza minevoꞌ alevoꞌ oloneꞌ nene eveneꞌ hamolitesi lelikumukovoꞌ nene ma minevoꞌ alevoꞌ osaꞌmune. Idoꞌ heleloneꞌ nene hamolitesi lelikumukovoꞌ nene ma helesaꞌmune. Nemuꞌ nene minevoꞌ alevoꞌ ogo minelobe idoꞌ helelobe nene Guvelesi veꞌmi evenelevoꞌ nene minelesune.
ROM 14:9 Nemuꞌ nene Kilisitoꞌ aza eveneꞌ veꞌinesi ha nizaveti Guveꞌinesi ve mino hili nizaveti Guveꞌinesi ve nesi nene minelongumuꞌ ve losa hilineꞌ ve. Idoꞌ nemukisi nene oto minevoꞌ minevoꞌ ogo neive.
ROM 14:10 Idoꞌ laza mukitoꞌ Oꞌmosoꞌmo goniꞌ o-ledelidoꞌ eze veleloꞌ vo otekunivo mukitoꞌ nene eiꞌ izeꞌ molo-ledelineꞌ o neinako lingine linge ma lengiꞌ zuholiti monovoꞌinemuꞌ izeꞌ mili laaꞌ naniꞌ nene nanimuꞌ nave. Idoꞌ linge ma nete lengiꞌ zuho mamuꞌ gilavo lemo haza niteꞌ loloꞌ ogaꞌ neineꞌ nene nanimuꞌ nave.
ROM 14:11 Idoꞌ Oꞌmosoꞌmo goniꞌ o-ledelidoꞌ nene ha volosune noluvoniꞌ nene monoꞌ godolouꞌ gamazi ma tiꞌ li gizi nizaniꞌ neineꞌ nenako nemuꞌ nene noluve: Guvelesi veꞌmo tiꞌ lo nolive: Naza nouvoniꞌ nene soza nomive. Mo gamazi gihile laminetoꞌ neive. Idoꞌ aꞌmineꞌmine ogo naza eveneꞌ hamo hamoꞌ mukiꞌ lingine obuvotine hizi neniꞌ gubiꞌ izi nimi Gaza Oꞌmoso gihile nane li li sotoꞌ ilisave lo noluvoniꞌ nene gamazi gihile laminekovoꞌ noluve.
ROM 14:12 Nemuꞌ nene laza eveneꞌ hamo hamoꞌ mukiꞌ leliꞌ ogo molo minuneꞌ monovote nene lo sotoꞌ ogo lo-emelesune.
ROM 14:13 Nemuꞌ nene laza ge izeꞌ molo-nede ne izeꞌ molo-gede lo minaaꞌ monovo nene hulo gohi amolone. Asi lingine tiꞌ li gili minilo. Leze zuho ma nene limi ingikelizaze. Laza ngeleꞌmize goloso ogaꞌ monovo nene amolone.
ROM 14:14 Naza Guvetesi ve Izesuda giꞌmize nouvonako neꞌmo nene tiꞌ lo gele eleꞌvoleꞌ gehepeve o nouve: Nosoꞌ niteꞌ leliꞌ lute do goloso o-ledaaꞌ emeni damenisi minineꞌ nosoꞌ niteꞌ ma nomive. Ne neiha eveneꞌ malite initeꞌ mamuꞌ nene lute do goloso ogaꞌ initeꞌ ve li gililizaniꞌ nene aꞌmine initeꞌ neve nene engiꞌ luꞌine do goloso ogaꞌ initeꞌ loloꞌ oloseive.
ROM 14:15 Ne neiha lingine lengiꞌ zuho malite nosoꞌ niteꞌ mamuꞌ nene lute do goloso ogaꞌ initeꞌ ve li gili nizaniꞌ nosoꞌ niteꞌ ma gopo naaꞌ ilizadiꞌmo nene aꞌmine lingine zuho di goloso i-ngidilizaniꞌ nene mo lutine ngemaaꞌ monovoloꞌ eꞌmetami minilisanako nemuꞌ nene lingine neꞌmine ogo leze zuho ngeleꞌmize goloso ogaꞌ monovo ma amolone li gili minisa nosoꞌ niteꞌ nalizadotiꞌ nene Kilisitoꞌ engitoꞌ hilive nene vi tolovo ilizaniꞌ akaloꞌ ngeleꞌmizi milamilo.
ROM 14:16 Nosoꞌ niteꞌ ma nalobe idoꞌ malise ogo minelobe neꞌmo nene Oꞌmosoꞌmo gizebo o neineꞌ akauꞌ nene initeꞌ naba nomive. Asi Oꞌmosoꞌmi Sikalahuꞌ neꞌmo nene do sotoꞌ o-ledaaꞌ monovo adoꞌ monovo lisiheꞌ laminekovoꞌ ogo molo minaaꞌ nesi idoꞌ muludeuꞌ hongu lo lamino minaaꞌ nesi idoꞌ luteuꞌ gulumo avile lisivo minaaꞌ monovo nesi nene initeꞌ naba neineꞌ nenako nemuꞌ nene lingine monovo lamineꞌ nehe li nosoꞌ niteꞌ ha gopo nikevo lengemenga likelizaze. Alamilo.
ROM 14:18 Neꞌmine igi Kilisitoda gelekeleꞌ i-di minilizave ingine nene Oꞌmosoꞌmo mulunouꞌ lamineꞌ gelelineꞌ initeꞌ igi mili mini eveneꞌ nesi ningavo lisiheꞌ ilineꞌ monovoloꞌ nene eꞌmeti minilisave.
ROM 14:19 Nemuꞌ nene lingine lengikuꞌ hongu li bizi lamini miniliza monovolokisi idoꞌ monokuꞌ ne hize eleꞌ o-gede ge hize eleꞌ o-nede li minilizadoꞌ lisiheꞌ o neineꞌ monovo ato atokisi nene amuzo mili eꞌmeti minilo.
ROM 14:20 Nosoꞌ niteꞌ ha gopo nalizaniꞌ neꞌmo nene lingine Oꞌmosoꞌmi gono di goloso amilo. Nosoꞌ niteꞌ ato atoꞌ mukiꞌ nene lute do goloso amaaꞌ neiha ha gopo nokunivo neꞌmo nene eveneꞌ linge ma monokutiꞌ limi ingalizaniꞌ nene monovo goloso olosune.
ROM 14:21 Nemuꞌ nene ize meꞌmele nehe vaini noso nehe initeꞌ ma nehe nene lingine nalizadiꞌmo lengiꞌ zuho linge ma monoꞌ akalotiꞌ nene vi zovoꞌ izilizaniꞌ nene lingine aꞌneꞌmine initeꞌ malise ilizaniꞌ nene lamineꞌ o neive.
ROM 14:22 Idoꞌ aꞌneꞌmine initekumuꞌ nene lingine hamo hamoꞌ gilaniꞌ nene lengikisi Oꞌmosolokisivoꞌ neivo lengiꞌ hamo hamokovoꞌ gili minilo. Eveneꞌ ma nete monovo mamuꞌ nene neꞌmine ogaꞌ ha neive li gilangumuꞌ nene engiꞌ luꞌineꞌmo goloso ve lo goniꞌ o-ngedamilineꞌ nene engiꞌ minevoꞌ alevoꞌine lamineꞌ neivo ngolize izilizadoꞌ lisiheꞌ o neive.
ROM 14:23 Eveneꞌ ma initeꞌ mamuꞌ nene naloneꞌ lute do goloso ilihe li gaꞌine setaꞌ gili minisasi aꞌmine initeꞌ gopo nalizaniꞌ nene mo Oꞌmosoꞌmo lihime molo-ngedeleseive. Nene nanitekumuꞌ ve. Laza initeꞌ mamuꞌ nene monovo lisiheꞌ ve lo gele eleꞌvoleꞌ amosasi ha gopo oloneꞌ nene monovo goloso uneꞌ gelavo lihime daloneꞌ nenako idoꞌ ingine aꞌmine initeꞌ naaꞌ nene lisiheꞌ o neive li gili eleꞌvoleꞌ amisa nalizaniꞌ o neinako nemuꞌ nene Oꞌmosoꞌmo lihime molo-ngedeleseive.
ROM 15:1 Laza monokuꞌ amuzo molo nonive nene leliꞌ lutelokovoꞌ ogo molo minamo monokuꞌ gilizevo i nizave hize eleꞌ o-ngedo engiꞌ geni ngibilineꞌ initeꞌ nene lazasi gehe-ngedelonidoꞌ o neive.
ROM 15:2 Laza hamo hamoꞌ mukiꞌ nene leze zuho monokuꞌ do amuzo molo-ngedelingumuꞌ ve lo do lamineꞌ o-ngedelesa nene ingine gilavo lamineꞌ ilineꞌ initekovoꞌ ogo molo minukeꞌzo.
ROM 15:3 Nene nanitekumuꞌ ve. Laza nene Kilisitoꞌ idiꞌmine ogo ogo molo mineloneꞌ o neinako nemuꞌ ve. Kilisitoꞌ aza nesi eiꞌ lulolokovoꞌ ogo molo amineꞌza monoꞌ godolouꞌ tiꞌ li gizi nizaniꞌ nene eitoꞌ gihile izineꞌ ve: Oꞌmosoo, geiꞌ divi lediviꞌ i-gidaaꞌ avete divi lediviꞌ i-gidi laniꞌ neꞌmi geniꞌve nene neniꞌ nogihuve.
ROM 15:4 Idoꞌ naza monoꞌ godolouꞌ gizi nizaniꞌ gamazimuꞌ noluvoniꞌ nene nemuꞌ noluve: Gozopoꞌ gizi nizaniꞌ gamazi mukiꞌ nene Oꞌmosoꞌmo aꞌmine gamazi leliꞌ nene monoꞌ apize lemelive lo gelo lavo gizi nizaniꞌ ve. Ee, monokuꞌ amuzo mili mini geni ha gihi di dizi minilizadoꞌ nene aꞌmine gamazi neꞌmo luꞌine do ngi lo-ngedavo gaꞌine sitaꞌ gilami lukuvo nalizangumuꞌ nene gilingili igi gizebo igi minilizave lo gelo Oꞌmosoꞌmo lavosa aꞌmine gamazi nene gizi nizaniꞌ ve.
ROM 15:5 Idoꞌ lingine lutine gatinesi idoꞌ gamazitinesi nene di hamoꞌ igisa Guvetesi ve Izesuꞌ Kilisitoꞌ melehine Oꞌmoso nene opoꞌni li di naba i-dilizave lo monokuꞌ amuzo molo geni gehe do dizo minaaꞌ monovo idoꞌ lute do ngi laaꞌ monovo do sotoꞌ ive Oꞌmoso neꞌmo nene lingine Izesuꞌ Kilisitoꞌni eꞌmeti nizavo gatine gilaaꞌ naniꞌ nene do hamoliꞌmine o-lengedeliho.
ROM 15:7 Nemuꞌ nene Oꞌmoso opoꞌni li di naba i-dilizangisi Kilisitoꞌ aza lengikisi lengeleꞌmize lamineꞌ idiꞌmine igi lingine ge neleꞌmize lamineꞌ o-nede ne geleꞌmize lamineꞌ o-gede li minilo.
ROM 15:8 Idoꞌ Kilisitoꞌ lengiꞌ eveneꞌ ato atoꞌ lengeleꞌmize lamineꞌ ineꞌ gamazi noluvoniꞌ nene nemuꞌ noluve: Kilisitoꞌ aza Oꞌmosoꞌmo gamazi laminetokovoꞌ laaꞌ neineꞌ nene do sotoꞌ ogo Oꞌmosoꞌmo Zuda veti avotemotinemuꞌ lo huko lo-ngidineꞌ gamazi nene do gihile izelesa gelekeleꞌ ve loloꞌ ogo Oꞌmosoꞌmi noso okodela mulunive Zuda ve lelita nene gono daniꞌ ve.
ROM 15:9 Idoꞌ Zuda ve lelikumukovoꞌ aniꞌ nevoba asi Oꞌmosoꞌmo heta atoꞌ vesi iseꞌine izavo inginesi aꞌminemuꞌ opoꞌni li di naba i-dilizangumuꞌ ve losa nene engikumukisi aniꞌ ve. Idoꞌ neꞌmine ineꞌ nene monoꞌ godolouꞌ tiꞌ li gizi nizadoꞌ nene eꞌmetosa neꞌmine ineꞌ ve: Nemuꞌ nene Oꞌmosoo, heta atoꞌ veti vovoꞌninguꞌ mino gopoꞌni lolosuve. Ee, geiꞌ guliveka do hozi lo nama lolosuve.
ROM 15:10 Idoꞌ ma nene tiꞌ li gizi nizaniꞌ ve: Heta atoꞌ ve lingine Oꞌmosoꞌmi evenelesi makatoꞌ longolize izi minilo.
ROM 15:11 Idoꞌ gohi ma tiꞌ lo neive: Heta atoꞌ ve lingine mukiꞌ nene Oꞌmoso opoꞌni li minilo. Ee, eveneꞌ zuho ato atoꞌ mukiꞌ ingine nene Oꞌmoso opoꞌni li minilizaniꞌ o neive.
ROM 15:12 Idoꞌ polohete Isaiaꞌ nesi nene tiꞌ lo ma lineꞌ ve: Guvelesi ve Davidiꞌ meleho Zesaiꞌ aꞌvopilemoꞌ zuhoutiꞌ nene ve ma sotoꞌ oloseive. Aza nene heta atoꞌ veti guveꞌinesi ve loloꞌ ogo gizebo o-ngedo neivo heta atoꞌ ve ingine gilingili igi ezemuꞌ gili eleꞌvoleꞌ ilisave.
ROM 15:13 Idoꞌ lukuvo naloningumuꞌ nene gele muꞌmusiꞌ ogaꞌ monovo do sotoꞌ ive Oꞌmosomuꞌ nene gili eleꞌvoleꞌ igi nizavo aza lavo muludinguꞌ nene gulumo avile atoliꞌmine ogo lisivo hongu gehepeve lo neivo Oꞌmosoꞌmi Sikalahuꞌ neꞌmo lukuvo nalizangumuꞌ nene gili muꞌmusiꞌ ilizaniꞌ amuzo nene lengemavo neꞌmo vauve ilisa gili muꞌmusiꞌ igi minavoo.
ROM 15:14 Neze zuhokizo, neniꞌ lengikumuꞌ giluvoniꞌ nene mo neꞌmine losa gele eleꞌvoleꞌ ogo gele nouve: Adoꞌ lengita nene monovo lamineꞌ vaiꞌ lo neivo gamazi monovo ato atoꞌ mukiꞌ nene mo gili minisa lingine ne gaka doo do akaloꞌ o-gede ge gaꞌne doo do akaloꞌ o-nede li minilizadoꞌ lisiheꞌ i nizave losa gele nouve.
ROM 15:15 Neꞌmine lo gele nouha eze Oꞌmosoꞌmo neniꞌ ninge lamineꞌ do heta atoꞌ ve lengita gono nimineꞌ nenako nemuꞌ nene monoꞌ linge ma gohi do gatidoꞌ molalove lo luhuvo niteꞌ mene nogizuve. Idoꞌ gamazi linge ma nogizuvoniꞌ nene amuzo malehe gamazi nogizuvoniꞌza neemukisi nehelele izamivo ha nogizuve.
ROM 15:16 Ee, Oꞌmosoꞌmo Izesuꞌ Kilisitoꞌni gelekeleꞌ veꞌve loloꞌ ogo heta atoꞌ vemuꞌ nene gono daline lo neleꞌmize molavo naza evenetoꞌ medelo mino Oꞌmoso initeꞌ lehize-daaꞌ uve gelo Oꞌmosoꞌmi Sikalahuliꞌmo do kekeize lo-ngedavo Oꞌmosoꞌmo ninge lamineꞌ ilidoꞌ i nizavo naza heta atoꞌ ve nene Oꞌmosoꞌmine lehize-delove lo Oꞌmosoꞌmi gamazi lamineꞌ nene heta atoꞌ vesi lo soto sotoꞌ ogo lo-lengemaaꞌ nouve.
ROM 15:17 Nemuꞌ nene naza giluvo Izesuꞌ Kilisitoda giꞌmize mino Oꞌmosomuꞌ gono daaꞌ nouvoniꞌ nene dizo minavo naza aꞌminemuꞌ nolize izo mino laaꞌ nouve.
ROM 15:18 Idoꞌ initeꞌ mamuꞌ lolovoba asi Oꞌmosoꞌmi Sikalahuliꞌmo amuzo nemavo naꞌniseꞌne gamazi noluvosi idoꞌ ngehelele izelineꞌ initeꞌ osoꞌ amosoꞌ suno ato atoꞌ ngelebizo ogo molo nouvosi Kilisitoꞌ aza heta atoꞌ ve do eitoꞌ gelekeleꞌ o-ngedelesa ineꞌ initekumukovoꞌ nene lovoꞌ kiselevoꞌ ogo lolosuve. Idoꞌ noluvoniꞌ neꞌmine ogo Zelusalemi numuno ebetotiꞌ apiꞌ ogo Kilisitoꞌ gamaziꞌve lamineꞌ nene lo soto sotoꞌ oꞌmo vo mo Ililikumi misubola vo pelekuve.
ROM 15:20 Idoꞌ neꞌmine noogo naza eveneꞌ maliꞌmo gono dadoꞌ imineꞌ molo damo Kilisitoꞌ guliveꞌve olihe gilamadaavoꞌ nene ezemuꞌ gamazi lamineꞌ lo sotoꞌ ogo lo-ngemelove losa neniꞌ luꞌneꞌmo gilidoꞌ nene eꞌmetuvoniꞌ ve.
ROM 15:21 Neꞌmine nouvo monoꞌ godolouꞌ tiꞌ li gizikaniꞌ gamazi nene vo gihile izineꞌ ve: Ezemuꞌ gamazi gilamave ingine nene ningilisave. Ee, eze gamazi gilamave aꞌminemuꞌ gili guno ilisave.
ROM 15:22 Neꞌmine ogo gono do mineloniꞌ neidiꞌmo naza lengita alosa giluvoniꞌ akaꞌne nene hize tile-nidineꞌ ve.
ROM 15:23 Ne neiha idise mene noluvoniꞌ misubola nene gono daloniꞌ ebeꞌ gohi ma nomivo naza kilisimasi mukikuꞌ lengita volove lo amuzo molo giluvodoꞌ eꞌmeto lengita alosuve.
ROM 15:24 Idoꞌ alosuve noluvoniꞌ nene Sipeni misubouꞌ volosa aka novosa lingine ninge-lengedelesa lengita vo hetelo lengikisi nene gamene linge ma minekuvo aꞌmida voloniꞌ akaꞌne nene vili-nidi hize eleꞌ i-nidikevo volosuve lo gele nouvoniꞌ nemuꞌ noluve.
ROM 15:25 Ne neiha idise naza Oꞌmosoꞌmi evenele zuho Zelusalemi ebekuꞌ nizaniꞌ nene hize eleꞌ o-ngedelesa aꞌmida novuve.
ROM 15:26 Idoꞌ novuvoniꞌ nene Izesuꞌ evenele Makedonia misuboukisi Akaia misuboukisi Izesuꞌ evenele Zelusalemi ebekuꞌ minangutiꞌ gohoꞌ gahaliꞌ alevemuꞌ nene moni do nubuho ogo ngemelone lisa di nubuho aniꞌ nemuꞌ nene novuve.
ROM 15:27 Ee, angiseꞌnidatiꞌ neꞌmine olone li aniꞌza lute do lamineꞌ ogaꞌ initeꞌ Zuda velatiꞌ sotoꞌ ineꞌ nene heta atoꞌ ve lengita ma inele aniꞌ nenako nemuꞌ nene aꞌmidoꞌ golo hizi okode do lamineꞌ ogaꞌ initeꞌ lengita neineꞌ nene Zuda vela inele ma ilizaniꞌ o neidoꞌ nizanako aꞌmine aniꞌ initeꞌ nene engita dinaꞌ neꞌmine minineꞌ nene apaselidoꞌ o minineꞌ ve.
ROM 15:28 Idoꞌ aꞌmine gono do okuꞌ lo ingine monoꞌ gihile di sotoꞌ igi moni di nubuho aniꞌ mene dalizaveti aꞌninguꞌ gehepeve molosa Zelusalemi numuno ebeꞌ hulo lengita ogosa Sipeni misubola volosuve.
ROM 15:29 Idoꞌ naza lengita voloniꞌ nene Kilisitodatiꞌ noꞌnohoꞌ vauve elo do-lengedo alosuve lo gele nouve.
ROM 15:30 Neze zuhokizo, naza amuzo molo tiꞌ lo longoꞌ noo-lingiduve: Lingine Guvetesi ve Izesuꞌ Kilisitoꞌnimuꞌ ve li idoꞌ Oꞌmosoꞌmi Sikalahuliꞌmo lute ne geme ge neme lo minaaꞌ monovo do sotoꞌ o-ledaaꞌ neingumuꞌ ve li naza amuzo molo Oꞌmosola laaꞌ nouvodiꞌmine igi linginesi imineꞌ mili nenikumuꞌ nene amuzo mili Oꞌmosola liꞌmi vi minilo.
ROM 15:31 Idoꞌ Oꞌmosola lilizaniꞌ nene naza Zudaia misubouko volonguꞌ nene aꞌmida Kilisitoꞌnimuꞌ gili eleꞌvoleꞌ amavelite nibililisa gili nilizangutiꞌ nene lukuvo nalongumuꞌ ve li idoꞌ Izesuꞌ evenele zuho Zelusalemi numunguꞌ nizaniꞌ ingine do vo ngemeloniꞌ initekumuꞌ oꞌove lami luꞌine laminetotiꞌ dalizave li Oꞌmosola lilo.
ROM 15:32 Idoꞌ neꞌmine likevo Oꞌmosoꞌmo gele lengemavo neꞌmo nene naza luꞌneuꞌ gulumo avile lisivo Oꞌmosoꞌmi luloloꞌ nolineꞌ nene lengita ogo hetelo lengikisi mino hepeꞌ doo lamineꞌ gelelongumuꞌ nene Oꞌmosola lilo.
ROM 15:33 Hongu lo lamino minaaꞌ monovo lemaaꞌ ive Oꞌmoso nene lengiꞌ mukita minivoo. Mo neꞌmino miniliho.
ROM 16:1 Alungo ma gulive Hoibeꞌ lengita naaniꞌ nene nasahiliꞌ i-dilizave lo eze monovoꞌve tiꞌ lo nolo-lingimuve: Aza nene Izesuꞌ evenele Kenekelea ebekuꞌ mulise milaaꞌ nada monoꞌ gono daaꞌ ineꞌ alu nene neive.
ROM 16:2 Nemuꞌ nene Izesuꞌ evenele zuho ilizadoꞌ lisiheꞌ o neineꞌ monovoloꞌ nene eꞌmeti Guvelesi vemuꞌ ve li eleꞌmize lamineꞌ ilizave lo noluve. Idoꞌ aza nene eveneꞌ vaikisi nenikisi hize eleꞌ o-ledaaꞌ ineꞌ nenako nemuꞌ nene initeꞌ neꞌmine manaꞌminemuꞌ viseꞌ ilineꞌ nene lingine hize eleꞌ i-dilo.
ROM 16:3 Idoꞌ nezesi makatoꞌ Izesuꞌ Kilisitoꞌ gono daaꞌ uneꞌ aleve Pilisikangi idoꞌ vanaho Akuilangi nene ngopoꞌni noluze. Li-ngimilo.
ROM 16:4 Ingine nene ngibili hilaaꞌ akaloꞌ vi neniꞌ lukuvo nimasineꞌ ve. Nemuꞌ nene naza engikumuꞌ isetine ve lo muluꞌneuꞌ lamineꞌ gelaaꞌ nouve. Idoꞌ nenikovoꞌ nevoba asi Izesuꞌ evenele zuholiti mulise mukiꞌ heta atoꞌ vetinguꞌ miniꞌmi monaniꞌ inginesi nene aꞌminemuꞌ muluꞌninguꞌ lamineꞌ gilaaꞌ nave.
ROM 16:5 Idoꞌ engiꞌ numuꞌninguꞌ mulise milaaꞌ navesi nene ngopoꞌni noluze. Li-ngimilo. Idoꞌ Asia misubouꞌ aleveutiꞌ ganaꞌ Kilisitoda vo giꞌmizive luꞌne eme nouve Epainetoꞌni nesi nene opoꞌni noluze. Li-imilo.
ROM 16:6 Idoꞌ lengitoꞌ gono amuzo molo daaꞌ ineꞌ alu Maliaꞌni nesi nene opoꞌni noluze. Li-imilo.
ROM 16:7 Idoꞌ neniꞌ neꞌmini Zuda ve minasive nenikisi makatoꞌ galapusoloꞌ minunive Adilonikongi Zuniangi nene ngopoꞌni noluze. Li-ngimilo. Aposololiti muliseuꞌ nene engiꞌ guliveꞌine dize minineꞌ ve. Idoꞌ ingine nene gomuꞌ mili nimi Kilisitoda vi giꞌmizi minasineꞌ ve.
ROM 16:8 Idoꞌ Guvelesi vela giꞌmizusive luꞌne eme nouve Abiliatoꞌnisi nene opoꞌni noluze. Li-imilo.
ROM 16:9 Idoꞌ makaꞌ Kilisitoda gono daaꞌ unive Ulubanoꞌnisi idoꞌ luꞌne eme nouve Sitakiꞌni nesi nene ngopoꞌni noluze. Li-ngimilo.
ROM 16:10 Idoꞌ Kilisitoꞌnimuꞌ gele eleꞌvoleꞌ ogaꞌ ive gehepeve Apeleꞌni nesi opoꞌni noluze. Li-imilo. Idoꞌ Alisitobuloꞌ zuho nesi nene ngopoꞌni noluze. Li-ngimilo.
ROM 16:11 Idoꞌ neniꞌ neꞌmine Zuda ve minive Helodiaꞌnisi nene opoꞌni noluze. Li-imilo. Idoꞌ Nalakisoꞌ zuho nesi nene Guvetesi veꞌmi zuho nizanako engikisi nene ngopoꞌni noluze. Li-ngimilo.
ROM 16:12 Idoꞌ Guvelesi veꞌmi gono amuzo mili daaꞌ asive Tilihainangi Tilihosangi nesi nene ngopoꞌni noluze. Li-ngimilo. Idoꞌ Guvelesi veꞌmi gono vaiꞌ amuzo molo daaꞌ ineꞌ alu Pelesiꞌni nesi nene opoꞌni noluze. Li-imilo.
ROM 16:13 Idoꞌ Guvelesi veꞌmi evenele lamineꞌ gehepeve minive Luhuꞌni nesi opoꞌni lo eiꞌ izeleho neniꞌ izeꞌneho gelo minineꞌ nesi nene opoꞌni noluze. Li-ngimilo.
ROM 16:14 Idoꞌ Asungilitoꞌ ve Helegoniꞌ ve Helemesiꞌ ve Patalobasiꞌ ve Helemasiꞌ ve idoꞌ leze zuho engikisi makatoꞌ minave nene ngopoꞌni noluze. Li-ngimilo.
ROM 16:15 Idoꞌ Hilologoꞌ ve Zuliaꞌ ve idoꞌ Neleakisi alunolosi idoꞌ Olibaꞌ ve idoꞌ Kilisitoꞌ evenele linge ma engikisi nizaniꞌ nesi nene ngopoꞌni noluze. Li-ngimilo.
ROM 16:16 Lingine nene Oꞌmosoꞌmi evenelelite ilizadoꞌ o minineꞌ monovoloꞌ nene igi adinguꞌ di ge nabutiꞌ ize ne gabutiꞌ ize li minaaꞌ ilo. Idoꞌ Kilisitoꞌ eveneleliti mulise mevola miniꞌmi monadite nene mukiꞌ longopoꞌni nilave.
ROM 16:17 Neze zuhokizo, gatine do naza amuzo molo tiꞌ lo nolo-lingimuve: Ehetineꞌ neve. Lingine monoꞌ ganakutiꞌ giladoꞌ vo damineꞌ gamazi li-lingimi monokutiꞌ limi ingaliza initekisi idoꞌ hizi hoꞌlilizaniꞌ gamazisi lilizavemuꞌ nene gizebo igi olovoꞌ igi minilo.
ROM 16:18 Nene nanitekumuꞌ ve. Aꞌneꞌmine ve ingine nene Guvetesi ve Kilisitoꞌnimuꞌ gelekeleꞌ igaꞌ navoba asi engiꞌ okoꞌnine neꞌmo laniteꞌ gilineꞌ initetokovoꞌ nene gelekeleꞌ igaꞌ nave. Gamazi laniteꞌ ineꞌ gamazi soza saza gamazi lisa ingine golosomuꞌ gilamaveti luꞌine nene golo izi ngeleꞌmize gopo igaꞌ nave.
ROM 16:19 Ee, lingine gamazi laminetoꞌ gelekeleꞌ igaꞌ nangumuꞌ guvetine nene mo misubouꞌ misubouꞌ buu lo monineꞌ nenako nemuꞌ nene naza lengikumuꞌ nolize izaaꞌ nouve. Ne neiha lingine monovo laminekumuꞌ nene gili nge li minikevo monovo goloso nene lengitoꞌ vo giꞌmize minamilive lo gele nouve.
ROM 16:20 Neꞌmine ikevo hongu lo lamino minaaꞌ monovo do sotoꞌ ogaꞌ ive Oꞌmoso neꞌmo nene mine haꞌna amo hize eleꞌ o-lengedo neivo Satanisi eiꞌ zuhosi ngivileꞌ gehepeve igi lingine lisi hupiꞌ izi-ngidaniꞌ geleleseive. Guvetesi ve Izesuꞌ nasahiliꞌve nene lengita minivoo.
ROM 16:21 Nezesi makaꞌ gono daaꞌ usive Timoteoꞌ nene longopoꞌni nolive. Idoꞌ neniꞌ neꞌmini Zuda ve minave Lukiole Zasonile Sosipatelole ingine nesi nene longopoꞌni nilave.
ROM 16:22 Idoꞌ Pauloꞌ gamazi nolivo luhuvo niteꞌ mene gizuve Teletioꞌ nazasi nene Guvelesi veꞌmi evenele nouvonako longopoꞌni noluve.
ROM 16:23 Idoꞌ Pauloꞌ naza numuꞌveuꞌ ongaaꞌ uve Gaioꞌ eiꞌ nesi nene longopoꞌni nolive. Eze numuꞌveuꞌ nene Kilisitoꞌ evenele mukiꞌ nesi nene mulise milaaꞌ nave. Idoꞌ mene numuno ebekuꞌ ngamani moniloꞌ gizebo ogaꞌ ive Elasitoꞌ ve idoꞌ leze zuho Kualatoꞌ ve engiꞌ nesi nene longopoꞌni nilasive.
ROM 16:25 Naza monoꞌ gamazi lamineꞌ lo soto sotoꞌ nouvoniꞌ neꞌmo nene Oꞌmosoꞌmo monokuꞌ do ngi lo-lengedelidoꞌ o neive lo neineꞌ ve. Aꞌmine gamazi nene Izesuꞌ Kilisitoꞌnimuꞌ gamazi lamineꞌ nene neive. Gamene galaꞌmudatiꞌ vomine aꞌmine sunoꞌ gamazi haleke minineꞌ nene voꞌmo voꞌmo ogo idise mene sotoꞌ nopizive. Ee, heta atoꞌ ve mukiꞌ aꞌmine gamazimuꞌ nene gili gili eleꞌvoleꞌ igi aꞌmidoꞌ gelekeleꞌ igi eꞌmetilizave lo idise nene minevoꞌ minevoꞌ Oꞌmoso neꞌmo lavo polohetelite gizikaniꞌ gamazi nene lo-ngemo aꞌmine gamazi nene heta atoꞌ ve mukita nene lo sotoꞌ nounivo aꞌmine gamazi nene sotoꞌ nopizive.
ROM 16:27 Oꞌmoso eiꞌ hamoꞌ nene otohato ve ne neive. Neꞌmine o neize. Laza nene do hozi lo-do Izesuꞌ Kilisitoꞌnimuꞌ ve lo opoꞌni lo minevoꞌ minevoꞌ ogo mineloneꞌ nene okuꞌ lamivoo. Neꞌmine ogo miniliho.
1CO 1:1 Izesuꞌ Kilisitoꞌ aposolo loloꞌ iline lo Oꞌmosoꞌmo gala gilidoꞌ neleꞌmize molave Pauloꞌ naza nene leze zuho Sositeniꞌ nesi makaꞌ mino
1CO 1:2 Kolidi ebeta Oꞌmosoꞌmi evenele lengita luhuvo initeꞌ mene nogize lingimuve. Lingine Izesuꞌ Kilisitoda igi giꞌmizikevo Oꞌmosoꞌmo eiꞌ evenele zuho minilizave lo do kegese-lingidineꞌ. Idoꞌ do kegese-lingidineꞌ nene ebeꞌ mukita engiꞌ Guveꞌinesi vesi leliꞌ Guvetesi vesi minive Izesuꞌ Kilisitoꞌni opoꞌni laaꞌ nave mukiꞌ nesi nene laminekovoꞌ lisiheꞌ igi minilizave lo eiꞌ evenele do kegeso lengeleꞌmize molaniꞌ ve.
1CO 1:3 Ee, naza nene luhuvo initeꞌ mene lengita nogize lengemo Oꞌmoso metehidasi Guvetesi ve Izesuꞌ Kilisitoꞌ eitasi nene lengiꞌ nasahiliꞌ i-lingidikesivo lengiꞌ muludinguꞌ nene hongu minelive lo engita noluve.
1CO 1:4 Naza Kilisitoꞌ gamaziꞌve lamineꞌ nene lo-lengemekuvo aꞌmine gamazi nene gilikevo lengita lutinguꞌ amuzo molosa minineꞌ ma neive. Neꞌmo nene lingine mo Izesuꞌ Kilisitoda igi giꞌmizikevo Oꞌmosoꞌmo nasahiliꞌ o-lengedo lutinguꞌ nene monovo danava laminekovoꞌ goꞌzo vaiꞌ lo-lengedave. Neꞌmo gele guno ogaꞌ nene lengita mo vaiꞌ lavo gamazi li sotoꞌ igaꞌ naniꞌ nene laminekutikovoꞌ laaꞌ nave. Ee, neꞌmino Oꞌmosoꞌmo lengiꞌ nasahiliꞌ o-lingidineꞌ nemuꞌ nene naza Oꞌmosola isaaꞌ neve lo gamene gamene opoꞌni laaꞌ nouve.
1CO 1:7 Idoꞌ Oꞌmosoꞌmo neꞌmino nasahiliꞌ o-lingidineꞌ nenako nemuꞌ nene Guvetesi ve Izesuꞌ Kilisitoꞌ ogo sotoꞌ neivo ningeloneꞌ gamenemuꞌ gizebo igi minangumuꞌ nene monovo danava lamineꞌ ato atoꞌ Oꞌmosoꞌmo eze evenele lehize-ledaaꞌ neingutiꞌ nene lingine monovo danava hamokisi ma viseꞌ isaꞌmave.
1CO 1:8 Oꞌmoso aza hize eleꞌ o-lengedeꞌmo vo neivo gamene naba aliteleseive. Neꞌmine ogavo Guvetesi ve Izesuꞌ Kilisitoꞌ alineꞌ gameneuꞌ nene okodidoꞌ gamazi nomivo laminekovoꞌ ha minilisave.
1CO 1:9 Oꞌmosoꞌmi gipele leliꞌ Guvetesi ve Izesuꞌ Kilisitoꞌ eikisi lutine hamoꞌ ogavo minilizave lo lengeleꞌmize molave eiꞌ nene gote izesaꞌmineꞌ ve. Idoꞌ eze gamazi lineꞌ nene vo haza amilineꞌ nenako nemuꞌ aꞌmine luvoniꞌ gamazi nene asiꞌve Oꞌmoso neꞌmo do sotoꞌ ogo do gihile izeleseive.
1CO 1:10 Agae, neze zuhokizo, Guvetesi ve Izesuꞌ Kilisitoꞌ eiꞌ velemuꞌ ogo gatine doo gamazi tiꞌ lo nolo-lingimuze. Gililo. Lingine gamazi ato atoꞌ li vi eza ema vamilo. Mukitoꞌ lingine gohi di bizii igi lutine di hamoꞌ igi hamoꞌ lutidokovoꞌ minilo.
1CO 1:11 Neze zuhokizo, naza mene gamazi noluvoniꞌ nene Koloveꞌ zuho linge malite lingine nene lutine aka ato atotoꞌ vavosa nene lolize hizi izi huki vi eza ema vaaꞌ nave li-nimikevosa nene noluve.
1CO 1:12 Neꞌminemuꞌ nene noluve: Lingine vi eza ema vi hamo hamoꞌ neꞌmine laaꞌ nave: Laza Pauloꞌni eꞌmetaaꞌ noune. Idoꞌ ma nete Apoloꞌni eꞌmetaaꞌ noune. Idoꞌ ma nete nene Petoloꞌni eꞌmetaaꞌ noune laaꞌ nave. Idoꞌ ma nete nene Kilisitoꞌni eꞌmetaaꞌ none laaꞌ nave.
1CO 1:13 Neꞌmine nene nanitekumuꞌ nilave. Kilisitoꞌ nene hoꞌlo ato atoꞌ vaiꞌ minamive. Pauloꞌ naza nene lengiꞌ do lunguꞌ izelesa lohotoꞌ zaloꞌ ma helamuve. Lingine noso hili-lingidaniꞌ nene neniꞌ Pauloꞌ muliseuꞌ nene ma imi hilamave.
1CO 1:14 Idoꞌ eveneꞌ ma nenikuꞌ imi hilikevo naza nene neniꞌ Pauloꞌ gulivelokovoꞌ noso holo-ledave li gilikelizave lo lingine noso hili-lingidangutiꞌ ve sitakovoꞌ Kilisipoꞌni ve Gaioꞌni ve engiꞌ nevoꞌ nene neniꞌ noso holo-ngedo gohi ma holo-lengedamuvoniꞌ ma nene lamineꞌ ve lo nogiluve.
1CO 1:16 Idoꞌ ma nene Setehanoꞌ ve eze zuhosi noso holo-ngiduvoniꞌ nenako nelotiꞌ nene noso ma holo-ngiduhe holo-ngedamuhe gelamuve.
1CO 1:17 Kilisitoꞌ aza nene eveneꞌ monoꞌ noso holo-ngedeline lo nimiselamive. Eiꞌ gamaziꞌve lamineꞌ nene lo-ngeme ngemeꞌ iline lo lo-nide neineꞌ ma neive. Nemuꞌ nene naza lengikutiꞌ mukiꞌ noso holo-lengedamuvoniꞌ nene lamineꞌ ve lo nogiluve. Idoꞌ naza gamazi lo sotoꞌ sotoꞌ ogo gamazi loloniꞌ nene Kilisitoꞌ lohotoꞌ zaloꞌ hilineꞌ gamaziꞌmi amuzo nene molo hitalonako eveneꞌ gamazi monovo gili miniꞌ miniꞌ igi gepeꞌ gamazivoꞌ laaꞌ navete laaꞌ naniꞌ neꞌmino lamo haza gili ngolosi gililizadokovoꞌ lolosuve.
1CO 1:18 Kilisitoꞌ do luꞌ izelesa hilineꞌ neꞌmi gamazi mamuꞌ aka golosouꞌ nivaniꞌ eveneꞌ nete nene negi gamazi laniꞌ ne neive laaꞌ nave. Neꞌmine laaꞌ naniꞌza Oꞌmosoꞌmo do luꞌ izo do eita eita oꞌmo novineꞌ aleve leliꞌ nete nene aꞌmine gamaziuꞌ Oꞌmosoꞌmi amuzoꞌve sotoꞌ ogo neineꞌ nene ningo gele none.
1CO 1:19 Ee, idoꞌ Oꞌmosoꞌmo aꞌminemuꞌ lineꞌ gamazi monoꞌ godolouꞌ ma tiꞌ li gizi nizaniꞌ ma neive: Naza nene gamazi monovo gilaaꞌ navete gamazi gilaaꞌ naniꞌ nene do goloso o-ngedelesuve. Idoꞌ luꞌine gaꞌninguꞌ gamazi lamineꞌ minineꞌ nene lokuvo vo haza oloseive.
1CO 1:20 Tiꞌ lo lineꞌ nemuꞌ gamazi monovo gilaaꞌ avemukisi idoꞌ initeꞌ mukikumuꞌ sukulu li osuꞌ lavemukisi idoꞌ gamazi li voleloꞌ meloꞌ igi initeꞌ monovo viseꞌ igaꞌ ave idise gameneuꞌ nizave nemukisi nadive lo gelelone. Me misubouꞌ minunive nene aꞌneꞌmine vete laniꞌ gamazimuꞌ gamazi gihile ve lo giluneꞌ gamazi nene Oꞌmosoꞌmo lavo haza gopo negi gamazi loloꞌ oganako nemuꞌ nene aꞌneꞌmine ve ingine nene mo haza ve loloꞌ ikeve lo gelelesune.
1CO 1:21 Ee, misubouꞌ ve nete Oꞌmosoꞌmi monovomuꞌ gele veveselone li viseꞌ aniꞌza aza Oꞌmosoꞌmo gala lamineꞌ gilidoꞌ do molo lavo engiꞌ gili vevesaaꞌine nene eze monovo ningilizadoꞌ lisiheꞌ amivo eze monovo nene mo ningamaniꞌ ve. Idoꞌ neꞌmine igi engiꞌ gamazi laminekutiꞌ nene eze monovo ningamanako nemuꞌ Oꞌmosoꞌmo eiꞌ luloloꞌ do molo aꞌmine negi gamazi ve laaꞌ naniꞌ gamazi nene nolo-ngimunivo ve ma ingine aꞌmine gamazi gili eleꞌvoleꞌ ave nene Oꞌmosoꞌmo do nguꞌ izaaꞌ neive.
1CO 1:22 Gili eleꞌvoleꞌ ave nene ha do nguꞌ izaaꞌ neiha ingine Zuda ve nete nene tiꞌ li laaꞌ aniꞌ ve: Oꞌmosolatiꞌ gamazi nene mo eitatiꞌ neive lo gele eleꞌvoleꞌ oloneꞌ nene atoliꞌmine suno ma sotoꞌ ogavo ningosavoꞌ nene gele eleꞌvoleꞌ olosune. Neꞌmine lisa haza minaaꞌ nave. Idoꞌ heta atoꞌ ve nGiliki aleve ingine nene initeꞌ ato atoliti gamazi gihileꞌvemuꞌ nene viseꞌ iꞌmi vi minaaꞌ naniꞌza
1CO 1:23 laza nene Kilisitoꞌ do luꞌ izelesa lohotoꞌ zaloꞌ hilineꞌ neꞌmi monovoꞌvevoꞌ nene lo sotoꞌ ogo lo-ngeme ngemeꞌ ogaꞌ noune. Neꞌmino nonivo Zuda ve nete lohotoꞌ za nene initeꞌ goloso mamuꞌ nilave li olovoꞌ goloso igaꞌ nave. Idoꞌ heta atoꞌ ve nete aꞌmine gamazi nene gamazi gihile nevoba negi gamazi ve lii gili eleꞌvoleꞌ isaꞌmave.
1CO 1:24 Ingine nene neꞌmine igaꞌ naniꞌza laza Zuda vesi nGiliki vesi Oꞌmosoꞌmo elese molo limidoꞌ eꞌmetunive nene Oꞌmosoꞌmo gala lamineꞌ gelaaꞌ neineꞌ nesi amuzoꞌve nesi nene Kilisitoda neineꞌ nene mo gele none.
1CO 1:25 Ee, Oꞌmosoꞌmo ogaꞌ neineꞌ initeꞌ nene negi initeꞌ ogaꞌ neive laaꞌ naniꞌ neꞌmo nene evenelite gaꞌine lamineꞌ gili igaꞌ naniꞌ initeꞌ nene ivileꞌ ogosa initeꞌ gihile neive. Idoꞌ Oꞌmosoꞌmo ogaꞌ neineꞌ initeꞌ nene amuzoꞌvesi nomineꞌ initeꞌ ogaꞌ neive laaꞌ naniꞌ neꞌmo nene evenelite amuzo mili igaꞌ naniꞌ initeꞌ mukiꞌ nene ngivileꞌ ogo amuzoꞌvesi initeꞌ neive. Neineꞌ nenako nemuꞌ nene Oꞌmosoꞌmo gala lamineꞌ gelaaꞌ neineꞌ nesi idoꞌ amuzoꞌvesi nene Kilisitoda mo neineꞌ nene gele none. Idoꞌ me misubouꞌ alevelite gamazi lamineꞌ ve li gilaaꞌ naniꞌ gamazi nemuꞌ nene Oꞌmosoꞌmo gilivo haza niteꞌ loloꞌ ogaꞌ neineꞌ nesi nene mo gele none.
1CO 1:26 Neze zuhokizo, lingine nene Oꞌmosoꞌmo eiꞌ ve lo elese molo lingimive ma nene nizave. Idoꞌ naniꞌmine aleve nizahe nemuꞌ gililizaniꞌ nene gamazi neuko luvoniꞌ mautiꞌ nene gamazi gihile neive li gili ngoloꞌ li gililisave. Idoꞌ lengiꞌ monovotine nene neꞌmino neingumuꞌ noluve: Me misubouko eveneꞌ mukiꞌ nete lengikumuꞌ nene gilavo lengikuꞌ nene gatinguꞌ gamazi lamineꞌ minive nene mukiꞌ ma minamave li gilaaꞌ naniꞌza lengiꞌ aꞌneꞌmine ve nene Oꞌmosoꞌmo eiꞌ ve lo elese molo-lengedo lengeleꞌmize molaniꞌ ve. Idoꞌ eveneꞌ amuzo malehe nene lengikuꞌ mukiꞌ nizamavo idoꞌ eveneꞌ ma izeꞌninge meꞌninge eveneꞌ naba nizavo sotoꞌ adiꞌmo guveꞌinesi ve gili nizaniꞌ aleve nene lengikuꞌ mukiꞌ ma nizamaniꞌza lengiꞌ neꞌmine aleve nene Oꞌmosoꞌmo eiꞌ ve lo elese molo-lengedo lengeleꞌmize molaniꞌ ve.
1CO 1:27 Neꞌmino leleꞌmize molaniꞌ nene eveneꞌ naba nevoꞌminevoꞌ leleꞌmize molaniꞌ nevoba Oꞌmosoꞌmo me misubouꞌ aleve malite eveneꞌ mamuꞌ negi nizave li li-ngidaaꞌ nave ma ngeleꞌmize molokuvo ingine eveneꞌ gaꞌine gili lamineꞌ igaꞌ ave di limi-ngidikevo ngovozo hili minilizave lo aꞌneꞌmine ve do kegeso ngeleꞌmize molaniꞌ ve. Idoꞌ me misubouꞌ alevelite eveneꞌ mamuꞌ gilizevo nizave li li-ngidaaꞌ nave ma ngeleꞌmize molokuvo ingine eveneꞌ amuzo malehe nizave di limi-ngidikevo ngovozo hili minilizave lo Oꞌmosoꞌmo aꞌneꞌmine ve do kegeso ngeleꞌmize molaniꞌ ve.
1CO 1:28 Ee, misubouꞌ aleveti veꞌnidoꞌ nene haza ve limi minii haza niteꞌ gehepeve gili minave nene Oꞌmosoꞌmo do kegeso ngeleꞌmize molavo aꞌneꞌmine ve nete eveneꞌ none laaꞌ ave nene ngivileꞌ igi minikevo haza niteꞌ loloꞌ ilisave.
1CO 1:29 Idoꞌ Oꞌmosoꞌmo neꞌmine ogaꞌ neineꞌ nene eveneꞌ malite eiꞌ veleloꞌ oti mini engiꞌ okoꞌine di hozi likelizave losa engiꞌ akaꞌine nene hize tile-ngedosa neꞌmine ogaꞌ neive.
1CO 1:30 Neꞌmine ogaꞌ neineꞌza lengiꞌ nene Oꞌmoso neꞌmo Izesuꞌ Kilisitoda do imineꞌ molo-lengedave. Neꞌmine ogo aꞌmine Kilisitoꞌni nene gateuꞌ gamazi lamineꞌ minineꞌ neꞌmi izelehine loloꞌ o-dave. Idoꞌ loloꞌ o-davo asiꞌve neꞌmo nene lelitoꞌ medelo minevoꞌ alevoꞌve hulo helo Oꞌmosoꞌmi veleloꞌ eveneꞌ lisiheꞌ laminekovoꞌ minilizave lo goloso initeꞌ apase-ledoo Oꞌmosoꞌmi evenele loloꞌ o-ledo aza golosoutiꞌ mudise leleꞌmize lamineꞌ oloseive.
1CO 1:31 Idoꞌ Oꞌmosoꞌmo neꞌmine neineꞌ nene monoꞌ godolouꞌ gamazi ma tiꞌ li gizaniꞌ maloꞌ nene eveneꞌ mukiꞌ eꞌmetilizave losa neꞌmine ineꞌ ve: Ve ma aza eiꞌ okoꞌnomuꞌ olize noizelineꞌ nevo alamo Guvelesi vemukovoꞌ olize izelive.
1CO 2:1 Neze zuhokizo, naza lengita ogo Oꞌmosoꞌmi gamazi sunoꞌ minineꞌ lo-lingimuvoniꞌ nene aꞌmine Oꞌmosoꞌmo okodine di dizamilo lineꞌ gamaziloꞌ eꞌmeto eveneꞌ dizi minavete laaꞌ adiꞌmino lamo gamazi monovo gilaaꞌ avetevoꞌ gililizadoꞌ nene lo-lengemamuvoniꞌ ve.
1CO 2:2 Idoꞌ neꞌmine uvoniꞌ nene nanitekumuꞌ ve. Naza lengita uvoniꞌ nene gamazi atokumuꞌ mo gaꞌne gelamolove lo asi Izesuꞌ Kilisitoꞌnimukisi idoꞌ lohotoꞌ zaloꞌ hilineꞌ monovomukisivoꞌ nene lo-lengemelove losa uvoniꞌ ma neive.
1CO 2:3 Idoꞌ naza lengikisi minuvoniꞌ gameneuꞌ nene amuzoꞌnesi nomineꞌ mino nehelele goloso izivo luvoluvo izosa minuvoniꞌ ve.
1CO 2:4 Idoꞌ monoꞌ gamazi lo-lengemelesa uvoniꞌ nene lingine gili eleꞌvoleꞌ ili ma Oꞌmosoꞌmi amuzo nene aꞌmine gamazi luvonguꞌ neive li gili eleꞌvoleꞌ ilizanako otohato gamazi laaꞌ avete laaꞌ adiꞌmino noluvo lingine mene otohato gamazi nolize. Aꞌmidoꞌ gele eleꞌvoleꞌ ukeꞌzo li likelizave lo neniꞌ gamazi lo-lengemaaꞌ uvoniꞌ nene lutine gatinguꞌ gamazi ma do gosohoꞌ o-lengedelone li gili mini otohato gamazi laaꞌ avete laaꞌ naniꞌ neꞌmino lutinguꞌ hizo monoꞌ lo-lengemamuve. Monoꞌ gamazi lo-lingimuvoniꞌ nene Oꞌmosoꞌmi Sikalahuliꞌmo hize eleꞌ o-nidivosa neꞌmi amuzo nene do sotoꞌ ogo lengelebizuvoniꞌ ve.
1CO 2:6 Lamineꞌ laza eveneꞌ ma monokuꞌ amuzo mili lodive igi nizavo monoꞌ lo-ngemeloneꞌ gameneuꞌ nene otohato gamazisi ha lo-ngemeloba me misubouꞌ alevesi guveꞌinesi vesi engiꞌ amuzoꞌine nene mo osuꞌ lolosa neineꞌ nenako nemuꞌ ingine otohato gamazi laaꞌ aniꞌ neꞌmino lamo atoliꞌmine lolosune.
1CO 2:7 Oꞌmosolatiꞌ otohato gamazi sunoꞌ minineꞌ nene lolosune. Aꞌmine gamazi nene Oꞌmosoꞌmo leliꞌ atoliꞌmine ogo do lamineꞌ o-ledelesa olihe okulumoꞌ misubo do sotoꞌ amo minidatiꞌ salani molo-ledavo hito minineꞌ ve.
1CO 2:8 Idoꞌ me misubouꞌ aleve gizebo i-ngidaaꞌ ave guveꞌinesi ve hamolitesi aꞌmine sunoꞌ gamazi nene ma gilamaniꞌ ve. Idoꞌ ma gili minadiniko Guvelesi ve atoliꞌmine ogo dizo minive nene lohotoꞌ zaloꞌ nene ma bili hilamadine.
1CO 2:9 Ee, gomuꞌ aꞌmine otohato gamazi nene sunoꞌ minineꞌza idise leliꞌ nene mo gelekune. Oꞌmosoꞌmi Sikalahuꞌ neꞌmo initeꞌ mukiꞌ nene do sotoꞌ ogaꞌ neive. Idoꞌ Oꞌmosoꞌmi monovo danava hito neineꞌ nesi nene do sotoꞌ ogo ningaaꞌ neineꞌ nenako Oꞌmosoꞌmo aꞌmine Sikalahuꞌve nene imiselavo aꞌmine neꞌmo nene Oꞌmoso lute emaaꞌ uneꞌ aleve leliꞌ do vaꞌvaꞌ o-lidineꞌ initeꞌ lamineꞌ nene idise lelebizave. Aꞌmine initeꞌ lamineꞌ do vaꞌvaꞌ o-lidingumuꞌ nene monoꞌ godolouꞌ tiꞌ li gizi nizaniꞌ ma neive: Eveneꞌ hamolitesi veꞌinedunuꞌ ningamaniꞌ initekisi idoꞌ li sotoꞌ amavo aꞌminemuꞌ ma gilamaniꞌ initekisi idoꞌ gaꞌine gili hehe laaꞌ anguꞌ ogo sotoꞌ amivo olihe gilamaniꞌ initekisi nene Oꞌmosoꞌmo leliꞌ lute emaaꞌ uneꞌ aleve nene do vaꞌvaꞌ o-lidineꞌ ma neive. Neꞌmine li gizi nizaniꞌ ma neineꞌza idise nene Sikalahuliꞌmo aꞌmine gamazi nene lelebizavosa lo sotoꞌ ogaꞌ noune.
1CO 2:11 Neꞌmine ogaꞌ nouneꞌza eveneꞌ lelikutiꞌ ve maliꞌmo ve maliꞌmi monovolo nene mo ningo gelamoloseive. Eveneꞌ eiꞌ Sikalahuꞌve neꞌmovoꞌ nene eveneꞌ neꞌmi lulouꞌ mino monovoloꞌve nene ningo gele mineleseive. Aꞌmineꞌmine ogo ve maliꞌmosi Oꞌmosoꞌmi monovo danava nene ningamive. Asiꞌve Oꞌmosoꞌmi Sikalahuꞌ neꞌmovoꞌ nene Oꞌmosoꞌmi monovo danavaꞌve nene ningaaꞌ neive.
1CO 2:12 Idoꞌ Kilisitoꞌ evenele leze Sikalahute nene me misubouꞌ sotoꞌ ineꞌ nomive. Laza Oꞌmosoꞌmo initeꞌ ato atoꞌ nolehize-lidineꞌ nene aꞌminemuꞌ ningo geleloningumuꞌ ve losa Oꞌmosolatiꞌ do ogo do tiꞌ uneꞌ ne neive.
1CO 2:13 Idoꞌ aposolo laza aꞌminemuꞌ lo sotoꞌ ogo noluneꞌ nene eveneꞌ angiseꞌinemuꞌ laza nene gate gele otohato ogaꞌ nounive nene none laaꞌ navete li-limaaꞌ naniꞌ gamaziloꞌ nene eꞌmetamune. Sikalahuliꞌmo lo-limidokovoꞌ nene eꞌmetosa apize lengemaaꞌ noune. Idoꞌ Oꞌmosoꞌmi Sikalahuꞌ engita minineꞌ eveneꞌ vaiꞌ nene Sikalahuliꞌmo lidoꞌ eꞌmeto gamazi nene lo ngoloꞌ lo lo-ngemaaꞌ noune.
1CO 2:14 Idoꞌ Oꞌmosoꞌmi Sikalahuliꞌmo lelebizaaꞌ neineꞌ gamaziꞌmi monovo nene aꞌmine Sikalahuꞌ neꞌmo lute gateꞌve do lapa nomineꞌ o-ledavo izeꞌ molo gelelonidoꞌ ogaꞌ neineꞌ nenako eveneꞌ ma Oꞌmosoꞌmi Sikalahuꞌ nomivo haza minaaꞌ nave nete aꞌmine gamaziꞌmi monovo nene gililizadoꞌ minamivo nemuꞌ nene negi gamazi ve li gili disaꞌmave.
1CO 2:15 Oꞌmosoꞌmi Sikalahuꞌ lelita minineꞌ aleve nene laza initeꞌ mukikumuꞌ nene leliꞌ lute gatedunuꞌ nene ha izeꞌ molo gelelesune. Neꞌmine olosuneꞌza leliꞌ lute gate nene eveneꞌ malite ngeli izeꞌ mili lamilisave.
1CO 2:16 Ee, monoꞌ godolo neꞌmo aꞌminemuꞌ tiꞌ lo lo neineꞌ ma neive: Guvelesi ve gilidiꞌmino eveneꞌ zaho gele nolive. Kekeꞌ hamolitesi mo gilamave. Gilamanako aza ma gelamineꞌ initekumuꞌ nene eveneꞌ zaho apize emelive. Tiꞌ lo lo neineꞌza Oꞌmosoꞌmi Sikalahuꞌ neꞌmo nene mo lelebizavo Kilisitoꞌ lulo galauꞌ gilidiꞌmino nene leliꞌ mo gele none. Idoꞌ gele noneꞌ nemuꞌ nene leliꞌ lute gate nene eveneꞌ malite ngeli izeꞌ mili lamilisave.
1CO 3:1 Idoꞌ neze zuhokizo, naza lengita ogo minuvoniꞌ gameneuꞌ nene lingine monoꞌ gilamaniꞌ haza vete igaꞌ adiꞌmine igii igi mili minii Kilisitoꞌ monovo danavaꞌve neꞌmine nene olihe igi mili ami izipe ngomo neꞌmine minaniꞌ nenako nemuꞌ naza eveneꞌ ma Oꞌmosoꞌmi Sikalahuliꞌmo lo-ngimidoꞌ igi mili minavo neꞌmo gaꞌine lapa nomineꞌ minave engiꞌ monoꞌ lo-ngemaaꞌ uvodiꞌmine ogo lingine ma lo-lengemelodoꞌ amivo
1CO 3:2 amuzo malehe gamazi ma lo-lengemamuvoniꞌ ma ne neive. Haza lapa nomineꞌ izipe amine naniꞌ maꞌmino lo-lingimuvoniꞌ ma neive. Aꞌmine gameneuꞌ nene ozohote naaꞌ aniꞌ nosoꞌ nitetoꞌ nene lisiheꞌ amaniꞌ nenako idisesi nene olihe lisiheꞌ amave.
1CO 3:3 Lingine nene monoꞌ gilamaveti monovoꞌine neꞌmidoꞌ nene ha eꞌmetivoꞌ vi nizave. Lingine lengikuꞌ nene ge nivileꞌ ogani ne givileꞌ ogani li lukehe igi lolize hizaaꞌ naangumuꞌ nene noluve. Idoꞌ neꞌmine igaꞌ naniꞌ nene monoꞌ gilamaveti monovoꞌnidoꞌ gehepeve nieꞌmeti engiꞌ neꞌmine nizaniꞌ ma neive.
1CO 3:4 Ee, lolize hizi malite Pauloꞌni noeꞌmetune nilavo malite Apoloꞌni noeꞌmetune li laaꞌ naniꞌ nene monoꞌ gilamaveti monovoꞌnidoꞌ nene nieꞌmetave.
1CO 3:5 Lingine leliꞌ nene hizi hoꞌli-lidi Apoloꞌ nene eveneꞌ naba ve idoꞌ Pauloꞌ nene eveneꞌ naba ve li nanimuꞌ laaꞌ nave. Neꞌmine mo lamilo. Laza nene haza gonoloꞌ ve mino Guvelesi veꞌmo gonote limidoꞌ limidoꞌ nene gono nodusivo aꞌmine gonotelotiꞌ gihileꞌve nene lingine Kilisitoꞌnimuꞌ gili eleꞌvoleꞌ aniꞌ nene nizave.
1CO 3:6 Idoꞌ naza nene ve ma mine gosohoꞌ zuhoꞌ ive maꞌmino mino Oꞌmosoꞌmi gamazi nene ganaꞌ lo-lingimuvoniꞌ ma neive. Idoꞌ Apoloꞌ nene mine gizebo ve mino mine naba ilive lo noso ohizo lepe lepe ve neꞌmino mino neniꞌ gonoloꞌ imineꞌ molo Oꞌmosoꞌmi gamazi masi nene ogo lo-lingimineꞌ ma neive. Laza nene gono daaꞌnivoꞌ dokusivo Oꞌmoso asiꞌve neꞌmo gonote nene do gihile ize-lidineꞌ ma neive.
1CO 3:7 Ve ma monokuꞌ mine zuhoꞌ ogaꞌ ive nesi idoꞌ mine gizebo ve neꞌmine nesi nene haza initeꞌ ve. Oꞌmoso eiꞌ hamoꞌ gihile do sotoꞌ ogaꞌ neineꞌ neevoꞌ nene initeꞌ naba goloso neive.
1CO 3:8 Mine zuhoꞌ okuvosa mine gizebo ogo noso ohizo lepe lepe ogaꞌ neive nesi nene hamoliꞌmine ogo lisihetoꞌ nosive. Nemuꞌ nene gono dusineꞌ votigileloꞌ votigileloꞌ laza hamo hamoꞌ menite dalosusive.
1CO 3:9 Laza nene Oꞌmososi makaꞌ hamoꞌ gono nodunivo lingine nene Oꞌmosoꞌmi miꞌve neꞌminisa nene nizave. Idoꞌ gepeꞌ gamazi ma atoꞌ nene Oꞌmosoꞌmo numuno do hizineꞌ neꞌminisa ne nizave.
1CO 3:10 Oꞌmosoꞌmo aꞌmine numuno nene do hizelesa gala gilineꞌ nemuꞌ neniꞌ nene neleꞌmize lamineꞌ o-nido aꞌmine numuno gizelongumuꞌ ve lo numuno lamineꞌ gizaaꞌ ave neꞌmine loloꞌ o-nidavo nemuꞌ nene aꞌmine numuno gizaaꞌ ave nete numuno gizaakumuꞌ gaꞌine lamineꞌ gilaaꞌ naniꞌ neꞌmidoꞌ eꞌmeto simeni loloꞌ ogo numuno do hizaaꞌ ebeꞌ amuzo malehe lamineꞌ do lisiheꞌ ogo loloꞌ okuve. Neꞌmine okuvo eveneꞌ ma ingine nene aꞌmidoꞌ numuno nigizave. Nigizanako ve ma aza aꞌmine simeni loloꞌ uvodoꞌ nene numuno gizelove loo ma do goloso ogalive. Mo ninge guno ogosa gizelive.
1CO 3:11 Numuno do oto gizaaꞌ simeni lamineꞌ nene ngeli atoꞌ kekeꞌ mo loloꞌ amilisave. Numuno do oto gizaaꞌ simeni lamineꞌ nene mo neize. Aꞌmidokovoꞌ nene numuno di oti gizilizave. Naza nene Oꞌmosoꞌmi numuno gizo do otaaꞌ simeni nene Izesuꞌ Kilisitoꞌ eiꞌ hamoꞌ nene neive losa noluve.
1CO 3:12 Aꞌmine simeniloꞌ Oꞌmosoꞌmi numuno nigizi monoꞌ eze evenele li-ngimaaꞌ nave ingine nene gono lamineꞌ daaꞌ nahe apa niteꞌ igaꞌ nave. Neꞌmi monovo nene mo sotoꞌ oloseinako nemuꞌ monoꞌ li-ngimilizaniꞌ nene gamazi gihilevoꞌ li-ngimilizave. Ladani igi li-ngimikelizave. Numuno nene olokuꞌ lamilineꞌ initeꞌ minevoꞌ minevoꞌ initeꞌ lamineꞌ ngoli moni idoꞌ siluvaꞌ geheni idoꞌ geheni lamineꞌ nevoꞌmine initedunuꞌ gizilizahe idoꞌ olokuꞌ lilineꞌ initeꞌ minevoꞌ minevoꞌ amilineꞌ initeꞌ za neꞌmine idoꞌ meꞌnihe idoꞌ angaba nevoꞌmine initedunuꞌ gizilizahe neꞌmi monovo nene gamene nabaloꞌ Oꞌmosoꞌmo do sotoꞌ oloseinako ha sotoꞌ oloseive. Gonoloꞌ ve hamo hamoliti gonoꞌineꞌmi monovo nene do sotoꞌ olosa aꞌmine numuno di huli gizada gizada nene viteꞌ okaꞌ okaꞌ ogavo oloꞌ neꞌmo loꞌvoto neꞌmi monovo do sotoꞌ oloseive.
1CO 3:14 Neꞌmine ogavo numuno lingela lamilineꞌ nene aꞌmida gono di numuno gizave gizave nene gonoꞌine lamineꞌ dadoꞌ meni dalisave.
1CO 3:15 Idoꞌ numuno lingela lo osuꞌ lilineꞌ nene aꞌmidoꞌ gono dave dave nene meni ngemamivo hazavoꞌ minilisave. Ee, engiꞌ nene Oꞌmosoꞌmo do nguꞌ izeleseiha eveneꞌ ma nene initeꞌ mataꞌine olokuꞌ lavo initeꞌine nomineꞌ neꞌmine mini hazavoꞌ minilisave. Ee, Oꞌmosoꞌmo eiꞌ gonoꞌve dunidoꞌ dunidoꞌ nene gono lamineꞌ dahe damahe lo izeꞌ molo-ledeleseinako gono goloso do noloneꞌ nene aꞌmidoꞌ meni lamineꞌ lemamoloseive.
1CO 3:16 Lingine mukiꞌ nene do nubuho ogo Oꞌmosoꞌmo neniꞌ kekeize numuꞌne ve lavo eiꞌ Sikalahuꞌve nene lengikuꞌ mino molo neive ma nene nizave. Lingine aꞌminemuꞌ nene gilamaniꞌ nevoba mo gili nizaniꞌ ma neive.
1CO 3:17 Oꞌmosoꞌmi numuno nene lengiꞌ nene nizave. Idoꞌ aꞌmine nene kekeize numuno nenako ve malite di goloso ilizaniꞌ nene Oꞌmosoꞌmo do goloso o-ngedeleseive.
1CO 3:18 Idoꞌ me misubouꞌ aleve nete lengikumuꞌ gilavo otohato ve minaniꞌ nolineꞌ nene Oꞌmosoꞌmo lengikumuꞌ gilivo lingine nene otohato ve nizave lo gele noloseive li gili lutine golo izamilo. Lengitatiꞌ eveneꞌ malite laza nene me misubouꞌ gamazi otohato o minineꞌ nene gele vevesunive otohato ve none li gili nilizaniꞌ nene Oꞌmosoꞌmo gilivo me misubouꞌ alevete otohato gamazi ve li gilaaꞌ naniꞌ nene negi gamazi ve lo gelaaꞌ neineꞌ nenako nemuꞌ nene otohato ve gihile loloꞌ ili ma nene tiꞌ ogo monilize. Me misubouꞌ aleveti veꞌnidoꞌ nene negi neꞌmine loloꞌ igi minilo. Idoꞌ misubouꞌ alevete otohato gamazi ve li gilaaꞌ naniꞌ nene Oꞌmosoꞌmo gilivo negi gamazi ve lo gelaaꞌ neingumuꞌ nene monoꞌ godolouꞌ tiꞌ li gizi nizaniꞌ ma neive: Otohato ve gaꞌine gili nge li mini eveneꞌ goꞌine izaaꞌ nevoꞌmine navo aza do sotoꞌ o-ngedo otohato gaꞌine gilaniꞌ nene do gopo o-ngedaaꞌ neive.
1CO 3:20 Idoꞌ gamazi gohi ma tiꞌ li gizi nizave: Guvelesi ve aza otohato gaꞌine gilaaꞌ avete gilaniꞌ gaꞌine nene mo gele neive. Neꞌmine ogo gaꞌine gilaniꞌ nene haza niteꞌ ve lo gelaaꞌ neive.
1CO 3:21 Nemuꞌ nene lingine hoꞌli ato atoꞌ mini monoꞌ lo-lengemaaꞌ unive haza eveneꞌ noneꞌ leliꞌ hamo hamokumuꞌ nene monoꞌ lo-lemaaꞌ ive naba nene eꞌmetaaꞌ nouneꞌ nenako eveneꞌ linge lengiꞌ nene lingivileꞌ ogosa none li lingine mulise ato atoꞌ mili mini okodine di dizaaꞌ naniꞌ nene mo hulilo.
1CO 3:22 Initeꞌ mukiꞌ nene mo lengiꞌ initetine neineꞌ nenako eveneꞌ leliꞌ hamo hamokumuꞌ nene eveneꞌ nabate ve li okodine di dizaaꞌ naniꞌ nene nanitekumuꞌ neꞌmine igaꞌ nave. Ee, adoꞌ neniꞌ Pauloꞌ idoꞌ Apoloꞌ ve Petoloꞌ ve idoꞌ misubouꞌ initeꞌ mataꞌ mukiꞌ nizaniꞌ nesi idoꞌ vetesi minevoꞌ alevoꞌ ogaꞌ nesi idoꞌ helaaꞌ nesi idoꞌ idise sotoꞌ neineꞌ initeꞌ nesi idoꞌ alingeꞌ sotoꞌ ilineꞌ initeꞌ nesi nene mo lengiꞌ initekovoꞌ ve.
1CO 3:23 Ne neineꞌza lingine nene Kilisitoꞌni nene nizave. Idoꞌ Kilisitoꞌ nene Oꞌmosoꞌmine ve. Nemuꞌ nene eveneꞌ haza Oꞌmosoꞌmi gonoloꞌ aleve lelikumuꞌ nene okodine di dizamilo.
1CO 4:1 Lingine lelikumuꞌ nene Kilisitoꞌ gonoloꞌ ve mini Oꞌmosoꞌmi gamazi sunoꞌ minidoꞌ gizebo igi li-ngimi ngimiꞌ igaꞌ ave ma nene nizave lisa gili minilo.
1CO 4:2 Idoꞌ gonoloꞌ ve ngeleꞌmize milavemuꞌ nene ngeleꞌmize milavete tiꞌ li gilaaꞌ nave: Gote izami lunidokovoꞌ eꞌmeti gono di minilizaniꞌ o neive. Neꞌmine li gilaaꞌ naniꞌ nenako nemuꞌ nene Guvelesi veꞌmo eze gonoloꞌ gizebo ve leleꞌmize molaniꞌ nenako lelikumuꞌ nene neꞌmine lo gele noloseive.
1CO 4:3 Neꞌmine lo gelo neniꞌ gonoꞌve daaꞌ nouvoniꞌ monovo nene lamineꞌ nehe goloso nehe lo ningeꞌmo vo minelineꞌ o neive. Neꞌmine ilineꞌ nenako lengitatipe evenetatipe goniꞌne ma sotoꞌ ogavo monovoꞌnemuꞌ izeꞌ mili goniꞌ ma i-nidilizaniꞌ nene initeꞌ naba neive lo gelamolosuve.
1CO 4:4 Naza nene Oꞌmosoꞌmi gono daaꞌ nouvonguꞌ nene do goloso ogaꞌ uvoniꞌ monovoꞌne nene ma nomive lo gele nouvoniꞌza neꞌmine lo gaꞌne giluvongutiꞌ nene nenikumuꞌ Oꞌmosoꞌmo giluvonguꞌ gele nolineꞌ nene laza ngelo sotoꞌ ivo ningamolosunako nemuꞌ nene gamaziꞌne nomineꞌ nouve lo lamolosuve. Idoꞌ nenikisi nehe eveneꞌ gohi masi nehe neze monovoꞌnemuꞌ izeꞌ molo losoꞌ nene vo damoloseive. Guvelesi ve eiꞌ hamoꞌ neꞌmo nene neze monovoꞌnemuꞌ izeꞌ molo lilive ne neive.
1CO 4:5 Nemuꞌ nene Guvelesi ve alineꞌ gamene olihe amidoꞌ lingine nene liteꞌ li eveneꞌ monovotemuꞌ izeꞌ mili gamazi laaꞌ naniꞌ nene huli Guvelesi ve alingumuꞌ nene gizebo ilo. Aza nene ogo initeꞌ liꞌnimusouꞌ minaniꞌ nene do sotoꞌ molo eveneꞌ vaiꞌ luteuꞌ nene nadive lo gelaaꞌ ube neꞌmine lemeni damenite nene do sotoꞌ ogavo ningelesune. Neꞌmine ogo luteuꞌ nene nadive lo gelo idoꞌ nani lemeni dameni molo monaaꞌ ube aꞌmidoꞌ aꞌmidoꞌ Oꞌmosoꞌmo do naba o-ledo lopoꞌni lilidoꞌ nolineꞌ nene lopoꞌni loloseive.
1CO 4:6 Neze zuhokizo, gamazi mukiꞌ mene monoꞌ gono daaꞌ usive nenitasi Apolodasi lo molo noluvoniꞌ nene aꞌmingutiꞌ monoꞌ godolouꞌ gizi nizaniꞌ neineꞌ gamazi avutoꞌ amaaꞌ monovomuꞌ nene viseꞌ igi gili dalizangisi eveneꞌ linge ma di naba i-ngidi linge ma divi lediviꞌ i-ngidi lingine monoꞌ gono daaꞌ aveutiꞌ dizo minive nene eꞌmetaaꞌ noune li okodine di dizisa gavele ve gehesami minilizave losa monokuꞌ hize eleꞌ o-lengedelesa noluve.
1CO 4:7 Eveneꞌ mukiꞌ lengikumuꞌ gilavo dize nonive ne none li gilaaꞌ nahe. Oꞌove. Lingine nene dizi nizave ne minamave. Lengita Oꞌmosoꞌmo lengemamineꞌ initeꞌ nene naniteꞌ neve. Ma nomive. Oꞌmosoꞌmo initeꞌ mataꞌ nene lengeme osuꞌ lo neineꞌ nenako lingine gilavo Oꞌmosoꞌmo initeꞌ mataꞌ lengemamineꞌ gelavo leliꞌ do sotoꞌ okune li okodine nanimuꞌ di hozi laaꞌ nave.
1CO 4:8 Lingine gilaniꞌ lutinguꞌ lutineꞌmi nosoꞌ niteꞌ nene vaiꞌ lave lisa gili nizahe. Eꞌe, mo vaiꞌ lamive. Idoꞌ lingine gilaniꞌ monoliꞌmi heneni nene lengita mo vaiꞌ lavo none lisa gili nizahe. Eꞌe, monoliꞌmi heneni nene lengita vaiꞌ lavo ma minamave. Idoꞌ laza nene lengikisi minamunivo monokuꞌ guvetinesi ve mo liliꞌ ikeniꞌ neive. Eꞌe, guvetinesi ve ma liliꞌ amaha ma liliꞌ adiniko lengikisi lelikisi nene makaꞌ guvetesi ve naba minunidine. Ne mo ede vidineꞌ ha liliꞌ ilizanakoo.
1CO 4:9 Loma ve monoꞌ gilamavete souꞌ di sotoꞌ adoꞌ eveneꞌ mukiliti veꞌnidoꞌ initeꞌ ato atoꞌ mukiꞌ di sotoꞌ igisa alingeꞌ nene eveneꞌ niningavo ngibili hililizave li eveneꞌ goloso ma di sotoꞌ igaꞌ aniꞌ nee maꞌmino naza leliꞌ aposolomuꞌ nene giluvoniꞌ Oꞌmosoꞌmo lelikumuꞌ aꞌmine ngibili hililizave neꞌmine minikevo angelolesi evenekisi mukitoꞌ nene ningi minilisave lo leliꞌ do alingeꞌ molo-ledo do sotoꞌ o-lidineꞌ gelavo haza initeꞌ loloꞌ okune losa gele nouve.
1CO 4:10 Laza nene Kilisitoꞌni eꞌmetuningumuꞌ ve losa negi ve neꞌmino noneꞌza lengiꞌ nene Kilisitoda imi hili lengikumuꞌ nene laza monokuꞌ otohato ve none li gilaaꞌ nave. Idoꞌ laza nene amuzo molamuneꞌza lingine lengikumuꞌ nene amuzo malehe none laaꞌ nave. Lingine nene evenelite lengikumuꞌ gilavo dizaaꞌ neive li laaꞌ naha leliꞌ nene evenelite divi ledivika li-lidaaꞌ nave.
1CO 4:11 Idoꞌ gamene galaꞌmudatiꞌ mine do dizo idise gameneloꞌ ivo aposolo laza Kilisitoꞌ gonoloꞌ nomonuninguꞌ nene hepeꞌ nosomuꞌ luvode gaꞌnaba gizivo mino idoꞌ naaꞌ initekumuꞌ gaꞌna helo mino idoꞌ okodeloꞌ initeꞌ nomivo viseꞌ ogo minaaꞌ noune. Idoꞌ aꞌine gavoso libili goboni mili-lidavo molo gelo minesoꞌ numuno ebekisi nomivo mono none.
1CO 4:12 Idoꞌ laza nene okode losuvoꞌmi initeꞌ nene dalone lo gono laꞌlisete amuzo molo leliꞌ adedunuꞌ daaꞌ noune. Idoꞌ evenelite goboni mili-lidaniꞌ gameneuꞌ nene aꞌminemuꞌ goloso gelamo hongu lo minaaꞌ noune.
1CO 4:13 Idoꞌ gamazi goloso palasa li-lidikevo ma laza nene do hongu gamazi lo-ngemaaꞌ noune. Ee, gamene galaꞌmudatiꞌ mine do dizo idisesi nene eveneꞌ me misubouꞌ alevete lelikumuꞌ gilaniꞌ leze nene sihononi gehepeve nizave li vasa izi-ngidaaꞌ ave maꞌminosa nene none.
1CO 4:14 Idoꞌ naza luhuvo initeꞌ mene longovozo hililizave losa gize lengemamuve. Asi lingine nene neniꞌ izipahaꞌne nizaniꞌ gelavo luꞌne lengeme nouvoniꞌ nenako nemuꞌ gatine dosa luhuvo initeꞌ mene nogize lingimuve.
1CO 4:15 Lingine Kilisitoꞌ monokuꞌ lengiꞌ gizebo vetine nene vaiꞌ li nilisaha neniꞌ nene ganaꞌ Kilisitoꞌnimuꞌ gamazi lamineꞌ nene lo-lengemekuvo nelotiꞌ gili eleꞌvoleꞌ ikevosa neniꞌ hamoꞌ nene metibine loloꞌ okuve. Nemuꞌ nene metinge vaiꞌ ma nizamave.
1CO 4:16 Nemuꞌ nene neniꞌ monovoloꞌ eꞌmeti alizave losa gatine do noluze. Gililo.
1CO 4:17 Lingine neꞌmine ilizave lo Timoteoꞌni imiselekuvo lengita novive. Aza nene luꞌne eme nouve Guvelesi veꞌmi monoꞌ akaloꞌ eleꞌmize molokuvo gipeꞌne loloꞌ ogo mino lulo lisiheꞌ o neivo gono lamineꞌ daaꞌ ive ve. Aza nene lengita ogo hetelo Kilisitoꞌni eꞌmeto ogo molo minaaꞌ nouvoniꞌ monovo nene dalizave lo Izesuꞌ Kilisitoꞌ evenele zuho mulise miniꞌmi monada mukiꞌ apize ngemaaꞌ nouvoniꞌ ma nene lo gatine oloseive.
1CO 4:18 Idoꞌ lengikutiꞌ linge malite neniꞌ nene nonida amoloseinako ngelo ogo lelemelihe li hokolizeꞌ igi gopo minaaꞌ naniꞌza
1CO 4:19 Guvelesi veꞌmo nenikumuꞌ lengita alive lo gele nolineꞌ nene eiꞌ luloloꞌ eꞌmeto naza mine haꞌna amo liteꞌ lo alosuve. Idoꞌ eveneꞌ ma ingine Oꞌmosoꞌmi gizebouꞌ vo hulunive ne none likevosa haza gamazi lilizadotikovoꞌ nene aꞌmineꞌmi gihile nene ningamo Oꞌmosoꞌmi amuzo nesi engita sotoꞌ neivosasi nene ningaaꞌ nounako naza nene ogo aꞌmine hokolizeꞌ igaꞌ aniꞌ aleve nene okoꞌine di hozi li gamazi gopo laaꞌ niilisanako aꞌminemuꞌ nene gelamo gele hulo Oꞌmosoꞌmi amuzo nene engita neihe nomihe nemukovoꞌ nene ningelove.
1CO 4:21 Idoꞌ lingine nadive li nigilave. Nenikumuꞌ nene lebelaaꞌ gavososi do ano li gili nizahe. Eꞌe, tiꞌ lii ma gilamilisanako nemuꞌ nene luꞌne laminekisi hongu lo mino nasahiliꞌ o-lengedelesa alosuvonako nemuꞌ monovotine nene di lamineꞌ igi minilo.
1CO 5:1 Eveneꞌ mukiꞌ nete lengiꞌ muliseuꞌ nene veneꞌ vemoholite igaꞌ aniꞌ monovo goloso ma sotoꞌ neive li liꞌmi nimonave. Aꞌmine initeꞌ nene monoꞌ gilamaaꞌ avetingukisi isaꞌmaniꞌ initeꞌ atoliꞌmine goloso ve. Aꞌmine initeꞌ nene eveneꞌ ma lengiꞌ muliseuꞌ neiveliꞌmo melehi elenahine dave.
1CO 5:2 Idoꞌ lingine initeꞌ neꞌmine sotoꞌ ineꞌ nemuꞌ nene okodidoꞌ gili longovozo hilami monokuꞌ dize nonive ne none li nanimuꞌ okodine di hozi li nizave. Lingine agae li longovozo hili lengiꞌ muliseutiꞌ aꞌmine monovo goloso dave nene imiseli hulilizanako imiseli hulamave.
1CO 5:3 Naza nene okoꞌneꞌvesi hota minuvoniꞌza voꞌne nene lengita lengikisi makaꞌ minineꞌ gelave. Idoꞌ makaꞌ lengikisi minuneꞌ gelavo aꞌmine initeꞌ goloso iveꞌmi gamaziꞌve nene gelo tiꞌ lo lo huko luve:
1CO 5:4 Lingine mulise milikevo neniꞌ voꞌnedunuꞌ lengikisi minuneꞌ gelavo Guvetesi ve Izesuꞌ aza do amuzo molo-lengedavo eze velemuꞌ igi monovo goloso daaꞌ ive nene goniꞌ i-di imiselikevo aza nene lengiꞌ muliseutiꞌ lemo Sataniꞌmi anauꞌ vavo neꞌmo monovo goloso daaꞌ ineꞌ okoꞌnoꞌve nene vo goloso ogavo alingeꞌ Guvelesi ve tiꞌno alineꞌ gameneuꞌ nene aꞌmine veꞌmi sikalahuꞌ do uꞌ izelingumuꞌ ve li lihime imi imiseli hulilizave.
1CO 5:6 Monovo goloso neꞌmine daaꞌ ive aza lengiꞌ muliseuꞌ neivo lingine monoꞌ gele guno o none li lingine okodine di hozi li nizaniꞌ nene lamineꞌ amive. Beleti do lulu izaaꞌ ineꞌ initeꞌ zisiti nene ngomo lasolo ma doo beleti loloꞌ oloneꞌ palauvaꞌ vaikuꞌ nene nososi do gopo okunivo aꞌmine zisiti neꞌmo palauvakuꞌ mono osuꞌ laaꞌ neineꞌ nene gilamaniꞌ nehe. Idoꞌ aꞌmineꞌmine ogo lihime goloso daaꞌ ive hamokovoꞌ nene lengikuꞌ minavosa neꞌmi lihime nene lengiꞌ mukita dizavosa mulisetine nene goloso ogaꞌ neive.
1CO 5:7 Nemuꞌ nene Oꞌmosoꞌmo Zuda veti avotemote Aigita misubouꞌ minaniꞌ iseꞌine izingumuꞌ gili holiseꞌ minilisa numudeuꞌ zisiti minamilive li numuꞌningutiꞌ zisiti viseꞌ igi di hulaaꞌ naniꞌ neꞌmine igi lingine lihimete nomineꞌ minelone li goloso initeꞌ lengita nolineꞌ nene viseꞌ igi di hulilo. Idoꞌ Zuda vete aꞌmine iseꞌine izineꞌ holisekumuꞌ nene sipisipi angale ma bilaaꞌ naniꞌ neꞌmino leliꞌ sipisipi angale Kilisitoꞌnisi bilikevo leliꞌ lihimetemuꞌ hilineꞌ nenako lingine lamineꞌ lihimetine nomineꞌ nizaniꞌ gele neive.
1CO 5:8 Nemuꞌ nene Zuda vete aꞌmine holiseꞌ minaaꞌ naniꞌ gameneuꞌ gameneuꞌ nene zisiti hulamavo lulu izamineꞌ beleti ni minaaꞌ naniꞌ neꞌmino laza nene litehe initeꞌ zisiti neꞌmino lute golososi monovo golososi lelita minamineꞌ mino lute lisiheꞌ laminekisi mino initeꞌ lamineꞌ gihilevoꞌ ogo molo minelone.
1CO 5:9 Luhuvo initeꞌ gomuꞌ ma tiꞌ lo gize lingimuvoniꞌ ma neive: Lingine nene veneꞌ vemohoꞌ monovo goloso gopoꞌ napa igaꞌ avesi bizi moni zogo mili namilo lo lo-lengede nouvoniꞌ ma neive.
1CO 5:10 Nene luvoniꞌ nene me misubouꞌ aleve Oꞌmosomuꞌ gilamaniꞌ heta atoꞌ aleve ma gopoꞌnapa monanikisi idoꞌ mumuzoꞌ igaꞌ avesi gumine gizengize vesi idoꞌ soza oꞌmosomuꞌ ngopoꞌni laaꞌ avesi mudise huli-ngidi mini kegesi minilo luvodini neꞌmine ve misubo vaitoꞌ miniꞌmi monaaꞌ naniꞌ nenako huli-ngidi mini kegesilisa huli-ngidi zaaꞌ misubola vadine. Lingine misubo mukiꞌ huli mala ngeli vamilisanako ma mini kegesilizave luvodini ngeli neꞌmine amilizadoꞌ luvodine.
1CO 5:11 Nemuꞌ nene luhuvo gize lingimuvoniꞌ gamaziꞌmi monovo ma nene neꞌmino neive: Eveneꞌ ma Izesuꞌ evenele leliꞌ muliseutiꞌ none laaꞌ nave veneꞌ vemohoꞌ engiꞌ nete monovo goloso igaꞌ ilizaniꞌ nehe mumuzoꞌ igaꞌ ilizahe soza oꞌmosomuꞌ ngopoꞌni laaꞌ ilizahe noso ni sipaki igaꞌ ilizahe idoꞌ gumine gize ngize ve minilizahe neꞌmine ve nesi nene bizi moni zogo milamilizave. Ee, nosoꞌ niteꞌ engikisi makaꞌ mo kekeꞌ namilizave.
1CO 5:12 Naza nene monoꞌ gilamaniꞌ aleve engiꞌ monovomuꞌ izeꞌ molo lo huko-ngedaaꞌ gono nene neniꞌ gono nomineꞌ nenako engikumuꞌ nene lamuve. Heta monoꞌ gilamave engiꞌ monovoꞌinemuꞌ izeꞌ molo laaꞌ nene Oꞌmosoꞌmi gono neive. Idoꞌ lengiꞌ muluseuꞌ monoꞌ nigilaniꞌ aleveti gamaziꞌinemuꞌ laaꞌ nene lengiꞌ gonotine ma nenako damilizahe. Nemuꞌ nene monoꞌ godolouꞌ tiꞌ lo minineꞌ nene gili dalo: Ve ma ingine monovo goloso daaꞌ niilizave nene lengiꞌ mulisetinguꞌ minamilizaze. nGimiseli hulilo.
1CO 6:1 Idoꞌ lengitatiꞌ maliꞌmo eze zuho ma lihime molo-davo aza goniꞌ o-delineꞌ nene monoꞌ aleve nizada do vo goniꞌ o-delineꞌ o neineꞌ nenako neꞌmine amo Oꞌmosomuꞌ gilamavetida do vo goniꞌ o-daaꞌ neive. Naza giluvoniꞌ lingine neꞌmine ilisa longovozo hililizahe lo giluvoniꞌza longovozo hilami neꞌmine igaꞌ nave.
1CO 6:2 Laza Oꞌmosoꞌmi evenele nete misubouꞌ aleve Oꞌmosomuꞌ gilama aleveti gamaziꞌine nene gelekaꞌ gelekaꞌ ogo mineloneꞌ nenako gilamaniꞌ nehe. Ee, gamaziꞌine nene gelekaꞌ gelekaꞌ ogo minelesunako lingine gamazi ngomo nesi nene gililizadoꞌ lisiheꞌ amahe.
1CO 6:3 Laza nene angeloliti gamaziꞌine nesi gele-ngedeloneꞌ nenako nemuꞌ gilamaniꞌ nehe. Nemuꞌ nene me misubouꞌ initeliti gamaziꞌine nene gele-ngedatoꞌ lisiheꞌ gehepeve o none.
1CO 6:4 Nemuꞌ nene me misubouꞌ initeliti gamazi lengita ma sotoꞌ ogavo ma aꞌmine gamazitine nene gili-lidilizave li engita di vaaꞌ naniꞌ alevemuꞌ nene Oꞌmosoꞌmi evenele zuho laza engikumuꞌ gilunivo monoꞌine nomineꞌ mo haza initeꞌ nizaniꞌ nenako engita nanimuꞌ di vaaꞌ nave.
1CO 6:5 Aꞌmine noluvoniꞌ nene longovozo hililizave losa noluve. Idoꞌ monoꞌ gilave Izesuꞌ zuho lengiꞌ muliseuꞌ gamazi ma sotoꞌ ilineꞌ nene galauꞌ otohato o minivo do lisiheꞌ o-lengedelive nene hamokisi ma minamihe.
1CO 6:6 Ma noloseiha gamazitine nene ha do lisiheꞌ o-lengedelinako ezela di vamavo linginelatiꞌ malite lengiꞌ zuho ma nene zasila ngeleꞌmizi di vi goniꞌ i-ngidaaꞌ naniꞌ nene goloso ve. Idoꞌ neevoꞌ nomive. Aꞌmine zasi nesi nene Izesungumuꞌ gili eleꞌvoleꞌ isaꞌmanako engita ngeleꞌmizi di vi goniꞌ i-ngidaaꞌ naniꞌ nene mo goloso gehepeve ve.
1CO 6:7 Lingine zuho monokuꞌ minangutiꞌ di gonitoꞌ mili-ngidaaꞌ nadiꞌmo nene monokutiꞌ mo limi ingikeve. Linginela lihime ma mili-lingidikevo ma nene goniꞌ i-ngidami huli ngimikilizaniꞌ nene lamineꞌ o neinako nanimuꞌ goniꞌ i-ngidaaꞌ nave. Idoꞌ lengiꞌ initetine gumine dikevo ma goniꞌ nene i-ngidami huli ngimikilizaniꞌ nene lamineꞌ o neinako nanimuꞌ goniꞌ i-ngidaaꞌ nave.
1CO 6:8 Neꞌmine amilizanako lingine nene langisetinesi lihime mili-ngidi monovo lisiheꞌ aniꞌ gilivo mini goꞌine izi gumine damine igaꞌ nave. Neꞌmine igaꞌ niigisa monokuꞌ minave lengiꞌ zuho nesi nene neꞌmine i-ngidaaꞌ nave.
1CO 6:9 Initeꞌ goloso daaꞌ nave nete nene Oꞌmosoꞌmi gizebouꞌ ngeli vi hilamilizaniꞌ nenako nemuꞌ gilamaniꞌ nehe. Eveneꞌ ma veneꞌ vemohoꞌ monovo goloso gopoꞌ napa igaꞌ navesi soza oꞌmosomuꞌ ngopoꞌni laaꞌ navesi eveneꞌ ma ve maliti eleꞌningine gopo daaꞌ navesi idoꞌ ve ma veneꞌ vemohoꞌ initeꞌ igaꞌ adiꞌmine igi vemohoꞌ engiꞌ okoꞌninguꞌ initeꞌ igaꞌ nave nesi idoꞌ veneꞌ engiꞌ okoꞌninguꞌ initeꞌ igaꞌ naniꞌ venekisi idoꞌ gumineloꞌ vesi idoꞌ ve maliti initetoꞌ mumuzoꞌ igaꞌ navesi idoꞌ noso ni sipaki igaꞌ navesi eveneꞌ divi ledivika li gamazi goloso laaꞌ navesi gumine gize ngize ve nesi nene Oꞌmosoꞌmi gizebouꞌ nene ngeli vi hilamilisaze. Lingine laza gopo minelonidotiꞌ nene aꞌminguꞌ ha vo holalobe li gopo gatine gilamilo.
1CO 6:11 Idoꞌ gomuta nene lengikutiꞌ eveneꞌ linge ma nete neꞌmini goloso initeꞌ daaꞌ ave ma minaniꞌza lingine igi Guvelesi ve Izesuꞌ Kilisitoda giꞌmizi eze gulive nene di lengita adiꞌmo Oꞌmosoꞌmi Sikalahuꞌ nene lengita ogo gono do aꞌmine monovo golosotine nene gilite-lengedo Oꞌmosoꞌmi evenele lamineꞌ loloꞌ o-lengedavo Oꞌmosoꞌmo lihimetinesi nomineꞌ ve lo-lingidineꞌ ve.
1CO 6:12 Lingine initeꞌ mukiꞌ nene ha gopo gamaziꞌvesi nomineꞌ ogo molo olosune laaꞌ naniꞌza aꞌmine initeꞌ linge ma nete leleꞌmize lamineꞌ amilisave. Ee, lingine initeꞌ mukiꞌ nene ha gopo gamaziꞌvesi nomivo ogo molo olosune laaꞌ naniꞌza initeꞌ ma ogo molo ogaꞌ nounivo aꞌmine initeliꞌmo guvetesi ve neꞌmine loloꞌ o lemavo agae neꞌmine amolone lo mineloneꞌ nesi geli geli ogo ogo molo minelesunako nemuꞌ nene naza initeꞌ maliꞌmo guveꞌnesi ve loloꞌ ogalive lo initeꞌ ato atoꞌ nene gopo osaꞌmuve.
1CO 6:13 Laminetoꞌ likeniꞌ neive. Oꞌmosoꞌmo nosoꞌ niteꞌ do sotoꞌ ineꞌ nene gatudemuꞌ ve losa do sotoꞌ ineꞌ ve. Idoꞌ gatude do sotoꞌ ineꞌ nene nosoꞌ nitekumuꞌ ve losa do sotoꞌ ineꞌ ve. Ne neiha eiꞌ Oꞌmosoꞌmo lavo nosoꞌ nitekisi gatudesi mudise osuꞌ ha lilisasive. Ee, Oꞌmosoꞌmo nosoꞌ nitekisi gatudesi nene neꞌminemuꞌ do sotoꞌ ineꞌza okode do sotoꞌ ineꞌ nene veneꞌ vemohoꞌ gopoꞌ napa ingalizave losa do sotoꞌ amo Guvelesi vela gelekeleꞌ igi nizavo Guvelesi veꞌmo okodeloꞌ gizebo o minelive losa okode nene do sotoꞌ ineꞌ ve.
1CO 6:14 Nemuꞌ nene Oꞌmosoꞌmo Guvelesi ve hele neingutiꞌ do ote-dineꞌ ve. Idoꞌ aꞌmineꞌmine ogo amuzoꞌvedunuꞌ lelikisi hele noloningutiꞌ do ote-ledeleseive.
1CO 6:15 Lingine nene Kilisitoꞌ okoꞌnoloꞌ gizene ana neꞌminisa nene miniꞌmi moni nizave. Nemuꞌ nene gilamaniꞌ nehe. Nemuꞌ nene laza Kilisitoꞌ okoꞌno hamoꞌ neꞌmine minuneꞌ gilivo minuningutiꞌ linge ma nene Kilisitoꞌ okoꞌnoloꞌ gizene ana neꞌmine minaniꞌ matesi vi pasidiaꞌ alusi ingalizaniꞌ neꞌmo Kilisitoꞌ okoꞌno ma nene di vi pasidiaꞌ veneꞌ alusi di gopo igi di hamoꞌ ilisanako nemuꞌ nene neꞌmine mo kekeꞌ amolone.
1CO 6:16 Ee, monoꞌ godolouꞌ gamazi ma veneꞌ vemohoꞌ bizi ingalisineꞌ nene hamoꞌ liliꞌ ilisasive lo neineꞌ nenako pasidiaꞌ venekisi ongalive nene aꞌmine venekisi hamoꞌ liliꞌ ilisasive. Nemuꞌ nene lingine gilamaniꞌ nehe.
1CO 6:17 Ne neiha eveneꞌ ma aza Kilisitoda vo giꞌmizelive nene Kilisitokisi luꞌine hamoꞌ loloꞌ ogavo minilisive.
1CO 6:18 Lingine veneꞌ alusi gopoꞌ napa ingiꞌmi monaaꞌ monovomuꞌ nene golise igi mehedine imilo. Initeꞌ goloso ato atoꞌ vaiꞌ nevo dalineꞌ nene okonga losuvolotikovoꞌ dalineꞌza veneꞌ alusi gopoꞌ napa ongalineꞌ nene geiꞌ okonga gihile nene lihime molo-do do goloso o-delesane.
1CO 6:19 Oꞌmosoꞌmi Sikalahuꞌ nene Oꞌmosoꞌmo lehize-lengedavo lutinguꞌ minevo dovoꞌ ogo minive eiꞌ kekeize numuꞌve nene lengiꞌ okodine nene neive. Lengiꞌ initetine nomive. Nemuꞌ nene gilamaniꞌ nehe.
1CO 6:20 Ee, Oꞌmosoꞌmo lengiꞌ nene meni hizo do eita o neineꞌ nenako okodine nene lengiꞌ initetine nomive. Nemuꞌ nene aꞌmine okodinedunuꞌ nene eze gulive do naba ilineꞌ initekovoꞌ nene igi mili minilo.
1CO 7:1 Idoꞌ lingine luhuvo initeꞌ gizi huli-nidi longoꞌ i-nidaniꞌ initeꞌ mamuꞌ nene lo sotoꞌ ogo lo-lengemeloze. Gililo. Ve maliꞌmo veneꞌ damo hazavoꞌ minelineꞌ nene nesi ha lamineꞌ o neive.
1CO 7:2 Neꞌmine o neineꞌza eveneꞌ mukiꞌ igaꞌ adiꞌmine igi lingine veneꞌ alusi gopo ingikelizanako nemuꞌ nene vemohoꞌ mukiꞌ hamo hamolite veneꞌ di minilizaniꞌ nesi nene lamineꞌ oloseive. Idoꞌ veneꞌ mukiꞌ hamo hamoꞌ ingine veloꞌ vanikovoꞌ minilizaniꞌ nene lamineꞌ oloseive.
1CO 7:3 Ve gaza elengahosi bizi ingalisidoꞌ o neize. Initeꞌ ogakumuꞌ aꞌmanapa o damozo. Idoꞌ veneꞌ gaza vangahosi bizi ingalisidoꞌ o neize. Gazasi initeꞌ ogakumuꞌ nene aꞌmanapa o damozo.
1CO 7:4 Veneꞌ lingine okodineꞌmi initetoꞌ nene gizebo amave. Asi vadinge nete gizebo i nizave. Aꞌmineꞌmine ogo vemohoꞌ lengiꞌ okodineꞌmi initetoꞌ nene gizebo amave. Asi mo eledinge netesi nene gizebo i-lingidi nizave.
1CO 7:5 Nemuꞌ nene elenahoi vanahoi lingine initeꞌ ili ma aꞌmanapa aꞌmanapa amilizo. Oꞌmosola lolosive lilisineꞌ gameneukovoꞌ nene Oꞌmosola gamene nanikeꞌ lolosive lilisihe li hukiki initeꞌ ami mini Oꞌmosola lilisineꞌ nene lamineꞌ o neive. Neꞌmine o neineꞌza Satani neꞌmo lengemenguꞌ molavo initeꞌ goloso ogatoꞌ lutine otavo moni veneꞌ vemohoꞌ atokisi gopoꞌ napa ingikelisive. Nemuꞌ aꞌmine gamene milasineꞌ nene osuꞌ lavo ma initeꞌ nene iheꞌ ha ilisasive lo noluve.
1CO 7:6 Idoꞌ neꞌmine lo nolo-lingimuvoniꞌ nene neꞌmine manaꞌmine ilizave idoꞌ amilizave lo lo huko lamuve. Langisetine nene neꞌmine ilisa gili nilisave lo gele noosa nogele lingimuve.
1CO 7:7 Naza giluvoniꞌ eveneꞌ mukiꞌ nene neniꞌ uvodiꞌmine igi veneꞌ dami hazavoꞌ minilisave lo gele nouvoniꞌza Oꞌmoso neꞌmo mino ogo molo oloneꞌ amuzote nene ato atoꞌ lehize-lidineꞌ nenako neꞌmo ma nete nene na minuvodiꞌmine igi ngeli minamilisave.
1CO 7:8 Idoꞌ nemuꞌ veloꞌ vamaniꞌ venekumukisi idoꞌ veneꞌ damavemukisi veneꞌ gevonokumukisi nene naza neꞌmine lo noluve: Ingine nene neniꞌ uvodiꞌmine igi veneꞌ dami veloꞌ vami hazavoꞌ minilizaniꞌ nene lamineꞌ oloseiha
1CO 7:9 veneꞌ vemohoꞌ malite veloꞌ vaaꞌ veneꞌ daaꞌ amo haza minelone lisa nizavo initeꞌ ogakumuꞌ okoꞌninguꞌ oloꞌ loꞌmo novivo hongu li minilizadoꞌ lisiheꞌ amaniꞌ aleve ingine nene ha veloꞌ vaaꞌ veneꞌ daaꞌ ilizave. Initeꞌ ogakumuꞌ okodinguꞌ oloꞌ laaꞌ neꞌmo goloso initeꞌ daaꞌ akauꞌ lengeleꞌmize molaloseinako veloꞌ vaaꞌ idoꞌ veneꞌ daaꞌ nene lamineꞌ o neive.
1CO 7:10 Idoꞌ veneꞌ vemohoꞌ liliꞌ igi nizaniꞌ aleve nene lengikumuꞌ tiꞌ lo lo huko nolo-lingimuha aꞌmine nene neniꞌ luvoniꞌ gamazivoꞌ nomive. Guvelesi veꞌmo lo huko-lingidineꞌ gamazi ve. Aꞌmine gamazi nene tiꞌ lo neive: Veneꞌ ingine vaꞌningine huli-ngidi vamilizave.
1CO 7:11 Neꞌmine o neineꞌza vaꞌningine ma huli-ngidilizaniꞌ nene eleꞌninge ingine ve gohi maloꞌ vami haza minilizave. Idoꞌ haza minesoꞌ ngisamilineꞌ nene tineꞌ mili gohi vaꞌningida alizave. Idoꞌ vaꞌninge nete eleꞌningine nene huli-ngidamilizave.
1CO 7:12 Idoꞌ naza eveneꞌ linge mamuꞌ Guvelesi veꞌmi gamazi nomineꞌ naꞌnise tiꞌ lo noluve: Izesuꞌ evenele zuho maliꞌmo Kilisitoꞌnimuꞌ gele eleꞌvoleꞌ ami veneꞌ ma do neivo vanahosi bizi mini di vilisida aꞌmine veneꞌ nene Oꞌmosoꞌmo do lamineꞌ o-davosa elenaho Kilisitoꞌnimuꞌ gele eleꞌvoleꞌ amineꞌ neꞌmo vanaho gele eleꞌvoleꞌ o neineꞌve nene ngelo do goloso o-damilidoꞌ mineleseinako nemuꞌ elenaho aza aꞌmine veloꞌ nene ha minelove nolivo ma aꞌmine veneꞌ nene do hulo-damo ha do minelive. Idoꞌ Izesuꞌ evenele zuhoutiꞌ veneꞌ maliꞌmo Kilisitoꞌnimuꞌ gele eleꞌvoleꞌ ami veloꞌ vo neivo elenahosi bizi mini di vilisida aꞌmine ve nene Oꞌmosoꞌmo do lamineꞌ o-davosa vanaho Kilisitoꞌnimuꞌ gele eleꞌvoleꞌ amineꞌ neꞌmo elenaho gele eleꞌvoleꞌ o neineꞌve nene ngelo ma do goloso o-damilidoꞌ mineleseinako nemuꞌ nene vanaho aza aꞌmine veneꞌ nene ha do minelesuve nolivo ma elenaho aza hulo-do vamilive. Aꞌmine Izesungumuꞌ gili eleꞌvoleꞌ ama vadingesi idoꞌ eledingesi nene Oꞌmosoꞌmo do lamineꞌ o-ngedamaaꞌ neineꞌ neidiniko izipe gidilizaniꞌ nene Oꞌmosoꞌmi evenele zuho minami heta atoꞌ ve minadine. Neꞌmine o neiha do lamineꞌ o-ngedaaꞌ neineꞌ aleve nizaniꞌ gilineꞌ neꞌmo izipahatine nene Oꞌmosoꞌmi evenele zuhoutiꞌ nizave.
1CO 7:15 Izesuꞌ zuho minamineꞌ veneliꞌmo he idoꞌ vemoholiꞌmo he vanahine nolihe elenahine nolihe hulo-delove nolivo ma Oꞌmosoꞌmo ezesi bizi minilisive lo hukamineꞌ mo asi hongu li laminivoꞌ minilizave lo neineꞌ nenako ma volone nilavo ma nene aꞌminemuꞌ oꞌve li-ngidamilo.
1CO 7:16 Ne neiha Izesuꞌ zuho minamineꞌ elengaho nolihe vangaho nolihe aꞌmingutiꞌ maliꞌmo minelesive lilineꞌ nene Oꞌmosoꞌmo do uꞌ izeli akaloꞌ eleꞌmize molalibe nemuꞌ gelamange. Mo hulo-damozo.
1CO 7:17 Idoꞌ Izesungumuꞌ gele eleꞌvoleꞌ amineꞌ vangaho nolihe elengaho nolihe nesi bizi minilisive lo Oꞌmosoꞌmo lo huko lamive lo lo-lingimuvoniꞌ ma neineꞌza Guvelesi veꞌmo lengiꞌ hamo hamoꞌ minevoꞌ alevotine nene neꞌmine manaꞌminesi minilizave lo lengeleꞌmize molavo aꞌmine minevoꞌ alevotinesi minikevo Oꞌmosoꞌmo elese molo-lengedo eiꞌ ve lo lengeleꞌmize molaniꞌ gameneuꞌ minaniꞌ minevoꞌ alevotine minineꞌ maꞌmino ha minivosa minilo. Idoꞌ Izesuꞌ evenele mulise ato atoꞌ miniꞌmi monada nene neꞌmine lo lo huko-ngedaaꞌ nouve.
1CO 7:18 Ve ma Zuda veti noso mili-di okoꞌno lolovo huki-dikedoꞌ Oꞌmosoꞌmo Izesuꞌ zuho minelive lo eleꞌmize molavo ma aꞌmine Zuda veti noso mili-daniꞌ nene do hulamoloseive. Idoꞌ ve ma okoꞌno lolovo huki-damaniꞌ heta atoꞌ ve minidoꞌ Oꞌmosoꞌmo Izesuꞌ zuho minelive lo eleꞌmize molavo ma Zuda veti noso mili-nidi okoꞌne lolovo huki-nidilizave lo lamilive.
1CO 7:19 Ne nanitekumuꞌ ve. Okode lolovo huki-lidikevo minaaꞌ nene haza initeꞌ ve. Idoꞌ okode lolovo hukamuneꞌ minaaꞌ nesi nene haza initeꞌ ve. Haza initeꞌ neiha initeꞌ gihile nene Oꞌmosoꞌmo lo huko-lidineꞌ gamaziꞌve gele daaꞌ ne neive.
1CO 7:20 Oꞌmosoꞌmo elese molo-lengedo eiꞌ ve lo lengeleꞌmize molaniꞌ gameneuꞌ lingine hamo hamolite minevoꞌ alevotine gomuꞌ minivo minaniꞌ maꞌmino ha minivosa minilo.
1CO 7:21 Idoꞌ eveneꞌ malite geiꞌ okonga nene meni hizikevo engiꞌ initeꞌ neꞌmine loloꞌ ogo goboni gono do-ngedeꞌmo vo nanivo Oꞌmosoꞌmo eiꞌ ve lo geleꞌmize molavo ma goboni ve naningumuꞌ nene gopo gaka gelamo aꞌminguꞌ nene ha minezo. Ne neiha aꞌmine goboni gonoutiꞌ apaso vilineꞌ aka ma sotoꞌ o-gedavo ma aꞌmidoꞌ eꞌmetelineꞌ nene lamineꞌ oloseive.
1CO 7:22 Ve ma eveneꞌ maliꞌmi goboni ve neivo Guvelesi veꞌmo eiꞌ ve lo eleꞌmize molalineꞌ nene Satani neꞌmi goboni ve miningutiꞌ apase-dineꞌ nenako neꞌmo nene Guvelesi veꞌmi evenele loloꞌ ogosa goboni ve minamineꞌ gelave. Nemuꞌ nene goboni ve miningumuꞌ ve lo gopo gala gelamilive. Idoꞌ aꞌmineꞌmine ogo ve ma goboni ve minamo neivo Guvelesi veꞌmo eiꞌ ve lo elese molo-do eleꞌmize molalineꞌ aꞌmine ve nene Kilisitoꞌ goboni ve loloꞌ ogo mineleseive.
1CO 7:23 Ee, Izesuꞌ aza minevoꞌ alevoꞌve hulo lengikumuꞌ helo lengiꞌ meni hizavo eiꞌ initeꞌve liliꞌ ikeniꞌ nizanaze. Nemuꞌ nene misubouꞌ alevete meni hizi-lingidikevo engiꞌ goboni gono di-ngidi minamilo.
1CO 7:24 Idoꞌ nemuꞌ nene neze zuhokizo, Oꞌmosoꞌmo elese molo-lengedo lengeleꞌmize molavo ma nene lingine hamo hamoꞌ gomuꞌ mini mili minaniꞌ minevoꞌ alevotine maloꞌ aꞌmidoꞌ nene Oꞌmososi makaꞌ makaꞌ minilo.
1CO 7:25 Veloꞌ vamaniꞌ idoꞌ veneꞌ damaniꞌ alevemuꞌ nene Guvelesi veꞌmo gamazi lo huko lamivo naꞌniseꞌne gaꞌne giluvoniꞌ gamazivoꞌ ma lo-lengemelesuve. Idoꞌ Guvelesi ve aza mulumoꞌne ningo do nuꞌ izo eiꞌ gonoloꞌ neleꞌmize molaniꞌ nenako gamazi lamineꞌ lengiꞌ lo-lengemelodoꞌ gili nimilizadokovoꞌ lisiheꞌ o nouve losa gele nouve.
1CO 7:26 Nemuꞌ nene tiꞌ lo gele nouve. Idise aꞌmene apiꞌ ogo sotoꞌ o-lengedeꞌmo novineꞌ geni initeꞌ neꞌmi lulouꞌ nizaniꞌ nenako nemuꞌ veloꞌ vami idoꞌ veneꞌ dami haza minaniꞌ aleve ingine minaniꞌ neꞌmini hazavoꞌ minilizaniꞌ nene lamineꞌ oloseive losa gele nouve.
1CO 7:27 Idoꞌ gaza veneka neivo ma nene naza veneꞌ alamo mo hulo-delove lo gelamozo. Idoꞌ veneka ma nomivo ma naza veneꞌ viseꞌ olove lo gelamozo.
1CO 7:28 Idoꞌ veneꞌ dalineꞌ nene goloso amoloseive. Idoꞌ veneꞌ alu maliꞌmo veloꞌ vilineꞌ nesi goloso amoloseive. Ne neiha veneꞌ vemohoꞌ liliꞌ ikeniꞌ nete nene okoꞌine losuvoꞌmi initekumuꞌ geni engita sotoꞌ ilingumuꞌ nene gilavo geni geni ivo minilisanako neꞌmine geni nene lengita sotoꞌ ogalive lo gelo veloꞌ vami veneꞌ dami haza minilizaniꞌ alevevoꞌ minilizaniꞌ nene lamineꞌ ve lo noluve.
1CO 7:29 Neze zuhokizo, gamazi lo-lengemeloniꞌ mene gililo. Oꞌmosoꞌmo molaniꞌ gamene naba nene mo alitave. Mo alitaze. Aꞌminemuꞌ nene di vaꞌvaꞌ igi minilizaniꞌ o neinako lingine initeꞌ gohi mamuꞌ gili minavo aꞌmine gamene naba nemuꞌ gatine molavo veneꞌ vemohoꞌ lingine vadinginemuꞌ gilavo dizaaꞌ neineꞌ idoꞌ eledinginemuꞌ gilavo dizaaꞌ neꞌmo Guvelesi vemuꞌ gilaaꞌ naniꞌ nene do leme-dalize. Veneꞌ vemohoꞌ liliꞌ igi nizaniꞌ aleve lingine nene veneꞌ vemohoꞌ liliꞌ igi minamaniꞌ eveneꞌ hamokovoꞌ neineꞌ gilivosa minilo.
1CO 7:30 Idoꞌ eveneꞌ ma linginela mulumo alumo gelaaꞌ initeꞌ ma minavo ive nama igaꞌ nave lingine nene ive nama amaniꞌ gilivosa minilo. Idoꞌ ve ma lingine initeꞌ mamuꞌ longolize ize minaaꞌ naniꞌ aleve lingine nene neꞌmine amaniꞌ gilivosa minilo. Idoꞌ initeꞌ maketi milaaꞌ meni hizaaꞌ igaꞌ nave lingine nene henenitine nomineꞌ nizaniꞌ gili minilo.
1CO 7:31 Idoꞌ eveneꞌ ma me misubouꞌ initetoꞌ gono daaꞌ nave ingine nene aꞌmidoꞌ luꞌine mili mini gono daniꞌ gelamivosa minilizave. Me misubosi idoꞌ aꞌmine misubouꞌ initeꞌ igi mili igaꞌ naniꞌ nesi nene osuꞌ loloseinako nemuꞌ gamazi mene noluve.
1CO 7:32 Gopo gatine gililiza initeꞌ nene lengita minamineꞌ minilizave losa gele nouve. Gohuno ve nete nene naniteꞌ naniteꞌ okunivo Guvelesi veꞌmo mulunouꞌ lamineꞌ gelelihe li Guvelesi veꞌmi initekumuꞌ luꞌine mili gili minaaꞌ naha
1CO 7:33 veneꞌ di nizave nene gopo gaꞌine gili naniteꞌ naniteꞌ okunivo venete lamineꞌ gililizahe li me misubouꞌ initekumuꞌ luꞌine mili gili minaaꞌ nave.
1CO 7:34 Neꞌmine igaꞌ naniꞌ neꞌmo nene luꞌine gaꞌine seꞌze lo minaaꞌ neive. Idoꞌ veloꞌ olihe vamaniꞌ alu nete nene okodesi lutesi Guvelesi veꞌmi initekovoꞌ mino kekeize lo minelive li Guvelesi veꞌmi initekumuꞌ luꞌine mili gili minaaꞌ naha veloꞌ vi nizaniꞌ veneꞌ nene gopo gaꞌine gili naniteꞌ naniteꞌ okunivo vademote lamineꞌ gililizahe li me misubouꞌ initekumuꞌ luꞌine mili gili minaaꞌ nave.
1CO 7:35 Lengiꞌ nene lengeleꞌmize lamineꞌ olove losa gamazi mene nolo-lingimuve. Lengiꞌ veneꞌ daaꞌ idoꞌ veloꞌ vaaꞌ akatine nene hize tile-lengedosa lamuve. Lingine gamene gamene lamineꞌ vevesi mini lutine initeꞌ maloꞌ maloꞌ milami lutine Guvelesi velokovoꞌ mili gelekeleꞌ i-di minilizave losa noluve.
1CO 7:36 Idoꞌ ve ma aza alungo ma izeni i-dikevo mino alingeꞌ nene veneꞌ damo haza minelove lo lo huko nolinguꞌ aꞌmine izeni elenahine nene ma duvo lo lulo amuzo molo otelineꞌ neꞌmo aꞌmine alumuꞌ lihime daniꞌ geleleseinako eikumuꞌ lulouꞌ gilidoꞌ do molo aꞌmine alu nene daloseive. Dalineꞌ neꞌmo goloso amoloseive.
1CO 7:37 Ne neiha ve maliꞌmo veneꞌ mo damolove lo lo huko eze lulo amuzo molo gizebo ogavo veneꞌ daakumuꞌ lulo otamivo hazavoꞌ minelidoꞌ lisiheꞌ o neivo ma izeni elenahine nene haza gizebo o-do mino damilineꞌ nene lamineꞌ oloseive.
1CO 7:38 Nemuꞌ nene ve ma aza izeni elenahine ma dalineꞌ nene lamineꞌ oloseiha ve ma izeni elenahine ma damo minelidiꞌmo nene ivileꞌ ogosa lamineꞌ oloseive.
1CO 7:39 Veneꞌ ingine vaꞌninge hilami veꞌinesi minilizaniꞌ gameneuꞌ nene vaꞌningine huli-ngidamilizaniꞌ o neineꞌ nenako bizivoꞌ minilisave. Idoꞌ vaꞌninge hilikevo ve maloꞌ volone lilizaniꞌ nene ha vilisaha aꞌmine vilizave nene Izesuꞌ zuho minilizavelokovoꞌ vilizave.
1CO 7:40 Neꞌmine ilizaniꞌza naza giluvoniꞌ veloꞌ vami hazavoꞌ minilizaniꞌ nene lamineꞌ minilisave losa gele nouve. Meve nene neniꞌ gamazi neineꞌza naza giluvoniꞌ Oꞌmosoꞌmi Sikalahuꞌ nene nenita neivosa eiꞌ gilidoꞌ hize eleꞌ ogo noluhe losa noluve.
1CO 8:1 Idoꞌ longoꞌ ma i-nidaniꞌ maloꞌ nene soza oꞌmoso ngimaniꞌ initeꞌ naaꞌ nemuꞌ lo-lengemelosuve. Lingine mukitoꞌ nevoꞌmine initeꞌ monovo danava gelaaꞌ noune laniꞌ nene mo laminetoꞌ laniꞌza ve ma ingine laꞌlisete initeꞌ monovo danava gelaaꞌ unive ne none laaꞌ nave nene engiꞌ okoꞌine di hozi li hokolizeꞌ igi minaaꞌ nave. Ingine nene neꞌmine igi minaaꞌ naha ve ma ingine luꞌine eveneꞌ ngimaaꞌ nave minaniꞌ nete nene hize eleꞌ i-ngidi minaaꞌ nave.
1CO 8:2 Idoꞌ ve ma ingine initeꞌ monovo danava gele osuꞌ lo none li gilaaꞌ nave ingine nene initeꞌ gele vevesaaꞌ monovo nene olihe gilamave.
1CO 8:3 Ne neineꞌza ve ma ingine Oꞌmoso luꞌine imaaꞌ nave nene Oꞌmosoꞌmo engikumuꞌ nene eiꞌ ve lo ningo gele neive.
1CO 8:4 Idoꞌ nelotiꞌ nene soza oꞌmoso initeꞌ ngimaniꞌ initekutiꞌ naaꞌ nemuꞌ naza tiꞌ lo noluve: Aꞌmine soza oꞌmoso nene initeꞌ gihile minamaniꞌ nenako aꞌminete me misubouꞌ initeꞌ ma amilisave. Oꞌmoso eiꞌ hamokovoꞌ minineꞌ nene neive li lingine laniꞌ nene lamineꞌ ve lo gele nouve.
1CO 8:5 Ee, eveneꞌ ma ingine Oꞌmosote ve idoꞌ Guvetesi ve ve laniꞌ initeꞌ okulumokukisi misuboukisi nene minaniꞌ neiha idoꞌ aꞌmine soza oꞌmoso idoꞌ guveꞌinesi ve liliꞌ igi minaniꞌ initeꞌ nene lamineꞌ mo vaiꞌ li minaniꞌ ve.
1CO 8:6 Neꞌmini minaniꞌ neiha Kilisitoꞌ evenele zuho laza nene tiꞌ lo gele none: Oꞌmoso eiꞌ hamoꞌ nene neive. Aza nene Meteho initeꞌ mataꞌ mukiꞌ do sotoꞌ ive ne neive. Idoꞌ laza nene eze luloloꞌ ogo molo olone lo eitoꞌ lehete ogo minaaꞌ unive ne neive. Idoꞌ Guvelesi ve nene hamoꞌ neive. Aꞌmine ve Izesuꞌ Kilisitoꞌ nene Oꞌmosoꞌmo eitoꞌ gele medele mino initeꞌ mataꞌ mukiꞌ nesi idoꞌ leliꞌ nesi do sotoꞌ ive ne neive.
1CO 8:7 Neꞌmine ve neingumuꞌ nene leliꞌ ha gele noneꞌ nenako soza oꞌmoso nene initeꞌ gihile nizamaze. Nemuꞌ nene eveneꞌ linge ma lingine soza oꞌmoso ngimaniꞌ nosoꞌ nitekutiꞌ naloneꞌ nene goloso amoloseive laaꞌ naniꞌza lengita Izesuꞌ evenele ma nete nemuꞌ olihe gili lamineꞌ amave. Ingine nene gamene galaꞌmudatiꞌ vomine soza oꞌmoso nene initeꞌ gihile ve li ngopoꞌni li minaaꞌ aniꞌ nenako nemuꞌ nene ingine idisesi soza oꞌmoso ngimaniꞌ nosoꞌ nitekutiꞌ nalizaniꞌ nene aꞌmine oꞌmoso ngopoꞌni nolune li gilisa nalisave. Idoꞌ neꞌmine ilizaniꞌ nene luꞌine gilizevo o vineꞌ mininguꞌ nene gili vevesamanako nemuꞌ nene ingine aꞌmingutiꞌ ma nalisa gili laza naloneꞌ nene soza oꞌmoso opoꞌni luneꞌ gelavo mo lihime dalosuneꞌza nevo ha nalosune li gili nalizaniꞌ neꞌmo nene ingine lihime daniꞌ gelavo lengiꞌ zuho nene ngeleꞌmize goloso ilisave.
1CO 8:8 Ne neineꞌza nosoꞌ niteꞌ naaꞌ idoꞌ namaaꞌ monovote neꞌmo Oꞌmosoꞌmo lelikumuꞌ gala gilineꞌ nene ma do atoꞌ amoloseive. Oꞌmosoꞌmi veleloꞌ nosoꞌ niteꞌ ma naloneꞌ neꞌmo do lamineꞌ o-ledamo idoꞌ malise ogo namoloneꞌ neꞌmo nene ma do goloso o-ledamoloseive.
1CO 8:9 Ne neiha soza oꞌmoso ngimaniꞌ nosoꞌ nitekutiꞌ nene ha nalonidoꞌ o neihe li nemuꞌ gili lingine nalizaniꞌ neꞌmo eveneꞌ ma ingine monokuꞌ gilizevo neꞌmine gili minaniꞌ nene monokutiꞌ limi ingikelizaze. Monovotidoꞌ nene gizebo lamineꞌ ilo.
1CO 8:10 Neꞌmine noluvoniꞌ nene nemuꞌ noluve. Gaza Izesuꞌ evenele malike, soza oꞌmoso nene initeꞌ gihile nizamaniꞌ nenako nemuꞌ nene soza oꞌmoso ngimaniꞌ initeꞌ nene ha nalosune lo gele nanivelike, soza oꞌmosoꞌmi monoꞌ numuꞌveuꞌ mino nosoꞌ niteꞌ no nanivo ve ma lulouko monoꞌ gele guno amive aza soza oꞌmoso ngimaniꞌ initeꞌ naaꞌ nene goloso ve lo gelaaꞌ noilive maliꞌmo ningo ehelele izaaꞌ ineꞌ ma nene ehelele izamivo ha vo naloseive.
1CO 8:11 Idoꞌ neꞌmine ilineꞌ nene goloso initeꞌ dalosuve lo gelo vo no lulo do goloso oloseinako neꞌmo monoꞌ gele guno amive geze zuho eikumukisi Kilisitoꞌ aza nene hilineꞌ nenako aꞌmine geze zuho ma nene do goloso o-do gaza soza oꞌmoso ngimangutiꞌ nene ha nalosune lo gelaaꞌ anidiꞌmo mo aka golosoloꞌ eleꞌmize molane.
1CO 8:12 Lingine neꞌmine igaꞌ naniꞌ neꞌmo lingine zuho ma monokuꞌ luꞌine gilizevo o vineꞌ nene di goloso i-ngidi lihime mili-ngidaaꞌ naniꞌ nene Kilisitoꞌnisi lihime mili-daaꞌ nave.
1CO 8:13 Nemuꞌ nene lingine olodiꞌmine igi minilizangisi naza soza oꞌmoso ngimaniꞌ nosoꞌ niteꞌ ma naloniꞌ nene neze zuho ma lihime akauꞌ vikelizave lo aꞌmine ize nevoꞌmingutiꞌ nene namo mino helelosuve.
1CO 9:1 Idoꞌ eveneꞌ ma nehe initeꞌ ma nehe neꞌmineti goboni veꞌine minamuvonako naza nene initeꞌ naniteꞌ olosa gelelohe nene ha olosuve. Naza nene Guvelesi veꞌmi velemuꞌ ogo gono daaꞌ uve aposolo nouve. Guvetesi ve Izesuꞌni nene neniꞌ veꞌnedunuꞌ mo ningekuvoniꞌ ve. Idoꞌ Guvelesi veꞌmi velemuꞌ ogo gono duvoniꞌ neꞌmi gihile lengiꞌ nene nizave.
1CO 9:2 Ee, lengita gono dokuvo Guvelesi veꞌmo eze evenele loloꞌ o-lingididiꞌmo naza nene aposolo gihile nouvoniꞌ nene mo sotoꞌ o neineꞌ nenako nemuꞌ eveneꞌ malite nenikumuꞌ aposolo nomive li gili nilizaniꞌ nene tiꞌ ogo monilize. Asi neniꞌ lengiꞌ aposolo nouvoniꞌ nene langise mo gili nizave.
1CO 9:3 Idoꞌ eveneꞌ malite neniꞌ monovoꞌnemuꞌ izeꞌ mili laaꞌ nahe nemuꞌ nene naza aꞌmidoꞌ mene tiꞌ lo ma nolo-lingimuve:
1CO 9:4 Nazasi makatoꞌ gono dunivesi volonida nene eveneꞌ ma ingine nosoꞌ niteꞌ haza limikevo nalonidoꞌ amihe. Eꞌe, mo ha nalonidoꞌ o neive.
1CO 9:5 Idoꞌ Petololesi Guvelesi veꞌmi akunolo zuhosi aposolo linge masi ingine monoꞌ gonoloꞌ monada monada nene veneꞌinesi makaꞌ monaaꞌ nave. Idoꞌ lingine mo gili nilisave. Leliꞌ nene neꞌmine olonidoꞌ mo lisiheꞌ o noloseive. Olo.
1CO 9:6 Idoꞌ aposolo linge nene nosoꞌ niteꞌ haza ngimikevo naaꞌ naha leliꞌ Banabasikisi nenikisi nene monoꞌ gono helala do idoꞌ helala okode losuvoꞌmi initekumuꞌ nene leliꞌ adedunuꞌ gono do do sotoꞌ ogaꞌ nosive. Ne neiha aposolo linge ma ingine nene nosoꞌ nitekumuꞌ gono dami haza naaꞌ naniꞌ nene ha neiha lelikovoꞌ nene gono dami haza nalisidoꞌ minamasive li lingine gilaaꞌ nahe. Ne nomive.
1CO 9:7 Idoꞌ ve ma ami pilisi ve nene gonoꞌveloꞌ meni imamavo asiꞌvevoꞌ nene okoꞌno losuvoꞌmi initeꞌ nene do sotoꞌ oꞌmo vo minelihe. Idoꞌ ve ma aza gono doo mine zuhoꞌ ogavo o molavo aꞌmingutiꞌ dolizo namilihe. Idoꞌ ve ma zaho bulumakaꞌ gizebo ogo minelingutiꞌ aꞌmine bulumakaliꞌmi amine novozo nene asiꞌve namilive. Neꞌmine igi haza gono mo kekeꞌ mo damilisave.
1CO 9:8 Idoꞌ neniꞌ nene eveneliti gamaziloꞌ eꞌmeto aꞌmine luvoniꞌ gamazi mene nolive lisa nilahe. Eꞌe, Oꞌmosoꞌmi louꞌ gamazi Moseꞌ ma tiꞌ lo gizineꞌ neineꞌ masi ne neive: Bulumakatinelite lengiꞌ viti gihiletine nene lisi di lediꞌ lediꞌ nii-lingidavo ma nene aꞌmingutiꞌ ha nalizadoꞌ o neize. Aꞌmingutiꞌ ma nikelizave li veꞌnidoꞌ nene initeꞌ ma di tili-ngidamilo. Idoꞌ lingine aꞌmine lineꞌ gamaziuꞌ nene Oꞌmosoꞌmo leliꞌ evenekumuꞌ lamo bulumakakumukovoꞌ lave li gili nizahe. Oꞌove. Leliꞌ evenekumukisi lo neineꞌ ma neive. Ee, ganaꞌ gono davesi idoꞌ neꞌmi gihileꞌve do sotoꞌ olosa alingeꞌ gono davesi ingine gonotelotiꞌ gihileꞌve sotoꞌ ogavo ma nelotiꞌ ha nalosune li gono dalizadoꞌ o neineꞌ nenako nemuꞌ aꞌmine gamazi nene lelikumukisi lineꞌ ma neive. Idoꞌ tiꞌ lo gize neineꞌ nenako Oꞌmosoꞌmi louꞌ gamazi nesi nene neniꞌ luvodiꞌmine ogo gonouꞌ ve nene gono haza damilisave lo neineꞌ ma neive.
1CO 9:11 Idoꞌ nelotiꞌ nene lengiꞌ lutinguꞌ monoꞌ nene zuhoꞌ ogosa neꞌmi gihileꞌve okode losuvoꞌmi initeꞌ lengitatiꞌ ma daloneꞌ nene mo initeꞌ nabasi nomive.
1CO 9:12 Eveneꞌ ma ingine nene lengitatiꞌ okoꞌine losuvoꞌmi initeꞌ dalizadoꞌ lisiheꞌ i nizahe idoꞌ leliꞌ nene engiꞌ ngivileꞌ ogosa okode losuvoꞌmi initeꞌ lengitatiꞌ dalonidoꞌ lisiheꞌ o none. Okode losuvoꞌmi initeꞌ lengitatiꞌ nene ha dalonidoꞌ lisiheꞌ o neiha ma damo okode losuvoꞌmi initekumuꞌ loloneꞌ nene eveneꞌ olovoꞌ ikevosa Kilisitoꞌ gamaziꞌve lamineꞌ nene gili dalizaniꞌ akaꞌve hize tilalone lo aꞌmine initeꞌ mukikumuꞌ nene laꞌlisete geni gono gehaaꞌ noune.
1CO 9:13 Idoꞌ monoꞌ numuno nabauꞌ gono dave ingine nosoꞌ niteꞌine nene monoꞌ numuno nabautiꞌ di naaꞌ nave. Ee, monoꞌ numuno nabauꞌ evenetoꞌ medeli mini Oꞌmoso initeꞌ lehizi-daaꞌ gono dave ingine nene Oꞌmoso lehizi-daniꞌ nosoꞌ nitekutiꞌ nene di naaꞌ nave. Lingine aꞌmine nee mamuꞌ gilamaniꞌ nehe.
1CO 9:14 Idoꞌ aꞌmineꞌmine ogo Guvelesi veꞌmi gamaziꞌve lamineꞌ nene di vi li sotoꞌ i ngimaaꞌ ilizave ingine nene li sotoꞌ i ngimilizavelatiꞌ nosoꞌ niteꞌine di nalisave lo asiꞌve Guvelesi veꞌmo lo hukineꞌ ma neive.
1CO 9:15 Ne neineꞌza naza Kilisitoꞌ gamaziꞌve lamineꞌ nene lo sotoꞌ ogo lo-ngemeꞌmo vaaꞌ nouvodoꞌ nene lo sotoꞌ o ngemaaꞌ uvelatiꞌ nene nosoꞌ niteꞌ nevoꞌminesi ma damo haza gidini lo-ngemaaꞌ nouve. Idoꞌ naza luhuvo neꞌmine lo nogizuvoniꞌ nene evenelite gili nosoꞌ niteꞌ nevoꞌmine ma nimilizave losa gelo luhuvo gizamuve. Naza giluvo monoꞌ gamazi haza gidini lo-ngemaaꞌ nouvoniꞌ monovoꞌne nene ede vive lo nolize izaaꞌ nouve. Nemuꞌ aꞌmine nolize izaaꞌ akaꞌne nene hizi tili-nidisa aꞌmine gono daaꞌ nouvongumuꞌ nosoꞌ niteꞌ haza gidini nimamavo hazavoꞌ mine do vo heleloniꞌ nene mo lamineꞌ ve lo gele nouve.
1CO 9:16 Nene nanitekumuꞌ ve. Guvelesi ve aza gamaziꞌne lamineꞌ nene lo sotoꞌ ogo lo-ngemeꞌmo viline lo lo huko-nidineꞌ nenako lo-ngemamoloniꞌ nene lihime nemavo agae agae lo minalove lo aꞌmine gamaziꞌve lamineꞌ nene lo-ngemamo haza mineloniꞌ akaꞌne nomivo mino Kilisitoꞌ gamazi lamineꞌ nene lo sotoꞌ ogo lo-ngemaaꞌ nouvoniꞌ nemuꞌ nene neniꞌ okoꞌne do dizo nolize izamolosuve.
1CO 9:17 Aꞌmine gono dalove lo neiꞌ luꞌne otavosa duvodiniko nelotiꞌ nene meniꞌnesi ha duvodiba neꞌmino nomive. Neniꞌ luꞌne olihe otamivosa Guvelesi veꞌmo aꞌmine gono nene nogimuze. Dozo lavo noduve.
1CO 9:18 Nemuꞌ nene meniꞌne naniteꞌ daaꞌ nouve. Neꞌmino neive. Monoꞌ gono daaꞌ nouvodotiꞌ nene okoꞌne losuvoꞌmi initeꞌ haza gidini dalodoꞌ o neineꞌ nene gele hulo meni dalongumuꞌ lamo Kilisitoꞌ gamaziꞌve lamineꞌ nene lo sotoꞌ ogo lo-ngemelodoꞌ meniꞌve nomivo haza gidini lo-ngemaaꞌ nouvongumuꞌ nene nolize izaaꞌ nouve. Nemuꞌ nene naza Kilisitoꞌ gamazi lo-ngemaaꞌ nouvodotiꞌ meniꞌne daaꞌ nouvoniꞌ nene aꞌmine nolize izaaꞌ nouvoniꞌ nene neive.
1CO 9:19 Neꞌmino neive: Naza nene meni nemaaꞌ ilive lo eveneꞌ hamoꞌ maliꞌmi gelekeleꞌ ve neꞌmine minamuvoniꞌza eveneꞌ vaiꞌ goloso ngeleꞌmize Izesuda molalove losa naꞌniseꞌne nene eveneꞌ mukitoꞌ gelekeleꞌ o-ngedaaꞌ nouve.
1CO 9:20 Naꞌniseꞌne nene Zuda veti louꞌ gamazi Moseꞌ gize ngimidokovoꞌ eꞌmetaaꞌ aveti muliseutiꞌ minamuvoniꞌza Zuda vesi idoꞌ Zuda veti louꞌ gamaziloꞌ eꞌmetaaꞌ ave mukiꞌ nesi nene ngeleꞌmize Izesuda olove lo aꞌmine Zuda vesi idoꞌ engiꞌ louꞌ gamaziloꞌ eꞌmetaaꞌ ave engiꞌ veꞌnida nazasi nene Zuda ve aꞌmine louꞌ gamaziloꞌ eꞌmetaaꞌ uve gelo gono do minelesuve.
1CO 9:21 Idoꞌ naꞌniseꞌne nene Oꞌmosoꞌmi louꞌ gamaziloꞌ eꞌmetesaꞌmuve minamuvoba Kilisitoꞌ louꞌ gamaziloꞌ gelekeleꞌ ogaꞌ uve nouvoniꞌza Oꞌmosoꞌmi louꞌ gamazi di minamave heta atoꞌ vesi nene ngeleꞌmize Izesuda olove lo aꞌmine Oꞌmosoꞌmi louꞌ gamazi di minamaveti veꞌnida nene nazasi engiꞌ aleve minuvoniꞌ gelo gono do minaaꞌ nouve.
1CO 9:22 Idoꞌ eveneꞌ monokuꞌ amuzo milamave engiꞌ nene ngeleꞌmize Izesuda ogo do amuzo molo-ngedelove lo nazasi nene engiꞌ gidini loloꞌ ogo mino gono daaꞌ nouve. Idoꞌ aꞌmine aleve mukikutiꞌ nene linge ma Oꞌmosoꞌmo do nguꞌ izelineꞌ akaloꞌ ngeleꞌmize molalohe lo ato atoꞌ aleveti monovoꞌnidoꞌ eꞌmeto amuzo molo gono daaꞌ nouve.
1CO 9:23 Idoꞌ initeꞌ mukiꞌ neꞌmine ogaꞌ nouvoniꞌ nene eveneꞌ mukiꞌ nene Kilisitoꞌ gamaziꞌve laminetoꞌ nene gelekeleꞌ ikevosa Oꞌmosoꞌmo engikisi nezesi makatoꞌ do lamineꞌ o-ledelive lo aꞌmine gamazi lamineꞌ nene hize eleꞌ olosa neꞌmine ogaꞌ nouve.
1CO 9:24 Lingine gili nizave. Eveneꞌ lotiꞌ izi ge hulo ne hulo lilizanguꞌ nene mukilite meni dalobe li amuzo mili lotiꞌ izilisaha eveneꞌ hamoliꞌmo ngivileꞌ ogosa meni daloseive. Idoꞌ aꞌmineꞌmine igi lingine meni daloningumuꞌ ve li monokuꞌ amuzo milalo.
1CO 9:25 Idoꞌ neꞌmine zohikuꞌ ge hulo ne hulo lilizave ingine eveneꞌ ma ngivileꞌ ogo meni daloningumuꞌ ve li engiꞌ okoꞌine do gilizevo ilineꞌ monovomuꞌ nene oꞌve li okoꞌine do amuzo molalineꞌ monovovoꞌ igi mili mini monovoꞌnidoꞌ gizebo lekeseve ilizave. Idoꞌ ingine neꞌmine ilizaniꞌ nene naniꞌmine meni dalisa neꞌmine ilizave. Haza minevoꞌ minevoꞌ amilineꞌ meni ma dalisa neꞌmine ilisave. Ne neiha leliꞌ nene monokuꞌ amuzo molokunivo Oꞌmosoꞌmo minevoꞌ minevoꞌ meni lamineꞌ lemelingumuꞌ nene monovoteloꞌ gizebo lekeseve olone.
1CO 9:26 Idoꞌ nemuꞌ gelo naza monokuꞌ amuzo molo lotiꞌ noizuvongukisi idoꞌ Satani lovo o emaaꞌ nouvonguꞌ nesi nene abeleni ogo zohiꞌ neꞌmine amo mino
1CO 9:27 eveneꞌ monoꞌ lo-ngemeꞌmo vo minaaꞌ uve minelonikisi naꞌniseꞌne nene vo tolovo ogalove lo neniꞌ okoꞌne nene goloso initekumuꞌ laniteꞌ gelelingumuꞌ nene amuzo molo doꞌmo leme-de mino aꞌmidoꞌ gizebo lekeseve ogaꞌ nouve.
1CO 10:1 Idoꞌ neze zuhokizo, Oꞌmosoꞌmo do nguꞌ izineꞌ aleve nene initeꞌ neꞌmine manaꞌmine igi mili ilizaha nesi mo ngeli vi tolovo amilisave li lingine gili nilisaha nemuꞌ aka lengelebizo lo-lengemeloze. Gililo. Lingine gili nizave. Moseꞌ aza leliꞌ Zuda veti avotemotine Aigita misuboukotiꞌ ngeleꞌmizo Kanaha misubouꞌ novivo vilizaniꞌ aka ngelebizelive lo Oꞌmosoꞌmo do sotoꞌ o-ngidineꞌ limusoꞌmi mumunouꞌ nene mukiꞌ ingine vaniꞌ. Idoꞌ noso naba nene izo huko eza ema o-ngedo aka loloꞌ o-ngedavo mukiꞌ ingine aꞌminguꞌ vaniꞌ.
1CO 10:2 Neꞌmine igi aꞌmine limusolokovoꞌ nene eꞌmeti guvo nosouꞌ vi vi helala vaniꞌ neꞌmo mukitoꞌ ingine Moseꞌ zuho liliꞌ igi noso hilaniꞌ gilineꞌ.
1CO 10:3 Idoꞌ ebeꞌ hadiveloꞌ nene naaꞌ initeꞌine nomivo Oꞌmosoꞌmo nosoꞌ niteꞌ Okulumokutiꞌ hulo-ngedavo mukitoꞌ naniꞌ.
1CO 10:4 Idoꞌ Oꞌmosoꞌmo geheni nabaꞌmi luloutiꞌ do sotoꞌ ogo ngimineꞌ nosoutiꞌ nene mukitoꞌ naniꞌ. Idoꞌ aꞌmine gameneloꞌ nene Kilisitoꞌ aza nene engikisi makaꞌ monineꞌ gelavo aꞌmine noso nene ezelotiꞌ sotoꞌ o ngimineꞌ ve.
1CO 10:5 Ee, Oꞌmosoꞌmo neꞌmino do nguꞌ izineꞌza aꞌmine do nguꞌ iziveutiꞌ lingela mukiꞌ nene goloso initeꞌ diꞌmi ikevo Oꞌmoso aza gele goloso ogo ngebelekaꞌ ngebelekaꞌ ivo ebeꞌ hadiveloꞌ nene hili geseꞌ aniꞌ ve.
1CO 10:6 Idoꞌ Zuda ve ingine goloso initekumuꞌ laniteꞌ gili di sotoꞌ iꞌmi vikevo Oꞌmosoꞌmo do sotoꞌ ogo lihime ngimineꞌ initeꞌ luvoniꞌ nemuꞌ lingine gili ingine adiꞌmine igi goloso initekumuꞌ laniteꞌ gili aꞌmineꞌmine ikelizave losa Oꞌmosoꞌmo alingeꞌ sotoꞌ olonivemuꞌ aka lelebizo neꞌmine ineꞌ ve.
1CO 10:7 Nemuꞌ nene ingine linge malite aniꞌ neꞌmine igi lingine soza oꞌmosomuꞌ gelekeleꞌ i-ngidi ngopoꞌni li minamilo. Ingine neꞌmine angumuꞌ monoꞌ godolouꞌ tiꞌ li gizi nizaniꞌ ma neive: Eveneꞌ ingine Oꞌmosote minelive li bulumakaꞌ avazaha neꞌmine liliꞌ igi opoꞌni li mini mitoꞌ mini nosoꞌ niteꞌ ni noso ni mini oti melengeni igi di goloso igi zohiꞌ igi minaniꞌ.
1CO 10:8 Idoꞌ ma nene engikutiꞌ veneꞌ vemohoꞌ gopoꞌ napa ingiꞌmi monikevo Oꞌmosoꞌmo gamene hamokukovoꞌ eveneꞌ 23 tauseni ngebele hilineꞌ nenaze. Laza nene ingine adiꞌmine ogo veneꞌ vemohoꞌ gopoꞌ napa ongamolone.
1CO 10:9 Idoꞌ Guvelesi vesi golo izikevo satalite ngibilikevo hilaniꞌ nenaze. Laza ingine adiꞌmine ogo Guvelesi ve golo izamolone.
1CO 10:10 Idoꞌ eveneꞌ linge malite Oꞌmosola nene initeꞌ ato atokumuꞌ emenga laaꞌ idoꞌ uvonga avanga li-daaꞌ ikevo Oꞌmosoꞌmo angeloꞌ ma imiselavo ogo lihime ngemo ngibilineꞌ nenaze. Laza nene ingine laniꞌ neꞌmino Oꞌmoso uvonga avanga lo-damolone.
1CO 10:11 Idoꞌ aꞌmine initeꞌ mukiꞌ mene sotoꞌ o ngimineꞌ nene eveneꞌ laza nelotiꞌ aka ningeloningumuꞌ ve losa sotoꞌ ineꞌ nene gamene osuꞌ lolosa neida mene noneꞌ aleve leliꞌ nene ningi neꞌmine amilizave li lelikumuꞌ nene monoꞌ godolouꞌ luhuvo gizaniꞌ ve.
1CO 10:12 Nemuꞌ nene ve ma gaza vo tolovo ogaꞌ akaloꞌ minamo ha mine giliꞌ lo nouve lo minelinive gaza ehee gemenguꞌ sotoꞌ o gemavo lihime daaꞌ akauꞌ vo holo lemo ongalinge. Ningosa minezo.
1CO 10:13 Lengita lengemenguꞌ sotoꞌ o lengemaaꞌ neineꞌ nene atoliꞌmine sotoꞌ o lengemamive. Eveneꞌ mukita sotoꞌ ogaꞌ neineꞌ maꞌmino nene sotoꞌ noo lingimive. Idoꞌ Oꞌmosoꞌmo leze nene hulo-ledamoloseinako lingine ezemuꞌ gili eleꞌvoleꞌ gehepeve i mini ezela lehete igi minilo. Aza nene lingivizelineꞌ lengemenguꞌ ma sotoꞌ o lengemelineꞌ nene ma ninge mate lingimikamoloseive. Lengemenguꞌ ma sotoꞌ o lengemelineꞌ nene lingivizamivo amuzo mili ha mine giliꞌ li minilizave lo aza nene olovoꞌ ilizaniꞌ aka vele-lengedeleseive.
1CO 10:14 Idoꞌ Moseꞌ mininguꞌ minave nene Oꞌmosoꞌmo lihime ngemo ngibilineꞌ maꞌmino lengebelalize. Nemuꞌ nene neze zuho luꞌne lengeme nouvoniꞌ mate, soza oꞌmoso nene gelekeleꞌ i-ngidami idoꞌ nosoꞌ niteꞌ ngimilizangutiꞌ nesi nami ngopoꞌni laaꞌ monovomuꞌ nene olovoꞌ igi mehedine ngimilo.
1CO 10:15 Lingine nene lutine gatine neive ma nene nizave losa gamazi mene lo-lengemelouze. Nemuꞌ nene gamazi loloniꞌ nene gihile nolihe langisetine ningi gili hehe lilo.
1CO 10:16 Lebeni initeꞌ naaꞌ nouninguꞌ Oꞌmosola isaaꞌ neve lo vaini gomise Guvelesi veꞌmo noꞌnohoꞌ izingutiꞌ nuneꞌ neꞌmo do hamoꞌ o-ledavo naaꞌ nouneꞌ aleve mukiꞌ nene Kilisitoꞌ vanise lepineꞌ neꞌmi gihileꞌve ma nene dalosune. Olo. Idoꞌ lebeni initeꞌ beleti apilo aꞌmingutiꞌ nuneꞌ neꞌmo do hamoꞌ o-ledavo naaꞌ nouneꞌ aleve mukiꞌ nene Kilisitoꞌ okoꞌno hulo hilineꞌ neꞌmi gihileꞌve ma nene dalosune. Olo.
1CO 10:17 Ee, lebeni initeꞌ naaꞌ nouninguꞌ nene beleti hamokovoꞌ minavosa laza mukitoꞌ aꞌmine beleti hamoꞌ mautiꞌ naaꞌ nounako nemuꞌ nene laza mukitoꞌ hamoꞌ zuho nene none.
1CO 10:18 Idoꞌ Isilaele aleveti monovomuꞌ mene gililo. Ingine Oꞌmoso imaniꞌ initekutiꞌ naaꞌ ave engiꞌ nene Oꞌmosola vi giꞌmizaaꞌ nave.
1CO 10:19 Neve nene naza nadive lo lo-lengemelesa noluve. Soza oꞌmoso ngimaniꞌ initeꞌ nene initeꞌ gihile ve lo lamuve. Idoꞌ soza oꞌmoso initeꞌ asiꞌve nesi nene initeꞌ gihile neive lo lamuve.
1CO 10:20 Oꞌove. Ne neineꞌza Oꞌmosomuꞌ gilamavete soza oꞌmoso ngimaniꞌ initeꞌ nene Oꞌmoso imaaꞌ naavoba sikalahuꞌ goloso ngimaaꞌ naanako nemuꞌ nene sikalahuꞌ goloso ngimaniꞌ initekutiꞌ nisa lingine makaꞌ giꞌmizi minilizave losa gelamuve.
1CO 10:21 Idoꞌ Guvelesi vela giꞌmizi mini lebeni nosoꞌve naaꞌ niigisa sikalahuꞌ golososi vi giꞌmizi mini sikalahuꞌ goloso ngimaniꞌ nosoutiꞌ nene nalizadoꞌ nomive. Guvelesi vela giꞌmizi mini holomoꞌvelotiꞌ nosoꞌ niteꞌ naaꞌ niigisa sikalahuꞌ golosola vi giꞌmizi engiꞌ holomoloꞌ nosoꞌ nitekutiꞌ nalizadoꞌ nomive.
1CO 10:22 Idoꞌ neꞌmine oloneꞌ nene Guvelesi ve aza nenitokovoꞌ giꞌmizilizanako lo izeboloꞌ molaloseive. Neꞌmine oloseinako leliꞌ amuzo neꞌmo Oꞌmosoꞌmi amuzo nene ma ivileꞌ aminako lebelamilihe. Olo.
1CO 10:23 Ee, lingine initeꞌ mukiꞌ nene ha gopo gamaziꞌvesi nomivo ogo molo olosune laaꞌ naniꞌza aꞌmine initeꞌ ma nete leleꞌmize lamineꞌ ma amilisave. Initeꞌ mukiꞌ nene ha gopo gamaziꞌvesi nomivo ogo molo olosune laaꞌ naniꞌza aꞌmine initeꞌ ma nete monokuꞌ ma hize eleꞌ i-lidamilisave.
1CO 10:24 Eveneꞌ hamo hamoꞌ lingine nene lengiꞌ okodinemukovoꞌ gilamisa lengiꞌ zuho neemukisi gili mini eveneꞌ ngeleꞌmize lamineꞌ ilizangumuꞌ amuzo mili minilo.
1CO 10:25 Idoꞌ gamazi ma monoꞌ godolouꞌ tiꞌ li gizi nizaniꞌ ma neive: Misubo nesi idoꞌ initeꞌ mataꞌ mukiꞌ aꞌminguꞌ neineꞌ nesi nene Guvelesi veꞌmi initeꞌ ve li gizi nizaniꞌ ve. Idoꞌ Guvelesi veꞌmine mino eiꞌ evenele leliꞌ di gunoꞌ ilizave losa neineꞌ nenaze. Ize neꞌmine situvakuꞌ nehe maketiloꞌ nehe milangutiꞌ ma meni hizi nali ma nene ha meni hizi nalisaze. Nemuꞌ nene leliꞌ lute do goloso ilineꞌ initeꞌ soza oꞌmoso ngimaniꞌ initekutiꞌ nehe idoꞌ nadiꞌ angutiꞌ ize neve li longoꞌ tongoꞌ amilo.
1CO 10:27 Idoꞌ eveneꞌ Izesungumuꞌ gili eleꞌvoleꞌ amaveutiꞌ maliꞌmo elese molo-lengedo nosoꞌ niteꞌ nalonge. Alo lo nolivo ma vi ha mili-lingidiliza initeꞌ nene leliꞌ lute do goloso ilineꞌ initeꞌ soza oꞌmoso ngimaniꞌ initekutiꞌ nehe li aꞌminemuꞌ longo tongoꞌ ami ha nalisave.
1CO 10:28 Ne neineꞌza nosoꞌ niteꞌ nalisa nizavo ve maliꞌmo nosoꞌ niteꞌ mene soza oꞌmoso ngimangutiꞌ ve lavo ma aꞌmine veꞌmi lulomuꞌ nene gilisa namilo.
1CO 10:29 Lengiꞌ lutine goloso ilingumuꞌ nomive. Aꞌmine lo-lingimive nene aza Guvelesi ve Izesuꞌ evenele aꞌmingutiꞌ nalizaniꞌ nene lihime dalisanako nemuꞌ namilizadoꞌ o neive lo lulouko gelo soza oꞌmoso ngimangutiꞌ ve lo lo-lingimineꞌ noloseinako lingine nikevo eze luloꞌve nene goloso ogalive losa noluve. Idoꞌ lengitatiꞌ linge malite tiꞌ li lilisave: Laza nosoꞌ niteꞌ mukiꞌ malise amo nalosa gelesoꞌ nene mo naakovoꞌ olosune. Eveneꞌ malite nosoꞌ niteꞌ mamuꞌ nene naloneꞌ lihime daalone li malise ilizangumuꞌ nene engiꞌ luꞌnidoꞌ do molo lazasi malise olone lamolosune.
1CO 10:30 Laza Oꞌmosola nosoꞌ nitekumuꞌ opoꞌni losa nonaloneꞌ nene eveneꞌ malite aꞌmine Oꞌmosola losa nonaloneꞌ initekumuꞌ nene ve mene malise igi namilizaniꞌ nosoꞌ niteꞌ ninave li lelikumuꞌ gamazi goloso lamilizadoꞌ o neineꞌ nenako nemuꞌ nene ma lamilisave.
1CO 10:31 Tiꞌ li lilizaha nosoꞌ niteꞌ ma nene ha nalizahe idoꞌ malise ilizahe neꞌmine ilizangukisi idoꞌ initeꞌ ato atoꞌ ilizangukisi nene Oꞌmosoꞌmi gulive do naba ilineꞌ initekovoꞌ igi mili minilo.
1CO 10:32 Zuda ve he heta atoꞌ ve nGiliki ve he idoꞌ Oꞌmosoꞌmi zuho Kilisitoꞌ evenele he engiꞌ neti veꞌnidoꞌ nene goloso initeꞌ dikeve li olovoꞌ ilizaniꞌ initeꞌ nene di sotoꞌ amilo.
1CO 10:33 Neniꞌ Pauloꞌ initeꞌ ma oloniꞌ nene neniꞌ neleꞌmize lamineꞌ oloseive losa amolosuve. Naza eveneꞌ mukikumuꞌ gelo Oꞌmosoꞌmo do nguꞌ izelineꞌ akaloꞌ ngeleꞌmize molalohe losa eveneꞌ ato atoꞌ mukiliti luꞌninguꞌ nene lamineꞌ gililiza initekovoꞌ olosuve.
1CO 11:1 Idoꞌ naza Kilisitoꞌ monovoloꞌ eꞌmeto ogo molo nouvoniꞌ neꞌmine igi linginesi neniꞌ monovoloꞌ ningi neꞌmeti igi mili minilo.
1CO 11:2 Lingine nene naza apize lengemo lo-lingimuvoniꞌ initekumuꞌ nene eꞌmeti gili minaaꞌ naniꞌ nemuꞌ longopoꞌni lo do naba noo-lingiduve.
1CO 11:3 Idoꞌ naza gamazi mene gili guni i minilizave losa nolo-lingimuve. Veneliti gizebo veꞌine nene vemohoꞌ nene nizave. Idoꞌ vemoholiti nabaꞌine nene Kilisitoꞌ ne neive. Idoꞌ Kilisitoꞌ nabaꞌve nene Oꞌmoso ne neive.
1CO 11:4 Lingine mo gili nizave. Leze monovola nene godotela initeꞌ ma do gehesoꞌ nene monovo neꞌmino neive: Eveneꞌ leze gizebo vete ma neive losa godoteloꞌ nene initeꞌ ma gehaaꞌ noune. Ne neineꞌza Oꞌmoso neꞌmo vemohoꞌ nene eiꞌ avazaha eiꞌ neꞌminosa loloꞌ ogavosa neꞌmo nene vemohoꞌ ivileꞌ igi miniliza initeꞌ nene ma minamaniꞌ ve. Nemuꞌ nene ve maliꞌmo Oꞌmosola lilihe Oꞌmosoꞌmi veletiꞌ gamazi lo sotoꞌ ilihe neꞌmine noilinguꞌ godololoꞌ initeꞌ ma gehe mino lilineꞌ nene eiꞌ godolo nene do uꞌmusupo lizineꞌ geleleseinako nemuꞌ nene initeꞌ ma gehamosa lilive. Ne neineꞌza Oꞌmosoꞌmo veneꞌ nene vemohoꞌ avazaha neꞌmine loloꞌ ogo hize eleꞌ ilingumuꞌ ve lo do sotoꞌ o-dineꞌ ve. Nemuꞌ nene veneꞌ ma aza Oꞌmosola lilihe Oꞌmosoꞌmi veletiꞌ gamazi ma lo sotoꞌ ilihe neꞌmine noilinguꞌ godololoꞌ initeꞌ ma gehamo lilineꞌ nene eiꞌ godoloꞌve ma nene do uꞌmusupo lize-deleseinako godololoꞌ initeꞌ gehosavoꞌ lilive. Idoꞌ veneꞌ ma aza godololoꞌ initeꞌ ma gehamilineꞌ nene monovo golosolokovoꞌ monaaꞌ aniꞌ alu nene godoꞌnidoꞌ initeꞌ gihamaaꞌ naanako aza nene engiꞌ neꞌmine mineleseinako godolo zopovo nene monovo golosoloꞌ monaaꞌ aniꞌ alu huki-ngidaaꞌ aniꞌ neꞌmini huki-dilisave. Idoꞌ veneꞌ aza godoꞌne zopovo huki-nidikevo novozo helo minalove lo gelo ma godololoꞌ nene initeꞌ ma gehelive.
1CO 11:8 Ee, veneꞌ ingine vemoholiti avazaha mini hizi eleꞌ i-ngidilizadoꞌ minaniꞌ ve. Oꞌmoso aza vemohoꞌ nene ganaꞌ venetatiꞌ do sotoꞌ o-davo sotoꞌ ineꞌ nomive. Veneꞌ nene ganaꞌ vemohotatiꞌ do sotoꞌ o-davo sotoꞌ ineꞌ ve.
1CO 11:9 Idoꞌ vemohoꞌ nene veneꞌ nemuꞌ ve losa do sotoꞌ o-damive. Asi vemohokumuꞌ ve losa veneꞌ nene do sotoꞌ molo-dineꞌ ve.
1CO 11:10 Nemuꞌ nene angeloꞌ ingine ningi vaꞌninginemuꞌ gili nizave li ngolize izilizangisi veneꞌ ingine godoꞌnidoꞌ nene vaꞌningi amuzoloꞌ none lisa initeꞌ ma gihisa minilizave.
1CO 11:11 Ee, veneꞌ ingine vaꞌningi amuzoloꞌ minilisaha Oꞌmoso aza veneꞌ nene ganaꞌ vemohotatiꞌ do sotoꞌ o-davo nelotiꞌ vemohoꞌ nene venetatiꞌ sotoꞌ igaꞌ naanako vemohoꞌ minamadiniko venekisi minamadine. Idoꞌ aꞌmineꞌmine ogo veneꞌ minamadiniko vemohokisi minamadine. Idoꞌ initeꞌ mukiꞌ Oꞌmosolatiꞌ sotoꞌ aniꞌ nemuꞌ nene Guvelesi veꞌmi evenele laza giluneꞌ nene vemohoꞌ dizi minikevo veneꞌ limi minikevo minamo lisiheꞌ ogovoꞌ none.
1CO 11:13 Langisetine ningi gili hehe lilo. Veneꞌ maliꞌmo godololoꞌ initeꞌ gehamo eveneꞌ veꞌnidoꞌ Oꞌmosola lilineꞌ nene edelihe. Ne mo edamoloseive.
1CO 11:14 Eveneꞌ ingine gozopoꞌ vomilatiꞌ igi mili minaniꞌ monovo danavamuꞌ gililizaniꞌ nene tiꞌ li gililisave: Vemohoꞌ ingine godoꞌine zopovo nene hukami hulikilizaniꞌ nene edamoloseiha
1CO 11:15 venelite godoꞌine zopovo haꞌna hulikilizaniꞌ nene Oꞌmoso neꞌmo godoꞌnidoꞌ gehaaꞌ angiliꞌ neꞌmine nene okoꞌnineꞌmi gonolise neꞌminosa ngeme neive.
1CO 11:16 Ne neineꞌza ve maliꞌmo aꞌmine noluvongumuꞌ nene lolize gani ma lilineꞌ nene nazasi idoꞌ neze gonoꞌneuꞌ minavesi laza veneꞌ haza initeꞌ godoꞌnidoꞌ gihami mini Oꞌmosola lilizave lo gele ngemesaꞌmune. Idoꞌ Oꞌmosoꞌmi zuho Izesuꞌ evenele gohi masi idoꞌ muliseꞌine miniꞌmi monanguꞌ nesi nene aꞌmine monovomuꞌ gili ngimisaꞌmave.
1CO 11:17 Idoꞌ naza initeꞌ monovo ma di goloso igaꞌ naniꞌ ma giluvoniꞌ nemuꞌ nene siza lo do naba o-lengedamo gatine do loloze. Gililo. Lingine nosoꞌ nitekisi lebeni initekisi nalisa di nubo igaꞌ naniꞌ neꞌmo nene monokuꞌ hize eleꞌ o-lengedeleseineꞌza lingine igi di nubo anguꞌ nene monovo lamineꞌ eꞌmetisaꞌmaniꞌ neꞌmo nene do goloso o-lengedaaꞌ neive.
1CO 11:18 Nene eveneꞌ malite tiꞌ li li-nimangumuꞌ noluve: Lingine nosoꞌ nitekisi lebeni initekisi nalisa di nubo anguꞌ nene mine hamoꞌ igi lebeni initeꞌ namisa hizi hoꞌli minaaꞌ nave. Idoꞌ lengiꞌ mulisetine nene hoꞌli izeꞌ mili vi ato atoꞌ ma ilizaniꞌ nene lengiꞌ mulisetinguꞌ eveneꞌ lisiheꞌ monovo laminekovoꞌ igi mili minaaꞌ ave ma nene sotoꞌ pizi minilizangumuꞌ nene neꞌmine ilisanako nemuꞌ nene aꞌmine gamazi li-nimangutiꞌ linge ma nene mo laminetoꞌ noloseive losa gele nouve.
1CO 11:20 Neze nene tiꞌ li li-nimave: Nosoꞌ niteꞌ igi nalisa adoꞌ nene gomuꞌ ma ave ingine alingeꞌ ma alizavemuꞌ nene gizebo ami nosoꞌ niteꞌ nene ni gatuꞌine igaꞌ idoꞌ noso ni negi hizaaꞌ ikevosa alingeꞌ ave nene nami gaꞌna hili di vaaꞌ nave. Nemuꞌ nene lingine lebeni initeꞌ nalone li igi di nubo igi ni minaaꞌ naniꞌ nene Guvelesi veꞌmi lebeni initeꞌ nonube li haza initeꞌ nene ni minaaꞌ nave.
1CO 11:22 Nadive. Lingine nosoꞌ niteꞌ ni miniliza numudine nene nomihe. Idoꞌ lingine Oꞌmosoꞌmi zuho mulise nemuꞌ gilavo haza initeꞌ loloꞌ ogavo leze zuho linge ma initeꞌine nomineꞌ mini nosoꞌ niteꞌ di amilizave nene ngovozo hililizave lisa igaꞌ nahe. Nemuꞌ naza nadive lo-lengedelove. Longopoꞌni lo do naba o-lengedelohe. Eꞌe, mo oꞌove. Neꞌmine mo amolosuve.
1CO 11:23 Naza lebeni initeꞌ naakumuꞌ lo-lingimuvoniꞌ gamazi nene Guvelesi velatiꞌ giluvoniꞌ nenako lingine aꞌmidokovoꞌ eꞌmeti minilizanako eꞌmetamave. Naza tiꞌ lo lo-lingimuvoniꞌ ma neive: Zudaꞌ aza Izesuꞌni lovo ve ngelebizineꞌ gameneuꞌ nene olihe lovo ve ngelebizamivo holukaꞌ izipahala zuhosi minanguꞌ Guvelesi ve Izesuꞌ aza beleti do
1CO 11:24 Oꞌmosola opoꞌni lo apilo izipahala zuho nongemo tiꞌ lo lineꞌ: Mene neniꞌ meꞌmeleꞌne lengikumuꞌ ve losa nolingimuze. Nenikumuꞌ gili minilizangumuꞌ di niꞌmi vi minilo.
1CO 11:25 Idoꞌ aꞌmineꞌmine ogo veꞌnine ni osuꞌ likevo vaini nososi minineꞌ gomise ma do oto tiꞌ lo lineꞌ: Gomiseuꞌ mene neniꞌ vaniseꞌne Oꞌmosoꞌmo lo huko-lingidineꞌ gamazi gosohoꞌ ma nene do amuzo molalingumuꞌ vaniseꞌne mene di nalo. Idoꞌ di niꞌmi vi mini naliza gamene mukikuꞌ nene nenikumuꞌ gili mini naaꞌ ilizaniꞌ ve.
1CO 11:26 Neꞌmine lineꞌ nenako lingine lebeni initeꞌ vaini nososi beleti nesi naliza gameneloꞌ gameneloꞌ nene Guvelesi ve hilineꞌ gamazi nene li soto sotoꞌ iꞌmi vi minilisave. Idoꞌ neꞌmine iꞌmi vi nizavo Guvelesi ve tineꞌ molo alineꞌ gamene aliteleseive.
1CO 11:27 Nemuꞌ nene ve ma ingine Guvelesi veꞌmi lebeni initeꞌ vaini nososi beletisi nene monovoꞌine di lisiheꞌ ami gopo haza nalizaniꞌ nene Guvelesi veꞌmi meꞌmelesi vanisesi nene di gopo ikevosa lihime dalisave.
1CO 11:28 Ve ma ingine Guvelesi veꞌmi meꞌmele vanise nene kekeize initeꞌ neive li gilami gopo ma nalizaniꞌ nene Oꞌmosoꞌmo lihime ngemelidoꞌ o neineꞌ nenako nemuꞌ nene Guvelesi veꞌmi meꞌmele vanise nali ma gomuꞌ nene lutinguꞌ monovo goloso nolingumuꞌ nene viseꞌ igi di hulisavoꞌ nene nalo.
1CO 11:30 Ee, lebeni initeꞌ gopoꞌ napa naaꞌ ave nene Oꞌmosoꞌmo lihime ngemelineꞌ o neineꞌ nenako lengikutiꞌ linge mukiꞌ ingine neꞌmine igi gopoꞌ napa nadiꞌmo gilizevo igi initeꞌ gizi davo linge ma nene hili osuꞌ laniꞌ ve.
1CO 11:31 Laza neꞌmine manaꞌmine olo ma leliꞌ monovotemuꞌ gomuꞌ gelo do lisiheꞌ ogosa neꞌmine ogaꞌ unidiniko Guvelesi ve neꞌmo lihime lemo do goloso o-ledamidine.
1CO 11:32 Idoꞌ idise mene gameneuꞌ Guvelesi veꞌmo lihime lemeꞌmo novineꞌ nene aza eveneꞌ linge ma Oꞌmosomuꞌ gilamave lihime ngemo do goloso o-ngedelinguꞌ nene lezesi neꞌmine o-ledalove losa monovote goloso nene do sotoꞌ o-ledo vete zopovo siꞌzeloningumuꞌ nene neꞌmine nooloseive.
1CO 11:33 Nemuꞌ nene neze zuho mate, nosoꞌ nitekisi lebeni initekisi nalisa igi di nubo niigi ma nene lingine zuho amaniꞌ nene ikevo makaꞌ nalone li gizebo mini ikevosavoꞌ nene nalo.
1CO 11:34 Lingine igi di nubo ilizanguꞌ nene ve linge ma gomuꞌ igi heteli nizavo gaꞌna ngolavo alingeꞌ alizavemuꞌ gilami gomuꞌ imi mini nosoꞌ niteꞌ nalizaniꞌ neꞌmo Guvelesi veꞌmo lihime lengemelineꞌ akauꞌ mini milikelizanako nemuꞌ nene nosoꞌ niteꞌ ngomo numuꞌnidatiꞌ gomuꞌ nikisavoꞌ nene alizave. Idoꞌ nemuꞌ gamazi gohi ma lo-lengemeloniꞌ neineꞌ nene naza lingine nizada alonguꞌ nene lo-lengemelesuve.
1CO 12:1 Idoꞌ neze zuho mate, Oꞌmosoꞌmi Sikalahuliꞌmo monoliꞌmi amuzo ato atoꞌ lehize-ledaaꞌ neineꞌ monovomuꞌ nene gilami minikelizaze. Lo-lengemeloze. Gililo.
1CO 12:2 Lingine gomuꞌ Oꞌmosomuꞌ gilami nizavo gatine hizi gopo lengeleꞌmizi vadaa vada nene naniteꞌ ngeꞌmeti vaaꞌ aniꞌ neve. Lingine soza oꞌmoso gamazi lisaꞌmaniꞌ initekovoꞌ ngeꞌmeti vaaꞌ aniꞌ nene mo gili nizave.
1CO 12:3 Idoꞌ lingine aꞌmine soza oꞌmosovoꞌ ngeꞌmetaaꞌ ave nizanako neꞌmo nene Oꞌmosoꞌmi Sikalahuliꞌmi monovomuꞌ gilami nilisanako nemuꞌ ma lo-lengemelove. Ve maliꞌmi lulouꞌ Oꞌmosoꞌmi Sikalahuliꞌmo gono nodavo Izesungumuꞌ nene dovo ledevoka ma lamoloseive. Idoꞌ Sikalahuliꞌmo lulouꞌ gono damivo minelive neꞌmo nene Izesungumuꞌ nene Guvelesi ve initeꞌ mukitoꞌ gizebo o minive neive lo ma lamoloseive. Nemuꞌ eveneꞌ ma ingine soza li Oꞌmosoꞌmi Sikalahuꞌ aza luteuꞌ gono nodavosa gamazi nolo-lingimune li nilavo ma nene soza nilahe lamineꞌ nilahe nemuꞌ gamaziꞌningutiꞌ nene ningi gili di sotoꞌ ilisave.
1CO 12:4 Monoliꞌmi amuzo nene ato atoꞌ mukiꞌ neineꞌza aꞌmine amuzo lehize-ledaaꞌ ive nene Oꞌmosoꞌmi Sikalahuꞌ hamoꞌ neꞌmovoꞌ nene mukiꞌ lehize-ledaaꞌ neive.
1CO 12:5 Idoꞌ monoꞌ gonoloꞌ ve nene gono ato atoꞌ mukiꞌ nene ha dalisaniꞌza Guvelesi ve hamokumukovoꞌ nene gono dalisave.
1CO 12:6 Idoꞌ gono daaꞌ amuzo nene ato atoꞌ vaiꞌ goloso neineꞌza aꞌmine amuzo mukiꞌ do sotoꞌ ive Oꞌmoso hamoꞌ neꞌmo evenele mukitoꞌ nene do sotoꞌ o-ledavo gonoꞌve nene daaꞌ noune.
1CO 12:7 Oꞌmosoꞌmi Sikalahuꞌ neꞌmo leliꞌ mukiꞌ nene leleꞌmize lamineꞌ ilingumuꞌ monoliꞌmi amuzo ato atokutiꞌ nene izeꞌ molo Oꞌmosoꞌmi evenele nene hamo hamoꞌ lehize-ledaaꞌ neive.
1CO 12:8 Luvoniꞌ neꞌmino neineꞌ nene nelotiꞌ ningo gelelesune. Ve ma nene Sikalahuliꞌmo hize eleꞌ o-divo monoꞌ gamazi nene otohato gamazi laaꞌ neive. Idoꞌ ve gohi ma nene aꞌmine Sikalahuꞌ neꞌmo monoꞌ monovo gelaaꞌ amuzo nene lehize-davo laaꞌ neive.
1CO 12:9 Idoꞌ ve gohi ma nene vauve elo gele eleꞌvoleꞌ ogaꞌ amuzo nene aꞌmine Sikalahuꞌ malotiꞌ daaꞌ neive. Idoꞌ hamoꞌ Sikalahuꞌ maꞌmo nene eveneꞌ goloso galasa do guno o-ngedaaꞌ amuzo nene eveneꞌ atoꞌ gohi ma nene ha emeleseive.
1CO 12:10 Idoꞌ ve gohi ma nene amuzo malehe initeꞌ do sotoꞌ ogaꞌ amuzo nene emo ma nene Oꞌmosoꞌmi veletiꞌ gamazi lo sotoꞌ ogaꞌ amuzo nene emo ve gohi ma nene gamazi ato atoꞌ izeꞌ molo Oꞌmosoꞌmi Sikalahutatiꞌ sotoꞌ ineꞌ nene do kegeso idoꞌ atokutiꞌ sotoꞌ ineꞌ nene ningo do kegeso lo sotoꞌ ogaꞌ amuzo nene emo idoꞌ ve gohi ma nene noꞌine ato atokutiꞌ laaꞌ amuzo nene emo ve gohi ma nene aꞌmine noꞌine ato atoꞌ do velepeꞌ izo laaꞌ amuzo nene emaaꞌ neive.
1CO 12:11 Aꞌmine neꞌmine amuzo ato atoꞌ mukiꞌ nene aꞌmine Sikalahuꞌ hamoꞌ neꞌmovoꞌ nene do sotoꞌ ogo eiꞌ lulolokovoꞌ aꞌmine lemelesa gala gilineꞌ amuzo nene naniꞌmine amuzo lemelesa gilihe nene leliꞌ eveneꞌ hamo hamoꞌ nene izeꞌ molo lemaaꞌ neive.
1CO 12:12 Idoꞌ neꞌmino neive: Leliꞌ okode nene initeꞌ hamokovoꞌ neineꞌza aꞌmine okodeloꞌ minaaꞌ naniꞌ initeꞌ gizede ade nevoꞌmine nene guliveꞌine ato atokisi vaiꞌ mukiꞌ nizave. Idoꞌ aꞌmineꞌmine ogo laza nene eveneꞌ mukiꞌ noneꞌza laza Kilisitoꞌ evenele zuho nene Kilisitoda giꞌmizo mino eiꞌ okoꞌnoloꞌ gizene ana initeꞌ ato atoꞌ nevoꞌmine nene loloꞌ ogo mino okoꞌno neꞌminosa hamoꞌ nene none.
1CO 12:13 Oꞌmosoꞌmi Sikalahuꞌ hamoꞌ neꞌmo leliꞌ mukita omo holavo laza mukiꞌ nene noso holokunivo aꞌmine Sikalahuꞌ hamoꞌ nene mo lute mukikuꞌ nene gono do minavo hamoꞌ zuho loloꞌ okune. Ee, lelikutiꞌ linge ma nene Zuda ve nonivo ma nene heta atoꞌ ve nGiliki ve nizavo idoꞌ ma nene eveneꞌ maloꞌ goboni ve nizavo ma nene neꞌmine ami haza minikevo noneꞌza laza eveneꞌ ato atoliꞌmine minunekisi nene hamoꞌ zuho loloꞌ ogo none. Neꞌmino nounako nemuꞌ laza nene eiꞌ Kilisitoꞌ okoꞌno hamoꞌ neꞌminosa nene none.
1CO 12:14 Idoꞌ okode nene gizede ade gote vete initeꞌ mukiꞌ nene neive. Okode nene lingelatikovoꞌ nomive.
1CO 12:15 Nemuꞌ nene gizede neꞌmo naza nene ade neꞌmine nomuvonako nemuꞌ nene okode lingelatiꞌ nomuve lo gelo gizedeꞌmo lilineꞌ nene gosohoꞌ loloseinako gizede nene mo okodeꞌmi lingelatiꞌ ne neive.
1CO 12:16 Idoꞌ gate neꞌmo naza nene vete neꞌmine nomuvonako nemuꞌ nene okode lingelatiꞌ nomuve lo gelo gate neꞌmo lilineꞌ nene gosohoꞌ loloseinako gate nene mo okode lingelatiꞌ ne neive. Idoꞌ aꞌmineꞌmine ogo Izesuꞌ evenele zuho ma nete linge ma gono daaꞌ amuzo di minaniꞌ neꞌmino ma damunako Izesuꞌ evenele zuhoutiꞌ minamo nolosune lo ma lamolosune. Lazasi nene mo Izesuꞌ evenelevoꞌ nene none.
1CO 12:17 Idoꞌ okode mukiꞌ nene vetevoꞌ minidiniko initeꞌ nene zalatiꞌ gilunidine. Idoꞌ okode mukiꞌ nene gatevoꞌ minidiniko initeꞌ unuvo zalatiꞌ gilunidine. Idoꞌ aꞌmineꞌmine ogo Izesuꞌ evenele mukiꞌ laza monokuꞌ hamoꞌ amuzo do hamoꞌ gono dunidiniko ma gono nene zamote dadine.
