﻿Ishaya.
14.
Vuzavaguɗu wi ta̱ a kupana asuvayali a Yakubu, wi ta̱ kpamu a kuzagba Isaraila ka̱ta̱ u zuwa le a̱ da̱sa̱ngu a iɗika i le kpamu. Omoci i ta̱ a kubana ɗe feu ka̱ta̱ o ɓolongu kaci ke le m kpaꞋa ku Yakubu. 
Aduniyan i ta̱ a kuɗika le ka̱ta̱ o bonoko le a iɗika i le. KpaꞋa ka aza Isaraila ki ta̱ a kuzuwa aza a iɗika n a̱bunda̱i ali n a̱ma̱ci a yaꞋanka le tsugbashi a iɗika i Vuzavaguɗu. I ta̱ o kubonoko aza a na ishi a zuwai le okpo agbashi-agbashi, ka̱ta̱ a lyaꞋa tsugono a gaɗi va aza na ishi a kutakacika le. 
A kanna ka na Vuzavaguɗu u nekei nu wuvuki a̱ ubuta̱ wa atakaci n una̱mgbi u ka̱tsuma̱ n tsugbashi tsu wuya-wuya, 
vi ta̱ a kuɗika ili yi izoshi i nampa a kubana u mogono ma Babila, <<Uteku tsu na katakaciki ka yawai uteku, tsu na wupa u ni u zuwai uteku. 
Vuzavaguɗu u koɗo ta̱ kalangu ka vuza va asuvawuya, kalangu ko ngono, 
ka na ka lapai uma n wupa wu babu uteku, ɗa ka lyaꞋi tsugono a iɗika n wupa u na wi babu kukotso. 
Ama a ukocishi ɗa iɗika dem i ciya̱i wuvuki m ma̱ta̱na̱ ali ɗa a cananai ishipa adama a̱ ma̱za̱nga̱. 
Ko nɗanga ma awana a̱ a̱ri, koɓolo nu nɗanga n ciɗa n Lebano n yaꞋan ta̱ ma̱za̱nga̱ adama a̱ nu ɗa a danai, <Gogo na a na a variki nu ɗe, babu kakapi ka maɗanga ka na ko kudoku ka gbatya tsu ka vakangu.> 
Kasaun ki ta̱ a̱ ma̱za̱nga̱ ka̱u adama a na ka gasa n avu. U ɗengusa̱ ta̱ a̱kpisa̱ adama a na a rabasa wu, aza na ishi n tsugbayin dem aduniyan, u tsu zuwa le ta̱ a̱ ɗa̱nga̱ a akuba o tsugono e le, koɓolo n aza a na ishi ngono a aduniyan dem. 
Ra̱ka̱ vi le i ta̱ a̱ kushuku, ka̱ta̱ a dana, <Avu feu vu okpo ta̱ babu utsura, uteku tsu na ci, tso okpo ta̱ derere.> 
A̱ra̱ɗi a̱ nu dem a yaꞋan ta̱ uvakangi a iɗika ya̱ a̱kpisa̱, koɓolo n kacaꞋa ki ishari ka̱ nu dem. Azun a ɗa okpoi kajiba ki ivaꞋin ka̱ nu ɗa kpamu okpoɗou o okpoi ipalatsu i nu. 
<<Inda tsu na vu uranai gaɗi ɗa vi yikpa̱i, avu na vi kazangata ku usana, maku mu usana. A vakangu wu ta̱ a aduniyan, avu na vu unai uma n a̱bunda̱i a aduniyan. 
Vu danai ka̱ci ka̱ nu, <Mi ta̱ a kukumba gaɗi, ka̱ta̱ n kiyangu kakuba ka̱ va̱ a gaɗi va azangata a̱ Ka̱shile, n zuwa kakuba ka̱ va̱ gaɗi n da̱sa̱ngi ɗe a kusan ka̱ a̱ma̱li daꞋangi a kubana uɓon u gaɗi. 
Mi ta̱ a kukumba gaɗi ve eleshu, ka̱ta̱ m bonoko ka̱ci ka̱ va̱ tsu MalaꞋimili.> 
Ama a̱ ciɗa̱ngu wu ta̱ a kasaun, punu a iɗika ya̱ a̱kpisa̱. 
Aza a na e enei nu i ta̱ o kumoɗoko wu a̱shi ka̱ta̱ a yaꞋan mereve ka̱ta̱ e ece, <Vuma nampa ɗa gaji vuza na u zuwai iɗika i gba̱ɗa̱i, ɗa kpamu tsugono n a̱bunda̱i tsu panai wovon wa? 
