﻿Irimiya.
50.
Kadanshi ka na Vuzavaguɗu u dansai adama aza a Babila, adama i ɗika ya aza Kalidiya, a una̱ u Irimiya keniki. 
<<Nekei arabali wa aza ana a buwai, dansai kakuna. ɗa̱ngusa̱i urotu ka kashi ka̱ta̱ i dansa, ka̱ta̱ i sokongu ka ba, ama i dana. <A ɗika ta̱ Babila, e neke ta̱ Belu wono, Merodach u shama ta̱. a̱ma̱li a̱ ni a yaꞋan ta̱ wono a̱ma̱li a̱ ni a shama ta̱.> 
<<Adama a na a ka̱tsa̱ma̱ ka uɓon ugaɗi uduniya u yoku u ɗa̱nga̱ ta̱ tsurala n a̱yi, i na ya ku bonoko iɗika i ni agali, tsu na wa kokpo babu vuza na wa̱ ku da̱sa̱ngu punu i ɗa, adama a na manama n vuma dem i ta̱ a kusuma. 
<<Vuzavaguɗu u dana ta̱, ka̱ta̱ ayin a nanlo, aza Isaraila n aza Yahuda oɓolongu ubuta̱ ute a̱ ma̱shi a̱ kula̱nsa̱ Vuzavaguɗu Ka̱shile ke le. 
Ka̱ta̱ ece uye u kubana Sihiyona, ka̱ta̱ o tono uɗa, ka̱ta̱ a dana, <Ta̱wa̱i tsu ɓolongi ka̱ci ka̱ tsu u Vuzavaguɗu, ka̱ta̱ tsu yaꞋan uzuwakpani n Vuzavaguɗu, u na a kucinukpa ba.> 
<<Uma a̱ va̱ okpo ta̱ a na nkyon n na m puwa̱nka̱i. Aza a na nguɓi n le m puwa̱nka̱i, aza na nguɓi m puwa̱nka̱i an nsansa. Aza na i a kubana n kubono a kusan. Aza a na a cinukpai nu ushiga u le. 
Ka̱ta̱ vuza na baci de dem u cinai le wu una le, ɗa irala i le i danai, <A̱ tsu, ci nu u nushi ba, adama a na a nusaka ta̱ Vuzavaguɗu vu le, vuza singai, Vuzavaguɗu vu na ikaya i le i keɗei a̱pa̱. 
<<Sumai yuta̱ i ka̱sukpa̱ Babila, ka̱ta̱ kpamu yuta̱ i ɗa̱skpa̱ iɗika ya aza Kalidiya, ka̱ta̱ yokpo an nga̱ji n na mi o ku rono ushiga kelime. 
Adama a na mita̱ a ku ɗa̱ngusa̱ likuci i gbagbaꞋin ya aza kasana adama a na a bana a̱ shilika̱ n Babila. Ka̱ta̱ a lyaꞋi. Uma a na ayaꞋa e le i tsa ayaꞋa a a fuɗai o kuvon, aza na ayaꞋa e le o tsu bono gbani ba. 
I ta̱ a̱ kupura̱ Kalidiya, ka̱ta̱ ra̱ka̱ le na a̱ pura̱i le va a̱ cuwa̱, mpa Vuzavaguɗu, mpa ɗa n dansai. 
<<Ko an wokpoi, i pana ta̱ u yoꞋo ɗa yi a̱ ma̱za̱nga̱, a̱ɗa̱ na i pura̱i uma u ka̱ni u va̱, ɗa kpamu yi a̱ ma̱za̱nga̱ an mashan a kajanu, a vishili an odoku, 
Adama a nannai a̱na̱kpa̱ a̱ɗa̱ i ta̱ a kuyaꞋan wono ka̱u, ka̱ta̱ e neke a̱yi na u matsai ɗa̱ wono. adama ana wita̱ o kokpo ka̱ca̱pa̱ a̱ ka̱tsuma̱ ku uduniya dem. kagbata, iɗika yu uɗekpu n kakamba. 
Adama a wupa u Vuzavaguɗu, babu vuza na u kuda̱sa̱ngu a̱ ka̱tsuma̱ ki i ɗa, yi ta̱ o kokpo agali, ka̱ta̱ yaba dem na u walai lo u namba i na wa kudansa, ka̱ta̱ kpamu u meɗe una̱ adama a untsu a̱ ni. 
<<Ra̱ka̱ vu ɗa̱ aza a njiki, ɗikai njiki n ɗa̱ i ka̱ra̱Ꞌa̱ Babila, a̱ɗa̱ ra̱ka̱, aza ana o tsu rono utan, tawa ni, ka̱ta̱ i buwaka ayaꞋa ba, adama ana u yaꞋin ka ta̱ Vuzavaguɗu unushi. 