1CO 12:18 Neꞌmine o neineꞌza neꞌmino nomive. Oꞌmoso neꞌmovoꞌ nene gizede ade gote vete initeꞌ mataꞌ mukiꞌ okodeloꞌ neineꞌ nene gono ato atotoꞌ hulo-ngedelesa gilidoꞌ hulo-ngedeꞌmo vo neive. Hulo-ngedeꞌmo vo neinako Izesuꞌ evenele lelikisi nene aꞌmineꞌmine ogo gono ato atotoꞌ hulo-ledeꞌmo vo neive.
1CO 12:19 Neꞌmine o neineꞌza okoꞌdeꞌmi initeꞌ ato atoꞌ gizede ade gote vete nene hamoꞌ initekovoꞌ minidiniko okode nene ma minamidine.
1CO 12:20 Minamidiba neꞌmino nomive. Asi okodeloꞌ gizede ade gote vete initeꞌ mukiꞌ nene neivosa okodeꞌve nene hamoꞌ loloꞌ ogo neive.
1CO 12:21 Idoꞌ ade nene nomidiniko vete nene lamineꞌ ha minamidiinako nemuꞌ nene vete neꞌmo ademuꞌ geze nene minamilineꞌ naza nene lamineꞌ ha minelesuve lo ma lamoloseive. Idoꞌ godote neꞌmo gizedemuꞌ gaza minamilineꞌ naza nene lamineꞌ ha minelesuve lo ma lamoloseive. Nemuꞌ nene laza aꞌmineꞌmine ogo Izesuꞌ evenele linge mamuꞌ lingine gono daniꞌ neꞌmo leliꞌ nene hize eleꞌ o-ledesaꞌmineꞌ nenako lingine minamilizaniꞌ nesi ha lamineꞌ minelesune lo ma lamolosune.
1CO 12:22 Mo oꞌove. Neꞌmine losoꞌ nene nomive. Okode linge mamuꞌ ninge gehe-do nge lamida neive laaꞌ nounida nene ma minamidiniko okode nene ma mine lamineꞌ ogo minamidine.
1CO 12:23 Idoꞌ okodeꞌmi initeꞌ mamuꞌ nene initeꞌ lamineꞌ nomive lo gelo ma nene aꞌmida nene okodeloꞌ initeꞌ ma do hito do lamineꞌ ogaꞌ noune. Idoꞌ okodeꞌmo ovozo hilineꞌ initeꞌ nene do hito gonolise ogaꞌ nouneꞌza
1CO 12:24 lovozo amineꞌ initeta nene ha sotoꞌ igi minaaꞌ nave. Ne neiha okodeloꞌ gizede ade gote vete neꞌmine initeꞌ mataꞌ mukiꞌ ingine nene ge dovo ledevoꞌ o-nede ne dovo ledevoꞌ o-gede li izeꞌ milami mukiꞌ nete ge nasahiliꞌ o-nede ne nasahiliꞌ o-gede livoꞌ minilizave lo Oꞌmoso aza okode lingela ma lamineꞌ o guno amineꞌ gelo minida nene lamineꞌ i minada nene ngivileꞌ ivosa di lamineꞌ i-ngidilizave lo okode nene do hamoꞌ ogo do sotoꞌ ineꞌ ve.
1CO 12:26 Nemuꞌ nene okode lingela mulumo alumo initeꞌ ma sotoꞌ ineꞌ nene okode mukiꞌ nene mulumo makatoꞌ gilaaꞌ nave. Idoꞌ okode lingela ma di naba i-di neꞌmine aniꞌ nene okode linge malasi nene di hamoꞌ igi ngolize izaaꞌ nave. Idoꞌ leliꞌ okodela sotoꞌ ogaꞌ neineꞌ monovo neꞌmino Izesuꞌ evenele zuho lelikutiꞌ eveneꞌ ma ingine mulumo initeliꞌmi lulouꞌ nizavo ma eveneꞌ lingela lazasi nene mulumoꞌine gelo hize eleꞌ o-ngedelone. Idoꞌ aꞌmineꞌmine ogo lelikutiꞌ eveneꞌ mamuꞌ di naba i-dikevo ma nene eveneꞌ lingela lazasi nene aꞌminemuꞌ lolize izo minelone losa noluve.
1CO 12:27 Nemuꞌ nene Izesuꞌ zuho lingine nene Kilisitoꞌ okoꞌno hamoꞌ neꞌmine mini okoꞌnoloꞌ gizene ana golo vele nevoꞌmine initeꞌve liliꞌ igi ato atoꞌ miniꞌmi vi mini ezemuꞌ gono di lingine hamo hamoꞌ ezela giꞌmizi nizave.
1CO 12:28 Ee, neꞌmine igi nizavo Oꞌmosoꞌmi zuhoti muliseuꞌ ganaꞌ dizi minave nene aposolo minilizave lo Oꞌmosoꞌmo linge ma nene do ote-lede neive. Idoꞌ aꞌmidotiꞌ nene eze veletiꞌ gamazi li sotoꞌ igaꞌ ave polohete nene minilizave lo linge ma nene do ote-ngede neive. Idoꞌ aꞌmidotiꞌ nene Izesuꞌ monoꞌ apizi ngimaaꞌ ave minilizave lo linge ma nene do ote-ngidineꞌ ve. Idoꞌ nelotiꞌ nene amuzo malehe suno di sotoꞌ igaꞌ ave nene do ote-ngedo eveneꞌ goloso galasa di lamineꞌ i-ngidaaꞌ amuzo di minavesi do ote-ngedo idoꞌ gonoloꞌ gizebo lamineꞌ ilizave nesi do ote-ngedo idoꞌ eveneꞌ ma nene noꞌine atokutiꞌ gili lamaaꞌ angutiꞌ laaꞌ ilizave nesi nene do ote-ngidineꞌ ve.
1CO 12:29 Neꞌmine ineꞌza lingine aposolo nene mukitoꞌ minaniꞌ nehe. Oꞌmosoꞌmi veletiꞌ gamazi li sotoꞌ igaꞌ ave nene mukitoꞌ minaniꞌ nehe. Idoꞌ monoꞌ apizi ngimaaꞌ ave nene mukitoꞌ minaniꞌ nehe. Idoꞌ amuzo malehe suno di sotoꞌ igaꞌ gono nene mukitoꞌ daniꞌ nehe.
1CO 12:30 Idoꞌ eveneꞌ goloso galasa do lamineꞌ o-ngedaaꞌ amuzo nene mukitoꞌ di minaniꞌ nehe. Idoꞌ noꞌine atokutiꞌ gili lamaaꞌ angutiꞌ nene mukitoꞌ laaꞌ naniꞌ nehe. Idoꞌ aꞌmine gili lamaaꞌ aniꞌ noꞌningutiꞌ nene ma likevo mukitoꞌ di velepeꞌ izi laaꞌ naniꞌ nehe. Oꞌove. Mo neꞌmino nomive. Neꞌmine manaꞌmine amuzo nene eveneꞌ mukitoꞌ di minamilisave. Linge nete atoꞌ ma di minikevo idoꞌ lingela nete nene atoꞌ ma di minilisave.
1CO 12:31 Ne neiha lingine nene polohete loloꞌ ogaꞌ amuzo nehe monoꞌ laaꞌ amuzo nehe eveneꞌ do lamineꞌ o-ngedaaꞌ amuzo nehe neꞌmine amuzo ato atoꞌ mukiꞌ miniꞌmi vangutiꞌ dizo nolineꞌ amuzo nene do minelone li amuzo milalo.
1CO 13:1 Oꞌmosoꞌmi Sikalahuꞌ aza note atokutiꞌ laaꞌ amuzo nene vauve elo lemavosa eveneliti noꞌningutiꞌ nene ha laaꞌ nooloneꞌ idoꞌ angeloliti noꞌningutikisi nene ha laaꞌ nooloba laza lute nene eveneꞌ aꞌnene ma ngemamosoꞌ neꞌmo laza nene ngeu ngeu lo gamazi lamaaꞌ neineꞌ initeꞌ peloꞌ nevoꞌmine mino haza initeꞌ loloꞌ olosune.
1CO 13:2 Idoꞌ Oꞌmosoꞌmi Sikalahuꞌ neꞌmo hize eleꞌ o-ledavosa Oꞌmosoꞌmi veletiꞌ gamazi lo sotoꞌ ogaꞌ amuzo dizo minineꞌ do mino Oꞌmosoꞌmi gamazi sunoꞌ minineꞌ mukiꞌ nene gelo monovoꞌvesi gele okuꞌ lo mino Oꞌmosomuꞌ gele eleꞌvoleꞌ ogaꞌ nouneꞌ lelita nene naba minavo neꞌmo golo mamuꞌ akatelotiꞌ olovoꞌ ozo lokunivo olovoꞌ ilidoꞌ o neivosa noloneꞌza eveneꞌ lute ngemesaꞌmo mineloneꞌ neꞌmo nene mo haza initeꞌ loloꞌ ogo minelesune.
1CO 13:3 Idoꞌ laza initeꞌ matate nene eveneꞌ gohoꞌ gahaliꞌ ngemeꞌmo vo mino idoꞌ Kilisitoda giꞌmize lamineꞌ ogo minuneꞌ nemuꞌ eiꞌ biluvaꞌve nete leliꞌ okode nene giziꞌ voti libili hililisa ikevo nemuꞌ nene laza neꞌmine i-lidikelizave lo Izesuꞌnimuꞌ gelamune lo golise gelo olovoꞌ amoloneꞌ nene monokuꞌ mo amuzo molokune lo gelo okode nene ha do dizelonidoꞌ o noloseive lo golise gelamo gele ngemaaꞌ nooloba laza eveneꞌ lute ngemamosoꞌ neꞌmo Kilisitongumuꞌ okode hulo helelonidotiꞌ nene Oꞌmosoꞌmo do naba ma o-ledamoloseive.
1CO 13:4 Idoꞌ lute nene eveneꞌ ma ngemaaꞌ noogo ma ingine lizeboloꞌ molalineꞌ initeꞌ ikevo ma nene laza lizeboloꞌ molamivo mino hongu lo minelesune. Idoꞌ lute ngemaaꞌ nounive nene do laminekovoꞌ o-ngedo mino initeꞌ lamineꞌ engita ma sotoꞌ ogavo ma laza lelita sotoꞌ ilinako lo engikumuꞌ muludeuꞌ goloso gelamolosune. Idoꞌ eveneꞌ lute ngemaaꞌ noogo ma leliꞌ okode nene do hozi lo gavele ve gehesamolosune.
1CO 13:5 Idoꞌ eveneꞌ lute ngemaaꞌ noogo ma hokolizeꞌ o-ngedamo mino ledenihe minamo lizeboloꞌ molamivo mino lihime mili lidikevo ma aꞌminemuꞌ gelamo minelesune.
1CO 13:6 Idoꞌ eveneꞌ lute ngemaaꞌ noogo ma ingine goloso initeꞌ di aka golosoloꞌ nivavo ma laza gizeꞌ o-ngedo lolize izamo ingine monoꞌ aka gihileloꞌ nivavo ma aꞌminemuꞌ nene lolize izelone.
1CO 13:7 Idoꞌ eveneꞌ lute ngemaaꞌ noogo ma nadiꞌ nadiꞌ i-lidilizahe nemuꞌ lamo ha geho mino engikumuꞌ nene eveneꞌ lamineꞌ nizave lo gele eleꞌvoleꞌ o-ngede mino engita initeꞌ lamineꞌ mukiꞌ nene mo sotoꞌ o ngemeleseive lo gelo minelone. Idoꞌ lute ngemaaꞌ nouneꞌ nemuꞌ nene ingine naniteꞌ naniteꞌ di gopo i-lidilizahe nene ha ningeꞌmo voovoꞌ minelesune.
1CO 13:8 Lute ngemaaꞌ monovo nene mo osuꞌ lamoloseiha Oꞌmosoꞌmi Sikalahuꞌ neꞌmo amuzo ngemavo eveneꞌ ma Oꞌmosoꞌmi veleutiꞌ gamazi li sotoꞌ igaꞌ niilizahe idoꞌ Oꞌmosoꞌmi Sikalahuliꞌmo gono davo noꞌine atokutiꞌ laaꞌ niilizahe idoꞌ monoꞌ monovo gili lamineꞌ igi laaꞌ niilizahe aꞌmine laaꞌ niiliza initeꞌ nene Oꞌmosoꞌmo lavo osuꞌ loloseive.
1CO 13:9 Ee, idise geleꞌmo nouneꞌ initeꞌ nene ngelo gele osuꞌ lo gelamolosune. Idoꞌ Oꞌmosoꞌmi veletiꞌ gamazi lo sotoꞌ oloneꞌ nene ngelo lo sotoꞌ ogo osuꞌ lamolosune.
1CO 13:10 Ne neiha alingeꞌ nene initeꞌ matakumuꞌ gele osuꞌ lo gelesoꞌ gamene alitelinguꞌ nene initeꞌ matakumuꞌ idise olihe gele osuꞌ lamo noneꞌ neꞌmino minamo gele osuꞌ lo gelelesunako nemuꞌ ingine initeꞌ mamuꞌ li-limilizadoꞌ amivo gonoꞌine osuꞌ lavo Oꞌmosoꞌmi veletiꞌ gamazi li sotoꞌ igaꞌ avesi Sikalahuliꞌmo luꞌninguꞌ gono davo noꞌine atokutiꞌ laaꞌ avesi idoꞌ monoꞌ monovo gili guni i mini aꞌminemuꞌ li-limaaꞌ avesi nene gohi li-limamilisave.
1CO 13:11 Nene neꞌmino neive. Laza gomuꞌ izipe namuno neꞌmino minuneꞌ gamene mauꞌ nene izipe namunote igi mili minaaꞌ aniꞌ monovoloꞌ do molo gamazi nene lo minuneꞌ ve. Idoꞌ lute gateuꞌ giluneꞌ nene gele nge lamo izipe namunote gilaaꞌ aniꞌ gaꞌine neꞌminosa nene gele minune. Laza gomuꞌ nene izipelite initeꞌ monovo gizekaꞌna hizi ningaaꞌ adiꞌmino gizekaꞌna hizo ningaaꞌ uneꞌ ve. Neꞌmine ogaꞌ uneꞌza alingeꞌ laza lodive ogosa izipeliti monovoloꞌ neꞌminosa ogo molo ogaꞌ uneꞌ ma nene hulo mehedela okune. Idoꞌ aꞌmineꞌmine ogo idise Oꞌmosomuꞌ geleꞌmo nouneꞌ nene izipe namuno gaꞌine gilaaꞌ naniꞌ neꞌmino gelo mino laza gele guno ogo gele osuꞌ losaꞌmuneꞌza alingeꞌ eveneꞌ lodive gilaaꞌ naniꞌ neꞌmino gelo laza ezemuꞌ gele guno ogo gele osuꞌ lolosune.
1CO 13:12 Ee, idise gamenela Oꞌmosomuꞌ ningo gelaaꞌ nouneꞌ nene neꞌminosa ningo gelaaꞌ noune: Oꞌmoso mehedela neivo gapo gapoꞌ golosouꞌ velelatiꞌ noningunivo sotoꞌ o guno amivo ninge guno amaaꞌ nouneꞌ neꞌminosa ne neive. Idise nene ezemuꞌ ningo gele guno osaꞌmuneꞌza alingeꞌ nene vetela ogavo aza leliꞌ vodeuꞌ mukiꞌ ninge osuꞌ lo minaaꞌ neineꞌ neꞌmino ezesi ninge guno ogo ezemuꞌ gele osuꞌ lolosune. Neꞌmine olosunako aꞌmine luvoniꞌ monoꞌ gono daaꞌ aniꞌ aleve ingine Oꞌmosomuꞌ li-limaaꞌ aniꞌ gonoꞌine nene osuꞌ loloseive.
1CO 13:13 Nene osuꞌ loloseiha monovo sito hamo adoꞌ Oꞌmosomuꞌ gele eleꞌvoleꞌ ogaꞌ idoꞌ Oꞌmosoꞌmo initeꞌ lamineꞌ oꞌmo vilingumuꞌ gelo gilingili ogo gizebo ogo minaaꞌ idoꞌ eveneꞌ lute ngemaaꞌ monovo nene osuꞌ lami miniviꞌ miniviꞌ igi ha minilisave. Idoꞌ aꞌmine monovo sito hamo neutiꞌ initeꞌ hamoꞌ lute ngemaaꞌ monovo neꞌmo nene ngivileꞌ ogo initeꞌ naba neive.
1CO 14:1 Nemuꞌ nene lingine eveneꞌ lutine ngimaaꞌ monovoloꞌ nene amuzo mili eꞌmetilo. Idoꞌ nelotiꞌ nene monoliꞌmi amuzo lingela nene ma dalone lisa amuzo milalo. Neꞌmine niigi Oꞌmosoꞌmi veletiꞌ gamazi li sotoꞌ igakumuꞌ nene gilavo dizelive.
1CO 14:2 Oꞌmosoꞌmi Sikalahuꞌ neꞌmo vetine do lapa nomineꞌ o-lengedavo gamazi notine atokutiꞌ laaꞌ nene lingine gilavo dizosa neineꞌza neꞌmo eveneꞌ mukiꞌ nene ma hize eleꞌ o-ngedamoloseinako aꞌmine gamazi notine atokutiꞌ laaꞌ nene dizo minamive. Lingine mulise milalizanguꞌ nene eveneꞌ maliꞌmo gamazi nolo atokutiꞌ lilineꞌ nene eveneꞌ gilamilizaniꞌ gamazi loloseinako aꞌmine lilineꞌ gamazi nene eveneꞌ lo-ngemamo Oꞌmosovoꞌ lo-imineꞌ geleleseive. Ee, Oꞌmosoꞌmi Sikalahuꞌ neꞌmo hize eleꞌ o-divosa eveneꞌ gilamilizaniꞌ gamazivoꞌ loloseive.
1CO 14:3 Ne neiha eveneꞌ maliꞌmo eveneꞌ mukiꞌ gililizaniꞌ gamaziutiꞌ nene Oꞌmosoꞌmi veletiꞌ gamazi lo sotoꞌ ogo aꞌmine gamazi eveneꞌ nevo ne lo-ngemelineꞌ neꞌmo monokuꞌ hize eleꞌ o-ngedo luꞌine do ngi lo-ngedo do nguꞌ izelineꞌ gamazi lo-ngemeleseive.
1CO 14:4 Izesuꞌ eveneleti muliseuꞌ nene eveneꞌ maliꞌmo gamazi eveneꞌ gilamaniꞌ nolo atokutiꞌ monoꞌ lilineꞌ nene eiꞌ lulovoꞌ hize eleꞌ o-deleseiha eveneꞌ ma Oꞌmosoꞌmi veletiꞌ gamazi evenelite gililiza noꞌningutiꞌ lo sotoꞌ ogo lilineꞌ neꞌmo aꞌmida Izesuꞌ evenele mulise minaveti luꞌine nene hize eleꞌ o-ngedeleseive.
1CO 14:5 Naza giluvoniꞌ lingine mukitoꞌ gamazi notine atokutiꞌ monoꞌ laaꞌ ilizaniꞌ nene lamineꞌ o neiha lingine Oꞌmosoꞌmi veletiꞌ gamazi eveneꞌ mukiꞌ gililiza noꞌningutiꞌ li sotoꞌ igaꞌ ilizaniꞌ neꞌmo nene ivileꞌ ogosa lamineꞌ oloseive losa gele nouve. Izesuꞌ zuhoti muliseuꞌ nene ve maliꞌmo gamazi nolo atokutiꞌ monoꞌ gamazi lilineꞌ nene Izesuꞌ evenele nene monokuꞌ hize eleꞌ o-ngedelingumuꞌ ve losa gamazi nolo atokutiꞌ monoꞌ lilineꞌ nene do velepeꞌ izidiniko neꞌmo nene gamazi nolo atokutiꞌ laaꞌ ivesi idoꞌ Oꞌmosoꞌmi veletiꞌ gamazi lo sotoꞌ ogaꞌ ivesi nene lisiheꞌ igi minasidineꞌza nolo atokutiꞌ monoꞌ lilineꞌ gamazi nene do velepeꞌ izo Izesuꞌ zuho mulise nene lo-ngemamilineꞌ neꞌmo nene gamazi nolo atokutiꞌ laaꞌ ive nene Oꞌmosoꞌmi veletiꞌ gamazi lo sotoꞌ ogaꞌ ive neꞌmo ivileꞌ ogo mineleseive.
1CO 14:6 Neze zuhokizo, naza lengita ogo Oꞌmosoꞌmi sunoꞌ gamaziutiꞌ ma lo-lengemamo idoꞌ monokumuꞌ gatine do ngoloꞌ lo-lengedamo idoꞌ Oꞌmosoꞌmi veletiꞌ gamazi lo sotoꞌ o lengemamo idoꞌ monoꞌ monovo ma apize lengemamo haza gilamilizaniꞌ gamazi noꞌne atokutiꞌ aꞌmine aꞌmine gamazi lo-lengemeloniꞌ nene monokuꞌ nene ngelo hize eleꞌ o-lengedamolosuve.
1CO 14:7 Idoꞌ aꞌmineꞌmine ogo veꞌinesi minamaniꞌ initeꞌ polepeꞌ idoꞌ ngita nevoꞌmine initedunuꞌ nama li ma bili guni amilizaniꞌ nene aꞌmine nama nene ma gilavete neꞌmine nama ma nene nolive li ngeli gilamilisave.
1CO 14:8 Idoꞌ biluvalite lovo di navo lovo di nave li ngimiseli di vilizangumuꞌ di nene igi minilizave lo pikuli izelineꞌ nene ize guno amivo eveneꞌ nete izelineꞌ monovo nene gili guno ami hazamuꞌ noizeleseive li gili ngeli di nene igi minamilisave.
1CO 14:9 Idoꞌ aꞌmineꞌmine ogo lingine notine atoꞌ eveneꞌ gilamilizangutiꞌ lilizaniꞌ nene gamazi lilizaniꞌ monovo nene eveneꞌ ingine gilamavo hazamuꞌ meheꞌnida li huli huliꞌ ilisave.
1CO 14:10 Misubo ato atoꞌ mukikuꞌ nene eveneꞌ laaꞌ naniꞌ noꞌine nene nanikeꞌ neve. Naza gelamuha mukiꞌ goloso neive. Idoꞌ aꞌmine gamaziꞌine mukikutiꞌ nene monovoꞌve nomineꞌ gamazi hamokisi ma minamo noloseive.
1CO 14:11 Minamoloseineꞌza ve maliꞌmo gamazi atoꞌ noloutiꞌ ma nolivo naza ma gelamoloniꞌ eze nene golo mala ve loloꞌ ogo do aka o-nidamivo nazasi nene aꞌmineꞌmine ogo golo gohila ve loloꞌ ogo do aka o-damuvo minelesusive.
1CO 14:12 Idoꞌ lingine notine atokutiꞌ monoꞌ lilizaniꞌ nene eveneꞌ monokuꞌ di aka i-ngidamilisanako lengitasi nene monovo aꞌmineꞌmine ogo neive. Nemuꞌ nene lingine monoliꞌmi amuzo ma dalisa amuzo mili nilizaniꞌ Izesuꞌ evenele zuho nene monokuꞌ hize eleꞌ o-ngedeloneꞌ amuzo dalone li hize eleꞌ i-ngidilisa amuzo milalo.
1CO 14:13 Nemuꞌ nene ve ma nolo atokutiꞌ monoꞌ gamazi lo sotoꞌ ogaꞌ olo ma nene alingeꞌ do velepeꞌ izo eveneꞌ gililizadoꞌ lo-ngemelingumuꞌ nene do velepeꞌ izo lo-ngemaaꞌ amuzomuꞌ nene Oꞌmosola lilive.
1CO 14:14 Idoꞌ nene nanitekumuꞌ ve. Lingine giliꞌnalo. Laza note atokutiꞌ Oꞌmosola ma lo minesoꞌ nene Oꞌmosola nadive nolube monovoꞌve gelamo gopo nolunivo leliꞌ Sikalahute neꞌmovoꞌ nene loloseive.
1CO 14:15 Nemuꞌ nene nadiꞌ olone. Sikalahuteꞌmo Oꞌmosola nolivosa gate neꞌmosi gele hehe nolivo vetedunuꞌ loloneꞌ nene lamineꞌ oloseive. Idoꞌ Sikalahuteꞌmo monoꞌ nama nolivosa gate neꞌmosi gele hehe nolivo vete nedunuꞌ losoꞌ nene lamineꞌ oloseive.
1CO 14:16 Idoꞌ neꞌmine amoloneꞌ nene lengikutiꞌ ve malike Sikalahuka nedunukovoꞌ gamazi noka atokutiꞌ Oꞌmosola lo opoꞌni noliliba aꞌmine noka nene gilamilizave ingine lilineꞌ gamazi gilamilizaniꞌ neꞌmo monokuꞌ hize eleꞌ o-ngedamolosainako nemuꞌ nene gamazi lo osuꞌ laanivo ingine neꞌmino minivo li ngeli lamilisave.
1CO 14:18 Idoꞌ Oꞌmosoꞌmi Sikalahuliꞌmo gamazi noꞌne atokutiꞌ laaꞌ amuzo nene vauve elo lehize-nidivo lengiꞌ mukitoꞌ nene lingivileꞌ ogosa laaꞌ nouvoniꞌ nemuꞌ nene Oꞌmoso opoꞌni laaꞌ nouve.
1CO 14:19 Ne neiha Izesuꞌ eveneleti muliseuꞌ gamazi nene atoꞌ noꞌneutiꞌ gamazi haꞌna haꞌna golososi lo-ngemeloniꞌ nene monokuꞌ ngelo hize eleꞌ o-ngedamolosuha noꞌne atokutiꞌ lamo gaꞌne gele hehe lo monoꞌ lo-ngemeloniꞌ nene gaꞌine do ngoloꞌ lo-ngedelesuve. Ee, gamazi liꞌnibesi nevo ma lo-ngemeloniꞌ nene gaꞌine ha do ngoloꞌ lo-ngedelesuvonako nemuꞌ nene gamazi noꞌne atokutiꞌ lo-ngemamo gaꞌne gele hehe lo mino gililizaniꞌ gamaziutikovoꞌ lo-ngemelesuve lo gele nouve.
1CO 14:20 Neze zuhokizo, lingine gatine gili guni ami izipe namuno liliꞌ igi minaniꞌ nene hulilo. Ne neiha goloso initeꞌ nene izipe namuno ngomolite nene ngeli damilisanako linginesi goloso initeꞌ nene dami izipe namuno neꞌmini minilisaniꞌza nemuꞌ lamuve. Lingine gatine gililizaniꞌ nene izipe namuno gatine gilami eveneꞌ lodivete gili vevesaaꞌ naniꞌ neꞌminisa lingine gatine gili vevesi minilo.
1CO 14:21 Monoꞌ godolouꞌ nene Oꞌmosoꞌmo ezemuꞌ gili eleꞌvoleꞌ amave Zuda vemuꞌ lineꞌ gamazi ma tiꞌ li gizi nizaniꞌ ma neive: Naza lokuvo golo malatiꞌ aleve ingine igi engiꞌ atoꞌ noꞌningutiꞌ mela aleve gamazi li-ngimilizaha nesi nene mela aleve neze gamazi gili damilisave.
1CO 14:22 Idoꞌ lingine gilaniꞌ nene Oꞌmosoꞌmo lengikumuꞌ nene lamineꞌ gelosa gamazi note atokutiꞌ laaꞌ monovo nene do sotoꞌ o-ledave li gilaaꞌ nahe. Oꞌove. Oꞌmosoꞌmo ezemuꞌ gili eleꞌvoleꞌ amavemuꞌ mulunouꞌ goloso gilineꞌ neꞌmi monovo nene ngelebizelesa gamazi noꞌine atokutiꞌ laaꞌ monovo nene engitasi do sotoꞌ ineꞌ nene aꞌmine monoꞌ godolouꞌ minineꞌ gamazi mautiꞌ nene ningo gelelesune. Ne neiha Oꞌmosoꞌmi veletiꞌ gamazi laaꞌ monovo nene ezemuꞌ gili eleꞌvoleꞌ amavemuꞌ nevoba ezemuꞌ gili eleꞌvoleꞌ avemuꞌ nene eze monovo ngelebizelesa do sotoꞌ o-ngedaaꞌ neive.
1CO 14:23 Idoꞌ nemuꞌ nene Izesuꞌ evenele lingine di nubo igi ato atoꞌ notingutiꞌ mukitoꞌ nilavo eveneꞌ ma monoꞌ monovo olihe gilamave nizahe idoꞌ Oꞌmosomuꞌ gili eleꞌvoleꞌ amave heta atoꞌ ve nizahe ingine nene aꞌminguꞌ dizi nizavo lingine ato atoꞌ notingutiꞌ li nizavo ingine gili nemuꞌ nene lingine negi hizi nizave li lilisave.
1CO 14:24 Idoꞌ ato atoꞌ notingutiꞌ lami mukitoꞌ Oꞌmosoꞌmi veletiꞌ gamazi li sotoꞌ sotoꞌ igi nizavo monoꞌ monovo olihe gilamave nizahe idoꞌ Oꞌmosomuꞌ gili eleꞌvoleꞌ amave heta atoꞌ ve nizahe engikutiꞌ ve ma aza lengiꞌ muliseuꞌ dizo monoꞌ gelelineꞌ nene monoꞌ lilizanguꞌ monovo goloso ogaꞌ noilidoꞌ neꞌmine ogaꞌ monovo nene goloso ve li li sotoꞌ sotoꞌ ikevo lulouꞌ hizo do ote-davo monovoꞌve goloso ogaꞌ ineꞌ nemuꞌ gelelineꞌ neꞌmo lihimeꞌvemuꞌ li sotoꞌ i-di goniꞌ i-daniꞌ geleleseinako
1CO 14:25 aꞌmine veꞌmi lulouꞌ monovo goloso lamineꞌ haleko minineꞌ ma nene sotoꞌ oloseive. Neꞌmine ogavo aza nene Oꞌmoso gubuꞌ ize emo golo hizo ongo Oꞌmoso nene lengiꞌ vovotinguꞌ neive lo loloseive.
1CO 14:26 Idoꞌ neze zuhokizo, neꞌmino neineꞌ nenako nelotiꞌ nene nadiꞌ olone. Lingine monokuꞌ igi di nubo ilizanguꞌ nene maliꞌmo monoꞌ nama lavo ma neꞌmo monoꞌ monovo ma lo ngoloꞌ lo lo-lengemavo ma neꞌmo Oꞌmosoꞌmi sunoꞌ gamazi ma lo sotoꞌ ogo lo-lengemavo maliꞌmo nene gamazi nolo atokutiꞌ lavo maliꞌmo aꞌmine lineꞌ gamazi nene do velepeꞌ izivo neꞌmine igi minilizaniꞌ neꞌmo nene eveneꞌ monokuꞌ do amuzo molo-ngedelineꞌ initeꞌ ilisanaze. Neꞌminevoꞌ ilo.
1CO 14:27 Idoꞌ ve ma ingine atoꞌ noꞌningutiꞌ monoꞌ lili ma nene sitalitise he sito hamolite he aꞌneꞌminetevoꞌ lilisave. Mukitoꞌ hamokuꞌ molo hite hiteꞌ igi lamilisave. Ga loke na loke li nilasivo maliꞌmo aꞌmine gamazi lilisineꞌ nene monovo do velepeꞌ izo lo-lengemelive.
1CO 14:28 Idoꞌ ve maliꞌmo nolo atokutiꞌ monoꞌ lo-lengemelesa neivo aꞌmine lo-lengemelineꞌ gamazi nene do velepeꞌ izo lo-lengemelive ma minamivo ma aꞌmine atoꞌ noloutiꞌ monoꞌ lolosa ive nene Izesuꞌ zuholiti muliseloꞌ nene gamazi lamo haza mino eiꞌ luloukovoꞌ Oꞌmoso lo-emo minelive.
1CO 14:29 Idoꞌ Oꞌmosoꞌmi veletiꞌ gamazi nene sitape sito hamohe neꞌminetevoꞌ ga loke na loke li nilavo eveneꞌ linge ma ingine nene lamineꞌ lilizahe di zovoꞌ izi lilizahe li gapepeꞌ igi gili minilisave.
1CO 14:30 Idoꞌ ve maliꞌmo Oꞌmosoꞌmi veletiꞌ gamazi lo sotoꞌ ogo nolo-lingimivo gapepeꞌ igi mulise mili minilizaveutiꞌ maliꞌmi lulouꞌ Oꞌmosoꞌmi Sikalahuꞌ neꞌmo monoꞌ gamazi gosohoꞌ ma molo-davo ma nene gomuꞌ gamazi lo-lengemo minive ma nene liteꞌ lo lo-lengemo osuꞌ lo haza neivo monoꞌ gamazi gosohoꞌ lulouꞌ limive neꞌmo lilive.
1CO 14:31 Lingine mukitoꞌ hamo hamoꞌ li-limiꞌ limiꞌ avo mukitoꞌ Oꞌmosomuꞌ gele veveso monokuꞌ amuzo molaloningumuꞌ ve li Oꞌmosoꞌmi veletiꞌ gamazi nene ga loke na loke li hamo hamoꞌ ha lo sotoꞌ ilisanako nemuꞌ nene gamazi lami gopo gatine gilami haza nizavo maliꞌmo nene ha lilive.
1CO 14:32 Idoꞌ Oꞌmosoꞌmi Sikalahuꞌ neꞌmo lute do ote-ledaaꞌ neineꞌ nenako gamazi nololoneꞌ nene geto lo osuꞌ lamolosune li lingine lamilo. Oꞌmosoꞌmi veletiꞌ gamazi li sotoꞌ igaꞌ ave engiꞌ luꞌnidoꞌ nene angisevoꞌ gizebo i nizanako nemuꞌ ve ma aza gamazi lo minelingutiꞌ nene hulo ha neivo monoꞌ gamazi gosohoꞌ lulouꞌ lemavo lolosa ive maꞌmo nene lilive.
1CO 14:33 Idoꞌ ne nanitekumuꞌ ve. Oꞌmoso nene initeꞌ do gopoꞌ napa ogaliꞌmi meleho minamo aza nene lute do hamoꞌ ogo hongu lo minaliꞌmi meleho ne neive. Nemuꞌ nene lingine monoꞌ gililisa mulise milalizanguꞌ nene lingine monokuꞌ igi mili iliza monovo nene di gopoꞌnapa ami mini monoꞌ lilizangumuꞌ nene kulu keleka lami ha ge loke ne loke li lilizave. Idoꞌ veneꞌ nene gamazi lamilizave lo oꞌove lo noneꞌ nenako nemuꞌ veneꞌ ingine Izesuꞌ eveneleti muliseꞌine miniꞌmi monaniꞌ mukikuꞌ nene gamazi lami haza minaaꞌ adiꞌmine igi lengitasi veneꞌ nene gamazi lami hazavoꞌ minilizave. Oꞌmosoꞌmi louꞌ gamaziꞌmo lidoꞌ igi veneꞌ ingine gelekelekovoꞌ igi minilizave.
1CO 14:35 Idoꞌ Izesuꞌ zuho mulise neti veꞌnidoꞌ venelite gamazi lilizaniꞌ nene lovozo oloseinako nemuꞌ nene veneꞌ ingine initeꞌ mamuꞌ longoꞌ ilisa gili ma nene numuꞌnida vi mini vanahosi angisevoꞌ minilisinguꞌ nene longoꞌ o-davo li gili ha gele igi gililisive.
1CO 14:36 Idoꞌ lingine veneꞌ gamazi lamilizave lo luvoniꞌ nemuꞌ eꞌmetamilizaniꞌ nene naza neꞌmine lo noluve: Oꞌmosoꞌmi gamazi nene lengikutiꞌ sotoꞌ ogo minineꞌ nehe. Idoꞌ lengikovoꞌ apiꞌ igi gilaniꞌ neve. Oꞌove. Nemuꞌ nene leliꞌ gomuꞌ Izesuꞌ zuho loloꞌ uneꞌ nene livileꞌ igi monovo gosohoꞌ di sotoꞌ amilo. Lengiꞌ nene leliꞌ gomuꞌ Izesuꞌ zuho loloꞌ uneꞌ nenaze. Leꞌmetilo.
1CO 14:37 Idoꞌ lengikutiꞌ ve malite engiꞌ nene Oꞌmosoꞌmi veletiꞌ gamazi lo sotoꞌ ogaꞌ unive none idoꞌ Sikalahutatiꞌ amuzo do minunive none lilizave nene neniꞌ gamazi mene gizo nolingimuvoniꞌ nemuꞌ nene Guvelesi veꞌmo lo huko-lidineꞌ gamazi ve li gili minilizave.
1CO 14:38 Idoꞌ Guvetesi veꞌmi gamazi ve lo nogize-lingimuvoniꞌ gamazi mene ve maliꞌmo gele hulavo ma nene ezemukisi gele hulo aza nene Oꞌmosoꞌmi veletiꞌ gamazi lo sotoꞌ ogaꞌ amuzo damive lolone.
1CO 14:39 Neze zuhokizo, gamazi meuko luvoniꞌ nemuꞌ nene Oꞌmosoꞌmi veletiꞌ gamazi li sotoꞌ ilizangumuꞌ amuzo milalo. Idoꞌ eveneꞌ ma noꞌine atokutiꞌ lilizangumuꞌ nene mo mudise oꞌve li-ngidilizave lo lamuvoniꞌza
1CO 14:40 lengiꞌ mulise milalizanguꞌ initeꞌ igi mili minilizaniꞌ mukiꞌ nene vo gopoꞌ napa amo laminekovoꞌ o-do vo miniliho losa noluve.
1CO 15:1 Neze zuhokizo, gomuꞌ lo-lingimuvoniꞌ monoꞌ gamazi lamineliꞌmi monovomuꞌ nene gohi lo-lengemelove. Aꞌmine gamazi neve lo-lengemekuvo lingine gili daniꞌ ve. Idoꞌ aꞌmine gamazi neve nene idisesi ha di giliꞌ li nizaniꞌ ve.
1CO 15:2 Idoꞌ aꞌmine gamazi di minaniꞌ neꞌmo Oꞌmosoꞌmo do lunguꞌ izelidoꞌ nene mini milisa nene nizave. Ee, idoꞌ lingine gamazi lo-lingimuvodoꞌ gili eleꞌvoleꞌ igi gili daniꞌ nene vo haza amivo aꞌmine gamazi gehepeve nene di giliꞌ li minilizaniꞌ nene Oꞌmosoꞌmo do lunguꞌ izeleseive.
1CO 15:3 Idoꞌ gomuꞌ lo-lingimuvoniꞌ monoꞌ gamazi lamineliꞌmi monovomuꞌ gohi lo-lengemelove luvoniꞌ nene nemuꞌ luve: Monoꞌ gamazi lamineꞌ ganaꞌ apiꞌ ogo gelo do goꞌzekuvonikovoꞌ nene lo-lengemo neutiꞌ nene dizo minineꞌ gamazi neꞌmino ve lo tiꞌ lo lo-lingimuvoniꞌ ve: Monoꞌ godolouꞌ Kilisitoꞌnimuꞌ gizadoꞌ eꞌmeto leliꞌ lihimetemuꞌ hilineꞌ ve.
1CO 15:4 Idoꞌ aꞌmineꞌmine ogo helavo galese izi-dikevo gamene sito hamo mino galeseutiꞌ oteleseive li monoꞌ godolouꞌ polohetelite gizadoꞌ eꞌmeto neꞌmine ineꞌ ve.
1CO 15:5 Idoꞌ galesetiꞌ otosa nomono Petoloꞌni sotoꞌ o emavo ningineꞌ. Idoꞌ aꞌmidotiꞌ nene izipahala zuho tuvelu nene sotoꞌ o ngimivo ninganiꞌ ve.
1CO 15:6 Nelotiꞌ alingeꞌ nene eze evenele zuho faef hadeti (500) neꞌmine di geseꞌ igi minadokisi eze okoꞌnoloꞌ ninganiꞌ ve. Idoꞌ aꞌmine Izesuꞌ okoꞌnoloꞌ ningave linge ma nene osuꞌ liꞌmi vaniꞌza vaiꞌ goloso nene veꞌinesi haza nizave.
1CO 15:7 Idoꞌ nelotiꞌ nene akunolo Zakoboꞌni sotoꞌ o emosa alingeꞌ nene aposolo mukita sotoꞌ o ngimineꞌ ve.
1CO 15:8 Idoꞌ nelotiꞌ naza nene ve goloso mino eze evenele loloꞌ ogo mineloniꞌ gamene nene ivileꞌ goloso ogo nouvo alingeꞌ gehepeve nene aposolo geleꞌmize molalove lo sotoꞌ o nemavo naza aꞌneꞌmine veꞌminesi ninguvoniꞌ ve. Neꞌmino ninguneꞌ nemuꞌ nene hilingutiꞌ mo otaniꞌ neive lo gele eleꞌvoleꞌ o minelone.
1CO 15:9 Idoꞌ naza ve goloso loloꞌ ogo nouvodoꞌ aposolo neleꞌmize molangumuꞌ luvoniꞌ nene naza Oꞌmosoꞌmi evenele zuho do goloso o-ngedaaꞌ uve mino aposolo loloꞌ ogo minelodoꞌ lisiheꞌ amo aposolo minanguꞌ lemo mino gizeꞌninguꞌ nouvoniꞌ nemuꞌ nene luvoniꞌ ve.
1CO 15:10 Nemuꞌ luvoniꞌza idise mene aposolo loloꞌ ogo monovoꞌne do atoꞌ ogaꞌ nouvoniꞌ nene Oꞌmosoꞌmo lulo lamineꞌ nene lehize-nedo do lamineꞌ o-nididiꞌmo nene nouve. Idoꞌ aꞌmine do lamineꞌ o-nidineꞌ nene vo haza amive. Naza nene gono amuzo molo do aposolo linge mukiꞌ nene ngivileꞌ ogo gono daaꞌ uvoniꞌ ve. Idoꞌ neꞌmine ogaꞌ nouvoniꞌ nene neniꞌ amuzoꞌnedunuꞌ nomive. Oꞌmosoꞌmo neꞌmino do lamineꞌ o-nedaaꞌ neineꞌ neꞌmo aposolo lingela nene ngivileꞌ ogosa gono daaꞌ nouve.
1CO 15:11 Ne neiha naza gono do monoꞌ gamazi lamineꞌ nene lo sotoꞌ olonipe aposolo lingelite li sotoꞌ ilizanipe mukitoꞌ laza Izesuꞌ hilingutiꞌ otive lo gomuꞌ lo-lingimuvoniꞌ neꞌmino hamoꞌ gamazivoꞌ lo-lengemelesune. Idoꞌ lingine ganaꞌ apiꞌ igi monoꞌ gamazi gili eleꞌvoleꞌ aniꞌ ma nene gamazi atoꞌ ma gili eleꞌvoleꞌ aniꞌ nomive. Mo aꞌmine gamazi gehepeve nene gili eleꞌvoleꞌ aniꞌ ma neive.
1CO 15:12 Neꞌmine aniꞌ ma neineꞌza laza Kilisitoꞌ hilingutiꞌ kululuꞌ izo otineꞌ ve lo lo-lengemaaꞌ nounivo lengikutiꞌ linge malite lingine helakutiꞌ gohi otaaꞌ nene nomive li laaꞌ naniꞌ nene nanimuꞌ laaꞌ nave.
1CO 15:13 Helakutiꞌ otaaꞌ nene nomidiniko Kilisitoꞌ hilingutiꞌ otive gamazi nene gihile minamidine.
1CO 15:14 Kilisitoꞌ nene hilingutiꞌ ma otamidiniko monoꞌ gamazi laaꞌ nouneꞌ nene gihile nomineꞌ minavo hazamuꞌ lokunivo aꞌmine gamazi nene lingine gili eleꞌvoleꞌ aniꞌ nenako mo hazamuꞌ gili eleꞌvoleꞌ adine.
1CO 15:15 Idoꞌ neevoꞌ nene nomive. Oꞌmosoꞌmo hilave nene do ote-ngedesaꞌmidiniko Kilisitokisi nene otelidoꞌ amivo otamidine. Nemuꞌ nene Oꞌmosoꞌmo hilingutiꞌ do ote-dineꞌ ve laaꞌ nounako Kilisitoꞌ hilingutiꞌ Oꞌmosoꞌmo do ote-dive laaꞌ nouneꞌ nene sozavoꞌ minidine. Idoꞌ nemuꞌ nene laza Oꞌmosoꞌmi monovomuꞌ soza luneꞌ nene ha ningi giladine.
1CO 15:17 Ee, Oꞌmosoꞌmo hilave nene ma do ote-ngedesaꞌmidiniko Kilisitoꞌnisi nene ma do ote-damidine. Idoꞌ Kilisitoꞌ hilingutiꞌ nene otamo hele osuꞌ lidiniko lingine Kilisitoꞌ lihimete hulo-lidineꞌ ve li gili eleꞌvoleꞌ aniꞌ nene gihile amivo hazamuꞌ gilikevo lihimetine nene ha minivo minadine.
1CO 15:18 Idoꞌ Kilisitoꞌnimuꞌ gili eleꞌvoleꞌ i mini hilave nesi nene mudise vi tolovo adine.
1CO 15:19 Idoꞌ laza nene vetesi me misubouꞌ mineloninguꞌ Kilisitoꞌni nene eꞌmeto vo minekunivo aza do lamineꞌ o-ledavo hele noloningutiꞌ gohi otosa minevoꞌ minevoꞌ olosune lo gelo laza gizebo ogo minaaꞌ nouneꞌza me misuboukovoꞌ minevoꞌ alevote osuꞌ lavo mudise hele osuꞌ lokunivo minevoꞌ minevoꞌ ogaꞌ nene minamaaꞌ idiniko eveneꞌ nete lelikumuꞌ nene ingine initeꞌ lamineꞌ goloso sotoꞌ o-ledeleseive li gilaniꞌza mo sotoꞌ o-ngedamoloseive li eveneꞌ linge mukiꞌ muheleꞌine ningaaꞌ aniꞌ ma nene ivileꞌ ivosa leiꞌ nene muhelete naba ningilizadoꞌ lisiheꞌ ivosa minunidine.
1CO 15:20 Neꞌmine unidineꞌza neꞌmino nomive. Oꞌmosomuꞌ gili eleꞌvoleꞌ igi mini hilave mukiꞌ nene Kilisitoꞌ aza gomuꞌ molo ngemo mo laminetoꞌ hilingutiꞌ otineꞌ ve.
1CO 15:21 Ee, helaaꞌ nene misubouko leliꞌ haza velatiꞌ sotoꞌ ineꞌ nenako helakutiꞌ otaaꞌ nesi aꞌmineꞌmine ogo evenetatiꞌ sotoꞌ ineꞌ ve.
1CO 15:22 Neꞌminemuꞌ noluve: Adamuꞌ aza gomuꞌ molo lemo helaaꞌ monovo do sotoꞌ ivo aꞌvopilemoꞌ mukiꞌ laza helaaꞌ nouneꞌ neꞌmino Kilisitoꞌni nene helelingutiꞌ gomuꞌ molo lemo galeseutiꞌ otelive lo Oꞌmosoꞌmo do ote-dineꞌ nenako Kilisitoda vo giꞌmizunive laza nene hele noloningutiꞌ do ote-ledavo gohi vete gizo oto minelesune.
1CO 15:23 Ne neiha Kilisitokisi eze evenele zuhosi nene helakutiꞌ nene gopo gomuꞌ otaaꞌ alingeꞌ otaaꞌ amolosune. Kilisitoꞌ nene mo gomuꞌ molo lemo otineꞌ nenako alingeꞌ eze alineꞌ gameneloꞌ nene evenele zuho laza nene vete gizo otelesune.
1CO 15:24 Nelotiꞌ nene gonoꞌve do pelelineꞌ gamene naba sotoꞌ oloseive. Neꞌmine ogavo Kilisitoꞌ aza eze biluvaꞌ i-daaꞌ ave eveneꞌ golosoliti guveꞌinesi vesi idoꞌ ato atoꞌ amuzoloꞌ gizebo igi amuzoꞌinesi minavesi nene mukiꞌ ngivileꞌ ogo do gulupese loloꞌ o-ngedo osuꞌ lo eze evenele zuho nene Oꞌmoso melehi anauꞌ molo-ledavo gizebo o-ledeleseive.
1CO 15:25 Ee, Guvelesi ve mino gizebo ilineꞌ amuzo eita minamilineꞌ nene aza lovo veꞌve nene ngivileꞌ amilidoꞌ mineleseinako nemuꞌ nene ngivileꞌ ogo do gizeneuko o-ngedosavoꞌ alingeꞌ nene aꞌmine gizebo ilineꞌ amuzo nene melehi anauꞌ hulavo gizebo o-ledeleseive.
1CO 15:26 Idoꞌ Kilisitoꞌ aza biluvaꞌve mukiꞌ nene do gulupese loloꞌ o-ngedosa alingeꞌ gehepeve nene lovo o lemaaꞌ initeꞌ ma gulive helaaꞌ neꞌmi amuzo nene do hulo akaꞌve hize tileleseive.
1CO 15:27 Idoꞌ initeꞌ mukiꞌ neineꞌ initeꞌ nemuꞌ nene eze gizeneukovoꞌ molavo gelekeleꞌ i-di minilisave li monoꞌ godolouꞌ gizi nizaniꞌ nenako aꞌmine initeꞌ mukiꞌ nene gelekeleꞌ i-di minilisave li gizanguꞌ nene aꞌmine initeꞌ mukiꞌ gipelela do gelekeleꞌ o-ngidive Oꞌmoso nesi nene Kilisitoꞌni gelekeleꞌ o-deleseive li ma gizamaniꞌ nene mo gele none.
1CO 15:28 Initeꞌ mukiꞌ nene gipele gelekeleꞌ i-di minikevo aꞌmine initeꞌ mukiꞌ do gelekeleꞌ o-ngidive Oꞌmosoꞌmo initeꞌ mataꞌ mukitokisi idoꞌ nenitokisi nene gizebo ilive lo gipele azasi nene gelekeleꞌ o-deleseive.
1CO 15:29 Idoꞌ helakutiꞌ otaaꞌ nene ma nomidiniko hilavemuꞌ ve li eveneꞌ malite noso hilaaꞌ naniꞌ nene nanimuꞌ hiladine. Helakutiꞌ otaaꞌ nene ma nomidiniko ingine hazamuꞌ holalosune li gili ma hilamadine.
1CO 15:30 Idoꞌ laza nene gamene gamene goboni malaꞌ malaliꞌmi lulouꞌ mino helaaꞌ akaloꞌ mine molo gono dodo novuneꞌ nene helakutiꞌ otaaꞌ nene nomidiniko geli geli ogo gono dodo ma vamunidine.
1CO 15:31 Guvetesi ve Izesuꞌ Kilisitoꞌnimuꞌ gono duvoniꞌ neꞌmi gihileꞌve lengikumuꞌ nene nolize izaaꞌ nouve lo laminetoꞌ loloniꞌ nene lingine mo gili nizave. Idoꞌ idise mene loloniꞌ gamazi nene aꞌmineꞌmine ogo Oꞌmosoꞌmi veleloꞌ laminetokovoꞌ lolosuve. Naza nene gamene gamene mo helo galese veleloꞌ vokuvongutikovoꞌ nene tineꞌ molo ogaꞌ nouve.
1CO 15:32 Idoꞌ eveneꞌ haza ve nete helakutiꞌ otaaꞌ nene nomive li giladoꞌ nene nazasi aꞌmineꞌmine ogo giluvodiniko Eheso numuda mene Kilisitoꞌ gonoꞌve do nouvo eveneꞌ ize gulo loposo gili minave nete nene biluvaꞌ i-nidi nizavo amuzo molo minuvodotiꞌ nene initeꞌ lamineꞌ ma ngelo dalohe. Mo damolosuko lo gelo alamuvodine. Idoꞌ lamineꞌ helakutiꞌ otaaꞌ nene ma nomidiniko geni gono neꞌmine nene gehamo aizeꞌ mo nohelesoꞌ nene mo mudise osuꞌ lolosunako nemuꞌ nosoꞌ niteꞌ luvoloni no mino lolize izovoꞌ minukeꞌzo li laaꞌ adokovoꞌ nene gele do minunidine.
1CO 15:33 Idoꞌ neꞌmine laaꞌ avela vi giꞌmizikevo gotine izikelizave. Eveneꞌ golosoloꞌ vi giꞌmizilizadotiꞌ nene lutine lengemeni dameni vo goloso oloseive li gizikaniꞌ ma nene lamineꞌ gizi nizaniꞌ neive.
1CO 15:34 Nemuꞌ nene lingine gopoꞌ napa negi gatine nene gilami gatine gili lamineꞌ igi mini goloso initeꞌ nene mehedine imi lihime daaꞌ monovo nene hulilo. Lingine gililo. Lengikutiꞌ linge ma nene olihe Oꞌmosomuꞌ ngomosi ma gilamave. Neꞌmine i nizangumuꞌ nene longovozo hililizadoꞌ o neive losa noluve.
1CO 15:35 Idoꞌ eveneꞌ ma nete tiꞌ li longoꞌ ilisave: Hilave engiꞌ nene nadiꞌ igisa otilizave. Okoꞌnine gelese noloseinako naniꞌmine okoꞌinesi otilizave.
1CO 15:36 Neꞌmine lilinive nene negike lolosane. Initeꞌ zuhoꞌ aineꞌ nene helosavoꞌ nene gohi golo dizaaꞌ neive.
1CO 15:37 Aꞌmine viti zuho nehe initeꞌ maliti zuho nehe zuhoꞌ naniꞌ nene alingeꞌ golo dizelineꞌ okoꞌno neꞌmine nene zuhoꞌ amave. Haza mo zuho initeꞌ nene zuhoꞌ igaꞌ naniꞌ ma neive. Idoꞌ gililo. Aꞌmineꞌmine ogo lazasi nene helo gonoso galeseuꞌ voloneꞌ okodesi nene otamo atoliꞌmine okodesi otelesune.
1CO 15:38 Idoꞌ aꞌmine zuho initeꞌ ato atoꞌ nene Oꞌmosoꞌmo okoꞌine ato atokisivoꞌ neꞌminisa minilisaze lo gilidoꞌ nene do molo do sotoꞌ o-ngedaaꞌ neive.
1CO 15:39 Idoꞌ zuho initeꞌ ato atoliꞌmine minaniꞌ neꞌmino eveneliti okoꞌine nene atoliꞌmine neivo ize guloliti okoꞌine nene atoliꞌmine neivo namaliti okoꞌine nene atoliꞌmine neivo alahaliti okoꞌine nesi atoliꞌmine neivo aꞌmine initeꞌ mukiꞌ nene hamoꞌ okoꞌinesivoꞌ ma minamave.
1CO 15:40 Idoꞌ okulumokuꞌ nene initeꞌ ma minikevo idoꞌ misuboukisi nene initeꞌ ma minikevo neꞌmini nizaniꞌ nene okoꞌine ato atoliꞌminesi nene nizave. Ee, okulumokuꞌ minaaꞌ naniꞌ initeliti okoꞌineꞌmi gonolise nene atoliꞌmine neivo misubouꞌ minaaꞌ naniꞌ initeliti okoꞌineꞌmi gonolise nene atoliꞌmine neive.
1CO 15:41 Idoꞌ holiꞌmi labanaꞌve nene atoliꞌmine neivo ikeꞌniꞌmi labanaꞌve nene atoliꞌimine neivo sonohiꞌ neti labanaꞌine nene atoliꞌmine neive. Idoꞌ sonohiꞌ neti labanaꞌine nesi nene hamoliꞌmine nomive. Labanaꞌine nene mo ato atoꞌ neive.
1CO 15:42 Nemuꞌ nene helo otaaꞌ monovo nesi nene hamoliꞌmine ogo neive. Hilaniꞌ okoꞌine galese izaaꞌ nouneꞌ nene vo goloso ogo osuꞌ laaꞌ neive. Idoꞌ hilakutiꞌ otaaꞌ okoꞌine nene vo goloso amoloseive.
1CO 15:43 Ee, hilaniꞌ okoꞌine nene haza initeꞌ ve lo galese izaaꞌ nouneꞌza hilangutiꞌ otilizaniꞌ nene okoꞌine gonolise laminekisi otilisave. Idoꞌ okoꞌine amuzolo nomineꞌ nene galese izekunivo otilizaniꞌ nene amuzo malehe okoꞌinesi otilisave.
1CO 15:44 Idoꞌ helo galese izaaꞌ okode nene misubo okode ne neive. Idoꞌ galeseutiꞌ otaaꞌ okode nene Okulumoꞌ okodesi otelesune. Idoꞌ misubo okode neineꞌ neꞌmino Okulumoꞌ okodesi neive.
1CO 15:45 Idoꞌ monoꞌ godolouꞌ luhuvo tiꞌ li gizi nizaniꞌ ma neive: Ganaꞌ apiꞌ ogo sotoꞌ ive Adamuꞌ aza nene veꞌinesi mini mili igaꞌ monovo nene Oꞌmosolatiꞌ dosa minineꞌ ve. Idoꞌ Adamuꞌnimuꞌ nene neꞌmine li gizaniꞌza Adamudoꞌ medelo Okulumokutiꞌ alingeꞌ sotoꞌ ive nene minevoꞌ minevoꞌ lemeni dameni lemaaꞌ ive loloꞌ ogo minineꞌ ve.
1CO 15:46 Minevoꞌ minevoꞌ lemeni daaꞌ monovo nene gomuꞌ sotoꞌ amivo vetesi misubouko mino molo ogaꞌ monovo nene gomuꞌ sotoꞌ ogavosa nelotiꞌ alingeꞌ nene minevoꞌ minevoꞌ lemeni dameni daatoꞌ nene mine molo none.
1CO 15:47 Ganaꞌ sotoꞌ ive nene misubodunuꞌ loloꞌ o-dineꞌ neꞌmo nene misubouꞌ ve minineꞌ ve. Idoꞌ ezeloꞌ medelo alingeꞌ sotoꞌ ive nene misuboutiꞌ sotoꞌ amo Okulumokutiꞌ sotoꞌ ive minineꞌ ve.
1CO 15:48 Misubouꞌ ve leliꞌ okode nene ganaꞌ avoteho misubouꞌ sotoꞌ ive Adamuꞌ eiꞌ okoꞌno neꞌminosavoꞌ nene noneꞌza Okulumokutiꞌ ve Kilisitoꞌ evenele zuho loloꞌ unive laza nene eiꞌ Okulumokuꞌ okoꞌno neꞌmine do minelesune.
1CO 15:49 Idoꞌ laza hamo hamoꞌ misubouꞌ ganaꞌ sotoꞌ ogo minineꞌ neꞌmine emeni damenisi noneꞌ neꞌmino gamene ma alingeꞌ lazasi Okulumokutiꞌ limive neꞌmi emeni dameniꞌve neꞌmine do minelesune.
1CO 15:50 Neze zuhokizo naza laminetoꞌ noluze. Gililo. Misubouꞌ okodesi minuneꞌ nedunuꞌ nene Oꞌmosoꞌmo gizebo inguꞌ ngelo vo holamolosune. Misubouꞌ okode vo tolovo ilineꞌ neꞌmo vo tolovo ami initeꞌ Okulumokuꞌ initeꞌ nene ngelo mo damoloseive.
1CO 15:51 Ne neineꞌza gamazi lamineꞌ ma gomuꞌ sunoꞌ minineꞌ idise sotoꞌ ogo neineꞌ nene ma lo-lengemeloze. Gililo: Leze mukitoꞌ nene linge ma hilikevo linge ma nene helamolosuneꞌza hele nolonivesi helamolonivesi mukita nene pikuli nolo molo osuꞌ nolivo liteꞌ lo vete gitibuluꞌ hamoꞌ izaaꞌ nouneꞌ neꞌmino okode nene atoliꞌmine sotoꞌ o osuꞌ loloseive. Ee, vo tolovo ogo hele vaaꞌ okode idise mene nonivo neineꞌ okode nesi mino Oꞌmosoꞌmo gizebo inguꞌ nene ngelo vo holamolosunako vo tolovo amaaꞌ idoꞌ hele vamaaꞌ emeni dameni nene do okodeloꞌ otuho-ledelineꞌ o neinako pikuli izelineꞌ leliꞌ okodeꞌve nene atoliꞌmine sotoꞌ o osuꞌ loloseive.
1CO 15:54 Idoꞌ vo tolovo ogo hele vaaꞌ okode neꞌmo minevoꞌ minevoꞌ ogo minaaꞌ emeni dameni dalineꞌ gameneuꞌ nene monoꞌ godolouꞌ gamazi tiꞌ li gizaniꞌ ma nene vo gihile izeleseive: Minevoꞌ minevoꞌ ogo minaaꞌ neꞌmo helaaꞌ nene ivileꞌ o neive.
1CO 15:55 Idoꞌ gaza helaaꞌ neke livileꞌ ilineꞌ amuzoka nene ma nomive. Idoꞌ gaza helaaꞌ neke lebelaaꞌ gavosoka nene ma nomive. Mo mudise osuꞌ gehepeve logane.
1CO 15:56 Idoꞌ aꞌmine helaaꞌ neꞌmi gavoso nene lihime daaꞌ monovo ne neive. Idoꞌ Oꞌmosoꞌmi louꞌ gamaziꞌve neꞌmo lihime damaaꞌ ve lo lo neivosa lute neꞌmo lihime daakumuꞌ nene otaaꞌ neive. Idoꞌ nelotiꞌ lihime daaꞌ monovo nene lelita amuzo molo sotoꞌ ogaꞌ neive.
1CO 15:57 Ne neiha Oꞌmosoꞌmo lavo Guvetesi ve Izesuꞌ Kilisitoꞌ aza hize eleꞌ o-lidivo lihime daaꞌ monovo nene ivileꞌ ogo lihime damo minaaꞌ nouneꞌ nemuꞌ Oꞌmoso opoꞌni lolone.
1CO 15:58 Idoꞌ nemuꞌ nene neze zuho luꞌne lengeme nouvoniꞌ mate, initeꞌ goloso maliꞌmo lengehusoꞌ ogalize. Lingine monokuꞌ nene amuzo mili eleꞌvoleꞌ igi oti pehe li minilo. Helakutiꞌ otaaꞌ nene nomidiniko Guvelesi veꞌmi gonoꞌve di-daaꞌ naniꞌ nene hazamuꞌ di-dadineꞌza helakutiꞌ otaaꞌ nene neineꞌ nenako hazamuꞌ ma di-damilisave. Nemuꞌ lingine nene hazamuꞌ do-dekunivo labuluvo amoloseive li gili nizaniꞌ nenaze. Guvelesi veꞌmi gono nene gamene gamene vauve ili di minilo.
1CO 16:1 Idise mene Zudaia misubouko Izesuꞌ zuho initeꞌine nomivo viseꞌ igaꞌ aniꞌ aleve nene hize eleꞌ i-ngidi lingine moni di nubuho ilizangumuꞌ gamazi ma loloze. Gililo: Galatia misubouꞌ Izesuꞌ zuho tiꞌ lo lo-ngiduvodoꞌ nene linginesi aꞌmineꞌmine ilo.
1CO 16:2 Lingine salele hamoliꞌmi lulouꞌ nene moni initeꞌ nanikeꞌ daaꞌ nahe aꞌmingutiꞌ nene daniꞌ votigileloꞌ gili mini Sadeuꞌ Sadeuꞌ nene izeꞌ mili lingela mili atoꞌ ikaꞌ ikaꞌ igi minilo. Neꞌmine ami gopo nizavo naza vo hetelekuvo lingine gohi lihiteheꞌ igi di lumo lumo ikelizaze. Neꞌmine igi minilo.
1CO 16:3 Neꞌmine igi nizavo naza linginela okuvo aꞌmine di nubuho igi milaniꞌ moni nene di vilizave ma di oti-ngidikevo engiꞌ monovomukisi idoꞌ viliza monovomukisi luhuvo gizo ngemekuvo di Zelusalemi numuda vilizave.
1CO 16:4 Idoꞌ nenikisi nene ha volodoꞌ o minelineꞌ nene nazasi makatoꞌ ha volosune.
1CO 16:5 Naza nene Makedonia misubouko voloniꞌ o neinako aꞌmida volodotiꞌ nene apase lengita alosuve.
1CO 16:6 Idoꞌ lengita aloniꞌ nene vo ninge-lengedo volosuve lo gelo lamuve. Lengikisi gamene haꞌna gidini makatoꞌ minelesune lo gelo nouvoniꞌ nene Guvelesi veꞌmo gilidoꞌ nolineꞌ nene ha minelesune. Neꞌmine lo giluvoniꞌ nenako lengita ogo hetelekuvo makatoꞌ nonivo hepeꞌ naba elaaꞌ ineꞌ gamene nesi ivileꞌ o vilihe losa nogiluve. Idoꞌ lengita aloniꞌ nene ogo minosa ebeꞌ mala volosa oloda nene lingine hize eleꞌ i-nidi aꞌmine voloda nene akaꞌne vili-nidilisave losa gele minosa alosuve.
1CO 16:8 Neꞌmine lo nogiluvoniꞌza Eheso ebeta mene Guvelesi veꞌmi gonoꞌveꞌmi gihile sotoꞌ ilineꞌ aka nene naba goloso ngoloꞌ lo-nedavo aꞌmine gono nene noduvo monokumuꞌ meheꞌine imi lovo i limaaꞌ ave nene vaiꞌ goloso nizave. Nemuꞌ nene aꞌmine gono naba nene do minelove lo idoꞌ lovo i limaaꞌ avete Izesuꞌ evenele di gopo i-ngidikelizave lo lengiꞌ nizada liteꞌ lo vamo Eheso ebeta mene ha nouvo Zuda veti holiseꞌ gamene ma gulive Pedekosi nene aliteleseive.
1CO 16:10 Idoꞌ Timoteoꞌ nene naza Guvelesi veꞌmi gonoꞌve gehaaꞌ nouvoniꞌ neꞌmino nogihinaze. Kolidi aleve lengiꞌ nizada novivo ma nene okoꞌnoloꞌ gelalize. Gehe gehe izi imi gamazi laminekovoꞌ li-imi minilo.
1CO 16:11 Idoꞌ ezemuꞌ nene haza ve ve li lingine ningi huli-damilo. Lengita navo ma hongu gamazivoꞌ li-imi mini neniꞌ nouvoda alingumuꞌ ve li akaꞌve vili-di imiselilo. Leze zuhosi mela eze alingumuꞌ nene gizebo o none.
1CO 16:12 Idoꞌ idise neve nene leze zuho Apoloꞌni mamuꞌ nene lolouve: Apoloꞌni nene leze zuho lingesi lengita vilive lo geli gelinga lo-duvoniꞌza aza nene lulo aꞌmida vamivo amuzo molo vamolove lo lingine nizada nene vamive. Vaminako alingeꞌ vilineꞌ aka lamineꞌ ma sotoꞌ o-davo ma nene lengita vilive.
1CO 16:13 Initeꞌ maliꞌmo lutine nene do goloso ogalize. Eheꞌ igi mini monoꞌ nemuꞌ gatine sita sataꞌ gilami amuzo mili gili eleꞌvoleꞌ igivoꞌ minilo. Idoꞌ eleꞌvoleꞌ igi vemohoꞌ liliꞌ igi oti pehe li minilo.
1CO 16:14 Initeꞌ igi mili ilizaniꞌ mukiꞌ nene haza igi mili ami nasahiliꞌ idoꞌ mangi idoꞌ lutine ngemaaꞌ monovotidotikovoꞌ nene igi mili minilo.
1CO 16:15 Neze zuhokizo lingine Setehanoꞌ zuho mamuꞌ gili nizave. Ingine nene aꞌmine lengiꞌ Akaia misubotinguꞌ nene eveneꞌ mukiꞌ minangutiꞌ engiꞌ nene gomuꞌ mili Izesuda vi giꞌmizi eze evenele liliꞌ igi Izesuꞌ zuho linge ma hize eleꞌ o-ngedaaꞌ gono dalone li aꞌmine gonomuꞌ luꞌine otavo di nizave.
1CO 16:16 Lingine aꞌmineꞌmine igi aꞌmine neꞌmine vesi idoꞌ engiꞌ makatoꞌ gono amuzo mili daaꞌ navesi gelekeleꞌ i-ngidi minilizave lo naza amuzo molo nolo-lingimuve.
1CO 16:17 Idoꞌ vekise Setehanoꞌ ve Hotunatoꞌ ve idoꞌ Akaikoꞌ ve nene neniꞌ nouvoda lingine mo amavo mulumo gele-lengedo nouvodoꞌ ingine nenita igi hetelikevo muluꞌneuꞌ lamineꞌ gelo nouve.
1CO 16:18 Neꞌmini igi hetelaniꞌ neꞌmo nene neniꞌ muluꞌneuꞌ lamineꞌ giluvo niteꞌ dikevo lamineꞌ goloso gelekuve. Idoꞌ aꞌmineꞌmine ogo lengiꞌ lutinesi nene di lamineꞌ i-lingidi nizave. Nemuꞌ neꞌmine ve nene di naba i-ngidi di lamineꞌ i-ngidilizave.
1CO 16:19 Idoꞌ Asia misubouko mene Izesuꞌ zuho mulise ato atoꞌ nete nene lengikumuꞌ gekeꞌ li-lingidi nizave. Idoꞌ Akuilaꞌ ve elenaho Pilisikilaꞌ ve engiꞌ numunguꞌ di geseꞌ igi monoꞌ gilaaꞌ ave ingine nene lengiꞌ longopoꞌni goloso nilavo noluve.
1CO 16:20 Idoꞌ Eheso ebeta mene leze zuho nizaniꞌ netesi longopoꞌni nilave. Idoꞌ monokuꞌ igi di nubo ilizaniꞌ nene Oꞌmosoꞌmi evenelelite ilizadoꞌ o minineꞌ monovoloꞌ igi ge meseꞌ aseka lo-nede ne meseꞌ aseka lo-gede li minilo.
1CO 16:21 Luhuvo mene gamazi noluvo ve maliꞌmo gize-nidineꞌza idoꞌ longopoꞌni lo luhuvo mene neniꞌ Pauloꞌ nene aꞌnedunuꞌ nogizuve.
1CO 16:22 Idoꞌ ve ma ingine hamo hamoꞌ Guvelesi ve luꞌine imamilizave nene Guvelesi veꞌmo usiꞌ ize-ngidivoo lo noluve. Idoꞌ Guvekasi ve ano lo noluve.
1CO 16:23 Idoꞌ Guvelesi ve Izesuꞌ nasahiliꞌve nene lengita mine molo minivoo lo noluve.
1CO 16:24 Lengikisi nenikisi nene Izesuꞌ Kilisitoꞌ evenele nounako nemuꞌ ve lo luꞌneꞌve nene lengiꞌ lengeme nouve losa longopoꞌni noluve. Luvoniꞌ neꞌmino miniliho. Moda aꞌnesiꞌ ve.
2CO 1:1 Izesuꞌ Kilisitoꞌ aposolo mineline lo Oꞌmosoꞌmo eiꞌ luloloꞌ neleꞌmize molave Pauloꞌ naza leze zuho Timoteokisi makaꞌ mino Oꞌmosoꞌmi evenele zuho Kolidi ebekuꞌ mulise milaaꞌ nave lengikisi idoꞌ Akaia misubo linge mukikuꞌ Oꞌmosoꞌmi evenele miniꞌmi monaniꞌ lengikisi nene luhuvo niteꞌ mene nogize-lingiduze. Ningilo.
2CO 1:2 Idoꞌ meteho Oꞌmoso idoꞌ Guvelesi ve Izesuꞌ Kilisitoꞌ engitatiꞌ nasahiliꞌ idoꞌ hongu lo lamino minaaꞌ monovo nene lengita mine do vo minivoo.
2CO 1:3 Guvetesi ve Izesuꞌ Kilisitoꞌ eiꞌ Oꞌmosoꞌve mino eiꞌ meleho minive nene opoꞌni lolone. Aza nene mulumote gelaaꞌ monovoliꞌmi meleho mino hize eleꞌ ogaꞌ monovo mukiꞌ do sotoꞌ o-ledaaꞌ neineꞌ Oꞌmoso nene neive.
2CO 1:4 Oꞌmoso naza hize eleꞌ okuvo ingine aꞌmineꞌmine igi eveneꞌ ma neꞌmine manaꞌmine geni gihilizaniꞌ nene hize eleꞌ i-ngidilizadoꞌ lisiheꞌ i minilizangumuꞌ ve lo aza nene genite vaikuꞌ hize eleꞌ o-ledaaꞌ neive.
2CO 1:5 Idoꞌ neꞌmine noluvoniꞌ nene nemuꞌ noluve. Laza nene Kilisitoꞌ mulumo gilidiꞌmine ogo mulumo vauve elo gelaaꞌ nouneꞌza aꞌminguꞌ nene Oꞌmosoꞌmo Kilisitoꞌnimuꞌ ve lo hize eleꞌ nesi vauve elo o-ledaaꞌ neive.
2CO 1:6 Laza mulumo gono noduneꞌ nene Oꞌmosoꞌmo lengiꞌ hize eleꞌ o-lengedo do lunguꞌ izelingumuꞌ ve losa nene nodune. Idoꞌ Oꞌmosoꞌmo leliꞌ hize eleꞌ o-lede neineꞌ neꞌmo nene lengiꞌ hize eleꞌ o-lengedelingumuꞌ ve lo hize eleꞌ o-lede neive. Laza mulumo gono nodunidiꞌmine igi linginesi nene mulumo gono di ha gihi di dizi minilizaniꞌ neꞌmo nene Oꞌmosoꞌmo aꞌmineꞌmine ogo hize eleꞌ o-lengedeleseive.
2CO 1:7 Idoꞌ leze mulumo gono dunidiꞌmine igi linginesi nene nidaze. Nemuꞌ nene Oꞌmosoꞌmo leliꞌ hize eleꞌ o-ledaaꞌ neidiꞌmine ogo lengikisi nene aꞌmineꞌmine ogo hize eleꞌ o-lengedeleseive lo gelosa lengikumuꞌ nene monokuꞌ eleꞌvoleꞌ igi minilisave lo gele noneꞌ nene mo gele eleꞌvoleꞌ o none.
2CO 1:8 Neze zuhokizo, Asia misubouꞌ geni initeliꞌmi lulouꞌ minuneꞌ nemuꞌ nene lo-lengemamuvo lingine gilami minilizaniꞌ nene edamoloseive lo gelosa mene nolo-lingimuve. Laza nene aꞌmine geni leliꞌ okodela sotoꞌ ineꞌ nene atoliꞌmine geni mo ngelo gehamolonidoꞌ o minineꞌ geni sotoꞌ o-ledavo neꞌmo leliꞌ nene gohi minevoꞌ alevoꞌ amolobe lo gate mukiꞌ goloso gelo golise gilune.
2CO 1:9 Ee, luteuꞌ neve nene mo helaatoꞌ leleꞌmize milikeniꞌ neive losa gele minune. Neꞌmine initeꞌ sotoꞌ o-lidineꞌ nene laza lelitoꞌ gele medelo mino minamo asi hilangutiꞌ do ote-ngedaaꞌ ive Oꞌmosoloꞌ nene lehete o mineloningumuꞌ nene sotoꞌ o-lidineꞌ ve.
2CO 1:10 Idoꞌ monovo goloso gehepeve ato atoꞌ i-lidilisa aniꞌ neꞌmo nene hilunidineꞌza Oꞌmoso neꞌmo nene mo do luꞌ izeꞌmo vo minineꞌ ve. Idoꞌ aza gohi do luꞌ izelidoꞌ o neive. Ee, linginesi nene lelikumuꞌ Oꞌmosola li hize eleꞌ i-lidi nizavo aza nene gohi do luꞌ izeleseive losa eitoꞌ gele muꞌmusiꞌ ogo none. Neꞌmine ogosa ezela eveneꞌ mukilite lelikumuꞌ lilizaniꞌ nene gelosa mangi o-ledo lukuvo lemelineꞌ nene eveneꞌ mukiꞌ ingine Oꞌmosola nene leliꞌ neꞌmine o-ledelineꞌ nemuꞌ nene opoꞌni lilisave.
2CO 1:12 Idoꞌ neꞌmine noluvoniꞌ nene nemuꞌ noluve: Leliꞌ luteuꞌ nene tiꞌ lo gele eleꞌvoleꞌ ogo none: Me misubouꞌ aleveti vovoꞌninguꞌ ogo molo uneꞌ nene me misubouꞌ aleve gilavo otohato monovo ve laaꞌ naniꞌ monovoloꞌ nene eꞌmetamo asi Oꞌmosoꞌmi nasahiliꞌve neꞌmo hize eleꞌ o-ledo neivo monovote nene do zovoꞌ zavaꞌ izo soza niteꞌ amo Oꞌmosoꞌmo gilivo lisiheꞌ ilineꞌ initekovoꞌ nene ogo molo minuneꞌ ve. Idoꞌ lengita nene aꞌmine monovoloꞌ nene eꞌmete gehepeve ogo ogo molo minuneꞌ ve. Idoꞌ luteuꞌ nene neꞌmine lo gele eleꞌvoleꞌ ogo minaaꞌ nouneꞌ nenako leliꞌ monovotemuꞌ nene lolize izaaꞌ noune.
2CO 1:13 Idoꞌ monovote nene zovoꞌ zavaꞌ izo soza saza initeꞌ osaꞌmune lo luvoniꞌ gamazi mene mo laminetokovoꞌ noluvoniꞌ nene luhuvo niteꞌ menelotiꞌ nene ningi gililisave. Naza gamazi gizaaꞌ nouvoniꞌ nene sunoꞌ gamazi gizamo asi sotoꞌ ogo minineꞌ gamazi lingine ha gati gili guni ilizadoꞌ o minineꞌ gamazivoꞌ nene gizaaꞌ nouve. Leliꞌ monovote lingela nene lingine mo gili guni i nizave. Idoꞌ monovote lingela lingine gili guni aniꞌ neꞌmino nene lelikumuꞌ gili guni igi osuꞌ lisa lelikumuꞌ tiꞌ li gililizaho lo gele minaaꞌ noune: Adoꞌ Guvetesi ve Izesuꞌ Kilisitoꞌ alineꞌ gamene nabala nene Paulole lelikumuꞌ ngolize izaaꞌ naaniꞌ neꞌmine ogo laza Paulonginemuꞌ lolize izelonidoꞌ o none li gililizaho lo gele minaaꞌ noune.
2CO 1:15 Idoꞌ lingine nenikumuꞌ nene mo lamineꞌ gililisave lo naza gele muꞌmusiꞌ o mino gomuꞌ nene naza gamene sitaꞌ lengita vokuvo lingine gamene sitaꞌ muludinguꞌ lamineꞌ gililizave lo gelo
2CO 1:16 Makedonia misubouꞌ volodoꞌ nene lengitasi voosa alodokisi nene gohi lengita ogo ninge-lengedekuvosa nene lingine Zudaia misubouꞌ voloniꞌ akaꞌne vili-nidisa nimiselilizave lo giluvoniꞌ ve.
2CO 1:17 Neꞌmine lo gelosa lengita amuvoniꞌ nene naza gamazi do senisi senisi ogo laaꞌ uve nouvodiꞌmo nehe. Naza oloniꞌ initekumuꞌ gaꞌne gelo do lisiheꞌ ogaꞌ nouvonguꞌ nene me misubouꞌ aleve vaiꞌ igaꞌ adiꞌmine ogo oo, neꞌmine ha olodoꞌ nouve nolo aꞌmidokisi oꞌve, mo amolosuve lo laaꞌ nouhe. Oꞌove, mo neꞌmine osaꞌmuve.
2CO 1:18 Oꞌmoso eikumuꞌ nene eveneꞌ mukiꞌ gele muꞌmusiꞌ olonidoꞌ lisiheꞌ o neineꞌ nenako nemuꞌ nene lingine lelikumuꞌ nene gili muꞌmusiꞌ ilizadoꞌ o neive. Laza lo-lengemaaꞌ nouneꞌ gamazi nene senisimi senisimi osaꞌmune. Oo laaꞌ nouninguꞌ oꞌove haleko minaaꞌ neineꞌ neꞌmino haleko neivosa nene ma losaꞌmune.
2CO 1:19 Naza laminetoꞌ noluve. Laza Siluvanolesi Timoteolesi lo sotoꞌ o-lingimunive Oꞌmosoꞌmi gipele Izesuꞌ Kilisitoꞌ eiꞌ nene oo linguꞌ oꞌove nene aꞌminguꞌ minamivo gamazi laaꞌ ive nene neive. Aza oo lineꞌ initeꞌ nene mo gihile izaakovoꞌ ogaꞌ neive.
2CO 1:20 Ee, aza nene Oꞌmosoꞌmo salani gamazi lo hukaaꞌ neidoꞌ nene oo lo do gihilevoꞌ izaaꞌ ive nene neive. Nemuꞌ nene aꞌmine Oꞌmosoꞌmi gamazi gelosa Oꞌmoso opoꞌni nolo lamineꞌ eleꞌvoleꞌ gamazi ve laaꞌ nouneꞌ nene eiꞌ Izesuꞌ Kilisitoꞌnimuꞌ ve losa nene lamineꞌ ve laaꞌ noune.
2CO 1:21 Idoꞌ Kilisitoda giꞌmize giliꞌ lo mineloningumuꞌ lezesi lengikisi hize eleꞌ ogaꞌ ive nene Oꞌmoso eiꞌ nene neive. Aza nene eiꞌ gonoloꞌ leleꞌmize molaniꞌ ve.
2CO 1:22 Idoꞌ leleꞌmize nomolo eiꞌ ve lo noso molo-ledo salani molo-lidineꞌ initeꞌ mukiꞌ nene damolosune li gilikelizave lo aꞌmingutiꞌ ma ganaꞌ dalonidoꞌ o minineꞌ initeꞌ eiꞌ Sikalahuꞌve nene luteuꞌ lehize-ledavo neive.
2CO 1:23 Naza Kolidi ebetida vamuvoniꞌ nene naza ma voloniꞌ nene geni gono gehe-lengedekuvo okodidoꞌ gilikelizave losa nene do lunguꞌ izosa vamuve. Nene mo laminetoꞌ noluve. Soza nololoniꞌ nene luꞌneuꞌ ninge osuꞌ lo neive Oꞌmoso neꞌmo nene lo sotoꞌ ilive losa ezela nene noluve.
2CO 1:24 Lingine gamazi gihile gili eleꞌvoleꞌ igi monokuꞌ mini giliꞌ li nizaniꞌ nenako nemuꞌ gizebo amuzo molo o-lengedo mino neꞌmine manaꞌminemuꞌ gili eleꞌvoleꞌ ilizave lolosa gelamuneꞌza haza lingine muludinguꞌ lamineꞌ gili minilizangumuꞌ lengeleꞌmize lamineꞌ olosa nene lengikisi makaꞌ gono nodune.
2CO 2:1 Ee, naza nene mo gaꞌne gele nge lo mino lengita gohi ma voloniꞌ nene geni initeliꞌmi lulouꞌ gohi lengeleꞌmize molalove lo naꞌniseꞌne oꞌove losa nene nizada vamuve.
2CO 2:2 Idoꞌ neniꞌ nolize izo minelodoꞌ neleꞌmizi milalizave nene lengiꞌ nizaniꞌ nenako naza nene lengiꞌ nizada vo hetelo geni gono ma gehe-lingiduvodiniko zamotelite nene naza nolize izo minelodoꞌ neleꞌmize miladine.
2CO 2:3 Ma minamadinako nemuꞌ nene naza nolize izo minelodoꞌ neleꞌmizi milalizave lengikumuꞌ nene mulumo geni gehalove lo gelo idoꞌ naza nolize ma izeloniꞌ initekumuꞌ nene linginesi aꞌminemuꞌ longolize izilizave losa lengikumuꞌ nene gele muꞌmusiꞌ o mino aꞌmine luhuvo gize-lingiduvoniꞌ gamazi nene gizuvoniꞌ ve.
2CO 2:4 Idoꞌ aꞌmine amuzo malehe gamazi lo luhuvo niteꞌ gize-lingiduvoniꞌ nene luꞌne gaꞌneuꞌ nene lengikumuꞌ geni nibilivo mino muluꞌne hukavo veꞌne novozo naba doꞌmozeꞌ mozeꞌ neivo nogizuvoniꞌ nene lingine lutinguꞌ mulumo gililizave losa nevoba asi neniꞌ luꞌne naba goloso lengiꞌ lengeme nouvoniꞌ nene ningi gililizangumuꞌ ve losa nene gizuve.
2CO 2:5 Aꞌmine goloso niteꞌ do geni do sotoꞌ ive neꞌmo nene nenikovoꞌ geni ma gehe-nedamive. Asi lengiꞌ mukita nesi nene geni lingela gehe-lengedave. Idoꞌ geni lingela gehe-lengedave noluvoniꞌ nene do geni ogo lolosa gelamuve.
2CO 2:6 Ne neiha aꞌmine goloso niteꞌ dosa lihime dave nene eveneꞌ mukilite lihime imi lihimeꞌve apasi-daniꞌ nene modave.
2CO 2:7 Aꞌmine ve nene gopo gala gelo geni naba geho minelineꞌ neꞌmo do ongo-dalize. Aꞌmine lihimeꞌve gohi di minami huli-disa eze lulouꞌ lamineꞌ gelelineꞌ initeꞌ i-di eleꞌmize lamineꞌ ilo.
2CO 2:8 Ee, geni neꞌmo nene do ongo-dalize. Lengita mulumo gani noluze. Eikumuꞌ goloso gilami lutine ha imi nizaniꞌ nene ningo gelelize. Elebizilo.
2CO 2:9 Idoꞌ aꞌmine luhuvo niteꞌ gize-lingiduvoniꞌ nene naza neꞌmine manaꞌmine initekumuꞌ luvoniꞌ mamuꞌ nene lingine gili daakovoꞌ i nizahe lo aꞌminemuꞌ monovotine do ningelove losa nene gizuve.
2CO 2:10 Lingine eveneꞌ maliꞌmi lihimeꞌve huli-daniꞌ nolineꞌ nene nazasi hulo-delodoꞌ o nouve. Ee, aꞌmine ve nene neniꞌ lihime molo-nede nolineꞌ nene aꞌmine lihime nene mo hulo-dekuvoniꞌ ma neive. Idoꞌ lihimeꞌve huluvoniꞌ nene Kilisitoꞌ veleloꞌ lengikumuꞌ ve losa huluve.
2CO 2:11 Nene nanitekumuꞌ ve. Satani aza leleꞌmize gopo olosa gelaaꞌ neineꞌ nene mo gele nounako nemuꞌ nene gote izo livileꞌ ogalive losa aꞌmine veꞌmi lihimeꞌve nene hulo-duvoniꞌ ve.
2CO 2:12 Naza Kilisitoꞌ gamazi lamineꞌ nene lo-ngemelesa Toloasi ebeta vo noheteluvo Guvelesi veꞌmi gono do-delodoꞌ aka nene ma sotoꞌ o-nidineꞌza
2CO 2:13 neze zuho Titoꞌ nene aꞌmida minamivo ma voteneꞌ o-damo ezemuꞌ nene gaꞌne mukiꞌ gelo minuvoniꞌ nenako neꞌmo nene mine guno amoloniꞌ ogavo aꞌmidotiꞌ nene mo minilo lo hulo-ngedo Makedonia misubouko ezemuꞌ viseꞌ olosa vuvoniꞌ ve.
2CO 2:14 Neꞌmine uvoniꞌza Oꞌmosoꞌmo gamene gamene hize eleꞌ o-ledaaꞌ neingumuꞌ nene opoꞌni noluve. Aza nene Kilisitoꞌ biluvaꞌve ngivileꞌ ogo osuꞌ lingumuꞌ lolize izo unuvo huhu lo minineꞌ guvele nene numudoꞌ namadoꞌ lo sotoꞌ olonidoꞌ nene leleꞌmize molavo monaaꞌ noune.
2CO 2:15 Ee, Kilisitoꞌ gamazi lo-ngemeꞌmo monaaꞌ nounive laza unuvo neꞌmine noune. Adoꞌ lovouꞌ gomuꞌ molaaꞌ iveꞌmo biluvaꞌve ngivileꞌ ogo aꞌminemuꞌ olize izo vaaꞌ neida nene unuvo huhu lo minaaꞌ ineꞌ sokile nene gizikevo hutileꞌ ogavo eze zuho gilavo laniteꞌ ogavosa idoꞌ biluvaꞌve linge aꞌminguꞌ ngeleꞌmizi monave nene gilisa leliꞌ libililisa nave li gilavo aꞌmine unuvo nene goloso loloꞌ ogaꞌ neineꞌ neꞌmine nene none. Oꞌmosoꞌmo gelavo laza Kilisitodatiꞌ unuvo lamineꞌ ezela dizineꞌ neꞌmine nene none. Aꞌmine unuvo nene lukuvo nalizavetingukisi idoꞌ vi tolovo ilizavetingukisi nene hutileꞌ ogaꞌ neive.
2CO 2:16 Idoꞌ aꞌmine unuvo nene vi tolovo ilizavetida ogosa hililizaniꞌ monovoꞌine do sotoꞌ o-ngedosa ngebele helaaꞌ unuvo gehepeve loloꞌ ogaꞌ neive. Idoꞌ lukuvo nalizavetida ogosa minevoꞌ minevoꞌ ilizaniꞌ monovoꞌine do sotoꞌ o-ngedosa do veꞌine gize-ngedaaꞌ ineꞌ unuvo loloꞌ ogaꞌ neive. Neꞌmine ogaꞌ neinako aꞌmine meuko noluvoniꞌ gonoloꞌ nene zamote dalizadoꞌ lisiheꞌ i nizave.
2CO 2:17 Eveneꞌ hamolitesi lisiheꞌ mo amuneꞌza laza nene eveneꞌ linge mukiꞌ goꞌine izi moni polopeti liliꞌ ilisa Oꞌmosoꞌmi gamazi di monaaꞌ nadiꞌmine amo Oꞌmosoꞌmo do ote-ledavo asiꞌve Oꞌmoso ninge neivosa nene Kilisitoda mine molo mino do voziuꞌ vomiuꞌ amo gono lisiheꞌ lamineꞌ dosa nene Oꞌmosoꞌmi gamazi laaꞌ nounako aꞌmine gono nene leliꞌ ne ha dalonidoꞌ o neive.
2CO 3:1 Neꞌmine noluvoniꞌ nene leliꞌ monovote nene lamineꞌ ve losa aꞌmine gamazi ma nene gohi apiꞌ ogo nolo-limive lisa nigilahe. Idoꞌ monoꞌ laaꞌ ave linge ma nete eveneꞌ malite engiꞌ monovoꞌinemuꞌ li sotoꞌ igi gizaniꞌ gamazi nene ma disa aꞌmine vilizada minaaꞌ naniꞌ aleve nene ngimaaꞌ nave. Lingine gilavo leliꞌ nene aꞌmineꞌmine ogo eveneꞌ malite leliꞌ monovotemuꞌ li sotoꞌ igi gizaniꞌ gamazi ma dosa lengemelonidoꞌ o neihe. Idoꞌ aꞌneꞌmine luhuvo nene eveneꞌ ma ngemeloningumuꞌ nene lingine ma gizi limilizadoꞌ o neihe.
2CO 3:2 Oꞌove. Leliꞌ monovote lo sotoꞌ ilineꞌ luhuvo niteꞌ neꞌmine nene mo lengiꞌ nene nizave. Idoꞌ aꞌmine leliꞌ monovote lo sotoꞌ ilineꞌ luhuvo niteꞌ gizaheꞌ nene leliꞌ luteuꞌ do nonivo eveneꞌ mukiꞌ nete nene aꞌminemuꞌ ningisa gilaaꞌ nave.
2CO 3:3 Leliꞌ monoꞌ gono noduneꞌ neꞌmi gihileꞌve lengiꞌ nene Kilisitodatiꞌ luhuvo niteꞌ neꞌminisa nizaniꞌ nene mo sotoꞌ gehepeve o neive. Aꞌmine luhuvo niteꞌ nene ingi noso neꞌminedunuꞌ gizaniꞌ nomive. Idoꞌ geheniloꞌ luhuvo mili gizaniꞌ neꞌminesi nene nomive. Asi minevoꞌ minevoꞌ Oꞌmoso neꞌmi Sikalahuꞌ nedunuꞌ nene eveneꞌ lengiꞌ lutinguꞌ nene luhuvo neꞌminosa gize neive.
2CO 3:4 Neꞌmine noluneꞌ nene Kilisitoꞌ gono daniꞌ neꞌmo nene Oꞌmosoloꞌ gele muꞌmusiꞌ o noneꞌ nenako neꞌmine gamazi lamineꞌ nene laaꞌ noune.
2CO 3:5 Idoꞌ neꞌmine laaꞌ nouneꞌ nene gihile neꞌmine do sotoꞌ olonidoꞌ nene laza mo lisiheꞌ o none losa nevoba neꞌmine amuzo nene lelita ma nomive. Asi Oꞌmoso eiꞌ nene amuzo lemo aꞌmine gono dalonidoꞌ nene do lisiheꞌ o-ledaaꞌ neive.
2CO 3:6 Aza nene lo huko-lidineꞌ gamazi gosohoꞌ neꞌmi gonouꞌ ve minelonidoꞌ nene do lisiheꞌ o-lede neive. Aꞌmine gono nene gizikaniꞌ neineꞌ louꞌ gamazi maloꞌ nevoba asi Oꞌmosoꞌmi Sikalahutoꞌ nene neive. Nene nanitekumuꞌ ve. Aꞌmine gizikaniꞌ neineꞌ louꞌ gamaziloꞌ nene ngelo eꞌmetamuneꞌ neꞌmo nene lute helavo aꞌmine louliꞌmo lebele helaaꞌ neineꞌ gilineꞌza Oꞌmosoꞌmi Sikalahuꞌ neꞌmo nene minevoꞌ minevoꞌ lemeni dameni lemo do upuhoꞌ o-ledaaꞌ neive.
2CO 3:7 Ee, idoꞌ aꞌmine gehedoꞌ gizikaniꞌ neineꞌ louꞌ gamaziꞌmi gonolotiꞌ nene helaaꞌ nouneꞌza aꞌmine louꞌ ganaꞌ sotoꞌ ineꞌ nene mo vode gade vilineꞌ initeꞌ amuzoꞌvesi labanaꞌvesi nene sotoꞌ ineꞌ ma neive. Idoꞌ aꞌmine amuzo labanaꞌve nene vo Moseꞌ golo velelotiꞌ nene silingengeꞌni hulo minineꞌ nene gopo okaꞌ okaꞌ oꞌmo vo minineꞌza aꞌminesi nene Isilaeleꞌ aleve ningavo veꞌine lenge lenge lavo vonuꞌ bililizadoꞌ lisiheꞌ amaniꞌ ve.
2CO 3:8 Aꞌneꞌmine initeꞌ nene neꞌmino minineꞌ nenako Oꞌmosoꞌmi Sikalahuliꞌmo do sotoꞌ o neineꞌ monoꞌ gono neꞌmo nene aꞌmine litehe monoꞌ nene ivileꞌ nabaloꞌ goloso ivosa leliꞌ vode gade goloso vilineꞌ monovoꞌvesi sotoꞌ oloseive.
2CO 3:9 Ee, gonitoꞌ ngeleꞌmize molaaꞌ ineꞌ monoꞌ litehe neꞌmo nene initeꞌ naba mino vode gade vilineꞌ monovoꞌvesi minineꞌ nenako Oꞌmosoꞌmo eveneꞌ lisiheꞌ ve lo-ledelidoꞌ leleꞌmize molaaꞌ neineꞌ monoꞌ gono gosohoꞌ neꞌmo nene ivileꞌ goloso ivosa initeꞌ naba goloso mino vode gade atoliꞌmine goloso ogosa vilineꞌ monovoꞌvesi noloseive.
2CO 3:10 Ee, monoꞌ gosohoꞌ neꞌmi monovoꞌve vode gade vaaꞌ neineꞌ neꞌmo nene ivileꞌ ogo dizo minidiꞌmo nene monoꞌ litehe labanaꞌvesi mino voꞌine gaꞌine vaaꞌ neineꞌ monovoꞌve ma nene mo vo halekave.
2CO 3:11 Ee, aꞌmine monoꞌ liteheliꞌmi labanaꞌve nene vo gopo okaꞌ okaꞌ oꞌmo vo osuꞌ lineꞌza aꞌmine nesi nene voꞌine gaꞌine vaaꞌ neineꞌ initeꞌ minineꞌ nenako osuꞌ lamo minevoꞌ minevoꞌ monovoꞌve laminekisi minineꞌ monoꞌ gosohoꞌ neꞌmo nene ivileꞌ ogo vode gade goloso vilineꞌ initeꞌ mineleseive.
2CO 3:12 Idoꞌ aꞌmine noluvoniꞌ monovomuꞌ mene mo gele muꞌmusiꞌ o noneꞌ nenako nemuꞌ nene laza gamazi laaꞌ nouneꞌ nene do hito gepeꞌ gamazi neꞌmingutikisi lamo asi mo gamazi lamineꞌ sotokovoꞌ lovoꞌ kiselevoꞌ ogo laaꞌ noune.
2CO 3:13 Laza nene Moseꞌ neꞌmine nene minamune. Aza nene eiꞌ velelotiꞌ silingengeꞌni hulo minineꞌ vo gopo okaꞌ okaꞌ oꞌmo vo osuꞌ nolivo Isilaeleꞌ aleve nene aꞌmidoꞌ gisili hizi ningi minikelizave losa veleloꞌ nene lavolavo do hitineꞌ ma neive.
2CO 3:14 Ne neiha Moseꞌ golo veleloꞌ lavolavo do hitineꞌ neꞌmino Isilaeleꞌ aleve nene Oꞌmosoꞌmo lo huko-ngidineꞌ monoꞌ litehe gatanguꞌ gatanguꞌ monovoꞌve gilisaꞌmaniꞌ nenako nemuꞌ nene idisesi engiꞌ luꞌine gaꞌnidoꞌ nene ha hite neineꞌ gele neivo luꞌine gaꞌnine nene ha ngi lo neive. Aꞌmine lute gateloꞌ hite minelineꞌ initeꞌ nene mo Kilisitoda vo giꞌmizekunivosavoꞌ nene do hulo-ledeleseive.
2CO 3:15 Ee, idise mene gamenelokisi nene Moseꞌ gizineꞌ monoꞌ gamazi eveneꞌ gati ngimaaꞌ naaniꞌ gameneloꞌ gameneloꞌ nene Isilaeleꞌ aleveti luꞌine gaꞌine nene initeliꞌmo ma hite neineꞌ gele neivo minaaꞌ naniꞌza
2CO 3:16 monoꞌ godolouꞌ Moseꞌnimuꞌ tiꞌ li gizi nizaniꞌ ma nene engitokisi ha gihile izelidoꞌ o neive: Idoꞌ Guvelesi vela mine velepeꞌ izineꞌ gameneloꞌ gameneloꞌ nene veleloꞌ hitineꞌ initeꞌ nene do hulaaꞌ ineꞌ ve. Adoꞌ Guvelesi vela mini velepeꞌ izilizaniꞌ gamenela nene aꞌmine luꞌineꞌmi veleloꞌ hitineꞌ nene do hulo-ngedeleseive.
2CO 3:17 Idoꞌ Guvelesi ve ve noluvoniꞌ nene Sikalahuꞌvemuꞌ noluve. Idoꞌ Guvelesi veꞌmi Sikalahuꞌ lelita minive nene initeꞌ maliꞌmosi nalava ize-ledamivo apase-ledavo haza minaaꞌ noune.
2CO 3:18 Ee, laza mukitoꞌ Moseꞌ initeꞌ veleloꞌ hitosa minaaꞌ ineꞌ neꞌmino minamo asi mukitoꞌ nene vete haza sotoꞌ o neivo mino gapogapoliꞌmo silingengeꞌni gohi do tineꞌ molo hulo mala ogaꞌ neineꞌ neꞌmino Guvelesi veꞌmi monovoꞌve vode vaaꞌ neineꞌ monovoꞌve nene lelitatiꞌ hulo eveneꞌ mala ogaꞌ noune. Aꞌmine monovoꞌve lamineꞌ goloso lelita minineꞌ nene vo naba oꞌmo voovoꞌ neivo laza nene eiꞌ Guvelesi veꞌmi emeni dameniloꞌ gehepeve lisiheꞌ ogosa medelo minaaꞌ noune. Idoꞌ neꞌmine nouneꞌ nene Oꞌmosoꞌmi Sikalahuliꞌmo nene ogaꞌ noune.
2CO 4:1 Neꞌmino neineꞌ nenako Oꞌmosoꞌmo asiꞌve lulo lamineꞌ lemosa aꞌmine monoꞌ gono lamineꞌ mene lemavo do do vo minaaꞌ nouninguꞌ nene goseleꞌ ogo muludeuꞌ goloso ogavo ma hulosaꞌmune.
2CO 4:2 Laza nene monovo goloso sunoꞌ daaꞌ naaniꞌ neꞌminemuꞌ nene mo amolosune lo mo mehede emekune. Laza eveneꞌ ma nene goꞌine izo Oꞌmosoꞌmi gamazi lamineliꞌmo lidoꞌ lamo do atoꞌ ogo lo-ngemesaꞌmune. Asi eveneꞌ mukiꞌ leliꞌ monovote nene izeꞌ mili ningi hehe lilizangumuꞌ ve lo Oꞌmosoꞌmi veleloꞌ mino gamazi gihile laminekovoꞌ nene lo sotoꞌ ogo ngelebizaaꞌ noune.
2CO 4:3 Idoꞌ aꞌmine Oꞌmosoꞌmi gamazi lamineꞌ lo sotoꞌ noneꞌ nene ma hito nolineꞌ nene mo vi tolovo ilizadoꞌ mini mili nizavelavoꞌ nene hitosa mineleseive.
2CO 4:4 Aꞌmine me misubouꞌ aleve vi tolovo ilizave nene Oꞌmoso gihilelotiꞌ do eita medele-ngedavo gelekeleꞌ i-di nizave Satani neꞌmo nene Oꞌmoso gele vive gehepeve Kilisitoꞌnimuꞌ guveleꞌvesi minineꞌ gamazi lamineꞌ neꞌmo nene hize labanaꞌ ele-ngedavo labanaꞌve ningikelizave losa aꞌmine Oꞌmosomuꞌ gili hulaaꞌ aveti luꞌineꞌmi vele nene do like-ngidineꞌ ve.
2CO 4:5 Idoꞌ Izesuꞌnimuꞌ gamazi ve luvoniꞌ nene nemuꞌ luve. Laza leliꞌ nene leꞌmetilizave losa neꞌmine gamazi nene lo-lengemaaꞌ nounivoba asi Izesuꞌ Kilisitoꞌ nene Guvelesi ve ne neize. Eiꞌ nene eꞌmetilo losa nene lo-lengemaaꞌ noune. Idoꞌ laꞌlisetemuꞌ nene laza Izesuꞌnimuꞌ gelosa lengitoꞌ gelekeleꞌ izipe neꞌmine nene none losa lo-lengemaaꞌ noune.
2CO 4:6 Neꞌmine noluvoniꞌ nene nemuꞌ noluve. Oꞌmoso gozopoꞌ akaꞌmila litiꞌmuso izo mininguꞌ labanaꞌ sotoꞌ ilive live neꞌmo nene Oꞌmoso neniꞌ nemeni dameni nene Izesuꞌ Kilisitoꞌ velelotiꞌ sotoꞌ neivosa aꞌmidotiꞌ nene ningi gililizangumuꞌ ve losa luteuꞌ nene hize labanaꞌ ele-lidineꞌ ma neive.
2CO 4:7 Ne neiha aꞌmine gamazi lamineꞌ tamineꞌ luteuꞌ do nonive laza nene haza niteꞌ heneni milaaꞌ aniꞌ somo misubodunuꞌ liliꞌ aniꞌ neꞌmine nene none. Idoꞌ somo neꞌmino haza niteꞌ noneꞌ nene lelitoꞌ minineꞌ amuzo atoliꞌmine goloso neineꞌ neve nene lelitatiꞌ minamineꞌza asi Oꞌmosolatiꞌ neineꞌ nene sotoꞌ o minelive losa nene somo neꞌmino haza niteꞌ nene none.
2CO 4:8 Laza nene geni ato atoꞌ gehaaꞌ nouneꞌza neꞌmo nene aka vamaatoꞌ ma leleꞌmize molosaꞌmive. Idoꞌ geni initeꞌ lelita minaaꞌ neingumuꞌ nene gate mukiꞌ gelaaꞌ nouneꞌza aꞌmine neꞌmo lute gate do gopo gehepeve ogo ma hize tile-ledesaꞌmive.
2CO 4:9 Idoꞌ libililisasi nene viseꞌ i-lidaaꞌ naniꞌza Oꞌmoso neꞌmo ma hulo-ledesaꞌmive. Idoꞌ libilikevosasi nene lemo ongaaꞌ nouba goloso gehepeve nene ma dosaꞌmune.
2CO 4:10 Neve nene laza mo Izesuꞌ helaatoꞌ mine molo mino monaaꞌ ineꞌ maꞌminosa nene nomonune. Neꞌmine ogaꞌ nouneꞌ nene lelitotiꞌ nene Izesuꞌ minevoꞌ alevoꞌve neineꞌ ma nene eveneꞌ mukiꞌ ningilizave losa nene neꞌmine ogaꞌ noune.
2CO 4:11 Ee, laza nene vetesi ha nouneꞌza Izesuꞌni do minuningumuꞌ nene gamene gamene helaaꞌ akalokovoꞌ leleꞌmizi milaaꞌ navo minaaꞌ noune. Neꞌmine ogaꞌ nouneꞌ nene aꞌmine helaaꞌ neineꞌ okodelotiꞌ mene Izesuꞌ minevoꞌ alevoꞌve neineꞌ nene sotoꞌ ogavo ningilizangumuꞌ ve losa nene neꞌmine ogaꞌ noune.
2CO 4:12 Neꞌmino neinako helaaꞌ neꞌmo nene lelita gono nodaniꞌza neꞌmine idiꞌmo minevoꞌ minevoꞌ ogaꞌ monovo neꞌmo nene lengikuꞌ gono nodave.
2CO 4:13 Idoꞌ ve maliꞌmo gamazi ma lineꞌ monoꞌ godolouꞌ minineꞌ neꞌmo nene lelitokisi vo do neive. Aꞌmine gamazi nene tiꞌ lo lo neive: Naza gele eleꞌvoleꞌ ogo nouvoniꞌ nenako nemuꞌ nene naza lo sotoꞌ nouve. Lazasi nene aꞌmineꞌmine ogo Izesuꞌnimuꞌ gele eleꞌvoleꞌ o minosa nene lo sotoꞌ ogaꞌ noune.
2CO 4:14 Neꞌmine ogaꞌ nouneꞌ nene aꞌmine Guvelesi ve Izesuꞌni hilingutiꞌ do ote-dive neꞌmo nene Izesulesi makaꞌ do ote-ledo lengikisi nene do eiꞌ veleloꞌ o-ledeleseive lo gele minosa nene neꞌmine ogaꞌ noune.
2CO 4:15 Idoꞌ laza neꞌmino mulumo alumo geni initeꞌ geho noneꞌ nene ha lengiꞌ lamineꞌ ilizangumuꞌ ve losa nene neꞌmine ogo none. Idoꞌ neꞌmine ogo noneꞌ nene Oꞌmosoꞌmi nasahiliꞌ neꞌmo eveneꞌ mukita nene vokaꞌ vokaꞌ ogovoꞌ neivosa aꞌminete nene Oꞌmoso opoꞌni likaꞌ likaꞌ iꞌmi viivoꞌ nizavo eze guvele nene vo naba goloso oꞌmo vo minelive losa nene neꞌmine ogaꞌ noune.
2CO 4:16 Neꞌmine o neineꞌ nenako nemuꞌ nene laza gono daakumuꞌ goseleꞌ osaꞌmune. Ee, okode losuvola amuzote neve nene labuluvo olosa apiꞌ oꞌmo novivosi gamene gamene lute nene gosohoꞌ okaꞌ okaꞌ oꞌmo novive.
2CO 4:17 Naza neꞌmine noluvoniꞌ nene laza neꞌmine manaꞌmine geni mukiꞌ leliꞌ geheloneꞌ o neineꞌ nene mo ngomo ha niteꞌ mino gamene liꞌnibemukovoꞌ ne neive. Idoꞌ aꞌmine neꞌmo nene initeꞌ naba aꞌmine geni mukiꞌ nene ivileꞌ ogo minineꞌ adoꞌ minevoꞌ alevoꞌ lamineꞌ goloso osuꞌ lamilineꞌ nene do sotoꞌ o-ledeꞌmo novive.
2CO 4:18 Ee, laza ninge noneꞌ initeꞌ mukiꞌ nene gamene liꞌnibemukovoꞌ minosa nene osuꞌ laaꞌ neineꞌza ningamuneꞌ Okulumokuꞌ initeꞌ nene minevoꞌ minevoꞌ initeꞌ nizave. Nemuꞌ nene ninge noneꞌ initetoꞌ nene lute gate molamo asi ningamuneꞌ initetoꞌ nene lute gate molaaꞌ noune.
2CO 5:1 Idoꞌ neꞌmine ogo minaaꞌ nouneꞌ nene nemuꞌ ve: Seli numuno nguꞌvosi milaaꞌ naaniꞌ neꞌmino me misubouꞌ minineꞌ numude leliꞌ okode ma osuꞌ lilineꞌ nene numude gohi ma neineꞌ nene evenelite aꞌinedunuꞌ gizamaniꞌ asi Okulumokuꞌ minevoꞌ minevoꞌ ilineꞌ numuno Oꞌmosoꞌmo salani molo-lede neineꞌ nene ma neive.
2CO 5:2 Ee, laza misubouꞌ okodesi noninguꞌ mene Okulumoꞌ numude nene do tiꞌ ogo saketi neꞌmino do ngolaloinako lo agae, agae lo leꞌ izo minaaꞌ noune.
2CO 5:3 Neꞌmine ogaꞌ nouneꞌ nene aꞌmine Okulumoꞌ numude nene saketi neꞌmino do ngolosa minesoꞌ nene haza bakaꞌ neꞌmine okodeloꞌ initeꞌ nomivo minamoloningumuꞌ ve losa nene neꞌmine ogaꞌ noune.
2CO 5:4 Ee, laza nene agae, agae lo leꞌ izo minaaꞌ nouneꞌ nene idise do noneꞌ okode mene do hulo haza minelone losa nevoba asi aꞌmine seli numunguꞌ mene ha geni libilivo mino minevoꞌ minevoꞌ lemeni dameni neꞌmo nene aꞌmine hele vaaꞌ okode neꞌmi ebeꞌ dalingumuꞌ nene Okulumoꞌ numude saketi neꞌmino ngolaloinako lo agae, agae lo leꞌ izo minaaꞌ noune.
2CO 5:5 Idoꞌ asiꞌve Oꞌmosoꞌmo nene minevoꞌ minevoꞌ lemeni dameni neꞌmo hele vaaꞌ okodeꞌmi ebeꞌ nene dalingumuꞌ ve losa leliꞌ nene do vaꞌvaꞌ o-ledosa aꞌmine salani molo-lidineꞌ initeꞌ mukiꞌ nene damolonivoba mo dalosune li ningi gililizangumuꞌ ve lo aꞌmingutiꞌ ganaꞌ dalonidoꞌ o neineꞌ initeꞌ eiꞌ Sikalahuꞌve nene mo lehize-lede neive.
2CO 5:6 Nemuꞌ nene laza gamene gamene vode vosaꞌmivo lute amuzo molo minivo tiꞌ lo gele minaaꞌ noune: Laza nene okode meesi ha mino Okulumoꞌ numudela minosa Guvelesi vesi makaꞌ minelonidotiꞌ nene hotoꞌ haza none.
2CO 5:7 Idoꞌ idise Guvelesi vesi makaꞌ minamune luvoniꞌ nene laza idise minevo dovoꞌ ogo noninguꞌ mene eze ninge minosa minevo dovoꞌ ogo nonivoba asi vetedunuꞌ eze ningamosa nene ha gele eleꞌvoleꞌ ogovoꞌ nene none.
2CO 5:8 Ee, laza nene vode vosaꞌmivo lute amuzo molo minivo mino laza nene okode mene hulo Okulumoꞌ numudela nene vo Guvelesi vesi makaꞌ minelobo lo gelo minaaꞌ noune.
2CO 5:9 Nemuꞌ nene me misubouꞌ okodesi ha minelobe Okulumoꞌ numudela vo minelobe neukisi nene Guvelesi veꞌmo lelikumuꞌ gelelineꞌ lamineꞌ ilive losa eiꞌ gilidoꞌ ogo molo olosa nene lute molo mino aꞌminemukovoꞌ nene gono amuzo molo daaꞌ noune.
2CO 5:10 Idoꞌ Guvelesi veꞌmo lelikumuꞌ gelelineꞌ lamineꞌ ilingumuꞌ ogo molo minaaꞌ nouneꞌ nene laza mukitoꞌ Kilisitoꞌ zasi gono dalidoꞌ nene laza hamo hamoꞌ okode losuvosi minuneꞌ gameneuꞌ ogo molo uneꞌ initetoꞌ initeꞌ lamineꞌ uneꞌ nolihe initeꞌ goloso uneꞌ nolihe neꞌmi meniꞌve lemelingumuꞌ nene eiꞌ veleloꞌ vo sotoꞌ oloneꞌ o neineꞌ nenako nemuꞌ nene neꞌmino ogo molo minaaꞌ noune.
2CO 5:11 Nemuꞌ nene laza Guvelesi vemuꞌ golise gelelonidoꞌ o neineꞌ nemuꞌ nene gele mino eveneꞌ ingine leliꞌ gamazite gililizangumuꞌ nene gaꞌine hizaaꞌ noune. Leliꞌ monovote nene mo Oꞌmosoꞌmo gele neive. Idoꞌ monovotemuꞌ nene linginesi izeꞌ mili gilisa aꞌminemuꞌ gili guni i-lidilizaho lo gelaaꞌ nouve.
2CO 5:12 Neꞌmine nolo-lingimuneꞌ nene leliꞌ monovote lamineꞌ ve losa aꞌminemuꞌ gohi lo-lengemelesa lamune. Asi leliꞌ monovotemuꞌ gilikevo lamineꞌ ogavo longolize izilizaniꞌ aka nene do sotoꞌ o-lengedekunivo eveneꞌ ma luꞌninguꞌ minineꞌ monovomuꞌ nene gili huli okoꞌine losuvolokovoꞌ lamineꞌ i minilizangumuꞌ nene di naba igi laaꞌ ave nene lingine laza lo-lengemeloneꞌ gamazi nene li-ngimikevo engiꞌ gamaziꞌine doꞌmozelingumuꞌ nene nolo-lingimune.
2CO 5:13 Ve malite lelikumuꞌ nene negi hizikeve li laaꞌ nahe. Neꞌmine nooloneꞌ nene mo Oꞌmosomuꞌ negi hize nolosune. Ne neiha negi hizamo lute gate laminekisi noloneꞌ nene lengikumuꞌ ve losa nene lute gate laminekisi mino ogo molo ogaꞌ noune.
2CO 5:14 Idoꞌ neꞌmine ogaꞌ nouneꞌ nene Kilisitoꞌ lulo leme neineꞌ monovoꞌve neꞌmo nene do ote-ledavosa nene ogaꞌ noune. Ee, laza tiꞌ lo izeꞌ molo gele noneꞌ nenako nemuꞌ nene neꞌmine ogaꞌ noune: Ve hamoꞌ nene eveneꞌ mukitoꞌ medelo hilineꞌ nenako nemuꞌ nene eveneꞌ mukiꞌ nene mo hilaniꞌ gele neive.
2CO 5:15 Idoꞌ eveneꞌ mukitoꞌ medelo hilineꞌ nene eveneꞌ ingine angiseꞌinemukovoꞌ igi mili minaaꞌ aniꞌ ma nene huli gohi neꞌmine ami aꞌmine engikumuꞌ helosa ote neive neemukovoꞌ nene igi mili ilizave losa nene eveneꞌ mukitoꞌ medelo hilineꞌ ve.
2CO 5:16 Neꞌmino neineꞌ nenako nemuꞌ nene laza idise adoꞌ mene noneꞌ gamenelotiꞌ nene eveneꞌ izeꞌ molo-ngedelo ma engiꞌ okoꞌine losuvolokovoꞌ ningekosa izeꞌ ma molo-ngedamolosune. Idoꞌ gomuꞌ ma nene Kilisitoꞌni nene okoꞌnolokovoꞌ ninge mino izeꞌ molo-duneꞌ nolineꞌ nene idise mene aꞌmineꞌmine ogo izeꞌ molo-desaꞌmune.
2CO 5:17 Ee, neꞌmino neineꞌ nenako nemuꞌ nene eveneꞌ ma ingine Kilisitoda mini mili nilizave nene mo Oꞌmosoꞌmo do gosohoꞌ gehepeve o-ngede neineꞌ nenako neꞌmo ingine gomuꞌ igi mili minaniꞌ monovoꞌine ma nene mo osuꞌ lavo ngemeni dameniꞌine nene, aizo, mo gosohoꞌ gehepeve loloꞌ ogave.
2CO 5:18 Idoꞌ aꞌmine noluvoniꞌ initeꞌ mukiꞌ nene Oꞌmosolatikovoꞌ sotoꞌ ineꞌ monovo ne neive. Oꞌmoso aza nene Kilisitoꞌ gono dadiꞌmo nene eze biluvaꞌ o-do minuningutiꞌ nene laza ezela ogo do hamoꞌ ogo bizeloneꞌ akate vele-ledosa eveneꞌ linge nene ezesi di hamoꞌ igi bizilizangumuꞌ ve losa aꞌmine akaloꞌ ngeleꞌmize molaloneꞌ gono nene mo leliꞌ limineꞌ ma neive.
2CO 5:19 Adoꞌ me misubouꞌ aleve Oꞌmoso eiꞌ gamaziꞌve avutoꞌ aniꞌ lihimeꞌine nene do moloꞌ moloꞌ o-ngedamo Kilisitoꞌ gono danguꞌ nene Oꞌmoso aza eita igi di hamoꞌ igi bizilizaniꞌ aka nene vele-ngedeꞌmo vo mino aꞌmine akaꞌmi gamazi nene eveneꞌ mukiꞌ li-ngimilizave lo leliꞌ nene do limineꞌ ve.
2CO 5:20 Idoꞌ nemuꞌ nene Laza Kilisitoꞌ limiselavo ezeloꞌ medelo mino asiꞌve Oꞌmoso nene leliꞌ gamaziteuꞌ mine molo mino lengiꞌ nene gatine daniꞌ gelavo leliꞌ nene Kilisitoꞌ lilineꞌ velemuꞌ nene leliꞌ medelo mino amuzonga tiꞌ lo nolo-lingimune: Oꞌmosola nene lingine biluvaꞌ i-di minaniꞌ monovo nene hulisa igi ezesi di bizi minilo.
2CO 5:21 Idoꞌ eveneꞌ laza nene Kilisitoda giꞌmizo minekunivo eiꞌ Oꞌmosoꞌmi monovo lisiheꞌ gehepeve nene leliꞌ okodela dizo minelingumuꞌ nene Oꞌmosoꞌmo lavo leliꞌ lihimete vaiꞌ nene eiꞌ Kilisitoꞌ okoꞌnola dizavo lihime hamokisi ma damive Kilisitoꞌ nene lelitoꞌ medelo lihimeloꞌ ve loloꞌ ineꞌ ve. Nemuꞌ nene lingine Oꞌmoso biluvaꞌ i-di minaniꞌ nene huli eita igi di bizi minilo losa nolo-lingidune.
2CO 6:1 Idoꞌ laza Oꞌmososi makaꞌ bize mino gono daaꞌ unive nete nene gatine do tiꞌ lo nolo-lingimune: Oꞌmosoꞌmi nasahiliꞌve lengemavo di minaaꞌ naniꞌ nene ningi hulikevo vo labuluvo ogalive losa nolune.
2CO 6:2 Idoꞌ neꞌmine noluvoniꞌ nene Oꞌmosoꞌmo tiꞌ lo lingumuꞌ nene noluve: Naza gamene lamineꞌ muluvonguꞌ nenita laaꞌ naniꞌ ma nene mo giluve. Ee, eveneꞌ do nguꞌ izelove lo gamene muluvonguꞌ nene hize eleꞌ o-lingiduvoniꞌ ve. Gililo. Aꞌmine gamene lamineꞌ molaniꞌ nene idise mene gamene nene neive. Eveneꞌ do luꞌ izelineꞌ gamene molaniꞌ nene idise mene gamene nene neive.
2CO 6:3 Laza nene goloso gidini gelelineꞌ monovo ngomosi nene ma okunivo aꞌmine monoꞌ gono noduneꞌ nene eveneꞌ nete divi ledivika li monoꞌ goloso ve likelizave lo eveneꞌ hamolitesi olovoꞌ ilizadoꞌ o minelineꞌ initeꞌ nene mo kekeꞌ amoovoꞌ minaaꞌ noune.
2CO 6:4 Asi laza nene Oꞌmosoꞌmi gonoloꞌ ve neꞌmine noneꞌ nene eveneꞌ do sotoꞌ ogo ngelebizelesa nene adoꞌ neꞌmine monovo lamineꞌ nene ogo minaaꞌ noune: Laza nene geni initeꞌ ato atoꞌ neꞌmi lulouꞌ minaaꞌ noube, idoꞌ lihiteheꞌ initeꞌ gehepeveliꞌmi lulouꞌ minaaꞌ noube, idoꞌ do goloso o-ledaaꞌ initeliꞌmo nene akate gize osuꞌ lavo minaaꞌ noube, neꞌmine ogo minaaꞌ nouninguꞌ nene lemo ongamo amuzo molovoꞌ minaaꞌ noune.
2CO 6:5 Idoꞌ di goloso igisasi nene libilaaꞌ nave. Idoꞌ nalaꞌ numunguꞌ nesi nene huli-lidaaꞌ nave. Idoꞌ eveneꞌ gulugulunga li lovo di sotoꞌ i-lidilisasi nene igaꞌ nave. Idoꞌ gonosi nene amuzo molo daaꞌ noune. Idoꞌ okisete nesi nene do guno ma ongosaꞌmune. Idoꞌ nosoꞌ niteꞌ nesi nene do lamino nosaꞌmo gaꞌnasi nene helo minaaꞌ noune.
2CO 6:6 Neꞌmino minoosa monovo lamineꞌ golosovoꞌ nesi nene ha ogo mino gele nge lo minaaꞌ monovo nesi nene do minaaꞌ noune. Idoꞌ laza nene hongu loovoꞌ mino eveneꞌ nasahiliꞌ o-ngedo mino Oꞌmosoꞌmi Sikalahuꞌve nesi nene lelita minevo dovoꞌ ogo neivo mino eveneꞌ lute ngemo minaaꞌ nouneꞌ nesi nene abeleni amo mino
2CO 6:7 Idoꞌ gamazi gihile laminekovoꞌ nesi nene lo mino Oꞌmosoꞌmi amuzo lelita minineꞌ nesi nene do sotoꞌ oꞌmo vo mino monovo lisiheꞌ lamineꞌ gehepeve neꞌmo nene lovouꞌ initete neꞌmine loloꞌ ogavo ade hela adavala nene lepesete neꞌmine ne neivo idoꞌ ade hela zamela nene bainati mitete neꞌmine ne neivo minaaꞌ noune.
2CO 6:8 Eveneꞌ linge ma nete nene di naba i-lidaaꞌ naavo idoꞌ linge ma nete nene di limi-lidaaꞌ naavo monaaꞌ noune. Idoꞌ eveneꞌ linge ma nete lelikumuꞌ nene lemenga laaꞌ naavo linge ma nete nene lopoꞌni laaꞌ naavo monaaꞌ noune. Ee, eveneꞌ linge ma nete lelikumuꞌ nene eveneꞌ goꞌine izaaꞌ ave ve li laaꞌ naaha laza nene neꞌmine amo soza niteꞌ osaꞌmune.
2CO 6:9 Idoꞌ eveneꞌ ma nete lelikumuꞌ nene gililisa ma gilisaꞌmaha eveneꞌ mukiꞌ nete lelikumuꞌ nene ningi gili lamineꞌ goloso i nizave. Idoꞌ lelikumuꞌ nene mo hililisaave li gili minaaꞌ naaha idoꞌ mene vetesi ha noneꞌ nene mo haza ne none. Idoꞌ lihimetemuꞌ ve lo mulumo gono nene neꞌmino daaꞌ nouba aꞌmine neꞌmo nene lebele helesaꞌmive.
2CO 6:10 Idoꞌ mulumo gele minuningukisi nene gamene gamene lolize izovoꞌ minaaꞌ noune. Laza nene ve gohoꞌ gahaliꞌ neꞌmine noneꞌza monokuꞌ eveneꞌ mukiꞌ nene heneni ve neꞌmine loloꞌ o-ngedaaꞌ noune. Henenite nomineꞌ minaaꞌ nouneꞌza initeꞌ mataꞌ nene lelita ha neivosa minaaꞌ noune. Idoꞌ neꞌmine ogo mine do vaaꞌ nounidotiꞌ nene laza Oꞌmosoꞌmi gonouꞌ ve minaaꞌ nouneꞌ nene sotoꞌ o minivo ningilizave lo neꞌmine ogaꞌ noune.
2CO 6:11 Agae, lingine Kolidi alevekizo, gamazi nene ma do halekamo mo lo ngolokovoꞌ lo lo-lengeme osuꞌ lokune. Laza lute lengeme noneꞌ nene mo nabaloꞌ goloso lengeme none.
2CO 6:12 Ee, leliꞌ nene lute lengemaatoꞌ do aꞌmanapa ma amuneꞌza langisetine lengiꞌ lutine nene di aꞌmanapa igi leliꞌ nene lutine limi lamineꞌ amave.
2CO 6:13 Idoꞌ lingine neniꞌ izipahaꞌne neꞌmine gili nizavo tiꞌ lo nolo-lingimune: Laza lute neꞌmino lingimuneꞌ maloꞌ nene golo hizi lutine di giliꞌ lami limi lamineꞌ ilo.
2CO 6:14 Adoꞌ monovo lamineꞌ ogaꞌ monovosi idoꞌ monovo golosoloꞌ vaaꞌ monovosi nene gono di hamoꞌ mili dikesivo monovoꞌine nene lisihetokovoꞌ vilihe vamilive. Aꞌmine noluvoniꞌ initeꞌ labanakisi litiꞌmusosi engiꞌ monovoꞌine nene hamoliꞌmine monovo igi mili isaꞌmasive. Idoꞌ aꞌmineꞌmine ogo Kilisitoꞌnimuꞌ gili eleꞌvoleꞌ ave nesi idoꞌ ezemuꞌ gili hulaaꞌ ave nesi nene hamoꞌ akaloꞌ ngeli ma eꞌmetamilisaanako nemuꞌ nene lingine Kilisitoꞌnimuꞌ gili hulaaꞌ ave engikisi nene makaꞌ moni engiꞌ igaꞌ aniꞌ monovo nene lingine igi mili ikelizaze. Engikisi bize lamineꞌ igi minamilo.
2CO 6:16 Oꞌmosoꞌmi kekeize numuꞌve nesi idoꞌ soza oꞌmososi di hamoꞌ ilisidoꞌ nene ma vo damive. Idoꞌ neꞌmine noluvoniꞌ nene minevoꞌ minevoꞌ Oꞌmosoliꞌmi numuꞌve nene leliꞌ noneꞌ nenako nemuꞌ noluve. Aꞌminemuꞌ nene Oꞌmosoꞌmo tiꞌ lo lo neineꞌ ma neive: Naza nene engiꞌ vovoꞌninguꞌ ogo minevoꞌ alevoꞌ ogo mino mono minelesuve. Idoꞌ Oꞌmosoꞌinesi nene loloꞌ ogo minelesuve. Idoꞌ ingine neve nene neniꞌ eveneꞌne zuho minilisave lo neineꞌ ma neive.
2CO 6:17 Nemuꞌ nene Guvelesi veꞌmo tiꞌ lo nolive: Aꞌmine nenikumuꞌ gili eleꞌvoleꞌ amaveti vovoꞌninguꞌ minangutiꞌ nene lingine huli mine abazaꞌ igi mini goloso niteꞌ nene damilo. Neꞌmine ikevo naza lengiꞌ nene do nenita ogo
2CO 6:18 metibo loloꞌ okuvo lingine nene neniꞌ gipe alu minilisave lo amuzoꞌve atoliꞌminesi minive Guvelesi veꞌmo nene lineꞌ ve.
2CO 7:1 Luꞌne lengeme nouvoniꞌ alevekizo, aꞌmine gamazi mene neꞌmino Oꞌmosoꞌmo lo huko-lede neineꞌ nenaze. Nemuꞌ nene laza okodesi lutesi do goloso o-ledelineꞌ monovo mukiꞌ gilito do hulosa Oꞌmosomuꞌ golise gelo mino mudise monovo lisiheꞌ lamineꞌ gehepevevoꞌ nene ogo molo oꞌmo vo minukeꞌzo.
2CO 7:2 Lingine leliꞌ nene di lutinguꞌ milalo. Ne nanitekumuꞌ ve. Laza lengikutiꞌ eveneꞌ hamokisi ma do goloso o-ngedamune. Idoꞌ eveneꞌ hamokisi nene aka golosoloꞌ ngeleꞌmize molamo idoꞌ eveneꞌ hamokisi goꞌine izo initeꞌine nene ma do lelita amune.
2CO 7:3 Idoꞌ neꞌmine luvoniꞌ nene lengelemosa lamuve. Heleloneꞌ nehe ha mineloneꞌ nehe, lengiꞌ nene luteuꞌ do molo-lengedamo mino neꞌmine ogalone losa lengiꞌ nene mo mudise luteuꞌ do molokune lo gomuꞌ mo ma lo-lengeme nouvoniꞌ ma neive.
2CO 7:4 Naza lingine gamazi nene ha gililizadoꞌ i nizave losa lengikumuꞌ nene gele eleꞌvoleꞌ o mino neꞌmine manaꞌmine lo ha lo-lengemaaꞌ nouve. Idoꞌ lengikumuꞌ nene nolize goloso izo mino do naba o-lengedo minaaꞌ nouve. Lengiꞌ monovotinemuꞌ giluvo lamineꞌ ogavo muluꞌneuꞌ nene lamineꞌ goloso o neivo geni ato atoꞌ geho minuningukisi nene luꞌneuꞌ gulumo atoliꞌmine ogo lisivosa nouve.
2CO 7:5 Ee, idoꞌ Makedonia misubouꞌ uneꞌ gamene nesi nene okode ma molo gelo minesoꞌ niteꞌ ogavo ma minamuneꞌza asi ganala geni initeꞌ neꞌmo nene aꞌmidatiꞌ aꞌmidatiꞌ okodela nene dizovoꞌ minive. Adoꞌ okode losuvolotiꞌ nene lovo lolize nene ha ogo mino luteuꞌ neve nene golise gelo minune.
2CO 7:6 Neꞌmino minuneꞌza geni initeliꞌmi lulouꞌ mini gopo gaꞌine gili nizanguꞌ do hongu lo-ngedaaꞌ ive Oꞌmoso neꞌmo nene Titoꞌni aka vele-do imiselavo nonida ogo hetelidiꞌmo golise gelo minuneꞌ nene do hongu lo-lidive.
2CO 7:7 Idoꞌ neꞌmino do hongu lo-lidineꞌ nene eiꞌ Titoꞌ adiꞌmovoꞌ ne nomive. Asi aza lengita vo hetelo lengita geni minineꞌ nene di lisiheꞌ ikeniꞌ neivo ningosa aꞌminemuꞌ geni bilineꞌ nene mate-do mulunouꞌ lamineꞌ ogavo aꞌminemuꞌ gamazi do aniꞌ neꞌmosi nene do hongu lo-lidineꞌ ve. Titoꞌ nene lingine neniꞌ ningesoꞌ lingisivo nizaniꞌ nemukisi idoꞌ goloso niteꞌ sotoꞌ ingumuꞌ agae, agae li minaaꞌ naaniꞌ nemukisi idoꞌ neniꞌ gamaziꞌneloꞌ eꞌmetilisa amuzo mili gilaaꞌ naaniꞌ nemukisi lo-limineꞌ nenako neꞌmo nene luꞌneuꞌ gulumo lisineꞌ nene vo naba goloso ineꞌ ve.
2CO 7:8 Gomuꞌ luhuvo nitekuꞌ gizuvoniꞌ gamazi neꞌmo muludinguꞌ agae li okodidoꞌ gili mulumo gilaniꞌ nolineꞌ nesi nene naza luꞌne gaꞌne nene do atoꞌ ma amuve. Ee, aꞌmine luhuvo niteꞌ nene ningi lutinguꞌ mulumo gilaniꞌ nemuꞌ nene mo ningo gelekuve. Idoꞌ aꞌmine lutinguꞌ mulumo nene gilaniꞌza neve nene mo gamene liꞌnibemukovoꞌ gilaniꞌ noloseive. Idoꞌ luꞌne gaꞌne do atoꞌ amuve luvoniꞌ nene lingine lutine di velepeꞌ izangumuꞌ nene naza olihe gelamosa gomuꞌ luꞌne gaꞌne do atoꞌ uvoniꞌza idise nene ma do atoꞌ amuve.
2CO 7:9 Asi idise nene mo nolize izo nouve. Idoꞌ nolize izo nouvoniꞌ nene lingine luhuvo ningi okodidoꞌ gili mulumo gilangumuꞌ nevoba asi mulumo giladotiꞌ lutine di velepeꞌ izaniꞌ nemuꞌ nene nolize izo nouve. Lingine okodidoꞌ gili mulumo gilaniꞌ nene Oꞌmosoꞌmo gele neidoꞌ vo daniꞌ nenako aꞌmine gamazitemuꞌ mulumo gilaniꞌ neꞌmo nene ma do goloso o-lengedamineꞌ ma neive.
2CO 7:10 Neꞌmine noluvoniꞌ nene Oꞌmosoꞌmo gele neidoꞌ ogo okodeloꞌ gelo mulumo gelelonidotiꞌ nene lute do velepeꞌ izo lukuvo naloneꞌ nenako nemuꞌ nene aꞌneꞌmino okodeloꞌ gelo mulumo gelaaꞌ nouneꞌ nene goloso ve lo lamolosune. Ne neiha Oꞌmosomuꞌ gilamavetida neꞌmino okoꞌnidoꞌ gili mulumo gilaaꞌ sotoꞌ o-ngedaaꞌ neineꞌ neꞌmo helaaꞌ nene do sotoꞌ o-ngedaaꞌ neive.
2CO 7:11 Naza noluvoniꞌ nene mo lamineꞌ noluze. Lingine ma ningiꞌnalo. Adoꞌ lingine aꞌmineꞌmine igi Oꞌmosoꞌmo gele neidoꞌ igi okodidoꞌ gili mulumo gilaniꞌ neꞌmo nene lengita monovo lamine tamineꞌ vaiꞌ goloso do sotoꞌ o-lengedave. Aꞌmine nene adoꞌ gilingili igi monovotine lisihekovoꞌ minelive li lutine aꞌmidoꞌ milaaꞌ monovo nene atoliꞌmine ogo do sotoꞌ o-lengedavosa lingine aꞌmine gamazitine nene di lisiheꞌ ilisa amuzo mili minii goloso monovo di hulilisa liteꞌ li upuhoꞌ igi minii golise gili minii leliꞌ ningelobo li gili minii goloso niteꞌ dave nene lihime imilisa amuzo mili minaniꞌ ve. Nemuꞌ nene aꞌmine lengita minineꞌ gamazi mamuꞌ nene gilunivo aꞌmine luvoniꞌ monovo mukiꞌ lingine igi mili minadiꞌmo nene lihime lengita minamineꞌ nene do sotoꞌ ogave.
2CO 7:12 Idoꞌ gomuꞌ luhuvo niteꞌ gize-lingiduvoniꞌ ma nene lihime davemuꞌ gelo gizuvoniꞌ nomive. Idoꞌ lihime do-divemuꞌ gelosa gizuvoniꞌ nomive. Asi lingine lutine lelita milaniꞌ amuzo goloso milisa milaniꞌ monovotine nene ningilizave losa Oꞌmosoꞌmi veleloꞌ neꞌmi monovo nene lengelebizosa gizuvoniꞌ ve.
2CO 7:13 Idoꞌ muludeuꞌ lamineꞌ giluneꞌ nene idise mene noluvoniꞌ initekumuꞌ nene lamineꞌ gilune. Idoꞌ lingine mukiꞌ nene Titoꞌ lulo di hongu li-dangumuꞌ olize izo minineꞌ neꞌmo nene aꞌmine muludeuꞌ lamineꞌ gilunidoꞌ nene imineꞌ molo lazasi gohi lolize naba izune.
2CO 7:14 Idoꞌ lolize izuneꞌ nene naza lengiꞌ do naba ogosa Titoꞌni gamazi gomuꞌ lo-imuvoniꞌ nene hazamuꞌ nomineꞌ nenako novozo nene ma helamuvoniꞌ nenako nemuꞌ nene mo lolize izune. Ee, naza lengiꞌ gamazi lo-lingimuneꞌ nene mo gamazi gihile laminetokovoꞌ lo-lingimuneꞌ neꞌmino lengiꞌ nene do naba o-lengedo Titoꞌni lo-imuneꞌ gamazi nene laminetokovoꞌ lo-imuneꞌ nenako aꞌmine nene mo lamineꞌ gihile izave.
2CO 7:15 Titoꞌ aza lengita ogo nohetelivo lingine mukiꞌ goliseꞌve gili luvo luvo izi mini eleꞌmize lamineꞌ igi gamaziꞌveloꞌ eꞌmetaniꞌ mamuꞌ nene aza gohi gele mino luloꞌve nene atoliꞌmine ogosa lengita hulo neive.
2CO 7:16 Idoꞌ naza idise nene giluvoniꞌ lingine nene initeꞌ mukikuꞌ monovotine nene mo lisiheꞌ ogavo minilisave losa giluvo mo muꞌmusiꞌ gehepeve ogavo nemuꞌ nene nolize goloso noizuve.
2CO 8:1 Neze zuhokizo, ingine Izesuꞌ evenele zuho mulise Makedonia misubouꞌ miniꞌmi monavela Oꞌmosoꞌmi nasahiliꞌve neꞌmo gono do gihileꞌve do sotoꞌ ineꞌ nemuꞌ naza gililizave losa nene lo-lengemelouve:
2CO 8:2 Ingine nene geni initeꞌ nabaliꞌmi lulouꞌ minangukisi idoꞌ angiseꞌine nene gohoꞌ gahaliꞌ gehepeve minangumukisi nene gili huli monokumuꞌ atoliꞌmine igi ngolize izi minadiꞌmo moni nene naba inele igi di nubo aniꞌ ve.
2CO 8:3 Idoꞌ ingine aꞌmine moni di nubo aniꞌ nene ingine hulilizadoꞌ o minineꞌ moni nene hulaniꞌza aꞌmine votigile nesi nene ivileꞌ ivosa vauve ili masi hulaniꞌ nemuꞌ naza gele lamineꞌ ogosa nolo-lingimuve. Ingine engiꞌ luꞌnidoꞌ di mili
2CO 8:4 geli geli igi amuzonga tiꞌ li li-limaniꞌ ve: Agae, lingine gili limikevo aꞌmine Oꞌmosoꞌmi evenele hizi eleꞌ i-ngidilisa moni di nubo ilizanguꞌ lazasi nene ma hulolosune.
2CO 8:5 Ee, ingine neꞌmine ilisave lo gilunidoꞌ avoba asi engiꞌ nene gomuꞌ Guvelesi ve lehizi-mikii alingeꞌ nene lelitasi gelekeleꞌ i-lidaniꞌ ve.
2CO 8:6 Neꞌmine aniꞌ nenako idoꞌ Titoꞌ neꞌmo nene ganaꞌ apiꞌ ogo lutine do ote-lengedavo lingine Izesuꞌ evenele nasahiliꞌ i-ngidilisa aꞌmine gono nene apiꞌ aniꞌ nenako nemuꞌ nene Titoꞌ aza aꞌmine gonoloꞌ vo gizebo ivo di pililizave lo amuzonga lo-dekune.
2CO 8:7 Lengita monoꞌ monovo mukiꞌ nene vauve elo neive. Aꞌmine adoꞌ lingine gili eleꞌvoleꞌ igi mini monoꞌ gamazi di lamineꞌ igi li sotoꞌ igi mini monokumuꞌ gili hehe li mini aꞌminemuꞌ gilingili igi mini idoꞌ laza lutine do ote-lengedekunivo lutine leliꞌ limi minaaꞌ naaniꞌ ne neive. Nemuꞌ nene aꞌmine nasahiliꞌ o-ngedaaꞌ gono nesi nene amuzo mili dalizadoꞌ o neive.
2CO 8:8 Idoꞌ neꞌmine noluvoniꞌ nene naza lo huko mo neꞌmine ilizave losa nolo-lingiduvoba asi eveneꞌ malite aꞌmine gonomuꞌ gilingili igi minaniꞌ monovoꞌine nene lo-lengemekuvo neꞌmo nene do ote-lengedavo lingine lutine ngimaaꞌ naaniꞌ nene mo abeleni isaꞌmii mo neꞌmine igaꞌ naniꞌ nene sotoꞌ ilive losa nene neꞌmine noluve.
2CO 8:9 Idoꞌ neꞌmine ilizadoꞌ o neive noluvoniꞌ nene lingine Guvetesi ve Izesuꞌ Kilisitoꞌ nasahiliꞌ o-lede neineꞌ monovoꞌve nene gili nizanako aꞌmidoꞌ eꞌmetilizadoꞌ o neive losa neꞌmine nene noluve. Aza nene initeꞌ mataꞌ mukiꞌ do minineꞌza aꞌmine do aꞌmanapa amo naza gohoꞌ gahaliꞌ loloꞌ okuvo neꞌmo nene lingine initeꞌ mataꞌ mukiꞌ di minilizave losa lengikumuꞌ nene gohoꞌ gahaliꞌ neꞌmine loloꞌ ineꞌ ve.
2CO 8:10 Idoꞌ aꞌmine gamazi memuꞌ nene naza gaꞌneuꞌ giluvoniꞌ nene ma lo-lengemelove: Ma kilisimasi mauꞌ nene lingine neꞌmine gono dalone li mo ganaꞌ apiꞌ igi daniꞌ ma nene mo lutine laminetotiꞌ daniꞌ ma neive. Nemuꞌ nene aꞌmine gonotine nene lingine ganaꞌ amuzo mili dalisa gili daniꞌ maꞌmine igi lengiꞌ initetineꞌmi votigileloꞌ di milisa liteꞌ li di osuꞌ lilizaniꞌ nene mo lamineꞌ oloseive.
2CO 8:12 Idoꞌ lengiꞌ initetineꞌmi votigileloꞌ di milisa ilisave noluvoniꞌ nene nemuꞌ noluve. Ve malite luꞌine otavosa initeꞌ ma lehizi-ngidilisa gilaniꞌ nolineꞌ nene Oꞌmosoꞌmo gelavo ingine initeꞌ di minaniꞌ votigileloꞌ lehizi-ngidaniꞌ nene mo lamineꞌ ogaꞌ neive. Aza nene initeꞌ masi lehizi-ngidilizanako lo gelo eveneꞌ ingine ma damaniꞌ initekumuꞌ nene ma gelo losaꞌmive.
2CO 8:13 Neꞌmine noluvoniꞌ nene eveneꞌ ma hize eleꞌ igi di nguꞌ izikevo lengita geni ilive losa nomive. Asi lisiheꞌ lisiheꞌ igivoꞌ minilizave losa nene noluve.
2CO 8:14 Idoꞌ idise meve lengiꞌ initetine vaiꞌ lo neineꞌ neꞌmo nene inginela nomineꞌ initeꞌ nene hize eleꞌ o-ngedeleseive. Neꞌmine oloseinako ingine gamene vilidoꞌ nene ingine initeꞌine vaiꞌ lo minelingutiꞌ nene linginela nomilineꞌ initeꞌ nene hize eleꞌ o-lengedeleseive. Neꞌmine ogavosa lingine mukitoꞌ nene lisiheꞌ lisiheꞌ igivoꞌ minilisave.
2CO 8:15 Aꞌmine nemuꞌ nene monoꞌ godolouꞌ tiꞌ li gizi nizadoꞌ vo daloseive: Nosoꞌ niteꞌ vaiꞌ di nubo ave nete nene nosoꞌ niteꞌine nene lumosi ma milisaꞌmave. Idoꞌ nosoꞌ niteꞌ ngomovoꞌ di nubo ave nete nene nosoꞌ niteꞌine osuꞌ lavo nosoꞌ niteꞌine viseꞌ ma isaꞌmave.
2CO 8:16 Oꞌmosoꞌmo Titoꞌ lulo do ote-davo laza hize eleꞌ o-lengedelesa gilingili ogo noneꞌ neꞌmino Titoꞌ nesi nene gilingili ogo neivo nemuꞌ Oꞌmoso isaaꞌ neve nolo-dune.
2CO 8:17 Ee, laza lengita vilive lokunivo gele limineꞌza asiꞌve mo lengita volosa gilingili ogo gele neidoꞌ nene luuneꞌ ve.
2CO 8:18 Idoꞌ Titokisi vilive lo leze zuho masi noimiselunive nene monoꞌ mulise mukiꞌ miniꞌmi monaniꞌ nete nene monoꞌ gamazi lamineꞌ lo sotoꞌ sotoꞌ ogaꞌ neingumuꞌ nene opoꞌni li di naba i-daaꞌ nave ne neive.
2CO 8:19 Idoꞌ neevoꞌ nomive. Adoꞌ monoꞌ mulise ato atoꞌ vaiꞌ nete nene aꞌmine nasahiliꞌ i-ngidi moni di nubo aniꞌ do vo ngemeloninguꞌ nene ezesi aꞌmine gonoloꞌ hize eleꞌ ogo lelikisi makaꞌ vilive li di oti-daniꞌ ve. Aꞌmine gono daloneꞌ nene aꞌmine gono dokunivo aꞌmidotiꞌ nene evenelite Guvelesi ve di naba i-dilizave losasi idoꞌ leliꞌ lute neꞌmo gohoꞌ gahaliꞌ hize eleꞌ o-ngedaakumuꞌ ote neineꞌ nene do sotoꞌ ilive losasi nene dalosune.
2CO 8:20 Idoꞌ lengita noimiseluneꞌ nene aꞌmine inele igi hulaniꞌ moni nabamuꞌ gono daloningumuꞌ nene eveneꞌ hamolitesi di gopo ikeve li lemenga li lelemikelizave losa aꞌmine aka hize tileloningumuꞌ nene noimiselune.
2CO 8:21 Nene nanitekumuꞌ ve. Laza neꞌmino monovo lamineꞌ oloningumuꞌ nene Oꞌmosoꞌmovoꞌ gelelivoba asi mo evenekisi nene gililisave losa nene neꞌmino lovo gizo do lisiheꞌ okune.
2CO 8:22 Idoꞌ aꞌmine ve sitakisi nene leze zuho gohi masi noimiselune. Gamene mukiꞌ aꞌmine ve nene gono ato atoꞌ dokaꞌ dokaꞌ inguꞌ monovoꞌve nene mo do ningekune. Aza monoꞌ gonouꞌ nene gilingili ogo minaaꞌ neive. Idoꞌ idise mene lengikumuꞌ nene monokuꞌ eleꞌvoleꞌ ilisave lo gele muꞌmusiꞌ gehepeve o neineꞌ nenako nemuꞌ nene aꞌmine gono nene dalosa mo gilingili ogo amuzo goloso nomolave.
2CO 8:23 Idoꞌ Titoꞌ neve nene nezesi bizo gono makatoꞌ daaꞌ usive nene neive. Idoꞌ leze zuho sitaꞌ ingine nene monoꞌ mulise ato atoꞌ nizadoꞌ nene di medeli-ngidi aꞌmine gonoloꞌ ngimiselave sitaꞌ nene Kilisitoꞌni di naba i-dilisidoꞌ i nizasive.
2CO 8:24 Nemuꞌ nene ingine nivavo ma lengiꞌ lutine ngimaaꞌ monovotine neꞌmi gihileꞌvesi idoꞌ laza lengiꞌ do naba o-lengedo lo-ngimuneꞌ gamazi neꞌmi gihileꞌvesi nene ningilizaze. nGelebizilo. Ee, monoꞌ mulise ato atokuꞌ aleve nete aꞌmine monovotinemuꞌ nene ningi gililizangisi ngelebizilo.
2CO 9:1 Izesuꞌ evenele Zudaia misubola minaniꞌ nene hize eleꞌ i-ngidi moni hulilizangumuꞌ do ote-lengedo gamazi lo-lengemeloniꞌ nene lingine mo aꞌminemuꞌ gili nizaniꞌ nenako aꞌminemuꞌ nene gohi luhuvo gize-lengedelodoꞌ nomize.
2CO 9:2 Asi lingine neꞌmine ilisa gilingili igi nizaniꞌ nemuꞌ nene mo gele nouvoniꞌ nenako nemuꞌ nene lingine Akaia misubouꞌ aleve nete gomuꞌ kilisimasi mautiꞌ nene neꞌmine ilisa di vaꞌvaꞌ igi nizaniꞌ ve lo Makedonia misubouꞌ aleveti veꞌnidoꞌ nene do naba o-lengedo minaaꞌ nouve. Lingine neꞌmine igi gilingili igi minaniꞌ neꞌmo nene engikutiꞌ linge mukiꞌ nene neꞌmine ilizadoꞌ do upuhoꞌ o-ngedave.
2CO 9:3 Ne neiha laza lengiꞌ do naba o-lengedo lo-ngimuneꞌ gamazi nene vo haza gamazi loloꞌ ogalive loosa naza lo-ngimuvoniꞌ neꞌmine igi lingine initeꞌ mukiꞌ di vaꞌvaꞌ igisa nizaniꞌ neivo ogo hetelelone losa aꞌmine leze zuho nene ngimiselekuve.
2CO 9:4 Ee, laza Makedonia aleve lingesi ogo hetelo lingine di vaꞌvaꞌ igi minami haza nizavo ningeloneꞌ nene lingine mo di vaꞌvaꞌ igi minilizave lo gele muꞌmusiꞌ o minuuneꞌ nemuꞌ nene lovozo helalone losa ngimiselekuve. Idoꞌ neve nene lengikumuꞌ lamuvoniꞌza linginesi nene longovozo hilamilizadoꞌ o neihe.
2CO 9:5 Nemuꞌ nene ingine gomuꞌ mili vi lingine inele igi ngemelone li gomukutiꞌ li hukaniꞌ initeꞌ nene ganakutiꞌ di lisiheꞌ ikevo minelive lo gelosa naza gomuꞌ mili vilizave lo aꞌmine leze zuho nene lo-ngedelodoꞌ o neive lo gelosa neꞌmine uvoniꞌ ve. Neꞌmino gomukutiꞌ di vaꞌvaꞌ ikevo minelineꞌ neꞌmo nene lingine ngimilisa gilamadoꞌ lelitatiꞌ amuzo molokunivo ngimamaniꞌza asi lutine laminetotiꞌ inele igi hulilizaniꞌ nene mo sotoꞌ ogo mineleseive.
2CO 9:6 Nemuꞌ nene naza gamazi mene lolouze. Gililo. Ve ma ingine zuho niteꞌ ngomo lasolo zuhoꞌ ilizaniꞌ nene aꞌmingutiꞌ ngomo lasolovoꞌ dolizilisaave. Idoꞌ ve ma ingine zuho niteꞌ vaiꞌ zuhoꞌ ilizaniꞌ nene mo vaiꞌ goloso dolizilisaave. Nemuꞌ nene ngimiliza votigilelokovoꞌ nene dikaꞌ dikaꞌ ilisave.
2CO 9:7 Eveneꞌ ma ingine luꞌine laminetotiꞌ ngolize izi mini initeꞌ ngimaaꞌ navemuꞌ nene Oꞌmoso neꞌmo umo helaaꞌ neineꞌ nenako nemuꞌ nene lutinguꞌ hizilizadoꞌ eꞌmeti lutinguꞌ geni lengebele minivo ngimami lingine hamo hamoꞌ mukitoꞌ lutinguꞌ neꞌmine ngemelone li gilaniꞌ votigileloꞌ nene mo lutine laminetotikovoꞌ ngimilo.
2CO 9:8 Lingine ilizadoꞌ o neineꞌ initeꞌ mukiꞌ ha vo dalineꞌ votigileloꞌ nene initeꞌ mukiꞌ lengita gamene gamene ha neivo gono lamineꞌ ato atoꞌ mukiꞌ nene ha dalizadoꞌ i minilizangumuꞌ ve lo Oꞌmosoꞌmo eiꞌ nasahiliꞌveutiꞌ nene initeꞌ mataꞌ mukiꞌ vauve elo lehize-lengedelidoꞌ lisiheꞌ o neive.
2CO 9:9 Neve nene monoꞌ godolouꞌ tiꞌ li gizikaniꞌ neineꞌ maloꞌ nene vo dave: Aꞌmine ve nene initeꞌve ha inele ogo izeꞌ molo gohoꞌ gahaliꞌ lehize-ngedave. Aꞌmine monovoꞌve lamineꞌ nene mo osuꞌ lamo minevoꞌ minevoꞌ ogo mineleseive.
2CO 9:10 Mine zuhoꞌ ilizave zuho niteꞌ nene do sotoꞌ ogo ngemosa nalizave lo nosoꞌ niteꞌ lemaaꞌ ive neꞌmo lengitatiꞌ ngimiliza niteꞌ nene do naba ogo do hutileꞌ ogo monovotine lamineliꞌmi gihileꞌve nene do vaiꞌ loꞌmo vo mineleseive.
2CO 9:11 Neꞌmine ilidiꞌmo nene lingine inele igi initeꞌ ngimikaꞌ ngimikaꞌ igi minilizangumuꞌ initeꞌ matatine nene do vaiꞌ lo-lengedavo mini laza aꞌmidoꞌ do upuhoꞌ o-lingiduneꞌ gono dalizadiꞌmo eveneꞌ nete Oꞌmoso nene opoꞌni li isaaꞌ neve li-dilisave.
2CO 9:12 Idoꞌ neꞌmine noluvoniꞌ nene lingine eveneꞌ hize eleꞌ i-ngidaaꞌ gono nidaniꞌ meꞌmo nene Oꞌmosoꞌmi evenele viseꞌ igaꞌ naaniꞌ initeꞌ nene do sotoꞌ o-ngedaaꞌ neineꞌza neevoꞌ nomive. Asi aꞌmine gonomuꞌ nene eveneꞌ mukiꞌ nesi nene vauve ili Oꞌmoso isaaꞌ neve laaꞌ naanako nemuꞌ nene noluve.
2CO 9:13 Ee, lingine Kilisitoꞌnimuꞌ gamazi lamineꞌ gele eleꞌvoleꞌ okune laniꞌ ma nene soza nomineꞌ laminetoꞌ laniꞌ nene di sotoꞌ igi aꞌmine gamaziloꞌ gelekeleꞌ igi lengiꞌ initetingutiꞌ nene ma izeꞌ mili inele igi engikisi idoꞌ eveneꞌ mukikisi lehizi-ngidii aꞌmine gono mene dikevosa neꞌmo nene eveneꞌ Oꞌmoso opoꞌni lilisave.
2CO 9:14 Idoꞌ Oꞌmosoꞌmo nasahiliꞌ atoliꞌmine ogo lengita do sotoꞌ ingumuꞌ nene ingine lengita luꞌine mili mini lengikumuꞌ ve li Oꞌmosola lilisave.
2CO 9:15 Idoꞌ Oꞌmosoꞌmo nasahiliꞌ o-ledo initeꞌ ineꞌ nemuꞌ nene isaaꞌ neve lo-dukeꞌzo. Aꞌmine initeꞌ nene atoliꞌmine ogo lamineꞌ goloso neivo aꞌminemuꞌ nene lolone lo ma losoꞌ nene mo ngelo lo pelamolosune.
2CO 10:1 Neniꞌ Pauloꞌ nene Kilisitoꞌ aza hongu lo muluno laminekisi minineꞌ mamuꞌ nene gele mino agae lo gatine do gamazi ma lo-lengemelove. Ee, lingine linge malite nenikumuꞌ nene leliꞌ vovoteuꞌ mino gamazi amuzo molo lo-lemelidoꞌ minamo honguvoꞌ lo minaaꞌ neiha vo mala mino luhuvo gize-lidinguꞌ nene gasava ve neꞌmine loloꞌ ogo mino oloꞌ lo vineꞌ gamazivoꞌ laaꞌ neive li li-nidaaꞌ ave neniꞌ nene agae lo tiꞌ lo nolo-lingimuve:
2CO 10:2 Neniꞌ monovoꞌnemuꞌ giluvoniꞌ nene naza nehelele izamivo mino ve linge ma lelikumuꞌ nene ha me misubouꞌ veliti monovolokovoꞌ eꞌmetaaꞌ nave li li-lidaaꞌ ave nene ha do lisiheꞌ o-ngedelodoꞌ o nouve lo gele nouve. Neꞌmino nouvoniꞌ nenako lengita ogo gasava ve neꞌmine mino amuzo molo-lengedaaloze. Neꞌmine olodoꞌ o minineꞌ gamazi nene mo hulilo.
2CO 10:3 Lamineꞌ laza nene mo ha misubouꞌ ve noneꞌza monoliꞌmi lovouꞌ lovo ogaꞌ nouneꞌ nene me misubouꞌ vete igaꞌ adoꞌ do molo lovo osaꞌmune.
2CO 10:4 Nene nanitekumuꞌ ve. Laza lovo ogaꞌ nouneꞌ initeꞌ nene me misubouꞌ initedunuꞌ lovo amo asi Oꞌmosoꞌmi amuzosi minineꞌ initeꞌ adoꞌ biluvaꞌ alete molo-ngedelineꞌ gamaziꞌine nene hupuꞌ ize hulilidoꞌ o minineꞌ amuzo nene do none.
2CO 10:5 Ee, gamaziꞌine bele hulo idoꞌ Oꞌmosoꞌmi monovomuꞌ ningi gililizaniꞌ aka hize tilaaꞌ neineꞌ amuzo malehe gamaziꞌine naba nesi nene ha belo doꞌmo lemaaꞌ noune. Idoꞌ evenelite gaꞌine gilaaꞌ initeꞌine mukiꞌ nesi nene doosa aꞌmine gaꞌine gilaaꞌ initeꞌine nene Kilisitoda do gelekeleꞌ o-ngedaaꞌ noune.
2CO 10:6 Idoꞌ ingine nene mudise lelitoꞌ gelelekeleꞌ gehepeve ikevo ma laza nene eveneꞌ linge ma gamazi gili hulikaꞌ hulikaꞌ adoꞌ adoꞌ nene golo hizo lihime ngemeloningumuꞌ nene mo do vaꞌvaꞌ ogo none.
2CO 10:7 Lengiꞌ vetidoꞌ sotoꞌ mene sotoꞌ o neineꞌ initeꞌ nene ningahe ningamave. Aloꞌ ningilo. Eveneꞌ ma zaho nolihe aza eikumuꞌ nene naza Kilisitoꞌ evenele nouve lo gele eleꞌvoleꞌ o minelive neꞌmo lelikumukisi nene naza Kilisitoꞌ evenele nouvoniꞌ neꞌmino inginesi nene Kilisitoꞌ evenele nizave lo gele minelidoꞌ o neive.
2CO 10:8 Idoꞌ Kilisitoꞌ evenele nouve lo noluvodoꞌ nene imineꞌ moloo loloniꞌ votigile ivileꞌ ivosa Guvelesi veꞌmo nimineꞌ amuzo nene do naba ma oloniꞌ nemukisi nene novozo ma helamolosuve. Aꞌmine amuzo Guvelesi veꞌmo nimineꞌ nene do goloso o-lengedelongumuꞌ nene nimivoba asi monokuꞌ hize eleꞌ o-lengedelongumuꞌ nene nimineꞌ ve.
2CO 10:9 Ee, Guvelesi veꞌmo nimineꞌ amuzo nene novozo helamo ha do naba oloniꞌza naza luhuvo niteꞌ gize-lengedaaꞌ nouvonguꞌ nene golise lengemelineꞌ gamazivoꞌ gizaaꞌ nouvoniꞌ gelalive losa nemuꞌ nene gele nouve.
2CO 10:10 Nene eveneꞌ linge nete tiꞌ li laaꞌ nangumuꞌ nene noluve: Aza luhuvo gizelineꞌ nene amuzo malehe gamazi genivesi gamazi gizaaꞌ neiha eiꞌ omo neivo ningeloneꞌ nene okoꞌno gilizevo o vineꞌ mino gamaziꞌve lineꞌ nesi nene amuzoꞌvesi nomineꞌ gamazi laaꞌ neive laaꞌ nave.
2CO 10:11 Neꞌmine li laaꞌ ave nene tiꞌ li gili minilizave: Lengikisi makaꞌ minamo luhuvo niteꞌ gizesoꞌ nene aꞌmine luhuvo nitekuꞌ gamazi amuzo molo gize noloneꞌ neꞌminosa laza linginela ogo hetelo ogo molo oloneꞌ nene aꞌmine luhuvo nitekuꞌ loloneꞌ neꞌmino gehepeve ogo molo olosune.
2CO 10:12 Lengita minave linge nete nene engiꞌ okoꞌine di dizi diziꞌ igi eveneꞌ ma ne none laaꞌ nave. Laza engikisi lelikisi nene do miliseꞌ ogo ningo engitoꞌ lisiheꞌ o none lo mo kekeꞌ lamolosune. Engikumuꞌ nene lehelele izamineꞌza ingine nene engiꞌ monovo izeꞌ mili ningaaꞌ naniꞌ nene Oꞌmosoꞌmo lineꞌ gamazisi di miliseꞌ igi ningami angiseꞌine gilaaꞌ naniꞌ gamazisi nene di miliseꞌ igi ningi izeꞌ mili mo eveneꞌ naba none li negi suno daaꞌ nanako nemuꞌ nene laza engitoꞌ lisiheꞌ o none lamolosune.
2CO 10:13 Leliꞌ monovotemuꞌ do naba oloneꞌ nene lisiheꞌ o neineꞌ votigile nene ivileꞌ ogo gohi ma do naba amolosune. Idoꞌ leliꞌ gono dalonidoꞌ nene Oꞌmosoꞌmo asiꞌve lakaꞌni molo-lede neive. Aꞌmine lakaꞌnitelokovoꞌ mino gono daaꞌ nouneꞌ neemukovoꞌ nene do naba ogo lolosune. Idoꞌ lengita vo gono duneꞌ ma nene aꞌmine Oꞌmosoꞌmo lakaꞌni molo-lidineꞌ nene mo aꞌmidasi vo do neivosa nene dune.
2CO 10:14 Ee, laza lengita ogo Kilisitoꞌ gamazi lamineꞌ leliꞌ neve ganaꞌ apiꞌ ogo lo-lingimuneꞌ nenako nemuꞌ nene lengita gono duneꞌ nene do naba oloningumuꞌ Oꞌmosoꞌmo molo-lede neineꞌ votigile nene ivileꞌ amolosune.
2CO 10:15 Eveneꞌ atolite daniꞌ gonomuꞌ nene leliꞌ okode do dizo Oꞌmosoꞌmo molo-lede neineꞌ votigile nene ivileꞌ amolosuuneꞌza laza lengikumuꞌ nene tiꞌ lo gele muꞌmusiꞌ o none: Lingine Oꞌmosomuꞌ gili eleꞌvoleꞌ aniꞌ nene mo amuzo moloꞌmo vo neivo leliꞌ gonote neꞌmo lengita nene vauve elo vo naba ilive.
2CO 10:16 Neꞌmine ogavo lengiꞌ mehedida minineꞌ misubolasi nene vo eveneꞌ gohi masi nene Kilisitoꞌ gamaziꞌve lamineꞌ nene lo-ngemelesune. Neꞌmine olosuneꞌza laza eveneꞌ malite vi gono dikenguꞌ nene vo gono damolosune. Idoꞌ eveneꞌ malite gono dangumuꞌ leliꞌ okode nene do dizamolosune.
2CO 10:17 Nemuꞌ monoꞌ godolouꞌ tiꞌ li gizi nizaniꞌ ma neive: Ve ma aza eiꞌ okoꞌnomuꞌ olize noizelineꞌ ne alamo Guvelesi ve neemukovoꞌ nene olize izelive.
2CO 10:18 Mene noluvoniꞌ nene nemuꞌ noluve: Eveneꞌ gihile minelive nene eiꞌ okoꞌno do dizaaꞌ ive minelivoba asi Guvelesi veꞌmo do naba o-dive neꞌmo nene eveneꞌ gihile mineleseive.
2CO 11:1 Gamazi ngomo mene lo-lengemeloniꞌ nene negi monovoloꞌ eꞌmetelesuha lingine nemuꞌ goseleꞌ lengebelamivo ha gopo gililizahoo lo gele nouze. Lingine gopo aꞌmine gamaziꞌne nene gililo.
2CO 11:2 Idoꞌ negi monovoloꞌ eꞌmeteloniꞌ nene Oꞌmosoꞌmo lengikumuꞌ eiꞌ initeꞌvevoꞌ minilisave lo amuzo molo gele minaaꞌ neineꞌ neꞌmino nazasi lengikumuꞌ aꞌmineꞌmine ogo amuzo molo gele nouvonako nemuꞌ nene aꞌmine negi monovoloꞌ eꞌmeto neniꞌ monovoꞌnemuꞌ do naba ogo lolosuve. Idoꞌ lengikumuꞌ amuzo molo gele nouve noluvoniꞌ nene lingine gopo monovoloꞌ monesaꞌmineꞌ alu neꞌmine mini aꞌmine ve hamotokovoꞌ vi giꞌmizilizave lo Kilisitoda izeni o-lengedekuvoniꞌ nenako nemuꞌ nene lengikumuꞌ nazasi nene amuzo molo gele nouve.
2CO 11:3 Gosiheliꞌmo Evaꞌni do neuꞌ manauꞌ ogo golo izineꞌ neꞌmino eveneꞌ malite gotine izi lutine gatine di gopo igi lutine Kilisitoꞌ eiꞌ hamotoꞌ milaaꞌ naadotiꞌ nene lengeleꞌmize gopo ikelizave lo gopo gaꞌne nogiluve.
2CO 11:4 Idoꞌ gopo gaꞌne nogiluvoniꞌ nene eveneꞌ maliꞌmo lengita ogo Izesuꞌnimuꞌ lo-lengemelineꞌ nene laza ezemuꞌ lo-lingimunidiꞌmine lamo atoꞌ gamazi lo-lengemaaꞌ neihe idoꞌ Oꞌmosoꞌmi Sikalahuꞌ lingine gomuꞌ daniꞌ neꞌmi emeni dameniꞌve nene atoliꞌmine neivosa aꞌmine veꞌmo dalizave lo lo-lengemelineꞌ sikalahuliꞌmi emeni dameniꞌve nene atoliꞌmine minaaꞌ neihe idoꞌ Oꞌmosoꞌmi gamazi lamineꞌ gomuꞌ gili daniꞌ neꞌmine minamo atoliꞌmine gamazi Oꞌmosoꞌmi gamazi lamineꞌ ve lo lo-lengemaaꞌ neihe neꞌmine ogaꞌ neineꞌ nene lingine aꞌminemuꞌ goseleꞌ lengebelamivo gamazi lamineꞌ ve li gilingili igi gilaaꞌ naaniꞌ nenako nemuꞌ nene naza gopo gaꞌne nogiluve.
2CO 11:5 Neꞌmine ogo naza giluvoniꞌ nene aꞌmine aposolo atoliꞌmine igi dizisa nizave lave engitotiꞌ nene naza ngomo neꞌminesi nene ma lemetiꞌ ogo nouve lo gelamuve.
2CO 11:6 Lamineꞌ naza nene gamazi do lisiheꞌ ogo laakumuꞌ nene sukulu ma lamuvoniꞌ nenako neꞌmo engiꞌ nene gamazi laatoꞌ nivileꞌ i nilisaha monoꞌ monovo gelaaꞌ nene gele nge lo gele nouve. Naza neꞌmino nouvoniꞌ nene laza neꞌmine manaꞌmine gono nodunidotiꞌ nene sotoꞌ gehepeve do sotoꞌ ogo lengelebizekune.
2CO 11:7 Naza nene lengiꞌ doꞌmo dize-lengedelesa naꞌnise okoꞌne doꞌmo lemo Oꞌmosoꞌmi gamazi lamineꞌ lo-lingimuvoniꞌ nene inele ogo haza gidini lo-lingimuvoniꞌ neve nene goloso niteꞌ dokuhe.
2CO 11:8 Ee, lengita neve gono dalongumuꞌ nene nosoꞌ niteꞌne nevoꞌmine nene lengitatiꞌ ma damo asi engita gono damo mino Izesuꞌ evenele mulise atotatiꞌ nene gumine gidini dokuve.
2CO 11:9 Neꞌmine noluvoniꞌ nene naza linginesi minuvoniꞌ gameneuꞌ initeꞌ ma viseꞌ uvoniꞌ initeꞌ nene leze zuho Makedonia misuboutiꞌ ave nete nene mudise hizi eleꞌ i-nidikevosa naza nene initeꞌ viseꞌ uvoniꞌ neꞌmi geniꞌve nene lengita ve hamokisi ma gehe-damuvoniꞌ nenako nemuꞌ nene noluve. Ee, naza lengita eveneꞌ hamokisi neꞌmine manaꞌmine geni nene gehe-lengedalove lo gizebo lekeseve ogo minuvoniꞌ ve. Neꞌmine ogo minuvoniꞌ nenako mo neꞌminevoꞌ o do vo minelesuve.
2CO 11:10 Naza Kilisitoꞌ gamazi gihile nenita neive loloniꞌ nene lingine gosohoꞌ laane li ataize lamilisave. Aꞌmine gamazi nene mo laminetoꞌ nenako lingine mo gili nizave. Idoꞌ aꞌmineꞌmine ogo gamazi mene ma loloniꞌ nene mo laminetoꞌ lolosuve. Adoꞌ naza lengiꞌ Akaia misubouꞌ monoꞌ gono daaꞌ nouvoniꞌ nene meniꞌve nomineꞌ haza gidini daaꞌ nouvongumuꞌ nolize izo do naba ogo laaꞌ nouvoniꞌ akaꞌne nene eveneꞌ hamolitesi mo kekeꞌ hizi tili-nidamilisave. Aꞌmida gono daaꞌ nouvodoꞌ meniꞌve nene initeꞌ hamokisi mo kekeꞌ lengitatiꞌ ma damolosuve.
2CO 11:11 Idoꞌ lengitatiꞌ initeꞌ ma damolosuve noluvoniꞌ nene naza luꞌne lengiꞌ lengemamosa noluhe. Oꞌove. Neniꞌ luꞌne lengeme nouvoniꞌ nene Oꞌmosoꞌmo ningo gele neive.
2CO 11:12 Aꞌmine ve lelitoꞌ lisiheꞌ o none li okoꞌine di dizi laaꞌ naavete laaꞌ naaniꞌ gamazi nene gamazi gihile gelalive lo aꞌmine aka hize tile-ngedelongumuꞌ nene naza idise do nouvoniꞌ monovoꞌne mene ha oꞌmo voovoꞌ mino meni neꞌmino initeꞌ mo kekeꞌ ma damolosuve.
2CO 11:13 Nene noluvoniꞌ nene nanitekumuꞌ ve. Aꞌmine neꞌmine ve nene soza aposolo mini monoꞌ gono daaꞌ naaniꞌ nene eveneꞌ goꞌine izisa di mini okoꞌine losuvolotiꞌ nene Kilisitoꞌ aposolo neꞌmine liliꞌ igi minaaꞌ nave.
2CO 11:14 Neꞌmine igaꞌ naangumuꞌ nene upuhoꞌ olonidoꞌ nomive. Nanitekumuꞌ ve. Gamene ma asiꞌve Satani neꞌmosi nene do atoliꞌmine ogo angeloꞌ lamineꞌ labanalasi minineꞌ neꞌmine nene loloꞌ ogaꞌ neinako
2CO 11:15 nemuꞌ nene eze gonoloꞌ ve netesi nene di atoꞌ igi monovo lisiheliꞌmi gonoloꞌ ve neꞌmine liliꞌ ilizaniꞌ nene initeꞌ naba nomineꞌ nenako ha liliꞌ ilisave. Aꞌmine ve nene ingine gono daniꞌ votigileloꞌ nene gamene nabaloꞌ lihime dalisave.
2CO 11:16 Naza gomuꞌ lokuvoniꞌ ma nene gohi tiꞌ lo nolo-lingimuve: Eveneꞌ hamolitesi nenikumuꞌ nene negi ve li gilamilo. Neꞌmine li gilamilizadoꞌ o neineꞌza lingine negi ve li gilili ma negi ningi mati ngimikaꞌ naaniꞌ neꞌmine igi neniꞌ nene ningi mati nimikavo nazasi nene monovoꞌnemuꞌ ngomo ma do naba ogo lolove.
2CO 11:17 Idoꞌ neꞌmine gamazi loloniꞌ nene Guvelesi veꞌmi monovoloꞌ eꞌmetelovoba asi neniꞌ monovoꞌnemuꞌ gele eleꞌvoleꞌ ogo do naba ogo loloniꞌ nene mo negi sunoloꞌ eꞌmetelesuha
2CO 11:18 eveneꞌ mukiꞌ okoꞌine losuvoliꞌmi initekumuꞌ nene di naba igi laaꞌ naanako nazasi nene aꞌmineꞌmine ogo do naba ogo lolosuve.
2CO 11:19 Ee, lingine gamazi gele nge laaꞌ nounive none li gilii negi aleve nene ha longolize izi ningi mati ngimikaꞌ naaniꞌ nenako naza nene aꞌmine negi sunoloꞌ eꞌmeto ha do naba ogo lolosuve.
2CO 11:20 Ee, eveneꞌ malite di gelekeleꞌ gehepeve i-lingidaaꞌ nahe idoꞌ lengiꞌ initetine nene bili gizaaꞌ naahe idoꞌ lingimimiseꞌ igi gotine izaaꞌ naahe idoꞌ ingine eveneꞌ naba liliꞌ igi di gizeꞌninguko i-lingidaaꞌ naahe idoꞌ aꞌine gavoso gotine vetinguꞌ lingibilahe neꞌmine manaꞌmine aniꞌ nene lingine ha ningi mati ngimikaꞌ naave.
2CO 11:21 Ingine neꞌmine initeꞌ i-lingidaaꞌ naaniꞌ neꞌmino laza aꞌmine neꞌmine initeꞌ o-lengedelonidoꞌ nene amuzoteuꞌ lisiheꞌ amive. Idoꞌ neꞌmine o-lengedelonidoꞌ nene amuzo molamuneꞌ nenako neꞌmo nene lovozo helelonidoꞌ o neihe. Oꞌove. Neꞌmine olonidoꞌ nomive lo noluve. Ne neiha eveneꞌ malite ngehelele izamivo engiꞌ monovoꞌinemuꞌ di naba igi lilizaniꞌ nene nani monovoꞌinemuꞌ lilizahe nazasi aꞌmineꞌmine ogo nehelele izamivo neniꞌ monovoꞌnemukisi do naba ogo lolosuve. Mene noluvoniꞌ nene negi sunoloꞌ eꞌmetosa noluve.
2CO 11:22 Ingine Zuda ve leliꞌ gulivete setohamo ditiꞌ igi Hebilaioꞌ aleve none idoꞌ Isilaeleꞌ aleve none idoꞌ Abalahamuꞌ aꞌvopilemoꞌ zuhoutiꞌ nene none li laaꞌ naha nazasi nene aꞌmineꞌmine ogo Hebilaioꞌ ve idoꞌ Isilaeleꞌ ve idoꞌ Abalahamuꞌ aꞌvopilemoꞌ zuhoutiꞌ ve nene nouve.
2CO 11:23 Idoꞌ ingine engikumuꞌ nene Kilisitoꞌ gonoloꞌ ve none laaꞌ nahe. Mene loloniꞌ nene godoꞌninguꞌ gamazi nomiveti sunoloꞌ eꞌmeto tiꞌ lo noluve: Neniꞌ nene engiꞌ ngivileꞌ ogosa Kilisitoꞌ gonoloꞌ ve gehepeve ne nouve lo noluve. Gono neve nene engiꞌ ngivileꞌ ogo amuzo goloso molosa duve. Idoꞌ monokumuꞌ ve lo nalaꞌ numunguꞌ nene gamene vaiꞌ goloso engiꞌ ngivileꞌ ogosa vo minekaꞌ minekaꞌ uvoniꞌ ve. Idoꞌ monokumuꞌ ve li nibilaniꞌ nene engiꞌ ngivileꞌ ivosa gamene vaiꞌ goloso nibilaniꞌ ve. Idoꞌ gamene mukiꞌ nene helaaꞌ akaloꞌ vaaꞌ uvoniꞌ ve.
