﻿Ishipa.
66.
Kadanshi a kubana u vuza vu kelime vi ishipa: Vishipa. Ishipa. A̱ɗa̱ aduniyan ra̱ka̱, yaꞋin yoroli i ma̱za̱nga̱ u Ka̱shile. 
Cananai ukuna u tsugbayin tsu kula ku ni, yaꞋan ucikpi u ni u ciya̱ tsugbayin. 
Danai Ka̱shile, <<Yiɗa̱i a ku gisanku n ili mereve i na vi a kuyaꞋansa. Adama a utsura ugbayin u nu, irala i nu yi ta̱ a̱ ku kuɗa̱ngu ku wu adama o wovon. 
Uma aduniyan dem a̱ kuɗa̱nku wu ta̱, a ku canana ka wu ishipa, a ku canana ishipa i kucikpa kula ku nu.>> Kuvuka 
Ta̱wa̱i ye ene ili i na Ka̱shile ka yaꞋin, ili i mereve i na u yaꞋin adama a uma. 
U bonokoi mala mokpoi iɗika i ɗekpu, uma a pasai kuyene ka n e ene, ta ɗe tsu kuyaꞋan ma̱za̱nga̱ u Ka̱shile. 
Wi ta̱ a kulyaꞋa tsugono n utsura u ni ko wannai, a̱shi a̱ ni i ta̱ a ku inda uduniyan. ka̱ta̱ aza a ugbamiwasuvu ene i ta̱ n tsugbayin ba. Kuvuka 
Cikpai Ka̱shile ka̱ tsu, a̱ɗa̱ uduniyan dem, cikpai ni n a̱la̱ka̱tsu ka̱u. 
A̱yi ɗa u tsu foɓo wuma u tsu, u ka̱sukpa̱ ene a̱ tsu e derece ba. 
Adama a na avu Ka̱shile, vu kondo tsu ta̱, vu luwa̱ tsu ta̱ tsa azurufa a na a̱ luwa̱i akina. 
Vu tuka̱ tsu ta̱ a maza. Vu zuwaka tsu ta̱ ucanuku wa̱ a̱miki a avangatsu a̱ tsu. 
Vu zuwai uma a dasai tsu, tsu tonoi e mere ma akina m mini, ama gogo na vu utuka̱ tsu ta̱, vu tuka̱i tsu a̱ ubuta̱ wu ida̱shi i ba̱ri. 
Mi ta̱ a̱ kuta̱wa̱ a kpaꞋa ku nu, n kuneꞋe ku kusongu, ka̱ta̱ n neke ili i na n kucinai, 
n danai mi ta̱ e kuneke wu, a makyan ma na mi o kusoꞋo atakaci. 
Mi ta̱ e ku neke wu kuneꞋe ku kusongu ku nnama mi ikyamba, n ili i ma̱gula̱ i kuneꞋe ku ka̱giri, mi ta̱ a kulyuka obomburon n nga̱ji. Kuvuka 
Ta̱wa̱i i pana, a̱ɗa̱ na yi a kupana wovon u Ka̱shile ra̱ka̱, yaꞋan n dana ɗa̱ ili i na u yaꞋankai mu. 
N banka ta̱ m ma̱shi ma̱ va̱ wa̱ nu, n kelentsu ka̱ va̱ n neke wu ta̱ tsugbayin. 
Ishi baci n zuwa ta̱ unushi a̱ ka̱ɗu ka̱ va̱, Vuzavaguɗu wishi a kupana ka mu ba, 
ama mayun ɗa Ka̱shile ka panakai mu, ɗa kpamu u panai avasa a̱ va̱. 
Una̱singai u Ka̱shile, vuza na u iwain avasa a̱ va̱ ba, ko u kpa̱ɗa̱i kuyotsongu mu ucigi u ni u na tsu sabaꞋa ba. 
