﻿Ishipa.
119.
Aza a̱ ma̱za̱nga̱ a ɗa aza a na i n unushi ba, aza a na i o kutono wila̱ u Vuzavaguɗu. 
Aza a̱ ma̱za̱nga̱ a ɗa aza a na a cinukpai n kadanshi ka̱ ni ba, aza a na i a̱ kula̱nsa̱ yi n a̱ɗu ele ra̱ka̱, 
ele na i a kuyaꞋan ka gbani-gbani ba, ama i ta̱ an nwalu a uye u ni. 
Vu zuwa ta̱ ili i kutono i nu adama a na o tono i ɗa mayin. 
Ishi baci ka̱ɗu ka̱ va̱ ki a sabaꞋa ba, a̱ ubuta̱ u kutono ili i na u dansai, 
mi shi o ko okpo n wono ba ɗa baci m bonokoi ka̱ɗu a̱ ubuta̱ u kutono ili i na u dansai. 
Mi ta̱ a kucikpa wu n ka̱ɗu ka mayun, A makyan ma na n piꞋisai afada a̱ usuɓi u nu. 
Mi ta̱ o kutono ili i na u dansai, ka̱ta̱ vu varuku mu ra̱ka̱-ra̱ka̱ ba. 
Nini ɗai ka̱ɗa̱nga̱ni ko kuyongo ciɗa? A̱ ubuta̱ u kutono kadanshi ka̱ nu. 
N ka̱ɗu ka̱ va̱ ra̱ka̱, n la̱nsa̱i nu, ka̱ta̱ vu ka̱sukpa̱ mu n katsukpa kadanshi ka̱ nu ba. 
N sokongu ta̱ kadanshi ka̱ nu a̱ ka̱ɗu ka̱ va̱, adama a na ka̱ta̱ n yaꞋanka wu unushi ba. 
Vuza vu una̱singai ɗa vi, avu Vuzavaguɗu, piꞋisaka mu ili i na vu dansai. 
N una̱ u va̱ u ɗa n kecei afada a na vu nekei tsu ra̱ka̱. 
Mi ta̱ a̱ ma̱za̱nga̱ mo kutono kadanshi ka̱ nu, tsu na vuma u ci yaꞋan ma̱za̱nga̱ ma̱ kuciya̱ udukuyan wa̱ a̱bunda̱i. 
Mi ta̱ a̱ kuka̱na̱ kusheshe, a̱ ukuna wi ili i kutono i nu, ka̱ta̱ n zuwaka n uye u nu. 
Mi ta̱ a̱ ma̱za̱nga̱ n ili i na vu dansai, mi a kucinukpa n kadanshi ka̱ nu ba. 
YaꞋanka kagbashi ka̱ nu kasingai, adama a na u ciya̱ wuma, u kutono kadanshi ka̱ nu. 
Ɓa̱yuwa̱ a̱shi a̱ va̱, adama a na me ene, ili i mereve i gbagbaꞋin a̱ ka̱tsuma̱ ka̱ wila̱ u nu. 
Mpa komoci kaꞋa aduniyan, ka̱ta̱ vu sokongu ku mu kadanshi ka̱ nu ba. 
Ili i na n laꞋi n kuciga ka̱u a makyan dem ɗaɗa n tono afada a̱ nu. 
Vu tsu ɓarangu ta̱ aza a ugbamukaci, ele na a katsukpai kadanshi nu. 
Uta̱ka̱ mu o kugoyi ku le n a̱ra̱ɗi ele, adama a na n tono ta̱ ili i na vu dansai. 
Ko a na wo okpoi aza o tsugono a gbaɓa ta̱ kaci, a̱ kula̱nga̱sa̱ mu kula, kagbashi ka̱ nu ki ta̱ e kusheshe ili i na vu dansai. 
Mayun, n tsu pana ta̱ uyoꞋo u kadanshi ka̱ nu, ke ci neke mu ta̱ odoki. 
Mi ta̱ ivaꞋin ma̱kpa̱ɓa̱ a̱ kubuta̱, wawa wuma u va̱ tsu kadanshi ka̱ nu. 
Ana n tonokoi nu ukuna u va̱ ɗa vu ushuki mu, piꞋisaka mu ili i na vu dansai. 
