﻿Irimiya.
23.
Vuzavaguɗu u dana ta̱,<<I li ya atakaci i ɗa a kubana nguɓi n na n wacuwai nlala n kaguɓa n kajanu ku va̱.>> 
Adama nannai, Vuzavaguɗu Ka̱shile ki Isaraila ka dansa ta̱ u kuna adama nguɓi n na m ɓa̱nka̱i uma a̱ va̱. <<I wacuwai ushiga wa nlala u va̱ ɗa i lokoi le, ɗa i iwain kuɓa̱nka̱ le. La̱na̱ mita̱ a kutakaci ɗa̱ adama a ka gbani-gbani ka̱ɗa̱. Mpa Vuzavaguɗu, ɗana ta̱. 
Ka̱ta̱ n ɓolongu ushiga wa nlala u va̱ u na wi a ubuta̱ ra̱ka̱, ka̱ta̱ m bonoko le a ubuta̱ u kalina u le, ka̱ta̱ a matsasaka a yimkpa. 
Ka̱ta̱ n zuwa ka le nguɓi n na kula̱na̱ le, i a kudoku kupana wovon ba, be le tana a rikpa̱, i tan feu a kupuwa̱nka̱ kpamu ba. Mpa Vuzavaguɗu mpa ɗa n dansai. 
<<La̱na̱, Vuzavaguɗu u dana ta̱, kanna ki ta̱ lo a kuta̱wa̱, kana n ku ɗengusa̱ ka̱ Dawuda kacaka ka̱ta̱ u lyaꞋa tsugono, ka̱ta̱ tana u lyaꞋa tsu ɗa mayin, n usuɓi kpamu n kasingai a iɗika. 
A ayin o tsugono a̱ ni a ɗa Yahuda u kuciya̱ wishi, ka̱ta̱ Isaraila tankpamu yongo m ma̱ta̱na̱. Kula ku na a ku ɗekei ku ɗana: Vuzavaguɗu ɗa, usuɓi u tsu.> 
<<Adama nannai, Vuzavaguɗu u dana ta̱, la̱na̱, kanna kita̱ lo a kuta̱wa̱, kana uma a kudoku a dana, a kucina ta̱ n Ka̱shile kana ku utuka̱i na aza Isaraila a i ɗika i Masar ba,> 
ama i ta̱ a kudana, akucina ta̱ n Vuzavaguɗu vu na wu utuka̱i n aza Isaraila a iɗika yi uɓon u gaɗi, a iɗika ra̱ka̱ i na uwaciwi le.> Ka̱ta̱ yeve a doku a da̱sa̱ngu iɗika i le. 
Adama eneki tankpamu, ekyamba i va̱ i kuwa̱ ta̱, ɗa etele i kyamba a̱ va̱ ra̱ka̱ a̱ gba̱ɗa̱i, ɗa mokpoi an ko osoꞋi ka̱ ma̱ra̱, an ko osoꞋi ka̱ ma̱ra̱ kana ma̱ra̱ ma laꞋa ni u soꞋi, adama a Vuzavaguɗu, adama kadanshi ka ciɗa ka̱ ni. 
Adama a na iɗika ya i shana ta̱ tukpa n cishakanlai, adama una̱u, iɗika ya yi ta̱ a kuyaꞋin kpalu, kpamu a ubuta̱ u kalina a kakamba u ɗekpe ɗe. Kusheshe ku le ka gbani-gbani ka a, a kuyaꞋin u linga n kusheshe le ubuta̱ wa a uwa. 
<<A na n ganu koɓolo n eneki dem vu le i n wovon u Ka̱shile ba, ko punu a kpaꞋa ku va̱ n cina ta̱ ka gbani-gbani ke le. Mpa Vuzavaguɗu mpa ɗa n dansai. 
Adama nannai, uye u le wi ta̱ okokpo n kederi a ubuta̱ u ka̱yimbi ubuta̱ u na o kutono ka̱ta̱ a yikpa̱, adama na n ku tuka̱ le ta̱ m ma̱dukpa̱, a̱ ka̱ya̱ ka a takacika ke le, Vuzavaguɗu ɗa u dansai. 
A ka̱tsa̱ma̱ ka eneki aza Samariya mene ta̱ i li gbani-gbani n kula ku ka̱ma̱li ka Balu ku ɗa i a ku yaꞋin kindana a ku zuwa uma a̱ va̱ aza Isaraila kupuwa̱nka̱. 
