﻿Ishipa.
83.
Vishipa vu Asafa. Ka̱shile, ka̱ta̱ vu paɗa bini, vu shamgba gbaɓa ba, Ka̱shile ka̱ta̱ vu kpa̱ɗa̱ kukeɓece ukuna ba. 
Inda, tsu na irala i nu yi a̱ra̱ɗi, la̱na̱, tsu na i a ugbamukaci. 
A nsata adama a uma a̱ nu, a gbaɓai aci e le a yaꞋan tsurala n uma a na vi a kinda. 
Aza a ugbamukaci a kudansa, <<Ta̱wa̱i tsu una aza a Isaraila, adama a na a cinukpa n ele ko wannai.>> 
N ka̱ɗu kete kaꞋa e sheshei, a gbaɓai kaci a kuyaꞋan tsurala n avu. 
Ele ɗa aza a Edom n aza a IshimaꞋilu, n aza a Mowabu, n aza a Haga, 
n aza a Gebalu n aza a Amona n aza a Ameleki n aza a Filisitiya n aza a Taya, 
Asiriya feu o ɓolongi kaci n ele, o doki kumaci ku Lotu utsura. Kuvuka 
YaꞋanka le tsu na vu yaꞋankai aza a Midiya, yaꞋanka le tsu na vu yaꞋankai Sisera, n Jabinu e kuyene ku Kishon, 
a̱ kuwa̱i a Eni-doru, even a ikyamba e le a shamai a iɗika. 
YaꞋanka aza e kelime e le tsu na vu yaꞋankai Orebu n Zeyibu, vu lokoi aza o tsugono e le tsu na vu lokoi Zeba n Zalumuna, 
a danai, <<Ci ta̱ a ku isa iɗika i na yi i Ka̱shile yi okpo i tsu.>> 
Ka̱shile ka̱ va̱, loko le tsu wunla̱i u kabatalikpau, vu loko le tsu na wunla̱i u tsu pura̱ngu kopo. 
Tsu na akina a ci lyaꞋa kutsun, tsu na kpamu melentsu ma akina me ci leɓece nsasan, 
Vu loko le n wunla̱i wu utsura u nu, vu rikpa̱sa̱ le n kabatalikpau ka utsura. 
Vuzavaguɗu zuwa le okpo n wono, adama a na a̱ la̱nsa̱ kula ku ni. 
YaꞋan okpo n wono ko wannai, yaꞋan a bana ukpa̱ u wono, 
Adama a na e yeve a na avu ɗa koci, Vuzavaguɗu, avu ɗa koci MalaꞋimili aduniyan ra̱ka̱. 