Ɓa̱nka̱ mu n yeve ili i kutono i nu, ka̱ta̱ n yongo a kuciɓasa n ulinga wi ili mereve i nu. 
Ka̱ɗu ka̱ va̱ ka̱ kula̱ ta̱ adama a una̱mgbuka̱tsuma̱, zuwa mu n tsurukpa tsu kadanshi ka̱ nu. 
Ere mu a uye wa aꞋuwa, yaꞋan n ciya̱ kasingai a̱ wila̱ u nu. 
N zagba ta̱ uye u ma̱riki, n zuwa ta̱ ka̱ɗu ka̱ va̱ a̱ ubuta̱ wa afada a̱ nu. 
Vuzavaguɗu, n ka̱na̱ ta̱ kadanshi nu gbagu, ka̱ta̱ vu ka̱sukpa̱ mu n yaꞋan wono ba. 
N ilaɗi i ɗa, mi o kutono kadanshi ka̱ nu, adama a na vu zuwa ta̱ ka̱ɗu ka̱ va̱ ko yongo ba̱ri. 
Vuzavaguɗu, piꞋisaka mu ili i na vu dansai, ka̱ta̱ n tono i ɗa ko wannai. 
Neke mu kuyeve, adama a na n tono wila̱ u nu, ka̱ta̱ ta na n tono u ɗa n ka̱ɗu ka̱ va̱ dem. 
Tono nu mpa n tsu uye u kadanshi ka̱ nu, adama a na ta ɗe mi a̱ kuciya̱ ma̱za̱nga̱. 
Zuwa ka̱ɗu ka̱ va̱, a̱ ubuta̱ u kutono kadanshi ka̱ nu, ba a̱ ubuta̱ u kula̱nsa̱ ku udukuyan ba. 
Takpa a̱shi a̱ va̱ a̱ ubuta̱ wu ili i kavama, ere wuma u va̱ tsu kadanshi ka̱ nu. 
Shatangu kadanshi ka̱ nu, u kagbashi ka̱ nu, u na vu yaꞋankai aza a na e nekei nu tsugbayin. 
Takpa ka mu wono u na mi a kupana wovon, adama a na afada a̱ nu ili i singai i ɗa. 
Mpa ɗa na a mali mi ili i kutono i nu, ere mu a̱ ka̱tsuma̱ ku usuɓi u nu. 
Vuzavaguɗu, yaꞋan ucigi u nu u na u tsu sabaꞋa ba u ta̱wa̱ wa̱ va̱, wishi u nu kpamu u ta̱wa̱ tsu uzuwakpani u nu, 
ka̱ta̱ n ciya̱ ili i na n ku ushuku vuza na wi a kushika mu, adama a na n zuwaka ta̱ kadanshi ka̱ nu katsura. 
Ka̱ta̱ vu takpa kadanshi ka̱ ma̱riki a̱ una̱ u va̱ ba, adama a na a afada a̱ nu u ɗa n keɗei a̱pa̱Ꞌa̱. 
Mi ta̱ o kutono wila̱ u nu a makyan dem, ko wannai, 
ka̱ta̱ n yaꞋan nwalu n va̱ ba̱ri, adama a na mi ta̱ a̱ kula̱nsa̱ ili i kutono i nu. 
Mi ta̱ a kudansa ukuna u kadanshi u nu e kelime ko ngono, mi ta na a kupana wono ba. 
Adama a na n tsu pana ta̱ uyoꞋo u kadanshi ka̱ nu, adama a na n ciga ta̱ u ɗa. 
Mi ta̱ e kuneke kadanshi ka̱ nu tsugbayin, adama a na n ciga ta̱ kaꞋa, kpamu ka̱ta̱ n ka̱ na̱ kusheshe a ili i na vu dansai. 
Ciɓa n kadanshi ka na vu yaꞋankai kagbashi ka̱ nu, adama a na vu zuwa mu ta̱ n keɗei a̱pa̱Ꞌa̱. 
Ma̱za̱nga̱ ma̱ va̱ a̱ ka̱tsuma̱ ka atakaci ɗaɗa uzuwakpani u nu u tsu ere ta̱ wuma u va̱. 
