﻿Ishipa.
39.
Kadanshi a kubana u vuza vu kelime vi ishipa: A yaꞋan vu ɗa n ka̱la̱ka̱tsu ka Jedutun. Vishipa vu Dawuda. Ɗa n danai, <<Mi ta̱ a ku zuwaka n ili i na mi a kuyaꞋan, adama a na ka̱ta̱ kelentsu ka̱ va̱, ka yaꞋan unushi ba. mi e kukeɓece ukuna ba, a makyan ma na uma a gbani-gbani i ɗevu nu mpa.>> 
M paɗai bini, n dansa ukuna ba. ko a ili i na yi i singai, ama n nannai dem atakaci a̱ va̱ o kudokusu. 
Ka̱ɗu ka̱ va̱ ka shanai n atakaci. tsu ka̱bunda̱i ka aciɓa a̱ va̱, ta atakaci a̱ va̱ okpoi nannai, mayun ɗa n yaꞋan kadanshi. 
<<Vuzavaguɗu, ayin a yain a ɗai n kuyongo aduniyan? Wanai ɗai n kukuwa̱? Yotsongu mu n yeve tsu na ayin a̱ va̱ i a kulaza gogoꞋo lo. 
La̱na̱, vu jebe ta̱ ka̱bunda̱i ka ayin a̱ va̱, ka̱bunda̱i ayin a̱ va̱ wa̱ a̱ nu, adanshi ili i yoku i ɗa ba, mayun wuma u vuza dem u laꞋa ayinviki ba. Kuvuka 
Wuma u vuma dem wi ta̱ a ku vadalukpasa tsu kulu, kubana n kubono ku ni dem gbani ɗa. u tsu ɓolongu ta̱ uciyi, ama u tsu yeve ko yayi u kulyaꞋa uyoꞋo wu uɗa ba. 
Vuzavaguɗu, gogo na a̱ yiɗa̱i n kuzuwa ka̱ɗu ka̱ va̱? Wa̱ a̱ nu u ɗa n zuwai ka̱ɗu ka̱ va̱. 
Wawa mu a̱ ka̱tsuma̱ ka unushi u va̱, Ka̱ta̱ vu ka̱sukpa̱ alau o zoꞋoso mu ba̱. 
Mi ta̱ a kupaɗa bini. mi a kudansa ukuna ba, adama a na vu zuwa mu ta̱ n takacikai tsu nampa. 
Ka̱ta̱ vu doku vu takacika mu ba. n yaꞋan ta̱ ɗevu n ku kuwa̱, adama a ulapi u na vi a kuyaꞋanka mu. 
Vu tsu ɓarangu ta̱, ka̱ ta̱ kpamu vu takacika vuma adama a unushi u ni, tsu kayan, vu tsu la̱nga̱sa̱ ta̱ ili i na vuma u laꞋi n kuciga, mayun, vuza vu wuma dem wi ta̱ tsu wunla̱i u na u tsu laza. Kuvuka 
Vuzavaguɗu, pana avasa a̱ va̱, vu pana ma̱shi ma̱ va̱ kpamu, ura ma̱shi ma̱ va̱, adama a na mi ta̱ koɓolo n avu, tsu komoci ka na ka kulaza, mpa komoci kaꞋa, tsu na ikaya i va̱ yi ishi cau. 
Ka̱sukpa̱ mu ko ka̱ɗu ka̱ va̱ ki ta̱ a kuvaku, kafu n laza, n ka̱sukpa̱ ubuta̱ u nampa.>> 
