﻿Ishipa.
36.
Kadanshi a kubana u vuza vu kelime vi ishipa: Vishipa vu Dawuda. Unushi wu ucigi u ka̱ɗu u tsu yaꞋan ta̱ kadanshi n uma a gbani-gbani a̱ɗu e le, i n wovon u Ka̱shile a̱ a̱shi e le ba, 
Adama a na i ta̱ a kuɗika ka̱ci ke le, ele ili i yoku i ɗa, e kene ku le, unushi u le wi a̱ ku uta̱ e keteshe ba. ali e neke le unushi. 
Kadanshi ke le ki ta̱ tukpa n ka gbani-gbani n aꞋuwa, a buwa n ugboji u na a kuyaꞋan kasingai ba. 
E ci sheshe ta̱ ka gbani-gbani a makyan ma na i a ivaꞋin ajiba ele, kuyongo kugaꞋan le ba, a ci iwan ka gbani-gbani ba. 
Vuzavaguɗu ucigi u nu u na u tsu sabaꞋa ba, u yawa ta̱ ali gaɗi a̱da̱nga̱shile, usuɓi u nu u yawa ta̱ a gaɗi vu eleshu. 
Usuɓi u nu wi ta̱ tsu nsasan n Ka̱shile, afada a̱ nu i ta̱ tsu uga̱vi u mala magbayin, Vuzavaguɗu a vu ɗa vi a̱ kula̱na̱ uma nu nnama dem. 
Ka̱shile, nu n yiɗa̱i a ku gisanku ugain wu ucigi u nu u na u tsu sabaꞋa ba? Uma a̱ tsu ciya̱ ta̱ ubuta̱ u kusheɗeku a ɗaka vu evelyu a̱ nu. 
A ci yaꞋan ta̱ ka̱ɗiva̱ n ka̱bunda̱i ki ilikulyaꞋa i na yi A̱Ꞌisa̱ a gbayin a̱ nu, vu tsu neke le ta̱ mini moku soꞋo o kuɗolu ku kasingai ku nu. 
Avu ɗa a̱shi a̱ mini a na e ci neke wuma, n kutashi ku nu ku ɗa tsu ce ene kutashi. 
LyaꞋa kelime n ucigi u nu u na u tsu sabaꞋa ba, wa aza a na e yevei nu, lyaꞋa kelime n kasingai ka̱ nu wa aza a na i n kamayun a̱ɗu. 
Ka̱ta̱ vu ka̱sukpa̱ ene aza a ugbamukaci a dasa mu ba, ko kpamu vu ka̱sukpa̱ ekiye aza a gbani-gbani o loko mu ba. 
La̱na̱ ubuta̱ u na aza a gbani-gbani a̱ yikpa̱i, ta ɗe a vaki a fuɗa a̱ ɗa̱nga̱ ba. 