Aza a ugbamukaci a yaꞋanka mu ta̱ ulami, ama n vadalukpuka wila̱ u nu kucina̱ ba. 
N ciɓai n afada a Vuzavaguɗu, ɗa n ciya̱i uneki u kadanshi. 
Wupa u tsu ka̱na̱ mu ta̱ ka̱u adama a uma a gbani-gbani, aza a na a̱ ka̱sukpa̱i wila̱ u nu. 
Ili i kutono i nu yo okpo mu ta̱ ishipa, a kpaꞋa ku na mi o limoci. 
Vuzavaguɗu, n ciɓa ta̱ n kula ku nu n kayin, mi ta̱ ta na o kutono wila̱ u nu. 
Nava ɗaɗa n kiwanai kuyaꞋansa, adama a na n zuwaka ta̱ n ili i kutono i nu. 
Vuzavaguɗu ɗa upecu u va̱, n yaꞋan ta̱ uzuwakpani n tono kadanshi ka̱ nu 
N la̱nsa̱ wu ta̱ n ka̱ɗu ka̱ va̱ dem, yaꞋan n ciya̱ mapasa ma singai tsu na vu yaꞋin kadanshi. 
N coꞋoko ta̱ n uye u va̱, ɗa n kpatalai n tonoi kadanshi ka̱ nu. 
Ɗa n dakakai n la̱nga̱sa̱ makyan ba, n tonoi kadanshi ka̱ nu. 
Uma a gbani-gbani a shiya mu ta̱ n awin, ama n cinukpa n wila̱ u nu ba. 
Kayin ke pece baci n tsu ɗa̱nga̱ ta̱ n cikpa wu, adama afada a usuɓi a̱ nu. 
Mpa ka̱ja̱Ꞌa̱ kaꞋa u yaba dem na wi a kupana wovon u nu, n aza na a zuwakai n ili i kutono i nu. 
Vuzavaguɗu, ucigi u nu u na u tsu sabaꞋa ba u shana ta̱ aduniyan ra̱ka̱, piꞋisaka mu ili i na vu dansai. 
Vuzavaguɗu, vu yaꞋanka ta̱ kagbashi ka̱ nu kasingai, tsu na vu yaꞋin kadanshi. 
PiꞋisaka mu n yeve afada asingai, adama a na n neke ta̱ katsura a kadanshi ka̱ nu. 
Kafu vu takacika mu, n nusa ta̱ ɗe, ama gogo na n tono ta̱ kadanshi ka̱ nu. 
Avu vuza singai ɗa, kpamu vi yaꞋan ta̱ kasingai, piꞋisaka mu ili i na vu dansai. 
Aza a ugbamukaci i ta̱ a kudansa aꞋuwa adama a̱ va̱, n zuwaka ta̱ n ili i kutono i nu n ka̱ɗu ka̱ va̱ ra̱ka̱. 
A̱ɗu ele a kpanduku ta̱, ama mpa mi ta̱ a̱ ma̱za̱nga̱ n wila̱ u nu. 
UgaꞋan ta̱ a na n takacikai, adama a na m piꞋisa ili i na vu dansai. 
Wila̱ wu una̱ u nu u laꞋaka mu ta̱, n a̱kpa̱n a azanariya n azurufa. 
Ekiye a̱ nu a ɗa a yaꞋin mu o foɓusoi mu, neke mu kuyeve, adama a na m piꞋisa kadanshi ka̱ nu. 
Aza a na i a kupana wovon u nu yaꞋan ene mu ka̱ta̱ a yaꞋan ma̱za̱nga̱, adama a na n keɗe ta̱ a̱pa̱Ꞌa̱ a kadanshi ka̱ nu. 
Vuzavaguɗu, n yeve ta̱ wila̱ u nu derere ɗa, kpamu a̱ ka̱tsuma̱ ka̱ ma̱riki ka̱ nu ɗa vu yaꞋankai mu afada a usuɓi. 
YaꞋan ucigi u nu u na u tsu sabaꞋa ba, u neke mu utsura u ka̱ɗu, tsu na vu danai kagbashi ka̱ nu, 
YaꞋan vu sa̱Ꞌa̱ mu, adama a na n yongo n wuma, adama a na mi ta̱ a̱ ma̱za̱nga̱ n wila̱ u nu. 
