﻿Irimiya.
49.
Adama aza Amuno. Vuzavaguɗu u dana ta̱. <<Ashe Isaraila wi m muku ba? Ashe wi n aza a na a kulyaꞋa uka̱ni u ni ba? Yiɗa̱i i zuwai ɗa aza a na i o kutono Milika, isai ubuta̱ u na Gadu wi ni ida̱shi, ɗa a̱ da̱sa̱ngi puna̱ a likuci i ni? 
Adama a nannai, la̱na̱, Vuzavaguɗu u dana ta̱, ayin i ta̱ lo a̱ kuta̱wa̱, a na n ku zuwa uma a pana ma̱shi adama aza a̱ likuci i Raba va aza Amuno. ka̱ta̱ wo okokpo agali a gbani, ka̱ta̱ o songu n likuci n ni na akina, yeve ka̱ta̱ Isaraila u lyaꞋa aza a na a lyaꞋi ni, Vuzavaguɗu ɗa u dansai. 
<<Lapai una̱, a̱ɗa̱ aza Heshibon, adama a na a̱ la̱nga̱sa̱ ta̱ Ai, Lapai una̱ a̱ɗa̱ nkere ma aza Raba, ukai akashi a kpalu, shika̱i, ka̱ta̱ i suma a kubana ni bonoi a̱ ka̱tsuma̱ ka nshilya. Adama a na Milika wita̱ a kubana ugbashi, koɓolo ni ganu i ni n aza gba̱ra̱-gba̱ra̱ a̱ ni. 
Yiɗa̱i i zuwai ɗa yi a̱ra̱ɗi n katsura ka̱ ɗa̱, a̱ɗa̱ vu babu kasingai, a̱ɗa̱ na yi a malapa ma̱ a̱pa̱ adama uciyi u ɗa̱, a kudana, <Ya yi u kufuɗa kushilika̱ n a̱ tsu?> 
La̱na̱, Vuzavaguɗu u dana ta̱, mi ta̱ a̱ kutuka̱ a̱ɗa̱ n atakaci a wovon, wa aza na i u ka̱ra̱Ꞌi n a̱ ɗa̱ dem, ka̱ta̱ a loko ɗa̱, yaba dem u ka̱na̱ uye u ni, a̱ we eni u a̱shi a̱ va̱, ka̱ta̱ a namba vuza na u kuɓolongu aza na a buwai. mpa Vuzavaguɗu MalaꞋi mi ili dem n danai. 
<<Ama a̱ ka̱ca̱pa̱ mi ta̱ o kubonosoko aza Amona n uciyi u le, mpa ɗa Vuzavaguɗu mpa ɗa n dansai,>> 
Adama aza Edom. Vuzavaguɗu MalaꞋimili u dana ta̱. <<Ashe ugboji u cicoꞋo u buwa ɗe a Teman ba? Odoki a̱ tsu na̱mgba̱ ta̱ ubuta̱ wa aza kuyeve? Ugboji u le wa u kotso ta̱? 
A̱ aza a Dedan, kpatalai, ka̱ta̱ i suma i sheɗeku uga̱vi, adama a na mita̱ a ku tuka̱i n atakaci a Isuwa, ayin a na baci n takacikai ni. 
Ɗa baci aza a kutaɓa u maci wi inabi a̱ ta̱wa̱i wa̱ a̱ nu, ashe a tsu buwaka kagimi ba? Ɗa baci oboki a̱ ta̱wa̱i nu n kayin, ashe i na a cigai i ɗaɗa a tsu ɗika ba? 
Ama m palukpa ta̱ Isuwa, m palukpa ta̱ ubuta̱ u kusheɗeku u ni, Ali uteku tsu na wa kufuɗa ku sokongu ka̱cika̱ni ba. una ta̱ muku n ni koɓolo n aza a̱ ni n itoku i ni, babu vuzana u buwai. 
Ka̱sukpa̱i mkpan n muku n ɗa̱, mpa n kula̱na̱ le ta̱ ka̱ta̱ kpo n wuma, ka̱ta̱ i ka̱sukpa̱ kpamu agapa a̱ɗa̱ ushuku nu mpa.>> 
Adama a na Vuzavaguɗu u dana ta̱, <<Ɗa baci wokpoi aza a na ugain a takacika atakaci a na mpa ba i o soꞋo a ɗa, avu va i ta̱ a ku ɗa̱skpa̱ wu gbani? I a ku ɗa̱skpa̱ wu gbani ba, avu feu vi ta̱ a ku soꞋo a ɗa. 
