﻿Ishaya.
5.
Mi ta̱ a kuyaꞋanka macigi ma̱ va̱ vishipa vu kashina ki itacishi i ni, macigi ma̱ va̱ mi ta̱ n kashina ki itacishi a ubuta̱ u tsuta̱ wu uɓon wu nsasan. 
Ɗa u za̱ɗukpa̱i iɗika ya, ɗa u ɓolongi atali a na i punu, ɗa u shikpa̱i nɗanga mi itacishi i na u laꞋi n kuciga. U maꞋi punu mashilya ma vuza kindi ɗa u doku u lapulai lo ubuta̱ u kupisha umaci u mambulu wa. U la̱nsa̱i icuꞋu yu umaci wu nɗanga i singai, ama i ɗa i matsai umaci u gbani-gbani. 
<<Gogo na a̱ɗa̱ aza a̱ ida̱shi a Urishelima n uma a Yahuda, yaꞋankai tsu afada a nampa mpa n kashina ki itacishi ka̱ va̱. 
Yiɗa̱i yi ishi i gaꞋin n yaꞋan n kashina ki itacishi ka̱ va̱ u laꞋi i na n yaꞋin ɗe? Ana n sheshei mi ta̱ a̱ kuciya̱ umaci u singai, yiɗa̱i i zuwai ɗa i kpa̱ɗa̱i kumatsa umaci u mambulu u singai? 
Gogo na mi ta̱ a kudana wu ili i na n kuyaꞋan n kashina ki itacishi ka̱ va̱. Mi ta̱ a kutakpa ubaru u na mi ishi n zuwai va, ka̱ta̱ ta na ka yaꞋan ula̱nga̱shi, ka̱ta̱ m ɓoso mashilya ma, ka̱ta̱ ta na a dasasa kaꞋa. 
Mi ta̱ o kubonoko kaꞋa ka̱pula̱ka̱, babu ukanaꞋi ko ucimbi ka̱ta̱ mataci n awana o gbonguro punu. Mi ta̱ a kudana Ka̱shile ko yoꞋo mini punu ba.>> 
Adama a na kashina ki itacishi ka Vuzavaguɗu MalaꞋimili kpaꞋa ki Isaraila ku ɗa, aza a Yahuda ele ɗa ica̱Ꞌa̱shi i singai i na u cigai. U la̱nsa̱i kasingai ama ɗa kucikpa we enei kutsuwa̱n ku mpasa, wi indanai ko u kuciya̱ ta̱ usuɓi ɗa kucikpa u panai ma̱shi ma̱ vishili. 
Ili ya atakaci i ɗa a kubana wa aza a na a tsu tsula iꞋuwa kakau n a̱bunda̱i koɓolo n uba̱nga̱ u kumaꞋa kakau n a̱bunda̱i ali ubuta̱ dem u kotso, ka̱ta̱ vi yongo endeꞋen a̱ ubuta̱ wa. 
Vuzavaguɗu MalaꞋimili u yaꞋan ta̱ kadanshi atsuvu a̱ va̱ a kupana, <<Mayun iꞋuwa n a̱bunda̱i yi ta̱ o kokpo agali, ka̱ta̱ iꞋuwa i gbagbaꞋin yo okpo lekeɗi babu vuza punu. 
Nsala kupa n kashina ki itacishi ki ta̱ a̱ kuta̱ m ma̱kya̱n ma aza a Yahuda kenu gbani, nca̱Ꞌa̱tsu kupa mi icuꞋu mi ta̱ a kumatsa ma̱ca̱Ꞌa̱tsu me te koci.>> 
Ili ya atakaci i ɗa a kubana wa aza a na a̱ tsu ɗa̱nga̱ n usana a̱ kula̱nsa̱ ma̱ra̱, ka̱ta̱ o yongo ɗe ali kayin ka gbayin o kusoꞋo ali ma maka le. 
I ta̱ n umolu koɓolo n ugogi a̱ ubuta̱ u ka̱ɗiva̱ ki ilikulya ke le, m medele mi ishipa n vushari koɓolo m ma̱ra̱, ama babu kukeɓece n ukuna wi ili i Vuzavaguɗu, ko e keɓece kpamu n ili i na u yaꞋin. 
Adama a nannai uma a̱ va̱ i ta̱ a kubana tsugbashi a iɗika i yoku adama a unambi u kuyeve, aza a na i n tsugbayin i ta̱ a̱ kukuwa̱ n kambulu, ka̱ta̱ aza a na a buwai kpamu a̱ kuwa̱ n kakuli. 
Adama a nannai kasaun ko yongoi a kulapula kelentsu ka̱ ni ɗa ka̱ ɓa̱yuwa̱i una̱ u ni n wanshi ka̱u, ciya̱ ugaꞋin u Urishelima n ka̱bunda̱i ka uma a̱ ni ka̱ zura̱ngu punu a asuvu. Aza a gbagbaꞋin n aza a kacaꞋa a na i lo dem, i ta̱ a̱ kuzura̱ngu punu. 