YaꞋan aza a ugbamukaci a yaꞋan wono, adama a ka gbani-gbani ka na a yaꞋankai mu ko unushi, ama mi ta̱ e kusheshe a ukuna wi ili i na vu dansai. 
YaꞋan aza a na i a kupana wovon u nu, o bono wa̱ va̱, ele na e yevei kadanshi ka̱ nu. 
YaꞋan ka̱ɗu ka̱ va̱ ko yongo ko unushi a ukuna wi ili i na vu dansai, adama a na ka̱ta̱ mo okpo n wono ba. 
Vuzavaguɗu, wuma u va̱ wi ta̱ a mali ka̱u a̱ kula̱nsa̱ wishi u nu, n keɗe ta̱ a̱pa̱Ꞌa̱ a kadanshi ka̱ nu. 
A̱shi a̱ va̱ a̱ ga̱la̱ ta̱ a kuvana uzuwakpani u nu, ɗa n danai, <<Wannai ɗai va kuneke mu kadanshi?>> 
Adama a na mo okpo ta̱ tsu kedele ku ukpan ka na a saki a̱ ka̱nga̱, dem n nannai n cinukpa n ili i na vu dansai ba. 
Ali n wannai ɗai kagbashi ka̱ nu ka kulyaꞋa kelime n kugbama asuvu? Wannai ɗai va kuyaꞋanka aza a na i a kutakacika mu afada? 
Aza a ugbamukaci a̱ ga̱va̱ ka̱ mu ta̱ kpenle adama a na n yikpa̱ punu, o tono wila̱ u nu ba. 
Kadanshi ka̱ nu ra̱ka̱ ili i kuzuwaka katsura kaꞋa, ɓa̱nka̱ mu, irala i va̱ i takacika mu ta̱ ko unushi, 
Kenu ɗa ubuwai o kotso nu mpa aduniyan, ama mpa n ka̱sukpa̱ ili i kutono i nu ba. 
Adama a ucigi u nu u na u tsu sabaꞋa ba, wawa wuma u va̱, ka̱ta̱ n tono kadanshi ka̱ una̱ u nu. 
Vuzavaguɗu, kadanshi ka̱ nu ki ta̱ lo ko wannai, ka shamgba ta̱ n utsura gaɗi. 
Ma̱riki ma̱ nu a tsukaya a kubana tsukaya ra̱ka̱, vu shikpa̱i aduniyan ɗa tana a ɗa ashamgbai mayin. 
Ili ra̱ka̱ yi ta̱ lo ali n gogo na adama afada a̱ nu, adama a na ili ra̱ka̱ agbashi a̱ nu a ɗa. 
Ishi ba ci n ciya̱ ma̱za̱nga̱ a̱ wila̱ u nu ba, mi ishi ta̱ a̱ ku kuwa̱ a̱ ka̱tsuma̱ ka atakaci a̱ va̱. 
Mi a ku cinukpa n ili i kutono i nu ba, adama a i ɗa, ɗa vu erei wuma u va̱. 
Wawa mu, adama a na mpa wa̱ nu u ɗa mi, n la̱nsa̱ ta̱ ili i kutono i nu. 
Uma a gbani-gbani i ta̱ a kuvana una mu, ama n ciɓa ta̱ n kadanshi ka̱ nu. 
N zuwaka ta̱ a na ko ili, yi lo o kuyongo ko wannai ba, ama kadanshi ka̱ nu ki n uteku ba. 
Tsu na n cigai wila̱ u nu, n tsu ka̱na̱ ta̱ kusheshe ku u ɗa kanna dem. 
Kadanshi ka̱ nu ka zuwa mu ta̱ n ciya̱i ugboji n laꞋi irala i va̱, adama a na makyan dem kaꞋa ki ta̱ nu mpa. 
N ciya̱ ta̱ kuyeve n laꞋi nlum n va̱ ra̱ka̱, adama a na mi ta̱ e kusheshe a ukuna u kadanshi ka̱ nu. 
