﻿Ishipa.
92.
Vishipa. Adama a kanna ka Ashibi Ili singai i ɗa a cikpa Vuzavaguɗu, a canana ishipa a kula ku Ka̱shile MalaꞋimili. 
Ili i singai i ɗa a sala ucigi u nu u na u tsu sabaꞋa ba n usana, ma̱riki ma̱ nu n kayin 
n ili yi iwashi yi umolu, n ka̱la̱ka̱tsu ku umolu ku ugaꞋin. 
Vuzavaguɗu, ulinga u gbayin u nu u tsu zuwa mu ta̱ ma̱za̱nga̱ ka̱u, adama ili i na vu yaꞋin, mi ta̱ ishipa i ma̱za̱nga̱. 
Vuzavaguɗu, n yiɗa̱i a kugisanku ulinga u gbayin u nu, kusheshe ku nu ki ta̱ n atakaci e kuyeve. 
Ili i yoku i ɗa na i na kalau ki e kuyeve ba, kpamu ka̱ta̱m ki a kufuɗa ku zuwaka ba, 
a na wo okpoi aza asuvawuya i ta̱ o kugbonguro tsu mita̱, aza a na i a kuyaꞋan ka gbani-gbani a̱ kuciya̱ uciyi, n nannai dem i ta̱ a ku una le ra̱ka̱-ra̱ka̱. 
Adama a na avu, Vuzavaguɗu ɗa MalaꞋimili ko wannai. 
Mayun, Vuzavaguɗu, irala i nu yi ta̱ a̱ ku kuwa̱, i ta̱ a ku kuwacuwa aza a kuyaꞋan ka gbani-gbani. 
Vu zuwai mu n tsurukpai tsu kanama, vu zuwakai mu una̱singai m ma̱za̱nga̱. 
A̱shi a̱ va̱ ene ta̱ tsu na irala i va̱ i yikpa̱i, m pana ta̱ ma̱shi ma uma a gbani-gbani. 
Aza a usuɓi i ta̱ o kutopo tsu nshuwa, o kugbonguro tsu nɗanga n sida a Lebano, 
n na a̱ shikpa̱i a kpaꞋa ku Vuzavaguɗu, i ta̱ a kulyaꞋa kelime a kpaꞋa ku Ka̱shile ka̱ tsu. 
Aza a na i a kumatsa n tsukutsa ci le, makyan dem i ta̱ o kuyongo n kuta̱nu n tsuloboi. 
A kusala Vuzavaguɗu wi ta̱ n usuɓi, a̱yi na wi e kere mu wi n unushi ba. 
