﻿Ishaya.
51.
<<Panakai mu, a̱ɗa̱ vu na yi a kuguva kasingai, ɗa kpamu yi a̱ kula̱nsa̱ Vuzavaguɗu, la̱na̱i a kakpanlai ka na e sheꞋwei ɗa̱ koɓolo n ubuta̱ u ka̱ta̱mba̱ u na a̱ ga̱va̱i ɗa̱. 
Indanai Ibirahi eshekpu a̱ ɗa̱, koɓolo n Saratu a̱yi na u matsai ɗa̱. A ayin a na n ɗekei ni wi m maku ba, ama ɗa n zuwakai ni una̱singai ɗa n doku n zuwai kumaci ku ni ku yimkpai n ka̱bunda̱i. 
Adama a na Vuzavaguɗu wi ta̱ e kuneke Sihiyona kadanshi ku uremi u ka̱ɗu ka̱ta̱ kpamu wi indana agali a̱ ni ra̱ka̱ n asuvayali, u bonoko kakamba ka̱ ni tsu Adini, akamba a̱ ni o bono tsu kashina ka Vuzavaguɗu. A̱ kuciya̱ ta̱ ma̱za̱nga̱ n izoshi wa̱ ni, koɓolo n kucikpa ali n ishipa. 
<<Panakai mu uma a̱ va̱, ka̱ta̱ i zuwaka mu atsuvu, a̱ɗa̱ aduniyan a̱ va̱, adama a na mi ta̱ e kuneke wila̱, ka̱ta̱ n zuwa kasingai ka̱ va̱ ko okpo kutashi a̱ ubuta̱ u uma. 
Usuɓi u va̱ wi ta̱ lo a kuyawa ɗevu m moloko, wishi u va̱ wi ta̱ lo a uye a̱ kuta̱wa̱, obolu a utsura a̱ va̱ i ta̱ a̱ kutuka̱ aduniyan n kasingai. Aza a na i ida̱shi a ka̱kina̱ ka̱ mini i ta̱ e kukeɗe a̱pa̱Ꞌa̱ wa̱ va̱, ka̱ta̱ kpamu a vana obolu a utsura a̱ va̱. 
Ɗengusa̱i a̱shi a̱ ɗa̱ gaɗi zuva, ka̱ta̱ yi inda ɗaka vi iɗika, adama a na gaɗi wi ta̱ a̱ kupuwa̱nka̱ tsu ka̱nga̱, ka̱ta̱ iɗika i shama tsu kakashi, ka̱ta̱ aza a na i o kuyongo punu a̱ kuwa̱ tsa ayun. Ama wi ishi u va̱ wi o kukotso ba, usuɓi u va̱ feu wo kokpo uye ba. 
<<Panakai mu, a̱ɗa̱ vu na i yevei kasingai, a̱ɗa̱ aza na yi n wila̱ u va̱ a̱ a̱ɗu a̱ ɗa̱, Ka̱ta̱ i pana wovon wu ujari u uma ba ko wovon wi ishikushi i le ba. 
Adama a na kayan ki ta̱ a kutakuma le tsu kuminya, ka̱ta̱ okpoɗou o sovo le o okpo an tsugbere, ama usuɓi u va̱ wi o kukotso ba, wishi u va̱ feu wi ta̱ o kuyongo ko wannai.>> 
Jimgba, jimgba, Vuzavaguɗu, ɗengusa̱ obolu a̱ nu n utsura, ɗa̱nga̱ tsu ayin cau, tsu na ili yi ishi n tsumani. Avu ɗa vu gbatyai Rahapu miri-miri ba, yayi u gbatyasai ka̱di ka nanlo ka? 
Avu ɗa vu ɗekpetengi mala ma ba, mini ma na mi n uga̱vi ka̱u, yayi u yaꞋin uye punu a mala mu uga̱vi adama a na aza a na a̱ ciya̱i ushibi a pasa punu? 
Ka̱ta̱ aza a na a̱ ciya̱i wishi u Vuzavaguɗu o bono. I ta̱ a kuꞋuwa a Sihiyona n ishipa, ma̱za̱nga̱ ma babu kukotso mi ta̱ o kokpo le tso oroliko. Uyo m ma̱ta̱na̱ mi ta̱ a̱ kuta̱wa̱ we le, ka̱ta̱ una̱mgbuka̱tsuma̱ n unambi u ma̱za̱nga̱ u kotso. 
