﻿Irimiya.
8.
<<A ayin a nanlo, Vuzavaguɗu u dana ta̱, kanna ki ta̱ lo a ku ta̱wa̱, ka na a̱ kutuka̱ n etele o ngono ma Yahuda, n etele aza a̱ gba̱ra̱-gba̱ra̱ a̱ ni, n etele a anan ganu a̱ ni, n etele e eneki a̱ ni koɓolo n etele aza a na i punu ida̱shi a Urushelima asaun e le. 
@@@@@@@Ka̱ta̱ ecikpe a ɗa a kanna, n wotoi, n e keteshe ki ili gaɗi ra̱ka̱, i na i a kuciga ɗa kpamu a yaꞋin kai a̱ ga̱nda̱, i na o tonoi, ni i na kpamu a̱ la̱nsa̱i ɗa kpamu o tonoi. I a ku ɓolongu a ɗa ba bele a ciɗa̱ngu a ɗa. Ama i ta̱ a̱ ku ka̱sukpa̱ le okpo tsa a̱ wuya̱n. 
Aza na a buwai n wuma a ka̱tsuma̱ ka aza gbani-gbani a nam pa i ta̱ a kudana u lata̱ tsu kuwa̱ a ubuta̱ dem u na n lokoi le, mpa Vuzavaguɗu MalaꞋimili mpa ɗa n dansai. 
<<Ka̱ta̱ vu dana le, Vuzavaguɗu u dana ta̱ Ɗa baci vuma u yikpa̱i, u tsu ɗa̱nga̱ kpamu ba? Ɗa baci vuza u ɗa̱skpa̱i uye, u tsu bono kpamu ba? 
Yiɗa̱i i zuwai ɗa uma a na mpa a ɗa̱skpa̱i uye o bonoi n ka̱ca̱pa̱ ra̱kura̱ka̱? Ushuki n ka uwa, ɗa a̱ kpa̱ɗa̱i ku bono. 
N mpa ɗa ta̱ bini ɗa n zuwai atsuvu n pana, ama babu vuza na u dansai kamayun, babu vuza na wushuki n unushi u ni, u dana, <Yiɗa̱i n yaꞋin?> Yaba dem wi ta̱ a ma̱la̱ki ma ka̱ci ka̱ ni, an kodoku kana ka sapai kaci a ku uwa ubuta̱ u kuvon. 
Ko koborou a ci imkpi gaɗi ke yeve ta̱ ayin a̱ ni, n moɗoi, n mashangi koɓolo n matapambara, ma tsu yeve ta̱ ayin o kubono e le, Ama uma a̱ va̱ e yeve ba. e yeve wila̱ u Vuzavaguɗu ba. 
<<Nini ɗa i kudana,<Ya kudana tsu ɗa̱nga̱, kpamu wila̱ u Vuzavaguɗu u ɗana koɓolo n a̱ tsu>? Wa ɗe tana macaka mi iɗani ma aza uwa mo bonoko ka ukuna wa a uwa. 
A za ugboji wono i ta̱ okokpo n wono, I ta̱ a kudagaza, ka̱ta̱ a laza n a̱ le, Adama na a iwan ta̱ kadanshi ka Vuzavaguɗu, nannai va ugboji we ene u ɗa i nu ɗa? 
Adama nannai, n ku ɗika ta̱ amaci e le n neke aza yoku, ka̱ ashina e le kpamu n neke a ɗa i rala i le, adama na i na i ɗikai a vuza kenu ali a kubana a vuzagbayin vu le, yaba dem vuza kalya a ɗa, i na i ɗikai a eneki ali a kubana i ganu i le, yaba dem ka yaꞋin ka uwa kaꞋa. 
O potsotongu ta̱ untsu a uma a̱ va̱ gaɗi, ka̱ta̱ a̱ ka̱na̱ kudana <Ma̱ta̱na̱, ma̱ta̱na̱,> Ashe tana ma̱ta̱na̱ mi lo ba. 
A pana ta̱ wono an a yaꞋin ka gbani-gbani ka? A̱ a̱, ko kenu a pana wono ba, e yeve ma uteku tsuna a tsu za̱lika̱ aci adama o wono ba. Adama nannai i ta̱ a kuyikpa̱ koɓolo n aza na a yikpa̱i, ayin a na baci n tecengu i le, ka̱ta̱ a vakangu le, 
Ɗa Vuzavaguɗu u danai, ka̱ta̱ ayin a na baci ma kuɓolongu le, ka̱ta̱ m kpa̱ɗa̱ kuciya̱ u maci u mambulu a nɗanga mi itacishi ba, ka̱ta̱ m kpa̱ɗa̱ kuciya̱ umaci u ma̱biri a maɗanga ma̱ ma̱biri ba, a̱vuku feu e ɗekpe ɗe, i na n neke i le i puwa̱nka̱ ɗe ekiye e le.>> 
Yiɗa̱i i zuwai ɗa ci ida̱shi na? Ɓolongi ubuta̱ ute, ka̱ta̱ tsu bana a likuci yu ukanji, adama na tsu kuwa̱ ɗe, adama na Vuzaguɗu u ɗa̱skpa̱ tsu ta̱ adama a na tsu kuwa̱ ɗa u nekei tsu mini ma yaza tsu soꞋo, adama na tsu yaꞋin kai ta̱ Vuzavaguɗu u nushi. 
Tsu la̱nsa̱ ta̱ an ci ciya̱ ma̱ta̱na̱, ama ci ciya̱ ba, tsu la̱nsa̱i ta̱ upoci, ama ɗa ce enei vishili. 
<<A pana ta̱ ilama ya odoku i rala a Dan, n upani u kacaꞋa ka nwalu ka ene ko odoku e le ɗa iɗika ra̱ka̱ i dagazai. A̱ ta̱wa̱i ɗa una iɗika n i na yi punu ra̱ka̱, likuci ya koɓolo n aza na i punu ida̱shi i ɗa. 
La̱na̱, n kusuꞋuku ɗa̱ ta̱ n oko, agbaji a na i n a̱guma̱ ba, ka̱ta̱ a luma ɗa̱,>> 
Ma̱za̱nga̱ ma̱ a̱ va̱ mo kotso ta̱, una̱mgbi u ka̱tsuma̱ u ɗa wa kuna mu, ka̱ɗu ka̱va̱ ka kuwa̱ ta̱. 
Pana ma̱shi ma uma a̱ va̱ ɗe a likuci ya n daꞋin. <<Vuzavaguɗu wi ɗe a Sihiyona ba? Mogono ma ni ma ba ɗe ba?>> <<Yiɗa̱i zuwai ɗa a zuwai mu wupa n nlulu n le, koɓolo n a̱ma̱li a kavama e le?>> 
<<Makapa mo kotso ɗe, lyushi i kotso ta̱, dem n nannai tsu laꞋaka ba.>> 
Adama na uma a̱ va̱ a yaꞋan kai muna, mpa ɗa n yaꞋankai muna, Mi ta̱ a kpalu, ɗa wovon kpamu u ka̱ ni mu. 
a̱guma̱ a ba ɗe a Giliyadu ba? Vuza va a̱guma̱ feu wi ɗe ba? Yiɗa̱i i zuwai ɗa a kpa̱ɗa̱i ku potsotongu uma a̱ va̱? 
