﻿Ansa.
15.
Wushuki u singai u tsu ta̱na̱ta̱ngu ta̱ ka̱ɗu, ama kadanshi ku usuɗukpi ka tsu ɗa̱ngusa̱ ta̱ ka̱ɗu. 
Kelentsu ka vuza vu ugboji ke tsu neke ta̱ kuyeve, ama una̱ u kalau u tsu tsuwa̱n tsulau. 
A̱shi a Vuzavaguɗu i ta̱ a ubuta̱ dem, a kinda aza a singai n aza a gbani-gbani. 
Kelentsu kana ka̱ tsu dansa kasingai, ki ta̱ u teku tsu maɗanga ma wuma, ama kelentsu ka a uwa ka tsu una ta̱ ayinviki asingai. 
Kalau ka tsu goyo ta̱ ugbari u Dada ni, ama vuzana dem u tsu zuwa atsuvu u pana odoki, vuza vu ugboji ɗa. 
KpaꞋa ka aza usuɓi ki ta̱ n uciyi wa̱ bunda̱i, ama uciyi u vuza gbani-gbani u tsu tuka̱ le ta̱ n atakaci. 
Una̱u u vuza vu ugboji u tsu dansa ta̱ u kuna u kuyeve, ama ka̱ɗu ka kalau ka tsu yaꞋan nanai ba. 
Vuzavaguɗu u tsu iwan ta̱ alyuka a vuza gbani-gbani. Ama kavasa ka vuza singai ka tsu zuwai ta̱ ma̱za̱nga̱. 
Vuzavaguɗu u tsu iwan ta̱ uye u uma a gbani-gbani, ama u ci ciga ta̱ aza na a tsuyaꞋan kasingai. 
Ɗa baci vu nusai, mayun ɗa a takacika wu, a̱yi na u iwain kulapulu wita̱ a ku kuwa̱. 
Ukpa̱ n munuka mi ta̱ a ubuta̱ u Ka̱shile, teɗai tamkpamu a̱ɗu a uma a̱ lima̱. 
Vuza vu kugoyi u tsu ciga a dansukai ba, u tsu bana u vuza vu ugboji ba. 
Ka̱ɗu ka̱ ma̱za̱nga̱ ka̱ tsu tuka̱ ta̱ n i meshe, ama una̱mgbi u ka̱ɗu ka̱tsu una ta̱ ayinviki. 
Uma ugboji a tsu la̱nsa̱ ta̱ kuyeve, ama ilikulyaꞋa i kalau i ɗa ɗa tsulau. 
Wuma wa aza unambi ra̱ka̱ wi ta̱ tukpa n atakaci, ama a̱ɗu aza ma̱za̱nga̱ a makyan dem ita̱ a̱ ka̱tsuma̱ ka kupana uyoꞋo. 
U lata̱ vu okpo n unambi n wovon u Vuzavaguɗu, ana va kuciya̱ udukuyan wa̱ a̱bunda̱i koɓolo n atakaci. 
U lata̱ vu lyaꞋa tsuwaꞋa tsu babu mkpaɗi ucigi de wi baci lo, ana va ku takuma i nyama i singai tsurala ci baci lo. 
Vuza vu usuɗukpi u ka̱ɗu u tsu ɗa̱ngusa̱ ta̱ vishili, 
Uye u vuza vu wonvoli tukpa ɗa u ɗa wi n awana, ama uye u vuza vu usuɓi a̱ ka̱ɗu uba̱rukpi uɗa wi. 
Maku mu ugboji u tsu zuwa ta̱ esheku a̱ ni u pana uyoꞋo ama kalau ka tsu goyo ta̱ a̱na̱ku ni. 
Tsulau ili i ma̱za̱nga̱ i kajarishi i ɗa, ama vuza na wi n kuyeve u tsu yaꞋan ta̱ ili ni derere. 
Ɗa baci odoki i lo ba, ka kuna ka tsu na̱mgba̱ ta̱ ama n odoki a̱bunda̱i, a tsu ciya̱ ta̱ u lyaꞋi. 
Yaba dem u tsu pana ta̱ uyoꞋo u wu ushuki u kadanshi kasingai, ili singai i ɗa a yaꞋan kadanshi ka singai a ayin ana agaꞋin. 
Uma ugboji a tsu tono ta̱ uye u na u kubanka le ubuta̱ u wuma, adama ana wu utuka̱ le a ubuta̱ wu ukpa̱. 
Vuzavaguɗu u tsu fa̱da̱ ta̱ kpaꞋa ku vuza vu ugbamukaci, ama u tsu kanza ta̱ kureꞋe ku kagapa. 
Vuzavaguɗu u tsu iwan ta̱ kusheshe ku vuza gbani-gbani, ama u tsu yaꞋan ta̱ ma̱za̱nga̱ n kadanshi ka a singai. 
Vuza kalyaꞋa, u tsu ronoko to kpaꞋa ku ni atakaci, ama a̱yi vuza na u iwain kalyaꞋa wi ta̱ a kuyongo n wuma. 
Ka̱ɗu ka vuza vu usuɓi ka tsu sheshe ta̱ kafu kushuku kadanshi, ama kelentsu ka vuza gbani-gbani ka tsu dansa ta̱ ka gbani-gbani. 
Vuzavaguɗu u tsu yongo ta̱ daꞋangi n vuma gbani-gbani, ama u tsu pana ta̱ kavasa ka vuma vu usuɓi. 
Imeshi i tsu zuwa ta̱ vuma u yaꞋan ma̱za̱nga̱, kpamu arabali a singai a tsu tuka̱ ta̱ n ma̱ta̱na̱ i kyamba. 
Vuza na dem u pana odoki a wuma, wi ta̱ o kuyongo a̱ ka̱tsuma̱ ka aza ugboji. 
Vuza na dem u iwain ugbari, ka̱cika̱ni kaꞋa u goyoi, ama vuza na baci de dem wu ushuki n kulapu, wi ta̱ a ku ciya̱ kuyeve. 
Wovon u Ka̱shile kuyotsongu su ku ugboji ku ɗa, kpamu sai vu goyo ka̱cika̱nu, yeve ka̱ta̱ vu ciya̱ tsugbayin. 
