﻿Ishipa.
89.
VicuꞋu vu tsuwaꞋi tsu Itan vuza va aza a Ezirahitu Mi ta̱ a kucanana ishipa adama a ucigi u Vuzavaguɗu u na u tsu sabaꞋa ba ko wannai. Mi ta̱ a kusala ukuna u ma̱riki ma̱ nu, tsukaya a kubana a tsukaya 
Mi ta̱ a kudana, <<Ucigi u nu u na u tsu sabaꞋa ba wi ta̱ o kuyongo ko wannai, ma̱riki ma̱ nu mi ta̱ o kuyongo tsu gaɗi a̱da̱nga̱shile.>> 
Vu danai, <<N yaꞋan ta̱ uzuwakpani m mazagbi ma̱ va̱, n yaꞋanka ta̱ kagbashi ka̱ va̱ Dawuda uzuwakpani n danai, 
<A ntsukaya u nu n ɗa a̱ kuciya̱ mogono ko wannai, i ta̱ a̱ kuda̱sa̱ngu a kakuba ko tsugono ka̱ nu tsukaya n tsukaya.> >> Kuvuka 
Vuzavaguɗu, ili wuma i gaɗi yi ta̱ a kucikpa ili i mereve i na vu yaꞋin, koɓolo ka uma a ciɗa feu, a kucikpa ma̱riki ma̱ nu. 
Adama a na ɗe e eleshu yayi a kugisanku n Vuzavagɗu, yayi wi tsu Vuzavaguɗu a̱ ka̱tsuma̱ ki ili wuma i gaɗi? 
I ta̱ e kuneke wu tsugbayin a̱ ka̱tsuma̱ ki ili i wuma i ciɗa, aza a na i uka̱ra̱Ꞌi n avu i ta̱ o wovon u nu ka̱u. 
Vuzavaguɗu Ka̱shile, MalaꞋimili, babu vuza vu utsura tsu nu, avu vuza vu ma̱riki ɗa a ili dem. 
Avu ɗa vu tsu lyaꞋa tsugono tsu mala ma ujari, vu tsu vaꞋanku ta̱ aɓau. 
Vu yokumoi ka̱ma̱li ka ugbamukaci ka nanlo vu unai ni, n utsura u kukiye ku nu ɗa vu wacuwai irala i nu. 
Gaɗi a̱da̱nga̱shile a̱ nu a ɗa, aduniyan feu a̱ nu a ɗa, avu ɗa vu yaꞋin aduniyan n ili i na yi punu dem. 
Avu ɗa vu yaꞋin uɓongaɗi n uɓonɗakai, kusan ku Taboru n Hamonu i ta̱ a kuyaꞋanka wu ishipa adama a̱ ma̱za̱nga̱. 
Kukiye ku nu ki ta̱ n tsugbayin, kukiye ku usingai ku nu kpamu ki ta̱ n utsura. 
Usuɓi n kamayun kaꞋa kumiꞋi ku kakuba ko tsugono ka̱ nu, ucigi u nu u na u tsu sabaꞋa ba m ma̱riki i ta̱ e kelime ka̱ nu. 
Vuzavaguɗu, aza a una̱singai a ɗa aza a na i a kucikpa wu n ishipa i ma̱za̱nga̱, aza a na i a nwalu a kutashi ku nu. 
I ta̱ a̱ ma̱za̱nga̱ a kanna dem adama a̱ nu, i a̱ kuciya̱ ucikpi adama a usuɓi u nu. 
Adama a na avu ɗa tsugbayin ci le n utsura u le, n kasingai ka̱ nu kaꞋa ci ciya̱i ucikpi. 
Adama a na mayun Vuzavaguɗu ɗa ma̱ra̱ga̱ ma̱ tsu, mogono ma̱ tsu a̱yi ɗa vuza ciɗa vi Isaraila, 
Vu saꞋwa ta̱ kuyaꞋan kadanshi tsa alatani u uma a̱ nu a usuɓi m makyan ɗe, vu danai,<<N neke ta̱ kovonshi utsura vuza na n ɗa̱ngusa̱i a̱ ka̱tsuma̱ ka uma. 
N ciya̱ ta̱ Dawuda kagbashi ka̱ va̱, me erengi ta̱ m maniꞋin ma ciɗa, 
Utsura u va̱ wi ta̱ o kuyongo n a̱yi, kukiye ku va̱ ki ta̱ a ku zuwa yi u tsurukpa. 
Vurala vu ni vi a kusaꞋwa kulyaꞋa yi ba, uma a gbani-gbani i o kuloko yi ba. 
A̱ a̱shi a̱ ni mi ta̱ o ku yokumo irala i ni, mu una aza a na a iwain ni. 
Ukuna u ma̱riki u va̱ n ucigi u va̱ u na u tsu sabaꞋa ba wi ta̱ o kuyongo n a̱yi, mi ta̱ a ku zuwa yi u ciya̱ ulyaꞋi. 
