﻿Ishipa i Sulemanu.
2.
Mpa a̱pa̱lu a ɗa akamba a Sharon, apulufa a ɗa a̱ ka̱ra̱Ꞌa̱. 
Tsu apulufa a̱ ka̱tsuma̱ ka awana ta macigi ma̱ va̱ mi nannai a̱ ka̱tsuma̱ ka n kere. 
Tsu maɗanga ma ruman a̱ ka̱tsuma̱ ka nɗanga n kutsun ta macigi ma̱ va̱ mi nannai a̱ ka̱tsuma̱ ko olobo. Mi ta̱ a̱ ma̱za̱nga̱ n da̱sa̱ngu a̱ kulu ku ni, umaci u ni wi ta̱ n uyoꞋo u kulyaꞋa tsu na n cigai. 
U bankai mu e kefeku ka na i a̱ ka̱ɗiva̱, Ucigi u ni urotu u ɗa wa̱ va̱. 
LyaꞋatangu mu n akala a umaci u ma̱biri e uɗekpu, Neke mu ma̱kya̱n n soꞋo ka̱ta̱ wuma u va̱ bono, adama a na mi ta̱ a̱ kukuwa̱ adama a ucigi. 
Kukiye ku ugula̱ ku ni ki ta̱ ɗaka vu kaci ka̱ va̱, kukiye ku usingai ku ni kpamu ku oɓongi mu. 
Nkere n Urushelima, yaꞋankai mu uzuwakpani n ula a nreꞋe nu nsheun n keteshe a na ya ku gbandarasa tsu ba makyan ma na ci a kupana uyoꞋo. 
Pana, macigi ma̱ va̱ la̱na̱, a̱yi ɗa na u yawai, a kaɗikpangusu a gaɗi va atali, e kujeꞋe a gaɗi vu aginda. 
Macigi ma̱ va̱ mi ta̱ tsu mesheun ko maku me mereꞋe. La̱na̱, a̱yi ɗa na ɗe kashani uka̱ra̱Ꞌi u mashilya ma̱ tsu, a̱ kula̱nuku su n katusu ka̱ kunu, a ku inda mu a kakashi ku utsutsu. 
Macigi ma̱ va̱ ma yaꞋan ta̱ kadanshi nu mpa, u danai, <<Ɗa̱nga̱, macigi ma̱ va̱ tsu wala, vuza vu ugaꞋin vu va̱, tono mu. 
La̱na̱, lyushi i laza ta̱, mini ma̱ Ka̱shile ma laza ɗe, kpamu ma laza ɗe. 
A̱pa̱lu uta̱ ta̱ aduniya, makyan mi ishipa ma yawa ta̱, a kupana ma̱shi mo moɗoi a̱ ubuta̱ ra̱ka̱ a iɗika i tsu. 
Nɗanga m ma̱biri m matsa ta̱, a̱pa̱lu a nɗanga mi itacishi n neke ta̱ ma̱gula̱ni me le. ɗa̱nga̱, tsu wala, macigi ma̱ va̱, vuza vu ugain vu va̱.>> 
Avu moɗoi ma̱ va̱ a kungu ku kaɓatsu, a̱ ubuta̱ u kusheɗeku a kakambu ka katali, yotsongu mu a̱shi a̱ nu, yaꞋan m pana ka̱la̱ka̱tsu ka̱ nu, adama a na ka̱la̱ka̱tsu ka̱ nu ki ta̱ uyoꞋo u kupana, a̱shi a̱ nu kpamu i ta̱ n ugaꞋin u ku inda. 
Ka̱na̱ka̱i tsu nsheꞋe n kakamba, m muku mu nsheꞋe n kakamba. Aza a na i a̱ kula̱nga̱sa̱ ashina a itacishi, ashina a itacishi a̱ tsu a na i a̱pa̱lu. 
Macigi ma̱ va̱ vuza vu va̱ ɗa, mpa feu vuza ni ɗa, u tsu guɓa ta̱ ushiga u ni a̱ ka̱tsuma̱ ka apulufa. 
Ali kayin a ka asa, makyan ma na ubuta̱ wu akanai, macigi ma̱ va̱, kpatala, vu okpo tsu mesheun, ko tsu maku me mereꞋe a gaɗi va aginda. 