Umaci u vuma dem ra̱ka̱ wi ta̱ a̱ kuciya̱ ugoyi ka̱ta̱ o bonoko vuma ukuna u gbani, a̱shi a vuza va̱ a̱ra̱ɗi i ta̱ a kuyaꞋan ugoyi. 
Ama Vuzavaguɗu MalaꞋimili wi ta̱ a̱ kuciya̱ ucikpi, adama a kasingai ka̱ ni, ka̱ta̱ Ka̱shile ka ciɗa ko yotsongu ka̱ci ka̱ ni ciɗa n utsura wu usuɓi u ni. 
Nkyon mi ta̱ a kulina ba̱ri tsu ubuta̱ u kalina u le, ka̱ta̱ muku mu nlala n lina a agali a aza a̱ uciyi. 
Ili ya atakaci i ɗa a kubana wa aza na i o kurono unushi o kutono le ka̱ca̱pa̱ n kawin ko modoruko, o kurono kawuya m mabana ma awin, 
ele na i a kudana, <<YaꞋan Ka̱shile ka yaꞋan gogoꞋo, yaꞋan u dakaka ulinga u ni ciya̱ ce ene u ɗa. YaꞋan kusheshe ku Vuza ciɗa va aza a Isaraila ku yawa ɗevu, ka̱ta̱ ku lyaꞋa kelime, ciya̱ ci yeve ku ɗa.>> 
Ili ya atakaci i ɗa wa aza a na e ci ɗeke kawuya ili i singai, kasingai tamkpamu e ɗeke yi kawuya, aza a na o tsu bonoko ka̱yimbi kokpo kutashi, kutashi tamkpmu kubono ka̱yimbi. Aza a na o tsu bonoko okono o okpo uyoꞋo, uyoꞋo tamkpamu u bono ili yo okono. 
Ili ya atakaci i ɗa a kubana wa aza na i n ugboji a̱ a̱shi e le, n kuyeve ku ka̱ci ke le feu. 
Ili ya atakaci i ɗa a kubana wa aza a gbagbaꞋin o osoꞋi a̱ ma̱ra̱, koɓolo n aza a na e yevei kumbuku ma̱ra̱ mayin, 
ele na a tsu isaka aza a unushi kadanshi n utsura u katsupu u na e kuneke le, ka̱ta̱ a nanna ka singai ka vuza na wi n ka mayun. 
Adama a nannai, tsu na melentsu ma akina ma tsu laɓana ciꞋiwa̱, n tsu na kpamu mita̱ me ci leɓece a akina. Nannai ɗa aralu e le a kushama ka̱ta̱ a̱pa̱lu e le o ɗoɗo ali wunla̱i u ɗika tsu kubuta̱, adama a na a iwan ta̱ wila̱ u Vuzavaguɗu MalaꞋimili ɗa kpamu o goyoi kadanshi ka Vuza ciɗa va aza a Isaraila. 
Adama a nannai wupa u Vuzavaguɗu wi ta̱ a̱ kukula̱ adama a uma a̱ ni, kukiye ku ni ku ba̱rukpa̱ ta̱ ɗa ku lapai le. Nsasan m gba̱ɗa̱i, ɗa even a ikyamba o okpoi an ka̱viri a uye u wawaꞋa u likuci. Ama ko n nannai dem, wupa u ni u kotso ba, kukiye ku ni ku buwa ta̱ uba̱rukpi. 
U ɗengusa̱i kakashi ku urotu adama a iɗika i na yi dadaꞋin, u yaꞋankai aza a na i a uteku wa aduniyan izumgbi n yula̱. Ele ta na a̱ ta̱wa̱i n ilaɗi m moloko. 
Ko vuza te vi le woꞋo ko u ta̱ɗa̱tsa̱ ba, babu vuza na u gbaɗikai ko u latai, babu kaɗambura ka̱ kuyun ka na ka̱ ɗa̱mba̱i ko vunu vu kataka vu na vu kasai. 
AyaꞋa e le i ta̱ lyalyaꞋan, utan u le gbende wi ta̱ ukatsuki, ɗaka va adasukpatsu vo odoku e le wi ta̱ ugbami an katali ka̱ a̱ta̱nza̱ri, anci a ekeke o odoku e le a kuwala an kabatalikpau. 
Izumgbi i le ci izumgbi i kawu, a̱ yura̱ tsu muku mi ikawu, yura̱ tsu na a tsu kiyangu nnama n na a tsu takuma ka̱ta̱ a lazaka babu vuza na u kisa le. 
A kanna ka nanlo i ta̱ a kuyaꞋan yura̱ tsu na mala ma tsu vutsukpa n yura̱. Vuza wi inda baci a iɗika i ɗekpu, wi ta̱ e kene ka̱yimbi n atakaci, ko kutashi ki ta̱ o kubono ka̱yimbi adama e eleshu. 
