﻿Ishaya.
2.
Na ɗa kene ku na Ishaya maku ma Amazo me enei adama a Yahuda n Urishelima. 
A kanna ku uteku, kusan ku kpaꞋa ku Vuzavaguɗu ki ta̱ a kuyaꞋan ugiti, ki ta̱ o kokpo ku gbayin wa aza a na a buwai, ka̱ta̱ a̱ ɗengusa̱ ku ɗa ku laꞋa nsasan n na m buwai dem, ka̱ta̱ kpamu iɗika kakau i na i buwai n a̱bunda̱i i shida̱ ɗe. 
Uma n a̱bunda̱i i ta̱ a̱ kuta̱wa̱ ka̱ta̱ a dana, <<Ta̱wa̱i tsu banai a̱ ubuta̱ u kusan ku Vuzavaguɗu, a kpaꞋa ku Ka̱shile ka Yakubu. Adama a na u yotsongu tsu uye u ni, ka̱ta̱ a̱ tsu tsu tono ura̱ u ni.>> Wila̱ u Vuzavaguɗu wi ta̱ a̱ kuta̱ a Sihiyona, ka̱ta̱ kadanshi ka̱ ni kuta̱ a Urishelima feu. 
Wi ta̱ a kuyaꞋanka iɗika kakau afada, ka̱ta̱ kpamu u tatsukpa vishili u uma n a̱bunda̱i. I ta̱ a kulapa otokobi e le a̱ ka̱ta̱la̱ a ɗa, ka̱ta̱ kpamu a jara nsara n le mo okpo tsu nkaun n kugeceke ili. Iɗika yo kudoku ya̱ shilika̱ n iɗika i yoku ba, ko o doku o yotsongbonoi tsu na a kuyaꞋan kuvon kpamu. 
A̱ɗa̱ ntsukaya n Yakubu, ta̱wa̱i tsu walai a̱ ubuta̱ u kutashi ku Vuzavaguɗu. 
Mayun Vuzavaguɗu vu ka̱sukpa̱ ta̱ uma a̱ nu aza a kpaꞋa ku Yakubu adama a na a shana ta̱ n ukuna u tsuboci wa aza a kasana, o yongoi a kuyaꞋansa ulinga u kula̱na̱ tsa aza A̱filisiya̱ ɗa o ɓolongi una̱ n aza o kutono a̱ma̱li. 
Iɗika i le i shana ta̱ n Azurufa koɓolo n azanariya, uciyi u le wi n uteku ba. Iɗika i le i shana ta̱ n odoku, ekeke o odoku e le i n uteku n kula ba. 
Iɗika i le i shana ta̱ n a̱ma̱li kakau, a ci cikpa ta̱ ili i na a yaꞋin n ka̱ci ke le, i na ekiye e le a yaꞋin. 
Adama a nannai i ta̱ o kubonoko vuma ukuna u gbani, umaci u vuma dem u ciya̱ ugoyi, adama a nannai ka̱ta̱ vu cinukpaka le ba. 
Banai i uwa a akpanlai ka̱ta̱ i sheɗeku punu a kayala, adama o wovon u Vuzavaguɗu koɓolo n ugaꞋin u tsugbayin u ni. 
A̱shi a vuza va a̱ra̱ɗi i ta̱ a̱ kuciya̱ kugoyi, ka̱ta̱ a̱ra̱ɗi a uma a yaꞋan ucipiki, ka̱ta̱ yeve Vuzavaguɗu endeꞋen u ciya̱ ucikpi a kanna ka nanlo. 
Vuzavaguɗu MalaꞋimili u zagba ta̱ ɗe kanna ka na aza a na i n a̱ra̱ɗi n ugbamukaci, ele na a tsu kungbasa ka̱ci ke le ra̱ka̱ ci le i ta̱ a kuyaꞋan ugoyi. 
Uma a ugaɗi tsu nɗanga n sida n Lebano i ta̱ a kuyaꞋan wuni, nannai ɗa feu a kuyaꞋan n uma a gbagbaꞋin ra̱ka̱ a na i tsu nɗanga n Oku ma aza a Bashan, 
nu nsasan mu ugaɗi dem ali n aginda a ugaɗi feu, 
mashilya mu ugaɗi de dem koɓolo m mashilya ma gbayin, 
n antsu a gbagbaꞋin a̱ mini dem a na i a Tarishi n antsu e kenkeꞋen a singai feu. 
Ugbamukaci u vuma wi ta̱ a̱ kuciya̱ kugoyi, ka̱ta̱ a̱ra̱ɗi a uma a yaꞋan ucipiki, ka̱ta̱ yeve Vuzavaguɗu endeꞋen u ciya̱ ucikpi a kanna ka nanlo, 
ka̱ta̱ a̱ma̱li a̱ puwa̱nka̱ gbende-gbende. 
Uma i ta̱ a kusuma a kuꞋuwa a aɓatsu punu a akpanlai koɓolo n enle punu a iɗika, adama a wovon u Vuzavaguɗu koɓolo n ugaꞋin u tsugbayin u ni a ayin a na baci u ɗa̱nga̱i ɗa u gba̱ɗa̱i iɗika. 
A kanna ka nanlo uma i ta̱ a kuvakanku mpopi n a̱zuwa̱ a̱ma̱li a na a yaꞋin n Azurufa n a na a yaꞋin n azanariya dem, a na a yaꞋankai ka̱ci ke le adama a na a cikpa. 
I ta̱ a kusuma kubana a aɓatsu a gbagbaꞋin a na i a akpanlai n amgbu adama o wovon u Vuzavaguɗu koɓolo n ugaꞋin u ni, a ayin a na baci u ɗa̱nga̱i kugba̱ɗa̱sa̱ iɗika. 
ka̱sukpa̱ kuneke katsura ka̱ nu u vuma, a̱yi na wi n ikyamba nu mpasa. A̱yi yiɗa̱i tamkpamu wi? 