Mi ta̱ a kuzuwa tsugono ci ni ci lyaꞋa kelime, ili i na i ɗikai a mala, ali a kubana e kuyene ku Ifiritis. 
Dawuda wi ta̱ a kudana mu,<Avu esheku a̱ va̱ a ɗa n Ka̱shile ka̱ va̱ avu ɗa vi e ku ere mu avu ɗa ubuta̱ u kusheɗeku u va̱ n kishi ka̱ va̱.> 
Mi ta̱ o kubonoko yi maku mu ugiti ma̱ va̱, vuza na u laꞋi ngono ma aduniyan m gbayin. 
Ucigi u va̱ u na u tsu sabaꞋa ba wi o kuyongo n a̱yi ko wannai, uzuwakpani u na n yaꞋin n a̱yi wi ta̱ a kushamgba ko wannai. 
A ntsukaya n ni ɗa a̱ kuciya̱ mogono makyan dem, tsugono ci ni ci ta̱ a kushamgba tsa eleshu a gaɗi. 
Ama ɗa baci muku n ni n kpa̱ɗa̱i kutono wila̱ u va̱, kpamu o tono ili i na n dansai ba, 
Ɗa baci a̱ ka̱sukpa̱i wila̱ u kadanshi, a̱ kpa̱ɗa̱i kutono uneki u kadanshi ka̱ va̱, 
mi ta̱ a kutakacika le adama a unushi u le, n faba le adama a kawuya ke le. 
Ama mi a̱ kukpa̱ɗa̱ ku ciga Dawuda ba, mi tana a̱ kukpa̱ɗa̱ kushatangu uzuwakpani u na n yaꞋanka ni ba. 
Mi o ku koɗo uzuwakpani u na n yaꞋanka ni ba, mi tana a̱ ku sabaꞋa ko ili i te a kadanshi ku una̱ ka̱ va̱ ba. 
N kula ku ciɗa ku va̱ ɗa n yaꞋin a kucina kute koci, mi a kuyaꞋanka Dawuda aꞋuwa ba. 
Ntsukaya n ni mi ta̱ o kuyongo ko wannai, mi ta̱ a̱ kula̱na̱ tsugono ci ni kanna ki baci de n kutashi. 
Ki ta̱ a kushamgba n utsura tsu wotoi, tsu magan mu usuɓi ma na mi gaɗi.>> Kuvuka 
Ama gogo na vu yaꞋan ta̱ wupa m mazagbi ma̱ nu, vu iwain ni ɗa vu variki ni. 
Vu koɗoi uzuwakpani u na vu yaꞋin n kagbashi ka̱ nu, vu variki oroliko a̱ ni a̱ ka̱kiza̱. 
Vu ɓosoi asaka a̱ likuci i ni, vu bonokoi ubuta̱ u kusheɗeku u ni agali. 
Aza a na i a nwalu a uye i ta̱ o kuboko ucanuku u ni, aza a na i a̱ ida̱shi ɗeɗevu n a̱yi o ku zoꞋoso yi. 
Vu zuwai irala i ni i lyaꞋi kelime, vu zuwai ra̱ka̱ vu le a yaꞋin ma̱za̱nga̱. 
Vu zuwai ucanuku u kuvon u ni wo okpoi ili i gbani, vu ka̱sukpa̱i a lyaꞋi ni n kuvon. 
Vu isai ni kalangu ko tsugono ci ni, vu lapai kakuba ko tsugono ci ni a iɗika. 
Vu zuwai ni u kutsai babu ayin a̱ ni a yawa, vu zuwai wono u kimba̱i ni. Kuvuka 
Vuzavaguɗu, ali n wannai ɗai va ku sokongu ka̱ci ka̱ nu? Ko wannai ɗa? Ali n wannai ɗa̱i ka̱ɗu ka̱ nu ka̱ kuka̱na̱ ku kula̱ tsa akina? 
Vuzavaguɗu, ciɓa a na ayin a vuma kenu ɗa a ɗa i, ciɓa tsu na vu yaꞋin vuma dem vuza vu ukpa̱ ɗa, 
Yayi u kuyongo n wuma ko wannai, u ku kuwa̱ ba? Nini ɗai vuma u kusa̱nka̱ ka̱ci ka̱ ni ku uwa a kasaun? Kuvuka 
Vuzavaguɗu te ɗai ucigi u nu u tsu sabaꞋa ba u cau? Te ɗai uzuwakpani u nu u na vu yaꞋankai Dawuda? 
Vuzavaguɗu, ka̱ta̱ vu cinukpa tsu na a shikusai mu ba, mpa kagbashi ka̱ nu, n tsu na n ka̱na̱i ka̱ɗu n kawuya ka na uma i a kuyaꞋanka mu, 
Vuzavaguɗu, ka̱ta̱ vu cinukpa tsu na irala i nu yi o ku zoꞋoso mogono ma na vu erengi ba, a̱ ka̱na̱i ku shika yi a̱ ubuta̱ u na u banai dem. 
Tsu cikpai Vuzavaguɗu ko wannai, Tananai! Tananai. 
