﻿Ishaya.
34.
Ta̱wa̱i ɗevu, a̱ɗa̱ iɗika i limoci ya aduniyan ka̱ta̱ i pana, bonokoi asuvu a̱ ɗa̱ ubuta̱ u te a̱ɗa̱ uma. YaꞋan iɗika n i na yi punu dem i pana, ka̱sukpa̱ aduniyan n i na i tsu uta̱ punu dem i yeve. 
Adama a na Vuzavaguɗu wi ta̱ a wupa n aduniyan ra̱ka̱, wupa wu usuɗukpi ka̱ɗu u ni, wi ta̱ a̱ ubuta̱ wi irala i le ra̱ka̱. Wi ta̱ a kuna le ra̱ka̱, wi ta̱ kpamu a̱ kuka̱sukpa̱ a kiɗa le. 
Even a ikyamba e le a̱ kuciya̱ uciɗa̱ngi ba, ka̱ta̱ ushami we even a ikyamba i le a̱ ka̱ra̱Ꞌa̱ iɗika, ka̱ta̱ nsansa n yene nu mpasa n le. 
Ka̱ta̱ kpamu ili i kutashi i gaɗi ra̱ka̱ a̱ niꞋwa̱n, Gaɗi wi ta̱ a̱ ka̱ta̱la̱ tsu kajiba, ka̱ta̱ azangata o ɗoɗo a iɗika tsa̱ a̱vuku a itacishi a na a lumbai, ko uteku tsu na umaci u ma̱biri u na u ɗekpei. 
Ayin a na baci kotokobi ka̱ va̱ ko kotsoi ulinga u ni na ɗe gaɗi, la̱na̱, ka ki ta̱ a̱ kucipa̱ adama a afada a aza e Edom, a̱ ubuta̱ u uma a na n sheshei kuna. 
Kotokobi ka Vuzavaguɗu ka̱ sumba̱ ta̱ nu mpasa, ki ta̱ upali nu ushuma koɓolo nu mpasa mu nlala nu nga̱ji, ushuma u muku n ka̱tsuma̱ ma̱ a̱giri. Adama a na Vuzavaguɗu wi ta̱ n alyuka a Boza, koɓolo m makiɗaka ma̱ a̱bunda̱i wa aza a Edom. 
Uma i ta̱ a̱ kukuwa̱ tsu njuma, koɓolo n a̱ɗa̱nga̱ni n aza a utsura feu. Iɗika yi ta̱ o kusoꞋo mpasa, ka̱ta̱ kayala ka̱ cuwa̱ n ushuma. 
Adama a na Vuzavaguɗu wi ta̱ n kanna ka kutsupa, ka̱ya̱ ka kutsupa i na a yaꞋankai Sihiyona. 
Ka̱ta̱ nyeneke n Edom m bono maniꞋin ma na a tsu sura a uye, kayala ka̱ ni ko bono tsa akina a̱ ka̱nga̱ ko tsukono, ka̱ta̱ iɗika i ni kpamu i kula̱ tsa akina a na i a kulala ka̱u. 
Kanna n kayin dem a̱ kukima̱ a ɗa ba, ka̱nga̱ ka ni ki ta̱ a̱ kuɗa̱nga̱ babu kuzuwa uteku. Ali n tsukaya n tsukaya, u ɗa wi ta̱ o kokpo ukuna u gbani, babu vuza na u kudoku wo tono u ɗa. 
Ma̱kpa̱tuwa̱n n kagawun i ta̱ o kuyongo punu a̱ ubuta̱ wa, ka̱ta̱ a yaꞋan ɗe cikinda. Adama a na Ka̱shile ki ta̱ a kugisangu iɗika i nanlo ya n cicoꞋo, wi ta̱ a kugisangu i ɗa adama a na u tuka̱ n kawuya koɓolo m munuka. 
Babu tsugbayin tsu na tsa kubuwa tsu na tsa kuzagba tsugono, muku mu ngono ra̱ka̱ mi ta̱ a̱ kuniꞋwa̱n. 
Awana i ta̱ o kugbonguro ka̱ta̱ a lyaꞋa iꞋuwa yi utsura i le, awanagbede i ta̱ a̱ kuta̱ a isa kefeku ko ngono koɓolo n likuci i na yi ni nshilya. I ɗa yi ta̱ o kokpo ubuta̱ u kuyongo wi nsheꞋe n kakamba, n iꞋuwa yi mkpa̱tuwa̱n. 
Ka̱ta̱ nnama n kamba n gasa n a̱kunzu, ka̱ta̱ nreꞋe n shika̱ka̱ itoku i le, mayu, ta ɗe ili i kayin i kuyongo, ka̱ta̱ a̱ la̱nsa̱ka̱ ka̱ci ke le ubuta̱ u kuvuka. 
Ta ɗe ma̱kpa̱tuwa̱ ma kuyaꞋan cikinda ka̱ta̱ a zuwa okowo, ka̱ta̱ u gyaꞋwan, ka̱ta̱ u ɓolongu muku ni a asuvu e evelyu a̱ ni, mayun ta ɗe kpamu asakali o kuyongo, vuza n vuka vi ni. 
La̱na̱ ka̱ta̱ vi kece a katagarda ka Vuzavaguɗu. Babu ili i te punu a katagarda ka i na i kupuwa̱nka̱, babu vuza na u kunamba vuza ni. Adama a na n una̱ u ni u ɗa Vuzavaguɗu u yaꞋin kadanshi ka, ayinviki a̱ ni i ta̱ o kuɓolongu le a̱ ubuta̱ u te. 
U zagbaka le ta̱ ubuta̱ u na yaba dem u kuyongo, n ekiye a̱ ni ɗa u pecekei le n kagisamkpatsu, i ta̱ a̱ kuka̱na̱ i ɗa ali sai uteku n uteku ta ɗe o kuyongoso ali n tsukaya n tsukaya. 
