﻿Ishipa.
51.
Kadanshi a kubana u vuza vu kelime vi ishipa: Vishipa vu Dawuda ana keneki Natan u banai wa̱ ni a makyan ma na Dawuda u vaki n Besheba vuka vu Uriya. Ka̱shile pana asuvayali a̱ va̱, adama a ucigi u nu u na u tsu sabaꞋa ba. adama a kasingai ka̱ a̱bunda̱i ka̱ nu vu cinukpa n unushi u va̱. 
Vu SaꞋa ka gbani-gbani ka̱ va̱ ra̱ka̱, vu bonoko mu ciɗa 
Adama a na n yeve ta̱ unushi u va̱, makyan dem unushi u va̱ wi ta̱ e kelime ka̱ va̱. 
Avu ɗa koci n nusakai, n yaꞋan ta̱ ka gbani-gbani a̱ a̱shi a̱ nu, derere ɗa afada a na vu kiɗakai mu. derere ɗa vu takacika mu. 
Mayun mpa vuza vu unushi ɗa, ali a makyan ma na a̱na̱ku a̱ va̱ a ɗikai ka̱tsuma̱ ka̱ va̱. Mayun mpa vuma vu gbani-gbani ɗa, ili i na i ɗikai a makyan ma na a matsai mu. 
Mayun ka̱ɗu kamayun ka̱ va̱ kaꞋa vu cigai, shatangu ka̱ɗu ka̱ va̱ n kuyeve ku nu. 
Vu za̱Ꞌa̱ ta̱ unushi u va̱ n hisop, mi ta̱ o kokpo ciɗa, vu za̱Ꞌa̱ mu, mi ta̱ a ku laꞋa tsukongoi wa̱ri. 
Ka̱ta̱ m pana uyoꞋo n ma̱za̱nga̱, yaꞋan etele a na vu yokumoi a yaꞋan ma̱za̱nga̱. 
Takpa unushi u va̱, ka̱ta̱ vu pura̱ngu ka gbani-gbani ka̱ va̱ ra̱ka̱. 
Ka̱shile, zuwaka mu ka̱ɗu ka ciɗa, vu sabaꞋaka mu ayinviki a savu o kutoni. 
Ka̱ta̱ vu loko mu kelime ka̱ nu ba, ka̱ta̱ vu takpa ayinviki a ciɗa a̱ nu wa̱ va̱ ba. 
Zuwa mu ma̱za̱nga̱ tsu na vu yaꞋin ana vu wawai mu, ka̱ ta̱ vu neke mu kadanshi n ka̱ɗu ka na n kutono wu. 
N piꞋisaka aza a unushi wila̱ u nu, ka̱ta̱ aza a unushi o bono wa̱ a̱ nu. 
Wawa wuma u va̱, a̱ ubuta̱ unushi u ku tsuwa̱n ku mpasa, Ka̱shile kishi ka̱ va̱, mi ta̱ tana a kusala kamayun ka̱ nu n ma̱za̱nga̱. 
Vuzavaguɗu, ɓa̱nka̱ mu adama a na n yaꞋan kadanshi, ka̱ta̱ n cikpa wu. 
Alyuka a na n kuneke wu i a kuyawa wu ba, vi tana a kupana uyoꞋo u, kuneꞋe ku kusongu ba. 
Ka̱shile, alyuka a̱ va̱ ɗaɗa ka̱ɗu ku usuɓi, ka̱ɗu ko kutoni, Ka̱shile vi a ku iwan a ɗa ba. 
Ka̱shile yaꞋanka Sihiyona kasingai, vu ɓa̱nka̱ yi, vu maꞋasaka nshilya n Urushelima. 
Ka̱ta̱ vu pana uyoꞋo wa alyuka a usuɓi, n alyuka o kusongu ra̱ka̱ i ta̱ ku kuneke obomburon kuneꞋe ka alyuka a katalikalyuka ka̱ nu. 
