﻿Ishipa.
52.
Kadanshi a kubana u vuza vu kelime vi ishipa: VicuꞋu vu tsuwaꞋi tsu Dawuda. A makyan ma na Dowegi vuza va aza a Edom u banai u mogono Shawulu a na Ahimeleki ganu sokongi Dawuda a kpaꞋa ku ni. Yiɗa̱i i zuwai ɗa vi a̱ra̱ɗi n kawuya ka na vi a kuyaꞋan, avu vuzagbayin? Yiɗa̱i i zuwai vi a̱ra̱ɗi makyan dem, a̱ɗa̱ na i yaꞋin ili i wono a̱ a̱shi a̱ Ka̱shile? 
Kelentsu ka̱ nu e kusheshe ka gbani-gbani, adama a na vu la̱nga̱sa̱ aza o yoku, ki ta̱ an kutanu ka alyu, makyan dem a kuyaꞋan aꞋuwa. 
Vu laꞋa ta̱ n ku ciga kawuya n kasingai, vu laꞋa ta̱ n ku ciga ka aꞋuwa n kamayun. Kuvuka 
Vu tsu ciga ta̱ kudoro uma n kadanshi ka̱ nu, avu kayaꞋin ka aꞋuwa. 
Adama a nannai Ka̱shile ki ta̱ a̱ kula̱nga̱sa̱ wu ko wannai, wi ta̱ e kureme wu ka̱ta̱ wu utuka̱ wu a kpaꞋa ku nu, wi ta̱ kpamu a kutakpa wu a iɗika i wuma. Kuvuka 
Aza a usuɓi ene baci ili i wovon i nanlo, i ta̱ o ku zoꞋoso wu, a dana, 
<<Inda biꞋi vuza na u kpa̱ɗa̱i kula̱nsa̱ ubuta̱ u kusheɗeku u Ka̱shile, adama a na u ciya̱ ida̱shi i ma̱ta̱na̱ ba, kucikpa u zuwai ka̱ɗu a̱ ubuta̱ wu uciyi u ni, a̱ kula̱nsa̱ ida̱shi i ma̱ta̱na̱ a ka gbani-gbani ka̱ ni>> 
Ama mpa mi ta̱ tsu maɗanga ma zaitu, ma na mo topoi mayin a kpaꞋa ku Ka̱shile. N neke ta̱ ka̱ɗu a ucigi u ni u na u tsu sabaꞋa ba ko wannai. 
Mi ta̱ a kucikpa wu Vuzavaguɗu, adama ili na vu yaꞋin. mi ta̱ e kuneke ka̱ɗu ka̱ va̱ wa̱ a̱ nu, mi ta̱ a ku sala kula ku nu, e kelime ka uma a usuɓi a̱ nu, adama a na avu vuza vu kasingai ɗa. 
