﻿Ishipa.
88.
Kadanshi a kubana u vuza vu kelime vi ishipa: Vishipa vu muku n Kora. A yaꞋan vu ɗa n ka̱la̱ka̱tsu ka Leyonotu.VicuꞋu vu tsuwaꞋi tsu Heman vuza vu aza a Ezirahitu Vuzavaguɗu Ka̱shile, vuza na u wawai mu, kanna n kayin mpa a̱ ma̱shi wa̱ nu, 
YaꞋan avasa a̱ va̱ a̱ ta̱wa̱ wa̱ nu, zuwa atsuvu vu pana ma̱shi ma̱ va̱. 
Wuma u va̱ wi ta̱ tukpa n atakaci, ali mi ɗevu n ukpa̱. 
E kece mu ta̱ a̱ ka̱tsuma̱ ka aza a na a̱ gida̱la̱i e kpenle ku ukpa̱ mo okpoi tsu vuza na wi n utsura ba, 
A variki mu a̱ ubuta̱ wa̱ a̱kpisa̱, tsa aza a na unai, punu a ivaꞋin asaun e le, aza a na vu cinukpai n e le, aza a na a buwai n u uɓa̱nki u nu ba. 
Vu taɗuku mu ta̱ a kasaun ku uga̱vi, m kpenle ku uga̱vi ku ka̱yimbi. 
Vi ta̱ a wupa nu mpa ka̱u, vu vita̱la̱sa̱i mu n aɓau a mala. Kuvuka 
Vu zuwai a̱ja̱Ꞌa̱ a̱ va̱ a variki mu, vu zuwai e pecei mu kau, mo okpoi a ukanji babu tsu na n kulaꞋaka. 
A̱shi a̱ va̱ a̱ ga̱la̱i adama a una̱mgbuka̱tsuma̱. Vuzavaguɗu kanna dem mi ta̱ e kuɗekushe wu, n tsu ɗa̱ngusa̱ ta̱ ekiye a̱ va̱ wa̱ nu avasa. 
Vu tsu yaꞋanka ta̱ a̱kpisa̱ ili i mereve? A̱kpisa̱ a̱ tsu ɗa̱nga̱ ta̱ a cikpa wu? Kuvuka 
A ci yaꞋan ta̱ kadanshi ka ucigi u nu u na u tsu sabaꞋa ba a kasaun? Ko ma̱riki ma̱ nu a̱ ubuta̱ wa aza a na a unai. 
I ta̱ e kene ili i mereve i nu a̱ ka̱yimbi? Ko ukuna wu usuɓi u nu a̱ ubuta̱ wa̱ a̱kpisa̱. 
Ama Vuzavaguɗu mi ta̱ e meɗevile a̱ kula̱nsa̱ uɓa̱nki, n usana n ci yaꞋan ta̱ avasa a kubana wa̱ nu. 
Vuzavaguɗu, yiɗa̱i i zuwai ɗa vu variki mu? Yiɗa̱i i zuwai ɗa vu sokongu ki mu a̱shi a̱ nu? 
Ili i na i ɗikai mpa kenu ɗa mi atakaci, ali a kubana ɗevu n ukpa̱, ɗa n togbolyoi adama atakaci a̱ nu. 
Wupa u nu u lyaꞋa mu ta̱ tsu na mini ma tsu aya, uɓarangi u nu wu una mu ta̱. 
Kanna ka̱ɓula̱ a̱ ka̱ra̱Ꞌi mu tsu mini, a kanza mu ta̱ a̱ ubuta̱ dem. 
Vu zuwai a̱ja̱Ꞌa̱ va̱ n aza a na a cigai mu a iwain mu, ka̱yimbi kaꞋa koci ko okpoi ka̱ja̱Ꞌa̱ ka̱ va̱. 