N laꞋa ta̱ nkoshi m gba̱ra̱-gba̱ra̱ kuyeve, adama a na n zuwaka ta̱ n ili i kutono i nu. 
N tsu suma ta̱ kuyongo ku gbani-gbani, adama a na n tono kadanshi ka̱ nu. 
N vadalukpa ka afada a̱ nu kucina̱ ba, adama a na avu ɗa vu piꞋisakai mu. 
UyoꞋo u kadanshi ka̱ nu a̱ una̱ u va̱, u laꞋa ta̱ ishigi uyoꞋo. 
A̱ ubuta̱ wi ili i kutono i nu ɗa n ciya̱i kuyeve, adama a nannai n iwan ta̱ uye wa aꞋuwa ra̱ka̱. 
Kadanshi ka̱ nu ki ta̱ tsu ma̱kuni e ene a̱ va̱, kutashi kpamu a uye u va̱. 
N kucina ta̱ kpamu ka shamgba ta̱ a na ma kuzuwaka n afada a̱ usuɓi u nu. 
Vuzavaguɗu n takacika ta̱ ka̱u, bonoko wuma u va̱ tsu kadanshi ka̱ nu. 
Vuzavaguɗu isa ili i na n kucinakai nu piꞋisaka mu afada a̱ nu. 
A makyan dem wuma u va̱ wi ta̱ a̱ ka̱tsuma̱ ka̱ ma̱da̱ka̱, ama n cinukpa wila̱ u nu ba. 
Uma a gbani-gbani a zuwaka mu ta̱ maza, ama n katsukpa a ili i kutono i nu ba. 
Ili i na vu dansai ili yu uka̱ni i va̱ i ɗa ko wannai, ka ɗaɗa ma̱za̱nga̱ ma̱ ka̱ɗu ka̱ va̱. 
N coꞋoko ta̱ n ili i na vu dansai ko wannai. 
N iwan ta̱ uma a̱ una̱ ure, ama n ciga ta̱ wila̱ u nu. 
Avu ɗa ubuta̱ u kusheɗeku u va̱ m ma̱ra̱ga̱ ma̱ va̱, n keɗe ta̱ a̱pa̱Ꞌa̱ a kadanshi ka̱ nu. 
YaꞋin daꞋangi nu mpa a̱ɗa̱ uma a gbani-gbani, adama a na n tono kadanshi ka̱ Ka̱shile ka̱ va̱. 
Neke mu wuma tsu na vu yaꞋin kadanshi, adama a na n ciya̱ wuma, ka̱ta̱ vu ka̱sukpa̱ mu n yaꞋan wono a̱ a̱pa̱Ꞌa̱ a na n keɗei ba. 
Ka̱na̱ mu, adama a na n ciya̱ wishi. N tono ili i na vu dansai ko wannai. 
Vu iwan ta̱ aza a na a katsukpai ili i na vu dansai, adama a na ma̱ya̱nsa̱ka̱ me le gbani ɗa. 
Vu tsu vakangu ta̱ uma a gbani-gbani aduniyan ra̱ka̱ tsa̱ a̱shinda̱, ɗaɗa i zuwai ɗa n cigai kadanshi ka̱ nu. 
Ikyamba i va̱ i jeꞋe ta̱ adama o wovon u nu, kpamu mi ta̱ a kupana wovon wa afada a̱ nu. 
N yaꞋan ta̱ ili yu usuɓi m mejege, ka̱ta̱ vu ka̱sukpa̱ mu ekiye a irala i va̱ ba. 
Ka̱sukpa̱ kagbashi ka̱ nu ko yongo m ma̱ta̱na̱, ka̱ta̱ vu ka̱sukpa̱ aza a ugbamukaci o doro mu ba. 
A̱shi a̱ va̱ a̱ ga̱la̱ ta̱ a kuvana wishi u nu, n kadanshi ku usuɓi ka̱ nu. 
yaꞋanka kagbashi ka̱ nu tsu ucigi u nu u na u tsu sabaꞋa ba, vu piꞋisaka mu ili i na vu dansai. 
Mpa kagbashi ka̱ nu kaꞋa, neke mu cicoꞋo, adama a na n yeve kadanshi ka̱ nu. 
