﻿Katagarda ka Nahum.
1.
Akaka adama a Niniva. Na lo va ɗaɗa katagarda ka kene ka na keneki Nahum vuza va aza a Elikoshi we enei. 
Vuzavaguɗu Ka̱shile vuza cisheꞋe ɗa, vuza na u ci yaꞋan katsupu, Vuzavaguɗu vuza katsupu ɗa, vuza va asuvu a usuɗukpi kpamu. Vuzavaguɗu u tsu tsupa ta̱ irala i ni, u tsu bonoko ta̱ wupa u ni a̱ ubuta̱ wi irala i ni. 
Vuzavaguɗu vuza wupa ɗa gogoꞋo ba, ama vuza tsu tsugbayin n utsura ɗa, Vuzavaguɗu wi a̱ kukpa̱ɗa̱ kutakacika vuza vu unushi ba. Uye u na Vuzavaguɗu u tsu wala, kabatalikpau ka gbayin ka tsu vugula̱ ta̱, eleshu kpamu ɗaɗa kubuta̱ ku ene a̱ ni. 
U tsu ɓarangu ta̱ mala ali me ɗekpe, u tsu zuwa ta̱ nyeneke ra̱ka̱ n ɗekpe. ali n ubuta̱ u kalina a Bashan nu nsasan n Kamelu dem, a na i n mita̱ ma̱ ta̱ku nu nɗanga n tsu ɗekpe ta̱, a̱pa̱lu a Lebano dem a tsu lumba ta̱. 
Nsasan m gbagbaꞋin n tsu gba̱ɗa̱ ta̱ e kelime ka̱ ni, aginda kpamu a tsu derikpe ta̱. Ka̱ta̱ iɗika i jengeɗe e kelime ka̱ ni, e, ali aduniyan koɓolo n ili i na yi punu dem. 
Yayi wa kufuɗa kushamgba e kelime ka̱ ni, u yaꞋan baci wupa? Yayi wa kufuɗa kugbama asuvu e kelime ka̱ ni, ɗa baci u yaꞋin wupa? Wupa u ni u tsu va̱ma̱ ta̱ tsa akina, akpanlai a gbagbaꞋin o tsu ɓoso ta̱ e kelime ka̱ ni. 
Vuzavaguɗu vuza singai ɗa, ubuta̱ u kusheɗeku u ɗa wi a kanna ka atakaci. U tsu ere ta̱ aza a na a̱ tsu sheɗeku wa̱ a̱ ni. 
Ama tsu mini ma na ma ayai wi ta̱ a kuniꞋwa̱nta̱ngu irala i ni ra̱ka̱, wi ta̱ a kuyawaka Niniva uteku, ka̱ta̱ u loko aza a na a iwain ni a kubana a̱ ka̱yimbi. 
Yiɗa̱i i zuwai ɗa yi a kushiya tsurala n Vuzavaguɗu? Ili ra̱ka̱ ko yiɗa̱i baci wi ta̱ a kubonoko i ɗa gbani, babu vuza na u kuyaꞋan tsurala n a̱yi kure. 
Irala i ni, i ta̱ ugbaɓi tsa awana, i ta̱ an osoꞋi a na a osoꞋi ma̱ra̱ ma makai le, a n nwalu n a tangalangi a maza me le, i ta̱ o kusongu le ra̱ka̱, an mita̱ me ɗekpu. 
Punu a̱ ka̱tsuma̱ ka Niniva, ɗa vuza yoku wu uta̱i, vuza na u foɓusoi ka gbani-gbani a kubana u Vuzavaguɗu, u nekei odoki a gbani-gbani. 
Ili i na Vuzavaguɗu u danai i ɗaɗa na, <<A̱ɗa̱ aza Asuriya, ko a na wo okpoi yi ta̱ n ka̱bunda̱i, tukpa n utsura kpamu, i ta̱ kugbatya ɗa̱, ka̱ta̱ a takpa ɗa̱. A̱ɗa̱ aza a Yahuda, ko a na wo okpoi n neke ɗa̱ ta̱ atakaci, mi o kudoku ma takacika ɗa̱ kpamu ba. 
Gogo na mi ta̱ o kukoɗo kogboro ke eɗeku a̱ ɗa̱, ka na aza Niniva a zuwakai ɗa̱, ka̱ta̱ kpamu n kasa ikani, i na a shiyakai ɗa̱.>> 
Vuzavaguɗu u neke ta̱ kadanshi, adama a Niniva u danai, <<I o kudoku kupana kula ku nu ba. A̱ma̱li u sheꞋwei n uluwi a̱ nu, mi ta̱ a kukapa a ɗa a̱ ka̱tsuma̱ ka a̱Ꞌisa̱ a̱ma̱li a̱ nu, ka̱ta̱ n foɓuso ko wu kasaun, adama a na avu ili i ma̱riki i ɗa ba.>> 
La̱na̱, a gaɗi vu nsasan m gbagbaꞋin, ene a vuza na u tsu tuka̱ n arabali a singai a ɗa na, a̱yi na u tsu sala ukuna u ma̱ta̱na̱. Avu Yahuda, zuwa ka̱ɗiva̱ a̱ nu, Shatangu uzuwakpani u nu. Adama a na ili i gbani-gbani i nanlo Niniva, a takpai ta̱ ra̱ka̱. i ta̱ a ku una le ra̱ka̱-ra̱ka̱. 
