﻿Ishipa.
62.
Kadanshi a kubana u vuza vu kelime vi ishipa: A yaꞋan vu ɗa n ka̱la̱ka̱tsu ka Jedutun. Vishipa vu Dawuda A̱ Ka̱shile kaꞋa koci wuma u va̱ u ciya̱i kuvuka, wishi u va̱ wu uta̱ ta̱ wa̱ ni. 
Ka̱shile kaꞋa koci katali ka̱va̱ n kishi ka̱ va̱, a̱yi ɗa ubuta̱ wu ukanji u va̱, mi a kupana wovon ba. 
Ali n wannai ɗai ra̱ka̱ vu ɗa̱ i ku shilika̱ n vuma vu te? Adama a na yi una yi, mashilya ma u tsubaki ma nampa, ko an mashilya ma na mi a ukuna u kuyikpa̱? 
Kusheshe ku ɗa̱ ku ɗa i cipuka̱ yi a̱ ubuta̱ u tsugbayin ci ni, I tsu pana ta̱ uyoꞋo u kuyaꞋan aꞋuwa. i tsu zuwaka ta̱ vuma una̱singai n una̱ u ɗa̱, ama a̱ɗu a̱ ɗa̱ una̱ u wuya u ɗa. Kuvuka 
A̱ Ka̱shile kaꞋa koci wuma u va̱ u ciya̱i kuvuka, wa̱ a̱ ni u ɗa n keɗei a̱pa̱Ꞌa̱. 
A̱yi ɗa koci katali ka̱ va̱ n kishi ka̱ va̱, a̱yi ɗa ubuta̱ wu ukanji u va̱, mi a kupana wovon ba. 
Wishi u va̱ n tsugbayin tsu va̱ tsu uta̱ ta̱ u Ka̱shile, a̱yi ɗa katali ka gbayin ka̱ va̱, ubuta̱ u kusheɗeku u va̱. 
Uma, zuwai a̱ɗu a̱ ɗa̱ wa̱ ni makyan dem, i dana yi ili i na yi a̱ɗu a̱ ɗa̱ ra̱ka̱. adama a na Ka̱shile kaꞋa ubuta̱ u kusheɗeku u tsu. Kuvuka 
Aza a unambi i ta̱ tsu ayinviki, aza a uciyi ukuna wa aꞋuwa u ɗa. a gisanku le baci ele ili i ɗa ba, ra̱ka̱ vu le ayinviki a ɗa koci. 
Ka̱ta̱ i zuwa a̱ɗu a̱ ɗa̱ a ukuna u modoruko ba, ko i ka̱na̱ a̱ra̱ɗi n ucanuku wu uboki ba. ko a na uciyi u yimkpai, ka̱ta̱ i zuwa a̱ɗu a̱ ɗa̱ a u ɗa ba. 
Ili i te i ɗa Ka̱shile kadanai, ama ili i re i ɗa m panai, utsura u Ka̱shile u ɗa, 
n ucigi u na u tsu sabaꞋa ba, Vuzavaguɗu Mayun vi ta̱ a kutsupa yaba dem derere vu ulinga u ni. 
