﻿Ishaya.
21.
Akaka a i ta̱ a kadanshi ke meremune ma na mi a uɓon u mala. Uteku tsu kabatalikpau ka na kuta̱i e Negebu ka̱ta̱ ka̱ pura̱ngu kakamba ku uɓon u ɗaka n utsura, nannai ɗa kawuya ka̱ uta̱ ɗe, ka̱ta̱ ka̱ pura̱ngu iɗika i gbani-gbani. 
A dana mu ta̱ tsa alatani o wovon, kodori u lyaꞋa kelime m modoruko, vuza munuka u lyaꞋa kelime m munuka ma̱ ni. Ɗenga̱i a̱ɗa̱ aza a Elim n aza a Midiya i kambuku ka̱ta̱ a̱ shilika̱ n aza a Babila. Adama a na mpa Vuzavaguɗu n kucina ta̱ an ma zuwa uteku wa atakaci a na a̱ tuka̱i. 
U ɓa̱la̱ mu ta̱ ka̱u, uteku tsu vuka va̱ a̱ga̱nda̱ a limata. Ikyamba i va̱ i kuwa̱ ta̱ ɗa u ɓa̱la̱i mu ka̱u, ali ɗa m kpa̱ɗa̱i kufuɗa kupana ko me ene. 
Ka̱ɗu ka̱ va̱ ka̱ shulyuku ta̱ ka̱u, ɗa wovon u zuwai mu kujeꞋeke ikyamba, kayin ka na mi a kuvana ka̱ ta̱wa̱, ɗa ko okpoi mu ko wovon. 
O foɓusoi ka̱ɗiva̱ ki ilikulya, o poloi ajiba adama a na uma a̱ da̱sa̱ngu, yaba dem a kulyaꞋa n u soꞋi, gogoꞋo ɗa̱nga̱i, a̱ɗa̱ aza a̱ gba̱ra̱-gba̱ra̱, putalai nra̱ga̱ n ɗa̱ maniꞋin. 
Ili i na Vuzavaguɗu u danai mu i ɗa na, <<Bana vu zuwa kindi, ka̱ta̱ u dana uma ili i na we enei. 
Ɗa baci we enei akumbi, e ekeke o odoku a aza e re e re, a gaɗi vo odoku n akumbi a njaki, koɓolo n akumbi a arakuma, yaꞋan u zuwa atsuvu u pana mayin, u yongo ufoɓushi.>> 
Ɗa kindi ka ka dansai n ka̱la̱ka̱tsu ka̱u u danai, <<A kanna dem, vuzagbayin vu va̱, n tsu shamgba ta̱ gaɗi vu mashilya ma kindana, a kayin lakam n tsu shamgba ta̱ a̱ ubuta̱ u na a zuwai mu. 
La̱na̱, vuma ɗa lo a̱ kuta̱wa̱ e keke vo odoku, koɓolo n ka̱tsura̱ ko odoku. Ɗa wu ushuki le u danai, <Babila u yikpa̱ ta̱, mayun u yikpa̱ ta̱. Urotu wa̱ a̱ma̱li a̱ ni dem u yikpa̱i furali a iɗika.> >> 
Uma a̱ va̱, aza a na a lapai ɗa e yelyukpei a kagbata, n dana ɗa̱ ta̱ ili i na m panai a̱ ubuta̱ u Vuzavaguɗu MalaꞋimili, Ka̱shile ka aza Isaraila. 
Akaka adama a aza a Duma. Vuza yoku u ɗeke mu ta̱ ɗe a Siyaru u danai, <<Kindi, wana ɗai kayin ko kukotso? Wana ɗai ko kukotso?>> 
Ɗa kindi ka ku ushuki, <<Kayin ki ta̱ a kasa, kanna kpamu ki ta̱ o kukotso. Vi baci n keci, ece, ka̱ta̱ vu doku vu bono kpamu.>> 
Akaka adama aza a Alaraba, a̱ɗa̱ aza a tsulaga a nwalu a Dedanu, aza a na a vaki a kakamba ka̱ durum ka Alaraba, 
tuka̱i m mini adama aza a kakuli, a̱ɗa̱ vu na yi ida̱shi a iɗika i Tima. Tuka̱i n ilikulya adama a aza a na a sumai adama o kuvon. 
Adama a na a suma ta̱ adama o kotokobi, a̱ ubuta̱ wu ukpa̱ u kotokobi, a̱ ubuta̱ wu utan u na a katsuki, koɓolo n ubuta̱ u na kuvon ku suɗukpai. 
Ili i na Vuzavaguɗu u danai mu i ɗaɗa na, <<A̱ ka̱tsuma̱ ka̱ ka̱ya̱ ke te, tsu na a ci ɗika vuza vu zamalinga ka̱ta̱ u ka̱na̱ kukece, ta tsugbayin tsu Kedaru tsa kuyawa uteku nannai. 
Vuzavaguɗu, Ka̱shile ka aza a Isaraila ka danai, aza o kuvon e Kedaru, i ta̱ o kokpo kenu.>> 