2CO 11:24 Gamene faef nene Zuda vete nalaꞌ gavosotunuꞌ sogoꞌ sagaꞌ izi nibilaniꞌ nene gamene teoti naeni (39) neꞌmine nene nibilaniꞌ ve.
2CO 11:25 Idoꞌ gamene setohamo nene Loma vete lobuno gavosodunuꞌ nibilaniꞌ ve. Idoꞌ gamene sitohamo neꞌmine nene sipiuꞌ nomonuvo sipi izo itineꞌ ve. Neꞌmine ogo guvo nosoloꞌ nene ha nouvo holukaꞌ hamokisi holiseꞌ hamokisi ogo vineꞌ ve.
2CO 11:26 Idoꞌ gamene mukiꞌ goloso nene aka hota hota vaiꞌ monuve. Neꞌmino monuvonguꞌ nene nosoꞌmo nibilineꞌ hakaaꞌ neive. Idoꞌ lasikolite nibilaniꞌ hakaaꞌ neive. Idoꞌ neniꞌ zuho Zuda ve nete nibilaniꞌ hakaaꞌ neive. Idoꞌ heta atoꞌ ve netesi nene nibilaniꞌ hakaaꞌ neive. Idoꞌ numuno ebeꞌ nabauꞌ nesi nene ganala voteneꞌ ogaꞌ nouve. Idoꞌ ebeꞌ hadivela nesi idoꞌ guvo nosoloꞌ sipiuꞌ monuvonguꞌ nesi nene ganala voteneꞌ ogaꞌ nouve. Idoꞌ Kilisitoꞌ evenele leze zuho none li soza laaꞌ ave nete nene ganala di-nidilisa igaꞌ naave.
2CO 11:27 Idoꞌ naza nene nabusoꞌne goloso ilivosa ato atoꞌ gono mukiꞌ nene eleꞌvoleꞌ ogo duvoniꞌ ve. Neꞌmine ogo minuvonguꞌ nene okiseꞌnesi nene do guno ongosaꞌmo idoꞌ nosoꞌ nitekumukisi nosomukisi nene gaꞌna helaaꞌ ogo mino nosoꞌ nitekisi namo gamene vaiꞌ nene haza monaaꞌ uvoniꞌ ve. Idoꞌ hepekuꞌ nene okoꞌneloꞌ initeꞌ nene hepekuꞌ izo monaatoꞌ vo damivo hepeꞌ novozo noꞌmo monaaꞌ uvoniꞌ ve.
2CO 11:28 Idoꞌ neevoꞌ nomive. Initeꞌ gohi masi masi neineꞌ lamuvoniꞌ nesi idoꞌ naza monoꞌ mulise mukiꞌ gizebo o-ngedaaꞌ geni nesi nene gamene gamene gehaaꞌ nouve.
2CO 11:29 Ve maliꞌmo monokuꞌ gilizevo ineꞌ nene nenikisi aꞌmineꞌmi geniꞌve nene gehesaꞌmuvoba makatoꞌ gehe-lengedaaꞌ nouvoniꞌ ma neive. Idoꞌ ve ma monokutiꞌ limi inganiꞌ nene naza engikumuꞌ okoꞌne hulosaꞌmuvoba mo hulaaꞌ nouvoniꞌ ma neive.
2CO 11:30 Naza nenikumuꞌ nene do naba ogo lolosa gelamuvoniꞌza nenikumuꞌ do naba ogo lamo mineloniꞌ aka nene ma nominako naza nene Oꞌmosoloꞌ lehete amo minelodoꞌ nouvoba asi gilizevo o nouvoniꞌ monovoꞌne nemukovoꞌ nene do naba ogo lolosuve.
2CO 11:31 Guvetesi ve Izesuꞌ Kilisitoꞌ Oꞌmosoꞌvesi melehosi minive adoꞌ opoꞌni loꞌmo vo nonivo osuꞌ lamilive neꞌmo me ve nene soza nomineꞌ nemuꞌ nene mo gele neive.
2CO 11:32 Damasiko numuno ebekuꞌ nouvo aꞌmine misubo nabauꞌ guvelesi ve naba Aletaꞌ aꞌmine numuno ebetoꞌ gizebo hulo-dive kiapeꞌ neꞌmo nene pilisive ngimiselavo ingine neniꞌ dalisa aꞌmine numuno ebeliꞌmi gatedoꞌ nene gizebo igi nizavo
2CO 11:33 Izesuꞌ evenelelite numuno ebeliꞌmi gesi haꞌnauꞌ viniduvaꞌ ma mininguꞌ nene gosuvahaꞌ gokuꞌ luhize nouvo nalatoꞌ nene huli heta i-nidikevo aꞌmine kiapeꞌ neꞌmi anautiꞌ nene golise vuvoniꞌ ve.
2CO 12:1 Lelikumuꞌ do naba ogaꞌ neꞌmo nene eveneꞌ hize eleꞌ o-ledesaꞌmineꞌza nenikumuꞌ do naba ogo lamo mineloniꞌ aka nene ma nominako nemuꞌ nene neniꞌ monovoꞌnemuꞌ do naba ogo lolosuha aꞌminguꞌ nene Guvelesi veꞌmo do sotoꞌ o-nedavo initeꞌ ato atoꞌ veꞌneloꞌ o molangumukisi idoꞌ atoliꞌmine initeꞌ nelebizingumukisi nene lo-lengemelesuve.
2CO 12:2 Naza Kilisitoꞌ evenele mamuꞌ gele nouve (neniꞌ ve lo lo sotoꞌ oloniꞌ nene edamilihe loo ve maloꞌ lo nomuluvoniꞌ gilivo noluve). Aꞌmine ve aza nene kilisimasi fotini (14) ogo vineꞌ ne olihe apiꞌ olosa idotiꞌ nene okulumoꞌ nama minaaꞌ aniꞌ nene hulo hoꞌ ikeꞌni sonohiꞌ minaaꞌ aniꞌ nesi nene hulosa Oꞌmosoꞌmo eiꞌ minaaꞌ idaa nene eleꞌmizo dizineꞌ ve. Aꞌmine ve nene okoꞌnoꞌve hulosa dizo vihe idoꞌ okoꞌnoꞌvesi dizihe nemuꞌ nene gelamuve. Asi Oꞌmosoꞌmovoꞌ nene gele neive.
2CO 12:3 Aꞌmine ve nene Oꞌmosoꞌmo Okulumoꞌ ebeꞌ lamineꞌ Paladisiuꞌ nene eleꞌmizo dizavo aꞌmida nene gamazi lamineꞌ eveneꞌ laza lolonidoꞌ lisiheꞌ amuneꞌ idoꞌ lo sotoꞌ amaatoꞌ ve li li hukaniꞌ gamazi galauꞌ gilineꞌ nene gele nouha okoꞌnoꞌve hulosa dizo vihe idoꞌ okoꞌnoꞌvesi dizihe nemuꞌ nene naza ma gelamuve. Asi Oꞌmosoꞌmovoꞌ nene gele neive.
2CO 12:5 Ee, naza aꞌneꞌmine vemuꞌ do naba ogo ha lolosuha nenikumuꞌ nene do naba ogo ma lamolosuha asi gilizevo o nouvoniꞌ monovoꞌne nemukovoꞌ nene do naba ogo lolosuve.
2CO 12:6 Idoꞌ lamineꞌ naza nenikumuꞌ do naba ogo ma lolove lo giluvodiniko mo gamazi gihile laminekovoꞌ luvodinako neniꞌ nene negi minamuvodine. Neꞌmine minamuvodineꞌza eveneꞌ malite nenikumuꞌ gililizaniꞌ nene angiseꞌine nene neniꞌ monovoꞌnemuꞌ ningi gilaniꞌ votigile ivileꞌ ogo dizalive losa neꞌmine olosa gelamuve.
2CO 12:7 Idoꞌ Guvelesi veꞌmo ato atoliꞌmine initeꞌ gehepeve nelebizineꞌ nemuꞌ neniꞌ nene okoꞌno do dizalive loo lokosoloꞌ medeluvoniꞌ gilivosa okoꞌneuꞌ mene mulumo alumo do sotoꞌ o-nedekaꞌ o-nedekaꞌ ogo minelineꞌ initeꞌ nene ma nimineꞌ ve. Ee, neniꞌ nene okoꞌne do dizeloniꞌ aka hize tile-nedo aꞌmine initeꞌ nene ogo lovo o nemelive loo Guvelesi veꞌmo laavosa Sataniꞌmo imiselavo aꞌmine initeꞌ nene ogo lovo o nemekaꞌ nemekaꞌ neive.
2CO 12:8 Aꞌmine ogo lovo o nemekaꞌ nemekaꞌ ineꞌ initeꞌ nene Guvelesi veꞌmo do hulilive lo eita agae lo gamene setohamo luve.
2CO 12:9 Lokuvo Guvelesi veꞌmo tiꞌ lo lo nimineꞌ ve: Eveneꞌ gilizevo minavela nene neniꞌ amuzoꞌne ngelebizeloniꞌ aka gihile lamineꞌ nene sotoꞌ o-nedaaꞌ neineꞌ nenako nemuꞌ nene geiꞌ nasahiliꞌ o-gedaaꞌ nouvoniꞌ neꞌmo geita geni sotoꞌ o neineꞌ nene ha gehe do dizelineꞌ votigileloꞌ nesi nene ha vo do neive lo lineꞌ ve. Neꞌmino neineꞌ nenako nemuꞌ nene initeꞌ mamuꞌ do naba ogo lamo asi Kilisitoꞌ amuzoꞌve nenita sotoꞌ ogo minelingumuꞌ ve lo neniꞌ do gilizevo o-nedaaꞌ neineꞌ initekumukovoꞌ nene nolize izo do naba ogo lolosuve lo gele nouve.
2CO 12:10 Nemuꞌ nene naza Kilisitoꞌnimuꞌ nene gilizevo ogo minuvonguꞌ nehe idoꞌ eveneꞌ neniꞌ divi lediviꞌ i-nidanguꞌ nehe idoꞌ lihitehe akaloꞌ mine molo minuvonguꞌ nehe idoꞌ eveneꞌ malite goboni malaꞌ malaꞌ mili-nidanguꞌ nehe idoꞌ initeꞌ maliꞌmo akaꞌne gize gehepeve o-nidihe neꞌmine inguꞌ nene muluꞌneuꞌ goloso gelamo ha lamineꞌ gelo minaaꞌ nouve. Nene nanitekumuꞌ ve. Naza gilizevo o nouvoniꞌ gameneuꞌ neve nene Kilisitoda lehete o minuvodiꞌmo nene mo amuzo molo minaaꞌ nouve.
2CO 12:11 Naza negi monovoloꞌ eꞌmeto gamazi mene lo minuvoniꞌ nene lengiꞌ lengemenitineꞌmo ivosa nene luve. Ee, lingine di naba i-nidilizadoꞌ o neineꞌ nenako di naba ma i-nidadiniko naza nene neniꞌ do naba olodoꞌ ma minamuvodiinako neeve nene mo lengiꞌ lengemenitineꞌmo ivosa nene do naba ogo luve. Idoꞌ lingine di naba i-nidilizadoꞌ o neive noluvoniꞌ nene naza haza nitekisi noluha aꞌmine aposolo dizi nizave lavelotiꞌ nene ngomosiꞌ ma lemo minamuvoniꞌ nenako nemuꞌ nene noluve.
2CO 12:12 Ee, lengita minuvoniꞌ gameneloꞌ nene geni geheꞌmo ogo minuvongumuꞌ nene gele hulo ato atoliꞌmine suno vodine vineꞌ initeꞌ amuzo niteꞌ nene do sotoꞌ ogo aposololiti suno gehepeve nenita minineꞌ nene lengelebizuvoniꞌ ve.
2CO 12:13 Idoꞌ lingine gilavo naza Izesuꞌ evenele mulise linge mukiꞌ o-ngedaaꞌ uvoniꞌ initeꞌ neꞌmine nene lengiꞌ ma o-lengedamuvo engiꞌ nene lingivileꞌ igi nizaniꞌ nehe. Oꞌove. Engiꞌ o-ngiduvoniꞌ initeꞌ mukiꞌ nene lengikisi o-lengedosa initeꞌ hamokovoꞌ nene ma o-lengedamuvoniꞌ ve. Aꞌmine nene adoꞌ lengitatiꞌ nosoꞌ nitekisi idoꞌ initekisi nevoꞌmine ma damo minuvodiꞌmo nene geni ma gehe-lengedamuvoniꞌ ma neive. Neꞌmine amuvoniꞌ nenako neeve nene lengita monovo goloso o-lingiduvoniꞌ neivosa aꞌminemuꞌ nene naza agae loo lihimeꞌne mene huli-nidilo lolodoꞌ neihe. Neꞌmine ma lolodoꞌ nomive.
2CO 12:14 Gililo. Naza idise do vaꞌvaꞌ ogo mino lengita gohi alosa nouvoniꞌ nene mo gamene sitohamo ivosa nene nouve. Idoꞌ aloniꞌ nene aꞌmineꞌmine ogo geni ma gehe-lengedamolosuve. Naza gele nouvoniꞌ initeꞌ nene lengiꞌ mili nizaniꞌ initetine nemuꞌ nene gele nouvoba asi lengikumuꞌ neeve nene gele nouve. Neve nene nanitekumuꞌ ve. Izipahaꞌine nete izeꞌningine meꞌningine initeꞌ salani mili-ngidilizadoꞌ nene nizavoba asi izeꞌninge meꞌninge nete nene izipahaꞌine initeꞌ salani mili-ngidilizadoꞌ nene nizave.
2CO 12:15 Idoꞌ naza aꞌmineꞌmine ogo lengikumuꞌ nene nolize izo nenita minineꞌ initeꞌ nene hulosa neniꞌ minevoꞌ alevoꞌnesi nene hulo labuluvo gehepeve olosuve. Neꞌmino naza luꞌne lengeme nouvoniꞌ votigile do naba gidini okuvo neꞌmo nene lingine lutine nimaniꞌ votigile nene di ngomo ilizaniꞌ nene lisiheꞌ o neihe.
2CO 12:16 Idoꞌ eveneꞌ linge ma nenikumuꞌ nene tiꞌ li nilave: Eiꞌ nene geni ma gehe-lengedamo nolineꞌza eiꞌ nene tilikiloꞌ ve mino gotine izo daniꞌ noloseive.
2CO 12:17 Ee, eveneꞌ lengita ngimiselivela laavo ingine lengita igi initetine gotine izi diisa di vi imi nilisaave nilaniꞌ nene mo laminetoꞌ neniꞌ ngimiseluve hamoliꞌmosi ma neꞌmine idoꞌ nilahe. Mo oꞌove.
2CO 12:18 Naza Titoꞌni do ote-dekuvo lengita vineꞌ nene leze zuho masi ezesi makaꞌ imiselekuvo vasineꞌ ve. Neꞌmini vasinguꞌ Titoꞌ nene initetine ma tilikimi o-lengedo do nolihe. Oꞌove. Azasi laza nene lemeni dameni hamoliꞌminesi mino hamoꞌ monovoloꞌ eꞌmeto hamoꞌ gono noduneꞌ nenako ngelo neꞌmine amoloseive.
2CO 12:19 Gamazi haꞌna gizuninguꞌ mene lingine gilavo lengiꞌ vetidoꞌ leliꞌ monovote nene lamineꞌ ilive losa aꞌmine monovote nene hize eleꞌ ogo gizuneꞌ nehe. Oꞌove. Laza Kilisitoda giꞌmizo mino Oꞌmosoꞌmi veleloꞌ neve nene aꞌmine gamazi nene gizune. Idoꞌ gizuneꞌ gamazi mukiꞌ nene luꞌne lengeme nouvoniꞌ aleve lengiꞌ nene monokuꞌ do amuzo molo-lengedelesa nene gizune.
2CO 12:20 Idoꞌ neꞌmine o-lengedelesa gizuvoniꞌ nene naza ogo lengiꞌ ningeloniꞌ nene lingine neꞌmini minilisaaze lo giluvodiꞌmine igi minamavo ningelohe idoꞌ lingine ningikevo neniꞌ nene neꞌmino minaalive li giladiꞌmine ogo minelohe lo gopo gaꞌne nogelosa nene gizuve. Ee, naza lengita ogo lingine lovo lolize igaꞌ idoꞌ ge lukehe nebele ne lukehe gebele laaꞌ idoꞌ lingizeboloꞌ molaaꞌ idoꞌ mine eza ema igi hizi hoꞌlaaꞌ idoꞌ divi ledivika laaꞌ idoꞌ meheꞌnida gamazi laaꞌ idoꞌ eveneꞌ naba gehesaaꞌ idoꞌ di gopoꞌ napa igaꞌ monovo neꞌmine nene igi nizavo ogo ningelohe lo gopo gaꞌne nogiluve.
2CO 12:21 Ee, gohi naza lengita ogo hetelekuvo Oꞌmosoꞌne neꞌmo lengiꞌ vetidoꞌ lengiꞌ monovotinemuꞌ nene do leme-nedelihe lo gelo lengikutiꞌ eveneꞌ linge mukilite monovo goloso gomuꞌ daniꞌ adoꞌ lute do goloso ogaꞌ monovosi veneꞌ vemohoꞌ alu gipe gopo ingaaꞌ monovosi idoꞌ neꞌmine manaꞌmine monovo goloso ngovozo hilami gopo igaꞌ monovosi nene igi mili minaaꞌ angumuꞌ nene ingine luꞌine di velepeꞌ izami minikevo naza engikumuꞌ nene agae lo ive gaꞌne dizelidoꞌ o minelihe lo gelo gopo gaꞌne nogiluve.
2CO 13:1 Lengita alosa nouvoniꞌ meve nene gamene sitohamo ivosa alosuuve. Idoꞌ ogo gonitine geleloniꞌ nene monoꞌ godolouꞌ tiꞌ li gizi nizadoꞌ nene do molosa gele-lengedelesuve: Gamazi gono nidavo lihime daveꞌmi monovo li sotoꞌ ilizave nene sitape sitohamope neꞌminete mini hamoꞌ gamazivoꞌ likevosavoꞌ nene laminetoꞌ likeve li gili eleꞌvoleꞌ ilisave.
2CO 13:2 Nemuꞌ nene gomuꞌ lengikisi gamene sitaꞌ vo minuvoniꞌ gamenela nene lihime gomuꞌ daniꞌ alevesi idoꞌ eveneꞌ linge mukikisi lo-lingimuvoniꞌ gamazi nene idise lengikisi minamuvonguꞌ nene gohi tiꞌ lo hungoꞌ molo nolo-lingimuve: Gohi aloniꞌ nene isetine mo kekeꞌ izamolosuve.
2CO 13:3 Neꞌmine oloniꞌ nene Kilisitoꞌ nene nenita mine molo neivosa gamazi noluve noluvoniꞌ nene mo laminetoꞌ noluvoniꞌ monovo lengelebizelongumuꞌ nene lingine nilaniꞌ nenako nemuꞌ naza neꞌmi monovo do sotoꞌ ogo lengelebizeloniꞌ nene isetine izamolosuve. Ee, Kilisitoꞌ lengitoꞌ gono daaꞌ neineꞌ nene gilizevo ogo daaꞌ neivoba asi lengiꞌ vovotinguꞌ nene amuzo molo gono do minaaꞌ neineꞌ ma neive.
2CO 13:4 Laminetoꞌ aza nene gilizevo neꞌmine loloꞌ ogo neidoꞌ nene lohotoꞌ zaloꞌ bilaniꞌza Oꞌmosoꞌmi amuzo eita gono do minineꞌ neꞌmo nene gohi vele gizo minevoꞌ dovoꞌ ogo neive. Ee, laza nene eikisi aꞌmineꞌmine ogo gilizevo ogo noneꞌza Oꞌmosoꞌmi amuzo lelita gono ha do neineꞌ neꞌmo nene ezesi vete gizo minevoꞌ dovoꞌ ogo mino lengikumuꞌ ve losa nene gono dalosune.
2CO 13:5 Laminetoꞌ lingine nene mo monoꞌ lulouꞌ nene nizahe nizamahe neꞌmi monovo di sotoꞌ ilisa langisetine monovotine nene emenguꞌ mili izeꞌ mili di ningilo. Lengiꞌ lutinguꞌ lutinguꞌ Kilisitoꞌ mine molo neingumuꞌ nene langisetine nene gili guni amahe. Ee, lingine nene Oꞌmosoꞌmo ninge mate-lengedelidoꞌ minamavo ma nene mo laminetoꞌ Kilisitoꞌ nene lengiꞌ lutinguꞌ mine molo neive.
2CO 13:6 Idoꞌ neꞌmine o neinako lingine leliꞌ ningavoo Oꞌmosoꞌmo ninge mate-ledamivo ha gono dalonidoꞌ minelesune losa nogiluve.
2CO 13:7 Laza lengikumuꞌ nene monovo goloso hamokisi nene ma damilizahoo lo Oꞌmosola laaꞌ noune. Idoꞌ neꞌmine lo Oꞌmosola laaꞌ nouneꞌ nene lingine monovo goloso damii minikevo Oꞌmosoꞌmo leliꞌ nene ningaavo gono dalonidoꞌ lisiheꞌ o noneꞌ nene sotoꞌ ogo minelingumuꞌ ve losa nene ma losaꞌmune. Asi leliꞌ nene Oꞌmosoꞌmo ninge mate-ledavoo gono dalonidoꞌ lisiheꞌ amuneꞌ gele nolineꞌ nevosi nene alamo lingine monovo lisiheꞌ laminekovoꞌ igi mili minilizangumuꞌ ve losa nene laaꞌ noune.
2CO 13:8 Idoꞌ neꞌmine noluvoniꞌ nene laza initeꞌ ma oloninguꞌ nene gamazi gihile belo doꞌmo leme-delineꞌ initeꞌ nene mo kekeꞌ ngelo ma amolosune. Asi gamazi gihile hize eleꞌ ilineꞌ initekovoꞌ nene olosuunako nemuꞌ nene noluve.
2CO 13:9 Ee, lingine monokuꞌ amuzo mili minaaꞌ aniꞌ neꞌmo nene laza amuzote do sotoꞌ oloneꞌ akate nomivosa gilizevo ogo minaaꞌ oloneꞌ gamene mukiꞌ nene lolize izo minaaꞌ noune. Idoꞌ ma neemukisi nene Oꞌmosola laaꞌ noune: Adoꞌ lengiꞌ nene mudise di lisiheꞌ igi minilizave losa nene laaꞌ noune.
2CO 13:10 Idoꞌ naza lengita olihe amo mino neꞌmine gamazi mene nogize-lingiduvoniꞌ nene lengita alonguꞌ nene Guvelesi veꞌmo neme neineꞌ amuzo nene do sotoꞌ ogo lingine dovo gizevoꞌ ogo lengelemalove lo gele minosa nene nogize-lingiduve. Aꞌmine amuzo nimineꞌ nene monokuꞌ doꞌmo leme-lengedelongumuꞌ ve losa nevoba asi doꞌmo dize-lengedelongumuꞌ ve losa nene nimineꞌ ve.
2CO 13:11 Neze zuhokizo, gamazi gize osuꞌ lolosa lumola mene tiꞌ lo nolo-lingiduve: Longolize izisa minilo. Idoꞌ monokuꞌ nene di lisiheꞌ iꞌmi dizi minilo. Naza gamazi luvoniꞌ mene gili diisa minilo. Idoꞌ lutine gatineꞌve nene hamoliꞌminevoꞌ minivosavoꞌ nene minilo. Idoꞌ lengikuꞌ nene hongu li laminiivoꞌ minilo. Neꞌmine ikevo lulo lemo do hongu lo-ledaaꞌ neineꞌ Oꞌmoso neꞌmo nene lengikisi mine molo minelive.
2CO 13:12 Lingine nene Oꞌmosoꞌmi evenelelite ilizadoꞌ o minineꞌ monovoloꞌ nene igi ge nabutiꞌ ize ne gabutiꞌ ize li minaaꞌ ilo. Idoꞌ Oꞌmosoꞌmi evenele mukiꞌ nete nene longopoꞌni nilave.
2CO 13:13 Guvelesi ve Izesuꞌ Kilisitoꞌ nasahiliꞌve nene lengikisi mine molo neivo Oꞌmosoꞌmi lulo nesi lengita neivo idoꞌ Oꞌmosoꞌmi Sikalahuliꞌmo nene lengikisi bizo minaavo minilizahoo lo noluve. Modave.
GAL 1:1 Aposolo Pauloꞌ naza idoꞌ leze zuho Izesuꞌ aleve ingine mukikisi noneꞌ nesi nene lingine Izesuꞌ Kilisitoꞌ zuho mulise mukiꞌ Galatia misubouꞌ miniꞌmi monangumuꞌ nene luhuvo initeꞌ gize lengemelone loosa naza mene nogize lingimuze. Ningilo. Naza aposolo gono daaꞌ nouvoniꞌ nene haza evenelite neꞌmine gono nimi neleꞌmizi milaniꞌ nevoba asi Izesuꞌ Kilisitoꞌ asiꞌve nesi hilingutiꞌ do ote-dive meleho Oꞌmoso nesi neleꞌmizi milasineꞌ nenako nemuꞌ aposolo nouve noluvoniꞌ nene mo laminetoꞌ noluve.
GAL 1:3 Idoꞌ Oꞌmoso metehosi Guvetesi ve Izesuꞌ Kilisitokisi engiꞌ nasahiliꞌ i-lidaaꞌ nasineꞌ monovoꞌine nesi idoꞌ hongu lo lamino minaaꞌ monovoꞌine nesi nene lengita minelive lo Oꞌmosola noluve.
GAL 1:4 Meteho Oꞌmosoꞌmo lavo eiꞌ luloloꞌ eꞌmeto Guvetesi ve Izesuꞌ Kilisitoꞌ aza idise minaniꞌ alevetinguꞌ goloso ogo noningutiꞌ nene do luꞌ izelove lo eze okoꞌno hulo lihimete apaso hilineꞌ.
GAL 1:5 Nemuꞌ nene Oꞌmoso opoꞌni lovoꞌ lovoꞌ ogo mino mo izo huko-ledamivo minevoꞌ minevoꞌ ogo minelive lo mo aꞌminemuꞌ neꞌminovoꞌ miniliho lo noluve.
GAL 1:6 Lingine Kilisitoꞌ nasahiliꞌ o-lengedavo neꞌmo Oꞌmosoꞌmo eiꞌ evenele ve lo lengeleꞌmize molavo minangutiꞌ liteꞌ li mehedine imi evenelite monoꞌ gamazi lamineꞌ ve li gamazi atoꞌ li-lingimaniꞌ gili ngimaaꞌ naniꞌ nemuꞌ nene naza upuhoꞌ ogo aizo lo nogiluve.
GAL 1:7 Ne neiha Kilisitoꞌ gamaziꞌve lamineꞌ neꞌmine nene atoꞌ ma nomineꞌza eveneꞌ ma ingine nene lengiꞌ lutinguꞌ hizi di gopoꞌ napa i-lingidi Kilisitoꞌ gamaziꞌve lamineꞌ nene di atoꞌ igi di goloso ilisa laaꞌ nave.
GAL 1:8 Ingine neꞌmine igi Kilisitoꞌ gamaziꞌve lamineꞌ gomuꞌ vomila lo-lingimuneꞌ nene li-lingimami ma di gopo igi atoꞌ ma li-lingimilizave ingine nene Oꞌmosoꞌmo usiꞌ ize-ngedavo mo vi tolovo ilisave lo noluve. Mo nazasi neꞌmine ma olonikisi nene mo vo tolovo olosuve lo noluve. Idoꞌ Okulumokutiꞌ Oꞌmosoꞌmi angeloꞌ neꞌmineꞌmosi neꞌmine ma ilineꞌ nene Oꞌmosoꞌmi angeloꞌ noliha aꞌminesi mo vo tolovo oloseive.
GAL 1:9 Gomuꞌ lo-lingimuneꞌ nene idise gohi tiꞌ lo nolo-lingimuve: Ve ma ingine laza monoꞌ gamazi lo-lingimuneꞌ gili eleꞌvoleꞌ aniꞌ gamazi neꞌmine li-lingimami atoliꞌmine ma li-lingimilizave nene Oꞌmosoꞌmo usiꞌ ize-ngedavo vi tolovo ilisave.
GAL 1:10 Idoꞌ eveneꞌ malite nenikumuꞌ nene aza laminetoꞌ lamo ha eveneꞌ laniteꞌ gililizadokovoꞌ lo-ngemaaꞌ neive laaꞌ aniꞌ nene naza neꞌmine ogaꞌ uvodoꞌ ladiniko idise eveneꞌ ma vi tolovo ilisave noluvoniꞌ nene ngelo lo-ngimuvodibe. nGelo ma lo-ngemamuvodine. Nemuꞌ nene eveneꞌ laniteꞌ gililizadokovoꞌ lo-ngemamo Oꞌmosoꞌmo ninge lamineꞌ dalidokovoꞌ lo-ngemaaꞌ nouve. Ee, Kilisitoꞌ gelekeleꞌ ve loloꞌ oo minuvoniꞌ neꞌmo evenelite neniꞌ ngeli ninge lamineꞌ damilizadoꞌ nenako evenelite neniꞌ ninge lamineꞌ dalizave losa idisesi neꞌmine ogo ha minuvodiniko Kilisitoꞌ gelekeleꞌ ve loloꞌ ogo ma minamuvodine.
GAL 1:11 Neze zuhokizo, naza Kilisitoꞌ gamaziꞌve lamineꞌ lo-lingimuvoniꞌ mamuꞌ lo-lengemeloze. Gililo. Aꞌmine gamazi nene eveneꞌ malitidatiꞌ giluvoba evenelitesi apizi nimamavo Izesuꞌ Kilisitoꞌ asiꞌve lo sotoꞌ ogo lo-nimineꞌ ve. Nemuꞌ nene evenelite di sotoꞌ milaniꞌ gamazi nomive li gililizave losa nolo-lingimuve.
GAL 1:13 Idoꞌ Kilisitoꞌ gamaziꞌve lamineꞌ nene eveneꞌ malitesi li-nimamavo Kilisitoꞌ asiꞌve lo sotoꞌ ogo lo-nimive luvoniꞌ nene nemuꞌ luze. Gililo. Naza gomuꞌ Zuda veti monovoloꞌ eꞌmeto mino ogo molo minaaꞌ uvoniꞌ monovoꞌne nene lingine mo li-lingimikevo mo gili nizave. Naza nene neꞌmine noogo Oꞌmosoꞌmi evenele zuho do goloso palasa ogo osuꞌ lo-ngedelove lo neꞌmine olosa do goloso ogosa goboni molo-ngedaaꞌ uvoniꞌ ve.
GAL 1:14 Idoꞌ naza nene avotemotidatiꞌ monovo ngomoꞌ nabaꞌ nene lemo ongalive lo aꞌmine avotemotidatiꞌ gamazi nene amuzo goloso molo gele do mino neze gonoꞌnemote leliꞌ Zuda veutiꞌ minaniꞌ mukiꞌ nene ngivileꞌ ogo Zuda veti monokuꞌ nene dize veletoꞌ okaꞌ okaꞌ oꞌmo vo minuvoniꞌ nene lingine mo gili nizave.
GAL 1:15 Neꞌmino mino neꞌmine ogaꞌ uvoniꞌza izeꞌnehi mulunouꞌ olihe ha minuvonguꞌ do kegese-nedo nasahiliꞌ o-nidineꞌ neꞌmo aposolo loloꞌ iline lo neleꞌmize molave Oꞌmoso aza gala gelavo lamineꞌ ogavo eze gamaziꞌve lamineꞌ nene do vo Zuda ve minama veti zuho ato atoꞌ nene vo lo-ngemeꞌmo moneline lo eiꞌ gipeleꞌmi monovo nene lo sotoꞌ ogo nelebizavo naza neꞌmi monovo nene imineꞌ mili li-nimilizave lo aꞌmine gamazi nemuꞌ eveneꞌ hamokisi ma lo gele ha gele amo
GAL 1:17 idoꞌ Zelusalemi ebeta olihe aposolo loloꞌ amuvo gomuꞌ mili aposolo liliꞌ igi minave engitasi nene vamuvoniꞌza naza liteꞌ lo eveneꞌ vaiꞌ minamaniꞌ misubo Alabia nela vo mino alingeꞌ nene Damasiko numuno ebeta tineꞌ molo vo minuvoniꞌ ve. Idoꞌ neꞌmine ogo evenekisi gamazi lo gele ha gele amuvoniꞌ nemuꞌ nene naza monoꞌ gamazi lo-lengemaaꞌ nouvoniꞌ nene evenetatiꞌ nomineꞌ ve. Asi Kilisitodatiꞌ neineꞌ neive li lingine gililizave losa nolo-lingimuve.
GAL 1:18 Idoꞌ tineꞌ molo Damasiko numuno ebeta vo hetelo mino kilisimasi seto hamo hulosa Petoloꞌni ningo gamazi lo-emo eze gamazi gelelove lo Zelusalemi ebeta dizo vo salele sitakisi gamene hamokisi nene ezesi makaꞌ minusive.
GAL 1:19 Neꞌmino minuvoniꞌza aposolo linge ma nene ningamo Guvelesi ve Izesuꞌ nakunolo minive Zakoboꞌnivoꞌ nene ninguve.
GAL 1:20 Idoꞌ naza aꞌmine me gamazi nogize-lingiduvoniꞌ nene gosohoꞌ nasahaꞌ lo-lengemamo Oꞌmosoꞌmi veleloꞌ laminetoꞌ monoꞌ gamazi lo-lengemaaꞌ nouvoniꞌ nene evenetatiꞌ gelamo Kilisitodatiꞌ giluvoniꞌ nene nolo-lingimuve.
GAL 1:21 Nelotiꞌ Zudaia misubouꞌ minamo gohi alingeꞌ nene Silia misuboukosi Kilikia misuboukosi vuvoniꞌ ve.
GAL 1:22 Vuvoniꞌza Zudaia misubouꞌ Kilisitoꞌ evenele mulise ato atoꞌ minaniꞌ ingine nene nenikumuꞌ ma ningi gilamaniꞌ ve.
GAL 1:23 Ee, ingine nene neniꞌ monovoꞌnemuꞌ nene veꞌinedunuꞌ ma ningami gaꞌinedunukovoꞌ nene eveneꞌ malite li-ngimikevo tiꞌ li gilaniꞌ ve: Leliꞌ monoꞌ gamazite osuꞌ lilive lo leliꞌ goboni molo-ledaaꞌ ive maꞌmo idise nene aꞌmine monoꞌ gamazi nene gamazi lamineꞌ ve lo lo-ngemeꞌmo nomonive.
GAL 1:24 Nemuꞌ nenikumuꞌ nene Oꞌmoso opoꞌni li minaniꞌ ve.
GAL 2:1 Nelotiꞌ kilisimasi fotini (14) ogo vavo Banabasikisi Zelusalemi numuno ebeta gohi dizo vusineꞌ ve. Idoꞌ dizo vusinguꞌ nene Titoꞌnisi eleꞌmizo makatoꞌ vuneꞌ ve.
GAL 2:2 Idoꞌ dizo vuvoniꞌ nene haza dizo vamuve. Oꞌmosoꞌmo dizo vozo lo-nemavosa dizo vuvoniꞌ ve. Idoꞌ aꞌmida dizo vosa naza gono gomuꞌ duvoniꞌ nesi idoꞌ gono idise noduvoniꞌ nesi nene gopo soza initeꞌ do minuvoniꞌ gelalive losa Izesuꞌ evenele guveꞌinesi ve minave engikovoꞌ nene mulise mili minanguꞌ nene aꞌmine gono daaꞌ uvoniꞌ monovo nene lo-ngimuvoniꞌ ve. Adoꞌ Zuda ve minamave heta atoꞌ ve nene Kilisitoꞌnimuꞌ gamazi lamineꞌ lo-ngemaaꞌ nouvoniꞌ nene neꞌmine lo lo-ngemo idoꞌ leliꞌ Zuda veti monovo di tiꞌ igi okodine lolovo huki hulilizave lo lo-ngemesaꞌmuve lo aꞌmine lo-ngemaaꞌ uvoniꞌ gamazimuꞌ nene lo sotoꞌ o-ngemekuve. Neꞌmino lo sotoꞌ o-ngemekuvo ingine gilii lamineꞌ ve laniꞌ ve.
GAL 2:3 Idoꞌ Zuda ve ma nete Titoꞌnimuꞌ nene aza heta atoꞌ ve nGiliki ve minineꞌ nenako Moseꞌ louꞌ gamaziloꞌ eꞌmeti okoꞌno lolovo huki huli-di Zuda ve loloꞌ i-dilizave laniꞌza Izesuꞌ evenele guveꞌinesi ve nete gili ngimami Titoꞌnimukisi okoꞌno lolovo huki-dilizave lii ma li hukamaniꞌ ve.
GAL 2:4 Idoꞌ aꞌmine Zuda ve nete Titoꞌni okoꞌno lolovo huki huli-di Zuda ve loloꞌ i-dilizave laniꞌ nene Moseꞌ louꞌ gamaziloꞌ gelekeleꞌ ogo aꞌmineꞌmi lulouꞌ minunidotiꞌ Izesuꞌ Kilisitoꞌ aza evenele leliꞌ do apase-lidineꞌ nenako aꞌminemuꞌ gilisa edamive li gili mo laminetoꞌ nolihe li ningi gililisa ingine haleki sunoꞌ leliꞌ vovoteuꞌ igi gote izi Izesuꞌ evenele minaniꞌ gili mini aꞌmine louꞌ gamaziloꞌ gohi di gelekeleꞌ i-lidilizaniꞌ akamuꞌ viseꞌ igi minisa laniꞌ ve.
GAL 2:5 Ee, ingine nete heta atoꞌ ve nene okoꞌine lolovo huki huli-ngidi Zuda ve loloꞌ i-ngidilizave li amuzo mili laniꞌza laza ingine Izesuꞌnimuꞌ gamazi lamineꞌ nene di gopo igi li-lingimikelizave lo aꞌmine gamaziloꞌ gizebo lamineꞌ okunivo gamazi gihile nene lamineꞌ ha minelive lo engiꞌ gamaziloꞌ nene mo gele ngemamune. Ee, gamene ngomosi nene mo kekeꞌ gele ngemamo Titoꞌni okoꞌno lolovo nene ma huko hulo-damune.
GAL 2:6 Idoꞌ monokuꞌ guveꞌinesi ve minaniꞌ gili minave ingine nene naza monoꞌ gamazi lamineꞌ lo-ngemaaꞌ uvodoꞌ nene gamazi neꞌminesi imineꞌ molo lo-ngemelesane li ma li-nimamaniꞌ ve. Idoꞌ monokuꞌ guveꞌinesi ve minaniꞌ gilivo minaniꞌ ve luve ingine nene mo guveꞌinesi ve minaniꞌ nolihe naniꞌmine ve minaniꞌ nolihe nemuꞌ nene naza giluvo haza initeꞌ loloꞌ ogave. Oꞌmoso neꞌmo eveneꞌ ninge lamineꞌ daaꞌ neineꞌ nene ingine dizi minangumuꞌ ve losa idoꞌ limi minangumuꞌ ve losa ma nomive.
GAL 2:7 Ee, monokuꞌ guveꞌinesi ve minaniꞌ nete gamazi ma neꞌmino imineꞌ molo lo-ngemeline li li-nidamaniꞌ ve. Asi monokuꞌ eveneꞌ naba numuno langise neꞌmini oti minave ve li li-ngidaaꞌ ave Zakoboꞌ ve Petoloꞌ ve Zohaneꞌ ve nete lelikumuꞌ nene lingine leliꞌ daaꞌ uneꞌ gono maꞌmini daaꞌ asive nene nizasive. Nemuꞌ nene laza Zuda vetida mene gono nodunivo lingine nene heta atoꞌ vetida vi gono dalisive li Banabasingisi adeloꞌ daniꞌ ve. Idoꞌ neꞌmine li adeloꞌ daniꞌ nene tiꞌ li ningi gilaniꞌ nemuꞌ adeloꞌ daniꞌ ve: Petoloꞌ aza okoꞌine lolovo huki hulaaꞌ ave Zuda vela aposolo gono danguꞌ hize eleꞌ o-daaꞌ ive Oꞌmoso neꞌmo naza heta atoꞌ vetida gono do nouvonguꞌ nene aꞌmineꞌmine ogo hize eleꞌ o-nedaaꞌ neineꞌ nene sotoꞌ ogo minavo nelotiꞌ nene aꞌmine aposolo ingine Izesuꞌnimuꞌ gamazi lamineꞌ nene Zuda ve lo-ngemeline lo Oꞌmosoꞌmo Petoloꞌni imiselineꞌ maꞌmino neze nene Zuda ve minamaniꞌ heta atoꞌ vetida vo Izesuꞌnimuꞌ gamazi lamineꞌ nene lo-ngemeline lo Oꞌmosoꞌmo nimiselineꞌ nemukisi idoꞌ nasahiliꞌ o-nedo aposolo loloꞌ o-nidineꞌ nemukisi nene ningi gilaniꞌ nenako nemuꞌ nene heta atoꞌ vetida vi gono dalizo li adeloꞌ daniꞌ ve.
GAL 2:10 Ingine gamazi gohi li-limami gamazi hamoꞌ nene tiꞌ li li-limaniꞌ ve: Lingine heta atoꞌ vetida Izesuꞌ aleve monoꞌ li-ngimilisinguꞌ nene ingine Zudaia misubouko gohoꞌ gahaliꞌ minave nene hize eleꞌ i-ngidilizave li li-ngimilisingumuꞌ nene gatine molamivoo. Neꞌmine laniꞌ nene naza mo neꞌmine olosa amuzo molo minuvodoꞌ laniꞌ ve.
GAL 2:11 Idoꞌ alingeꞌ Petoloꞌ aza neniꞌ minuvoniꞌ numuno ebeꞌ Adiokiala ogosa aꞌmida initeꞌ ma ogo molo minineꞌ lisiheꞌ amineꞌ nene sotoꞌ ogavo nemuꞌ nene naza neida vo lo sotoꞌ ogo elemuvoniꞌ ve.
GAL 2:12 Idoꞌ elemuvoniꞌ nene neꞌmine ogo molo miningumuꞌ nene elemuvoniꞌ ve: Aza nene aꞌmine Adiokiala ogo hetelo mininguꞌ nene Izesuꞌ evenele zuho mukiliti guvetesi ve Zakoboꞌ aza Izesuꞌ evenele Zuda ve linge ma ngimiselavo Adiokiala olihe igi hetelamavo Peteloꞌ aza nene monovo lamineꞌ apizo Izesuꞌ evenele Zuda ve minamavesi nene gopo makatoꞌ nosoꞌ niteꞌ naaꞌ aniꞌ ve. Aza monovo lamineꞌ apizo neꞌmine ogaꞌ ineꞌza Zelusalemi ebetatiꞌ Zakoboꞌ ngimiselive ingine igi hetelikevo Petoloꞌ aza nene tiꞌ lo gelo golise gilineꞌ: Zuda ve linge mukiꞌ nene engiꞌ louꞌ gamaziloꞌ amuzo mili gili mini ingine heta atoꞌ ve gomuꞌ okoꞌine lolovo huki huli Zuda ve liliꞌ igisavoꞌ nene Izesuꞌ evenele liliꞌ ilisave laaꞌ nave. Nemuꞌ nene aꞌmine Zuda ve ingine nenikumuꞌ nene gaza heta atoꞌ vesi nosoꞌ niteꞌ makatoꞌ naniꞌ neꞌmo nene Zuda ve leliꞌ louꞌ gamazite nene avutoꞌ ogane li nelemilizahe lo gelo golise gilineꞌ. Nemuꞌ nene heta atoꞌ vesi nosoꞌ niteꞌ makatoꞌ naaꞌ adotiꞌ nene vo nokaꞌ minekaꞌ ogo mino gohi vo namo hulo lamineꞌ ineꞌ ve.
GAL 2:13 Idoꞌ aꞌmida Izesuꞌ zuho Zuda ve linge ma nesi Zuda vemuꞌ golise gilangumuꞌ nene aꞌmineꞌmine igi monovo di goloso igi ingine luꞌninguꞌ nene laza heta atoꞌvesi nosoꞌ niteꞌ makatoꞌ naaꞌ nouneꞌ nene lisiheꞌ o neive li ha gili minaniꞌ nene di haleki heta atoꞌ vesi makatoꞌ naaꞌ aniꞌ nene hulikevo neꞌmo Banabasiꞌ nesi engikuꞌ vo giꞌmizo aꞌmine monovoloꞌ eꞌmeto aꞌmineꞌmine ineꞌ ve.
GAL 2:14 Ingine Izesuꞌ zuho heta atoꞌ ve minanikisi makatoꞌ nosoꞌ niteꞌ naaꞌ adotiꞌ huli alamaniꞌ neꞌmo Kilisitoꞌ gamazi lamineliꞌmi akauꞌ lisiheꞌ igi vamavo naza ningo Izesuꞌ evenele linge mukiliti veꞌnidoꞌ nene Petoloꞌni tiꞌ lo lo-imuve: Gaza nene Zuda veutiꞌ sotoꞌ aineꞌ mino Zuda veti monovo hulo heta atoꞌ vela bizaaꞌ anive neke nene heta atoꞌ vela bizo nosoꞌ niteꞌ makatoꞌ naaꞌ adotiꞌ hulo alamo minaineꞌ neꞌmo nene heta atoꞌ ve ingine gilavo gomuꞌ Zuda ve loloꞌ ikevosavoꞌ nene laza Izesuꞌ evenele Zuda ve minunekisi nene bizo minelesune laineꞌ gelave. Nemuꞌ nene heta atoꞌ ve nene Zuda veti monovoloꞌ ngeleꞌmize molalosa ilineꞌ nene ngelo lisiheꞌ ilihe lo lo-imuve.
GAL 2:15 Mo laminetoꞌ laza nene Zuda ve minamaniꞌ heta atoꞌ zuho Moseꞌ louꞌ gamazi gilami gopoꞌnapa minaaꞌ aveutiꞌ sotoꞌ uneꞌ nevoba Moseꞌ louꞌ gamazi di minave Zuda veutiꞌ sotoꞌ uneꞌ noneꞌza
GAL 2:16 laza tiꞌ lo gele none: Moseꞌ louꞌ gamaziloꞌ nene ngelo eꞌmeto osuꞌ lamoloneꞌ nenako aꞌmine louꞌ gamaziloꞌ eꞌmeto mineloneꞌ neꞌmo do gamazite nomineꞌ loloꞌ o-ledamo eveneꞌ hamokisi Oꞌmosoꞌmo do luꞌ izelidoꞌ do lisiheꞌ gehepeve o-ledamoloseinako nemuꞌ nene Oꞌmosoꞌmo eveneꞌ do luꞌ izelidoꞌ do lisiheꞌ o-ledelineꞌ nene louꞌ gamaziloꞌ eꞌmeti minangumuꞌ ve losa nevoba ingine Izesuꞌ Kilisitoꞌnimuꞌ gili eleꞌvoleꞌ angumuꞌ ve losa do luꞌ izelidoꞌ do lisiheꞌ o-ledeleseive. Nemuꞌ nene laza louꞌ gamaziloꞌ eꞌmeto minuneꞌ neꞌmo do luꞌ izelidoꞌ do lisiheꞌ o-ledamivo Kilisitoꞌnimuꞌ gele eleꞌvoleꞌ oloneꞌ neꞌmovoꞌ nene do luꞌ izelidoꞌ do lisiheꞌ o-ledeleseive lo laza Zuda ve lingela nene Izesuꞌ Kilisitoꞌnimuꞌ gele eleꞌvoleꞌ uneꞌ ve.
GAL 2:17 Idoꞌ Kilisitoꞌnimuꞌ gele eleꞌvoleꞌ okunivo neꞌmovoꞌ nene Oꞌmosoꞌmo do luꞌ izelidoꞌ do lisiheꞌ o-ledeleseive lo gelo louꞌ gamaziloꞌ eꞌmetaaꞌ akaloꞌ vamuneꞌ neꞌmo lazasi heta atoꞌ ve neꞌmine louꞌ avutoꞌ ogaꞌ unive minuneꞌ gelavo nemuꞌ Kilisitoꞌ aza nene eveneꞌ lihime daaꞌ akaloꞌ leleꞌmize molaaꞌ ive neive lisa gililizaha oꞌve mo kekeꞌ ne nomive.
GAL 2:18 Idoꞌ lingine mo gili nizave. Petoloꞌ aza heta atoꞌ vesi nosoꞌ niteꞌ ni minaaꞌ adiꞌmo Zuda veti louꞌ gamazi nene mo hulo alamineꞌ ve. Idoꞌ alingeꞌ heta atoꞌ vesi nosoꞌ niteꞌ makaꞌ naaꞌ aniꞌ nene hulo haza minidiꞌmo aꞌmine gomuꞌ hulokineꞌ louꞌ gamazi nene gohi amuzo molalive lo gohi do oto eꞌmetineꞌ gilineꞌ ve. Idoꞌ laza aꞌmineꞌmine ogo louꞌ gamaziꞌmi lulouꞌ minaaꞌ monovo mudise hulokuneꞌ nene gohi ma do oto eꞌmetunidiniko laza lamineꞌ mo louꞌ gamazi avutoꞌ ogo lihime daaꞌ unive minuneꞌ nene do sotoꞌ unidine.
GAL 2:19 Idoꞌ neꞌmine luvoniꞌ nene nemuꞌ luvoniꞌ ve: Louꞌ gamazi nene ngenga lo gele damuvo aꞌmine neꞌmo nebele hilineꞌ gelavo neꞌmo louꞌ gamaziꞌmi gesi minguꞌ minuvoniꞌ nene osuꞌ lineꞌ. Idoꞌ osuꞌ lineꞌ nene naza Oꞌmosoꞌmo luꞌne do ote-nedeꞌmo vo minivo eiꞌ lilidokovoꞌ ezemuꞌ gelo ogo molo minelove lo nemuꞌ louꞌ gamaziꞌmi gesi minguꞌ nene gohi ma minamuvoniꞌ ve. Kilisitoꞌni nene neniꞌ lihimeꞌnemuꞌ lohotoꞌ zaloꞌ bilanguꞌ nene nenikisi makaꞌ nibili hilaniꞌ gelavo nouve.
GAL 2:20 Neꞌmine ogo naza nene veꞌnesi ha minevoꞌ alevoꞌ nouha Kilisitoꞌ neꞌmo luꞌneuꞌ minevoꞌ dovoꞌ ogo minidiꞌmo nene nouve. Idoꞌ idise me misubouꞌ minevoꞌ alevoꞌ ogo nouvoniꞌ nene Oꞌmosoꞌmi gipele aza lulo nemo nenikumuꞌ lohotoꞌ zaloꞌ hilive eikumuꞌ gele eleꞌvoleꞌ ogo nouve.
GAL 2:21 Idoꞌ Oꞌmosoꞌmi louꞌ gamazi nene gele dokunivo lihimete nomineꞌ minelonidoꞌ minidiniko Kilisitoꞌ nene hazamuꞌ hilidine. Neꞌmine idinako Oꞌmosoꞌmo nasahiliꞌ o-ledo Kilisitoꞌni imiselavo ogo lihimetemuꞌ hilineꞌ nemuꞌ nene gele hulo naza Moseꞌ louꞌ gamaziloꞌ nene gele dosavoꞌ lihimeꞌne nomineꞌ minelesuve lamolosuve. Neꞌmine ma oloniꞌ nene Oꞌmosoꞌmo nasahiliꞌ o-ledo Kilisitoꞌni imiselavo lihimete nomivo mineloneꞌ akate vele-lidineꞌ nene hazamuꞌ vele-ledave lo meheꞌne imuvoniꞌ geleleseinako nemuꞌ nene mo kekeꞌ meheꞌne emamolosuve.
GAL 3:1 Agae, Galatia aleve lingine nene Izesuꞌ Kilisitoꞌ lohotoꞌ zaloꞌ hilineꞌ monovomuꞌ nene do lanosa lo sotoꞌ ogo lo-lengemekunivo lingine gilaniꞌ nene mo vetinedunuꞌ ninganiꞌ gilineꞌ nenako lingine negi neꞌmine hizi Moseꞌ louꞌ gamaziꞌmi gesi minguꞌ vilisa naniꞌ nene zaho gatine hizo lengeleꞌmize gopo ogavosa neꞌmine nave.
GAL 3:2 Neꞌmine naniꞌ nemuꞌ nene lingine mene ma longoꞌ o-lengedelouze. Gililo. Lingine Oꞌmosoꞌmi Sikalahuꞌ di tiꞌ aniꞌ ma nene Moseꞌ louꞌ gamaziloꞌ eꞌmeti minisa daniꞌ nehe. Ne nomive. Lingine Izesuꞌ Kilisitoꞌnimuꞌ gilisa ezemuꞌ gili eleꞌvoleꞌ igi minaniꞌ neꞌmo Oꞌmosoꞌmi Sikalahuꞌ nene di tiꞌ aniꞌ ma neive.
GAL 3:3 Lingine ganaꞌ nene Oꞌmosoꞌmi Sikalahuꞌ nene di tiꞌ igi eiꞌ amuzololoꞌ minaniꞌ nene mo hulisa lingine louꞌ gamaziꞌmi gesi minguꞌ vo leliꞌ amuzotelokovoꞌ mino monovote mudise do lamineꞌ olone li gilaniꞌ nolineꞌ nene mo negi gatine gehepeve gilaniꞌ ve.
GAL 3:4 Idoꞌ lingine gomuꞌ Oꞌmosoꞌmi Sikalahuꞌ di tiꞌ igi nizavo lengita ato atoꞌ monovo vaiꞌ goloso sotoꞌ o lingimineꞌ ma nene hazamuꞌ nehe. Eꞌe, hazamuꞌ sotoꞌ o lingimineꞌ nomive losa gele nouve.
GAL 3:5 Idoꞌ lingine Oꞌmosoꞌmo Sikalahuꞌ lehize-lengedo eleꞌvoleꞌ suno lengikuꞌ do sotoꞌ ogaꞌ ineꞌ ma nene louꞌ gamaziloꞌ gili di gono di minangumuꞌ neꞌmine ineꞌ nehe idoꞌ Izesuꞌ gamazi gili gili eleꞌvoleꞌ angumuꞌ neꞌmine ineꞌ neve.
GAL 3:6 Monoꞌ godolouꞌ tiꞌ li gizi nizaniꞌ ma neive: Abalahamuꞌ Oꞌmosomuꞌ gele eleꞌvoleꞌ ogavo nemuꞌ Oꞌmosoꞌmo gelavo ve lisiheꞌ lihimeꞌve nomineꞌ loloꞌ ineꞌ. Idoꞌ Oꞌmosoꞌmo Abalahamuꞌni initeꞌ o-dineꞌ nesi idoꞌ lengikuꞌ eleꞌvoleꞌ suno do sotoꞌ ogaꞌ ineꞌ nesi nene hamoꞌ monovo angumuꞌ do sotoꞌ o-lingidineꞌ nenako Abalahamuꞌ Oꞌmosomuꞌ gele eleꞌvoleꞌ ineꞌ neꞌmine igi lingine Izesuꞌnimuꞌ gili eleꞌvoleꞌ igi minangumuꞌ ve losa eleꞌvoleꞌ suno lengikuꞌ nene do sotoꞌ ogaꞌ ineꞌ ve.
GAL 3:7 Idoꞌ Abalahamuꞌ Oꞌmosomuꞌ gele eleꞌvoleꞌ ineꞌ nemuꞌ nene Oꞌmosoꞌmo ve lisiheꞌ ve lo-dineꞌza lengiꞌ gatine hizave nene tiꞌ li li-lingimi nilisave: Oꞌmosoꞌmi evenele zuho nene Abalahamuꞌ aꞌvopilemoꞌ okoꞌine lolovo huki huli Moseꞌ louꞌ gamaziꞌmi gesi minguꞌ minavevoꞌ nene Oꞌmosoꞌmi zuho nizave. Neꞌmine li li-lingimi nilisaha aꞌmine monoꞌ godolouꞌ neineꞌ gamazi Abalahamuꞌ monovomuꞌ luvoniꞌ malotiꞌ nene lingine neꞌmine li ningi gililisave: Abalahamuꞌ zuho gihile nene eze aꞌvopilemoꞌ minave nene nizavoba asi eveneꞌ ma ingine eze emeni dameniꞌve di tiꞌ igi eze ogaꞌ idiꞌmine igi Oꞌmosomuꞌ gili eleꞌvoleꞌ igaꞌ ave nene Abalahamuꞌ zuho gihile nene nizave.
GAL 3:8 Idoꞌ Abalahamuꞌ aꞌvopilemoꞌ minamaniꞌ eveneꞌ heta atoꞌ ve inginesi Oꞌmosomuꞌ alingeꞌ gili eleꞌvoleꞌ ikevo nemuꞌ nene Oꞌmosoꞌmo lihimeꞌine hulo-ngedo do lisiheꞌ o-ngedelineꞌ nene mo gele mino aza Oꞌmosoꞌmo aꞌminemuꞌ nene Abalahamuꞌni gamazi lamineꞌ tiꞌ lo lo-imineꞌ monoꞌ godolouꞌ tiꞌ li gizi nizaniꞌ ma neive: Geitatiꞌ noꞌnohoka nene eveneꞌ zuho ato atoꞌ mukita do sotoꞌ o-ngedelesuve.
GAL 3:9 Nemuꞌ nene Abalahamuꞌ aza gele eleꞌvoleꞌ ogaꞌ ive mine do vo minineꞌ neꞌmine igi gili eleꞌvoleꞌ igaꞌ nave ingine nene Oꞌmosoꞌmo Abalahamuꞌni noꞌnohoꞌ ize-do aꞌmineꞌmine ogo engikisi noꞌnohoꞌ ize-ngedaaꞌ neive.
GAL 3:10 Idoꞌ monoꞌ godolouꞌ tiꞌ li gizi nizaniꞌ ma neive: Ve ma ingine aꞌmine louꞌ gamazi gizi nizaniꞌ mukiꞌ nene gili dii osuꞌ liꞌmi vi minami aꞌmingutiꞌ ma hitilizaniꞌ nene Oꞌmosoꞌmo mudise vi tolovo ilisave lo engikumuꞌ usiꞌ ize-ngedo lo huko lo-ngede neive. Idoꞌ tiꞌ li gizi nizaniꞌ nenako ve ma ingine aꞌmine Moseꞌ lo huko lineꞌ louꞌ gamaziloꞌ nene gele dokunivo aꞌmineꞌmo do luꞌ izelihe li aꞌmidoꞌ eꞌmetaaꞌ ave nene Oꞌmosoꞌmo mudise vi tolovo ilisave lo usiꞌ ize-ngedo lo huko lineꞌ gamaziꞌmi lulouꞌ nene vi hilaaꞌ nave. Nemuꞌ nene louꞌ gamaziꞌmi gesi minguꞌ vaaꞌ nave nene Oꞌmosoꞌmo noꞌnohoꞌ ize-ngedaaꞌ neive li li-lingimaniꞌ nene mo laminetoꞌ li-lingimamave.
GAL 3:11 Ee, ve ma gili eleꞌvoleꞌ igi minilizadiꞌmo Oꞌmosoꞌmi veleloꞌ lihimeꞌine nomineꞌ minilizave ingine hazavoꞌ eleꞌvoleꞌ igi mini di vi minilizave li monoꞌ godolouꞌ gizi nizaniꞌ nenako nemuꞌ nene Moseꞌ louꞌ gamaziloꞌ eꞌmeto minelonidotiꞌ Oꞌmosoꞌmi veleloꞌ lihimete nomineꞌ minelonidoꞌ nomineꞌ nene mo sotoꞌ o neive.
GAL 3:12 Ne neiha louꞌ gamazi dokunivo neꞌmo do luꞌ izeleseive laaꞌ nave ingine nene Oꞌmosomuꞌ gele eleꞌvoleꞌ ogaꞌ monovoloꞌ mini mili minisaꞌmaniꞌza ingine monoꞌ godolouꞌ tiꞌ li gizi nizaniꞌ gamaziꞌmi lulouꞌ nene vi hilaniꞌ ve: Louꞌ gamazi gili dalizave ingine louꞌ gamazi ngomoꞌ nabaꞌ mukiꞌ nene gili di osuꞌ lilizaniꞌ neꞌmo nene hazavoꞌ eleꞌvoleꞌ igi mini di vi minilisave.
GAL 3:13 Ne neiha louꞌ gamaziloꞌ nene ngelo gele do osuꞌ lamoloneꞌ o neineꞌ nenako neꞌmo Oꞌmosoꞌmo mudise vi tolovo ilisave lo usiꞌ izo lo huko lo-lidineꞌ gamaziꞌmi lulouꞌ nene vo huluneꞌ ve. Idoꞌ laza aꞌminguꞌ vo hulunidotiꞌ Kilisitoꞌ aza eze okoꞌno nene hulo meni hizo do tineꞌ molo-lidineꞌ ma neive. Idoꞌ do tineꞌ molo-lidineꞌ aka nene neꞌmino neive. Monoꞌ godolouꞌ gamazi ma tiꞌ li gizi nizaniꞌ ma neive: Eveneꞌ zaloꞌ ngibili badave nene Oꞌmosoꞌmo usiꞌ ize-ngidive nizave. Kilisitoꞌ nene leliꞌ lihimetemuꞌ lohotoꞌ zaloꞌ bili badikevo lelitoꞌ medelo Oꞌmosoꞌmo usiꞌ ize-dive loloꞌ ogave.
GAL 3:14 Idoꞌ Kilisitoꞌ neꞌmine ineꞌ nene eiꞌ Izesuꞌ Kilisitoda vo giꞌmizekunivo Abalahamudatiꞌ noꞌnohoꞌ nene numudoꞌ namadoꞌ ve lelita vo osuꞌ lavo ezemuꞌ gele eleꞌvoleꞌ ogo minekunivo neꞌmo Oꞌmosoꞌmo Sikalahuꞌve lemelove lo lo huko-lidineꞌ nene mo eleꞌvoleꞌ ogavo daloningumuꞌ ve losa neꞌmine ineꞌ ve.
GAL 3:15 Neze zuhokizo, eveneꞌ laza ogo molo ogaꞌ nouningutiꞌ naza haza avazaha gamazi ma loloze. Gililo. Ve ma aza eveneꞌ mamuꞌ gamazi ma lo huko-do aꞌmine gamazi nene amuzo molo minelive lo luhuvo gize molavo aꞌmine gamazi nene haza eveneliti gamazi neiha eveneꞌ malitesi mo kekeꞌ aꞌmine gamazi lo huko luhuvo gize molaniꞌ nene di hulisa atoꞌ gamazi gohi ma imineꞌ mili ma lamilisave.
GAL 3:16 Nemuꞌ nene Oꞌmoso neve Abalahamuꞌni initeꞌ lamineꞌ ma do sotoꞌ o-delesa gamazi lo huko lo-dineꞌ nenako aꞌmine gamazi di hulisa atoꞌ gamazi gohi ma imineꞌ mili ma lamilisave. Aꞌmine lo huko lineꞌ gamazi nene Abalahamuꞌnimukisi idoꞌ aꞌvopilemokumukisi nene lo-ngidineꞌ ve. Idoꞌ aꞌmine lo-ngidinguꞌ nene gaꞌvopilemoꞌ mukikumuꞌ noluve lamo gaꞌvopilemokumuꞌ noluve lineꞌ nenako nemuꞌ nene aza eveneꞌ mukikumuꞌ lamo eveneꞌ hamokumukovoꞌ lineꞌ gelave. Idoꞌ aꞌmine aꞌvopilemoꞌ hamoꞌ nene Kilisitoꞌnimuꞌ lineꞌ ve.
GAL 3:17 Idoꞌ Oꞌmosoꞌmo Abalahamuꞌnimuꞌ lo huko lo-dineꞌ gamazi nene di hulisa atoꞌ gamazi gohi ma imineꞌ mili ma lamilisave luvoniꞌ nene nemuꞌ noluve: Oꞌmosoꞌmo gozopoꞌ nene aꞌmine lehize-ledelineꞌ initekumuꞌ nene Abalahamuꞌni lo huko-davo nelotiꞌ alingeꞌ kilisimasi fo hadeti teoti (430) ogo vavo Moseꞌ gizineꞌ louꞌ gamazi nene sotoꞌ ogo minineꞌ ve. Idoꞌ aꞌmine louꞌ gamazi nene alingeꞌ sotoꞌ ineꞌ nenako Oꞌmosoꞌmo gomuꞌ Abalahamuꞌnimuꞌ lo huko lineꞌ gamazi nene ivileꞌ ogavo haza gamazi ma loloꞌ amoloseive.
GAL 3:18 Ee, lingine mo gili nizave. Laza nene tiꞌ lo laaꞌ noune: Oꞌmosoꞌmo salani molo-lidineꞌ initeꞌ lemelineꞌ nene initeꞌ ma okunivo lemelivoba Oꞌmoso aza ha lemelove lo lo huko-lidineꞌ gamaziꞌve nene do gihile izelove losa haza gidini lemeleseive laaꞌ noune. Idoꞌ lengiꞌ gatine hizave nete tiꞌ li laaꞌ nave: Oꞌmosoꞌmo salani molo-lidineꞌ initeꞌ lemelineꞌ nene haza gidini lemamoloseive. Asi laza Moseꞌ louꞌ gamaziloꞌ eꞌmeto minekunivosavoꞌ nene menite gidini neꞌmine nene lemeleseive laaꞌ nave. Idoꞌ ingine neꞌmine laaꞌ naniꞌ gamazi nene laminetoꞌ likeve losa Moseꞌ louꞌ gamaziloꞌ eꞌmeto minekunivosavoꞌ nene Oꞌmosoꞌmo salani molo-lidineꞌ initeꞌ nene menite neꞌmine lemaaꞌ idiniko leliꞌ laaꞌ nouneꞌ gamazi nene gosohoꞌ luneꞌ gelavo Oꞌmosoꞌmo ha lemelove lo lo huko-lidineꞌ gamaziꞌve nene do gihile izelove lo lemelesa lineꞌ initeꞌ nene haza gidini lemamidine. Idoꞌ haza nene lemamidineꞌza Oꞌmosoꞌmo Abalahamuꞌni emelove lo lo huko-dineꞌ initeꞌ imineꞌ nene initeꞌ mamuꞌ emamo ha gemelove lo lo huko-dineꞌ gamaziꞌve nene do gihile izelove losa haza gidini imineꞌ nenako nemuꞌ nene Oꞌmoso aza lemelove lo lo huko salani molo-lidineꞌ initeꞌ lemelineꞌ nene louꞌ gamaziloꞌ eꞌmeto minuningumuꞌ lemelivoba asi lo huko-lidineꞌ gamaziꞌve nene do gihile izelove losavoꞌ nene lemeleseive lo mo laminetoꞌ gele none. Idoꞌ nemuꞌ nene moseꞌ louꞌ gamazi neꞌmo Oꞌmosoꞌmo gomuꞌ lo huko lineꞌ gamazi nene ivileꞌ amoloseive.
GAL 3:19 Neꞌmino neivo ma Moseꞌ louꞌ gamazi nene nanitekumuꞌ do sotoꞌ o-lidineꞌ neve li longoꞌ ilisave. Oꞌmosoꞌmo aꞌmine louꞌ gamazi do sotoꞌ o-lidineꞌ nene nemuꞌ do sotoꞌ o-lidineꞌ ve. Adoꞌ louꞌ gamaziꞌve avutoꞌ ogaꞌ nouneꞌ monovote nene aꞌmine louꞌ gamazi neꞌmo do sotoꞌ ogo lelebizelive losa do sotoꞌ o-lidineꞌ ve. Idoꞌ neꞌminemuꞌ do sotoꞌ o-ledosa aꞌmine louꞌ gamazi nene mudise minelive losa do sotoꞌ o-ledamo asi aꞌmine louꞌ gamazi minelineꞌ nene aza gamazi lo huko-dive adoꞌ Abalahamuꞌ aꞌvopilemoꞌ olihe amineꞌ gameneukovoꞌ minelive losa do sotoꞌ o-lidineꞌ ve. Idoꞌ asiꞌve Oꞌmoso neꞌmo aꞌmine louꞌ gamazi nene eveneꞌ leliꞌ adeuꞌ gehepeve lemamive. Eveneꞌ di ngimilo lo angeloꞌ nene ngemavo di igi leliꞌ goholusoꞌ vete Moseꞌni imikevo do limineꞌ ve.
GAL 3:20 Neꞌmine o neineꞌza ve maliꞌmo goholusoꞌ ve loloꞌ ogo minelineꞌ nene eveneꞌ hamokumukovoꞌ minamoloseive. Eveneꞌ sitalitisi gamaziꞌine do hamoꞌ olosa mineleseive. Idoꞌ aꞌmine eveneꞌ sitaꞌ ingine gamaziꞌine di hamoꞌ nasivo engikutiꞌ maliꞌmo aꞌmine lasineꞌ gamaziꞌnidoꞌ ma gele damilineꞌ nene aꞌmine gamaziꞌine li di hamoꞌ asineꞌ nene doꞌmozeleseive. Aꞌmineꞌmine ogo Oꞌmosoꞌmo louꞌ gamazi do sotoꞌ o-ngidinguꞌ ezesi gamazi li di hamoꞌ aniꞌ nene eveneꞌ nete gili damavo aꞌmine louꞌ gamazi nene doꞌmozave. Ne neiha Abalahamuꞌni gamazi lo huko-dive Oꞌmoso aza nene eveneꞌ hamoꞌ mino lo huko-lidineꞌ nenako asiꞌve neꞌmo gamaziꞌve nene do amuzo molavo ngelo ma doꞌmozamoloseive.
GAL 3:21 Idoꞌ neꞌmino neivo ma Moseꞌ louꞌ gamazi neꞌmo nene Oꞌmosoꞌmo gomuꞌ lo huko-lidineꞌ gamazi nene molo hite-do minevoꞌ minevoꞌ lemeni dameni daloneꞌ aka atoꞌ gohi do sotoꞌ o-lede neihe. Oꞌove. Mo kekeꞌ neꞌmine ma amive. Leliꞌ nene eveneꞌ lisiheꞌ gehepeve loloꞌ o-ledo minevoꞌ minevoꞌ lemeni dameni do sotoꞌ o-ledelidoꞌ lisiheꞌ o minineꞌ louꞌ gamazi nene ma limidiniko aꞌmine louꞌ gamazi gele dunidotiꞌ eveneꞌ lisiheꞌ gehepeve loloꞌ unidineꞌza aꞌmine neꞌmine olonidoꞌ do lisiheꞌ o-ledelineꞌ louꞌ gamazi ma nomive. Idoꞌ nomineꞌ nenako nemuꞌ nene Moseꞌ louꞌ gamazi neꞌmo Oꞌmosoꞌmo minevoꞌ minevoꞌ lemeni dameni haza gidini lemelove lo gomuꞌ lo huko-lidineꞌ gamazi molo hite-do minevoꞌ minevoꞌ lemeni dameni daloneꞌ aka atoꞌ gohi ma do sotoꞌ o-ledamive lo noluvoniꞌ ve.
GAL 3:22 Ee, aꞌmine louꞌ gamazi gele dunidotiꞌ eveneꞌ lisiheꞌ gehepeve loloꞌ unidineꞌza monoꞌ godolouꞌ nene eveneꞌ mukiꞌ louꞌ gamazi linge ma avutoꞌ igi minisa lihime daaꞌ monovoꞌmi galapuso ve nizave li gizi nizavo louꞌ gamazi neutiꞌ lihimete nomineꞌ mino minevoꞌ minevoꞌ lemeni dameni daaꞌ akaꞌve nene ma sotoꞌ amive. Idoꞌ louꞌ gamaziutiꞌ sotoꞌ amineꞌ nene Oꞌmosoꞌmo Izesuꞌ Kilisitoꞌnimuꞌ gili eleꞌvoleꞌ igi minilizangumuꞌ ve lo aꞌmine haza lemelove lo lo huko lineꞌ initeꞌ nene ezemuꞌ gili eleꞌvoleꞌ ave ngemeleseive losa nene louꞌ gamaziutiꞌ sotoꞌ amineꞌ ve. Nemuꞌ nene Moseꞌ louꞌ gamaziꞌve neꞌmo nene Oꞌmosoꞌmo haza lemelove lo lo huko-lidineꞌ gamaziꞌveloꞌ nene ataize neꞌmine lo-do molo hitelidoꞌ o neive lo lamolosune.
GAL 3:23 Idoꞌ laza gele eleꞌvoleꞌ oloneꞌ akate do sotoꞌ o-ledelive Kilisitoꞌ nene olihe sotoꞌ amivosa laza nene louꞌ gamazi neꞌmo galapuso gono lemo do minivo mino Kilisitoꞌnimuꞌ gele eleꞌvoleꞌ oloneꞌ akate sotoꞌ ilineꞌ nene sotoꞌ ilingumuꞌ gizebo ogo minune.
GAL 3:24 Nemuꞌ nene Kilisitoꞌnimuꞌ gele eleꞌvoleꞌ okunivo neꞌmovoꞌ lihimete nomineꞌ minelone losa louꞌ gamazi neꞌmo Kilisitoꞌ alingumuꞌ nene gizebo o-ledo leleꞌmize akaloꞌ ogo minineꞌ ve.
GAL 3:25 Idoꞌ aꞌmine Kilisitoꞌ mo ogavo ezemuꞌ mo gele eleꞌvoleꞌ ogosa laza nene louꞌ gamaziꞌmi gizebouꞌ nene gohi ma minamune.
GAL 3:26 Idoꞌ neꞌmine luvoniꞌ nene lingine mo Kilisitoda igi giꞌmizi ezemuꞌ gili eleꞌvoleꞌ igi minikevo neꞌmo nene mukitoꞌ Oꞌmosoꞌmi izipahala zuho liliꞌ igi nizaniꞌ nenako mo aꞌneemuꞌ luvoniꞌ ve.
GAL 3:27 Ee, laza monoꞌ noso holo Kilisitoda giꞌmizunive mukiꞌ nene Kilisitoꞌ emeni dameniꞌve do otuhuneꞌ nenako neꞌmo nene Oꞌmosoꞌmi izipahala zuho loloꞌ okune.
GAL 3:28 Lingine nene mo Kilisitoꞌ evenele hamoꞌ zuho neꞌmine liliꞌ igi nizanako nemuꞌ nene gomuꞌ Zuda ve minaniꞌ nehe heta atoꞌ ve nGiliki ve nevoꞌmine minaniꞌ nehe idoꞌ eveneꞌ maliti goboni ve liliꞌ igi minaniꞌ nehe idoꞌ neꞌmine ami haza minaniꞌ nolihe idoꞌ vemohoꞌ minaniꞌ nehe veneꞌ minaniꞌ nolihe eveneꞌ atoliꞌmine atoliꞌmine minaniꞌ monovotine nene idiꞌne mo osuꞌ lave.
GAL 3:29 Idoꞌ Kilisitoꞌ evenele zuho nilizaniꞌ nene Abalahamuꞌ zuho gihile mini Oꞌmosoꞌmo eze zuho lemelove lo lo huko salani molaniꞌ initeꞌ nene dalisave.
GAL 4:1 Idoꞌ luvoniꞌ initeliꞌmi monovo nene do guno ogo gohi ma lolosuze. Gililo. Monovo neꞌmino ma neive: Eveneꞌ nabaꞌmi gipele ma naba oꞌmo vo lodive ogo melehidatiꞌ initeꞌ ma do aꞌmine initeꞌ mukitoꞌ nene ha gizebo ogo mineleseiha olihe naba ogo lodive amineꞌ gameneuꞌ nene neꞌmine amo haza goboni ve minave nene ngivileꞌ amo
GAL 4:2 ha meleho molo-dineꞌ gamenemuꞌ nene gizebo ogo mino meleho neꞌmo ezelokisi idoꞌ heneniꞌvelokisi gizebo ilizave lo eveneꞌ ngeleꞌmize moladoꞌ nene gelekeleꞌ ogovoꞌ mineleseive.
GAL 4:3 Idoꞌ eveneꞌ laza aꞌmineꞌmine ogo gelekeleꞌ ogo minuneꞌ ve. Gomuꞌ nene olihe monokuꞌ lodive amunivo aꞌmine gamenela nene me misubouꞌ veti monoꞌ ato atoꞌ gihileꞌve nomineꞌ monotoꞌ gelekeleꞌ ogo minuneꞌ ve.
GAL 4:4 Neꞌmino nonivo gamene lamineꞌ nene sotoꞌ ogavo Oꞌmosoꞌmo leliꞌ nene do tiꞌ ogavo izipahala zuho mineloningumuꞌ ve lo eiꞌ gipele nene Moseꞌ louꞌ gamaziloꞌ gelekeleꞌ ogo minunive nene aꞌmine Moseꞌ louꞌ gamaziꞌmi gesi mingutiꞌ do heta o-ledelive lo Oꞌmosoꞌmo imiselavo venetatiꞌ sotoꞌ ogo Moseꞌ louꞌ gamaziloꞌ gelekeleꞌ ogo minosa eiꞌ okoꞌno hulo meni hizo do luꞌ izidotiꞌ nene amuzo do Oꞌmosoꞌmi izipahala gihile none.
GAL 4:6 Idoꞌ izipahala minuningumuꞌ ve lo Oꞌmoso eiꞌ gipeleꞌmi Sikalahuꞌve nene imiselavo lelita ogo mino lute do otavo Oꞌmosomuꞌ nene ahono idoꞌ meteho ve laaꞌ noune.
GAL 4:7 Nemuꞌ nene gaza goboni ve idoꞌ gelekeleꞌ ve neꞌmine gohi ma minamo asi Oꞌmosoꞌmi izipahala ne nane. Idoꞌ mo izipahala loloꞌ ogo naneꞌ nenako Oꞌmosoꞌmo nasahiliꞌ o-gedavo gazasi nene eze zuhomuꞌ salani molo-ngidineꞌ initekutiꞌ dalinive loloꞌ ogane.
GAL 4:8 Mo laminetoꞌ gomuꞌ lingine heta atoꞌ ve mini Oꞌmosomuꞌ gilamaniꞌ gameneuꞌ nene soza initeꞌ Oꞌmoso gihile lamineꞌ minamadoꞌ nene gelekeleꞌ igi minaaꞌ aniꞌza
GAL 4:9 idiꞌne nene Oꞌmosomuꞌ mo ningi gilikeve. Ne neiha naza nene Oꞌmosoꞌmo lengiꞌ nene ningo gele neive nizave lo loloniꞌ nene mo lamineꞌ akautiꞌ lolosuve. Ee, Oꞌmosomuꞌ lingine mo ningi gili nizaniꞌ nenako lingine gohi velepeꞌ izi vi amuzoꞌve nomineꞌ monoꞌ mino idoꞌ lengeleꞌmize lamineꞌ ilidoꞌ minamo gihileꞌvesi nomineꞌ monoꞌ atokuꞌ vi hili aꞌmidoꞌ gohi gelekeleꞌ olone li nanimuꞌ nigilave.
GAL 4:10 Neꞌmine niigi lingine neꞌmine olonidiꞌmo Oꞌmosoꞌmo do luꞌ izelihe li ladani gatine gili gamene ato atotoꞌ holiseꞌ gameneloꞌ nehe ikeꞌni gosohoꞌ lomineꞌ gameneloꞌ nehe kilisimasi gosohoꞌ ma sotoꞌ ilidope aꞌmine monokumuꞌ nene gilisa holiseꞌ minaaꞌ nave.
GAL 4:11 Naza lengita monoꞌ gono duvoniꞌ nene vo haza ilihe lo lengikumuꞌ geni nebelavo nehelele izaaꞌ neive.
GAL 4:12 Neze zuhokizo, lingine gomuꞌ Moseꞌ louꞌ gamaziꞌmi gesi minguꞌ minami heta minaniꞌ maꞌmino nazasi minelesa aꞌmine louꞌ gamaziꞌmi gesi minguꞌ minuvongutiꞌ nene leme heta ogo nouve. Nemuꞌ nene lingine naza leme heta ogo nouvoniꞌ neꞌmine igi minilizangisi lingine Moseꞌ louꞌ gamaziꞌmi gesi minguꞌ vilisa minangutiꞌ nene tineꞌ mili heta limi alizave lo agae losa nolo-lingiduve. Lengita vo nouvo lingine di goloso ma i-nidamaniꞌ ma neive.
GAL 4:13 Ganaꞌ Kilisitoꞌnimuꞌ gamazi lamineꞌ lo sotoꞌ ogo lo-lingimuvoniꞌ nene naza initeꞌ gize doo gilizevo ogo mino ebeꞌ mala vamoloniꞌ ogavosa nemuꞌ lengita ogo mino Kilisitoꞌnimuꞌ lo-lingimuvoniꞌ nene lingine mo gili nizave.
GAL 4:14 Idoꞌ naza lengita initeꞌ gize do gilizevo ogo minuvongumuꞌ nene lingine geꞌnebe goloso igi naꞌnaꞌ i-nidi minaniꞌza nenikumuꞌ goseleꞌ lengebelamivo vasa izi-nidami Oꞌmosoꞌmi angelope Izesuꞌ Kilisitope neꞌmine ve ngeleꞌmize lamineꞌ goloso ilizaniꞌ maꞌminisa neniꞌ neleꞌmize lamineꞌ goloso aniꞌ ve.
GAL 4:15 Neꞌmine i-nidaniꞌ nenako nenikumuꞌ longolize izi minaniꞌ nene idise osuꞌ lahe. Ee, aꞌmine gameneuꞌ nene lingine neniꞌ veꞌne di lamineꞌ i-nidilisa lengiꞌ vetine nene ha kuluhizilizadoꞌ o minidiniko lingine aꞌmine vetine nene ha kuluhizi nimadine. Idoꞌ nimadiniko naꞌniseꞌne gele lamineꞌ ogo ha lo sotoꞌ olonako lingine lamineꞌ nenikumuꞌ longolize izi minaniꞌ nene mo gele lamineꞌ o nouve.
GAL 4:16 Idoꞌ gotine izamo gamazi nene laminetokovoꞌ lo-lengemaaꞌ nouvodiꞌmo nenikumuꞌ nene lovo o lemaaꞌ ive loloꞌ ogave li gilaniꞌ gelave.
GAL 4:17 Moseꞌ louꞌ gamaziꞌmi gesi minguꞌ lengeleꞌmizi nimilave ingine nene lengiꞌ di naba i-lingidaaꞌ naniꞌza nene lengiꞌ lengeleꞌmize lamineꞌ ilidoꞌ nomive. Ingine lengiꞌ di naba i-lingidaaꞌ naniꞌ nene nenitoꞌ idoꞌ neniꞌ gamaziꞌnelokisi giꞌmizi minilizaniꞌ akatine nene hizi tili-lingidikevo lingine nene engiꞌ di naba i-ngidi minilizave li lengiꞌ di naba i-lingidi gotine izaaꞌ nave.
GAL 4:18 Idoꞌ eveneꞌ do naba o-ngedaaꞌ nene goꞌine izami laminetokovoꞌ di naba i-ngidilizaniꞌ nene monovo lamineꞌ ve. Idoꞌ neniꞌ di naba i-nidili ma naza lengita nouvosavoꞌ nene di naba i-nidami mo gamene gamene neꞌmine ilizaniꞌ nene mo lamineꞌ o neive.
GAL 4:19 Izipahaꞌne mate, olihe Kilisitoꞌnimuꞌ gili eleꞌvoleꞌ amavo lengikumuꞌ mulumo naba gelo minuvoniꞌ maꞌmino naza gohi nogiluve. Veneꞌ izipahaꞌine sotoꞌ olosa neivo mulumo naba gilaaꞌ naniꞌ neꞌmino lengikumuꞌ nene Kilisitoꞌ emeni damenisi sotoꞌ ilizanako lo gelo mulumo naba nogiluve.
GAL 4:20 Lengikumuꞌ nene naza nadiꞌ ilizave lo gopo gaꞌne gelo lengita liteꞌ lo vo hetelo gamazi lo-lengemaaꞌ uvoniꞌ monovoꞌne nene ma do atoꞌ ogo neniꞌ veꞌneutiꞌ gehepeve lo-lengemeloho lo gelaaꞌ nouve.
GAL 4:21 Lingine Moseꞌ louꞌ gamaziꞌmi gesi minguꞌ mino aꞌmidoꞌ gelekeleꞌ ogo minelone li laaꞌ nave lingine aꞌmine louꞌ gamazi gizikaniꞌ buku mauꞌ gizi nizaniꞌ gamazi ma nene lingine mo gilaaꞌ naniꞌ nehe. Olo.
GAL 4:22 Aꞌmine bukuuꞌ nene Abalahamuꞌ gipele gidingumuꞌ gizi nizaniꞌ gamazi mamuꞌ noluve. Abalahamuꞌ aza gipele setaꞌ gidineꞌ ve li gizi nizaniꞌ ve. Aꞌmine gipele setakutiꞌ ma nene elenaho Salaꞌ neꞌmi goboni aluꞌve Hagalanguꞌ gedo ma nene goboni alu minamineꞌ eiꞌ elenaho Salanguꞌ gidineꞌ ve.
GAL 4:23 Goboni aluuꞌ gidive Isimaeleꞌ aza nene eveneꞌ mukiꞌ leliꞌ sotoꞌ ogaꞌ nouneꞌ monovoloꞌ ogo haza sotoꞌ ineꞌza goboni alu minamineꞌ veneꞌ Salanguꞌ gidive Isakaꞌ aza nene Oꞌmosoꞌmo Abalahamuꞌni lo huko-dineꞌ gamazi nene do gihile izelingumuꞌ sotoꞌ ineꞌ ve.
GAL 4:24 Aꞌmine gamaziloꞌ nene aneza gamazi ma lo-lengemelove: Aꞌmine veneꞌ sitaꞌ nene Oꞌmosoꞌmo gamazi sitaꞌ ato atoꞌ lo huko lidoꞌ nene lo molo noluve. Ma nene Sinae gololotiꞌ louꞌ gamaziloꞌ gelekeleꞌ igi mini goboni aleve minilizave lo lo huko-ngidineꞌ ve. Aꞌmine lo huko-ngidineꞌ gamazi nene goboni alu Hagalaꞌnidoꞌ lo molo noluve.
GAL 4:25 Idoꞌ Moseꞌ aza Sinae gololoꞌ vo Oꞌmosoꞌmo louꞌ gamazi lo huko lineꞌ nene do sotoꞌ ineꞌ nenako aꞌmine Sinae golo Hagalaꞌ aꞌvopilemoꞌ zuholite di minaniꞌ misubo Alabiauꞌ minineꞌ nene Moseꞌ louꞌ gamaziloꞌ gelekeleꞌ igi aꞌmineꞌmi goboni ve minaniꞌ aleve neti izeꞌnibo neꞌmino mino goboni alu Hagalaꞌ neꞌmine minineꞌ ve. Ne neiha idisesi neineꞌ Zelusalemi numuno ebeꞌ nene aꞌmine Moseꞌ louꞌ gamaziloꞌ eꞌmeti di minaniꞌ aleve neti gotoꞌ ebeꞌine mino izeꞌnibo neꞌminosa minineꞌ nenako nemuꞌ nene Sinae gololoꞌ medelo Hagalaꞌ neꞌmine minineꞌ gelave. Idoꞌ nene nanitekumuꞌ ve. Aꞌmine Zelusalemi ebekutiꞌ aleve nesi idoꞌ aꞌminguꞌ minineꞌ monovoloꞌ igi mili miniꞌmi vi minave mukiꞌ ingine nesi nene Moseꞌ louꞌ gamaziloꞌ gelekeleꞌ igi aꞌmineꞌmi goboni ve minaniꞌ nenako ingine nene aꞌmine goboni alu Hagalaꞌ neꞌmine mini goboni vevoꞌ nizave losa noluve.
GAL 4:26 Ne neiha Okulumokuꞌ hozi minineꞌ Zelusalemi numuno ebeꞌ gosohoꞌ nene goboni alu minamineꞌ veneꞌ Salaꞌnidoꞌ nene lo molo noluve. Aza nene Moseꞌ louꞌ gamaziꞌmi goboni ve minamunive leliꞌ gotoꞌ ebete mino izeteho neꞌmine nene neive.
GAL 4:27 Idoꞌ Okulumokuꞌ minineꞌ Zelusalemi numuno ebeꞌ gosohoꞌ nene Izesuꞌ zuho leliꞌ gotoꞌ ebete mino izeteho neꞌmino neive luvoniꞌ nemuꞌ nene aꞌmine luvodoꞌ vo dalineꞌ gamazi nene izipahala leliꞌ sotoꞌ oloningumuꞌ monoꞌ godolouꞌ tiꞌ li gizi nizaniꞌ nenako nemuꞌ nene mo laminetoꞌ lokuvoniꞌ neive lo gelelesune: Zelusalemi numuno ebeꞌ gaza mulumo gelo izipe gedamanivo izipaha nizamavo gohuno veneꞌ neꞌmino minaineꞌza nemuꞌ gelamo golize izo minezo. Ee, gaza vangaho Oꞌmoso aza hulo-gedavo izipe gedamo minaineꞌ gilineꞌza alingeꞌ nene gomuꞌ minineꞌ Zelusalemi litehe nene vanahosi mino izipahala vaikisi minineꞌ nene ivileꞌ ogo izipaha vaiꞌ goloso gedelesane. Nemuꞌ nene gaza ouꞌ ouꞌ lo gekeꞌ gekeꞌ lo golize izo minezo li gizi nizaniꞌ ma neive.
GAL 4:28 Idoꞌ neze zuhokizo, lingine nene Oꞌmosoꞌmo Abalahamuꞌni lo huko-dineꞌ gamazi do gihile izelingumuꞌ Isakaꞌ sotoꞌ ineꞌ neꞌmine igi linginesi Oꞌmosoꞌmo gozopoꞌ lo huko lineꞌ gamazi ma nene di gihile izi eiꞌ izipahala zuho liliꞌ igi nizave.
GAL 4:29 Ne neiha Isimaeleki Isakaki sotoꞌ igi minasineꞌ gameneuꞌ nene leliꞌ haza ve sotoꞌ ogaꞌ uneꞌ monovoloꞌ sotoꞌ ive neꞌmo Sikalahutatiꞌ sotoꞌ ive nene goboni malaꞌ malaꞌ o-daaꞌ ineꞌ neꞌmine igi idise gameneukisi Moseꞌ louꞌ gamaziꞌmi goboni ve Zuda ve ingine Sikalahutatiꞌ sotoꞌ unive Izesuꞌ evenele leliꞌ nene goboni mili-lidaaꞌ nave.
GAL 4:30 Neꞌmine o neineꞌza aꞌmine louꞌ gamaziꞌmi goboni aleveloꞌ vo do neineꞌ gamazi ma monoꞌ godolouꞌ gizi nizaniꞌ nene lo-lengemelove. Tiꞌ li gizi nizave: Goboni aluꞌmi gipele aza goboni alu minamineꞌ veneliꞌmi gipele nene meleho salani molo-dineꞌ initeꞌ dalingutiꞌ nene linge ma mo kekeꞌ damoloseinako nemuꞌ nene aꞌmine goboni alu nesi aꞌmine gipele nesi nene ngimiselo hulozo.
GAL 4:31 Nemuꞌ nene neze zuhokizo, laza nene goboni alu eiꞌ zuhoutiꞌ sotoꞌ amo asi goboni alu minamineꞌ Salaꞌ zuhoutiꞌ sotoꞌ uneꞌ nene none.
GAL 5:1 Idoꞌ Kilisitoꞌ aza nene goboni ve gohi ma minamilisave lo laza Moseꞌ louꞌ gamaziꞌmi gesi minguꞌ mino aꞌmineꞌmi goboni ve mino geni gono do minunidotiꞌ nene do heta o-ledave. Nemuꞌ nene gohi louꞌ gamazi neꞌmi gesi minguꞌ lengeleꞌmizi mili goboni ve liliꞌ i-lingidikelizaze. Gamaziꞌine nene gili huli hetavoꞌ moni minilo.
GAL 5:2 Idoꞌ naꞌnise Pauloꞌ nene tiꞌ lo nolo-lingimuze. Gililo. Lingine gatine hizaaꞌ nave nete ladoꞌ gili ngimi Moseꞌ louꞌ gamaziꞌmi gesi minguꞌ vi hilalisa okodine lolovo huki hulilizaniꞌ nene lingine Kilisitoda vi giꞌmizaniꞌ nene vo haza ogavo do lamineꞌ o-lengedamoloseive.
GAL 5:3 Idoꞌ okodine lolovo huki hulilizave mukiꞌ nene gohi do lamino lo-lengemeloze. Gililo. Zuda ve neꞌmine loloꞌ okunivo nemuꞌ Oꞌmosoꞌmo do luꞌ izelihe li lingine okodine lolovo huki hulilizaniꞌ neꞌmo nene Moseꞌ louꞌ gamazi ngomoꞌ nabaꞌ vaitoꞌ nene gili di osuꞌ lilizadoꞌ o mineleseive.
GAL 5:4 Idoꞌ lingine Oꞌmosoꞌmo eveneꞌ lisiheꞌ lamineꞌ gehepeve ve lo-ledelive li Moseꞌ louꞌ gamaziloꞌ eꞌmeti osuꞌ lilisa ilizaniꞌ nene lingine Kilisitoꞌni nene mo huli-di mehedine imikeve. Neꞌmine igisa Oꞌmosoꞌmi nasahiliꞌ nesi nene mo hulikeve.
GAL 5:5 Idoꞌ neꞌmine noluvoniꞌ nene nemuꞌ noluve: Laza Kilisitoda vo giꞌmizunive nene okode lolovo huko hulo nolobe huko hulamo nolobe nemuꞌ Oꞌmosoꞌmo leliꞌ do luꞌ izelesa gala gilineꞌ nene do atoliꞌmine ma amoloseive. Neꞌmine amoloseiha asi Kilisitoꞌnimuꞌ gele eleꞌvoleꞌ o noneꞌ neꞌmo lute ngemaaꞌ monovo nene ogo molo mineloneꞌ neevoꞌ nene initeꞌ gihile neive. Neꞌmino neineꞌ nenako nemuꞌ Oꞌmosoꞌmo leliꞌ nene ve lisiheꞌ lamineꞌ gehepeve ve lo-ledelive lo gelo laza neꞌmine ilingumuꞌ gizebo ogo noneꞌ nene Oꞌmosoꞌmi Sikalahuꞌ neꞌmo hize eleꞌ o-ledavo Kilisitoꞌnimuꞌ gele eleꞌvoleꞌ ogo minuningumukovoꞌ nene eveneꞌ lisiheꞌ ve lo-ledelineꞌ nenako nemuꞌ nene luvoniꞌ ve.
GAL 5:7 Gomuꞌ nene lingine monoꞌ akaloꞌ lamini viviꞌ viviꞌ igi minaniꞌ malotiꞌ idise nene monoꞌ gamazi gihile maloꞌ eꞌmetami apiꞌ igi mehedine imilisa naniꞌ nene zaho gatine hizo monoꞌ akatine hize tilavosa neꞌmine nave.
GAL 5:8 Aꞌmine monoꞌ akatine hize tilo gatine hizive nene lengiꞌ vise lo-lengemo do eita ive neꞌmo nene gatine hizavo neꞌmine ma isaꞌmave.
GAL 5:9 Beleti do lulu izaaꞌ ineꞌ initeꞌ zisiti nene ngomo lasolo ma do beleti loloꞌ oloneꞌ palauvaꞌ vaikuꞌ nene nososi do gopo okunivo aꞌmine zisiti neꞌmo palauvakuꞌ mone okuꞌ laaꞌ neineꞌ neꞌmino eveneꞌ hamo hamoꞌ ingine lengiꞌ vovotinguꞌ mini monovo goloso ma apizi lingimilizaniꞌ nene aꞌmine monovo nene lengita buu lo mone osuꞌ lavo mukitoꞌ goloso ikelizave.
GAL 5:10 Ne neiha naza lengikumuꞌ gelo tiꞌ lo gele eleꞌvoleꞌ o nouve: Lingine Guvelesi vela vi giꞌmizi nizaniꞌ nenako lingine nene neniꞌ gele mino laaꞌ nouvoniꞌ monoꞌ nene di atoꞌ ami linginesi aꞌmidokovoꞌ gilaaꞌ ilisave. Ne neiha lengiꞌ lengeleꞌmize gopo ogaꞌ neive nene zaho nolive. Aꞌmine ve nene Oꞌmosoꞌmo lihimeꞌve emavo mulumo gono daloseive.
GAL 5:11 Idoꞌ naza Kilisitoꞌnimuꞌ olihe gele eleꞌvoleꞌ amosa ma eveneꞌ mukiꞌ okoꞌine lolovo huki hulilizaniꞌ neꞌmo nene Oꞌmosoꞌmo do nguꞌ izeleseive lo gomuꞌ laaꞌ uvoniꞌ ma nene idisesi ha lo-ngemaaꞌ nooloseive li lingine gilaaꞌ nahe. Eꞌe, naza neꞌmine lo apize ngemaaꞌ uvodiniko Kilisitoꞌ leliꞌ lihimetemuꞌ lohotoꞌ zaloꞌ hilingumuꞌ nene gele eleꞌvoleꞌ okunivo Oꞌmosoꞌmo do luꞌ izeleseive lo naza laaꞌ nouvoniꞌ nemuꞌ goloso gilaaꞌ naniꞌ nene gohi gilamavo osuꞌ lavo Moseꞌ louꞌ gamaziꞌmi gesi minguꞌ vi hili nizave engiꞌ nete neniꞌ goboni malaꞌ malaꞌ i-nidaaꞌ amadine.
GAL 5:12 Ne neiha Oꞌmosoꞌmo lengiꞌ nene elese molo-lengedo do eita o-lingidineꞌ nene lingine Moseꞌ louꞌ gamaziloꞌ gelekeleꞌ igi aꞌmineꞌmi goboni ve galapuso aleve neꞌmini minami haza aleve minilizave losa elese molo-lengedo do eita o-lingidineꞌ nenako nemuꞌ nene ve ma ingine aꞌmine Moseꞌ louꞌ gamaziꞌmi gesi minguꞌ nene vi minilizave li lengeleꞌmizi gopo igi okodine lolovo huki huli-lingidilisa gilaaꞌ nave ingine lengiꞌ okodine lolovo nene huki hulilizadoꞌ nomineꞌ nenako initeꞌ atoꞌ gohi ma huki hulilisa gili ma engiꞌ initeꞌinesi vaiꞌ nene nanimuꞌ huki hulamave. Ee, neze zuho mate, Oꞌmosoꞌmo goboni ve minami haza aleve minilizave lo elese molo-lengedo do eita o-lengedaniꞌza lingine laza nene louꞌ gamaziꞌmi goboni ve minamuneꞌ nenako olosa giluneꞌ initeꞌ mukiꞌ nene ha olosune li okodineꞌmo goloso initekumuꞌ laniteꞌ gelaaꞌ neineꞌ neꞌmo lengeleꞌmize gopo ilineꞌ akaꞌve vilikelizave. Neꞌmine ami eveneꞌ lute ngemaaꞌ monovoloꞌ gelekeleꞌ igi ge nasahiliꞌ o-nede ne nasahiliꞌ o-gede li minilo.
GAL 5:14 Idoꞌ lute ngemaaꞌ monovoloꞌ gelekeleꞌ igi minilizave luvoniꞌ nene monokuꞌ gamazi hamoꞌ ma neineꞌ nene gele do osuꞌ loloneꞌ neꞌmo nene Oꞌmosoꞌmi louꞌ gamazi vaiꞌ gele duneꞌ geleleseinako nemuꞌ luvoniꞌ ve. Aꞌmine gamazi nene tiꞌ lo neive: Geiꞌ okongamuꞌ gelaaꞌ naineꞌ neꞌmino eveneꞌ ato atoꞌ mamuꞌ nesi gelo luka ngemezo.
GAL 5:15 Ne neineꞌza neꞌmine ami lengiꞌ okodinguꞌ lovo lolize di sotoꞌ igi ge do leme-nede ne do leme-gede li minilizaniꞌ nene lingine vi tolovo ikelizaze. Eheꞌ igi ningisa minilo.
GAL 5:16 Idoꞌ nemuꞌ naza ma tiꞌ lo noluve: Lingine nene Oꞌmosoꞌmi Sikalahuꞌ neꞌmo lilidoꞌ lilidokovoꞌ nene eꞌmeti igi mili minilo. Neꞌmine igi minilizaniꞌ neꞌmo lengemeni dameni goloso gomuꞌ igi mili monaaꞌ aniꞌ monovo ma nene gohi damilisave.
GAL 5:17 Neꞌmine luvoniꞌ nene nemuꞌ noluve: Gomuꞌ lengemeni dameni goloso neꞌmo atoꞌ initekumuꞌ laniteꞌ gilivo idoꞌ Oꞌmosoꞌmi Sikalahuꞌ neꞌmo atoꞌ initekumuꞌ gilivo neꞌmine igi eze ivileꞌ olosa ivo idoꞌ eze ivileꞌ olosa ivo igi mini lutinguꞌ lovo hizi minaaꞌ nasineꞌ neꞌmo lingine ilisa gilaniꞌ initeꞌ nene amilizadoꞌ ogaꞌ neive.
GAL 5:18 Ne neiha lingine Oꞌmosoꞌmi Sikalahuꞌ neꞌmo aka lengelebizidoꞌ eꞌmetilizaniꞌ nene Moseꞌ louꞌ gamaziloꞌ gelekeleꞌ igi neꞌmi goboni veꞌve minamilisave.
GAL 5:19 Idoꞌ gomuꞌ lemeni dameni goloso neꞌmi monovo nene ha sotoꞌ ogo neineꞌ nenako neꞌmino neineꞌ ma nene lingine mo gili ninganiꞌ ma neive: Veneꞌ vemohoꞌ alu gipe gopoꞌ napa ongoꞌmo monaaꞌ monovo idoꞌ neꞌmine monovo lute do goloso ilineꞌ monovo ato atoꞌ idoꞌ lovozo helamo aꞌmine monovo ato atoꞌ nene eveneꞌ veꞌnidoꞌ do sotoꞌ ogaꞌ
GAL 5:20 idoꞌ soza oꞌmosoloꞌ ngopoꞌni laaꞌ idoꞌ poisini inite pataꞌ do minaaꞌ monovo nesi idoꞌ eveneꞌ lovo o-ngemaaꞌ idoꞌ lolize lovo ogaꞌ idoꞌ ngizeboloꞌ molavo muluꞌninguꞌ goloso gelaaꞌ idoꞌ ngizeboloꞌ molaaꞌ idoꞌ guvetesi ve loloꞌ olone li engiꞌ okoꞌinemuꞌ gilavo dizavo amuzo milaaꞌ idoꞌ luꞌine di hamoꞌ ami izi hoꞌli vi eza ema vaaꞌ idoꞌ gaꞌine ato atoꞌ gilii izi hoꞌli mulise ato atoꞌ liliꞌ igaꞌ
GAL 5:21 idoꞌ eveneꞌ maliti initetoꞌ mumuzoꞌ ogo lukehe lakehe ogaꞌ idoꞌ noso no sipaki ogo minaaꞌ idoꞌ noso ni sipaki goloso igi minaaꞌ pati do sotoꞌ ogaꞌ idoꞌ nevoꞌmine inite pataꞌ mukiꞌ nene gomuꞌ lemeni dameniꞌmi monovo nenako nemuꞌ mo gili nizaniꞌ ma neive. Gomuꞌ lo-lingimuvoniꞌ maꞌmino idise gatine do tiꞌ lo noluve: Eveneꞌ ma ingine me noluvoniꞌ monovo danava ma di minilizave nene Oꞌmosoꞌmo gizebo o neinguꞌ ma vi hilamilisaze. Eheꞌ igi ningisa minilo.
GAL 5:22 Ne neiha Oꞌmosoꞌmi Sikalahuꞌ neꞌmo luteuꞌ gono do neivo neꞌmi gihile nene neꞌmine monovo ogo molo minelesune: Lute ngemo nasahiliꞌ o-ngedaaꞌ idoꞌ muludeuꞌ lamineꞌ gelaaꞌ idoꞌ gopo gate gelamo lamino minaaꞌ idoꞌ lizeboloꞌ molaniꞌ initeꞌ ikevo ma goloso gelamo zou lo minaaꞌ idoꞌ mangi gatulo ogo minaaꞌ idoꞌ initeꞌ ogo molo olo ma nene eveneꞌ goꞌine izamo monovote lisihetotikovoꞌ ogo molo ogaꞌ
GAL 5:23 idoꞌ lemo zou lo minaaꞌ idoꞌ gomuꞌ lemeni dameni goloso nene gohi ogalone lo ningosa minelone. Aꞌmine neꞌmine monovo lamineꞌ nene ogo molo ogakumuꞌ louꞌ gamazi ma neꞌmine amaaꞌ ve lo minineꞌ ma nomive.
GAL 5:24 Idoꞌ Kilisitoꞌ evenele zuho laza gomuꞌ lemeni dameni golososi idoꞌ aꞌmineꞌmo goloso initekumuꞌ umo helo laniteꞌ gelaaꞌ ineꞌ monovoꞌvesi nene mo lohotoꞌ zaloꞌ bele hiluneꞌ gelavo aꞌmine monovo danava goloso nene ogo molo amo minaaꞌ noune.
GAL 5:25 Oꞌmosoꞌmi Sikalahuꞌ neꞌmo lemeni dameni gosohoꞌ do sotoꞌ o-ledavo minevo dovoꞌ ogo nounako nemuꞌ nene aꞌmine Sikalahuliꞌmo aka lelebizidokovoꞌ nene eꞌmeto vo minelone.
GAL 5:26 Laza leliꞌ okode do dize dizeꞌ ogo ne givileꞌ o-gede ge nivileꞌ o-nede lo mino ge muluꞌneuꞌ hizo do goloso o-nede ne mulungauꞌ hizo do goloso o-gede lamo lamino mino aꞌmingutiꞌ ma livileꞌ igi minilizangumuꞌ nene lukehe ngebelamo minelesune.
GAL 6:1 Neze zuhokizo, lingine ve malite lihime nidavo ningi ma nene Oꞌmosoꞌmi Sikalahuꞌ neꞌmo aka lengelebizidoꞌ lisiheꞌ gehepeve igi eꞌmeti vaaꞌ nave nete lingine nene amuzonga li-ngimami zou li lamini mini di hehe li-ngidi gohi ngeleꞌmize akaloꞌ ilo. Neꞌmine igi mini lengita lengemenguꞌ sotoꞌ o lengemelinguꞌ nene linginesi aꞌmineꞌmine igi lihime diisa limi ingikelizaze. Gizebo lamineꞌ igi minilo.
GAL 6:2 Idoꞌ geni initeliꞌmi lulouꞌ minii ma nene ge hize eleꞌ o-nede ne hize eleꞌ o-gede li minilo. Neꞌmine igi minilizaniꞌ nene Kilisitoꞌ lo huko lineꞌ louꞌ gamazi maloꞌ nene mo eꞌmeti osuꞌ lilisave.
GAL 6:3 Idoꞌ lengiꞌ okodidoꞌ gizebo lamineꞌ igi mini ge hize eleꞌ o-nede ne hize eleꞌ o-gede li minilo luvoniꞌ nene ve maliꞌmo eveneꞌ mukiꞌ minaniꞌ neꞌmino haza minelidotiꞌ nene aza eikumuꞌ gelavo eveneꞌ linge ngivileꞌ ogo dizo minelineꞌ nene eiꞌ luloꞌve golo izosa mo lemo ongalidoꞌ mineleseinako nemuꞌ nene luvoniꞌ ve.
GAL 6:4 Nemuꞌ nene Oꞌmosoꞌmo leliꞌ hamo hamoꞌ gonote limineꞌ nene daloningutiꞌ olovoꞌ amo hamo hamoꞌ mukitoꞌ leliꞌ gonote geheloneꞌ nenaze. Nemuꞌ nene lingine hamo hamoꞌ langisetine igi mili minaaꞌ naniꞌ monovotine nene lamineꞌ nolihe goloso nolihe izeꞌ mili ningiꞌ nalo. Idoꞌ ve ma gaza eveneꞌ maliti monovomuꞌ nene izeꞌ molo gele guno o-ngedamo asi geiꞌ monovokamukovoꞌ nene ningo gelanivo lamineꞌ o neivo ma nene aꞌminemuꞌ golize izo minelinidoꞌ o neive.
GAL 6:6 Idoꞌ monoꞌ gilaaꞌ naniꞌ aleve lingine aꞌmine monoꞌ apizi lingimaaꞌ nave nene lengitatiꞌ initeꞌ matatine lamineꞌ nevo ma nolingutiꞌ nene izeꞌ mili lingela ngimilo.
GAL 6:7 Lingine mo gili nizave. Minguꞌ initeꞌ zuhoꞌ ikevo neꞌmi gihileꞌve nene mo initeꞌ zuhoꞌ aniꞌ initeꞌ neꞌmine gehepeve izaaꞌ neineꞌ neꞌminisa lingine igi mili ilizaniꞌ monovo nene monovo lamineꞌ nolihe goloso nolihe alingeꞌ aꞌmineꞌmi gihileꞌve gehepeve nene lengita izeleseinako lingine initeꞌ amaaꞌ iliza initekumuꞌ nene leliꞌ luteloꞌ nene ha ogo molo Oꞌmoso golo izelone li gililizadiꞌmo lengiꞌ lutine nene golo izikelizave. Oꞌmoso nene golo ngeli izamilisave.
GAL 6:8 Ve ma ingine gomuꞌ ngemeni dameni golosoꞌmi monovoloꞌ igi mili ilizaniꞌ nene aꞌmine gomuꞌ ngemeni dameni golosoꞌmi gihileꞌve nene mudise vo ladise ogaꞌ nene dalisave. Neꞌmine ilisaha Oꞌmosoꞌmi Sikalahuꞌ neꞌmi emeni dameniloꞌ eꞌmeti igi mili minilizaniꞌ neꞌmi gihileꞌve nene aꞌmine Oꞌmosoꞌmi Sikalahutatiꞌ nene minevoꞌ minevoꞌ ogaꞌ ngemeni dameni nene dalisave.
GAL 6:9 Ee, laza monovo danava lamineꞌ ogo molo minakumuꞌ nene goseleꞌ lebelamivo aꞌmine monovo nene hulamo hazavoꞌ ogo molo mineloneꞌ nene Oꞌmosoꞌmo molaniꞌ gameneloꞌ aꞌmineꞌmi gihileꞌve nene do sotoꞌ molosoꞌ nenako nemuꞌ laza initeꞌ mataꞌ lamineꞌ nene ogo molo minelo ma goseleꞌ aseleꞌ amo amuzo molo ogo molo minelone.
GAL 6:10 Nemuꞌ nene neꞌmine ogo laza nene eveneꞌ do lamineꞌ o-ngedo nasahiliꞌ o-ngedelonidoꞌ o neivo ma nene laza eveneꞌ mukiꞌ nene neꞌmine o-ngedelone. Idoꞌ eveneꞌ neꞌmino do lamineꞌ o-ngedeloningutiꞌ linge nene Izesuꞌ evenele minikevo ma ingine nene leliꞌ zuho nizanako gomuꞌ nene engiꞌ do lamineꞌ o-ngedeloneꞌ aka do sotoꞌ ogo do lamineꞌ o-ngedelone.
GAL 6:11 Gamazi mene imineꞌ molo nogize-lingiduvoniꞌ mene naꞌniseꞌne neniꞌ aꞌnedunuꞌ nogize-lingiduze. Nabaꞌmine luhuvo nogizuvoniꞌ mene ningilo.
GAL 6:12 Aꞌmine gatine hizaaꞌ nave ingine okoꞌine losuvolotikovoꞌ igi mili igaꞌ naniꞌ initeꞌ nene di sotoꞌ ikevo neꞌmo Izesungumuꞌ gili eleꞌvoleꞌ amaniꞌ Zuda vete engikumuꞌ gilikevo lamineꞌ ilive li gili lengikumuꞌ nene okodine lolovo huki hulilizave li gatine hizaaꞌ naniꞌ nene aꞌmine gatine hizaaꞌ nave nene Zuda vete goboni mili-lidikelizave li giladiꞌmo nene neꞌmine igaꞌ nave. Ee, Kilisitoꞌ aza leliꞌ lihimetemuꞌ hilineꞌ nenako nemuꞌ laza okode lolovo huko hulakumuꞌ nene gele hulo eikumuꞌ gele eleꞌvoleꞌ okunivo neꞌmo Oꞌmosoꞌmo do luꞌ izeleseive lo Kilisitoꞌ evenele laza neꞌmine laaꞌ nouneꞌ nemuꞌ Zuda vete goboni malaꞌ malaꞌ i-lidaaꞌ naniꞌ nenako nemuꞌ gili neꞌmine i-lidikelizave li ingine gatine hizi okodine lolovo huki hulilizave li li-lingidaaꞌ nave.
GAL 6:13 Idoꞌ okoꞌine lolovo hukave ingine nesi nene Moseꞌ louꞌ gamazi linge maloꞌ nene gili di osuꞌ lamaniꞌza aꞌmine ve ingine nene linginesi okodine lolovo huki huli lelita igi giꞌmizi minikevo neꞌmo nene leliꞌ guvete vilive lisa engiꞌ okoꞌine di dizilisa nene lengiꞌ gatine hizi okodine lolovo huki hulilizave li li-lingidaaꞌ nave.
GAL 6:14 Ingine neꞌmine igaꞌ naha neniꞌ nene initeꞌ mamukisi okoꞌne ma do dizesaꞌmuve. Asi Guvetesi ve Izesuꞌ Kilisitoꞌ do luꞌ izelesa lohotoꞌ zaloꞌ hilineꞌ nemukovoꞌ nene do naba ogo minaaꞌ nouve. Kilisitoꞌ lohotoꞌ zaloꞌ hilineꞌ neꞌmo naza me misubouꞌ monovote goloso okode losuvolotiꞌ nene eveneꞌ lamineꞌ none lo okode do dizaaꞌ monovo goloso nevoꞌmine nene mudise hulosa aꞌmine monovomuꞌ giluvo mo hele osuꞌ laniꞌ nenako neniꞌ luꞌneuꞌ nene gohi ma minevoꞌ dovoꞌ amilidoꞌ neive. Idoꞌ Kilisitoꞌ lohotoꞌ zaloꞌ hilinguꞌ nene nazasi hiluvoniꞌ gelavo aꞌmine me misubouꞌ monovo goloso neꞌmo neniꞌ luꞌne nene gohi ma do ote-nedamilidoꞌ o neive.
GAL 6:15 Laza nene okode lolovo huko hulosa noneꞌ nolihe huko hulamo noneꞌ nolihe neꞌmo initeꞌ gihile aꞌminguꞌ ma nomive. Asi gosohoꞌ lemeni dameni lamineꞌ do otuho minaaꞌ neꞌmo nene initeꞌ gihile neive. Nemuꞌ nene naza okoꞌne losuvolotiꞌ nene eveneꞌ lamineꞌ nouve lo okoꞌne do dizamo Kilisitoꞌ lohotoꞌ zaloꞌ hilineꞌ nemukovoꞌ nene do naba ogo minaaꞌ nouve.
GAL 6:16 Idoꞌ nemuꞌ nene aꞌmine noluvoniꞌ gamaziloꞌ nene eꞌmeti igi mili minilizave nene lengita Oꞌmosolatiꞌ hongu nesi idoꞌ mangi gatulo nesi nene mino Isilaeleꞌ zuho gihile Oꞌmosoꞌmi evenele mukitasi nene mine do vo miniliho lo noluve.
GAL 6:17 Gamazi nene mo osuꞌ nolivo naza tiꞌ lo noluve: Izesuꞌnimuꞌ gele eleꞌvoleꞌ uvoniꞌ nemuꞌ goboni mili-nidi neniꞌ okoꞌneloꞌ nibilaniꞌ huꞌne nene Izesuꞌ eiꞌ nosoꞌve neꞌmino asiꞌve molo-nedavo nouvoniꞌ nenako nemuꞌ nene gohi lihiteheꞌ initeꞌ igi geni nebeleli akaloꞌ neleꞌmize milalizave lo gelamuve.
GAL 6:18 Idoꞌ neze zuhokizo, leliꞌ Guvetesi ve Izesuꞌ Kilisitoꞌ do lamineꞌ o-ledaaꞌ neineꞌ monovoꞌve lamineꞌ neꞌmo lutinguꞌ mine do vo minivo. Neꞌmino miniliho. Moda ve.
EPH 1:1 Izesuꞌ Kilisitoꞌ aposoloꞌve mineline lo Oꞌmosoꞌmo eiꞌ luloloꞌ neleꞌmize molave Pauloꞌ naza Oꞌmosoꞌmi zuho Eheso numuno ebekuꞌ mini Izesuꞌ Kilisitoꞌnimuꞌ gili eleꞌvoleꞌ igi eꞌmeti minave lengiꞌ nene luhuvo initeꞌ mene nogize-lingiduze. Ningilo.
EPH 1:2 Idoꞌ meteho Oꞌmoso idoꞌ Guvelesi ve Izesuꞌ Kilisitoꞌ engitatiꞌ nasahiliꞌ idoꞌ hongu lo lamino minaaꞌ monovo nene lengita mine do voo miniliho.
EPH 1:3 Kilisitoda ogo giꞌmizuningumuꞌ ve lo Guvetesi ve Izesuꞌ Kilisitoꞌ eiꞌ Oꞌmosoꞌve mino melehosi minive aza nene Okulumokutiꞌ lute hize eleꞌ o-ledelineꞌ monovo danava lamineꞌ ato atoꞌ mukiꞌ nene lehize-ledo noꞌnohoꞌ mo ize-lede neineꞌ nenako nemuꞌ do naba o-do opoꞌni lo-delone.
EPH 1:4 Neꞌmine o-lidineꞌ nene gomuꞌ olihe okulumoꞌ misubo do sotoꞌ amosa neze veꞌneloꞌ neze eveneꞌne lisiheꞌ lihimetine nomivo gamazitine nomineꞌ minilizave lo do kegese-ledo Kilisitoda do giꞌmize-lidineꞌ ve.
EPH 1:5 Neꞌmine ogo gomukutiꞌ lulo lemo leliꞌ nene Kilisitoꞌ gono dodo vilidotiꞌ nene neniꞌ izipahaꞌne ve lo do tiꞌ oloniꞌ nene lamineꞌ oloseive lo eiꞌ luloloꞌ ogo do tiꞌ o-lidineꞌ ve.
EPH 1:6 Idoꞌ neꞌmine ineꞌ nene Oꞌmosoꞌmo lulo eme neive eiꞌ gipele nene haza gidini leliꞌ nasahiliꞌ o-ledo imiselineꞌ nene Oꞌmoso aza atoliꞌmine ogo nasahiliꞌ gehepeve o-ledavo laza opoꞌni lo do naba o-deloningumuꞌ ve losa neꞌmine ineꞌ ve.
EPH 1:7 Aꞌmine Oꞌmosoꞌmo lulo imive gipele nene lelitoꞌ medelo leliꞌ lihimetemuꞌ vaniseꞌve hulo hilineꞌ neꞌmo aꞌmine lihimete nene hulo-ledavo lihimete nomineꞌ minaaꞌ none. Ee, neꞌmine ogo aza vauve elo do atoliꞌmine ogo nasahiliꞌ o-ledo
EPH 1:8 gele vevesaaꞌ monovo idoꞌ gele nge lo minaaꞌ monovo nene lehize-lidineꞌ ve.
EPH 1:9 Neꞌmine ogo eiꞌ luloloꞌ gozopota Kilisitoꞌ gono dodo vilidotiꞌ olove lo gilineꞌ initeꞌ lamineꞌ goloso sunoꞌ haleko ha minineꞌ nene laza aꞌminemuꞌ geleloneꞌ nene lamineꞌ oloseive lo gelo aꞌmine sunoꞌ haleko ha minineꞌ initekumuꞌ nene lo sotoꞌ ogo lo-limineꞌ ve.
EPH 1:10 Aꞌmine eiꞌ luloloꞌ do sotoꞌ ilineꞌ initeꞌ nene neꞌmino neive: Gono gizekaꞌ hizo dodo vo neivo gamene lamineꞌ nene sotoꞌ ogavo neuꞌ nene apiꞌ ogo aza initeꞌ mataꞌ mukiꞌ okulumokuꞌ minaniꞌ initekisi idoꞌ me misubouꞌ minaniꞌ initekisi nene mine lamineꞌ igi minami ato atoꞌ minadotiꞌ do hamoꞌ o-ngedo Kilisitoda do eꞌmete-ngedo Kilisitoꞌni nene aꞌmine initeꞌ mataꞌ mukiliti godoꞌnidoꞌ minive loloꞌ o-deleseive.
EPH 1:11 Idoꞌ laza eiꞌ Kilisitoꞌnimuꞌ gele eleꞌvoleꞌ ogo minuneꞌ neꞌmo ganaꞌ apiꞌ ogo Kilisitoꞌ do luꞌ izelingumuꞌ nene gele eleꞌvoleꞌ ogo ezemuꞌ gizebo ogo minaaꞌ unive Zuda ve leze nene Oꞌmoso aza initeꞌ mukiꞌ nene eiꞌ gilidokovoꞌ do sotoꞌ ogaꞌ ive aza gozopotatiꞌ neꞌmine olove lo gala gelo minidoꞌ nene Zuda ve leliꞌ nene do kegese-ledo eiꞌ evenele zuho ve lo leleꞌmize molaniꞌ ve. Ee, eveneꞌ ato atolite ningi Oꞌmosomuꞌ eze nene emeni dameniꞌve lamineꞌ golososi neive li nopoꞌni lilizave losa Zuda ve leze nene eiꞌ evenele zuho ve lo leleꞌmize molavo none.
EPH 1:13 Idoꞌ aꞌmineꞌmine igi Zuda ve minamave lingine gamazi gihile adoꞌ Kilisitoꞌ aza lengiꞌ do lunguꞌ izelingumuꞌ gamazi lamineꞌ nene mo gilisa Kilisitoꞌnimuꞌ gili eleꞌvoleꞌ ikevo neꞌmo nene Oꞌmosoꞌmo lemelove lo lo huko lineꞌ Sikalahuꞌve nene eiꞌ Kilisitoꞌnimuꞌ ve lo lehize-lengedo eiꞌ ve lo aꞌmine Sikalahuꞌ nedunuꞌ nene noso molo-lengedavo nizave.
EPH 1:14 Idoꞌ Oꞌmosoꞌmo eiꞌ Sikalahuꞌve lehize-lidineꞌ nene eveneꞌ mukiꞌ Oꞌmosomuꞌ nene emeni dameni laminekisi neive li nopoꞌni lilizave lo eze evenele leliꞌ nene meni hizo do eita ilineꞌ gono apiꞌ ineꞌ nene mudise do pelosa lemelesa salani molo-lidineꞌ initeꞌ linge ma nene mo laminetoꞌ dalizave lo lelebizelesa aꞌmine salani molo-lidineꞌ initekutiꞌ ma aꞌmine Sikalahuꞌve nene gomuꞌ noso neꞌmine molosa lehize-lidineꞌ ve.
EPH 1:15 Nemuꞌ nene lingine Guvelesi ve Izesuꞌ Kilisitoꞌnimuꞌ gili eleꞌvoleꞌ naniꞌ idoꞌ Izesuꞌ zuho mukiꞌ lutine ngimi nasahiliꞌ i-ngidaaꞌ naniꞌ neꞌmi gamaziꞌve nene naza gelo
EPH 1:16 nemuꞌ lengikumuꞌ nene Oꞌmosola isaaꞌ neve lo gamene gamene opoꞌni laaꞌ nouve. Idoꞌ neꞌmino Oꞌmosola lengikumuꞌ laaꞌ nouvonguꞌ nene aza neꞌmino hize eleꞌ o-lengedelive losa neꞌmine laaꞌ nouve:
EPH 1:17 Lingine Oꞌmosomuꞌ gili guni ilisa giliꞌmi vi nizavo Guvetesi ve Izesuꞌ Kilisitoꞌ Oꞌmosoꞌve aza emeni dameni lamineꞌ golososi minidiꞌmo guvele monaaꞌ ive meteho aza nene gamazi monovo do sotoꞌ ogo lengelebizo idoꞌ gili vevesaaꞌ lengemeni nesi nene lehize-lengedelive lo ezela laaꞌ nouve.
EPH 1:18 Idoꞌ initeꞌ neꞌmine dalizave lo elese molo lingimineꞌ gamenelotiꞌ gili eleꞌvoleꞌ igi aꞌminemuꞌ gizebo igi minaaꞌ naniꞌ initeꞌ nene aza guvelesi initeꞌ neꞌmine manaꞌmine initeꞌ lamineꞌ nene vauve elo eze evenele leliꞌ lemelesa salani molo-lidineꞌ neꞌmi monovo nene lingine mo ningi gili vevesi
EPH 1:19 idoꞌ amuzo ato atoꞌ mukiꞌ ngivileꞌ ogo osuꞌ lo atoliꞌmine ogo dizo minineꞌ amuzoꞌve neꞌmo laza ezemuꞌ gele eleꞌvoleꞌ ogo minaaꞌ nonive leliꞌ hize eleꞌ o-ledaaꞌ neineꞌ neꞌmi monovo nesi ningi gili vevesi minilizave lo nemukisi Oꞌmosola laaꞌ nouve.
EPH 1:20 Idoꞌ aꞌmine leze hize eleꞌ o-ledaaꞌ neineꞌ amuzo atoliꞌmine ogo dizo minineꞌ neꞌmo nene Kilisitoda gono do mo hilingutiꞌ do ote-do Okulumokuko do dize-do Oꞌmosolotiꞌ lemo miniveꞌmi moꞌmosiꞌ Okulumokuꞌ Oꞌmosoꞌmo ana hulaaꞌ idaa hulo-davo mitoꞌ neive.
EPH 1:21 Idoꞌ neꞌmino mino Kilisitoꞌ aza nene eveneꞌ guveꞌinesi ve dizi minaniꞌ limi minaniꞌ ngomoꞌ nabaꞌ idoꞌ ato atoꞌ amuzoꞌinesi minave mukiꞌ idise mene gameneuꞌ nizaniꞌ engikovoꞌ nesi nevoba asi alingeꞌ gamenela sotoꞌ igi minilizaniꞌ nesi mukiꞌ nene mo ngivileꞌ ogo osuꞌ gehepeve losa mukiliti Guveꞌinesi ve loloꞌ ogo neive.
EPH 1:22 Neꞌmino neivo Oꞌmoso neꞌmo initeꞌ mukiꞌ nene do Kilisitoꞌ gizeneukovoꞌ leme-ngedo Oꞌmosoꞌmi evenele mulise lelitoꞌ nesi nene godoteloꞌ minive mineleseive lo eleꞌmize molo-lidineꞌ ve.
EPH 1:23 Idoꞌ Kilisitoꞌ nene godoteloꞌ minive neivo eze evenele mulise laza nene eiꞌ okoꞌnoꞌve linge loloꞌ ogo mino aꞌmine numudoꞌ namadoꞌ initeꞌ mataꞌ mukikuꞌ mine osuꞌ lo minevo dovoꞌ ogo minive eita vo giꞌmizekunivo ezesi lezesi nene eveneꞌ hamoꞌ neꞌmine loloꞌ ogo nonive nene none.
EPH 2:1 Idoꞌ lingine Zuda ve minamavesi gomuꞌ monovo goloso palasa di sotoꞌ igi idoꞌ lihimetinesi ve minaaꞌ adiꞌmo lutine nene mo hele vineꞌ gelavo minangutiꞌ nene Oꞌmosoꞌmo Kilisitoꞌni hilingutiꞌ do ote-dinguꞌ nene linginesi makatoꞌ do ote-lingidineꞌ ve.
EPH 2:2 Ee, gomuꞌ nene lingine me misubouꞌ aleveti monovo golosoloꞌ eꞌmeti nivi sikalahuꞌ golosoliti muliseloꞌ gizebo o neive eitoꞌ gelekeleꞌ igi minaniꞌ gameneuꞌ nene monovo goloso palasa di sotoꞌ igi lihime diꞌmi vi minaaꞌ aniꞌ ve. Idoꞌ aꞌmine sikalahuꞌ golosoliti guveꞌinesi ve nene Oꞌmosoꞌmi gamazi gili hulaaꞌ naveti luꞌninguꞌ idise gono do minaaꞌ ive nene neive.
EPH 2:3 Idoꞌ gomuꞌ nene Zuda ve lazasi nene aꞌmine Oꞌmosoꞌmi gamazi gili hulaaꞌ avete igi mili igaꞌ adiꞌmine ogo laza mukiꞌ gomuꞌ lemeni dameni goloso neꞌmo umo hilidoꞌ eꞌmeto okodesi idoꞌ gatesi engiꞌ lasidoꞌ ogo molo minaaꞌ uneꞌ ve. Idoꞌ eveneꞌ linge mukiꞌ minaniꞌ neꞌmino lazasi nene Oꞌmosoꞌmo izeboloꞌ molavo lebelelidoꞌ o minineꞌ lemeni dameni golososi minuneꞌ ve.
EPH 2:4 Neꞌmino mino laza nene goloso initete neꞌmo lutesi mo hele vivo minuneꞌ gelavo minuneꞌza Oꞌmosoꞌmo leliꞌ mulumote gelo isete vauve elo izaaꞌ ive minosa lulo atoliꞌmine ogo lemaaꞌ neineꞌ nenako nemuꞌ nene Kilisitoꞌni aza hilingutiꞌ do ote-dinguꞌ nene goloso initete neꞌmo lelikisi hiluneꞌ gelavo noningutiꞌ nene makatoꞌ do ote-lidineꞌ ve. Idoꞌ Kilisitoꞌni nene Okulumokuko do dize-do eveneꞌ nabalitevoꞌ minaaꞌ aniꞌ moꞌmositoꞌ eleꞌmize molanguꞌ nene lelikisi aꞌmineꞌmine ogo do dize-ledo aꞌmine neꞌmine moꞌmositeloꞌ leleꞌmize molaniꞌ gelave. Oꞌmosoꞌmo neꞌmino do luꞌ izineꞌ nene initeꞌ mamukisi nomineꞌ asi mo leliꞌ do lamineꞌ o-ledelove losa do luꞌ izineꞌ ve.
EPH 2:7 Aza neꞌmino do luꞌ izineꞌ nene eveneꞌ alingeꞌ gamenela vomine atoliꞌmine ogo aza leliꞌ do lamineꞌ o-lidineꞌ nene ningilizave losa ngelebizelesa neꞌmino do luꞌ izineꞌ ve. Idoꞌ neꞌmine ogo do luꞌ izelesa Izesuꞌ Kilisitoꞌni nene lelikumuꞌ ogo helelive lo imiselineꞌ neꞌmo nene lelikumuꞌ do atoliꞌmine ogo muhelete ningineꞌ nene sotoꞌ ogo neive.
EPH 2:8 Ee, Oꞌmosoꞌmo do luꞌ izineꞌ nene initeꞌ mamukisi nomineꞌ asi mo leliꞌ do lamineꞌ o-ledelove losa nasahiliꞌ o-ledavo Izesuꞌnimuꞌ gele eleꞌvoleꞌ uneꞌ nemuꞌ nene do luꞌ izineꞌ ve. Laza leliꞌ amuzotelotiꞌ gono duningumuꞌ do luꞌ izamive. Asi Oꞌmosoꞌmo haza gidini neꞌmine o-lidineꞌ ve.
EPH 2:9 Idoꞌ laza nene gono do minuningumuꞌ do luꞌ izineꞌ nomineꞌ nenako nemuꞌ nene leliꞌ gono do minunidotiꞌ ve lo okode do naba ogaꞌ nene ma nomive.
EPH 2:10 Idoꞌ neꞌmine noluvoniꞌ nene Oꞌmosoꞌmo asiꞌve gono dosa leliꞌ do sotoꞌ o-ledavo noneꞌ nenako nemuꞌ noluve. Aza nene leliꞌ olihe do sotoꞌ o-ledamosa leliꞌ nene monovo laminetokovoꞌ eꞌmeti minilizave losa gomukutiꞌ gele minineꞌ nenako laza Izesuꞌ Kilisitoda giꞌmizekunivo nemuꞌ nene aza aꞌmine monovo lamineꞌ nene igi mili minilizangumuꞌ ve lo lemeni dameni gosohoꞌ do sotoꞌ o-lidineꞌ ve.
EPH 2:11 Idoꞌ lingine goloso gehepeve igi minangutiꞌ nene Oꞌmosoꞌmo neꞌmine ogo do lunguꞌ izineꞌ nenako nemuꞌ gatine molavo opoꞌni lami minikelizave. Nemuꞌ nene Oꞌmosoꞌmi noso nene lengiꞌ okodidoꞌ minamivo lingine heta atoꞌ ve ve li li-lingidaaꞌ aniꞌ nemuꞌ nene gatine molamivo ha gili minilo. Ee, eveneꞌ ingine aꞌinedunuꞌ okoꞌine lolovo huki hulaaꞌ aniꞌ nenako aꞌminemuꞌ nene Oꞌmosoꞌmi noso do nonive ma nene none li laaꞌ ave Zuda Ve ingine nene lengikumuꞌ Oꞌmosoꞌmi noso di minamave ve li li-lingidaaꞌ aniꞌ ve.
EPH 2:12 Aꞌmine gameneloꞌ nene lingine Oꞌmosoꞌmi evenele zuho Isilaeleꞌ aleveutiꞌ minami heta atoꞌ ve mini Oꞌmosoꞌmo Isilaeleꞌ aleve do nguꞌ izelive ma engita imiselelesa lo huko-ngidineꞌ gamaziꞌmi lulouꞌ nene lingine minami idoꞌ Kilisitokisi nene do lunguꞌ ezelidoꞌ mini mili minamaniꞌ gelavo idoꞌ Oꞌmososi nene lengikisi minamineꞌ gelavo idoꞌ initeꞌ lamineꞌ sotoꞌ o-ledeleseive li lingine gili eleꞌvoleꞌ igi aꞌminemuꞌ gizebo igi minilizaniꞌ initeꞌ nesi nene ma minamivo lingine misubouko haza minivi diviꞌ igi mini mudise goloso ilizaniꞌ akaloꞌ mini mili minaniꞌ nene gatine molamivo ha gili minilo.
EPH 2:13 Ee, neꞌmine igi minaniꞌza lingine gomuꞌ nene Oꞌmosomuꞌ ningi gilami abazaꞌ minave ma nene idise mo Kilisitoda igi giꞌmizikevo lihimetinemuꞌ vaniseꞌve hulo hilineꞌ neꞌmo nene lengeleꞌmize Oꞌmosola ogavo nizave.
EPH 2:14 Idoꞌ neꞌmine noluvoniꞌ nene Kilisitoꞌ aza asiꞌve nene heta atoꞌ vesi Zuda vesi nene do hongu lo-ledo do hamoꞌ o-lidineꞌ nenako laza zou lo minuneꞌ monovo nene eitatiꞌ nenako nemuꞌ nene noluve. Aza nene ge lukehe nebele ne lukehe gebele lo minuneꞌ monovote nene laza Zuda vesi heta atoꞌ vesi minuninguꞌ olusoꞌ nene gesi neꞌmine minineꞌ nene kelo lolotoloꞌ ogo do hulo leleꞌmize hamoꞌ ineꞌ ve.
EPH 2:15 Idoꞌ Moseꞌ aza neꞌmine manaꞌmine ilo lo louꞌ gamazi ato atoꞌ Zuda vemuꞌ lo huko-ledavo neꞌmi gesi minguꞌ minunivo neꞌmo Zuda vesi heta atoꞌ vesi do ato atoꞌ o-ledavo ge lukehe nebele ne lukehe gebele lo minunivo Kilisitoꞌ aza Zuda vesi heta atoꞌ vesi ato atoꞌ minuningutiꞌ nene do hamoꞌ o-ledo aꞌmine zuho sitaꞌ minuningutiꞌ nene hamoꞌ zuho neꞌmine gosohoꞌ loloꞌ o-ngedelove lo eiꞌ okoꞌno hulo hilidiꞌmo aꞌmine louꞌ gamazi nene do hulo do hongu lo-lidineꞌ ve.
EPH 2:16 Izesuꞌ aza nene lohotoꞌ zaloꞌ hilidiꞌmo laza Zuda ve minunivesi heta atoꞌ vesi nene hoto hotoꞌ mino lovo lolize uneꞌ gilineꞌ nene do hele-ledo mulise hamoꞌ loloꞌ o-ledo idoꞌ Oꞌmoso aza lihimetemuꞌ izeboloꞌ molavo minineꞌ nesi nene bele helo Oꞌmosola makatoꞌ do bize-ledo zogo limineꞌ ve.
EPH 2:17 Neꞌmine ogo hongu lo laminoovoꞌ minaliꞌmi gamazi nene Oꞌmosomuꞌ gilami abazaꞌ minave heta ve linginesi idoꞌ abazaꞌ minamo Oꞌmososi bizo minunive Zuda ve lelikisi nene ogo lo sotoꞌ ogo lo-lemavo gelekune.
EPH 2:18 Neꞌmine noluvoniꞌ nene KIlisitoꞌ aza lihimetemuꞌ helo heta atoꞌ vesi idoꞌ Zuda vesi sitatoꞌ Oꞌmoso metehida aloneꞌ akate vele-ledavo Oꞌmosoꞌmi Sikalahuꞌ hamoꞌ neꞌmo leleꞌmizo aꞌmine akaloꞌ ogavo laza sitatoꞌ aꞌmidoꞌ ha ogaꞌ nouneꞌ nenako nemuꞌ noluve.
EPH 2:19 Nemuꞌ nene heta atoꞌ ve lingine gomuꞌ nene venenga ve neꞌmine idoꞌ gaꞌ ve neꞌmine minaniꞌ nene gohi minami Oꞌmosoꞌmi eveneꞌvela vi giꞌmizi eze gizebo inguꞌ minuniveti zuhouꞌ nene mudise vi giꞌmizi minikeve.
EPH 2:20 Neꞌmine igi mini eiꞌ evenele liliꞌ igi minikevo Oꞌmoso aza lengikuꞌ minevoꞌ alevoꞌ ogo minineꞌ neꞌmo lingine nene eiꞌ numuꞌve neꞌmine liliꞌ igi nizave. Idoꞌ laza aposolokisi polohetesi nene monoꞌ numuno di oti gizaaꞌ naniꞌ simeni neꞌmine nene nonivo numuno nene lelitoꞌ do ngi lo lehete o minaaꞌ neive. Idoꞌ Kilisitoꞌ neve nene numuno mukiꞌ do giliꞌ lo do ngi lo do minaaꞌ ive numuno langise neꞌmine nene mino numuno mukiꞌ nene do ngi lo neive.
EPH 2:21 Ee, numunoliꞌmi okoꞌno vaiꞌ nene ezeloꞌ lehete o neivo neꞌmo nene Guvelesi veꞌmi kekeize monoꞌ numuno loloꞌ oꞌmo vo minaaꞌ neive.
EPH 2:22 Idoꞌ linginesi Guvelesi vela igi giꞌmizaniꞌ neꞌmo Oꞌmoso aza aꞌminguꞌ minevo dovoꞌ ilive lo Oꞌmosoꞌmi Sikalahuꞌ neꞌmo linginesi nene aꞌmine numuno neꞌmi lingelalatiꞌ nene loloꞌ o-lengedeꞌmo novive.
EPH 3:1 Idoꞌ Oꞌmosoꞌmo neꞌmino do lunguꞌ izineꞌ nenako nemuꞌ Pauloꞌ naza Izesuꞌ Kilisitoꞌ goboni veꞌve mino eikumuꞌ nene heta atoꞌ ve lengita gono do minuvoniꞌ nemuꞌ Loma vete galapuso numunguꞌ huli-nidikevo minuve naza Oꞌmosola lengikumuꞌ laaꞌ nouve.
EPH 3:2 Oꞌmosoꞌmo lengiꞌ nene eiꞌ nasahiliꞌveuꞌ lengeleꞌmize molalongumuꞌ ve lo asiꞌve lengikumuꞌ neniꞌ nene gono nimineꞌ nemuꞌ mo gili nilisave lo gele nouve.
EPH 3:3 Idoꞌ neꞌmine o-nedo olosa gilineꞌ initeꞌ haleko sunoꞌ minineꞌ nene lo sotoꞌ ogo lo-nimineꞌ nesi nene mo gili nilisave lo gele nouve. Aꞌminemuꞌ nene me luhuvo initekuꞌ nene gamazi liꞌnibevoꞌ gize nouvoniꞌ ma neive.
EPH 3:4 Aꞌmine gizuvoniꞌ gamazi nene gatisa naza Kilisitoꞌnimuꞌ gamazi sunoꞌ minineꞌ gele guno o nouvoniꞌ nemuꞌ nene lingine gili lamineꞌ ilisave.
EPH 3:5 Idoꞌ aꞌmine sunoꞌ minineꞌ gamazi nene Oꞌmosoꞌmi Sikalahuꞌve neꞌmo idise mene gamenela Kilisitoꞌ aposoloꞌve minilizave lo do kegese-lidive lelitasi idoꞌ polohetelasi lo sotoꞌ ogo nolo-limineꞌ neꞌmino gomuꞌ gamene vomila nene Oꞌmosoꞌmo eveneꞌ ma lo-ngemesaꞌmineꞌ ve.
EPH 3:6 Aꞌmine gamazi gomuꞌ haleko sunoꞌ minineꞌ nene neꞌmino neive: Oꞌmosoꞌmo eze evenele zuho lemelove lo lo huko-ledo salani molo-lidineꞌ initeꞌ nene Zuda ve lelikovoꞌ dalobe lo giluneꞌ initeꞌ nene lelikovoꞌ ma damolosune. Asi heta atoꞌ ve lingine Kilisitoꞌnimuꞌ gamazi lamineꞌ mene gilii gili eleꞌvoleꞌ igi ezela giꞌmizi Oꞌmosoꞌmi evenele liliꞌ igi leliꞌ Zuda vesi hamoꞌ zuho liliꞌ igi mini aꞌmine Oꞌmosoꞌmo initeꞌ lemelove lo lo huko-lidineꞌ gamazi neꞌmi lulouꞌ lelikisi makatoꞌ vi hili mini aꞌmine salani molo-lidineꞌ initeꞌ nene lelikisi makatoꞌ dalonidoꞌ minikeve.
EPH 3:7 Idoꞌ Oꞌmoso aza nasahiliꞌ o-nidineꞌ neꞌmo eiꞌ amuzoꞌve nene nenikuꞌ gono nodavo aza gono nemavosa aꞌmidoꞌ eꞌmeto aꞌmine gamazi lamineꞌ nene lo soto sotoꞌ ogo eze goboni ve neꞌmine loloꞌ ogo nouve.
EPH 3:8 Ee, naza nene gomuꞌ minaaꞌ uvodasi giluvoniꞌ nene Oꞌmosoꞌmi evenele mukikutiꞌ lemo minuve minuvoniꞌza Oꞌmoso aza neniꞌ nene do vevese-nedo nasahiliꞌ o-nidineꞌ neꞌmo Kilisitodatiꞌ nene monovo danava lamine tamineꞌ vaiꞌ goloso lo neivo laza ngelo ningo gele osuꞌ lamoloneꞌ o minineꞌ initeꞌ neꞌmi gamaziꞌve lamineꞌ nene Zuda ve minamaniꞌ heta atoꞌ ve lo sotoꞌ ogo lo-ngemeline lo
EPH 3:9 idoꞌ Oꞌmosoꞌmo leze Zuda vesi heta atoꞌ vesi Kilisitoda do hamoꞌ o-ledelesa gilineꞌ gamazi nene initeꞌ mataꞌ do sotoꞌ ogaꞌ ive Oꞌmoso aza nene gozopoꞌ gamene akaꞌmilatiꞌ eiꞌ lulouꞌ molo halekekivo sunoꞌ haza minineꞌ gamazi nene eveneꞌ ato atoꞌ mukilite ningi gililizangumuꞌ nene neniꞌ lo soto sotoꞌ ogo lo-ngemeline lo gono lamineꞌ nemosa neleꞌmize molavo nouve.
EPH 3:10 Idoꞌ Oꞌmosoꞌmo neꞌmine ineꞌ nene guveꞌinesi ve amuzoꞌine ato atokisi okulumokuꞌ veleta miniꞌmi monave nete leliꞌ Zuda vesi idoꞌ heta atoꞌ vesi Oꞌmosoꞌmo do hamoꞌ o-ledo eze evenele mulise gosohoꞌ hamoꞌ do sotoꞌ o-ledavo minunive lelitotiꞌ nene ningisa Oꞌmoso aza nene neꞌmine manaꞌmine gala gele nge lo minaaꞌ neive li ningi gililizave losa neꞌmine ineꞌ ve.
EPH 3:11 Idoꞌ Oꞌmosoꞌmo neꞌmine ineꞌ nene gomuꞌ gozopoꞌ akaꞌmilatiꞌ aza olosa gilineꞌ initeꞌ nene Guvetesi ve Izesuꞌ Kilisitoꞌ gono dadiꞌmo sotoꞌ ineꞌ initeꞌ nene do gihile izelove losa neꞌmine ineꞌ ve.
EPH 3:12 Idoꞌ Kilisitoꞌ gono daniꞌ neꞌmi gihileꞌve nene laza ezemuꞌ gele eleꞌvoleꞌ ogo mino Oꞌmosoꞌmo lebelelihe lo golise gelamo mo hize eleꞌ o-ledeleseive lo gele eleꞌvoleꞌ ogo ezemuꞌ lehelele izamivo gamazi ha lo-emaaꞌ oloneꞌ akate nene Kilisitoꞌ mo vele ngolose-ledavo Oꞌmoso gamazi ha lo-emaaꞌ none.
EPH 3:13 Idoꞌ Oꞌmosoꞌmo gono nimidotiꞌ nene initeꞌ lamineꞌ neꞌmine sotoꞌ ogaꞌ neineꞌ nenako nemuꞌ nene naza tiꞌ lo nolo-lingimuve: Naza lengiꞌ lengeleꞌmize lamineꞌ olosa gono do minuvoniꞌ maꞌmo goboni mili-nidi nalaꞌ numunguꞌ huli-nidikevo geni initeliꞌmi lulouꞌ nouvoniꞌ nemuꞌ nene geni lengebelamivo minilo. Aꞌmine geni initeliꞌmi lulouꞌ nouvoniꞌ nene lengikumuꞌ ve losa nouvoniꞌ nenako Pauloꞌ lelikumuꞌ gelavo dizave li nelotiꞌ lingine ningi gili longolize izilizadoꞌ o neive.
EPH 3:14 Idoꞌ Oꞌmosoꞌmo neꞌmino do lunguꞌ izive lo gomuꞌ lo-lingimuvoniꞌ nemuꞌ nene naza okulumokuko misubouko ato atoꞌ zuho mineꞌmo monuneꞌ mukiliti gulivetesi idoꞌ lemeni damenisi do sotoꞌ molo-ledaaꞌ ive meteho Oꞌmosola nene obuvoꞌne hizo lengikumuꞌ nene tiꞌ lo laaꞌ nouve:
EPH 3:16 Eiꞌ emeni dameni atoliꞌmine lamine tamineꞌ neineꞌ votigileloꞌ nene do molo amuzo lengemavosa Sikalahuꞌve neꞌmo lutinguꞌ hize eleꞌ o-lingidivo
EPH 3:17 neꞌmo Kilisitoꞌnimuꞌ gili eleꞌvoleꞌ igi minikevo aza lutinguꞌ minevo dovoꞌ ogo minelive. Idoꞌ neꞌmine ogavo lingine lute ngemo nasahiliꞌ o-ngedaaꞌ monovoloꞌ nene eꞌmeti minikevo neꞌmo monokuꞌ luhivetine do ngi lo-lengedavo amuzo mili minilizave.
EPH 3:18 Idoꞌ neꞌmine ilizave lo Oꞌmosola laaꞌ nouvoniꞌ nene Kilisitoꞌ do atoliꞌmine ogo lulo lemo nasahiliꞌ o-ledaaꞌ neineꞌ monovo nemuꞌ nene eveneꞌ laza mudise gele osuꞌ lamolonidoꞌ o neineꞌ monovomuꞌ nene gilisa Kilisitoꞌ do atoliꞌmine goloso ogo vauve elo lulo lemaaꞌ neingumuꞌ nene Oꞌmosoꞌmi evenele mukikisi gili nge li minikevo neꞌmo Oꞌmosoꞌmi emeni dameni vaiꞌ nene lutinguꞌ vaiꞌ lo minelive lo Oꞌmosola laaꞌ nouve.
EPH 3:20 Ee, laza Oꞌmosoꞌmo neꞌmine manaꞌmine initeꞌ ha oloseive lo giluneꞌ initeꞌ idoꞌ neꞌmine ilive lo ezela laaꞌ nouneꞌ initeꞌ mukiꞌ nene ivileꞌ ogo eiꞌ amuzoꞌve neꞌmo leliꞌ luteuꞌ gono do minaaꞌ neineꞌ neꞌmo nene atoliꞌmine initeꞌ vauve elo ilineꞌ amuzoꞌvesi neineꞌ nemuꞌ nene
EPH 3:21 laza Izesuꞌ Kilisitoꞌnimuꞌ gele eleꞌvoleꞌ ogo Oꞌmosoꞌmi evenele mulise loloꞌ ogo nonivete ezemuꞌ opoꞌni loꞌmo vo nonivo kilisimasi ogo vokaꞌ vokaꞌ ogo minelineꞌ nene mo osuꞌ lamivo mo neꞌminovoꞌ miniliho.
EPH 4:1 Neꞌmine o neineꞌ nenako nemuꞌ nene lingine Oꞌmosoꞌmo elese molo-lengedo eiꞌ ve lo lengeleꞌmize molavete eꞌmetikevo lisiheꞌ ilineꞌ monovolokovoꞌ lisiheꞌ igi eꞌmeti viviꞌ viviꞌ igi minilizaho lo agae lo naza Guvelesi veꞌmi goboni ve minuvongumuꞌ nalaꞌ numunguꞌ huli-nidikevo minuveꞌmine nolo-lingimuve.
EPH 4:2 Lingine neꞌmine idi nivilizangutiꞌ nene lutineꞌve di dizami loposo lengemeni dameni di otuhi minangutiꞌ Oꞌmosoꞌmo do gatine lo-lengedavo nizadokovoꞌ nene mini ato atoꞌ initeꞌ lengita sotoꞌ neivo ma hongu li mini lengiꞌ okodinguꞌ nene eze izeboloꞌ molali initeꞌ anivo anivo ge gizeboloꞌ molali initeꞌ ivo ivo li minilizangumuꞌ nene gili hulisa asi goseleꞌ lengebelamivo lutine ge neme ne geme livoꞌ minilo.
EPH 4:3 Idoꞌ neꞌmine igi mini Oꞌmosoꞌmi Sikalahuꞌ neꞌmo do hamoꞌ o-lengedavo hongu lo minaliꞌmi gesi minguꞌ nizangutiꞌ nene limi vami lutine di hamoꞌ igi aꞌmine monovoloꞌ nene amuzo mili eꞌmeti vi minilo.
EPH 4:4 Kilisitoꞌ evenele mukitoꞌ laza nene Kilisitoꞌ okoꞌno hamokutiꞌ neꞌmine nonivo Oꞌmosoꞌmi Sikalahuꞌ hamoꞌ neꞌmo nene leliꞌ mukikuꞌ nene minevo dovoꞌ ogo neive. Idoꞌ aꞌmineꞌmine ogo Oꞌmosoꞌmo do lamineꞌ o-lengedelove lo elese molo-lingididotiꞌ lingine gili eleꞌvoleꞌ igi aꞌmine gizebo igi minaniꞌ initekumuꞌ nene laza mukitoꞌ aꞌminemukovoꞌ gele eleꞌvoleꞌ ogo gizebo ogo none.
EPH 4:5 Idoꞌ Guvetesi ve nene hamokovoꞌ neivo eitoꞌ gele eleꞌvoleꞌ uneꞌ nene mukitoꞌ gele hamoꞌ o none. Idoꞌ Guvetesi ve hamokumuꞌ nene gele eleꞌvoleꞌ o mino monoꞌ noso holaaꞌ nouneꞌ nene eiꞌ gulive hamotokovoꞌ noso holaaꞌ none.
EPH 4:6 Idoꞌ Oꞌmoso nene mukitoꞌ meteho hamoꞌ nene neive. Eiꞌ neve eveneꞌ mukiꞌ nene livileꞌ ogo osuꞌ losa dizosa neive. Neꞌmine ogo mino eveneꞌ mukiliti vovoteuꞌ mino luteuꞌ luteuꞌ gono do neive.
EPH 4:7 Ne neiha Kilisitoꞌ aza leliꞌ hamo hamoꞌ lehize-ledelesa gilineꞌ votigileloꞌ nene leliꞌ mukiꞌ hamo hamoꞌ nene monoliꞌmi amuzo lehize-ledave.
EPH 4:8 Nemuꞌ nene monoꞌ godolouꞌ tiꞌ li gizi nizaniꞌ ma neive: Guvelesi ve aza biluvaꞌve ngivileꞌ ogosa oto hozeuko dizo vinguꞌ nene lovoutiꞌ galapuso ve neꞌmine do mulise molo-ngedo ngeleꞌmizo voosa initeꞌ ato atoꞌ nene eiꞌ evenele lehize-ngidineꞌ.
EPH 4:9 Idoꞌ hoziuko dizo vineꞌ ve li gizangumuꞌ nene laza nadive lo gelelone. Aza nene gomuꞌ misubouko lemosa mo misubo luloukosi homine leme pelosa dizo vineꞌ ve lo gelelesune.
EPH 4:10 Idoꞌ misubouko mene lemo ave neꞌmi emeni dameni neꞌmo nene misubouꞌ idoꞌ okulumokuꞌ mine gikiꞌ ogo minelive lo okulumoꞌ ningaaꞌ noneꞌ nene ivileꞌ ogo idoꞌ ma ningamuneꞌ mukiꞌ nene ngivileꞌ ogo mo hoziuꞌ goloso dizosa minineꞌ ve.
EPH 4:11 Idoꞌ aꞌmine ve neꞌmo initeꞌ ato atoꞌ monoliꞌmi amuzo neꞌmine nene eveneꞌ linge leze nene aposolo minilizave lo leleꞌmize molaaꞌ idoꞌ linge ma eze veleutiꞌ gamazi li sotoꞌ igaꞌ ave polohete minilizave lo neꞌmi amuzo lehize-ngedaaꞌ idoꞌ linge ma nene monoꞌ gamazi lamineꞌ nene li sotoꞌ igi li-ngimiliza amuzo lehize-ngedaaꞌ idoꞌ pasitoli gonouꞌ ngeleꞌmize molaaꞌ idoꞌ monoꞌ apizi ngimaaꞌ ilizave lo ngeleꞌmize molaaꞌ neive.
EPH 4:12 Idoꞌ Oꞌmosoꞌmo neꞌmine ogo monoliꞌmi amuzo ato atoꞌ lehize-ledo neꞌmine gonoloꞌ leleꞌmize molaaꞌ neineꞌ nene eze aleve lelikumuꞌ nene monokuꞌ izipe ngomo neꞌmine minikevo tilikiloꞌ ve ingine lengeleꞌmize gopo ilisa gotine izi soza monoꞌ ato atoꞌ li-lingimikevo neꞌmo gamene gamene hepeliꞌmo pipizaꞌ niteꞌ do voleloꞌ meloꞌ ogaꞌ neineꞌ neꞌmine igi mini me monokuꞌ volobe idoꞌ ma monokuꞌ me volobe li minikelizave lo Oꞌmosoꞌmo eze evenele nene ge hize eleꞌ o-nede ne hize eleꞌ o-gede li gono diꞌmi vi mini lengiꞌ mulise Kilisitoꞌ okoꞌno neꞌmine neineꞌ nene hize eleꞌ ikevo amuzo molo minavo lingine mukiꞌ nene Oꞌmoso neniꞌ gipeꞌnemuꞌ gili eleꞌvoleꞌ igi eiꞌ monovoꞌve nene gili vevesi minikevo neꞌmo lutine do hamoꞌ ogavo monokuꞌ lodive igi Kilisitoꞌ emeni dameni vaiꞌ nene lengita mine osuꞌ lilidoꞌ o minivo minilizangumuꞌ ve lo aꞌmine gono nene leliꞌ daloningumuꞌ ve lo do vaꞌvaꞌ o-ledo gono ato atokuꞌ leleꞌmize molaaꞌ neive.
EPH 4:15 Idoꞌ monoꞌ gono ato atokuꞌ leleꞌmize molaaꞌ neineꞌ nene laza tilikiloꞌ ve golosolite igaꞌ aniꞌ neꞌmine amosa gamazi gihile laminetokovoꞌ nene eꞌmeto eveneꞌ lute ngemo aꞌmine gamazi laminekovoꞌ nene lo-ngemeꞌmo vo mineloneꞌ neꞌmo leze godoteloꞌ minive Kilisitoda nene giꞌmize lamineꞌ okunivo eze emeni dameni vaiꞌ neꞌmo lezela mine vaiꞌ lo neivo monokuꞌ lodive oloningumuꞌ ve losa monoꞌ gono ato atokuꞌ leleꞌmize molaaꞌ neive.
EPH 4:16 Aꞌmine godoteloꞌ minive neꞌmo nene eze okoꞌno neꞌmine minunive leliꞌ nene lingela lingela gono ato atoꞌ limineꞌ votigileloꞌ votigileloꞌ do molo gono lisiheꞌ ogo nodunivo aꞌmidotiꞌ nene do hamoꞌ gehepeve o-ledavo neꞌmo nene aꞌmine okoꞌno neꞌmine minunive mulise vaiꞌ nene monokuꞌ naba okaꞌ okaꞌ oꞌmo vo mino mukitoꞌ nene lute ge neme ne geme lo minuneꞌ neꞌmo do amuzo molo-ledeꞌmo vo minivo minaaꞌ noune.
EPH 4:17 Nemuꞌ nene naza Guvelesi veꞌmi velemuꞌ ogo gamazi mene amuzo molo tiꞌ lo nolo-lingimuve: Oꞌmosomuꞌ gilamave heta atoꞌ ve ingine nene gihileꞌve nomineꞌ initekumukovoꞌ gaꞌine gilaaꞌ naniꞌ nenaze. Lingine engiꞌ monovoꞌnidoꞌ nene gohi ngeꞌmetamilo.
EPH 4:18 Ingine nene luꞌninguꞌ litiꞌmuso ize minineꞌ neꞌmo negi hizi mini Oꞌmosomuꞌ gililisa aniꞌ nene luꞌine ngi lo aꞌmanapa ogavo Oꞌmosolatiꞌ minevoꞌ minevoꞌ minaaꞌ ngemeni dameni nene engita nomivo minaaꞌ nave.
EPH 4:19 Idoꞌ luꞌine ngi lo aꞌmanapa ineꞌ neꞌmo nene goloso initekumuꞌ ngovozo hilami okodeꞌmo laniteꞌ gelaaꞌ neineꞌ monovo goloso lute do goloso o-ledaaꞌ neineꞌ monovo mukiꞌ nene goseleꞌ ngebelamivo vauve goloso ilisa igi mili mini initeꞌ gohi gohi dalone li minaaꞌ nave.
EPH 4:20 Idoꞌ Kilisitoꞌ monovoꞌve lingine gilaaꞌ aniꞌ ma nene lingine engiꞌ igaꞌ aniꞌ neꞌmine ilizave losa nomive.
EPH 4:21 Eiꞌ monovo nene mo li-lingimikevo lingine ezela vi giꞌmizikevo eiꞌ Izesudatiꞌ gamazi gihile lamineꞌ nene mo apizi lingimikeniꞌ noloseive lo gele nouve.
EPH 4:22 Idoꞌ nemuꞌ nene lingine gomuꞌ monovo goloso igi mili minaaꞌ adotiꞌ ha minineꞌ lengemeni dameni litehe neꞌmo nene leliꞌ gote izo leleꞌmize goloso ogaꞌ neineꞌ initekumuꞌ nene umo helaaꞌ neineꞌ nenako nemuꞌ lingine aꞌmine gomuꞌ lengemeni dameni nene mo di hulilo.
EPH 4:23 Neꞌmine ikevo lutine gatineꞌve nene gosohoꞌ ogavo mini
EPH 4:24 lengemeni dameni gosohoꞌ nene di otuhi lingine nene Oꞌmosoꞌmi emeni dameni neꞌminesi mini gamazi lamineliꞌmi gihileꞌve nene di sotoꞌ igi eveneꞌ lisiheꞌ lamineꞌ minaaꞌ idoꞌ Oꞌmoso gelekeleꞌ o-do minakumuꞌ nene lutine mili minilo.
EPH 4:25 Nemuꞌ Kilisitoꞌ evenele laza okode do hamoꞌ ogo noningutiꞌ nene okode lingela lingela neꞌmine mino vaitoꞌ bizo noneꞌ nenako nemuꞌ mukitoꞌ lingine soza saza laaꞌ monovo nene huli eveneꞌ ma gamazi li-ngimilizaniꞌ nene mo laminetokovoꞌ li-ngimilo.
EPH 4:26 Idoꞌ lingine initeꞌ mamuꞌ lingizeboloꞌ molavo muludinguꞌ goloso gililizaniꞌ neꞌmo nene lihime lengemelineꞌ o neineꞌ nenaze. Lingine nene initeꞌ mamuꞌ muludinguꞌ goloso gili minilizaniꞌ neꞌmo Satani aza ogo do gopo o-lengedelineꞌ akaꞌve di ngoloꞌ li-dikevo ogalize. Goloso gililizaniꞌ nene lengita ha minivo hoꞌ nene lemo suꞌmizalize. Nemuꞌ eheeꞌ igi mini muludinguꞌ goloso gililizaniꞌ nene geti di hulilo.
EPH 4:28 Idoꞌ gomuꞌ gumine damineloꞌ ve minave ingine idise aꞌmine monovotine nene hulisa lengiꞌ adinedunuꞌ gono laminekovoꞌ disa initeꞌ viseꞌ igi minilizaniꞌ aleve hize eleꞌ o-ngedeloneꞌ votigileloꞌ nene initeꞌ pataꞌ do sotoꞌ molalone li gono amuzo mili di minilo.
EPH 4:29 Idoꞌ lengiꞌ vetingutiꞌ nene gamazi goloso mo kekeꞌ hamokisi lami gamazite gililiza aleve nene ngeleꞌmize lamineꞌ olone li eze hize eleꞌ o-divo eze hize eleꞌ o-divo li minaaꞌ akamuꞌ nene viseꞌ igi di sotoꞌ igi gamazi laminekovoꞌ li minilo.
EPH 4:30 Neꞌmine igi mini Oꞌmosoꞌmo eiꞌ ve lo meni hizi ve leliꞌ nene alingeꞌ mudise do luꞌ izo leleꞌmize eita ilingumuꞌ ve lo noso molo eiꞌ Sikalahuꞌve lehize-lidineꞌ nenako nemuꞌ lingine Oꞌmosoꞌmi Sikalahuꞌ aza nene goloso gelo muheleꞌ ogo minelineꞌ initeꞌ neꞌmine i-damilo.
EPH 4:31 Idoꞌ muludinguꞌ ekeseꞌ goloso gelaaꞌ idoꞌ muludinguꞌ oloꞌ laaꞌ monovo idoꞌ lingizeboloꞌ molaaꞌ monovo idoꞌ eveneꞌ gekeꞌ goloso li gotingutiꞌ li-ngimaaꞌ monovo idoꞌ eveneꞌ divi lediviꞌ igi ngemenga laaꞌ monovo idoꞌ neꞌmine manaꞌmine monovotine goloso mukiꞌ nene ogo molo ogalone li olovoꞌ igi minilo.
EPH 4:32 Ezemuꞌ mulumo gelanivo gezemuꞌ mulumo gilivo li mini ne nasahiliꞌ o-gede ge nasahiliꞌ o-nede li mini Kilisitoꞌ lihimetinemuꞌ hilineꞌ neꞌmo Oꞌmosoꞌmo aꞌmine lihimetine nene mo hulo-lengedavo nizaniꞌ nenaze. Lingine aꞌmineꞌmine igi lengikumuꞌ eveneꞌ malite goloso gili lihime dalizahe idoꞌ lingine engikumuꞌ goloso ma gili lihime dalizahe ilizaniꞌ lihimetinemuꞌ nene gili huli minami ge hulo-nede ne hulo-gede li minilo.
EPH 5:1 Idoꞌ neꞌmine ogo Oꞌmosoꞌmo lihimetine hulo-lingidineꞌ nemuꞌ nene lingine Oꞌmosoꞌmo lulo lingimineꞌ izipahala minaniꞌ nete nene eiꞌ emeni dameni neꞌmidoꞌ gehepeve eꞌmetilizadoꞌ o neineꞌ nenako nemuꞌ nene eꞌmeti minilo.
EPH 5:2 Idoꞌ Oꞌmosoꞌmo unuvo lamineꞌ gelo mulunouꞌ lamineꞌ gelelive li sipisipi ize nevoꞌmine bili olokuꞌ gizi Oꞌmoso imaaꞌ naniꞌ neꞌmine ogo Kilisitoꞌ aza nene leliꞌ lulo limidiꞌmo lelikumuꞌ okoꞌno nene hulo hilineꞌ ve. Nemuꞌ lingine nene aꞌmineꞌmine igi lutine ngemaaꞌ monovo nene lengita minivosa aꞌmidoꞌ eꞌmeti vi minilo.
EPH 5:3 Idoꞌ veneꞌ vemohoꞌ gipe alu gopo ingaaꞌ monovo idoꞌ neꞌmine monovo lute do goloso ilineꞌ monovo ato atoꞌ nesi idoꞌ initeꞌ gohi gohi dalisa gilaaꞌ monovo nene Oꞌmosoꞌmi evenele laza ogo molo amolonidoꞌ o neineꞌ nenako lengiꞌ vovotinguꞌ aꞌmine monovo nene ngomosi mo sotoꞌ ogalize. Aꞌmine initeꞌ goloso nemuꞌ nene li voleloꞌ meloꞌ igi gohi di gatidoꞌ milamilo.
EPH 5:4 Idoꞌ lingine nene ekeseꞌ gamazi nesi lami idoꞌ dingani gamazi nevoꞌmine nesi lami idoꞌ ha gizeꞌ zohiꞌ gamazi nolube li monovo laminekumuꞌ di gopo igi lami idoꞌ monovo golosomuꞌ nene veteteꞌ igi lami Oꞌmoso opoꞌni li minilo.
EPH 5:5 Ee, veneꞌ vemohoꞌ gipe alu gopoꞌnapa ingiꞌmi monaaꞌ nave nehe ido do goloso o-ngedelineꞌ monovo goloso igi mili igaꞌ nave nehe idoꞌ initeꞌ gohi gohi dalone li gilaaꞌ nave nene aꞌmine initeꞌ neꞌmo engiꞌ Oꞌmosoꞌine gelavo soza oꞌmoso opoꞌni li minaaꞌ ave neꞌmine ve nene Oꞌmososi Kilisitokisi gizebo i minasinguꞌ nene vi hilami salani mili-lidasineꞌ initeꞌ nesi nene ma damilisave lo laminetokovoꞌ nolo-lingimuze. Gili minilo. Idoꞌ aꞌmine neꞌmine monovo daaꞌ nave nene Oꞌmososi Kilisitokisi gizebo i minasinguꞌ nene vi hilamilisanako nemuꞌ nene lingine aꞌmine neꞌmine monovo nene damilo lo nolo-lingimuve.
EPH 5:6 Oꞌmosoꞌmi gamazi gili disaꞌmave nete nene aꞌmine neꞌmine monovo goloso daaꞌ naniꞌ nenako nemuꞌ Oꞌmoso izeboloꞌ molavo lihime ngemelineꞌ nenaze. Aꞌmine neꞌmine monovo goloso nemuꞌ nene gotine izi soza saza gamazi nili-lingimavo ma nene aꞌmidoꞌ gili ngimamilo.
EPH 5:7 Nemuꞌ nene lingine neꞌmine alevesi giꞌmizo makaꞌ monalone li eheeꞌ igi minilo.
EPH 5:8 Lingine gomuꞌ nene litiꞌmusouꞌ neꞌmine minaniꞌ ma neineꞌza idise nene mo Guvelesi vela igi giꞌmizi mini labanaꞌ neꞌmi lulouꞌ nizaniꞌ nenaze. Aꞌneꞌmine aleveloꞌ nene giꞌmizami labanaliꞌmi emeni damenisi minaniꞌ nete igi mili minilizaniꞌ lisiheꞌ ilineꞌ monovolokovoꞌ nene eꞌmeti vi minilo.
EPH 5:9 Ee, labanaliꞌmi gihile neꞌmi emeni damenisi minave ingine nene monovo laminekovoꞌ igi mili eveneꞌ lisiheꞌ mini eveneꞌ goꞌine izami gamazi nene laminetokovoꞌ laaꞌ naniꞌ nenako nemuꞌ nene laza labanaliꞌmi emeni damenisi minunive leliꞌ monovotelokovoꞌ nene eꞌmeti vi minilizangumuꞌ luvoniꞌ ve.
EPH 5:10 Idoꞌ neꞌmine igi minilizanguꞌ nene Guvelesi veꞌmo ningivo lamineꞌ ilineꞌ monovomukovoꞌ nene viseꞌ igi ningi igi mili minilo.
EPH 5:11 Lingine eveneꞌ litiꞌmuso neꞌmi lulouꞌ mini monovo goloso igi mili minaaꞌ naniꞌ neꞌmo nene gihile izesaꞌmineꞌ nenaze. Engikisi zogo mili bizi minami asi aꞌmine monovoꞌine goloso nene hulilizangisi di sotoꞌ i-ngidilo.
EPH 5:12 Ee, ingine haleki igi mili igaꞌ naniꞌ monovomuꞌ nene laza ma ogo molo amo noloba ha vetetekovoꞌ oloneꞌ nesi nene lovozo helelonidoꞌ o neineꞌ nenako nemuꞌ nene aꞌmine monovoꞌine nene di sotokovoꞌ i-ngidilo.
EPH 5:13 Di sotoꞌ ikevo miniliza initeꞌ mukiꞌ nene labanatoꞌ sotoꞌ igi minikevo labanaꞌ neꞌmo engiꞌ monovoꞌine nene do sotoꞌ ogavo sotokovoꞌ minaaꞌ neive.
EPH 5:14 Idoꞌ neꞌmine noluvoniꞌ nene aꞌmine di sotoꞌ ikevo miniliza initeꞌ mukiꞌ nene labanaliꞌmi emeni dameni di otuhilizadoꞌ o neineꞌ nenako nemuꞌ nene luvoniꞌ ve. Aꞌminemuꞌ nene nama ma tiꞌ li laaꞌ nave: Upuhoꞌ igi otilevo. Lutine okise ongavo minave lingine hili minaniꞌ gili minangutiꞌ nene otilevo. Otikevo Kilisitoꞌ aza hize labanaꞌ ele-lengedeleseive.
EPH 5:15 Nemuꞌ nene lingine eveneꞌ gaꞌine gili nge li mini igi mili isaꞌmave nete igaꞌ aniꞌ neꞌmine ami asi eveneꞌ gaꞌine gili nge li mini monovo laminekovoꞌ igi mili igaꞌ naniꞌ neꞌmine igi monovotine igi mili mini di vilizadoꞌ nene gizebo lekeseve igi minilo.
EPH 5:16 Idoꞌ idise gameneuꞌ eveneꞌ ingine nene monovo goloso di sotoꞌ iꞌmi vivoꞌ nizanaze. Lingine haza gopo moni minami monovotidoꞌ gizebo lekeseve igi mini eveneꞌ hize eleꞌ i-ngidiliza gonotine lamineꞌ sotoꞌ ilineꞌ nene mo diivoꞌ minilo.
EPH 5:17 Ee, eveneꞌ ingine nene monovo goloso di sotoꞌ iꞌmi vivoꞌ nizaniꞌ nenako nemuꞌ negi hizi gopoꞌ napa minami Guvelesi veꞌmo eiꞌ lulouꞌ nene lengikumuꞌ nadiꞌ igi minilizave lo gele nolihe nemukovoꞌ nene ningi gili hehe li minilo.
EPH 5:18 Idoꞌ lutine nene do gopo o-lengedavo vi tolovo ikelizaze. Negi noso nene ni sipaki igi minamilo. Asi Oꞌmosoꞌmi Sikalahuꞌ neꞌmo nene lutine vaitoꞌ gizebo o neivo mini eiꞌ lilidokovoꞌ nene eꞌmeti minilo.
EPH 5:19 Idoꞌ gamazi li voleloꞌ meloꞌ igi minilizanguꞌ nene monoꞌ nama ato atoꞌ Oꞌmoso opoꞌni li laaꞌ naniꞌ idoꞌ Oꞌmosoꞌmi Sikalahuꞌ neꞌmo lo sotoꞌ ogo lo lengemelineꞌ neꞌmine nama nene li mini Guvelesi ve nene lutinedunuꞌ opoꞌni li longolize izi minilo.
EPH 5:20 Neꞌmine igi mini lengita sotoꞌ ilineꞌ initeꞌ mukikumuꞌ nene Guvetesi ve Izesuꞌ Kilisitoꞌ velemuꞌ igi gamene gamene Oꞌmoso metehine nene tangezoꞌ li-di opoꞌni li minilo.
EPH 5:21 Idoꞌ Kilisitoꞌnimuꞌ nene eveneꞌ naba lamineꞌ ve li ezemuꞌ lengehelele izivo mini eiꞌ gala gilidoꞌ eꞌmeti lingine nene ge gelekeleꞌ o-nede ne gelekeleꞌ o-gede li minilo.
EPH 5:22 Idoꞌ aꞌmineꞌmine igi veneꞌ nete Guvetesi vela gelekeleꞌ i-daaꞌ naniꞌ neꞌmine igi vadinge lilizadoꞌ gelekeleꞌ igi minilizadoꞌ o neineꞌ nenako gelekeleꞌ i-ngidi minilo.
EPH 5:23 Ee, Kilisitoꞌ aza evenele muliseti godoteloꞌ minive minineꞌ neꞌmino vadinge nene godotidoꞌ minave nizaniꞌ nenako nemuꞌ nene gelekeleꞌ i-ngidi minilo. Idoꞌ Kilisitoꞌ aza nene godoteloꞌ minivevoꞌ minineꞌ nevoba eiꞌ evenele eiꞌ okoꞌno neꞌmino minunive nene do luꞌ izaaꞌ ive neꞌmine nesi minineꞌ ve.
EPH 5:24 Nemuꞌ nene eze evenele mulise Kilisitoꞌnimuꞌ gelekeleꞌ o-do minaaꞌ nouneꞌ neꞌmine igi veneꞌ nete vaꞌninge lilizaniꞌ initeꞌ mukikumuꞌ nene gelekeleꞌ i-ngidilizadoꞌ o neive.
EPH 5:25 Kilisitoꞌ aza nene evenele zuho mulise nene lulo limidiꞌmo lelikumuꞌ okoꞌno hulo hilineꞌ nenaze. Vemohoꞌ lingine aꞌmineꞌmine igi eledingine nene lutine ngimilo.
EPH 5:26 Idoꞌ Kilisitoꞌ eiꞌ evenele mulisemuꞌ eiꞌ okoꞌno hulo hilineꞌ nene aza aꞌmine eveneꞌ mulise nene gamaziꞌne lo-ngemo noso holo-ngedeloniꞌ neꞌmo neniꞌ ve lo ngeleꞌmize molo luꞌninguꞌ goloso neineꞌ nene gilite osuꞌ lo-ngedelove lo
EPH 5:27 idoꞌ aꞌmine eveneꞌne mulise neti okoꞌnidoꞌ nene huꞌine neꞌmine initeꞌ golososi nomivo mini idoꞌ gonoliseꞌine laminekisi minaniꞌ gelavo naꞌniseꞌne nenita do giꞌmize-ngedekuvo lihimeꞌinesi idoꞌ gamaziꞌinesi nomineꞌ minilizave lo nemuꞌ nene eiꞌ okoꞌno hulo hilineꞌ ve.
EPH 5:28 Idoꞌ aꞌmineꞌmine igi vemohoꞌ nete lengiꞌ okodinemuꞌ gilaaꞌ naniꞌ neꞌmine igi lengiꞌ eledinginemuꞌ gili lutine ngimilizadoꞌ o neive. Ve ma ingine eleꞌningine luꞌine ngimi minaaꞌ nave nene mo engiꞌ okoꞌinesi nene neꞌmine nii-dave.
EPH 5:29 Ee, eveneꞌ hamolitesi engiꞌ okoꞌinemuꞌ nene goloso ma gili imaaꞌ navoba asi nosoꞌ niteꞌ lamineꞌ nene di vele vele igi aꞌmine okoꞌine nene ganala daliko li gizebo lamineꞌ i-daaꞌ naniꞌ nenako idoꞌ eledinge nene lengiꞌ okodine neꞌmine nizaniꞌ nenaze. Nemuꞌ nene lingine aꞌmineꞌmine igi lutine ngimilizadoꞌ o neive. Idoꞌ Kilisitoꞌ evenele mulise laza nene eiꞌ okoꞌnoloꞌ gizene ana nevoꞌmine noneꞌ nenako aza nene aꞌmineꞌmine ogo leze luteꞌmi nosoꞌ niteꞌve nene do vele vele o-ledo ganala dikelizave lo gizebo lamineꞌ o-ledaaꞌ neive. Nemuꞌ nene ingine engiꞌ okoꞌine i-daaꞌ naniꞌ neꞌmine igi eleꞌninginesi aꞌmineꞌmine i-ngidilizave nene mo Kilisitoꞌ eiꞌ evenele leliꞌ o-ledaaꞌ neineꞌ neꞌmine igi minilisave.
