﻿Ishipa.
77.
Kadanshi a kubana u vuza vu kelime vi ishipa: A yaꞋan vu ɗa n ka̱la̱ka̱tsu ka Jedutun. Vishipa vu Asafa. N shika̱i n ka̱la̱ka̱tsu ka̱u u Ka̱shile, n ɗengusa̱i ka̱la̱ka̱tsu ka̱u n shika̱i, adama a na u panaka mu. 
A makyan ma atakaci n tsu vasa ta̱ u Vuzavaguɗu, kayin dem n tsu ɗengusa̱ ta̱, ekiye a̱ va̱ gaɗi n yaꞋan a avasa, ama ka̱ɗu ka̱ va̱ ka̱ ciya̱ ma̱ta̱na̱ ba. 
Makyan ma na n ciɓai n Ka̱shile ɗa n yaꞋin yura̱, a makyan ma na baci mi aciɓa, n ci yaꞋan ta̱ adanshi n takpa asuvu. Kuvuka 
U tsu ka̱sukpa̱ mu n lata ba, n na̱mgba̱i ka̱tsuma̱ ali n kpa̱ɗa̱i kufuɗa kudansa. 
N ciɓasai n ayin a na a lazai ɗe, n tsu ciɓa ta̱ kpamu n a̱ya̱ a na a lazai ɗe m makyan. 
N ciɓai n vishipa vu va̱ kayin ka̱ɓula̱, n sheshei a̱ ka̱ɗu ka̱ va̱. 
Ɗa n danai,<<Ayin tutu ɗa Vuzavaguɗu u ku iwan mu? Wi kpamu o kudoku kupana asuvayali a̱ va̱ ba? 
Ucigi u nu u na u tsu sabaꞋa ba u kotso ta̱ ko wannai? Wi ta̱ a̱ kukpa̱ɗa̱ kushatangu uzuwakpani u ni makyan dem? 
Ka̱shile ka cinukpa ta̱ kupana asuvayali ɗa? Ko wupa u ni u zuwa yi ta̱ u kpa̱ɗa̱i kusa̱Ꞌa̱ tsu?>> Kuvuka 
<<Ili i na i laꞋi n kuɓa̱la̱ mu a̱ ka̱ɗu i ɗaɗa, kukiye ku MalaꞋimili ku ka̱sukpa̱ ta̱ kuɓa̱nka̱ tsu.>> 
Mi ta̱ a kuciɓa n ulinga u na vu yaꞋansai Vuzavaguɗu, mi ta̱ a kuciɓa n ili mereve i na vu yaꞋin cau ɗe. 
Mi ta̱ a̱ kuka̱na̱ kusheshe ili i na vu yaꞋin ra̱ka̱, mi ta̱ a̱ ka̱na̱ kusheshe a ukuna wu ulinga u nu. 
Ka̱shile, uye u nu u ciɗa u ɗa. Ka̱ma̱li ki lo n tsugbayin tsu Ka̱shile ka̱ tsu ba. 
Avu ɗa Ka̱shile ka na ka ci yaꞋan ili mereve, vu yotsongu ta̱ utsura u nu a̱ ka̱tsuma̱ ka uma. 
N utsura u nu ɗa vu shiba̱i uma a̱ nu, ntsukaya n Yakubu nu n Isufu. Kuvuka 
Ka̱shile, ana mini me enei nu, ana mini me enei nu ɗa ma panai wovon, mala mu uga̱vi ma vuzakpai adama o wovon. 
Eleshu o yoꞋi mini, ɗa a lapai kakpanga ɗe gaɗi, ɗa ulaɗi wu akanai ubuta̱ dem. 
Izumgbi i kakpanga i nu i ka̱ra̱Ꞌi a̱ ubuta̱ dem, kutashi ku ulaɗi ku akanai aduniyan ra̱ka̱, aduniyan a panai wovon ɗa a̱ gba̱ɗa̱i. 
Vu walai a mala, vu pasamgbanai mala mu uga̱vi ka̱u, ama e ne ura̱Ꞌa̱ u ene a̱ nu ba. 
Vu tonoi n uma a̱ nu tsu maguɓi, e kiye a Musa n Haruna. 