Adama a na mpa Vuzavaguɗu n kucina ta̱ n ka̱cika̱va̱, n danai, Bozara wita̱ okokpo ili wovon, ili yi izoshi, n ili kushika, ka̱ta̱ likuci i ni ra̱ka̱ yokpo agali kowanai.>> 
Mpa na ta̱ akaka u Vuzavaguɗu, a suꞋuku ta̱ kalingata uduniya. <<Ɓolongi ka̱cika̱ɗa̱ ka̱ta̱ yu uta̱ tsurala n a̱yi, ka̱ta̱ i ɗa̱ngusa̱ vishili n a̱yi. 
Adama a na ɗa na, n ku bonoko wu za kenu a̱ ka̱tsuma̱ ku uduniya, ili i kugoyi a ka̱tsuma̱ ka uma. 
Ugbamukaci u ɗa̱ u ya̱nsa̱ ɗa̱ ta̱, koɓolo n a̱ra̱ɗi a̱ɗu a̱ ɗa̱, a̱ɗa̱ vuna yi ida̱shi a ungu a tali, a̱ɗa̱ vuna i ka̱na̱i gaɗi vu kusan. ko an i maꞋin kpaꞋa ku ɗa̱ gaɗi vu kusan an mashangi, mpa n ku cipa̱ka̱ wu ta̱ i ɗika, 
<<Edom wita̱ a̱ o kokpo ili wovon. Ka̱ta̱ yaba dem vu na u walai lo, u pana wovon ali u meɗe una̱ adama kagbanigbani kana wenei. 
Derere uteku tsu na a vakangi Sodom n Gomora n likuci i le i na i buwai, tsu na Vuzavaguɗu u danai, babu vuza na u ku da̱sa̱ngu ɗe, babu kpamu vuza na u ku yaꞋan tso omoci ɗe. 
La̱na̱, uteku tsu na Kawu u tsu uta̱ a̱ kutsun ku Urdu adama a na u uwa ushiga wa nlala, nannai ɗa n kuzuwa le a suma yi. Ka̱ta̱ yeve n zuwa yaba dem na n zagbai. Adama a na yayi ɗa wi lo tsu va̱? Yayi ɗa u ku ɗeke mu? Maguɓi me e ne ma maku shamgba e kelime ka̱ va̱? 
Adama a nannai panai ofoɓuso a na Vuzavaguɗu u yaꞋin adama Edom koɓolo ni na n sheshei kuyaꞋan n kumaci ka aza Teman. mayun ali n muku n wawaꞋa mita̱ a ku laza na̱ le. Ka̱ta̱ ubuta̱ u kalina u le wokpo ubuta̱ u wovon. 
Ka̱ta̱ a ilama yi uyikpi u le iɗika i gba̱ɗa̱, ka̱ta̱ a pana a̱la̱ka̱tsu a̱ ma̱shi me le a mala mashili. 
La̱na̱, vuza yoku wita̱ a̱ ku imkpa n kafura, ka̱ta̱ u gaɗukpa gaɗi an mashangi ka̱ta̱ u ba̱ra̱kpa̱ evelyu a̱ ni adama a Bozara. Ama a̱ɗu osoji a Edom a kanna ka nanlo i ta̱ okokpo an a̱ɗu a vuka va a̱ ga̱nda̱ a limata.>> 
Adama Dimaska tan kpamu. <<Hamatu koɓolo n Apadu a̱ rikpa̱ ta̱, adama ana a pana ta̱ ukuna u gbanigbani, ɗa e derikpei adama o wovon, A takacikai an kuɗolu kuna ku tsu paɗa bini ba. 
Ɗa Dimaska wokpoi babu utsura, ɗa u kpatalai adama a na u suma, ɗa wovon u ka̱na̱i ni, atakaci a̱ una̱mgbi u ka̱tsuma̱ a̱ ka̱na̱i ta̱, an vuka va a̱ ga̱nda̱ a limata. 