EPH 5:31 Monoꞌ godolouꞌ tiꞌ li gizi nizaniꞌ maꞌminosa nene neive: Nemuꞌ nene vehomoꞌ aza izelehingi melehingi nene hulo elenahida vo bizo minavo ingine nene eveneꞌ hamoꞌ neꞌmine loloꞌ igi minilisasive.
EPH 5:32 Idoꞌ aꞌmine monoꞌ godolouꞌ gizaniꞌ gamaziuꞌ nene aneza gamazi dizo minineꞌ ma haleko neive. Naza aꞌminemuꞌ nene giluvo eveneꞌ hamoꞌ neꞌmine liliꞌ igi minilisasive li gizaniꞌ nene Kilisitoꞌnimukisi idoꞌ eze evenele mulise leliꞌ nesi nene hamoꞌ liliꞌ igi minilisasive li li mili gizikeniꞌ neive.
EPH 5:33 Idoꞌ neꞌmine li monoꞌ godolouꞌ gizaniꞌ nene Kilisitoꞌnimukisi eze evenele zuho mulisemukisi nene li gizaniꞌza aꞌmine nene mo lengiꞌ veneꞌ vemohotasi nene vo do neize. Mukitoꞌ lingine lengiꞌ okodinemuꞌ gilaaꞌ naniꞌ neꞌmine igi venetinemuꞌ gili lutine ngimikevo veneꞌ lingine nete vadinginemuꞌ nene eveneꞌ nabate mo gelekeleꞌ o-ngedelonidoꞌ o neive li vadingine gili ngimi mini di vi minilizave.
EPH 6:1 Idoꞌ Kilisitoda giꞌmizi minave nete igi mili ilizadoꞌ o neineꞌ monovoloꞌ nene izipe lingine izetingine metingine gelekeleꞌ i-ngidi minilizadoꞌ lisiheꞌ o neineꞌ nenaze. Lingine gelekeleꞌ i-ngidi minilo.
EPH 6:2 Nemuꞌ nene monoꞌ godolouꞌ tiꞌ li gizi nizaniꞌ ma neive: Lingine izetingine metinginemuꞌ gilikevo dizo minavo naꞌnaꞌ i-ngidi minilo. Neꞌmino neineꞌ nenako Moseꞌ aza aka gamazi mukiꞌ nene gizeꞌmo nolemo aꞌmida nene Oꞌmosoꞌmo do lamineꞌ o-ledelesa lo huko lineꞌ gamazi imineꞌ molo ma gizamo aꞌmine mene luvoniꞌ gamazi maloꞌ nene ganaꞌ apiꞌ ogo neꞌmine gamazi ma imineꞌ molo tiꞌ lo gizineꞌ ve:
EPH 6:3 Lingine izetingine metinginemuꞌ gilikevo dizo minavo naꞌnaꞌ i-ngidi minilizaniꞌ neꞌmo nene naza lokuvo misubouko mene vetinesi gamene haꞌna lamineꞌ ha mini di vi minilisave.
EPH 6:4 Idoꞌ izeꞌninge meꞌninge lingine izipahatine nene ngizeboloꞌ molali initeꞌ initeꞌ i-ngidami Guvelesi veꞌmi monovomuꞌ apizi ngimi eze akaꞌveloꞌ eꞌmeti vi minilizangumuꞌ ve li di hehe li-ngidi minilo.
EPH 6:5 Idoꞌ gonouꞌ ve lingine nene Kilisitoꞌ gamazi lidoꞌ gili di minaniꞌ gilivosa me misubouko gizebo i-lingidaaꞌ navetine nene eveneꞌ nabate nizave li engikumuꞌ lengehelele izivo mini lutine mili hamoꞌ gehepeve i mini lilizadoꞌ gili di gelekeleꞌ i-ngidi minilizave.
EPH 6:6 Idoꞌ gonouꞌ ve lingine gizebo vete nete lezemuꞌ ningi lamineꞌ gililizave li engiꞌ veꞌnidoꞌ nene gono amuzo mili daaꞌ nave gili gono di minisa idoꞌ alingeꞌ gizebo vetine nete ningamavo gono gilizevo igi di minaaꞌ naniꞌ neꞌmine nene amilo. Kilisitoꞌ goboni ve gihilelite gono dalizaniꞌ monovo lisihetokovoꞌ nene eꞌmeti Oꞌmosoꞌmo gilidoꞌ nene eꞌmeti gizebo vetine nete gono lingimilizaniꞌ nene lutine laminetotikovoꞌ dalo.
EPH 6:7 Ee, evenekumuꞌ gono dami asi Guvelesi vemuꞌ gono daniꞌ gilivosa lingine nene lutine lamineꞌ o minivo aꞌmine gizebo vetine nete gono lingimilizaniꞌ nene dalo.
EPH 6:8 Lingine mo gili nizaniꞌ ma neive. Ve malite gono lamineꞌ dalizaniꞌ nene Guvelesi veꞌmo meni lamineꞌ ngemeleseive. Idoꞌ aꞌmine ve nene gelekeleꞌ ve nilizahe idoꞌ gelekeleꞌ ve minami haza ve nilizahe aꞌmine hamo hamoꞌ mukitoꞌ nene gono dalizaniꞌ votigileloꞌ votigileloꞌ ogo meni ngemeleseive.
EPH 6:9 Idoꞌ gonoloꞌ veti gizebo veꞌine lingine aꞌmineꞌmine igi gonouꞌ vetine nene monovo laminekovoꞌ i-ngidilo. Lingine gili nizave. Gizebo ve lengiꞌ nesi gonouꞌ ve nesi gizebo vetine hamoꞌ minive nene Okulumokuꞌ Guvelesi ve hamoꞌ nene neive. Idoꞌ aza nene ningivo laza linge ma dizo nonivo linge ma limi minikevo minamo laza mukitoꞌ nene lisihetokovoꞌ none. Nemuꞌ nene gizebo ve lingine gonouꞌ ve nene gono amuzo mili dalizangumuꞌ ve li golise gililiza initeꞌ initeꞌ i-ngidaaꞌ naniꞌ nene huli monovo laminekovoꞌ i-ngidilo.
EPH 6:10 Idoꞌ naza gamazi lo osuꞌ nolo tiꞌ lo noluve. Lingine Guvelesi vela vi giꞌmizi mini eitatikisi amuzo disa eleꞌvoleꞌ igi minilo.
EPH 6:11 Satani neꞌmo gotine izo do gopoꞌnapa o-lengedo lingivileꞌ olosa ilineꞌ nene lingine mo limi ingami ha eleꞌvoleꞌ igi oti minilizangumuꞌ ve li Oꞌmosolatiꞌ lovo hizaaꞌ initeꞌ mukiꞌ nene di okodida igisa minilo.
EPH 6:12 Idoꞌ laza neꞌmino lovo hizaaꞌ initeꞌ Oꞌmosolatiꞌ do ngolo mineloneꞌ nene nanitekumuꞌ ve. Laza lovo oloneꞌ nene haza eveneꞌ leliꞌ okodesi neꞌmine minaniꞌ nene lovo o-ngemeloneꞌ nevoba asi Sataniꞌmi zuho goloso guveꞌinesi ve naba amuzoꞌine ato atokisi minave okulumoꞌ gahevela minaaꞌ naniꞌ initeꞌ ingine nene me misubouko eveneꞌ litiꞌmusouꞌ neꞌmine ha minaveloꞌ nene amuzo malaꞌ malaꞌ i-ngidi gizebo i-ngidi minaaꞌ nave engikisi lovo hizeloneꞌ nemuꞌ nene Oꞌmosolatiꞌ lovo hizaaꞌ initeꞌ nene do ngolo minelone.
EPH 6:13 Nemuꞌ nene Satanilatiꞌ ve goloso ingine lovo i-lingimilizanguꞌ nene lingine limi ingami ha oti pehe li amuzo mili mini mo ngivileꞌ igi osuꞌ li minilizangisi Oꞌmosoꞌmo lovo hizaaꞌ initeꞌ mukiꞌ lemaaꞌ neineꞌ nene ha di minilo.
EPH 6:14 Idoꞌ neꞌmine igi lingine lovo hizi ngivileꞌ ilizangumuꞌ ve li eleꞌvoleꞌ igi oti mini gamazi laminetokovoꞌ laaꞌ monovo neꞌmo nene gopotidoꞌ leti neꞌmine loloꞌ ogo minavo idoꞌ monovo lisiheꞌ ogo molo minaaꞌ neꞌmo nene losodidoꞌ lepese neꞌmine loloꞌ ogo minavo
EPH 6:15 idoꞌ monoꞌ gamazi lamineꞌ hongu lo minaaꞌ monovomuꞌ lo-lemaaꞌ neineꞌ neꞌmo nene lisi ngi li minilizangumuꞌ suuꞌ neꞌmine loloꞌ ogavo
EPH 6:16 initeꞌ linge mukiꞌ neꞌmine disa Kilisitoꞌnimuꞌ gili eleꞌvoleꞌ igaꞌ naniꞌ nedunuꞌ nene ve golosolatiꞌ oloꞌ lo minineꞌ elese alineꞌ nene bili lihizi di hulilizadoꞌ i minilizaniꞌ nenako nemuꞌ nene aꞌmine gili eleꞌvoleꞌ igaꞌ naniꞌ neꞌmo nene lepese naba neꞌmine loloꞌ ogavosa di minilo.
EPH 6:17 Neꞌmine igi Oꞌmosoꞌmo do luꞌ izaaꞌ neineꞌ neꞌmo nene lovo angilitine ainidunuꞌ liliꞌ aniꞌ neꞌmine loloꞌ ogavo di gihi mini Oꞌmosoꞌmi gamazi eiꞌ Sikalahuꞌveliꞌmo lengemaaꞌ neineꞌ neꞌmo nene bainati miteꞌ neꞌmine loloꞌ ogavo di minilo.
EPH 6:18 Neꞌmine igi mini lingine nene Oꞌmosoꞌmi Sikalahuꞌ neꞌmi amuzololoꞌ nene gamene gamene Oꞌmosola li mini initeꞌ nanitekumuꞌ viseꞌ ilizahe nemuꞌ nene Oꞌmosola livoꞌ minilo. Neꞌmine ilizangumuꞌ nene goseleꞌ lengebelamivo lutine okise ongamivo mini Oꞌmosoꞌmi zuho mukiꞌ engikumuꞌ nene Oꞌmosola liviꞌ liviꞌ igi minaaꞌ ilo.
EPH 6:19 Idoꞌ naza Izesuꞌ velemuꞌ ogo ezemuꞌ gamazi lamineꞌ gomuꞌ sunoꞌ minineꞌ nene lo sotoꞌ ogaꞌ nouve nouvoniꞌ nenako nemuꞌ nalaꞌ numunguꞌ huli-nidikevo nouvongukisi aꞌmine gamazi lamineꞌ nene lovoꞌ kiselevoꞌ ogo lo sotoꞌ olodoꞌ o neineꞌ nenako nemuꞌ nene lingine Oꞌmosola lilizanguꞌ nene lovoꞌ kiselevoꞌ ogo lo sotoꞌ olongumuꞌ ve li nenikumukisi nene Guvelesi veꞌmo veꞌne do lapa nomineꞌ ogavo aꞌmine gamazi lamineꞌ nene nehelele izamivo veꞌne telo lo sotoꞌ olongumuꞌ ve li Oꞌmosola nenikumuꞌ lilo.
EPH 6:21 Naza mela mine molo nouvongumukisi idoꞌ gono do nouvongumukisi nene Tikikoꞌ vo lo-lengeme osuꞌ lilive lo imiselekuvo novive. Aza nene Kilisitoꞌ aleve leliꞌ zuho Guvetesi veꞌmi gelekeleꞌ izipeꞌve lisiheꞌ lamineꞌ neivo luꞌne emaaꞌ nouve minive
EPH 6:22 neꞌmo leliꞌ gamazi nene lo-lengemo muludinguꞌ do lamineꞌ ilive lo imiselekuvo lengita nesene novive.
EPH 6:23 Oꞌmoso metehosi idoꞌ Guvelesi ve Izesuꞌ Kilisitokisi ingine hongu lo minaaꞌ monovo nene neze zuho lengita di sotoꞌ i-lingidi idoꞌ lingine engikumuꞌ gili eleꞌvoleꞌ adoꞌ nene imineꞌ mili lutine ge neme ne geme li minilizaniꞌ amuzo nesi nene di sotoꞌ i-lingidilisiho.
EPH 6:24 Idoꞌ lingine Guvetesi ve Izesuꞌ Kilisitoda giꞌmize lamineꞌ igi lutine mudise eleꞌvoleꞌ igi imaaꞌ aniꞌ aleve mukita nene Oꞌmosoꞌmi nasahiliꞌ neꞌmo mine molo minivo. Moda ve.
PHI 1:1 Pauloꞌ nazasi Timoteokisi Izesuꞌ gelekeleꞌ ve minusive netise nene makatoꞌ mino lengiꞌ Oꞌmosoꞌmi evenele Izesuꞌ Kilisitoda giꞌmizi minave Hilipi numuno ebekuꞌ nizaniꞌ mukiꞌ nesi idoꞌ monoꞌ gizebo vetinesi idoꞌ monoꞌ gonoloꞌ vetinesi lengikumuꞌ nene luhuvo niteꞌ mene nogize-lingiduze. Ningilo.
PHI 1:2 Oꞌmoso metehosi idoꞌ Guvetesi ve Izesuꞌ Kilisitoꞌ nesi nasahiliꞌ i-lingidikesivo neꞌmo lengiꞌ muludinguꞌ nene hongu minivo mine lamineꞌ igi minilizave lo Oꞌmosola noluve.
PHI 1:3 Naza lengikumuꞌ giluvoniꞌ gameneloꞌ gameneloꞌ nene Oꞌmosoꞌnela isaaꞌ neve lo laaꞌ nouve.
PHI 1:4 Idoꞌ aꞌmine lengikumuꞌ Oꞌmosola laaꞌ nouvonguꞌ nene gamene gamene nolizesi minosavoꞌ nene laaꞌ nouve.
PHI 1:5 Neꞌmino laaꞌ nouvoniꞌ nene nanitekumuꞌ ve. Lingine ganaꞌ apiꞌ igi gamazi lamineꞌ giladotiꞌ mineꞌmo dizo idise nonida neve aꞌmine gamazi lamineliꞌmi gono noduvonguꞌ nene hize eleꞌ i-nidaaꞌ aniꞌ nemuꞌ nene neꞌmino Oꞌmosola nolize izo laaꞌ nouve.
PHI 1:6 Naza lengikumuꞌ nene tiꞌ lo gele muꞌmusiꞌ o nouve: Lengikuꞌ apiꞌ ogo gono lamineꞌ nodave Oꞌmoso neꞌmo nene gono do do vo neivo Izesuꞌ Kilisitoꞌ alineꞌ gamenela aꞌmine gono nene vo pele gehepeve oloseive.
PHI 1:7 Idoꞌ lengiꞌ nene luꞌneuꞌ homi do molo nouvoniꞌ ma nene nizanako naza lengikumuꞌ neꞌmine lo gele muꞌmusiꞌ o nouvoniꞌ nene mo lisiheꞌ lamineꞌ o neive. Ee, Oꞌmosoꞌmo nasahiliꞌ o-nedo gono nimineꞌ noduvonguꞌ nene lingine mukitoꞌ hize eleꞌ i-nidaaꞌ aniꞌ adoꞌ nalaꞌ numunguꞌ nouvonguꞌ mesi idoꞌ gamazi lamineꞌ diꞌmi limaaꞌ aveti gamaziꞌine doꞌmo lemoo gamazi lamineꞌ nene doꞌmo dizosa aꞌmine gamaziꞌmi amuzoꞌve do sotoꞌ uvonguꞌ nesi nene hize eleꞌ i-nidaaꞌ aniꞌ nenako nemuꞌ lengiꞌ nene luꞌneuꞌ homi do molo nouve.
PHI 1:8 Ee, Izesuꞌ Kilisitoꞌ lulo limineꞌ neꞌmo do ote-nedavo aza ogaꞌ neineꞌ neꞌmino muluꞌneuꞌ homine lengikumuꞌ nene huhu lo gele nouve. Neve nene mo laminetoꞌ noluvoniꞌ nene Oꞌmosoꞌmo gele neive.
PHI 1:9 Idoꞌ lengikumuꞌ Oꞌmosola luvonguꞌ nene tiꞌ lo laaꞌ nouve: Lingine lutine ngemaaꞌ monovotine nene naba oꞌmo vo neivo gatine gili nge li initeꞌ ningi hehe laaꞌ monovo di minilizave.
PHI 1:10 Adoꞌ monovo ato atoꞌ mukiꞌ izeꞌ mili monovo ma ngivileꞌ igi lamineꞌ gehepeve minaniꞌ monovo nene di kegesi ningi dalizadoꞌ lisiheꞌ i minilizangumuꞌ nene lingine gatine gili nge li initeꞌ ningi hehe laaꞌ monovo di minilizave lo laaꞌ nouve. Idoꞌ lingine neꞌmine ilizadotiꞌ nene Izesuꞌ Kilisitoꞌ alineꞌ gamenela nene lingine lutinguꞌ goloso monovo nomivo okodida gamazitinesi nomivo minikevo
PHI 1:11 monovo lisiheliꞌmi gihileꞌve Izesuꞌ Kilisitoꞌ do sotoꞌ o-ledaaꞌ neineꞌ nene lengita vaiꞌ laavo aꞌminemuꞌ nene evenelite Oꞌmoso di hozi li opoꞌni lilizadoꞌ lisiheꞌ o mineleseive lo laaꞌ nouve.
PHI 1:12 Neze zuhokizo, nenita sotoꞌ ineꞌ initeꞌ mene gamazi lamineliꞌmi akaꞌve nene hize tilivoba asi gamazi lamineꞌ hize eleꞌ ineꞌ nenako nemuꞌ nene lingine gililizave lo gelosa nolo-lingimuve.
PHI 1:13 Ee, naza nalatoꞌ nouvoniꞌ nene Kilisitoꞌnimuꞌ nouvoniꞌ nenako nene mo sotoꞌ o neivo mela Kaesaleꞌ numuꞌveloꞌ gizebo igaꞌ aniꞌ ami pilisi ve mukilitesi idoꞌ eveneꞌ linge mukikisi nene mo ningi gili osuꞌ li nizave.
PHI 1:14 Idoꞌ nalatoꞌ nouvoniꞌ neꞌmo nene leze zuho linge mukiꞌ nete nene Guvelesi vemuꞌ gili muꞌmusiꞌ i minaniꞌ nene naba goloso ogavo ingine ngehelele izamivo amuzo mili Kilisitoꞌ gamazi nene li sotoꞌ igaꞌ nave.
PHI 1:15 Idoꞌ eveneꞌ linge malite Kilisitoꞌ gamaziꞌve li sotoꞌ igaꞌ naaniꞌ nene nenikumuꞌ muluꞌninguꞌ goloso o minivo neniꞌ nivileꞌ ilisa nene laaꞌ naaniꞌza linge ma nete Kilisitoꞌ gamaziꞌve li sotoꞌ igaꞌ naaniꞌ nene luꞌine laminetotiꞌ gehepeve li sotoꞌ igaꞌ naave.
PHI 1:16 Ee, ingine Kilisitoꞌ gamaziꞌve li sotoꞌ naaniꞌ nene naza nalaꞌ numunguꞌ nouvoniꞌ meꞌmo gamazi lamineꞌ nene alete molo-delive losa Oꞌmosoꞌmo neleꞌmize molavo nouvongumuꞌ nene gili mini luꞌine nimisa li sotoꞌ naaha
PHI 1:17 linge ma meuko luve nete nene gamazi lamineꞌ li sotoꞌ naaniꞌ nene luꞌine laminetotikovoꞌ naavoba asi ingine nene Pauloꞌ nalaꞌ numunguꞌ neinguꞌ nene geni gohi masi do imineꞌ molo-delone liisa engiꞌ okoꞌine di dizilisavoꞌ gamazi lamineꞌ nene li sotoꞌ igaꞌ naave.
PHI 1:18 Toꞌ o monilize. Gamazi lamineꞌ luꞌine avilelotiꞌ abeleni igi li sotoꞌ ahe idoꞌ luꞌine lamineꞌ gehepevelotiꞌ nene li sotoꞌ ahe neꞌmine manaꞌmine adotikisi nene mo Kilisitoꞌnimuꞌ li sotoꞌ naave loosa nemuꞌ nene nolize izaaꞌ nouve. Ee, aꞌminemuꞌ nene nolizevoꞌ izeꞌmo vo minelesuve.
PHI 1:19 Idoꞌ naza nene nolize izeꞌmo voovoꞌ minelesuve noluvoniꞌ nene nanitekumuꞌ ve. Lingine nenikumuꞌ ve li Oꞌmosola laaꞌ naavo idoꞌ Oꞌmosoꞌmi Sikalahuliꞌmo hize eleꞌ o-nedaaꞌ neivo neineꞌ neꞌmo nene idise initeꞌ sotoꞌ o-nede neivo nouvongutiꞌ nene ha do nuꞌ izeleseive lo gele nouvongumuꞌ nene nolize izeꞌmo voovoꞌ minelesuve.
PHI 1:20 Ee, naza novozo ngomosi helamo mino gamene gamene ogaꞌ uvodiꞌmine ogo idisesi nene ha aꞌmineꞌminevoꞌ ogo gamazi nene lovoꞌ kiselevoꞌ ogo lo nouvo neniꞌ okoꞌnedunuꞌ initeꞌ ogo molo oloniꞌ mukiꞌ neꞌmo Kilisitoꞌni nene do naba o-deleseive. Aꞌmine nene adoꞌ minevoꞌ alevoꞌ ogo ha minelohe idoꞌ nibili hilikevo helelohe olonikisi Kilisitoꞌni nene ha do naba o-daakovoꞌ olosuve lo gele muꞌmusiꞌ o nouve.
PHI 1:21 Nenikumuꞌ neꞌmine noluvoniꞌ nene neemuꞌ noluve: Naza minevoꞌ alevoꞌ ogo mine do voloniꞌ nene Kilisitoꞌ nenita mine molo neivosa eikumukovoꞌ nene minevoꞌ alevoꞌ olosuve. Idoꞌ helo voloniꞌ neꞌmo nene minevoꞌ alevoꞌ ogo mineloniꞌ nesi ivileꞌ ivosa lamineꞌ golosouꞌ vo minelesuve.
PHI 1:22 Ne neiha okoꞌneꞌvesi ha minevoꞌ alevoꞌ ogo mine do voloniꞌ nene gihile vaiꞌ izelineꞌ gono nene dalosuvonako nemuꞌ nene heleloniꞌ akaloꞌ eꞌmetelove loloniꞌ nene lamineꞌ ilihe idoꞌ minevoꞌ alevoꞌ o do vaaꞌ akaloꞌ eꞌmetelove loloniꞌ nene lamineꞌ ilihe nemuꞌ nene ma gelamuve.
PHI 1:23 Aꞌmine aka sitaꞌ memuꞌ nene veꞌneheꞌ kaꞌneheꞌ lo nouve. Naza vo Kilisitokisi minaaꞌ nene ivileꞌ o neineꞌ nenako neꞌmine olongumuꞌ laniteꞌ nene ha gele nouha
PHI 1:24 helo voloniꞌ nene lingine siheleꞌni neꞌmine gopo minilizaniꞌ nenako naza me misubouꞌ okoꞌnesi ha mineloniꞌ neꞌmo nene ivileꞌ ogo lamineꞌ oloseive.
PHI 1:25 Nemuꞌ nene tiꞌ lo gele eleꞌvoleꞌ gehepeve ogo gele nouve: Naza nibili hilamavo lingine monokumuꞌ lutinguꞌ gulumo avile lisivo minaniꞌ nesi nene do naba oꞌmo vo minelongumuꞌ nene lengiꞌ mukikisi ha mine do vo minelesuuve losa gele nouve.
PHI 1:26 Idoꞌ neꞌmino lengita gohi ogo mineloniꞌ neꞌmo nene lingine nenikumuꞌ ve li Izesuꞌ Kilisitoꞌni nene vauve ilisa di naba i-dilizadoꞌ minilisave.
PHI 1:27 Neꞌmine manaꞌmine initeꞌ naniteꞌ naniteꞌ neꞌmine sotoꞌ ilihe. Aꞌmingukisi lingine nene Kilisitoꞌ gamazi lamineꞌ gilavete igi mili minilizadoꞌ lisiheꞌ o minineꞌ monovolokovoꞌ nene eꞌmeti igi mili minilo. Neꞌmine igi nizavo naza ogo ninge-lengedelohe idoꞌ hota mino lengikumuꞌ gamazi gelelohe oloniꞌ nene lingine ongovango lamii ha lutine di hamoꞌ i mini monokuꞌ oti pehe li mini monoliꞌmi lovouꞌ nene makaꞌ makatoꞌ lutine gatine hamoꞌ minivo biluvaꞌ i-lingidaaꞌ avete neꞌmine manaꞌmine initeꞌ i-lingidilizangumuꞌ nene lengehelele izamivo gili eleꞌvoleꞌ i nizaniꞌ gamazi lamineꞌ di otilisa nene makatoꞌ amuzo mili nizavoo ningo gelelove. Neꞌmine igi minilizaniꞌ neꞌmo aꞌmine biluvaꞌ i-lingidaaꞌ ave vi tolovo ilizangumuꞌ nene ngelebizosa lingine lukuvo nalizangumuꞌ nene lengelebizeleseive. Neꞌmino sotoꞌ ilineꞌ nene Oꞌmosoꞌmo laavosa eitatiꞌ nene sotoꞌ oloseive.
PHI 1:29 Idoꞌ neꞌmine noluvoniꞌ nene neemuꞌ noluve: Oꞌmosoꞌmo nasahiliꞌ o-lengedo lingine igi mili ilizaniꞌ aka lehize-lingidineꞌ nene lingine Kilisitoꞌnimuꞌ gili eleꞌvoleꞌ i minilizave losavoꞌ lehize-lingidineꞌ nevoba asi eiꞌ Kilisitoꞌnimuꞌ nene mulumo alumo initeꞌ nesi nene gihilizave losa aꞌmine neꞌmine aka nesi nene lehize-lingidineꞌ ve.
PHI 1:30 Ee, linginesi nene aꞌmine monoliꞌmi lovouꞌ mene zegeꞌ zegeꞌ igi nizave. Aꞌmine lovouꞌ nene gomuꞌ naza zegeꞌ zegeꞌ ogo nouvo ninganiꞌ idoꞌ idisesi ha zegeꞌ zegeꞌ ogo nouvo gilaniꞌ lovo ma nene neive.
PHI 2:1 Neꞌmino neineꞌ nenako nemuꞌ nene naza agae lo tiꞌ lo nolo-lingiduve: Lingine Kilisitoda giꞌmizi nizaniꞌ neꞌmo hize eleꞌ o-lengedavo idoꞌ Kilisitoꞌ lulo limineꞌ neꞌmo nene lutine do upuhoꞌ o-lengedavo idoꞌ Oꞌmosoꞌmi Sikalahuꞌ neꞌmo lengikisi bizo neivo muludine hukavo mulumoꞌine ningaaꞌ monovo nene lingine di nilizaniꞌ nenako nemuꞌ nene
PHI 2:2 naza nene nolize gehepeve izeloniꞌ aka nene ma di sotoꞌ i-nidisa neꞌmine igi minilo: Aꞌmine nene adoꞌ lingine lutine gatine di hamoꞌ igivoꞌ mini lutine ngemaaꞌ monovo hamotoꞌ eꞌmeti ge luka neme ne luꞌne geme li mini lutine vo hamoꞌ ogavo hamoꞌ gatinevoꞌ gili minilo.
PHI 2:3 Lengikuꞌ nene lengikutiꞌ ma ngivileꞌ ogo minelone li okodine hazamuꞌ di dizaaꞌ monovoloꞌ nene eꞌmetilizavoba asi lengiꞌ okodine diꞌmi limi mini lengiꞌ okodinemuꞌ gilaaꞌ naniꞌ nene ivileꞌ ivosa eveneꞌ mamuꞌ gilavo dizo mineleseive.
PHI 2:4 Lingine hamo hamoꞌ lengiꞌ initetinemukovoꞌ viseꞌ igi minami lingine hamo hamoꞌ eveneꞌ linge ma neti initeꞌinemukisi nene viseꞌ igi hize eleꞌ i-ngidi minilo.
PHI 2:5 Lengiꞌ lengemeni damenitine nene mo Kilisitoꞌ emeni dameniꞌve gehepeve meꞌminesi nene di minilo:
PHI 2:6 Adoꞌ aza neve nene mo ganakutiꞌ Oꞌmosoꞌmi emeni dameni gehepevesi minineꞌza aza nene Oꞌmososi lisihetoꞌ minineꞌ moꞌmosiꞌve nene do giliꞌ lo do minelove lo gelamo
PHI 2:7 aꞌmine amuzoꞌve nene do hulo gelekeleꞌ ve neꞌmineti ngemeni dameni gehepeve do otuho eveneꞌ okode neꞌminesi loloꞌ ineꞌ ve. Eveneꞌ okode neꞌminesi sotoꞌ ogo mino
PHI 2:8 eiꞌ okoꞌno nene do leme gehepeve noogo Oꞌmosoloꞌ gelekeleꞌ ogo minineꞌ nene Oꞌmosoꞌmo vo heleline lineꞌ gamazilokisi nene gele doosa hilineꞌ ve. Ee, lohotoꞌ zaloꞌ bililizangutiꞌ nene ovozo helo olovoꞌ amo Oꞌmoso gelekeleꞌ o-do eveneꞌ mukiliti veꞌnidoꞌ ve goloso gehepeve neꞌmine loloꞌ ogo lohotoꞌ zalokisi nene hilineꞌ ve.
PHI 2:9 Neꞌmine ingumuꞌ nene Oꞌmosoꞌmo doꞌmo dizo dizo mo moꞌmosiꞌ nabaloꞌ goloso hozine hulo-doo eiꞌ gulive do hozi lo-dineꞌ neꞌmo nene gulive ato atoꞌ mukiꞌ nene ngivileꞌ ogosa minineꞌ ve.
PHI 2:10 Idoꞌ neꞌmine ineꞌ nene Okulumokuꞌ nizaniꞌ initekisi misuboloꞌ nizanikisi misubo lulouꞌ nizanikisi mukitoꞌ Izesuꞌ gulive lilizadoꞌ nene obuvoꞌine hizi imi
PHI 2:11 mukitoꞌ Izesuꞌ Kilisitoꞌ neve nene Guvelesi ve naba neive li li sotoꞌ ilizave losa neꞌmine ineꞌ ve. Idoꞌ Izesuꞌni neꞌmine i-dikevo neꞌmo nene meleho Oꞌmoso neꞌmi guvele nene voloseive.
PHI 2:12 Luꞌne lengeme nouvoniꞌ alevekizo, Izesuꞌ aza nene Oꞌmoso neꞌmino gelekeleꞌ o-do minineꞌ nenako nemuꞌ nene lingine aꞌmineꞌmine igi gelekeleꞌ igi minilo. Gomuꞌ naza lengikisi minuvonguꞌ gamene gamene gelekeleꞌ i-nidaaꞌ aniꞌ maꞌmine igi mini idise naza lengikisi minamuvodoꞌ nene aꞌmine gomuꞌ monovotine nene ivileꞌ igisa gelekeleꞌ gehepeve i-nidilo. Naza tiꞌ lo nolo-lingimuve: Oꞌmosoꞌmo do lunguꞌ izelineꞌ nenaze. Neꞌmi gihile di sotoꞌ ilizangisi lengiꞌ nene ladise ogalone li golise gili luvo luvo izi minisa nene amuzo mili gono dalo.
PHI 2:13 Neꞌmine noluvoniꞌ nene nanitekumuꞌ ve. Oꞌmosoꞌmo gilivo lamineꞌ ilineꞌ initeꞌ olone li gilisa lingine aꞌmine initeꞌ ilizadoꞌ nene do upuhoꞌ noo-lengedo asiꞌve Oꞌmoso neve nene lengikuꞌ omo mino gono nodave.
PHI 2:14 Nemuꞌ nene lingine neꞌmine manaꞌmine initeꞌ igi mili minilizanguꞌ nene nulu nulunga li lihiteheka li lovo lolize amisavoꞌ nene igi mili minilo.
PHI 2:15 Idoꞌ neꞌmine igi minilizave lo noluvoniꞌ nene nanitekumuꞌ noluve: Lingine nene okodidoꞌ gamazi nomivo mini lutingukisi goloso monovo nomivo mini me misubouꞌ aleve aka lisihetoꞌ vami zovoꞌ zavaꞌ izi vaaꞌ aveti vovoꞌninguꞌ nene Oꞌmosoꞌmi izipahala zuho lengita goloso niteꞌ ma giꞌmizamineꞌ minilizangumuꞌ nene neꞌmine ilizave losa noluve. Neꞌmine igi mini aꞌmine me misubouꞌ aleveti vovoꞌninguꞌ mene sonohiꞌ neꞌminisa veꞌne veꞌne ili mini
PHI 2:16 minevoꞌ minevoꞌ minaaliꞌmi gamazi nene di hozi li minikevo naza lotiꞌ hazamuꞌ izo minuvoniꞌ nomive lo idoꞌ amuzo molo gono hazamuꞌ do minuvoniꞌ nomive losa Kilisitoꞌ alineꞌ gameneloꞌ nene lengikumuꞌ lo sotoꞌ ogo nolize izelodoꞌ minelesuve.
PHI 2:17 Neze nene nibili hililizahe gelamuha neꞌmine ma ikevo vanise lepeloniꞌ nene lingine Kilisitoꞌnimuꞌ gili eleꞌvoleꞌ igaꞌ naaniꞌ nene sipisipi Oꞌmoso imilisa bilaaꞌ naaniꞌ neꞌmino neivo aꞌmine nene lingine mo Oꞌmoso lehizi-di nizadoꞌ neniꞌ vaniseꞌne lepeloniꞌ nene aꞌmidoꞌ imineꞌ molo mineleseive losa nolize noizuve. Idoꞌ aꞌminemuꞌ nolize izeloniꞌ nene lengiꞌ mukikisi makaꞌ lolize izelesune.
PHI 2:18 Idoꞌ neꞌmine oloniꞌ nene lingine aꞌmineꞌmine igi longolize iziisa nenikisi makatoꞌ lolize izelonidoꞌ o neive.
PHI 2:19 Naza lengiꞌ nene nadii nizahe lo aꞌminemuꞌ gelosa muluꞌneuꞌ lamineꞌ gelelove loo Guvelesi ve Izesuꞌ luloloꞌ nolineꞌ nene Timoteoꞌni lengita nene liteꞌ losa imiselelove losa gele nouve.
PHI 2:20 Idoꞌ Timoteoꞌni neꞌmine nene nenikisi mela ma minamave. Asi eiꞌ hamoꞌ nene neniꞌ gelaaꞌ nouvodiꞌmine ogo gilivo bizo minusive mino lengikumuꞌ gehepeve ogo minelive ne neive.
PHI 2:21 Idoꞌ linge ma mukiꞌ nete nene engiꞌ initeꞌinemukovoꞌ gili minisa Izesuꞌ Kilisitoꞌ gonoꞌvemuꞌ nene ma gilisaꞌmave.
PHI 2:22 Idoꞌ Timoteoꞌ monovoꞌve lamineꞌ mamuꞌ nene lingine mo gili nizaniꞌ ma neive. Aza nene nenikisi melehoi gipelei neꞌmine loloꞌ ogo monoꞌ gamazi laminetoꞌ nene gelekeleꞌ ogo do hutileꞌ ogo minaaꞌ nousive.
PHI 2:23 Neꞌmino minaaꞌ nousingumuꞌ lengita imiselelove nene eiꞌ ve losa gelo neniꞌ okoꞌnela initeꞌ sotoꞌ ilineꞌ ma nene vo nadiꞌ nadiꞌ ilihe ninge minosa liteꞌ lo lengita imiselelove lo giluve.
PHI 2:24 Idoꞌ Guvelesi vemuꞌ gele eleꞌvoleꞌ o nouvoniꞌ nenako nemuꞌ nene neniꞌ nesi mo liteꞌ lo lengita alosuve losa gele muꞌmusiꞌ o nouve.
PHI 2:25 Idoꞌ nenikisi gono doo monoliꞌmi lovouꞌ makatoꞌ zegeꞌ zegeꞌ ogo minusive leze zuho lengiꞌ imiselikevo ogo nasahiliꞌ o-nedo minaaꞌ ive Epahaloditoꞌ nene naza lengita tineꞌ molo vilidoꞌ o neive lo gelosa gohi lengita imiselelesa nouve.
PHI 2:26 Nene nanitekumuꞌ ve. Aza lengiꞌ mukikumuꞌ nene gohi ningelove lo lulouꞌ huhu lo gelo mininguꞌ nene aza initeꞌ gize do miningumuꞌ lingine gilangumuꞌ nene gelosa gala mukiꞌ goloso nogilive.
PHI 2:27 Ee, laminetoꞌ eiꞌ nene mo initeꞌ gize do helaatoꞌ mine molaniꞌza Oꞌmosoꞌmo do uꞌ izineꞌ ve. Idoꞌ neꞌmine ineꞌ nene eikovoꞌ neꞌmine o-damive. Nenikisi nene geni geho mino aꞌminemuꞌ mulumo gelo nouvonguꞌ mene gohi mulolo kaloloꞌ ogo mulumo gele-daline losa Oꞌmosoꞌmo nenikisi nene do nuꞌ izive.
PHI 2:28 Idoꞌ aza lengikumuꞌ mulunouꞌ huhu lo gelo mino lengikumuꞌ gala mukiꞌ gelo minineꞌ nenako nemuꞌ nene lingine eze ningisa muludinguꞌ lamineꞌ gohi nigilavosa nezela mulumo minineꞌ nene ngomo ilive lo gelo lengita imiselelongumuꞌ luꞌne nene amuzo molo otavo imiselelesa nouve.
PHI 2:29 Neꞌmine olosuze. Lengiꞌ nene Izesuꞌ Kilisitoꞌ zuholiti sunoloꞌ eꞌmeti longolize naba izi minisa eleꞌmize lamineꞌ ilo. Lingine nene neꞌmine vemuꞌ gilavoo dizosa minelidoꞌ o neive.
PHI 2:30 Idoꞌ ezemuꞌ nene lingine gilavoo dizosa minelidoꞌ o neive noluvoniꞌ nene nemuꞌ noluve. Aza nene lengitoꞌ medelo mino neniꞌ nene nasahiliꞌ o-nedelove loosa eiꞌ minevoꞌ alevoꞌve hulo labuluvo ogo Kilisitoꞌ gonoꞌve hize eleꞌ ogo mininguꞌ nene hilingutiꞌ hakaave.
PHI 3:1 Neze zuhokizo, gamazi nene mo gize lengemekuvoniꞌza ma neineꞌ nene lo-lengemeloze. Gililo. Guvelesi vemuꞌ nene longolize iziisa nene minilo. Gomuꞌ lo-lingimuvoniꞌ gamazi gohi gize lengemaakumuꞌ nene naza giluvo goseleꞌ nebelamive. Idoꞌ gohi gize lengemeloniꞌ meve nene lengiꞌ gopo aka vilizadotiꞌ nene alete molo-lengedelineꞌ nenako nemuꞌ nene tiꞌ lo nolo-lingimuve:
PHI 3:2 Goloso gono daaꞌ ave gulo neꞌmine minavemuꞌ nene eheꞌ igi minilo. Ee, Zuda veti monovoloꞌ eꞌmetisa Oꞌmosoꞌmi noso nomulube li Izesuꞌ evenele lengiꞌ okodine di goloso igi huki-lingidilisa laaꞌ avemuꞌ nene eheꞌ igi ningisa minilo.
PHI 3:3 Neꞌmine noluvoniꞌ nene neemuꞌ noluve. Oꞌmosoꞌmi noso gihile neve nene leliꞌ okode losuvoꞌmi initetoꞌ nene gele medelamuba asi Oꞌmosoꞌmi Sikalahuꞌ neꞌmo hize eleꞌ o-lididiꞌmo Oꞌmoso gubiꞌ ize emo Izesuꞌ Kilisitoꞌnimuꞌ lolize izo mino ezeloꞌ gele medele minaaꞌ nounive netevoꞌ nene do none.
PHI 3:4 Okode losuvoꞌmi initetoꞌ gele medelamuba neniꞌ nene okoꞌne losuvoꞌmi initetoꞌ ma gele medelelove lo giluvodini aꞌmine gele medelelodoꞌ o minineꞌ initeꞌ nene nenita ha neive. Ee, eveneꞌ malite gele medelelonidoꞌ o neineꞌ initeꞌ nene leliꞌ okodela ma do none li gili nilizaniꞌ nene neniꞌ ngivileꞌ ogo neꞌmine laniꞌ initeꞌ nene vaiꞌ do nouve.
PHI 3:5 Adoꞌ nemuꞌ noluve: Naza nene sotoꞌ uvodotiꞌ gamene seveni ogo vavo eitiloꞌ nene Oꞌmosoꞌmi noso mili-nidi okoꞌne lolovo huki hulaniꞌ ve. Idoꞌ naza Isilaeleꞌ aleveutiꞌ Benizaminiꞌ aꞌvopilemoꞌ zuhoutiꞌ sotoꞌ uvoniꞌ ve. Ee, izeꞌne meꞌne neniꞌ gidasive nene Hebilaioꞌ aleve minasineꞌ nenako naza nene Hebilaioꞌ ve gihile ne nouve. Idoꞌ Moseꞌ louꞌ gamaziꞌveloꞌ eꞌmete gehepeve igi minaaꞌ ave Halisaioꞌ veti muliseuꞌ vo giꞌmizuve mino
PHI 3:6 aꞌmine Halisaioꞌ monokumuꞌ gilingili ogo minuvodiꞌmo nene Izesuꞌ evenele zuho goboni malaꞌ malaꞌ o-ngedaaꞌ uvoniꞌ ve. Moseꞌ louꞌ gamaziꞌve neꞌmo ve lisiheꞌ minilizave nete nene neꞌmine neꞌmine ilisaave lidoꞌ nene eꞌmete osuꞌ lo naza nene aꞌmine louꞌ avutoꞌ amo gamaziꞌne nomineꞌ minuvoniꞌ ve.
PHI 3:7 Neꞌmine ve minuvoniꞌza aꞌmine neꞌmine monovo nete nene di naba i-nidilizadoꞌ o neive lo giluvoniꞌ initekumuꞌ nene naza alingeꞌ Kilisitoꞌ evenele loloꞌ ogosa gaꞌne giluvoniꞌ nene mo haza niteꞌ gehepeve liliꞌ ikeve.
PHI 3:8 Idoꞌ neevoꞌ nomive. Naza Guveꞌnesi ve Izesuꞌ Kilisitoꞌnimuꞌ ningo gelaaꞌ neꞌmo initeꞌ mukiꞌ nene ngivileꞌ gehepeve ogo initeꞌ naba ve lo gelo initeꞌ mataꞌ mukikumuꞌ nene giluvoo mukiꞌ nene haza niteꞌ gehepeve liliꞌ ikeve. Ee, initeꞌ mataꞌ mukikumuꞌ nene giluvoo pipiza initeꞌ gehepeve liliꞌ ikevoo Kilisitoꞌni nene do tiꞌ olongumuꞌ ve loo initeꞌ mataꞌ mukiꞌ nene huluve.
PHI 3:9 Ee, initeꞌ mataꞌ mukiꞌ huluvoniꞌ nene Kilisitoꞌni do tiꞌ ogo ezela mine molo minosa ve lisiheꞌ loloꞌ oloniꞌ nene louꞌ gamaziloꞌ eꞌmetosa nenitatiꞌ do sotoꞌ ogo loloꞌ olovoba asi Kilisitoꞌnimuꞌ gili eleꞌvoleꞌ igaꞌ ave nene gili eleꞌvoleꞌ ikevosavoꞌ nene Oꞌmosoꞌmo ve lisiheꞌ loloꞌ o-ngedaaꞌ neineꞌ neꞌmine ogo naza ezemuꞌ gele eleꞌvoleꞌ okuvoo ve lisiheꞌ loloꞌ o-nidivoo minelongumuꞌ ve loo
PHI 3:10 idoꞌ ezemuꞌ ningo gelo hilingutiꞌ otineꞌ amuzo do neineꞌ neꞌmo nene nenitasi mine molo neivo mino aza gomuꞌ mulumo alumo geni gehaaꞌ ineꞌ maꞌmino nazasi nene makatoꞌ geho mino idoꞌ eze hilineꞌ monovo danava nene nenita minivo mino
PHI 3:11 nazasi helelongutiꞌ ma otelodoꞌ o minelongumuꞌ ve losa initeꞌ mataꞌ mukiꞌ nene huluve.
PHI 3:12 Neꞌmine monovo nenita minelive lo noluvoniꞌ nene nenita mudise minavo Oꞌmosoꞌmo mudise do lisiheꞌ gehepeve o-nedavosa noluvoba asi Izesuꞌ Kilisitoꞌ aza neniꞌ do tiꞌ ineꞌ nene neꞌmine monovo do mineline losa do tiꞌ o-nidineꞌ nenako nemuꞌ nene aꞌmine luvoniꞌ monovo nene naza do tiꞌ olosa aꞌminemuꞌ amuzo molo do novuve.
PHI 3:13 Neze zuhokizo, aꞌmine initeꞌ nene mo dokuve losa gele nouvoba asi initeꞌ hamoꞌ meve nene ogaꞌ nouve: Gomuꞌ initeꞌ mukikumuꞌ nene mo hulo meheꞌnela ogosa alingeꞌ initeꞌ veꞌnela neineꞌ initeꞌ nene dalohe lo ahanga o do aꞌmida nene novo
PHI 3:14 Oꞌmosoꞌmo Izesuꞌ Kilisitoda mine molo mino Okulumokuꞌ hozi minevoꞌ minevoꞌ ogaꞌ iline lo elese molo-nidineꞌ nene do gihile izo meniꞌne neꞌmine aꞌmine Okulumokuꞌ minevoꞌ minevoꞌ ogaꞌ nene dalove losa daloniꞌ makila nene amuzo molo lotiꞌ izo vo nouve.
PHI 3:15 Nemuꞌ nene laza monokuꞌ lodive ogo nonive nete nene idise luvoniꞌ gamazi menemuꞌ nene hamoꞌ gatevoꞌ gelelone. Idoꞌ lengikutiꞌ malite gatine atoliꞌmine ma gililizaniꞌ nene aꞌminemukisi nene Oꞌmosoꞌmo do lisiheꞌ ogo lengelebizeleseive.
PHI 3:16 Neꞌmine oloseineꞌza laza monokuꞌ mo gele noneꞌ gamazi nene do giliꞌ lo mino aꞌmine gamazi gehepevelokovoꞌ nene eꞌmeto ogo molo mine do dizelonidoꞌ o neive.
PHI 3:17 Neze zuhokizo, naza ogo molo ogaꞌ nouvodoꞌ nene apiꞌnapiꞌ igi mini leliꞌ lengelebizuuneꞌ monovo neꞌmidoꞌ eꞌmeti igi mili minaaꞌ aveloꞌ nene ngamamaka mili ningi minisa nene aꞌmineꞌmine ilo.
PHI 3:18 Neꞌmine ve nene ningi minisa ngeꞌmetilo noluvoniꞌ nene neemuꞌ noluve: Eveneꞌ mukiꞌ minaniꞌ neti monovoꞌinemuꞌ nene mo gomuꞌ gamene mukiꞌ lo-lingimuvoniꞌ ve. Idoꞌ idise nene mulumoꞌine gelosa veꞌne novozo doꞌmozeꞌ mozeꞌ neivosa engiꞌ monovomuꞌ nene gohi tiꞌ lo nolo-lingimuve: Ingine igi mili minaaꞌ naaniꞌ monovo neꞌmo nene Kilisitoꞌ lohotoꞌ zaloꞌ hilineꞌ monoꞌ mamuꞌ nene biluvaꞌ liliꞌ i-daaꞌ naaniꞌ gele neive.
PHI 3:19 Neꞌmine igi mili minadotiꞌ gihileꞌve sotoꞌ ilineꞌ nene vo tolovo ogaꞌ ne neive. Engiꞌ Oꞌmosoꞌine neve nene okoꞌineꞌmo laniteꞌ gelaaꞌ neineꞌ initeꞌ mataꞌ mukiꞌ nete nene liliꞌ ikeve. Ingine ngovozo hililizadoꞌ o neineꞌ initekumuꞌ nene okoꞌine di dizi mini luꞌine nene me misubouꞌ initetokovoꞌ mili minaaꞌ nave.
PHI 3:20 Idoꞌ Izesuꞌ evenele leliꞌ gotoꞌ numude nene Okulumokuꞌ nenako ingine neꞌmine igi minaaꞌ naaniꞌ nene mo edamive. Ee, do luꞌ izelive Guvelesi ve Izesuꞌ Kilisitoꞌ aza Okulumokutiꞌ alingumuꞌ nene gilingili ogo gizebo ogo none.
PHI 3:21 Idoꞌ alineꞌ nene initeꞌ mataꞌ mukiꞌ ezeloꞌ do gelekeleꞌ o-ngedelidoꞌ o minineꞌ amuzoꞌve nedunuꞌ nene idise mene nge lamineꞌ misubouꞌ okode nene do velepeꞌ izo eiꞌ okoꞌno atoliꞌmine ogo minineꞌ neꞌmine do otuho-ledeleseive.
PHI 4:1 Neꞌmine ilineꞌ nenako nemuꞌ nene neze zuho luꞌne lengeme mino lengikumuꞌ ogaꞌ uvo aleve adoꞌ muluꞌneuꞌ gulumo avile lisivo minaaꞌ nouvo aleve adoꞌ gonoꞌnelotiꞌ gihileꞌve gonolise niteꞌ neꞌmine do mineloniꞌ alevekizo, ongovango lamii Guvelesi vela eleꞌvoleꞌ igi giꞌmizi giliꞌ li minilo.
PHI 4:2 Gaza Zuvodiaꞌ nesi idoꞌ Sidikeꞌ geiꞌ nesi lingine sitatoꞌ nene Guvelesi veꞌmi evenele nizasineꞌ nenaze. Lutine gatine di hamoꞌ igi minilisive lo gatine do agae lo nolo-lingimuve.
PHI 4:3 Ee, idoꞌ gono makaꞌ daaꞌ usive gihile geita nene tiꞌ lo noluve: Alungo netise Izesuꞌ gamazi lamineꞌ nene di otilisa monoliꞌmi lovouꞌ nene zegeꞌ zegeꞌ igi minasineꞌ nenako nemuꞌ nene gaza uva li di bizilisize. Hize eleꞌ o-ngedelesane. Ee, inginesi nenikisi Kelemedokisi idoꞌ gono makaꞌ daaꞌ unive lingesi nene makatoꞌ monoꞌ gonouꞌ nene zegeꞌ zegeꞌ uneꞌ ve. Aꞌmine aleveti guliveꞌine nene Oꞌmosoꞌmo minevoꞌ minevoꞌ ngemeni dameni ngemeliveti guliveꞌine gize molaaꞌ neineꞌ bukuꞌveuꞌ nene gize neive.
PHI 4:4 Idoꞌ lingine gamene gamene Guvelesi vemuꞌ longolize izivoꞌ minilo. Idoꞌ gohi tiꞌ lo noluve: Longolize izivoꞌ minilo.
PHI 4:5 Hongu livoꞌ minaaꞌ naniꞌ monovotine nene ningilizaze. Eveneꞌ mukita di sotoꞌ igi ngelebizilo. Guvelesi ve nene mo avitoꞌ oganaze.
PHI 4:6 Initeꞌ mukikumuꞌ muludine otavo gituhoꞌ namii mini asi aꞌmine initeꞌ mukikumuꞌ nene Oꞌmosola li vokuꞌ laaꞌ igi idoꞌ isaaꞌ neve laaꞌ igi mini initeꞌ mamuꞌ longoꞌ ilisa gilaniꞌ initekumuꞌ nene Oꞌmoso li-imaaꞌ igi minilo.
PHI 4:7 Neꞌmine ikevo Izesuꞌ Kilisitoda giꞌmizi nizaniꞌ neꞌmo Oꞌmosolatiꞌ hongu monovoꞌve adoꞌ leliꞌ evenelitesi gelaaꞌ nouneꞌ nene ivileꞌ goloso ivosa atoliꞌmine neineꞌ neꞌmo nene lutidoꞌ gatidoꞌ nene alete molo-lengedo gizebo oloseive.
PHI 4:8 Neze zuhokizo, gamazi adoꞌ meve nene ma lo-lengemelouze. Gililo. Lingine minilizanguꞌ nene monovo lamineꞌ goloso adoꞌ evenelite di hozi lilizadoꞌ lisiheꞌ o nolineꞌ monovo nevoꞌminemukovoꞌ nene gatine gilisa minilo. Aꞌmingutiꞌ linge neve nene adoꞌ initeꞌ gihile laminekumupe initeꞌ lisiheꞌ gehepevemupe golososi minamineꞌ initekumupe ninge lamineꞌ daaꞌ initekumupe initeꞌ guvele laminekisi neineꞌ initekumupe nevoꞌmine initekumukovoꞌ nene gilisa minilo.
PHI 4:9 Idoꞌ neniꞌ apize lingimuvo nenitatiꞌ daniꞌ monovosi idoꞌ neniꞌ noluvoo gilaniꞌ monovosi idoꞌ ningi nizavo ogo molo uvoniꞌ monovosi nene lingine di gono veleuꞌ mili igi mili minilo. Neꞌmine ikevo hongu lo lamino minaaꞌ monovo do sotoꞌ o-ledaaꞌ neineꞌ Oꞌmoso neꞌmo nene lengikisi mine molo minelive.
PHI 4:10 Lingine gamene haꞌna ha minisa nenikumuꞌ gili nizaniꞌ monovotine nene gohi di sotoꞌ aniꞌ nemuꞌ nene Guvelesi vela nolize naba noizuve. Lingine gomuꞌ nene nenikumuꞌ gili minaniꞌza aꞌmine nenikumuꞌ ha gili minaniꞌ di sotoꞌ ilizaniꞌ aka nene ma sotoꞌ o-lengedamive.
PHI 4:11 Naza neꞌmine manaꞌmine initeꞌ sotoꞌ o-nidivoo mineloha aꞌmine neꞌmingukisi nene lamineꞌ minaaꞌ monovo nene mo ningo otohato o nouvoniꞌ nenako nemuꞌ nene naza nolize noizuve noluvoniꞌ nene naza initekumuꞌ ma viseꞌ ogosa initeꞌ ma hize eleꞌ i-nidilizave losa lamuve.
PHI 4:12 Gamene ma initeꞌne nomivo viseꞌ ogaꞌ uvoniꞌ ve. Idoꞌ gamene ma nene initeꞌ mataꞌ vaiꞌ ha neivo minaaꞌ uvoniꞌ ve. Nemuꞌ nene neꞌmine manaꞌmine ogo minaaꞌ monovomuꞌ nene mo otohato ogo mino mo hizo gele nouve. Adoꞌ naza initeꞌne vaiꞌ logavo gatuꞌne ivosavoꞌ minelohe idoꞌ initeꞌne nomivo viseꞌ ogo gaꞌna helo minelohe olongukisi lamino minaaꞌ monovo nene mo otohato ogo gele nouve.
PHI 4:13 Ee, naniteꞌ naniteꞌ sotoꞌ o-nedelihe aꞌmine mukikuꞌ nene do amuzo molo-nedaaꞌ ive Kilisitoda nene lehete o mino eleꞌvoleꞌ ogo ha ogo molo minelodoꞌ o nouve.
PHI 4:14 Ne neiha lingine initedunuꞌ hize eleꞌ i-nidadiꞌmo neniꞌ geniꞌne gihuvonguꞌ nene makatoꞌ lengikisi gihuneꞌ gilineꞌ nenako lingine monovo laminetoꞌ eꞌmeti neꞌmine aniꞌ nene mo lamineꞌ ve.
PHI 4:15 Idoꞌ Hilipi alevekizo, langisetine nene mo gili nizaniꞌ ma neive. Naza ganaꞌ ogo Kilisitoꞌ gamazi lamineꞌ lo-lengemo minuvodotiꞌ aꞌmine Makedonia misubotine hulo vuvonguꞌ nene monoꞌ mulise malitesi monoꞌ gonoꞌne dalongumuꞌ hize eleꞌ i-nidi moni ma nimavo duvoniꞌ nevoba asi lengikovoꞌ nene neꞌmine igi initeꞌ nimavo nenikisi gono makaꞌ gihuuneꞌ ve.
PHI 4:16 Ee, olihe misubo mala vamo ha Tesalonika numuno ebeta minuvongukisi viseꞌ uvo initeꞌ nene lengiꞌ ma huli-nidi hize eleꞌ i-nidaniꞌ nene gamene hamokovoꞌ nevoba asi gohi gohi neꞌmine aniꞌ ma neive.
PHI 4:17 Lingine initeꞌ ma nimilizave lo gele noosa noluvoba asi initeꞌ ma nimikevo neꞌmi gihileꞌve nene vo naba ogosa aꞌmine gihile nene lengikumuꞌ ha ize-lengede minelive lo gele minosa noluve.
PHI 4:18 Ne neiha initeꞌ mukiꞌ naza viseꞌ uvoniꞌ votigile nene ivileꞌ ivosi mo do osuꞌ lokuve. Lingine huli-nidaniꞌ initeꞌ nene Epahaloditoꞌ do nemavosa neniꞌ votigileloꞌ nene vo dosa vaiꞌ lave. Aꞌmine huli-nidaniꞌ initeꞌ nene unuvo laminekisi initeꞌ Oꞌmosoꞌmo ninge lamineꞌ do mulunouꞌ lamineꞌ gelelidoꞌ o minineꞌ initeꞌ neꞌmine nene lehizi-dave.
PHI 4:19 Idoꞌ lingine Izesuꞌ Kilisitoda giꞌmizi minangumuꞌ nene Oꞌmosoꞌne neꞌmo nene initeꞌve atoliꞌmine ogo vaiꞌ goloso lo miningutiꞌ nene lingine viseꞌ iliza initetoꞌ nene vauve elo golo hizo lengemo mineleseive.
PHI 4:20 Idoꞌ meteho Oꞌmoso eiꞌ opoꞌni loꞌmo vo mineloneꞌ nene osuꞌ lamo mine do voovoꞌ minelive. Mo neꞌmino minilihoo.
PHI 4:21 Naza Izesuꞌ Kilisitoda vi giꞌmizi Oꞌmosoꞌmi evenele liliꞌ ave nene ngopoꞌni noluze. Li-ngimilo. Leze zuho mela nenikisi makaꞌ nonive nete longopoꞌni nilaze. Li-ngimilo.
PHI 4:22 Idoꞌ Izesuꞌ evenele mukiꞌ nete longopoꞌni nilaha engikutiꞌ guvelesi ve naba Kaesaleꞌ numunguꞌ minaaꞌ ave nete nene longopoꞌni naba goloso nilave.
PHI 4:23 Guvelesi ve Izesuꞌ Kilisitoꞌ nasahiliꞌve nene lengiꞌ lutinguꞌ mine molo minivoo.
COL 1:1 Izesuꞌ Kilisitoꞌ aposolo mineline lo Oꞌmosoꞌmo eiꞌ luloloꞌ neleꞌmize molave Pauloꞌ naza leze zuho Timoteokisi makaꞌ mino
COL 1:2 leze zuho Oꞌmosoꞌmi evenele Kolosa ebekuꞌ mini Kilisitoꞌnimuꞌ gili eleꞌvoleꞌ igi eꞌmete lamineꞌ igi minave lengiꞌ nene luhuvo niteꞌ mene nogize-lengedo tiꞌ lo noluve: Meteho Oꞌmoso eitatiꞌ nasahiliꞌ idoꞌ hongu lo lamino minaaꞌ monovo nene lengikisi miniliho lo noluve.
COL 1:3 Laza lengikumuꞌ Guvetesi ve Izesuꞌ Kilisitoꞌ meleho Oꞌmosola laaꞌ uninguꞌ nene gamene gamene lengikumuꞌ nene Oꞌmoso isaaꞌ neve lo-daaꞌ noune.
COL 1:4 Lengikumuꞌ Oꞌmosola laaꞌ nouneꞌ nene lingine Izesuꞌ Kilisitoꞌnimuꞌ gili eleꞌvoleꞌ angumukisi idoꞌ Oꞌmosoꞌmi evenele zuho mukiꞌ lutine ngimaaꞌ naaniꞌ mamukisi nene geloosa Oꞌmoso isaaꞌ neve lo-daaꞌ noune.
COL 1:5 Lingine neꞌmine igi Izesuꞌ Kilisitoꞌnimuꞌ gili eleꞌvoleꞌ igi Oꞌmosoꞌmi evenele lutine ngimaaꞌ naaniꞌ nene gomuta lingine gamazi gihile Kilisitoꞌ gamazi lamineꞌ li-lingimanguꞌ nene Oꞌmosoꞌmo Okulumokuko salani molo-lingidineꞌ initekumuꞌ nene giliisa aꞌminemuꞌ gili medeli minaniꞌ neꞌmo nene neꞌmine aniꞌ ve.
COL 1:6 Aꞌmine lengita aniꞌ gamazi lamineꞌ neꞌmo nene lingine ganaꞌ apiꞌ igi giliisa Oꞌmosoꞌmi nasahiliꞌveꞌmi monovo gihilemuꞌ ningi vevesaniꞌ gamenelotiꞌ lengita idiꞌmine ogo aꞌmine gamazi lamineꞌ nene gihile noizo misubouꞌ misubouꞌ hutileꞌ ogo naba oꞌmo novive.
COL 1:7 Idoꞌ aꞌmine Oꞌmosoꞌmi nasahiliꞌveꞌmi monovo gihilemuꞌ nene leliꞌ gidini ve Kilisitoꞌ gelekeleꞌ veꞌve lute eme nonive Epahalaꞌ neꞌmo apize lengemavoo gili nizaniꞌ ma neive. Eiꞌ neve nene lelitoꞌ medelo Kilisitoꞌ gonoloꞌ nene peleseveꞌ ngomosi ma izamo daaꞌ ive ne neive.
COL 1:8 Idoꞌ eiꞌ neve nene lingine Oꞌmosoꞌmi Sikalahuliꞌmo do ote-lengedavoo lutine ngimaaꞌ monovotine lengita minineꞌ nemuꞌ lo-limive ne neive.
COL 1:9 Idoꞌ lingine neꞌmine igi minaniꞌ nemuꞌ giluneꞌ gamenelotiꞌ lengikumuꞌ nene gamene gamene Oꞌmosola laaꞌ nouninguꞌ nene Oꞌmosoꞌmo monokuꞌ otohato ve gehepeve loloꞌ o-lengedavo lingine eiꞌ Sikalahutatiꞌ gele vevesaaꞌ monovo di nizavo neꞌmo nene eiꞌ Oꞌmosoꞌmi luloloꞌ minineꞌ monovomuꞌ nene gili osuꞌ li minilizave losa laaꞌ noune.
COL 1:10 Guvelesi veꞌmi evenele minilizaniꞌ votigileloꞌ mini mili mini Guvelesi veꞌmo ninge lamineꞌ dalineꞌ monovolokovoꞌ nene eꞌmeti minilizave. Neꞌmine ikevo neꞌmi gihile nene gono lamineꞌ ato atoꞌ mukiꞌ di nizavo Oꞌmosomuꞌ gili vevesaaꞌ aniꞌ monovotine nene naba oꞌmo vo minelive.
COL 1:11 Idoꞌ Oꞌmosolatiꞌ atoliꞌmine ogo minineꞌ amuzoꞌve nene lengemavoo neꞌmo eleꞌvoleꞌ gehepeve igi mini lengita geni ato atoꞌ mukiꞌ sotoꞌ o-lengedelinguꞌ nene hongu li mini ha gihi di dizivoꞌ minilizadoꞌ lisiheꞌ i mini longolize izi
COL 1:12 metehida nene isaaꞌ neve li tangezoꞌ ve li-dilizave losa nene Oꞌmosola laaꞌ noune. Aza nene labanaꞌvesi minineꞌ ebeꞌveuꞌ eze evenele salani molo-lidineꞌ initeꞌ linge nene dalizadoꞌ do lisiheꞌ o-lengede neive.
COL 1:13 Ee, litiꞌmuso melehi amuzoloꞌ mino gelekeleꞌ o-do minuningutiꞌ nene do luꞌ izo hulo lulo eme neineꞌ gipeleꞌmi gizebouꞌ o-lede neive.
COL 1:14 Aꞌmine gipele neꞌmo nene meni hizo do kuluhize-lidineꞌ nene adoꞌ lihime apase-lidineꞌ neve ne neive.
COL 1:15 Idoꞌ aꞌmine Oꞌmosoꞌmi gipele nene ningamosoꞌ o minineꞌ Oꞌmoso neꞌmi avazaha neꞌmine mino Oꞌmosoꞌmo initeꞌ do sotoꞌ molaniꞌ mukiꞌ neti nabaꞌine ne neive.
COL 1:16 Idoꞌ initeꞌ mukiliti nabaꞌine neive noluvoniꞌ nene initeꞌ Okulumokuꞌ minaniꞌ initekisi misubouꞌ initekisi mukiꞌ nene eitatikovoꞌ sotoꞌ aniꞌ nenako nemuꞌ nene nabaꞌine ve noluvoniꞌ nene adoꞌ ningaaꞌ nouneꞌ initekisi idoꞌ ma ningamaaꞌ nouneꞌ initekisi ato atoꞌ initetoꞌ gizebo igi minaaꞌ ave dizi minaniꞌ limi minaniꞌ guveꞌinesi ve mukikisi nene eikumukovoꞌ asiꞌve do sotoꞌ o-ngidineꞌ ve.
COL 1:17 Idoꞌ eiꞌ neve nene initeꞌ mukikisi olihe sotoꞌ amavosa ha mino initeꞌ mukiꞌ hize eleꞌ o-ngedo neivosa eiꞌ amuzoloꞌ nene nizave.
COL 1:18 Aza nene eze evenele mulise eiꞌ okoꞌno neꞌmino minuniveti godoteloꞌ minive ne neive. Aza nene leliꞌ minevoꞌ alevoteꞌmi izeleho mino eiꞌ nene initeꞌ mukiꞌ ngivileꞌ ogo dizo minelove losa gomuꞌ molo lemo hilingutiꞌ otineꞌ ve.
COL 1:19 Idoꞌ Oꞌmosoꞌmo eiꞌ gipele ezeloꞌ lisihetokovoꞌ minelive lo gala gilidoꞌ do molo laavo aꞌmine gipelela nene eiꞌ Oꞌmosoꞌmi emeni dameniꞌve gehepeve mudise mine molo minineꞌ nenako nemuꞌ nene naza ezemuꞌ initeꞌ mukiꞌ ngivileꞌ ogo neive noluvoniꞌ nene mo laminetokovoꞌ noluve.
COL 1:20 Oꞌmosoꞌmo gala gelo laavo aꞌmine gipele nene lohotoꞌ zaloꞌ helo vaniseꞌve lepineꞌ neꞌmo nene Oꞌmososi biluvaꞌ ogo minuningutiꞌ nene kuku holo-ledo eiꞌ Oꞌmososi initeꞌ mukikisi misubouꞌ initeꞌ nilizahe Okulumokuꞌ initeꞌ nilizahe nesi nene do hamoꞌ o-ledavo uva lo do bizo none.
COL 1:21 Ee, lingine gomuꞌ Oꞌmoso huli hotoꞌ i-di mini monovo goloso igi minadiꞌmo nene lutine gatinguꞌ Oꞌmoso biluvaꞌ i-di minaniꞌza
COL 1:22 idise nene Kilisitoꞌ aza eveneꞌ okoꞌnoꞌve hulo labuluvo ogo hilineꞌ neꞌmo nene Oꞌmososi do hamoꞌ o-lingidineꞌ ve. Idoꞌ neꞌmine ineꞌ nene lingine golosoutiꞌ mine abazaꞌ igi mini lihime okodida dizamivo gamazitine nomivo minikevo Oꞌmosoꞌmi veleloꞌ nene lengeleꞌmize molalove losa nene neꞌmine ineꞌ ve.
COL 1:23 Idoꞌ neꞌmine o-lengedelineꞌ nene lingine monoꞌ gamazi lamineꞌ gilaniꞌ gili muꞌmusiꞌ aniꞌ nene huli vamii gili eleꞌvoleꞌ i mini monokuꞌ nene eleꞌvoleꞌ igi mini mine giliꞌ li minilizanikovoꞌ nene neꞌmine o-lengedeleseive. Aꞌmine monoꞌ gamazi lamineꞌ nene li sotoꞌ igi misubouꞌ misubouꞌ numudoꞌ namadoꞌ ve nene li-ngimikeve. Idoꞌ neniꞌ Pauloꞌ nene aꞌmine monoꞌ gamaziꞌmi gonoloꞌ ve loloꞌ ogo nouve.
COL 1:24 Idoꞌ naza lengikumuꞌ ve lo mulumo alumo geni nogihuvoniꞌ nemuꞌ nene idise naza nolize noizuve. Neꞌmine nouvoniꞌ nene Kilisitoꞌ aza mulumo geni gehelineꞌ nene ma ha neivosa naza nene ezeloꞌ medelo eiꞌ okoꞌno neꞌmine liliꞌ igi minave eze evenele zuho mulisemuꞌ nene aꞌmine ha minineꞌ geni nene do pelelesa neniꞌ okoꞌnela nene ma nogeho hize eleꞌ noo-lingiduve.
COL 1:25 Ee, Oꞌmosoꞌmo neniꞌ nene lengikumuꞌ gono doo aꞌmine gonoloꞌ gizebo ve mineline lo gono nimidoꞌ do molosa aꞌmine Kilisitoꞌ evenele zuho muliseꞌmi gonoloꞌ ve nene loloꞌ ogo nouve. Idoꞌ neꞌmi gonoloꞌ ve loloꞌ ogo nouvoniꞌ nene Oꞌmosoꞌmo eiꞌ gamaziꞌve nene lo-ngemo osuꞌ gehepeve liline losa lo-nedavo nemuꞌ nene gonoloꞌ ve loloꞌ o nouve.
COL 1:26 Idoꞌ aꞌmine gamaziꞌve nene gozopoꞌ akaꞌmila sotoꞌ ikaꞌ ikaꞌ iꞌmi ave nene gilamavo sunoꞌ gamazi neꞌmine minineꞌza idise nene eze evenele zuho ningi gililizave lo do sotoꞌ o-ngede neive.
COL 1:27 Ee, aꞌmine sunoꞌ gamazi nene ede vineꞌ initeꞌ gehepeve mino Zuda ve minamave heta atoꞌ ve engikisi do olusoꞌ o-ngedelingumuꞌ nene Oꞌmosoꞌmo eze evenele gililizave lo gelo lo-ngemelesa gele minineꞌ ve. Aꞌmine gamazi nene neꞌmino neive: Kilisitoꞌ neve nene lengikuꞌ neivosa neꞌmo nene lingine Oꞌmosolatiꞌ initeꞌ atoliꞌmine ogo minineꞌ nene vi di tiꞌ ilisaaze. Nemuꞌ nene aꞌminemuꞌ ha gili muꞌmusiꞌ i minilizadoꞌ o neive.
COL 1:28 Eveneꞌ hamo hamoꞌ mukiꞌ nene Kilisitoda giꞌmizi minisa monokuꞌ lodive ikeniꞌ nizavosavoꞌ Oꞌmosoꞌmi veleloꞌ nene ngeleꞌmize molalone losa nene aꞌmine Kilisitoꞌnimuꞌ lo sotoꞌ ogo eveneꞌ hamo hamoꞌ mukiꞌ nene hungoꞌ ngemo otohato monovoloꞌ gehepeve eꞌmeto eiꞌ Kilisitoꞌnimuꞌ nene eveneꞌ hamo hamoꞌ mukiꞌ apize ngemaaꞌ noune.
COL 1:29 Idoꞌ neꞌmine olongumuꞌ nene Kilisitoꞌ atoliꞌmine ogo do amuzo molo-nedaaꞌ neineꞌ votigileloꞌ gehepeve do molosa aꞌmine amuzodunuꞌ nene zegeꞌ zegeꞌ ogosa eleꞌvoleꞌ ogo gono daaꞌ nouve.
COL 2:1 Idoꞌ neꞌmine noluvoniꞌ nene naza lengikumukisi idoꞌ Laodikia ebekuꞌ minavemukisi idoꞌ neniꞌ goꞌne veꞌne gehepeveloꞌ ningamave linge mukikumukisi nene monoꞌ gono zegeꞌ zegeꞌ ogo daaꞌ nouvongumuꞌ nene gililizave losa noluve.
COL 2:2 Idoꞌ neꞌmine nouvoniꞌ nene ingine luꞌine amuzo molavo luꞌine ne geme ge neme li di hamoꞌ igi bizi minilizangumuꞌ ve losa neꞌmine nouve. Neꞌmine igi monoꞌ nene mo gili vevesilizadiꞌmo nene gili eleꞌvoleꞌ gehepeve igi Oꞌmosoꞌmo sunoꞌ molaniꞌ initeꞌ Kilisitoꞌnimuꞌ nene gili ngoloꞌ li minilizave losa gele noosa noluve.
COL 2:3 Idoꞌ monoꞌ gele osuꞌ lo otohato ogo minaaꞌ monovo mukiꞌ nene heneni lamineꞌ di haleki milaaꞌ naaniꞌ neꞌmine mino aꞌmine nene eiꞌ Kilisitoda mine osuꞌ lo neive.
COL 2:4 Neꞌmine noluvoniꞌ nene eveneꞌ hamolitesi gamazi nosoꞌvesi li-lingimii gotine izi lengeleꞌmize gopo ikelizave losa noluve.
COL 2:5 Ee, naza nene hota goloso nouha luꞌne gaꞌneꞌve nene mo lengikisi gehepeve neivo lingine Kilisitoꞌnimuꞌ gili eleꞌvoleꞌ anitine nene ma hulami di giliꞌ li mini di hamoꞌ igi mine lamineꞌ igi nizaniꞌ nene ningo gelo nolize izo nouve.
COL 2:6 Lingine Guvetesi ve minelive li Izesuꞌ Kilisitoꞌni nene di tiꞌ aniꞌ nenaze. Nemuꞌ lingine nene ezela eꞌmeti igi milisa minilo.
COL 2:7 Luhisetine nene Izesuꞌ Kilisitodoꞌ do neivosa minevoꞌ alevotine nene eita di lehete igi li-lingimaniꞌ gamaziloꞌ nene eꞌmetisa ezemuꞌ gili eleꞌvoleꞌ naaniꞌ nene di amuzo miliꞌmi vi mini aꞌminemuꞌ Oꞌmosola nene isaaꞌ neve li opoꞌni vauve ili li minilo.
COL 2:8 Eveneꞌ hamolitesi gotine izi gihileꞌve nomineꞌ gamazimuꞌ nene otohato gamazi lamineꞌ ve li lengeleꞌmize gopo igi aꞌmidoꞌ di gelekeleꞌ i-lingidikelizaze. Eheꞌ igi ningisa minilo. Aꞌneꞌmine gamazi li-lingimilizaniꞌ nene Kilisitoꞌ gamaziloꞌ vo dalineꞌ gamazi li-lingimilizavoba asi haza evenelite neꞌmine manaꞌmine initeliti monovomuꞌ nene avotemotidatiꞌ li di dizaniꞌ gamazivoꞌ nene li-lingimilisave.
COL 2:9 Idoꞌ neꞌmine noluvoniꞌ nene eiꞌ Kilisitoda eiꞌ okoꞌnola gehepeve nene Oꞌmosoꞌmi emeni dameni vaiꞌ nene mo mine molo osuꞌ lo neineꞌ nenako nemuꞌ nene noluve.
COL 2:10 Idoꞌ Oꞌmosoꞌmi emeni dameni vaiꞌ Kilisitoda neineꞌ neꞌmo nene lingine ezeloꞌ giꞌmizi nizaniꞌ nenako eitatiꞌ neve nene lutineꞌmo minevoꞌ alevoꞌ ilineꞌ initeꞌ vaiꞌ nene lingine di osuꞌ li nizanako nemuꞌ nene ngomosi ma viseꞌ amilisave. Aꞌmine Kilisitoꞌ nene guveꞌinesi ve gizebo igaꞌ amuzo di nizave mukiliti godoꞌnidoꞌ minive ne neive.
COL 2:11 Ezeloꞌ vi giꞌmizikevosa Oꞌmosoꞌmi noso neve nene mo lengita molo-lengede neive. Aꞌmine Oꞌmosoꞌmi noso nene evenelite Zuda veti monovoloꞌ eꞌmeti okodine lolovo huki huli-lingidiisa milaniꞌ nevoba asi lengemeni dameni litehe nene di hulikevo Kilisitoꞌ asiꞌve nene aꞌmine Oꞌmosoꞌmi noso nene molo-lingidineꞌ ve.
COL 2:12 Ee, lingine noso hilanguꞌ nene Kilisitoꞌ galeseuꞌ liminguꞌ nene linginesi makaꞌ ezesi limaniꞌ gele neive. Idoꞌ ezeloꞌ giꞌmizi mini eze galeseutiꞌ do ote-dive Oꞌmosoꞌmi amuzo neꞌmo lelikisi do ote-ledelidoꞌ lisiheꞌ o neive li gili eleꞌvoleꞌ aniꞌ neꞌmo nene ezesi galeseutiꞌ do ote-dinguꞌ nene lengikisi makatoꞌ do ote-lingidineꞌ gele neive.
COL 2:13 Ee, lingine Oꞌmosoꞌmi noso lengita nomineꞌ mini lengemeni dameni litehe nene hulamii goloso niteꞌ di minadiꞌmo lutine hele vineꞌ minangutiꞌ nene Kilisitoꞌnisi makaꞌ lengiꞌ lutinesi nene Oꞌmosoꞌmo do vele gizineꞌ ve. Neꞌmino Kilisitoꞌnisi makatoꞌ do ote-lidineꞌ gilineꞌ nene aza goloso nitete mukiꞌ do hulo-ledosa nene neꞌmine ineꞌ ve.
COL 2:14 Leliꞌ lihimetemuꞌ lo sotoꞌ ogo goniꞌ o-ledelesa minineꞌ luhuvo niteꞌ Moseꞌ gizineꞌ louꞌ gamazi nene lohotoꞌ zaloꞌ belo bado aꞌmine gamazi neꞌmo leliꞌ goniꞌ o-ledelineꞌ amuzoꞌve nene do hulavo osuꞌ gehepeve lineꞌ ve.
COL 2:15 Neꞌmino Kilisitoꞌ lohotoꞌ zaloꞌ hilidiꞌmo nene aza guveꞌinesi sikalahuꞌ goloso gizebo igaꞌ amuzoꞌinesi minave nene ngivileꞌ ogosa amuzoꞌine nene do hulo-ngedosa aꞌmine lohotoꞌ zadunuꞌ ngivileꞌ ogosa neineꞌ monovo nene eveneꞌ mukiliti veꞌnidoꞌ do sotoꞌ ogo osuꞌ laave.
COL 2:16 Neꞌmine ineꞌ nenako nemuꞌ nene lingine nosoꞌ niteꞌ ma naakumuꞌ nehe malise ogakumuꞌ nehe eveneꞌ malite neꞌmine neꞌmine ilizave lii monovotinemuꞌ izeꞌ mili lii lengemenga lilizaniꞌ nene gili ngimamilo. Idoꞌ aꞌmineꞌmine igi evenelite holiseꞌ minaaꞌ aniꞌ gamene adoꞌ kilisimasiloꞌ kilisimasiloꞌ nosoꞌ niteꞌ naba naaꞌ aniꞌ gamenelokisi ikeꞌni gosohoꞌ sotoꞌ ineꞌ gameneloꞌ gamenelokisi idoꞌ saleleuꞌ saleleukisi nene lingine holiseꞌ minaaꞌ naahe minamaaꞌ naahe neꞌmine naavo eveneꞌ malite aꞌmine monovotinemuꞌ izeꞌ mili lii lengemenga nilavo ma nene gili ngimamilo.
COL 2:17 Aꞌmine nosoꞌ niteꞌ nehe holiseꞌ gamene nehe neꞌmine initeꞌ nene alingeꞌ sotoꞌ ilizaniꞌ initeliti avazahaꞌine mumunoꞌine neꞌmine minaniꞌza aꞌmine initeliti initeꞌ gihileꞌine nene Kilisitoꞌ ne neive.
COL 2:18 Eveneꞌ malite ha me misubouꞌ alevete gaꞌine gilaaꞌ adiꞌmine igi gilii ingine laza veteloꞌ initeꞌ o molavo ninguuneꞌ nenako nemuꞌ nene laza monoꞌ monovo gehepeve gele none liisa engiꞌ okoꞌine nene hazamuꞌ di dizi minii lengikumuꞌ nene lingine amuzo mili okodine di limisa angeloꞌ gubiꞌ izi ngimaaꞌ amilizaniꞌ nene lukuvo nalizadoꞌ lisiheꞌ igi minamilisave lii lutinguꞌ hizilizaniꞌ nene gili ngimamilo.
COL 2:19 Aꞌmine neꞌmine aleve nene leliꞌ godote neꞌmino neive Kilisitodoꞌ nene eze aleve mukitoꞌ giꞌmizo noneꞌ neꞌmine igi ingine nene giꞌmizamave. Idoꞌ laza eitoꞌ giꞌmizo noneꞌ nene ezelatiꞌ guꞌnuhuvolo neꞌmo eze okoꞌno linge ato atoꞌ neꞌmine nonive mukiꞌ nene do giliꞌ lo-lidivo mino Oꞌmosoꞌmo hize eleꞌ o-lede neivo neꞌmo nene naba oꞌmo vo minaaꞌ noune.
COL 2:20 Lingine nene Kilisitolesi makaꞌ hiliisa me misubouꞌ alevete neꞌmine manaꞌmine initekumuꞌ gili laaꞌ aniꞌ gamaziloꞌ gelekeleꞌ igi minangutiꞌ nene kuluhizisa nizaniꞌ nenako nemuꞌ nene lingine aꞌmine Kilisitoꞌnimuꞌ gilamave me misubouꞌ aleveti muliseutiꞌ ha nizaniꞌ gilivo evenelite neꞌmine manaꞌmine initekumuꞌ nene di gilamilo idoꞌ ni gilamilo idoꞌ diisa igi mili amilo li li-lingidaaꞌ aniꞌ gamaziloꞌ gelekeleꞌ igivoꞌ minaaꞌ naaniꞌ nene nanimuꞌ naave.
COL 2:22 Ingine neꞌmine li-lingidaaꞌ aniꞌ initeꞌ nene ha igi mili naavo osuꞌ loosa vo haza ogaꞌ neineꞌ initekumukovoꞌ nene li-lingidaaꞌ aniꞌ ve. Idoꞌ ingine neꞌmine igaꞌ aniꞌ nene haza evenelitevoꞌ apizi ngimi li huki li-ngidaaꞌ aniꞌ gamaziloꞌ eꞌmetiisa igaꞌ aniꞌ ve.
COL 2:23 Aꞌmine laaꞌ aniꞌ gamazi neꞌmo nene okodelotiꞌ monokumuꞌ laniteꞌ gelo amuzo molo eꞌmetaakumukisi idoꞌ leliꞌ okode nene laniteꞌ gelamilineꞌ initeꞌ o-do do limuneꞌ gelo minaakumukisi nene laaꞌ neineꞌ nenako aꞌmine neve nene otohato gamazi gele neineꞌza aꞌmine lemeni dameni litehe neꞌmo laniteꞌ gilineꞌ monovo nene do leme-doo eꞌmetamo mineloningumuꞌ nene mo kekeꞌ hize eleꞌ o-ledesaꞌmive.
COL 3:1 Nemuꞌ nene Kilisitoꞌ hilingutiꞌ Oꞌmosoꞌmo do ote-dinguꞌ nene lengikisi lutine helavo minangutiꞌ nene makaꞌ do ote-lengedavo nizaniꞌ nenako nemuꞌ nene lingine Kilisitoꞌ Oꞌmosolotiꞌ lemo mino ana hulaaꞌ ida neida Okulumokuꞌ minineꞌ monovo danavavoꞌ nene dalone li gili mini gono di minilo.
COL 3:2 Me misubouꞌ minineꞌ initetoꞌ nene lutine milami asi Okulumokuko neineꞌ monovo danavalokovoꞌ nene lutine mili gili minilo.
COL 3:3 Neꞌmine noluvoniꞌ nene neemuꞌ noluve: Lingine hili nizaniꞌ gelavosa minevoꞌ alevotine gihile nene Kilisitonguꞌ haleke neineꞌ nene mo Oꞌmosola neive.
COL 3:4 Ne neiha minevoꞌ alevotineꞌmi izeleho Kilisitoꞌ ogo sotoꞌ pizelineꞌ nene linginesi aꞌmineꞌmine igi lengemeni dameni okodine atoliꞌminesi makaꞌ sotoꞌ ilisave.
COL 3:5 Nemuꞌ nene lingine me misubouꞌ monovo danava goloso lutinguꞌ neineꞌ adoꞌ veneꞌ vemohoꞌ gipe alu gopo ingaaꞌ monovosi idoꞌ lute do goloso ilineꞌ monovo ato atoꞌ nesi idoꞌ initeꞌ goloso mamuꞌ lutine otavo ninge lamineꞌ ogaꞌ nesi idoꞌ initeꞌ gohi masi masi dunivoo lii mumuzoꞌ ogaꞌ monovo nene soza oꞌmosoloꞌ gelekeleꞌ ogaꞌ monovo neꞌmine nenaze aꞌmine nesi nene mo ngibili hilaniꞌ gelavo mudise hulisa minilo.
COL 3:6 Oꞌmosoꞌmi gamazi gili huli neꞌmine monovo igi mili igaꞌ avemuꞌ nene Oꞌmoso izeboloꞌ molavo lihime ngemeleseive.
COL 3:7 Idoꞌ linginesi gomuꞌ aꞌmine neꞌmine monovo nene lengiꞌ lutineꞌmine loloꞌ ogavo minanguꞌ nene aꞌmidoꞌ eꞌmeti igi mili minaaꞌ aniꞌ ma neive.
COL 3:8 Neꞌmine igi minaniꞌza idise aꞌmine nene hulisa ma meꞌmine monovo nesi nene hulilo: Adoꞌ lingizeboloꞌ malaꞌ malaꞌ nesi idoꞌ eveneꞌ singeheꞌ goloso minaaꞌ nesi idoꞌ lukehe lakehe ogaꞌ monovo nesi idoꞌ dovo ledevoka laaꞌ monovo nesi idoꞌ gamazi goloso laaꞌ nesi nene mo mudise hulilo.
COL 3:9 Lengikuꞌ gamazi lilizanguꞌ nene sozasi lamilo. Lingine gomuꞌ lengemeni damenisi idoꞌ aꞌmineꞌmo ogo molo ogaꞌ ineꞌ monovoꞌve golososi nene di hulisa
COL 3:10 lengemeni dameni gosohoꞌ di otuhaniꞌ ma neive. Aꞌmine lengemeni dameni nene Oꞌmosoꞌmo lingine eikumuꞌ gili vevesi osuꞌ li minilizangumuꞌ ve lo eiꞌ aꞌmine lengemeni dameni do sotoꞌ iveꞌmi avazahaloꞌ gehepeve nene gohi do gosohoꞌ oꞌmo voovoꞌ neive.
COL 3:11 Idoꞌ neꞌmino do gosohoꞌ o-lidinguꞌ mene gomuꞌ hoꞌlo ato atoꞌ minuneꞌ monovo ma nene mo mudise osuꞌ laave. Adoꞌ eveneꞌ linge ma nene heta atoꞌ aleve nGiliki aleve nevoꞌmine minavo linge ma Zuda aleve minunivo neꞌmo hoꞌlo minuneꞌ nolihe idoꞌ linge ma okodela Oꞌmosoꞌmi noso neivo linge ma nomivo haza nizavoo minuneꞌ nolihe idoꞌ linge ma nene save dunive neꞌmine nonivo linge ma nene save damave eveneꞌ loposo neꞌmine minavo minuneꞌ nolihe idoꞌ linge ma goboni ve minavo linge ma nene eveneꞌ maliti goboni ve minamo haza nonivo minuneꞌ nolihe laza neꞌmino minaaꞌ uneꞌ ma nene idise Kilisitoꞌ aza leliꞌ mukiliti nabate loloꞌ ogo leliꞌ nene mukikuꞌ mine molo neineꞌ nenako nemuꞌ nene neꞌmino hoꞌlo minaaꞌ uneꞌ monovo ma nene mo osuꞌ lave.
COL 3:12 Neꞌmino neineꞌ nenako nemuꞌ nene lingine Oꞌmosoꞌmo lengiꞌ nene do kegeso do eita ogosa lulo lengeme neive eiꞌ evenele nizaniꞌ nenaze. Lingine meꞌmine monovo nene di otuhi igi mili minilo. Adoꞌ muludine hukavo eveneꞌ mulumoꞌine ningaaꞌ monovosi idoꞌ nasahiliꞌ o-ngedaaꞌ monovosi idoꞌ okode do lemo minaaꞌ monovo nesi idoꞌ muludine laminekisi hongu lo minaaꞌ monovo nesi idoꞌ lingizeboloꞌ molaniꞌ initeꞌ ikevo ma goloso gelamo zou lo minaaꞌ monovo nesi nene di otuhi
COL 3:13 lengikuꞌ eveneꞌ malite lingizeboloꞌ molali initeꞌ i-lingidikaꞌ i-lingidikaꞌ navo ma nemuꞌ nene goseleꞌ lengebelamivo gili huli aꞌmine lihimeꞌine nene huli-ngidilo. Ee, Guvelesi veꞌmo lengiꞌ lihimetine nene hulo-lingidineꞌ nenaze. Aꞌmineꞌmine igi lingine nene ge lihimeka hulo-gede ne lihimeꞌne hulo-nede livoꞌ minilo.
COL 3:14 Idoꞌ lingine neꞌmine manaꞌmine initeꞌ igi mili minaaꞌ naaniꞌ nene ngivileꞌ ivosa initeꞌ naba nene lutine ngemaaꞌ monovo nene di otuhi igi mili minilizave. Aꞌmine lute ngemaaꞌ monovo neꞌmo nene monovo lamineꞌ mukiꞌ nene asabuꞌ ize neivosa laminovoꞌ minelonidoꞌ do hamoꞌ o-ledaaꞌ neive.
COL 3:15 Kilisitoꞌ elese molo-lengedo lengeleꞌmize eita ineꞌ nene lingine lutine hamoꞌ ogavo hongu li laminivoꞌ minilizave losa neꞌmine ineꞌ nenaze. Lingine neꞌmine manaꞌmine initeꞌ ilisa gilii ma nene gomuꞌ aꞌmine initekumuꞌ izeꞌ mili di ningi Kilisitodatiꞌ hongu lo lamino minaaꞌ monovoloꞌ nene eꞌmetilizaniꞌ aka vele-lengedelineꞌ initekovoꞌ ilo. Neꞌmine igi mini Oꞌmoso isaaꞌ neve li opoꞌni li minilo.
COL 3:16 Kilisitoꞌ gamaziꞌve nene lutinguꞌ vauve goloso elosa mine molo minivo minilo. Neꞌmine igi otohato gamazi gehepeve li ge apize neme ne apize geme idoꞌ ge hungoꞌ molo neme ne hungoꞌ molo geme lisa monoꞌ nama ato atoꞌ monoꞌ godoloutiꞌ monoꞌ nama nehe idise aꞌmene laaꞌ naaniꞌ monoꞌ nama nehe idoꞌ Oꞌmosoꞌmi Sikalahuꞌ neꞌmo lo sotoꞌ ogo lo-lengemelineꞌ monoꞌ nama nehe neeve nene li Oꞌmoso nene isaaꞌ neve li aꞌmine nama nene lutingutiꞌ gehepeve li-imaaꞌ igisa minilo.
COL 3:17 Lingine gono dalizanguꞌ nehe gamazi lilizanguꞌ nehe nadiꞌ nadiꞌ ilizahe aꞌminguꞌ nene Izesuꞌ aza lengiꞌ Guvetinesi ve miningumuꞌ nene sotoꞌ ogo minelidoꞌ di milisa igi mili eiꞌ Izesuꞌnimuꞌ nene melehine Oꞌmoso isaaꞌ neve li-di minilo.
COL 3:18 Lingine Guvelesi veꞌmi evenele nizanako nemuꞌ nene veneꞌ lengiꞌ nene vadinge lilizaniꞌ gamaziloꞌ nene gelekeleꞌ igi gili daakovoꞌ igi minilizadoꞌ o neineꞌ nenaze. Gelekeleꞌ i-ngidi minilo.
COL 3:19 Idoꞌ vemohoꞌ lengiꞌ nene eledingine lutine ngimi mini goseleꞌ ngebelelineꞌ initeꞌ i-ngidamilo.
COL 3:20 Idoꞌ izipe lengiꞌ nene izetingine metingine gelekeleꞌ i-ngidi minilizaniꞌ nene Guvelesi veꞌmo gilivo mulunouꞌ lamineꞌ oloseize. Gamene gamene gelekeleꞌ i-ngidivoꞌ minilo.
COL 3:21 Idoꞌ izeꞌninge meꞌninge lingine izipahatine goseleꞌ ngibilivoovoꞌ minikelizaze. nGizeboloꞌ molali initeꞌ initeꞌ i-ngidi minamilo.
COL 3:22 Idoꞌ gonouꞌ ve lingine nene me misubouko gizebo i-lingidaaꞌ naavetine nene gamene gamene gelekeleꞌ i-ngidivoꞌ minaaꞌ ilo. Idoꞌ neꞌmini gelekeleꞌ i-ngidilizaniꞌ nene lengiꞌ gizebo vetinelite lengikumuꞌ ningi lamineꞌ gililizave li engiꞌ veꞌnidoꞌ nene gono amuzo mili daaꞌ naave gili gono di miniisa alingeꞌ ingine ningamavo gono gilizevo igi di minaaꞌ neꞌmine nene amii asi Guvelesi vemuꞌ golise gili mini lutine gonotidokovoꞌ mili mini gono di minilo.
COL 3:23 Neꞌmine manaꞌmine gono dalizanguꞌ nene eveneliti gono di-ngidamii asi Guvelesi veꞌmi gono nidi-daniꞌ gilivosa lutine laminetotiꞌ gehepeve nene di minilo.
COL 3:24 Idoꞌ neꞌmine ilizaniꞌ nene Guvelesi veꞌmo aꞌmine gonotidoꞌ golo hizo salani molo-lidineꞌ initeꞌ nene menitine neꞌmine lehize-lengedelineꞌ mamuꞌ nene gili nizaniꞌ nenako nemuꞌ nene neꞌmine ilisaave. Lingine gelekeleꞌ i-di nizave nene Guvelesi ve Kilisitoꞌni gelekeleꞌ i-di nizaniꞌ ve.
COL 3:25 Idoꞌ neꞌmine noluvoniꞌ nene ingine gamaziꞌve avutoꞌ igi monovo goloso ilizave nene hamokisi voꞌneloꞌ ve ve lo ma ninge mate-ngedamo mukiꞌ nene monovo goloso ilizadoꞌ golo hizo lihime ngeme osuꞌ loloseive.
COL 4:1 Idoꞌ gonoloꞌ veti gizebo veꞌine lingine Okulumokuꞌ nene lengitoꞌ gizebo vetine ma neineꞌ nenaze. Aꞌminemuꞌ nene gili mini lengiꞌ gonouꞌ vetine nene monovo hehe lo minelineꞌ lisihekovoꞌ nene i-ngidisa minilo.
COL 4:2 Idoꞌ Oꞌmosola li minilizaniꞌ nene hulami laakovoꞌ igi minilo. Idoꞌ neꞌmini Oꞌmosola li minilizanguꞌ nene lutine okise ongamivoo gilingili igi Oꞌmoso nene isaaꞌ neve li-di minilo.
COL 4:3 Idoꞌ Kilisitoꞌ gamaziꞌve gomuꞌ sunoꞌ minineꞌ lo sotoꞌ ogo lo-ngemeloningumuꞌ nene Oꞌmosoꞌmo akahe siꞌze-ledaavo naza lolodoꞌ o neidoꞌ do molo lolongumuꞌ neniꞌ nene aꞌmine gamazi lovo ngoloꞌ lovoꞌ ogo lo-ngemelive lii lingine aꞌmine Oꞌmosola li minilizanguꞌ nene lelikumukisi lilo. Naza nalatoꞌ ve nouvoniꞌ nene aꞌmine Kilisitoꞌ gamaziꞌve lo sotoꞌ ogaꞌ uvongumuꞌ nene nouve.
COL 4:5 Idoꞌ lingine nene gopo moni minamii eveneꞌ adoꞌ Izesuꞌ evenele liliꞌ ami heta minave nene naniteꞌ di-ngidilizahe aꞌminemuꞌ nene gatine gili nge li mini monovo laminekovoꞌ i-ngidi eveneꞌ hize eleꞌ i-ngidiliza gonotine lamineꞌ sotoꞌ ilineꞌ nene mo diivoꞌ minilo.
COL 4:6 Idoꞌ gamazitine lilizaniꞌ nene gamazi unuvo huhu lo mino meleleꞌ o minelineꞌ gamazivoꞌ lilo. Neꞌmine igi minilizaaniꞌ nene monokumuꞌ ma longoꞌ i-lingidilizave hamo hamoꞌ nene di velepeꞌ izi li-ngimiliza gamazimuꞌ nene gili hehe li minisa minilizave.
COL 4:7 Idoꞌ nenita sotoꞌ oꞌmo novineꞌ initekumuꞌ gamaziꞌve mukiꞌ nene Tikikoꞌ lo-lengemeleseive. Aza nene Kilisitoꞌ evenele leliꞌ zuho Guvetesi veꞌmi gelekeleꞌ izipeꞌve lisiheꞌ lamineꞌ lelikisi makaꞌ gono daaꞌ ive neivo luꞌne emaaꞌ nouve minive
COL 4:8 neꞌmo leliꞌ gamazi nene lo-lengemo muludinguꞌ do lamineꞌ ilive lo imiselekuvo lengita nesene novive.
COL 4:9 Idoꞌ lengikutiꞌ ve Onesimoꞌ nene leze zuho peleseveꞌ izamaaꞌ ive lute eme nonive minive aza nene ezesi makaꞌ nivasive. Ingine nene mela minineꞌ gamazi mukiꞌ nene li-lingimilisasive.
COL 4:10 Nenikisi makaꞌ nalatoꞌ nosive Alisitakoꞌ neꞌmo nene longopoꞌni nolive. Idoꞌ Banabasiꞌ oholoho Malekoꞌ nesi nene longopoꞌni nolive. Ezemuꞌ i-dilizaniꞌ gamazi nene mo lengita hulo nouvo mo gili nizaniꞌ ma neive. Lengita naavo ma nene eleꞌmize lamineꞌ ilo.
COL 4:11 Idoꞌ ve ma gulive Izesuꞌ ve lo minineꞌ adoꞌ guliveꞌve gohi ma Zusitoꞌ ve li li-daaꞌ ave neesi nene longopoꞌni nolive. Zuda ve minangutiꞌ nene aꞌmine luve metevoꞌ nene nenikisi makaꞌ Oꞌmosoꞌmo gizebo o-ledelingumuꞌ gono daaꞌ unive minii aꞌmine nete nene hize eleꞌ gehepeve i-nidave.
COL 4:12 Idoꞌ lengikutiꞌ minive mino Izesuꞌ Kilisitoꞌ gonoloꞌ ve minive Epahalaꞌ nesi nene longopoꞌni nolive. Aza lengikumuꞌ nene gamene gamene Oꞌmosola zegeꞌ zegeꞌ ogo laaꞌ neive. Ee, lingine monokuꞌ lodive igi Oꞌmosoꞌmo lulouꞌ gilineꞌ gamazi mukiꞌ nene gili hehe li aꞌmidoꞌ eꞌmeti osuꞌ lilizave losa nene Oꞌmosola laaꞌ neive.
COL 4:13 Ee, naza eze monovo nene mo gele noosa aꞌminemuꞌ nene tiꞌ lo noluve: Aza neve nene lengikumukisi idoꞌ Izesuꞌ evenele Laodikia ebekuꞌ minavemukisi idoꞌ Hielapoli ebekuꞌ minavemukisi nene geꞌnebe gono goloso amuzo molosa do minaaꞌ neive.
COL 4:14 Idoꞌ longopoꞌni gohi ma nilasineꞌ nene lute eme nonive tota ve Lukaꞌ nesi idoꞌ ve ma Demaꞌ nesi nene nilasive.
COL 4:15 Idoꞌ laza leze zuho Laodikia ebekuꞌ mulise milaaꞌ naavesi idoꞌ Nimihaꞌnisi idoꞌ monoꞌ aleve eze numuꞌveuꞌ mulise milaaꞌ naavesi nene ngopoꞌni noluze. Li-ngimilo.
COL 4:16 Idoꞌ luhuvo niteꞌ meve nene gati li-lingimikevo ma nene Laodikia ebekuꞌ mulise milaaꞌ naanguꞌ nesi nene gatilizangisi huli-ngidilizave. Idoꞌ Laodikia ebekuꞌ di nizaniꞌ luhuvo niteꞌ nene lingine di igi aꞌminesi nene gatilo.
COL 4:17 Idoꞌ Alakipoꞌni nene tiꞌ li li-imilo: Gaza Guvelesi veꞌmo gimineꞌ gono nene hulamo mo do pelelove lo gele minosa dalosane.
COL 4:18 Luhuvo niteꞌ gizi-nidaveti aꞌningutiꞌ luhuvo gizaaꞌ initeꞌ nene doosa neniꞌ Pauloꞌ nene longopoꞌni lo neniꞌ aꞌnedunuꞌ nogizuve. Nemuꞌ nene lingine nalatoꞌ nouvongumuꞌ nene gatine molalize. Aꞌminemuꞌ nene gili minilo. Oꞌmosoꞌmi nasahiliꞌve neꞌmo nene lengita mine molo minivoo.
1TH 1:1 Pauloꞌ nazasi idoꞌ Siluvanokisi Timoteokisi laza Meteho Oꞌmoso idoꞌ Guvetesi ve Izesuꞌ Kilisitoꞌ eze evenele zuho lingine Tesalonika ebekuꞌ mulise milaaꞌ naniꞌ nene luhuvo niteꞌ gize-lengedelone losa luhuvo niteꞌ mene nogize-lingiduze. Ningilo. Nogize-lengedo Oꞌmosoꞌmo nasahili o-lengedavo hongu laminekuꞌ minilizave lo ezela noluve.
1TH 1:2 Laza lingine mukikumuꞌ ve lo gamene gamene Oꞌmoso opoꞌni lovoꞌ lovoꞌ ogaꞌ noune. Idoꞌ goseleꞌ lebelamivo lengikumukisi Oꞌmosola lo minaaꞌ noune.
1TH 1:3 Ee, Meteho Oꞌmosoꞌmi veleloꞌ mini lingine Izesuꞌnimuꞌ gili eleꞌvoleꞌ igaꞌ naniꞌ neꞌmi gihileꞌve di sotoꞌ igi gono daaꞌ naniꞌ nemuꞌ idoꞌ lutine ngimi amuzo mili nasahiliꞌ i-ngidaaꞌ naniꞌ nemuꞌ idoꞌ Izesuꞌ Kilisitoꞌ ogo do luꞌ izeleseive li gilingili igi mini lutine di giliꞌ li hongu li minaaꞌ naniꞌ nemukisi gelo Oꞌmosola laaꞌ noune.
1TH 1:4 Idoꞌ neze zuhokizo, Oꞌmosoꞌmo lulo lengeme neineꞌ mate, aza neniꞌ ve lo do kegese-lingidineꞌ nene gele nounako nemukisi opoꞌni laaꞌ noune.
1TH 1:5 Monoꞌ gamazi lamineꞌ do vo lo-lingimuneꞌ nene haza gamazi loloꞌ amineꞌ ve. Oꞌmosoꞌmi Sikalahuꞌ amuzoꞌvesi neineꞌ nene sotoꞌ ogavosa gele eleꞌvoleꞌ o mino lo-lingimuneꞌ nemuꞌ Oꞌmosoꞌmo do kegese-lingidineꞌ nene mo gele none. Neꞌmine ogo laza lengikumuꞌ ve lo lengita monoꞌ gono do minuneꞌ gameneuꞌ ogo molo ogo minuneꞌ monovo nene langisetine mo ningi gili nizave.
1TH 1:6 Monovote ningi gili unidiꞌmine unidiꞌmine igi Guvetesi ve idiꞌminesi igi minaniꞌ. Neꞌmine igi Oꞌmosoꞌmi gamazi gili gili eleꞌvoleꞌ igi gili di minikevo nemuꞌ amuzo mili goboni mili-lingidiꞌmi vi minangukisi Oꞌmosoꞌmi Sikalahuꞌ aza muludine do lamineꞌ ogo neivo muludinguꞌ lamineꞌ gili minaniꞌ.
1TH 1:7 Lingine neꞌmine igi minaniꞌ nene gilii Makedonia misubouꞌ idoꞌ Akaia misubouꞌ monoꞌ gili eleꞌvoleꞌ avete lingine adiꞌmine igi lengeꞌmeti vaniꞌ ve.
1TH 1:8 Idoꞌ Guvetesi veꞌmi gamazi nene lengitatiꞌ vo hutileꞌ ogo Makedonia misuboukisi idoꞌ Akaia misuboukisivoꞌ vivoba numudoꞌ namadoꞌ lingine Oꞌmosomuꞌ gili eleꞌvoleꞌ aniꞌ neꞌmi guvele nene buu lo vineꞌ. Buu lo vavo eveneꞌ mukiꞌ gili osuꞌ likeve. Nemuꞌ ma lo-ngemelonidoꞌ nomive.
1TH 1:9 Eveneꞌ angiseꞌine veteteꞌ igi li sotoꞌ igaꞌ nave. Laza lengita vo mino gono dunivo neꞌmi gihileꞌve sotoꞌ ineꞌ nemuꞌ veteteꞌ igi lingine veꞌine gaꞌine nomineꞌ avazaha oꞌmoso niteꞌ gelekeleꞌ i-ngidaaꞌ igi minaniꞌ nene mehedine ngimi Oꞌmosola vi giꞌmizi velesi neive Oꞌmoso gihile gelekeleꞌ i-di minaaꞌ naniꞌ neꞌmi gamazi li sotoꞌ igaꞌ nave.
1TH 1:10 Idoꞌ neꞌmine igi lingine aꞌmine Oꞌmosoꞌmi gipele hilingutiꞌ do ote-dineꞌ nene Okulumokutiꞌ alingumuꞌ gizebo igi nizaniꞌ nemukisi veteteꞌ igi laaꞌ nave. Adoꞌ aꞌmine alingeꞌ gonitoꞌ vokunivo Oꞌmosoꞌmo lihimete apaso mulumo niteꞌ o-ledelesa neingutiꞌ do luꞌ izaaꞌ neive Izesuꞌnimuꞌ nene noluve.
1TH 2:1 Neze zuho mate, lengita vo gono dunivo vo haza amineꞌ nene langisetine ningi gili nizave.
1TH 2:2 Idoꞌ gomuꞌ nene Hilipi ebekuꞌ mulumo niteꞌ i-lidi goboni mili-lidaniꞌ nesi langisetine ningi gili nizave. Neꞌmine i-lidaniꞌza leze Oꞌmosoteꞌmo hize eleꞌ o-ledo amuzo lemavo aꞌmine mulumosi geni naba hiluningukisi Oꞌmosoꞌmi gamazi lamineꞌ nene lovoꞌ kiselevoꞌ ogo lo sotoꞌ ogo lo-lingimune.
1TH 2:3 Gatine do lo-lingimuneꞌ gamazi nene ladanga lo lo-lengemamune. Idoꞌ goloso initeꞌ daaꞌ univete lo-lengemamune. Idoꞌ gotine izo soza lo lo-lengemamune.
1TH 2:4 Oꞌmosoꞌmo leze luteuꞌ ningavo eze gamazi lamineꞌ nene ha li-ngimilizadoꞌ neive lo ninge-lede neivo lo-lengemaaꞌ noune. Evenelite gilikevo lamineꞌ ilive losa nomive. Oꞌmoso luteuꞌ ningaaꞌ iveꞌmo ningivo lamineꞌ ilive losa lo-lengemaaꞌ noune.
1TH 2:5 Lingine leze monovote gili nizave. Lengita minuneꞌ gameneuꞌ monovote do haleko sunoꞌ mino lengiꞌ moni henenimuꞌ mumuzoꞌ ogo muludinguꞌ hizo ma lamune. Oꞌmosoꞌmo gele neivo nolune.
1TH 2:6 Lengiꞌ nehe eveneꞌ atolite nehe lezemuꞌ gilikevo dizavo guvetesi ve loloꞌ olone losa lamune.
1TH 2:7 Laza eveneꞌ naba gidini eze aposolo liliꞌ igi minilizave lo Kilisitoꞌ aza leleꞌmize molanako laza amuzo molo-lengedeloneꞌ ha neive. Ha neineꞌza neꞌmine amo izeꞌnibo maliꞌmo izipahala zou lo gizebo o-ngedo minaaꞌ neineꞌ neꞌmino laza linginela minuneꞌ ve.
1TH 2:8 Neꞌmine ogo lute lengita minavo Oꞌmosoꞌmi gamazi lamineꞌ nene lo-lengemelone losavoꞌ lamune. Lingine vodeloꞌ aleve liliꞌ aniꞌ nemuꞌ nene leze minevoꞌ alevote lengita osuꞌ lilineꞌ nene lamineꞌ ve lo gelo nesi lengemelone losa lune.
1TH 2:9 Neze zuho mate, eleꞌvoleꞌ gono do labusote ilivo gono do minuneꞌ nene mo gili nizave. Linginelatiꞌ initeꞌ ma limilizaniꞌ nene linginela nomivo geni ogalive lo holisekisi holukakisi okode losuvoꞌmi gono eleꞌvoleꞌ ogo do mino Oꞌmosoꞌmi gamazi lamineꞌ nene lo-lingimuneꞌ ma neive.
1TH 2:10 Laza lute laminekisi mine kegese mino lute lisihekisi mino lihimete nomivo mino monoꞌ gilaaꞌ ave lengita ogo molo uneꞌ nene mo linginesi Oꞌmososi ningi gili nizave.
1TH 2:11 Meꞌnibo maliꞌmo izipahala zuho o-ngedaaꞌ neineꞌ neꞌmine ogo laza lingine hamo hamoꞌ neꞌmine o-lengedo minaaꞌ uneꞌ ma ve.
1TH 2:12 Neꞌmine ogo gatine do vodine lutine do gilingili o-lengedo lo huko tiꞌ lo lo-lengemo minune: Eiꞌ gizebo o neinguꞌ mini eze labanaꞌve ningi di tiꞌ ilizave lo Oꞌmosoꞌmo lengeleꞌmize molaze. Nemuꞌ Oꞌmoso eiꞌ evenele zuho igi mili ilizaniꞌ o nolidokovoꞌ igi mili minilo lo lo-lengemo minuneꞌ ma neive.
1TH 2:13 Idoꞌ laza Oꞌmosoꞌmi gamazi lo-lingimunivo gilikevo haza eveneliti gamazi loloꞌ amineꞌ ve. Lingine Oꞌmosoꞌmi gamazi ve li gili di goꞌzaniꞌ ma neive. Mo lamineꞌ Oꞌmosoꞌmi gamazi neive. Oꞌmosoꞌmi gamazi neꞌmo monoꞌ gili gili eleꞌvoleꞌ i nizave lengita gono daaꞌ neive. Nemuꞌ nene laza gamene gamene goseleꞌ lebelamivo Oꞌmoso opoꞌni laaꞌ noune.
1TH 2:14 Neze zuho mate, Oꞌmosoꞌmi evenele zuho Zudaia misubouko Izesuꞌ Kilisitoda vi giꞌmizave inginesi linginesi hamoꞌ suno di nizavo mulumo initeꞌ i-lingidi engiꞌ nene Zuda vete goboni malaꞌ malaꞌ i-ngidaniꞌ. Aꞌmineꞌmine igi lingi zuho malitesi goboni mili-lingidaniꞌ ve.
1TH 2:15 Zuda ve ingine neve gozopoꞌ Oꞌmosoꞌmi gamazi li sotoꞌ igaꞌ ave polohete nene ngibili hilaniꞌ. Idoꞌ aꞌmineꞌmine igi Guvelesi ve Izesuꞌni nesi bili hilaniꞌ ve. Idoꞌ leze libili gaꞌ limiselaniꞌ. Aꞌmine Zuda vemuꞌ Oꞌmosoꞌmo gilivo lamineꞌ amineꞌ. Aꞌmine Zuda ve nete eveneꞌ mukiꞌ numudoꞌ namadoꞌ ve nene lovo i ngimi minaaꞌ nave.
1TH 2:16 Laza ato atoꞌ vetida vo monoꞌ lo-ngemekunivo gili Oꞌmosoꞌmo do nguꞌ izivo minilizave lo volosa nonivo aꞌmine Zuda ve ingine neꞌmine igi lelikumuꞌ nene monoꞌ goloso laaꞌ nanako aka hize tilelobe li lovo gani li-limaaꞌ aniꞌ. Ingine neꞌmine iviꞌ iviꞌ igi minikevo engiꞌ lihime ehetoꞌ ehetoꞌ ogo dize minavo Oꞌmosoꞌmo izeboloꞌ molaniꞌ neꞌmi lovoꞌve nene engita mo ogo minave.
1TH 2:17 Neze zuho mate, leliꞌ nene gamene ngomo hulo hotoꞌ o-lengedo siheleꞌni izipe neꞌmine loloꞌ ogo noneꞌza hulo hotoꞌ o-lingiduneꞌ nene lutedunuꞌ nomive. Okode losuvodunukovoꞌ neꞌmine une. Nemuꞌ nene lengikumuꞌ lisivo mino lingi vo ningelone lo amuzo molo gelo aka viseꞌ ogo minune.
1TH 2:18 Lengita volone lo gelo minuneꞌ nenako Pauloꞌ naza gamene masi masi volosa okuvo Sataniꞌmo aka hize tile-nidineꞌ.
1TH 2:19 Lengikumuꞌ ve lo laniteꞌ gelaaꞌ noune. Nene neꞌmino neive: Guvetesi ve Izesuꞌ hetelelineꞌ gameneuꞌ nene zaaꞌ vete leliꞌ gonoliꞌmi gihile liliꞌ ilizave. Langise nene leliꞌ gonoliꞌmi gihile liliꞌ ilisave. Nemuꞌ lengikumuꞌ lolize izo minaaꞌ noune.
1TH 2:20 Lengikumuꞌ muludeuꞌ lamineꞌ gelo Oꞌmoso opoꞌni laaꞌ none.
1TH 3:1 Lengikumuꞌ nisivo mulumo gelo minuvoniꞌ nene edamivo Timoteoꞌ aza hulo-nedo lengita vavo nenikovoꞌ Atena numuda minelove lo gelo
1TH 3:2 lelikisi makaꞌ Oꞌmosoꞌmi gono do Kilisitoꞌ gamaziꞌve lamineꞌ lo sotoꞌ ogaꞌ ive leze zuho Timoteoꞌni imiselekuve. Idoꞌ imiseluvoniꞌ nene aza lengita vo monokumuꞌ lengiꞌ goboni mili-lingidi nizaniꞌ neꞌmo nene monoꞌ hulikelizave lo gatine do lutine do ngi lo-lengedo Izesuꞌnimuꞌ gili eleꞌvoleꞌ naniꞌ nene do amuzo molo-lengedelive lo imiseluvoniꞌ ve. Ee, Oꞌmosoꞌmo gelavo aꞌmine geni nene ha gehelonidoꞌ o noneꞌ nene lingine mo gili nizave.
1TH 3:4 Ee, aꞌmine geni olihe sotoꞌ amivo laza lengita ha minuneꞌ gameneuꞌ nene mulumo geni niteꞌ sotoꞌ o-ledelesa neive lo gomuꞌ ogo lo-lingimuneꞌ nenako nemuꞌ nene aꞌminemuꞌ mo ningi gili nizave.
1TH 3:5 Idoꞌ lemenguꞌ molaaꞌ ive lengemenguꞌ molavo lengita gono duneꞌ nene vo haza ogalinako monoꞌ gili di nizahe idoꞌ hulahe lo neꞌmi monovo gelelove lo lengikumuꞌ mulumo naba gelosa ogo molo minuvonikisi edamivo Timoteoꞌni imiselekuvo vineꞌ ve.
1TH 3:6 Idoꞌ Timoteoꞌ aza lingisi minadatiꞌ lezela ogo hetelo lingine Izesuꞌnimuꞌ gili eleꞌvoleꞌ igi minaniꞌ nemuꞌ veteteꞌ ogo lo-lemave. Idoꞌ lelikumuꞌ gilikevo gamene gamene lamineꞌ ogo minaaꞌ ivo laza lingine ningelone lo minaaꞌ uneꞌ neꞌmino linginesi aꞌmineꞌmine igi lezemuꞌ ningelone li gili minaaꞌ aniꞌ nesi lo-leme osuꞌ lave.
1TH 3:7 Lo-leme osuꞌ lavo neze zuho, lingine Izesuꞌnimuꞌ gili eleꞌvoleꞌ igi minaniꞌ nene gelo nemuꞌ lengikumuꞌ geni libilineꞌ nene mate-ledavo goboni mili-lidi nizavo mulumo gelo noningukisi lamineꞌ giluneꞌ ve.
1TH 3:8 Idiꞌnise lingine Guvetesi vela vi giꞌmizi eleꞌvoleꞌ i nilizaniꞌ nemuꞌ gelo luteuꞌ lamineꞌ ogavo gohi mine lamineꞌ ogo ogo molo minelesune.
1TH 3:9 Idoꞌ lengikumuꞌ ve lo Oꞌmosoꞌmi veleloꞌ muludeuꞌ lamineꞌ goloso giluningumuꞌ ve lo lengikumuꞌ do dizosa Oꞌmoso opoꞌni lolone.
1TH 3:10 Gele lemavo lengita vo ge ninge ne ninge lo monoꞌ linge ma mineꞌmo vo neineꞌ nene imineꞌ molo lo-lengemelone lo holisekisi holukakisi vauve elo Oꞌmosola laaꞌ noune.
1TH 3:11 Idoꞌ Meteho Oꞌmoso asiꞌvesi Guvetesi ve Izesukisi voloneꞌ akate velo hulo lengita ivo.
1TH 3:12 Guvetesi ve lengita gono davo lengikuꞌ lutine ge neme ne geme li mini laꞌlise leliꞌ lute linginela muluneꞌ neꞌmini linginesi aꞌmineꞌmine igi lutine eveneꞌ mukita milikevo buu lo aꞌmine monovo amuzo molo minelive lo Oꞌmosola nolune.
1TH 3:13 Neꞌmine ogo Guvetesi veꞌmo lutine do ngi lo-lengedavo Guvetesi ve Izesuꞌ eze evenele zuho mukikisi ogo hetelelineꞌ gameneuꞌ lingine nene Oꞌmosoꞌmo ningivo lihimetine nomivo lutine laminekisi minilizave.
1TH 4:1 Neze zuho mate, gamazi mo gize lengemekuvoniꞌza ma neineꞌ nene lo-lengemeloze. Gililo. Guvetesi ve Izesuꞌ eiꞌ velemuꞌ ogo gatine do amuzo molo lo-lengedo lingine monokuꞌ igi mili minilizaniꞌ neꞌmo Oꞌmosoꞌmo gilivo lamineꞌ ilineꞌ neꞌmi monovo apize lingimuneꞌ neꞌminevoꞌ igi minilo lo nolo-lingimune. Neꞌmine igi nizaniꞌza gohi amuzo mili minilo lo nolo-lingidune.
1TH 4:2 Lingine gili dalizaniꞌ gamazi Guvetesi ve Izesuꞌ velemuꞌ ogo gozopoꞌ lo-lingimuneꞌ nene mo gili nizave.
1TH 4:3 Oꞌmosoꞌmo neꞌmine igi minilizave lo gelo tiꞌ lo laaꞌ neive: Veneꞌ vemohoꞌ gopoꞌ napaꞌ monaaꞌ nene huli eveneꞌ kekeize ve, ve lisiheꞌ lamineꞌ minilizave lo laaꞌ neive.
1TH 4:4 Lingine hamo hamoꞌ okodine di kekeize li mini eveneꞌ veꞌnidoꞌ lihimetine nomivo minilizave.
1TH 4:5 Eveneꞌ atoꞌ atoꞌ Oꞌmosomuꞌ gilamavete veneꞌ alumuꞌ ngumo helepeleꞌ ivo aꞌminemukovoꞌ gili di monaaꞌ nave. Lingine ingine igaꞌ adiꞌmine amilo.
1TH 4:6 Maliꞌmo neꞌmine ilineꞌ nene ve gonoloho noso molaniꞌ nene avutoꞌ ogo elenahine longoꞌ ogo aꞌmine ve gonolohi initeꞌve do gopo o-dalive. Neꞌmine ilizave nene Guvelesi veꞌmo lihime ngemeleseive lo gomuꞌ ogo lo-lingimuneꞌ ma ve.
1TH 4:7 Oꞌmosoꞌmo lengeleꞌmize molaniꞌ nene veneꞌ vemohoꞌ gopoꞌ napaꞌ monangutiꞌ lutine nene goloduvosi minilingumuꞌ ve livoba lutine nene guluviꞌ lamineꞌ lisiheꞌ minilingumuꞌ ve lo lengeleꞌmize molaniꞌ ve.
1TH 4:8 Nemuꞌ nene aꞌmine gamazi gele hulilive neꞌmo haza eveneliti gamazi gele huluhe lo Oꞌmosoꞌmi gamazi gele huloloseive. Idoꞌ gamaziꞌve gele hulilinguꞌ nene aza Oꞌmoso nesi vasa ize-deleseive. Ee, eze Sikalahuꞌve lamineꞌ lengemaaꞌ ive Oꞌmoso nene vasaꞌ ize-deleseive.
1TH 4:9 Lutinedunuꞌ nasahiliꞌ ge o-nede ne o-gede li minilizave lo Oꞌmosoꞌmo asiꞌve monovoꞌve lengelebizo lo lengeme neineꞌ nenako laza luhuvo niteꞌ gize lengemo lingine Izesuꞌ evenele zuho linge nene lutine ngimilizave lo nanitekumuꞌ lo-lengemelone.
1TH 4:10 Idoꞌ lo-lengeme neineꞌ neꞌmine igi lingine Makedonia misubouꞌ Izesuꞌ evenele zuho miniꞌmi moni nizave mukiꞌ nene lutinedunuꞌ nasahiliꞌ i-ngidi minaaꞌ nave. Neꞌmine igi nizaniꞌza gohi amuzo mili li-ngimi minilo lo gatine do nolo-lingimune.
1TH 4:11 Neꞌmine ogo gamazi tiꞌ lo lo huko lo-lingimuneꞌ: Zou lo mino eveneꞌ maliti gamaziloꞌ nehe nosoꞌ nitetoꞌ nehe gopo domo dize dize ogo monamo leliꞌ initetemukovoꞌ gelo mino laꞌlisete adedunuꞌ gono do minelone li neꞌmine ilisavoꞌ amuzo milalo.
1TH 4:12 Neꞌmine ikevo nemuꞌ eveneꞌ monoꞌ gilamavete gilikevo monovotine lamineꞌ mineleseive. Idoꞌ neꞌmini gono dalizadiꞌmo initeꞌ matatine vaiꞌ lo minavo eveneꞌ mala initekumuꞌ vokuꞌ vokuꞌ ma lilizadoꞌ o minamoloseive.
1TH 4:13 Neze zuho mate, gililo. Monoꞌ gilamavete ingine hilavemuꞌ gopo gaꞌine gili mo hili osuꞌ likeve li gohi ningamolosune li ive nama igaꞌ nave. Ingine neꞌmine igaꞌ naniꞌza linginesi neꞌmine ikelizave lo hilavemuꞌ nene lo-lengemelouze. Gililo.
1TH 4:14 Laza nene Izesuꞌ hilingutiꞌ gohi otineꞌ nene gele eleꞌvoleꞌ o none. Nemuꞌ tiꞌ lo gelelone: Tineꞌ molo alineꞌ gameneuꞌ nene Izesuꞌnimuꞌ gili eleꞌvoleꞌ igi hilave inginesi Oꞌmosoꞌmo ngeleꞌmizo aloseive.
1TH 4:15 Guvetesi lineꞌ gamazi ma lo-lengemelesune: Misubouko vetesi nonive nete Guvetesi ve alineꞌ gameneuꞌ nene hilave ngivileꞌ amolosune.
1TH 4:16 Guvetesi ve Okulumokutiꞌ lemelove lo amuzo molo vise lavo angeloliti guveꞌinesi ve naba neꞌmo nolo molavo Oꞌmosoꞌmi pikuliꞌve neꞌmo nolo molavo lemeleseive. Nolimivo Kilisitoꞌnimuꞌ gili eleꞌvoleꞌ igi minadotiꞌ hilave ingine gomuꞌ mili otilisave.
1TH 4:17 Otikevo evenele zuho lingela laza vetesi minelonive nene Oꞌmosoꞌmo leleꞌmizo dizavo aꞌmidoꞌ imineꞌ molokunivo limuso avileloꞌ Guvelesi vesi makaꞌ do bizelesune. Neꞌmine ogo Guvetesi vesi minevoꞌ minevoꞌ ogo minelesune.
1TH 4:18 Nemuꞌ nene lingine gamazi mene li voleloꞌ meloꞌ igi gili hilavemuꞌ mulumo gilii ma ge do hongu lo-nede ne do hongu lo-gede li minilo.
1TH 5:1 Neze zuho mate, gamene nanikeꞌ ogo vavosa Guvetesi ve alive idoꞌ naniteꞌ naniteꞌ sotoꞌ ogavosa alive. Neꞌmine initekumuꞌ nene nanitekumuꞌ luhuvo niteꞌ gize lengemelone.
1TH 5:2 Langisetine gili nizave. Gumineloꞌ ve holukaꞌ alizave lo gelamuneꞌ gameneloꞌ igi hetelaaꞌ adiꞌmino Guvetesi vesi aꞌmineꞌmine ogo aloseive lo gelamoloneꞌ gameneloꞌ ogo heteleleseive.
1TH 5:3 Aꞌmine gameneloꞌ eveneꞌ ingine gamene lamineꞌ initeliꞌmo lebelamilineꞌ gamene neive li nizavo ngemengingi initeliꞌmo liteꞌ lo ogo mudise do goloso o-ngedeleseive. Izipe gatuꞌinesi veneꞌ ingine mulumo gililiza gamene gilami gopo nimonavo mulumo inginela sotoꞌ ogavo niniꞌ igaꞌ naniꞌ neꞌmine ogo aꞌmine ngemengingi initeꞌ nene sotoꞌ o-ngemeleseive. Sotoꞌ o-ngemavo nene ngeli golise vilizahe.
1TH 5:4 Neze zuho mate, lingine nene initekumuꞌ ma gilami litiꞌmusouꞌ ma minamave. Nemuꞌ nene gumineloꞌ vemuꞌ eveneꞌ ingine gizebo igi minamilizaniꞌ gameneloꞌ igi hetelaaꞌ aniꞌ neꞌmino linginesi aꞌmine gamenemuꞌ gizebo igi minamadoꞌ ogo do upuhoꞌ o-lengedalive.
1TH 5:5 Lingine mukiꞌ labanaliꞌmi zuho nizave. Litiꞌmusoꞌmi zuho nomune.
1TH 5:6 Nemuꞌ eveneꞌ lingela haza ve ingine luꞌine okise ongo minaaꞌ ineꞌ neꞌmino lute ongamivo lute gate gopo amivo laꞌlisete gizebo eleꞌvoleꞌ ogo minukeleꞌzo.
1TH 5:7 Ingine okise ingaaꞌ nave nene litiꞌmusouꞌ ingaaꞌ nave. Idoꞌ noso nii sipaki igaꞌ nave inginesi nene litiꞌmusouꞌ nii sipaki igaꞌ nave.
1TH 5:8 Labanaꞌ gameneꞌmi evenele nounako sipaki amo lute gate do veveso minelone. Neꞌmine ogo Izesuꞌnimuꞌ gele eleꞌvoleꞌ o noneꞌ idoꞌ lute ngemaaꞌ nouneꞌ neꞌmo lepesete loloꞌ ogavo Oꞌmosoꞌmo do luꞌ izavo lamineꞌ minelone lo lute gilingili ogo minaaꞌ neineꞌ neꞌmo leze lovo angiliꞌ neꞌmine loloꞌ ogavo minelone.
1TH 5:9 Neꞌmi monovo neꞌmino neive: Oꞌmosoꞌmo izeboloꞌ molaniꞌ nene apase-ledo lihime lemelove lo leleꞌmize molaniꞌ nomive. Asi Guvetesi ve Izesuꞌ Kilisitoꞌ do luꞌ izavo minelone lo leleꞌmize molaniꞌ ma neive.
1TH 5:10 Hele noosa nehe vetesi minosa nehe ogavo ezesi minevoꞌ minevoꞌ ogo minelone lo Guvetesi ve lelikumuꞌ ogo hilineꞌ.
1TH 5:11 Nemuꞌ nene lutinedunuꞌ ge hize eleꞌ o-nede ne hize eleꞌ o-gede li lutine di amuzo mili mini monokuꞌ ge do amuzo molo-nede ne do amuzo molo-gede li idise igaꞌ naniꞌ neꞌmine i diivoꞌ vi minilizave.
1TH 5:12 Neze zuho mate, initeꞌ mamuꞌ amuzo molo nolo-lingidune: Guvetesi veꞌmo ngeleꞌmize molavo lengita monoꞌ gono di gizebo i-lingidi mini lengeleꞌmizi hehe li nizavemuꞌ nene gili lamineꞌ igi minilo.
1TH 5:13 Monoꞌ gono daaꞌ nanako engikumuꞌ gilikevo amuzo molo dizavo mini lutine ngimi nasahiliꞌ i-ngidi minilo. Idoꞌ lengiꞌ okodinguꞌ lovo lolize hizami hongu li minilo.
1TH 5:14 Idoꞌ neze zuho mate, gatine do tiꞌ lo nolo-lingidune: Izesuꞌ evenele malite okoꞌine losuvoꞌmi gono dami gopo minaaꞌ naniꞌ nene di hehe li-ngidilo. Idoꞌ golise gelekeleꞌ igi nizave nene di amuzo mili-ngidilo. Idoꞌ Izesuꞌ evenele maliti luꞌine nene eleꞌvoleꞌ amivo ma nene hize eleꞌ i-ngidilo. Neꞌmine igi eveneꞌ mukikumuꞌ eleseꞌ igi hongu li minilo.
1TH 5:15 Eveneꞌ maliꞌmo lengiꞌ muludine do goloso o-lengedavo ma lingine gohi eze o-lididiꞌmine ve li eze muluno di goloso i-damilo. Neꞌmine ikelizaze. Lutine gizebo lamineꞌ igi gamene gamene linginesi eveneꞌ mukikisi do lamineꞌ o-ngedelone li aꞌmine monovolokovoꞌ eleti igi mili minilo.
1TH 5:16 Muludinguꞌ gulumo avile lisivovoꞌ minilo.
1TH 5:17 Goseleꞌ lengebelamivo Oꞌmoso opoꞌni livoꞌ minilo.
1TH 5:18 Neꞌmine manaꞌmine initekumuꞌ Oꞌmoso opoꞌni livoꞌ minilo. Izesuꞌ Kilisitoꞌ evenele zuho nizangumuꞌ nene Oꞌmosoꞌmo neꞌmine igi minilizave lo gele neive.
1TH 5:19 Oꞌmosoꞌmi Sikalahuꞌ nene izi huki-damilo.
1TH 5:20 Neꞌmine ami Oꞌmosoꞌmi veletiꞌ gamazi li-lingimilizaniꞌ nene gilikevo haza niteꞌ amivo.
1TH 5:21 Gamazi mukiꞌ nene lamineꞌ nehe goloso nehe lii izeꞌ mili gili minilo. Lamineꞌ neivo ma gili di minilizave.
1TH 5:22 Idoꞌ goloso niteꞌ atoꞌ atoliꞌmine mukiꞌ nene hulilizave.
1TH 5:23 Oꞌmoso aza hongu meleho asiꞌve lutine do lamineꞌ gehepeve o-lengedo gizebo o-lengedavo vodinesi lengemenisi okodinesi lisiheꞌ ogo lamineꞌ minavo Guvetesi ve Izesuꞌ Kilisitoꞌ alineꞌ gameneuꞌ nene lihimetine nomineꞌ minilizaho.
1TH 5:24 Elese molo lingimive neꞌmo lo huko lineꞌ gamaziꞌveꞌmi gihile do sotoꞌ molalingumuꞌ nene idise aꞌmene luvoniꞌ gamazi neꞌmi gihile nene do sotoꞌ molaloseive.
1TH 5:25 Neze zuho mate, lelikumuꞌ ve li Oꞌmosola li minilo.
1TH 5:26 Izesuꞌ evenele mukiꞌ nene monokuꞌ aꞌmine o neineꞌ monovoloꞌ eꞌmeti aꞌnidoꞌ di ngabutiꞌ izaaꞌ monovo ne igi mili minilo.
1TH 5:27 Naza Guvetesi veꞌmi velemuꞌ ogo amuzo molo tiꞌ lo nolo-lingiduve: Izesuꞌ evenele zuho mukiꞌ gili osuꞌ lilizangisi luhuvo niteꞌ mene gati ngimilo.
1TH 5:28 Guvetesi ve Izesuꞌ Kilisitoꞌ eiꞌ nasahiliꞌve linginela minelive lo Oꞌmosola noluve. Moda ve.
2TH 1:1 Pauloꞌ nazasi Siluvanokisi idoꞌ Timoteokisi laza meteho Oꞌmoso idoꞌ Guvetesi ve Izesuꞌ Kilisitoꞌ eze evenele zuho lingine Tesalonika ebekuꞌ mulise milaaꞌ naniꞌ nene luhuvo niteꞌ mene nogize-lingidunge. Ningilo.
2TH 1:2 Idoꞌ meteho Oꞌmoso idoꞌ Guvelesi ve Izesuꞌ Kilisitoꞌ engitatiꞌ nasahiliꞌ idoꞌ hongu lo lamino minaaꞌ monovo nene lengita mine do vo minivoo.
2TH 1:3 Leze zuho mate, Izesuꞌnimuꞌ gili eleꞌvoleꞌ igaꞌ naniꞌ nene naba ogavo lutine hamo hamoꞌ ge neme ne geme li minaaꞌ naniꞌ nesi naba ogavo nemuꞌ nene Oꞌmoso opoꞌni lolonidoꞌ lisiheꞌ ogavo gamene gamene lengikumuꞌ ve lo opoꞌni laaꞌ noune.
2TH 1:4 Lengiꞌ goboni mili-lingidi mulumo niteꞌ i-lingidiviꞌ i-lingidiviꞌ igi minaaꞌ navo mulumo gili minanguꞌ nene Izesuꞌnimu gili eleꞌvoleꞌ anitine nesi hulami amuzo mili minaaꞌ aniꞌ ve. Neꞌmine aniꞌ ne gelo Oꞌmosoꞌmi evenele zuho mukiꞌ miniꞌmi monada lengikumuꞌ longopoꞌni lo gulivetine do hozi laaꞌ noune.
2TH 1:5 Idoꞌ Oꞌmosoꞌmo gizebo o neinguꞌ vo holalone li lingine aꞌminemuꞌ mulumo geni ha gihiꞌmi vi nizaniꞌ neꞌmo nene aꞌmine Oꞌmosoꞌmo gizebo o neinguꞌ vi hilalizadoꞌ do lisiheꞌ o-lengedelesa neineꞌ neꞌmo nene Oꞌmosoꞌmo do lisiheꞌ ogo izeꞌ molo-ledaaꞌ neineꞌ nene do sotoꞌ ogave.
2TH 1:6 Idoꞌ neꞌmi monovo neꞌmino neive: Guvetesi ve Izesuꞌ aza amuzo malehe angeloꞌvesi Okulumokutiꞌ limi sotoꞌ i limilizaniꞌ gamenela nene Oꞌmosoꞌmo gilivo lisiheꞌ o neivo aza mulumo initeꞌ i-lingidi minaaꞌ nave engiꞌ nene aꞌmineꞌmine ogo mulumo initeꞌ o-ngedeleseive. Idoꞌ goboni mili-lingidikevo mulumo gili minaaꞌ nave linginesi lelikisi nene aꞌmine mulumo niteꞌ do mate-ledo do hongu lo-deleseive.
2TH 1:8 Neꞌmine noogo oloꞌ gulumosi lemo Oꞌmosoꞌmi monovo gilamave nesi Guvetesi ve Izesuꞌ Kilisitoꞌ eiꞌ gamazi lamineꞌ nene gili disaꞌmave nesi lihime ngemeleseive.
2TH 1:9 Ee, ve aꞌneꞌmine ve lihime tiꞌ ogo ngemeleseive: Guvetesi veꞌmi velelotiꞌ ngimisele hulavo vi eze amuzoꞌvesi labanaꞌvesi mo ningami mini golosovoꞌ igi miniviꞌ miniviꞌ ilisave.
2TH 1:10 Oꞌmosoꞌmo lihime neꞌmine ogo nongimivo Izesuꞌ tineꞌ molo alineꞌ gamenela eze evenele zuho di kegesi minaniꞌ ingine eze labanaꞌve ningi di tiꞌ igi ezemuꞌ gili eleꞌvoleꞌ igi minave ingine gamaziꞌinesi nomivo siza li-dilisave. Idoꞌ lingine leliꞌ lo-lingimuneꞌ gamazi nene gili eleꞌvoleꞌ aniꞌ nenako nemuꞌ linginesi aꞌmine evenekisi minilisave.
2TH 1:11 Nemuꞌ nene lengikumuꞌ ve lo gamene gamene Oꞌmosola laaꞌ noune. Igi mili minilizaniꞌ ve lo lengeleꞌmize molaniꞌ monovo nene igi mili minilizadoꞌ aza Oꞌmosoꞌmo do lisiheꞌ o-lengedo amuzo molo hize eleꞌ o-lengedavo neꞌmo lingine Oꞌmosomuꞌ gele eleꞌvoleꞌ o noneꞌ neꞌmi gihile do sotoꞌ olone li initeꞌ lamineꞌ ilisa gilaniꞌ mukiꞌ nene gihile izelive lo nolune.
2TH 1:12 Idoꞌ neꞌmine lo Oꞌmosola laaꞌ nouneꞌ nene nemuꞌ laaꞌ noune: Adoꞌ leliꞌ Oꞌmosote idoꞌ Guvetesi ve Izesuꞌ Kilisitoꞌ ingine aꞌmine laaꞌ nounidoꞌ igi nasahiliꞌ i-lingidikesivo lingine igi mili igi minilizaniꞌ monovotidotiꞌ nene Guvetesi ve Izesuꞌ guliveꞌve di hozi li nizavo aza nene lengiꞌ gulivetinesi do hozi lilingumuꞌ ve lo laaꞌ noune.
2TH 2:1 Leze zuho mate, isetine ve. Guvetesi ve Izesuꞌ Kilisitoꞌ alingumukisi idoꞌ navo ezela vo do nubo oloningumukisi loloze. Gililo.
2TH 2:2 Aꞌmine Guvetesi veꞌmi gamene nene mo ogo vave li eveneꞌ malite laniꞌ ve. Neꞌmine laniꞌ nene soza laniꞌ nenako lingine gili liteꞌ li gatine gili gopo igi muludine dize dize amilo. Ee, aꞌmine gamazi nene Oꞌmosoꞌmi veletiꞌ gamazi ve li lahe idoꞌ monoꞌ gamazi matiꞌ ve li lahe idoꞌ leliꞌ luhuvo niteꞌ huluningutiꞌ ve li lahe nesi nene gatine gili gopo igi muludine dize dize amilo.
2TH 2:3 Soza gamazi neꞌmine manaꞌmine igi li-lingimi di gopo i-lingidikelizaze. Nemuꞌ tiꞌ li gililo: Aꞌmine Guvetesi veꞌmo alineꞌ gamene olihe olosa neivo gomuꞌ nene eveneꞌ Oꞌmosomuꞌ gili huli lovo i imilizaniꞌ monovo nene buu lo sotoꞌ oloseive. Idoꞌ louꞌ gamazi gele hulo avutoꞌ ogaliꞌmi meleho minelive nene adoꞌ vo tolovo gehepeve ilidoꞌ minelive nene sotoꞌ oloseive.
2TH 2:4 Aꞌmine ve nene sotoꞌ ogo eveneꞌ Oꞌmosote ve laniꞌ initeꞌ nilizahe idoꞌ di kekeize li ngopoꞌni lilizaniꞌ initeꞌ nilizahe neꞌmine initeꞌ mukikisi nene lovo o ngemo ngivileꞌ ogo eiꞌ okoꞌno do dizo naꞌniseꞌne ne Oꞌmoso nouve lo Oꞌmosoꞌmi numunguꞌ dizo Oꞌmosoꞌmi moꞌmosiꞌvelokisi mineleseive.
2TH 2:5 Naza lengita mino gamazi neꞌmine lo lo-lengemeꞌ lengemeꞌ ogo minuvoniꞌ ma gatine molahe.
2TH 2:6 Idoꞌ mene gameneloꞌ aꞌmine veꞌmi akaꞌve hize tile-de neive nene gili nizave. Oꞌmosoꞌmo molo-dineꞌ gamenelokovoꞌ sotoꞌ oloseive.
2TH 2:7 Mene gameneuꞌ louꞌ gamazi gele hulo avutoꞌ ogaꞌ suno neꞌmo sunoꞌ gono daaꞌ neineꞌza aka hize tilaaꞌ neive nene Oꞌmosoꞌmo do ngoloꞌ lo-davo sotoꞌ oloseive.
2TH 2:8 Aꞌmine gameneloꞌ nene louꞌ gamazi gele damaaꞌ ive ma sotoꞌ ilineꞌ nene Guvetesi ve Izesuꞌ vele mutive neꞌmo bele heleleseive. Guvetesi ve ogo labanaꞌve do sotoꞌ ogavo neꞌmo do goloso o-deleseive.
2TH 2:9 Aꞌmine louꞌ gamazi gele damaaꞌ ive nene Sataniꞌmo amuzo emavo ogo hetelo apa niteꞌ ogo ato atoꞌ suno do eleꞌvoleꞌ initeꞌ mukiꞌ nene osoꞌ amosoꞌ ogo soza molo do sotoꞌ oloseive.
2TH 2:10 Neꞌmine ogo ato atoꞌ suno goloso do eveneꞌ linge ma labuluvo ilizadoꞌ minave engiꞌ nene goꞌine izo do gopo o-ngedeleseive. Aꞌmine ve nete gamazi gihile laminekumuꞌ ngumo helamivo gili hulaniꞌ nenako Oꞌmosoꞌmo do nguꞌ izamoloseive.
2TH 2:11 Ee, ingine gamazi gihile laminekumuꞌ ngumo helamivo minaniꞌ nenako Oꞌmosoꞌmo asiꞌve lavo gaꞌine gili gopo ilisave. Gili gopo ilizaniꞌ neꞌmo soza gamaziloꞌ nene mudise gili eleꞌvoleꞌ ilisave.
2TH 2:12 Oꞌmosoꞌmo neꞌmine o-ngedelineꞌ nene hazamuꞌ nomive. Gamazi gihile lamineꞌ gili dami monovo golosomuꞌ laniteꞌ gilaaꞌ ave mukiꞌ nene goniꞌ o-ngedo lihime ngemelove lo neꞌmine o-ngedeleseive.
2TH 2:13 Leze zuhokizo, Guvetesi veꞌmo lulo lengeme neineꞌ mate, Oꞌmosoꞌmi Sikalahuꞌve neꞌmo lutine do guluviꞌ lo do lisiheꞌ ogavo gihile lamineꞌ nene gili eleꞌvoleꞌ ikevo do lunguꞌ izelove lo Oꞌmosoꞌmo gamene galaꞌmuda vomine do kegese-lingidingumuꞌ ve lo eze opoꞌni lolonidoꞌ ogavo gamene gamene laaꞌ noune.
2TH 2:14 Idoꞌ Izesuꞌ gamaziꞌve lamineꞌ nene lo-lengemekunivo gilikevo Oꞌmosoꞌmo do lunguꞌ izelove lo lengeleꞌmize molaniꞌ nene Guvetesi ve Izesuꞌ Kilisitoꞌ labanaꞌve di tiꞌ ilizave lo lengeleꞌmize molaniꞌ ma neive.
2TH 2:15 Nemuꞌ nene leze zuhokizo, vetetiꞌ gamazi lo-lingimuneꞌ nehe luhuvo nitekutiꞌ lo-lingimuneꞌ nehe monoꞌ gamazi apize lingimuneꞌ mukiꞌ nene amuzo mili di giliꞌ li di minilo.
2TH 2:16 Asiꞌve Guvetesi ve Izesuꞌ Kilisitoꞌ idoꞌ Meteho Oꞌmoso aza lulo lemo nasahiliꞌ o-ledo lute hize eleꞌ o-ledevoꞌ o-ledevoꞌ ogo mino laza do lamineꞌ ogovoꞌ minelone lo gele eleꞌvoleꞌ olonidoꞌ gate do hamoꞌ o-ledaaꞌ iveꞌmo
2TH 2:17 lutine do giliꞌ lo-lengedo initeꞌ lamineꞌ gihile mukiꞌ ilizadoꞌ nesi gamazi lamineꞌ lilizadokisi idoꞌ gono lamineꞌ dalizadokisi hize eleꞌ o-lengedelive lo nolune.
2TH 3:1 Leze zuho mate, gamazi nene mo gize-lengemekuneꞌza ma neineꞌ nene lo-lengemelonge. Gililo. Guvetesi veꞌmi gamazi lengita ineꞌ neꞌmino buu lo novivo neꞌmi guvele vovoꞌ minelive li lelikumuꞌ ve li Oꞌmosola livoꞌ minilo.
2TH 3:2 Idoꞌ eveneꞌ mukiꞌ nene Izesuꞌnimuꞌ gili eleꞌvoleꞌ isaꞌmanako engiꞌ aꞌninguꞌ okunivo libilikelizanako lingine aꞌmine zogo zogoloꞌ ve eveneꞌ golosoliti aꞌninguꞌ volosa nooloningutiꞌ ipeꞌ ilive li Oꞌmosola livoꞌ minilo.
2TH 3:3 Ee, eveneꞌ ingine gamaziꞌve gili eleꞌvoleꞌ isaꞌmaniꞌza Guvelesi ve neve eiꞌ gamazi lidoꞌ gele daaꞌ neive mino ezeloꞌ gele medelelonidoꞌ lisiheꞌ o neive. Nemuꞌ nene ve goloso neꞌmo lengebelalive lo luhivetine do ngi lo-lengedo alete molo-lengedeleseive.
2TH 3:4 Idoꞌ linginela gono davo lingine lo huko lo-lingimuneꞌ gamazi nene idise gili di mini alingekisi giliꞌmi giliꞌmi dizi minilizave lo Guvelesi vemuꞌ gele eleꞌvoleꞌ o nonako lengikumuꞌ gate setaꞌ gelamune.
2TH 3:5 Guvelesi ve aza lutine eleꞌmize lamineꞌ ogo Oꞌmoso lulo leme neineꞌ neꞌmi monovo gili guni igi aꞌmine monovo di tiꞌ ilizaniꞌ akaloꞌ lengeleꞌmize molalive lo Oꞌmosola nolune.
2TH 3:6 Leze zuhokizo, Guvetesi ve Izesuꞌ Kilisitoꞌ eiꞌ velemuꞌ ogo tiꞌ lo lo huko nolo-lingimune. Izesuꞌ evenele zuho linge ma nete monoꞌ gamazi lo-lingimuneꞌ nene gili huli ha gopo moni gono damaniꞌ nene inginela vi giꞌmizami mini abazaꞌ igi minilo.
2TH 3:7 Laza ogo molo uneꞌ neꞌmine igi lingine leꞌmetilizaniꞌ o neineꞌ nene langisetine gili nizave.
2TH 3:8 Lengita mino nosoꞌ niteꞌ haza gidini ma namune. Ve hamoliꞌmidatikisi nosoꞌ niteꞌ haza ma do no minamune. Linginelatiꞌ initeꞌ ma limilizaniꞌ nene linginela nomivo geni ogalive lo holisekisi holukakisi eleꞌvoleꞌ gono amuzo molo do labusote ilivo okode losuvoꞌmi gono do minuneꞌ ma neive.
2TH 3:9 Monoꞌ gono daaꞌ nounive laza aꞌmine gonolotiꞌ nosoꞌ niteꞌ daloninako lengitatiꞌ haza gidini nunidini nene lisiheꞌ ogo minidineꞌza monovo lamineꞌ do mino aka lengelebizekunivo leꞌmeti mini leliꞌ gono duneꞌ monovo neꞌmine di minilizave lo gono do nosoꞌ nitete do sotoꞌ uneꞌ ma ve.
2TH 3:10 Idoꞌ lengita minuneꞌ gameneuꞌ tiꞌ lo lo huko lo-lengemaaꞌ uneꞌ: Ve maliꞌmo gono dalosa gelamivo ma nosoꞌ niteꞌ malise i-dikevo namilive.
2TH 3:11 Idoꞌ lengitatiꞌ gamazi ma ogavo giluneꞌ neꞌmino ogave: Ve linge ma nete engiꞌ gonoꞌine huli ve maliti gonoꞌninguꞌ gavakavatoꞌ monaaꞌ nave.
2TH 3:12 Eveneꞌ aꞌneꞌmine ve Guvetesi ve Izesuꞌ Kilisitoꞌ eiꞌ velemuꞌ ogo gaꞌine do tiꞌ lo nolo-ngidune: Ingine dalupizi mini engiꞌ gonoꞌnine di engitatikovoꞌ nalizave.
2TH 3:13 Leze zuho mate, lingine goseleꞌ lengebelamivo mini gono lamineꞌ veveso lisiheꞌ o minelineꞌ gono ha di minilo.
2TH 3:14 Idoꞌ luhuvo niteꞌ meuꞌ gamazi gizo nolo-lingimuneꞌ nene ve maliꞌmo gele hulavo ma eze monovo ningi gili asiꞌvevoꞌ mino ovozo helelingumuꞌ ve li huli-di mehedine imilo.
2TH 3:15 Nene biluvaꞌ i-dilizave losa lamuve. Leze zuho ve li gala di di vevesi i-dilo.
2TH 3:16 Guvetesi ve hongu meleho aza gamene gamene neꞌmine manaꞌmine ogo do hongu lo-ledelive lo nolune. Guvetesi ve linginesi mine do dizo minelive.
2TH 3:17 Lingine longopoꞌni noluve. Idoꞌ ve gohi maliꞌmo gizamivo naꞌnise gizuvoniꞌ ve li ningilizave lo neꞌmi gamazi nene Pauloꞌ naza neniꞌ aꞌnedunuꞌ nogizuve. Naza gamene gamene neniꞌ luhuvo tiꞌ ogo gizaaꞌ nouve.
2TH 3:18 Guvetesi ve Izesuꞌ Kilisitoꞌ eiꞌ nasahiliꞌ lingine mukita minelive lo Oꞌmosola noluve. Moda ve.
1TI 1:1 Do luꞌ izaaꞌ ive Oꞌmososi idoꞌ leleꞌmize lamineꞌ ilive ne neive lo gele medele minaaꞌ unive Izesuꞌ Kilisitokisi engiꞌ nene Izesuꞌ Kilisitoꞌ aposolo loloꞌ iline li lasidoꞌ loloꞌ uve neniꞌ Pauloꞌ luhuvo niteꞌ meve nene
1TI 1:2 gaza monokuꞌ neniꞌ gipeꞌne gihile loloꞌ ogo minanive geiꞌ Timoteoꞌni nene nogize-giduve. Neꞌmine ogosa meteho Oꞌmosolatiꞌ idoꞌ Guvetesi ve Izesuꞌ Kilisitodatiꞌ nasahilikisi idoꞌ mulumote ningaaꞌ monovosi idoꞌ hongu lo lamino minaaꞌ monovo nesi nene lehizi-gidikesivo geitoꞌ minivoo losa noluve.
1TI 1:3 Naza gomuꞌ Makedonia misubouko volosa noogo tiꞌ lo lo-gimuvoniꞌ maloꞌ nene eꞌmeto ozo: Adoꞌ Eheso numuno ebekuꞌ hazavoꞌ mino eveneꞌ malite monoꞌ atoliꞌmine ma apizi eveneꞌ li-ngimaaꞌ naniꞌ nene oꞌve lo-ngedosa
1TI 1:4 avoꞌningine di naba i-ngidi guliveꞌine likaꞌ likaꞌ igi laaꞌ naniꞌ gamazi adoꞌ ngeli li pili osuꞌ lamilizadoꞌ o minineꞌ gamazi nehe idoꞌ gihileꞌve nomineꞌ gamazi gaꞌningutiꞌ gili laniꞌ gamazi nehe neꞌmine gamazimuꞌ nene gaꞌine giliviꞌ giliviꞌ amilizaze. Lo-ngedezo. Aꞌmine giliviꞌ giliviꞌ igi minaaꞌ naaniꞌ gamaziꞌmi monovomuꞌ viseꞌ igi gohi li voleloꞌ meloꞌ ikaꞌ ikaꞌ avo neꞌmo nene maduꞌine do lihiteheꞌ o-ngedosa aꞌmine gamazi neꞌmo Oꞌmosoꞌmo lulouꞌ gele neineꞌ akaloꞌ nene ma ngeleꞌmize molosaꞌmive. Asi Oꞌmosoloꞌ gele medele minaaꞌ neꞌmovoꞌ nene aꞌmine akaloꞌ leleꞌmize molaaꞌ neive.
1TI 1:5 Idoꞌ gaza neꞌmine lo-ngedeline noluvoniꞌ nene ingine aꞌmidoꞌ eꞌmetisa luꞌninguꞌ goloso monovosi nomivo mini gaꞌninguꞌ engiꞌ monovoꞌinemuꞌ izeꞌ mili gilikevo laminekovoꞌ minaaꞌ ive mini apa niteꞌ ami Oꞌmosomuꞌ gili eleꞌvoleꞌ gehepeve igi minilizadiꞌmovoꞌ luꞌine ngemaaꞌ monovo nene engita sotoꞌ ogo minelive losa luvoniꞌ ve.
1TI 1:6 Neꞌmine ilizangumuꞌ nene noluvoniꞌza eveneꞌ linge ma nene mo aꞌmine aka lamineꞌ nene huli zovoꞌ izisa gihileꞌve nomineꞌ gamazivoꞌ li voleloꞌ meloꞌ igaꞌ nave.
1TI 1:7 Ingine nene Oꞌmosoꞌmi louꞌ gamazi apizi ngimaaꞌ ave liliꞌ ilisa gilaniꞌza ingine aꞌminemuꞌ laaꞌ naaniꞌ gamaziꞌmi monovo nesi idoꞌ aꞌmine liviꞌ kiseliviꞌ igi laniꞌ initeliti monovo nesi nene mo ma gili hehe lisaꞌmave.
1TI 1:8 Oꞌmosoꞌmi louꞌ gamazi nene laza ladeni amo gonoꞌveloꞌ gehepeve do molo oloneꞌ nene mo initeꞌ lamineꞌ gehepeve mineleseive.
1TI 1:9 Ee, aꞌmine louꞌ gamazi neve nene eveneꞌ lisiheꞌ i minavemuꞌ nomive. Asi eveneꞌ ma louꞌ gamaziloꞌ eꞌmetamaaꞌ ave gizengizeloꞌ ve nizahe idoꞌ Oꞌmosomuꞌ ngehelele izamaaꞌ ive lihimeloꞌ ve nizahe nemukisi idoꞌ monovo lisiheꞌ laminetoꞌ eꞌmetami monoꞌine nomineꞌ minave nizahe idoꞌ meꞌningine izeꞌningine ngibili hilaaꞌ idoꞌ eveneꞌ ngibili hulaaꞌ ave nizahe nemukisi idoꞌ
1TI 1:10 veneꞌ vemohoꞌ gipe alu gopo ingiꞌmi monaaꞌ ave nizahe veneꞌ vemohoꞌ ingaaꞌ aniꞌ avazahaloꞌ eꞌmeti ingami veneꞌ angiseꞌine ingaaꞌ avo vemohoꞌ angiseꞌine ingavo igaꞌ ave nizahe nemukisi idoꞌ eveneꞌ gumine di halekiki moni daaꞌ ave nizahe idoꞌ sozaloꞌ ve nizahe idoꞌ soza gamazimuꞌ lamineꞌ nolune li aꞌine dizaaꞌ ave nizahe nemukisi idoꞌ monovo gohi eveneꞌ ngeleꞌmize lamineꞌ ilineꞌ monotoꞌ vo damaaꞌ ineꞌ maloꞌ eꞌmetaaꞌ ave nizahe neꞌmine alevemuꞌ nene louꞌ gamazi ne neive lo gele minosa Oꞌmosoꞌmi louꞌ gamazi nene gonoꞌveloꞌ gehepeve do molo oloneꞌ nene aꞌmine louꞌ nene initeꞌ lamineꞌ gehepeve mineleseive.
1TI 1:11 Aꞌmine neꞌmine noluvoniꞌ gamazi mene laminekuꞌ minive Oꞌmosolatiꞌ guvelesi gamazi laminetoꞌ nene vo miliseꞌ o neive. Aꞌmine nene Oꞌmosoꞌmo lo soto sotoꞌ ogo lo-ngemeline lo lehize-nede neineꞌ gamazi lamineꞌ mamuꞌ nene noluve.
1TI 1:12 Aꞌmine gono dalongumuꞌ amuzo nimive Guvetesi ve Izesuꞌ Kilisitoꞌnimuꞌ nene isaaꞌ neve lo opoꞌni noluve. Ee, naza gomuꞌ eze nene dovo ledevoꞌ ogo mino evenele goboni molo-ngedo do goloso o-ngedaaꞌ uvoniꞌza naza eze monovo gele guno amuvodiꞌmo ezemuꞌ gele eleꞌvoleꞌ amo neꞌmine ogaꞌ uvonako nemuꞌ nene iseꞌne izosa nenikumuꞌ aꞌmine gonoꞌve nene ha dalidoꞌ o neive lo gele medele mino aꞌmine gonoloꞌ nene neleꞌmize molaave.
1TI 1:14 Neꞌmine o-nedoo Guvetesi ve aza vauve goloso elo nasahiliꞌ o-nedosa naza eiꞌ Izesuꞌ Kilisitoꞌnimuꞌ gele eleꞌvoleꞌ o mino luꞌne emelodoꞌ neleꞌmize molangumuꞌ nene opoꞌni lo isaaꞌ neve noluve.
1TI 1:15 Ee, Izesuꞌ Kilisitoꞌ aza lihimeloꞌ ve do nguꞌ izelove lo me misubouꞌ limive gamazi nene mo gihile lamineꞌ neive. Eveneꞌ mukiꞌ aꞌminemuꞌ gele muꞌmusiꞌ o minelonidoꞌ nene lisiheꞌ o neive. Idoꞌ lihimeloꞌ ve engikutiꞌ neniꞌ neve nene lihimeloꞌ ve naba minuve ne nouve.
1TI 1:16 Nouvoniꞌza Izesuꞌ Kilisitoꞌ iseꞌne izineꞌ nene aza mo mulumote gelo geto lihime lemamo isete izeꞌmo ogo minaaꞌ neineꞌ monovoꞌve nene nenitoꞌ ganaꞌ do sotoꞌ ogo ngelebizavo alingeꞌ ezemuꞌ gili eleꞌvoleꞌ igisa minevoꞌ minevoꞌ ngemeni dameni dalizave ningilizangumuꞌ nene aꞌmine monovoꞌveꞌmi avazaha pikisa neꞌmine neniꞌ nene minelongumuꞌ ve losa iseꞌne izineꞌ ma neive.
1TI 1:17 Ogo vokaꞌ vokaꞌ ilineꞌ gamene mukitoꞌ Guvelesi ve naba minive helamaaꞌ ive adoꞌ evenelite ha ningelonidoꞌ amive Oꞌmoso hamoꞌ minive nene do hozi lo opoꞌni lo minevoꞌ minevoꞌ ogo mineloneꞌ nene okuꞌ lamilihoo. Neꞌmine ilihoo.
1TI 1:18 Gipeꞌne Timoteoo, aꞌmine gono gamazi mene nolo-giduvoniꞌ nene geiꞌ monovoka do sotoꞌ ogo Oꞌmosoꞌmi veletiꞌ gamazi ma gozopoꞌ sotoꞌ ineꞌ mamuꞌ nene gele mino nolo-giduve. Idoꞌ gaza aꞌmine gamaziloꞌ mene noeꞌmeto monoliꞌmi lovo laminekuꞌ nene lovo hizeline losa nolo-giduze.
1TI 1:19 Neꞌmine ogo monoꞌ gihilemuꞌ nene gele eleꞌvoleꞌ o mino madungauꞌ nene monovo lisiheꞌ lamineꞌ neive lo gele nanidoꞌ gehepeve eꞌmeto mineline losa nene nolo-giduve. Monoꞌ aleve linge ma nete monovo goloso neive li gilaaꞌ naniꞌ maduꞌine nene gili hulii monoꞌ engitoꞌ minineꞌ nene di gopo igisa mo goloso akaloꞌ nivave.
1TI 1:20 Aꞌmine aleve engikutiꞌ nene Himenaioꞌ ve Alekisadeloꞌ ve engiꞌ nene nizasive. Aꞌmine ve sitaꞌ nene naza Oꞌmoso divi lediviꞌ igaꞌ asineꞌ nene ningi gilisa gohi neꞌmine amilisingumuꞌ nene ningi gililisive losa do hulo heta o-ngedo Sataniꞌmi anauꞌ molo-ngedekuve.
1TI 2:1 Idoꞌ naza gamazi gaka do lolonguꞌ mene ganaꞌ neve nene tiꞌ lo nolo-gimuve: Lingine nene Oꞌmosolavoꞌ laaꞌ ilo. Idoꞌ lengita initeꞌ ma viseꞌ igi ma nemukisi nene Oꞌmosola laaꞌ ilo. Idoꞌ eveneꞌ ato atoꞌ mukiꞌ nene hize eleꞌ o-ngedelive li Oꞌmosola laaꞌ ilo. Neꞌmine ilizanguꞌ nene isaaꞌ neve li-di opoꞌni laaꞌ ilo.
1TI 2:2 Ee, laza monokuꞌ minineꞌ monovoloꞌ eꞌmete osuꞌ lo Oꞌmososi evenekisi monovo lisihekovoꞌ o-ngedo mino goboni mili-lidamavo hongu lo laminovoꞌ mineloningumuꞌ nene guveꞌinesi ve nabamukisi idoꞌ gizebo i-lidaaꞌ gono daaꞌ ave mukikumukisi nene Oꞌmosoꞌmo hize eleꞌ o-ngedelive lo ezela laaꞌ olone.
1TI 2:3 Neꞌmine ogaꞌ oloneꞌ nene do luꞌ izaaꞌ ive Oꞌmosoꞌmo ningivo lamineꞌ ogavo mulunouꞌ lamineꞌ oloseive.
1TI 2:4 Aza nene eveneꞌ mukiꞌ lukuvo nalizaho idoꞌ monoꞌ gamazi gihile nene goꞌzi vaiꞌ lilizaho losavoꞌ gele minaaꞌ neive.
1TI 2:5 Naza Oꞌmosoꞌmo eveneꞌ mukikumuꞌ lukuvo nalizaho lo gala gele minaaꞌ neingumuꞌ Oꞌmosola aꞌmine alevemuꞌ laaꞌ ilizave noluvoniꞌ nene Oꞌmoso ne mo hamokovoꞌ neivosa idoꞌ Oꞌmososi evenekisi goholusoꞌ mino kuku holo-ledo do hamoꞌ o-ledaaꞌ ive nesi nene hamokovoꞌ neivosa noluve. Aꞌmine kuku holo-ledaaꞌ ive nene eveneꞌ minive Izesuꞌ Kilisitoꞌ
1TI 2:6 adoꞌ eveneꞌ mukiꞌ kuluhize-ledelingumuꞌ meniꞌve eiꞌ okoꞌno hulo hilive nemuꞌ nene noluve. Neꞌmine ineꞌ nene Oꞌmosoꞌmo eveneꞌ mukiꞌ lukuvo nalizahoo lo gala gele minineꞌ nene gameneꞌveloꞌ lisiheꞌ ogo lelebizavo mo ningo gele none.
1TI 2:7 Aꞌmine gamazi nene lo soto sotoꞌ ilinive aposolo loloꞌ iline lo Oꞌmosoꞌmo neleꞌmize molaniꞌ ve. Naza neꞌmine noluvoniꞌ nene mo sozasi lamuvoniꞌza mo laminetoꞌ gehepeve noluve. Aza nene eveneꞌ heta atoꞌ ve gamazi gihile lamineꞌ apize ngeme ngemeꞌ ogaꞌ anive loloꞌ ogo nanivo ingine gili eleꞌvoleꞌ ilizave losa neleꞌmize molaniꞌ ve.
1TI 2:8 Nemuꞌ nene monoꞌ mulise numudoꞌ namadoꞌ miniꞌmi monanguꞌ vemohoꞌ ingine Oꞌmosola nene laaꞌ ilizave losa noluve. Aꞌmine Oꞌmosola lilisa aꞌine di hozi lilizaniꞌ nene lihimeꞌine nomineꞌ mini ngizeboloꞌ nomivo engikuꞌ lovo lolize neꞌminesi nomivo minisa nene Oꞌmosola lilisave.
1TI 2:9 Idoꞌ aꞌmineꞌmine ogo venelite eꞌmetilizaniꞌ monovomuꞌ lo-gemelove: Veneꞌ neve nene evenelite ma ningilizahe ningamilizahe li maduꞌine zopovo nalava izi di maꞌmine maꞌmine igi okoꞌnidoꞌ niteꞌ meniꞌve dizo minineꞌ initeꞌ ngilisa gonolise initeꞌ ato atoꞌ meniꞌve dizo minineꞌ ngaluluꞌ nehe ngolidunuꞌ liliꞌ aniꞌ initeꞌ nehe nevoꞌmine initeꞌ ngilami ha eveneꞌ do upuhoꞌ o-ngedamilineꞌ initeꞌ laminekovoꞌ ngilaaꞌ ilizaniꞌ nene lamineꞌ ve.
1TI 2:10 Adoꞌ Oꞌmoso opoꞌni laaꞌ noune laaꞌ aniꞌ venelite igi mili ilizadoꞌ lisiheꞌ o minineꞌ monovo laminetoꞌ eꞌmeti igi mili minilizaniꞌ neꞌmo neve nene engiꞌ okoꞌnidoꞌ gonolise neꞌmine nene mineleseive.
1TI 2:11 Veneꞌ neve nene gelekeleꞌ gehepeve igi mini eleseꞌ iki mini gamazi nene di maduꞌninguꞌ milikaꞌ milikaꞌ igivoꞌ minaaꞌ ilizave.
1TI 2:12 Veneꞌ neve nene vemohoꞌ gamazi apize ngemaaꞌ nehe vemohoꞌ ngivileꞌ o mino gizebo o-ngedaaꞌ nehe neꞌmine ilizangumuꞌ nene gele ngemamo oꞌove noluze. Veneꞌ ingine eleseꞌ ikiivoꞌ minilizave.
1TI 2:13 Nene Nanitekumuꞌ ve. Oꞌmosoꞌmo ganaꞌ nene Evaꞌni loloꞌ amo Adamuꞌni nene gomuꞌ loloꞌ ineꞌ ve.
1TI 2:14 Idoꞌ Sataniꞌmo za gihilemuꞌ golo izavo gele ladeni ive nene Adamuꞌ nevoba asi Evaꞌ gele ladeni ogosa Sataniꞌmi gamaziloꞌ gele do Oꞌmosoꞌmo lineꞌ gamazi avutoꞌ ineꞌ ve. Nemuꞌ veneꞌ neve nene vemohoꞌ ngivileꞌ ami eleseꞌ igivoꞌ minilizave losa noluve.
1TI 2:15 Ne neiha veneꞌ ingine Guvelesi vemuꞌ gele muꞌmusiꞌ i mini luꞌine ngemaaꞌ monovoloꞌ eꞌmeti mini idoꞌ lihime monovomuꞌ olovoꞌ i mini veneꞌ lamineꞌ gehepeve gili mini nizavo izipe gidaaꞌ ilizanguꞌ nene lukuvo ngemeleseive.
1TI 3:1 Ve ma aza gizebo ve loloꞌ olosa ive nene mo gono gihile lamineꞌ maloꞌ nene lulo nomolave li evenelite laaꞌ naniꞌ nene mo lamineꞌ laaꞌ nave.
1TI 3:2 Aꞌmine gono nene gono lamineꞌ nenako aꞌmine gizebo ve loloꞌ ilive nene eveneliti veꞌnidoꞌ nene monovo golosoꞌvesi minamaaꞌ ilive minoo veneꞌ hamoꞌ do minive mino getipe ve minamo monovo goloso ogalove lo monovoꞌveloꞌ gizebo ogo initeꞌ ogo molo ilineꞌ nene mo lisihekovoꞌ ilive mino venenga ve ngeleꞌmize lamineꞌ ogaꞌ ive mino eveneꞌ gamazi apize ngemaaꞌ ilidoꞌ o minelive mineleseive.
1TI 3:3 Noso geli geli ogo naaꞌ ive minamilive. Idoꞌ evenekumuꞌ izeboloꞌ malaꞌ malaꞌ ogaꞌ ive minamo asi hongu lo-ngemo lamineꞌ minaaꞌ ive lovo lolize amaaꞌ ilive minelive. Idoꞌ aꞌmine monoꞌ muliseloꞌ gizebo o-ngedaaꞌ ilive nene monimuꞌ lulo molaaꞌ ilive minamilive.
1TI 3:4 Aꞌmine ve nene eiꞌ veneꞌ izipahala zuholoꞌ gizebo lamineꞌ ogo ngeleꞌmize akaloꞌ ogaꞌ neivo aꞌmine izipahala ingine meꞌnibinemuꞌ gilavo dizavosa peleseveꞌ izami gamaziꞌveloꞌ gili daaꞌ ave minelive.
1TI 3:5 Neꞌmine noluvoniꞌ nene eze zuho gizebo ogo ngeleꞌmize akaloꞌ o-ngedaaꞌ monovo gele vevesamilineꞌ nene Oꞌmosoꞌmi muliseloꞌ gizebo ogaꞌ gono dalidoꞌ nene ngelo lisiheꞌ o minelihe. Mo kekeꞌ lisiheꞌ o minamoloseinako nemuꞌ nene noluve.
1TI 3:6 Aꞌmine monoꞌ muliseloꞌ gizebo ve nene monokuꞌ olihe lodive amive eveneꞌ gosohoꞌ neꞌmine eleꞌmizi milalizaniꞌ nene neꞌmine i-nidikeve loo okoꞌno do dizavo Oꞌmosoꞌmo Satani lihime molo-do mulumo gono emelesa neineꞌ neꞌmine ogo lihime molo-do mulumo gono emaalinako olihe monokuꞌ lodive amive eveneꞌ gosohoꞌ nene monoꞌ gizebo ve liliꞌ i-damilizave.
1TI 3:7 Idoꞌ Izesuꞌ evenele minamave nete ezemuꞌ gamangi mili-daaꞌ avevoꞌ nene monoꞌ gizebo ve liliꞌ i-dilizave. Monoꞌ gizebo ve nene neꞌmine ve minamilineꞌ nene eveneꞌ malite monovo goloso ogave li elemikevo Sataniꞌmo emenguꞌ molo ivileꞌ ogavo lihime daalive losa noluve.
1TI 3:8 Idoꞌ monoꞌ muliseloꞌ medeli mini ato atoꞌ gono adoꞌ gohoꞌ gahaliꞌ nasahiliꞌ i-ngidaaꞌ gono nevoꞌmidoꞌ gizebo ve nete nene aꞌmineꞌmine igi monoꞌ muliseloꞌ gizebo ve neꞌminisa mini evenelite gamangi mili-ngidilizadoꞌ i minave mini eveneꞌ goꞌine izaaꞌ ave minami noso geli geli igi naaꞌ ave minami monovo goloso igi moni heneni vaiꞌ dalisa gilaaꞌ ave minami
1TI 3:9 monoliꞌmi sunoꞌ gamazi Oꞌmosoꞌmo do sotoꞌ o-lede neineꞌ nene di mini monoꞌ gili nizadoꞌ nene ha eꞌmetivoꞌ minisa engiꞌ luꞌninguꞌ monovo goloso minivo ningisaꞌmave minilizave.
1TI 3:10 Idoꞌ aꞌmine ato atoꞌ gonoloꞌ gizebo ve liliꞌ i-ngidilizave nene gomuꞌ engiꞌ monovomuꞌ izeꞌ mili-ngidi ningavo engita aꞌmine eꞌmetamilizave luvoniꞌ initekutiꞌ nene ma nomivo minilizanikovoꞌ nene aꞌmine gonoloꞌ dalizangumuꞌ di oti-ngidilizave.
1TI 3:11 Idoꞌ engikisi bizi minaniꞌ veneꞌ neve nene evenelite gamangi mili-ngidilizadoꞌ lisiheꞌ i minaniꞌ veneꞌ minii divi lediviꞌ gamazi li-ngidisaꞌmaniꞌ veneꞌ mini negi hizami monovoꞌnidoꞌ gizebo lamineꞌ igi mini neꞌmine manaꞌmine gono dalizaniꞌ nene monovo lisihetokovoꞌ eꞌmetisa di minilizaniꞌ veneꞌ minilizave.
1TI 3:12 Idoꞌ aꞌmine ato atoꞌ gonoloꞌ gizebo ve liliꞌ i-ngidilizave nene veneꞌ hamoꞌ di minisa engiꞌ izipahaꞌnidokisi engiꞌ numuꞌninguꞌ ingaaꞌ avelokisi nene gizebo lamineꞌ i-ngidi ngeleꞌmize akaloꞌ igaꞌ ave minilizave.
1TI 3:13 Neꞌmine noluvoniꞌ nene nanitekumuꞌ ve. Aꞌmine gonoꞌine nene laminisa ma di minilizaniꞌ nene eveneꞌ gilavo dizi minisa Izesuꞌ Kilisitodoꞌ giꞌmizo mino gelaaꞌ nouneꞌ monokumuꞌ nene ngehelele izamivo livi kiseliviꞌ ilisanako nemuꞌ nene noluve.
1TI 3:14 Naza geiꞌ nanida nene liteꞌ lo alohe lo gele nouha liteꞌ lo amuvo ma nene gaza ladani amo Oꞌmosoꞌmi evenele zuhoutiꞌ alevelite igi mili ilizaniꞌ monovomuꞌ nene gaza gele mineline losa gamazi mene nogize-giduve. Aꞌmine Oꞌmosoꞌmi evenele zuhomuꞌ luvoniꞌ nene minevoꞌ minevoꞌ ogaꞌ neineꞌ Oꞌmosola giꞌmizunive leliꞌ mulisemuꞌ nene luve. Langise neꞌmo numuno hize eleꞌ ogo do minaaꞌ neineꞌ neꞌmino gamazi gihile hize eleꞌ ogo do minaaꞌ neineꞌ nene leliꞌ Oꞌmosoꞌmi evenele mulise neve nene none.
1TI 3:16 Idoꞌ sunoꞌ gamazi leliꞌ monoteuꞌ sotoꞌ ogo minineꞌ nene gamazi naba neive lo lo sotoꞌ ogaꞌ nouneꞌ nene adoꞌ Kilisitoꞌ eiꞌ nene leliꞌ okode neꞌmine do otuho sotoꞌ ogo minavoo eiꞌ monovoꞌve nene mo lisiheꞌ o neive lo Sikalahuliꞌmo do sotoꞌ ogo lelebizavosa angeloꞌ ma netesi nene ningikevo eveneꞌ zuho ato atotidasi gamaziꞌve nene li sotoꞌ igi li-ngimikevo me misubouko aleve linge netesi nene ezemuꞌ gili eleꞌvoleꞌ aniꞌ ve. Idoꞌ eze nene Oꞌmosoꞌmo Okulumoꞌ ebeꞌ laminekuko eleꞌmizo dizineꞌ ve.