Ka̱ra̱Ꞌi ni n kacaꞋa ka kuvon, sapu na u neke utan, nshilya n ni yikpa̱ ta̱, a vakangu ta̱ asaka a̱ ni. adama ana na va katsupu ka Vuzavaguɗu ka. tsupai i na u yaꞋin, yaꞋankai ni derere uteku tsu na u yaꞋankai ɗa̱. 
Sa̱nka̱i Babila aza vu ca̱Ꞌa̱, n aza a tsu ka̱na̱ nkaun a ayin a vukyaꞋa. adama o kotokobi ka vuza gbanigbani, yaba dem wita̱ o ku bono ubuta̱ u uma a̱ ni, yaba dem kpamu wita̱ a kusuma a ku bono a iɗika i ni. 
<<Aza Isaraila i ta̱ an nkyon n na wacuwai, aza na kawu u lokoi. Nu ugiti mogono ma Asuriya maꞋa ma takumai le. Ama a u koci, Nebukadnezaru mogono ma Babila ma mo ɓosoi etele ele. 
Adama a nanai Vuzavaguɗu ma laꞋi mi ili, Ka̱shile ki Isaraila u dana ta̱. Mita̱ a kutuka̱ n atakaci u mogono ma Babila n iɗika i ni, uteku tsu na n takacikai mogono ma Asuriya. 
Mita̱ o ku bonoko n aza Isaraila a kajanu ku le, ka̱ta̱ a yaꞋan kalina a Kamelu m Bashan, ka̱ta̱ a̱ cuwa̱ a kamba aza Ifiraimu n Giliyadu. 
Ka̱ta̱ a ayin a nanlo, a makyan ma nanlo ma, a̱ la̱nsa̱ u nushi a̱ ka̱tsuma̱ ki Isaraila n Yahuza ama ka̱ta̱ a lamba, adama ana mita̱ a kucinukpa ka aza ana a buwai u unushi u le. 
Vuzavaguɗu u danai, <<Shilika̱i n uma a Merathaim, n aza Peko.unai ka̱ta̱ i foro le. yaꞋin ili i na n danai nu dem. mpa Vuzavaguɗu n danai. 
KacaꞋa ko kuvon ki ta̱ i ɗika ya, n kuna ku gbayin. 
Uteku tsuna a iwain uma a duniyan ra̱ka̱, uteku tsuna Babila u kunu u gbani, nu unata n uma ana a buwai. 
N zuwaka wu ta̱ atakaci, a̱ ka̱na̱u ta̱ tana, a vu Babila, a vu tana vu yeve ba. a̱ ciya̱ ta̱ a̱ ka̱nu wu adama ana vu yaꞋin ta̱ vishili nu mpa. 
Vuzavaguɗu u ɓa̱yuwa̱ ta̱ ubuta̱ wi ili i kuvon i ni, u tuka̱ ta̱ n yunatsu i wupa i ni, adama Vuzavaguɗu Ka̱shile malyaꞋi mi ili dem, wi ta̱ nu ulinga una wi a kuyaꞋin i ɗika ya. 
Ta̱wa̱i, i shilika̱ n a̱yi a̱ ka̱tsuma̱ ki ili dem. ɓa̱yuwa̱i mpon n ni, i picaꞋa sa i ɗa tsu ili i kashina, i una i ɗa ra̱ka̱, ka̱ta̱ ili i yoku i ni i buwa ba. 
U nai obomburon e le ra̱ka̱, a banka le ubuta̱ u ku kiɗa, ka̱ ya vu le adama ana ayin ele o kotso ta̱, ayin a fada ele o kotso ta̱. 
Panai, a suma ta̱ a laꞋa ka a̱ ka̱tsuma̱ ka Babila, adama ana a̱ yikpa̱ a Sihiyona, katsupu ka Vuzavaguɗu Ka̱shile ka̱ tsu adama kasingai ka̱ ni. 
<<Ɗekei aza njiki, aza ana o tsu rono njiki, a̱ yikpa̱ u Babila. maꞋin likuci u ka̱ra̱Ꞌi u le, ka̱ta̱ i ka̱sukpa̱ vuza u laꞋa ka ba. i yaꞋin ka le ulinga u le adama ana u goyo ta̱ Vuzavaguɗu, vuza ci ɗa vi Isaraila. 
Adama nanai olobo e le i ta̱ a̱ kuyikpa̱ a uye. i ta̱ a kuna osoji a̱ ni ra̱ka̱ a kanna ka nanlo mpa Vuzavaguɗu n danai. 
