﻿Ishipa.
71.
Vuzavaguɗu, yaꞋan n sheɗekeu wa̱ nu, ka̱ta̱ vu ka̱sukpa̱ mu m pana wono ba. 
Uta̱ka̱ mu, vu ɓa̱nka̱ mu n laꞋaka, adama a usuɓi u nu, zuwaka mu atsuvu, vu wawa mu. 
Vu okpo ubuta̱ u kusheɗeku u va̱, ubuta̱ u na n kubansa makyan dem. Neke kadanshi a wawa mu, adama a na avu ɗa ubuta̱ u kusheɗeku u va̱, m mashilya me ku ere mu. 
Ka̱shile ka̱ va̱, uta̱ka̱ mu e ekiye aza a kawuya, a utsura wa aza asuvawuya n ka gbani-gbani. 
Adama a na wa̱ nu ɗa n keɗei a̱pa̱Ꞌa̱, Vuzavaguɗu, Vuzavaguɗu, wa̱ nu ɗa n zuwai ka̱ɗu ali mpa maku me kenu. 
N gbasatangu ta̱ wa̱ nu kafu a matsa mu, avu ɗa vu utuka̱i mu a̱ ka̱tsuma̱ ka̱ a̱na̱ku a̱ va̱, mi ta̱ a kucikpa wu makyan dem. 
Mo okpoi ili yi urotu a̱ ubuta̱ uma n a̱bunda̱i, adama a na avu ɗa ubuta̱ u kusheɗeku wu utsura u va̱. 
Una̱ u va̱ wi ta̱ a kucikpa wu, kanna ka̱ɓula̱, a kusala tsugbayin tsu nu. 
Gogo na ana n kutsai na, ka̱ta̱ vu varuku mu ba, ana utsura u va̱ u kotsoi na, ka̱ta̱ vu ka̱sukpa̱ mu ba. 
Irala i va̱ yi ta̱ a kadanshi ka̱ va̱, aza a na cigai ku una mu o ɓolongu ta̱ a nsata adama a̱ va̱. 
A danai, <<Ka̱shile ka̱ ka̱sukpa̱ yi ta̱, yaꞋan tsu guva yi tsu reme yi, adama a na vuza u kuɓa̱nka̱ yi u laꞋaka ba.>> 
Ka̱shile, ka̱ta̱ vu bana daꞋangi nu mpa ba, Ka̱shile ka̱ va̱, ta̱wa̱ gogoꞋo vu ɓa̱nka̱ mu. 
YaꞋan aza a na i e ku neꞋeshe mu unushi, okpo n wono ka̱ta̱ a̱ kuwa̱. YaꞋan aza a na a cigai ene mu atakaci, a̱ ciya̱ kugoyi nu nlukana. 
Ama mpa mi ta̱ a kuzuwa ka̱ɗu ka̱ va̱ wa̱ nu makyan dem, mi ta̱ a kulyaꞋa kelime n kucikpa wu. 
Una̱ u va̱ wi ta̱ a kudansa ukuna wu usuɓi u nu, kanna ka̱ɓula̱ mpa a kudansa ukuna u wishi u nu, ko a na wo okpoi mi a kufuɗa kuyeve le dem ba. 
Vuzavaguɗu Ka̱shile, mi ta̱ a̱ kuta̱wa̱, adama a na n sala ulinga u gbayin u nu, ka̱ta̱ n ciɓaka uma ukuna wu usuɓi u nu, avu endeꞋin. 
Ka̱shile, avu ɗa vu piꞋisakai mu ali mpa maku me kenu, ali n anana mi ta̱ a kudansa ukuna u mereve u nu. 
Ko gogoꞋo na ana n kutsai n yaꞋin ka̱nji ka̱ri, Ka̱shile, ka̱ta̱ vu ka̱sukpa̱ mu ba, ali n dansa ukuna wu utsura u nu n tsugbayin tsu nu a kubana a ntsukaya n na n kuta̱wa̱. 
Ka̱shile, usuɓi u nu, u yawa ta̱ gaɗi vu eleshu. Vu yaꞋan ta̱ ili i gbagbaꞋin. Ka̱shile, vuza wi lo tsu nu ba. 
Ko ana wo okpoi vu ka̱sukpa̱ mu ta̱ me enei atakaci m ma̱dukpa̱ ka̱u, vi ta̱ o kubonoko mu n wuma u va̱ ayin tutu. Punu a kasaun, vi ta̱ a̱ kuɗa̱ngusa̱ mu kpamu ayin tutu. 
Vi ta̱ o kudoku mu tsugbayin, ka̱ta̱ vu kparasa mu kpamu. 
Ka̱shile ka̱ va̱, mi ta̱ kpamu a kucikpa wu n umolu, adama a kamayun ka̱ nu. N umolu u va̱ mi ta̱ a kuyaꞋanka wu ishipa, vuza ciɗa vi Isaraila. 
Mi ta̱ a̱ ku ɗa̱ngusa̱ ka̱la̱ka̱tsu n isali i ma̱za̱nga̱, ayin ana mi a kucikpa wu n ishipa, adama a na vu shiba̱ mu ta̱. 
Ka̱ta̱ kelentsu ka̱ va̱ ka dansa ukuna wu usuɓi u nu kanna ka̱ɓula̱. Aza a na a cigai ene mu atakaci okpo n wono n kugoyi. 