1TI 4:1 Ne neiha Oꞌmosoꞌmi Sikalahuꞌ neꞌmo tiꞌ lo lo sotoꞌ ogo lo-leme neineꞌ ma neive: Alingeꞌ nela nene eveneꞌ ma ingine monoꞌ gihile di mini minilizangutiꞌ nene hulisa goꞌine izaaꞌ naniꞌ sikalahuta nene vi giꞌmizi sikalahuꞌ golosolatiꞌ minineꞌ monoꞌ gamazi apizi ngimaaꞌ naadoꞌ nene eꞌmetilisave.
1TI 4:2 Neꞌmine monoꞌ goloso di sotoꞌ nave nete okoꞌine losuvolotiꞌ nene eveneꞌ lamineꞌ gili minii sozaloꞌ ve monovo goloso lamineꞌ izeꞌ mili ningi di kegesaaꞌ aniꞌ maduꞌine di goloso ikeniꞌ mini
1TI 4:3 veneꞌ daaꞌ veloꞌ vaaꞌ nene amilizave li idoꞌ Oꞌmoso ezemuꞌ gili eleꞌvoleꞌ igi gamazi gihile gili minave Oꞌmosoꞌmo eiꞌ isaaꞌ neve li-di di nalizave lo nosoꞌ niteꞌ do sotoꞌ ineꞌ linge ma nene malise ilizave li-ngidaaꞌ nave.
1TI 4:4 Idoꞌ naza Oꞌmoso isaaꞌ neve li-di dalizave noluvoniꞌ nene Oꞌmosoꞌmo do sotoꞌ ineꞌ initeꞌ mataꞌ nene laminekovoꞌ neineꞌ nenako aꞌmine mukikumuꞌ nene Oꞌmoso isaaꞌ neve lo-dosa hamokumukisi nene oꞌove lamo mo daakovoꞌ oloneꞌ o neineꞌ nenako nemuꞌ nene luve.
1TI 4:5 Idoꞌ naza di naakovoꞌ ilisave noluvoniꞌ nene nanitekumuꞌ ve. Oꞌmosoꞌmo lineꞌ gamazi neꞌmosi idoꞌ laza isaaꞌ neve lo Oꞌmosola luneꞌ neꞌmosi aꞌmine nosoꞌ niteꞌ nene do lamineꞌ ogaꞌ neinako nemuꞌ nene luve.
1TI 4:6 Gaza lo-giduvoniꞌ gamazi mene leze zuho Izesuꞌ evenele lo-ngedelineꞌ nene monoꞌ gamazi lamineꞌ apize gimunidoꞌ eꞌmeto minaineꞌ neꞌmo nene lukaꞌmi nosoꞌ niteꞌ loloꞌ ogo hize eleꞌ o-gidivo mino mo Izesuꞌ Kilisitoꞌ gonoloꞌ ve gihile lamineꞌ nene minelesane.
1TI 4:7 Monokuꞌ vo damineꞌ gamazi heluno neꞌmine gihileꞌve nomineꞌ getipe gamazi laaꞌ naniꞌ nene mehenga emaaꞌ ozo. Neꞌmine ogaꞌ noogosa monotoꞌ monovo do hehe lovoꞌ ogo molo iliningumuꞌ nene eleꞌvoleꞌ ogo aꞌmineꞌmi gonoꞌve do ningeꞌ ningeꞌ ogo dokaꞌ dokaꞌ oꞌmo vo minezo.
1TI 4:8 Neꞌmine noluvoniꞌ nene nemuꞌ noluve. Laza okode amuzo molo eleꞌvoleꞌ ogo minelive lo neꞌmi gonoꞌve dokaꞌ dokaꞌ oꞌmo vo eksesais ogo minaaꞌ nouneꞌ neꞌmo nene ngomo hize eleꞌ o-ledaaꞌ neive. Neꞌmine ogaꞌ neiha monotoꞌ monovo do hehe lovoꞌ ogo amuzo molo ogo molo ogaꞌ neꞌmo nene idise minevoꞌ alevoꞌ ogo nounidaa mene hize eleꞌ o-ledelidoꞌ o neivosa idoꞌ alingeꞌ Okulumokuko minevoꞌ minevoꞌ ogo minelonidaasi nene hize eleꞌ o-ledelidoꞌ o neive. Nemuꞌ nene okode losuvomuꞌ oloneꞌ initeꞌ nene ivileꞌ ivosa aꞌmine monotoꞌ monovo do hehe lovoꞌ ogaꞌ neꞌmo nene mudise hize eleꞌ gehepeve o-ledaaꞌ neineꞌ nenako nemuꞌ nene noluve.
1TI 4:9 Idoꞌ gamazi meve nene gihile lamineꞌ neineꞌ nenako mo mudise gele dalonidoꞌ nene lisiheꞌ o neive.
1TI 4:10 Nemuꞌ nene minevoꞌ minevoꞌ ogaꞌ neineꞌ Oꞌmoso aza eveneꞌ mukiꞌ do nguꞌ izaatoꞌ minidotiꞌ nene adoꞌ leliꞌ Kilisitoꞌnimuꞌ gele eleꞌvoleꞌ ogaꞌ nounive nene do luꞌ izaaꞌ ive gehepeve ne neive losa ezemuꞌ gele muꞌmusiꞌ ogo noneꞌ nenako aꞌnemuꞌ nene zegeꞌ zegeꞌ goloso ogosa mulumo gono neꞌmine do do dizo minaaꞌ noune.
1TI 4:11 Aꞌmine lo-giduvoniꞌ gamazi mukiꞌ mene lo sotoꞌ ogo apize ngemezo.
1TI 4:12 Idoꞌ gaza ve gosoꞌve ve li geikumuꞌ gilikevo lemo minaaline. Nemuꞌ nene Kilisitoꞌnimuꞌ gili eleꞌvoleꞌ igi minave nene geiꞌ monovokaloꞌ eꞌmetilizadoꞌ lisiheꞌ ilidoꞌ ogo molo ozo. Gaza gamazi lilininguꞌ nolihe neꞌmine manaꞌmine initeꞌ ilininguꞌ nolihe eveneꞌ lute ngemaaꞌ monovolokisi idoꞌ Guvelesi vemuꞌ gele eleꞌvoleꞌ ogaꞌ monovolokisi idoꞌ monovo goloso hamokisi ogo molo amo minaaꞌ monovolokisi nene gaza lamino eꞌmeto nanivo neꞌmo nene ingine aꞌmidoꞌ eꞌmeti igi mili ilizaniꞌ akaꞌine nene ngelebizelive.
1TI 4:13 Naza geiꞌ nanida olihe amuvo nanidoꞌ nene monoꞌ godolouꞌ gamazi nene gate ngemaaꞌ idoꞌ luꞌine do oto gaꞌine daaꞌ gamazi lo-ngemaaꞌ idoꞌ monoꞌ monovo apize ngemaaꞌ gono neꞌmidoꞌ nene luka amuzo molo molo minoosa do do vo minezo.
1TI 4:14 Idoꞌ Oꞌmosoꞌmi veletiꞌ gamazi geikumuꞌ lineꞌ nene nilavo idoꞌ monoꞌ gizebo ve nene gonouꞌ geleꞌmizi mili aꞌnine godokaloꞌ nimilavo gonouꞌ amuzo Oꞌmosoꞌmo lehize-gidineꞌ nesi nene damanivo haza minaalive.
1TI 4:15 Monoꞌ gonoka do lamineꞌ oꞌmo novaineꞌ nene eveneꞌ mukiꞌ ningilizangumuꞌ ve lo aꞌmine lo-giduvoniꞌ initetoꞌ mene luka molo mino aꞌmine neꞌmine monovo ogatokovoꞌ nene minezo.
1TI 4:16 Geiꞌ monovokalokisi idoꞌ eveneꞌ apize ngeme ngemeꞌ ilineꞌ gamazilokisi nene ninge lamineꞌ gehepeve o minezo. Gaza aꞌmine gamaziloꞌ nene mo giꞌmize giliꞌ lo minelineꞌ neꞌmo nene gasika lukuvo nalinidoꞌ geleꞌmize molosa geiꞌ gamazika gililizavesi nene lukuvo nalizadoꞌ ngeleꞌmize molalosainaze. Aꞌmine gamaziloꞌ nene giꞌmize giliꞌ lo minezo.
1TI 5:1 Gaza vemohoꞌ ozoho neꞌmine nene gamazi amuzonga lo-emamo geiꞌ maho gehepeve gele neivosa gala do gamazi lo-emezo. Idoꞌ izipe gosoꞌve nene nakuna gehepeve neꞌmine gili minavosa gaꞌine do gamazi lo-ngemezo.
1TI 5:2 Idoꞌ veneꞌ ozoho neve nene geiꞌ izamote gehepeve gili nizavo idoꞌ veneꞌ alu neꞌmine nene gaka do zovoꞌ zavaꞌ izalize. Aluna gehepeve gili nizavosa nene gaꞌine do gamazi lo-ngemezo.
1TI 5:3 Veneꞌ gevonoꞌ mamuꞌ ninganivo monoꞌ mulise nete hize eleꞌ i-ngidilizadoꞌ minikeve lo ningelineꞌ nene mo guhalihali gehepeve i minaniꞌ venekumukovoꞌ nene ningelesane.
1TI 5:4 Ne neiha veneꞌ gevonoꞌ maliti izipahaꞌine nehe ngaꞌvopilemoꞌ nehe ma minilizaniꞌ aꞌmine aleve nene initeꞌ atoꞌ ma amisa gomuꞌ ilizaniꞌ initeꞌ naba adoꞌ monoꞌ neꞌmo izeꞌningine meꞌninginemuꞌ neꞌmine monovo ilizave lo neineꞌ nene ningi gili aꞌmidoꞌ eꞌmetiꞌmi vi engiꞌ zuho gehepeve engiꞌ izeꞌningine meꞌningine golo hizi-ngidi nosoꞌ niteꞌ nevoꞌmine ngimi hize eleꞌ i-ngidilizave. Ee, neꞌmine ogakumuꞌ nene Oꞌmosoꞌmo lamineꞌ gelaaꞌ neineꞌ nenako nemuꞌ nene izipahaꞌine ingine aꞌmine izeꞌningine gizebo i-ngidilizave.
1TI 5:5 Veneꞌ gevonoꞌ guhalihali gehepeve ogo minaaꞌ neineꞌ neꞌmo nene Oꞌmosoloꞌ gele muꞌmusiꞌ o mino holukaꞌ nehe holiseꞌ nehe gamene gamene hize eleꞌ o-delingumuꞌ nene Oꞌmosola lo minaaꞌ neive.
1TI 5:6 Neꞌmine ogo minaaꞌ neiha veneꞌ gevonoꞌ ma okoꞌno losuvoꞌmo laniteꞌ gilineꞌ initekumukovoꞌ gelo monaaꞌ ineꞌ veneꞌ nene mo velesi ha noliha luloꞌve nene mo hele osuꞌ lo vineꞌ ne neive.
1TI 5:7 Mene nolo-giduvoniꞌ gamazi nene ma avutoꞌ ikevo evenelite ngelemikelizaze. Aꞌmine lo-giduvoniꞌ gamazi meve nene lo-ngemezo.
1TI 5:8 Ve ma ingine engiꞌ zuho di guni gizebo i-ngidami minilizave mukiꞌ nene monovo goloso igi monoꞌ huli osuꞌ lisa Kilisitoꞌnimuꞌ gili eleꞌvoleꞌ amave nene ngivileꞌ igi lihime daaꞌ ave minilisave. Ne neiha ve ma engiꞌ numuꞌninguꞌ ingaaꞌ ave engiꞌ zuho gehepeve di guni i-ngidami minilizave engiꞌ neve nene engiꞌ zuho gizebo i-ngidamaaꞌ ave linge masi nene ngivileꞌ igi lihime nene naba goloso gehepeve daaꞌ ilisave.
1TI 5:9 Idoꞌ monoꞌ muliselite hize eleꞌ i-ngidilizadoꞌ lisiheꞌ i minaniꞌ veneꞌ gonoliti guliveꞌine gizelo ma nene kilisimasi fifti naeni (59) ivileꞌ o nolineꞌ veneꞌ vanahine hamotoꞌ bizo minineꞌ veneꞌ
1TI 5:10 adoꞌ eveneꞌ hize eleꞌ o-ngedaaꞌ gono lamineꞌ adoꞌ izipe do naba o-ngedaaꞌ ineꞌ nolihe idoꞌ venenga ve aniꞌ nasahiliꞌ o-ngedaaꞌ ineꞌ nolihe idoꞌ eze okoꞌno do lemo mino gelekeleꞌ veneꞌ neꞌmine gelo Oꞌmosoꞌmi evenele hize eleꞌ o-ngedaaꞌ gono daaꞌ ineꞌ nolihe idoꞌ geni initeliꞌmi lulouꞌ minave hize eleꞌ o-ngedaaꞌ ineꞌ nolihe neꞌmine manaꞌmine gono laminetoꞌ eꞌmeto daaꞌ ineꞌ veneꞌ lamineꞌ nolineꞌ neevoꞌ nene guliveꞌine gizezo.
1TI 5:11 Ne neiha veneꞌ gevonoꞌ olihe ozoho milami gosohoꞌ gidini nizaniꞌ neti guliveꞌine nene gizamozo. Nene nanitekumuꞌ ve. Alingeꞌ nene luꞌine Kilisitodokovoꞌ mili minaniꞌ ma nene okoꞌine losuvoꞌmo laniteꞌ gilineꞌ initekumuꞌ otavosa veloꞌ gohi volone li amuzo mili gililizaniꞌ nenako nemuꞌ nene guliveꞌine gizamolosane.
1TI 5:12 Ingine gohi veloꞌ ma vilizaniꞌ nene ganaꞌ luꞌine Kilisitodokovoꞌ molo minelone laniꞌ ma nene avutoꞌ igisa lihime dalisave.
1TI 5:13 Idoꞌ ma nene gono dami haza gopo minaaꞌ monovo ningi ditiꞌ igi mini numuno mukikuꞌ dizaaꞌ limaaꞌ igi moniivoꞌ minaaꞌ nave. Neꞌmine niigisa gamazi lodonga hize eza ema igi gamazi di lulu izi eveneꞌ initekumuꞌ dedeꞌ izi lamilizaniꞌ gamazisi nene liꞌmi monaaꞌ nave.
1TI 5:14 Nemuꞌ nene monoteliꞌmi biluvaꞌ ve nete ngemenga likelizave lo naza veneꞌ gosohoꞌ gevonoꞌ minaniꞌ nene veloꞌ gohi vi izipe gidi mili numuꞌine ebeꞌnidoꞌ nene gizebo igi minilizave losa noluve.
1TI 5:15 Neꞌmine noluvoniꞌ nene nanitekumuꞌ ve. Veneꞌ gevonoꞌ linge nene mo monokutiꞌ limi vi Satani eꞌmeti nivaniꞌ nenako nemuꞌ nene noluve.
1TI 5:16 Idoꞌ Kilisitoꞌ evenele maliꞌmi zuhouꞌ nene veneꞌ gevonoꞌ ma nizavo ma engiꞌ hize eleꞌ o-ngedaaꞌ gono nene monoꞌ mulise gehe-ngedamo asiꞌve nene hize eleꞌ o-ngedo viseꞌ aniꞌ initeꞌ ngemo minelive. Ne nanitekumuꞌ ve. Monoꞌ mulise neꞌmo nene guhalihali igi minaaꞌ naaniꞌ veneꞌ gevonoꞌ nene hize eleꞌ o-ngedaaꞌ neineꞌ nenako hize eleꞌ i-ngidilizaniꞌ initeꞌ viseꞌ ikelizave losa nemuꞌ nene aꞌmine engiꞌ zuho asiꞌve hize eleꞌ o-ngedelive lo noluve.
1TI 5:17 Idoꞌ monoꞌ gizebo ve linge gono lamineꞌ di minaaꞌ nave nene meniꞌnidoꞌ masi imineꞌ mili ngimilizadoꞌ lisiheꞌ o neize. Neꞌmine igi ngimilo. Neꞌmine noluvoniꞌ nene monoꞌ gono lamineꞌ daaꞌ ave mukitoꞌ nene vo do neiha monoꞌ gamazi li sotoꞌ igaꞌ naavelokisi idoꞌ monoꞌ monovo apizi ngimaaꞌ naavelokisi nene vo do gehepeve o neive.
1TI 5:18 Aꞌmine noluvoniꞌ gamazi meemuꞌ neve nene monoꞌ godolouꞌ tiꞌ lo lo neineꞌ ma mo gele noneꞌ ma neive: Bulumakatinelite lengiꞌ viti gihiletine nene lisi di lediꞌ lediꞌ nii-lingidavo ma nene aꞌmingutiꞌ nevo ha nalizadoꞌ o neize. Ma nikelizave li veꞌnidoꞌ nene initeꞌ ma di tili-ngidamilo. Idoꞌ ma neve nene: Gonouꞌ ve ingine gonoꞌnidotiꞌ meniꞌine dalizadoꞌ lisiheꞌ o neineꞌ nenako mo meniꞌine dalisave.
1TI 5:19 Idoꞌ eveneꞌ maliꞌmo monoꞌ gizebo ve mamuꞌ monovo goloso dave lo goniꞌ o-delesa ma nolivo ma nene aꞌmine monovo goloso do nolineꞌ nemuꞌ nene eveneꞌ sitape setohamo he neꞌminete mo neꞌmine ogave li hamoꞌ gamazivoꞌ gehepeve lamavo ma nene alamo goniꞌ o-damolosane.
1TI 5:20 Idoꞌ lihime diꞌmi nave nene eveneꞌ mukiliti veꞌnidoꞌ nene ngelemezo. Ee, eveneꞌ linge nesi nene nemuꞌ golise gili lihime dami hazavoꞌ minilizangisi eveneꞌ mukiliti veꞌnidoꞌ nene ngelemezo.
1TI 5:21 Gaza lo-giduvoniꞌ gamazi mene eꞌmete gehepeve iline losa naza Oꞌmosoꞌmi velelokisi Izesuꞌ Kilisitoꞌ velelokisi idoꞌ Oꞌmosoꞌmo do kegese-ngidineꞌ angeloꞌveti veꞌnidokisi nene nolo-giduze. Goniꞌ gamaziꞌine olihe gele-ngedamo bubu izo mo laminetoꞌ lihime dikeve idoꞌ damave lo mo lamo idoꞌ gonikuꞌ sisitemi nesi nene mo amo goniꞌ neve nene mo monovo lisihetokovoꞌ do molo gele-ngedelesane.
1TI 5:22 Idoꞌ gaza eveneꞌ ma do kegeso monoꞌ gizebo ve loloꞌ o-ngedelo ma nene bubu izo anga godoꞌnidoꞌ hito do kegese-ngedamozo. Gaza bubu izo ingine monovoꞌine golososi ma nolingumuꞌ neꞌmine oganivo engiꞌ lihime nene geita dizalize. Lihimeka nomineꞌ mineliningisi geiꞌ monovokaloꞌ nene gizebo lamineꞌ ogosa minezo.
1TI 5:23 Neꞌmine ogo minelesaineꞌza gaza haza nosovoꞌ nonaineꞌ nene hulo haza nosovoꞌ namo gatungauꞌ initeꞌ geteꞌ geto gize doꞌ gize doꞌ ogaꞌ naineꞌ nene do lamineꞌ o-gedelingisi vaini noso ngomo ha niteꞌ nesi malasini neꞌmino nokaꞌ nokaꞌ olosane.
1TI 5:24 Idoꞌ gaza bubu izamozo noluvoniꞌ nene nanitekumuꞌ luvoba asi eveneꞌ malite monovo goloso di lihime daaꞌ naaniꞌ neꞌmi guvele nene geto buu lo vavosa alingeꞌ gonitoꞌ ngeleꞌmizi milii lihime ngimaaꞌ naaniꞌza ve ma neve nene monovo goloso di lihime daaꞌ naniꞌ neꞌmi lihime geto sotoꞌ amivo mino alingeꞌ sotoꞌ ogaꞌ neive.
1TI 5:25 Idoꞌ aꞌmineꞌmine ogo eveneꞌ malite monovo lamineꞌ igi mili igaꞌ naniꞌ nene mo sotokovoꞌ minaaꞌ neive. Idoꞌ malite monovo lamineꞌ igi mili igaꞌ naniꞌ nene idise sotoꞌ amo nolineꞌ nesi nene ngelo mudise halekamoloseinako nemuꞌ nene bubu izamaaꞌ iline losa nolo-giduve.
1TI 6:1 Eveneꞌ malitesi nene Oꞌmosoꞌmi gulive diꞌmi limi apize lengemaaꞌ nouneꞌ monote nesi nene divi lediviꞌ ikelizaze. Eveneꞌ malite gelekeleꞌ gono gihi-ngidikevo engiꞌ gonouꞌ initeꞌine neꞌmine liliꞌ i minave mukiꞌ ingine aꞌmine gelekeleꞌ gono gihi-ngidaaꞌ avemuꞌ nene gilunivo diziivoꞌ minilizadoꞌ o neive li gili gelekeleꞌ lamineꞌ i-ngidivoꞌ minilisave.
1TI 6:2 Idoꞌ ve ma gono gihi-ngidaaꞌ ave gizebo veꞌine nene gili eleꞌvoleꞌ ave nilizaniꞌ nene engitoꞌ gono daaꞌ ave nete nene aꞌmine gizebo vete nene Izesuꞌ evenele leze zuho neive li gilisa engikumuꞌ gilavo lemavosa gonouꞌ nene alahaꞌ alahaꞌ igi dikelizave. Asi leliꞌ gono dunidiꞌmo hize eleꞌ o-ngidive nene Izesuꞌ evenele leliꞌ zuho lute ngimunive nene nizave lisa gono engitoꞌ dalizaniꞌ nene gohi ma amuzo milisa di mini gelekeleꞌ lamineꞌ gehepeve i-ngidilizave. Mene noluvoniꞌ gamazi nene eꞌmetilizave lo gaꞌine do apize ngemezo.
1TI 6:3 Eveneꞌ malite monoꞌ gihile lamineꞌ Guvetesi ve Izesuꞌ Kilisitoꞌ gamazi monoꞌ monovo lisihetoꞌ leleꞌmize molaaꞌ neidoꞌ nene luꞌine milami gamazi atoꞌ apizi ngimilizaniꞌ nene
1TI 6:4 engiꞌ okoꞌine di dizi otohato ve none li gilaaꞌ naha initeꞌ hamokumukisi ma gili lamineꞌ amavete nene laaꞌ nave. Monoꞌ monovomuꞌ nene gamazidunuꞌ ge hulo ne hulo laakumuꞌ nene naba goloso ngisaaꞌ neineꞌza neꞌmine ogaꞌ neꞌmo nene initeꞌ neꞌmino do sotoꞌ ogaꞌ neive: Mumuzoꞌ ogo goloso gelaaꞌ lovo lolize ogaꞌ idoꞌ dovo ledevoꞌ gamazi laaꞌ hazamuꞌ ngemenga laaꞌ gaꞌine gilaaꞌ
1TI 6:5 eze elemivo eze elemivo laaꞌ neꞌmine monovo nene do sotoꞌ neive. Aꞌmine neꞌmine monovo neꞌmini di sotoꞌ igaꞌ ave neti maduꞌine nene goloso ogavo mini gamazi gihile nene damavo engita nomivo mini initeꞌ gohi gohi daloneꞌ aka nene monoꞌ monovoloꞌ eꞌmetaaꞌ nehe li gilaaꞌ nave.
1TI 6:6 Idoꞌ lamineꞌ initeꞌ gohi gohi daloneꞌ aka nene neineꞌza ingine giladiꞌmine ogo me misubouꞌ initeꞌ nevoba asi laza do noneꞌ initeꞌ nene leliꞌ votigileloꞌ mo vo do neive lo hongu lo lamino minosa monoꞌ monovoloꞌ eꞌmetaaꞌ nouneꞌ neꞌmo luteliꞌmi heneni nene vaiꞌ goloso do sotoꞌ o-ledaaꞌ neive.
1TI 6:7 Neꞌmine noluvoniꞌ nene nanitekumuꞌ ve. Laza izetehi mulunoutiꞌ sotoꞌ uninguꞌ nene initeꞌ hamokisi do amosa me misubo hulo volonidaa nene initeꞌ hamokisi ma do vamolosune.
1TI 6:8 Nemuꞌ nene nosoꞌ nitekisi okodeloꞌ nitekisi do mineloneꞌ nene leliꞌ votigileloꞌ mo vo do neive lo hongu lo lamino minelone.
1TI 6:9 Ne neiha ingine heneni ve loloꞌ olone li gilaaꞌ ave nene Sataniꞌmo ngemenguꞌ molo ngimimiseꞌ ogavo negi hizi do goloso o-ngedaaꞌ neineꞌ initeꞌ mukikumuꞌ nene ma dunivo li gilaaꞌ naniꞌ neꞌmo nene vi Sataniꞌmi gelevusouꞌ bilaaꞌ nave. Ee, eveneꞌ di goloso i-ngidi ngeleꞌmize tolovo igaꞌ naniꞌ initekumuꞌ nene ngumo helavo monokutiꞌ limi ingi goloso igaꞌ nave.
1TI 6:10 Neꞌmine noluvoniꞌ nene lute moniloꞌ molaaꞌ neꞌmo nene neꞌmine manaꞌmine monovo goloso nene do sotoꞌ ogaꞌ neive. Eveneꞌ ma nene moni heneni dalisa gili monoꞌ akalotiꞌ vi gopo igi engiꞌ okoꞌnidoꞌ nene mulumo geni initeꞌ vaiꞌ angiseꞌine di gihaaꞌ nanako nemuꞌ nene noluve.
1TI 6:11 Neꞌmine igaꞌ naniꞌza Oꞌmosoꞌmi gonoloꞌ ve gaza me luvoniꞌ monovo golosolotiꞌ nene golise ogo mehenga emo mene lo-gemeloniꞌ monovo nene imiselo dalosa amuzo molozo. Adoꞌ monovo lisihekovoꞌ ogakisi monoꞌ monovoloꞌ eꞌmetaakisi Guvelesi vemuꞌ gele eleꞌvoleꞌ ogakisi lute ngemaaꞌ monovo nesi idoꞌ geni initeꞌ sotoꞌ ilinguꞌ zegeꞌ zegeꞌ ogakisi hongu monovo eveneꞌ ngelebizo minaakisi nene dalinge. Imiselezo.
1TI 6:12 Eveneꞌ malite meni dalisa ge hulo ne hulo li lotiꞌ izi vaaꞌ naniꞌ neꞌmino gaza monoꞌ lesisi laminekuꞌ nene zegeꞌ zegeꞌ ogo lotiꞌ izo minevoꞌ minevoꞌ gemeni dameni nene do tiꞌ ozo. Adoꞌ neꞌmine iline lo Oꞌmosoꞌmo elese molo-gedavo ogo eveneꞌ mukiliti veꞌnidoꞌ do lamineꞌ ogo Kilisitoꞌnimuꞌ gele eleꞌvoleꞌ ogaꞌ naningumuꞌ nene lo sotoꞌ aineꞌ ma neive.
1TI 6:13 Idoꞌ Oꞌmoso initeꞌ mukiꞌ vetesi minaaꞌ amuzo limiveꞌmi velelokisi idoꞌ ngamani naba Podioꞌ Pilatoꞌ minidaa gamazi gihile lamineꞌ lo sotoꞌ ive Izesuꞌ Kilisitoꞌ velelokisi nene tiꞌ lo nolo-giduze:
1TI 6:14 Gaza monoꞌ gamazi lo-giduvoniꞌ nene eꞌmete gehepeve ozo. Neꞌmino gaza aꞌmine gamazi nene do gopo amanivo eveneꞌ nene ningi aꞌmine gamazimuꞌ nene ningedoꞌ hangedoka lamavo Guvetesi ve Izesuꞌ Kilisitoꞌ sotoꞌ ilidoꞌ nene lihimeka nomineꞌ minelesane lo nolo-giduve.
1TI 6:15 Idoꞌ aꞌmine Guvetesi ve nene Oꞌmoso asiꞌve molaniꞌ gameneloꞌ gehepeve nene do sotoꞌ o-deleseive. Aꞌmine Oꞌmoso nene laminekukovoꞌ minive dizo minineꞌ gizebo ve hamoꞌ minive guveꞌinesi naba mukiliti Guveꞌinesi ve naba minive
1TI 6:16 eiꞌ hamokovoꞌ nene helamaaꞌ ive adoꞌ eveneꞌ hamolitesi ngelo avitasi vamoloneꞌ o minineꞌ labanaliꞌmi lulouꞌ minive eveneꞌ hamolitesi ningamaniꞌ mino mo ngeli ningamilizaniꞌ Oꞌmoso eikumuꞌ nene gilunivo dizo minavo gizebo o-ledelineꞌ amuzoꞌve nene eleꞌvoleꞌ ogo minevoꞌ minevoꞌ ilive. Mo neꞌmino minilihoo.
1TI 6:17 Idoꞌ gaza idise mene gameneloꞌ moni heneni ve nizave nene gaꞌine do lo-ngedezo. Angiseꞌinemuꞌ gilavoo dizi minisa aꞌmine do ngululubize-ledaaꞌ neineꞌ initeꞌ moni heneniloꞌ nene gili muꞌmusiꞌ igi gili medeli minami asi laniteꞌ gili minilizave lo initeꞌ mataꞌ mukiꞌ vauve elo lehize-ledaaꞌ ive Oꞌmoso eikumuꞌ neve nene gili muꞌmusiꞌ igi gili medeli mini
1TI 6:18 gono lamineꞌ di nizavo heneniꞌine nene aꞌmine gono lamineꞌ neꞌmo nene loloꞌ ogavosa aꞌmine nene vauve ili dii mini engita minineꞌ initeꞌ nene inele panala igi eveneꞌ masi nasahiliꞌ i-ngidi minilo lo lo-ngedezo.
1TI 6:19 Neꞌmine ilizaniꞌ nene alingeꞌ gameneuꞌ mine lamineꞌ ilizangumuꞌ hize eleꞌ o-ngedelineꞌ heneniꞌine nene di milisa aꞌmine gameneuꞌ initeꞌ gihile minevoꞌ minevoꞌ ngemeni dameni nene dalizadoꞌ minilisave.
1TI 6:20 Timoteoo, gaza Oꞌmosoꞌmo do-nedeline lo gono gimineꞌ maloꞌ nene gizebo lekeseve ozo. Idoꞌ haza monoꞌ gihile nomineꞌ gamazi eveneꞌ malite laaꞌ naniꞌ nesi idoꞌ soza li gele vevesaaꞌ monovoloꞌ noeꞌmetune li monoꞌ gamazite bili laaꞌ naniꞌ gamazi nesi nene gelamo mehenga emaaꞌ ozo.
1TI 6:21 Neꞌmine ogaꞌ ozo noluvoniꞌ nene eveneꞌ ma nene aꞌmine neꞌmine gamaziloꞌ vi giꞌmizaniꞌ neꞌmo monoꞌ gihilelotiꞌ nene mo zovoꞌ izi vikeve. Oꞌmosoꞌmi nasahiliꞌ nene lengikisi miniliho.
2TI 1:1 Oꞌmosoꞌmo eveneꞌ ma ingine Izesuꞌ Kilisitoda giꞌmizilizadotiꞌ nene minevoꞌ minevoꞌ ngemeni dameni dalisave lo lo huko lingumuꞌ neniꞌ nene Izesuꞌ Kilisitoꞌ aposolo mineline lo gilidoꞌ aposolo loloꞌ uve Pauloꞌ naza
2TI 1:2 luhuvo niteꞌ mene geiꞌ voꞌneloꞌ gipeꞌne minanive Timoteoꞌni nogize-giduve. Neꞌmine ogosa meteho Oꞌmosolatiꞌ idoꞌ Guvetesi ve Izesuꞌ Kilisitodatiꞌ nasahilikisi idoꞌ mulumote ningaaꞌ monovosi idoꞌ hongu lo lamino minaaꞌ monovo nesi nene lehizi-gidikesivo geitoꞌ minivoo losa noluve.
2TI 1:3 Gamene gamene holukaꞌ neiha holiseꞌ neiha Oꞌmosola laaꞌ nouvonguꞌ geikumuꞌ gaꞌne molosaꞌmivo mino Oꞌmoso isaaꞌ neve laaꞌ nouve. Aꞌmine Oꞌmoso nene avoꞌnemote gelekeleꞌ i-di opoꞌni laaꞌ adiꞌmine ogo luꞌneuꞌ monovo lisihekovoꞌ neivo minosa nene gelekeleꞌ o-do opoꞌni laaꞌ nouve.
2TI 1:4 Idoꞌ naza hulo-gedo mala volosa nouvo veka novozo doꞌmozineꞌ mamuꞌ nene naza ha gele mino okongaloꞌ ma ningekuvo nenita nolize naba sotoꞌ iliho losa gelaaꞌ nouve.
2TI 1:5 Gaza Oꞌmosomuꞌ gele eleꞌvoleꞌ ogaꞌ naineꞌ nene mo apa niteꞌ amo laminetoꞌ gele eleꞌvoleꞌ gehepeve nane lo gele minaaꞌ nouve. Ee, ganaꞌ nene eleni izaho Loisiꞌ aꞌmineꞌmine ogo Oꞌmosomuꞌ gele eleꞌvoleꞌ ogo neivosa izaho Eunikeꞌ nesi aꞌmineꞌmine ineꞌ nenako naza geiꞌ nene aꞌmineꞌmine ogo gele eleꞌvoleꞌ o nolosane losa gele muꞌmusiꞌ o nouve.
2TI 1:6 Nemuꞌ nene naza aꞌne hite-giduvonguꞌ Oꞌmosoꞌmo gonouꞌ amuzo lehize-gedavo geita neineꞌ nene gaza amuzo molo do otezo lo gaka noduve.
2TI 1:7 Idoꞌ naza Oꞌmosoꞌmo gonouꞌ amuzo gimineꞌ nene amuzo molo do otezo noluvoniꞌ nene aꞌmine Oꞌmosoꞌmo leme neineꞌ lemeni dameni neve nene laza evenekumuꞌ lovozo helo golise gelaaꞌ lemeni dameni leme neivoba asi eveneꞌ veꞌnidoꞌ eleꞌvoleꞌ ogo ogo molo ogaꞌ amuzo do minaaꞌ lemeni damenisi idoꞌ eveneꞌ lute ngemaaꞌ lemenisi idoꞌ lute okodeloꞌ gizebo eleꞌvoleꞌ ogaꞌ amuzosi nene lehize-lede neize.
2TI 1:8 Nemuꞌ nene gaza govozo helamo mino Guvetesi vemuꞌ gamaziꞌve nene lo soto sotokovoꞌ ozo. Idoꞌ aꞌmine Guvetesi vemuꞌ nalatoꞌ ve loloꞌ ogo nouve nenikumukisi nene govozo helamozo. Asi Kilisitoꞌ gamazi laminekumuꞌ lelitokisi sotoꞌ o-ledaaꞌ neineꞌ mulumo geni initeꞌ neꞌmine sotoꞌ o gemelineꞌ nene gazasi Oꞌmosoꞌmo amuzo geme neineꞌ neꞌmi votigileloꞌ do molo ha geheꞌmo vo minezo.
2TI 1:9 Aꞌmine amuzo gimive Oꞌmoso neꞌmo leliꞌ elese molo-ledo do luꞌ izo do eita o-lidineꞌ nene eveneꞌ monovo lamineꞌ uningumuꞌ nene neꞌmine ineꞌ nevoba asi olihe initeꞌ mataꞌ do sotoꞌ amo asiꞌvevoꞌ minida vomine aza nasahiliꞌ Izesuꞌ Kilisitonguꞌ lehize-ledelesuve lo eiꞌ luloloꞌ do lisiheꞌ okidoꞌ eꞌmeto ineꞌ ve.
2TI 1:10 Aꞌmine eikovoꞌ minineꞌ gamene gozopoꞌ vomila plenim ineꞌ initeꞌ nene idiꞌnise aꞌnene Guvetesi ve Izesuꞌ Kilisitoꞌ sotoꞌ idotiꞌ nene mo sotoꞌ ogavo ningekune. Aza nene sotoꞌ ogosa helaaꞌ neꞌmi amuzoꞌve nene bele helosa helo gelesamo minevoꞌ minevoꞌ minaaꞌ nene monoꞌ gamazi laminekutiꞌ nene do sotoꞌ ogo lelebizave.
2TI 1:11 Aꞌmine gamazi lamineꞌ nene lo soto sotoꞌ ogaꞌ ilinive mineline idoꞌ aꞌmineꞌmi aposolo mineline idoꞌ aꞌmine gamazi nene apize ngemaaꞌ anive mineline lo Oꞌmosoꞌmo neniꞌ neve nene neleꞌmize molave.
2TI 1:12 Neꞌmine o-nidineꞌ neꞌmo naza idise mela mulumo alumo niteꞌ mene geheꞌmo nouvoniꞌza naza gele muꞌmusiꞌ o-daaꞌ nouve Kilisitoꞌ monovoꞌve nene naza ningo gele minuvodiꞌmo aza gono nimineꞌ nene do nouvo aza aꞌmidoꞌ gizebo lamineꞌ ilineꞌ amuzoꞌvesi mino gizebo lamineꞌ ogo neivo gamene naba aloseive lo gele eleꞌvoleꞌ o nouvoniꞌ nenako nemuꞌ novozo helamo mino aꞌmine gono nene daaꞌ nouve.
2TI 1:13 Nemuꞌ nene gaza nenitatiꞌ gelaineꞌ gamazi nene gamazi gihile neineꞌ nenaze. Aꞌmine gelaineꞌ gamazi nene gaza aꞌmineꞌmine ogo lo-ngemeliningumuꞌ nene avazahaꞌve neꞌmine do mino Izesuꞌ Kilisitoda minineꞌ monovo ezemuꞌ gele eleꞌvoleꞌ ogatokisi idoꞌ lute ngemaatokisi nene eꞌmeto mino gonoꞌve do mino
2TI 1:14 lelikuꞌ omo minive Oꞌmosoꞌmi Sikalahutoꞌ nene lehete o mino Oꞌmosoꞌmo gono lamineꞌ gimidoꞌ nene gizebo lekeseve o minosa do minezo.
2TI 1:15 Gaza mo gele nane. Asia aleve mukikisi idoꞌ Higeloki Helemogeneki nesi nene mo meheꞌine nimi mine velepeꞌ izikeve.
2TI 1:16 Ne neiha engiꞌ zuho Onesiholoꞌ aza nene gamene mukiꞌ luꞌneuꞌ do gehe gehe ize-nedo mino nalatoꞌ minuvongumuꞌ nene ovozo ogavo golise gelamaaꞌ ineꞌ nenako nemuꞌ nene Guvelesi veꞌmo eiꞌ Onesiholoꞌ zuhola nene mulumoꞌine ningivo lo noluve.
2TI 1:17 Ee, golise gelamo Loma ebekuꞌ ogo hetelo mino nenikumuꞌ nene amuzo molo viseꞌ ogo ogosa ningineꞌ ma neive.
2TI 1:18 Nemuꞌ nene gamene nabala Guvelesi veꞌmo gele emo mulumolo ningiliho lo noluve. Idoꞌ Eheso numuno ebekuꞌ nouvo aza vauve goloso elosa neniꞌ nene hize eleꞌ o-nedo minineꞌ gasika mo ningo gele lamineꞌ o naneꞌ ma neive.
2TI 2:1 Nemuꞌ nene gaza gipeꞌne make, laza Izesuꞌ Kilisitoda vo giꞌmizekunivo Oꞌmosoꞌmo nasahiliꞌve lehize-ledaaꞌ neingutiꞌ nene amuzo do minosa nene amuzo molo minezo.
2TI 2:2 Neꞌmine ogo minosa naza eveneꞌ mukiliti veꞌnidoꞌ lo sotoꞌ nouvo nenitatiꞌ gelaineꞌ monoꞌ nene eveneꞌ masi apizi ngimilizangisi nene monotoꞌ eꞌmete lamineꞌ igi mini apizi ngimilizadoꞌ lisiheꞌ i minaniꞌ eveneta nene ngeme molozo.
2TI 2:3 Gaza nene Izesuꞌ Kilisitoꞌ amiꞌve loloꞌ ogange. Ami laminelite mulumo gono ha gihaaꞌ naniꞌ neꞌmino laza Kilisitoꞌnimuꞌ mulumo geni neꞌmine gehaaꞌ nouneꞌ neꞌmino gazasi nene ha gehaaꞌ ozo.
2TI 2:4 Ami hamolitesi nene atoꞌ gono neꞌmo adeloꞌ do minaalive li haza gonouꞌ ma vi hilalizavoba asi amiuꞌ leleꞌmize molave neꞌmo lelikumuꞌ lamineꞌ gelelingumuꞌ ve li olovoꞌ igi minaaꞌ nave.
2TI 2:5 Idoꞌ zohiꞌ igaꞌ nave nene zohiꞌ iꞌmi vilizanguꞌ zohiliꞌmi louꞌ gamaziꞌve ma avutoꞌ ilizaniꞌ nene zohikuꞌ vuni ikeve li palaisi ngimisaꞌmave.
2TI 2:6 Idoꞌ ma neve nene ve ma mine zuhoꞌ ogo gono amuzo molo dalive neꞌmo nene gomuꞌ apiꞌ ogo nosoꞌ niteꞌ o molaaꞌ neineꞌ nene do naaꞌ neive.
2TI 2:7 Nemuꞌ nene mene noluvoniꞌ initeꞌ mukikumuꞌ nene Guvelesi veꞌmo luka gaka do ngoloꞌ lo-gedavo gele nge lo gelelesange. Nemuꞌ nene izeꞌ molo gelo minezo.
2TI 2:8 Idoꞌ gaza Izesuꞌ Kilisitoꞌnimuꞌ nene gele nge lo minezo. Aza neve nene guvelesi ve Davidiꞌ aꞌvopilemoꞌ zuhoutiꞌ mino hilingutiꞌ oto neingumuꞌ monoꞌ gamazi lamineꞌ lo-ngemaaꞌ nouvoniꞌ nene gele minezo.
2TI 2:9 Naza aꞌmine gamazi lamineꞌ laaꞌ nouvongumuꞌ nene mulumo geni niteꞌ nogihuve. Ee, naza nene gizengize ve nouvoniꞌ gelavo nalaꞌ numunguꞌ nesi nene huli-nidikevo nouve. Neꞌmine ikevo nouha Oꞌmosoꞌmi gamazi nesi nene nalatoꞌ ma minamive.
2TI 2:10 Nemuꞌ naza Oꞌmosoꞌmo eiꞌ ve lo do kegese-ngede neineꞌ alevemuꞌ nene mulumo geni initeꞌ mukiꞌ nene ha geheꞌmo vo minaaꞌ nouve. Ee, aꞌmine aleve Izesuꞌ Kilisitoda igi giꞌmizilizadotiꞌ lukuvo ni labanaꞌve di tiꞌ igi ezesi miniviꞌ miniviꞌ ilizangumuꞌ ve lo nenita sotoꞌ ogaꞌ neineꞌ mulumo niteꞌ mukiꞌ nene ha geheꞌmo vo mino monoꞌ gamazi lo-ngemaaꞌ nouvoniꞌ nene hulosaꞌmuve.
2TI 2:11 Gamazi meve nene mo gihile lamineꞌ neive. Adoꞌ: Laza nene mo laminetoꞌ Kilisitolesi makaꞌ helekuneꞌ nolineꞌ nene ezesi makaꞌ minevoꞌ alevoꞌ ogo minelesune.
2TI 2:12 Idoꞌ laza geni mukiꞌ sotoꞌ ilinguꞌ amuzo molo minesoꞌ nene Guvelesi ve naba loloꞌ ogo minelinguꞌ nene lazasi makaꞌ gonoꞌveloꞌ gizebo o minelesune. Laza eze aleve nomune lo ataize lo-deloneꞌ nene azasi aꞌmineꞌmine ogo neze aleve nizamave lo lo-ledeleseive.
2TI 2:13 Eiꞌ gamazi lo nolidoꞌ nene gele hulosa ataize ngelo lamilineꞌ nenako nemuꞌ nene laza ezemuꞌ gele eleꞌvoleꞌ ogo mino eꞌmetelone loloneꞌ gamaziloꞌ ma gele damoloneꞌ nene aza neve olove lilineꞌ gamaziloꞌ nene mo gele do ogakovoꞌ oloseive.
2TI 2:14 Aꞌmine noluvoniꞌ gamazi mene lo gaꞌine ogo lo-ngemo monoꞌ gamazimuꞌ nene lovo lolize amilizave lo Oꞌmosoꞌmi veleloꞌ nene gaꞌine do lo-ngedezo. Neꞌmino lovo lolize ogaꞌ neꞌmo nene initeꞌ gihile ma do sotoꞌ amosa asi aꞌmine lolize gamazi gililizave nene ngeleꞌmize goloso oloseive.
2TI 2:15 Gaza geiꞌ nene Oꞌmosoꞌmo ningivoo gonouꞌ ve lisiheꞌ mino gono daaꞌ monovoꞌnemuꞌ novozo helamolodoꞌ minelove lo gono amuzo molo do mino gamazi gihile nene do hehe lo izeꞌ molo lo-ngemezo.
2TI 2:16 Eveneꞌ malite haza monoꞌ gihile nomineꞌ gamazi laaꞌ naniꞌ nene gele hulo mehenga emezo. Neꞌmine gamazi liꞌmi vaaꞌ naadiꞌmo nene monoꞌ hulilizadoꞌ mini milikevo
2TI 2:17 aꞌmine laaꞌ naniꞌ gamazi neꞌmo nene huso goloso okodeloꞌ naba oꞌmo vo pelaaꞌ neineꞌ huso neꞌmino eveneꞌ linge mukita vosa mo ngeleꞌmize goloso oloseive. Adoꞌ neꞌmine gamazi laaꞌ aveutiꞌ nene Himenaeoki Hiletoki nene nizasive.
2TI 2:18 Aꞌmine ve sitaꞌ netise nene hele noloningutiꞌ otaaꞌ nene luteliꞌmo mo otaniꞌ nenako nemuꞌ nene gohi ma otamolosune lisa monoꞌ gamazi gihilelotiꞌ nene zovoꞌ izi visa eveneꞌ lingeliti monoꞌine nene di gopo i-ngidikesive.
2TI 2:19 Neꞌmine ikesiha Oꞌmosoꞌmo gamazi gihileloꞌ do lehete o-ngedo do ote-ngidiveti mulise nene eleꞌvoleꞌ ogo neivo initeꞌ maliꞌmosi do gabeꞌ osaꞌmive. Idoꞌ aꞌmidoꞌ nene monovoꞌve tiꞌ lo gize neive: Guvelesi ve aza eiꞌ evenele nene mo ningo gele neive. Idoꞌ ma nene: Guvelesi veꞌmi gulive igi eiꞌ evenele none laaꞌ nave mukiꞌ nene monovo golosomuꞌ olovoꞌ ilisave.
2TI 2:20 Guvelesi ve maliꞌmi numuꞌve nabauꞌ somo lapese nevoꞌmine initeꞌ nene initeꞌ lamineꞌ ngolidunukisi siluvadunukisi liliꞌ aniꞌ initekovoꞌ minaaꞌ neivoba asi haza niteꞌ zadunuꞌ nehe misubodunuꞌ nehe liliꞌ aniꞌ initekisi nene ha minaaꞌ neive. Linge ma meniꞌve dize minineꞌ initetunuꞌ liliꞌ aniꞌ initeꞌ nene gono initeꞌ laminekumuꞌ neive. Idoꞌ haza nitetunuꞌ liliꞌ aniꞌ initeꞌ nene haza gonolokumuꞌ nene gopo minaaꞌ neive.
2TI 2:21 Neꞌmine ogaꞌ neinako eveneꞌ malite lo-gimuvoniꞌ goloso niteꞌ nene haza lapese gili minangutiꞌ golovoꞌ izi ma di hulilizaniꞌ nene ingine aꞌmine meniꞌve dizo minineꞌ lapese neꞌmine liliꞌ igi Guvelesi veꞌmo ato atoꞌ gono laminetoꞌ ngeleꞌmize molalidoꞌ di lisiheꞌ igi mini eiꞌ kekeize initeꞌve gono daaꞌ ilineꞌ initeꞌve neꞌmine mini mili minilisave.
2TI 2:22 Nemuꞌ nene gaza umungive gosoꞌve lavoꞌine lemaaꞌ neineꞌ initekumuꞌ nene lavonga lemamivo golise ogo mehenga emosa gaza luꞌninguꞌ goloso monovo nomivo mini Guvelesi vela likaꞌ likaꞌ igi ezeloꞌ lehete i minave mukikisi nene makaꞌ bizo mino lisiheꞌ lamineꞌ minaaꞌ monovosi idoꞌ Guvelesi vemuꞌ gele eleꞌvoleꞌ ogaꞌ monovosi idoꞌ lute ngemaaꞌ monovosi idoꞌ hongu lo lamino minaaꞌ monovosi nene imiselo dalosa amuzo molozo.
2TI 2:23 Idoꞌ gihileꞌve nomineꞌ getipe gamazi adoꞌ gamazi monovo gilamavete laaꞌ naniꞌ gamazi neꞌmine li monoꞌ monovomuꞌ gamazidunuꞌ ge hulo ne hulo laaꞌ neꞌmo nene lovo lolize do sotoꞌ ogaꞌ neineꞌ nene mo gele naneꞌ ma neive. Nemuꞌ nene gaza aꞌminguꞌ vo holamo mehenga emezo.
2TI 2:24 Guvelesi veꞌmi gelekeleꞌ ve nene lovo lolize amilizadoꞌ i mini asi eveneꞌ mukita alahaꞌ igi hongu gamazi li-ngimi mini apizi ngimiliza monovoꞌine nene laminekisi mini gehe gehe izi ngimi mini
2TI 2:25 engiꞌ gamaziꞌine bililisa igaꞌ ave nene hongu monovo di sotoꞌ i-ngidi minisa di hehe li-ngidilizaniꞌ o neive. Neꞌmine ikevo luꞌine di velepeꞌ izi gamazi gihile nene gili lamineꞌ ilizadoꞌ Oꞌmosoꞌmo ngeleꞌmize molalihe losa noluve.
2TI 2:26 Neꞌmine ogavosa Satani aza eiꞌ gelekeleꞌ i-dilizave lo do eita o minavo gelevusoꞌveliꞌmo do miningutiꞌ nene apasisa lukuvo nalisave.
2TI 3:1 Ne neiha naza ma lo-gemeloze. Gele minezo. Alingeꞌ gamenela nene lihiteheꞌ initeꞌ sotoꞌ o-ledelineꞌ gamene gehepeve sotoꞌ oloseive.
2TI 3:2 Aꞌmine noluvoniꞌ nene adoꞌ eveneꞌ engikumukovoꞌ gilaaꞌ idoꞌ monimukovoꞌ gilaaꞌ idoꞌ engiꞌ igi mili iliza nitekumuꞌ okoꞌine di naba igi laaꞌ idoꞌ engikumuꞌ gilavo dizaaꞌ, eveneꞌ dovo ledevoꞌ o-ngedaaꞌ, izeꞌningi meꞌningi gamazi gili hulaaꞌ, initeꞌ lamineꞌ i-ngidavemuꞌ gilavo haza niteꞌ loloꞌ ogaꞌ, monoꞌ luꞌninguꞌ nomineꞌ minaaꞌ,
2TI 3:3 idoꞌ engiꞌ zuhomukisi ngumo helesaꞌmivo minaaꞌ, eveneꞌ mamuꞌ lihime di minaaꞌ, ngemenga laaꞌ, okoꞌnine luꞌnidoꞌ gizebo ami gopo minaaꞌ, ize gulo suno di eveneꞌ di goloso i-ngidaaꞌ, monovo laminekumuꞌ ngumo helamivo minaaꞌ,
2TI 3:4 engiꞌ zuho biluvaliti aꞌninguꞌ ngeleꞌmizi milaaꞌ, initeꞌ bubu izi di goloso igaꞌ, engikumuꞌ gilavo dizaaꞌ, idoꞌ Oꞌmosoloꞌ luꞌine milaaꞌ naniꞌ nene ivileꞌ ivosa okoꞌineꞌmo laniteꞌ gelaaꞌ neineꞌ initetoꞌ luꞌine milaaꞌ,
2TI 3:5 nevoꞌmine manaꞌmine monovo nene mo ha di sotoꞌ ilisave. Idoꞌ monoꞌ nene vi gilaaꞌ ilizaha okoꞌine losuvolotikovoꞌ gili mini monoꞌ nene luꞌninguꞌ amuzo molo gihileꞌve do sotoꞌ ilingumuꞌ nene oꞌve li monoliꞌmi amuzo nene vasa izilisave. Nemuꞌ nene gaza aꞌmine neꞌmine manaꞌmine vesi nene bizami olovoꞌ ogo minezo.
2TI 3:6 Neꞌmine luvoniꞌ nene nemuꞌ luve: Engikutiꞌ nene ve malite eveneꞌ goꞌine izi numuꞌninguꞌ dizi aꞌminguꞌ veneꞌ monokuꞌ luꞌine gilizevo o vivo mini okoꞌnidoꞌ lihime monovo vaiꞌ dizivo okoꞌineꞌmo laniteꞌ gilineꞌ initeꞌ ato atoꞌ neꞌmo ngimimiseꞌ ogo do novivo minaaꞌ aniꞌ veneꞌ nene luꞌninguꞌ hizi di giꞌmizaaꞌ nave.
2TI 3:7 Aꞌneꞌmine veneꞌ nene gamazi lamineliꞌmi monovo nene gelelone li gamene gamene amuzo milaaꞌ naniꞌza gamazi gihile nene ngeli ma ningi gililizadoꞌ minisaꞌmave.
2TI 3:8 Idoꞌ Halaoꞌ luso veꞌve setaꞌ Zaneki Zabeleki ingine Moseꞌ gamaziꞌve diꞌmi limilisa asidiꞌmine igi noluve ingine mene gamazi gihile diꞌmi limilisa igaꞌ nave. Ingine nene luꞌine gaꞌine unuvo ogo goloso o vineꞌ neivo mini ingine Oꞌmosoꞌmo gilivo lisiheꞌ amineꞌ monokumukovoꞌ gili eleꞌvoleꞌ igaꞌ nave.
2TI 3:9 Neꞌmine igaꞌ naha Zaneki Zabeleki monovoꞌine sotoꞌ ineꞌ neꞌmino aꞌmine luve nesi negi hizaniꞌ monovoꞌine nene sotoꞌ ogavo eveneꞌ mukiꞌ nene ningi gililisanako aꞌmine eveneꞌ goꞌine izaaꞌ aniꞌ nene gohi goꞌine iziꞌmi vilizadoꞌ minamilisave.
2TI 3:10 Ne neiha geiꞌ neve nene neniꞌ monoꞌ apize ngemaaꞌ ogo ogo molo ogaꞌ uvoniꞌ monovoꞌnesi idoꞌ gono do gihile do sotoꞌ olosa giluvongumuꞌ nesi nene mo ningo geleꞌmo geleꞌmo nane. Idoꞌ Kilisitoꞌnimuꞌ gele eleꞌvoleꞌ o mino hongu lo mino luꞌne ngemaaꞌ ogo mino mulumo geni ha geheꞌmo vo minaaꞌ nouvongumuꞌ nesi nene mo ningo geleꞌmo geleꞌmo ogo nane.
2TI 3:11 Idoꞌ eveneꞌ goboni malaꞌ malaꞌ i-nidi nizavo neꞌmi mulumo geni naba Adiokia numuno ebekukisi Ikonio numuno ebekukisi Lisitila numuno ebekukisi geheꞌmo vuvoniꞌ monovo nene gasika mo gele nane. Ee, idoꞌ aꞌmine geni initeꞌ mukiliti lulouꞌ minuvodotiꞌ nene Guvelesi veꞌmo alete molo-nedavo lukuvo nosa nouve.
2TI 3:12 Idoꞌ eveneꞌ laza Izesu Kilisitoda giꞌmizo mino monoꞌ monovoloꞌ eꞌmetovoꞌ minelone losa neꞌmine ogo minelonive mukiꞌ nene goboni mili-lidavo aꞌmine neꞌmine geni mulumo initeꞌ nene gehamolonivoba mo geheloneꞌ o neive.
2TI 3:13 Ne neiha eveneꞌ goloso soza monoꞌ li eveneꞌ goꞌine izaaꞌ ave nene Sataniꞌmo goꞌine izavosa ingine aꞌmineꞌmine igi eveneꞌ goꞌine iziꞌmi vi mini goloso naba iꞌmi iꞌmi vi minilisave.
2TI 3:14 Neꞌmine igi minilisaha geiꞌ neve nene aꞌmine gele naneꞌ monoꞌ apize gimunive leiꞌ monovote nene mo ningo gele naneꞌ nenako nemuꞌ aꞌmine geiꞌ gele mino gele muꞌmusiꞌ o naneꞌ monoꞌ maloꞌ nene do ngi lo do minezo.
2TI 3:15 Idoꞌ ma mesi nene gele naneꞌ ma neive. Adoꞌ gomuꞌ izipe ngomolotiꞌ monoꞌ godoloutiꞌ gamazi geleꞌmo geleꞌmo ogosa do madungauꞌ molo osuꞌ lo nane. Idoꞌ aꞌmine monoꞌ godoloutiꞌ gamazi neꞌmo nene lukuvo nalinidoꞌ geleꞌmize molalidoꞌ o neive. Ee, aꞌmine gamazi do madungauꞌ molanidiꞌmo gaza gamazi monovo gele vevesosa Izesu Kilisitoꞌnimuꞌ gele eleꞌvoleꞌ ilinidoꞌ o neineꞌ nenako neꞌmo nene Oꞌmosoꞌmo do guꞌ izelidoꞌ geleꞌmize molaloseive.
2TI 3:16 Monoꞌ godoloutiꞌ gamazi mukiꞌ nene Oꞌmosoꞌmo eveneꞌ maduꞌninguꞌ molo zatuhoꞌ o-ngedavo gizaniꞌ neineꞌ nenako nemuꞌ aꞌmine gamazi neve nene monoꞌ monovo apize ngemelonidokisi idoꞌ gopo ladani igaꞌ avesi lihime davesi monovoꞌine ngelebizo do lisiheꞌ o-ngedo ngeleꞌmize akaloꞌ olonidokisi idoꞌ monovo lisihekovoꞌ igi mili ilizaniꞌ monovo apiꞌ napiꞌ o-ngemelonidoꞌ nesi nene lisiheꞌ lamineꞌ o neive.
2TI 3:17 Neꞌmine olonidoꞌ lisiheꞌ o neineꞌ nene Oꞌmosoꞌmi gelekeleꞌ ve laza nene do lisiheꞌ gehepeve oko mino gono lamineꞌ ato atoꞌ mukiꞌ nene dalonidoꞌ mo lisihekovoꞌ o mineloningumuꞌ ve losa neꞌminosa neineꞌ neive.
2TI 4:1 Izesu Kilisitoꞌ nene tineꞌ molo ogo Guvelesi ve naba loloꞌ ogo gizebo o-ledelingumuꞌ nene naza gaꞌne gele mino gaka dalove. Oꞌmosoꞌmi velelokisi idoꞌ hilaniꞌ alevesi idoꞌ ha minilizaniꞌ alevesi gonitoꞌ leleꞌmize molo izeꞌ molo-ledelive aꞌmine Izesu Kilisitoꞌ eiꞌ velelokisi nene gaka do tiꞌ lo nolo-giduve:
2TI 4:2 Gaza gamazi lamineꞌ nene lo sotoꞌ ogo lo-ngemezo. Ee, gili gimilizaniꞌ gameneloꞌ nolihe gili gimamilizaniꞌ gameneloꞌ nolihe ha lo-ngemovoꞌ mino goseleꞌ gebelamivo apize ngemeꞌmo vo mino gaꞌine do monoꞌ nene gihile neive lo ngelebizo lihimeꞌinemuꞌ nene ngelemo luꞌine do ngii lo-ngedezo.
2TI 4:3 Idoꞌ gamazi neꞌmino lo-ngemezo noluvoniꞌ nene ingine monoꞌ gamazi gihilemuꞌ goseleꞌ ngebelavo gelesoꞌ ngisamivo angiseꞌine laniteꞌ gili gililizaniꞌ gamazimuꞌ nene gaꞌninguꞌ huhu lavo aꞌmine laniteꞌ gili gililiza gamazi nene apizi ngimilizave vaiꞌ ngeleꞌmizi di igi hitilizaniꞌ gamene ma aloseinako nemuꞌ nene luve.
2TI 4:4 Neꞌmine igi gamazi gihile nene meheꞌine imi zovoꞌ izi vi gihileꞌve nomineꞌ gamazi heluno neꞌmine maloꞌ nene giꞌmizilisave.
2TI 4:5 Neꞌmine ilisaanaze. Geiꞌ neve nene negi hizo ladani amo gaka gele ngevoꞌ lo mino monoliꞌmi geni mulumo sotoꞌ ilineꞌ nesi nene ha geho mino monoꞌ gamazi lamineꞌ lo sotoꞌ ogo lo-ngemaaꞌ gono nene ha do mino gono geitoꞌ hulo neineꞌ gono nene mo vaiꞌ doovoꞌ minezo.
2TI 4:6 Naza neꞌmine gamazi mene nolo-gimuvoniꞌ nene neniꞌ vaniseꞌne nene mo apiꞌ igi lepilisa navo neniꞌ osuꞌ lo voloniꞌ gameneꞌne nene mo alite neivosa noluve. Idoꞌ vaniseꞌne neꞌmino lepeloniꞌ nene Oꞌmosomuꞌ ve li vaini noso lepi hulaaꞌ naniꞌ neꞌmino lepe hulolosuve.
2TI 4:7 Naza monoꞌ lesisi laminekuꞌ nene amuzo molo lotiꞌ izo vo makiloꞌ mo hetelekuve. Monoꞌ gihilelotiꞌ nene zovokisi izamo mo eꞌmete osuꞌ lokuve.
2TI 4:8 Idise melotiꞌ alingeꞌ neve nene monovo lisihetoꞌ eꞌmetaaꞌ avete daaꞌ naniꞌ meni nene nenikumuꞌ gizebo ogo neive. Aꞌmine meni initeꞌ nene monovo lisihetoꞌ izeꞌ molo-ledaaꞌ neineꞌ zasi Guvelesi ve neꞌmo nene gamene nabala nemeleseive. Idoꞌ nemelineꞌ nene nenikovoꞌ nemelivoba asi eiꞌ alingumuꞌ luꞌine mili minave mukikisi nene ngemavo dalisave.
2TI 4:9 Gaza nenita liteꞌ lo alineꞌ aka nene amuzo molo ma do sotoꞌ ogo ano.
2TI 4:10 Demaꞌ neve nene me misubouꞌ minineꞌ initetoꞌ lulo molosa neniꞌ nene hulo-nedo Tesalonika numuno ebeta vavo idoꞌ Kelesekeꞌ nene Galatia misubouko vavo idoꞌ Titoꞌ nene mo Dalamatia misubouko vavosa nene noluve.
2TI 4:11 Lukaꞌ nevoꞌ nene nenikisi makaꞌ nosive. Idoꞌ Malekoꞌ neve nene gelekeleꞌ ogo hize eleꞌ lamineꞌ o-nedaaꞌ neineꞌ nenaze. Alininguꞌ nene eleꞌmizo makaꞌ alizo.
2TI 4:12 Idoꞌ Tikikoꞌni nene mo Eheso numuno ebeta imisele hulokuvo vogave.
2TI 4:13 Idoꞌ gaza alininguꞌ nene naza Toloasi numuno ebekuꞌ Kalipoꞌ neida ponisa hulo uvoniꞌ masi nene do-nedo ano. Idoꞌ bukuꞌne masi nene do ano. Adoꞌ aꞌmine bukuꞌneutiꞌ nene ize losuvoloꞌ luhuvo gizaniꞌ pepa ma nene initeꞌ naba nenaze. Aꞌmine nene gaka molavo hulo ogaline.
2TI 4:14 Vapadunuꞌ initeꞌ ato atoꞌ loloꞌ ogaꞌ ive Alekisadeloꞌ neꞌmo monovo goloso nene vaiꞌ goloso o-nidive. Aza ogo molo idoꞌ nene Guvelesi veꞌmo golo hizo lihime emeleseive.
2TI 4:15 Idoꞌ aza leliꞌ laaꞌ nouneꞌ gamazite nene amuzo molo molovoꞌ hitevoꞌ ogo minineꞌ nenaze. Geikisi nene gamazika molovo hitevoꞌ ogalize. Eikumuꞌ nene eheꞌ ogo gizebo lamineꞌ ozo.
2TI 4:16 Ganaꞌ apiꞌ igi gonitoꞌ neleꞌmizi milaniꞌ gameneuꞌ nene eveneꞌ hamolitesi neniꞌ gamaziꞌneloꞌ hize eleꞌ ma i-nidamave. Mukitoꞌ mo huli-nidi vikeve. Nemuꞌ neꞌmi lihime nene Oꞌmosoꞌmo do-ngede minamiliho losa noluve.
2TI 4:17 Neꞌmine aniꞌza Guvelesi ve nene nenikisi mino amuzo nemo hize eleꞌ o-nidineꞌ neꞌmo laza lo sotoꞌ ogaꞌ nouneꞌ gamazi nene naza lo sotoꞌ ogo lo-ngeme osuꞌ lokuvo heta atoꞌ ve mukiꞌ nesi nene gilaniꞌ ve. Idoꞌ neꞌmine ogo Guvelesi ve neꞌmo Loma vete nibili hililisa angutiꞌ nene alete molo do hulo-nedavo lukuvo nuve.
2TI 4:18 Idoꞌ di goloso i-nidilisa ilizaniꞌ initeꞌ mukikutiꞌ nene Guvelesi veꞌmo alete molo-nedo lukuvo nemo Okulumokuko eiꞌ gizebo o neinguꞌ nene neleꞌmize do voloseive. Nemuꞌ nene eze opoꞌni lo mineloneꞌ nene huko vamivo ha minevo minevoꞌ ogo minelineꞌ nene mo neꞌmino miniliho.
2TI 4:19 Neniꞌ nene Pilisikilaꞌnisi Akuilaꞌnisi idoꞌ Onesiholoꞌ numuꞌveuꞌ ingaaꞌ aniꞌ aleve nesi nene ngopoꞌni noluze. Lo-ngemezo.
2TI 4:20 Elasitoꞌ nene Kolidi numuno ebeta nene ha minive. Idoꞌ Tolohimoꞌ nene initeꞌ gize do neivosa Mileto numuno ebekuꞌ nene hulo-dosa uvoniꞌ ve.
2TI 4:21 Hepeꞌ gamene olihe amidoꞌ nene gaza alineꞌ aka amuzo molo viseꞌ ogo do sotoꞌ ogosa ano. Idoꞌ Eubouloꞌ nesi Poudeꞌ nesi Linoꞌ nesi Kalaudiaꞌ nesi idoꞌ leze zuho mukiꞌ nesi nene gopoꞌni nilave.
2TI 4:22 Idoꞌ Guvelesi ve nene geiꞌ sikalahukasi minivo. Idoꞌ Oꞌmosolatiꞌ nasahiliꞌ nene lengita minivo. Moda aꞌnesiꞌ ve.
TIT 1:1 Titoo, naza monoꞌ akaloꞌ geleꞌmize molokuvo nazasi gazasi hamoꞌ monoꞌ gele eleꞌvoleꞌ o nosinako gaza neniꞌ gipeꞌne gihile gelo minaneꞌ make, luhuvo mene nogize-giduve. Pauloꞌ naza Oꞌmosoꞌmi gelekeleꞌ izipe Izesu Kilisitoꞌ aposoloꞌve neniꞌ nogize-giduze. Ningezo. Oꞌmosoꞌmo aꞌmine gono nimineꞌ nene eze do kegeso ningekineꞌ eveneꞌ ingine monokuꞌ eleꞌvoleꞌ ilizave lo idoꞌ gamazi gihile lamineꞌ monokuꞌ ma neineꞌ nene gili vevesi minilizave lo aꞌmine gono nimineꞌ ma neive. Aꞌmine gamazi gihile neꞌmi monovo neꞌmino neive: Oꞌmoso soza losaꞌmive neꞌmo gozopoꞌ gamene galaꞌmuda vomine olihe Okulumoꞌ misubo do sotoꞌ molamineꞌ gamene neuꞌ salani gamazi lo minevoꞌ minevoꞌ lemeni dameni nene lehize-ledelove lo lo huko lo molo-ledo lingumuꞌ vode otavo gilingili ogo minaaꞌ noune. Aꞌmine lo huko molaniꞌ gamene ogavo aꞌmine gamaziꞌve do sotoꞌ o-lidineꞌ. Ee, do sotoꞌ o-ledo do luꞌ izaaꞌ ive Oꞌmosoꞌmo nenikumuꞌ gaza aꞌmine gamazi nene lo sotoꞌ ogo eveneꞌ lo-ngemeꞌmo vo mineline lo gono nemavo nemuꞌ nene gono daaꞌ nouve. Neꞌmine ogo luhuvo niteꞌ mene gize-gedo meteho Oꞌmoso idoꞌ do luꞌ izaaꞌ ive Izesuꞌ Kilisitoꞌ engitatiꞌ nasahilikisi hongu lo lamino minaaꞌ monovo nesi geikisi miniliho lo Oꞌmosola noluve.
TIT 1:5 Gono lumo ma ha minineꞌ nene do veveso do apaseline lo Keleta ailaniuꞌ hulo-gedo vuvonguꞌ gono gamazi neꞌmine lo-giduvoniꞌ ma neive: Gaza numudoꞌ namadoꞌ mono monoꞌ ve linge ma do gizebo ve minilizave lo ngeleꞌmize molalosane.
TIT 1:6 Gizebo ve ngeleꞌmize molalo ma ve neꞌminevoꞌ ngeleꞌmize molalosane: Eveneꞌ mukiꞌ gilavo lihimeꞌve nomivo veneꞌ hamoꞌ do ezesi bizovoꞌ minavo izipahala zuho nete Oꞌmosola giꞌmizi minikevo eveneꞌ nete engiꞌ monovo ningi gili zogo zogo izi mini gamazi gilamaaꞌ ave nizave li lamilizadoꞌ minikevo ma ve neꞌminevoꞌ ngeleꞌmize molalosane.
TIT 1:7 Ee, Oꞌmosoꞌmi gonoloꞌ gizebo ogaꞌ ilineꞌ nemuꞌ monoꞌ gizebo ve minelive nene eveneꞌ ezemuꞌ gilavo lihimeꞌve nomivo minelineꞌ o neive. Neꞌmine ogo mino eveneꞌ ngivileꞌ ogo gamazi belaaꞌ ive minamo izeboloꞌ geto molosaꞌmive mino noso no sipaki amaaꞌ ive mino lovo amaaꞌ ive mino moni heneni mamuꞌ mumuzoꞌ amaaꞌ ive neꞌmine ve minelineꞌ o neive.
TIT 1:8 Neꞌmine ogo venenga ve ikevo ma nasahiliꞌ o-ngedo ngeleꞌmize molaaꞌ ilive mino initeꞌ lamineꞌ ogo molo ogakumuꞌ umo helelive mineleseive. Idoꞌ gala gele vevesaaꞌ ive ma mino eze monovoꞌve lisihekovoꞌ o minelineꞌ mino eze okoꞌno lulo do hamoꞌ ogo gizebo ogaꞌ ive mineleseive.
TIT 1:9 Neꞌmine ogo lo-ngeme ngemeꞌ nouneꞌ gamazi gihile nene do giliꞌ lo do minelive. Nene gamaziꞌmo eze hize eleꞌ o-divo monoꞌ gihile lamineꞌ nene lo-ngemo gaꞌine do hize eleꞌ o-ngedelive. Neꞌmine ogo leze monoꞌ gamazi bilaaꞌ aveti gamazi nene do peleseveꞌ izo do galaꞌmuda ilive.
TIT 1:10 Nanitekumuꞌ ve. Eveneꞌ aꞌmanapa igi gamazi bilaaꞌ ave mukiꞌ nizanako nemuꞌ ve. Ingine godoꞌninguꞌ gamazi nomivo gopo gamazi li eveneꞌ di gopo i-ngidi goꞌine izaaꞌ nave. Engikutiꞌ Zuda ve ma Izesuda vi giꞌmizi alingeꞌ di gopo igi Izesuꞌ monokovoꞌ nomive li avotemoti louꞌ gamazi nesi gele dunivo Oꞌmosoꞌmo do luꞌ izelive li vauve ili neꞌmine igaꞌ nave.
TIT 1:11 Neꞌmine igaꞌ ave nete eveneꞌ linge ma veneꞌ izipahaꞌinesi mukiꞌ nene ngeleꞌmizi gopo igaꞌ nave. Ee, ingine goꞌine izekunivo moni limilizahe li gili lamilizadoꞌ o minineꞌ gamazi nene li ladanga monoꞌ apizi ngimi ngeleꞌmizi gopo igaꞌ nave. Idoꞌ neꞌmine igaꞌ nanako nemuꞌ nene engiꞌ gamazi doꞌmo lemoo oꞌve lo-ngedelone.
TIT 1:12 Keleta ailaniuꞌ aleveti monovoꞌine goloso minineꞌ nene sotoꞌ o minineꞌ ve. Idoꞌ engikutiꞌ ve ma gamazi monovo gelaaꞌ iveꞌmo engiꞌ monovo lo sotoꞌ ogo tiꞌ lo lineꞌ: Keleta aleve nene sozaloꞌ ve mini idoꞌ ize loposo neꞌmine mini nosoꞌ niteꞌ nalisavoꞌ lamineꞌ gili mini gono dalisa goseleꞌ goloso ngebelaaꞌ neive. Ee, gamene galaꞌmudatiꞌ neꞌmine monovoꞌine mine do dizo idisesi ha neive lineꞌ.
TIT 1:13 Engikumuꞌ aꞌmine gamazi lineꞌ nene laminetoꞌ lineꞌ ve. Nemuꞌ nene Zuda veti heluno haza gamazi nene gohi gili dami haza eveneꞌ gamazi gihile nene meheꞌine imaaꞌ avete li huki nizaniꞌ gamazi nesi gili dami monoꞌ gili vevesi mini gili eleꞌvoleꞌ ilizave lo gaza amuzo molo ngelemo gaꞌine dozo.
TIT 1:15 Ingine initeꞌ mamuꞌ nene di gililizanipe di nalizanipe neꞌmo lutine goloduvo eleleseive li laaꞌ nahe. Naza lo-gemelove: Eveneꞌ luꞌine lamineꞌ o nolineꞌ nene initeꞌ mataꞌ do lamineꞌ o-ngedeleseiha eveneꞌ monoꞌ gili huli mini luꞌine goloso o nolineꞌ nene luꞌine gaꞌine ngemeni dameni goloso ineꞌ nenako nemuꞌ nene initeꞌ mataꞌ do lamineꞌ o-ngedamo gohi do goloso o-ngedeleseive.
TIT 1:16 Ingine Oꞌmosoꞌmi monovo gele none li veꞌinedunuꞌ laaꞌ naniꞌza igi mili igaꞌ aniꞌ neꞌmo lo sotoꞌ neivo gihile nomive. Ingine eveneꞌ goloso gamazi gili hulaaꞌ ave gono lamineꞌ hamokisi ngeli ma dalizadoꞌ nomive.
TIT 2:1 Ingine aniꞌ neꞌmine amo gaza neve gamazi lo-ngemelineꞌ nene monoꞌ gihile lamineꞌ apize gimunidoꞌ vo miliseꞌ o minelineꞌ gamazivoꞌ lo-ngemelesane.
TIT 2:2 Tiꞌ lo lo-ngemezo: Ve ozoho ingine gaꞌine gopo amivo mini ngemeni dameni vevese minivo mini gaꞌine gili hehe li luꞌine gaꞌine gizebo igi mini monokuꞌ minaaꞌ monovoꞌine di lamineꞌ igi eveneꞌ luꞌine ngimi nasahiliꞌ i-ngidaaꞌ monovoꞌine di lamineꞌ igi geni initeliꞌmi lulouꞌ mini ma eleꞌvoleꞌ igi hongu li minaaꞌ monovoꞌine nene di lamineꞌ igi minilizave.
TIT 2:3 Idoꞌ veneꞌ eleni nizaniꞌ nene lo-ngemanivo ingine aꞌmineꞌmine igi monoꞌ veneꞌ liliꞌ igi mini eveneꞌ ngemenga lami vaini noso geli geli igi namilizave. Neꞌmine igi mini monovo lamineꞌ apizi ngimi minilizave.
TIT 2:4 Adoꞌ ingine veneꞌ gosohoꞌ nesi vaꞌningine izipahaꞌine luꞌine ngimi gizebo i-ngidilizaniꞌ aka ngelebizilizave.
TIT 2:5 Idoꞌ ingine veneꞌ gosohoꞌ gili vevesi okoꞌine luꞌine gizebo igi luꞌine hamoꞌ ivo mini numuꞌine ebeꞌine gizebo lamineꞌ igii numuꞌninguꞌ minaaꞌ ave nesi nasahiliꞌ i-ngidi mini vaꞌningine gelekeleꞌ i-ngidi minilizave. Eveneꞌ Oꞌmosoꞌmi gamazi divi lediviꞌ ikelizave li neꞌmine igi minilizave.
TIT 2:6 Idoꞌ aꞌmineꞌmino gosoꞌvesi gaꞌine do lo-ngemanivo inginesi okoꞌine luꞌine gizebo lamineꞌ ilizave.
TIT 2:7 Idoꞌ gaza neve monovoka do lamineꞌ ogo mino eveneꞌ ingine initeꞌ mukiꞌ ilineꞌ ningi geiꞌ monovokaloꞌ geꞌmetilizangumuꞌ ve lo initeꞌ lisiheꞌ ogo molo mino aka tiꞌ ogo ngelebizezo: Monoꞌ apize ngemelo ma abeleni amo do veveso apize ngemezo.
TIT 2:8 Soza lo ladani ogane li lamilizaniꞌ gamazi laminekovoꞌ lo-ngemezo. Neꞌmine anivo lovo i limaaꞌ ave ingine lelikumuꞌ gamazi goloso lilisa viseꞌ igi ngovozo hili hulilisave.
TIT 2:9 Idoꞌ gelekeleꞌ gipe alu nene lo-ngemanivo ingine meꞌningine muluꞌine di lamineꞌ i-ngidi gamazi di tibizi li-ngimami initeꞌ mataꞌ mukitoꞌ nene gelekeleꞌ i-ngidi gamzaiꞌine diivoꞌ minilizave.
TIT 2:10 Neꞌmine igi meꞌningi initeꞌ mataꞌ gumine dami initeꞌ matatoꞌ gizebo lamineꞌ igi gono di igi mili ilizaniꞌ neꞌmo veveseleseive. Neꞌmine ilizaniꞌ nene Oꞌmoso do luꞌ izaaꞌ iveꞌmi monoꞌ nene neꞌmine manaꞌmine ogo do otelesune li tiꞌ ilisave.
TIT 2:11 Oꞌmosoꞌmo eveneꞌ mukiꞌ do lamineꞌ o-ledelesa nasahiliꞌ o-lidineꞌ nene sotoꞌ ogavo ningekune.
TIT 2:12 Idoꞌ nasahiliꞌ o-lidineꞌ neꞌmo leleꞌmize vevesavo Oꞌmoso mehede emo zogo zogo izaaꞌ monovo nene hulo Oꞌmosomuꞌ gilamavete mene misubouꞌ initekumuꞌ ngumo helepeleꞌ igaꞌ naniꞌ nesi hulo idise gamene okode lute gizebo lamineꞌ ogo initeꞌ lisihekevoꞌ ogo molo monoꞌ lemeni dameni ogavo minelone.
TIT 2:13 Idise gameneuꞌ neꞌmine ogo mine do dizo gilingili ogo minaaꞌ nouneꞌ initeꞌ laminekumuꞌ nene gizebo ogo minelesune. Aꞌmine initeꞌ lamineꞌ neꞌmino neive: Leze Oꞌmosote naba do luꞌ izaaꞌ ive Izesuꞌ Kilisitoꞌ aloseive. Ogavo eze labanaꞌve ningelesune.
TIT 2:14 Aza neve goloso niteꞌ gozopoꞌ doꞌmo vuneꞌ akalotiꞌ do tineꞌ molo leleꞌmizo ogo do luꞌ izelesa lelikumuꞌ ogo hilineꞌ. Ee, lihimeꞌine apaso do lamineꞌ o-ngedekuvo neze zuho liliꞌ igi mini luꞌine aꞌmida mili initeꞌ lisiheꞌ laminekumuꞌ amuzo mili gili igi mili ilizave lo lelikumuꞌ ogo hilineꞌ ve
TIT 2:15 Haza ve nabe li gilikelizaze. Neꞌmine gamazi lo-ngemo gaꞌine do ngeleꞌmize veveso amuzo molo lo-ngemezo.
TIT 3:1 Geiꞌ gizebouꞌ minaniꞌ eveneꞌ nene gamazi do gosohoꞌ ogo tiꞌ lo lo-ngeme ngemeꞌ ogo minezo: Ingine ngamanisi idoꞌ ngamani gono di lelitoꞌ gizebo igi minaaꞌ avesi gelekeleꞌ i-ngidi gamaziꞌine gili dalizave. Alingeꞌ gono lamineꞌ atoliꞌmine atoliꞌmine nasahiliꞌ ogaꞌ gono neꞌmine sotoꞌ ilineꞌ nene ha dalone li amuzo mili gili minilizave.
TIT 3:2 Eveneꞌ mamuꞌ ngemenga lami lovo lolize hizami hongu ve mini eveneꞌ mukiꞌ nene nasahiliꞌ i-ngidi minilizave.
TIT 3:3 Lazasi gozopoꞌ nene aꞌmineꞌmine ogo negi hizo ladani ogo gamazi gele hulo gopo minuneꞌ ve. Neꞌmine ogo initeꞌ goloso ato atoꞌ lumo helaaꞌ ineꞌ idoꞌ laniteꞌ gelaaꞌ uneꞌ initeꞌ nemuꞌ gelekeleꞌ o-do mino eveneꞌ igi mili igaꞌ naniꞌ neꞌmine ogo molo mineloninako lo gituhoꞌ no mikileꞌ ogaꞌ uneꞌ ve. Neꞌmine ogo nonivo eveneꞌ mukiꞌ biluvaꞌ i-lidi minikevo lazasi biluvaꞌ o-ngedo minaaꞌ uneꞌ ve.
TIT 3:4 Neꞌmino nonivo alingeꞌ leleꞌmize lamineꞌ ogaꞌ ive Oꞌmosoꞌmo eze nasahiliꞌve nesi idoꞌ lulo limineꞌ nesi do sotoꞌ ogo lelebizo do luꞌ izineꞌ.
TIT 3:5 Do luꞌ izineꞌ nene laza initeꞌ lisiheꞌ ogo molo ogaꞌ nouneꞌ nemuꞌ ve lo gilivoba asiꞌve lelikumuꞌ mulumo gilineꞌ nemuꞌ do luꞌ izineꞌ ve. Noso izo do izipe gosohoꞌ sotoꞌ aniꞌ neꞌmine o-ledo eze Sikalahuꞌve neꞌmo lemeni dameni gosohoꞌ limineꞌ neꞌmine ogo do luꞌ izineꞌ.
TIT 3:6 Ee, do luꞌ izaaꞌ ive Izesuꞌ Kilisitoꞌ gono davo neꞌmo Oꞌmosoꞌmo eze Sikalahuꞌve vauve elo lehize-lidineꞌ.
TIT 3:7 Nasahiliꞌ o-lidineꞌ nemuꞌ leleꞌmize lisiheꞌ ogo eleꞌvoleꞌ ngemeni dameni disa miniviꞌ miniviꞌ ilizave lo eze Sikalahuꞌve lehize-lidineꞌ ve. Neꞌmine ogo laza ezesi mino minevoꞌ minevoꞌ oloninako lo gilingili ogo dalosa giluneꞌ initeꞌ nene molo-lidineꞌ.
TIT 3:8 Gamazi mene gihile lamineꞌ lineꞌ ne neive. Oꞌmosomuꞌ gili eleꞌvoleꞌ igi nizave ingine gaꞌine hamoꞌ gili initeꞌ lamineꞌ ato atoꞌ eveneꞌ hize eleꞌ i-ngidaaꞌ neꞌmine nene amuzo mili igi mili minilizave loo luvoniꞌ gamazi mene amuzo molo lo-ngemeline lo nogiluve. Gamazi mene lamineꞌ neinako eveneꞌ mukiꞌ hize eleꞌ o-ngedelidoꞌ o neive.
TIT 3:9 Abelenga gamazi idoꞌ haza gamazimuꞌ viseꞌ igi li voleloꞌ meloꞌ igi minaaꞌ naniꞌ nesi gele hulo mehenga emo idoꞌ avoꞌningi guliveꞌinemuꞌ li naza eveneꞌ nabaliti ngaꞌvopilemoꞌ nouve li engiꞌ okoꞌine di dizi di naba igi di hutileꞌ igi laaꞌ naniꞌ nesi gele hulo mehenga emo idoꞌ Moseꞌ Zuda vemuꞌ louꞌ gamazi lo huko lineꞌ nemuꞌ ato atoꞌ gamazi li lovo lolize hizi minaaꞌ naniꞌ nesi haza gamazi gopo gamazi gihile nomineꞌ nenako gele hulo mehenga emezo.
TIT 3:10 Eveneꞌ malite gamazi di gopo igi li monoꞌ mulise hizi hoꞌli nizavo ma do vevese-ngedelesa gaꞌine do gamene hamope setape lo-ngemanivo gilamavo ma izeꞌ molo do hulo-ngedezo.
TIT 3:11 Gele nabe. Ve neꞌmine ve nene peleseveꞌ izaaꞌ ave luꞌine gopo o vineꞌ mini ingine igi mili igaꞌ aniꞌ neꞌmo engiꞌ monovoꞌine do sotoꞌ ogave.
TIT 3:12 Naza Nikopoli ebekuꞌ vo mino hepeꞌ naba elelineꞌ gamenelokisi nene aꞌmida minelove lo lo hukokuze. Atemaꞌni he Tikikoꞌni he geiꞌ nanida imiselekuvo vo hetelavo ma gaza nene aꞌmine mineloniꞌ ebeta alove lo amuzo molozo.
TIT 3:13 Idoꞌ ve setaꞌ adoꞌ Apoloki idoꞌ louꞌ gamazi li hukaniꞌ gelaaꞌ ive Zenaki monoꞌ gono di vilisidoꞌ initeꞌ mataꞌ viseꞌ ikelisize. Nemuꞌ akaloꞌ initeꞌ mataꞌ amuzo molo viseꞌ ogo do sotoꞌ o ngemezo.
TIT 3:14 Initeꞌ lamineꞌ ogo molo ogaliꞌmi monovo ningi gili lamineꞌ ilizangumuꞌ nene leze evenete zuho Izesuꞌ evenele mukiꞌ ingine gono lamineꞌ diꞌmi vilizadoꞌ nene luꞌine milalizave. Neꞌmine igi eveneꞌ ma initekumuꞌ viseꞌ igi geni ngebelavo ma hizi eleꞌ i-ngidilizave. Leze zuho engita monoliꞌmi gihile nomineꞌ minikelizaze.
TIT 3:15 Nezesi makaꞌ noneꞌ aleve ingine gopoꞌni nilave. Monokumuꞌ ve li luꞌine limaaꞌ nave ngopoꞌni nolo-ngiduze. Gaza lo-ngemezo. Nasahiliꞌ o-lengedelive lo Oꞌmosola noluve. Moda ve.
PHM 1:1 Luhuvo niteꞌ meve nene Izesuꞌ Kilisitoꞌnimuꞌ ve lo nalatoꞌ nouve Pauloꞌ nenitatikisi idoꞌ leze zuho Timoteodatikisi nene novive. Aꞌmine luhuvo niteꞌ meve nene lelikisi hamoꞌ gono daaꞌ nounive lute geme nonive Hilemoniꞌ geikumukisi
PHM 1:2 idoꞌ leze zuho veneꞌ Ahiaꞌnimukisi idoꞌ monoliꞌmi lovouꞌ makaꞌ zegeꞌ zegeꞌ ogaꞌ unive Alakipoꞌnimukisi idoꞌ Kilisitoꞌ evenele geiꞌ numungauꞌ mulise milaaꞌ naave engikumukisi nene nogize-lingiduve.
PHM 1:3 Nemuꞌ nene luhuvo niteꞌ mene nogize-lengedo Oꞌmoso metehosi Guvetesi ve Izesuꞌ Kilisitoꞌ neesi nasahiliꞌ i-lingidikesivo neꞌmo lengiꞌ muludinguꞌ nene hongu minivoo mine lamineꞌ igi minilizave loo Oꞌmosola noluve.
PHM 1:4 Hilemoniꞌ gaza Guvelesi ve Izesuꞌnimuꞌ gele eleꞌvoleꞌ ogo mino luka ezesi idoꞌ Oꞌmosoꞌmi evenele mukikisi ngemaaꞌ naningumuꞌ nene gelosa naza Oꞌmosola laaꞌ nouvonguꞌ nene geikumuꞌ gamene gamene isaaꞌ neve lo-daaꞌ nouve.
PHM 1:6 Idoꞌ aꞌmine Oꞌmosola laaꞌ nouvoniꞌ nene gaza Kilisitoꞌnimuꞌ gele eleꞌvoleꞌ ogo lelikuꞌ omo giꞌmizo naineꞌ neꞌmo nene laza Kilisitoda mine molo initeꞌ lamineꞌ daaꞌ nouneꞌ mukikumuꞌ nene gele osuꞌ lo mineline losa Oꞌmosola laaꞌ nouve.
PHM 1:7 Idoꞌ neze zuho make, Oꞌmoso isaaꞌ neve lo-daaꞌ nouvoniꞌ nene gaza luka Oꞌmosoꞌmi evenele ngeme naineꞌ neꞌmo luꞌine amuzo gohi daniꞌ neꞌmo nene luꞌne do ngi lo-nedavo muluꞌneuꞌ gulumo avile atoliꞌmine ogo lisivoo nouvoniꞌ nenako nemuꞌ nene Oꞌmoso isaaꞌ neve lo-daaꞌ nouve.
PHM 1:8 Naza amuzo molo lovo kiselevoꞌ ogosa Kilisitoꞌ velemuꞌ ogo gaza lisiheꞌ o neineꞌ initeꞌ meꞌmine nene ozo lo lo-huko lo-gedelodoꞌ o nouvoniꞌza
PHM 1:9 Kilisitoꞌ evenele laza lute ge neme ne geme lo minelonidoꞌ o neinako nemuꞌ nene amuzo molo lo huko lo-gedamo asi haza nevo longoꞌ ogo gele-gedelesa nene noluve. Ee, Pauloꞌ naza Kilisitoꞌ velemuꞌ medelo mino gamaziꞌve lo sotoꞌ ogaꞌ uve idoꞌ idise aꞌmine Izesuꞌ Kilisitoꞌnimuꞌ ve li nalatoꞌ huli-nimikave neniꞌ nene haza nevo longoꞌ ogo gele-gedelesa nene noluve.
PHM 1:10 Idoꞌ longoꞌ ogo gele-gedelesa noluvoniꞌ nene nalatoꞌ mene minuvonguꞌ meleho loloꞌ okuvo aza izipahaꞌne loloꞌ ive Onesimoꞌnimuꞌ nene muheleꞌ gamazi nolo-gimuve.
PHM 1:11 Aꞌmine ve aza gomuꞌ geikisi minasida nene gonoka do-gedelidoꞌ lisiheꞌ amo minineꞌ ma neineꞌza idise geiꞌ gonokasi neniꞌ gonoꞌne nesi do-ledelidoꞌ lisiheꞌ gehepeve ogosa neive.
PHM 1:12 Aza neve nene neniꞌ veꞌne gihile gehepeve neineꞌza aꞌminemuꞌ nene gele hulosa geita gohi noimisele huluve.
PHM 1:13 Naza Kilisitoꞌ gamaziꞌve lamineꞌ lo soto sotoꞌ ogo minaaꞌ uvongumuꞌ nalatoꞌ mela nouvonguꞌ geitoꞌ medelo mino gonoꞌne do-nedaaꞌ ilingumuꞌ nene nenikisi ha minelive lo gele minuha ma imiselamuvodineꞌza
PHM 1:14 geitatiꞌ gamazi ma gele nemamo nolinidoꞌ nene initeꞌ do neꞌmine manaꞌmine uvoniꞌ gelalive losa nene alamuve. Idoꞌ neꞌmino alamuvoniꞌ nene Onesimoꞌ gonoꞌne do-nedelingumuꞌ nene oꞌve lo-delineꞌ aka hize tile-gedekuvosa gaza monovo do lamineꞌ ogo aꞌmine gono dalive loo lo nemelineꞌ nene edamilineꞌ o neivosa gasika nene lukaloꞌ do molosa neniꞌ gono do-nedelive lo lo nemeline losa nene alamuve.
PHM 1:15 Idoꞌ Oꞌmosoꞌmo lavo gamene liꞌnibemukovoꞌ geiꞌ hulo-gedo hota vo minineꞌ nene alingeꞌ tineꞌ molo ogo geikisi mudise miniviꞌ miniviꞌ ilisive lo nemuꞌ hulo-gedo vihe losa nene gele nouve.
PHM 1:16 Idoꞌ tineꞌ molo ogo geikisi minelineꞌ nene ha gonouꞌ ve neꞌminevoꞌ nene minelivoba asi Kilisitoꞌ evenele geze zuho luka emelinidoꞌ o minelivesi nene mineleseive. Ee, neze zuho luꞌne eme lamineꞌ o nouve loloꞌ ogo neiha geita nene gonouꞌ ve minosa idoꞌ Guvelesi vela giꞌmizo minosa geze zuho gehepevesi nene loloꞌ ogo mineleseinako neniꞌ luꞌne eme nouvoniꞌ nene ivileꞌ ivosa gaza nene luka vauve elosa emelinidoꞌ mineleseive.
PHM 1:17 Nemuꞌ nene gaza nenikumuꞌ gelanivo zogo naaꞌ olosive lamineꞌ nane lo gele naineꞌ nenako nemuꞌ nene Onesimoꞌ aza geiꞌ nanida naavo ma nene naza nanida alodoꞌ neleꞌmize lamineꞌ ilineꞌ akaloꞌ do molosa eleꞌmize lamineꞌ ozo.
PHM 1:18 Neꞌmine ilineꞌza aza neve gomuꞌ makaꞌ minasida ma do goloso o-gede nolihe idoꞌ geitatiꞌ initeꞌ maloꞌ golo hizo ma gemelidoꞌ o neivo ma nene aꞌmine initeꞌ mukitoꞌ nene neniꞌ golo hize-gedeloze. Neniꞌ gehe-nedezo.
PHM 1:19 Idoꞌ aꞌmine mene neniꞌ golo hize-gedelove noluvoniꞌ gamazi nene do amuzo molalosa luhuvo aꞌme ve nene Pauloꞌ neniꞌ aꞌnedunuꞌ gehepeve nogizuve: Aꞌmine neve neniꞌ golo hizo gemelesuve. Gemelesuha nenitatiꞌ dinaꞌ naba geita nene ha neineꞌ ma neineꞌza naza aꞌminemuꞌ nene ha luvodineꞌza ma lolosa gelamuve. Aꞌmine dinaꞌ nene adoꞌ Kilisitoꞌnimuꞌ neniꞌ lo sotoꞌ ogo lo-gemekuvo ezemuꞌ gele eleꞌvoleꞌ ogo minevoꞌ minevoꞌ gemeni dameni daningumuꞌ nene noluve.
PHM 1:20 Ne neiha neze zuho make, laza nene Guvelesi veꞌmi evenele nosineꞌ nenako geitatiꞌ initeꞌ ma daloho lo nogiluve. Aꞌmine nene adoꞌ Kilisitoꞌ evenele nosingumuꞌ ve lo neniꞌ luꞌneuꞌ do lamineꞌ o-nedo gele emanivo Onesimoꞌ nenita alive losa noluve.
PHM 1:21 Idoꞌ neꞌmine lo nogizuvoniꞌ nene gaza longoꞌ o-gedeloniꞌ votigile ivileꞌ ivosa initeꞌ lamineꞌ gohi masi imineꞌ molo olosane losa gele nouvoniꞌ nenako gamaziꞌne mene mo gele dalosane lo gele muꞌmusiꞌ o minosa nene nogizuve.
PHM 1:22 Idoꞌ gamazi hamoꞌ gohi ma neineꞌ neve nene neꞌmine lo noluve: Lingine nenikumuꞌ ve li Oꞌmosola laaꞌ naaniꞌ maloꞌ nene Oꞌmosoꞌmo gele lengemo neniꞌ neve nene lengita nimiselavo alosuve losa gele nouze. Ongaloniꞌ numuno lulo nene ma do vaꞌvaꞌ o nimikezo.
PHM 1:23 Idoꞌ nenikisi makaꞌ Izesuꞌ Kilisitoꞌnimuꞌ nalatoꞌ nosive Epahalaꞌ neꞌmo nene gopoꞌni nolive.
PHM 1:24 Idoꞌ makaꞌ gono daaꞌ unive adoꞌ Malekoꞌ ve Alisitakoꞌ ve Demaꞌ ve idoꞌ Lukaꞌ ve engiꞌ nete nene aꞌmineꞌmine igi gopoꞌni nilave.
PHM 1:25 Guvelesi ve Izesuꞌ Kilisitoꞌ nasahiliꞌve nene lengiꞌ lutinguꞌ mine molo minivoo.
HEB 1:1 Gozopoꞌ nene Oꞌmosoꞌmo gamaziꞌve avotemotine lo-ngemelesa nene ato atoꞌ gameneuꞌ monovo do ato atoꞌ ogo polohetela molavo ingine avotemotine li-ngimi ngimiꞌ iꞌmi igaꞌ aniꞌ ve.
HEB 1:2 Ne neiha gamene alingeꞌ idise mene noneꞌ gamenela nene Oꞌmosoꞌmo gamaziꞌve nene leliꞌ lo-lemelesa eiꞌ gipele neve imiselavo ogo lo-limineꞌ ve. Aꞌmine gipele nene initeꞌ mataliti meꞌnibo minelive lo eleꞌmize molo eiꞌ gipeleloꞌ aꞌmine initeꞌ mataꞌ mukiꞌ nene do sotoꞌ ineꞌ ve.
HEB 1:3 Aꞌmine gipele neve Oꞌmosoꞌmi monovo danavaꞌve atoliꞌmine goloso ogo lamineꞌ neineꞌ neꞌmi gihileꞌve gehepeve mino Oꞌmosoꞌmi emeni dameni neꞌmidoꞌ lisiheꞌ gehepeve o minive ne neive. Nemuꞌ aꞌmine gipele neꞌmo eiꞌ amuzoꞌveloꞌ molo gele mino laaꞌ neineꞌ gamazi neꞌmo nene initeꞌ mataꞌ mukiꞌ nene hize eleꞌ ivo laminekovoꞌ minaaꞌ neive. Idoꞌ aza nene goloso initete apase-ledaaꞌ akaꞌve vele osuꞌ lo-ledo veleta ve Guvelesi ve naba eitotiꞌ lemo minive nenako ana hulaaꞌ ida minineꞌ ve.
HEB 1:4 Mino Oꞌmosoꞌmi gipele ve li li-daniꞌ guliveꞌve neꞌmo Oꞌmoso gelekeleꞌ i-di gonoꞌve di-daaꞌ ave angeloliti guliveꞌine nene ivileꞌ ogo mino aꞌmine votigileloꞌ lisiheꞌ ogo ngivileꞌ goloso ogo dizosa neive.
HEB 1:5 Ee, Oꞌmosoꞌmo gipelemuꞌ lineꞌ gamazi nene angeloꞌ hamokumukisi ma lo-ngedamineꞌ nenako neꞌmo nene aza angeloꞌ ngivileꞌ ogo dizosa neive. Oꞌmosoꞌmo ezemuꞌ tiꞌ lo lineꞌ monoꞌ godolouꞌ gizi nizaniꞌ ma neive: Idise naza geiꞌ maho loloꞌ ogo neniꞌ gipeꞌne geiꞌ nene nane lo do ote-giduvoniꞌ ve. Idoꞌ ma lineꞌ gizi nizaniꞌ ma neive: Naza nene eiꞌ giduve melehine minekuvo Eze nene neniꞌ gipeꞌne minelive.
HEB 1:6 Idoꞌ Oꞌmosoꞌmo ganaꞌ gipele nene misubouko imiselelesa gohi lineꞌ gamazi ma tiꞌ li gizi nizaniꞌ ve: Oꞌmosoꞌmi angeloꞌ mukiꞌ ingine gubiꞌ izi imi opoꞌni lilizave.
HEB 1:7 Idoꞌ angeloꞌve ingine gelekeleꞌ i-di minaaꞌ avemuꞌ nene Oꞌmosoꞌmo gamazi tiꞌ lo lineꞌ luhuvo gizi nizaniꞌ ma neive: Oꞌmosoꞌmo lavo eiꞌ angeloꞌve nene hepeꞌ ngemeni dameni di otuhaaꞌ nave. Idoꞌ lavo aꞌmine gelekeleꞌ i-daaꞌ ave nene oloꞌ gulumo neꞌmine ngemeni dameni di otuhaaꞌ nave.
HEB 1:8 Neꞌmine o neineꞌza gipelemuꞌ neve monoꞌ godolouꞌ tiꞌ lo lineꞌ: Oꞌmosoo, gaza gizebo ogaꞌ moꞌmosikauꞌ gizebo ogo minelineꞌ nene huko vamo minevoꞌ minevoꞌ ogo mineleseive. Mineleseinako Guvekasi ve loloꞌ ogo minelineꞌ neꞌmi monovo nene monovo do lisiheꞌ ogaꞌ monovo nene mineleseive.
HEB 1:9 Gaza nene monovo lisiheꞌ laminetokovoꞌ luka molo mino goloso initeꞌ daaꞌ monovomuꞌ goseleꞌ gebelavo mehenga emaaꞌ nane. Neꞌmine ogaꞌ naneꞌ nenako Oꞌmoso geiꞌ Oꞌmosoka neꞌmo eveneka ngivileꞌ ogo gaza golize izo mineline lo aꞌmine moꞌmositoꞌ nene geleꞌmize molave.
HEB 1:10 Idoꞌ ma nene Oꞌmosoꞌmo gipelemuꞌ Guvekasi ve lo-do tiꞌ lo lo neineꞌ ma neive: Guvekasi ve, gaza ganaꞌ nene me misubo do sotoꞌ molanivo amuzo molo ha neive. Idoꞌ Okulumoꞌ nesi geiꞌ angadunuꞌ loloꞌ aineꞌ ve.
HEB 1:11 Ne neiha aꞌmine initeꞌ nene vi osuꞌ lilisasineꞌza gaza nene minevoꞌ minevoꞌ ogo haza minaaꞌ nane. Idoꞌ okulumoꞌ misubo nene eveneliti okoꞌnidoꞌ initeꞌ hulupovo ili goloso igaꞌ naniꞌ neꞌmine ilisasive.
HEB 1:12 Idoꞌ aꞌmine okulumoꞌ misubo nene litehe initeꞌ di gangi milaniꞌ maꞌmino gango moloko gosohoꞌ ha do sotoꞌ olosaba gaza neve ha minevoꞌ minevoꞌ ogo hazavoꞌ nanivo kilisimasi nene ogo vokaꞌ vokaꞌ ogo minelineꞌ nene osuꞌ lamoloseive.
HEB 1:13 Idoꞌ gipelemuꞌ tiꞌ lo lineꞌ gamazi neꞌmino nene angeloꞌ hamokumukisi lo-ngemesaꞌmive: Nezelotiꞌ geiꞌ nene nange. Aꞌne hulaaꞌ uvoda nene minezo. Mine do vo nanivo biluvaka nete gelekeleꞌ i-gidi minilizave lo gizengauꞌ doꞌmo leme-ngedelesuve.
HEB 1:14 Neꞌmine ma lo-ngedesaꞌmineꞌ nenako angeloꞌ ingine gipele neꞌminisa dizi minami ha Okulumoꞌ ngemeni damenisi Oꞌmosoꞌmi gelekeleꞌ veꞌve minikevo Oꞌmosoꞌmo do luꞌ izelesa leleꞌmize molave leliꞌ nene hize eleꞌ i-lidilizave lo ngimiselaaꞌ neive.
HEB 2:1 Idoꞌ monoꞌ gamazi nogiluneꞌ nene angeloꞌ ngivileꞌ ogo dize minive Oꞌmosoꞌmi gipeleꞌmo lo-limineꞌ gamazi nenako nemuꞌ nene aꞌmidoꞌ eꞌmeto novube lo zovoꞌ izo mala valonge. Aꞌmine nogiluneꞌ gamazi lamineꞌ mene lute gate molo gele lamineꞌ o mino eꞌmeto volone.
HEB 2:2 Oꞌmosoꞌmidatiꞌ gamazi ha angelolite laniꞌ gamazi Moseꞌ gizineꞌ neꞌmo nene amuzoꞌvesi miningumuꞌ aꞌmine gamazi nene ma avutoꞌ igi gili hulave engiꞌ nene aꞌmine gamazi avutoꞌ aniꞌ votigileloꞌ nene di mili lihime ngimi mulumo initeꞌ di-ngidaaꞌ aniꞌ ve.
HEB 2:3 Idoꞌ aꞌmine amuzoꞌve ngomosi minineꞌ gamazi avutoꞌ ave nene mulumo niteꞌ neꞌmine di-ngidaaꞌ aniꞌ nenako aꞌmine Moseꞌ gizineꞌ gamazi ivileꞌ ogo dizo minineꞌ initeꞌ naba Oꞌmosoꞌmo lihimete hulo-ledo do luꞌ izelineꞌ akate vele-lidineꞌ neꞌmi gamazi nene gilube gelamube ogo mineloneꞌ nene Oꞌmosoꞌmo lihime lemo mulumo niteꞌ naba do-ledeleseive. Idoꞌ aꞌmine mulumo niteꞌ naba do-ledelingutiꞌ nene mo ngelo olovoꞌ amolosune. Idoꞌ aꞌmine Oꞌmosoꞌmo lihimete hulo-ledo do luꞌ izelineꞌ gamazi nene Guvelesi ve asiꞌve ganatilise lo sotoꞌ ivo eze veletiꞌ gilave nete lezela li hulaniꞌ ve.
HEB 2:4 Idoꞌ lezela nili hulavo aꞌmine gamazi nene lamineꞌ ve li ningilizave lo Oꞌmosoꞌmo eiꞌ gala gilidoꞌ do molo atoꞌ suno ogo amuzo malehe initeꞌ ato atoliꞌmine do sotoꞌ ogo idoꞌ aꞌmine gamazi li-limave nene Sikalahuꞌvelatiꞌ amuzo ato atoꞌ lehize-ngedo minineꞌ ve. Idoꞌ Oꞌmosoꞌmo neꞌmine ineꞌ nenako nemuꞌ nene aꞌmine lihimete hulo-ledo do luꞌ izelineꞌ gamazi nene laminetoꞌ mo initeꞌ naba goloso neive. Nemuꞌ nene lute gate molo gele lamineꞌ o mino eꞌmeto volone.
HEB 2:5 Idoꞌ idise lo-lingimuvoniꞌ nene monovo gosohoꞌ sotoꞌ ilinguꞌ vi hilalizaniꞌ alevemuꞌ nene lo-lingimuvoniꞌ ve. Idoꞌ aꞌmine monovo gosohoꞌ sotoꞌ ilinguꞌ vi hilalizaniꞌ aleve nene angeloꞌ engitoꞌ neve gelekeleꞌ i-ngidi minikevo gizebo i-ngidilizave lo Oꞌmosoꞌmo ma lo-ngedamive.
HEB 2:6 Idoꞌ monoꞌ godolouꞌ gamazi ma ve maliꞌmo Oꞌmoso lo-imineꞌ gamazi ma tiꞌ lo gize neineꞌ ma neive: Laza eveneꞌ ngomo haza niteꞌ noneꞌ lelikumuꞌ nene gaka gelo minelinidoꞌ minamaneꞌza aizo, lelikumuꞌ nene gaka gelo minaaꞌ nane. Idoꞌ eveneꞌ lemeni dameni nene lamineꞌ amivo gaza gizebo o-ledelinidoꞌ minamaneꞌza gaza nene ha gizebo o-ledaaꞌ nane. Idoꞌ neꞌmine o-ledaaꞌ naningumuꞌ nene naza aizo lo gelekuve.
HEB 2:7 Eveneꞌ nene angeloꞌ engitotiꞌ gamene liꞌnibevoꞌ lemetiꞌ igi minilizave lo gaza eveneꞌ nene angelototiꞌ do leme-ngedo molo-ngede nane. Gaza eveneꞌ nene do hozi lo-ngedo guveꞌinesi ve loloꞌ o-ngedane.
HEB 2:8 Idoꞌ neꞌmine o-ngedo eveneꞌ nete initeꞌ mataꞌ mukitoꞌ gizebo igi minilizave lo aꞌmine initeꞌ mataꞌ mukiꞌ nene eveneliti gizeꞌinguꞌ do leme-ngedaaꞌ nane. Ee, Oꞌmosoꞌmo initeꞌ mukiꞌ nene eveneliti gizeꞌninguko do leme-ngedo molave. Neꞌmine ogavo initeꞌ hamokisi evenelite gizebo amilizave lo molaniꞌ initeꞌ nene ma nizamave. Ne neiha idise gameneuko ningaaꞌ nouneꞌ nene initeꞌ mukiꞌ nete eveneꞌ nene olihe gelekeleꞌ i-ngidi osuꞌ lamavo ningaaꞌ noune.
HEB 2:9 Idoꞌ ningo gelaaꞌ nouneꞌ nene Oꞌmoso aza angelototiꞌ gamene liꞌnibevoꞌ lemetiꞌ ogo minelive lo angelototiꞌ do lemetiꞌ ogo hulo-dive Izesuꞌnimuꞌ nene ningo gelaaꞌ noune. Ee, Oꞌmosoꞌmo nasahiliꞌ o-ledo eveneꞌ mukikumuꞌ helelive lo imiselineꞌ ve. Idoꞌ aꞌmine ve Izesuꞌ nene mulumo gelo hilingumuꞌ ve lo Oꞌmosoꞌmo do hozi lo-doo Guvelesi ve loloꞌ o-dineꞌ nemuꞌ nene mo ningo gelaaꞌ noune.
HEB 2:10 Idoꞌ Oꞌmosoꞌmo Izesuꞌni imiselo mulumo alumo gelo helelive lineꞌ nene nanitekumuꞌ ve. Izesuꞌ nene do luꞌ izelineꞌ gono dalidoꞌ olihe lisiheꞌ gehepeve amo minineꞌ nenako nemuꞌ mulumo alumo gelo helelineꞌ neꞌmo aꞌmine leliꞌ do luꞌ izelineꞌ gono nene dalidoꞌ do lisiheꞌ gehepeve o-delingumuꞌ mulumo alumo gelo helelive lo Oꞌmosoꞌmo imiselineꞌ ve. Idoꞌ izipahala vaiꞌ leleꞌmize molo atoliꞌmine ogo do lamineꞌ o-ledelesa gono doꞌmo vo miningutiꞌ nene Oꞌmoso aza leliꞌ gomuꞌ molo lemo akate velo do luꞌ izelive Izesuꞌ mulumo alumo gelo helelive lo imiselineꞌ neꞌmo nene monovo do lamineꞌ goloso ineꞌ ve. Ee, initeꞌ mataꞌ mukiꞌ eiꞌ initeꞌve eikumukovoꞌ mini di dizilizave lo do sotoꞌ molave eveneꞌ naba Oꞌmoso aza Izesuꞌni nene do luꞌ izelidoꞌ do lisiheꞌ o-delesa mulumo alumo gelo helelive lo imiselineꞌ neꞌmo nene monovo do lamineꞌ goloso ineꞌ ve.
HEB 2:11 Idoꞌ eveneꞌ lute noso izo gilito do lamineꞌ o-ledo do Oꞌmosoꞌmi evenele loloꞌ o-ledaaꞌ ivesi idoꞌ lute do lamineꞌ o-lidineꞌ alevesi leliꞌ meteho nene hamoꞌ minineꞌ aleve none. Nemuꞌ aza lelikumuꞌ nene neniꞌ akuꞌne aluꞌne zuho nizave lolosa ovozo helesaꞌmive.
HEB 2:12 Idoꞌ akuꞌne aluꞌne zuho ve lineꞌ nemuꞌ monoꞌ godolouꞌ Oꞌmoso lo-imineꞌ gamazi ma tiꞌ li gizi nizaniꞌ ma neive: Naza neniꞌ akuꞌne aluꞌne zuho nene geiꞌ guliveka nene lo sotoꞌ o ngemo geiꞌ guliveka do hozi lo leliꞌ zuholiti muliseuꞌ nene nama lolosuve.
HEB 2:13 Idoꞌ leliꞌ eveneliti lemeni damenisi minelingumuꞌ lineꞌ gamazi gohi ma tiꞌ li gizi nizaniꞌ ma neive: Naza Oꞌmosomuꞌ gele eleꞌvoleꞌ o mino eitoꞌ lehete o minelove. Neꞌmine lo gohi ma tiꞌ lo lineꞌ ma neive: Idoꞌ naza nene Oꞌmosoꞌmo neze izipahaꞌne zuho nimineꞌ mesi noneꞌ ningilo.
HEB 2:14 Idoꞌ aꞌmine izipahala zuho laza nene hele vaaꞌ okodesi noneꞌ nenako aꞌmineꞌmine ogo Izesuꞌ aza helelineꞌ neꞌmo helaaꞌ amuzo do minive Satani nene do goloso o-do idoꞌ helakumuꞌ ngehelele izaaꞌ neꞌmo gesi hizo hulo lulouꞌ o-ngedavo ngehelele izaaꞌ lulouꞌ minave nesi nene aza helosa gesi kele hulo-ngedelesa hele vaaꞌ okode neꞌmine do otuho minineꞌ ve.
HEB 2:16 Idoꞌ neꞌmine ineꞌ nene angeloꞌ aleve do nguꞌ izo neꞌmine ineꞌ nevoba monoꞌ godolouꞌ Abalahamuꞌ aꞌvopilemoꞌ zuho do nguꞌ izaaꞌ neive li gizi nizadoꞌ eꞌmeto neꞌmine ineꞌ ve.
HEB 2:17 Idoꞌ nemuꞌ nene eveneliti lihimete apase-ledelesa leliꞌ hele vaaꞌ okode neꞌmine do otuho nakunolo alunolo zuho leliꞌ gehepeve neꞌmine loloꞌ ilineꞌ ogavo idoꞌ evenetoꞌ medeli mini Oꞌmoso initeꞌ lehizi-daaꞌ ave naba nete eveneliti lihime apasaakumuꞌ gono daaꞌ nanako neꞌmine ve loloꞌ ogo eveneꞌ muhelete ningo Oꞌmosoꞌmi veleloꞌ monovo lisihetotiꞌ Oꞌmosoꞌmo lidokovoꞌ gono dalosa eze akunolo alunolo zuho leliꞌ gehepeve neꞌmine loloꞌ ilineꞌ ogavo loloꞌ ineꞌ nenako aza nene leliꞌ gehepeve neꞌmine loloꞌ amidiniko aꞌmine gono nene dalidoꞌ lisiheꞌ mo amidine. Nemuꞌ nene leliꞌ gehepeve neꞌmine loloꞌ ilineꞌ ogavo loloꞌ ineꞌ ve.
HEB 2:18 Ee, idoꞌ emenguꞌ milanguꞌ mulumo gelo minineꞌ nemuꞌ nene mo ningo gele neineꞌ nenako ve ma ingine ngemenguꞌ nimilavo minilizaniꞌ aleve nene hize eleꞌ noo-ngedo alete molo-ngedelidoꞌ o neive.
HEB 3:1 Nemuꞌ nene neze zuho, Oꞌmosoꞌmo eiꞌ ve lo Okulumokuꞌ voloningumuꞌ lengeleꞌmize molave lingine nene leliꞌ monokuꞌ nene Oꞌmosoꞌmo eiꞌ velemuꞌ ogo imiselavo ave aposolo mino evenetoꞌ medeli mini Oꞌmoso initeꞌ lehizi-daaꞌ ave naba neꞌmine minive naba Izesuꞌnimuꞌ nene gatine gili minilo.
HEB 3:2 Moseꞌ aza Oꞌmosoꞌmi zuhola gono danguꞌ nene Oꞌmosoꞌmo lo-didokovoꞌ eꞌmeto monovoꞌve lisihetotiꞌ gono do do vineꞌ neꞌmine ogo Izesuꞌ aza nesi aꞌmineꞌmine ogo gonoloꞌ eleꞌmize molave Oꞌmosoꞌmi gamaziꞌve nene ivileꞌ amo lo-didokovoꞌ eꞌmeto monovoꞌve lisihetotiꞌ gono do do vineꞌ ve.
HEB 3:3 Idoꞌ eveneꞌ zuho maliti meꞌnibi guvele neꞌmo aꞌmine zuholiti guveꞌine nene ivileꞌ ogo naba minaaꞌ neineꞌ neꞌmino Izesuꞌ gulive do hozi loloneꞌ nene Moseꞌ gulive do hozi laaꞌ nouneꞌ nene ivileꞌ ivosa do hozi lolonidoꞌ lisiheꞌ o neive. Idoꞌ lisiheꞌ o neineꞌ nenako nemuꞌ nene ezemuꞌ gatine gili minilo.
HEB 3:4 Idoꞌ neꞌmine lo Oꞌmosoꞌmi evenele zuholiti meꞌnibo nene Izesuꞌnimuꞌ luvoniꞌ gilineꞌ nenako nemuꞌ nene lo-lengemelove. Eveneꞌ zuho ato atoꞌ di sotoꞌ i-ngidave meꞌninge nene minamaniꞌ nevoba ha minaniꞌ ma neive. Ha minaniꞌza aꞌmine initeꞌ mataꞌ mukiꞌ do sotoꞌ molave nene Oꞌmosoꞌmovoꞌ do sotoꞌ molaniꞌ nenako eiꞌ hamoꞌ nene meꞌnibo neive.
HEB 3:5 Idoꞌ Moseꞌ nene Oꞌmosoꞌmo lo-didokovoꞌ eꞌmeto monovoꞌve lisihetotiꞌ Oꞌmosoꞌmi zuhola gono do do vineꞌ nene ha Oꞌmosoꞌmi gelekeleꞌ veꞌvevoꞌ mino Oꞌmosoꞌmi gamaziꞌve alingeꞌ sotoꞌ ilingumukovoꞌ gamazi lo ngeme ngemeꞌ ogo gono do do vineꞌza
HEB 3:6 Kilisitoꞌ aza neve Oꞌmosoꞌmo lo-didokovoꞌ eꞌmeto monovoꞌve lisihetotiꞌ gono do do vineꞌ nene mo Oꞌmosoꞌmi gipele mino eze zuholoꞌ gizebo o-ngede mino gono do do vineꞌ ve. Idoꞌ eze zuho ve luvoniꞌ nene laza Kilisitoꞌ do luꞌ izelive lo ezemuꞌ gele eleꞌvoleꞌ o mino lolize izaaꞌ nouneꞌ monovote nene ma hulamosoꞌ aꞌmine zuho nene leliꞌ minelesune.
HEB 3:7 Nemuꞌ nene laza Oꞌmosoꞌmi Sikalahuliꞌmo gamazi ma tiꞌ lo lineꞌ mamuꞌ nene gele dalone: Moseꞌ aza ebeꞌ hadivela ngeleꞌmizo novivo Oꞌmoso golo izaniꞌ gameneuꞌ eveneꞌ ingine Oꞌmosoꞌmi gamaziꞌve gili huli gili dalisa gilami aꞌmanapa igi minaniꞌ neꞌmine igi minami lingine eiꞌ noloꞌve idise aꞌmene ma nigili ma lutine di aꞌmanapa igi gili hulamilo.
HEB 3:9 Idoꞌ aꞌmine ebeꞌ hadivela nene avotinge ingine initeꞌ mataꞌ mukiꞌ engita ogo molo uvoniꞌ nene kilisimasi foti (40) neꞌmine nene mini ningi minaniꞌza ningi huli-nidi goꞌne iziꞌmi igi minaniꞌ ve.
HEB 3:10 Nemuꞌ nene naza aꞌmine alevemuꞌ nene muluꞌneuꞌ goloso gehepeve gelo engikumuꞌ tiꞌ lo luvoniꞌ ve: Engiꞌ luꞌine neꞌmo gamene gamene gopo akaloꞌ vaaꞌ ivo neze akaꞌne nene ningi hulaniꞌ ve.
HEB 3:11 Nemuꞌ nene nizeboloꞌ molaniꞌ nenako naza laminetoꞌ nolo hukuve lo tiꞌ lo luvoniꞌ ve: Ingine nene neniꞌ mine gelaaꞌ ebeꞌneuꞌ nene igi mini gilamilisave lo noluve.
HEB 3:12 Nemuꞌ nene neze zuhokizo, lengikutiꞌ eveneꞌ ma nene lutine golososi mini Oꞌmosomuꞌ gili eleꞌvoleꞌ ami minevoꞌ minevoꞌ ogo gono daaꞌ ive Oꞌmoso nene mehedine imikelizaze. Eheꞌ igi minilo.
HEB 3:13 Idoꞌ lengikutiꞌ eveneꞌ ma lingine lutine Oꞌmosola molakumuꞌ lutine aꞌmanapa ogavo lihime daaꞌ monovo goloso neꞌmo lingimimiseꞌ ogavo goloso ikelizaze. Monoꞌ godolouꞌ idise gamene ve laniꞌ nene ha neidokovoꞌ monokuꞌ nene ne luꞌne do ngi lo-nede ge luka do ngi lo-gede livoꞌ minilo.
HEB 3:14 Laza ganaꞌ apiꞌ ogo Kilisitoꞌnimuꞌ gele eleꞌvoleꞌ uneꞌ nene hulamo do giliꞌ lo nonivo idise mene noneꞌ gamene osuꞌ lilineꞌ nene aꞌneꞌmovoꞌ Kilisitoꞌ evenele loloꞌ uneꞌ nene gihile mineleseive.
HEB 3:15 Nemuꞌ nene monoꞌ godolouꞌ tiꞌ li gizi nizaniꞌ gamazi maloꞌ eꞌmeti minilo: Eveneꞌ ingine Oꞌmosoꞌmi gamaziꞌve gili huli gili dalisa gilami aꞌmanapa igi minaniꞌ neꞌmine igi minami lingine eiꞌ noloꞌve idise aꞌmene nigili ma lutine di aꞌmanapa igi gili hulamilo.
HEB 3:16 Idoꞌ monoꞌ godolouꞌ gamazi idise lo sotoꞌ uvoniꞌ neꞌmo nene laminetoꞌ tiꞌ lo nolo-limive: Laza Oꞌmosoꞌmi gamazi gele damo mehede emo mineloneꞌ nene Oꞌmosoꞌmo mine gelaaꞌ lemelesa neinguꞌ nene ngelo vo holamolosune. Ee, Oꞌmosoꞌmo gamazi nolo-ngimivo gili minisasi aꞌmine gamaziloꞌ eꞌmetami meheꞌine imave li monoꞌ godolouꞌ gizaniꞌ ma nene zamotinemuꞌ luhuvo gizaniꞌ neve. Moseꞌ Aigita misuboutiꞌ ngeleꞌmizo aniꞌ aleve mukiꞌ engikumuꞌ nene luhuvo gizaniꞌ ve.
HEB 3:17 Idoꞌ kilisimasi foti (40) neꞌmi lulouꞌ ma nene Oꞌmosoꞌmo zamotinemuꞌ mulunouꞌ goloso gehepeve gilineꞌ neve. Aꞌmine hamoꞌ aleve ingine kilisimasi foti (40) neꞌmi lulouꞌ lihime di ebeꞌ hadivela hili geseꞌ aniꞌ aleve engiꞌ nemuꞌ nene mulunouꞌ goloso gehepeve gilineꞌ ma neive.
HEB 3:18 Idoꞌ Oꞌmoso aza eveneꞌ mine gelaaꞌ ebeꞌ ngemelesa nouvonguꞌ nene ingine mini gilamilisave lo eveneꞌ zamotinemuꞌ lo huko lineꞌ ma neve. Aꞌmine hamoꞌ aleve ingine Oꞌmosoꞌmi gamazi gili huli meheꞌine imave engikumuꞌ nene mine gelaaꞌ ebeꞌ ngemelesa nouvonguꞌ nene igi mini gilamilisave lo lo hukineꞌ ve.
HEB 3:19 Nemuꞌ nene ingine Oꞌmosomuꞌ gili eleꞌvoleꞌ ami meheꞌine imaaꞌ aniꞌ monovoꞌine neꞌmo nene mine gelaaꞌ ebeꞌ ngemelesa inguꞌ nene vamaniꞌ ve lo mo ningo gele none.
HEB 4:1 Idoꞌ nemuꞌ nene Oꞌmosoꞌmo eveneꞌ ma ingine mine gelaaꞌ ebeꞌneuꞌ nene vi hilalisave lo lo hukineꞌ gamazi nene olihe ogo gihile izamivo aꞌmineꞌmi akaꞌvesi olihe tilamidoꞌ nene Oꞌmosoꞌmo lengikumuꞌ gala gelosa lengikutiꞌ eveneꞌ mamuꞌ mo aka ivileꞌ ikenako aꞌminguꞌ mo kekeꞌ vi hilamilisave lo gelalize. Laza eheꞌ ogo golise gelo minelone.
HEB 4:2 Idoꞌ laza eheꞌ ogo golise geleloneꞌ nene nanitekumuꞌ ve. Moseꞌ mininguꞌ minaniꞌ aleve monoꞌ gamazi lamineꞌ li-ngimaniꞌ neꞌmine igi lezesi li-limikevo none. Idoꞌ aꞌmine monoꞌ gamazi lamineꞌ nene li-ngimi ngimiꞌ avo gilaniꞌza ingine aꞌminemuꞌ gili eleꞌvoleꞌ igi eꞌmetisaꞌmadiꞌmo engita vo gihile izamo hize eleꞌ o-ngedamaaꞌ ineꞌ ve. Nemuꞌ nene laza engiꞌ aniꞌ monovo nemuꞌ gelo golise gelo eheꞌ ogo minelone.
HEB 4:3 Idoꞌ Oꞌmosoꞌmo ezemuꞌ gili eleꞌvoleꞌ ami meheꞌine imaaꞌ avemuꞌ ingine mine gelaaꞌ ebeꞌneuꞌ igi mini gilamilisave lo lo hukokuve lineꞌ nenako nemuꞌ nene aꞌneꞌmine ve ingine mine gelaaꞌ ebeꞌveuꞌ nene vi hilamilizadoꞌ mini mili minikevo aꞌmine mine gelaaꞌ ebeꞌveuꞌ vo holalonive nene ezemuꞌ gele eleꞌvoleꞌ ogo nonive leliꞌ nene none. Idoꞌ ingine Oꞌmosoꞌmi mine gelaaꞌ ebeꞌveuꞌ vi hilamaniꞌ nene mine gelaaꞌ ebeꞌve nomivosa nevoba asi aza okulumoꞌ misubo do sotoꞌ ogo gono do osuꞌ lidotiꞌ nene mine gelo neineꞌ nenako mine gelaaꞌ ebeꞌve nene mo neive.
HEB 4:4 Idoꞌ Oꞌmoso aza mine gelo neive luvoniꞌ nene Oꞌmosoꞌmo gamene sigisi (6) neꞌmi lulouꞌ gono davo gamene seveni (7) ineꞌ nemuꞌ nene monoꞌ godolouꞌ gamazi tiꞌ li gizi nizaniꞌ ma neive: Gamene seveni (7) ogavo gonoꞌve osuꞌ lineꞌ nenako neuꞌ nene apiꞌ ogo mine gilineꞌ.
HEB 4:5 Idoꞌ mine gelo neive li luhuvo gohi gizaniꞌ ma tiꞌ lo lineꞌ neuko mo lo-lengemekuve: Ingine nene mine gelaaꞌ ebeꞌneuꞌ nene igi mini gilamilisave.
HEB 4:6 Idoꞌ naza gomuꞌ lo-lingimuvoniꞌ gamazi malotiꞌ nene eveneꞌ ma ingine Oꞌmosoꞌmi mine gelaaꞌ ebeꞌveuꞌ vi hilalizaniꞌ aka nene ha ngolokovoꞌ lo minivo minineꞌ nenako idoꞌ gomuꞌ minanguꞌ nene monoꞌ gamazi lamineꞌ li-ngimikevo gilave engiꞌ nene aꞌmine gamazi gili eleꞌvoleꞌ igi eꞌmetisaꞌmadiꞌmo Oꞌmosoꞌmi mine gelaaꞌ ebekuꞌ nene ma vamaniꞌ nenako
HEB 4:7 aꞌminguꞌ vo holaloneꞌ gamene atoꞌ gohi ma do kegeso molo-lidineꞌ ve. Idoꞌ aꞌmine gamene nene idise mine do nodizuneꞌ gamene ne neive. Ee, Moseꞌ eveneꞌ ngeleꞌmizo vineꞌ gamenelotiꞌ kilisimasi vaiꞌ goloso ogo vavo aꞌmine gamenemuꞌ nene idise mine do nouneꞌ gamene ve lo Oꞌmosoꞌmo Davidiꞌ veleuꞌ molavo aꞌmine lo-lingimuvoniꞌ gamazi ma nene Davidiꞌ tiꞌ lo lineꞌ ve: Lingine eiꞌ noloꞌve idise aꞌmene ma nigili ma lutine di aꞌmanapa igi gili hulamilo.
HEB 4:8 Idoꞌ Moseꞌ helavo Zosuvaꞌ ezeloꞌ medelo Kanaha misubouꞌ ngeleꞌmizo vineꞌ mauꞌ nene ingine mine gelaaꞌ ebeꞌ nene dadiniko Oꞌmosoꞌmo mine gelaaꞌ ebekuꞌ vo holaaꞌ gamene atoꞌ gohi mamuꞌ alingeꞌ ma lamidine.
HEB 4:9 Nemuꞌ nene Oꞌmosoꞌmo gonoꞌve do osuꞌ losa mine gilineꞌ neꞌmine ogo eze evenele zuho mine geleloneꞌ gamene nene lelikumuꞌ ha gizebo ogo neive.
HEB 4:10 Ee, Oꞌmosoꞌmi mine gelaaꞌ ebekuꞌ vo holalonive laza nene Oꞌmosoꞌmo initeꞌ mataꞌ loloꞌ ogo osuꞌ lo gonoꞌve hulo mine gilineꞌ neꞌmino lazasi gonotesi hulo aꞌmida mudise aka vo mine gelelesunako nemuꞌ nene Oꞌmosoꞌmi evenele zuho mine geleloneꞌ gamene nene lelikumuꞌ gizebo ogo neive.
HEB 4:11 Nemuꞌ nene laza Moseꞌ mininguꞌ minaniꞌ aleve Oꞌmosoꞌmi gamazi gili huli eꞌmetami aꞌmine mine gelaaꞌ ebekuꞌ vi hilamaniꞌ neꞌmine ogo engiꞌ aniꞌ neꞌmine oloneꞌ neꞌmo aꞌmine mine gelaaꞌ ebekuꞌ nene vo holamo zovoꞌ izo mauꞌ vogalonge. Mine gelaaꞌ ebekuꞌ voloningumuꞌ nene Oꞌmosomuꞌ gele eleꞌvoleꞌ ogo eze gamaziꞌve nene amuzo molo gele do vo minelone.
HEB 4:12 Ee, Oꞌmosoꞌmi gamazi neꞌmo nene gilizevo ogo haza minamo amuzoꞌvesi goloso mino gono dovo dovoꞌ ogo mino bainati miteꞌ velela geꞌno mehenela geꞌno gohe goloso minaaꞌ neineꞌ nene ivileꞌ ogo gohe goloso neive. Idoꞌ bainati miteꞌ nene eveneꞌ hize sato sokuluꞌ lo lulouꞌ gehepeve vaaꞌ neineꞌ nene ivileꞌ ogo aꞌmine Oꞌmosoꞌmi gamazi neꞌmo luteuꞌ vodeuꞌ nene hize sokuluꞌ lo vo holosa laza lute gateuꞌ olosa giluneꞌ initekumuꞌ nene izeꞌ molaaꞌ neive.
HEB 4:13 Oꞌmosoꞌmo do sotoꞌ molaniꞌ initeꞌ mukiꞌ nene haleki minilizadoꞌ ma minamavo aza ningesaꞌmineꞌ initeꞌ nene hamokisi mo kekeꞌ nizamave. Ee, leze monovote izeꞌ molo-ledelive eiꞌ veleloꞌ nene initeꞌ mukiꞌ hiti minami sotokovoꞌ minaaꞌ naniꞌ nenako nemuꞌ aꞌmine Oꞌmosoꞌmi gamazi nene amuzo molo gele do minelone.
HEB 4:14 Idoꞌ evenetoꞌ medeli mini Oꞌmoso initeꞌ lehizi-daaꞌ ave nabalitevoꞌ monoꞌ numuno nabauꞌ lavolavo izi hukikaniꞌ nene di vesemeꞌ ili Oꞌmosoꞌmi moꞌmosiꞌvevoꞌ ve languꞌ dizaaꞌ aniꞌ neꞌmine ogo Oꞌmosoꞌmi gipele Izesuꞌ aza evenetoꞌ medelo mino Oꞌmoso initeꞌ lehize-daaꞌ ive nabate dizo minive loloꞌ ogo okulumoꞌ ivileꞌ ogosa hozila Oꞌmosoꞌmi moꞌmosiꞌve gehepeve neida Okulumokuko dizo minineꞌ nenako nemuꞌ monote gele eleꞌvoleꞌ uneꞌ nene do amuzo molo do ngi lo do minelone.
HEB 4:15 Idoꞌ monote nene do amuzo molo do ngi lo do mineloneꞌ nene evenetoꞌ medelo mino Oꞌmoso initeꞌ lehize-daaꞌ ivete naba nene lemenguꞌ neꞌmi lulouꞌ mino amuzote nomivo gilizevo ogo nonivo aza nene mulumote ningamo ninge mate-ledaaꞌ ive minineꞌ nevoba lelita lemenguꞌ ato atoꞌ mukiꞌ sotoꞌ ogaꞌ neineꞌ neꞌmino ezelasi nene emenguꞌ ato atoliꞌmine sotoꞌ o-dineꞌ nenako nemuꞌ nene leliꞌ mulumote ningelidoꞌ lisiheꞌ o neive. Ee, lelita lemenguꞌ sotoꞌ ogaꞌ neineꞌ neꞌmino ezelasi sotoꞌ ineꞌza aza neve lihime hamokisi ma damive. Idoꞌ leliꞌ mulumote ningelidoꞌ lisiheꞌ o neineꞌ nenako nemuꞌ nene monote nene do amuzo molo do ngi lo do minelone.
HEB 4:16 Idoꞌ evenetoꞌ medelo mino Oꞌmoso initeꞌ lehize-daaꞌ ive nabate neꞌmo leliꞌ mulumote ningelidoꞌ lisiheꞌ o minive aza nene Oꞌmoso neida leliꞌ gamazite hize eleꞌ olosa vo neineꞌ nenako nemuꞌ laza geni lebeleli gameneuꞌ nene Oꞌmosoꞌmo isete izo idoꞌ nasahiliꞌ o-ledo ha hize eleꞌ o-ledeleseive lo aꞌmine geni lebelelineꞌ initeꞌ nemuꞌ nene lovoꞌ kiselevoꞌ ogo lo-emesoꞌ nene Oꞌmoso aza moꞌmosiꞌveloꞌ mino gizebo o-ledo nasahiliꞌ o-ledo minaaꞌ neingumuꞌ nene ha lo-emelone.
HEB 5:1 Idoꞌ neꞌmino geni lebeleli initekumuꞌ Oꞌmoso lo-emeloneꞌ nene evenetoꞌ medelo mino Oꞌmoso initeꞌ lehize-daaꞌ ive nabaꞌmi monovo tiꞌ lo neingumuꞌ nene gelo ma neꞌmine ha olosune. Neꞌmino neive: Evenetoꞌ medeli mini Oꞌmoso initeꞌ lehizi-daaꞌ ave mukiꞌ ngeleꞌmizi milikaꞌ milikaꞌ igaꞌ naniꞌ nene sipisipi nevoꞌmine initeꞌ lihimete apase-ledelive li Oꞌmoso imilisa di aniꞌ nene ngibili Oꞌmoso imaniꞌ initeꞌ ato atoꞌ mukiꞌ nesi olokuꞌ gizikaꞌ gizikaꞌ igi minilisa eveneꞌ lelikumuꞌ ve li Oꞌmosola gono di hizi eleꞌ i-lidilizave minilizave lo Oꞌmosoꞌmo lidoꞌ igi eveneꞌ engikutiꞌ nene ma ngeleꞌmizi milaaꞌ nave.
HEB 5:2 Idoꞌ aꞌmine evenetoꞌ medeli mini Oꞌmoso initeꞌ lehizi-daaꞌ ave naba nene haza eveneꞌ mini inginesi nene eveneꞌ mukiꞌ amuzote nomineꞌ mino aka laminetotiꞌ zovoꞌ izo vaaꞌ nouneꞌ neꞌmine nene ha ilizadoꞌ o neineꞌ nenako nemuꞌ nene monoꞌ gili lamineꞌ ami zovoꞌ izi vaaꞌ naniꞌ neꞌmino lazasi zovoꞌ izo vunidine li neꞌmine aniꞌ aleve nene mulumoꞌine gili hongu monovo ngelebizilizadoꞌ o neive.
HEB 5:3 Idoꞌ aꞌmine evenetoꞌ medeli mini Oꞌmoso initeꞌ lehizi-daaꞌ ave nabasi nene amuzoꞌine nomineꞌ mini zovoꞌ ha izi vilizadoꞌ i nizaniꞌ nenako nemuꞌ evenekumuꞌ nene lihimeꞌine apase-ngedelive li sipisipi nevoꞌmine initeꞌ ngibili olokuꞌ gizi Oꞌmoso imilizaniꞌ neꞌmine igi angiseꞌinemukisi ma imilizaniꞌ o neive.
HEB 5:4 Aꞌmine evenetoꞌ medelo mino Oꞌmoso initeꞌ lehize-daaꞌ ive nabaꞌmi gono nene dizosa neive. Idoꞌ aꞌmine gono dalisa nene ve malite engiꞌ luꞌnidoꞌ di mili ma disaꞌmave. Oꞌmoso asiꞌve nene Moseꞌ uvoloho Aloniꞌni nene do ote-davo neꞌmine gono daniꞌ maꞌmine ogo eveneꞌ ma do ote-ngedavo aꞌmine gono nene daaꞌ nave.
HEB 5:5 Idoꞌ Kilisitoꞌ nene aꞌmineꞌmine ogo eiꞌ gala gilidoꞌ do molo eiꞌ okoꞌno do hozi lo evenetoꞌ medelo mino Oꞌmoso initeꞌ lehize-daaꞌ ive naba loloꞌ amineꞌ. Asi Oꞌmoso neꞌmo eleꞌmize nomolo tiꞌ lo lo-dineꞌ ve: Idise naza geiꞌ maho loloꞌ ogo neniꞌ gipeꞌne geiꞌ nene nane lo do ote-giduvoniꞌ ve.
HEB 5:6 Idoꞌ monoꞌ gamazi gohi mautiꞌ Kilisitoꞌ nene Abalahamuꞌni noꞌnohoꞌ ize-dive Melekisedekiꞌ gono daaꞌ ineꞌ neꞌmino aꞌmidoꞌ medelo do mino evenetoꞌ medelo mino Oꞌmoso initeꞌ lehize-daaꞌ ive minelive lo Kilisitoꞌnimuꞌ tiꞌ lo lineꞌ: Oꞌmoso neniꞌ nimaniꞌ initeꞌ nene Melekisedekiꞌ gono daaꞌ ineꞌ monovoloꞌ ogo evenetoꞌ medelo mino initeꞌ lehize-nedaaꞌ anive minevoꞌ minevoꞌ ogo minelesane.
HEB 5:7 Izesuꞌ aza misubouko ve loloꞌ ogo minineꞌ gameneuꞌ nene aza helaaꞌ akaloꞌ novingutiꞌ do tiꞌne-do do uꞌ izeli amuzoꞌvesi minive Oꞌmosola nene vise nabaꞌ naba lo idoꞌ Oꞌmosola loo veletiꞌ ive novozo limineꞌ. Neꞌmine ogavo aza okoꞌno doꞌmo lemo gelekeleꞌ o-nedaaꞌ ingumuꞌ ve lo Oꞌmosoꞌmo gele imineꞌ.
HEB 5:8 Aza nene Oꞌmosoꞌmi gipele minineꞌza mulumo alumo gilineꞌ neꞌmo nene Oꞌmoso gelekeleꞌ o-daaꞌ monovomuꞌ nene gele ngoloꞌ lo gilineꞌ.
HEB 5:9 Idoꞌ neꞌmino gele ngoloꞌ lo gilidiꞌmo eze nene gono dalidoꞌ lisiheꞌ gehepeve ogo mino gelekeleꞌ o-daaꞌ unive mukikumuꞌ nene minevoꞌ minevoꞌ oloningumuꞌ ve lo mudise do luꞌ izaaꞌ neꞌmi meleho nene aza loloꞌ ogavosa
HEB 5:10 Oꞌmosoꞌmo gaza neniꞌ nimaniꞌ initeꞌ nene Melekisedekiꞌ gono daaꞌ ineꞌ monovoloꞌ ogo evenetoꞌ medelo mino initeꞌ lehize-nedaaꞌ anive naba minelesane lo eleꞌmize molaniꞌ ve.
HEB 5:11 Idoꞌ aꞌminemuꞌ gamazi lo-lengemeloniꞌ nene vaiꞌ goloso neineꞌza gatine gohi duu lo vivo nizaniꞌ neꞌmo nene lo ngoloꞌ lo lo-lengemelesa geꞌnebe olosuve.
HEB 5:12 Idoꞌ geꞌnebe oloniꞌ nene lingine Kilisitoꞌ evenele liliꞌ igi gamene haꞌna minaniꞌ nenako idise mene eveneꞌ ma monoꞌ monovo apizi ngimilizadoꞌ i minilizanako neꞌmine ami ve malite Oꞌmosoꞌmi gamazi nili-lingimavo gohi apiꞌ igi bina giliꞌmi giliꞌmi dizi alizadoꞌ mini mili mini monoꞌ gamazi amuzo malehe ma gilami izipe amine naaꞌ naniꞌ neꞌmine lapa nomineꞌ gamazi neevoꞌ nene gililizadoꞌ i nizaniꞌ neꞌmo nene geꞌnebe olosuve.
HEB 5:13 Ee, ingine amine naaꞌ nave mukiꞌ nene ha izipe ngomo neꞌmine nene nizanako neꞌmo nene monovo lisiheliꞌmi gamaziꞌve nene ningi di kegesami ladenivoꞌ igi minaaꞌ nave.
HEB 5:14 Ne neiha luteꞌmi amuzo malehe nosoꞌ niteꞌve nalizaniꞌ nene lute gate do lamineꞌ olone li di ningiꞌ ningiꞌ igi monovo lisihekisi golososi ningi di kegesisa monokuꞌ lodive igi nizave engikovoꞌ nene amuzo malehe nosoꞌ niteꞌ neꞌmine nene ha nalisave.
HEB 6:1 Nemuꞌ nene luꞌine do ngi lo-ngedelingumuꞌ ve li Kilisitoꞌ evenele idiꞌne aꞌmene liliꞌ ave ganaꞌ apizi ngimaaꞌ aniꞌ gamazi adoꞌ luꞌine di velepeꞌ izi labuluvo ogaꞌ akauꞌ ngeleꞌmize molaaꞌ neineꞌ monovo nene hulaakumuꞌ gamazi nesi idoꞌ Oꞌmosomuꞌ gele eleꞌvoleꞌ ogaliꞌmi gamazi nesi monoꞌ noso holaaꞌ monovo ato atokumuꞌ apizi ngimaaꞌ naniꞌ gamazi nesi idoꞌ aꞌine eveneꞌ godoꞌnidoꞌ hitaaꞌ naniꞌ monovo neꞌmi gamazi nesi idoꞌ hele noloningutiꞌ otaaꞌ neꞌmi gamazi nesi idoꞌ Oꞌmosoꞌmo goniꞌ o-ngedo lihime ngemelive mulumo alumo gili miniviꞌ miniviꞌ ilizaniꞌ gamazi nene gohi gelo gohi gelo minuneꞌ nene hulo gamazi monokuꞌ do lodive o-ledelineꞌ gamazi ma atokumukisi imineꞌ molo gelo minelone.
HEB 6:3 Idoꞌ gamazi gohi ma monokuꞌ do lodive o-ledelineꞌ gamazi mamuꞌ imineꞌ molo gelo gelo mineloningumuꞌ nene mo Oꞌmosoꞌmo gele lemavo ma mo neꞌmino imineꞌ molo gelo minelone.
HEB 6:4 Monoꞌ neꞌmo ve ma ingine luꞌine hize labanaꞌ ele-ngedavo Oꞌmosoꞌmo eze evenele lehize-ngedaaꞌ initeꞌ nene lehize-ngedavo neꞌmi laniteꞌve gilaaꞌ idoꞌ Oꞌmosoꞌmi Sikalahuꞌ engita ogavo minaaꞌ idoꞌ Oꞌmosoꞌmi gamazi nene lamineꞌ neive li neꞌmi laniteꞌve gilaaꞌ idoꞌ alingeꞌ gamene naba sotoꞌ ilineꞌ neꞌmi amuzo engita sotoꞌ ivo laniteꞌve gilaaꞌ ave ingine neꞌmine ve monoꞌ meheꞌine imi hulilizaniꞌ neꞌmo ingine Oꞌmosoꞌmi gipele nene lohotoꞌ zaloꞌ gohi bilaniꞌ gelavo eveneꞌ mukiꞌ eze di uꞌmusupo lizi-dilizaniꞌ monovo di sotoꞌ ilizaniꞌ nenako neꞌmine igi nizadotiꞌ laza engiꞌ nene luꞌine di velepeꞌ izilizaniꞌ akauꞌ ngelo ngeleꞌmize tineꞌ molamolosunako nemuꞌ nene lutine di velepeꞌ izilisave li ganaꞌ apiꞌ igi li-lingimaaꞌ aniꞌ gamazi bina nene hazamuꞌ gohi lo gohi lo amo gamazi gohi mamuꞌ imineꞌ molo lo gelo minelone.
HEB 6:7 Ee, goline nene misubouꞌ izekaꞌ izekaꞌ ivo misubo neꞌmo geꞌno nosa aꞌmine misubouꞌ gono daaꞌ ave nene do lamineꞌ o-ngedeli nosoꞌ niteꞌ nene do sotoꞌ ogaꞌ neineꞌ misubo nene Oꞌmosoꞌmo noꞌnohoꞌ izo do lamineꞌ ogaꞌ neineꞌ neꞌmino aza eveneꞌ ma engita eze gamazi limineꞌ nene gili neꞌmi gihileꞌve monovo lamineꞌ di sotoꞌ ilizave nene noꞌnohoꞌ ize-ngedaaꞌ neive.
HEB 6:8 Idoꞌ aꞌmine misubo neꞌmo goline nene geꞌno noosa aꞌminguꞌ nene gasavasi lilihe golosovoꞌ do sotoꞌ ilineꞌ nene Oꞌmosoꞌmo aꞌmine misubo nene gohi ma do guno amosoꞌ ogave lo usiꞌ ize-delidoꞌ o neinako aꞌmine misubouꞌ nene oloꞌ enge viteꞌ oloseinako nemuꞌ nene Oꞌmosoꞌmidatiꞌ gamazi nene engita lemavo mo gilisa monovo lamineꞌ di sotoꞌ ami mudise meheꞌine imilizave nene mo olokuꞌ vilisave.
HEB 6:9 Neꞌmine ve nene olokuꞌ vilisave luvoniꞌza luꞌne lengeme nouvoniꞌ aleve lingine nene olokuꞌ vaaꞌ akaloꞌ vilizave lo gele minosa noluvoba lengiꞌ do lunguꞌ izineꞌ neꞌmi gihile monovo lamineꞌ nene lengita sotoꞌ o do vo minelive lo gele minosa nene noluve.
HEB 6:10 Lingine Oꞌmosola lutine mili minadiꞌmo lingine eiꞌ evenele nasahiliꞌ i-ngidaaꞌ naniꞌ monovotine nene lengita neivo neꞌmine i di vi minaaꞌ naniꞌ ma neive. Idoꞌ lingine neꞌmine igi minaaꞌ nangumuꞌ nene Oꞌmoso aza gala molavo lengeleꞌmize lamineꞌ amidiniko eze nene monovo goloso ogaꞌ ive neꞌmine minidine. Neꞌmine idineꞌza monovo goloso ogaꞌ ive minesaꞌmineꞌ nenako lingine neꞌmine igi minaaꞌ nangumuꞌ nene gala molavo lengiꞌ nene lengeleꞌmize lamineꞌ amilivoba ha lengeleꞌmize lamineꞌ oloseive.
HEB 6:11 Oꞌmosoꞌmo gamene nabala initeꞌ lamineꞌ lehize-ledeleseive li aꞌminemuꞌ gapepeꞌ igi minaaꞌ naniꞌ initeꞌ nene dalizangisi lingine hamo hamoꞌ aꞌmine igi mili minaniꞌ monovotine neꞌminevoꞌ nene igi mili mini amuzo mili minilizave lo gelo noluve.
HEB 6:12 Idoꞌ eveneꞌ malite goseleꞌ ngebelamivo Oꞌmosomuꞌ gili eleꞌvoleꞌ igi mini igi mili minaaꞌ naniꞌ aleve nene Oꞌmosoꞌmo eze evenele lemelove lo lo huko salani molo-lidineꞌ initeꞌ nene daaꞌ nave. Lingine aꞌmineꞌmine igi monokumuꞌ goseleꞌ lengebelaaꞌ ive liliꞌ igi minami aꞌmine aleveti monovoꞌnidoꞌ nene ngeꞌmeti nivi igi mili minilizangumuꞌ ve losa lingine Oꞌmosoꞌmi evenele nasahiliꞌ i-ngidi minaniꞌ monovotine neꞌminevoꞌ nene igi mili mini amuzo mili minilizave lo gelo noluve.
HEB 6:13 Oꞌmosoꞌmo salani molo-ngidineꞌ initeꞌ daaꞌ nave luvoniꞌ nene Abalahamuꞌni salani gamazi lo molo-dineꞌ nene gihile izingumuꞌ luvoniꞌ ve. Eveneꞌ eze Oꞌmoso ivileꞌ ogo minive ma neivosa aꞌmine veꞌmi guliveloꞌ salani gamazi lo huko lilive ma minamivo Oꞌmoso eiꞌ guliveloꞌ salani gamazi tiꞌ lo lo hukineꞌ:
HEB 6:14 Neniꞌ nene noꞌnohoꞌ ize-gedekuvo gaꞌvopilemoꞌ vaiꞌ goloso sotoꞌ igi mini di vilisave losa neniꞌ noluve.
HEB 6:15 Tiꞌ lo lo huko-dineꞌ nenako aꞌmine nene geto gihile izamingumuꞌ nene goseleꞌ belamivo ha gele eleꞌvoleꞌ ogo gizebo ogo hazavoꞌ neivo aꞌmine Oꞌmosoꞌmo lo huko-dineꞌ gamazi nene Isakaꞌni gedavosa apiꞌ ogo gihile izineꞌ.
HEB 6:16 Eveneꞌ ingine nene gamazi lamineꞌ nolune li engiꞌ ngivileꞌ ogo minive eiꞌ guliveloꞌ likevo neꞌmo eveneꞌ ingine laniꞌ gamaziloꞌ nene ve malitesi eꞌmenga aꞌmanga lisaꞌmave. Nemuꞌ nene Oꞌmosoꞌmo gamazi lo hukineꞌ nene eiꞌ guliveꞌveloꞌ lo huko lineꞌ ve.
HEB 6:17 Ee, Oꞌmoso eiꞌ nene izipahala zuho leliꞌ do lemelove lo lo hukineꞌ initekumuꞌ nene lulo do velepeꞌ izo lemamilihe li gilikelizave losa aꞌmine lineꞌ gamazi nene mo lamineꞌ lave li gililizangumuꞌ nene amuzo molo gele mino eiꞌ guliveꞌveloꞌ lo huko lineꞌ ve.
HEB 6:18 Idoꞌ initeꞌ sitaꞌ aꞌmine gamazi lo huko lineꞌ nemukisi idoꞌ aꞌmine gamazi lo huko linguꞌ nene eiꞌ guliveꞌvelokisi lineꞌ nemukisi nene aza lulo do velepeꞌ izo mo amolosuve lo soza ngelo lamoloseive lo geleloneꞌ neꞌmo lute do amuzo goloso molo-ledavo laza alete molo-ledelive lo eze gizebo inguꞌ vo hulunive laza aꞌmine lo huko-lidineꞌ initeꞌ nene alingeꞌ mo do sotoꞌ o-ledeleseive lo gapepeꞌ ogo gizebo minaaꞌ nouneꞌ nene hulamo do giliꞌ lo do minelone losa aꞌmine gamazi nene eiꞌ guliveꞌveloꞌ lo huko-lidineꞌ ve.
HEB 6:19 Idoꞌ aꞌmine initekumuꞌ gapepeꞌ ogo gizebo minaaꞌ nouneꞌ neꞌmo nene lute do giliꞌ lo-lede mino mo apasamilineꞌ initeꞌ sipi vo mala valive li di giliꞌ li-daaꞌ aniꞌ initeꞌ neꞌminosa mo apasamilineꞌ initeꞌ nenako lute nene ngelo vo mala vamoloseive. Ee, monoꞌ numuno nabauꞌ nene Oꞌmosoꞌmi moꞌmosiꞌveuko dizikelizave li eveneꞌ akaꞌine hizi tili-ngidi lavolavo izi hukikaniꞌ nene di vesemeꞌ ili evenetoꞌ medeli mini Oꞌmoso initeꞌ lehizi-daaꞌ ave naba ingine aꞌmine Oꞌmosoꞌmi moꞌmosiꞌve ve languꞌ dizaaꞌ naniꞌ neꞌmine ogo aꞌmine Oꞌmosoꞌmo lo huko-lidineꞌ initekumuꞌ gapepeꞌ ogo gizebo minaaꞌ nouneꞌ lute gate neꞌmo nene vo Oꞌmosoꞌmi moꞌmosiꞌve gihile neida nene nalava ize neineꞌ gelavo none.
HEB 6:20 Idoꞌ aꞌmine Oꞌmosoꞌmi moꞌmosiꞌve gihile neida nene Izesuꞌ nesi nene Melekisedekiꞌ gono daaꞌ ineꞌ monovoloꞌ ogo evenetoꞌ medelo mino Oꞌmoso initeꞌ lehize-daaꞌ ive naba loloꞌ ogosa leliꞌ gamazite hize eleꞌ olosa leliꞌ nene gomuꞌ molo lemo vo neive.
HEB 7:1 Aꞌmine Melekisedekiꞌ nene Salemi ebekuꞌ guvelesi ve mino idoꞌ evenetoꞌ medelo mino veleta Oꞌmoso atoliꞌmine minive nene initeꞌ lehize-daaꞌ ive nesi loloꞌ ogo minineꞌ ve. Idoꞌ Abalahamuꞌ aza guveꞌinesi ve ma minaniꞌ nene ngebele osuꞌ lo tineꞌ molo navo Melekisedekiꞌ aza vavo akaloꞌ di goꞌine hizi Abalahamuꞌni nene noꞌnohoꞌ ize-dineꞌ ve.
HEB 7:2 Neꞌmino Abalahamuꞌni noꞌnohoꞌ ize-davo aza initeꞌ mataꞌve teni teni (10 10) neꞌmine miningutiꞌ Melekisedekiꞌni hamo hamoꞌ ma imineꞌ. Idoꞌ eiꞌ gulive Melekisedekiꞌ neꞌmi monovo nene monovoꞌve lisihekovoꞌ ogo minineꞌ guvelesi ve ve. Idoꞌ ebeꞌve gulive Salemi neꞌmi monovo nene hongu monovo ve losa neineꞌ nenako aza nene hongu monovoꞌvesi minaaꞌ ineꞌ guvelesi ve nene neive.
HEB 7:3 Idoꞌ Aloniꞌ monovoꞌveloꞌ imineꞌ mili evenetoꞌ medeli mini Oꞌmoso initeꞌ lehizi-daaꞌ ave nene lamineꞌ Zakoboꞌ gipele Leviꞌ aꞌvopilemoꞌ minaniꞌ nene ngelebizi avoꞌninge idoꞌ izeꞌninge meꞌningeliti guliveꞌine li sotoꞌ ikevosavoꞌ nene aꞌmine gonoloꞌ ngeleꞌmizi milaaꞌ aniꞌza Melekisedekiꞌ aza nene neꞌminosa minamineꞌ ve. Aza nene evenetoꞌ medelo mino Oꞌmoso initeꞌ lehize-daaꞌ ive minineꞌza monoꞌ godolouꞌ nene avolomote idoꞌ izele mele neti guliveꞌine nene gizavo ma gelamune. Idoꞌ sotoꞌ ogo mine do ogo hilineꞌ neꞌmi monovo nesi gizavo gelamuneꞌ neꞌmo Melekisedekiꞌ nene minevoꞌ minevoꞌ ogovoꞌ minineꞌ gelavo Oꞌmosoꞌmi gipele eiꞌ neꞌmine mino evenetoꞌ medelo mino Oꞌmoso initeꞌ lehize-daaꞌ ive mine do vovoꞌ vovoꞌ ogo minaaꞌ ive minineꞌ ve.
HEB 7:4 Idoꞌ Melekisedekiꞌ aza nene eveneꞌ naba goloso minaniꞌ neineꞌ nemuꞌ mene giliꞌnalo: Avoteho naba minive Abalahamuꞌ aza nene lovouꞌ ngivileꞌ ineꞌ alevetidatiꞌ initeꞌ teni teni (10 10) do angutiꞌ Melekisedekiꞌni nene hamo hamoꞌ imineꞌ ve.
HEB 7:5 Isilaeleꞌ aleve ma haza alevesi idoꞌ Leviꞌ aꞌvopilemoꞌ linge ma evenetoꞌ medeli mini Oꞌmoso initeꞌ lehizi-daaꞌ ave liliꞌ ave nesi mukitoꞌ nene Abalahamuꞌ aꞌvopilemoꞌ mini hamoꞌ zuho minaniꞌza aꞌmine evenetoꞌ medeli mini Oꞌmoso initeꞌ lehizi-daaꞌ ave ingine Oꞌmosoꞌmo louꞌ gamazi lidoꞌ nene eꞌmeti engiꞌ Isilaeleꞌ aleve linge ma initeꞌ teni teni (10 10) di sotoꞌ igaꞌ angutiꞌ hamo hamoꞌ nene daaꞌ aniꞌ ve. Ee, initeꞌ ngimaaꞌ ave idoꞌ initeꞌ daaꞌ ave mukiꞌ nene mo Abalahamuꞌ aꞌvopilemokovoꞌ minaniꞌza mo engitatikisi ha daaꞌ aniꞌ ve.
HEB 7:6 Ne neiha Melekisedekiꞌ aza Leviꞌ aꞌvopilemokutiꞌ sotoꞌ amineꞌ minineꞌza Abalahamuꞌnidatiꞌ initeꞌ nene ha daniꞌ ve. Idoꞌ Oꞌmosoꞌmo salani gamazi lamineꞌ Abalahamuꞌni lo huko-daaꞌ idiꞌmo nene eveneꞌ naba minineꞌza Melekisedekiꞌ neꞌmo nene noꞌnohoꞌ ize-dineꞌ ve.
HEB 7:7 Idoꞌ Oꞌmosoꞌmo salani gamazi lamineꞌ nene Abalahamuꞌni lo huko-daaꞌ idiꞌmo nene Abalahamuꞌ aza eveneꞌ naba goloso minineꞌ nene gele none. Ne neiha Abalahamuꞌ aza Melekisedekiꞌni ivileꞌ ogo naba minidiniko Melekisedekiꞌ aza Abalahamuꞌni nene noꞌnohoꞌ ize-delidoꞌ o minamidine. Noꞌnohoꞌ ize-delidoꞌ o minamidineꞌza aza mo Abalahamuꞌni noꞌnohoꞌ ize-dineꞌ nenako Melekisedekiꞌ aza nene Abalahamuꞌni ivileꞌ ogo minineꞌ ve. Ee, ve maliꞌmo ve ma noꞌnohoꞌ ize-delineꞌ nene noꞌnohoꞌ ize-dive nene dizo minavo noꞌnohoꞌ dave nene lemo mineleseive lo gele noneꞌ nene lamineꞌ nenako malite soza gamazi ve li mo lamilisave. Nemuꞌ nene Melekisedekiꞌ aza Abalahamuꞌni ivileꞌ ogo minive minaaniꞌ neive lo gelelesune.
HEB 7:8 Idoꞌ ma nene Leviꞌ aꞌvopilemoꞌ zuhoutiꞌ evenetoꞌ medeli mini Oꞌmoso initeꞌ lehizi-daaꞌ ave nete eveneꞌineti initeꞌ teni teni (10 10) miningutiꞌ hamo hamoꞌ daaꞌ ave engiꞌ nene hili vaaꞌ aniꞌ zuho nizave lo gele minelesune. Ne neiha aꞌmineꞌmine ogo evenetatiꞌ initeꞌ daaꞌ ive Melekisedekiꞌ eiꞌ nene hilineꞌ ve li monoꞌ godolouꞌ gizamavo neꞌmo Melekisedekiꞌ nene helamo velesi hazavoꞌ neineꞌ gilineꞌ nemuꞌ nene gelelone.
HEB 7:9 Naza giluvoniꞌ mo neꞌmine luvodine: Abalahamuꞌ lovoutiꞌ initeꞌ teni teni (10 10) do angutiꞌ hamo hamoꞌ Melekisedekiꞌni imineꞌ gameneuꞌ nene Abalahamuꞌ aꞌvopilemoꞌ initeꞌ teni teni (10 10) evenelite di minangutiꞌ hamo hamoꞌ daaꞌ aveti avoꞌnibo Leviꞌ nene olihe Abalahamudatiꞌ sotoꞌ amivo nenako azasi Abalahamukisi makaꞌ mini aꞌmine initeꞌ nene imasineꞌ gelave. Nemuꞌ nene evenetoꞌ medeli mini Oꞌmoso initeꞌ lehizi-daaꞌ ave Leviꞌ aꞌvopilemoꞌ zuho nene Melekisedekiꞌ evenetoꞌ medelo mino Oꞌmoso initeꞌ lehize-daaꞌ gono daaꞌ ineꞌ neꞌmo ngivileꞌ ogo minineꞌ ve.
HEB 7:11 Idoꞌ Oꞌmosoꞌmo Moseꞌni louꞌ gamaziꞌve iminguꞌ nene gamazi ma tiꞌ lo lo-imineꞌ ma lingine mo gili nizaniꞌ ma neive: Leviꞌ aꞌvopilemokutiꞌ Oꞌmoso neniꞌ nimaniꞌ initeꞌ evenetoꞌ medeli mini lehizi-nidilizave liliꞌ igi minilizave ingine nene aꞌmine louꞌ gamaziloꞌ nene gizebo igi eveneꞌ ngeleꞌmize akaloꞌ ilizave. Neꞌmine lo lo-imineꞌ nenako nemuꞌ nene aꞌmine evenetoꞌ medeli mini Oꞌmoso initeꞌ lehizi-daaꞌ ave nete eveneꞌ nene mudise ngeleꞌmize akaloꞌ ilizadoꞌ lisiheꞌ gehepeve i minadiniko Leviꞌ aꞌvopilemoꞌ evenetoꞌ medelo mino Oꞌmoso initeꞌ lehize-daaꞌ ive aza Aloniꞌ gono daaꞌ ineꞌ neꞌmino damo Melekisedekiꞌ evenetoꞌ medelo mino Oꞌmoso initeꞌ lehize-daaꞌ gono daaꞌ ineꞌ neꞌmino daaꞌ ive atoliꞌmine ogo minive Izesuꞌni nene ma nanimuꞌ do ote-didine. Leviꞌ aꞌvopilemoꞌ zuho ingine gono nene di pili di osuꞌ ladiniko aꞌmine initeꞌ lehize-daaꞌ gono dalive gosohoꞌ do ote-dive neꞌmi gonoꞌve nene ma minamivo ma do ote-damidine.
HEB 7:12 Idoꞌ evenetoꞌ medeli mini Oꞌmoso initeꞌ lehizi-daaꞌ gono daaꞌ ave gomuꞌ minadoꞌ nene medelo atoliꞌmine gosohoꞌ sotoꞌ ogavo ma nene louꞌ gamazi nesi gosohokovoꞌ sotoꞌ oloseinako nemuꞌ nene gomuꞌ louꞌ gamazi neꞌmi gonoꞌve nene mo osuꞌ laniꞌ ve.
HEB 7:13 Idoꞌ evenetoꞌ medelo mino Oꞌmoso initeꞌ lehize-daaꞌ ive do ote-dingumuꞌ atoliꞌmine ve ve luvoniꞌ nene Oꞌmoso neniꞌ nimaniꞌ initeꞌ nene Melekisedekiꞌ gono daaꞌ ineꞌ monovoloꞌ eꞌmeto lehize-nedaaꞌ anive minevoꞌ minevoꞌ ogo minelesane lo Oꞌmosoꞌmo lo-dive nene Leviꞌ aꞌvopilemoꞌ zuhoutiꞌ sotoꞌ amo Oꞌmosoꞌmi holomoloꞌ mili-daniꞌ initeꞌ lehize-daaꞌ gono nene ma damaaꞌ ave atoꞌ zuhoutiꞌ sotoꞌ ogo minineꞌ nenako nemuꞌ nene luvoniꞌ ve.
HEB 7:14 Idoꞌ atoꞌ zuhoutiꞌ sotoꞌ ive luvoniꞌ nene Guvetesi ve aza Zudaꞌ aꞌvopilemoꞌ zuhoutiꞌ sotoꞌ ineꞌ nene mukitoꞌ mo gele osuꞌ lo noneꞌ nenako nemuꞌ nene luvoniꞌ ve. Idoꞌ Moseꞌ neꞌmo louꞌ gamazi gizinguꞌ nene Leviꞌ aꞌvopilemoꞌ zuhoutikovoꞌ nene evenetoꞌ medeli mini Oꞌmoso initeꞌ lehizi-daaꞌ ave liliꞌ ilizave lo lo-ngidineꞌza Zudaꞌ aꞌvopilemoꞌ zuhoutikisi nene evenetoꞌ medeli mini Oꞌmoso initeꞌ lehizi-daaꞌ ave liliꞌ ilizave lo ma lo-ngedamineꞌ ma neive.
HEB 7:15 Idoꞌ evenetoꞌ medelo mino Oꞌmoso initeꞌ lehize-daaꞌ ive atoliꞌmine sotoꞌ ineꞌ nene louꞌ gamazi ma evenetoꞌ medeli mini Oꞌmoso initeꞌ lehizi-dilizave nene Leviꞌ aꞌvopilemoꞌ zuhoutikovoꞌ mini okoꞌine laminekisivoꞌ minilizavetevoꞌ nene Oꞌmoso initeꞌ lehizi-daaꞌ ave liliꞌ ilizave li louꞌ miladoꞌ nene lisiheꞌ o nouve losa Leviꞌ zuholiti gonoloꞌ medelo sotoꞌ ineꞌ nevoba asi minevoꞌ minevoꞌ ogo mino vo osuꞌ lamaaꞌ amuzo ezela miningumuꞌ ve losa evenetoꞌ medelo mino Oꞌmoso initeꞌ lehize-daaꞌ ive Melekisedekiꞌ gonoloꞌ medelo sotoꞌ ineꞌ nenako gomuꞌ minineꞌ louꞌ gamazi nene Oꞌmosoꞌmo do atoꞌ ingumuꞌ luvoniꞌ gamazi nene neꞌmo sotoꞌ ogavo mo laminetoꞌ ningekune.
HEB 7:17 Idoꞌ Oꞌmoso aza aꞌmine vemuꞌ evenetoꞌ medelo mino Oꞌmoso initeꞌ lehize-nedaaꞌ anive loloꞌ ogo minevoꞌ minevoꞌ ogo minelesane lo lo-dineꞌ gamazi neꞌmo aꞌmine luvoniꞌ gamaziloꞌ nene vo daanako mo laminetoꞌ lokuve.
HEB 7:18 Idoꞌ Oꞌmosoꞌmo louꞌ gamazi gomuꞌ minineꞌ do atoꞌ ineꞌ neꞌmi monovo nene neꞌmino neive: Aꞌmine louꞌ gamazi nene eveneꞌ hamokisi mudise leleꞌmize akaloꞌ amivo eveneꞌ lisiheꞌ lamineꞌ minesaꞌmuneꞌ neꞌmo amuzoꞌve nomineꞌ mino eveneꞌ hize eleꞌ o-ledamivo Oꞌmosoꞌmo lavo aꞌmine louꞌ gamazi nene gohi minamineꞌ. Idoꞌ neꞌmine ogo Oꞌmosoꞌmo aꞌmine evenetoꞌ medelo mino Oꞌmoso initeꞌ lehize-daaꞌ ive atoliꞌmine nene do sotoꞌ o-ledavo aza nene gomuꞌ louꞌ nesi evenetoꞌ medeli mini Oꞌmoso initeꞌ lehizi-daaꞌ ave nesi nene ngivileꞌ ogo leleꞌmize akaloꞌ ogavo neꞌmo lisiheꞌ lamineꞌ ogo Oꞌmososi makaꞌ minelonidoꞌ lisiheꞌ ogavo ezela nene lehete ogo minaaꞌ noune.
HEB 7:20 Idoꞌ evenetoꞌ medelo mino Oꞌmoso initeꞌ lehize-daaꞌ ive gosohoꞌ atoliꞌmine nene Oꞌmosoꞌmo eleꞌmize nomolo aꞌmine gono do minevoꞌ minevoꞌ ogo minelesane lo eiꞌ guliveloꞌ lo huko-damo haza do ote-dineꞌ nevoba aza eiꞌ guliveꞌveloꞌ lo huko-do do ote-dineꞌ ve. Ingine Leviꞌ aꞌvopilemoꞌ zuhoutiꞌ evenetoꞌ medeli mini Oꞌmoso initeꞌ lehizi-daaꞌ ave liliꞌ aniꞌ nene Oꞌmosoꞌmo ngeleꞌmize nomolo lingine aꞌmine gono di miniviꞌ miniviꞌ ilisave lo eiꞌ guliveloꞌ lo huko-ngedamivo haza di oti-ngidaaꞌ aniꞌza
HEB 7:21 aꞌmine ve gosohokumuꞌ nene monoꞌ godolouꞌ tiꞌ lo minineꞌ gamazi nene Oꞌmoso eiꞌ guliveloꞌ lo lo huko-dineꞌ ve: Gaza nene evenetoꞌ medelo mino Oꞌmoso neniꞌ initeꞌ lehize-nedaaꞌ anive loloꞌ ogo minevoꞌ minevoꞌ ogo minelesane lo Guvelesi ve Oꞌmoso aza eiꞌ guliveloꞌ lo huko-dineꞌ neꞌmo lulo ngelo do velepeꞌ izo soza lamoloseive.
HEB 7:22 Idoꞌ Izesuꞌ aza minevoꞌ minevoꞌ ogo gono dalive lo Oꞌmosoꞌmo neꞌmine ogo eiꞌ guliveloꞌ lo huko do ote-dineꞌ neꞌmo leliꞌ gele daloneꞌ gamazi ve lo Oꞌmosoꞌmo minevoꞌ minevoꞌ gamazi lo huko-lidineꞌ nene gihile izelingumuꞌ hize eleꞌ ilive izeleho nene Izesuꞌ minavo idoꞌ neꞌmo nene aꞌmine idise lo huko-lidineꞌ gamazi neꞌmo gomuꞌ aleve lo huko-ngidineꞌ gamazi nene ivileꞌ ogosa gamazi lamineꞌ neive.
HEB 7:23 Idoꞌ gomuꞌ nene evenetoꞌ medeli mini Oꞌmoso initeꞌ lehizi-daaꞌ ave minaniꞌ nene hilikaꞌ hilikaꞌ iꞌmi vaaꞌ aniꞌ neꞌmo miniviꞌ miniviꞌ igi gono dalizadoꞌ minamavo eveneꞌ ato atoꞌ mukiꞌ vaiꞌ nete nene evenetoꞌ medeli mini Oꞌmoso initeꞌ lehizi-daaꞌ ave liliꞌ ikaꞌ ikaꞌ iꞌmi vaaꞌ aniꞌ ve.
HEB 7:24 Neꞌmine aniꞌza Izesuꞌ aza helamo minevoꞌ minevoꞌ ogovoꞌ minelineꞌ nenako ezeloꞌ medeli ma minamavo evenetoꞌ medelo mino Oꞌmoso initeꞌ lehize-daaꞌ gono nene mo mudise dovo dovoꞌ ogo mineleseive.
HEB 7:25 Nemuꞌ nene Izesuꞌ aza lelikumuꞌ nene isete izelive lo Oꞌmosola lo minevoꞌ minevoꞌ ogo minaaꞌ neineꞌ nenako Izesuꞌnimuꞌ gele eleꞌvoleꞌ ogo Oꞌmosola vo hulunive leliꞌ nene Izesuꞌ do luꞌ izo mudise leleꞌmize lamineꞌ ilidoꞌ neive.
HEB 7:26 Idoꞌ aza neꞌmine veꞌmo evenetoꞌ medelo mino Oꞌmoso initeꞌ lehize-daaꞌ ivete naba mino goloso ogo minunidotiꞌ leleꞌmize lamineꞌ ilidoꞌ lisiheꞌ o neineꞌ nenako ha do luꞌ izo leleꞌmize lamineꞌ oloseive. Aꞌmine ve nene aza ve lamineꞌ atoliꞌmine ogo mino lulo do gopo o-delineꞌ initeꞌ hamokisi eita ma nomineꞌ mino lihime daaꞌ naniꞌ aleve neꞌmino minamo atoliꞌmine gehepeve ogo mino okulumoꞌ nesi ivileꞌ ogo osuꞌ lo dizosa neive.
HEB 7:27 Evenetoꞌ medeli mini Oꞌmoso initeꞌ lehizi-daaꞌ ave naba ingine gamene gamene eveneliti lihimeꞌine apase-ngedelive li sipisipi nevoꞌmine initeꞌ ngibili olokuꞌ gizi Oꞌmoso lehizi-dilisa gomuꞌ nene engiꞌ lihimeꞌine apase-ngedelive li sipisipi ma ngibili Oꞌmoso imaaꞌ nave. Izesuꞌ aza dizosa mino engiꞌ ngivileꞌ ogo lihimeꞌvesi nomineꞌ lamineꞌ minaaꞌ neineꞌ nenako ingine igaꞌ adiꞌmine osaꞌmineꞌ ve. Eiꞌ nene gele ngemavo evenelite bili hilanguꞌ asiꞌve lulo okoꞌnoꞌve nene Oꞌmoso emavo leliꞌ mukiꞌ lihimete nene mudise apase-ledelidoꞌ lisiheꞌ ogavo eiꞌ okoꞌnoꞌve nene gamene hamokovoꞌ emavo osuꞌ lineꞌ ma neive.
HEB 7:28 Idoꞌ lelitoꞌ medelo mino Oꞌmoso initeꞌ lehize-daaꞌ ivete naba neꞌmo gomuꞌ evenetoꞌ medeli mini Oꞌmoso initeꞌ lehizi-daaꞌ ave naba minaniꞌ nene ngivileꞌ ogo lamineꞌ minive ve luvoniꞌ nene neꞌmino neingumuꞌ luvoniꞌ ve: Gomuꞌ minineꞌ louꞌ gamaziloꞌ eꞌmeti evenetoꞌ medeli mini Oꞌmoso initeꞌ lehizi-daaꞌ ave naba minilizave di oti-ngidaaꞌ aniꞌ nene ha eveneꞌ mukiꞌ amuzote nomivo minaaꞌ nouneꞌ ngemeni damenisi minave nene di oti-ngidaaꞌ aniꞌ ve. Ee, neꞌmine vevoꞌ di oti-ngidaaꞌ aniꞌza Oꞌmosoꞌmo gomuꞌ louꞌ gamaziloꞌ medelo alingeꞌ evenetoꞌ medelo mino Oꞌmoso initeꞌ lehize-daaꞌ ive mineline lo eiꞌ guliveꞌveloꞌ lo huko-dive eiꞌ gipele nene do ote-dineꞌ ve. Idoꞌ aꞌmine gipele neve gopo haza neivosa do ote-dineꞌ nevoba asi aꞌmine gono dalidoꞌ nene mudise do lisiheꞌ o-davo neivosa nene do ote-dineꞌ ve.
