﻿Ishipa.
60.
Kadanshi a kubana u vuza vu kelime vi ishipa: A yaꞋan vu ɗa n ka̱la̱ka̱tsu <<Lili vu uzuwakpani.>> Vishipa vu Dawuda. Ana u shilika̱i n Aram Naharami n Aram vu Zoba n ayain a na Jowabu u banai wu unai aza a Edom a̱kpa̱n kupa n ere a̱ ka̱ra̱Ꞌa̱ ka mkpaɗi. Ka̱shile vu iwan tsu ta̱, ali ɗa ka̱sukpa̱i a lyaꞋi utsura u tsu, vu yaꞋan ta̱ wupa n a̱ tsu, ama gogo na bonoko tsu. 
Vu zuwai iɗika i gba̱ɗa̱i ɗa i ɓatsai, gogo na ciɗa̱ngu enle a, adama a na i tsurukpa kpamu. 
Vu zuwa ta̱ uma a̱ nu a takacikai ka̱u, vu nekei tsu ma̱kya̱n ma na ma lamkpai ali ma zuwai tsu ku tangala. 
Ama vu ɗa̱ngusa̱ ta̱ urotu u kakashi wa aza a na i ku pana wovon u nu, adama a na a laꞋaka a utan. Kuvuka 
Wawa tsu vu ɓa̱nka̱ tsu n utsura u nu, adama a uma a na vu cigai a̱ ciya̱ wishi u nu, 
Ka̱shile ka yaꞋan ta̱ kadanshi a̱ ubuta̱ u ciɗa u ni. <<N ulyaꞋi mi ta̱ e kupece Shekem, ka̱ta̱ m pecukusu ka̱ra̱Ꞌa̱ ka Sukotu. 
Giliyadu vu va̱ vu ɗa, Manasa feu vu va̱ vu ɗa. Ifirayimu ɗa ma̱kuꞋun ma̱ viyum ma̱ va̱. Yahuda kalangu ko tsugono ka̱ va̱. 
Mi ta̱ o kubonoko Mowabu tsu kasasu ka̱ kuza̱Ꞌa̱ ka̱ va̱, Edom wi ta̱ o ko okpo a ɗaka vu ene a̱ va̱, Ka̱ ta̱ n yaꞋan yoroli yi ulyaꞋi wa aza a Filisitiya.>> 
Yayi u kubanka mu a̱ likuci yi u ukanji? Yayi u kutono nu mpa a kubana a iɗika i Edom? 
Ka̱shile avu ɗa vu variki tsu, Vu kpa̱ɗa̱i kudoku kuwala n osoji a̱ tsu ba? 
Ɓa̱nka̱ tsu, tsu shilika̱ ni irala i tsu, adama a na uɓa̱nki u vuma gbani ɗa. 
Ka̱shile ki baci n a̱tsu ci ta̱ a̱ kuciya̱ ulyaꞋi, wi ta̱ a kulyaꞋa irala i tsu. 
