﻿Ishipa.
74.
VicuꞋu vu tsuwaꞋi tsu Asafa Ka̱shile, yiɗa̱i i zuwai ɗa vu variki tsu ko wannai? A̱tsu ushiga wu nkyon wu ubuta̱ u kalina u nu u ɗa, yiɗa̱i i zuwai ɗa vi asuvu a usuɗukpi n a̱tsu? 
Ciɓa n koɓolo ka uma a̱ nu a na vu tsulai ali n ayin a cau ɗe, a na vu shiba̱i okpo kumaci ku uka̱ni ku nu, ciɓa n Kusan ku Sihiyona ubuta̱ u na vu da̱sa̱ngi. 
Ta̱wa̱ vu ka̱ra̱Ꞌa̱ ubuta̱ u na a̱ la̱nga̱sa̱i na ra̱ka̱ ra̱ka̱. Irala i la̱nga̱sa̱ ta̱ ili i na yi punu ra̱ka̱ a̱ ubuta̱ u ciɗa. 
Aza a na a iwain nu i ta̱ o yoroli yi ulyaꞋi, a̱ ubuta̱ u na vu tsu gasa n a̱tsu, a zuwai urotu u le ɗe. 
I ta̱ tsu aza a na i a kukapa nɗanga a̱ kutsun n ogovu e le. 
N ogovu e le nu ntalaka n le a̱ la̱nga̱sa̱i ili i na e sheꞋwei. 
Ɗa o songi A̱Ꞌisa̱ a gbayin a̱ nu ra̱ka̱, a natukpai ubuta̱ wu ida̱shi i kula ku nu. 
A danai ka̱ci ke le <<Ci ta̱ a̱ kuka̱na̱ i ɗa gbende,>> ɗa o songi ubuta̱ u na a tsu gasa n Ka̱shile dem, a iɗika ya. 
Tsu doku tsu ene urotu ba, eneki kpamu a buwa ba, kpamu ko vuza a̱ ka̱tsuma̱ ka̱ tsu u yeve, ko wannai ɗai ili i nampa i kukotso. 
Ka̱shile, ali n wannai ɗai irala i ku ka̱na̱ ku zoꞋoso tsu? I ta̱ a̱ kuka̱na̱ kugoyo kula ku nu ko wannai ɗa? 
Yiɗa̱i i zuwai ɗa vu oɓongi ekiye a̱ nu? Ɗa̱ngusa̱ kukiye ku usingai ku nu vu una le. 
Ama Ka̱shile, avu ɗa mogono ma̱ va̱ ali n cau ɗe, vu tsu tuka̱ ta̱ n wishi aduniyan. 
Avu ɗa vu pecei mala n utsura u tsugbayin u nu, vu ɓosoi aci oroꞋo a̱ mini. 
Avu ɗa vu minjarai kaci ka̱ ka̱di ka mala, ɗa vu nekei ni wo okpoi ilikulyaꞋa yi nnama n kakamba. 
Avu ɗa vu ta̱sa̱i a̱shi a̱ mini n ayinva, vu zuwai kuyene ku ɗekpei. 
Kanna n kayin ka̱nu kaꞋa, avu ɗa vu zuwai wotoi n kanna a̱ ubuta̱ u le. 
Avu ɗa vu zuwakai aduniyan kureꞋe, avu ɗa vu yaꞋin lyushi n irana. 
Vuzavaguɗu, ciɓa n tsu na irala i nu yi o ku zoꞋoso wu, n tsu na kpamu alau i o kugoyo kula ku nu. 
Ka̱ta̱ vu neke wuma wu nkyon n nu wa̱ a̱kunzu ba, ka̱ta̱ vu cinukpa n uma a̱ nu a na a takacikai ba, ko wannai. 
Ciɓa n uzuwakpani u na vu yaꞋankai tsu, obogozu a na i n ka̱yimbi a iɗika dem, i ta̱ tukpa n aza a ujari. 
Ka̱ta̱ vu ka̱sukpa̱ aza a na a takacikai okpo n wono ba, yaꞋan aza a unambi n aza a̱ kula̱nsa̱ uɓa̱nki a cikpa kula ku nu. 
Ka̱shile, ɗa̱nga̱ vu utuka̱ ka̱ci ka̱ nu, ciɓa tsu na alau i o ku zoꞋoso wu kanna dem. 
Ka̱ta̱ vu cinukpa n kadanshi ka kacaꞋa ka aza a na a iwai nu ba, ka̱ta̱ vu cinukpa m mololo ma aza a na i a kuyaꞋanka wu ugbamiwasuvu ba. 