Vuma vu na u zuwai aduniyan o okpoi an kakamba, a̱yi na u la̱nga̱sa̱i likuci n a̱bunda̱i i ni ɗa kpamu u sa̱nka̱i agbashi a̱ ni kubono a kpaꞋa?> 
Ngono ma aduniyan ra̱ka̱ a̱ ciɗa̱ngu le ta̱ n tsugbayin, yaba dem vi le n kasaun ka̱ ni. 
Ama avu a taɗuku wu ta̱ pulai tsu kacaka babu uciɗa̱ngi u singai. Vi ta̱ upali n aza na a unai, ele na na a gbatyasai n kotokobi, aza a na a̱ yikpa̱i ɗaka vu kpenle ka atali, an keven ka na i e kukpeteshe. 
Avu va̱ kuciya̱ uciɗa̱ngi u singai ba, adama na avu vu la̱nga̱sa̱ ta̱ iɗika i nu ɗa kpamu vu unai uma a̱ nu. <<O kudoku a kula limata i vuza gbani-gbani kpamu ba. 
Lapula ubuta̱ adama a na vi kiɗa muku n ni adama a̱ unushi wi ikaya i le. Adama a na ta lo a̱ ɗa̱nga̱ a ka̱na̱ iɗika ya, ko a shatangu iɗika ya n likuci n a̱bunda̱i.>> 
Mpa Vuzavaguɗu MalaꞋimili n danai, <<Mi ta̱ a̱ kuɗa̱nga̱ ka̱ta̱ n shilika̱ n ele, ka̱ta̱ n la̱nga̱sa̱ Babila, n kula ku ni, n aza a na a buwai n wuma, koɓolo m muku n ni n ntsukaya n ni.>> 
<<Mi ta̱ o kubonoko Babila tsa agali, ubuta̱ u kuyongo wu mkponguron n adaɓa. Mi ta̱ a̱ kupura̱ngu Babila m menju ma munuka,>> Mpa ɗa Vuzavaguɗu MalaꞋimili n danai. 
A̱yi Vuzavaguɗu u kucina ta̱ ɗe. <<Mayun ɗa tsu na n sheshei ɗe ta u kokpo nannai, tsu na kpamu n zuwai ta ka kushamgba nannai. 
Mi ta̱ a kuna aza a Asiriya a iɗika i va̱, mi ta̱ a kudasa yi n ene a nsasan n va̱. Atakaci a̱ ni i ta̱ a kuyaꞋan utakpi a̱ ubuta̱ u uma u va̱, ka̱ta̱ a takpa a̱miki a̱ ni a avangatsu e le.>> 
Na va ɗaɗa ili i na u foɓusoi kuyaꞋanka aduniyan dem. Kukiye ku va̱ ki ta̱ uba̱rukpi adama a na kutakacika uma a aduniyan dem. 
Adama a na Vuzavaguɗu MalaꞋimili u sheshe ta̱ ɗe, yayi wa kufuɗa wa sabaꞋa kaꞋa? U ba̱ra̱kpa̱ ta̱ ɗe kukiye ku ni babu vuza na u kusa̱nka̱ yi? 
Kadanshi ka nampa ka̱ ta̱wa̱ ta̱ a̱ ka̱ya̱ ka na mogono Ahazu u kuwa̱i. 
A̱ɗa̱ aza A̱filisiya̱ ka̱ta̱ i yaꞋan ma̱za̱nga̱ ba, ka̱ta̱ i dana kalangu ka na ko foroi ɗa̱ va ka kukoɗo ta̱ ba. Punu a umaci u koko ka nanlo i ta̱ a kumatsa maku ma kagbaturu. Ili i na u matsai kpamu yi ta̱ a kuyaꞋan n tsukono tsu koko. 
Muku mu ugiti ma aza a unambi i ta̱ a̱ kucuwa̱, ka̱ta̱ a̱ la̱nsa̱i a vaku m ma̱ta̱na̱, ama mi ta̱ a kuna kumiꞋi ku nu n kambulu, ka̱ta̱ a una aza a na a buwai n wuma. 
Shika̱i ka̱ta̱ i lapa una̱ a̱ utsutsu u likuci u ɗa̱, kuwa̱i n wovon a̱ɗa̱ A̱filisiya̱ ra̱ka̱. Keleshu ka̱ ka̱nga̱ kuta̱i a uɓon u gaɗi, babu kowonvoni a̱ ka̱tsuma̱ ke le. 
Wushuki we ne u ɗai vuza u kuneke azusuki a iɗika a? <<Vuzavaguɗu ɗa u zuwai Sihiyona, a̱ ubuta̱ u ni u ɗa aza a na i n atakaci a̱ kuciya̱ wishi.>> 
