﻿Ishaya.
42.
<<Nava ɗaɗa kagbashi ka̱ va̱, vuza na n kumgbasai, a̱yi ɗa vuza na mpa n zagbai, n vuza na ka̱ɗu ka̱ va̱ ka cigai. N zuwa ta̱ ayinviki a̱ va̱ wa̱ ni. Wi ta̱ a̱ kutuka̱ n kasingai a aduniyan. 
Wi o ku orukpo ka̱u ba, ko tana u ɗengusa̱ ka̱la̱ka̱tsu, ko kuta̱ e keteshe tsu na uma a pana ba. 
Ko kososhi wi o kukoɗo ba, wi tana feu a kukima̱ ma̱kuni ma na mi a kukima̱ ba. N kamayun kaꞋa u kutuka̱ n kasingai, 
a̱yi wi o koꞋo ba, ba le tana u na̱mgba̱ ka̱ɗu, ali sai ayin a na u zuwai kasingai ka̱ ka̱ra̱Ꞌi aduniyan dem. A̱ wila̱ u ni u ɗa aza o kotogu a kuzuwa a̱pa̱ e le.>> 
Na ɗa ili i na Ka̱shile Vuzavaguɗu u danai, vuza na u yaꞋin gaɗi ɗa u ba̱ra̱kpa̱i i ɗa. Vuza na u yaꞋin iɗika n i na yi punu a i ɗa, a̱yi na u nekei uma ayinviki, n wuma kpamu wa aza a na i punu a nwalu i ɗa. 
<<Mpa ɗa Vuzavaguɗu, n ɗeke wu ta̱ adama a kasingai, Mi ta̱ a kuɗika wu e ekiye a̱ va̱, Mi ta̱ a̱ kuka̱na̱ wu ka̱ta̱ m bonoko wu vo okpo uzuwukpani adama a uma kutashi kpamu adama aza ka̱yimbi, 
adama na vu ɓa̱yuwa̱ a̱shi a na i n uyimba̱, ka̱ta̱ vu uta̱ka̱ n aza na i a kunu ku ugbashi ka̱ta̱ kpamu mu uta̱ka̱ aza na i ida̱shi a̱ ka̱yimbi. 
<<Mpa ɗa Vuzavaguɗu, ɗaɗa kula ku va̱, Mpa n kuneke tsugbayin tsu va̱ u vuza ba, ko n ka̱sukpa̱ ucikpi u va̱ a kubana a̱ ubuta̱ wa̱ a̱ma̱li. 
La̱na̱i, ili i cau i ta̱wa̱ ta̱ ɗa i lazai ɗe, gogo na ili i savu i ɗa mi a kudansa, kafu i ɗa i yaꞋan ɗa mi a kudana ɗa̱ i ɗa.>> 
YaꞋankai Vuzavaguɗu vishipa vu savu, yaꞋin vishipa va a̱ɗa̱ a aduniyan, n a̱ɗa̱ vu na i tsu wala a mala, koɓolo n i na yi punu ra̱ka̱, a̱ɗa̱ otogu n aza a na i ɗe ida̱shi. 
ka̱sukpa̱ aza a na i a̱ likuci dem m meremune ma̱ ni a̱ ɗengusa̱ a̱la̱ka̱tsu e le a cikpa yi, ka̱sukpa̱ uma a̱ likuci i wawaꞋa i Kedaru a yaꞋan ishipa adama a̱ ni. ka̱sukpa̱ uma a Sila a canana ishipa i ma̱za̱nga̱ a kubana wa̱ ni, ka̱sukpa̱ le o orukpo ɗe a gaɗi vu nsansa a kubana wa̱ ni. 
ka̱sukpa̱ le e neke Vuzavaguɗu tsugbayin, ka̱ta̱ a sala ucikpi u ni o otogu. 
