﻿Irimiya.
22.
Ɗa Vuzavaguɗu u danai, <<Ɗa̱nga̱ vu bana a kpaꞋa ku mogono ma a Yahuda vu dansa kadanshi ka na mpa, 
ka̱ta̱ vu dana, <Pana kadanshi ka Vuzavaguɗu, a vu mogono ma a Yahuda, a vu na vu da̱sa̱ngi a kakuba ka tsugono tsu Dawuda, a vu n ana n taji a̱ nu koɓolo n uma a̱ nu a na a tsu tono n utsutsu na mpa. 
Vuzavaguɗu u dana ta̱ yaꞋin ka usuɓi n kasingai, adama na i ciya̱ wishi ekiye a vuza na o doroi. Ka̱ta̱ i nusaka komoci kana ka̱ ta̱wa̱i limoci a̱ wu a ɗa̱ ko i takacika yi ba, m mkpan koɓolo n agapa, ka̱ta̱ yuna vuza gbani ubuta̱ u na mpa ba. 
Adama na, ɗa baci i tonoi kadanshi ka na mpa, ngono n na n da̱sa̱ngi a kakuba ka Dawuda, i ta̱ a kuwa n utsutsu na mpa gaɗi va a keke odoku, n gaɗi va odoku, e le n a na taji e le koɓolo uma e le. 
Ama ɗa baci i iwain ku tono kadanshi ka na mpa, n kucina ta̱ n ka̱ci ka̱ va̱, kpaꞋa ku na mpa ki ta̱ o kubono agali. Mpa Vuzavaguɗu mpa ɗa n dansai. 
Adama na Vuzavaguɗu dansa ta̱ ukuna adama a kpaꞋa ku mogono ma a Yahuda, u danai. <<<A̱ ɗa̱ yi ta̱ an Giliyadu wa̱ a̱ va̱, n tsu na kaginda kagbayin ka Lebano ki, dem n nannai mayun ɗa m bono ko a̱ɗa̱ kakamba, likuci babu vuza. 
n ku foɓuso ta̱ vuza munuka adama a̱ ni, yaba dem n ucanuku munuka u ni, ka̱ta̱ a kapa nɗanga n singai n sida ka̱ta̱ a varuku le akina. 
<<<Ka̱ta̱ uduniya wa a̱bunda̱i u na wi a kutono n likuci i nanlo u danannai, <<Yi ɗa̱i i zuwai Vuzavaguɗu takacikai i ɗika i gbangam i na mpa?>> 
Ka̱ta̱ ushuku a dana, <<Adama a ka̱sukpa̱ ta̱ Vuzavaguɗu Ka̱shile ke le ɗa o bonoi o kutono a̱ma̱li n a yaꞋin kai le tsu gbashi.>>>>> 
Ka̱ta̱ i shika̱ i yi na u kuwa̱i ɗe ba, ka̱ta̱ i yaꞋin kai kpalu ba, ama shika̱i wuya wuya adama ni a̱ yi na u lazai, adama na u buwa a kubono we ene iɗika yi uka̱ni i ni ba. 
Adama na Vuzavaguɗu dansa ta̱ kakuna adama Shallum kolobo ka Josaya, mogono ma a Yahuda ma na ma lyaꞋi tsugono una̱u dada ni Josaya, a̱ yi ɗa vuza na a ɗikai a lazakai a kubanka i ɗika i Babila, <<Kpamu wi a kudoku ku bono ubuta̱ u na mpa kpamu ba. 
Ama ɗe ubuta̱ u na a ɗikai ni a bankai tsugbashi, ta ɗe u ku kuwa̱, wi a kudoku kene iɗika i na mpa kpamu ba.>> 
<<I li ya atakaci i ɗa u vuza na u maꞋin kpaꞋa n uye u modoruko, a̱nu a gaɗi a̱ ni kpamu n uye wa uwa, a̱yi na u tsu zuwa toku linga ka̱ta̱ u kpa̱ɗa̱ ku tsupa yi, ka̱ta̱ u kpa̱ɗa̱ kutsupa yi atakaci ulinga a̱ ni, 
a̱ yi na u tsu dana ka̱sukpa̱ n maka ka̱ci ka̱ va̱ kpaꞋa ku gbayin n unu a gbagbain a gaɗi,> ka̱ta̱ u yaꞋin ka le atusu, ka̱ta̱ u paɗara a ɗa n nɗanga n sida ni, yeve ka̱ta̱ u sura ku ɗa mini mashili. 
