﻿Ishaya.
24.
Inda Ka̱shile ki ta̱ a̱ kula̱nga̱sa̱ aduniyan ka̱ta̱ u bonoko a ɗa tsa agali, wi ta̱ a̱ kula̱nga̱sa̱ a ɗa ka̱ta̱ u wacuwa uma a̱ ni a na i punu. 
Ili i te i na i kuciya̱ anan ganu ta kpamu i kuciya̱ uma nannai ali a gbagbaꞋin n agbashi feu nannai, a̱ma̱ci a gbagbaꞋin ni nkere feu nannai. Atsuli n edengi, okopuki n aza e kuneke okopu, aza o kutono atan n aza e kuneke atan. 
Aduniyan i ta̱ o kokpo ukuna u gbani ka̱ta̱ a ɗa a̱ na̱mgba̱ wuya-wuya, aduniyan i ta̱ o kubono agali ta Vuzavaguɗu u yaꞋin kadanshi nannai. 
Aduniyan a lumba ta̱ ra̱ka̱-ra̱ka̱, aduniyan kpamu e ɗekpei ɗa a̱ na̱mgba̱i. Aza a gbagbaꞋin a yambai ɗa a̱ na̱mgba̱i. 
Aduniyan a yaꞋan ta̱ ula̱nga̱shi, adama a na a iwan ta̱ kutono wila̱ u Ka̱shile, a̱ la̱nga̱sa̱i i singai ɗa kpamu a iwain kutono uzuwakpani u ko wanai. 
Adama a nannai una̱ u gbani-gbani u ka̱na̱ ta̱ iɗika, uma a̱ ni a na i punu a ɗika ta̱ unushi u le. Adama a nannai uma aduniyan i ta̱ a kuyaꞋan usongi gbende, kenu ɗa a̱ kuka̱sukpa̱. 
Ma̱kya̱n ma savu ma me ɗekpe ta̱, itacishi i ni kpamu i lumba ta̱, aza a̱ ma̱za̱nga̱ dem a̱ na̱mgba̱ ta̱ ka̱tsuma̱. 
Kucaɗa ku medele ka ku kotso ta̱, kacaꞋa ka aza a̱ ma̱za̱nga̱ ka ka shamgba ta̱, izumgbi i ma̱za̱nga̱ yu umolu ya i paɗa ta̱ bini. 
O doku o soꞋo ma̱kya̱n n ishipa kpamu ba, ma̱kya̱n ma mo okpo ta̱ n okono a̱ ubuta̱ wo soꞋi wa. 
Likuci i na i na̱mgba̱i va yo okpo ta̱ agali, iꞋuwa dem i yaꞋan ta̱ uɓa̱ya̱ngi babu ili i na i kuꞋuwa. 
Ayin a̱ ma̱za̱nga̱ o kotso ta̱ a aduniyan, o doku a yaꞋan ishipa i ma̱kya̱n ba, ma̱za̱nga̱ dem mo okpo ta̱ ili i wovon, a̱ sa̱nka̱ ta̱ ma̱za̱nga̱ a aduniyan dem. 
Likuci i yaꞋan ta̱ ula̱nga̱shi, utsutsu u ni kpamu u yaꞋan ta̱ uɓoshi. 
Nannai ɗa ka kuyaꞋan punu a iɗika n aduniyan dem, tsu ayin a na a tsu lapa umaci u maɗanga ma zaitu, n tsu ayin a kuɗayu wana ɗai a taɓa mambulu. 
A̱ ɗengusa̱i a̱la̱ka̱tsu e le, a cananai ishipa i ma̱za̱nga̱, na ɗe a̱ ka̱livi o orukpoi adama a tsugbayin tsu Vuzavaguɗu. 
Adama a nannai a̱ɗa̱ na yi a kasana nekei tsugbayin a kubana u Vuzavaguɗu, aza a na i o kotogu nekei kula ku Vuzavaguɗu vi Isaraila tsugbayin. 
Ali ɗe a uteku wa aduniyan ɗa tsu panai ishipa i kucikpa, <<Tsugbayin a kubana u Vuza vu usuɓi.>> Ama ɗa n danai, <<Mo okpo ta̱ ukuna u gbani, mo okpo ta̱ ukuna u gbani. Ili ya atakaci i ɗa a̱ kuta̱wa̱ wa̱ va̱, aza a kuvakangu uma i ta̱ a kulyaꞋa kelime n kuvakangu mu. A lyaꞋi kelime kpamu n a kulya ku uma.>> 
Wovon, maza m Kpenle a kuvana ɗa̱, a̱ɗa̱ uma a aduniyan a nampa. 
Vuza na wi a kuciga wa suma adama a kacaꞋa ko wovon wi ta̱ a̱ kuyikpa̱ e kpenle. Vuza na baci u livanki a̱ kuta̱ pulai vu kpenle va, maza mi ta̱ a̱ kuka̱na̱ yi. Adama a na atusu a gaɗi i ta̱ uɓa̱yuwi, ɗa uvari wi iɗika u gba̱ɗa̱i. 
Aduniyan a yaꞋan ta̱ umijarangi ra̱ka̱, aduniyan ra̱ka̱ i ta̱ upeci, aduniyan dem a̱ gba̱ɗa̱ ta̱ n katsura. 
Aduniyan a̱ ka̱na̱i kuletishe an kosoꞋi, a̱ kuvita̱la̱sa̱ a̱ wunla̱i tsu na ka̱pa̱m ka̱ tsu gba̱ɗa̱, a̱miki a̱ unushi u ni i ta̱ o kurono yi a̱ kuta̱wa̱ a iɗika, ka̱ta̱ u yikpa̱ babu kpamu kufuɗa kuɗa̱nga̱. 
A kanna ka nanlo Vuzavaguɗu wi ta̱ a kutakacika utsura u na wi a̱da̱nga̱shile gaɗi, ka̱ta̱ kpamu u takacika ngono ma aduniyan punu a aduniyan a nampa. 
I ta̱ o kuɓolongu le a̱ ubuta̱ u te tsa agbashi e kpenle ku te, i ta̱ a̱ kuɓa̱ya̱ngu le a̱ ubuta̱ wu ugbashi, ka̱ta̱ a yaꞋan baci ayin n a̱bunda̱i yeve a takacika le. 
Kutashi ku wotoi ki ta̱ o kubono kpa̱ɓa̱, ka̱ta̱ usuɗukpi u kanna feu u ra̱ma̱, Adama a na Vuzavaguɗu MalaꞋimili wi ta̱ a kulyaꞋa tsugono a Kusan ku Sihiyona punu a̱ Urushelima, ka̱ta̱ tsugbayin ci ni ci shamgba a̱ ubuta̱ wu nkoshi m gba̱ra̱-gba̱ra̱ n ni. 
