﻿Ishipa.
55.
Kadanshi a kubana u vuza vu kelime vi ishipa: A yaꞋan vu ɗa n aꞋin a umolu. VicuꞋu vu tsuwaꞋi tsu Dawuda. Ka̱shile, pana avasa a̱ va̱, ka̱ ta̱ vu iwan kupana ufolu u va̱ ba. 
Panaka mu, vu ushuku mu, adama a na una̱mgbuka̱tsuma̱ u va̱ woꞋuso mu ta̱ ka̱u, 
Ka̱ɗu ka̱ va̱ ka̱ ɗa̱nga̱ ta̱, adama kacaꞋa ka irala i va̱, adama o modoruko ma uma a gbani-gbani, o tsu ronoko mu ta̱ atakaci, a kupana wupa u va̱ i a ku iwan mu. 
ka̱ɗu ka̱ va̱ ki ta̱ tukpa n una̱mgbuka̱tsuma̱, wovon wu ukpa̱ u ka̱na̱i mu. 
Wovon u ka̱na̱i mu ka̱u, n kujeꞋeke ki ikyamba, n rikpa̱i ka̱u. 
Ɗa n danai, <<Ishi baci mi ta̱ n evelyu tsu moɗoi, mi shi ta̱ a ku imkpa m bana n la̱nsa̱ ubuta̱ u kuvuka. 
m bana daꞋangi, n yaꞋan ɗe kpaꞋa ku va̱ e meremune. Kuvuka 
Mi ta̱ a kuyaꞋan moloko n la̱nsa̱ ubuta̱ u kusheɗeku, a gaɗi daꞋangi n wunla̱i wu utsura n uguyi.>> 
Vuzavaguɗu, la̱nga̱sa̱ kusheshe ku le, ka̱ ta̱ kpamu vu ripula̱ kadanshi ke le. adama a na me ene ta̱ ugbamukaci a̱ kuɗa̱nga̱ a̱ likuci ya. 
Kanna n kayin a̱ kuka̱ra̱Ꞌa̱sa̱ a nshilya n likuci ma, likuci ya tana yi ta̱ tukpa n unushi n ka gbani-gbani. 
Ukuna u kula̱nga̱su u shana ta̱ a̱ ubuta̱ dem a̱ likuci ya. modoruko n kawuya ka shana ta̱ a̱ ubuta̱ dem. 
Ishi baci vurala vu va̱ ɗa vi o ku zoꞋoso mu, mi shi ta̱ a ku gbama asuvu, ishi baci a dana a̱yi ɗa vuza kelime vu va̱, mi shi ta̱ a kukpaꞋwan adama a̱ ni. 
Ama avu ɗa ka̱ja̱Ꞌa̱ ka̱ va̱, vuma va̱, ka̱ja̱Ꞌa̱ ka gbagu ka̱ va̱ kpamu. 
Cau ci ishi ta̱ tsu ci yongo, tsu tsu bana ta̱ A̱Ꞌisa̱ a gbayin koɓolo. 
Ka̱shile ka zuwa ukpa̱ u ta̱wa̱ wi irala i va̱ babu uyevi, yaꞋan a bana iɗika yi ukpisa̱ n wuma u le, ka gbani-gbani ki ta̱ aꞋuwa i le n unata̱ u le. 
Ama n ɗeke ta̱ Ka̱shile ka̱ ɓa̱nka̱ mu, Vuzavaguɗu tana wi ta̱ a ku wawa mu. 
Kanna n kayin, n shika̱i n mavura, ɗa tana u panai ka̱la̱ka̱tsu ka̱ va̱. 
Wi ta̱ a̱ kushiba̱ mu, a̱ ubuta̱ u kuvon ku na n ci yaꞋan, n irala i va̱ ya̱ a̱bunda̱i. 
Ka̱shile, vuza na wi o tsugono ali n tsu cau, wi ta̱ a kupanaka mu, ka̱ta̱ u loko le, Kuvuka uma a na a tsu sabaꞋa kuyongo ku le ba. adama a na a tsu pana wovon u Ka̱shile ba. 
Ka̱ja̱Ꞌa̱ ka̱va̱, ka banka ta̱ a̱ja̱Ꞌa̱ ni vishili, u koɗoi uzuwakpani u ni. 
Kadanshi ka̱ ni ka laꞋa ta̱ maniꞋin me epeshe n pete, ama maꞋiwanai mi ta̱ punu a̱ ka̱ɗu ka̱ ni, Kadanshi ka̱ ni ka laꞋa ta̱ maniꞋin n leku, ama ki ta̱ n alyu tsu una̱ u kotokobi. 
Banka Vuzavaguɗu atakaci a̱ nu, wi ta̱ a̱ kuɓa̱nka̱ wu. wi a̱ ku ka̱sukpa̱, a lyaꞋa kelime ka vuza vu usuɓi ba. 
Ama avu, Ka̱shile vi ta̱ a ku taɗuku aza a gbani-gbani, punu a iɗika a̱ ubuta̱ wu uga̱vi, aza aꞋuwa n aza a̱ kutsuwa̱n ku mpasa, babu e pece ayin e le a duniya, ama mpa mi ta̱ e kuneke ka̱ɗu ka̱ va̱ wa̱ a̱ nu. 
