﻿Ishipa.
79.
Vishipa vu Asafa. Ka̱shile, uduniyan u tuka̱ ta̱, uma a̱ nu n kuvon, a natukpai A̱Ꞌisa̱ a gbayin a ciɗa a̱ nu, o bonokoi Urushelima agali. 
A̱ ka̱sukpa̱i even a ikyamba ya agbashi a̱ nu, o okpo ilikulyaꞋa yi nnu, inyama i uma a ciɗa a̱ nu, okpoi ilikulyaꞋa yi nnama n kakamba. 
A̱ tsuwa̱in mpasa n uma a̱ nu tsu mini, a̱ ubuta̱ ra̱ka̱ a Urushelima, ko vuza u buwa a na wa̱ ciɗa̱ngu even a ikyamba a ba. 
Tsu okpoi ili i ma̱ka̱n, wa aza a na i a ida̱shi ɗeɗevu n a̱tsu, tsu okpoi ili yi izoshi n ulami, wa aza a na i uka̱ra̱Ꞌi n a̱tsu. 
Vuzavaguɗu ali n wannai ɗai, vu kulyaꞋa ta̱ kelime n wupa ko wannai ɗa? Ali n wannai ɗai, wupa u nu u kuka̱na̱ ku kula̱ tsa akina? 
Vu tsuwa̱n wupa u nu, a uduniyan u na u kpa̱ɗa̱i ku cikpa wu, N tsugono dem, tsu na tsu kpa̱ɗa̱i kuɗeke kula ku nu. 
Adama a na a lyaꞋa ta̱ Yakubu, a̱ la̱nga̱sa̱i iɗika i ni. 
Ka̱ta̱ vu takacika tsu, adama unushi wi ikaya i tsu ba, ama vu pana asuvayali a̱ tsu, adama a na tsu takpa ta̱ asuvu a̱ tsu. 
Vu ɓa̱nka̱ tsu, Ka̱shile kishi ka̱ tsu, adama a tsugbayin tsu kula ku nu, isa tsu ka̱ta̱ vu cinukpaka tsu unushi u tsu, adama a kula ku nu. 
Adama a̱ yiɗa̱i ɗa uduniyan u ku dana, <<Te ɗai Ka̱shile ke le?>> YaꞋan tsu ene tsu na va kutakacika uduniyan, adama a na vu tsupa mpasa ma agbashi a̱ nu n na a̱ tsuwa̱in. 
Zuwa atsuvu vu pana, yura̱ ya aza a na i ushiyi, n kukiye ku utsura ku nu, vu wawa aza a na a kiɗakai afada a̱ ukpa̱. 
Vuzavaguɗu tsupa, uduniyan u nanlo ali kucindere, adama a kadanshi ka ishikushi ka na a yaꞋankai nu. 
A̱tsu na ci uma a̱ nu, nkyon mu ushiga u nu, ci ta̱ a kucikpa wu ko wannai. Tsukaya a kubana a tsukaya, ci ta̱ a kucikpa wu. 
