﻿Hosiya.
7.
A makyan ma na baci n cigai kupotsotongu aza a Isaraila, ka̱ta̱ unushi wa aza a Ifirayimu wu uta̱ e keteshe n ka gbani-gbani ka aza a Samariya ka̱ uta̱ e keteshe, adama a na a yaꞋan ta̱ unambi wu usuɓi. ele oboki a ɗa n aza a̱ ma̱ga̱la̱ka̱, 
Ama a zuwaka, a na mi a kuciɓa n ka gbani-gbani ke le ba, gogo na ka gbani-gbani ka̱ ka̱ra̱Ꞌa̱ le ta̱, ki ta̱ a̱ a̱shi a̱ va̱. 
A kuzuwa mogono ma̱za̱nga̱ n ka gbani-gbani ke le, aza e kelime feu a̱ ma̱za̱nga̱ n unambi wu usuɓi u le. 
Ra̱ka̱ vu le i ta̱ a mali ma tsugbani, tsu akina a kazatsu, tsu akina a na o kudoku nɗanga ba, a makyan ma na a̱yi biꞋi a kulapa kiya. ali a kubana a makyan ma na kiya ka ku shitai, 
A kanna ka̱ ka̱ɗiva̱ ka kuzuwa mogono ma savu, a tsu zuwa ta̱ mogono n aza e kelime o soꞋo ma̱ra̱ ali ma maka le, ka̱ta̱ u gbaɓa kaci n aza a kavama. 
Asuvu a usuɗukpi a na akina a kazatsu, wupa u le u tsu yongo ta̱ a kutasa ali kayin washi. n usana wu uta̱ tsu melentsu ma akina. 
Ra̱ka̱ vu le asuvu a usuɗukpi tsu akina a kazatsu, a ku una aza o tsugono e le. ngono n le ra̱ka̱ a̱ yikpa̱ ta̱, ko vuza u sa̱la̱ka̱ mu ba. 
Aza a Ifirayimu a gbaɓai kaci n uduniya, okpoi tsu kemeshe ka na a vadalukpai ba. 
Omoci a̱ ka̱na̱i kulyaꞋa utsura u le, ama a zuka ba, ka̱nji ka̱ri ka̱ uta̱i le, ama e yeve ba, 
A̱ra̱ɗi aza a Isaraila wu uta̱i e keteshe, n nannai dem o bono wa̱ va̱ ba, mpa na mi Vuzavaguɗu Ka̱shile ke le. kpamu a̱ la̱nsa̱ mu ba. 
Aza a Ifirayimu i ta̱ tsu moɗoi, gogo lo a̱ ya̱nsa̱ le adama a na i n ugboji ba, anana a̱ la̱nsa̱ uɓa̱nki wa aza a Masar, makpaꞋa a panaka le a̱ ku la̱nsa̱ uɓa̱nki wa aza Asiriya. 
Makyan ma na baci a kulaza, mi ta̱ a ku taɗuku maza ma̱va̱, mi ta̱ a̱ kucipa̱ka̱ le iɗika tsu na a ci yaꞋanka nnunu n na mi a ciꞋimkpi gaɗi. 
Ili ya atakaci a kubana we le, adama a na a suma mu ta̱, i ta̱ a̱ kukuwa̱, adama a na a yaꞋanka mu ta̱ ugbamukaci. ko a na wo okpoi n ciga ta̱ kushiba̱ le, ama ɗa a̱ ka̱na̱i kuyaꞋanka mu aꞋuwa. 
A̱ shika̱ ma̱shi me le a kubana wa̱ a̱ va̱ n ka̱ɗu ke te ba, a na i a̱ ma̱shi a iꞋuwa i le, a kiɗasai ikyamba i le tsu aza o kutono a̱ma̱li adama a ufolu ilikulya n ma̱kya̱n a yaꞋankai mu ugbamukaci. 
Ko a na wo okpoi mpa ɗa m gbarai le, n zuwai le a tsurukpai, ama n nannai dem ɗa i a kuyaꞋanka mu kawuya. 
A vadalukpakai mu kucina̱, o kutono a̱ma̱li a gbani. i ta̱ tsu utan u na u koɗoi. I ta̱ a ku una aza a̱ gba̱ra̱-gba̱ra̱ e le n kotokobi, adama a kadanshi ka̱ a̱ra̱ɗi ke le. i ta̱ o ko okpo ili i ma̱ka̱n a iɗika i Masar. 
