﻿Ishipa.
145.
Vishipa vu kucikpa vu Dawuda. Ka̱shile ka̱ va̱ mogono mi ta̱ a kucikpa tsugbayin tsu nu, mi ta̱ a kucikpa kula ku nu ko wannai. 
Kanna lakam mi ta̱ a kucikpa wu, ka̱ta̱ n cikpa kula ku nu ko wannai. 
Vuzavaguɗu vuzagbayin ɗa, mayun ɗa u yotsoi a cikpa yi, tsugbayin ci ni tsu laꞋa ta̱ utsura u kuyeve. 
Tsukaya a kubana a tsukaya i ta̱ a kucikpa ili i na vi yaꞋin, ka̱ta̱ a dansa ili i gbagbaꞋin i na vi yaꞋin. 
Uma i ta̱ a kudansa ukuna wu ucikpi u tsugbayin tsu nu, mpa kpamu mi ta̱ e kusheshe a ukuna wi ili i mereve i na vi yaꞋin. 
I ta̱ a kudansa ukuna wu ulinga u gbagbaꞋin u nu, mi ta̱ kpamu e kuneke arabali a tsugbayin tsu nu. 
I ta̱ a kudansa ukuna u tsugbayin n kasingai ka̱ nu ra̱ka̱, ka̱ta̱ a canana ishipa a ukuna wu usuɓi u nu. 
Vuzavaguɗu vuza kasingai ɗa, vuza va asuvayali, u ci yaꞋan wupa gogoꞋo ba, n ucigi u na u tsu sabaꞋa ba. 
Vuzavaguɗu vuza kasingai ɗa a uma ra̱ka̱, u tsu sa̱Ꞌa̱ ta̱ ili i na u yaꞋin ra̱ka̱. 
Vuzavaguɗu, ili i na vu yaꞋin ra̱ka̱ yi ta̱ a kucikpa wu, uma a̱ nu kpamu ra̱ka̱ i ta̱ a kucikpa wu. 
I ta̱ a kusala tsugbayin tsu tsugono tsu nu. ka̱ta̱ a dansa ukuna wu utsura u nu, 
adama a na muku n vuma ra̱ka̱ e yeve ulinga ugbayin u nu, n ucikpi u tsugbayin u tsugono tsu nu. 
Tsugono tsu nu tsu ko wannai tsu ɗa, avu mogono maꞋa tsukaya a kubana a tsukaya. 
Vuzavaguɗu, u tsu keɗe ta̱ aza a na i a̱ kuyikpa̱, u tsu ɗa̱ngusa̱ ta̱ aza a na a̱ yikpa̱i. 
A̱shi a uma ra̱ka̱ i ta̱ wa̱ nu, vu ci neke le ta̱ ilikulyaꞋa a makyan ma na ma untsai. 
Vu tsu neke le ta̱ ili n a̱bunda̱i, ili i na a cigai dem. 
Vuzavaguɗu vuza vu usuɓi ɗa a̱ uye u ni ra̱ka̱, vuza vu ma̱riki kpamu a̱ ka̱tsuma̱ ka ulinga u ni ra̱ka̱. 
Vuzavaguɗu wi ta̱ ɗevu n aza a na e ɗekei ni, aza a na e ɗekei ni n ka̱ɗu n ke te. 
U tsu neke ta̱ aza a na i a kupana wovon u ni ili i na a cigai ra̱ka̱, u tsu pana ta̱ ma̱shi me le, ka̱ta̱ u wawa le. 
Vuzavaguɗu u tsu ere ta̱ aza a na a cigai ni ra̱ka̱, ama u tsu una ta̱ aza a gbani-gbani ra̱ka̱. 
Vuzavaguɗu, ayin tutu mi ta̱ a kucikpa wu yaꞋan uma ra̱ka̱ a cikpa kula ku ciɗa ku ni ko wannai. 
