﻿Ishipa.
50.
Vishipa vu Asafa. Ka̱shile MalaꞋimili, Vuzavaguɗu u yaꞋin kadanshi, e kuɗeke aduniyan ra̱ka̱, a kasana a kubana a̱ ka̱livi. 
Ka̱shile ki ta̱ a ku akana a Sihiyona, a̱ likuci i singai i Sihiyona. 
Ka̱shile ka̱ tsu ka̱ ta̱wa̱ ta̱, u sokongi u ɗa wi ba. akina a munuka a̱ kuta̱wa̱ e kelime ka̱ ni, uguyi u gbayin kpamu u ka̱ra̱Ꞌi n a̱yi. 
U ɗekei gaɗi n aduniyan okpo ngan, ene tsu na wi a kuyaꞋanka uma a̱ ni afada. 
U danai, <<Ɓolongu ku mu uma a usuɓi a̱ va̱, aza a na a shatangi uzuwakpani u na mi nu u ɗa n ele, a̱ ubuta̱ u kuneꞋe ka alyuka.>> 
Gaɗi a̱da̱nga̱shile a kusala usuɓi u Ka̱shile, adama a na a̱yi ɗa wi a kuyaꞋan afada. Kuvuka 
<<Panai, a̱ɗa̱ uma a̱ va̱, mi ta̱ a kuyaꞋan kadanshi, mi ta̱ a kuyaꞋan kadanshi n dana, Isaraila yi ta̱ n unushi. Mpa ɗa Ka̱shile, Ka̱shile ka̱ ɗa̱. 
M ɓarangu ɗa̱ adama alyuka a̱ ɗa̱ ba. ko adama e kuneꞋe ku kusongu ku na yi e kuneke mu makyan dem ba. 
Mi a kuciga kobomburon ushiga u ɗa̱ ba, ko nlala a ushiga u ɗa̱ ba. 
Adama a na nnama n kakamba dem n va̱ n ɗa, a̱kpa̱n anaka a na i aginda ra̱ka̱ a̱ va̱ a ɗa. 
Nnu n na mi a ciɗinkpi gaɗi dem n va̱ n ɗa, n ili i wuma i na yi a iɗika ra̱ka̱. 
<<Ko ishi baci mi ta̱ a kupana kambulu, mi a kudana ɗa̱ ba, adama a na aduniyan n ili i na yi punu dem i va̱ i ɗa. 
n tsu takuma ta̱ inyama yi obomburon ɗa? Ko n tsu soꞋo ta̱ mpasa mu nraɗika? 
YaꞋan i neke Ka̱shile kuneꞋe ku kucikpa ku ɗa̱, ka̱ta̱ i neke malaꞋimili kuneꞋe ra̱ka̱ ku na i yaꞋin uzuwakpani. 
YaꞋin meɗevile wa̱ a̱ va̱, a makyan ma atakaci, mi ta̱ a ku isa ɗa̱, a̱ɗa̱ kpamu yi ta̱ a kucikpa mu.>> 
Ama Ka̱shile ka dana ta̱ uma a gbani-gbani, <<Yiɗa̱i i zuwai yi e kukece wila̱ uva̱? Yiɗa̱i ɗa yi a kuyaꞋan kadanshi ka uzuwakpani u va̱? 
I iwain m ɓarangu ɗa̱, ɗa kpamu i variki kadanshi ka̱ va̱. 
Yi ene baci koboki, i ci yaꞋan ta̱ cija̱Ꞌa̱ n a̱yi, i tsu gbaɓa ta̱ kaci n aza a tsugbani. 
<<Makyan dem yi ta̱ foɓushi, i dansa ka gbani-gbani, i tsu pana munla̱i ma kudansa aꞋuwa ba. 
A ufoɓushi u ɗa yi, i dansa ka gbani-gbani wa̱ aza a̱ ɗa̱, i neke le unushi. 
I yaꞋan ta̱ ili i nanlo dem, ama mpa n keɓecei ukuna ba. adama a nannai i zuwa ta̱ tsu ɗa̱ tsu ɗa mi, ama gogo na mi ta̱ a ku ɓarangu ɗa̱, mu utuka̱ n unushi u ɗa̱ e keteshe. 
<<Panai na, a̱ɗa̱ na i cinukpai nu mpa, ta baci nannai ba, mi ta̱ a ku karasa ɗa̱, ko vuza wi a ku isa ɗa̱ ba. 
Vuza na u tsu cikpa mu, a makyan ma na wi e kuneke alyuka a̱ ni, wi ta̱ e kuneke mu tsugbayin, n vuza na kpamu wi o kutono kadanshi ka̱ va̱, mi ta̱ o kuyotsongu yi wi ishi u va̱.>> 
