﻿Ansa.
18.
Vuza na u tsuyaꞋan cija̱Ꞌa̱ ba, utsu la̱nsa̱ ta̱ u ciya̱ kulyaꞋa ku kelime ku ni koci, u tsu iwan ta̱ n odoki ana i a singai. 
Kalau ka tsu pana uyoꞋo u ciya̱ kuyeve ba, ama u tsu pana ta̱ uyoꞋo u dansa kusheshe ku ni koci. 
Makyan mana ka gbani-gbani ka̱ ta̱wa̱i, kugoyi feu ki ta̱ ta̱wa̱, koɓolo n unambi u kasingai, i ta̱ a̱ kuciya̱ kugoyi. 
Kadanshi ku una̱ u vuma, ki ta̱ n uga̱vi tsu mini, ka̱shi ku ugboji tankpamu ki ta̱ uteku tsu kuɗolu ku mini mana mi e kuyene. 
U gaꞋan vu yaꞋanka vuma gbani-gbani kasingai, ko vu sa̱nka̱ vuza vu babu unushi usuɓi ba. 
Kadanshi ka kalau ka tsu tuka̱ ta̱ n kunani, una̱ u ni u tsu ronokoi ta̱ ulapi. 
Kadanshi ka kalau ka tsu unai ta̱, una̱ u ni u tsu okpoi ta̱ maza. 
Kadanshi ka vuza kuyun, ki ta̱ tsu ilikulya yu uyoꞋo, a kugida̱la̱ a ku uwa a i kyamba. 
Ka iwain ku ulinga, ka̱ja̱Ꞌa̱ ka vuza kula̱nga̱su kaꞋa. 
Kula ku Vuzavaguɗu tsu mashilya mu utsura ma a, vuma vu usuɓi u tsu suma ta̱ u uwa u da̱sa̱ngu n ma̱ta̱na̱. 
U vuza vu uciyi, udukuyan u ni tsu likuci yi nshilya n ɗa. a kusheshe ku ni, udukuyan uni u ka̱ra̱Ꞌi tsu mashilya mu ugaɗi. 
Ugbamukaci u tsu vakangu ta̱ vuza, ama uka̱ni u kaci u tsu tuka̱ ta̱ n ucikpi. 
Vuza na baci wu ushuki kadanshi babu u pana, tsulau tsu ɗa n ili i wono i ni. 
Ayinviki ki a vuma i ta̱ a ku fuɗa kugbama a̱ suvu nu mɓa̱la̱, ama vuma na ayinviki a̱ ni a takpai a̱pa̱, ka̱ ni ko kotso ta̱. 
Ka̱ɗu ka vuza ugboji ayin tutu ki ta̱ a̱ kula̱nsa̱ uye u kudoku kuyeve, atsuvu a vuza vu ugboji a̱ tsu la̱nsa̱ ta̱ kuyeve ayin tutu. 
KuneꞋe ku tsu ɓa̱yuwa̱ ka̱ ta̱ utsutsu, ali ku banka wu ubuta̱ u ku ene uma gbagbaꞋin. 
Vuzana u tuka̱i kadanshi ka̱ ni n ugiti, u tsu okpo ta̱ adanshi a̱ yi ɗa vuza kamayun, sai ayin ana vuza yoku wu uta̱i u yaꞋankai ni kece biꞋi. 
Kazagba kaꞋa ka̱ tsu tuka̱ kananai uteku, a̱yi ɗa u tsu pece a̱ ka̱tsuma̱ ka aza utsura. 
Ɓa̱nka̱ aza̱ nu ele tana i ta̱ a ku ere wu tsu mashilya mu utsura, ama vu shilika̱ baci n ele, i ta̱ a ku ɓa̱ya̱ngu ku utsutsu. 
Adama a katsupu ka kadanshi ka̱nu, tsu nanai tsu ɗa vi a̱ kuciya̱ wuma. 
Ukpa̱ n wuma wi ta̱ a utsura u kelentsu ka̱ nu, aza ana a cigai kaꞋa i ta̱ a kulaꞋa uciyi u le. 
Vuza na u ciya̱i vuka, u ciya̱ ta̱ ili singai, urotu wu uciyi mapasa ma singai maꞋan u Vuzavaguɗu. 
Vuza vu unambi u tsu yaꞋan ta̱ kadanshi n ka̱la̱ka̱tsu ka̱ kula̱nsa̱ asuvayali, ama vuza vu uciyi u tsu neke ta̱ wu ushiki babu asuvayali. 
Cija̱Ꞌa̱ tsu yoku tsu tsu geshe ba, ama cija̱Ꞌa̱ tsu yoku ci ta̱ n kamayun ali ka laꞋi ka̱ aza̱ nu. 
