﻿Ishipa.
65.
Kadanshi a kubana u vuza vu kelime vi ishipa: Vishipa vu Dawuda. Vishipa. Ka̱shile mayun ɗa uma a cikpa wu a Sihiyona, ka̱ta̱ e neke ili i na a kucinai kuneke. 
Uma ra̱ka̱ i ta̱ a̱ kuta̱wa̱ wa̱ a̱ nu, avu na vu tsu pana avasa. 
Ɗa baci unushi u tsu u laꞋi utsura u tsu, vu takpaka tsu u ɗa. 
Aza a una̱singai a ɗa aza a na vu zagbai, ɗa vu tuka̱i le ɗevu o yongo a ulanga u nu. Ci ta̱ a̱ kucuwa̱ n kasingai ka̱ a̱ ubuta̱ wi ida̱shi i nu, n una̱singai wa̱ A̱Ꞌisa̱ a gbayin a ciɗa a̱ nu. 
Ka̱shile kishi ka̱ tsu, vu ushuku tsu ta̱ a̱ ubuta̱ u kuyaꞋan ili i mereve, n kuyaꞋan ili yi usuɓi. Avu a̱pa̱Ꞌa̱ a uma a̱ ubuta̱ dem aduniyan, ali a upashi u mala. 
Avu na vu zuwai nsasan n shamgbai n utsura u nu, ana vu foɓusoi ka̱ci ka̱ nu n utsura. 
Avu na vu tsu vaꞋanka kacaꞋa ka mala, n kacaꞋa ka aɓau a mala, vu tsu vaꞋanka ta̱ ujari wu uduniyan. 
Uma a na i a ida̱shi a uteku wa aduniyan dem, a pana ta̱ wovon adama ili i mereve i na vu yaꞋin. Vu zuwa ta̱ ma̱za̱nga̱, u uma a na i a ida̱shi a kasana n aza na i a idashi a̱ ka̱livi. 
Vu tsu la̱na̱ ta̱ iɗika ka̱ta̱ vu yoꞋo ko i ɗa mini, vu tsu zuwa ta̱ i ɗa yo okpo n tsuta̱ ka̱u. Nɗolu n Ka̱shile n shanai tukpa m mini. Vu zuwa ta̱ iɗika i nekei uma ili i kashina, ta vu foɓusoi nannai. 
Vu zuwai aɓakanla a̱ ta̱na̱i n mini, ɗa vu ɓosoi yolo ya, ɗa vu zuwa i ɗa i ta̱na̱i n ijaꞋashi, vu zuwakai ica̱Ꞌa̱shi una̱singai. 
Vu zuwa ta̱ ka̱ya̱ ka ko okpoi ka vukyaꞋa n a̱bunda̱i, mpon n nu n shanai n ili kashina ali n m pasai. 
Vu zuwai mita̱ ma̱ uta̱i gbani a kakamba adama a kalina, ɗa aginda dem a shanai m ma̱za̱nga̱. 
Ushiga wu nlala u palai ubuta̱ dem a̱pula̱ka̱, a̱ra̱Ꞌa̱ a shanai n alkama. O yoroli n cananai ishipa i ma̱za̱nga̱ tsu uma. 