Ama u eneki a za Urushelima ɗa mene ili yi unata i na kpamu i lyaꞋi i na mpa a ma yaꞋin ma tsugbani n adanshi ka uwa, a kudoku aza a gbani-gbani u tsura, adama na ka̱ta̱ vuza u kpatala u ka̱sukpa̱ ka gbani-gbani ka̱ ni ba, ra̱ka̱ vu le ɗa okpoi mu tsu Sodom, aza na i punu ida̱shi kpamu tsu Gomora.>> 
Adama a nannai, Vuzavaguɗu va ovonshi u dansa ta̱ u kuna adama eneki a nanlo. <<La̱na̱, ilikulyaꞋa ya okono i ɗa n ku zuwa le a lyaꞋa, ka̱ta̱ n neke le mini mo okono o soꞋo, adama a na ubuta̱ u eneki wa aza Urushelima u ɗa kutoni ka̱ma̱li ku ka̱ra̱i iɗika ra̱ka̱.>> 
I na Vuzavaguɗu vo ovonshi u dansai i ɗa na, <<Ka̱ta̱ i pana kadanshi ka eneki a uwa a na mpa ba, adama na ku kparasa ku ɗa koci i a kukparasa a̱ɗa̱. Kusheshe ka̱ a̱ɗu kuci ke le ku ɗa koci i a kudana a̱ɗa̱, ba u kuna u Ka̱shile u ɗa ba. 
A tsu dakaka ta̱ kudana uma a na o goyoi mu, <Vuzavaguɗu u dana ta̱ yi ta̱ o kuyongo m ma̱ta̱na̱.> wa aza ugbamukaci na tamkpamu o tonoi le, ka̱ta̱ a dana, babu atakaci a na a kuciya̱ a̱ɗa̱.> 
A dama na, babu vuza na u sawai kuda̱sa̱ngu o koɓolo ka odoki gaɗi, adama na wene ko u pana kadanshi ka̱ ni. Ya yi u da̱sa̱ngi ɗa u panai kadanshi ka̱ ni ɗa u tonoi kaꞋa? 
La̱na̱, keleshu ka wupa ka Vuzavaguɗu, ko o ɓoso ta̱ ɗa kuta̱i n wupa uteku tsu na kabatalikpau ka tsu ɗa̱nga̱ a kaci ka aza gbani-gbani. 
Wupa u Vuzavaguɗu wi a̱ kuta̱na̱ ba sai u ɗa u kotso ra̱ka̱ ukuna u ka̱ a̱ɗu ka̱ ni a ayin a na a kuta̱wa̱ ta lo ya ku yeve ili ya mayin. 
Mpa n suꞋuku eneki a na mpa ba, dem n nannai ɗa a̱ ka̱ra̱i n akaka e le, mpa n yaꞋin kadanshi n a̱ le ba, dem n nannai ɗa i a kuyaꞋin kene. 
Ama ishi baci a̱ da̱sa̱ngu a̱ ka̱tsuma̱ ko oɓolo a uma a̱ va̱, ashi ta̱ a kudana uma a̱ va̱ kadanshi ka̱ va̱. ka̱ta̱ a zuwa le a kpatala a ka̱sukpa̱ u nushi u le n ka gbani-gbani ke le. 
Vuzavaguɗu u danai <<Mpa ɗa Ka̱shile kana ki ubuta̱ dem,>> <<ba kubuta̱ ute ba. 
Vuzavaguɗu u danai, vuza wi ta̱ a kusheɗeku a ubuta̱ ka̱ta̱ n kpa̱ɗa̱ kenei?>> Ashe mpa ɗa n shatangi gaɗi n iɗika ba?>> 
<<Ai, mpa na ta̱ i na eneki a uwa a na mpa i a kudansa adama a kula ku va̱. A tsu dana ta̱, <N yaꞋin ta̱ alatani. N yaꞋin ta̱ alatani.> 
Ali wanai ɗa eneki a uwa a na mpa a ku ka̱sukpa̱ u kuna wa a uwa, e le na a tsu ka̱na̱ kudoro uma n ukuna wa uwa u na wi a̱ɗu we ele? 