HEB 8:1 Gamazi noluvoniꞌ neꞌmi monovo neꞌmino neingumuꞌ nene gelelesune: Evenetoꞌ medelo mino Oꞌmoso initeꞌ lehize-daaꞌ ivete naba eiꞌ monovoꞌve nene neꞌmino neive lo lo-lingimuvoniꞌ maꞌmine monovo laminekisi minive nene lelikumuꞌ sotoꞌ ogo neive. Aza nene Oꞌmosolotiꞌ lemo minive nenako Okulumokuko Guvelesi ve naba minive Oꞌmosoꞌmo gizebo ogo minaaꞌ neineꞌ moꞌmosiꞌveuko nene ana hulaaꞌ ida neive.
HEB 8:2 Idoꞌ aꞌmida nene evenelite gizamaniꞌ numuno Guvelesi veꞌmo do sotoꞌ molaniꞌ monoꞌ numuno neꞌmi avazahaloꞌ seli numuno gele vineꞌ monoꞌ numuno avotemote gizi di monaniꞌ neꞌmine monoꞌ numuno lulouꞌ gehepeve Oꞌmosoꞌmi moꞌmosiꞌve neinguꞌ nene mino initeꞌ Oꞌmoso lehize-daaꞌ gonoꞌve nene do neive.
HEB 8:3 Idoꞌ neꞌmine gono do minaaꞌ neineꞌ nene evenetoꞌ medeli mini Oꞌmoso initeꞌ lehizi-daaꞌ ave naba mukiꞌ di oti-ngidaaꞌ naniꞌ nene eveneꞌ Oꞌmoso imilisa di igaꞌ naniꞌ initekisi idoꞌ lihimemuꞌ sipisipi nevoꞌmine initeꞌ ngibili olokuꞌ gizi imilizave li di igaꞌ naniꞌ initekisi nene Oꞌmoso lehizi-dilizave li eveneꞌ di oti-ngidaaꞌ naniꞌ nenako nemuꞌ nene azasi neꞌmine gono do minaaꞌ neive. Idoꞌ neꞌmine gono do neineꞌ nenako nemuꞌ nene azasi nene initeꞌ Oꞌmoso ma lehize-delidoꞌ o minineꞌ nenako mo nene lehize-daniꞌ ve.
HEB 8:4 Idoꞌ aza nene misubouko mene minidini Moseꞌ gizineꞌ louꞌ gamaziloꞌ eꞌmeti evenetoꞌ medeli mini Oꞌmoso initeꞌ lehizi-daaꞌ ave nene mo minaniꞌ nenako aza nene evenetoꞌ medelo mino Oꞌmoso initeꞌ lehize-daaꞌ ive loloꞌ ilidoꞌ lisiheꞌ amivo loloꞌ amidine.
HEB 8:5 Ingine misubouko evenetoꞌ medeli mini Oꞌmoso initeꞌ lehizi-daaꞌ aveti monoꞌ numunoꞌine idoꞌ gono daaꞌ naniꞌ nene Okulumokuko minaniꞌ initeliti avazaha idoꞌ mumunoꞌinevoꞌ nene minaaꞌ nave. Aꞌmine nene monoꞌ numuno seli numuno gele vineꞌ nene Moseꞌ gizelesa neivo Oꞌmosoꞌmo Moseꞌni tiꞌ lo lo-imineꞌ maꞌmino nene neive: Gaza nene gololoꞌ minusidoꞌ seli numuno gele vineꞌ monoꞌ numuno idoꞌ aꞌminguꞌ miniliza initeꞌ mukiꞌ neti avazaha gelebizuvoniꞌ maloꞌ nene eꞌmeto eheꞌ ogo minosa do lamino loloꞌ ogo gizezo.
HEB 8:6 Idoꞌ evenetoꞌ medeli mini Oꞌmoso initeꞌ lehizi-daaꞌ ave ingine gomuꞌ gono daaꞌ aniꞌ nene Okulumokuko gono gihile minineꞌ neꞌmi avazahaloꞌ nene daaꞌ aniꞌza Izesuꞌ nene aꞌmine gono gihile nene nodavo neꞌmo gomuꞌ daaꞌ aniꞌ gono nene ngivileꞌ ogo hozila neive. Idoꞌ gomuꞌ aleve lo huko-ngidineꞌ gamazi neuꞌ nene Oꞌmosoꞌmo initeꞌ lamineꞌ o-ledelesa lo huko-lidineꞌza leliꞌ lo huko-lidineꞌ gamazi gosohokuꞌ nene ivileꞌ ogosa initeꞌ lamineꞌ goloso o-ledelesa lo huko-lidineꞌ nenako Izesuꞌ aza lelikisi Oꞌmososi kuku holo-ledo gamazi hulo eza ema ogo leliꞌ gele daloneꞌ gamazi ve lo Oꞌmosoꞌmo lo huko-lidineꞌ gamazi lo do ogo limineꞌ neꞌmo Oꞌmosoꞌmo gomuꞌ aleve lo huko-ngidineꞌ gamazi nene ivileꞌ ogo neineꞌ nene gele none. Idoꞌ aꞌmine votigileloꞌ aꞌmineꞌmine ogo Izesuꞌ gono do neineꞌ neꞌmo misubouko evenetoꞌ medeli mini Oꞌmoso initeꞌ lehizi-daaꞌ avete gono di minaaꞌ aniꞌ nene ivileꞌ ogosa lamineꞌ neive.
HEB 8:7 Avotemote gili dalizaniꞌ gamazi ve lo lo huko-ngidineꞌ gamazi neꞌmo gono davo vo gihile ma izidiniko aꞌmidotiꞌ nene leliꞌ gili dalizaniꞌ gamazi ve lo gosohoꞌ ma do sotoꞌ ogo lo huko-ledamidine.
HEB 8:8 Neꞌmine amidineꞌza avotemote igi mili igaꞌ aniꞌ monovoꞌine goloso nene do sotoꞌ o-ngedosa Guvelesi veꞌmo lineꞌ gamazi ma monoꞌ godolouꞌ tiꞌ li gizi nizaniꞌ ma neive: Guvelesi veꞌmo tiꞌ lo lave: Gililo. Isilaeleꞌ zuhoti muliseukisi Zudaꞌ zuhoti muliseukisi nene gili dalizaniꞌ gamazi gosohoꞌ ma lo huko-ngedo do sotoꞌ oloniꞌ gamene nene alingeꞌ ma sotoꞌ oloseive.
HEB 8:9 Aꞌmine gili dalizaniꞌ gamazi gosohoꞌ ma lo huko-ngedeloniꞌ nene avoꞌningine Aigita misuboutiꞌ ngeleꞌmizo novosa gili dalizave lo lo huko-ngiduvoniꞌ gamaziloꞌ nene eꞌmetamadiꞌmo ingine nene ninge mate-ngedo minuvoniꞌ nenako neꞌmo nene gomuꞌ lo huko-ngiduvoniꞌ gamazi maꞌminosa lo huko-ngedamo atoliꞌmine ogo lo huko-ngedelesuve lo
HEB 8:10 Guvelesi veꞌmo gohi tiꞌ lo lineꞌ: Alingeꞌ aꞌmine noluvoniꞌ gamene nene ogavo nelotiꞌ alingeꞌ nene Isilaeleꞌ aꞌvopilemoꞌ zuho mukilite gili dalizaniꞌ gamazi atoꞌ gohi ma lo huko do sotoꞌ o-ngedelesuve. Aꞌmine lo huko-ngedeloniꞌ gamazi nene neꞌmino neive: Neniꞌ lo huko loloniꞌ gamazi mukiꞌ nene engiꞌ gaꞌninguꞌ molo-ngedo luꞌninguꞌ nene luhuvo gizekelesuve. Neꞌmine ogo engiꞌ Oꞌmosoꞌine loloꞌ ogo nouvo ingine nene neniꞌ eveneꞌne zuho liliꞌ igi minilisave.
HEB 8:11 Neꞌmine igi eveneꞌ dizi minaniꞌ limi minaniꞌ mukiꞌ nene nenikumuꞌ gili osuꞌ li gili nilizaniꞌ nenako ve malite ingine zuho gaꞌine di Guvelesi vemuꞌ gili minilo li ma li-ngidamilisave.
HEB 8:12 Idoꞌ neꞌmino lo huko-ngedeloniꞌ nene goloso initeꞌ dangumuꞌ nene iseꞌine ize-ngedosa aꞌmine lihimeꞌinemuꞌ nene gohi gaꞌne gelamolosuvonako nemuꞌ Isilaeleꞌ aleve nene aꞌmine luvoniꞌ gamazi nene lo huko-ngedelesuve lo Guvelesi veꞌmo lineꞌ.
HEB 8:13 Idoꞌ gili dalizaniꞌ gamazi nene gosohoꞌ lo huko-ngedelesuve lineꞌ nenako neꞌmo gomuꞌ lo huko-ngidineꞌ gamazi nene mo litehe ilineꞌ neꞌmo nene mo geto vo haleke gehepeve ilidoꞌ ogave.
HEB 9:1 Idoꞌ aꞌmine gamazi gomuꞌ lo huko-ngidineꞌ nene Oꞌmoso gubiꞌ izi imi opoꞌni laaꞌ idoꞌ initeꞌ olokuꞌ gizi imaaꞌ nemuꞌ nene louꞌ gamaziꞌvesi minivo minineꞌ ve. Idoꞌ aꞌmine lo huko-ngidineꞌ gamazi nemuꞌ nene misubouko mene monoꞌ numuno ma minineꞌ ve.
HEB 9:2 Ee, seli numuno gele vineꞌ monoꞌ numuno nene mo gizi di otaniꞌ ve. Aꞌmine monoꞌ numunguꞌ ganaꞌ lumu izi hukikanguꞌ nene lamu liviꞌ di badaaꞌ aniꞌ zavasi idoꞌ Oꞌmoso lehizi-di veleloꞌ mili-daniꞌ beleti nesi idoꞌ tevoliꞌvesi nene minaaꞌ ineꞌ ve. Aꞌmine izi hukikaniꞌ lumu nene kekeize lo minineꞌ numuno lulo ve laaꞌ aniꞌ ve.
HEB 9:3 Idoꞌ oduvo numuno lulo gohi ma izi hukiki lavolavodunuꞌ izi tilikaniꞌ nemuꞌ nene mo kekeize atoliꞌmine lo minineꞌ numuno lulo ve likevo minaaꞌ ineꞌ ve.
HEB 9:4 Aꞌmine numuno lulouꞌ nene unuvo lamineꞌ ogaꞌ ineꞌ initeꞌ Oꞌmoso gizi imaaꞌ aniꞌ holomo ngolidunuꞌ liliꞌ aniꞌ nesi idoꞌ eveneꞌ gili dalizave lo lo huko-ngidineꞌ gamazi milikaniꞌ bokisi ngolidunuꞌ asabuꞌ izi liliꞌ aniꞌ nesi idoꞌ aꞌminguꞌ goꞌzikaniꞌ initeꞌ nene Okulumokutiꞌ ngimineꞌ nosoꞌ niteꞌ gulive mana minineꞌ somo ngolidunuꞌ liliꞌ aniꞌ nesi idoꞌ Aloniꞌ hatuso sisive hoꞌlineꞌ hatusoꞌve nesi idoꞌ Oꞌmosoꞌmo lo huko-ngidineꞌ gamazi luhuvo gizineꞌ geheni nesi nene minaaꞌ aniꞌ ve.
HEB 9:5 Idoꞌ aꞌmine bokisi veletoꞌ nene initeꞌ sitaꞌ ma eveneꞌ godoꞌine neꞌmino mino holokeꞌneꞌinesi minasineꞌ initeꞌ gulive kelubu avazahaloꞌ liliꞌ aniꞌ initeꞌ nene minaaꞌ asineꞌ. Kelubu ingine hela hela mini holokeꞌneꞌine di pateli di hozi li hiti nizasivo olusoꞌ nene Oꞌmosoꞌmo eveneꞌ lihimeꞌine apase-ngedaaꞌ ineꞌ moꞌmosiꞌve nene minineꞌ. Idoꞌ minineꞌ nenako aꞌmine kelubu minasidoꞌ nene Oꞌmosoꞌmi labanala nene sotoꞌ ogo minaaꞌ ineꞌ ve. Idoꞌ aꞌmine initeꞌ neti monovo nene ato atoꞌ vaiꞌ neineꞌ nenako aꞌminemuꞌ imineꞌ molo gohi ma lo-lengemelodoꞌ nomive.
HEB 9:6 Idoꞌ aꞌmine initeꞌ nene di vaꞌvaꞌ igi osuꞌ likevo evenetoꞌ medeli mini Oꞌmoso initeꞌ lehizi-daaꞌ ave ingine monoꞌ gonoꞌine nene nidi aꞌmine monoꞌ numunguꞌ ganaꞌ izi hukikaniꞌ numuno lulouꞌ nene gamene gamene dizaaꞌ naha
HEB 9:7 aꞌmidotiꞌ numuno lulo gohi ma izi hukikanguꞌ nene evenetoꞌ medelo mino Oꞌmoso initeꞌ lehize-daaꞌ ive naba neꞌmovoꞌ nene kilisimasiloꞌ kilisimasiloꞌ gamene hamokovoꞌ dizaaꞌ neive. Idoꞌ dizeli gamene nene eiꞌ lihimeꞌvesi eveneliti lihimeꞌinesi nene Oꞌmosoꞌmo apase-ledelingumuꞌ ve lo ato atoꞌ izeliti vanisesi nene damo dizo vaaꞌ ineꞌ nevoba ha do-dosavoꞌ nene aꞌminguꞌ dizo vaaꞌ ineꞌ ve.
HEB 9:8 Neꞌmine ogaꞌ ineꞌ nenako nelotiꞌ nene tiꞌ lo gelelesune: Ganaꞌ izi hukaniꞌ numuno lulo nene vo goloso amo hazavoꞌ neivo ma numuno lulo gohi ma Oꞌmosoꞌmi kekeize atoliꞌmine lo minineꞌ numuno lulo ve li izi hukikavo akaloꞌ tile minineꞌ lavolavo nesi nene ha minelineꞌ nenako Oꞌmoso neida voloneꞌ akate nene olihe do sotoꞌ o-ledamive lo Oꞌmosoꞌmi Sikalahuꞌ neꞌmo lelebizavo gelelesune.
HEB 9:9 Idoꞌ monoꞌ numuno adoꞌ seli numuno gele vineꞌ nesi idoꞌ aꞌminguꞌ igi mili di sotoꞌ aniꞌ initeꞌ nene idise gameneuꞌ igi mili igaꞌ naniꞌ initeꞌ neti avazahaꞌine do sotoꞌ ogavo neꞌmi monovo tiꞌ lo noningune: Aꞌminguꞌ nene initeꞌ ma Oꞌmoso imi idoꞌ sipisipi nevoꞌmine initeꞌ ngibili lihimete apase-ledelive li olokuꞌ gizi Oꞌmoso imi minaaꞌ naniꞌza neꞌmo neꞌmine igaꞌ aveti luꞌine nene ma do lisiheꞌ lamineꞌ o-ngedesaꞌmive.
HEB 9:10 Idoꞌ luꞌine do lamineꞌ o-ngedesaꞌmineꞌ nene okoꞌinevoꞌ do lamineꞌ o-ngedelineꞌ louꞌ gamazilokovoꞌ nene eꞌmeti minaaꞌ aniꞌ nenako neꞌmo luꞌine nene do lisiheꞌ lamineꞌ o-ngedesaꞌmive. Ee, aꞌmine louꞌ gamazi nene nosoꞌ niteꞌ idoꞌ noso avoso nalizangumuꞌ idoꞌ ato atoꞌ monovomuꞌ nosouꞌ ingi okoꞌine noso izi hulilizangumuꞌ idoꞌ nevoꞌmine initekumukovoꞌ nene gamazi li gizi Kilisitoꞌ monovo gosohoꞌ do sotoꞌ ogo initeꞌ mukiꞌ do lamineꞌ ilidokovoꞌ nene mino osuꞌ loloseive li gizi nizaniꞌ ve.
HEB 9:11 Idoꞌ Kilisitoꞌ nene evenetoꞌ medelo mino Oꞌmoso initeꞌ lehize-daaꞌ ive naba monoꞌ initeꞌ lamineꞌ idiꞌne Oꞌmosolatiꞌ sotoꞌ oꞌmo novineꞌ nene do sotoꞌ ive loloꞌ ogo mo ogave. Aza nene monoꞌ numuno adoꞌ seli numuno gele vineꞌ nene ivileꞌ ogo lamineꞌ goloso mino idoꞌ eiꞌ gono dalidoꞌ lisiheꞌ gehepeve o minineꞌ monoꞌ numuno nene evenelitesi liliꞌ amaniꞌ asi mo mene misuboukosi ma minamineꞌ monoꞌ numunomuꞌ noluve. Aza aꞌminguꞌ nene dizo gono do
HEB 9:12 memeꞌ ize idoꞌ bulumakaꞌ angale neti vanise nene aꞌmida do vamo eiꞌ vaniseꞌve nene gamene hamokovoꞌ mudise Oꞌmosoꞌmi moꞌmosiꞌve kekeize lo minida do vo minineꞌ ve. Idoꞌ neꞌmine ineꞌ neꞌmo goloso ogo minunidotiꞌ nene mudise do luꞌ izo Oꞌmosola tineꞌ molo vo mineloneꞌ akate vele-lidineꞌ ve.
HEB 9:13 Idoꞌ memeꞌ ize idoꞌ bulumakaꞌ neti vanisemuꞌ luvoniꞌ nene monokumuꞌ kekeize laniꞌ initeꞌ dikevosa monokuꞌ dizilizaniꞌ akatine nene hize tile-lengedo okodida sihononi neꞌmine initeꞌ hitelineꞌ nene gilite-lengedelive li memeꞌ izeliti vanisesi idoꞌ vemohoꞌ bulumakaliti vanisesi idoꞌ alungo bulumakaꞌ giziꞌvotaniꞌ neꞌmi leneheꞌve nesi nene Oꞌmoso imikevosa neꞌmo okodida sihononi neꞌmine hitelineꞌ nene do hulavo lamineꞌ ogaꞌ neineꞌ nenako nemuꞌ nene luvoniꞌ ve.
HEB 9:14 Idoꞌ neve nene initeꞌ ngomoliꞌmo okodida sihononi neꞌmine hitineꞌ nene do lamineꞌ ogaꞌ neineꞌ nenako initeꞌ naba Kilisitoꞌ vaniseꞌve neꞌmo monovotine goloso labuluvo ogaꞌ akauꞌ lengeleꞌmize molaaꞌ neineꞌ neti lihime lutine gatinguꞌ nene gilite hulo-lengedo minevoꞌ minevoꞌ Oꞌmoso gelekeleꞌ i-di gubiꞌ izi imi minilizadoꞌ nene do lisiheꞌ o-lengedelidoꞌ nene mo lisiheꞌ gehepeve o neive. Ee, Oꞌmosoꞌmi minevoꞌ minevoꞌ Sikalahuꞌve neꞌmo Kilisitoꞌni hize eleꞌ o-davo aza okoꞌnoloꞌ lihime hamokisi minamineꞌ mino okoꞌnoꞌve hulo Oꞌmoso imineꞌ nenako neꞌmo nene leliꞌ lute do lamineꞌ o-ledelidoꞌ lisiheꞌ o neive.
HEB 9:15 Idoꞌ Kilisitoꞌ vaniseꞌve neꞌmo lihimete mukiꞌ gilite hulo-ledaaꞌ neineꞌ nenako Izesuꞌ aza nene evenekisi Oꞌmososi kuku holo-ledo gamazi hulo eza ema ogo leliꞌ gele emeloneꞌ gamazi ve lo gosohoꞌ gamazi Oꞌmosoꞌmo lo huko-lidineꞌ nene do ogo limive loloꞌ ogo neive. Idoꞌ neꞌmine ineꞌ nene Oꞌmosoꞌmo izipahala zuho minilizave lo elese molo-ledo leleꞌmize molave leliꞌ nene minevoꞌ minevoꞌ initeꞌ lemelove lo lo huko-ledo salani molo-lidineꞌ initeꞌ daloningumuꞌ ve losa neꞌmine ineꞌ ve. Ee, Oꞌmosoꞌmo gomuꞌ lo huko-lidineꞌ gamazi nene avutoꞌ ogo lihime duningumuꞌ aꞌmidoꞌ golo hizo Izesuꞌ hilineꞌ neꞌmo nene aꞌmine lihime nene apase-lidineꞌ nenako neꞌmo nene aꞌmine salani molo-lidineꞌ initeꞌ daloneꞌ aka nene ngoloꞌ lo neinako ha dalosune.
HEB 9:16 Ee, Izesuꞌ nene ma helamidiniko Oꞌmosoꞌmo salani molo-lidineꞌ initekisi idoꞌ leliꞌ dalizave lo lo huko-lidineꞌ gamazisi nene gihile izelidoꞌ minamidine. Lingine mo gili nizave. Eveneꞌ malite alingeꞌ hililizangumuꞌ leliꞌ monovoloꞌ eꞌmeti luhuvo tiꞌ li gizi milaaꞌ nave: Laza helekunivo ma mene alevete leliꞌ initete nene dalizave li aꞌmine initeꞌ dalizangumuꞌ li huki-ngidaniꞌ gamazi nene luhuvouꞌ gizi milaaꞌ nave. Idoꞌ aꞌmine initeꞌine dalizangumuꞌ luhuvo gizaniꞌ nene gizave hilikevo neꞌmovoꞌ nene aꞌmine li huki-ngidaniꞌ gamazi nene gihile izelidoꞌ vo lisiheꞌ ilineꞌ nenako nemuꞌ nene luhuvo gizave hilami veꞌinesi ha nizavo ma nene aꞌmine gamazi nene olihe gihile izamo ha minaaꞌ neive. Nemuꞌ nene ve maliꞌmo neꞌmine luhuvo gize molosa mino helavo ma initeꞌve dalizave ingine aꞌmine luhuvo gizive nene mo helanako luhuvo gizidoꞌ eꞌmeto initeꞌve ma nene ha dalosune lilisave. Lilisaha helave lilizaniꞌ gamazi nene mo laminetoꞌ lahe idoꞌ soza lahe nemuꞌ nene gomuꞌ ningi gilikevosavoꞌ nene aꞌmine dalizave lineꞌ initeꞌ nene ha dalisave. Helaaꞌ neꞌmo li hukaaꞌ naniꞌ gamazi nene do amuzo molaaꞌ neive. Nemuꞌ nene Izesuꞌ aza helamidini Oꞌmosoꞌmo salani molo-lidineꞌ initekisiꞌ idoꞌ leliꞌ dalizave lo lo huko-lidineꞌ gamazisi nene gihile izelidoꞌ minamidine.
HEB 9:18 Idoꞌ helaaꞌ neꞌmo li hukaaꞌ naniꞌ gamazi nene do amuzo molaaꞌ neineꞌ nenako nemuꞌ aꞌmineꞌmine ogo Oꞌmosoꞌmo gomuꞌ lo huko-ngidineꞌ gamazi nene haza do amuzo molaniꞌ nevoba helaaꞌ neꞌmovoꞌ nene do amuzo molaniꞌ ve. Do amuzo molaniꞌ nene bulumakaꞌ ngibili hilikevo neti vaniseꞌine neꞌmo aꞌmine gomuꞌ lo huko-ngidineꞌ gamazi nene do amuzo molaniꞌ ve.
HEB 9:19 Ee, aꞌmine louꞌ gamazi miningutiꞌ gamazi godolo godolola nene Moseꞌ lo sotoꞌ ogo eveneꞌ lo-ngemavosa ingine nene bulumakaꞌ ma ngibilikevo Moseꞌ aza vaniseꞌine do nososi do gopo ogo unuvo ogaꞌ ineꞌ za ngomo ma gulive hisopu ve lo minineꞌ neꞌmi aꞌnava ma do aꞌmidoꞌ nene sipisipi zopovo gulehedunuꞌ nene likosa vaniseuꞌ nene lupizoo aꞌmine louꞌ gamaziꞌmi luhuvolokisi idoꞌ aꞌmida eveneꞌ mukitokisi nene hibiꞌ izo nohulo-ngedo
HEB 9:20 gamazi tiꞌ lo lineꞌ: Vanise mene Oꞌmosoꞌmo louꞌ gamazi gili dalizave lo lo huko-lingidineꞌ nene do amuzo molaaꞌ neineꞌ vanise ma neive. Idoꞌ Moseꞌ neꞌmine ineꞌ nenako nemuꞌ Oꞌmosoꞌmo gomuꞌ lo huko-ngidineꞌ gamazi nene vanisedunuꞌ di amuzo mili-daniꞌ ve luvoniꞌ nene mo laminetoꞌ luvoniꞌ ve.
HEB 9:21 Idoꞌ Moseꞌ aza luhuvosi evenekisi vanise hibiꞌ izo hulo-ngidineꞌ neꞌmino monoꞌ numuno adoꞌ seli numuno gele vineꞌ nesi idoꞌ Oꞌmoso opoꞌni li gubiꞌ izi imaaꞌ anguꞌ nene lapese gomise miteꞌ initeꞌ mukiꞌ aꞌminguꞌ milikevo minidoꞌ nesi vanise hibiꞌ izo hulineꞌ ve.
HEB 9:22 Idoꞌ gomuꞌ lo huko lineꞌ louꞌ gamazi neuꞌ nene naza luvoniꞌ evenekisi idoꞌ luvoniꞌ initekisivoꞌ nevoba initeꞌ mukiꞌ gidini neꞌmine ma goloso ilizahe lihime dalizahe ilizaniꞌ nene initeliti vanisedunuꞌ nene do lamineꞌ olosane lo lo hukineꞌ ma neive. Idoꞌ aꞌmine gomuꞌ lo huko lineꞌ gamazi neuꞌ nene ize nevoꞌmine ganaꞌ ma bili vaniseꞌinedunuꞌ nene hibiꞌ izi Oꞌmosoꞌmi holomoꞌveloꞌ hulamaniꞌ nene lihime nene mo kekeꞌ apase-ngedesaꞌmineꞌ ve.
HEB 9:23 Ee, gomuꞌ louꞌ gamazi neꞌmo neꞌmine ilizave lo lo neineꞌ nenako nemuꞌ aꞌmine seli monoꞌ numuno nesi aꞌminguꞌ initeꞌ mukiꞌ nesi nene Okulumokuꞌ minineꞌ avazahaloꞌ liliꞌ aniꞌ initeꞌ nene luvodiꞌmine igi bulumakaꞌ ngibili Oꞌmoso imi vanisedunuꞌ nene hibiꞌ izi-ngidi di kekeize lilisave. Neꞌmine ilisaaha misubouko mene avazaha initeꞌ do lamineꞌ o-ngedelive li bulumakaꞌ ngibili vaniseꞌine hibiꞌ izi hulaaꞌ naniꞌ nene Okulumokuꞌ initeꞌ do lamineꞌ o-ngedelidoꞌ lisiheꞌ o minelineꞌ initeꞌ neꞌmo ngivileꞌ ogo lamineꞌ goloso mineleseive.
HEB 9:24 Idoꞌ nene nanitekumuꞌ luvoniꞌ neve. Kilisitoꞌ aza monoꞌ numunguꞌ dizineꞌ nene evenelite liliꞌ igi di kekeize laniꞌ monoꞌ numuno adoꞌ Okulumokuko minineꞌ neꞌmi avazahaloꞌ minineꞌ monoꞌ numunguꞌ nene dizineꞌ nevoba asi mo Okulumokuꞌ gehepeve nene dizo leliꞌ hize eleꞌ o-ledelesa Oꞌmosoꞌmi veleloꞌ vo neive.
HEB 9:25 Idoꞌ dizineꞌ nene Zuda veti evenetoꞌ medelo mino Oꞌmoso initeꞌ lehize-daaꞌ ive naba aza eiꞌ vaniseꞌve do dizamo ize ato atoliti vaniseꞌine nene Oꞌmosoꞌmi kekeize atoliꞌmine lo minineꞌ numuno luloꞌveuꞌ nene kilisimasiloꞌ kilisimasiloꞌ do dizo Oꞌmoso lehize-dekaꞌ lehize-dekaꞌ ogaꞌ ineꞌ neꞌmine nene eiꞌ Kilisitoꞌ ilidoꞌ o minidiniko Oꞌmosoꞌmo misubo do sotoꞌ idotiꞌ apiꞌ ogo gamene mukiꞌ okoꞌno huloꞌmo ogo mulumo gelekaꞌ gelekaꞌ ogovoꞌ minidineꞌza aꞌmine Zuda veti evenetoꞌ medelo mino Oꞌmoso initeꞌ lehize-daaꞌ ive nabaꞌmo ogaꞌ ineꞌ neꞌmine ilidoꞌ minamineꞌ nenako nemuꞌ aza gamene mukiꞌ eze okoꞌno hulo vaniseꞌve lepo Oꞌmoso lehize-dekaꞌ lehize-dekaꞌ ogo minelesa dizineꞌ nevoba asi Oꞌmosoꞌmo molaniꞌ gamene nene osuꞌ lolosa neivo Kilisitoꞌ aza gamene hamokovoꞌ eiꞌ okoꞌno nene hulo vaniseꞌve lepo Oꞌmoso lehize-do lihimete nene mudise hulo-ledelesa sotoꞌ ineꞌ ve.
HEB 9:27 Idoꞌ Oꞌmosoꞌmo lidoꞌ ogo eveneꞌ laza gamene hamokovoꞌ helosa Oꞌmosoꞌmo goniꞌ o-ledelidoꞌ volosunako
HEB 9:28 Kilisitoꞌ aza aꞌmineꞌmine ogo eveneꞌ mukiliti lihime geho okoꞌnoꞌve hulo hilineꞌ nenako alingeꞌ gohi alineꞌ nene lihimetemuꞌ amo eikumuꞌ gizebo nonive nene mudise do luꞌ izo leleꞌmize lamineꞌ olosa aloseive.
HEB 10:1 Idoꞌ gomuꞌ louꞌ gamaziloꞌ eꞌmeti ize ato atoꞌ ngibili Oꞌmoso lehizi-dikevo neꞌmi gihileꞌve initeꞌ lamineꞌ sotoꞌ o ngemaaꞌ neineꞌ nene alingeꞌ initeꞌ lamineꞌ lelita sotoꞌ o lemelineꞌ nene initeꞌ gihile neꞌmine engita nene ma sotoꞌ o ngemesaꞌmineꞌ ve. Asi mo alingeꞌ sotoꞌ o-ledelineꞌ initeꞌ neti avazaha neꞌminevoꞌ nene sotoꞌ o ngemaaꞌ neineꞌ nenako ingine nene kilisimasiloꞌ kilisimasiloꞌ lihimete apase-ledavo lisiheꞌ lamineꞌ mineloningumuꞌ ve li ize ato atoꞌ di igi ngibili Oꞌmoso lehizi-dikaꞌ lehizi-dikaꞌ igi minaaꞌ naniꞌ neꞌmo ngelo do lisiheꞌ lamineꞌ gehepeve o-ngedesaꞌmineꞌ nenako nemuꞌ nene aꞌmine initeꞌ nene Oꞌmoso lehizi-dikaꞌ lehizi-dikaꞌ igivoꞌ minaaꞌ nave.
HEB 10:2 Ee, neꞌmine igaꞌ naniꞌ neꞌmo lihimeꞌine apase-ngedo mudise do lisiheꞌ gehepeve o-ngididiniko aꞌmine initeꞌ Oꞌmoso imi gubiꞌ izi imaaꞌ nave ingine nene lihimete nomineꞌ minelesune li ize ngibili Oꞌmoso lehizi-dikaꞌ lehizi-dikaꞌ naniꞌ nene huli alamadine.
HEB 10:3 Ne neiha vemohoꞌ bulumakaꞌ neti vanisesi memeꞌ ize neti vanisesi neꞌmo nene eveneliti lihimeꞌine nene apase osuꞌ lo-ngedamilidoꞌ nenako kilisimasiloꞌ kilisimasiloꞌ ingine neꞌmine initeꞌ ngibili vaniseꞌine nene Oꞌmoso lehizi-daaꞌ naniꞌ neꞌmo lihime daniꞌ mamuꞌ nene gohi gili okoꞌnidoꞌ gilaaꞌ nave.
HEB 10:5 Nemuꞌ nene Kilisitoꞌ misubouko mene lemelesa noogo monoꞌ godolouꞌ melehine lo imineꞌ gamazi ma tiꞌ li gizi nizaniꞌ ma neive: Gaza eveneꞌ isaaꞌ neve li ize ato atoꞌ bili gimi idoꞌ initeꞌ gohi ato atoꞌ nene gimikaꞌ gimikaꞌ igi minilizave lo gelamo neniꞌ nene gelekeleꞌ o-gedelongumuꞌ ve lo okoꞌne nene do vaꞌvaꞌ ogo molo-nedane.
HEB 10:6 Ee, ize ma bili olokuꞌ giziꞌ voti gimi idoꞌ lihime apase-ngedelive li ize ngibili vaniseꞌine gimaaꞌ naniꞌ nemuꞌ nene laniteꞌ gelesaꞌmanivosamuꞌ
HEB 10:7 tiꞌ lo lo-gimuvoniꞌ ve: Oꞌmosoo, gelezo. Naza monoꞌ godolouꞌ nenikumuꞌ louꞌ gamazi gizi nizaniꞌ maloꞌ nene eꞌmeto geiꞌ lukaloꞌ do molo gelekeleꞌ o-gedelesa uvoniꞌ ve.
HEB 10:8 Idoꞌ Moseꞌ louꞌ gamaziꞌmo lidoꞌ eꞌmeti igaꞌ naniꞌ initekumuꞌ Kilisitoꞌ aza Oꞌmosomuꞌ lineꞌ nene ize ato atoꞌ bili gimi idoꞌ ato atoꞌ initeꞌ nesi isaaꞌ neve li gimi idoꞌ lihime apase-ngedelive li ize bili giziꞌ voti gimaaꞌ naniꞌ nene laniteꞌ gelamosa nimikaꞌ nimikaꞌ igi minilizave lo gelesaꞌmane loosa
HEB 10:9 nelotiꞌ nene geiꞌ lukaloꞌ do molo gelekeleꞌ o-gedelesa uvoniꞌ ve lo Izesuꞌ lidiꞌmo lihimetemuꞌ ize belo Oꞌmoso emaaꞌ monovomuꞌ nene ganaꞌ lineꞌ gamazi nene do hulo Oꞌmosoꞌmi luloloꞌ do molo gelekeleꞌ o-daaꞌ monovomuꞌ alingeꞌ lineꞌ gamazi nene do otineꞌ ve.
HEB 10:10 Idoꞌ Kilisitoꞌ aza Oꞌmosoꞌmi luloloꞌ eꞌmeto leliꞌ mukikumuꞌ nene gamene hamokovoꞌ okoꞌno hulo helo Oꞌmoso imineꞌ neꞌmo lute do lisiheꞌ o-ledo Oꞌmoso gelekeleꞌ o-do mineloneꞌ evenele loloꞌ o-ledave.
HEB 10:11 Idoꞌ evenetoꞌ medeli mini Oꞌmoso initeꞌ lehizi-daaꞌ ave mukiꞌ ingine nene goꞌ laneme goꞌ laneme monoꞌ gonoꞌine nene di mini ize ato atoꞌ ngibili gamene gamene hamoꞌ initekovoꞌ igi Oꞌmoso imiꞌmi vi minaaꞌ naniꞌza eveneliti lihimete nene apase-ledelidoꞌ lisiheꞌ amineꞌ initekovoꞌ imaaꞌ nave.
HEB 10:12 Ingine neꞌmine igaꞌ naniꞌza Kilisitoꞌ aza gamene hamokovoꞌ okoꞌno hulo helo Oꞌmoso imineꞌ neꞌmo eveneliti lihimete nene mudise apase-ledelidoꞌ vo daavosa Oꞌmosolatiꞌ lemo minive eiꞌ moꞌmosiꞌve Oꞌmosoꞌmo ana hulaaꞌ ida neidoꞌ aꞌmida vo neive.
HEB 10:13 Ee, eze okoꞌno hulo helo mo gamene hamokovoꞌ Oꞌmoso imineꞌ neꞌmo Oꞌmoso gelekeleꞌ o-do mineloneꞌ evenele nene mo mudise do lisiheꞌ lamineꞌ gehepeve o-lidineꞌ nenako nemuꞌ nene okoꞌnoꞌve gohi gohi hulo helo Oꞌmoso emamo vo Oꞌmosoꞌmo ana hulaaꞌ ida eiꞌ moꞌmosiꞌveloꞌ mino nelotiꞌ nene eiꞌ Kilisitoꞌni biluvaꞌ i-daaꞌ ave nene gelekeleꞌ i-dilizave lo Oꞌmosoꞌmo gizeneuko doꞌmo leme-ngedelingumuꞌ nene gizebo o neive.
HEB 10:15 Idoꞌ aꞌmine luvoniꞌ gamazi nene Oꞌmosoꞌmi Sikalahuꞌ neꞌmosi hize eleꞌ ogave. Aꞌmine Sikalahuliꞌmo eiꞌ gamaziꞌve lo-limineꞌ monoꞌ godolouꞌ tiꞌ li gizi nizaniꞌ ma neive:
HEB 10:16 Guvelesi veꞌmo tiꞌ lo lineꞌ: Gamene muluvoniꞌ nene ogavo alingeꞌ eveneꞌ mukilite gili dalizaniꞌ gamazi gosohoꞌ gohi ma lo huko do sotoꞌ o-ngedeloniꞌ gamazi nene neꞌmino neive: Naza lo huko do sotoꞌ o-ngedeloniꞌ gamazi nene luꞌninguꞌ molo-ngedo idoꞌ gaꞌninguꞌ nene luhuvo neꞌmine gize-ngedekuvo mineleseive.
HEB 10:17 Idoꞌ neꞌmine lo nelotiꞌ alingeꞌ gamazi gohi ma tiꞌ lo lineꞌ: Idoꞌ eveneꞌ engita lihime minineꞌ mamuꞌ nesi idoꞌ louꞌ gamazi avutoꞌ igaꞌ naniꞌ mamukisi nene gohi gaꞌne gelamolosuve.
HEB 10:18 Idoꞌ Oꞌmosoꞌmo lihimete mukiꞌ nene apaso osuꞌ lo-ledavo ma nene lihimete apase-ledelive lo lihimetemuꞌ ize ato atoliꞌmine belo olokuꞌ gize emaaꞌ uneꞌ ma nene gohi ma amolosune.
HEB 10:19 Nemuꞌ nene neze zuho lingine Izesuꞌ vanise lepo helo Oꞌmoso imineꞌ neꞌmo lihimete nene mudise apase-lidineꞌ nenako nemuꞌ nene golise gelamo Oꞌmosoꞌmi kekeize atoliꞌmine lo minineꞌ numuno lulouꞌ nene ha vo dizelonidoꞌ o neive.
HEB 10:20 Ee, Izesuꞌ eze okoꞌno hulo hilineꞌ neꞌmo Oꞌmosoꞌmi kekeize atoliꞌmine lo minineꞌ numuno lulouꞌ nene eveneꞌ dizikelizave li monoꞌ numuno nabauꞌ lavolavodunuꞌ akate hizi tili-limikaniꞌ nene mudise bele ngoloꞌ lo-ledo Oꞌmososi bizo mineloneꞌ aka gosohoꞌ eleꞌvoleꞌ ogo minevoꞌ minevoꞌ ilineꞌ nene vele-ledave.
HEB 10:21 Idoꞌ lelitoꞌ medelo mino Oꞌmoso initeꞌ lehize-daaꞌ ivete nene aza eveneꞌ naba mino Oꞌmosoꞌmi evenele zuho leliꞌ nene gizebo o-lede neive.
HEB 10:22 Nemuꞌ nene evenetoꞌ medeli mini Oꞌmoso initeꞌ lehizi-daaꞌ ave ngeleꞌmize milalizangumuꞌ aꞌmine ve nene di lamineꞌ i-ngidi okoꞌnidoꞌ nene vanisedunuꞌ hibiꞌ izi huli-ngidi idoꞌ nosoꞌ izi-ngidaaꞌ aniꞌ neꞌmino aza leliꞌ lute nene eiꞌ vaniseꞌvedunuꞌ hibiꞌ izo hulo-ledo aꞌminguꞌ monovo goloso minineꞌ nene do hulo-ledo idoꞌ okode nene noso laminedunuꞌ noso ize-lidineꞌ gelavo mino lute lisiheꞌ lamineꞌ minidiꞌmo Oꞌmoso golo izamo idoꞌ gate setaꞌ gelamo ezemuꞌ gele eleꞌvoleꞌ goloso ogo Oꞌmosola ogo ezesi bizo minukeꞌzo.
HEB 10:23 Idoꞌ Oꞌmosoꞌmo initeꞌ mukiꞌ ha olosuve lineꞌ initeꞌ nene mo laminetoꞌ oloseive lo mo gele noneꞌ ma nenako laza gele eleꞌvoleꞌ ogo Oꞌmosoꞌmo lemelove lo lo neineꞌ initekumuꞌ gizebo ogo minaaꞌ noningumuꞌ lo sotoꞌ ogaꞌ nouneꞌ nemuꞌ nene golise gelo hulamo do giliꞌ lo do minelone.
HEB 10:24 Neꞌmine ogo lute ngemo nasahiliꞌ o-ngedaaꞌ monovo idoꞌ nevoꞌmine gono lamineꞌ ato atoꞌ daaꞌ monovo lamineꞌ nene lelita amuzo molo minelive lo ge luka do ote-gede ne luꞌne do ote-nede loloneꞌ akamuꞌ nene viseꞌ ogo ningo ogo molo minelone.
HEB 10:25 Idoꞌ eveneꞌ malite monokumuꞌ do geseꞌ ogaꞌ monovo hulaaꞌ naniꞌ neꞌmine igi lingine hulami monokumuꞌ di geseꞌ iꞌmi vi mini monokuꞌ ge hize eleꞌ o-nede ne hize eleꞌ o-gede li minilo. Gamene naba mo avitoꞌ navo lingine mo ningi gili nizaniꞌ nenaze. Nemuꞌ nene lingine mo ge hize eleꞌ o-nede ne hize eleꞌ o-gede liviꞌ liviꞌ igivoꞌ minilo.
HEB 10:26 Idoꞌ laza Kilisitoꞌ gamaziꞌve gihile laminekumuꞌ nene mo gelo eꞌmeto minaaꞌ noolonivete lihime daaꞌ initekumuꞌ nene mo amoloneꞌ initeꞌ neive lamo lihime dosoꞌ neꞌmo Kilisitoꞌ vaniseꞌve lepo helo lihimete apase-ledelineꞌ aka vele-lidingumuꞌ nene oꞌve luneꞌ geleleseive. Idoꞌ laza lihime daaꞌ akaloꞌ gohi voloneꞌ neꞌmo Oꞌmosoꞌmo lihimete apase-ledelineꞌ aka nene Kilisitoꞌ vele-lidingumuꞌ nene oꞌve luneꞌ gelavo aꞌmine lihimetemuꞌ golo hizo Oꞌmoso lehize-deloneꞌ initeꞌ gohi ma minamoloseinako aꞌmine lihimete nene Oꞌmosoꞌmo ha do mineleseive.
HEB 10:27 Idoꞌ aꞌmine lihimeꞌine do minelive nene Oꞌmoso biluvaꞌ i-daaꞌ nanako aza oloꞌ goloso lo neineꞌ olokuꞌ ngimiselavo aꞌminguꞌ vi tolovo ilizaniꞌ nenako laza golise voloneꞌ akate atoꞌ ma nominako nemuꞌ laza lihime daaꞌ akaloꞌ gohi ma voloneꞌ nene lehelele izivo golise goloso gelo Oꞌmosoꞌmo lihime lemo olokuꞌ hulo-ledo neꞌmine o-ledelineꞌ gamenemukovoꞌ nene gizebo ogo minelesune.
HEB 10:28 Idoꞌ Moseꞌ louꞌ gamazi avutoꞌ ave nene mo iseꞌine izisaꞌmaniꞌ ve. Ve malite aꞌmine louꞌ gamazi avutoꞌ aniꞌ nene eveneꞌ sitape sitohamolite he ningi gonikuꞌ li sotoꞌ i-ngidikevo aꞌmine louꞌ gamazi avutoꞌ ave nene lihime ngimi ngibili hilaaꞌ nave.
HEB 10:29 Ee, Moseꞌ louꞌ gamaziꞌve nene mo gili eꞌmeti minaaꞌ niigisa aꞌmine louꞌ nene ma avutoꞌ aniꞌ nene ngibili hilaaꞌ aniꞌ nenako Moseꞌni ivileꞌ ogo minive Oꞌmosoꞌmi gipele aza Oꞌmosoꞌmo lo huko-lidineꞌ gamazi gosohoꞌ nene do amuzo molo idoꞌ engiꞌ luꞌine do lamineꞌ o-ngedo Oꞌmosoꞌmi evenele loloꞌ o-ngedo vaniseꞌve lepo hilingumuꞌ gilikevo haza initeꞌ ogavo eze nene lisi hupiꞌ izi-dii idoꞌ leliꞌ nasahiliꞌ o-ledaaꞌ ive Oꞌmosoꞌmi Sikalahuꞌ nene di uꞌmusupo lizi-dilizave nene Moseꞌ louꞌ gamazi avutoꞌ ikevo lihimeꞌinemuꞌ ngibili hilaaꞌ naniꞌ nene ivileꞌ ivosa lihime nabaloꞌ goloso ngemeleseive.
HEB 10:30 Monoꞌ godolouꞌ gizaniꞌ gamazi ma tiꞌ lo livemuꞌ mo gele none: Lihime ngemaaꞌ gono nene neniꞌ gono nenako lihime nene neniꞌ ngemelesuve. Idoꞌ ma nene: Guvelesi veꞌmo zasi gono do eze evenele izeꞌ molo-ngedeleseive. Idoꞌ aꞌmine gamazi live nene Oꞌmosoꞌmo lineꞌ nenako nemuꞌ nene Izesuꞌ monovo danavamuꞌ mo gili minisasi avutoꞌ igaꞌ nave nene lihime ngemo mo ngebeleleseive losa mo gele none.
HEB 10:31 Nemuꞌ nene laza neꞌmino lihime do minelonidotiꞌ lebelaaꞌ amuzoꞌvesi minive minevoꞌ minevoꞌ Oꞌmosoꞌmi anauꞌ aloneꞌ nene lihime atoliꞌmine ogo lemeleseinako agae mo nehelele goloso izo live. Nemuꞌ nene lihime akauꞌ vaalone lo ge hize eleꞌ o-nede ne hize eleꞌ o-gede lovoꞌ lovoꞌ ogovoꞌ minelone.
HEB 10:32 Gomuꞌ gameneuꞌ lingine minaniꞌ monovomuꞌ gatine molalize. Aꞌminemuꞌ gohi gili minilo. Aꞌmine gameneuꞌ nene Izesuꞌnimuꞌ gilikevo neꞌmo lutinguꞌ hize labanaꞌ elavo minaniꞌ neꞌmo goboni malaꞌ malaꞌ i-lingidi nizavo mulumo alumo giliꞌmi vi minisasi Izesuꞌ monoꞌve nene hulami amuzo mili di minaniꞌ.
HEB 10:33 Ee, gamene ma nene eveneꞌ mukiliti veꞌnidoꞌ di oti-lingidi gamazi goloso li-lingidi di goloso i-lingidaaꞌ aniꞌ ve. Idoꞌ gamene ma nene lingine zuhola aꞌmine suno nene sotoꞌ noo-ngidivo linginesi aꞌminguꞌ vi makatoꞌ aꞌmine geni nene gihaaꞌ aniꞌ ve.
HEB 10:34 Neꞌmine noluvoniꞌ nene Izesuꞌni biluvaꞌ i-daaꞌ avelite henenitine initeꞌ matatine ipeꞌ igi di vikevo lingine nene laza aꞌmine heneni nene ivileꞌ ogo minineꞌ luteꞌmi minevoꞌ minevoꞌ ilineꞌ heneni nene ha molo none li gili longolize izi ningi mati-ngimikavo dii vaaꞌ aniꞌ ve. Idoꞌ lingine zuho Izesuꞌ evenele linge nalaꞌ numunguꞌ minaniꞌ nene mulumoꞌine gili nasahiliꞌ i-ngidaaꞌ aniꞌ nemuꞌ nene noluve.
HEB 10:35 Ee, lingine gomuꞌ nene lengita geni initeꞌ ato atoꞌ mukiꞌ sotoꞌ ivo aꞌminguꞌ amuzo mili gili eleꞌvoleꞌ igi minaniꞌ nenako neꞌmi gihileꞌve dalizangisi idise lengehelele izavo aꞌmine gili eleꞌvoleꞌ aniꞌ nene hulikelizaze. Ha gili eleꞌvoleꞌ igi di minilo. Oꞌmosoꞌmo lemelove lo salani molo-lidineꞌ initeꞌ nene dalone li ma aꞌmine geni initeꞌ sotoꞌ o-lengemelingutiꞌ nene olovoꞌ igi limi ingami amuzo mili gili eleꞌvoleꞌ igivoꞌ minilizaniꞌ nenako nemuꞌ nene aꞌmine gili eleꞌvoleꞌ ilizaniꞌ monovotine nene hulami di giliꞌ li di minilo. Amuzo mili gili eleꞌvoleꞌ igi minilizaniꞌ nene Oꞌmosoꞌmo menitine naba lengemeleseive.
HEB 10:37 Idoꞌ geni lengebelelinguꞌ nene olovoꞌ ami ha amuzovoꞌ mili gili eleꞌvoleꞌ igi minilizaniꞌ nene monoꞌ godolouꞌ Izesuꞌ geto alingumuꞌ tiꞌ li gizi nizaniꞌ nenako nemuꞌ neꞌmine ilizave: Aꞌmine aloseive lave nene gamene haꞌna neꞌmine minosa alivoba alineꞌ gameneꞌve nene mo liꞌnibe o neive.
HEB 10:38 Idoꞌ Oꞌmosoꞌmo tiꞌ lo lineꞌ: Neꞌmine o neiha neze eveneꞌne zuho luꞌine lisihekisi minaniꞌ nete nenikumuꞌ gili eleꞌvoleꞌ igivoꞌ minilizaniꞌ neꞌmo hazavoꞌ eleꞌvoleꞌ igi veꞌinesi mini-di vii minilisaniꞌza gili eleꞌvoleꞌ igi mini-di vilizangutiꞌ ve ma ingine olovoꞌ igi velepeꞌ izi vilizaniꞌ nene naza mo luꞌneuꞌ goloso gehepeve gelelesuve.
HEB 10:39 Neꞌmine lo lineꞌza laza nene eveneꞌ ma ingine gili eleꞌvoleꞌ igi mini di vangutiꞌ olovoꞌ igi velepeꞌ izi vii vi tolovo igaꞌ nave neꞌmine eveneꞌ minamo laza nene gele eleꞌvoleꞌ ogo mino mine do dizo minaaꞌ lemeni dameni do minelonive nene none.
HEB 11:1 Gele eleꞌvoleꞌ ogaꞌ monovo nene neꞌmino neive: Laza Oꞌmosomuꞌ gele eleꞌvoleꞌ o noo ma aza lemelove lo salani molo-lidineꞌ initekumuꞌ gizebo o noneꞌ nene olihe damo idoꞌ aꞌminesi nene ma ningamuneꞌ nenako nomihe idoꞌ lemamilihe lo gate sitaꞌ gelamo aꞌmine initeꞌ nene mo ha noloseinako lemavo dalosune lo aꞌminemuꞌ nene gele eleꞌvoleꞌ ogovoꞌ minelesune.
HEB 11:2 Idoꞌ Oꞌmosoꞌmi evenele gomuꞌ minaniꞌ nete aꞌmineꞌmine igi gili eleꞌvoleꞌ igi minaaꞌ aniꞌ nemuꞌ nene Oꞌmosoꞌmo inginemuꞌ ninge lamineꞌ daaꞌ ineꞌ ve.
HEB 11:3 Idoꞌ Oꞌmosomuꞌ gele eleꞌvoleꞌ o noneꞌ neꞌmo okulumokuꞌ idoꞌ misubouko initeꞌ mataꞌ mukiꞌ sotoꞌ ogo neineꞌ nene Oꞌmosoꞌmo lavosavoꞌ sotoꞌ ogo neineꞌ nene mo gele none. Idoꞌ ningaaꞌ nouneꞌ initeꞌ mataꞌ mukiꞌ nene ningesaꞌmuneꞌ initedunuꞌ do sotoꞌ molaniꞌ nenako nesi nene mo gele none.
HEB 11:4 Idoꞌ Adamuꞌ gipele Kainiki Abeliki ingine initeꞌ olokuꞌ gizi Oꞌmoso imasingutiꞌ Abeliꞌ aza nene Oꞌmosomuꞌ gele eleꞌvoleꞌ ogo minineꞌ neꞌmo uvoloho Kainiꞌni nene ivileꞌ ogosa monovolo laminekisi minidotiꞌ initeꞌ lamineꞌ olokuꞌ gize imineꞌ ve. Neꞌmine ogavo Oꞌmoso aza mo lamineꞌ ve lo daniꞌ nenako neꞌmo Abeliꞌ aza ve lisiheꞌ minineꞌ nene mo lelebizavo ningo nogilune. Idoꞌ Abeliꞌ aza nene mo helaniꞌ ma neineꞌza Oꞌmosomuꞌ neꞌmino gele eleꞌvoleꞌ ogo minineꞌ neꞌmo gamaziꞌve nene ha minivo gelaaꞌ noune.
HEB 11:5 Idoꞌ gozopoꞌ akaꞌmila Enokuꞌ Oꞌmosomuꞌ gele eleꞌvoleꞌ ogo minineꞌ neꞌmo olihe helamivo Oꞌmosoꞌmo eleꞌmize do vineꞌ ve. Idoꞌ eleꞌmize do vineꞌ nenako ezemuꞌ nene eveneꞌ ingine viseꞌ igi ma ningamaniꞌ ve. Nemuꞌ nene eiꞌ monovomuꞌ monoꞌ godolouꞌ tiꞌ li gizi nizaniꞌ ma neive: Oꞌmosoꞌmo olihe eleꞌmize do vamineꞌ gamenelasi nene Oꞌmosoꞌmo ninge lamineꞌ do-daaꞌ ineꞌ ve.
HEB 11:6 Ne neiha Oꞌmosola vo giꞌmizelone li minilizave ingine ezemuꞌ nene tiꞌ li gili gili eleꞌvoleꞌ igi minilizadoꞌ o neive: Oꞌmoso nene nomineꞌ nevoba mo neive. Idoꞌ eze viseꞌ igi ezela vi giꞌmizave nene meni lamineꞌ ngemaaꞌ ive ma ne neive. Idoꞌ neꞌmine li gili gili eleꞌvoleꞌ igi minilizadoꞌ o neineꞌ nenako ma gili eleꞌvoleꞌ amilizaniꞌ nene Oꞌmosoꞌmo engiꞌ ninge lamineꞌ dalineꞌ aka nene ma minamoloseive.
HEB 11:7 Idoꞌ Oꞌmosomuꞌ gele eleꞌvoleꞌ ogaꞌ ive gohi ma Noaꞌni nene Oꞌmosoꞌmo eveneꞌ ngebeleleseive lineꞌ noso nene olihe sotoꞌ amivo aꞌmine noso sotoꞌ ilingumuꞌ nene lo sotoꞌ ogo lo-emavo Noaꞌ aza Oꞌmosomuꞌ gele eleꞌvoleꞌ ogo minineꞌ neꞌmo aza veneꞌ izipesi goloso ogalone lo Oꞌmosoꞌmo lidoꞌ gele lamineꞌ o mino sipi ma loloꞌ ogo noso velo anguꞌ nene gipele zuhosi veneꞌ izipesi nene do nguꞌ izineꞌ. Idoꞌ neꞌmine ogo Oꞌmosomuꞌ gele eleꞌvoleꞌ ogo minineꞌ neꞌmo misubouko aleve linge engita monovo goloso minineꞌ nene ngelebizineꞌ. Idoꞌ Oꞌmosoꞌmo ezemuꞌ gili eleꞌvoleꞌ igi minaaꞌ ave mukiliti luꞌine nene do lisiheꞌ o-ngedaaꞌ neineꞌ nenako Noaꞌ aza neꞌmine ogo Oꞌmosomuꞌ gele eleꞌvoleꞌ ogo minineꞌ neꞌmo nene eiꞌ Noaꞌ lulosi do lisiheꞌ o-dineꞌ ve.
HEB 11:8 Idoꞌ Abalahamuꞌ aza Oꞌmosomuꞌ gele eleꞌvoleꞌ ogo minineꞌ nenako nemuꞌ nene Oꞌmosoꞌmo naza gelebizeloniꞌ misubola gaꞌ lo vozo lo lo-davo aza aꞌmidoꞌ gele do vineꞌ ve. Ee, aza vo hetelelineꞌ misubo nemukisi nene ningo gelamo gopo eze misuboꞌve hulo Oꞌmosoꞌmo aꞌvopilemoꞌ zuholiti misubo minelive lo alingeꞌ imineꞌ misubola nene gaꞌ lo vo minineꞌ.
HEB 11:9 Idoꞌ Oꞌmosomuꞌ gele eleꞌvoleꞌ ogaꞌ ive minineꞌ neꞌmo aꞌmine vozo lo-dineꞌ misuboloꞌ nene vo hetelo aꞌmida nene gopo venenga ve neꞌmine gelo mino Oꞌmosoꞌmo aꞌmine misubo salani molo-lengedekuve lo lo huko-ngidive sitaꞌ eiꞌ gipele Isakaki idoꞌ Isakaꞌ gipele Zakoboki nesi nene aꞌmida seli numungukovoꞌ ingi monaniꞌ ve.
HEB 11:10 Idoꞌ seli numungukovoꞌ ongo minineꞌ nene Oꞌmosoꞌmo gala gelo luhuvo izo do sotoꞌ ineꞌ numuno ebeꞌ minevoꞌ minevoꞌ inguꞌ nene alingeꞌ vo holalove lo gala gelo aꞌminemuꞌ gizebo ogo mino seli numungukovoꞌ ongo minaaꞌ ineꞌ ve.
HEB 11:11 Idoꞌ Abalahamuꞌ aza Oꞌmosomuꞌ gele eleꞌvoleꞌ ogaꞌ ive minineꞌ neꞌmo nene Oꞌmosoꞌmo gipa ma gedelesane lo lo huko-dineꞌ nenako nemuꞌ aza goꞌne ngelo izamoloseinako mo gedelesuve lo gelo gele eleꞌvoleꞌ ogo minineꞌ neꞌmo elenaho Salaꞌ aza gohuno veneꞌ neivo idoꞌ Abalahamuꞌ aza ozoho molo izipe gedeli gamene osuꞌ lavo neꞌmini minasidoꞌ nene Oꞌmosoꞌmo Salaꞌni izipe molo emelineꞌ amuzo emavo Isakaꞌni gidineꞌ.
HEB 11:12 Neꞌmo Abalahamuꞌ eze nene mo ozoho molo vani goloso molo minidotiꞌ nene aꞌvopilemoꞌ mukiliti avoꞌnibo loloꞌ ineꞌ. Eiꞌ hamokutiꞌ nene aꞌvopilemoꞌ vaiꞌ goloso sotoꞌ igi okulumotoꞌ sonohiꞌ neꞌmine idoꞌ noso gahevela gepe neꞌminisa sotoꞌ igi evenelitesi gati nanikeꞌ nilizahe li ningamilizadoꞌ neꞌmine minaniꞌ ve.
HEB 11:13 Idoꞌ aꞌmine mene lo-lingimuve mukiꞌ ingine nene Oꞌmosoꞌmo ngemelove lo salani molo-ngidineꞌ initeꞌ nene olihe engita sotoꞌ amivo hili vaniꞌza aꞌmine initeꞌ sotoꞌ ilineꞌ gamene nene olihe hotoꞌ ha neivo mo sotoꞌ oloseive li ningi gili laniteꞌ gili gili eleꞌvoleꞌ igivoꞌ mini hilaniꞌ. Idoꞌ neꞌmine igi mini hilaniꞌ neꞌmo ingine nene me misubouꞌ mine giliꞌ lo minelonive minamo ha venenga ve neꞌminevoꞌ gelo minelonive nene none li li sotoꞌ igi minaniꞌ ve.
HEB 11:14 Idoꞌ eveneꞌ ma ingine gamazi neꞌminevoꞌ nilavo ma nene neꞌmo ingine mo mini giliꞌ lilizaniꞌ ebeꞌine atokumuꞌ viseꞌ igi gizebo igi nizave lo gelelesune.
HEB 11:15 Idoꞌ ingine gomuꞌ mini mili minaaꞌ aniꞌ misuboꞌninguko tineꞌ mili gohi ma vilisa giladiniko tineꞌ mili viliza akaꞌine nene ha ngoloꞌ lo minivo mo tineꞌ mili vikedine.
HEB 11:16 Vikedineꞌza ingine minaniꞌ misubo ivileꞌ ogo minineꞌ ebeꞌ Okulumokuꞌ neineꞌ nela luꞌine nene vavo aꞌmine misubouꞌ nene ha gopo minaniꞌ ve. Idoꞌ ingine neꞌmine igi minaaꞌ aniꞌ nemuꞌ Oꞌmoso aza engiꞌ Oꞌmosoꞌine minineꞌ nemuꞌ nene Oꞌmosoꞌine nouve loo lo sotoꞌ olosa ovozo helaaꞌ ineꞌ nevoba olize izo lo sotoꞌ ogaꞌ ineꞌ ve. Idoꞌ aza nene engiꞌ alingeꞌ miniliza numuno ebeꞌine do sotoꞌ ogo molo-ngidineꞌ nenako neꞌmo nene engiꞌ Oꞌmosoꞌine minineꞌ nemuꞌ ovozo helamaaꞌ ineꞌ nene mo gele none.
HEB 11:17 Idoꞌ Oꞌmosoꞌmo Abalahamuꞌni nene nenikumuꞌ gele eleꞌvoleꞌ ihe amihe lo emenguꞌ molo gipele Isakaꞌni nene belo olokuꞌ gize nemezo lavo Abalahamuꞌ aza Oꞌmosomuꞌ gele eleꞌvoleꞌ ineꞌ neꞌmo gipele Isakaꞌni nene belo olokuꞌ gize emelesa ineꞌ. Ee, gomuꞌ nene aꞌmine Isakaꞌnimuꞌ nene Abalahamuda Oꞌmosoꞌmo gamazi atoꞌ atoꞌ lo lo huko-do tiꞌ lo lineꞌ: Geiꞌ guliveka di mini sotoꞌ igi mini-di dizilizaniꞌ gaꞌvopilemoꞌ zuho nene aꞌmine Isakadatikovoꞌ sotoꞌ ilisave lo lo-emavo Abalahamuꞌ aza gele lamineꞌ ogo aꞌminemuꞌ nene gele eleꞌvoleꞌ ineꞌza Isakaꞌ aza helaavo ma Oꞌmosoꞌmo gohi do ote-do lo huko lo nimineꞌ gamazi nene ha do gihile izelidoꞌ o neive lo gala gilineꞌ nenako Oꞌmosoꞌmo lavo aza nene aꞌmine gipele hamoꞌ Isakaꞌni nene belo olokuꞌ gizo Oꞌmoso lehize-delesa ineꞌ ve. Idoꞌ Abalahamuꞌ Isakaꞌni belelesa gamunoꞌ neivo Oꞌmosoꞌmo geto oꞌve lo-damidini Abalahamuꞌ aza belavo mo heladinako nemuꞌ nene hilingutiꞌ Oꞌmosoꞌmo do tineꞌ molo-davo eleꞌmizo aniꞌ gelave.
HEB 11:20 Idoꞌ Isakaꞌ aza Oꞌmosomuꞌ gele eleꞌvoleꞌ ogo minineꞌ neꞌmo gipele Zakobongi Esaungi engita alingeꞌ sotoꞌ o-ngemelineꞌ initeꞌ nemuꞌ nene lo-ngemo noꞌnohoꞌ ize-ngidineꞌ.
HEB 11:21 Idoꞌ Zakoboꞌ aza Oꞌmosomuꞌ gele eleꞌvoleꞌ ogo minineꞌ neꞌmo helelesa miningutiꞌ nene Zoseheꞌ gipele sitaꞌ nene hamo hamoꞌ Zakoboꞌ noꞌnohoꞌ ize-ngidineꞌ. Neꞌmine ogo zaloꞌ do oto gubiꞌ izo Oꞌmoso opoꞌni lineꞌ.
HEB 11:22 Idoꞌ Zoseheꞌ aza Oꞌmosomuꞌ gele eleꞌvoleꞌ ogo minineꞌ neꞌmo vani molo helelesa minineꞌ gameneuꞌ nene Kanaha misubo nene Oꞌmosoꞌmo ngemelove lo salani molo-ngidineꞌ nenako neze zuho Isilaeleꞌ aleve ingine Aigita misubo nene huli Kanaha misubola tineꞌ mili vilisave lo gala gelo gele eleꞌvoleꞌ ogo aꞌminemuꞌ lo-ngemo idoꞌ neniꞌ amuzoꞌne nesi nene di vii aꞌmine Kanaha misubola galese izilizave lo lo-ngimineꞌ.
HEB 11:23 Idoꞌ Moseꞌ sotoꞌ ogavo izelehoi melehoi ningasineꞌ nene izipe lamineꞌ goloso sotoꞌ ogavo ingine Oꞌmosomuꞌ gili eleꞌvoleꞌ igi minasineꞌ neꞌmo Aigita aleveti guveꞌinesi ve Halaoꞌ aza Isilaeleꞌ alevelatiꞌ gipeꞌine ma sotoꞌ ikevo ma mo ngibili hiliꞌmi vivoꞌ minilisave lo lo huko-ngidingumuꞌ nene golise gilami gili huli aꞌmine gipeꞌine nene di haleki di minasivo ikeꞌni sito hamo vineꞌ.
HEB 11:24 Idoꞌ Halaoꞌ aluvoꞌmo Moseꞌni nene do mongizavo minineꞌ nenako aza nene eiꞌ gipele gelo mino Aigita vetinguꞌ eveneꞌ naba mino neꞌmi laniteꞌve ato atoꞌ gelo minidineꞌza aza lodive ogosa Oꞌmosomuꞌ gele eleꞌvoleꞌ ogo minineꞌ neꞌmo Oꞌmosoꞌmo eiꞌ evenele meni ngemelinguꞌ nene nezesi nemelive lo nemuꞌ lulo molo minineꞌ nenako nemuꞌ nene Aigita ve nete Isilaeleꞌ aleve ingine Kilisitoꞌ zuho neꞌmine liliꞌ igi minadiꞌmo di uꞌmusupo lizi-ngidavo minanguꞌ nene nazasi vo holo engikisi mulumo gelo mineloniꞌ nemuꞌ Oꞌmosoꞌmo meniꞌne nemelineꞌ neꞌmo Aigita misubouꞌ heneni nganeni minineꞌ nene ivileꞌ o neive lo gelo idoꞌ naza nene Aigita aleveti monovo golosoloꞌ nene eꞌmeto neꞌmi laniteꞌve nene nazasi ha gelo mineloniꞌza aꞌmine laniteꞌve nene geto osuꞌ lilineꞌ nenako nemuꞌ nene neꞌmine amo naza nene Oꞌmosoꞌmi evenele Isilaeleꞌ aleveuꞌ nene vo holo engiꞌ goboni mili-ngidanguꞌ nene makatoꞌ mino mulumo alumo gelo minelone lo Oꞌmosomuꞌ gele eleꞌvoleꞌ ogo minineꞌ neꞌmo Halaoꞌ aluvoꞌmi gipele ve li-nidamilizave lo oꞌve lo golise vineꞌ.
HEB 11:27 Idoꞌ Oꞌmosomuꞌ gele eleꞌvoleꞌ ogo minineꞌ neꞌmo guvelesi ve Halaoꞌ neꞌmi goliseꞌve gelamo Aigita misubo hulo vineꞌ. Ee, Oꞌmoso nene vetedunuꞌ ngelo ningamolonidoꞌ o minineꞌza Moseꞌ aza Oꞌmosomuꞌ gele eleꞌvoleꞌ ogo minineꞌ neꞌmo aza nene Oꞌmoso ninge neineꞌ gele minivo minineꞌ neꞌmo nene Aigita misubo hulo Oꞌmosoꞌmo imineꞌ gono nene hulamo geni bilingukisi ha amuzo molo doꞌmo vo minineꞌ.
HEB 11:28 Idoꞌ Moseꞌ aza Oꞌmosomuꞌ gele eleꞌvoleꞌ ogo minive minineꞌ nenako neꞌmo nene aza neꞌmine ineꞌ ve. Oꞌmosoꞌmo angeloꞌ ma imiselavo ogo Aigita aleveti ganaꞌ gipeꞌine ngebelelinguꞌ nene Isilaeleꞌ aleve leze gipetesi ngebelalive lo Moseꞌ aza angeloliꞌmo iseꞌine izelineꞌ akaloꞌ ngeleꞌmize molo Oꞌmosoꞌmo lidoꞌ eꞌmeto eveneꞌ lo-ngedavo Isilaeleꞌ aleve ingine sipisipi angale nene ngibili vaniseꞌine nene numuꞌine gatedoꞌ gatedoꞌ nene noso mili hibiꞌ izi hilikaꞌ hilikaꞌ aniꞌ ve.
HEB 11:29 Idoꞌ Isilaeleꞌ aleve ingine Oꞌmosomuꞌ gili eleꞌvoleꞌ aniꞌ neꞌmo guvo noso ma gulive Guleheꞌ Noso nene izo huko eza ema ogo gokoꞌ misubo neꞌmino minineꞌ gele minivo aꞌminguꞌ liki vaniꞌ. Idoꞌ Aigita aleve inginesi aꞌmineꞌmine ogo volone li nivavo guvo noso neꞌmo iheꞌ ogo do suꞌmize-ngedavo noso nii hilaniꞌ.
HEB 11:30 Idoꞌ Isilaeleꞌ aleve ingine Oꞌmosomuꞌ gili eleꞌvoleꞌ igi minaniꞌ neꞌmo Oꞌmosoꞌmo lidoꞌ eꞌmeti Zeliko numuno ebeliꞌmi gesi gehenidunuꞌ gizaniꞌ gesi haꞌna nene goꞌ laneme goꞌ laneme nene gamene hamo hamoꞌ di vodo vodo i-dikaꞌ i-dikaꞌ igi nizavo gamene seveni (7) ogavo aꞌmine gamene seveni (7) neꞌmi lulouꞌ nene gohi gamene seveni (7) neꞌmine di vodo vodo i-dikevo aꞌmine gehenidunuꞌ gizaniꞌ gesi nene ngululubizo lemo ongavo Isilaeleꞌ aleve aꞌminguꞌ dizi Zeliko aleve ngibili geseꞌ aniꞌ.
HEB 11:31 Idoꞌ Isilaeleꞌ aleve lovo di Zeliko ebekuꞌ olihe alisa navo aꞌmine ebekuꞌ minineꞌ pasidiaꞌ alu Lahabaꞌ aza apiꞌ ogo Oꞌmosomuꞌ gele eleꞌvoleꞌ ogo minineꞌ neꞌmo Isilaeleꞌ ve sitaꞌ aꞌmine numuno ebeꞌ Zeliko nene amamakaꞌ mili ningi alisa vasive nene do lamineꞌ o-ngedo numuꞌveuꞌ ngeleꞌmize molavo nemuꞌ nene alingeꞌ Isilaeleꞌ aleve nete igi Zeliko aleve Oꞌmosoꞌmi gamazi gili hulaniꞌ ngibili geseꞌ anguꞌ nene Lahabaꞌni nene bilami iseve izi-daniꞌ ve.
HEB 11:32 Idoꞌ aꞌmine luvoniꞌ eveneꞌ ingine Oꞌmosomuꞌ gili eleꞌvoleꞌ igi minaniꞌ neꞌmine igi eveneꞌ linge mukiꞌ ingine aꞌmineꞌmine igi Oꞌmosomuꞌ gili eleꞌvoleꞌ aniꞌza naza nGideoniꞌ ve Balakaꞌ ve Samusoniꞌ ve Zehitaꞌ ve Davidiꞌ ve Samueliꞌ ve idoꞌ Oꞌmosoꞌmi veletiꞌ gamazi li sotoꞌ igaꞌ ave polohete linge mukiꞌ engiꞌ neti gamazi lo osuꞌ lo lolosa luvodiniko lo do vo nouvo haꞌna idine. Nemuꞌ nene gamazi linge nene ngelo ma lo osuꞌ lamolosuve.
HEB 11:33 Aꞌmine ve ingine Oꞌmosomuꞌ gili eleꞌvoleꞌ igi minadiꞌmo Oꞌmosoꞌmo hize eleꞌ o-ngedo neivo engikutiꞌ linge ma nete amuzo mili misubo mala mala vi Oꞌmosomuꞌ gilamave nene lovo i ngimi ngivileꞌ igi engita di gelekeleꞌ i-ngidaniꞌ. Idoꞌ engikutiꞌ linge ma nete engiꞌ misuboꞌninguꞌ nene monovo lisiheꞌ laminekovoꞌ minelive li eveneꞌ di lisiheꞌ i-ngidaaꞌ aniꞌ ve. Idoꞌ Oꞌmosoꞌmo neꞌmine manaꞌmine initeꞌ do sotoꞌ o-ngedelove lo lo huko-ngidineꞌ gamazi nesi nene engita gihile izaaꞌ ineꞌ ve. Idoꞌ engikutiꞌ eveneꞌ linge ma nete loposo gulo laioni nete ngibililisa ikevo ma aꞌmine laizoni nete libilikelizave li eveneꞌ nete akaꞌine nene hizi tili-ngidaaꞌ aniꞌ ve.
HEB 11:34 Idoꞌ engikutiꞌ linge ma nete ololiꞌmo loꞌvote-ngedelesa ineꞌ amuzoꞌve nene di hongu li-daaꞌ aniꞌ ve. Idoꞌ linge ma nene lovo ve nete bainati miteꞌ nedunuꞌ ngibilaaꞌ aniꞌza ingine olovoꞌ lamineꞌ ikevo bainati miteꞌ neꞌmo ngebelamaaꞌ ineꞌ ve. Idoꞌ linge ma ingine gilizevo minangutiꞌ nene amuzo ve liliꞌ igi minaaꞌ aniꞌ. Idoꞌ misubo mautiꞌ ve igi lovo i ngimaaꞌ anguꞌ nene linge ma nete amuzo mili mini ngimiseli di vaaꞌ aniꞌ ve.
HEB 11:35 Idoꞌ veneꞌ linge ma nene izipahaꞌine hilikengutiꞌ nene Oꞌmosoꞌmo do ote-ngedavo gohi izeꞌningida igi giꞌmizaaꞌ aniꞌ ve. Idoꞌ linge ma ingine Oꞌmosomuꞌ gili eleꞌvoleꞌ igi minaniꞌ neꞌmo ve malite gavoso ngibili goboni mili-ngidi tiꞌ li li-ngidaaꞌ aniꞌ ve: Isetine izo gavoso lengebelamoloniko lingine Oꞌmoso mehedine imi monoꞌ nene hulilizave li neꞌmine li-ngidaaꞌ aniꞌza alingeta hele noloningutiꞌ gohi oto minevoꞌ minevoꞌ lemeni dameni lamineꞌ dosoꞌ ma nenave li gili huli nizavo ngibilikevo hilaaꞌ aniꞌ ve.
HEB 11:36 Idoꞌ linge ma nene evenelite gamazi goloso palasa li-ngidi gize zohiꞌ i-ngidi amuzo malehe nalaꞌ izi lobe tobeꞌ aniꞌ nedunuꞌ nene ngibilaaꞌ aniꞌ ve. Idoꞌ linge ma nene gizeꞌnidoꞌ aꞌnidoꞌ seni nalaꞌ izi-ngidi huli nalaꞌ numunguꞌ i-ngidaaꞌ aniꞌ ve.
HEB 11:37 Idoꞌ linge ma nene gehenidunuꞌ huli huliꞌ igi ngibilaaꞌ avo hilaaꞌ aniꞌ ve. Idoꞌ linge ma nene ngibili giti setaꞌ igaꞌ aniꞌ ve. Idoꞌ linge ma nene bainati miteꞌ nedunuꞌ ngibili hilaaꞌ aniꞌ ve. Idoꞌ linge ma Oꞌmosomuꞌ gili eleꞌvoleꞌ aniꞌ nemuꞌ ngimiseli hulikevo okoꞌnidoꞌ initeꞌine nomivo sipisipi losuvo idoꞌ memeꞌ losuvo nedunukovoꞌ okoꞌnidoꞌ ngili moni okoꞌine losuvoꞌmi initeꞌ nosoꞌ initekisi idoꞌ geneganaꞌinesi mukiꞌ nene nomivo nimonavo goboni mili-ngidi di goloso i-ngidaaꞌ aniꞌ ve.
HEB 11:38 Ingine Oꞌmosomuꞌ gili eleꞌvoleꞌ igi eveneꞌ lisiheꞌ lamineꞌ minadiꞌmo eveneꞌ linge mukiꞌ nene engitoꞌ lisiheꞌ igi minamaniꞌza aꞌmine aleve nene evenelite vasa izi-ngidikevo guhali hali igi vi eveneꞌ nizamada ebeꞌ hadivela idoꞌ golola geheni mulikuꞌ idoꞌ misubo luloukisi gopo ingaaꞌ aniꞌ ve.
HEB 11:39 Aꞌmine mene aleve mukiꞌ ingine ezemuꞌ gili eleꞌvoleꞌ aniꞌ nemuꞌ Oꞌmosoꞌmo ningivo lamineꞌ ineꞌza lehize-ngedelove lo evenele zuho lo molo-ngidineꞌ initeꞌ nene olihe dami hilaniꞌ ve.
HEB 11:40 Idoꞌ aꞌmine Oꞌmosoꞌmo ngemelove lo lo molo-ngidineꞌ initeꞌ nene olihe dami hilaniꞌ nene nanitekumuꞌ ve. Oꞌmosoꞌmo leliꞌ olihe sotoꞌ amunivo engiꞌ lehize-ngedeloniꞌ initeꞌ nene gomuꞌ mili mudise dalizadoꞌ lisiheꞌ i nizaha gizebo igi nizavo lelikisi makatoꞌ daloneꞌ nene lamineꞌ oloseive lo gomuꞌ gele minineꞌ nenako nemuꞌ nene ingine olihe dami hilaniꞌ ve.
HEB 12:1 Aꞌmine Oꞌmosomuꞌ gele eleꞌvoleꞌ ogaliꞌmi monovo di sotoꞌ mili lelebizave mukiꞌ ingine nene limuso neꞌmini vaiꞌ goloso mini hizi vodo vodo i-lidi vonuꞌ libili nizaniꞌ gilineꞌ nemuꞌ nene laza okodela lihiteheꞌ initeꞌ vaiꞌ nene do hulo idoꞌ lihime initeliꞌmo gizedeloꞌ izo do mineꞌ mineꞌ ilineꞌ initeꞌ nesi nene do hulo hazala ogo Oꞌmosoꞌmo aka lelebizidokovoꞌ nene initeꞌ maliꞌmo aꞌmine aka hize tile-ledamivo idoꞌ ahukisi mo lamo lotikovoꞌ izo vo minelone.
HEB 12:2 Idoꞌ neꞌmino lotiꞌ izo novo Oꞌmosomuꞌ gele eleꞌvoleꞌ ogaꞌ monovoloꞌ nene gomuꞌ molo lemo aꞌmine monovoloꞌ eꞌmete osuꞌ losa aka lelebizive Izesuꞌnivoꞌ nene eꞌmeto volone lo eitokovoꞌ nene vete hulo-do volone. Aza nene alingeꞌ nolize izo minelongumuꞌ ve lo gelo evenelite ve goloso ve li gili lohotoꞌ zaloꞌ bililizangumuꞌ ovozo helo minelingumuꞌ nene haza initeꞌ ve lo gele hulo golise vamo aꞌmine lohotoꞌ zaloꞌ bilangukisi nene amuzo molo minineꞌ ve. Neꞌmine ogo Oꞌmosolatiꞌ lemo minelineꞌ moꞌmosiꞌveloꞌ Oꞌmosoꞌmo ana hulaaꞌ ida vo neive.
HEB 12:3 Idoꞌ Izesuꞌ monovomuꞌ gililizaniꞌ nene aza mo hize eleꞌ o-ledelineꞌ nenako nemuꞌ nene lingine monokuꞌ amuzo molaakumuꞌ goseleꞌ lengebelavo lutine nene vo gilizevo ogalive li lihime daaꞌ ave nete Izesuꞌni biluvaꞌ i-daaꞌ anguꞌ amuzo molo minineꞌ mamuꞌ nene gili minilo.
HEB 12:4 Lingine goloso initeꞌ neꞌmo do ongo-lengedelesa neivo amuzo mili lovo i imi aꞌmineꞌmi luloutiꞌ nene lingine olihe vanise lepi hilamave.
HEB 12:5 Idoꞌ lingine Oꞌmosoꞌmo muludinguꞌ do lamineꞌ ogo gipeꞌne ve lo gamazi ma monoꞌ godolouꞌ tiꞌ lo lo-lingidineꞌ mamuꞌ nene gatine molahe. Olo: Gipeꞌnee, Guvelesi veꞌmo eveneꞌ ma lulo ngemo minelive nene veꞌine zopovo siꞌzi monovo lisihetokovoꞌ monilizangumuꞌ ve lo geni initeliꞌmi lulouꞌ ngeleꞌmize molaloseive. Ee, gipeꞌne ve lo ningaaꞌ ive mukiꞌ nene veꞌine zopovo siꞌzilizave lo ngebeleleseive. Idoꞌ neꞌmine oloseinako nemuꞌ nene gaza Guvelesi veꞌmo veka zopovo siꞌzo monovo lisihetokovoꞌ moneline lo do lisiheꞌ o-gedo geni initeliꞌmi lulouꞌ geleꞌmize nomolavo ma gaza nemuꞌ gelanivo haza initeꞌ loloꞌ amivo. Idoꞌ lihimeka nogimivo ma nemuꞌ goseleꞌ gebelamilive.
HEB 12:7 Geni initeliꞌmi lulouꞌ mini ma nene Guvelesi veꞌmo leleꞌmize akaloꞌ neive li aꞌmine initeꞌ nene goseleꞌ lengebelamivo ha gihi minilo. Meꞌninge nete gipeꞌine ma veꞌine zopovo siꞌzilizave li ngibili di hehe li-ngidami huli-ngimikavo minaniꞌ nene ma minamavo mukitoꞌ nene ngibili di hehe li-ngidaaꞌ naniꞌ nemuꞌ nene Oꞌmosoꞌmo linginesi gipeꞌne nizave lo neꞌmine o-lengedo noloseive.
HEB 12:8 Ee, meꞌninge mukiꞌ nete gipeꞌine veꞌine zopovo siꞌziliza initeꞌ di-ngidi di hehe li-ngidaaꞌ naanako lengikisi Oꞌmosoꞌmo neꞌmine o-lengedo minamineꞌ neidiniko eiꞌ izipahala zuho minami akaloꞌ izipe neꞌmine minadine.
HEB 12:9 Idoꞌ aꞌmine gamaziloꞌ imineꞌ molo ma lolove. Ha okode losuvosi noneꞌ mene gidave metemote nete leliꞌ vete zopovo siꞌzilizave li di hehe li-lidavo gelekeleꞌ o-ngedo mino lamineꞌ giluneꞌ nenako nemuꞌ nene neꞌmine o-ngedaaꞌ nouneꞌ nene ivileꞌ ogo vode lute lemeni dameni do sotoꞌ o-ledaaꞌ ive metehine nene nabosa gelekeleꞌ o-dukeꞌvo. Olo. Ee, laza neꞌmine ogo ezelatiꞌ minevoꞌ minevoꞌ lemeni do minevoꞌ minevoꞌ olosunako nemuꞌ nene gelekeleꞌ nabo o-do minelone.
HEB 12:10 Ee, me misubouꞌ metemote di hehe li-lidavo gelekeleꞌ o-ngiduneꞌ nene ingine engiꞌ luꞌnidoꞌ lamineꞌ oloseive li giladoꞌ gamene liꞌnibevoꞌ di hehe li-lidaaꞌ aniꞌza Oꞌmoso eiꞌ neꞌmino lihimete goloso daaꞌ monovote nene nomivo monovote lisihekisivoꞌ minelone lo leleꞌmize lamineꞌ ilineꞌ initeꞌ do sotoꞌ o-ledo do hehe lo-ledaaꞌ neineꞌ nenako nemuꞌ nene gelekeleꞌ nabo o-do minelone.
HEB 12:11 Vete zopovo siꞌzeloningumuꞌ ve li di hehe li-lidi geni initeliꞌmi lulouꞌ leleꞌmizi milikevo aꞌminguꞌ mineloneꞌ gameneuꞌ nene lolize izo laniteꞌ gelo minelonivoba ha mulumo alumo gelo minelesuneꞌza neꞌmine oloneꞌ neꞌmo leleꞌmize akaloꞌ ogavo ma alingeꞌ neꞌmi gihileꞌve nene monovo lisiheꞌ laminekovoꞌ ogo molo nonivo lute nene zou lo minaaꞌ neive.
HEB 12:12 Oꞌmosoꞌmo vetine zopovo siꞌzilizave lo geni initeliꞌmi lulouꞌ lengeleꞌmize molaaꞌ neineꞌ neꞌmo nene lengeleꞌmize lamineꞌ oloseinako nemuꞌ nene lingine lutine gopo o vivo lutineꞌmi gizene anaꞌve nene guluꞌ gelo izo bele vivo lutine gilizevo ogo minaaꞌ neineꞌ nene gohi di oti-di gonouꞌ eleꞌmizi milalo.
HEB 12:13 Neꞌmine igi lutine neꞌmo monoꞌ akaloꞌ volosa neivo ma lengikuꞌ ve ma lingine lutineꞌmi gizeneꞌve goloso o vivo minave lingine nene gopo aka mili vami aꞌmidoꞌ lamini nivi lamineꞌ ilizangumuꞌ nene aka lamineꞌ di hehe li vi minilo.
HEB 12:14 Idoꞌ lengikuꞌ lovo lolize nene sotoꞌ ogalive li eveneꞌ mukita hongu monovo nene igi mili ngelebizi minilizangumuꞌ nene amuzo milalo. Idoꞌ ve ma ingine Oꞌmosoꞌmi evenelelite di minilizaniꞌ monovo lisiheꞌ lamineꞌ nene engita nomivo minaaꞌ nave nene Guvelesi ve mo ningamilizaniꞌ nenako lingine hongu monovo igi mili ilizadotiꞌ nene Oꞌmosoꞌmi evenele nounako li monovo lisiheꞌ laminetokovoꞌ eꞌmeto volone li amuzo mili minilo.
HEB 12:15 Oꞌmosolatiꞌ nasahiliꞌ lamineꞌ nene lengiꞌ zuho malite ningi huli aka maloꞌ vikelizave li ge gizebo o-nede ne gizebo o-gede li minilo. Idoꞌ lengiꞌ zuho maliꞌmo lengiꞌ vovotinguꞌ mino za maliꞌmo gihile ekeseꞌ ineꞌ izaaꞌ neineꞌ neꞌmino mino monovo goloso ato atoꞌ do sotoꞌ ogo lengita geni do sotoꞌ o-lengedo neivo lengikutiꞌ eveneꞌ lingela mukiꞌ nene aꞌmineꞌmine igi monovo goloso dikevo lutine do gopo ogalive li gizebo lekeseve igi minilo.
HEB 12:16 Idoꞌ lengikutiꞌ veneꞌ vemohoꞌ gopoꞌnapa ingi monikelizave. Idoꞌ lengikutiꞌ eveneꞌ ma Esauꞌ neꞌmine mini Oꞌmosomuꞌ gaꞌine molavo me misubouꞌ initekumukovoꞌ gili minikelizave li ge gizebo o-nede ne gizebo o-gede li minilo. Esauꞌ aza nene Isakaꞌ ganaꞌ gipele mino melehidoꞌ medelo mino melehi initeꞌvelokisi nene medelo minelidoꞌ minineꞌza gamene ma aꞌmine uvoloho Esauꞌ aza gaꞌna helo nakunolo Zakoboꞌ nosoꞌ niteꞌ gize vataꞌ ogo minineꞌ nenako aꞌmingutiꞌ nene linge ma nemavo nalongisi ve lo haza misubouꞌ initeꞌ nosoꞌ nitetoꞌ nene melehidoꞌ medelo minelineꞌ moꞌmosiꞌve nene nakunolo Zakoboꞌni eme molaniꞌ ve. Ee, Esauꞌ aza Oꞌmosomuꞌ gala molavo me misubouꞌ initekumukovoꞌ gele minive mino haza nosoꞌ niteꞌ nene gamene hamokovoꞌ nalosa idoꞌ nene initeꞌ naba melehidoꞌ medelo minelineꞌ moꞌmosiꞌve nene Zakoboꞌni imineꞌ ve.
HEB 12:17 Emavo Zakoboꞌ ezeloꞌ medelo minavo alingeꞌ meleho aza ganaꞌve noꞌnohoꞌ ize-delineꞌ noꞌnohoꞌ nene Zakoboꞌni ize-davo Esauꞌ aza meꞌneho noꞌnohoꞌ nene do tineꞌ molo neniꞌ noꞌnohoꞌ ize-nedelive lo ive ogo lulo do velepeꞌ izelineꞌ aka viseꞌ ogo minineꞌza ma ningamivo meleho aza Esauꞌ gamaziꞌve gele hulineꞌ nene lingine mo gili nizaniꞌ ma neize. Nemuꞌ nene lingine eze ineꞌ neꞌmine amilo.
HEB 12:18 Lingine Oꞌmosola igi giꞌmizaniꞌ nene Isilaeleꞌ aleve leliꞌ avotemote Sinae golola louꞌ gamazi lo huko-ngidineꞌ dalisa vanguꞌ sotoꞌ ogo minineꞌ initeꞌ neꞌmidoꞌ nene lingine ma amave. Ingine ha veꞌinedunukovoꞌ ningi idoꞌ gaꞌinedunukovoꞌ gililizaniꞌ initeꞌ nevoꞌminevoꞌ neidoꞌ aniꞌ ma neive. Ee, ingine Sinae golola vadoꞌ nene oloꞌ gulumo ogo minivo idoꞌ litiꞌmuso goloso izo minivo idoꞌ hepeꞌ naba mumu gehe gehe ogo elo minivo
HEB 12:19 idoꞌ pikuli neꞌmo nolo naba molo minivo idoꞌ Oꞌmosoꞌmo gamazi livo gilave nete nolo nene gilangumuꞌ golise gili gamazi gohi ma lelitoꞌ lisiheꞌ ogo lo lemamilive li amuzo mili Moseꞌni li-imaniꞌ.
HEB 12:20 Idoꞌ Oꞌmosoꞌmo tiꞌ lo lo huko-ngidineꞌ nemuꞌ ngemengingi goloso izineꞌ: Aꞌmine Sinae golola vi lisi gililiza initepe evenepe nene mo geheni huli huliꞌ igi ngibili hililizave. Idoꞌ evenekovoꞌ nevoba ize gulo nesi aꞌmida vi lisi gililizaniꞌ nene mo ngibili hililizave lo lineꞌ.
HEB 12:21 Ee, ingine ninganiꞌ initeꞌ nene ngemengingi izaaꞌ initeꞌ atoliꞌmine goloso minavo Moseꞌ aza nehelele goloso izavo luvoluvo zaloꞌ do nouve lo lo-ngimineꞌ.
HEB 12:22 Ee, lingine nene avotemotida Sinae golola ngemengingi initeꞌ sotoꞌ o ngimineꞌ neꞌmidoꞌ nene ma vamave. Asi aꞌmine ngemengingi initeꞌ ivileꞌ ogo lamineꞌ goloso minineꞌ initetoꞌ ikeniꞌ neive. Idoꞌ Zelusalemi numuno ebekuꞌ minineꞌ golo Zaioni neꞌmine minevoꞌ minevoꞌ Oꞌmosoꞌmi numuno ebeꞌ Zelusalemi neꞌmino Okulumokuko minineꞌ numuno ebekuꞌ Zaioni golo mala nene lingine mo imi hilikeve. Idoꞌ angeloꞌ tauseni tauseni neꞌminete zegeꞌ zegeꞌ igi ngolize izi minadasi
HEB 12:23 idoꞌ Oꞌmosoꞌmo noꞌnohoꞌ ize-ngedelineꞌ izipahala Okulumoꞌ ebeꞌ ngemelingumuꞌ guliveꞌine Okulumokuꞌ gize molave engiꞌ muliseukisi nene mo imi hilikeve. Idoꞌ eveneꞌ mukiliti Oꞌmoso leliꞌ zaasi naba minidasi idoꞌ ve lisiheꞌ neꞌmine mo hilikevo sikalahuꞌine Oꞌmosoꞌmo mudise ngeleꞌmize lamineꞌ ogavo nizada nesi nene mo imi hilikeve.
HEB 12:24 Idoꞌ lelikisi Oꞌmososi kuku holo-ledo gamazi hulo voleloꞌ meloꞌ o-ledo Oꞌmosoꞌmo gamazi lamineꞌ gosohoꞌ lo huko-lidineꞌ lo-do ogo limive Izesuda nesi imi hilikevo vaniseꞌve lutidoꞌ hibiꞌ izo hulineꞌ gelavo minikeve. Kainiꞌ aza Abeliꞌni bele hilineꞌ vaniseꞌve nene misubouꞌ doꞌmozavo Oꞌmosoꞌmo ningo Kainiꞌni nene lihime imineꞌza Izesuꞌni bili hilaniꞌ vaniseꞌve nene ningo lihime lemamo isete izineꞌ nenako aꞌmine vaniseꞌve neꞌmo gono daniꞌ nene Abeliꞌ vaniseꞌmo gono daniꞌ nene ivileꞌ ogosa gono lamineꞌ daniꞌ ve. Neꞌmo lingine nene mo aꞌminguꞌ imi hilikeve. Idoꞌ lingine aꞌminguꞌ nene mo imi hilikenako nemuꞌ nene Oꞌmosoꞌmo nasahiliꞌ o-ledo hize eleꞌ o-ledaaꞌ neineꞌ nene lengikutiꞌ ve malite ningi huli monovo goloso lengiꞌ vovotinguꞌ di sotoꞌ ikelizave li gizebo lamineꞌ igi minilo.
HEB 12:25 Ee, Oꞌmosoꞌmi gamazi Izesuꞌ lo-lingimineꞌ nene hulikelizaze. Gizebo lamineꞌ igi minilo. Ingine Oꞌmosoꞌmi gamazi misubouꞌ mene Moseꞌ lo-ngimineꞌ gili hulave nene Oꞌmosoꞌmo ngebelelingutiꞌ olovoꞌ igi golise viliza akaꞌine ma minamivo aza lihime ngemaaꞌ neineꞌ nenako nemuꞌ Oꞌmosoꞌmi gamazi nene Okulumokutiꞌ lo-limineꞌ nenako gele huloloneꞌ nene laza Oꞌmosoꞌmo lihime lemelingutiꞌ nene mo kekeꞌ ngelo olovoꞌ amolosunako nemuꞌ nene aꞌmine gamazi nene gili hulikelizaze. Gizebo lamineꞌ igi minilo.
HEB 12:26 Moseꞌ Sinai gololoꞌ dizo minineꞌ gameneuꞌ nene Oꞌmosoꞌmo gamazi nolo-imivo nolo neꞌmo misubo nene do moꞌmongoꞌ ineꞌ ve. Idoꞌ Oꞌmosoꞌmo idise tiꞌ lo lo huko neineꞌ ma neive: Iheꞌ initeꞌ mukiꞌ nene gamene hamokovoꞌ ma do moꞌmongoꞌ olosuve. Idoꞌ misubovoꞌ nevoba okulumoꞌ nesi do moꞌmongoꞌ olosuve lo lineꞌ ve.
HEB 12:27 Idoꞌ initeꞌ mataꞌ nene gohi do moꞌmongoꞌ olosuve lo lineꞌ nene aza initeꞌ mataꞌ mukiꞌ do sotoꞌ muluvoniꞌ nene do moꞌmongoꞌ ogo do hulokuvo moꞌmongoꞌ ami minilizaniꞌ initekovoꞌ nene ha miniviꞌ miniviꞌ ilisave lo gele mino do moꞌmongoꞌ ilingumuꞌ lineꞌ ve.
HEB 12:28 Idoꞌ laza Oꞌmosoꞌmo gizebo inguꞌ moꞌmongoꞌ amilineꞌ ebeꞌ minevoꞌ minevoꞌ ilinguꞌ nene vo holokuneꞌ nenako nemuꞌ nene Oꞌmoso isaaꞌ neve lo-do opoꞌni lo-deloneꞌ nene mulunouꞌ lamineꞌ gelelidokovoꞌ o-delone. Idoꞌ ololiꞌmo initeꞌ loꞌvoto osuꞌ lilineꞌ neꞌmino Oꞌmosote neꞌmo eveneꞌ goloso ngebele osuꞌ loloseinako eze opoꞌni loloneꞌ nene ezemuꞌ lehelele izivo goliseꞌve gele mino neꞌmine ogo minelone.
HEB 13:1 Lingine monokuꞌ nene hamoꞌ zuho liliꞌ igi mini lutine nene ne geme ge neme li minaaꞌ naniꞌ nene lengitatiꞌ huko vamivo mini di vi minilo.
HEB 13:2 Idoꞌ eveneꞌ malite venenga ve ma engiꞌ minada ikevo ngeleꞌmize lamineꞌ igi haza eveneꞌ nene neꞌmine noo-ngidube li gili angeloꞌ nene ngeleꞌmize lamineꞌ aniꞌ nenako nemuꞌ lingine venenga ve ngeleꞌmize lamineꞌ ogakumuꞌ nene gili hulikevo gatine molalive.
HEB 13:3 Idoꞌ Izesuꞌ evenele ma nalaꞌ numunguꞌ huli-ngidikevo minanguꞌ nene lingine engikisi makatoꞌ nalaꞌ numunguꞌ mini mulumo alumo gili nizaniꞌ gilivosa engikumuꞌ gili mini hize eleꞌ i-ngidi minilo. Idoꞌ lingine ha vetinesi mini olihe ma hili vamanako lengikisi nene aꞌmineꞌmine igi goboni mili-lingidilizaniꞌ nene agae ma hize eleꞌ i-lidavoo li minilisanako nemuꞌ nene goboni mili-ngidavo minaaꞌ navemukisi nene gili mini hize eleꞌ i-ngidi minilo.
HEB 13:4 Idoꞌ veneꞌ vemohoꞌ gopoꞌ napa ingalizaniꞌ nene Oꞌmosoꞌmo lihime ngemeleseinako eveneꞌ mukiꞌ nene veneꞌ vemohoꞌ liliꞌ igaꞌ monovomuꞌ nene gili lamineꞌ i mini di gopo ami lisiheꞌ lamineꞌ igi mini eledingesivoꞌ idoꞌ vadingesivoꞌ ingalizave.
HEB 13:5 Idoꞌ Guvelesi ve aza lengiꞌ mo kekeꞌ hulo-lengedo vo haha amolosuve lo lineꞌ nenako nemuꞌ lingine lutine nene moni heneniloꞌ vaalive. Initeꞌ gohi ma daloinako li mumuzoꞌ ami lingine di minaniꞌ initeꞌ nene leliꞌ votigileloꞌ lisiheꞌ o neive li gili hongu li lamini minilo. Ee, Guvelesi ve aza lengiꞌ hulo-lengedamolosuve lineꞌ nenako
HEB 13:6 nemuꞌ nene laza gopo gate gelamo ezemuꞌ gele eleꞌvoleꞌ ogo monoꞌ godolouꞌ tiꞌ li gizi nizaniꞌ gamazi ma nene ha tiꞌ lo lolosune: Guvelesi ve aza hize eleꞌ o-ledaaꞌ neinako laza initeꞌ mamuꞌ lehelele izelidoꞌ nomivo idoꞌ eveneꞌ nete ma di goloso i-lidilizadoꞌ minamune.
HEB 13:7 Idoꞌ Oꞌmosoꞌmi gamazi li-lingimave gizebo vetine ingine monoꞌ akaloꞌ nivi hilaniꞌ engita nene gili mini gizekaꞌnidoꞌ nene ningi hehe li mini ngeꞌmeti nivi ingine Oꞌmosomuꞌ gili eleꞌvoleꞌ igi minaaꞌ aniꞌ monovoꞌine neꞌmidoꞌ nene lingine apiꞌnapiꞌ igi di minilo.
HEB 13:8 Izesuꞌ Kilisitoꞌ aza nene gomuꞌ minineꞌ monovoꞌvesi hazavoꞌ mino monovoꞌve nene do atoꞌ amo idisesi nene mo aꞌmineꞌmine ogovoꞌ mino mine do voo mineleseinako
HEB 13:9 nemuꞌ nene eveneꞌ ma monoꞌ gamazi ve li soza gamazi ato atoꞌ li-lingimilizaniꞌ neꞌmo gatine hizalize. Lute hize eleꞌ oloseive li nosoꞌ niteꞌ naakumukisi li-lingimilizaniꞌza lute hize eleꞌ o-ledaaꞌ neineꞌ initeꞌ nene nosoꞌ niteꞌ nevoba asi Oꞌmosoꞌmo nasahiliꞌ o-ledaaꞌ neineꞌ neꞌmo lute amuzo molavo neꞌmo nene lamineꞌ ilineꞌ nenako aꞌmine nosoꞌ nitekumuꞌ li-lingimilizaniꞌ gamazi gili daaꞌ nave nene aꞌmine initeliꞌmo ngeleꞌmize lamineꞌ amaaꞌ neineꞌ nenako neꞌmo gatine hizalive.
HEB 13:10 Ee, Oꞌmoso imaniꞌ nosoꞌ initekutiꞌ nene ha nalisave li li-lingimilisaniꞌza nemuꞌ lo-lengemeloze. Gililo. Sipisipi ize nevoꞌmine bili Oꞌmosoꞌmi holomoloꞌ mili gizi imisa naaꞌ naniꞌ neꞌmine initeꞌ gelo minivete Kilisitoꞌ nene leliꞌ sipisipi nevoꞌmine initete loloꞌ ogo lelita mine molo neive. Aꞌmine Kilisitoꞌ nene Oꞌmoso belo gize emaaꞌ sipisipi ize neꞌmine loloꞌ ogo neivosa laza nene eiꞌ Izesuꞌnimuꞌ gele eleꞌvoleꞌ ogo minaaꞌ nouneꞌ neꞌmo eiꞌ Izesuꞌ okoꞌno naaꞌ nouneꞌ gelave. Neꞌmine ogaꞌ nouneꞌza Zuda veti monoꞌ numuno adoꞌ seli numuno avazahaloꞌ gizaniꞌ mininguꞌ nene vi hili mini sipisipi nevoꞌmine bili Oꞌmoso imangutiꞌ naaꞌ nave ingine nene leliꞌ sipisipi izete neꞌmine loloꞌ ogo neivo laza eze okoꞌno nene naaꞌ nouneꞌ gilivo minaaꞌ nouneꞌ neꞌmine igi ingine gohi Izesuꞌ okoꞌnosi nene nalizave lo Oꞌmosoꞌmo gele ngemamineꞌ ve.
HEB 13:11 Idoꞌ gele ngemamineꞌ nene Kilisitoꞌ avazahaloꞌ ingine nene ize ma bilikevosa evenetoꞌ medelo mino Oꞌmoso initeꞌ lehize-daaꞌ ive naba aza aꞌmine izeliti vaniseꞌne nene eveneliti lihimeꞌine apaselingumuꞌ ve lo Oꞌmosoꞌmi kekeize atoliꞌmine lo minineꞌ numuno lulouko nene do dizo hibiꞌ izo Oꞌmoso emavo sikizapovo nene mo kekeꞌ nami di vi numuno ebeꞌ heta giziꞌvotaaꞌ aniꞌ nenako nemuꞌ aꞌmineꞌmine igi ize neꞌmi avazahaloꞌ minive bilangutikisi nene ingine mo naniꞌ gilivo minilizave lo ma gele ngemamineꞌ ve.
HEB 13:12 Idoꞌ aꞌmine ize neꞌmi vaniseꞌve nene Oꞌmoso imi sikizapovola nene di vi numuno ebeꞌ heta giziꞌvotaaꞌ aniꞌ nenako neꞌmo Izesuꞌ aza eiꞌ vaniseꞌvedunuꞌ eveneliti lihimete apase-ledo Oꞌmosoꞌmi evenele loloꞌ ogo minelonidoꞌ do lisiheꞌ o-ledelesa Zelusalemi numuno ebeliꞌmi gesi gatedotiꞌ lemo heta ogo mulumo gelo hilineꞌ.
HEB 13:13 Nemuꞌ nene Zuda veti gesi mingutiꞌ lemo vida nene lazasi lemo vo heta ogo ezela giꞌmizo mino eze ovozo hilineꞌ initeꞌ i-di minaaꞌ aniꞌ maꞌmine igi leliꞌ lovozo heleloneꞌ initeꞌ i-lidi minilizaniꞌ nene gopo gehe do vukeꞌzo.
HEB 13:14 Idoꞌ ezemuꞌ lovozo heleloneꞌ initeꞌ geho Zuda veti gesi mingutiꞌ lemo vo heta oloneꞌ nene minevoꞌ minevoꞌ ilineꞌ numuno ebete me misubouꞌ nene ma minamivo minevoꞌ minevoꞌ numuno ebete nene alingeꞌ sotoꞌ o-ledelingumuꞌ gelo aꞌminemuꞌ gizebo ogo neꞌmine olone.
HEB 13:15 Nemuꞌ nene eze evenele nene none lo leliꞌ vetetiꞌ eze gulive ogaꞌ noolonivete aꞌmine gulive nene do oto minelonidoꞌ o neineꞌ nenako nemuꞌ nene Izesuꞌ akate vele-lididoꞌ nene eꞌmeto Oꞌmoso ize bili imaaꞌ aniꞌ neꞌmino laza nene gamene gamene veteutiꞌ Oꞌmoso opoꞌni lo-emo minelone.
HEB 13:16 Idoꞌ eveneꞌ nasahiliꞌ i-ngidi initeꞌine nomivo nizaniꞌ aleve nene inele i-ngidi minilizaniꞌ neꞌmo ize ato atoꞌ bili Oꞌmoso gizi imaaꞌ aniꞌ initeꞌ neꞌmine lamineꞌ ma imaniꞌ gelavo mulunouꞌ lamineꞌ geleleseinako nemuꞌ nene neꞌmine ogakumuꞌ gatine molalive.
HEB 13:17 Lengiꞌ monokuꞌ gizebo i-lingidaaꞌ nave nete di minaaꞌ naniꞌ gonoꞌine neꞌmi monovomuꞌ nene alingeꞌ gamene nabaloꞌ Oꞌmosoꞌmi veleloꞌ li sotoꞌ ilisanako nemuꞌ gili mini ingine nene lengiꞌ monovotidoꞌ gizebo lamineꞌ igi di lisiheꞌ i-lingidivoꞌ minaaꞌ nave. Nemuꞌ nene lengikumuꞌ geni ngebelamivo gonoꞌine nene ngolize izi luꞌine laminetotikovoꞌ daaꞌ ilizave li lingine engiꞌ gamazi lilizadoꞌ gili di mini gelekelekovoꞌ i-ngidi minilo. Ee, ingine lengikumuꞌ goseleꞌ ve li geni ngibilivo gono dalizaniꞌ neꞌmo lengiꞌ lengeleꞌmize lamineꞌ amilizadoꞌ o neineꞌ nenako nemuꞌ liliza gamaziloꞌ nene gelekelekovoꞌ i-ngidi minilo.
HEB 13:18 Laza gamene gamene monovo lisihekutikovoꞌ ogo molo minelone lo gelo minaaꞌ nouneꞌ nenako laza giluneꞌ leliꞌ lute nene Oꞌmosoꞌmi veleloꞌ lisiheꞌ goloso o neive losa gele none. Nemuꞌ nene lingine Oꞌmosola lelikumuꞌ ve li li minilo.
HEB 13:19 Idoꞌ Oꞌmosola nenikumuꞌ li-nidikevo neꞌmo neleꞌmize lamineꞌ ivo lengita liteꞌ losa tineꞌ molo alove lo amuzonga noluve.
HEB 13:20 Idoꞌ Oꞌmoso nene zou lo minaaꞌ monovo do sotoꞌ o-ledaaꞌ ive mino aza nene eiꞌ evenele sipisipi ize neꞌmine gelo minunive leliꞌ gizebo vete naba Izesuꞌ Kilisitoꞌ aza vaniseꞌve lepo leliꞌ gele daloningumuꞌ ve lo Oꞌmosoꞌmo lo huko-lidineꞌ minevoꞌ minevoꞌ ilineꞌ gamazi do amuzo molavo gohi hilingutiꞌ do ote-dineꞌ neꞌmo
HEB 13:21 Oꞌmoso aza nene lingine eiꞌ luloloꞌ eꞌmeti gili dalizangumuꞌ ve lo neꞌmine ilizadoꞌ do lisiheꞌ o-lengedo monovo lamine tamineꞌ mukiꞌ nene lehize-lengedo Izesuꞌ Kilisitoꞌ amuzo neꞌmo lutinguꞌ gono do eze ninge lamineꞌ ilineꞌ monovo nene do sotoꞌ o-lengedelive lo idoꞌ eze opoꞌni liviꞌ liviꞌ igi mini izi hukamavo minevoꞌ minevoꞌ ilive lo mo neꞌmino miniliho lo noluve.
HEB 13:22 Neze zuhokizo, lutine do ngi lo-lengedo luhuvo initeꞌ mene do liꞌnibe ogosa gizuvoniꞌ nenako nemuꞌ nene goseleꞌ lengebelamivo gati gili minilizave losa lengita amuzo molo noluve.
HEB 13:23 Idoꞌ tiꞌ lo nolo-lingimuze. Gililo. Leze zuho Timoteoꞌni ma nene nalatoꞌ minidotiꞌ mo imiselikeve. Idoꞌ mo imiselikenako aza liteꞌ lo nouvoda ogo hetelelineꞌ nene ninge-lengedelesa lengiꞌ nizada nene makatoꞌ ogo hetelelesusive.
HEB 13:24 Idoꞌ lengiꞌ gizebo vetine nesi Oꞌmosoꞌmi evenele mukiꞌ nesi nene longopoꞌni noluze. Gati li-ngimilo. Idoꞌ Oꞌmosoꞌmi zuho Italia misuboukotiꞌ minaniꞌ ingine netesi longopoꞌni nilave.
HEB 13:25 Oꞌmosoꞌmi nasahiliꞌ neꞌmo nene lengita mine do vo miniliho lo noluve. Moda aꞌnesiꞌ ve.
JAM 1:1 Oꞌmoso idoꞌ Guvetesi ve Izesuꞌ Kilisitoꞌ engiꞌ gelekeleꞌ izipe Zakoboꞌ naza luhuvo niteꞌ nogizuve. Isilaeleꞌ veti avoteho Zakoboꞌ gipele zuho tuvelu engiꞌ ngaꞌvopilemoꞌ muliseꞌningutiꞌ muliseꞌningutiꞌ ma hutileꞌ igi misubouꞌ misubouꞌ miniꞌmi vangutiꞌ Izesuꞌ evenele zuho liliꞌ ave lengikumuꞌ luhuvo niteꞌ mene nogizuve. Longopoꞌni lo nogizuve.
JAM 1:2 Neze zuho mate, lengemenguꞌ molaaꞌ initeꞌ nehe mulumo niteꞌ ato atoꞌ nehe neꞌmine initeꞌ lengita sotoꞌ ilineꞌ neꞌmo nene Oꞌmosomuꞌ gili eleꞌvoleꞌ igaꞌ naniꞌ nene do amuzo molo gili eleꞌvoleꞌ igi di giliꞌ li minilizaniꞌ monovo do sotoꞌ ilineꞌ nene mo gili nizave. Gili nizanako mulumo niteꞌ ato atoꞌ neꞌmine lengita sotoꞌ neivo ma muludinguꞌ goloso gilami longolize izivoꞌ minilo.
JAM 1:4 Mulumo initekuꞌ mini Oꞌmosomuꞌ gili eleꞌvoleꞌ igi di giliꞌ li minaniꞌ nene hulami aꞌmingukovoꞌ minilizaniꞌ neꞌmi gihile nene neꞌmino sotoꞌ oloseive: Lengita monoꞌ monovo lamineꞌ mine osuꞌ lavo nominekisi minami minilisave. Nemuꞌ nene neꞌmine ogo minelone li gili eleꞌvoleꞌ igi di giliꞌ li minilo.
JAM 1:5 Idoꞌ lengikutiꞌ ve maliꞌmo gala lamineꞌ gelaaꞌ monovomuꞌ nene viseꞌ ogo ma Oꞌmosola lilive. Lilineꞌ ha emeleseive. Oꞌmoso neve eveneꞌ mukiꞌ nene balu o-ledo lukehe amo initeꞌ ha lemaaꞌ neive.
JAM 1:6 Nemuꞌ nene aꞌmine ve Oꞌmosola lilinguꞌ initeꞌ dalohe damolohe lo gala setaꞌ gelamo gele hamoꞌ o mino Oꞌmosola lilive. Gaꞌine sitaꞌ gilaaꞌ nave nene gaꞌine gili nge lami guvo noso mine guno amivo hepeliꞌmo do mone mone ogaꞌ neineꞌ neꞌmini minaaꞌ nave.
JAM 1:7 Ve aꞌneꞌmine ve luꞌine gaꞌine taza vo vineꞌ nete zovoꞌ izi di monaaꞌ nanako Guvelesi velatiꞌ initeꞌ ngeli damilisave.
JAM 1:9 Neze zuhokizo, linginela eveneꞌ ma limi nizave ingine nene Oꞌmosoꞌmo ningivo dizi nizanako nemuꞌ ngolize izi minilizave.
JAM 1:10 Idoꞌ heneni ve nete heneniꞌinemuꞌ ngolize izami ingine Oꞌmosoꞌmo ningivo limi nizaniꞌ nemuꞌ ngolize izi minilizave. Guvise naviseꞌmi guvovo suludaniꞌ neꞌmine igi suludilisave.
JAM 1:11 Ee, hoꞌ dizo amuzo molo lavo aꞌmine guvise navise gokoꞌ loloseive. Idoꞌ gokoꞌ lavo guvovo suludoꞌmozavo emeniꞌve gonoliseꞌve lamineꞌ nene goloso ogaꞌ neive. Aꞌmineꞌmine igi heneni ve ingine gono bezeꞌninguꞌ moni minilizadotiꞌ vi tolovo ilisave.
JAM 1:12 nGemenguꞌ molaaꞌ initekuꞌ nehe mulumo initekuꞌ nehe mulumo initeꞌ ato atokuꞌ nehe ne gilizevo ami amuzo mili minilizave ingine ngolize izi minilisave. Amuzo mili mini aꞌmine initeꞌ ivileꞌ ikevo neꞌmi meniꞌve nene Oꞌmosoꞌmo minevoꞌ minevoꞌ ngemeni dameni nene lehize-ngedeleseive. Ee, luꞌine Oꞌmoso imi nizave engiꞌ ngemelove lo salani molo-ngidineꞌ initeꞌ minevoꞌ minevoꞌ ngemeni dameni nene lehize-ngedeleseive. Idoꞌ lehize-ngedelingumuꞌ ve li ngolize izi minilisave.
JAM 1:13 Initeꞌ maliꞌmo emenguꞌ molalosa lulo hizo eze geleleheꞌ ogo do vavo ma aꞌmine ve aza lihime dosa Oꞌmosoꞌmo nemenguꞌ molave lamilive. Lihime daakumuꞌ nene Oꞌmoso aza lulo otesaꞌmive. Idoꞌ lihime dalizave lo Oꞌmosoꞌmo nene lemenguꞌ molosaꞌmive. Nemuꞌ nene nemenguꞌ molave lamilive.
JAM 1:14 Leliꞌ goloso niteꞌ ogo molo ogakumuꞌ lumo helaaꞌ neineꞌ neꞌmo gate hizo limimiseꞌ ogaꞌ neive.
JAM 1:15 Lumo helaaꞌ neineꞌ neꞌmo izipahala mino gedelineꞌ neꞌmi gulive nene lihime ve. Lihime neꞌmo naba ogo izipahala mino gedelineꞌ neꞌmi gulive nene helaaꞌ ve.
JAM 1:16 Neze zuho luꞌne lengeme nouvoniꞌ mate, ladani gatine gilamilo.
JAM 1:17 Initeꞌ mataꞌ lamineꞌ idoꞌ leleꞌmize lamineꞌ ogaꞌ initeꞌ lamineꞌ nene Oꞌmosolatiꞌ neive. Meteho Oꞌmoso Okulumokuꞌ labanaꞌ elaaꞌ neineꞌ initeꞌ do sotoꞌ molave aza aꞌmine molaniꞌ initeꞌ nene neꞌmino do velepeꞌ alepeꞌ izesaꞌmive. Gamene gamene do lamineꞌ o-ledovoꞌ neive.
JAM 1:18 Laza nene eiꞌ do sotoꞌ ineꞌ initeꞌ mukiꞌ ngivileꞌ igi mini evenele zuho gosohoꞌ ganaꞌ apiꞌ igi liliꞌ ilizave lo Oꞌmosoꞌmo asiꞌve gala gelo gamaziꞌve gihiledunuꞌ do sotoꞌ o-ledo lemeni dameni gosohoꞌ lemave.
JAM 1:19 Neze zuho luꞌne lengeme nouvoniꞌ mate, gamazi mene gililo. Lingine mukiꞌ nene gamazi gelaakumuꞌ liteꞌ li di nene igi minilo. Ne neiha gamazi laakumuꞌ nene zou li gili minisa lilo. Idoꞌ linginela liteꞌ lo lingizeboloꞌ molamivo.
JAM 1:20 Eveneꞌ lizeboloꞌ neꞌmo Oꞌmosoꞌmi monovo lisiheꞌ nene ngelo do sotoꞌ amoloseive.
JAM 1:21 Nemuꞌ nene lutine do goloso ogaꞌ initeꞌ mukiꞌ idoꞌ goloso niteꞌ pataꞌ buu lo minineꞌ nene huli hokolizeꞌ ami okodine diꞌmi limi mini Oꞌmosoꞌmi gamazi lutinguꞌ molaniꞌ nene di giliꞌ li dalo. Oꞌmosoꞌmi gamazi neꞌmo nene do lunguꞌ izo do lamineꞌ oloseize. Di giliꞌ li dalo.
JAM 1:22 Idoꞌ neꞌmine igi Oꞌmosoꞌmi gamazi nene haza gatinedunukovoꞌ gili minami gili di eꞌmetilo. Haza gatinedunukovoꞌ gililizaniꞌ nene langisetine lutine golo izilisave.
JAM 1:23 Eveneꞌ malite Oꞌmosoꞌmi gamazi gili gili damilizaniꞌ nene ve ma gapogapokuꞌ ningi engiꞌ goꞌine veꞌine ningaaꞌ naniꞌ neꞌmino neive.
JAM 1:24 Goꞌine veꞌine ningi vikevo aꞌmidoꞌ liteꞌ lo gaꞌine molaaꞌ neive.
JAM 1:25 Nene neiha Oꞌmosoꞌmi gamazi lo huko-lidineꞌ nene gamazi gihile lamineꞌ mino goloso niteliꞌmi gelekeleꞌ ve minuningutiꞌ apase-ledaaꞌ neive. Neꞌmine ogaꞌ neineꞌ nenako aꞌmine gamazi neutiꞌ nene Oꞌmosoꞌmi monovomuꞌ viseꞌ ogo gate molamivo gele dovoꞌ mineloneꞌ nene Oꞌmosoꞌmo aꞌminguꞌ hize eleꞌ o-ledavo initeꞌ mukiꞌ oloneꞌ nene lamineꞌ ogavo muludeuꞌ lamineꞌ gelelesune.
JAM 1:26 Eveneꞌ malite Oꞌmosomuꞌ gele eleꞌvoleꞌ ogo monoꞌ ve none li lilizaniꞌ nete gamazi laaꞌ adoꞌ gizebo isaꞌmaniꞌ nene eveneꞌ aꞌneꞌmine ve monoꞌ ve nobe li engiꞌ luꞌine golo izi soza lilisave.
JAM 1:27 Lodomuloꞌ izipe idoꞌ veneꞌ getoꞌ muheleꞌ igi minaniꞌ nene ngeleꞌmize lamineꞌ oloneꞌ idoꞌ me misubouꞌ eveneꞌ Oꞌmosomuꞌ gilamaveti monovoꞌine dokunivo lute do goloso ogalive lo gizebo ogo mineloneꞌ nene Oꞌmosomuꞌ gele eleꞌvoleꞌ ogo monoꞌ ve gihile minelonidiꞌmo Meteho Oꞌmosoꞌmi veleloꞌ hehe lamineꞌ lo mineleseive.
JAM 2:1 Neze zuho mate, lingine labanaꞌvesi minive Guvetesi ve Izesuꞌ Kilisitoꞌnimuꞌ gili eleꞌvoleꞌ i nizanako eveneꞌ di kegesi eveneꞌ mamuꞌ siza li-ngidi eveneꞌ mamuꞌ ningi hulaaꞌ naniꞌ nene nanitekumuꞌ ve.
JAM 2:2 Lingine monoꞌ gililisa di geseꞌ igi nizavo ve maliꞌmo initeꞌ lamineꞌ ngolo analoꞌ ngolidunuꞌ liliꞌ aniꞌ lini lamineꞌ izo nodizivo ve gohoꞌ gahaliꞌ ma geneganaꞌve litehevoꞌ izo dizelineꞌ nesi nene
JAM 2:3 lingine initeꞌ lamineꞌ ngolo nodizive ma ne ningi siza li-di gaza holomo lamineta me ogo minezo li-di ve gohoꞌ gahaliꞌ nene gaza akaꞌ volela vo ote minezo idoꞌ meheꞌneko ogo minezo li li-imilizaniꞌ nene
JAM 2:4 lingine eveneꞌ di kegesi-ngidi gatine goloso gili eveneꞌ gizekaꞌ igaꞌ nave.
JAM 2:5 Neze zuho luꞌne lengeme nouvoniꞌ mate, gililo. Eveneꞌ me misubouꞌ minangutiꞌ linge mamuꞌ ve gohiꞌ gahaliꞌ nizave li laaꞌ nahe. Aꞌmine ve nene Oꞌmosoꞌmo neze zuho liliꞌ ilisave lo do kegese-ngidineꞌ ma ve. Ee, ezemuꞌ gili eleꞌvoleꞌ ikevo nemuꞌ Oꞌmosoꞌmo gelavo gili eleꞌvoleꞌ aniꞌ neꞌmo heneniꞌine loloꞌ ogavo heneni ve gililisave. Idoꞌ luꞌine imilizavemuꞌ Oꞌmosoꞌmo initeꞌ ma ngemelesa salani molo-ngidineꞌ neive. Aꞌmine initeꞌ nene aꞌmine gohoꞌ gahaliꞌ engiꞌ ngemelove lo do kegese-ngidineꞌ ma ve. Idoꞌ ngemelineꞌ initeꞌ nene neꞌmino neive: Ingine Oꞌmosoꞌmo gizebo o neinguꞌ vi hilalisave.
JAM 2:6 Ne neiha lingine neve ningikevo gohoꞌ gahaliꞌ nene haza niteꞌ minaniꞌ ve. Heneni ve neve ingine goboni mili-lingidi gonitoꞌ lengeleꞌmizi di moniꞌ moniꞌ i-lingidaaꞌ nave.
JAM 2:7 Idoꞌ Izesuꞌ gulive lamineꞌ lingine di nizaniꞌ nene inginesi di hozi laaꞌ ilizanako aꞌmine heneni ve nete diviꞌ lediviꞌ igaꞌ nave.
JAM 2:8 Monoꞌ godolouꞌ Guvetesi ve nabaꞌmo lo huko lineꞌ gamazi ma neꞌmino neive: Geikumuꞌ gelaaꞌ naineꞌ neꞌmino geiꞌ nanida nizavemuꞌ gelo luka ngemezo lo lo neive. Lingine aꞌmine eleꞌvoleꞌ gamazi gili dalizaniꞌ nene initeꞌ gihile dalisaniꞌza
JAM 2:9 eveneꞌ ma siza li-ngidi eveneꞌ ma ningi goseleꞌ ilizaniꞌ nene lihime dalizaniꞌ o neive. Idoꞌ neꞌmine ilizaniꞌ nene Oꞌmosoꞌmo lo huko lineꞌ gamazi avutoꞌ igaꞌ ave minikeve loloseive.
JAM 2:10 Ve maliꞌmo Oꞌmosoꞌmo lo huko lineꞌ gamazi mukiꞌ gele do mino hamokovoꞌ ma gele hulilineꞌ nene mukiꞌ avutoꞌ ineꞌ geleleseive.
JAM 2:11 Oꞌmosoꞌmo veneꞌ longoꞌ amilo idoꞌ eveneꞌ ngibili hilamilo nesi lineꞌ ma neive. Nemuꞌ nene gaza veneꞌ longoꞌ amaba eveneꞌ ma bele helelineꞌ neꞌmo mo louꞌ gamazi avutoꞌ ogaꞌ anive loloꞌ olosane.
JAM 2:12 Idoꞌ Oꞌmosoꞌmo eveneꞌ mukiꞌ izeꞌ molo-ledelesa nene lihime monovoloꞌ gelekeleꞌ ogo minuningutiꞌ apase-ledaaꞌ ineꞌ louꞌ gamaziꞌve nene gili di minahe gili hulahe lo izeꞌ molo-ledeleseive. Neꞌmine ilingumuꞌ nene gilii lingine gamazi lilizadokisi initeꞌ igi mili ilizadokisi gizebo igi minilo.
JAM 2:13 Idoꞌ ve maliꞌmo eveneꞌ iseꞌine izesaꞌmivo ma Oꞌmosoꞌmo goniꞌ o-do eze iseve ize-damoloseive. Idoꞌ eveneꞌ ma nete eveneꞌ iseꞌine izaaꞌ nave nene aꞌmineꞌmine ogo Oꞌmosoꞌmo engiꞌ iseꞌine ize-ngedeleseive. Iseꞌine izaaꞌ neꞌmo goniꞌ ogaꞌ nene ivileꞌ oloseive.
JAM 2:14 Neze zuho mate, ve maliꞌmo monovo lamineꞌ ogo molo minamo naza Izesuꞌnimuꞌ giluvoniꞌ nene gele eleꞌvoleꞌ okuve lo lilineꞌ nene haza niteꞌ loloꞌ oloseive. Neꞌmine ogovoꞌ gele eleꞌvoleꞌ o do vilidotiꞌ nene Oꞌmosoꞌmo do uꞌ izamoloseive.
JAM 2:15 Ve ma he veneꞌ ma he okoꞌnoloꞌ initeꞌ nomivo nosoꞌ nitekisi viseꞌ ogo neivo
JAM 2:16 lengikutiꞌ maliꞌmo aꞌmine viseꞌ ineꞌ initeꞌ ma emamo geita hongu minivo vozo. Muꞌmu lo-gidivo mino no gatunga ogo minezo lo lo-emelineꞌ nene lamineꞌ ilihe. Aꞌmine haza gamazi lineꞌ neꞌmo eveneꞌ ha do lamineꞌ o-delihe. Haza ngelo do lamineꞌ o-damoloseive.
JAM 2:17 Idoꞌ aꞌmineꞌmine ogo aꞌmine gamazi lineꞌ nene haza nitekovoꞌ minineꞌ neꞌmino monovo lamineꞌ ogo molo minamo haza Oꞌmosomuꞌ gele eleꞌvoleꞌ ogaꞌ nesi haza niteꞌ neive. Eveneꞌ ma ingine gili eleꞌvoleꞌ igisa monovo lamineꞌ nesi igi mili minamilizaniꞌ nene Oꞌmosomuꞌ gili eleꞌvoleꞌ aniꞌ nene hele osuꞌ lo haza niteꞌ loloꞌ ogave.
JAM 2:18 Ne neiha lengikutiꞌ ve maliꞌmo tiꞌ lo lilihe lo gele nouve: Eveneꞌ malite Oꞌmosomuꞌ gili eleꞌvoleꞌ igaꞌ navo idoꞌ eveneꞌ ma nete monovo lamineꞌ igi mili minaaꞌ nave. Idoꞌ ve ma neꞌmine lo lilineꞌ naza tiꞌ lo lo-emelesuve: Monovo lamineꞌ ogo molo amosa Oꞌmosomuꞌ gele eleꞌvoleꞌ o naineꞌ nene nado do sotoꞌ anivo ningelove. Ne neiha naza monovo lamineꞌ ogo molo nouvoniꞌ neꞌmo Oꞌmosomuꞌ gele eleꞌvoleꞌ o nouvonikisi nene do sotoꞌ ogavo nelotiꞌ ha ningelesane lo lo-emelesuve.
JAM 2:19 Lingine Oꞌmoso hamokovoꞌ neive li gili eleꞌvoleꞌ igaꞌ nahe. Neꞌmini gilaaꞌ naniꞌ nene mo lamineꞌ neiha Sataniꞌmi zuho sikalahuꞌ goloso ingine nesi aꞌmineꞌmine igi Oꞌmoso neive li gilii gili eleꞌvoleꞌ igaꞌ nave. Ee, ingine gili eleꞌvoleꞌ igaꞌ nanako nemuꞌ nene lihime lemeleseive li golise gilivoꞌ minaaꞌ nave.
JAM 2:20 Monovo lamineꞌ ogo molo minamo Oꞌmosomuꞌ gele eleꞌvolekovoꞌ ogaꞌ oloneꞌ nene haza niteꞌ neineꞌ nenako gaza gelamabe. Ve negi mene naza gelebizelove.
JAM 2:21 Avoteho Abalahamuꞌ aza gipele Isakaꞌni Oꞌmoso gize emelesa ogo monovo lamineꞌ ineꞌ nemuꞌ Oꞌmosoꞌmi veleloꞌ ve lisiheꞌ gehepeve lihimeꞌvesi nomineꞌ minineꞌ gilineꞌ nene lingine mo gili nizave. Olo.
JAM 2:22 Nemuꞌ nene aza Oꞌmosomuꞌ gele eleꞌvoleꞌ ogo mino monovo lamineꞌ nesi ogo molaaꞌ idotiꞌ nene monovo lamineꞌ ogaꞌ monovoꞌve neꞌmo Oꞌmosomuꞌ gele eleꞌvoleꞌ ogaꞌ monovoꞌve nene hize eleꞌ ogo do gihile izo do sotoꞌ ineꞌ nene ningi gilamahe.
JAM 2:23 Neꞌmine ogavo monoꞌ godolouꞌ minineꞌ gamazi ma nene gihile izineꞌ ve. Aꞌmine gamazi nene neꞌmino neive: Abalahamuꞌ aza Oꞌmosomuꞌ gele eleꞌvoleꞌ ineꞌ nemuꞌ Oꞌmosoꞌmo gelo Abalahamuꞌ nene lihimeꞌve nomive ve lisiheꞌ ve lineꞌ Idoꞌ eveneꞌ ingine ezemuꞌ Oꞌmosoꞌmi zogo ve neive li laniꞌ.
JAM 2:24 Nemuꞌ nene Oꞌmosoꞌmo ningivo lihimete nomivo ve lisiheꞌ minaaꞌ nouneꞌ neꞌmi monovo mo ningi osuꞌ li nilisave. Neꞌmi monovo neꞌmino neive: Eveneꞌ haza gili eleꞌvoleꞌ igaꞌ nanikovoꞌ nene Oꞌmosoꞌmo ningivo lisiheꞌ osaꞌmive. Idoꞌ eveneꞌ ezemuꞌ gili eleꞌvoleꞌ igi monovo lamineꞌ nesi igi mili igaꞌ naniꞌ nene ningivo eveneꞌ lisiheꞌ lihimeꞌine nomineꞌ minaaꞌ nave.
JAM 2:25 Idoꞌ aꞌmineꞌmine ogo pasidiaꞌ veneꞌ Lahabaꞌ aza monovo lamineꞌ ogavo Oꞌmosoꞌmo ezemuꞌ gilivo lisiheꞌ ineꞌ ve. Isilaeleꞌ aleve Kanaha misubo dizi dalisa nizavo guveꞌinesi ve Zosuvaꞌ aza eveneꞌ ma misubo amamakaꞌ mili ningilizave lo ngimiselavo vi aꞌmine Kanaha veneꞌ Lahabaꞌ neida vikevo aza ngeleꞌmize numuꞌveuꞌ molo Kanaha eveneꞌ nete ningi ngibilikelizave lo aka atota ngimiselavo vaniꞌ.
JAM 2:26 Ve ma sikalahuꞌve nomivo okoꞌno losuvovoꞌ minelineꞌ nene mo hele neive lolosune. Aꞌmineꞌmine ogo ve ma aza haza gele eleꞌvoleꞌ ogo minelineꞌza monovo lamineꞌ ogo molo minamivo ma eze gele eleꞌvoleꞌ ogaꞌ neineꞌve nene ezela mo helave lo lolosune.
JAM 3:1 Neze zuho mate, laza tisaꞌ loloꞌ ogo nonivete ladanga gamazi loloneꞌ nene Oꞌmosoꞌmo aꞌminemuꞌ goniꞌ o-ledo haza eveneꞌ goniꞌ o-ngedelineꞌ nene ivileꞌ ivosa leliꞌ nene goniꞌ nabaloꞌ o-ledelineꞌ nene gili nizave. Gili nizanako nemuꞌ nene lengikutiꞌ eveneꞌ mukiꞌ tisaꞌ liliꞌ amilo.
JAM 3:2 Eveneꞌ mukiꞌ laza ladani vaiꞌ ogaꞌ noune. Eveneꞌ hamoꞌ hamolite gamazi ladanga lamilizaniꞌ nene ingine ve lisiheꞌ gehepeve minilisave. Veꞌnidoꞌ gizebo lamineꞌ igi gopo gamazi lisaꞌmanako okoꞌnine mukitoꞌ ha gizebo lamineꞌ ilizadoꞌ i nizave.
JAM 3:3 Hosi ize ingine initeꞌ naba nizaniꞌza okoꞌine di zovoꞌ izi vilizangumuꞌ ve li sitiaꞌ initeꞌ ainidunuꞌ liliꞌ aniꞌ ngomo lasolo nene veꞌninguꞌ di ingihi-ngidikevo neꞌmo gamazi gilaaꞌ nave.
JAM 3:4 Aꞌmineꞌmine ogo sipi nene initeꞌ nabaꞌ naba neivo idoꞌ hepeꞌ naba neꞌmo do vaaꞌ neineꞌza sipiloꞌ daaꞌ ive aza sipiꞌmi sitiaꞌve ngomoloꞌ geleleheꞌ ogavo initeꞌ nabaliꞌmo aꞌmidoꞌ gele do zovoꞌ izo vaaꞌ neive.
JAM 3:5 Aꞌmineꞌmine ogo vete nahuno nene initeꞌ ngomo lasolo neineꞌza aꞌminetunuꞌ gamazi lokunivo neꞌmo initeꞌ naba ma sotoꞌ oloseive. Oloꞌ vele ngomo neꞌmo gulumo ogo za zuho initeꞌ mataꞌ mukiꞌ lovotaaꞌ neive.
JAM 3:6 Idoꞌ vete nahuno nene oloꞌ neꞌmino neive. Okodela initeꞌ vaikutiꞌ vete nahuno nene misuboko monovo goloso mukiliti izeꞌnibo nene neive. Vete nahuno neꞌmo okode lute do gopoꞌ napaꞌ ogaꞌ neive. Oloꞌ vele nene gulumo ogo za zuho initeꞌ mataꞌ mukiꞌ lovotaaꞌ neineꞌ neꞌmine ogo misubouꞌ eveneꞌ mukiliti vete nahuno nene oloꞌ ebekutiꞌ ve Satani neꞌmo do velepeꞌ alepeꞌ ize-ledavo gamazi goloso losa aꞌmidotiꞌ ogo molo ogaꞌ nouneꞌ initeꞌ nene golosovoꞌ o do vaaꞌ neive.
JAM 3:7 Ize gulo gaha nama, gosiheꞌ, nosouꞌ nama gaha ato atoliꞌmine mukiꞌ nene ha di gaꞌine lilizadoꞌ o neive. Idoꞌ di gaꞌine laaꞌ naniꞌza
JAM 3:8 vete nahuno nene ve maliꞌmo ngelo do gala lamoloseive. Vete nahuno nene initeꞌ goloso do velepeꞌ alepeꞌ izo mino hazasi minesaꞌmive. Vete nahuno nene zahemede goloso helaaꞌ initeꞌ neꞌmine neive.
JAM 3:9 Vete nahunodunuꞌ Guvetesi ve Metehine opoꞌni laaꞌ noune. Idoꞌ Oꞌmoso eze gidini do sotoꞌ ineꞌ eveneꞌ nene aꞌmine vete nahunodunuꞌ gamazi goloso lo-ngedaaꞌ noune.
JAM 3:10 Vete hamokutiꞌ opoꞌni laaꞌ noune. Idoꞌ do velepeꞌ izo gamazi goloso nesi laaꞌ noune. Neze zuhokizo, nene edamineꞌ suno neive.
JAM 3:11 Noso hinipiniꞌ hamokutiꞌ lingela nene naaꞌ limivo idoꞌ lingela nene ekeseꞌ limivo ilihe.
JAM 3:12 Za atoꞌ za dize nolinguꞌ za maliꞌmi gihileꞌve ngelo izamoloseive. Vaini nalaꞌ maloꞌ gohuno gihile ngelo izelihe. Idoꞌ guvo nosotiꞌ naaꞌ noso ohizelibe. nGelo ma ohizamolosane. Nemuꞌ nene veka hamokutiꞌ gamazi laminekovoꞌ lemelive.
JAM 3:13 Lengikutiꞌ ve ma gamazi monovo gelaaꞌ ive mino gala gele veveso ogaꞌ ive nolineꞌ nene hokolizeꞌ amo gele vevesaaꞌ monovo neꞌmo do sotoꞌ ogaꞌ neineꞌ monovo adoꞌ okode doꞌmo lemo minaaꞌ monovo ogo molo minelidotiꞌ nene aꞌmine gamazi monovo gelo gele vevesaaꞌ monovoꞌve nene do sotoꞌ ilidoꞌ o neive.
JAM 3:14 Ne neiha lingine lutinguꞌ lukehe ekeseꞌ ngibili mini ge hulo ne hulo li mini okodine di dizi laza gate gele veveso ogaꞌ nonive ne none li lilizaniꞌ nene mo gamazi lamineꞌ lami sozasi lilisanako nemuꞌ neꞌmine lamilo.
JAM 3:15 Neꞌmine ilizaniꞌ nene Oꞌmosolatiꞌ neineꞌ gele vevesaliꞌmi monovo nene dalisave. Oꞌmosomuꞌ gili hulaaꞌ ave me misubouꞌ ve ingine igaꞌ naniꞌ neꞌmine Satanilatiꞌ neineꞌ monovo nene dalisave.
JAM 3:16 Luꞌninguꞌ lukehe neivo ge hulo ne hulo li minilizada eveneꞌ luꞌine bizamivo gopoꞌ napaꞌ mini monovo goloso ato atoliꞌmine mukiꞌ di minilisave.
JAM 3:17 Oꞌmosolatiꞌ gele vevesaaꞌ monovo di minave engiꞌ monovoꞌine nene neꞌmino neive: Initeꞌ naba nene luꞌninguꞌ goloso initekisi nomivo luꞌine laminekovoꞌ minaaꞌ neive. Idoꞌ aꞌmidotiꞌ nene ve hongu vevoꞌ mini gelekeleꞌ igi eveneꞌ muheleꞌine ningi di lamineꞌ tamineꞌ i-ngidi idoꞌ evenekumuꞌ gili mamuꞌ ngumo hilivo mamuꞌ goseleꞌ ngibilivo ami di kegesi-ngidami mini veꞌine avilelotiꞌ soza lamilisave.
JAM 3:18 Idoꞌ hongu ve eveneꞌ kuku hili-ngidi hongu li minaaꞌ naniꞌ neꞌmi gihile nene lisiheꞌ lamineꞌ minaaꞌ nene sotoꞌ ogavo dalisave.
JAM 4:1 Idoꞌ gamazi gohi ma lo-lengemeloze: Linginela lingizeboloꞌ molavo lovo hizi minaaꞌ naniꞌ nene naniteliꞌmo ve. Lingine laniteꞌ gili ahuꞌ laniꞌ initeꞌ nete lutinguꞌ lovo di sotoꞌ ikevo neꞌmo lovo hizaaꞌ nave.
JAM 4:2 Initeꞌ mamuꞌ lungumo hilineꞌ nene dami eveneꞌ ngibililisa gilaaꞌ nave. Idoꞌ aꞌmine initekumuꞌ mumuzoꞌ igi ngeli ma damilizaniꞌ ogavo ma gililinga li lovo hizaaꞌ nave. Initeꞌ ma damaniꞌ nene Oꞌmosola vokuꞌ lisaꞌmadiꞌmo nene disaꞌmave.
JAM 4:3 Idoꞌ initeꞌ mamuꞌ Oꞌmosola vokuꞌ laniꞌza gatine goloso gili langisetine aꞌmine initeliꞌmi laniteꞌ gililizangumukovoꞌ vokuꞌ likevosa nene Oꞌmosoꞌmo lengemesaꞌmive.
JAM 4:4 Lingine nene veneꞌ ma vaꞌningine huli ve gohi maloꞌ vaaꞌ ave neꞌmine mini Oꞌmosomuꞌ lungumo hilineꞌ nene huli me misubouꞌ ve Oꞌmosomuꞌ gili hulaniꞌ alevemukisi idoꞌ engiꞌ initeꞌinemukisi lungumo helelineꞌ neꞌmo Oꞌmoso mehedine imaaꞌ idoꞌ lovo i imaaꞌ o neineꞌ ne gilamahe.
JAM 4:5 Idoꞌ monoꞌ godolouꞌ gamazi ma neꞌmino neive: Oꞌmosoꞌmo leze luteuꞌ molaniꞌ sikalahute neꞌmo initeꞌ atoꞌ atokumuꞌ umo helavo aꞌmine nene dalongisi lo ahuꞌ laaꞌ neive. Aꞌmine gamazi nene hazamuꞌ neive li gilahe. Oꞌove. Hazamuꞌ nomive.
JAM 4:6 Ne neiha lumo helaaꞌ initeꞌ goloso nene gele emamoloningumuꞌ ve lo Oꞌmosoꞌmo vauve elo hize eleꞌ o-ledaaꞌ neive. Nemuꞌ nene monoꞌ godolouꞌ gamazi ma tiꞌ lo neive: Oꞌmosoꞌmo hokolizeꞌ igaꞌ ave lovo o ngemo limi minave hize eleꞌ o-ngedaaꞌ neive.
JAM 4:7 Nemuꞌ nene Oꞌmoso gelekeleꞌ i-di Satani nene oꞌve li-di gili huli-dilo. Neꞌmine ikevo hulo-lengedo golise vohaha oloseive.
JAM 4:8 Lingine Oꞌmosola vi giꞌmizilizaniꞌ nene aza linginela aꞌmineꞌmine ogo giꞌmizeleseive. Lingine goloso initeꞌ daaꞌ nave aꞌmine initeꞌ aloꞌ hulilo. Idoꞌ Oꞌmosola volohe goloso initeta volohe li veꞌneheꞌ kaꞌneheꞌ nilaniꞌ nene huli lutine noso izi di lamineꞌ ilo.
JAM 4:9 Lingine monovotida gili eveneꞌ goloso none li agae agae li longovozo hili mulumo gili ive ilo. Ee, gize zohiꞌ igi longolize izaaꞌ naniꞌ nene huli mulumo gili muheleꞌ igi ivevoꞌ igi agae agae li minilo.
JAM 4:10 Neꞌmine igi Guvelesi veꞌmi veleloꞌ langisetine lutine diꞌmi limilo. Neꞌmine ikevo Guvelesi ve aza doꞌmo dize-lengedeleseive.
JAM 4:11 Neze zuho mate, lengikuꞌ ge dovo ledevoꞌ o-nede ne dovo ledevoꞌ o-gede lamilo. Ve maliꞌmo gonolohi monovo izeꞌ molo dovo ledevoꞌ ogo lihime molo-delineꞌ nene ezevoꞌ neꞌmine o-damoloseive. Louꞌ gamazi nesi neꞌmine o-do dovo ledevoꞌ ogo ivileꞌ ogo izeꞌ molalineꞌ nene louꞌ gamazi gele daaꞌ anive minamo louꞌ gamaziloꞌ gizebo ogo izeꞌ molaaꞌ anive loloꞌ ogane.
JAM 4:12 Idoꞌ Oꞌmosoꞌmo asiꞌve hamoꞌ louꞌ gamazi do sotoꞌ ogo izeꞌ molaaꞌ ive neive. Asiꞌvevoꞌ do luꞌ izaakumuꞌ idoꞌ leleꞌmize tolovo ogakumuꞌ laaꞌ ive neive. Neineꞌ nenako gasika Oꞌmoso noosa gonahi monovo izeꞌ molo lihime molo-delibe.
JAM 4:13 Lingine nene Oꞌmoso ivileꞌ igi idise nehe aizeꞌ nehe ebeꞌ mala vo kilisimasi hamoꞌ mino bisinisi gono do moni heneni do sotoꞌ olone li laaꞌ naniꞌ aleve nene gamazi ma lo-lengemeloze.
JAM 4:14 Aizeꞌ initeꞌ neꞌminesi neꞌminesi ogo molo ogo minelone laaꞌ naniꞌ nene lingine aizeꞌ sotoꞌ ilineꞌ initeꞌ nene gili niisa laaꞌ nahe. Lingine mo gilamave. Oꞌmosovoꞌ gele neive. Lengiꞌ miniviꞌ diviꞌ igi nizaniꞌ nene oloꞌ sokile neꞌmino neive. Oloꞌ sokile nodizivo nodizivo eveneꞌ gamene ngomo ningi nizavo gete geto osuꞌ laaꞌ neive.
JAM 4:15 Nemuꞌ nene neꞌmine li lilo: Guvetesi veꞌmo gelavo lamineꞌ o neivo ma mine do dizo initeꞌ neꞌminesi neꞌminesi ogo molo minelone li lilo.
JAM 4:16 Idise lingine monovo goloso di lihime nidave. Hokolizeꞌ igi Oꞌmoso ivileꞌ igi initeꞌ neꞌminesi neꞌminesi ogo molo minelone li okodine di dizaaꞌ nave.
JAM 4:17 Idoꞌ initeꞌ veveso lisiheꞌ ogaliꞌmi monovo ningi gili minisasi aꞌmine monovo lisiheꞌ amilizaniꞌ nene lihime dalisave. Nemuꞌ Oꞌmoso ivileꞌ ami Oꞌmosoꞌmo gelo gele lemavo ma initeꞌ neꞌminesi neꞌminesi ogo molo minelone li lilo.
JAM 5:1 Heneni nganeni ve lingine gililo. Mulumo niteꞌ naba linginela sotoꞌ ilingumuꞌ gekeꞌ gekeꞌ li ive nama igi minilo.
JAM 5:2 Henenitine di nubo nubo aniꞌ nene mo hulupo elavo geneganatine lamineꞌ nene giꞌningoni nete mo huki nikeve.
JAM 5:3 Idoꞌ monitine nene gaba hitineꞌ neꞌmo moni di giliꞌ li minaniꞌ monovotine nene do sotoꞌ ogavo neꞌmo mulumo gono dikevo okodine ololiꞌmo lovotineꞌ geleleseive. Heneni di nubo nubo igi milaniꞌza misubouꞌ initeꞌ osuꞌ lilineꞌ gamene mo alitave.
JAM 5:4 Lengiꞌ midinguꞌ gono dave ingine gohise hili minamuno dolizi-lingidikevo lingine meniꞌine lingela di haleki ngimamavo nemuꞌ gono daaꞌ ave ive nama ikevo initeꞌ mukitoꞌ gizebo ogaꞌ ive amuzoꞌvesi minive Oꞌmoso aza gelave.
JAM 5:5 Lingine me misubouꞌ mini nosoꞌ nitetine vaiꞌ ivo niviꞌ niviꞌ igi mini laniteꞌ ato atoliꞌmine gili ize neꞌmine gehesaniꞌ. Neꞌmine igi gehesi minikeniꞌza Oꞌmosoꞌmo lengebelelineꞌ gamene nene mo noalitive.
JAM 5:6 Lingine nete eveneꞌ vevesi lisiheꞌ i minaniꞌ goniꞌ i-ngidi ngibilaniꞌ. Idoꞌ lingine ningibilavo ingine di tibizi lingibilami haza hongu li minaaꞌ nave.
JAM 5:7 Neze zuho mate, goseleꞌ aseleꞌ ami Guvetesi ve alingumuꞌ gizebo igi minilo. Lingine gili nizave. Mine zuhoꞌ igaꞌ avete mine zuhoꞌ aniꞌ nene gomuꞌ golinesi alingeꞌ golinesi izavo minamuno o molavo mine lamineꞌ nalone li goseleꞌ aseleꞌ ami gizebo igi minaaꞌ nave.
JAM 5:8 Aꞌmineꞌmine igi lingine goseleꞌ aseleꞌ ami lutine mili eleꞌvoleꞌ igi minilo. Guvetesi ve alineꞌ gamene nene mo alitelesa neize.
JAM 5:9 Neze zuho mate, goniꞌ o-ledelive mo avitoꞌ ogave. Goniꞌ ikelizaze. Lingine ge nemenga laani ne gemenga loku lami lamini ha minilo.
JAM 5:10 Idoꞌ Oꞌmosoꞌmi velemuꞌ igi eze gamazi li sotoꞌ igaꞌ ave polohete ingine evenelite goboni nimili-ngidavo nemuꞌ nene goseleꞌ aseleꞌ ami eleꞌvoleꞌ igi minaniꞌ nene gili nizave. Ingine mulumo initekuꞌ mini goseleꞌ aseleꞌ amo eleꞌvoleꞌ ogo minaliꞌmi monovo nene lelebizikenaze. Ingine adiꞌmine ilo.
JAM 5:11 Gili nizahe. Ingine mulumo initekuꞌ mini hongu li eleꞌvoleꞌ igi minave engikumuꞌ nene Oꞌmosoꞌmo mulunouꞌ lamineꞌ gelo do lamineꞌ o-ngedaaꞌ neinako nemuꞌ laminekuꞌ minave ve lo laaꞌ noune. Sataniꞌmo goboni molo-davo Hizobeꞌ aza mulumo alumo gilingukisi hongu lo eleꞌvoleꞌ ogo minineꞌ ma gili nizave. Idoꞌ alingeꞌ Guvetesi ve initeꞌ mataꞌ lamineꞌ lehize-dineꞌ nesi mo gili nizave. Nemuꞌ nene Guvetesi veꞌmo muhelete ningo muluno hukavo hize eleꞌ o-ledaaꞌ neive lo gelelone.
JAM 5:12 Neze zuho mate, amuzo gamazi ma lo-lengemeloze. Gililo. Lingine gamazi ma lilizaniꞌ nene lamineꞌ nolune li lilisa Okulumotoꞌ li mili adine dizi li hukamilo. Idoꞌ misuboloꞌ idoꞌ initeꞌ maloꞌ maloꞌ li mili li hukamilo. Oꞌmosola goniꞌ ikelizaze. Lingine initeꞌ mamuꞌ oo. Mo laminetoꞌ nolune lili ma nene laminetokovoꞌ lilo. Idoꞌ oꞌve. Neꞌmine amolone lili ma nene laminetokovoꞌ lilo.
JAM 5:13 Lengikutiꞌ ve ma mulumo geni initekuꞌ mino ma Oꞌmosola lilive. Idoꞌ maliꞌmo mulunouꞌ lamineꞌ goloso gelo mino ma Oꞌmoso opoꞌni nolo nama lilive.
JAM 5:14 Idoꞌ lengikutiꞌ ve ma initeꞌ gize do ongo mino ma monoꞌ gizebo ve mamuꞌ elese molavo igi heteli Oꞌmosola li Guvelesi veꞌmi velemuꞌ igi uveli noso hili-dilisave.
JAM 5:15 Oꞌmosomuꞌ gili eleꞌvoleꞌ i mini Oꞌmosola lilizaniꞌ nene Guvelesi veꞌmo do lamineꞌ o-davo initeꞌ gize dave aza lamineꞌ geleleseive. Lamineꞌ gelavo lihimeꞌve ma minelineꞌ nene Oꞌmosoꞌmo aꞌmine lihimeꞌve hulo-deleseive.
JAM 5:16 Oꞌmosoꞌmo do lamineꞌ o-lengedelingumuꞌ ve li lihime di miniꞌ miniꞌ aniꞌ nene ingine li sotoꞌ avo lingine li sotoꞌ avo di bizi Oꞌmosola li ge numuna lo-nede ne numuna lo-gede laaꞌ ilo. Ve lisiheꞌ vevesi minavete Oꞌmosola lilizaniꞌ nene amuzo malehe initeꞌ neive. Neꞌmo Oꞌmosoꞌmo gelavo initeꞌ gihilevoꞌ sotoꞌ oloseive.
JAM 5:17 Eliaꞌ nene leliꞌ gidini veꞌmo asiꞌve nene goline izamilive lo amuzo molo Oꞌmosola lavo kilisimasi setohamosi ikeꞌni lumo sigisi vivo misuboloꞌ goline izamineꞌ.
JAM 5:18 Alingeꞌ nene gohi goline izelive lo Oꞌmosola lavo Okulumokutiꞌ goline izavo misubouꞌ initeꞌ mataꞌ mukiꞌ nene gala hoꞌli dizaniꞌ.
JAM 5:19 Neze zuho mate, lengikutiꞌ maliꞌmo monoꞌ gamazi gihile hulo aka zovoꞌ izo gopo novivo ma maliꞌmo eleꞌmize tineꞌ molalineꞌ nene
JAM 5:20 aza gamazi tiꞌ lo geleleseive: Ve maliꞌmo lihimeꞌvesi ve ma aka golosoloꞌ novidotiꞌ do tineꞌ molo-delineꞌ nene aꞌmine lihimeꞌvesi veꞌmo emeniꞌve nene mudise do uꞌ izo lihimeꞌve mukiꞌ do hulo-dineꞌ geleleseive. Modave.
1PE 1:1 Izesuꞌ Kilisitoꞌ aposolo minuve Petoloꞌ naza lingine Izesuꞌ Kilisitoꞌ gamaziꞌve gili diivoꞌ minilizangumuꞌ ve losa idoꞌ vaniseꞌve neꞌmo noso ize-lengedo Kilisitoꞌ gelekeleꞌ ve lengeleꞌmize molalingumuꞌ ve losa eiꞌ Oꞌmosoꞌmi Sikalahuꞌve neꞌmo nene do kekeize lo-lengedelive lo Oꞌmosoꞌmo gomukutiꞌ vomine gele minidoꞌ eꞌmeto do kegese-lengede neineꞌ aleve lingine venenga ve neꞌmine gili mini gamene liꞌnibemukovoꞌ Podo misuboukisi Galatia misuboukisi Kapadokia misuboukisi Asia misuboukisi idoꞌ Bitinia misuboukisi miniꞌmi monave lengiꞌ nene luhuvo niteꞌ mene nogize-lingiduve. Oꞌmosolatiꞌ nasahiliꞌ nesi idoꞌ hongu lo lamino minaaꞌ monovo nesi nene lengita mine vaiꞌ loꞌmo vo miniliho.
1PE 1:3 Idoꞌ Guvetesi ve Izesu Kilisitoꞌ eiꞌ Oꞌmosoꞌve mino eiꞌ meleho minive nene opoꞌni lolone. Opoꞌni loloneꞌ nene adoꞌ Oꞌmosoꞌmo mulumote naba gelosa lemeni dameni nene do gosohoꞌ o-ledo gohi do sotoꞌ o-ledave. Idoꞌ neꞌmine o-lidineꞌ nene laza minevoꞌ alevoꞌ lamineꞌ daloningumuꞌ upuhoꞌ ogo gilingili ogo mino aꞌminemuꞌ gele muꞌmusiꞌ ogo noneꞌ akaloꞌ nene leleꞌmize nomolosa lemeni dameni nene do gosohoꞌ o-ledo gohi do sotoꞌ o-lidineꞌ ve. Idoꞌ neꞌmine o-lidineꞌ nene Izesu Kilisitoꞌ hilingutiꞌ do ote-didiꞌmo nene neꞌmine o-lidineꞌ ve.
1PE 1:4 Ee, idoꞌ neꞌmine ineꞌ nene aza Okulumokuko salani molo-lengede neineꞌ initeꞌ adoꞌ geleso osuꞌ lamaaꞌ idoꞌ golosoꞌvesi minamaaꞌ idoꞌ emeni dameniꞌve gopo amo gosohoꞌ laminekovoꞌ minaaꞌ initeꞌ nene dalizangumuꞌ ve losa lengemeni dameni do gosohoꞌ o-lengedo gohi do sotoꞌ o-lengedave.
1PE 1:5 Idoꞌ lingine aꞌmine salani molo neineꞌ initeꞌ dalizave noluvoniꞌ nene lingine ezemuꞌ gili eleꞌvoleꞌ igi minaaꞌ naniꞌ nemuꞌ nene Oꞌmosoꞌmo do lunguꞌ izelingumuꞌ ve losa eiꞌ amuzoꞌve neꞌmo alete molo-lengede minaaꞌ neingumuꞌ nene noluve. Aza do lunguꞌ izelesa do nene ogo neineꞌ nene gamene nabala do sotoꞌ ogo mudise do lunguꞌ izeleseive.
1PE 1:6 Nemuꞌ nene lingine longolize izilizadoꞌ o neive. Ee, Oꞌmosoꞌmo gelavo idise nene gamene liꞌnibemuꞌ mulumo geni ato atoꞌ ma gihi nilizangukisi nene longolizevoꞌ izi minilizadoꞌ o neive.
1PE 1:7 Idoꞌ aꞌmine mulumo geni gihaaꞌ ilizaniꞌ nene nanitekumuꞌ ve. Lingine Oꞌmosomuꞌ gili eleꞌvoleꞌ igi minaaꞌ naniꞌ nene aza mo gihile lamineꞌ nehe lo neꞌmi monovo do sotoꞌ o-lengedelesa nene lengemenguꞌ nomolave. Idoꞌ evenelite gilavo ngoli neꞌmo initeꞌ mataꞌ mukiꞌ ngivileꞌ ogo initeꞌ lamineꞌ neiha ngoli nene ngoli lamineꞌ nolihe li ningilisa olokuꞌ gizikevo loꞌvotamo ha minaaꞌ neiha alingeꞌ ngoli nesi nene vo osuꞌ loloseive. Lingine Oꞌmosomuꞌ gili eleꞌvoleꞌ igi minaaꞌ nanitine nene gihile lamineꞌ nolineꞌ nene mo ngoli nene ivileꞌ goloso ivosa initeꞌ naba neive. Nemuꞌ nene neꞌmino Oꞌmosoꞌmo lengemenguꞌ molaaꞌ ilidotiꞌ gele eleꞌvoleꞌ ogatine gihile lamineꞌ neineꞌ nene sotoꞌ ogavo Izesu Kilisitoꞌ gohi sotoꞌ o lemelineꞌ gamenela nene aza longopoꞌni lo gulivetine do hozi lo do naba o-lengedelingumuꞌ nene aꞌmine mulumo geni ato atoꞌ nene gihaaꞌ ilisave.
1PE 1:8 Izesu Kilisitoꞌni nene lingine mo ma ningamaniꞌza lutine imi minikeve. Idoꞌ idisesi mene okoꞌnoloꞌ ma ningami nizangukisi nene ezemuꞌ gili eleꞌvoleꞌ i mini lutinguꞌ gulumo avile lisivo longolize izi minaniꞌ nene laza evenelitesi ngelo monovo ma lamolonidoꞌ o minineꞌ longolize adoꞌ Okulumokutiꞌ atoliꞌmine ogo minineꞌ ma ne neive.
1PE 1:9 Idoꞌ neꞌmine igi longolize izi nizaniꞌ nene Kilisitoꞌnimuꞌ gili eleꞌvoleꞌ igi minaniꞌ neꞌmi gihileꞌve nene Oꞌmosoꞌmo lutine lukuvo emelidoꞌ mini mili nizaniꞌ nemuꞌ nene lutinguꞌ gulumo avile lisivosa longolize izi nizave.
1PE 1:10 Oꞌmosoꞌmo leliꞌ lehize-ledelesa gele minineꞌ nasahilikumuꞌ li sotoꞌ ikaꞌ ikaꞌ igaꞌ ave gozopoꞌ minaniꞌ polohete nete nene aꞌmine aꞌme luvoniꞌ gamazi adoꞌ Oꞌmosoꞌmo lukuvo lemelineꞌ nene nado lemelive li neꞌmi monovomuꞌ nene gelelone li viseꞌ ikaꞌ ikaꞌ iꞌmi vi minaniꞌ ve.
1PE 1:11 Ee, Kilisitoꞌ Sikalahuꞌve neꞌmo aꞌmine polohete engikuꞌ omo mino Kilisitoꞌ mulumo geni ato atoꞌ gehelingumukisi lo sotoꞌ ogo idoꞌ neꞌmine ilidotiꞌ Guvelesi ve naba gehepeve loloꞌ ogo minelineꞌ makiloꞌ mine do dizelingumukisi lo sotoꞌ ineꞌ nene aꞌmine polohete nete aꞌmine mulumo geni gehelive zaho nolive li idoꞌ aꞌmine Sikalahuliꞌmo lo sotoꞌ ogo lo-limineꞌ initeꞌ nene nani gameneloꞌ sotoꞌ ilizave li neꞌmi monovo nene viseꞌ ikaꞌ ikaꞌ igaꞌ aniꞌ ve.
1PE 1:12 Viseꞌ ikevo Oꞌmosoꞌmo tiꞌ lo ngelebizineꞌ ve: Ingine Kilisitoꞌ gehelineꞌ initekumuꞌ li sotoꞌ igi gono daniꞌ nene angiseꞌinemuꞌ dami asi lengikumuꞌ daniꞌ nene Oꞌmosoꞌmo ngelebizavo gilaniꞌ ve. Idoꞌ aꞌmine Kilisitoꞌnimuꞌ laniꞌ gamazi nene idise lingine mo gilikeve. Oꞌmosoꞌmo Sikalahuꞌ Okulumokutiꞌ lelita imiselineꞌ neꞌmo do ote-ngedavo Kilisitoꞌnimuꞌ gamazi lamineꞌ li sotoꞌ igi li-lingimave nete nene mo li sotoꞌ igi li-lingimikevo gilikeve. Idoꞌ aꞌmine li-lingimaniꞌ gamazi laminekumuꞌ nene angeloꞌ netesi nene ma ningo geleloinakoo li gili minaaꞌ nave.
1PE 1:13 Neꞌmine o neineꞌ nenako nemuꞌ nene lutine gatine nene gono dalidoꞌ di nene i-di mini lingine negi hizami monovotidoꞌ ha gizebo lamineꞌ igi mini Izesu Kilisitoꞌ sotoꞌ o lemelidoꞌ nasahiliꞌ gohi o-ledelingumuꞌ nene mudise gili muꞌmusiꞌ i minisa minilo.
1PE 1:14 Lingine Oꞌmosoꞌmi izipahala mini eiꞌ gamaziꞌve gili dalizadoꞌ o neineꞌ nenaze. Nemuꞌ nene lingine gomuꞌ ezemuꞌ gilami haza minaniꞌ gamenela vomine laniteꞌ gilaaꞌ aniꞌ initeꞌ maloꞌ nene gohi mini milamilo.
1PE 1:15 Asi monoꞌ godolouꞌ nene Oꞌmosoꞌmo lineꞌ gamazi tiꞌ li gizi nizaniꞌ ve: Naza nene monovoꞌne golososi nomineꞌ nouvoniꞌ nenako nemuꞌ nene linginesi monovotine golososi nomineꞌ minilo. Idoꞌ neꞌmine lineꞌ gizi nizaniꞌ nenako nemuꞌ nene elese molo-lengedo do eita ive Oꞌmoso aza monovo golosoꞌvesi nomivo neineꞌ neꞌmine igi linginesi nene initeꞌ mataꞌ mukiꞌ igi mili ilizanguꞌ nene monovotine golososi nomineꞌ minilo.
1PE 1:17 Idoꞌ lingine meteho ve li Oꞌmosola laaꞌ naniꞌza eveneꞌ mukiꞌ izeꞌ molo-ledaaꞌ ilineꞌ nene gopo eveneꞌ mala ninge lamineꞌ o-ledoo mala ninge goloso o-lede minosa nene izeꞌ molo-ledelineꞌ nevoba asi leliꞌ hamo hamoꞌ nene ogo molo olonidoꞌ olonidoꞌ do molo meni lamineꞌ lemelihe goloso lemelihe ilineꞌ nene mo aꞌmine o noloneꞌ initeꞌ lisiheꞌ o nolidokovoꞌ nene lisiheꞌ ogo golo hizo lemeleseive. Neꞌmine ilineꞌ nenako lingine olihe gotoꞌ numudine Okulumokuko vi minami venenga ve gili me misubouko minilizaniꞌ gameneuꞌ nene ezemuꞌ lengehelele izivosa mini monovo lisiheꞌ laminekovoꞌ igi mili minilo.
1PE 1:18 Idoꞌ neꞌmine igi minilizaniꞌ nene lingine tiꞌ li gili nizaniꞌ nemuꞌ nene neꞌmine igi minilisave. Lingine lengiꞌ avotingidatiꞌ di minaniꞌ dingani monovo igi mili minangutiꞌ nene do eita ogo meni hize-lingidineꞌ nene me misubouꞌ initeꞌ hulupo elelineꞌ siluvaꞌ nehe ngolimoni nehe nevoꞌmine initeꞌ nedunuꞌ nene meni hizineꞌ nevoba
1PE 1:19 asi mo Kilisitoꞌ vaniseꞌve lamineꞌ nedunuꞌ meni hizineꞌ ve. Ee, Kilisitoꞌ aza lihimetemuꞌ belaaꞌ nouneꞌ sipisipi angale okoꞌnoloꞌ initeꞌ goloso hamokisi nomineꞌ neꞌmine loloꞌ ogo neivo biladotiꞌ vaniseꞌve lamineꞌ nedunuꞌ nene meni hizineꞌ ma neive.
1PE 1:20 Ee, Oꞌmosoꞌmo me misubo nene olihe do sotoꞌ amosa gozopoꞌ vomilotiꞌ nene neꞌmine ilingumuꞌ ha mo ningo gele minineꞌza ha minosa alingeꞌ gameneuꞌ mene lengikumuꞌ ve losa do sotoꞌ o-dineꞌ ve.
1PE 1:21 Neꞌmine o-davo aꞌmine Kilisitoꞌ gono dadotiꞌ nene lingine Kilisitoꞌ hilingutiꞌ do ote-do do naba o-dive Oꞌmosomuꞌ nene gili eleꞌvoleꞌ aniꞌ nene Oꞌmosomuꞌ neve nene gili eleꞌvoleꞌ igi ezemuꞌ gili muꞌmusiꞌ igi minaaꞌ nave.
1PE 1:22 Lingine gamazi gihile di minadiꞌmo lutinguꞌ monovo goloso minineꞌ nene di huli lutine di guluviꞌ lisa lingine lengiꞌ zuho Kilisitoꞌ evenele lutine ngimilizaniꞌ nene abeleni ami asi lutine ngimi giliꞌ lilizadoꞌ nene lisiheꞌ i nizaze. Mo lutine laminetotiꞌ nene amuzo mili lutine ge neme ne geme li minilo.
1PE 1:23 Lingine nene lengemeni dameni gosohoꞌ ogavo gohi sotoꞌ aniꞌ ve. Idoꞌ gohi sotoꞌ aniꞌ nene helosa osuꞌ liliveꞌmo zuho molavosa nevoba asi helosa osuꞌ lamaaꞌ neiveꞌmo zuho molavosa gohi sotoꞌ aniꞌ ma neive. Ee, minevoꞌ minevoꞌ ogo mino minevoꞌ minevoꞌ ogaliꞌmi monovo do sotoꞌ o-ledaaꞌ neineꞌ initeꞌ Oꞌmosoꞌmi gamazi neꞌmo lengiꞌ lutinguꞌ gono dadotiꞌ nene lengemeni dameni do gosohoꞌ ogavo gohi sotoꞌ aniꞌ ma neive.
1PE 1:24 Idoꞌ mene noluvoniꞌ gamazi nene monoꞌ godolouꞌ tiꞌ li gizi nizaniꞌ gamaziloꞌ vo miliseꞌ o neivosa nene noluve: Eveneꞌ mukiꞌ leliꞌ nene guvise navise neꞌmine nene none. Idoꞌ leliꞌ do sotoꞌ ogaꞌ nouneꞌ initeꞌ lamineꞌ tamineꞌ ato atoꞌ mukiꞌ nene ha aꞌmine guvise naviseliꞌmi guvovo neꞌmine nene neive. Guvise nene gaꞌnuvo elo osuꞌ lavosa guvovoꞌve nene suludoꞌmozaaꞌ neive.
1PE 1:25 Neꞌmine ogaꞌ neiha Guvelesi veꞌmi gamazi nene mo eleꞌvoleꞌ ogo minevoꞌ minevoꞌ ogovoꞌ mineleseive. Idoꞌ aꞌmine Guvelesi veꞌmi gamazi nene adoꞌ aꞌmine li soto sotoꞌ igi li-lingimaniꞌ gamazi lamineꞌ nene neive.
1PE 2:1 Nemuꞌ nene lingine goloso monovo ato atoꞌ mukiꞌ adoꞌ eveneꞌ goꞌine izaaꞌ idoꞌ lutinguꞌ monovo goloso haleko neivosa eveneꞌ lamineꞌ gili monaaꞌ idoꞌ eveneꞌ maliti initekumuꞌ lavodine lemavo muludinguꞌ goloso gilaaꞌ idoꞌ gamazi di goloso igi laaꞌ monovo ato atoꞌ mukiꞌ nesi nene ogalone li mudise huli osuꞌ lisa mini
1PE 2:2 Oꞌmosoꞌmi gamazi neꞌmo lute do naba ogavo lukuvo naloningumuꞌ ve li izipe namunolite aminemuꞌ ngisavo igaꞌ naniꞌ neꞌmine igi lingine aꞌmine lutineꞌmi nosoꞌ niteꞌ aminemuꞌ nene lingisivosavoꞌ minilo.
1PE 2:3 Neꞌmine igi minilizave lo noluvoniꞌ nene lingine Guvelesi veꞌmo mulumote ningo do lamineꞌ o-ledaaꞌ neineꞌ monovoꞌveꞌmi laniteꞌve ningi nigilaniꞌ nemuꞌ nene noluve.
1PE 2:4 Aꞌmine Guvelesi ve nene numuno gizaaꞌ geheni sikalahuꞌvesi minineꞌ neꞌmine ne neive. Eveneꞌ nete eiꞌ nene di ningisa goloso neive li di hulaniꞌza Oꞌmosoꞌmo eikumuꞌ gilivo dizo neivosa do kegese-dineꞌ nenaze. Eita nene igi giꞌmizi minilo.
1PE 2:5 Neꞌmine igisa lingine nene numuno gizaaꞌ geheni sikalahuꞌvesi minineꞌ neꞌmine liliꞌ igi minikevo Oꞌmosoꞌmo eiꞌ Sikalahuꞌveꞌmi numuꞌve loloꞌ o-lengedelize. Guvelesi vela igi giꞌmizilo. Idoꞌ neꞌmine igisa lingine Oꞌmosoꞌmi numunguꞌ gono di-dilisa kekeize li minaniꞌ zuho liliꞌ igi monoꞌ numuno nabauꞌ Oꞌmoso initeꞌ lehizi-daaꞌ aniꞌ neꞌmine igi Oꞌmosoꞌmo Izesu Kilisitoꞌ gono dangumuꞌ gelosa ninge lamineꞌ dalineꞌ initeꞌ nene lengiꞌ lutingutiꞌ nene di sotoꞌ igi lehizi-dilizave.
1PE 2:6 Mene noluvoniꞌ nene mo laminetoꞌ monoꞌ godolouꞌ Oꞌmosoꞌmo lineꞌ gamazi tiꞌ li gizi nizadoꞌ nene eꞌmeto noluve: Lingine giliꞌnalo. Naza numuno gizaaꞌ geheni mamuꞌ nene giluvo dize neivosa aꞌmine geheni nene numuno do amuzo molaaꞌ geheni minelive losa do kegeso neniꞌ eveneꞌne zuhoti ebeꞌnine Zaioni golo neuꞌ adoꞌ engiꞌ vovoꞌninguꞌ gehepeve nene nohulo-duve. Idoꞌ ezemuꞌ gili eleꞌvoleꞌ ilizave mukiꞌ nene gili eleꞌvoleꞌ ilizaniꞌ neꞌmi gihile nene sotoꞌ amivo ngovozo ma hilamilisave.
1PE 2:7 Idoꞌ aꞌmine geheni nene mo dizo neive noluvoniꞌ nene lingine ezemuꞌ gili eleꞌvoleꞌ i nizave nene ezemuꞌ gilavo dize neivosa nene noluha eveneꞌ ma ezemuꞌ gili eleꞌvoleꞌ amavela nene monoꞌ godolouꞌ tiꞌ li gizi nizaniꞌ gamazi maloꞌ nene mo gihile izave: Numuno gizilizaniꞌ geheni mukikutiꞌ nene geheni ma numuno gizaaꞌ avelite ningisa goloso o vive li di hulaniꞌ geheni neꞌmo geheni mukiꞌ ngivileꞌ ogo numuno do amuzo molaaꞌ geheni loloꞌ ogave.
1PE 2:8 Idoꞌ ma nene: Aꞌmine geheni nene eveneꞌ lodohoꞌ izi limi pouꞌ li ingalizaniꞌ geheni gehepeve ne neive. Ingine lodohoꞌ izi limi ingaaꞌ naniꞌ nene Oꞌmosoꞌmi gamazi gili damadiꞌmo nene limi ingaaꞌ nave. Oꞌmosoꞌmo ingine mo neꞌmine ilizave lo gele neidoꞌ nene neꞌmine igaꞌ nave.
1PE 2:9 Ne neiha lingine neve nene mo Oꞌmosoꞌmo eiꞌ ve lo do kegesineꞌ zuho mini Guvelesi ve nabaꞌmi monoꞌ gono di-di initeꞌ lehizi-daaꞌ aveliti muliseutiꞌ mini Oꞌmosoꞌmo eiꞌ ve lo do kekeize lo-lengede neineꞌ zuho nene nizave. Idoꞌ neꞌmine nizaniꞌ nene vode vavo lehelele izelineꞌ labanaꞌveuꞌ nene litiꞌmusoutiꞌ elese molo-lengedo lengeleꞌmize molavemuꞌ nene opoꞌni li guvele li soto sotoꞌ ilizangumuꞌ nene neꞌmine aleve nene nizave.
1PE 2:10 Gomuꞌ lingine eveneꞌ numuno gulivetine minamivo gopo minaniꞌza idise nene numuno gulivetine Oꞌmosoꞌmi evenele zuho ve lisa nene nizave. Gomuꞌ nene Oꞌmosoꞌmo isete izo nasahiliꞌ o-ledaaꞌ ineꞌ monovoꞌve nene lengita hetelamivo minaniꞌza idise nene mo lengita ogo hetelavo aꞌmineꞌmi lulouꞌ nene nizave.
1PE 2:11 Lingine luꞌne lengeme nouvoniꞌ alevekizo, me misubouꞌ aleve minami gamene liꞌnibemukovoꞌ aꞌmida mene minilizaniꞌ nenako okodineꞌmo me misubouꞌ initekumuꞌ laniteꞌ gilineꞌ nene gili hulilo. Okodineꞌmo neꞌminemuꞌ gilineꞌ neꞌmo lutine nene ivileꞌ olosa lovo o emaaꞌ neinaze. Lingine gili hulilo lo nolo-lingiduve.
1PE 2:12 Oꞌmosoꞌmi evenele minamaveti zuhoti vovoꞌninguꞌ minilizanguꞌ lingine igi mili ilizaniꞌ nene mo monovo lisiheꞌ laminekovoꞌ nene igi mili minilo. Ee, ingine lengikumuꞌ eveneꞌ goloso ve li divi lediviꞌ i-lingidi laaꞌ naha neꞌmine i-lingidi minilizangukisi monovo lamineꞌ igi mili igaꞌ ilizaniꞌ nene ningi miniꞌ miniꞌ ilizadiꞌmo Oꞌmosoꞌmo monovoꞌnidoꞌ ogo do ningelineꞌ gameneloꞌ ingine nene aꞌmine monovote laminekumuꞌ Oꞌmoso opoꞌni lilizangumuꞌ ve li monovo lisiheꞌ laminekovoꞌ igi mili minilo.
1PE 2:13 Guvelesi veꞌmo ningivo lamineꞌ ilingumuꞌ ve li lingine evenelite amuzo ato atoꞌ ngimaniꞌ aleve mukiꞌ nene gelekeleꞌ i-ngidivoꞌ minilo. Adoꞌ eveneꞌ linge mukiꞌ ngivileꞌ ogo minive guvelesi ve naba gehepeve nolihe
1PE 2:14 idoꞌ aꞌmine guvelesi ve naba neꞌmo ingine eveneꞌ monovo goloso ilizave lihime ngemaaꞌ gonosi idoꞌ monovo lamineꞌ ilizave ngopoꞌni laaꞌ gono nesi nene dalizave lo ngeleꞌmize molave ngamani naba nilizahe mukiꞌ nene gelekeleꞌ i-ngidivoꞌ minilo.