Vuzavaguɗu u tsu bana ta̱ a̱ ubuta̱ u kuvon tsu kovonshi, tsu kosoji tsu ɗa u tsu shilika̱ n utsura, u ci yaꞋan ta̱ yoroli i kuvon, ka̱ta̱ wu una irala i ni babu wovon. 
<<M megeshe m paɗa ta̱ bini, m paɗa ta̱ bini ɗa m kpa̱ɗa̱i kukeɓece. Ama gogo na uteku tsu vuka va a̱ga̱nda̱, mo orukpoi, n inkai n yaꞋin yura̱. 
Mi ta̱ a̱ kuka̱sukpa̱ nsansa n aginda a takacika, ka̱ta̱ n ɗekpetengu ica̱Ꞌa̱shi i le ra̱ka̱, ka̱ta̱ m bonoko nɗolu mo okpo iɗika i gbani, ka̱ta̱ n ɗekpetengu adaɓa. 
Mi ta̱ o kutono n a̱yimba̱ a uye u na e yevei ba, n uye u na e yevei ba u ɗa mpa n kutono n ele, ka̱ta̱ m bonoko ka̱yimbi kutashi a̱ a̱shi e le, ka̱ta̱ kpamu n lapula ubuta̱ u gbani-gbani u gaꞋan. Na ɗa ili i na n kuyaꞋanka le, Mpa mi a kuka̱sukpa̱ le ba. 
Ama aza a na e nekei a̱ɗu e le wa̱ a̱ma̱li, aza a na a tsu dana ululu, <A̱ɗa̱ ɗa a̱ma̱li a̱ tsu> i ta̱ o kokpo n wono. 
Vuzavaguɗu u danai, <<Panai, a̱ɗa̱ agulani, la̱na̱i, a̱ɗa̱ a̱yimba̱, ka̱ta̱ ye ene. 
Yayi wi ka̱yimba̱ tsu kagbashi ka̱ va̱, ko wi kagulani uteku tsu kalingata ka na n suki? Yayi kpamu wi ka̱yimba̱ tsu vuza na u nekei ka̱ci ka̱ ni wa̱ va̱, ko wi ka̱yimba̱ tsu kagbashi ka Vuzavaguɗu? 
Ye ene ta̱ ili n a̱bunda̱i, ama i coꞋoko ba, atsuvu a̱ ɗa̱ i ta̱ uɓa̱yuwi, ama i pana ba.>> 
Vuzavaguɗu we enei u gaꞋan yi ta̱ adama a usuɓi ka̱ ni, u zuwa wila̱ u ni u tsurakpa koɓolo n tsugbayin. 
Ama ele ɗa uma a na a̱ pura̱i gbani ɗa a yaꞋankai uboki, ra̱ka̱ vi le ɗa a̱ ka̱na̱i e kpenle ko yi usokongi a̱ ubuta̱ wu ugbashi, okpo ta̱ ucanuku u kuvon, n babu vuza na wa kisa le, okpoi eremishi, m babu vuza na wa kudana, <<Bonokoi le.>> 
Yayi a̱ ka̱tsuma̱ ka̱ ɗa̱ u kuzuwa atsuvu adama a ili i nampa, ko u coꞋoko mayin adama a ayin a na a kuta̱wa̱? 
Yayi u nekei kpaꞋa ku Yakubu ɗa a yaꞋankai ku ɗa uboki, ko e nekei Isaraila e ekiye a aza a na a̱ pura̱i ili le gbani? Ashe Vuzavaguɗu ɗa ba, a̱yi ɗa vuza na tsu nusakai? A̱yi ɗa vuza na tsu kpa̱ɗa̱i kutono uye u ni, a̱yi ɗa vuza na tsu kpa̱ɗa̱i kushuku n wila̱ u ni? 
Adama a nannai ɗa u tsunki le wupa u gbayin u ni, n wupa u kuvon ku usuɗukpi. U kambuki le akina, ama n nannai dem a fuɗa e yeve ba, u songi le, ama o coꞋoko ba. 
