﻿Irimiya.
10.
A̱ɗa̱ aza Isaraila panai kadanshi kana Vuzavaguɗu wi a ku u dana ɗa̱. 
Vuzavaguɗu u dana ta̱, <<Ka̱ta̱ i tono i na aza aduniyan i a kuyaꞋin sa ba, ka̱ta̱ kpamu i pana wovon wu urotu u na wi gaɗi ba, adama na uduniyan wi ta̱ a kupana wovon u le, 
adama na kutoni ka̱ a̱ma̱li kuma ili i gbani i ɗa. A ka kamba ka a ci kapa maɗanga, ka̱ta̱ kesheꞋwi ashewi ma n kushe ka alyu. 
ka̱ta̱ u paɗara ka na azurufa koɓolo n azanariya, ka̱ta̱ u vara ka n ikusa m matalaka adama na ka ka̱ yikpa̱ ba. 
A̱ma̱li e le, i ta̱ ci ili wovon a kashina kagbani, a tsu dansa ba, kpamu sai uma a ɗika le, adama na a tsu wala ba. Ka̱ta̱ i pana wovon u le ba, adama na a tsu takacika vuza ba, be le tana a yaꞋin kasingai.>> 
Babu vuza na wi tsu nu, Vuzavaguɗu, A vu vuzagbayin ɗa, kula ku nu kpamu ku gbayin ku ɗa koɓolo n utsura. 
Ya yi wa ku kpa̱ɗa̱ kupana wovon u nu, a vu mogono mu aduniyan? Adama na vu yawa ta̱ a pana wovon u nu, adama a na a ka̱tsuma̱ ka aza ugboji aduniyan ra̱ka̱, n tsugono tsu le ra̱ka̱ babu vuza na wi tsu nu. 
Ra̱ka̱ vu le, alau a gbani-gbani ɗa, ku yotsongu ka̱ a̱ma̱li e le, i yoku i ɗa ba, nɗanga n ɗa koci. 
Kuluwa ka azurufa ku uta̱ ta̱ a Tarishi, ka azanariya kpamu a Ufazu. Ulinga u kesheꞋwi u ɗa koɓolo n kukiye ku kawakana ka azanariya, ucanuku u le, usumbi u ma̱ɗiya̱ u ɗa n usuni, ra̱ka̱ vu le ta na u linga u keyevi u ɗa. 
Ama Vuzaguɗu a̱yi ɗa Ka̱shile ka mayun, a̱yi ɗa Ka̱shile ka wuma m mogono mana me geshei. U yaꞋin baci wupa u ni ka̱ta̱ iɗika i jengeɗe, aduniyan tana u kufuɗa a gbama asuvu n wupa u ni ba. 
Nanai ɗa yi a kudana le, <<A̱ma̱li a na a yaꞋin gaɗi n iɗika ba, i ta̱ a ku takacika uduniya n ɗaka vu Ka̱shile.>> 
A̱yi ɗa vuza na u yaꞋin iɗika n utsura u ni, ɗa kpamu yaꞋin uduniya n ugboji u ni, n kuyeve ku ni kpamu ɗa u ba̱rukpa̱i gaɗi. 
Ɗa baci wu uta̱ka̱i ka̱la̱ka̱tsu ka̱ ni, ka̱ta̱ a pana yura̱ i mini gaɗi, u tsu zuwa ta̱ eleshu a̱ ɗenga̱ a u koci wu aduniyan. ka̱ta̱ u zuwa ulaɗi adama a mini, ka̱ta̱ u tuka̱ n wunla̱ a ka̱tsa̱ma̱ ki uwa i le. 
Uma ra̱ka̱ alau a ɗa kpamu e yeve ili ba, Ka̱luwa̱i ka kazanariya dem ka tsu okpo ta̱ n wono adama a̱ ka̱ma̱li kana u yimai, adama na ka̱ma̱li ka na u yaꞋin va, ka uwa kaꞋa, kpamu ka ki n wuma ba. 
E le ili yoku i ɗa ba, ukuna u modoruko u ɗa koci, ayin atakaci a yawa baci i ta̱ a ku kuwa̱. 
Ama a̱yi Ka̱shile kana a̱ tsu aza Isaraila ci o ku tono ki tsa a̱ma̱li a nanlo ba, adama na a̱yi ɗa vuza na u yaꞋin i li ra̱ka̱, kpamu aza Isaraila e le ɗa kumaci ka a gadu ku ni, kula ku ni ku ɗa mogono mo ovonshi. 
Ɓolongi ucanuku u ɗa̱, a̱ɗa̱ na yi ida̱shi a ubuta̱ wu ugbashi. 
Adama na Vuzavaguɗu u dana ta̱, <<La̱na̱, ɗa na mita̱ a ku vakangu kumaci ku uduniya a ayin na mpa, ka̱ta̱ n tuka̱ le n atakaci, ka̱ta̱ tana a takacika.>> 
Mpa, ka̱va̱ ka kotso ta̱, adama muna ma va̱ ma yimkpa ta̱. Ama ɗa n danai, <<Mayun na va ugbari u ɗa, mayun ɗa n gbama asuvu.>> 
A̱ la̱nga̱sa̱ ta̱ ka̱pa̱m ka̱va̱, ɗa a kasai awin a̱ ni, muku n va̱ ra̱ka̱, n iwan mu ta̱, kpamu a buwa o kubono ba. Babu vuza na u buwai an wa shikpa̱ ka̱ mu ka̱pa̱m kpamu, be le tana u saku mu a kakashi utsutsu a. 
Adama na nguɓi ma alau a ɗa, e le a̱ la̱nsa̱ Vuzavaguɗu ba, i ɗa ɗa i zuwai ɗa a nambai una̱singai, ɗa a wacuwai ushiga wu nlala u le ra̱ka̱. 
Panai, ka̱luwi, la̱na̱i, ka ɗa tana ka yawai, atakaci a gbayin a na uta̱i uɓon u gaɗi, adama na o bonoko likuci i Yahuda a gali, n ubuta̱ ku yongo wa nsheꞋe n kakamba. 
N yeve ta̱, Vuzavaguɗu, wuma u vuma u ni u ɗa ba, Ba a̱yi ɗa vuza na wi a kinda kudasa ku ni ba. 
Lapula mu, Vuzavaguɗu, ama a ka̱tsuma̱ ku usuɓi, ba a ka̱tsuma̱ ka wupa u nu ba, ta lo mo kokpo i li gbani. 
Va̱ma̱ wupa u nu ubuta̱ wu uduniya u na u kpa̱ɗa̱i ku yeve wu, n ubuta̱ uma a na a tsu kpa̱ɗa̱ ku ɗeke kula ku nu, adama na a takuma ta̱ kumaci ka aza Yakubu, a takumai ta̱ ɗa o soɗongi ni, ɗa o bonokoi ubuta̱ wi ida̱shi u ni agali. 
