﻿Ishipa.
56.
Kadanshi a kubana u vuza vu kelime vi ishipa: A yaꞋan vu ɗa n ka̱la̱ka̱tsu ko <<Moɗoi a gaɗi vu maɗanga ma Oku.>> Vishipa vu Dawuda. Ana aza a Filisitiya e remei ni a Gatu. Ka̱shile, pana asuvayali a̱ va̱, adama a na uma a̱ tuka̱ mu ta̱ n kuvon, irala i va̱ yi ta̱ a kutakacika mu kanna dem. 
Kanna dem irala i va̱ yi ta̱ a ku guva mu, n ka̱bunda̱i ke le i ta̱ a̱ vishili nu mpa. 
Makyan ma na baci m panai wovon, mi ta̱ a kuzuwa ka̱ɗu ka̱ va̱ wa̱ a̱ nu. 
N zuwa ta̱ ka̱ɗu ka̱ va̱ u Ka̱shile, mi ta̱ a kucikpa uzuwakpani u ni. wa̱ a̱ ni u ɗa n zuwai ka̱ɗu, mi a ku pana wovon ba. Yiɗa̱i vuma vu lima̱ u kuyaꞋanka mu? 
Irala i va̱ i tsu oꞋuso mu ta̱ kanna dem, makyan dem i ta̱ e kusheshe, tsu na o kudoro mu. 
O tsu ɓolongu ta̱ u sokongi, a ku inda nwalu n va̱, a kuvana tsu na a ku una mu. 
Ka̱shile, ka̱ta̱ vu ka̱sukpa̱ le a laꞋaka a ka gbani-gbani ke le ba, a wupa u nu una uduniyan u nampa. 
Ɗana una̱mgbuka̱tsuma̱ u va̱, kece ka̱bunda̱i ka kujilya ka̱ va̱, i a katagarda ka̱ nu ba? 
A kanna ka na baci n ɗekei nu, irala i va̱ yi ta̱ o kubono n ka̱ca̱pa̱. adama a na n yeve ta̱ Ka̱shile ki ta̱ koɓolo nu mpa. 
Ka̱shile, mi ta̱ a kucikpa kadanshi ka̱ nu, Vuzavaguɗu, mi ta̱ a kucikpa kadanshi ka̱ nu. 
Ka̱shile, wa̱ nu u ɗa n zuwai ka̱ɗu, mi tana a kupana wovon ba. Yiɗa̱i vuma vu lima̱ u kuyaꞋan ka mu? 
Ka̱shile, mi ta̱ e kuneke wu ili i na n yaꞋin uzuwakpani. mi ta̱ e kuneke wu kuneꞋe ku kucikpa. 
Adama a na vu wawa mu ta̱ a̱ ubuta̱ wu ukpa̱, vu erei ene a̱ va̱ a̱ ubuta̱ u ma̱ta̱ɗa̱, adama a na n wala e kelime ka̱ Ka̱shile, a kutashi ku na ku tsu neke wuma. 
