﻿Ishaya.
35.
Meremune n agbata i ta̱ a kuyaꞋan ma̱za̱nga̱, kakamba ki ta̱ a kuyaꞋan ma̱za̱nga̱ ka̱ta̱ ka yaꞋan a̱pa̱lu tsa apulufa, 
wi ta̱ a̱ kuba̱za̱lukpa̱ a̱pa̱lu n a̱bunda̱i ka̱ta̱ u yaꞋan ma̱za̱nga̱ m ma̱ta̱na̱ n ishipa. I ta̱ e kuneke yi tsugbayin tsu Lebano, uteku tsugbayin tsu kusan ku Kamelu n ka̱ra̱Ꞌa̱ ka Sharon. I ta̱ e kene tsugbayin tsu Vuzavaguɗu Ka̱shile ka̱ tsu, tsugono tsu Ka̱shile ka̱ tsu. 
Ɓa̱nka̱i aza a na oꞋoi, ka̱ta̱ i ɓa̱nka̱ aza a na a buwai n utsura ba. 
Danai aza na i n a̱ɗu o wovon, <<Gbamai asuvu, ka̱ta̱ i pana wovon ba, Ka̱shile ka̱ ɗa̱ ki ta̱ a̱ kuta̱wa̱, wi ta̱ a̱ kuta̱wa̱ n katsupu, ka̱ta̱ wi isa ɗa̱.>> 
Ka̱ta̱ a̱shi a̱ a̱yimba̱ a̱ ɓa̱yuwa̱, ka̱ta̱ atsuvu a kagulani kpamu a pana, 
ka̱ta̱ nkutsuma̱ n taɗukpa tsu nreꞋe, ka̱ta̱ kelentsu ke kebebe ko orukpo adama a̱ ma̱za̱nga̱. Ka̱ta̱ mini mu uta̱ e meremune, n nyeneke n yene a kakamba. 
Iɗika yu usuɗukpi yi ta̱ o kokpo kadaɓa ka̱ mini, ka̱ta̱ iɗika i ɗekpu i yene mini. Ka̱ta̱ ubuta̱ u na nsheꞋe n kakamba mi ishi n ci yongo, u shana m mita̱, n ikiku koɓolo n abatamini i ta̱ o kugbonguro. 
Uye u gbayin u kuyaꞋan ta̱ ɗe, i ta̱ e kuɗeke u ɗa uye u ciɗa, aza a unata a kuwala punu ba. U ɗa wi ta̱ o kokpo uye wa aza a na i o kutono uye u Ka̱shile, ko alau o kutono u ɗa ba. 
Babu kawu vu na u kuyongo ɗe, babu kpamu nnama m gbani-gbani n na n kutono ɗe, e kene le ɗe ba, ama aza a na Vuzavaguɗu wi isai koci ele ɗa o kutono uye wa, 
ka̱ta̱ aza na Vuzavaguɗu u Shiba̱i o bono, ka̱ta̱ a uwa Sihiyona n ishipa, ka̱ta̱ ma̱za̱nga̱ ma babu uteku mo yongo n ele, ka̱ta̱ a̱ ciya̱ ma̱za̱nga̱ m ma̱ta̱na̱, ka̱ta̱ una̱mgbuka̱tsuma̱ n atakaci o kotso. 