Vuzavaguɗu makyan ma yaꞋan ta̱ a na va kuyaꞋan ili, adama a na uma o koɗo ta̱ wila̱ u nu. 
Adama a na n cigai ta̱ kadanshi ka̱ nu ali u laꞋi azanariya, u laꞋi azanariya koci. 
Adama a na kpamu mi ta̱ a kuzuwaka n ili i kutono i nu mayin, n iwan ta̱ ukuna wa aꞋuwa ra̱ka̱. 
Kadanshi ka̱ nu ili i mereve i ɗa, ɗaɗa i zuwai ɗa n zuwai kadanshi ka̱ nu a̱ ka̱ɗu ka̱ va̱. 
Ku utuka̱ kadanshi ka̱ nu e keteshe ku tsu neke ta̱ kutashi, ku tsu neke ta̱ kuyeve u vuza na wi n kuyeve ba. 
M apukai una̱ u va̱ ka̱u, n ka̱na̱i ayinviki gaɗi-gaɗi, adama a ucigi u kadanshi ka̱ nu. 
Kpatala wa̱ va̱ vu yaꞋanka mu kasingai, tsu na wu untsukai vu yaꞋanka aza a na a cigai kula ku nu. 
Tono nu nwalu n va̱ tsu na vi yaꞋin kadanshi, ka̱ta̱ vu ka̱sukpa̱ ka gbani-gbani ka̱ ciya̱ mu ba. 
Shiba̱ mu ekiye aza o modoruko, ka̱ta̱ n zuwaka n ili i kutono i nu. 
YaꞋan kutashi ku nu ku akana a̱shi a kagbashi ka̱ nu, ka̱ta̱ vu piꞋisaka mu ili i na vu dansai. 
Kujilya a̱ kutsuwa̱n a̱ a̱shi a̱ va̱ tsu mini, adama a na uma o tono wila̱ u nu ba. 
Vuzavaguɗu, avu vuza vu usuɓi ɗa, afada a̱ nu kpamu i ta̱ mejege. 
Kadanshi ka na vu nekei ra̱ka̱, ku usuɓi kaꞋa, kpamu ili i kuzuwaka katsura kaꞋa. 
Mali ma̱ va̱ wa̱ nu ma takacika mu ta̱, adama a na irala i va̱ i iwan ta̱ kadanshi ka̱ nu. 
O kondo ta̱ kadanshi ka̱ nu mayin, kpamu mpa kagbashi ka̱ nu n ciga ta̱ kaꞋa. 
Mpa ili i yoku i ɗa ba, ili i kugoyi, ama n cinukpa n ili i kutono i nu ba. 
Usuɓi u nu, usuɓi u ɗa ko wannai, wila̱ u nu mayun ɗa ayin dem. 
Mi ta̱ n atakaci n una̱mgbuka̱tsuma̱, ama kadanshi ka̱ nu ke ci neke mu ta̱ ma̱za̱nga̱ a̱ ka̱ɗu. 
Kadanshi ka̱ nu ki ta̱ mejege ko wannai, ke ci neke mu ta̱ kuyeve adama a na n ciya̱ wuma. 
Vuzavaguɗu, ushuku mu n ka̱ɗu ka̱ va̱ kaꞋa ra̱ka̱ mi a̱ ma̱shi, mi ta̱ o kutono ili i na vu dansai. 
Mi ta̱ e meɗevile wa̱ nu, wawa mu! Ka̱ta̱ n tono kadanshi ka̱ nu. 
Kafu kayin ka asa n shika̱ ta̱ a̱ kula̱nsa̱ uɓa̱nki n keɗe ta̱ a̱pa̱Ꞌa̱ a kadanshi ka̱ nu. 
Kayin ra̱ka̱ n lata ba, e kusheshe a ukuna wu uzuwakpani u Vuzavaguɗu. 
Pana ka̱la̱ka̱tsu ka̱ va̱ adama a ucigi u nu u na u tsu sabaꞋa ba, ere wuma u va̱ tsu afada a̱ nu. 
Aza a gbani-gbani a na a takacikai mu, a yawa ta̱ ɗevu, uma a na i daꞋangi n wila̱ u nu. 
