﻿Ishipa i Sulemanu.
6.
Te ɗai Macigi ma̱ nu ma banai, avu mekere ma na ma laꞋi n tsuloboi a̱ ka̱tsuma̱ ka̱ a̱ma̱ci? Uye wene u ɗai macigi ma̱ nu mo tonoi, ciya̱ tsu ɓa̱nka̱ wu kula̱nsa̱ yi. 
Macigi ma̱ va̱ ma gida̱la̱ ta̱ a kubana a kashina ka̱ ni, a̱ ubuta̱ u na ili i wali yi, a kaguɓa punu a kashina ka kpamu o kuɓolongu a̱pa̱lu. 
Mpa macigi maꞋa u macigi ma̱ va̱, macigi ma̱ va̱ kpamu ma̱ va̱ maꞋa, wi ta̱ a kaguɓa ka ushiga u ni punu apulufa. 
Avu vu gaꞋan ta̱ tsu likuci i Tiriza, macigi ma̱ va̱, vu gaꞋan ta̱ tsu Urushelima, n tsuloboi tsu ka̱tsura̱ ko osoji a na i uɓa̱ni n urotu u kakashi. 
Takpa a̱shi a̱ nu wa̱ va̱, i ta̱ a̱ ku ripula̱sa̱ mu. Ka̱nji ka̱ nu ki ta̱ an ushiga wu nraɗika n na mi a̱ kugida̱la̱ aginda a Giliyadu. 
Anga a̱ nu i ta̱ tsu ushiga wu nlala n na mu uta̱i a̱ ubuta̱ u na a̱ sumba̱i le a kugaɗukpa. Yaba dem n gbaɓi vi ni, babu vu vuza te vu le na wi endeꞋin. 
Nguji n nu mi ta̱ a kutasa tsu kucina̱ ku umaci u Ruman. 
Ko ɗa baci Egbere amangatatsu i ɗe, n a̱ma̱ci a pulai amanga̱na̱shi, nu nkere n na n yeve ali ba, aza a na a laꞋi kukece, 
a̱yi ɗa koci mi a kuciga wi ta̱ n ugaꞋin tsu moɗoi, a̱yi endeꞋin a̱ ubuta̱ wa̱ a̱na̱ku a̱ ni, maku mu uleshi maꞋa wa̱ a̱na̱ku a̱ ni. Nkere mene yi baci ka̱ta̱ a dana, a̱yi vuza vu una̱singai ɗa, anan Sangina n a̱ma̱ci a pulai a tsu cikpa yi ta̱. 
Yayi a̱ kuɓa̱tsa̱ na ɗe an kanna, ugaꞋin an wotoi, a kutasa an kanna, n tsuloboi tsa azangata a na i ugeri? 
N gida̱la̱ ta̱ a kubana a kashina ka nɗanga n alumo adama a na me ene nɗanga n na m ɓatsai a̱ ka̱ɗa̱ka̱i ka, adama a na me ene ko nɗanga mi itacishi n matsa ta̱, ko ruman u yaꞋan ta̱ a̱pa̱lu. 
Kafu n zuwaka, a̱shi a wuya a zuwai mu, me enei ka̱ci ka̱ va̱ a̱ ida̱shi, koɓolo m mogono ekeke vu odoku vi ni. 
Bono, bono, avu mekere ma aza a Shulamiya, bono, bono adama a na ci inda wu. Mekere ma dansai Adama a̱ n yiɗa̱i yi a kinda vuza vu Shulamiya, a na wi e kujeꞋe tsu Mahanayim? 
