﻿Ishipa.
147.
Cikpai Vuzavaguɗu, adama a na u gaꞋan ta̱ a canana, vishipa vu ucikpi u Ka̱shile ka̱ tsu, ili i uyoꞋo i ɗa kpamu derere ɗa a cikpa yi. 
Vuzavaguɗu ɗa u maꞋi Urushelima, ɗa u ɓolongi aza a Isaraila a na ishi a tsugbashi a iɗika i yoku, 
U tsu neke ta̱ kadanshi wa aza a na a takpai a̱ɗu, tsa aza na i n untsu ka̱ta̱ a shiya le. 
U tsu kece ta̱ ka̱bunda̱i ka azangata, u tsu ɗeke le ta̱ n ula ra̱ka̱. 
Vuzavaguɗu vu tsu vuza gbayin ɗa, vuza vu utsura ɗa, kuyeve ku ni ki kugisanku ba. 
U tsu ɗa̱ngusa̱ ta̱ aza a na o doroi, ama u tsu cipa̱ka̱ ta̱ aza a gbani-gbani a iɗika. 
Cananai vishipa vu kuneke ucikpi u Vuzavaguɗu, cikpai Ka̱shile ka̱ tsu n umolu. 
U pala ta̱ gaɗi n eleshu, u yoꞋokoi iɗika mini, ɗa kpamu u zuwai mita̱, mo gbonguroi a kaginda. 
U tsu neke ta̱ nnama ijanu i le, m muku ma agawun a makyan ma na a̱ shika̱i. 
U tsu zuwa katsura wo odoku a utsura ba, ko u yaꞋan ma̱za̱nga̱ n utsura u vuma. 
Vuzavaguɗu u tsu pana ta̱ u yoꞋo wa aza na i a kupana wovon u ni, aza a na e keɗei a̱pa̱Ꞌa̱ e le, a ucigi u ni u na u tsu sabaꞋa ba. 
Cikpa Vuzavaguɗu, avu Urishelima, cikpa Ka̱shile ka̱ nu, avu Sihiyona. 
A̱yi ɗa wi a ku inda utsutsu u nu mayin, u tsu zuwaka ta̱ uma a na i punu una̱singai. 
U tsu zuwa ta̱ kureꞋe ki iɗika i nu, kuyongo m ma̱ta̱na̱, u tsu lyaꞋatangu wu ta̱ n alkama vu singai. 
U tsu suku ta̱ n kadanshi ka̱ ni aduniyan, gogoꞋo lo ɗa kadanshi ka̱ ni ka tsu bana a̱ ubuta̱ u na a̱ suki kaꞋa. 
U tsu suku ta̱ egele a pala iɗika tsu tsugbere tsu a̱ri, u tsu vishangu ta̱ a ɗa an kokomo. 
U tsu suku ta̱ m mini ma atali, tsu atali a wawaꞋa, yayi u kufuɗa kugbama asuvu n uta̱ni u ni. 
Utsu neke ta̱ kpamu kadanshi, ka̱ta̱ atali a, a̱ niꞋwa̱n utsu suku ta̱ n wunla̱i, ka̱ta̱ mini me yene. 
U tsu suku ta̱ n kadanshi ka̱ ni u Yakubu, u tsu yotsongu ta̱ ili i kutono i ni n afada a̱ ni wa aza a Isaraila. 
U yaꞋanka uduniyan u yoku ili i nanlo ba, adama a na e yeve wila̱ u ni ba. Cikpai Vuzavaguɗu. 