Ama avu Vuzavaguɗu, vi ta̱ ɗevu, kadanshi ka̱ nu kpamu mayun ɗa. 
Ali n cau ɗa n yevei a kadanshi ka̱ nu, vu zuwa ta̱ kaꞋa ko wannai. 
Indana atakaci a̱ va̱ ka̱ta̱ vu isa mu, adama a na n cinukpa n wila̱ u nu ba. 
Shamkpa mu ka̱ta̱ vu shiba̱ mu, ere mu tsu na vu dansai. 
Wishi wi ta̱ daꞋin n aza agbani-gbani, adama a na a̱ la̱nsa̱ e yeve ili i na vu dansai ba. 
Vuzavaguɗu, asuvayali a̱ nu a gbayin a ɗa, ere wuma u va̱ tsu afada a̱ nu. 
Irala i na yi a kutakacika mu, i ta̱ n a̱bunda̱i, ama n katsukpa kadanshi ka̱ nu ba. 
Mi indai aza a kavama ɗa m panai unata u le, adama a na o tono kadanshi ka̱ nu ba. 
Vuzavaguɗu la̱na̱ tsu na n cigai ili i kutono i nu, ere wuma u va̱ tsu ucigi u nu u na u tsu sabaꞋa ba. 
Kadanshi ka̱ nu ra̱ka̱ mayun ɗa, afada a usuɓi a̱ nu ko wannai ɗa. 
Aza o tsugono a kutakacika mu ko unushi, ama ka̱ɗu ka̱ va̱ ki ta̱ o wovon u kadanshi ka̱ nu. 
Mi ta̱ a̱ ma̱za̱nga̱ n a̱bunda̱i n kadanshi ka̱ nu, tsu vuza na u ciya̱i ucanuku u gbani n a̱bunda̱i. 
N kovo ta̱ aza aꞋuwa, kpamu n tsu pana ta̱ unata u le, ama n ciga ta̱ wila̱ u nu. 
A kanna lakam n ci cikpa wu ta̱ kucindere, adama afada a usuɓi u nu. 
Aza a na a cigai wila̱ u nu a̱ ciya̱ ta̱ ida̱shi i ma̱ta̱na̱ ka̱u, kpamu ko ili yi lo a kuzuwa le a̱ ta̱ɗa̱tsa̱ ba. 
vuzavaguɗu, mi ta̱ a kuvana wishi u nu, mi ta̱ o kutono kadanshi ka̱ nu. 
N tono ta̱ kadanshi ka̱ nu, n ciga ta̱ kaꞋa n ka̱ɗu ke te. 
N zuwaka ta̱ n ili i kutono i nu n kadanshi ka̱ nu, adama a na vu yeve ta̱ ili i na mi a kuyaꞋan ra̱ka̱. 
Vuzavaguɗu, yaꞋan ma̱shi ma̱ va̱ ma yawa wa̱ nu neke mu kuyeve tsu na vu dansai 
YaꞋan ufolu u va̱ u ta̱wa̱ wa̱ nu, isa mu tsu na vu yaꞋin kadanshi. 
YaꞋan nla̱ba̱ ma̱ una̱ u va̱ u cikpa wu, adama a na vu piꞋisaka mu ili i na vu dansai. 
YaꞋan kelentsu ka̱ va̱ ka canana kadanshi ka̱ nu, adama a na kadanshi ka̱ nu ra̱ka̱ ku usuɓi kaꞋa. 
YaꞋan kukiye ku nu kuyongo ufoɓushi kuɓa̱nka̱ mu, adama a na n zagba ta̱ ili i kutono i nu. 
Vuzavaguɗu, mi ta̱ a mali ma wishi u nu, n ci ciya̱ ta̱ ma̱za̱nga̱ n wila̱ u nu. 
Ka̱sukpa̱ mu n wuma, adama a na n cikpa wu, kpamu yaꞋan afada a̱ nu a̱ ɓa̱nka̱ mu. 
M puwa̱nka̱ ta̱ tsu mokyon ma na ma̱ puwa̱nka̱i. La̱nsa̱ kagbashi ka̱ nu adama a na n cinukpa n kadanshi ka̱ nu ba. 