A vu, vu sheshe ta̱ kudana mogono ma vi, an vu kalai kpaꞋa ku nu n nɗanga n sida? Esheku a̱ nu a lyaꞋa ta̱ n u soꞋi, adama a kasingai n usuɓi ɗa tana u ciya̱i ida̱shi ma̱ta̱na̱. 
U ɓa̱nka̱i mkpan n aza unambi, ɗa tana ugain i ni. Ashe na va ɗaɗa kuyeve ku va̱ ba? Mpa Vuzavaguɗu mpa ɗa n dansai. 
Ama a vu zuwa ta̱ a̱shi n ka̱ɗu ka̱ nu ubuta̱ u kalyaꞋa, n ubuta̱ u munuka ma uma a gbani n ubuta̱ u modoruko n vishili.>> 
Adama a nannai Vuzavaguɗu dansa ta̱ u kuna adama Johoyakim kolobo ka Josaya mogono ma a Yahuda. u danai, <<Ka̱ta̱ a shika̱i kpalu, a dana,<Ai mokoshi ma tsu ma,> ko <Taku tsu ɗa ba.> Ka̱ta̱ a shika̱ yi, a dana. Vuzavaguɗu.> ko <Vuzagbayin ba.> 
Tsu na a ci ciɗa̱ngu majaki ta a ku ciɗa̱ngi nannai, i ta̱ o ku ronoi a vakangu a kucina̱ ku utsutsu Urushelima.>> 
<<Bana kumba gaɗi vu Lebano ka̱ta̱ vi shika̱ ɗe, ka̱ta̱ a vu utuka̱ ka̱la̱ka̱tsu a̱ nu a likuci i Basha, i shika̱ a likuci i Abarim, adama na ncigi n nu ra̱ka̱ n kuwa̱ ta̱. 
N dansa ka ɗa̱ ta̱ a ayin uciyi u ɗa̱, ama ɗa <I iwain kupana,> Tsu na mpa tsu ɗa i kiwanai, tun ɗe a ayin u ɗa̱nga̱ ni u ɗa̱, i tsu tono kadanshi ka̱ va̱ ba. 
Wunla̱ wi ta̱ a̱ kupura̱ngu tsugbayin tsu ɗa̱ ra̱ka̱, ka̱ta̱ a ɗika ncigi n ɗa̱ a banka tsugbashi, ka̱ta̱ vokpo n wono, adama ka gbani-gbani ka̱ɗa̱ ra̱ka̱. 
A̱ɗa̱ aza Lebano, a̱ɗa̱ na yi ida̱shi punu a ka̱tsuma̱ ka nɗanga n sida, i cuꞋu yi inka ye ne i ɗa ya kuyaꞋin ɗa baci atakaci a̱ ta̱wa̱i ɗa̱ an ɓa̱la̱ an vuka va a̱ga̱nda̱.>> 
<<Mpa Vuzavaguɗu n kucina ta̱ n wuma u va̱, ko an wokpoi Jokoniyan kolobo ka Johoyakim mogono ma aza Yahuda, makawani ma ka̱ta̱mba̱ri ma a ka̱jivu ka kukiye ku usingai ka̱ va̱, dem n nannai mita̱ a ku utuka̱ wu 
ka̱ta̱ n neke wu ekiye aza a na i a kula̱nsa̱ wuma u nu, ekiye aza na vi a kupana wovon u le, wa ta Nebukanezaru mogono ma aza Babila kpamu n ekiye aza Kaldiya. 
Ka̱ta̱ n taɗuku koɓolo n a̱na̱ku a na amaci nu a iɗika i yoku kau i na vu nambai kuyeve, ta ɗe va ku kuwa̱. 
Vi a ku doku ku bono a iɗika i na mpa i na vu cikalai ba.>> 
Ɗa vuza yoku u danai, <<Na va, Jokoniyan ka ɓoshi ka mogbodo ka, ma̱diki ma na vuza u buwai a ku cikala ba? Yiɗa̱i zuwai ɗa a taɗuki ni koɓolo n muku n ni a iɗika i na eyevi ba? 
OꞋo iɗika, iɗika, iɗika, pana kadanshi ka Vuzavaguɗu. 
Vuzavaguɗu u dana ta̱, <<Ɗana vuma na mpa madari, vuma na wa kusuɓa̱ a wuma u ni ba, adama na babu matsukaya ma ni ma na ma ku ciya̱ u lyai u na wa ku da̱sa̱ngu a kakuba ka tsugono tsu Dawuda be le tana u lyaꞋaka Yahuda tsugono.>> 