1PE 2:15 Idoꞌ lingine gelekeleꞌ i-ngidivoꞌ minilizave noluvoniꞌ nene Oꞌmosoꞌmo tiꞌ lo gele neingumuꞌ nene noluve: Adoꞌ lingine monovo lisiheꞌ laminetoꞌ eꞌmeti minilizadiꞌmo eveneꞌ negi adoꞌ gamazi monovo gilamavete divi lediviꞌ i-lingidaaꞌ nave neti veꞌnidoꞌ nene humo izi-ngidikevo gohi lamilisave lo gele neive.
1PE 2:16 Lingine Moseꞌ louliꞌmi gesi minguꞌ mini nalatoꞌ ve gili minangutiꞌ kuluhizi nizaniꞌza aꞌmine louliꞌmo adeloꞌ damivo fili o noneꞌ nenako nemuꞌ nene monovo ato atoꞌ mukiꞌ nene lihimeꞌve nomivo gopo ha olosune lisa monovo goloso dikelizave. Neꞌmine amilo. Asi Oꞌmosoꞌmi gelekeleꞌ ve mini eiꞌ lulolokovoꞌ igi mili minilo.
1PE 2:17 Adoꞌ eveneꞌ mukikumuꞌ gilavo dizivo mini Kilisitoꞌ evenele leliꞌ zuho mukiꞌ nene lutine ngimi mini Oꞌmosomuꞌ golise gili mini aꞌmine me misubouꞌ guvetinesi ve naba minive nene di naba i-di gili imi minilo.
1PE 2:18 Gonoloꞌ gipe alu lingine lengehelele gehepeve izivo mini metinge gizebo vetine nene gelekeleꞌ i-ngidivoꞌ minilo. Adoꞌ gizebo vetine ve lamineꞌ hongu ve neꞌmine minilizanikovoꞌ gelekeleꞌ i-ngidi minilizavoba asi metinge gasava ve minilizaniꞌ nesi nene ha gelekeleꞌ i-ngidivoꞌ minilo.
1PE 2:19 Ee, eveneꞌ ma initeꞌ ma do goloso amilidoꞌ hazamuꞌ mulumo gono imikevosa aza hongu lo mino aꞌmine mulumo nene Oꞌmosomuꞌ gele mino ha gehelineꞌ nene Oꞌmosoꞌmo ezemuꞌ gelavo lamineꞌ oloseive.
1PE 2:20 Ne neiha lingine initeꞌ ma di goloso ikevo aꞌminemuꞌ lihime lingimi gavoso nilingibilavo lingine hongu li mini ha gihilizaniꞌ nemuꞌ nene longopoꞌni lilizadoꞌ minilizahe. Oꞌove. Longopoꞌni lamilisaniꞌza lingine initeꞌ lisiheꞌ lamineꞌ ma ikevo gavoso nilingibilavo lingine hongu li ha gihilizaniꞌ nene Oꞌmosoꞌmo ningivo lamineꞌ oloseive.
1PE 2:21 Idoꞌ neꞌmine ilizave lo noluvoniꞌ nene Oꞌmosoꞌmo neꞌmine ilizave lo elese molo lengeleꞌmize molaniꞌ nenako nemuꞌ noluve. Idoꞌ Oꞌmosoꞌmo neꞌmine ineꞌ nene Kilisitoꞌ azasi lingine neniꞌ ogo molo uvodoꞌ apiꞌ napiꞌ igi igi mili minilizave lo avazaha pikisa neꞌmine bele molo lengitoꞌ medelo mulumo gono gihineꞌ nenako nemuꞌ nene Oꞌmosoꞌmo linginesi neꞌmine ilizave losa elese molo-lengedave.
1PE 2:22 Aꞌmine ogo molo minidoꞌ apiꞌ napiꞌ igi eꞌmetilizave Kilisitoꞌ aza nene lihime ma damineꞌ ma neive. Idoꞌ goꞌine izo soza gamazi veleutiꞌ livo eveneꞌ hamoliꞌmosi ma gelamineꞌ ve.
1PE 2:23 Evenelite divi lediviꞌ igi elemadoꞌ nene do velepeꞌ izo aza aꞌmidoꞌ do goloso o-ngedo ngelemesaꞌmineꞌ ve. Idoꞌ mulumo niteꞌ i-dadoꞌ nene golo hizo golise gililiza gamazi lo-ngedamo asi goniꞌ do lisiheꞌ ogovoꞌ gelaaꞌ ive Oꞌmosoꞌmi anaukovoꞌ molosa ezeloꞌ lehete o minaaꞌ ineꞌ ve.
1PE 2:24 Idoꞌ leliꞌ nene lihime mudise hulisa monovo lisiheꞌ laminekovoꞌ igi mili miniviꞌ aliviꞌ ilizangumuꞌ ve losa asiꞌve nene leliꞌ lihimete eiꞌ okoꞌnoloꞌ geho aꞌminemuꞌ nene lohotoꞌ zaloꞌ hilineꞌ ve. Eiꞌ biladiꞌmo lingine nene mo lamineꞌ ikeve.
1PE 2:25 Idoꞌ naza neꞌmine noluvoniꞌ nene lingine sipisipi ize neꞌmine mini vi gopo igi minaniꞌza idise mini velepeꞌ izi lengiꞌ lutineꞌmi noso niteꞌ emeꞌmo vo aꞌmidoꞌ gizebo o-lengedelivela igi giꞌmizikeniꞌ nizaniꞌ nenako nemuꞌ nene noluve.
1PE 3:1 Idoꞌ gomuꞌ noluvoniꞌ neꞌmine igi veneꞌ nete vadingine gelekeleꞌ i-ngidivoꞌ minilo. Ee, neꞌmine ikevo vadinge engikutiꞌ linge ma Kilisitoꞌ gamaziloꞌ gili dami nilizaniꞌ nene veneꞌine lingine ha lengehelele izivo mini monovo goloso lengita nomivo monovo laminekovoꞌ igi mili nizavo ingine aꞌmidoꞌ ningi miniꞌ miniꞌ ilizaniꞌ neꞌmo nene lingine gamazi li-ngimamavosi Kilisitoꞌnimuꞌ gili eleꞌvoleꞌ igi eze zuhouko ha di imineꞌ mili minilizahe. Nemuꞌ lengiꞌ nene ha gelekeleꞌ i-ngidivoꞌ minilo.
1PE 3:3 Idoꞌ gonolisetine nene okodine losuvoloꞌ minelineꞌ initeꞌ adoꞌ madudine zopovo nalava izi di maꞌmine maꞌmine igaꞌ nehe, ngolidunuꞌ liliꞌ aniꞌ initeꞌ nehe, okodidoꞌ initeꞌ lamineꞌ tamineꞌ nehe, nevoꞌmine initeꞌ neve nene minelivoba
1PE 3:4 asi lengemeni dameni lutinguko haleko minaaꞌ neineꞌ adoꞌ hongu lo alahaꞌ ogo minaaꞌ lengemeni dameni neꞌmo nene litehe elo osuꞌ lamo gonolisetine gihile mineleseive.
1PE 3:5 Ee, idoꞌ gomuꞌ vomila Oꞌmosola giꞌmizi mini ezeloꞌ gili muꞌmusiꞌ igi minaaꞌ aniꞌ veneꞌ nete nene luteꞌmi gonoliseꞌve minelive li aꞌmine neꞌmine monovoloꞌ eꞌmetisa vaꞌningida gelekeleꞌ i-ngidi minaniꞌ nenako lengitasi neꞌmine monovotine minelineꞌ nene lamineꞌ oloseive.
1PE 3:6 Mene noluvoniꞌ nene adoꞌ Salaꞌ aza Abalahamuꞌnimuꞌ nenitoꞌ gizebo ve ve lo gamaziꞌve gele doꞌmo vo minaaꞌ ineꞌ maꞌminemuꞌ nene noluve. Idoꞌ lingine monovo laminetokovoꞌ eꞌmeti mini neꞌmine manaꞌmine initekumuꞌ golise gilami minilizaniꞌ nene eiꞌ aluvo gidini mini eiꞌ gili vaniꞌ minilisave.
1PE 3:7 Idoꞌ vaꞌninge lingine eledinginemuꞌ luvodiꞌmine ogo tiꞌ lo nolo-lingimuve: Lingine nene Oꞌmosola laaꞌ oloneꞌ akate nene goloso ogalive li eledinginemuꞌ nene ingine amuzo damaniꞌ mini lelitotiꞌ nene limisa nizave li ngeleꞌmize lamineꞌ igi mini Oꞌmosoꞌmo lehize-ledavo minevoꞌ alevoꞌ ogaꞌ lemeni dameni nene engikisi lelikisi makatoꞌ dalonive ne nizave li eleꞌvoleꞌ i-ngidami asi gili nge li mini zou li makatoꞌ lamini bizi minilo.
1PE 3:8 Naza gamazi lo osuꞌ lo do vo noꞌnovo molalosa tiꞌ lo nolo-lingimuve: Lingine lutine gatine nene hamoliꞌminevoꞌ minivosa minilo. Idoꞌ ge mulumoꞌne ninge-nede ne mulumoka ninge-gede lisavoꞌ minilo. Idoꞌ lengiꞌ nene hamoꞌ zuho nizanaze. Ge luka neme ne luꞌne geme lisavoꞌ minilo. Idoꞌ ezemuꞌ mulunga hukivo hukivo gezemuꞌ muluno hukivo hukivo lisavoꞌ minilo. Idoꞌ hokolizeꞌ ami okodine diꞌmi limivoꞌ minilo.
1PE 3:9 Idoꞌ lengiꞌ di goloso nii-lingidavo ma aꞌmidoꞌ golo hizi di goloso i-ngidamilo. Idoꞌ aꞌmineꞌmine igi lengiꞌ nene gamazidunuꞌ giziꞌvoti gamazi ma nili-lingidavo ma nene aꞌmidoꞌ golo hizi lingine giziꞌvoti li-ngidamilo. Asi Oꞌmosoꞌmo lengiꞌ vise lo do eita ineꞌ nene eitatiꞌ nene noꞌnohoꞌ dalizave losa neꞌmine ineꞌ nenako nemuꞌ nene neꞌmine nii-lingidavo ma aꞌmidoꞌ nene Oꞌmosoꞌmo noꞌnohoꞌ ize-lingidivo lisavoꞌ nene li-ngimilo.
1PE 3:10 Mene nolo-lingimuvoniꞌ gamazi neve nene monoꞌ godolouꞌ gamazi tiꞌ li gizi nizaniꞌ maloꞌ nene vo nodave: Ve ma aza minevoꞌ alevoꞌve lamineꞌ minivo laminekovoꞌ mine do dizelesa gelelive nene veleꞌmo gamazi gosohoꞌ nasahaꞌ lo gamazi goloso lalive lo veleloꞌ nene gizebo lamineꞌ ilive.
1PE 3:11 Idoꞌ monovo golosomuꞌ nene olovoꞌ o mino monovo laminekovoꞌ ilive. Idoꞌ hongu lo lamino minaaꞌ monovomuꞌ nene viseꞌ ogo imisele do vo dalive.
1PE 3:12 Ee, Guvelesi veꞌmi vele nene eveneꞌ lisihetokovoꞌ hulo mino gizebo o-ngedo mino ezemuꞌ lilizaniꞌ gamazi nene gelelesa gapepeꞌ o minaaꞌ neiha eveneꞌ monovo goloso daaꞌ avela nene gololoꞌ ninge-ngedo minaaꞌ neineꞌ nenako nemuꞌ nene aꞌmine minevoꞌ alevoꞌ laminekuꞌ minelesa gelelive nene aꞌmine meuko luvoniꞌ neꞌmine nene ilidoꞌ o neive.
1PE 3:13 Idoꞌ lingine monovo laminekovoꞌ igi mili ilisa amuzo mili minilizaniꞌ nene evenelite ma di goloso i-lingidilizadoꞌ o neihe. Mo oꞌove.
1PE 3:14 Ne neiha monovo lamineꞌ igi mili ilizangumukisi mulumo gono ma gihi-lingidilizaniꞌ nene Oꞌmosoꞌmo ninge lamineꞌ o-lengedeleseinako lamineꞌ oloseive. Lingine evenelite lengehelele izelineꞌ initeꞌ i-lingidilizaniꞌ nene muludine badavo golise gilamilo.
1PE 3:15 Kilisitoꞌ nene lengiꞌ lutineꞌmi Guvelesi ve minelive li eleꞌmizi milalo. Idoꞌ lingine Kilisitoꞌnimuꞌ gili muꞌmusiꞌ i nizangumuꞌ evenelite longoꞌ i-lingidikaꞌ i-lingidikaꞌ ilizadoꞌ nene aꞌmine gili muꞌmusiꞌ i nizaniꞌ neꞌmi monovo nene li ngoloꞌ li li-ngimilizadoꞌ di vaꞌvaꞌ ikisavoꞌ minilo.
1PE 3:16 Idoꞌ neꞌmine igi li-ngimili ma nene humedame ami hongu gamazi laminekovoꞌ li-ngimilo. Idoꞌ lingine Kilisitoꞌ evenelelite ilizadoꞌ o neineꞌ monovo lamineꞌ igi mili minaaꞌ naangumuꞌ divi lediviꞌ igi laaꞌ nave nene aꞌmine lengemenga langumuꞌ nene ngovozo hililizangumuꞌ ve li monovo lisiheꞌ lamineꞌ gehepeve neive li lutinguꞌ gili nizadokovoꞌ nene eꞌmeti minilo.
1PE 3:17 Idoꞌ Oꞌmosoꞌmo gelavo lingine mulumo geni gihilizadoꞌ o nolineꞌ nene lingine monovo laminekovoꞌ eꞌmetilizadotiꞌ aꞌmine mulumo geni gihilizaniꞌ nene lamineꞌ oloseiha lingine mulumo geni gihilizaniꞌ nene mo monovo goloso dalizadotiꞌ gihilizaniꞌ neve nene mo goloso oloseive.
1PE 3:18 Ee, Kilisitoꞌ azasi nene mulumo alumo gelo hilineꞌ ve. Aza nene ve lisiheꞌ minineꞌza Oꞌmosola do bize-ledelesa eveneꞌ goloso leliꞌ lihimetemuꞌ lelitoꞌ medelo hilineꞌ ve. Idoꞌ aꞌmine gamene hamokovoꞌ hilineꞌ aꞌneꞌmo nene leliꞌ mukiliti lihimete nene mo osuꞌ lilidoꞌ vo daniꞌ ve. Aza neve nene eveneꞌ leliꞌ okode neꞌminesi neivosa nene bili hilaniꞌza sikalahuꞌve nene Oꞌmosoꞌmo do upuhoꞌ o-davo vele gizosa
1PE 3:19 aꞌmine sikalahuꞌve nesi mino nene vo nalaꞌ numunguꞌ minaniꞌ sikalahuꞌ nene monoꞌ lo-ngimineꞌ ve.
1PE 3:20 Aꞌmine monoꞌ lo-ngimineꞌ sikalahuꞌ nene gomuꞌ Noaꞌ minineꞌ gameneuꞌ Noaꞌ aza sipi loloꞌ neivo Oꞌmosoꞌmo eveneꞌ engikumuꞌ izeboloꞌ molavo geto ngebelamo ha gizebo o minineꞌ gameneuꞌ eze gamazi gili hulave engiꞌ nene monoꞌ lo-ngimineꞌ ve. Aꞌmine sipiuꞌ nene eveneꞌ ngomosiꞌ eiti aꞌneꞌminevoꞌ dizikevo Oꞌmosoꞌmo nosodunuꞌ do nguꞌ izineꞌ ve.
1PE 3:21 Idoꞌ aꞌmine noso velo aniꞌ nene noso holaaliꞌmi avazaha neꞌmine nene sotoꞌ ineꞌ ve. Ee, noso hilaaꞌ naadotiꞌ nene Oꞌmosoꞌmo do lunguꞌ izaaꞌ neive. Idoꞌ noso holaaꞌ nouneꞌ nene okodeloꞌ goloduvo gilite-ledelive losa nevoba asi Oꞌmosoꞌmo lute do guluviꞌ lo-ledavo guluvikovoꞌ lo minaaꞌ ilive losa ezela lo noso holaaꞌ noune. Idoꞌ aꞌmine Oꞌmosoꞌmo do lunguꞌ izaaꞌ neineꞌ nene Izesuꞌ Kilisitoꞌ hilingutiꞌ otidiꞌmo ve losa do lunguꞌ izaaꞌ neive.
1PE 3:22 Idoꞌ Kilisitoꞌ eiꞌ neve nene idise Okulumokuko dizo Oꞌmosolotiꞌ lemo mino ana hulaaꞌ idaa neivo angeloꞌ nesi idoꞌ ato atoꞌ amuzoꞌinesi miniꞌmi monaniꞌ nesi nene gizeneuko limi gelekeleꞌ i-di nizavosa gizebo o-ngede neive.
1PE 4:1 Nemuꞌ nene Kilisitoꞌ okoꞌnoloꞌ mulumo geni gihidiꞌmine igi linginesi mulumo geni gihilizangumuꞌ nene lutine gatine di amuzo mili di vaꞌvaꞌ igisa minilo. Nene nanitekumuꞌ ve. Ve ma okoꞌnoloꞌ mulumo geni gehe nolive aza lihime daaꞌ monovo nene mo hulosa noloseinako nemuꞌ nene noluve.
1PE 4:2 Idoꞌ neꞌmine ma ilizaniꞌ nene idise melotiꞌ nene haza okodesi minevoꞌ alevoꞌ oꞌmo dizeloneꞌ gameneuꞌ nene haza alevete laniteꞌ gilaaꞌ naaniꞌ monovo nene laza gohi amo asi Oꞌmosoꞌmi lulolokovoꞌ ogo molo minelone lisa neꞌmine ilizaniꞌ o neive.
1PE 4:3 Ee, gomuꞌ lingine Oꞌmosoꞌmi evenele minamave heta atoꞌ velite ngumo helaaꞌ ineꞌ monovo goloso igi miliꞌmi dizaniꞌ nene mo moda ve lo noluze. Gohi amilo. Aꞌmine goloso monovo nene adoꞌ neꞌmine manaꞌmine monovo goloso longovozo hilami gopo igaꞌ, initeꞌ goloso mamuꞌ lutine otaaꞌ, nosoloꞌ moni sipaki goloso igaꞌ, nosoꞌ niteꞌ naba ni zohiꞌ igi noso ni sipaki igaꞌ idoꞌ noso naaꞌ pati di sotoꞌ igaꞌ idoꞌ soza oꞌmoso ngeꞌmetaaꞌ monovo goloso igaꞌ aniꞌ mamuꞌ nene noluze. Mo hulilo.
1PE 4:4 Lingine aꞌmine heta atoꞌ vesi nene aꞌmine monovo golosouꞌ nene vili viviꞌ viviꞌ igi minaniꞌ maꞌmine nene gohi amavo ingine ningi upuhoꞌ igi lengiꞌ nene divi lediviꞌ igi lengemenga laaꞌ nave.
1PE 4:5 Ne neiha aꞌmine engiꞌ nene vetesi ha nonivesi hilavesi monovotemuꞌ goniꞌ o-ledo izeꞌ molo-ledelesa do vaꞌvaꞌ o neive neꞌmo nene neꞌmine angumuꞌ nene lingine nanitekumuꞌ ave lo goniꞌ o-ngedo lihime ngemeleseive.
1PE 4:6 Nemuꞌ nene monoꞌ gamazi lamineꞌ nene hilavetidasi vo hetelineꞌ ve. Ingine haza okoꞌinesi minaniꞌ gameneuꞌ nene Oꞌmosoꞌmo eveneꞌ mukiꞌ o-ledaaꞌ neineꞌ neꞌmino engikisi goniꞌ o-ngedo lihime ngemavo hilaniꞌza ingine sikalahuꞌinesi mini Oꞌmosoꞌmo minevoꞌ minevoꞌ ogaꞌ neidiꞌmine igi miniviꞌ miniviꞌ ilizangumuꞌ ve losa aꞌmine monoꞌ gamazi lamineꞌ nene engitasi hulavo vo hetelineꞌ ve.
1PE 4:7 Idoꞌ initeꞌ mataꞌ mukiꞌ osuꞌ lilineꞌ gamene nene mo avitoꞌ ogaze. Lingine nene Oꞌmosola lilizadoꞌ lisiheꞌ i minilizangumuꞌ nene lutine gatine gopo amivo di vevesi minilo.
1PE 4:8 Lute ngemaaꞌ monovoloꞌ eꞌmetilizave nete nene evenelite di goloso i-ngidilizaniꞌ lihime mukiꞌ nene di halekisavoꞌ apasi-ngidilizaniꞌ nenako nemuꞌ nene lingine igi mili ilizaniꞌ initeꞌ mukikutiꞌ ma dizo neineꞌ nene lingine lutine ge neme ne geme li minilisa nene amuzo mili igi mili minilo.
1PE 4:9 Idoꞌ eveneꞌ numudinguꞌ alizangumuꞌ nene lingine nulu nulunga li lihiteheka lami numudinguꞌ numudinguꞌ nene ne do lamineꞌ o-gede ge do lamineꞌ o-nede lisavoꞌ minilo.
1PE 4:10 Oꞌmosoꞌmo lengiꞌ nene nasahiliꞌ o-lengedo gono daaꞌ amuzo ato atoꞌ vaiꞌ nene lehize-lengede neize. Aꞌmine lehize-lingidineꞌ amuzoloꞌ nene gizebo lamineꞌ igi minilizangisi lingine hamo hamoꞌ aꞌmine di nizaniꞌ amuzodunuꞌ nene ge hize eleꞌ o-nede ne hize eleꞌ o-gede li minilo.
1PE 4:11 Adoꞌ monoꞌ lo-lengemelive neve nene Oꞌmosoloꞌ medelo mino eiꞌ Oꞌmosoꞌmi gamaziꞌvevoꞌ nene lo-lengemelive. Idoꞌ nasahiliꞌ ogo hize eleꞌ gono do-lengedelive neve nene Oꞌmosoꞌmo amuzo emaaꞌ neineꞌ votigileloꞌ nene do molo aꞌmine gono nene do-lengedelive. Idoꞌ neꞌmine ilizaniꞌ nene lingine Izesuꞌ Kilisitoꞌ hize eleꞌ o-lidivo laza oloneꞌ initeꞌ mataꞌ mukitotiꞌ nene Oꞌmosoꞌmi gulive nene do naba o-delone lisa nene neꞌmine ilizave. Ezela nene guvelesi idoꞌ amuzo nesi nene mo minevoꞌ minevoꞌ ogovoꞌ minelive. Mo neꞌmino minilihoo.
1PE 4:12 Luꞌne lengeme nouvoniꞌ alevekizo, lutine do ningelesa lengemenguꞌ molo ololiꞌmo longolaaꞌ neineꞌ neꞌmino mulumo geni gihi-lingidilisa naavo lengiꞌ sotoꞌ o-lengedelesa neingumuꞌ nene lingine leliꞌ sotoꞌ o-ledamilidoꞌ o neineꞌ initeꞌ atoliꞌmine ma sotoꞌ o-ledelesa neihe li upuhoꞌ amilo.
1PE 4:13 Asi Kilisitoꞌ mulumo geni gihineꞌ neꞌmine nene linginesi gihi nilizaniꞌ nenako nemuꞌ nene lingine Kilisitoꞌ labanaꞌvesi gohi sotoꞌ ilineꞌ gameneuꞌ nene luteuꞌ gulumo avile lisivo mino lolize naba izeloningumuꞌ ve li longolize izi minilo.
1PE 4:14 Idoꞌ lingine Kilisitoꞌ evenele liliꞌ igi eze gulive di minangumuꞌ lingilimaaꞌ navo ma nene guvelesi neineꞌ Oꞌmosoꞌmi Sikalahuꞌ neve nene lengitoꞌ omo mino mine do vilineꞌ nenako nemuꞌ nene lingine longolize izi minilizadoꞌ o neive.
1PE 4:15 Idoꞌ lengikutiꞌ linge ma mulumo gono gihi-lingidilizaniꞌ nene lingine eveneꞌ ma ngibili hililizahe idoꞌ gumine damine ilizahe idoꞌ monovo goloso atoliꞌmine ilizahe idoꞌ eveneꞌ maliti initekuꞌ gavakavatoꞌ monaaꞌ ilizahe ilizadotiꞌ mulumo gono lingimilizaniꞌ nene mo edamoloseize. Aꞌneꞌmine monovo nene mo amilo.
1PE 4:16 Ne neiha eveneꞌ ma aza Kilisiteni loloꞌ ogo minelingumuꞌ mulumo geni initeꞌ gihi-dilizaniꞌ nemuꞌ nene ovozo helamo asi Kilisiteni guliveꞌve miningumuꞌ nene Oꞌmoso do naba o-do minelive.
1PE 4:17 Neꞌmine manaꞌmine monovoloꞌ eꞌmeti minilizave lo meuko noluvoniꞌ nene Oꞌmosoꞌmo eze evenele zuho gonitoꞌ leleꞌmize molo-ledelineꞌ gamene mo alitingumuꞌ nene noluve. Idoꞌ eiꞌ evenele lelitotiꞌ apiꞌ ogo eveneꞌ lihime lengemeꞌmo vilineꞌ nene aizo, alingeꞌ nela eze gamaziꞌve laminekumuꞌ gili eleꞌvoleꞌ amave goniꞌ o-ngedo lihime ngemo do nadiꞌ o-ngedelidoꞌ o minelivoo. Mo mulumo gono goloso gehepeve ngemelineꞌ o noloseive.
1PE 4:18 Aꞌmine neve nene monoꞌ godolouꞌ tiꞌ li gizi nizadoꞌ nene vo do neive: Oꞌmosoꞌmo eveneꞌ lisiheꞌ lamineꞌ do luꞌ izelesa nene geꞌnebe ogosa do luꞌ izaaꞌ neineꞌ nenako Oꞌmoso meheꞌine imi lihimeloꞌ monaaꞌ ave nene lukuvo nalizadoꞌ o neihe. Mo kekeꞌ ngeli lukuvosi ma namilisave.
1PE 4:19 Nemuꞌ nene Oꞌmosoꞌmi luloloꞌ eveneꞌ ma mulumo geni gihi nilizave engiꞌ minevoꞌ alevoꞌine nene engiꞌ do sotoꞌ o-ngidive adoꞌ gamaziꞌve lavo haza ma osaꞌmive eiꞌ anauꞌ miliki eitoꞌ leheteꞌ i mini monovo laminetoꞌ nene eꞌmeti minilizadoꞌ o neive.
1PE 5:1 Idoꞌ lengikutiꞌ monoꞌ gizebo vetine minavemuꞌ nene gamazi lolouze. Gililo. Lengiꞌ neꞌmine gizebo ve minuve adoꞌ Kilisitoꞌ mulumo geni geheꞌmo navo ningaaꞌ idoꞌ alingeꞌ sotoꞌ o-ledelesa neineꞌ initeꞌ lamineꞌ labanaꞌvesi neineꞌ nene makatoꞌ dalonivesi minuve naza gatine do tiꞌ lo nolo-lingimuve:
1PE 5:2 Lengita Oꞌmosoꞌmi zuho mulise nizaniꞌ neve nene luꞌineꞌmi nosoꞌ niteꞌ ngimika ngimikaꞌ igi gizebo lamineꞌ i-ngidi minilo. Neꞌmine i-ngidi minilizaniꞌ nene evenelite lutinguꞌ hizavosa nevoba asi lutineꞌmo neꞌmine olosa gele nolidokovoꞌ nene eꞌmeti ilo. Idoꞌ ma nene moni heneni initeꞌ ma dalone li gili minisa gizebo i-ngidilizaniꞌ neꞌmo nene lovozo helaaꞌ initeꞌ goloso ilisaze. Mo neꞌmine ami asi Oꞌmosoꞌmo lingine aꞌmine gonomuꞌ lutine mili minisa gono dalizave lo gele neidoꞌ nene eꞌmeti gono dalo.
1PE 5:3 Idoꞌ gohi ma nene tiꞌ lo nolo-lingimuve: Aꞌmine gizebo i-ngidi nilizaniꞌ aleve nene amuzo malaꞌ malaꞌ igi gizebo i-ngidami asi Oꞌmosoꞌmi zuho engiꞌ igi mili minilizaniꞌ initeꞌ nene lingine avazaha pikisa neꞌmine mini aka ngelebizi igi mili minilo.
1PE 5:4 Neꞌmine ikevo gizebo ve naba aza sotoꞌ ogo hetelelineꞌ gameneuꞌ nene lingine meni dalisave. Adoꞌ geleso osuꞌ lamilineꞌ palaisi labanaꞌvesi neineꞌ nene dalisave.
1PE 5:5 Idoꞌ monoꞌ gizebo ve gonoꞌine neivo ha igaꞌ naaniꞌ neꞌmine igi gosoꞌvelite ilizaniꞌ o neineꞌ initeꞌ nesi nene mo neꞌmino neive: Lingine nene gizebo vetinelite lilizaniꞌ gamaziloꞌ nene ha gili ngimisa minilo. Idoꞌ monoꞌ godolouꞌ Oꞌmosoꞌmi monovo ma tiꞌ li gizi nizaniꞌ ma neive: Eveneꞌ ma okoꞌine di dizi minaaꞌ nave nene Oꞌmosoꞌmo biluvaꞌ o-ngedaaꞌ neiha eveneꞌ ma engiꞌ okoꞌine diꞌmi limi minaaꞌ nave engiꞌ nene ninge lamineꞌ o-ngedo nasahiliꞌ o-ngedaaꞌ neive. Aza neꞌmine ogaꞌ neineꞌ nenako nemuꞌ nene eveneꞌ mukiꞌ lingine okodine diꞌmi limi mini ge gelekeleꞌ o-nede ne gelekeleꞌ o-gede li minilo.
1PE 5:6 Idoꞌ Oꞌmoso neve nene neꞌmine ogaꞌ neineꞌ nenako nemuꞌ nene lingine eiꞌ molaniꞌ gamene sotoꞌ ilinguꞌ nene do ote-ledelingumuꞌ ve li lengiꞌ okodine nene diꞌmi limisa Oꞌmosoꞌmi anauꞌ vi mini eiꞌ amuzoꞌve nabalokovoꞌ nene lehete i minisa
1PE 5:7 Oꞌmosoꞌmo lengikumuꞌ mulumotine gele minaaꞌ neineꞌ nenako nemuꞌ nene lingine gopo gatine gilaaꞌ naniꞌ initetine geni neꞌmine vaiꞌ nene eiꞌ anauꞌ huli milalo.
1PE 5:8 Lingine nene lutine gatine vo gopoꞌnapa amivo gatine gili nge li mini eheꞌ igi ningisa minilo. Adoꞌ biluvatine Satani aza loposo gulo naba laioni neꞌmo gaꞌna helo ngebelo nalineꞌ initekumuꞌ visetoꞌ monaaꞌ neineꞌ neꞌmino lengebelelesa nomonize. Ningisa minilo.
1PE 5:9 Mulumo geni lengiꞌ nigihi-lingidaniꞌ neꞌmino nene lengiꞌ zuho Kilisitoꞌ evenele misubo vaikuꞌ miniꞌmi monave engikisi nene aꞌmineꞌmine igi nigihi-ngidaniꞌ nenako lingine nemuꞌ gili mini Kilisitoꞌnimuꞌ gele eleꞌvoleꞌ igaꞌ naniꞌ nene di giliꞌ li minisa aꞌmine biluvatine nene lovo i imivoꞌ minilo.
1PE 5:10 Neꞌmine igi aꞌmine mulumo geni nene gihiꞌmi vi nizavosa gamene haꞌna amivo aꞌmine ato atoꞌ initekuꞌ mulumote ningo nasahiliꞌ o-ledaaꞌ ive Oꞌmoso adoꞌ Kilisitoda vi giꞌmizisa labanaꞌvesi minevoꞌ minevoꞌ ogaꞌ neineꞌ moꞌmosikuꞌ nene imi hilalizave lo lengiꞌ vise lo do eita ive neꞌmo nene gohi do lamineꞌ o-lengedo do ngi lo-lengedo idoꞌ amuzo lengemo eleꞌvoleꞌ igi oti pehe li minilizadoꞌ lengeleꞌmize molaloseive.
1PE 5:11 Amuzo mukiꞌ nene gamene gamene eitavoꞌ minivo. Mo neꞌmino minilihoo.
1PE 5:12 Naza gamazi noluvo ezeloꞌ gele medele minelodoꞌ o neive lo giluve adoꞌ leze zuho Siluvanoꞌ neꞌmo hize eleꞌ o-nedo luhuvo mene nogizivo naza aꞌmine gamazi noluvoniꞌ meve nene Oꞌmosoꞌmo nasahiliꞌ o-ledaaꞌ neineꞌ monovo gihileꞌmi gamazi ve lo lo-lengemelesa naza hize eleꞌ ogosa lengiꞌ lutine nene do ngi lo-lengedo luhuvo niteꞌ liꞌnibe mene nogize-lingiduze. Aꞌmine Oꞌmosoꞌmi nasahilikuꞌ nene mini giliꞌ li minilo.
1PE 5:13 Idoꞌ lengiꞌ neꞌmine aleve Oꞌmosoꞌmo makaꞌ do kegese-lingidive Kilisitoꞌ evenele Babelonia numuno ebekuꞌ mela mulise milaaꞌ nave ingine longopoꞌni nilavoo neze gipeꞌne Malekoꞌ azasi nene longopoꞌni nolize.
1PE 5:14 Lingine nene isetine ve li lute ngemaaꞌ monovo di sotoꞌ igi ge nabutiꞌ ize ne gabutiꞌ ize li adidoꞌ disa minaaꞌ ilo. Hongu lo lamino minaaꞌ monovo neve nene Kilisitoꞌ evenele minave lengiꞌ mukita minivo. Moda aꞌnesiꞌ ve.
2PE 1:1 Adoꞌ Izesu Kilisitoꞌ gonouꞌ ve idoꞌ aposoloꞌve minuve Simeoniꞌ guliveꞌne gohi ma Petoloꞌ naza lengiꞌ luhuvo niteꞌ mene nogize-lingiduve. Adoꞌ Oꞌmosotesi idoꞌ do luꞌ izaaꞌ ivesi minive Izesu Kilisitoꞌ aza ve lisiheꞌ minidiꞌmo nene lelikisi lengikisi do miliseꞌ ogo do lisiheꞌ o-ledosa hamoliꞌmine monovo adoꞌ ezemuꞌ gele eleꞌvoleꞌ ogaꞌ monovo lamineꞌ nene leliꞌ limineꞌ neꞌmino lengikisi lehize-lengedavo di nizave lengiꞌ nene nogize-lingiduve.
2PE 1:2 Idoꞌ lingine Oꞌmosomukisi Guvelesi ve Izesuꞌnimukisi gili lamineꞌ igi gili minaaꞌ ilizadotiꞌ nene Oꞌmosoꞌmi nasahiliꞌ monovo nesi idoꞌ hongu lo lamino minaaꞌ monovo nesi nene lengita mine vaiꞌ loꞌmo vo miniliho.
2PE 1:3 Oꞌmosoꞌmo leliꞌ nene monotoꞌ eꞌmetovoꞌ mino minevoꞌ alevoꞌ ogo minelonidoꞌ do lisiheꞌ o-ledelineꞌ monovo mukiꞌ nene lehize-lede neive. Idoꞌ aꞌmine lehize-lede neineꞌ monovo daloneꞌ nene aza leliꞌ vise lo-ledo do eita ive eikumuꞌ nene laza ningo gele lamineꞌ ogo gele minaaꞌ olonidotiꞌ nene dalosunako nemuꞌ nene lehize-lede neive. Idoꞌ aꞌmine vise lo-ledo do eita iveꞌmo neꞌmine o-lidineꞌ nene eiꞌ labanaꞌvesi idoꞌ eiꞌ monovoꞌve lamineꞌ atoliꞌmine ogo neineꞌ nesi nene di tiꞌ ilizave losa vise lo-ledo do eita ineꞌ ve.
2PE 1:4 Neꞌmine ogosa aza lo huko-ledekineꞌ gamazi ma nene do gihile noizo monovo lamineꞌ goloso dizo minineꞌ nene lehize-lede neive. Idoꞌ neꞌmine ineꞌ nene me misubouꞌ aleveti luꞌine otavosa laniteꞌ gilaaꞌ naaniꞌ monovo igaꞌ nadiꞌmo luꞌine do goloso ogaꞌ neineꞌ initekutiꞌ lingine olovoꞌ ilizadotiꞌ nene Oꞌmosoꞌmo eiꞌ emeni dameni neꞌmine nene izeꞌ molo lengemavo di minilizangumuꞌ nene neꞌmine ineꞌ ve.
2PE 1:5 Idoꞌ neꞌmine ineꞌ nenako nemuꞌ nene lingine ezemuꞌ gili eleꞌvoleꞌ igaꞌ naaniꞌ monovotidoꞌ nene imineꞌ mili mo lamineꞌ goloso gehepeve minaaꞌ monovoloꞌ nene monokumuꞌ gatineꞌ gili vevesaaꞌ monovo nesi igi mili minilisa nene amuzo goloso milalo.
2PE 1:6 Idoꞌ aꞌmine gatine gili vevesaaꞌ monovoloꞌ nene okodine lutidoꞌ gizebo igaꞌ monovo nesi igi mili minilisa nene amuzo goloso milalo. Idoꞌ aꞌmine okodine lutidoꞌ gizebo igaꞌ monovoloꞌ nene monokuꞌ amuzo mili geni gihi di dizi minaaꞌ monovo nesi igi mili minilisa nene amuzo goloso milalo. Idoꞌ aꞌmine monokuꞌ amuzo mili geni gihi di dizi minaaꞌ monovoloꞌ nene monoꞌ avazahasivoꞌ igi mili igaꞌ monovo nesi igi mili minilisa nene amuzo goloso milalo.
2PE 1:7 Idoꞌ aꞌmine monoꞌ avazahasivoꞌ igi mili igaꞌ monovoloꞌ nene lengiꞌ zuho Izesuꞌ evenele lutine ngimaaꞌ monovo nesi igi mili minilisa nene amuzo goloso milalo. Idoꞌ aꞌmine lengiꞌ zuho Izesuꞌ evenele lutine ngimaaꞌ monovoloꞌ nene eveneꞌ atoꞌ atoꞌ vaiꞌ lutine ngimaaꞌ monovo nesi igi mili minilisa nene amuzo goloso milalo.
2PE 1:8 Neꞌmine monovoloꞌ amuzo goloso mili igi mili ilizave noluvoniꞌ nene aꞌmine neꞌmine monovo lengita mine hutileꞌ ogo minelineꞌ neꞌmo nene lingine Guvetesi ve Izesuꞌ Kilisitoꞌnimuꞌ ningi gili minaaꞌ naaniꞌ nene hazamuꞌ neivo neꞌmi gihile lengita izamilivoba asi mo ize lamineꞌ oloseinako nemuꞌ nene noluve.
2PE 1:9 Eveneꞌ ma ingine meuko luvoniꞌ monovoloꞌ igi mili minamilizave neti luꞌineꞌmi vele nene mo ngenge ogosa like minaaꞌ neive. Neꞌmine ogavosa Oꞌmosoꞌmo gomuꞌ lihimeꞌine daniꞌ gilite-ngidineꞌ mamuꞌ nene mo gaꞌine molaniꞌ gele vivo gopo nizave.
2PE 1:10 Nemuꞌ nene neze zuhokizo, Oꞌmosoꞌmo lengiꞌ do kegese-lengedo vise lo-lengedo do eita ineꞌ nene di eleꞌvoleꞌ gehepeve ilisa lingine amuzo gohi gohi miliꞌmi dizivoꞌ minilo. Neꞌmine ilizave lo noluvoniꞌ nene nanitekumuꞌ ve. Lingine nene adoꞌ meuko luvoniꞌ initeꞌ igi mili minilizaniꞌ neve nene mo monokutiꞌ mo kekeꞌ ngeli limi ingamilisave.
2PE 1:11 Ee, neꞌmine ilizaniꞌ neve nene Guvetesi vesi idoꞌ do luꞌ izaaꞌ ivesi minive Izesuꞌ Kilisitoꞌ gizebo o-ledo minevoꞌ minevoꞌ ilinguꞌ nene vi hilalizaniꞌ amuzo vauve elo lehize-lengedeleseive.
2PE 1:12 Neꞌmine o neineꞌ nenako nemuꞌ nene naza meuko nolo-lingimuvoniꞌ initekumuꞌ nene gohi lo gatine okaꞌ okaꞌ olosa gele nouve. Ee, aꞌmine initekumuꞌ nene mo gili mini adoꞌ lengita omo neineꞌ gamazi gihileloꞌ nene mo giꞌmizi giliꞌ li nizaniꞌza aꞌmine initekumuꞌ nene ha mo lo gatine okaꞌ okaꞌ olosa gele nosa nene noluve.
2PE 1:13 Ee, naza gamene liꞌnibemukovoꞌ me misubouꞌ okoꞌnesi nouvoniꞌ gamenela mene aꞌmine meuko luvoniꞌ initekumuꞌ nene gohi lo gatine ogo lutine do ote-lengedeloniꞌ neꞌmo nene lisiheꞌ oloseive lo gele nosa neꞌmine nouve.
2PE 1:14 Ne nanitekumuꞌ ve. Guvetesi ve Izesuꞌ Kilisitoꞌ aza heleloniꞌ monovomuꞌ lo sotoꞌ ogo lo-nimineꞌ maloꞌ nene do gihile izo aꞌmine me misubouꞌ okoꞌne do huloloniꞌ gamene nene mo avitoꞌ ogave lo gele nouvoniꞌ nemuꞌ nene noluve.
2PE 1:15 Naza osuꞌ lokuvo lingine aꞌmine luvoniꞌ initeꞌ mene gamene gamene omo gatidoꞌ gatidoꞌ ivo ha gili minaaꞌ ilizangumuꞌ ve loo aka vele-lengedelesa nene amuzo molalosuve.
2PE 1:16 Laza Izesuꞌ Kilisitoꞌ amuzoꞌvemukisi idoꞌ alingumukisi lo-lingimuneꞌ nene heluno gamazi ma gili nge li mini ladoꞌ nene eꞌmetosa lo-lengemamune. Asi aꞌmine amuzoꞌve atoliꞌmine minineꞌ monovoꞌve nene leliꞌ vete gulo neꞌmo ningavosa nene lo-lingimuneꞌ ma neive.
2PE 1:17 Adoꞌ labanaꞌve nabaꞌ nabasi minivelatiꞌ gamazi tiꞌ lo ezela limineꞌ gamenela nene laza aꞌmida mino ningo gele minuneꞌ ve: Neniꞌ voꞌneloꞌ gipeꞌne hamo me ve nene neive. Eikumuꞌ nene naza laniteꞌ lamineꞌ nogiluve lo meleho Oꞌmosoꞌmo do naba o-do opoꞌni lineꞌ ve.
2PE 1:18 Idoꞌ aꞌmine Oꞌmosoꞌmi labanaꞌve sotoꞌ ineꞌ gololoꞌ nene Izesukisi minunidoꞌ aꞌmine Okulumokutiꞌ limineꞌ gamazi nene leliꞌ gehepeve aposoloꞌ lingesi giluneꞌ ve.
2PE 1:19 Idoꞌ neꞌmino gilunidotiꞌ polohetelite laniꞌ gamaziloꞌ gele muꞌmusiꞌ ogaꞌ uneꞌ maloꞌ nene gohi nabosa gele muꞌmusiꞌ gehepeve uneꞌ ve. Neꞌmine uneꞌ nenako linginesi nene aꞌmineꞌmine igi polohetelite laniꞌ gamaziloꞌ ma gili dalizaniꞌ nene mo lamineꞌ oloseive. Aꞌmine gamazi nene litiꞌmuso ebekuꞌ lamuliꞌmo labanaꞌ ele neineꞌ neꞌminosa ne neive. Neꞌmino labanaꞌ elo neivo goꞌ lolosa goꞌ nuvonuvo neivo sonohiꞌ ganangomeꞌ dizaaꞌ neineꞌ neꞌmino Izesuꞌ nene gohi sotoꞌ ogo lutinguꞌ hize labanaꞌ gehepeve eleleseive.
2PE 1:20 Idoꞌ lingine polohetelite laniꞌ gamazi gili dalizaniꞌ o neineꞌ nenako naza tiꞌ lo lo-lengemeloniꞌ gamazi nene initeꞌ naba neize. Aꞌmine gamazimuꞌ nene gili minisavoꞌ polohetelite laniꞌ gamazi nene gili dalisave: Aꞌmine polohetelite laniꞌ gamazi monoꞌ godolouꞌ neineꞌ mukiꞌ nene polohete hamolitesi angiseꞌine gaꞌningutiꞌ gamazi ma li sotoꞌ aniꞌ nene nomive.
2PE 1:21 Ee, polohetelite laaꞌ aniꞌ gamazi neꞌmine nene haza eveneliti luteloꞌ nene eꞌmeto mo kekeꞌ sotoꞌ osaꞌmive. Asi eveneꞌ Oꞌmosoꞌmi gamazi laaꞌ aniꞌ nene Oꞌmosoꞌmi Sikalahuꞌ neꞌmo zatuhoꞌ o-ngedavosavoꞌ nene Oꞌmosoꞌmi veleutiꞌ gamazi laaꞌ aniꞌ ve.
2PE 2:1 Ne neiha gomuꞌ nene Oꞌmosoꞌmi eveneleliti vovoꞌninguꞌ nene soza polohetesi sotoꞌ igi minaaꞌ aniꞌ ve. Neꞌmine igaꞌ aniꞌ neꞌmine igi lengiꞌ vovotingukisi nene soza monoꞌ apizi lingimilizave sotoꞌ igi minilisave. Engiꞌ nene monovoꞌine di haleki mini lengeleꞌmize goloso ilidoꞌ o minelineꞌ soza monoꞌ nene li sotoꞌ igisa engiꞌ meni hize-ngidive Guvelesi ve nesi nene meheꞌine imilisave. Idoꞌ neꞌmine ilizadotiꞌ nene Oꞌmosoꞌmo upuhoꞌ niteꞌ ngiso do goloso o-ngedeleseive.
2PE 2:2 Idoꞌ ingine neꞌmine manaꞌmine monovo goloso gopo igaꞌ ilizaniꞌ monovoꞌnidoꞌ nene eveneꞌ mukiꞌ ngeꞌmetilisave. Nemuꞌ nene evenelite monoꞌ aka gihile nene diviꞌ lediviꞌ ilisave.
2PE 2:3 Aꞌmine soza monoꞌ apizi lingimilizave nene initeꞌ gohi gohi dalone lii soza gamazi li-lingimilizadotiꞌ nene lengitatiꞌ moni geleleheꞌ ilisave. Oꞌmosoꞌmo gozopoꞌ akaꞌmila aꞌmine ve lihime ngemelesa lineꞌ nene hazamuꞌ ma lamive. Aꞌmine gamazi lokivo neineꞌ nene okise ongamo ha neivo mo do goloso gehepeve o-ngedeleseive.
2PE 2:4 Oꞌmosomuꞌ nene tiꞌ lo gele none: Angeloꞌ linge ma lihime daniꞌ nene iseꞌine izivoba asi seni nalaꞌ ize-ngedosa lihime ngemeloniꞌ gamenemuꞌ gizebo igi litiꞌmusoukovoꞌ minilizave lo galese naba mo homiuꞌ gehepeve ngimisele neive.
2PE 2:5 Idoꞌ ma nene tiꞌ lo gele none: Gamene akaꞌmila minaniꞌ alevesi iseꞌine izamo eveneꞌ goloso misubo vaikuꞌ miniꞌmi monaniꞌ mukiꞌ nene nosodunuꞌ molo hite-ngedo ngebele geseꞌ ineꞌ ve. Neꞌmine ineꞌza aꞌmine gameneuꞌ nene eveneꞌ eiti (8) adoꞌ monovo lisihekumuꞌ lo soto sotoꞌ ogaꞌ ive Noakisi idoꞌ eveneꞌ gohi sevenisi nene alete molo do nguꞌ izineꞌ ve.
2PE 2:6 Idoꞌ ma nene tiꞌ lo gele none: Sodomi alevesi nGomola alevesi idoꞌ numuno ebeꞌine nesi nene Oꞌmosoꞌmo lihime ngemo do velepeꞌ izo lenehevoꞌ miniliza akaloꞌ ngeleꞌmize molavo neꞌmine aniꞌ ve. Neꞌmine ineꞌ nene ezemuꞌ gilamave sotoꞌ o-ngedeli initeliꞌmi avazaha neꞌmine do sotoꞌ ineꞌ ve.
2PE 2:7 Neꞌmine ogo aza ve lisiheꞌ Lotiꞌni nene aꞌmine ve goloso ingine monovo goloso iꞌmi angumuꞌ nene muluno hukidiꞌmo lulo zovoꞌ izo miningutiꞌ nene do uꞌ izineꞌ ve.
2PE 2:8 Ee, aꞌmine ve lisiheꞌ engiꞌ vovoꞌninguꞌ mino ingine monovo lamineꞌ avutokovoꞌ iꞌmi iꞌmi vi nizangumuꞌ nene ningo geleꞌmo vineꞌ neꞌmo eze lulo lisihekuꞌ nene gamene gamene mulumo geni naba beleꞌmo beleꞌmo vo minineꞌ ve.
2PE 2:9 Idoꞌ Oꞌmosomuꞌ neꞌmine lo gele noneꞌ nenako nemuꞌ nene laza tiꞌ lo gelelesune: Guvelesi ve aza eveneꞌ lisiheꞌ ngemenguꞌ sotoꞌ o ngemelingutiꞌ do nguꞌ izaaꞌ monovomuꞌ nene gele mino eveneꞌ goloso nene lihimeꞌine abeleni ogo ngemeꞌmo vo mino mukitoꞌ goniꞌ o-ledelineꞌ gamenemuꞌ gizebo ogo lihimeꞌine do minaaꞌ monovo nesi nene mo gele neive.
2PE 2:10 Idoꞌ aꞌmine lihime ngemelive engikutiꞌ nene okoꞌineꞌmo laniteꞌ gilineꞌ monovo goloso gehepeveloꞌ eꞌmeti mini eveneꞌ nabaꞌmi gizeboloꞌ mini gamaziꞌve gili di minaaꞌ monovomuꞌ goseleꞌ igaꞌ ave nene lihime naba ngemeleseive. Aꞌneꞌmine ve adoꞌ aꞌmine soza monoꞌ laaꞌ ave engiꞌ nene gamazi gilami hokolizeꞌ igi engiꞌ luꞌnidokovoꞌ igaꞌ ave mini hozila dizi minave nabamuꞌ nesi nene ngehelele izamivo mini engiꞌ nesi nene diviꞌ lediviꞌ i-ngidaaꞌ nave.
2PE 2:11 Neꞌmine igaꞌ naha Oꞌmosoꞌmi angeloꞌ nete aꞌmine nene ngivileꞌ igi mini eveneꞌ naba amuzoꞌinesi nizaniꞌza ingine neve nene diviꞌ lediviꞌ i-ngidi Guvelesi vela goniꞌ i-ngidisaꞌmave.
2PE 2:12 Ne neiha aꞌmine ve nene ize gulo idoꞌ nama gaha gaꞌine nomivo minaniꞌ adoꞌ evenelite ngimiselo ngebelaaꞌ idoꞌ ngebelaaꞌ olonidoꞌ sotoꞌ igi minaaꞌ naaniꞌ neꞌmini mini ingine gilamaniꞌ initekumuꞌ nene diviꞌ lediviꞌ igi laaꞌ nave. Nemuꞌ nene ize gulo nama gaha ngebelaaꞌ nouneꞌ neꞌmine ogo Oꞌmosoꞌmo aꞌmine ve nene do goloso gehepeve o-ngedeleseive.
2PE 2:13 Ee, eveneꞌ di goloso ilizadoꞌ nene Oꞌmosoꞌmo golo hizo do goloso o-ngedeleseive. Aꞌmine soza monoꞌ laaꞌ avete gilavo labanaꞌ ele minineꞌ gameneloꞌ nosoꞌ niteꞌ naba nii noso niꞌmi vi minaakumuꞌ nene laniteꞌ goloso ve li gilaaꞌ nave. Ingine lengikisi makaꞌ nosoꞌ niteꞌ ni mini di gopoꞌnapa i-lingidi gotine izaaꞌ naangumuꞌ nene ngolize izi mini lengiꞌ muliseuꞌ nene longovozo hililiza niteꞌ goloso liliꞌ ikeve.
2PE 2:14 Ingine veneꞌ ma ninganiꞌ nene ma duvo lii gumine dikaꞌ dikaꞌ igi lihime daaꞌ monovo nene engitatiꞌ osuꞌ losaꞌmivo monokuꞌ amuzoꞌine nomive nene lihime monovouꞌ ngimimiseꞌ igi di vaaꞌ igi mini mumuzoꞌ ogaꞌ monovomuꞌ apiꞌnapiꞌ igi save naba di minaniꞌ nenako nemuꞌ nene Oꞌmosoꞌmo usiꞌ ize-ngedelidoꞌ i nizave.
2PE 2:15 Ingine aka lisiheꞌ nene huli vi gopo igi nimonaniꞌ nene Bosoleꞌ gipele Balaamuꞌ vineꞌ akaloꞌ nene eꞌmetikeve. Adoꞌ monovo golosolotiꞌ meni dalingumuꞌ umo hilive maꞌmi monovoloꞌ eꞌmetikevosa nene noluve.
2PE 2:16 Aꞌmine Balaamuꞌ neꞌmo nene monovo lamineꞌ avutoꞌ ingumuꞌ Oꞌmosoꞌmo elemineꞌ ve. Aꞌmine elemineꞌ nene gamazi lamaaꞌ ineꞌ initeꞌ dongi ize neꞌmo nene eveneꞌ laaꞌ nouneꞌ noloutiꞌ gamazi lo-emo aꞌmine poloheteliꞌmo negi initeꞌ olosa ingutiꞌ nene do oꞌove lo-dineꞌ ve.
2PE 2:17 Aꞌmine soza monoꞌ laaꞌ ave nene noso hinipinikuꞌ gokoꞌ lavo haza galesevoꞌ minaaꞌ neineꞌ neꞌminesi idoꞌ hepeliꞌmo limuso hubu lo do vavo goline izamaaꞌ neineꞌ neꞌminesi nene nizaniꞌ nenako neꞌmo nene monokuꞌ ma hize eleꞌ i-lidisaꞌmave. Nemuꞌ nene Oꞌmosoꞌmo litiꞌmuso atoliꞌmine ogo ize minineꞌ ebekuꞌ vi hilalisave lo aꞌmine litiꞌmuso ebeꞌ nene salani molo-ngede neive.
2PE 2:18 Neꞌmine noluvoniꞌ nene nemuꞌ noluve: Ingine gamazi naba gele vineꞌ gihileꞌve nomineꞌ gamazi li eveneꞌ ma ladeni igi igi mili minaaꞌ nave engikutiꞌ idise aꞌmene olovoꞌ nave nene okodeꞌmo laniteꞌ gelaaꞌ neidoꞌ gopo geligeli igi eꞌmeti minaaꞌ monovo nedunuꞌ nene gohi ngimimiseꞌ igaꞌ nave.
2PE 2:19 Aꞌmine ve ingine aꞌmine ngimimiseꞌ aniꞌ aleve nene tiꞌ li li-ngimaaꞌ nave: Leliꞌ leꞌmetilizaniꞌ nene lingine initeꞌ maliꞌmosi nene igi mili ilizaniꞌ akatine nene hize tile-lengedamivo goboni ve neꞌmine ma minamilisave. Neꞌmine li li huki-ngidaaꞌ naaniꞌza engiꞌ neve nene leleꞌmize tolovo ogaꞌ initeꞌ monovo goloso neꞌmo nene aꞌnidoꞌ davo neꞌmi goboni ve mini milikeve. Idoꞌ goboni ve minikeve noluvoniꞌ nene initeꞌ maliꞌmo zatuhoꞌ o-ngidivo aꞌmine initeꞌ igi mili igaꞌ ilizave neve nene mo aꞌmine initeliꞌmi goboni ve liliꞌ i nizaniꞌ nenako nemuꞌ nene noluve.
2PE 2:20 Ee, eveneꞌ malite Guvetesi ve do luꞌ izaaꞌ ive Izesuꞌ Kilisitoꞌnimuꞌ giladotiꞌ nene me misubouꞌ minineꞌ monovo goloso eveneꞌ lute do goloso o-ledaaꞌ neidotiꞌ nene olovoꞌ igisa gohi aꞌmine monovouꞌ vi hili mutuho ngatuho igi minilizaniꞌ nene gomuꞌ goloso igi minilizadoꞌ mini milaniꞌ ma nene ivileꞌ ivosa alingeꞌ nela nene di goloso gehepeve igi minilizadoꞌ mini mili minilisave.
2PE 2:21 Ee, Oꞌmosoꞌmo lo-lidineꞌ gamazi ma li-ngimikevo gilisa aꞌmine gamazi gili huli meheꞌine ma imadoꞌ nene golo hizo lihime atoliꞌmine ogo ngemelidoꞌ o neineꞌ nenako ingine nene aꞌmine aka lisihekumuꞌ nene ma gilami minadiniko aꞌmine lihime do dizo ngemelineꞌ votigilelotiꞌ nene lemosa lihime ngemelidoꞌ minadinako neꞌmo nene mo lamineꞌ ngomo ma idine.
2PE 2:22 Aꞌmine neꞌmine ve nene monoꞌ godolouꞌ tiꞌ li gizikaniꞌ maloꞌ nene vo miliseꞌ ogave: Gulo neꞌmo muso velo do hulineꞌ initeꞌ nene gohi vo naaꞌ neive. Idoꞌ ma nene: Ize nene nosouꞌ ongo-dekunivo gohi vo gohikuꞌ gomo gomo izo ongaaꞌ neive.
2PE 3:1 Luꞌne lengeme nouvoniꞌ alevekizo, luhuvo meve nene gohi naba tuu luhuvo nene nogize-lingiduve. Aꞌmine luhuvo sitakuꞌ mene lingine lutinguꞌ gatinguꞌ gilaaꞌ naaniꞌ nene mo lisiheꞌ laminekovoꞌ gililizangumuꞌ nene gamazi ma lutine do ote-lengedo lo gatine nouve.
2PE 3:2 Aꞌmine gamazi nene Oꞌmosoꞌmi polohetelite alingeꞌ sotoꞌ ilineꞌ initekumuꞌ li sotoꞌ aniꞌ gamazi nesi idoꞌ Guvetesi ve mino do luꞌ izaaꞌ ive minive Izesu Kilisitoꞌ lo-lidineꞌ gamazi lengiꞌ aposolotinete li-lingimaniꞌ nesi nene gililizave lo lo gatine nouve.
2PE 3:3 Initeꞌ naba nene adoꞌ tiꞌ li gililizangumuꞌ noluve: Gamene alingeꞌ nela nene eveneꞌ engiꞌ luꞌnidokovoꞌ eꞌmeti mini monokumuꞌ gize abelenga laaꞌ ave ma igi tiꞌ li
2PE 3:4 lilisave: Aza tineꞌ molo alosuve lo lo huko lineꞌ neꞌmi gihileꞌve ma nene zaaꞌ sotoꞌ ive. Adoꞌ metemote nesi nene gizebo igi mini hilikeniꞌza initeꞌ mukiꞌ nene ma do atoliꞌmine amivo Okulumoꞌ misubo ganaꞌ sotoꞌ idotiꞌ nene hamoliꞌminevoꞌ ogo mine do novineꞌ nenako ngelo alihe.
2PE 3:5 Neꞌmine laaꞌ naaniꞌza adoꞌ mene lo-lengemeloniꞌ gamazimuꞌ nene gelalone li gaꞌine hizi ngi likeve: Adoꞌ Oꞌmosoꞌmo lavo Okulumoꞌ nene gozopoꞌ akaꞌmila sotoꞌ ivo misubo nesi nene nosoutiꞌ sotoꞌ ogo noso veleta galaꞌmuda minavo olusoꞌ minineꞌ ve.
2PE 3:6 Idoꞌ aꞌmine noso neꞌmo nene aꞌmine gameneloꞌ minineꞌ misubo nene molo hito do goloso ineꞌ mamuꞌ nene gaꞌine molavo initeꞌ mukiꞌ nene ma senisi amave laaꞌ nave.
2PE 3:7 Idoꞌ aꞌmine Oꞌmosoꞌmo lo neineꞌ gamazi neꞌmo nene aꞌmine idise nizasineꞌ Okulumokisi misubosi nene ololiꞌmi minani neꞌmine mini monoꞌ gilamave lihime ngemelineꞌ gamene nabamuꞌ nene gizebo ha nizasive lo neineꞌ ve.
2PE 3:8 Luꞌne lengeme nouvoniꞌ alevekizo, initeꞌ hamoꞌ aꞌmene lo-lengemeloniꞌ gamazi nemuꞌ nene gilami minikelizave: Adoꞌ Guvelesi veꞌmo gamenemuꞌ gelaaꞌ neineꞌ nene do atoꞌ ogo gelaaꞌ neive. Aza neve nene gamene liꞌnibe gamene hamoꞌ neꞌminemuꞌ nene gelavo gamene haꞌna goloso kilisimasi vanu tauseni (1,000) neꞌmine minineꞌ gelaaꞌ neive. Idoꞌ gamene haꞌna kilisimasi vanu tauseni neꞌminemuꞌ nene gelavo gamene liꞌnibe gehepeve gamene hamoꞌ neꞌmine minineꞌ gelaaꞌ neive.
2PE 3:9 Eveneꞌ malite Guvelesi ve alosa lo huko lineꞌ gamazi do gihile izelingumuꞌ nene zou zou gohi lave li gilaaꞌ naniꞌ nene ladani igi gilikeve. Aza nene zou zou lamive. Asi eveneꞌ hamokisi vi tolovo ilizave lo gelamo mukitoꞌ nene luꞌine di velepeꞌ izilizahoo lo lengikumuꞌ nene goseleka lamo ha gizebo o neive.
2PE 3:10 Neꞌmine ogo neiha gumineloꞌ ve alisave lo gelamuneꞌ gameneloꞌ igi hetelaaꞌ naniꞌ neꞌmino aꞌmine Guvelesi ve alineꞌ gameneꞌve nene sotoꞌ oloseive. Aꞌmine gameneuꞌ Okulumoꞌ neve nene gugu lo vo haha oloseive. Idoꞌ aꞌminguꞌ initeꞌ mataꞌ mukiꞌ nene ololiꞌmovoꞌ lovoꞌ lovotevoꞌ o-ngidivo haza niteꞌ gidilisave. Idoꞌ misubo nesi idoꞌ aꞌminguꞌ di sotoꞌ naaniꞌ initeꞌ mukiꞌ nesi nene ololiꞌmo ningeleseive.
2PE 3:11 Neꞌmino ololiꞌmo initeꞌ mataꞌ mukiꞌ nene ninge osuꞌ lavo apile osuꞌ lilidoꞌ o neineꞌ nenaze. Aꞌmine Oꞌmosoꞌmi gamene nabamuꞌ gizebo igi minilizanguꞌ nene aꞌmine gamene nene geto ogo hetelelingumuꞌ ve li Oꞌmosoꞌmi evenele gehepeve mini monokuꞌ monovo laminetokovoꞌ eꞌmeti minilizadoꞌ o neive. Adoꞌ aꞌmine Okulumoꞌ nene ololiꞌmo lovo apilevoꞌ neivo aꞌminguꞌ miniꞌmi monaniꞌ initeꞌ mataꞌ nene lala lilizaniꞌ gamenemuꞌ nene noluve.
2PE 3:13 Idoꞌ neꞌmino lo osuꞌ loloseineꞌza aza lo huko lo-lidineꞌ gamazi do gihile izo monovo lisiheꞌ laminekovoꞌ minelineꞌ Okulumoꞌ atoliꞌmine gosohokisi misubo atoliꞌmine gosohokisi do sotoꞌ o-ledeleseive lo aꞌminemuꞌ gilingili ogo gizebo ogo none.
2PE 3:14 Nemuꞌ nene luꞌne lengeme nouvoniꞌ alevekizo, aꞌmine initekumuꞌ gilingili igi gizebo igi minilizanguꞌ nene Guvelesi ve ogo ningelineꞌ nene laza luteuꞌ goloso monovo nomivo idoꞌ okodeloꞌ gamazi nomivo mino hongu lo nonivo ningelive li aꞌmidokovoꞌ amuzo mili minilo.
2PE 3:15 Idoꞌ Guvelesi ve aza geto amo gizebo ha ogo neingumuꞌ gililizaniꞌ nene aza eveneꞌ gohi ma do luꞌ izelingumuꞌ nene neꞌmine ogo neive lisa nene gili minilo. Leze zuho lute eme nonive Pauloꞌni Oꞌmosoꞌmo gele nge lo minaaꞌ monovo lehize-didoꞌ do molo azasi nene aꞌmine mene luvoniꞌ gamazi neꞌminesi nene mo luhuvo gize-lingidineꞌ ma neive.
2PE 3:16 Idoꞌ luhuvo niteꞌ mukiꞌ eiꞌ gizinguꞌ nene aꞌmine neꞌmine initekumuꞌ gizidaa gizida nene aꞌmine hamoliꞌmine gamazi memuꞌ nene mo azasi hamoꞌ gamazivoꞌ gizeꞌmo vo neive. Idoꞌ aꞌmine luhuvo niteꞌ gizeꞌmo vinguꞌ nene gamazi linge ma monovoꞌve geto gele lamineꞌ amolonidoꞌ o minineꞌ gamazi nesi nene gize neive. Neꞌmino neineꞌ nenako monoꞌ monovo gili vevesami luꞌine amuzo molamive ingine monoꞌ godolouꞌ gamazi lingeꞌmi monovo nesi nene di zovoꞌ zavaꞌ izaaꞌ naadiꞌmine igi aꞌmine Pauloꞌ gamaziꞌve nesi nene aꞌmineꞌmine igi di zovoꞌ zavaꞌ izaaꞌ nave. Neꞌmine igaꞌ naadotiꞌ nene angiseꞌine meniꞌine goloso nene di sotoꞌ igaꞌ nave.
2PE 3:17 Nemuꞌ nene luꞌne lengeme nouvoniꞌ zuhokizo, lingine aꞌmine neꞌmine ilizangumuꞌ nene mo gili nizaniꞌ ma neize. Lingine monokuꞌ lamineꞌ mine ngi li nizangutiꞌ nene monoꞌine nomivete di zovoꞌ zavaꞌ izaaꞌ naaniꞌ monovoꞌine neꞌmo nene geleleheꞌ o-lengedavo limi ingikelizaze. Eheꞌ igi ningisa minilo.
2PE 3:18 Neꞌmine igi mini Guvetesi ve do luꞌ izaaꞌ ive Izesuꞌ Kilisitoꞌ ninge lamineꞌ ogaꞌ neineꞌ monovoloꞌ eꞌmetaaꞌ naaniꞌ nene gohi di naba iꞌmi vi mini eze monovo danavaꞌve nesi nene gili ngoloꞌ liꞌmi vi minilo. Eita guvele sotoꞌ ogaꞌ neineꞌ monovoꞌve nene minevo minevoꞌ ogo idisesi alingetasi mine do vo minilihoo. Mo neꞌmino minelive. Moda aꞌnesiꞌ ve.
1JO 1:1 Oꞌmosoꞌmo olihe apiꞌ ogo initeꞌ mataꞌ do sotoꞌ amivosa aꞌmine gameneloꞌ akaꞌmine ha minivemuꞌ nene luhuvo niteꞌ mene gizo nolo-lingimuze. Ningilo. Ee, aꞌmine giluneꞌ idoꞌ vetedunuꞌ ningo ningeꞌmo vo minuneꞌ idoꞌ adedunuꞌ do giluneꞌ nemuꞌ nolo-lingimuve. Adoꞌ minevoꞌ minevoꞌ minaaliꞌmi meleho neꞌmi monovoꞌve laaꞌ ivemuꞌ nene nolo-lingimuve.
1JO 1:2 Aꞌmine ve nene minevoꞌ minevoꞌ ogo minaaꞌ do sotoꞌ ineꞌ nene ninguneꞌ ve. Ninguneꞌ nenako aꞌminemuꞌ lo-lengemaaꞌ noune. Aꞌmine minevoꞌ minevoꞌ ogo minaaꞌ nene metehida minidotiꞌ sotoꞌ o-ledavo ninguneꞌ nemuꞌ lo sotoꞌ o-lengemaaꞌ noune.
1JO 1:3 Ee, linginesi lazasi aꞌmidoꞌ lute do hamoꞌ ogo bizo minelone lo initeꞌ ninguneꞌ idoꞌ giluneꞌ nene lengikisi lo-lengemaaꞌ noune. Idoꞌ laza nene lute do hamoꞌ ogo bizo minaaꞌ nouneꞌ nene Meteho Oꞌmososi idoꞌ gipele Izesuꞌ Kilisitokisi bizo minaaꞌ noune.
1JO 1:4 Idoꞌ linginesi neꞌmine ogo lute do hamoꞌ ogo bizo mino lolize izo minelone lo nene gamazi nogize-lingimuve.
1JO 1:5 Idoꞌ ezelatiꞌ giluneꞌ gamazi nene neꞌmino neive: Eita initeꞌ goloso litiꞌmusouꞌ initeꞌ hamokisi mo kekeꞌ nomive. Nomivo Oꞌmoso ezela neve initeꞌ lamineꞌ labanakovoꞌ neive.
1JO 1:6 Nemuꞌ nene litiꞌmuso monovo golosouꞌ nomonosasi laza ezesi do hamoꞌ ogo bizo none lo loloneꞌ nene sozasi lokunivo ogo molo oloneꞌ nene initeꞌ gihile nomoloseive.
1JO 1:7 Ne neiha aza nene labanakuꞌ neineꞌ neꞌmino lazasi aꞌmineꞌmine ogo labanakuꞌ minevo alevoꞌ oloneꞌ nene lute do hamoꞌ ogo lamineꞌ bizo minelesune. Idoꞌ neꞌmine okunivo gipele Izesuꞌ vanise neꞌmo nene goloso nitete mudise gilite ledeꞌmo vo neivo laminovoꞌ minelesune.
1JO 1:8 Idoꞌ lihime lelita nomive loloneꞌ nene soza lo leliꞌ lute nene golo izelesune. Neꞌmine okunivo gamazi gihile nene lelita minamoloseive.
1JO 1:9 Ne neiha laza lihimete lo sotoꞌ oloneꞌ nene aza aꞌmine lihimete nene hulo-ledo goloso niteꞌ lelita neineꞌ vaiꞌ nene gilite-ledeleseive. Ee, aza nene ve lisiheꞌ mino gote izesaꞌmineꞌ nenako nemuꞌ lihimete lo sotoꞌ okunivo lihimete hulo-ledeleseive.
1JO 1:10 Ne neiha goloso niteꞌ daaꞌ nave lo lo-lemaaꞌ neineꞌ nenako laza goloso niteꞌ ma damaaꞌ noune lo loloneꞌ nene Oꞌmosomuꞌ sozaloꞌ ve ve lo lo-duneꞌ geleleseive. Idoꞌ neꞌmine oloneꞌ nene eze gamazi leze luteuꞌ minamoloseive.
1JO 2:1 Izipahaꞌne zuho mate, goloso niteꞌ ma dikelizave losa luhuvo niteꞌ mene nogize lingimuve. Idoꞌ maliꞌmo lihime niteꞌ ma dalineꞌ nene Metehida aꞌmine lihimeꞌvemuꞌ goniꞌ ogavo leze hize eleꞌ o-ledelive ve lisiheꞌ Izesuꞌ Kilisitoꞌ nene aꞌmida neive. Aza nene aꞌmine lihime ma dalive nene hize eleꞌ o-deleseive.
1JO 2:2 Asiꞌve Izesuꞌ gono do lihimete apase-lidineꞌ ma ve. Idoꞌ leliꞌ lihimetevoꞌ nomive. Eveneꞌ mukiꞌ misubouꞌ misubouꞌ miniꞌmi monaveti lihimeꞌine nesi apase-ngidineꞌ ve.
1JO 2:3 Idoꞌ eze nene ningo gele none lo gelaaꞌ nouneꞌ nene lamineꞌ nehe. Nado gelelone. Leliꞌ monovote do ningosa gelelesune. Eze gamazi lo huko-lidineꞌ nene gele do minaaꞌ nooloneꞌ nene eze ningo gele none lo gelaaꞌ nouneꞌ nene lamineꞌ gelaaꞌ noune lo gelelesune.
1JO 2:4 Idoꞌ eveneꞌ lingelite eze ningo gele none li gamaziꞌve gili disaꞌmaniꞌ nene ingine sozaloꞌ ve minikevo gamazi gihile engita nomive.
1JO 2:5 Idoꞌ eveneꞌ linge ma Oꞌmosoꞌmi gamazi gili di minaniꞌ nete ingine luꞌine imaniꞌ nene apa niteꞌ nomive. Laminetokovoꞌ imi giliꞌ li imaaꞌ nave. Idoꞌ ingine Oꞌmosola giꞌmize none laaꞌ ave nene Izesuꞌ ogo molo minidiꞌmine igi inginesi aꞌmineꞌmine igi mili minilizaniꞌ o neive. Laza neꞌmino ogo molo ogo mino ma neꞌmo ezela giꞌmize none luneꞌ nene gamazi gihile ve lo gelelesune.
1JO 2:7 Luꞌne lengeme nouvoniꞌ mate, louꞌ gamazi gosohoꞌ ma lo sotoꞌ ogo gize lengemamuve. Litehe louꞌ adoꞌ gamene gozopoꞌ akaꞌmilatiꞌ gili minaniꞌ mamuꞌ nogize-lingimuve. Aꞌmine louꞌ gamazi litehe nene nado neve. Nene monoꞌ gamazi li-lingimikevo gilaaꞌ naniꞌ nene neive.
1JO 2:8 Ne neiha mene luhuvo nitekuꞌ nogizuvo aꞌmine louꞌ nene gosohoꞌ neineꞌ gelave. Ee, mo laminetoꞌ gosohoꞌ neive. Izesuꞌ aza aꞌmine louꞌ nene do gosohoꞌ ogavo linginela gono gosohoꞌ nodavo litiꞌmuso izo minineꞌ nene vovoꞌ vovoꞌ neivo labanaꞌ gihile nene mo apiꞌ ogo noilive.
1JO 2:9 Ne neiha eveneꞌ linge ma eveneꞌ mamuꞌ muluꞌninguꞌ goloso ogavo lukehe ngibili minisa laza labanakuꞌ none li laaꞌ nave nene ingine olihe labanakuꞌ ami litiꞌmusouꞌ ha nizave.
1JO 2:10 Nizaniꞌza eveneꞌ linge ma ingine eveneꞌ mukiꞌ luꞌine ngimi nasahiliꞌ i-ngidaaꞌ ave nene lamineꞌ labanakuꞌ nizave. Ingine eveneꞌ ma ngeleꞌmizi gopo amilisave.
1JO 2:11 Idoꞌ ingine eveneꞌ mamuꞌ muluꞌninguꞌ goloso ogavo lukehe ngibilaaꞌ nave nene litiꞌmusouꞌ ha nizave. Aꞌmine ve nete litiꞌmusoukovoꞌ moni litiꞌmusoliꞌmo veꞌine likavo vilizaniꞌ aka nene ningi gilamave.
1JO 2:12 Izipahaꞌne zuho mate, Izesuꞌnimuꞌ ve lo Oꞌmosoꞌmo lihimetine hulo-lengede neive. Nemuꞌ luhuvo niteꞌ mene nogize-lingiduve.
1JO 2:13 Idoꞌ meꞌninge lingine Oꞌmosoꞌmo olihe apiꞌ ogo initeꞌ mataꞌ do sotoꞌ amivosa aꞌmine gameneloꞌ akaꞌmila ha minive nene ningi gili nizave. Nemuꞌ luhuvo niteꞌ mene nogize-lingiduve. Idoꞌ ve gosoꞌve lingine goloso meleho Satani mo ivileꞌ igi nizave. Nemuꞌ luhuvo niteꞌ mene nogize-lingiduve.
1JO 2:14 Izipekizo, lingine Metehine ningi gili nizave. Nemuꞌ luhuvo niteꞌ mene gize-lingiduvoniꞌ ve. Idoꞌ meꞌninge lingine Oꞌmosoꞌmo olihe apiꞌ ogo initeꞌ mataꞌ do sotoꞌ amivosa aꞌmine gameneloꞌ akaꞌmine ha minive nene ningi gili nizave. Nemuꞌ luhuvo niteꞌ mene gize-lingiduvoniꞌ ve. Idoꞌ ve gosoꞌve lingine amuzo mili minavo Oꞌmosoꞌmi gamazi nene lutinguꞌ neivo goloso meleho Satani mo ivileꞌ igi nizave. Nemuꞌ luhuvo niteꞌ mene gize-lingiduvoniꞌ ve.
1JO 2:15 Oꞌmoso gelekeleꞌ o-damo misubouko minevoꞌ dovoꞌ ogaꞌ sunoloꞌ nehe idoꞌ me misubouꞌ minineꞌ initeꞌ golosoloꞌ nehe nene lutine milamilo. Eveneꞌ ma ingine luꞌine aꞌmidoꞌ milaniꞌ nete luꞌine nene Meteho Oꞌmoso imisaꞌmave.
1JO 2:16 Misubouꞌ veti monovo danava mukiꞌ nene goloso nitekumuꞌ lumo helaaꞌ idoꞌ initeꞌ mataꞌ ninge lamineꞌ tamineꞌ ogo mumuzoꞌ ogaꞌ nehe idoꞌ eveneꞌ veꞌnidoꞌ heneni nganeni do sotoꞌ sotoꞌ ogo gonolise gonolise ogo okode lute do dize dizeꞌ ogaꞌ nehe neꞌmine monovo nesi nene Metehidatiꞌ nomive. Misuboukotikovoꞌ neive.
1JO 2:17 Idoꞌ misubouꞌ neve aꞌminguꞌ lumo helaaꞌ ineꞌ initeꞌ mataꞌ nesi nene osuꞌ loꞌmo novive. Noviha ingine Oꞌmosoꞌmi gamazi gili di minaaꞌ nave nene vi osuꞌ lami miniviꞌ miniviꞌ igivoꞌ minilisave.
1JO 2:18 Izipahaꞌne zuho mate, gamene nene mo liꞌnibe ogave. Nemuꞌ Kilisitoꞌni lovo o emaaꞌ ive mo sotoꞌ oloseive li li nizaniꞌ nene mo gilikeve. Idoꞌ giladoꞌ nene lovo i imaaꞌ ave mukiꞌ nene mo sotoꞌ ikeve. Nemuꞌ nene gamene mo liꞌnibe ogave lo gele none.
1JO 2:19 Aꞌmine ve nene lezesi makaꞌ minuningutiꞌ leze huli-lidi vaniꞌza leze aleve gihile liliꞌ igi minamave. Leze aleve gihile liliꞌ igi minadini leze huli-lidi vamavo makaꞌ minunidine. Idoꞌ ingine huli-lidi vaniꞌ nemuꞌ ingine mukiꞌ leliꞌ zuho minamaniꞌ nene sotoꞌ ogavo gele none.
1JO 2:20 Emeni dameniꞌve lamineꞌ atoliꞌminesi minive neꞌmo Sikalahuꞌve lehize-lingidivo mini lingine mukiꞌ gamazi gihile nene mo gili nizave.
1JO 2:21 Luhuvo niteꞌ mene gizuvoniꞌ nene lingine gamazi gihile lamineꞌ nene gilamave lo gizamuve. Gamazi gihile lamineꞌ nene mo gili mini aꞌmine gamazi gihile laminekutiꞌ nene soza gamazi ma sotoꞌ osaꞌmineꞌ nesi nene gili nizave lo gizuvoniꞌ ve.
1JO 2:22 Idoꞌ sozaloꞌ ve ve lo ne zamotinemuꞌ lolone. Ingine Izesuꞌnimuꞌ ataize li aza Oꞌmosoꞌmo do luꞌ izelive lo imiselelesa live minamive li laaꞌ nave nene ingine sozaloꞌ ve ve lolone. Me ve nete Melehingi gipelengi ataize li-ngidisa Kilisitoꞌni lovo i imaaꞌ ave nizave.
1JO 2:23 Ingine gipelemuꞌ ataize li-daaꞌ nave nete Melehosi makaꞌ bizi minamaaꞌ nave. Idoꞌ ingine gipele gili imaaꞌ nave nete Melehosi makaꞌ bizi minaaꞌ nave.
1JO 2:24 Lingine gozopoꞌ gamene akaꞌmila ganaꞌ gilaniꞌ gamazi nene gili di minilo. Aꞌmine ganaꞌ gilaniꞌ gamazi nene gili di minilizaniꞌ nene Melehingi Gipelengi inginela giꞌmize lamineꞌ ilisave.
1JO 2:25 Idoꞌ Izesuꞌ aza initeꞌ ma lehize-ledelove lo lo huko lineꞌ nene minevoꞌ minevoꞌ ogo minaaꞌ lemeni dameni nene lehize-ledelove lo molo-lede neive.
1JO 2:26 Me gamaziuꞌ nene lengiꞌ lengeleꞌmize gopo ilisa gili minaveti monovo lo sotoꞌ ogo gize lingimuvoniꞌza
1JO 2:27 lingine neve Kilisitoꞌ lehize-lingidineꞌ Sikalahuꞌve nene ha di miniꞌmi vi nizave. Di miniꞌmi vi nizanako eveneꞌ laza initeꞌ matakumuꞌ apize lengemelonidoꞌ nomive. Aꞌmine Sikalahuꞌve lehize-lingidineꞌ neꞌmo initeꞌ matakumuꞌ apize lengemaaꞌ neive. Idoꞌ gamazi lo-lengemaaꞌ neineꞌ nene sozasi nomive. Laminetokovoꞌ lo-lengemaaꞌ neineꞌ nenako lidoꞌ nene gili di Kilisitoda giꞌmizi minilo.
1JO 2:28 Ee, izipahaꞌne zuho mate, Kilisitoꞌ ogo hetelelineꞌ gamene sotoꞌ ilinguꞌ nene laza eze veleloꞌ mino lovozo helepeleꞌ ogo lehelele izamivo minelone li ezela giꞌmizi minilo.
1JO 2:29 Oꞌmoso aza nene ve lisiheꞌ lamineꞌ neive li lingine gili nizave. Gili nizanako eveneꞌ ingine monovo lisiheꞌ lamineꞌ igi mili minaaꞌ navemuꞌ nene Oꞌmosolatiꞌ sotoꞌ aniꞌ ve li gililisave.
1JO 3:1 Vekizo, Meteho lulo atoliꞌmine ogo leme neineꞌ nene gili nizahe. Ee, lulo atoliꞌmine ogo limidotiꞌ nene izipahaꞌne zuho ve lo lo-ledaaꞌ neive. Idoꞌ lamineꞌ izipahala zuho none. Noneꞌza me misubouꞌ ve Oꞌmoso gelekeleꞌ i-damaniꞌ ingine nene Oꞌmoso ningi gilamaniꞌ nenako lezesi aꞌmineꞌmine igi ningi gilamaaꞌ nave.
1JO 3:2 Idoꞌ luꞌne lengeme nouvoniꞌ aleve mate, laza idiꞌnise nene Oꞌmosoꞌmi izipahala zuho ne none. Idoꞌ mino nani lemeni dameniloꞌ sotoꞌ oloneꞌ nehe neꞌmi monovo nene olihe ma sotoꞌ o lamineꞌ amineꞌza laza mo tiꞌ lo gele none: Guvetesi ve sotoꞌ ilineꞌ gameneloꞌ nene eiꞌ emeni dameniꞌve ningo lazasi eiꞌ emeni dameni neꞌmine gidinisi minelesune losa gele none.
1JO 3:3 Idoꞌ ogavo eze ningo emeni dameni neꞌmine gidinisi minelone li ezemuꞌ gili eleꞌvoleꞌ igi minaaꞌ nave mukiꞌ ingine nene eiꞌ lulo lamineꞌ minineꞌ neꞌmino leze lute nesi lamineꞌ minelive li engiꞌ luꞌine di lamineꞌ igi minaaꞌ nave.
1JO 3:4 Goloso niteꞌ daaꞌ neꞌmo Oꞌmosoꞌmo louꞌ gamazi lineꞌ nene avutoꞌ ogaꞌ neineꞌ nenako ingine goloso niteꞌ daaꞌ niilizaniꞌ nene Oꞌmosoꞌmo louꞌ gamazi lineꞌ nene avutoꞌ ikeve.
1JO 3:5 Avutoꞌ ikeniꞌza Izesuꞌ aza goloso niteꞌ do hulolosa sotoꞌ ineꞌ nesi idoꞌ ezela goloso niteꞌ ma minamineꞌ nesi nene lingine gili nizave.
1JO 3:6 Nemuꞌ nene ezela giꞌmizi minaaꞌ nave ingine goloso niteꞌ di minisaꞌmave. Goloso niteꞌ daaꞌ nave nete nene eze ningi gilisaꞌmave.
1JO 3:7 Izipahaꞌne zuho mate, ingine monovo lisiheꞌ lamineꞌ igi mili i minaaꞌ nave nene Izesuꞌ aza ve lisiheꞌ lamineꞌ minineꞌ neꞌmini eveneꞌ lisiheꞌ lamineꞌ nizave. Nemuꞌ malite atoꞌ gamazi li lengeleꞌmize gopo ikelizave.
1JO 3:8 Idoꞌ malite goloso niteꞌ di minilizaniꞌ nene ingine Sataniꞌmi zuho minilisave. Satani aza goloso niteꞌ gozopoꞌ akaꞌmilatiꞌ doꞌmo ogo minaaꞌ neive. Idoꞌ goloso niteꞌ doꞌmo ogo minineꞌ nenako Oꞌmosoꞌmi gipele aza Sataniꞌmi gono nene bele helo ize huko-delesa sotoꞌ ineꞌ ma neive.
1JO 3:9 Oꞌmosolatiꞌ sotoꞌ igi izipahala liliꞌ igi nizave ingine goloso niteꞌ mo di minisaꞌmave. Ee, Oꞌmosolatiꞌ emeni dameniꞌve engita mine molo neivo ingine ezelatiꞌ sotoꞌ igi eiꞌ izipahala liliꞌ i nizanako goloso niteꞌ ngeli di minamilisave.
1JO 3:10 Oꞌmosoꞌmi izipahala zuho idoꞌ Sataniꞌmi izipahala zuho engiꞌ monovo danava tiꞌ lo do kegeso ningelesune: Eveneꞌ ma ingine hehe li lamineꞌ minamilizaniꞌ nene ingine Oꞌmosolatiꞌ sotoꞌ igi minamave lo ningelesune. Idoꞌ aꞌmineꞌmine ogo eveneꞌ ma ingine eveneꞌ mukiꞌ luꞌine ngimi nasahiliꞌ i-ngidamilizaniꞌ nene ingine Oꞌmosolatiꞌ sotoꞌ igi minamave lo ningelesune.
1JO 3:11 Nemuꞌ nene monoꞌ gamazi apiꞌ ogo gilunidotiꞌ gamazi tiꞌ lo geleꞌmo geleꞌmo ogo minune: Laza lute ne geme ge neme lo bizo minelone.
1JO 3:12 Gozopoꞌ vomila minive Kainiꞌ aza ineꞌ neꞌmine amolone. Aza nene ve goloso Sataniꞌmi gipele loloꞌ ogo akunoloine bele hilineꞌ. Idoꞌ bele hilineꞌ monovo nene nanitekumuꞌ bele hilive. Eiꞌ Kainiꞌ ogo molo minineꞌ monovoꞌve nene goloso o vivo idoꞌ nakunoloꞌmo ogo molo minineꞌ monovoꞌve nene lisiheꞌ lamineꞌ minineꞌ nenako nemuꞌ bele hilineꞌ ve.
1JO 3:13 Leze zuho mate, me misubouꞌ ve adoꞌ Oꞌmoso gelekeleꞌ i-damaaꞌ ave nete lengikumuꞌ muluꞌninguꞌ goloso ogavo lukehe lingibilaaꞌ nangumuꞌ nene lingine gosohoꞌ suno ma ve li gilii upuhoꞌ igi gatine mukiꞌ gilamilo.
1JO 3:14 Laza lute eveneꞌ mukiꞌ ngemaaꞌ nouneꞌ nenako lelikumuꞌ tiꞌ lo gelaaꞌ noune: Hele noningutiꞌ tineꞌ molo ogo eleꞌvoleꞌ ogo minevoꞌ minevoꞌ ogo mineloninguꞌ vo holokuneꞌ ma neive. Eveneꞌ malite eveneꞌ ma luꞌine ngimami minaaꞌ ave ingine nene luꞌine hele vineꞌ nizave.
1JO 3:15 Malite eveneꞌ mamuꞌ muluꞌninguꞌ goloso ogavo lukehe ngibili minaaꞌ nave ingine nene eveneꞌ ngibili hilaaꞌ ave nizaniꞌ gelaaꞌ neive. Idoꞌ eveneꞌ ngibili hilaaꞌ avemuꞌ lingine mo gili nizave. Ingine minevoꞌ minevoꞌ ngemeni damenisi minamave.
1JO 3:16 Izesuꞌ aza lelikumuꞌ ve lo minevoꞌ alevoꞌve hulo lute ngemaliꞌmi monovo lelebizavo ningo gele none. Nemuꞌ laza aꞌmineꞌmine ogo evenekumuꞌ nene minevoꞌ alevote hulolonidoꞌ o neive.
1JO 3:17 Ne neiha eveneꞌ ma me misuboꞌmi heneni di minave ingine eveneꞌ ma initeꞌine nomineꞌ minave ma ningi mulumoꞌine gili initeꞌ ma ngimami minilizaniꞌ nene ingine mo kekeꞌ luꞌine Oꞌmoso imisaꞌmave.
1JO 3:18 Izipahaꞌne zuho mate, laza lute eveneꞌ ngemaaꞌ noune lo ma haza gamaziꞌve vetedunukovoꞌ lalone. Lute ngemaaꞌ noune lo ma neꞌmi gihileꞌve do sotoꞌ ilineꞌ gono nene dalone.
1JO 3:19 Neꞌmine ogo minaaꞌ olonidotiꞌ nene laza gamazi gihile lamineliꞌmi zuhoutiꞌ noneꞌ nene ningo gelelesune. Neꞌmine ogo Oꞌmosoꞌmi veleloꞌ lute do hongu lo minelesune.
1JO 3:20 Idoꞌ goloso niteꞌ daaꞌ unive ve lo lutedunuꞌ gelo lovozo helo ma tiꞌ lo gelelesune: Oꞌmoso nene lute ivileꞌ ogo mino initeꞌ mataꞌ mukiꞌ nene gele ngoloꞌ lo gelaaꞌ neive.
1JO 3:21 Luꞌne lengeme nouvoniꞌ mate, goloso niteꞌ daaꞌ unive ve lo lutedunuꞌ gelo lovozo helamo ma Oꞌmosoꞌmi veleloꞌ nene gele oloboꞌ ogo minelesune.
1JO 3:22 Neꞌmine ogo laza nene lo huko lineꞌ gamazi nene gele do mino nemuꞌ eze mulunouꞌ lamineꞌ gelaaꞌ neineꞌ initeꞌ ogo molo minaaꞌ nounako ezela initeꞌ nanitekumuꞌ lube nene haza lemavo daaꞌ noune.
1JO 3:23 Idoꞌ aꞌmine lo huko lineꞌ gamazi nene tiꞌ lo neive: Izesuꞌnimuꞌ nene aza Oꞌmosoꞌmi gipele mino Oꞌmosoꞌmo do luꞌ izelive lo imiselelesa live nene neive lo laza gele eleꞌvoleꞌ ogo lute ge neme ne geme lo mineloningumuꞌ lo-limidoꞌ eꞌmeto olosune.
1JO 3:24 Idoꞌ lo-huko lineꞌ gamazi nene gele do noolonive laza Oꞌmososi bizo lamineꞌ makaꞌ minekunivo Oꞌmoso aza luteuꞌ minevo dovoꞌ ogo minaaꞌ neive. Idoꞌ eze Sikalahuꞌ lehize-lidineꞌ neꞌmo lo-lemavo Oꞌmoso aza luteuꞌ minevoꞌ dovoꞌ neive lo gelaaꞌ noune.
1JO 4:1 Luꞌne lengeme nouvoniꞌ mate, Oꞌmosoꞌmi gamazi lo sotoꞌ ogaꞌ unive polohete none li sozasi laaꞌ ave mukiꞌ sotoꞌ igi misubouꞌ misubouꞌ nimonanako nemuꞌ engikutiꞌ ve ma lengita igi soza gamazi li-lingimikevo gili ngimikelizave. Nemuꞌ nene linginela igi Sikalahuliꞌmo leleꞌmize akaloꞌ o-lede neive li monoꞌ li-lingimaaꞌ ave mukiꞌ gopo gili-ngimaaꞌ naniꞌ monovotine nene hulilo. Gopo gili ngimami gamazi mukiꞌ nene Oꞌmosolatiꞌ nehe atokutiꞌ nehe li gili ningilo.
1JO 4:2 Oꞌmosoꞌmi Sikalahuꞌ neꞌmo ngeleꞌmize akaloꞌ o-ngedaaꞌ ivemuꞌ nene tiꞌ li ningilisave: Ve ma ingine Izesuꞌ Kilisitoꞌ aza eveneꞌ okode neꞌmine loloꞌ ogo sotoꞌ ineꞌ ve li li sotoꞌ milalizave nene ingine Oꞌmosolatiꞌ nizave li ningi gililisave.
1JO 4:3 Idoꞌ ve ma Izesuꞌnimuꞌ aza eveneꞌ okode neꞌmine do otuho sotoꞌ ineꞌ neive li lamilizaniꞌ nene Oꞌmosolatiꞌ nizamave. Ingine Kilisitoꞌni lovo o emaaꞌ iveꞌmi gamazi laaꞌ ave nizave. Aꞌmine Kilisitoꞌni lovo o emaaꞌ ive misubouko sotoꞌ oloseive li likevo gili nizave. Idoꞌ idiꞌnise mo sotoꞌ ogo omo neive.
1JO 4:4 Izipahaꞌne zuho mate, lingine Oꞌmosolatiꞌ sotoꞌ igi Oꞌmosoꞌmi gamazi lo sotoꞌ ogaꞌ unive polohete none li sozasi laaꞌ ave nene ngivileꞌ igi nizaniꞌ ma neive. Lengiꞌ lutinguꞌ minaaꞌ neive neꞌmo me misubouꞌ ve adoꞌ Oꞌmoso gelekeleꞌ i-damaveti luꞌninguꞌ minive nene ivileꞌ o neive. Nemuꞌ lingine aꞌmine Kilisitoꞌni lovo i imaaꞌ ave nene ngivileꞌ i nizave.
1JO 4:5 Ingine misubouꞌ ve Oꞌmoso gelekeleꞌ i-damaveti ngemeni damenisi minaaꞌ nanako aꞌmine ngemeni dameniloꞌ vo miliseꞌ ilineꞌ gamazivoꞌ laaꞌ nave. Likevo misubouꞌ ve ingine laniꞌ gamazi gili laniteꞌ gilaaꞌ nave.
1JO 4:6 Laza nene Oꞌmosolatiꞌ sotoꞌ uneꞌ nenako ingine Oꞌmoso ningi gilaaꞌ ave nene leze gamazite gili daaꞌ nave. Idoꞌ Oꞌmosolatiꞌ sotoꞌ amave nete leze gamazite gili hulaaꞌ nave. Neꞌmine igaꞌ nanako nemuꞌ Oꞌmosoꞌmi Sikalahuꞌ neꞌmo do sotoꞌ ineꞌ gamazi gihile lamineꞌ nesi idoꞌ gopo gamazi adoꞌ Oꞌmosoꞌmi Sikalahuliꞌmo do sotoꞌ amineꞌ gamazi nesi nene do kegeso ningo gelaaꞌ noune.
1JO 4:7 Luꞌne lengeme nouvoniꞌ mate, lute ngemaaꞌ nene Oꞌmosolatiꞌ neineꞌ nenako nemuꞌ laza lute ne geme ge neme lo minukeꞌzo. Ingine eveneꞌ luꞌine ngimi nasahiliꞌ i-ngidi minilizave nene Oꞌmosolatiꞌ sotoꞌ adite ilisave. Ingine Oꞌmosomuꞌ mo ningi gili nizave ve.
1JO 4:8 Oꞌmoso aza lute ngemaaꞌ monovoꞌmi meleho neineꞌ nenako nemuꞌ eveneꞌ ma ingine luꞌine eveneꞌ ngimami minaaꞌ nave nete Oꞌmosomuꞌ ningi gilisaꞌmave.
1JO 4:9 Oꞌmosoꞌmo gipele hamoꞌ leliꞌ do luꞌ izo minevoꞌ minevoꞌ lemeni dameni do sotoꞌ o-ledelive me misubouko imiselavo lemo aniꞌ. Nemuꞌ nene Oꞌmosoꞌmo lulo limineꞌ nene sotoꞌ ogavo ningekune.
1JO 4:10 Lute ngemaliꞌmi monovo tiꞌ ogo neive: Laza lute Oꞌmoso emamunivosa asiꞌve gomuꞌ lulo lemo lelitoꞌ medelo mino okoꞌno hulo helo lihimete apase-ledelive lo gipeleine imiselineꞌ ve.
1JO 4:11 Luꞌne lengeme nouvoniꞌ mate, Oꞌmosoꞌmo lulo atoliꞌmine ogo lemaze. Nemuꞌ laza aꞌmineꞌmine ogo lute ne geme ge neme lo minelonidoꞌ o neive.
1JO 4:12 Eveneꞌ hamolitesi Oꞌmoso mo ningamune. Lute ne geme ge neme lo mineloneꞌ nene Oꞌmosoꞌmo lezesi bizo luteuꞌ neivo lute imuneꞌ nene apa niteꞌ amivo laminetokovoꞌ lute eme giliꞌ lo minelesune.
1JO 4:13 Idoꞌ Oꞌmosola bizo noneꞌ idoꞌ Oꞌmosoꞌmo luteuꞌ minevoꞌ dovoꞌ ogo neineꞌ nene ningo gele none. Idoꞌ naniteliꞌmo ningo gele none. Eze Sikalahuꞌve leliꞌ limidiꞌmo nene ningo gele none.
1JO 4:14 Meteho aza numudoꞌ namadoꞌ ve do luꞌ izelive lo gipeleine imiselavo lemo aniꞌ nene laꞌlisete vetedunuꞌ ninguneꞌ nenako neꞌmi gamazi lo sotoꞌ ogaꞌ noune.
1JO 4:15 Idoꞌ eveneꞌ malite Izesuꞌ aza lamineꞌ mo Oꞌmosoꞌmi gipele neive li li sotoꞌ ave nene Oꞌmosoꞌmo engiꞌ luꞌninguꞌ minevoꞌ dovoꞌ ogo neivo ingine Oꞌmososi bizi nizave.
1JO 4:16 Idoꞌ Oꞌmosoꞌmo lulo lemaaꞌ neineꞌ nene ningo gele eleꞌvoleꞌ o none. Lulo lemo nasahiliꞌ ogaꞌ monovo nene Oꞌmosoꞌmi emeni dameni gihile neineꞌ nenako ve ma ingine luꞌine ve ma ngimiꞌmi vi miniviꞌ diviꞌ iꞌmi vilizaniꞌ nene ingine Oꞌmosola bizi nizavo Oꞌmoso nesi engiꞌ luꞌninguꞌ minevoꞌ dovoꞌ ogo mineleseive.
1JO 4:17 Idoꞌ Izesuꞌ mene misubouko minevoꞌ dovoꞌ idiꞌmine ogo lazasi aꞌmineꞌmine ogo minevoꞌ dovoꞌ ogo nounako nemuꞌ gamene nabauꞌ Oꞌmosoꞌmo lihime ngemelineꞌ gamenela nene lamineꞌ minelone lo gele oloboꞌ ogo noneꞌ neꞌmo nene lute imuneꞌ nene apa niteꞌ amo laminetokovoꞌ eme giliꞌ lolosune.
1JO 4:18 Lute ve ma emo ma aꞌmine vemuꞌ golise gelamolosune. Lute emo giliꞌ luneꞌ neꞌmo golise nene ehusoꞌ ogaꞌ neive. Nemuꞌ nene eveneꞌ Oꞌmosomuꞌ golise gilave ingine lihimete lemelihe li ezemuꞌ golise gilaniꞌ neꞌmo luꞌine imaniꞌ nene imi giliꞌ lisaꞌmave.
1JO 4:19 Laza nene Oꞌmosoꞌmo ganaꞌ lulo limineꞌ nenako nemuꞌ Oꞌmososi evenekisi lute ngemaaꞌ noune.
1JO 4:20 Ve malite ve mamuꞌ muluꞌninguꞌ goloso ogavo lukehe ngibili minaaꞌ niigi lute nene Oꞌmoso emaaꞌ noune lilizaniꞌ soza lilisave. Ve ma ingine ningi nizave ma luꞌine ngimamilizaniꞌ nene ningamave Oꞌmoso nesi mo luꞌine imamilisave. Nemuꞌ lute Oꞌmoso emaaꞌ noune lilizaniꞌ nene soza lilisave.
1JO 4:21 Idoꞌ Izesuꞌ lo huko lo-lidineꞌ gamazi ma tiꞌ lo gelaaꞌ noune: Lute nene Oꞌmoso emo ma evenekisi ngemeloneꞌ o neive.
1JO 5:1 Ve malite Izesuꞌnimuꞌ nene aza do luꞌ izelive lo Oꞌmosoꞌmo imiselelesa live neive li gili eleꞌvoleꞌ ilizaniꞌ nene Oꞌmosolatiꞌ sotoꞌ igi izipahala zuho liliꞌ igi nizave. Idoꞌ ve ma ingine luꞌine meꞌnibine imi ma izipahala zuhosi ngimilisave.
1JO 5:2 Idoꞌ lute Oꞌmosoꞌmi izipahala zuho ngemaaꞌ noube ngemamaaꞌ noube. Lute Oꞌmoso emo lo huko lineꞌ gamazi gele do mino ma nene mo laminetoꞌ lute ngemaaꞌ noune lo ningo gelelesune.
1JO 5:3 Lute Oꞌmoso emaliꞌmi monovo tiꞌ ogo neive: Lo huko lineꞌ gamazi gele daloneꞌ nene mo laminetoꞌ lute emaaꞌ olosune. Idoꞌ Oꞌmosoꞌmo lo huko lineꞌ gamazi nene geniꞌvesi nominako ngelo livizamoloseive.
1JO 5:4 Oꞌmosolatiꞌ sotoꞌ unive laza nene Oꞌmoso gelekeleꞌ i-damaniꞌ misubouꞌ aleveti monovo nene damo aꞌmine monovo nene amuzo molo do lemeꞌmo ogo minunako Oꞌmosoꞌmo lo huko lineꞌ gamazi nene livizesaꞌmive. Idoꞌ aꞌmine misubouꞌ minineꞌ monovo nene gele damo amuzo moloꞌmo ogo minaaꞌ nouneꞌ nene naniteliꞌmo ve. Izesuꞌnimuꞌ gele eleꞌvoleꞌ ogo noneꞌ neꞌmo ve.
1JO 5:5 Idoꞌ zamote aꞌmine misubouko minineꞌ monovo di limiꞌmi igi amuzo mili minilizave. Ingine Izesuꞌnimuꞌ aza lamineꞌ Oꞌmosoꞌmi gipele neive li gili eleꞌvoleꞌ i nizavetevoꞌ neꞌmine ilisave.
1JO 5:6 Aꞌmine ve Izesuꞌ Kilisitoꞌ aza nene nososi vanisesi sotoꞌ ineꞌ ve. Nosovoꞌ nomive. Sotoꞌ ineꞌ nene monoꞌ noso holanikisi vanise lepo hilinekisi ne neive. Idoꞌ Sikalahuꞌ neꞌmo aza aꞌmine gamazi nene hize eleꞌ o-daaꞌ neive. Sikalahuꞌ aza gamazi gihileꞌmi meleho neinako aꞌmine gamazi laaꞌ neivo gihile izaaꞌ neive.
1JO 5:7 Nemuꞌ nene Sikalahuꞌ neꞌmo idoꞌ monoꞌ noso holaniꞌ neꞌmo idoꞌ vanise lepo hilineꞌ neꞌmo Izesuꞌ monovo hize eleꞌ i-di gono daaꞌ nave. Sikalahuꞌ idoꞌ noso holaniꞌ idoꞌ vaniseꞌve ingine setohamo nete gamazi laniꞌ nene hamoꞌ gamazi neive.
1JO 5:9 Haza eveneꞌ nete gamazi ma hizi eleꞌ ikevo ma nene laza aꞌmine gamazi mo laminetoꞌ neive lo gelaaꞌ noune. Ne neiha Oꞌmosoꞌmo gamazi lilineꞌ nene haza eveneliti gamazi ivileꞌ ogo gihile lamineꞌ izeleseive. Nemuꞌ nene Oꞌmosoꞌmo gipele hize eleꞌ o-do lineꞌ gamazi neineꞌ nene gele eleꞌvoleꞌ olosune.
1JO 5:10 Ingine Oꞌmosoꞌmi gipelemuꞌ gili eleꞌvoleꞌ igaꞌ nave nene luꞌinedunuꞌ gilikevo eleꞌvoleꞌ ogaꞌ neive. Idoꞌ ingine Oꞌmosoꞌmo lineꞌ gamazi gili eleꞌvoleꞌ ami nizave nete Oꞌmosoꞌmo gipele hize eleꞌ o-do lineꞌ gamazi nene gilikevo gihile izesaꞌminako nemuꞌ Oꞌmosomuꞌ sozaloꞌ ve ve laniꞌ gelaaꞌ neive.
1JO 5:11 Idoꞌ gipele hize eleꞌ o-do lineꞌ gamazi nene tiꞌ lo neive: Oꞌmosoꞌmo minevoꞌ minevoꞌ ogaꞌ lemeni dameni nene mo leme neive. Idoꞌ aꞌmine minevoꞌ minevoꞌ minaaliꞌmi meleho nene eiꞌ gipele ne neive.
1JO 5:12 Nemuꞌ nene ingine Oꞌmosoꞌmi gipele di giliꞌ li nizaniꞌ nete nene minevoꞌ minevoꞌ ogaꞌ ngemeni dameni nesi di nizave. Idoꞌ ingine Oꞌmosoꞌmi gipele di giliꞌ li di minamave nete minevoꞌ minevoꞌ ogaꞌ ngemeni dameni nesi mo damave.
1JO 5:13 Oꞌmosoꞌmi gipelemuꞌ gili eleꞌvoleꞌ i nizave lingine minevoꞌ minevoꞌ lengemeni dameni nene mo do none li gili eleꞌvoleꞌ igi gililizave lo mene gamazi nene nogize-lingimuve.
1JO 5:14 Laza tiꞌ lo Oꞌmosoꞌmi veleloꞌ gele oloboꞌ o none: Oꞌmosola initeꞌ mamuꞌ vokuꞌ lunivo eiꞌ gele neidoꞌ vo dalineꞌ nene gele lemeleseive.
1JO 5:15 Idoꞌ neꞌmine manaꞌmine initekumuꞌ vokuꞌ lunivo gele lemeleseive lo gele eleꞌvoleꞌ o noneꞌ nenako initeꞌ mamuꞌ vokuꞌ lo-deloneꞌ nene lemavo liteꞌ lo daaꞌ noune lo gele none.
1JO 5:16 Ve maliꞌmo eze zuho ma goloso niteꞌ nodavo ningivo aꞌmine neꞌmo mudise helaaꞌ akauꞌ vilidoꞌ nomivo ma nene aꞌmine vemuꞌ Oꞌmosola lilive. Lavo Oꞌmosoꞌmo minevoꞌ minevoꞌ emeni damenisi mine do dizo minelineꞌ akaloꞌ eleꞌmize molaloseive. Mudise hilaaꞌ akauꞌ vilizadoꞌ nomineꞌ goloso niteꞌ davemukovoꞌ noluve. Goloso niteꞌ ma neineꞌ nene aꞌmine dalizaniꞌ nene mudise hilaaꞌ akauꞌ vilizadoꞌ o neive. Neꞌmine initeꞌ davemuꞌ Oꞌmosola lilizave lo lamuve.
1JO 5:17 Goloso niteꞌ mukiꞌ nene lihime daaꞌ nitekovoꞌ neive. Neineꞌza goloso niteꞌ ma daloneꞌ nene vo mudise helaaꞌ akauꞌ volonidoꞌ nomive.
1JO 5:18 Laza tiꞌ lo gelaaꞌ noune: Oꞌmosolatiꞌ sotoꞌ unidite nene goloso niteꞌ do minamolosune. Oꞌmosoꞌmi gipele neꞌmo gizebo o-ledavo golosoꞌmi meleho aza geleleheꞌ o-ledo do goloso o-ledamoloseive.
1JO 5:19 Laza nene Oꞌmosolatiꞌ sotoꞌ ogo none lo gele none. Idoꞌ me misubouꞌ ve Oꞌmoso gelekeleꞌ i-damaniꞌ mukiꞌ nete goloso melehida vi giꞌmizi gelekeleꞌ i-di nizaniꞌ nesi gele none.
1JO 5:20 Idoꞌ tiꞌ lo gele none: Oꞌmosoꞌmi gipele aza misubouko lemo ogave. Ogo gate do ngoloꞌ lo-lidineꞌ nenako Oꞌmoso gihile nene ningo gelaaꞌ nouneꞌ. Ee, Oꞌmoso gihile nesi bizo none. Gipele Izesuꞌ Kilisitokisi bizo none. Me ve nene Oꞌmoso gihile idoꞌ minevoꞌ minevoꞌ ogo minaaliꞌmi meleho neive.
1JO 5:21 Izipahaꞌne zuho mate, lingine avazaha oꞌmoso niteꞌ Oꞌmoso gihile minamaniꞌ nene gelekeleꞌ i-ngidikelizaze. Monovotidoꞌ gizebo lamineꞌ igi minilo. Moda ve.
2JO 1:1 Oꞌmosoꞌmo do kegeso eiꞌ ve lo geleꞌmize molaniꞌ veneꞌ make, gizebo ve naza gezesi idoꞌ izipaha zuhosi luꞌne lamineꞌ lengeme nouvoniꞌ aleve lengikumuꞌ luhuvo niteꞌ mene nogize lingimuve. Idoꞌ nenikovoꞌ luꞌne lengeme nouvoniꞌ nevoba gamazi gihile gili lamineꞌ i nizave mukikisi aꞌmineꞌmine igi luꞌine lingimaaꞌ nave.
2JO 1:2 Idoꞌ laza lute lengemaaꞌ nouneꞌ nene aꞌmine gamazi gihile neꞌmo leliꞌ luteuꞌ mino lelita minevoꞌ minevoꞌ ogo minelineꞌ nenako nemuꞌ nene lute lengemaaꞌ noune.
2JO 1:3 Idoꞌ Meteho Oꞌmoso idoꞌ eze gipele Izesuꞌ Kilisitoꞌ ingine luꞌine limi nizasinako lamineꞌ muhelete ningi nasahiliꞌ i-lidi mulude di hongu li-lidilisive.
2JO 1:4 Idoꞌ izipaha zuho linge ma meteho lo huko-lididoꞌ gili di gamazi gihileꞌve nene di mini nizavo neꞌmi gamazi gelo muluꞌneuꞌ lamineꞌ goloso gelekuve.
2JO 1:5 Idoꞌ veneꞌ make, Oꞌmosoꞌmo lo huko-lidineꞌ gamazi ma lo-gemekuvo geleline losa noluve. Aꞌmine gamazi nene gosohoꞌ nomive. Litehe ma monovolatiꞌ vomine geleꞌmo geleꞌmo ogo minuneꞌ nene tiꞌ lo lo-gemelove: Laza mukiꞌ lute ne geme ge neme lo minelesune.
2JO 1:6 Lute Oꞌmososi evenekisi ngemaaliꞌmi monovo neꞌmino neive: Laza Oꞌmosoꞌmo lo huko lineꞌ gamaziloꞌ gele doꞌmo ogo minelesune. Idoꞌ lingine lo huko lineꞌ gamazi nene monovolatiꞌ vomine giliꞌmi giliꞌmi igi minaniꞌ. Tiꞌ lo neive: Lingine lutine ngimiꞌmi vi minilisave.
2JO 1:7 Soza monoꞌ li eveneꞌ ngeleꞌmize gopo igaꞌ ave mukiꞌ sotoꞌ igi misubouꞌ misubouꞌ nimonave. Ingine Izesuꞌ Kilisitoꞌ aza leliꞌ haza eveneliti okode neꞌminesi sotoꞌ ineꞌ ve li gili imisaꞌmave. Aꞌneꞌmine ve nene soza monoꞌ li eveneꞌ ngeleꞌmize gopo igaꞌ ave mini Kilisitoꞌni lovo i imaaꞌ ave nizave.
2JO 1:8 Gono lengita duneꞌ nene vo gopo ogo haza ogalive. Monovotidoꞌ gizebo lamineꞌ igi minilo. Neꞌmine igi mini di dizikevo Oꞌmosoꞌmo neꞌmi gihileꞌve lengemavo mukiꞌ nene dalizave.
2JO 1:9 Malite Kilisitoꞌ gamaziꞌve apizi ngimanguꞌ minami ivileꞌ igi atoꞌ gamazi lilizaniꞌ nene Oꞌmoso di minamave. Idoꞌ malite atoꞌ gamazi lami Kilisitoꞌ gamaziꞌve di minilizaniꞌ nene ingine metehingi gipelengi nene di minaaꞌ nave.
2JO 1:10 Eveneꞌ malite Kilisitoꞌ gamaziꞌve di minami monoꞌ apizi lingimilisa nilavo ma lingine ngeleꞌmizi numudinguꞌ milamilo. Idoꞌ meseꞌ aseka li-ngidamilo.
2JO 1:11 Meseꞌ aseka li-ngidilizave nete aꞌmine ve gono goloso dalizaniꞌ nene hize eleꞌ ilisave. Nemuꞌ nene meseꞌ aseka li-ngidamilo.
2JO 1:12 Gamazi lo-lengemeloniꞌ nene mukiꞌ ha neiha luhuvo nitekuꞌ gizelove lo gelamuve. Lengita vokuvo vetedunuꞌ lo voleloꞌ meloꞌ ogo muludeuꞌ lamineꞌ goloso gelelone lo gelekuve.
2JO 1:13 Aluna Oꞌmosoꞌmo do kegeso eiꞌ ve lo eleꞌmize molaniꞌ neꞌmi izipahala zuho nete gopoꞌni nilave. Moda ve.
3JO 1:1 Zogone lamineꞌ Gaio gaza luꞌne gimuve make, gizebo ve naza luhuvo niteꞌ nogize gimuze. Ningezo.
3JO 1:2 Zogone, luka do lamineꞌ ogo nanivo okongasi aꞌmineꞌmine ogo ha lamineꞌ minavo minevoꞌ alevoka laminekovoꞌ o-do vo minelive lo Oꞌmosola laaꞌ nouve.
3JO 1:3 Leze zuho malite igi gamazi gihileꞌmi akaloꞌ vaaꞌ nane li idoꞌ gamazi gihile do giliꞌ lo minaaꞌ nane li geiꞌ monovoka li sotoꞌ igi li-nimikevo muluꞌneuꞌ lamineꞌ goloso gelo minuvoniꞌ ve.
3JO 1:4 Initeꞌ neꞌmine manaꞌmine initekumuꞌ muluꞌneuꞌ lamineꞌ geleloniꞌza neniꞌ izipahaꞌne zuho gamazi gihileꞌmi akaloꞌ vaaꞌ nave li likevo gelo atoꞌ nitekumuꞌ lamineꞌ gelaaꞌ nouvoniꞌ nene ivileꞌ ogo muluꞌneuꞌ lamineꞌ goloso gelaaꞌ nouve.
3JO 1:5 Zogone, Gaza leze aleve Izesuꞌ zuho ma venenga ve minanikisi lengita igaꞌ igaꞌ avo ngeleꞌmize lamineꞌ olosa gono daaꞌ naineꞌ nene monovo gihile lamineꞌ daaꞌ nane.
3JO 1:6 Luka ngemaningumuꞌ nene aꞌmine aleve nete Izesuꞌ evenele mulise milanguꞌ li sotoꞌ igi gopoꞌni laaꞌ nave. Idoꞌ aꞌneꞌmine aleve lengita igi nivavo ma Oꞌmosoꞌmo gelavo lisiheꞌ lamineꞌ ilidoꞌ do molo akala vilizanguꞌ initeꞌ ma viseꞌ ilizaniꞌ initeꞌ nene do sotoꞌ ogo ngemo ngeleꞌmizo vilineꞌ nene lamineꞌ oloseive.
3JO 1:7 Ee, Izesuꞌ guvele monelingumuꞌ gono dalone li engiꞌ misuboꞌine huli vi Izesuꞌnimuꞌ gilamavetida gono di engitatiꞌ meni disaꞌmanako hize eleꞌ o-ngedelineꞌ nene lamineꞌ o neive.
3JO 1:8 Nemuꞌ nene gamazi gihile di hutileꞌ ilizanguꞌ lazasi gono makatoꞌ duneꞌ gelavo mineloningumuꞌ ve lo aꞌneꞌmine ve hize eleꞌ o-ngedeloneꞌ o neive.
3JO 1:9 Lengiꞌ muliseloꞌ luhuvo niteꞌ ma gizuvoniꞌza lengiꞌ vovotinguꞌ ve naba loloꞌ olosa amuzo molaaꞌ ive Dioteleheꞌ aza nene neniꞌ gamaziꞌne gele hulaaꞌ neive.
3JO 1:10 Nemuꞌ nene aza ogaꞌ ineꞌ initekumuꞌ vo lo sotoꞌ ogo eita gamazi gono dalosuve. Lelikumuꞌ gamazi goloso gehepeve lo soza gamazi lo-ledaaꞌ neive. Idoꞌ neevoꞌ nomive. Leze zuho Izesuꞌ aleve ma lengita ngimiselekunivo vi hetelikevo aza meseꞌ aseka lo-ngedesaꞌmive. Idoꞌ malite meseꞌ aseka lo-ngedelone li lilisa naavo oꞌve lo-ngedo monoꞌ muliseutiꞌ hulo heta o-ngedaaꞌ neive.
3JO 1:11 Zogone lamine, eveneꞌ ma goloso niteꞌ di nizavo ma aꞌmidoꞌ ngeꞌmetamozo. Initeꞌ lamineꞌ di nizavo ma nelokovoꞌ ngeꞌmetezo. Ingine initeꞌ lamineꞌ di minaaꞌ nave nene Oꞌmosolatiꞌ sotoꞌ aniꞌ ve. Idoꞌ ingine goloso niteꞌ di minaaꞌ nave ingine mo Oꞌmosomuꞌ ningi gilamave.
3JO 1:12 Demetelioꞌnimuꞌ eveneꞌ mukiꞌ gamangi mili-daaꞌ navo gamazi gihile neꞌmosi gamangi molo-daaꞌ neive. Nazasi ezemuꞌ gamangi nomolo-duve. Idoꞌ gamazi laminekovoꞌ noluvoniꞌ nene gele nane.
3JO 1:13 Naza gamazi lo-gemeloniꞌ nene mukiꞌ ha neineꞌza gizesoꞌ gaꞌne nisamive.
3JO 1:14 Naza gamene haꞌna minamo geiꞌ vo ninguvo vetedunuꞌ gamazi lo voleloꞌ meloꞌ ogo minelosive losa noluve.
3JO 1:15 Oꞌmosoꞌmi hongu geita mineꞌmo vo minelive. Zogole zuho gopoꞌni nilave. Idoꞌ zogole zuho aꞌmida nizaniꞌ nene vo lo-ngemezo. Engiꞌ hamoꞌ hamokumuꞌ ngopoꞌni noluve. Moda ve.
JUD 1:1 Adoꞌ Izesu Kilisitoꞌ gonoloꞌ ve Zakoboꞌ akunolo Zudaꞌ naza luhuvo niteꞌ meve nene Oꞌmosoꞌmo lulo lengeme mino vise lo do eita o-lengedavo Izesu Kilisitoꞌ gizebo o-lengede neive lengiꞌ nene nogize-lingiduze.
JUD 1:2 Oꞌmosolatiꞌ mulumote ningaaꞌ monovosi idoꞌ hongu lo lamino minaaꞌ monovosi idoꞌ lulo lemaaꞌ neineꞌ monovoꞌve nesi nene lengita vauve elo vaiꞌ loꞌmo vo miniliho.
JUD 1:3 Luꞌne lengeme nouvoniꞌ alevekizo, naza Oꞌmosoꞌmo nenikisi lengikisi do luꞌ izineꞌ monovomuꞌ nene luhuvo niteꞌ ma gize-lengedeloho lo amuzo molo nogiluvodoꞌ mene Oꞌmosoꞌmo eze evenele mudise levo levo lo minelineꞌ monoꞌ lehize-lidineꞌ nene lingine zegeꞌ zegeꞌ igi hizi eleꞌ ilizave lo luhuvo niteꞌ lutine do oto ma gizeloniꞌ ogavosa mene nogizuve.
JUD 1:4 Ne nanitekumuꞌ ve. Eveneꞌ ma nene heleleꞌ igi vovoteuꞌ ma dizikeve. Ingine nene monotoꞌ eꞌmete lamineꞌ ami mini Oꞌmosoteꞌmo nasahiliꞌ o-ledo lihimete hulo-ledaaꞌ neineꞌ monovoꞌve nene di zovoꞌ izii aꞌmine monovoꞌve neꞌmo nene monovo goloso gopo geligeli ogo daaꞌ nene asabuꞌ izaaꞌ neive li eveneꞌ nabate hamoꞌ minive Guvetesi ve Izesu Kilisitoꞌni nesi nene meheꞌine imaaꞌ nave. Aꞌmine neꞌmine ve nene Oꞌmosoꞌmo goniꞌ o-ngedo lihime ngemeleseive li gozopoꞌ akaꞌmilatiꞌ li huki gizi nizaniꞌ ma neive.
JUD 1:5 Lo-lengemeloniꞌ gamazi mukikumuꞌ mene lingine mo gili nizaha aꞌminemuꞌ nene lo gatine olove lo gele noosa nene noluve: Adoꞌ Guvelesi ve neꞌmo nene Isilaeleꞌ aleve Aigita misubouꞌ minangutiꞌ ganaꞌ nene do nguꞌ izo ngeleꞌmizo vineꞌza alingeꞌ nene ezemuꞌ gili eleꞌvoleꞌ amave ngebele geseꞌ ineꞌ ve.
JUD 1:6 Idoꞌ angeloꞌ linge Oꞌmosoꞌmo ngimineꞌ moꞌmosiꞌnidoꞌ nene mini giliꞌ lami aꞌmine gonoꞌine hulaniꞌ angeloꞌ nene gamene nabala goniꞌ o-ngedelove lo levo levo lo minelineꞌ seni nalaꞌ nene ize-ngedo litiꞌmusouꞌ hulo-ngedeko gizebo o-ngedo neive.
JUD 1:7 Idoꞌ aꞌmine angeloꞌ nete lihime daniꞌ neꞌmino nene Sodomi nGomola idoꞌ aꞌmida mineꞌmo monineꞌ numuno ebekuꞌ aleve lihime daniꞌ nene adoꞌ veneꞌ vemohoꞌ gopoꞌ napa ingaaꞌ igi minaaꞌ idoꞌ veneꞌ nene huli vemohoꞌ angiseꞌine okoꞌninguꞌ initeꞌ igaꞌ aniꞌ ve. Neꞌmine igi minangumuꞌ Oꞌmosoꞌmo oloꞌ gizeꞌ vote-ngidineꞌ ve. Neꞌmine ineꞌ nene eveneꞌ ma aꞌmineꞌmine ogo lihime ngemo lihizami olokuꞌ hulo-ngedelineꞌ avazaha nesi do sotoꞌ ogo lelebizineꞌ ve.
JUD 1:8 Aꞌmine monoꞌ di gopo igi laaꞌ avemuꞌ mene noluvoniꞌ nene ingine aꞌmineꞌmine igi lihime disa vamuꞌ neꞌmine ningaaꞌ naadotiꞌ nene engiꞌ okoꞌine di goloso igi mini idoꞌ ve nabaꞌmi gizeboloꞌ mini gamaziꞌve gili di minaaꞌ monovomuꞌ nene goseleꞌ igi hozila dizi minave naba angeloꞌ nevoꞌmine nesi nene divi lediviꞌ i-ngidaaꞌ nave.
JUD 1:9 Ingine neꞌmine igaꞌ naha gonoso Moseꞌni nene zaho dalive li aꞌminemuꞌ nene angeloꞌ naba Mikaelekisi Satanisi gamazi gono dasinguꞌ nene Mikaeleꞌ (Maikoliꞌ) aza Satani dovo ledevoꞌ gamazi lo-do elemelodoꞌ nomuve lo gelo neꞌmine amineꞌ ve. Asi Guvelesi veꞌmo gelemivo lo aꞌneevoꞌ nene ma lo-imineꞌ ve.
JUD 1:10 Neꞌmine ineꞌza me noluve nene gili hehe lamilizadoꞌ o minineꞌ initekumukisi nene ganuꞌ li gamazi goloso laaꞌ nave. Idoꞌ ingine initeꞌ linge mamuꞌ gilaaꞌ naniꞌ nene nama gaha ize gulolite haza okoꞌineꞌmo laniteꞌ gilineꞌ initekumukovoꞌ gilaaꞌ naniꞌ ngemeniloꞌ nene di milisa gilaaꞌ naniꞌ nenako nemuꞌ nene aꞌmine gilaaꞌ naniꞌ initelite nene ngeleꞌmize goloso igaꞌ nave.
JUD 1:11 Agae, engiꞌ nene mo mulumo gono dalisave. Ee, ingine Kainiꞌ eikumukovoꞌ gelaaꞌ ineꞌ monovo maloꞌ eꞌmetikeve. Idoꞌ moni heneni dalone li Balaamuꞌ aka laminetotiꞌ zovoꞌ izo vo moniloꞌ lulo molaniꞌ maꞌmine monovoloꞌ amuzo mili eꞌmetikeve. Idoꞌ ma nene Kolaꞌ ineꞌ neꞌmine igi ingine nene Oꞌmosoꞌmo lineꞌ gamazimuꞌ nene oꞌove li biluvaꞌ i-daaꞌ naniꞌ nenako labuluvo ineꞌ neꞌmine igi labuluvo ilisa nave.
JUD 1:12 Lingine lutine ge neme ne geme li minaaꞌ nangumuꞌ nene di nubo igi makatoꞌ nosoꞌ niteꞌ naaꞌ nanguꞌ nene aꞌmine neꞌmine ve ingine imi mini ngovozosi hilami mini nosoꞌ niteꞌ sau sau li naaꞌ naniꞌ neꞌmo nene aꞌmine nosoꞌ niteꞌ nalisa mulise milaaꞌ naniꞌ mulisetine nene di goloso igaꞌ nave. Idoꞌ engiꞌ neve nene hepeliꞌmo limuso hubu lo do vavo goline izamivo ma hize eleꞌ o-ledesaꞌmineꞌ neꞌmino monokuꞌ nene ma hizi eleꞌ i-lidisaꞌmave. Idoꞌ ma nene za ma gihile izaaꞌ naaniꞌ gameneuꞌ malite gihile izamaaꞌ naaniꞌ neꞌmino monoliꞌmi gihile di sotoꞌ amavo za ma luhive gili hulikevo mo gokoꞌ laaꞌ neineꞌ neꞌmino engiꞌ luꞌine nene mo mudise hele gehepeve ogave.
JUD 1:13 Idoꞌ engiꞌ neve nene hepeꞌ naba elo guvo noso velo gituhoꞌ galakalaꞌ ogo noso hemuvolotiꞌ pipiaꞌ do ogo gahevela hutileꞌ ogo hulaaꞌ neineꞌ neꞌmine nene minaaꞌ nave. Idoꞌ ma nene sonohilite vilizaniꞌ akaꞌine hulisa zovoꞌ izi mala vaaꞌ naaniꞌ neꞌminisa nene nizave. Aꞌmine soza monoꞌ apizi lingimaaꞌ nave engiꞌ nene vi litiꞌmuso atoliꞌmine gehepeveuꞌ minevoꞌ minevoꞌ ilizave lo Oꞌmosoꞌmo salani molo-ngede neivo engikumuꞌ ha gizebo o neive.
JUD 1:14 Idoꞌ aꞌmine soza monoꞌ laaꞌ avemuꞌ nene Adamudotiꞌ mini di aveutiꞌ naba seveni minive Enokuꞌ neꞌmo gomukutiꞌ Oꞌmosoꞌmi veletiꞌ gamazi ma tiꞌ lo lineꞌ ma neive: Me gililo. Guvelesi ve nene eze angeloꞌve mulise naba tauseni tauseni neꞌmine ngeleꞌmizo ogo
JUD 1:15 monoꞌ monovoloꞌ eꞌmetamave mukiꞌ ingine monokuꞌ nomineꞌ monovoloꞌ eꞌmeti igi mili aniꞌ initeꞌ mukikumukisi idoꞌ monotoꞌ eꞌmetamave lihimeloꞌ ve ezemuꞌ gizengize gamazi li-daaꞌ aniꞌ mukikumukisi nene goniꞌ o-ngedo lihime ngemelove lo alosa neive.
JUD 1:16 Aꞌmine mene noluve neꞌmine nete nene initeꞌ mukikumuꞌ lihiteheka li muluꞌninguꞌ liteꞌ liteꞌ li goloso gilaaꞌ ave mini engiꞌ okoꞌineꞌmo laniteꞌ gilidokovoꞌ eꞌmeti mini gamaziꞌmovoꞌ i vaniꞌ mini initeꞌ ma dalobe li goꞌine izi ngopoꞌni laaꞌ nave.
JUD 1:17 Luꞌne lengeme nouvoniꞌ alevekizo, lingine Guvelesi ve Izesu Kilisitoꞌ aposoloꞌvelite gomukutiꞌ laniꞌ gamazi mamuꞌ gatine molalize. Gili nge li minilo.
JUD 1:18 Adoꞌ tiꞌ li li-lingimaniꞌ mamuꞌ nene noluve: Gamene alingeꞌ nela nene monokumuꞌ gize abelenga laaꞌ ave engiꞌ luꞌnidokovoꞌ di mili monokuꞌ nomineꞌ monovo golosoloꞌ eꞌmetilizave ma sotoꞌ ilisave li li-lingimave.
JUD 1:19 Aꞌmine aleve nene Oꞌmosoꞌmi evenele hizi hoꞌli-ngidaaꞌ ave nene nizave. Ingine me misubouꞌ initekumukovoꞌ gelaaꞌ neineꞌ ngemenisivoꞌ minikevo Oꞌmosoꞌmi Sikalahuꞌ nene engita minesaꞌmivo ma damave.
JUD 1:20 Ne neiha luꞌne lengeme nouvoniꞌ alevekizo, lingine neve nene monotine gili eleꞌvoleꞌ igaꞌ naniꞌ adoꞌ Oꞌmosolatiꞌ atoliꞌmine gehepeve o neidoꞌ nene mine giliꞌ li mini monokuꞌ naba ilizangumuꞌ nene ge hize eleꞌ o-nede ne hize eleꞌ o-gede li mini Oꞌmosoꞌmi Sikalahuꞌ neꞌmo amuzo lingimivo minilizadotiꞌ nene Oꞌmosola li mini
JUD 1:21 Oꞌmosoꞌmo lulo lengemeꞌmo vo minelidoꞌ mini mili minilizangumuꞌ nene lengiꞌ monovotidoꞌ gizebo lamineꞌ igi mini Guvetesi ve Izesuꞌ Kilisitoꞌ mulumotine gelo ogo minevoꞌ minevoꞌ lengemeni gihile do otuho-lengedelingumuꞌ nene gili muꞌmusiꞌ igi aꞌminemuꞌ gizebo igi minilo.
JUD 1:22 Eveneꞌ linge ma monokumuꞌ gaꞌine setaꞌ sataꞌ gili minilizave nene mulumoꞌine gili hize eleꞌ i-ngidilo.
JUD 1:23 Idoꞌ linge ma neve nene olokuꞌ vaaꞌ akaloꞌ mini mili nizangutiꞌ nene singeli huli-ngidi di nguꞌ izilo. Idoꞌ lingine mulumoꞌine gililizadoꞌ i minilizaniꞌ aleve linge nene okoꞌineꞌmo laniteꞌ gilineꞌ monovo goloso nene okoꞌnidoꞌ minelineꞌ nenako nemuꞌ nene aꞌmine okoꞌnidoꞌ niteꞌ nemukisi nene goseleꞌ i minisa lelitasi giꞌmizalive li golise gili eheꞌ i minisa mulumoꞌine gili hizi eleꞌ i-ngidilo.
JUD 1:24 Guvetesi ve Izesuꞌ Kilisitoꞌ gono dadotiꞌ do luꞌ izaaꞌ ive minive Oꞌmoso hamoꞌ aza lengiꞌ alete molo-lengedo neivo lodohoꞌ izi limi ingami okodidoꞌ gamazisi nomivo longolize naba izi nizavo eiꞌ labanaꞌvesi miniveꞌmi veleloꞌ nene lengeleꞌmize molalidoꞌ lisiheꞌ o neize. Eita nene guveleꞌve nabavoꞌ mino gizebo ve minaaꞌ amuzoꞌve gozopotiꞌ minineꞌ nene idisesi alingekisi minevoꞌ minevoꞌ ogo mine do dizo minelive. Mo neꞌmino miniliho. Moda aꞌnesiꞌ ve.
REV 1:1 Gizeloniꞌ gamazi mene Oꞌmosoꞌmo Izesu Kilisitoꞌni lo sotoꞌ ogo elebizineꞌ initekumuꞌ nene gizelouve. Aꞌmine initeꞌ elebizineꞌ nene geto sotoꞌ ilidoꞌ o minineꞌ initekumuꞌ mene eze gonoloꞌ ve ngelebizelive lo Oꞌmosoꞌmo elebizineꞌ ve. Neꞌmine ogavo aza leliꞌ gililizave losa gonoloꞌ ve neniꞌ Zohaneꞌni nelebizelesa angeloꞌve nenitoꞌ imiselo aꞌmine gamazi nene do sotoꞌ o-nidineꞌ ve.
REV 1:2 Idoꞌ aꞌmine do sotoꞌ o-nidineꞌ initeꞌ mukiꞌ ninguvoniꞌ nene naza lo sotoꞌ ogo aꞌmine Oꞌmosoꞌmi gamazi Izesu Kilisitoꞌ hize eleꞌ ogo lo sotoꞌ idoꞌ nene naza hize eleꞌ ogosa nogizuve.
REV 1:3 Aꞌmine initeꞌ sotoꞌ ilineꞌ gamene nene mo alite neineꞌ nenako nemuꞌ nene eveneꞌ ma aꞌmine Oꞌmosoꞌmi veletiꞌ gamazi gizuvoniꞌ mene gati ma li-ngimilizave nesi idoꞌ gati li-ngimikevo gilisa aꞌminguꞌ gizuvoniꞌ gamaziloꞌ eꞌmeti gili dalizave nesi nene Oꞌmosoꞌmo noꞌnohoꞌ ize-ngedelineꞌ nenako nemuꞌ nene ngolize izilizaniꞌ akaloꞌ mini milalisave.
REV 1:4 Zohaneꞌ naza Asia misubouꞌ miniꞌmi monaniꞌ monoꞌ mulise seveni lengiꞌ nene luhuvo niteꞌ mene nogize-lengedo tiꞌ lo noluve: Idise mino gomukutiꞌ mino mine do dizeꞌmo alive ezelatikisi idoꞌ aza gizebo o-ledo minaaꞌ neineꞌ moꞌmosiꞌveꞌmi velela minaaꞌ naniꞌ Sikalahuꞌ seveni engitatikisi idoꞌ Izesu Kilisitoꞌ adoꞌ Oꞌmosoꞌmi gamazi lamineꞌ lo sotoꞌ o-ledaaꞌ ive ezeloꞌ gele medelelonidoꞌ o minive gomuꞌ molo-ledo hilingutiꞌ oto minive idoꞌ misubouꞌ misubouꞌ miniꞌmi monaniꞌ guveꞌinesi ve naba mukiꞌ engiꞌ guveꞌinesi ve naba minive ezelatikisi nene adoꞌ nasahiliꞌ ogaꞌ monovosi idoꞌ hongu lo lamino minaaꞌ monovosi nene lengita minivo. Adoꞌ luloꞌve leme neive neꞌmo nene eiꞌ vaniseꞌve hulo hilidotiꞌ nene lihimete apase-ledo
REV 1:6 eiꞌ gizebouꞌ leleꞌmize molo moꞌmosite naba lemosa eiꞌ Oꞌmosoꞌve adoꞌ eiꞌ melehinemuꞌ opoꞌni lo initeꞌ lehize-daaꞌ olonive loloꞌ o-lidive eita nene guvele minivo gizebo o-ledelineꞌ amuzoꞌve nene minevoꞌ minevoꞌ ogo mine do dizo minelive. Mo neꞌmino miniliho.
REV 1:7 Me gililo. Limuso avileloꞌ nene alosa neive. Idoꞌ alineꞌ nene eveneꞌ mukiꞌ nete veꞌinedunuꞌ ningilisave. Adoꞌ bilii losonouꞌ hizi ngolosave inginesi nene ningilisave. Idoꞌ misubouꞌ misubouꞌ miniꞌmi monaniꞌ eveneꞌ zuho ato atoꞌ mukiꞌ ingine eikumuꞌ nene agae agae li ive nama igi minilisave. Neve nene mo lamineꞌ ve. Mo neꞌmino sotoꞌ iliho.
REV 1:8 Guvelesi ve Oꞌmoso adoꞌ initeꞌ mukitoꞌ gizebo ve minaaꞌ amuzoꞌvesi minive idise mino gomukutiꞌ mino mine do dizeꞌmo alive neꞌmo nene tiꞌ lo nolive: Neniꞌ nene initeꞌ mataꞌ mukiꞌ minamanguꞌ gomuꞌ molo mino alingeꞌ ma osuꞌ lilizaniꞌ nene naza ha minevoꞌ minevoꞌ ogo minelove nene nouve.
REV 1:9 Lengiꞌ zuho lengikisi makaꞌ Izesuda giꞌmize mino eiꞌ gizebouꞌ vo holo nonivo goboni mili-lidanguꞌ mino mulumo geni ha eleꞌvoleꞌ ogo geheꞌmo vo minaaꞌ nounive Zohaneꞌ naza Oꞌmosoꞌmi gamazi lo sotoꞌ ogo Izesuꞌ gamazi hize eleꞌ ogo lo sotoꞌ ogo minuvongumuꞌ nene lihime nimi ailani ma Patimosi ve laaꞌ anguꞌ nene mineline li nimiseli hulikevo vo minuvoniꞌ ve.
REV 1:10 Aꞌmida minuvonguꞌ nene Guvelesi veꞌmi gamene ve lo holiseꞌ minaaꞌ nouneꞌ gamene mauꞌ nene Oꞌmosoꞌmi Sikalahuꞌ neꞌmo zatuhoꞌ o-nidivo nouvo meheꞌnelatiꞌ pikuli nolo molaaꞌ neineꞌ neꞌmino nolo nabautiꞌ sotoꞌ ineꞌ nene gamazi
REV 1:11 tiꞌ lo lineꞌ giluve: Gaza ningelineꞌ initeꞌ meve nene bukuuꞌ gizosa Izesuꞌ evenele mulise seveni adoꞌ Eheso numuno ebetamukisi idoꞌ Similina numuno ebetamukisi idoꞌ Pelegamoni numuno ebetamukisi idoꞌ Tiatila numuno ebetamukisi idoꞌ Saladisi numuno ebetamukisi idoꞌ Hiladelehia numuno ebetamukisi idoꞌ Laodikia numuno ebetamukisi nene gizo hulo-ngedezo.
REV 1:12 Neꞌmine lavo naza aꞌmine neꞌmine nolo molo gamazi lo-nimive nene ningelesa mine velepeꞌ izuvoniꞌ ve. Neꞌmine ogo ninguvoniꞌ nene ngolidunuꞌ liliꞌ aniꞌ lamu seveni nene ningo
REV 1:13 aꞌmine lamu neti vovoꞌninguꞌ nene eveneꞌ okoꞌnosi minive ma ninguve. Aꞌmine veꞌmi geneganaꞌve nene haꞌna haꞌna gizeneloꞌ leme pele minineꞌ nene ngolo mino losonoloꞌ nene ngolidunuꞌ liliꞌ aniꞌ initeꞌ leti neꞌmine izekineꞌ minineꞌ ve.
REV 1:14 Idoꞌ godolo zopovo nene mokonoꞌ hego gehepeve elo minavo vele gulo nesi nene oloꞌ gulumo neꞌminosa minineꞌ ve.
REV 1:15 Gizeneꞌve nene ngoli gele vineꞌ initeꞌ olokuꞌ gizi di lamineꞌ ikevo veꞌne veꞌne elo minaaꞌ neineꞌ neꞌmino veꞌne veꞌne elo minineꞌ ve. Idoꞌ noloꞌve nene noso nabaꞌmi gugu neꞌminosa minineꞌ ve.
REV 1:16 Idoꞌ ana zamela nene sonohiꞌ seveni neꞌmine do minineꞌ ve. Idoꞌ veleutiꞌ nene bainati miteꞌ velela geꞌno mehenela geꞌno gohe goloso minineꞌ nene omo hetele minivo golo vele nene hoꞌ amuzo molo silingengeꞌne hulaaꞌ neineꞌ neꞌmine labanaꞌ nene sotoꞌ ogo minineꞌ ve.
REV 1:17 Neꞌmine ogo neivo naza ningo gizeneuꞌ lemo pouꞌ lo ongo hiluve neꞌmine gelo minuvoniꞌ ve. Neꞌmine ogo nouvo ana zame nedunuꞌ nene okoꞌneloꞌ nodo gelo tiꞌ lo lineꞌ ve: Gaza golise gelamozo. Naza nene initeꞌ mataꞌ mukiꞌ minamanguꞌ ganaꞌ minuve alingeꞌ osuꞌ ma lilizanguꞌ nesi nene ha minevoꞌ minevoꞌ ogo minelove nene nouve.
REV 1:18 Minevoꞌ minevoꞌ ogaꞌ nemeni damenisi nene nouve. Gomuꞌ nene naza hiluvoniꞌza aizo, idise nene naza gohi veꞌne gizo minevoꞌ minevoꞌ ogovoꞌ nouve. Idoꞌ neniꞌ neve nene hili vilizangumuꞌ akahe siꞌzaaꞌ kiiꞌ nesi idoꞌ hilisa minaniꞌ ebekutiꞌ oti vilizangumuꞌ akahe siꞌzaaꞌ kiiꞌ nesi nene nenikovoꞌ do nouve.
REV 1:19 Nemuꞌ nene gaza neꞌmine olosane. Gaza idise sotoꞌ o neineꞌ initekisi idoꞌ alingeꞌ sotoꞌ olosa neineꞌ initekisi nene ningelesange. Aꞌmine initeꞌ nene ningosa luhuvo gizezo.
REV 1:20 Sunoꞌ minineꞌ initeꞌ adoꞌ aꞌne zamela nene sonohiꞌ seveni do nouvo ningaineꞌ neꞌmi monovo nesi idoꞌ ngolidunuꞌ liliꞌ aniꞌ lamu seveni minineꞌ neꞌmi monovo nesi nene neꞌmino neive: Aꞌmine sonohiꞌ seveni nene eveneꞌne mulise seveni neti angeloꞌnidoꞌ nene medeli avazaha neꞌmine nene nizave. Idoꞌ aꞌmine lamu seveni nene aꞌmine eveneꞌne mulise seveniloꞌ nene medeli avazaha neꞌmine nene nizave.
REV 2:1 Neꞌmine losa Izesuꞌ tiꞌ lo lo-nidineꞌ ve: Eheso numuno ebekuꞌ eveneꞌne muliseꞌmi angeloliꞌmo engiꞌ lo-ngemelineꞌ gamazi nene luhuvo tiꞌ lo gizezo: Aꞌne zamela sonohiꞌ seveni do mino lamu seveni neti vovoꞌninguꞌ mono minaaꞌ nouve neꞌmo nene gamazi tiꞌ lo noluve:
REV 2:2 Lengiꞌ monovotine nene mo ningo gele nouve. Adoꞌ amuzo mili monoꞌ monovoloꞌ eꞌmeti mini mulumo geni eleꞌvoleꞌ igi gihiꞌmi vi minaaꞌ naniꞌ nemuꞌ nene mo ninge minaaꞌ nouve. Idoꞌ eveneꞌ golosomuꞌ gili goseleꞌ igaꞌ naniꞌ nesi idoꞌ aposolo gihile minamaha aposolo none laaꞌ avemuꞌ nesi nene lingine monovoꞌine izeꞌ mili ningi sozaloꞌ ve minaniꞌ monovoꞌine nene mo ningi di sotoꞌ igi gilaniꞌ nemukisi nene mo ningo gele nouve.
REV 2:3 Idoꞌ lingine nenikumuꞌ ve li mulumo geni amuzo mili gihiꞌmi vi minaaꞌ nanguꞌ ahuꞌ lamaaꞌ naaniꞌ nemukisi nene mo ningo gele nouve.
REV 2:4 Ne neiha lengita monovo ma neineꞌ nene mo edamive lo gele nouve. Adoꞌ lutine idise nimaaꞌ naniꞌ nene ganaꞌ lutine vauve ili nimi minaaꞌ aniꞌ votigileloꞌ nene nimisaꞌmave.
REV 2:5 Gomuꞌ monovo lamineꞌ igi mili minaaꞌ aniꞌ nene huli mo limi ingikeve. Aꞌmine gomuꞌ monovotinemuꞌ nene gohi gililo. Lutine di velepeꞌ izii ganaꞌ igaꞌ aniꞌ suno nene gohi igi mili minilo. Neꞌmine amilizaniꞌ nene naza ogo lengitoꞌ medelo minineꞌ lamutine nene moꞌmosiꞌvelotiꞌ do hulolosuve. Lutine ma di velepeꞌ izamilizaniꞌ nene neꞌmine olosuve losa nene nolo-lingiduve.
REV 2:6 Ne neiha lengita monovo ma neꞌmino neineꞌ nene lamineꞌ ve. Naza goseleꞌ gehepeve oko minaaꞌ nouvoniꞌ monovo adoꞌ Nikolaoꞌni eꞌmetaaꞌ navete igaꞌ naniꞌ monovo nemuꞌ nene linginesi goseleꞌ gehepeve iki minaaꞌ naave.
REV 2:7 Gatine ngoloꞌ live ni ma nene Oꞌmosoꞌmi Sikalahuꞌ neꞌmo eze evenele mulise minikaꞌ minikaꞌ anguꞌ nolo-ngimineꞌ gamazi meve nene gililo. Monoliꞌmi lovouꞌ Satani ivileꞌ ilizave nene gele ngemekuvo ingine neve nene Oꞌmosoꞌmi miꞌve paladisi za zuhouꞌ vi mini minevoꞌ minevoꞌ ngemeni dameni do otuho-ngedelineꞌ zaꞌveꞌmi gihile nene ili nalisave.
REV 2:8 Neꞌmine losa Izesuꞌ gohi ma tiꞌ lo lo-nidineꞌ ve: Idoꞌ Similina numuno ebekuꞌ eveneꞌne muliseꞌmi angeloliꞌmo engiꞌ lo-ngemelineꞌ gamazi nene luhuvo tiꞌ lo gizezo: Initeꞌ mataꞌ mukiꞌ minamanguꞌ ganaꞌ minuve alingeꞌ aꞌmine initeꞌ osuꞌ lilizanguꞌ nene minevoꞌ minevoꞌ ogo minelove adoꞌ mo hiluvoniꞌza gohi veꞌne gizo otuve naza nene gamazi tiꞌ lo noluve:
REV 2:9 Lengiꞌ goboni mili-lingidi nizavo geni gihiꞌmi vi nizaniꞌ nemukisi idoꞌ gohoꞌ gahaliꞌ nizaniꞌ nemukisi nene mo gele nouve. Idoꞌ ne neiha mo monokuꞌ heneni ve liliꞌ ikeve. Idoꞌ Oꞌmosoꞌmi evenele Zuda ve none laaꞌ naaha Oꞌmosoꞌmi evenele gihile minami Sataniꞌmi evenele mulise nizaniꞌ nete lengiꞌ divi lediviꞌ i-lingidaaꞌ nangumukisi nene mo gele nouve.
REV 2:10 Idoꞌ mulumo geni gihi-lingidilisa navo lingine mo gihilisa nangumuꞌ nene mo golisesi gilamilo. Lingine gililo. Ve goloso neꞌmo nene lengemenguꞌ molo do ningelesa eveneꞌ ma do ote-ngedavo ingine lengikutiꞌ eveneꞌ linge ma nene nalaꞌ numunguꞌ huli-lingidilisa naaze. Mulumo geni initeꞌ nene lengitoꞌ sotoꞌ ogo neivo gamene liꞌnibe gamene teni aꞌneꞌminevoꞌ nene mineleseive. Ne neiha nenitoꞌ giꞌmizi minilizangumuꞌ lingibili hililisa ilizangumukisi gili huli nenitoꞌ nene ha giꞌmizi gilikovoꞌ li minilo. Neꞌmine ma ilizaniꞌ neꞌmi meniꞌve nene naza minevoꞌ minevoꞌ minaaꞌ lengemeni nene lehize-lengedelesuve.
REV 2:11 Gatine ngoloꞌ live ni ma nene Oꞌmosoꞌmi Sikalahuꞌ neꞌmo eze evenele mulise minikaꞌ minikaꞌ anguꞌ nolo-ngimineꞌ gamazi meve nene gililo. Ve ma ingine monoliꞌmi lovouꞌ Satani ivileꞌ ilizave neve nene gamene nabala monoꞌ gilamave gohi hililizanguꞌ nene gohi hilamavo aꞌmine gohi helaaꞌ neꞌmo nene ma ngeleꞌmize goloso amoloseive.
REV 2:12 Neꞌmine losa Izesuꞌ gohi tiꞌ lo lo-nidineꞌ ve: Idoꞌ Pelegamoni numuno ebekuꞌ eveneꞌne muliseꞌmi angeloliꞌmo engiꞌ lo-ngemelineꞌ gamazi nene luhuvo tiꞌ lo gizezo: Adoꞌ bainati miteꞌ velela geꞌno mehenela geꞌno gohe goloso minineꞌ do minuve neꞌmo nene tiꞌ lo noluve:
REV 2:13 Lingine minaaꞌ naniꞌ ebetineꞌmi monovoꞌve nene mo gele nouve. Ebeꞌ goloso Sataniꞌmi moꞌmosiꞌve gehepeve minineꞌ ebeꞌveuꞌ nene nizave lo mo ningo gele nouve. Ne neiha neniꞌ guliveꞌne lengita neineꞌ nene di giliꞌ li mini neniꞌ hulo-nedamo gamaziꞌne hize eleꞌ ogo lo sotoꞌ ogaꞌ ive Adipasiꞌni bili hilaniꞌ gameneukisi lingine nenikumuꞌ gili eleꞌvoleꞌ i minaniꞌ mamuꞌ nene neꞌmine ma osaꞌmune li ataize lamave. Aꞌmine ve nene adoꞌ lengiꞌ vovotinguꞌ Sataniꞌmo minevoꞌ alevoꞌ ogaꞌ neineꞌ ebeta gehepeve nene neivo bili hilaniꞌ ve.
REV 2:14 Ne neiha lengita initeꞌ linge ngomo ma neineꞌ nene edamive lo gele nouve. Aꞌmine nene eveneꞌ linge ma Balaamuꞌ gamene gomuta apize ngimineꞌ monovo ha di minaaꞌ nave nene lengikuꞌ ma nizave. Aꞌmine monovo nene adoꞌ Balaamuꞌ neꞌmo guvelesi ve Balakiꞌni aka elebizavo aza Isilaeleꞌ aleve ngimimiseꞌ ivo ingine soza oꞌmoso ngimaniꞌ nosoꞌ niteꞌ nisa veneꞌ vemohoꞌ gopoꞌ napa ingaaꞌ aniꞌ ve.
REV 2:15 Idoꞌ aꞌmineꞌmine ogo lengikuꞌ nene eveneꞌ linge ma Nikolaoꞌni eꞌmetaaꞌ avete apizi ngimaniꞌ monovo goloso di minaaꞌ nave nene nizave.
REV 2:16 Nemuꞌ nene lingine lutine di velepeꞌ izilo. Neꞌmine ma amilizaniꞌ nene naza lengita geto ogo hetelo veꞌneutiꞌ bainati miteꞌ omo hetele neineꞌ nedunuꞌ nene aꞌmine monovo golosoloꞌ eꞌmeti minave nene lovo o ngemelesuve.
REV 2:17 Gatine ngoloꞌ live nii ma nene Oꞌmosoꞌmi Sikalahuꞌ neꞌmo eze evenele mulise minikaꞌ minikaꞌ anguꞌ nolo-ngimineꞌ gamazi meve nene gililo. Ve ma ingine monoliꞌmi lovouꞌ Satani ivileꞌ ilizave nene naza Okulumokutiꞌ nosoꞌ niteꞌ haleko minaaꞌ neineꞌ mana nene ma ngemekuvo nalisave. Idoꞌ ma nene geheni mokonoꞌ ngemelesuve. Aꞌmine geheniloꞌ nene gulive gosohoꞌ minekaꞌ minekaꞌ ineꞌ ngemekuvo dalizave netevoꞌ nene aꞌmine gulivemuꞌ nene sunoꞌ gili minilisave.
REV 2:18 Neꞌmine losa Izesuꞌ tiꞌ lo lo-nidineꞌ ve: Tiatila numuno ebekuꞌ eveneꞌne muliseꞌmi angeloliꞌmo engiꞌ lo-ngemelineꞌ gamazi nene luhuvo tiꞌ lo gizezo: Oꞌmosoꞌmi gipele naza veꞌne gulo nene oloꞌ gulumo neꞌminesi mino gizeꞌnelotiꞌ nene ngoli gele vineꞌ initeꞌ bolonisi neꞌmino veꞌne veꞌne elo minineꞌ gizeꞌnesi minuve naza nene tiꞌ lo noluve:
REV 2:19 Lengiꞌ igi mili igaꞌ naniꞌ monovotinesi idoꞌ lutine ngimaaꞌ monovotinesi idoꞌ nenita gili eleꞌvoleꞌ igaꞌ naniꞌ monovotinesi idoꞌ hize eleꞌ ogaꞌ gono lamineꞌ di minaaꞌ monovotinesi idoꞌ mulumo geni eleꞌvoleꞌ igi gihiꞌmi vi minaaꞌ naniꞌ monovotinesi nizangumuꞌ nene naza mo gele nouve. Gelo mino alingeꞌ igi mili igaꞌ naniꞌ monovotine neꞌmo nene gomuꞌ igi mili igaꞌ aniꞌ monovotine nene ivileꞌ ogo lamineꞌ neingumuꞌ nene mo gele nouve.
REV 2:20 neꞌmino mo gele nouvoniꞌza lengita monovo ma neineꞌ nene mo edamive lo gele nouve. Aꞌmine monovo nene adoꞌ veneꞌ Zezabeleꞌ aza polohete nouve lo neniꞌ gelekeleꞌ eveneꞌne ma nene ngeleꞌmize gopo ogo veneꞌ vemohoꞌ gopoꞌ napa ingiꞌmi monaaꞌ monovolokisi idoꞌ soza oꞌmoso ngimaniꞌ nosoꞌ niteꞌ naaꞌ monovolokisi nene apize ngemaaꞌ neineꞌ veneꞌ neve nene ningi goseleꞌ i-dami ningi mati-daaꞌ naangumuꞌ nene noluve.
REV 2:21 Idoꞌ aꞌmine neꞌmino gopo monaaꞌ monovomuꞌ nene lulo do velepeꞌ izelihe lo lihime emamo ninge mate-miko gamene imuha lulo ma do velepeꞌ izelesa gelamive.
REV 2:22 Aizoo, me giliꞌnalo. Eiꞌ neve nene mo mulumo alumo gili ingaaꞌ initekuko nene mo ongokelive losa do nohulo-duve. Idoꞌ ezesi makaꞌ lihime daaꞌ niilizave ingine ezesi igaꞌ aniꞌ monovoꞌinemuꞌ luꞌine ma di velepeꞌ izamilizaniꞌ nene inginesi mulumo gono naba gihilizadoꞌ do hulo-ngedelesuve.
REV 2:23 Idoꞌ eiꞌ izipahala zuho nene mo ngebele geseꞌ okuvo hililisave. Neꞌmine okuvo neniꞌ eveneꞌne mulise mukiꞌ nete nenikumuꞌ nene gilikevo neniꞌ neve nene eveneꞌ luꞌninguꞌ gaꞌninguꞌ minineꞌ initekumuꞌ viseꞌ ogo ningo gelaaꞌ ive ve li gililisave. Ee, lingine igi mili igaꞌ adoꞌ gehepevevoꞌ nene golo hizo hamo hamoꞌ meni lengemelesuve.
REV 2:24 Idoꞌ neniꞌ eveneꞌne Tiatila numuno ebekuꞌ nizangutiꞌ linge ma lingine aꞌmine veneliꞌmo apize lengemaaꞌ neineꞌ gamaziloꞌ ma gili dami idoꞌ eveneꞌ malite SAtaniꞌmi monovo danava luhiseꞌve ve laaꞌ naniꞌ monovolokisi nene gili damaaꞌ nave lengiꞌ nene geni gono gohi ma gehe-lengedamolosuze.
REV 2:25 Asi idise lingine ma di nizaniꞌ monotoꞌ nene ha di giliꞌ li di minilo. Neꞌmine i nizavosa tineꞌ molo aloniꞌ nene mo lamineꞌ oloseive lo neevoꞌ nene nolo-lingiduve.
REV 2:26 Ve ma ingine monoliꞌmi lovouꞌ Satani ivileꞌ igi neniꞌ sunoloꞌ mudise eꞌmeti igi mili nizavo gamene osuꞌ lilineꞌ nene naza meꞌnehidatiꞌ do nouvoniꞌ amuzo neꞌmine nene Oꞌmosomuꞌ gilamaniꞌ eveneꞌ zuho ato atotoꞌ gizebo i-ngidilizaniꞌ amuzo nene ngemelesuve. Idoꞌ neꞌmino ngemekuvo ingine aꞌmine Oꞌmosomuꞌ gilamave ngibililizaniꞌ gavoso ainidunuꞌ liliꞌ aniꞌ nene di minisa amuzo mili gizebo i-ngidi mini misubo somo ngibili itaaꞌ naniꞌ neꞌmine igi aꞌmine aleve nene iziviꞌ itiviꞌ i-ngidilisave. Idoꞌ ma nene nedengaꞌ holukatiꞌ dizaaꞌ neineꞌ sonohiꞌ ganangomeꞌ nene ngemelesuve.
REV 2:29 Gatine ngoloꞌ live nii ma nene Oꞌmosoꞌmi Sikalahuꞌ neꞌmo eze evenele mulise minikaꞌ minikaꞌ anguꞌ nolo-ngimineꞌ gamazi meve nene gililo.
REV 3:1 Neꞌmine losa Izesuꞌ tiꞌ lo lo-nidineꞌ ve: Saladisi numuno ebekuꞌ eveneꞌne muliseꞌmi angeloliꞌmo engiꞌ lo-ngemelineꞌ gamazi nene luhuvo tiꞌ lo gizezo: Oꞌmosoꞌmi sikalahuꞌ sevenisi do mino sonohiꞌ seveni do minuve naza nene tiꞌ lo noluve: Lingine igi mili minaaꞌ naniꞌ monovotine nene mo ningo gele nouve. Adoꞌ lutine nene mo oto minevoꞌ alevoꞌ o neive likevo nemuꞌ guvetine nene nomonineꞌza lutine nene hele vineꞌ neingumuꞌ likeniꞌ neivo mo ningo gele nouze.
REV 3:2 Upuhoꞌ igi otilo. Lengita monotine linge nene ha neiha mo helelidoꞌ o neineꞌ nene hize eleꞌ igi di ngi lilo. Nanitekumuꞌ ve. Lingine igi mili igaꞌ naniꞌ monovotine nene neniꞌ Oꞌmosoꞌneꞌmo ningineꞌ nene eiꞌ gele neineꞌ makiloꞌ olihe vo damineꞌ nemuꞌ nene mo ninge nouve.
REV 3:3 Nemuꞌ nene li-lingimikevo ganakutiꞌ gili daniꞌ monokumuꞌ nene gohi gatine gilisa aꞌmidoꞌ eꞌmeti mini lutine di velepeꞌ izilo. Idoꞌ neꞌmine ami upuhoꞌ igi ma otamilizaniꞌ nene naza gumineloꞌ ve alizaniꞌ gamenemuꞌ gilamavo igaꞌ naaniꞌ neꞌminosa nene alosuve. Lingine nene naza aloniꞌ gamenemuꞌ ma gilami nizavosa nene lengita ogo hetelelesuve.
REV 3:4 Ne neiha Saladisi numuno ebetinguꞌ nene eveneꞌ linge ngomo ma nizaniꞌ nene geneganaloꞌ goloduvo elaaꞌ neineꞌ neꞌmino okoꞌnida goloso niteꞌ dizo giꞌmizamive ma nizaniꞌ ingine nene mo lisiheꞌ i nizaniꞌ nenako goloduvosi nomineꞌ mokonoꞌ initekovoꞌ ngili minavo nenikisi makaꞌ monelesune.
REV 3:5 Aꞌmineꞌmine igi ve ma monoliꞌmi lovouꞌ Satani ivileꞌ ilizave nene geneganaꞌine mokonokovoꞌ ngili minikevo minevoꞌ minevoꞌ ngemeni dameni dalizaveti guliveꞌine minineꞌ buku neutiꞌ engiꞌ guliveꞌine nene gilite hulamolosuve. Asi meꞌnehi velelokisi idoꞌ angeloꞌveliti veꞌnidokisi nene neniꞌ eveneꞌne nizave lo engiꞌ guliveꞌine nene lo sotoꞌ olosuve.
REV 3:6 Gatine ngoloꞌ live ni ma nene Oꞌmosoꞌmi Sikalahuꞌ neꞌmo eze evenele mulise minikaꞌ minikaꞌ anguꞌ nolo-ngimineꞌ gamazi meve nene gililo.
REV 3:7 Neꞌmine losa Izesuꞌ tiꞌ lo lo-nidineꞌ ve: Hiladelehia numuno ebekuꞌ eveneꞌne muliseꞌmi angeloliꞌmo engiꞌ lo-ngemelineꞌ gamazi nene luhuvo tiꞌ lo gizezo: Oꞌmosoꞌmi emeni damenisi mino monovo gihile neꞌmi meleho minuve guvelesi ve Davidiꞌ gizebo ineꞌ numuno ebeꞌveꞌmi avazaha minineꞌ numuno ebeliꞌmi kiiꞌve do minuve adoꞌ akahe siꞌzekelodoꞌ nene ve malitesi ma gizamilizadoꞌ o minuve adoꞌ akahe gizekelodoꞌ nene ve malitesi ma siꞌzamilizadoꞌ o minuve naza nene tiꞌ lo noluve:
REV 3:8 Lingine igi mili igaꞌ naniꞌ monovotine nene mo ningo gele nouve. Me gililo. Lengiꞌ vilizangumuꞌ akahetine nene mo do godeko lehize-lengede nouve. Aꞌmine akahe nene ve malitesi ngeli mo gizamilisave. Idoꞌ lingine amuzo di nizaniꞌ nene ha ngomo neingumuꞌ naza ningo gelo lingine neniꞌ gamaziꞌne nene gili diivoꞌ mini neniꞌ guliveꞌne di minangumuꞌ ataize mo lamangumukisi nene ningo gele nouve.
REV 3:9 Idoꞌ gililo. Ve ma ingine Sataniꞌmi muliseꞌveutiꞌ mini Oꞌmosoꞌmi evenele Zuda ve minilizadoꞌ lisiheꞌ i minamaha Zuda ve none laaꞌ ave nene naza lokuvo ingine igi lengiꞌ gizedinguꞌ gubiꞌ izi lingimisa neniꞌ luꞌne lengeme nouvoniꞌ nemuꞌ nene mo ningi gililisave.
REV 3:10 Neniꞌ gamazi lo-lingiduvoniꞌ nene gili disa mulumo geni eleꞌvoleꞌ igi ha gihiꞌmi vi minaniꞌ nenako nemuꞌ nene me misubouꞌ aleve lutine do ningo misubo mukita lengemenguꞌ sotoꞌ o-lengedelesa neineꞌ nene sotoꞌ ilineꞌ gameneukisi lengiꞌ nene alete molo-lengedo minelesuve.
REV 3:11 Naza nene mo geto alosuze. Eveneꞌ malite menitine nene lengitoꞌ medeli dikelizaze. Monotine ma di nizaniꞌ nene mo di giliꞌ lisa di minilo.
REV 3:12 Ve ma ingine monoliꞌmi lovouꞌ Satani ivileꞌ ilizave nene neniꞌ Oꞌmosoꞌneꞌmi kekeize lo neineꞌ numuꞌveuꞌ nene za langise neꞌmine minilizave lo ngeleꞌmize molokuvo aꞌminguꞌ mini gohi ma heta limi vamilisave. Idoꞌ vamii nizavo engitoꞌ nene neniꞌ Oꞌmosoꞌneꞌmi gulivesi gizo idoꞌ aꞌmine Oꞌmosoꞌneꞌmi numuno ebeꞌve adoꞌ Okulumokutiꞌ neniꞌ Oꞌmosoꞌnelatiꞌ lemo alineꞌ Zelusalemi gosohoꞌ neꞌmi gulivesi nene gizo idoꞌ neniꞌ guliveꞌne adoꞌ guliveꞌne gosohoꞌ nesi nene engitoꞌ gizelesuve.
REV 3:13 Idoꞌ gatine ngoloꞌ live ni ma nene Oꞌmosoꞌmi Sikalahuꞌ neꞌmo eze evenele mulise minikaꞌ minikaꞌ anguꞌ nolo-ngimineꞌ gamazi meve nene gililo.
REV 3:14 Neꞌmine losa Izesuꞌ tiꞌ lo lo-nidineꞌ ve: Laodikia numuno ebekuꞌ eveneꞌne muliseꞌmi angeloliꞌmo engiꞌ lo-ngemelineꞌ gamazi nene luhuvo tiꞌ lo gizezo: Gamaziꞌne do gihile izaakovoꞌ ogaꞌ uve Oꞌmosoꞌmi gamazi hize eleꞌ ogo lo sotoꞌ ogaꞌ uve gihile nenitoꞌ gili medelilizadoꞌ o minuve adoꞌ Oꞌmosoꞌmo do sotoꞌ ineꞌ initeliti izeꞌnibo minuve naza nene tiꞌ lo noluve:
REV 3:15 Lingine igi mili minaaꞌ naniꞌ monovotine nene mo ningo gele nouve. Adoꞌ lingine monokumuꞌ gilikevo muꞌmusiꞌ otiꞌ amotiꞌ idoꞌ hepeꞌ lotiꞌ lamotiꞌ ogaꞌ neingumuꞌ nene mo ningo gele nouze. Lingine monokumuꞌ gilavo muꞌmusiꞌ gehepeve ogavo minilizahe idoꞌ hepeꞌ lize neivo minilizahe ilizaniꞌ neꞌmo nene mo lamineꞌ o neive lo gele nouve.
REV 3:16 Lingine monokumuꞌ gilavo muꞌmusiꞌ otiꞌ amotiꞌ hepeꞌ lotiꞌ lamotiꞌ ogaꞌ neivo olusoꞌ gotoꞌ nizaniꞌ nemuꞌ nene mo muso gaꞌne dizikenako muso vele hulo-lengedelesuve.
REV 3:17 Lingine tiꞌ li laaꞌ nave: Laza nene mo heneni vaiꞌ do molosa heneni aleve mino initeꞌ matakumuꞌ viseꞌ olonidoꞌ minamune. Neꞌmine laaꞌ naha lingine neve nene mo mulumotine gelelonidoꞌ gehepeve mini monokuꞌ gohoꞌ gahaliꞌ liliꞌ igi lutineꞌmi vele like vineꞌ mini okodidoꞌ initeꞌ nomivo bakaꞌ minaaꞌ naaniꞌ neꞌmine igi monotine nomineꞌ minaaꞌ naaniꞌ nemuꞌ nene ma gilamave.
REV 3:18 Neꞌmine igi nizaniꞌ nemuꞌ nene naza gatine do tiꞌ lo ma nolo-lingimuve: Lingine monota heneni ve gihile minilizangisi nenitatiꞌ nene olokuꞌ gizi di lamineꞌ aniꞌ ngoli nene meni hizilo. Idoꞌ okode nene bakaꞌ sotoꞌ o neivo evenelite ningilizaniꞌ nene lovozo helalone li okodidoꞌ initeꞌ ngili minilizangisi nenitatiꞌ genegana mokonoꞌ nene meni hizi ngilalo. Idoꞌ lutineꞌmi vele nene ningelingisi aꞌminguꞌ hilalizaniꞌ malasini nenitatiꞌ meni hizi hilalo.
REV 3:19 Naza luꞌne ngeme nouvoniꞌ aleve mukiꞌ nene veꞌine zopovo siꞌze-ngedo ngelemo lihime ngemaaꞌ nouze. Nemuꞌ nene lingine monokumuꞌ nene gilingili igi minisa lutine di velepeꞌ izilo.
REV 3:20 Gililo. Naza nene lutineꞌmi gatedoꞌ nene ote mino dizo alosa okohoꞌ okohoꞌ izo nouve. Idoꞌ lengikutiꞌ malite noꞌne gili akahe ma siꞌzi-nidilizaniꞌ nene naza nizanguꞌ dizekuvo nosoꞌ niteꞌ nenikisi engikisi makatoꞌ nalosune.
REV 3:21 Ve ma ingine monoliꞌmi lovouꞌ Satani ivileꞌ ilizave nene naza gele ngemekuvo naza Satani ivileꞌ oko meꞌnehosi makaꞌ moꞌmosiꞌvela evenetoꞌ gizebo o nosineꞌ neꞌmino ingine nenikisi makaꞌ moꞌmosiꞌnela evenetoꞌ gizebo ogo minelesune.
REV 3:22 Gatine ngoloꞌ live ni ma nene Oꞌmosoꞌmi Sikalahuꞌ neꞌmo eze evenele mulise minikaꞌ minikaꞌ anguꞌ nolo-ngimineꞌ gamazi meve nene gililo.
REV 4:1 Neꞌmine gamazi nene lo-nemo osuꞌ lavo nelotiꞌ ninguvoniꞌ nene Okulumokuꞌ akahe nene gode neivo ninguve. Neꞌmino ninge nouvo aꞌmingutiꞌ gomuꞌ giluvoniꞌ nolo adoꞌ pikuli nolo gele vineꞌ nolo maꞌmo nene tiꞌ lo lo-nimive: Gaza nene meloꞌ dizo ano. Neꞌmine oganivo naza idise nelotiꞌ alingeꞌ sotoꞌ okaꞌ okaꞌ ilineꞌ initekumuꞌ nene gelebizelove.
REV 4:2 Mo neꞌmine nolineꞌ velesi Oꞌmosoꞌmi Sikalahuꞌ neꞌmo zatuho o-nidivo mino Okulumokuꞌ ninguvoniꞌ nene guveꞌinesi vetevoꞌ minaaꞌ aniꞌ moꞌmosiꞌ nene neivo idoꞌ aꞌminguꞌ nene eveneꞌ ma mitoꞌ neivo ninguve.
REV 4:3 Aꞌmine moꞌmositoꞌ miniveꞌmi emeni dameniꞌve nene meniꞌve dizo minineꞌ geheni zasipalotikisi idoꞌ koneliani geheni gulehetotikisi silingengeꞌni hulaaꞌ neineꞌ neꞌminosa minineꞌ ve. Idoꞌ aꞌmine moꞌmositoꞌ vodo vodo ogo giniꞌ huzebe hize minineꞌ nene veꞌne veꞌne elaaꞌ ineꞌ geheni emeladi neꞌminosa nene zavile elo minineꞌ ve.
REV 4:4 Idoꞌ aꞌmine Guvelesi veꞌmi moꞌmosiꞌveloꞌ vodo vodo ogo moꞌmosiꞌ gohi tuvedi foꞌa (24) minavo aꞌmine moꞌmositoꞌ nene gizebo ve tuvedi foꞌa (24) genegana mokonokovoꞌ ngili mini godoꞌnidoꞌ initeꞌ ma kuvanadi neꞌmine ngolidunuꞌ liliꞌ aniꞌ gihikaniꞌ nene mitoꞌ minaniꞌ ve.
REV 4:5 Idoꞌ Guvelesi veꞌmi moꞌmosiꞌvelotiꞌ nene goꞌ paꞌna paꞌna neivo nolo nolo molo goꞌ lete lete lo minineꞌ ve. Idoꞌ aꞌmine Guvelesi veꞌmi moꞌmosiꞌ neꞌmi velela nene oloꞌ liviꞌ seveni adoꞌ Oꞌmosoꞌmi Sikalahuꞌve seveniloꞌ medeli minaniꞌ nene liviꞌ liviꞌ igi minaniꞌ ve.
REV 4:6 Idoꞌ aꞌmida initeꞌ ma minineꞌ nene adoꞌ guvo noso ngalasidunuꞌ liliꞌ aniꞌ gele vineꞌ mo kilia gehepeve o minineꞌ initeꞌ neꞌmine nene minineꞌ ve. Idoꞌ olusokuꞌ Guvelesi veꞌmi moꞌmosiꞌveloꞌ vodo vodo ogo nene eleꞌvoleꞌ igi veꞌinesi ha minaaꞌ naniꞌ initeꞌ setaꞌve setaꞌve nene ma minaniꞌ ve. Idoꞌ okoꞌineꞌmi velelasi mehenelasi nene veꞌine guloꞌmovoꞌ nene bize minineꞌ ve.
REV 4:7 Aꞌmine veꞌinesi ha minaaꞌ aniꞌ initekutiꞌ ma neve nene laioni gulo gele vineꞌ minineꞌ ve. Idoꞌ ezelotiꞌ minive nene bulumakaꞌ neꞌmine gele vineꞌ minineꞌ ve. Idoꞌ ezelotiꞌ minineꞌ initeꞌ nene eveneꞌ gote vete gele vineꞌ neꞌminesi minineꞌ ve. Idoꞌ aꞌmidotiꞌ neve nene nolise naba patelo nomonineꞌ emeni damenisi minineꞌ ve.
REV 4:8 Idoꞌ aꞌmine eleꞌvoleꞌ igi veꞌinesi ha minaaꞌ naniꞌ initeꞌ setaꞌve setaꞌve ingine mukiꞌ hamo hamoꞌ nene holokeꞌneꞌine sigisi sigisisi minaniꞌ ve. Idoꞌ okoꞌine mukitoꞌ adoꞌ holokeꞌneꞌine luloukosi hetasi nene veꞌine guloꞌmovoꞌ bize minineꞌ ve. Idoꞌ gamene gamene goꞌ liha litiꞌmuso iziha mo matesi ami tiꞌ li li minaaꞌ nave: Guvekasi ve Oꞌmoso amuzoka vaiꞌ golososi minanive, gomuꞌ mino idise mino mine do dizeꞌmo alinive geiꞌ nene mo kekeize atoliꞌmine gehepeve losa nane.
REV 4:9 Idoꞌ aꞌmine eleꞌvoleꞌ igi veꞌinesi ha minaaꞌ naniꞌ initelite neꞌmine li aꞌmine moꞌmosiꞌveloꞌ mino minevoꞌ minevoꞌ minaaꞌ neive di hozi li-di opoꞌni li isaaꞌ neve li-daniꞌ gameneloꞌ gameneloꞌ nene
REV 4:10 aꞌmine gizebo ve tuvedi foꞌa (24) ingine nete nene moꞌmosiꞌveloꞌ miniveꞌmi velela nene limi ingi mini aꞌmine minevoꞌ minevoꞌ minaaꞌ ive nene opoꞌni lisa ingine di minaniꞌ amuzoꞌmi makiꞌve minineꞌ initeꞌ kuvanadi angiliꞌine nene apasi moꞌmosiꞌ minineꞌ velela milisa tiꞌ li laaꞌ nave:
REV 4:11 Guvetesi ve mino Oꞌmosote minanive geiꞌ nene initeꞌ mataꞌ mukiꞌ do sotoꞌ aineꞌ nenako ee, sotoꞌ igi minaniꞌ nene geiꞌ lukalokovoꞌ sotoꞌ igi minaniꞌ nenako neꞌmo geiꞌ nene aꞌmine amuzokamuꞌ gopoꞌni lo do hozi lo-gedelonidoꞌ nene mo lisiheꞌ o nane.
