﻿Katagarda ki Ishaya.
1.
Kene ku na Ishaya maku ma Amazo we enei adama a Urishelima n Yahuda a ayin o tsugono a Uzaya, n Jotan, n Ahazu, n Hezikaya ngono n Yahuda. 
Gaɗi pana, ka̱ta̱ avu iɗika vu zuwa atsuvu, adama a na Vuzavaguɗu u dansa ta̱, <<Muku n na n kumgbasai ɗa n la̱na̱i, a yaꞋanka mu ta̱ ugbamukaci. 
Anaka e yeve ta̱ maguɓi me le, njaki feu n yeve ta̱ ubuta̱ u na kesheku ke le ke ci neꞋe le ilikulya, ama aza a Isaraila e yeve ba, uma a̱ va̱ e yeve ba.>> 
A̱ɗa̱ iɗika yu unushi, uma a na i tukpa n kawuya, ka̱tsura̱ ka aza a̱ nkunu, muku n na n nekei ka̱ci ke le adama a kuyaꞋan ku kalyaꞋa. A̱ ka̱sukpa̱i uye u Vuzavaguɗu, ɗa o goyoi vuza Ciɗa vi Isaraila, ali ɗa o bonoi a zuwakai ni kucina̱. 
Yiɗa̱i i zuwai ɗa vu buwai o morono ma adama ali ɗa a buwai a kulyaꞋa kelime n kulapa wu? Yiɗa̱i i zuwai ɗa vi a kulyaꞋa kelime n ugbamukaci? Kaci ka̱ nu ki gbaga ba, ka̱ɗu ka̱ nu kpamu ka̱ ciya̱ ta̱ muna. 
Ili i na i gita̱i punu a ataka e ene a̱ nu, ali a kubana a kaci, babu ubuta̱ u na wi gbaga, Sai ukpan wo ojuno, n untsu, n ajakata, I feu uza̱Ꞌi ba, ko wali n akashi ko usuri m maniꞋin. 
Iɗika i ɗa̱ yo okpo ta̱ agali, ɗa kpamu likuci i ɗa̱ i kula̱i n akina. Omoci a isai ashina a̱ ɗa̱, a̱ɗa̱ e kene, ɗa a̱ la̱nga̱sa̱i ili dem i na e enei punu. 
A̱ ka̱sukpa̱ ta̱ likuci i Urishelima, tsu ka̱pa̱m ka kindi ka kashina ki itacishi, ko tsu ka̱pa̱m ka na ki a̱ ubuta̱ u kashina ka̱ nɗimbi ma Ayahuda, uteku ci likuci i na a lyaꞋi n kuvon. 
Ishi baci Vuzavaguɗu MalaꞋimili u buwaka aza o yoku n wuma ba, ci ishi ta̱ o kokpo tsu Sodom, ka̱ta̱ kpamu tso okpo tsu Gomora. 
Panai kadanshi ka Vuzavaguɗu, a̱ɗa̱ na yi tsa aza o tsugono o Sodom, panai wila̱ u Ka̱shile ka̱ tsu, a̱ɗa̱ na yi tsu uma o Gomora. 
Vuzavaguɗu u danai, <<Ka̱bunda̱i ka alyuka ka̱ ɗa̱, yiɗa̱i ki a kuyaꞋanka mu. N ciya̱ ta̱ alyuka o kusongu a a̱giri koɓolo n anaka a ikyamba ali u laꞋi tsu na n cikalai. Mi m mali ma mpasa mo obomburom ni nkyon koɓolo nu nraɗika ba. 
<<Ana vu ta̱wa̱i wa̱ va̱, yayi we ecei nu ili i nampa, a̱ kuka̱ra̱sa̱ punu a ulanga wa̱ a̱Ꞌisa̱? 
Ka̱sukpa̱ kutuka̱ n alyuka a na i ili i makara wa̱ va̱ ba, ili i ma̱gula̱ni i nu yo okpo ta̱ ili yu unata a kuta̱wa̱ wa̱ va̱. I ci indana ta̱ ka̱ɗiva̱ ko wotoi u savu, n kanna ka Ashibi, n oɓolo a gbayin, ama mpa ma̱ kushuku n oɓolo a kavama a̱ unushi a̱ ɗa̱ a nanlo ba. 
N ciga ka̱ɗiva̱ ko wotoi u savu u ɗa̱, koɓolo n ka̱ɗiva̱ kakau a na yi n aɗa ba. O okpo mu ta̱ ucanuku a kaci ka̱ va̱, mo woꞋo ta̱ n kucanuku u ɗa̱. 
