﻿Ishipa.
140.
Kadanshi a kubana u vuza vu kelime vi ishipa: Vishipa vu Dawuda. Vuzavaguɗu, uta̱ka̱ mu e ekiye a aza a gbani-gbani, ere mu e ekiye a aza a na a̱ ci ɗa̱ngusa̱ vishili, 
aza a na a̱ɗu ele i tukpa n kusheshe ku gbani-gbani, makyan dem a̱ kuɗa̱ngusa̱ vishili. 
Elentsu ele an oko o tsukono, kadanshi ka na ka tsu uta̱ una̱ u le ki ta̱ an tsukono tsu kagbaji. Kuvuka 
Vuzavaguɗu uta̱ka̱ mu e ekiye aza a gbani-gbani, ere mu e ekiye a aza a na a̱ ci ɗa̱ngusa̱ vishili, aza a na o foɓusoi a varuku mu. 
Aza a̱ra̱ɗi azuki mu ayakuru a zuwakai mu maza a uye u le, adama a na a̱ ka̱na̱ mu. Kuvuka 
Ɗa n danai, Vuzavaguɗu, <<Avu ɗa Ka̱shile ka̱ va̱.>> Pana ma̱shi ma̱ va̱, ma̱ kula̱nsa̱ uɓa̱nki, Vuzavaguɗu. 
Vuzavaguɗu Ka̱shile kishi ka̱ va̱ ku utsura, a̱yi na wu erei mu m ma̱ra̱ga̱ a kanna ko kuvon. 
Vuzavaguɗu, ka̱ta̱ vu neke aza a gbani-gbani ili i na a cigai ba, ka̱ta̱ vu ka̱sukpa̱ a̱ ciya̱ ulyaꞋi e kusheshe ku le ba, ta lo a kuyaꞋan a̱ra̱ɗi. Kuvuka 
Ka̱ta̱ vu ka̱sukpa̱ irala i va̱ i ciya̱ ulyaꞋi ba, yaꞋan ka gbani-gbani ka na i a kuyaꞋanka mu ko bono a kaci ke le. 
YaꞋan a̱ga̱ruwa̱shi akina a̱ tsuwa̱nka̱ le aci, yaꞋan a taɗuku le akina punu e kpenle ku uga̱vi, ka̱ta̱ o doku ku uta̱ ba. 
Ka̱ta̱ aza a̱ kula̱nga̱su a̱ ciya̱ katsura a iɗika ya ba, yaꞋan wunla̱i u gbani-gbani u tamba aza a na a̱ ci ɗa̱ngusa̱ vishili. 
N yeve ta̱ Vuzavaguɗu wi ta̱ a̱ kuɓa̱nka̱ aza a unambi, ka̱ta̱ kpamu u yaꞋanka aza a yali kasingai. 
Mayun aza a̱ ma̱riki i ta̱ a kucikpa kula ku nu, ka̱ta̱ aza a ukuna u mayun a̱ɗu e le, a̱ da̱sa̱ngu e kelime ka̱ nu. 
