﻿Ishipa.
105.
Cikpai Vuzavaguɗu, ɗekei kula ku ni, salai ukuna wu ulinga u ni, a kumaci ku uduniyan dem. 
YaꞋankai ni ishipa, yaꞋankai ni ishipa yu ucikpi. dansai ukuna wu ulinga u mereve u na u yaꞋin ra̱ka̱. 
YaꞋin ma̱za̱nga̱ adama a kula ku ciɗa ku ni, yaꞋan a̱ɗu a aza a na a̱ la̱nsa̱i, Vuzavaguɗu a yaꞋan ma̱za̱nga̱. 
Zuwai a̱ɗu a̱ ɗa̱ u Vuzavaguɗu, n utsura u ni, la̱nsa̱i a̱shi a̱ ni a makyan dem. 
Ciɓai n ulinga u mereve u ni, nu urotu u mereve u ni, n afada a na u kiɗai, ɗa u dansai n una̱ u ni, 
a̱ɗa̱ ntsukaya n kagbashi ka̱ ni Ibirahi, a̱ɗa̱ muku n Yakubu nzagbi n ni. 
A̱yi ɗa Vuzavaguɗu Ka̱shile ka̱ tsu, afada a̱ ni i ta̱ a ubuta̱ dem aduniyan. 
U tsu ciɓa ta̱ n uzuwakpani u ni u ko wannai, kadanshi ka na vu nekei, a kubana tsukaya a̱kpa̱n, 
uzuwakpani u na u yaꞋin n Ibirahi, akucina a̱ ni a na u yaꞋan n Ishaku, 
u na u dansai u Yakubu mayun ɗa, uzuwakpani wa aza a Isaraila ko wannai, 
u danai,<<Wa̱ a̱ nu ɗa n ku neke iɗika ya aza a KanaꞋana, yo okpo ubuta̱ wu uka̱ni u ɗa̱.>> 
A ayin a na biꞋi i kenu, kenu gbani, kpamu omoci a ɗa a iɗika ya, 
a̱ ka̱ka̱ra̱sa̱ a iɗika-iɗika, o tsugono tsu nampa a kubana tsu nanɗe, 
u ka̱sukpa̱ aza o yoku o doro le ba, kpamu ɗa u ɓarangi ngono adama e le, 
a kudana <<Ka̱ta̱ i saꞋwa nzagbi n va̱ ba, ka̱ta̱ kpamu i uka eneki a̱va̱ muna ba.>> 
U tuka̱i n kambulu a iɗika ya, ɗa u la̱nga̱sa̱i ubuta̱ u kuciya̱ ilikulyaꞋa dem, 
ɗa u suki vuza e kelime ke le, Isufu vu na e dengei tsu kagbashi. 
A̱yi na a shiyai ene a̱ ni n ikani, kuɗeku ku ni kpamu m kogboro ka̱ viyum, 
ali makyan ma na kene ku na a yaꞋin a kaci ka̱ ni ku shanai, ali kadanshi ka Vuzavaguɗu ko yotsongi ili i na u dansai va mayun ɗa. 
Mogono ma̱ suki a̱ ka̱sukpa̱ yi, vuza vu tsugono tsu aduniyan wu uta̱ka̱ ni. 
Ɗa u zuwai ni wo okpo Vuzagbayin vu kpaꞋa ku ni, u bonokoi ni vuza kula̱na̱ ucanuku u kpaꞋa ku ni dem, 
adama a na u ɓarangu aza o tsugono a̱ likuci, tsu na u cikalai, ka̱ta̱ kpamu u piꞋisaka nkoshi m gba̱ra̱-gba̱ra̱ kuyeve. 
Ɗa Isaraila u uwai a Masar, Yakubu tamkpamu u da̱sa̱ngi limoci a iɗika i Ham. 
Vuzavaguɗu u zuwai, uma a̱ ni a matsasakai n ka̱bunda̱i, u zuwai a laꞋa irala i le utsura. 
Ɗa Vuzavaguɗu u sabaꞋi a̱ɗu a irala i le, a iwan uma a̱ ni, e sheshei ka gbani-gbani adama e le. 
U suki kagbashi ka̱ ni Musa, n Haruna aza na u zagbai. 
A yaꞋansai ukuna u gbagbaꞋin e kelime ke le, a yaꞋin ili i mereve a iɗika i Ham. 
U suki n ka̱yimbi, ɗa tana a yaꞋin ka̱yimbi a iɗika ya, adama a na aza a Masar, a yaꞋan ta̱ ugbamiwasuvu n kadanshi ka̱ ni. 
U bonokoi mini me le mpasa, u zuwai adan e le a̱ kuwa̱i. 
Iɗika i le i shanai n opoɗo, ali a uwai anunu a ku asa o ngono n le. 
U yaꞋin kadanshi ɗa ka̱kuma̱ ka ayun ka̱ ta̱wa̱i, ɗa nkulaꞋin n shanai a iɗika ya. 
U yoꞋokoi le mini ma atali, a na wo yoꞋokoi le m mini ma gaɗi, n ulaɗi u na wu akanai iɗika i le ra̱ka̱, 
ɗa ma lapai ashina a itacishi, nu nɗanga n zaitu n le, ɗa o koɗosoi nɗanga mi iɗika n le, 
U yaꞋin kadanshi ɗa ka̱kuma̱ ka akyun ku uta̱i, nta̱ɗa̱ma̱ci a na a laꞋi kukece. 
A takumai ica̱Ꞌa̱shi yi iɗika i le ra̱ka̱, a takumai ili ya ashina e le dem. 
Ɗa u lapai muku mu ugiti mi iɗika n le ra̱ka̱, muku mu ugiti mu utsura u le, 
Wu uta̱ka̱i n aza a Isaraila tukpa n azanariya n azurufa, ko vuza te a kumaci ku le u ta̱ɗa̱tsa̱ ba. 
Aza a Masar a yaꞋin, ma̱za̱nga̱ n wu uta̱i u le, adama a na i ta̱ a kupana wovon wa aza a Isaraila ka̱u. 
U zuwai keleshu n kanna, adama a na u neke le kulu, akina kpamu n kayin adama a na u neke le kutashi. 
O folonoi ɗa u nekei le nroni, ɗa kpamu u nekei le ilikulyaꞋa i gaɗi, a lyaꞋi a̱ cuwa̱i. 
U ka̱ga̱lukpa̱i katali ɗa mini mu uta̱i, ɗa me yenei a kakamba tsu kuyene. 
Adama a na u ciɓa ta̱, n uzuwakpani u ciɗa u ni, u na u yaꞋankai kagbashi ka̱ ni Ibirahi, 
Wu utuka̱i uma a̱ ni m ma̱za̱nga̱, nzagbi n ni kpamu n ishipa i ma̱za̱nga̱. 
Ɗa u nekei le iɗika ya aza a KanaꞋana, ɗa u ka̱sukpa̱i le a lyaꞋa ili yu uka̱ni i le, 
adama a na o tono wila̱ u ni, ka̱ta̱ kpamu o tono, kuyotsongusu ku ni. Cikpai Vuzavaguɗu. 