Ayin a na baci i ɗengusa̱i ekiye adama a na i yaꞋan kavasa a kubana wa̱ va̱, mi ta̱ o kusokongu a̱shi a̱ va̱ ko i vasa baci n ugbami, mi a kupanaka ɗa̱ ba. Ekiye a̱ ɗa̱ a̱ na̱mgba̱ ta̱ nu mpasa ma aza a na i n unushi ba. 
SaꞋi i takpa nshinda̱ n ɗa̱. Takpai ukuna u wuya u ɗa̱ kelime ka̱ va̱. ka̱sukpa̱i kuyaꞋan ku kawuya, 
piꞋisai kuyaꞋan ku kasingai, la̱nsa̱i nwalu n singai, ɓa̱nka̱i aza a na i o kusoꞋo atakaci. Ɓa̱nka̱i mkpan, koɓolo n agapa. 
<<Ta̱wa̱i gogo na ci sheshei koɓolo Vuzavaguɗu u danai, Ko a na unushi u ɗa̱ u yaꞋin ɗe tsu na ili i ci yaꞋan ushili ka̱u, wi ta̱ o kubono wa̱ri ka̱u tsa akaɗa, ko u ɗa wi ushili an kejikenle, wi ta̱ o kubono wa̱ri an tsugbere. 
Yu ushuku baci ɗa i tonoi, yi ta̱ a kulyaꞋa ili i na i laꞋi n kugaꞋan a iɗika ya, 
ama i iwan baci ɗa i yaꞋin ugbamukaci, kotokobi ki ta̱ e kupeɗe mpasa n ɗa̱.>> Ɗaɗa ili i na yu uta̱i a̱ una̱ u Vuzavaguɗu. 
Indanai biꞋi tsu na likuci yu uneki u ka̱ɗu yo okpoi an kashakanlai. Yi ishi ta̱ n kasingai ka̱u koɓolo n usuɓi kpamu u tsu yongo ta̱ punu, ama gogo na o okpo ta̱ aza a̱ ma̱ga̱la̱ka̱. 
Azurufa a̱ ɗa̱ okpo ta̱ babu a̱miki. Ma̱ra̱ ma̱ nu ma na vu laꞋi n kuciga mo okpoi usatari m mini. 
Aza e kelime a̱ ɗa̱ i ta̱ n ugbamukaci, okpoi a̱ja̱Ꞌa̱ o oboki, okpoi kpamu n ucigi u kalyaꞋa koɓolo n ucigi u kisa kuneꞋe. A̱ ɓa̱nka̱ aza a na i mkpan ba, o doku kpamu e keɓece n ukuna wa aza a na i agapa ba. 
Adama a nannai, Vuzavaguɗu, MalaꞋimili mo Osoji a gaɗi, Vuzagbayin va aza a Isaraila u dana ta̱, <<To mi ta̱ o kuyotsongu wupa u va̱ wa aza a na a iwain mu, ka̱ta̱ kpamu n tsupa wa irala a̱ va̱. 
Mi ta̱ o kubono ma̱ shilika̱ n a̱ɗa̱, mi ta̱ a kulapula ukpa̱ɗi u kusuɓa̱ u ɗa̱ ka̱ta̱ n takpa ukpa̱ɗi u kuyongo ciɗa u ɗa̱. 
Mi ta̱ o kubonoko n ayaꞋinafada a̱ɗa̱ tsu na ishi ɗe n tsumani, koɓolo n aza e kuneke odoki tsu na cau ishi. Nannai ɗa e kuɗeke ɗa̱ Likuci ya aza a Usuɓi, Likuci yu uneki u ka̱ɗu.>> 
Sihiyona wi ta̱ a̱ kuciya̱ ushibi n kasingai, aza a na a̱ shika̱i unushi i ta̱ a kisa le n usuɓi. 
Ama aza a ugbamukaci n aza a̱ unushi i ta̱ a kuyaꞋan wuni, aza a na a iwain Vuzavaguɗu i ta̱ a kuyaꞋan uniꞋwa̱ta̱ngi. 
Vi ta̱ a kupana wono adama a maɗanga mo oku ma na vu zuwakai ka̱ɗu, vi ta̱ o kokpo n wono adama a kashina ki ishiꞋwan ka na vu zagbai. 
Vi ta̱ o kokpo an maɗanga mo oku ma na a̱vuku a̱ ni a lumbai, tsu kashina ki ishiꞋwan ka na ka nambai mini. 
Vuza vu utsura wi ta̱ o kokpo an ciꞋiwa̱ ka̱ta̱ ulinga u ni u leɓece a akina. Ele n ulinga u kawuya u le i ta̱ a̱ kukula̱ koɓolo, babu vuza na u kufuɗa wa̱ kima̱sa̱ akina a nanlo. 
