﻿Ishipa.
96.
Cananai ishipa i savu u Vuzavaguɗu, cananai ishipa u Vuzavaguɗu aduniyan ra̱ka̱. 
Cananai ishipa u Vuzavaguɗu, cikpai kula ku ni, i sala ukuna u wishi u ni kanna lakam. 
Salai tsugbayin ci ni a̱ ka̱tsuma̱ ku uduniyan, n ulinga wi ili i mereve i na u yaꞋin a̱ ubuta̱ u uma ra̱ka̱. 
Adama a na Vuzavaguɗu vuza tsugbayin ɗa, mayun ɗa a cikpa yi, mayun ɗa kpamu a laꞋa n kupana wovon u ni n a̱ma̱li ra̱ka̱. 
Adama a na a̱ma̱li aduniyan ra̱ka̱ ili i gbani ɗa, ama Vuzavaguɗu a̱yi ɗa u yaꞋin gaɗi. 
Ucikpi n tsugbayin ci ta̱ uka̱ra̱Ꞌi n a̱yi, utsura n ugaꞋin u shana ta̱ ubuta̱ wu ida̱shi i ciɗa i ni. 
Nekei Vuzavaguɗu tsugbayin, a̱ɗa̱ uma aduniyan ra̱ka̱, cikpai Vuzavaguɗu adama a tsugbayin n utsura u ni. 
Nekei kula ku Vuzavaguɗu tsugbayin, tuka̱i n kuneꞋe, i uwa punu a ulanga u kpaꞋa ku ni, 
i kuɗa̱ngu e kelime ka Vuzavaguɗu n ugaꞋin u ciɗa u ni, i jeꞋeke ikyamba e kelime ka̱ ni a̱ɗa̱ aduniyan ra̱ka̱. 
Dansai a̱ ka̱tsuma̱ ku uduniyan, <<Vuzavaguɗu wi ta̱ o tsugono, aduniyan a shamgba ta̱ mayin, i a̱ ku gba̱ɗa̱ ba, wi ta̱ a kuyaꞋanka uma afada derere.>> 
YaꞋan gaɗi u yaꞋan ma̱za̱nga̱, ka̱ta̱ iɗika i yaꞋan ma̱za̱nga̱ feu, yaꞋan mala ma yaꞋan yura̱ n ili i na yi punu ra̱ka̱. 
YaꞋan a̱pula̱ka̱ a yaꞋan ma̱za̱nga̱ n ili i na yi punu ra̱ka̱, yaꞋan nɗanga n kutsun ra̱ka̱ n yaꞋan ishipa i ma̱za̱nga̱, 
e kelime ka Vuzavaguɗu, adama a na wi ta̱ a̱ kuta̱wa̱, wi ta̱ a̱ kuta̱wa̱ u yaꞋanka aduniyan afada, wi ta̱ a kuyaꞋanka aduniyan afada a usuɓi, n kuyaꞋan ka afada e mejege u uma ra̱ka̱. 