<<Mpa ɗa vuza na n tsu dokusu wu ka̱ɗu utsura, avu ɗa ya vu pana wovon u vuza na wi a̱ kukuwa̱, umaci u vuma u na wi uyaꞋin tsu mita̱? 
Ali ɗa vu cinukpai n Vuzavaguɗu, Vuza na u yaꞋin nu, a̱yi na u ba̱rukpa̱i gaɗi ɗa kpamu u varai kumi ka aduniyan, ɗa vi a kulyaꞋa kelime n kupana wovon ali a kanna ka̱ɓa̱la̱ adama a wupa u vuza gbani-gbani, vuza na u zuwai ɗe ka̱ci ka̱ ni a uye u na u kukuwa̱? Ama te ɗai biꞋi wupa u vuza gbani-gbani wa wi? 
Aza a na i a kutakacika i ta̱ a kuyaꞋan uba̱ruwi gogoꞋo, i ta̱ a kuyaꞋan ayin a̱ a̱bunda̱i n wuma ka̱ta̱ kpamu a lyaꞋa ilikulya i na a cikalai. 
Adama a na mpa ɗa Vuzavaguɗu Ka̱shile ka̱ nu, vuza na u tsu vura̱ mala ka̱ta̱ aɓau a̱ ni a̱ shida̱, Vuzavaguɗu MalaꞋimili ɗa kula ku va̱. 
Mpa n zuwa ta̱ kadanshi ka̱ va̱ punu a̱ una̱ u nu, ɗa m palai nu n kululu ku kukiye ku va̱. Mpa na n yaꞋin gaɗi ɗa kpamu n varai kumi ka aduniyan, a̱yi na u danai Sihiyona, <A̱ɗa̱ ɗa uma a̱ va̱.> >> 
Jimgbai, jimgbai, Ɗenga̱ kashani, avu Urushelima, avu na vu soꞋi ɗe e kukiye ku Vuzavaguɗu, moko ma wupa ma̱ ni, avu na vu soꞋi ali vi teneꞋi keɓeletsu ka na ka tsu zuwa uma ma maka le. 
A̱ ka̱tsuma̱ ka limata i nu babu vuza te vu na u buwai a na wa kinda wu, muku n na vu woꞋi dem babu kpamu vuza te vu na u kuɓa̱na̱ yi kukiye a̱ ka̱tsuma̱ ke le 
Ili i re i nampa ya i ta̱wa̱ ta̱ wa̱ nu, yayi u kudokusu wu utsura u ka̱ɗu? Kula̱nga̱su m munuka, n kambulu n kuvon, yayi u kudokusu wu utsura u ka̱ɗu? 
Muku n nu n lima̱ ta̱, a vaku ta̱ a nsanji mu uye dem, tsu mereꞋen ma na mazai a̱ bilili, i ta̱ tukpa n wupa u Vuzavaguɗu, n Uɓarangi u Ka̱shile ka̱ ɗa̱. 
Adama a nannai pana ukuna u nampa, a̱ɗa̱ na i ci yaꞋan kagbanigbani, yo okpoi osoꞋi ama ba kusoꞋo ku ma̱ra̱ ba. 
Na ɗa ili i na Vuzavaguɗu MalaꞋimili u danai, Ka̱shile ka̱ ɗa̱ ka na ko tsu folono adama a uma a̱ ni u danai, <<La̱na̱, n takpa ta̱ kaꞋa ekiye a̱ nu matan ma na ma tsu zuwa vo okpo adanshi ma̱ra̱ ma maka wu ta̱ va, keɓeletsu ka wupa u va̱ ka na vi ishi o kusoꞋo va ka buwa ba. 
Mi ta̱ a kukucukpa ma zuwa matan ma e ekiye a aza a na i a kutakacika wu, aza na a danai nu, <Kuɗa̱ngu adama a na tsu wala gaɗi vu nu.> Ɗa ta na vu zuwai kokondo ka̱ nu ci iɗika, tsu uye adama a na uma a wala.>> 