REV 5:1 Idoꞌ nelotiꞌ ma ninguvoniꞌ nene aꞌmine moꞌmosiꞌveuꞌ miniveꞌmi ana zamelatiꞌ nene pepa avile haꞌna haꞌnaloꞌ luhuvo velela gizi mehenela gizikaniꞌ buku nene haza vete siꞌzi gatikelizave li di gangi nalaꞌ seveni izi humo izikaniꞌ nene do neivo ninguve.
REV 5:2 Idoꞌ angeloꞌ amuzoꞌvesi minive maliꞌmo vise naba lo tiꞌ lo nolivo ninguve: Eveneꞌ ma zaho maꞌmo buku meꞌmi nalaꞌve nene huko apaso gatelidoꞌ lisiheꞌ o minosa neꞌmine ilive.
REV 5:3 Neꞌmine lineꞌza Okulumokuꞌ nehe idoꞌ misubouꞌ nehe idoꞌ misubo lulouꞌ nehe eveneꞌ ma aꞌmine buku siꞌzi ningilizaniꞌ amuzoꞌinesi minave nene mo kekeꞌ hamokisi ma minamaniꞌ ve.
REV 5:4 Idoꞌ aꞌmine buku siꞌzi ningilizave nene hamokisi ma sotoꞌ amavo nemuꞌ nene naza ive nabaloꞌ goloso uvoniꞌ ve.
REV 5:5 Neꞌmine nouvo gizebo ve mautiꞌ hamoliꞌmo nene tiꞌ lo lo-nimive: Gelezo. Zudaꞌ aꞌvopilemoꞌ zuhoutiꞌ amuzo ve adoꞌ laioni gulo neꞌmine gele vive Davidiꞌ zuhoutiꞌ Davididoꞌ medelo mino eiꞌ moꞌmosiꞌve dave neꞌmo nene monoliꞌmi lovouꞌ vuni gehepeve oganako aꞌmine bukuꞌmi nalaꞌve seveni nene huko apaselidoꞌ lisiheꞌ o neize. Gaza nene ive amozo.
REV 5:6 Neꞌmine lavo sipisipi angale ma mo bili hilikeniꞌ gele vineꞌ nene adoꞌ gizebo ve vodo vodo igi minikevo idoꞌ eleꞌvoleꞌ igi veꞌinesi hazavoꞌ nizaniꞌ initeꞌ nene vodo vodo igi minikevo Guvelesi veꞌmi moꞌmosiꞌve mininguꞌ gehepeve nene ote neivo ninguve. Aꞌmine nene godololoꞌ komuꞌve seveni mino idoꞌ vele gulo seveni mino ineꞌ ve. Aꞌmine vele gulo seveni neve nene Oꞌmosoꞌmi Sikalahuꞌ seveni misubo mukikuꞌ ngimisele hulineꞌ ma nene minave.
REV 5:7 Aꞌmine sipisipi angale neꞌmo nene ogo aꞌmine moꞌmosikuꞌ miniveꞌmo ana zamela buku do minineꞌ ma nene dave.
REV 5:8 Idoꞌ aꞌmine buku nene do anauꞌ ogavo aꞌmine eleꞌvoleꞌ igi veꞌinesi ha minaaꞌ naniꞌ initeꞌ setaꞌve setaꞌve nesi idoꞌ gizebo ve tuvedi foꞌa (24) nesi nene aꞌmine sipisipi angaleꞌmi velela nene limi goꞌine hizi inganiꞌ ve. Ingine hamo hamoꞌ nene musiki molaaꞌ initeꞌ gulive hapu nesi idoꞌ ngolidunuꞌ liliꞌ aniꞌ luduno lapeseuꞌ nene gizikevo unuvo lamineꞌ ogaꞌ ineꞌ initeꞌ vaiꞌ lo minineꞌ nesi nene di minaniꞌ ve. Idoꞌ aꞌmine unuvo lamineꞌ ogaꞌ ineꞌ initeꞌ nene Oꞌmosoꞌmi evenelelite Oꞌmosola laaꞌ naaniꞌ gamazi neve nene minineꞌ ve.
REV 5:9 Idoꞌ aꞌmine velela limi pouꞌ li ingave nete nene nama gosohoꞌ bili mili tiꞌ li laniꞌ ve: Geiꞌ nene gibilikevo geiꞌ vaniseka hulo helanidiꞌmo eveneꞌ zuho ato atoꞌ noꞌine ato atokisi okoꞌine ato atokisi misubo ato atoꞌ mukikuꞌ miniꞌmi monaniꞌ aleve ma nene meni hizo leliꞌ Oꞌmoseteꞌmi gizebouꞌ ngeleꞌmize molo moꞌmosiꞌine naba ngemosa Oꞌmosomuꞌ opoꞌni li initeꞌ lehizi-daaꞌ ilizave loloꞌ o-ngedanivo ingine misuboloꞌ gizebo ogaꞌ gono di minilisave. Idoꞌ neꞌmine aineꞌ nenako neꞌmo nene gaza aꞌmine buku nene dosa nalaꞌve huko apaselinidoꞌ nene mo lisiheꞌ gehepeve o nane.
REV 5:11 Neꞌmine ikevo ninguvoniꞌ nene Guvelesi veꞌmi moꞌmosiꞌvesi idoꞌ eleꞌvoleꞌ igi veꞌinesi ha minaaꞌ naniꞌ initekisi idoꞌ gizebo ve tuvedi foꞌa (24) nesi nene angelolite di vodo vodo i-ngidi vaiꞌ goloso tauseni tauseni ivileꞌ igisa minaniꞌ nene naza ningo mukitoꞌ
REV 5:12 noꞌine naba di nubuho igi tiꞌ li nilavo giluvoniꞌ ve: Sipisipi angale gibilikeniꞌ gaza nene amuzo ve minaningumukisi idoꞌ heneni ato atoꞌ vaiꞌ do minaningumukisi idoꞌ gele nge laaꞌ naningumukisi idoꞌ eleꞌvoleꞌ ogo minaaꞌ naningumukisi idoꞌ dizo minaaꞌ naningumukisi idoꞌ guveka monaaꞌ neingumukisi nene gopoꞌni lolonidoꞌ lisiheꞌ gehepeve o naningumuꞌ nene geiꞌ gopoꞌni nolune.
REV 5:13 Neꞌmine li nilavo ma giluvoniꞌ nene Oꞌmosoꞌmo do sotoꞌ ineꞌ initeꞌ Okulumokuꞌ nehe misubouꞌ nehe idoꞌ misubo lulouꞌ nehe idoꞌ guvo nosoloꞌ nehe aꞌminguꞌ minaniꞌ initeꞌ mukiꞌ nete nene nama tiꞌ li nilavo giluve: Moꞌmosiꞌveuꞌ minivesi sipisipi angalesi ingine nene amuzoꞌinesi ve mini dizivoꞌ minikesivo guveꞌine monaaꞌ neingumuꞌ nene do naba o-ngedo ngopoꞌni noluneꞌ nene mo huko vamo minevoꞌ minevoꞌ ogo minelive.
REV 5:14 Neꞌmine likevo eleꞌvoleꞌ igi veꞌinesi ha minaaꞌ naniꞌ initeꞌ setaꞌve setaꞌ ve nete nene mo neꞌmino minilihoo li li hulikevo gizebo ve ingine limi goꞌine hizi ingi aꞌmine ve setaꞌ nene di naba i-ngidi ngopoꞌni laniꞌ ve.
REV 6:1 Idoꞌ ma ninguvoniꞌ nene sipisipi angale neꞌmo bukuꞌmi nalaꞌve apiꞌ ogo hamoꞌ ma huko apasavo eleꞌvoleꞌ igi veꞌinesi ha minaaꞌ naniꞌ initeꞌ setaꞌve setaꞌveutiꞌ hamoꞌ maliꞌmo nene goꞌ ngilili neꞌminosa nolo molo tiꞌ lo nolivo giluve: Ano.
REV 6:2 Lavo ninguvoniꞌ nene aizo, veꞌnela mokonoꞌ hosi ma omo neivo ninguve. Aꞌmine hosiloꞌ mino daaꞌ ive nene kebili do neivo godololoꞌ nene lovouꞌ ngivileꞌ avete gihaaꞌ aniꞌ angiliꞌ nene ma di gihi-dikevo biluvaꞌve ngivileꞌ olosa vo ngivileꞌ oꞌmo vineꞌ ve.
REV 6:3 Idoꞌ sipisipi angale neꞌmo bukuꞌmi nalaꞌve naba tuu ma nene huko apasavo eleꞌvoleꞌ igi veꞌinesi ha minaaꞌ naniꞌ initekutiꞌ naba tuu maꞌmo nene ano nolivo giluve.
REV 6:4 Neꞌmine lavo hosi gohi ma sotoꞌ ogo aniꞌ nene oloꞌ gulumo neꞌmine guleheꞌ hosi aniꞌ ve. Idoꞌ aꞌmine hosiloꞌ daaꞌ ive nene eveneꞌ ge nebele hele ne gebele hele li minilizangumuꞌ nene misuboukotiꞌ hongu lo lamino minaaꞌ monovo nene ipeꞌ ogo do vilive lo Oꞌmosoꞌmo gele emosa bainati miteꞌ naba ma emavo daniꞌ ve.
REV 6:5 Idoꞌ sipisipi angale neꞌmo bukuꞌmi nalaꞌve naba tili nene huko apasavo aꞌmine eleꞌvoleꞌ igi veꞌinesi ha minaaꞌ naniꞌ initekutiꞌ naba tili neꞌmo nene ano nolivo giluve. Neꞌmine lavo veꞌnela nene gonobuꞌ hosi gohi ma omo neivo ninguve. Idoꞌ aꞌmine hosiloꞌ minive neꞌmi anauꞌ nene sigeli ma do minineꞌ ve.
REV 6:6 Idoꞌ aꞌmine veꞌinesi ha minaaꞌ naniꞌ initeꞌ setaꞌve setaꞌve engiꞌ vovoꞌningutiꞌ nene nolo ma tiꞌ lo sotoꞌ ineꞌ ma giluve: Gaꞌna gamene ogavo nosoꞌ niteꞌ meniꞌve dizo vavo nosoꞌ niteꞌ viti meni hizilizaniꞌ nene moni naba fo kina (K4) neꞌmine hulisa nosoꞌ niteꞌ viti nene geniꞌve ngomo vani kilo (1Kg) aꞌneꞌminevoꞌ nene dalisave. Idoꞌ nosoꞌ niteꞌ goloso gidini bali nene meni hizilisa fo kina hulilizadoꞌ nene tili kilo (3Kg) neꞌminevoꞌ nene dalisave. Ne neiha nosoꞌ niteꞌ gize vataꞌ igaꞌ aniꞌ uveliꞌmi zaꞌve oliva za nesi idoꞌ vaini nalaꞌ nesi nene ha minilisasize. Do goloso amozo lo lo-dineꞌ ve.
REV 6:7 Idoꞌ bukuꞌmi nalaꞌve naba fo nene huko apasavo aꞌmine veꞌinesi ha minaaꞌ naniꞌ initekutiꞌ naba fo neꞌmo nene ano nolivo giluve.
REV 6:8 Neꞌmine lavo veꞌnela hosi ma omo minineꞌ nene okoꞌnoloꞌ lani gise holo neineꞌ gele vineꞌ minineꞌ ve. Idoꞌ aꞌmine hosiloꞌ miniveꞌmi gulive nene Helaaꞌ ve lo minineꞌ ve. Idoꞌ ve ma gulive Gonoso Galese ve lo minive nene mo avitoꞌ mehenela ezesi makaꞌ vasineꞌ ve. Neꞌmine nasivo engiꞌ nene Oꞌmosoꞌmo misubouꞌ aleve mulise setaꞌve setaꞌve minangutiꞌ mulise hamoꞌ nene ngibililisingumuꞌ amuzo ngemekuvo ingine aꞌmine amuzo di mini aꞌmine aleve nene lovoꞌmo ma ngebelelive idoꞌ gaꞌnaꞌmo ma ngebele helelive idoꞌ siki initeliꞌmo ma ngebele helelive idoꞌ loposo initelite nene ma ngibili hililizave likesivo ngibili hililizangumuꞌ nene Oꞌmosoꞌmo aꞌmine amuzo nene ngimineꞌ ve.
REV 6:9 Idoꞌ bukuꞌmi nalaꞌve naba faef ma nene huko apasavo ninguvoniꞌ nene eveneꞌ ma Oꞌmosoꞌmi gamaziloꞌ gili di mini aꞌmine gamazi hizi eleꞌ igi li sotoꞌ igaꞌ angumuꞌ ngibili hilikevo voꞌinehaza nene Oꞌmoso imaaꞌ naniꞌ initeꞌ milaaꞌ aniꞌ holomo alata neꞌmi galaꞌmunguko nene nizavo ninguve.
REV 6:10 Idoꞌ aꞌmine voꞌinehaza nete nene noꞌine nabautiꞌ vise li tiꞌ li laniꞌ ve: Guvekasi ve naba kekeize lo minineꞌ gemeni damenisi mino monovo gihile neꞌmi meleho minanive gaza nene leliꞌ libilaniꞌ vanise maloꞌ nene golo hizo misubouꞌ minaaꞌ naniꞌ aleve nene goniꞌ o-ngedo lihime ngemamolaniko naniheꞌ lihime ngemeline.
REV 6:11 Neꞌmine likevo aꞌmine eveneꞌ voꞌinehaza minaniꞌ hamo hamoꞌ nene veletatiꞌ gizeꞌnida leme minineꞌ genegana mokonoꞌ gehepeve nene ngemekaꞌ ngemekaꞌ ogo tiꞌ lo lo-ngimineꞌ ve: Oꞌove, lengiꞌ neꞌmini neniꞌ gonoloꞌ ve minave lengiꞌ zuho linge nesi nene lengiꞌ lingibilaniꞌ neꞌmini igi ngibililizadoꞌ o neineꞌ nene ngibili osuꞌ gehepeve lilizangumuꞌ nene lamini mini gili mini gizebo ngomo ma minilo.
REV 6:12 Idoꞌ neꞌmine lo-ngemavo naza ninge nouvo sipisipi angale neꞌmo nene bukuꞌmi nalaꞌve naba sigisi ma nene huko apasavo mimiꞌ naba goloso ineꞌ ve. Idoꞌ hoꞌ nene gonobuꞌ elo lihizineꞌ nene veneꞌ gevonolite gonobuꞌ initekovoꞌ ngilaaꞌ naaniꞌ gele vineꞌ neꞌmine ineꞌ ve. Idoꞌ ikeꞌniꞌmi veleloꞌ nene vanise neꞌmino guleheꞌ elo osuꞌ lineꞌ ve.
REV 6:13 Idoꞌ hepeꞌ nabaliꞌmo gohuno za do moꞌmongoꞌ ogavo gihileꞌve diꞌmozaaꞌ naaniꞌ neꞌmino okulumotoꞌ minaniꞌ sonohiꞌ nene misubouko diꞌmozeꞌ mozeꞌ aniꞌ ve.
REV 6:14 Idoꞌ okulumoꞌ nene mati di gangaaꞌ naniꞌ neꞌmino gango vo haha ineꞌ ve. Idoꞌ golo mukiꞌ nesi idoꞌ ailani mukiꞌ nesi nene minaniꞌ ebeꞌine hulisa ebeꞌ mala vi minaniꞌ ve.
REV 6:15 Idoꞌ misubouꞌ misubouꞌ miniꞌmi monaniꞌ guveꞌinesi ve naba nesi idoꞌ eveneꞌ nabaꞌ naba nesi idoꞌ amiloꞌ gizebo ve naba nesi idoꞌ moni heneni ve nesi idoꞌ amuzo ve nesi idoꞌ eveneꞌ mukiꞌ gonouꞌ ve limi minave nizahe haza ve nizahe nesi nene vi geheni gavulo golouꞌ vi halekaaꞌ idoꞌ geheni mulikuꞌ vi halekaaꞌ aniꞌ ve.
REV 6:16 Neꞌmine igisa golomukisi geheni gavulomukisi tiꞌ li li-ngidaniꞌ ve: Laza nene moꞌmosiꞌveloꞌ minive Oꞌmosoꞌmi veleloꞌ sotoꞌ ogo minamoloningumukisi idoꞌ sipisipi angaleꞌmo izeboloꞌ molavo lihime lemelingutiꞌ olovoꞌ ogo mineloningumukisi nene lingine limi mili hiti-lidi di haleki-lidilo.
REV 6:17 Nene nanitekumuꞌ ve. Ingine eveneꞌ lihimetemuꞌ ngizeboloꞌ molangumuꞌ nene lihime limilisineꞌ gamene naba nene mo oganiꞌ nenako neꞌmo nene eveneꞌ hamokisi ma libilami ha huli-lidikavo minamolosune.
REV 7:1 Nelotiꞌ ma ninguvoniꞌ nene angeloꞌ setaꞌve setaꞌve misubo lumola lumola otiꞌmi vi nizavo ninguve. Ingine misuboloꞌ nehe guvo nosoloꞌ nehe za mukitoꞌ nehe ne hepeꞌ elo do goloso ogalive li aꞌmine misuboloꞌ hepeꞌ elelineꞌ hepeꞌ setaꞌve setaꞌve nene di giliꞌ li miniꞌ miniꞌ aniꞌ ve.
REV 7:2 Idoꞌ gohi ma ninguvoniꞌ nene angeloꞌ gohi maliꞌmo minevoꞌ minevoꞌ ogaꞌ neineꞌ Oꞌmosoꞌmo eiꞌ initeꞌveloꞌ noso molaaꞌ neineꞌ initeꞌve nene do mino hoꞌ dizaaꞌ idatiꞌ nene sotoꞌ ogo navo ninguve. Neꞌmine ogo aꞌmineꞌmo nene aꞌmine angeloꞌ setaꞌve setaꞌve adoꞌ misubosi guvo nososi di goloso ilizave lo Oꞌmosoꞌmo gele ngimivemuꞌ nene nolo nabautiꞌ vise naba lo
REV 7:3 tiꞌ lo lo-ngidineꞌ ve: Laza Oꞌmosoteꞌmi gonouꞌ veꞌveti golihiꞌnidoꞌ Oꞌmosoꞌmi noso olihe molo-ngede osuꞌ lo-ngedamuninguꞌ lingine nene misubo nehe guvo noso nehe idoꞌ zaꞌnalaꞌ nehe neve nene olihe di goloso amilo.
REV 7:4 Neꞌmine lavo Oꞌmosoꞌmi noso mili-ngidaniꞌ aleveti nabaꞌine nene mo li-nimikevo giluvoniꞌ ve. Adoꞌ Isilaeleꞌ gipeleti ngaꞌvopilemoꞌ zuho mukikutiꞌ nene eveneꞌ vanu hadeti foti fo tauseni (144,000) nene noso mili-ngidaniꞌ ve.
REV 7:5 Adoꞌ Zudaꞌ aꞌvopilemokutiꞌ nene tuvelu tauseni (12,000) noso mili-ngidi Idoꞌ Lubeniꞌ aꞌvopilemokutiꞌ nene tuvelu tauseni (12,000) noso mili-ngidii Idoꞌ nGadiꞌ aꞌvopilemokutiꞌ nene tuvelu tauseni (12,000) noso mili-ngidii
REV 7:6 Idoꞌ Aseliꞌ aꞌvopilemokutiꞌ nene tuvelu tauseni (12,000) noso mili-ngidii Idoꞌ Nahataliꞌ aꞌvopilemokutiꞌ nene tuvelu tauseni (12,000) noso mili-ngidii Idoꞌ Manaseꞌ aꞌvopilemokutiꞌ nene tuvelu tauseni (12,000) noso mili-ngidii
REV 7:7 Idoꞌ Simeoniꞌ aꞌvopilemokutiꞌ nene tuvelu tauseni (12,000) noso mili-ngidii Idoꞌ Leviꞌ aꞌvopilemokutiꞌ nene tuvelu tauseni (12,000) noso mili-ngidii Idoꞌ Isakalaꞌ aꞌvopilemokutiꞌ nene tuvelu tauseni (12,000) noso mili-ngidii
REV 7:8 Idoꞌ Zebuloniꞌ aꞌvopilemokutiꞌ nene tuvelu tauseni (12,000) noso mili-ngidii Idoꞌ Zoseheꞌ aꞌvopilemokutiꞌ nene tuvelu tauseni (12,000) noso mili-ngidii Idoꞌ Benizaminiꞌ aꞌvopilemokutiꞌ nene tuvelu tauseni (12,000) noso mili-ngidaniꞌ ve.
REV 7:9 Nelotiꞌ ma ninguvoniꞌ nene eveneꞌ vaiꞌ goloso ngelo gatamolonidoꞌ i minaniꞌ nene adoꞌ misubouꞌ misuboutiꞌ eveneꞌ zuho ato atokutiꞌ okoꞌine ato atokisi noꞌine ato atokisi nene aꞌmine Oꞌmosoꞌmi moꞌmosiꞌve adoꞌ sipisipi angale ote minineꞌ velela nene oti mini mokonoꞌ initekovoꞌ ngili zavile davile ledi di mini
REV 7:10 noꞌine nabautiꞌ gekeꞌ li tiꞌ li laniꞌ ve: Lukuvo nuneꞌ nene moꞌmosiꞌveloꞌ minive Oꞌmosoteliꞌmosi sipisipi angale neꞌmosi nene lukuvo limikesivo lukuvo nuneꞌ ve.
REV 7:11 Idoꞌ neꞌmine likevo angeloꞌ mukiꞌ nene Oꞌmosoꞌmi moꞌmosiꞌvesi idoꞌ gizebo vesi idoꞌ eleꞌvoleꞌ igi veꞌinesi ha minaaꞌ naniꞌ initeꞌ setaꞌve setaꞌve nesi nene di vodo vodo i-ngidi oti mini aꞌmine Oꞌmosoꞌmi moꞌmosiꞌveꞌmi velela nene limi goꞌine hizi ingi Oꞌmoso opoꞌni li
REV 7:12 tiꞌ li laniꞌ ve: Mo lamineꞌ likeve. Nemuꞌ nene leliꞌ Oꞌmosote aza amuzo ve mino idoꞌ eleꞌvoleꞌ ogo mino idoꞌ gala gele nge lo minaaꞌ ive dizo neivo guvele monaaꞌ neingumuꞌ nene isaaꞌ neve lo do naba o-do opoꞌni noluneꞌ nene mo huko vamo minevoꞌ minevoꞌ ogo minelive. Mo neꞌmino miniliho.
REV 7:13 Idoꞌ aꞌmidoꞌ nene gizebo ve mautiꞌ maliꞌmo tiꞌ lo longoꞌ o-nidive: Okoꞌnidoꞌ initeꞌ mokonokovoꞌ ngili minave mene zamote nizave. Idoꞌ zaalatiꞌ aniꞌ neve.
REV 7:14 Neꞌmine lavo naza tiꞌ lo lo-imuve: Ve nabo, Naza ma gelamuve. Asi gasika nene gele naneꞌ ve. Neꞌmine lokuvo tiꞌ lo lo-nimive: Aꞌmine aleve meve nene goboni mili-ngidi nizavo aꞌmine geni ato atoꞌ sotoꞌ ineꞌ gameneuꞌ eleꞌvoleꞌ igi geni gihi mini lukuvo nave ma nene nizave. Engiꞌ geneganaꞌine nene sipisipi angaleꞌmi vanisedunuꞌ nosoꞌ izisa di guluviꞌ li di mokonoꞌ ilaniꞌ ve.
REV 7:15 Nemuꞌ nene Oꞌmosoꞌmi moꞌmosiꞌveꞌmi velela mini gamene gamene goꞌ liha litiꞌmuso iziha kekeize lo neineꞌ numuꞌveuꞌ nene eze gonoꞌve di-di nizavo moꞌmosiꞌveloꞌ minive aza engikisi makaꞌ mino alete molo-ngedaaꞌ oloseive.
REV 7:16 Neꞌmine ogavo ingine nosoꞌ niteꞌ nehe haza noso nehe nevoꞌmine initeꞌ nene gohi ma viseꞌ ami gaꞌnasi hilamilisave. Idoꞌ hoꞌ neꞌmosi nene okoꞌnidoꞌ oloꞌ lo ma do goloso o-ngedamoloseive
REV 7:17 Nene naniteliꞌmo ve: Sipisipi angale Oꞌmosoꞌmi moꞌmosiꞌveuꞌ minive neꞌmo nene gizebo o-ngedo mino minevoꞌ minevoꞌ ogo minaaꞌ neineꞌ noso hinipinita nene ngeleꞌmizo vaaꞌ oloseive. Neꞌmino neivosa Oꞌmosoꞌmo nene veꞌine novozo lemaliꞌ lemaliꞌ lo-ngedo mineleseive.
REV 8:1 Nelotiꞌ nene sipisipi angale neꞌmo bukuꞌmi nalaꞌve naba seveni nene huko apasavo Okulumokuꞌ minaniꞌ initeꞌ nene noꞌinesi milamavo eleseꞌ iki nizavoo gamene haf aua neꞌmine nene gaꞌme pize minineꞌ ve.
REV 8:2 Neꞌmine ogavo nelotiꞌ ninguvoniꞌ nene Oꞌmosoꞌmi velela minaaꞌ aniꞌ angeloꞌ seveniꞌa ma nene ninguve. Engiꞌ nene pikuli seveniꞌa ma ngemavo di minaniꞌ ve.
REV 8:3 Idoꞌ angeloꞌ gohi ma neve nene unuvo lamineꞌ ogaꞌ ineꞌ initeꞌ milaaꞌ aniꞌ lapese ngolidunuꞌ liliꞌ aniꞌ nene do mino ogo alata neida ote minineꞌ ve. Neivo ngolidunuꞌ liliꞌ aniꞌ alata Oꞌmosoꞌmi moꞌmosiꞌveꞌmi velela minidoꞌ nene aꞌmine angeloꞌ neꞌmo aꞌmine unuvo lamineꞌ ogaꞌ ineꞌ initeꞌ nene Oꞌmosoꞌmi evenelelite Oꞌmosola laniꞌ gamazisi nene olokuꞌ gizo Oꞌmoso emelive lisa vaiꞌ goloso nene imaniꞌ ve.
REV 8:4 Idoꞌ neꞌmine ogavo aꞌmine unuvo lamineꞌ ogaꞌ ineꞌ initeliꞌmi sokile nene Oꞌmosoꞌmi evenelelite eita laniꞌ gamazisi aꞌmine Oꞌmosoꞌmi velela minineꞌ angeloliꞌmi anautiꞌ nene dizo vineꞌ ve.
REV 8:5 Idoꞌ neꞌmine ogo aꞌmine angeloꞌ neꞌmo alatalotiꞌ oloꞌ vele ma do aꞌmine do minineꞌ lapeseuꞌ nene molosa hulo misubouko ogavo goꞌ ngilili ngilili lo nolo nolo molo goꞌ paꞌna neꞌmo lede ogo vogo ivo mimiꞌ ineꞌ ve.
REV 8:6 Idoꞌ nelotiꞌ nene pikuli seveni di minaniꞌ angeloꞌ seveni mate nene aꞌmine pikuli di nolo milalisa gamunoꞌ i minaniꞌ ve.
REV 8:7 Neꞌmine igi minadotiꞌ naba vani angeloꞌ neꞌmo nene pikuli hubu lo do nolo molavo osupo gihilesi olokisi nene vanisesi gopoꞌ napa o minineꞌ nene sotoꞌ ogavo misubouko mili hulikevo doꞌmozineꞌ ve. Idoꞌ doꞌmozineꞌ neꞌmo nene misubo lakaꞌni seto hamo miningutiꞌ linge hamoꞌ nene loꞌvoto osuꞌ lavo idoꞌ za lingelatikisi nene aꞌmineꞌmine votigileloꞌ ma lo osuꞌ lavo misuboloꞌ guvise navise ngomoꞌ nabaꞌ mukiꞌ nesi nene lo osuꞌ lineꞌ ve.
REV 8:8 Neꞌmine ogavo angeloꞌ naba tuu neꞌmo nene pikuli hubu lo do nolo molavo golo naba neꞌmine gele vineꞌ initeꞌ nene ma oloꞌ lo neivo guvo nosouꞌ di hulaniꞌ ve. Neꞌmine ikevo guvo noso lakaꞌni seto hamo miningutiꞌ lingela hamoꞌ nene vanise nosovoꞌ loloꞌ ineꞌ ve.
REV 8:9 Neꞌmine ogavo guvo nosouꞌ veꞌinesi minaniꞌ initekutiꞌ nene aꞌmineꞌmine votigileloꞌ nene hili osuꞌ laniꞌ ve. Idoꞌ aꞌmine guvo nosoloꞌ monaniꞌ sipiutiꞌ aꞌmineꞌmine votigileloꞌ nene vi goloso aniꞌ ve.
REV 8:10 Neꞌmine ikevo angeloꞌ naba tili neꞌmo nene pikuliꞌve nene hubu lo do nolo molavo Okulumokutiꞌ sonohiꞌ naba goloso liviꞌ neꞌmino lo minineꞌ nene misubouꞌ noso hinipinikisi noso mukikisi minaniꞌ nene lakaꞌni seto hamo minangutiꞌ hamoꞌ maloꞌ nene limineꞌ ve.
REV 8:11 Aꞌmine sonohiliꞌmi gulive nene Ekeseꞌ Malasini ve lo minineꞌ ve. Idoꞌ noso linge setaꞌ ha nizasivo noso linge ma neꞌmo ekeseꞌ malasini loloꞌ ineꞌ neꞌmo nene eveneꞌ mukiꞌ goloso hilaniꞌ ve.
REV 8:12 Idoꞌ nelotiꞌ nene angeloꞌ naba fo neꞌmo nene pikuli hubu lo do nolo molavo hoꞌ nene lakaꞌni mili seto hamo minangutiꞌ linge hamota nene belavo litiꞌmuso izineꞌ ve. Idoꞌ aꞌmineꞌmine votigileloꞌ ikeꞌni miningutiꞌ lingela nene belavo litiꞌmuso izineꞌ ve. Idoꞌ aꞌmineꞌmine votigileloꞌ sonohiꞌ linge setata nene ha nizasivo hamota nene belavo litiꞌmuso izineꞌ ve. Holiseꞌ hamokuꞌ gamene seto hamo miningutiꞌ linge hamota nene labanaꞌve nomineꞌ minineꞌ ve. Idoꞌ aꞌmineꞌmine ogo litiꞌmuso hamokuꞌ ize gito seto hamo miningutiꞌ linge hamota nene labanaꞌ ngomosi minamivo litiꞌmuso gehepeve ize minineꞌ ve.
REV 8:13 Idoꞌ ninge minuvoniꞌ nene nolise naba ma hamokovoꞌ minidiꞌmo nene okulumoꞌ veleta olusoꞌ gehepeve hozene patelo nomonineꞌ nene ninge nouvo nolo nabautiꞌ tiꞌ lo nolivo giluve: Agae, agae, agae. Angeloꞌ lumo seto hamo nizaniꞌ nete pikuliꞌine hubu li di noꞌine milalisa naaniꞌ neꞌmo nene misubouꞌ alevela mulumo geni atoliꞌmine ogo sotoꞌ o-ngedelesa neive.
REV 9:1 Idoꞌ neꞌmine ogavo angeloꞌ naba faef neꞌmo nene pikuliꞌve hubu lo do nolo molavo ninguvoniꞌ nene okulumokutiꞌ sonohiꞌ ma misuboloꞌ doꞌmoze minineꞌ nene ninguve. Aꞌmine sonohiꞌ neve nene hemuvosi nomineꞌ galese haꞌnaliꞌmi velelotiꞌ kiiꞌve nene imikevo do minineꞌ ve.
REV 9:2 Idoꞌ aꞌmine kiiꞌ nedunuꞌ nene aꞌmine galeseꞌmi akaheꞌve nene siꞌzo godavo aꞌmingutiꞌ nene sokile vaiꞌ goloso hosoni viteꞌ ikevo sokile dizaaꞌ ineꞌ neꞌmino dizo okulumotokisi idoꞌ hoꞌ velelokisi molo hito do litiꞌmuso izineꞌ ve.
REV 9:3 Idoꞌ aꞌmine sokileutiꞌ nene maꞌnabuso gili vaniꞌ initeꞌ nene misubouꞌ limikevo misubouko nizaniꞌ gazehe gaꞌmukoꞌ neꞌmineti amuzoꞌine neꞌmine nene Oꞌmosoꞌmo ngimineꞌ ve.
REV 9:4 Neꞌmine ogo tiꞌ lo lo-ngidineꞌ ve: Lingine nene guvise navise nehe zaꞌ nalaꞌ nehe nevoꞌmine initeꞌ nene di goloso i-ngidami asi Oꞌmosoꞌmi noso golihiꞌnidoꞌ milamaniꞌ alevevoꞌ nene di goloso i-ngidilo.
REV 9:5 Neꞌmine lo aꞌmine ngimineꞌ amuzo nene aꞌmine aleve ngibili hililizaniꞌ amuzo ngimineꞌ nevoba asi ikeꞌni faef neꞌmi lulouꞌ ngibiliꞌmi vi nizavo mulumo ekeseꞌ goloso gili minilizangumuꞌ ve losa amuzo ngimineꞌ ve. Idoꞌ aꞌmine mulumo gili minilizaniꞌ nene gazehe gaꞌmukolite eveneꞌ ngibilikevo mulumo ekeseꞌ goloso gilaaꞌ naniꞌ neꞌminisa nene gili minilisave.
REV 9:6 Neꞌmine igi mulumo ekeseꞌ gili minilizaniꞌ gameneuꞌ nene eveneꞌ nete helaaꞌ akamuꞌ viseꞌ ilisaha mo ma ningamilisave. Ee, mo helelobo li gili minilisaha helaaꞌ neꞌmo nene olovoꞌ o-ngedeleseive.
REV 9:7 Idoꞌ aꞌmine maꞌnabuso gili vaniꞌ initeꞌ nene hosi gili minaniꞌ ve. Adoꞌ lovouꞌ di vilisa di nene i-ngidikevo minaniꞌ hosi gili minaniꞌ ve. Idoꞌ aꞌmine maꞌnabuso gili vaniꞌ initeliti godoꞌnidoꞌ nene kuvanadi angiliꞌ ngolidunuꞌ liliꞌ aniꞌ gele vineꞌ nene gihi minaniꞌ ve. Idoꞌ goꞌine veꞌine nene eveneꞌ gote vete neꞌminesi minaniꞌ ve.
REV 9:8 Idoꞌ maduꞌine zopovo nene haꞌna haꞌna venelitine neꞌminosa minineꞌ ve. Idoꞌ veꞌine gavulo nene laioni gulo neti veꞌine gavulo gasava neꞌminosa minineꞌ ve.
REV 9:9 Idoꞌ losoꞌnidoꞌ lepese neꞌmine izikaniꞌ nene ainidunuꞌ liliꞌ aniꞌ gele vineꞌ izikaniꞌ ve. Idoꞌ aꞌmine initeꞌ pateli nivavo holokeꞌneꞌningutiꞌ nolo molaniꞌ nene hosi vailite lovouꞌ kali ma geleleheꞌ igi lotiꞌ izi di nivavo gilili ngilili lo minaaꞌ neineꞌ neꞌminosa minineꞌ ve.
REV 9:10 Idoꞌ gazehesi idoꞌ gazehe neꞌmini minaniꞌ initeꞌ masi ingine avasuvoꞌninguꞌ nene eveneꞌ ngibilaaꞌ aniꞌ initeꞌinesi minaaꞌ naaniꞌ neꞌmini aꞌmine maꞌnabuso gili vaniꞌ initeꞌ nene avasuvoꞌninguꞌ eveneꞌ ngibilaaꞌ aniꞌ initeꞌinesi minaniꞌ ve. Idoꞌ neꞌmini minaniꞌ nenako nemuꞌ nene aꞌmine ikeꞌni faef neuꞌ eveneꞌ di goloso i-ngidi minilizaniꞌ amuzoꞌine nene aꞌmine avasuvoꞌninguꞌ nene minineꞌ ve.
REV 9:11 Idoꞌ engiꞌ guveꞌinesi ve nene aꞌmine hemuvosi nomineꞌ galese haꞌna haꞌnaloꞌ gizebo ogaꞌ neineꞌ angeloꞌ neve nene engiꞌ guveꞌinesi ve minineꞌ ve. Aꞌmine angeloliꞌmi gulive nene Zuda veti gamaziꞌningutiꞌ nene Abadoniꞌ ve li laaꞌ nave. Idoꞌ nGiliki veti gamaziꞌningutiꞌ nene Apolioniꞌ ve li laaꞌ nave. Aꞌmine gulive setalitisi monovo nene initeꞌ do goloso ogaꞌ ive ve.
REV 9:12 Agae, mulumo geni initeꞌ naba hamoꞌ ma nene mo vaaha mulumo geni naba lumo setaꞌ nene mo olihe sotoꞌ ilisa nasive.
REV 9:13 Idoꞌ nelotiꞌ nene angeloꞌ naba sigisi neꞌmo nene pikuliꞌve hubu lo do nolo molavo ngolidunuꞌ liliꞌ aniꞌ alata Oꞌmosoꞌmi velela minineꞌ neꞌmi gatuꞌmuvo setaꞌve setaꞌvela komu minangutiꞌ nene nolo hamoꞌ ma sotoꞌ ogosa
REV 9:14 aꞌmine pikuli di minaniꞌ angelokutiꞌ naba sigisi mamuꞌ nene tiꞌ lo nolo-divo giluve: Noso naba Zupalati nela angeloꞌ setaꞌve setaꞌve nalaꞌ izi-ngidikaniꞌ ma nene vo vakese-ngedezo.
REV 9:15 Neꞌmine lavo vo aꞌmine angeloꞌ setaꞌve setaꞌve adoꞌ Oꞌmosoꞌmo aꞌmine gamenemuꞌ gehepeve do vaꞌvaꞌ o-ngedavo minaniꞌ ma nene vo apase-ngidineꞌ ve. Neꞌmine lavo vo apase-ngidineꞌ nene eveneꞌ lakaꞌni seto hamo minangutiꞌ lingela hamoꞌ nene ngibili hililizave lo Oꞌmosoꞌmo neꞌmine i-ngidilizaniꞌ gameneꞌmi kilisimasiꞌvesi idoꞌ ikeꞌniꞌvesi idoꞌ holiseꞌ gameneꞌvesi idoꞌ auaꞌvesi nene gamene molo hulo-ngedekivosa ha minaniꞌ nene vakese-ngidineꞌ ve.
REV 9:16 Idoꞌ aꞌmine angeloꞌ foꞌa neti gizeboꞌnidoꞌ mini hosiloꞌ monaaꞌ aniꞌ ami nene tuu hadeti milioni (200,000,000) neꞌmine nene minaniꞌ ve. Idoꞌ aꞌmine tuu hadeti milioni neꞌmine minave noluvoniꞌ nene mo nabaꞌine li-nimikevo mo gelosa nene noluve.
REV 9:17 Idoꞌ aꞌmine hosiloꞌ minaniꞌ amisi hosiꞌinesi veꞌneloꞌ i milanguꞌ nene neꞌminisa nizavoo ninguve: Losoꞌnidoꞌ lepese nene oloꞌ gulumo neꞌmine guleheꞌ ilinekisi idoꞌ sahila geheni gumi kala neꞌminesi idoꞌ salfa geheni neꞌmine gihungoꞌ ilinekisi nene izikaniꞌ ve. Idoꞌ hosiꞌineti maduꞌine nene laioni guloliti maduꞌine gele vineꞌ nizavo veꞌningutiꞌ nene oloꞌ gulumosi sokilesi salfa gehenisi nene leme heta ogo minineꞌ ve.
REV 9:18 Aꞌmine eveneꞌ di goloso i-ngidaaꞌ aniꞌ initeꞌ seto hamo adoꞌ aꞌmine hosiliti veꞌningutiꞌ leme minineꞌ initeꞌ oloꞌ gulumosi sokilesi idoꞌ salfa geheni nesi nete nene eveneꞌ seto hamo seto hamo minangutiꞌ hamo hamoꞌ nene ngibili hilaniꞌ ve.
REV 9:19 Ee, aꞌmine hosiliti amuzoꞌine nene veꞌningukisi avasuvoꞌningukisi minineꞌ ve. Avasuvoꞌnine nene gosiheꞌ neꞌmine maduꞌinesi minikevo aꞌmine avasuvoꞌinedunuꞌ nene eveneꞌ di goloso i-ngidaaꞌ aniꞌ ve.
REV 9:20 Ne neiha aꞌmine eveneꞌ di goloso i-ngidaaꞌ aniꞌ initelite ngibili hilamavo eveneꞌ lumo ha minave nete nene luꞌine di velepeꞌ izisa igi mili igaꞌ aniꞌ monovo nene hulilizanako hulamave. Adoꞌ veꞌine ningisaꞌmaniꞌ idoꞌ gaꞌine gilisaꞌmaniꞌ initeꞌ idoꞌ aka monamilizadoꞌ i nizaniꞌ initeꞌ soza oꞌmoso adoꞌ ngolidunuꞌ nehe siluvaꞌ gehenidunuꞌ nehe idoꞌ ngoli gele vineꞌ initeꞌ gohi madunuꞌ nehe idoꞌ gehenidunuꞌ nehe idoꞌ zadunuꞌ nehe nevoꞌmine initetunuꞌ engiꞌ aꞌinedunuꞌ gono di liliꞌ aniꞌ initeꞌ nene ngopoꞌni li minaaꞌ idoꞌ sikalahuꞌ goloso ngopoꞌni li minaaꞌ aniꞌ nene hulamaniꞌ ve.
REV 9:21 Idoꞌ luꞌine di velepeꞌ izi engiꞌ monovoꞌine goloso linge adoꞌ eveneꞌ ngibili hilaaꞌ aniꞌ monovoꞌinesi idoꞌ poisini gamaziꞌinesi idoꞌ veneꞌ vemohoꞌ alu gipe gopo ingaaꞌ aniꞌ monovoꞌinesi idoꞌ gumine damine igaꞌ aniꞌ monovoꞌinesi nene mo hulamaniꞌ ve.
REV 10:1 Nelotiꞌ ma ninguvoniꞌ nene amuzo malehe angeloꞌ gohi ma nene Okulumokutiꞌ limusoliꞌmo do asabuꞌ ize-de minivo nolimivosa ninguve. Godololoꞌ nene giniꞌ huzebe hize neivo golo vele nene hoꞌ hulaaꞌ neineꞌ neꞌmino minineꞌ ve. Idoꞌ gizene hela hela nene oloꞌ gulumo neꞌmine gelo mino za langise neꞌmine haꞌna dizo minineꞌ ve.
REV 10:2 Idoꞌ anauꞌ nene di gangaaꞌ aniꞌ buku ngomo ma di patelikaniꞌ neineꞌ nene do mino gizene zamelatiꞌ nene guvo nosoloꞌ lisosa gizene adavalatiꞌ nene misuboloꞌ lisineꞌ ve.
REV 10:3 Neꞌmine o mino noloꞌve nene laioni gulo neꞌmo nolo molaaꞌ neineꞌ gele minivosa nolo nabautiꞌ vise lineꞌ ve. Idoꞌ vise lavo goꞌ ngilili seveniꞌa nete aꞌmidoꞌ noꞌine mili gamazi laniꞌ ve.
REV 10:4 Idoꞌ aꞌmine goꞌ ngilili seveniꞌa nete neꞌmini gamazi likevo naza laniꞌ gamazi nene gizelesa nouvo Okulumokutiꞌ nene nolo ma tiꞌ losa sotoꞌ ivo giluve: Aꞌmine goꞌ ngilili seveniꞌalite laniꞌ gamazi nene gelo do halekekezo. Mo gizamozo.
REV 10:5 Neꞌmine lavo aꞌmine angeloꞌ adoꞌ guvo nosolokisi misubolokisi lise neivo ninguvoniꞌ angeloꞌ neꞌmo ana zamela nene Okulumota do otineꞌ ve.
REV 10:6 Do otosa eiꞌ lilineꞌ gamazi do amuzo molalosa nene minevoꞌ minevoꞌ ogovoꞌ minaaꞌ ive adoꞌ Okulumokisi aꞌminguꞌ nizaniꞌ initeꞌ matakisi idoꞌ misubosi aꞌminguꞌ nizaniꞌ initeꞌ matakisi idoꞌ guvo nososi aꞌminguꞌ nizaniꞌ initeꞌ matakisi do sotoꞌ iveloꞌ nene lo molo tiꞌ lo live: Gamene gohi ma ogo vamoloseive.
REV 10:7 Asi angeloꞌ naba seveni neꞌmo pikuliꞌve hubu lo do nolo molalineꞌ gamene ilidoꞌ gehepeve nene Oꞌmosoꞌmo eze gonoloꞌ veꞌve polohete gomuꞌ lo sotoꞌ ogo lo-ngimineꞌ gamazi nene do gihile izo initeꞌ sunoꞌ neineꞌ olosa gele minaaꞌ neineꞌ nene do sotoꞌ ogo do peleleseive.
REV 10:8 Neꞌmine lavo Okulumokutiꞌ nolo sotoꞌ ogavo gomuꞌ giluve neꞌmo gohi gamazi lo-nemo tiꞌ lo live: Gaza nene vo guvo nosolokisi misubolokisi liso ote neineꞌ angeloliꞌmi anauꞌ do neineꞌ buku di patelikaniꞌ ma nene dozo.
REV 10:9 Neꞌmine lo-nedavo aꞌmine angeloꞌ neida vo buku nene nemezo lo-dekuvo aza tiꞌ lo lo-nimive: Gaza buku mene dosa no mikileꞌ ozo. Aꞌmine neꞌmo nene gatungauꞌ lemo neivo gatunga neꞌmo nene laniteꞌ gelamoloseive. Neꞌmine oloseineꞌza nonanivo vekauko nene himoni novozo neꞌmo laniteꞌ ogaꞌ neineꞌ neꞌminosa laniteꞌ oloseive.
REV 10:10 Neꞌmine lavo aꞌmine buku ngomo nene aꞌmine angeloꞌ maꞌmi anautiꞌ dosa no mikileꞌ okuvo veꞌneuko laniteꞌ ineꞌ nene himoni novozoliꞌmo laniteꞌ ineꞌ gilive. Neꞌmine ineꞌza no mikileꞌ okuvo gatuꞌneuko limineꞌ nene mo lanitekisi amive.
REV 10:11 Neꞌmine ogavo nouvo tiꞌ li li-nimave: Gaza nene eveneꞌ zuho ato atoꞌ okoꞌine ato atokisi noꞌine ato atokisi minaniꞌ mukikumukisi idoꞌ guveꞌinesi ve naba mukikumukisi nene aꞌmine sotoꞌ o ngemelineꞌ initekumuꞌ nene Oꞌmosoꞌmi veletiꞌ gamazi nene imineꞌ molo gohi lo sotoꞌ ogo lo-ngemelinidoꞌ o neive.
REV 11:1 Idoꞌ nelotiꞌ gohi ma neve nene initeꞌ maki milaaꞌ aniꞌ gavoso gonoukumuꞌ minelive li milikaniꞌ angaba gavoso neꞌmine haꞌna ma nimii tiꞌ li li-nimaniꞌ ve: Gaza oto vo aꞌmine gavosotunuꞌ maki molo ningo Oꞌmosoꞌmo do nguꞌ izeli initeꞌve adoꞌ kekeize numuꞌve nesi idoꞌ aꞌminguꞌ alataꞌve minineꞌ nesi nene nabaꞌine do ningo idoꞌ aꞌminguꞌ Oꞌmoso opoꞌni li minaaꞌ nave nesi nene nabaꞌine do ningezo.
REV 11:2 Neꞌmine ilineꞌza maki molalo ma nene siꞌmingala gesi vodo vodo ogo neineꞌ nene maki molamosa asi aꞌmidotiꞌ lulouꞌ vodo vodo ogo neineꞌ gesi nelotiꞌ nene apiꞌ ogo maki molo hulo lulouko ogosa nene do ningezo. Ne nanitekumuꞌ ve. Aꞌmine makimi amiline noluvoniꞌ ebeꞌ nene Oꞌmosomuꞌ gilamave heta atoꞌ velite di minilisave lo Oꞌmosoꞌmo gele ngemavo di mini Oꞌmosoꞌmi numuno ebeꞌve nene lisi di goloso iꞌmi vi nizavo ikeꞌni foti tuu (42) neꞌmine ogo voloseive.
REV 11:3 Aꞌmine gameneuꞌ nene neniꞌ gamaziꞌne hizi eleꞌ ilisive setaꞌ nene amuzo ngemekuvo aꞌmine gamene vanu tauseni tuu hadeti sigisiti (1,260) neꞌmi lulouꞌ nene alingeꞌ mulumo sotoꞌ ilineꞌ nemuꞌ eveneꞌ mulumoꞌine gilisa neꞌmi avazaha nene veneꞌ gevonoliti genegana neꞌminevoꞌ ngili mini neniꞌ veꞌneutiꞌ gamazi nene li sotoꞌ sotoꞌ igi minilisasive.
REV 11:4 Aꞌmine ve setaꞌ neve nene gomuꞌ polohete Zekaliaꞌ lineꞌ oliva za setakisi idoꞌ lamu liviꞌ setaꞌ misuboliꞌmi Guvelesi veꞌmi veleloꞌ minaaꞌ nasive ma nene nizasive.
REV 11:5 Idoꞌ engiꞌ biluvaꞌine aꞌmine ve setaꞌ do goloso o-ngedelone li ave mukiꞌ nene aꞌmine ve setalitisi veꞌningutiꞌ oloꞌ gulumo neꞌmo nene lemo gizeꞌ vote-ngedaaꞌ neive. Ee, engiꞌ di goloso i-ngidilisa gililizave nene neꞌminisa di goloso i-ngidikesivo neꞌminisa hililizadoꞌ o neive.
REV 11:6 Idoꞌ aꞌmine ve setaꞌ nene Oꞌmosoꞌmi veleutiꞌ gamazi li sotoꞌ sotoꞌ igi minilisineꞌ gameneloꞌ nene golinesi izamilive li okulumota goline sisili di hulaaꞌ amuzo nene di nizasive. Idoꞌ nosomuꞌ nene likesivo vanise nosovoꞌ loloꞌ ilineꞌ amuzo nesi nene di mini idoꞌ eveneꞌ ma di goloso i-ngidilisa gililisineꞌ gameneloꞌ gameneloꞌ me misubouꞌ eveneꞌ di goloso i-ngidilizaniꞌ initeꞌ ato atoꞌ mukiꞌ di sotoꞌ igaꞌ amuzo nesi nene di nizasive.
REV 11:7 Neꞌmine ilisineꞌ amuzo di nizasineꞌza Oꞌmosoꞌmi gamazi hizi eleꞌ ilisineꞌ gonoꞌine di pililisineꞌ nene hemuvosi nomineꞌ galese haꞌnautiꞌ dizelineꞌ loposo niteꞌ neꞌmo nene lovo do sotoꞌ ogo lovo o ngemo ngivileꞌ ogosa ngebele heleleseive.
REV 11:8 Neꞌmine ogavo aꞌmine hililisineꞌ gonosoꞌine nene ningi huli ngimikavo aꞌmine numuno ebeꞌ nabaꞌmi akauꞌ nene gopo ingi minilisasive. Aꞌmine numuno ebeꞌ nabaꞌmi emeni dameni goloso nene di sotoꞌ igi gulive Sodomilokisi idoꞌ Aigitalokisi li mili laaꞌ nave. Aꞌmine numuno ebeꞌ nene aꞌmine hilasive setaꞌ netisi Guveꞌinesi ve lohotoꞌ zaloꞌ bilaniꞌ numuno ebeꞌ ne neive.
REV 11:9 Idoꞌ aꞌmine ve setalitisi gonosoꞌine nene akauꞌ gopo ingi nizasivo eveneꞌ zuho ato atokutikisi idoꞌ noꞌine ato atokutikisi idoꞌ okoꞌine ato atokutikisi nene gamene seto hamosi hapu neꞌminesi nene gizevo gizi-ngidi minilisaha galeseuꞌ mili-ngidilisa nene oꞌve lilisave.
REV 11:10 Neꞌmine igisa me misubouꞌ aleve ingine meve ma nene hilasive li ngolize nabaꞌmine izi mini ngumo hilineꞌ initeꞌ nevo ve nene ge lehize-nede ne lehize-gede li minilisave. Nanitekumuꞌ ve. Aꞌmine polohete setaꞌ netise lasineꞌ gamazi neꞌmo nene me misubouꞌ aleve mukiꞌ luꞌine do goloso ogavo luꞌninguꞌ geni bilivo minaniꞌ nenako neemuꞌ nene neꞌmine aniꞌ ve.
REV 11:11 Neꞌmine igi nizavo gamene seto hamosi hapusi nene ogo vavo Oꞌmosolatiꞌ sikalahuꞌ gosohoꞌ nene hilasiveuꞌ ogo dizavo ingine upuhoꞌ igi oti pehe likesivo eveneꞌ ma ningave nene ngehelele goloso izineꞌ ve.
REV 11:12 Neꞌmine neivo nelotiꞌ nene Okulumokutiꞌ nolo naba ma sotoꞌ ineꞌ nene engikumuꞌ tiꞌ lo nolivo gilasive: Meloꞌ dizi alizo. Neꞌmine lavo ingine nene Okulumokuko limusouꞌ dizi vasineꞌ ve. Idoꞌ dizi nivasivo engiꞌ biluvaꞌine nete ningi minaniꞌ ve.
REV 11:13 Aꞌmine gameneloꞌ gehepeve nene mimiꞌ naba neivo aꞌmine numuno ebekuꞌ numuno teni teni mini di vangutiꞌ hamo hamoꞌ nene nguti inganiꞌ ve. Aꞌmine mimiꞌ inguꞌ nene eveneꞌ seveni tauseni (7,000) neꞌmine nene ngebele geseꞌ ogavo linge ha minave engita nene ngeme ngingi naba sotoꞌ ogavo Okulumokuꞌ Oꞌmoso nene di naba i-di opoꞌni laniꞌ ve.
REV 11:14 Agae, mulumo geni initeꞌ naba setaꞌ ma nene mo apasi vikesiha mulumo geni naba hamokovoꞌ olihe sotoꞌ amineꞌ ma nene mo nela geto sotoꞌ olosa neive.
REV 11:15 Nelotiꞌ nene angeloꞌ naba seveni neꞌmo nene pikuliꞌve hubu lo do nolo molavo Okulumokuko noꞌine naba vaiꞌ ma sotoꞌ aniꞌ nete nene tiꞌ li laniꞌ ve: Guvetesi ve Oꞌmososi idoꞌ eiꞌ gonoꞌvemuꞌ noso molo-dive Kilisitokisi me misubouꞌ gizebo ogaꞌ gono nene engiꞌ aꞌninguꞌ lemaaniꞌ neꞌmo nene gizebo ogaꞌ gono nene divi diviꞌ igi nizasivo mo hukosi vamoloseive.
REV 11:16 Neꞌmine li likevo gizebo ve tuvedi foꞌa (24) moꞌmosiꞌninguꞌ Oꞌmosoꞌmi velela minave ingine nene limi goꞌine hizi ingi Oꞌmoso di naba i-di opoꞌni li
REV 11:17 tiꞌ li laniꞌ ve: Guvekasi ve Oꞌmoso amuzo mukiliꞌmi meleho gozopotatiꞌ mine do ogo idisesi ha minanive gaza amuzoka naba do tiꞌ ogo apiꞌ ogo me misubouꞌ gizebo ogo naningumuꞌ nene isaaꞌ neve lo gopoꞌni nolune.
REV 11:18 Ee, geikumuꞌ gilamave heta atoꞌ ve neve nene geikumuꞌ ngizeboloꞌ molavo gaza engikumuꞌ gizeboloꞌ molaniꞌ nene do sotoꞌ ogo lihime ngemo hilavesi goniꞌ o-ngedo geiꞌ gonouꞌ veka polohetesi idoꞌ geiꞌ eveneka mukiꞌ adoꞌ eveneꞌ naba nizahe ngomo nizahe geikumuꞌ goliseka gili mini geꞌmeti minave mukiꞌ nesi nene meniꞌine ngemo me misubouꞌ di goloso igi minave nesi do goloso o-ngedelineꞌ gamene nene mo ogave.
REV 11:19 Neꞌmine likevo ma ninguvoniꞌ nene Oꞌmosoꞌmi kekeize numuꞌve Okulumokuko minineꞌ nene gode neivo aꞌmine kekeize numuꞌveuꞌ nene aꞌmine eveneꞌve lo huko-ngidineꞌ gamazi milikaniꞌ bokisi nene sotoꞌ ogo minineꞌ ve. Neꞌmine ogo neivo aꞌminguꞌ nene goꞌ paꞌna paꞌna ogo nolo nolo molo goꞌ ngilili ngilili lo mimiꞌ neivo osupo gihile neꞌmo nene atoꞌ ogo minineꞌ ve.
REV 12:1 Nelotiꞌ nene avazaha niteꞌ naba ma okulumotoꞌ tiꞌ ogo sotoꞌ ivo ninguve: Oꞌmosoꞌmi evenele zuho avazahaloꞌ veneꞌ neꞌmine neivo ma ninguvoniꞌ ve. Idoꞌ aꞌmine veneliꞌmi okoꞌnolotiꞌ hoꞌ hulo neivo gizeneuko nene ikeꞌni neivo idoꞌ godololoꞌ nene sonohiꞌ tuveluꞌa (12) minineꞌ angiliꞌ nene geheko neivo ninguve.
REV 12:2 Aꞌmine veneꞌ nene izipe gatunosi mino izipe gedelesa mulumo alumo gelo gekeꞌ lo minineꞌ ninguve.
REV 12:3 Idoꞌ neꞌmine ogo okulumotoꞌ nene avazaha atoꞌ gohi ma tiꞌ ogo sotoꞌ ineꞌ ninguve: Sataꞌ gele vineꞌ loposo niteꞌ naba oloꞌ gulumo neꞌmine guleheꞌ okoꞌnosi godolo seveniꞌasi mino idoꞌ komuꞌve teniꞌasi mino idoꞌ guveꞌinesi vete gihaaꞌ aniꞌ angiliꞌ seveniꞌa nene godololoꞌ gehe minive.
REV 12:4 Idoꞌ avasuvoꞌve neꞌmo nene okulumokuꞌ sonohiꞌ mulise seto hamo minangutiꞌ mulise hamoꞌ nene belo tululu lo hulo misubouko ogavo limaniꞌ ve. Aꞌmine loposo sataꞌ gele vineꞌ nene aꞌmine izipe gedelesa minineꞌ veneliꞌmi velela nene izipe gedavo do mikileꞌ olosa vo minineꞌ ve.
REV 12:5 Neꞌmine ogavo veneꞌ aza izipe ma gidineꞌ nene gipele gidineꞌ ve. Aꞌmine izipe neꞌmo nene ainidunuꞌ liliꞌ aniꞌ gavoso nene do minosa Oꞌmosomuꞌ gilamave heta atoꞌ ve mukiꞌ nene amuzo molo gizebo o-ngedeleseive. Idoꞌ aꞌmine veneliꞌmi izipahala nene Oꞌmosoꞌmo ipeꞌ ogo Okulumokuko do dize-davo eiꞌ Oꞌmoso neida eiꞌ moꞌmosiꞌveuꞌ nene dize minineꞌ ve.
REV 12:6 Neꞌmine ogavo veneꞌ aza nene golise ebeꞌ hadivela vo minineꞌ ve. Ee, Oꞌmosoꞌmo gamene vanu tauseni tu hadeti sigisiti (1,260) neꞌmi lulouꞌ aꞌmida neivo gizebo i-di minilizave lo aꞌmine ebeꞌ hadivela do vaꞌvaꞌ o-dineꞌ ebeꞌ ma minida nene vo minineꞌ ve.
REV 12:7 Neꞌmine ogavo angeloꞌ naba Maikoliꞌ ve idoꞌ eze angeloꞌvesi nene sataꞌ gele vineꞌ loposo niteꞌ naba nene lovo i imikevo aꞌmine loposo niteꞌ sataꞌ gele vineꞌ nesi idoꞌ eze angeloꞌve zuhosi nene lovo hizi nizavo Okulumotoꞌ nene lovo naba sotoꞌ ineꞌ ve.
REV 12:8 Neꞌmine igi minaniꞌza aꞌmine loposo niteꞌ nene nge lamivo Okulumokuꞌ nene ma minilizadoꞌ amivo
REV 12:9 aꞌmine loposo niteꞌ naba gomukutiꞌ minineꞌ sataꞌ adoꞌ gulive Ve Goloso Satani ve lave adoꞌ me misubouꞌ aleve mukiꞌ ngeleꞌmize gopo ogaꞌ ive nene angeloꞌvesi Maikoliꞌ angeloꞌve nete Okulumokutiꞌ ngehusoꞌ i huli-ngidikevo misubouko nene limi minaniꞌ ve.
REV 12:10 Neꞌmine ikevo Okulumokuꞌ nene nolo naba ma sotoꞌ ogo tiꞌ lo nolivo giluve: Leze zuho goniꞌ o-ngedaaꞌ ive adoꞌ gamene gamene goꞌ liha litiꞌmuso iziha lihime neꞌmine dikeve lo Oꞌmosoꞌmi velela goniꞌ o-ngedo minaaꞌ ive nene ivileꞌ igisa ehusoꞌ i hulikevo limineꞌ nenako neꞌmo idise nene leliꞌ Oꞌmosoteꞌmo nene eveneꞌve do nguꞌ izo amuzoꞌve do sotoꞌ ogo Guvelesi ve mino eveneꞌveloꞌ gizebo ogaꞌ gonoꞌve nene davo eiꞌ gonoꞌvemuꞌ noso molo-dive Kilisitoꞌ nesi nene aꞌmine gono dalineꞌ amuzoꞌvesi nene mo do sotoꞌ ogo eveneꞌveloꞌ gizebo ogo neive.
REV 12:11 Ee, leze zuho goniꞌ o-ngedaaꞌ ineꞌza aꞌmine ivileꞌ aniꞌ nene sipisipi angale engiꞌ lihimeꞌinemuꞌ helo vaniseꞌve hulineꞌ neꞌmosi idoꞌ eiꞌ gamaziꞌve hizi eleꞌ igi li soto sotoꞌ igi minaaꞌ aniꞌ neꞌmosi nene ivileꞌ ikeve. Ee, engiꞌ hililiza okoꞌinemukisi nene gili alami gamaziꞌve nene hizi eleꞌ igi nizavosa ngibili hilikevo hilaniꞌ ve.
REV 12:12 Neꞌmine igi ehusoꞌ i hulikevo lemo vo neingumuꞌ nene lingine Okulumokuko minaniꞌ ebeꞌ mukikuꞌ minevoꞌ alevoꞌ igi nizave nene longolize izi minilo. Idoꞌ aꞌmine ve goloso lemo omo neineꞌ nene eiꞌ gameneꞌve osuꞌ lolosa mo liꞌnibe o neivo nemuꞌ gelo izeboloꞌ naba goloso molo davosa lemo omo neinaze. Misuboukisi guvo nosoukisi nizave lengiꞌ nene agae, ehetineꞌ ne ve.
REV 12:13 Neꞌmine lavo gelosa ninguvoniꞌ nene aꞌmine sataꞌ gele vineꞌ loposo niteꞌ naba neꞌmo eze nene mo misubouko ehusoꞌ i hulikevo leme neingumuꞌ nene mo ningo gelosa aꞌmine gipe gidineꞌ veneꞌ nene belelesa imisele do vineꞌ ve.
REV 12:14 Neꞌmine ogavo aꞌmine veneꞌ nene golise patelo misubo hadivela eiꞌ ebeꞌve Oꞌmosoꞌmo do vaꞌvaꞌ o-dida vilive li nolise naba golosoꞌmi holokeꞌneꞌve setaꞌ ma di otuhi-dikevo aꞌmine satakumuꞌ nene golise aꞌmida vineꞌ ve. Aꞌmine golise vineꞌ ebeta nene kilisimasi seto hamosi hapusi lulouꞌ ne neivo gizebo igi nasahiliꞌ i-di minilizangumuꞌ nene aꞌmine do vaꞌvaꞌ o-dekineꞌ ebeta nene vineꞌ ve.
REV 12:15 Neꞌmine ogavo aꞌmine sataꞌ neꞌmo aꞌmine veneꞌ nene nosoꞌmo bele do vilive lo noso naba neꞌmine nene veleutiꞌ gusoꞌ ogo do hulineꞌ ve.
REV 12:16 Neꞌmine ineꞌza misubo neꞌmo veneꞌ nene hize eleꞌ o-do vele do aaꞌ ogo aꞌmine loposo niteꞌ nabaꞌmo veleutiꞌ gusoꞌ ogo hulineꞌ noso nene no mikileꞌ ineꞌ ve.
REV 12:17 Neꞌmine ogavo aꞌmine loposo sataꞌ naba nene aꞌmine venekumuꞌ izeboloꞌ molavo aꞌmine veneꞌ neꞌmi izipahala zuho linge nene lovo o ngemelesa vineꞌ ve. Adoꞌ Oꞌmosoꞌmo lo-ngede neineꞌ gamaziloꞌ ha gili di mini Izesuꞌ gamaziꞌve hizi eleꞌ igi di minaaꞌ nave nene lovo o ngemelesa vineꞌ ve.
REV 12:18 Idoꞌ voosa guvo noso gahevela vo ote minineꞌ ve.
REV 13:1 Idoꞌ neꞌmine ningosa gohi ma ninguvoniꞌ nene guvo nosoutiꞌ loposo niteꞌ ma dizo nohetelivo ninguve. Aꞌmine loposo niteꞌ nene godolo sevenisi komuꞌve tenisi minineꞌ ve. Aꞌmine komuꞌve hamo hamotoꞌ nene guveꞌinesi velitevoꞌ gihaaꞌ aniꞌ angiliꞌ gehekaꞌ gehekaꞌ ineꞌ ve. Idoꞌ godolo hamo hamotoꞌ nene gulive goloso Oꞌmoso doꞌmo leme-daaꞌ gulive gizikaꞌ gizikaꞌ aniꞌ ve.
REV 13:2 Idoꞌ aꞌmine loposo niteꞌ ninguvoniꞌ nene loposo pusi lepadi neꞌmine okoꞌnosi mino gizene anaꞌve nene loposo gaha nabaꞌ nabaꞌmi gizene ana neꞌminesi mino vele gavulo nene laioni gulo neꞌmi vele gavulo neꞌminesi minineꞌ ve. Aꞌmine loposo niteꞌ nene aꞌmine sataꞌ gele vineꞌ loposo niteꞌ naba neꞌmo nene amuzoꞌvesi moꞌmosiꞌvesi emosa evenetoꞌ gizebo ogaꞌ amuzo naba nesi nene imineꞌ ve.
REV 13:3 Idoꞌ ma ninguvoniꞌ nene aꞌmine loposo niteꞌ pusi lepadi gele vineꞌ neꞌmi godolo seveni minangutiꞌ hamoꞌ ma neve nene bili hilikeniꞌ gilineꞌza aꞌmine bili hilaniꞌ husoꞌve nene mo lamineꞌ oganiꞌ ve. Neꞌmine ogavo misubo vaikuꞌ minave nene neꞌmine ingumuꞌ nene voꞌine vavo gopo gaꞌine gili mini aꞌmine loposo niteꞌ nene eꞌmetaniꞌ ve.
REV 13:4 Neꞌmine igi aꞌmine loposo pusi nene amuzo imingumuꞌ ve li aꞌmine sataꞌ gele vineꞌ loposo niteꞌ nene opoꞌni li gelekeleꞌ i-di mini idoꞌ aꞌmine loposo pusi nesi opoꞌni li tiꞌ li laniꞌ ve: Aizou, eveneꞌ hamolitesi aꞌmine loposo pusi nene lovo imi ivileꞌ ilizadoꞌ minave nene ma nizamanako aꞌmine loposo nitetoꞌ nene lisiheꞌ igi eze neꞌmine minave nene ma nizamave.
REV 13:5 Neꞌmine ikevo aꞌmine loposo niteꞌ neꞌmo eiꞌ okoꞌno do dizo Oꞌmoso doꞌmo leme-daaꞌ gamazi lilingumuꞌ nene Oꞌmosoꞌmo gele imineꞌ ve. Idoꞌ ikeꞌni foti tuu (42) neꞌmi lulouꞌ nene evenetoꞌ gizebo ogo minaaꞌ amuzo do mino ogo molo ilive lo nemukisi gele imineꞌ ve
REV 13:6 Neꞌmine ogavo aza apiꞌ ogo Oꞌmosomuꞌ gamazi goloso lo guliveꞌve doꞌmo lemo minevoꞌ alevoꞌ ogaꞌ ineꞌ numuꞌvesi idoꞌ Okulumokuꞌ minavesi nene dovo ledevoꞌ o-ngedo minineꞌ ve.
REV 13:7 Idoꞌ Oꞌmosoꞌmi evenele zuho lovo o ngemo ngivileꞌ ilingumuꞌ nene Oꞌmosoꞌmo gele emo eveneꞌ zuho ato atoꞌ misubo ato atokuꞌ miniꞌmi monave noꞌine ato atokisi okoꞌine ato atokisi minaveloꞌ nene gizebo ogo minelineꞌ amuzo nesi nene imineꞌ ve.
REV 13:8 Neꞌmine ogavo me misubouꞌ miniviꞌ diviꞌ igi nizaniꞌ aleve mukiꞌ nete aꞌmine loposo niteꞌ nene opoꞌni li gelekeleꞌ i-dilisave. Adoꞌ sipisipi angale bili hilikevo neineꞌ neꞌmo do minineꞌ bukuuꞌ guliveꞌine nene Oꞌmosoꞌmo olihe okulumoꞌ misubo do sotoꞌ amineꞌ gamenela gizamivo minamineꞌ aleve mukiꞌ nete aꞌmine loposo niteꞌ nene opoꞌni li gelekeleꞌ i-dilisave. Adoꞌ aꞌmine buku nene minevoꞌ minevoꞌ ngemeni dameni dalizaveti guliveꞌine minaaꞌ neineꞌ bukumuꞌ noluve.
REV 13:9 Idoꞌ gatine ngoloꞌ live nii ma nene gamazi meve nene gililo:
REV 13:10 Eveneꞌ ma ingine galapusoloꞌ vilizadoꞌ o neivo ma nene mo galapusoloꞌ vilizave. Idoꞌ eveneꞌ ma bainati mitetunuꞌ ngibili hililizaniꞌ o neivo ma nene mo aꞌmine eveneꞌ nene bainati mitetunuꞌ ngibili hililizave. Adoꞌ neꞌmine monovo sotoꞌ ilinguꞌ nene Oꞌmosoꞌmi evenele nene eleꞌvoleꞌ igi mulumo geni gihiꞌmi vi mini Kilisitoꞌni huli-dami ezela ha giꞌmizi minilizadoꞌ o neive.
REV 13:11 Nelotiꞌ ma ninguvoniꞌ nene loposo niteꞌ gohi ma misuboutiꞌ dizo nohetelivo ninguve. Aꞌmine loposo niteꞌ nene sipisipi angaleliti komuꞌine neꞌmine setakisi minineꞌ mino gamaziꞌve lineꞌ nene sataꞌ gili vaniꞌ loposo niteꞌ naba gizeꞌine aꞌinesi minaniꞌ nete gamazi laaꞌ naniꞌ neꞌminosa lineꞌ ve.
REV 13:12 Idoꞌ aꞌmine loposo niteꞌ neꞌmo nene gomuꞌ sotoꞌ ineꞌ loposo niteliꞌmi amuzo mukiꞌ nene do mino aꞌmineꞌmi veleloꞌ nene aꞌmine amuzodunuꞌ initeꞌ mataꞌ ogo molo minineꞌ ve. Neꞌmine ogo misubosi aꞌminguꞌ miniꞌmi monaniꞌ aleve mukikisi nene ganaꞌ sotoꞌ ineꞌ loposo niteꞌ adoꞌ bili hilaniꞌ husoꞌve mo lamineꞌ ogavo minineꞌ loposo niteꞌ neve nene gelekeleꞌ i-di opoꞌni li minilizave lo aꞌmine alingeꞌ sotoꞌ ineꞌ loposo initeꞌ neꞌmo nene zatuhoꞌ o-ngidineꞌ ve.
REV 13:13 Neꞌmine ogo atoliꞌmine suno naba ato atoꞌ do sotoꞌ ineꞌ ve. Idoꞌ aꞌmine atoliꞌmine suno do sotoꞌ inguꞌ nene ma neꞌminesi do sotoꞌ ineꞌ ve. Adoꞌ aza logavo eveneliti veꞌnidoꞌ nene Okulumokutiꞌ oloꞌ neꞌmo misubola limineꞌ ve.
REV 13:14 Idoꞌ Oꞌmosoꞌmo gele emavo gomuꞌ loposo niteliꞌmi veleloꞌ nene aꞌmine atoliꞌmine suno ato atoꞌ do sotoꞌ ineꞌ nedunuꞌ nene misubouꞌ aleve goꞌine izo ngeleꞌmize gopo ineꞌ ve. Neꞌmine ogo misubouꞌ aleve lo-ngedavo ingine aꞌmine bainati mitetunuꞌ bili hilikevo vele gizo minineꞌ loposo niteꞌ nene gubiꞌ izi imi opoꞌni lilizangumuꞌ aꞌmineꞌmi avazaha soza oꞌmoso niteꞌ ma liliꞌ ilizave lo-ngedavo liliꞌ aniꞌ ve.
REV 13:15 Neꞌmine ikevo aꞌmine loposo niteꞌ neꞌmo aꞌmine liliꞌ aniꞌ avazaha nitekuꞌ nene sikalahuꞌ molo-delingumuꞌ Oꞌmosoꞌmo gele imineꞌ ve. Aꞌmine gele imineꞌ nene loposo niteꞌ neꞌmo avazaha niteꞌ nene sikalahuꞌ molo-davo aꞌmine avazaha niteꞌ neꞌmo gamazi losa eveneꞌ nene lo-ngedavo aꞌmine loposo niteliꞌmi avazaha niteꞌ nene gelekeleꞌ i-di opoꞌni ma lamilizave nene ngibili hililizangumuꞌ ve lo Oꞌmosoꞌmo gele imineꞌ ve.
REV 13:16 Neꞌmine ogavo aꞌmine loposo niteꞌ neꞌmo zatuhoꞌ o-ngedavo eveneꞌ mukiꞌ adoꞌ eveneꞌ nabasi eveneꞌ ngomosi moni heneni vesi gohoꞌ gahalikisi eveneꞌ maliti gonouꞌ ve liliꞌ igi minavesi idoꞌ angiseꞌine gonoꞌine daaꞌ avesi mukiꞌ nene aꞌnine zamela nehe golihiꞌnidoꞌ nehe neꞌmida nene maki mili-ngidaniꞌ ve.
REV 13:17 Idoꞌ neꞌmine igi eveneꞌ ma ingine aꞌmine maki adoꞌ aꞌmine loposo niteliꞌmi guliveꞌve nehe aꞌmine guliveꞌveꞌmi nabaꞌve nehe neutiꞌ ma damilizave nete nene initeꞌ mataꞌ meni hizilizangumukisi idoꞌ maketi milalizangumukisi nene gili ngimami mo oꞌove li-ngidaniꞌ ve.
REV 13:18 Aꞌmine maki neꞌmi monovomuꞌ nene gili vevesi gililizadoꞌ o neive. Aꞌmine naba nene eveneꞌ maliꞌmi gulivemuꞌ lo molo noluvonaze. Gatine gili vevesaaꞌ ave ma nii ma nene aꞌmine naba nene gati luhuvoꞌve hamo hamoꞌ di nubo ikaꞌ ikaꞌ igisa aꞌmine loposo niteliꞌmi gulive nene di ningi gati gililisave. Aꞌmine nabaꞌve nene sigisi sigisi sigisi (666) ne neive.
REV 14:1 Nelotiꞌ ma ninguvoniꞌ nene sipisipi angale nene Zaioni gololoꞌ ote neivo ninguve. Idoꞌ ezesi makaꞌ nene eveneꞌ vanu hadeti foti fo tauseni (144,000) minaniꞌ ve. Idoꞌ aꞌmine eveneliti golihiꞌnidoꞌ nene sipisipi angaleꞌmi gulivesi idoꞌ melehi gulivesi gizikavo minaniꞌ ve.
REV 14:2 Idoꞌ nelotiꞌ nene Okulumokutiꞌ nolo naba ma sotoꞌ ineꞌ nene giluve. Aꞌmine nolo nene noso nabaꞌmi gugu neꞌminosa mino idoꞌ goꞌ ngilili nabaꞌmi gugu neꞌminosa minineꞌ ve. Ee, aꞌmine nolo giluvoniꞌ nene eveneꞌ mukilite ngita bili minaaꞌ naaniꞌ neꞌminosa minineꞌ ve.
REV 14:3 Idoꞌ aꞌmine ninguvoniꞌ aleve nete nene adoꞌ Oꞌmosoꞌmi moꞌmosiꞌveꞌmi velelasi idoꞌ eleꞌvoleꞌ igi veꞌinesi ha minaaꞌ naniꞌ initeꞌ setaꞌve setaꞌveti veꞌnidokisi idoꞌ gizebo veti veꞌnidokisi mini nama gosohoꞌ nene bili mili laniꞌ ve. Aꞌmine nama nene eveneꞌ malitesi ngeli gili lamilizadoꞌ o minineꞌ ve. Asi aꞌmine eveneꞌ vanu hadeti foti fo tauseni (144,000) adoꞌ misubouꞌ aleveutiꞌ Guvelesi veꞌmo meni hizo do eita ineꞌ aleve engiꞌ netevoꞌ nene gili lilizadoꞌ o minineꞌ ve.
REV 14:4 Ingine veneꞌ damave minaniꞌ nenako neꞌmo nene veneꞌ alusi monovo goloso igi engiꞌ luꞌine di goloso ma amave nene minaniꞌ ve. Idoꞌ ingine nene sipisipi angaleꞌmo vida ada igaꞌ ave nene nizave. Idoꞌ engiꞌ neve nene misubouꞌ aleve mukikutiꞌ gomuꞌ mili Oꞌmosoꞌmi evenelesi idoꞌ sipisipi angaleꞌmi evenelesi liliꞌ ilizangumuꞌ sipisipi angale neꞌmo meni hizo do eita ineꞌ aleve nene nizave.
REV 14:5 Idoꞌ engiꞌ veꞌningutiꞌ nene soza gamazi hamokisi ma lamaniꞌ ve. Ee, lihime dikeve gamazi neꞌminesi nene engiꞌ okoꞌnidoꞌ ma dizamineꞌ minaniꞌ ve.
REV 14:6 Idoꞌ nelotiꞌ ma ninguvoniꞌ nene angeloꞌ gohi ma okulumoꞌ veleta olusoꞌ gehepeve hozene patelo nomonivo ninguve. Aza nene misubouꞌ minave adoꞌ misuboꞌine ato atokuꞌ eveneꞌ zuho ato atoꞌ noꞌine ato atokisi okoꞌine ato atokisi minave mukiꞌ nene adoꞌ minevoꞌ minevoꞌ ilineꞌ gamazi lamineꞌ aza lo-ngemelineꞌ gamazi nene do vo
REV 14:7 nolo nabautiꞌ tiꞌ lo lo-ngimineꞌ ve: Oꞌmosoꞌmo eveneꞌ goniꞌ o-ngedo lihime ngemelineꞌ gamene nene mo ogaze. Lingine nene Oꞌmosoꞌmi goliseꞌve gili mini di naba i-di mini aꞌmine Okulumokisi misubosi idoꞌ guvo nososi idoꞌ noso hinipiniꞌ mukikisi do sotoꞌ ive nene gelekeleꞌ i-di opoꞌni li minilo.
REV 14:8 Neꞌmine ogavo angeloꞌ gohi ma naba tuu neꞌmo eꞌmeto ogo tiꞌ lo lineꞌ ve: Amuzo veti numuno ebeꞌ dizo minineꞌ Babelonia neve nene mo simeꞌ nave. Ee, adoꞌ pasidiaꞌ alu nete vemohoꞌ ngimimiseꞌ igi vaini noso ngimaaꞌ naniꞌ neꞌmino aꞌmine aleve nene Oꞌmoso izeboloꞌ molalineꞌ monovo di sotoꞌ igi eveneꞌ zuho ato atoꞌ mukiꞌ nene engiꞌ monovoꞌine golosoloꞌ nene ngimimiseꞌ igi apizi ngimaaꞌ aveti numuno ebeꞌine Babelonia neve nene mo simeꞌ nave.
REV 14:9 Nelotiꞌ nene angeloꞌ gohi ma naba tili neꞌmo nene gomuꞌ angeloꞌ setaꞌ ma nene ngeꞌmeto ogo nolo nabautiꞌ tiꞌ lo lineꞌ ve: Eveneꞌ ma ingine aꞌmine loposo nitekisi aꞌmineꞌmi avazahaꞌvelokisi gelekeleꞌ i-di opoꞌni li mini aꞌmine loposo niteliꞌmi makiꞌve golihiꞌnidoꞌ nehe aꞌnidoꞌ nehe neꞌmida ma di nizaniꞌ nolineꞌ nene
REV 14:10 Oꞌmosoꞌmo lihimeꞌinemuꞌ izeboloꞌ molangumuꞌ lihime ngemelineꞌ initeꞌ nene amuzo malehe vaini noso haza nososi di gopo amaniꞌ neꞌmine nene neive. Aꞌmine vaini noso nene Oꞌmosoꞌmi izeboloꞌ nenako mo ngemavo nalisave. Ee, Oꞌmosoꞌmi angeloliti veꞌnidokisi sipisipi angaleꞌmi velelokisi nene salfa geheniloꞌ oloꞌ ahuꞌ goloso lo minelineꞌ olokuꞌ nene mulumo alumo gili minilisave.
REV 14:11 Ee, aꞌmine loposo nitetokisi idoꞌ aꞌmineꞌmi avazahalokisi gelekeleꞌ i-di opoꞌni li aꞌmine loposo niteliꞌmi maki adoꞌ guliveꞌveꞌmi luhuvoꞌve ma dalizave mukita nene gamene gamene goꞌ liliha litiꞌmuso izeliha mulumo nene matamivo minii mo mini gilamilisave. Ee, mo aꞌmine olokuꞌ mini mulumo alumo giliviꞌ giliviꞌ igivoꞌ minilizadiꞌmo sokileꞌve nesi dizelineꞌ nene mo huko vamivo mo dizevo dizevoꞌ ogovoꞌ mineleseive.
REV 14:12 Neꞌmine oloseinako Oꞌmosoꞌmi evenele adoꞌ Oꞌmosoꞌmo lo huko lineꞌ gamaziloꞌ eꞌmeti Izesuꞌnimuꞌ gili eleꞌvoleꞌ igi minaaꞌ naniꞌ alevela nene neꞌmine monovo sotoꞌ o-ngedalize. Ingine Oꞌmosoꞌmo lo huko lineꞌ gamaziloꞌ eꞌmeti Izesuꞌnimuꞌ gili eleꞌvoleꞌ igi minaaꞌ naaniꞌ monovoꞌine nene hulami aꞌmine neꞌmine angumuꞌ mulumo alumo geni niteꞌ sotoꞌ o-ngedelineꞌ nene eleꞌvoleꞌ igi ha gihiꞌmi vi minilizadoꞌ o neive.
REV 14:13 Nelotiꞌ nene Okulumokutiꞌ nolo ma sotoꞌ ogo tiꞌ lo nolivo giluve: Gamazi tiꞌ lo gizezo: Idise melotiꞌ eveneꞌ ma ingine Guvelesi ve huli-dami eita ha giꞌmizi mini hili vikaꞌ vikaꞌ ilizave nene mo ngolize izi lamini miniliza akaloꞌ mini mili nizave. Neꞌmine lavo Oꞌmosoꞌmi Sikalahuꞌ neꞌmo nene mo lamineꞌ ve losa tiꞌ lo lineꞌ ve: Engiꞌ igi mili minaaꞌ aniꞌ monovoꞌineꞌmi gihileꞌve nesi nene engikisi makaꞌ vo hetelelineꞌ nenako nemuꞌ nene lihiteheꞌ gono daaꞌ aniꞌ ma nene gohi dami ha mini gilivoꞌ minilisave.
REV 14:14 Neꞌmine ogo gohi ma veꞌnela mene ninguvoniꞌ nene limuso mokonotoꞌ nene eveneꞌ gihile neꞌmine gele vineꞌ ma mitoꞌ neivo ninguve. Aꞌmine ve nene ngolidunuꞌ liliꞌ aniꞌ kuvanadi angiliꞌ nene godololoꞌ geheko anauꞌ nene nosoꞌ niteꞌ dolizaaꞌ miteꞌ gohe goloso nene do neivo ninguve.
REV 14:15 Idoꞌ angeloꞌ gohi ma neve nene Oꞌmosoꞌmi kekeize numuꞌveutiꞌ leme heta ogo nolo nabautiꞌ limuso mokonotoꞌ minivemuꞌ nene vise lo tiꞌ lo lo-dineꞌ ve: Misubouko minamuno nene o molavo dolizaaꞌ gamene nene mo ogaze. Miteka nene hulo gonouꞌ ogo nosoꞌ niteꞌ nene mo dolizezo.
REV 14:16 Lavo aꞌmine limusoloꞌ minive neꞌmo aꞌmine miteꞌve ma nene hulo gonouꞌ ogo misubouꞌ nosoꞌ niteꞌ nene dolizineꞌ ve.
REV 14:17 Idoꞌ angeloꞌ gohi ma nene Okulumokuꞌ Oꞌmosoꞌmi kekeize numuꞌveuꞌ miningutiꞌ leme heta ineꞌ nene azasi nene nosoꞌ niteꞌ dolizaaꞌ miteꞌ gohe goloso nene ma do minineꞌ ve.
REV 14:18 Idoꞌ angeloꞌ mo gohi ma adoꞌ olotoꞌ gizebo o minive nene Oꞌmosoꞌmi alata maukotiꞌ leme heta ogo aꞌmine gohe miteꞌ do minineꞌ angeloꞌ nemuꞌ nene nolo nabautiꞌ tiꞌ lo lo-dineꞌ ve: Misubouko vaini minguꞌ vaini gihile nene mo gaizeꞌ naba igi lodive ikeze. Gaza gohe miteka nene hulo gonouꞌ ogo huko do nubo ozo.
REV 14:19 Neꞌmine lavo aꞌmine angeloꞌ neꞌmo miteꞌve nene misubouko hulo gonouꞌ ogo aꞌmine vaini gihile nene huko do nubo ineꞌ ve. Neꞌmine ogosa aꞌmine vaini gihile lipaaꞌ aniꞌ initeꞌ naba adoꞌ Oꞌmosoꞌmo izeboloꞌ molangumuꞌ lihime ngemelineꞌ initeꞌ nabauꞌ nene hulineꞌ ve.
REV 14:20 Neꞌmine ogavo aꞌmine vaini gihile nene numuno ebeꞌ nabaꞌmi heta nene lisi pilikiꞌ izikevo vanise vaiꞌ goloso nene aꞌmine novozo lemaaꞌ ineꞌ bokisiutiꞌ nene leme heta ineꞌ ve. Aꞌmine vanise neve nene noso neꞌminosa lomo vineꞌ nene vanu hadeti eiti fo (184) maili (tu hadeti naidi sigisi (296) kilomita) neꞌmine nene lomo vo minosa ohunoꞌve nene evenekisi do suꞌmize-ngedelidoꞌ o minineꞌ ve.
REV 15:1 Idoꞌ ninguvoniꞌ nene okulumokuꞌ avazaha niteꞌ naba gohi vode vilidoꞌ o minineꞌ nene ninguve. Adoꞌ angeloꞌ seveni nete eveneꞌ di goloso i-ngidiliza niteꞌ seveni di minaniꞌ nene ma ninguve. Aꞌmine eveneꞌ di goloso i-ngidiliza niteꞌ sotoꞌ ilizaniꞌ neꞌmo Oꞌmosoꞌmo eveneliti lihimeꞌinemuꞌ izeboloꞌ molaniꞌ nene osuꞌ lo-delineꞌ nenako aꞌmidotiꞌ nene eveneꞌ do goloso o-ngedeli initeꞌ gohi ma sotoꞌ amoloseive.
REV 15:2 Idoꞌ ma ninguvoniꞌ nene guvo noso adoꞌ ngalasisi idoꞌ olokisi mini gopo igi minasineꞌ gele vineꞌ nene ninguve. Idoꞌ aꞌmine guvo nosola eveneꞌ ma oti nizavo ninguvoniꞌ nene adoꞌ loposo niteꞌ neꞌmosi aꞌmineꞌmi avazaha neꞌmosi nene zatuhoꞌ ngeli ma i-ngidamasivo aꞌmine loposo niteliꞌmi guliveꞌmi nabaꞌve nene okoꞌnidokisi ma dami ngivileꞌ ave nene minaniꞌ ve. Aꞌmine aleve nene Oꞌmosoꞌmo ngimineꞌ ngita gele vineꞌ initeꞌ hapu nene di mini
REV 15:3 nama ma laniꞌ nene adoꞌ Oꞌmosoꞌmi gonoloꞌ ve Moseꞌ namaꞌvesi idoꞌ sipisipi angaleꞌmi namaꞌvesi nene li tiꞌ li laniꞌ ve: Guvekasi ve Oꞌmoso amuzo malehe gaza ogo molo ogaꞌ naineꞌ initeꞌ nene initeꞌ naba atoliꞌmine vode vilidoꞌ o minineꞌ initeꞌ ne neive. Eveneꞌ zuho ato atoliti Guvetesi ve make geiꞌ monovoka nene monovo gihile lisiheꞌ gehepeve o neive.
REV 15:4 Guvekasi ve, geiꞌ hamoꞌ nene gemeni dameni lisiheꞌ lamineꞌ gehepevesi naneꞌ nenako geiꞌ goliseka gelamo geiꞌ guliveka do hozi lamilive nene hamokisi ma nomive. Mo oꞌove. Adoꞌ geiꞌ monovoka lisiheꞌ lamineꞌ nene mo sotoꞌ gehepeve o neineꞌ nenako neꞌmo nene eveneꞌ zuho ato atoꞌ mukiꞌ nene igi gelekeleꞌ i-gidi geiꞌ vekaloꞌ nene gopoꞌni li minilisave.
REV 15:5 Nelotiꞌ gohi ma ninguvoniꞌ nene Okulumokuꞌ Oꞌmosoꞌmi kekeize numuꞌve adoꞌ lo huko lineꞌ gamazi hize eleꞌ ogatoꞌ minineꞌ numuꞌve seli numuno gele vineꞌ nene akaheꞌve siꞌze gode neivo ninguve.
REV 15:6 Aꞌmine kekeize numungutiꞌ nene aꞌmine eveneꞌ di goloso i-ngidiliza niteꞌ seveni di minaniꞌ angeloꞌ seveni nene limi heta aniꞌ ve. Ingine genegana ngilaniꞌ nene lavolavo laminetunuꞌ liliꞌ aniꞌ initeꞌ guluviꞌ lamineꞌ veꞌne veꞌne lo minineꞌ nene ngilikaniꞌ mini losoꞌnidoꞌ nene ngolidunuꞌ liliꞌ aniꞌ leti neꞌmine nene izikaniꞌ ve.
REV 15:7 Idoꞌ mo limi heta ikevo eleꞌvoleꞌ igi veꞌinesi ha minaaꞌ naniꞌ initeꞌ setaꞌve setaꞌveutiꞌ hamoliꞌmo nene ngolidunuꞌ liliꞌ aniꞌ luduno lapese adoꞌ minevoꞌ minevoꞌ ogaꞌ neineꞌ Oꞌmosoꞌmo izeboloꞌ molangumuꞌ lihime ngemelineꞌ initeꞌ vaiꞌ lo minineꞌ lapese seveni nene aꞌmine angeloꞌ seveni nene do ngimive.
REV 15:8 Neꞌmine ogavo Oꞌmosoꞌmi labanaꞌvelotikisi amuzoꞌvelotikisi sokileꞌve neꞌmo aꞌmine kekeize numuꞌveuꞌ nene vaiꞌ lavo eveneꞌ di goloso i-ngidiliza niteꞌ seveni adoꞌ angeloꞌ sevenilite di minaniꞌ nene olihe di goloso i-ngidiꞌmi nivavosa eveneꞌ hamolitesi nene aꞌmine kekeize numuꞌveuꞌ nene olihe ma dizilizadoꞌ amineꞌ ve.
REV 16:1 Idoꞌ ma giluvoniꞌ nene Oꞌmosoꞌmi kekeize numuꞌveutiꞌ nene nolo naba ma sotoꞌ ogo angeloꞌ seveni engikumuꞌ nene tiꞌ lo nolivo giluve: Lingine vi Oꞌmosoꞌmo eveneꞌ lihimeꞌinemuꞌ izeboloꞌ molangumuꞌ lihime ngemelineꞌ initeꞌ adoꞌ lapesetinguꞌ lapesetinguꞌ neineꞌ ma nene lepi huli misubouko ilo.
REV 16:2 Neꞌmine lavo angeloꞌ naba vanu neꞌmo vo eiꞌ lapeseꞌveuꞌ minineꞌ initeꞌ goloso nene lepe hulo misubouko ineꞌ ve. Neꞌmine ogavo eveneꞌ ma ingine loposo niteliꞌmi makiꞌve di mini aꞌmine loposo niteliꞌmi avazahaloꞌ gubiꞌ izi imi opoꞌni li minaaꞌ aveti okoꞌnidoꞌ nene huso goloso galasa gehepeve nene izekaꞌ izekaꞌ oꞌmo vineꞌ ve.
REV 16:3 Nelotiꞌ nene angeloꞌ naba tuu neꞌmo vo eiꞌ lapeseꞌveuꞌ minineꞌ initeꞌ goloso ma nene lepe hulo guvo nosouꞌ ogavo aꞌmine guvo noso nene eveneꞌ hilaveti vaniseꞌine neꞌmine loloꞌ ogavo aꞌminguꞌ veꞌinesi minaaꞌ aniꞌ initeꞌ mukiꞌ nene hili geseꞌ aniꞌ ve.
REV 16:4 Idoꞌ nelotiꞌ angeloꞌ naba tili neꞌmo vo eiꞌ lapeseꞌveuꞌ minineꞌ initeꞌ goloso ma nene lepe hulo noso nabaꞌ nabaukisi hinipiniꞌ noso ngomo ngamaukisi ogavo vanise gehepeve loloꞌ ineꞌ ve.
REV 16:5 Neꞌmine ogavo noso mukitoꞌ gizebo ogaꞌ ineꞌ angeloꞌ neꞌmo nene tiꞌ lo nolivo giluve: Gaza gomukutiꞌ mino idisesi ha nanive adoꞌ gemeni damenika lisiheꞌ lamineꞌ gehepevesi minanive neke neꞌmino lihime nongemaineꞌ nene mo monovo lisiheꞌ ogo molo nane.
REV 16:6 Naza neꞌmine noluvoniꞌ nene nanitekumuꞌ ve. Ingine aꞌmine vanise noso nongemanive engiꞌ nene geiꞌ polohetesi geiꞌ eveneka lingesi ngibili hilikevo vaniseꞌine lepaniꞌ nenako aꞌmidoꞌ golo hizo vanise noso nalizave lo nongemane. Ee, engiꞌ neꞌmine noo-ngedaineꞌ nene mo neꞌmine o-ngedelinidoꞌ lisiheꞌ i nizaniꞌ nenako mo lamineꞌ neꞌmine noo-ngedane.
REV 16:7 Idoꞌ nelotiꞌ ma giluvoniꞌ nene alata neꞌmo tiꞌ lo nolivo giluve: Ee, Guvekasi ve Oꞌmoso amuzo malehe mo laminetoꞌ nolive. Gaza lihime ngemaaꞌ naineꞌ nene mo monovo gihile lisihetokovoꞌ do molosa ngemaaꞌ nane.
REV 16:8 Idoꞌ nelotiꞌ nene angeloꞌ naba fo neꞌmo vo eiꞌ lapeseꞌveuꞌ minineꞌ initeꞌ goloso nene lepe hulo hokuꞌ ogavo hoꞌ neꞌmo oloꞌ ahuꞌ loosa eveneꞌ okoꞌnidoꞌ honoponoꞌ minelive lo Oꞌmosoꞌmo hoꞌ nene gele imineꞌ ve.
REV 16:9 Neꞌmine ogavo eveneꞌ okoꞌnidoꞌ nene holiꞌmi oloꞌ ahuꞌve neꞌmo loꞌvote-ngedavo ingine nene neꞌmino eveneꞌ do goloso o-ngedelineꞌ amuzoꞌvesi minive Oꞌmosoꞌmi gulive nene divi lediviꞌ igi mini luꞌine di velepeꞌ izi lihimeꞌine hulami Oꞌmoso di naba i-damaniꞌ ve.
REV 16:10 Idoꞌ nelotiꞌ nene angeloꞌ naba faef neꞌmo vo eiꞌ lapeseꞌveuꞌ minineꞌ initeꞌ goloso nene lepe hulo loposo niteliꞌmo gizebo o-ngedo minaaꞌ ineꞌ moꞌmosiꞌveloꞌ nene ogavo aꞌmine gizebo o-ngedo minaaꞌ ineꞌ alevetida nene litiꞌmuso naba izineꞌ ve. Neꞌmine ogavo eveneꞌ ingine mulumo giladiꞌmo veꞌine nahuno nene ingihi mataꞌ mataꞌ izi minii
REV 16:11 adoꞌ husoꞌine golosoutiꞌ mulumo neivo mulumo gilaniꞌ neꞌmo nene Okulumokuꞌ Oꞌmoso nene divi ledivika li-di mini luꞌine di velepeꞌ izami igi mili igaꞌ aniꞌ initeꞌ golosoꞌine nene mo hulamaniꞌ ve.
REV 16:12 Idoꞌ nelotiꞌ nene angeloꞌ naba sigisi neꞌmo vo eiꞌ lapeseꞌveuꞌ minineꞌ initeꞌ goloso nene lepe hulo Zupalati noso nabauꞌ ogavo aꞌmine noso naba nene hoꞌ dizaaꞌ idatiꞌ guveꞌinesi ve naba alizaniꞌ akaꞌine nene do vaꞌvaꞌ o-ngedo gokoꞌ lineꞌ ve.
REV 16:13 Idoꞌ neꞌmine ogavo ma ninguvoniꞌ nene sataꞌ naba gele vineꞌ loposo niteliꞌmi veleutikisi ezelotiꞌ sotoꞌ ineꞌ loposo niteliꞌmi veleutikisi idoꞌ soza polohete ma minidiꞌmi veleutikisi nene sikalahuꞌ goloso seto hamo adoꞌ gizeleꞌ gili vanikovoꞌ nene limi heta aniꞌ ve.
REV 16:14 Aꞌmine sikalahuꞌ goloso nene ve golosoꞌmi zuhoutiꞌ mini engiꞌ amuzoꞌine ngelebizi ato atoꞌ suno di sotoꞌ igi misubouꞌ misubouꞌ eveneꞌ zuho ato atoꞌ ngamaniꞌine ato atokisi miniꞌmi monadaa monadaa nene vaniꞌ ve. Idoꞌ aꞌmine gizeleꞌ gili vaniꞌ sikalahuꞌ goloso neꞌmine igi vaniꞌ nene amuzo malehe Oꞌmosoꞌmo lihime ngemo ngebelelesa ilineꞌ gamene adoꞌ gamene nabala nene aꞌmidatiꞌ aꞌmidatiꞌ guveꞌinesi ve naba nete nene lovo i imilizangumuꞌ ve li di nubuho i-ngidilisa vaniꞌ ve.
REV 16:15 Idoꞌ Guvelesi veꞌmo tiꞌ lo nolive: Gililo. Naza nene gumineloꞌ ve alive li gilamadoꞌ ogaꞌ neineꞌ neꞌmino alosuve. Eveneꞌ ma ingine laza aꞌmine gameneuꞌ nene geneganate viseꞌ ogo bakaꞌ nomonunivo eveneꞌ ningikevo lovozo helalone li eheꞌ igi mini geneganaꞌnidoꞌ gizebo lamineꞌ igi minilizave nene ngolize izilizadoꞌ mini mili minilisave.
REV 16:16 Neꞌmine igi aꞌmine sikalahuꞌ goloso nete aꞌmine vi di nubo i-ngidave nene ngeleꞌmizi ebeꞌ ma gulive Zuda veti gamaziꞌningutiꞌ Halamagedoni ve laaꞌ naada nene di nubo i-ngidaniꞌ ve.
REV 16:17 Neꞌmine ikevo angeloꞌ naba seveni neꞌmo eiꞌ lapeseꞌveuꞌ minineꞌ initeꞌ goloso nene lepe hulo akaꞌvozene hepeꞌ monaaꞌ idoꞌ ogavo Oꞌmosoꞌmi kekeize numuꞌveuꞌ moꞌmosiꞌvelatiꞌ nene nolo naba ma sotoꞌ ogo tiꞌ lo lineꞌ ve: Me gono osuꞌ nolineꞌ gameneꞌve nene mo ogo novive.
REV 16:18 Neꞌmine lavo aꞌmidoꞌ nene goꞌ paꞌna paꞌna ogo nolo nolo molo goꞌ ngilili ngilili nolo mimiꞌ naba ma ineꞌ nene mo naba goloso ive. Eveneꞌ me misubouꞌ apiꞌ ogo sotoꞌ ogo mine do dizo idiselasi nonidoꞌ nene aꞌmine mimiꞌ naba goloso neꞌmine nene ma amineꞌ ve.
REV 16:19 Neꞌmine ogavo neꞌmo numuno ebeꞌ naba nene hoꞌlo seto hamo neivo idoꞌ eveneꞌ zuho ato atoliti numuno ebeꞌine miniꞌmi monaniꞌ nesi nene simeꞌ naniꞌ ve. Ee, Oꞌmosoꞌmo numuno ebeꞌ naba dizo minineꞌ Babelonia nemuꞌ nene ha gele mino lihimeꞌinemuꞌ izeboloꞌ goloso molangumuꞌ lihime ngemaaꞌ neineꞌ initeꞌ goloso vaini noso neꞌmine nene minineꞌ nenako aꞌmine izeboloꞌ vaini noso nene nalizave lo Babelonia numuno ebekuꞌ aleve ngimineꞌ ve.
REV 16:20 Idoꞌ ailani mukiꞌ nene vi haha ikevo golosi nene limi ingi osuꞌ li gohi ma minamavo ningamaniꞌ ve.
REV 16:21 Neꞌmine ogavo okulumokutiꞌ nene osupo gihile nabaꞌ naba adoꞌ gihile hamo hamoliꞌmo geniꞌve vanu hadeti (100) pauni (foti faef kilo (45Kg)) neꞌmine minekaꞌ minekaꞌ ineꞌ nene evenetoꞌ limiꞌmi vaniꞌ ve. Neꞌmine neivo aꞌmine nene initeꞌ goloso gehepeve sotoꞌ o-ngidineꞌ nenako aꞌmine osupo gihile evenetoꞌ diꞌmoziꞌ moziꞌ aniꞌ nemuꞌ nene aꞌmine aleve ingine Oꞌmoso divi ledivika li-daniꞌ ve.
REV 17:1 Idoꞌ nelotiꞌ nene aꞌmine angeloꞌ seveni lapese seveniuꞌ initeꞌ goloso mili di minave mautiꞌ maliꞌmo ogo gamazi lo-nemo tiꞌ lo lineꞌ ve: Adoꞌ numuno ebeꞌ naba pasidiaꞌ veneꞌ neꞌmine minineꞌ numuno adoꞌ noso mukiꞌ minada minineꞌ numuno nene Oꞌmosoꞌmo lihime emavo mulumo geni gehelineꞌ nene gelebizeloze. Ano.
REV 17:2 Aꞌmine numuno ebetoꞌ medelo minineꞌ veneꞌ nene adoꞌ misubouꞌ misubouꞌ guveꞌinesi ve nete vi ezesi monovo goloso daaꞌ aniꞌ veneꞌ ne neive. Aꞌmine veneꞌ neꞌmo nene eiꞌ monovoꞌve goloso adoꞌ vaini noso neꞌmine nene misubouꞌ miniꞌmi monaniꞌ aleve ngimineꞌ neꞌmo nene sipaki igi minaniꞌ ve.
REV 17:3 Neꞌmine lo-nemo Oꞌmosoꞌmi Sikalahuꞌ neꞌmo zatuhoꞌ o-nidivo nouvo aꞌmine angeloꞌ maꞌmo nene neleꞌmize do ebeꞌ hadivela vineꞌ ve. Neꞌmine ogavo aꞌmida ninguvoniꞌ nene veneꞌ ma loposo niteꞌ guleheꞌ ngengeꞌni goloso ma minidoꞌ nene mitoꞌ neivo ninguve. Aꞌmine loposo niteꞌ neꞌmi okoꞌnoloꞌ nene Oꞌmoso doꞌmo leme-daaꞌ gulive goloso nene vaiꞌ goloso neivo godolo nene seveniꞌa neivo idoꞌ komuꞌve nene teniꞌa minaniꞌ ve.
REV 17:4 Aꞌmine veneꞌ nene genegana guleheꞌ ngengeꞌnisi idoꞌ gumi kala pepoli ve laaꞌ naniꞌ gulehekisi minineꞌ adoꞌ meniꞌve dizo minineꞌ genegana nene ngolo mino idoꞌ gonoliseꞌve ato atoꞌ meniꞌve dizo minineꞌ initeꞌ adoꞌ ngolidunuꞌ nehe guleheꞌ kaleheꞌ gehenidunuꞌ nehe idoꞌ ngaluluꞌ laminedunuꞌ nehe nevoꞌmine initedunuꞌ nene gonolise ogosa minineꞌ ve. Idoꞌ anauꞌ ngolidunuꞌ liliꞌ aniꞌ kapu ma do mininguꞌ nene vaini noso neꞌmino ovozo monovosi pasidiaꞌ monovoꞌve golososi nene vaiꞌ lo minineꞌ kapu do minineꞌ ve.
REV 17:5 Neꞌmino neivo golihileloꞌ nene luhuvo gamazi godolo aneza gamaziutiꞌ tiꞌ li gizikaniꞌ ve: Pasidiaꞌ veneꞌ mukiliti izeꞌnibosi idoꞌ me misubouꞌ minaniꞌ lovozo monovo ato atoliti izeꞌnibosi minineꞌ ebeꞌ Babelonia numuno ebeꞌ dizo minineꞌ ma ne neive.
REV 17:6 Aꞌmine Babelonia numuno ebekutiꞌ aleve nete Oꞌmosoꞌmi evenele Izesuꞌ gamazi hizi eleꞌ igi minave nene geli geli igi ngolize izi ngibilikaꞌ ngibilikaꞌ avo vaniseꞌine vaiꞌ goloso lepaniꞌ nenako naza ninguvoniꞌ nene aꞌmine pasidiaꞌ veneꞌ neꞌmo vaniseꞌine nene vaini noso neꞌmino geli geli ogo nadiꞌmo sipaki ineꞌ gelo neivo ninguve. Naza ningosa voꞌne vaavo gamaziꞌnesi nomivo minuve.
REV 17:7 Neꞌmino nouvo angeloꞌ neꞌmo tiꞌ lo lo-nimive: Gaza gopo gaka nanimuꞌ gelo nane. Aꞌmine veneliꞌmi monovosi idoꞌ aꞌmine mitoꞌ neineꞌ loposo niteꞌ adoꞌ godolo sevenisi komuꞌve tenisi minineꞌ neꞌmi monovosi nene lo ngoloꞌ lo lo-gemelesuve.
REV 17:8 Aꞌmine noningaineꞌ loposo niteꞌ nene gomuꞌ minosa idise nene minamineꞌza aꞌmine hemuvosi nomineꞌ galeseutiꞌ nene dizo hetelelesa neive. Ma dizo hetelelineꞌ nene mo simeꞌ nalineꞌ akaloꞌ mine molo voloseive. Idoꞌ me misubouꞌ aleve adoꞌ minevoꞌ minevoꞌ ngemeni dameni dalizaveti guliveꞌine minaaꞌ neineꞌ buku adoꞌ me misubo sotoꞌ idaatiꞌ neineꞌ bukuuꞌ guliveꞌine nomive ingine aꞌmine loposo niteꞌ nene ningisa mo voꞌine vavo gopo gaꞌine gili minilisave. Idoꞌ voꞌine vavo gopo gaꞌine gili minilizaniꞌ nene aꞌmine loposo niteꞌ nene gomuꞌ minosa idise minamo alingeꞌ nene aloseinako nemuꞌ nene ingine mo voꞌine vavo gopo gaꞌine gili minilisave.
REV 17:9 Me gamaziꞌmi monovo gililizangumuꞌ nene otohato igisa gililizadoꞌ o neive. Aꞌmine loposo niteliꞌmi godolo seveni nene aꞌmine veneꞌ minaaꞌ neida minaniꞌ golo seveni neemuꞌ nene nizave. Idoꞌ ma nene guveꞌinesi ve nabaꞌ naba seveni nemukisi nene nizave.
REV 17:10 Aꞌmine guveꞌinesi ve naba engikutiꞌ faef nene mo mini osuꞌ likevo hamoꞌ nene guvelesi ve gono ha do neive. Idoꞌ ma neve nene olihe sotoꞌ amive. Olihe sotoꞌ amiha ma alineꞌ nene gamene liꞌnibemukovoꞌ guvelesi ve gono do mineleseive.
REV 17:11 Idoꞌ aꞌmine loposo niteꞌ adoꞌ gomuꞌ minosa idise minamive nene aꞌmine guveꞌinesi ve seveniloꞌ imineꞌ molo naba eiti (8) neꞌminosa nene neive. Ne neiha aza neve nene aꞌmine guveꞌinesi ve seveni engikutiꞌ hamoꞌ neve nene ma mino mo simeꞌ nalineꞌ akaloꞌ mine molo neive.
REV 17:12 Idoꞌ aꞌmine loposo niteliꞌmi komuꞌve teni ningaineꞌ nene ingine guveꞌinesi ve nabaꞌ naba tenimuꞌ nene nizave. Ingine olihe guveꞌinesi ve mini evenetoꞌ gizebo igaꞌ gono apiꞌ igi damaniꞌza alingeꞌ aꞌmine loposo niteꞌ nesi makaꞌ aꞌmine gono dalizangumuꞌ nene gamene liꞌnibemukovoꞌ amuzo di mini gono dalisave.
REV 17:13 Neꞌmine igi mini aꞌmine guveꞌinesi ve teni ingine hamoꞌ initekovoꞌ ilisa giliisa engiꞌ evenetoꞌ gizebo igaꞌ amuzoꞌine nene aꞌmine loposo initekovoꞌ nene lehizi-dilisave.
REV 17:14 Neꞌmine igisa sipisipi angale nene lovo i imavo lovo hizilisaniꞌza aza nene mo guveꞌinesi veti guveꞌinesi ve mino idoꞌ ve nabaꞌ nabaliti ve nabaꞌine neineꞌ nenako aza nene mo ngivileꞌ oloseive. Idoꞌ aꞌmine lovo hizilizanguꞌ nene eze evenele ve lo Oꞌmosoꞌmo vise lo do kegese-ngidive adoꞌ ezeloꞌ giꞌmize lamineꞌ i minave nene ezesi makaꞌ oti minilisave.
REV 17:15 Idoꞌ ma nene tiꞌ lo lo-nimive: Aꞌmine pasidiaꞌ veneꞌ minida noso mukiꞌ ningaineꞌ nene eveneꞌ ato atoꞌ mukiꞌ adoꞌ eveneꞌ vaiꞌ goloso okoꞌine ato atokisi noꞌine ato atokisi minadoꞌ nene mini milisa nizave.
REV 17:16 Idoꞌ aꞌmine loposo niteliꞌmi komuꞌve teni ningaineꞌ nesi idoꞌ aꞌmine loposo niteꞌ nesi nene aꞌmine Babelonia numuno ebetoꞌ medelo minineꞌ pasidiaꞌ veneꞌ nene ningi goseleꞌ gehepeve i-dii initeꞌ mataꞌve nene tava li di huli-dii haza bakakovoꞌ huli-mikii aꞌminguꞌ minaniꞌ aleve mukiꞌ nene mo ngibili osuꞌ liisa oloꞌ nedunuꞌ viteꞌ i-dilisave.
REV 17:17 Idoꞌ neꞌmine i-dilizaniꞌ nene Oꞌmosoꞌmo mo neꞌmine i-dilisave lo gala gele neineꞌ initeꞌ ilizangumuꞌ nene mo luꞌine do ote-ngede neineꞌ nenako neꞌmo nene mo neꞌmine i-dilisave. Aꞌmine engiꞌ mukiꞌ nene hamoꞌ initekovoꞌ ilisa gili minilisaanako ingine guveꞌinesi ve mini evenetoꞌ gizebo igaꞌ amuzoꞌine nene aꞌmine loposo niteꞌ nene lehizi-dilizangumuꞌ nene luꞌine do ote-ngede neive. Idoꞌ neꞌmine o-ngede neinako eiꞌ Oꞌmosoꞌmo lineꞌ gamazi nene olihe gihile izeꞌmo novilinguꞌ nene aꞌmine loposo niteꞌ nene gelekeleꞌ i-di hizi eleꞌ i-di nizavo aꞌmine Oꞌmosoꞌmo lineꞌ gamazi nene ogo gihile ize osuꞌ loloseive.
REV 17:18 Idoꞌ aꞌmine veneꞌ ningaineꞌ ma nene numuno ebeꞌ naba misubouꞌ misubouꞌ guveꞌinesi ve nabaꞌ naba gizebo o-ngedo minaaꞌ neineꞌ numuno ebetoꞌ medelo neineꞌ veneꞌ nene ningane.
REV 18:1 Nelotiꞌ nene angeloꞌ gohi ma Okulumokutiꞌ lemo navo ninguve. Aꞌmine angeloꞌ nene amuzo naba do minosa nolimivo eiꞌ labanaꞌve neꞌmo misubo nene hize labanaꞌ elo minineꞌ ve.
REV 18:2 Neꞌmino mino aza nene nolo nabautiꞌ vise lo tiꞌ lo lineꞌ ve: Amuzo veti numuno ebeꞌ dizo minineꞌ adoꞌ Babelonia numuno ebeꞌ ma nene mo simeꞌ nave. Ee, aꞌmine numuno ebeꞌ nene simeꞌ nosa mo sikalahuꞌ golosoliti numuꞌine loloꞌ ogave. Aꞌminguꞌ nene sikalahuꞌ goloso ato atoꞌ mukiꞌ ingi monaaꞌ navo idoꞌ nama goloso ato atoꞌ mukiꞌ nesi nene ingi monaaꞌ navo loposo niteꞌ goloso ato atoꞌ goseleꞌ aseleꞌ initeꞌ mukiꞌ nesi nene ingi monaaꞌ nave.
REV 18:3 Ne nanitekumuꞌ ve. Aꞌmine pasidiaꞌ veneꞌ neꞌmo laniteꞌ gelaaꞌ ineꞌ monovo goloso vaini noso neꞌmino minineꞌ nene eveneꞌ zuho ato atoꞌ ngemavo ezesi makaꞌ aꞌmine vaini noso nene naaꞌ aniꞌ ve. Idoꞌ misubouꞌ misubouꞌ guveꞌinesi ve nabaꞌ naba miniꞌmi monave ingine nene aꞌmine pasidiaꞌ venekisi makaꞌ monovo goloso igaꞌ aniꞌ ve. Idoꞌ aza initeꞌ matakumuꞌ amuzo molo laniteꞌ gelaaꞌ ineꞌ nenako neꞌmo ezelotiꞌ nene misubouꞌ misubouꞌ bisinisi igaꞌ ave nene moni heneni ve liliꞌ ikeve. Nemuꞌ nene aꞌmine Babelonia ebeꞌ nene mo simeꞌ naniꞌ ve.
REV 18:4 Neꞌmine lavo nelotiꞌ nene Okulumokutiꞌ nolo gohi ma sotoꞌ ogo tiꞌ lo nolivo giluve: Neze zuhokizo, lingine nene aꞌmine Babelonia alevete lihime daaꞌ naniꞌ nene makaꞌ dikevo naza lihime ngemo do goloso o-ngedeloniꞌ initeꞌ ato atoꞌ nene lengikisi aꞌmineꞌmine ogo do sotoꞌ o-lengedaloze. Lingine huli-ngidi abazakovoꞌ vi minilo.
REV 18:5 Naza lihime ngemelesuve noluvoniꞌ nene engiꞌ lihimeꞌine nene ehetoꞌ ehetoꞌ miliꞌmi dizi vaniꞌ nene mo Okulumokisi do gelo neivo Oꞌmoso neꞌmo aꞌmine goloso niteꞌ daniꞌ nemuꞌ gala nogilineꞌ nenako nemuꞌ nene noluve.
REV 18:6 Aꞌmine pasidiaꞌ veneꞌ neꞌmo eveneꞌ do goloso o-ngidineꞌ nene nadiꞌ nadiꞌ ogosa o-ngede nolihe aꞌmidoꞌ golo hizi aꞌmine numuno ebeꞌ nene di goloso i-dilo. Ee, aꞌmine eiꞌ ogo molo o nolineꞌ initeꞌ goloso hamo hamotoꞌ nene seta setaꞌ di lobeꞌ lobeꞌ igisavoꞌ lihime imilo. Ee, aꞌmine eiꞌ monovoꞌve goloso adoꞌ amuzo malehe vaini noso neꞌmine kapuuꞌ lepo ngeme nolineꞌ votigile nene ivileꞌ ivosa vaini noso nene gohi masi di amuzo mili lepi imilo.
REV 18:7 Aza nene eiꞌ okoꞌno do dizo mino okoꞌnoꞌmo laniteꞌ gilineꞌ monovolokovoꞌ geli geli ogo doꞌmo vo mine do dizineꞌ votigileloꞌ nene di milisa diꞌmi limi-di mulumo alumo gelaaꞌ idoꞌ mulunouꞌ mulumo alumo gelaaꞌ ilidoꞌ di mili i-dilo. Aza nene lulouꞌ tiꞌ lo laaꞌ neive: Naza nene guveꞌnesi veneꞌ dizo nouvoniꞌ veneꞌ ma nene nouve. Eveneꞌne zuho ngeli ma hilamilisanako ngelo mulumo alumo gelo ma minamolosuve.
REV 18:8 Neꞌmine laaꞌ neineꞌ nenako idoꞌ eze lihime emelive Guvelesi ve Oꞌmoso nene amuzo ve neineꞌ nenako nemuꞌ nene gamene hamokukovoꞌ aꞌmine veneꞌ di goloso i-dilizaniꞌ initeꞌ goloso ato atoꞌ sotoꞌ i-dilisave. Adoꞌ initeꞌ gize daaꞌ monovo sotoꞌ o-deleseive. Idoꞌ mulumo alumo sotoꞌ o-deleseive. Idoꞌ gaꞌna naba sotoꞌ o-deleseive. Idoꞌ oloꞌ neꞌmo nene lovoꞌ lovotevoꞌ o-deleseive.
REV 18:9 Misubouꞌ misubouꞌ guveꞌinesi ve vaiꞌ miniꞌmi monaniꞌ ingine aꞌmine Babelonia numuno ebetoꞌ medelo minineꞌ pasidiaꞌ venekisi makaꞌ monovo goloso igi okoꞌineꞌmo laniteꞌ gilineꞌ monovo ato atokovoꞌ igi mili minaaꞌ aniꞌ nenako aꞌmine numuno ebeꞌ Babelonia nene ololiꞌmo lovoꞌ lovotevoꞌ neivo lilineꞌ sokileꞌve nene aꞌmine guveꞌinesi ve ningi aꞌmine aleve mulumo alumo nigilaniꞌ nene lazasi gelalone li golise gilisa mini hotoꞌ igi mini zanamana izi ive nama i-ngidi mini tiꞌ li lilisave: Agae, agae, numuno ebeꞌ naba ma lae. Amuzo veti numuno ebeꞌ Babelonia ma lae. Mo gamene hamoꞌ maukovoꞌ Oꞌmosoꞌmo lihime gimineꞌ nene mo mulumo gele-gedekune.
REV 18:11 Idoꞌ misubouꞌ misubouꞌ bisinisi igaꞌ ave nesi aꞌmine numuno ebekumuꞌ nene mulumo gili ive nama i-dilisave. Ee, ingine maketi milaaꞌ aniꞌ initeꞌ ma nene meni gohi ma hizamilisanako nemuꞌ nene mo ive nama i-dilisave.
REV 18:12 Aꞌmine evenelite maketi milavo meni hizaaꞌ aniꞌ initeꞌ nene adoꞌ ngolidunuꞌ liliꞌ aniꞌ initeꞌ nehe idoꞌ siluvadunuꞌ liliꞌ aniꞌ initeꞌ nehe idoꞌ geheni lamine tamineꞌ nehe idoꞌ ngaluluꞌ lamineꞌ goloso nehe idoꞌ amuzo malehe lavolavo lamineꞌ nehe idoꞌ lavolavo gumi kala pepoli ve laaꞌ nanikisi idoꞌ guleheꞌ ngengeꞌnisi meniꞌve dizo minineꞌ lavolavo nehe idoꞌ silika lavolavo nehe idoꞌ luhuvo lahava minineꞌ palani za lamineꞌ ato atoꞌ nehe idoꞌ elefaniti veꞌine gavulo nabadunuꞌ liliꞌ aniꞌ initeꞌ ato atoꞌ nehe idoꞌ meniꞌve dizo neineꞌ za laminedunuꞌ liliꞌ aniꞌ initeꞌ nehe idoꞌ ngoli gele vineꞌ initetunuꞌ liliꞌ aniꞌ initeꞌ nehe idoꞌ ainidunuꞌ liliꞌ aniꞌ initeꞌ nehe idoꞌ mokonoꞌ geheni laminetunuꞌ liliꞌ aniꞌ initeꞌ nehe
REV 18:13 idoꞌ unuvo laminekisi uveli ato atoꞌ nehe idoꞌ olokuꞌ gizikevo unuvo lamineꞌ ogaꞌ ineꞌ initeꞌ nehe idoꞌ za setalitisi novozo unuvo lamineꞌ ogaꞌ ineꞌ nehe idoꞌ vaini noso nehe idoꞌ okoꞌnidoꞌ hilaaꞌ idoꞌ nosoꞌ niteꞌ gizi vataꞌ igaꞌ aniꞌ uveli nehe idoꞌ sikoni beki, viti beki nehe idoꞌ bulumakaꞌ ize, sipisipi ize, hosi ize nehe idoꞌ hosilite geleleheꞌ igaꞌ aniꞌ kali nehe gonoloꞌ ve adoꞌ voꞌinehazasi minaniꞌ initeꞌ eveneꞌ nesi initeꞌ mukiꞌ nene maketi milikevo meni hizaaꞌ aniꞌ ve.
REV 18:14 Idoꞌ evenelite aꞌmine numuno ebekutiꞌ alevemuꞌ tiꞌ li lilisave: Initeꞌ lamine tamineꞌ lutinguꞌ dalisa gilaniꞌ ma nene mo lengiꞌ nizadatiꞌ vo haha ogave. Ee, aꞌmine ngomoꞌ nabaꞌ nosoꞌ niteꞌ lamine tamineꞌ vaiꞌ nesi idoꞌ guleheꞌ kaleheꞌ initeꞌ lamineꞌ tamineꞌ nesi lengitatiꞌ nene mo vo haha ogo osuꞌ loganako lingine gohi ma ningamilisave.
REV 18:15 Idoꞌ misubouꞌ misubouꞌ bisinisi ve aꞌmine meꞌmine initeꞌ lamineꞌ tamineꞌ maketi mili aꞌmine pasidia venetatiꞌ moni di heneni ve liliꞌ ave ingine aꞌmine Babelonia aleve mulumo alumo nigilaniꞌ neꞌmino lazasi gelalone li golise gilisa mini hota i mini gisi ngisi mili ive nama igi
REV 18:16 tiꞌ li lilisave: Agae, agae, numuno ebeꞌ naba ma lae. Aꞌmine numuno ebeꞌ meve nene veneꞌ ma genegana guleheꞌ ngengeꞌnisi idoꞌ gumi kala pepoli ve laaꞌ nanikisi minineꞌ meniꞌve dizo minineꞌ genegana ngolo mino idoꞌ gonoliseꞌve ato atoꞌ meniꞌve dizo minineꞌ initeꞌ adoꞌ ngolidunuꞌ nehe guleheꞌ kaleheꞌ gehenidunuꞌ nehe idoꞌ ngaluluꞌ laminedunuꞌ nehe nevoꞌmine initedunuꞌ gonolise ogosa minineꞌ veneꞌ gele vineꞌ numuno ebeꞌ Babelonia ma laee.
REV 18:17 Heneni nganenika atoliꞌmine ogosa minineꞌ ma nene mo gamene hamoꞌ maukovoꞌ hede gudi vogangumuꞌ nene mo mulumo gele-gedekune. Idoꞌ sipiloꞌ gizebo vesi idoꞌ aꞌmine sipiuꞌ ebeꞌ mala vilisa nivaniꞌ alevesi idoꞌ sipiuꞌ bosukulu nesi idoꞌ guvo nosolotiꞌ bisinisi liliꞌ igi initeꞌ daaꞌ ave mukiꞌ nesi nene mukitoꞌ mini hotoꞌ igi
REV 18:18 aꞌmine Babelonia numuno ebeꞌ nene ololiꞌmo lovoꞌ lovotevoꞌ neivo aꞌmine nolineꞌ sokileꞌve nene ningi gekeꞌ gekeꞌ li tiꞌ li laniꞌ ve: Agae, aꞌmine numuno ebeꞌ naba meꞌmine nene mo ma nomineꞌ ve.
REV 18:19 Neꞌmine lii uꞌmusupo gisi godoꞌnidoꞌ hiliisa gekeꞌ gekeꞌ li gisi ngisi mili ive nama igi tiꞌ li laniꞌ ve: Agae, agae, numuno ebeꞌ naba ma laee. Guvo nosoloꞌ sipi di monave mukiꞌ nene eiꞌ aꞌmine numuno ebeꞌ Babelonia nelatiꞌ heneni nganeni di moniꞌ moniꞌ igi moni heneni ve liliꞌ igaꞌ aniꞌ maho. Idise nene mo gamene hamoꞌ maukovoꞌ initeꞌ mukiꞌ nene tava li di hulikevo mo golosoloꞌ molavo mulumo gele-dekune li laniꞌ ve.
REV 18:20 Aꞌmine aleve nene mo neꞌmine igi goloso ikeniꞌ nenako Okulumokuꞌ nizave lingine longolize izi minilo. Ee, lengiꞌ di goloso i-lingidaaꞌ aniꞌ mamuꞌ nene Oꞌmosoꞌmo gonitoꞌ hize eleꞌ o-lengedo aꞌmine aleve nene lihime ngimineꞌ nenaze. Nemuꞌ nene Oꞌmosoꞌmi evenelesi aposolosi idoꞌ polohete linginesi nene longolize izi minilo.
REV 18:21 Idoꞌ nelotiꞌ gohi ma ninguvoniꞌ nene amuzo malehe angeloꞌ maliꞌmo geheni nabaꞌ naba ma ganadise geheni neꞌmine nene ma do oto hulo guvo nosouꞌ ogo tiꞌ lo lineꞌ ve: Babelonia numuno ebeꞌ naba ma nene neꞌminisa nene mili hulikevo evenelitesi nene gohi ma ningamilisave.
REV 18:22 Idoꞌ aꞌmine numuno ebeꞌ Babelonia neke, geikuꞌ nene ngita gele vineꞌ initeꞌ hapu nibilavo nehe idoꞌ musiki nimilavo nehe idoꞌ huhunaleꞌ nimilavoo nehe idoꞌ pikuli hubu nilavoo nehe neꞌmine manaꞌmine naavo noloꞌve nene kekeꞌ gohi ma gilamilisave. Idoꞌ ato atoꞌ gono mukiliꞌmi gonouꞌ ve nene gohi ma mini-gidavo ningamilisave. Idoꞌ viti gihile etaaꞌ neineꞌ masini neꞌmi noloꞌve geikuꞌ nene gohi ma molavo ma gilamilisave.
REV 18:23 Idoꞌ lamuꞌmi liviꞌ labanaꞌve nesi nene geikuꞌ livoo mo ma ningamilisave. Idoꞌ veneꞌ alu hizaaꞌ veneꞌ daaꞌ niigi ngolize izi nama gaha nilavo noloꞌve geikuꞌ nene minivoo ma gilamilisanako mo osuꞌ loloseive. Nene nanitekumuꞌ ve. Geitatiꞌ bisinisi igaꞌ ave nene misubo lingela minave ngivileꞌ igi eveneꞌ naba liliꞌ aniꞌ nenako nemukisi idoꞌ eveneꞌ do goloso o-ngedaaꞌ monovoka golosodunuꞌ eveneꞌ zuho ato atoꞌ nene goꞌine izo ngeleꞌmize gopo aineꞌ nenako nemukisi nene simeꞌ nalosane.
REV 18:24 Idoꞌ aꞌmine Babelonia numuno ebekuꞌ aleve adoꞌ Oꞌmosoꞌmi evenelesi polohetesi ngibili hilikevo vaniseꞌine lepaniꞌ neꞌmi lihime nesi idoꞌ misubouꞌ misubouꞌ eveneꞌ ngibili hilikaꞌ hilikaꞌ aniꞌ neti lihime nesi nene mo engita sotoꞌ neinako mo simeꞌ nalisave.
REV 19:1 Nelotiꞌ gohi ma giluvoniꞌ Okulumokuꞌ nene eveneꞌ vaiꞌ golosolite gamazi nilaniꞌ noꞌine naba neꞌmine giluvoniꞌ nene tiꞌ li nilavo giluve: Oꞌmoso opoꞌni nolune. Aꞌmine Oꞌmosote neve nene leliꞌ do luꞌ izaaꞌ ive mino Guvelesi naba mino amuzo ve neive.
REV 19:2 Idoꞌ Oꞌmoso opoꞌni neꞌmino noluneꞌ nene aꞌmine pasidiaꞌ veneꞌ naba neꞌmo monovo golosoloꞌ monaaꞌ idiꞌmo misubo mukikuꞌ aleve ngeleꞌmize goloso ineꞌ veneꞌ nene Oꞌmosoꞌmo goniꞌ o-do eiꞌ gonouꞌ veꞌve ngebele helavo vaniseꞌine lepaniꞌ maloꞌ nene golo hizo lihime imineꞌ nenako nemuꞌ nene aza lihime ngemaaꞌ neineꞌ nene mo monovo lisihetokovoꞌ do molosa ngemaaꞌ neive lo opoꞌni nolune.
REV 19:3 Neꞌmine li gohi vise li tiꞌ li laniꞌ ve: Aꞌmine numuno ebeꞌ Babelonia nene mudise lihime eme osuꞌ nolineꞌ nenako oloꞌ nolineꞌ sokile neve nene osukisi lamo sokile dizevoꞌ dizevoꞌ ogo minelineꞌ nemuꞌ nene Oꞌmoso opoꞌni nolune.
REV 19:4 Neꞌmine likevo gizebo ve tuvedi foꞌa minaniꞌ nesi idoꞌ eleꞌvoleꞌ igi veꞌinesi ha minaaꞌ naniꞌ initeꞌ setaꞌve setaꞌve nesi nene limi goꞌine hizi ingi moꞌmosiꞌveloꞌ minive Oꞌmoso opoꞌni li tiꞌ li laniꞌ ve: Mo neꞌmino miniliho lo Oꞌmoso opoꞌni nolune.
REV 19:5 Neꞌmine likevo nolo ma nene Oꞌmosoꞌmi moꞌmosiꞌvelatiꞌ sotoꞌ ogo tiꞌ lo lineꞌ ve: Lingine leliꞌ Oꞌmosoꞌmi gonoloꞌ ve adoꞌ eikumuꞌ goliseꞌve gilaaꞌ ave eveneꞌ ngomoꞌ nabaꞌ mukitoꞌ nene Oꞌmosote opoꞌni lilo.
REV 19:6 Neꞌmine lavo ma giluvoniꞌ nene eveneꞌ vaiꞌ golosoliti noꞌine neꞌmine gele vineꞌ idoꞌ noso nabaliꞌmi nolo neꞌmine gele vineꞌ idoꞌ goꞌ ngilili amuzo molo laaꞌ neineꞌ neꞌmino nolo ma molaniꞌ nene tiꞌ lo livo giluve: Guvetesi ve Oꞌmosote amuzo ve neꞌmo nene eveneꞌveloꞌ apiꞌ ogo gizebo neineꞌ nemuꞌ nene opoꞌni nolune.
REV 19:7 Sipisipi angale neꞌmo eze zuho do eita ilineꞌ gamene mo ogavo aꞌmine eze zuho mulise neve nene eita volone li elenaho neꞌmini gonolise igi di nene igi nizaniꞌ nenako nemuꞌ nene laza muheleꞌ aheleꞌ amo lolize naba goloso izo mino Oꞌmoso do naba o-dukeꞌzo.
REV 19:8 Idoꞌ aꞌmine veneꞌ nene lavolavo mokonoꞌ guluviꞌ lamineꞌ goloso lo minineꞌ nene do okoꞌnoloꞌ ngolalive lo Oꞌmosoꞌmo gele imineꞌ ve. Aꞌmine lavolavo lamineꞌ ve laniꞌ nene Oꞌmosoꞌmi evenelelite igi mili aniꞌ initeꞌ lisiheꞌ lamineꞌ maloꞌ nene li milisa laniꞌ ve.
REV 19:9 Idoꞌ nelotiꞌ nene angeloꞌ neꞌmo gohi tiꞌ lo lo-nimive: Gaza luhuvo tiꞌ lo gizezo: Ve ma ingine aꞌmine sipisipi angaleꞌmo veneꞌve neꞌmini evenele minave do eita olosa neingumuꞌ nosoꞌ niteꞌ nalizada alizave lo elese molo-ngede nolive nene mo mine lamineꞌ ilizaniꞌ akaloꞌ nizaniꞌ nenako nemuꞌ nene mo ngolize izilizadoꞌ nizave. Neꞌmine lo imineꞌ molo gohi ma tiꞌ lo lo-nimive: Mene noluvoniꞌ gamazi nene mo Oꞌmosoꞌmi gamazi gihile ne neive.
REV 19:10 Neꞌmine lo-nemavo naza nene opoꞌni lo do naba o-delove lo gizeneuko lemo goꞌne hizo unguvoniꞌza aza nene tiꞌ lo lo-nimive: Naza nene haza Oꞌmosoꞌmi gonoloꞌ ve geiꞌ neꞌmino minuve geiꞌ zuho gehepeve adoꞌ Izesuꞌ gamaziꞌve di mini hizi eleꞌ igaꞌ ave lengikutiꞌ ne nouze. Gaza neꞌmine o-nedamo asi Oꞌmosovoꞌ nene opoꞌni lo do naba o-dezo. Mene noluvoniꞌ nene nanitekumuꞌ ve. Oꞌmosoꞌmi veletiꞌ gamazi li sotoꞌ igaꞌ ave mukiꞌ nete nene Izesuꞌ gamaziꞌvevoꞌ hizi eleꞌ igaꞌ naanako nemuꞌ nene noluve.
REV 19:11 Neꞌmine lavo veꞌnela mene gohi ma ninguvoniꞌ Okulumoꞌ nene gode neivo aꞌminguꞌ nene mokonoꞌ hosi ma ninguve. Aꞌmine hosiloꞌ eveneꞌ ma minineꞌ neꞌmi gulive nene Monovo Gihilevoꞌ Ogo Molo Ogo Gamaziꞌve Do Gihile Izaakovoꞌ Ogaꞌ Ive ve lo minineꞌ ve. Aza nene goniꞌ gelo lihime ngemo lovo do sotoꞌ ogaꞌ neineꞌ nene mo monovo lisiheꞌ laminetokovoꞌ do molosa ogaꞌ neive.
REV 19:12 Idoꞌ vele gulo neve nene oloꞌ gulumo neꞌmino neivo idoꞌ godololoꞌ nene guveꞌinesi veti angiliꞌ nene mukiꞌ gehe minineꞌ ve. Idoꞌ eitoꞌ nene guliveꞌve ma gizikavoo minineꞌ nene eveneꞌ malitesi gilamavoo eikovoꞌ gele minineꞌ ve.
REV 19:13 Idoꞌ okoꞌnoloꞌ initeꞌ ngolo minineꞌ neve nene vaniseuꞌ lupizikaniꞌ lavolavo do ngolosa minineꞌ ve. Idoꞌ guliveꞌve neve nene Oꞌmosoꞌmi Gamaziꞌve ve lo minineꞌ ve.
REV 19:14 Neꞌmino neivo Okulumokuꞌ minaniꞌ ami nene okoꞌnidoꞌ initeꞌ adoꞌ lavolavo mokonoꞌ lamineꞌ goloso guluviꞌ gehepeve neve nene ngilisa inginesi mokonoꞌ hosiloꞌ mini eꞌmeti vaniꞌ ve.
REV 19:15 Idoꞌ eveneꞌ zuho ato atoꞌ Oꞌmosomuꞌ gilamaaꞌ nave nene ngebelelingumuꞌ bainati miteꞌ gohe goloso o minineꞌ nene veleutiꞌ omo hetele minineꞌ ve. Aza nene ainidunuꞌ liliꞌ aniꞌ gavoso do minosa aꞌmine Oꞌmosomuꞌ gilamaaꞌ nave nene amuzo molo gizebo o-ngedo mino aꞌmine mokonoꞌ hosiloꞌ minive neꞌmo nene Oꞌmoso amuzo ve minive neꞌmo eveneꞌ lihimeꞌinemuꞌ izeboloꞌ molangumuꞌ nene vaini noso liliꞌ ilisa evenelite vaini gihile lisi pilikiꞌ izaaꞌ naaniꞌ neꞌmino nene lihime ngemo do goloso o-ngedeleseive.
REV 19:16 Idoꞌ okoꞌnoloꞌ izekineꞌ initetokisi amasuvololasi nene guliveꞌve neꞌmine li gizikaniꞌ minineꞌ ve: Guveꞌinesi Veti Guveꞌinesi Ve Idoꞌ Ve Nabaꞌ Nabaliti Ve Nabaꞌine ve li gizikaniꞌ ve.
REV 19:17 Idoꞌ angeloꞌ hamoꞌ gohi ma ninguvoniꞌ nene hokuꞌ ote neivo ninguve. Aꞌmine angeloꞌ neꞌmo nene nolo nabautiꞌ okulumotoꞌ hoze pateli moni minaniꞌ nama mukikumuꞌ nene tiꞌ lo nolo-ngimivo giluve: Oꞌmosoꞌmo do sotoꞌ o-lengedelineꞌ nosoꞌ niteꞌ nabala mene igi di geseꞌ ilo.
REV 19:18 Igi di geseꞌ ilizaniꞌ nene guveꞌinesi veti gonoso meꞌmele nehe amiliti gizebo ve nabaliti meꞌmele nehe amuzo veliti meꞌmele nehe hosi izeliti meꞌmele nehe aꞌmine hosiloꞌ monaaꞌ aniꞌ amiliti meꞌmele nehe idoꞌ eveneꞌ ngomoꞌ nabaꞌ adoꞌ angiseꞌine gonoꞌine daaꞌ ave nizahe idoꞌ eveneꞌ maliti gonouꞌ daaꞌ ave nizahe mo mukiꞌ ngomoꞌ nabaꞌ neti meꞌmeleꞌine nalizangumuꞌ nene igi di geseꞌ ilo.
REV 19:19 Neꞌmine lavo gohi ma ninguvoniꞌ nene aꞌmine gomuꞌ ninguvoniꞌ loposo niteꞌ masi idoꞌ misubouꞌ misubouꞌ guveꞌinesi ve nabaꞌ nabaꞌ nesi idoꞌ engiꞌ lovo hizaaꞌ aniꞌ amiꞌinesi nete nene aꞌmine mokonoꞌ hosiloꞌ minivesi idoꞌ ezesi makaꞌ minaniꞌ amiꞌvesi nene lovo i-ngimilisa di nubo naavo ninguve.
REV 19:20 Neꞌmine igi mo lovo hizikeniꞌ neineꞌza loposo niteꞌ nesi idoꞌ ezeloꞌ medelo atoꞌ suno do sotoꞌ ogaꞌ idiꞌmo eveneꞌ aꞌmine loposo niteliꞌmi makiꞌve di mini avazahaꞌvelokisi gubiꞌ izi imi opoꞌni laaꞌ ave ngeleꞌmize gopo ive soza polohete nesi nene ngivileꞌ igisa di-ngidaniꞌ ve. Aꞌmine ve setaꞌ nene diisa veꞌinesi haza nizasivo salfa geheniloꞌ oloꞌ lo mino noso ohuno neꞌmino molo mininguꞌ nene di huli-ngidaniꞌ ve.
REV 19:21 Idoꞌ aꞌmine loposo niteliꞌmi zuho linge mukiꞌ nene aꞌmine mokonoꞌ hosiloꞌ minive neꞌmo nene veleutiꞌ omo hetele minineꞌ bainati miteꞌ nedunuꞌ nene ngebele geseꞌ ogo osuꞌ lavo meꞌmeleꞌine nene aꞌmine nama mukiꞌ mate niviꞌ niviꞌ igi gatuꞌine gehepeve aniꞌ ve.
REV 20:1 Naza gohi ma ninguvoniꞌ nene Okulumokutiꞌ angeloꞌ maliꞌmo seni nalaꞌ nabasi idoꞌ hemuvosi nomineꞌ galeseꞌmi kiiꞌve nesi nene anauꞌ do mino lemo navo ninguve.
REV 20:2 Lemo ogo aꞌmine sataꞌ naba gele vineꞌ loposo niteꞌ adoꞌ gomukutiꞌ minineꞌ gosiheꞌ adoꞌ Ve Goloso Satani nene analoꞌ dokoo kilisimasi vanu tauseni (1000) minelive lo seni nalaꞌ naba nene ize-do
REV 20:3 hemuvosi nomineꞌ galeseuꞌ nene do hulo-do aꞌmine galeseꞌmi veleloꞌ akahe nene lokimi ogosa siꞌzikelizave lo kekeize luhuvo aꞌmine akaheloꞌ nene ma do giꞌmizekineꞌ ve. Idoꞌ neꞌmine ineꞌ nene eveneꞌ zuho ato atoꞌ ngeleꞌmize gopo ogaꞌ ineꞌ ma nene aꞌmine kilisimasi vanu tauseni (1000) minelinguꞌ nene gohi neꞌmine amilive losa lokimi o-dineꞌ ve. Aꞌmine kilisimasi vanu tauseni (1000) nene ogo vo osuꞌ lavosa Oꞌmosoꞌmo gelavo gohi gamene liꞌnibemukovoꞌ ma kuluhizi-dikevo omo heta ilidoꞌ o neive.
REV 20:4 Idoꞌ gohi ma ninguvoniꞌ nene moꞌmosiꞌ ma minikaꞌ minikaꞌ adoꞌ eveneꞌ ma nizavo ninguvoniꞌ nene ingine eveneꞌ gamaziꞌine minelineꞌ gili di lisiheꞌ i-ngidi gizebo i-ngidi minilizaniꞌ amuzo nene Oꞌmosoꞌmo ngemavo di minave minaniꞌ ve. Idoꞌ ma ninguvoniꞌ nene Izesuꞌ gamaziꞌve hizi eleꞌ igi Oꞌmosoꞌmi gamazi li sotoꞌ igaꞌ angumuꞌ luvoꞌine giti huli huliꞌ ave adoꞌ loposo nitetoꞌ nehe aꞌmineꞌmi avazahaꞌveloꞌ nehe gelekeleꞌ igi gubiꞌ izi imi opoꞌni lami aꞌmine loposo niteliꞌmi makiꞌve golihiꞌnidoꞌ nehe aꞌnidoꞌ nehe nesi nene mo damaveti voꞌinehaza nene ninguve. Ingine nene gohi upuhoꞌ igi oti veꞌine gizi kilisimasi vanu tauseni (1000) neꞌmi lulouꞌ nene Kilisitoꞌ nesi makaꞌ eze eveneꞌveloꞌ gizebo igi minaniꞌ ve.
REV 20:5 Neve nene hilavete otiliza gamene naba vanu ne neive. Ne neiha aꞌmine gameneloꞌ nene hilave linge nene otami aꞌmine kilisimasi vanu tauseni (1000) osuꞌ lavosa nene gohi veꞌine gizi otaniꞌ ve.
REV 20:6 Idoꞌ aꞌmine hilave otiliza gamene naba vanuloꞌ gohi veꞌine gizi otilizave nene Oꞌmosoꞌmi evenele gihile gehepeve mini ngolize izilizaniꞌ akaloꞌ mini mili minilisave. Ingine nene adoꞌ gamene nabala monoꞌ gilamave gohi hililizaniꞌ gameneuꞌ nene aꞌmine gohi helaaꞌ neꞌmo do goloso o-ngedelineꞌ amuzoꞌve nene ma nomivo mo gohi hilami Oꞌmososi Kilisitoꞌnisi initeꞌ lehizi-ngidaaꞌ gono nene di mini kilisimasi vanu tauseni (1000) neꞌmi lulouꞌ nene eikisi makaꞌ eveneꞌveloꞌ gizebo igi minilisave.
REV 20:7 Neꞌmino kilisimasi vanu tauseni nene ogo vo osuꞌ nolivo ve goloso Satani nene nalatotiꞌ kuluhizi-dikevo
REV 20:8 leme heta ogo vo misubouꞌ misubouꞌ eveneꞌ zuho ato atoꞌ adoꞌ nGogu ve Mangongu ve laniꞌ aleve nene goꞌine izo ngeleꞌmize gopo oloseive. Idoꞌ ngeleꞌmize gopo ogo lovo di sotoꞌ igi hizilizangumuꞌ nene do nubo o-ngedeleseive. Aꞌmine di nubo ilizaa eveneliti nabaꞌine nene guvo noso gahevela gepe minineꞌ neꞌmini gatamolonidoꞌ mini vaiꞌ goloso minilisave.
REV 20:9 Ingine aꞌmine misuboꞌmi gelenguꞌ nene mine hutileꞌ igi mini Oꞌmosoꞌmo lulo eme minineꞌ numuno ebeꞌ adoꞌ eze evenele ingi monaaꞌ aniꞌ numuno ebeꞌine Zelusalemi nene di vodo vodo i-di minaniꞌ ve. Neꞌmine aniꞌza oloꞌ neꞌmo Okulumokutiꞌ lemo do mikileꞌ o-ngidineꞌ ve.
REV 20:10 Neꞌmine ogavo aꞌmine aleve ngeleꞌmize gopo ive ve goloso Satani nene aꞌmine salfa geheniloꞌ oloꞌ lo mino noso ohuno neꞌmino molo mininguꞌ adoꞌ loposo nitekisi soza poloheteꞌvesi di huli-ngidikevo minasineꞌ ebekuꞌ nene di huli-daniꞌ ve. Neꞌmine aniꞌza aꞌmine ingine seto hamo nene gamene gamene goꞌ liliha litiꞌmuso izeliha mulumo gono nene ha gihiviꞌ gihiviꞌ igi minilisave.
REV 20:11 Idoꞌ gohi ma ninguvoniꞌ nene moꞌmosiꞌ mokonoꞌ nabasi idoꞌ aꞌminguꞌ minivesi nene ninguve. Misubogi Okulumoki nene ingine minilisineꞌ ebekisi nomivo aꞌmine ninguve neꞌmi velelotiꞌ nene mo mudise vi haha asineꞌ ve.
REV 20:12 Neꞌmine ikesivo ninguvoniꞌ nene hilave ngomoꞌ nabaꞌ mukiꞌ nete nene aꞌmine Oꞌmosoꞌmi moꞌmosiꞌveꞌmi velela nene oti nizavo aꞌmine aleveti monovoꞌine gizaniꞌ buku nene ma di patelaniꞌ ve. Idoꞌ buku gohi ma adoꞌ minevoꞌ minevoꞌ ngemeni dameni dalizaveti guliveꞌine gizikaniꞌ buku nesi nene di patelaniꞌ ve. Neꞌmine ikevo aꞌmine hilavete igi mili ikaꞌ ikaꞌ aniꞌ initekumuꞌ aꞌmine bukuuꞌ gizikadoꞌ nene do molo izeꞌ molo-ngedo aꞌmidoꞌ golo hizo meni ngemekaꞌ ngemekaꞌ ineꞌ ve.
REV 20:13 Ee, guvo nosouꞌ hilave nene guvo nosoꞌmo do sotoꞌ noo-ngidivo idoꞌ helaaꞌ monovo neꞌmosi idoꞌ hilaveti numuno ebeꞌ nesi ingine hilave engiꞌ aꞌninguꞌ minave nene di sotoꞌ nii-ngidasivo aꞌmine hilave hamo hamoꞌ ingine igi mili ikaꞌ ikaꞌ adoꞌ adoꞌ nene do molosa izeꞌ molo-ngedo aꞌmidoꞌ golo hizo meni ngemekaꞌ ngemekaꞌ ineꞌ ve.
REV 20:14 Neꞌmine ogosa aꞌmine helaaꞌ monovo nesi idoꞌ hilavete minaaꞌ aniꞌ numuno ebeꞌ nesi nene salfa geheniloꞌ oloꞌ lo mino noso ohuno neꞌmino molo mininguꞌ nene do hulo-ngidineꞌ ve. Aꞌmine salfa geheniloꞌ oloꞌ lo mino noso ohuno neꞌmino molo minineꞌ neve nene helaaꞌ naba tuu ma ne neive.
REV 20:15 Idoꞌ ve maliti guliveꞌine aꞌmine minevoꞌ minevoꞌ ngemeni dameni dalizaveti guliveꞌine neineꞌ bukuuꞌ nene ma minamivo ningamive nene aꞌmine salfa geheniloꞌ oloꞌ lo mino noso ohuno neꞌmino molo mininguꞌ nene di huli-ngidaniꞌ ve.
REV 21:1 Idoꞌ nelotiꞌ gohi ma ninguvoniꞌ nene Okulumoꞌ gosoholiꞌminesi idoꞌ misubo gosoholiꞌminesi nene ninguve. Idoꞌ gosoholiꞌmine ninguve noluvoniꞌ nene Okulumoꞌ misubo litehe nene mo mudise vi haha ikesivo guvo noso nesi nene gohi ma minamineꞌ nenako nemuꞌ nene gosohoꞌ ve noluve.
REV 21:2 Aꞌmine Oꞌmosoꞌmi numuꞌve ebeꞌve Zelusalemi gosohoꞌ nene Okulumokutiꞌ Oꞌmosolatiꞌ nolimivo ninguve. Aꞌmine numuno ebeꞌ nene ha gidi naniꞌ goloso adoꞌ veneꞌ ma veloꞌ volosa do nene ogo gonolise ogo minaaꞌ neineꞌ neꞌmino do nene o minineꞌ nolimivo ninguve.
REV 21:3 Neꞌmino nolimivo ningo nouvo Oꞌmosoꞌmi moꞌmosiꞌvelatiꞌ nene nolo naba ma tiꞌ lo nolivo giluve: Gililo. Oꞌmoso ongo minelineꞌ numuꞌve nene eveneliti vovoꞌninguꞌ naave. Aza neve nene inginesi minevoꞌ alevoꞌ ogo ongo mono mineleseive. Neꞌmino neivo ingine neve nene eze evenele minikevo Oꞌmoso asiꞌve nene engikisi mino Oꞌmosoꞌine gehepeve mineleseive.
REV 21:4 Neꞌmine ogo mino veꞌine novozo nene veꞌningutiꞌ lemaliꞌ lemaliꞌ lo-ngedo mineleseive. Idoꞌ helaakisi nene ma minamoloseive. Idoꞌ mulumo alumo gelaaꞌ nehe ive nama ogaꞌ nehe geni gehaaꞌ nehe nevoꞌmine monovo nene hamokisi gohi ma minamoloseive. Ee, gomuꞌ minaniꞌ monovo nene mo gozopoꞌ vi haha ilisanako nemuꞌ nene neꞌmine monovo hamokisi engita ma minamoloseive.
REV 21:5 Idoꞌ nelotiꞌ nene aꞌmine moꞌmosiꞌveloꞌ minive neꞌmo nene tiꞌ lo lineꞌ ve: Gililo. Naza idise nene initeꞌ mataꞌ mukiꞌ nene do gosohoꞌ ogo do atoliꞌmine nouve. Idoꞌ neꞌmine lo gohi tiꞌ lo lineꞌ ve: Aꞌmine gamazi meve nene mo laminetoꞌ noluvonaze. Aꞌminemuꞌ nene gili medeli minilizadoꞌ o neinaze. Aꞌmine gamazi nene mo luhuvo gizezo.
REV 21:6 Neꞌmine lo tiꞌ lo lo-nimive: Gamaziꞌne luvoniꞌ maloꞌ nene mo do gihile izo osuꞌ lokuve. Neniꞌ neve nene initeꞌ mataꞌ mukiꞌ minamanguꞌ gomuꞌ molo mino alingeꞌ ma osuꞌ lilizaniꞌ nene naza ha minevoꞌ minevoꞌ ogo minelove adoꞌ ganakutiꞌ minuvesi idoꞌ alingetasi minelovesi ne nouve. Eveneꞌ ma nosomuꞌ ngisavo minilizave nene minevoꞌ minevoꞌ izeleho minineꞌ noso hinipinikutiꞌ neve nene haza gidini ohizo ngemelesuve.
REV 21:7 Monoliꞌmi lovouꞌ Satani ma ivileꞌ ilizave nene naza mene noluvoniꞌ initeꞌ mukikutiꞌ nene izeꞌ molo-ngedekuvo dalisave. Aꞌmine alevemuꞌ nene naza engiꞌ Oꞌmosoꞌine gehepeve loloꞌ ogo minekuvo ingine nene neniꞌ izipahaꞌne gehepeve liliꞌ igi minilisave.
REV 21:8 Ne neiha eveneꞌ ma evenekumuꞌ golise gili mini Kilisitoꞌni eꞌmeti guni amilizavesi idoꞌ ezemuꞌ gili eleꞌvoleꞌ amaaꞌ ilizavesi idoꞌ lovozo monovoloꞌ eꞌmetaaꞌ ilizavesi idoꞌ eveneꞌ ngibili hilaaꞌ ilizavesi idoꞌ veneꞌ vemohoꞌ gipe alu monovo goloso gopoꞌ napaꞌ igaꞌ ilizavesi idoꞌ poisini initeꞌ pataꞌ di monaaꞌ ilizavesi idoꞌ soza oꞌmosoloꞌ gelekeleꞌ igi gubiꞌ izi ngimi ngopoꞌni laaꞌ ilizavesi idoꞌ sozaloꞌ ve mukiꞌ engiꞌ nesi nene aꞌmine helaaꞌ naba tuu minineꞌ ebeꞌ adoꞌ aꞌmine salfa geheniloꞌ oloꞌ lo mino noso ohuno neꞌmino molo mininguꞌ nene vi hilalisave.
REV 21:9 Idoꞌ nelotiꞌ nene aꞌmine eveneꞌ do goloso o-ngedaaꞌ initeꞌ seveni alingeꞌ gamenela sotoꞌ ikaꞌ ikaꞌ ilizaniꞌ initeꞌ lapese seveniuꞌ di minikaꞌ minikaꞌ aniꞌ angeloꞌ seveni engikutiꞌ maliꞌmo ogo gamazi lo-nemo tiꞌ lo lineꞌ ve: Naza sipisipi angaleꞌmo do okoꞌnola ilineꞌ veneꞌ neꞌmino minineꞌ numuno ebeꞌ nene gelebizeloze. Ano.
REV 21:10 Neꞌmine lavo Oꞌmosoꞌmi Sikalahuꞌ neꞌmo zatuhoꞌ o-nidivo nouvo aꞌmine angeloꞌ neꞌmo neleꞌmizo golo naba haꞌnaloꞌ ma dize mino Oꞌmosoꞌmi numuno ebeꞌve Zelusalemi nene Okulumokutiꞌ Oꞌmosolatiꞌ nolimivo nelebizineꞌ ve.
REV 21:11 Aꞌmine numuno ebetotiꞌ nene Oꞌmosoꞌmi labanaꞌve sotoꞌ ogo minineꞌ ve. Aꞌmine labanaꞌve neve nene meniꞌve dizo minineꞌ geheni zasipa adoꞌ ngalasi lamineꞌ gele vineꞌ neꞌmidotiꞌ silingengeꞌniꞌve zavile hulo minineꞌ gelo minineꞌ ve.
REV 21:12 Idoꞌ lave gesiꞌve neve nene naba zaloꞌ goloso mino aꞌminguꞌ nene gateniꞌve tuveluꞌa neivo aꞌmine gatedoꞌ gatedoꞌ nene angeloꞌ tuveluꞌa nene miniꞌmi vaniꞌ ve. Idoꞌ aꞌmine gateni hamo hamotoꞌ nene Isilaeleꞌ gipele tuvelu neti ngaꞌvopilemoliti mulise neti guliveꞌine ma nene gizikaꞌ gizikaꞌ ikevo minineꞌ nene ninguve.
REV 21:13 Idoꞌ aꞌmine gesiꞌmi gateniꞌve hoꞌ dizaaꞌ neineꞌ gahevela nene seto hamo neivo idoꞌ veleta gahevela nene aꞌmineꞌmine ogo aꞌmine gesiꞌmi gateniꞌve nene seto hamo neivo idoꞌ galaꞌmuno gahevela nene aꞌmineꞌmine ogo gateni seto hamo neivo idoꞌ hoꞌ lemaaꞌ idaa nene aꞌmineꞌmine ogo gateni seto hamo minineꞌ ve.
REV 21:14 Idoꞌ aꞌmine numuno ebeliꞌmi laveꞌve nene geheni nabaꞌ naba gavele initeꞌ goloso tuvelu neꞌmidoꞌ nene di otikaniꞌ minineꞌ ve. Aꞌmine geheniloꞌ nene sipisipi angaleꞌmi aposoloꞌve tuvelu neti guliveꞌine nene gizikaꞌ gizikaꞌ ikevo minineꞌ ve.
REV 21:15 Idoꞌ aꞌmine makaꞌ gamazi lo-nemo minineꞌ angeloꞌ neꞌmo nene aꞌmine numuno ebekuꞌ gateniꞌvesi laveꞌvesi nene molo ningaakumuꞌ ve lo maki molo ningaaꞌ initeꞌ angaba gavoso neꞌmine ngolidunuꞌ liliꞌ aniꞌ nene do minineꞌ ve.
REV 21:16 Idoꞌ aꞌmine numuno ebeꞌ neꞌmi kona konaꞌvela nene mo hamoꞌ lisihetokovoꞌ mino sukoea gehepeve o minineꞌ ve. Numuno ebeꞌ nene aꞌmine molo ningaaꞌ initeꞌ nedunuꞌ molo ningineꞌ nene aꞌmida aꞌmida vanu tauseni faef hadeti (1,500) maili (2,400 Km) neꞌmine minavo aꞌmine numunoꞌmi kona konaꞌvesi idoꞌ veleta dizo vaaꞌ idoꞌ lede vaaꞌ ineꞌ neꞌmi kona konaꞌve nesi nene mo sukoea gehepeve o minineꞌ ve.
REV 21:17 Idoꞌ aꞌmine angeloꞌ neꞌmo evenelite maki milaaꞌ aniꞌ monovoloꞌ do molo maki molaniꞌ nene aꞌmine numuno ebeliꞌmi laveꞌmi gesiꞌve neꞌmi mukileꞌve hetatiꞌ lulouko dizo vivo nene mo tu hadeti sigisitini (216) fiti (66 mita) neꞌmine minineꞌ ve.
REV 21:18 Idoꞌ aꞌmine numuno ebeliꞌmi lave gesiꞌve nene zasipa gehenidunuꞌ gizaniꞌ mino idoꞌ numuno ebeꞌ nene mo ngoli lamineꞌ gehepeve nedunukovoꞌ gizikevo ngalasi guluviꞌ gehepeve neꞌmine mino silingengeꞌniꞌve hulo minineꞌ ve.
REV 21:19 Idoꞌ aꞌmine numuno ebeliꞌmi lave gesiꞌve hizi di otikaniꞌ nene geheni ato atotunuꞌ nene gonolise ikaniꞌ ve. Aꞌmine nabaꞌ naba gehengutiꞌ naba vanu geheni nene zavile geheni adoꞌ zasipa geheni minineꞌ ve. Idoꞌ aꞌmidotiꞌ naba tuu geheni nene gumi lo guno amineꞌ adoꞌ sahila geheni ma nene minineꞌ ve. Idoꞌ naba tili geheni nene zavile gumi neꞌmine adoꞌ agate geheni minineꞌ ve. Idoꞌ naba fo geheni nene zavile gehepeve adoꞌ emeladi geheni minineꞌ ve.
REV 21:20 Idoꞌ geheni naba faef nene mokonoꞌ lede vokaꞌ guleheꞌ lede vokaꞌ ineꞌ adoꞌ saledoniki geheni minineꞌ ve. Idoꞌ geheni naba sigisi nene guleheꞌ ngengeꞌni adoꞌ koneliani geheni nene minineꞌ ve. Idoꞌ geheni naba seveni nene ngoli moni okoꞌnosi minineꞌ adoꞌ kilisolaiti geheni minineꞌ ve. Idoꞌ geheni naba eiti nene guvo nosoloꞌ gumi zavile elo minaaꞌ neineꞌ adoꞌ belili geheni minineꞌ ve. Idoꞌ geheni naba naeni nene gihungoꞌ zavile adoꞌ topazi geheni minineꞌ ve. Idoꞌ geheni naba teni nene zavileuꞌ mokonoꞌ ele minineꞌ adoꞌ kilisopalasi geheni minineꞌ ve. Idoꞌ geheni naba leveni nene okohuno adoꞌ hiasini geheni nene minineꞌ ve. Idoꞌ geheni naba tuvelu nene mo okohuno gehepeve adoꞌ ametisi geheni nene minineꞌ ve.
REV 21:21 Idoꞌ aꞌmine lave gesiꞌmi gateniꞌve tuveluꞌa nene meniꞌve dizo minineꞌ initeꞌ ngaluluꞌ gele vineꞌ initeꞌ tuveluꞌa nene gateni hamo hamotoꞌ hamo hamodunuꞌ nene liliꞌ ikaꞌ ikaꞌ aniꞌ minineꞌ ve. Idoꞌ aꞌmine numuno ebekuꞌ aka ngomoꞌ naba nene mo ngoli gehepevedunuꞌ vilaniꞌ aka mino luloukotiꞌ nene ngalasilotiꞌ silingengeꞌni hulaaꞌ neineꞌ neꞌmino hulo minineꞌ ve.
REV 21:22 Idoꞌ aꞌmine numuno ebeliꞌmi monoꞌ numunoꞌve nene mo asiꞌve Guvelesi ve Oꞌmoso amuzo mukiliꞌmi meleho minive nesi idoꞌ sipisipi angale nesi minasineꞌ nenako neꞌmo nene naza aꞌminguꞌ monoꞌ numunosi mo kekeꞌ ningamuve.
REV 21:23 Idoꞌ aꞌmine numuno ebekuꞌ nene Oꞌmosoꞌmi labanalaꞌmo hize labanaꞌ ele-daaꞌ neivo sipisipi angale neve nene aꞌminguꞌ liviꞌ lamuꞌve neꞌmino neineꞌ nenako holiꞌmo nehe ikeꞌniꞌmo nehe aꞌmine numuno ebekuꞌ hize labanaꞌ elaatoꞌ nene ma minamasive.
REV 21:24 Idoꞌ aꞌmine numuno ebeliꞌmi labanatoꞌ nene eveneꞌ zuho ato atoꞌ mukiꞌ ingine mini mili aka moni tiꞌ igi minilisave. Idoꞌ misubouꞌ misubouꞌ guveꞌinesi ve nabaꞌ naba miniꞌmi monaniꞌ mukiꞌ nete ingine gilavo dizo minineꞌ initeꞌine nene di aꞌminguꞌ alisave.
REV 21:25 Aꞌmine numuno ebeliꞌmi akaheꞌve naba nene goꞌ lo minelineꞌ gameneuꞌ nene gizisaꞌmavo ha gode minaaꞌ neive. Ee, aꞌmida nene litiꞌmuso izesaꞌmineꞌ nenako neꞌmo akaheꞌve nene ha godovoꞌ minaaꞌ neive.
REV 21:26 Eveneꞌ zuho ato atoꞌ mukiꞌ ingine heneniꞌine nehe initeꞌ lamineꞌ atoꞌ nolihe ingine gilavo dizo minineꞌ initeꞌ mataꞌine nene mo aꞌmine numuno ebekuꞌ di alisave.
REV 21:27 Aꞌmine numuno ebekuꞌ nene goloduvo ele vineꞌ initeꞌ hamokisi ma dizamoloseive. Ee, lovozo monovo nehe soza monovo nehe nevoꞌmine monovo igi mili igaꞌ ave nene aꞌmine numuno ebekuꞌ dizamavo asi sipisipi angaleꞌmi bukuꞌve adoꞌ minevoꞌ minevoꞌ ngemeni dameni dalizaveti guliveꞌine neineꞌ bukuuꞌ guliveꞌine gizikave engikovoꞌ nene aꞌminguꞌ dizilisave.
REV 22:1 Idoꞌ aꞌmine monusineꞌ angeloꞌ neꞌmo ma nelebizineꞌ nene minevoꞌ minevoꞌ minaliꞌmi izeleho minineꞌ noso nene adoꞌ Oꞌmososi sipisipi angalesi minaaꞌ nasineꞌ moꞌmosiꞌnidotiꞌ nene ngalasi lamineꞌ neꞌmine veꞌne veꞌne elo lemosa o lomo minineꞌ nene nelebizineꞌ ve.
REV 22:2 Aꞌmine noso nene aꞌmine numuno ebekuꞌ aka naba minineꞌ neꞌmi olusokuꞌ nene o lomo vo neivo aꞌmine noso neꞌmi gaheve hela helaꞌvela nene minevoꞌ minevoꞌ minaliꞌmi izeleho minineꞌ za setaꞌ nene dizi minasineꞌ ve. Aꞌmine za netise nene ikeꞌniloꞌ ikeꞌniloꞌ gihile izikaꞌ izikaꞌ igi mini Kilisimasi hamokuꞌ nene gamene tuvelu neꞌmine gihile izaaꞌ nasive. Aꞌmine za netise avileꞌine nene eveneꞌ zuho ato atokutiꞌ aleve mukiꞌ ingine nikevo initeꞌ gizi dami ha laminekovoꞌ minilizave losa minineꞌ ve.
REV 22:3 Aꞌmine numuno ebekuꞌ nene Oꞌmosoꞌmo usiꞌ izaaꞌ neineꞌ initeꞌ nene hamokisi ma minamavo Oꞌmososi sipisipi angalesi minaaꞌ nasineꞌ moꞌmosiꞌine nene aꞌmine numuno ebekuꞌ ne neivo Oꞌmosoꞌmi gonoloꞌ veꞌve nene opoꞌni li di naba i-di gelekeleꞌ i-di minilisave.
REV 22:4 Neꞌmine i-di mini eiꞌ guliveꞌve nene golihiꞌnidoꞌ neivo eiꞌ golo veleꞌveloꞌ nene ha ningiꞌmi vi minilisave.
REV 22:5 Idoꞌ litiꞌmuso neve nene gohi ma minamoloseive. Aꞌmine aleve nene Guvelesi ve Oꞌmoso neꞌmo nene hize labanaꞌ ele-ngedo mineleseinako nemuꞌ nene lamuliꞌmo nehe holiꞌmo nehe hizi labanaꞌ ili-ngidaaꞌ gono dalisidoꞌ nene ma minamilisasive. Idoꞌ aꞌmine aleve nete guveꞌinesi ve neꞌmine liliꞌ igi gono di minilizaniꞌ nene mo huko vamivoo divi diviꞌ igivoꞌ minilisave.
REV 22:6 Idoꞌ angeloꞌ neꞌmo nene tiꞌ lo lo-nimive: Aꞌmine gamazi meve nene mo laminetoꞌ nenaze. Aꞌminemuꞌ nene mo gili medeli minilizadoꞌ o neive. Guvelesi ve Oꞌmoso adoꞌ poloheteliti luꞌine do ote-ngedaaꞌ ive neꞌmo nene geto sotoꞌ ilidoꞌ o neineꞌ initekumuꞌ nene eiꞌ Oꞌmosoꞌmi gonoloꞌ ve ngelebizelive lo angeloꞌve nene imiselineꞌ ve.
REV 22:7 Ee, Izesuꞌ tiꞌ lo nolive: Me gililo. Naza mo geto alosuve. Eveneꞌ ma ingine Oꞌmosoꞌmi veleutiꞌ gamazi me bukuuꞌ neidoꞌ nene ma di mini eꞌmetilizave nene mo ngolize izilizaniꞌ akaloꞌ mini mili nizave.
REV 22:8 Aꞌmine gizuvoniꞌ initeꞌ mukiꞌ mene neniꞌ Zohaneꞌ giluvoniꞌ initeꞌ idoꞌ ninguvoniꞌ initeꞌ nene neive. Idoꞌ aꞌmine initeꞌ mukikumuꞌ nene gelaaꞌ idoꞌ ningaaꞌ ogosa naza aꞌmine initeꞌ mukiꞌ nelebizineꞌ angeloꞌ nene opoꞌni lo do naba o-delesa gizeneuꞌ lemo goꞌne hizo unguve.
REV 22:9 Neꞌmine uvoniꞌza aza tiꞌ lo lo-nimive: Gazasi geze zuho polohete nizavesi idoꞌ me bukuuꞌ neineꞌ gamazi di mini eꞌmetaaꞌ navesi lingine Oꞌmosoꞌmi gonoloꞌ ve nizaniꞌ neꞌmino nazasi aꞌmineꞌmine ogo Oꞌmosoꞌmi gonoloꞌ ve mino lengiꞌ gidini nouze. Gaza neꞌmine o-nedamo asi Oꞌmosovoꞌ nene opoꞌni lo do naba o-dezo.
REV 22:10 Neꞌmine lo gohi ma tiꞌ lo lo-nimive: Oꞌmosoꞌmi veleutiꞌ gamazi me bukuuꞌ neineꞌ mene gihile izelineꞌ gamene nene mo avitoꞌ ogaze. Eveneꞌ aꞌmine bukutiꞌ mene gati gililizaniꞌ akaꞌine hize tile-ngedo kekeize luhuvo aꞌmine bukuloꞌ nene mo hitamozo.
REV 22:11 Idoꞌ gamene nene mo avitoꞌ oganiꞌ nenako nemuꞌ nene monovo goloso igi mili igaꞌ nave neve nene aꞌmine monovoꞌine nene ha igi milivoꞌ minilizaniꞌ o neive. Ee, goloduvo ele vineꞌ monovoloꞌ eꞌmetaaꞌ nave ingine nene aꞌmine goloduvo ele vineꞌ monovolokovoꞌ nene ha eꞌmetivoꞌ minilizaniꞌ o neive. Idoꞌ monovo lisiheꞌ lamineꞌ igi mili igaꞌ nave ingine neve nene aꞌmine monovo lisiheꞌ lamineꞌ nene ha igi milivoꞌ minilizaniꞌ o neive. Ee, Oꞌmosoꞌmi evenele liliꞌ igi nizave ingine nene mo Oꞌmosoꞌmi evenelelite igi mili ilizadoꞌ o neineꞌ monovo lamineꞌ nene ha igi milivoꞌ minilizaniꞌ o neive.
REV 22:12 Izesuꞌ tiꞌ lo nolive: Gililo. Naza mo geto alosuve. Idoꞌ aloniꞌ nene eveneꞌ hamo hamoꞌ igi mili aniꞌ votigileloꞌ nene golo hizo meni ngemelove lo aꞌmine ngemeloniꞌ initeꞌ adoꞌ meni golososi idoꞌ laminekisi nene do alosuve.
REV 22:13 Neniꞌ neve nene initeꞌ mataꞌ minamanguꞌ gomuꞌ molo mino alingeꞌ ma osuꞌ lilizaniꞌ nene naza ha minevoꞌ minevoꞌ ogo minelove adoꞌ ganakutiꞌ mino idoꞌ alingetasi minelove ne nouve.
REV 22:14 Idoꞌ eveneꞌ ma ingine okoꞌnidoꞌ initeꞌ noso izaaꞌ naniꞌ neꞌmini luꞌine di guluviꞌ lisa minilizave ingine nene ngolize iziliza akaloꞌ mini mili nizave. Naza gele ngemekuvo ingine Oꞌmosoꞌmi numuno ebeꞌveꞌmi gatenguꞌ nene dizisa minevoꞌ minevoꞌ ogo minaaliꞌmi izeleho minineꞌ zaliꞌmi gihile nene naaꞌ ilisave.
REV 22:15 Ne neiha eveneꞌ ma ize gulo monovoꞌinesi minave poisini initeꞌ pataꞌ di monaaꞌ avesi idoꞌ veneꞌ vemohoꞌ monovo goloso gopoꞌ napaꞌ igaꞌ avesi idoꞌ eveneꞌ ngibili hilaaꞌ avesi idoꞌ soza oꞌmosoloꞌ gelekeleꞌ i-ngidi gubiꞌ izi ngimi ngopoꞌni laaꞌ avesi idoꞌ soza gamazimuꞌ laniteꞌ gili laaꞌ ave mukiꞌ nesi nene aꞌmine numuno ebekuꞌ nene dizami haza hetavoꞌ minilisave.
REV 22:16 Neniꞌ Izesuꞌ nene naza angeloꞌne meve ne alingeꞌ sotoꞌ ilineꞌ initeꞌ memuꞌ nene eveneꞌne mulise miniꞌmi monaniꞌ lengiꞌ nene vo lo sotoꞌ ogo lo-lengemelive losa imiselekuve. Neniꞌ neve nene Davidiꞌ nalavautiꞌ adoꞌ Davididoꞌ medelo mino eiꞌ moꞌmosiꞌve do Oꞌmosoꞌmi eveneleliti Guveꞌinesi ve naba loloꞌ ogo gizebo o-ngedo mineꞌmo vo minaaꞌ uve ma nene nouve. Naza nene nedengaꞌ holukatiꞌ dizaaꞌ neineꞌ sonohiꞌ labanaꞌvesi minineꞌ adoꞌ ganangomeꞌ maꞌminosa minuve ma nene nouve.
REV 22:17 Oꞌmosoꞌmi Sikalahuꞌ neꞌmosi idoꞌ veneꞌ neꞌmino Izesuꞌ mudise do eita ilineꞌ evenele inginesi nene gaza ano nilave. Idoꞌ gamazi mene gililizave mukiꞌ nesi nene eikumuꞌ gaza ano lilizadoꞌ o neive. Idoꞌ eveneꞌ ma minevoꞌ minevoꞌ minaaliꞌmi izeleho minineꞌ nosomuꞌ ngisavo aꞌmine noso ma nalisa gililizave ingine nene haza gidini nalisave.
REV 22:18 Idoꞌ Oꞌmosoꞌmi veleutiꞌ gamazi me bukuuꞌ neineꞌ nene gati gililizave mukikumuꞌ naza tiꞌ lo hungoꞌ molo nolo-ngiduve: Me bukuuꞌ gizuvoniꞌ gamaziloꞌ mene eveneꞌ ma ingine gamazi atoꞌ gohi ma aꞌmidoꞌ imineꞌ mili gizilizave nene ingine adiꞌmino Oꞌmosoꞌmo engiꞌ minevoꞌ alevoꞌninguꞌ nene imineꞌ molo do goloso o-ngedelineꞌ initeꞌ nene do sotoꞌ o-ngedeleseive. Adoꞌ mene bukuuꞌ gizuvoniꞌ initeꞌ nene eveneꞌ di goloso i-ngidiliza initeꞌ neꞌmine ma do sotoꞌ o-ngedeleseive.
REV 22:19 Idoꞌ Oꞌmosoꞌmi veletiꞌ gamazi aꞌmine mene bukuuꞌ neingutiꞌ ma di hulilizave nene Oꞌmosoꞌmi numuno ebekuꞌ dizi mini minevoꞌ minevoꞌ minaaliꞌmi izeleho minineꞌ zaliꞌmi gihile di nalizaniꞌ aka nene Oꞌmosoꞌmo engitatiꞌ do huloloseive. Aꞌmine zamukisi idoꞌ numuno ebekumukisi me luhuvo gize do limuvonguko gize nouvoniꞌ initeꞌ mamuꞌ nene noluve.
REV 22:20 Idoꞌ me bukuuꞌ gizuvoniꞌ gamaziloꞌ hize eleꞌ ive neꞌmo nene tiꞌ lo nolive: Ee, laminetoꞌ naza mo geto alosuve nolive. Mo neꞌmino miniliho. Guvekasi ve Izesuvo gaza ano.
REV 22:21 Guvetesi ve Izesuꞌ nasahiliꞌve neꞌmo nene lengiꞌ mukita mine molo miniliho. Moda aꞌnesiꞌ ve.