E sheshe ta̱, kudana uma a̱ va̱ i ta̱ a kucinukpa m mpa, ubuta̱ wa alatani u le u na i a madanansanai, uteku tsu na ikaya i le i cinukpai m mpa a ayin a na a̱ gita̱i kutono ku balu. 
Ɗa Vuzavaguɗu u danai, ka̱sukpa̱i keneki ka na de dem ki na alatani ka dansa alatani a̱ ni, ama a̱ ka̱sukpa̱i aza na i n kadanshi ka̱ va̱, a dansa ka mayin. Yiɗa̱i i gbaɓai mita̱ n ishina?>> 
Ɗa Vuzavaguɗu u danai<<Ashe, kadanshi ka̱ va̱ ki uteku tsa akina ba?>>an, kalapatsu ka na ka ka ɓosoi katali ba? 
<<Adama nannai,>> Vuzavaguɗu u dana ta̱, <<Mpa mita̱ a tsurala n eneki a na i a mobokoko ma kadanshi ka̱ va̱ a̱ ka̱tsuma̱ ke le. 
Mayun,>> Vuzavaguɗu u dana ta̱ <<Mpa mita̱ a tsurala n eneki a na a tsu ɓa̱yuwa̱ una̱u le, ka̱ta̱ a dana, <Vuzavaguɗu ɗa u dana ta̱.> 
Mayun, mpa mita̱ a tsurala n eneki a na a tsu dansa alatani a uwa,>> Vuzavaguɗu ɗa u dansai, <<Ka̱ta̱ a ka̱na̱ kudana le ukuna wa uwa, ka̱ta̱ a zuwa uma a̱ va̱ a̱ puwa̱nka̱, mpa n suku le, be le tana n zagba le. I tana a ku ciya̱ u lyai uma nanlo ba ko kenu,>> Vuzavaguɗu ɗa u dansai. 
<<Ɗa baci vuza a̱ ka̱tsuma̱ ka uma a na mpa, ko keneki, ko ganu wecei nu, <Yeɗei yi a kutakacika Vuzavaguɗu?> Ka̱ta̱ vu dana le, <A̱ɗa̱ ɗa atakaci a̱ ni, kpamu mita̱ a ku ka̱sukpa̱ ɗa̱, mpa Vuzavaguɗu n dansa ta̱.> 
Ama ɗa baci keneki, ko ganu, ko vuza yoku a ka̱tsuma̱ ka uma, u dansai ukuna wa a uwa ɗa u danai, <N ciya̱ ta̱ kene u Vuzavaguɗu,> Mpa n kutakacika ta̱ vuma nanlo koɓolo n kpaꞋa ku ni. 
Ama i na yi a kulyaꞋa kelime m madananai i ɗana, Yeɗei wushuki u Vuzavaguɗu?> Ko kpamu <Yiɗa̱i Vuzavaguɗu dansai?> 
Ama, Ɗa̱skpa̱i kudansa ukuna wa atakaci a Vuzavaguɗu,> adama na akaka a yaba dem i ta̱ o kokpo atakaci a ka̱cika̱ni. La̱na̱, a̱ɗa̱ ɗa na yi a ku la̱nga̱sa̱ kadanshi ka Vuzavaguɗu Ka̱shile ka wuma, Ka̱shile MalaꞋimili, Ka̱shile ka̱ tsu. 
Uteku tsu na ya kudana eneki u ɗa na<Yeɗei wushuki u Vuzavaguɗu?> Ko kpamu <Yiɗa̱i Vuzavaguɗu dansai?> 
Ɗa baci wushuki, <I na mpa n danai ɗa̱, kene ku ɗa ku Vuzavaguɗu,> ka̱ta̱ i dakaka kudana, <<N ciya̱ ta̱ kene u Vuzavaguɗu>>ko a na n danai ɗa̱ ka̱ta̱ i dansa u kuna an i ciya̱i kene u Vuzavaguɗu ba.> 
Adama nannai, mpa Vuzavaguɗu n ku vakangu ɗa̱ ta̱ eneki a uwa. Ka̱ta̱ n loko ɗa̱ a e kelime ka̱ va̱, a̱ɗa̱ n likuci i na n nekei ɗa̱, a̱ɗa̱ ni ikaya i ɗa̱. 
Ka̱ta̱ n zuwa ɗa̱ yokpo ili yi unata n ili wono ali uteku. Kpamu i a kucinukpa n ka ba.>>> 