<<Ɗan na, mita̱ a tsurala n avu, avu Babila, vuza vu ugbami u kaci. adama ana kanna kana mi a takacika wu, ka̱ yawa ta, mpa Vuzavaguɗu malaꞋi mi ili dem n danai. 
Vuza vu ugbami u kaci wita̱ a̱ ku ta̱ɗa̱tsa̱ u yikpa̱, babu vuza na kpamu u ku ɗa̱ngusa̱i, mita̱ o kusongu likuci i ni n a kina, mita̱ kpamu a kuna ili i na yi u ka̱ra̱ i uni ra̱ka̱. 
<<Mpa Vuzavaguɗu malaꞋi mi ili dem n danai, a tsugba ta̱ uma Isaraila na a Yahuda, a zana a̱ ka̱na̱i dem ele agbashi a̱ ka̱na̱i le n utsura. a iwain ku ka̱sukpa̱ le. 
Vuza kisa vi le vuza vu utsura ɗa, Vuzavaguɗu malaꞋi mi ili dem ɗa kula kuni. mayun wita̱ a ku shamgba ka le adama ana u tuka̱ aduniyan n ma̱ta̱na̱, ama mita̱ a̱ ku tuka̱ aza ida̱shi i Babila vishili. 
Mpa Vuzavaguɗu n danai, kotokobi ki ta̱ lo a Kilidiyawa, n aza ida̱shi i Babila, n aza ulinga a̱ ni n aza cicoꞋo a̱ ni. 
Kotokobi ki ta̱ lo wa aza a̱guma̱ adama ana okpo alau. otokobi i ta̱ lo wa aza utsura a̱ ni, adama ana una le. 
Otokobi i ta̱ lo wa aza ana a tsu kumba odoku, n ukuna wo osoji ayin kuyongo n ele, adama ana okpo an a̱ ma̱ci, otokobi i ta̱ lo ubuta̱ wu udukuyan u va̱ ra̱ka̱ adama ana o loko u ɗa. 
Uɗekpu wita̱ a kuzuwa mini ma shamgba, adama ana iɗika yita̱ tukpa n a̱ma̱li ana uma i a mali ma a ɗa. 
<<Adama a nannai nnama n kakamba nu n nu, ita̱ a̱ kuda̱sa̱ngu a Babila, ta kpamu uma nannai o kudoku kuciya̱ a za ida̱shi a̱ ka̱tsuma̱ ke le ba a tsumani dem. 
Ili i na i yaꞋin n aza Saduma n Gomora n likuci i gbagbaꞋin u ka̱ra̱Ꞌi ule, i ɗa kpamu ya yaꞋin n Babila, babu vuma vun vi a̱ kuda̱sa̱ngu punu. 
<<Uma a ɗana a kubana a kasana, iɗika i gbagbaꞋin nu ngono, a̱ ku ta̱wa̱ ubuta̱ u dadaꞋin punu aduniyan. 
Ita̱ uremi nu iven nu nsara, aza gbagbaꞋin aza babu asuvu ayali. ofoɓuso ele ita̱ an ni izumgbi i kuɗolu, i ta̱ u foɓuso adama ku yaꞋin kuvon n avu, avu Babila. 
Mogono ma Babila u panai arabali e le, Ekiye a̱ ni, a̱ yikpa̱i gbani. a wuya n atakaci a̱ ka̱na̱i ta̱, an vuka vu limata. 
<<Mpa Vuzavaguɗu mita̱ lo a̱ ku ta̱wa̱ an kawu vuna vi a̱ kuta̱ a kangu ka maɗanga ma Urdu a ku bana a maguɓi. gogolo, mita̱ a ku zuwa a suma wa ni. ayin a nanlo ka̱ta̱ n zagba kayi vuzana n zagbai, yayi wi uteku tsuva̱? Yayi u ku banka mu a kara? Vuzagbayin ne ɗai u kuyaꞋin vishili nu mpa? 
Adama a nannai panai ili i na Ka̱shile ke sheshei ku yaꞋin n aza Babila, nu usheshi u na u yaꞋin vishili n iɗika i Kilidiyawa. mayun mita̱ a ku wala n aza wawaꞋa e le ushiga wita̱ o kokpo a gali. 
Aduniyan i ta̱ a̱ kugba̱ɗa̱ makyan mana u panai a lyaꞋi Babila n kuvon. i ta̱ a kupana ma̱shi ma̱ni a̱ ka̱tsuma̱ ki iɗika i na i buwai. 
