﻿Ishipa.
143.
Vishipa vu Dawuda. Vuzavaguɗu, pana avasa a̱ va̱, pana ma̱shi ma asuvayali a̱ va̱, avu vuza vu usuɓi ɗa n vuza vu ma̱riki, adama a nannai ushuku mu. 
Ka̱ta̱ vu yaꞋanka kagbashi ka̱ nu afada ba, adama a na ko vuza wi lo babu u nushi wa̱ nu ba. 
Vurala vu va̱ vu guva mu ta̱, u ɓasangi mu a iɗika, u zuwai mu ida̱shi a̱ ka̱yimbi, tsa aza a na a̱ kuwa̱i ɗe m megeshe. 
Adama a nannai mi ta̱ a ukuna u kutakpa ka̱ɗu, mi ta̱ a una̱mgbuka̱tsuma̱ ka̱u. 
N ciɓa ta̱ n ayin a cau, n ka̱na̱i kusheshe a ili i na vu yaꞋin ra̱ka̱, n ciɓa ta̱ n ulinga we ekiye u nu ra̱ka̱. 
N ɗa̱ngusa̱ ta̱ ekiye a̱ va̱ wa̱ nu a kavasa, mi ta̱ a kakuli ka̱ nu ci iɗika i na i cigai mini. Kuvuka 
Vuzavaguɗu, ushuku mu gogoꞋo, mi ta̱ ɗevu n kutakpa asuvu, ka̱ta̱ vu sokongu mu a̱shi a̱ nu ba, ka̱ ta̱ mo okpo a na aza na a̱ kuwa̱i ɗe ba. 
Zuwa mu n ciɓa n ucigi u nu u na u tsu sabaꞋa ba adama a na n zuwa ta̱ katsura wa̱ nu. Yotsongu mu uye u na n kutono n neke ta̱ wuma u va̱ wa̱ nu. 
Vuzavaguɗu, isa mu ekiye a irala i va̱, n ta̱wa̱ ta̱ wa̱ nu kula̱nsa̱ ubuta̱ sheɗeku. 
PiꞋisaka mu n tono kusheshe ku nu, yaꞋan ayinviki a singai a̱ nu o tono nu mpa, a uye u na wi n a̱ga̱vushi ba. 
Vuzavaguɗu, adama a kula ku nu ere wuma u va̱, a ukuna wu usuɓi nu utuka̱ wuma u va̱ atakaci. 
Adama a ucigi u nu u na u tsu sabaꞋa ba una irala i va̱ ra̱ka̱, adama a na mpa kagbashi ka̱ nu ka a. 