Nini ɗa̱i a ɗa̱skpa̱i likuci yu uyeve, likuci i ma̱za̱nga̱ i va̱? 
Adama a nannai a̱ɗa̱nga̱ni a̱ ni i ta̱ a kuyikpa̱ e keteshe ka likuci, ka̱ta̱ kpamu una osoji a̱ ni ra̱ka̱ a kanna ka nanlo, mpa Vuzavaguɗu vu Uba̱nga̱ri. 
Mita̱ a kudyaɓa akina an nshilya Dimaska, ka̱ta̱ a ɗa o songu ubuta̱ u katsura ka aza Ben-hadadu.>> 
Adama aza Kedaru likuci igbain i Hazo i na Nebbukadnezzaru mogono ma Babila mu unai. Vuzavaguɗu u dana ta̱ <<Ɗa̱nga̱i a ku bana Kedaru, una uma a̱ ka̱livi. 
Ka̱ta̱ i pura̱ nva̱li n le, n ushiga u le, n akashi utsutsu e le koɓolo n ucanuku le ra̱ka̱. ka̱ta̱ kpamu a lazaka n arakuma e le, ka̱ta̱ uma a̱ ka̱na̱ malapa mu una̱ a kudana atakaci ubuta̱ dem, 
<<A̱ɗa̱ aza Hazo, i i sheɗeku uga̱vi, a̱ɗa̱ aza Hazo Vuzavaguɗu u danai adama ana Nebukadnezaru, mogono ma Babila, mo foɓuso ta̱ kagbanigbani, u sheshei kagbanigbani adama a̱ɗa̱. 
Ɗa Vuzavaguɗu u danai ɗa̱nga̱i, adama a na i shilika̱ nu uduniya u na wi ida̱shi ma̱ta̱na̱, uduniya u na wi ida̱shi ma̱ta̱na̱, aza na likuci i le na a̱tsutsu ko aburakpatsu ba, aza a na i ida̱shi an deꞋen le. 
Vuzavaguɗu u dana ta̱, <<I ta̱ a̱ ku pura̱ arakuma e le, ka̱ta̱ a̱ pura̱ ushiga wa wi ilikuzuwa i ɗa̱. ka̱ta̱ n wacuwa le a ubuta̱ dem, e le na a tsu puna iga̱Ꞌin i a̱nji i le, ka̱ta̱ n tuka̱ le n atakaci a ubuta̱ u na wi u ka̱ra̱i na̱ e le dem. 
Ka̱ta̱ Hazo wo okpo agali a kowanai, ubuta̱ u kuyongo wa nyama, ka̱kiza̱ ka babu uteku babu vuza na wa ku da̱sa̱ngu ɗe, babu kpamu komoci kana ka ku yaꞋan limoci ɗe.>> 
Kadanshi ka Vuzavaguɗu kana ka̱ ta̱wa̱i u Irimiya keniki, adama a Elim, a ugiti u tsugono Zedekiya mogono ma aza Yahuda. 
Vuzavaguɗu ma laꞋi mi ili u danai ta̱. <<La̱na̱, mita̱ ku koɗo utan u Elim, u na wi katsura ka̱ ni. 
Ka̱ta̱ n tuka̱ Elim wunla̱ u na̱shi wu uɓon u nushi u Ka̱shile. Ka̱ta̱ n wacuwa le o tono u ɗa a ubuta̱ dem. Ka̱ta̱ wokpo babu likuci i na a ku namba vuza Elim punu. 
Ka̱ta̱ n zuwa Elim u pana wovon a̱ a̱shi i irala i le n ubuta̱ wa aza na i a̱ ku la̱nsa̱ wuma u le. Ka̱ta̱ n tuka̱ le nu usuɗukpi u wupa u va̱. Vuzavaguɗu ɗa u dansai. Ka̱ta̱ n zuwa a una le n otokobi sapu ayin a na n kotso le ra̱ka̱, 
ka̱ta̱ n shikpa̱ tsugono tsu va̱ a Elim, ka̱ta̱ mu una mogono me le ni taji i ni. Vuzavaguɗu ɗa u dansai. 
<<Ama a u koci ka̱ta̱ n bonoko Elim n uciyi u ni. Vuzavaguɗu ɗa u dansai.>> 
