﻿Ishipa.
75.
Kadanshi a kubana u vuza vu kelime vi ishipa: Vishipa vu Asafa, a yaꞋan vu ɗa n Ka̱la̱ka̱tsu, <<Ka̱ta̱ a yaꞋan munuka ba.>> Ka̱shile, tsu cikpa wu ta̱, tsu cikpa ta̱ kula ku nu adama a na vi ta̱ lo, tsu dansai ili i mereve i na vu yaꞋin. 
Vuzavaguɗu Ka̱shile u danai, <<N zuwa ta̱ makyan ma afada, mi ta̱ tana a kuyaꞋan afada a na i derere. 
Ko ɗa baci aduniyan e jengeɗei, ali uma a̱ ni e jeꞋekei ikyamba, mpa ɗa n zuwai kumiꞋi u ni u shamgbai n utsura. Kuvuka 
N dana ta̱ aza a̱ra̱ɗi,<Ka̱ta̱ i yaꞋan a̱ra̱ɗi ba.> uma a gbani-gbani kpamu, n danai, <Ka̱ta̱ i yaꞋan ugbamiwasuvu ba. 
Ka̱ta̱ i yaꞋanka Ka̱shile ugbamiwasuvu ba, ka̱ta̱ i lapa nka̱nga̱ n ɗa̱ ba.> >> 
Ko vuza wi a̱ ku uta̱ a kasana ko a̱ ka̱livi, ko a kakamba u ta̱wa̱ u neke aza o yoku tsugbayin ba. 
Ama Ka̱shile kaꞋa kayaꞋinkafada, u tsu goyo ta̱ aza o yoku, ka̱ta̱ u neke aza o yoku tsugbayin. 
Vuzavaguɗu wi ta̱ uɓa̱ni n mokoꞋo e kukiye ku ni, tukpa n ma̱kya̱n ma kalam ma na mi n kusasu, u ɓelei maꞋa, ɗa uma a gbani-gbani aduniyan, o soꞋi maꞋa gbende. 
Ama mpa mi ta̱ a kusala ukuna u nampa ko wannai, mi ta̱ a kucanana ishipa n cikpa Ka̱shile ka Yakubu. 
A̱yi ɗa u ku goyo aza a ugbamiwasuvu, ama wi ta̱ e kuneke aza a usuɓi tsugbayin. 
